དཔལ་འཁོར་ལོ་སྡོམ་པའི་སྦྱིན་སྲེག་གི་ཆོ་ག་དངོས་གྲུབ་སྙེ་མ།
དཔལ་འཁོར་ལོ་སྡོམ་པའི་སྦྱིན་སྲེག་གི་ཆོ་ག་དངོས་གྲུབ་སྙེ་མ་ཞེས་བྱ་བ་བཞུགས།
ཨོཾ་སྭ་སྟི། དཔལ་འཁོར་ལོ་སྡོམ་པའི་སྦྱིན་སྲེག་གི་ཆོ་ག་མདོར་བསྡུས་པ། བླ་མ་དང་ཧེ་རུ་ཀ་ལ་ཕྱག་འཚལ་ལོ། །གྱ་གྱུས་མངོན་པར་བསྒྲོད་མཁས་གཟུང་འཛིན་མགྲོན། །དྷུ་ཏིའི་ལམ་དུ་ནམ་ཡང་བཅོམ་ལས་སླར། །ཕུང་ཁམས་ཚོགས་རྣམས་འོད་གསལ་འབར་བའི་སྤྲས། །དགའ་སྟོན་མཆོག་ཏུ་རོལ་ལ་ཡ་མཚན་དགྱེས། །འདི་སླད་བཅོམ་པའི་རིམ་པ་ལས། །ཡེ་ཤེས་འཁོར་ལོ་བསྲེག་བླུག་གིས། །ཚིམ་བྱེད་རིམ་པ་འདིར་སྤེལ་ཏེ། །ལས་རྣམས་ཐམས་ཅད་མཐར་འབྱིན་པའོ། །དེ་ལ་འདིར་ཞི་བའི་སྦྱིན་སྲེག་སྒྲུབ་པར་འདོད་པས། ཆོ་ག་སྦྱོར་དངོས་རྗེས་གསུམ་ལས། དང་པོ་ནི། སྔོན་འགྲོ་གཏོར་མ་བཏང༌། གནས་དང་མཆོད་པ་བྱིན་གྱིས་རླབས། སྐྱབས་འགྲོ་ནས་བརྩམས་ཏེ་བདག་བསྐྱེད་བཟླས་པའི་བར་བྱས་ལ། དཀྱིལ་འཁོར་བསྡུས་ནས། སྦྱིན་སྲེགས་གང་དུ་བྱ་བའི་ས་གཞིར་དཀྱིལ་ཆོག་ལྟར་སའི་ལྷ་མོ་སྟ་གོན་བྱ། དེ་ནས་སུམ་བྷ་བརྗོད་ཅིང་ནང་
གཏོར་ལག་པ་རྡོ་རྗེ་དང་བཅས་པས་དྲི་བཟང་གིས་ས་གཞི་ལ་བྱུག་ཅིང༌། ཨོཾ་ཧ་ན་ཧ་ན་ཀྲོ་དྷ་ཧཱུཾ་ཕཊ། ཉེར་གཅིག་ཡང་དབུས་སུ་རྡོ་རྗེ་དང་བཅས་པའི་ལག་པ་བཞག །ཨོཾ་བྷུ་ཁཾ་ས་གཞི་ནམ་མཁའི་རང་བཞིན་དུ་གྱུར། ཕུར་གདབ་བྱེད་ན། སྟོང་པའི་ངང་ལས་པཾ་ལས་པདྨ་དང༌། རཾ་ལས་ཉི་མའི་སྟེང་དུ་ཧཱུཾ་ལས་སྣ་ཚོགས་རྡོ་རྗེ་ཤར་སྔོ། ཞེས་པ་ནས། བྱང་ཆུབ་མ་ཐོབ་གྱི་བར་དུ་བར་ཆད་བསྲུང་བར་གྱུར། ཞེས་མངོན་རྟོགས་བཞིན་ནོ། །དེར་ཚངས་ཐིག་དང༌། ཟུར་ཐིག་བཏབ་ལ། ལྟེ་བ་ནས་གཡས་གཡོན་དུ་མཐོ་གང་གང་གཞལ་བའི་སར་ཟླུམ་ཐིག་བསྐོར་བའི། ཁྲུ་གང་ཟླུམ་པོར་འགྱུར། ཡང་ཐབ་ཆུང་ངུར་བྱེད་ན། ཁྲུ་གང་བསྐོར་བའི། བསྐུམ་གྲུའི་ཚད་དུ་འགྱུར་བ་དང༌། སོར་བརྒྱད་བསྐོར་ཏེ་ཐབས་ཀྱི་ཕྱིའི་ཚད་ལ་གྲུ་གང་དུ་འགྱུར་རོ། །དེ་བཞིན་དུ་ཕྱིའི་ཚད་ལས་གཞན་པའི་ཐིག་མེད་པ་སྤྱི་དང་མཐུན་པའང་རུང་ངོ༌། །
