ཏཱ་ར་ནཱ་ཐའི་གསུང་འབུམ།

བཅོམ་ལྡན་འདས་གཤིན་རྗེ་གཤེད་པོའི་དཀྱིལ་འཁོར་རབ་འབྱམས་ཀྱི་སྒྲུབ་ཐབས་འཕྲིན་ལས་ཀྱི་ཉི་མ་འབུམ་གྱི་གཟི་བརྗིད།

― TNT06_Page_0725 ―

^{[མ་དཔེ་གཟིགས་ན་འདིར་གནོན།]}

[Full Size]

བཅོམ་ལྡན་འདས་གཤིན་རྗེ་གཤེད་པོའི་དཀྱིལ་འཁོར་རབ་འབྱམས་ཀྱི་སྒྲུབ་ཐབས་འཕྲིན་ལས་ཀྱི་ཉི་མ་འབུམ་གྱི་གཟི་བརྗིད་ཅེས་བྱ་བ་བཞུགས།

― TNT06_Page_0726 ―

^{[མ་དཔེ་གཟིགས་ན་འདིར་གནོན།]}

[Full Size]

ཨོཾ་སྭཱ་སྟི། བཅོམ་ལྡན་འདས་གཤིན་རྗེ་གཤེད་པོའི་དཀྱིལ་འཁོར་རབ་འབྱམས་ཀྱི་སྒྲུབ་ཐབས་འཕྲིན་ལས་ཀྱི་ཉི་མ་འབུམ་གྱི་གཟི་བརྗིད་ཅན་ཞེས་བྱ་བ། བླ་མ་དང་བཅོམ་ལྡན་འདས་དཔལ་གཤིན་རྗེ་གཤེད་ཀྱི་ལྷ་ཚོགས་ཐམས་ཅད་ལ་ཕྱག་འཚལ་ལོ། །འོད་གསལ་རྡོ་རྗེ་འབར་བའི་སྣང་བས་ཕྱོགས་ཆ་འགེངས། །མ་ལུས་བདུད་སྡེའི་ཚོགས་པ་ལན་བརྒྱར་འཇོམས་མཛད་པ། །བླ་མེད་བླ་མ་འཁོར་ལོའི་མགོན་ལ་གུས་པས་འདུད། །སྲིད་འདི་གཤིན་རྗེའི་འཇིགས་པ་ཆེ་ལས་བསྐྱབ་ཏུ་གསོལ། །ཕྱི་ནང་གསང་བའི་གཤིན་རྗེ་འཇོམས་མཛད་ལྷ། །རྣམ་པ་དུ་

― TNT06_Page_0727 ―

^{[མ་དཔེ་གཟིགས་ན་འདིར་གནོན།]}

[Full Size]

མའི་སྐུ་དང་གསུང་ཐུགས་ཀྱི། །མཐའ་ཡས་རོལ་པ་སྟོན་མཛད་དཀྱིལ་འཁོར་པ། །དེ་དག་རྣམས་ལའང་གུས་པས་ཕྱག་འཚལ་ལོ། །རྡོ་རྗེ་འཛིན་པས་རབ་འབྱམས་རྒྱུད་སྡེ་རུ། །སྔགས་དང་དཀྱིལ་འཁོར་ཆོ་ག་དཔག་ཡས་གསུངས། །དེ་དོན་སྐྱེ་བོ་རྣམས་ལ་གསལ་བའི་ཕྱིར། །སྔགས་རིག་མང་པོས་ལག་ལེན་ཆོ་ག་བརྩམས། །ལས་ཚོགས་འཁྲུལ་འཁོར་མཐར་ཐུག་སྟོན་པའི་རྒྱུད། །དམར་ནག་འཇིགས་གསུམ་ཞེས་གྲགས་རྒྱུད་འདི་ལ། །མཁས་གྲུབ་དུ་མས་གསལ་བཤད་མཛད་པ་རྣམས། །མཐའ་དག་རྟོགས་ཕྱིར་བདག་གིས་ངལ་བ་བྱ། བསྟན་བཅོས་མཐའ་དག་རྙེད་དཀའ་བས། །ལུགས་བརྒྱ་གསལ་བྱེད་ཉུང་ངུའི་གཏམ། །དོན་རབ་རྒྱ་ཆེར་རབ་གསལ་བ། །མཐའ་དག་ལྟ་བའི་མེ་ལོང་ཡིན། བཅོམ་ལྡན་འདས་གཤིན་རྗེ་གཤེད་

― TNT06_Page_0728 ―

^{[མ་དཔེ་གཟིགས་ན་འདིར་གནོན།]}

[Full Size]

དམར་པོ་ལ་ཕྱག་འཚལ་ལོ། །འདིར་དང་པོར་དཀྱིལ་འཁོར་ཆེན་པོའི་རྡོ་རྗེ་སློབ་དཔོན་དཔལ་འཛིན་གྱིས་ཉེ་བར་བཀོད་པ། གཤིན་རྗེ་དམར་པོའི་དཀྱིལ་འཁོར་གྱི་སྒྲུབ་ཐབས་ཀྱི་རྗེས་སུ་འབྲངས་ནས་ངག་འདོན་ཙམ་བརྗོད་པར་བྱའོ། །དེ་ལ་སྐྱབས་འགྲོ་སེམས་བསྐྱེད་ཡིག་བརྒྱ་བདུད་རྩི་མྱང་བ་རྣམས་སྔོན་དུ་བཏང་སྟེ། རང་སྐད་ཅིག་གིས་གཤིན་རྗེ་དམར་པོའི་སྐུར་གསལ་བའི་སྙིང་གར། པཾ་ལས་པདྨ་དང༌། ཨཾ་ལས་ཉི་མའི་དཀྱིལ་འཁོར་གྱི་སྟེང་དུ། ཡཾ་ཡིག་གི་དབུས་སུ་ཧཱུཾ་དམར་པོ། དེ་ལས་འོད་འཕྲོས་རང་བཞིན་གྱི་གནས་ནས། གཤིན་རྗེ་གཤེད་པོའི་ལྷ་བཅུ་གསུམ་གྱི་བདག་ཉིད་ཅན་གྱི་དཀྱིལ་འཁོར། བླ་མ་རྡོ་རྗེ་འཆང་སངས་རྒྱས་བྱང་ཆུབ་སེམས་དཔའི་ཚོགས་དང་བཅས་པ་མདུན་གྱི་ནམ་མཁར་བྱོན་པར་གྱུར། སྟོང་ཉིད་སྙིང་རྗེ་གཅིག་པའི་སྐུ། །སྲིད་གསུམ་བདེ་ཆེན་ངོ་བོ་ཉིད། །སྤྲོས་པའི་དྲི་མས་མ་གོས་པའི། །བླ་མ་རྡོ་རྗེ་ཅན་ཞབས་འདུད། །བདུད་བཞི་པོ་ནི་རྣམ་པར་འཇོམས། །དཔའ་བོ་གདུལ་དཀའ་འདུལ་བ་པོ། །གཤིན་རྗེ་མཐར་བྱེད་ཕྱག་འཚལ་ཞིང༌། །དཀྱིལ་འཁོར་ལྷ་ཚོགས་རྣམས་ལ་འདུད། །ཙརྩི་ཀཱ་སོགས་ལྷ་མོ་རྣམས་ཀྱིས་མཆོད་པར་བསམས་ཏེ། ཨོཾ་ཨརྒྷཾ་པྲ་ཏཱིཙྪ་སྭཱཧཱ། དེ་བཞིན་དུ་པཱདྱཾ། ཨོཾ་བཛྲ་པུཥྤེ་ཨཱཿཧཱུཾ། དེ་བཞིན་དུ་དྷཱུ་པེ་ནས། ཤཔྟའི་བར་དུ་སྦྱར། སྐབས་འདི་དག་ཏུ་ཧྲཱིཿཥྚཱིཿཧཿསོགས་བྱེད་པ་ཡང་སྤྱིར་ཤིན་ཏུ་ལེགས་ཤིང༌། སྔགས་དེ་གཤིན་རྗེ་གཤེད་ཀྱི་སྒོས་ཆོས་ཀྱང་ཡིན་མོད། ལུགས་འདིའི་མཆོད་པ་ཡིན་ཚད་ལ་བཟང་མདོག་སྟོན་པའི་ཕྱིར། དེ་འབའ་ཞིག་རང་ངོ་མཐོན་དུ་སྦྱོར་མི་དགོས་ཏེ། དཀྱིལ་འཁོར་མཆོད་པ་དང་གཏོར་མ་དང་སྦྱིན་སྲེག་ལ་སོགས་པའི་ཁྱད་པར་གྱི་སྐབས་འགའ་ཞིག་ཏུ་ངེས་པར་བྱ་ཡི། ཚོགས་ཞིང་

― TNT06_Page_0729 ―

^{[མ་དཔེ་གཟིགས་ན་འདིར་གནོན།]}

[Full Size]

ཙམ་དང་མཆོད་པ་ཕྲ་མོ་རྣམས་ལ་ཇི་ལྟར་འོས་པ་སྦྱར་བས་ཆོག་གོ །ལུས་དང་ངག་དང་ཡིད་ཀྱི་སྡིག །བགྱིས་དང་དེ་བཞིན་བགྱིད་སྩལ་གང༌། །གང་ཡང་རྗེས་སུ་ཡི་རང་བ། །དེ་ཀུན་དུས་གསུམ་མགོན་ལ་བཤགས། །རྫོགས་སངས་རྒྱས་དང་དེ་ཡི་སྲས། །འཕགས་རྣམས་དགེ་ཚོགས་རྗེས་ཡི་རང༌། །རྫོགས་སངས་རྒྱས་དང་དམ་པའི་ཆོས། །ཚོགས་མཆོག་བཅས་ལ་སྐྱབས་སུ་མཆི། །ཡོན་ཏན་རྒྱ་མཚོ་ཁྱེད་རྣམས་ལ། །རང་གི་ལུས་འདི་དབུལ་བར་བགྱི། །དམ་པའི་ཆོས་ཀུན་སྟོན་པ་ཡི། །སྒྲ་དབྱངས་མཛེས་པས་བཞུགས་སུ་གསོལ། །ཡང་དག་རྫོགས་པའི་སངས་རྒྱས་དང༌། །དེ་སྲས་ལམ་གྱུར་སྦྱིན་སོགས་ཚུལ། །སྐུ་གསུམ་ཡེ་ཤེས་ཐོབ་བྱའི་ཕྱིར། །རབ་ཏུ་དད་པས་བསྟེན་པར་བགྱི། །སེམས་ཅན་ཀུན་གྱི་དོན་སྒྲུབ་ཕྱིར། །རྫོགས་པའི་བྱང་ཆུབ་སེམས་བསྐྱེད་བགྱི། །བསོད་ནམས་ཀུན་ནས་གང་བསགས་པ། །རྫོགས་པའི་བྱང་ཆུབ་ཐོབ་ཕྱིར་བསྔོ། །དཔལ་ལྡན་གཤིན་རྗེ་མཐར་བྱེད་དུ། །གྱུར་ནས་བདག་གིས་འགྲོ་ཕན་བགྱིད། །ཅེས་ལན་གསུམ་བརྗོད། ཨོཾ་ཨཱཿཧཱུཾ་བཛྲ་མུཿ ཞེས་གཤེགས་སུ་གསོལ། ཚད་མེད་བཞི་སྤྱི་དང་མཐུན། རང་བཞིན་དང་བྲལ་སྟོང་པ་སྟེ། །རྒྱུ་ཡིས་ཀྱང་ནི་མཚན་མ་མེད། །རྣམ་པར་རྟོག་དང་བྲལ་ཉིད་ཀྱིས། །སྨོན་པ་རྣམ་པར་སྤངས་པའོ། །ཨོཾ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཆག་ལོའི་སྒྲུབ་ཐབས་སུ། སྐབས་འདིར་ནཱ་ད་འཇོག་པར་བཤད་པ་ནི་གཞན་མང་པོ་དང་མཐུན་ཅིང༌། དམ་པའི་མན་ངག་ཡིན་པས་སྤྱིར་མི་འགོག་ཀྱང༌། ལུགས་འདིའི་རྒྱུད་གཞུང་ལས་མི་གསལ་བས་མི་དགོས་ལ། འདིར་ཡི་གེར་ལྔ་འཇོག་པར་འདོད་པ་ནི་གསང་འདུས་ཞབས་ལུགས་ཀྱི་རྒྱས་བཀབ་ཧ་ཅང་ཐལ་ཆེས་པའོ། །སྟོང་པའི་ངང་

― TNT06_Page_0730 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་ཨཾ་ལས་བྱུང་བའི་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་ལས་བྱུང་བའི་རྡོ་རྗེ་སྔོན་པོ་རྩེ་ལྔ་པ། དེ་ལས་རྡོ་རྗེའི་འོད་ཟེར་འཕྲོས་པས། འོག་རྡོ་རྗེའི་ས་གཞི། ཐད་ཀར་རྡོ་རྗེའི་ཁོར་ཡུག་གི་ནང་དུ་རྭ་བ། སྟེང་དུ་རྡོ་རྗེའི་གུར་དང་བླ་རེ། མདའི་དྲ་བ། ཕྱི་ནང་ཕྱོགས་ཐམས་ཅད་དུ་ཡེ་ཤེས་ཀྱི་མེ་དཔུང་འབར་བ་དང་བཅས་པའི་སྲུང་བའི་འཁོར་ལོ་རབ་ཏུ་ཡངས་ཤིང་རྒྱ་ཆེ་བ་དང་བཅས་པར་གྱུར། སྐབས་འདི་དག་དང་འབྲེལ་བ་ལ་པདྨ་སྲུང་བས་མཛད་པའི་ནག་པོའི་སྒྲུབ་ཐབས་སོགས། ནག་པོའི་ཕྱོགས་འགག་ཞིག་ཏུ། དུར་ཁྲོད་བཤད་པ་དང་རིག་པ་མཚུངས་པའི་ཕྱིར། དམར་པོ་ལ་ཡང་དུར་ཁྲོད་ཡོད་ན་ལེགས་སོ། །དམར་ནག་གི་གཞུང་ཕལ་ཆེར་ལས་དུར་ཁྲོད་མི་འབྱུང་བ་ནི། སྐལ་བ་དང་མི་ལྡན་པ་ཚོགས་པའི་ནང་དུ་དུར་ཁྲོད་མི་འབྲི་བར་གསུངས་པ་དང་གནད་གཅིག་པས། རྒྱུ་མཚན་དང་དགོས་པ་དེ་ཙམ་དུ་ཟད་ལ། དེས་ན་གསང་སྔགས་ནང་པའི་ཁྲོ་བོ་ཆེན་པོའི་དཀྱིལ་འཁོར་ཡིན་པས། བྲི་བ་དང་བསྒོམ་པ་གཉིས་ཀ་ལ་དུར་ཁྲོད་ཡོད་ན་བྱིན་རླབས་ཆེ་ཞིང་བཟང་ལ། མེད་ཀྱང་ཆད་པའི་ཉེས་པ་ཆུང་བ་ནི་ཡིན་ཏེ། ཕྱིས་ཕལ་ཆེར་གྱིས་མ་མཛད་དོ། །འོན་ཀྱང་འདི་དག་གི་གཞུང་དུ་གཏན་ནས་མ་གསུངས་པ་ནི་མ་ཡིན་ཏེ། སྐྱེ་བོས་དབེན་ཕྱོགས་དུར་ཁྲོད་སོགས། །ཞེས་གནས་ཀྱི་ཁྱད་པར་གསུངས་པའི་ཟུར་གྱིས་འཕངས་པར་ཡང་ཤེས་སོ། །དེ་ལ་དུར་ཁྲོད་ཀྱི་མཚན་ཉིད་ནི་སྤྱི་དང་འདྲ་ལ། འདིར་དེ་ཡི་ཕྱི་རོལ་མཚན་ཉིད་ཐམས་ཅད་དང་ལྡན་པའི་དུར་ཁྲོད་ཆེན་པོ་བརྒྱད་ཀྱིས་ཡོངས་སུ་བསྐོར་བར་གྱུར། ཅེས་བརྗོད། ཡང་དུར་ཁྲོད་ཀྱི་མངོན་རྟོགས་འབྲིང་དུ་བསྒོམ་པར་འདོད་ན། ཕྱི་རོལ་ཏུ་གཏུམ་དྲག་ལ་སོགས་པ། དུར་ཁྲོད་ཆེན་པོ་འཇིགས་སུ་རུང་ཞིང་ཞེས་པ་ནས། མཆོད་རྫས་སྣ་ཚོགས་པས་གང་བའོ། །ཞེས་པའི་བར་

― TNT06_Page_0731 ―

^{[མ་དཔེ་གཟིགས་ན་འདིར་གནོན།]}

[Full Size]

རྡོ་རྗེ་འཇིགས་བྱེད་ཀྱི་སྒྲུབ་ཐབས་སྙིང་པོ་བཞིན་དུ་ཤེས་པར་བྱའོ། །རྒྱས་པ་ལ་མོས་ན། ཤིང་དང་ཕྱོགས་སྐྱོང་དང༌། ཞིང་སྐྱོང་དང༌། ཀླུ་དང༌། སྤྲིན་ལ་སོགས་པ་སྤྱི་དང་མཐུན་པར་གསལ་བཏབ་ཀྱང་ལེགས་ལ། ཡང་ན་རྭ་བའི་ལུགས་ལྟར་ཤར་ནས་ཕྱོགས་གཡས་སྐོར་དང༌། མེ་ནས་མཚམས་གཡས་སྐོར་གྱིས། གཏུམ་དྲག་དྲག་ཏུ་རྒོད་པ་དང༌། །དྲག་པོ་མུན་བྱེད་ཅ་ཅོ་སྒྲོག །བི་བྷི་ཥ་ཎ་འབར་བའི་རིགས། །དམྱལ་སོགས་དབྱིབས་ཅན་དུར་ཁྲོད་བརྒྱད། །ན་ག་གེ་སར་པ་ལ་ཀྵ། །བྱང་ཆུབ་ཤིང་དང་པ་ཊ་ལི། །ཨརྫུ་ན་དང་པ་ལ་ཤ ། ཨུ་དུམ་བ་ར་ཨ་མྲ་ཤིང༌། །ཞིང་སྐྱོང་ཨཊྚ་ཧ་ས་དང༌། །ཙི་ར་ཊ་དང་ཀིལ་ཀི་ནི། །ཛ་ཡན་ཏ་དང་པྲ་ཡན་ཏ། །སྣ་ཛུ་མ་དང་ལྷའི་འཁོར་ལོ། །ཨུ་ཙ་ཡ་རྣམས་ལུས་ཕྱེད་ཐོན། །སྒྲོག་བྱེད་སེར་པོ་ལྡོག་བྱེད་སྔོ། །འཇིགས་བྱེད་དཀར་པོ་འཁོར་བྱེད་སེར། །འགེངས་བྱེད་དམར་པོ་ཆར་འབེབས་སྔོ། །གཏུམ་པ་ནག་པོ་འཐུག་པོ་དཀར། །ནོར་རྒྱས་སེར་པོ་པདྨ་དཀར། །སྟོབས་རྒྱུ་ནག་པོ་འཇོག་པོ་དམར། །ཧུ་ལུན་ཏ་སྔོ་རིགས་ལྡན་ལྗང༌། །དུང་སྐྱོང་སེར་པོ་པད་ཅན་དཀར། །ཞེས་པ་ལྟར་བསྒོམས་ཀྱང་རུང་ལ། ཞིང་སྐྱོང་རྣམས་ཡུམ་དང་བཅས་པ་འཁོར་མཁའ་འགྲོ་རིགས་དྲུག་དྲུག་གིས་བསྐོར་བ་ཡང་ཡོད་དོ། །ཡང་ན་ཞིང་སྐྱོང་བརྒྱད་ནི། ཤར་དུ་གཏུམ་པོ་སེར་པོ་སྤྱི་བླུགས་ཐོད་པ་འཛིན་པ། ཤར་ལྷོར་དཔལ་འཛིན་དམར་པོ་འཕྲེང་བ། ལྷོར་རྣམས་འཇིགས་ནག་པོ་དབྱུག་པ། ལྷོ་ནུབ་ཏུ་དྲག་པོ་མུན་བྱེད་སེར་པོ་གྲི་གུག ནུབ་ཏུ་འོད་ཀྱི་འཕྲེང་བ་ཅན་དཀར་པོ་སྦྲུལ་ཞགས། ནུབ་བྱང་དུ་ཅ་ཅོ་སྒྲོག་པ་སྔོན་པོ་རླུང་རས་སྔོ་སྐྱ། བྱང་དུ་གྷ་བ་ཏ་ར་སེར་པོ་རྡོ་རྗེ། བྱང་ཤར་དུ་གད་མོ་ཆེར་སྒྲོགས་པ་དཀར་པོ་རྩེ་གསུམ་དང་ཐོད་པ་འཛིན་

― TNT06_Page_0732 ―

^{[མ་དཔེ་གཟིགས་ན་འདིར་གནོན།]}

[Full Size]

པ། ཐམས་ཅད་ཀྱང་སྤྱན་གསུམ་དྲག་པོའི་ལུས་ཅན་ནོ། །འདི་སློབ་དཔོན་ཀ་མ་ལ་རཀྵི་ཏས་ནག་པོའི་སྒྲུབ་ཐབས་སུ་གསུངས་པའི་ལུགས་ཡིན། དུར་ཁྲོད་ཀྱི་མངོན་པར་རྟོགས་པ་འདི། འདིར་བསྟན་གཤིན་རྗེ་གཤེད་ཀྱི་སྒྲུབ་ཐབས་ཐམས་ཅད་ལ་འཁྱེར་བར་བྱའོ། །དེ་ནས་འདི་སྐད་ཅེས་བྱ་སྟེ། སྲུང་བའི་འཁོར་ལོའི་ནང་དུ། པད་ཟླ་ལ་གནས་པའི་སཾ་ལས་རྡོ་རྗེ་སཾ་གྱིས་མཚན་པ་ལས། ཆོས་ཀྱི་འབྱུང་གནས་གྲུ་གསུམ་ཕྱི་དཀར་ལ་ནང་ཅུང་ཟད་དམར་བ། རྩ་བ་ཕྲ་བ་ཐུར་དུ་བསྟན་ཅིང་གདེངས་ཀ་ཆེ་བ་གྱེན་དུ་ཕྱོགས་པ། ཀུན་ཏུ་བཟང་པོ་ཡབ་ཡུམ་གྱི་ངོ་བོ། དེའི་ནང་དུ་པཾ་ལས་སྣ་ཚོགས་པདྨ་དང༌། ཧཱུཾ་ལས་སྣ་ཚོགས་རྡོ་རྗེ་བརྩེགས་པའི་ལྟེ་བར། བྷྲུཾ་ལས་འཁོར་ལོ་དཀར་པོ་རྩིབས་བཅུ་གཉིས་པ་བྷྲུཾ་གྱིས་མཚན་པ་ཡོངས་སུ་གྱུར་པ་ལས། སངས་རྒྱས་རྣམ་པར་སྣང་མཛད་ཀྱི་རང་བཞིན་གཞལ་མེད་ཁང་གྲུབ་པར་གྱུར། ཅེས་སོ། །ཆག་ལོ་དང་བླ་མ་ཆོས་ཀྱི་རྒྱལ་པོ་དང༌། ཤོང་བློ་བརྟན་རྣམས་ཀྱིས་སྐབས་འདིར་རྣམ་སྣང་ཞལ་ཕྱག་གི་རྣམ་པ་ཅན་མི་བསྐྱེད་པ་ཉིད་བླ་མའི་མན་ངག་ཏུ་སྣང་ཞིང་འཇུག་པ་བདེ་ལ། མཁས་མཆོག་བུའི་རྣལ་འབྱོར་བཞི་གསལ་སོགས་ཕྱི་མ་རྣམས་ལས་རྣམ་སྣང་སྐྱེད་པར་མཛད་པ་ཡང༌། རྟག་པའི་ཡན་ལག་ཡང་དག་བྱུང༌། །ཞེས་དཔལ་འཛིན་གྱི་གཞུང་གི་དགོངས་པར་ནི་གསལ་ལོ། །གཞན་ཡང་སྒྲུབ་ཐབས་འགའ་ཞིག་ལས། ཀུན་ཏུ་བཟང་པོ་ཞལ་ཕྱག་གི་རྣམ་པ་ཅན་བསྐྱེད་ནས། དེ་ཞུ་བ་ལས་ཆོས་འབྱུང་དགོད་པ་དང༌། ས་བོན་ལས་བསྐྱེད་པའི་འབྱུང་བ་བཞི་གཅིག་ཏུ་འདུས་པ་ལས། རྣམ་སྣང་དུ་སྐྱེད་པ་དང༌། དེ་ཞུ་བ་ལས་གཞལ་ཡས་ཁང་བསྒོམ་པ་ཡོད་ཅིང༌། སྒྲུབ་ཐབས་གཞན་འགའ་ལས་ཀྱང༌། དེ་དང་ཕྱོགས་མཚུངས་སུ་བཤད་པ་དང༌། ནག་པོའི་རྒྱུད་ལེའུ་བཅོ་བརྒྱད་པ་དང༌།

― TNT06_Page_0733 ―

^{[མ་དཔེ་གཟིགས་ན་འདིར་གནོན།]}

[Full Size]

དམར་པོའི་རྒྱུད་ལེའུ་བཅུ་དགུ་པ་འདི་དག གསང་བ་འདུས་པའི་རྗེས་སུ་འགྲོ་བའི་རྒྱུད་ཀྱང་ཡིན་མོད་ཀྱི། གསང་འདུས་ནི་རྒྱུད་རྒྱས་པ་ཡིན་ཞིང༌། དེ་ལ་ཆོ་གའི་སྤྲོས་པ་ཡང་རྒྱས་པ་འཆད་ཅིང་འོས་ཀྱང༌། འབྱུང་བཞི་ནི་གསང་འདུས་ཡེ་ཤེས་ཞབས་ལུགས་ལའང་མེད་ལ། འདི་ནི་རྒྱུད་བསྡུས་པ་ཉིད་ཀྱི་ཕྱིར། ཆོ་ག་ཡང་ཅུང་ཟད་བསྡུས་པ་སྦྱོར་རིགས་པས། དོན་གྱི་རྐང་འདྲ་བ་ལ་བསྡུས་པ་འཐད་པས། ཆོས་འབྱུང་དང་གཞལ་ཡས་ཁང་གི་རྒྱུར་ལྷ་སྐུ་མི་བསྒོམ་པར། དེ་དང་དེ་ལྷའི་ངོ་བོར་མོས་པ་བྱེད་པ་ཉིད་ལེགས་ཤིང༌། གཞལ་ཡས་ཁང་གི་རྒྱུར་འབྱུང་བཞི་བསྒོམ་པ་ནི། དམར་པོའི་རྒྱུད་ལས་ལྷ་ལྔའི་ཕྱོགས་ལ་གསུངས་ཀྱང༌། བཅུ་གསུམ་མའི་ཕྱོགས་ནས་ནག་པོ་དང་མཚུངས་དགོས་པའི་ཕྱིར་དང༌། རྒྱུད་དེ་ལས་དེ་མི་འབྱུང་བའི་ཕྱིར། རྒྱུད་ཀྱི་དགོངས་པའི་བསྟན་ཚོད་ཐོབ་ཐང་དང་བསྟུན་ན། དམར་པོ་བཅུ་གསུམ་མའི་སྐབས་འདིར་བསྒོམ་མི་དགོས་སོ། །དེ་ལྟ་ན་ཡང་སློབ་དཔོན་དཔལ་འཛིན་ཉིད་ཀྱི་བཞེད་གཞུང་སྲོང་ན། ཆོས་འབྱུང་གི་སྐབས་སུ། སཾ་བྱུང་རྡོ་རྗེ་བཟང་པོ་ཡི། །ཡན་ལག་ཆོས་འབྱུང་ཟུར་གསུམ་དཀར། །ཞེས་རྡོ་རྗེའི་ཡན་ལག་སྟེ། རྡོ་རྗེའི་གཟུགས་ལས་བྱུང་བར་བཤད་པ་དང༌། གཞལ་ཡས་ཁང་ལ་འཁོར་ལོའི་ཡན་ལག་ཅེས་མི་གསུངས་པར། རྟག་པའི་ཡན་ལག་གཅེས་འབྱུང་བས། རྣམ་སྣང་ཞུ་བ་ལས་གཞལ་ཡང་ཁང་བསྒོམ་ཉིད་གཞུང་དེའི་ལུགས་ལ་དགོས་པར་གསལ་ལོ། །འདིར་དཔལ་འཛིན་གྱི་བཞེད་གཞུང་རྗེས་སུ་སྐྱོང་ན་དེའི་རང་ལུགས་ཡིན་པས་རྣམ་པ་གཅིག་ཏུ་ན་སྒོམ་པའི་ལུགས་ལེགས་ལ། གཉིས་སུན་ཆོས་འབྱུང་གི་སྐབས་དང་དོད་སྙོམས་ཤིང་རྒྱུད་ན་མི་གསལ་བ་ཉིད་རྒྱུ་མཚན་ནོ། །དེ་ཡང་འདི་ལྟར། ཐར་པ་ཆེན་པོའི་ཁང་བཟང་གཞལ་ཡས་ཁང་རིན་པོ་ཆེ་སྣ་ལྔ་ལས་རྫོགས་པར་

― TNT06_Page_0734 ―

^{[མ་དཔེ་གཟིགས་ན་འདིར་གནོན།]}

[Full Size]

གྲུབ་པ། ཐུབ་པའི་དབང་པོའི་འོད་ཟེར་གྱིས་མཐའ་ཡས་པའི་ཕྱོགས་ཀུན་ཏུ་ཁྱབ་པ། གྲུ་བཞི་པ། སྒོ་བཞི་པ། ཕྱི་ནས་རིམ་པ་བཞིན་དུ་དཀར་སེར་དམར་ལྗང་སྔོ་བའི་རྩིག་པ་རིམ་པ་ལྔ་དང་ལྡན་པ། དེའི་སྟེང་དུ་རིན་པོ་ཆེའི་ཕ་གུ་དམར་པོས་བསྐོར་བའི་སྟེང་ན་གསེར་ཀྱི་སྐེ་རགས་བཞིའི་ཕྱི་ངོས་སུ་ཆུ་སྲིན་གྱི་ཁ་ན་འཕྱང་བའི་དྲ་བ་དྲ་ཕྱེད། དེའི་སྟེང་དུ་བྱ་འདབས་ལས་འཕྱང་བའི་ཤར་བུ། སྟེང་དུ་མདའ་ཡབ་མཆོད་རྟེན་གྱི་དབྱིབས་ཅན་གྱིས་ཡོངས་སུ་བསྐོར་བ་ལ། རྒྱལ་མཚན་དང་བ་དན་ལ་སོགས་པ་རྒྱན་ཐམས་ཅད་ཀྱིས་རྣམ་པར་བརྒྱན་པ། རྩིག་པའི་ཕྱི་འགྲམ་འདོད་ཡོན་གྱི་སྣམ་བུ་དམར་པོས་བསྐོར་བ་ལ། བཞུགས་སྟངས་དང་ཁ་དོག་སྣ་ཚོགས་པའི་གཟུངས་མ་རྣམས་ཀྱིས་མཆོད་རྫས་སྣ་ཚོགས་ཐོགས་ནས་བཅོམ་ལྡན་འདས་ལ་མཆོད་པ། སྒོ་བཞིའི་མདུན་དུ་སྟེགས་བུ་གྲུ་བཞི་པའི་སྟེང་དུ། བུམ་པ་ལ་གནས་པའི་ཀ་བ་བཞི་བཞིས་བཏེགས་པའི་རྟ་བབས་ཀྱི་རྩེ་མོར་པདྨ་ལ་གནས་པའི་འཁོར་ལོ་དང༌། གཡས་གཡོན་དུ་རི་དྭགས་ཕོ་མོས་བརྒྱན་པ། སྒོ་དང་སྒོ་ཁྱུད་གྱི་ཕྱི་མཚམས་དང༌། གྲྭ་བཞིར་ཟླ་ཕྱེད་ལ་གནས་པའི་རིན་པོ་ཆེ་ལ་རྡོ་རྗེས་མཚན་པ། རྟ་བབས་ཀྱི་གཡས་གཡོན་དུ་བུམ་པ་བཟང་པོ་དང་དཔག་བསམ་གྱི་ཤིང་དང༌། རྒྱལ་སྲིད་སྣ་བདུན་དང༌། སྤྲིན་གྱི་གསེབ་ནས་བྱུང་བའི་ལྷ་མོ་མེ་ཏོག་གི་འཕྲེང་བ་ཐོགས་པ་རྣམས་འཁོད་པ། གཞལ་ཡས་ཁང་གི་དབུས་ཀྱི་གཞི་ལ་སྣ་ཚོགས་རྡོ་རྗེ་རྭ་ཉི་ཤུ་པ། རྡོ་རྗེའི་རྭ་རྣམས་དང༌། གཞལ་ཡས་ཁང་གི་སྟེང་འོག་གཞི་རྣམས། ཤར་དཀར་ལྷོ་སེར་ནུབ་དམར་བྱང་ལྗང་དབུས་སྔོན་པོའོ། །སྣ་ཚོགས་རྡོ་རྗེའི་

― TNT06_Page_0735 ―

^{[མ་དཔེ་གཟིགས་ན་འདིར་གནོན།]}

[Full Size]

ལྟེ་བ་གྲུ་བཞི་ལ། མཐའ་ནས་རྡོ་རྗེ་སྔོན་པོའི་འཕྲེང་བས་བསྐོར་བ། སྣ་ཚོགས་རྡོ་རྗེའི་དབུས་ཀྱི་ལྟེ་བ་དང༌། ཤར་གྱི་རྭ་རྩ་དང༌། རྡོ་རྗེ་རྭའི་མཚམས་ཀྱི་གྲྭ་བཞི་པོ་རྣམས་སུ། ཟླ་བའི་གདན། རྭའི་རྩ་བ་གཞན་གསུམ་དང༌། སྒོ་བཞིར་ཉི་མའི་གདན། ཉི་ཟླ་ཐམས་ཅད་ཀྱང་སྣ་ཚོགས་པདྨའི་ལྟེ་བ་ལ་གནས་པའོ། །དེ་ཡན་ཆད་ནི་རྣལ་འབྱོར་བཞིའི་སྔོན་འགྲོའི་ཆོས་ཡིན་ཡང༌། རྣལ་འབྱོར་དང་པོའི་ཁོངས་སུ་བསྡུ་བར་བྱའོ། །དབུས་ཀྱི་གདན་གྱི་སྟེང་དུ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨ་ཨཻ། ཨོ་ཨཽ། ཨཾ་ཨཿ ཕྲག་གཉིས་ཞུ་བ་ལས་བྱུང་བའི་ཟླ་བའི་དཀྱིལ་འཁོར་དཀར་པོ། དེའི་སྟེང་དུ། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ་ཤ་ཥ་ས་ཧ་ཀྵ། ཡ་ར་ལ་ཝ་ཌ་ཌྷ། ཕྲག་གཉིས་རྣམས་ཞུ་བ་ལས་བྱུང་བའི་ཟླ་བའི་དཀྱིལ་འཁོར་དམར་པོ། དེ་ལྟར་ཟླ་བ་གཉིས་ཁ་སྦྱོར་ནི་མེ་ལོང་ལྟ་བུའི་ཡེ་ཤེས་སོ། །དེ་གཉིས་གཅིག་ཏུ་འདྲེས་པ་ནི་མཉམ་པ་ཉིད་ཀྱི་ཡེ་ཤེས་སོ། །དེའི་སྟེང་དུ་ཧཱུཾ་ཡིག་དཀར་ལ་དམར་བའི་མདངས་ཆགས་པ་ནི་སོ་སོར་རྟོག་པའི་ཡེ་ཤེས་སོ། །འདིར་དམར་པོ་བཅུ་གསུམ་མའི་སྒྲུབ་ཐབས་ཆག་འགྱུར་ལས། མཉམ་པ་ཉིད་ནི་དེ་གཅིག་ཉིད། །སོ་སོར་ཀུན་རྟོག་དེ་བྱུང་ཧཱུཾ། །ཞེས་ཟླ་གཉིས་གཅིག་ཏུ་འདྲེས་པ་དེ་ལས་བྱུང་བའི་ཧཱུཾ་ཡིག་ཅེས་པའི་དོན་དུ་སྣང་བ། དམར་པོ་བཅུ་གསུམ་མའི་སྒྲུབ་ཐབས་ལ་ཆག་ལོ་སོགས་བོད་སྔ་ཕྱི་ཕལ་ཆེར་དེ་བཞིན་དུ་འདོད། འོན་ཀྱང་དཔལ་འཛིན་གྱི་ནག་པོའི་སྒྲུབ་ཐབས་འགྱུར་རྙིང་རྣམས་སུ། དེ་དག་གཅིག་གྱུར་མཉམ་པ་ཉིད། །དེར་སྐྱེས་ཧཱུཾ་ནི་སོ་སོར་རྟོག །ཅེས་བསྒྱུར་བ་ལེགས་པར་མཐོང་ལ།

― TNT06_Page_0736 ―

^{[མ་དཔེ་གཟིགས་ན་འདིར་གནོན།]}

[Full Size]

དེས་ན་འདིར་ཡང༌། དེ་བྱུང་ཞེས་པ། དེར་བྱུང་ཞེས་གནས་གཞིའི་སྒྲ་ཡོད་པར་བྱས་ནས། ཟླ་བ་གཉིས་ཞུ་བའི་སྟེང་དུ་ས་བཽན་དང་ཕྱག་མཚན་བསྒོམ་པར་བྱས་ན། གཤིན་རྗེ་གཤེད་བཅུ་གསུམ་འཁོར་ལོའི་རྒྱུད་གཞུང་གཞན་ཐམས་ཅད་དང་མཐུན་ཅིང༌། ཞབས་ལུགས་སོགས་དང་ཡང་མཚུངས་པར་འགྱུར་བས་དེ་བཞིན་དུ་བྱས་ན་ལེགས་སོ་སྙམ་པ་ནི་བདག་གི་རྣམ་རྟོག་ཡིན་ཞིང༌། བླ་མ་ཆོས་ཀྱི་རྒྱལ་པོས་ཀྱང་བཤད་དོ། །དམར་པོ་བཅུ་གསུམ་མ་ལ། དཱ་ན་ཤཱི་ལ་དང་གློ་བོ་ལོ་ཙཱ་བའི་འགྱུར་ཡོད་འདུག་པ་རྙེད་ན་བརྟག་པར་བྱ་ལ། ཆག་ལུགས་ལ་འཕགས་སྐོར་གྱི་རིགས་འགྲེ་བྱུང་ངམ་སྙམ་མོ། །དེ་ལས་དབྱུག་པ་དཀར་པོ་རྡོ་རྗེའི་རྩེ་མོ་ཅན་མི་མགོ་རློན་པ་སེར་པོས་མཚན་པ། དེའི་དབུས་སུ་ཉི་མ་ལ་ཧཱུཾ་དམར་པོས་མཚན་པར་གྱུར། ཨོཾ་བཛྲ་དཎྜ་ཨཏྨ་ཀོ྅ཧཾ། དེ་ལས་འོད་ཟེར་འཕྲོས་འདུས་ཡོངས་སུ་གྱུར་པ་ལས། བདག་ཉིད་རྒྱུ་རྡོ་རྗེ་འཆང་དཔལ་བདེ་བ་ཆེན་པོ་རྡོ་རྗེ་སེམས་དཔའ་གཤིན་རྗེ་གཤེད་སྐུ་མདོག་དཀར་ལ་ཡིད་ཙམ་དམར་བའི་མདངས་ཅན། རོལ་པའི་ཁྲོ་བོ་ཆེན་པོ་སྤྱན་གསུམ་པ་དབུ་སྐྲ་གྱེན་བརྫཻས་སྟག་ལྤགས་དང་སྦྲུལ་རྒྱན་ཅན། ཕྱག་གཡས་པས་ཐོད་དབྱུག་དང༌། གཡོན་པས་ཐོད་ཁྲག་འཛིན་པ། པད་ཟླ་ལ་གཡོན་བརྐྱང་གི་སྟབས་ཀྱིས་བཞུགས་ཤིང༌། ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ། རང་སྣང་གི་ཡུམ་གྱིས་འཁྱུད་པའོ། །འདི་ནི་སྐུ་མཛེས་ཤིང་རོལ་པའི་ཁྲོ་བོ་ཡིན་པ་དང༌། མ་ཧེའི་གདན་མེད་ཅིང་སྐུ་མདོག་གི་ཁྱད་པར་ཙམ་མ་གཏོགས། གཞན་ཁྱད་པར་ཡེ་མ་གསུངས་པས་ཆེས་གཟིགས་སུ་ཡངས་པའི་མཁས་པ་འགའ་ཞིག་གིས་ཀྱང༌། འདི་སྒེག་པའི་ཁྲོ་བོ་ཡིན་པས། དབུ་སྐྲ་དམར་སེར་གྱེན་བརྫེས་དང་སྨ་ར་མེད། ཐོད་པ་སྐམ་རློན་དང་སྟག་ལྤགས་

― TNT06_Page_0737 ―

^{[མ་དཔེ་གཟིགས་ན་འདིར་གནོན།]}

[Full Size]

སྦྲུལ་རྒྱན་སོགས་མི་རུང་ངོ་གསུང་བ་ནི། ཀྱཻ་རྡོར་བདེ་མཆོག་སོགས་ཧེ་རུ་ཀ་སྒེག་ཁྲོས་ཆེན་པོ་རྣམས་ལ་ཇི་ལྟར་ཡོད་པ་ཐུགས་ཀྱིས་སྙེལ་པའོ། །དེ་དག་ནི་མངོན་བྱང་ལྔ་ལས་རྒྱུའི་རྡོ་རྗེ་འཛིན་པ་རྫོགས་པ་སྟེ། རྣལ་འབྱོར་བཞི་ལས་རྣལ་འབྱོར་དང་པོའོ། །དེ་ནས་ཡབ་ཡུམ་སྙོམས་པར་ཞུགས་པའི་བདེ་བ་ཆེན་པོའི་རྐྱེན་གྱིས་ཡབ་ཀྱི་ཐུགས་ཀའི་ཧཱུཾ་ལས་ཡེ་ཤེས་ཀྱི་འོད་ཟེར་འཕྲོས་པས། འགྲོ་བ་ཐམས་ཅད་སངས་རྒྱས་ཀྱི་གཟུགས་བརྙན་དུ་བྱས་ཏེ། ཐམས་ཅད་ཀྱང་བདེ་བ་ཆེན་པོའི་ངོ་བོར་ཞུ་སྟེ། རང་ཉིད་ལ་ཐིམ། རང་སེམས་ཀྱི་སྣང་བའི་གཙོ་བོ་ནམ་མཁར་གནས་ལ། ཨོཾ་ཨཱཿཧཱུཾ་ཧོཿ དམར་པོ་གཉིས་ཀྱི་མཐའ་བརྟེན་པར་གྱུར་པའི་ཡི་གེ་ལྔ་པོ་དེ་ཉིད་སྐར་མདའ་འཕོ་བ་ལྟར་བྱོན་ཏེ། རྡོ་རྗེ་འཆང་ཆེན་པོའི་སྐུ་ལ་ཞུགས། གཞི་ལ་གནས་པའི་བྱང་ཆུབ་ཀྱི་སེམས་དང་འདྲེས། རྡོ་རྗེའི་ལམ་ནས་ཡུམ་གྱི་པདྨའི་ནང་དུ་ཆུད་པ་ཙམ་གྱིས། དཔལ་བདེ་བ་ཆེན་པོ་ཡབ་ཡུམ་གྱི་སྐུ་ཡང༌། དེ་དག་དང་རོ་གཅིག་པར་བྱང་ཆུབ་ཀྱི་སེམས་སུ་ཞུ་སྟེ། འོད་གསལ་བའི་རང་བཞིན་ཐིག་ལེའི་ངོ་བོར་གྱུར་ཏོ། །འདི་ཆག་ལོའི་སྒྲུབ་ཐབས་ན། ཡབ་ཡུམ་ཞུ་བ་ཉིད་ཡི་གེ་ལྔར་གྱུར་པ་དང༌། གཞུང་ལས་སྐར་མདའ་འཕོ་བ་ལྟ་བུར་གསུངས་པའི་དོན་ཡང་ཡི་གེ་ལྔ་པོ་གཅིག་ལ་གཅིག་ཐིམ་ནས་མཐར་ཐིག་ལེར་གྱུར་པ་ལ་འཆད་དོ། །ལོ་ཙཱ་བ་དེ་ནི་མཁས་བཙུན་བཟང་བའི་ཚད་དུ་ཕྱིན་པ་དང༌། རྒྱ་བལ་པཎ་གྲུབ་ཀྱི་མན་ངག་ཕྱིན་ཅི་མ་ལོག་པ་མངའ་བ་དང༌། རྒྱལ་བའི་བསྟན་པ་གཅེས་པར་འཛིན་པས་རང་བཟོ་མི་མཛད་པའི་ཕྱིར། ལུགས་དེ་སྤོང་དུ་ནི་མི་རུང་ཡང་རྒྱུད་དང་གཞུང་གི་དགོངས་པ་ནི་དཀྱུས་སུ་བཤད་པ་ཉིད་ཡིན་ཞིང༌། ཡེ་ཤེས་ཞབས་

― TNT06_Page_0738 ―

^{[མ་དཔེ་གཟིགས་ན་འདིར་གནོན།]}

[Full Size]

ལུགས་སོགས་ཕྱོགས་མཐུན་གྱི་རྒྱབ་རྟེན་རྣམས་དང་ཡང་མཐུན་ནོ། །ཡང༌། ཐིག་ལེ་ལས་སྤྲུལ་པའི་ཙརྩི་ཀཱ་ལ་སོགས་པའི་ལྷ་མོ་བཞི་པོ་རྣམས་ཕྱོགས་བཞིར་འཁོད་ནས། འོད་གསལ་ལས་བཞེངས་པར་བསྐུལ་བ་ནི། ཐུགས་རྗེའི་ཁྲོ་བོ་རྗེ་བཙུན་ཉིད་བཞེངས་ཤིག །ས་གསུམ་མཐའ་དག་རྨོངས་པ་བསལ་མཛོད་ཅིག །ཇོ་བོ་བདུད་བཞི་པོ་འདི་ལས་རྒྱལ་བ། །སེམས་ནི་གཡེངས་སོ་རྗེ་བཙུན་ཉིད་བཞེངས་ཤིག །འདིར་སེམས་ནི་གཡེངས་སོ་ཞེས་པ་ཤོང་བློ་བརྟན་གྱིས། དགྱེས་པའི་ཐུགས་ཀྱིས་ཞེས་བསྒྱུར་བ་དོན་ལེགས་པ་འདྲའོ། །འཇིག་རྟེན་མགྲོན་གཉེར་སྟོང་ཉིད་བཞུགས་སམ་ཅི། །རྗེ་བཙུན་འཇིག་རྟེན་བསོད་ནམས་ཉིད་ཀྱིས་བཞེངས། །བྱང་ཆུབ་རང་བཞིན་འཇིག་རྟེན་མགྲོན་གཉེར་ནས། ཁྱོད་ནི་སྟོང་ཉིད་སེམས་ཤིང་ཅི་ལ་བཞུགས། །ཞེས་བསྐུལ་བས་བྱང་ཆུབ་ཀྱི་སེམས་ཀྱི་ཐིག་ལེའི་ཕུང་པོ་ཆ་གཉིས་སུ་གྱུར་པའི་ཆ་ཤས་གཅིག ཆ་གསུམ་དུ་གྱུར་ཆ་ཤས་དང་པོ། པཾ་ལས་སྣ་ཚོགས་པདྨ། ཡང་ཆ་ཤས་གཉིས་པ་ཨཾ་ལས་ཉི་མའི་དཀྱིལ་འཁོར། ཡང་ཆ་ཤས་གསུམ་པ་མཾ་ལས་མ་ཧེ་དམར་པོ་དྲེགས་ཤིང་ཁྲོས་པས་སྡང་བ་དང་གདུག་པ་ཐམས་ཅད་གསོད་ཅིང་དངངས་པར་བྱེད་པ། སྨིན་རྫི་དང་སྨ་ར་རབ་ཏུ་འབར་བ། མེ་ལྕེ་འབར་བའི་རྭ་བརྡར་ཞིང༌། རྨིག་པ་བརྡབས་པས་འཇིགས་པའང་འཇིགས་པར་བྱེད་པ། མི་རུས་ཀྱི་འཕྲེང་བས་བརྒྱན་པར་གྱུར། གདན་དེ་རྣམས་བརྩེགས་པའི་སྟེང་དུ། བྱང་ཆུབ་སེམས་ཀྱི་ཕུང་པོ་སྟེང་མ་ཆ་ཅི་ཤོས་དེ་ཧཱུཾ་ཡིག་དམར་པོར་གྱུར། དེ་ལས་དབྱུག་པ་དཀར་པོ་རྡོ་རྗེའི་རྩེ་མོ་ཅན་མི་མགོ་རློན་པ་སེར་པོས་མཚན་པ། དེའི་དབུས་སུ་གཟུགས་

― TNT06_Page_0739 ―

^{[མ་དཔེ་གཟིགས་ན་འདིར་གནོན།]}

[Full Size]

བརྙན་ཤར་བའི་ཚུལ་གྱིས་ཉི་མ་ལ་གནས་པའི་ཧཱུཾ་དམར་པོའོ། །དེ་ལས་འོད་ཟེར་སྣ་ཚོགས་པ་འཕྲོས། འཕགས་པ་རྣམས་མཆོད། སེམས་ཅན་ཐམས་ཅད་གཤིན་རྗེ་གཤེད་ཀྱི་གོ་འཕང་ལ་བཀོད། སླར་འདུས་ཏེ་ཐིམ་པ་ཡོངས་སུ་གྱུར་པ་ལས། རང་ཉིད་བཅོམ་ལྡན་འདས་གཤིན་རྗེ་གཤེད་དམར་པོ། དཔའ་བོ་ཆེན་པོ་ཉི་མ་བྱེ་བའི་འོད་དང་མཚུངས་པ། སྒེག་པ་ལ་སོགས་པ་གར་དགུའི་ཉམས་ཀྱི་རོ་དང་ལྡན་པ། བདུད་ཀྱི་དཀྱིལ་འཁོར་མ་ལུས་སྲེག་པར་བྱེད་པའི་ཡེ་ཤེས་ཀྱི་མེ་དཔུང་དྲག་ཏུ་འཕྲོ་ཞིང་འབར་བའི་དབུས་ན་བཞུགས་པ། ཞལ་གཅིག་ཕྱག་གཉིས། གཡས་འཇིག་རྟེན་གསུམ་འདུལ་བར་བྱེད་པའི་དབྱུག་པ་དཀར་པོ་རྡོ་རྗེའི་རྩེ་མོ་ཅན། མི་མགོ་རློན་པ་སེར་པོས་མཚན་པ་སྟེང་དུ་འཕྱར་བ། གཡོན་ཐོད་པ་དཀར་པོ་ཡེ་ཤེས་བདུད་རྩི་རྣམ་པ་ལྔས་གང་བ་ཐུགས་ཀའི་ཐད་ཀར་འཛིན་པའི་ཚུལ་གྱིས་ཡུམ་ལ་འཁྱུད་པ། དམར་ལ་ཟླུམ་པའི་སྤྱན་གསུམ་དྲག་པོའི་ལྟ་སྟངས་ཀྱིས་གཟིགས་ཤིང་མེ་འོད་འཕྲོ་བ། དྲག་ཏུ་འབར་བའི་མཆེ་བ་གཙིགས་ཤིང་ལྗགས་སྐྱོད་པ། བཞིན་ཤིན་ཏུ་འགྱུར་བའི་ཁྲོ་གཉེར་འཇིགས་སུ་རུང་ཞིང༌། མགྲིན་པ་ཧཱུཾ་གི་སྒྲས་གང་བ། སྨ་ར་སྨིན་མ་དབུ་སྐྲ་ཁམས་སེར་གྱེན་དུ་བརྫེས་པ། ཞབས་གཡས་བསྐུམ་གཡོན་བརྐྱང་པའི་གྱད་ཆེན་པོའི་འདོར་སྟབས་ཀྱིས་པདྨ་ཉི་མ་མ་ཧེ་གདོང་གཡས་སུ་བསྟན་པ་རྣམས་བརྩེགས་པའི་གདན་ལ། གཤིན་རྗེ་ནག་པོ་དབྱུག་པ་དང་ཞགས་པ་ཐོགས་པ་ཁ་བུབ་ཏུ་བསྒྱེལ་ཞིང་བརྗིས་པས་དེ་བརྒྱལ་ཞིང་མྱོས་པ། སྐུ་སྤོམ་ཞིང་ཐུང་བ། གསུས་ཁྱིམ་ཆེ་བ། བདུད་བཞི་བསྒྲལ་

― TNT06_Page_0740 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་ཁྲག་གི་ཚོགས་ལ་རོལ་བ། སྟག་གི་ལྤགས་པའི་སྨད་དཀྲིས་ཅུང་ཟད་གྲོལ་ཞིང༌། མི་མགོ་སྐམ་པོ་ལྔའི་དབུ་རྒྱན་དང༌། རློན་པ་ཁྲག་འཛག་པ་ལྔ་བཅུའི་དོ་ཤལ་ཅན། ཀླུའི་རྒྱལ་པོ་མཐའ་ཡས་སྔོན་པོས་དབུ་སྐྲ་བཅིངས་ཤིང༌། འཇོག་པོ་དམར་པོས་རྣ་རྒྱན་བྱས་པ། རིགས་ལྡན་ཁྲ་བོས་དཔུང་པ་བརྒྱན་ཅིང༌། དུང་སྐྱོང་སེར་པོས་ཕྱག་གདུབ་བྱས་པ། པདྨ་དཀར་པོས་མགུལ་བ་བརྒྱན་ཅིང༌། སྟོབས་ཀྱི་རྒྱུ་ལྗང་ཁུས་མཆོད་ཕྱིར་ཐོགས་བྱས་པ། ནོར་རྒྱས་ཀྱི་བུ་བདུད་རྩིའི་ཁ་དོག་ལྟ་བུས་སྐེ་རགས་བཅིངས་པ། པདྨ་ཆེན་པོ་དཀར་པོས་ཞབས་གདུབ་བྱས་པ། ཐམས་ཅད་ཀྱང་གདུག་པའི་སྦྲུལ་ནོར་བུའི་གདེངས་ཀ་དང༌། ལྕེ་གཉིས་འབར་བའི་འཕྲེང་བ་ཅན་ནོ། །དེ་ལ་འཁྱུད་པའི་བཅོམ་ལྡན་འདས་མ་ཡང་སྐུ་མདོག་དང༌། ཕྱག་མཚན་དང༌། རྒྱན་རྣམས་བཅོམ་ལྡན་འདས་དང་མཚུངས་པ་ལས། གཅེར་བུ་མི་མགོ་སྐམ་པོའི་དོ་ཤལ་ཅན། ཚངས་སྐུད་སྤངས་པ། ཕྱག་གཉིས་ཡབ་ཀྱི་མགུལ་ནས་འཁྱུད་ཅིང༌། ཞབས་གཡས་བརྐྱང་གི་སྟབས་ཀྱིས་མཉམ་པར་སྦྱོར་བ། ཁྲོ་མོའི་དབང་ཕྱུག་མཆོག་གི་ཆ་བྱད་རྫོགས་པའོ། །གཙོ་བོའི་ཐུགས་ཀར་ཧཱུཾ་ལས་བྱུང་བའི་དབྱུག་པ་དཀར་པོ་རྡོ་རྗེའི་རྩེ་མོ་ཅན། མི་མགོ་རློན་པ་སེར་པོས་མཚན་པ་ནི་ཡེ་ཤེས་སེམས་དཔའ། དེའི་ནང་གི་དབུས་སུ་ཧཱུཾ་ཡིག་དམར་པོ་མར་མེ་ལྟར་རབ་ཏུ་འབར་བ་ཉི་མ་ལ་གནས་པ་ནི་ཏིང་ངེ་འཛིན་སེམས་དཔའ་འོ། །གཞུང་ལས་སེམས་དཔའ་གསུམ་བརྩེག་གི་རྗེས་སུ་ཡུམ་བསྐྱེད་པ་འདྲ་རུང་ཅིག་ཡོད་པ་ནི་བཤད་པའི་གོ་རིམ་ཡིན་ཞིང༌། དོན་དུ་གཙོ་བོ་ཡབ་ཡུམ་དང་ཐུགས་ཀའི་སེམས་དཔའ་གཉིས་རྣམས་དུས་གཅིག་ཏུ་བསྐྱེད་པ་

― TNT06_Page_0741 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་པས། ཆོ་ག་སྔ་ཕྱིའི་རིམ་པ་མ་ཡིན་པའི་ཕྱིར། དམིགས་པས་དེ་ལྟར་བསྒོམ་དགོས་པར་གོ་ན། ངག་གི་བརྗོད་ཚུལ་སྔ་ཕྱི་ལ་ཁྱད་མེད་དོ། །ཡབ་ཀྱི་གསང་གནས་ཧཱུཾ་ལས་བྱུང་བའི་རྡོ་རྗེ། ཨོཾ་ལས་བྱུང་བའི་ནོར་བུ་བུ་གར་ཕཊ་ཀྱིས་བཀག་པ། ཡུམ་གྱི་པདྨ་ཨཾ་ཡིག་ལས་བྱུང་བའི་མཚོ་སྐྱེས། ཧྲཱིཿལས་བྱུང་བའི་ཟེ་འབྲུ་བུ་གར་ཕཊ་ཀྱིས་མཚན་པ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཏྨ་ཀོ྅ཧཾ། རྗེས་ཆགས་ཀྱི་སྤྱོད་པ་སྔོན་དུ་འགྲོ་བས། སྙོམས་པར་ཞུགས་པ་ལས་དགའ་བ་བཞིའི་རིམ་པས་ལྷན་ཅིག་སྐྱེས་པ་མངོན་དུ་བྱས་པར་གྱུར། ཡུམ་གྱི་ལྟེ་བའི་འོག་ཏུ་པདྨ་དམར་པོའི་ལྟེ་བར། ཧྲཱིཿཡིག་དམར་པོ། རང་གི་སྤྱི་བོའི་བདུད་རྩི་ལས་འཐོན་པའི་རེ་ཁ་དཀར་པོ་པདྨའི་སྣལ་མ་ལྟ་བུ། ཧྲཱིཿཡིག་གི་རྩེ་མོར་འབབ་བཞིན་པར་གྱུར། འདི་ལ་ཤེས་རབ་འཕེལ་བའི་ཆོ་ག་ཞེས་བྱའོ། །དེ་ནས་བྱང་ཆུབ་མཆོག་གི་ང་རྒྱལ་དང་བཅས་པས། ཨོཾ་དྷརྨཱ་དྷ་ཏུ་སྭ་བྷཱ་ཝ་ཨཏྨ་ཀོ྅ཧཾ། ཞེས་བརྗོད་ཏེ། དེ་ལྟར་རྗེས་ཆགས་ཀྱི་རྒྱུ་བདེ་བ་བསྒོམ་པ་དང༌། བར་སྲིད་ཞུགས་པས་ཞུ་བ་དང༌། གླུས་བསྐུལ་བ་དང༌། སེམས་དཔའ་གསུམ་བརྩེག་ཏུ་བཞེངས་པ་དང༌། རྗེས་ཆགས་དང༌། ཤེས་རབ་སྐྱེད་པ་དང༌། བྱང་ཆུབ་མཆོག་གི་ང་རྒྱལ་བཟུང་བ་སྟེ། དོན་ཚན་བདུན་པོ་དེ་ནི་རྗེས་སུ་རྣལ་འབྱོར་རོ། །རང་གི་ཐུགས་ཀའི་ས་བོན་ལས་འོད་འཕྲོས། སངས་རྒྱས་སྲས་དང་བཙུན་མོར་བཅས་པ་ཐམས་ཅད་སྤྱན་དྲངས། རང་གི་ཞལ་དུ་ཞུགས། ཐུགས་ཀར་བྱང་ཆུབ་ཀྱི་སེམས་སུ་ཞུ། རྡོ་རྗེའི་ལམ་ནས་ཡུམ་གྱི་པདྨ་སྤྲོས་ཏེ། བྱང་ཆུབ་ཀྱི་སེམས་ཀྱི་ཆ་གཅིག་གཞལ་ཡས་ཁང་མཚན་

― TNT06_Page_0742 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་ཐམས་ཅད་ཡོངས་སུ་རྫོགས་པའི་ལྷའི་གདན་དང་བཅས་པར་གྱུར། ཆ་གཅིག་ཆ་བཅུ་བདུན་དུ་གྱུར་པ། དེ་རྣམས་ཡ་ཀྵེ་མ་མེ་ད། ཡཙྪ་ནི་རཱ་ཛ་ས་དོ་རུ། ཎ་ཡོ་ནི་རཱ་རྣམས་སུ་གྱུར། དབུས་ཀྱི་གདན་གྱི་སྟེང་དུ་ཡ་ལས་བཅོམ་ལྡན་འདས་ཞེ་སྡང་གཤིན་རྗེ་གཤེད་དམར་པོ། དཔའ་བོ་ཆེན་པོ་ནས། ཁྲོ་མོའི་དབང་ཕྱུག་མཆོག་གི་ཆ་བྱད་རྫོགས་པའོ། །སྙིང་པོའི་ཤར་དུ་ཀྵེ་ལས་འཁོར་ལོ་ཀྵེས་མཚན་པ་ལས་གཏི་མུག་གཤིན་རྗེ་གཤེད་སྐུ་མདོག་དཀར་པོ། ཕྱག་གཡས་ན་འཁོར་ལོ་བསྣམས་པ། ལྷོར་མ་ལས་རིན་པོ་ཆེ་མས་མཚན་པ་ལས། ཕྲ་མ་གཤིན་རྗེ་གཤེད་སེར་པོ་གཡས་རིན་པོ་ཆེ་འཛིན་པ། ནུབ་ཏུ་མེ་ལས་པདྨ་མེས་མཚན་པ་ལས། འདོད་ཆགས་གཤིན་རྗེ་གཤེད་དམར་པོ་གཡས་ན་པདྨ་འཛིན་པ། བྱང་དུ་ད་ལས་རལ་གྲི་དས་མཚན་པ་ལས། ཕྲག་དོག་གཤིན་རྗེ་གཤེད་ལྗང་ཁུ། གཡས་རལ་གྲི་བསྣམས་པ། ཤར་སྒོར་ཡ་ལས་ཐོ་བ་ཡས་མཚན་པ་ལས། ཐོ་བ་གཤིན་རྗེ་གཤེད་མཐིང་ཁ། །ཕྱག་གཡས་རྡོ་རྗེ་ཐོ་བ་རྭ་ཉི་ཤུ་པ་བསྣམས་པ། ལྷོ་སྒོར་ཙྪ་ལས་དབྱུག་པ་ཙྪས་མཚན་པ་ལས། དབྱུག་པ་གཤིན་རྗེ་གཤེད་དཀར་པོ། ཕྱག་གཡས་ཐོད་དབྱུག་འཛིན་པ། ནུབ་སྒོར་ནི་ལས་པདྨ་ནི་ས་མཚན་པ་ལས། པདྨ་གཤིན་རྗེ་གཤེད་དམར་པོ། ཕྱག་གཡས་པདྨ་འཛིན་པ། བྱང་སྒོར་རཱ་ལས་རལ་གྲི་རཱས་མཚན་པ་ལས། རལ་གྲི་གཤིན་རྗེ་གཤེད་ལྗང་སྔོན། ཕྱག་གཡས་རལ་གྲི་འཛིན་པ། དེ་ལྟར་ཁྲོ་བོ་བརྒྱད་པོ་རྣམས་རང་སྣང་གི་ཤེས་རབ་མ་ལ་འཁྱུད་པ། ལྷག་མ་གཙོ་བོ་དང་རྣམ་པ་མཚུངས་པའོ། །སྣ་ཚོགས་རྡོ་རྗེའི་གྲྭ་བཞིར་ཤར་

― TNT06_Page_0743 ―

^{[མ་དཔེ་གཟིགས་ན་འདིར་གནོན།]}

[Full Size]

ལྷོར་ཛ་ལས་འཁོར་ལོ་ཛས་མཚན་པ་ལས། ཙརྩིཀཱ་དཀར་མོ་སྐེམ་ཞིང་ཁྲོས་པ། ཕྱག་གཡས་འཁོར་ལོ་འཛིན་པ། ལྷོ་ནུབ་ཏུ་ས་ལས་རྡོ་རྗེ་སས་མཚན་པ་ལས། ཕག་མོ་སྔོ་སངས་ཕྱག་གཡས་རྡོ་རྗེ་རྩེ་ལྔ་པ་འཛིན་པ། དྲག་མོ་ཆེན་མོ་ཕག་གི་གདོང་པ་ཅན། ནུབ་བྱང་དུ་དོ་ལས་པདྨ་དོས་མཚན་པ་ལས། དབྱངས་ཅན་མ་དམར་མོ་ཕྱག་གཡས་པདྨ་འཛིན་པ། ཞི་ཞིང་སྒེག་ལ་ཆགས་པའི་ཉམས་ཀྱིས་བརྒྱན་པའི་ཁྲོ་མོའོ། །བྱང་ཤར་དུ་རུ་ལས་རལ་གྲི་རུས་མཚན་པ་ལས། གཽ་རཱི་ལྗང་ཁུ་ཕྱག་གཡས་རལ་གྲི་འཛིན་པ། ཕག་མོ་དང་གཽ་རཱི་གཉིས་སྦོམ་ཞིང་ཐུང་ལ་ལྟོ་བ་རྒྱས་པ་སྟེ། གཏི་མུག་གཤིན་རྗེ་གཤེད་དང་ལྷ་མོ་བཞི་ཟླ་བའི་གདན། གཞན་རྣམས་ཉི་མའི་གདན་ལ་གཡོན་བརྐྱང་གི་སྟབས་ཀྱིས་གནས་ཤིང༌། ཐམས་ཅད་ཀྱང་ཕྱག་གཡོན་པས་ཐོད་པ་ཁྲག་གིས་གང་བ་བསྣམ་པ། ལྷ་མོ་རྣམས་ཀྱང་མཆོད་ཕྱིར་ཐོགས་སྤངས་ཤིང་ལྷག་མ་རྒྱན་དང་ན་བཟའ་སོགས་གཙོ་བོ་དང་མཚུངས་པའོ། །གཞལ་ཡས་ཁང་གི་གྲྭ་བཞིར། ཎ་ཡོ་ནི་ར། ཡི་གེ་བཞི་ཡོངས་སུ་གྱུར་པ་ལས། པདྨ་ལ་གནས་པའི་ཐོད་པ་བདུད་རྩིས་གང་བ་བཞིའོ། །དེ་ནས་དཀྱིལ་འཁོར་སྤྲོ་བ་ནི། ཨོཾ་ཧྲཱིཿཥྚཱིཿཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱཧཱ། མཁའ་ནང་གི་གཙོ་བོ་ཡབ་ཡུམ་དཔག་ཏུ་མེད་པ་སྤྲོས་ཕྱི་དབྱིབས་ཀྱི་བཅོམ་ལྡན་འདས་མ་གཙོ་བོ་དང་བཅས་པའི་བ་སྤུའི་བུ་ག་ནས་ཕྱིར་ཕྱུང༌། མཁའ་དབྱིངས་ཐམས་ཅད་ཡོངས་སུ་གང༌། སེམས་ཅན་ཐམས་ཅད་ཀྱི་དོན་མཛད། ཁྱད་པར་དུ་ཡང་ཉོན་མོངས་པ་ཞེ་སྡང་སྦྱངས། ཞེ་སྡང་གཤིན་རྗེ་གཤེད་ཀྱི་གོ་འཕང་ལ་བཀོད། ཚུར་འདུས་

― TNT06_Page_0744 ―

^{[མ་དཔེ་གཟིགས་ན་འདིར་གནོན།]}

[Full Size]

གཅིག་ཏུ་འདྲེས། དཀྱིལ་འཁོར་གྱི་གཙོ་བོ་རང་ཉིད་ཀྱི་ཐུགས་ཀར་ཐིམ། བདེ་སྟོང་གཉིས་སུ་མེད་པ་སྐུ་གསུམ་ཡེ་ཤེས་ལྔའི་བདག་ཉིད་དུ་གྱུར། ཨོཾ་ཛི་ན་ཛྲིཀ་སྭཱཧཱ། མཁའ་ནང་གི་གཏི་མུག་གཤིན་རྗེ་གཤེད་དཔག་ཏུ་མེད་པ་སྤྲོས། ཕྱི་དབྱིབས་ཀྱི་བཅོམ་ལྡན་འདས་མ་གཙོ་བོ་དང་བཅས་པའི་བ་སྤུའི་བུ་ག་ནས་ཕྱིར་བྱུང༌། མཁའ་དབྱིངས་ཐམས་ཅད་ཡོངས་སུ་གང༌། གཏི་མུག་གཤིན་རྗེ་གཤེད་ཀྱི་གོ་འཕང་ལ་བཀོད། ཚུར་འདུས་གཅིག་ཏུ་འདྲེས། སེམས་ཅན་ཐམས་ཅད་ཀྱི་དོན་མཛད། ཁྱད་པར་དུ་ཡང་ཉོན་མོངས་པ་གཏི་མུག་སྦྱངས། ཕྱིའི་གཞལ་ཡས་ཁང་ཆེན་པོའི་ནང་གི་སྣ་ཚོགས་རྡོ་རྗེའི་ཤར་གྱི་རྭའི་རྩ་བར་པད་ཟླའི་གདན་ལ་འཁོད་པར་གྱུར། ཨོཾ་རཏྣ་དྷྲྀྀཀ་སྭཱཧཱ། ཕྲ་མ་གཤིན་རྗེ་གཤེད༴ ཁྱད་པར་དུ་ང་རྒྱལ་དང་སེར་སྣ༴ ཕྲ་མ་གཤིན་རྗེ་གཤེད་ཀྱི༴ ནང་གི་སྣ་ཚོགས་རྡོ་རྗེའི་ལྷོའི་རྭའི་རྩ་བར་པད་ཉི༴ ཨོཾ་ཨ་རོ་ལིཀ་སྭཱཧཱ། འདོད་ཆགས་གཤིན་རྗེ་གཤེད༴ ཁྱད་པར་འདོད་ཆགས་ཀྱི་རྣམ་རྟོག༴ འདོད་ཆགས་གཤིན་རྗེ་གཤེད་ཀྱི༴ ནུབ་ཀྱི་རྭའི་རྩ་བར༴ ཨོཾ་པྲཛྙཱ་དྷྲྀྀཀ་སྭཱཧཱ། ཕྲག་དོག་གཤིན་རྗེ་གཤེད༴ ཁྱད་པར་ཕྲག་དོག་གི་ཉེས་པ༴ ཕྲག་དོག་གཤིན་རྗེ་གཤེད་ཀྱི༴ བྱང་གི༴ ཨོཾ་མུད་ག་ར་དྷྲྀཀ་སྭཱཧཱ། ཐོ་བ་གཤིན་རྗེ་གཤེད༴ ཕུང་པོའི་བདུད་བཅོམ། དད་པའི་སྟོབས་ལ་བཀོད། ཤར་སྒོར༴ ཨོཾ་དཎྜ་དྷྲྀཀ་སྭཱཧཱ། དབྱུག་པ་གཤིན་རྗེ་གཤེད༴ ཉོན་མོངས་པའི་བདུད་བཅོམ། བརྩོན་འགྲུས་ཀྱི་སྟོབས་ལ་བཀོད། ལྷོ་སྒོར༴ ཨོཾ་པདྨ་དྷྲྀཀ་སྭཱཧཱ། པདྨ་གཤིན་རྗེ་གཤེད༴ འཆི་བདག་གི་བདུད་བཅོམ། དྲན་པའི་སྟོབས་ལ་བཀོད། ནུབ་སྒོ༴ ཨོཾ་ཁདྒ་དྷྲྀཀ་སྭཱཧཱ། རལ་གྲི་གཤིན་རྗེ་

― TNT06_Page_0745 ―

^{[མ་དཔེ་གཟིགས་ན་འདིར་གནོན།]}

[Full Size]

གཤེད༴ ལྷ་ཡི་བུའི་བདུད་བཅོམ། ཏིང་ངེ་འཛིན་གྱི་སྟོབས་ལ་བཀོད། བྱང་སྒོར་པད་ཉི་ལ༴ ཨོཾ་མོ་ཧཱ་ར་ཏི་སྭཱཧཱ། ལྷ་མོ་ཙརྩི་ཀཱ༴ ཁྱད་པར་སའི་ཁམས་སྦྱངས། བྱམས་པ་ཆེན་པོ་ལ་བཀོད། སྣ་ཚོགས་རྡོ་རྗེའི་ཤར་ལྷོའི་གྲྭར་པད་ཟླ་ལ་འཁོད། ཨོཾ་དྭེ་ཥ་ར་ཏི་སྭཱཧཱ། ལྷ་མོ་རྡོ་རྗེ་ཕག་མོ༴ ཆུའི་ཁམས༴ སྙིང་རྗེ་ཆེན་པོ༴ སྣ་ཚོགས་རྡོ་རྗེའི་ལྷོ་ནུབ་ཀྱི་གྲྭར་པད་ཟླ་ལ༴ ཨོཾ་རཱ་ག་ར་ཏི་སྭཱཧཱ། ལྷ་མོ་རྡོ་རྗེ་དབྱངས་ཅན་མ༴ མེའི་ཁམས༴ དགའ་བ་ཆེན་པོ༴ ནུབ་བྱང་གི་གྲྭར་པད་ཟླ་ལ། ཨོཾ་བཛྲ་ར་ཏི་སྭཱཧཱ། ལྷ་མོ་རྡོ་རྗེ་གཽ་རཱི༴ རླུང་གི་ཁམས༴ བཏང་སྙོམས་ཆེན་པོ༴ བྱང་ཤར་གྱི་གྲྭར་པད་ཟླ་ལ༴ ཨོཾ་ཨཱཿཧཱུཾ། ལན་བཞི། ཐོད་པ་བཞི་གདན་དང་བཅས་པ༴ ཁྱད་པར་ཡུལ་དྲུག་གི་དྲི་མ་སྦྱངས། མངོན་པར་ཤེས་པ་དྲུག་ལ་བཀོད། ཕྱིའི་གྲྭ་བཞི་ལས་པདྨའི་གདན་ལ་འཁོད་པར་གྱུར། ཨོཾ་ཨཱཿཧཱུཾ། གཞལ་ཡང་ཁང་༴ ཁྱད་པར་སྣོད་ཀྱི་འཇིག་རྟེན་སྦྱངས། དག་པའི་ཞིང་ཁམས་ལ་བཀོད། ཕྱིའི་དཀྱིལ་འཁོར་ཆེན་པོའི་གཞལ་ཡས་ཁང་ལ་ཐིམ། ཞེས་སོ། །མངལ་དུ་གཞལ་ཡས་ཁང་བསྐྱེད་པ་སྤྲོ་བ་འདི་ཆག་ལོས་མ་མཛད། འདིའི་སྒྲུབ་ཐབས་མཛད་པ་པོ་བོད་ཕལ་ཆེར་གྱིས་མཛད་ཅིང༌། དེ་ཡང་རྒྱུད་གཞུང་གཞན་རྣམས་དང་མཐུན་པས་སྤྱིར་བཏང་དུ་ལེགས་པར་མངོན་པ་ལྟར་འདིར་ཡང་བཀོད་དོ། །འོན་ཀྱང་དམར་ནག་གི་སྒྲུབ་ཐབས་དཔལ་འཛིན་གྱིས་མཛད་པ་ན། མཁའ་ནང་དུ་གཞལ་ཡང་ཁང་མི་བསྐྱེད་པ་ཉིད་དེ། གཞུང་བསྡུས་པའི་ཕྱོགས་ལ་དེ་ཡང་ཤིན་དུ་འཐད་ཅིང་རིགས་པ་ནི་དགྱེས་རྡོར་བཞིན་ཏེ། དེ་ལྟ་བས་ན་ཇི་ལྟར་མོས་པ་དེ་ལྟར་བྱའོ། །དེ་ལྟར་སངས་རྒྱས་རྣམས་སྐུ་ལ་གཞུག་པ་དང༌།

― TNT06_Page_0746 ―

^{[མ་དཔེ་གཟིགས་ན་འདིར་གནོན།]}

[Full Size]

མཁའ་ནང་དུ་དཀྱིལ་འཁོར་བསྐྱེད་པ་དང༌། སྤྲོ་བསྡུའི་སྒོ་ནས་ཕྱི་རོལ་ཏུ་འགོད་པ་སྟེ། དེ་དག་ནི་དཀྱིལ་འཁོར་གྱི་ལྷ་ཚོགས་སྤྲོ་བ་ཤིན་ཏུ་རྣལ་འབྱོར་རོ། །ལྷ་ཐམས་ཅད་ཀྱི་མིག་ཏུ་ཀྵིཾ་ལས་འཁོར་ལོ་ཀྵིཾ་གིས་མཚན་པ་ལས། རྡོ་རྗེ་མིག་གཏི་མུག་གཤིན་རྗེ་གཤེད་ལྟ་བུ། རྣ་བར་ཛྲིཾ་ལས་རྡོ་རྗེ་ཛྲིཾ་གིས་མཚན་པ་ལས། རྡོ་རྗེ་རྣ་བ་ནག་པོ་རྡོ་རྗེ་དང་ཐོད་ཁྲག་འཛིན་པ། སྣར་ཁཾ་ལས་རིན་པོ་ཆེ་ཁཾ་གིས་མཚན་པ་ལས། རྡོ་རྗེ་སྣ་ཕྲ་མ་གཤིན་རྗེ་གཤེད་ལྟ་བུ། ལྕེ་ལ་གཾ་ལས་པདྨ་གཾ་གིས་མཚན་པ་ལས། རྡོ་རྗེ་ལྕེ་འདོད་ཆགས་གཤིན་རྗེ་གཤེད་ལྟ་བུ། དཔྲལ་བར་སྐཾ་ལས་རལ་གྲི་སྐཾ་གིས་མཚན་པ་ལས། རྡོ་རྗེ་ལུས་ཕྲག་དོག་གཤིན་རྗེ་གཤེད་ལྟ་བུ། ལྟེ་བར་སཾ་ལས་རྡོ་རྗེ་སཾ་གིས་མཚན་པ་ལས། རྡོ་རྗེ་ཡིད་དཀར་པོ་རྡོ་རྗེ་དང་ཐོད་ཁྲག་འཛིན་པ། ཐམས་ཅད་ཀྱང་པད་ཟླ་ལ་གནས་ཤིང་རོལ་བའི་ཁྲོ་བོའི་ཚུལ་ཅན་ནོ། །ཐུགས་ཀར་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས། ཐུགས་རྡོ་རྗེ་ནག་པོ་རྡོ་རྗེ་དང་ཐོད་ཁྲག་འཛིན་པའི་ཐུགས་ཀར་ཧཱུཾ་སྔོན་པོ། འདིར་ཆག་ལོ་ཆོས་རྒྱལ་ཤོང་གསུམ་གྱི་བཞེད་པ་དང་མཐུན་པར། ཐུགས་རྡོ་རྗེ་ཕྱག་མཚན་འདི་ལྟར་འཐད་ལ། སྒྲུབ་ཐབས་རྣལ་འབྱོར་བཞི་གསལ་སོགས་ལས། སྐུ་མདོག་སྔོན་པོ་ཕྱག་མཚན་གཙོ་བོ་དང་འདྲ་བར་བཞེད་པ། གཞུང་གི་ནག་འདེད་མཛད་པ་ཡིན་ཡང་ཅུང་ཟད་མི་ལེགས་སོ། །འོ་ན་དམར་པོའི་གཞུང་ལས། སྙིང་གར་རྡོ་རྗེའི་དཀྱིལ་གནས་ཧཱུཾ། །རྡོ་རྗེ་ཧཱུཾ་ལས་ཐུགས་རྡོ་རྗེ། །དུས་དགྲའི་སྐུ་མདོག་ཕྱག་མཚན་ལྡན། །འོད་ཟེར་སྔོན་པོ་འབར་བའོ། །ཞེས་བཤད་པ་མ་ཡིན་ནམ་སྙམ་ན། ད་ལྟའི་གཞུང་ལ་དེ་ལྟར་ཡོད་མོད། འདི་ནི་དཔལ་འཛིན་གྱིས་གཤེད་ནག་གི་སྒྲུབ་ཐབས་དང་པོར་

― TNT06_Page_0747 ―

^{[མ་དཔེ་གཟིགས་ན་འདིར་གནོན།]}

[Full Size]

མཛད་ནས། དེ་ལ་འདཽན་པ་སྤོས་ནས་གཤེད་དམར་གྱི་སྒྲུབ་ཐབས་མཛད་པས། འདིའི་ཐད་ཀྱི་འདོན་པ་བསྒྱུར་དགོས་རྒྱུ་དེ། མ་བསྒྱུར་བར་ལུས་པའོ། །དེ་ཡང་ནག་པོའི་གཞུང་འགྱུར་རྙིང་ལས། སྙིང་གར་ཧཱུཾ་ལས་རྡོ་རྗེའི་ནང༌། །ཧཱུཾ་དང་རྡོ་རྗེ་འོད་སྔོན་བྱུང༌། །ཐུགས་རྡོར་ཞེ་སྡང་གཤིན་གཤེད་ཀྱི། །མདོག་དང་མཚོན་ཆ་ཡང་དག་ལྡན། །ཞེས་འབྱུང་བ་དང༌། དམར་མོའི་གཞུང་ཆག་འགྱུར་སྔར་དྲངས་པ་གཉིས། ཚིག་འགྱུར་ཁྱད་མ་གཏོགས་དོན་ཅུང་ཟད་ཀྱང་ཁྱད་མ་བྱུང་ཞིང༌། ནག་པོའི་སྒྲུབ་ཐབས་ལ་ཞེ་སྡང་གཤིན་རྗེ་གཤེད། མཐིང་ག་ཡིན་པའི་ཕྱིར་དང༌། ཐུན་མོང་མ་ཡིན་པའི་ཕྱག་མཚན་རྡོ་རྗེ་ཕྱག་ན་ཡོད་པའི་ཕྱིར། ཐུགས་རྡོ་རྗེའི་མཚན་ཉིད་ཚང་བ་དེར་འདུག །འདིར་དེ་འདྲ་བྱས་ན་ཞེ་སྡང་གཤིན་རྗེ་གཤེད་དམར་པོ་ཡིན་པས། དུས་དགྲའི་སྐུ་མདོག་ཅེས་པ་དང༌། འོད་ཟེར་སྔོན་པོ་ཞེས་པ་ཡང་ནང་འགལ་བར་འགྱུར་ལ། ཕྱག་མཚན་དབྱུག་པ་བསྣམས་པར་བྱས་ནས། ཕྱི་མ་གཉིས་ཀྱི་ཕྱག་མཚན་ལས་དཔགས་ཏེ་ཟླ་སྟོབས་ཀྱི་ཤུགས་ལས་ཐོད་པ་དང་མི་འགྲིག་པའི་ཕྱིར་རོ། །ཡང་དམར་པོའི་ལུགས་ཀྱི་ཐུགས་རྡོ་རྗེའི་རིགས་ལ། དབྱུག་པའི་མཚན་མ་འབྱུང་བ་སྒོས་ཀྱི་ཁྱད་ཆོས་ཡིན་ནོ་སྙམ་ན་ནི་མིན་ཏེ། དེ་ཡིན་ན་རྡོ་རྗེའི་རྣ་བ་དང་ཡིད་ཀྱང་དབྱུག་པ་འཛིན་དགོས་པར་འགྱུར་རོ། །དེས་ན་རྡོ་རྗེ་གསུམ་གྱི་སྐུ་མདོག་ཕྱག་མཚན་སྤྱི་ལ་གྲགས་པ་ཉིད་ཡིན་པའི་ཕྱིར་ཐུགས་རྡོ་རྗེ་ནི་རྡོ་རྗེ་ཐོད་ཁྲག་འཛིན་པར་བྱའོ། །མགྲིན་པར་ཨཱཿལས་པདྨ་ཨཱཿས་མཚན་པ་ལས། གསུང་རྡོ་རྗེ་འདོད་ཆགས་གཤིན་རྗེ་གཤེད་ལྟ་བུའི་ཐུགས་ཀར་ཨཱཿདམར་པོ། སྤྱི་བོར་ཨོཾ་ལས་འཁོར་ལོ་ཨོཾ་གྱིས་མཚན་པ་ལས། སྐུ་རྡོ་རྗེ་གཏི་མུག་གཤིན་རྗེ་གཤེད་ལྟ་བུའི་ཐུགས་ཀར་ཨོཾ་དཀར་པོ། དེ་རྣམས་ཀྱི་ཐུགས་ཀ་ནས་འོད་ཟེར་འཕྲོས། གདོད་ནས་གྲུབ་

― TNT06_Page_0748 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་སྐུ་གསུང་ཐུགས་རྡོ་རྗེའི་ལྷ་ཚོགས་རྒྱལ་བ་ཀུན་འདུས་པའི་བདག་ཉིད་ཐམས་ཅད་སྤྱན་དྲངས་ཏེ་མདུན་དུ་བཞུགས་པར་གྱུར། ཨོཾ་བཛྲ་པུཥྤེ་ཨཱཿཧཱུཾ། ནས། ནཻ་ཝེ་ཏྱའི་བར་གྱིས་མཆོད། ཐུགས་གསུང་སྐུ་རྡོ་རྗེའི་ལྷ་ཚོགས་ཐམས་ཅད་རང་གི་གནས་གསུམ་གྱི་རྡོ་རྗེ་གསུམ་ལ་ཐིམ། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཝཱཀ་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཏྨ་ཀོ྅ཧཾ། རང་གི་སྙིང་གའི་ས་བོན་ལས་འོད་ཟེར་འཕྲོས། དབང་གི་ལྷ་དེ་བཞིན་གཤེགས་པ་ཡབ་ཡུམ། སེམས་དཔའ་སེམས་མ་ཁྲོ་བོ་ཡབ་ཡུམ་གྱི་ཚོགས་དང་བཅས་པ། མདུན་གྱི་ནམ་མཁར་བཛྲ་ས་མཱ་ཛཿ ཨརྒྷཾ་དང་པུཥྤེ་སོགས་ཉེར་སྤྱོད་ལྔས་མཆོད། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ། སློབ་དཔོན་རྡོ་རྗེ་འཆང་ཆེན་པོར་གྱུར་པ་དང༌། དེ་བཞིན་གཤེགས་པ་རྣམས་ཀྱིས་ཚིགས་བཅད་དང་དབང་བསྐུར་བའི་དགོངས་པ་མཛད། སེམས་དཔའ་ཡབ་ཡུམ་རྣམས་ཀྱིས་བཀྲ་ཤིས་ཀྱི་གླུ་དབྱངས་ལེན་ཅིང༌། སྣ་ཚོགས་པའི་རོལ་མོ་སོགས་མཆོད་པ་ཐམས་ཅད་ཀྱིས་མཆོད། ཁྲོ་བོ་ཡབ་ཡུམ་རྣམས་ཀྱིས་བགེགས་བསྐྲད། ཙར་ཙི་ཀཱ་ལ་སོགས་པ་ཡུམ་བཞི་པོ་རྣམས་ཀྱིས། བུམ་པ་དཀར་པོ་བདུད་རྩིས་གང་བ་ཐོགས་ཏེ། དབང་བསྐུར་རྡོ་རྗེ་ཆེན་པོ་ནི། ཁམས་གསུམ་པ་ཡིས་ཕྱག་བྱས་པ། །སངས་རྒྱས་རྣམས་ནི་ཐམས་ཅད་ཀྱི། །གསང་གསུམ་གནས་བྱུང་སྦྱིན་པར་བྱ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུཾ། དེ་ལྟར་དབང་བསྐུར་བས་ལྷ་ཐམས་ཅད་ཀྱི་སྐུ་ལུས་བདུད་རྩིའི་ཆུ་རྒྱུན་གྱིས་གང༌། སྒྲིབ་གཉིས་སྦྱངས། ཡེ་ཤེས་ལྔ་མངོན་

― TNT06_Page_0749 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་གྱུར། ཆུའི་ལྷག་མ་གྱེན་དུ་འཁྱིལ་བ་ལས། གཙོ་བོ་ལ་རྡོ་རྗེ་སེམས་དཔའ་དང༌། འཁོར་རྣམས་ལ་གཙོ་བོ་ཉིད་ཀྱིས་དབུ་བརྒྱན། ཡང་གཙོ་བོའི་ཐུགས་ཀའི་ས་བོན་ལས་འོད་ཟེར་འཕྲོས། རང་བཞིན་གྱི་གནས་ནས་གཤིན་རྗེ་གཤེད་དམར་པོའི་དཀྱིལ་འཁོར་གྱི་འཁོར་ལོ་ཡེ་ཤེས་པ་བཛྲ་ས་མ་ཛཿ ཨོཾ་ཨཱཿབིགྷྣཱན་ཏ་ཀྲི་ཏ་ཧཱུཾ་ཧཱུཾ། ཞེས་བགེགས་བསྐྲད། ཨོཾ་ཨཱཿཧྲཱིཿཔྲ་ཝ་ར་སཏ་ཀ་རརྠཾ། ཨརྒྷཾ་པྲ་ཏཱིཙྪ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ནས་ཤཔྟའི་བར་གྱིས་མཆོད། ཨོཾ་མུད་ག་ར་ཛཿ ཨོཾ་དཎྜ་ཧཱུཾ། ཨོཾ་པདྨ་བཾ། ཨོཾ་ཁཏྒ་ཧོཿ དམ་ཚིག་སེམས་དཔའི་དཀྱིལ་འཁོར་དང་ཡེ་ཤེས་སེམས་དཔའི་དཀྱིལ་འཁོར་གཉིས་སུ་མེད་པར་གྱུར། ཡང་རང་གི་སྙིང་ག་ནས་འོད་ཟེར་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས། འདོད་ཡོན་དང་བཅས་པ་བཀུག་སྟེ་རང་གི་སྐུ་ལ་ཞུགས། ཐུགས་ཀར་རྗེས་ཆགས་ཀྱི་མེས་བྱང་ཆུབ་ཀྱི་སེམས་སུ་ཞུ། རྡོ་རྗེའི་ལམ་ནས་འཐོན། ཡུམ་གྱི་པདྨའི་ཟེ་འབྲུར་སོན་པ། མཆོད་པའི་ལྷ་མོ་སྣ་ཚོགས་པར་གྱུར་ཏེ། མཆོད་རྫས་སྣ་ཚོགས་པ་ཐོགས་པ་མཁའ་ནང་ནས་ཕྱིར་སྤྲོས་ཏེ། དཀྱིལ་འཁོར་གྱི་ལྷ་ཚོགས་ཐམས་ཅད་མཆོད་པར་གྱུར། ཨོཾ་ཨཱཿརཱུ་པ་བཛྲ་ཧཱུཾ། དེ་བཞིན་དུ་ཤཔྟ། གནྡྷེ། ར་ས། སྤར་ཤེ། ཨོཾ་ཨཱཿདྷརྨ་དྷཱ་ཏུ་བཛྲཱ་ཧཱུཾ། ཨ་ཡོ། ཀྱེ་ཀྱེ་གཤིན་རྗེ་གཤེད་དམར་པོ། །བླ་མ་སྲིན་པོའི་གཟུགས་རང་བཞིན། ཁྱོད་མཐོང་ཁོ་བོ་རྣམ་པར་འཇིགས། །བླ་མ་ཁྲོ་བོའི་རང་བཞིན་སྤོངས། ཁྱོད་ཀྱིས་གར་མཛད་ས་སྟེང་དང༌། །ས་བླ་དང་ནི་ས་འོག་གཡོ། །ཆགས་པས་བརྒྱན་པ་ཁྲོ་བོའི་ཡིད། །གར་མཛད་ཁྱོད་

― TNT06_Page_0750 ―

^{[མ་དཔེ་གཟིགས་ན་འདིར་གནོན།]}

[Full Size]

ནི་རོ་ལངས་ལགས། །སྐུ་ལུས་སྦོམ་ཐུང་དམར་བ་སྟེ། །རྣམ་པ་སྣ་ཚོགས་གཟུགས་སྤྲུལ་པ། །རྡོ་རྗེ་དབྱངས་ཅན་མ་ཡིས་བཏུད། །གར་མཛད་ཁྱོད་ནི་བདེ་བ་ཆེ། །ཧྲཱིཿཥྚཱིཿའི་གསང་སྔགས་དག་གིས་ཁྱོད། །ས་གསུམ་པོ་ཡི་འཁྲུལ་པ་སེལ། །ཐུགས་རྗེའི་ཁྲོ་བོ་རྗེ་བཙུན་ཁྱོད། །གར་མཛད་འགྲོ་བ་ཡོངས་ལ་གཟིགས། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཏྨ་ཀོ྅ཧཾ། དེ་ནས་གཙོ་བོས་ཀྱང་འཁོར་རྣམས་ལ། གཏི་མུག་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ཤིན་དུ་འཇིགས། །སྟོན་པ་སངས་རྒྱས་ཀུན་རང་བཞིན། །སྐུ་ཡི་རྡོ་རྗེ་ཁྱོད་ཕྱག་འཚལ། །སེར་སྣ་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ཤིན་ཏུ་འཇིགས། །སེམས་ཀྱི་རྡོ་རྗེ་རབ་ཏུ་གསལ། །རིན་ཆེན་རྡོ་རྗེ་ཁྱོད་ཕྱག་འཚལ། །འདོད་ཆགས་རྡོ་རྗེའི་རང་བཞིན་ཁྱོད། ཁྱབ་བདག་ཆགས་པས་ཆོས་འབྱུང་གནས། །དབྱངས་མཆོག་ཀུན་གྱི་མཆོག་གི་མཆོག །གསུང་གི་རྡོ་རྗེ་ཁྱོད་ཕྱག་འཚལ། །ཕྲག་དོག་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ལས་ཀུན་བྱེད། །སྐུ་ཡི་རྡོ་རྗེ་རབ་གསལ་བ། །ཕྱག་ན་རལ་གྲི་ཁྱོད་ཕྱག་འཚལ། །ཡང་འཁོར་རྣམས་ཀྱིས་གཙོ་བོ་ལ། སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་རབ་མཆོག་གི་མཆོག །དཀྱིལ་འཁོར་དབང་ཕྱུག་ཁྱོད་ཕྱག་འཚལ། །ཞེས་བསྟོད་པར་བསམ་མོ། །འདིར་མཆོད་བསྟོད་གཉིས་ཡན་ལག་སོ་སོར་མི་བགྲོང་བར། མཆོད་པའི་རྣལ་འབྱོར་ཞེས་གཅིག་ཏུ་སྡོམ་པ་ཉིད་གཞུང་གི་དགོངས་པར་འདུག་པས། བསྟོད་པའི་ང་རྒྱལ་ལོགས་སུ་བཟུང་བ་གཞུང་ན་མེད་ལ། ཆག་ལོ་སོགས་ཀྱིས་མཛད་པ་ལྟར་ན། གཞུང་གཞན་དང་མཐུན་པས་མི་

― TNT06_Page_0751 ―

^{[མ་དཔེ་གཟིགས་ན་འདིར་གནོན།]}

[Full Size]

ལེགས་པའང་མ་ཡིན་པ། ཇི་ལྟར་མོས་པར་བྱའོ། །ནང་མཆོད་ལ། ཨོཾ་ཨཱཿབིགྷྣཱན་ཏ་ཀྲི་ཏ་ཧཱུཾ་ཧཱུཾ་གིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་འབར་བས་མཚན་པ། དེའི་སྟེང་དུ་ཨོཾ་ཨཱཿཧཱུཾ་ལས་མི་མགོའི་སྒྱེད་པུ་གསུམ། དེའི་སྟེང་དུ་ཨ་ལས་བྱུང་བའི་ཀ་པཱ་ལའོ། །དེའི་ནང་དུ་བི་ར་ཤུ་མ་མུཿལས་བྱུང་བའི་བདུད་རྩི་ལྔ། བྷྲུཾ་ཨཾ་ཛྲིཾ་ཁཾ་ཧཱུཾ་རྣམས་ལས་བྱུང་བའི་ཤ་ལྔ། ཧཱུཾ་ལས་བྱུང་བའི་རྡོ་རྗེ་སྔོན་པོ་འོག་གི་རྭ་ལྔས་ཐོད་པའི་སྟེང་ནས་བཀག་པ། དེའི་སྟེང་དུ་ཅུང་ཟད་མ་རེག་པར། ཧཱུཾ་ལས་སྐྱེས་པའི་རྡོ་རྗེ་དབྱུག་པ་དཀར་པོ་མགོ་བོ་ཐུར་དུ་ལྟ་བ། རླུང་གཡོས། མེ་སྦར། རྫས་རྣམས་ཞུ་ཞིང་ཁོལ་བ་ཉི་མ་འཆར་ཀའི་མདོག་ཅན་དུ་གྱུར་ཅིང༌། དེའི་འོད་ཀྱིས་རྡོ་རྗེ་སྔོན་པོ་ཡང་ཞུ་ཞིང་ཐིམ། རྡོ་རྗེ་དབྱུག་པས་རྫས་རྣམས་ཡང་དང་ཡང་དུ་དཀྲུགས་ནས། དེ་ཉིད་དུ་ཞུ་ཞིང་འདྲེས་པས། བདུད་རྩི་དཀར་ཞིང་བསིལ་བ། ཁ་དོག་དྲི་རོ་ནུས་མཐུ་ཕུན་སུམ་ཚོགས་པར་གྱུར། དེའི་སྟེང་གི་ནམ་མཁའ་ལ་ཨོཾ་དཀར་པོ། དེ་ལས་འོད་ཟེར་འཕྲོས། སངས་རྒྱས་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་སྤྱན་དྲངས་ནས་ཨོཾ་ལ་ཐིམ། ཨོཾ་ཡིག་ལྷུང་བ་སྔར་གྱི་བདུད་རྩི་དང་འདྲེས་པས། དོན་དམ་བདེ་བ་ཆེན་པོའི་ཡེ་ཤེས་མཆོག་གི་བདུད་རྩི་ལྔའི་རྒྱ་མཚོར་གྱུར། ཨོཾ་ཨཱཿཧཱུཾ། ལན་ལྔ་སོགས་མང་དུ་བརྗོད། ནང་མཆོད་བྱིན་རླབས་ལྟ་བུ་ཕྲན་ཚེགས་ཀྱི་རིགས་ལ། ལ་ལ་སྒྲུབ་ཐབས་འདི་དང་འཆད་འགྱུར་གྱི་སྒྲུབ་ཐབས་གཞན་རྣམས་ལ་ལུགས་སོ་སོའི་ཁྱད་ཆོས་ཕྲན་ཚེགས་ཡོད་པ་རྣམས་འགྲུབ་ན་རང་

― TNT06_Page_0752 ―

^{[མ་དཔེ་གཟིགས་ན་འདིར་གནོན།]}

[Full Size]

ལུགས་བཞིན་བྱེད་དགོས་མོད། དེ་ལྟ་བུ་མ་འགྲུབ་ན་གཅིག་ཉིད་ཀུན་ཏུ་སྦྱར་བས་ཀྱང་རུང་ངོ༌། །ལྷ་རྣམས་ཀྱི་ལྗགས་ཧཱུཾ་ལས་བྱུང་བའི་རྡོ་རྗེ་དཀར་པོའི་འོད་ཟེར་གྱིས་བདུད་རྩི་དྲངས་ཏེ་གསོལ་བས་ཚིམ་ཞིང་མཉེས་པར་གྱུར། ཨོཾ་ཨཱཿཧཱུཾ། ཞེས་བདུད་རྩི་མྱང་ངོ༌། །དེ་ནས་རང་གི་སྙིང་གར་སེམས་དཔའ་གསུམ་བརྩེག་རྒྱས་བསྡུས་གང་རུང་ཅིག་བསྒོམས་ནས། ཧཱུཾ་གི་འོད་ཀྱིས་ཁམས་གསུམ་སྣོད་བཅུད་ཐམས་ཅད་དཀྱིལ་འཁོར་གྱི་འཁོར་ལོར་བསྒྱུར་ལ། བདག་ཉིད་ཀྱིས་བསྒོམ་པའི་དཀྱིལ་འཁོར་གྱི་འཁོར་ལོ་ལ་བསྡུ། རང་གིས་བསྒོམ་པའི་དཀྱིལ་འཁོར་གྱི་འཁོར་ལོ་ཡང་གཟུང་འཛིན་གྱི་འཁྲུལ་པ་དང་བྲལ་བ། དོན་དམ་གྱི་སེམས་ཡོངས་གྲུབ་ཆེན་པོའི་ངོ་བོར་ཤེས་བཞིན་པས། གསལ་སྟོང་གཉིས་སུ་མེད་པའི་དཀྱིལ་འཁོར་བསྒོམ་པར་བྱའོ། །དེ་ལྟར་ཡང་གཞུང་ལས། གང་ཕྱིར་འཁྲུལ་པ་གཉིས་ལ་གནས། །ཞེས་གཟུང་འཛིན་གཉིས་འཁྲུལ་སྣང་ཡིན་པ་དང༌། འཁྲུལ་པའི་ངོ་བོ་དེ་ཉིད་མིན། །ཞེས་གཟུང་འཛིན་གནས་ཚུལ་ལ་མ་གྲུབ་པ་དང༌། སེམས་ནི་རྟག་ཏུ་འཁྲུལ་བ་མེད། །ཅེས་དོན་དམ་གྱི་སེམས་གཟུང་འཛིན་ལས་གྲོལ་ཞིང༌། འདི་ལས་གཞན་དུ་དེ་ཉིད་མིན། །ཞེས་དཀྱིལ་འཁོར་གྱི་འཁོར་ལོ་དེ་ཀ་དོན་དམ་གྱི་སེམས་ཡིན་ཞིང༌། གཟུང་འཛིན་ཀུན་རྫོབ་ཀྱི་ཆོས་ཐམས་ཅད་ནི་དེ་ཡང་མ་ཡིན། དེ་ལས་གཞན་དུ་ཡང་མ་གྲུབ་སྟེ། རང་གི་ངོ་བོས་སྟོང་པའི་ཕྱིར་རོ་ཞེས་པའོ། །ཆག་ལོས་སྐབས་འདིར་རྫོགས་རིམ་སྒྱུ་ལུས་འོད་གསལ་ཟུང་འཇུག་གི་ཐ་སྙད་མཛད་པ་ནི། ལོ་པཎ་རྣམས་འཕགས་སྐོར་ལ་བློ་བྱང་བའི་རྣམ་འགྱུར་དུ་ཟད་ཀྱི། དཔལ་འཛིན་གྱི་ལུགས་ནི་ཞབས་ལུགས་ཡིན་པས། ཅུང་ཟད་མི་འགྲིག་ལ། གཞུང་འདིའི་ཐད་

― TNT06_Page_0753 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་མན་ངག་རྣམས་འབྱུང་བའི་མན་ངག་དང་གཅིག་པས་གསལ་བར་ནག་པོའི་སྒྲུབ་ཐབས་རྡོ་རྗེ་འོད་ཟེར་དུ་བཤད་ཟིན་ཏོ། །འདིར་མཆོག་ཏུ་དགའ་བའི་མཚན་ཉིད་དོ་ཞེས་པ་དང༌། བདེ་བ་དམ་པའི་གཟུགས་ཅན་བསྒོམས། །ཞེས་པས། བསྐྱེད་རིམ་གྱི་ལྷ་སྐུ་དེ་ཡང་བདེ་སྟོང་དུ་ཤར་བ་ཞིག་དགོས་པར་བསྟན་ཏོ། །དེ་ལྟར་ན། སྐྱེ་མཆེད་བྱིན་རླབས་དང༌། རྡོ་རྗེ་གསུམ་བྱིན་རླབས་དང༌། དབང་བསྐུར་རྒྱས་བཏབ་དང༌། ཡེ་ཤེས་དགུག་གཞུག་དང༌། མཆོད་བསྟོད་དང༌། བདུད་རྩི་མྱང་བ་དང༌། དཀྱིལ་འཁོར་སྤྲོ་བསྡུ་སྟེ། དེ་དག་ནི་རྣལ་འབྱོར་ཆེན་པོའོ། །འདིའི་སྐབས་སུ་བསྒོམ་རྒྱུའི་རྫོགས་རིམ་ནི་རྣལ་འབྱོར་བཞི་རིམ་མོ། །བཟླས་པའི་དམིགས་པ་རྣམས་ཀྱང་སྒྲུབ་ཐབས་རྡོ་རྗེ་འོད་ཟེར་དུ་བཤད་ཟིན་པ་ལྟར། འདུས་པ་ཡེ་ཤེས་ཞབས་ལུགས་བཞིན་ཡིན་པས། དཔལ་འཛིན་གྱི་གཞུང་ལ་ནག་པོའི་སྒྲུབ་ཐབས་སུ། ཡེ་ཤེས་ལམ་ལས་སྐྱེས་པ་དགོད། །ཅེས་ཡེ་ཤེས་སེམས་དཔའི་གདན་སའི་དཀྱིལ་འཁོར་དགོས་པ་ཙམ་ལས་གཞན་མ་གསུངས་ཀྱང༌། དེས་མཚོན་ནས་སྐུ་རྡོ་རྗེའི་གདན་རླུང་དང༌། གསུང་ལ་ཆུ་དང༌། ཐུགས་ལ་མེ་རྣམས་ཀྱང་དགོས་སོ། །དངོས་བསྟན་ལྟར་ན་ཞབས་ལུགས་དང་འདི་ལ་རྡོ་རྗེ་བཞིའི་གདན་དང༌། ཐུགས་ཀའི་ས་བོན་བཞིའི་གདན་གྱི་ཁྱད་བྱུང་མོད་ཀྱང་འདམ་ཀའོ། །བཟླས་པའི་སྔགས་ནི། ཨོཾ་ཧྲཱིཿཥྚཱིཿཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་ཡི་གེ་བཅུ་བཞི་པ་སྙིང་པོའོ། །ཨོཾ་ཡ་མ་རཱ་ཛ་ས་དོ་མེ་ཡ། ཡ་མེ་དུ་རུ་ཎ་ཡོ་ད་ཡ། ཡ་ད་ཡོ་ནི་ར་ཡཀྵེ་ཡ། ཡཀྵེ་ཡཙྪ་ནི་རཱ་མ་ཡ་ཧཱུཾ་ཕཊ་ཕཊ་སྭཱཧཱ། ཞེས་པ་ནི་འཁོར་ལོའི་ལས་ཀྱི་སྔགས་སོ། །བླ་མ་དམ་པ་འགའ་ཞིག་ཡི་གེ་བདུན་པའང་བཟླ་བར་བཞེད་ལ། འཁོར་གྱི་སྔགས་ནི། ཨོཾ་ཨཱཿཛི་ན་

