དཔལ་མཁའ་འགྲོ་མ་སྒྱུ་མ་བདེ་མཆོག་གི་སྒྲུབ་ཐབས་དགའ་བདེ་རྒྱ་མཚོ།
དཔལ་མཁའ་འགྲོ་མ་སྒྱུ་མ་བདེ་མཆོག་གི་སྒྲུབ་ཐབས་དགའ་བདེ་རྒྱ་མཚོ་ཞེས་བྱ་བ་བཞུགས།
ཨོཾ་སྭཱ་སྟི། དཔལ་སངས་རྒྱས་ཐམས་ཅད་དང་མཉམ་པར་སྦྱོར་བ་མཁའ་འགྲོ་མ་སྒྱུ་མ་བདེ་མཆོག་གི་སྒྲུབ་ཐབས་དགའ་བདེ་རྒྱ་མཚོ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། ཁྱབ་བདག་རིགས་ཀུན་འཁོར་ལོས་བསྒྱུར། །དཔལ་ལྡན་བདེ་ཆེན་ཕྱག་འཚལ་ནས། །དྲྭ་བ་སྡོམ་པ་ལས་འབྱུང་བའི། །རིགས་བསྡུས་དཀྱིལ་འཁོར་སྒྲུབ་ཐབས་བཤད། །དེ་ལྟར་ཡང་རྩ་བའི་རྒྱུད་ལས། །སྦྱོར་བ་བཞི་ཡི་རིམ་པ་ཡིས། །དེ་ཡི་ལམ་ལ་རབ་ཏུ་སྦྱོར། །ཞེས་རྣལ་འབྱོར་བཞི་ལྡན་དུ་བསྒོམ་པར་གསུངས་ལ། བདག་ཉིད་ཆེ་བའི་ལྷར་སྦྱོར་བས། །བདག་ལ་བདག་གིས་རབ་ཏུ་མཆོད། །ཅེས་གཙོ་བོ་བསྐྱེད་པ་རྣལ་འབྱོར་དང༌། རྣལ་འབྱོར་ཐམས་ཅད་བདེ་བ་ཡི། །རྗེས་སུ་སྦྱོར་བས་མཆོད་བྱེད་ཅིང༌། །ཞེས་རིག་མ་སྒྲུབ་ཅིང་རྗེས་ཆགས་བརྩམ་པ་ནི་རྗེས་སུ་རྣལ་འབྱོར་དང༌། རྒྱུད་ལ་མྱང་བར་བྱེད་པས་ནི། །ཤིན་ཏུ་
སྦྱོར་བས་འགྲུབ་པར་འགྱུར། །ཞེས་མངལ་གནས་ནས། དཀྱིལ་འཁོར་སྤྲོ་བ་ཤིན་ཏུ་རྣལ་འབྱོར་དང༌། །སངས་རྒྱས་རྣམས་ནི་ཐམས་ཅད་ཀྱི། །ར་སཱ་ཡ་ཎའི་བདེ་བ་འདི། །རྡོ་རྗེ་སེམས་དཔའི་ཚེ་དཔལ་དང༌། །ནད་མེད་ལང་ཚོ་བདེ་མཆོག་འགྲུབ། །ཅེས་སྐྱེ་མཆེད་བྱིན་རླབས་དབང་བསྐུར་མཆོད་བསྟོད་ལ་སོགས་པ་ནི། རྣལ་འབྱོར་ཆེན་པོའོ། །དེ་ལ་དང་པོར་འདི་ཉིད་ཀྱི་མཆོད་ཆོག གཏོར་འབུལ་ལ་སོགས་པ་སྔོན་དུ་སོང་ན་ཤིན་ཏུ་ལེགས། ཡང་ཕྱོགས་འདིར་བར་སྐབས་སུ་བྱོན་པའི་བླ་མ་རྣམས་ཀྱི་ཕྱག་བཞེས་ལྟར། སྔོན་འགྲོ་གཏོར་མ་དང༌། གནས་ཡོ་བྱིན་རླབས་ཙམ་བྱེད་པའང་མི་འགལ་ཞིང་ལེགས་པའི་ཡན་ལག་ཡིན་ལ། སྒྲུབ་ཐབས་ཙམ་ཉམས་སུ་ལེན་པ་ལ་དེ་དག་མ་བསྒྲུབས་ཀྱང་འགལ་བ་མེད་པས། སྐྱབས་འགྲོ་སེམས་བསྐྱེད་ཡིག་བརྒྱ་རྣམས་བླ་མེད་སྤྱི་དང་འདྲ་བར་བྱས་ནས། ནད་མཆོད། སུམྦྷའམ། ཨོཾ་བཛྲ་
ཀྲོ་དྷ་ཨ་མྲྀ་ཏ་ཀུཎྜ་ལི་ཧཱུཾ་ཚིནྡྷ་ཚིནྡྷ་ཧཱུཾ་ཕཊ། ཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་སྔོན་པོ་ཟླ་གམ་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་འབར་བས་མཚན་པ། དེའི་སྟེང་དུ་ཀཾ་ལས་བྱུང་བའི་ཐོད་པ་ནང་འོད་གསལ་ཆགས་ཐོགས་མེད་པ་ལ་གནས་པའི་དྲི་ཆེན་དྲི་ཆུ་རཀྟ་རྐང་དང་བྱང་སེམས་ཏེ་བདུད་རྩི་ལྔ་དང་བ་གླང་ཁྱི་རྟ་གླང་པོ་ཤ་ཆེན་ཏེ་སྒྲོན་མ་ལྔ། ཧཱུཾ་ཨོཾ་ཧྲིཿཏྲཾ་ཧཾ། ཡེ་ཤེས་ལྔའི་རང་བཞིན་གྱིས་མཚན་པ། དེའི་སྟེང་དུ་ཨ་ལས་བྱུང་བའི་ཟླ་བ་ལ་གནས་པའི་ཧཱུཾ་ལས་བྱུང་བའི་རྡོ་རྗེ། རླུང་གཡོས་མེ་སྦར་རྫས་དང་ཡི་གེ་རྣམས་ཞུ། ཧཱུཾ་ཨོཾ་ཧྲིཿཧྲིཿཧཱཾ་ཧཾ། ཨོཾ་ཨཱཿཧཱུཾ་སརྦ་པཉྩ་ཨ་མྲཾ་ཏ་ཧཱུཾ་ཧྲཱིཿཐཱ། ཞེས་བརྗོད། རིགས་དྲུག་གི་ས་བོན་ལས་ཕྱག་མཚན་དང་དེ་ལས་སྐུར་གྱུར་པའི་འཕྲོ་འདུས་ཡེ་ཤེས་ཀྱི་བདུད་རྩི་བཀུག་ནས་རྡོ་རྗེ་ལ་བཞུགས། རྡོ་རྗེ་དང་ཟླ་བ་སྣོད་དུ་ལྷུང་བ་ལས་ཞུ་སྟེ་འོད་ཟེར་ལྔ་དང་ལྡན་པའི་ཡེ་ཤེས་ཀྱི་བདུད་རྩི་ཁ་དོག་དང་དྲི་རོ་ནུས་པའི་མཐུ་ཕུན་སུམ་ཚོགས་པའི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་ཧ་ཧོ་ཧྲཱིཿ རང་ཉིད་དཔལ་རྡོ་རྗེ་སེམས་དཔའི་སྐུར་གྱུར་པའི་ལག་པ་གཡས་པར་ཉི་མའི་དཀྱིལ་འཁོར་དྲུག་གི་དབུས་སུ། ཧཱུཾ་ཨོཾ་ཧཾཿཧྲཱིཿཏྲཾ་ཧཾ་རྣམས་ལས། རྡོར་སེམས་རྣམ་སྣང་ཁྲག་འཐུང་དང༌། །གར་དབང་ཉི་མ་རྟ་མཆོག་གོ །ལག་པ་གཡོན་པར་ཟླ་བའི་དཀྱིལ་འཁོར་དྲུག་གི་སྟེང་དུ། ཨ་ཡིག་དཀར་པོ་དྲུག་ལས། ཀུན་ཏུ་བཟང་མོ་སངས་རྒྱས་སྤྱན། །
ཀྲོ་དྷཱི་ཤྭ་རཱི་གོས་དཀར་མོ། །མཱ་མ་ཀཱི་དང་སྒྲོལ་མའོ། །ལྕེ་ལ། ན་མསྟཱུ་སརྦ་བུདྡྷེ་བྷྱཿཞེས་པས་མཚན་པ། ཨོཾ་ཨཱཿཧཱུཾ་བདུད་རྩི་མྱང༌། བདག་ཉིད་སེམས་དཔའ་སུམ་བརྩེགས་སུ་གྱུར། དཔྲལ་པར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། མཛོད་སྤུ་ནས་སྤྲོས་པའི་འོད་ཟེར་གྱིས་སྲིད་པ་གསུམ་པོ་སྦྱངས། རྡོ་རྗེ་གསུམ་གྱི་གོ་འཕང་ལ་བཀོད། རང་གི་ཚངས་བུག་ཏུ་ཞུགས་ཤིང་ཐིམ། སྙིང་གའི་ཧཱུཾ་ལས་འོད་ཟེར་འཕྲོས། བླ་མ་དང་དཀྱིལ་འཁོར་གྱི་འཁོར་ལོའི་ལྷ་ཚོགས་ཐམས་ཅད་སྤྱན་དྲངས་ཏེ་ཟླ་བའི་གདན་ལ་བཞུགས། ཛཿཧཱུཾ་བཾ་ཧོ། ཨོཾ་བཛྲ་ས་མཱ་ཛ་ཧཱུཾ། ཨོཾ་ཨེ་ཧྱེ་ཧི་བྷ་ག་ཝཱན། མ་ཧཱ་ཀཱ་རུ་ཎི་ཀ་དྲྀ་ཤྱ་ཧོ། ས་མ་ཡ་སྟྭཾ། ས་མ་ཡ་ཧོ། ཞེས་སྤྱན་དྲངས། མཧཱ་ས་མ་སྟྭཾ། ལན་གཉིས་ཀྱིས་ཆུ་གཉིས་ཕུལ། ཨོཾ་སུམྦྷ་ནི་སུམྦྷ་ནི་ཧཱུཾ། བགེགས་ཐམས་ཅད་བཤིག་ཅིང་བསྲུང་བའི་འཁོར་ལོས་མཚམས་བཅད། ཨོཾ་ཨཱཿཧཱུཾ། མཆོད་པ་དཔག་ཏུ་མེད་པ་སྤྲུལ། ན་མོ་གུ་རུ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་པྲ་ཎ་མེ་ནཾ་བཛྲ་བནྡྷ་ནཾ་ཀ་རོ་མི། ཨོཾ་ཨ་ཏི་བྷུ་ཧོ། །ཞེས་ཕྱག་འཚལ་ལོ། །རྡོ་རྗེ་སེམས་དཔའ་བསྡུས་པ་ནི། །རྡོ་རྗེ་རིན་ཆེན་བླ་ན་མེད། །རྡོ་རྗེ་ཆོས་ནི་གླུར་བླངས་པ། །རྡོ་རྗེ་ལས་ཀུན་བྱེད་པར་འགྱུར། །ཨོཾ་ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿསརྦ་ཐ་ཁཾ་ཨུད་ག་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཨོཾ་བཛྲ་པུཥྤེ་ཨོཾ། ཨོཾ་བཛྲ་དྷུ་པེ་ཧཱུཾ། ཨོཾ་བཛྲ་ཨཱ་ལོ་ཀེ་ཧྲཱིཿ ཨོཾ་བཛྲ་གནྡྷེ་ཧཱུཾ། ཨོཾ་བཛྲ་ནཻ་བི་དྱ་ཏྲཱཾ། ཨོཾ་བཛྲ་ཨཱ་ཧཾ་ར་ཧཱིཿ ན་མཿསརྦ་ཏ་ཐཱ་ག་ཏེ་བྷྱོ་ཨ་ལཾ་ཀ་ར་པ་ན་བཻ་ཧཱུཾ་སྭཱ་ཧཱ།
བོདྷྱཾ་རཏྣ་མེ་གྷ་སྥ་ར་ཎ་ཧཱུཾ། ཞེས་ཕྱི་མཆོད་དང༌། ཨོཾ་ན་མཿསརྦ་པཉྩ་རཱ་ས་ཡ་ཎ་ཨ་མྲྀ་ཏེ་ཧཱུཾ་ཕཊ། ནང་མཆོད་དང༌། ཨོཾ་བོ་དྡྷི་ཙིཏྟི་མ་ཧཱ་སུ་ཁ་ཧཱུཾ། ཞེས་གསང་མཆོད་ཕུལ། འགྲུབ་ན་ཁྱད་པར་གྱི་བཤགས་པ་ཡང་བྱ། བླ་མ་སངས་རྒྱས་ཆོས་དགེ་འདུན། །བྱང་ཆུབ་སེམས་དཔའ་རྣམས་ལ་ཡང༌། །རྣམ་ཀུན་བཏུད་དེ་སྐྱབས་མཆི་ཞིང༌། །མཆོད་འོས་གཞན་ལའང་ཕྱག་འཚལ་ལོ། །སྡིག་པ་ལས་ནི་བཟློག་བགྱི་ཞིང༌། །བསོད་ནམས་ཐམས་ཅད་ཡོངས་སུ་བཟུང༌། །ལུས་ཅན་རྣམས་ཀྱི་བསོད་ནམས་དག །ཀུན་ལ་རྗེས་སུ་ཡི་རང་ངོ༌། །བདག་ནི་ལུས་བཏུད་ཐལ་སྦྱར་ནས། །གསང་བའི་ཐེག་ཆེན་བཤད་པ་དང༌། །འགྲོ་གནས་བར་དུ་བཞུགས་སླད་དུ། །རྫོགས་པའི་སངས་རྒྱས་རྣམས་ལ་གསོལ། །དེ་ལྟར་བགྱིས་པའི་བསོད་ནམས་གང༌། །བདག་གིས་བགྱིས་དང་མ་བགྱིས་གང༌། །དེས་ནི་སེམས་ཅན་ཐམས་ཅད་ཀྱང༌། །བླ་མེད་བྱང་ཆུབ་གནས་ཐོབ་ཤོག ཅེས་རྒྱུན་བཤགས་བྱ། འདི་ནི་སློབ་དཔོན་ཀུ་ཀུ་རཱ་ཛའི་ཆོ་ག་ལྔ་པ་ལས་འབྱུང་བ་ཡིན། གཏམ་བྱ་རིན་ཆེན་འཕྲེང་བའི་ཚིག་གི་ཟུར་ཅུང་ཟད་བསྒྱུར་བར་སྣང་ལ། གསང་དོན་རྣམ་པར་བཀོད་པ་དང༌། ཧཱུཾ་མཛད་གྲགས་པའི་ཡན་ལག་བཞི་པ་ལས་འབྱུང་བ་སོགས་ནི། ཧ་ཅང་མང་གྲགས་པས་མ་བཀོད་དོ། །མཐར། ཨོཾ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏེ་ནོ་པ་ཏིཥྟ་དྲི་དྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོཥྱོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ་སརྦ་ཀརྨ་སུ་ཙ་མེ་ཙིཏྟཾ་ཤྲི་ཡཾཿཀུ་རུ་ཧཱུཾ་ཧ་ཧ་ཧ་ཧ་ཧོཿ བྷ་ག་ཝཱན་སརྦ་ཏ་ཐཱ་ག་ཏ་བཛྲ་མ་མེ་མུཉྩ་བཛྲི་
བྷ་ཝ་མཧཱ་ས་མ་ཡཱ་ས་ཏྭ་ཨཱཿ ཨོཾ་ཨཱཿཧཱུཾ། རྡོ་རྗེ་ཁུ་ཚུར་གཉིས་གཤིབས་པའི་མཐེ་བོང་བསྒྲེངས་ནས་གཡོབ། རྡོ་རྗེ་ཐལ་མོའི་རྨད་ལན་གསུམ་བརྡབ། ཨོཾ་བཛྲ་གཙྪ་མུ། ཨོཾ་བཛྲ་ཏུ་ཥྱ་ཧོཿ ཞེས་གཤེགས་སུ་གསོལ། དེ་དག་ནི་ཡུལ་དམན་པ་དང་མཆོག་ལ་ཚོགས་བསགས་པའོ། །ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་པད་ཉི་ལ་ཧཱུཾ་ལས་སྣ་ཚོགས་རྡོ་རྗེ་ཧཱུཾ་གིས་མཚན་པ། དེ་ལས་འོད་འཕྲོས། རྡོ་རྗེའི་ས་གཞི་ར་བ་དྲ་བ་གུར་བླ་རེ་ཕྱེ་རོལ་བསྐལ་པའི་མེ་དཔུང་རབ་ཏུ་འབར་བར་གྱུར། དེའི་དབུས་སུ་བདག་ཉིད་རྡོ་རྗེ་སེམས་དཔའོ། །དཔུང་པ་གཉིས་པ་སྣོལ་ཞིང་སེ་གོལ་གཏོགས་པའི་སྒྲ་དང༌། བཛྲ་ས་མཱ་ཛཿ སངས་རྒྱས་ཐམས་ཅད་བཀའ་བགྲཽོ་བ་མཛད་དེ་གཅིག་ཏུ་འདུས་པ། བདག་ཉིད་རྡོ་རྗེ་སེམས་དཔའ་ལ་ཐིམ་པ་ཧཱུཾ་དུ་གྱུར། ཧཱུཾཿ རིང་པོ་གསུམ་སྣ་བུག་ནས་བརྗོད། རང་ཉིད་ཁྲོ་བོ་ཐམས་ཅད་ཀྱི་རྒྱལ་པོ་དཔལ་ཧེ་རུ་ཀར་གྱུར་པ་ནི། སྐུ་མདོག་སྔོན་པོ་རབ་ཏུ་ཁྲོས་པའི་རྩ་ཞལ་མཐིང་ནག འབར་བ་ཆེན་པོའི་འོད་ཟེར་ཅན་གཡས་དཀར་གཡོན་སེར་རྒྱབ་དམར་བ་སྟེ་ཞལ་བཞི་པ། ཕྱག་བརྒྱད་ཀྱི་དང་པོ་གཉིས་རྡོ་རྗེ་དང་ཁ་ཊཱཾ་ག་དྲིལ་བུ་གསིལ་པ་དང་བཅས་པ་འཛིན་པ། གཉིས་པ་གཉིས་ཀྱིས་ལྕགས་ཀྱུ་དང་ཞགས་པ། གསུམ་པ་གཉིས་ཀྱིས་རལ་གྲི་དང་ཐོད་པ། བཞི་པ་གཉིས་ཀྱིས་མདའ་དང་གཞུ་འཛིན་པ། དུར་ཁྲོད་ཆས་བརྒྱད་སྐུ་ལ་རྫོགས་ཤིང༌། ཡུམ་ཆེན་ཀྲོ་དྷི་ཤྭ་རིས་འཁྱུད་པ། དེའི་ཐུགས་ཀ་ནས་ཁྲོ་བོ་