དེ་ནས་དེའི་ཕྱིར་སླར་ཡང་ཁྲུ་ཕྱེ་བསྐོར་ཏེ། དེ་ལ་བསྐོར་ཐིག་རིམ་པ་གཉིས་ཀྱིས་གསུམ་གཏུབས་སུ་བཏང་བས། ནང་ནས་རིམ་པ་བཞིན་ཁ་ཁྱེར་དང༌། མུ་རན་དང་ལས་ཀྱི་ཁ་ཁྱེར་དང་གསུམ་དུ་འགྱུར་རོ། །ཐིག་ཕྱི་མ་དེ་ཉིད་ལ་རེག་པར་སྟེགས་བུ་གྲུ་བཞི་པའི་ཐིག་བཏབ་སྟེ། འདིའི་བྱ་རྗེས་ཟུར་ཐིག་གི་སྟེང་ནས་ལག་ལེན་བཞིན་བཙལ་བར་བྱའོ། །ཐབས་ཀྱིས་ནང་དུ་པདྨ་འདབ་བརྒྱད་ཀྱི་ཐིག་བཏབ། དེ་ནས་ཚོན་འགྱེད་ཅིང་མཚན་མ་འགོད་པར་བྱ་སྟེ། ཐམས་ཅད་ཀྱང་ཁ་དོག་དཀར་པོ་ལ་ཇི་ལྟར་འོས་པའི་བཅད་ཀྱི་རི་མོ་བྱའོ། །པདྨའི་ལྟེ་བ་ལ་རྡོ་རྗེ་དང་གྲི་གུག་སྔོན་པོ་བྲིས། འདབ་མ་བཞི་ལ་ཁ་ཊྭཱཾ་ག་རེ་རེ་བྲིས་ཏེ། ཤར་དུ་འཁོར་ལོ། ལྷོར་རིན་པོ་ཆེ། ནུབ་ཏུ་པདྨ། བྱང་དུ་སྣ་ཚོགས་རྡོ་རྗེས་མཚན་པ་དང༌། མཚམས་སུ་བུམ་ཐོད་བྲིས། མ་གྲུབ་ན་ཚོམ་བུ་བཀོད་ཀྱང་རུང༌། ཁ་ཁྱེར་ལ་པདྨ་དཀར་པོའི་འཕྲེང་བ། མུ་རན་ལ་གྲི་གུག་སྔོན་པོའི་ཕྲེང་བ། ལས་ཀྱི་ཁ་ཁྱེར་ལ་རྡོ་རྗེ་སྔོན་པོའི་འཕྲེང་བ་སྟེགས་བུ་སེར་པོ་གྲྭ་བཞིར་ཟླ་ཕྱེད་རྡོ་རྗེ་རྣམས་བྲིའོ། །བྲིས་ཐབས་རྒྱས་འབྲིང་བསྡུས་གསུམ་འདི་ལས་འདི་ནི་བསྡུས་པའོ། །ཐབ་ཀྱི་ཟླུམ་བསྐོར་དང་མཐུན་པར་འོ་མ་ཅན་གྱི་ཤིང་ངམ། ནགས་ཀྱི་བ་གླང་གི་ལྕི་བའི་མཐོ་གང་ཙམ་གྱི་དཔངས་ཟླུམ་པོར་བརྩིགས་པར་བྱའོ། །ཐབ་ཀྱི་ཤར་ལྷོ་མེ་ཚང་དང༌། ཕྱེ་མར་ཏིང་ལོ་གཅིག་བཅའ། ནང་བུད་ཤིང་གིས་ཁེངས་པར་བྱ། མཐར་མདའ་དྲ་དང་མེ་ལོང་ཕུར་བུ་ཚོན་སྐུད་རྣམས་བཅའ་བའི་ལག་ལེན་མཛད། དེ་རྣམས་མ་འགྲུབ་ཀྱང་མི་འགལ། དཀྱིལ་འཁོར་ལ་འབུལ་བ་ལྟར་ཕྱོགས་མཚམས་བརྒྱད་དུ་ཀུ་ཤ་བཀྲམ། ཤ་ཆང་གིས་བརྒྱན་པའི་གཏོར་མ་གསུམ་དང༌། ལྕེད་ལྡེ་དང༌། བསངས་ཆུའི་དུང་
ཆོས་ཀུ་ཤའི་འཐོར་གཡབ་དང་བཅས་པ་དང༌། རྡོར་དྲིལ། ཅང་ཏེའུ། ནང་མཆོད། དུང་ཆོས་གཉིས། སྒྲུབ་པ་པོ་འཇིག་རྟེན་པའི་ཤར་དུ་བལྟས་པའི་ཐབ་ཀྱི་གཡས་སུ་མཆོད་པ་དང༌། གཡོན་དུ་བསྲེགས་རྫས་རྣམས་མདུན་ནས་འགོ་བརྩམས་ཏེ་རིམ་པས་བཤམ། ཡམ་ཤིང་འོ་མ་ཅན་གྱི་ཤིང་ལས་བྱུགས་པ། སྦོམ་སུ་མཐེའུ་ཆུང་ཙམ་སྲིད་དུ་སོར་བརྒྱད་ནས་གྲུ་གང་གི་བར་གང་ཡང་རུང་བ། སྦྲང་རྩི་དང་མར་གྱིས་བྱུག་པ། ཡལ་ག་དང་བཅས་པས་ཀྱང་རུང་སྟེ། ཡམ་ཤིང་དང༌། རྩི་བཅུད་ཀྱི་མར་ཁུ་ཡང་ལེགས་པར་འདུ་བྱ་ལ། བུམ་པ་བཅའ་ཞིང་སྒྲུབ་པ་འགྲུབ་ན་ངེས་པར་བྱ་བ་ཡིན་མོད་ཀྱི། བསྡུས་པ་ལ་མ་གྲུབ་ཀྱང་འགལ་བ་མེད་པར་ཤེས་པར་བྱའོ། །དེ་ནས་སྔོན་འགྲོ་གཏོར་མ་དང་གནས་དང་ཡོ་བྱད་བྱིན་གྱིས་རླབས་པ་སྔོན་དུ་འགྲོ་བའི་བདག་བསྐྱེད་ཀྱི་རྣལ་འབྱོར་རྫོགས་པར་བསྒོམ། དཀྱིལ་འཁོར་