― TNT06_Page_0754 ―

^{[མ་དཔེ་གཟིགས་ན་འདིར་གནོན།]}

[Full Size]

ཛིཀ་ཧཱུཾ་ཕཊ་སྭཱཧཱ། ཞེས་པ་ནས། ཨོཾ་ཨཱཿབཛྲ་ར་ཏི་ཧཱུཾ་ཕཊ་སྭཱཧཱ། ཞེས་པའི་བར་དུ་རང་རང་སོ་སོའི་སྤྲོ་བའི་སྔགས་རྣམས་ལ་དེ་ཉིད་ལྔ་སྤེལ་བྱེད་པ་ཉིད་དོ། །དེ་ནས་ཐུན་བསྡུ་བར་འདོད་ན། དག་པ་དྲན་པ་ནི། མི་མཉམ་མེད་པ་གྲུ་བཞི་སྟེ། །དྲན་པར་ཉེར་གཞག་ཤར་གྱི་སྒོ། །ལྷོ་སྒོ་ཡང་དག་སྤོང་བ་སྟེ། །རྫུ་འཕྲུལ་རྐང་པ་ནུབ་སྒོའོ། །དབང་སྟོབས་བྱང་གི་སྒོ་རུ་བརྗོད། །བསམ་གཏན་བཞི་ཡི་རྟ་བབས་དང༌། །ཏིང་འཛིན་བཞི་ཡི་ཁ་ཁྱེར་ཏེ། །གཟུངས་དང་ལྷ་མོའི་ཚོགས་ཡིན་ནོ། །དྲིལ་བུའི་སྒྲ་སོགས་ཡན་ལག་དགུ། །རྒྱན་རྣམས་བྱང་ཆུབ་ཡན་ལག་སྟེ། །འཕགས་ལམ་བརྒྱུད་ཀྱི་ཀ་བའོ། །རྣམ་ཐར་བརྒྱད་པོ་རྣམ་དག་པས། །སྣ་ཚོགས་རྡོ་རྗེའི་ཟུར་དང་ལོགས། །རྭ་རྣམས་འཇིག་ལྟ་ཉི་ཤུ་འཇོམས། །རྡོ་རྗེའི་ཐིག་ནི་ཆོས་འཁོར་བསྐོར། །ཉེས་པས་མ་གོས་པདྨ་དང༌། །སྨིན་དང་སྙིང་རྗེ་ཉི་ཟླའི་གདན། །ཡེ་ཤེས་ལྔ་པོ་ཡོངས་རྫོགས་པ། །ཕུང་པོ་ཉོན་མོངས་ལྔ་དག་པས། །བདེ་གཤེགས་ཁྲོ་བོ་རིགས་ལྔའོ། །བདུད་བཞི་སྒྲིབ་པ་བཞི་བཅོམ་ཞིང༌། །ལྟ་བ་བཞི་སྤངས་སྟོབས་བཞིའི་དངོས། །སྒོ་སྐྱོང་གཤེད་པོ་བཞི་རྣམས་སོ། །འབྱུང་བ་བཞི་རྣམས་རྣམ་དག་ཅིང༌། །ཕ་རོལ་ཕྱིན་བཞི་ཚད་མེད་དངོས། །ཡེ་ཤེས་ལྷ་མོ་བཞི་རྣམས་སོ། །རྣམ་དག་གཟུགས་སོགས་ངོ་བོ་ཉིད། །ཕ་རོལ་ཕྱིན་དྲུག་རབ་རྫོགས་པ། །ཡེ་ཤེས་བདུད་རྩིས་གང་བའི་སྣོད། །དཀྱིལ་འཁོར་ཆོས་ཀྱི་དབྱིངས་ཉིད་དོ། །ཞེས་སོ། །ལྷའི་རྣལ་འབྱོར་ཟིན་ནས་བཟླས་པ་རྫོགས་ཤིང༌། ཐུན་མཚམས་ལ་འཇུག་པར་འདོད་ན། ཨོཾ་ཨཱཿརཱུ་པ་བཛྲ་ཧཱུཾ། ནས། དཀྱིལ་འཁོར་དབང་ཕྱུག་ཁྱོད་ཕྱག་འཚལ། །ཞེས་པའི་

― TNT06_Page_0755 ―

^{[མ་དཔེ་གཟིགས་ན་འདིར་གནོན།]}

[Full Size]

བར་མཆོད་བསྟོད་དང༌། སྙིང་པོའི་མཐར་ཨོཾ་ཨཱཿཧཱུཾ། བཏགས་པས་བདུད་རྩི་མྱང༌། སྐབས་འདིར་དམར་ནག་གི་སྒྲུབ་ཐབས་དང་དཔལ་འཛིན་གྱིས་མཛད་པ་གཉིས་དང༌། གཤིན་རྗེ་གཤེད་འབྱུང་བ་སོགས་གཞུང་འགའ་ཞིག་གི་ལག་ལེན་ལ་བདག་བསྐྱེད་ཀྱི་ཡེ་ཤེས་པ་གཤེགས་སུ་གསོལ་བར་བཤད་ཅིང༌། བོད་ཕལ་ཆེར་ཕྱག་ལེན་ལ་ཡང་མཛད་པས། སློབ་དཔོན་དེ་དག་གི་ལུགས་ལྟར་ན། ཡིག་བརྒྱ་གསུམ་གྱི་མཐར་བཟོད་པར་གསོལ་ནས། ཨོཾ་ཨཱཿམུཿཞེས་ཡེ་ཤེས་པ་གཤེགས་སུ་གསོལ་བ་ཡིན་ཡང༌། ལུགས་དེ་ནི་རྣལ་འབྱོར་གྱི་རྒྱུད་ཀྱི་ཆོ་གའི་ཤན་འདྲེས་པ་སྟེ། སློབ་དཔོན་དེ་རྣམས་ཉིད་ཀྱི་འཁྲུལ་པའི་ཆ་ཤས་སུ་སྣང༌། ཁ་ཅིག་དེ་ཕ་རྒྱུད་ཀྱི་རང་ལུགས་ཡིན་ནམ་སྙམ་པ་འདུག་ཀྱང་དེ་འདྲ་མ་ཡིན་པས། བླ་མེད་ཀྱི་ལུགས་ལ་བདག་བསྐྱེད་ཀྱི་ཡེ་ཤེས་པ་མི་གཤེགས་པ་ཉིད་བཟང་བས། རང་ལུགས་ལ་གཤེགས་གསོལ་བྱེད་མི་དགོས་སོ། །དེ་ནས་འདི་ལྟར་བྱ་སྟེ། རང་གི་སྙིང་ག་ནས་འོད་ཟེར་འཕྲོས། ཁམས་གསུམ་སྣོད་བཅུད་ཐམས་ཅད་དཀྱིལ་འཁོར་གྱི་འཁོར་ལོར་གྱུར། འོད་དུ་ཞུ་ནས་སྲུང་བའི་འཁོར་ལོ་ལ་ཐིམ། དེ་འོད་དུ་ཞུ་སྟེ་ཆོས་འབྱུང་ལ་ཐིམ། དེ་ཡང་འོད་དུ་ཞུ་སྟེ་གཞལ་ཡས་ཁང་ལ་ཐིམ། གཞལ་ཡས་ཁང་འོད་དུ་ཞུ་སྟེ་ལྷ་ཚོགས་རྣམས་ལ་ཐིམ། འཁོར་གྱི་ལྷ་ཚོགས་དང་རིག་མ་གཙོ་བོའི་ཐུགས་ཀར་ཐིམ། དེ་ཡང་རིམ་གྱིས་འོད་གསལ་དུ་ཞུགས་པར་གྱུར། དེ་ནས་ཐུན་མཚམས་ཀྱི་ལྷ་སྐུར་ལངས་ཏེ། གནས་གསུམ་བྱིན་གྱིས་བརླབས་ནས་དགེ་བ་བསྔོའོ། །བཟླས་པ་ནས་དེའི་བར། རྣལ་འབྱོར་ཆེན་པོ་དངོས་མ་ཡིན་ཡང༌། དེའི་ཡན་ལག་ཡིན་པའི་ཕྱིར། གཞུང་ལས་རྣལ་འབྱོར་ཆེན་པོའི་ཁོངས་སུ་བསྡུས་སོ། །གཏོར་མའི་ཆོ་ག་ལ། ལྷ་ལྔའི་སྒྲུབ་ཐབས་སུ་བཤད་པ་རྣམས་

― TNT06_Page_0756 ―

^{[མ་དཔེ་གཟིགས་ན་འདིར་གནོན།]}

[Full Size]

ཕལ་ཆེར་བློ་ལ་དྲན་པར་བྱས་ནས། གཏོར་མ་བྱིན་རླབས་ནི་གོང་གི་ནང་མཆོད་བྱིན་རླབས་བཞིན་ནམ། རྒྱུད་ལེའུ་བཅུ་དགུ་པའི་དངོས་བསྟན་སྒྲ་ཇི་བཞིན་པས་ཀྱང་ཆོག་གོ །དེ་ལ་སློབ་དཔོན་དཔལ་འཛིན་གྱི་དམར་པོའི་གཏོར་ཆོག་ལོགས་ན་ཡོད་པ་དང༌། ནག་པོའི་དཀྱིལ་ཆོག་གི་ནང་ན་ཡོད་པའི་གཏོར་ཆོག་ནི་འགྱུར་ཁྱད་དང༌། ནག་པོའི་སྐབས་སུ་ལྷ་རྣམས་ཕྱག་མང་བྱེད་པའི་ཁྱད་མ་གཏོགས་ཁྱད་གཞན་ཡེ་མེད་ལ། དེ་གཉིས་ཀ་རུ་གཏོར་མ་བྱིན་རླབས་འདི་ལྟའོ་ཞེས་གསལ་བར་མེད་པ་ནི། སྒྲུབ་ཐབས་སུ་བཤད་པའི་བདུད་རྩི་བྱིན་རླབས་དང་འདྲ་བར་དགོངས་པ་ཡིན་ནོ། །སྔགས་རྙིང་མ་བར་གྲགས་པ་རྣམས་གཏོར་མ་དང་བདུད་རྩི་བྱིན་རླབས་མི་འདྲ་བར་བྱེད་པ་ཤས་ཆེ་ཡང༌། རྒྱ་གར་ནས་བསྒྱུར་ངེས་པའི་གསང་སྔགས་ནང་པའི་ལུགས་ཕལ་ཆེར་ལ་དེ་གཉིས་འདྲ་བར་བྱེད་པས་འདིར་ཡང་དེ་ལྟར་འོས་པ་ཡིན་ལ། འོན་ཀྱང་དཔལ་འཛིན་གྱི་གཏོར་ཆོག་འདི་དག །དམར་པོའི་རྒྱུད་ཀྱི་ལེའུ་བཅུ་གཅིག་པ་གཏོར་མའི་ལེའུ་ལ་བརྟེན་པར་ནི་སྣང་སྟེ། ཚིག་རིགས་ཀྱང་ཕལ་ཆེར་གཅིག་པ་ལྟ་བུར་ཡོད་པས་སོ། །འགའ་ཞིག་ཅུང་ཟད་མི་འདྲ་བའང་སྣང་བ་ནི་འདམ་ཁ་ཡིན་པར་ཤེས་པར་བྱའོ། །དེ་ཡང་ཨོཾ་ཨཱཿབིགྷྣཱནྟ་ཀྲྀཏ་ནས་ཨོཾ་ཨཱཿཧཱུཾ། ལན་ལྔའི་བར་གོང་ནང་མཆོད་ལྟར་གཏོར་མ་བྱིན་གྱིས་བརླབས། རང་གི་སྙིང་ག་ནས་འོད་ཟེར་འཕྲོས། གཤིན་རྫེ་གཤེད་དམར་པོའི་དཀྱིལ་འཁོར་བཛྲ་ས་མཱ་ཛཿ ཨོཾ་ཧྲཱིཿཥྚཱིཿཧཿ ལ་སོགས་པའི་མཆོད་པས་མཆོད། སངས་རྒྱས་ཀུན་གྱི་སོགས་ཀྱིས་བསྟོད། མདུན་གྱི་ནམ་མཁར་བཞུགས་པར་གྱུར། རང་གི་སྙིང་ག་ནས་ཁྲོ་བོ་ཞེས་པ་ནས། སྟོང་པའི་ངང་ལས་སྐད་ཅིག་གིས་གཤིན་རྗེ་གཤེད་དམར་པོའི་སྐུ་ཤེས་རབ་མ་རྣམས་གྲི་གུག་དང་ཐོད་པ་འཛིན་པས་འཁྱུད་པའི་སྐུར་གྱུར། ཅེས་འདོན་པ་སྤོ།

― TNT06_Page_0757 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱས་པ་ལ་མོས་ན། སྐྱེ་མཆེད་དང་སྐུ་གསུང་ཐུགས་བྱིན་རླབས་དང༌། དབང་བསྐུར་ནས་གཤིན་རྗེ་གཤེད་པོས་རྒྱས་གདབ་པའི་བར་སྒྲུབ་ཐབས་བཞིན་བྱ། ཅུང་ཟད་བསྡུ་ན། དེ་ཐམས་ཅད་ཀྱི་དཔྲལ་བར་ནས། བྷེ་ད་བྷེ་ད་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་པའི་བར་གཤེད་དམར་ལྷ་ལྔའི་གཏོར་ཆོག་དང་འདྲ་བས་ཀྱང་ཆོག་གོ །དེ་རྗེས་དམར་པོའི་གཏོར་ཆོག་ན་ཡང་ནག་པོ་དང་འདྲ་བར། ཨོཾ་ཨིནྡྲ་ཡ་ཧྲིཿ ཞེས་སོགས་འབྱུང་བ་དམར་ནག་གི་འཇིག་རྟེན་པའི་གཏོར་སྔགས་འདྲ་བར་བྱས་ན་ཟོར་ཡང་བའི་དགོས་པ་ཡོད་པ་ལ་དགོངས་ལ། རྒྱུད་ལས་འབྱུང་ཚུལ་ནི་ནག་པོའི་རྒྱུད་དུ་གཏོར་སྔགས་ལ། ན་མཿཞེས་པ་མེད། དམར་པོའི་རྒྱུད་ན་ཡོད་པས་སོ་སོ་ལ་རྒྱུད་ལྟར་བྱས་ན་ལེགས་སོ། །དེ་རྗེས་ཆུ་གཉིས་སྔོན་དུ་འགྲོ་བའི་ཉེར་སྤྱོད་ནས་གཟུང༌། བཛྲ་མུཿ ཞེས་པའི་བར་ཡང་ལྷ་ལྔའི་གཏོར་ཆོག་དང་འདྲའོ། །རྗེས་སུ་སྨོན་ལམ་བཏབ། དགེ་བ་བསྔོའོ། །བཅུ་གསུམ་མའི་སྐབས་འདིར་དཔའ་བོ་བཞིའི་མཚན་སྔགས་དང་རྣལ་འབྱོར་མ་བཞིའི་གཏོར་སྔགས་ལོགས་པ་མི་མཛད་དེ། རྒྱུ་མཚན་ནི་དམར་པོ་ལྷ་ལྔའི་སྐབས་གཏོར་སྔགས་རིང་མོ་རཀྟ་ཞེས་སོགས་སྔགས་དོན་དང་མཐུན་པར་གཙོ་བོ་ཞེ་སྡང་རྡོ་རྗེ་ཤེས་རབ་མ་དང་བཅས་པ་ཁོ་ན་ལ་སྦྱོར་ཞིང་ཕྱོགས་སྐྱོང་ལའང་བྱེད་པའི་སྐབས་ཤིག་ཡོད་པ་དེ་ཡང༌། ཞེ་སྡང་རྡོ་རྗེར་བསྒྱུར་ཟིན་པའི་དབང་དུ་བྱས་ལ། དཀྱིལ་འཁོར་བ་བཅུ་པོ་ལ་ཡང་རེ་རེ་བཞིན་ཐུན་མོང་མ་ཡིན་པའི་གཏོར་སྔགས་དེ་སྦྱོར་བའི་ལུགས་ཡིན་པས། དེ་ལྟར་བྱེད་པ་ཤིན་ཏུ་འོས་ལ། འདིར་མི་འབྱུང་བ་ནི་ཐོ་བ་གཤིན་རྗེ་གཤེད་སོགས་ལ་སྔགས་ལོགས་པ་མེད་པས་དེ་ཕྱིར་རིགས་བཞི་ཡུམ་བཞི་ལ་ཡང་གཏོར་སྔགས་ལོགས་པ་ངེས་པ་དགོས་པ་མིན་ཞིང༌། འཁོར་བཅུ་གཉིས་པོ་ལ་སྐབས་འདིའི་བྱ་བྱེད་རིག་པ་མཚུངས་པར་བྱ་སྟེ། གལ་ཆེ་ཆུང་གི་དབྱེ་བ་མི་ཤེས་པའི་ཕྱིར་

― TNT06_Page_0758 ―

^{[མ་དཔེ་གཟིགས་ན་འདིར་གནོན།]}

[Full Size]

དང༌། ཐམས་ཅད་གཙོ་བོའི་རིགས་སུ་གཅིག་པའི་ཕྱིར། གཏོར་སྔགས་རིང་མོ་ལ་འདུས་པར་དགོངས་པའོ། །ཡང་རྒྱས་པར་སྤྲོ་ན། ཕྱོགས་སྐྱོང་དགུག་པའི་སྐབས་ལ་ཡི་གེ་བཅུ་བཞི་པའི་ཕཊ་ཕཊ་ཀྱི་མཐར། ཧཱུཾ་སརྦ་དུཥྟ་ཨིནྡྲ་ས་པཱ་རི་ཝཱ་ར་ཨཱ་ཀརྵ་ཡ་ཛཿསྭཱཧཱ། ཨིནྡྲ་ཞེས་པའི་གནས་སུ་ཨུ་བེན་དྲ་ལ་སོགས་པ་སོ་སོའི་མཚན་བཅུག་པས་དགུག་པ་དང༌། ཡང་ཕུར་འདེབས་ཀྱི་སྐབས་སུ་ཕཊ་ཕཊ་ཀྱི་རྗེས་སུ། ཧཱུཾ་སརྦ་དུཥྟ་ཨིནྡྲ་ས་པཱ་རི་ཝཱ་ར་ཀཱི་ལ་ཡ་ཧཱུཾ་ཕཊ་སྭཱཧཱ་དང༌། ཨུ་བེནྡྲ་ལ་སོགས་པ་གཞན་རྣམས་ཀྱི་མཚན་སྔགས་སྤེལ་བས་ཕུར་བུས་འདེབས་སོ། །རྣལ་འབྱོར་གྱི་ཡན་ལག་གཞན་རྣམས་ནི་སྤྱི་དང་འདྲ་ཞིང༌། བླ་མ་སྔ་མ་རྣམས་ཀྱི་སྒྲུབ་ཐབས་ན་ཡོད་པ་ལྟར་ཤེས་པར་བྱའོ། །སློབ་དཔོན་དཔལ་འཛིན་ཉིད་ཀྱི་ལུགས་གཞིར་བཞག་པ་ལ་གཤིན་རྗེ་གཤེད་ནག་པོའི་སྒྲུབ་ཐབས་ཀྱང༌། འདི་ཉིད་འདོན་པ་སྤོས་པས་རིགས་འདྲེ་བར་ནུས་ཏེ། དེ་ལས་ཤེས་རབ་སྐྱེད་པའི་ཆོ་ག་ནི། ནག་པོའི་རྒྱུད་ལས་མ་གསུངས་ཤིང༌། དམར་པོའི་རྒྱུད་ལས་གསུངས་པ་ཉིད་ཀྱི་ཕྱིར། དམར་པོའི་ཐུན་མོང་མ་ཡིན་པར་འགྱུར་ལ། དམར་པོའི་སྒྲུབ་ཐབས་འདིར་མཁའ་གསང་བྱིན་རླབས་རྗེས་ཆགས་ཀྱི་ང་རྒྱལ་དང་བཅས་པ། རྗེས་སུ་རྣལ་འབྱོར་དུ་བསྡུ་བར་མཛད་ཅིང༌། ཡེ་ཤེས་སེམས་དཔའ་དང༌། ཏིང་ངེ་འཛིན་སེམས་དཔའ་བསྡུས་པ་ཡང༌། སྐབས་དེ་དག་འབྲེལ་བར་འབྱུང་ལ། ནག་པོའི་སྒྲུབ་ཐབས་ཀྱི་དངོས་བསྟན་ལ། སེམས་དཔའ་གཉིས་དང་རྗེས་ཆགས་གནས་སྐབས་གང་དུ་བསྒོམ་མི་གསལ་ཡང༌། རྗེས་ཆགས་ནི་རྒྱབ་བརྟེན་ཡེ་ཤེས་ཞབས་ལུགས་སོགས་སྤྱི་འགྲོས་དང་བསྟུན་ན། བྱང་ཆུབ་མཆོག་གི་ང་རྒྱལ་གཟུང་ཟིན་པའི་རྗེས་སུ། རང་སྙིང་ས་བོན་འོད་ཀྱིས་དགུག །ཅེས་སོགས་ཀྱི་གོང་དེར་ཁ་སྐོང་གི་ཚུལ་གྱིས་བཅུག་ནས། རྗེས་སུ་རྣལ་

― TNT06_Page_0759 ―

^{[མ་དཔེ་གཟིགས་ན་འདིར་གནོན།]}

[Full Size]

འབྱོར་ལ་མི་སྡུད་པར་ཤིན་ཏུ་རྣལ་འབྱོར་གྱི་ཆོ་གར་བསྡུ་དགོས་སོ། །སེམས་དཔའ་གསུམ་བརྩེག་སྤྱི་ནི་བསྒོམ་དགོས་པར་ཤིན་ཏུ་གསལ་ཏེ། ཡེ་ཤེས་འོད་ཀྱིས་སྙིང་གར་དགོད། །ཅེས་པ་དང༌། ཡེ་ཤེས་ལམ་ལས་སྐྱེས་པར་དགོད། །ཅེས་པ་གསུངས་པའི་ཕྱིར་རོ། །འོན་ཀྱང་གནས་སྐབས་གང་དུ་བསྒོམ་མི་གསལ་བ་ལ། དམར་པོ་བཅུ་གསུམ་མ་ལ་ལྷ་ལྔ་དང་ཕྱོགས་མཚུངས་ཀྱི་དབང་ལས། བསྡུས་པ་དེ་གཙོ་བོ་བཞེངས་མ་ཐག་ཏུ་མཛད། ནག་པོ་ལ་ནི་ཁ་སྐོང་གི་ཚུལ་དུ་གསུམ་བརྩེག་བསྡུས་པ་སྐབས་དེའམ། རྡོ་རྗེ་གསུམ་བྱིན་གྱིས་བརླབས་པ་དང་དབང་བསྐུར་གྱི་མཚམས་སུ། སེམས་དཔའ་གསུམ་བརྩེག་རྒྱས་པ་ཉིད་བསྒོམས་ཀྱང་རུང་ངོ༌། །འོན་ཀྱང་འདིར་འབྲས་བུ་གཤིན་རྗེ་གཤེད་གཞེངས་མ་ཐག་ཏུ། སེམས་དཔའ་གསུམ་ཡོད་ན་དེ་ལ་འདུས། མེད་ན་ཐུགས་ཀར་ས་བོན་བསྒོམ་པ་ནི་མེད་དུ་མི་རུང་བས་ངེས་པ་དགོས་ཤིང༌། ས་བོན་ཡང་ཡི་གེ་བཅུ་བདུན་གྱི་དབྱེ་བས་མཁའ་དཀྱིལ་གྱི་གཙོ་བོའི་ས་བོན་ཡ་ཡིག་ཡིན་ཡང༌། འབྲས་བུ་རྡོ་རྗེ་འཛིན་པའི་སྐབས་འདིར་ནི་ཡ་ཡིག་བྱེད་པའང་ཡོད་མོད་ཧཱུཾ་ཡིག་ཁོ་ན་གཙོ་ཆེ་བར་མངོན་ནོ། །ཡང་གཤིན་རྗེ་གཤེད་དམར་པོའི་རྒྱུད་ལེའུ་ཉེར་གཉིས་པ་ལས། རྒྱུ་རྡོ་རྗེ་འཛིན་པ་རྫོགས་མཚམས་ཉིད་དུ། སེམས་དཔའ་གསུམ་བརྩེག་བསྡུས་པ་དང༌། མཁའ་གསང་བྱིན་རླབས་དང་བཅས་པའི་རྗེས་ཆགས་དང༌། ཤེས་རབ་འཕེལ་བ་གསུམ་རིམ་ཅན་དུ་གསུངས་ལ། བཅུ་གསུམ་མའི་སྐབས་འདིར། འབྲས་བུ་རྡོ་རྗེ་འཛིན་པ་རྫོགས་མ་ཐག་ཏུ་བྱེད་པས། གང་དུ་བསྒོམ་པའི་དུས་སྐབས་མི་འདྲ་ཡང༌། ཆོས་གསུམ་པོ་དེའི་གོ་རིམ་རྒྱུད་དེར་གསུངས་པ་དང་མཐུན་པར་བསྟན་པ་སྟེ་དམར་པོ་ལ་རིམ་པ་དེ་ལྟར་བྱེད་པའི་རྒྱུ་མཚན་དེ་ཡིན་ལ། ནག་པོ་ལ་དེ་ལྟར་མ་ངེས་སོ། །༈ དཔལ་གཤིན་རྗེ་

― TNT06_Page_0760 ―

^{[མ་དཔེ་གཟིགས་ན་འདིར་གནོན།]}

[Full Size]

གཤེད་ནག་པོ་ལ་ཕྱག་འཚལ་ལོ། །ད་ནི་དེ་ལ་འདོན་པ་སྤོ་ཚུལ་བརྗོད་པར་བྱ་སྟེ། རང་སྐད་ཅིག་གིས་གཤིན་རྗེ་གཤེད་ནག་པོའི་སྐུར་ཅེས་དང༌། ཉི་མའི་དཀྱིལ་འཁོར་གྱི་སྟེང་དུ་ཡཾ་ཡིག་མཐིང་ནག དེ་ལས་འོད་འཕྲོས་ཞེས་དང༌། མངོན་བྱང་བཞི་པའི་སྐབས། དེ་ལས་རྡོ་རྗེ་དཀར་པོ་རྩེ་ལྔ་པ། ལྟེ་བར་ཟླ་བའི་དཀྱིལ་འཁོར་གྱི་སྟེང་དུ། ཧཱུཾ་དཀར་པོས་མཚན་པར་གྱུར། ཨོཾ་བཛྲ་ཨཱཏྨ་ཀོ྅ཧཾ། དེ་ལས་འོད་ཟེར་འཕྲོས་འདུས་ཞེས་པ་དང༌། སྦྲུལ་རྒྱན་ཅན། ཕྱག་དྲུག་གི་དང་པོ་གཉིས་གྲི་གུག་དང་ཐོད་པ་འཛིན་པས་ཡུམ་ལ་མཁྱུད་པ། ལྷག་མ་གཡས་གཉིས་རྡོ་རྗེ་དང་རལ་གྲི། གཡོན་གཉིས་འཁོར་ལོ་དང་པདྨ་འཛིན་པ། པད་ཟླ་ལ་གཡོན་བརྐྱང་ཞེས་དང༌། མཾ་ལས་མ་ཧེ་ནག་པོ་དྲེགས་ཤིང་ཞེས་དང༌། བྱང་ཆུབ་སེམས་ཀྱི་ཕུང་པོ་སྟེང་མ་ཆ་གཅིག་ཤོས་དེ་ཧཱུཾ་ཡིག་ནག་པོར་གྱུར། དེ་ལས་རྡོ་རྗེ་ནག་པོ་རྩེ་ལྔ་པ། རྭ་གདེངས་ཤིང་འབར་འཕྲེང་འཁྲུག་པའི་ལྟེ་བར་ཉི་མ་ལ་གནས་པའི་ཧཱུཾ་ནག་པོའོ། །དེ་ལས་ཞེས་དང༌། རང་ཉིད་བཅོམ་ལྡན་འདས་གཤིན་རྗེ་གཤེད་ནག་པོ་དུས་མཐའི་སྤྲིན་དང་མཚུངས་པ། སྒེག་པ་ལ་སོགས་ཞེས་དང༌། ཞལ་གསུམ་ཕྱག་དྲུག་གི་མདུན་མ་གཉིས་སྡང་བ་མ་ལུས་པ་འཇོམས་པར་མཛད་པའི་གྲི་གུག་འབར་བ་དང༌། བདུད་བཞིའི་ཁྲག་གིས་གང་བའི་ཐོད་པ་འཛིན་པས་ཡུམ་ལ་འཁྱུད་པ། གཉིས་པ་ན་འབར་བའི་རྡོ་རྗེ་རྩེ་ལྔ་པ་གསོར་བས་འཇིག་རྟེན་གསུམ་འདུལ་བ། གསུམ་པ་ན་མི་བཟད་པའི་རལ་གྲིས་གདུག་པ་ཅན་མ་ལུས་པ་འཇོམས་པར་མཛད་པ། གཡོན་གྱི་གཉིས་པ་ན་འཁོར་ལོ་རྩིབས་བརྒྱད་པ་བསྐོར་བས་གནོད་པ་དང་སྡུག་བསྔལ་མཐའ་དག་ཞི་ཞིང་བཟློག་པར་མཛད་པ།

― TNT06_Page_0761 ―

^{[མ་དཔེ་གཟིགས་ན་འདིར་གནོན།]}

[Full Size]

གསུམ་པས་པདྨ་དམར་པོ་སྡོང་བུ་དང་བཅས་པ་བསྣམས་པས་བརྟན་གཡོ་མཐའ་དག་འགུགས་ཤིང་དབང་དུ་བྱེད་པ། རྩ་ཞལ་ནག་པོ་མི་བཟད་པའི་ཁྲོ་གཉེར་བསྡུས་པས་སྡེ་བརྒྱད་གཤིན་རྗེའི་ཚོགས་ཐམས་ཅད་དངངས་ཤིང་སྙིང་འགས་པར་བྱེད་པ། གཡས་ཞལ་དཀར་པོ་བདེ་བ་དམ་པའི་འོད་དཀར་གྱིས་ཕྱོགས་ཆ་འགེངས་ཤིང༌། གཡོན་ཞལ་དམར་པོ་གདངས་ཤིང་བཞད་པས་རི་རབ་བསྒྱེལ་ཞིང་འཇིག་རྟེན་གསུམ་སྐྱེད་པར་མཛད་པ། ཞལ་རེ་རེ་ལ་དམར་ལ་ཟླུམ་པའི་ཞེས་དང༌། ཡུམ་གྱི་སྐབས་རྩ་བའི་ཕྱག་གཉིས། ཡབ་ཀྱི་མགུལ་ནས་ཞེས་དང༌། ཆ་བྱད་རྫོགས་པའོ། །གཙོ་བོའི་ཐུགས་ཀར་རང་དང་འདྲ་བའི་ཡེ་ཤེས་སེམས་དཔའ་གཤིན་རྗེ་གཤེད་ཞལ་གསུམ་ཕྱག་དྲུག་པ། པད་ཉིའི་གདན་ལ་བཞུགས་པ། དེའི་ཐུགས་ཀར་ཏིང་ངེ་འཛིན་སེམས་དཔའ། ཉི་མ་ལ་གནས་པའི་རྡོ་རྗེ་སྔོན་པོ་རྩེ་ལྔ་པའི་ལྟེ་བར་ཡང་ཉི་དཀྱིལ་ལ་གནས་པའི་ཧཱུཾ་མཐིང་ནག་འབར་བའི་འོད་ཀྱི་སྣང་བས་ཕྱོགས་ཀུན་ཁྱབ་པར་བྱེད་པའོ། །ཨོཾ་དྷརྨ་དྷཱ་ཏུ་སོགས་བརྗོད། ཡབ་ཀྱི་གསང་གནས་ཧཱུཾ་ཞེས་པ་ནས། མངོན་དུ་བྱས་པར་གྱུར། རང་གི་ཐུགས་ཀའི་ས་བོན་ལས་འོད་འཕྲོས། སངས་རྒྱས་སྲས་དང་བཙུན་མོར་བཅས་པ་སྤྱན་དྲངས་ཞེས་སོགས་བརྗོད་དེ། དམར་པོ་བཅུ་གསུམ་མའི་སྐབས་ལས་གོ་རིམ་ཅུང་ཟད་བསྒྱུར་བའོ། །ཡ་ལས་ཞེ་སྡང་གཤིན་རྗེ་གཤེད་ནག་པོ། དུས་མཐའི་སྤྲིན་ཅེས་པ་ནས། མཆོག་གི་ཆ་བྱད་རྫོགས་པའོ། །སྙིང་པོའི་ཤར་དུ་ཞེས་དང༌། གཏི་མུག་གཤིན་རྗེ་གཤེད་སྐུ་མདོག་དཀར་པོ་དཀར་ནག་དམར་བའི་ཞལ་གསུམ་ཕྱག་དྲུག་གིས་དང་པོ་གཉིས་གྲི་གུག་དང་ཐོད་པ་འཛིན་པས་རང་སྣང་གི་ཡུམ་ལ་འཁྱུད་པ། ལྷག་

― TNT06_Page_0762 ―

^{[མ་དཔེ་གཟིགས་ན་འདིར་གནོན།]}

[Full Size]

མ་གཡས་གཉིས་ན་འཁོར་ལོ་དང་རལ་གྲི། གཡོན་གཉིས་ན་ནོར་བུ་དང་པདྨ་འཛིན་པ་ཞེས་དང༌། ཕྲ་མ་གཤིན་རྗེ་གཤེད་སེར་པོ། སེར་ནག་དཀར་བའི་ཞལ་གསུམ། དང་པོ་གཉིས་འདྲ། གཡས་གཉིས་ན་ནོར་བུ་དང་རལ་གྲི། གཡོན་གཉིས་ན་འཁོར་ལོ་དང་པདྨ་ཅཻས་དང༌། འདོད་ཆགས་གཤིན་རྗེ་གཤེད་དམར་པོ། དམར་ནག་དཀར་བའི༴ གཡས་གཉིས་ན་པདྨ་དང་རལ་གྲི། གཡོན་གཉིས་ན་འཁོར་ལོ་དང་ནོར་བུ། ཞེས་དང༌། ཕྲག་དོག་གཤིན་རྗེ་གཤེད་ལྗང་ཁུ། ལྗང་ནག་དཀར་བའི༴ གཡས་གཉིས་ན་རལ་གྲི་དང་འཁོར་ལོ། གཡོན་གཉིས་ན་ནོར་བུ་དང་པདྨ། ཐོ་བ་གཤིན་རྗེ་གཤེད་མཐིང་ཁ། ནག་དཀར་དམར་བའི༴ གཡས་གཉིས་ན་རྡོ་རྗེ་ཐོ་བ་རྭ་ཉི་ཤུ་པ་དང་རལ་གྲི། གཡོན་གཉིས་ན་ནོར་བུ་དང་པདྨ། ཞེས་དང༌། དབྱུག་པ་གཤིན་རྗེ་གཤེད་དཀར་པོ། དཀར་ནག་དམར་བའི༴ གཡས་གཉིས་ན་དབྱུག་པ་དང་རལ་གྲི། གཡོན་གཉིས་ན་འཁོར་ལོ་དང་པདྨ། ཞེས་དང༌། པདྨ་གཤིན་རྗེ་གཤེད་དམར་པོ་སོགས། འདོད་ཆགས་གཤིན་རྗེ་གཤེད་དང་འདྲ། རལ་གྲི་གཤིན་རྗེ་གཤེད་ལྗང་སྔོན་ནམ་ལྗང་ནག་སོགས། ཕྲག་དོག་གཤིན་རྗེ་གཤེད་དང་འདྲ། ལུགས་འདི་ལ་གཞུང་ལས། ཅུང་ཟད་སྔོན་པོ་ཁྱད་པར་རོ། །ཞེས་གསུངས་པས། ལྗང་སྔོན་ནམ་ལྗང་ནག་དགོས་ཏེ། གཞན་དུ་ན་སྐུ་མདོག་གི་ཁྱད་པར་ཅུང་ཟད་འཆད་པར་འགྱུར་རོ། །ཡང་ན་སྒོ་བསྲུང་བཞི་པོ་དེ་རྣམས་ལ། གྲི་གུག་དང་ཐོད་པ་འཛིན་པ་ཐུགས་ཀར་བསྣོལ་བ། ཞེས་ཡབ་རྐྱང་གི་སྐུར་བསྒོམས་ཀྱང་རུང་བ་ཡིན་ནོ། །དཔལ་འཛིན་གྱི་དམར་པོའི་གཞུང་ལས། རིགས་ལྔའི་སྐབས་སུ། གཉུག་མའི་ཤེས་རབ་གཉིས་མེད་འཁྱུད། །ཅེས་དང༌། སྒོ་བ་བཞིའི་སྐབས་སུ། རང་སྣང་ཤེས་རབ་ཡན་ལག་

― TNT06_Page_0763 ―

^{[མ་དཔེ་གཟིགས་ན་འདིར་གནོན།]}

[Full Size]

སྦྱོར། །ཞེས་གསུངས། ནག་པོའི་སྒྲུབ་ཐབས་སུ་རིགས་ལྔ་ལ་ཡུམ་གསུངས་པ་དམར་པོ་དང་འདྲ་ཞིང༌། སྒོ་བ་བཞི་ཡབ་རྐྱང་དུ་བྱུང་བས། དམར་ནག་གཉིས་ལ་ཐོབ་ཐང་གི་སྒོ་ནས། སྒོ་བ་བཞི་ལ་ཡུམ་ཡོད་མེད་ཀྱི་ཁྱད་པར་མེད་ཅིང༌། སྐབས་འདིར་རྒྱུད་ཚིག་ལའང་ཁྱད་པར་མེད་པས་དམར་ནག་གཉིས་ཀ་ལ་སྒོ་སྲུངས་བཞི་ཡུམ་ཅན་དང༌། ཡབ་རྐྱང་འདམ་ཁར་དགོངས་པའོ། །དེ་ཡང་དཔལ་འཛིན་གྱི་གཞུང་གི་དབང་དུ་བྱས་ཀྱི། སྤྱིར་གཤེད་ནག་གི་ལྷ་ཚོགས་ཐམས་ཅད་རང་སྣང་གི་ཐབས་ཤེས་ཕན་ཚུན་འཁྱུད་པའི་ཁ་སྦྱོར་གྱི་སྐུ་ཁོ་ནར་བྱེད་པ་དང༌། གོང་དུ་སྨོས་པའི་འདམ་ཁ་གཉིས་དང༌། འཁོར་ཚོགས་ཐམས་ཅད་ཡབ་རྐྱང་ཡུམ་རྐྱང་དུ་བྱེད་པ་སྟེ་མི་འདྲ་བ་བཞི་བྱུང་ཞིང༌། མཚམས་ཀྱི་ཐོད་པ་བཞིའི་དོད་དུ་མི་མགོ་རིལ་པོ་བྱེད་པ་སོགས་སྣ་ཚོགས་བྱུང་ཡང༌། རྒྱུད་དོན་ལ་འགྲིག་ཕྱིན་བླ་མའི་མན་ངག་ཡིན་པས་མི་འགལ་ལ། ཁ་ཅིག་གསང་སྔགས་ཀྱི་རྒྱུད་ཀྱི་ལུགས་སུ་འབྲེལ་ཞིང༌། བཅུ་གསུམ་གྱི་འཁོར་ལོའི་གཙོ་བོ་ཡང་ཤེས་རབ་མ་དང་བྲལ་བ་ཁོ་ནར་འདོད་པ་དང༌། འཁོར་ཚོགས་རྣམས་ཐུགས་ཀ་ནས་སྤྲོ་བར་འདོད་པ་དག་འཕགས་ཡུལ་དུ་བྱུང་བ་ནི་མི་མཐད་དོ་ཞེས་རྒྱུད་ཀྱི་འགྲེལ་པར་བཀག་པ་ལྟར་ཡིན་ཏེ། འདོད་པ་དེ་འདྲ་མན་ངག་ཡིན་ནོ་ཞེས་སྨྲ་བ་སྲིད་ཀྱང༌། རྒྱུད་ཀྱི་དངོས་བསྟན་ཉིད་དང་འགལ་བའི་ཕྱིར་དོར་བར་བྱ་ལ། དེ་ལྟར་འདོད་པའི་བསྟན་བཅོས་བོད་དུ་འགྱུར་བ་མ་མཐོང་ཡང༌། འདོད་ཚུལ་དེ་འདྲ་ཡོ་ག་བ་ཀུན་སྙིང་གི་ལུགས་ཡིན་ནམ་སེམ་མོ། །ད་ནི་དཀྱུས་ལ་འཇུག་སྟེ། ཙར་ཙི་ཀཱ་དཀར་མོ་སྐེམ་ཞིང་ཁྲོས་པ་དཀར་ནག་དམར་སོགས་གཏི་མུག་གཤིན་རྗེ་གཤེད་དང་འདྲ། ཕག་མོ་སྔོན་མོ་སྔོ་དཀར་དམར་བའི༴ གཡས་གཉིས་ན་རྡོ་རྗེ་དང་རལ་གྲི། གཡོན་གཉིས་ན་འཁོར་ལོ་དང་པདྨ། དྲག་མོ་ཆེན་མོ་རྩ་བའི་ཞལ་ཕག་གི་གདོང་པའོ། །

― TNT06_Page_0764 ―

^{[མ་དཔེ་གཟིགས་ན་འདིར་གནོན།]}

[Full Size]

དབྱངས་ཅན་མ་དམར་མོ་དམར་ནགསོགས། འདོད་ཆགས་གཤིན་རྗེ་གཤེད་དང་འདྲ། ཞི་ཞིང་སྒེག་ལ་སོགས་དང༌། གཽ་རཱི་ལྗང་ཁུ་ལྗང་ནག་དཀར་སོགས་ཕྲག་དོག་གཤིན་རྗེ་གཤེད་དང་འདྲ། ཕག་མོ་དང་གཽ་རཱི་ཞེས་པ་ནས། གཞལ་ཡས་ཁང་ལ་ཐིམ་གྱི་བར་ཤིན་ཏུ་རྣལ་འབྱོར་གྱི་འཕྲོས་རྣམས་དག་ནས་འདོན་ཚུལ་ལ་ཁྱད་པར་མེད་དོ། །སྐྱེ་མཆེད་བྱིན་རླབས་ཀྱི་སྐབས་སུ། རྡོ་རྗེ་རྣ་བ་ནག་པོ་ཞེ་སྡང་གཤིན་རྗེ་གཤེད་དང་འདྲ་བ་ལས། མ་ཧེ་དང་གཤིན་རྗེའི་གདན་སྤངས་པ། ཞེས་དང༌། རྡོ་རྗེ་ཡིད་དཀར་པོ་རྒྱུའི་རྡོ་རྗེ་སེམས་དཔའ་དང་མཚུངས་པ། ཞེས་དང༌། རྡོ་རྗེ་གསུམ་བྱིན་རླབས་ཀྱི་སྐབས་སུ། ཐུགས་རྡོ་རྗེ་ནག་པོ་ཞེ་སྡང་གཤིན་རྗེ་གཤེད་ལྟ་བུའི་ཐུགས་ཀར་ཧཱུཾ་སྔོན་པོ་ཞེས་འདོན་པ་སྤོ། རང་བཞིན་གྱི་གནས་ནས་གཤིན་རྗེ་གཤེད་ནག་པོའི་དཀྱིལ་འཁོར་ཞེས་དང༌། ཀྱཻ་གཤིན་རྗེ་གཤེད་ནག་པོ། ཅེས་དང༌། ཆགས་པས་རྒྱན་སོགས་ཀྱི་དོད་དུ། ནག་པོ་མིག་སྨན་བཅག་འདྲ་ཡི། །ཞེས་དང༌། སྐུ་ལུས་སྤོམ་ཐུང་ནག་པ་སྟེ། །ཞེས་འདོན་པ་སྤོའོ། །ཧཱུཾ་ཧཱུཾ་རྡོ་རྗེ་སྟོབས་པོ་ཆེ། །རབ་འཇིགས་མི་མཐུན་ཟད་མཛད་པ། །རྡོ་རྗེ་སྐུ་དབྱེར་མེད་པའི་ལྷ། །ཐོ་བ་རྡོ་རྗེ་ཕྱག་འཚལ་བསྟོད། །སངས་རྒྱས་རྡོ་རྗེ་ཀུན་ཏུ་བཟང༌། །མཉམ་པའི་རྡོ་རྗེ་མི་བསྐྱོད་པ། །རྡོ་རྗེ་གསང་བ་དབྱིངས་ཆེན་པོ། །ཡེ་ཤེས་རྡོ་རྗེ་ཕྱག་འཚལ་བསྟོད། །རྡོ་རྗེ་དམ་ཚིག་རྡོ་རྗེ་གསུང༌། །རྡོ་རྗེ་དབྱངས་ནི་ཟབ་མོ་ཆེ། །འདོད་ཆགས་རྡོ་རྗེ་ཉིད་མཚུངས་པ། །སྐྱོན་བྲལ་རྡོ་རྗེ་ཕྱག་འཚལ་བསྟོད། །རྡོ་རྗེ་ལས་ནི་བརྩོན་འགྲུས་ཆེ། །སངས་རྒྱས་རྡོ་རྗེ་བརྟུལ་ཞུགས་འཛིན། །ལས་མཐར་མཛད་པའི་ཐུབ་ཆེན་པོ། །རྡོ་རྗེ་བརྩོན་འགྲུས་ཁྱོད་ཕྱག་འཚལ། །རྡོ་རྗེ་ཞི་བ་བྱང་ཆུབ་སེམས། །གཏི་

― TNT06_Page_0765 ―

^{[མ་དཔེ་གཟིགས་ན་འདིར་གནོན།]}

[Full Size]

མུག་རྡོ་རྗེ་ཉིད་དབྱེར་མེད། །ཆོས་ཀྱི་དབྱིངས་ཀྱི་བདག་ཆེན་མོ། །རྡོ་རྗེ་ཙར་ཙི་ཀཱ་ཕྱག་འཚལ། །མི་བསྐྱོད་རྡོ་རྗེ་ཡེ་ཤེས་ཆེ། །ཞེ་སྡང་བདག་པོ་ཐུགས་དབྱེར་མེད། །མི་ཕྱེད་རྣམ་རྟོག་རབ་གཅོད་མ། །རྡོ་རྗེ་ཕག་མོ་ཁྱོད་ཕྱག་འཚལ། །རྡོ་རྗེ་གསུང་ནི་ཡེ་ཤེས་ཆེ། །པདྨ་ཤེས་རབ་ཕ་རོལ་ཕྱིན། །འདོད་ཆགས་ཆེན་པོ་ཉིད་སྦྱོང་བ། །རྡོ་རྗེ་དབྱངས་ཅན་ཁྱོད་ལ་བསྟོད། །ལས་ཀྱི་རྡོ་རྗེ་ཀུན་སྒྲོལ་མ། །ཕྲག་དོག་རྡོ་རྗེ་དབྱེར་མེད་སྐུ། །ཐམས་ཅད་རྡོ་རྗེ་བཏང་སྙོམས་ཉིད། །རྡོ་རྗེ་གཽ་རཱི་ཕྱག་འཚལ་བསྟོད། །ཅེས་པ་འདི་གཤེད་ནག་གི་ལྷ་བཅུ་གསུམ་སོ་སོའི་སྒྲུབ་ཐབས་དཱི་པཾ་ཀ་ར་ཛྙཱ་ནས་མཛད་པ། ཀོར་ནི་རུ་པས་བསྒྱུར་བ་ན་ཡོད། ལར་ནས་རྒྱུད་ཀྱི་ཚིག་ཡིན་རིགས་སུ་འདུག །གཤེད་སྐོར་བ་རྙིང་བ་གཞན་གྱི་ལུགས་ལ་མི་འདུག་ཀྱང༌། བུ་སྟོན་མན་ཆད་ཕྱིས་བྱོན་ཅི་རིགས་པ་རྣམས་མཛད་ཀྱིན་འདུག་པ་བཞིན། དམར་ནག་འཇིགས་བྱེད་བཅུ་གསུམ་མ་ལུགས་གཞན་རྣམས་ལའང༌། བསྟོད་པའི་སྐབས་ཁ་བསྐང་བས་ལེགས་པར་འོང༌། དེང་ཡང་བདག་བསྐྱེད་ཀྱི་མཆོད་བསྟོད་བདུད་རྩི་མྱང་བ་ལ་མི་དགོས་ཀྱང༌། མདུན་བསྐྱེད་ཀྱི་བསྟོད་པ་ལ་ཅི་རིགས་སུ་སྦྱར་རོ། །བདུད་རྩི་བྱིན་རླབས་ཀྱི་སྐབས། དེའི་སྟེང་དུ་ཅུང་ཟད་མ་རེག་པར། ཧཱུཾ་ལས་སྐྱེས་པའི་རྡོ་རྗེ་དཀར་པོ། ཞེས་དང༌། རྡོ་རྗེ་དཀར་པོས་རྫས་རྣམས། ཞེས་འདོན་པ་སྤོ་ཞིང༌། གཞུང་ལས་ཀྱང་དེ་ཁོ་ན་ཡོད་མོད་སྤྱིར་ནས་ནག་པོ་ལ་ཡང་དབྱུག་བ་དཀར་པོ་མི་འགལ་ཏེ། དེ་ནི་ལྷའི་ཕྱག་མཚན་གྱི་དབང་དུ་བྱས་པ་མིན་བདུད་རྩིའི་དོན་དུ་ཁ་ཊྭཱཾ་ག་དཀར་པོ་ཉིད་ཀྱིས་སོ། །གཏོར་ཆོག་གི་སྐབས་གཏོར་མ་བྱིན་རླབས་ནང་མཆོད་ཀྱི་སྐབས་ཁོ་ན་དང་འདྲ། གཏོར་མགྲོན་ཕྱོགས་སྐྱོང་རྣམས་ལ་ཕུར་བུས་བཏབ་ཟིན་མ་ཐག །ཡེ་ཤེས་པར་བསྒྱུར་

― TNT06_Page_0766 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་སྐབས་སུ་དམར་པོའི་ལུགས་ལ་ལྷ་ཚོགས་ཐམས་ཅད་ཞལ་གཅིག་ཕྱག་གཉིས་པ་ཡིན་ཞིང༌། གཤིན་རྗེ་གཤེད་ཀྱི་ཕྱག་མཚན་འཛིན་དགོས་པའི་རྒྱུ་མཚན་གྱིས། ཕྱོགས་སྐྱོང་སོ་སོའི་ཕྱག་མཚན་འཛིན་པ་མེད་ལ། དེ་ལ་ཡང་ཕྱོགས་སྐྱོང་སོ་སོ་རང་མདོག་དང་མཐུན་པར། མཐར་བྱེད་རིགས་ལྔ་སོ་སོར་སྐྱེད་དུ་རུང་མོད་ཀྱང༌། ཐམས་ཅད་གཙོ་བོའི་རྣམ་འཕྲུལ་ལས་བྱུང་བ་ཉིད་ཀྱི་ཕྱིར། འཇུག་པ་བདེ་བས། ཞེ་སྡང་གཤིན་རྗེ་གཤེད་དམར་པོའི་རྣམ་པ་ཁོ་ནས་རང་རང་གི་བཞོན་པ་ལ་གནས་པ་བསྒོམ་པ་ཡིན་ལ། འདིར་ཡང་བསྡུས་པ་ལ་དགའ་བས་དེས་རིགས་བསྒྲེས་ན་རུང་ངོ༌། །འོན་ཀྱང་ལྕོགས་ན་དཀྱིལ་ཆོག་ལས་གསལ་བ་ལྟར། སོ་སོར་བསྐྱེད་ན་བཟང་སྟེ། ཕུར་བུས་བཏབ་པས་བྱང་ཆུབ་ཀྱི་སེམས་ཀྱི་ཐིག་ལེར་གྱུར། ཐིག་ལེ་རྣམས་ཡོངས་སུ་གྱུར་པ་ལས། ཤར་དུ་ཧྲཱིཿདང་རྡོ་རྗེ་ལས་བྱུང་བའི་དབང་པོ་དམར་སེར། དུད་སྔོ་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པ། ལྷག་མ་གཡས་གཉིས་ཀྱིས་རྡོ་རྗེ་དང་རལ་གྲི། གཡོན་གཉིས་ཀྱིས་འཁོར་ལོ་དང་པདྨ། ལྷོར་ཥྚཱིཿདང་དབྱུག་པ་ལས། གཤིན་རྗེ་སྔོན་པོ་སྔོ་དཀར་དམར་བ། གཡས་གཉིས་དབྱུག་པ་དང་རལ་གྲི། གཡོན་དེ་དང་འདྲ། ནུབ་ཏུ་བི་དང་སྦྲུལ་ཞགས་ལས། ཆུ་ལྷ་དཀར་པོ་དཀར་ནག་དམར། གཡས་གཉིས་སྦྲུལ་ཞགས་དང་རལ་གྲི། གཡོན་སྔ་མ་དང་འདྲ། བྱང་དུ་ཀྲི་དང་བི་ཛ་པུ་ར་ལས། གནོད་སྦྱིན་སེར་པོ་སེར་ནག་དཀར་བ། གཡས་གཉིས་བི་ཛ་པུ་ར་དང་རལ་གྲི། གཡོན་འདྲ། བྱང་ཤར་དུ་ཏ་དང་རྩེ་གསུམ་ལས། དབང་ལྡན་དཀར་པོ་དཀར་ནག་དམར། གཡས་གཉིས་རྩེ་གསུམ་དང་རལ་གྲི། གཡོན་གཉིས་འཁོར་ལོ་དང་ནོར་

― TNT06_Page_0767 ―

^{[མ་དཔེ་གཟིགས་ན་འདིར་གནོན།]}

[Full Size]

བུ། རང་འོད་ཀྱི་གཽ་རཱི་འཁྱུད་པ། ཤར་ལྷོར་ཨ་དང་མེ་ཐབ་ལས། མེ་ལྷ་དཀར་པོ་དམར་ནག་དཀར། གཡས་གཉིས་སྤྱི་བླུགས་དང་རལ་གྲི། གཡོན་གཉིས་ནོར་བུ་དང་པདྨ། ལྷོ་ནུབ་ཏུ་ན་དང་གྲི་གུག་ལས། སྲིན་པོ་ནག་པོ་ཞེ་སྡང་གཤིན་རྗེ་གཤེད་ལྟ་བུའམ། གཡས་གཉིས་རལ་གྲི་དང་རྡོ་རྗེ་ཞེས་བྱ། ནུབ་བྱང་དུ་ན་དང་རླུང་རས་ལས། རླུང་ལྷ་ལྗང་ཁུ་ལྗང་ནག་དཀར། གཡས་གཉིས་བ་དན་དང་རལ་གྲི། གཡོན་གཉིས་པདྨ་དང་ནོར་བུ། སྟེང་གི་གཡོན་དུ་ཧཱུཾ་དང་མེ་ཏོག་ཀུ་མུ་ཏ་ལས། ཟླ་བ་དཀར་པོ་དཀར་ནག་དམར། གཡས་གཉིས་ཀུ་མུ་ཏ་དང་རལ་གྲི། གཡོན་གཉིས་འཁོར་ལོ་དང་ནོར་བུ་འཛིན་པ། སྟེང་གི་གཡས་སུ་ཧཱུཾ་དང་པདྨ་ལས། ཉི་མ་དམར་པོ་དམར་ནག་དཀར་བ། གཡས་གཉིས་པདྨ་དང་རལ་གྲི། གཡོན་གཉིས་འཁོར་ལོ་དང་ནོར་བུའོ། ཁ་ཅིག་ལ་འཁོར་ལོའི་དོད་དུ་པདྨའོ། །སྟེང་གི་དབུས་སུ་ཕཊ་དང་བགྲང་འཕྲེང་ལས། ཚངས་པ་སེར་པོ་སེར་ནག་དཀར་པོ། གཡས་གཉིས་བགྲང་འཕྲེང་དང་རལ་གྲི། གཡོན་གཉིས་པདྨ་དང་ནོར་བུ་འཛིན་པ། འོག་ཏུ་ཕཊ་དང་བུམ་པ་ལས། སའི་ལྷ་མོ་སེར་མོ་སེར་ནག་དཀར་བ། གཡས་གཉིས་བུམ་པ་དང་རལ་གྲི། གཡོན་གཉིས་པདྨ་དང་ནོར་བུ། ཁ་ཅིག་ལས་བུམ་པའི་དོད་དུ་འཁོར་ལོའོ། །དེའི་གཡས་སུ་སྭཱ་དང་རལ་གྲི་ལས། ཐགས་བཟང་རིས་སྔོན་པོ་སྔོ་དཀར་དམར་བ། གཡས་གཉིས་རལ་གྲི་དང་རྡོ་རྗེ། གཡོན་གཉིས་པདྨ་དང་འཁོར་ལོ། ཤར་གྱི་གཡོན་དུ་ཧཱ་དང་ག་དའི་དབྱུག་པ་ལས་ཁྱབ་འཇུག་སྔོན་པོ། སྔོོ་དཀར་དམར། གཡས་གཉིས་དབྱུག་པ་དང་རལ་གྲི། གཡོན་གཉིས་པདྨ་དང་འཁོར་ལོ། གནོད་སྦྱིན་གྱི་

― TNT06_Page_0768 ―

^{[མ་དཔེ་གཟིགས་ན་འདིར་གནོན།]}

[Full Size]

གཡོན་དུ་ཧཱ་དང་དགྲ་སྟ་ལས། ཚོགས་བདག་དཀར་པོ་སྟེ། ཞལ་མདོག་ལ་ཟངས་ཀར་འགྱུར་ལས་དཀར་སེར་དམར་བར་འབྱུང་ནའང༌། ཡི་གེ་མ་དག་པར་མངོན་ཏེ། འདི་དང་འདུས་པ་ཡེ་ཤེས་ཞབས་ལུགས་ཀྱི་ལྷ་ཞལ་གསུམ་པ་རྣམས་ལ་ཁ་དོག་ངེས་ཅན་ཡོད་པ་དང་འགལ་བའི་ཕྱིར་རོ། །དེས་ན་འགྱུར་གཞན་ལས་འབྱུང་བ་ལྟར། དཀར་ནག་དམར་བ། གཡས་གཉིས་དགྲ་སྟ་དང་རལ་གྲི། གཡོན་གཉིས་པདྨ་དང་འཁོར་ལོའོ། །གཤིན་རྗེ་དང་སྲིན་པོ་ཆེས་ཆེར་ཁྲོས་པའི་ཁྲོ་བོའི་ཆ་བྱད་རྫོགས་པ། གཞན་རྣམས་རོལ་པའི་ཁྲོ་བོའོ། །དེ་གཉིས་དང་ཐགས་བཟང་རིས་དང༌། མེ་ལྷ་ཉི་མ་རྣམས་ཉི་མའི་གདན་ལ་གནས་ཤིང༌། གཞན་རྣམས་ཟླ་བའི་གདན་ལ་གནས་པ། དབང་པོ་ཆུ་ལྷ་གནོད་སྦྱིན་རྣམས་རིན་པོ་ཆེའི་ཅོད་པན་ཅན། ཐམས་ཅད་ཀྱང་གཤིན་རྗེ་གཤེད་པོའི་ལྷ་ཚོགས་རྣམས་དང་ཆ་བྱད་མཚུངས་ཤིང༌། རང་འདྲའི་ཡུམ་དང་མཉམ་པར་སྦྱོར་བ། གཡོན་བརྐྱང་གི་སྟབས་ཀྱིས་རང་རང་གི་བཞོན་པ་ལ་གནས་པའོ། །ཟངས་ཀར་འགྱུར་ལས། བརྒྱ་སྦྱིན་དམར་སྐྱ་ཞེས་འབྱུང་བ་ནི་རྒྱ་སྐད་གཽ་རཱ་ཞེས་པ་དཀར་པོ་དང་སེར་པོ་སྐབས་ཐོབ་སོ་སོས་འཇུག་ཚུལ་ཡོད་པ། སྐབས་འདིར་སེར་པོར་བསྒྱུར་དགོས་རྒྱུ། སྐྱེ་བོར་བསྒྱུར་བས་ནོར་བ་དང༌། ནག་ཚོ་འགྱུར་ལས། ཁྱབ་འཇུག་གི་ཕྱག་མཚན་ག་ད་སྲུབ་ཤིང་དུ་བསྒྱུར་བ་ཡང་འགྱུར་ནོར་བ་སྟེ། ག་ད་ནི་དབྱུག་པ་རིང་པོ་དཀར་པོ་ཏོག་ཅན་ཅིག་གི་མིང་ཡིན་ནོ། །འདིའི་ཐད་ཀྱི་ཕྱག་མཚན་ལ་དཔེ་མི་མཐུན་པ་ཅུང་ཟད་འདུག་ཀྱང་དཔེ་མང་པོ་ལ་གཏུགས་ཏེ། དག་པར་བྱས་མོད་གདོད་ནས་ཀྱང་ཡེ་ཤེས་ཞབས་ལུགས་ཁུངས་མ་དང་མི་མཐུན་པ་ཅུང་ཟད་སྣང་ངོ༌། །ཐམས་ཅད་ཀྱི་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབས། དབང་བསྐུར་རྒྱས་

― TNT06_Page_0769 ―

^{[མ་དཔེ་གཟིགས་ན་འདིར་གནོན།]}

[Full Size]

བཏབ་བྱས་ཏེ། གཤིན་རྗེ་གཤེད་ཀྱིས་དབུ་བརྒྱན། ཡང་ན་བརྒྱ་སྦྱིན་མེ་ལྷ་གཤིན་རྗེ་སྲིན་པོ་ཁྱབ་འཇུག་རྣམས་ལ་མི་བསྐྱོད་པའི་དབུ་རྒྱན་ཅན། ཚངས་པ་དང་ས་ལྷ་དང་ཐགས་བཟང་རིས་ལ་རྣམ་སྣང༌། ཆུ་ལྷ་གནོད་སྦྱིན་ཚོགས་བདག་རྣམས་ལ་རིན་འབྱུང༌། དབང་ལྡན་ཟླ་བ་ཉི་མ་རྣམས་ལ་འོད་དཔག་མེད། རླུང་ལྷ་ལ་དོན་གྲུབ་ཀྱིས་དབུ་བརྒྱན་པར་བྱེད་པའམ། རིགས་ཀྱི་རིམ་པ་དེ་ལས་རིགས་ལྔ་ཁྲོ་བོས་རྒྱས་བཏབ་ཀྱང་རུང་ངོ༌། །འདི་ནི་སྐྱེད་ཆོག་རྒྱས་པའི་ལུགས་ཏེ། འདུས་པ་ཞབས་ལུགས་ཀྱི་རྗེས་སུ་འབྲང་བ་ཡིན་ནོ། །འཇིག་རྟེན་ལས་འདས་པའི་གཏོར་མ་འབུལ་བའི་སྔགས་ནི། ཨོཾ་ཧྲཱིཿཥྚཱིཿཝི་ཀྲི་ཏཱ་ན་ན་ཨི་དཾ་བ་ལིང་གྲྀཧྣ་གྲྀཧྣ་སརྦ་དུཥྟན་ས་མ་ཡ་མུ་དྲ་པྲ་བྷཉྫ་ཀ ། མ་མ་ཤཱནྟིང་རཀྵ་ཙ་ཀུ་རུ་ཀུ་རུ་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་གཙོ་བོ་དང༌། འཁོར་རྣམས་ལའང་སོ་སོའི་བཟླས་པའི་སྔགས་ཀྱི་ནང་དུ་གཏོར་སྔགས་བཅུག །ཨོཾ་ཨཱཿཛི་ན་ཛིཀ་ཨི་དཾ་བ་ལིང་སོགས་སྦྱར་བའམ། ཡི་གེ་བཅུ་བདུན་པའམ་ཡི་གེ་སོ་གཉིས་པའི་མཐར། ཨི་དཾ་སོགས་སྦྱར་བས་གཙོ་འཁོར་ཐམས་ཅད་ལ་དུས་གཅིག་ཏུ་འབུལ། གཤེད་དམར་ལ་ཕྱོགས་སྐྱོང་གི་གཏོར་མའི་སྔགས་ཀྱི་མཇུག་ཏུ། ཧ་ཧི་ཧཱུཾ་ཕེཾ་རྣམས་གསུམ་གསུམ་ཡོད་ཀྱང༌། འདིར་དེ་དག་གཉིས་གཉིས་ཁོ་ནའོ། །དེ་ཙམ་མ་གཏོགས་གཞན་ནི་ཁྱད་མེད་དོ། །དེ་ལྟར་ན་གཤིན་རྗེ་གཤེད་འབྱུང་བའི་རྗེས་འབྲང༌། དགྲ་ནག་ཞང་ལུགས་སུ་གྲགས་པ་ནི་ལོགས་སུ་བཤད་ཟིན་ལ། གཞན་རྭ་ལུགས་དང་མལ་ལུགས་སོགས་ཀྱི་ཡི་གེ་རྙིང་པ་རྣམས་ན་ཕྲན་ཚོགས་མི་འདྲ་བ་སྣ་ཚོགས་སུ་ཡོད་ཀྱང༌། དོན་གྱི་རྐངས་མི་འདྲ་བ་མེད་ཅིང༌། གནད་གཅིག་པར་ཡོད་ལ། ཁོ་བོས་ཞང་ལུགས་ཀྱི་ལག་ལེན་དབང་བསྐུར་ལོགས་སུ་ཐོབ་ཅིང༌། བརྒྱུད་པ་གཞན་རྣམས་ལ་དེ་དང་དེ་དག་གི་ཡིག་

― TNT06_Page_0770 ―

^{[མ་དཔེ་གཟིགས་ན་འདིར་གནོན།]}

[Full Size]

རྙིང་སོ་སོའི་སྟེང་ནས། ལག་ལེན་ཐ་དད་དུ་མ་ཐོབ་ཀྱང༌། བུ་སྟོན་ཆེན་པོ་ལ་སོགས་པ་བླ་མ་གོང་མ་རྣམས་ཀྱིས་བརྒྱུད་པ་རྙིང་མ་ལུགས་སོ་སོ་ཐ་དད་པ་ཕལ་ཆེར་གསན་ཅིང༌། གཅིག་ཏུ་དྲིལ་ནས་ཐམས་ཅད་ཀྱི་ལེགས་ཆ་བསྡུས་ཤིང༌། གཙོ་བོར་སློབ་དཔོན་དཔལ་འཛིན་གྱི་སྒྲུབ་དཀྱིལ་ལ། གཞུང་བསྲངས་པའི་ཡི་གེ་བརྩམ་ཤིང་ལག་ལེན་མཛད་པ་ལྟར། བརྒྱུད་པ་ཀུན་འདུས་སྤྱི་འགྲོས་ཀྱི་ལུགས་དེ་ཐོབ་པས། དེ་ལ་སྔོན་གྱི་ལུགས་སྲོལ་མཐའ་དག་གི་བྱིན་རླབས་བརྒྱུད་པ་འདུས་པ་ཡིན་ལ། འདིར་ནི་ཁོ་བོས་སློབ་དཔོན་གཞན་གྱི་གཞུང་མི་འདྲ་བ་སྣ་ཚོགས་དང༌། བོད་རྙིང་པའི་འདོད་ཚུལ་ཐ་དད་པ་སྣ་ཚོགས་དང༌། བར་སྐབས་སུ་བྱུང་བའི་བློ་བཟོ་རྒྱས་བཀབ་སྣ་ཚོགས་སྤངས་ཏེ། སློབ་དཔོན་དཔལ་འཛིན་ཉིད་ཀྱི་བཞེད་པ་གཙང་མར་བཀོད་པ་ཡིན་ནོ། །བར་སྐབས་ཀྱི་ཡི་གེ་མང་པོར་སོ་སོའི་ཞལ་གདམས་མན་ངག་གི་ཁྱད་པར་རྣམས་སྤངས་ནས། དཔལ་འཛིན་གྱི་གཞུང་ཁོ་ན་ལ་བློ་བརྟད་འཆའ་བར་འདོད་བཞིན་དུ། གཞུང་འདི་དང་མ་འབྲེལ་བའི་དཔེ་སྣ་སྣ་ཚོགས་བསྡུས་པའི་བཅོས་བཏབ་པས། རྩ་བའི་རང་གཞུང་དང་འགལ་བར་གྱུར་བ་དག་མཐོང་སྟེ་སྙིང་པོས་དབེན་ནོ། །དེས་ན་བརྒྱུད་པ་ཡོད་མེད་ཀྱི་གཞུང་སྣ་ཚོགས་ནས་བསྡུ་ཕྱིན་ཆད། བརྒྱུད་པ་ཡོད་པའི་མན་ངག་ཏུ་འདོད་པ་རྣམས་སྤང་དུ་མི་རུང་ལ། ཁུངས་གསལ་ཅན་གྱི་གཞུང་ཉིད་གཙོ་བོར་འཇོག་ཕྱིན། འདོད་པ་ཐ་དད་པའི་གཞུང་སྣ་ཚོགས་ཕྱོགས་གཅིག་ཏུ་སྡེབ་པ་དགོས་པ་མེད་པས། དེ་དག་གང་བྱེད་རུང་རྩ་བའི་གཞུང་དང་འགལ་ན་ནི་ཅིར་ཡང་མི་རུང་བས་འབད་དེ་སྤང་པར་བྱའོ། །དམར་ནག་བཅུ་གསུམ་མ་འདི་གཉིས་ཀྱི་དཀྱིལ་ཆོག་ནི། རྡོ་རྗེ་སློབ་དཔོན་དཔལ་འཛིན་ཉིད་ཀྱིས་གཉིས་ཀ་ལ་དཀྱིལ་ཆོག་མཛད་པ་དེའི་སྟེང་ནས་སྒྲུབ་དགོས་མོད། ཕྱོགས་སྐྱོང་གི་གཏོར་ཆོག་ཡོད་མེད་སོགས་ཕྲན་ཚེགས་དང༌། འགྱུར་ཁྱད་མ་གཏོགས་དོན་ལ་ཁྱད་ཅི་ཡང་མེད་པས་

― TNT06_Page_0771 ―

^{[མ་དཔེ་གཟིགས་ན་འདིར་གནོན།]}

[Full Size]

དབང་བསྐུར་དཀྱིལ་འཁོར་གྱི་ཆོ་ག་གཅིག་ཁོ་ནས་ཆོག་གོ །ད་ནི་གཤིན་རྗེ་གཤེད་ཀྱི་སྒྲུབ་པའི་ཐབས་ཀྱི་རིམ་པ་འདི་དག་གི་སྦྱང་བྱ་སྦྱོང་བྱེད་ཀྱི་རིམ་པ་ཅུང་ཟད་བརྗོད་ན། དེ་ཡང་ཆོ་གས་རྟེན་མཆོག་དམན་གཉིས་ལ་ཚོགས་བསག་པ་ནི། སྔོན་རོལ་ཀྱི་སྐྱེ་བའི་དུས་ན། ཕྱིས་ཀྱི་སྐྱེ་བ་འཕེན་བྱེད་ཀྱི་ལས་གསོག་པ་དང་འདྲ། དེ་ལས་ཀྱང་རང་ལྷར་གསལ་བ་དང་ཐུགས་ཀའི་ས་བོན་ནི། སྐྱེ་བ་བླངས་ནས་ལུས་རྫོགས་པའི་བར་དང་མཚུངས། འོད་ཟེར་སྤྲོ་བ་མན་ཆད་ནི་གསོན་པོའི་གནས་སྐབས་ན་ལས་སྣ་ཚོགས་ལ་འཇུག་པ་དང་འདྲའོ། །ཡེ་ཤེས་ཚོགས་གསོག་ནི་དེ་དུས་ཀྱི་ཕུང་པོ་དོར་ནས། སེམས་འཆི་བ་འོད་གསལ་ལ་ཞུགས་པ་དང་འདྲ་སྟེ། སྔོན་རོལ་ཀྱི་སྐྱེ་བ་མང་པོ་དག་ཏུ། སྐྱེས་འཚོ་འཆི་བ་གསུམ་གྱི་རིམ་པ། ཕྲུགས་མི་གཅིག་པ་ཡང་ཡང་བྱུང་མོད་ཀྱང༌། སྐྱེས་འཚོ་འཆི་བ་གསུམ་གྱི་རྣམ་པར་མཐུན་པའི་ཕྱིར། སྦྱང་བྱ་གནས་སྐབས་དུ་མ་རྣམས། སྦྱོང་བྱེད་དམིགས་པ་གཅིག་གིས་སྦྱོང་པའི་དབང་དུ་བྱས་སོ། །དེས་ནས་སྦྱང་བྱ་སྐྱེས་འཚོ་འཆི་གསུམ་ནི། ད་ལྟ་འཕངས་ཤིང༌། ཕྱིས་རྫོགས་པར་འགྱུར་བའི་སྐྱེ་བ་དེའི་གནས་སྣོད་ཀྱི་འཇིག་རྟེན་མ་གྲུབ་པའི་སྔོན་རོལ་ན་ཡང་འགའ་ཞིག་ཡོད་ལ། གནས་ནི་གྲུབ་ཕ་མ་མ་གྲུབ་པའི་དུས་ནའང་ལ་ལ་དག་ཡོད་ཅིང༌། ཕྱིས་ཀྱི་སྐྱེ་སྲིད་དེ་ལ་ལྟོས་པའི་ཕ་མའི་ལུས་གྲུབ་པའི་གནས་སྐབས་ན་ཡང་འགའ་ཞིག་ཡོད་མོད་ཀྱི། སྦྱོང་བྱེད་ལམ་གྱི་དམིགས་པའི་སྐབས་འདིར། ཐོག་མའི་ཚོགས་བསག་དེ་ཁོ་ནས། དེ་ཐམས་ཅད་ཀྱི་སྦྱོང་བྱེད་འགྲུབ་པའི་ཕྱིར། གཞལ་ཡས་ཁང་དང་ལྷན་ཅིག་ཏུའམ། རྒྱུ་རྡོ་རྗེ་འཆང་དང་ལྷན་ཅིག་ཏུ་སྔ་རོལ་ཀྱི་སྐྱེ་འཚོ་འཆི་གསུམ་སྦྱོང་བྱེད་ལོགས་པ་བསྒོམ་མི་དགོས་སོ། །སྲུང་འཁོར་གཞལ་ཡས་ཁང་ལྷའི་གདན་དང་བཅས་པ་བསྒོམ་པ་ནི། གང་དུ་སྐྱེ་བ་ལེན་འགྱུར་གྱི་གནས་སྣོད་ཀྱི་འཇིག་རྟེན་སྤྱི་དང༌། ཐུན་མོང་མ་ཡིན་པའི་

― TNT06_Page_0772 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྱད་པར་རྣམས་གྲུབ་པ་དང་འདྲ་ཞིང༌། སྲུང་འཁོར་ནི་སྐྱེ་བ་ལེན་པའི་མི་མཐུན་ཕྱོགས་རྣམས་བཅོམ་པ་དང་འདྲའོ་ཞེས་ཁ་ཅིག་གོ །མངོན་བྱང་ལྔ་ལས་རྒྱའི་རྡོ་རྗེ་སེམས་དཔའ་གྲུབ་པ་ནི། སྲིད་པ་སྐྱེ་བའི་རིམ་པས་སྐྱེ་བའི་རྒྱུ་རྐྱེན་ཕ་མ་གཉིས་ཀྱི་ལུས་རྫོགས་པ་སྦྱོང་ངོ༌། །དེ་ལ་ཟླ་བ་གཉིས་ནི་ཕ་མའི་ཡང་ཕ་མ་གཉིས་ལུས་ལ་གནས་པའི་ཁམས་དཀར་དམར་དང༌། གཅིག་ཏུ་འདྲེས་པ་ནི་དཀར་དམར་དེ་གཉིས་མའི་མངལ་གནས་སུ་འཛོམས་པ་དང༌། ཧཱུཾ་ཡིག་ནི་ཕ་མ་དེ་དག་ཉིད་ཀྱི་བར་དོའི་རྣམ་ཤེས་དང༌། ཕྱག་མཚན་ནི་དེར་སྐྱེ་བ་གཟུང་མ་ཐག་པ་དང༌། སྤྲོ་བསྡུ་གཅིག་འདྲེས་ནི་མངལ་དུ་ལུས་རྫོགས་པ་དང༌། སྐུ་རྫོགས་པ་ནི། མངལ་ནས་བཙས་ཏེ་ལུས་རྫོགས་པའི་བར་རོ། །འདི་ནི་སྐྱེ་སྲིད་འབྱུང་འགྱུར་དེའི་དངོས་ཀྱི་ཕ་མར་མ་ཟད། ལས་མཐུན་པའི་མེས་ཡང་མེས་ཕྱི་མོ་ཡང་ཕྱི་མོ་སོགས་མཐའ་མེད་པའི་བར་དུ། དེ་ཐམས་ཅད་ཀྱི་ལུས་གྲུབ་ཚུལ་རྣམས་དམིགས་པ་འདི་གཅིག་པུས་སྦྱོང་ངོ༌། །དེ་དག་ཕ་མར་འགྱུར་བའི་ལས་རང་ལ་ཡོད་པ་རྣམས་སྦྱོང་བར་མ་ཟད། རང་ཉིད་འགྲོ་བ་གཞན་གྱི་ཕ་མ་སོགས་སུ་འགྱུར་བའི་ལས་རྣམས་ཀྱང་དག་པར་བྱེད་དོ། །དེ་རྗེས་གཤིན་རྗེ་གཤེད་དམར་པོ་སྒྲུབས་ཐབས་སུ། སྣོད་བཅུད་དག་པར་བྱས་ནས་བདེ་བ་བསྒོམ་ཡོད་པ་ལྟར་ན། ཕ་མ་དེ་དག་ཡུལ་སྣ་ཚོགས་དང་འདོད་པ་ཐམས་ཅད་ལ་ལོངས་སྤྱོད་པ་མཚོན་ཅིང༌། ནག་པོའི་མངོན་རྟོགས་ན་རང་གཞུང་ལ་མེད་ཀྱང་དམར་པོ་ནས་འདི་ཁ་བསྐང་ན་ལེགས་པར་འགྱུར་ལ། གཞུང་གི་དངོས་བསྟན་ལྟར་མ་བྱས་ཀྱང་ཆད་པར་མི་འགྱུར་ཏེ། འདིའི་དག་སྦྱོར་རྣམས་རྡོ་རྗེ་སེམས་དཔའ་ཁ་སྦྱོར་གྱི་སྐུ་ཉིད་ལ་འདུས་པར་བལྟའོ། །ཡི་གེ་ལྔ་ནི་སྐྱེ་སྲིད་ལེན་འགྱུར་གྱི་བར་དོ་སྦྱོང་བྱེད་དང༌། དེ་ཉིད་རྡོ་རྗེ་འཆང་གི་སྐུ་ལ་ཞུགས་ཏེ་ཞུ་བ་ནི། བར་སྲིད་དེ་ཉིད་མངལ་དུ་སྐྱེ་བ་བླངས་པ་དང༌། གླུས་བསྐུལ་བ་ནི་མངལ་གྱི་གནས་སྐབས་འཕེལ་བ་དང༌། ཐིག་ལེ་ས་བོན་ཕྱག་མཚན་འོད་ཟེར་སྤྲོ་བསྡུ་རྣམས།

― TNT06_Page_0773 ―

^{[མ་དཔེ་གཟིགས་ན་འདིར་གནོན།]}

[Full Size]

མངལ་གྱི་གནས་སྐབས་རྫོགས་པ་དང༌། འབྲས་བུ་རྡོ་རྗེ་འཛིན་པར་བཞེངས་པ་ནི་མངལ་ནས་བཙས་པ་དང་མཚུངས་པ་ཡིན་ལ། འདི་མན་ཆད་ལ་འདུས་པ་ཞབས་ལུགས་སོགས་དང་མཐུན་རུང་དུ་སྒྲིག་པའི་དབང་དུ་བྱས་ནས་སྔ་རབས་པ་མང་པོ་ཞིག་འདི་སྐད་ཅེས་འཆད་དེ། སེམས་དཔའ་གསུམ་བརྩེག་ནི་ལུས་ངག་ཡིད་གསུམ་གྱི་མཐུ་རྫོགས་པར་གྱུར་གྱི་བར་ལ་སྦྱོར། གཞན་ཡང་སེམས་དཔའ་གསུམ་ནི། རགས་པ་དང༌། ཕྲ་བ་དང༌། ཤིན་ཏུ་ཕྲ་བའི་རིམ་པས། ལུས་དང་རླུང་དང་འོད་གསལ་མཚོན་པར་གསང་འདུས་ལུགས་གཉིས་ལས་འཆད་པ་ལྟར་ཡིན་ནོ། །གཤེད་དམར་ལ་སྐབས་འདིར་རྗེས་ཆགས་བསྒོམ་པ་ནི། ཐིག་ལེ་རྫོགས་པ་དང༌། ཤེས་རབ་འཕེལ་བ་ནི། རིམ་གྱིས་བློ་ནུས་རྫོགས་པ་དང༌། བྱང་ཆུབ་མཆོག་གི་ང་རྒྱལ་ཡང༌། སྔོན་འཕངས་པའི་འབྲས་བུ་རྣམས་རྫོགས་པ་སྟེ། གསུམ་པོ་འདི་ལོ་བཅུ་དྲུག་ལོན་པའི་མཐའ་དང་སྦྱོར་རོ། །ནག་པོའི་མངོན་རྟོགས་ལྟར་ན་བྱང་ཆུབ་མཆོག་གི་ང་རྒྱལ་བཟུང་བ་ཡན་ཆད། ལོ་བཅོ་ལྔ་ཚུན་ཆོད་དུ་སྔོན་གྱིས་འཕངས་པའི་རྣམ་སྨིན་ལ་གཙོ་བོར་སྤྱོད་པ་དང་སྦྱར་ནས། རྗེས་ཆགས་ནི་ལོ་བཅུ་དྲུག་གི་མཐར། རིགས་དང་མཐུན་པའི་བག་མ་བླང་བ་སོགས་སྦྱོང་བྱེད་དོ། །དེའི་ཚེ་ཕོ་མོ་གཉིས་སྦྱོང་བྱེད་ལ་ལྷ་ཡབ་ཡུམ་གཉིས་སོ་སོར་ཡོད་ཀྱང༌། གཉིས་ཀའི་བར་དོ་དང༌། མངལ་ན་གནས་པ་སྦྱོང་བྱེད་ནི། དམིགས་པ་ཕྲུགས་གཅིག་པོ་དེས་ཆོག་པའོ། །ཤིན་ཏུ་རྣལ་འབྱོར་ནི། དེ་ནས་བུ་དང་བུ་མོ་སོགས་སྐྱེད་པ་སྦྱོང་བ་དང༌། སྐྱེ་མཆེད་བྱིན་རླབས་ནི་དེ་རྣམས་ཀྱི་མིག་སོགས་ཀྱི་ནུས་པ་རྒྱས་པ་དང༌། རྡོ་རྗེ་གསུམ་བྱིན་གྱིས་བརླབ་པ་ཡང་སྒོ་གསུམ་གྱི་ནུས་པ་རྫོགས་པ་དང༌། དབང་བསྐུར་རྒྱས་བཏབ་ནི། རང་རང་གི་རིགས་ཀྱི་བྱ་བ་ལ་གནས་པ་དང༌། མཆོད་བསྟོད་བདུད་རྩི་མྱང་བ་ནི་འདོད་ཡོན་ལ་ལོངས་སྤྱོད་པ་དང༌། ཉེར་བསྡུ་ནི་འཆི་བ་སྦྱོང་བ་དང༌། ཐུན་མཚམས་ཀྱི་ལྷ་སྐུ་ནི་

― TNT06_Page_0774 ―

^{[མ་དཔེ་གཟིགས་ན་འདིར་གནོན།]}

[Full Size]

སླར་ཡང་སྐྱེ་བ་ལེན་པ་སོགས་སྦྱོང་བར་བྱེད་དོ། །ཞེས་པ་འདི་ནི་སྔ་མ་རྣམས་ཀྱི་བཞེད་ཚུལ་ཡིན་ལ། ཀ་མ་ལ་རཀྵི་ཏའི་སྒྲུབ་ཐབས་དང་འགྲིག་པར་འགྱུར་རོ། །བདག་གི་རྣམ་པར་རྟོག་པ་ལྟར་ན། སྐྱེ་མཆེད་བྱིན་རླབས་ནས་དབང་བསྐུར་རྒྱས་བཏབ་ཀྱི་བར་གཙོ་འཁོར་ཐམས་ཅད་ལྷན་ཅིག་ཏུ་སྒྲུབ་པའི་ལུགས་དཔལ་འཛིན་དང་ལ་ལི་ཏ་སོགས་ཀྱི་སྲོལ་ཀ་འདི་ལ། བཤད་མ་ཐག་པ་དེ་ཅུང་ཟད་མི་འགྲིག་པ་ལྟར་སྣང་ལ། སྐབས་འདི་ན་གསང་འདུས་ཡེ་ཤེས་ཞབས་ལུགས་སམ། བདེ་མཆོག་ནག་པོའི་ལུགས་ཀྱི་དཀྱིལ་འཁོར་རྒྱལ་མཆོག་དང༌། གཤིན་རྗེ་གཤེད་དམར་ནག་འདིའི་རྣལ་འབྱོར་ཕྱི་མ་གཉིས་དམིགས་པ་འདྲ་རུང་དུ་ཡོད་ཀྱང༌། གཅིག་གིས་གཅིག་ལ་རྒྱས་མི་ཁེབས་ཏེ། འབྲས་བུ་རྡོ་རྗེ་འཛིན་པར་བཞེངས་པ་ནས། མངལ་དུ་དཀྱིལ་འཁོར་བསྐྱེད་པའི་བར་ལ། རིམ་པ་གཞན་མང་པོ་ཡོད་མེད་ཀྱིས་སྒོ་ནས་ཆོ་ག་རྒྱས་བསྡུས་ཁྱད་ཤིན་ཏུ་ཆེ་བའི་ཕྱིར་རོ། །དེས་ན་འདི་ལྟར་བྱ་སྟེ། འབྲས་བུ་རྡོ་རྗེ་འཛིན་པར་བཞེངས་མ་ཐག་པ་ནི་མངལ་ནས་བཙས་པ་དང༌། དེ་མ་ཐག་ཏུ་རླུང་དང་ཁམས་སྤྲོ་བའི་གཞི་ལེགས་པར་གྲུབ་པ་ནི། སེམས་དཔའ་ནང་མ་གཉིས་དང་དྷརྨ་དྷཱ་ཏུ་ནི་ཆོས་ཀྱི་དབྱིངས་ཏེ་རྒྱུའི་དོན་ཡིན་པས་དེའི་ང་རྒྱལ་བཟུང་བ་ནི། སྔོན་ཀྱི་ལས་ཀྱིས་འཕངས་པའི་བདེ་སྡུག་མྱོང་བའི་འགོ་བརྩམས་པ་སྦྱོང་བ་དང༌། གཤེད་དམར་ལྟར་ན་བདེ་བ་དང༌། བློ་ནུས་འཕེལ་པའི་འགོ་བརྩམས་པ་ཡང་ཡིན་ལ། ནག་པོ་ལྟར་ན་རྗེས་ཆགས་ནི། ལྟེ་བའི་གཏུམ་མོའི་ནུས་པ་རྩ་གནས་ཀྱི་རླུང་གཡོ་བ་དང༌། སངས་རྒྱས་རྣམས་ཞུགས་ཤིང་མཁའ་དཀྱིལ་དུ་གྱུར་པ་ནི། ཕྱི་རོལ་ཀྱི་རླུང་ནང་དུ་ཞུགས་པའི་རྐྱེན་གྱིས་རྩ་གནས་ཐམས་ཅད་དུ་རླུང་གཡོ་ཞིང་འབབ་པ་དང༌། དཀྱིལ་འཁོར་སྤྲོ་ཞིང་དགོད་པ་ནི། དེ་ལྟར་རླུང་བབས་པའི་རྐྱེན་གྱིས་ཕུང་ཁམས་སོགས་རྫོགས་པ་མཚོན་ཏེ། ཕུང་པོ་ལྔ་རིགས་ལྔ། འབྱུང་བ་བཞི་ཡུམ་བཞི། སྒོ་སྐོང་བཞི་ལུས་ཀྱི་ཡན་ལག །ཐོད་པ་

― TNT06_Page_0775 ―

^{[མ་དཔེ་གཟིགས་ན་འདིར་གནོན།]}

[Full Size]

བཞི་དབང་ཡུལ་རྣམས་སོ། །མངལ་དུ་གཞལ་ཡས་ཁང་བསྒོམ་ཞིང་དེ་ལ་དག་སྦྱོར་བྱེད་ན། སྐྲ་སེན་གྱི་མཐར་ཐུག་པའི་ལུས་ཀྱི་ཁོག་པ་སྤྱི་ལ་སྦྱོར་དགོས་ཏེ། འོན་ཀྱང་གཞུང་ལས་མ་བཤད་པས་མ་སྦྱར་ཀྱང་ཆོག །དེ་ལྟར་ན་དེ་དག་གི་བྱིས་པ་བཙས་ནས་མི་རིང་བའི་གནས་སྐབས་སྦྱོང་བྱེད་དང༌། དེ་རྗེས་དབང་པོ་དྲུག་གི་ནུས་པ་འཕེལ་བ་ནི། སྐྱེ་མཆེད་བྱིན་རླབས། སྒོ་གསུམ་གྱི་ནུས་པ་འཕེལ་བ་ནི་རྡོ་རྗེ་གསུམ་བྱིན་རླབས། འཕེལ་བ་རྫོགས་ནས་རང་རིགས་ཀྱི་བྱ་བ་ལ་གནས་པ་ནི་དབང་བསྐུར་རྒྱས་བཏབ་དང༌། ཡུལ་སྣ་ཚོགས་པ་བསྟེན་པ་དང་ལས་སྣ་ཚོགས་ལ་འཇུག་ཅིག་བདེ་སྡུག་མྱོང་བ་ནི། མཆོད་བསྟོད་བདུད་རྩི་མྱང་བ་དཀྱིལ་འཁོར་སྤྲོ་བསྡུ་དང་བཅས་པའོ། །ལྷག་མ་སྔར་དང་འདྲ་སྟེ། དེ་དག་ཀྱང་བདག་ཁོ་ནའི་རྣམ་རྟོག་གསར་པ་འབའ་ཞིག་མ་ཡིན་ཏེ། ས་བོན་ཕལ་ཆེར་བླ་མ་དམ་པ་གང་བའི་རྡོ་རྗེའི་གསུངས་ལས་བྱུང་བའོ། །སྦྱངས་འབྲས་ཀྱི་དག་པ་ལ། ཚོགས་བསག་དང་པོ་ནི། བསྐལ་པ་གྲངས་མེད་གསུམ་དུ་བསོད་ནམས་ཚོགས་བསགས་པ་དང༌། ཚོགས་བསག་གཉིས་པ་ལས་ཐོག་མར་སྟོང་ཉིད་ཀྱི་དོན་བསམ་པ་ཡང༌། ལམ་དུས་སུ་ཡེ་ཤེས་ཀྱི་ཚོགས་སྒྲུབ་པ་ཉིད་དང་སྦྱོར་ཞིང་ཕྱིས་ཤཱུ་ནྱ་ཏའི་སྔགས་བརྗོད་པ་ནས་བརྩམས་ཏེ། ཡི་གེ་ལྔ་བསྐྱེད་པའི་བར་དུ་རྟེན་གྱི་དཀྱིལ་འཁོར་དུ་རྒྱུ་རྡོ་རྗེ་འཛིན་པ་བསྐྱེད་པའི་སྐབས། སོ་སོ་ཐད་ཁ་དེར་རང་རང་གི་ང་རྒྱལ་ཡོད་མོད་ཀྱང༌། ང་རྒྱལ་གྱི་གཙོ་བོ་ནི་སེམས་སྟོང་ཉིད་དུ་ཞུགས་པ་དེ་ལ་ཆོས་ཀྱི་སྐུའི་ང་རྒྱལ་འཇུག་དགོས་པས། ཡེ་ཤེས་ཀྱི་ཚོགས་ཀྱི་ངང་ལ་གནས་པའི་སྐབས་དེ་ནི། འབྲས་བུ་ཆོས་ཀྱི་སྐུ་མཚོན་པའོ། །གང་དུ་སངས་རྒྱ་བའི་ཞིང་ཁམས་ནི། སྲུང་འཁོར་གཞལ་ཡས་ཁང་གདན་དང་བཅས་པས་ལམ་དུ་བྱེད་ལ། སྲུང་འཁོར་ནི་བདུད་བཞི་བཅོམ་པའོ་ཞེས་ཕལ་ཆེར་

― TNT06_Page_0776 ―

^{[མ་དཔེ་གཟིགས་ན་འདིར་གནོན།]}

[Full Size]

སྨྲ་སྟེ། དེ་ལྟར་སྦྱོར་ན་ནི། རྡོ་རྗེ་གདན་དུ་བདུད་བཏུལ་བའི་མཛད་པ་ཚུལ་སྟོན་པ་དེ་དང་ཤིན་ཏུ་འགྲིག་པ་མ་ཡིན་པས། ནམ་སངས་རྒྱས་པ་ན་སྒྲིབ་གཉིས་སྤངས་པ་ཉིད་ལ་བདུད་བཏུལ་བ་ཞེས་བྱ་སྟེ། འདི་དང་སྦྱར་ན་འགྲིག་གོ །མངོན་བྱང་ལྔ་ནི་ཡེ་ཤེས་ལྔ་དང༌། ཨཱ་ལི་ཀཱ་ལི་ནི་མཚན་དཔེ་སྟེ་ཟླ་བ་སྐུ་དང༌། ས་བོན་གསུང༌། ཕྱག་མཚན་ཐུགས། འོད་ཟེར་སྤྲོ་བསྡུ་འཕྲིན་ལས་ཏེ། དེ་དག་དང་ལྡན་པའི་རྒྱུ་རྡོ་རྗེ་འཛིན་པ་ནི་ལོངས་སྤྱོད་རྫོགས་སྐུའོ། །དེ་ནས་ཡི་གེ་ལྔ་ལས། འབྲུ་གསུམ་ནི་རྡོ་རྗེ་གསུམ། ཧོཿགཉིས་ནི་སྙིང་རྗེ་ཆེན་པོ་དང་ཐབས་ལ་མཁས་པ་སྟེ། དེ་སྐུ་ལ་ཞུགས་པ་ནི། ཐུགས་སྙིང་རྗེ་ཆེན་པོའི་དབང་དུ་གྱུར་པ་དང༌། སྙིང་རྗེ་ཆེན་པོ་དེ་ཡང་དམིགས་པ་མེད་པ་ཡིན་པ་ནི་ཞུ་བ་དང༌། སྟོང་ཉིད་སྙིང་རྗེ་དབྱེར་མེད་ཀྱི་བྱང་ཆུབ་ཀྱི་སེམས་དེ་ལ་གནས་པ་དེ་ཚད་མེད་བཞིས་བསྐུལ་བ་ནི་གླུས་བསྐུལ་བ་སྟེ། དེ་ནི་ལོངས་སྐུས་སྤྲུལ་པ་སྤྲུལ་པར་མཛད་པའི་རྒྱུ་ཡིན་ལ། འབྲས་བུ་རྡོ་རྗེ་འཛིན་པར་བཞེངས་པ་ནི་སྤྲུལ་པའི་སྐུའོ། །སྤྲུལ་སྐུ་དེ་རྩ་བའི་སྤྲུལ་སྐུ་ཡིན་ལ། བྱང་ཆུབ་མཆོག་མཆོག་གི་ང་རྒྱལ་བཟུང་བ་ནི། དེ་ཡང་ཆོས་སྐུའི་རྣམ་རོལ་ཏུ་ཤེས་པའི་ཕྱིར་དང༌། རྗེས་ཆགས་དཀྱིལ་འཁོར་སྤྲོ་བ་དང་བཅས་པ་ནི། འདོད་ཆགས་ཆེན་པོས་གདུལ་བ་ལ་ཆགས་ལམ་སྟོན་པ་དང༌། ཡན་ལག་གི་སྤྲུལ་པའི་སྐུ་སྣ་ཚོགས་པ་འགྱེད་པར་མཛད་པའོ། །སྐྱེ་མཆེད་བྱིན་རླབས་ནི་ཡོན་ཏན་མཐའ་ཡས་པ་མངའ་བ་དང༌། རྡོ་རྗེ་གསུམ་བྱིན་གྱིས་བརླབ་པ་ནི། སངས་རྒྱས་ཐམས་ཅད་ཡེ་ཤེས་མཉམ་ཉིད་དུ་འདྲེས་པ་དང༌། དབང་བསྐུར་ནི་འཁོར་འདས་ཐམས་ཅད་ཀྱི་འདྲེན་པར་གྱུར་པ་སྟེ། མཆོད་བསྟོད་བདུད་རྩི་མྱང་བ་ནི་མཆོད་པའི་བཀོད་པ་དང༌། སྤྲོ་བསྡུ་ནི་མཛད་པ་སྣ་ཚོགས་པ་དང༌། བཟླས་པ་ཆོས་སྟོན་པ་དང༌། དཀྱིལ་འཁོར་ཉེར་བསྡུ་ནི་ལ་ལར་སྤྲུལ་པའི་སྐུ་མི་སྣང་བར་འགྱུར་བ་དང༌། ཐུན་མཚམས་ཀྱི་ལྷ་སྐུ་ནི་ཕྱོགས་གཞན་དུ་སྤྲུལ་སྐུ་སྣང་བས་མཛད་པ་རྣམས་སོ། །ཡང་རྫོགས་རིམ་གྱི་

― TNT06_Page_0777 ―

^{[མ་དཔེ་གཟིགས་ན་འདིར་གནོན།]}

[Full Size]

སྨིན་བྱེད་དུ་འགྱུར་ཚུལ་མདོ་ཙམ་དུ་བརྗོད་ན། ཡེ་ཤེས་ཚོགས་གསོག་ནི་སྟོང་ཕྱོགས་ཁོ་ནི་རྫོགས་རིམ་གྱི་སྨིན་བྱེད་དང༌། དཀྱིལ་འཁོར་ལ་ཉེར་བསྡུ་ནི་གསལ་བ་ལྷའི་འཁོར་ལོ་འོད་གསལ་དུ་འཇུག་པ་དང༌། རྡོ་རྗེ་སེམས་དཔའ་ཞུ་བ་ནི། བདེ་བས་ཁྱད་པར་དུ་བྱས་པའི་སྟོང་ཉིད་ཏེ། གསུམ་པོ་དེ་སྟོང་པའི་ཕྱོགས་ཀྱི་རྫོགས་རིམ་སྨིན་བྱེད་ཡིན་ལ། རྟེན་གྱི་དཀྱིལ་འཁོར་བསྐྱེད་པ་དང༌། ཐོག་མཐའ་གཉིས་སུ་ཐུན་མཚམས་ཀྱི་ལྷ་སྐུ་བསྒོམ་པ་ནི། རྒྱ་ཆེ་བ་སྣང་ཕྱོགས་ཀྱི་རྫོགས་རིམ་སྨིན་པར་བྱེད། མངོན་བྱང་ལྔ་ནི་ཁམས་དཀར་དམར་གྱི་འདུ་འཕྲོད་ལས། རླུང་འགགས་པ་དང༌། རྣམ་རྟོག་ཐིམ་པ་དང༌། ཕུང་ཁམས་དག་པ་དང༌། དངོས་འབྲས་ཡེ་ཤེས་ཀྱི་སྐུ་རྫོགས་པ་མཚོན་ཅིང༌། ཞུ་བ་བསྐུལ་ཏེ་འབྲས་བུ་རྡོ་རྗེ་འཛིན་པར་བཞེངས་པ་ཡང༌། རྩ་འཁོར་ལོ་བཞིར་རླུང་སེམས་འགགས་པས་སྐུ་གསུང་ཐུགས་རྡོ་རྗེའི་བདག་ཉིད་ཀྱི་ཡེ་ཤེས་སྐྱེ་བ་མཚོན་པ་དང༌། སེམས་དཔའ་གསུམ་བརྩེག་ནི་སྙིང་གའི་མི་ཤིགས་པའི་ཐིག་ལེའི་སྐོར་དང༌། ཤིན་ཏུ་རྣལ་འབྱོར་ནི་ནོར་བུ་ཐིག་ལེ་རྗེས་དྲན་དང་བཅས་པ་དང༌། སྐྱེ་མཆེད་སྐུ་གསུང་ཐུགས་དབང་བསྐུར་རྣམས་དགའ་བྲལ་སྤྲུལ་པའི་ཐིག་ལེའི་སྐོར་དང༌། དཀྱིལ་འཁོར་སྤྲོ་བསྡུ་ནི་མི་ཤིགས་ཐིག་ལེ་ཆེན་པོ་སྣང་བཅས་རྗེས་གཞིག་ཡེ་ཤེས་སྐུའི་རིམ་པ་སོགས་ཏེ། སྣང་སྟོང་ཟུང་དུ་འཇུག་པའི་རྫོགས་རིམ་དང༌། མཆོད་བསྟོད་སོགས་ནི་རིག་པའི་བརྟུལ་ཞུགས་ཀྱི་སྨིན་བྱེད་དོ། །དེ་ལ་གཤིན་རྗེ་གཤེད་ནག་པོའི་རྒྱུད་ལེའུ་བཅོ་བརྒྱད་ཅན་ནས། ནག་པོ་ལྷ་བཅུ་གསུམ་གྱི་དཀྱིལ་འཁོར་གསུངས་པ་རྣམས་དང༌། དམར་པོའི་རྒྱུད་ལེའུ་བཅུ་དགུ་ཡོད་པ་ནས། དམར་པོ་བཅུ་གསུམ་མའི་དཀྱིལ་འཁོར་སྟོན་བྱེད་ཀྱི་ཚིག་རྣམས། ཕལ་ཆེར་འདྲ་བ་ཡོད་ཅིང༌། དམར་པོའི་ཕྱོགས་ལ་རྒྱུད་གཉིས་ཀ་ནས་ལྷ་ལྔ་རྒྱས་པར་བཤད་ཅིང༌། ཉེར་གཉིས་པ་ལས་བཅུ་གསུམ་མ་གསུངས་པ་མེད་ལ། རྒྱུད་ལེའུ་བཅུ་

― TNT06_Page_0778 ―

^{[མ་དཔེ་གཟིགས་ན་འདིར་གནོན།]}

[Full Size]

དགུ་པ་ལས་ལྷ་བཅུ་གསུམ་མའི་སྒྲུབ་ཐབས་འདི། འཐོར་ཐབས་སུ་གསུངས་སོ། །དམར་པོ་བཅུ་གསུམ་མ་ལ་ནི། སྒྲུབ་ཐབས་དཔལ་འཛིན་གྱིས་མཛད་པ་འདི་ཁོ་ན་ལས་གཞན་མ་འགྱུར་བས། ད་ལྟ་ལག་ལེན་དུ་འདེབས་པ་ལ། དཔལ་འཛིན་གྱི་གཞུང་ལ་མི་བརྟེན་པའི་ཐབས་མེད་ལ། ནག་པོ་ལ་ཡང་དཔལ་འཛིན་གྱི་གཞུང་འདི་དག་གྲགས་ཆེ་ཤོས་ཡིན་མོད་ཀྱི། གཤིན་རྗེ་གཤེད་འབྱུང་བ་དང༌། ཀ་མ་ལ་རཀྵི་ཏའི་སྒྲུབ་ཐབས་སོགས། རྒྱུ་གཞུང་བཟང་པོ་གཞན་ཡང་མང་དུ་ཡོད་ཅིང༌། རྭ་ལུགས་ཀྱི་སྒྲུབ་ཐབས་རྙིང་པ་དང༌། ནཱ་རོ་པའི་མན་ངག་ཀློག་སྐྱ་ལུགས་དང༌། ན་རི་པའི་མན་ངག་མལ་ལུགས་གཅིག་ཏུ་འདུས་པའི་སྒྲུབ་ཐབས་སོགས་རྒྱུད་རྐྱང་མན་ངག་གི་ལུགས་ལེགས་པོ་ཡང་མང་དུ་ཡོད་དོ། །གཤེད་ནག་གི་སྒྲུབ་ཐབས་རྒྱུད་ཀྱི་བསྟན་ཚོད་དགོངས་དོན་ཇི་ཙམ་ཡིན་པ་དེ་ལས་ལྷག་ཆད་ཀྱི་སྐྱོན་ཐམས་ཅད་དང་བྲལ་བ་ནི། དུས་གསུམ་སངས་རྒྱས་ཐམས་ཅད་ཀྱི་ངོ་བོ་ཆོས་རྗེ་ཀུན་མཁྱེན་ཆེན་པོའི་གསུང་ལས་རྟོགས་པར་བྱའོ།། །།༈ བཅོམ་ལྡན་འདས་དཔལ་ཁྲོ་བོའི་རྒྱལ་པོ་གཤིན་རྗེ་གཤེད་ཞལ་དྲུག་པའི་སྐུ་ལ་ཕྱག་འཚལ་ལོ། །རྒྱུད་སྡོམ་གསུམ་པ་ལས་འབྱུང་བ་ལྟར། འཇམ་དཔལ་ཁྲོས་པའི་དཀྱིལ་འཁོར་བསྒོམ་པར་འདོད་པས། སྐྱབས་འགྲོ་སེམས་བསྐྱེད་ཡིག་བརྒྱ་རྣམས་སྔོན་དུ་བཏང༌། རང་སྐད་ཅིག་གིས་བཅོམ་ལྡན་འདས་གཤིན་རྗེ་གཤེད་པོའི་སྐུར་གསལ་བའི་སྙིང་གར་ཨཱཿལས་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ཡིག་ནག་པོ། དེ་ལས་འོད་འཕྲོས་རང་བཞིན་གྱི་གནས་ནས། རྡོ་རྗེ་ཁྲོ་བོ་ཆེན་པོ་འཆོལ་པ། གཤིན་རྗེ་གཤེད་པོ་ལྷ་ཉེར་གཅིག་གི་དཀྱིལ་འཁོར། བླ་མ་རྡོ་རྗེ་འཆང༌། སངས་རྒྱས་བྱང་ཆུབ་སེམས་དཔའི་ཚོགས་དང་བཅས་པ་མདུན་གྱི་ནམ་མཁར་བྱོན་པར་གྱུར། གང་གི་དྲིན་གྱིས་སོགས་

