དཔལ་འཁོར་ལོ་སྡོམ་པའི་ལག་མཆོད།
དཔལ་འཁོར་ལོ་སྡོམ་པའི་ལག་མཆོད་བཞུགས།
ཨོཾ་སྭ་སྟི། དཔལ་འཁོར་ལོ་སྡོམ་པ་ལ་ཕྱག་འཚལ་ལོ། །ལག་མཆོད་བྱེད་པར་འདོད་པས། ཆུ་གཉིས་ཉེར་སྤྱོད་ལྔ་ནང་མཆོད་མེ་ཏོག་ཕུད་ཕོར་ཟན་ཌཱ་མ་རུ་རྣམས་ངེས་པར་ཚོགས་པར་བྱས་པས། བདག་བསྐྱེད་སྔོན་དུ་འགྲོ་བས། ལག་པ་གཡོན་པ། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་ལག་མཐིལ་དུ་པདྨ་འདབ་མ་ལྔ་པ། ལྟེ་བ་དང་འདབ་མ་རྣམས་ལ་ཟླ་བའི་གདན། སོར་མོའི་ཚིགས་དབུས་མ་རྣམས་དང༌། སེན་མོ་རྣམས་གཅིག་ཏུ་འདུས་པ་ལ་པད་ཟླའི་གདན་རེ་རེ། དེ་ནས་ནང་མཆོད་ནས་གཡས་ཀྱི་སྲིན་ལག་གིས་བླང་སྟེ། ལག་མཐིལ་དང༌། སོར་མོའི་ཚིགས་དང༌། སེན་མོ་རྣམས་གཅིག་ཏུ་འདུས་པ་ལ་ཐིག་ལེ་བྱ་ཞིང༌། ཨོཾ་ཨོཾ་ཧ། ནས། ཨོཾ་ཕཊ་ཕཊ་ཀྱི་བར་ཚར་གཅིག་བརྗོད། ལག་མཐིལ་གྱི་པདྨའི་ལྟེ་བར། ཨོཾ་བཾ་དམར་མོ་རྡོ་རྗེ་ཕག་མོ་
མདུན་ནས་གཡོན་སྐོར་གྱི་འདབ་མ་ལྔ་ལ་རིམ་པས། ཧཾ་ཡོཾ་སྔོན་མོ༴ ནས། ཙཎྜི་ཀཱའི་ངོ་བོ། མཐེ་བོང་ལ་ཨོཾ་ཨོཾ་ཧ་དཀར་པོ་རྡོ་རྗེ་སེམས་དཔའ། འཛུབ་མོ་ལ་ཨོཾ་ན་མ་ཧི་སེར་པོ་རྣམ་པར་སྣང་མཛད། གུང་མོ་ལ་ཨོཾ་སྭཱཧཱ་ཧཱུཾ་དམར་པོ་པདྨ་གར་གྱི་དབང་ཕྱུག །སྲིན་ལག་ལ་ཨོཾ་བཽ་ཥ་ཊ་ཧེ་ནག་པོ་དཔལ་ཧེ་རུ་ཀ །མཐེའུ་ཆུང་ལ་ཨོཾ་ཧཱུཾ་ཧཱུཾ་ཧོ་དམར་སེར་རྡོ་རྗེ་ཉི་མ། སེན་མོ་རྣམས་གཅིག་ཏུ་འདུས་པའི་ངོས་ལ་ཨོཾ་ཕཊ་ཕཊ་ཧཾ་ལྗང་ཁུ་རྟ་མཆོག་གི་ངོ་བོ། ལག་པའི་ས་ཁམས་སངས་རྒྱས་སྤྱན་མ། ཆུ་ཁམས་མཱ་མ་ཀི མེ་ཁམས་གོས་དཀར་མོ། རླུང་ཁམས་སྒྲོལ་མ། ནམ་མཁའི་ཁམས་པདྨ་དྲ་བ་ཅན་ནོ། །སླར་ཡང་དེ་ཐམས་ཅད་ཀྱི་གནས་སུ་ནང་མཆོད་གཏོར་ཞིང༌། ཨོཾ་ཨཱཿཧཱུཾ། ལན་བཅུ་གཉིས་བརྗོད།
