འཁོར་ལོ་སྡོམ་པའི་ལྷ་ཚོགས་ཀྱི་བཀྲ་ཤིས་དགེ་ལེགས་རྒྱ་མཚོ།
འཁོར་ལོ་སྡོམ་པའི་ལྷ་ཚོགས་ཀྱི་བཀྲ་ཤིས་དགེ་ལེགས་རྒྱ་མཚོ་ཞེས་བྱ་བ་བཞུགས།
ཨོཾ་སྭ་སྟི། བདེ་ལེགས་སུ་གྱུར་ཅིག །དཔལ་ལྡན་ཕྱོགས་ཀུན་དགེ་ལེགས་སྦྱིན་མཛད་པ། །མཁའ་དབྱིངས་རབ་གང་རྒྱལ་བ་སྲས་བཅས་དང༌། །བླ་མ་དཀྱིལ་འཁོར་ལྷ་ཚོགས་ཐམས་ཅད་ཀྱིས། །ཤིན་ཏུ་དགེས་པའི་སྤྱན་ནི་རབ་ཕྱེ་ནས། ཁ་ཅིག་མེ་ཏོག་ཆར་འབེབས་རྔ་ཆེན་བརྡུང༌། །གཞན་དག་བཀྲ་ཤིས་གླུ་ལེན་མཆོད་པ་བྱེད། ཁྲོ་བོ་ལྷ་མོར་བཅས་པས་བར་ཆད་བསྲུང༌། ཁྱེད་ལ་གནས་འདིར་རྟག་ཏུ་དགེ་ལེགས་སྩོལ། །དཔལ་ལྡན་རྡོ་རྗེ་ཐེག་པའི་ལམ་བཟང་མཆོག་གིས་འགྲོ་བ་སྨིན་ཞིང་གྲོལ་བར་མཛད་པ་རྒྱལ་བ་ཐམས་ཅད་འདུས་པའི་ངོ་བོ་འཁོར་ལོའི་མགོན་པོ་དཀྱིལ་འཁོར་ཐམས་ཅད་ཀྱི་བདག་པོ་རྩ་བརྒྱུད་བླ་མ་དམ་པ་རྣམས་ལ་དགེ་ལེགས་ཀྱི་མཚན་མ་ཇི་སྙེད་མངའ་བའི་བཀྲ་ཤིས་དམ་པ་དེས། སྐལ་པ་དང་ལྡན་པ་གང་དག་འདིར་
འཁོད་པ་རྣམས་གཙོ་བོར་གྱུར་པའི་ཁམས་གསུམ་གྱི་སྐྱེ་འགྲོ་ཐམས་ཅད་སྲིད་པ་དང་ཞི་བའི་ཕུན་ཚོགས་ཀྱི་དཔལ་ལ་གནས་པས་ལྷག་པར་སྐྱོང་བར་གྱུར་ཅིག །རྒྱལ་བ་དབང་ཕྱུག་བརྒྱད་ལྡན་འཁོར་ལོ་སྡོམ། རྣལ་འབྱོར་མ་དཔལ་གསང་བའི་བདག་པོ་དང༌། །ས་ར་ཧ་དང་ཀླུ་སྒྲུབ་ཤཱ་བཱ་རི། །ལཱུ་ཡི་པ་དང་ད་རི་ཌེངྒེ་པ། །རྡོ་རྗེ་དྲིལ་བུ་པ་དང་རུས་སྦལ་ཞབས། །ཛཱ་ལནྡྷ་ར་ནག་པོ་སྤྱོད་པ་དང༌། །གུ་ཧྱ་རྣམ་རྒྱལ་ཞབས་དང་ཏིལླི་པ། །ནཱ་རོ་པ་སོགས་བླ་མ་དམ་པ་ལ། །བྱིན་རླབས་དགེ་ལེགས་མཚན་མ་ཅི་མངའ་བས། །བླ་མ་དམ་པའི་རྣམ་ཐར་ཇི་ལྟ་བ། །འཛིན་ཞིང་རིམ་གཉིས་ལམ་གྱིས་མཆོག་གྲུབ་ནས། །གསང་སྔགས་བསྟན་པ་རྒྱས་པའི་བཀྲ་ཤིས་ཤོག །ཐར་པ་ཆེན་པོ་གཞལ་ཡས་ཁང་གི་སྙིང་པོའི་སྣ་ཚོགས་པདྨའི་ལྟེ་བར་