― TNT06_Page_0779 ―

^{[མ་དཔེ་གཟིགས་ན་འདིར་གནོན།]}

[Full Size]

དང༌། ཞལ་དྲུག་འཇིགས་པའི་ཧཱུཾ་སྒྲ་སྒྲོག །ཞབས་དྲུག་སྐྱིལ་ཀྲུང་གཡོན་བརྐྱང་གར། །ཕྱག་དྲུག་མི་བཟད་མཚོན་ཆ་འཛིན། །ལྷ་ཆེན་དྲུག་འཇོམས་དེ་ལ་འདུད། །ཨོཾ་ཨརྒྷཾ་པྲ་ཏིཙྪ་སྭཱཧཱ། ནས་ཤཔྟའི་བར་གྱིས་མཆོད་པ་དང༌། ལུས་དང་ངག་དང་ཡིད་ཀྱི་སྡིག་སོགས་རྒྱུན་བཤགས་དང༌། ཤཱུ་ནྱ་ཏའི་སྔགས་དོན་བསམ་པའི་བར། གཤེད་དམར་བཅུ་གསུམ་མའི་སྒྲུབ་ཐབས་བཞིན་ནོ། །འདིར་པཎྜི་ཏ་ཀླུ་བྱང་གིས་སྙིང་གའི་ཧཱུཾ་གི་འོད་ཟེར་གྱིས་གདུག་པ་ཅན་བསྲེག་པར་བཤད་པ་ནི། ཚོགས་ཞིང་གི་ཆོ་གའི་ཡན་ལག་ཏུ་སྐབས་སུ་མི་བབ་ཅིང༌། ཡན་ལག་བདུན་པ་གུར་ནས་འབྱུང་བ་བཞིན་མཛད་པ་ནི་མི་ལེགས་པ་མ་ཡིན་ནོ། །སྟོང་པར་སྦྱོང་བ་ལ་ཡང༌། དང་པོར་ཤཱུ་ནྱ་ཏ་དང༌། རྗེས་སུ་སྭ་བྷཱ་ཝ་བྱེད་པར་བཤད་དེ་ངེས་པར་དགོས་པ་ནི་མ་ཡིན་ལ། གོ་རིམ་ཡང་དེ་ཅུང་མི་ལེགས་སོ། །སྟོང་པའི་ངང་ལས་པཾ་ལས་པདྨ་དང༌། རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་ལས་སྣ་ཚོགས་རྡོ་རྗེ་ཧཱུཾ་གིས་མཚན་པ་དེ་ལས་འོད་ཟེར་ཕྱོགས་བཅུར་སྤྲོས། འོག་རྡོ་རྗེའི་ས་གཞི། ཞེས་པ་ནས། ཀུན་ཏུ་བཟང་པོ་ཡབ་ཡུམ་གྱི་ངོ་བོར་གྱུར། ཅེས་པའི་བར་ཡང༌། དམར་པོ་བཅུ་གསུམ་མའི་སྐབས་བཞིན་ལས། སྲུངས་འཁོར་གྱི་མཚམས་སུ། ཨོཾ་བཛྲ་རཀྵ་རཀྵ་ཧཱུཾ། ཞེས་བརྗོད་པ་ནི་ཁྱད་པར་རོ། །ཆོས་འབྱུང་གི་ནང་དུ། ལཾ་ལས་སའི་དཀྱིལ་འཁོར་ལྗང་སེར་གྲྭ་བཞིར་རྡོ་རྗེས་མཚན་པ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་འབར་བས་མཚན་པ། དེའི་སྟེང་དུ་ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་བ་དན་གྱིས་མཚན་པ། དེའི་སྟེང་དུ་པཾ་ལས་སྣ་ཚོགས་པདྨ་དང༌། ཧཱུཾ་ལས་སྣ་ཚོགས་རྡོ་རྗེ་བརྩེགས་པ་ཞེས་པ་ནས། བྷྲུཾ་

― TNT06_Page_0780 ―

^{[མ་དཔེ་གཟིགས་ན་འདིར་གནོན།]}

[Full Size]

གྱིས་མཚན་པ་འབྱུང་བཞི་པདྨ་རྡོ་རྗེ་འཁོར་ལོ། དེ་རྣམས་གཅིག་ཏུ་འདྲེས་པ་ཡོངས་སུ་གྱུར་པ་ལས་སངས་རྒྱས་རྣམ་པར་ནས། མེ་ཏོག་གི་འཕྲེང་བ་ཐོགས་པ་རྣམས་ཀྱིས་བརྒྱན་པ། ཞེས་པའི་བར་གཞལ་ཡས་ཁང་བསྐྱེད་ཚུལ་ཡང་དམར་པོ་བཅུ་གསུམ་མའི་སྐབས་དང་འདྲའོ། །གཞལ་ཡང་ཁང་གི་སྟེང་འོག་གི་གཞི་རྣམས། ཤར་དཀར་ལྷོ་སེར་ནུབ་དམར་བྱང་ལྗང་དབུས་སྔོ་བ། རྩིག་པའི་ནང་རོལ་ཏུ་ལྷ་སྣམ་གྱིས་བསྐོར་བའི་དབུས་ཀྱི་གཞི་ལ། འཁོར་ལོ་སྔོན་པོ་རྩིབས་བརྒྱད་པ། འཁོར་ལོའི་ལྟེ་བར་པཾ་ལས་སྣ་ཚོགས་པདྨའི་སྟེང་དུ། རཾ་ལས་ཉི་མའི་དཀྱིལ་འཁོར། འཁོར་ལོའི་རྩིབས་ཤར་དུ་ཟླ་བ། ལྷོར་རིན་པོ་ཆེ། ནུབ་ཏུ་པདྨ། བྱང་དུ་རྡོ་རྗེ་རྒྱ་གྲམ་གྱི་གདན། མཚམས་ཀྱི་རྩིབས་བཞི་དང༌། ཕྱིའི་གྲྭ་བཞི་དང༌། ནང་གི་གྲྭ་བཞི་སྟེ་བཅུ་གཉིས་སུ། ཟླ་བའི་དཀྱིལ་འཁོར་གྱི་གདན་རེ་རེའོ། །དབུས་ཀྱི་གདན་གྱི་སྟེང་དུ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཱཻ། ཨོ་ཨཽ། ཨཾ་ཨཿ ཕྲག་གཉིས་ཞུ་བ་ལས་བྱུང་བའི་ཟླ་བའི་དཀྱིལ་འཁོར་མེ་ལོང་ལྟ་བུའི་ཡེ་ཤེས། དེ་སྟེང་དུ། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ་ཤ་ཥ་ས་ཧ་ཀྵ། ཡ་ར་ལ་ཝ་ཌ་ཌྷ། ཕྲག་གཉིས་ཞུ་བ་ལས་བྱུང་བའི་ཉི་མའི་དཀྱིལ་འཁོར་མཉམ་པ་ཉིད་ཀྱི་ཡེ་ཤེས་སོ། །སྐབས་འདིར་རྒྱུད་ལས། ཡ་སོགས་སྤངས་པ་མིན་པ་ཉིད། །གསུམ་པའི་གཉིས་པ་བཞི་པ་ཉིད། །ཅེས་གསུངས་པ་ནི། ཡ་ར་ལ་ཝ་ཌ་ཌྷ་སྟོན་པའི་ཚིག་གོ །རྒྱུད་ལས་མངོན་བྱང་གཉིས་པ་ཉི་མར་བཤད་ཅིང༌། ལྷ་འབྱུང་གི་སྒྲུབ་ཐབས་ན་ཡང་རྒྱུད་བཞིན་དུ་ཡོད། སྒྲུབ་ཐབས་རྒྱ་མཚོ་ན་ཡོད་པ་དེ་དང་བོད་ཁ་ཅིག་ཟླ་བ་ཁ་སྦྱོར་དུ་འདོད་མོད་ཀྱི། རྒྱུད་སྡོམ་གསུམ་པ་

― TNT06_Page_0781 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་བརྟེན་པའི་སྐབས་འདིར་ཉི་མ་ཉིད་དོ། །དེ་གཉིས་ཀྱི་བར་དུ་ཧཱུཾ་ལས་བྱུང་བའི་རྡོ་རྗེ་ཐོ་བ་ཧཱུཾ་གིས་མཚན་པ་དང༌། ཨཱཿལས་བྱུང་བའི་གྲི་གུག་ཨཱཿས་མཚན་པ་ནི། སོ་སོར་རྟོག་པའི་ཡེ་ཤེས། དེ་ལས་འོད་ཟེར་སྣ་ཚོགས་པ་འཕྲོས། འཕགས་པ་རྣམས་མཆོད། སེམས་ཅན་ཐམས་ཅད་གཤིན་རྗེ་གཤེད་ཀྱི་གོ་འཕང་ལ་བཀོད། སླར་འདུས་ཏེ་ཐིམ་པ་ནི་བྱ་བ་སྒྲུབ་པའི་ཡེ་ཤེས་སོ། །དེ་དག་ཡོངས་སུ་གྱུར་པ་ལས་སྐུ་རྫོགས་པ་ཧྲཱིཿཡིག་དང་བཅས་པ་ནི་ཆོས་ཀྱི་དབྱིངས་ཀྱི་ཡེ་ཤེས་ཏེ། རང་ཉིད་བཅོམ་ལྡན་འདས་གཤིན་རྗེ་སྐུ་མདོག་ནག་པོ་དུས་ཀྱི་མུན་པ་ལྟར་གནག་ཅིང་ངམ་ཟ་བ། སྒེག་པ་ལ་སོགས་པ་གར་དགུའི་ཉམས་ཀྱི་རོ་དང་ལྡན་པ། བདུད་ཀྱི་དཀྱིལ་འཁོར་མ་ལུས་པ་སྲེག་པར་བྱེད་པའི་ཡེ་ཤེས་ཀྱི་མེ་དཔུང་དྲག་ཏུ་འཕྲོ་ཞིང་འབར་བའི་དབུས་ན་བཞུགས་པ། དཔལ་གྱི་མགུར་ནས་ཧྲཱིཿཡིག་གི་སྒྲ་སྒྲོག་པ། ཞལ་དྲུག་ཕྱག་དྲུག་ཞབས་དྲུག་དང་ལྡན་པ། རྩ་ཞལ་ནག་པོ་རབ་ཏུ་ཁྲོས་པ། འབྲུག་སྟོང་ལྡིར་བ་ལྟ་བུའི་གད་རྒྱངས་ཅན། གཡས་ཞལ་དང་པོ་དམར་པོ་ལྗགས་འགྲིལ་ཞིང་བསྐྱོད་པ། གཉིས་པ་ལྗང་ཁུ་ཁྲོ་གཉེར་བསྡུས་པ། གཡོན་ཞལ་དང་པོ་དཀར་པོ་འཛུམ་ཞིང་བཞད་པ། གཉིས་པ་སེར་པོ་རྣམ་པར་གཙིགས་པ། སྟེང་ཞལ་ནག་པོ་རབ་ཏུ་འཇིགས་ཤིང་ཞལ་གདངས་པའོ། །སྟེང་ཞལ་གྱི་དབུ་སྐྲ་ལྷག་པར་འབར་ཞིང༌། ཞལ་གཞན་རྣམས་ཀྱི་དབུ་སྐྲ་རྩ་བའི་ཕྱོགས་ནས་བཅིངས་པ་ལ། མི་མགོ་སྐམ་པོའི་འཕྲེང་བས་བརྒྱན་པ། ཕྱག་དྲུག་གི་གཡས་ཀྱི་དང་པོ་རྡོ་རྗེ་ཐོ་བ་རྭ་ཉི་ཤུ་པ་འཕྱར་བའི་ཐབས་ཀྱིས་འཛིན་པས་གནོད་བྱེད་འབྱུང་པོ་མ་ལུས་པ་ཐལ་བར་བརླག་པར་

― TNT06_Page_0782 ―

^{[མ་དཔེ་གཟིགས་ན་འདིར་གནོན།]}

[Full Size]

མཛད་པ། གཡོན་གྱི་དང་པོ་ཞགས་པ་དང་བཅས་པའི་སྡིགས་འཛུབ་ཀྱིས་མི་སྲུན་པ་ཐམས་ཅད་སྡིགས་པར་མཛད་པ། བར་པ་གཉིས་ཀྱི་གཡས་འབར་བའི་རལ་གྲིས་མ་རུངས་པ་རྣམས་དུམ་བུར་གཏུབ་ཅིང༌། གཡོན་གཏུན་ཤིང་བསྣམས་པས་སྡང་བ་ཐམས་ཅད་ཕྱེ་མར་མཛད་པ། ཐ་མའི་ཕྱག་མདུན་མ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ཞབས་མདུན་མ་གཉིས་རྡོ་རྗེའི་སྐྱིལ་ཀྲུང་བཅས། བར་པ་གཉིས་གཡས་བསྐུམ་གཡོན་བརྐྱང་པས། མ་ཧེ་ནག་པོ་དྲེགས་ཤིང་ཁྲོས་པ་མགོ་གཡས་སུ་བསྟན་པའི་སྟེང་དུ། གཤིན་རྗེ་ཕོ་མོ་ནག་པོའི་སྟོབས་ཀྱིས་བརྫིས་པ། རྒྱབ་མ་གཉིས་གཡོན་བརྐྱང་བའི་སྐྱིལ་ཀྲུང་ཕྱེད་པའི་གར་གྱིས་གནས་པ། འདིར་པཎྜི་ཏ་ཀླུ་བྱང་དང༌། སྒྲུབ་ཐབས་རྒྱ་མཚོར། དང་པོ་གཉིས་སེམས་སྐྱིལ་དུ་འདོད་ཀྱང༌། ད་ལྟ་ཡོད་པའི་རྒྱུད་དང་དེ་བ་ཨཱ་ཀ་རས་རྡོར་སྐྱིལ་དུ་ཡོད་པ་ལྟར་བྱ། ཞབས་འོག་གི་གཤིན་རྗེ་ཕོ་མོ་ལ། རྒྱུད་རྒྱ་གཞུང་ན་དམིགས་བསལ་མེད། བོད་སྔ་ཕྱི་རྣམས་ལ་བྱི་ཆིངས་སུ་བསྣོལ་བ་དང༌། བྱིན་བཅིངས་སུ་བསྣོལ་བ་དང༌། མཁའ་གསང་སྦྱར་བ་དང༌། ཁ་གསང་སྤྲད་པ་སོགས་ཡི་གེའི་འཁྲུལ་གཞི་ལ་བརྟེན་པའི་འདོད་ཚུལ་སྣ་ཚོགས་ཡོད་ཀྱང༌། གཡས་བསྐུམ་པས་ཕོ་ཁ་བུབ་དང༌། གཡོན་བརྐྱང་བས་མོ་གན་ཀྱལ་དུ་མནན་པ་ཡིན་ནོ། །ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་དང་ལྡན་ཞིང༌། བཞིན་ཤིན་ཏུ་འགྱུར་བའི་ཁྲོ་གཉེར་ཅན། མཆེ་བ་རྣོན་པོ་ཟངས་ཡག་ཏུ་གཙིགས་པ། སྐུ་སྤོམ་ཞིང་ཐུང་ལ་གསུས་ཁྱིམ་འཕྱང་བ། ཁྲོ་བོ་འཆོལ་བའི་ཆ་བྱད་ཅན། སྟག་ལྤགས་ཀྱི་སྨད་དཀྲིས་དང༌། སེང་གེ་པགས་པས་སེ་རལ་ཁ་བྱས་པ། རུས་པའི་རྒྱན་དྲུག་གིས་བརྒྱན་པ། ཁྲག་འཛག་མི་མགོ་ལྔ་བཅུའི་དོ་ཤལ་ཅན། ཀླུའི་

― TNT06_Page_0783 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱལ་པོ་མཐའ་ཡས་སྔོན་པོས་དབུ་སྐྲ་བཅིངས་པ་ཞེས་པ་ནས། འབར་བའི་འཕྲེང་བ་ཅན་གྱི་བར། གཤེད་དམར་བཅུ་གསུམ་མའི་སྐབས་བཞིན། དེ་ལ་འཁྱུད་པའི་བཅོམ་ལྡན་འདས་མ་རྡོ་རྗེ་རོ་ལངས་མ། སྐུ་མདོག་མཐིང་ཁ། ཞལ་གཅིག་ཕྱག་གཉིས་སྤྱན་གསུམ་པ། ཕྱག་གཡས་རྡོ་རྗེ་གྲི་གུག་ཅུང་ཟད་འཕྱར་ཞིང༌། གཡོན་པས་ཐོད་པ་ཁྲག་གང་འཛིན་པས་ཡབ་ཀྱིས་མགུལ་ནས་འཁྱུད་པ། གཅེར་བུ་ཕྱག་རྒྱ་ལྔ་སོགས་རྒྱན་དང་ཆ་བྱད་བཅོམ་ལྡན་འདས་དང་ཕལ་ཆེར་མཚུངས་ཤིང༌། ཐོད་པ་སྐམ་པོའི་དོ་ཤལ་གྱིས་ཁྱད་པར་དུ་བྱས་པ། ཞབས་གཉིས་པདྨའི་སྐྱིལ་ཀྲུང་གིས་ཐབས་ཤེས་སྙོམས་པར་འཇུག་པ། ཁྲོ་མོའི་དབང་ཕྱུག་མཆོག་གི་ཆ་བྱད་རྫོགས་པའོ། །གཙོ་བོའི་ཐུགས་ཀར་རང་དང་འདྲ་བའི་ཡེ་ཤེས་སེམས་དཔའ། དེའི་ཐུགས་ཀར་པདྨ་དང་ཉི་མའི་དཀྱིལ་འཁོར་གྱི་སྟེང་དུ་ཏིང་ངེ་འཛིན་སེམས་དཔའ་རྡོ་རྗེ་རྩེ་ལྔ་པའམ། ཐོ་བ་ཧྲཱིཿཡིག་གིས་མཚན་པ་དང༌། ཡུམ་གྱི་ཐུགས་ཀར་ཡང་པད་ཉི་ལ་གནས་པའི་གྲི་གུག་གི་ཡུ་བར་ཨ་ཡིག་གོ །འདིར་དབུ་རེ་རེ་ལ་ཐོད་སྐམ་གྱི་དབུ་རྒྱན་བོད་སྔ་མ་ཕལ་ཆེར་གྱིས་མཛད་པ་ནི། སྤྱི་འགྲོས་དང་མཐུན་མོད་ཀྱང༌། ཐོད་སྐམ་གྱི་འཕྲེང་བ་དབུ་སྐྲ་འཆང་བྱེད་དུ་རྒྱུད་ཉིད་ལས་བཤད་པས་དེ་ནི་ངེས་པར་དགོས་ཤིང༌། དེ་ཕྱིན་ཐོད་སྐམ་གྱི་དབུ་རྒྱན་མེད་ཀྱང་ཆོག་པར་མངོན་ལ། ཞལ་མདོག་ལ་རྭ་ཤར་པ་རྣམས་དཀར་དམར་མཐིང་གསུམ་ཉིས་བརྩེག་ཏུ་མཛད། རོང་པ་ཤེར་སེང་སོགས་བར་སྐབས་ཀྱི་མང་པོ་ཞིག་གཡས་ཞལ་དཀར་པོ་ཉིས་སྒྲིགས་དང༌། གཡོན་ཞལ་དམར་པོ་ཉིས་སྒྲིགས་སུ་མཛད་པ་དང༌། ཞང་ལུགས་དང་རྭ་ལུགས་ཀྱི་མནའ་ཆན་འགའ་ན་དབུས་ཞལ་གསུམ་བརྩེག་སྟེང་འོག་གཉིས་ནག་ཅིང༌། བར་མ་དཀར་བ་དང༌། གཡས་སེར་གཡོན་ལྗང་རྒྱབ་དམར་ཟེར་བ་དང༌། སྒྲུབ་

― TNT06_Page_0784 ―

^{[མ་དཔེ་གཟིགས་ན་འདིར་གནོན།]}

[Full Size]

ཐབས་རྒྱ་མཚོའི་ནང་དུ་འབྱུང་བ་ལ། ནག་སྔོ་དཀར་སེར་དམར་ནག་པར་བཤད་པ་ཡང་ཡོད་པ་སོགས་ཀྱང༌། མན་ངག་དང་ལྡན་ན་མི་འགལ་ལོ། །དེ་ལྟ་ན་ཡང་ཞལ་ཁྲར་བྱེད་ན། གོང་དུ་བཤད་མ་ཐག་པ་ལྟར་བྱ་ཞིང༌། ཡང་ན་ཞལ་དྲུག་ཁ་དོག་མཐིང་ནག་འབའ་ཞིག་ཏུ་བྱེད་ནའང་ཤིན་ཏུ་ལེགས་ཏེ། རྒྱུད་ལས་སྟེང་ཞལ་ནག་པོར་གསུངས་ཤིང༌། གཡས་གཡོན་གྱི་ཁ་དོག་མ་གསུངས་པ་ཤུགས་ལ་གོ་བའི་དབང་དུ་མཛད་པའོ། །ཞེས་བཤད་ཀྱང་རུང་ངོ༌། །ཀླུའི་བྱང་ཆུབ་ཅེས་པའི་པཎྜི་ཏས་མཛད་པའི་སྒྲུབ་ཐབས་ལས། འཇམ་དབྱངས་ཞི་བའི་སྐབས་ཐོར་ཚུགས་ཀྱི་རྩེ་མོ་བརྒྱན་པར་བཤད་དེ། ད་ལྟར་འགྱུར་བའི་རྒྱུད་ན། ཞི་བའི་དབུ་རྒྱན་མི་གསལ་ཞིང༌། འོག་ཏུ་རིགས་ལྔའི་དབུ་རྒྱན་འགོད་དགོས་པ་དང་མི་འགྲིག་གོ །སྟེང་ཞལ་མ་གཏོགས་པའི་དབུ་སྐྲ་ཡང༌། རྩ་བ་ནས་སོར་བཞི་ཙམ་ཡར་གཞལ་མཚམས་སྤྱི་བོར་བཅིངས་ཤིང༌། དེ་ལ་མགོ་བོ་མང་པོའི་ཕྲེང་བ་རིང་པོས་མང་དུ་དཀྲིས་པ་ལས། དབུ་སྐྲ་རྩེ་མོ་གྱེས་པ་ཁ་གཡེལ་བའི་རྣམ་པར་བྱའོ། །ཕྱིས་ཀྱི་འགའ་ཞིག་ཡུམ་རང་དང་འདྲ་བར་འདོད་པ་དང༌། ཁ་ཅིག་དཀྱིལ་འཁོར་གྱི་ལྷ་མཚན་ལ་ཡུམ་གྱི་ཕྱག་མཚན་གྲི་གུག་བཤད་པ་དང་འགལ་གྱི་དོགས་ནས། གཞན་རང་འདྲ་ལས་ཕྱག་མཚན་དང་པོ་གྲི་གུག་ཟེར་བ་ནི་མི་འཐད་དེ། རང་འདྲར་འདོད་པ་ལ་ཡུམ་ཞབས་དྲུག་པ་བྱས་ན་སྦྱོར་སྟངས་ཤིན་ཏུ་མི་བདེ་ལ། ཕྱག་མཚན་གཅིག་པར་འདོད་པ་ལ་གྲི་གུག་གིས་གནོད་ཅིང༌། ཕྱག་མཚན་དང་པོ་གྲི་གུག་ཏུ་བསྒྱུར་བ་དང༌། ཞལ་དྲུག་པ་ལ་ཞབས་གཉིས་མར་བྱས་ན་ནི། རྟོག་བཟོ་ཁོ་ནར་སོང་པའི་ཕྱིར་རོ། །རྒྱན་སོགས་འདིར་དཀྱུས་སུ་བཀོད་པ་ནི། སྔ་མ་རྣམས་ཀྱི་ཕྱག་ལེན་གྱི་རྒྱུན་ཙམ་ཡིན་ལ། རྒྱུད་ལས། བསྟོད་པའི་སྐབས་སུ། དུར་ཁྲོད་རྒྱན་གྱིས་ལེགས་བརྒྱན་པ། །ཞེས་དུར་ཁྲོད་ཀྱི་རྒྱན་

― TNT06_Page_0785 ―

^{[མ་དཔེ་གཟིགས་ན་འདིར་གནོན།]}

[Full Size]

ཐམས་ཅད་ཡོད་པར་གསུངས་ཤིང༌། དུས་གསུམ་ཁྲོ་རྒྱལ་ཧེ་རུ་ཀ་ཡི་ཐུགས། །ཞེས་ཧེ་རུ་ཀ་ཡིན་པར་ཡང་བཤད་པས་རུས་རྒྱན་ངེས་པར་དགོས་པ་དང༌། གླང་ལྤགས་མི་ལྤགས་སོགས་ཀྱང་རུང་བར་མངོན་ཅིང༌། འཆོལ་བའི་ཁྲོ་བོར་བཤད་པས། དབུ་སྐྲ་བུམ་ལྟོ་འམ་རེས་འགའ་ཅོ་རེག་དང་ཟུར་ཕུད་སོགས་སམ། ཁྲག་ཞག་གི་ཐིག་ལེ་དང༌། རྒྱུ་མའི་དོ་ཤལ་དང༌། རུས་དུམ་གྱི་འཕྲེང་བས་བརྒྱན་པ་སོགས་ཀྱང་བྱས་ན་ལེགས་པ་ནི་ཡིན་ནོ། །འདི་ལ་གཞལ་ཡས་ཁང་མི་བྱེད་པར་གཙོ་རྐྱང་ངམ་ལྷ་ལྔ་བསྐྱེད་པ་དང༌། གཞལ་ཡས་ཁང་གི་དབུས་སུ་གཙོ་རྐྱང་བསྒོམ་པའང་ཡོད་པ། གལ་ཏེ་གཙོ་བོ་འབའ་ཞིག་བསྒོམ་པ་ཡིན་ནམ། སྐབས་འདིར་ཡེ་ཤེས་སེམས་དཔའ་སྤྱན་འདྲེན་རྒྱས་བཏབ་བྱེད་ཅིང༌། དཀྱིལ་འཁོར་རྫོགས་པར་བསྒོམ་པ་ཡིན་ན། སྐབས་འདིར་ཡེ་ཤེས་པ་བསྲེ་བ་མི་བྱེད་དེ། འོག་ཏུ་གཙོ་འཁོར་ཐམས་ཅད་ལྷན་ཅིག་ཏུ་བྱས་པ་ཉིད་ཀྱིས་ཆོ་ག་ལ་སྤྱིར་ཡེ་ཤེས་པ་བསྲེ་ན་ལན་མང་དུ་བྱུང་ཡང་སྐྱོན་དུ་འགྱུར་བ་ཏ་ནམ་ཡང་མ་ཡིན་མོད་ཀྱི། ཅུང་ཟད་ཆོ་ག་བསྡུས་པའི་ལུགས་ལ་ཟོར་ཡང་བ་ཉིད་ལེགས་པའི་དབང་དུ་བྱས་སོ། །འོག་གི་ཡེ་ཤེས་པ་གཞུག་མཚམས་ནི་ངེས་པ་ཅན་ཡིན་ལ། འདིར་ནི་ཕྱག་རྒྱ་བཞིའི་སྔ་ཕྱི་གང་དུ་བྱས་ཀྱང་རུང་མོད་ཀྱི། སྤྱི་ལ་ཡོངས་སུ་གྲགས་པའི་ཕྱག་རྒྱ་བཞིའི་རྒྱས་བཏབ་རྣམས། ཡེ་ཤེས་དགུག་གཞུག་གི་རྗེས་ལ་འབྲེལ་ཆགས་སུ་བསྒོམ་པ་དང༌། ཆོས་སྐད་གོ་བསྟུན་ཏེ་པཎྜི་ཏ་ཀླུ་བྱང་གིས་བཤད་ཅིང་ལྷ་འབྱུང་ཟླ་བའི་གཞུང་དུ་ཡང༌། ཕྱག་རྒྱ་བཞིའི་རྒྱས་བཏབ་ཀྱི་ཐ་སྙད་མི་བྱེད་མོད། རགས་བཤད་དུ་དོན་ལ་འདྲ་བར་སྣང་བས་གཙོ་བོ་དམ་ཚིག་པ་བསྐྱེད་མ་ཐག་ཏུ་ཡེ་ཤེས་དགུག་གཞུག་བྱེད་པའི་དབང་དུ་བྱས་ན། ཐུགས་ཀའི་ཧཱུཾ་ལས་འོད་ཟེར་འཕྲོས། རང་བཞིན་གྱི་གནས་ནས་བཅོམ་

― TNT06_Page_0786 ―

^{[མ་དཔེ་གཟིགས་ན་འདིར་གནོན།]}

[Full Size]

ལྡན་འདས་གཤིན་རྗེ་གཤེད་ཞལ་དྲུག་པ། གདོད་ནས་གྲུབ་པའི་ཡེ་ཤེས་སེམས་དཔའ་འཁོར་བཅས་བཛྲ་ས་མཱ་ཛཿ ཨརྒྷཾ་ནས་ཤཔྟའི་བར་གྱིས་མཆོད། ཨོཾ་བཛྲ་ཨཾ་གུ་ཤ་ཛཿ ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་ཛྲ་ཨ་བེ་ཤ་ཧོཿ དེ་རྣམས་ཀྱི་ཕྱག་རྒྱ་ནི། རྡོ་རྗེ་བསྡམས་པ་ལས་འཛུབ་མོ་གཉིས་ལྕགས་ཀྱུའི་ཚུལ་དང༌། ཁུ་ཚུར་ལག་གཉིས་བསྣོལ་ཏེ་མཁྲིག་མའི་རྒྱབ་སྤྲད་པ་དང༌། རྡོར་བསྡམས་ལས་མཐེབ་འཛུབ་རྩེ་སྤྲད་པ་ལུ་གུ་བརྒྱུད་དུ་བྱས་པ་དང༌། རྡོར་བསྡམས་ནང་དུ་མཐེ་བོང་བཅིངས་པ་རྣམས་སོ། །གོང་དུ་བཤད་པ་ལྟར་མངོན་རྟོགས་རྒྱས་པའི་དཀྱུས་ལ་སྐབས་འདིར་ཡེ་ཤེས་བསྲེ་བ་དེ་མི་དགོས་ཀྱང་གཙོ་རྐྱང་ལ་དགོས་པ་གོ་བླ་བའི་ཕྱིར་འདིར་སྨོས་སོ། །དེ་ནས་ཕྱག་རྒྱས་གདབ་པ་ནི། ཡི་གེ་བཅུ་བཞི་པའི་མཐར། ཨ་དྷི་ཏིཥྛ་སྭ་མཾ། ཞེས་བརྗོད་དེ། སྙིང་ག་དང༌། དཔྲལ་བ་དང༌། ལྐོག་མ་དང༌། སྤྱི་བོ་རྣམས་སུ་གཤིན་རྗེ་གཤེད་པོའི་དམ་རྒྱས་རེག་སྟེ་རོ་མཉམ་དུ་བྱ་སྟེ་དེ་ཡང་རྡོ་རྗེ་ཐལ་མོ་ལས། མཐེ་བོང་གུང་མོའི་རྩ་བར་གཤིབས། །འཛུབ་མོ་གཉིས་གུང་མོའི་རྒྱབ་ཏུ་ཅུང་ཟད་བསྐྱང་བའོ། །དེ་ནི་དམ་ཚིག་གི་ཕྱག་རྒྱས་རྒྱས་བཏབ་པའོ། །རྩ་ཞལ་གྱི་ལྗགས་ཀྱི་སྟེང་དུ། ཧཱུཾ་ལས་རྡོ་རྗེ་ནག་པོ་རྩེ་ལྔ་པ་རྭ་གདེངས་པ། ལྟེ་བ་ལ་གནོད་འཇོམས་ཀྱི་ཡི་གེ་ཧཱུཾ་གིས་མཚན་པའོ། །དེ་ནི་ཆོས་ཀྱི་ཕྱག་རྒྱས་རྒྱས་བཏབ་པའོ། །རྡོར་བསྡམས་ལས་གུང་མོ་གཉིས་བསྒྲེང་བ། སེམས་མ་རྡོ་རྗེ་མའི་ཕྱག་རྒྱ་སྤྱི་བོར་བཞག་པ་དང༌། རྡོར་བསྡམས་ལས་གུང་མོ་དང་འཛུབ་མོ་བརྐྱངས་ཤིང༌། འཛུབ་མོའི་ཚིགས་གཉིས་པ་བཅག་པ། ཆོས་དབྱིངས་རྡོ་རྗེ་མའི་ཕྱག་རྒྱ་དཔྲལ་བར་བཞག་པ་དང༌། རྡོར་བསྡམས་ལས་གུང་མོ་རིན་པོ་ཆེ་ལྟར་བྱས་པ། རིན་ཆེན་རྡོ་རྗེ་མའི་ཕྱག་རྒྱ་གཡས་ཀྱི་རྣ་ལྟག་ཏུ་བཞག་པ་དང༌། ཐལ་མོ་ཀ་པུ་ཏ་ལས། གུང་མོ་གཉིས་པདྨའི་འདབ་མ་ལྟར་བྱས་པ། ཆོས་ཀྱི་རྡོ་རྗེ་མའི་ཕྱག་རྒྱ་ལྟག་

― TNT06_Page_0787 ―

^{[མ་དཔེ་གཟིགས་ན་འདིར་གནོན།]}

[Full Size]

པར་བཞག་པ་དང༌། རྡོ་རྗེ་ཐལ་མོ་ལས། མཐེ་བོ་གཉིས་མཉམ་པར་སྦྱར། གུང་མོའི་ཚིགས་གསུམ་པ་ལ་གུང་མོའི་རྩེ་མོ་སྦྱར་བ་ལས་ཀྱི་རྡོ་རྗེ་མའི་ཕྱག་རྒྱ་རྣ་ལྟག་གཡོན་དུ་འཇོག་པ་རྣམས་རིམ་པས་བྱ་སྟེ། དེ་རྣམས་ཀྱི་སྔགས་དང༌། ཨོཾ་བཛྲ་སཏྭ་ཧཱུཾ་ཨ་བྷི་ཥིཉྩ་མཾ། སྤྱི་བོར་མི་བསྐྱོད་པ་སྔོན་པོ་ས་གནོན་གྱི་ཕྱག་རྒྱས་བཞུགས་པ། ཨོཾ་བུདྡྷ་ཨ་བྷི་ཥིཉྩ་མཾ། དཔྲལ་བར་རྣམ་སྣང་དཀར་པོ་བྱང་ཆུབ་མཆོག་གི་ཕྱག་རྒྱ་མཛད་པ། ཨོཾ་རཏྣ་ཨ་བྷི་ཥིཉྩ་མཾ། རྣ་ལྟག་གཡས་སུ་རིན་ཆེན་འབྱུང་ལྡན་སེར་པོ་མཆོག་སྦྱིན་གྱི་ཕྱག་རྒྱ་མཛད་པ། ཨོཾ་པདྨ་ཨ་བྷི་ཥིཉྩ་མཾ། ལྟག་པར་འོད་དཔག་མེད་དམར་པོ་ཏིང་ངེ་འཛིན་གྱི་ཕྱག་རྒྱ་མཛད་པ། ཨོཾ་ཀརྨ་ཨི་བྷི་ཥིཉྩ་མཾ། རྣ་ལྟག་གཡོན་དུ་དོན་ཡོད་གྲུབ་པ་ལྗང་ཁུ་མི་འཇིགས་པའི་ཕྱག་རྒྱ་མཛད་པ་སྟེ། དེ་ལྟར་རིགས་ལྔས་དབང་བསྐུར་བར་གྱུར། ཡང་ན་སྐབས་འདིར་ཕྱག་རྒྱ་ཁོ་ནས་དབང་བསྐུར་ཏེ། རིགས་ལྔའི་སྐུ་མི་བསྒོམ་ལ། འོག་ཏུ་ལྷ་ཚོགས་ཐམས་ཅད་ལ་རྒྱས་འདེབས་བྱེད་པའི་སྐབས། མི་བསྐྱོད་པའི་རྒྱས་བཏབ་བྱས་ནའང་མི་ལེགས་པ་མ་ཡིན་ཞིང༌། ལྷ་འབྱུང་ཡང་དོན་གྱིས་འདི་བཞེད་པ་མངོན་ནོ། །དེ་ནི་ཕྱག་རྒྱ་ཆེན་པོས་རྒྱས་བཏབ་པའོ། །བསྡུ་ན་དེས་ཙམ་གྱིས་ཆོག །སྤྲོས་པ་བྱེད་ན། རྡོ་རྗེ་ཁུ་ཚུར་ཁ་ཕྱེ་བ་གནས་དགུར་རེག་སྟེ། ཨོཾ་ཀྲུཾ། ཞེས་གོ་བགོས་ལ། ཨོཾ་བཛྲ་ཏུ་ཥྱ་ཧོཿ ཞེས་ཐལ་མོ་རྟིང་བ་བརྡབས་པས་དར་དཔྱངས་ཀྱི་དབང་བསྐུར་རོ། །འདི་ནི་ཕྱག་ཆེན་གྱི་རྗེས་འབྲང་སྟེ། པཎྜི་ཏ་ཀླུ་བྱང་ཞེས་པ་ངེས་བཤད་ཀྱི་རྒྱུད་ལས་མི་གསལ། གཞུང་གཞན་ལས་ཀྱང་མི་འབྱུང་ངོ༌། །རང་གི་ཐུགས་ཀ་ནས་སྒེག་མོ་ལ་སོགས་པ་ལྷ་མོ་བརྒྱད་སྤྲུལ་ཏེ། སྣ་ཚོགས་པའི་མཆོད་པས་མཆོད་པར་གྱུར། གར་པད་སྔོན་དུ་བཏང་ནས་སོ་སོའི་ཕྱག་རྒྱ་བཅས་ཏེ། ཨོཾ་བཛྲ་སཏྭ་སུ་སཾ་གྲ་ཧཏ། ཨོཾ་བཛྲ་ལ་

― TNT06_Page_0788 ―

^{[མ་དཔེ་གཟིགས་ན་འདིར་གནོན།]}

[Full Size]

སྱཱ་ཧཱུཾ། ཨོཾ་བཛྲ་རཏྣ་མ་ནུཏྟ་རཾ། ཨོཾ་བཛྲ་མཱ་ལེ་ཏྲཱཾ། ཨོཾ་བཛྲ་དྷརྨ་གཱ་ཡ་ནི། ཨོཾ་བཛྲ་གཱི་ཏི་ཧྲཱིཿ ཨོཾ་བཛྲ་ཀརྨ་ཀ་རོད་བྷ་ཝེ། ཨོཾ་བཛྲ་ནྀ་ཏྱ་ཨ། ཨོཾ་བཛྲ་སཏྭ་སུ༴ ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་རཏྣ༴ ཨོཾ་བཛྲ་པུཥྤེ་ཏྲཱཾ། ཨོཾ་བཛྲ་དྷརྨ༴ ཨོཾ་བཛྲ་ཨཱ་ལོ་ཀེ་ཧྲཱིཿ ཨོཾ་བཛྲ་ཀརྨ་ཀཾ༴ ཨོཾ་བཛྲ་གནྡྷེ་ཨཿ ལྷ་མོ་བརྒྱད་པོ་རྣམས་རང་ཉིད་ལ་ཐིམ། དེ་ནི་ལས་ཀྱི་ཕྱག་རྒྱས་རྒྱས་འདེབས་པའོ། །དེ་དག་ནི་དང་པོ་སྦྱོར་བའི་ཏིང་ངེ་འཛིན་ནོ། །གཙོ་རྐྱང་བསྒོམ་པར་འདོད་ན། གཞལ་ཡས་ཁང་སྤངས་པའམ། ཡོད་ཀྱང་རུང་སྟེ་འཁོར་གྱི་གདན་སྤངས་ནས་འདི་ཡན་ཆད་བསྒོམ། གཙོ་བོའི་བསྟོད་པས་བསྟོད་ནས། བཟླས་པ་ལ་ཞུགས་པས་ཀྱང༌། ལུགས་འདིའི་བསྐྱེད་རིམ་ཆ་ཚང་བ་འགྲུབ་པ་ཡིན་ནོ། །དཀྱིལ་འཁོར་རྒྱས་པར་བསྒོམ་པར་འདོད་པས། གཙོ་བོའི་ཡེ་ཤེས་ཀྱི་སྣང་བ་ལས་བྱུང་བའི་འཁོར་གྱི་ལྷ་ཚོགས་གྲུབ་པར་གྱུར་པ་ནི། ཨོཾ་ཛི་ན་ཛིཀ་སྭཱཧཱ། འཁོར་ལོའི་ཤར་གྱི་རྩིབས་ལ། གཏི་མུག་རྡོ་རྗེ་སྐུ་མདོག་དཀར་པོ། གཡས་འཁོར་ལོ་འཕྱར་ཞིང༌། གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཨོཾ་རཏྣ་དྷྲིཀ་སྭཱཧཱ། ལྷོའི་རྩིབས་ལ་སེར་སྣ་རྡོ་རྗེ་སྐུ་མདོག་སེར་པོ། གཡས་རིན་པོ་ཆེ་འཕྱར་ཞིང༌། གཡོན་དེའི༴ ཨོཾ་ཨ་རོ་ལིཀ་སྭཱཧཱ། ནུབ་ཀྱི་རྩིབས་ལ་འདོད་ཆགས་རྡོ་རྗེ་སྐུ་མདོག་དམར་པོ། གཡས་པདྨ་དམར་པོའི་སྡོང་བུ་འཕྱར་ཞིང༌། གཡོན་དེའི༴ ཨོཾ་པྲཛྙཱ་དྷྲིཀ་སྭཱཧཱ། བྱང་གི་རྩིབས་ལ་ཕྲག་དོག་རྡོ་རྡེ་སྐུ་མདོག་ལྗང་ཁུ། ཕྱག་གཡས་སྣ་ཚོགས་རྡོ་རྗེ་འཕྱར་ཞིང༌། གཡོན་དེའི། སོགས་གོང་བཞིན། དེ་ལྟར་རིགས་བཞི་ནི་ཁྲོ་བོ་སྲིན་པོའི་ཆ་བྱད་འཆང་བའོ། །ཨོཾ་ལོ་ཙ་ནཱ་ཧཱུཾ། ཤར་ལྷོའི་རྩིབས་ལ། ས་རྡོ་རྗེ་མ་དཀར་མོ་

― TNT06_Page_0789 ―

^{[མ་དཔེ་གཟིགས་ན་འདིར་གནོན།]}

[Full Size]

གཏི་མུག་རྡོ་རྗེ་ལྟ་བུ། ཨོཾ་མ་མ་ཀཱི་ཏཱཾ། ལྷོ་ནུབ་ཀྱི་རྩིབས་ལ། ཆུ་རྡོ་རྗེ་མ་སེར་མོ་སེར་སྣ་རྡོ་རྗེ་ལྟ་བུ། ཨོཾ་པཎྜ་རི་ཧྲཱིཿ ནུབ་བྱང་གི་རྩིབས་ལ། མེ་རྡོ་རྗེ་མ་དམར་མོ་འདོད་ཆགས་རྡོ་རྗེ་ལྟ་བུ། ཨོཾ་ཏཱ་རེ་ཨ། བྱང་ཤར་གྱི་རྩིབས་ལ་རླུང་རྡོ་རྗེ་མ་ལྗང་ཁུ་ཕྲག་དོག་རྡོ་རྗེ་དང་མཚུངས་པ། འོན་ཀྱང༌། ཡུམ་བཞི་པོ་དེ་དག་ནི་རོལ་བའི་ཁྲོ་མོ་སྟེ་ཕྱག་གཡོན་པ་རྣམས་ཀྱིས་ཐོད་པ་ཁྲག་གིས་གང་བ་ཐུགས་ཀར་འཛིན་པ་ནི་ཁྱད་པར་རོ། །འཁོར་ལོའི་གྲུ་ཆད་བཞི་ལ་ནང་གི་ལྷ་མོ་བཞི་སྤྲོ་སྟེ། ཨོཾ་བཛྲ་ལཱ་སྱ་ཧཱུཾ། ཤར་ལྷོར་སྒེག་མོ་དཀར་མོ་ཕྱག་གཉིས་རྡོ་རྗེ་ཁུ་ཚུར་དཀུར་བསྟེན་པ། ཨོཾ་བཛྲ་མཱ་ལེ་ཏྲཱཾ། ལྷོ་ནུབ་ཏུ་འཕྲེང་བ་མ་སེར་མོ། ཕྱག་གཉིས་རིན་པོ་ཆེའི་འཕྲེང་བ་འཕྱར་ཏེ་འཛིན་པ། ཨོཾ་བཛྲ་གིརྟི་ཧྲཱིཿ ནུབ་བྱང་དུ་གླུ་མ་དམར་མོ་ཕྱག་གཉིས་ཀྱིས་པི་ཝང་རྡུང་བ་ལ་བརྩོན་པ། ཨོཾ་བཛྲ་ནྲྀ་ཏི་ཨཿ བྱང་ཤར་དུ་གར་མ་ལྗང་ཁུ། ཕྱག་གཉིས་ཀྱིས་རྡོ་རྗེ་རྩེ་གསུམ་པ་རེ་རེ་འཛིན་པས་གར་བྱེད་པའོ། །ལྷ་སྣམ་གྱི་གྲྭ་བཞི་ལ་ཕྱིའི་ལྷ་མོ་རྣམས་སྤྲོ་སྟེ། ཨོཾ་བཛྲ་དྷཱུ་པེ་ཧཱུཾ། ཤར་ལྷོར་བདུག་སྤོས་མ་དཀར་མོ། བདུག་སྤོས་ཀྱི་སྣོད་འཛིན་པ། ཨོཾ་བཛྲ་པུཥྤེ་ཏྲཱཾ། ལྷོ་ནུབ་ཏུ་མེ་ཏོག་མ་སེར་མོ། གཡོན་མེ་ཏོག་གི་སྣོད་འཛིན་ཅིང༌། གཡས་འཐོར་བའི་ཚུལ་མཛད་པ། ཨོཾ་བཛྲ་ཨཱ་ལོ་ཀེ་ཧྲཱིཿ ནུབ་བྱང་དུ་མར་མེ་མ་དམར་མོ། མར་མེའི་གོང་བུ་འཛིན་པ། ཨོཾ་བཛྲ་གརྦྷེ་ཨཱཿ བྱང་ཤར་དུ་དྲི་ཆབ་མ་ལྗང་ཁུ། གཡོན་པས་དྲི་བཟང་གིས་གང་བའི་དུང་ཆོས་འཛིན་ཅིང༌། གཡས་པས་དེ་ཉིད་བྱུག་པའི་ཚུལ་མཛད་པའོ། །སྒེག་མོ་ལ་སོགས་པ་བརྒྱད་པོ་དེ་དག །འཛུམ་ཞིང་བཞད་ལ་དར་དང་རིན་པོ་ཆེས་བརྒྱན་པ། ཞི་བའི་ཉམས་ཤས་

― TNT06_Page_0790 ―

^{[མ་དཔེ་གཟིགས་ན་འདིར་གནོན།]}

[Full Size]

ཆེ་ཞིང་ཡིད་ཙམ་ཁྲོ་བ། སྤྱན་གསུམ་པ། དབུ་སྐྲ་ནག་པོ། བུད་མེད་སྒྱུ་མའི་ང་རྒྱལ་གྱིས་འགྱིང་བའོ། །འདི་རྣམས་སེམས་དཔའི་སྐྱིལ་ཀྲུང་གིས་བཞུགས་པར་བཞེད་པ་མང་ཡང༌། དུས་འཁོར་ལྟ་བུའི་དམིགས་བསལ་ཡོད་ན་མ་གཏོགས། གཙོ་འཁོར་གཞན་རྣམས་ཀྱི་ཟླ་སྟོབས་ལས་རྟོགས་ནུས་པའི་ཕྱིར། བཞེངས་པ་ཉིད་ཡིན་པར་གསལ་ལོ། །སྒོ་སྐྱོང་བཞི་སྤྲོ་བར་བྱ་སྟེ། ཨོཾ་བཛྲ་ཨཾ་གུ་ཤ་ཛཿ རྡོ་རྗེ་ལྕགས་ཀྱུ་དཀར་པོ་ཕྱག་གཡས་པས་ལྕགས་ཀྱུ་འཕྱར་ཞིང༌། ཞབས་གཡས་བརྐྱང་གི་སྟབས་ཀྱིས་བཞུགས་པ། ཨོཾ་བཛྲ་པཱ་ཤ་ཧཱུཾ། ལྷོར་སྒོར་རྡོ་རྗེ་ཞགས་པ་སེར་པོ་གཡས་རྡོ་རྗེ་ཞགས་པ་འཕྱར་ཞིང༌། ཞབས་གཡོན་བརྐྱང་གི་སྟབས་ཀྱིས་བཞུགས་པ། ཨོཾ་བཛྲ་སྥོ་ཊ་བཾ། ནུབ་སྒོར་རྡོ་རྗེ་ལྕགས་སྒྲོག་དམར་པོ། ཕྱག་གཡས་ལྕགས་སྒྲོག་འཕྱར་ཞིང༌། ཞབས་ས་གའི་སྟབས་ཀྱིས་བཞུགས་པ། ཨོཾ་བཛྲ་ཨཱ་བེ་ཤ་ཧོཿ བྱང་སྒོར་རྡོ་རྗེ་དྲིལ་བུ་ལྗང་ཁུ། ཕྱག་གཡས་དྲིལ་བུ་འཁྲོལ་ཞིང༌། ཞབས་ཟླུམ་པོའི་སྟབས་ཀྱིས་གནས་པ། དེ་བཞི་ཕྱག་གཡོན་པ་རྣམས་ཀྱིས་སྡིགས་འཛུབ་མཛད་པ་སྟེ། སྒོ་བ་བཞི་པོ་ཡང་ཁྲོ་བོ་ཆེན་པོའི་ཆ་བྱད་ཅན་ནོ། །དེ་ལྟར་ཁྲོ་ཆེན་བརྒྱད་པོ་རྣམས་ནི། སྟག་ལྤགས་དང༌། སྦྲུལ་རྒྱན་དང༌། མགོ་བོའི་ཕྲེང་བས་སྐྲ་བཅིངས་དང༌། དོ་ཤལ་ཅན། བཅོམ་ལྡན་འདས་ཉིད་དང་སྐུའི་ཉམས་མཚུངས་པ། མེ་དཔུང་འབར་བའི་དབུས་ན་བཞུགས་པའོ། །དེ་བ་ཨཱ་ཀ་རའི་སྒྲུབ་ཐབས་ན། གླུ་མ་དཀར་མོ་སོགས་སྐུ་མདོག་མི་འདྲ་བ་ཅུང་ཟད་ཡོད་དེ། མི་རུང་བ་མེད་ལ། སྒྲུབ་ཐབས་དེར་ཡང་རྡོ་རྗེ་ལྕགས་ཀྱུ་སོགས་ཀྱི་དགུག་གཞུག་བྱེད་ཚུལ་ཙམ་ལས། དཀྱིལ་འཁོར་གྱི་གང་དུ་འགོད་

― TNT06_Page_0791 ―

^{[མ་དཔེ་གཟིགས་ན་འདིར་གནོན།]}

[Full Size]

མི་གསལ་ལོ། །ཀླུ་བྱང་གིས་ནི། སྣ་ཚོགས་ཀྱི་མངོག་ཅན་འབར་བའི་འཕྲེང་བའི་འོད་ཀྱི་ཁྲོ་བོ་རྣམས་ཕྱག་ན་མཚན་མ་ལྔ་བསྣམས་པ། ཞེས་རིགས་ལྔ་བསྒོམ་ཚུལ་ཟུར་ཙམ་མ་གཏོགས། དཀྱིལ་འཁོར་ལ་ལྷ་གཞན་མི་འགོད་དེ། རྡོ་རྗེ་ལྕགས་ཀྱུ་སོགས་ཀྱིས་དགུག་གཞུག་དང༌། སྒེག་སོགས་རྣམས་མཆོད་པའི་སྐབས་སུ་ཡུད་ཙམ་འགོད་པར་གསལ། ཡུམ་བཞིའི་གླེང་བརྗོད་མེད་དོ། །གོང་དུ་དྲངས་པའི་ཚིག་དེ་གཙོ་བོའི་མངོན་རྟོགས་ཀྱི་དཀྱིལ་ན་ཡོད་པས་དེའི་དོན་ནི། ཁྲོ་བོ་གདོང་དྲུག་པ་ཉིད་གཞན་འདྲ་བ་ལས། སྐུ་མདོག་དང་ཕྱག་གཡས་ཀྱི་ཐ་མའི་ཕྱག་མཚན་རིགས་སོ་སོའི་མཚན་མར་བསྒྱུར་བ་ཞིག་བསྒོམ་པར་གསལ་ལོ། །འོན་ཀྱང་རྒྱུད་ཀྱི་དགོངས་པ་ནི་དཀྱུས་སུ་བཤད་པ་ཉིད་དོ། །སྒོ་སྐྱོང་བཞི་པོ་འདི་རྣམས་ལ་རོ་གདན་ཕྱུང་ན་ལེགས་པར་སེམས་ཤིང༌། རྭ་ཡེ་ཤེས་སེང་གེས་མཛད་ཟེར་བ་དང༌། རོང་བ་ཤེར་སེང་དང༌། རྒྱ་སྟོན་གྱི་སྒྲུབ་ཐབས་ན་མགྲིན་གཅིག་པར་བྱང་གི་སྒོ་སྲུངས་ཕྱག་མཚན་མེ་ལོང་འཛིན་པ་དང༌། མཚན་ཡང་རྡོ་རྗེ་མེ་ལོང་ཞེས་འདོགས། སྒོ་སྲུང་བཞི་ཀ་ཡང་ཕྱག་གཡོན་དྲིལ་བུ་འཛིན་པར་བཞེད་དོ། །དེ་གཉིས་རྭ་ཤར་ནུབ་སོ་སོའི་སྲོལ་འཛིན་ཆེན་པོ་རེ་ཡིན་ལས། ངག་སྒྲོས་མཐུན་པར་བྱུང་བས། རྭ་ལོའི་མན་ངག་མ་ནོར་བ་ཡིན་པར་ནི་གསལ་ལོ། །དེའི་ལུགས་ལྟར་ན་རྡོ་རྗེ་འབེབས་པའི་ཕྱག་གཡས་མེ་ལོང་འཛིན་པར་འདུག །མེ་ལོང་ཡང་ལྷ་རྣམས་མཉེས་པར་བྱེད་པ་ཡིན་པས། དགུག་གཞུག་བཅིང་མཉེས་ཀྱི་རིམ་པ་དང་མི་འགྲིག་པ་ནི་མེད། འོན་ཀྱང་སྒྲུབ་ཐབས་ཀྱི་གཞུང་རྣམས་ལས། འབེབས་པའི་ཕྱག་རྒྱ་སྤྱི་འགྲོ་ལྟར་དྲིལ་བུའི་ཕྱག་རྒྱར་བཤད་ཅིང༌། རྭ་བ་རང་གི་ལག་ལེན་ལ་ཡང་མཛད་པས། རྭ་ལུགས་པ་རང་གིས་ལུགས་ལ་ནི། སྒོ་སྐྱོང་གཞན་གསུམ་གྱི་ཕྱག་མཚན་གཡས་གཙོ་ཆེ་བ་དང༌། རྡོ་རྗེ་

― TNT06_Page_0792 ―

^{[མ་དཔེ་གཟིགས་ན་འདིར་གནོན།]}

[Full Size]

འབེབས་པའི་ཕྱག་མཚན་གཡོན་གཙོ་ཆེ་བར་འཆད་དགོས་མོད། སྤྱིར་དཀྱུས་སུ་བཤད་པ་ཉིད་འཐད་དོ། །དེ་དག་ནི་འཁོར་གྱི་ལྷ་ཚོགས་སྤྲུལ་པའོ། །དཀྱིལ་འཁོར་གྱི་ལྷ་ཐམས་ཅད་ཀྱི་མིག་ཏུ་ཀྵིཾ་ལས། སའི་སྙིང་པོ་དཀར་བོ་འཁོར་ལོ་འཛིན་པ། རྣ་བར་ཛྲིཾ་ལས། ཕྱག་ན་རྡོ་རྗེ་ནག་པོ་རྡོ་རྗེ་འཛིན་པ། སྣར་ཁཾ་ལ་ནམ་མཁའི་སྙིང་པོ་སེར་པོ་རིན་པོ་ཆེ་འཛིན་པ། ལྕེར་གཾ་ལས་སྤྱན་རས་གཟིགས་དམར་པོ་པདྨ་འཛིན་པ། དཔྲལ་བར་སྐཾ་ལས་སྒྲིབ་པ་རྣམས་སེལ་ལྗང་ཁུ་རྡོ་རྗེ་རྒྱ་གྲམ་འཛིན་པ། སྤྱི་བོར་ཨོཾ་ལས་སྐུ་རྡོ་རྗེ་དཀར་པོ་འཁོར་ལོ་འཛིན་པ། མགྲིན་པར་ཨཱཿལས་གསུང་རྡོ་རྗེ་དམར་པོ་པདྨ་འཛིན་པ། ཐུགས་ཀར་ཧཱུཾ་ལས་ཐུགས་རྡོ་རྗེ་སྔོན་པོ་རྡོ་རྗེ་འཛིན་པ། ཐམས་ཅད་ཀྱང་ཞི་བ་དར་དང་རིན་པོ་ཆེའི་རྒྱན་གྱིས་བརྒྱན་པ། པད་ཟླ་ལ་རྡོ་རྗེའི་སྐྱིལ་ཀྲུང་གིས་བཞུགས་པ། གཡས་རང་རང་གི་ཕྱག་མཚན་ཐུགས་ཀར་འཇོག་ཅིང༌། གཡོན་དྲིལ་བུ་དཀུར་བརྟེན་བའོ། །སངས་རྒྱས་ཐམས་ཅད་སྐུ་གསུང་ཐུགས་རྡོ་རྗེའི་ལྷ་ཚོགས་ཀྱི་རྣམ་པར་སྤྱན་དྲངས། མཆོད་པ་དུ་མས་ཡང་དག་པར་མཆོད་དེ། ལྷ་ཐམས་ཅད་ཀྱི་གནས་གསུམ་གྱི་རྡོ་རྗེ་གསུམ་ལ་ཐིམ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཀོ྅ཧཾ། དེ་བཞིན་དུ་བཱཀ་དང་ཙིཏྟ་ལ་ཡང་སྦྱར། གཙོ་བོའི་ཐུགས་ཀའི་ཧཱུཾ་ལས་འོད་ཟེར་འཕྲོས། བཅོམ་ལྡན་འདས་གཤིན་རྗེ་གཤེད་པོའི་ཡེ་ཤེས་སེམས་དཔའི་ལྷ་ཚོགས་མདུན་གྱི་ནམ་མཁར་བཛྲ་ས་མཱ་ཛཿ རྡོ་རྗེ་ཐལ་མོ་ཁ་ཕྱེ་སྟེ། ཨོཾ་ཨརྒྷཾ་པྲ་ཏཱིཙྪ་སྭཱཧཱ། མཆོད་ཡོན། པྲ་ཝ་ར་སཏྐ་ར་པྲ་ཏཱིཙྪ་སྭཱཧཱ། ཞབས་བསིལ། འདིའི་ཕྱག་རྒྱ་ནི་ཁུ་ཚུར་མཐེབ་འཛུབ་གཉིས་ཀྱིས་མེ་ཏོག་སོགས་བླངས་ཏེ། གུང་

― TNT06_Page_0793 ―

^{[མ་དཔེ་གཟིགས་ན་འདིར་གནོན།]}

[Full Size]

མོ་སོགས་བཀྲོལ་ཏེ་ཁ་གྱེན་དུ་བསྟན་པའོ། །དེ་ནས་སྤྱི་དང་མཐུན་པར། པུཥྤཻ་ནས་ཤཔྟའི་བར་གྱིས་མཆོད། ཨོཾ་བཛྲ་ཨང་གུ་ཤ་སོགས་སྒོ་བ་བཞིའི་སྔགས་རྒྱས། དགུག་གཞུག་བཅིངས་མཉེས་གོང་དུ་བཤད་པ་ལྟར་བྱ། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས། དབང་གི་ལྷ་རིགས་ལྔ་འཁོར་དང་བཅས་པ་བཛྲ་ས་མཱ་ཛཿ པུཥྤེ་ལ་སོགས་པ་ཉེར་སྤྱོད་ལྔས་མཆོད། ཨོཾ་ཨ་བྷི་ཥིཉྩ་ཏུ་མཾ་སརྦ་ཏ་ཐཱ་ག་ཏ་ཞེས་གསོལ་བ་བཏབ་པས། དབང་བསྐུར་རྡོ་རྗེ་ཆེན་པོ་ནི། །སོགས་ཀྱི་མཐར། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་དབང་བསྐུར། ལྷ་ཐམས་ཅད་ཀྱི་སྐུ་ལུས་བདུད་རྩིའི་ཆུ་རྒྱུན་གྱིས་གང༌། སྒྲིབ་གཉིས་སྦྱངས། ཡེ་ཤེས་ལྔ་མངོན་དུ་བྱས། ཆུའི་ལྷག་མ་གྱེན་དུ་འཁྱིལ་བ་ལས། གཙོ་བོ་ལ་མི་བསྐྱོད་པས་དབུ་བརྒྱན་པའམ། སྔར་རིགས་ལྔའི་དབུ་རྒྱན་བསྒོམས་ཡོད་ན། གཙོ་བོའི་དབུ་རྒྱན་རིགས་ལྔ་ལ་ཐིམ་པས། ལྷག་པར་གཟི་བྱིན་རྒྱས་པར་གྱུར་ཅིག་ཅིང༌། འཁོར་གྱི་ལྷ་ཚོགས་རྣམས་ལ། ཤར་དང་ཤར་ལྷོ་པ་རྣམས་ལ་རྣམ་པར་སྣང་མཛད། ལྷོ་དང་ལྷོ་ནུབ་པ་ལ་རིན་ཆེན་འབྱུང་གནས། ནུབ་དང་ནུབ་བྱང་བ་ལ་འོད་དཔག་མེད། བྱང་དུ་བྱང་ཤར་བ་ལ་དོན་ཡོད་གྲུབ་པས་དབུ་བརྒྱན། དེ་དག་ནི་རྒྱས་བཏབ་ཀྱི་རྣལ་འབྱོར་རོ། །ཨོཾ་སརྦ་ཏ་ཐཱ་ག་ཏ་བྷ་ག་ཝཱན་ཤྲཱི་ཡ་མཱནྟ་ཀ་ས་པཱ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། ནས་ཤཔྟའི་བར་དུ་སྦྱར་བས་མཆོད། གཟུགས་སྒྲ་ལ་སོགས་དྲུག་པོ་ནི། །ཞེས་པ་ནས། པུ་ཛ་བཛྲ་གྱིས་ང་རྒྱལ་བཟུང་བའི་བར་བྱ། ཧཱུཾ། དུར་ཁྲོད་རྒྱན་གྱིས་རྣམ་བཞུགས་པའི། །ཞེས་སྡང་གཤིན་རྗེ་རྡོ་རྗེ་ནི། །སྤྲོས་མེད་ནམ་

― TNT06_Page_0794 ―

^{[མ་དཔེ་གཟིགས་ན་འདིར་གནོན།]}

[Full Size]

མཁའ་ལྟ་བུ་ལས། །སྙིང་རྗེ་ཐབས་ཀྱིས་སྐུ་སྤྲུལ་པ། །ཡེ་ཤེས་ཁྲོ་རྒྱལ་རབ་འཇིགས་པའི། །དུད་པ་མུན་ཅན་སྐུ་ལ་འདུད། །གར་དགུ་ཉམས་དང་ལྡན་པ་ཡི། །གཏི་མུག་རྡོ་རྗེ་གཤེད་རྗེ་གཤེད། །སྐྱེ་མེད་དོན་དམ་ངང་ཉིད་ལས། །ཐབས་ཀྱིས་སྤྲུལ་པའི་སྐུར་བསྟན་པ། །འཇིགས་བྱེད་དྲག་པོའི་ཆ་ལུགས་ཅན། །ཟླ་བ་ཉ་འདྲ་ཁྱོད་ལ་འདུད། །བསྐལ་པའི་མེ་ལྟར་འབར་བ་ཡི། །སེར་སྣ་གཤིན་རྗེ་རྡོ་རྗེ་ནི། །འཛིན་པ་པོ་ལས་གྲོལ་བ་ཡིས། །གདུག་པ་འདུལ་ཕྱིར་ཁྲོ་བོར་སྤྲུལ། །གཏེར་འཆང་སེར་སྣ་གྲོལ་མཛད་པ། །བཙོ་མ་གསེར་འདྲ་ཁྱོད་ལ་འདུད། །ཆགས་པས་མ་ལུས་དབང་མཛད་པའི། །འདོད་ཆགས་གཤིན་རྗེ་རྡོ་རྗེ་ནི། །སྐྱེ་མཆེད་རྣམ་དག་ཆོས་དབྱིངས་ལས། ཁམས་གསུམ་པ་དག་ཁྲོ་བོར་སྤྲུལ། མ་ཆགས་སྤྱན་ལྡན་ཐུགས་རྗེ་ཅན། །བནྡྷུ་ལྟ་བུའི་སྐུ་ལ་འདུད། །ཤེས་རབ་ཐབས་ལྡན་ཧེ་རུ་ཀ ། ཕྲག་དོག་གཤིན་རྗེ་རྡོ་རྗེ་ནི། །རྣམ་རྟོག་དཔེ་དང་བྲལ་བ་ལས། །ཐུགས་རྗེ་སྤྲུལ་པའི་ཁྲོ་བོ་ནི། །འགྲོ་དོན་བརྩོན་པའི་རལ་གྲི་ཅན། །སྣ་ཚོགས་མདོག་ཅན་ཁྱོད་ལ་འདུད། །ཐམས་ཅད་སྐྱེད་པའི་ལྷ་མོ་ཆེ། །དབང་པོ་ལྟ་བུར་བསྒྱུར་མཛད་པ། ཁམས་གསུམ་གཟིགས་པའི་སྤྱན་དང་ལྡན། །རྣམ་སྣང་ཅན་གྱི་བདུད་བཞི་འཇིགས། །བདེ་བ་ཆེན་པོས་རྟག་ཏུ་དགྱེས། །ཡེ་ཤེས་སྤྱན་ཅན་ཁྱོད་ལ་འདུད། །ཀུན་སྡུད་ལྷ་མོ་རིན་པོ་ཆེ། །བདག་རྟོག་སྐྱོན་ལས་རྣམ་གྲོལ་ཡང༌། །དུས་གསུམ་བདེ་གཤེགས་བདག་གིར་བྱེད། །རིན་ཆེན་ཏོག་ཅན་མཛེས་པའི་སྐུ། །དོན་དམ་ཐུགས་ཆུད་འཁོར་བ་སེལ། །མ་ལུས་ཀུན་གྱི་བདག་ལ་འདུད། །འདུས་བྱས་མ་ལུས་སྲེག་

― TNT06_Page_0795 ―

^{[མ་དཔེ་གཟིགས་ན་འདིར་གནོན།]}

[Full Size]

བྱེད་པ། །རྣམ་རྟོག་ཞི་བའི་རང་བཞིན་ལས། །ཁམས་གསུམ་མ་ལུས་སྒྲོལ་བར་བྱེད། །འོད་དཔག་མེད་ཀྱིས་རབ་མཛེས་པ། །མ་ཆགས་ཕྱག་ན་བསྣམས་པ་ཡིས། །འཕྲིན་ལས་དག་བྱེད་ཅན་ལ་འདུད། །ཐུགས་རྗེས་གཡོ་བའི་རང་བཞིན་ཅན། །འཇིག་རྟེན་གསུམ་དག་སྒྲོལ་བར་བྱེད། །གཉིས་མེད་བདེ་ཆེན་ངང་ཉིད་ལས། །འཕྲིན་ལས་གྲུབ་པའི་རང་བཞིན་ཅན། བཏང་སྙོམས་བཞུགས་པས་འགྲོ་བ་འདུལ། །ཀུན་ཏུ་ལས་ཀྱི་རྒྱལ་ལ་འདུད། །སྟུ་ཏི་བཛྲ་གྱི་ང་རྒྱལ་བཟུང༌། དེ་རྗེས་དཔལ་རྡོ་རྗེ་འཇིགས་བྱེད་རྭ་ལུགས་ཀྱི་སྒྲུབ་ཐབས་སྙིང་པོར་བཤད་པ་ལྟར་བདུད་རྩི་བྱིན་གྱིས་བརླབས་ཏེ། སྔགས་རྣམས་ཀྱི་མཐར་འབྲུ་གསུམ་བཏགས་པས་མྱང༌། ཨ་མྲྀ་ཏ་སྭ་དས་ང་རྒྱལ་བཟུང་ངོ༌། །འདིར་རྒྱུད་ལས་བདུད་རྩི་མྱང་བ་ཞེས་བྱ་བའི་ཏིང་ངེ་འཛིན་ཅེས་པ་ནས། འཕྲོས་པས་བཀུག་སྟེ་ཚིམས་པར་བྱ་ཞེས་པའི་བར་ཐམས་ཅད་བདུད་རྩི་མྱང་བའི་གཞུང་ཡིན་ཏེ། སྡོམས་ཀྱི་སྐབས་སུ། ཡང་དག་བྱིན་གྱིས་བརླབས་པ་དང༌། །བདུད་རྩི་མྱང་བར་བྱ་བ་དང༌། །ཚངས་པའི་གནས་བཞི་བསྒོམ་པ་དང༌། །ཞེས་གསུངས་པའི་ཕྱིར། རྒྱལ་བ་རིགས་ལྔ་གདན་བཅས་བསྒོམ་པ། བདུད་རྩི་བྱིན་རླབས་ཀྱི་སྐབས་ཉིད་དང་འབྲེལ་བས་ན། བདུད་རྩི་བྱིན་རླབས་ཀྱི་ཆོ་ག་རྭ་ལུགས་འདི། རྒྱུད་སྡོམ་གསུམ་པའི་དགོས་པ་ཕྱིན་ཅི་མ་ལོག་པར་སྣང་ངོ། །དེ་དག་ནི་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་ཏོ། །དེ་ལྟར་སྣང་བའི་དཀྱིལ་འཁོར་གྱི་འཁོར་ལོ་ཡང་རྨི་ལམ་ལྟ་བུར་ཡོངས་སུ་ཤེས་པས། སྤྲོ་བ་དང་བསྡུ་བ་ལ་བསླབ་པ་ནི། ལས་རྒྱལ་པོ་མཆོག་གི་ཏིང་ངེ་འཛིན་ཏོ། །ཏིང་ངེ་འཛིན་སེམས་དཔའི་མཐར་སྔགས་འཕྲེང་བཀོད་པ་སོགས་དམིགས་པ་རྣམས་གཤེད་སྐོར་སྤྱི་དང་འདྲ་བར་གསལ་བཏབ་སྟེ།

― TNT06_Page_0796 ―

^{[མ་དཔེ་གཟིགས་ན་འདིར་གནོན།]}

[Full Size]

ཨོཾ་ཧྲཱིཿཥྚཱིཿབི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་ཅི་ནུས་སུ་བཟླ་ཞིང༌། ཡི་གེ་སོ་གཉིས་པ་དང་ཨཱ་ལི་ཀཱ་ལི་དེ་ཉིད་ལྔ་སྤེལ་དུ་བྱས་པ་དང༌། གོང་དུ་བཤད་པའི་འཁོར་གྱི་ལྷ་སྐྱེད་པའི་སྔགས་རྣམས་ཀྱང༌། ཇི་ལྟར་འོས་པར་བཟླའོ། །ཐུན་བསྡུ་བར་འདོད་ན། གཞལ་ཡས་ཁང་ནི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ནོ། །གཙོ་བོ་བཅོམ་ལྡན་འདས་ནི། ཀུན་ཏུ་ཁྱབ་པའི་ཆོས་ཀྱི་དབྱིངས་ཀྱི་ཡེ་ཤེས་སོ། །ཚད་མེད་པ་རྣམས་མཉམ་པ་ཉིད་ནི། རྡོ་རྗེ་རོ་ལངས་མའོ། །གཏི་མུག་རྡོ་རྗེ་ལ་སོགས་པ་ནི། མེ་ལོང་ལྟ་བུ་ལ་སོགས་པ་ཡེ་ཤེས་བཞིའི་ངོ་བོ་ཉིད་དོ། །ལྷ་མོ་བཞི་ནི་ཚད་མེད་པ་བཞིའི་བདག་ཉིད་དོ། །སྒེག་མོ་ལ་སོགས་པ་བརྒྱད་ནི། སྦྱིན་པ་ལ་སོགས་པ་བརྒྱད་ཀྱི་དངོས་པོའོ། །སྒོ་བ་བཞི་ནི་བདུད་བཞི་ཡང་དག་པར་བཅོམ་པའོ། །ཞེས་དག་དྲན་བྱས་ཏེ། རང་གི་སྙིང་ག་ནས་འོད་ཟེར་འཕྲོས། ཞེས་པ་ནས། ཁམས་གསུམ་སྣོད་བཅུད་སོགས་དང༌། དགེ་བ་བསྔོ་བའི་བར་ཡང༌། གོང་གཤེད་དམར་གྱི་སྐབས་སུ་བཤད་པ་དང་འདྲ། གཏོར་ཆོག་ལ། གཏོར་མ་བྱིན་རླབས་ནི་ནང་མཆོད་བྱིན་རླབས་དང་འདྲ་ཞིང༌། འབུལ་བའི་སྔགས་ནི། འཇིག་རྟེན་འདས་པ་ལ། དགྲ་ནག་དཔལ་འཛིན་ལུགས་ཀྱི་སྐབས་སུ་བཤད་པ་དང་འདྲ་ཞིང༌། ཕྱོགས་སྐྱོང་རྣམས་ཡེ་ཤེས་པར་བསྒྱུར་བའི་སྐབས་གཙོ་བོ་ཉིད་དང་མཚུངས་པར་བྱ་ལ། ཕྱོགས་སྐྱོང་གི་གཏོར་སྔགས་ཀྱང་དགྲ་ནག་དང་འདྲ་ཞིང༌། ཡང་ན་འདི་ལ་ཕྱོགས་སྐྱོང་རྣམས་སྐུའི་རྣམ་པ་མ་བསྒྱུར་བ་ཉིད་ཀྱང་ལེགས་པར་མངོན་ནོ། །སྤྱིར་གཤིན་རྗེ་གཤེད་གདོང་དྲུག་སྡོམ་གསུམ་པའི་རྒྱུད་འདི། ཞོར་བྱུང་ཙམ་མ་གཏོགས་གཙོ་བོར་ལག་ལེན་དུ་བྱེད་པ་རྒྱ་བོད་གཉིས་ཅར་དུ་ཉུང་བར་བྱུང་འདུག་པས། སྒྲུབ་ཐབས་གཉིས་ཁོ་

― TNT06_Page_0797 ―

^{[མ་དཔེ་གཟིགས་ན་འདིར་གནོན།]}

[Full Size]

ན་ལས་དགོངས་འགྲེལ་རྒྱ་གཞུང་གཞན་མར་འགྱུར་ལ། རྒྱུད་ལའང་རྒྱ་འགྲེལ་མེད། བོད་ཀྱིའང་རྭ་ལུགས་ཀྱི་ཡིག་སྣ་གཅིག་ཡོད་ཅིང༌། གཞན་ས་བཅད་དང་རྒྱུད་གཞུང་ལ་མཆན་བུ་ཐར་ཐོར་མ་གཏོགས་བོད་ཀྱི་ཡིག་རྙིང་ཡང་དཀོན་པར་ཡོད་དོ། །རྒྱུད་རང་གི་ངོ་བོ་ཞལ་གསལ་པོའི་རིགས་སུ་འདུག་ཀྱང༌། དགོངས་འགྲེལ་གྱི་བསྟན་བཅོས་ཉུངས་པས། ཇི་བཞིན་དུ་འཆད་དཀར་བར་གྱུར་ཏེ། བོད་ཀྱི་བླ་མ་བར་སྐབས་སུ་བྱུང་བ་ཕལ་ཆེར། ལྷ་སྔགས་ཙམ་མ་གཏོགས། དགྲ་ནག་བཅུ་གསུམ་མ་ཁོ་ན་འདོན་པ་སྤོ་བར་མཛད་པ་དང༌། ལོ་ཙཱ་བ་རིན་རྣམ་ཡང་གཞན་རྣམས་དེ་དང་འདྲ་བ་ལས། ཕྱག་རྒྱའི་རྒྱས་བཏབ་ཀླུ་བྱང་གི་གཞུང་ནས་ཁ་སྐོང་སྟེ། རྒྱས་བཏབ་བྱེད་པ་དེ་ནི་ལེགས་ཀྱང༌། སྐྱེད་ཆོག་དགྲ་ནག་ཇི་བཞིན་དུ་བྱེད་པ་དེ་ཐམས་ཅད་སྤྱིར་མན་ངག་ཡིན་ན་མི་འགལ་མོད། རྒྱུད་གཞན་གྱི་ཆོ་གས་སྒྲུབ་པའི་ལུགས་སུ་སོང་གི། རྒྱུད་འདི་ཉིད་ཀྱི་དགོངས་པ་མ་ཡིན་ཏེ། རྒྱུ་རྡོ་རྗེ་འཛིན་པ་དང༌། ཞུ་བ་གླུས་བསྐུལ་དང༌། འཁོར་ཚོགས་མཁའ་ནང་ནས་སྤྲོ་བ་རྣམས་རྒྱུད་ལས་ཟུར་ཙམ་མ་ཡང་གསུངས་པའི་ཕྱིར་རོ། །སྒྲུབ་ཐབས་གཉིས་ལས་ཀྱང་དེ་འདྲ་མ་གསུངས་སོ། །དེས་ན་གཙོ་བོ་མངོན་བྱང་ལྔ་བསྐྱེད་དང༌། འཁོར་རྣམས་སྙིང་པོའི་སྔགས་ཀྱིས་བསྐྱེད་པ་ཉིད། རྒྱུད་ཀྱི་དངོས་བསྟན་ཡིན་པར་བསྙོན་དུ་མེད་དོ། །དགྲ་སྟོན་དུས་དགྲ་ནག་པོས་སྦྱར་ཞེས་འབྱུང་བའི་ཡི་གེ་ལས། གཙོ་འཁོར་ཐམས་ཅད་མངོན་བྱང་ལྔ་ལས་བསྐྱེད་པ་དང༌། དེའི་རྒྱུ་མཚན་རྒྱུད་ལས། རྡོ་རྗེ་ཐོ་སོགས་སོ་སོར་རྟོག །ཅེས་པའི་སོགས་ཁོངས་ནས་འཁོར་གྱི་ཕྱག་མཚན་དང༌། མངོན་བྱང་དང་པོའི་སྐབས། འཁོར་ལོ་ལ་སོགས་ས་བོན་ཡིན། །ཞེས་གཏི་མུག་རྡོ་རྗེ་ལ་སོགས་པའི་མངོན་བྱང་ཡང་བསྟན་པས་སོ། །ཞེས་ཟེར་བ་ནི་རྒྱུད་དོན་མ་ཡིན་ཏེ། ཐོ་བ་སོགས་ཀྱི་དོན་སོགས་ཁོངས་ནས་ཡུམ་གྱི་ཕྱག་

― TNT06_Page_0798 ―

^{[མ་དཔེ་གཟིགས་ན་འདིར་གནོན།]}

[Full Size]

མཚན་འདོན་པ་ཡིན་ལ། འཁོར་ལོ་ལ་སོགས་ཀྱི་དོན། ཕྱག་ཞབས་འཁོར་ལོའི་མཚན་པ་སོགས། མཚན་བཟང་པའི་ས་བོན་དུ་བསྟན་པའོ། །དགྲ་སྟོན་ཅེས་བྱ་བ་དེ་ཡང་གོང་མ་ཚེས་ལྔ་པའི་གབ་མིང་ཡིན་ཞེས་གྲག་གོ །གང་ལྟར་ནའང་དེ་འདྲ་བའི་ཡི་གེ་མཐོང་ན། རང་ལུགས་ལ་ཐེ་ཚོམ་ཟ་བ་གྱུར་གྱི་དོགས་ནས། དེའི་ལུགས་ལའང་དཔྱད་པར་བྱས་ཀྱི། སྤྱིར་དེ་ཙམ་ལ་དཔྱད་ཀྱིས་མི་ལང་ངོ༌། །འདིའི་དག་སྦྱོར་གྱི་སྙིང་པོ་ནི། གཞལ་ཡས་ཁང་གདན་དང་བཅས་པ་ཡན་ཆད་དམར་ནག་བཅུ་གསུམ་མའི་སྐབས་དང་འདྲ། སྦྱང་བྱའི་སྐབས་ཕ་མ་བུ་སོགས་ཀྱིས་དབྱེ་བ་མི་བྱེད་པར། མངོན་བྱང་ལྔ་ལས་གཙོ་བོ་བསྐྱེད་པ་ནི། མངལ་སྐྱེས་དང་སྒོང་སྐྱེས་ཀྱི་སྲིད་པ་སྦྱོང་བསྐྱེད་རིམ་སྤྱིའི་རིམ་པ་དང་མཐུན་ཅིང༌། ནད་སོགས་བར་དོ་སྦྱོང་བྱེད་ལ་ལོགས་པར་མེད་ཀྱང༌། སྐབས་འདིར་ཧཱུཾ་ཡིག་དང་པོར་སྐྱེད་ཙམ་ཉིད། བར་དོ་སྦྱོང་བྱེད་ཡིན་ལ། སྐད་ཅིག་གཉིས་པ་ལ་མངལ་དུ་ཞུགས་པ་མཚོན། སྤྱིར་ཆོ་ག་བསྡུས་པའི་ལུགས་ལ། བར་དོ་སྦྱོང་བྱེད་ལོགས་སུ་མེད་པ་ཡང་ཤིན་ཏུ་མང་པོ། །སེམས་དཔའ་གསུམ་བརྩེག་སྔར་དང་འདྲ། ཕྱག་རྒྱ་བཞི་ནི་རིམ་པས་སེམས་དང་ངག་དང་ལུས་དང་ལོངས་སྤྱོད་རྫོགས་པའོ། །གཙོ་བོ་ལ་ཡེ་ཤེས་དགུག་གཞུག་ལོགས་སུ་ཡོད་པ་ལྟར་ན། དེ་ཡང་སེམས་རྫོགས་པའི་ནང་དུ་འདུའོ། །འཁོར་གྱི་ལྷ་ཚོགས་སྔགས་ཙམ་ལས་བསྐྱེད་པ་ནི། རླུང་གི་སྐྱེ་གནས་ཅན་རྫུས་སྐྱེས་སྦྱོང་བྱེད་དང༌། མིག་སོགས་དང་རྡོ་རྗེ་གསུམ་གྱི་ལྷ་ས་བོན་ལས་སྐྱེད་པ་ནི། དྲོད་གཤེར་སྐྱེས་སྦྱོང་བ་དང༌། རྡོ་རྗེ་གསུམ་བྱིན་གྱིས་བརླབ་པ་དང༌། ཡེ་ཤེས་དགུག་གཞུག་ནི། དེ་རྣམས་ཀྱི་སྐུ་གསུང་ཐུགས་དང༌། ཡེ་ཤེས་ཀྱི་ནུས་པ་རྫོགས་པ་དང༌། དབང་བསྐུར་མཆོད་བསྟོད་སོགས་ཀྱང་སྤྱི་དང་འདྲའོ། །དེ་བཞིན་དུ་མངོན་བྱང་ལྔ་ནི། རྩ་ཨ་ཝ་དྷཱུ་ཏཱིར་ཁམས་དང་རླུང་གི་འདུ་འཕྲོད་ལས། རྫོགས་རིམ་གྱི་ཡེ་ཤེས་སྐྱེ་

― TNT06_Page_0799 ―

^{[མ་དཔེ་གཟིགས་ན་འདིར་གནོན།]}

[Full Size]

བ་དང༌། ཕྱག་རྒྱ་བཞི་ནི་རྣམ་རྟོག་ཐིམ་པ་དང༌། རླུང་ཐིམ་པ་དང༌། ཁམས་ཀྱི་སྒྲོད་པ་སྤྱི་བོར་ཐིམ་པ་དང༌། རྩ་བརྒྱད་དག་པའི་མཐུ་ལས་འདོད་ཡོན་བདེ་བར་ཤར་བའོ། །འཁོར་ཚོགས་སྤྲོ་བ་ནི། ཕུང་པོ་དང༌། ཁམས་དང༌། དབང་ཡུལ་དང༌། དབང་རྟེན་ཁོག་པ་རྣམས་རིམ་གྱིས་རྣམ་པར་དག་པའི་ཡེ་ཤེས་སོ། །མིག་སོགས་བྱིན་རླབས་མན་ཆད་སྤྱི་དང་མཚུངས། ཡང་འབྲས་བུ་དང་སྦྱར་ན་མངོན་བྱང་ལྔ་ནི་ཡེ་ཤེས་ལྔ། ཕྱག་རྒྱ་བཞི་ནི་སྐུ་བཞི། འཁོར་ཚོགས་རྣམས་ནི་ཕུང་ཁམས་སོགས་དག་པའམ་སྟོང་ཉིད་ཉི་ཤུའི་ཡེ་ཤེས། གཞན་རྣམས་ལ་སྤྱི་དང་མཚུངས་པའི་དག་སྦྱོར་བྱའོ། །འདི་ལ་སྒོས་ཀྱི་དཀྱིལ་ཆོག་རྒྱ་གཞུང་མེད་པས། རྭ་བ་དང་སྐྱོ་བ་ནི་རང་རང་གི་ལུགས་རྡོ་རྗེ་འཇིགས་བྱེད་ཀྱི་དཀྱིལ་ཆོག་འདོན་པ་སྤོ་ལ། ཞང་པ་ཡང་ནག་པོའི་དཀྱིལ་ཆོག་འབྱུང་བ་དང་སྦྱོར། སྔོན་གྱི་མལ་ལུགས་པ་ཡང་རང་བཞེད་ཀྱི་ནག་པོའི་དཀྱིལ་ཆོག་དང་སྦྱོར་བར་གྲགས། འོན་ཀྱང་འདིར་ནི་བར་སྐབས་བྱོན་པའི་ཆེན་པོ་རྣམས་ཀྱིས་ལུགས་རྙིང་པ་ཐམས་ཅད་གསན་ནས་གཅིག་ཏུ་གྲིལ་བ་ཡིན་པས་འདོན་པ་བསྒྱུར་དགོས་ཀྱི་ཁྱད་པར་རྣམས་མ་གཏོགས། དམར་ནག་གི་དཀྱིལ་ཆོག་དཔལ་འཛིན་གྱི་ལུགས་དེ་ཁ་སྦྱོར་རྒྱུ་ཡིན་ནོ། །རྒྱུད་འདིའི་འཁྲུལ་འཁོར་ནི། བླ་མ་དང་ལྷག་པའི་ལྷའི་བྱིན་རླབས་ཀྱི་སྟོབས་ལས་བཤད་པ་བྱ་སྟེ། བོད་ཀྱི་ཡི་གེ་འཁོད་པ་གང་ནའང་རྒྱུད་དོན་བཞིན་མེད་དེ། མ་བཤད་པ་དང་ལོག་བཤད་དག་ཁོ་ནའོ། །ཀླུ་བྱང་གིས་ཅུང་ཟད་བཤད་པ་དེ་ཡང་ཤིན་ཏུ་མི་གསལ་ལོ། །དེས་ན་འདི་ལྟར་གོ་དགོས་ཏེ། དཀྱུས་དང་ལོགས་སུ་ཐིག་བརྒྱད་བརྒྱད་བཏབ་པས། རེ་མིག་བཞི་བཅུ་ཞེ་དགུར་བྱ། ཡང་ན་ཟླུམ་སྐོར་རིམ་པ་བཞི་བྱས་པའི་འཁོར་ལོ་ཟླུམ་པོ་ལའང་འགྲིག་ཙམ་འོང་སྟེ། རྒྱུད་ཀྱི་དགོངས་པ་ནི་གྲུ་བཞི་ཉིད་དོ། །དེ་ཡང་ཕྱིའི་ཟུར་བཞི་ལ་རྀ་ལྀ་བཞི། བར་བའི་ཟུར་

― TNT06_Page_0800 ―

^{[མ་དཔེ་གཟིགས་ན་འདིར་གནོན།]}

[Full Size]

བཞི་ལ་ཨ་སོགས་བཞི། ནང་མའི་ཟུར་བཞི་ལ་ཨེ་སོགས་བཞི། ཕྱི་སྐོར་གྱི་སྟེང་གི་རེ་མིག་ལྔ་ལ་ཀ་སྟེ། གཡོན་གྱི་ལྔ་ལ་ཙ་སྡེ། འོག་གི་ལྔ་ལ་ཊ་སྡེ། གཡས་ཀྱི་ལྔ་ལ་ཏ་སྡེ། རིམ་པ་བར་བའི་སྟེང་གི་གསུམ་པ་ལ་ཕ་བ། གཡོན་གྱི་གསུམ་ལ་བྷ་མ་ཡ། འོག་གི་གསུམ་ལ་ར་ལ་ཝ། གཡས་ཀྱི་གསུམ་ལ་ཤ་ཥ་ས། ནང་མའི་ཕྱོགས་བཞི་ལ་གཡས་སྐོར་གྱི། ཧ་དང་ཨཱུ་རིང་པོ་དང༌། ང་རོ་རྣམ་བཅད་རྣམས་འགོད་པར་བྱའོ། །ནང་གི་རེ་མིག་དགུའི་ཕྱོགས་བཞི་དང་བར་པའི་མཚམས་བཞི་བོར་བའི་རེ་མིག་བཅུ་གཉིས་ལ། ཡ་སོགས་ཡི་གེ་བཅུ་བདུན་འགོད། ཕྱི་སྐོར་ཉེར་བཞི་ལ། ཟུར་དང་པོར་ཨོཾ་དགོད་པར་བརྩམས་ཏེ། བར་དུ་རེ་མིག་རེ་རེ་བོར་བར་ཡི་གེ་བཅུ་བཞི་པ་འགོད་དེ། ཧཱུཾ་གཉིས་དང་ཕཊ་གཉིས་རེ་མིག་རེ་རེ་ལ་འགོད་དོ། །ལྟེ་བར་ཡའི་དབུས་སུ་ཀྵ་འགོད་ཅིང༌། དེའི་ནང་དུའང་མིང་ཡིག་བྲི། གཞན་རྣམས་མགོ་ཕྱིར་བསྟན་ཡིན་ན། དབྱངས་གསལ་ཕྱི་དང༌། ནང་བསྟན་ཡིན་ན་སྔགས་འབྲུ་རྣམས་ཕྱིར་འགོད། དབྱངས་གསལ་རྐྱང་པ་ཡོད་པའི་རེ་མིག་ཉི་ཤུ་ལ། དབྱངས་གསལ་གྱི་ཡི་གེའི་འོག་ཏུ། ཧྲཱིཿཡིག་གམ་ཧཱུཾ་གཉིས་ཀྱི་མཐའ་བརྟེན་པའི་མིང་ཡིག་འབྲི་སྟེ། དཔེར་ན་སྟེང་དུ་ཀ་དང༌། འོག་གི་ཧྲཱིཿའམ་ཧཱུཾ་གཉིས་གསུམ་ཚོམས་སུ་བྱུང་བ་ནི། རྒྱ་ཡིག་ཨི་དང་འདྲ་བ་སྟེ། སུམ་སྐོར་གྱི་དོན་ཡིན་པ། འདི་ལའང་འཁྲུལ་འཁོར་རི་མོར་བྲིས་པ་དང་མཐུན་པའི་སྔགས་བཟླ་ཚུལ་སོགས་བྱ་དགོས་སོ། །འདིར་སྨྲས་པ། སྔོན་རབས་འགའ་ཡིས་འདི་དོན་རྟོགས་སྲིད་ཀྱང༌། །ཡི་གེའི་ལམ་དུ་འཁོད་པ་གཅིག་ཀྱང་མེད། །ཕྱི་རབས་དུས་དང་དེང་སང་རྒྱུད་འདིའི་དོན། །ཇི་བཞིན་མ་ནོར་སྨྲ་བར་ང་མིན་སུ། །འདི་ནི་འཁྲུལ་འཁོར་གྱི་ཁྱད་པར་ཐུན་མོང་མ་ཡིན་པ་ཡོད་ཚུལ་སྐལ་ལྡན་དོན་གཉེར་རྣམས་ལ་འཕྲིན་བསྐུར་བ་ཙམ་

― TNT06_Page_0801 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་གྱི། ལག་ལེན་བླ་མ་དམ་པ་ལས་རྟོགས་དགོས་པ་ཁོ་ནའོ།། །།༈ བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཆེན་པོ་ལ་ཕྱག་འཚལ་ལོ། །དེ་ལ་འཇམ་དཔལ་ཁྲོས་པ་ལྷ་བཞི་བཅུ་རྩ་དགུའི་བདག་ཉིད་ཀྱི་སྒྲུབ་ཐབས་མཛད་པ་པོ་ལ་ལི་ཏ་བཛྲ་ཞེས་བྱ་བ་འདི། ནག་པོ་སྐོར་གསུམ་གྱི་རྒྱུད་སྤྱན་འདྲེན་པ་པོའི་ལ་ལི་ཏ་བཛྲ་མ་ཡིན་པར་ཤེས་ལ། རོ་ལངས་བརྒྱད་སྐོར་གྱི་སྒྲུབ་ཐབས་རྒྱ་གཞུང་མཛད་པ་པོ་དང༌། དགྲ་ནག་གི་གཞུང་གཤིན་རྗེ་གཤེད་འབྱུང་བ་མཛད་པ་པོ་ཡང༌། རྒྱུད་སྤྱན་འདྲེན་མཁན་གྱི་ལ་ལི་ཏ་མིན་པར་ངེས་ཤིང༌། གཞུང་འདི་དག་མཛད་པ་པོ་གང་ཟག་གཅིག་རང་ཡང་ཡིན་པར་མ་ངེས་པས། ལ་ལི་ཏའི་མཚན་ཅན་མང་དུ་བྱུང་བར་གསལ། རྒྱུད་སྤྱན་འདྲེན་པ་པོ་ལ་ལ་ལི་ཏ་ཆེ་བ་དང༌། གཞན་རྣམས་ལ་ལ་ལི་ཏ་ཆུང་བ་ཟེར་ཡང༌། ཆུང་བ་ལ་གཅིག་ཁོ་ནར་ངེས་བཟུང་མེད་ལ། ལ་ལི་ཏ་བཛྲ་དང༌། ལཱི་ལ་བཛྲ་ཡང༌། བོད་སྐད་དུ་བསྒྱུར་ན་རོལ་པའི་རྡོ་རྗེ་ཞེས་བྱ་བར་གཅིག་ཀྱང་རྒྱ་སྐད་མཚན་ཐ་དད་པའི་ཕྱིར། རྒྱུ་མཚན་ངེས་ཅན་གཞན་ཡོད་ན་མ་གཏོགས། སོ་སོ་ཡིན་པར་གསལ་ལོ། །སྐྱོ་ལུགས་པ་རྣམས་ལ་ལི་ཏའི་མཚན་གྱི་རྣམ་གྲངས་སྒེག་པའི་རྡོ་རྗེར་བཞེད་མོད། སྤྱིར་དེ་ལྟར་མི་འགལ་ཡང༌། འཇམ་དཔལ་གསང་ལྡན་མཛད་པ་པོ་དང་ནི་ཡེ་མི་གཅིག་གོ །འདིར་ལ་ལི་ཏ་ཆུང་བས་མཛད་པའི་སྒྲུབ་ཐབས་ཀྱི་རྗེས་སུ་འབྲངས་ནས། འཇིགས་མཛད་ཆེན་པོ་ཞེ་དགུ་མའི་སྒྲུབ་ཐབས་མདོ་ཙམ་བཤད་པར་བྱའོ། །དེ་ལ་ཐོག་མར་རྡོ་རྗེ་འཇིགས་བྱེད་དཔའ་རྐྱང་རྭ་ལུགས་ཀྱི་སྒྲུབ་ཐབས་སྙིང་པོ་ཞེས་བྱ་བ་ཁོ་བོས་སྔར་སྦྱར་ཟིན་པ་དང༌། དེའི་དཀྱིལ་ཆོག་སྔར་སྦྱར་ཟིན་པའི་བདག་བསྐྱེད་དང་མདུན་བསྐྱེད་ཀྱི་སྐབས་ཀྱི་ཚིག་དོན་རྣམས་བློ་ལ་འཇེམས་པར་བྱས་ནས། བྱ་བའི་རིམ་པ་དང་ཚིག་རིགས་གཅིག་གིས་ཆོག་པ་རྣམས།

― TNT06_Page_0802 ―

^{[མ་དཔེ་གཟིགས་ན་འདིར་གནོན།]}

[Full Size]

དེར་ཁ་འཕངས་ཏེ་འདིར་མི་འདྲ་བའི་ཁྱད་པར་རྣམས་བརྗོད་པར་བྱའོ། །སྐྱབས་སེམས་ཡིག་བརྒྱ་སོགས་སོང་ནས། སྐད་ཅིག་གིས་རང་དཔལ་རྡོ་རྗེ་འཇིགས་བྱེད་དུ་གྱུར་པའི་སྙིང་གར་པདྨ་དང་ཟླ་ཉི་ལ། ཧཱུཾ་ནག་པོ་མཆོག་ཏུ་འབར་བའི་ཞེས་དང༌། ཨོཾ་བཛྲ་ལ་སྱ་སོགས་ཀྱི་དོད་དུ། ཨརྒྷཾ་ནས་ཤཔྟའི་བར་གྱིས་མཆོད་པ་གོང་དམར་པོའི་སྐབས་བཞིན་དུ་བྱ། རྒྱུན་བཤགས་སྡོམ་བཟུང་ཚད་མེད་བཞི་དང༌། སྭ་བྷཱ་ཝའི་སྔགས་དོན་གྱི་བར་ཡང་སྒྲུབ་ཐབས་སྙིང་པོ་དང་འདྲ། འོན་ཀྱང་འདི་ལ་སྐྱོ་པ་རྣམས་ཚོགས་ཞིང་ལ་ཕྱི་ནང་གསང་བའི་མཆོད་པ་འབུལ། རྒྱུན་བཤགས་ཚིག་ལྷུག་པ་བྱེད། དེ་ནི་མི་ལེགས་པའང་མིན་ལ། འཛིམས་པ་རིན་ཤེའི་སྒྲུབ་ཐབས་དང༌། ལ་ལི་ཏའི་རྗེས་འབྲང་དུ་འདོད་པ་ཕྱིས་འབྱུང་ཐམས་ཅད་ཀྱིས། རྒྱ་གཞུང་གི་ཚིག །སྡིག་པ་རྣམས་ནི་བཤགས་པར་བྱ། །སྐྱེས་ཞིང་འབྱུང་བ་རྣམས་ནི་བསལ། །མི་བྱེད་པར་ཡང་སྤྱན་སྔར་བརྗོད། །ཅེས་སོགས་བརྗོད་པ་ནི་མི་ལེགས་ཏེ། དེ་དག་ནི་བཤགས་པ་ལ་སོགས་པ་དེ་དང་དེ་བྱའོ་ཞེས་གོ་བ་སྟོན་ཅིང་འཆད་པའི་ཚིག་ཡིན་གྱི། ངག་ནས་འདོན་རྒྱུའི་ཚིག་མ་ཡིན་པའི་ཕྱིར་རོ། །ཚིག་དེ་ཉིད་ཀྱི་ཐོག་མཐར། མཆོད་པ་རྣམས་ཀྱིས་ལེགས་པར་མཆོད། །ཅེས་དང༌། ཚད་མེད་བཞི་ཡི་ཁང་བཟང་ལམ། །མཆོད་པ་བདུན་ནི་རབ་ཏུ་བྱ། །ཞེས་སོགས་དང་འདྲ་སྟེ། དེ་འདོན་དགོས་ན་དེ་ཡང་འདོན་དགོས་པར་འགྱུར་རོ། །དེ་ནས་སྭ་བྷཱ་ཝའི་རྗེས་སུ། ཨོཾ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་དུད་ཁ་ཟླུམ་པོའི་སྟེང་གི་དབུས་སུ། སྣ་ཚོགས་རྡོ་རྗེ་དང་བཅས་པ། དེའི་སྟེང་དུ་པཾ་ལས་པདྨ་དང༌། ཨ་ལས་ཟླ་བའི་གདན་ལ་ཡི་གེ་དྷཱྀཿལས་རང་ཉིད་འཇམ་དཔལ་གཞོན་ནུ་སྐུ་མདོག་སྔོན་

― TNT06_Page_0803 ―

^{[མ་དཔེ་གཟིགས་ན་འདིར་གནོན།]}

[Full Size]

པོའམ་གསེར་གྱི་མདོག་ཅན་ཡིད་ཙམ་ཁྲོ་བ། ཕྱག་གཡས་རྡོ་རྗེས་མཚན་པའི་རལ་གྲི་འཕྱར་ཞིང༌། གཡོན་སྡིགས་འཛུབ་མཛད་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་ཤིང༌། དར་དང་རིན་པོ་ཆེས་བརྒྱན་པ། ཟུར་ཕུད་ལྔ་དང་ལྡན་ཞིང་མཚན་དཔེ་ཐམས་ཅད་ཡོངས་སུ་རྫོགས་པར་གྱུར། དེའི་ཐུགས་ཀར་ཨ་ལས་ཉི་མའི་དཀྱིལ་འཁོར་རོ། །ཉི་མའི་འོད་ཀྱིས་འཇམ་དཔལ་གྱི་སྐུ་ཞུ་སྟེ་ཉི་མའི་དཀྱིལ་འཁོར་ལ་གཅིག་ཏུ་འདྲེས་པར་གྱུར། དེ་ལས་འོད་ཟེར་ཕྱོགས་བཅུར་འཕྲོས་པས། འོད་ཀྱི་རྩེ་མོ་ལ་འཇམ་དཔལ་གྱི་སྐུ་དཔག་ཏུ་མེད་པ་སྤྲུལ། ཕྱོགས་བཅུའི་བགེགས་དང་ལོག་འདྲེན་བར་ཆད་ཐམས་ཅད་བསད་བསྐྲད་དབྱེ་རྨོངས་རེངས་བརྒྱལ་བ་ལ་སོགས་པས་ཚར་བཅད། ཚུར་འདུས་ཉི་མ་ལ་ཐིམ། སླར་ཡང་འོད་ཟེར་དཔག་ཏུ་མེད་པ་འཕྲོས། སེམས་ཅན་གྱི་དོན་བྱས། དེ་བཞིན་གཤེགས་པ་དང༌། བྱང་ཆུབ་སེམས་དཔའ་དང༌། རིག་པའི་ལྷ་མོ་དང༌། ཁྲོ་བོ་དང༌། རིག་པ་འཛིན་པའི་ཚོགས་ཐམས་ཅད་སྤྱན་དྲངས་ཏེ་ཉི་མ་ལ་ཐིམ། གདུག་པ་ཐམས་ཅད་སྲེག་པར་བྱེད་པའི་འོད་ཟེར་མཐའ་མེད་དུ་འབར་བས། ཉི་མའི་དཀྱིལ་འཁོར་དཔག་ཚད་འབུམ་དུ་ཁྱབ་པར་གྱུར། སྐྱོ་བའི་ཡིག་རྙིང་འགའ་ལས། སྐབས་འདིར་འཇམ་དཔལ་ཉི་མ་ལ་ཐིམ་པར་བྱེད་ཀྱང་གཞུང་ཉིད་དང་ཅུང་ཟད་མི་མཐུན་ནོ། །དེ་ལྟ་བུའི་འོད་ཀྱི་འཕྲེང་བ་ལས་སྐད་ཅིག་གིས། རྡོ་རྗེའི་ས་གཞི་རྭ་གུར་མེ་དཔུང་དང་བཅས་པའི་བསྲུང་བའི་འཁོར་ལོར་གྲུབ་ཅིང༌། དབུས་སུ་བྷྲུཾ་ལས་སྣ་ཚོགས་རྡོ་རྗེའི་གཞི་ལ་གནས་པ། རྣམ་པར་སྣང་མཛད་ཀྱི་རང་བཞིན་གཞལ་མེད་ཁང་གྲུ་བཞི་སྒོ་བཞི་པ། རིན་པོ་ཆེ་སྣ་ལྔ་ལས་གྲུབ་པ། ནང་ནས་

― TNT06_Page_0804 ―

^{[མ་དཔེ་གཟིགས་ན་འདིར་གནོན།]}

[Full Size]