འདོད་པའི་རྒྱལ་པོ་སྤྲོས། ཕྱོགས་བཅུའི་བགེགས་ཚོགས་ཐམས་ཅད་བཀུག་སྟེ། ཧཱུཾ་ལས་བྱུང་བའི་ཁྲོན་པ་རྣམས་སུ་བསྒྱུར། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞ་པཱ་ཡ་གྲྀཧྞ་པཱ་ཡ་ཧཱུཾ། ཨཱ་ན་ཡ་ཧོ་བྷ་ག་ཝཱན་བིདྱ་རཱ་ཛ་ཧཱུཾ་ཕཊ། ཨོཾ་ཨིནྡྲ་ཡ་ཛཿ ཡ་མ་ཡ་ཛཿ ཝ་རུ་ཎཱ་ཡ་ཛཿ ཀུ་བཻ་ར་ཡ་ཛཿ ཨགྞ་ཡེ་ཛཿ ནཻ་རི་ཏྱ་ཛཿ བྷེ་ར་མ་ཧཱ་ཡ་ཛཿ ཨཱི་ཤཱ་ན་ཡ་ཛཿ ཙནྡྲ་ཡ་ཛཿ སུརྻ་ཡ་ཛཿ སུ་ར་ཏཱ་ཡ་ཛཿ ཨ་ར་པ་ཏ་ཡ་ཛཿ རང་གི་སྙིང་ག་ནས་ཁྲོ་བོ་བཅུ་སྤྲོས། ཨོཾ་བཛྲ་ཀྲོདྷ་ཡ་བི་ཛ་ཨ་ཧཱུཾ་ཧ་ན་ཧ་ན་ཧཱུཾ་ཕཊ། ཨོཾ་བཛྲ་ཀྲོདྷ་ཡ་མཱནྷ་ཀ་ཧཱུཾ་པ་ཙ་པ་ཙ་ཧཱུཾ་ཕཊ། ཨོཾ་བཛྲ་ཀྲོདྷ་ཧ་ཡ། གྲཱྀ་བ་ཧཱུཾ་ཧྱ་ཧུ་ལུ་ཧུ་ལུ་ཧཱུཾ་ཕཊ། ཨོཾ་བཛྲ་ཀྲོདྷ་ཨ་མྲྀ་ཏ་ཀུཎྜ་ལི། ཧཱུཾ་ཚིནྡྷ་ཚིནྡྷ་ཧཱུཾ་ཕཊ། ཨོཾ་བཛྲ་ཀྲོདྷ་ནཱི་ལ་དཎྜ་ཧཱུཾ་ད་ཧ་ད་ཧ་ཧཱུཾ་ཕཊ། ཨོཾ་བཛྲ་ཀྲོདྷ་ཨཱརྱ་ཨ་ཙ་ལ་ཧཱུཾ་བནྡྷ་བནྡྷ་ཧཱུཾ་ཕཊ། ཨོཾ་བཛྲ་ཀྲོདྷ་ཨ་པ་ར་ཛི་ཏ་ཧཱཾ་ཏིཥྛ་ཏིཥྛ་ཧཱུཾ་ཕཊ། ཨོཾ་བཛྲ་ཀྲོ་དྷ་ཏྲཻ་ལོ་ཀྱ་བི་ཛ་ཡ་ཧཱུཾ་བྷིནྡྷ་བྷིནྡྷ་ཧཱུཾ་ཕཊ། ཨོཾ་བཛྲ་ཀྲོ་དྷ་ཧཱུཾ་ཀ་ར་ཧཱུཾ་གརྫགརྫ་ཧཱུཾ་ཕཊ། ཨོཾ་བཛྲ་ཀྲོ་དྷ་མཧཱ་བ་ལ་ཧཱུཾ་སྥོ་ཊ་སྥོ་ཊ་ཧཱུཾ་ཕཊ། ཁྲོ་བོ་ཐམས་ཅད་སྐུ་མདོག་ནག་པོ་ནག་དཀར་དམར་བའི་ཞལ་གསུམ། གཡས་རྡོ་རྗེ་རལ་གྲི་ཐོ་བ། གཡོན་ཐོད་ཁྲག་ཞགས་པ་ལྕགས་ཀྱུ། སྨད་ཕུར་པའི་རྣམ་པ་ཅན་དུ་གྱུར། དེ་ནས་ཁྲོ་བོ་བདུད་རྩི་འཁྱིལ་བ་ཐོ་བ་བསྣམས་པ་སྤྲུལ་ཏེ། ཁྲོ་བོ་རྣམས་ཕྱོགས་བཅུའི་བགེགས་ལ་ཕུར་བུའི་ཚུལ་དུ་བཏབ་པར་གྱུར། ཨོཾ་གྷ་གྷ་གྷཱ་ཏ་ཡ་གྷཱ་ཏ་
ཡ། སརྦ་དུཥྟ་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལ་བཛྲ་དྷ་རོ་ཨཱ་ཛྙཱ་པ་ཡ་ཏི། སརྦ་བིགྷྣན་ཀཱ་ཡ་ཝ་ཀཱ་ཙིཏྟ་བཛྲ་ཀཱི་ལ་ཡ་ཧཱུཾ་ཕཊ། ལན་གསུམ་བརྗོད། འོད་ཟེར་རྣོན་པོ་འཁྲུག་ཅིང་འབར་བས་ཀྱང་བགེགས་ཐམས་ཅད་བསྲེགས། རྡོ་རྗེ་གུར་གྱི་དབུས་སུ་འཁོར་ལོ་རྩིབས་བཅུ་པ་གྲུབ་སྟེ། ཁྲོ་བོ་བཅུ་རྣམས་དེ་ལ་བཞུགས་ཤིང་སྤྲུལ་པ་ཡང་སྤྲུལ་གྱི་ཚོགས་ཀྱིས་བགེགས་བསྲུང་བའི་ལས་མཛད་པར་གྱུར། ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་དག་ནི་ཀུན་རྫོབ་དང་དོན་དམ་པའི་སྲུང་འཁོར་ཏེ་སྔོན་འགྲོའི་རིམ་པ་རྣམས་སོ། །སྟོང་པའི་ངང་ལས་རང་ཉིད་སྟོང་གསུམ་གྱི་ཡང་ཐོག་ཏུ་གནས་པས། ཨོཾ་ན་མཿསརྦ་ཏ་ཐཱ་ག་ཏ་ཨ་ནུ་ར་ག་ཡ་མི་མཎྜལ་ཧཱུཾ་བྷྲཱུཾ། སྐད་ཅིག་ཙམ་གྱིས་ཨེ་ལས་ནམ་མཁའི་རང་བཞིན་ཆོས་འབྱུང་དཀར་པོ་ཀུན་ཏུ་བཟང་མོའོ། །དེའི་ནང་དུ་ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་རྡོ་རྗེ་རྒྱ་གྲམ་དང་བ་དན་གྱིས་མཚན་པ་སྒྲོལ་མའོ། །དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་འབར་བ་དཀར་པོ་རྩེ་མང་པོས་མཚན་པ་གོས་དཀར་མོའོ། །དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པ་མཱ་མ་ཀཱི་ལའོ། །དེའི་སྟེང་དུ་ལཾ་ལས་དབང་ཆེན་གྱི་དཀྱིལ་འཁོར་སེར་པོ་གྲུ་བཞི་རྡོ་རྗེས་མཚན་པ་སྤྱན་མའོ། །དེར་ཁཾ་ལས་བྱུང་བ་འོ་མའི་རྒྱ་མཚོའི་དབུས་སུ། སུཾ། ལས་
བྱུང་བའི་རི་རབ་རིན་པོ་ཆེ་སྣ་བཞི་ལས་གྲུབ་པ། རོལ་མཚོ་རི་དང་བཅས་པས་བརྒྱན་པའོ། །དེ་དག་ནི་གཞིའི་ཏིང་ངེ་འཛིན་ནོ། །དེའི་སྟེང་དུ་པཾ་ལས་པདྨ་ལ་གསེར་གྱི་འཁོར་ལོ། དེའི་ལྟེ་བར་ཧཱུཾ་ལས་སྣ་ཚོགས་རྡོ་རྗེ། དེའི་དབུས་སུ་ཧཱུཾ་ལས་གཞལ་མེད་ཁང་ཆེན་པོ་གྲུ་བཞི་རྟ་བབས་བཞིས་བརྒྱན་པ། ནང་ནས་རིམ་པ་བཞིན་དུ་དཀར་མཐིང་དམར་སེར་ལྗང་བའི་རྩིག་པ་རིམ་པ་ལྔ་དང་ལྡན་པ་ལས། རང་བྱུང་ཉི་ཤུ་རྩ་ལྔའི་འོད་ཟེར་འཕྲོ་པའོ། །ཕ་གུ་དང་དྲ་ཕྱེད་དང་ཤར་བུ་དང་མདའ་ཡབ་དང་འདོད་ཡོན་གྱི་སྣམ་བུ་ལ་སོགས་པ་མཚན་ཉིད་ཐམས་ཅད་ཡོངས་སུ་རྫོགས་པ། རྒྱན་ཐམས་ཅད་ཀྱིས་རྣམ་པར་བརྒྱན་པ། འཁྱམས་ཀྱི་ཕྱི་རིམ་ལ། འཇིག་རྟེན་པའི་ལྷ་སྣམ་དཀར་པོས་བསྐོར་བ། དེའི་ཕྱི་རོལ་པདྨ་དང་འཁོར་ལོ་དང༌། རྡོ་རྗེའི་ར་བ་མེ་དཔུང་འབར་བས་བསྐོར་བ། ཕྱི་རོལ་ཕྱོགས་མདོག་དང་མཚུངས་པའི་ས་གཞི་ལ་དུར་ཁྲོད་ཆེན་པོ་བརྒྱད་ཀྱིས་ཡོངས་སུ་བསྐོར་བ་ལ། ཕྱོགས་སྐྱོང་དང༌། ཞིང་སྐྱོང་དང༌། ཤིང་དང༌། མེ་དང༌། ཆུ་དང༌། སྤྲིན་དང༌། མཆོད་རྟེན་དང༌། མཁའ་འགྲོ་དང༌། མཁའ་འགྲོ་མ་དང༌། རོ་ལངས་དང༌། ཤ་ཟ་དང༌། འབྱུང་པོ་དང༌། དཔའ་བོ་དང༌། རྣལ་འབྱོར་མ་དང༌། གྲུབ་པ་ཐོབ་པ་དག་གནས་ཤིང༌། རོ་དང༌། དུམ་བུ་དང༌། འཐོར་བ་དང༌། ཀེང་རུས་དང༌། བྱ་དང༌། གཅན་གཟན་སྣ་ཚོགས་པས་ཁྱབ་པའོ། །དེའི་ཕྱི་རོལ་རྒྱལ་མཚན་དང་བ་དན་ལ་སོགས་པ་འདོད་ཡོན་
སྣ་ཚོགས་ཀྱིས་གང་བའི་སྣམ་བུ་སེར་པོ། དེའི་ཕྱི་རོལ་རྡོ་རྗེའི་ར་བ་སྔོན་པོས་བསྐོར་བའོ། །གཞལ་ཡས་ཁང་ཆེན་པོ་དེའི་ནང་གི་སྟེང་འོག་རྣམས་ཤར་དཀར་ལྷོ་སྔོ་ནུབ་དམར་བྱང་སེར་དབུས་ལྗང་ཁུའོ། །དེའི་དབུས་སུ་ནང་གི་གཞལ་ཡས་ཁང་རྣམས་སོ། །སྐབས་འདིར་དབུས་སུ་གདུང་བཞིའི་རེ་མིག་དགུ་པ་བྱས་ནས། མཚམས་བཞི་ལ་རྟ་མཆོག་གི་དཀྱིལ་འཁོར་བཞི་དང༌། དབུས་དང་ཕྱོགས་བཞིར་རིགས་ལྷག་མ་ལྔ་དགོད་དོ། །དེ་ཤར་དུ་དཀྱིལ་འཁོར་དགུ་བྱེད་པ་ནི་རྒྱས་པ་ཡིན་ལ། རྟ་མཆོག་གི་དཀྱིལ་འཁོར་གཅིག་ནི་བྱས་ཏེ། དཀྱིལ་དུ་ཡང་དག་བྱེད་པ་ནི་འབྲིང་པོར་འགྱུར་ལ། ལྷ་དགུ་དགུའི་ནང་གི་དཀྱིལ་འཁོར་ཁོ་ན་དྲུག་བཀོད་ནས་མཆོད་ལྷ་དང༌། བཅས་པ་དཀྱིལ་འཁོར་ཆེན་པོ་ཁོ་ན་ལ་བཀོད་ནས་བསྡུས་པ་ཡིན་ནོ། དཀྱིལ་འཁོར་དགུའམ་དྲུག་ལ་བསྲུང་འཁོར་ཚུན་ཆོད་དང་དུར་ཁྲོད་དང་བཅས་པ་ཡོངས་རྫོགས་བྱེད་པ་དང༌། གཞལ་ཡས་ཁང་རྟ་བབས་དང་བཅས་པ་བྱེད་པ་དང༌། རྟ་བབས་མེད་པ་སྟེ་གསུམ་པོ་ཡང་དེ་དང་དེ་ཉིད་ལ་བལྟོས་པའི་རྒྱས་འབྲིང་བསྡུས་གསུམ་མོ། །མཆོག་གི་འཁོར་གྱི་ལྷ་འགོད་ཚུལ་ལ། དཀྱིལ་འཁོར་དགུ་པ་ལྟར་ན། ཤར་ལྷོ་ཤར་དང་མཚུངས་པ་སོགས་ཕྱོགས་བཞིའི་དཀྱིལ་འཁོར་དང་མཚུངས་པར་མི་འདྲ་བ་བཞི་ཡིན་ནོ། །ཡང་དཀྱིལ་འཁོར་དྲུག་པ་ལྟར་གྱིས་དབུས་དང་ཕྱོགས་བཞིར་དཀྱིལ་འཁོར་ལྔ་དང༌། དབང་ལྡན་དུ་རྟ་མཆོག་གི་དཀྱིལ་འཁོར་ཐོབ་ཐང་ཡིན་ཡང༌། བྲི་ཆ་ལ་མི་མཛེས་པས། བླ་མ་རྣམས་ཀྱི་མན་ངག་གིས་ཤར་གྱི་དཀྱིལ་འཁོར་ཤར་དབང་ལྡན་དང༌། ལྷོའི་དཀྱིལ་འཁོར་ལྷོ་མེ་མཚམས་ལ་ཉེ་བ་དང༌། ནུབ་ཀྱི་དཀྱིལ་འཁོར་ནུབ་བདེན་བྲལ་ལ་
ཉེ་བ་དང༌། བྱང་གི་དཀྱིལ་འཁོར་ཡང་རླུང་མཚམས་ལ་ཉེ་བའི་ནུབ་དང༌། བྱང་ཤར་ཀྱི་དཀྱིལ་འཁོར་དབང་ལྡན་ལ་ཉེ་བའི་བྱང་ཕྱོགས་སུ་འགོད་པ་སྟེ། བདེ་མཆོག་འཁོར་ལོ་བསྒྱུར་དྲུག་བཞིན་བྱེད་དོ། །ཕྱོགས་རྣམས་སུ་ཇི་ལྟར་འགོད་པ་ལ། ཁ་ཅིག ཤར་དུ་རྣམ་སྣང༌། ལྷོར་རྡོ་རྗེ་ཉི་མ། ནུབ་ཏུ་གར་དབང༌། བྱང་དུ་རྟ་མགྲིན་འགོད་པ་སོགས་འདུག་ཀྱང༌། ཡན་ལག་བཞི་པ་ལས། གཉིས་གོང་བཞིན། ལྷོར་ཧེ་རུ་ཀ བྱང་དུ་ཉི་མ། མཚམས་སུ་རྟ་རྒྱལ། དབུས་སུ་རྡོར་སེམས་འགོད་པ་ཉིད་ཤིན་ཏུ་ལེགས་པར་མཐོང་སྟེ། འོན་ཀྱང་རང་རང་གི་མོས་པའི་དབང་དང༌། གང་ཞིག་གཙོ་བོར་སྒྲུབ་པའི་དབང་ལས། དཀྱིལ་འཁོར་གཙོ་བོ་འཕོ་བའི་ཚུལ་གྱིས་འགོད་ན་ནི། རྣམ་པ་དྲུག་གར་ཡང་འབྱུང་སྟེ། རྡོ་རྗེ་གུར་རིགས་བསྡུས་བཞིན་ནོ། །སྤྱི་ལྡོག་ནས་རྒྱུད་འདི་རྡོ་རྗེ་སེམས་དཔའ་གཙོ་བོར་འགྱུར་པ་ཡིན་པས། ཧེ་རུ་ཀ་དཀྱིལ་དུ་བཞག རྡོར་སེམས་མཐར་བཏོན་ནས། རིགས་བསྡུས་ལ་མཉམ་སྦྱོར་ཁྲོ་བོ་དང༌། རྡོར་སེམས་རིགས་རྐྱང་ལ་མཉམ་སྦྱོར་ཞི་བའི་ཐ་སྙད་བྱེད་པ་ནི་མི་ལེགས་པར་མཐོང་ངོ༌། །དེས་ན་རེ་ཞིག་ལ་དཀྱིལ་འཁོར་དྲུག་པའི་དབང་དུ་བྱས་ཏེ་བརྗོད་ན། དབུས་ཀྱི་གཞི་ལྗང་ཁུ་ལ། གཞལ་མེད་ཁང་མཚན་ཉིད་ཐམས་ཅད་རྫོགས་པ་དྲུག་སྟེ། རྩིག་པ་དང་ལྷ་སྣམ་གྱི་ཕྱོགས་མདོག་ནི། དཀར་སེར་དམར་ལྗང་མཐིང་ག་ནི། རྡོར་སེམས་ཁྲག་འཐུང་དཀྱིལ་འཁོར་ལའོ། །སྔོ་སེར་དམར་ལྗང་དཀར་བ་ཤར། །དཀར་སེར་ནག་ལྗང་དམར་བ་ནུབ། །དཀར་ནག་དམར་ལྗང་སེར་བ་དབུས། །མཚམས་ཀྱི་དཀྱིལ་འཁོར་གཞི་དཀྱིལ་འདྲ། །ཡང་ལུགས་གཅིག་ལྟར་ན་དཀྱིལ་འཁོར་ཕྱི་ནང་ཐམས་