ལག་པའི་མཁྲིག་མའི་ཚིགས་ལག་མཐིལ་གྱི་རྒྱབ་ངོས་དང་བཅས་པར་སྐད་ཅིག་ཙམ་གྱིས་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་གྲུབ་པར་གྱུར་པ་ནི། གཞལ་ཡས་ཁང་འཁོར་ལོ་རིམ་པ་བཞི། ལྷའི་གདན་དང་བཅས་པ། དབུས་ཀྱི་གདན་གྱི་སྟེང་དུ་འཁོར་ལོ་བདེ་མཆོག །ཞེས་པ་ནས། ཐོད་པའི་སྟེང་དུ་རྡོ་རྗེའི་འཕྲེང་བས་མཚན་པའི་བར་མཁའ་ནང་གི་དཀྱིལ་འཁོར་བཞིན་བསྐྱེད། མདུན་གྱི་མཆོད་པ་རྣམས་བྱིན་གྱིས་བརླབས། ཐོག་མར་མེ་ཏོག་ནས་གཡས་པའི་མཐེབ་སྲིན་གྱིས་བླངས། དཀྱིལ་འཁོར་གྱི་ལྷ་ལ་ཕུལ་བར་མོས་ཏེ། གཙོ་བོ་ཡབ་ཡུམ་གྱི་སྙིང་པོ་དང༌། འཁོར་རྣམས་ལ་སྔགས་ཕྲེང་བཞིན་ཚར་གཅིག་བརྗོད་ནས། ཨོཾ་བཛྲ་པུཥྤེ་ཨཱཿཧཱུཾ། ཞེས་ལག་མཐིལ་དུ་སྤུངས། ཡང་བླངས་ཏེ། ཨོཾ་ཨོཾ་ཧ༴ ནས། ཕཊ་ཕཊ། ཀྱི་བར་བརྗོད་ཅིང༌། སོ་སོའི་གནས་སུ་རེག་ལ། ལག་མཐིལ་དུ་སྤུངས། ཟན་ཡང་དེ་བཞིན་དུ་འབུལ་བ་ལས། པུཥྤེ་ཨཱཿཧཱུཾ་གི་ཚབ་ཏུ། ཨོཾ་ཨཱཿཧཱུཾ། ཞེས་བརྗོད། དེ་བཞིན་ཆང་ལ་སོགས་པ་ཁུ་བའི་རྫས་ཡོད་ནའང་ཆོ་ག་དེ་ཁས་འབུལ། དེ་ནས། དྭངས་ཤིང་དྲི་མེད་ཡིད་འོང་བའི། །ཞེས་པ་ནས་རོལ་མོའི་བར་གྱིས་མཆོད། ཕྱག་རྒྱ་རྣམས་ལག་པ་གཡས་པས་བྱེད། ནང་མཆོད་འབུལ་ཚུལ། མེ་ཏོག་དང་ཟན་འབུལ་བ་དང་འདྲ། ཨ་ནུ་རཱ་ག་ནའི་སྔགས་ཀྱིས་གསང་བའི་མཆོད་པ་འབུལ། ལག་པ་གཡས་ཀྱིས་ཌཱ་མ་རུ་བཀྲོལ་ཞིང༌། རྐང་བརྒྱད་གཉིས་ཀྱིས་བསྟོད། བཅོམ་ལྡན་འདས་དཔལ་འཁོར་ལོ་སྡོམ་པའི་ལྷ་ཚོགས་རྣམས་ཀྱིས་བདག་ལ་དངོས་གྲུབ་མཐའ་དག་སྩལ་དུ་གསོལ། ཡི་གེ་བརྒྱ་པ་ལན་གསུམ། མ་འབྱོར་པ་དང༌། སོགས་བརྗོད།
ལག་མཐིལ་གྱི་རྫས་རྣམས་སྣོད་གཅིག་ཏུ་སྤུངས་ལ། ལག་པ་ལ་སོགས་པའི་རྫས་རྣམས་ཕན་ཚུན་དུ་མཉེས་ཤིང༌། ཨོཾ་ཨ་ཀཱ་རོ་སོགས་བརྗོད་པས། ལྷ་རྣམས་རང་གནས་སུ་ཐིམ་པར་གྱུར། ཨོཾ་ཡོ་ག་ཤུདྡྷོ་སོགས་ལ་འཁྱུད་རྒྱ། སྤྱི་བོའི་ཐད་དུ་བྱེད། ཚོགས་འཁོར་དང་མདུན་བསྐྱེད་སོགས་བྱེད་ནའང་སྐབས་འདི་ནས་འཇུག་ཅིང༌། ལག་མཆོད་ཁོ་ན་བྱེད་ན། རང་ཉིད་འཁོར་ལོ་བདེ་མཆོག་ཏུ་གསལ་བའི་གནས་རྣམས་སུ། ཞེས་པ་ནས། བཀྲ་ཤིས་ཀྱི་བར་རྗེས་ཆོག་ལྟར་བྱའོ། །ལག་མཆོད་ཀྱི་ངག་འདོན་མདོར་བསྡུས་པ་འདི་ཡང་ཏཱ་ར་ནཱ་ཐས་སྨྲས་པའོ།། །།ཞུས་དག བཀྲ་ཤིས།། །།
ཤོག་སྟོང་།