རིམ་པ་བཞིན་དུ། ནག་ལྗང་དམར་སེར་དཀར་བའི་རྩིག་པ་རིམ་པ་ལྔ་དང་ལྡན་པ། དེའི་སྟེང་དུ་ཕ་གུ་སེར་པོ་དང༌། དྲ་བ་དང༌། དྲ་ཕྱེད་འཆང་བ། རིན་པོ་ཆེའི་འཕྲེང་བ་དང་བཅས་པ། སྟེང་མདའ་ཡབ་མཆོད་རྟེན་གྱི་རྣམ་པར་མཛེས་པ། པུ་ཤུའི་ཁོར་ཡུག་ལ་གདུགས་དང་རྒྱལ་མཚན་དང་བ་དན་བསྒྲེང་བ། ནང་གི་ལྷ་སྣམ་ཤར་དཀར་ལྷོ་སེར་ནུབ་དམར་བྱང་ལྗང༌། དབུས་སྔོ་བ། ནང་ཀ་བ་བརྒྱད་དང་ལྡན་པ། སྟེང་རྡོ་རྗེའི་གདུང་བཞིས་མིག་མང་རིས་སུ་བྲིས་པ། དབུས་སུ་དཀྱིལ་འཁོར་ཟླུམ་པོ། དེའི་ནང་རེ་མིག་དགུར་གྱུར་པ། རྩིག་པའི་ཕྱི་རོལ་འདོད་ཡོན་གྱི་སྣམ་བུ་ལ་མཆོད་པའི་གཟུངས་མ་རྣམས་དང༌། སྒོ་བཞིའི་ཐད་ཀ་ནས་ཀ་བ་བཞི་བཞིས་བཏེགས་པའི་རྟ་བབས་རྣམས་ཀྱི་རྩེ་མོར་པདྨ་ལ་གནས་པའི་འཁོར་ལོ་དང༌། རི་དྭགས་དང་གདུགས་ཀྱིས་མཚན་པ། ཁྱམས་ལ་མཆོད་པའི་ཚོགས་ཐམས་ཅད་ཀྱིས་བརྒྱན་པའོ། །དེའི་ཕྱིར་རོལ་ཏུ་གཏུམ་དྲག་ལ་སོགས་པ་ནས། སྣ་ཚོགས་པས་གང་བའོ། །ཞེས་པའི་བར་སྒྲུབ་ཐབས་སྙིང་པོ་ལྟར་རོ། །དཀྱིལ་འཁོར་ནང་མའི་རེ་མིག་དགུ་དང༌། ཕྱོགས་བཞིའི་ལྷ་སྣམ་ལ་ལྷའི་གནས་བརྒྱད་བརྒྱད་དང༌། སྒོ་བཞི་དང༌། གྲྭ་བཞི་སྟེ་ལྷའི་གནས་བཞི་བཅུ་རྩ་དགུར། སྣ་ཚོགས་པདྨ་དང་ཉི་མའི་དཀྱིལ་འཁོར་བརྩེགས་པའི་གདན་རེ་རེ་གནས་པར་གྱུར། དེ་ནས་ལྷ་བསྐྱེད་པ་ལ། སྐབས་འདིར་གཞུང་ལས། ཐོག་མ་ཕྱག་མཚན་རྣམས་བཀོད་ནས། དེ་ཟླ་བར་བསྒྱུར་དགོས་པ་འདྲ་བ་ཞིག་ཡོད་ཅིང༌། ཕྱིས་ཀྱི་དཔྱད་པ་ཆེ་རུ་རེ་བ་ཀུན་ཡང༌། སྐབས་འདིའི་དོན་འཛུག་ཚུགས་བཤད་རྒྱུ་མེད་ནས་ཟོལ་འཇོག་བྱེད་ཅིང་འབྲོས་པར་སྣང་ངོ༌། ཁ་ཅིག་འདིར་རླུང་གི་དཀྱིལ་འཁོར་བཞི་བཅུ་ཞེ་དགུ་བསྒོམ་པར་

― TNT06_Page_0805 ―

^{[མ་དཔེ་གཟིགས་ན་འདིར་གནོན།]}

[Full Size]

འདོད་པ་ནི། གཞུང་དང་མི་མཐུན་ལ་སྔ་རབས་པ་སུ་ཡང་མི་འདོད་ཅིང༌། ཧམ་ཤུར་བརྗོད་པ་ཙམ་མོ། །དེ་ལ་གཞུང་གི་དོན་ནི། ལས་དང་པོ་པས་དཀྱིལ་འཁོར་བཤར་སྒོམ་བྱེད་པ་སོགས། བསྙེན་པ་རྐྱང་བའམ་བདག་བསྐྱེད་རྐྱང་བའི་སྐབས་སུ། སྐབས་འདིར་ཕྱག་མཚན་བསྒོམ་དགོས་པའི་དོན་མིན། སྒྲུབ་པ་སྒྲུབ་ཆེན་ལ་བདག་མདུན་དབྱེར་མེད་ཀྱི་སྐབས་སུ། གཞལ་ཡས་ཁང་གདན་དང་བཅས་པ་བསྐྱེད་པ་ཕན་ཆད་སོང་ནས། ཐོག་མང་དཀྱིལ་འཁོར་ལ་བྲིས་པའི་ལྷ་མཚན་རྣམས་ཡིད་ཀྱིས་གསལ་བཏབ་ནས། དེ་ཉིད་ཟླ་བར་བསྒྱུར་བ་སོགས་ཀྱི་དོན་ཡིན་ཞིང༌། སྒྲུབ་ཐབས་འདི་ཡང་རྟོག་བདུན་གྱི་རྟོག་པ་དང་པོའི་དོན་འགྲེལ་དུ་ཤེས་པར་བྱའོ། །ལར་བྱ་བའི་རིམ་པ་ལ་ལྟོས་པའི་བསྙེན་པ་ཉེར་སྒྲུབ་སྒྲུབ་པ་སྒྲུབ་ཆེན་འདི་དག་མ་གོ་བས། གཤིན་རྗེ་གཤེད་ལ་མཁས་རློམ་ཕྱིས་བྱུང་བ་རྣམས་ཤིན་ཏུ་འཕོངས་པར་གྱུར་གདའོ། །ད་ནི་དཀྱུས་ལ་འཇུག་སྟེ། ལྷའི་གདན་ཐམས་ཅད་ཀྱི་སྟེང་དུ། ཨ་ལས་བྱུང་བའི་ཟླ་བའི་དཀྱིལ་འཁོར་རེ་རེ་གནས་པར་གྱུར། དེ་རྣམས་ཀྱི་སྟེང་དུ་ཆུ་ལས་ཆུ་བུར་བརྡོལ་བའི་ཚུལ་གྱིས། ས་བོན་གྱི་ཡི་གེ་རེ་རེ་བྱུང་བ་ནི། དབུས་ཀྱི་ཟླ་བ་ལ་དྷཱིཿ རེ་མིག་བརྒྱད་ལ། ཨོཾ་ཨཾ་ཛྲིཾ་ཁཾ་སཾ་རཾ་དྷཾ་ཀཾ ཤར་གྱི་ལྷ་སྣམ་ལ། བཾ་ཁཾ་མཻཾ་མཾ་ཛྙཱཾ་ཝཾ་ཙཾ་ཛྙཱཾ། ལྷོའི་ལྷ་སྣམ་ལ། བཾ་ཡཾ་མུཾ་དྷཾ་རཾ་ཏཾ་ཧཾ་ཛཾ། ནུབ་ཀྱི་ལྷ་སྣམ་ལ། བྷཾ་མཾ་རཱཾ་རཾ་སཱཾ་རཾ་སཱུཾ་བཾ། བྱང་གི་ལྷ་སྣམ་ལ། ཀེཾ་ཧཾ་གཾ་ཛྙཱཾ་སཾ་སཾ་ཨཾ་ཨཾ། སྒོ་བཞིར། ཨཾ་པཱཾ་སྥཾ་གྷཾ། གྲྭ་བཞིར། སུཾ་ཨུཾ་ཧཱུཾ་ཨཾ་རྣམས་སོ། །ཟླ་བ་དང་ཡི་གེ་དེ་རྣམས་ལས་འོད་ཟེར་འཕྲོས། འཕགས་པ་མཆོད། སེམས་ཅན་ཐམས་ཅད་ཀྱི་དོན་བྱས་སླར་འདུས་ཏེ་ཐིམ་པ་སོ་སོའི་གནས་སུ་ཡོངས་སུ་གྱུར་པ་

― TNT06_Page_0806 ―

^{[མ་དཔེ་གཟིགས་ན་འདིར་གནོན།]}

[Full Size]

ལས། དབུས་ཀྱི་གདན་གྱི་སྟེང་དུ་འཇམ་དཔལ་གཞོན་ནུ་སྐུ་མདོག་སྔོན་པོ། འོད་ཟེར་གྱི་འཕྲེང་བས་ཕྱོགས་ཀུན་ཁྱབ་པར་བྱེད་པ་དང༌། རེ་མིག་དགུ་ལ་ཤར་ནས་གཡས་སྐོར་གྱིས། གཏི་མུག་རྡོ་རྗེ་ཕྲ་མ་རྡོ་རྗེ་དང༌། །འདོད་ཆགས་རྡོ་རྗེ་ཕྲག་དོག་རྡོ་རྗེའོ། །དེ་བཞིན་མེ་ནས་བརྩམས་ཏེ་གཡས་སྐོར་གྱིས། །སེམས་མ་རྡོ་རྗེ་རིན་ཆེན་རྡོ་རྗེ་མ། །ཆོས་རྡོར་རྗེ་མ་ལས་ཀྱི་རྡོ་རྗེ་མའོ། །བྱང་ཤར་ནས་བརྩམས་གཡས་སྐོར་ལྷ་སྣམ་ལ། རྡོ་རྗེ་རྣོན་པོ་རྡོ་རྗེ་རལ་གྲི་དང༌། །བྱམས་པ་དང་ནི་འཇམ་དཔལ་ཡེ་ཤེས་སྐུ། །ངག་གི་དབང་ཕྱུག་དང་ནི་ཟླ་བའི་འོད། །ཡེ་ཤེས་མཚོ་རྣམས་ཤར་གྱི་ལྷ་སྣམ་ལའོ། །རྡོ་རྗེ་ལས་དང་རྡོ་རྗེ་གནོད་སྦྱིན་དང༌། །རྡོ་རྗེ་ཁུ་ཚུར་དང་ནི་རྡོ་རྗེ་ཆོས། །སྲུང་བ་དང་ནི་རྣོན་པོ་རྡོ་རྗེ་རྒྱུ། །དྲ་བའི་འོད་རྣམས་ལྷོ་ཡི་སྣམ་བུ་ལའོ། །རྡོ་རྗེ་སྨྲ་བ་རྡོ་རྗེ་སེམས་དཔའ་དང༌། །རྡོ་རྗེ་རྒྱལ་པོ་ཆགས་པ་ལེགས་པ་དང༌། །རྡོ་རྗེ་རིན་ཆེན་རྡོ་རྗེ་ཉི་མའི་འོད། །རྡོ་རྗེ་ཉི་མ་རྣམས་ནི་ནུབ་ཕྱོགས་སུའོ། །རྡོ་རྗེ་ཏོག་དང་བཞད་པ་སྤོས་ཀྱི་གླང༌། །ཡེ་ཤེས་ཏོག་དང་ཐམས་ཅད་ཐབས་ཀྱི་འགྲོ། །རྒྱ་མཚོའི་བློ་གྲོས་བློ་གྲོས་མི་ཟད་པ། །བདུད་རྩིའི་འོད་རྣམས་བྱང་གི་སྣམ་བུ་ལའོ། །ཤར་སོགས་སྒོ་བཞིར་རྡོ་རྗེ་ལྕགས་ཀྱུ་དང༌། །རྡོ་རྗེ་ཞགས་པ་ལྕགས་སྒྲོག་དྲིལ་བུའོ། །མེ་སོགས་མཚམས་བཞིར་གནོད་མཛེས་གཙུག་གཏོར་དང༌། །ཧཱུཾ་མཛད་དང་ནི་གཞན་གྱིས་མི་ཐུབ་པའོ། །དེ་ལྟར་ན་ཤར་དང་ཤར་ལྷོ་པ་རྣམ་དཀར་པོ། ལྷོ་དང་ལྷོ་ནུབ་པ་རྣམས་སེར་པོ། ནུབ་དང་ནུབ་བྱང་པ་རྣམས་དམར་པོ། བྱང་དང་བྱང་ཤར་བ་རྣམས་ལྗང་ཁུ།

― TNT06_Page_0807 ―

^{[མ་དཔེ་གཟིགས་ན་འདིར་གནོན།]}

[Full Size]

ཐམས་ཅད་ཀྱང་ཡིད་ཙམ་ཁྲོ་བ་ནས། མཚན་དཔེ་ཐམས་ཅད་ཡོངས་སུ་རྫོགས་པར་གྱུར་གྱི་བར་གོང་བཞིན། འོན་ཀྱང་ལྷ་མོ་བཞི་ནི་དབུ་སྐྲ་ཕྱེད་བཅིངས་ཤིང༌། བུད་མེད་སྒྱུ་མའི་ང་རྒྱལ་འཛིན་པའོ། །སྐབས་འདིར་སྐྱོ་ལུགས་པ་རྣམས་དང༌། ཕྱིས་ཀྱི་རྣམས་ཕལ་ཆེར། དབུས་ཀྱི་གཙོ་བོ་འཇམ་དཔལ་དམར་སེར། ཤར་ཕྱོགས་ཀྱི་ལྷ་རྣམས་ནག་པོར་འདོད་དེ། སྒྲུབ་ཐབས་ཀྱི་གཞུང་ཞང་འགྱུར་ཁོ་ན་ལས་གཞན་མ་མཐོང་བར་ཟད་ལ། ཞེ་དགུ་མ་འདི་སྐྱོ་ལུགས་སུ་གྲགས་ན་ཡང་འདི་རྩ་བ་ཞང་ལུགས་ལ་ཐུག་པ་ཡིན་པས། སྐྱོ་བ་རྣམས་ཞེ་དགུ་མའི་གཞུང་ཞང་འགྱུར་ཁོ་ན་བྱེད་དོ། །ཞང་འགྱུར་ལས་ནི། གཙོ་བོ་འཇམ་དབྱངས་ཀྱི་སྐུ་མདོག་སྔ་ཕྱི་གཉིས་ཀར་དུ་མི་གསལ་ལ། ཤར་གྱི་ཕྱོགས་པ་ཐམས་ཅད་ནག །ཅེས་འབྱུང་ཡང་གཏི་མུག་རྡོ་རྗེ་དང་སེམས་མ་རྡོ་རྗེ་མ་ནག་པོར་མི་འཐད་ཅིང༌། རོང་ཟོམ་འགྱུར་ལས། ཐམས་ཅད་འཇམ་དཔལ་གཞོན་ནུའི་གཟུགས། །དབུས་ཀྱི་གཙོ་བོ་སྐུ་མདོག་སྔོ། །ཤར་གྱི་ཕྱོགས་པ་ཐམས་ཅད་དཀར། །ཞེས་སོགས་འབྱུང་བས། གཞལ་ཡས་ཁང་གི་ཕྱོགས་མདོག་ཀྱང༌། དབུས་སྔོ་ཞིང་ཤར་དཀར་བ་སོགས་རྡོ་རྗེའི་རིགས་ཀྱི་སྤྱིའི་འགྲོས་ལ་ཡོད་པ་དང་མཐུན་པས་ལེགས་ལ། ཚིག་སྔ་མ་གཉིས་པོ་དེ་ཞང་འགྱུར་ལ་ཆད་པས། གཙོ་བོ་སྐུ་མདོག་ཏུ་མ་ཟད། འཁོར་གྱི་ལྷ་ཚོགས་རྣམས་ཀྱི་ཕྱག་མཚན་ལ་ཡང༌། འདོད་པ་མི་མཐུན་པ་དང་ཐེ་ཚོམ་གྱི་དཔྱད་པ་མང་དུ་བྱུང་མོད། རོང་འགྱུར་དུ་འཇམ་དཔལ་གཞོན་ནུའི་གཟུགས་ཞེས་ཕྱག་མཚན་དང་སྐུའི་དབྱིབས་གསལ་བར་བསྟན་ཏོ། །ཡང་སྐབས་འདིར་གཞུང་ལས། དེ་ནས་ཡི་གེ་ཨ་ལ་སོགས། །ཡི་གེ་ཧ་ཡིག་མཐར་ཐུག་པ། །འདི་དག་ཐམས་ཅད་ཡོངས་གྱུར་ལས།

― TNT06_Page_0808 ―

^{[མ་དཔེ་གཟིགས་ན་འདིར་གནོན།]}

[Full Size]

གོང་གི་ལྷ་རུ་བསམ་པར་བྱ། །ཞེས་འབྱུང་བ་ལ། ཁ་ཅིག་ཞི་བའི་ལྷ་ཚོགས་འདི་རྣམས་མངོན་བྱང་ལྔ་ལས་སྐྱེད་ཟེར་བ་ནི། གཞུང་གི་དོན་མིན་ཞིང་རྒྱ་མཁར་ཀ་བཅུ་བ་སོགས་གཞན་དག་ཚིག་དེ་གོང་དུ་བཤད་པའི། ཨོཾ་ཨཾ་སོགས་ས་བོན་དེ་རྣམས་ཨཱ་ལི་ཀཱ་ལི་ལས་བྱུང་བའི་དོན་ཡིན་པར་འཆད་པ་ནི། སྨྲ་རྒྱུས་འཕོངས་པར་ཟད་ཅིང༌། ངོར་པ་སོགས་མང་པོ་ཞིག་ནི་ཞེ་དགུ་མའི་བསྔགས་བརྗོད་ཡང་སྐྱོར་མང་པོ་བྱེད་ཀྱང་གཞུང་འདི་དག་ལ་མི་སྨྲ་བའི་བརྟུལ་ཞུགས་འཛིན་ཏོ། །འོ་ན་འདིའི་དོན་ཅི་ཞེ་ན། གོང་དུ། འདི་དག་ས་བོན་ཡི་གེ་ནི། །ཨོཾ་ཨཾ་ཛྲིཾ་སོགས་གསུངས་ནས། དེ་ནས་ཡི་གེ་ཨ་ལ་སོགས། །ཞེས་འབྱུང་སྟེ། ས་བོན་གོང་དུ་སྨོས་པ་རྣམས་སམ། ཡང་ན་ཨ་ཡིག་ལས་གཙོ་བོ་འཇམ་དཔལ་བསྐྱེད་པ་ནས། ཧཱ་ཡིག་ལས་གཞན་གྱིས་མི་ཐུབ་སྐྱེད་པའི་བར། ས་བོན་འདམ་ཁར་གསུངས་པ་ཡིན་ཏེ། ཀྵ་སྤངས་ནས། ཡི་གེ་བཞི་བཅུ་ཞེ་དགུར་གསུང་བའི་རྒྱུ་མཚན་ཡང་དེ་ཡིན་ནོ། །ལྷ་ཞེ་དགུ་ལ་འཇམ་དཔལ་གཉིས་བྱུང་ཡང་གཙོ་བོ་འཇམ་དཔལ་ནི་རྡོ་རྗེ་འཆང་ཆེན་པོའི་ངོ་བོ་སྟེ་རྫོགས་པའི་སངས་རྒྱས་ཡིན་ལ། ཤར་གྱི་ལྷ་སྣམ་གྱི་འཇམ་དཔལ་ནི། བྱང་ཆུབ་སེམས་དཔའོ། །རྡོ་རྗེ་རྣོན་པོ་གཉིས་བྱུང་བ་ནི། སྔ་མ་རྡོ་རྗེའི་རིགས་དང༌། ཕྱི་མ་པདྨའི་རིགས་ཀྱི་སྒོ་ནས་ཐ་དད་ཡིན་ལ། སྤྱིར་ནི་རྣོན་པོ་ཉིད་འཇམ་དཔལ་དུ་བཤད་པ་སོགས་ཡོད་པས། རྒྱུད་གཅིག་དང་ཐ་དད་སོགས་ཀྱི་དཔྱད་པ་མི་འཇུག་ལ། མཚན་ཐ་དད་དང་རིགས་ཐ་དད་ལས་ལྷ་སོ་སོར་འཇོག་དགོས་པའི་སྐབས་ཤིན་ཏུ་མང་ངོ༌། །ཡང༌། ལྷ་ཐམས་ཅད་ཀྱི་ཐུགས་ཀར་ཡི་གེ་ཨ་ལས་ཉི་མའི་དཀྱིལ་འཁོར་རེ་རེ། དེ་རྣམས་ལས་འོད་ཟེར་འཕྲོས། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཁྱབ། དེ་བཞིན་གཤེགས་པ་འཁོར་དང་བཅས་པ་དཔག་ཏུ་མེད་པ་

― TNT06_Page_0809 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱན་དྲངས། ལྷ་རྣམས་ཀྱི་ཐུགས་ཀའི་ཉི་མའི་དཀྱིལ་འཁོར་རྣམས་ལ་ཐིམས་པའི་རྐྱེན་གྱིས། ལྷ་རྣམས་ཉི་མའི་དཀྱིལ་འཁོར་ཉིད་ལ་འདྲེས་པས། ཉི་མའི་དཀྱིལ་འཁོར་འབར་བའི་འཕྲེང་བ་འཁྲིགས་པ་བཞི་བཅུ་རྩ་དགུར་གྱུར། ཡང་འོད་ཟེར་འཕྲོས་འདུས་ཡོངས་སུ་གྱུར་པ་ལས། ཉི་མའི་དཀྱིལ་འཁོར་རྣམས་ཀྱི་སྟེང་དུ། ཁྲོ་བོའི་ས་བོན་རྣམས་གྲུབ་པ་ནི། དབུས་སུ་ཧཱུཾ་སྔོན་པོ། རེ་མིག་བརྒྱད་ཀྱི་ཕྱོགས་བཞིར། ཨོཾ་ཧྲཱིཿཥྚཱིཿབི། མཚམས་བཞིར། ཀྲྀ་ཏཱ་ན་ན། ཤར་ཀྱི་ལྷ་སྣམ་ལ། ཡཀྵེ་ཡཙྪ་ནི་རཱ་མ་ཡ། ལྷོའི་ལྷ་སྣམ་ལ། ཡ་མ་རཱ་ཛ་ས་དོ་མེ་ཡ། ནུབ་ཀྱི་ལྷ་སྣམ་ལ། ཡ་མེ་དུ་རུ་ཎ་ཡོ་ད་ཡ། བྱང་གི་ལྷ་སྣམ་ལ། ཡ་ད་ཡོ་ནི་ར་ཡ་ཀྵེ་ཡ། སྒོ་བཞིར། ཡ་མཱན་ཏ་ཀ གྲྭ་བཞིར། ཧཱུཾ་ཨོཾ་ཧཱུཾ་ཕཊ། ཅེས་པའི་ཡི་གེ་ཕྱོགས་ཀྱི་མདོག་ཅན་རྣམས་སུ་གྱུར། འདིར་ཞང་འགྱུར་གྱི་དཔེ་རྣམས་ལ། ཨོཾ་གསུམ་ཨོཾ་བཞི་ཧཱུཾ་གཅིག་ཕཊ་གསུམ་སོགས་སྣ་ཚོགས་ཞིག་སྣང་བ། བོད་དཔེ་རིང་དུ་བརྒྱུད་པས་མ་དག་པར་མངོན། རོང་ཟོམ་འགྱུར་གྱི་དཔེ་ཁ་ཅིག་ན། ཡི་གེ་ཧཱུཾ་ཨོཾ་སུཾ་ཡིག་ཕཊ། ཅེས་འབྱུང་བའི་སུཾ་ཡིག་ནི་གནོད་མཛེས་ཀྱི་ས་བོན་དུ་བསམས་ནས་བོད་ཀྱིས་བཅོས་པར་འདུག དཔེ་དག་པ་རྣམས་ལས། ཡི་གེ་ཧཱུཾ་ཨོཾ་ཧཱུཾ་ཡིག་ཕཊ། ཅེས་འབྱུང་བ་ལྟར་ཡིན་ཏེ། སྔགས་གསུམ་གྱི་ཡི་གེ་ལས་ལྷ་ཚོགས་བསྐྱེད་དགོས་པའི་ཕྱིར། སུཾ་ཡིག་འབྱུང་བ་མི་བདེ་ལ། རྩ་སྔགས་དང་སྙིང་པོའི་ཨོཾ་གཉིས་གཅིག་ཏུ་སྡོམས། ཕཊ་གསུམ་གཅིག་ཏུ་སྡོམས། ཧཱུཾ་གསུམ་ལས་སྙིང་པོ་ཉེ་སྙིང་གི་ཧཱུཾ་གཉིས་འདིར་བཀོད་པ་ཡིན་ལ། རྩ་སྔགས་ཀྱི་ཧཱུཾ་ནི་གཙོ་བོའི་ས་བོན་ཉིད་དོ། །ས་བོན་དེ་རྣམས་ལས་འོད་ཟེར་འཕྲོས། ཕྱོགས་བཅུའི་འཇིག་

― TNT06_Page_0810 ―

^{[མ་དཔེ་གཟིགས་ན་འདིར་གནོན།]}

[Full Size]

རྟེན་གྱི་ཁམས་ཐམས་ཅད་ཁྱབ། དེ་བཞིན་གཤེགས་པ་དང༌། བྱང་ཆུབ་སེམས་དཔའ་དང༌། ཁྲོ་བོའི་དབང་པོ་དང༌། རིག་པའི་ལྷ་མོ་འཁོར་དང་བཅས་པ་དཔག་ཏུ་མེད་པ་སྤྱན་དྲངས། ཡིག་འབྲུ་རྣམས་ལ་ཐིམ། དེ་རྣམས་ཡོངས་སུ་གྱུར་པ་ལས། དབུས་ཀྱི་གཙོ་བོའི་གནས་སུ། རྡོ་རྗེ་ནག་པོ་རྩེ་དགུ་པ་རྭ་གདེངས་པའོ། །རེ་མིག་བརྒྱད་ལ། ཤར་དུ་མགོ་བོ། ལྷོར་ལག་པ། ནུབ་ཏུ་རྒྱུ་མ། བྱང་དུ་རྐང་པ། ཤར་ལྷོར་ཐོད་ཁྲག །ལྷོ་ནུབ་ཏུ་ཐོད་ཚལ། ནུབ་བྱང་དུ་རོ་རས། བྱང་ཤར་དུ་སྐྱེས་བུ་གསལ་ཤིང་གིས་ཕུག་པའོ། ཤར་གྱི་ལྷ་སྣམ་ལ་གྲི་གུག་དང༌། མཚོན་རྩེ་གཅིག་པ་དང༌། གཏུན་ཤིང་དང༌། ཆུ་གྲི་དང༌། ཀ་ཎ་ཡ་དང༌། ལྕགས་ཀྱུ་དང༌། མ་ཧེ་དང༌། བ་ལང་རྣམས་སོ། །ལྷོའི་ལྷ་སྣམ་ལ་རིམ་པ་བཞིན། སྟ་རེ་དང༌། མདའ་དང༌། དབྱུག་པ་དང༌། ཁ་ཊྭཱཾ་ག་དང༌། འཁོར་ལོ་དང༌། ཞགས་པ་དང༌། ཕག་དང༌། བོང་བུའོ། །ནུབ་ཀྱི་ལྷ་སྣམ་ལ། རྡོ་རྗེ་དང༌། ཅང་ཏེའུ་དང༌། ཕུབ་དང༌། གཞུ་དང༌། དྲིལ་བུ་དང༌། རླུང་རས་དང༌། རྔ་མོང་དང༌། ཁྱིའོ། །བྱང་གི་ལྷ་སྣམ་ལ། སྡིགས་འཛུབ་དང༌། བ་དན་རྩེ་གསུམ་པ་དང༌། གླང་ལྤགས་དང༌། ཐོ་བ་དང༌། མདུང་དང་མེ་ཐབ་དང༌། ལུག་དང༌། ལྕེ་སྤྱང་རྣམས་སོ། །ཤར་སྒོར་བྱ་རྒོད། ལྷོ་སྒོར་འུག་པ། ནུབ་སྒོར་བྱ་རོག །བྱང་སྒོར་སེང་གེ ། ཤར་ལྷོར་བྱ་ཁྲ། ལྷོ་ནུབ་ཏུ་བྱ་ཆེན་པོ། ནུང་བྱང་དུ་ཁྱིམ་བྱ། བྱང་ཤར་དུ་བཞད་དཀར་རྣམས་སོ། ཁ་ཅིག་ཕྱག་མཚན་འདི་རྣམས་ལའང་ཕྱོགས་མདོག་བྱེད་པ་ནི། ས་བོན་ལ་ཕྱོགས་མདོག་བྱེད་པའི་རིགས་འགྲེར་འདུག་ཀྱང༌། བྱ་རོག་དམར་པོ་སོགས་བཞད་གད་ཀྱི་གནས་མང་པོ་འབྱུང་ངོ༌། །དེས་ན་འདི་རྣམས་རང་མདོག་ཏུ་

― TNT06_Page_0811 ―

^{[མ་དཔེ་གཟིགས་ན་འདིར་གནོན།]}

[Full Size]

བྱ་ལ། འོག་ཏུ་གཙོ་བོའི་ཞབས་འོག་གི་སྲོག་གཟུགས་འཆད་པའི་སྐབས་ན་ཕག་མེད་ཀྱང༌། རྒྱུད་ཀྱི་གཏོར་མའི་སྐབས་ན་ཡོད་ལ། ཁ་ཅིག་སེང་གེ་ནི་ཧ་རི་ཞེས་པ་ནེ་ཙོའི་སྐད་དོད། སེང་གེར་བསྒྱུར་བས་འགྱུར་ནོར་བ་ཡིན་ཟེར་མོད། ཧ་རི་ཁ་དོག་ལྗང་ཁུ་ལ་འཇུག་པ་ཡོད་ཀྱང༌། ནེ་ཙོའི་སྐད་དོད་མིན། ནེ་ཙོ་ནི། ལྷ་མོ་དཔལ་ཆེན་མོ་མཚོན་ཅིང༌། སེང་གེ་ཡང་དཔལ་ཆེན་མོའི་བཞོན་པ་ཡིན་པས་དོད་མཚུངས་པ་ལ་དགོངས་པའི་ཕྱིར་མི་འགལ་བས། འདབ་ཆགས་ཀྱི་སྡེབས་ལ་གཅན་གཟན་བྱུང་བ་མ་དག་གོ་སྙམ། བློ་བཟོའི་བཅོས་མི་བྱའོ། །ཡང༌། དེ་རྣམས་ལས་འོད་ཟེར་གྱི་ཚོགས་ཆེན་པོ་དང༌། ལྷན་ཅིག་ཏུ་རྡོ་རྗེ་ཕྲ་མོ་མང་པོ་དང༌། སངས་རྒྱས་ལ་སོགས་པའི་གཟུགས་དཔག་ཏུ་མེད་པ་སྤྲོས། སྡང་བ་དང༌། གདུག་པ་རྣམས་ཚར་བཅད། སེམས་ཅན་ཐམས་ཅད་སངས་རྒྱས་ལ་བཀོད། ཞིང་ཁམས་དག་པར་བྱས། ཞེས་པ་ནས། འཇིག་རྟེན་གསུམ་པོས་ལྟ་བར་ཡང་མི་བཟོད་པའི་བདག་ཉིད་དུ་གྱུར། ཅེས་པའི་བར། སྒྲུབ་ཐབས་སྙིང་པོ་བཞིན་དུ་བརྗོད་པ་ལས། ཞབས་འོག་གི་ལྷའི་སྐབས་སུ། གཞོན་ནུ་གདོང་དྲུག་དང༌། ཚོགས་ཀྱི་བདག་པོ་དང༌། ཟླ་བ་དང༌། ཉི་མ་རྣམས་ཁ་བུབ་ཏུ་བསྒྱེལ་ནས་གནོན་པ། ཞེས་ལྷ་ཆེན་བརྒྱད་དུ་བརྗོད་ན། གཞུང་ལས། གཞོན་ནུ་བི་ནཱ་ཡ་ཀ་སོགས། །ཞེས་པའི་དོན་དང་མཐུན་པར་འགྱུར་ལ། གཙོ་བོའི་གཡས་གཡོན་གྱི་ཞལ་དྲུག་ནི་འདི་ལ་ངེས་པར་འཁོར་ཞལ་ཡིན། དེ་ཡང་གཞུང་ལས། གཡས་ཀྱི་དང་པོའི་ཞལ་ནི་སྔོ། །དེའི་གཡས་དམར་གཡོན་སེར་པོ་དང༌། །ཞེས་འབྱུང་བས། ཞེ་དགུ་མའི་སྐབས་འདིར་མདུན་ནས་མུ་དེད་ཡིན་པར་གསལ་ལོ། །འདིར་དེ་ལྟར་ཡིན་ཡང་སྤྱིར་རྭ་ཞལ་དང༌། བརྩེགས་ཞལ་དང༌། འཁོར་ཞལ་ཉིད་ལ་ཡང༌། གཡས་གཡོན་གྱི་དང་པོ་ནི། གཡས་

― TNT06_Page_0812 ―

^{[མ་དཔེ་གཟིགས་ན་འདིར་གནོན།]}

[Full Size]

གཡོན་གྱི་དབུས་མ་ལ་ངོས་འཛིན་པ་སོགས་ཀྱང༌། རྒྱུད་གཞུང་རྣམས་ལས་ཅི་རིགས་པ་འབྱུང་ཞིང༌། འགའ་ཞིག་མན་ངག་ཡིན་ལ། རྒྱུད་དང་ཡང་འགལ་བ་མེད་དོ། །ཕྱག་དང་པོ་གཉིས་ཀྱིས་གླང་ལྤགས་འཛིན་པ་དང༌། འོག་གིས་འཛིན་པའང་མི་འགལ་མོད། །དཀྱུས་དང་འདྲ་བར་བྱས་ཀྱང་ལེགས་སོ། །རེ་མིག་བརྒྱད་ལ་ཤར་དུ་རྡོ་རྗེ་མགོ་བོ། ལྷོར་རྡོ་རྗེ་ལག་པ་ཞེས་པ་ནས། ནུབ་བྱང་དུ་རྡོ་རྗེ་ཁྱིམ་བྱ། བྱང་ཤར་དུ་རྡོ་རྗེ་བཞད་དཀར། ཞེས་པའི་བར་དུ་ཕྱག་མཚན་དགོད་པའི་སྐབས་དང་འདྲ་བ་ལས། མིང་ཐམས་ཅད་ཀྱི་ཐོག་མར་རྡོ་རྗེ་ཞེས་པ་རེ་འཇུག་ཅིང༌། རེ་མིག་གི་གྲྭ་བཞིའི་ལྷ་ལ། ཤར་ལྷོར་རྡོ་རྗེ་ཐོད་ཁྲག་མོ་ཞེས་སོགས་ལྷ་མོའི་མཚན་འཇུག་གོ །ཡུམ་བཞི་ནི། ཁྲོ་མོ་ལྷ་ཞལ་ཅན་ཕྱག་རྒྱ་ལྔས་བརྒྱན་པ། གཞན་རྣམས་མ་ཧེའི་ཞལ་ཅན། ཕྱག་རྒྱ་དྲུག་དང་ལྡན་ཅིང༌། ལིང་ག་རྒྱས་པ། ཐམས་ཅད་ཀྱང་སྐུ་མདོག་ནག་པོ་ཞལ་གཅིག་ཕྱག་གཉིས་པ། ཕྱག་གཡས་པ་རྣམས་ཀྱིས་རང་མིང་དང་མཐུན་པའི་ཕྱག་མཚན་འཕྱར་ཞིང༌། གཡོན་པ་རྣམས་ཀྱིས་ཐོད་པ་བདུད་རྩིས་གང་བ་འཛིན་པ། ཞབས་གཡས་བསྐུམ་གཡོན་བརྐྱང་པས་མི་རོའི་གདན་ལ་གནས་པ། སྤྱན་གསུམ་མཆེ་གཙིགས། དབུ་སྐྲ་ཁམས་སེར་གྱེན་དུ་བརྗེས་པ། བཅོམ་ལྡན་འདས་ཀྱི་ཞལ་རས་ལ་བལྟ་བ། ཆེས་ཆེར་འཁྲུགས་ཤིང་ཕཻཾ་ཀྱི་སྒྲ་དང་བཅས་པས་རྒྱ་ཆེར་བཞད་པ། ཐོད་སྐམ་གྱི་དབུ་རྒྱན་དང༌། མགོ་རློན་གྱི་དོ་ཤལ་དང༌། གདུག་པའི་སྦྲུལ་གྱིས་བརྒྱན་པ། བཅོམ་ལྡན་འདས་དང་དེའི་རིགས་ལས་སྐྱེས་པའི་ཚུལ་གྱིས། འབར་འཕྲེང་འཁྲུགས་པའི་དབུས་ན་བཞུགས་པའོ། །འདིར་གཞུང་ལས། བཅོམ་ལྡན་ཇི་བཞིན་ཐམས་ཅད་ཀྱང༌། །

― TNT06_Page_0813 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་འབྱུང་བའི་དོན། གོང་མ་ཕལ་ཆེར། མ་ཧེའི་ཞལ་སྟོན་བྱེད་དུ་བཞེད་པ་ལྟར། བླ་མའི་ངག་སྒྲོས་དང་མན་ངག་མི་སྤོང་བའི་ཕྱིར་འདིར་ཡང་དེ་ལྟར་བཀོད་དོ། །འོན་ཀྱང་གཞུང་ནས་འཁོར་རྣམས་ལ་མ་ཧེའི་ཞལ་སྟོན་བྱེད་གསལ་བོ་མེད་ཅིང༌། བཅོམ་ལྡན་ཇི་བཞིན་ཞེས་པ་ཡང་ཉམས་དང་ཆ་བྱད་རགས་རིམ་འདྲ་བ་ལ་དགོངས་པ་ཤས་ཆེ་བས། འཁོར་ཐམས་ཅད་ཁྲོ་ཞལ་དུ་བྱས་ཀྱང་ལེགས་སོ་སྙམ་པ་ནི། བདག་གི་རྣམ་པར་རྟོག་པའོ། །ཞེ་དགུ་མའི་ལུགས་འཛིན་པ་ཁ་ཅིག །གཞན་ཕོ་མོ་ཐམས་ཅད་མ་ཧེའི་ཞལ་དུ་བྱེད་ཅིང༌། རྒྱུད་ལས་སྒོ་མཚམས་བརྒྱད་དུ་རོ་ལངས་འབྲི་བར་བཤད་པས། བརྒྱད་པོ་ཁྲོ་ཞལ་དུ་བྱ་དགོས་ཏེ། རོ་ལངས་ལ་མ་ཧེའི་ཞལ་མི་བདེ་བས་སོ་ཟེར་བ་ནི། དོན་ཤིན་ཏུ་མ་རྟོགས་པ་སྟེ། སྤྱིར་རྒྱུད་ཀྱི་དངོས་བསྟན་ཕྱག་མཚན་གྱི་དཀྱིལ་འཁོར་དང༌། རོ་ལངས་བརྒྱད་བཀོད་པ་ཡིན་ཡང༌། ཞེ་དགུར་བྱེད་པ་ནི་ལ་ལི་ཏ་ཆུང་ངུས་བླ་མའི་མན་ངག་བཀོད་པ་ཡིན་གྱི། རྒྱུད་ཀྱི་དངོས་བསྟན་མིན་ལ། མན་ངག་འདི་ལ་བརྟེན་ནས་རྒྱུད་དོན་འཆད་པའི་ཚེ། སྒོ་མཚམས་ཀྱི་རོ་ལངས་བརྒྱད་པོ་ལྷའི་གདན་ཡིན་གྱི་ལྷ་མ་ཡིན་ནོ། །དེས་ན་འཁོར་གྱི་རོ་གདན་ཐམས་ཅད་རོ་ལངས་ཡིན་ཡང༌། ལྷ་གཞན་རྣམས་ལ་གདན་མི་འགོད་པར་ཕྱག་མཚན་འགོད། སྒོ་མཚམས་རྣམས་ལ་གདན་ལྷ་མཚན་དུ་འགོད་པ་ཡིན་པར་འཆད་དགོས་པ་མ་ཤེས་པ་དང༌། རོ་ལངས་བརྒྱད་སྐོར་གྱི་དཀྱིལ་འཁོར་འཆད་པ་ལྟར་ན། རོ་ལངས་ཀྱི་དོན་མི་རོ་ལངས་པ་ཁོ་ན་མ་ཡིན་གྱི། རོ་ལངས་ཀྱི་ལས་བྱེད་པའི་ལྷ་ལ་ཟེར་བ་ཡིན་པས། དེ་ལ་གདོང་བརྙན་བྱུང་ཡང་འགལ་བ་ཡེ་མེད་དོ། །འཁོར་རྣམས་ཀྱི་ཕྱག་མཚན་ལ་ཁ་ཅིག་ཕྱག་གཉིས་ཀས་མགོ་བོ་ལ་སོགས་པ་རེ་རེ་བསྣམས་པར་བཞེད་ན། དེ་ཡང་གཅིག་ཏུ་འགལ་བ་མེད་མོད། ཁ་ཅིག་རང་དེ་ལྟར་སྨྲ་བཞིན་དུ། གཞན་ལྷ་མཚན་ལ་འགོད་པའི་ལག་པ་དང་རྐང་པ་

― TNT06_Page_0814 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་གཉིས་བྱེད་པ་ལ་དགག་པ་གཏོང་བ་ནི། རྗེ་དངོས་ཀྱི་དབང་ལས་ནང་འགལ་སྨྲ་བ་ཡིན་ལ། མཚོན་ཆ་རྣམས་ནི་སྟོང་པ་དང༌། །སྙིང་རྗེ་དག་ནི་བཅུ་དྲུག་གཉིས། །ཞེས་ཕྱག་མཚན་གྱི་དག་པ་ཐམས་ཅད་གསུངས་ཟིན་པའི་རྗེས་སུ། ལྷ་རྣམས་ཉིད་ཀྱི་རང་མིང་ནི། །དང་པོར་ཨོཾ་དང་ཧཱུཾ་ཕཊ་མཐའ། །ཐོད་པར་བཏུང་བ་དག་པའོ། །ཞེས་ལྷ་ཞེ་བརྒྱད་ཀྱི་མཚན་སྔགས་རྣམ་པར་དག་པ། ཐོད་པ་བཏུང་བ་དང་བཅས་པར་བཤད་པས་ན། ལྷ་ཐམས་ཅད་ཀྱི་ཕྱག་ཏུ་ཐོད་པ་བཏུང་བས་གང་བ་དགོས་ཏེ། གཞན་དུ་ན། མཚམས་ཀྱི་ཐོད་པ་བཞི་ལ་སྦྱོར་ན་སྔགས་ཞེ་བརྒྱད་དང་སྦྱོར་བའི་དག་སྦྱོར་དེ་ལ་འབྲེལ་ཆེན་པོ་མི་འབྱུང་བས་སོ། །དེས་ན་མཚམས་བཞིར་ཐོད་པ་བཞི་ཡང་དཀྱིལ་འཁོར་འདི་ལ་མི་དགོས་སོ། །ཕྱག་མཚན་མགོ་བོ་ནི་གཞུང་འདིར་ཡང༌། ཚངས་མགོར་བཤད་པ་ཟུར་ཙམ་ཡང་མེད་པས། ཞེ་དགུ་མའི་སྐབས་འདིར་ཡང་མི་མགོ་ཁོ་ནའོ། །འོ་ན་རྒྱུད་ལས་དཀྱིལ་འཁོར་གྱི་དབུས་སུ་མི་རོ་འབྲི་བ་དེ། ཞེ་དགུ་མའི་སྐབས་འདིར། རོ་ལངས་ཀྱི་རིག་པ་མཚུངས་པས་གདན་བཀོད་པར་བྱེད་དགོས་ན། གཙོ་བོའི་གདན་མི་རོར་འཆད་པ་མི་འགྲིག་གོ་ཞེས་དོགས་ནས། གཙོ་བོའི་གདན་ནི་བྱོལ་སོང་བཅུ་དྲུག་དང༌། ལྷ་ཆེན་བརྒྱད་སོགས་རྣམ་གྲངས་མངས་པའི་ཕྱིར། ཐམས་ཅད་དགོད་མི་ནུས་པས། དེ་དག་ཐམས་ཅད་ཀྱི་སྤྱི་གཟུགས་མི་རོའམ། ཡང་ན་ཞབས་གཡས་ཀྱི་དང་པོའི་འོག་གི་མི་གཟུགས་བཀོད་པ་ཡིན་ནོ། །ཞེས་པ་རྣམས་ཀྱང་ཞེ་དགུ་མའི་ལུགས་འདི་ལ་ངེས་པར་བྱའོ། །དེའི་རྗེས་སུ་སྐྱེ་མཆེད། སྐུ་གསུམ་ཐུགས་བྱིན་གྱིས་བརླབ་པ། སྒྲུབ་ཐབས་སྙིང་པོ་ནས་འབྱུང་བ་ལྟར་བྱས་ནའང་ལེགས་ལ། འདི་ཉིད་ཀྱི་རང་གཞུང་ལས་མི་འབྱུང་བས་མེད་ཀྱང་ཆོག་གོ །འགའ་ཞིག་སྐབས་འདིར་སེམས་དཔའ་གསུམ་བརྩེག་བྱེད་ཀྱང༌། གཞུང་ལས་ས་བོན་ཙམ་

― TNT06_Page_0815 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་མ་བཤད་པས་རང་ལུགས་ལ་འདི་ལྟར་བྱ་སྟེ། ལྷ་ཐམས་ཅད་ཀྱི་ཐུགས་ཀར་པདྨ་དང་ཉི་མའི་གདན། དེ་རྣམས་ཀྱི་སྟེང་དུ་གཙོ་བོའི་ཐུགས་ཀར་ཧཱུཾ། འཁོར་རྣམས་ཀྱི་ཐུགས་ཀར། ཨོཾ་ཧྲཱིཿཥྚཱིཿབི་ཀྲི་ཏཱ་ན་ན་ཡ་ཀྵེ་ཡ་ཙྪ་ནི་རཱ་མ་ཡ་ཡ་མ་རཱ་ཛ་ས་ཏོ་མེ་ཡ་ཡ་མེ་དོ་རུ་ཎ་ཡོ་ད་ཡ་ཡ་ད་ཡོ་ནི་ར་ཡ་ཀྵེ་ཡ་ཡ་མཱན་ཏ་ཀ་ཧཱུཾ་ཨོཾ་ཧཱུཾ་ཕཊ། རྣམས་མར་མེ་ལྟར་འོད་ཟེར་དཔག་ཏུ་མེད་པ་འབར་བའོ། །ལྷ་ཐམས་ཅད་ཀྱི་ཐུགས་ཀའི་ས་བོན་ལས་འོད་ཟེར་འཕྲོས། རང་བཞིན་གྱི་གནས་ནས། བཅོམ་ལྡན་འདས་འཇམ་དཔལ་རྡོ་རྗེ་འཇིགས་མཛད་ཆེན་པོ་ལྷ་བཞི་བཅུ་རྩ་དགུའི་དཀྱིལ་འཁོར་གྱི་ལྷ་ཚོགས་མདུན་གྱི་ནམ་མཁར་བཛྲ་ས་མཱ་ཛཿ ཨརྒྷཾ་ནས་ཤཔྟའི་བར་གྱིས་མཆོད། ཛཿཧཱུཾ་བཾ་ཧོཿ ལན་ལྔ་བཅུ་སོགས་མང་དུ་བརྗོད། དམ་ཚིག་པ་དང་ཡེ་ཤེས་པ་གཉིས་སུ་མེད་པར་ཐིམ་པར་གྱུར། འདིར་སྔ་ཕྱི་ཁ་ཅིག་རྡོ་རྗེ་བྱ་རྒོད་ལ་སོགས་པའི་མཚན་སྔགས་ཀྱི་དགུག་གཞུག་བྱེད་པ་ནི། ཁྱད་ཆོས་སུ་རློམ་པའི་རྟོག་བཟོ་ཐལ་ཞེས་པ་ཡིན་ལ། ཨོཾ་བཛྲ་ཨང་གུ་ཤ་ཛཿ སོགས་བྱེད་ན་ནི་མི་ལེགས་པ་མ་ཡིན་ནོ། །ཡང་གཙོ་བོའི་ཐུགས་ཀའི་ཧཱུཾ་ལས་འོད་ཟེར་འཕྲོས། རང་བཞིན་གྱི་གནས་ནས་དབང་གི་ལྷ་འཇིགས་མཛད་ཆེན་པོ་རིགས་ལྔ་ཡབ་ཡུམ་སེམས་དཔའ་སེམས་མ་ཁྲོ་བོ་ཁྲོ་མོའི་ལྷ་ཚོགས་རྣམས་མདུན་གྱི་ནམ་མཁར་བཛྲ་ས་མཱ་ཛཿ ཨོཾ་པཉྩ་ཀུ་ལ་ས་པ་རི་ཝཱ་ར། ཞེས་སྦྱར་ནས། ཨརྒྷཾ་དང་པུཥྤེ་སོགས་ཉེར་སྤྱོད་ལྔས་མཆོད། སྐྱོ་པའི་ཡིག་རྙིང་ལས་སྐབས་འདིར་ཕྱི་ནང་གསང་གསུམ་གྱི་མཆོད་པ་བྱེད་པས་

― TNT06_Page_0816 ―

^{[མ་དཔེ་གཟིགས་ན་འདིར་གནོན།]}

[Full Size]

བཤད། མགོན་པོ་དེ་བཞིན་གཤེགས་པ་ཁྱེད་རྣམས་ཀྱིས་བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས། དབང་གི་ལྷ་རྣམས་ཀྱིས། སངས་རྒྱས་དག་ནི་ཐམས་ཅད་ཀྱི། །སྐྱེ་བས་ཐོབ་པའི་དབང་བསྐུར་ལྟར། །དེ་བཞིན་བདག་གིས་ལྷ་ཡི་ཆུས། །དག་པ་ལྷ་ཡི་ཆུ་དབང་བསྐུར། །ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུཾ། ཞེས་བུམ་པའི་ཆུས་དབང་བསྐུར། སྒོ་གསུམ་གྱི་དྲི་མ་དག །ཟླ་བ་ཞུན་མ་ལྟ་བུའི་བདུད་རྩིའི་སྐུ་ལུས་ཐམས་ཅད་གང༌། ཆུའི་ལྷག་མ་སྤྱི་བོར་འཁྱིལ་བ་ལས། གཙོ་བོ་ལ་མི་བསྐྱོད་པ། ཤར་དང་མེ་མཚམས་ཀྱི་ལྷ་ལ་རྣམ་པར་སྣང་མཛད། ལྷོ་དང་བདེན་བྲལ་གྱི་ལྷ་ལ་རིན་ཆེན་འབྱུང་ལྡན། ནུབ་དང་རླུང་མཚམས་ཀྱི་ལྷ་ལ་འོད་དཔག་མེད། བྱང་དང་བྱང་ཤར་གྱི་ལྷ་ལ་དོན་ཡོད་གྲུབ་པས་དབུ་བརྒྱན། འདིར་སྐྱོ་ལུགས་ཀྱི་མན་ངག་ལས། དབང་ལྷ་རྡོ་རྗེ་འཇིགས་བྱེད་རིགས་ལྔ་དང་བཅས་པ་ཞེས་འབྱུང་ཞིང༌། དེའི་དོན་ཡང་ཁྲོ་བོ་རིགས་ལྔ་ལ། དབུ་རྒྱན་ནམ་ཐུགས་ཀར་ཞི་བ་རིགས་ལྔ་བཞུགས་པ་ཡིན་ལ། དེ་ཐམས་ཅད་ཀྱིས་དབང་བསྐུར་བར་བཞེད་དོ། །ཕྱིས་ཀྱི་ཁ་ཅིག་གཞུང་ཞང་འགྱུར་དུ། སྔགས་པས་ཡང་ནི་གཅིག་པུ་ནི། །དབང་བསྐུར་བ་ཡང་བསྒོམ་པར་བྱ། །ཞེས་པའི་དོན་དུ་བསམས་ནས། གཙོ་བོ་གཅིག་པུ་ལ་དབང་བསྐུར་བ་དང༌། གཞན་དག་རོང་འགྱུར་ལས། སྔགས་པས་ཡང་ནི་གཅིག་ཏུ་བྱ། །ཞེས་པའི་དོན་དུ་བསམས་ནས། རྡོ་རྗེ་གསུམ་དང་ཡེ་ཤེས་པ་ལན་གཉིས་འཇུག་པར་འདོད་དེ། གཞུང་གི་དགོངས་པ་ནི། སྔགས་པས་ཡང་ནི་གཅིག་ཏུ་བྱ། །ཞེས་པ་ཡིན་ཡང༌། དེའི་སྔོན་དུ། གཞུག་དང་བཅིང་དང་མཉེས་པར་བྱ། །ཞེས་གསུངས་པའི་འཇུག་སྡོམ་ཡིན་པས་ཚིག་སྔ་མ་དང་དོན་གཅིག་པའམ། ཡང་ན་དུས་འཁོར་ལྟར། རོ་མཉམ་གྱི་དོན་ཡིན་གྱི། བསྐྱར་ནས་ཡེ་ཤེས་

― TNT06_Page_0817 ―

^{[མ་དཔེ་གཟིགས་ན་འདིར་གནོན།]}

[Full Size]

པ་དང་གཅིག་ཏུ་བྱེད་པའི་དོན་མ་ཡིན་ནོ། །ཨོཾ་བཛྲ་བྷཻ་ར་ཝ་མཎྜལ་དེ་བ་ཏ་ས་པཱ་རི་ཝཱ་ར་བྷྱཿ ཞེས་ཐོག་མར་སྦྱར་ནས། ཨརྒྷཾ་ནས་ཤཔྟ་པྲ་ཏཱིཙྪ་སྭཱཧཱ། བར་གྱིས་མཆོད། བསྟོད་པ་ནི། ཧཱུཾ། དྲག་པོ་ཆེན་པོ་དྲག་ཤུལ་ཆེ། །འཇིགས་པ་དག་ཀྱང་འཇིགས་པར་བྱེད། །རྐང་པའི་སྟབས་ཀྱིས་ས་གཞི་གནོན། །ལྷ་དང་ལྷ་མ་ཡིན་རྣམས་ལ། །སྡིགས་པའི་ཕྱག་རྒྱས་བསྡིགས་མཛད་པའི། །ཞལ་དགུ་པ་ལ་ཞབས་བཅུ་དྲུག །ཕྱག་རྒྱ་སུམ་ཅུ་རྩ་བཞིར་ལྡན། །ཕྱག་རྒྱ་མང་པོ་འབར་ཞིང་འཁྲུག །འཇིགས་པ་མ་ཧེའི་གདོང་པ་ཅན། །བསྐལ་པའི་མེ་དཔུང་ལྟ་བུ་ཡི། །ལྷ་མཆོག་རྣམ་པར་གཙིགས་པའི་ཞལ། །ལྗགས་འགྲིལ་མཆེ་བ་གཙིགས་པ་ཡི། །ལྷ་དང་ལྷ་མ་ཡིན་རྣམས་དང༌། །གདུག་ཅན་དགྲ་རྣམས་གསོལ་བར་མཛད། །དབུ་སྐྲ་ཁམས་ནག་གྱེན་དུ་བརྫེས། །དྲག་པོ་ཆེན་པོ་གཡོན་བརྐྱང་པའི། །སྟོབས་ཀྱིས་གནོད་ཅིང་མཚན་མ་བསྒྲེང༌། །གསུས་ཁྱིམ་ཆེ་ཞིང་ལྗགས་བསྐྱོད་པ། །མི་མགོ་ལྔ་བཅུའི་འཕྲེང་བས་བརྒྱན། །ཕྱག་རྒྱ་དྲུག་གིས་མཛེས་པར་སྤྲས། །ཐོད་སྐམ་འབར་བའི་དབུ་རྒྱན་མཐོ། །འཇིགས་བྱེད་ཆེ་ལ་ཕྱག་འཚལ་བསྟོད། །ཉིད་ཀྱི་སྐུ་གསུང་ཐུགས་ལས་སྤྲུལ། །འཇིགས་བྱེད་ཁྲོ་བོའི་ཚོགས་རྣམས་དང༌། ཁྲོ་མོ་རྣམས་དང་དུར་ཁྲོད་གནས། །བསྲུང་མ་དམ་ཅན་ཚོགས་ལའང་བསྟོད། །ཅེས་པས་བསྟོད། དེ་དག་ནི་ལུགས་འདིའི་སྲོལ་འཛིན་རྙིང་པ་རྣམས་ཀྱི་ལག་ལེན་ལྟར་ཡིན་ཞིང༌། རྒྱས་པར་ན་རྟགས་བསྟོད་ལ་སོགས་པ་བྱའོ། །སྒྲུབ་ཐབས་འདི་དགྲ་ནག་གདོང་དྲུག་གཤེད་དམར་རྣམས་ཀྱིས་ཁ་འགེངས་མི་མཛད་པའི་ལུགས་སུ་

― TNT06_Page_0818 ―

^{[མ་དཔེ་གཟིགས་ན་འདིར་གནོན།]}

[Full Size]

འདུག་པས་བསྟོད་པ་འདི་ཉིད་འོས་མོད། བོད་ལ་སྒྲུབ་ཐབས་རྙིང་པར་བཤད་པ་ལྟར་གྱི་མཆོད་བསྟོད་སྣ་ཚོགས་པ་དག་ཀྱང་འགལ་བ་མེད་དོ། །དེ་རྗེས་དག་པ་དྲན་པ་ནི། དམ་པའི་དོན་དུ་རྣམ་དག་པ། །དུས་ནི་དཔའ་བོ་ཆེན་པོའི་གཟུགས། །ཞལ་བརྒྱད་ཐུན་ཚོད་བརྒྱད་ཡིན་ཏེ། །ཞལ་དགུ་ཐུན་ཚོད་སྤྱི་ཡིན་ནོ། །ཕྱག་དང་རྭ་གཉིས་ཟླ་བ་དང༌། །ཟླ་བ་ཕྱེད་པ་ཡང་དག་སྦྱོར། །བཞོན་པ་བཅུ་དྲུག་དུས་དང་ནི། །ཟླ་བ་ཡི་ནི་ཞག་ཏུ་ཤེས། །ཞལ་ནི་གཟའ་དགུ་དག་ཏུ་ཤེས། །སྤྱན་ནི་རྒྱུ་སྐར་དག་དང་སྦྱར། །ཞབས་ནི་འཕོ་བ་བཅུ་གཉིས་དང༌། །དུས་བཞི་ཡང་ནི་དེ་བཞིན་ནོ། །མཚོན་ཆ་རྣམས་ནི་སྟོང་པ་དང༌། །སྙིང་རྗེ་དག་ནི་བཅུ་དྲུག་གཉིས། །གླང་ཆེན་ལྤགས་པ་བགེགས་ཆེན་ཏེ། །དྲག་པོའི་གཟུགས་ནི་སྡུག་བསྔལ་ཆེ། །སེལ་བར་བྱེད་པའི་གཙོ་བོའོ། །ཁ་དོག་ནག་པོ་བྱམས་པ་ཆེ། །ཐོད་པའི་རྒྱན་ནི་མི་འགྱུར་བའོ། །དཀྱིལ་འཁོར་ལྷ་ནི་ཐམས་ཅད་དག །རང་བཞིན་འབྱུང་བའི་དུས་དག གོ །དུས་གསུམ་དག་པས་སྐུ་གསུམ་མོ། །ལྷ་རྣམས་ཉིད་ཀྱི་རང་མིང་ནི། །དང་པོར་ཨོཾ་དང་ཧཱུཾ་ཕཊ་མཐའ། །ཐོད་པར་བཏུང་བ་དག་པའོ། །དཀྱིལ་འཁོར་བྱང་ཆུབ་ཕྱོགས་ཡིན་ནོ། །བཞོན་པ་ས་རི་སནྟ་ཀ ། མདོག་སོགས་དེ་བཞིན་གཤེགས་པ་སྟེ། །དག་པ་ཐམས་ཅད་ཤེས་པའོ། །ཞེས་བརྗོད་ཅིང་དོན་བསམ། དག་དྲན་འདི་གཞུང་གི་དངོས་བསྟན་ལ། ཐུན་མཚམས་ཀྱི་སྤྱོད་པའི་ཡང་འཇུག་ན་ཡོད་མོད་ཀྱི། དེ་ནི་བཤད་པའི་གོ་རིམ་ཙམ་ལས། སྐབས་དེར་བསྒོམ་དགོས་པའི་དོན་མིན་ལ། དེས་ནི་འདི་བཟླས་པའི་ཐོག་མཐའ་གང་རུང་དུ་བྱའོ། །དེ་ནས་བཟླས་པ་ནི། ཨོཾ་ཡ་མ་རཱ་ཛ་ས་དོ་མེ་ཡ།

― TNT06_Page_0819 ―

^{[མ་དཔེ་གཟིགས་ན་འདིར་གནོན།]}

[Full Size]

ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡ་ཀྵེ་ཡ་ཙ་ནི་རཱ་མ་ཡ་ཧཱུཾ་ཧཱུཾ་ཕཊ་ཕཊ། ཅེས་པ་ནི་རྩ་བའི་སྔགས་སོ། །ཨོཾ་ཧྲཱྀཿཥྚཱིཿབི་ཀྲི་ཏཱ་ན་ན་ཧཱུཾ་ཕཊ། ལས་སྔགས་སམ་ཉེ་བའི་སྙིང་པོའོ། །ཨོཾ་ཡ་མཱན་ཏ་ཀ་ཧཱུཾ་ཕཊ། སྙིང་པོའོ། །འཁོར་གྱི་སྔགས་ལ། ཨོཾ་བཛྲ་ཤི་རཿཧཱུཾ་ཕཊ། ཨོཾ་བཛྲ་ཧསྟ་ཧཱུཾ་ཕཊ། ཨོཾ་བཛྲ་ཨནྡྲ་ཧཱུཾ་ཕཊ། ཨོཾ་བཛྲ་པཱ་ད་ཧཱུཾ་ཕཊ། ཚུལ་དེས་འགོར་ཨོཾ་བཛྲ་དང༌། མཇུག་ཏུ་ཧཱུཾ་ཕཊ་སྦྱར་ཏེ། ཀ་པཱ་ལ། ཙཱ་ཤ་ཀ ། ཤྨ་ཤཱ་ན་ཀརྤ་ཊ། ཤུ་ལ་བྷིན་ད་པུ་རུ་ཥ། ཀརྟ་རི་བྷིན་དི་པཱ་ལ། མུ་ཥ་ལ། ཚུ་རི་ཀ ། ཀ་ཎ་ཡ། ཨང་གུ་ཤ ། མ་ཧི་ཥ། སྲྀ་གཱ་ལ། ཀུ་ཋཱ་ར། ཤ་ར། ག་ད། ཁ་ཊྭཱཾ་ག །ཙཀྲ། བ་ཤ ། བཱ་རཱ་ཧ། གརྡ་བྷ། ཡང་ཨོཾ་བཛྲ་བཛྲ་ཧཱུཾ་ཕཊ། དེ་བཞིན་དུ། ཌ་མ་རུ་ཀ ། ཕལྐ། དྷ་ནུ། གྷཎྜ། བ་ཏ་པཊྚ། ཨུཥྛ། ཤྭ་ན། ཏརྫ་ནི། ཏྲི་བ་ཏཱ་ཀཾ༴ ག་ཛ་ཙརྨ། མུད་ག་ར། ཀུནྟ། ཨགྣི་ཀུཎྜ། མ་ཥ། ཛམྦུ་ཀ ། གྲྀ་དྷཱ། ཨུ་ལུ་ཀ ། ཀཱ་ཀ ། ཧ་རི། མནྟི། སེ་ན། ཤ་ཀུ་ནི། ཨོཾ་བཛྲ་སཱ་ར་ས་ཧཱུཾ་ཕཊ། ཅེས་པ་ནི་འཁོར་གྱི་སྔགས་སོ། །ཡང་འདི་དག་ལ། ཨོཾ་ཨོཾ་བཛྲ་ཤི་ར་ཧཱུཾ་ཕཊ། ཨོཾ་ཧྲཱིཿབཛྲ་ཧསྟ་ཧཱུཾ་ཕཊ། ཅེས་སོགས་དང༌། ཨོཾ་ཡ་བཛྲ་ཀརྟ་རི་ཧཱུཾ་ཕཊ། ཨོཾ་ཀྵེ་བཛྲ་བི་དེ་པཱ་ལ་ཧཱུཾ་ཕཊ། ཅེས་སོགས་དང༌། ཨོཾ་ཡ་བཛྲ་གྲྀ་དྷ་ཧཱུཾ་ཕཊ། ཨོཾ་མཱན་བཛྲ་ཨུ་ལུ་ཀ་ཧཱུཾ་ཕཊ། ཅེས་སོགས་དང༌། ཀུན་གྱི་མཐར། ཨོཾ་ཕཊ་བཛྲ་སཱ་ར་ས་ཧཱུཾ་ཕཊ། ཀྱི་བར་དུ། ས་བོན་དང་སྤེལ་ནས་བཟླ་བ་ཞང་ལུགས་ཀྱི་མན་ངག་ཏུ་འཆད་དེ། ནག་པོ་ཞང་ལུགས་དང་མཐུན་ཅིང༌། འཁོར་གྱི་སྔགས་ལ་རྩ་འདོན་བྱེད་ཕྱིན་ཆད། ཤིན་ཏུ་བཟང་བར་ཡང་མངོན་ནོ། །གཞུང་ལས། མཆོད་པ་སྣ་ཚོགས་མཆོད་པར་བྱ། །

― TNT06_Page_0820 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་སོགས་དང༌། ཤ་རྣམས་ཐམས་ཅད་བཟའ་བ་ན། །ཞེས་སོགས་འབྱུང་བ་ནི། སྒྲུབ་པའི་དཀྱིལ་འཁོར་ལ་མཆོད་པའི་དབང་དུ་བྱས་པ་ཡིན་གྱི། བདག་བསྐྱེད་ཀྱི་མཆོད་པ་ཁོ་ན་སྟོན་བྱེད་མ་ཡིན་མོད་ཀྱང་རིག་པ་མཚུངས་པའི་ཕྱིར། བཟླས་པའི་ཐ་མར་ཡང༌། གོང་བཞིན་མཆོད་པ་དང༌། འདུད་ཉི་ཤུའི་བསྟོད་པ་དང༌། བདུད་རྩི་མྱང་བ་སོགས་བྱས་པའི་མཐར། རང་གི་སྙིང་ག་ནས་འོད་ཟེར་འཕྲོས། ཞེས་པ་ནས། དགེ་བ་བསྔོ་བའི་བར། གཤེད་དམར་གྱི་སྐབས་དང་ཚིག་དོན་འདྲ་བ་ལས། རང་རིག་མ་ཞེས་པ་མི་དགོས་སོ། །སྤྱིར་རྡོ་རྗེ་འཇིགས་བྱེད་ལྷ་བཅུ་གསུམ་མ་སོགས། འཁོར་ཚོགས་མངལ་འབྱིན་གྱི་ཆོ་ག་ཡོད་པའི་ལུགས་རྣམས་ལ། རྟག་ཏུ་འཁྱུད་པའི་ཡུམ་བསྒོམ་པ་འོས་ཤིང་ལེགས་པ་ཡིན་ཡང༌། ཞེ་དགུ་མ་དང་རོ་ལངས་བརྒྱད་བསྐོར་སོགས་ལ། གསང་བའི་མཆོད་པའི་སྐབས་ལྟ་བུ་དམིགས་པ་ཡུད་རེ་བསྒོམ་པ་ལ་འཁྱུད་ཡུམ་དགོས་པའི་སྐབས་ཡོད་ཀྱང༌། དང་པོ་སྐྱེད་ཆོག་གི་སྐབས་ནས། རྟག་ཏུ་འཁྱུད་ཡུམ་བསྒོམ་པ་ནི་མི་རིགས་ཏེ། རང་རང་གི་གཞུང་དང་འགལ་བའི་ཕྱིར་རོ། གཏོར་མ་འབུལ་བར་འདོད་ན། ཡི་གེ་བཅུ་པ་དང༌། ཨ་མྲྀ་ཏས་བསངས། ས་བྷཱ་ཝའམ། ཨ་ཀཱ་རོས་སྟོང་པར་སྦྱངས། སྟོང་པའི་ངང་ལས་མི་མགོའི་སྐྱེད་པུ་གསུམ་གྱི་དབུས་སུ། ཡཾ་ལས་རླུང་གི་དཀྱིལ་འཁོར་སྔོན་པོ་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་འབར་བས་མཚན་པ། དེའི་སྟེང་དུ་ཨ་ལས་ཐོད་པ་དུམ་བུ་གཅིག་པ། ཕྱི་དཀར་ལ་ནང་དམར། དེའི་སྟེང་དུ་ཨ་ལས་པདྨ་དང་ཟླ་བའི་གདན་དབུས་སུ་ན་ལས་མིའི་ཤ་དང་མུ་ལས་བྱུང་བའི་དྲི་ཆུ་བརྩེགས་པ། ཤར་དུ་གོ་ལས་བ་ལང་གི་ཤ ། ལྷོར་ཀུ་ལས་

― TNT06_Page_0821 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྱིའི་ཤ ། ནུབ་ཏུ་ད་ལས་རྟའི་ཤ ། བྱང་དུ་ཧ་ལས་གླང་བོ་ཆེའི་ཤ ། ཤར་ལྷོར་བྷྲུཾ་ལས་དྲི་ཆེན། ལྷོ་ནུབ་ཏུ་ཨཾ་ལས་རཀྟ། ནུབ་བྱང་དུ་ཛྲིཾ་ལས་བྱང་སེམས། བྱང་ཤར་དུ་ཁཾ་ལས་ཀླད་པ་རྣམས་སུ་གྱུར། རླུང་གཡོས་མེ་སྦར་ཤ་ལྔ་བདུད་རྩི་ཞུ་ཞིང་ཁོལ། རཾ་ཡིག་དམར་པོའི་འོད་ཀྱིས་ཁ་དོག་དང་དྲི་རོ་ངན་པ་ཐམས་ཅད་བསྲེགས་ཤིང་སྦྱངས། ཨ་ཡིག་དཀར་པོའི་འོད་ཀྱིས་བདུད་རྩིའི་རྒྱ་མཚོ་ཆེན་པོར་གྱུར། དེའི་སྟེང་གི་ནམ་མཁའ་ལ་ཨོཾ་ཨཱཿཧཱུཾ། དེ་རྣམས་ལས་འོད་འཕྲོས། སྐུ་གསུང་ཐུགས་རྡོ་རྗེའི་ལྷ་ཚོགས་སྤྲོས་ཤིང་བསྡུས་ནས་ཡེ་ཤེས་ཀྱི་བདུད་རྩི་བཀུག་སྟེ་ཐིམ་པ་དང༌། འདོད་ཡོན་དཔག་ཏུ་མེད་པའི་ཆར་ཕབ་པར་གྱུར། ཨོཾ་ཨཱཿཧཱུཾ། དེ་རྗེས་རྒྱས་པ་ལ་མོས་ན། མདུན་དུ་དཀྱིལ་འཁོར་བསྐྱེད་དེ་གཙོ་བོ་ཆོ་ག་གསུམ་བསྐྱེད་དང༌། གཞན་རྣམས་ས་བོན་ཙམ་ལས་བསྐྱེད་དོ། །དེ་རྗེས་ཡེ་ཤེས་སྤྱན་འདྲེན་དང་དབང་བསྐུར་རྒྱས་བཏབ་བྱས་ནས། མཆོད་བསྟོད་ཅུང་ཟད་རྒྱས་པ་སྔོན་དུ་འགྲོ་བས་གཏོར་མ་འབུལ། མདོར་བསྡུས་པ་ལ་དགའ་ན། རང་གི་སྙིང་ག་ནས་འོད་ཟེར་འཕྲོས་དཔལ་རྡོ་རྗེ་འཇིགས་བྱེད་ཆེན་པོའི་དཀྱིལ་འཁོར་སངས་རྒྱས་བྱང་སེམས་དཔའ་བོ་མཁའ་འགྲོའི་ཚོགས་ཐམས་ཅད་ཀྱིས་བསྐོར་བ་བཛྲ་ས་མཱ་ཛཿ ཨརྒྷཾ་ནས་ཤཔྟའི་བར་གྱིས་མཆོད། བསྟོད་པ་གང་རུང་གིས་བསྟོད། ལྗགས་ཧཱུཾ་ལས་བྱུང་བའི་རྡོ་རྗེའི་སྦུ་གུས་གཏོར་མ་དྲངས་ཏེ་གསོལ་བར་གྱུར། ཨོཾ་ཧྲཱིཿཥྚཱིཿབི་ཀྲི་ཏཱ་ན་ན་ཧཱུཾ་ཕཊ། ཤྲཱི་བཛྲ་བྷེ་ར་ཝ། ཨ་ཏི་པ་ཏི། ཨི་མཾ་བ་ལིང༌། ཁ་ཁ། ཁཱ་ཧི་ཁཱ་ཧི་ཧཱུཾ་ཕཊ་སྭཱཧཱ། ལན་བདུན་ལ་སོགས་པས་གཙོ་བོ་ལ་ཕུལ། སྔགས་གསུམ་གྱི་མཐར། ཨི་མཾ་བ་ལིང༌། སོགས་བཏག་པས་འཁོར་ཚོགས་རྣམས་

― TNT06_Page_0822 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་ཕུལ། ཨརྒྷཾ་ལ་སོགས་པས་མཆོད་ཅིང་འདུད་བསྟོད་བྱ། ལ་ལི་ཏིའི་གཏོར་ཆོག་ཆུང་ངུ་ནི་ཞེ་དགུའི་སྒྲུབ་ཐབས་ཀྱི་ཆ་ལག་ཡིན་པས་འདིར་སྦྱོར་དགོས་སོ། །རང་གི་སྙིང་ག་ནས་འོད་ཟེར་འཕྲོས། ས་འོག་ས་སྟེང༌། ས་བླ་ན་གནས་པ་དང༌། སྐུ་གསུང་ཐུགས་ཀྱི་ལས་བྱེད་རྣམས་དང༌། འཕྲིན་ལས་རྣམ་པ་བཞི་ལ་དབང་འབྱོར་བའི་ཕྱིར། ཕྱོགས་བཞིར་རྒྱུ་བའི་དམ་ཅན་རྣམས་དང༌། ཕྱོགས་སྐྱོང་བ་བཅུ། སྲིད་པ་གསུམ་གྱི་འབྱུང་པོའི་ཚོགས་དང་བཅས་པ་བཛྲ་ས་མཱ་ཛཿ ཨརྒྷཾ་སོགས་ཀྱིས་མཆོད། ཡི་གེ་བཅུ་པའི་མཐར། ས་མ་ཡ་སྟྭཾ། གྱིས་དམ་ལ་བཞག ཨོཾ་བྷཱུ་ཙ་རཱ་ནཱཾ། ཡ་པཱ་ཏཱ་ལ་ཙ་རཱ་ཡ། མཱན་ཁེ་ཙ་རཱ་ཎཱ། ཏ་པུརྦ་དི་གཱ་ནཱཾ། ཀ་དཀྵི་ཎ་དཱི་གཱ་ཡ། ཧཱུཾ་པཉྩི་མ་དཱི་གཱ་ནཱཾ་ཕཊ་ཨུད་ཏ་ར་དི་བཱ་ཡ། ཨོཾ་ཨི་ཧྲཱིཿཡ་ཥྟཱི་བ། བི་ཀྵ་ཀྲི་ཀ་ཏཱ་ཡེ་ན་ཨ་ན་དེ་ཧཱུཾ་བྷྱཿཕཊ་སརྦ་བྷཱུ་ཏེ་བྷྱཿ ཨི་མཾ་བ་ལིང་ཁ་ཁ་ཁཱ་ཧི་ཁཱ་ཧི་ཧཱུཾ་ཕཊ་སྭཱཧཱ། ལན་གསུམ་མམ་བདུན་གྱིས་ཕུལ། ཨརྒྷཾ་སོགས་ཀྱིས་མཆོད། བདུད་བཞི་པོ་ནི་རྣམ་པར་འཇོམས། །སོགས་ལ། དམ་ཅན་བསྲུང་མའི་ཚོགས་ལ་བསྟོད། །ཅེས་འདོན་པ་སྤོ། རྡོ་རྗེ་འཇིགས་མཛད་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ། །ནས། ཀུན་འགྲུབ་ཤོག །གཞན་ཡང་ཞུ་ཞིང་གསོལ་བ་ནི། །བླ་མ་སྨོད་པར་བྱེད་པ་དང༌། །དཀོན་མཆོག་གསུམ་ལ་གནོད་པ་དང༌། །བསྟན་པ་འཇིག་པར་བྱེད་པ་དང༌། །སེམས་ཅན་ཡོངས་ལ་འཚེ་བ་དང༌། །སྔགས་རྒྱུད་སྨོད་པར་བྱེད་པའི་མི། །འདི་རྣམས་ཁྱོད་ཀྱིས་སྒྲོལ་བ་དང༌། །བདག་ཅག་རྣམས་ལ་བརྩེ་བར་མཛོད། །ཅེས་ལས་གཞོལ། རྗེས་དངོས་གྲུབ་བླང་བ་དང༌། ཡིག་བརྒྱ། བཟོད་

― TNT06_Page_0823 ―

^{[མ་དཔེ་གཟིགས་ན་འདིར་གནོན།]}

[Full Size]

གསོལ། གཤེགས་གསོལ། སྨོན་ལམ་བཀྲ་ཤིས་རྣམས་སྤྱི་དང་འདྲའོ། །སྒྲུབ་ཐབས་འདིའི་སྦྱང་བྱ་སྦྱོང་བྱེད་ལ་བསྲུང་འཁོར་དང་གཞལ་ཡས་ཁང་གི་དག་སྦྱོར་ནི། རྒྱུད་སྡེ་སྤྱི་དང་མཚུངས་ཤིང༌། ཞི་བའི་ས་བོན་བཞི་བཅུ་ཞེ་དགུ་བསྒོམ་པ་ནས་བརྩམས་ཏེ། ལྷ་མང་ཉུང་གི་ཁྱད་པར་ཙམ་མ་གཏོགས། དག་སྦྱོར་ཐམས་ཅད་དཔའ་རྐྱང་གི་སྒྲུབ་ཐབས་ཀྱིས་རིགས་འགྲེ་ལ། ལྷ་རྣམས་ཀྱི་དག་པ་ནི། རེ་མིག་གི་ལྷ་དགུ་ཕུང་ལྔ་འབྱུང་བཞི་དག་ཅིང༌། ཡེ་ཤེས་ལྔ་དང་ཚད་མེད་བཞིའི་ངོ་བོ་ཡིན་ལ། སྣམ་བུའི་ལྷ་རྣམས་ཕྱི་ནང་གི་ཆོས་དང་འཕོ་བ་དག་ཅིང༌། བདེ་སྟོང་སོ་གཉིས་དང༌། མཚན་སོ་གཉིས་ཀྱི་ངོ་བོ་ཡིན་ལ། སྒོ་མཚམས་བརྒྱད་པོ་རྣམས། རྣམ་ཤེས་བརྒྱད་དག་ཅིང༌། དབང་ཕྱུག་བརྒྱད་ཀྱི་ངོ་བོའོ། །དངོས་སྒྲུབ་ཐབས་ལུགས་འདི་རྒྱུད་རྐྱང་མན་ངག་གི་ལུགས་མིན། སྒྲུབ་ཐབས་རྒྱ་གཞུང་ཁོ་ན་གཙོ་བོར་བྱེད་པ་ཡིན་ཡང༌། འགྱུར་བྱེད་བོད་ཀྱི་སྲོལ་ཀའི་དབང་དུ་བྱས་ན། འཇིགས་མཛད་ཞང་ལུགས་ཀྱི་ཐ་སྙད་ཀྱང་ཆོས་འདི་ལ་འཇུག་པར་འགྱུར་ཞིང༌། སྐྱོ་པའི་རྗེས་འབྲང་ཕྱི་མ་རྣམས། བོད་ཀྱི་བརྒྱུད་པ་གཞན་ལ་མ་ལྟོས་པ་ལེགས་སྙམ་ནས། ཨ་མོ་གྷ་ལ་བརྒྱུད་པ་འདེད་ཀྱང༌། ཆོས་འདི་ནི་སྐྱོས་ཨ་མོ་གྷ་ལ་མ་གསན་ཞང་ལ་གསན་པ་ཡིན་པས། སྐྱོ་ལུགས་ཞང་ལུགས་ཞེས་སོ་སོར་མེད་དོ། །དེས་ན་འདིའི་དབང་ཆོག་ལ། སྐྱོ་ལུགས་ལྷ་དགུའི་དབང་ཆོག་སྦྱོར་བ་མི་ལེགས་ཏེ། བརྒྱུད་པ་སོ་སོའི་ལག་ལེན་བཞིན་བྱེད་ཕྱིན། དགྲ་ནག་ཞང་ལུགས་ལ་འདོན་པ་སྤོང་བ་ཉིད་མཆོག་ཏུ་བཟང་ངོ༌།། །།༈ ད་ནི་དཔལ་རྡོ་རྗེ་འཇིགས་མཛད་ཆེན་པོ་ཁྲོ་མོ་བརྒྱད་སྐོར་གྱི་སྒྲུབ་ཐབས་བཤད་པར་བྱའོ། །འདི་ལ་གནོད་སྦྱིན་མོ་བརྒྱད་སྐོར་དང༌། གཤིན་རྗེ་མོ་བརྒྱད་སྐོར་དང༌། སྐྱོ་ལུགས་ལྷ་དགུ་ཞེས་ཀྱང་

― TNT06_Page_0824 ―

^{[མ་དཔེ་གཟིགས་ན་འདིར་གནོན།]}

[Full Size]

གྲགས་ཏེ། དོན་དུ་མཐུན་རུང་གི་མིང་ཡིན་ལ། ངོར་པ་རྣམས་ན་རེ། འདི་ལ་ལྷ་བཅུ་བདུན་མ་ཞེས་བྱ། རྡོ་རྗེ་འཇིགས་བྱེད་ཀྱི་སྲོལ་འཛིན་བོད་དུ་བྱུང་བ་ལ་བཟང་ཤོས་མཐར་ཐུག་ནི་མལ་ལུགས་ཡིན་པས་དེ་ལ་འགྲན་ཟླ་མེད། དེ་འོག་ན་སྐྱོ་ལུགས་ཁོ་ན་ངོ་མཚར་ཆེ། སྐྱོ་ནི་རྡོ་རྗེ་འཇིགས་བྱེད་ཀྱི་བསྟན་པའི་མངའ་བདག་ཡིན། སྐྱོའི་སློབ་བརྒྱུད་གཉན་རིན་ཆེན་བརྟན་པའི་ཊཱི་ཀ་ཡང་བཤད་སྒྲོས་ཤིན་ཏུ་བཟང༌། རྭ་ལོ་ནི་མཐུ་ཆེ་ཡང་རྒྱུད་དོན་འཆད་མི་ཤེས་སོ་ཞེས་སྒྲོག་ཅིང༌། ཁོང་པ་རང་ཚོ་ཤིན་ཏུ་བསྔགས་བརྗོད་ཆེ་བའི་སྐྱོ་ལུགས་དེ་ཇི་ལྟར་ཡིན་འཆད་པ་ན། འདི་སྐད་ཅེས། སྐྱོ་ལུགས་པ་རྣམས་ནི། སྒྲུབ་ཐབས་རྡོ་རྗེ་སེམས་དཔའ་བསྡུས་པ་ཞེས་བྱ་བ་འཇིགས་བྱེད་བཅུ་བདུན་མའི་སྒྲུབ་ཐབས་ཨ་མོ་གྷ་བཛྲ་ཀྱིས་མཛད་པ་འདི་དང༌། རྟོག་གསུམ་གྱི་ལས་ཚོགས་ཁོ་ན་གཙོ་བོར་བྱེད། ཡང་ཞེ་དགུ་མའང་རྩལ་འཐོན་ལག་ལེན་བྱེད་ཅེས་སྨྲའོ། །འདི་ནི་ཆ་མེད་ཀྱི་རྒྱུས་གཏམ་ཁོ་ན་སྟེ། སྔོན་གྱི་ངོར་བ་དེ་དག་ཀྱང་སྐྱོ་ལུགས་ཀྱི་གཞུང་མན་ངག་ཀྱང་ཕྱག་ལེན་རྣམས་ཤེས་པའི་ཕྱོགས་སུ་ལྟ་ག་ལ་ཕྱིན། ཆོས་སྐོར་ཇི་ཙམ་ཡོད་དང༌། ཉམས་ལེན་གྱི་མཐིལ་གང་ཡིན་ཙམ་ཡང་ངོ་མ་ཤེས་པའི་ཧམ་གཏམ་ཤུགས་བསྐྱེད་དེ། མཐའ་འཁོབ་ཀྱི་བླུན་པོ་རྣམས་དང༌། མཚན་ཉིད་པ་ཕྱོགས་ཞེན་ཅན་རྣམས་མགོ་བསྐོར་བ་ལ་ཞུགས་པ་ཁོ་ན་ཡིན་པའི་ཕྱིར་རོ། །དེའི་རྒྱུ་མཚན་ཡང་འདི་ལྟ་སྟེ། སེམས་དཔའ་བསྡུས་པའི་སྒྲུབ་ཐབས་འདི་ལ། ཚིག་སྣ་རིང་ཐུང་མི་འདྲ་བའི་རྒྱས་བསྡུས་གཉིས་ཡོད་ཅིང༌། དཔེ་ལ་ལ་ན་མཛད་པ་པོ་དོན་ཡོད་རྡོ་རྗེས་བསྒྱུར་རོ་བྱ་བ་འདུག་ཀྱང༌། དཔེ་རྙིང་ལ་ལ་ན་འཇམ་དཔལ་ཡེ་ཤེས་ཀྱིས་མཛད་ཅེས་པའང་ཡོད། དོན་ཡོད་རྡོ་རྗེས་བསྒྱུར་བྱ་བ་དང༌། རོང་ཟོམ་གྱིས་བསྒྱུར་བྱ་བ་ཡང་ཡོད། སྒྲུབ་ཐབས་

― TNT06_Page_0825 ―

^{[མ་དཔེ་གཟིགས་ན་འདིར་གནོན།]}

[Full Size]

འདི་ནི་རྒྱ་གཞུང་རྩོད་མེད་དུ་བྱེད་ཀྱང་རྒྱུད་གཞན་ལ་བརྟེན་པའམ་བླ་མའི་མན་ངག་ཙམ་ཡིན་གྱི། རྟོག་བདུན་ལ་གཙོ་བོར་བརྟེན་པ་མིན་ལ། འདི་ལ་ཁྱེད་རྣམས་ཀྱིས་བཅུ་བདུན་མའི་ཐ་སྙད་སྦྱར་འདུག་པའི་ཐ་སྙད་རང་ཡང་དོན་དང་མི་མཐུན་པས་མི་འཐད་དེ། དཀྱིལ་འཁོར་ལ་ལྷ་དགུ་ལས་མེད་པའི་ཕྱིར་རོ། །སྲུང་འཁོར་ལ་གཤིན་རྗེ་ཕོ་བརྒྱད་ཡོད་པས་སོ་སྙམ་ན། འོ་ན་ཁྱེད་རང་རྣམས་ཀྱི་ལུགས་ལ་ཡང༌། ཀྱཻ་རྡོར་གྱི་མངོན་རྟོགས་བསྒོམ་པའི་ཚེ། སྲུང་འཁོར་གྱི་གཙུག་གཏོར་འཁོར་ལོས་བསྒྱུར་བའི་ལྟོ་བ་ཡངས་པའི་ནང་དུ། དཀྱིལ་འཁོར་བསྒོམ་པ་ན། ཀྱཻ་རྡོར་ལྷ་ཉི་ཤུ་མ་དང༌། འཁོར་བསྒྱུར་ཞུ་ཞིང་སྦྱངས་པའི་ཤུལ་དུ་བསྒོམ་ན། ཀྱཻ་རྡོར་ལྷ་བཅུ་དགུ་མར་འགྱུར་བའི་ཕྱིར་རོ། །སེམས་དཔའ་བསྡུས་པ་འདི་ཨ་མོ་གྷས་མཛད་པར་ཡང་མ་ངེས་ལ། མཛད་ཀྱང་ཆེ་ཆུང་སུ་ཡིན་ཆ་མེད་པས། ངེས་པ་མེད་བཞིན་དུ་དེ་རྒྱུ་མཚན་དུ་འགོད་པ་དང༌། དེ་ལ་ཐག་ཆོད་བྱེད་པ་ཡང་བླུན་རྟགས་ཡིན་ནོ། །སྐྱོན་ཆེན་པོ་ནི་རྟོག་པ་བདུན་པའི་དགོངས་དོན་སྐྱོང་མཁན་མཆོག་ཅིག་དོན་ལའང་ཡིན་ཞིང༌། ཁྱེད་རང་ཡང་དེ་ལྟར་ཁས་ལེན་ན་རྟོག་བདུན་གྱི་བསྟན་པ་འཛིན་མཁན་གྲག་ཤོས་རང་དེ་ཉམས་ལེན་གྱི་མཐིལ་རྟོག་བདུན་གྱི་ལུགས་ལ་མི་བྱེད་པ་ཤིན་ཏུ་མི་རུང་བའི་ཕྱིར། སྐྱོ་པའི་ཉམས་ལེན་གྱི་མཐིལ་སེམས་དཔའ་བསྡུས་པ་ག་ལ་ཡིན། སྐྱོ་ལུགས་ཀྱི་སྒྲུབ་ཐབས་རྙིང་པ་དང༌། སེམས་དཔའ་བསྡུས་པ་སྡུར་ལ་ལྟོས་ཤིག ཡང་སེམས་དཔའ་བསྡུས་པ་དང་རྟོག་བདུན་ཇི་ལྟར་མི་མཐུན་སྙམ་ན། རྟོག་བདུན་ལས་ནི་སྐྱེད་ཆོག་འཇམ་དཔལ་དང༌། ཉི་མ་དང༌། ས་བོན་དང༌། ཕྱག་མཚན་གྱི་རིམ་པས་བསྐྱེད་པར་གསུངས་ལ། སེམས་དཔའ་བསྡུས་པ་ལས་ནི། བདེ་མཆོག་དྲིལ་བུ་ལྷ་ལྔ་དང༌། མཻ་ཏྲི་བཅུ་གསུམ་མ་ལྟར་གཞལ་ཡས་ཁང་སྐྱེད་ཟིན་པའི་རྗེས་སུ། ཨཱ་ལི་ཀཱ་ལི་ལ་ལྟོས་པའི་

― TNT06_Page_0826 ―

^{[མ་དཔེ་གཟིགས་ན་འདིར་གནོན།]}

[Full Size]

ཉི་ཟླ་ས་བོན་གཅིག་འདྲེས་ཀྱི་རིམ་པ་མངོན་བྱང་ལྔ་ཡོངས་གྲགས་འདི་ལས། གཙོ་འཁོར་ཐམས་ཅད་དུས་གཅིག་ཏུ་སྐྱེད་པར་མཛད་པས་ན་དེ་གཉིས་ཤིན་ཏུ་མི་འདྲ་བས་སོ། ཁྱེད་རྣམས་རྭ་ལུགས་ལ་རྟོག་གསུམ་མི་འདོད་ཅེས་ཟེར་བ་ནི། ཁྱེད་རང་རྣམས་ཀྱང་དཔྱད་པ་མ་ཞུགས་པར་རྭ་ལོའི་གསུང་དུ་ཁས་ལེན་ཐག་ཆོད་བྱེད་པའི་རྭ་པོད་ཀྱི་ཀར་ཆག་ཙམ་ཡང་རྫོགས་པར་མ་མཐོང་བའམ། མཐོང་ཡང་གཞིག་པ་མ་ཆུག་པར་ཟད་ལ། སྐྱོ་པ་རྣམས་ལས་ཚོགས་རྟོག་གསུམ་ཁོ་ན་ལ་གཙོ་བོར་མཛད་པའི་རྒྱུ་མཚན་ཡང་མེད་དེ། རྟོག་བདུན་གྱི་འཁྲུལ་འཁོར་ཉིད་རྩལ་དུ་འདོན་པའི་ཕྱིར་དང༌། འཁྲུལ་འཁོར་དེ་ཡང་རྟོག་བདུན་གྱི་ལུགས་རྭ་ལུགས་དང་ཕལ་ཆེར་མཐུན་གྱི་རྟོག་གསུམ་གྱི་ལུགས་མ་ཡིན་པའི་ཕྱིར་རོ། །དེ་ན་སྐྱོ་འོད་འབྱུང་ནི། བོད་དུ་བྱོན་པའི་ཨ་མོ་གྷ་བཛྲ་ཆུང་བ་དེ་ལ་གསན་པའི་རྒྱུད་ཀྱང་མན་ངག་གི་ལུགས་ཉིད་ཉམས་ལེན་དང་ཕྱག་ལེན་གྱི་མཐིལ་དུ་མཛད་པ་ཡིན་ཞིང༌། ཕྱིས་ཞེ་དགུ་མ་སོགས་ཞལ་ལུགས་ཀྱི་ནག་པོ་སྐོར་གསུམ་དང༌། རོང་ཟོམ་ལུགས་ཀྱི་རྟོགས་གསུམ་དང༌། སེམས་དཔའ་བསྡུས་པ་སོགས་ཀྱང༌། རྒྱབ་བརྟེན་གྱི་ཚུལ་དུ་བོད་ཀྱི་བླ་མ་རྣམས་ལ་གསན་ནས་ཉན་བཤད་ཅི་རིགས་ལ་མཛད་པར་ནི་སྣང་མོད། ཞེ་དགུ་གཙོ་བོར་རྩལ་དུ་འདོན་པ་ནི་མིན་ནོ། །ཉམས་ལེན་གྱི་མཐིལ་རྒྱུད་རྐྱང་གི་མན་ངག་དེ་ཡང༌། ཕལ་ཆེར་ཞི་བ་ཡེ་ཤེས་ཀྱི་གཞུང་དང་མཐུན་ལ། འཁོར་ཁྲོ་མོ་བརྒྱད་པོ་ཁོ་ན་སེམས་དཔའ་བསྡུས་པ་དང་མཐུན་གྱི། གཞན་མ་ཡིན་ནོ། །ལུགས་འདིའི་མངོན་རྟོགས་དཀྱུས་ཀྱི་ཉམས་ལེན་སྐབས་སྲུང་འཁོར་ལ་གཤིན་རྗེ་ཕོ་བརྒྱད་ཀྱང་མེད་དེ། ཁྱེད་དག་གི་ནི་སྐྱོ་ལུགས་ཀྱི་ཡིག་སྣ་རྙིང་པ་རྣམས་མ་མཐོང་བར་མ་ཟད། ཤིན་ཏུ་གྲགས་ཆེ་བ་འཛིམས་པས་བྱས་པའི་སྒྲུབ་ཐབས་ཙམ་ཡང་མ་མཐོང་ཞིང༌། གཞན་ལ་རྒྱུན་དུ་ངོམ་ངོམ་འཕྱར་འཕྱར་བའི་གཉན་ཊཱིཀ་

― TNT06_Page_0827 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་ཡང་མ་ལྟས་པར་ཟད་དོ། །འོན་ཀྱང་སྐྱོ་བ་རྣམས་གཞལ་ཡས་ཁང་གི་ནང་དུ་མ་མོ་བརྒྱད། དུར་ཁྲོད་དུ་གཤིན་རྗེ་ཕོ་བརྒྱད་བསྒོམ་པས་བཅུ་བདུན་མའི་ཐ་སྙད་འཐད་དོ་སྙམ་ན། དེ་ལྟ་ན་དུར་ཁྲོད་དུ་ཕྱོགས་སྐྱོང་དང་ཀླུ་ལ་སོགས་པའང་ཡོད་པས་ལྷ་སོ་གསུམ་མ་ལ་སོགས་པར་ཡང་འགྱུར་རོ། །འདིའི་དུར་ཁྲོད་དུ་གཤིན་རྗེ་བརྒྱད་དང༌། ཡུམ་བརྒྱད་ཀྱང་ཡོད་མེད་དོན་ལ་ཞིང་སྐྱོང་དམྱལ་སྲུང་བརྒྱད་རྒྱུད་གཞན་དུ་བཤད་པ་དང་འདྲའོ། །ཡང་ཁྱེད་དག་གི་ནང་ཚན་ཀུ་ཀེ་རྒྱུ་འགུལ་བ་གྲགས་རྒྱལ་གྱིས། བྱ་བ་བསྡུས་པའི་ལུགས་ཀྱི་སྒྲུབ་ཐབས་ཁ་འགེངས་སྣ་ཚོགས་ཅན་ཅིག་བརྩམས་ནས། འདི་ལ་རྒྱ་གཞུང་མ་གཏོགས་བོད་ཡིག་མེད་དོ་ཟེར་ཏེ། སྐྱོ་ལུགས་དེ་ནི་བོད་དུ་ཆོས་བརྒྱད་ཤིན་ཏུ་དར་བའང་ཡིན་ཞིང༌། ཁྱེད་དག་གི་འདོད་པ་ལྟར་དེ་དག་གི་ལག་ལེན་གྱི་མཐིལ་བྱ་བ་བསྡུས་པ་ལ་བྱེད་པ་ཡིན་ན་ནི། བོད་ཀྱི་ཡིག་རིགས་ཅི་ཡང་མི་ཡོང་བའི་རྒྱུ་མཚན་ཅི། བོད་ཡིག་གཏན་ནས་མེད་ན། སྐྱོ་ལུགས་ཡིན་པར་ཡང་མི་འགྱུར་ཏེ། སེམས་དཔའ་བསྡུས་པ་ནི་སྐྱོས་མ་བྱས་ལ། སྐྱོས་བྱས་པའི་ཡི་གེ་གཞན་མེད་པའི་ཕྱིར་རོ། །དེ་ལྟར་རྫུན་དང་ཧམ་པའི་འཚང་སྟིབ་ཟིན་ནས། ད་ནི་ཡིན་ཚུལ་རྣམས་བཤད་པར་བྱ་སྟེ། ལུགས་འདིའི་བརྟེན་སོའི་གཞུང་ནི། རྒྱུད་ཀྱི་རིགས་ལ་རྟོག་བདུན་རྟོག་གསུམ་རྟོག་པ་གཅིག་པ་དང་ཆོས་ཀྱི་རྒྱལ་པོའི་རྟོག་པ་རྣམས་ཡོད་ལ། དགོངས་འགྲེལ་གྱི་རིགས་ལ་ཞི་བ་ཡེ་ཤེས་ཀྱི་སྒྲུབ་ཐབས་ཆེན་མོ་དང༌། བསྙེན་པ་ཁོ་ནའི་ཡན་ལག་ཏུ་དོན་ཡོད་རྡོ་རྗེ་ཆུང་པའི་སྒྲུབ་ཐབས་བསྡུས་པ་དང་གཏོར་ཆོག་གཉིས། འཇམ་དཔལ་ཡེ་ཤེས་དང༌། དོན་ཡོན་རྡོ་རྗེས་མཛད་སྐད་པའི་སྒྲུབ་ཐབས་སེམས་དཔའ་བསྡུས་པ་ཆེ་ཆུང་གཉིས། དོན་ཡོད་རྡོ་རྗེ་ཆེ་བས་མཛད་པར་གྲགས་པའི་དཀྱིལ་ཆོག །ཡང་འཇམ་དཔལ་ཡེ་ཤེས་གཞན་ཞིག་གིས་མཛད་པར་གྲགས་པའི་སྒྲོན་མ་དྲུག་གི་གཞུང༌། ཨ་མོ་གྷའི་ཞི་བ་ལས་བདུན་དང༌། དྲག་པོ་ལས་བདུན་རྣམས་ལ་ཉན་བཤད་ངེས་པར་

― TNT06_Page_0828 ―

^{[མ་དཔེ་གཟིགས་ན་འདིར་གནོན།]}

[Full Size]

བྱུང་ལ་གཞན་ཡང་ཡོད་སྲིད་དོ། །རྟོག་བདུན་ལ་སྐྱོ་ཆེན་པོ་ཉིད་ཀྱི་ཊཱི་ཀ་དང༌། རྟོགས་གསུམ་ལ་ཡང༌། གསུངས་བགྲོས་ལ་བརྟེན་པའི་ཊཱི་ཀ་འགའ་རེ་ཡོད། མན་ངག་གི་ཡི་གེ་ནི་ཆོག་སྒྲིགས་ཉམས་ཀྱི་ཞལ་གདམས། གནས་ཀྱི་ལྷན་ཐབས། དྲག་པོའི་གའུ་སྐོར་བའི་མན་ངག་ཤྲཱི་བྷ་དྲའི་ལུགས། འཁྲུལ་འཁོར་གྱི་འགྲེལ་ཆུང༌། ཞུ་བ་ཡེ་ཤེས་ཀྱི་སྒྲུབ་ཐབས་གསལ་བྱེད། སྤོགས་པའི་ཆོ་ག །སྔགས་བཏུའི་བྱིན་རླབས་ཚིགས་བཅད་མ་ཚོགས་མཆོད་དང་བཅས་པ་ཆེ་ཆུང་གཉིས། ཚ་ཚ་གདབ་པའི་ཚུལ་མར་མེ་མཛད་ཟླ་བས་མཛད་པ། ཡི་གེའི་སྒྲ་དོན་བཤད་པ་ལ་ལི་ཏས་མཛད་ཟེར་བ་གཅིག །འཁོར་ལོ་བཟློག་པའི་རྒྱུ་བཤད་པ། འཁོར་ལོའི་དབྱེ་བ་བསྟན་པ། གཏོར་སྔགས་ཀྱི་ཞལ་བཞེས། འཁོར་ལོ་རྐྱང་པའི་མན་ངག་འཕྲོས་དང་བཅས་པ། བྲིས་སྐུའི་རབ་གནས། སྒྲུབ་པའི་ཡིག་ཆུང༌། བྱང་ཆུབ་ཀྱི་སེམས་བཟའ་བའི་གདམས་ངག །རལ་གྲི། མིག་སྨན། རིལ་བུ། འབྱུང་པོ་དབང་དུ་བྱེད་པ། རོ་ལངས་སྒྲུབ་པ། སྲིན་པོ། གནོད་སྦྱིན། ཀླུ་རྣམས་དབང་དུ་བྱེད་པ། ཀླུ་ལ་གཏད་པ། ཞུ་བའི་བསམ་གཏན་དང༌། ཨ་མོ་གྷའི་ཞལ་གདམས། འདི་གཉིས་རྫོགས་རིམ་ཡིན། གཏོར་མ་བྱིན་རླབས་ཀྱི་ཞལ་གདམས། ནང་མཆོད་ཀྱི་ཞལ་གདམས། ཚོགས་འཁོར་གསལ་བྱེད། ཞི་བ། རྒྱས་པ། དབྱེ་བ། དབང་སྡུད། དགུག་པ། མནན་པ། བསྐྲད་པ། བསད་པ་རྣམས་ཀྱི་ཡིག་ཆུང་རེ་རེ། འཁོར་ལོ་ཁ་སྦྱོར་གྱི་མན་ངག །ཕུར་པ་ཅན་གྱི་གདམས་ངག །བཾ་སྲོག་གཉིས་ཀྱི་ཡིག་ཆུང༌། བཾ་སྲོག་གཉིས་ཀྱི་ཡི་གེ་ཆེ་བ། འདི་གཉིས་གཤིན་རྗེར་སྒྲོལ་གྱི་གདམས་ངག་ཡིན། ཕྱག་མཚན་དབབ་པ་ཟེར་པའི་བསྙེན་སྒྲུབ་ཀྱི་ཡི་གེ་གཅིག །ཡང་ཕྱག་མཚན་དབབ་པའི་ཡིག་སྣ་གསུམ། འཁོར་ལོའི་ཞལ་

― TNT06_Page_0829 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་ཐོར་བུ་གཞན་ཡང་མང་དུ་སྣང༌། ལས་མཁན་གྱི་བསྟོད་བསྐུལ་ཆེ་ཆུང་སོགས་འཕྲོས་དོན་གྱི་ཡིག་ཆུང་དུ་མ་དང་བཅས་པ་ཡོད་དོ། །སྔར་བཤད་པའི་རྒྱ་གཞུང་དེ་རྣམས་ལ་བསྡུས་དོན་མཆན་བུ་ཡིག་སྣ་ཐོར་བུ་རེ་དང་བཅས་པ་ཡོད་ཅིང༌། ལྷ་དགུ་དང༌། ཞེ་དགུ་མའི་སྒྲུབ་ཐབས། དབང་ཆོག །སྦྱིན་སྲེག །རབ་གནས་སོགས་སྦྱར་བྱང་ཡོད་མེད་ཅི་རིགས་པ་སྣ་ཚོགས་དག་ཡོད་དོ། །ཡིག་ཆུང་དེ་དག་ཕལ་ཆེར་ལ་སྦྱར་བྱང་མེད་ཅིང༌། འགའ་ཞིག་སྐྱོ་ཆེན་པོ་དང༌། ཕལ་ཆེར་སྐྱོ་ཁམ་པས་མཛད་དོ་ཞེས་གྲག་གོ །ཁོ་བོས་མཐོང་བ་ནི་དེ་འདྲ་ལ་ད་དུང་ལྷག་པོ་ཡོད་སྲིད་དོ། །དེས་ན་ལུགས་འདི་ལ་སྒྲུབ་ཐབས་སེམས་དཔའ་བསྡུས་པའི་ལུགས་ཀྱི། དབང་བསྐུར་རྐང་ཚུགས་སུ་བྱེད་པའི་སྲོལ་མ་བྱུང་བས། ངོར་པ་རྣམས་འདི་ལ་དེར་རློམ་པ་ནི། མུན་རྡོ་འཕངས་པ་འབའ་ཞིག་སྟེ། སེམས་དཔའ་བསྡུས་པ་ནི་འཁྲུལ་འཁོར་ལག་ལེན་སོགས་རྒྱབ་བརྟེན་གྱི་གཞུང་ཡིན་གྱི། སྒོས་སུ་དབང་བཀའ་ཙམ་ཡང་མེད་པ་ལ་ཉམས་ལེན་མཐིལ་ཡིན་ནོ་སྐད་སྨྲ་བ་འདི་ལས་རྫུན་ཆེ་བ་ཅི་ཡོད། ད་ནི་ལུགས་འདིའི་སྒྲུབ་ཐབས་བརྗོད་པར་བྱ་སྟེ། དེ་ཡང་བསྙེན་པ་ལ་འཇུག་ན། མཎྜལ་གྱི་དཀྱིལ་འཁོར་ཚོམ་བུ་དགུ་པ་ཅན་བྱ་ལ། རྒྱུན་གྱི་ཉམས་ལེན་ལ་མཎྜལ་ཚོམ་བུ་དང་བཅས་པ་མེད་ཀྱང་ཆོག །གང་ལྟར་ཡང་རུང་སྟེ་བྲིས་སྐུའི་མདུན་དུ་མཉྫི་ལ་དཔལ་གཏོར་ཆེན་པོ་བ་དན་དང་བཅས་པ་བཤམས། དེའི་མདུན་དུ་དམར་གྱིས་གང་པའི་ཀ་པཱ་ལ། གཏོར་སྣོད་དང་མཐོ་དམན་མཉམ་པར་བཞག །ཕྱོགས་མཚམས་བརྒྱད་དུ། དེ་ལས་ཅུང་ཟད་དམའ་བའི་སྟེང༌། ཐོད་ཆེན་ནམ། ཚལ་བུའམ། མ་རྙེད་ན་སྣོད་གང་ཡང་རུང་བ་རཀྟས་གང་བ་བཞག །གཞན་ཐོད་པ་དམ་རྫས་ཀྱིས་གང་པ་དང༌། མཾ་སའི་ལྷ་བཤོས་དང༌། ཞི་དྲག་གི་མཆོད་པ་རྣམས་སྤྱི་དང་འདྲ་བར་བཤམ། ཐུན་གཏོར་ཡང་དགོས། སྔོན་འགྲོ་