ཉིན་མོར་བྱེད་པ་ལ། འཇིགས་བྱེད་དང་དུས་མཚན་གྱི་གདན་ལ། མཆོག་ཏུ་མཛེས་པའི་མཚན་དང་དཔེ་བྱད་རབ་ཏུ་འབར་བ་ཨིནྡྲ་ནཱི་ལིའི་ལྷུན་པོ་ལ་ཉིན་མོར་བྱེད་པའི་འོད་ཟེར་འབུམ་གྱིས་འཁྱུད་པ་ལྟ་བུ་དབང་ཕྱུག་བརྒྱད་དང་ཡོན་ཏན་བརྒྱད་དང་ཡན་ལག་བདུན་དང་རོ་མྱང་བརྒྱད་ལ་སོགས་པ་ཡོན་ཏན་ཐམས་ཅད་དང་ལྡན་པའི་སྟོན་པ་ཕུན་སུམ་ཚོགས་པ་བཅོམ་ལྡན་འདས་དཔལ་ཧེ་རུ་ཀ་འཁོར་ལོ་བདེ་མཆོག་ཡབ་ཡུམ་ལ་ཤིན་ཏུ་ངོ་མཚར་བའི་དགེ་ལེགས་ཀྱི་མཚན་མ་ཇི་སྙེད་མངའ་བའི་བཀྲ་ཤིས་དམ་པ་དེས་སྐལ་པ་དང་ལྡན་པ་གང་དག་འདིར་འཁོད་པ་རྣམས་གཙོ་བོར་གྱུར་པའི་ཁམས་གསུམ་གྱི་སྐྱེ་འགྲོ་ཐམས་ཅད་སྲིད་པ་དང་ཞི་བའི་ཕུན་ཚོགས་ཀྱི་དཔལ་ལ་གནས་པས་ལྷག་པར་སྐྱོང་བར་གྱུར་ཅིག །བཀྲ་ཤིས་གང་ཞིག་ཆོས་ཀྱི་དབྱིངས་ལས་ལེགས་བྱུང་བའི། །ཧེ་རུ་ཀ་དཔལ་འཇིགས་བྱེད་རྒྱལ་པོ་འབར་བའི་སྐུ། །ཤེས་རབ་ཕག་མོའི་པདྨར་རྡོ་རྗེ་རོལ་མཛད་པའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག ། བདེ་བའི་མཆོག་གྱུར་ཧེ་རུ་ཀ་དཔལ་དང༌། །བདེ་སྟེར་ཤེས་རབ་མ་མཆོག་རྣལ་འབྱོར་མ། །བདེ་སྟོང་དཔྱིད་ཐིག་ཟུང་འཇུག་སྦྱོར་བའི་མཆོག །བདེ་ཆེན་འཁོར་ལོ་སྡོམ་པ་ཡབ་ཡུམ་ལ། །དགེ་ལེགས་མཚན་མ་ཇི་སྙེད་མངའ་བ་དེས། །མི་མཐུན་ཀུན་ཞི་ཕུན་ཚོགས་དཔལ་འབྱོར་རྒྱས། །ཆོས་ཀུན་ལྷན་སྐྱེས་རབ་འབྱམས་སྡོམ་པའི་མཆོག །རང་གཞན་ཕན་བདེ་རྒྱས་པའི་བཀྲ་ཤིས་ཤོག །ཐུབ་པ་ཆེན་པོའི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་སྙིང་པོ་རབ་དང་མཆོག་ཏུ་གྱུར་པ། རྣལ་འབྱོར་མའི་རྒྱུད་བྱེ་བ་ཕྲག་བཅུ་དྲུག་གི་
གཙོ་བོ་གྲུབ་པའི་རྟོག་པ་རྨད་དུ་བྱུང་བ། དཔའ་བོ་ཆེན་པོ་བཀླགས་པས་འགྲུབ་པ། ཐམས་ཅད་དུ་གཞན་གྱིས་མི་ཐུབ་པ་གདོད་ནས་གྲུབ་བརྒྱུད་ཐམས་ཅད་ཀྱི་བླ་མ། དཔལ་ཧེ་རུ་ཀ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་རྩ་བའི་རྒྱུད་དང༌། བཤད་པའི་རྒྱུད་དང༌། ཡན་ལག་གི་རྒྱུད་དང་བཅས་པ་ལ་ཤིན་ཏུ་ངོ་མཚར་བའི་དགེ་ལེགས་ཀྱི་མཚན་མ་ཇི་སྙེད་མངའ་བའི་བཀྲ་ཤིས་དམ་པ་དེས། སྐལ་པ་དང་ལྡན་པ་གང་དག་འདིར་འཁོད་པ་རྣམས་གཙོ་བོར་གྱུར་པའི་ཁམས་གསུམ་གྱི་སྐྱེ་འགྲོ་ཐམས་ཅད་སྲིད་པ་དང་ཞི་བའི་ཕུན་ཚོགས་ཀྱི་དཔལ་ལ་གནས་པས་ལྷག་པར་སྐྱོང་བར་གྱུར་ཅིག །བདེ་བ་ཆེ་མཆོག་རབ་འབྱམས་རྟོགས་པ་དང༌། །དབང་དང་རིམ་གཉིས་མཐའ་ཡས་རབ་སྟོན་པ། །བརྒྱད་ཁྲི་བཞི་སྟོང་ཆོས་ཀྱི་སྙིང་པོ་ནི། །དཔལ་ལྡན་འཁོར་ལོ་སྡོམ་པའི་རྒྱུད་སྡེ་ལ། །དགེ་ལེགས་མཚན་མ་ཇི་སྙེད་མངའ་བ་དེས། །མི་མཐུན་ཀུན་ཞི་ཕུན་ཚོགས་དཔལ་འབྱོར་རྒྱས། །ཆོས་ཀུན་ལྷན་སྐྱེས་རབ་འབྱམས་སྡོམ་པའི་མཆོག །རང་གཞན་ཕན་བདེ་རྒྱས་པའི་བཀྲ་ཤིས་ཤོག །རབ་འབྱམས་ནམ་མཁའི་མཐའ་ཀླས་པར་སྒྲུབ་པ་པོ་ལ་དངོས་སྒྲུབ་རྩོལ་ཞིང་གཙོ་བོ་ཉིད་དང་ཐུགས་ཀྱི་ཡེ་ཤེས་མི་གཉིས་པ། དཔའ་བོ་ཆེན་པོ་གཟུགས་རྡོ་རྗེ་དང༌། དཔའ་བོ་ཆེན་པོ་ཚོར་བ་རྡོ་རྗེ་དང༌། དཔའ་བོ་ཆེན་པོ་འདུ་ཤེས་རྡོ་རྗེ་དང༌། དཔའ་བོ་ཆེན་པོ་འདུ་བྱེད་རྡོ་རྗེ་དང༌། དཔའ་བོ་ཆེན་པོ་རྣམ་ཤེས་རྡོ་རྗེ་དང༌། དཔའ་བོ་ཆེན་པོ་ཆོས་ཀྱི་དབྱིངས་དེ་བཞིན་གཤེགས་པ་ཐམས་ཅད་ཀྱི་གཙོ་བོ་རྡོ་རྗེ་དང༌། དཔའ་བོ་ཆེན་པོ་མིག་རྡོ་རྗེ་དང༌། དཔའ་བོ་ཆེན་པོ་རྣ་བ་རྡོ་རྗེ་དང༌།
དཔའ་བོ་ཆེན་པོ་སྣ་རྡོ་རྗེ་དང༌། དཔའ་བོ་ཆེན་པོ་ལྕེ་རྡོ་རྗེ་དང༌། དཔའ་བོ་ཆེན་པོ་ལུས་རྡོ་རྗེ་དང༌། དཔའ་བོ་ཆེན་པོ་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་རྡོ་རྗེ་དང༌། རྣལ་འབྱོར་མ་ཆེན་མོ་ལྟུང་བྱེད་མ་དང༌། རྣལ་འབྱོར་མ་ཆེན་མོ་གསོད་བྱེད་མ་དང༌། རྣལ་འབྱོར་མ་ཆེན་མོ་འགུགས་བྱེད་མ་དང༌། རྣལ་འབྱོར་མ་ཆེན་མོ་པདྨ་གར་གྱི་དབང་ཕྱུག་མ་དང༌། རྣལ་འབྱོར་མ་ཆེན་པོ་པདྨ་དྲ་བ་ཅན་དང༌། གཞན་ཡང་རབ་འབྱམས་ཞིང་ཀུན་གྱི་རྡུལ་སྙེད་དང་མཉམ་པའི་ཡུམ་བཞི་དང་གནས་གསུམ་གྱི་དཔའ་བོ་མཁའ་འགྲོ་རྣམས་དང༌། མ་མོ་རྣམས་དང༌། གོ་ཆའི་དཔའ་བོ་དང་རྣལ་འབྱོར་མ་རྣམས་ཀྱི་རིགས་སུ་གནས་པ་ཐམས་ཅད་ཀྱང་ཧཱུཾ་དང་ཕཊ་ཀྱི་སྒྲ་སྒྲོགས་པ་མཛེས་པའི་གར་སྣ་ཚོགས་