ཅད་མཚུངས་པར་རྩིག་པ་དང་ལྷ་སྣམ་ཀྱི་ཕྱོགས་མདོག་དཀར་སེར་དམར་ལྗང་སྔོ་བའི་རིམ་པར་བྱས་ཀྱང་རུང་ངོ༌། །ཕོ་བྲང་དབུས་མ་རྡོ་རྗེ་སེམས་དཔའི་དཀྱིལ་འཁོར་ལ་དབུས་སུ་ཟླུམ་པོ་རྡོ་རྗེའི་མུ་ཁྱུད་ཅན། ཕོ་བྲང་ཤར་མའི་དབུས་སུ་ཟླུམ་པོ་འཁོར་ལོའི་མུ་ཁྱུད་ཅན། ལྷོ་མའི་དབུས་སུ་ཟླ་གམ་ཆེན་པོ་ཁ་དོག་དམར་པོ་སྒོ་གཅིག་ཤར་དུ་བསྟན་པ། ཐོད་པའི་འཕྲེང་བས་བསྐོར་ཞིང༌། ཞིང་གི་འཕན་གདུགས་སོགས་འཇིགས་པའི་རྒྱན་གྱིས་བརྒྱན་པ། དེའི་དབུས་སུ་ཟླུམ་པོ་རེ་མིག་དགུ་པ་ལ་ཁྲོ་བོའི་རྡོ་རྗེ་འཕྲེང་བས་བསྐོར་བ། དབུས་སུ་པདྨ་དྲེགས་བྱེད་ཉི་ཟླ་བརྩིགས་པའི་གདན་རེ་མིག་བརྒྱད་ལ་བམ་ཆེན་རེ་རེའོ། །དཀྱིལ་འཁོར་ནུབ་མའི་དབུས་སུ་པདྨ་འདབ་མ་བརྒྱད་པའི་དབྱིབས་ཅན། ཀ་བ་དང་མུ་ཁྱུད་ལ་པདྨའི་འཕྲེང་བས་བསྐོར་བའོ། །བྱང་མའི་དབུས་སུ་རིན་པོ་ཆེ་ཟུར་བརྒྱད་པའི་དབྱིབས་ཅན་གྱི་དཀྱིལ་འཁོར་ལ་རིན་པོ་ཆེའི་མུ་ཁྱུད་ཀྱིས་བསྐོར་བའོ། །མཚམས་ཀྱི་དཀྱིལ་འཁོར་རྒྱ་གྲམ་གྱི་འཕྲེང་བས་བསྐོར་བའི་ནང་སྣ་ཚོགས་རྡོ་རྗེ་ཉིས་རིམ་ལྷའི་གནས་ཐམས་ཅད་དུ་པདྨའི་གདན་དང་བཅས་པའོ། །ཐམས་ཅད་ཀྱང་ནང་ལེ་ཚེ་དགུ་དགུ་དང་ལྡན་པ། རྟ་མཆོག་གི་དཀྱིལ་འཁོར་མ་གཏོགས་དབུས་ཀྱི་ལེ་ཚེ་ལ་པདྨ་འདབ་མ་བརྒྱད་པའི་གདན་རེ་རེ་པདྨ་ཐམས་ཅད་ཀྱི་མཚམས་ཀྱི་འདབ་མ་རྣམས་ལ། རིན་པོ་ཆེའི་བུམ་པ་བདུད་རྩིས་གང་བ་ཐོད་པས་ཁ་བརྒྱན་པ་རེ་རེ་དང༌། རྟ་མཆོག་ལ་སྣ་ཚོགས་རྡོ་རྗེ་ནང་མའི་མཚམས་
བཞིར་བུམ་པ་དང་བཅས་པར་གྱུར། དཀྱིལ་འཁོར་ཐམས་ཅད་ལ་མཚུངས་པར་སྒོ་བཞི་དང་གྲྭ་བཞིར་པདྨའི་གདན་ནོ། །དེ་དག་ནི་རྟེན་གྱི་དཀྱིལ་འཁོར་བསྒོམས་པའི་ཏིང་ངེ་འཛིན་ནོ། །དཀྱིལ་འཁོར་དྲུག་པོ་ཐམས་ཅད་གྱི་གཙོ་བོའི་གནས་པདྨ་ཉི་ཟླའི་གདན་རྣམས་ལ། རང་གི་སེམས་ཉིད་དཔལ་མཆོག་དང་པོ་བཞུགས་པར་མཛད་དེ། ཡོད་པ་མ་ཡིན་མེད་པ་མིན། །དབུ་མར་ཡང་ནི་དམིགས་སུ་མེད། །ཤེས་རབ་ཕ་རོལ་ཕྱིན་སྦྱོར་བ། །སངས་རྒྱས་བྱང་ཆུབ་རབ་སྒྲུབ་པའོ། །སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་དང་རང་བཞིན་གྱིས་འོད་གསལ་བའི་ཏིང་ངེ་འཛིན་ནོ། །དེའི་ཚེ་བདེ་མཆོག་མ་ལ་སོགས་པ་བཞིས། རྣམ་པ་མང་པོའི་འདོད་ཆགས་རྒྱུད་ཀྱི་སེམས་ཅན་མ་ལུས་ལུས་པ་མེད་པར་འདུལ་མཁས་པ། །དེ་བཞིན་གཤེགས་པ་ཀུན་གྱི་སྒྱུ་མ་བདེ་མཆོག་སྒྱུ་མས་ཐམས་ཅད་རབ་ཏུ་རྣམ་པར་འཕྲུལ། ཏེ་ན་ཏེ་ཏེ་ཧཱུཾ། རྣམ་པ་མང་པོ་རབ་ཏུ་དགའ་བའི་རྒྱུད་ཀྱི་སེམས་ཅན་མ་ལུས་ལུས་པ་མེད་པར་འདུལ་མཁས་པ། །དེ་བཞིན་གཤེགས་པ་ཀུན་གྱི་སྒྱུ་མ་བདེ་མཆོག་སྒྱུ་མས་ཐམས་ཅད་རབ་ཏུ་སྤྲུལ་རོལ་རྣམ་པར་སྤྲུལ། །རྣམ་པ་མང་པོ་ཁྲོ་བོའི་རྒྱུད་ཀྱི་སེམས་ཅན་མ་ལུས་ལུས་པ་མེད་པར་འདུལ་མཁས་པ། །དེ་བཞིན་གཤེགས་པ་ཀུན་གྱི་སྒྱུ་མ་བདེ་མཆོག་སྒྱུ་མས་རབ་ཏུ་རྣམ་པར་འཕྲུལ། རུ་ལུ་རུ་ལུ་ཧཱུཾ་བྷྱོ་ཧཱུཾ། རྣམ་པ་མང་པོ་སྲོག་གི་རྒྱུད་ཀྱི་སེམས་ཅན་མ་ལུས་ལུས་པ་མེད་པར་འདུལ་མཁས་པ། །དེ་བཞིན་གཤེགས་པ་ཀུན་གྱི་སྒྱུ་མ་བདེ་མཆོག་སྒྱུ་མས་
ཐམས་ཅད་རབ་ཏུ་རྣམ་པར་འཕྲུལ། །ཧཱུཾ་ཤིཥྱ་བི་ཤ་ཧཱུཾ། ཞེས་བསྐུལ་བས་སྟོང་པའི་ངང་ལས། ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨཿ ལས་ཟླ་བའི་དཀྱིལ་འཁོར་དབྱངས་ཀྱིས་མཚན་པ་མེ་ལོང་ལྟ་བུའི་ཡེ་ཤེས་སོ། །དེའི་སྟེང་དུ་ཀ་ཁ་ག་གྷ་ང༌། ཙ་ཚ་ཛ་ཛྙ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ྈྐ་ྈྑ་ྉྤ་ྉྥ་ང་རོ་དང་རྣམ་བཅད་རྣམས་ལས་བྱུང་བའི་ཉི་མའི་དཀྱིལ་འཁོར་གསལ་བྱེད་ཀྱིས་མཚན་པ་ནི་མཉམ་པ་ཉིད་ཀྱི་ཡེ་ཤེས་སོ། །ཉི་ཟླའི་འོད་ཀྱི་འཕྲོ་འདུ་ལས་ཧཱུཾ་དུ་གྱུར། དེ་ལས་རྡོ་རྗེ་དཀར་པོ་རྩེ་ལྔ་པ་འོད་དམར་པོ་འཕྲོ་བའི་ལྟེ་བར་ཧཱུཾ་གིས་མཚན་པ་ནི་སོ་སོར་རྟོག་པའི་ཡེ་ཤེས་སོ། །དེ་ལས་འོད་འཕྲོས་རིགས་དྲུག་གི་དཀྱིལ་འཁོར་སྤྲུལ། སེམས་ཅན་ཐམས་ཅད་རྡོ་རྗེ་གསུམ་གྱི་གོ་འཕང་ལ་བཀོད། སླར་འདུས་ཏེ་ཐིམ་པས་ཤིན་ཏུ་འོད་ཟེར་འབར་བར་གྱུར་པ་ནི་བྱ་བ་སྒྲུབ་པའི་ཡེ་ཤེས་སོ། །བཛྲོ྅ཧཾ། དེ་ཐམས་ཅད་ཡོངས་སུ་གྱུར་པ་ལས་དཀྱིལ་འཁོར་དྲུག་ཀར་གྱི་དབུས་སུ་རྡོ་རྗེ་སེམས་དཔའི་སྐུ་རེ་རེ་ཡོངས་སུ་རྫོགས་པ་ནི་ཆོས་ཀྱི་དབྱིངས་ཀྱི་ཡེ་ཤེས་སོ། །ཨོཾ་མ་ཧཱ་སུ་ཁ་བཛྲ་ས་ཏྭ་ཨ། ཛཿཧཱུཾ་བཾ་ཧོ་སུ་ར་ཏ་སྟྭཾ། གངས་རི་རྡུལ་བྲལ་མེ་ཤེལ་འོད། །དཀར་མཐིང་དམར་དང་སེར་པའི་ཞལ། །རྡོ་རྗེ་ཁ་ཊྭཱཾ་མདའ་གཞུ་འཛིན། །ཀུན་ཏུ་བཟང་མོ་རང་འདྲས་འཁྱུད། །དེ་ལྟར་བདག་ཉིད་རྒྱུ་རྡོ་རྗེ་འཛིན་པར་གྱུར་པ་དྲུག་པོ་
རྣམས་ཀྱི་སྐུ་ལ་རིགས་དྲུག་གི་ལྷའི་རྡུལ་ཕྲ་རབ་ཀྱིས་ཁྱབ་པར་གྱུར། རྡོ་རྗེ་རྩེ་ལྔ་པའི་ཕྱག་རྒྱ་རིགས་བདག་བཞུགས་སའི་གནས་ལྔར་གདུགས་ཏེ། ཨོཾ་ན་མཿསརྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་གུ་ཎ་ཀརྨ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རྡོ་རྗེ་ཐལ་མོ་ལས་མཐེ་བོང་བསྣོལ། གུང་མཛུབ་རྡོ་རྗེ་རྩེ་གསུམ་པའི་ཚུལ་དུ་བྱས་པ། མཁའ་དབྱིངས་དབང་ཕྱུག་མའི་ཕྱག་རྒྱས། སྤྱི་མགྲིན་སྙིང་ལྟེ་ཡན་ལག་ཐམས་ཅད་ལ་རེག་སྟེ། ཨོཾ་དྷརྨ་དྷ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། ཡབ་རྣམས་ཀྱི་གསང་གནས་ཧཱུཾ་ལས་རྡོ་རྗེ་འབར་བ་ནོར་བུའི་རྩེ་མོ་ཅན་ཕཊ་ཀྱིས་མཚན་པའོ། །ཤེས་རབ་མ་རྣམས་ཀྱི་བྷ་ག་ཨཱཿལས་པདྨ་སེར་པོ་འདབ་མ་བརྒྱད་པ་ཕྱི་རོལ་ཆོས་འབྱུང་གི་དབྱིབས་ཅན། ཟེ་འབྲུ་ལ་ཨས་མཚན་པའོ། །ས་མ་ཡ་ཧོ་ས་མ་ཡ་སྟྭཾ། ཛཿཧཱུཾ་བཾ་ཧོ། ཨོཾ་པྲ་བེ་ཤ་ཡ་ཕཊ། ཨ་ལ་ལ་ལ་ལ་ཧོ། ཞེས་ཡབ་ཡུམ་བཅུ་གཉིས་སྙོམས་པར་ཞུགས་པས། བདེ་བ་ཆེན་པོའི་འོད་ཟེར་གྱིས་སངས་རྒྱས་ཐམས་ཅད་མཉེས་ཤིང་བསྐུལ། སེམས་ཅན་ཐམས་ཅད་ཀྱི་དྲི་མ་སྦྱངས། སླར་འདུས་ཏེ་སོ་སོའི་སྐུ་ལ་ཐིམ། བྱང་ཆུབ་ཀྱི་སེམས་སུ་ཞུ་བ་རྡོ་རྗེའི་ལམ་ནས་ཤེས་རབ་མ་རྣམས་ཀྱི་པདྨར་སྤྲོས། ཡབ་ཡུམ་བཅུ་གཉིས་ཀ་སོ་སོའི་གནས་སུ་བྱང་ཆུབ་སེམས་ཀྱི་ངོ་བོར་ཞུ་བར་གྱུར། བདེ་མཆོག་མ་ལ་སོགས་པ་རང་རང་གི་ལྷ་མོ་བཞི་བཞིས་སོ་སོར་བསྐུལ་བ་ནི། སྟོང་པ་ཤིན་ཏུ་རྣལ་འབྱོར་ཡོད་མེད་མཐུས། །ནམ་མཁའི་ཉིད་དུ་དམ་ཚིག་ཉེ་བར་གནས། །བདེ་གཤེགས་བདེ་བར་གཤེགས་པ་བཞེངས་སུ་གསོལ། །རྡོ་རྗེ་སེམས་དཔའ་སྐལ་བཟང་དཔལ་ཁྱོད་བདག
ཅེས་བསྐུལ་བས། བྱང་ཆུབ་སེམས་ཀྱི་ཐིག་ལེ་དྲུག་པོ་རྣམས། ཧཱུཾ་ཨོཾ་ཧཱིཿཧྲཱིཿཧྲཱཾ་ཧཾ་རྣམས་སུ་གྱུར། དེ་ལས་འོད་འཕྲོས་སངས་རྒྱས་ཐམས་ཅད་བསྐུལ་ཏེ་ཚུར་འདུས་ཐིམ་པ་ལས་འབྲས་བུ་རྡོ་རྗེ་འཛིན་པ་རིགས་དྲུག་གི་འཁོར་ལོས་བསྒྱུར་བ་རྣམས་སུ་བཞེངས་པར་གྱུར་པ་ནི། དེ་ཡང་དཀྱིལ་འཁོར་དབུས་མའི་གཙོ་བོའི་གནས་སུ་ཧཱུཾ་ལས་དཔལ་རྡོ་རྗེ་སེམས་དཔའ་བདེ་བ་ཆེན་པོ་ཀུན་ཏུ་བཟང་པོ་རྡོ་རྗེ་འཆང་དུང་དང་ཀུན་ད་དང་ཟླ་བའི་འོད་ལྟར་དཀར་བ་ལ་ཡིད་ཙམ་དམར་བའི་མདངས་ཆགས་པ། སྒེག་ཅིང་འཛུམ་ལ་རབ་ཏུ་རྒྱས་པའི་སྤྱན་གདངས་པ། ཞལ་བཞི་ཕྱག་བཞི་རྩ་ཞལ་དཀར་བ་གཡས་སྔོ་གཡོན་དམར་རྒྱབ་སེར་བ། ཕྱག་གཡས་ཀྱི་དང་པོས་འབར་བའི་རྡོ་རྗེ་རྩེ་ལྔ་པ་དང༌། གཡོན་གྱི་དང་པོས་དྲིལ་བུ་དཔྱངས་པའི་ཁ་ཊྭཱཾ་ག་འཛིན་པས་རབ་ཏུ་སྙེམས་པ་དང་བཅས་པའི་ཚུལ་གྱིས་ཤེས་རབ་མ་ལ་འཁྱུད་པ། འོག་མ་གཉིས་ཀྱིས་མདའ་དང་གཞུ་འཛིན་པ། ཞབས་རྡོ་རྗེའི་སྐྱིལ་མོ་ཀྲུང་དུ་བཞུགས་པ། སྟོད་གཡོགས་དར་དཀར་གསེར་གྱི་ངང་རིས་ཅན་དང་སྨད་གཡོགས་ཚིག་གུའི་ན་བཟའ་གསོལ་བ། རིན་པོ་ཆེའི་རྒྱན་ཐམས་ཅད་ཀྱིས་རྣམ་པར་བརྒྱན་པ། རང་དང་འདྲ་བའི་ཡུམ་ཀུན་ཏུ་བཟང་མོ་དང་མཉམ་པར་སྦྱོར་བའོ། །དཀྱིལ་འཁོར་ཤར་མའི་དབུས་སུ། ཁཾ་ངམ་ཨོཾ་ལས་སངས་རྒྱས་རྒྱལ་བ་རྟག་པ་རྣམ་པར་སྣང་མཛད་དཀར་ལ་སེར་བའི་མདངས་ཅན། རྩ་བའི་ཞལ་དཀར་བ་གཡས་སེར་གཡོན་དམར་རྒྱབ་ལྗང་བ། ཕྱག་དང་པོ་གཉིས་ཀྱིས་སྟོད་གཡོགས་
ཆོས་གོས་ངུར་སྨྲིག་གསོལ་བའི་གྲྭ་དང་ལྷུང་བཟེད་བདུད་རྩིས་གང་བ། འོག་མ་གཉིས་ཀྱིས་མཁར་གསིལ་དང་གླེགས་བམ་འཛིན་པ། འཁོར་ལོས་བསྒྱུར་བའི་ཆ་ལུགས་དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། རྡོ་རྗེའི་སྐྱིལ་མོ་ཀྲུང་གིས་བཞུགས་པ། སངས་རྒྱས་སྤྱན་མ་དཀར་མོ་འཁོར་ལོ་དང་ཐོད་པ་འཛིན་པས་རབ་ཏུ་འཁྱུད་པ། རྡོ་རྗེའི་སྐྱིལ་མོ་ཀྲུང་གིས་བཞུགས་པའོ། །དཀྱིལ་འཁོར་ལྷོ་མའི་དབུས་སུ་ཧཱུཾ་ངམ་ཧྲཱིཿལས་དཔལ་ཧེ་རུ་ཀ་སྐུ་མདོག་སྔོན་པོ་རབ་ཏུ་ཁྲོས་པའི་རྩ་ཞལ་མཐིང་ནག་འབར་བ་ཆེན་པོའི་ཟེར་ཅན། གཡས་དཀར་གཡོན་སེར་རྒྱབ་དམར་བ་སྟེ་ཞལ་བཞི་པ། ཕྱག་བརྒྱད་ཀྱི་དང་པོ་གཉིས་རྡོ་རྗེ་དང་ཁ་ཊྭཱཾ་ག་དྲིལ་བུ་དཔྱངས་པ་དང་བཅས་པ། གཉིས་པ་གཉིས་ཀྱིས་འཇིགས་བྱེད་ཆེན་པོའི་པགས་པ་རླུང་གིས་བསྐྱོད་པའི་ཚུལ་ཅན། གསུམ་པ་གཉིས་ཀྱིས་མདའ་དང་གཞུ། བཞི་པ་གཉིས་ཀྱིས་ཐོད་པ་ཁྲག་གིས་གང་བ་དང༌། སྙིང་ཆེན་པོས་གང་བ་འཛིན་པ། དུར་ཁྲོད་ཆས་བརྒྱད་སྐུ་ལ་རྫོགས་པ། སྤྱན་གསུམ་གདངས་མིག་དམར་པོ་ལས་མེ་སྟག་འཕྲོ་བ། དབུ་སྐྲ་སྨ་ར་སྨིན་མ་སེར་ནག་གྱེན་དུ་འཁྱིལ་ཞིང༌། རྡོ་རྗེའི་བ་སྤུ་གཡས་སུ་འཁྱིལ་བ། ཞལ་གདངས་པ་མཆེ་བ་གཙིགས་པ། ལྗགས་འགྲིལ་བ། རྐན་སྒྲ་གདབ་པ། ཞབས་གཡས་ཅུང་ཟད་བསྐུམ་པ་ཡུམ་གྱི་བརླ་ལ་འཁྱུད་ཅིང༌། གཡོན་བརྐྱང་པའི་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པ། སྒེག་པ་དཔའ་བ་མི་སྡུག་པ། །རྒོད་པ་གཤེ་བ་འཇིགས་སུ་རུང༌། །སྙིང་རྗེ་རྔམ་དང་ཞི་བ་དང༌། །