ཉེ་བར་བསྡུས་ཏེ། བདག་ཉིད་ཕྱག་གཉིས་པའི་ང་རྒྱལ་དང་ལྡན་པས་མཆོད་ཡོན་གཉིས།སུམྦྷས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་བྷྲུཾ་དང་ཤཾ་ལས་དུང་དཀར་མཚན་ཉིད་དང་ལྡན་པའི་ནང་དུ་ཧཱུཾ་ཧཱུཾ་ལས་བྱུང་བའི་བསངས། ཆུ་དང་མེ་ལྷ་དགའ་བར་བྱེད་པའི་མཆོད་ཡོན་ནུས་པ་ཐམས་ཅད་དང་ལྡན་པར་གྱུར། བསངས་ཆུ་ལ་དམིགས་ནས་སུམྦྷ་གང་མང་དང༌། མཆོད་ཡོན་ལ་ཡི་གེ་བདུན་པ་ཉེར་གཅིག་ཙམ་བཟླས་པ་བྱ། གཉིས་པ་ནི། ཐབ་དང་ཡོད་བྱད། ཐམས་ཅད་ལ་བསངས་ཆུས་གཏོར་ཏེ། སུམ་བྷ། སོགས་དང༌། ཨོཾ་སྭཱཧཱའི་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཧཱུཾ་ལས་ཞི་བའི་ཐབ་ཁུང་དཀར་པོ་ཟླུམ་པོ་རྒྱར་ཁྲུ་གང་བ། ཟབ་སུ་
ཁྲུ་ཕྱེད་པ་ཁ་ཁྱེར་ལ་པདྨ་དཀར་པོའི་འཕྲེང་བ། མུ་རན་ལ་གྲི་གུག་གི་འཕྲེང་བ་དང༌། ལས་ཀྱི་ཁ་ཁྱེར་ལ་རྡོ་རྗེའི་འཕྲེང་བས་མཚན་པ། ལས་ཀྱི་ཁ་ཁྱེར་དང་བཅས་པ། ཕྱི་རོལ་སྟེགས་བུ་གྲུ་བཞི་པ་ལ་ཟླ་ཕྱེད་རྡོ་རྗེས་མཚན་པ། དྭངས་ཤིང་ཐོགས་པ་མེད་པ་ནང་ལྷ་རྫས་ཀྱི་བུད་ཤིང་གི་གང་བར་གྱུར། མཆོད་རྫས་དང༌། བསྲེགས་རྫས་རྣམས་མི་དམིགས་ཏེ་སྟོང་པའི་ངང་ལས་ཨ་ལས་ཡེ་ཤེས་ཀྱི་ཀཱ་པ་ལ་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུཾ་ཞུ་བ་ལས་བྱུང་བའི་མཆོད་ཡོན། ཞབས་བསིལ། མེ་ཏོགབདུག་སྤོས། མར་མེ། དྲི་ཆབ། ཞལ་ཟས། རོལ་མོ་དང་བསྲེགས་རྫས་རྣམས་རྒྱུ་འཇིག་རྟེན་དང་འཇིག་རྟེན་ལས་འདས་པའི་དགེ་བ་ལས་གྲུབ་པ། ངོ་བོ་བཟང་ཞིང་རྒྱ་ཆེ་བ། ཡུལ་ནམ་མཁའི་མཐའ་ཁྱབ་པ། དུས་འཁོར་བ་ཇི་སྲིད་མ་སྟོངས་ཀྱི་བར་དུ་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལྟ་བུ། ལས་སོ་སོ་སྒྲུབ་པའི་ནུས་པ་ཕུན་སུམ་ཚོགས་པ་དང་ལྡན་པར་གྱུར། ཨོཾ་བཛྲ་ཨརྒྷཾ། ནས། ཨ་ཁཾ་སྭ་ཧཱའི་བར་བརྗོད་ལ་རོལ་ཆེན་བྱ། ཨོཾ་ཨ་སྭཱཧཱ། གསུམ་གྱིས་མར། ལན་གསུམ་གྱིས་ཡམ་ཤིང་དང༌། ཨོཾ་ཤྲཱི་སྭཱཧཱས་མར་དང་གསུམ་གྱིས། འབྲུ་དང༌། ཨོཾ་ཛི་རཾ་སྭཱཧཱས་འབྲུ་རྣམས་དང༌། གསུམ་གྱིས་རྫས་གཞན་རྣམས་དང༌། ཨོཾ་ཀུ་རུ་ཀུ་རུ་སྭཱཧཱ། ཞེས་པས་རྫས་གཞན་རྣམས་བསངས་ཤིང་བྱིན་གྱིས་རླབས་པར་བྱའོ། །དེ་ནས་ལྕེད་