པ་བྱེད་ཅིང༌། རང་གི་དམ་ཚིག་དང་འཁྱུད་པ་དང་ཙུམ་པ་སོགས་སྙིང་རྗེ་ཆེན་པོའི་ཉམས་ཡོངས་སུ་རྫོགས་པར་མཛད་ཅིང་ཕུང་པོ་དང་ཁམས་དང་སྐྱེ་མཆེད་དང༌། རྩ་དང༌། ཁམས་དང༌། རླུང་བྱིན་གྱིས་རླབས་ནས། ལམ་གྱི་གྲོགས་མཛད་པའི་དཔའ་བོ་དང་རྣལ་འབྱོར་མ་རྣམས་ལ་ཤིན་ཏུ་ངོ་མཚར་བའི་དགེ་ལེགས་ཀྱི་མཚན་མ་ཇི་སྙེད་མངའ་བའི་བཀྲ་ཤིས་དམ་པ་དེས་སྐལ་པ་དང་ལྡན་པ་གང་དག་འདིར་འཁོད་པ་རྣམས་གཙོ་བོར་གྱུར་པའི་ཁམས་གསུམ་གྱི་སྐྱེ་འགྲོ་ཐམས་ཅད་སྲིད་པ་དང་ཞི་བའི་ཕུན་ཚོགས་ཀྱིས་དཔལ་ལ་གནས་པའི་ལྷག་པར་སྐྱོང་བར་གྱུར་ཅིག ཕུང་ཁམས་སྐྱེ་མཆེད་བྱིན་གྱིས་རློབས་པའི་ལྷ། །གཟུགས་ཀྱི་རྡོ་རྗེ་ལ་སོགས་ལྷ་རྣམས་དང༌། །བགེགས་ཀུན་འཇོམས་ཤིང་ཏིང་འཛིན་དམ་པ་ལས། །གཡོ་བ་མེད་མཛད་གོ་ཆའི་ལྷ་རྣམས་ལ། །དགེ་ལེགས་མཚན་མ་ཇི་སྙེད་མངའ་བ་དེས། །མི་མཐུན་
ཀུན་ཞི་ཕུན་ཚོགས་དཔལ་འབྱོར་རྒྱས། །ཆོས་ཀུན་ལྷན་སྐྱེས་རབ་འབྱམས་སྡོམ་པའི་མཆོག །རང་གཞན་ཕན་བདེ་རྒྱས་པའི་བཀྲ་ཤིས་ཤོག །བཀྲ་ཤིས་གང་ཞིག་སྣ་ཚོགས་པདྨའི་འདབ་མ་ལ། །རིགས་ཀྱྀ་ཡུམ་བཞི་དཔའ་བོའི་ཕྱོགས་བཞིའི་ཞལ་ལ་གཟིགས། །པདྨའི་མུ་ཁྱུད་གྲི་གུག་ཕྲེང་བས་རྣམ་པར་མཛེས། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །མཁའ་འགྲོ་ལཱ་མ་དུམ་སྐྱེས་གཟུགས་ཅན་མ། །དམ་ཚིག་ཅན་འདུས་བརྩེ་བའི་རྗེས་བཟུང་ནས། །ཡོན་ཏན་མ་ལུས་སྐྱེད་པའི་གྲོགས་མཛད་མ། །བསམ་པ་ཙམ་གྱིས་བདེ་སྟེར་ཡུལ་བཞི་ལ། །དགེ་ལེགས་མཚན་མ་ཇི་སྙེད་མངའ་བ་དེས། །མི་མཐུན་ཀུན་ཞི་ཕུན་ཚོགས་དཔལ་འབྱོར་རྒྱས། །ཆོས་ཀུན་ལྷན་སྐྱེས་རབ་འབྱམས་སྡོམ་པའི་མཆོག །རང་གཞན་ཕན་བདེ་རྒྱས་པའི་བཀྲ་ཤིས་ཤོག །བཀྲ་ཤིས་གང་ཞིག་མཚམས་ཀྱི་པདྨའི་འདབ་མ་ལ། །བྱང་ཆུབ་སེམས་དང་ཙན་དན་དྲི་ཆེན་གུར་གུམ་ཆུས། །གང་བའི་སྣོད་བཞིས་དཔའ་བོའི་ཞལ་ལ་རེག་པར་སྤྱོད། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །ཡེ་ཤེས་བདུད་རྩི་ལྔ་ཡིས་རྣམ་གང་བ། །ཐབས་ཀྱི་རང་བཞིན་རྡོ་རྗེ་དམ་ཚིག་སྣོད། །རབ་ཏུ་བསྟེན་ན་ཡེ་ཤེས་ལུས་སུ་འགྱུར། །བྱང་སེམས་འཕེལ་བའི་དངོས་གྲུབ་སྦྱིན་རྣམས་ལ། །དགེ་ལེགས་མཚན་མ་ཇི་སྙེད་མངའ་བ་དེས། །མི་མཐུན་ཀུན་ཞི་ཕུན་ཚོགས་དཔལ་འབྱོར་རྒྱས། །ཆོས་
ཀུན་ལྷན་སྐྱེས་རབ་འབྱམས་སྡོམ་པའི་མཆོག །རང་གཞན་ཕན་བདེ་རྒྱས་པའི་བཀྲ་ཤིས་ཤོག །བཀྲ་ཤིས་གང་ཞིག་ནམ་མཁའི་གནས་ན་ལེགས་སྤྱོད་པའི། །འཁོར་ལོ་སྔོན་པོ་རྩིབས་བརྒྱད་མུ་ཁྱུད་རྡོ་རྗེའི་ཕྲེང༌། །གནས་ལ་སོགས་པར་དཔའ་བོ་དཔའ་མོ་གཉིས་མེད་རོལ། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །ཐུགས་ཀྱི་རིགས་གྱུར་ཕོ་ཉ་གསུམ་འདུས་ལས། །འོད་གསལ་དགའ་སྟོན་སྦྱིན་མཛད་ནམ་མཁའ་སྤྱོད། །གནས་དང་ཉེ་གནས་དཔའ་བོ་ལྷ་མོ་ལ། །དགེ་ལེགས་མཚན་མ་ཇི་སྙེད་མངའ་བ་དེས། །མི་མཐུན་ཀུན་ཞི་ཕུན་ཚོགས་དཔལ་འབྱོར་རྒྱས། །ཆོས་ཀུན་ལྷན་སྐྱེས་རབ་འབྱམས་སྡོམ་པའི་མཆོག །རང་གཞན་ཕན་བདེ་རྒྱས་པའི་བཀྲ་ཤིས་ཤོག །བཀྲ་ཤིས་གང་ཞིག་ས་སྟེང་གནས་ན་ལེགས་སྤྱོད་པའི། །འཁོར་ལོ་དམར་པོ་རྩིབས་བརྒྱད་མུ་ཁྱུད་པདྨའི་འཕྲེང༌། །ཞིང་ལ་སོགས་པར་དཔའ་བོ་དཔའ་མོར་གཉིས་མེད་རོལ། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །གསུང་གི་རིགས་གྱུར་ཕོ་ཉ་གསུམ་འདུས་ལས། །འོད་གསལ་དགའ་སྟོན་སྦྱིན་མཛད་ས་སྟེང་སྤྱོད། །ཞིང་དང་འདུན་རྟོག་ཉེ་བར་བཅས་པ་ཡི། །དཔའ་བོ་ལྷ་མོར་དགེ་ལེགས་ཅི་མངའ་བས། །མི་མཐུན་ཀུན་ཞི་ཕུན་ཚོགས་དཔལ་འབྱོར་རྒྱས། །ཆོས་ཀུན་ལྷན་སྐྱེས་རབ་འབྱམས་སྡོམ་པའི་མཆོག །རང་གཞན་ཕན་བདེ་རྒྱས་པའི་བཀྲ་ཤིས་ཤོག །བཀྲ་ཤིས་གང་ཞིག་ས་འོག་གནས་ན་ལེགས་སྤྱོད་པའི། །འཁོར་