― TNT06_Page_0830 ―

^{[མ་དཔེ་གཟིགས་ན་འདིར་གནོན།]}

[Full Size]

གཏོར་མ་དང༌། གནས་ཡོ་བྱིན་རླབས་དང༌། ནང་མཆོད་བྱིན་རླབས་རྣམས་ཀྱང་བྱ། སྐྱབས་འགྲོ་སེམས་བསྐྱེད་ཡིག་བརྒྱ་རྣམས་སྔོན་དུ་བཏང༌། རང་ཉིད་དཔལ་རྡོ་རྗེ་འཇིགས་བྱེད་ཆེན་པོ་སེམས་དཔའ་གསུམ་བརྩེགས་ཀྱི་སྐུར་གྱུར། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞ་པཱ་ཡ་གྲྀཧྞ་པཱ་ཡ་ཧཱུཾ། ཨཱ་ནཱ་ཡ་ཧོ་བྷ་ག་ཝཱན་བིདྱ་རཱ་ཛ་ཧཱུཾ་ཕཊ། ཅེས་པའམ། ཡང་ན་བདེ་མཆོག་གི་ཞལ་བཞི་པའི་སྔགས་ལྟ་བུ་བྱས་ཀྱང་རུང༌། ཨོཾ་གྷ་གྷ་གྷ་ཏ་ཡ་གྷ་ཏ་ཡ། སརྦ་དུཥྟཾ་ཕཊ། ཀཱི་ལ་ཡ་ཀཱི་ལ་ཡ་སརྦ་པ་པཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལ་བཛྲ་དྷ་རོ་ཨཱ་ཛྙཱ་པ་ཡ་ཏི་སརྦ་བིགྷྣཱན་ཀཱ་ཡ་ཝཀ་ཙིཏྟ་བཛྲ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་མུད་ག་ར་བཛྲ་ཀཱི་ལ་ཨཱ་ཀོ་ཊ་ཡ་ཧཱུཾ་ཕཊ། ཡི་གེ་བཅུ་པ་ལན་གསུམ་བརྗོད་དེ། བགེགས་ཐམས་ཅད་བསྐྲད་པར་བསམ། བསྲུང་བ་འདི་བསྙེན་ཆུང་གི་སྒྲུབ་ཐབས་ཨ་མོ་གྷས་མཛད་པ་ལ་བརྟེན་པར་སྣང་ཡང༌། གང་དུ་སྒོམ་པའི་གནས་སྐབས་དང་ཆོ་ག་དངོས་ཀྱང་ཅུང་ཟད་མི་འདྲ་བ་ནི། མན་ངག་དབང་བཙན་པར་བྱས་པའོ། །སྐད་ཅིག་གིས་རང་རྡོ་རྗེ་འཇིགས་བྱེད་ཅེས་པ་ནས། ས་མཱ་ཛཿ ཨོཾ་སརྦ་ཏ་ཐཱ་ག་ཏ་པཱ་ད་བནྡྷ་ནཾ་ཀ་རོ་མི། ཞེས་ཕྱག་འཚལ། སྙིང་ག་ནས་སྤྲོས་པའི་མཆོད་པའི་ལྷ་མོ་རྣམས་ཀྱིས་མཆོད་པར་གྱུར། གོང་མ་རྣམས་འོག་ནས་འབྱུང་བའི་མཆོད་བསྟོད་རྒྱས་པ་སྐབས་འདིར་མཛད། འཛིམས་པ་རིན་ཤེས་སྐབས་འདིར་བསྡུས་པ་ལེགས་གསུངས་ཏེ། ད་ལྟའི་འགྲོ་བ་ལ་ལག་ལེན་ཟོར་ཡང་པ་འཕྲོད་པར་སྣང་བས། འདིར་ཡང་འཛིམས་པ་བཞིན་བྱའོ། །ཨོཾ་བཛྲ་བྷཻ་ར་བ་པྲ་ཝ་ར་སཏ་ཀཱ་ར་པྲ་ཏཱིཙྪ་སྭཱཧཱ། ཞབས་བསིལ་དང༌། ཨོཾ་ནི་རི་ཏེ་ཧཱུཾ་ཁཾ། མཐོར་མཐུང་དང༌། ཨོཾ་ཨརྒྷཾ་པྲ་ཏཱིཙྪ་སྭཱཧཱ། མཆོད་ཡོན་དང༌། ཨོཾ་པདྨ་ཀ་མ་ལ་སྟྭཾ། གདན་ཕུལ། ཨོཾ་བཛྲ་པུཥྤེ་ཧཱུཾ། དྷཱུ་པེ། ཨཱ་ལོ་ཀེ

― TNT06_Page_0831 ―

^{[མ་དཔེ་གཟིགས་ན་འདིར་གནོན།]}

[Full Size]

གནྡྷེ། ནཻ་ཝི་ཏི། ཤཔྟ། ཕྱིའི་མཆོད་པའི། ཨོཾ་རཱུ་པ་བཛྲ་པཱུ་ཛི་ཏེ་ཧཱུཾ། དེ་བཞིན་དུ། ཤཔྟ། གནྡྷེ། རཱ་ས། སྥརྴ། ནང་གི་མཆོད་པའོ། །ཨོཾ་ཨཱཿཧཱུཾ། ལན་གསུམ་གྱིས་བདུད་རྩི་དབུལ་ཏེ་བླ་ན་མེད་པའི་མཆོད་པའོ། །ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཏྨ་ཀོ྅ཧཾ། གསང་བའི་མཆོད་པའོ། །ན་མོ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་གཟུགས་བརྙན། སྐུའི་སྤྲུལ་པ། གསུང་གི་དབང་ཕྱུག །དཔལ་འཇམ་པའི་རྡོ་རྗེ་ལ་སོགས་པ་ཕྱོགས་བཅུ་ན་བཞུགས་སོ་འཚལ་ལ། བདག་ལུས་ངག་ཡིད་གསུམ་གྱི་སྒོ་ནས་ཕྱག་འཚལ་ཞིང་སྐྱབས་སུ་མཆིའོ། །གཞན་ཡང་བདག་ཅག་གི་ཐོག་མ་མེད་པའི་དུས་ནས་དུག་གསུམ་གྱི་དབང་གིས་སྡིག་པ་མི་དགེ་བ་ཅི་དང་ཅི་བགྱིས་པ་རྣམས་ནི་སོ་སོར་བཤགས་ཤིང༌། སླད་ཆད་ཀྱང་སྡོམ་པར་བགྱིའོ། །ཕྱོགས་བཅུའི་འཕགས་པ་རྣམས་དང༌། འགྲོ་བ་དག་གིས་བསོད་ནམས་སྐྱེད་དོ་འཚལ་ལ། བདག་རྗེས་སུ་ཡི་རང་བར་བགྱིད་དོ། །སྟོན་པ་འཇིག་རྟེན་གྱི་སྒྲོན་མེར་གྱུར་པ། བསྐུལ་བའི་ས་ལ་བཞུགས་སོ་འཚལ། དེ་དག་ལ་ཆོས་ཀྱི་འཁོར་ལོ་བསྐོར་བར་བསྐུལ་ལོ། །བདེ་བར་གཤེགས་པ་གང་དག་བསྐུལ་བའི་དུས་ལ་བབ་པ། ལོག་པར་ལྟ་བ་རྣམས་སུན་དབྱུང་བའི་ཕྱིར། ཐབས་ཀྱིས་མྱ་ངན་ལས་འདའ་བར་བཞེད་པ་རྣམས་ལ། འཁོར་བ་ཇི་སྲིད་པར་དོན་མཛད་པར་གསོལ་བ་འདེབས་སོ། །དགེ་བའི་རྩ་བ་དེ་དག་དང༌། གཞན་ཡང་བདག་དང་འགྲོ་བ་ཀུན་གྱིས་བགྱིས་སོ་འཚལ་གྱི་དགེ་བའི་རྩ་བ་ཐམས་ཅད་ཀྱང་བླ་ན་མེད་པའི་བྱང་ཆུབ་བསྔོ་བར་བགྱིའོ། །ཇི་ལྟར་དུས་གསུམ་གྱི་སངས་རྒྱས་རྣམས་ཀྱིས་

― TNT06_Page_0832 ―

^{[མ་དཔེ་གཟིགས་ན་འདིར་གནོན།]}

[Full Size]

བྱང་ཆུབ་མཆོག་ཏུ་སེམས་བསྐྱེད་པ། ཕུང་པོ་དང་ཁམས་དང་སྐྱེ་མཆེད་དང་བྲལ་བ། གཟུང་བ་དང་འཛིན་པའི་རྣམ་པ་སྤངས་པ། ཆོས་བདག་མེད་པ་ལ་མཉམ་པ་ཉིད་རང་གི་སེམས་གདོད་མ་ནས་མ་སྐྱེས་པ། སྟོང་པ་ཉིད་ཀྱི་རང་བཞིན་དུ་ཐུགས་བསྐྱེད་པ་དེ་ལྟར། བདག་གིས་ཀྱང་སེམས་བསྐྱེད་པར་བགྱིའོ། །བདག་གིས་འཕགས་པ་རྣམས་ལ་ལུས་ཕུལ་ཏེ། སེམས་ཅན་འཁོར་བའི་རྒྱ་མཚོ་ན་གནས་པ་རྣམས་བསྒྲལ་བའི་ཆེད་དུ་བཅོམ་ལྡན་འདས་འཇམ་པའི་རྡོ་རྗེ་བསྒྲུབས་ཏེ། སེམས་ཅན་ཐམས་ཅད་མྱ་ངན་ལས་འདའ་བར་བགྱིའོ། །ཞེས་ལན་གསུམ་རྒྱུན་བཤགས་བྱ། ཚད་མེད་བཞི་སྤྱི་དང་འདྲ། དམིགས་པ་ནི། ཐུགས་ཀ་ནས་འོད་དམར་ལྗང་དཀར་སེར་བཞི་སྤྲོ་བ་ཡིན་ཏེ། ཕཾ་ཐིང་པའི་མན་ངག་དང་ཕྱོགས་འདྲའོ། །དེ་ནས་རྗེས་གཞིག་གི་རིམ་པས། སྣོད་བཅུད་འོད་གསལ་དུ་བསྡུ་བའི་དམིགས་པ་བསྒོམ། ཨོཾ་སྭ་བྷཱ་ཝ་བི་ཤུདྡྷ་སརྦ་དྷརྨ་སྭ་བྷཱ་ཝ་བི་ཤུདྡྷོ྅ཧཾ། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་དུ་བའི་ཁ་དོག་ཅན་གྱི་སྟེང་དུ། ཧྲཱིཿལས་སྣ་ཚོགས་པདྨ་འདབ་བརྒྱད་ཀྱི་ལྟེ་བར། ཨཿལས་ཟླ་བ་ལ་དྷཱིཿལས་རལ་གྲི་དྷཱིཿས་མཚན་པ་ཡོངས་སུ་གྱུར་པ་ལས། འཇམ་དཔལ་གཞོན་ནུ་སྐུ་མདོག་གུར་གུམ་གཞོན་ནུའི་མེ་ཏོག་རྒྱས་པ་ལྟར་དམར་སེར། ཕྱག་གཡས་མཆོག་སྦྱིན་གྱི་ཕྱག་རྒྱ་དང༌། གཡོན་ཐུགས་ཀར་མེ་ཏོག་ཨུཏྤ་ལ་སྔོན་པོའི་སྡོང་བུ་བསྣམས་པ། ཞི་ཞིང་སྒེག་པ་ཞེས་པ་ནས། སྔགས་འཕྲེང་རྣམས་སྤྱན་དྲངས་ཏེ་ཐིམ་པས་ཉི་མའི་སྟེང་དུ། ཧཱུཾ་ནག་པོ་འོད་ཟེར་ལྔ་ལྡན་དུ་གྱུར་ཅེས་པ་ནས། ཕྱག་གཡོན་གྱི་ཕྱག་མཚན་སྐབས། གཡོན་ལྷག་མ་རྣམས་ཀྱིས་

― TNT06_Page_0833 ―

^{[མ་དཔེ་གཟིགས་ན་འདིར་གནོན།]}

[Full Size]

ཚངས་པའི་མགོ་བོ། ཕུབ་ཟླུམ། རྐང་པ་ཞེས་པ་དང༌། དྲག་པོ་སྟེ་བདུད་བཞི་ལ་སོགས་པ་རྣམས་ཁ་བུབ་ཏུ་བསྒྱེལ་ནས་མནན་པ། ཞེས་པ་ནས། དེའི་ཐུགས་ཀར་ཡེ་ཤེས་སེམས་དཔའ་མ་ཧེའི་ཞལ་ཅན་ཞལ་གཅིག་ཕྱག་གཉིས་པ། དེའི་ཐུགས་ཀར་རྡོ་རྗེའི་ལྟེ་བར་ཏིང་ངེ་འཛིན་སེམས་དཔའ་ཧཱུཾ་ནག་པོའོ། །ཞེས་པའི་བར་གཞན་རྣམས་སྒྲུབ་ཐབས་སྙིང་པོར་བཤད་པ་དང་འདྲ། འདིར་ཨ་མོ་གྷས་མཛད་པའི་སྒྲུབ་ཐབས་ཆུང་ངུ་ལས། འདིའི་དེ་མ་ཐག་མཆོད་བསྟོད་དང་བཟླས་པ་ལ་འཇུག་སྟེ། སྐྱོ་པ་རྣམས་ཀྱི་བཞེད་པས། བསྙེན་རྐྱང་གི་སྐབས་དེ་ཙམ་གྱིས་ཆོག་སྟེ། སྐུ་གསུང་ཐུགས་བྱིན་གྱིས་བརླབ་པ་ནི། རྒྱུའི་དུས་ན་ཉི་མ་དང༌། ས་བོན་དང༌། ཕྱག་མཚན་གསུམ་ཡོད་པས་འགྲུབ་ལ། སྐྱེ་མཆེད་དྲུག་བྱིན་གྱིས་བརླབས་པའི་དོད་ནི། གཡས་གཡོན་གྱི་ཞལ་དྲུག་གིས་ཐུབ། ཡེ་ཤེས་པ་བསྟིམ་པ་ཡང་སྔར་རྒྱུའི་དུས་ཀྱི་སྤྲོ་བསྡུ་ལན་བཞི་ལ་འདུས་ཤིང༌། རིགས་བདག་གི་རྒྱས་འདེབས་ཀྱང་འཇམ་དཔལ་གྱི་ཞལ་ལ་ཚང་བས། བསྡུས་པ་ལ་དགའ་ན་འདི་ཙམ་གྱིས་ཆོག་ཅིང༌། སྤྱིར་རྒྱས་པ་འགོག་པ་ནི་མ་ཡིན་ནོ། །དཔལ་འཛིན་གྱི་སྒྲུབ་ཐབས་ཀྱང་སྐབས་འདིའི་དོན་ལ་དེ་དང་འདྲ་ཞིང་སྒྲུབ་ཐབས་དེར། དམ་རྫས་སོགས་བྱིན་གྱིས་བརླབས་ནས་བསྟེན་པར་བཤད་པ་ཉིད་མཆོད་པ་ཡིན་པས། བཟླས་པའི་སྔོན་གྱི་མཆོད་བསྟོད་ཀྱང་མེད་མི་རུང་མ་ཡིན་པར་བཞེད་དོ། །ཡང་གཙོ་རྐྱང་ཁོ་ན་བསྒོམ་ཞིང༌། མཆོད་བསྟོད་སྐབས་འདིར་མི་བྱེད་ན། སྐྱོ་བའི་སྔགས་པ་རྙིང་པ་རྣམས་བཞེད་པ་ལྟར་ཚོགས་ཞིང་གི་སྐབས་སུ་མཆོད་བསྟོད་རྒྱས་པ་བྱེད་པ་བཟང་ངོ༌། །ཞི་བ་ཡེ་ཤེས་ཀྱི་སྒྲུབ་ཐབས་ལས་ནི། སྐབས་འདི་ན་སྐུ་གསུང་ཐུགས་བྱིན་རླབས་དང༌། དབང་བསྐུར་རྒྱས་བཏབ་ངེས་པར་བྱེད་པར་བཞེད་ཅིང༌། དམ་ཡེ་བསྲེ་བའི་གསལ་ཁ་མེད།

― TNT06_Page_0834 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིག་རྙིང་ལས་ནི་སྐྱེད་མཆེད་བྱིན་རླབས་ཀྱང་བྱེད་ལ། ཡེ་ཤེས་སྤྱན་འདྲེན་ནི་འོག་ཏུ་དཀྱིལ་འཁོར་བསྒོམ་པའི་སྐབས་ཀྱི་དེ་དང་ལྷན་ཅིག་ཏུ་བྱེད་པས་སྐབས་འདིར་མི་མཛད། འཛིམས་པས་དབང་གི་ལྷ་ཉིད་ཡེ་ཤེས་པ་བསྟིམ་པར་མཛད་དེ་གཅིག་ཏུ་མི་ལེགས་པའང་མིན་ནོ། ཁོ་བོ་ནི་འདི་ལྟར་སེམས་ཏེ། ཞི་བ་ཡེ་ཤེས་ཀྱི་སྒྲུབ་ཐབས་ཀྱི་དངོས་བསྟན་ལྟར། དཀྱིལ་འཁོར་བསྒོམ་པའི་སྐབས། སྐུ་གསུང་ཐུགས་དང་སྐྱེ་མཆེད་བྱིན་རླབས་དང༌། དབང་བསྐུར་རྣམས་མི་བྱེད་ན་སྐབས་འདིར་དེ་དག་བྱེད་དགོས་ལ། འོག་དཀྱིལ་འཁོར་གྱི་སྐབས་སུ་དེ་དག་བྱེད་པ། སྐྱོ་པ་སྔ་མ་འགའ་རེ་དང༌། འཛིམས་པ་སོགས་བཞེད་པ་ལྟར་ན། སྤྱིར་མི་ལེགས་པ་མ་ཡིན་མོད། དེ་ལྟར་ན་སྐབས་དེར་བདག་དང་མདུན་བསྐྱེད་ཀྱི་ལྷ་ཚོགས་ལྷན་ཅིག་ཏུ་དེ་དག་བྱས་པས་ཆོག་པའི་ཕྱིར། སྐབས་འདིར་དེ་རྣམས་མི་དགོས་སོ་སྙམ་མོ། །ཞི་བ་ཡེ་ཤེས་ཀྱིས་ཀྱང༌། སྐབས་འདིར་གནས་གསུམ་བྱིན་རླབས་དང་དབང་བསྐུར་མཛད། ཡེ་ཤེས་སྤྱན་འདྲེན་པ་མེད་པ་དང༌། འོག་དཀྱིལ་འཁོར་གྱི་སྐབས་དེ་གཉིས་མེད་ཡེ་ཤེས་སྤྱན་འདྲེན་ཡོད་པ་ཡང་དེ་དག་ལན་གཉིས་མི་དགོས་པ་ལ་དགོངས་སོ། །དེ་ལྟ་ན་ཡང༌། འཛིམས་པ་རིན་ཤེ་ཡོ་ག་ལ་བག་ཆགས་བརྟས་པས། བདག་བསྐྱེད་ཀྱི་སྐབས་འདི་རྣལ་འབྱོར་རྒྱུད་ཀྱི་བདག་རྫོགས་ཀྱི་དོད་ཐུབ་པར་བསམས་ནས། དེའི་ཡན་ལག་ཏུ་ཡེ་ཤེས་སྤྱན་འདྲེན་དབང་བསྐུར་རྒྱས་བཏབ་དགོས་པར་བསམས་པ་དང༌། མདུན་བསྐྱེད་ཀྱི་སྐབས། རང་འོག་མིན་དུ་ཕྱིར་པས་མོས་ཞེས་དང༌། རྗེས་སུ་འོག་མིན་ནས་བབས་ཞེས་ཟེར་བ་ནི་དགོས་ནུས་མེད་ཅིང་བསྲེ་བསླད་ཁོ་ན་ཡིན་པས་མི་ལེགས་སོ། །སྐབས་འདིར་སྐུའི་རྣམ་འགྱུར་ལ། སྒྲུབ་ཐབས་སེམས་དཔའ་བསྡུས་པ་ལས། རྭ་གཡས་པ་ལ་གནས་པའི་ཞལ་དང་

― TNT06_Page_0835 ―

^{[མ་དཔེ་གཟིགས་ན་འདིར་གནོན།]}

[Full Size]

པོ་མཐིང་ག་ཞེས་དང༌། གཡོན་ལའང་དེ་བཞིན་དུ་གསུངས་པས། གཞུང་དེར་རྭ་ཞལ་དུ་བཞེད་པ་ཡིན་ལ། ཞི་བ་ཡེ་ཤེས་ཀྱང་རྭ་ཞལ་དུ་བཞེད་དེ། ཇི་སྐད་དུ། ཞལ་གཡས་ཀྱི་དང་པོ་སྔོན་པོ། གཉིས་པ་དམར་པོ་གསུམ་པ་སེར་པོ་སྟེ། རྭ་མཆན་ན་གནས་པའོ། །ཞེས་གསུངས་ཏེ། རྭ་མཆན་ནི་རྭའི་ངོས་ལ་གནས་པའི་དོན་ནོ། །སྐྱོ་པ་རྣམས་བརྟེན་སོ་མཛད་པའི་གཞུང་གི་དབང་དུ་བྱས་ན་རྭ་ཞལ་བཤད་པ་དེ་གཉིས་ཡིན་ལ། གཞན་ཛྙཱ་ན་ཀ་རས་མཛད་པ་ལས་ཀྱང༌། གཡས་པས་རྭ་ལ་བརྟེན་པའི་ཞལ། །དང་པོ་མཐིང་ག་འཇིག་པར་བྱེད། །ཅེས་དང༌། གཡོན་པའི་རྭ་ལ་བརྟེན་པའི་ཞལ། །དང་པོ་དཀར་པོ་རྨོངས་པར་བྱེད། །ཅེས་སོགས་བཤད་པས་བོད་ཕལ་ཆེར་རྭ་ཞལ་ལ་ཁུངས་མེད་པར་འདོད་པ་ནི་ཧལ་ལེ་ཧོ་ལེར་སྤྱོད་པ་ཁོ་ན་ཡིན་ལ། དེ་ལྟ་ན་ཡང་སྐྱོ་པ་རྣམས་ཉིད་ཀྱི་ལག་ལེན་ལ། ཨ་མོ་གྷ་ཆུང་བའི་གཞུང་ཆུང་དང༌། ཞེ་དགུ་མའི་གཞུང་གི་རྗེས་སུ་འབྲངས་ནས། མན་ངག་གི་སྐབས་འཁོར་ཞལ་ཁོ་ན་མཛད་ཅིང༌། དེའི་ཡང་ནང་ཚན་རྩ་ཞལ་གྱི་གཡས་དང་གཡོན་དུ་རིམ་འདེད་ཁོ་ན་མཛད་དོ། །ད་ནི་དཀྱུས་ལ་འཇུག་སྟེ། རང་གི་སྤྱི་བོར་ཨོཾ་ལས་འཁོར་ལོ་དཀར་པོ་ཨོཾ་གྱིས་མཚན་པ་ལས་སྐུ་རྡོ་རྗེ་སྐུ་མདོག་དཀར་པོ། གཡས་འཁོར་ལོ་འཛིན་པའི་ཐུགས་ཀར་ཡང༌། འཁོར་ལོའི་ལྟེ་བར་ཨོཾ། མགྲིན་པར་ཨཱཿལས་པདྨ་དམར་པོ་ཨཱཿས་མཚན་པ་ལས། གསུང་རྡོ་རྗེ་སྐུ་མདོག་དམར་པོ། གཡས་པདྨ་འཛིན་པའི་ཐུགས་ཀར་ཡང་པདྨ་ལ་ཨཱཿ ཐུགས་ཀར་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས། ཐུགས་རྡོ་རྗེ་སྐུ་མདོག་སྔོན་པོ། གཡས་རྡོ་རྗེ་འཛིན་པའི་ཐུགས་ཀར་ཡང༌། རྡོ་རྗེའི་ལྟེ་བར་ཧཱུཾ་ངོ༌། །ཐམས་ཅད་ཀྱང་

― TNT06_Page_0836 ―

^{[མ་དཔེ་གཟིགས་ན་འདིར་གནོན།]}

[Full Size]

གཡོན་དྲིལ་བུ་འཛིན་པ། རོལ་པའི་ཁྲོ་བོ་ཆེན་པོའོ། །སྤྲོས་པ་ལ་མོས་པས་སྐྱེ་མཆེད་བྱིན་རླབས་བྱེད་ན། མིག་ཏུ་ཀྵིཾ་སོགས་སྒྲུབ་ཐབས་སྙིང་པོར་བཤད་པ་ལྟར་བྱ། དབང་བསྐུར་བ་ནི། གཙོ་བོའི་ཐུགས་ཀའི་ཧཱུཾ་ལས་འོད་ཟེར་འཕྲོས། ཞེས་པ་ནས། སྤྱི་བོར་འཁྱིལ་བ་ལས་མི་བསྐྱོད་པས་དབུ་བརྒྱན། ཞེས་པའི་བར་ཞེ་དགུ་མའི་སྐབས་དང་འདྲ། དབང་བསྐུར་བྱེད་པ་པོའི་དཀྱིལ་འཁོར་གྱི་ལྷ་ཚོགས་ཀྱང་རང་ལ་ཐིམ། ཛཿཧཱུཾ་བཾ་ཧོཿ ཞེས་བྱའོ། །འདི་ཡེ་ཤེས་བསྲེ་བ་ཞོར་ཐབས་ཙམ་ཡིན་གྱི། རྐང་ཚུགས་མིན་ལ་རང་ལ་མི་སྟིམ་པར་དབྱིངས་སུ་གཤེགས་ཀྱང་ཆོག་གོ །དེའི་རྗེས་སུ་དཀྱིལ་འཁོར་བསྒོམ་པར་བྱ་སྟེ། འདི་བདག་ཉེར་སྒྲུབ་བམ། བསྙེན་སྒྲུབ་སྦྲགས་པའི་ལུགས་སུ་བྱུང་ཡང༌། སྐྱོ་པ་རྣམས་ཀྱི་བཞེད་པས། གཟུགས་བརྙན་གྱི་དཀྱིལ་འཁོར་ལ་མ་བརྟེན་པར། བྲིས་སྐུ་ཙམ་ལ་དམིགས་པའམ། ཏིང་ངེ་འཛིན་འབའ་ཞིག་གིས་ཀྱང་རུང་སྟེ། བདག་བསྐྱེད་ཀྱི་ཡན་ལག་ཏུ་དཀྱིལ་འཁོར་བསྒོམ་སྟེ། བསྙེན་སྒྲུབ་སྦྲགས་མ་དང༌། དམིགས་པ་བསྒོམ་ཚུལ་ཕྱོགས་འདྲ་མོད་ཀྱི། འདི་ནི་བསྙེན་སྒྲུབ་སྦྲགས་མ་མ་ཡིན། དཀྱིལ་འཁོར་ཆེན་པོའི་བསྙེན་པ་ཡིན་ཞིང༌། བདག་མདུན་གཉིས་ཡོད་པ་ནི། གྲོགས་པོ་ལྟ་བུར་བསྙེན་པ་ཡིན་གྱི་སྒྲུབ་པའི་དོན་མིན་ལ། འདི་ལ་གོམས་ན་བསྙེན་སྒྲུབ་སྦྲགས་མ་མི་དགོས་པར་སྒྲུབ་པ་ལ་ཞུགས་ཆོག་པས་འཇུག་པ་བདེ་བ་ལ་ཡང་དགོངས་སོ། །ཞི་བ་ཡེ་ཤེས་ཀྱིས་ཀྱང་འདི་བསྙེན་པར་བཤད་པ་ཡིན་གྱི་སྒྲུབ་པ་ཡིན་པར་མ་བཤད་ལ། སྒྲུབ་པ་ལས་སྦྱོར་ལོགས་སུ་ཡོད་པ་ལྟར་ཡིན་པས། རྒྱ་མཁར་བཀའ་བཅུ་པ་སོགས་འདི་སྒྲུབ་པའི་དབང་དུ་བྱས་ཟེར་བ་ནི། འོལ་ཚོད་ཙམ་སྟེ། གཞུང་འདི་ཉིད་རྫོགས་པར་མ་བཀླགས་པའི་སྐྱོན་ནོ། །ཞི་བ་ཡེ་ཤེས་ཀྱི་སྒྲུབ་ཐབས་འདི་ནི། བསྙེན་སྒྲུབ་ལས་སྦྱོར་གསུམ་ལ་ལེའུ་རེ་རེ་

― TNT06_Page_0837 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོད་ཅིང༌། རྟོག་བདུན་གྱི་བརྗོད་བྱའི་གཙོ་བོ་མཐའ་དག་འཆུན་ནུས་པས། རྒྱུད་ཀྱི་དོན་འགྲེལ་དུ་གྱུར་པ་ཞིག་སྟེ། རྡོ་རྗེ་འཇིགས་བྱེད་ཀྱི་སྒྲུབ་ཐབས་བོད་དུ་འགྱུར་བ་ལ་དོན་བཟང་བ་ཞིག་ཡིན་པར་སྣང་ཡང༌། ཕལ་ཆེར་གྱིས་མ་ཤེས་པར་མཚན་མིང་བཟང་པོ་ལ་ཁ་གཡར་བའི་རྗེས་སུ་རྒྱུག་ཀྱིན། གྲུབ་ཆེན་ལ་ལི་ཏ། གྲུབ་ཆེན་ཨ་མོ་གྷ་ཞེས་བཟླས་བརྗོད་བྱེད་ཀྱིས། ས་སྐྱ་པ་ཕྱི་མ་དང་དགེ་ལྡན་པ་མང་པོ་ཞིག་ཤ་ཐང་ཆད་པར་གྱུར་ཏོ། །སྤྲོས་པས་ཆོག་གོ །དེ་རྗེས་འདི་སྐད་ཅེས་བྱ་སྟེ། སྭ་བྷཱ་ཝ་སྟོང་པར་སྦྱངས། སྟོང་པའི་ངང་ལས། ཨེ་ལས་བྱུང་བའི་ཆོས་འབྱུང་གྲུ་གསུམ་ཕྱི་དཀར་ལ་ནང་དམར་བ། གདེངས་ཀ་གྱེན་དུ་ཕྱོགས་པའི་ནང་དུ། ཡཾ་ལས་རླུང་གི་དཀྱིལ་འཁོར་ནག་པོ་ཟླ་གམ་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་འབར་བས་མཚན་པ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞི་རྡོ་རྗེས་མཚན་པ། དེའི་སྟེང་དུ་སུཾ་ལས་རིའི་རྒྱལ་པོ་རི་རབ་རིན་པོ་ཆེ་སྣ་བཞི་ལས་གྲུབ་པ་བང་རིམ་བཞི་དང་ལྡན་པ། དེའི་སྟེང་དུ་ཧཱུཾ་ལས་སྣ་ཚོགས་རྡོ་རྗེ། ཤར་དཀར། ལྷོ་སེར། ནུབ་དམར། བྱང་ལྗང༌། ལྟེ་བ་མཐིང་ནག་ལ་ཧཱུཾ་གིས་མཚན་པ། དེ་ལས་འོད་འཕྲོས། རྡོ་རྗེའི་ས་གཞིར་རྭ་གུར་བླ་རེ་དང་བཅས་པ། ཕྱི་རོལ་རྡོ་རྗེའི་མེས་གཏམས་པར་གྱུར། ཨོཾ་བཛྲ་རཀྵ་རཀྵ་ཧཱུཾ་ཧཱུཾ་ཧཱུཾ་ཕཊ་སྭཱཧཱ། སྲུང་བའི་འཁོར་ལོའི་དབུས་སུ་བྷྲཱུཾ་ལས་རྣམ་པར་སྣང་མཛད་ཀྱི་རང་བཞིན་གཞལ་མེད་ཁང༌། ཞེས་པ་ནས། སྣ་ཚོགས་པས་གང་བའོ། །ཞཻས་པའི་བར་གོང་ཞེ་དགུ་

― TNT06_Page_0838 ―

^{[མ་དཔེ་གཟིགས་ན་འདིར་གནོན།]}

[Full Size]

མའི་སྐབས་བཞིན་ནོ། །འདིར་ཞི་བ་ཡེ་ཤེས་ཀྱི་སྒྲུབ་ཐབས་དངོས་བསྟན་ལས། སྒྲུབ་བའི་སྐབས་བྲིས་པའི་དཀྱིལ་འཁོར་ཡང་ཞོར་ལ་རྟོགས་པའི་དབང་དུ་མཛད་ནས། གཙོ་བོའི་གནས་སུ་མི་རོའི་གདན་ལ། སྲོག་ཆགས་གནས་པ་སོགས་བཤད་ཀྱང༌། བསྙེན་པའི་སྐབས་སུ་དེ་མི་དགོས་ཤིང༌། སྒོ་བ་བཞི་ཁྲོ་བོ་དང༌། མཚམས་མ་བཞི་མཆོད་ལྷར་མཛད་ཀྱང༌། སྐྱོ་པ་རྣམས་གཞུང་དེའི་བརྡར་དེར་མི་མཛད་ཅིང༌། དེ་ཇི་མ་ཇི་བཞིན་དུ་མི་སྤྱོད་དེ། ཨ་མོ་གྷ་ཆུང་བའི་མན་ངག་གི་དབང་དུ་མཛད་ནས། འཁོར་གཤིན་རྗེ་མོ་བརྒྱད་དུ་མཛད་ལ། དེ་ཉིད་རྒྱུད་ལས་ཀྱང༌། རོ་ལངས་བརྒྱད་དུ་གསུངས་པས་ཀྱང་སྟོན་ཅིང༌། རྒྱུད་ཀྱི་འཇུག་ཏུ་གལ་ཏེ་སྨྲས་ན་དཔལ་རྡོ་རྗེ་འཇིགས་བྱེད་ཀྱིས་དང༌། གཞན་ཡང་རྣལ་འབྱོར་མ་དང་མཁའ་འགྲོ་མ་རྣམས་ཀྱིས་ཟའོ། །ཞེས་འཁོར་གྱི་གཙོ་བོ་སྨོས་པ་དེ་མཁའ་འགྲོ་མ་འབྱུང་བས་གཉིས་པོ་སྡེབས་པས་ཁྲོ་མོ་བརྒྱད་སྐོར་གསལ་བར་བསྟན་པར་བཞེད་དོ། །དེས་ན་འདི་ལྟར་བྱ་སྟེ། དབུས་ཀྱི་གཙོ་བོའི་གནས་སུ་པདྨ་དང༌། ཉི་མའི་དཀྱིལ་འཁོར་གྱི་གདན། སྒོ་མཚམས་བརྒྱད་དུ་ཡང་མི་རོའི་གདན་རྣམས་སོ། །ནང་གི་རེ་མིག་བརྒྱད་ལ། ཤར་དུ་ཚངས་པའི་མགོ་བོ། ལྷོར་ལག་པ། ནུབ་ཏུ་རྒྱུ་མ། བྱང་དུ་རྐང་པ། ཤར་ལྷོར་ཐོད་པ། ལྷོ་ནུབ་ཏུ་ཐོད་ཚལ། ནུབ་བྱང་དུ་རོ་རས། བྱང་ཤར་དུ་སྐྱེས་བུ་གསལ་ཤིང་གིས་ཕུག་པའོ། །སྐྱོ་པ་དང༌། ཞང་པ་རྣམས་ནག་འཇིགས་གཉིས་ལ་རེ་མིག་དགུ་བཞེད་ཚུལ་ནི། ཐིག་བཞི་བཏབ་པའི་མིག་མང་རིས་མ་ཡིན་གྱི། པདྨའི་ཐིག་འདྲ་བ་ལྟ་བ་ཟླུམ་པོ་ཞིག་མཛད་དོ། །ཤར་གྱི་ལྷ་སྣམ་ལ། གྲི་གུག་དང༌། འཕང་མདུང་དང༌། གཏུན་ཤིང་དང༌། ཆུ་གྲི་དང༌། རྡོ་རྗེ་རྩེ་གཅིག་པ་དང༌། ལྕགས་ཀྱུ་

― TNT06_Page_0839 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམས་སོ། །ལྷོའི་ལྷ་སྣམ་ལ། སྟ་རེ་དང༌། མདའ་དང༌། དབྱུག་པ་དང༌། ཁ་ཊྭཱཾ་ག་དང༌། འཁོར་ལོ་དང༌། ཞགས་པ་རྣམས་སོ། །ནུབ་ཀྱི་ལྷ་སྣམ་ལ། རྡོ་རྗེ་དང༌། ཅང་ཏེའུ་དང༌། ཕུབ་དང༌། གཞུ་དང༌། དྲིལ་བུ་དང༌། རླུང་རས་རྣམས་སོ། །བྱང་གི་ལྷ་སྣམ་ལ། སྡིགས་འཛུབ་དང༌། འཕན་རྩེ་གསུམ་པ་དང༌། གླང་ལྤགས་དང༌། ཐོ་བ་དང༌། མདུང་དང༌། མེ་ཐབ་རྣམས་གནས་པར་གྱུར། སྐྱོ་པ་རྣམས་དབང་བསྐུར་དང༌། སྒྲུབ་ཐབས་ཀྱི་དཀྱིལ་འཁོར་ལ་མི་འདྲ་བའི་ཁྱད་མི་བཞེད་པས། སྒྲུབ་ཐབས་ལའང་ཕྱག་མཚན་ངེས་པར་བཞེད་ལ། ལུགས་འདིའི་བྲིས་ཐང་རྙིང་པ་ཀུན་ལའང་ཕྱག་མཚན་བཀོད་པ་ཁོ་ན་ཡོད་ཅིང༌། འཇིགས་མཛད་གཙོ་རྐྱང་ངམ་ལྷ་དགུའི་དཀྱིལ་འཁོར་ལ་བོད་རྗེས་མ་ཕལ་ཆེར་ཕྱག་མཚན་མི་འདོད་པ་ནི། རི་བོང་གི་ཅལ་བཞིན་དུ་སོང་བ་ཡིན་ཞིང༌། ཕྱག་མཚན་མི་འགོད་ན། གཞལ་ཡས་ཁང་ཡེ་མེད་པའམ། ཐོད་མཁར་ཙམ་བྱེད་པ་ཡིན་ནོ། །ལུགས་འདིར་ཡང་སྐབས་འདིར་ཕྱག་མཚན་སྐད་ཅིག་གིས་བསྐྱེད་པའམ་ཕྱིས་གཙོ་བོའི་སྐུ་ལས་སྤྲོ་བ་གང་བྱས་ཀྱང་འདྲའོ། །དབུས་ཀྱི་གདན་གྱི་སྟེང་དུ། ཧཱུཾ་ལས་ཁྲོ་བོའི་རྡོ་རྗེ་རྩེ་ལྔ་པ་ནག་པོ་ཧཱུཾ་གིས་མཚན་པ། འཇིག་དུས་ཀྱི་མེ་ལྟར་འབར་བའི་འཕྲེང་བ་འཁྲུགས་པ། དེ་ལས་འོད་ཟེར་གྱི་ཚོགས་དཔག་ཏུ་མེད་པ་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཆོད་པས་མཉེས་པར་བྱས། སེམས་ཅན་ཐམས་ཅད་ཀྱི་སྡུག་བསྔལ་དང་སྡིག་སྒྲིབ་མ་ལུས་པ་སྦྱངས། སྡང་བ་དང་གདུག་པའི་སེམས་ཅན་མ་ལུས་པ་ཐམས་ཅད་ཚར་བཅད། ནམ་མཁའ་གང་བའི་སངས་རྒྱས་ཐམས་ཅད་རྡོ་རྗེ་འཇིགས་མཛད་ཀྱི་རྣམ་པར་སྤྱན་དྲངས། རྡོ་རྗེ་ཧཱུཾ་ཡིག་

― TNT06_Page_0840 ―

^{[མ་དཔེ་གཟིགས་ན་འདིར་གནོན།]}

[Full Size]

དང་བཅས་པ་ལ་གཅིག་ཏུ་འདྲེས་པ་ཡོངས་སུ་གྱུར་པ་ལས། བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཅེས་པ་ནས། ཧཱུཾ་ནག་པོའི་བར་སེམས་དཔའ་གསུམ་བརྩེགས་བདག་བསྐྱེད་དང་འདྲའོ། །གཙོ་བོའི་ཐུགས་ཀ་ན་ཡ་བརྒྱད་སྤྲོས་ཏེ། སྒོ་མཚམས་བརྒྱད་ན་གནས་པའི་བཾ་ཆེན་གྱི་གདན་རྣམས་ཀྱི་སྟེང་དུ་འཁོད་པ་དེ་རྣམས་ལས་འོད་ཟེར་འཕྲོས། དགྲ་བགེགས་གདུག་པ་ཅན་ཐམས་ཅད་ཚར་བཅད་པ་སྔོན་དུ་འགྲོ་བའི་འཕྲིན་ལས་རྣམ་པར་བཞིས་སེམས་ཅན་གྱི་དོན་བྱས། སླར་འདུས་ཏེ་ཐིམ་པ་ཡོངས་སུ་གྱུར་པ་ལས། ཤར་སྒོར་གཤིན་རྗེ་ལྕགས་ཀྱུ་མ་བྱ་རྒོད་ལ་གནས་པ། ལྷོ་སྒོར་གཤིན་རྗེ་ཞགས་པ་མ་འུག་པ་ལ་གནས་པ། ནུབ་སྒོར་གཤིན་རྗེ་ལྕགས་སྒྲོག་མ་བོང་ཁྲ་ལ་གནས་པ། བྱང་སྒོར་གཤིན་རྗེ་འབེབས་པ་མ་བྱ་རོག་ལ་གནས་པ། ཤར་ལྷོར་གཤིན་རྗེ་ཕོ་ཉ་མོ་ཆུ་སྐྱར་ལ་གནས་པ། ལྷོ་ནུབ་ཏུ་གཤིན་རྗེ་མཆེ་བ་མ་མཐིང་རིལ་ལ་གནས་པ། ནུབ་བྱང་དུ་གཤིན་རྗེ་བེ་ཆོན་མ་ཀང་ཀ་ལ་གནས་པ། བྱང་ཤར་དུ་དུས་ཀྱི་མཚན་མོ་རྨ་བྱ་ལ་གནས་པ། ཞེས་པ་འདི་ནི་སྐྱོ་པའི་མན་ངག་ཡིན་ལ། སེམས་དཔའ་བསྡུས་པའི་དངོས་བསྟན་ལ། མཚམས་ལ་བྱ་རྒོད་སོགས་དང༌། ཕྱོགས་ལ་ཆུ་སྐྱར་སོགས་གསུངས་པས་གང་མོས་བྱའོ། །ཐམས་ཅད་ཀྱང་རྔམ་ཞིང་ཁྲོས་ལ་མི་གདུག་པ་ཆེར་ཁྲོས་པའི་ཆ་བྱད་ཅན། ལང་ཚོ་གསར་དུ་བདོ་ཞིང་གཅེར་བུ་ནུ་འབུར་རྒྱས་པ། མཆེ་བ་ཟངས་ཡག་ཏུ་གཙིགས་ཤིང༌། དྲག་ཏུ་བཞད་པ། དམར་ལ་ཟླུམ་པའི་སྤྱན་གསུམ། དབུ་སྐྲ་དམར་སེར་ལྷུག་པར་གྲོལ་བ། ཕྱག་གཡས་གྲི་གུག་དང༌། གཡོན་པས་མགོ་ཐོད་དམར་ཆེན་གྱིས་གང་བ་འཛིན་

― TNT06_Page_0841 ―

^{[མ་དཔེ་གཟིགས་ན་འདིར་གནོན།]}

[Full Size]

ཅིང་ཞལ་དུ་གསོལ་བ། མེ་དཔུང་འབར་བའི་དབུས་ན་བཞུགས་ཤིང༌། ཕྱོགས་བཅུའི་གདུག་པ་ཅན་ཐམས་ཅད་འཇོམས་པར་མཛད་པ། འཇམ་དཔལ་རྡོ་རྗེ་འཇིགས་མཛད་ཆེན་པོ་ཕྱག་གཉིས་པ་རེ་རེས་དབུ་ལ་བརྒྱན་པའོ། །འདི་རྣམས་ལ་ཞབས་ཀྱི་བཞུགས་ཚུལ་ཐམས་ཅད་མཚུངས་པར་རོལ་སྟབས་སམ། མཚུངས་པར་གཡས་བསྐུམ་གཡོན་བརྐྱང་ངམ། མཚུངས་པར་གཡས་བརྐྱང་ངམ། ཡང་ན་མཚུངས་པར་བཞོན་པ་སོ་སོ་ལ་ཆིབས་པ་སོགས་གང་ལ་མོས་པ་དེ་ལྟར་བསྒོམ་ལ། ཆོལ་བར་བསྒོམ་དུ་ནི་མི་རུང་ངོ༌། ཁ་ཅིག་དབུ་རྒྱན་རིགས་བདག་མི་བསྐྱོད་པར་འདོད་པའང་རུང་ཙམ་ཡིན་ལ། འཛིམས་པ་སོགས་འཇམ་དབྱངས་ཞི་བས་མཛད་པའང་སྤྱིར་ལེགས་མོད་ཀྱི་དཀྱུས་སུ་བཤད་པ་ཉིད་ཆེས་མཆོག་གོ །དེ་བཞིན་དུ་མཁའ་འགྲོ་མ་ལྟར་སྒྲུབ་ན། ཐོད་སྐམ་ཐོད་རློན་རུས་རྒྱན་སོགས་རྒྱན་གྱིས་བརྒྱན་པ་དང༌། གཤིན་རྗེ་མོར་བྱེད་ན་རྒྱན་སྤངས་པའོ། །ཕྱི་རོལ་དུར་ཁྲོད་ཆེན་པོ་བརྒྱད་ལ་གཤིན་རྗེ་ཆེན་པོ་བརྒྱད་གནས་པ་ནི། ཤར་དུ་ཡ་བ་ཏི། ལྷོར་ཆོས་ཀྱི་རྒྱལ་པོ། ནུབ་ཏུ་ཏེལ་པ་ནག་པོ། བྱང་དུ་གླང་མགོ་ཅན། མེ་མཚམས་སུ་མིག་དམར། ལྷོ་ནུབ་ཏུ་ཕྱ་སངས། ནུབ་བྱང་དུ་སྨིགས་པ། བྱང་ཤར་དུ་རལ་པ་ཚར་དགུ་རྣམས་རང་རང་གི་ཆུང་མ་དང་བཅས་པའོ། །གཞན་ཡང་གཤིན་རྗེ་དང༌། མ་མོ་དང༌། མཁའ་འགྲོ་མ་དང༌། སྲིན་པོ་དང༌། འབྱུང་པོ་དང༌། རོ་ལངས་དང༌། ཕྱག་བརྙན་གྱི་ཚོགས་ཐམས་ཅད་ཀྱིས་ཡོངས་སུ་གང་བའོ། །ཞེས་བརྗོད་དོ། །ཞི་བ་ཡེ་ཤེས་ཀྱི་སྒྲུབ་ཐབས་དངོས་བསྟན་ལ། ཕྱག་མཚན་སོ་གཉིས་འགོད་པའི་གསལ་ཁ་མེད་ཀྱང༌། དཀྱིལ་འཁོར་ནང་མ་ལ་རེ་མིག་དགུ་བཤད་པས། དགོངས་དོན་ལ་ཡོད་

― TNT06_Page_0842 ―

^{[མ་དཔེ་གཟིགས་ན་འདིར་གནོན།]}

[Full Size]

པས་འགོད་དགོས་ཤིང༌། རྡོ་རྗེ་འཇིགས་མཛད་ཀྱི་སྒྲུབ་ཐབས་ལ། གཞལ་ཡས་ཁང་གྲུ་བཞི་སྒོ་བཞི་བཤད་པའི་རྒྱ་གཞུང་འགའ་ཞིག་ཏུའང་ཚིག་ཟིན་ལ་ཕྱག་མཚན་མི་འབྱུང་མོད། དོན་དུ་རྡོ་རྗེ་འཇིགས་བྱེད་ལ་གཞལ་ཡས་ཁང་རྒྱས་པ་བསྒོམ་ལ་རྟོག་བདུན་ལུགས་སུ་རློམ་ཕྱིན་དེ་དག་བསྒོམ་དགོས་ཏེ། གཞན་དུ་ན་རྒྱུད་ལས་འགོངས་པར་འགྱུར་བའི་ཕྱིར་རོ། །དེས་ན་རྭ་ལུགས་སུ་རློམ་པ་དང༌། མལ་ལུགས་སུ་རློམ་པའི་རོ་ལངས་བརྒྱད་བསྐོར་བྱེད་པ་ཁ་ཅིག་དང༌། སྐྱོ་ལུགས་གཤིན་མོ་བརྒྱད་སྐོར་བ་སྔ་ཕྱི་ཁ་ཅིག་དེ་དག་མི་ཕྱེད་པ་ཟབ་ཁྱད་དུ་འདོད་པ་ནི། དགོས་ངེས་ཤེས་པ་ཆད་པའི་འཁྲུལ་པ་ལ། ཐུན་མོང་མ་ཡིན་པའི་ཁྱད་ཆོས་སུ་རློམ་པ་སྟེ། ཐོག་མར་བྱུང་བའི་ཉེས་བཤད་ཀྱི་དུག་ཆུ་གཅིག་གིས་མང་པོ་ཞིག་བསླད་པའོ། །དེ་ཡང་གང་སྙམ་ན། རྟོག་བདུན་གྱི་འགྲེལ་པ་སློབ་དཔོན་མི་བསྐྱོད་པས་བྱས་པ་ནི་རྒྱ་འགྲེལ་མ་ཡིན་པར་ངེས་ཤིང༌། མ་ནང་ལོ་ཙཱ་བ་གོ་རུ་བ་ཆོས་ཤེས་བྱས་པ་ཡིན་ཡང༌། བོད་ཀྱི་མཁས་པར་འདོད་པ་རྣམས་སངས་རྒྱས་ཀྱི་བཀའ་ཡིན་པ་ཙམ་དུ་རྩི་བར་སྣང་སྟེ་དེ་ལས་བྱུང་བའོ། །རྒྱས་པ་ལ་མོས་ན་སྐབས་འདིར་གཙོ་འཁོར་ཐམས་ཅད་ལ་སེམས་དཔའ་གསུམ་བརྩེག་དང༌། སྐུ་གསུང་ཐུགས་བྱིན་རླབས། དབང་བསྐུར་རྒྱས་བཏབ། དབང་བསྐུར་མཁན་རྣམས་རང་ལ་ཡེ་ཤེས་པའི་ཚུལ་གྱིས་གཞུག་པ་རྣམས་བྱེད་ཅེས་ཞི་བ་ཡེ་ཤེས་ཀྱི་གཞུང་གི་མཆན་བུ་རྙིང་པ་ལས་འབྱུང་ཞིང༌། འཛིམས་པ་ཡང་བཞེད་དོ། །ད་ནི་འདི་ལྟར་བྱ་སྟེ། རང་ཉིད་དཔལ་རྡོ་རྗེ་འཇིགས་བྱེད་ཆེན་པོ། དྲག་ཅིང་བཟོད་པར་དཀའ་བའི་གཟི་བརྗིད་ཅན། དཀྱིལ་འཁོར་ཆེན་པོ་དེའི་ལྷོ་སྒོ་ནས་ཞུགས་ཏེ། དེའི་ཐད་ཀའི་ལྷ་སྣམ་ལ་འཁོད་པར་གྱུར། རང་གི་ཐུགས་ཀའི་ཏིང་ངེ་འཛིན་

― TNT06_Page_0843 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས་དཔའི་ཧཱུཾ་ཡིག་ལས། འོད་ཟེར་དཔག་ཏུ་མེད་པ་འཕྲོས། རང་བཞིན་གྱི་གནས་ནས་བཅོམ་ལྡན་འདས་རིགས་ཐམས་ཅད་ཀྱི་བདག་པོ་འཇམ་དཔལ་ཁྲོ་བོ་གཤིན་རྗེ་གཤེད་པོ་དཔལ་རྡོ་རྗེ་འཇིགས་བྱེད་ཆེན་པོའི་དཀྱིལ་འཁོར་ལ། སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་དམ་ཅན་བསྲུང་མའི་ཚོགས་ཐམས་ཅད་ཀྱིས་བསྐོར་བ་བཛྲ་ས་མཱ་ཛཿཧཱུཾ། འཇམ་དཔལ་རང་བཞིན་ཆོས་རྣམས་ཀུན་གྱི་དངོས། །གནས་མེད་འགྲོ་འོང་བྲལ་བ་ནམ་མཁའ་བཞིན། །དུས་ཀྱི་མཁའ་བཞིན་ཐུགས་རྗེ་འགྲོ་འོང་བྲལ། །སྤྲུལ་པ་འགྲོ་འོང་བྲལ་བའི་གཟུགས་བརྙན་བཞིན། །འགྲོ་དང་འོང་བའི་མཚན་ཉིད་མི་མངའ་ཡང༌། །ཆུ་ཟླ་བཞིན་དུ་གང་དམིགས་དེར་སྣང་བའི། །དེང་འདིར་སྤྱན་འདྲེན་གཤེགས་སུ་གསོལ་བའི་ལྷ། །སངས་རྒྱས་ཀུན་གྱི་རང་བཞིན་འཇམ་པའི་དབྱངས། །གདུག་པ་འདུལ་ཕྱིར་འཇིགས་བྱེད་གཤིན་རྗེ་གཤེད། །ཡེ་ཤེས་ཐུགས་ལས་སྤྲུལ་པའི་ལྷ་མོ་བསྐོར། །ལས་བྱེད་སྤྲུལ་པ་གཤིན་རྗེའི་འཁོར་དང་བཅས། །འདིར་གཤེགས་བརྟན་པར་བདག་ལ་དགོངས་སུ་གསོལ། །ཨོཾ་ཧྲཱིཿཧ་བྷོ་མཧཱ་ཀྲོ་དྷ། ཨཱ་གཙྪ་གཙྪ། ཨསྨཏ་པཱུ་ཛ་པྲ་ཏི་གྲྀཧྞནྟུ་པྲ་སཱ་དྷ་མེ་དྷཱི་མཱ་ན་ཀུ་རུ་ཀུ་རུ་སྭཱཧཱ། ཨོཾ་བཛྲ་ཨང་ཀུ་ཤ་ཛཿ སོགས་སམ། བསྡུ་ན། ཛཿཧཱུཾ་བཾ་ཧོཿ ལན་མང་དུ་བརྗོད། བདག་དང་མདུན་གྱི་དཀྱིལ་འཁོར་གཉིས་ཀ་ལ་ཐིམ། གཉིས་མེད་ཐུན་མོང་མ་ཡིན་ཁྱབ་པའི་སྐུ། །ཀུན་ལ་སྙོམས་མཛད་རྒྱལ་བ་ཀུན་གྱི་ཡབ། །ཆོས་ཀྱི་

― TNT06_Page_0844 ―

^{[མ་དཔེ་གཟིགས་ན་འདིར་གནོན།]}

[Full Size]

དབྱིངས་གྱུར་རྒྱལ་བ་ཀུན་གྱི་ཡུམ། །ཡེ་ཤེས་སེམས་དཔའ་རྒྱལ་བ་ཀུན་གྱི་སྲས། །ཕྱག་འཚལ་འཇམ་པའི་དཔལ་གྱུར་རྫོགས་པ་ཁྱོད། །ཆོས་ཀྱི་སྐུ་ལ་བྱམས་སྡང་མི་མངའ་ཡང༌། །སྲིད་གསུམ་གདུག་པ་མ་ལུས་འདུལ་བའི་ཕྱིར། །ཐུགས་རྗེ་ཐབས་ཀྱིས་ཁྲོ་རྒྱལ་སྐུར་བསྟན་པ། །འཇིགས་བྱེད་གཤིན་རྗེ་གཤེད་ལ་ཕྱག་འཚལ་ལོ། །དུས་གསུམ་སངས་རྒྱས་ཀུན་གྱི་ཡེ་ཤེས་ནི། །ཆོས་རྣམས་ཀུན་དང་རང་བཞིན་དབྱེར་མེད་པ། །སྒྲུབ་མཆོག་བདག་གི་སེམས་ཀྱང་དེ་ལགས་ན། །དེ་དོན་མཚོན་ཕྱིར་རྟགས་ཀྱི་སྐུར་བསྟན་པ། །ཐུགས་ལ་གནས་པའི་ཡེ་ཤེས་འཕྲོས་པའི་ཕྱིར། །ཡེ་ཤེས་སེམས་དཔའི་སྐུ་ལ་ཕྱག་འཚལ་ལོ། །བདེ་གཤེགས་ཀུན་གྱི་ཡོན་ཏན་རྨད་པོ་ཆེ། །བསམ་འདས་བརྗོད་བྲལ་དཔག་གིས་མི་ལང་ཡང༌། །མི་ཕྱེད་རྡོ་རྗེ་གསུམ་དུ་འདུས་བསྟན་པ། །སྐུ་གསུང་ཐུགས་ཀྱི་ལྷ་ལ་ཕྱག་འཚལ་ལོ། །བདེ་གཤེགས་ཐམས་ཅད་མཉམ་ཉིད་ཆོས་ཀྱི་སྐུ། །རང་བཞིན་རྣམ་དག་རིགས་བརྒྱུད་མི་མངའ་ཡང༌། །རྣལ་འབྱོར་སྒྲུབ་པ་མཚོན་ཕྱིར་རྒྱས་བཏབ་པ། །དབུ་རྒྱན་རྡོ་རྗེས་མཚན་ལ་ཕྱག་འཚལ་ལོ། །ཡེ་ཤེས་སྣང་མེད་ཆགས་པའི་རྡུལ་བྲལ་ཞིང༌། །འདོད་པའི་ཁམས་ཀྱི་སེམས་ཅན་འདུལ་སླད་དུ། །ཐབས་ལ་མཁས་པས་འདོད་ཡོན་གཟུགས་སུ་སྤྲུལ། །མཆོད་པའི་ལྷ་མོའི་ཚོགས་ལ་ཕྱག་འཚལ་ལོ། །འདི་ཞི་བ་ཡེ་ཤེས་ཀྱི་ལུགས་ཉིད་ཀྱི་དབང་དུ་བྱས་པ་ཡིན། དཀྱུས་ལྟར་ན་མཆོད་པའི་སོགས་ཀྱི་དོད་ལ། མཚམས་ཀྱི་ཁྲོ་མོའི་ཚོགས་ལ་ཕྱག་འཚལ་ལོ། །ཞེས་འདོན་པ་སྤོ། ཆོས་དབྱིངས་སྤྲོས་བྲལ་དབྱིངས་ཀྱི་ཕོ་བྲང་

― TNT06_Page_0845 ―

^{[མ་དཔེ་གཟིགས་ན་འདིར་གནོན།]}

[Full Size]

དུ། །གཟུང་འཛིན་བྲལ་བའི་ཡེ་ཤེས་བློ་འཇུག་ཕྱིར། །འཁྲུལ་པའི་བགེགས་ཚོགས་འདུལ་བའི་སྐུར་སྟོན་པ། །གཞལ་ཡས་སྒོ་སྐྱོང་བཞི་ལ་ཕྱག་འཚལ་ལོ། །བཅོམ་ལྡན་ཆོས་རྗེ་འཇམ་དབྱངས་སྤྱན་ལམ་དུ། །བདུད་འདུལ་བསྟན་པ་བསྲུང་བར་ཞལ་བཞེས་པ། །ལས་ཀྱི་གཤིན་རྗེ་མ་མོ་མཁའ་འགྲོ་མ། །འབྱུང་པོ་རོ་ལངས་ཅི་བགྱི་བཀའ་མཉན་ཚོགས། །ཕྱི་ནང་སྐྱོང་བའི་དམ་ཅན་མ་ལུས་ལ། །བདག་ནི་རེ་བའི་སེམས་ཀྱིས་བདུད་ཅིང་མཆིས། །ཞེས་ཕྱག་འཚལ། རྒྱལ་བ་རྣམས་ནི་གཙང་གྱུར་ཅིང༌། །སྨེ་ཡི་རྟོག་པ་མི་མངའ་ཡང༌། །སྲིད་ཞུའི་ཚུལ་གྱི་ཡོན་ཆབ་འདི། །བདེ་གཤེགས་རྣམས་ལ་སྐུ་ཁྲུས་གསོལ། །ཨོཾ་ཧྲཱིཿཥྚཱིཿཧཱཿ མཆོད་ཡོན་ནོ། །ཚིགས་བཅད་དེ་ཉིད་དང༌། ཨོཾ་ཧཱུཾ་ཧཱུཾ་ཕཊ། བསང་གཏོར་རོ། །རྒྱལ་བ་རྣམས་ཀྱི་ཡོན་ཏན་མཆོག་གི་སྐུ། །ཚུལ་ཁྲིམས་རྣམ་པར་དག་པའི་དྲི་ངད་ལྡང༌། །ཨོཾ་བི་ཀྲི་ཏཱ་ན་ན། དུཥྟཾ་སཏྭ་ད་མ་ཀ་གཿགཿགཿ བྱང་ཆུབ་ཡན་ལག་རྒྱན་པ་མེ་ཏོག་མཛེས། །ཨོཾ་ཀུ་མ་ར་རཱུ་པི་ནི་ཛ་ཛ་ཛ། ཡེ་ཤེས་ཕོ་བྲང་མཚན་གྱི་མེ་ཏོག་སྤོས། །ཨོཾ་ཧྲཱིཿཧཿཧེ་ཕཊ། མ་རིག་མུན་པ་བྲལ་བས་ཡེ་ཤེས་གསལ། །ཨོཾ་དཱིཔྟ་ལོ་ཙ་ན་བི་ཀྲི་ཏཱ་ན་ན་མཧཱ་ཨཊྚ་ཊྚ་ན་དི་ན་དིཔྟཱ་ཡ་སྭཱཧཱ། ནོར་བདུན་ཡོན་ཏན་ཆོས་ཀྱི་བདུད་རྩིའི་ཟས། །ཨོཾ་ཀཱ་ལ་རཱུ་པ་སརྦ་དུཥྟ་སཏྭ་ད་མ་ཀ་ནཻ་ཝེ་ཏེ་པཱུ་ཛ་ཡ་སྭཱཧཱ། སྒྱུ་མའི་ཆོས་ལ་ཡེ་ཤེས་མངའ་བསྒྱུར་ཞིང༌། །རང་བཞིན་རྣམ་དག་ཆགས་རྡུལ་མི་མངའ་ཡང༌། །བདག་ཅག་སྲིད་ཞུ་གུས་པའི་ཚུལ་གྱིས་སུ། །དྲི་དང་མེ་ཏོག་བདུག་པ་མར་མེ་བཤོས། །དག་

― TNT06_Page_0846 ―

^{[མ་དཔེ་གཟིགས་ན་འདིར་གནོན།]}

[Full Size]

ཅིང་གཙང་མར་བཤམས་ཏེ་ཕུལ་བ་འདིས། །བསོད་ནམས་ཡན་ལག་ཡོངས་སུ་རྫོགས་གྱུར་ཅིག །མཆོད་པའོ། །ཧཱུཾ། འཇམ་དཔལ་མཁའ་ལས་བྱུང་བའི་གསེར་མདོག་ཅན། །འཇམ་དཔལ་ཐུགས་ལས་ཆོས་ཀུན་རང་བཞིན་གསལ། །འཇམ་དཔལ་གསུང་གི་དབང་ཕྱུག་འཇམ་པའི་དབྱངས། །འཇམ་དཔལ་བདག་ནི་རེ་བའི་སེམས་ཀྱིས་འདུད། །ཐུགས་མཆོག་འཇམ་པའི་ངང་ལས་མ་གཡོས་ཀྱང༌། །ཐུགས་རྗེས་གདུག་པ་འདུལ་ཕྱིར་གཤིན་རྗེ་གཤེད། །འཇིགས་བྱེད་ཆེན་པོ་འཇིགས་པའི་སྐུར་བསྟན་པ། །མི་བཟད་དུས་མཐའ་བསྐལ་པའི་མེ་ལྟར་འབར། །ཞལ་གདངས་ཁྲོ་གཉེར་སྨིན་མ་གློག་ལྟར་འཁྱུག །སྤྱན་བགྲད་མཆེ་བ་གཙིགས་ཤིང་རབ་ཏུ་འབར། །རྡོ་རྗེ་རྟ་སྐད་དྲག་པོ་ཧ་ཧར་བཞད། །མཁའ་འགྲོ་བསྡུད་པའི་ཕཻཾ་སྐད་གནམ་དུ་འདོན། ཁྲོས་པའི་སྟབས་ཀྱིས་ཞབས་བརྡབས་ཁམས་གསུམ་གནོན། །སྡིགས་འཛུབ་གནམ་དུ་གདེངས་ཤིང་ལྷ་ཆེན་འདུལ། །ལྗགས་འགྲིལ་འབར་བའི་ཞལ་གདངས་ཁྲག་གིས་མྱོས། །ལྷ་དང་བཅས་པའི་འཇིག་རྟེན་ཞལ་དུ་གསོལ། །བགེགས་ཆེན་ཀོ་རློན་ཐོད་པའི་འཕྲེང་བས་བརྒྱན། །གཅེར་བུ་འཇིགས་བྱེད་དབང་ཕྱུག་ཆེན་པོའི་ཚུལ། །འཇིགས་བྱེད་མ་ཧེ་ཁྲོས་པའི་ཞལ་གདངས་ཤིང༌། །ཞལ་དགུ་འབར་བས་སྲིད་གསུམ་ཟ་བར་རྔུབ། །སྣ་ཚོགས་འགྲོ་བ་འདུལ་བའི་ཕྱག་རྒྱ་འབར། །བདུད་རིགས་ཀུན་གནོན་ཞབས་ནི་བརྐྱང་བསྐུམ་གནས། །འཇིགས་བྱེད་ཆེན་པོའི་སྐུ་ལ་རྟག་ཏུ་འདུད། །དབུ་དགུ་འབར་

― TNT06_Page_0847 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་དཀྱིལ་འཁོར་ནས། །གཡས་ཀྱི་ཞལ་གསུམ་གདངས་པ་ནི། །མཐིང་ག་དམར་དང་སེར་བའི་ཞལ། །གཡོན་གྱི་ཞལ་གསུམ་གཙིགས་པ་ནི། །དཀར་དང་དུད་ཁ་གནག་པའི་ཞལ། །དབུས་ཀྱི་ཞལ་གསུམ་འབར་བ་ནི། ཁྲོ་དང་ཆགས་དང་ཞི་བའི་ཚུལ། །ཕྱག་རྒྱ་འོད་ཟེར་འབར་བ་སྟེ། །གཡས་ཀྱི་ཕྱག་མཚན་བཅུ་དྲུག་ནི། །བརྡེག་ཅིང་འཇོམས་པའི་མཚོན་ཆ་གདེངས། །གཡོན་གྱི་ཕྱག་མཚན་བཅུ་དྲུག་ནི། །རོལ་ཞིང་སྟབ་པའི་མཚན་མས་མཛེས། །བརྗིད་གནོན་ཞབས་ཀྱི་ཚམ་རྔམ་ལས། །གཡས་ཀྱི་ཞབས་བརྒྱད་བསྐུམ་པ་ནི། །དྲེགས་པའི་ལྷ་བརྒྱད་ཐབས་ཀྱིས་འདུལ། །གཡོན་གྱི་ཞབས་བརྒྱད་བརྐྱང་བ་ནི། །དྲེགས་པའི་ལྷ་མོ་བརྒྱད་ལ་རོལ། །འདོད་ཆགས་ཆེན་པོ་འདུལ་བའི་ཕྱིར། །རྟག་ཏུ་ལིང་ག་རྒྱས་པའི་ཚུལ། །དྲག་པོའི་ཚུལ་གྱིས་ཞེ་སྡང་འདུལ། །འདུལ་བྱེད་སྐུ་ཁྱོད་ལ་ཕྱག་འཚལ། །དུར་ཁྲོད་ཆེན་པོའི་དཀྱིལ་འཁོར་ནས། །བདུད་དང་གཤིན་རྗེ་ཐབས་ཀྱིས་འདུལ། །མ་མོ་མཁའ་འགྲོ་དབང་དུ་བསྡུད། །དབང་ཕྱུག་ཆེ་ལ་ཕྱག་འཚལ་འདུད། །དབང་ཕྱུག་ཆེན་པོའི་དཀྱིལ་འཁོར་ནས། །དབང་མེད་དད་པས་འདུས་པ་དང༌། །ཡེ་ཤེས་སྤྲུལ་པའི་འཁོར་གྱིས་བསྐོར། །འཁོར་བཅས་ཁྱོད་ལ་ཕྱག་འཚལ་འདུད། །ཡེ་ཤེས་ཐུགས་ཀྱི་དཀྱིལ་འཁོར་ནས། །ཇི་ལྟ་བུར་ནི་སྤྲུལ་གྱུར་ཀྱང༌། །རྣམ་དག་དབྱིངས་ལས་མ་གཡོས་ཏེ། །མཉམ་ཉིད་སྐུ་ལ་ཕྱག་འཚལ་ལོ། །ཡང་མཆོད་ཡོན་དང༌། ཨོཾ་བཛྲ་ཤཔྟ་

― TNT06_Page_0848 ―

^{[མ་དཔེ་གཟིགས་ན་འདིར་གནོན།]}

[Full Size]

ཨཱཿཧཱུཾ། ཨོཾ་དྷརྨ་ར་ཎི་ཏ་སོགས་ཀྱིས་རོལ་མོའི་སྒྲ་བྱའོ། །ནང་མཆོད་ཡི་གེ་བཅུ་པས་བསངས། ཨ་ཀཱ་རོའི་སྔགས་ཀྱིས་སྦྱངས། སྟོང་པའི་ངང་ལས་མི་མགོའི་སྒྱེད་པུ་གསུམ་གྱི་སྟེང་དུ། ཡཾ་ལས་རླུང་གི་དཀྱིལ་འཁོར་སྔོན་པོ་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་འབར་བས་མཚན་པ། དེའི་སྟེང་དུ་ཨ་ལས་ཐོད་པ་དུམ་བུ་གཅིག་པ། ཕྱི་དཀར་ལ་ནང་དམར་བ། དེའི་ནང་དུ་པདྨ་དང་ཨ་ལས་ཟླ་བའི་གདན། དེའི་སྟེང་དབུས་སུ་ན་ལས་མིའི་ཤ ། ཤར་དུ་གོ་ལས་བ་ལང་གི་ཤ ། ལྷོར་ཀུ་ལས་ཁྱིའི་ཤ ། ནུབ་ཏུ་ད་ལས་རྟའི་ཤ ། བྱང་དུ་ཧ་ལས་གླང་པོ་ཆེའི་ཤ ། དེ་རྣམས་ཀྱི་སྟེང་དུ། དབུས་སུ་ཧཱུཾ་ལས་དྲི་ཆུ། ཤར་དུ་བྷྲུཾ་ལས་དྲི་ཆེན། ལྷོར་ཨཾ་ལས་རཀྟ། ནུབ་ཏུ་ཛྲིཾ་ལས་བྱང་སེམས། བྱང་དུ་ཁཾ་ལས་ཤ་ཆེན་གྱི་དྭངས་མ་རྣམས་སུ་གྱུར། སྟེང་དུ་ཧཱུཾ་ལས་བྱུང་བའི་རྡོ་རྗེས་ཁ་བཅད་པ། དེའི་ལྟེ་བར་ཡང་ཉི་མ་ལ་ཧཱུཾ་གིས་མཚན་པ། དེ་ལས་འོད་འཕྲོས། རླུང་གཡོས། མེ་སྦར། ཤ་ལྔ་བདུད་རྩི་ལྔ་ཞུ་ཞིང་ཁོལ། ཁ་དོག་དྲི་རོ་ངན་པ་རྣམས་བསྲེགས་ཤིང་སྦྱངས། དེའི་སྟེང་གི་ནམ་མཁའ་ལ་ཨོཾ་ཨཱཿཧཱུཾ། དེ་རྣམས་ལས་འོད་འཕྲོས། སྐུ་གསུམ་ཐུགས་རྡོ་རྗེའི་ལྷ་ཚོགས་སྤྲོས་ཤིང༌། ཁམས་གསུམ་སྣོད་བཅུད་ཐམས་ཅད་ཀྱི་བཀྲག་མདངས་བཅུད་རྣམས་དང༌། ཡེ་ཤེས་ལྷའི་བདུད་རྩི་བཀུག་སྟེ་ཐིམ་པ་དང༌། འདོད་ཡོན་དཔག་ཏུ་མེད་པའི་ཆར་ཕབ་པར་གྱུར། ཨོཾ་ཨཱཿཧཱུཾ། མང་དུ་བརྗོད། རྩ་བརྒྱུད་ཀྱི་བླ་མ་རྣམས་ཀྱི་མཚན་ནས་བརྗོད་དེ་འབུལ། སྔགས་གསུམ་གྱི་མཐར་འབྲུ་གསུམ་བཏགས་པས། བདུད་རྩི་མྱངས་ཏེ་ལྷ་རྣམས་ཚིམས་པར་བསམ།

― TNT06_Page_0849 ―

^{[མ་དཔེ་གཟིགས་ན་འདིར་གནོན།]}

[Full Size]

གཞུང་ལས་སྐབས་འདིར་གཏོར་མ་འབུལ་བར་བཤད་པ་ལྟར་འདིར་བྱེད་ན། ཡང་གོང་བཞིན་ནང་མཆོད་ལྟར་གཏོར་མ་བྱིན་གྱིས་རློབ་པའམ། ནང་མཆོད་དང་ལྷན་ཅིག་བྱིན་གྱིས་བརླབས་ཀྱང་རུང་ལ། བཟླས་པའི་རྗེས་སུ་གཏོར་མ་འབུལ་ན། བྱིན་རླབས་ཀྱང་སྐབས་དེ་ཉིད་དུ་བྱ་ཡི། འདིར་མི་བྱའོ། །གཏོར་མ་འབུལ་བ་དངོས་ནི། སྔགས་གསུམ་པོ་རེ་རེའི་མཐར། ཨི་དཾ་ཨ་མྲྀ་ཏཱ་མཧཱ་སྭ་ར་ཧཱུཾ། ཞེས་བཏགས་པ་ལན་གསུམ་ལ་སོགས་པས་གཙོ་བོ་བཅོམ་ལྡན་འདས་ཉིད་ལ་འབུལ། འཇིག་རྟེན་དང་འཇིག་རྟེན་འདས་པའི་ལྷ་ཐམས་ཅད་ལ་ཐུན་མོང་དུ་འབུལ་བ་ནི། ཨོཾ་ཀཱ་ལ་རཱུ་པ་སརྦ་དུཥྟ་སཏྭ་ད་མ་ཀ་མཧཱ་བྷཱུ་ཏ་ཨ་དྷི་པ་དྷི་ཨི་མཾ་བ་ལིཾ་གྲྀཧྞ་གྲྀཧྞ་པ་ཡ་སྭཱཧཱ། ཨོཾ་ཨིནྡྲ་ཡ་ཧྲཱི་ནས། ཕཻཾ་ཕཻཾ་ཕཊ་ཕཊ་སྭཱཧཱའི་བར་སྦྱར་བ་དང༌། ཨ་ཀཱ་རོ་བཏགས་པ་ནི་བསྙེན་པའི་སྐབས་ཀྱི་གཏོར་སྔགས་སོ། །ཀཱ་ལ་རཱུ་པའི་སྔགས་དང༌། ཨོཾ་ཨིནྡྲ་ཡ་སོགས་དེ་དང་འདྲ་བ་ལས། དེའི་མཐར་འདི་འདོགས་ཏེ། ཨོཾ་ཧྲཱྀཿཥྚཱིཿབི་ཀྲི་ཏཱ་ན་ན་ཧཱུཾ་ཧཱུཾ་ཧཱུཾ་ཕཊ་ཕཊ་ཧཱུཾ་ཡེ་མ་མ་ཤཱ་ཏྲུན་ན་ཏྲ་ན་སརྦཱན་ཁ་ཁ་ཁཱ་ཧི་ཁཱ་ཧི། མ་ར་མ་ར། བི་དྭེ་ཥ་ཡ། ཨུ་ཙ་ཊ་ཡ། ཨུ་ཙ་ཊ་ཡ། སྟཾ་བྷ་ཡ་སྟཾ་བྷ་ཡ་ཧཱུཾ་ཕཊ། སྒྲུབ་པའི་དུས་ཀྱི་གཏོར་སྔགས་སོ། །ཨོཾ་ཀཱ་ལ་རཱུ་པའི་སྔགས་ལ། ཨི་དཾ་བ་ལིང་ཞེས་པའི་ཚབ་ཏུ། ཨི་དཾ་མ་མ་ཤཱ་ཏྲུན་པ་ཏ་བ་ལིང་ཏ་ད་ད་མི་ཞེས་འདོན་པ་བསྒྱུར་ཞིང༌། ཕྱོགས་སྐྱོང་གི་སྔགས་ཀྱི་གཞུག་ཏུ། ཨོཾ་ཧྲཱྀཿཥྚཱིཿཧཱུཾ་མ་མ་ཤཱ་ཏྲཱུཾ་ནི་མཱ་ར་ཡ་ཧཱུཾ་ཕཊ། ཨོཾ་བི་ཀྲྀ་ཏཱ་ན་ན་ཧ་ཧཱ་ཧི་ཧཱི་ཧུ་ཧཱུ་ཧེ་ཧཻ་ཧོ་ཧཽ་ཧཾ་ཧ། ཨི་དཾ་མ་མ་དི་ཤ་ཧཱུཾ། ཁ་ཁ་ཁཱ་ཧི་ཁཱ་ཧི་མ་ར་མ་ར་གྲྀཧྞ་གྲྀཧྞ་བནྡྷ་བནྡྷ་ད་ཧ་ད་ཧ་པ་ཙ་པ་ཙ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཧྲཱྀཿཥྚཱིཿབི་ཀྲི་ཏཱ་ན་ན་མ་མ་ཤཱ་ཏྲུན་ཨ་མུ་ཀཾ་མཛྫ་མེ་ཙ་བ་ས་མཾ་

― TNT06_Page_0850 ―

^{[མ་དཔེ་གཟིགས་ན་འདིར་གནོན།]}

[Full Size]

ས་ཛི་ཝཾ་སུ་ཁཾ་རུ་དྷི་ར་པྲི་ཡཾ་བྷཀྵ་ནི་ཨི་དཾ་བ་ལིཾ་ཨ་མྲྀ་ཏ་སྭ་ད་ཡ། གྲྀྀཧྞ་གྲྀྀྀཧྞ་ཁཱ་ཧི་ཁཱ་ཧི་བྷུཉྫ་ཧོ། རཀྟ་ཨརྒྷཾ་གྲྀྀྀཧྞ་གྲྀྀྀཧྞ་ཁཱ་ཧི་ཁཱ་ཧི། པི་བ་ཧོ། ཨི་དཾ་ཨ་ཏི་ཀྲ་མ། ས་མ་ཡ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱཧཱ། ལས་སྦྱོར་གྱི་གཏོར་སྔགས་སོ། །གཏོར་སྔགས་གསུམ་པོ་འདི། ཐོབ་ཐང་ནི་བསྙེན་སྒྲུབ་ལས་གསུམ་སོ་སོའི་སྐབས་སུ་སྦྱོར་རྒྱུ་ཡིན་ཡང༌། ལག་ལེན་ལ་དཀྱུས་ཀྱི་ཉམས་ལེན་སྐབས། བསྙེན་པའི་གཏོར་སྔགས་ལན་བདུན་རེ་དང༌། ངག་བྱང་བའི་ཕྱིར་སྒྲུབ་པ་དང་ལས་སྦྱོར་གྱི་གཏོར་སྔགས་ཀྱང་ཚར་རེ་རེ་དཀྱུས་ལ་ཡང་འདོན་པར་བྱེད་དོ། ཁྱད་པར་གྱི་འཕྲིན་ལས་བསྐུལ་བའི་ཕྱིར། དུར་ཁྲོད་གནས་པའི་གཤིན་རྗེ་ལ་འབུལ་ན། ཡ་མ་རཱ་ཛ་ཡ་མ་རཱ་ཛ་ཡ་མ་རཱ་ཛ། ཨོཾ་ཀཱ་ལ་རཱུ་པ་ནས། གྲྀྀཧྞ་པཱ་ཡ་སྭཱཧཱ། ཞེས་བཏགས་པ་དང༌། དེ་བཞིན་དུ། ས་དོ་མེ་ཡ་ས་དོ་མེ་ཡ་ས་དོ་མེ་ཡ། ཨོཾ་ཀཱ་ལ་རཱུ་པ་སོགས་བཏགས་པ་དང༌། དེས་མཚོན་ཏེ། ནི་རཱ་མ་ཡའི་བར་དུ་སྦྱར་རོ། །དེ་བཞིན་དུ་གཤིན་རྗེ་ཐམས་ཅད་ཀྱི་སྤྱི་བོ་ལས་ཀྱི་གཤིན་རྗེ་འཁོར་བྱེ་བ་ཐེར་འབུམ་དང་བཅས་པ་ལ་དམིགས་ནས། ཡ་མ་སྙིང་ཤ་ཤ་ཛཱཿཛཱཿདུན། ཡ་མ་སྙིང་རཱུ་པ་ཤ ། ཡ་མ་ཨཱ་ཀརྵ་ཡ་ཧཱུཾ་ཕཊ། ཅེས་པ་ལ་ཨོཾ་ཀཱ་ལ་རཱུ་པའི་སྔགས་བཏགས་པ་ལན་བདུན་གྱིས་རི་རབ་ཆེན་པོའི་འོག རྒྱ་མཚོའི་གཏིང་ནས་གནས་པའི་ཆོས་ཀྱི་རྒྱལ་པོ་ལ་འབུལ་ལོ། །སྐབས་འདིར་དཀྱིལ་འཁོར་དང་ཕོ་ཉ་བསྐུལ་པ་བྱས་ནའང་རུང་མོད་ཀྱི། བཟླས་པའི་གཞུག་ཏུ་བྱེད་པ་ཉིད་གཙོ་ཆེའོ། །འདིར་དཀྱིལ་འཁོར་ནང་གི་གཤིན་རྗེ་མོ་བརྒྱད་ནི། ཡེ་ཤེས་ཀྱི་ཁྲོ་མོ། རོ་ལངས་མ་ལ་སོགས་པ་བརྒྱད་གདུལ་བྱ་མ་མོ་བརྒྱད་དང༌། གཤིན་རྗེ་མོ་བརྒྱད་ཀྱི་ཚུལ་བཟུང་བ་ཙམ་ཡིན་ལ། དེ་དག་ལ་གཙོ་བོ་དང་ལྷན་ཅིག་ཏུ་གཏོར་མ་ཕུལ་

― TNT06_Page_0851 ―

^{[མ་དཔེ་གཟིགས་ན་འདིར་གནོན།]}

[Full Size]

བར་མོས་པས་ཆོག་གི་སྒོས་སུ་མེད་ཀྱང་ཆོག །ཕྱོགས་སྐྱོང་གི་གཏོར་སྔགས་ཀྱིས་དུར་ཁྲོད་གནས་པ་ཐམས་ཅད་ལ་འབུལ་བ་ཡིན་པས། སྔགས་དེ་ལ་འཇིག་རྟེན་པ་སྤྱིའི་གཏོར་སྔགས་ཞེས་བྱ་ལ། མ་གཤིན་བཅུ་དྲུག་ཀྱང་དེའི་ཁོངས་སུ་འདུས་པས་མདོར་བསྡུས་པའི་ཚེ་དེ་ཙམ་གྱིས་ཀྱང་ཆོག་ཅིང༌། ཨ་ཀཱ་རོ་ནི་འཇིག་རྟེན་འཇིག་རྟེན་འདས་པ་གཉིས་ཀའི་ཐུན་མོང་བ། རྒྱུད་གཞན་ལས་འབྱུང་བ་དྲངས་པ་ཡིན་ཡང༌། འདིར་མ་ཟད། ལ་ལི་ཏ་ཆུང་བས་ཀྱང་ནག་པོའི་སྐབས་སུ་བཤད་དོ། །དེ་ལྟ་ན་ཡང་ཁྱད་པར་གྱི་འཕྲིན་ལས་སྒྲུབ་པའི་དོན་དུ། ཁྲོ་རྒྱལ་གཤིན་རྗེ་གཤེད་ཀྱི་བཀའ་ཉན་ཐུན་མོང་མ་ཡིན་པ་ཉིད་ཀྱི་ཕྱིར། མ་མོ་གཤིན་རྗེའི་སྒོས་ཀྱི་གཏོར་མ་ཡང་ངེས་པར་བྱེད་དགོས་པ་ནི་ཡིན་ནོ། །དེ་རྗེས་བཟླས་པའི་དམིགས་པ་གསལ་བཏབ་ལ། བདག་མདུན་ཞལ་སྤྲོད་ཀྱི་ཚུལ་དུ་སྔགས་གསུམ་ཅི་ནུས་སུ་བཟླ་ཞིང༌། གཙོ་བོར་ལྷའི་རྣལ་འབྱོར་གྱི་ཏིང་ངེ་འཛིན་བྱའོ། །སྐྱོ་ལུགས་ཕལ་ཆེར་དུ་རྩ་སྔགས་ལ་ཧཱུཾ་གཉིས་ཕཊ་གཉིས་ཡོད། སྭཱཧཱ་མེད་ལ། ལ་ལར་སྭཱཧཱ་ཡང་ཡོད་པ་དང༌། ཁ་ཅིག་ཏུ་ཧཱུཾ་གཅིག་དང་ཕཊ་གཅིག་དང༌། འགའ་ཞིག་ཏུ་ཧཱུཾ་མེད་པར་ཕཊ་གཉིས་བྱས་པའང་སྣང་བ། རྒྱུད་ཀྱི་སྔགས་བཏུའི་དཔེ་མི་འདྲ་བ་དང༌། སྔགས་བཏུ་མེད་པ་དག་ལ་རྟེན་པ་ལས་བྱུང་བ་ཡིན་ནམ་སེམས་ཤིང༌། འཇིགས་མཛད་ཀྱི་རྒྱུད་རྒྱ་ནག་གི་ཡུལ་ན་བཞུགས་པ་ལ་ཡང་སྔགས་བཏུའི་ལེའུ་མེད་ཅེས་གྲགས་སོ། །ད་ལྟ་བོད་དུ་འགྱུར་བའི་རྟོག་བདུན་ལ་དཔེ་མ་དག་པ་ལ་ཚད་མི་འཇོག །གཞན་ཞང་འགྱུར། རོང་ཟོམ་འགྱུར། རྭ་འགྱུར། མལ་འགྱུར། དཔེ་དག་པོ་ཐམས་ཅད་ན། འགྱུར་བྱང་མེད་པའི་ཚིགས་བཅད་མ་རྣམས་ན། མཆོག་གི་དབང་ཕྱུག་ཅེས་འབྱུང་བས་

― TNT06_Page_0852 ―

^{[མ་དཔེ་གཟིགས་ན་འདིར་གནོན།]}

[Full Size]

ཧཱུཾ་ཡིག་ཡོད་པ་ཁོ་ན་ཡིན་པས། ཧཱུཾ་ཡིག་མི་བྱེད་པ་ནི་མ་དག་པར་སེམས་ལ། གཞན་ནི་རང་རང་གི་ལུགས་བཞིན་བྱའོ། །སྒྲུབ་པ་དང་ལས་སྦྱོར་གྱི་སྐབས་སུ། དམིགས་པའི་ཁྱད་པར་མི་འདྲ་བ་དང༌། སྔགས་ལ་ཤམ་བུ་འདོགས་ཚུལ་སོགས་གནད་ཅེས་པ་འགའ་རེ་ཡོད་ཀྱང༌། སྐབས་འདིར་མ་བཤད་དོ། ཁོ་བོས་ནི་ལུགས་འདིའི་དབང་བསྐུར་དང༌། མན་ངག་གི་ཡིག་ལུང་སོགས་ཆོས་སྐོར་ཆ་ཚང་བ་ཙམ་ནི་བླ་མ་ལས་ཐོབ། འཛུབ་ཁྲིད་ཞལ་གདམས་དང་ལུང་མཐའ་དག་ཞུ་བའི་ཡུལ་ནི་མ་རྙེད་ཀྱང༌། རྭ་ལུགས་སོགས་བརྒྱུད་པ་གཞན་གྱི་ལུགས་ཀྱི་གདམས་ངག་གིས་གུང་ཁེབས་ཤིང༌། གནད་རིག་པ་ན་དེས་ལྡེ་མིག་ཐོབ་སྟེ། ལུག་འདིའི་རྒྱུད་བཤད་དང༌། མན་ངག་གི་ཡི་གེ་མཐོང་བས་ཀྱང་དོན་རྟོགས་པར་གྱུར་ཏོ། །གང་དག་མན་ངག་གབ་སྟེ་བཞག་པའི་སྤྱི་ཁོག་ཙམ་པ། དཔེར་ན་འཛིམས་པས་བྱས་པའི་སྒྲུབ་དཀྱིལ་ལྟ་བུ་དང༌། ཊཱི་ཀ་སྣ་རེ་ཙམ་མཐོང་བ་ལ་བློ་བརྟད་བཅས། རྒྱབ་རྟེན་དུ་འགྲོ་ལ་རེ་ནས། བསྟན་འགྱུར་ནང་གི་རྒྱ་གཞུང་འགའ་རེ་ལ། རྡུལ་སྤྲུགས་དང་མུར་ཉེད་དུམ་རེ་བྱས་ནས། ཁོ་བོས་སྤྱིར་གཤིན་རྗེ་གཤེད་སྐོར་ཤེས་སོ། །སྒོས་སུ་སྐྱོ་ལུགས་ཤེས་སོ། །མལ་ལུགས་ཤེས་སོ། །སྔ་མ་གཞན་གྱི་ལུགས་ལ་མ་ལྟོས་པར། རང་རྐང་ཚུགས་པ་ཤེས་སོ། །ཞེས་སོགས་ཁ་ཕོ་རྦད་ཤོད་འདོན་མཁན་མང་པོ་བར་སྐབས་སུ་བྱུང་མོད་ཀྱང༌། བླུན་པོའི་ཚོགས་པ་མགོ་བསྐོར་བ་ལས་སྙིང་པོ་ཅུང་ཟད་ཀྱང་ཡོད་པར་མ་མཐོང་ངོ༌། །འདིར་ནི་ཁོ་བོས་ཐོག་མ་རང་ནས་སྨྲ་བ་ལ་རིངས་པར་མ་བྱས་ཏེ། སྐྱོ་པ་རྣམས་ཉིད་ཀྱི་བཞེད་ཚུལ་གང་ཡིན་པ་དེ་ལ་རིང་དུ་སྦྱངས་པ་ན་ཕྱིས་ཁོང་དུ་ཆུད་ནས་ཅུང་ཟད་ཅིག་སྨྲས་སོ། །འཕྲོས་དོན་དོན་ནོ། །བཟླས་པའི་མཐར་སླར་ཡང་ཨོཾ་ཧྲཱྀཿཥྚཱིཿཧཿ སོགས་ཀྱིས་ཕྱི་མཆོད་ནང་མཆོད་ཕུལ། གཏོར་མ་གསར་

― TNT06_Page_0853 ―

^{[མ་དཔེ་གཟིགས་ན་འདིར་གནོན།]}

[Full Size]

པའམ་གཏོར་ཁ་གསོས་ནས་སྔོན་བཞིན་གཏོར་མ་ཕུལ་ནའང་ལེགས། བསྡུས་པ་ལ་མོས་ཚེ་བཟླས་པའི་གོང་དུ་ཕུལ་ན་འདིར་མི་དགོས་ལ། འདིར་འབུལ་ན་གོང་དུ་མི་དགོས་སོ། །སྔར་བཤད་པའི་ཕྱག་འཚལ་ལམ་བསྟོད་པ་གང་རུང་ཞིག་གིས་བསྟོད། མཆོད་སྦྱིན་གཏོར་མ་འདི་བཞེས་ལ། །སོགས་བྱ་སྟེ་སྤྱི་འགྲོས་ཡིན། དེ་ནས་བསྐུལ་བ་བྱ་སྟེ། ཧཱུཾ། དཀོན་མཆོག་གསུམ་གྱི་སྐུ་དགྲ་སོགས། །སྒྱུ་ལུས་ཕུང་པོའི་གཏོར་གཞོང་ན། །དོན་སྙིང་རྣམ་ལྔའི་གཏོར་མས་བཀང༌། །རྣམ་ཤེས་བརྒྱད་ཀྱི་མེ་ཏོག་བཀྲམ། །མདངས་ཀྱི་མར་མེ་དབུགས་ཀྱི་སྤོས། །ཆུ་སེར་དྲི་ཆབ་སྦྱར་བ་དང༌། །དམར་ཆེན་ཨར་གྷར་བཅས་པ་དང༌། །རང་བྱུང་བདུད་རྩིར་ལྔར་བཅས་འདི། །འཇམ་དཔལ་ནག་པོའི་མཆོད་རྫས་ཏེ། །རོལ་གཅིག་གསོལ་ཅིག་ནག་པོའི་ཚོགས། །འཇིགས་མཛད་ཆེ་ལ་མཆོད་པར་འབུལ། །མཆོད་པར་བཞེས་ཤིག་དངོས་གྲུབ་སྩོལ། །ཧཱུཾ། བཅོམ་ལྡན་འཇམ་དཔལ་ཁྲོས་པ་ཡི། །སྐུ་ལས་སྤྲུལ་པའི་ཕོ་ཉ་ནི། །ཡེ་ཤེས་ཁྲོ་བོ་རྔམ་པའི་ཚོགས། །བྱེ་བ་གྲངས་མེད་བསམ་ལས་འདས། ཁྱོད་ཀྱི་ཐུགས་དམ་དུས་ལ་བབ། །ཡང་སྤྲུལ་ཕོ་ཉ་མ་རུངས་པ། །མཁའ་འགྲོ་མ་དང་སྲིན་པོ་དང༌། །མ་མོ་གཤིན་རྗེ་འབྱུང་པོའི་ཚོགས། ཁྱོད་ཀྱི་ཐུགས་དམ་དུས་ལ་བབ། །གསུམ་སྤྲུལ་ཕོ་ཉ་གདུག་པ་ཅན། །མི་བཟད་བྱ་དང་གཅན་གཟན་དང༌། །རྭ་ཅན་སྦྲུལ་གདུག་སྲོག་ཆགས་ཚོགས། །མཁའ་དབྱིངས་ཁྱབ་པའི་དུས་ལ་བབ། །བྷྱོཿ བྱང་ཤར་དུས་ཀྱི་མཚན་མོ་ནི། །གཅེར་བུ་མཐིང་ནག་རལ་པ་གཡོ། །ཞལ་གཅིག་ཕྱག་གཉིས་ལྗགས་ཀྱང་བསྐྱོད། །ཕྱག་ན་གྲི་གུག་

― TNT06_Page_0854 ―

^{[མ་དཔེ་གཟིགས་ན་འདིར་གནོན།]}

[Full Size]

ཐོད་པ་བསྣམས། །ཆིབས་སུ་རྨ་བྱ་འོད་ལྡན་ཆིབས། །གདུག་ཅན་མ་ལུས་འགུགས་མཛད་མ། །འཇམ་པའི་རྡོ་རྗེའི་བཀའ་མནོས་ནས། །གསོད་བྱེད་ཆེན་པོ་དགྲ་ལ་ཡཱ། །བྷྱོཿ ནུབ་བྱང་གཤིན་རྗེ་བེ་ཅོན་མ། །གཅེར་བུ་མཐིང་ནག༴ ཞལ་གཅིག༴ ཕྱག་ན༴ ཆིབས་སུ་ཀང་ཀ་མཆུ་རིངས་ཆིབས། །གདུག་ཅན༴ འཇམ་དཔའི༴ གསོད་བྱེད་ཆེན་མོ་དགྲ་ལ་ཡཱ། །དེ་གཉིས་ཀྱིས་འོག་མ་རྣམས་ལའང་རིགས་འགྲེ། བྷྱོཿ ལྷོ་ནུབ་གཤིན་རྗེ་མཆེ་བ་མ། །གཅེར་བུ་མཐིང་ནག༴ ཞལ་གཅིག༴ ཕྱག་ན༴ ཆིབས་སུ་མཐིང་རིལ་སྔོན་མོ་ཆིབས། །གདུག་ཅན༴ འཇམ་དཔའི༴ མྱོས་བྱེད་ཆེན་མོ་དགྲ་ལ་ཡཱ། །བྷྱོཿ ཤར་ལྷོར་གཤིན་རྗེ་ཕོ་ཉ་མ། །གཅེར་བུ་མཐིང་ནག༴ ཞལ་གཅིག༴ ཕྱག་ན༴ ཆིབས་སུ་ཉ་ཁྲ་སྐྱ་མོ་ཆིབས། །གདུག་ཅན༴ འཇམ་དཔའི༴ མྱོས་བྱེད་ཆེན་མོ་དགྲ་ལ་ཡཱ། །བྷྱོཿ ཤར་ཕྱོགས་གཤིན་རྗེ་ལྕགས་ཀྱུ་མ། །གཅེར་བུ་མཐིང་ནག༴ ཞལ་གཅིག༴ ཕྱག་ན༴ ཆིབས་སུ་ཤ་ཟ་བྱ་རྒོད་ཆིབས། །གདུག་ཅན༴ འཇམ་དཔའི༴ ཁྲག་འཐུང་ཆེན་མོ་དགྲ་ལ་ཡཱ། །བྷྱོཿ ལྷོ་ཕྱོགས་གཤིན་རྗེ་ཞགས་པ་མོ། །གཅེར་བུ་མཐིང་ནག༴ ཞལ་གཅིག༴ ཕྱག་ན༴ ཆིབས་སུ་མུན་མཐོང་འུག་པ་ཆིབས། །གདུག་ཅན༴ འཇམ་དཔའི༴ ཁྲག་འཐུང་ཆེན་མོ་དགྲ་ལ་ཡཱ། །བྷྱོཿ ནུབ་ཕྱོགས་གཤིན་རྗེ་ལུགས་བརྒྱུད་མ། །གཅེར་བུ་མཐིང་ནག༴ ཞལ་གཅིག༴ ཕྱག་ན༴ ཆིབས་སུ་གསོད་བྱེད་ཧོར་པ་ཆིབས། །གདུག་ཅན༴ འཇམ་དཔའི༴ འཁོར་བྱེད་ཆེན་མོ་དགྲ་ལ་ཡཱ། །བྷྱོཿ བྱང་ཕྱོགས་གཤིན་རྗེ་འབེབས་པ་མོ། །གཅེར་བུ་མཐིང་ནག༴ ཞལ་གཅིག༴ ཕྱག་ན༴ ཆིབས་སུ་བྱ་རོག་རྔམ་པ་ཆིབས། །གདུག་ཅན༴ འཇམ་དཔའི༴ འཁོར་བྱེད་ཆེན་མོ་དགྲ་ལ་ཡཱ། །ཡང་ན་མཚམས་མ་བཞི་བྱ་རྒོད་སོགས་དང༌། ཕྱོགས་ཀྱི་བཞི་སྐྱར་མོ་མཐིང་རིལ་ཀང་ཀ་རྨ་བྱ་དང་སྦྱར་བའང་རུང་ངོ༌། །འཇིགས་ཆེན་ལྷོ་ཕྱོགས་དུར་ཁྲོད་ནས། །སྐུ་དགྲ་སྒྲོལ་བྱེད་ཕོ་ཉ་ནི། །གསོད་བྱེད་གཤིན་རྗེ་དྲག་ཤུལ་ཅན། །གད་རྒྱངས་ཆེན་པོས་སྟོང་གསུམ་འགེངས། །སྤྲུལ་པ་གནམ་ས་ཁྱབ་པར་སྤྲོ། །སྔོོན་

― TNT06_Page_0855 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་དམ་ཚིག་དྲན་བྱས་ཏེ། །རྔམ་སྟབས་ཆེན་པོས་རྒྱུག་ཅིང་འོང༌། །ཕོ་ཉ་བྲན་གཡོག་ཚོགས་དང་བཅས། །དམ་རྫས་མཆོད་པ་འདི་བཞེས་ཤིག །ཤླཽ་ཀ་འདི་གཉིས་འོག་མ་ཀུན་ལའང་རིགས་འགྲེའོ། །ལྷོ་ཕྱོགས་ཞེས་ནུབ་ཕྱོགས་སོགས་སུ་འདོན་པ་བསྒྱུར་རོ། །ཡཱ། ཆོས་ཀྱི་རྒྱལ་པོའི་དུས་ལ་བབ། །ཡ་མཱན་ཏ་ཀའི་ཕོ་ཉ་སྟེ། །སྐུ་མདོག་མཐིང་ནག་འཇིགས་པ་ལ། །གཡས་པ་དབྱུག་ཏོ་འབར་བ་འཕྱར། །གཡོན་པ་མི་ཐོད་སྙིང་བཅས་འཛིན། །ཆིབས་སུ་མ་ཧེ་སྔོན་ནག་ཆིབས། །རྒྱུ་མ་མི་མགོའི་དོ་ཤལ་ཅན། །ཁམས་གསུམ་སྲོག་ལ་དབང་བྱེད་པ། །འཁོར་ནི་མ་མོ་འབུམ་གྱིས་བསྐོར། །ཤ་ཁྲག་གཏོར་མ་འདི་བཞེས་ལ། །དགྲ་བགེགས་བྱད་མ་དབང་དུ་བསྡུས། །དམ་ཉམས་དགྲ་བོ་འདི་ལོང་ཅིག །དུས་ལ་བབ་པོ་ས་མ་ཡཱ། །ཨཱེ། མགོ་དགུ་བརྩེགས་པ་རྐང་བརྒྱ་མོ། །ཆོས་ཀྱི་རྒྱལ་པོའི་ཆུང་མ་སྟེ། །སྲོག་དབུགས་ཀུན་གྱི་མངའ་བདག་མ། །འགལ་བྱེད་མ་ལུས་ཁཱ་རཾ་ཁཱ་ཧི། །བསྟན་པ་བཤིག་པའི་དགྲ་བོ་འདི། །བདུད་ཕོ་བཅུ་ཡིས་ཁྲམ་ལ་ཐོབ། །འཆི་བདག་འཁོར་ལོའི་ཕྱག་ཏུ་གཏོད། །གྱིང་ཆེན་བཅོ་བརྒྱད་ལས་ལ་བསྐུལ། །ས་མ་ཡཱ། ནུབ་ཕྱོགས༴ ཡཱ། ཏེལ་པ་ནག་པོའི་དུས་ལ་བབ། །ཡ་མཱན༴ སྐུ་མདོག་སྨུག་ནག་དུག་གི་འོད། །ཕྱག་གཡས་འབྱེད་བྱེད་བེ་ཅོན་བསྣམས། །གཡོན་པ་འབིགས་བྱེད་མདའ་གཞུ་འཛིན། །ཆིབས་སུ་རྔ་མོང་གྭ་པ་ཆིབས། །དུག་ཅན་འབར་བ་སྦྲུལ་གྱིས་བརྒྱན། ཁམས་གསུམ༴ འཁོར་ནི༴ ཤ་ཁྲག༴ དགྲ་བགེགས༴ དམ་ཉམས༴ དུས་ལ༴ ཨཱེ། ཁྲོས་མ་

― TNT06_Page_0856 ―

^{[མ་དཔེ་གཟིགས་ན་འདིར་གནོན།]}

[Full Size]