ལྡེ་ལ་མེ་སྦར་ཏེ་ཐལ་མོ་སྦྱར་བའི་བཟུང༌། སུམ་བྷ་བཟླ་ཞིང༌། ཐབ་ལ་གཡོན་བསྐོར་གྱིས་བསྐོར་བ་ལན་གསུམ་བྱ་སྟེ་མེ་ཚངས་དུ་གཞུག ཨོཾ་ཧེ་རུ་ཀ་མཧཱ་བཛྲ་ཛྭ་ལ་ཛྭ་ལ་ཧཱུཾ་ཧཱུཾ། ཞེས་བརྗོད་བཞིན་པས། མར་ཁུ་བླུགས་གཟར་ཆུང་ངུར་གསུམ་བླུགས་ལ་མེ་གསོས་སོ། །དེ་ནས་ཀུ་ཤས་བསངས་ཆུ་གཏོར་ལ་སུམྦྷའི་མཐར། ཨོཾ་སྭཱཧཱ་བཏགས་པའི་བསངས། སྭ་བྷཱ་ཝས་སྦྱངས། སྟོང་པའི་ངང་ལས་རཾ་ལས་ཡེ་ཤེས་ཀྱི་མེའི་ཕུང་པོ་རབ་ཏུ་འབར་བའི་དབུས་སུ། བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོའི་གདན་ལ། རཾ་ལས་དབྱུག་གུ་རྩེ་གསུམ་པ་རཾ་གྱིས་མཚན་པ་ལས་མེ་ལྷ་པཱ་པ་ཀ་སྐུ་མདོག་དཀར་པོ་ཞལ་གཅིག་ཕྱག་བཞི་པ་སྤྱན་གསུམ་པ། རལ་པའི་ཐོར་ཚུགས་ཅན། མཆོད་ཕྱིར་ཐོགས་འཆང་བ། གཡས་གཉིས་ཀྱིས་དབྱུག་གུ་དང་མི་འཇིགས་པ་སྦྱིན་པ། གཡོན་གཉིས་ན་བགྲང་ཕྲེང་དང༌། སྤྱི་བླུགས་འཛིན་པ། སྐུའི་ཆ་ཐམས་ཅད་ལས་བདུད་རྩི་དཀར་པོའི་རྒྱུན་འབབ་ཅིང༌། འོད་ཟེར་དཀར་པོ་འཕྲོ་བ། དེའི་ཐུགས་ཀར་པཾ་ལས་སྣ་ཚོགས་པདྨ་འདབ་མ་བརྒྱད་པའི་ལྟེ་བར་བཾ་ལས་ཆུའི་དཀྱིལ་འཁོར་གྱི་སྟེང་དུ། རཾ་ལས་མེའི་དཀྱིལ་འཁོར་དམར་པོ་གྲུབ་པའི་མདུན་གྱི་ཟུར་ལ། གཟུགས་མེད་ཁམས་དང་ས་བླ་དག་པ་ཧཱུཾ་ལས་རྡོ་རྗེ་ཧཱུཾ་གིས་མཚན་པ། གཡས་ཀྱི་ཟུར་དུ་གཟུགས་ཁམས་དང་ས་སྟེང་དག་པ་ཨཱཿལས་པདྨ་ཨཱཿམཚན་པ། གཡོན་གྱི་ཟུར་དུ། འདོད་ཁམས་དང་ས་འོག་དག་
པ་ཨོཾ་ལས་འཁོར་ལོ་ཨོཾ་གྱིས་མཚན་པ། དབུས་སུ་བཾ་དང་རཾ་ལས་དབྱུག་གུ་རྩེ་གསུམ་པ་རཾ་གྱིས་མཚན་པ། དེ་ཐམས་ཅད་རོ་གཅིག་ཏུ་འདྲེས་པ་ལས། ཁམས་གསུམ་གྱི་བདག་པོ་དཔལ་ཧེ་རུ་ཀ་ཞེས་བྱ་བའི་མེ་ལྷ་སྐུ་མདོག་དཀར༴ ནས། འཕྲོ་བ། ཞེས་པའི་བར་གོང་བཞིན་ནོ། །པདྨའི་འདབ་མ་བརྒྱད་དང་སྟེང་འོག་ཏུ། ཨོཾ་ཨེནྡྲ་ཡེ། ཨགྣ་ཡེ། ཡ་མཱ་ཡེ། ནཻ་རི་ཏི་ཡེ། ཝ་རུ་ཎ་ཡེ། ཝ་ཡ་ཝེ། ཀུ་བཻ་ར་ཡེ། ཨི་ཤྭ་ན་ཡེ། ཨུདྷཾ་བྲ་ཧྨ། ཨ་ཀྵོ་པྲི་ཐི་ཝི། ཞེས་བརྗོད་པས་སྐད་ཅིག་གིས་ཤར་ཏུ་བརྒྱ་བྱིན་དཀར་པོ་གླང་པོ་ཆེ་ལ་ཞོན་པ་རྡོ་རྗེ་འཛིན་པ། ལྷོར་གཤིན་རྗེ་སྔོན་པོ་མ་ཧེ་ལ་ཞོན་པ་བེ་ཅོན་འཛིན་པ། ནུབ་ཏུ་ཆུ་ལྷ་དཀར་པོ་ཆུ་སྲིན་ལ་ཞོན་པ་སྦྲུལ་ཞག་འཛིན་པ། བྱང་དུ་གནོད་སྦྱིན་སེར་པོ་རྟ་ལ་ཞོན་པ་ནེའུ་ལེ་འཛིན་པ། བྱང་ཤར་དུ་དབང་ལྡན་དཀར་པོ་གླང་ལ་ཞོན་པ་ལྕགས་སྒྲོགས་རྩེ་གསུམ་འཛིན་པ། ཤར་ལྷོར་མེ་ལྷ་དམར་པོ་ར་སྐྱེས་ལ་ཞོན་པ། གཡས་གཉིས་བགྲང་ཕྲེང་དང་མཆོད་སྤྱིན་གཡོན་