གར་དགུའི་རོ་དང་ལྡན་པ་ཉིད། །གུ་ལང་དང༌། དབང་ཆེན་དང༌། ཟླ་བ་དང༌། ཉི་མ་དང༌། གཤིན་རྗེ་དང༌། ཚངས་པ་ལ་སོགས་པ་དྲེགས་པ་ཐམས་ཅད་ཞབས་འོག་ཏུ་གནོན་པ། ཡུམ་ཀྲོ་དྷཱི་ཤྭ་རཱི་སྔོ་སྐྱ་ཐོད་ཁྲག་དང་བ་དན་རྩེ་གསུམ་པའི་ཕྱག་རྒྱ་ཅན་གྱིས་ཡང་དག་པར་འཁྱུད་པའོ། །ཡང་ན་ཧེ་རུ་ཀ་ཕྱག་བཞི་པ། གཡས་གཉིས་རྡོ་རྗེ་དུང་ཁྲགགཡོན་གཉིས་བཤོར་ཐོད་ཞགས་པ་འཛིན་པ། ལྷ་ཆེན་པོའི་གཡང་གཞི་སྟོད་གཡོགས་སུ་བསྣམས་པའོ། །བསྡུ་ན་ཧེ་རུ་ཀ་ཕྱག་གཉིས་པ། རྡོ་རྗེ་དང་ཐོད་ཁྲག་བསྣམས་པ། ཁ་ཊྭཱཾ་ག་སེར་རལ་ཁར་བྱས་པ། ཡུམ་ལ་ཡང་ཁ་ཊྭཱཾ་ག་རྒྱབ་ཀྱི་ཕྱོགས་སུ་སེར་རལ་ཁ་ལ་བརྟེན་པ་ཁྱད་པར་གཞན་རྣམས་སྔར་དང་མཚུངས་པར་བསྒོམས་ཀྱང་རུང་ངོ༌། །སྟོད་གཡོགས་གཉིས་དང་སྨད་གཡོགས་དང༌། །ཐོད་འཕྲེང་གསུམ་དང་སྦྲུལ་རྒྱན་བརྒྱད། ཁྲག་ཞག་ཐལ་བ་ཕྱག་རྒྱ་དྲུག །དེ་དག་དཔལ་གྱི་ཆས་བརྒྱད་དོ། །དཀྱིལ་འཁོར་ནུབ་མའི་དབུས་སུ། ཧྲཱིཿལས་པདྨ་གར་གྱི་དབང་ཕྱུག་དམར་ལ་དཀར་བའི་མདངས་ཅན། ཞལ་བཅོ་ལྔ་ཉམས་དང་ཁ་དོག་སྣ་ཚོགས་པ། རྩ་ཞལ་སྐུ་ལུས་དང་མཚུངས་པའི་མདོག་ཅན། ཆགས་པའི་ཉམས་ལྡན་ནོ། །ཕྱག་གཡས་ལྔ་བཅུའི་རྡོ་རྗེ་འཁོར་ལོ་རིན་ཆེན་དབྱུག་པ་རལ་གྲི་ལ་སོགས་པ་སྣ་ཚོགས་པའི་མཚོན་ཆ་འཛིན་ཞིང༌། གཡོན་ལྔ་བཅུ་ཁ་དོག་མ་ངེས་པའི་པདྨའི་སྡོང་བུ་འབའ་ཞིག་འཛིན་པ། ཞབས་ཉི་ཤུ་རྩ་བཞི་གཡས་བརྐྱང་བའི་སྟབས་ཀྱིས་བཞུགས་པ། ཡུམ་གོས་དཀར་མོ་དམར་མོ་པདྨ་དང་ཐོད་ཁྲག་འཛིན་པ་དང་མཉམ་པར་སྦྱོར་བ། མཚན་དཔེ་
རྫོགས་ཤིང་དར་དང་རིན་པོ་ཆེས་བརྒྱན་པའོ། །ཡང་ན་ཞལ་གཅིག་ཕྱག་བཞི་པ་དང་པོ་གཉིས་ཆོས་འཆད་ཀྱིས་པད་སྡོང་གཉིས་འཛིན་པ། འོག་མ་གཉིས་ཀྱིས་མདའ་གཞུ། ཞབས་རྒྱལ་པོ་རོལ་བའི་ཚུལ་དུ་བསྒོམས་ནའང་ལེགས་སོ། །དཀྱིལ་འཁོར་བྱང་མའི་དབུས་སུ་ཏྲཾ་ལས་རྡོ་རྗེ་ཉི་མ། གསེར་གྱི་མདོག་ཅན་ཞལ་བཞི་སེར་བ། རེས་འགའ་དམར་ཞིང་ཡིད་ཙམ་ཁྲོ་བ། ཕལ་ཆེར་ལྷག་པར་འཛུམ་པས་བཞད་པ། ཕྱག་དང་པོ་གཉིས་མདའ་དང་གཞུ། འོག་མ་གཉིས་ཀྱིས་རལ་གྲི་འཕྱར་ཞིང་ཉི་མའི་དཀྱིལ་འཁོར་དང་རྡོ་རྗེས་མཚན་པའི་པདྨ་བསྣམས་པ། རིན་པོ་ཆེ་སྣ་བདུན་གྱིས་བརྒྱན་ཞིང་སེམས་དཔའི་སྐྱིལ་ཀྲུང་གིས་བཞུགས་པ། ཡུམ་མཱ་མ་ཀཱི་སྔོན་མོ་རིན་པོ་ཆེ་དང་ཐོད་པ་འཛིན་པས་ཤིན་ཏུ་འཁྱུད་པའོ། །མཚམས་ཀྱི་དཀྱིལ་འཁོར་གྱི་དབུས་སུ། ཧཱུཾ་ངམ་ཧཾ་ལས་རྡོ་རྗེ་རྟ་མཆོག་རོལ་བའི་སངས་རྒྱས་སྐུ་ལུས་ལྗང་ཁུ། རྩ་ཞལ་དམར་བ་གཡས་སྔོ་གཡོན་དཀར། སྟེང་ཞལ་རྟ་གདོང་ལྗང་ཁུ་མགྲིན་པ་གཏོད་དེ་སྒྲ་འབྱིན་པ། ཕྱག་བརྒྱད་ཀྱི་གཡས་རྣམས་བ་དན་གསུམ་པའི་ཕྱག་རྒྱ་དང་རྒྱ་གྲམ་དང་རལ་གྲི་དང་མདའ་རྣམས་འཛིན་པ། གཡོན་བཞིས་སྣ་ཚོགས་པདྨ་དང་ཤཀ་ཏི་དང་བེ་ཅོན་དང་གཞུ་འཛིན་པ། ཞབས་བཞི་གཡས་བརྐྱང་བའི་དང་པོས་དུས་མཚན་མ་དང་དཔལ་མོ། གཉིས་པས་ཞི་བ་མ་དང་དགའ་བ་མ། གཡོན་བསྐུམ་པའི་དང་པོས་དྲག་པོ་དང་ཁྱབ་འཇུག །གཉིས་པས་འདོད་ལྷ་དང་ཚངས་པ་མནན་པ། ཞབས་ཀྱི་མཐིལ་ནས་རྡོ་རྗེའི་
རྨིག་པ་འབྱིན་པས་དེ་རྣམས་འཚིར་བར་མཛད་པ། སྤྱན་གསུམ་མཆེ་བ་གཙིགས་སྐྲ་སེར་གྱེན་དུ་བརྫེས་པ། དྲག་པོ་ཆེན་པོ་གར་གྱི་ཉམས་དགུ་དང་ལྡན་པ། གྲུ་མོ་ཕན་ཆད་ཀྱི་ཕྱག་རྣམས་དམར་ཞིང༌། པུས་མོ་མན་ཆད་ཀྱི་ཞབས་རྣམས་ནག་པོ། རང་འོད་ཀྱི་ཡུམ་དམ་ཚིག་སྒྲོལ་མ་ལྗང་སྐྱ། སྣ་ཚོགས་རྡོ་རྗེ་དང་ཐོད་པ་འཛིན་པས་ངེས་པར་འཁྱུད་པ་སྣ་ཚོགས་རྡོ་རྗེའི་ལྟེ་བར་བཞུགས་པའོ། །ཡང་ན་རྟ་མཆོག་ལྗང་ཁུ་ཕྱག་བཞི་པ། དང་པོ་གཉིས་སྣ་ཚོགས་རྡོ་རྗེ་དང༌། སྣ་ཚོགས་པདྨ། འོག་མ་གཉིས་མདའ་གསུམ་པ་དང༌། རལ་གྲི་འཛིན་པར་བྱས་ཀྱང་རུང་ངོ༌། །དེ་ལྟར་ན་འབྲས་བུ་རྡོ་རྗེ་འཛིན་པ་དྲུག་པོ་ཐམས་ཅད་ཀྱི་དཔྲལ་པར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀར་རང་འདྲའི་ཡེ་ཤེས་སེམས་དཔའ་རྣམས་དང༌། དེ་རྣམས་ཀྱི་ཐུགས་ཀར་ཏིང་ངེ་འཛིན་སེམས་དཔའ། ཧཱུཾ་ཨོཾ་ཧིཿཧྲཱིཿཏྲཱཾ་ཧཾ་རྣམས་སུ་གྱུར། ཡེ་ཤེས་སེམས་དཔའི་ལྷ་ཚོགས་ཕཻཾ། འབར་བའི་ཕྱག་རྒྱ་བསྐོར། ཐུགས་ཀ་ནས་སྤྲུལ་པའི་ལྷ་མོ་བཞིས། བདུད་རྩིའི་བུམ་པས་ཁྲུས་གསོལ་ཞིང་དབང་བསྐུར། ཛཿཧཱུཾ་བཾ་ཧོཿ སྤྱི་བོ་ནས་ཞུགས་ཏེ་འདྲེས་པས་དམ་ཚིག་པ་རྣམས་དང་གཉིས་སུ་མེད་པར་ཐིམ། དབང་རྟགས་སུ་དེ་བཞིན་གཤེགས་པ་ལྔ་ལྔས་དབུ་ལ་བརྒྱན། མཁའ་དབྱིངས་དབང་ཕྱུག་མའི་ཕྱག་རྒྱ་རིགས་བདག་གི་གནས་ལྔར་གཏུགས་ལ། ཨོཾ་ཨ་བྷི་ཥིཉྩ་མཾ། ལན་ལྔ། སོར་མོ་ཐམས་ཅད་ནང་དུ་བསྣོལ། །
རྩེ་མོའི་ངོས་རྣམས་ཀུན་སྤྲད་ལ། །མཐེ་བོས་རྡོ་རྗེས་མནན་པ་ནི། །སྣ་དང་མིག་ཕུགས་ལྟ་བུ་སྟེ། །ཞེས་པའི་ཐོད་སྐམ་གྱི་ཕྱག་རྒྱ་ཡང་གནས་ལྔར་གཏུགས་ལ། ཧཱུཾ་བཛྲ་ཨབྷི་ཥིཉྩ་མཾ། རིན་པོ་ཆེའི་ཕྱག་རྒྱ་སྤྱི་བོར་གཏུགས་ལ། ཨེ་རཏྣ་མཱ་ལ་ཨ་བྷི་ཥིཉྩ་ཏྲཱཾ། རྡོ་རྗེ་ཁུ་ཚུར་དཔྲལ་མགྲིན་སོགས་གནས་ལྔར་རེག ཨོཾ་ཊྲཱུཾ་ལན་མང་དུ་བརྗོད་པའི་མཐར། ཨོཾ་པ་ཊ་ལཾ་བ་ཨ་བྷི་ཥིཉྩ་ཧཱུཾ། ཨོཾ་བཛྲ་ཏུ་ཥྱ་ཧོ། ཞེས་དར་དཔྱངས་བཅིང་ངོ༌། །སྐབས་འདི་དག་ཏུ། གསང་དོན་རྣམ་པར་བཀོད་པ་དྲུག་ལས། རྡོ་རྗེ་སེམས་དཔའ་ལ་རྒྱུ་འབྲས་ཀྱི་དབྱེ་བ་མེད་དེ། གནས་ལྔ་བྱིན་རླབས་ཀྱི་རྗེས་ཐོགས་ཉིད་ལ་དབང་བསྐུར་སོགས་མཛད་ཅིང༌། རིགས་ལྷག་མ་ལྔ་ལ་དེའི་རྗེས་ཐོགས་སུ། སྐད་ཅིག་ཙམ་གྱིས་འབྲས་བུ་རྡོ་རྗེ་འཛིན་པར་བསྒྱུར་བར་མཛད་དོ། །སློབ་དཔོན་ཧཱུཾ་ཀ་རས་དྲུག་ཀ་ལ་རྒྱུ་འབྲས་རྡོ་རྗེ་འཛིན་པའི་དབྱེ་བ་དང་ཞུ་བ་གླུས་བསྐུལ་མཛད་དོ། །དེ་ནི་འབྲས་བུར་བཞེངས་ལུགས་བླ་མེད་སྤྱི་དང་མཐུན་པས་ཤིན་ཏུ་ལེགས་པར་མངོན་ལ། སྤྱིར་ཡང་རྡོར་སེམས་དང་རིགས་གཞན་ལྔ་ལ་རྒྱུ་འབྲས་རྡོར་འཛིན་བྱེད་མི་བྱེད་ཀྱི་དབྱེ་བ་ཡང་མེད་དོ། །ཡང་རྒྱུད་གཅིག་གསུངས་པའི་དཀྱིལ་འཁོར་གཅིག་གི་མངོན་རྟོགས་རྒྱས་པ་མཉམ་པོ་ལ། སྤྱི་ལྡོག་ནས་ཞུ་བ་གླུས་བསྐུལ་ཡོད་མེད་གཉིས་ཀ་འབྱུང་བ་འཁོར་ལོ་སྡོམ་པ་སོགས་དང་འདྲ་བས། རྒྱུ་རྡོར་སེམས་སྔོན་དུ་མ་བཏང་བར་ཡང་མངོན་བྱང་ལྔ་ལས་ཧེ་རུ་ཀ་སོགས་སྐྱེད་པར་རུང་ནི་རུང་ངོ༌། །རིགས་རྐྱང་ལ་དེ་ལྟར་ཡིན་པ་བཞིན་དུ་རིགས་བསྡུས་ལ་ཡང་གོ་བར་བྱའོ། །དེ་དག་ནི་རྣལ་འབྱོར་དང་པོའོ། །རྗེས་སུ་ཆགས་པ་རྣམ་མང་བདེ་བའི་པདྨོ་རྣམས། །དགའ་
བ་མཆོད་པས་གསལ་བར་རྗེས་སུ་མཆོད་བྱས་པས། །མཆོག་ཏུ་རྟག་པའི་རྣལ་འབྱོར་བདེ་བས་བདེ་སྒྲུབ་མཛོད། །ཨེ་མ་ཧོ་མཆོག་ཏུ་བདེ་བའི་དམ་ཚིག་ངོ་བོ་ཉིད། །མཆོག་ཏུ་བདེ་བའི་རྣལ་འབྱོར་སྐལ་བཟང་མཆོག་དགྱེས་པ། །རང་གི་དམ་ཚིག་རྟག་ལ་རོལ་ཅིག་རོལ་ཅིག་ཧོ། །ཞེས་པའི་གླུས་བསྐུལ། འཁོར་ལོས་བསྒྱུར་བ་དྲུག་གི་དབྱེ་བས། ཡབ་རྣམས་ཀྱི་གསང་གནས་ཧཱུཾ་ཨོཾ་ཧིཿཧྲཱི་ཧྲཱཾ་ཧཾ་རྣམས་ལས། རྡོ་རྗེ་འབར་བ༴ ནས། ཐམས་ཅད་ཀྱི་དྲི་མ་སྦྱངས་པར་གྱུར། རྗེས་སུ་རྣལ་འབྱོར་རོ། །དེ་ནས་ཕྱོགས་བཅུའི་སངས་རྒྱས་ཐམས་ཅད་རིགས་དྲུག་གི་གསུང་གི་ཡི་གེར་གྱུར་པ་རྣམས་སོ་སོའི་བ་སྤུའི་བུ་ག་ནས་ཞུགས། བདེ་བ་ཆེན་པོའི་གནས་སུ་འདུས་ཏེ་བྱང་ཆུབ་ཀྱི་སེམས་དང་རོ་གཅིག་པར་གྱུར་པ། འཁོར་ལོ་བཞི་ནས་བརྒྱུད་རང་རང་གི་བརྟ་ཀ་སྟེ་རྡོ་རྗེ་ནོར་བུའི་རྩེ་མོར་ཕྱིན། ཡང་རྗེས་ཆགས་ཀྱི་འོད་ཟེར་ཀྱིས་འགྲོ་བ་ཐམས་ཅད་སྦྱངས། རིགས་དྲུག་གི་དཀྱིལ་འཁོར་དང་རྡོ་རྗེ་རྣམ་པ་གསུམ་གྱི་གོ་འཕང་ལ་བཀོད། སླར་འདུས་ཏེ་ཐིམ་པ་ཤེས་རབ་མ་དྲུག་པོ་རྣམས་ཀྱི་དབང་གི་གནས་སོ་སོར་གཞལ་ཡས་ཁང་སོ་སོ་ལྷའི་གདན་དང་བཅས་པར་གྱུར། ལྷ་སོ་སོའི་གནས་སུ་རང་མདོག་དང་མཐུན་པའི་ཐིག་ལེ་རེ་རེ། དེ་རྣམས་ཡོངས་སུ་གྱུར་པ་ལས། ཆོས་ཀྱི་སྙིང་པོའི་ཡི་གེ་སྟེ་ས་བོན་རྣམས་སུ་གྱུར། དབུས་ཀྱི་རྣམས་གཙོ་བོ་དྲུག་པོ་རྣམས་སུ་གྱུར། ཕྱིའི་དཀྱིལ་འཁོར་གྱི་གཙོ་མོ་དྲུག་པོ་