ཆེན་མོ་ཕག་མགོ་ཅན། །ཡབ་གཅིག་ཏེལ་པའི་ཆུང་མ་སྟེ། ཁྱོད་ནི་ཁྲག་བདག་ཆེན་མོ་ཡིན། །འགལ་བྱེད༴ བསྟན་པ༴ བདུད་ཕོ༴ འཆི་བདག༴ གྱིང་ཆེན༴ ས་མ་ཡཱ། །བྱང་ཕྱོགས༴ ཡཱ། ཨ་ཝ་གླང་མགོའི་དུས་ལ་བབ། །ཡ་མཱན༴ སྐུ་མདོག་དུད་ཁ་ཁྱབ་པ་ལ། །ཕྱག་གཡས་འཛིན་བྱེད་ལྕགས་ཀྱུ་ཐོགས། །གཡོན་པ་འཆིང་བྱེད་ཞགས་པ་བསྣམས། །ཆིབས་སུ་དྲེ་རྟ་རྐང་གསུམ་ཆིབས། །རླུང་ནག་འཁྱིལ་བའི་ནང་ནས་བཞེངས། ཁམས་གསུམ༴ འཁོར་ནི༴ ཤ་ཁྲག༴ དགྲ་བགེགས༴ དམ་ཉམས༴ དུས་ལ༴ ཨཱེ། ཁ་བརྒྱ་ཆེན་མོ་མཐུ་མོ་ཆེ། །ཨ་ཝ་གླང་མགོའི་ཆུང་མ་སྟེ། །ནད་དང་རིམས་ཀྱི་བདག་མོ་ཡིན། །འགལ་བྱེད༴ བསྟན་པ༴ བདུད་ཕོ༴ འཆི་བདག༴ གྱིང་ཆེན༴ ས་མཱ་ཡ། ཤར་ཕྱོགས༴ ཡཱ། སྲོག་བདག་ཡ་བ་ཏི་ཡི་དུས་ལ་བབ། །ཡ་མཱན༴ སྐུ་མདོག་སྔོ་སྐྱ་རབ་ཏུ་འབར། །ཕྱག་གཡས་སྲོག་གཅོད་རལ་གྲི་ཐོགས། །གཡོན་པ་དགྲ་སྟ་དམ་ཉམས་སྒྲོལ། །ཆིབས་སུ་ཆུ་གླང་ཁྲོས་པ་ཆིབས། །ཕྱོགས་བཅུ་ཀུན་ཏུ་ཁྱབ་པར་འགྲོ། ཁམས་གསུམ༴ འཁོར་ནི༴ ཤ་ཁྲག༴ དགྲ་བགེགས༴ དམ་ཉམས༴ དུས་ལ༴ ཨཱེ་དཀར་མོ་ཆེན་མོ་ཤེལ་མིག་མ། །ཡ་བ་ཏི་ཡི་ཆུང་མ་སྟེ། །སྲོག་གི་བདག་མོ་རྩེ་གསུམ་ཐོགས། །འགལ་བྱེད༴ བསྟན་པ༴ བདུད་ཕོ༴ འཆི་བདག༴ གྱིང་ཆེན༴ ས་མ་ཡཱ། ཤར་ལྷོ༴ ཡཱ། གཤིན་རྗེ་མིག་དམར་དུས་ལ་བབ། །ཡ་མཱན༴ སྐུ་མདོག་དམར་པོ་མེ་འོད་འདྲ། །ཕྱག་གཡས་གཅོད་བྱེད་རལ་གྲི་བསྣམས། །གཡོན་པ་དམ་ཉམས་མགོ་ལུས་འབྲེལ། །ཆིབས་སུ་ལྐུག་པ་ལུག་ལ་ཆིབས། །ཤ་ཁྲག་རློན་པ་ཟ་བར་བྱེད། ཁམས་གསུམ༴ འཁོར་ནི༴ ཤ་ཁྲག༴ དགྲ་བགེགས༴ དམ་ཉམས༴ དུས་ལ༴

― TNT06_Page_0857 ―

^{[མ་དཔེ་གཟིགས་ན་འདིར་གནོན།]}

[Full Size]

ཨཱེ། མིག་སྟོང་འབར་མ་མཐུ་མོ་ཆེ། །སྲོག་བདག་མིག་དམར་ཆུང་མ་སྟེ། །འཕྲོག་མ་ཆེན་མོ་མ་རུངས་མ། །འགལ་བྱེད༴ བསྟན་པ༴ བདུད་ཕོ༴ འཆི་བདག༴ གྱིང་ཆེན༴ ས་མ་ཡཱ། ལྷོ་ནུབ༴ ཡཱ། གཤིན་རྗེ་ཕྱ་སངས་དུས་ལ་བབ། །ཡ་མཱན༴ སྐུ་མདོག་ཐལ་སྐྱ་རབ་ཏུ་འབར། །ཕྱག་གཡས་འཁོར་ལོ་འབར་བ་བསྐོར། །གཡོན་པ་ཚེ་སྲོག་བུམ་པ་བསྣམས། །ཆིབས་སུ་ཉི་ཟླའི་འཁོར་ལོ་ཆིབས། །མི་མགོ་རློན་པས་ལུས་ལ་བརྒྱན། ཁམས་གསུམ༴ འཁོར་ནི༴ ཤ་ཁྲག༴ དགྲ་བགེགས༴ དམ་ཉམས༴ དུས་ལ༴ ཨཱེ། མ་མོ་དྲེད་ཀྱི་ཨབ་གཤམ་ཅན། །རྒྱལ་ཆེན་ཕྱ་སངས་ཆུང་མ་སྟེ། །སྨྱོ་བྱེད་ཆེན་མོ་མཁའ་དབྱུག་ཐོགས། །འགལ་བྱེད༴ བསྟན་པ༴ བདུད་ཕོ༴ འཆི་བདག༴ གྱིང་ཆེན༴ ས་མ་ཡཱ། ནུབ་བྱང་༴ ཡཱ། གཤིན་རྗེ་སྨིགས་པའི་དུས་ལ་བབ། །ཡ་མཱན༴ སྐུ་མདོག་སེར་ནག་འབར་བ་ལ། །ཕྱག་གཡས་དབང་བསྡུད་ཞགས་པ་བསྣམས། །གཡོན་པ་འཇོམས་བྱེད་མདུང་ཐུང་འཛིན། །ཆིབས་སུ་སྨྱོ་འགྲོས་ཤ་བ་ཆིབས། །ཕ་རོལ་གཞན་གྱི་སྲོག་གཅོད་མཁན། ཁམས་གསུམ༴ འཁོར་ནི༴ ཤ་ཁྲག༴ དགྲ་བགེགས༴ དམ་ཉམས༴ དུས་ལ༴ ཨཱེ། མགོ་དགུ་འབར་བའི་ལག་བརྒྱ་མ། །ཡབ་ཅིག་སྨིགས་པའི་ཆུང་མ་སྟེ། །དབང་པོ་ལྔ་དང་བཅུད་ཀྱི་བདག །འགལ་བྱེད༴ བསྟན་པ༴ བདུད་ཕོ༴ འཆི་བདག༴ གྱིང་ཆེན༴ ས་མ་ཡཱ། བྱང་ཤར༴ ཡཱ། རལ་པ་ཚར་དགུའི་དུས་ལ་བབ། །ཡ་མཱན༴ སྐུ་མདོག་ལྗང་ནག་མུན་ལྟར་གཏིབས། །ཕྱག་གཡས་བདུད་ཀྱི་ཁྲམ་ཤིང་ཐོགས། །གཡོན་པ་རྒྱུ་ཞགས་གློག་ལྟར་འཕེན། །ཆིབས་སུ་དུག་སྦྲུལ་ནག་པོ་ཆིབས། །རོལ་པ་ཆེན་པོ་གཤིན་རྗེ་གཤེད། །རྒྱ་མཚོའི་རྦ་རླབས་བཞིན་དུ་འཁྲུག །

― TNT06_Page_0858 ―

^{[མ་དཔེ་གཟིགས་ན་འདིར་གནོན།]}

[Full Size]

སྦལ་པ་ནག་པོ་མི་ཟན་བསྣམས། །དུག་ཅན་ལུས་ལ་འཕྱང་ཕྲུལ་བརྒྱན། ཁམས་གསུམ༴ འཁོར་ནི༴ ཤ་ཁྲག༴ དགྲ་བགེགས༴ དམ་ཉམས༴ དུས་ལ༴ ཨཱེ། མ་མོ་རི་ནག་འཁྱིལ་པ་མོ། །རལ་པ་ཚར་དགུའི་ཆུང་མ་སྟེ། །ཕུང་བྱེད་བདག་མོ་ཐོད་ཁྲག་འཛིན། །འགལ་བྱེད༴ བསྟན་པ༴ བདུད་ཕོ༴ འཆི་བདག༴ གྱིང་ཆེན༴ ས་མ་ཡཱ། གཤིན་རྗེའི་རྒྱལ་པོ་ཁྱེད་རྣམས་ཀྱང༌། །ཚངས་པ་དང་ནི་འཇུག་སྲེད་པོ། །ལྷ་གདོན་དྲག་པོ་མ་རུངས་པ། །བསྐུལ་ཞིག་བསྐུལ་ཞིག་ལས་ལ་ཆོས། །སྡིག་ཅན་བསྟན་དགྲ་ངན་སེམས་ཅན། །ཚེ་སྲོག་རྐུས་ལ་ལུས་སེམས་ཕྲོལ། །དབང་པོ་སྡོམས་ལ་གནད་དུ་གཟིར། །ལྷ་དང་ཕྲོལ་ཞིག་བརླག་པར་བགྱིས། །ཧཱུཾ་ཡཱ་འཇིགས་བྱེད་ཆེན་པོའི་བཀའ་བྱུང་གི ། གདུག་བྱེད་གཤིན་རྗེ་ཕོ་མོ་ལས་ལ་ཡཱ། །འདི་ནས་བྱང་ཕྱོགས་རི་རབ་ལྷུན་པོའི་རྨད། །རྒྱ་མཚོ་ཆེན་པོའི་གཏིང་རུམ་ནས། །དཔག་ཚད་བརྒྱ་ཁྲི་འདས་པའི་འོག །རྒྱ་གྲམ་རླུང་གི་བར་དག་ནས། །ཐོད་པ་ལྕགས་ཀྱི་མུན་ཁང་ནས། །ཡ་མ་རཱ་ཛ་གཤེགས་སུ་གསོལ། །བྱེ་བ་གུང་རིང་སུ་མི་བཟློག །སྲིན་མོ་དུག་ཧྲུལ་གཉིས་མེད་རོལ། །སྐུ་མདོག་མཐིང་ནག་འབར་བ་ལ། །རྒྱུ་མ་མགོ་འཕྲེང་ལུས་ལ་དཀྲིས། །མི་ལྤགས་ཤུན་ཆེན་སྣ་ཚོགས་དང༌། །རོ་རས་ནག་པོ་གོས་སུ་གྱོན། །གཡས་ན་གསོད་བྱེད་རལ་གྲི་འཕྱར། །གཡོན་པ་འཁོར་ལོ་ཞགས་པ་འཕེན། ཁ་ནས་མེ་འབར་ཐོག་སེར་འབེབས། །བདུད་པོ་མི་བཟད་སྐྱེ་འགྲོའི་བདུད། ཁྱོད་ནི་གཤིན་རྗེའི་སྡེ་དཔོན་ཏེ། །བམ་ཆེན་ཕུང་པོའི་གདན་ལ་བཞུགས། །གསོད་བྱེད་དྲེགས་པ་ཀུན་

― TNT06_Page_0859 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་སྤྱི་ལ་གནས། །ཕོ་ཉ་གྱད་ཆེན་ཁྱེད་ཀྱི་དགྱེས་བདེ་མོ། །བདུད་མོ་ཁྲག་གི་རལ་པ་ཅན། །སྲིད་གསུམ་ལྟོ་ན་འཆང་བ་མོ། །ཤ་ཁྲག་སྲོག་དབུགས་བདག་མོ་སྟེ། །ལས་ཀྱི་རླུང་དམར་ཞོན་ནས་རྒྱུག །འདུ་བ་རྣམ་བཞིའི་ནད་གཏོང་མ། །ཕྱག་ན་ཐོད་པ་ཐོགས་ཏེ་ཁྲག་ལ་རོལ། །ད་འདྲའི་བཙུན་མོ་སྲས་དང་བློན་པོ་དང༌། །གཡོག་འཁོར་བྱེ་བ་སྟོང་དང་བཅས། །སྡེ་བརྒྱད་མ་ལུས་བྲན་དུ་འཁོལ། །ཡི་དྭགས་མ་མོ་ཕོ་ཉར་འགྱེད། །ཟས་སུ་དགྲ་བགེགས་སྲོག་དབུགས་ཟ། །ལས་སུ་འགུགས་དང་གསོད་ལ་དགའ། ཁྱོད་ལ་འཕྲིན་ལས་བཅོལ་བ་ནི། །བསྟན་པ་འཇིག་པའི་དགྲ་བོ་འདི། །གང་ན་འདུག་ཀྱང་མྱུར་དུ་ཁུག །ཁྲམ་ལ་ཐོབ་ཅིག་ལྟོང་ལ་རྒྱུས། ཁྲག་མདའ་བུ་ཡུག་ཆར་ལྟར་ཕོབ། །ཐར་མེད་ཁྲི་མོན་ཆེན་པོར་ཆུབ། །མྱོས་པར་གྱིས་ཤིག་སྲོག་དང་ཕྲོལ། །འཆི་བདག་གཤིན་རྗེ་ལས་ལ་ཡཱ། །དགྲ་བགེགས་ཐལ་བ་རྡུལ་དུ་རློགས། །བཅོལ་བའི་འཕྲིན་ལས་གྲུབ་པར་མཛོད། །ཅེས་བསྐུལ། གཞན་ཡང་ཕྱོགས་སྐྱོང་བ་བཅུ་བསྐུལ་བ་སོགས་བྱས་ནས། སྒྲུབ་པའི་སྐབས་ཡིན་ན། འདྲུབ་ཁུང་བསྐྱེད་ཅིང་ལིང་ག་དགུག་གཞུག་སྒྲོལ་ཆོག་ཞལ་དུ་བསྟབ་པ། སླར་ཡང་མཆོད་པ་བསྟོད་དང༌། འཇིགས་མཛད་ཆེན་པོའི་གཡས་པ་ཡིས། །ཞེས་སོགས་སླར་ཡང་ཕོ་ཉ་བསྐུལ་ལོ། །བསྙེན་པའི་སྐབས་དེ་རྣམས་མི་དགོས་སོ། །བསྙེན་སྒྲུབ་གཉིས་ཀ་ལ་མཐར་ཐུན་གཏོར་གཏོར་སྟེགས་ཀྱི་ཁར་སྐྱེལ་བའམ། །ཟོར་དུ་འཕང་ངོ༌། །བསྙེན་པའི་སྐབས་ལས་ཀྱི་གཤིན་རྗེའི་སྔགས་བཟླ་བ་

― TNT06_Page_0860 ―

^{[མ་དཔེ་གཟིགས་ན་འདིར་གནོན།]}

[Full Size]

ངེས་པར་དགོས་པ་མིན་ཡང༌། ཅུང་ཟད་ཙམ་བཟླ་བར་སྤྲོ་ན། གོང་བཟླས་པའི་འཇུག་ཏུའམ་སྐབས་འདིར་བྱ་སྟེ། དེ་ཡང་རྩ་སྔགས་ཀྱི་མཐར་བཏགས་ཏེ་བཟླ་ཞིང༌། དེ་ལ་ཚེ་སྤེལ་སྔགས་བཏགས་ཏེ་ཡང་བཟླའོ། །སླར་ཡང་ཧྲཱྀཿཥྚཱིཿཧཿལ་སོགས་པའི་ཕྱི་མཆོད་དང༌། བདུད་རྩི་ལྔ་ལ་སོགས་པའི་ནང་མཆོད་ཕུལ། ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ཀྱི་ངོ་བོ། དཔལ་ཆེན་པོ་རྡོ་རྗེ་འཇིགས་བྱེད་ཀྱི་ལྷ་ཚོགས་རྣམས་ཀྱིས། བདག་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་སོགས་འདོད་དོན་གསོལ་བ་བཏབ། དེ་ནས་ཡིག་བརྒྱ་བཟོད་གསོལ་བྱ། སྤྲོས་མེད་མཁའ་ལྟར་ཁྱབ་པའི་སྐུ་མཆོག་ནི། །མི་གནས་ཕྱིར་ན་གཤེགས་པ་མི་མངའ་ཡང༌། །སྲིད་ཞུའི་ཚུལ་གྱིས་གཤེགས་སུ་གསོལ་བ་འདིས། །བདག་དང་གཞན་བཅས་སྒྲིབ་པ་བྲལ་གྱུར་ཅིག །ཨོཾ་ཛ་ཡ་ཛ་ཡ་སུ་ཛ་ཡ། བི་ཤྭ་རཱུ་པ་དྷ་རི། གཙྪ་གཙྪ་སྭ་བྷཱ་ཝ་ནཾ། ཀྲི་ཏ་ན་ཏཱེ་ན་ཏ་ཐཱ་གཙྪ་སརྦ་བུདྡྷ་ཤྩ་བི་ས་ཛ་ཡ། མ་མ་ཀརྻཾ་ཀུ་རུ་སྭཱཧཱ། ཞེས་མདུན་བསྐྱེད་དཀྱིལ་འཁོར་གྱི་འདས་མ་འདས་ཀྱི་ལྷ་ཚོགས་གསར་དུ་སྤྱན་དྲངས་པ་རྣམས་གཤེགས་སུ་གསོལ། རང་གི་སྙིང་ག་ནས་འོད་ཟེར་འཕྲོས། ཁམས་གསུམ་སྣོད་བཅུད་ཐམས་ཅད་དཀྱིལ་འཁོར་གྱི་འཁོར་ལོར་གྱུར། ཅེས་པ་ནས། གཞལ་ཡས་ཁང་འོད་དུ་ཞུ་སྟེ། མདུན་བསྐྱེད་དམ་ཚིག་པའི་ལྷ་རྣམས་ལ་ཐིམ། ལྷ་མོ་བརྒྱད་གཙོ་བོའི་ཐུགས་ཀར་ཐིམ། མདུན་བསྐྱེད་གཙོ་བོ་ཡང་རང་གི་ཐུགས་ཀར་ཐིམ། དེ་ཡང་རིམ་གྱིས་འོད་གསལ་དུ་ཞུགས་པ་ནས། དགེ་བ་བསྔོ་བའི་

― TNT06_Page_0861 ―

^{[མ་དཔེ་གཟིགས་ན་འདིར་གནོན།]}

[Full Size]

བར་གོང་བཞིན་ནོ། །འདིའི་སྦྱང་བྱ་སྦྱོང་བྱེད་སྦྱོར་ཚུལ་ནི། གཞན་རྣམས་དཔའ་བོ་གཅིག་པའི་སྐབས་དང་འདྲ། མདུན་བསྐྱེད་དཀྱིལ་འཁོར་ནི་རང་དང་ལས་མཐུན་པའི་གནས་གྲོགས་འཁོར་རྣམས་སྦྱོང་ལ། ཡེ་ཤེས་པ་ལྷན་ཅིག་བསྟིམ་པ་ནི། ཕྱི་དོན་དུ་སྣང་ཡང་རང་སེམས་ཀྱི་རྣམ་འཕྲུལ་ཡིན་པ་མཚོན་ནོ། །གོང་གི་གཏོར་ཆོག་ཉིད་ལ་མདུན་བསྐྱེད་ཀྱི་གཏོར་མ་རྒྱས་པར་འདུས་པས། ཐུན་མཚམས་ཀྱི་གཏོར་མ་ལོགས་པ་མི་དགོས་སོ། །འོན་ཀྱང་འཛིམས་པས་ནི། ཐུན་ནང་དུ་གཏོར་ཆོག་རྒྱས་པ་སྐྱོ་པའི་མན་ངག་ལུགས་དེ་མི་བྱེད་པར། ཐུན་མཚམས་གཏོར་མའི་དུས། ལ་ལི་ཏ་ཆུང་བས་མཛད་པའི་གཏོར་ཆོག་ཞེ་དགུ་མའི་ཆ་ལག་དེ་ཁ་འདིར་སྦྱོར་ལ། ཡང་ཕྱིས་ཀྱི་འགའ་ཞིག །ཨོཾ་ཡ་མ་དུ་ཏཱི་ནཱི་ཧཱུཾ་ཕཊ། ཨོཾ་ཡ་མ་དཾཥྟི་ནཱི་ཧཱུཾ་ཕཊ། ཨོཾ་ཡ་མ་དནྜཱི་ནཱི་ཧཱུཾ་ཕཊ། ཨོཾ་ཡ་མ་ཀཱ་ལ་རཱ་ཏྲི་ཧཱུཾ་ཕཊ། ཨོཾ་ཡ་མ་ཨང་གུ་ཤཱ་ཧཱུཾ་ཕཊ། ཨོཾ་ཡ་མ་ཀཱ་ལ་པཱ་ཤཱ་ཧཱུཾ་ཕཊ། ཨོཾ་ཡ་མཱ་ཤྲིཾ་ཁ་ལཱ་ཧཱུཾ་ཕཊ། ཨོཾ་ཡ་མཱ་ཨ་བེ་ཤཱ་ཧཱུཾ་ཕཊ། ཅེས་པའང་གཏོར་མ་དང་མཆོད་སྔགས་ལ་སྦྱོར་བ་གནང་བ་གཞུང་དང་མན་ངག་གི་ཁུངས་ཡོད་ན་ནི་ལེགས་ཀྱང༌། རྒྱ་བོད་ཀྱི་ཡིག་རྙིང་ན་འདུག་པ་བདག་གིས་ནི་མ་མཐོང་ངོ༌། །འཇམ་དཔལ་ཡེ་ཤེས་ཀྱིས་མཛད་པའི་སྒྲོན་མེ་དྲུག་པ་ཞེས་བྱ་བའི་གཞུང་ཞིག་ཡོད་དེ། བསྙེན་པ། སྒྲུབ་པ། སྤོགས་ཆོག །འཇིག་རྟེན་ལྷ། སྒོམ་བཟླས། རྫོགས་པའི་རིམ་པ་སྟེ་ལེའུ་དྲུག་གོ །དེའི་དྲུག་པ་ནི་རྭ་རྩེ་སེམས་འཛིན་སྟོན་བྱེད་ཡིན་ལ། དང་པོ་ནི། རྭ་གཡས་གནས་པ་སྔོ་དང་དམར། །ཞེས་རྭ་ཞལ་གསལ་བ་ཙམ་དང༌། ལྔ་པ་ན་འཁོར་ཞལ་ཡོད་པས། སློབ་དཔོན་དེ་འཁོར་ཞལ་དང་རྭ་ཞལ་གཉིས་ཀ་གདམ་ཀ་བཞེད་པར་མངོན་ལ། དང་པོ་དང་ལྔ་པ་གཉིས་ཀར་ནས་མངོན་རྟོགས་རེ་སྟོན་པ།

― TNT06_Page_0862 ―

^{[མ་དཔེ་གཟིགས་ན་འདིར་གནོན།]}

[Full Size]

མདུན་དུ་དཀྱིལ་འཁོར་རྒྱས་པ་སྐྱེད་མི་སྐྱེད་ཀྱི་ཁྱད་མ་གཏོགས། ཞི་བ་ཡེ་ཤེས་དང་གུང་འགྲིག་སྟེ། བྲིས་སྐུ་སོགས་ལ་དམིགས་ཤིང༌། བདག་མདུན་ཞལ་སྤྲོད་གྲོགས་པོ་ལྟ་བུའི་ཚུལ་གྱིས་བསྙེན་པ་ཡིན་ནོ། །སྐྱོ་ལུགས་པ་རྣམས་ཀྱི་སྒྲུབ་པའི་ལག་ལེན་རྣམས། འདིའི་ལེའུ་གཉིས་པ་ལ་གཙོ་བོར་བརྟེན་ནས་མཛད་ཅིང༌། རྟོག་བདུན་གྱི་དངོས་བསྟན་ཐུན་མོང་མ་ཡིན་པའི་འཁོར་ལོ། སྙོས་རྭ་སྐྱོ་གསུམ་གྱི་ཕྱག་ལེན་མཛད་པ་འདི་ཡང༌། གཞུང་འདིའི་ལེའུ་གཉིས་པ་ཉིད་ན་གསལ་བར་ཡོད་པས། མཁས་པ་ཆེན་པོར་རློམ་པ་རྣམས་དེ་ལ་ཁུངས་མེད་པས་སེམས་པ་ནི། རྒྱ་གཞུང་ཡིན་ངེས་བསྟན་འགྱུར་དུ་མ་ཆུག་པ་རྣམས་མ་མཐོང་ཞིང༌། རྒྱུད་ཀྱི་ཚིག་དོན་ལ་གོ་བ་མ་རྙེད་པའི་རྣམ་འགྱུར་དུ་སྣང་ལ། འདིའི་ལེའུ་བཞི་པ་འཇིག་རྟེན་པའི་ལྷ་ནི། ལས་གཤིན་གྱི་སྒྲུབ་ཐབས་ཡིན་ཡང༌། སྐྱོ་པ་རྣམས་འདི་ལ་ཕྱག་ལེན་ཆེར་མི་མཛད་ཅིང༌། ཞི་བ་ཡེ་ཤེས་ཀྱི་གཞུང་ན་བསྙེན་པའི་སྐབས་བཀའ་སྡོད་ལ་བསྙེན་པ་མེད། སྐྱོ་ལུགས་ཀྱི་སྒྲུབ་ཐབས་མན་ངག་ལུགས་དཀྱུས་ཉིད་ཡི་དམ་དང་བཀའ་སྡོད་ཆོས་སྐྱོང་སྦགས་སྒྲུབ་ཡིན་པས། འདིའི་ལུགས་ལ་ལས་གཤིན་གྱི་སྒྲུབ་ཐབས་ལོགས་པ་མེད་ཀྱང་ཆ་ལག་མ་ཚང་བར་ནི་མི་འགྱུར་རོ། །ལུགས་འདིའི་སྒྲུབ་པ་དང་ལས་སྦྱོར་རྣམས། རྙིང་མའི་གཤིན་རྗེ་གཤེད་ཁ་ཐུན་ནག་པོ་དང་ཕལ་ཆེར་གུང་མཐུན་ཡང༌། ཕན་ཚུན་བསྲེ་བསླད་ནི་མིན་ཏེ། སེམས་དཔའ་བསྡུས་པ་དང༌། ཞི་དྲག་གི་ལས་བདུན་སོགས་ཉིད་ལས་འབྱུང་བའི་མན་ངག་ལེན་ཡིན་པས་སྐྱོན་མ་ཡིན། ཕན་ཚུན་གཅིག་གི་དཔང་པོ་ཅིག་ཤོས་ཀྱིས་ཐུབ་པའི་ཡོན་ཏན་ཡིན་མོད། དེ་ལྟ་ན་ཡང་དེ་གཉིས་འཕགས་ཡུལ་དུ་སྔོན་བྱུང་བ་མན་ངག་གི་རྩ་བ་གཅིག་ལས་བྱུང་བ་ནི་ཡིན་སྲིད་དོ། །དེས་ན་སྙེམ་མདོ་ཤཱཀྱ་དཔལ་བས་བྱས་པའི་ཞེ་དགུ་མའི་སྒྲུབ་དཀྱིལ་དང༌། ངོར་ལུགས་པ་དང༌། ཕྱིས་

― TNT06_Page_0863 ―

^{[མ་དཔེ་གཟིགས་ན་འདིར་གནོན།]}

[Full Size]

དབུས་ཕྱོགས་སུ་བྱུང་བའི། སེམས་དཔའ་བསྡུས་པའི་རྗེས་འབྲང་གི་སྒྲུབ་ཐབས་ཅི་རིགས་པ་བྱུང་བ་སོགས། སྐྱོ་པའི་ལུགས་དང་མི་མཐུན་པ་ལ་སྐྱོ་ལུགས་སུ་ཁ་གཡར་ནས། ཁུངས་ཆེ་ཆེ་ལྟར་སྒྲོག་ཅིང་ང་ཕོ་འདོན་པའི་རྫུས་མ་རྣམས་སུན་དབྱུང་བའི་ཕྱིར། སྐྱོ་ལུགས་ཀྱི་སྒྲུབ་ཐབས་ཆོག་ཁྲིགས་ཅུང་ཟད་ཞིབ་ཅིང་གསལ་བར་བརྗོད་པ་ཡིན་གྱི། མན་ངག་ནི་ཀུན་གྱི་སྤྱོད་ཡུལ་མ་ཡིན་པའི་ཕྱིར་འདིར་མ་བྲིས་སོ། །ལུགས་འདིའི་དབང་ཆོག་ནི་བླ་མ་གོང་མ་རྣམས་ཀྱིས་མང་དུ་མཛད་ཡོད་ཅིང༌། དེ་ཡང་ཕལ་ཆེར་དོན་ཡོད་རྡོ་རྗེའི་དཀྱིལ་ཆོག་ལ་བརྟེན་པ་ཡིན་ནོ།། །།༈ ད་ནི་ཇོ་བོ་ནཱ་རོ་པ་དང་ཇོ་བོ་ན་རི་པའི་མན་ངག་གུང་སྤྲོས་ཏེ། རྟོག་བདུན་གྱི་དོན་བཤད་པ་ལས་བྱུང་བ་རྒྱུད་རྐྱང་གི་ལུགས། འཇིགས་བྱེད་མལ་ལུགས་སུ་གྲགས་པའི་སྒྲུབ་ཐབས་བཤད་པར་བྱ་ན། འདིའི་ཆིངས་ནི་ཤྲཱི་བྷ་དྲ་དང་བག་ཙམ་མཐུན་མོད་དེའི་ལུགས་ནི་མིན་ནོ། །དེ་ཡང་སྤྱིར་ཞལ་དྲུག་པའི་རྒྱུད་ལ་ནི། བོད་སྐད་ཉིད་ལ་ཡིག་འབྲུ་འཆུགས་པའི་ཚིག་ཟུར་འདྲ་མིན་ཕྲན་ཚེགས་མ་གཏོགས་པ་འགྱུར་མི་གཅིག་པ་མེད་ལ། རོང་ཟོམ་རྭ་སྐྱོ་མལ་སྙོས་སོགས་ལུགས་སོ་སོའི་རྗེས་འབྲང་རྣམས། ལོ་ཙཱ་བ་དེ་དང་དེས་བསྒྱུར་རོ་སྙམ་པ་འགའ་ཞིག་ལ་ཡོད་སྲིད་ནའང༌། རང་རང་གི་འདོད་པ་འཇོ་བ་ཙམ་དུ་ཟད། དེས་ན་འདི་ནི་སྔ་དར་གྱི་དུས་སམ། སྔ་དང་ཕྱི་དར་གྱི་བར་ལ་འགྱུར་བ་ཞིག་ཡིན་ཞེས་འགའ་ཞིག་འཆད་པ་དོན་ལ་གནས་པར་མཐོང༌། དེ་འདྲའི་རྒྱུད་གཞན་ཡང་ཡོད་དེ། ཟླ་གསང་ཐིག་ལེ་དང་རྡོ་རྗེ་བདུད་རྩིའི་རྒྱུད་ད་ལྟ་ཡོད་པ་འདི་ལ་སོགས་པའོ། །སྔ་དར་དུས་རྒྱལ་བློན་ལ་གསངས་ཏེ་བསྒྱུར་བ་འགའ་ཞིག་ཆད་པས་འཇིགས་ཏེ། ལོ་པཎ་གྱི་མིང་འགྱུར་བྱང་མ་སྨོས་པ་

― TNT06_Page_0864 ―

^{[མ་དཔེ་གཟིགས་ན་འདིར་གནོན།]}

[Full Size]

དང༌། བར་མཚམས་སུ་བསྒྱུར་བ་འགའ་ཞིག་སྔ་དར་བཞིན་དུ་བཀས་བཅད་ཀྱི་སྒྲིགས་མེད་ཅིང༌། ཕྱི་དར་བཞིན་དུ་གཞན་ལ་མིག་ལྟོས་མ་བཅོལ་བས། བསྒྱུར་ངོས་ཤེས་པ་ལ་འགྱུར་བྱང་མེད་པ་དང༌། བརྩམས་རྒྱུད་ལ་འགྱུར་བྱང་བྱས་པ་སོགས་ངེས་པ་མེད་པའོ། །འདིར་གདོང་དྲུག་གི་རྒྱུད་ལ། དཔེ་རྙིང་ཡིད་ཆེས་པའི་འགྱུར་བྱང་མེད་ཅིང༌། འདི་ལ་ཉན་བཤད་བྱེད་པའི་ལོ་ཙཱ་བ་ཐམས་ཅད་ཀྱིས་ཀྱང་འགྱུར་རྙིང་གཅིག་ཁོ་ནའི་སྟེང་ནས་འཆད་དོ། །ནག་འཇིགས་ཀྱི་རྒྱུད་གཉིས་ལ་འགྱུར་མི་གཅིག་པ་མང་སྟེ། མལ་ལུགས་པ་དང༌། དེའི་རྗེས་འབྲངས་ལུགས་རྙིང་པ་ནི། ནག་པོའི་རྒྱུད་ནག་ཚོ་འགྱུར་ལ་ཀློག་སྐྱས་བཅོས་པའི་སྟེང་ནས་འཆད། རྟོག་བདུན་ལ་ཀློག་སྐྱའི་འགྱུར་མེད་པ་ལགས་ཏེ་མཆི། ཡོད་ན་མལ་འགྱུར་ཡང་དེ་ལ་འགྱུར་བཅོས་ཡོང་ཐང་བ་ལ། མལ་ལོ་ཉིད་ཀྱི་འགྱུར་བྱང་ཡོད་པ་འདི། པུ་རངས་པ་ཁྱུང་པོ་ཆོས་བརྩོན་གྱི་འགྱུར་ལ་མལ་ལོས་བཅོས་པ་ཡིན་ཞེས་མཆན་བུ་རྙིང་པ་ལས་འབྱུང་ངོ༌། །མལ་གྱི་ཀྱང་ཕམ་ཐིང་པ་ཆེན་པོ་ནས་བརྒྱུད་པ། དང་པོར་ཀློག་སྐྱ་དང༌། ཕྱིས་ཕམ་ཐིང་པ་ཕྱི་མ་ལ་ཡང་གསན་པར་གྲགས་ལ། ན་རི་པ་ནས་བརྒྱུད་པ་ནི་ཧ་དུ་དཀར་པོར་གྲགས་པའི་བལ་པོའི་པཎྜི་ཏ་བ་རེནྡྲ་རུ་ཙེ་ལ་ཡང་ཞུས་སོ། །མལ་ལོ་ལ་ས་སྐྱ་བླ་ཆེན་གྱིས་གསན་ཏེ། བླ་ཆེན་གྱིས་རྟོག་བདུན་ལ་མཆན་བུ་དང༌། དཀའ་འགྲེལ་དུ་གྲགས་པའི་སྤྱི་དོན་དེ་མཛད་ཅིང༌། སྲས་སྐུ་མཆེད་ཀྱིས་དཀའ་འགྲེལ་ལ་ཆན་བུ་དང༌། བསྟོད་པ་སོགས་མཛད། ནག་པོ་ལ་རྗེ་བཙུན་ཆེན་པོའི་སྒྲུབ་ཐབས་ཡོད་པ་འདི་རྒྱུད་དོན་ལ་ཤིན་ཏུ་འབྱོར་བའི་ཡང་དག་པ་ཞིག་སྣང༌། རྒྱ་གཞུང་དཔལ་འཛིན་གྱི་སྒྲུབ་ཐབས་ཚིག་འབྲུ་ལེགས་ཤིང་བྱིན་རླབས་ལོས་ཀྱང་ཆེ། རྒྱུད་དོན་ལ་འབྱོར་ཚབས་དེ་བས་ཀྱང་འདི་ངོས་ཆེ་ན་ཡང་གྲགས་ནི་ཆུང་ངོ༌། །གཞན་མཛད་བྱང་མེད་པའི་ནག་པོའི་

― TNT06_Page_0865 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱུད་ཀྱི་མཆན་བུ་དང༌། ས་བཅད་དང༌། ཡིག་སྣ་ཐུང་ཐུང་འགའ་རེ་དང༌། དངོས་ནག་པོའི་དཀྱིལ་ཆོག་ཡིན་པ་ལ། རྡོ་རྗེ་འཇིགས་མཛད་ལ་ཡང་སྦྱོར་རྒྱུའི་དཀྱིལ་ཆོག་གཉིས་ཡོད། གཅིག་ནི་ནཱ་རོ་པ་ནས་ཕམ་ཐང་པ་ལ་བརྒྱུད་པའི་ལུགས་ཏེ། དཀྱིལ་འཁོར་བསྒྲུབ་པའི་སྐབས་སུ་འདོན་པ་སྤོས་པ་མ་གཏོགས། མལ་ལུགས་ཀྱི་འཁོར་ལོ་སྡོམ་པའི་དཀྱིལ་ཆོག་ཇི་ལྟ་བ་བཞིན། གཅིག་ཤོས་ནི་སློབ་དཔོན་ཡེ་ཤེས་ཞབས་ཀྱི་མན་ངག་ཡིན་གསུང་སྟེ། ན་རི་པའི་ལུགས་ཡིན། འདི་ལ་རྡོ་རྗེའི་དབང་གི་དོད་དུ་རལ་གྲིའི་དབང་བསྐུར་བ་སོགས་སྤྱི་དང་མི་འདྲ་བའི་ཐུན་མོང་མ་ཡིན་པའི་ཁྱད་ཆོས་མང་དུ་ཡོད་པའི་དབང་ཆོག་ངོ་མཚར་ཅན་ཡིད་འཕྲོག་པ་ཅིག་སྣང༌། དབང་ཆོག་དེ་གཉིས་མཛད་བྱང་མེད་ཅིང༌། ས་ཆེན་གྱི་གསུང་འབུམ་ནང་དུ་མ་ཆུག་ཀྱང༌། མཛད་པ་པོ་བླ་ཆེན་རང་ཡིན་པར་གྲགས། ལུགས་འདི་ནི་རྒྱ་བལ་གྱི་པཎྜི་ཏའི་ངག་རྒྱུན་གཙང་མ། བསྲེ་བསླད་ཆུང་ཞིང་གམ་གཙང་བ་ལེགས་པོ་ཅིག་ཡོད་ཅིང༌། སྒྲུབ་དཀྱིལ་དེ་རྣམས་ཤིན་ཏུ་ཡ་མཚན་ཆེ་བར་འདུག །སྤྱི་དོན་དང་ཚིག་དོན་གྱི་བཤད་པ་ནི་རྒྱ་ཆེན་པོ་རང་མེད་ཅིང༌། གདམས་ངག་རྣམ་གྲངས་མང་པོའང་མི་སྣང་ངོ༌། །འོན་ཀྱང་བཤད་པའི་སྐབས་རྒྱུད་ཉིད་མངོན་རྟོགས་སུ་བསླང་བའམ། རྒྱུད་ཀྱི་ཕུར་བུ་འདོན་ཚུལ་གྱི་འཆད་ལུགས་གནད་ཆེ་རབ་ཡང་ཡོད་དོ། །ལས་མཁན་སྨྱོན་པ་འཇིགས་བྱེད་ཁྲའི་གདོང་ཅན་སོགས་མཁའ་འགྲོ་མ་བཞི་སྐོར་གྱི་བསྙེན་སྒྲུབ་ལས་གསུམ་གྱི་གཞུང་ན་རི་པས་མཛད་པ་དང༌། དེའི་གསལ་བྱེད་བླ་ཆེན་གྱིས་མཛད་པ་ཅིག་སྔོན་ཡོད་ངེས་པར་འདུག་ནའང་ཁོ་བོས་མ་མཐོང༌། དེང་སང་དེ་མཐོང་ཐོས་སྐད་པ་ཡོད་ཡོད་མི་འདྲའོ། །གདོང་དྲུག་གི་རྒྱུད་ལའང༌། ལུགས་འདི་ལ་ས་བཅད་དང༌། མཆན་བུ་ཐན་ཐུན་ཙམ་ལས་ཡིག་སྣ་དང་སྒྲུབ་ཐབས་རྙིང་

― TNT06_Page_0866 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ཡང་མ་མཐོང་ངོ༌། །དེ་དག་ལ་གཞན་ཡི་གེ་རྙིང་པ་དང༌། བར་སྐབས་སུ་བྱུང་བའི་ཡི་གེ་ནི་མང་པོ་མེད་ལ། ཕྱིས་ངོར་ལུགས་པ་རྣམས་ཀྱིས་བརྩམས་པ་འགའ་རེ་ཡོད་ནའང༌། གཞན་ཕལ་ཆེར་ཅལ་ཅོལ་དུ་སྣང༌། སྐྱེད་ལྷས་པ་བདག་པོ་བློ་གྲོས་པས་བརྩམས་པ་ཞིག་ཡིག་རྙིང་དང་མཐུན་པས་ཅུང་ཟད་ལེགས་པ་ཙམ་དུ་གོའོ། །ཡང་ལུགས་འདི་སྐྱོང་བར་ཁས་མཆེ་བའི་ངོར་པ་རྣམས་འདི་སྐད་ཅེས་སྨྲ་སྟེ། མལ་ལུགས་འདི་ལ་དགྲ་ནག་གི་རྒྱུད་ལ། དཔལ་འཛིན་གྱིས་འགྲེལ་པ་བཏབ་པའི་བཤད་པ་རྒྱས་པ་ཡོད་པ་དང༌། སྒྲུབ་དཀྱིལ་ཡང་དཔལ་འཛིན་གྱི་རྗེས་སུ་འབྲང་ཟེར་བ་དང༌། རྒྱུ་མཚན་བླ་ཆེན་གྱི་དཀའ་འགྲེལ་ལས། དཀྱིལ་ཆོག་ནི་ནག་པོའི་དཀྱིལ་ཆོག་ཏུ་ཤེས་པར་བྱ་ཞེས་ཁ་འཕངས་པའི་ནག་པོའི་དཀྱིལ་ཆོག་ནི། དཔལ་འཛིན་གྱི་དགྲ་ནག་དཀྱིལ་ཆོག་ཡིན་པས་སོ། །ཟེར་བ་ནི་ཚོད་དཔོགས་ཙམ་མ་གཏོགས་ཤིན་ཏུ་བླུན་ཏེ། དགྲ་ནག་གི་སྒྲུབ་ཐབས་དཔལ་འཛིན་གྱི་ལུགས་དང༌། ལུགས་འདི་མི་གཅིག་པར་སྒྲུབ་ཐབས་རྗེ་བཙུན་ཆེན་པོས་མཛད་པ་དེ་མཐོང་བ་ཙམ་གྱིས་ཀྱང་གོ་ནུས་ན། སྒྲུབ་ཐབས་དེ་གཞག་འབྲེལ་ཆུག་པོ་ཚར་གཅིག་ཙམ་ཡང་མ་སྒྲགས་པའི་སྐྱོན་དུ་འདུག་ཅིང༌། དབང་ཆོག་དཔལ་འཛིན་གྱི་ལུགས་ཡིན་ཟེར་བ་ནི། འདིའི་རང་ལུགས་ལ་དབང་ཆོག་ཡོད་པ་ཙམ་ཡང་མ་ཚོར་བར། རྫུན་གཏམ་འབའ་ཞིག་སྨྲས་པར་འདུག་ལ། སྤྱིར་དཔལ་འཛིན་གྱི་ལུགས་མལ་དང་བླ་ཆེན་གྱིས་མ་གསན་ནོ་མི་མཁྱེན་ནོ་ཟེར་བ་ཏ་མ་ཡིན་མོད། ལག་ལེན་དུ་འདེབས་ཤིང་བཤད་པ་མཛད་པའི་ལུགས་དེ་ནི། རྒྱུད་རྐྱང་མན་ངག་གི་ལུགས་ཡིན་ཏེ། དཔལ་འཛིན་གྱི་གཞུང་འགྲེལ་ལ་མི་མཛད་དོ། །ལུགས་འདིའི་དགྲ་ནག་གི་མཆན་བུ་དང་ཡིག་སྣ་རྣམས་

― TNT06_Page_0867 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང༌། དཔལ་འཛིན་གྱི་འགྲེལ་བ་དང་བཤད་སྒྲོས་མི་གཅིག་ཅིང༌། འཇིགས་མཛད་ཀྱི་སྒྲུབ་ཐབས་དཔལ་འཛིན་གྱིས་མཛད་པ་དང་ཡང་ལུགས་འདི་ཤིན་ཏུ་མི་འདྲའོ། །དགྲ་ནག་གི་རྒྱུད་ལ་དཔལ་འཛིན་གྱིས་འགྲེལ་པ་བཏབ་པའི་བཤད་པ་རྒྱས་པོ་ཡོད་ཟེར་བའང་ཤབ་ཤོབ་ཁོ་ན་སྟེ། འགྲེལ་པ་དེ་ཁོ་ནས་འཆད་པ་ཡིན་ན། བཤད་པ་རྒྱས་རྒྱུ་ཅང་མེད་ལ། མཐའ་ཆོད་དང་ཁ་སྐོང་རྒྱས་པོ་ཡོད་ན་ནི། དེ་འདྲ་བའི་ཡི་གེ་དེ་ཡང་ངོས་འཛིན་དགོས་ན། དེ་འདྲ་ཅི་ཡང་མེད་པའི་ཕྱིར། སྔོན་བཤད་པ་རྒྱས་པ་བྱུང་བ། ཕྱིས་ཁྱེད་རྣམས་ཀྱི་མངོན་ཤེས་ཀྱི་མཐོང་བ་ཡིན་ལ་རག །མདོར་ན་དབང་ཆོག་གང་ཡིན་ཙམ་ཡང་ཆ་རྒྱུས་མེད་བཞིན་དུ། གཞན་ལས་ཆེས་མཆོག་ཏུ་གྱུར་པའི་རྣམ་གཞག་ཡོད་སྐད་ཤེས་སྐད་བྱེད་ཅིང་རྩལ་དུ་ཐོན་ཐོན་སྐད་དུ་རྒྱ་ཆེར་སྨྲ་བ་ནི། སློབ་མ་རྣམས་བསླུ་བའི་ཐབས་འབའ་ཞིག་དང༌། མཁས་པ་རྣམས་ཞེ་ནས་ཁྲེལ་བའི་རྒྱུ་ཁོ་ནའོ། །དེ་དག་ལས་ཁ་ཅིག །ལུགས་འདིའི་སྒྲུབ་ཐབས་རྩོམ་པ་ན། གཞལ་ཡས་ཁང་གི་དབུས་སུ་གཙོ་རྐྱང་ཁོ་ན་བྱེད་པ་ནི། ལེའུ་བཞི་པའི་སྤྱི་དོན་གྱི་ཐད་ཁོ་ན་ལ་གདོང་འདོད་བྱས་པར་ཟད། ཁ་ཅིག་གིས་རོ་ལངས་གྲི་ཐོད་འཛིན་པར་བྱས། འགའ་ཞིག་ལྷ་དགུ་བསྒོམ་ཀྱང་དཀྱིལ་འཁོར་ལ་ཕྱག་མཚན་མི་འགོད་པ་དང༌། མདུན་བསྐྱེད་ལ་འགོད་བདག་བསྐྱེད་ལ་མི་འགོད་པ་སོགས་ནི། སྤྱི་དོན་དང་རྒྱུད་ཀྱི་མཆན་བུ་ཙམ་ཡང་སྡོམ་མ་ཤེས་པ་དང༌། གོ་རཾ་བསོད་སེང་བ་སོགས་ཁ་ཅིག་དཀྱིལ་ཆོག་དཔལ་འཛིན་གྱི་ལུགས་ལ་བརྟེན་ནས། རིག་པའི་དབང་ལྔ་ལ་ཞལ་དགུ་པ་རིགས་ལྔ་བསྒོམ་པ་སོགས་ནི་རང་བཟོ་འབའ་ཞིག་ཡིན་ཏེ། དེ་འདྲ་དེ་དཔལ་འཛིན་གྱི་ལུགས་དང་ཡང་འགལ། འདིའི་རང་ལུགས་ཀྱི་དཀྱིལ་ཆོག་དང་མི་མཐུན། དཀའ་འགྲེལ་དང་མཆན་བུ་སོགས་ལས་ཀྱང་མ་བཤད།

― TNT06_Page_0868 ―

^{[མ་དཔེ་གཟིགས་ན་འདིར་གནོན།]}

[Full Size]

ལུགས་གཞན་གྱི་དཀྱིལ་ཆོག་ཚད་ལྡན་གང་ལའང་མེད་པའི་རྫུན་ཆོས་ཡིན་ལ། ད་ལྟ་ན་ཡང་འདི་ནི་བླ་ཆེན་གྱི་དཀའ་འགྲེལ་ན། ལས་ཚོགས་ཀྱི་སྐབས། རྩ་ཞལ་གྱི་ཁ་དོག་བསྒྱུར་བའི་འཇིགས་མཛད་རིགས་ལྔ་ཞིག་བཤད་པ། དེ་ཙམ་ཞིག་མཐོང་ནས་འདི་རིག་དབང་སྦྱར་ན་མཚར་པོ་ཞིག་འོང་ངོ་སྙམ་དྲན་རྐྱེན་བྱས་པའོ། །བདག་བསྐྱེད་ལ་འཁོར་མི་སྐྱེད་པ་དང༌། བདག་མདུན་གྱི་དཀྱིལ་འཁོར་ལ་ཕྱག་མཚན་མི་འགོད་པ་ནི། བླ་ཆེན་གྱི་དཀའ་འགྲེལ་དང་འགལ་ཏེ་དེ་ལས་འདི་སྐད་ཅེས། རྟོག་པ་བཞི་པའི་སྒྲུབ་ཐབས་ལྟར། སྟོང་པ་ནས་དམ་ཚིག་སེམས་དཔའི་བར་དུ་བསྐྱེད། ཡེ་ཤེས་པ་གཞུག །ཅེས་མདུན་བསྐྱེད་དཀྱིལ་འཁོར་དངོས་གཞི་སྒྲུབ་པའི་སྐབས་སུ་བཤད་པས། མདུན་བསྐྱེད་ཀྱི་དཀྱིལ་འཁོར་དང༌། བདག་བསྐྱེད་ཀྱི་དཀྱིལ་འཁོར་རྒྱས་བསྡུས་རྣམ་པ་ལ་ཁྱད་མེད་པར་བསྟན། དཀྱིལ་འཁོར་དེ་ཡང་རྟོག་པ་དང་པོའི་དཀྱིལ་འཁོར་གྱི་སྐབས་ཡིན། དེ་ལས་ཕྱག་མཚན་དང་རོ་ལངས་འགོད་པར་གསུངས་པས་སོ། །བོད་འགའ་ཞིག་ཕྱག་མཚན་འགོད་པ་དང་རོ་ལངས་འགོད་པ་སོ་སོར་བྱེད་ཀྱང༌། དེ་འདྲ་དེ་སྤྱིར་ཡང་རྒྱུད་ཀྱི་ཚིག་དོན་དང་འགལ་བས་ཤིན་ཏུ་མི་འཐད། སྒོས་སུ་མལ་ལུགས་པ་རྣམས་མི་འདོད་དེ། རྒྱུད་འདིར་དཀྱིལ་འཁོར་གཅིག་ཁོ་ན་བསྟན་པ་ཡིན་པར་བཞེད་པས་པས་སོ། །དེས་ན་ལུགས་འདི་ལ་རྟོག་པ་དང་པོ་དང༌། བཞི་པ་བསྲེས་པས་བདག་མདུན་གང་ལ་ཡང་ལྷ་དགུའི་དཀྱིལ་འཁོར་ཕྱག་མཚན་གྱིས་བརྒྱན་པ་དེ་ཁོ་ན་ཡིན་པར་ཤེས་སོ། །རོ་ལངས་གྲི་ཐོད་འཛིན་པར་བསྒོམ་པ་ནི་རྡོ་རྗེ་གྲུབ་པ་སོགས་ཀྱིས་བཤད་པས་སྤྱིར་བཟང་ཞིང་འཐད་ནའང་བླ་ཆེན་གྱི་མཆན་བུ་དང་དངོས་སུ་འགལ་བས། ས་ལུགས་ནི་ཡེ་མ་ཡིན་ནོ། །དགྲ་ནག་དཔལ་འཛིན་གྱི་ལུགས་བཞིན་བྱེད་ཟེར་བའི་རྒྱུ་

― TNT06_Page_0869 ―

^{[མ་དཔེ་གཟིགས་ན་འདིར་གནོན།]}

[Full Size]

ནི། མལ་ལུགས་ཀྱི་རང་བཞིན་ནི་ཡེ་མ་གོ །སྤྱིར་དཔལ་འཛིན་གྲགས་ཆེ། སྒོས་སུ་བུ་སྟོན་ཆེན་པོ་ཙམ་ནས་གཟུང༌། ཕྱིས་ཀྱི་གསར་མའི་གཤིན་རྗེ་གཤེད་པ་ཕལ་ཆེར་ཞིགདཔལ་འཛིན་ཁོ་ན་ལ། ཡིད་བརྟོན་པར་བྱས་པས། དེ་ཐོས་ནས་ལུགས་དེ་གཞན་པས་རྔམས་ཆེ་བ་ཞིག་ཡོད་པར་འདུག་སྙམ་ནས། མཐོ་འགྲོགས་ཀྱི་ལུགས་སུ་བྱས་ཏེ་བརྡོལ་ཐབས་སུ་སྨྲས་པ་ཁོ་ནར་ཟད་དོ། །དེ་དག་ནི་ལུགས་འདི་ལ་བསྙད་ནས་རྫུན་གྱིས་གཞན་མགོ་བསྐོར་བ་རྣམས་ཀྱི་འཚང་ཟུར་ཙམ་སྨོས་པའོ། །ད་ནི་དཀྱུས་ཀྱི་དོན་ལ་འཇུག་པར་བྱ་སྟེ། རྒྱུད་པ་འདི་པའི་ལུགས་ཀྱི་དཀྱིལ་འཁོར་ཀུན་ལ་སྒྲུབ་མཆོད་དམ་མཎྜལ་མཆོད་ཆོག་ཡོད་ན་མ་གཏོགས། མངོན་རྟོགས་གྱི་འགོར་སྔོན་འགྲོ་གཏོར་མ་མི་མཛད་པ་རང་ཤས་ཆེ། བྲིས་སྐུའི་མདུན་དུ་ཕྱི་མཆོད་ནང་མཆོད་གཏོར་མ་གཉིས་བཤམས། སྤྲོ་ན་སྨྱོན་པ་འཇིགས་བྱེད་ཀྱི་གཏོར་མ་ཤ་ཁྲག་གིས་བརྒྱན་པའང་ཟུར་དུ་བཤམས། ཨོཾ་ཡ་མཱན་ཏ་ཀ་ཧཱུཾ་ཕཊ། རང་སྐད་ཅིག་གིས་རྡོ་རྗེ་འཇིགས་བྱེད་དུ་གྱུར། མཆོད་པ་རྣམས་རྩ་སྔགས་ཀྱིས་བསང་བར་བཞེད་མོད་ཀྱི། དེ་ལག་ལེན་མི་བདེ་བས། འདམ་ཁ་ལ་ཡོད་པ་ལྟར། ཧྲཱྀཿཥྚཱིཿས་བསངས། དོན་ལའང་བསང་བ་ཐམས་ཅད་རྩ་སྔགས་ཀྱིས་བྱེད་པ་ཧ་ཅང་ཐལ་ཆེས་སོ། །སྭ་བྷཱ་ཝས་སྦྱངས། སྟོང་པའི་ངང་ལས་ཨ་བདུན་ལས་ཐོད་པའི་སྣོད་བདུན་གྱི་ནང་དུ་ཧཱུཾ་བདུན་ལས། ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས་དང༌། གཞན་ཡང་མཆོད་རྫས་རྣམས་དྭངས་ཤིང་ཐོགས་པ་མེད་པ། ཡེ་ཤེས་ཀྱི་བདུད་རྩིའི་རང་བཞིན་གྱིས་གང་བར་གྱུར། ཨོཾ་བཛྲ་ཨརྒྷཾ་ཨཱཿཧཱུཾ། ཨོཾ་བཛྲ་པཱདྱཾ་ཨཱཿཧཱུཾ། ཨོཾ་བཛྲ་པུཥྤེ་ཨཱཿཧཱུཾ། དྷཱུ་པེ། ཨ་ལོ་

― TNT06_Page_0870 ―

^{[མ་དཔེ་གཟིགས་ན་འདིར་གནོན།]}

[Full Size]

ཀེ ། གནྡྷེ། ནཻ་ཝི་ཏེ། ཤཔྟ་ཨཱཿཧཱུཾ། ཨོཾ་བཛྲ་གཎྜེ་ར་ཎེ་ཊ་སོགས་བརྗོད། དེ་རྗེས་སྐྱབས་འགྲོ་སེམས་བསྐྱེད་ཡིག་བརྒྱ་རྣམས་བྱ། ནང་མཆོད་གཏོར་མ་ལྟར་བྱིན་གྱིས་བརླབས། ཨོཾ་ཨཱཿཧཱུཾ། ཞེས་གཏོར་མ་ལ་གཏོར་ཏེ་སྲུང་བ་བྱ། ཡང་འབྲུ་གསུམ་གྱིས་བདུད་རྩི་མྱང༌། དེ་ནས་སུམྦྷ་ལན་གཉིས་ཀྱིས་ཚམ་རྔམ་དང༌། ཨོཾ་མེ་དྷི་ནི་བཛྲི་བྷ་ཝ་བནྡྷ་ཧཱུཾ་སོགས། སྔགས་དྲུག་གིས་སྲུང་འཁོར་དགོད། ཨོཾ་གྷ་གྷ་སོགས་དང༌། མུད་ག་ར་སོགས་ཀྱིས་ཕུར་གདབ་བྱ། བསྲུང་འཁོར་འདི་དཀའ་འགྲེལ་དང་མཆན་བུ་ན་མེད་ཀྱང༌། འདི་ཉིད་ཀྱི་དཀྱིལ་མཆོག་ན་ཡོད་ཅིང༌། འོག་ཏུ་སྟོང་པར་སྦྱངས་པའི་དེ་མ་ཐག་ཏུ། སྲུང་འཁོར་བསྒོམ་པ་མེད་པའི་ཕྱིར། འདི་མེད་ན་ལུགས་འདི་ལ་སྲུང་འཁོར་ཆད་པར་འགྱུར་བས་ངེས་པར་དགོས་སོ། །ཕྱིས་རྟེན་བརྟེན་པ་དུས་གཅིག་ཏུ་བསྐྱེད་པའི་སྐབས་འཁོར་ཡོད་སྙམ་ན་དེ་ཙམ་གྱིས་གོ་མི་ཆོད་དེ། རྒྱུའི་འཇམ་དཔལ་སོགས་དངོས་གཞི་སྐྱེད་ཆོག་གལ་ཆེན་མང་པོ་ལ་མ་ཁྱབ་པའི་ཕྱིར་རོ། །ཚོགས་ཞིང་གི་སྐབས་འདིར་ཁྲོ་བོའི་ཐུགས་ཀར་ཧཱུཾ་དང༌། ཞི་བའི་ཐུགས་ཀར་དྷཱིཿབསྒོམ་པ་འདམ་ཁ་ཡིན་ཡང༌། ལག་ལེན་ཁྲོ་བོ་ལ་མཛད། སྐད་ཅིག་གིས་རང་རྡོ་རྗེ་འཇིགས་བྱེད་ཅེས་པ་ནས། ཕྱག་འཚལ་འདུད་ཀྱི་བར་སྒྲུབ་ཐབས་སྙིང་པོ་དང་འདྲ། ཚིག་ཟུར་ཕྲན་བུ་ཙམ་ལ་ངེས་པ་མེད་དེ། གང་ལྟར་བྱས་ཀྱང་འདྲ་བས་སོ། །ཨོཾ་སརྦ་ཏ་ཐཱ་ག་ཏ་ཤྲཱི་བཛྲ་བྷཻ་ར་ཝ་ཨརྒྷཾ་པྲ་ཏཱིཙྪ་སྭཱཧཱ། དེ་བཞིན་དུ་པཱདྱཾ། ཨོཾ་སརྦ་ཏ་ཐཱ་ག་ཏ་ཤྲཱི་བཛྲ་བྷཻ་ར་ཝ་བཛྲ་པུཥྤེ་ཨཱཿཧཱུཾ་སྭཱཧཱ། དེ་བཞིན་དུ་ནཻ་ཝི་ཏེའི་བར་དང༌། རོལ་མོ་ལ་ཡང་སྦྱར། བདུད་བཞི་པོ་ནི་ནས། ལྷ་ཚོགས་རྣམས་ལ་འདུད། །ཅེས་བསྟོད། ཨོཾ་སརྦ་བིད་པཱུ་ར་ནས། ཧོའི་བར་བརྗོད། བདག་གི་སྐྱེ་བ་ཐོགས་མ་མེད་པ་ནས། སྡིག་པ་མི་དགེ་བའི་ལས་བགྱིས་པ་དང༌།

― TNT06_Page_0871 ―

^{[མ་དཔེ་གཟིགས་ན་འདིར་གནོན།]}

[Full Size]

བགྱིད་དུ་སྩལ་བ་དང༌། བགྱིད་པ་ལ་རྗེས་སུ་ཡིད་རང་བ་དེ་དག་སོ་སོར་བཤགས་པར་བགྱིའོ། །བླ་མ་དང་དཔལ་རྡོ་རྗེ་འཇིགས་བྱེད་འཁོར་དང་བཅས་པ་ལ་སྐྱབས་སུ་མཆིའོ། །ཐུན་མོང་དང་ཁྱད་པར་གྱི་དམ་ཚིག་དང་སྡོམ་པ་རྣམས་བླང་ཞིང་བསྐྱང་བར་བགྱིའོ། །སངས་རྒྱས་དང༌། བྱང་ཆུབ་སེམས་དཔའ་དང༌། རང་སངས་རྒྱས་དང༌། ཉན་ཐོས་དང༌། སོ་སོ་སྐྱེ་བོའི་དགེ་བའི་རྩ་བ་ལ་རྗེས་སུ་ཡི་རང་བར་བགྱིའོ། །བདག་གིས་སེམས་ཅན་འཁོར་བའི་རྒྱ་མཚོ་ལས། མ་རྒལ་བ་རྣམས་སྒྲལ་བར་བགྱི། །མ་གྲོལ་བ་རྣམས་གྲོལ་བར་བགྱི། དབུགས་མ་ཕྱུང་བ་རྣམས་དབུགས་དབྱུང་བར་བགྱི། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟླ་བར་བགྱིའོ། །ཆོས་ཀྱི་འཁོར་ལོ་བསྐོར་བར་བསྐུལ་བར་བགྱིའོ། །འཁོར་བ་མ་སྟོངས་ཀྱི་བར་དུ་མྱ་ངན་ལས་མི་འདའ་བར་གསོལ་བར་བགྱིའོ། །བདག་གིས་དཔལ་རྡོ་རྗེ་འཇིགས་བྱེད་ཀྱི་བཟླས་བསྒོམ་གཉིས་ལ་གནས་པར་བྱའོ། །བདག་དང་སེམས་ཅན་ཐམས་ཅད་ཀྱིས་དཔལ་རྡོ་རྗེ་འཇིགས་བྱེད་ཀྱི་གོ་འཕང་ཐོབ་པར་གྱུར་ཅིག །ཅེས་སོ། །དེ་ལྟར་ན། བཤགས་པ་སྐྱབས་འགྲོ་དམ་ཚིག་ཡི་རང་བཞི། །སྨོན་སེམས་བསྐུལ་དང་གསོལ་འདེབས་འཇུག་སེམས་བཞི། །འཇུག་བསྔོ་བ་སྟེ་ཡན་ལག་དགུ་ཡིན་ནོ། །དེ་རྗེས་གནང་བ་མནོས་པ་ནི། དེ་ལྟར་སྒྲུབ་པ་ནི་ལམ་ལེགས་པ་ལ་གནས་པ་ཡིན་ནོ་ཞེས་གསུང་བར་གྱུར། བར་འདིར་ཡིད་ཀྱིས་ཕྱག་དང་མཆོད་པ་ཙམ་བྱ་སྟེ། ངག་ནས་མི་བརྗོད། ཨོཾ་བཛྲ་མུཿ ཞེས་ཚོགས་རྟེན་གཤེགས་སུ་གསོལ། ཚད་མེད་བཞི་ངག་ནས་བརྗོད་ཚུལ་སྤྱི་དང་འདྲ་བ་ལས། དམིགས་པ་ནི།

― TNT06_Page_0872 ―

^{[མ་དཔེ་གཟིགས་ན་འདིར་གནོན།]}

[Full Size]

ཐུགས་ཀའི་ས་བོན་ལས་འོད་ཟེར་ཕྱོགས་མདོག་ཅན་ཕྱོགས་བཞིར་སྤྲོས་པས། བདེ་བ་ལ་བཀོད་པ་སོགས་བྱས་པར་བསམས། འདི་དག་ནས་མི་བརྗོད་ཅེས་དཀའ་འགྲེལ་གྱི་མཆན་བུ་ལས་འབྱུང་མོད། བརྗོད་ཀྱང་ཆོག །དེ་མལ་ལུགས་ཉིད་ཀྱི་ལཱུ་ཡི་པ་དང་འདྲ་བའི་ཕྱིར་རོ། །དེ་ནས་ཐ་མལ་པའི་ཡིད་དང༌། གཟུང་བ་དང་འཛིན་པ་རྣམས་རྣམ་པར་དག་པར་མོས་ཏེ། སྭ་བྷཱ་ཝ་དང༌། བཛྲཱ་ཤུདྡྷ་དང༌། ཡོ་ག་ཤུདྡྷོའི་སྔགས་རྣམས་བརྗོད་དོ། །ཕྱིས་ཀྱི་ས་ལུགས་ཡིན་རློམ་འགའ་ཞིག །སྔགས་བར་པ་མི་བྱེད་པ་ནི། དཀའ་འགྲེལ་གྱི་ཡིག་ཆུང་མ་མཐོང་བར་ཟད་དོ། །སྟོང་པའི་ངང་ལས་ནམ་མཁའི་དབུས་སུ། ཡཾ་ལས་རླུང་གི་དཀྱིལ་འཁོར་དུ་བའི་ཁ་དོག་ཅན་གྱི་སྟེང་དུ་ཨཿལས་ཟླ་བ་ལ། ཞེས་པ་ནས། རྡོ་རྗེའི་གདན་གྱིས་བཞུགས་པ། དེའི་མདུན་དུ་ཨཿལས་ཉི་མའི་དཀྱིལ་འཁོར་རོ། །འདིར་ཉི་མ་མདུན་དང་ཐུགས་ཀར་བསྒོམ་པ་སྐབས་ཐོབ་ཀྱི་འདམ་ཁར་ཡོད་ཀྱང༌། མདུན་དུ་བསྒོམ་པ་གཙོ་ཆེ་སྟེ་དཀྱུས་སུ་བཤད་པའི་ཕྱིར་རོ། །དེ་ལས་འོད་ཟེར་འཕྲོས་ཕྱོགས་བཅུའི་དེ་བཞིན་གཤེགས་པ་ནས། འབུམ་དུ་ཁྱབ་པར་གྱུར། ཉི་མ་དེ་ཉིད་ཧཱུཾ་ཡིག་ནག་པོ་འོད་ཟེར་ལྔ་དང་ལྡན་པར་གྱུར། འདིར་དཀའ་འགྲེལ་དུ། ཉི་མ་དེ་ཉིད་ལས་ཧཱུཾ་ནག་པོ་འོད་ཟེར་ལྔ་དང་ལྡན་པར་བསམ། ཞེས་འབྱུང་བའི་དོན་ནི། ཉི་མ་དེ་ཉིད་སླར་ཡང་ཧཱུཾ་དུ་གྱུར་པའི་དོན་ཡིན་ཞིང༌། ཉི་མ་དང་ཧཱུཾ་གི་བར་དུ་འོད་ཟེར་སྤྲོ་བ་སོགས་ཡེ་མ་བཤད་པས། མལ་ལུགས་ཡིན་གྱུ་བ་ངོར་ལུགས་པའི་མངོན་རྟོགས་དང་བཤད་པ་རྣམས་སུ། ཉི་མ་ལས་འོད་ཟེར་མེའི་ཚ་ཚ་ལྟ་བུ་འཕྲོས། སྡང་བ་ཚར་བཅད། ཅེས་ཟེར་བ་དང༌། ཉི་མ་རང་གདན་དུ་བཞག་ནས་ཆུ་ལས་ཆུ་བུར་བརྡོལ་བའི་ཚུལ་དུ་ཧཱུཾ་ནག་པོ་སྟེང་དུ་འཐོན་པ་འདོད་པ་དང༌། བཤད་པའི་སྐབས་སུ་སྐྱོ་ལུགས་དང༌། དགེ་ལུགས་པའི་བཤད་པ་དམ་དུམ་

― TNT06_Page_0873 ―

^{[མ་དཔེ་གཟིགས་ན་འདིར་གནོན།]}

[Full Size]

རྣ་བར་བཞག་ནས། མངོན་བྱང་ལྔའི་སྤྲོས་བཤད་བྱེད་ཅིང༌། ལུགས་འདི་མངོན་བྱང་ལྔ་ལས་རྟེན་དང་བརྟེན་པ་དུས་གཅིག་ཏུ་བསྐྱེད་པ་ཡིན་པས་སྒོང་སྐྱེས་སྦྱོང་ཞིང༌། སྒོང་སྐྱེས་སྦྱངས་པས་སྐྱེ་གནས་གཞན་རྣམས་ཀྱང་ཞོར་ལ་འབྱོངས་པའི་ཕྱིར། སྦྱངས་གཞི་ལུགས་འདི་ཁོ་ན་རྒྱ་ཆེའོ་ཞེས་དྲན་རྐྱེན་དང༌། ཁ་མཁས་ཀྱི་སྨྲ་བརྗོད་མང་སྟེ། མལ་ལོས་ཡིད་ལ་མ་དྲན་པའི་མལ་ལུགས་དང༌། ས་སྐྱ་གོང་མ་ལྔས་རྣ་བར་མ་ཚོར་བའི་ས་ལུགས་གཙང་མ་འདྲེས་མེད་དེ་འདྲ་ངོ་མཚར་ཅན་རང་ཡིན་པར་སྣང་ངོ༌། །ཧཱུཾ་ལས་འོད་འཕྲོས། སླར་འདུས་ཡོངས་སུ་གྱུར་པ་ལས། ཧཱུཾ་ཡིག་དེ་ཉིད་རྡོ་རྗེ་ཆེན་པོ་མཐིང་ནག་རྩེ་ལྔ་པ། རྭ་གདེངས་པ། ལྟེ་བ་ལ་ཧཱུཾ་གིས་མཚན་པར་གྱུར། དེ་ལས་དེ་བཞིན་གཤེགས་པ་ལ་སོགས་པ་དང་རྡོ་རྗེ་ཕྲ་མོ་མཐའ་ཡས་པ་སྤྲོས། སྡང་བ་དང༌། གདུག་པ་རྣམས་ཚར་བཅད། སེམས་ཅན་ཐམས་ཅད་སངས་རྒྱས་ལ་བཀོད། ཞིང་ཁམས་དག་པར་བྱས། ཉི་མའི་དཀྱིལ་འཁོར་ལ་བཞུགས་པའི་སངས་རྒྱས་དེ་རྣམས་དང༌། འཇམ་དཔལ་རྡོ་རྗེ་འཇིགས་བྱེད་ཀྱི་དཀྱིལ་འཁོར་ཚད་མེད་པ་སྤྱན་དྲངས་ཏེ། དེ་དག་ཐམས་ཅད་གཅིག་ཏུ་གྱུར་པ་ལས། དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པར་གྱུར་པ་ནི། རྡོ་རྗེའི་ས་གཞི། ར་བ། དྲ་བ། གུར། བླ་རེ། ཕྱི་རོལ་རྡོ་རྗེའི་མེས་གཏམས་པའི་སྲུང་འཁོར་ཡངས་ཤིང་རྒྱ་ཆེ་བ། དེའི་དབུས་སུ་སྣ་ཚོགས་རྡོ་རྗེའི་ལྟེ་བ་ལ་གནས་པའི། གཞལ་མེད་ཁང་གྲུ་བཞི་སྒོ་བཞི་པ་ཞེས་པ་ནས། སྣ་ཚོགས་པས་གང་བའོ། །ཞེས་པའི་བར་ཞེ་དགུ་མའི་སྐབས་བཞིན། རེ་མིག་དབུས་མའི་གནས་སུ་བདག་ཉིད་

― TNT06_Page_0874 ―

^{[མ་དཔེ་གཟིགས་ན་འདིར་གནོན།]}

[Full Size]

བཅོམ་ལྡན་འདས་རྡོ་རྗེ་འཇིགས་བྱེད་ཅེས་པ་ནས། མི་བཟོད་པའི་བདག་ཉིད་དུ་གྱུར། ཅེས་པའི་བར་བརྗོད། ལུགས་འདི་ལའང་གཡས་གཡོན་གྱི་ཞལ་དྲུག་འཁོར་ཞལ་སྤྱི་དང་མཐུན་པ་ཁོ་ན་ཡིན་ཞིང༌། ཞབས་འོག་ཏུ་བདུད་བཞི་ཁོ་ན་བྱེད་པ་སྐྱོ་ལུགས་ལྷ་དགུ་དང་འདྲ། སྤྱིར་ནི་བདུད་བཞི་ནི་མཚོན་བྱེད་དེ། ལྷ་ཆེན་པོ་རྣམས་གནོན་པ་ཡིན་པས། ལུགས་ཐམས་ཅད་ལ་གང་ལྟར་བྱས་ཀྱང་མི་འགལ་ཞིང༌། ཡང་ཅིག་ཏུ་ན་སྲོག་ཆགས་བཅུ་དྲུག་ཉིད་ལྷ་ཆེན་ཕོ་མོ་རྣམས་ཀྱི་ངོ་བོ་ཡིན་པས། བྱོལ་སོང་བཅུ་དྲུག་ཁོ་ན་ཞབས་འོག་ཏུ་མནན་པའི་ཆོག་པའི་སྐབས་ཀྱང་ཡོད་དོ། །དེ་ལྟར་ན་ཡང་དོན་ཡོད་རྡོ་རྗེ་མཛད་པའི་མངོན་རྟོགས་བསྟོད་པ་ལས། གཡས་སུ་བརྒྱ་བྱིན་ཚངས་པ་དང༌། གཡོན་དུ་ཁྱབ་འཇུག་དྲག་པོ་མནན་པ་དང༌། ཕྱག་གཡོན་གྱི་དང་པོ་ན་ཚངས་མགོ་འཛིན་པར་བཤད་པ་འདི། བོད་ཀྱི་འཇིག་བྱེད་མཁན་པོ་ཀུན་ལ་གྲགས་ཆེ་བར་འདུག་གོ །རེ་མིག་བརྒྱད་ལ་ཤར་དུ་ཚངས་པའི་མགོ་བོ་ཞེས་པ་ནས། མེ་ཐབ་རྣམས་གནས་པར་གྱུར་གྱི་བར་ཡང་གོང་སྐྱོ་ལུགས་བཞིན། སྒོ་མཚམས་བརྒྱད་དུ་རོ་ལངས་ཆེན་པོ་བརྒྱད། སྐུ་མདོག་ནག་པོ་རང་གི་མགོ་བོ་བཅད་དེ་ལག་པ་གཡོན་དུ་བཟུང་བ། རྒྱུ་མས་བརྒྱན་ཏེ་གར་བྱེད་པ། པདྨ་དང་ཉི་མའི་གདན་ལ་གནས་ཤིང༌། འབར་བའི་འཕྲེང་བ་འཁྲུགས་པ་རྣམས་སུ་གྱུར། རང་གི་ཐུགས་ཀར་ཧྲཱིཿལས་པདྨ་དམར་པོ་དང༌། ཨཱཿལས་ཉི་མ་ལ་ས་བོན་ཧཱུཾ། དེ་ལས་འོད་ཟེར་འཕྲོས། རང་བཞིན་གྱི་གནས་ནས་བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཆེན་པོའི་ཡེ་ཤེས་པའི་དཀྱིལ་འཁོར། རྒྱལ་བ་སྲས་བཅས་ཀུན་འདུས་པའི་བདག་ཉིད་ཨོཾ་བཛྲ་ས་མཱ་ཛཿ བདུད་བཞི་པོ་ནི་སོགས་དང༌། ཚོགས་ཞིང་གི་སྐབས་ལྟར་མཆོད།

― TNT06_Page_0875 ―

^{[མ་དཔེ་གཟིགས་ན་འདིར་གནོན།]}

[Full Size]

ཛཿཧཱུཾ་བཾ་ཧོཿ མང་དུ་བརྗོད། རང་གི་དཔྲལ་བར་ཟླ་བ་ལ་ཨོཾ་དཀར་པོ་སངས་རྒྱས་ཐམས་ཅད་ཀྱི་སྐུ་རྡོ་རྗེའི་ངོ་བོ། མགྲིན་པར་པདྨ་ལ་ཨཱཿདམར་པོ་སངས་རྒྱས་ཐམས་ཅད་ཀྱི་གསུང་རྡོ་རྗེའི་ངོ་བོ། སྙིང་ཁར་ཉི་མ་ལ་ཧཱུཾ་ནག་པོ་སངས་རྒྱས་ཐམས་ཅད་ཀྱི་ཐུགས་རྡོ་རྗེའི་ངོ་བོའོ། །འདིར་ཡང་ངོར་ལུགས་པ་རྣམས་དམ་ཚིག་པ་བསྐྱེད་པ་བསྙེན་པ། སྐུ་གསུང་ཐུགས་བྱིན་རླབས་ཉེ་བསྙེན། ཡེ་ཤེས་པ་གཞུག་པ་སྒྲུབ་པ་ཞེས་ཐ་སྙད་སྦྱོར་བ་ནི། གཤིན་རྗེ་གཤེད་ཀྱི་སྐབས་འདིར། ས་སྐྱ་གོང་མ་རྣམས་ཀྱང་དེ་འདྲ་མི་བཞེད་དེ། འདི་ནི་ཀྱཻ་རྡོར་གྱི་བཤད་ཡ་མས་ཅིག་གིས་འདྲེས་ཡིན་ལ། རྟོག་བདུན་དཀའ་འགྲེལ་གྱི་མཆན་བུའི་ཀ་ཀ་མཐོ་མ་མཐོང་བར་ཟད་དེ། ཇི་སྐད་དུ། དེ་ནས་སྐུ་གསུང་ཐུགས་བྱིན་གྱིས་བརླབས། ཡེ་ཤེས་སེམས་དཔའ་སྤྱན་དྲངས་ཤིང་གཞུག །ཅེས་དཀྱུས་ལ་བྱུང་ཡང༌། དེ་གཉིས་ཀ་ཀ་མཐོས་གོང་འོག་བསྒྱུར་ཡོད་པ་དང༌། ཡེ་ཤེས་སེམས་དཔའ་ཞེས་པའི་གོང་དུ། ས་བོན་གྱི་འོད་ཀྱིས་ཞེས་མཆན་བུ་བཏབ་ཡོད་པའི་ཕྱིར། གནས་གསུམ་བྱིན་རླབས་སྔོན་དུ་སོང་ན། དེའི་ཧཱུཾ་ལས་འོད་སྤྲོས་པས་ཆོག་པའི་ཕྱིར། ས་བོན་གྱི་ཞེས་པ་སྨོས་མི་དགོས་བས་སོ། །དེས་ན་དམ་ཡེ་བསྲེས་པ་བརྟན་བྱེད་དུ་གནས་གསུམ་བྱིན་གྱིས་རློབ་པ་ཡིན་ནོ། །ཡང་ཐུགས་ཀའི་ས་བོན་ལས་འོད་ཟེར་འཕྲོས། དབང་གི་ལྷ་རིགས་ལྔ་འཁོར་དང་བཅས་པ་ཨོཾ་བཛྲ་ས་མཱ་ཛཿ ཨོཾ་ན་མོ་པཉྩ་ཀུ་ལ་ཏ་ཐཱ་ག་ཏ་ས་པཱ་རི་ཝ་ར་བྷྱཿ ཞེས་ཕྱག་འཚལ། ཨོཾ་བཛྲ་ཨརྒྷཾ་སོགས་ནས། ནཻ་ཝེ་ཏེའི་བར་གྱིས་མཆོད། བཅོམ་ལྡན་དེ་བཞིན་གཤེགས་པ་ཀུན། །སོགས་ཀྱིས་གསོལ་བ་བཏབ། སངས་རྒྱས་རྣམས་ནི་ཐམས་ཅད་ཀྱི། །སོགས་དང༌། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུཾ། འདིར་ཡང་ངོར་བ་རྣམས་བཛྲ་ཨུ་ཏ་

― TNT06_Page_0876 ―

^{[མ་དཔེ་གཟིགས་ན་འདིར་གནོན།]}

[Full Size]

ཀའི་སྔགས་བྱེད་པ་ནི། དཀའ་འགྲེལ་གྱི་མཆན་བུ་མ་མཐོང་བའི་འོལ་ཚོད་དོ། །གོང་གི་འཕྲོས་ལས། འདི་སྐད་ཅེས་ཞེས་གསུངས་ཤིང༌། དེ་བཞིན་གཤེགས་པ་རྣམས་ཀྱིས་དབང་བསྐུར། རིག་མ་རྣམས་ཀྱིས་རྡོ་རྗེའི་གླུ་ལེན། བྱང་ཆུབ་སེམས་དཔའ་རྣམས་ཀྱིས་བཀྲ་ཤིས་བརྗོད། རྡོ་རྗེ་མ་རྣམས་ཀྱིས་མཆོད་པ་ཕུལ། ཁྲོ་བོ་ཁྲོ་མོ་རྣམས་ཀྱིས་བགེགས་བསྐྲད། དབང་གི་ཆུ་རྒྱུན་གྱིས་ལུས་ཐམས་ཅད་གང༌། སྡིག་སྒྲིབ་ཐམས་ཅད་སྦྱངས་ཆུའི་ལྷག་མ་སྤྱི་བོར་འཁྱིལ་བ་ལས་མི་བསྐྱོད་པས་དབུ་བརྒྱན། སྐབས་འདིར་མཆོད་བསྟོད་བྱས་ན་བཟླས་པའི་རྗེས་ལ་མི་དགོས་ཤིང༌། བཟླས་པའི་རྗེས་ལ་མཆོད་བསྟོད་བྱེད་ན་སྐབས་འདིར་མི་དགོས་ཞེས་གསུང་པས་སྤྱིར་གང་རུང་ཅིག་གིས་ཆོག་ནའང་སྐབས་འདིར་བྱེད་པ་གཙོ་ཆེའོ། །དེས་ན་གོང་བཞིན་མཆོད་པ་བྱིན་གྱིས་བརླབས། དང་པོར་སྔགས་མཆོད་ནི། རྩ་སྔགས་སྙིང་པོ་ཉེ་སྙིང་སོགས་སྔགས་གསུམ་བརྗོད་པས་གཙོ་བོ་དང༌། སྤྲོས་པ་ལ་དགའ་ན་ཡ་མཱན་ཏ་ཀ་ཚར་བརྒྱད་ཀྱིས་རོ་ལངས་བརྒྱད་ལ་མཆོད། བསྡུ་ན་གཙོ་བོ་ཁོ་ནས་ཆོག་གོ། ཚོགས་ཞིང་གི་སྐབས་ལྟར་ཕྱི་མཆོད་ཕུལ་བའི་རྗེས་ལ། སྔགས་ཀྱི་མགོ་འདྲ་བ་ལས། རཱུ་པ་ཀཱ་མ་གུ་ཎ་པུ་ཛི་ཏ་ཧཱུཾ། དེ་བཞིན་དུ། པར་ཤེའི་བར་དུ་སྦྱར། སྔགས་གསུམ་གྱི་ཐ་མར་འབྲུ་གསུམ་བཏགས་པས་ནང་མཆོད་ཕུལ། དུར་ཁྲོད་རྒྱན་གྱིས་སོགས་དང༌། སྤྲོ་ན་མི་ཐུང་སྒེག་པོ་སོགས་ཀྱིས་ཀྱང་བསྟོད་དོ། །བཟླས་པ་དངོས་ནི། འཇིགས་མཛད་ཀྱི་སྒྲུབ་ཐབས་སྤྱི་དང་འདྲ། གཙོ་བོར་ཡི་གེ་བཅུ་པ་ཉིད་བཟླ། ཐུན་གྱི་འཇུག་ཏུ་ཧཱུཾ་དང་ཡི་གེ་བཅུ་པ་མི་དམིགས་པར་བྱས་ལ། ཡའམ་མའི་མཐར་རྩ་སྔགས་ཀྱིས་བསྐོར་བར་བསྒོམ་སྟེ།

― TNT06_Page_0877 ―

^{[མ་དཔེ་གཟིགས་ན་འདིར་གནོན།]}

[Full Size]

རྩ་སྔགས་བརྒྱ་རྩ་སོགས་བཟླ། དེ་ཡང་མི་དམིགས་པའི་ཤུལ་དུ། ཡའམ་མ་ལ་ཉེ་སྙིང་གིས་བསྐོར་བར་བསྒོམ། ཉེ་སྙིང་ཡང་བརྒྱ་སོགས་ཇི་ལྟར་འོས་པ་བཟླ། མཐར། བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཀྱི་ལྷ་ཚོགས་རྣམས་ཀྱིས། བདག་དང་སེམས་ཅན་ཐམས་ཅད་ལ་བྱིན་གྱིས་བརླབ་ཏུ་གསོལ། མྱུར་དུ་འཇམ་དཔལ་མཆོག་རྡོ་རྗེ་འཇིགས་བྱེད་ཆེན་པོའི་གོ་འཕང་ཐོབ་པར་བྱིན་གྱིས་བརླབ་ཏུ་གསོལ། ཡིག་བརྒྱ་ལན་གསུམ། མ་འབྱོར་བ་དང་སོགས། དེ་རྗེས་དཀྱིལ་འཁོར་བསྡུ་ཞིང་ཐུན་མཚམས་སུ་ལྡང་བ་ནི། གོང་མ་རྣམས་དང་འདྲའོ། །སྒྲུབ་ཐབས་འདིར་སྦྱང་བྱ་སྦྱོང་བྱེད་ཀྱི་རྣམ་བཞག་ནི། རྭ་ལུགས་དཔའ་རྐྱང་གི་ཞོར་ལ་རྟོགས་པར་འགྱུར་ལ། གཞལ་ཡས་ཁང་འཁོར་དང་བཅས་པ་བསྐྱེད་པ་ནི། སྐྱེ་བ་བླངས་པ་ན་ལས་མཐུན་པའི་གནས་འཁོར་ལོངས་སྤྱོད་རྣམས་གྲུབ་པ་མཚོན་ནོ། །དེ་ནས་ཐུན་མཚམས་སུ་གཏོར་མ་འབུལ་བའམ། ཡང་ན་གོང་དུ་བཟླས་པའི་རྗེས་ལ་མཆོད་བསྟོད་བྱེད་ན་དེའི་རྗེས་དང༌། མི་བྱེད་ན་བཟླས་པ་གྲུབ་མ་ཐག་ཏུ། གཏོར་མ་ཕུལ་ན་ཡང་ཤིན་ཏུ་ལེགས་སོ། །གཏོར་མ་རྩ་སྔགས་སམ་སྙིང་པོས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། ཡཾ་ལས་རླུང་རཾ་ལས་མེའི་དཀྱིལ་འཁོར་གྱི་སྟེང་དུ། ཨ་ལས་ཐོད་པ་དཀར་པོ་ཡངས་ཤིང་རྒྱ་ཆེ་བའི་ནང་དུ། དབུས་སུ་ན་ལས་མིའི་ཤ་སོགས། དེ་རྣམས་ཀྱི་སྟེང་དུ་དབུས་སུ་མུ་ལས་དྲི་ཆུ་སོགས། དེ་རྣམས་ཀྱི་སྟེང་དུ་དབུས་སུ་ཧཱུཾ་ཆོས་ཀྱི་དབྱིངས་ཀྱི་ཡེ་ཤེས། ཤར་དུ་ཨོཾ་མེ་ལོང༌། ལྷོར་ཏྲཱཾ་མཉམ་པ། ནུབ་ཏུ་ཛྲིཾ་སོ་སོར། བྱང་དུ་ཁཾ་བྱ་བ་སྒྲུབ་པའི་ཡེ་ཤེས། འདི་གཉིས་ལ་ཧྲཱིཿདང་ཨཿཡོང་ཤིང་ཡང་མི་གསུང༌། དེ་རྣམས་

― TNT06_Page_0878 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་སྟེང་གི་ནམ་མཁའ་ལ་ཨོཾ་དཀར་པོ་མགོ་བོ་ཐུར་དུ་ལྟ་བ། དེའི་སྟེང་དུ་ཧཱུཾ་ལས་སྣ་ཚོགས་རྡོ་རྗེའི་ལྟེ་བ་ལ་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་གིས་མཚན་པ། དེ་ལས་འོད་ཟེར་འོག་ཏུ་འཕྲོས་པས་རླུང་གཡོས། མེ་སྦར་རྫས་རྣམས་ཞུ་ཞིང་ཁོལ་བའི་རླངས་པ་སྟེང་དུ་སོང་བ། ཨོཾ་དང་སྣ་ཚོགས་རྡོ་རྗེའི་ལྟེ་བའི་ཧཱུཾ་ལ་ཕོག །དེ་དག་ལས་བདུད་རྩིའི་རྒྱུན་བབས། ཧཱུཾ་ལས་འོད་ཟེར་ཕྱོགས་བཅུར་འཕྲོས་པས། སངས་རྒྱས་ཐམས་ཅད་ཀྱི་ཐུགས་ཀ་ནས་ཐོད་པ་ཡེ་ཤེས་ཀྱི་བདུད་རྩིས་གང་བ་དུ་མ་སྤྱན་དྲངས་ཏེ། མདུན་གྱི་ཐོད་པ་ལ་ཐོད་པ་ཐིམ། བདུད་རྩི་ལ་བདུད་རྩི་ཐིམ། ཡེ་ཤེས་ཀྱི་བདུད་རྩི་དང་གཉིས་སུ་མེད་པར་གྱུར་ཏེ། ཁ་དོག་དྲི་རོ་ནུས་པའི་མཐུ་ཕུན་སུམ་ཚོགས་པའི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ། ལན་མང་དུ་བརྗོད། ཡི་གེ་བཅུ་པ་བརྗོད་ལ་བདག་ཉིད་ལྷའི་ང་རྒྱལ་གསལ་བཏབ། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་རང་གི་མདུན་དུ་སྐད་ཅིག་གིས་དཔལ་རྡོ་རྗེ་འཇིགས་བྱེད་ནས། བདག་ཉིད་དུ་གྱུར། སྔར་དཀྱིལ་འཁོར་བསྡུས་ཟིན་པའི་ཐུན་མཚམས་ཡིན་ན། སྐུའི་མཐའ་སྐོར་དུ་དུར་ཁྲོད་ཆེན་པོ་བརྒྱད། རོ་ལངས་ཆེན་པོ་ལ་སོགས་པ་བཀའ་སྡོད་སྲུངས་མའི་ཚོགས་ཐམས་ཅད་ཀྱིས་བསྐོར་བ་དང༌། གཙོ་བོའི་གཡོན་གྱི་ཕྱོགས་སུ་སྨྱོན་པ་འཇིགས་བྱེད་སྐུ་མདོག་དམར་པོ། ཕྱག་གཡས་རལ་གྲི་འཕྱར་ཞིང༌། གཡོན་ཐོད་ཁྲག་གམ་ཞགས་པ་འཛིན་པ། འཁོར་མཁའ་འགྲོ་མའི་ཚོགས་རྣམས་ཀྱིས་བསྐོར་བ། བཅོམ་ལྡན་འདས་ཀྱི་བཀའ་ནོད་པའི་ཚུལ་དུ་བཞུགས་ཤིང༌། ཞིང་སྐྱོང་བ་སོགས་དུར་ཁྲོད་ཀྱི་བདག་པོ་རྣམས་ཀྱང་གསལ་བར་

― TNT06_Page_0879 ―

^{[མ་དཔེ་གཟིགས་ན་འདིར་གནོན།]}

[Full Size]

འཁོད་པར་གྱུར། རང་གི་སྙིང་ག་ནས་འོད་ཟེར་འཕྲོས། རང་བཞིན་གྱི་གནས་ནས་དཔལ་རྡོ་རྗེ་འཇིགས་བྱེད་ཆེན་པོ་ལས་བྱེད་དཔག་ཏུ་མེད་པས་བསྐོར་བ་བཛྲ་ས་མཱ་ཛཿ ཛཿཧཱུཾ་བཾ་ཧོཿ ཨོཾ་ཡ་མཱན་ཏ་ཀ་བཛྲ་བྷཻ་ར་ཝ། པདྨ་ཀ་ལ་མ་ཡ་སྟྭཾ། ཨུནྨཱནྟ་བྷཻ་ར་ཝ་ཨ་གྲ་ཏིཥྛ་ཏིཥྛ། བཛྲ་བྷཻ་ར་ཝ་ཨ་གྲ་ཏིཥྛ་ཏིཥྛ། ཤྨ་ཤ་ན་ཨ་དྷི་པ་ཏི་ཨ་གྲ་ཏིཥྛ་ཏིཥྛ། དེ་ནས་སྔགས་གསུམ་ཅུང་ཟད་བཟླས་ཏེ། བཅོམ་ལྡན་འདས་རྡོ་རྗེ་འཇིགས་བྱེད་འཁོར་དང་བཅས་པ་རྣམས་ཀྱི་ལྗགས་རྡོ་རྗེའི་སྦུ་གུའི་འོད་ཀྱིས་གཏོར་མ་དྲངས་ཏེ་གསོལ་བར་གྱུར། རྩ་སྔགས་ཀྱི་རྗེས་སུ། ཨོཾ་བྷཻ་ར་ཝ་གྲྀཧྞ་ཨི་དཾ་བ་ལིཾ་མ་མ་ཀརྱཾ་སཱ་དྷ་ཡ་སྭཱཧཱ། ལན་གསུམ་སོགས་ཀྱིས་བཅོམ་ལྡན་འདས་ལ་ཕུལ། ཨོཾ་ཨུནྨཱནྟ་བྷཻ་ར་ཝ་ར་བ་ལིཾ་གྲྀཧྞ་གྲྀཧྞ་མ་མ་ཀརྱ་སཱ་དྷ་ཡ་སྭཱཧཱ། ཞེས་ལན་གསུམ་གྱིས་སྨྱོན་པ་འཇིགས་བྱེད་དང༌། ཨཥྟ་སྨ་ཤ་ན་ཏིཥྛ་བུདྡྷ་ཤཱ་ས་ན་རཀྵནྟུ་སརྦ་གྲྀཧྞ་གྲྀཧྞ་ཨི་དཾ་བ་ལིཾ་མ་མ་སརྦ་ཀརྱཾ་སཱ་དྷ་ནི་སྭཱཧཱ། ཞེས་ལན་གསུམ་གྱིས་དུར་ཁྲོད་ཀྱི་བདག་པོ་རྣམས་ལ་འབུལ། དེ་ནས་གོང་བཞིན་ཕྱི་མཆོད་ནང་མཆོད་བསྟོད་པ་རྣམས་བྱ། མཆོད་སྦྱིན་གཏོར་མ་འདི་བཞེས་ལ། །སོགས་དང༌། གོང་བཞིན་འདོད་དོན་གསོལ་བཏབ། ཡིག་བརྒྱ་བཟོད་གསོལ་རྣམས་བྱ། ཨོཾ་ཁྱོད་ཀྱིས་སེམས་ཅན་སོགས་ཀྱིས་གཤེགས་གསོལ་དང༌། ཐུན་མཚམས་ཀྱི་སྐབས་ཡིན་ན། གནས་གསུམ་དུ་འབྲུ་གསུམ་གྱི་བདུད་རྩིའི་ཐིག་ལེ་བྱ། སྨོན་ལམ་དང་བཀྲ་ཤིས་ཙམ་བརྗོད། བདག་བསྐྱེད་མ་བསྡུས་པའི་སྐབས་ཡིན་ན། ཡེ་ཤེས་པ་གཤེགས་གསོལ་བྱས་མ་ཐག་ཏུ། མདུན་བསྐྱེད་ཀྱི་དམ་ཚིག་པ་དང༌། དཀྱིལ་འཁོར་ལྷན་ཅིག་ཏུ་བདག་ལ་བསྡུ། ཐུན་མཚམས་ཀྱི་ལྷ་སྐུར་

― TNT06_Page_0880 ―

^{[མ་དཔེ་གཟིགས་ན་འདིར་གནོན།]}

[Full Size]

ལངས་པའི་རྗེས་སུ་སྨོན་ལམ་དང་བཀྲ་ཤིས་བྱའོ། །ལུགས་འདིའི་དབང་ཆོག་ནི། བར་སྐབས་སུ་དཔལ་འཛིན་གྱི་ཆོ་ག་ལ་བརྟེན་པ་མ་གཏོགས། རང་ལུགས་མ་རྙེད་པར་སྣང་ཡང་ད་ལྟ་རབ་ལུགས་གཉིས་པོ་དེ་རྙེད་པས་གཉིས་པོའི་ནང་ནས་ན་རི་པའི་ལུགས་ལ་བྱའོ།། །།ལྷ་བཅུ་གསུམ་མར་གྲགས་པའི་དཀྱིལ་འཁོར་གྱི་སྒྲུབ་ཐབས། ༈ དཔལ་རྡོ་རྗེ་འཇིགས་བྱེད་འཇིགས་པར་བྱེད་པ་ལ་ཕྱག་འཚལ་ལོ། །ལྷ་བཅུ་གསུམ་མར་གྲགས་པའི་དཀྱིལ་འཁོར་གྱི་སྒྲུབ་ཐབས་བསྒོམ་པར་འདོད་པས། འདི་ལྟར་ཤེས་དགོས་ཏེ། དེ་ལ་ངོར་པ་རྣམས་ན་རེ། འཇིགས་བྱེད་བཅུ་གསུམ་མ་ལ་རྒྱ་གཞུང་གི་ཁུངས་མེད། ཅེས་དང༌། འདི་རྭ་ལོ་ཁོ་ནའི་རྟོག་བཟོ་ཡིན་གྱི་གཞན་ལ་མ་གྲགས་ཞེས་པ་དང༌། རྗེ་བཙུན་ཙོང་ཁ་པས། རྭ་ལོ་དང་གཉོས་ལོས་བཅུ་གསུམ་ཅན་མཛད་དོ་ཞེས་བཤད་པ་ལ། དེ་ཁྱེད་གཟིགས་རྒྱ་ཆེས་བ་ཁ་ཐལ་བ་ཡིན་ཞེས་བཏིངས་ཚིག་སྨྲ་ཞིག་གཉོས་ལུགས་ལ་ལྷ་དགུ་ལས་མེད་དོ་ཞེས་དང༌། འབྲོག་མི་ལོ་ཙཱ་བས་ཀྱང་གཤེད་སྐོར་མང་དུ་བསྒྱུར་རོ་ཞེས་སྨྲའོ། །དེ་ནི་ཤིན་ཏུ་མི་འཐད་དེ། ཁུངས་མེད་ཅེས་པ་འདི་རྟོག་བདུན་གྱི་དངོས་བསྟན་མ་ཡིན་པ་ཙམ་ལ་ཟེར་ན་ནི། ཞེ་དགུ་མ་དང་ཁྱེད་རང་རྣམས་བཅུ་བདུན་མར་འདོད་པའི་དཀྱིལ་འཁོར་དེ་ཡང་ཁུངས་མེད་དུ་ཐལ་ཏེ་རྒྱུད་ཀྱི་དངོས་བསྟན་མ་ཡིན་པའི་ཕྱིར་རོ། །དགོངས་འགྲེལ་རྒྱ་གཞུང་གི་ཁུངས་མེད་དོ་སྙམ་ན། མཐོང་རྒྱ་ཤིན་ཏུ་ཆུང་སྟེ། སློབ་དཔོན་པདྨ་སྲུང་བ་སྟེ་ཀ་མ་ལ་རཀྵི་ཏའི་སྒྲུབ་ཐབས་བསྡུས་པ་དང༌། རྣམ་སྣང་སྲུང་བ་སྟེ་བཻ་རོ་ཙ་ན་རཀྵི་ཏིའི་སྒྲུབ་ཐབས་རྒྱས་པ་སྟེ་སྒྲུབ་ཐབས་རྒྱ་གཞུང་གཉིས་ཡོད་ལ། རྟོག་བདུན་གྱི་འགྲེལ་བ་སཽ་ན་ཤྲཱི་འམ། རྡོ་རྗེ་གྲུབ་པས་

― TNT06_Page_0881 ―

^{[མ་དཔེ་གཟིགས་ན་འདིར་གནོན།]}

[Full Size]

མཛད་པ་ལས་ཀྱང་ཤིན་ཏུ་གསལ་ཞིང༌། དེ་ཡང་དཔལ་འཛིན་གྱི་མན་ངག་ཡིན་པར་འཆད་པས། རྡོ་རྗེ་སློབ་དཔོན་ཆེན་པོ་དཔལ་འཛིན་ཡང་འཇིགས་བྱེད་བཅུ་གསུམ་མ་བཞེད་པར་གསལ་ལོ། །སྤྱིར་ནི་རྭ་ལོ་རྡོ་རྗེ་གྲགས་པ་ཡང༌། རྒྱ་བལ་གྱི་པཎ་གྲུབ་མང་པོའི་ཐུགས་བཅུད་མན་ངག་ལོངས་ཤིང༌། ཁོང་གི་བཤད་སྒྲོས་དང་མན་ངག་ལ་བོད་ཀྱི་བསྲེ་བསླད་མེད་ཅེས་དུས་མཉམ་གྱི་མཁས་པ་ཆེན་པོ་ཉི་ཟླ་ལྟར་གྲགས་པ་རྣམས་ཀྱིས་བསྔགས་པའི་ཕྱིར། མན་ངག་ཁུངས་ལྡན་དུ་གྲུབ་པ་ཁོ་ནས་ཀྱང༌། རྒྱ་གཞུང་གི་ཁུངས་ཐན་ཐུན་ཡོད་མེད་ལ་རག་མ་ལུས་ལ། དེ་བས་ཀྱང་ཆེས་ལྷག་པ། ཁོང་ཉིད་རྡོ་རྗེ་སློབ་དཔོན་ཆེན་པོའི་གནས་ཐོབ་སྟེ། ཏིང་ངེ་འཛིན་ལ་བརྟན་པ་བརྙེས། ཡི་དམ་ལྷག་པའི་ལྷ་ཞལ་གཟིགས་དཔལ་ནག་པོ་ཆེན་པོ་དང༌། ལྷ་མོ་རེ་མ་ཏི་དང༌། གཤིན་རྗེ་ཆོས་ཀྱི་རྒྱལ་པོ་དང༌། ལང་ཀའི་བདག་པོ་ལ་སོགས་པ། ཆེས་ཆེ་བའི་ལྷ་རྣམས་བྲན་དུ་འཁོར་ལ་མི་དང་མི་མ་ཡིན་རྣམས་ལ་ལས་བཞི་ཐོགས་མེད་དུ་འགྲུབ་པའི་སྒྲུབ་པ་པོ་རྣལ་འབྱོར་ཅན་གྱི་དབང་ཕྱུག་ཡིན་པའི་ཕྱིར། ཁུངས་གཞན་ལས་འཚོལ་མི་དགོས་སོ། །དེ་ལྟར་ན་རྭ་ལོ་ཆེན་པོ་དེ་ནི། མཁས་པའི་ཕྱོགས་ནས་ཀྱང་བོད་ཁམས་ཀྱི་དགེ་བཤེས་ཐམས་ཅད་སློབ་མར་འདུ་བ་དང༌། ནུས་མཐུའི་སྒོ་ནས་རྒྱལ་ཁམས་ཐམས་ཅད་འདར་བར་བྱེད་པ་ཞིག་ཡིན་ནོ། །མལ་འབྲོག་མི་སྐྱོ་ལ་སོགས་པ་ནི། སྤྱིར་མཁས་གྲུབ་རྨད་དུ་བྱུང་པ་ཡིན་མོད་ཀྱང༌། རྭ་ལོ་ལ་ལྟོས་ན་ནི། དེ་དག་ཕག་ཕུག་གི་སྔགས་པ་ཆུང་ངུ་ཙམ་དུ་ཟད་ན། ཕྱིས་བྱུང་བ་ཐ་ན་ཆོས་རྒྱུས་ཙམ་ལ་ཡང་མི་མཁས་ཤིང་ནུས་པ་ཕྲ་མོ་ཙམ་ཡང་མེད་པ་ཁྱེད་དག་གིས། སྐྱེས་ཆེན་དེ་འདྲ་བ་འགོག་པ་ལ་ཞུགས་པ་ན། ཁྱི་ལྟོགས་རྒྱགས་པས་སེང་གེའི་གཉའ་རལ་ལ་འཇུ་ཞེས་སྐྱེ་བོ་རྣམས་ལ་གྲགས་པ་དེ་ཁོ་ན་སྟེ། ཤིན་ཏུ་བླུན་ཅིང་ཆོས་ཀྱི་

― TNT06_Page_0882 ―

^{[མ་དཔེ་གཟིགས་ན་འདིར་གནོན།]}

[Full Size]