གཉིས་དབྱུག་གུ་རྩེ་གསུམ་པ་འཛིན་པ་དང་རིལ་བུ་སྤྱི་བླུགས་འཛིན་པ། ལྷོ་ནུབ་ཏུ་སྲིན་པོ་སྔོ་ནག་རོ་ལངས་ལ་ཞོན་པ་རལ་གྲི་འཛིན་པ། ནུབ་བྱང་དུ་རླུང་ལྷ་དུད་ཁ་ཤ་བ་ལ་ཞོན་པ་བ་དན་འཛིན་པ། སྟེང་དུ་ཚངས་པ་སེར་པོ་ངང་པ་ལ་ཞོན་པ་གཎྜེ་འཛིན་པ། འོག་ཏུ་ས་ལྷ་སེར་པོ་ཕག་པ་ལ་ཞོན་པ་བུམ་པ་འཛིན་པ། ཐམས་ཅད་ཀྱང་རང་རང་གི་
རྒྱན་དང་ཆ་ལུགས་ཀྱི་མཛེས་པའོ། །ཕྱི་ནང་གི་ལྷ་དེ་དག་ཐམས་ཅད་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུཾ་སྔོན་པོ། གནས་རྣམས་སུ་ཟླ་བའི་དཀྱིལ་འཁོར་གྱི་སྟེང་དུ། སྙིང་ཁར་ཨོཾ་ཨོཾ་ཧ་དཀར་པོ། ནས། ཙཎྜི་ཀའི་ངོ་བོའི་བར་སྒྲུབ་ཐབས་བཞིན། རང་གི་སྙིང་ག་ནས་འོད་ཟེར་འཕྲོས་པས། ཤར་ལྷོར་ནས་མེ་ལྷ་དྲང་སྲོང་གི་ཚོགས་དང་བཅས་པ་བཛྲ་ས་མཱ་ཛཿས་བཀུག་པར་གྱུར། དབྱུག་གུ་རྩེ་ལྔ་པའི་ཕྱག་རྒྱ་རྣ་བའི་དྲུང་དུ་གཡབ་ཅིང༌། ཨོཾ་ཚུར་བྱོན་ཚུར་བྱོན་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག ། བསྲེག་བླུགས་ཞལ་ཟས་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །ཨོཾ་ཨེ་ཧྱ་ཧི་མཧཱ་བྷུ་ཏ་དེ་ཝ་རི་ཥི། དྭི་ཛ་སཏྟ་མཧཱ་གྲྀ་སྟྭཾ་ཨ་ཧུ་རི་མ་ཧེ་རི་ཨཥྨི་ན་སནྣི་ཧི་ཏོ་བྷ་ཝ། ཨོཾ་ཧེ་རུ་ཀ་མཧཱ་བཛྲ་པཱ་པ་ཀ་ཨགྣ་ཡེ་མ་མ་ཤིནྟཾ་ཀུ་རུ་སྭཱཧཱ། ཞེས་པས་སྤྱན་དྲངས། པདྨ་ཀཱ་མ་ལ་ཡ་སྟྭཾ། ཞེས་པས་གདན་ཕུལ། ཨོཾ་ཧེ་རུ་ཀ་མཧཱ་བཛྲ་པཱ་པ་ཀ་ཨགྣ་ཡེ་ས་པ་རི་ཝཱ་ར་ཨརྒྷཾ་པྲ་ཏིཙྪ་སྭཱཧཱ། ནས། ཤཔྟའི་བར་གྱི་མཆོད། ཨོཾ་ཨགྣ་ཡ་སྭཱཧཱ། ལན་བདུན་གྱིས་དགང་གཟར་བཀང་ལ། ཤྲཱི་ཧེ་རུ་ཀ་མཧཱ་བཛྲ་པཱ་པ་ཀ །ཨོཾ་ཨགྣ་ཡེ། ཨ་དི་བྱ། ཨ་དི་བྱ། ཨཱ་བི་ཤ་ཨཱ་བི་ཤ ཤྲཱི་ཡེ་ཧ་བྱ་ཀ་བྱ་ཝ་ཧ་ན་ཡ་སྭཱཧཱ། བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་ཐམས་ཅད་ཤནྟི་ཀུ་རུ་ཡེ་སྭཱཧཱ། ཞེས་ལན་གསུམ་གྱིས་འབུལ་བ་ནི་བྱོན་ཟན་ནོ། །ཛཿཧཱུཾ་བཾ་ཧོ། སླར་གནས་གསུམ་བྱིན་རླབས་དང༌།
གོ་ཆ་འགོད་པ་སྔར་བཞིན་ནོ། །ཡང་རང་གི་ཐུགས་ཀ་ནས་འོད་ཟེར་འཕྲོས་པས། དབང་གི་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་ཕཻཾ། ཨོཾ་བཛྲ་ས་མཱ་ཛཿ ཉེར་སྤྱོད་ལྔས་མཆོད། དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། དབང་གི་ལྷའི་ཐུགས་ཀ་ནས། སྒོ་མཚམས་མ་བརྒྱད་སྤྲུལ་ཏེ། དབང་བསྐུར་བའི་དགོངས་པ་མཛད་ཧེ་རུ་ཀའི་ཡིག་བརྒྱའི་མཐར་གཙོ་བོ་ཡབ་ཡུམ་གྱི་སྙིང་པོ་དང༌། མཁའ་འགྲོ་མ་བཞིའི་སྙིང་པོ་བརྗོད་ལ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཧཱུཾ། ཡང་སྒོ་མཚམས་མ་བརྒྱད་ཀྱི་སྔགས་ཀྱི་མཐར། ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུཾ། ཞེས་གསུང་ཤིང་དབང་བསྐུར། སྐུ་གང་དྲི་མ་དག་ཆུའི་ལྷག་མ་ཡར་ལུད་པ་ལས། མཁའ་འགྲོ་མ་བཞིས་དབུ་རྒྱན། ཨོཾ་པ་དྲ་ལཾ་པ་ཨབྷི་ཥིཉྩ་བཛྲ་ཏུཥྟྱ། ཨོཾ་རཏྣ་མཱ་ལ་ཨབྷི་ཥིཉྩ་ཏྲཾ། སྔར་བཞིན་བསངས། སྟོང་པའི་ངང་ལས་ཧཱུཾ་ལས་བྱུང་བའི་ཀུ་ཤ་སྔོ་ལྗང་རྩ་རྩེ་མ་ཉམས་པ། སྲུང་བ་དང་གཙང་བྱེད་དམ་པ་ནུས་པ་ཕུལ་དུ་ཕྱིན་པར་གྱུར། ཨོཾ་བཛྲ་ས་ཏྭ་ཨ། ལན་བརྒྱད་བརྗོད་ལ་ཀུ་ཤ་བཀྲམས་པར་བསམ་ལ། ཨོཾ་ཀུ་ཤ་འདི་ནི་བཟང་ཞིང་དགེ །ཚངས་པ་ཡི་ནི་དག་བྱེད་ཡིན། །དཀོན་མཆོག་གསུམ་གྱི་དག་བྱེད་དེ། །ས་ལ་སྐྱེས་པའི་སྙིང་པོ་མཆོག །ཅེས་པའི་ཀུ་ཤ་ཕུལ། འདིས་བདག་ཅག་འཁོར་བཅས་ལ་གེགས་མེད་ཅིང་ཞི་བར་མཛོད་ཅིག་སྭཱཧཱ། སུམ་བྷ་ལན་བརྒྱད་བརྗོད་ཅིང༌། མདའི་དྲ་བས་མཛེས་ཤིང༌། མེ་ལོང་གི་ཕྲེང་བ་ལ་སོགས་པས་ཡོངས་སུ་བསྐོར་བར་གྱུར། ཞེས་
བརྗོད། མདའ་དྲ་སོགས་བཅིངས་པར་བསམ། མེ་ལྷའི་ཞལ་དང་དགང་བླུགས་ཀྱི་རྩེ་མོར། ཨོཾ་ཨོཾ་ཨོཾ་ཌཱ་ཀི་ནི་ཛི་ན་ཛི་ཀ་སྭཱཧཱ། ཞེས་ལན་གཅིག་བརྗོད། གོང་གི་བྱོན་ཟན་འབུལ་བའི་སྐབས་ལྟར། ཨོཾ་ཨགྣ། དགང་གཟར་ལན་གསུམ་གྱིས་བཀང་ལ། ཨཽཾ་ཧེ་རུ་ཀ་མཧཱ་བཛྲ་པཱ་པ་ཀ་ཨགྣ་ཡེ་སྟྭཾ། ཞེས་ལན་གསུམ་ཕུལ། སྐབས་འདིར་མེ་བཀྲ་བརྟག ངན་ན་བགེགས་སྐྲད། མཆོད་ཡོན་གྱིས་སྣོད་བཟུང་སྟེ། ཨོཾ་ཧེ་རུ་ཀ་མཧཱ་བཛྲ་པཱ་པ་ཀ་ཨགྣ་ཡེ་པྲ་བར་སརྐ་ར་པྲ་ཏཱིཙྪ་སྭཱཧཱ། ཞེས་མཆོད་ཡོན་དང་པོ་དང༌། ཨོཾ་ཨི་མཾ་ཨརྒྷཾ་མ་ཡ་དད་ཏཾ། གྲྀཧྞ་སིད་དྷི་མྨེ་པྲ་ཡཙྪ་ཡེ་སྭཱཧཱ། གཉིས་པ་དང༌། ཨོཾ་ཨི་མཾ་པདྱཾ་མས་ཡ་དད་ཏཾ། གྲྀཧྞ་སིད་དྷི་མྨེ་པྲ་ཡཙྪ་ཡེ་སྭཱཧཱ། ཞབས་བསིལ། ཨོཾ་ཧེ་རུ་ཀ་མཧཱ་བཛྲ་པཱ་པ་ཀ་ཨགྷ་ཡེ་ས་པ་རི་ཝ་ར་པུཥྤེ། ནས། ཤཔྟའི་བར་གྱིས་མཆོད། ཨོཾ་ཨཱཿཧཱུཾ། ནང་མཆོད་འབུལ། རྡོ་རྗེ་དྲིལ་བུ་འཛིན་པས། ཚངས་དབང་འཇིག་རྟེན་མགོན་གྱི་སྲས། མེ་ལྷའི་རྒྱལ་པོ་དྲང་སྲོང་མཆོག །འབྱུང་པོ་ཡོངས་སུ་སྐྱོབ་པའི་ཕྱིར། །ཐུགས་རྗེའི་དབང་གི་སྐུ་སྤྲུལ་པ། །རིགས་སྔགས་གྲུབ་པའི་དྲང་སྲོང་ཚུལ། །ཉོན་མོངས་བསྲེག་པའི་ཤེས་རབ་འོད། །བསྐལ་པའི་མེ་ལྟར་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱི་སྤྲུལ་པའི་ཐེག་པ་ཆིབས། །རིགས་སྔགས་གསུང་གི་བགྲང་ཕྲེང་འཛིན། །བདུད་རྩི་བཅུད་ལྡན་གནྡྷེ་བསྣམས། །ཉེས་པའི་སྐྱོན་བྲལ་ཚངས་པར་སྤྱོད། །ཆོས་ཀྱི་བདུད་རྩི་ཡོངས་ལ་བསིལ། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་
ཀྱང་ཐུགས་རྗེ་ཆེ། །དེ་ལ་བསྟོད་དེ་ཕྱག་ཀྱང་འཚལ། །ཤེས་རབ་ཆེན་པོ་བདག་མེད་ཐུགས་ཆུད་ཅིང༌། །ཐུགས་རྗེ་ཆེན་པོས་འགྲོ་བ་ཀུན་སྒྲོལ་ཡང༌། །ཐབས་ལ་མཁས་པས་དྲང་སྲོང་ཆ་ལུགས་འཛིན། །འཇིགས་བྱེད་མེ་ལྷ་ཉིད་ལ་རྣམ་པར་འདུད། །གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་རབ་སྩོལ་བ། །རང་གཞན་དོན་སྦྱོར་ས་ལ་བཞུགས། །ཚངས་སྲས་མཆོག་ལ་ཕྱག་འཚལ་ལོ། །ཞེས་པའི་བསྟོད། བསྲེག་རྫས་ཐམས་ཅད་ལ་བསངས་ཆུ་གཏོར་ཏེ། ཨོཾ་སྭཱཧཱ། ལན་མང་དུ་བརྗོད། དེ་ནས་ཡམ་ཤིང་འབུལ་ཞིང༌། ཨོཾ་ཧེ་རུ་ཀ་མཧཱ་བཛྲ་པཱ་པ་ཀ་ཨགྣ་ཡེ། ཞེས་པ་ནི་ལྷ་སྔགས། ཨོཾ་བཛྲ་ཛྭ་ལ་ཡེ་སྭཱཧཱ། ཡམ་ཤིང་གི་རྫས་སྔགས། བདག་དང་སེམས་ཅན་ཐམས་ཅད་ཀྱི་སརྦ་པ་པཾ་ཤིནྟཾ་ཀུ་རུ་སྭཱཧཱ། ལས་སྔགས་ཏེ། དལ་བའི་ཚེ་གསུམ་ཆར་སྒྲགས་པ་ཉེར་གཅིག་ལ་སོགས་པའི་ཕུལ། བསྡུ་ན་ལྷ་སྔགས་དང༌། ལས་སྔགས་ལན་གཅིག་གིས་བར་དུ། རྫས་སྔགས་ཀྱི་མཐར་སྭཱཧཱ་སྦྱར་བ། བདུན་ནམ་ཉེར་གཅིག་ཕུལ། རྫས་སྔགས་སོ་སོའི་ཁྱད་པར་མ་བཏོགས་འོག་མ་རྣམས་ལ་འདིའི་རིགས་འགྲེ་བར་བྱས་ཏེ། སོ་སོའི་རྫས་སྔགས་ནི། ཨོཾ་ཨགྣ་ཡེ་སྭཱཧཱས་མར་ཁུའོ། །ཨོཾ་སརྦ་པཱ་པཾ་ད་ཧ་ན་བཛྲ་ཡེ་སྭཱཧཱས་ཏིལ། ཨོཾ་ཧེ་རུ་ཀ་མཧཱ་བཛྲ་ཨགྣ་ཡེ་སྭཱཧཱས་འབྲས་ཆན། ཨོཾ་སརྦ་ས་པོ་ཏེ་སྭཱཧཱས་ཟས་མཆོགཨོཾ་བཛྲ་ཨཱ་ཡུ་ཥེ་སྭཱཧཱས་དུར་བ། ཨོཾ་མི་ཧཱ་བེ་ག་ཡེ་སྭཱཧཱས་ནས། ཨོཾ་བཛྲ་གྣསྨི་རི་ཡེ་སྭཱཧཱས་གྲོ། ཨོཾ་བཛྲ་བི་ཛ་ཡེ་སྭཱཧཱ། སོ་བ་ལ་སོགས་པའི་འབྲུ་སྣ་ཚོགས། ཨོཾ་བཛྲ་