སོ་སོའི་མཁའ་ནང་ནས་ཕྱིར་སྤྲོས། ཨོཾ་མ་ཧཱ་སུ་ཁ་བཛྲ་སཏྭ་ཨཱཿཛ་ཧཱུཾ་བཾ་ཧོ་སུ་ར་ཏ་གྷཾ། ཨོཾ་བྷུ་ཁཾ། ཨོཾ་ཧེ་རུ་ཀ་བཛྲ་ས་མ་ཡ་ཧྲཱིཿསརྦ་དུཥྟན་ས་མ་ཡ་མུ་དྲ་པྲ་པཉྫ་ཀ་ཧཱུཾ་ཕཊ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་ནིརྟེ་ཤྭ་ར་ཧྲཱིཿཛ། ཨོཾ་སིདྡྷྱཾནྟུཿས་མ་ཡཿསིདྡྷྱ་མཧཱ་བཛྲ་རཏྣ་བ་བ་ཊ་ཊ་ཏྲཾ། ཨོཾ་སུམྦྷ་ནི་སུམྦྷ་ཧཱུཾ། སྤྲུལ་པ་དཔག་ཏུ་མེད་པ་སྤྲོས། ཆོས་ཀྱི་འཁོར་ལོ་བསྐོར་བ་ལ་སོགས་པ་སངས་རྒྱས་ཀྱི་མཛད་པ་ཁྱད་པར་ཅན་ཐམས་ཅད་མཛད། སེམས་ཅན་ཐམས་ཅད་རྒྱལ་བ་རིགས་དྲུག་གི་གོ་འཕང་ལ་བཀོད། སོ་སོ་རེ་རེར་གཅིག་ཏུ་འདུས་ནས། རིགས་དྲུག་གི་འཁོར་ལོས་བསྒྱུར་བ་རྣམས་ཀྱི་ཐུགས་ཀར་ཐིམ། འཁོར་གྱི་ལྷ་མོ་རྣམས་ཀྱང་རྒྱས་པར་ན། རང་སྔགས་ཀྱིས་འབྱིན་པ་ཡིན་ཡང༌། མདོ་ཙམ་ན་ས་བོན་གྱིས་ཕྱུང་བས་ཆོག་སྟེ། ཛཿབདེ་མཆོག་མ་དཀར་མོ་མདའ་གཞུ་འགེངས་པ་དང༌། ཧཱུཾ་ཨེ་མ་ཧོ་བདེ་མ་གསེར་མདོག་ལིང་ག་རྡོ་རྗེས་མཚན་པ་དང་བྷ་ག་རིན་པོ་ཆེས་མཚན་པ་འཛིན་པ་དང་བཾ་སྣང་མཛད་མ་དམར་མོ་སྣ་ཚོགས་རྡོ་རྗེ་དང་བདུད་རྩིའི་ཐོད་པ་འཛིན་ཞིང་ཁ་ཊྭཱཾ་ག་གྲུ་མོར་བརྟེན་པ་དང༌། ཧོཿསློབ་པ་མོ་ལྗང་ཁུ་གཡས་མདའ་འཛིན་པས་འཁྱུད་པའི་ཚུལ་དང་གཡོན་སངས་རྒྱས་ཀྱི་སྐུ་གཟུགས་ཀྱིས་མཚན་པའི་བདུད་རྩིའི་བུམ་པ་འཛིན་པ་རྣམས་རྡོ་རྗེ་སེམས་དཔའི་དཀྱིལ་འཁོར་གྱི་དབུས་ཀྱི་པདྨ་འདབ་མ་བཞི་ལ་ཤར་སོགས་གཡས་སྐོར་གྱིས་གནས་པའོ། །ཨཱཾ་སངས་རྒྱས་བྱང་ཆུབ་མ་དཀར་དམར་ཚངས་པའི་མགོ་བོས་མཚན་པའི་མདའ་
བཞི་དུས་གཅིག་ཏུ་འཐེན་པའི་ཚུལ་དང་གཞུ་འཛིན་པ། བྷྲུཾ་ཆོས་ཀྱི་འཁོར་ལོ་མ་དཀར་སེར་གཡས་པའྀ་གུང་མོ་ལ་འཁོར་ལོ་དམར་པོ་དང་སྔོན་པོ་གཉིས་བསྐོར་ཞིང་གཡོན་དཀུར་བསྟེན་པ། ཧཿཁམས་གསུམ་རྣམ་རྒྱལ་མ་དམར་སྐྱ་གཡས་མདུང་རྩེ་གསུམ་འཕྱར་ཞིང་གཡོན་རྡོ་རྗེ་ཐུགས་ཀར་བསྟེན་པ། ཁཾ་འདོད་པའི་དབང་མོ་ལྗང་ཁུ་དཔག་བསམ་ཤིང་གི་ལྕུག་མ་རླུང་གིས་བསྐྱོད་པ་འཛིན་ཞིང་གར་མཛད་པ་རྣམས་རེ་མིག་བརྒྱད་ཀྱི་ཤར་སོགས་ཕྱོགས་བཞིར་གཡས་སྐོར་གྱིས་འཁོད། ཨོཾ་གླིང་བུ་མ་སྔོན་མོ། ཧཾ། པི་ཝང་མ་སེར་མོ། ཝཾ། རྔ་ཆེན་མ་དམར་མོ། སཾ། རྫ་རྔ་མ་ལྗང་ཁུ་རྣམས་རེ་མིག་གི་ཤར་ལྷོ་ནས་བརྩམས་ཏེ་གཡས་སྐོར་གྱིས་འཁོད། ཨོཾ་མེ་ཏོག་མ་དམར་སེར། ཨཱཿསྤོས་མེ་མ་དཀར་མོ། ཨཾ་མར་མེ་མ་དམར་མོ། ཨཿ དྲི་ཆབ་མ་ལྗང་ཁུ་རྣམས་ཕྱིའི་མཚམས་ཀྱི་གྲྭ་བཞི་ལ་མེ་ནས་བརྩམས་ཏེ་གཡས་སྐོར་གྱིས་འཁོད། གླིང་བུ་མ་ལ་སོགས་པ་བརྒྱད་རང་རང་གི་མིང་དང་མཐུན་པའི་ཕྱག་མཚན་རྡོ་རྗེས་མཚན་པ་འཛིན་པ། བདེ་མཆོག་མ་ལ་སོགས་པའི་ལྷ་མོ་བཅུ་དྲུག་པོ་དེ་རྣམས་དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། སྒེག་མཛེས་ཆགས་པའི་ཉམས་ཅན། འོད་ཀྱི་དཀྱིལ་འཁོར་འབར་བ། འགྱིང་བག་གི་ཚུལ་དང་སེམས་དཔའི་སྐྱིལ་མོ་ཀྲུང་གིས་བཞུགས་པའོ། །དེ་དག་ནི་རྡོར་སེམས་ཀྱི་ཐུན་མོང་མ་ཡིན་པའི་ལྷ་ཚོགས་སོ། ཛཿ རྟ་མགྲིན་འཕངས་མཐོ་
མ་དཀར་མོ་རྟ་གདོང་ཅན་ལྕགས་ཀྱུ་དང་ཐོད་པ་བདུད་རྩིས་གང་བ་འཛིན་པ། ཧཱུཾ་ཕག་གདོང་མ་སྔོན་མོ་མཆེ་བ་དང་ཞགས་པ་འཛིན་པ། བཾ། སྣང་བ་མ་དམར་མོ་ཁྱི་གདོང་ཅན་ཉི་ཟླས་མཚན་པའི་ལྕགས་སྒྲོག་འཛིན་པ། ཧོཿ ཐལ་བར་འཇིགས་བྱེད་རོ་ལངས་མ་ལྗང་ཁུ་སེར་གེའི་གདོང་ཅན་དྲིལ་བུ་དང༌། འོད་དཔག་མེད་པའི་སྐུས་མཚན་པའི་ཐོད་པ་བདུད་རྩིས་གང་བ་འཛིན་པ་རྣམས་གཉིས་གཉིས་སྤྲོས་ཏེ། དཀྱིལ་འཁོར་དབུས་མ་དང་ཕྱི་རོལ་གཞི་དཀྱིལ་གྱི་ཤར་སོགས་སྒོ་བཞི་ལ་གཡས་སྐོར་གྱིས་འཁོད། དེ་རྣམས་ཀྱང་རང་རང་གི་ཕྱག་མཚན་ལ་རྡོ་རྗེས་མཚན་པ་སྟེ་གཏུམ་ཞིང་ཁྲོས་ལ། དུར་ཁྲོད་ཀྱི་ཆས་དང་ལྡན་པ་གཡས་པ་བརྐྱང་ཞིང་གནས་པ་མེ་དཔུང་འབར་པའི་དབུས་ན་བཞུགས་པའོ། །དེ་དག་ནི་རྡོར་སེམས་དང་གཞི་དཀྱིལ་གྱི་སྒོ་མ་རྣམས་སོ། །ཧཾ་སངས་རྒྱས་ཀུན་བརྗོད་མ་དཀར་མོ་ལྗགས་ཀྱིས་མཚན་པའི་པདྨ་འཛིན་པ། ཧཱུཾ་ཤིན་ཏུ་རྒྱལ་མ་སེར་མོ་ཕྱག་གཉིས་ཐལ་མོ་རྡེབ་པ། ཏྲཱཾ། ཀུན་ནས་བཟང་མོ་དམར་མོ་རྡོ་རྗེ་རྩེ་ལྔ་དང་རིན་པོ་ཆེའི་ཟ་མ་ཏོག་འཛིན་པ། དྷཾ། མི་ཟད་པའི་སྣོད་མ་སྣ་ཚོགས་མདོག་ནོར་བུས་གང་བའི་སྣོད་དང་ཆོས་དུང་འཛིན་པ་རྣམས་རྣམ་སྣང་གི་དཀྱིལ་འཁོར་གྱི་པད་འདབ་བཞི་ལ་འཁོད། ཨོཾ་སངས་རྒྱས་ཀུན་ལྡན་མ་དམར་སེར་རྒྱལ་བ་མི་བསྐྱོད་པའི་སྐུ་ཐུགས་ཀར་འཛིན་པ། བྲུཾ། ཞལ་བཟང་མ་དཀར་མོ་མེ་ལོང་གི་མདོག་ཅན་མེ་ལོང་དང་རྔ་ཡབ་འཛིན་པ། ཧ། སྤྲིན་
ཆེན་མ་སྔོན་མོ་སེར་བ་འབེབས་པའི་རྡོ་རྗེའི་སྤྲིན་འཛིན་པ། ཁཾ། ནམ་མཁའི་སྤྱན་མ་སེར་སྐྱ་པདྨ་མིག་འབྲས་ཀྱིས་མཚན་པ་འཛིན་པ། རེ་མིག་བརྒྱད་ཀྱི་ཤར་སོགས་ཕྱོགས་བཞིར་གཡས་སྐོར་གྱིས་འཁོད། ཨོཾ། གླིང་བུ་མ་ཞེས་པ་ནས། མེ་དཔུང་འབར་བའི་བར་མཆོད་ལྷ་བརྒྱད་དང༌། སྒོ་མ་བཞི་པོ་སྔར་དང་འདྲ་བ་ལས། བདུད་རྩིས་གང་བ་འཛིན་པ་རྣམས་སྤྲོས་ཏེ་སྒོ་བཞི་ལ་གཡས་སྐོར་གྱིས་འཁོད། ཅེས་འདོན་པ་སྤོ། ཕྱག་མཚན་ལ་རྡོ་རྗེས་མཚན་པ་ཞེས་པའི་གནས་སུ། འཁོར་ལོས་མཚན་པ་སྟེ། དེ་དག་ནི་རྟག་པ་སྟེ་རྣམ་སྣང་གི་ལྷ་ཚོགས་སོ། །ཧྲཱིཿ གོ་རཱི་དཀར་སེར་ཅུང་ཟད་ཞི་བའི་མདངས་ཅན་ཞལ་བཞི་པ་ཕྱག་བརྒྱད་ཀྱིས་མདའ་གཞུ་འགེངས་པས་ཚངས་པའི་མགོ་བཞི་འབིགས་པ། ཧྣི། ཙཽ་རི་དམར་སེར་དྲག་མོའི་ཉམས་ཅན་གཡས་གུང་མོས་འཁོར་ལོ་རྩིབས་བརྒྱད་པ་གཏོད་པ། གཡོན་ཐུགས་ཀར་ལྕགས་ཀྱུ་འཛིན་པ་ཁ་ཊྭཱཾ་ག་ལ་འཁྱུད་པ། ཛྫིཿ པྲ་མོ་ཧ་དམར་ནག་རྨོངས་བྱེད་ཀྱི་ཚུལ་ཅན་སྟེང་ཞལ་ཕག་གདོང་ཅན་ཕྱག་དང་པོ་གཉིས་རྩེ་གསུམ་དང་ཐོད་པ། འོག་མ་གཉིས་འཁོར་ལོ་དང་ཁུ་ཚུར་བཅིངས་པ། གཡས་བརྐྱང་གི་སྟབས། ཛིཿ བཻ་ཏཱ་ལི་དཀར་མོ་ཤི་བ་སློང་བའི་ཚུལ་ཅན། ཐོད་པ་བདུད་རྩིས་གང་བ་དང༌། བ་དན་གསུམ་པའི་ཕྱག་རྒྱ་མཛད་པ་རྣམས་ཕྱོགས་བཞིའི་རེ་མིག་ལ་འཁོད། ཧཱུཾ། པུཀྐ་སི་སྣ་ཚོགས་པའི་མདོག་དང་གར་གྱི་སྟབས་ཅན། རྡོ་རྗེ་རྩེ་ལྔ་དང་
དཔག་བསམ་ཤིང་གི་ལྕུག་མ་འཛིན་པ། འདིའི་སྐུ་མདོག་གི་ཁྱད་པར་ནི། བོལ་བཞི་བརླ་དཔུང་དཀར་བ་ལ། ལུས་སྒྲོལ་ཉ་བཞི་དམར་བ་སྟེ། །ཕྱག་མཆོག་ལོ་མ་སྔོན་པོ་འདྲ། །ཞེས་གསུངས་ཤིང༌། ཞལ་རས་སྔོན་པོར་དོན་གྱིས་ཐོབ་བརླ་སེར་སྐྱར་བཤད་པ་ཡང་ཡོད་དོ། །ཕཊ་ཙཎྜ་ལི་སྔོ་ནག་དགུགས་སྐྱོད་པའི་ཚུལ་ཅན་རླུང་རས་རྡོ་རྗེས་མཚན་པ་དང་ཏྲི་ཤུ་ལ་འཛིན་པ། ཧཱུཾ། གྷསྨ་རི་སེར་ནག་མི་རོ་ཟ་བའི་ཚུལ་ཅན་རལ་གྲི་དང་མེ་ཐབ་འཛིན་པ། ཕཊ། སྨེ་ཤ་མ་མཐིང་ནག་རྣམ་པར་གཡེང་བའི་ཚུལ་ཅན་གཡས་གཉིས་རྡོ་རྗེ་དང་དུང་དམར། གཡོན་གཉིས་བཤོར་ཐོད་དང་ཞགས་པ། ཁ་ཊྭཱཾ་ག་སེ་རལ་ཁར་ཐོགས་པ་རྣམས་མཚམས་ཀྱི་རེ་མིག་བཞི་ལ་འཁོད། དེ་ལྟར་ཁྲོ་མོ་བརྒྱད་པོ་རྣམས་ནི། ཞིང་ལྤགས་དང་དར་གྱི་ན་བཟའ་གསོལ་བ། སྦྲུལ་དང་ཐོད་འཕྲེང་དང་རིན་པོ་ཆེས་བརྒྱན་པ། པད་ཉི་རོའི་གདན་ལ་གར་སྟབས་ཀྱིས་བཞུགས་པའོ། །མེ་མདའ་འཛིན་མ་དཀར་མོ་མདའ་གཞུ་ཐོགས་པ། ཝཾ། ཁ་ཊྭཱཾ་འཛིན་མ་སེར་མོ་ཁ་ཊྭཱཾ་ག་དྲིལ་བུར་བཅས་པ་ཐོགས་པ། ཡཾ། འཁོར་ལོ་འཛིན་མ་དམར་སེར་འཁོར་ལོ་རྩིབས་བརྒྱད་འཛིན་པ། རཾ། སྣ་ཚོགས་བ་དན་འཛིན་པ་ལྗང་ཁུ་བ་དན་ལ་དྲིལ་བུ་དཔྱངས་པ་འཛིན་པ། གཙོ་བོའི་པདྨའི་འདབ་མ་བཞི་ལ་འཁོད། མེ་ཏོག་མ་སོགས་ལྷག་མ་སྔར་དང་འདྲ་བ་ལས། ཁྲོ་བོའི་ཉམས་དང་ལྡན་ཞིང༌། ཕྱག་མཚན་གྱི་སྐབས། ཁྲོ་བོའི་རྡོ་རྗེས་མཚན་པ་ཞེས་བྱའོ། །དེ་དག་ནི་ཧེ་རུ་ཀའི་ལྷ་ཚོགས་རྣམས་སོ། །
ཛཿ རྣམ་གཟིགས་མ་དམར་མོ་ཕྱག་གཡས་པས་པདྨ་དམར་པོ་སྙེམས་པའི་ཚུལ་གྱིས་འཛིན་ཞིང་གཡས་པས་ཁ་འབྱེད་པ། ཧཱུཾ། སྒྲོལ་མ་ལྗང་ཁུ་པདྨ་སྔོན་པོའི་སྡོང་བུ་དཀུར་བསྟེན་ཞིང་གཡས་པས་དེ་ཉིད་འདྲེན་པ། བཾ། ས་འཛིན་མ་སྔོན་མོ་འཁོར་ལོ་དང་པད་དཀར་འཛིན་པ། ཧོཿ ཁྲོ་གཉེར་མ་དཀར་མོ་མདུང་རྩེ་གསུམ་པའི་ཕྱག་རྒྱས་གར་བྱེད་ཅིང་ཨུཏྤལ་མཐིང་ག་འཛིན་པ་རྣམས་འདབ་མ་བཞི་ལ་འཁོད། ཧཱུཾ། གཏུམ་པའི་དབང་ཕྱུག་མ་དཀར་མོ་གཡས་རྡོ་རྗེ་གཏོད་ཅིང༌། གཡོན་པདྨ་དམར་པོ་འཛིན་པ། ཧེ། སྣ་ཚོགས་པདྨོ་མ་སྔོ་ལྗང་འཁོར་ལོ་གྱེན་དུ་གཏོད་པ་དང་སྣ་ཚོགས་པདྨོ་འཛིན་པ། ཨཱཿ པདྨའི་ན་བཟའ་མ་གསེར་མདོག་ཆུ་སྲིན་གྱི་རྒྱལ་མཚན་དང་པདྨ་སེར་པོ་འཛིན་པ། ཧོཿ པདྨའི་དབང་ཕྱུག་མ་དམར་མོ་རྡོ་རྗེ་རྩེ་ལྔ་དང་པདྨ་དམར་པོ་འཛིན་པ། རེ་མིག་བརྒྱད་ཀྱི་སོགས་འགྲེ། གླིང་བུ་མ་སོགས་སྔར་དང་འདྲ་བ་ལས། ཆགས་པའི་ཉམས་ཅན་པདྨའི་འཕྲེང་བས་ཀླུབས་པའོ། །དེ་དག་ནི་པདྨ་གར་དབང་གི་ལྷ་ཚོགས་སོ། །ཨོཾ་དབང་བསྐུར་མ་དམར་མོ་རྡོ་རྗེས་མཚན་པའི་རིན་པོ་ཆེའི་ཅོད་པན་འཛིན་པ། ཧྲཱིཿ གཏེར་ལྡན་མ་སེར་མོ་རིན་པོ་ཆེས་གང་བའི་བུམ་པ་འཛིན་པ། ཧོཿ རྒྱལ་མཚན་མཆོག་ལྡན་མ་དཀར་དམར་རྒྱལ་མཚན་ནོར་བུའི་ཏོག་ཅན་འཛིན་པ། ཧཾ། མཆོད་ཆེན་མ་ལྗང་ཁུ་རྫས་སྣ་ཚོགས་ཀྱིས་གང་བའི་སྣོད་འཛིན་པ་རྣམས། རྡོ་རྗེ་ཉི་མའི་དཀྱིལ་འཁོར་གྱི་དབུས་ཀྱི་འདབ་མ་བཞི་ལ་འཁོད། ཛཿ
མདའ་གཞུ་མ་དམར་སེར་མདའ་གཞུ་འཛིན་པ། ཧཱུཾ། རལ་གྲི་སྔོན་མོ་རལ་གྲི་དང་ཁྲ་ཊྭཱཾ་ག་འཛིན་པ། བཾ། ཉི་མ་དམར་སེར་ཉི་མའི་དཀྱིལ་འཁོར་འཛིན་པ། ཧོཿ མེ་འབར་མ་ལྗང་དམར་རྡོ་རྗེས་མཚན་པའི་མེ་ཐབ་འཛིན་པ་རྣམས་རེ་མིག་གི་ཕྱོགས་བཞིར་འཁོད། གླིང་བུ་མ་སོགས་སྔར་དང་འདྲ་བ་ལས། ཕྱག་མཚན་གྱི་སྐབས། ནོར་བུ་རིན་པོ་ཆེས་མཚན་པ་སྐུ་ལ་ནོར་བུ་དམར་པོའི་མདངས་འོད་འཕྲོ་བའོ། །དེ་དག་ནི་རྡོ་རྗེ་ཉི་མའི་ལྷ་ཚོགས་སོ། །རྟའི་རྒྱལ་པོའི་དཀྱིལ་འཁོར་ལ་ནི། ཛཱིཿ རྟ་མཆོག་གི་གཡས་སུ་ལྷ་མོ་སྣ་ཚོགས་པདྨ་མ་ལྗང་སེར། ཧཿ རྟ་མཆོག་གི་གཡོན་དུ་ལྷ་མོ་སྣ་ཚོགས་རྡོ་རྗེ་མ་ལྗང་ཁུ། གཉིས་ཀའང་གཡས་རང་མིང་དང་མཐུན་པའི་ཕྱག་མཚན་དང༌། གཡོན་ཐོད་ཁྲག་འཛིན་པ། ཁྲོ་མོའི་ཆ་བྱད་རྫོགས་པའོ། །དཀྱིལ་འཁོར་གཅིག་པའི་སྐབས། རིགས་བཞི་ཇི་ལྟར་སྦྱར་ཀྱང་རུང་བ་ལས། ལས་དང་རིན་ཆེན་ཕྱོགས་མཚུངས་རྒྱུད་སྡེ་སྤྱི་ལུགས་ཀྱི་ཕྱིར་ངེས་པར་རྡོ་རྗེ་ཉི་མ་དང་མཚུངས་པ་ཡིན་པས་ཞི་དཀྱིལ་དུ་བྱེད་ན་དེ་ལྟར་བྱ་ལ། ཡང་རྣམ་སྣང་དང་མཚུངས་པར་འདོད་པའང་ཡོད་དོ། ཁྲོ་དཀྱིལ་དུ་བྱེད་ན་ཧེ་རུ་ཀའི་ལུགས་བཞིན་ནོ། །དེ་ལ་རྟ་མཆོག་ཁྲོ་བོ་གཙོ་ཆེ་བས། ཧྲཱིཿ གཽ་རཱི་དཀར་སེར་ཞེས་སོགས་ལ། ཕྱག་རྒྱ་མཛད་པ་རྣམས་སྣ་ཚོགས་རྡོ་རྗེའི་ཤར་ལ་སོགས་པའི་དབུས་ཀྱི་རྭ་བཞི་ལ་འཁོད། ཅེས་པ་དང༌། སེ་རལ་ཁར་ཐོགས་པ་རྣམས་སྣ་ཚོགས་རྡོ་རྗེའི་རྭ་བར། མཚམས་བཞི་ལ་འཁོད། ཅེས་འདོད་པ་སྤོ། །མཾ་མདའ་འཛིན་མ་ནས་འདབ་མ་བཞི་ལ་འཁོད་ཀྱི་བར་མི་དགོས། ཨ་མེ་ཏོག་མ་སོགས། གོང་དུ་བཤད་པ་ལྟར་
ལས། ལྷ་མོ་ཐམས་ཅད་ཀྱི་ཕྱག་མཚན་ལ་སྣ་ཚོགས་རྡོ་རྗེས་མཚན་པའོ། །དེ་ལྟར་ཡེ་ཤེས་ཀྱི་ལྷ་ཚོགས་མངོན་དུ་བཞེངས་པ་ན། ཉི་མ་དང་ཉི་མའི་འོད་ཟེར་གྱི་ཚུལ་དུ་ཤར་དུ་ལྷ་ཆེན་བརྒྱད་དང་ཕྱོགས་སྐྱོང༌། ལྷོར་གཤིན་རྗེ་དང་མ་མོའི་ཚོགས། ནུབ་ཏུ་ཕོ་ཉ་དང་ཀླུ་ཆེན་བརྒྱད། བྱང་དུ་གནོད་སྦྱིན་བརྒྱད་དང་འབྱུང་པོའི་ཚོགས། གཞན་ཡང་བཀའ་སྡོད་དམ་ཅན་སྲིད་པ་གསུམ་གྱི་འབྱུང་པོ་དཀྱིལ་འཁོར་ལ་མངོན་པར་དད་པ་མཐའ་ཡས་པའི་ཚོགས་རྣམས་ཕྱི་རོལ་འཇིག་རྟེན་པའི་སྣམ་བུ་ལ་འཁོད་པར་གྱུར། རིགས་བསྡུས་ཀྱི་སྐབས་འདིར་ལྷ་མོ་ཐམས་ཅད་རང་སྣང་གི་ཡབ་དང་བཅས་པ་འདོད་པའི་སྐབས་ཀྱང་ཡོད་མོད་ཀྱི། མཐའ་གཅིག་ཏུ་ངེས་པར་དགོས་པའང་མ་ཡིན་པས། ཐམས་ཅད་འཁོར་ལོས་བསྒྱུར་བའི་རིག་མར་བྱས་ན་བསྒོམ་པ་བདེའོ། །དེ་ལྟར་ན་དཀྱིལ་འཁོར་དྲུག་ལྟར་ལ་འཁོར་གྱི་ལྷ་མོ་བརྒྱ་དང་ཉི་ཤུ་རྩ་གཉིས། དཀྱིལ་འཁོར་ཕྱི་མ་ལ་སྒོ་བ་བཞི། དེ་སྟེང་གཙོ་བོ་ཡབ་ཡུམ་བཅུ་གཉིས་ཏེ། བརྒྱ་དང་སོ་བརྒྱད་དོ། །གཙོ་བོ་ཡབ་ཡུམ་གཉིས་མེད་དང༌། རྡོར་སེམས་དཀྱིལ་འཁོར་དང་གཞི་དཀྱིལ་གྱི་སྒོ་བ་རྣམས་རིགས་མཐུན་སྡོམ་པས། བརྒྱ་དང་ཉི་ཤུ་རྩ་བརྒྱད་དུའང་བཤད་པ་ཡིན་ནོ། །སྤྱིར་དཀྱིལ་འཁོར་དགུ་པའི་དབང་དུ་བྱས་ནས། ཉིས་བརྒྱ་དང་དྲུག་གམ། ཞེ་གཉིས་སམ། དྲུག་ཅུའི་བར་གྱི་རྣམ་གཞག་ཀྱང་ཡོད་དོ། །བླ་མ་གོང་མ་རྣམས་དཀྱིལ་འཁོར་དྲུག་ཚོམས་ལ་གཙོ་བོར་མཛད་པ་རྐྱང་པར་འདུག་པ་དང༌། ཅུང་ཟད་བསྡུས་པ་ཉེ་བར་འཁོ་བའི་ཕྱིར་འདིར་དཀྱུས་ལ་དྲུག་པའི་དབང་དུ་བྱས་ཏེ་བཤད་པ་ཡིན་ནོ། །འོན་ཀྱང་བདག་གི་རྣམ་པར་རྟོག་པ་ནི་དཀྱིལ་འཁོར་དགུ་པ་ཉིད་བཟང་ཞིང༌། རྟ་མཆོག་ལ་པད་འདབ་ཀྱི་ལྷ་མོ་རྣམས་ཀྱི་དོད་སྣ་ཚོགས་
པདྨ་དང་སྣ་ཚོགས་རྡོ་རྗེ་མ་གཉིས་ཉིད་ཡིན་པས། དཀྱིལ་འཁོར་སོ་སོའི་འདབ་མའི་ལྷ་མོ་རྣམས་སྤངས་པ་ཉིད་ཡིན་པར་ངེས་སོ་སྙམ་མོ། །ཡང་རྡོར་སེམས་དང་རྣམ་སྣང་གི་ལྷ་རྣམས་སེམས་དཔའི་སྐྱིལ་ཀྲུང༌། ཧེ་རུ་ཀའི་རྣམས་སྐྱིལ་ཀྲུང་ཕྱེད་པའི་གར་སྟབས། གར་དབང་གི་རྣམས་སྐྱིལ་ཀྲུང་ཕྱེད་པའི་རོལ་པས་བཞུགས་པ། རྡོ་རྗེ་ཉི་མའི་རྣམས་རྡོ་རྗེའི་སྐྱིལ་ཀྲུང། རྟ་མཆོག་གི་རྣམས་ཁྲོ་བོའི་སྐྱིལ་ཀྲུང་སྟེ། བརྐྱང་བསྐུམ་མོ་ཞེས་ཀྱང་འགའ་ཞིག་ལས་འབྱུང་ངོ༌། །དེ་དག་ནི་ཤིན་ཏུ་རྣལ་འབྱོར་ཞེས་བྱའོ། །དཀྱིལ་འཁོར་གྱི་ལྷ་ཐམས་ཅད་ཀྱི་མིག་དང་གཟུགས་ཕུང་ལ་རྣམ་པར་སྣང་མཛད། རྣ་བ་དང་ཚོར་བ་ལ་རྡོ་རྗེ་ཉི་མ། ལྕཻ་དང་འདུ་ཤེས་ལ་པདྨ་གར་དབང༌། སྣ་དང་འདུ་བྱེད་ལ་རྟ་མཆོག ཡིད་དང་རྣམ་ཤེས་ལ་ཧེ་རུ་ཀ ལུས་དང་ཡེ་ཤེས་ལ་རྡོ་རྗེ་སེམས་དཔའོ། །སྙིང་གའི་ས་བོན་ལས་འོད་ཟེར་འཕྲོས་ནས་ཡེ་ཤེས་ཀྱི་འཁོར་ལོ་བཛྲ་ས་མཱ་ཛཿ བཛྲ་པུཥྤེ་པུ། དྷཱུ་པེ་དྷུ། ཨཱ་ལོ་ཀི་ཧྲི། གནྡྷེ་གཾ སརྦ་པཱུ་ཛ་སྥ་ར་ཎ་ཧཱུཾ། ཐུགས་ཀ་ནས་སྤྲུལ་པའི་ལྷ་མོ་བཞིས་བདུད་རྩིའི་བུམ་པས་ཁྲུས་བྱས་ཤིང་གནས་གསུམ་དུ་དབང་བསྐུར། དྲི་མ་ཐམས་ཅད་དང་བྲལ་བར་བྱས། ལྷ་རྣམས་ཀྱི་སྤྱི་བོ་ནས་གཉིས་སུ་མེད་པར་ཐིམ། ཛཿཧཱུཾ་བཾ་ཧོཿ ཨོཾ་བུདྡྷ་ཨ་བྷི་ཥིཉྩ་ཨོཾ། ཨོཾ་བཛྲ་ཨ་བྷི་ཥིཉྩ་ཧཱུཾ། ཨོཾ་རཏྣ་ཨ་བྷི་ཥིཉྩ་ཏྲཾ། ཨོཾ་པདྨ་ཨ་བྷི་ཥིཉྩ་ཧྲིཿ ཨོཾ་ཀརྨ་ཨ་བྷི་ཥིཉྩ་ཨ། ཨོཾ་རཏྣ་མཱ་ལ་ཨ་བྷི་ཥིཉྩ་ཏྲཱཾ། པ་ཊ་ལཾ་བ་ཧཱུཾ། ཨོཾ་བཾཾ་བཛྲ་རུཥྟུ་ཧེཿ ཁཾ་ཨ་བྷི་ཥིཉྩ་མཾ། ཞེས་རྣམ་སྣང་གི་ལྷ་ཚོགས་དང༌། ཧི་ཨ་བྷི་ཥིཉྩ་མཾ། ཧེ་རུ་ཀའི་དང་། ཧྲཱིཿཨ་བྷི་ཥིཉྩ་མཾ། པདྨ་གར་དབང་གི་དང༌། ཏྲཱཾ་ཨ་བྷི་
ཥིཉྩ་མཾ། ཞེས་རྡོ་རྗེ་ཉི་མའི་དང༌། ཧཾ་ཨ་བྷི་ཥིཉྩ་མཾ། ཞེས་རྡོ་རྗེ་རྟ་མཆོག་གི་དཀྱིལ་འཁོར་ལ་དབང་བསྐུར་རོ། །རྣལ་འབྱོར་གྱི་ཡན་ལག་ལ། མཆོད་པ། བསྟོད་པ། བཟླས་པ། ཐིག་ལེ་ཕྲ་མོ་སྟེ་ལྔ་ལས། དང་པོ་ནི། ཨོཾ་ཨཱཿཧཱུཾ་ཨ་ཏི་བྷུ་ཧོ། བནྡྷ་ནཾ་ཀ་རོ་མི། གུ་རུ་པ་ཏི་ཨ་ལ་ལ་ཧོ། ཞེས་ཕྱག་བྱ། ཨོཾ་འབྱུང་བ་ཆེན་པོ་ཐམས་ཅད་འབྱུང༌། སྟོང་གསུམ་རྡུལ་སྙེད་མ་ལུས་པའི། །གཟུགས་སྒྲ་དྲི་རོ་རེག་བྱ་ཆོས། །ལྷ་མོའི་ཚོགས་རྣམས་མ་ལུས་སྤྲོ། །མེ་ཏོག་བདུག་པ་མར་མེ་མ། །དྲི་མཆོག་ཀུན་གྱིས་མཆོད་པར་བྱ། །ཨོཾ་པ་ན་པོ་ནུ་པུར་ར་ཏི་པུ། སརྦ་ཏ་ཐཱ་ག་ཏ་ས་མ་ཡོ་གི་སིདྡྷི་ཧཱུཾ། ཞེས་མཆོད་པ་སྤྲུལ། ཨོཾ་བཛྲ་པུཥྤེ། བཛྲ་དྷུ་པེ། བཛྲ་ཨཱ་ལོ་ཀེ བཛྲ་གནྡྷེ། པྲ་ཏིཙྪ་ཧོ། ཤྲཱི་བྷཾ་ག་ཝཱན། ཁ་ཁ་ཁཱ་ཧི། ཞེས་ཕུལ། གཞན་ཡང༌། ཨོཾ་བཛྲ་པུཥྤེ་ཨཱཿཧཱུཾ། སོགས། ཤཔྟའི་བར་དུ་སྦྱར་རོ། །དེ་ནས་ཧཱུཾ་ཞེས་སྐད་གསངས་མཐོན་པོས་གླུར་བླང་སྟེ། དཔལ་རྡོ་རྗེ་སེམས་དཔའི་གླུའི་ཕྱག་རྒྱ་བཅིངས། འདི་ལ་ཆོས་ཀྱི་སྙིང་པོའི་གསལ་ཁ་གཞུང་རྣམས་ན་མེད། ཀུན་ཏུ་བཟང་མོ་ལ་སྔགས་ལོགས་པའང་མེད་མོད། ཡབ་ཡུམ་གཉིས་སུ་མེད་པ་ཉིད་ཀྱི་ཕྱིར་གཙོ་བོའི་སྙིང་པོ་བརྗོད་དོ། །རྡོ་རྗེ་སེམས་དཔའ་བདེ་ཆེན་སྐལ་བཟང་དཔལ་ཁྱོད་བདག་ཅག་བསྒྲུབས་ལ་རྟོགས་པར་མཛད་དུ་གསོལ། ཀྱཻ། དེ་བཞིན་གཤེགས་པ་ཀུན་གྱི་བདག་ཉིད་བདེ་བ་མཁའ་འགྲོ་སྒྱུ་མའི་ཚོགས་རྣམས་བདེ་བའི་མཆོག །འགྲོ་བའི་རྒྱུད་རྣམས་རྣམ་པ་སྣ་ཚོགས་འདུལ་མཆོག་གྲུབ་པ་བདག་ལ་གྲུབ་པར་མཛད་དུ་གསོལ། །ཨ་ལ་ལ་ཧོ། དེ་བཞིན་གཤེགས་པའི་སྦྱོར་བ་རྣམ་པ་
སྣ་ཚོགས་གར་རྣམས་བསྟན་དུ་གསོལ། །ཛཿཧཱུཾ་བཾ་ཧོཿ ཀྱཻ་མ་བདེ་མཆོག་བདེ་བས་བཟུང་ལ་རྣམ་པར་སྤྲུལ་ཧཱུཾ་སྣང་བར་མཛད་དུ་གསོལ། །ཨ་ལ་ལ་ལ་ལ་ཧོ། དེ་བཞིན་གཤེགས་པ་ཀུན་གྱི་མཁའ་འགྲོ་སྒྱུ་མས་སློབ་མ་བཟུང་དུ་གསོལ། །རབ་ཏུ་དགའ་བ་རྗེས་སུ་ཆགས་པའི་མདའ་གཞུ་རབ་ཏུ་ཕྲ་བས་རྒྱས་བཏབ་པའི། །རབ་ཏུ་དགའ་བའི་སྦྱོར་བའི་བདེ་བས་མྱོས་པའི་བདེ་བས་ཐམས་ཅད་བདག་ལ་གྲུབ་པར་མཛོད། །རབ་ཏུ་བདེ་མཆོག་རྣམ་པ་སྣ་ཚོགས་རྣམ་པར་རྒྱལ་བའི་རྒྱལ་མཚན་བསྒྲེང་བའི་ལོངས་སྤྱོད་དང༌། །རབ་ཏུ་དགའ་བའི་དབང་ཕྱུག་ཆེ་མཆོག་གྲུབ་པ་དེ་བཞིན་གཤེགས་པ་རབ་ཏུ་སྣ་ཚོགས་བདེ་མཆོག་རོལ་ཅིག་ཧོཿ ཞེས་པ་ནི་དཔལ་རྡོ་རྗེ་སེམས་དཔའི་གླུའོ།། རྣམ་པར་སྣང་མཛད་ཀྱི་གླུའི་ཕྱག་རྒྱ་བཅིངས་ལ། ཨཽཾ་རུ་རུ་སྥུ་རུ་ཛྭ་ལ་ཏིཥྵ་སིདྡྷི་ལོ་ཙ་ནེ། སརྦ་ཨརྦ་སིདྡྷ་ནི་སྭཱ་ཧཱ། ཞེས་ཆོས་ཀྱི་སྙིང་པོ་ལྷ་མོ་རྣམས་ཀྱི་ལྕེ་ལ་བཀོད་དེ། ཨོཾ་རྡོ་རྗེ་སེམས་དཔའ་བསྡུས་པ་ནི། སོགས་དང༌། ཨོཾ་ཨཱཿཧཱུཾ། རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་པ་གྲུབ་པར་མཛོད། །དམ་ཚིག་དམ་པ་གྲུབ་པར་མཛད་དུ་གསོལ། །མཆོད་པ་ཆེན་པོ་ཐམས་ཅད་དག་པར་མཛོད། །མཆོད་པ་ཆེན་པོ་ཐམས་ཅད་གྲུབ་པར་མཛོད། །མཉམ་པ་ཆེན་པོའི་གནས་ལ་རོལ་དུ་གསོལ། །རྟག་པའི་གླུའོ། །དཔལ་ཧེ་རུ་ཀའི་གླུའི་ཕྱག་རྒྱ་དང༌། སུབྷ་གསྟ་མ་ཧཱ་ན་དེ་བོ། ཧ་རི་མི་རི། ཤྲི་ཡེ། ཞེས་བཀོད་ལ།
ཧཱུཾ་རྡོ་རྗེ་ལས་ཀྱི་མདའ་གཞུ་ལ་ཕྱག་འཚལ། །རྡོ་རྗེ་ཆགས་པའི་དམ་ཚིག་དཔལ་ཁྱོད་འདུད། །རྡོ་རྗེ་ཁ་ཊྭཱཾ་རབ་ཏུ་འཇིགས་ལ་འདུད། །རྡོ་རྗེ་དྲིལ་བུ་རབ་ཏུ་འཁྲོལ་བའི་དཔལ། །གཟིགས་པ་རྣམ་པ་སྣ་ཚོགས་འགྱུར་བའི་རྒྱས་ཐོབ་ལ། །རྣམ་པ་སྣ་ཚོགས་འོ་བྱེད་འཁྱུད་པས་རྨོངས་མཛད་དེ། །རྣམ་པ་སྣ་ཚོགས་བདེ་བའི་མཆོག་བརྟན་ཀུན་སྩོལ་མ། །རྣམ་པ་སྣ་ཚོགས་བདེ་མཆོག་ངོ་མཚར་བརྟན་དུ་གསོལ། ཧེ་རུ་ཀའི་གླུའོ། །གར་དབང་གི་ཕྱག་རྒྱ་དང༌། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་བཀོད་ལ། ལ་ལར་རབ་ཏུ་དྲག་ཅིང་སྐྱེ་བོ་དག་ལ་དྲག་པའི་བུད་མེད་སྐུ་ལྟར་སྣང༌། །འགྲོ་བ་མཐའ་དག་འདུལ་ཕྱིར་ལ་ལར་རབ་ཏུ་སྣང་བའི་འཁོར་ལོ་ཕྱག་ན་བསྣམས་པའི་སྐུ། །ལ་ལར་ངེས་ཤིང་ཞི་བར་མི་འགྱུར་སྦྱིན་པ་ཚངས་པའི་སྐུར་ཡང་སྟོན་པར་མཛད། །ལ་ལར་རབ་ཏུ་འབར་བའི་ཆགས་པ་པདྨོའི་དམ་ཚིག་བདག་ལ་གྲུབ་པར་མཛོད། །གར་གྱི་དབང་ཕྱུག་གི་གླུའོ། །རྡོ་རྗེ་ཉི་མའི་ཕྱག་རྒྱ་དང༌། ཏྲཾ་བ་བ་ཊ་ཊ་ཊ་ཏྲ་ཊ། ཞེས་བཀོད་ལ། ཐམས་ཅད་དབང་བསྐུར་དབང་ཕྱུག་དམ་པ་མི་ཟད་པ་ཡི་གཏེར་མཆོག་བདག་ལ་གྲུབ་པར་མཛད་དུ་གསོལ། །སྐུ་མཆོག་རྒྱལ་མཚན་རྒྱལ་བ་བསྒྲེང་རྡོ་རྗེ། །རིན་ཆེན་ཤིན་ཏུ་ཆེ་བ་བདག་ལ་སྩོལ། །རྡོ་རྗེ་ཉི་མའི་གླུའོ། །རྟའི་རྒྱལ་པོའི་ཕྱག་རྒྱ་དང༌། ཧྲིཿཔདྨ་བ་ཊ་སུ་ཁ་ཡོ་གཱི་ཤྭ་ར། ཧི་ཧི་ཧི་ཧི་ཧི། ཞེས་བཀོད་ལ། ལ་ལར་མཁས་པའི་གཟུགས་ཀྱང་འཛིན། །ལ་ལར་དུས་མཐའི་དུས་ལྟར་དྲག །
ལ་ལར་རྒྱལ་བའི་དབང་བཞིན་ཞི། །ལ་ལར་རྟ་མཆོག་སྦྱོར་བས་འགྲུབ། །མྱོས་བྱེད་སྤྱད་ལས་ལྷག་པར་བདེ་བ་འདོད་པའི་གཟུགས་སྟོན་པ། འདུལ་བའི་དབང་གིས་གཤིན་རྗེ་སྟོང་ལས་ལྷག་པར་རབ་ཏུ་འཇིགས། ཞི་བའི་སྐུ་ནི་ཚངས་པ་སྟོང་ལས་ལྷག་པར་རབ་ཏུ་མཛེས། །དཀྱིལ་འཁོར་ཀུན་གྱི་མཆོག་འགྱུར་དེ་བཞིན་གཤེགས་ཀུན་གྲུབ་པར་མཛོད། །ཅེས་པ་ནི་རྟ་མཆོག་གི་གླུའོ། །འཛུབ་མོ་སྐྱིལ་ཀྲུང་དུ་བསྣོལ་མཐེ་བོས་བཀབ་སྟེ་མཛུབ་མོའི་རྩེ་མིག་འབྲས་ལྟར་སྟོན་པ་ནི་རྡོ་རྗེ་སེམས་དཔའི་གླུའི་ཕྱག་རྒྱའོ། །ཐལ་མོ་ཁོང་སྟོང་མཛུབ་མོའི་རྩེ་མོ་བཀུག་སྟེ་མཐེ་བོའི་རྩེ་དང་སྦྱར་བ་ནི་རྟག་པའིའོ། །རྡོ་རྗེ་ཐལ་མོ་ཁ་གྱེན་དུ་འཕྱེ་མཛུབ་མོ་བཀུག མཐེ་བོང་མཆེ་བ་ལྟར་ཕྱིར་བརྐྱང་བ་ནི་ཧེ་རུ་ཀའིའོ། །རྡོ་རྗེ་ཐལ་མོ་ལས་གུང་མོ་རྩེ་སྦྱར། མཐེ་བོང་མཐེ་ཆུང་འདབ་མ་བཞིར་བྱས་པ་ནི་པདྨ་གར་དབང་གིའོ། །རྡོ་རྗེ་ཐལ་མོ་ལས་མཛུབ་མོ་ཕྱིར་བཀུག་སྟེ་དེའི་རྩེ་མོ་མཐེ་བོས་མནན་པ་ནི་རྡོ་རྗེ་ཉི་མའིའོ། །རྡོ་རྗེ་ཐལ་མོ་ལས་མཐེ་ཆུང་སྲིན་ལག་མཉམ་པར་བརྐྱང་མཛུམ་མོ་བཀུག་སྟེ་རྩེ་སྤྲད་པ་ནི་རྟའི་རྒྱལ་པོའིའོ། །ཨོཾ་འབྱུང་བ་ཐམས་ཅད་ལྔ་ལས་བྱུང༌། །རང་ལས་མ་བྱུང་གང་ཡང་མེད། །གཙང་སྨེའི་དྲི་རྟོག་ཀུན་བྲལ་བའི། །བདུད་རྩི་བྱང་ཆུབ་སེམས་ཆེན་པོ། །བདག་སོགས་གཉིས་སུ་མེད་པའི་ཕྱིར། །མཉམ་པ་ཆེན་པོའི་གནས་ལ་རོལ། །ཨོཾ་ན་མཿསརྦ་པཉྩ་ཨ་མྲྀ་ཏ་ཨཱཿཧཱུཾ་སྭཱ་ཧཱ། བྱིན་རླབས་མཚན་དང་རྒྱན་ལྡན་པའི། །མི་མོ་རྣམས་ཀྱི་རེག་བྱའི་མཆོག །བྱིན་གྱིས་རློབས་ཤིག་རྣལ་འབྱོར་པ། །གསང་བ་ཆེན་པོ་རྣམ་པར་རོལ། །ཨོཾ་མཧཱ་སུ་ཁ་བོ་དྷི་ཙིཏྟ་ཨ་ལ་ལ་ཧོ། །
གཉིས་པ་ནི། མཉམ་ཉིད་མི་གཡོ་མཉམ་ཉིད་མཆོག་གི་ཆོས་ཉིད་ཅན། །ཐུགས་རྗེའི་བདག་ཉིད་འགྲོ་བའི་སྡུག་བསྔལ་སེལ་བར་མཛད། །ཡོན་ཏན་མཐའ་ཡས་དངོས་གྲུབ་ཐམས་ཅད་སྦྱིན་མཛད་པ། །དྲི་མེད་མི་གཡོ་མཉམ་མེད་དམ་པའི་མཆོག་ཆོས་ཅན། །ཡོན་ཏན་ཤིན་ཏུ་ཕྲ་བའི་ཆ་ལའང་ཚད་མེད་དེ། །དེས་ནི་ནམ་མཁའ་དང་ཡང་བསྐྲུན་དུ་ཡོད་མ་ཡིན། །དངོས་གྲུབ་མཐའ་ཡས་མཉམ་མེད་དཔེ་དང་བྲལ་བ་རྣམས། །སེམས་ཅན་ཁམས་ལ་དངོས་གྲུབ་མཆོག་རྣམས་ངེས་པར་སྩོལ། །རྟག་ཏུ་དྲི་མ་མེད་པ་ཐུགས་རྗེའི་ཤུགས་ལས་བྱུང༌། །སྨོན་ལམ་གྲུབ་པ་འགག་པ་མེད་པའི་ཆོས་ཉིད་ཅན། །འགྲོ་བའི་དོན་གྲུབ་རབ་ཏུ་བརྩོན་པ་མཐའ་ཡས་པ། །ཐུགས་རྗེ་ཆེན་པོའི་བདག་ཉིད་རྟག་ཏུ་རྣམ་པར་སྣང༌། །ཚད་མེད་ཚད་དང་བྲལ་བ་ཤིན་ཏུ་རྫོགས་པ་ཡི། །བདེ་བར་གཤེགས་པའི་གོ་འཕང་དམ་པ་བརྙེས་གྱུར་ཀྱང༌། ཁམས་གསུམ་དག་ལ་དངོས་གྲུབ་མཆོག་སྩོལ་མཛད་པ་ཡི། །ཐུགས་རྗེའི་སྤྱོད་པ་མི་གཡོ་འགག་པར་ཡོངས་མི་འགྱུར། །ཨེ་མ་ཧོ་ཤིན་ཏུ་བཟང་པོའི་ཆོས་ཉིད་མཆོག་དང་ལྡན། །མཆོག་སྦྱིན་རྣམས་ཀྱི་ནང་ནས་གོ་འཕང་མཆོག་བརྙེས་པ། ཁམས་གསུམ་ཀུན་ལ་རྟག་ཏུ་དངོས་གྲུབ་མཆོག་སྩོལ་མཛད། །མགོན་པོ་དུས་གསུམ་སྒྲིབ་པ་མེད་པར་རབ་མཁྱེན་པ། །དམ་ཚིག་མཆོག་གསུམ་དངོས་གྲུབ་དམ་པ་བདག་ལ་སྩོལ། །འདི་ནི་སངས་རྒྱས་ཐམས་ཅད་ཀྱི། །
ཡང་དག་ཡོན་ཏན་རྒྱ་ཆེན་ཏེ། །ལན་གཅིག་ཙམ་ཞིག་བརྗོད་པས་ཀྱང༌། །གསང་སྔགས་ཐམས་ཅད་འགྲུབ་པར་འགྱུར། །བདག་ཅག་དམ་ཚིག་འདི་ལ་མངོན་དུ་ཞུགས་པ་རྣམས། །བཅད་གཏུབས་ལ་སོགས་ལུས་ལ་འབྱུང་བར་མི་འགྱུར་ཞིང༌། །གྲིབ་མས་ཕོག་པའི་སྡུག་བསྔལ་ཤིན་ཏུ་མི་བཟད་པ། །སྐུ་ཡི་ཕྱོགས་ཙམ་མཐོང་བའི་མོད་ལ་འཚོ་བ་དང༌། །གཟིགས་མདངས་ལུས་ལ་འཇུག་པ་བྱེ་བ་སྟོང་ཕྲག་གི །འོད་ཀྱིས་ཕོག་པས་འཇིག་རྟེན་ཁམས་ཀུན་སྣང་བ་དང༌། །ལུས་དང་སེམས་དང་ཚེ་ནི་རྡོ་རྗེ་རབ་བརྟན་ཏེ། །རེ་སྨོན་ཐམས་ཅད་དུས་འདིར་འགྲུབ་པར་མཛད་དུ་གསོལ། །གསུམ་པ་ནི། ཨོཾ་བཛྲ་སཏྭ་མ་ཧཱ་ས་མ་ཡ་ཨཱཿཧཱུཾ་སྭཱ་ཧཱ། ཞེས་པ་དང༌། གོང་དུ་བཤད་པའི་འབྱིན་སྔགས་དྲུག་པོ་རྣམས་ཀྱང་ཅི་རིགས་པར་བཟླ་ལ། བཟླས་པའི་མན་ངག་ནི་སྤྱི་དང་འདྲའོ། །བཞི་པ་ནི། སྟེང་འོག་གི་སྣ་རྩེ་ལ་བསླབ་པ་ཕྲ་མོའི་རྣལ་འབྱོར་འདུས་པ་ཡེ་ཤེས་ཞབས་ལུགས་སོགས་དང་ཕལ་ཆེར་འདྲ་ལ། ལྔ་པ་སྙིང་གར་དབྱངས་གསལ་བཅུ་དྲུག་པོ་ཚན་གསུམ་བསྐོར་བའི་དབུས་སུ། ཨ་ཡིག་ཟླ་ཕྱེད་ཐིག་ལེར་ལྡན་པའམ། ཕྱག་མཚན་བསྒོམ་པར་བཤད་ལ། མཚན་མ་མེད་པའི་རྣལ་འབྱོར་ནི། ཆོས་ཐམས་ཅད་མཉམ་ཉིད་བདེ་བ་ཆེན་པོ་བཟུང་འཛིན་དང་བྲལ་བ་ལ་མཉམ་པར་འཇོག་པའོ། །རྣལ་འབྱོར་གྱི་རྗེས་ལ་དག་པ་དྲན་པ་ནི། རྟེན་ནི་དགེ་བ་བཅུ་ཡིན་ཏེ། །གྲུ་བཞི་བདེན་པ་བཞི་རུ་བརྗོད། །ཡན་ལག་བཅུ་གཉིས་རྡོ་རྗེའི་རྭ། །ཡོན་ཏན་སྣ་ཚོགས་ཀུན་རྒྱས་ཤིང༌། །ཚངས་
པའི་གནས་བཞི་ཁྱབ་མཛད་ཟུར། །ཆོས་རྫོགས་སུམ་ཅུ་རྩ་བདུན་ལས། །ཏིང་འཛིན་བཞི་པོ་འཇུག་པའི་སྒོ། །རང་བཞིན་ཡེ་ཤེས་དྲུག་དག་ལས། །རིགས་ཀྱི་མཚན་མ་སྣ་ཚོགས་རྣམས། །རྣམ་ཐར་བརྒྱད་པོ་ཀ་བར་བཅས། །རྡོ་རྗེ་ཐེག་པའི་ཚུལ་ཉིད་མཛེས། །མཉམ་ཉིད་དཀྱིལ་འཁོར་ཆེན་པོར་བརྗོད། །ཐུགས་རྗེ་ཆེན་པོའི་ཆར་ཕབ་བོ། །ཉོན་མོངས་དྲུག་རྣམས་རྣམ་དག་པ། །དེ་ལས་ཡེ་ཤེས་དྲུག་འཛིན་པ། །རིགས་དྲུག་འཁོར་ལོས་བསྒྱུར་བ་སྟེ། །རྡོ་རྗེ་སེམས་དཔའ་གཅིག་པུའི་ངང༌། །རྟོག་པས་མ་གོས་ཐུགས་རྗེའི་བདག །ཟླ་འདྲ་དམར་བའི་མདངས་དང་ལྡན། །ལྷ་མོའི་ཚོགས་རྣམས་དགོད་བྱ་བ། །ཉོན་མོངས་ཉི་ཤུ་དག་པར་མཛད། །ཅེས་པའོ། །རྗེས་ཐུན་མཚམས་ཀྱི་བྱ་བ་རྣམ་གྲངས་དུ་མ་ཡོད་ཀྱང༌། གཏོར་མའི་ཆོ་ག་ཀུན་ལ་ཉེ་བར་མཁོ་བ་ཡིན་ལ། དེ་ལ་ཡང་རྒྱས་འབྲིང་བསྡུས་གསུམ་གྱི་དབྱེ་བ་དུ་མ་སྣང་ཞིང༌། སྐབས་འདིར་གཏོར་ཆོག་རྒྱས་པ་ནི། ཧ་ཅང་མ་ངེས་པར་འགྱུར་བས། བསྡུས་པའི་ཚུལ་གྱིས་བཤད་པར་བྱའོ། །དེ་ལ་གཏོར་མ་མཆོད་པ་དང་བཅས་པ་འདུས་བྱས། མཎྜལ། ཟླ་གམ་དམར་པོ་དབུས་སུ་ཐིག་ལེ་ལྔ་དང་བཅས་པ་བཤམས། མཆོད་རྫས་རྣམས་སྤྱི་དང་མཐུན་པར་བྱིན་གྱིས་བརླབས་ནས། ཨོཾ་མཧཱ་ཙཀྲ་མཎྜལ་ཧཱུཾ། ཧཱུཾ་ཨོཾ་ཧིཿཧྲཱིཿཏྲཱི་ཧཾ། ཨོཾ་ཨཱཿཧཱུཾ། ཞེས་དཔའ་བོ་འབྲུ་དགུ་དང༌། ཨོཾ་མཧཱ་ཀྲོ་ཏཱི་ཤྭ་རི། སརྦ་དྲ་བྱཾ་ཤོ་དྷ་ཡ་ཨཱཿཧཱུཾ། ཞེས་ལན་གསུམ་བཟླས་པས་བྱིན་གྱིས་བརླབས། ནང་མཆོད་སྔར་བཞིན་བྱིན་གྱིས་བརླབས་པའམ་འབྲུ་གསུམ་གྱིས་ཁ་གསོ།