ལོ་དཀར་པོ་རྩིབས་བརྒྱད་མུ་ཁྱུད་འཁོར་ལོའི་འཕྲེང༌། །འདུ་ལ་སོགས་པར་དཔའ་བོ་དཔའ་མོ་གཉིས་མེད་རོལ། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །སྐུའི་རིགས་གྱུར་ཕོ་ཉ་གསུམ་འདུས་ལས། །འོད་གསལ་དགའ་སྟོན་སྦྱིན་མཛད་ས་འོག་སྤྱོད། །འདུ་དང་དུར་ཁྲོད་ཉེ་བར་བཅས་པ་ཡི། །དཔའ་བོ་ལྷ་མོར་དགེ་ལེགས་ཅི་མངའ་བས། །མི་མཐུན་ཀུན་ཞི་ཕུན་ཚོགས་དཔལ་འབྱོར་རྒྱས། །ཆོས་ཀུན་ལྷན་སྐྱེས་རབ་འབྱམས་སྡོམ་པའི་མཆོག །རང་གཞན་ཕན་བདེ་རྒྱས་པའི་བཀྲ་ཤིས་ཤོག །བཀྲ་ཤིས་གང་ཞིག་དཀྱིལ་འཁོར་སྒོ་བཞི་མཚམས་རྣམས་སུ། ཁཱ་གདོང་ལ་སོགས་མ་མོ་ཡིད་འཕྲོག་གཟུགས་གཉིས་ལྡན། །ཐུགས་རྗེས་འགྲོ་བའི་དོན་མཛད་གདུག་པ་ཀུན་འདུལ་བའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །རྟ་ཡི་རྒྱལ་པོའི་རིགས་མཆོག་ལས་ཀུན་དང༌། །དངོས་གྲུབ་ཐམས་ཅད་ཐོགས་པ་མེད་པར་བསྒྲུབ། །ལམ་གྱི་བར་གཅོད་གདུག་པ་ཐམས་ཅད་འདུལ། །རབ་སོང་གནས་བརྒྱད་ཕོ་ཉས་བདེ་སྟེར་མ། །རྡོ་རྗེ་མ་མོར་དགེ་ལེགས་ཅི་མངའ་བས། །མི་མཐུན་ཀུན་ཞི་ཕུན་ཚོགས་དཔལ་འབྱོར་རྒྱས། །ཆོས་ཀུན་ལྷན་སྐྱེས་རབ་འབྱམས་སྡོམ་པའི་མཆོག །རང་གཞན་ཕན་བདེ་རྒྱས་པའི་བཀྲ་ཤིས་ཤོག །དེ་ལྟར་དཀོན་མཆོག་རིན་ཆེན་རྣམ་པ་གསུམ་གྱི་བཞུགས་པའི་གནས་ཕུན་སུམ་ཚོགས་པ་དཀྱིལ་འཁོར་ཆེན་པོ་བཞི་ལ་གནས་པའི་རིའི་རྒྱལ་པོ་ལྷུན་པོ་རིན་པོ་ཆེ་
སྣ་ཚོགས་ལས་གྲུབ་པའི་སྟེང་ན་རྡོ་རྗེ་རིན་པོ་ཆེའི་གཞལ་ཡས་ཁང་རྒྱན་དང་མཚན་ཉིད་ཐམས་ཅད་རྫོགས་པ་ཉི་མ་དང་ཟླ་བའི་འོད་ལྟར་འབར་བའི་དཔག་ཚད་བྱེ་བར་ཁྱབ་པ། དྲིལ་བུ་དཔྱངས་པའི་སྒྲ་ལས་ཡན་ལག་དགུ་དང་ལྡན་པ། རྡོ་རྗེ་ཐེག་པའི་ཆོས་ཀྱི་འཁོར་ལོ་གཞོམ་དུ་མེད་པའི་དབྱངས་ལ་འཇུག་པའི་སྒྲ་སྒྲོག་པ། སྲུང་བའི་འཁོར་ལོས་བསྐོར་བའི་ཕྱིར་རོལ་སྣ་ཚོགས་པའི་ལྷ་དང༌། ཀླུ་དང༌། ཕྱོགས་སྐྱོང་བ་དང༌། ཞིང་སྐྱོང་བ་དང༌། འབྱུང་པོ་རྣམས་དང་མཁའ་འགྲོ་དང༌། མཁའ་འགྲོ་ཕཻཾ་ཞེས་པ་དང༌། ཨ་ལ་ལའི་སྒྲ་སྒྲོགས་པ། དྲིལ་བུ་དང༌། ཅང་ཏེའུའི་སྒྲ་དང་མཆོད་རྫས་རྣམས་ཀྱིས་གང་བའི་མཆོག་ཏུ་རྨད་དུ་བྱུང་བ་ཆེན་པོ་དང་བཅས་པ་ལ་ཤིན་ཏུ་ངོ་མཚར་བའི་དགེ་ལེགས་ཀྱི་མཚན་མ་ཇི་སྙེད་མངའ་བའི་བཀྲ་ཤིས་དམ་པ་དེས། སྐལ་པ་དང་ལྡན་པ་གང་དག་འདིར་འཁོད་པ་རྣམས་གཙོ་བོར་གྱུར་པའི་ཁམས་གསུམ་གྱི་སྐྱེ་འགྲོ་ཐམས་ཅད་སྲིད་པ་དང་ཞི་བའི་ཕུན་ཚོགས་ཀྱི་དཔལ་ལ་གནས་པས་ལྷག་པར་སྐྱོང་བར་གྱུར་ཅིག།བཀྲ་ཤིས་གང་ཞིག་དྲན་པ་ཉེར་བཞག་བཞི་རྣམས་དང༌། ཡང་དག་སྤོང་དང་རྫུ་འཕྲུལ་རྐང་པ་དབང་པོ་སོགས། བྱང་ཆུབ་ཕྱོགས་ཆོས་སུམ་ཅུ་རྩ་བདུན་ཡོངས་རྫོགས་པའི། བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག ། བཀྲ་ཤིས་གང་ཞིག་རིན་ཆེན་ཕ་གུས་མཛེས་པའི་སྟེང༌། །འདོད་པའི་ཡོན་ཏན་ལྔས་ནི་རབ་ཏུ་བརྒྱན་གྱུར་ཅིག །མུ་ཏིག་ཉི་ཟླ་རིན་ཆེན་གསེར་གྱི་དྲིལ་བུ་དཔྱངས། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །བཀྲ་ཤིས་
གང་ཞིག་རྟ་བབས་པདྨ་འཁོར་ལོ་གདུགས། །རི་དྭགས་དང་བཅས་མཛེས་པའི་བ་དན་བཅུ་དྲུག་འཕྱར། །རླུང་གིས་བསྐྱོད་པའི་དྲིལ་བུ་ཆོས་ཀྱི་སྒྲ་སྒྲོགས་པ། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །བཅུ་གཉིས་ས་ཡི་རང་བཞིན་འཁོར་ལོ་ལྔ། །རབ་ཡངས་ཕོ་བྲང་དམ་པ་གཞལ་མེད་ཁང༌། །རིན་ཆེན་རྒྱན་རྣམས་ཀུན་ལྡན་སྣང་བྱེད་གཙོ། །བཅོམ་ལྡན་རྟག་པའི་རྣམ་པར་འཕྲུལ་པ་ལ། །དགེ་ལེགས་མཚན་མ་ཇི་སྙེད་མངའ་བ་དེས། །མི་མཐུན་ཀུན་ཞི་ཕུན་ཚོགས་དཔལ་འབྱོར་རྒྱས། །ཆོས་ཀུན་ལྷན་སྐྱེས་རབ་འབྱམས་སྡོམ་པའི་མཆོག །རང་གཞན་ཕན་བདེ་རྒྱས་པའི་བཀྲ་ཤིས་ཤོག །བཀྲ་ཤིས་གང་ཞིག་ཡོངས་བསྐོར་དུར་ཁྲོད་བརྒྱན་རྣམས་སུ། ཕྱོགས་སྐྱོང་བརྒྱད་དང་ཤིང་ཆེན་བརྒྱད་ནི་གནས་པ་ལ། །གདོང་བརྙན་དང་ལྡན་ཞིང་སྐྱོང་བརྒྱད་ནི་གནས་གྱུར་པའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །བཀྲ་ཤིས་གང་ཞིག་ཡེ་ཤེས་མེ་བརྒྱད་རབ་འབར་ཞིང༌། །བྱང་ཆུབ་སེམས་ཀྱི་སྤྲིན་ཆེན་བརྒྱད་ནི་འདུས་གྱུར་ལ། །དགའ་བོ་ལ་སོགས་ཀླུ་ཆེན་བརྒྱད་ནི་གནས་གྱུར་པའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །བཀྲ་ཤིས་གང་ཞིག་ཐུགས་རྗེའི་ཆུ་ཆེན་བརྒྱད་འབབ་ཅིང༌། །དཔའ་བོ་རྣལ་འབྱོར་མ་དང་མཁའ་འགྲོའི་ཚོགས་ཀྱི་གང༌། །ཤ་ཟ་སྲིན་པོ་འབྱུང་པོའི་ཚོགས་ཀྱི་ཉེར་བསྟེན་པ། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །བཀྲ་ཤིས་གང་ཞིག་རྡོ་རྗེའི་ས་གཞི་ར་བ་གུར། །
བླ་རེས་ཀུན་ནས་བྲིས་ཤིང་མདའ་ཡི་དྲ་བར་ལྡན། །ཡེ་ཤེས་མེ་དཔུང་འབར་བའི་ཀུན་ནས་ཡོངས་བསྐོར་བའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །རྣམ་ཤེས་བརྒྱད་ཀྱི་སྲིད་པ་སྤངས་པ་ལས། །དུར་ཁྲོད་བརྒྱད་པོ་ཉེར་སྤྱོད་ཡོངས་རྫོགས་པ། །དཀྱིལ་འཁོར་པ་ཀུན་མཆོད་ཅིང་ལས་ཀུན་སྒྲུབ། །སྒྲུབ་ལ་ཞི་རྒྱས་དབང་དང་དྲག་པོའི་ལས། །སྦྱིན་མཛད་དཔའ་བོ་མཁའ་འགྲོ་དཔག་ཡས་ཀྱིས། །མི་མཐུན་ཀུན་ཞི་ཕུན་ཚོགས་དཔལ་འབྱོར་རྒྱས། །ཆོས་ཀུན་ལྷན་སྐྱེས་རབ་འབྱམས་སྡོམ་པའི་མཆོག །རང་གཞན་ཕན་བདེ་རྒྱས་པའི་བཀྲ་ཤིས་ཤོག །མི་ཕྱེད་བསྲུང་བའི་འཁོར་ལོ་དམ་པ་ནི། །རྣམ་པར་ཐར་པ་བཞི་ཡི་བདག་ཉིད་ཅན། །བདུད་དཔུང་འཇོམས་པའི་ཡེ་ཤེས་མེ་ལྕེར་བཅས། །རྡོ་རྗེ་བསྲུང་འཁོར་རབ་ཏུ་བརྟན་པ་ལ། །དགེ་ལེགས་མཚན་མ་ཇི་སྙེད་མངའ་བ་དེས། །མི་མཐུན་ཀུན་ཞི་ཕུན་ཚོགས་དཔལ་འབྱོར་རྒྱས། །ཆོས་ཀུན་ལྷན་སྐྱེས་རབ་འབྱམས་སྡོམ་པའི་མཆོག །རང་གཞན་ཕན་བདེ་རྒྱས་པའི་བཀྲ་ཤིས་ཤོག །འདི་ལ་སྤྲོ་ན་རྫོགས་པ་འདི་བྱས་ལ། དེ་ནས་གཞན་ཡང་རྒྱལ་བའི་བཀའ་ལས་བྱུང་བའི་བཀྲ་ཤིས་ཞིག་གི་ཐོག་དྲངས་ཏེ་ཅི་རིགས་ཤིག་བྱའོ། །མི་སྤྲོ་ན་ཚིག་ལྷུག་རྣམས་བོར་ཏེ་ཚིགས་བཅད་ཁོ་ནས་ཀྱང་རུང་ངོ༌། །ཞེས་བྲམ་ཟེ་རིན་ཆེན་རྡོ་རྗེའི་བཀྲ་ཤིས་དང་སྤེལ་མར་སྦྱར་བ་འཁོར་ལོ་སྡོམ་པའི་ལྷ་ཚོགས་ཀྱི་བཀྲ་ཤིས་དགེ་ལེགས་རྒྱ་མཚོ་ཞེས་བྱ་བ་འདི་ཡང༌། ཏཱ་ར་ནཱ་ཐས་རང་ལོ་ཉེར་གསུམ་ལ་སྣྲོན་གྱི་ཟླ་བའི་ཡར་ཚེས་བཅུ་བཞི་ལ་སྦྱར་བའོ།། །།ཞུས་དགབཀྲ་ཤིས།།