བསོད་ནམས་ཟད་པའི་བནྡྷེ་དང་མི་དཔོན་མང་རབ་ཀྱིས་ལས་ཀྱི་དབང་གིས་ཁྱེད་དག་ལ་བཏུད་པ་ན། ཁྱེད་ཅག་ང་རྒྱལ་གྱིས་དྲེགས་ནས་བག་མེད་དུ་ཡན་ཏེ། གླེན་པའི་རང་འཚང་རྒྱུད་མ་ནས་རྒྱུད་མར་སྟོན་པའོ། །རྗེ་འབྲོག་གིས་གཤེད་སྐོར་བསྒྱུར་བའི་ལོ་རྒྱུས། སྔོན་མཁས་རྨོངས་སུ་ལའང་མ་གྲགས་མོད། ཁྱེད་འགའ་ཞིག་གིས་བསྟན་འགྱུར་བལྟས་པ་ན། འཇུག་མཛད་ཀྱི་སྒྲུབ་ཐབས་ཛྙཱ་ན་ཀ་རས་མཛད་པ་དེ་ལ། འགྱུར་བྱང་མེད་པར་མཐོང་བ་ན། འབྲོག་མིའི་ཞེན་དུ་བསམས་ནས། འདི་རྗེ་འབྲོག་གིས་བསྒྱུར་རོ་ཞེས། མི་ཤེས་པ་རྣམས་ཀྱི་མགོ་བོ་བརྫུན་གྱི་སྐོར་བར་བྱེད་དོ། །གཞུང་དེ་ལེགས་རབ་ཡོད་ཀྱང་བདག་པོ་མེད་པར་འཁྱམས་པས་ཐ་ན་མཛད་པ་པོ་རང་ཡང་ཆ་རྒྱུས་སུ་ལའང་མེད་དེ། ཛྙཱ་ན་ཀ་ར་ཡིན་ནམ། ཛྙཱ་ནཱ་ཀ་ར་ཡིན་ཡང་བཤད་རྒྱུ་མེད་ལ། གཞན་ཡང་འབྲོག་གཤེད་སྐོར་མི་མཛད་པའི་རྒྱུ་མཚན་མང་དུ་ཡོད་དོ། །འཇིགས་བྱེད་བཅུ་གསུམ་མ་རྭ་ལོ་མིན་པ་གཞན་ལ་མེད་པའང་མིན་ཏེ། ཁྱུང་པོ་རྣལ་འབྱོར་པའི་ལུགས་ལའང་ཤིན་ཏུ་གྲགས་ཆེ་བ་དང༌། གྱི་ཇོ་ལ་སོགས་པ་གཞན་ལའང་ཡོད་པར་གྲགས་པའི་ཕྱིར་རོ། །གཉོས་པ་ལ་རིགས་བཞི་ཡུམ་བཞིས་བསྐོར་བའི་ལྷ་དགུ་མ་གཏོགས་བཅུ་གསུམ་མ་མེད་ཟེར་བ་ནི། ཁྱེད་ཀྱི་རྗེ་ཀུན་བཟང་བས། དཔེ་མཛོད་རྙིང་པ་འདྲ་གཡེངས་པ་ན། སློབ་དཔོན་བསོད་ནམས་རྒྱལ་པོས་བྱས་པའི། གཉོས་ལུགས་ལྷ་དགུའི་སྒྲུབ་ཐབས་དེ་རྙེད་ཡོད་པར་འདུག །གཞན་གཉོས་ལུགས་ཀྱི་ཡི་གེ་ཆ་ཚང་བ་མ་མཐོང་མོད། དེ་མ་ཐག་གཉོས་ལུགས་ནི་ལྷ་དགུ་ཁོ་ན་ཡིན་ནོ་སྙམ་ནས། ཡི་གེ་གཞན་ཚོལ་ལོང་དང་བལྟ་ལོག་མེད་པར་ཏབ་ཏོབ་ཏུ་གཞན་ལ་འཕྱ་བར་ཟད་དོ། །གཉོས་ལུགས་བཅུ་གསུམ་མ་ནི། སློབ་དཔོན་དཔལ་སེང་དང༌། འབྲི་ཕྱུག་པའི་སྒྲུབ་ཐབས་ཀྱང་ཡོད་པར་འདུག་ཅིང༌། རྒྱལ་བ་ལྷ་ནང་བའི་སློབ་མ། འགར་ཆོས་སྡིངས་པའི་སྒྲུབ་དཀྱིལ་ནི་ཁོ་བོས་ཀྱང་

― TNT06_Page_0883 ―

^{[མ་དཔེ་གཟིགས་ན་འདིར་གནོན།]}

[Full Size]

མཐོང་ངོ༌། །དེར་མ་ཟད་གཉོས་ལུགས་ལ་རོ་ལངས་བརྒྱད་སྐོར་ཡང་སྣང་བས་བག་ཡོད་པར་བྱའོ། །ཡང་རྭ་ལོ་སྐྱེས་བུ་བཟང་ཞིང་བླ་མའི་མན་ངག་དང་ལྡན་དུ་ཆུག་ཀྱང༌། རྒྱ་གཞུང་གི་ཁུངས་མེད་ན་ཡིད་མི་ཆེས་སོ་སྙམ་ན། བཅུ་གསུམ་མ་ལ་ཏ་རྒྱ་གཞུང་གི་ཁུངས་ཀྱང་གོང་དུ་བསྟན་པ་ལྟར་ཡིན་མོད། སྤྱིར་དེ་ལྟར་འདོད་ན་ཁྱེད་རང་རྣམས་མི་ཚེ་ཧྲིལ་པོར་སྒྲིལ་བའི་ཀྱཻ་རྡོར་མན་ངག་ལུགས་དེ་ཇི་ལྟར་ཡིན། རྫའི་དོས་ཁུར་ནས་རྡོ་འཐབ་མ་བྱེད་ཅིག །ཁྱེད་རྣམས་ཤིན་ཏུ་མི་མཁས་པའི་སྟེང་དུ། ཕྱོགས་འཛིན་ཕྲག་དོག་གི་གདོན་ཞུད་ཆེན་པོ་བཏབ་ནས་སྨྱོན་པའི་བརྟུལ་ཞུགས་འཛིན་པ་འདི་ལ། ཁོ་བོས་སྙིང་བརྩེ་བའི་བསླབ་སྟོན་བྱས་པ་ཡིན་ནོ། །བུ་སྟོན་སོགས་པ་མཁས་པ་འགའ་ཞིག་གིས། བསྟན་འགྱུར་གཟིགས་ནས་སྒྲུབ་ཐབས་སོ་སོ་ལ་ཁུངས་འཚོར་བ་དང་དཔྱད་པའི་སྒོ་མང་དུ་བྱས་པ་དེ། ཁྱེད་རྣམས་ལ་ཐན་ཆེན་པོར་བྱུང་འདུག་སྟེ། དེ་དག་གིས་དེ་ལྟར་བྱས་པ་ན། ཁྱེད་ཀྱི་བླ་མ་འགྲམ་ཆུ་ལངས་བརྡབས་ཞོགས་འཕྲོད་དེ་བསྟན་འགྱུར་ཅི་རིགས་པ་བལྟས་པ་ན། ཟ་ཟི་ལངས་ན་ཉེས་བཤད་དང་ལོག་པར་བཤད་པའི་སེར་བ་དྲག་པོ་ཟད་པ་མེད་པ་ཁྱེད་སློབ་མ་རྣམས་ཀྱི་བློ་གྲོས་ལ་བདུད་དུ་གཅེར་གྱིས་བབས་པའི་ཕྱིར་རོ། །འདིར་སྨྲས་པ། ལ་ལའི་མཐོང་རྒྱ་རྒྱན་ཡིན་ཏེ། །ལ་ལའི་མཐོང་རྒྱ་བྱུར་ཆགས་ཡིན། །མཁས་པ་མཐོང་རྒྱ་ཆེ་ན་བཟང༌། །ངོར་པའི་མཐོང་རྒྱས་རང་ཉིད་བརླག །ཅེས་སོ། །ངོར་པ་ཟིན་བྲིས་ཀྱིས་ཕུང་ངོ་ཞེས། དུས་དེ་ཉིད་ནས་ཕྱོགས་ཀུན་ཏུ་གྲགས་སོ། །གཞན་ཡང་ཁོ་བོ་ཅག་ནི། འདི་སྐད་ཅེས། དགྲ་གདོང་འཇིགས་གསུམ་ཕན་ཚུན་ཕྱོགས་མཐུན་གྱི་རྒྱུད་ཡིན་ཡང༌། དངོས་པོ་ལ་རྩ་བཤད་ཀྱི་རྒྱུད་དུ་གནས་པ་མིན། ཆ་མཐུན་ཡིན་པའི་ཕྱིར། ཕན་ཚུན་ཁ་སྐོང་བའི་དོན་དུ།

― TNT06_Page_0884 ―

^{[མ་དཔེ་གཟིགས་ན་འདིར་གནོན།]}

[Full Size]

བླ་མའི་མན་ངག་གི་སྒོ་ནས། རྩ་བཤད་དུ་སྦྱོར་བའི་ལུགས་མང་དུ་བྱུང༌། དེ་ཡང་འོས་ཤིང་རིགས་པ་ཡིན་གྱི་ནོར་བ་ནི་མིན་ཞེས་སྨྲའོ། ཁྱེད་རྣམས་ནི་དགྲ་གདོང་འཇིགས་གསུམ་དངོས་པོའི་སྟེང་ནས་རྩ་བཤད་ཀྱི་རྒྱུད་ཡིན་པར་ཁས་བླང་ནས། ཕན་ཚུན་དུ་ཁ་སྐོང་བར་འདོད་བཞིན་དུ། འཇིགས་མཛད་ལ་ནག་པོའི་འཁོར་མི་རུང་བར་འདོད་པ་ནི། ཤིན་ཏུ་ནང་འགལ་བའང་ཡིན་ནོ། །ད་ནི་འདི་དཔྱད་དེ། འདིར་མང་པོ་ཞིག་འཇིགས་མཛད་ཀྱི་སྒྲུབ་ཐབས་ཡིད་བཞིན་གྱི་གཏེར་མཛོད་དང༌། དེའི་དཀྱིལ་ཆོག་དང༌། སྒྲུབ་ཐབས་ཆུང་བ་བཞི་ལ་སོགས་པ་ནི། རྭ་ལོ་ཆེན་པོའི་གསུང་དུ་འདོད་ཅིང༌། དེ་ལ་བསམས་ནས་དགག་པའང་གཏོང་བ་མང་མོད་ཀྱི། ཁུངས་དང་ལྡན་པའི་གཏམ་ལས། རྭ་ཤར་བ་དཀོན་མཆོག་སེང་གེས་མཛད་དོ། །ཞེས་འབྱུང་བ་ཉིད་འཐད་དེ། རྒྱུ་མཚན་ལར་མང་མོད་གཅིག་དཔེ་ཙམ་དུ་སྨྲོས་ན། སྒྲུབ་དཀྱིལ་འདི་དག་ཏུ། བཅོམ་ལྡན་དེ་བཞིན་གཤེགས་པ་ཀུན། །སོགས་དང༌། སངས་རྒྱས་རྣམས་ནི་ཐམས་ཅད་ཀྱི། །ཞེས་སོགས་འབྱུང་ན། ཚིག་བཅད་འདི་ནི་འབྲོག་འགྱུར་ཡིན་གྱི་རྭ་འགྱུར་མ་ཡིན་ནོ། །རྭ་འགྱུར་ལས་ནི། གསང་གསུམ་གནས་ལས་བྱུང་བ་ཡི། ཁམས་གསུམ་ཀུན་གྱིས་ཕྱག་བྱས་པ། །དབང་བསྐུར་རྡོ་རྗེ་ཆེན་པོ་འདི། །བྱིན་ཅིག་སངས་རྒྱས་ཐམས་ཅད་ཀྱི། །ཞེས་འབྱུང་བའི་ཕྱིར་རོ། །དེ་ལྟ་ན་ཡང་ངག་སྒྲོས་འཆུགས་པ་རེ་རེ་ཙམ་མ་གཏོགས། ཕལ་ཆེར་རྭ་ལོའི་མན་ངག་མ་ནོར་བ་ནི་ཡིན་ནོ། །དེ་ལྟར་གོ་ནའང་མི་མང་པོ་ཞིག་ལ་སྐུར་འདེབས་དང་མུན་ནག་ཆེ་ཚད་ཞིག་སངས་འགྲོ་བར་གདོག་གོ །དཀྱིལ་འཁོར་འདི་ལ་སྒྲུབ་ཐབས་འཁྱེར་བདེ་བ་ཁོ་བོས་སྔར་སྦྱར་བ་ཞིག་ཡོད་ནའང་ད་ལྟ་མ་རྙེད་པས། ད་ནི་འདིར་སྒྲུབས་ཐབས་སྙིང་པོ་ལ་འདོན་པ་

― TNT06_Page_0885 ―

^{[མ་དཔེ་གཟིགས་ན་འདིར་གནོན།]}

[Full Size]

སྤོས་ན་འགྲུབ་སྟེ། སྐྱབས་འགྲོ་སེམས་བསྐྱེད་རྡོར་སེམས་བསྒོམ་བཟླས། ཚོགས་ཞིང་སྤྱན་འདྲེན། ཕྱག་མཆོད། རྒྱུན་བཤགས། སྡོམ་བཟུང༌། ཚད་མེད་བཞི། སྟོང་པར་སྦྱང་བ། སྲུང་འཁོར་སྒོམ་པ་རྣམས་སྒྲུབ་ཐབས་སྙིང་པོ་བཞིན་བྱ་བ་ལས་འདིར་ཆོས་འབྱུང་གི་ཚིག་བོར་ཏེ། སྟོང་པའི་ངང་ལས་ཧཱུཾ་ལས་སྣ་ཚོགས་ཞེས་སྦྲེལ་ལོ། །དེ་ནས་ཕཊ་སྭཱཧཱ། སྲུང་བའི་འཁོར་ལོའི་ནང་དུ་པད་ཟླའི་སྟེང་དུ། སཾ་ལས་ཀུན་ཏུ་བཟང་པོ་དཀར་པོ། ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དར་དང་རིན་པོ་ཆེས་བརྒྱན་པ། དེ་ཞུ་བ་ལས་ཆོས་འབྱུང་གྲུ་གསུམ་ཕྱི་དཀར་ལ་ནང་དམར་བ། གདེངས་ཀ་གྱེན་དུ་ཕྱོགས་པ། དེའི་ནང་དུ་པཾ་ལས་པདྨ་དང༌། ཨ་ལས་ཟླ་བ་ལ་གནས་པའི་བྷྲུཾ་ལས་འཁོར་ལོ་དཀར་པོ་རྩིབས་བཅུ་གཉིས་པ་བྷྲུཾ་གྱིས་མཚན་པ། དེ་ལས་བྱུང་བའི་རྣམ་སྣང་དཀར་པོ། ཞལ་གཅིག་ཕྱག་གཉིས་ཏིང་ངེ་འཛིན་གྱི་ཕྱག་རྒྱས་འཁོར་ལོ་འཛིན་པ། རྡོ་རྗེའི་སྐྱིལ་མོ་ཀྲུང་གིས་བཞུགས་ཤིང་དར་དང་རིན་པོ་ཆེས་བརྒྱན་པ། དེ་ཞུ་བ་ལས་བྱུང་བའི་གཞལ་མེད་ཁང༌། གྲུ་བཞི། སྒོ་བཞི་པ། རིན་པོ་སྣ་ལྔ་ལས་གྲུབ་པ། ནང་ནས་རིམ་པ་བཞིན་དུ། ནག་སེར་དམར་ལྗང་དཀར་བའི་རྩིག་པ་རིམ་པ་ལྔ་དང་ལྡན་པ། དེའི་སྟེང་དུ་ཕ་གུ་སེར་པོ་དང༌། དྲ་བ་དྲ་ཕྱེད་འཕྱང་བ། རིན་པོ་ཆེའི་འཕྲེང་བ་དང་བཅས་པ། སྟེང་མདའ་ཡབ་མཆོད་རྟེན་གྱི་རྣམ་པར་མཛེས་པ། པུ་ཤུའི་ཁོར་ཡུག་ལ་གདུགས་དང༌། རྒྱལ་མཚན་དང༌། བ་དན་བསྒྲེང་བ། ནང་གི་ལྷ་

― TNT06_Page_0886 ―

^{[མ་དཔེ་གཟིགས་ན་འདིར་གནོན།]}

[Full Size]

སྣམ་ཤར་དཀར་ལྷོ་སེར་ནུབ་དམར་བྱང་ལྗང་བ། དབུས་ཀྱི་གྲུ་ཆད་ཀྱི་འོག་གཞི་རྡོ་རྗེའི་གཞི་ལ། སྟེང་དུ་རཀྟའི་རྒྱ་མཚོ་རྦ་ཀློང་འཁྲུག་པ། ནང་ཀ་བ་བརྒྱད་དང་ལྡན་པ། དེའི་དབུས་སུ་མི་མགོ་སྐམ་པོའི་ར་བ་ཟླུམ་པོ་སྒོ་གཅིག་པ། ཕྱི་ནང་གི་ས་གཞི་ཐམས་ཅད་ཁྲག་ཞག་འཁྲུག་པ། སྟེང་རྡོ་རྗེའི་གདུང་བཞིས་མིང་མངས་རིས་སུ་བྲིས་པ། ནང་རེ་མིག་དགུར་གྱུར་པའི་སྟེང་ཕྱོགས་ཀེང་རུས་ཀྱི་ཀ་གདུང་གིས་ཕུག་པ། གཡས་གཞིའི་བླ་བྲེ་དང༌། རྒྱུ་རློན་གྱི་ལྡ་ལྡི་ལ་སོགས་པས་བརྒྱན་པའི་དབུས་ཕྱུར་བུར་གྱུར་པའི་རྩེ་མོར་རྡོ་རྗེ་དང་རིན་པོ་ཆེའི་ཏོག་གིས་མཚན་པ། རྩིག་པའི་ཕྱི་རོལ་འདོད་ཡོན་གྱི་སྣམ་བུ་ལ་མཆོད་པའི་གཟུངས་མ་རྣམས་དང༌། སྒོ་བཞིའི་ཐད་ཀ་ནས་ཀ་བ་བཞི་བཞིས་བཏེག་པའི་རྟ་བབས་རྣམས་ཀྱི་རྩེ་མོར། པདྨ་ལ་གནས་པའི་འཁོར་ལོ་དང༌། རི་དྭགས་དང༌། གདུགས་ཀྱིས་མཚན་པ། འཁྱམས་ལ་མཆོད་པའི་ཚོགས་ཐམས་ཅད་ཀྱིས་བརྒྱན་པའོ། །དེའི་ཕྱི་རོལ་ཏུ་གཏུམ་དྲག་སོགས་པ་ནས། སྣ་ཚོགས་པས་གང་བའོ། །ཞེས་བྱའོ། །རྭ་ལུགས་ཀྱི་མན་ངག་རྣམས་ལ་ཡང་དཀྱིལ་འཁོར་ནང་མ་རིལ་གྱི་ཐོད་མཁར་དུ་བྱེད་པ་དང༌། རེ་མིག་དབུས་མའི་ནང་དུ་ཐོད་མཁར་བྱེད་པ་ལུགས་གཉིས་བྱུང་ངོ༌། །དེ་གཉིས་འདམ་ཁ་ཡིན་ཡང་ནང་གི་དཀྱིལ་འཁོར་ཟླུམ་པོ་རིལ་གྱི་ཐོད་མཁར་དུ་བྱད་པ་འདི་ངོས་སྒོམ་སྟབས་བདེ་བར་སྣང་ངོ༌། །འདིར་ངོར་པ་དག་ན་རེ་ཐོད་མཁར་ལས་སྤྲ་ཁོག་བླང་བ་མ་གཏོགས། གསར་བའི་རྒྱུད་གཞུང་གི་ཁུངས་མེད་ཟེར་ཞིང༌། གཞན་མང་པོ་ཞིག་ཀྱང་དེ་ལྟར་སེམས་པར་སྣང་མོད། གསང་འདུས་ཀྱི་འགྲེལ་པ་རབ་ཞི་ཡེ་ཤེས་ཀྱིས་མཛད་པ་དང༌། རྒྱ་འགྲེལ་མཛད་བྱང་མེད་པ་ཞིག་དང༌། མཉམ་སྦྱོར་

― TNT06_Page_0887 ―

^{[མ་དཔེ་གཟིགས་ན་འདིར་གནོན།]}

[Full Size]

ཧེ་རུ་ཀའི་སྒྲུབ་ཐབས་འགའ་རེ་ན་ཡང་ཡོད་ལ། འདིར་རྟོག་བདུན་ལས། དཔའ་བོའི་གནས་ལ་གནས་པས་ཞེས་དང༌། དཀྱིལ་འཁོར་གྱི་གྲྭར་ཁྲག་གིས་ཆག་ཆག་གདབ་ཅེས་གསུངས་པས་གསལ་བར་བསྟན་ཅིང༌། ཞང་འགྱུར་ལྟར་ན། ཐོད་པ་བརྩེགས་པའི་རྩེ་མོ་མཐོན་པོ་འཇིགས་སུ་རུང་བ། ཞེས་པས་ཀྱང་བསྟན་ཏོ། ཁོ་བོས་ནི་མ་མཐོང་ཡང་དམ་པ་འགའ་ཞིག་གིས་གཟིགས་པ། ལཱི་ལ་བཛྲ་གྱི་དཀྱིལ་ཆོག་ལས་ཀྱང༌། ཟླུམ་པོ་རེ་མིག་དགུ་པ་སྟེ། །ཐོད་པ་སྐམ་རློན་འཕྲེང་གིས་བརྒྱན། །ཞེས་ཡོད་པར་གྲགས་སོ། །ཡང་ཁྱེད་སྤྲ་ཁོག་བླང་བ་ཞེས་པ་ཁྲོ་བོ་རྣམ་རྒྱལ་གྱི་རྒྱུད་ལ་ཟེར་ན་ནི། དེ་ལས་ནི་ཐོད་མཁར་སྟོན་བྱེད་ཀྱི་ཚིག་ཡེ་མེད་ན། ཁྱེད་ཀྱི་མནལ་ལམ་ལ་བྱུང་བ་ལགས་སམ་ཅི། ཡོད་པ་དག་མི་མཐོང་ལ་མེད་པ་དག་མཐོང་ཨ་རེ་རེ་ཞེས་བྱའོ། །དབུས་ཀྱི་རེ་མིག་ཏུ། རླུང་གི་དཀྱིལ་འཁོར་ལ་མི་རོ་མགོ་དང་རྐང་ལག་བྲལ་བ། དེའི་སྟེང་དུ་པཾ་ལས་སྣ་ཚོགས་པདྨ་འདབ་མ་སྟོང་དང་ལྡན་པ་དང༌། རེ་མིག་བརྒྱད་ལ། ཤར་དུ་མགོ་བོ། ལྷོར་ལག་པ་གཉིས། ནུབ་ཏུ་རྒྱུ་མ། བྱང་དུ་རྐང་པ་གཉིས། ཤར་ལྷོར་ཐོད་པ། ལྷོ་ནུབ་ཏུ་ཐོད་ཚལ། ནུབ་བྱང་དུ་རོ་རས། བྱང་ཤར་དུ་སྐྱེས་བུ་གསལ་ཤིང་གིས་ཕུག་པའོ། །དེ་རྣམས་ཀྱི་སྟེང་དུ། ཤར་དུ་པད་ཟླ། ལྷོར་པད་ཉི། ནུབ་ཏུ་པད་མའི་སྟེང་དུ་ཉི་མ་འོད་དང་བྲལ་བ། བྱང་དུ་པདྨ་ལ་རླུང་དཀྱིལ། མཚམས་བཞིར་པད་ཟླའི་གདན། ཤར་གྱི་ལྷ་སྣམ་ལ། སྒོའི་གཡས་སུ་གྲི་གུག །འཕང་ཐུང༌། གཏུན་ཤིང༌། གཡོན་དུ་ཆུ་གྲི། ཀ་ཎ་ཡ། ལྕགས་ཀྱུ། ལྷོའི་ལྷ་སྣམ་ལ། གཡས་སུ་སྟ་རེ། མདའ། ཁ་ཊཱཾ་ག །གཡོན་དུ་དབྱུག་པ། འཁོར་ལོ། ཞགས་པ། ནུབ་ཀྱི་ལྷ་སྣམ་ལ།

― TNT06_Page_0888 ―

^{[མ་དཔེ་གཟིགས་ན་འདིར་གནོན།]}

[Full Size]

གཡས་སུ་རྡོ་རྗེ། ཅང་ཏེའུ། ཕུབ། གཡོན་དུ་གཞུ། དྲིལ་བུ། རླུང་རས། བྱང་སྒོའི་གཡས་སུ་སྡིགས་འཛུབ། འཕན་རྩེ་གསུམ་པ། གླང་ལྤགས། གཡོན་དུ་ཐོ་བ། མདུང༌། མེ་ཐབ་བོ། །ཤར་སྒོར་ཐོ་བ། ལྷོ་སྒོར་དབྱུག་པ། ནུབ་སྒོར་པདྨ། བྱང་སྒོར་རལ་གྲི་རྣམས་ཉལ་ཐབས་སུ་གནས་པ་བཞི་པོ་དེའི་སྟེང་དུ་པདྨ་དང་ཉི་མའི་གདན་རེ་རེ། གྲྭ་བཞིར། རོ་ལངས་ནག་པོ་མགོ་གསུམ། ལག་པ་གསུམ། རྐང་པ་གསུམ་གར་བྱེད་པའམ། ཕྱག་གཉིས་གཡས་ཐལ་མོ་འཕྱར་ཞིང༌། གཡོན་ཐུགས་ཀར་ཐལ་མོ་བྱེད་པ་བསྒོམས་ཀྱང་རུང་ངོ༌། །དབུས་ཀྱི་གདན་གྱི་སྟེང་དུ། ཨ་ལས་ཟླ་བ་ལ་དྷཱིཿལས་རལ་གྲི་ཞེས་པ་ནས། རྩེ་དགུ་པ། རྭ་གདེངས་པ། འོད་འབར་བ། ལྟེ་བ་ལ་ཧཱུཾ་གིས་མཚན་པར་གྱུར། དེ་ལས་དེ་བཞིན་གཤེགས་པ་ཞེས་པ་ནས། རྡོ་རྗེས་མཚན་པའི་གྲི་གུག་གདེངས་ཤིང༌། ཐོད་པ་ཁྲག་གིས་གང་བ་ཐུགས་ཀའི་ཐད་ཀར་འཛིན་པས་ཡུམ་ལ་འཁྱུད་པ། གཡས་ལྷག་མ་ཞེས་པ་ནས། ཡེ་ཤེས་སེམས་དཔའ་འཇམ་དཔལ་གཞོན་ནུ། དེའི་ཐུགས་ཀར་ཏིང་ངེ་འཛིན་སེམས་དཔའ། རྡོ་རྗེ་རྩེ་ལྔ་པའི་ལྟེ་བ་ལ་ཧཱུཾ་ནག་པོ་འོད་ཟེར་འབར་བའོ། །ཞེས་སོ། །རྭ་ལུགས་ལ་གཡས་གཡོན་གྱི་ཞལ་དྲུག་པོ་རྭ་ཞལ་དུ་བཞེད་པ་དང༌། བརྩེགས་ཞལ་དུ་བཞེད་པ་དང༌། འདམ་ཁར་བཞེད་པ་གསུམ་ཡོད་པ། སྤྱིར་འདམ་ཁ་ཡིན་མོད་ཀྱང༌། རྭ་ལོ་ཆེན་པོའི་བཞེད་པ་རྭ་ཞལ་གཙོ་ཆེའོ། །བཅོམ་ལྡན་འདས་དེའི་སྐུ་ལ་འཁྱུད་པའི་ཡུམ་ཁྲོ་མོའི་དབང་ཕྱུག་རྡོ་རྗེ་རོ་ལངས་མ། གཅེར་བུ་སྐུ་མདོག་མཐིང་ནག་ཞལ་གཅིག་ཕྱག་གཉིས། གཡས་གྲི་

― TNT06_Page_0889 ―

^{[མ་དཔེ་གཟིགས་ན་འདིར་གནོན།]}

[Full Size]

གུར་འཕྱར་ཞིང༌། གཡོན་ཐོད་ཁྲག་འཛིན་པས་ཡབ་ཀྱི་མགུལ་ནས་འཁྱུད་པ། ཁྲོ་སྒེག་ལང་ཚོ་ལ་བབ་ཅིང༌། དབུ་སྐྲ་གྱེན་དུ་བརྫཻས་པ། ཕྱག་རྒྱ་ལྔ་དང་སྦྲུལ་གྱིས་བརྒྱན་པ། ཐོད་པ་སྐམ་པོའི་དབུ་རྒྱན་དང༌། དོ་ཤལ་ཅན། ཞབས་གཡོན་བསྐུམ་གཡས་བརྐྱང་པའི་སྟབས་ཀྱིས་བཅོམ་ལྡན་འདས་དང་མཉམ་པར་སྦྱོར་བའོ། །དེ་ཡན་ཆད་ནི་རྣལ་འབྱོར་བཞིའི་དབང་དུ་བྱས་ནས། རྣལ་འབྱོར་དང་པོ་དང་རྗེས་སུ་རྣལ་འབྱོར་ཡིན་ཡང་ནག་པོའི་རྒྱུད་ནས་གསུངས་པའི་རྣལ་འབྱོར་དང་པོ་གཉིས་ཇི་ལྟ་བ་བཞིན་འདི་ལ་འགྲིག་དཀའ་བས། ཏིང་འཛིན་གསུམ་དང་སྦྱར་ནས། དེ་ཡན་ཆད་དང་པོ་སྦྱོར་བའི་ཏིང་ངེ་འཛིན་དུ་བྱ་ལ། ལུགས་འདི་ལ་མཁའ་ནང་ནས་དཀྱིལ་འཁོར་སྤྲོ་དགོས་པའི་ཕྱིར། འཇིགས་མཛད་ཡབ་ཡུམ་ཁ་སྦྱོར་གྱི་སྐུ་ཅན་ངེས་པར་བསྒོམ་དགོས་ལ། ཁ་ཅིག་ཡུམ་ཅན་བྲིས་སྐུ་ལ་བྲིར་མི་རུང་ཟེར་བ་ཏོམ་ཚོལ་ཙམ་ཡིན་པས། རང་གང་ལ་ཡི་དམ་དུ་བྱེད་པ་དེ་ཉིད་བྲིར་རུང་ཞིང༌། ཁྱུང་པོ་རྣལ་འབྱོར་པའི་ཡིན་ཐང་ལ་ཡང་ཡུམ་ཅན་དུ་བྲིས་ཡོད་ལ། འོན་ཀྱང་ལུགས་དེ་ལ་ཡུམ་རྡོ་རྗེ་ཕག་མོ་དམར་མོ་ཡིན་ཞིང༌། འདིར་རོ་ལངས་མ་ནག་མོ་ཕྱག་གཉིས་པ་མཛད་པ་ནི། གདོང་དྲུག་དང་རྗེས་སུ་མཐུན་པ་ཡིན་ནོ། །ཡབ་ཀྱི་གསང་གནས་མི་དམིགས་ཏེ་སྟོང་པའི་ངང་ལས། ཧཱུཾ་ལས་རྡོ་རྗེ་སྔོན་པོ་རྩེ་ལྔ་པ་ཧཱུཾ་གིས་མཚན་པ་དང༌། ཡུམ་གྱི་མཁའ་མི་དམིགས་ཏེ་སྟོང་པའི་ངང་ལས། ཨཱཿལས་པདྨ་དམར་པོ་ཟེ་འབྲུ་ལ་ཨཱཿས་མཚན་པ། གཉིས་པའི་བུ་ག་ཕཊ་ཡིག་གིས་བཀག་པའོ། །ཡབ་ཡུམ་སྙོམས་པར་འཇུག་པའི་དགའ་བའི་སྒྲས། སངས་རྒྱས་བྱང་ཆུབ་སེམས་དཔའ་ཐམས་ཅད་སྤྱན་དྲངས། ཡབ་ཀྱི་ཞལ་དུ་ཞུགས་

― TNT06_Page_0890 ―

^{[མ་དཔེ་གཟིགས་ན་འདིར་གནོན།]}

[Full Size]

ཐུགས་ཀར་བྱང་ཆུབ་ཀྱི་སེམས་སུ་ཞུ། སྲོག་དག་པའི་ལམ་ནས་ཡུམ་གྱི་མཁར་བབས་པ་ཐིག་ལེ་བཅུ་བདུན་དུ་གྱུར། དེ་རྣམས་ལྷ་སོ་སོའི་ས་བོན་དུ་གྱུར། དབུས་སུ་ཡ་ལས་རྡོ་རྗེ་ཡས་མཚན་པ་ཡོངས་སུ་གྱུར་པ་ལས། བཅོམ་ལྡན་འདས་རྡོ་རྗེ་འཇིགས་བྱེད་ནས། མི་བཟོད་པའི་བདག་ཉིད་དུ་གྱུར། འདིར་ཡུམ་མ་བསྐྱེད་ཀྱང་ཆོག །བསྐྱེད་པར་སྤྲོ་ན་བཅོམ་ལྡན་འདས་དེའི་སོགས་གོང་བཞིན་བྱ། ཤར་དུ་ཀྵེ་ལས་འཁོར་ལོ་ཀྵེས་མཚན་པ་ལས། གཏི་མུག་གཤིན་རྗེ་གཤེད་དཀར་པོ་དཀར་ནག་དམར་བའི་ཞལ་གསུམ་ཕྱག་དྲུག་གིས། དང་པོ་གཉིས་གྲི་གུག་དང་ཐོད་པ་འཛིན་པས་རང་སྣང་གི་ཡུམ་ལ་འཁྱུད་པ། ལྷག་མ་གཡས་གཉིས་ཀྱིས་འཁོར་ལོ་དང་རལ་གྲི། གཡོན་གཉིས་ཀྱིས་ནོར་བུ་དང་པདྨ་འཛིན་པ། ལྷོར་མ་ལས་རིན་པོ་ཆེ་མས་མཚན་པ་ལས། ཕྲ་མ་གཤིན་རྗེ་གཤེད་སེར་པོ་སེར་ནག་དཀར་བའི་ཞལ་གསུམ་ཕྱག་དྲུག །དང་པོ་གཉིས་གོང་དང་འདྲ། ལྷག་མ་གཡས་གཉིས་ཀྱིས་རིན་པོ་ཆེ་དང་རལ་གྲི། གཡོན་གཉིས་ཀྱིས་འཁོར་ལོ་དང་པདྨ་འཛིན་པ། ནུབ་ཏུ་མེ་ཡིག་ལས་པདྨ་མེ་ཡིག་གིས་མཚན་པ་ཡོངས་སུ་གྱུར་པ་ལས། འདོད་ཆགས་གཤིན་རྗེ་གཤེད་དམར་པོ། དམར་ནག་དཀར་བའི༴ ཕྱག་དང་པོ་གཉིས་འདྲ། གཡས་གཉིས་ཀྱིས་པདྨ་དང་རལ་གྲི། གཡོན་གཉིས་ཀྱིས་འཁོར་ལོ་དང་ནོར་བུ། བྱང་དུ་ད་ཡིག་ལས་རལ་གྲི་ད་ཡིག་གིས་མཚན་པ་ཡོངས་སུ་གྱུར་པ་ལས། ཕྲག་དོག་གཤིན་རྗེ་གཤེད་ལྗང་ཁུ། ལྗང་ནག་དཀར་བའི༴ ལྷག་མ་གཡས་གཉིས་ཀྱིས་རལ་གྲི་དང་འཁོར་ལོ། གཡོན་གཉིས་ཀྱིས་རིན་པོ་ཆེ་དང་པདྨ་འཛིན་པ། ཤར་ལྷོར་ཛ་

― TNT06_Page_0891 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་འཁོར་ལོ་ཛས་མཚན་པ་ལས་རྡོ་རྗེ་ཙརྩི་ཀཱ་དཀར་མོ། དཀར་ནག་དམར་བ་སོགས་གཏི་མུག་གཤིན་རྗེ་གཤེད་དང་འདྲ་བ་ལས། གྲི་གུག་དང་ཐོད་པ་འཛིན་པས་རང་གི་ཐབས་ལ་འཁྱུད་པ། ཞེས་བརྗོད། ལྷ་མོ་གཞན་གསུམ་ལའང་ཕྱག་དང་པོ་གཉིས་རིགས་འགྲེའོ། །ལྷོ་ནུབ་ཏུ་ས་ལས་རྡོ་རྗེས་སས་མཚན་པ་ལས། རྡོ་རྗེ་ཕག་མོ་སྔོན་མོ་སྔོ་དཀར་དམར་བའི་ཞལ་གསུམ་རྩ་ཞལ་གྱི་སྟེང་དུ་ཕག་གདོང་ཅན། གཡས་གཉིས་རྡོ་རྗེ་དང་རལ་གྲི། གཡོན་གཉིས་འཁོར་ལོ་དང་པདྨ། ནུབ་བྱང་དུ་དོ་ལས་པདྨ་དོ་ཡིག་གིས་མཚན་པ་ལས། རྡོ་རྗེ་དབྱངས་ཅན་མ་དམར་མོ་དམར་ནག །སོགས་འདོད་ཆགས་གཤིན་རྗེ་གཤེད་དང་འདྲ། བྱང་ཤར་དུ་རུ་ལས་རལ་གྲི་རུ་ཡིག་གིས་མཚན་པ་ལས། གཽ་རི་ལྗང་ཁུ་སོགས་ཕྲག་དོག་གཤིན་རྗེ་གཤེད་དང༌། དེ་དག་གི་ཕྱི་ངོས་ཤར་ཕྱོགས་སུ་ཡ་ལས་ཐོ་བ་ཡས་མཚན་པ་ལས། ཐོ་བ་གཤིན་རྗེ་གཤེད་ནག་དཀར་དམར། སོགས། རིག་མ་དང་མཉམ་པར་སྦྱོར་བ། གཡས་གཉིས་ན་ཐོ་བ་རྭ་ཉི་ཤུ་པ་དང་རལ་གྲི། གཡོན་གཉིས་ན་ནོར་བུ་དང་པདྨ། ལྷོར་ཙ་ལ་དབྱུག་པ་ཙ་ཡིག་གིས་མཚན་པ་ལས། དབྱུག་པ་གཤིན་རྗེ་གཤེད་དཀར་པོ་དཀར་ནག་དམར་བའི། སོགས། གཡས་གཉིས་ན་དབྱུག་པ་དང་རལ་གྲི གཡོན་གཉིས་ན་འཁོར་ལོ་དང་པདྨ། ནུབ་ཏུ་ནི་ལས་པདྨ་ནི་ཡིག་གིས་མཚན་པ་ལས། པདྨ་གཤིན་རྗེ་གཤེད་དམར་པོ་སོགས་འདོད་ཆགས་གཤིན་རྗེ་གཤེད་དང་འདྲ། བྱང་དུ་ར་ལས་རལ་གྲི་ར་ཡིག་གིས་མཚན་པ་ལས། རལ་གྲི་གཤིན་རྗེ་གཤེད་ལྗང་ཁུ་སོགས་ཕྲག་དོག་གཤིན་རྗེ་གཤེད་དང་འདྲ། ལྷ་མོ་བཞི་རྣམས་

― TNT06_Page_0892 ―

^{[མ་དཔེ་གཟིགས་ན་འདིར་གནོན།]}

[Full Size]

མཆོད་ཕྱིར་ཐོགས་སྤངས་ཤིང་བུད་མེད་ཀྱི་མཚན་ཉིད་ཅན། ཁྲོ་བོ་བརྒྱད་སེ་རལ་ཁ་དང་བཅས་པ། ཐམས་ཅད་ཀྱང་སྤྱན་གསུམ་མཆེ་གཙིགས་དབུ་སྐྲ་གྱེན་དུ་བརྫེས་པ། སྟག་ལྤགས་དང་མགོ་འཕྲེང་དུ་རུས་པ་དང་སྦྲུལ་གྱིས་བརྒྱན་པ། ཞབས་གཡོན་བརྐྱང་གི་སྟབས་ཀྱིས་བཞུགས་པ། ཆ་བྱད་ཐམས་ཅད་བཅོམ་ལྡན་འདས་ཡབ་ཡུམ་དང་མཚུངས་ཤིང༌། གཏི་མུག་གཤིན་རྗེ་གཤེད་དང་ལྷ་མོ་བཞི་ཟླ་བའི་འོད་ཅན་དང༌། གཞན་རྣམས་ཉི་མའི་འོད་ཅན། ཐམས་ཅད་ཀྱང་མེ་དཔུང་འབར་བའི་དབུས་ན་བཞུགས་པའོ། །མཚམས་བཞིར། ཎ་ཡོ་ནི་ར་རྣམས་ལས་ཐོད་པ་ཁྲག་གིས་གང་བ་བཞི་པོ་རྣམས་ཀྱང་འཁོད་པར་གྱུར། མངོན་རྟོགས་ཡིད་བཞིན་གཏེར་མཛོད་ན། ཐོད་པ་བཞིའི་གསལ་ཁ་མེད་ཀྱང༌། བཅུ་གསུམ་མའི་ཕྱོགས་ལ་ངེས་པར་དགོས་སོ། །ཨོཾ་ཧྲཱྀཿཥྚཱིཿབི་ཀྲི་ཏཱ་ན་ན་ཧཱུཾ་ཕཊ། མཁའ་ནང་གི་གཙོ་བོ་ཡབ་ཡུམ་དཔག་ཏུ་མེད་པ་སྤྲོས། བཅོམ་ལྡན་འདས་མ་གཙོ་བོ་དང་བཅས་པའི་བ་སྤུའི་བུ་ག་ནས་ཕྱིར་བྱུང༌། མཁའ་དབྱིངས་ཐམས་ཅད་ཡོངས་སུ་གང་བར་བྱས། སེམས་ཅན་ཐམས་ཅད་ཀྱི་དོན་མཛད་ཅིང༌། ཁྱད་པར་དུ་ཡང་ཉོན་མོངས་པ་ཞེ་སྡང་སྦྱངས། ཞེ་སྡང་གཤིན་རྗེ་གཤེད་པོ་རྡོ་རྗེ་འཇིགས་བྱེད་ཆེན་པོའི་གོ་འཕང་ལ་བཀོད། ཚུར་འདུས་གཅིག་ཏུ་འདྲེས། དཀྱིལ་འཁོར་གྱི་གཙོ་བོ་རང་ཉིད་ཀྱི་ཐུགས་ཀར་ཐིམ། བདེ་སྟོང་གཉིས་སུ་མེད་པ་སྐུ་གསུམ་ཡེ་ཤེས་ལྔའི་བདག་ཉིད་དུ་གྱུར། ཨོཾ་ཛི་ན་ཛིཀ་ཧཱུཾ་ཕཊ། མཁའ་ནང་གི་གཏི་མུག་གཤིན་རྗེ་གཤེད་དཔག་ཏུ་མེད་པ་སྤྲོས། བཅོམ་ལྡན་འདས་མ་གཙོ་བོ་དང་བཅས་པའི་

― TNT06_Page_0893 ―

^{[མ་དཔེ་གཟིགས་ན་འདིར་གནོན།]}

[Full Size]

བ་སྤུའི་བུ་ག་ནས་ཕྱིར་བྱུང༌། མཁའ་དབྱིངས་ཐམས་ཅད་ཡོངས་སུ་གང་བར་བྱས། སེམས་ཅན་ཐམས་ཅད་ཀྱི་དོན་མཛད་ཅིང༌། ཁྱད་པར་དུ་ཡང་གཏི་མུག་སྦྱངས། གཏི་མུག་གཤིན་རྗེ་གཤེད་ཀྱི་གོ་འཕང་ལ་བཀོད། ཚུར་འདུས་གཅིག་ཏུ་འདྲེས། ཤར་གྱི་རེ་མིག་ཏུ་པད་ཟླའི་གདན་ལ་འཁོད་པར་གྱུར། ཨོཾ་རཏྣ་དྷྲྀཀ་ཧཱུཾ་ཕཊ། ཕྲ་མ་གཤིན་རྗེ་གཤེད༴ ཁྱད་པར་དུ་ཉོན་མོངས་པ་ང་རྒྱལ་དང་སེར་སྣ༴ ཕྲ་མ་གཤིན་རྗེ་གཤེད་ཀྱིས། ལྷོའི་རེ་མིག་ཏུ་པད་ཉི་ལ༴ ཨོཾ་ཨ་རོ་ལིཀ་ཧཱུཾ་ཕཊ། འདོད་ཆགས་གཤིན་རྗེ་བཤེད༴ ཉོན་མོངས་པ་འདོད་ཆགས་ཀྱི་རྣམ་རྟོག༴ འདོད་ཆགས་གཤིན་རྗེ་གཤེད་ཀྱི༴ ནུབ་ཀྱི་རེག་མིག་ཏུ་པདྨའི་སྟེང་དུ་ཉི་མ་འོད་དང་བྲལ་བའི་གདན་ལ༴ ཨོཾ་པྲཛྙཱ་དྷྲྀཀ་ཧཱུཾ་ཕཊ། ཕྲག་དོག་གཤིན་རྗེ་གཤེད༴ ཉོན་མོངས་པ་ཕྲག་དོག་གི་ཉེས་པ༴ ཕྲག་དོག་གཤིན་རྗེ་གཤེད་ཀྱི༴ བྱང་གི་རེ་མིག་ཏུ་པདྨ་དང་རླུང་དཀྱིལ་གྱི་གདན་ལ༴ ཨོཾ་མོ་ཧཱ་ར་ཏི་ཧཱུཾ་ཕཊ། ལྷ་མོ་རྡོ་རྗེ་ཙརྩི་ཀཱ༴ ཁྱད་པར་དུ་སའི་ཁམས་སྦྱངས། བྱམས་པ་ཆེན་པོ་ལ་བཀོད། ཤར་ལྷོའི་རེ་མིག་ཏུ་པད་ཟླའི་གདན་ལ་འཁོད༴ ཨོཾ་དྭེ་ཥ་ར་ཏི་ཧཱུཾ་ཕཊ། ལྷ་མོ་རྡོ་རྗེ་ཕག་མོ༴ ཆུའི་ཁམས༴ སྙིང་རྗེ་ཆེན་པོ༴ ལྷོ་ནུབ་ཀྱི་རེག་མིག་གི་པད་ཟླ༴ ཨོཾ་རཱ་གར་ཏི་ཧཱུཾ་ཕཊ། ལྷ་མོ་རྡོ་རྗེ་དབྱངས་ཅན༴ མེའི་ཁམས༴ དགའ་བ་ཆེན་པོ༴ ནུབ་བྱང་གི་རེ་མིག་ཏུ་པད་ཟླ༴ ཨོཾ་བཛྲ་ར་ཏཱི་ཧཱུཾ་ཕཊ། ལྷ་མོ་རྡོ་རྗེ་གཽ་རཱི༴ རླུང་གི་ཁམས༴ བཏང་སྙོམས་ཆེན་པོ༴ བྱང་ཤར་གྱི་རེ་མིག་ཏུ་པད་ཟླ༴ ཨོཾ་མུད་ག་ར་དྷྲྀཀ་ཧཱུཾ་ཕཊ། ཐོ་བ་གཤིན་རྗེ་གཤེད༴ ཕུང་པོའི་བདུད་བཅོམ། དད་པའི་

― TNT06_Page_0894 ―

^{[མ་དཔེ་གཟིགས་ན་འདིར་གནོན།]}

[Full Size]

སྟོབས་ལ་བཀོད། ཤར་སྒོར་པད་ཉིའི་གདན་ལ་འཁོད་པར་གྱུར། ཨོཾ་དཎྜ་དྷྲྀཀ་ཧཱུཾ་ཕཊ། དབྱུག་པ་གཤིན་རྗེ་གཤེད༴ ཉོན་མོངས་པའི་བདུད༴ བརྩོན་འགྲུས་ཀྱི་སྟོབས༴ ལྷོ་སྒོར་པད་ཉི༴ ཨོཾ་པདྨ་དྷྲྀཀ་ཧཱུཾ་ཕཊ། པདྨ་གཤིན་རྗེ་གཤེད༴ འཆི་བདག་གི་བདུད༴ དྲན་པའི་སྟོབས༴ ནུབ་སྒོར་པད་ཉི༴ ཨོཾ་ཁད་ག་དྷྲྀཀ་ཧཱུཾ་ཕཊ། རལ་གྲི་གཤིན་རྗེ་གཤེད༴ ལྷའི་བུའི་བདུད༴ ཏིང་ངེ་འཛིན་གྱི་སྟོབས༴ དཀྱིལ་འཁོར་ཆེན་པོའི་བྱང་སྒོར་པད་ཉི་ལ་འཁོད་པར་གྱུར། ཨོཾ་ཨཱཿཧཱུཾ། ལན་བཞི། ཐོད་པ་བཞི་གདན་དང་བཅས་པ༴ ཁྱད་པར་དུ་ཡུལ་དྲུག་གི་དྲི་མ་སྦྱངས། མངོན་པར་ཤེས་པ་དྲུག་ལ་བཀོད། ལྷ་སྣམ་ཀྱི་གྲྭ་བཞི་ལ། རྡོ་རྗེ་རོ་ལངས་བཞིའི་མདུན་དུ་པདྨའི་གདན་རེ་རེ་ལ་འཁོད་པར་གྱུར། འདིར་ཡིད་བཞིན་གཏེར་མཛོད་ལས། མཁའ་ནང་དུ་གཙོ་བོ་མི་སྐྱེད་པར། ཕྱི་དཀྱིལ་གྱི་གཙོ་བོ་སྤྲོ་བསྡུ་བྱས་པ་ནི། གསུང་བགྲོས་འཆུགས་པའི་དོན་ལ་ནོར་བ་ཡིན་ལ། མཁའ་ནང་དུ་ཐོག་མར་གཞལ་ཡས་ཁང་མི་སྐྱེད་པའི་ལུགས་སུ་བྱས་ཀྱང༌། སྒོ་སྐྱོང་བཞི་སྐྱེད་པའི་སྐབས་སུ། ཤར་སྒོར་ཞེས་སོགས་སྨྲོས་པ་ནི་ཡི་གེ་འཆུགས་པར་གསལ་ལོ། །སྤྱིར་མཁའ་ནང་དུ་གཞལ་ཡང་ཁང་སྐྱེད་ཅིང་སྤྲོ་བ་ལ་འགལ་བ་མེད་མོད་ཀྱི། ཅུང་ཟད་བསྡུས་པའི་དབང་དུ་བྱས་ཏེ་གཞལ་ཡས་ཁང་མི་བསྐྱེད་པ་ཉིད་རང་ལུགས་སོ། །སྒྲུབ་ཐབས་དེ་ལས། ལྷ་བཅུ་གསུམ་མ་གཏོགས་ཐོད་པ་བཞི་མེད་ནའང༌། ཡི་གེ་བཅུ་བདུན་གྱི་ངེས་པས་ཐོད་པ་བཞི་དགོས་ཤིང༌། ངེས་པར་དེ་མི་བྱེད་ན། རོ་ལངས་བཞི་ཐོག་མར་མི་བསྐྱེད་པ་སྐབས་འདིར་ཎ་ཡོ་ནི་ར་ལས་སྐྱེད་དེ་དབྱུང་དགོས་སོ། །

― TNT06_Page_0895 ―

^{[མ་དཔེ་གཟིགས་ན་འདིར་གནོན།]}

[Full Size]

ལྷ་ཐམས་ཅད་ཀྱི་མིག་ཏུ་ཀྵིཾ་ལས་འཁོར་ལོ་ཀྵིཾ་གིས་མཚན་པ་ལས་སའི་སྙིང་པོ། གཏི་མུག་གཤིན་རྗེ་གཤེད་ལྟ་བུ། རྣ་བར་ཛྲིཾ་ལས་རྡོ་རྗེ་ཛྲིཾ་གིས་མཚན་པ་ལས། ཕྱག་ན་རྡོ་རྗེ་སྟེང་ཞལ་སྤངས་པའི་རྡོ་རྗེ་ཕག་མོ་ལྟ་བུ། སྣར་ཁཾ་ལས་རིན་པོ་ཆེས་ཁཾ་གིས་མཚན་པ་ལས། ནམ་མཁའི་སྙིང་པོ་ཕྲ་མ་གཤིན་རྗེ་གཤེད་ལྟ་བུ། ལྕེ་ལ་གཾ་ལས་པདྨ་གཾ་གིས་མཚན་པ་ལས། སྤྱན་རས་གཟིགས་འདོད་ཆགས་གཤིན་རྗེ་གཤེད་ལྟ་བུ། དཔྲལ་བར་སྐཾ་ལས་རལ་གྲི་སྐཾ་གིས་མཚན་པ་ལས། སྒྲིབ་པ་རྣམ་སེལ་ཕྲག་དོག་གཤིན་རྗེ་གཤེད་ལྟ་བུ། ལྟེ་བར་སཾ་ལས་རྡོ་རྗེ་སཾ་གིས་མཚན་པ་ལས། ཀུན་ཏུ་བཟང་པོ་དཀར་པོ་དཀར་ནག་དམར་བའི་ཞལ་གསུམ་ཕྱག་དྲུག་ཕྱག་མཚན་རྡོ་རྗེ་ཕག་མོ་ལྟ་བུའོ། །སྤྱི་བོར་ཨོཾ་ལས་འཁོར་ལོ་ཨོཾ་གྱིས་མཚན་པ་ལས། སྐུ་རྡོ་རྗེ་གཏི་མུག་གཤིན་རྗེ་གཤེད་ལྟ་བུ། མགྲིན་པར་ཨཱཿལས་པདྨ་ཨཱཿས་མཚན་པ་ལས། གསུང་རྡོ་རྗེ་འདོད་ཆགས་གཤིན་རྗེ་གཤེད་ལྟ་བུ། ཐུགས་ཀར་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས། ཐུགས་རྡོ་རྗེ་སྟེང་ཞལ་སྤངས་པའི་རྡོ་རྗེ་ཕག་མོ་ལྟ་བུ་སྟེ་སྐྱེ་མཆེད་དྲུག་དང་རྡོ་རྗེ་གསུམ་སྟེ། ལྷ་དགུ་པོ་རྣམས་ཀྱི་ཐུགས་ཀར་ཡང༌། རང་རང་གི་ས་བོན་གྱིས་མཚན་པའོ། །དེ་ནས་དབང་བསྐུར་བ་དང༌། ཡེ་ཤེས་པ་གཞུག་པ་བསྡུས་པ་ལྟར་ན། མངོན་རྟོགས་སྙིང་པོར་བཤད་པ་བཞིན་བྱ། ཅུང་ཟད་སྤྲོས་པ་ལ་མོས་ན། རང་གི་སྙིང་གའི་ཏིང་ངེ་འཛིན་སེམས་དཔའ་ལས་འོད་ཟེར་འཕྲོས། རང་བཞིན་གྱི་གནས་ནས། དཔལ་རྡོ་རྗེ་འཇིགས་བྱེད་ཆེན་པོ་ལྷ་བཅུ་གསུམ་གྱི་བདག་ཉིད། དཀྱིལ་འཁོར་གྱི་འཁོར་ལོ་

― TNT06_Page_0896 ―

^{[མ་དཔེ་གཟིགས་ན་འདིར་གནོན།]}

[Full Size]

མདུན་གྱི་ནམ་མཁར་བཛྲ་ས་མཱ་ཛཿ ཨོཾ་བཛྲ་པུཥྤེ་ནས། ནཻ་ཝི་ཏེ་ཨཱཿཧཱུཾ། ཨོཾ་བཛྲ་མུད་ག་ར་ཛཿ ཨོཾ་བཛྲ་དཎྜ་ཧཱུཾ། ཨོཾ་བཛྲ་པདྨ་བཾ། ཨོཾ་བཛྲ་ཁཏྒ་ཧོཿ ཡང་ཧཱུཾ་ལས་འོད་ཟེར་འཕྲོས། རང་བཞིན་གྱི་གནས་ནས་དབང་གི་ལྷ། དེ་བཞིན་གཤེགས་པ་དང༌། བྱང་ཆུབ་སེམས་དཔའ་དང༌། ཁྲོ་བོའི་རྒྱལ་པོ་རྣམས་རང་རང་གི་རིགས་ཀྱི་བཙུན་མོའི་ཚོགས་དང་བཅས་པ། དབང་གི་དོན་དུ་བཛྲ་ས་མཱ་ཛཿ ཨརྒྷཾཾ་ནས་ཤཔྟའི་བར་གྱིས་མཆོད། སངས་རྒྱས་རྣམས་ལ་རྡོར་འཆང་གིས། །དབང་བསྐུར་བཞིན་དུ་འགྲོ་བ་རྣམས། །བསྒྲལ་ཕྱིར་ཡོན་ཏན་འབྱུང་བའི་གནས། །དེ་བཞིན་བདག་ལ་གནང་བ་ཞུ། །ཨོཾ་ཨ་བྷི་ཥིཉྩ་ཏུ་མཾ་སརྦ་ཏ་ཐཱ་ག་ཏ། ཞེས་གསོལ་བ་བཏབ་པས་དབང་གི་ལྷ་རྣམས་ཀྱིས། གསང་གསུམ་གནས་ལས་བྱུང་བ་ཡི། །ཁམས་གསུམ་ཀུན་གྱིས་ཕྱག་བྱས་པ། །དབང་བསྐུར་རྡོ་རྗེ་ཆེན་པོ་འདི། །བྱིན་ཅིག་སངས་རྒྱས་ཐམས་ཅད་ཀྱི། །ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་གཤེགས་ཀུན་ཁྲུས་གསོལ་ཅིག །ཨོཾ་སརྦ་ཏ་ཐཱ་ག་ཨ་བྷི་ཥེ་ཀ་ཡ་ས་མ་ཡ་ཤྲི་ཧཱུཾ། ཞེས་གསུངས་ཤིང༌། དེ་བཞིན་གཤེགས་པ་རྣམས་ཀྱིས་དབང་བསྐུར། ཙར་ཙི་ཀཱ་ལ་སོགས་པས་རྡོ་རྗེའི་གླུ་ལེན། གཟུགས་རྡོ་རྗེ་མ་ལ་སོགས་པས་ཡང་དག་པར་མཆོད། གུར་གུམ་ལ་སོགས་པ་མེ་ཏོག་གི་ཆར་དང༌། རྔ་བོ་ཆེ་ལ་སོགས་པ་རོལ་མོའི་སྒྲ་བསྒྲགས་ཏེ་དབང་བསྐུར་བས། ལྷ་རྣམས་ཀྱི་སྐུ་ལུས་བདུད་རྩིའི་ཆུ་རྒྱུན་གྱིས་ཁྱབ་སྟེ། ལུས་ངག་ཡིད་གསུམ་གྱི་དྲི་མ་སྦྱངས།

― TNT06_Page_0897 ―

^{[མ་དཔེ་གཟིགས་ན་འདིར་གནོན།]}

[Full Size]

དབང་གི་ལྷ་རྣམས་ཀྱང་སྤྱི་བོ་ནས་ཞུགས། བདག་ཉིད་སྐུ་གསུང་ཐུགས་རྡོ་རྗེའི་རང་བཞིན་དུ་བྱས། གཙོ་བོ་ཡབ་ཡུམ་ལ་མི་བསྐྱོད་པས་དབུ་བརྒྱན། གཏི་མུག་རྡོ་རྗེ་ཙར་ཙི་ཀཱ། །ཐོ་བ་གཤིན་རྗེ་གཤེད་རྣམས་ལ་རྣམ་སྣང༌། སེར་སྣ་རྡོ་རྗེ། ཕག་མོ་དབྱུག་པ་གཤིན་རྗེ་གཤེད་རྣམས་ལ་རིན་འབྱུང༌། འདོད་ཆགས་རྡོ་རྗེ། དབྱངས་ཅན་མ། པདྨ་གཤིན་རྗེ་གཤེད་རྣམས་ལ་སྣང་མཐའ། ཕྲག་དོག་རྡོ་རྗེ། གཽ་རཱི། རལ་གྲི་གཤིན་རྗེ་གཤེད་རྣམས་ལ་དོན་ཡོད་གྲུབ་པས་དབུ་བརྒྱན། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཏྨ་ཀོ྅ཧཾ། བཱཀ་དང༌། ཙིཏྟ་ལ་ཡང་སྦྱར། དེ་རྗེས་རྡོ་རྗེ་རྩེ་ལྔ་པའི་ཕྱག་རྒྱས་གནས་གསུམ་དུ་གཏུགས་པ་ནས། བསྟོད་པའི་ང་རྒྱལ་གཟུང་བའི་བར་སྙིང་པོ་བཞིན་བྱ་ལ། དེ་ནས། མི་ཐུང་སྒེག་པོ་སོགས་ཀྱིས་བསྟོད་པར་འདོད་ཀྱང༌། ངེས་པར་དགོས་པ་མིན་ལ། འཁོར་གྱི་བསྟོད་པ་ནི། གཏི་མུག་རྡོ་རྗེའི་རང་བཞིན་ཁྱོད། །སོགས་ཤླཽ་ཀ་བཞི་དང༌། འབྱུང་བཞི་རྣམ་དག་ཚད་མེད་བཞི། །འཕྲིན་ལས་བཞི་ལྡན་སྐུ་བཞིར་ལྡན། །འགྱིང་བག་ལྡན་པ་ལྷ་ཡི་ཚོགས། །བརྙེས་མཛད་ཡུམ་བཞིའི་སྐུ་ལ་འདུད། །བདུད་བཞི་སྒྲིབ་པ་བཞི་སྦྱོང་ཞིང༌། །ལྟ་བ་བཞི་ལས་རྣལ་གྲོལ་བ། །དགུག་འཛིན་འཆིང་སྡོམ་གཟིར་བྱེད་པ། །སྒོ་སྐྱོང་བཞི་ལ་ཕྱག་འཚལ་བསྟོད། །ཅེས་པ་རྣམས་ཁ་བསྐང༌། ཨོཾ་ཨཱཿཧཱུཾ་ཨོཾ་སརྦ་ནས། དགེ་བ་བྱང་ཆུབ་ཏུ་བསྔོ་བའི་བར་འདྲ་བ་ལས། གཞལ་ཡས་ཁང་ལ་ཐིམ། དེ་འོད་དུ་ཞུ། ལྷ་རྣམས་ལ་ཐིམ། འཁོར་བཅུ་གཉིས་པོ་དང་ཡུམ་ཡང་རང་ཉིད་ལ་ཐིམ། ཞེས་བརྗོད། བདུད་རྩི་མྱང་བ་ཡན་ཆད་དཀྱིལ་འཁོར་རྒྱལ་མཆོག་ཡིན་ལ།

― TNT06_Page_0898 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་རྒྱལ་མཆོག་ནི་གདོང་དྲུག་གི་སྐབས་སུ་བཤད་པ་དང་འདྲའོ། །འཁོར་གྱི་བཟླས་པ་བྱེད་པར་སྤྲོ་ན་ཡུམ་ལ། ཨོཾ་བཛྲ་བཻ་ཏ་ལཱི་ཨཱ་གཙྪ་ཨཱ་གཙྪ་ཧཱུཾ་ཛ་སྭཱཧཱ། ཞེས་པ་དང༌། འཁོར་གྱི་འབྱིན་སྔགས་རྣམས་བཟླའོ། །གཏོར་མའི་ཆོ་ག་ཡང༌། སྒྲུབ་ཐབས་སྙིང་པོར་བཤད་པ་དེ་ཁོ་ནས་ཆོག་པ་ལས། བལྟ་བར་མི་བཟོད་པའི་བདག་ཉིད། གཏི་མུག་གཤིན་རྗེ་གཤེད་ལ་སོགས་པའི་འཁོར་གྱིས་བསྐོར་བར་གྱུར། ཅེས་དང༌། མི་བསྐྱོད་པ་དང༌། འཁོར་རྣམས་ལ། གཙོ་བོ་ཉིད་ཀྱིས་དབུ་བརྒྱན། ཅེས་འདོན་པ་སྤོ། ལྷ་སོ་སོ་ལ་གཏོར་སྔགས་ལོགས་པར་དགོས་པ་ནི་མིན། བྱེད་པར་སྤྲོ་ན་རེ་རེའི་སྔགས་ཀྱི་མཐར། སརྦ་བིགྷྣཱན་སོགས་བཏགས་པས་འབུལ། སྤྲོས་པ་ལ་དགའ་ན། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཞེས་པའི་རྗེས་སུ་མཆོད་པ་བྱིན་གྱིས་བརླབས། མཆོད་བསྟོད་རྒྱས་བསྡུས་ཇི་ལྟར་འོས་པ། དཀྱིལ་ཆོག་དང་དྲུག་ཅུ་རྩ་བཞིའི་གཏོར་ཆོག་ལས་དྲངས་ཏེ་བྱས་ཀྱང་མི་རུང་བ་མེད་དོ། །རྡོ་རྗེ་འཇིགས་བྱེད་བཅུ་གསུམ་མའི་རིགས་ལ། རྒྱ་གཞུང་གཉིས་ན་དཀྱིལ་འཁོར་གཞལ་ཡས་ཁང་ལྷའི་གདན་དང་བཅས་པ་དགྲ་ནག་ཇི་བཞིན་དུ་མཛད་དོ། །དེ་ལས་པདྨ་སྲུང་བའི་ལུགས་འདི་ལའང་རེ་མིག་དགུ་དང་ཕྱག་མཚན་འགོད་པ་བྱས་ན་ལེགས་ཏེ། གཞན་དུ་ན་འདི་རྟོག་བདུན་གྱི་རྗེས་འབྲང་ཡིན་པ་ལ་རྟོག་བདུན་ཉིད་ལས་བཤད་པ་དང་ཅུང་ཟད་འགལ་བའི་ཕྱིར་རོ། །ཏིང་ངེ་འཛིན་ཆོ་གའི་རིམ་པ་ལ། བཻ་རོ་ཙ་ན་རཀྵི་ཏའི་དེ་འབྲས་བུ་རྡོ་རྗེ་འཛིན་པའི་སྐབས་ཞལ་གསུམ་ཕྱག་དྲུག་རྩ་ཞལ་མ་ཧེའི་ཞལ་ཅན་དུ་བྱེད་པ་དང༌། དཀྱིལ་འཁོར་རྒྱལ་མཆོག་གི་མཁའ་ནང་གི་གཙོ་བོ་ཞལ་དགུ་པ་བསྒོམས་ནས། དེ་སྤྲོས་ཏེ་རང་ལ་བསྟིམ་པས་རང་ཉིད་རྡོ་རྗེ་འཇིགས་བྱེད་ཕྱག་མང་དུ་འགྱུར་བར་བཞེད། རྒྱུ་རྡོར་

― TNT06_Page_0899 ―

^{[མ་དཔེ་གཟིགས་ན་འདིར་གནོན།]}

[Full Size]

འཛིན་གྱི་སྐབས་རྣམས་མ་གཏོགས། གཞན་ཆོ་ག་ཐམས་ཅད་དགྲ་ནག་བཅུ་གསུམ་མ་སྒྲ་ཇི་བཞིན་ཡིན་པས་འདི་ནི་ལྷ་འཇིགས་མཛད་ཡིན་པ་ཁོ་ན་ལས་རྟོག་བདུན་དང་བསྟུན་པ་མ་ཡིན་པས་རེ་མིག་དང་ཕྱག་མཚན་མེད་པར་དགྲ་ནག་ཁོ་ན་ལྟར་བྱས་ན་དེའི་ལུགས་ཡིན་པས་སྐྱོན་མེད་དོ། །ཀ་མ་ལ་རཀྵི་ཏའི་དེ་ཡང་ཕལ་ཆེར་དེ་དང་འདྲ་བ་ལས་གླུས་བསྐུལ་ལྷག་པོར་ཡོད་གཞན་རྒྱུའི་འཇམ་དཔལ་ལས་འབྲས་བུ་རྡོ་རྗེ་འཇིགས་བྱེད་དུ་བསྐྱེད་པའི་བར་རྟོག་བདུན་དང་བསྟུན། དེ་མན་ཆད་དགྲ་ནག་ནས་ཁ་བསྐང་བ་ཡིན་པས་རྭ་བའི་ལུགས་འདི་དང་མཐུན་ཤས་ཆེའོ། །རྒྱ་མཁར་བཀའ་བཅུ་པ་སོགས་ཁ་ཅིག་བཅུ་གསུམ་མ་ལ་གཞལ་ཡས་ཁང་དང་འཁོར་ཚོགས་དགྲ་ནག་ཁོ་ན་དང་མ་བསྟུན་ན་ཁུངས་མེད་པར་འགྱུར་བས། ངེས་པར་མཐུན་དགོས། དེའི་ཚེ་ཕྱག་མཚན་འགོག་པ་མི་དགོས་ཤིང༌། གྲྭ་བཞིར་རོ་ལངས་ཀྱང་མི་དགོས་ཞེས་ཟེར་ཞིང༌། རྭ་ལུགས་འགོག་སྟེ་འདི་སྐད་ཅེས། མགོ་བོ་ལ་སོགས་པ་ཕྱག་མཚན་གྱི་སྟེ། སླར་ལྷ་འགོད་པ་མི་རིགས་ཏེ། མགོ་བོ་ལ་སོགས་པ་འགོད་པ་ནི། ཕྱག་མཚན་དེ་དང་དེ་འཛིན་པའི་ལྷ་མགོད་པའི་དོན་ཡིན་གྱི། གཏི་མུག་གཤིན་རྗེ་གཤེད་ལ་སོགས་པ་བཀོད་ནས། མགོ་བོ་སོགས་ཡོད་དོན་མེད་དེ། དེ་དག་ལྷ་མཚན་ཡིན་པའི་ཕྱིར་རོ། །ཞེས་སེམས་ཀྱང་སྨྲའོ། །འདི་ནི་གསང་སྔགས་སྤྱི་འགྲོས་ལ་བསྒོམ་རྒྱུ་ཕྱག་མཚན་དེ་དག་འཛིན་པའི་ལྷ་ཡིན་ཡང༌། བྲི་བའི་དཀྱིལ་འཁོར་ལ་ཕྱག་མཚན་ཙམ་འབྲི་བའི་སྤྱིར་གཏང་ཙམ་ཕྱོགས་མཐོང་གོ་ཡང༌། རྒྱུད་སྡེ་འོག་མ་མང་པོ་དང་མཉམ་སྦྱོར་སོགས་བླ་མེད་ལ་ཡང༌། ཕྱག་མཚན་ཁོ་ནས་ལྷའི་གོ་ཆོད་པའི་གནས་སྐབས་མང་དུ་ཡོད་པ་དང༌། ཁྱད་པར་གཤིན་རྗེ་གཤེད་ལ་ཕྱག་རྒྱའི་དཀྱིལ་འཁོར་རྩལ་དུ་

― TNT06_Page_0900 ―

^{[མ་དཔེ་གཟིགས་ན་འདིར་གནོན།]}

[Full Size]

འདོན་པའི་སྐབས་མང་དུ་ཡོད་པའི། རང་ལུགས་ཀྱི་དམིགས་བསལ་རྣམས་མགོ་བའི་སྐྱོན་ཏེ། རྒྱུད་ལས། འཁོར་ལོའི་དབུས་སུ་ཕྱག་རྒྱའི་མཚན་མའོ། །ཞེས་གསུངས། ཕྱག་རྒྱ་ནི་ཕྱག་རྒྱ་ཆེན་པོ་སྟེ། ལྷ་ཉིད་ཡིན་ལ། མཚན་མ་ནི་གཙོ་བོའི་ཕྱག་མཚན་ཏེ། ཕྱག་མཚན་ཉིད་ལྷ་སྐུ་ཕྱག་རྒྱ་ཆེན་པོའོ། །ཞེས་པའི་དོན་ཡིན་ནོ། །གཞན་ཕལ་ཆེར་དུ་ཡང༌། ལྷ་རྣམས་ཀྱི་ཕྱག་མཚན་ལྷའི་ངོ་བོ་ཙམ་ཡིན་མོད་དེ། ལྷ་སྐུ་ཕྱག་རྒྱ་ཆེན་པོ་ནི་ཞལ་ཕྱག་གི་རྣམ་པ་ཅན་ཁོ་ན་ལ་ཟེར་བ་མང་ཡང༌། འདིར་ཕྱག་མཚན་ཉིད་ལྷ་སྐུ་ཕྱག་རྒྱ་ཆེན་པོ་ཡིན་པར་སྟོན་ལ། གཞན་དུ་ན་གཤིན་རྗེ་གཤེད་རྣམ་པར་རྒྱལ་བའི་ཕྱག་རྒྱའི་ལྷ་ཚོགས་རྣམས་ལ། དེ་དག་ཕྱག་ཏུ་འཛིན་པའི་ལྷ་གཞན་གང་ཞིག་སྐྱེད་བསམ་དགོས་སོ། །གཞན་ཡང་འཇིགས་བྱེད་ལ་མགོ་བོ་སོགས་ཕྱག་མཚན་བཀོད་པ་ནི། ཞེ་དགུ་མའི་དཀྱིལ་འཁོར་ཁོ་ནའི་དབང་དུ་བྱས་པ་ཡིན། རོ་ལངས་བརྒྱད་བསྐོར་ནི་ཕྱག་མཚན་མེད་པའི་དཀྱིལ་འཁོར་གཞན་ཡིན་ལ། བཅུ་གསུམ་མ་ནི་དེ་གཉིས་ཀ་མ་ཡིན་པར། འཁོར་ཚོགས་རྣམས་དགྲ་ནག་ནས་ཁ་བསྐང་ཕྱིན། ལྷའི་གདན་སོགས་ཀྱང་དགྲ་ནག་ཁོ་ན་དང་བསྟུན་དགོས་ཤིང༌། དེའི་ཡང་གཞུང་དག་ཤོས་དཔལ་འཛིན་གྱི་གཞུང་ཡིན། གཞན་རྣམས་ལ་ནི་ཡིད་བརྟན་མི་ཐུབ་པོ་སྙམ་དུ་སེམས་པར་འདུག་ན། འདི་ནི་དགྲ་ནག་དང་ཕྱོགས་མཚུངས་པ་ཡིན་གྱི། དགྲ་ནག་ཇི་ལྟ་བ་ཡིན་པར་མ་ངེས་མོད། གལ་ཏེ་འཁོར་ཚོགས་ནག་པོའི་རྒྱུད་ཇི་བཞིན་དུ་བྱེད་པ་ཡིན་དུ་བཅུག་ནས། དེ་ཡིན་ན། གདན་ཡང་དེ་ཁོ་ན་ལས་གཞན་དུ་འཁྱོགས་པར་མི་རུང་ན། བཞུགས་གནས་གཞལ་ཡས་ཁང་ཡང་དེ་ཁོ་ན་ལྟར་བྱེད་དགོས་པར་འགྱུར་བས། འཇིགས་བྱེད་བཅུ་གསུམ་མ་ལ་རེ་མིག་དགུ་མེད་པར། དབུས་ཀྱི་ལྷ་དགུ་སྣ་ཚོགས་རྡོ་རྗེ་ལ་

― TNT06_Page_0901 ―

^{[མ་དཔེ་གཟིགས་ན་འདིར་གནོན།]}

[Full Size]

མགོད་དགོས་པར་འགྱུར་ཞིང༌། ཡང་ན་འཇིགས་བྱེད་ལ་རེ་མིག་དགུ་ཡོད་པ་ལྟར། ནག་པོ་ལ་ཡང་རེ་མིག་དགུ་པ་བྱེད་དགོས་པར་ཐལ་བར་འགྱུར་རོ། །པདྨ་སྲུང་བ་དང༌། རྣམ་སྣང་སྲུང་བ་འཇིགས་བྱེད་ལ་ཡང་གདན་སྣ་ཚོགས་རྡོ་རྗེ་འདོད་ཅིང༌། ཞང་ལུགས་པ་རྣམས་དགྲ་ནག་ལ་ཡང་རེ་མིག་དགུ་འདོད་མོད་ཀྱི། ཁྱེད་ནི་དེ་ལྟ་བུ་ནམ་ཡང་མི་འདོད་པས་སོ། །རྒྱུད་ལས་དབུས་ཀྱི་རེ་མིག་ལ་མགོ་བོ་སོགས་འགོད་པར་བཤད་ཀྱི། གཏི་མུག་སོགས་མ་གསུངས་ལ། དེར་མགོ་བོ་སོགས་མ་བཀོད་ན། རྒྱུད་ལས་གསུངས་པ་ཆད་པའི་སྐྱོན་དུ་འགྱུར་ཞིང༌། རྒྱུད་ལས་གསུངས་པ་མ་ཆད་པའི་སྟེང་དུ། གྲུབ་ཐོབ་རྒྱུན་མ་ཆད་པའི་མན་ངག་གི་ལྷག་པོ་སྣོན་པ་མི་འགལ་ཡང༌། རང་གི་རྒྱུད་ནས་གསུངས་ངེས་ཤེས་པ་ཆད་ནས། མ་བཤད་པའི་ལྷག་པོའི་ཁ་སྐོང་གིས་ཅི་ཞིག་བྱ། དེ་བཞིན་དུ་ཁྱེད་ཀྱི་ལུགས་ལ་གཞལ་ཡང་ཁང་རྟོག་བདུན་གྱི་རྒྱུད་དང་མཐུན་པར་བསྒོམ་ན་ནི་ལྷ་སྣམ་ཡོད་ཅིང་ཕྱག་མཚན་ཡང་འགོད་དགོས་སོ། །ལྷ་སྣམ་ལ་དོན་ཀྱང་གྲི་གུག་སོགས་ཞེ་དགུའི་སྐབས་ཡིན་གྱི་གཞན་ལ་མི་དགོས་སྙམ་ན། ལྷ་སྣམ་སྟོང་པའི་འཁོར་ཡུག་གི་ཅི་ཞིག་བྱ། དཔའ་བོ་གཅིག་པ་ལྟ་བུ་ལྷ་གཅིག་ཡིན་ན་མ་གཏོགས། ལྷ་ཚོགས་རྣམས་དབུས་སུ་སྤུངས། འཁོར་ས་སྟོང་པར་བཞག་པ་ཤིན་ཏུ་མི་མཛེས་པས་སོ། །གལ་ཏེ་ལྷ་སྣམ་ལ་གྲི་གུག་སོགས་འགོད་ན། རེ་མིག་ལ་མགོ་སོགས་མ་བཀོད་པས། རྒྱུད་ལས་གསུངས་པའི་ཕྱག་མཚན་ཚང་བ་མི་འགོད་པར་ཐོ་རེ་ལོང་ངེ་བ་བཀོད་པར་འགྱུར་བས། ལ་ལ་འགོད་ལ། ལ་ལ་མི་འགོད་པ་རང་བཟོ་ཁོ་ནར་འགྱུར་རོ། །རྒྱུ་མཚན་དེའི་ཕྱིར་ན། ཕྱག་མཚན་མི་དགོད་ཅིང༌། རེ་མིག་དགུ་པ་བྱས་པ་འདི་ནི་དགྲ་ནག་ལུགས་ཀྱི་གཞལ་ཡས་ཁང་ཡང་མ་ཡིན་ལ། རྟོག་བདུན་ལུགས་ཀྱང་མ་ཡིན་པའི་འདྲ་མེན་བོང་ལྟོ་ཡིན་ནོ། །དེས་ན་རང་

― TNT06_Page_0902 ―

^{[མ་དཔེ་གཟིགས་ན་འདིར་གནོན།]}

[Full Size]

ལུགས་ནི། སློབ་དཔོན་སོ་སོའི་འདོད་ཚུལ་གྱི་རྗེས་མ་དེད། མན་ངག་ཡིན་ཟེར་བ་ལ་སྐྱབས་སུ་མ་སོང་བར། རྟོག་བདུན་གྱི་རྟོག་པ་དང་པོའི་དཀྱིལ་འཁོར་བྲི་བའི་སྐབས་སུ་གསུངས་པའི་སྒྲ་དོན་ཇི་ལྟ་བའི་དངོས་བསྟན་གྱི་དཀྱིལ་འཁོར་ནི་གཅིག་ཁོ་ན་ཡིན་ཏེ། དཀྱིལ་འཁོར་གཉིས་པ་སྟོན་པའི་ཚིག་ཅུང་ཟད་ཀྱང་མེད་པས་སོ། །དེས་ན་རེ་མིག་དགུ་དང་ལྷ་སྣམ་དང་བཅས་པའི་དཀྱིལ་འཁོར་ལ། དངོས་སུ་བཤད་པའི་ཕྱག་མཚན་སོ་གཉིས་འགོད། རོ་ལངས་བརྒྱད་ཀྱང་དཀྱིལ་འཁོར་དེ་ཁོ་ན་ལ་འགོད་དེ། དངོས་སུ་བཤད་པའི་དཀྱིལ་འཁོར་འདི་ཁོ་ན་ཡིན། རོ་ལངས་དང་མི་རོ་འདམ་ཁའམ་དོན་གཅིག་པར་གཞོན་ནུ་ཟླ་བས་བཤད་པ་སོགས་ཀྱང་འགལ་བ་མེད་ལ། གང་ལྟར་ནའང་ཞེ་དགུ་མ་དང༌། ལྷ་དགུའི་དཀྱིལ་འཁོར་ཀུན་རྟོག་བདུན་ཁོ་ན་ལ་བརྟེན་པས་ན་འདི་སྐབས་ཀྱང་རྒྱུད་དང་མ་འགལ་བ་དགོས་ཤིང༌། བཅུ་གསུམ་ཡང་རྟོག་བདུན་གྱི་རྗེས་འབྲང་དུ་བྱེད་ན། སྔར་བཤད་པའི་དཀྱིལ་འཁོར་ཡོངས་རྫོགས་ཀྱི་སྟེང་དུ། ལྷག་པོ་སྣོད་ཁ་རྒྱབ་ན་དག་པར་འགྱུར་གྱི། རྟོག་བདུན་གྱི་རྗེས་འབྲང་དུ་རློམ་བཞིན་དུ་རྟོག་བདུན་དང་འགལ་ན་ཅིར་ཡང་མི་རུང་ངོ༌། །ཅི་སྟེ་གཞན་དུ་ན་གཙོ་བོ་ཁོ་ན་འཕོས་པ་མ་གཏོགས་ནག་པོའི་དཀྱིལ་འཁོར་བཞིན་དུ་བྱས་ཏེ། རེ་མིག་དགུ་མེད་པར་སྣ་ཚོགས་རྡོ་རྗེ་བཀོད་ན་རྒྱུད་གཞན་གྱི་ཆོ་གས་བསྒྲུབས་པས་ལུགས་སུ་འགྱུར་ལ། དེ་འདྲ་ནི་རྟོག་བདུན་གྱི་དགོངས་པ་མིན་ཡང་མན་ངག་དང་ལྡན་ན་སྤྱི་ཙམ་ནས་མི་འགལ་ལོ། །དེས་ན་འདིར་རྭ་བའི་བཞེད་པས། རེའི་མིག་ཕྱག་མཚན་རྒྱུད་ནས་གསུངས་པ་ལྟར་མ་ཆད་པའི་སྟེང་དུ། ནག་པོ་ནས་འབྱུང་བ་དང་མཐུན་པར་རིགས་ལྔ་ཡུམ་བཞི་བཀོད། རོ་ལངས་ཆེན་པོ་བརྒྱད་ནི། རྒྱུད་ལས་རོ་ལངས་ཞེས་པ་ཙམ་མ་གཏོགས་གསལ་ཁ་མེད་པས། ལུགས་གཅིག་ལ་ལྷའི་གདན་དུ་

― TNT06_Page_0903 ―

^{[མ་དཔེ་གཟིགས་ན་འདིར་གནོན།]}

[Full Size]

འཆད་པ་དང༌། དེ་དང་བརྟུན་པའི་མན་ངག་ཟབ་མོ་ཡང་ཡོད་ཅིང༌། ཡང་རོ་ལངས་ཞེས་པ་རོ་ལངས་ཀྱི་ལྷ་ལ་འཆད་པ་ཤས་ཆེ་བས་དེའི་ལུགས་ཀྱང་ཡོད་པ། རྒྱུད་ཀྱི་རྡོ་རྗེའི་ཚིགས་གཅིག་ལ་བཤད་རྒྱུད་ཀྱིས་བཀྲལ་བའམ་གྲུབ་ཐོབ་ཀྱི་མན་ངག་དང་ལྡན་ན། དོན་གྱི་རྣམ་གྲངས་དུ་མ་འགལ་མེད་དུ་འབྱུང་བས། བཤད་ཚུལ་གཉིས་ཀ་རྣམ་གྲངས་མི་འདྲ་བ་ཙམ་མ་གཏོགས་འགལ་བ་མ་ཡིན་ལ། སྐབས་འདིར་རོ་ལངས་ཀྱི་ལྷའི་དབང་དུ་བྱས་ཏེ། བཅུ་གསུམ་མའི་སྐབས་དང་སྦྱོར་ན། ལྷ་དེ་ཡང་འདས་མ་འདས་གཉིས་སུ་འགྱུར་བ་ལས། མ་འདས་པ་བཞི་ནི་ཟུར་དུ་འགོད་ལ། འདས་པ་ནི་ཐོ་བ་གཤིན་རྗེ་གཤེད་ལ་སོགས་པ་བཞི་སྟེ། སྐབས་འདིར་འདི་དག་རོ་ལངས་ཀྱི་དངོས་གྲུབ་སྩོལ་བ་པོའི་ལྷ་ཡིན་པས། རོ་ལངས་ཉིད་ཡིན་གྱི་རོ་ལངས་ཀྱི་དོད་ཙམ་མ་ཡིན་ནོ། །དེའི་ཕྱིར་ཞལ་ཕྱག་གི་རྣམ་པ་ཅན་གྱི་ལྷའི་སྐུ་ལ། ལྷ་ཞེས་ཀུན་ལ་ཐུན་མོང་དུ་གྲགས་ཤིང༌། ཕྱག་མཚན་ནི་ལྷ་ཡིན་པར་གསང་སྔགས་པ་ནང་ཕན་ཚུན་དུ་ཅི་རིགས་པར་གྲགས་མོད་ཀྱང༌། ཀུན་ལ་ཐུན་མོང་དུ་མ་གྲགས་པ་དང༌། ཡང་རིམས་ཀྱི་བདག་པོའི་རོ་ལངས་ཀྱང་ཞལ་ཕྱག་ཅན་ཡིན་མོད། ཡེ་ཤེས་ལྷ་རྣམས་དང་དོད་མ་སྙོམས་པས་འཇིག་རྟེན་གྲགས་པའི་དབང་དུ་བྱས་ནས་དངོས་སུ་འདས་པའི་ལྷ་བཅུ་གསུམ་ཡོད་པས་ལྷ་བཅུ་གསུམ་མ་ཞེས་བརྗོད་དོ། །གཤིན་རྗེ་མོ་བརྒྱད་སྐོར་ཡང་རོ་ལངས་ཀྱི་ལྷ་ཉིད་ཡིན་པའི་ཕྱིར། རོ་ལངས་བརྒྱད་སྐོར་ཉིད་ཡིན་ཞིང༌། རྒྱུད་ལས། རོ་ལངས་ཞེས་པ་མ་གཏོགས་ཕོ་མོའི་དབྱེ་བ་མ་གསུངས་པས། གཉིས་ཀ་འབྱུང་དུ་རུང་ངོ༌། །གཞན་ཡང་རྒྱ་མཁར་བ་སོགས་རྭ་ལུགས་བཅུ་གསུམ་མ་ལ་འདོད་ཆགས་རྡོ་རྗེའི་གདན་ཉི་མ་འོད་དང་བྲལ་བ་དང༌། ཕྲག་དོག་རྡོ་རྗེའི་གདན་རླུང་དཀྱིལ་སོགས་དགྲ་ནག་ལ་མེད་པས་མ་དག་ཟེར་བ་ཡང༌། མན་ངག་མི་ཤེས་པའི་གཏམ་སྟེ། འདིར་བཤད་པའི་འཁོར་གྱི་ལྷ་བཅུ་

― TNT06_Page_0904 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་པོ་རྣམས་ནི། ནག་པོའི་རྒྱུད་ལས་འབྱུང་བ་དང་ཕལ་ཆེར་འདྲ་བའི་དབང་དུ་བྱས་ནས། རྡོ་རྗེ་འཇིགས་བྱེད་ལ་དགྲ་ནག་གི་འཁོར་གྱིས་བསྐོར་བ་ཞེས་གོ་བདེ་བའི་ཚིག་ཉུང་ངུར་བརྗོད་པ་ཡིན་གྱི། དོན་ལ་འཁོར་བཅུ་གཉིས་པོ་རྣམས་རྟོག་བདུན་ལས་མ་བཤད་ཀྱང་འཇིགས་མཛད་ཉིད་ཀྱི་འཁོར་ཡིན་པས། དགྲ་ནག་ལས་བླངས་པ་ཁོ་ན་རང་ཡང་མིན་ནོ། །འཕགས་ཡུལ་དུ་བཅུ་གསུམ་མ་ཐོག་མར་བྱེད་པ་པོའི་གྲུབ་ཐོབ་རྣམས་ཀྱིས་ཀྱང༌། འཇིགས་མཛད་ཆེན་པོའི་འཁོར་དེ་ལྟར་འདུག་པར་མངོན་སུམ་གྱིས་གཟིགས་པའམ། རྒྱུད་རྒྱས་པ་མཁའ་འགྲོའི་ཕྱག་ན་བཞུགས་པ་རྣམས་ཀྱི་དོན་རྟོགས་ནས་གསུངས་པའམ། ལྷག་པའི་ལྷས་འཁོར་རྣམས་ཞལ་ཕྱག་འདི་དང་འདི་ལྟ་བུ་སྒོམས་ཤིག་ཅེས། ལུང་བསྟན་པ་ལ་བརྟེན་ནས་བརྩམས་པ་ཡིན་གྱི། ཁྱེད་རྣམས་ཀྱི་གོ་ཡུལ་ལྟར་ན། འཇིགས་བྱེད་མཁན་པོ་སྔར་རྟོག་བདུན་ལག་ན་ཡོད་པ་ཅིག་གིས། ཕྱིས་དགྲ་ནག་གི་རྒྱུད་རྙཻད་པ་ན། སྔར་འཇིགས་བྱེད་འཁོར་གྱིས་འཕོངས་ནས། ཁས་མ་ཆད་པ་ཞིག་པ་ཡོད་པ་དེ་སྐབས་དེར་སྲོག་སྟོར་བ་རྙེད་པ་བཞིན། འདི་སྙམ་དུ་དགྲ་ནག་འདི་རྒྱུད་ཁུངས་མ་ཡིན་པར་འདུག་པས། དེའི་འཁོར་རྣམས་འདིར་སྦྱར་ན་ཤིན་ཏུ་འཛེམ་མོ་སྙམ་སྟེ་བཅུ་གསུམ་མ་བརྩམས་པ་ལྟ་བུའི་གོ་བ་ཅིག་ཤར་འདུག་སྟེ་དེ་འདྲ་ག་ལ་ཡིན། ཡང་དེར་མ་ཟད་ཡི་དམ་མམ་གྲུབ་ཐོབ་ཅིག་གིས་སློབ་མ་ལ་སྟོན་པ་ན། རྟོག་བདུན་གྱི་སྒྲུབ་ཐབས་འཆད་འཕྲོ་ལ། དགྲ་ནག་གི་རྒྱུད་དཔེ་ལ་འཛུབ་མོ་བཙུགས་ནས། འདིའི་འཁོར་རྣམས་འདི་ནས་ཡོང་བ་ལགས་སོ་ཟེར་གྱིན། ལུང་འདྲེན་ནར་ཙམ་ནར་ཙམ་བྱེད་པའི་གོ་བ་ཅིག་ཀྱང་ཁྱེད་རྣམས་ལ་ཤར་འདུག་སྟེ། སོ་སོ་སྐྱེ་བོ་ཕལ་བའི་རྒྱས་འགེབས་འཕགས་པ་ལ་བྱེད་པ་འདི་ག་སྐྱོན་ཆེ་བར་གདའ་འོ། །ཡང་ཞལ་གཟིགས་དང་ལུང་བསྟན་དང༌། རྒྱུད་རྒྱས་པ་ལ་བརྟེན་པ་སོགས་ལ་

― TNT06_Page_0905 ―

^{[མ་དཔེ་གཟིགས་ན་འདིར་གནོན།]}

[Full Size]

དཔལ་འཛིན་གྱི་ལུགས་ཀྱི་དགྲ་ནག་ཇི་བཞིན་དུ་ཡོང་བའི་རྒྱུ་མཚན་མེད་ཅིང༌། ཅི་སྟེ་དགྲ་ནག་གི་རྒྱུད་ལས་གསུངས་པ་ཡིན་དུ་ཆུག་ཀྱང༌། དཔལ་འཛིན་གྱི་རྗེས་འབྲངས་མ་ཡིན་པ་རྣམས་ལ། དཔལ་འཛིན་གྱི་གཞུང་ཁོ་ནས་ཞུས་དག་བྱེད་པ་ནི། བློ་གྲོས་ཀྱི་འཇུག་པ་གུ་དོག་པ་ལས་ཀྱང་ཆེས་དོག་པའི་ཨུ་ཚུགས་ཐབས་རྡུགས་སུ་སོང༌། དེས་ན་འདིར་དཔལ་འཛིན་མི་བཞེད་པའི་གདན་གྱི་ཁྱད་པར་མི་འདྲ་བ་དེ་ག་དང་ཕག་མོའི་ཕག་ཞལ་སྟེང་ཞལ་དུ་བྱེད་པ་དང༌། དཔལ་འཛིན་འདོད་པའི་ཙར་ཙི་ཀཱ་སྐེམ་ཁྲོས་དང༌། དབྱངས་ཅན་མ་ཞི་བ་དང༌། རལ་གྲི་གཤིན་རྗེ་གཤེད་ལྗང་ནག་སོགས་མི་བྱེད་པར་ཐམས་ཅད་ཀྱང་ཉམས་མཚུངས་པར་བྱེད་པ་སོགས་འདི་ཉིད་ཀྱི་རང་ལུགས་ཡིན་པས། ལུགས་གཞན་གྱི་ཞུས་དག་ག་ལ་དགོས། དཔེར་ན་པདྨ་སྲུང་བ་དང༌། རྣམ་སྣང་སྲུང་བ་གཉིས་ཀས། ཕག་མོ་སེར་མོ་བཤད་པའང༌། དགྲ་ནག་གི་རྒྱུད་དང་མི་མཐུན་མོད། དེ་གཉིས་ཀྱིས་དགྲ་ནག་གི་རྒྱུད་གཞུང་མ་མཐོང་བར། དགྲ་ནག་དང་འདྲ་བ་རྩོམ་མ་ཤེས་པ་ག་ལ་ཡིན། དེ་རྣམས་ཉིད་ཀྱི་རང་ལུགས་ཡིན་ནོ་ཞེས་གོ་དགོས་སོ། །ད་ནི་འདི་ལྟར། འདི་ལ་དག་སྦྱོར་ནི། བླ་མ་སྔ་རབས་པ་རྣམས་ཀྱིས་གསལ་བར་བཤད་པ་མེད་ལ། བར་སྐབས་པ་རྣམས་འདི་ལྟར་འཆད་དེ་གཞལ་ཡང་ཁང་བསྐྱེད་པ་མན་ཆད་སྤྱི་དང་འདྲ། རྒྱུའི་འཇམ་དཔལ་ནས་འབྲས་བུ་འཇིགས་བྱེད་དུ་བཞེངས་པའི་བར་གྱིས་བར་དོ་དང་མངལ་གྱི་གནས་སྐབས་སྦྱོང་ཞིང༌། སྐུའི་དག་སྦྱོར་གྱིས་མངལ་གྱི་གནས་སྐབས་འཕེལ་བ་སྦྱོར་ཚུལ་ཡང༌། རྡོ་རྗེ་འཇིགས་བྱེད་ཀྱི་སྒྲུབ་ཐབས་སྤྱི་དང་མཚུངས། སེམས་དཔའ་གསུམ་སེམས་ཀྱི་མཐུ་རྫོགས་པ་དང༌། མཁའ་གསང་བྱིན་རླབས་ནི་བདེ་བ་རྫོགས་པ་དང༌། སངས་རྒྱས་རྣམས་ཞལ་དུ་འཇུག་པ་ནི་ཁམས་ཀྱི་འཕེལ་འགྲིབ་དང༌། འཁོར་གྱི་བར་དོར་སྦྱོང༌། འཁོར་ཚོགས་སྤྲོ་བ་ནི་རིགས་

― TNT06_Page_0906 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱུད་སྤྲོ་བ་དང༌། སྤྲོ་བསྡུ་ནི་དེ་རྣམས་ཉིད་ཀྱི་མངལ་གྱི་གནས་སྐབས་དང༌། སྐྱེ་མཆེད་བྱིན་རླབས་མན་ཆད་ཞབས་ལུགས་དང་མཐུན་རུང་སྔར་ལྟར་འདོད་མོད། སེམས་དཔའ་གསུམ་བརྩེག་མན་ཆད་ནག་པོའི་སྐབས་རང་ལུགས་བཤད་པ་ལྟར་སྦྱར་ན་ལེགས་སོ་སྙམ་མོ། །དེ་ལ་རྭ་པ་རྣམས་ལས་རབ་འབྱམས་སྒྲུབ་པ་ལ་རྣོ་ཞིང་མྱུར་བ་དང༌། རོ་ལངས་སོགས་ཀྱི་དངོས་གྲུབ་ལ་རོ་ལངས་ཀྱིས་བསྐོར་བ་ཉིད་རྣོ་ཞིང་ཟབ་ལ། རྒྱུད་ལས་གསུངས་ཚོད་ཀྱི་རྩ་དཀྱིལ་ཡང་རོ་ལངས་བརྒྱད་བསྐོར་ཡིན་མོད། དང་པོར་སྨིན་བྱེད་ཀྱི་དབང་དང༌། རབ་གནས་ཆེན་མོ་སོགས་འཇིགས་མཛད་ཉིད་ལ་བརྟེན་ནས་སྒྲུབ་ཕྱིན། བཅུ་གསུམ་མ་ཉིད་དགེ་ཞིང་བཀྲ་ཤིས་ལ། རྒྱུད་སྨིན་ཚབས་ཆེ་བ་ཡིན་ཞེས་འདི་ལ་གཙོ་བོར་མཛད་ལ། བར་སྐབས་ཀྱི་རྭ་པ་རྣམས་ཆོག་སྒྲིགས་ལའང་བཅུ་གསུམ་མ་གཙོ་བོར་མཛད་ཅིང༌། དག་སྦྱོར་རྒྱ་ཆེ་བའི་ཕྱིར། མཆོག་སྒྲུབ་པ་ལའང་འདི་ཟབ་ཅེས་རྡོ་རྗེ་འཇིགས་བྱེད་ཉིད་ཀྱི་རྩ་དཀྱིལ་རང་ཡིན་པ་ལྟ་བུར་ལག་ལེན་ལ་འདེབས་རྒྱུའི་གཙོ་བོ་བཅུ་གསུམ་མ་ལ་མཛད་པ་ཤས་ཆེ་ཞིང༌། དོན་ལ་གནས་པ་ལ་ཡང་རྒྱུད་ཀྱིས་བསྟན་ཚོད་ཀྱི་རྩ་དཀྱིལ་རང་ནི་མིན་ཡང་ད་ལྟའི་བར་དུ་བྱིན་རླབས་ཀྱི་འཇུག་སྒོ་ཆེན་པོ་དང་ལྡན་པ་ཞིག་གོ །ངོར་བ་རྣམས་དགེ་ལྡན་པའི་བཅུ་གསུམ་མ་ལ་ཚིག་པ་ཟོས་པས་རྭ་ལོ་ཙཱ་བ་ལ་སྐུར་པ་འདེབས་པ་ནི། སྦྲང་བུ་བསད་པར་འདོད་པས་ཕའི་ཀླད་སྐོར་རྡོ་བས་བཅོམ་པའི་དཔེ་དང་འདྲའོ། །རྡོ་རྗེ་འཇིགས་བྱེད་ཀྱི་ཆོས་སྐོར་ལ། མན་ངག་སྣ་རེ་དང་བཤད་སྒྲོས་སྣ་རེ་ཙམ་ཤིན་ཏུ་ལེགས་པ་གཞན་ཅི་རིགས་ཡོད་སྲིད་ཀྱང༌། བྱིན་རླབས་ཀྱིས་བཀའ་བབས་དང་ལག་ལེན་འགྲན་ཟླ་མེད་པ་རྭ་ལུགས་ཡིན་ལ། རྭ་ལུགས་ལ་མོས་ཤིང་དཀྱིལ་འཁོར་ཡང་རྒྱས་པར་བསྒོམ་པར་འདོད་ན། དཀྱིལ་འཁོར་འདི་ལ་འཇུག་པར་བྱའོ། །དཀྱིལ་འཁོར་འདིར་བློར་མ་ཆུག་པའམ། དབང་ནི་མ་ཐོབ་བསྡུས་

― TNT06_Page_0907 ―

^{[མ་དཔེ་གཟིགས་ན་འདིར་གནོན།]}

[Full Size]

པས་ཡིད་མ་ཚིམ་པའམ་གཞན་ལ་ངོམས་པའི་ཕྱིར་རྒྱས་པ་དགོས་པ་བྱུང་ན། རྐངས་དེ་རྭ་ལུགས་ལ་བཅོལ་ནས་བདག་བསྐྱེད་ལ་ཡང་གཞལ་ཡས་ཁང་རྒྱས་པ་ལ་རོ་ལངས་བརྒྱད་དང༌། ཕྱག་མཚན་འགོད་པའི་སྒྲུབ་ཐབས་རྒྱས་པ་བྱེད་ཅིང༌། ཨུཥྞི་ཥ་རྭ་ལུགས་སོགས་ཀྱང་སྒྲུབ་ཐབས་ཀྱི་ནང་དུ་འདེབས་པ་དག་ཡོད་དེ། དེ་དག་ནི་བསྲེ་བསླད་ཡིན་པའི་ཕྱིར་མི་བྱ་སྟེ། ཨུཥྞ་ཥ་སོགས་ཐུན་མཚམས་སུ་བསྒོམ་པར་བྱ་ཡི། རྡོ་རྗེ་འཇིགས་བྱེད་ཀྱི་ཆོ་གའི་ཡན་ལག་མ་ཡིན་པས་མངོན་རྟོགས་ཀྱི་དཀྱིལ་དུ་བཅུག་ན་ཟབ་ཏུ་འགྲོ་བ་དཀའ་ཞིང༌། གཞན་འགའ་སེམས་དཔའ་བསྡུས་པའི་བསྲུང་འཁོར་རྟོག་བདུན་ལུགས་ཀྱི་ཆོ་གའི་གསེབ་ཏུ་འདེབས་པ་ཡང་དེ་དང་འདྲ་བས། དེ་བསྒོམ་ན་ཐོབ་ཐང་ལ་སེམས་དཔའ་བསྡུས་པ་རང་བསྒོམ་དགོས་ཀྱང༌། དེ་ལ་དབང་རྒྱུན་དང་ལག་ལེན་གྱི་རྒྱུ་ན་ལོགས་པ་མེད་པས། སྲུང་བཟློག་དགོས་པ་ལ་དེ་ཉིད་ལོགས་སུ་བསྒོམ་ན་བཟང་ངོ༌། །གཤིན་རྗེ་གཤེད་དམར་པོ་ལྷ་བཅུ་གསུམ་མའི་དབང་གི་བརྒྱུད་པ་ནི། རྡོ་རྗེ་འཆང༌། ཡེ་ཤེས་ཀྱི་མཁའ་འགྲོ་མ། སློབ་དཔོན་དཔལ་འཛིན། ཨ་ནུ་པ་མ་རཀྵི་ཏ། རཏྣ་ཨཱ་ཀ་ར་ཤཱནྟི། དྷརྨ་ཨཱ་ཀ་ར་ཤཱནྟི། རྡོ་རྗེ་གདན་གྱི་མཁན་པོ་ན་ཡ་ཀ་པ། བིཀྵྱ་ཏ་དེ་བ། དཱ་ན་ཤི་ལ། གཡག་སྡེ་ལོ་ཙཱ་བ། རོང་པ་རྒ་ལོ། རོང་པ་ཤེར་སེང༌། སྐྱི་སྟོན་གྲགས་རྒྱལ། ཀུན་མཁྱེན་ཆེན་པོ། ས་བཟང་པཎ་ཆེན། ཐེག་ཆེན་ཆོས་རྗེ། དྲག་ཐོག་པ་བསོད་བཟང༌། རྗེ་ཀུན་དགའ་རྣམ་རྒྱལ་བ། རིག་པའི་གློག་འཕྲེང༌། རྒྱ་སྟོནབྱང་དབང༌། ཤཱཀྱ་ཀུན་དགའ། བླ་མ་དམ་པ་ཡེ་ཤེས་དབང་པོ། དེ་ལ་བདག་གིས་ནོད་པ་ལགས་སོ། །ཡང་ན། འཇམ་དབྱངས་གཤིན་རྗེ་གཤེད་པོ་བིརྺ་པ། །ཌོཾ་བི་པ་དང་བྲམ་ཟེ་དཔལ་འཛིན་དང༌། །བི་ར་ཌི་པ་བློ་གྲོས་བཟང་པོ་དང༌། །ནིསྐ་ལངྒ་ར་བནྡེ་པ་དང༌། །གློ་བོ་ལོ་ཙཱ་བླ་ཆེན་འཕགས་པ་དང༌། །དཀོན་མཆོག་དཔལ་དང་ཆོས་རྗེ་བྲག་ཕུག་པ། །

― TNT06_Page_0908 ―

^{[མ་དཔེ་གཟིགས་ན་འདིར་གནོན།]}

[Full Size]

བསོད་ནམས་མཚན་དང་ཐེག་ཆེན་ཆོས་རྗེའོ། །དེ་མན་ཆད་གོང་དང་འདྲ་མོད། གློ་བོ་ལོ་ཙཱ་བས་དར་བན་ལ་གསན་ནམ་བརྟག་དགོས་སོ། །འདི་གློ་བོ་ལོ་ཙཱ་བ་ནས་བརྒྱུད་པ་སྟེ། བིརྺ་ཌོཾ་བི་གཉིས་འཇུག་པ་ནི། ལྷ་ལྔ་དང་བཅུ་གསུམ་མ་གཉིས་ཀའི་བརྒྱུད་ལ་ཚང་པའི་དབང་དུ་བྱས་པ་འདྲ་ཞིང༌། དཔལ་འཛིན་ལུགས་ཀྱི་ཕྱིར་ཟློག་སྲུང་འཁོར་གྱི་བརྒྱུད་པ་ནི་རྣལ་འབྱོར་བཞི་རིམ་དང་འདྲའོ། །ཡང་ཆག་ལུགས་ཀྱི་བརྒྱུད་པ་ནི། ར་བེན་དྲ་པ་ཡན་ཆད་དེ་དང་འདྲ་བ་ལས། ཆོས་རྗེ་དཔལ་དང་རྒྱལ་མཚན་དགེ་བ་དང༌། །ཤོང་ལོ་བློ་བརྟན་མང་མཁར་ལོ་ཙཱ་དང༌། །དཔལ་ལྡན་སེང་གེ་བུ་སྟོན་ཆོས་རྗེ་དང༌། །སྒྲ་ཚད་པ་དང་ནམ་མཁའ་མཆོག་གྲུབ་དང༌། །རིན་ཆེན་དཔལ་གྲུབ་མཁྱེན་རབ་ཆོས་རྗེ་དང༌། །རིག་འཛིན་རྒྱལ་པོ་ཆོས་རིག་རྒྱལ་མཚན་དང༌། །བསོད་ནམས་དཔལ་འབྱོར་བཀྲ་ཤིས་རྒྱལ་མཚན་དང༌། དཔལ་ལྡན་ཆོས་བཟང་ཞབས་ལས་བདག་གིས་འཁུམས། དཱ་ན་ཤཱི་ཀའི་ལུགས་ལ་ནི། གཡག་སྡེ་ལོ་ཙཱ་བ་བསོད་སེང༌། ཟེ་དམར་བ་སངས་རྒྱས་ཡེ་ཤེས། དེ་ལ་ཀུན་མཁྱེན་ཆེན་པོ་དང་བུ་སྟོན་ཆེན་པོ་གཉིས་ཀར་གྱིས་གསན་འདུག་པས་དེ་བཞིན་དུ་དེད་ཀྱང་ཆོག་གོ །གཤིན་རྗེ་གཤེད་ནག་པོའི་དབང་གི་བརྒྱུད་པ་ལས། རྭ་ལུགས་ཀྱི་བརྒྱུད་པ་ནི། རྡོ་རྗེ་འཆང༌། ཡེ་ཤེས་མཁའ་འགྲོ་མ། ལ་ལི་ཏ་བཛྲ། ཨ་མོ་གྷ་བཛྲ། ཡེ་ཤེས་འབྱུང་གནས་སྦས་པ། པདྨ་བཛྲ། དཱི་པཾ་ཀ་ར་རཀྵི་ཏ། རྭ་རྡོ་རྗེ་གྲགས། རྭ་ཆོས་རབ། རྭ་ཡེ་ཤེས་སེང་གེ ། རྭ་འབུམ་སེང༌། རྗེ་བཙུན་རྒ་ལོ། རོང་པ་ཤེར་སེང༌། དཔལ་ལྡན་སེང་གེ ། བུ་སྟོན་ཆེན་པོ་མན་ཆད། རྗེ་བྱང་གླིང་པ་རིན་ཆེན་བཀྲ་ཤིས་རྒྱལ་མཚན་པའི་བར་དུ་དམར་པོ་ཆག་ལུགས་ཀྱི་སྐབས་དང་འདྲ་བ་ལས། མཁས་མཆོག་བྱམས་པ་ལྷུན་གྲུབ། དེས་བདག་ལའོ། །འདི་དང་གདོང་དྲུག་ལ་མལ་ལུགས་དང་ཞང་ལུགས་དང་སྐྱོ་ལུགས་ཀྱི་བརྒྱུད་པའང་འདུས་པ་ཡིན་མོད་ཀྱི་འདིར་མ་བྲིས་སོ། །འདིར་རྭ་བ་རྣམས་དགྲ་ནག་གི་ལ། ཏི་ལི་པ། ནཱ་རོ་པ། པྲཛྙཱ་རཀྵི་ཏ།