མཎྜལ་གྱི་དབུས་སུ་རྡོ་རྗེ་རྟ་མཆོག་ཧཾ་ལས་འཁྲུངས་པ། དེའི་མདུན་དུ་ལྷ་ཆེན་པོ་གཡས་སུ་ཚངས་པ། རྒྱབ་ཏུ་བརྒྱ་བྱིན། གཡོན་ཏུ་ཁྱབ་འཇུག །དེའི་ཕྱི་རོལ་ཤར་ཕྱོགས་སུ་ཕྱོགས་སྐྱོང་དང་ཞིང་སྐྱོང༌། ལྷོ་ཕྱོགས་སུ་མ་མོའི་ཚོགས། ནུབ་ཕྱོགས་སུ་ལྷ་ཆེན་པོ་རྣམས་དང་ཀླུ་ཆེན་བརྒྱད། བྱང་དུ་འབྱུང་པོ་སྣ་ཚོགས་པ་དང་འགྲོ་བ་རིགས་དྲུག་གི་གཙོ་བོ་འཁོར་བཅས་གནས་པར་གྱུར། རང་གི་སྙིང་ག་ནས་འོད་ཟེར་འཕྲོས། འཇིག་རྟེན་དང་འཇིག་རྟེན་ལས་འདས་པའི་གཏོར་མགྲོན་གྱི་ལྷ་ཚོགས་ཐམས་ཅད་འབར་བའི་ཕྱག་རྒྱས་སྤྱན་དྲངས། ཨོཾ་བཛྲ་ཊཱ་ཀི་ནཱི་བྷྱོ། ཨེ་ཨ་རལླི་ཧྲིང་ཧྲིང་ཛ་ཛ། ཞེས་སྤྱན་དྲངས། ཨོཾ་བཛྲ་གུ་ཧྱ་དྲྀ་ཤྱ་ཧོ། ས་མ་ཡ་སྟྭཾ། ཨོཾ་བཛྲ་གུ་ཧྱ་དྲྀ་ཤྱ་ས་མ་ཡ་ཧོཿ ཨོཾ་བཛྲ་གུ་ཧྱ་དྲྀ་ཤྱ་ས་མ་ཡ་ཕཊ། ཅེས་དམ་ཚིག་གི་ཕྱག་རྒྱ་བསྟན། ཨོཾ་ཨི་དམ་དྷཱུ་པ། པུཥྤ། དཱི་པ། གནྡྷེ་པཱུ་ཛ་སྥ་ར་ཎ་ཨརྒྷཾ་བ་ལིང་ཁ་ཁ། ཞེས་མཆོད། གོང་དུ་ནང་མཆོད་བྱིན་རླབས་བཞིན་གཏོར་མ་བྱིན་གྱིས་བརླབས་པ་ལས། ཨོཾ་ཨཱཿཧཱུཾ་ཏེ་ཛོ་བ་ལིང་ཏ་བ་ལ་བ་ཏེ། གུ་ཧྱ་སིདྡྷི་ས་མ་ཡ་ཧཱུཾ་ཧྲི་ཐ། ཞེས་བྱིན་གྱིས་བརླབས། འཁོར་ལོས་བསྒྱུར་བ་དྲུག་གི་སྔགས་ཀྱི་མཐར། ཨི་དམ་བ་ལིང་ཏ་ཁ་ཁ་ཁཱ་ཧི་ཁཱ་ཧི། ཞེས་པ་བཏགས་ནས་འཇིག་རྟེན་འདས་པ་ལ་ཕུལ། དེ་དང་སྤེལ་ནས། ཨོཾ་འཇིག་རྟེན་ཀུན་གཙོ་མངའ་མཛད་པའི། །འཇིགས་བྱེད་དྲག་བྱེད་སྟོབས་ལྡན་པ། །བདེ་གཤེགས་སྲས་སོགས་བྲན་མཛད་པའི། །བྱང་ཆུབ་སེམས་ལྡན་སྙིང་རྗེ་ཅན། །དབང་ཕྱུག་ཆེན་པོ་ཆུང་མར་བཅས། །དེ་བཞིན་ཁྱབ་
འཇུག་ཚངས་པ་དང༌། །བརྒྱ་བྱིན་འདོད་དགའ་ཆུང་མར་བཅས། །ལྷ་ཆེན་འཁོར་བཅས་ཚོགས་རྣམས་དང༌། །ཕྱོགས་སྐྱོང་བརྒྱད་པོ་འཁོར་དང་བཅས། །ཀླུ་ཆེན་བརྒྱད་པོ་འཁོར་དང་བཅས། །མཁའ་འགྲོ་དྲག་མོ་གསུས་འཛིན་མ། །དུར་ཁྲོད་མ་མོའི་ཚོགས་བཅས་དང༌། །གཞན་ཡང་ལྷ་སྲིན་སྡེ་བརྒྱད་དང༌། །འགྲོ་བ་དྲུག་པོ་འཁོར་བཅས་རྣམས། །སྐུ་གསུང་ཐུགས་སོགས་སྦྱངས་བྱས་ནས། །རང་གི་ལྷ་ཡི་གཟུགས་འཛིན་རྣམས། །གནས་འདིར་འདུས་པའི་དམ་ཚིག་ཅན། །མཆོད་གཏོར་རྒྱན་དང་བཅས་པ་བཞེས། །དམ་ཚིག་སྲུངས་ཤིག་དམ་ཚིག་ཅན། །ལས་ལ་བརྩོན་པའི་མཁའ་འགྲོ་རྣམས། །མཁའ་འགྲོ་དྲག་མོ་འཁོར་བཅས་རྣམས། །རྣལ་འབྱོར་སྒྲུབ་པའི་གྲོགས་མཛོད་ཅིག །ལས་མཛད་རྡོ་རྗེ་བྲན་བཅས་པས། །ཞི་རྒྱས་དབང་དྲག་ལས་སྒྲུབ་ཅིང༌། །ཐེག་ཆེན་གསང་སྔགས་སྲུང་བ་དང༌། །ནད་དང་གདོན་སོགས་ཞི་བ་དང༌། །ཚེ་དབང་བཀྲ་ཤིས་སྤེལ་བ་དང༌། །བདེ་ལེགས་འབྲས་བུ་གྲུབ་པར་མཛོད། །ཨོཾ་ཨཱཿཧཱུཾ། པདྨ་བ་ཌ་བ་མུ་ཁ་ཧཱུཾ་ཧྲི། ཨོཾ་ཧྲི་བཛྲ་ཌཱ་ཀི་ནི་ནཾ། བ་ལིང་ཏ་པྲ་ཏིཙྪ་ཧཱུཾ་ཁཱ་ཧི། ཨོཾ་ཨཱཿཧྲི་ཁཱ་ཧི། ཞེས་པ་ལན་གསུམ་གྱིས་མགྲོན་སྤྱི་ལ་ཕུལ་ནས། རོལ་མོའི་སྒྲ་དང་བཅས་ཏེ། ཨོཾ་ཐུགས་རྗེ་ཆེན་པོས་གཟིགས་ནས་ཀྱང༌། །སྣ་ཚོགས་རྒྱུད་རྣམས་སྤྲུལ་མཛད་པའི། །གར་མཁན་འཁོར་ལོའི་རྒྱུད་མངའ་བ། །དྲག་པོ་ཞི་མཛད་ཁྱོད་ལ་ཕྱག་འཚལ་ལོ། །སྣ་ཚོགས་གར་གྱི་རྣམ་པར་སྤྲུལ་ལ་ཕྱག་འཚལ་ལོ། །རྡོ་རྗེ་ལ་སོགས་མཚོན་ཆས་
རོལ་ལ་ཕྱག་འཚལ་ལོ། །མ་ལུས་ལྷ་ཡི་ལྷ་མཆོག་སྐྱོང་ལ་ཕྱག་འཚལ་ལོ། །དཔའ་བོ་རྩལ་རྫོགས་སྟོབས་བཅུའི་ཤུགས་ལ་ཕྱག་འཚལ་ལོ། །ཨ་ཏི་བྷུ་ཧོ། ཨ་ལ་ལ་ལ་ལ་ཧོ། ཡིག་བརྒྱ་ལན་གསུམ། ཨོཾ་ཕྱོགས་བཅུ་ནམ་མཁའི་མཐས་ཀླས་པར། །སེམས་ཅན་ཀུན་གྱི་དོན་སྒྲུབ་པ། །ཇི་ལྟར་ཐུགས་ཀྱི་དབང་ཕྱུག་བཞིན། །དེ་ཉིད་སྤྱོད་པར་བདག་གྱུར་ཅིག །སེམས་ཅན་ཐམས་ཅད་བདེ་གྱུར་ཅིག །སེམས་ཅན་ཐམས་ཅད་སྐྱོན་མེད་པ། །གང་གི་ལམ་གྱིས་གྲོལ་གྱུར་པ། །དེ་ཡིས་སངས་རྒྱས་མྱུར་ཐོབ་ཤོག །ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཞིང་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །གཙྪ་མུ། ཞེས་ཡེ་ཤེས་པ་རྣམས་གཤེགས། དམ་ཚིག་པའི་དཀྱིལ་འཁོར་བདག་ལ་ཐིམ། ཐུན་མཚམས་ལ་འཇུག་པའམ། ཉལ་བ་ན། རང་གི་སྙིང་གའི་འོད་ཀྱིས་ཕོག་པས་དཀྱིལ་འཁོར་གྱི་འཁོར་ལོ་འོད་དུ་ཞུ་ནས་བདག་ཉིད་དམ་ཚིག་སེམས་དཔའ་ལ་ཐིམ། དེ་ཡེ་ཤེས་སེམས་དཔའ་ལ་ཐིམ། དེ་ཏིང་ངེ་འཛིན་སེམས་དཔའ་ལ་ཐིམ། དེ་ཡང་ཧཱུཾ་ལ་ཐིམ། དེ་ཡང་ནཱ་དའི་བར་དུ་བསྡུས་ཏེ་མཉམ་པ་ཉིད་ཀྱི་ངང་དུ་ཐིམ། ཉལ་བ་ལས་ལངས་པའམ། སྤྱོད་ལམ་ལ་འཇུག་ན། རྡོ་རྗེ་སེམས་དཔའ་ཕྱག་གཉིས་པའི་སྐུར་གྱུར། སྤྱི་བོ་ལ་སོགས་པའི་གནས་བཞིར། ཀཾ་ཧཾ་ཨཾ་ཏུཾ། ཞེས་གོ་ཆ་དགོད། རཏྣ་མཱ་ལ་ཨ་བྷི་ཥིཉྩ་ཧཱུཾ་ཕཊ་ཨ་བ་ལམྤ་ཨ་བྷི་ཥིཉྩ་ཧཱུཾ། ཞེས་རིགས་ལྔའི་དབུ་རྒྱན་གྱིས་དབང་བསྐུར་བར་མོས། དགེ་བ་བསྔོའོ། །འདིའི་སྔགས་འཕྲེང་
རྒྱས་པ་བཟླ་བར་མོས་ན། གཙོ་བོ་དྲུག་སྨོས་ཟིན། འཁོར་རྣམས་ཀྱི་སྔགས་ནི། ཛཿབཛྲ་དྲིཥྟི་ས་མ་ཀེ་མ་ཊ། ཧཱུཾ་བཛྲ་ཀེ་ལཱི་ཀཱེ་ལཱི་ཧཱུཾ། བཾ་བཛྲི་ཎི་ས་མ་ར་ན་ཊ། ཧོ་བཛྲ་ཀཱ་མེ་ཤྭ་རི་ཏྲཾ། ཨོཾ་ཨཾ་མ་དུ་བཛྲི་གྷྲུཾ་གྷྲུཾ། ཨོཾ་བཛྲ་མེ་གྷེ་གུ་ལུ་གུ་ལུ་བྲུཾ། ཨོཾ་ཧཿཤ་རང་བཛྲི་ཨཾ་ཨཾ། ཨོཾ་ཁཾ་བཛྲ་ཤེ་ཤི་རི་ཧཱུཾ་ཧཱུཾ། ཨོཾ་ཨཾ་ར་ཏི་བཛྲ་བི་ལཱ་སི་ནི་ཏྲ་ཊ། ཧེ་ར་ཏེ་བཛྲ་གཱི་ཏེ་ཏེ་ཏེ་ཏེ། ཧོ་ར་ཏི་བཛྲ་ཧ་སྱ་ཧ་ཧ་བཾ། ཨོཾ་ཧེ་ར་ཏི་བཛྲ་ནྲྀ་ཏྱ་བེ་ས་བཛྲཾ། ཨོཾ་བཛྲ་པུཥྤེ། ཨཱ་བཛྲ་དྷུ་པེ། ཨོཾ་བཛྲ་ཨཱ་ལོ་ཀེ ཨཿབཛྲ་གནྡྷེ། ཨོཾ་བཛྲཾ་ཀུ་ཤི་ཛཿ ཨོཾ་བཛྲ་པཱ་ཤེ་ཧཱུཾ། ཨོཾ་བཛྲ་ཤྲིཾ་ཁ་ལེ་པཾ། ཨོཾ་བཛྲ་གྷཎྜེ་ཧོཿ རྡོ་རྗེ་སེམས་དཔའི་ལྷ་ཚོགས་རྣམས་སོ། །ཨོཾ་བཛྲ་སཏྭ་ཤཾ །ཨོཾ་བཛྲ་རཏྣ་རཾ། ཨོཾ་བཛྲ་དྷརྨྨ་སཾ། ཨོཾ་བཛྲ་ཀརྨྨ་ཐཾ། ཧཾ་སཏྭ་བ་ཛྲེ། ཛྲཾ་བཛྲ་ར་ཧྲེ་ས་ཏ། ཏྲཾ་བཛྲ་པདྨེ་དྷཾ། བི་ཤྭ་བཛྲི། ལྷག་མ། ཨོཾ་ཨཾ་ར་ཏི་བཛྲ་སོགས་ལ། བཛྲ་གྱི་དོད་དུ་ཙཀྲ་སྦྱར་རོ། །རྣམ་སྣང་གི་ལྷ་ཚོགས་སོ། །ཧཱུཾ་བཛྲ་གུ་ཧྱ་སིདྡྷི་པ་ར་མ་ཡོ་གཱི་ཤྭི་རི་ཧྲཱིཿ ཧཱུཾ་ཧཱུཾ་བཛྲ་ཙཎྜེ་ཤྭ་རི་ཁ་ཊྭཱཾ་གི་མཧཱ་བཛྲ་ཀ་པཱ་ལ་མཱ་ལཱ་མ་ཀུ་ཊ་རུ་ལུ་རུ་ལུ་ཧཱ། ཧཱུཾ་བཛྲ་ནཱ་རཱ་ཡོ་ནི་ཛྫིཿ ཧཱུཾ་བཛྲ་པ་ཏྭ་རེ་ཛིཿ ཧཱུཾ་བཛྲ་པྲ་ཧ་ར་མཊ། ཧཱུཾ་བཛྲ་ཤུ་ལ་གྲི་བྷིནྡ་མཊ། ཧཱུཾ་བཛྲ་ཀོ་ཤེ་ཚིནྡྷ་མཊ། ཧཱུཾ་བཛྲ་བི་མ་ལ་པཱ་ཤེ་མཊ། ཧེ་བཛྲ་ར་ཏི་མཾ། བཾ་མཧཱ་རཏ་བཛྲི་ཧོཿ ཨོཾ་བཛྲ་ལོ་ཙ་ནེ་ཡཾ། རཾ་མཧཱ་ཤྲཱི་བཛྲེ་ཧཱིཿ ཨ་བཛྲ་པུཥྤེ། སོགས་བརྒྱད་ནི་རྡོ་རྗེ་སེམས་དཔའི་སྐབས་བཞིན་ནོ། །ཧེ་རུ་ཀའི་ལྷ་ཚོགས་རྣམས་སོ། །ཨོཾ་སརྦ་ཏ་ཐཱ་ག་ཏ་པདྨཱ་ཛྫཿ ཧཱུཾ་བཛྲ་
པདྨི་ཧེ་པདྨི་པདྨི་བཾ། ཧོཿཔདྨ་མ་ཎི་རཱ་ཛི། ཧཱུཾ་པདྨ་ཎྜེ་ཤྭ་རི་ཧཱུཾ་ཕཊ། ཧེ་མཧཱ་བི་ཤྭ་པདྨ་མཱུརྟེ་སིདྡྷྱཾ་ཧཱུཾ་ཕཊ། ཧྲཱིཿཔདྨི་པདྨ་ཧཱུཾ་ཨཱཾ། ཧོཿཔདྨི་བི་ཤྭ་ཀྲ་མཱ་ཀྲ་མཱ་ཧཱཾ་ཛྫཿ ཞེས་སོ། །ཧེ་ར་ཏི་པདྨི་བི་ལ་སི་ནི་ཏྲཊ། ཧེ་ར་ཏི་པདྨ་གི་ཏེ་ཏེ་ཏེ། ཧེ་ར་ཏི་པདྨ་ཧཱ་སྱ་ཧཱ་ས་བཾ། ཧེ་ར་ཏི་པདྨ་ནྲྀ་ཏྱ་བི་པ་བ་ཛཾ། ལྷག་མ་བརྒྱད་ནི་སྔར་དང་མཚུངས་པ་ལས། བཛྲ་གྱི་གནས་སུ་པདྨའོ། །པདྨ་གར་དབང་གི་ལྷ་ཚོགས་སོ། །བཛྲ་སཏྭ་ཛཿ བཛྲ་རཏྣ་ཧཱུཾ། བཛྲ་དྷརྨྨ་བཾ། བཛྲ་ཀརྨྨ་ཧོཿ ཨོཾ་པྲ་ཏི་བཛྲི་ནི་ཕཊ། ཨོཾ་བཛྲི་པྲཱི་ཏི་ཧྲཱིཿ ཨོཾ་ཛིཾ་ར་མི་ནི་ཧོཿ ཨོཾ་མཧཱ་མ་ཧོ་ཧཱཾ། ལྷག་མ་བཅུ་གཉིས་ནི་རྡོ་རྗེ་སེམས་དཔའི་སྐབས་བཞིན་ལས།བཛྲ་གྱི་གནས་སུ་རཏྣ་སྦྱར་བའོ། །རྡོ་རྗེ་ཉི་མའི་ལྷ་ཚོགས་སོ། ཨོཾ་བི་ཤཱ་བཛྲ་དྷརྨྨ་ཛྲི། ཨོཾ་བི་ཤྭ་བཛྲ་སཏྭ་ཧཿ ལྷག་མ་གཞན་དང་མཚུངས་ཏེ། རྟ་མཆོག་གི་ལྷ་ཚོགས་སོ། །ལུགས་འདིའི་གཏོར་ཆོག་རྒྱས་པ་ནི། ཡན་ལག་བཞི་པའི་གཞུང་དང་བླ་མ་གོང་མའི་ཡི་གེ་རྣམས་ལས་ཤེས་པར་བྱ་ཞིང༌། མཆོད་པའི་སྤྲོས་པ་རྒྱས་པ་རྣམས་ཀྱང་གཞུང་དག་ལས་ཤེས་པར་བྱའོ། །ཡང་ཉེར་མཁོའི་ཡན་ལག་ཏུ་འགྱུར་ན་ནི། གཏོར་ཆོག་རྒྱས་པ་སོགས་སུ་འབྲི་བར་ཡང་སྤྲོའོ། །རིམ་པ་འདི་ཉིད་ཀྱི་རིགས་སོ་སོའི་དཀྱིལ་འཁོར་རིགས་རྐྱང་གི་སྒྲུབ་ཐབས་རྣམས་ཀྱང་རྟོགས་པར་འགྱུར་ལ། ཅི་སྟེ་ཞུ་བ་གླུས་བསྐུལ་དང༌། རྒྱུ་འབྲས་རྡོ་རྗེ་འཛིན་པའི་དབྱེ་བ་མི་བྱེད་པའི་ལུགས་ལ་མོས་ན། དཔལ་མཆོག་དང་པོའི་སེམས་ཉིད་རྒྱུ་རྡོ་རྗེ་འཛིན་པའི་དོད་ཡིན་ལ། མངོན་བྱང་ལྔ་ལས་འབྲས་བུའི་ལྷ་སོ་སོ་བསྐྱེད་པར་བྱའོ། །རིགས་བསྡུས་ཀྱི་སྐབས་འདིར། འབྲས་བུ་རྡོ་རྗེ་འཛིན་པ་དབུས་སུ་གང་བཀོད་པ་གཙོ་བོ་དེས། དཀྱིལ་འཁོར་མཐའ་དག་སྤྲོ་བར་བྱས་ཀྱང་རུང་བ་ཡིན་མོད་
རིགས་རྐྱང་སོ་སོའི་ཆོ་ག་ཞོར་ལ་ཤེས་པར་འགྱུར་བའི་དགོས་པ་ཡོད་པས་དཀྱུས་ཉིད་ལེགས་སོ། །ཤིན་ཏུ་རྨད་བྱུང་བླ་མེད་ཆོས་འདི་ནི། །དུས་མཐའི་སྔགས་ལས་མིང་ཡང་ཐོས་པར་དཀོན། །སྐྱེ་བོ་བློ་དམན་འདི་ལ་གཙོར་བྱེད་ཉུང༌། །དེ་ཕྱིར་གོ་སླ་ཤིན་ཏུ་ཉུང་ངུར་སྦྱར། །གསར་རྙིང་གཞུང་འགྲེལ་དོན་ཀུན་འདི་ལ་འདུས། །དེ་སླད་ཟབ་ཅིང་རྒྱ་ཆེའི་རྒྱུད་སྡེ་ལ། །འཇུག་པར་འགྱུར་སྙམ་འདི་བྲིས་དགེ་བ་ཡིས། །མཁའ་མཉམ་འགྲོ་ཀུན་བདེ་ཆེན་གནས་ཐོབ་ཤོག །ཅེས་པ་དཔལ་སངས་རྒྱས་ཐམས་ཅད་མཉམ་པར་སྦྱོར་བ་མཁའ་འགྲོ་མ་སྒྱུ་མ་བདེ་མཆོག་གི་སྒྲུབ་ཐབས་དགའ་བདེ་རྒྱ་མཚོ་ཞེས་བྱ་བ་འདི། རྒྱལ་ཁམས་པ་ཏཱ་ར་ནཱ་ཐས་ཉེ་བར་སྦྱར་བའོ།། །།མངྒ་ལཾ།། གཅིག་ཞུས་དག །
ཤོག་སྟོང་།