― TNT06_Page_0909 ―

^{[མ་དཔེ་གཟིགས་ན་འདིར་གནོན།]}

[Full Size]

བལ་བོ་ཐུགས་རྗེ་ཆེན་པོ་ཞེས་བརྒྱུད་པ་འདེད་པ་དང༌། གདོང་དྲུག་ལ་ཡེ་ཤེས་མཁའ་འགྲོ་མ། ནག་པོ་སྤྱོད་པ་པ། བྷ་དྲ་པ། དྷ་མ་པ། དེ་བ་པ། ཛེ་ཏཱ་རི་པ། ཨ་ནང་ག་པ། དྷརྨ་ཨ་ཀ་ར་མ་ཏི། བལ་པོ་ཐུགས་རྗེ་ཆེན་པོ་ཞེས་བརྒྱུད་པ་འདེད་པ་ནི། རྭ་ལུགས་ཀྱི་དགྲ་གདོང་འཇིགས་གསུམ་ཚང་མ་ལ་འདམ་ཁའི་ཚུལ་དུ་སྦྱོར་རྒྱུ་ཡིན་གྱི་སོ་སོ་ལ་ངེས་ཅན་སྦྱོར་བ་ལྟར་བྱེད་པ་ནི། སྔོན་ཅིག་གིས་མཁས་ཁྱད་དུ་བྱས་པ་དེ། དཔྱད་པ་མེད་པར་ཕྱིས་མཁས་རྨོངས་ཀུན་ལ་ཁྱབ་པ་ཡིན་ནོ། །སྤྱིར་རྒྱ་གར་ན་རྩ་བའི་བླ་མ་བྱིན་རླབས་དང་ནུས་མཐུར་ལྡན་པ་དང་ཐོག་མའི་སྲོལ་འབྱེད་ཀྱི་གཞུང་བཟང་བ་ལ་འདམ་གྱི། བར་སྐབས་ཀྱི་བརྒྱུད་པ་ལ་རྩད་གཅོད་ཆུང་བས་བརྒྱུད་ཡིག་སོ་སོ་ན་འཁོད་པ་རྣམས་ལའང༌། པཎ་གྲུབ་གཅིག་ནས་བརྒྱུད་པའི་ཆོས་གཅིག་ལའང་ལོ་ཙཱ་བ་སོ་སོའི་འདོད་པས་དེ་གོང་གི་བརྒྱུད་པ་མི་འདྲ་བ་དུ་མ་བྱུང་བ་ཡིན་ནོ། །འདི་བོད་མཁས་རྨོངས་ཀུན་གྱིས་ནན་ཏན་དུ་གོ་དགོས་སོ། །རྡོ་རྗེ་འཇིགས་བྱེད་ཞེ་དགུ་མ་དང༌། ཁྲོ་མོ་བརྒྱད་སྐོར་གཉིས་ཀ་ལ། དེང་སང་ཕལ་ཆེར་བརྒྱུད་པ་འདེད་ལུགས་འདྲ་བར་བྱེད་དེ། རྡོ་རྗེ་འཆང༌། ཡེ་ཤེས་ཀྱི་མཁའ་འགྲོ་མ། ལ་ལི་ཏ་བཛྲ། འཇམ་དཔལ་བཤེས་གཉེན། ཨ་མོ་གྷ་བཛྲ་ཆེ་བ། ཨ་མོ་གྷ་བཛྲ་ཆུང་པ། དེ་ལ་སྔོན་སྐྱོ་ནག་འབྲོམ་སྟོན་ཞེས་བྱ་བ་ཕྱིས་སྐྱོ་འོད་འབྱུང་དུ་མཚན་གྲགས་པའི་སྐྱོ་ཆེན་པོས་གསན། དེ་ལ་སྲས་སྐུ་མཆེད་གཉིས་ཏེ། ཆེ་བ་འཇམ་དཔལ་དང༌། ཆུང་བ་པདྨ་ཞེས་བྱ་བ་ལ། མགྱོགས་མིང་དུ་སྐྱོ་འཇམ་མེ་དང༌། སྐྱོ་བའང་དེར་གྲགས་སོ། །མཆེད་དེ་གཉིས་ལ་འཇམ་མེའི་སྲས་སྐྱོ་ཁམ་པས་གསན། དེ་ནས་གཉན་རིན་ཆེན་བརྟན་པ། གཉན་འོད་སྲུང༌། གཉན་ཆོས་རྒྱལ། འཛིམས་པ་རིན་ཤེ ། ཤར་པ་འཇམ་དབྱངས་རིན་ཆེན་རྒྱལ་མཚན། ལ་རུ་བ་བསོད་ནམས་སེང་གེ ། ཀློག་སྐྱ་གྲགས་ཆེན། སྤང་ཁང་པ་གྲགས་པ་དཔལ། ས་བཟང་པཎ་ཆེན། ས་བཟང་འཕགས་པ།

― TNT06_Page_0910 ―

^{[མ་དཔེ་གཟིགས་ན་འདིར་གནོན།]}

[Full Size]

ས་བཟང་པ་སློབ་དཔོན་ཟླ་བ་རྒྱལ་མཚན། བློ་གྲོས་གྲགས་པ། བྱམས་པ་རྡོ་རྗེ་རྒྱལ་མཚན། ཤེས་རབ་རིན་ཆེན་པ། རྗེ་བཙུན་རྡོ་རྗེ་འཆང་དོན་གྱི་སླད་དུ་མཚན་ནས་སྨོས་ཏེ་ཀུན་དགའ་རྒྱལ་མཚན། དེས་བདག་ལ་སྩལ་ལོ། །དེ་ལྟ་ན་ཡང་ཁྲོ་མོ་བརྒྱད་སྐོར་གྱི་བརྒྱུད་པ་ནི་དེ་ཡང་ཡིན་ལ། ཡང་ན། སྐྱོ་ཆེན་པོ། ཉི་མ་ཤེས་རབ། ལྷོ་ནག་སྨོན་ལམ་ཚུལ་ཁྲིམས། ལྷོ་བ་ཀུན་མཁྱེན། རིན་ཆེན་བཟང་པོ། རྔོག་སེང་གེ་གྲགས། རྔོག་ཚ་བྱང་ཆུབ་བསོད་ནམས། མཁས་གྲུབ་རྡོ་རྗེ་བཟང་པོ། ཐར་པ་གླིང་པ་ཨཱརྱ་དེ་བ། གྲུབ་ཆེན་ཀུན་བློ། དགེ་བ་རྒྱལ་མཚན་པ། སྐྱེས་མཆོག་རྒྱལ་མཚན། སྐྱེས་མཆོག་རིན་ཆེན། ཡེ་ཤེས་རིན་ཆེན། ལྷ་ཆུང་བ། རྗེ་བྱམས་པ་ལྷུན་གྲུབ། དེས་བདག་ལའོ། །སེམས་དཔའ་བསྡུས་པའི་སྲུང་ཟློག་གི་བརྒྱུད་པའང་དེ་དང་འདྲའོ། །ཞེ་དགུ་མ་ནི། ཞང་དགེ་འདུན་བཟང་པོ་ལ་སྐྱོས་ཞུས་པར་སྣང་བས། དེ་ཡན་ཆད་དགྲ་ནག་ཞང་ལུགས་བཞིན་བརྒྱུད་པ་དེད་ན་ལེགས་སོ། །ཞེ་དགུ་མ་ཞང་ལུགས་ཀྱི་བརྒྱུད་པ་ནི། འཇམ་དཔལ་ཡེ་ཤེས་ཞབས་དང་མར་མེ་མཛད། །ལ་ལི་ཏ་དང་སོ་སུ་ར་པ་དང༌། །ཤེ་ན་པ་དང་ཨ་བ་ལི་ན་པ། །གུ་ཎ་བྷ་དྲ་ངག་དབང་གྲགས་པ་དང༌། །ལྷ་འབྱུང་ཟླ་བ་ཅོ་གྲུ་ཤེས་རབ་བླ། །དགེ་འདུན་བཟང་པོ་དབང་བསོད་རྡོ་རྗེ་རྩེ། །ཉི་མ་འོད་དང་རིན་ཆེན་གྲགས་པ་དང༌། །བསམ་གླིང་རྡོར་འོད་འཛིམ་པ་རིན་ཤེ་དང༌། །ཉི་མ་བཤེས་གཉེན་ཨེ་བ་མཁོན་སྟོན་དང༌། །དཀོན་མཆོག་བཟང་པོ་ནམ་མཁའ་སྨོན་ལམ་དང༌། །ནམ་མཁའ་བཟང་པོ་མཁས་གྲུབ་ཆོས་བཟང་དང༌། །སངས་རྒྱས་དར་དང་བློ་གྲོས་རིན་ཆེན་དང༌། །དངོས་གྲུབ་རྒྱ་མཚོ་ཤེས་རབ་རྒྱ་མཚོ་དང༌། །རྩ་བའི་བླ་མ་རྡོ་རྗེ་འཆང་ཆེན་ཏེ། །བརྒྱུད་པའི་བླ་མ་རྣམས་ལ་གསོལ་བ་འདེབས། །རྡོ་རྗེ་འཇིགས་བྱེད་མལ་ལུགས་ཀྱི་བརྒྱུད་པ་ནི། ཕམ་ཐིང་པའི་ལུགས་ལྟར་ན། རྒྱ་བལ་གྱི་བླ་མ་རྣམས་བདེ་མཆོག་ལཱུ་ཡི་པའི་བརྒྱུད་པ་

― TNT06_Page_0911 ―

^{[མ་དཔེ་གཟིགས་ན་འདིར་གནོན།]}

[Full Size]

སྒྲ་ཇི་བཞིན་དུ་འདེད། བརྒྱུད་པ་གཉིས་པ་ནི། འཇམ་དཔལ་ཡེ་ཤེས་ཞབས་དང་མར་མེ་མཛད། །ཛ་མ་རི་པ་རྣལ་འབྱོར་ན་རི་པ། །མི་མཉམ་རྡོ་རྗེའི་ཁོལ་དང་ཡི་རང་པ། །བློ་གྲོས་གྲགས་དང་སྙིང་པོ་རྩེ་མོ་དང༌། །གྲགས་པའི་མཚན་དང་པཎ་ཆེན་ཁུ་དབོན་དང༌། །ཨ་སྙན་དམ་པ་དགའ་ལྡན་ཀུན་བསོད་དང༌། །རྡོ་རྗེ་དཔའ་དང་ཀིརྟི་གསང་ཆེན་པ། །མ་ཏི་པཎ་ཆེན་ཐེག་ཆེན་ཆོས་རྗེ་དང༌། །གྲགས་པ་རིན་ཆེན་གྲུབ་ཆེན་ཀུན་བློ་དང༌། །དགེ་བ་རྒྱལ་མཚན་ཤེས་རབ་ཟླ་བ་དང༌། །ཀུན་སྤངས་ཆོས་རྗེ་འཇམ་དབྱངས་ཀུན་དགའི་མཚན། །བརྒྱུད་པའི་རིམ་པ་དེ་ལས་བདག་གིས་མནོས། །ཡང་ས་པཎ། གན་པ་ཆོས་རྒྱལ་ཆོས་རིན། རིན་རྒྱལ་ཏེ་གསུམ། མཁན་ཆེན་ཤེས་རབ་རྡོ་རྗེ། བླ་མ་ཆོས་དཔལ་ཤེས་རབ། རྒོད་ཕྲུག་གྲགས་པ་འབྱུང་གནས། དམར་སྟོན་རྒྱལ་མཚན་པ། སྐྱེས་མཆོག་རྒྱལ་མཚན་མན་ཆད་སྐྱོ་ལུགས་བཞིན་ནོ། །རྭ་ལུགས་འཇིགས་མཛད་བཅུ་གསུམ་མའི་བརྒྱུད་པ་ནི། རོ་ལངས་བརྒྱད་སྐོར་གྱི་ཐུན་མོང་མ་ཡིན་པའི་བརྒྱུད་པ་དང་འདྲ་བར་བྱས་ཀྱང་རུང་ལ། རྭ་ཆོས་རབ། རྭ་དཀོན་མཆོག་སེང་གེ ། དྷརྨ་སེངྒེ། ཤེས་རབ་རྒྱལ་མཚན། རྒྱ་དབང་ཕྱུག་རྒྱལ་མཚན། རྒྱ་སྟོན་ཀུན་དགའ་བརྩོན་འགྲུས། དྭངས་མ་བ་བརྩོན་འགྲུས་བྱང་ཆུབ། ཆོས་རྗེ་བསོད་ནམས་ཡོན་ཏན། བླ་མ་གྲགས་པ་རྒྱལ་མཚན། བླ་མ་དཀོན་མཆོག་དཔལ་བ། འཕགས་པ་བདེ་འབྱོར་པ། རྭ་པཎ་ཆེན་པ། རྩ་བའི་བླ་མ་རྭ་ཚུལ་ཁྲིགས་རྣམས་རྒྱལ། དེས་བདག་ལའོ། །ཡང་བསོད་ནམས་ཡོན་ཏན། དགེ་ལེགས་བཟང་པོ་པ། འཕགས་པ་བདེ་འབྱོར་པ་བྱས་ཀྱང་ཆོག་གོ །ཡང་ན་རྭ་ཤེས་རྒྱལ། ཁམ་པ་དཀོན་མཆོག་རིན་ཆེན། བླ་མ་འབྲོ་མཁར་བ། བླ་མ་གཟི་བརྗིད་པ། བླ་མ་རིན་ཆེན་རྒྱ་མཚོ། ཡང་བརྒྱུད་པ་ལུགས་གཅིག་ལ། རོང་པ་ཤེར་སོང༌། འཇམ་དབྱངས་ཉག་གཅིག །བླ་མ་དཀོན་བཟང་བ། ཡང་ན། བཞི་ཐོག་རིན་རྒྱལ། དགུ་རུམ་དཀོན་རྒྱལ། བག་སྟོན་པ། ཚུལ་རྒྱལ་པ། དཀོན་བཟང་ཚུལ་རྒྱལ་གཉིས་ལ་འཇམ་རལ་གྱིས་ཞུས། དེ་རྗེས་

― TNT06_Page_0912 ―

^{[མ་དཔེ་གཟིགས་ན་འདིར་གནོན།]}

[Full Size]

འཛམ་གླིང་ཉི་མ། རྭ་ཀུན་དགའ་སེང་གེ ། པཎ་ཆེན་པ་མན་ཆད་སྔར་བཞིན། ཡང་རྒྱ་སྟོན། ཁམས་པ་ཡོན་ཏན་འདུམ། མཆོད་རྟེན་དཀར་པོ་པ་སངས་རྒྱས་སྐྱབས། ལྷ་བསོད་ནམས་རིན་ཆེན། སློབ་དཔོན་བསོད་ནམས་རྒྱལ་མཆོག །རྗེ་བསམ་རིན། རྭ་ཀུན་དགའ་སེང་གེ་སོགས་གོང་བཞིན་དུ་ཤེས་པར་བྱའོ། །བཅུ་གསུམ་མའི་དབང་བསྐུར་བ་ཇོ་གདན་ཚོགས་པ་ཆོས་ལུང་བའི་མཁན་ཆེན་འཇམ་དབྱངས་རིན་རྒྱལ་བའི་དབང་ཆོག་སྟེང་ནས་ཕྱག་ལེན་རྒྱས་པ་དང༌། ཁྲོམ་ཡོན་པའི་ཊཱི་ཀའི་ལུང་སོགས་ལུང་བཀའ་མང་རབ་དང་བཅས་པ་མཁན་ཆེན་རིན་པོ་ཆེ་ལུང་རིགས་རྒྱ་མཚོའི་དྲུང་དུའང་ཐོབ་མོད། བརྒྱུད་པ་ཞུ་བ་མ་བྱུང་ངོ༌། །ཡང་བླ་མ་མཉམ་མེད་གྲགས་རྒྱལ། གཟུངས་ཀྱི་དཔལ་བ། དགེ་བཟང་བ་ཞེས་དེད་ཀྱང་ཆོག་གོ །རྗེ་གྲོལ་མཆོག་གི་གསན་ཡིག་ན། མཉམ་མེད་པ། གཟུངས་པ། དགེ་བཟང་བ། བླ་ཆེན་ཆོས་དཔལ་བ། བླ་མ་ནམ་མཁའ་རྡོ་རྗེ། རྭ་སྟོན་པ། རྗེ་བྱམས་གླིང་པ་དཔལ་ལྡན་ཚུལ་ཁྲིམས་ལ། རྗེ་གྲོལ་མཆོག་གིས་གསན་གསུང་བ་དེ་དངོས་སུ་རོ་ལངས་བརྒྱད་བསྐོར་ཡིན་རྒྱུ་གཅིག་བྱུང་ན་ཡང༌། བུ་སྟོན་གྱི་རོ་ལངས་བརྒྱད་བསྐོར་ཆེར་མ་མཛད་པ་འདྲ་བས་བཅུ་གསུམ་མའི་བརྒྱུད་པ་ཡིན་ནམ་སེམས། དེ་ལྟ་ན་རྗེ་དཔལ་ཚུལ་པ་ལ་གྲུབ་མཆོག་རྡོ་རྗེ་འཆང་རྩ་བའི་བླ་མས་གསན་འདུག །བདག་གིས་ཀྱང་བཀླགས་ཆོག་གི་དབང་ཐོབ་པ། བརྒྱུད་པ་རྩད་གཅོད་གནང་བ་མ་བྱུང་བཀའ་སྩོལ་ཡོད་ཀྱང་དེ་ལྟར་བྱས་པས་ཆོག་གམ་སྙམ་མོ། །ཡང་སྔགས་འཆང་ཀུན་དགའ་ཟླ་བས་ཀྱང་རོ་ལངས་བརྒྱད་བསྐོར་བདག་བསྐྱེད་ལ་ཡོད་པ། དཀྱིལ་འཁོར་སྒོ་བཞི་པའི་སྒྲུབ་ཐབས་བྱས་པ་ན། ཁོང་གིས་དགེ་བཟང་པ་ལ་ཞུས་པ་རྒྱ་སྟོན་ལ་བརྒྱུད་པ་དེད་འདུག་སྟེ། དགེ་བཟང་པ་ལ་བཅུ་གསུམ་མ་དང༌། རོ་ལངས་བརྒྱད་བསྐོར་བརྒྱུད་པ་ཐ་དད་ནས་བརྒྱུད་པ་ཡོད་ཀྱང་ཁོང་གིས་འདྲེས་པ་འདྲའོ། །

― TNT06_Page_0913 ―

^{[མ་དཔེ་གཟིགས་ན་འདིར་གནོན།]}

[Full Size]

མལ་ལུགས་ངོར་པ་ནས་བརྒྱུད་པའང༌། རྗེ་དཀོན་མཆོག་ལྷུན་གྲུབ་ལ། མཁས་མཆོག་བྱམས་པའི་མཚན་ཅན་གྱིས་གསན་འདུག །སྤྱིར་དེ་འདྲའང་ཡོད་མོད་འདིར་མི་འདོད་དོ། །ཡང་བཅུ་གསུམ་མ་ལ་རྭ་འབུར་སེང༌། རྒ་ལོ། གྲུ་གུ་མཁར་སྔོན་པ། རྭ་བན་ཆོས་དབྱིངས་པ། ཆོས་བསམ་འགྲུབ། ཆོས་བཀྲ་ཤིས། ཤེས་རབ་སེང་གེ ། ཀུན་དགའ་སེང་གེ ། ཆོས་ཀྱི་སེང་གེ ། འཇམ་དབྱངས་བློ་གྲོས། ཚུལ་ཁྲིམས་རྣམ་རྒྱལ། ཞེས་བརྒྱུད་པ་དེད་ནའང་བྱིན་རླབས་བརྒྱུད་པ་ཡིན་པས་ལེགས་སོ། །བརྒྱུད་པའི་རིམ་པ་བསྟན་པའི་སྐབས་སོ།། །།༈ ད་ནི་ཉེར་མཁོ་ཡན་ལག་ཕྲ་མོ་དག་བརྗོད་པར་བྱ་སྟེ། སློབ་དཔོན་ལི་ལ་བཛྲ་གྱིས་མཛད་པའི་རོ་ལངས་བརྒྱད་བསྐོར་གྱི་སྒྲུབ་ཐབས་ལས། ཁྲོ་བཅུ་ཞལ་གསུམ་ཕྱག་དྲུག་པའི་སྲུང་འཁོར་ཅིག་བཤད་ཀྱང༌། དེང་སང་དེ་ལ་རྒྱུན་དང་མན་ངག་མེད་ཅིང༌། ལར་ཡང་དེ་འདུས་པ་ཡེ་ཤེས་ཞབས་ལུགས་ལས་བླངས་པ་ཡིན་གྱི། གཤེད་སྐོར་རང་ལུགས་མིན་ནོ། །ཞབས་ལུགས་ལ་བྱེད་ཕྱིན་ཨུཥྞི་ཥ་གཉན་ལུགས་ཀྱི་མན་ངག་ཟབ་ལ་རྒྱ་ཆེ་བ་ཡོད་པས་དེ་སྒོམ་པ་མཆོག་ཡིན་ཞིང༌། དེ་ཡང་དམར་ནག་འཇིགས་གསུམ་གྱི་མངོན་རྟོག་ཀྱི་གསེབ་ཚགས་སུ་འདེབས་ན་མི་རུང་གི་ལོགས་སུ་བསྒོམ་པར་བྱའོ། །ཨུཥྞི་ཥ་རྭ་ལུགས་ཀྱང་འདུས་པ་ཞབས་ལུགས་དང༌། རྡོ་རྗེ་གུར་གྱི་མན་ངག་གུང་སྤྲོས་པ། བཟློག་པ་ཟབ་ལ་རྒྱས་པ་ཡིན་ཡང༌། གཤིན་རྗེ་གཤེད་ཀྱི་སྒྲུབ་ཐབས་ལ་དཀྱུས་སུ་འཇུག་རྒྱུ་མིན། ལོགས་སུ་བསྒོམ་པར་བྱ་བ་ཡིན་མོད་ཀྱི་ངག་འདོན་ཞིག་ལོགས་སུ་བཤད་ཟིན་ལ། ཨུཥྞི་ཥ་ལུགས་གཉིས་ནི་རྟགས་ཐོན་ཐོན་པ་བྱ་བ་བྱས་བྱས་པ་ཡིན་པར་གྲགས་པ་དོན་ལའང་དེ་ཀའི་ཚུལ་དུ་སྣང་བ་དེའི་མན་ངག་ནི་ཡིག་རྙིང་ལས་ཤེས་པར་བྱའོ། །ད་ནི་རྡོ་རྗེ་འཇིགས་བྱེད་ཀྱི་

― TNT06_Page_0914 ―

^{[མ་དཔེ་གཟིགས་ན་འདིར་གནོན།]}

[Full Size]

སྒྲུབ་ཐབས་བྱ་བའི་རིམ་པ་སེམས་དཔའ་བསྡུས་པ་ལས་འབྱུང་བ། སྲུང་འཁོར་གྱི་ཆོ་ག་ནི་འདི་ཡིན་ཏེ། སྤྲོས་པ་ལ་དགའ་ན། སྐྱབས་སེམས་ཡིག་བརྒྱ་ཚོགས་ཞིང་རྒྱུན་བཤགས་སྡོམ་བཟུང་ཚད་མེད་བཞི་རྣམས་སྔོན་དུ་བཏང༌། མདོར་བསྡུས་ན་སྐྱབས་སེམས་ཙམ་སྔོན་དུ་བཏང་ནས། དངོས་གཞི་ནི། ཨོཾ་སྭ་བྷཱ་ཝ༴ ཨོཾ་ཤཱུ་ནྱ་ཏ༴ སྟོང་པའི་ངང་ལས། ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་རྒྱལ་མཚན་གྱིས་མཚན་པ། དེའི་སྟེང་དུ་རཾ་ལས་མིའི་དཀྱིལ་འཁོར་དམར་པོ་གྲུ་གསུམ་འབར་བས་མཚན་པ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞི་རྡོ་རྗེས་མཚན་པ། དེའི་སྟེང་དུ་སུཾ་ལས་རིའི་རྒྱལ་པོ་རི་རབ་རིན་པོ་ཆེ་སྣ་བཞི་ལས་གྲུབ་པ། དེའི་སྟེང་དུ་པཾ་ལས་སྣ་ཚོགས་པདྨ་དང༌། རཾ་ལས་ཉི་མའི་དཀྱིལ་འཁོར་རོ། །དེའི་སྟེང་དུ་ཧཱུཾ་ལས་སྣ་ཚོགས་རྡོ་རྗེའི་ལྟེ་བ་ལ་ཧཱུཾ་གིས་མཚན་པ། དེ་ལས་འོད་ཟེར་ཕྱོགས་བཅུར་འཕྲོས། ཁོར་ཡུག་ཐམས་ཅད་རྡོ་རྗེའི་ར་བ། སྟེང་དུ་གུར་དང་བླ་རེ། ཕྱི་རོལ་ཏུ་མདའི་དྲ་བ་དང༌། མེ་རི་འབར་བར་གྱུར། ཨོཾ་མེ་དྷི་ནི་བཛྲི་བྷ་ཝ་བཛྲ་བནྡྷ་ཧཱུཾ་ཧཱུཾ་ཕཊ་ཕཊ། ཨོཾ་བཛྲ་པྲ་ཀ་ར་ཧཱུཾ་བཾ་ཧཱུཾ། ཨོཾ་བཛྲ་པཉྩ་ར་ཧཱུཾ་བཾ་ཧཱུཾ། ཨོཾ་བཛྲ་བི་ཏཱ་ན་ཧཱུཾ་བཾ་ཧཱུཾ། ཨོཾ་བཛྲ་ས་ར་ཛཱ་ལ་ཏྲཾ་སཾ་ཏྲཾ། ཨོཾ་བཛྲ་ཛྭ་ལ་ཨ་ན་ལཱརྐ་ཧཱུཾ་ཧཱུཾ་ཧཱུཾ། སྲུང་བའི་འཁོར་ལོའི་ནང་དུ་པཾ་ལས་པདྨ་དང༌། རཾ་ལས་ཉི་མའི་དཀྱིལ་འཁོར་གྱི་སྟེང་དུ། བྷྲུཾ་ལས་འཇམ་དཔལ་གཤིན་རྗེ་གཤེད་ཀྱི་གནས་འཁོར་ལོ་སེར་པོ་རྩིབས་བརྒྱད་པ། རྩེ་མོ་རྣོ་བ། གཡས་སྐོར་དུ་བར་མེད་དུ་འཁོར་བ། འཁོར་ལོའི་ལྟེ་བར་པཾ་ལས་པདྨ་དང༌། རཾ་ལས་ཉི་མའི་སྟེང་དུ་བདུད་བཞིའི་

― TNT06_Page_0915 ―

^{[མ་དཔེ་གཟིགས་ན་འདིར་གནོན།]}

[Full Size]

གདན། རྩིབས་བརྒྱད་ལ་པདྨ་དང་ཉི་མའི་གདན་ལ། ཤར་དུ་དབང་པོ། ལྷོར་གཤིན་རྗེ། ནུབ་ཏུ་ཆུ་ལྷ། བྱང་དུ་གནོད་སྦྱིན། བྱང་ཤར་དུ་འབྱུང་པོ། ཤར་ལྷོར་མེ་ལྷ། ལྷོ་ནུབ་ཏུ་སྲིན་པོ། ནུབ་བྱང་དུ་རླུང་ལྷ་རྣམས་བསྒྱེལ་བའི་བཾ་ཆེན་གྱི་གདན་རེ་རེར་གྱུར། དབུས་ཀྱི་གདན་གྱི་སྟེང་དུ་ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཞུ་བ་ལས་བྱུང་བའི་ཟླ་བའི་དཀྱིལ་འཁོར་མེ་ལོང་ཡེ་ཤེས། དེའི་སྟེང་དུ། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ་ཤ་ཥ་ས་ཧ་ཀྵཿ རྣམས་ཡོངས་སུ་གྱུར་པ་ལས། ཉི་མའི་དཀྱིལ་འཁོར་མཉམ་པ་ཉིད་ཀྱི་ཡེ་ཤེས། དེ་གཉིས་ཀྱི་བར་དུ་ཧཱུཾ་ལས་ཐོ་བ་ཧཱུཾ་གིས་མཚན་པ་དང༌། པཾ་ལས་གྲི་གུག་པཾ་ཀྱིས་མཚན་པ་སོ་སོར་རྟོག་པའི་ཡེ་ཤེས། དེ་རྣམས་གཅིག་ཏུ་འདྲེས་པ་བྱ་བ་སྒྲུབ་པའི་ཡེ་ཤེས། དེ་ལས་སྐུ་ཡོངས་སུ་རྫོགས་པ་ཆོས་ཀྱི་དབྱིངས་ཀྱི་ཡེ་ཤེས། བདག་ཉིད་བཅོམ་ལྡན་འདས་ཁྲོ་བོའི་རྒྱལ་པོ་གཤིན་རྗེ་ཐམས་ཅད་མཐར་བྱེད་པ། སྐུ་མདོག་དུས་ཀྱི་མུན་པ་ལྟར་གནག་ཅིང༌། ཆར་སྤྲིན་ལྟར་ངམ་ཟ་བ། ཉི་མ་འབུམ་དང་མཉམ་པའི་གཟི་བརྗིད་འབར་བས་འཇིགས་པའང་འཇིགས་པར་བྱེད་པ། ཞལ་དྲུག །ཕྱག་དྲུག །ཞབས་དྲུག་པ། རྩ་ཞལ་ནག་པོ་རབ་ཏུ་ཁྲོས་ཤིང་རྒྱ་ཆེར་བཞད་པ། གཡས་ཞལ་དང་པོ་དཀར་ཞིང༌། གཉིས་པ་ལྗང་ཁུ། གཡོན་ཞལ་དང་པོ་དམར་ཞིང་གཉིས་པ་སེར་པོ། སྟེང་ཞལ་སྔོན་པོ་རབ་ཏུ་གདངས་ཤིང་སྟེང་དུ་ཕྱོགས་པས་གནམ་དུ་གཟིགས་པའོ། །ཕྱག་གཡས་ཀྱི་དང་པོ་ན་རྡོ་རྗེ་ཐོ་བ། གཉིས་པ་ན་འཁོར་ལོ། གསུམ་པ་ན་བེ་ཅོན་

― TNT06_Page_0916 ―

^{[མ་དཔེ་གཟིགས་ན་འདིར་གནོན།]}

[Full Size]

དཀར་པོ། གཡོན་གྱི་དང་པོ་ན་པད་མ། གཉིས་པ་ན་རིན་པོ་ཆེ། གསུམ་པ་ན་རལ་གྲི་བསྣམ་པ། ཐོད་སྐམ་གྱི་དབུ་རྒྱན་དང༌། མགོ་རློན་གྱི་དོ་ཤལ་དང༌། གདུག་པའི་སྦྲུལ་གྱིས་སྐུ་ལ་བརྒྱན་པ། སྟག་ལྤགས་ཀྱི་སྨད་དཀྲིས་ཅན། ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་དང་ལྡན་པ། ལྗགས་འགྲིལ་ཞིང་མཆེ་བ་གཙིགས་པ། སྨ་ར་སྨིན་མ་དབུ་སྐྲ་དམར་སེར་གྱེན་དུ་བརྫེས་པ། ཚངས་པ་དང༌། དབང་པོ་དང༌། ཉེ་དབང་དང༌། དྲག་པོ་སྟེ་བདུད་བཞི་བརྫིས་པའི་མ་ཧེ་ནག་པོ་དྲེགས་ཤིང་ཁྲོས་པའི་སྟེང་ན། ཞབས་གཡས་གསུམ་བསྐུམ་ཞིང་གཡོན་གསུམ་བརྐྱང་བའི་སྟབས་ཀྱིས་བཞུགས་པ། དེ་ལ་འཁྱུད་པའི་ཡུམ་བཅོམ་ལྡན་འདས་མ་གཤིན་རྗེ་མཐར་བྱེད་མ་ཡང༌། བཅོམ་ལྡན་འདས་དང་མཚུངས་པ་ལས། ཕྱག་དང་པོ་གཉིས་དང་ཞབས་དང་པོ་གཉིས་ཀྱིས་ཡབ་ལ་འཁྱུད་པའོ། །རང་གི་སྙིང་གར་རྡོ་རྗེའི་ལྟེ་བར་ཧཱུཾ། དེ་ལས་འོད་ཟེར་འཕྲོས། བཅོམ་ལྡན་འདས་གཤིན་རྗེ་གཤེད་པོ་བཛྲ་ས་མཱ་ཛཿ ཨོཾ་ཧྲཱི་ཧ་བྷོ་ནས། ཀུ་རུ་སྭཱཧཱ། ཛཿཧཱུཾ་བཾ་ཧོཿ རང་གི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རང་གི་ཐུགས་ཀ་ནས་འོད་ཟེར་འཕྲོས། ཕྱོགས་སྐྱོང་གཤིན་རྗེ་བརྒྱད་བཀུག །ཕྱོགས་མཚམས་ཀྱི་གདན་བརྒྱད་ལ་མཁོད་པ་ནི། ཤར་དུ་ཡ་བ་ཏི་ལྕགས་ཀྱུ་དང་རལ་གྲི་འཛིན་པ། ལྷོར་ཆོས་ཀྱི་རྒྱལ་པོ་རྩིས་བྱང་དང་རྡོ་རྗེ་འཛིན་པ། ནུབ་ཏུ་ཏེལ་པ་ནག་པོ་སྤུ་གྲི་དང་ཐོད་ཁྲག་འཛིན་པ། བྱང་དུ་གླང་མགོ་ཅན་ལྕགས་ཀྱུ་དང་རྒྱུ་ཞགས་འཛིན་པ། བྱང་ཤར་དུ་རལ་པ་ཚར་དགུ་མེའི་འཁོར་ལོ་དང༌། ཞིང་དབྱུག་འཛིན་པ། ཤར་ལྷོར་གཤིན་རྗེ་མིག་དམར་རལ་གྲི་དང༌། ཞིང་ཆུ་འཛིན་པ། ལྷོ་ནུབ་ཏུ་ཕྱ་

― TNT06_Page_0917 ―

^{[མ་དཔེ་གཟིགས་ན་འདིར་གནོན།]}

[Full Size]

སངས་རྩེ་གསུམ་དང༌། བུམ་པ་འཛིན་པ། ནུབ་བྱང་དུ་སྨིགས་པ་ལྕགས་སྒྲོག་དང་ཐོད་ཁྲག་འཛིན་པ། ཐམས་ཅད་ཀྱང་སྐུ་མདོག་མཐིང་ནག་ཕོ་ཉ་དྲག་གཏུམ་གྱི་ཆ་བྱད་འཛིན་པའོ། །ཨོཾ་ཡ་མ་རཱ་ཛ་ཨཱ་གཙྪ་ཡ་ཧཱུཾ་ཛཿ ཞེས་ལན་མང་དུ་བརྗོད། རང་གི་བ་སྤུའི་བུ་ག་ནས་འཕྲོས་པའི་འོད་ཟེར་གྱི་རྩེ་ལ། རྡོ་རྗེ་ཕུར་བུ་རྣམས་སྤྲོས་ཏེ། ཕྱོགས་སྐྱོང་གཤིན་རྗེ་རྣམས་ལ་རེག་པ་ཙམ་གྱིས་གཅིག་ཏུ་འདྲེས་ནས། ཐམས་ཅད་ཀྱང་གཤིན་རྗེ་གཤེད་པོའི་ལྷ་ཚོགས་སུ་གནས་གྱུར། ཨོཾ་ཧྲཱྀཿཥྟཱྀཿབི་ཀྲི་ཏཱ་ན་ན་ཡ་མ་རཱ་ཛ་ཀཱི་ལི་ཀཱི་ལ་ཡ་ཧཱུཾ་ཕཊ། ལན་བརྒྱད་བརྗོད། ཤར་དུ་གཏི་མུག་ཡ་མཱནྟ་ཀ་དཀར་པོ་འཁོར་ལོ་འཛིན་པ། ལྷོར་སེར་སྣ་ཡ་མཱནྟ་ཀ་སེར་པོ་རིན་པོ་ཆེ་འཛིན་པ། ནུབ་ཏུ་འདོད་ཆགས་ཡ་མཱནྟ་ཀ་དམར་པོ་པདྨ་འཛིན་པ། བྱང་དུ་ཕྲག་དོག་ཡ་མཱནྟ་ཀ་ལྗང་ཁུ་རྡོ་རྗེ་རྒྱ་གྲམ་འཛིན་པ། བྱང་ཤར་དུ་རལ་གྲི་ཡ་མཱནྟ་ཀ་ལྗང་ཁུ། ཤར་ལྷོར་ཐོ་བ་ཡ་མཱནྟ་ཀ་ནག་པོ། ལྷོ་ནུབ་ཏུ་དབྱུག་པ་ཡ་མཱནྟ་ཀ་དཀར་པོའམ་སེར་པོ། ནུབ་བྱང་དུ་པདྨ་ཡ་མཱནྟ་ཀ་དམར་པོ། དེ་བཞི་པོ་ཕྱག་གཡས་རང་མིང་གི་ཕྱག་མཚན་འཛིན་པ། ཐམས་ཅད་ཀྱང་ཞལ་གཅིག་ཕྱག་གཉིས་གཡོན་བརྐྱང་གི་སྟབས་ཅན། གཡས་རང་རང་གི་ཕྱག་མཚན་འཕྱར་ཞིང༌། གཡོན་སྡིགས་འཛུབ་དང་བཅས་པའི་སྦྲུལ་ཞགས་འཛིན་པས། གདུག་པ་ཅན་མ་ལུས་པ་སྡིགས་ཤིང་འཆིང་བར་མཛད་པ། གཙོ་བོ་བཞིན་དུ་ཁྲོ་བོའི་ཆ་བྱད་ཡོངས་སུ་རྫོགས་པ། ཕྱོགས་མཚམས་སྐྱོང་བ་རྣམས་བསྒྲལ་བའི་སྟེང་དུ་གཡོན་བརྐྱང་གི་སྟབས་ཀྱིས་བཞུགས་པའོ། །བདག་ཉིད་གཤིན་རྗེ་གཤེད་པོའི་ཐུགས་ཀ་ནས་

― TNT06_Page_0918 ―

^{[མ་དཔེ་གཟིགས་ན་འདིར་གནོན།]}

[Full Size]

འོད་ཟེར་འཕྲོས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད། ཡེ་ཤེས་སེམས་དཔའི་དོན་དུ་ཨོཾ་བཛྲ་ས་མཱ་ཛཿ ཨོཾ་ཧྲཱིཿཧ་བྷོ་ནས། མེ་དྷི་མཱ་ན་ཀུ་རུ་ཀུ་རུ་སྭཱ་ཧཱའི་བར་ལན་གསུམ་བརྗོད་པས་སྤྱན་དྲངས། ཨརྒྷཾ་ནས། ཤཔྟའི་བར་གྱིས་མཆོད། དེ་ཐམས་ཅད་གཙོ་བོའི་ཞལ་དུ་ཞུགས། ཐུགས་ཀར་བྱང་ཆུབ་ཀྱི་སེམས་སུ་ཞུ། རྡོ་རྗེའི་ལམ་ནས་ཤེས་རབ་ཀྱི་པདྨར་སྤྲོས་ཏེ། མཐར་བྱེད་ཆེན་པོ་བརྒྱད་ཀྱི་རྣམ་པ་ཅན་དུ་གྱུར། མཁའ་ནང་ནས་ཕྱིར་སྤྲོས་ཏེ་རྩིབས་ཀྱི་ལྷ་ཚོགས་རྣམས་ལ་ཐིམ། ཨོཾ་བཛྲ་ཨང་གུ་ཤ་ཛཿ སོགས་དང༌། ཛཿཧཱུཾ་བཾ་ཧོཿ མང་དུ་བརྗོད། འདིར་གོང་མ་རྣམས་ཡེ་ཤེས་པ་རྣམས་དམ་ཚིག་པ་སོ་སོའི་སྤྱི་བོ་ནས་ཐིམ་པར་བསྒོམ་པ་རྒྱ་གཞུང་གི་དོན་དུ་མཛད། ཡང༌། རང་གི་ཐུགས་ཀ་ནས་འོད་ཟེར་འཕྲོས། དབང་གི་ལྷ་རིགས་ལྔ་འཁོར་དང་བཅས་པ་བཛྲ་ས་མ་ཛཿ ཨོཾ་པཉྩ་ཀུ་ལ་ས་པཱ་རི་ཝཱ་ར་བྷྱཿ སྔོན་དུ་འགྲོ་བ། ཨརྒྷཾ་ནས་ཤཔྟའི་བར་གྱིས་མཆོད། ཨོཾ་ཨ་བྷི་ཥིཉྩ་ཏུ་མཾ་སརྦ་ཏ་ཐཱ་ག་ཏ་ཞེས་གསོལ་བ་བཏབ་པས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། བུམ་པའི་ཆུས་སྤྱི་བོ་ནས་དབང་བསྐུར། སྐུ་གང༌། དྲི་མ་དག་ཆུའི་ལྷག་མ་ཡར་ལུད་པ་ལས། གཙོ་བོ་ལ་མི་བསྐྱོད་པ་དང༌། འཁོར་རྣམས་ལ་གཤིན་རྗེ་གཤེད་ཕྱག་གཉིས་པ་རེས་དབུ་བརྒྱན་པར་གྱུར། དངོས་སུ་བཤམས་པའི་མཆོད་པ་ཡོད་ན་སྐབས་འདིར་བྱིན་གྱིས་བརླབས། ཨོཾ་ཧྲཱིཿཧིཿ སོགས་ཀྱིས་འབུལ་དགོས་པ་ལས། འདི་ཉིད་ཀྱི་གཞུང་ལས། མཆོད་ཡོན་གསང་གཏོར་དྲི་ཆབ་མེ་ཏོག་བདུག་སྤོས་གཏོར་མ་མར་མེ་ཞེས་འབྱུང་བ། ཞལ་ཟས་གཏོར་མའི་ནང་དུ་འདུས་པས་ལོགས་སུ་མི་དགོས་པའི་དབང་དུ་མཛད་པ་ཡིན། འོན་ཀྱང༌། རྒྱལ་བ་རྣམས་

― TNT06_Page_0919 ―

^{[མ་དཔེ་གཟིགས་ན་འདིར་གནོན།]}

[Full Size]

ནི་གཙང་གྱུར་ཅིང༌། །ཞེས་པ་ནས། ནཻ་ཝེ་ཏེ་པུ་ཛ་ཡ་སྭཱཧཱའི་བར་གྱིས་མཆོད་པ་འབུལ་ཚུལ་འཇིགས་མཛད་ཁྲོ་མོ་བརྒྱད་བསྐོར་གྱི་སྐབས་དང་འདྲ། གདུག་པ་སྐྲག་བྱེད་འཁོར་ལོ་མེ་ལྟར་འབར། །དུས་གསུམ་ཁྲོ་རྒྱལ་ཧེ་རུ་ཀ་ཡི་ཐུགས། །ལས་རྣམས་ཀུན་བྱེད་ཕྲག་དོག་རྡོ་རྗེ་སྟེ། །མ་ལུས་ཚེམས་གཅོད་གསོལ་བ་སྐུ་ཡི་ངང༌། །ཧཱུཾ་དང་ཕཊ་གྱི་གདུག་རྩུབ་སྦྱོར་བའི་གསུང༌། །ཀུན་གྱི་རང་བཞིན་ཁྱོད་ཀྱི་གཤིན་རྗེ་ཡི། །ལྟོར་འཛུད་ངེས་ཀྱང་བཀའ་ལས་མི་འདའ་ཞིང༌། །ཕྱོགས་བཅུར་སྤྲུལ་པས་མ་ལུས་གནས་ནས་འགུགས། །མ་ལུས་ཀུན་བྱེད་འཁོར་ལོ་ཆེ་མཆོག་ལ། །བདག་ནི་གཞན་གྱི་དོན་ཕྱིར་ཕྱག་འཚལ་ལོ། །ཁྱོད་ནི་དཔའ་བོ་མཐུ་ཆེན་ཀུན་གྱི་བདུད། །ང་ཡི་ལམ་བསྟན་བདུད་རྣམས་མི་བྱེད་ཀྱང༌། །དམ་ལས་འདའ་ཞིང་ལོག་པ་ཀུན་སྐྱེད་པ། ཁྱོད་ཀྱང་བཀའ་ལས་མ་འདའ་ལས་རྣམས་སྒྲུབས། །ཚེ་དང་སྲོག་བསྡུས་ཡན་ལག་རྣམ་པར་ཆིངས། །བདུད་རྩིའི་རྒྱུན་གྱིས་རྣལ་འབྱོར་ང་ལ་འདོད་སྒྲུབ་ན། །ངས་ནི་སྦྱིན་བྱ་ཁྱོད་ནི་དམ་ལས་མ་འདའ་ཅིག །ཅེས་པས་བསྟོད། འཁོར་ལོ་གཡོན་བསྐོར་དུ་འཁོར་བ་དང༌། དགྲ་བགེགས་བྱད་མ་གཏུབ་པའི་དམིགས་པ་མན་ངག་བཞིན་བྱས་ལ། ཨོཾ་ཧྲཱྀཿཥྚཱིཿབི་ཀྲི་ཏཱ་ནཱ་ན་ཧཱུཾ། སརྦ་ཤ་ཏྲུན་ནཱ་ཤ་ཡ་སྟཾ་བྷ་ཡ་ཕཊ་ཕཊ་སྭཱཧཱ། ཞེས་པ་ཉིད་དྲག་ཏུ་བཟླ། འདི་སྙིང་པོའི་སྔགས་སུ་གསུངས་ཏེ། རྒྱུན་གྱི་བཟླས་པ་དང་སྲུང་བཟློག་གཉིས་ཀར་བྱེད། རྩ་སྔགས་ཡི་གེ་སོ་གཉིས་པའི་སྒོ་ནས་བཟློག་པ་བྱེད་ན། ཨོཾ་ཡ་མ་རཱ་ཛ་དགྲ་དང་བགེགས་དང་བྱད་མ་ཞེས་པའམ། ཆྒཻ་མོ་ནཱ་ཤ་ཡ་སྟཾ་བྷ་ཡ་ཧཱུཾ་ཧཱུཾ་ཕཊ་ཕཊ་སྭཱཧཱ། ས་དོ་མེ་ཡ་ནས། ནི་ར་

― TNT06_Page_0920 ―

^{[མ་དཔེ་གཟིགས་ན་འདིར་གནོན།]}

[Full Size]

མ་ཡའི་བར་ལའང་དེ་བཞིན་དུ་སྦྱར། འདི་འདི་ཉིད་ཀྱི་གཞུང་དུ་གབ་པའི་མན་ངག་ཡིན། ཨོཾ་ཧྲཱིཿཀཱ་ལའི་སྔགས་ནི་ཉེ་སྙིང་དང༌། ཨོཾ་ཧྲཱིཿཀྲུཾ་ནི་མཆོག་གི་སྙིང་པོར་བཤད། སྔགས་འདི་གཉིས་ནི་གཙོ་བོའི་ཐུགས་རྒྱུད་བསྐུལ་བ་དང་སྲུང་བ་ཡིན་གྱི་བཟློག་བསད་གཙོ་མི་ཆེའོ། །བཟླས་པའི་མཐར་གཏོར་མ་བྱིན་གྱིས་རློབ་སྟེ། ཁྲོ་མོ་བརྒྱད་བསྐོར་ཀྱི་སྐབས་བཞིན། ཨོཾ་ཀཱ་ལ་རུ་པ་སརྦ་དུཥྟའི་སྔགས་ཀྱིས་གཙོ་འཁོར་ཐམས་ཅད་ལ་དུས་གཅིག་ཏུ་ཕུལ། བསྡུ་ན་གོང་བཞིན་བསྟོད་པ་གཅིག་པུས་ཆོགདེ་རྗེས་ཐལ་མོ་བརྡབ་ཅིང་དམོད་པ་བྱའོ། །སྤྲོས་པ་ལ་དགའ་ན་བསྟོད་པ་རྒྱས་བསྡུས་ཇི་ལྟར་འོས་པ་བྱས་ནས་བསྐུལ་ཏེ། བཅོམ་ལྡན་དཔལ་ཆེན་ཁྲོ་རྒྱལ་གཤིན་རྗེ་གཤེད། །འཇམ་དཔལ་རྡོ་རྗེ་འཇིགས་མཛད་སྤྲུལ་པ་ནི། །དམ་ཉམས་དགྲ་བོ་མནའ་ཟན་བསྒྲལ་བའི་ཕྱིར། །ཉི་མ་བཞི་པའི་སྤྲུལ་པ་ལས་ལ་ཡ། །ཤར་ཕྱོགས་འཁོར་ལོ་འབར་བའི་རྩིབས་སྟེང་ནས། །བརྒྱ་བྱིན་དྲི་ཟ་བསྒྲལ་བའི་གདན་སྟེང་ནས། །འཁོར་བྱེད་ཆེན་པོ་གཤིན་རྗེ་ཡ་བ་ཏི། །གཡས་པ་རྡོ་རྗེ་ལྕགས་ཀྱུ་འབར་བ་ཡིས། །དམ་ཉམས་དགྲ་བོའི་སྲོག་རྩ་དམར་ནས་དྲོངས། །གཡོན་པ་རྡོ་རྗེ་རལ་གྲི་འབར་བ་ཡིས། །དགྲ་བགེགས་གནོད་བྱེད་མགོ་ལུས་དུམ་བུར་གཏུབས། །ཐོད་ཚལ་དུམ་བུ་མང་པོ་ཀྲ་ལ་ལ། །སྡང་བྱེད་དགྲ་བོའི་ཀླད་པ་འཁོར་དུ་ཆུག །ཉི་མ་བཞི་པའི་སྤྲུལ་པ་ལས་ལ་ཡ། །ཐུགས་དམ་དུས་ལ་བབ་པོ་ས་མ་ཡ། །འཇམ་པའི་དབྱངས་དང་དཀོན་མཆོག་གསུམ་གྱི་བཀའ། །བསྒྲུབ་ཕྱིར་གཤིན་རྗེའི་རྒྱལ་པོ་དགྲ་ལ་ཡ། །ཤླཽ་ཀ་རྟིང་མ་འདི་ཀུན་གྱི་འཇུག་ཏུ་སྦྱར། ལྷོ་ཕྱོགས་འཁོར་ལོ༴ ཡི་དྭགས་གཤིན་

― TNT06_Page_0921 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་བསྒྲལ་བའི༴ ཁྲག་འཐུང་ཆེན་པོ་ཆོས་ཀྱི་རྒྱལ་པོ་ནི། །གཡས་པའི་ཕྱག་ན་སྐྱེ་འགྲོའི་རྩིས་བྱང་བསྣམས། །དམ་ཉམས་དགྲ་བོ་ཐུས་ལ་འཇུག་པར་མཛད། །གཡོན་པ་རྡོ་རྗེ་རྩེ་ལྔ་འབར་བ་བསྣམས། །དགྲ་བགེགས་གནོད་བྱེད་དབང་པོ་སྣ་ལྔ་འདོན། །བུ་ག་དགུ་ནས་ཁྲག་རྒྱུན་ཅུར་རུ་རུ། །སྡང་བྱེད་དགྲ་བོ་ཁོང་ཁྲག་སྐྱུག་ཏུ་ཆུག །ཉི་མ་བཞི་པའི་སོགས། ནུབ་ཕྱོགས༴ ཀླུ་གཉན་ཆུ་བདག༴ ཁྲག་འཐུང་ཆེན་པོ་གཤིན་རྗེ་ཏེལ་པ་ནི། །གཡས་པ་སྤུ་གྲི་མེ་ལྟར་འབར་བ་ཡིས། །དམ་ཉམས་དགྲ་བོའི་སྲོག་གཅོད་ཉལ་ལ་ལ། །གཡོན་པ་ཐོད་ཁྲག་ཁོལ་ཞིང་འབར་བ་བསྣམས། ཁྲག་རྒྱུན་དྲོན་མོ་ཞལ་དུ་གསོལ་བར་མཛད། །སྡང་བྱེད་དགྲ་བོ་ཁོང་ཁྲག་སྐྱུག་ཏུ་ཆུག །ཉི་མ་བཞི་པའི་སོགས། བྱང་ཕྱོགས༴ གནོད་སྦྱིན་བདུད་ཚོགས༴ མྱོས་བྱེད་ཆེན་པོ་གཤིན་རྗེ་གླང་མགོ་ཅན། །གཡས་པ་འགུགས་བྱེད་མི་ཟད་ལྕགས་ཀྱུ་ཐོགས། །དམ་ཉམས་དགྲ་བོའི་སྙིང་གི་དཀྱིལ་ནས་དྲོངས། །གཡོན་པ་རྡོ་རྗེ་རྒྱུ་ཞགས་འཕེན་ཅིང་རྡོག །དགྲ་བགེགས་གནོད་བྱེད་དབང་པོ་ཡན་ལག་ཆིངས། །མྱོས་ཤིང་དྲག་ཏུ་བརྒྱལ་བའི་ལས་མཛོད་ཅིག །སྡང་བྱེད་དགྲ་བོ་སྨྱོ་བའི་འཕྲིན་ལས་མཛོད། །ཉི་མ་བཞི་པའི་སོགས། བྱང་ཤར༴ བགེགས་རྒྱལ་འབྱུང་པོ་བསྒྲལ་བའི་གདན་སྟེང་དུ། །གསོད་བྱེད་ཆེན་པོ་རལ་པ་ཚར་དགུ་ནི། །གཡས་པ་མེ་ལྕེའྀ་འཁོར་ལོ་དྲག་ཏུ་འཁོར། །དམ་ཉམས་དགྲ་བོའི་མགོ་ལུས་དུམ་བུར་གཅོད། །གཡོན་པ་རོ་ལངས་ཞིང་གི་དབྱུག་ཐོ་བསྣམས། །དགྲ་བགེགས་གནོད་བྱེད་ལུས་ཀུན་ཐལ་བར་རློག །

― TNT06_Page_0922 ―

^{[མ་དཔེ་གཟིགས་ན་འདིར་གནོན།]}

[Full Size]

སྙིང་ནས་བཀས་ཤིང་ཤ་ཁྲག་དུམ་བུར་འཐོར། །སྡང་བྱེད་དགྲ་བོ་བསད་པའི་ལས་མཛོད་ཅིག །ཉི་མ་བཞི་པའི་སོགས། ཤར་ལྷོར༴ མེ་ལྷ་དྲང་སྲོང་༴ གསོད་བྱེད་ཆེན་པོ་གཤིན་རྗེ་མིག་དམར་ནི། །གཡས་པ་རྡོ་རྗེ་ཆུ་གྲི་འབར་བ་ཡིས། །དམ་ཉམས་དགྲ་བོ་བརྒྱ་སྟོང་དུམ་བུར་གཏུབས། །གཡོན་པ་ཞིང་དབྱུག་ཀེང་རུས་འབར་བ་ཡིས། །དགྲ་བགེགས་གནོད་བྱེད་ལུས་སེམས་འབྲེལ་བར་མཛད། །མི་རོ་རྟ་རོ་མང་པོ་རྫ་ལྟར་བསྙིལ། །སྡང་བྱེད་དགྲ་བོ་རྩད་ནས་ཆོད་ལ་ཤོག །ཉི་མ་བཞི་པའི་སོགས། ལྷོ་ནུབ༴ ཤ་ཟ་སྲིན་པོ༴ འཁོར་བྱེད་ཆེན་པོ་གཤིན་རྗེ་ཕྱ་སངས་ནི། །གཡས་པ་རྡོ་རྗེ་ཏྲི་ཤུ་འབར་པ་ཡིས། །དམ་ཉམས་དགྲ་བགེགས་ལུས་ངག་ཡིད་གསུམ་ཆོམས། །གཡོན་པ་ཚེ་སྲོག་བསྡུད་པའི་བུམ་པ་བསྣམས། །དགྲ་བགེགས་གནོད་བྱེད་བླ་སྲོག་སྦར་གྱིས་ཐོབ། །སྡང་བྱེད་དགྲ་བོ་འཁྲུལ་ཞིང་འཁོར་བར་མཛོད། །ཉི་མ་བཞི་པའི་སོགས། ནུབ་བྱང་འཁོར་ལོ་འབར་བའི་རྩིབས་སྟེང་ནས། །དཀྲུགས་བྱེད་རླུང་ལྷ་བསྒྲལ་བའི་གདན་སྟེང་ནས། །སྨྱོ་བྱེད་ཆེན་པོ་གཤིན་རྗེ་སྨིགས་པ་ནི། །གཡས་པ་ཐོད་རློན་འབར་བ་བསྣམས་པ་ཡིས། །དམ་ཉམས་དགྲ་བོའི་དབང་ལྔ་ཞལ་དུ་སྟོབས། །གཡོན་པ་རྡོ་རྗེ་ལྕགས་སྒྲོག་འདེབས་མཛད་ཅིང༌། །དགྲ་བགེགས་གནོད་བྱེད་ལུས་ཀུན་སྡོམ་པར་མཛོད། །དྲན་རིག་ཤེས་པ་མེད་པ་མུན་ལྟར་འཁྱམས། །སྡང་བྱེད་དགྲ་བོ་སྨྱོ་ཤིང་འབག་ཏུ་ཆུག །ཉི་མ་བཞི་པའི་སྤྲུལ་པ་ལས་ལ་ཡ། །ཐུགས་དམ་དུས་ལ་བབ་པོ་ས་མ་ཡ། །འཇམ་པའི་དབྱངས་དང་དཀོན་མཆོག་

― TNT06_Page_0923 ―

^{[མ་དཔེ་གཟིགས་ན་འདིར་གནོན།]}

[Full Size]

གསུམ་གྱི་བཀའ། །བསྒྲུབ་ཕྱིར་གཤིན་རྗེའི་རྒྱལ་པོ་དགྲ་ལ་ཡ། །ཞེས་དྲག་ཏུ་བསྐལ་ལོ། །ལས་ཚོགས་དྲག་པོ་སྒྲུབ་པའི་སྐབས། ལིང་ག་འགུགས་འདྲེན་བསྒྲལ་ཆོག །ཞལ་དུ་སྟོབ་པའི་བར་བྱ། དཀྱུས་ཀྱི་རིམ་པ་ལ་དེ་དག་མི་དགོས་ཏེ། གཏོར་མ་ཟོར་དུ་འཕངས། ཨུཥྞི་ཥ་རྭ་ལུགས་སུ་བཤད་པ་ལྟར་དམོད་པ་དྲག་ཏུ་འདེབས་ཤིང༌། ཐལ་མོ་གདབ་བོ། །ཡི་གེ་བརྒྱ་པ་དང་བཟོད་གསོལ་གྱི་མཐར། ཨོཾ་ཛ་ཡ་ཛ་ཡ་སུ་ཛ་ཡ། སོགས་བརྗོད་དེ། ཡེ་ཤེས་པ་རྣམས་གཤེགས། དམ་ཚིག་པ་རྣམས་རང་གི་སྙིང་གར་བསྡུ། རང་ཉིད་ཕྱག་གཉིས་པའི་ང་རྒྱལ་གྱིས་དགེ་བ་བསྔོ། འདིའི་གཤིན་རྗེ་བརྒྱད་པོའི་ཕྱག་མཚན་ནི་སྐྱོ་པའི་མན་ངག་གི་ནང་ནས། སེམས་དཔའ་བསྡུས་པའི་གཞུང་གི་མན་ངག་ལྟར་ཡིན་ལ། ཡང་ཞི་བ་ཡེ་ཤེས་ཀྱི་གཞུང་དང་འབྲེལ་བའི་སྐྱོ་ལུགས་ཀྱི་མན་ངག་རྒྱུན་འཁྱེར་གྱི་ལུགས་ནི། གོང་ཁྲོ་མོ་བརྒྱད་བསྐོར་གྱི་སྐབས་ཀྱི་བསྐལ་དུ་བཤད་པ་བཞིན་ནོ། །ཡང་དེ་གཉིས་ཀ་ལ་མདོར་བསྡུས་ལ་དགའ་བའི་ངོར། གཤིན་རྗེ་ཕོ་མོ་ཐམས་ཅད་བཞོན་པ་སྤངས་ཤིང༌། སྐུ་མདོག་མཐིང་ནག་ཤ་སྟག །ཕོ་རྣམས་དབྱུག་པ་དང་ཐོད་ཁྲག་གམ། དབྱུག་པ་དང་ཞགས་པ་འཛིན་པ། མོ་རྣམས་རལ་གྲི་ཐོད་ཁྲག་གམ། རལ་གྲི་ཞགས་པ་འཛིན་པ། ཡང་ཕོ་བརྒྱད་ནག་པོ་དང་མོ་བརྒྱུད་དམར་མོར་བྱས་ཀྱང་རུང༌། ཕོ་བརྒྱད་སྔོ་སྐྱ་ཐལ་མདོག་དང༌། མོ་བརྒྱད་ནག་མོར་བྱེད་པའང་ཡོད། དེ་དག་ཇི་ལྟར་བདེ་བས་ཆོག་གོ །གོང་དུ་སྨོས་པ་བཞིན་སྲུང་བཟློག་གི་ཆོ་ག་འདི། སེམས་དཔའ་བསྡུས་པའི་ཆོ་གའི་ཡན་ལག་ཡིན་ཞིང༌། དེའི་ལུགས་ལྟར་འཇིགས་མཛད་ཀྱི་མངོན་རྟོགས་བསྒོམས་ན། ཚོགས་གསོག་དང་གཞལ་ཡང་ཁང་གི་བར་དུ་བསྒོམ་རྒྱུའི་སྲུང་འཁོར་དེ་འདི་ཡིན་ཡང༌། སེམས་དཔའ་བསྡུས་པའི་ལུགས་མི་བསྒོམ་ཕྱིན། དགྲ་

― TNT06_Page_0924 ―

^{[མ་དཔེ་གཟིགས་ན་འདིར་གནོན།]}

[Full Size]

གདོང་འཇིགས་གསུམ་གྱི་སྒྲུབ་ཐབས་གཞན་རྣམས་ཀྱི་ནང་གི་སྲུང་འཁོར་གྱི་སྐབས་སུ། འདི་བཅུག་སྟེ་བསྒོམས་ཀྱང་བསྲེ་བསླད་དང་རང་བཟོར་འགྱུར་བའི་ཕྱིར། དེ་ལྟར་མི་བྱེད་པར་ལོགས་སུ་བསྒོམ་པ་ཉིད་བཟང་ལ། འོན་ཀྱང་སྤྲོས་པ་ལ་དགའ་བས། སྐྱོ་ལུགས་དང་སྡེབ་ན་སྐྱབས་སེམས་ཡིག་བརྒྱ་སོང་མཚམས་ཚོགས་ཞིང་སྤྱན་འདྲེན་མ་བྱས་པའི་གོང་དེར། འདི་ཡོངས་རྫོགས་བསྒོམས་ནས་ཐུན་མཚམས་ཀྱི་ལྷ་སྐུ་ལངས། སླར་སོ་སོའི་ཚོགས་ཞིང་མན་ཆད་ལ་ཞུགས་ན། སྔ་ཕྱིར་དཀྱིལ་འཁོར་མི་འདྲ་བ་གཉིས་སོ་སོར་བསྒོམ་པའི་ལུགས་དང་ཁྱད་མེད་པས། བསྲེ་བསླད་དུ་མི་འགྲོ་ཞིང་མ་འབྲེལ་བ་ཡང་མིན་ལ། ཆོག་ཁྲིགས་སྤྲོས་པ་ལ་དགའ་བ་རྣམས་ཀྱི་བློ་ཚིམས་པ་ཞིག་ཀྱང་འོང་བར་སྣང་ངོ༌། །དེའི་ཚེ་ཧཱུཾ་བཞི་པའི་སྔོན་དུ་འདིའི་དམོད་པ་ཡན་ཆད་རྫོགས་པར་བྱའོ། །སྲུང་བཟློག་འདི་སྤྱིར་གཤེད་སྐོར་ཀུན་གྱི་ཡང་ཆ་ལག་ཏུ་འབྲེལ་བ་ཙམ་ཡིན་མོད་ཀྱི། འཇིགས་མཛད་སྐྱོ་ལུགས་དང་ལྷག་པར་འབྲེལ་ཆེ་བ་ཡིན་ནོ།། །།༈ སློབ་དཔོན་དཔལ་འཛིན་གྱི་ཕྱིར་བཟློག་མན་ངག་དྲུག་གི་ནང་ནས། ཕྱིའི་བྱད་མ་སྔགས་ཀྱིས་བཟློག་པ་ཞེས་བྱ་བ། བསྒོམ་བཟླས་ཀྱི་བསྲུང་བཟློག་འདི་ལྟ་བུ་ཞིག་ཀྱང་གསུངས་ཏེ། སྐྱབས་འགྲོ་སེམས་བསྐྱེད་ཚད་མེད་བཞི་རྣམས་སྔོན་དུ་བཏང༌། སྭ་བྷཱ་ཝ་དང༌། ཡོ་ག་ཤུད་དྷ་དང༌། ཤཱུ་ནྱ་ཏ་སྟེ་སྔགས་གསུམ་གྱིས་སྟོང་པར་སྦྱངས། སྟོང་པའི་ངང་ལས་ཨེ་ཡིག་ལས་ཆོས་ཀྱི་འབྱུང་གནས་གྲུ་གསུམ་པ། དཀྱུས་ཀྱི་ལས་ཚོགས་ལ་དཀར་དམར་དང་དྲག་པོའི་ལས་ལ་མཐིང་ནག་ཏུ་བྱ། གདེངས་ཀ་ཆེ་བ་གྱེན་དུ་ཕྱོགས་པའི་ནང་དུ་པཾ་ལས་པདྨ་དང༌། རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་ལས་སྣ་ཚོགས་རྡོ་རྗེ་རྭ་ཉི་ཤུ་པ། ཤར་དཀར། ལྷོ་སེར། ནུབ་

― TNT06_Page_0925 ―

^{[མ་དཔེ་གཟིགས་ན་འདིར་གནོན།]}

[Full Size]

དམར། བྱང་ལྗང༌། དབུས་སྔོ་བ། ལྟེ་བ་ལ་ཧཱུཾ་གིས་མཚན་པ། དེ་ལས་འོད་ཟེར་ཕྱོགས་བཅུར་འཕྲོས། འོག་ཐམས་ཅད་རྡོ་རྗེའི་ས་གཞི། འཁོར་ཡུག་ཐམས་ཅད་རྡོ་རྗེ་རྭ་བ་དང་དྲ་བ། སྟེང་ཐམས་ཅད་རྡོ་རྗེའི་གུར་དང་བླ་རེ། ཕྱི་རོལ་ཐམས་ཅད་ཡེ་ཤེས་ཀྱི་མེ་དཔུང་འབར་བས་གང་བར་གྱུར། ཨོཾ་བཛྲ་རཀྵ་རཀྵ་ཧཱུཾ་ཧཱུཾ་ཧཱུཾ་ཕཊ་སྭཱཧཱ། སྲུང་བའི་འཁོར་ལོའི་ནང་དུ། བྷྲུཾ་སེར་པོའམ་སྔོན་པོ་ལས་འཁོར་ལོ་སེར་པོའམ་སྔོན་པོ་རྩིབས་བཅུ་པ། རྩེ་མོ་རྣོ་བ་ཁོག་པ་སྟོང་པ་ཡངས་ཤིང་རྒྱ་ཆེ་བ། གོ་སྐབས་མེད་པར་གྱུར། ཨོཾ་བཛྲ་ཙཀྲ་རཀྵ་ཧཱུཾ་ཧཱུཾ་ཧཱུཾ། འཁོར་ལོའི་ལྟེ་བར་པཾ་ལས་པདྨ་རཾ་ལས་ཉི་མ། མཾ་ལས་མ་ཧེ་ནག་པོ་དྲེགས་ཤིང་ཁྲོས་པའི་སྟེང་དུ། ཡ་ལས་གཤིན་རྗེ་བསྒྱེལ་བའི་གདན་ལ། རང་སེམས་ཧཱུཾ་ལས་འོད་འཕྲོས། འཕགས་པ་མཆོད་སེམས་ཅན་གྱི་དོན་བྱས། དགྲ་བགེགས་བྱད་མ་གདུག་པ་ཅན་ཐམས་ཅད་ཚར་བཅད་ཚུར་འདུས་ཡོངས་སུ་གྱུར་པ་ལས། དབུས་སུ་རང་ཉིད་ཁྲོ་བོ་ཆེན་པོ་ཁམས་གསུམ་རྣམ་རྒྱལ་དང་གཉིས་སུ་མེད་པའི་བཅོམ་ལྡན་འདས་གཤིན་རྗེ་གཤེད་པོ་སྐུ་མདོག་མཐིང་ནག །ཕྱག་གཡས་པས་རྡོ་རྗེས་མཚན་པའི་ཐོད་དབྱུག་འཕྱར་ཞིང༌། གཡོན་དུས་ཀྱི་ཞགས་པ་དང་བཅས་པའི་སྡིགས་མཛུབ་མཛད་པ། རྡོ་རྗེ་སེམས་དཔའི་དབུ་རྒྱན་ཅན། ཐུགས་ཀ་ནས་ཧཱཾ་བཅུ་སྤྲོས་ཏེ། འཁོར་ལོའི་རྩིབས་བཅུ་ལ་འཁོད་པ་ནི། ཤར་དུ་གཤིན་རྗེ་མཐར་བྱེད་ནག་པོ་ཐོ་བ་འཛིན་པ་རྣམ་སྣང་གི་དབུ་རྒྱན་ཅན། ལྷོར་ཤེས་རབ་མཐར་བྱེད་དཀར་པོ་བེ་ཅོན་འཛིན་པ་རིན་འབྱུང་གི་དབུ་རྒྱན་ཅན། ནུབ་ཏུ་པདྨ་

― TNT06_Page_0926 ―

^{[མ་དཔེ་གཟིགས་ན་འདིར་གནོན།]}

[Full Size]

མཐར་བྱེད་དམར་པོ་པདྨ་འཛིན་པ་འོད་དཔག་མེད་པའི་དབུ་རྒྱན་ཅན། བྱང་དུ་བགེགས་མཐར་བྱེད་ལྗང་ཁུ་རྡོ་རྗེ་འཛིན་པ་དོན་ཡོད་གྲུབ་པའི་དབུ་རྒྱན་ཅན། ཤར་ལྷོར་མི་གཡོ་བ་སྔོ་སྐྱ་རལ་གྲི་འཛིན་པ་རྣམ་སྣང་གི་དབུ་རྒྱན་ཅན། ལྷོ་ནུབ་ཏུ་འདོད་རྒྱལ་སྔོ་དམར་ལྕགས་ཀྱུ་འཛིན་པ་སྣང་མཐའི་དབུ་རྒྱན་ཅན། ནུབ་བྱང་དུ་དབྱུག་སྔོན་ཅན་སྔོན་པོ་དབྱུག་པ་འཛིན་པ་མི་བསྐྱོད་པའི་དབུ་རྒྱན་ཅན། བྱང་ཤར་དུ་སྟོབས་པོ་ཆེ་དུད་ནག་རྩེ་གསུམ་འཛིན་པ་རྔ་སྒྲའི་དབུ་རྒྱན་ཅན། སྟེང་དུ་གཙུག་ཏོར་འཁོར་ལོས་བསྒྱུར་པ་སེར་པོ་འཁོར་ལོ་འཛིན་པ་རྣམ་སྣང་གི་དབུ་རྒྱན་ཅན། འོག་ཏུ་གནོད་མཛེས་རྒྱལ་པོ་ནག་པོ་གཏུན་ཤིང་འཛིན་པ་མི་བསྐྱོད་པའི་དབུ་རྒྱན་ཅན། ཡང་ན་ཐམས་ཅད་མི་བསྐྱོད་པའི་དབུ་རྒྱན་ཅན་དུ་བྱས་ཀྱང་རུང་ངོ༌། །གཙོ་འཁོར་ཐམས་ཅད་ཀྱང་སྤྱན་གསུམ་པ། མཆེ་བ་གཙིགས་པ། དབུ་སྐྲ་དམར་སེར་གྱེན་དུ་བརྫཻས་པ། སྨ་ར་སྨིན་མ་རབ་ཏུ་འབར་བ། ཕྱག་རྒྱ་དྲུག་དང་ཀླུ་ཆེན་པོ་བརྒྱད་ཀྱིས་བརྒྱན་པ། སྟག་གི་པགས་པའི་སྨད་དཀྲིས་ཅན། གཡོན་བརྐྱང་གི་སྟབས་ཀྱིས་བཞུགས་ཤིང༌། ཕྱོགས་བཅུའི་བགེགས་ཐམས་ཅད་ཚར་གཅོད་པར་མཛད་པའོ། །ལྷ་ཐམས་ཅད་གྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས། རང་བཞིན་གྱི་གནས་ནས་ཁྲོ་བོ་བཅུ་གཅིག་སྲུང་བའི་འཁོར་ལོ་དང་བཅས་པ་ལ། རྒྱལ་བ་སྲས་བཅས་ཐམས་ཅད་ཁྲོ་བོ་བཅུ་གཅིག་གི་རྣམ་པ་དཔག་ཏུ་མེད་པས་བསྐོར་བ་བཛྲ་ས་མཱ་ཛཿ ཨོཾ་མུད་ག་ར་ཛཿ ཨོཾ་དཎྜ་ཧཱུཾ། ཨོཾ་པདྨ་བཾ། ཨོཾ་ཁད་ག་ཧོཿ སྤྲོ་ན་རིགས་བདག་རང་བཅས་མི་བྱེད་པར་དབང་བསྐུར་བྱ། བསྡུ་ན། གོང་དུ་བཤད་

― TNT06_Page_0927 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ལྟར་དབུ་རྒྱན་རང་ཆས་ཁོ་ནས་ཆོག་གོ །གཙོ་བོའི་ཐུགས་ཀ་ནས་འདོད་པའི་རྒྱལ་པོ་གྲངས་མེད་པ་སྤྲུལ། ན་མཿས་མནྟ་ཀཱ་ཡ་ཝཱཀ་ཙིཏྟ་བཛྲ་ཎཱཾ། ཨོཾ་ཊཀྐི་ཧཱུཾ་ཛཿ ཕྱོགས་བཅུའི་བགེགས་ཐམས་ཅད་བཀུག་སྟེ། ཧཱུཾ་ལས་བྱུང་བའི་འདྲུབ་ཁུང་རྣམས་སུ་བཅུག་པར་གྱུར། ཨོཾ་གྷ་གྷ་སོགས་ལན་གསུམ་གྱིས་ཕུར་བུས་བཏབ། ཨོཾ་བཛྲ་མུད་ག་ར་སོགས་ཀྱིས་ཐོ་བས་བརྡུངས། ཕོ་ཉ་རྣམས་རང་ཉིད་ལ་ཐིམ། རང་གི་སྙིང་གར་ཧཱུཾ་ལས་ཞེ་སྡང་གཤིན་རྗེ་གཤེད། སྤྱི་བོར་ཀྵེ་ལས་གཏི་མུག་གཤིན་རྗེ་གཤེད། ལྟེ་བར་མ་ལས་ཕྲ་མ་གཤིན་རྗེ་གཤེད། མགྲིན་པར་མེ་ལས་འདོད་ཆགས་གཤིན་རྗེ་གཤེད། གསང་བར་ད་ལས་ཕྲག་དོག་གཤིན་རྗེ་གཤེད་རྣམས་རང་སྣང་གི་ཡུམ་དང་བཅས་པའོ། །ཚོགས་མར་ཛ་ལས་ཙར་ཙི་ཀཱ། ཕོ་བར་ས་ལས་ཕག་མོ། རྐང་མཐིལ་གཡས་སུ་དོ་ལས་དབྱངས་ཅན་མ། རྐང་མཐིལ་གཡོན་དུ་རུ་ལས་གཽ་རཱི། ལག་མཐིལ་གཡས་སུ་ཡ་ལས་ཐོ་བ་གཤིན་རྗེ་གཤེད། གཡོན་དུ་མ་ལས་དབྱུག་པ་གཤིན་རྗེ་གཤེད། པུས་མོ་གཡོན་དུ་ནི་ལས་པདྨ་གཤིན་རྗེ་གཤེད། གཡས་སུ་ར་ལས་རལ་གྲི་གཤིན་རྗེ་གཤེད་དོ། །དེ་ལྟར་སྒོ་སྐྱོང་བཞིའི་མདུན་དུ། ཎ་ཡོ་ནི་ར་ལས་ཐོད་པ་བཞིའོ། །སྙིང་གར་རང་དང་འདྲ་བའི་ཡེ་ཤེས་སེམས་དཔའི་ཐུགས་ཀར་ཏིང་ངེ་འཛིན་སེམས་དཔའ་ཉི་མ་ལ་གནས་པའི་ཧཱུཾ་ཡིག་གོ །དེ་ལ་བསྲུང་བྱ་རྣམ་མན་ངག་བཞིན་དུ་བཀོད། སྐབས་འདིར་མཆོད་བསྟོད་བྱ། དེ་ནས་འཁོར་ལོ་བསྐོར་བ་སོགས་སྤྱི་དང་མཚུངས། ཧྲཱྀཿཥྚཱིཿཡི་གེ་བཅུ་བཞི་པའི་སྔགས་དང༌། སུམྦྷ་བཟླ་སྟེ་གཙོ་བོའི་སྔགས་ཡིན། ཨོཾ་ཨཱཿཡ་མཱན་ཏ་ཀྲི་ཏ་

― TNT06_Page_0928 ―

^{[མ་དཔེ་གཟིགས་ན་འདིར་གནོན།]}

[Full Size]

ཧཱུཾ་ཧཱུཾ་ཕཊ་སྭཱཧཱ། སོགས་ཁྲོ་བོ་བཅུའི་མཚན་སྔགས་བཟླ་སྟེ། སྲུང་བའོ། །འདིའི་བཟློག་པ་དང་བསད་པ་ལ་གཙོ་བོ་འཕོ་བ་མི་དགོས། ཧྲཱྀཿཥྚཱིཿལ་དགྲ་བགེགས་བྱད་མ་ཐམས་ཅད་ནཱ་ཤ་ཡ་སྟཾ་བྷ་ཡ། ཞེས་སྤེལ་བ་ཉིད་གཙོ་བོར་བཟླ། སྤྲོ་ཞིང་ནུས་ན། རྡོ་རྗེ་གུར་ལས་འབྱུང་བའི་ཁྲོ་བོ་བཅུའི་འཕྲེང་སྔགས་ཀྱང་བཟླ་ཞེས་སྔ་མ་རྣམས་བཞེད། ཁྱད་པར་བཟློག་པའི་སྐབས་ཨུཥྞི་ཥ་དང༌། བསད་པ་ལ་དབྱུག་སྔོན་གྱི་འཕྲེང་སྔགས་གཙོ་བོར་བཟླ་ཞེས་གསུང་ངོ༌། །དེ་ནས་སླར་ཡང་གོང་བཞིན་མཆོད་བསྟོད་བྱས་ལ། ཨུཥྞི་ཥ་རྭ་ལུགས་ནས་འབྱུང་བ་ལྟར་དམོད་པ་དྲག་ཏུ་གདབ། གལ་ཏེ་གཏོར་མ་འབུལ་ན། བཟླས་པ་དང་མཆོད་བསྟོད་ཀྱི་བར་དེར་བྱའོ། །སྐབས་འདིའི་ཁྲོ་བོ་བཅུ་ཞལ་གསུམ་ཕྱག་དྲུག་ཏུ་མཛད་པ་ཡང་ཡོད་མོད། གཞུང་གི་མཆན་བུར་རྡོ་རྗེ་གུར་བཞིན་དུ་བྱེད་གསུང་བ་ལྟར་དང༌། གཙོ་བོ་ཕྱག་གཉིས་པ་ཡིན་པའི་ཕྱིར། འཁོར་རྣམས་ཀྱང་ཕྱག་གཉིས་པ་འོས་པ་ལྟར་བཀོད་པ་ཡིན་ནོ། །གལ་ཏེ་ཕྱག་མངས་སུ་བྱེད་ན་ཡང༌། ཕྱོགས་གླང་གསར་མའི་ཡི་གེ་ན་ཡོད་པ་དེ་མི་ལེགས་ཀྱི་འདུས་པ་ཞབས་ལུགས་དང་བཏུན་ན་ལེགས་ཤིང་གོང་དུ་སྨོས་པའི་གཞུང་གི་མཆན་བུ་དེ་ཡང་གློ་བོ་ལོ་ཙཱ་བ་ཉིད་ཀྱི་མཆན་བུ་ཡིན་ཞེས་གྲགས་པས་གུར་དང་མཐུན་པར་ལེགས། གཏོར་མ་བྱིན་རླབས་གཤེད་དམར་ལྷ་ལྔ་དང༌། བཅུ་གསུམ་མ་གང་ལྟར་བྱས་ཀྱང་འདྲ། ཐུན་ཀྱི་སྐབས་བདག་བསྐྱེད་ལ་འབུལ་བ་ཡིན་ན་དེ་མ་ཐག་ཕུལ་བས་ཆོག །ཐུན་མཚམས་མདུན་བསྐྱེད་ལ་འབུལ་བ་ཡིན་ན། རང་གི་སྙིང་ག་ནས་འོད་ཟེར་འཕྲོས། བསྲུང་བའི་འཁོར་ལོ་བཅོམ་ལྡན་འདས་གཤིན་རྗེ་གཤེད་ཡབ་ཡུམ། ལུས་དཀྱིལ་ལྷ་བཅུ་གསུམ། ཁྲོ་བོ་བཅུ་དང་བཅས་པ་བཛྲ་ས་མཱ་ཛཿ ཧྲཱྀཿཥྚཱིཿའི་ཧཱུཾ་གི་གོང་དུ། ཨི་དཾ་བ་ལིང་

― TNT06_Page_0929 ―

^{[མ་དཔེ་གཟིགས་ན་འདིར་གནོན།]}

[Full Size]

གྲྀཧྞ་གྲྀཧྞ་སརྦ་དུཥྟན་ས་མ་ཡ་མུ་དྲ་པྲ་བྷཉྫ་ཀ ། མ་མ་ཤཱནྟིཾ་རཀྵཉྩ་ཀུ་རུ་ཀུ་རུ། ཞེས་བཅུག་པ་ལན་གསུམ་མམ་བདུན་གྱིས་གཙོ་བོ་ལ་ཕུལ། ཡ་མ་མེ་ད་ཀྵེ་རཱ་ཛ་ས་དོ་རུ་ཎ་ཡོ་ནི་ར་ཡ་ཙ་ནིའི་མཐར་གོང་བཞིན་སྤེལ་ཚིགས་དང༌། ཧཱུཾ་ཧཱུཾ་ཕཊ་ཕཊ་སྭཱཧཱ། སྦྱར་བས་སྐུ་ལུས་ཀྱི་ལྷ་རྣམས་དང༌། ཨོཾ་ཨཱ་ཡ་མཱནྟ་ཀྲྀ་ཏ་ཨི་དཾ། སོགས་སྤེལ་ཚིག་གི་མཐར། ཧཱུཾ་ཧཱུཾ་ཕཊ་ཕཊ་སྭཱཧཱ། སྦྱར་བས། གཤིན་རྗེ་མཐར་བྱེད་སོགས་ཁྲོ་བོ་བཅུ་ལ་འབུལ་བ་རིགས་འགྲེ། མཐར་ཨརྒྷཾ་ལ་སོགས་པས་མཆོད། ཁྲོ་བོ་ཞེ་སྡང་གནས་ལས་སྐྱེས། །སོགས་ཀྱིས་བསྟོད། མཆོད་སྦྱིན་གཏོར་མ་འདི་བཞེས་ལ། །སོགས་ཀྱིས་འདོད་དོན་གསོལ་བ་བཏབ། ཡིག་བརྒྱ། བཟོད་གསོལ། སྨོན་ལམ། བཀྲ་ཤིས་རྣམས་བྱའོ། ཁྲོ་བོ་བཅུ་གཅིག་ལུས་དཀྱིལ་དང་བཅས་པ་ལ། སྦྱིན་བསྲེག་ཕུལ་བས་ཀྱང་སྤྱིར་ལས་ཐམས་ཅད་དང༌། སྒོས་སུ་སྲུང་བཟློག་བསད་གསུམ་ཐོགས་པ་མེད་པར་འགྲུབ་སྟེ། འདིའི་ཆོ་ག་ནི་སློབ་དཔོན་ཆེན་པོ་དཔལ་འཛིན་ཉིད་ཀྱིས། དམར་ནག་གི་དཀྱིལ་ཆོག་གམ། དམར་པོའི་སྦྱིན་བསྲེག་བཞིན་དུ་བྱའོ། །འདིར་གཞུང་ལས། རྫས་ཀྱི་ཕྱིར་བཟློག་གི་སྐབས་སུ། ས་བོན་སྔགས་ལས་བཅུ་གསུམ་ལྷར་བསྐྱེད་ནས། བཅུ་གསུམ་གནས་སུ་བཞག །ཧཱུཾ་ཀྵེ་མ་མེ་ད། ཛ་ས་དོ་རུ་ཎ་ཡོ་ནི་ར། ཡ་ཙ་ནི་ར། སྙིང་ག་མིག་དང་རྣ་བ་སྣ། ཁ་དང་ལྟེ་བ་འོག་སྒོ་གཉིས། །བརླ་གཉིས་ཕྲག་པ་གཉིས་དང་ནི། །དེ་བཞིན་སྤྱི་བོའི་གཙུག་ལ་རེག །ཅེས་གསུངས་པའི་ས་བོན་བཅུ་གཉིས་དང༌། ལུས་ཀྱི་གནས་བཅུ་གསུམ་གྱི་གོ་རིམ་སྦྱོར་ཚུལ་དེ་ནི་རྫས་ཀྱི་བསྲུང་བའི་སྐབས་ཡིན་ཞིང༌། དེ་དང་འདིར་ལྷ་དགོད་ཚུལ་ཅུང་ཟད་མི་མཐུན་ཡང༌། གནས་སྐབས་ཐ་དད་པ་

― TNT06_Page_0930 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་པའི་ཕྱིར་འགལ་བ་མ་ཡིན་ནོ། །བསྲུང་བཟློག་གི་མན་ངག་འདི་ཡང༌། གཤིན་རྗེ་གཤེད་ཀྱི་རྣལ་འབྱོར་ཐམས་ཅད་དང་འབྲེལ་བ་ཡིན་མོད་ཀྱི། དཔལ་འཛིན་གྱི་མན་ངག་ཏུ་མཚུངས་པའི་ཕྱིར། དམར་ནག་བཅུ་གསུམ་མ་གང་རིགས་གཅིག་དང་སྦྲེལ་ནས་བསྒོམ་ན་འབྲེལ་ཆེའོ། །ད་ལྟའི་ཕྱིར་བཟློག་དྲུག་གི་གཞུང་འདི་གློ་བོ་ལོ་ཙཱ་ཁོ་ནས་བསྒྱུར་བ་ཡིན། ཁོང་ནག་པོ་ལ་ལག་ལེན་མི་མཛད་པས་དེའི་ཤུགས་བརྡས་ཏེ། གཞན་ཆོས་ཀྱང་གཤེད་དམར་འབའ་ཞིག་གི་ཆ་ལག་ཏུ་སྦྱོར་གྱིན་འདུག་ཀྱང༌། དམར་པོ་ཁོ་ནའི་ཁྱད་ཆོས་ཡིན་པར་མ་ངེས་སོ། །འདིར་གཙོ་བོ་སྐུ་མདོག་ནག་པོ་ཕྱག་གཉིས་པར་གསུངས། དེ་ལ་བླ་མ་སྔ་མ་མང་པོ་སྐུ་མདོག་མ་གཏོགས། གཤེད་དམར་བཅུ་གསུམ་མའི་གཙོ་བོ་ཡབ་ཡུམ་སྒྲ་ཇི་བཞིན་དུ་བཞེད་མོད། འོན་ཀྱང་གཞུང་དེ་དམར་ནག་གཉིས་ཀའི་ཐུན་མོང་ཡིན་པས་འདི་ལྟར་ཤེས་དགོས་ཏེ། ནག་པོ་ལ་བརྟེན་ནས་བྱེད་ན། གཙོ་བོ་གཤེད་ནག་ཞལ་གསུམ་ཕྱག་དྲུག་པ་བསྒོམ་པ་དང༌། དེའི་ཚེ་འཁོར་རྣམས་ཕྱག་གཉིས་པའང་རུང་ལ། སྤྲོ་ན་ཞལ་གསུམ་ཕྱག་དྲུག་པ་གསང་འདུས་ཞབས་ལུགས་དང་མཐུན་པའི་ཁྲོ་བཅུར་བྱས་ཀྱང་ཆོག །ཁྲོ་བཅུའི་སྔགས་ཀྱང་གསང་འདུས་ལྟར་བྱས་ན་ལེགས། གཤེད་དམར་དང་སྦྲེལ་ན་གཙོ་བོའི་སྐུའི་དབྱིབས་བཅུ་གསུམ་མའི་གཙོ་བོ་ཇི་བཞིན་དུ་བྱས་ཕྱིན། དྲག་པོའི་ལས་ཡིན་ཡང་སྐུ་མདོག་ནག་པོར་བསྒྱུར་མི་དགོས་ཏེ། གཤེད་དམར་གྱི་སྐུ་མདོག་དམར་པོ་ནི་རྩ་བའི་སྐུ་མདོག་ཡིན་གྱི། དབང་གི་ལས་མཚོན་བྱེད་མ་ཡིན་པའི་ཕྱིར། བཟློག་བསད་ཀྱི་ལས་དང་སྐུ་མདོག་དམར་པོ་མི་འགལ་ལོ། །བླ་མ་སྔ་མ་རྣམས་ཀྱི་བཞེད་པ་དེ་ཡང་སྤྱིར་མི་འགལ་མོད། གཞུང་གི་དངོས་བསྟན་སྐུ་མདོག་ནག་པོ་ནི། གཤེད་དམར་སྐུ་མདོག་ནག་པོ་བསྒྱུར་བ་མ་ཡིན་གྱི། གཤིན་རྗེ་གཤེད་གང་ལ་སྦྱར་ཀྱང་འཇུག་པའི་དབང་དུ་མཛད་ནས། རྩ་བའི་གཤིན་རྗེ་གཤེད་དུ་གྲགས་པའི་སྐུར་བསྒོམ་པའི་དབང་དུ་བྱས་པར་གསལ་ཏེ་རྣམ་པ་ནི་གོང་དུ་བཤད་པ་ཉིད་དོ། །གཞུང་

― TNT06_Page_0931 ―

^{[མ་དཔེ་གཟིགས་ན་འདིར་གནོན།]}

[Full Size]

ལས། དབུས་སུ་རང་ཉིད་གཤིན་རྗེ་གཤེད། །མདོག་ནག་ཁྲོས་པ་མ་ཧེའི་སྟེང༌། །ཞེས་པའི་ཐད་ཀྱི་མཆན་བུ་ལས། སྒྲུབ་ཐབས་རྒྱ་མཚོར་བཤད་པ་ལྟར་གྱི་ཞེས་འབྱུང་སྟེ། གཤེད་དམར་དུ་སྒོམ་ན། རང་གཞུང་རྒྱས་པ་ཡོད་ཕྱིན། སྒྲུབ་ཐབས་རྒྱ་མཚོར་ཁ་འཕང་མི་དགོས་ལ། དབྱིབས་གཤེད་དམར་དང་འདྲ་བ་ལ། སྐུ་མདོག་ནག་པོ་རྒྱ་མཚོ་ན་མེད་པས། གོང་དུ་བཤད་པའི་ཕྱག་གཉིས་པ་དེ་ཁ་དང་འདྲ་བ། རྒྱ་མཚོ་ན་ཡོད་པ་དེ་ལ་ཁ་འཕངས་པའོ། །དེ་ལྟར་ན་སྐབས་འདིར་དཔལ་འཛིན་ལུགས་ཀྱི་གཤིན་རྗེ་གཤེད་དམར་ནག་གཉིས་དང༌། ཞལ་དྲུག་པ་དང༌། རྡོ་རྗེ་འཇིགས་བྱེད་ལྷ་ཞེ་དགུ་མ་དང༌། འཇིགས་མཛད་ཁྲོ་མོ་བརྒྱད་ཀྱིས་བསྐོར་བའི་དཀྱིལ་འཁོར་དང༌། རོ་ལངས་བརྒྱད་བསྐོར་གྱི་རིགས་མལ་ལུགས་སུ་གྲགས་པ་དང༌། འཇིགས་མཛད་བཅུ་གསུམ་མ་སྟེ། གཤིན་རྗེ་གཤེད་ཀྱི་དཀྱིལ་འཁོར་ཆེན་པོའི་སྒྲུབ་ཐབས་བདུན། བསྲུང་འཁོར་གྱི་སྒྲུབ་ཐབས་གཉིས་ཏེ་རིམ་པ་དགུ་བཤད་ཟིན་ཏོ། །བཟློག་པའི་དཀྱིལ་འཁོར་འདི་གཉིས་གཤིན་རྗེ་གཤེད་ཀྱི་དབང་ཐོབ་པ་ཁོ་ནས་བསྒོམ་དུ་རུང་བས། བཀའ་ལོགས་པ་མི་དགོས་མོད། དེ་ལྟ་ན་ཡང་བླ་མའི་ཞལ་ལུང་ངམ་ཀློག་ལུང་གང་རུང་ཞིག་ཐོབ་པར་བྱའོ། །དེ་དག་ལས་གཞན་རྣམས་ལ། བཀའ་སྡོད་ཆོས་སྐྱོང་འདི་ལྟ་བུའོ་ཞེས་པའི་དམིགས་བསལ་མེད་ལ། གདུལ་བྱའི་གཙོ་བོ་ཡིན་པའི་རྒྱུ་མཚན་གྱིས། ཆོས་ཀྱི་རྒྱལ་པོའི་རྟོག་པ་ལོགས་སུ་ཡོད་པ་ཉིད་ཆ་ལག་ཏུ་སྦྱོར་བའི་སྲོལ་ནི་མལ་ལུགས་མ་གཏོགས་གཞན་ཀུན་ལ་བྱུང་བར་སྣང༌། མལ་ལུགས་ལ་སྨྱོན་པ་འཇིགས་བྱེད་ཡིན་པར་འཆད་ཀྱང་ད་ལྟ་དེར་ཟད་ལ། སྐྱོ་ལུགས་ནི་ཡི་དམ་ཆོས་སྐྱོང་སྦགས་སྒྲུབ་ཡིན་ཏེ། དེ་ཡང་ལས་བྱེད་ཀྱི་གཙོ་བོ་མ་མོ་དང་གཤིན་རྗེ་ཁོ་ན་ཡིན་ནོ། །རྭ་ལུགས་ལ་ནི་ཐོག་མ་

― TNT06_Page_0932 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་ཡི་དམ་བཀའ་སྲུང་སྦགས་ཏེ་མི་སྒྲུབ་པར་དང་པོར་ཆོས་ཀྱི་རྒྱལ་པོའི་རྟོག་པ་ལ་སོགས་པ་ཕྱག་བརྙན་གྱི་སྒྲུབ་ཐབས་རྣམས་ལོགས་སུ་གཏན་ལ་ཕབ་ནས། བླ་མའི་མན་ངག་ལ་བརྟེན་ནས་ཡེ་ཤེས་ལྷ་དང་སྦྲེལ་ལུགས་ནི་དགོས་ཤིང༌། བཀའ་ཉན་གྱི་གཙོ་བོ་ནི་ལས་ཀྱི་གཤིན་རྗེ་དང༌། ནག་པོ་ཆེན་པོ་དང༌། མ་མོ་དང༌། དྲག་པོ་དབང་ཕྱུག་ཆེན་པོ་སྟེ་དྲེགས་པ་གཙོ་བོ་བཞི་པོ་འདི་དག་ཡིན་ལ། ཆ་ལག་ཏུ་གཤིན་རྗེ་དམར་ནག་གཞན་རྣམས་ཀྱང་སྦྱོར་བར་མཛད་དོ། །མགོན་པོ་ལས་མཁན་དུ་སྦྱོར་བ། སློབ་དཔོན་འཇམ་པའི་དབྱངས་ཀྱི་སྒྲུབ་ཐབས་ལས་ཀྱང་བཤད། དོན་ལ་ནག་པོ་ཆེན་པོ་ནི། རོ་ལངས་བརྒྱད་པོ་གང་རུང་ཅིག་དང་གཅིག་པ་དང༌། འཇིགས་མཛད་ཆེན་པོའི་གདུལ་བྱའི་གཙོ་བོ་དྲག་པོ་དབང་ཕྱུག་ཆེན་པོ་ཁྲོས་པ་ནི་འཇིག་རྟེན་ལས་མ་འདས་པའི་འཇིགས་བྱེད་ཆེན་པོ་ཉིད་ཡིན་པས། ལས་བྱེད་མཆོག་ཏུ་འགྱུར་ཞིང༌། ལྷ་མོ་ནག་མོ་རྗེ་ཁོལ་འདི་རྣམས། དངོས་སུ་གཤིན་རྗེའི་ལྕམ་ལ། ནག་པོ་ཆེན་པོའི་ཡུམ་ཡིན་ཞིང༌། རེས་འགའ་འགོ་བཟློག་པ་སྒྲུབ་ཚུལ་ཡང་ཡོད་པ་ལྟར། གཤིན་རྗེ་མགོན་པོ་གཉིས་ཀ་དང་འབྲེལ་བས། གཤིན་རྗེ་གཤེད་པོའི་དབང་དྲག་གཙོ་བོར་གྱུར་པའི་འཕྲིན་ལས་ཀྱི་རྣོ་ཁྱད་ཐམས་ཅད། དུས་ཀྱིས་མཚན་མོ་དང་གཉིས་སུ་མེད་པའི་ལྷ་མོ་རི་མ་ཏཱི་ལ་རག་ལས་པ་ལྟ་བུར་ཡོད་དོ། །དེ་ལྟར་ན་མགོན་པོ་མ་མོ་དབང་ཕྱུག་གསུམ་པོ་ནི། གཤིན་རྗེ་གཤེད་གཞན་པས་ཀྱང་འདི་ལ་ལྷག་པར་འབྲེལ་ཆེ་སྟེ། རྡོ་རྗེ་འཇིགས་བྱེད་ཀྱི་ལས་མཁན་མཆོག་རེ་རེ་ཡིན་པར་རྭ་ལོ་ཆེན་པོ་ཡབ་སྲས་བཞེད་ཅིང༌། དོན་ཐོག་ཏུ་ཁེལ་བའི་གནད་ཆེན་པོ་ཡིན་ཡང༌། བོད་ཀྱི་རྡོ་རྗེ་འཇིགས་བྱེད་མཁན་པོར་རློམ་པ། ཕྱིས་བྱུང་གཞན་རྣམས་ལྟ་ཞོག །རྭ་ལུགས་པ་ཡིན་པ་ང་རྒྱལ་བ་རྣམས་ཀྱིས་ཀྱང་མ་གོ་སྟེ། དེ་ཐམས་ཅད་ཆོས་རྒྱལ་གྱི་རྟོག་པ་ཙམ་མམ། འགའ་ཞིག་དེ་བས་ཀྱང་འགངས་ཆུང་བའི། ཉེ་བརྒྱུད་ཡིན་ཟེར་

― TNT06_Page_0933 ―

^{[མ་དཔེ་གཟིགས་ན་འདིར་གནོན།]}

[Full Size]

བ་རེ་ཙམ་ལ་ཡིད་བརྟན་འཆའ་སྟེ། ད་དུང་མན་ངག་རིག་པ་རྣམས་ཡུན་རིང་དུ་བསྟེན་དགོས་པ་ཡིན་ནོ། །དེ་ལྟར་ན་སྒྲུབ་པའི་ཐབས་འདི་དང་འདི་ལྟ་བུ་དག་བླ་མ་དམ་པ་ལས་ཐོབ་པར་བྱས་ནས། དེའི་རྗེས་སུ་ལེགས་པར་བརྟགས་ལ། བློ་སྣ་མང་པོའི་སྣ་ཚོགས་སྒྲུབ་འདོད་སྤངས་ནས། རང་ཉིད་མོས་ཤིང་སྐལ་བ་དང་འཚམ་པ་གཅིག །དམ་ཚིག་མ་ཉམས་ཤིང་རབ་ཏུ་གསང་བའི་སྒོ་ནས་བསྒྲུབས་ན། གནས་སྐབས་དང་མཐར་ཐུག་གི་འདོད་དོན་ཐམས་ཅད་དང༌། འཕྲིན་ལས་རབ་འབྱམས་ཐུན་མོང་དང་མཆོག་གི་དངོས་གྲུབ་དང་བཅས་པ། བདེ་བ་དམ་པས་ཐོབ་པར་འགྱུར་རོ། །དཔལ་ལྡན་གཤིན་རྗེ་གཤེད་པོའི་དཀྱིལ་འཁོར་གྱི། །སྒྲུབ་ཐབས་རབ་འབྱམས་དེ་དག་གཞུང་དོན་དང༌། །སྦྲེལ་ཕྱིར་གོ་དོན་མཐའ་ཆོད་ཅི་རིགས་པའང༌། །ལེགས་པར་འགོད་འདི་སྔོན་མེད་དགེ་བ་ཡིན། །ནག་པོ་ཞང་ལུགས་གཤེད་དམར་ལྷ་ལྔ་དང༌། །རྟོག་བདུན་དངོས་བསྟན་རྭ་ལུགས་གཙོ་རྐྱང་གི ། སྒྲུབ་ཐབས་དཀྱིལ་ཆོག་གཞན་དུ་བཤད་ཟིན་ཅིང༌། །འདིར་བཤད་དགུ་སྟེ་འདི་ཙམ་ཁོ་ནས་ཀྱང༌། །རྣལ་འབྱོར་བླ་མེད་གཤིན་རྗེ་གཤེད་རྒྱུད་ཀྱི། །དབང་དང་སྒྲུབ་ཐབས་བཀའ་ཡོད་ལྷད་མེད་པ། །གངས་ཅན་འདི་ན་ད་ལྟ་ཡོད་པ་ཀུན། །མ་འདྲེས་ཇི་བཞིན་གསལ་བར་རྟོགས་པ་ནུས། །དེ་སྐད་སྨྲ་བ་ཏཱ་ར་ནཱ་ཐ་སྟེ། །བླུན་པོ་གྲགས་པའི་རྗེས་འབྲང་མི་མགུ་ཡང༌། །རིག་འཛིན་མཁས་པ་ཀུན་གྱི་དགའ་སྟོན་འདིས། །རྣམ་དཔྱོད་བཞིན་གྱི་དཀྱིལ་འཁོར་གསལ་བར་བྱས། །ཞེས་པ་བཅོམ་ལྡན་འདས་གཤིན་རྗེ་གཤེད་པོའི་དཀྱིལ་འཁོར་རབ་འབྱམས་ཀྱི་སྒྲུབ་ཐབས། འཕྲིན་ལས་ཀྱི་ཉི་མ་འབུམ་གྱི་གཟི་བརྗིད་ཅན་ཞེས་བྱ་བ་འདི་ཡང༌། ཡོན་ཏན་མངོན་པར་མཐོ་བ་དུ་མ་དང་བཅས་པའི་བླ་ཆེན་ཡེ་ཤེས་རྒྱ་མཚོ་བ་སོགས། བཤེས་གཉེན་གསང་སྔགས་རིག་པ་འགའ་ཞིག་གིས་བསྐུལ་ནས། ཀུན་དགའ་སྙིང་པོས་མེ་ཕོ་སྟག་དགྲ་བགེགས་བདུད་སྡེ་ཉེས་སྐྱོན་མི་མཐུན་པའི་ཕྱོགས་ཐམས་ཅད་ཟད་པའི་ལོ། དཔྱིད་ཟླ་ར་བ་མཁའ་འགྲོ་འདུ་བའི་ཚེས་ལ་སྦྱར་བའོ།། །།དགེ་ལེགས་འཕེལ། །མངྒ་ལཾ།། །