པུཥྤེ་ཡེ་སྭཱཧཱས་འབྲས། ཨོཾ་མཧཱ་བ་ལ་ཡེ་སྭཱཧཱས་སྲན་མ། ཨོཾ་མཧཱ་ཤྲི་ཕ་ལ་དྷ་ནི་སྭཱཧཱས་འཛའ་ཏི་ལ་སོགས་པའི་འབྲས་བུ་རྣམས། ཨོཾ་ཨ་པྲ་ཏི་ཧ་ཏ་བཛྲ་ཡེ་སྭཱཧཱས་ཀུ་ཤ་རྣམས་འབུལ་མར་ཁུ་བླུགས་གཟར་དང༌། གཞན་རྣམས་ལག་པ་གཡོན་པའི་མཐེབ་སྲིན་གྱིས་ཁ་གྱེན་དུ་བསྟན་པས་འབུལ། ཉེར་གཅིག་སོགས་མང་ཉུང་ལོང་སྐབས་དང་སྦྱར། དེ་ནས་གོང་བཞིན་ཕྱི་མཆོད་ནང་མཆོད། ཤེས་རབ་ཆེན་པོ་བདག་མེད་ཐུགས་ཆུད་ཅིང༌། སོགས་དང༌། གཟི་བརྗིད་ཆེན་པོ་མེ་ཡེ་ལྷ། ཞེས་པ་ཡན་ཆད་ཀྱིས་བསྟོད། ཨོཾ་ཧེ་རུ་ཀ་ཛྭ་ལ་ཛྭ་ལ་ཧཱུཾ་ཧཱུཾ་ཞེས་བརྗོད། མར་ཁུ་དགང་བླུགས་རྐྱང་བ་གང་ཕུལ་ནས། མེ་ལྷ་ཐུགས་ཀྱི་དཀྱིལ་འཁོར་དང་བཅས་པ་འབར་བའི་རྣམ་པ་ཅན་དུ་གྱུར། དེ་ནས་འཇིག་རྟེན་ལས་འདས་པའི་མེ་ལྷ་མཆོད་པ་ནི། མཆོད་རྫས། བསྲེགས་རྫས་རྣམས་ཁ་གསོས་ལ་མེ་དང་བཅས་པ་ཐམས་ཅད་གོང་བཞིན་བསངས་སྦྱངས། མཆོད་པ་དང་བསྲེགས་རྫས་བྱིན་གྱིས་རླབས་པའི་སྔགས་རྣམས་གོང་བཞིན་བརྗོད། སྟོང་པའི་ངང་ལས་མེ་ནང་དུ་སྲུང་བའི་འཁོར་ལོ་ཡོངས་སུ་རྫོགས་པར་གྱུར། ཨོཾ་མེ་དྷི་ནི་བཛྲ་བྷ་ཝ་བྷནྡ་ཧཱུཾ། ཨོཾ་བཛྲ་པྲ་ཀ་ར་ཧཱུཾ་ལཾ་ཧཱུཾ། ཨོཾ་བཛྲ་པཉྩ་ར་ཧཱུཾ་པཾ་ཧཱུཾ། ཨོཾ་བཛྲ་བི་ཏ་ན་ཧཱུཾ་ཁཾ་ཧཱུཾ། ཨོཾ་བཛྲ་ས་ར་ཛྭ་ལ་དྲི་སཾ་དྲཾ། ཨོཾ་བཛྲ་ཛྭ་ལ་ཨ་ན་ཨརྐ་ཧཱུཾ་ཧཱུཾ་ཧཱུཾ། ཞེས་སྔགས་དྲུག་པོ་ལན་གསུམ་བརྗོད། སྲུང་བའི་འཁོར་ལོའི་ནང་དུ་ཨེ་ལས༴ ཞེས་པ་ནས། ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ་ལྷ་ཚོགས་ཡོངས་སུ་རྫོགས་པར་གྱུར་པ་ནི། དབུས་སུ་གདན་གྱི་སྟེང་དུ་བཅོམ་ལྡན་འདས་འཁོར་ལོ་
བདེ་མཆོག་སྐུ་མདོག་སྔོན་པོ༴ ནས། རྡོ་རྗེའི་ཕྲེང་བའི་མཚན་པའོའི་བར་མངལ་དཀྱིལ་བཞིན་བསྐྱེད། དུར་ཁྲོད་ཆེན་པོར་ཤར་དུ་ཚངས་པ། བྱང་དུ་གཞོན་ནུ་ཀརྟི་ཀ ནུབ་ཏུ་ཁྱབ་འཇུག ལྷོར་དབང་ཕྱུག་ཆེན་པོ་འཁོར་དང་བཅས་པ་འཁོད་པར་གྱུར། རང་གི་སྙིང་ག༴ ཞེས་པ་ནས། དེ་ནས་ཕཻཾ་ཞེས་པའི་བར་དཀྱིལ་འཁོར་རྒྱལ་མཆོག་བཞིན། ཨོཾ་བཛྲ་ཧེ་རུ་ཀ་ཨེ་ཧྱ་ཧི། བྷ་ག་ཝན་ཨི་ཧ་ཝ་ཀྱ་ས་མ་ཡེ་ན་ཙ་པཉྩ་ཨ་མྲྀ་ཏ་ཨརྒྷཾ་པྲ་ཏཱིཙྪ་སྟྭཾ་པུ་ཛ་པྲ་ཝ་ར་ཡ་མི། དཀྱིལ་འཁོར་རྒྱལ་མཆོག་ལྟར་ཕྱི་མཆོད་འབུལ། ཨོཾ་སརྦ་ཏ་ཐཱ་ག་ཏ་ཤྲཱི་ཙཀྲ་སཾ་བྷ་ར་མཎྜ་ལ་ལ་ཙཀྲ་སརྦ་བི་ར་ཡོ་གི་ནི། ཨོཾ་ཨགྣེ་ཡེ་སྭཱཧཱ། ལན་བདུན་གྱིས་བཀང་ལ། ཨ་དི་བྱ། སོགས་ཀྱིས་སྔགས་སྦྱར་ནས་གོང་ལྟར་བྱོན་ཟན་འབུལ། ཛཿཧཱུཾ་བཾ་ཧོཿ ཨོཾ་ཡོ་ག་ཤུདྡྷ་སརྦ་དྷརྨ་ཡོ་ག་ཤུདྡྷོ་྅་ཧཾ། གཙོ་བོ་ཡབ་ཡུམ་ཀྱི་གནས་རྣམས་སུ་སྙིང་གར་ཨོཾ་ཨོཾ་ཧ་ནས་བརླར་ཧ་ལྗང་ཁུ་ནས་དོན་ཡོད་གྲུབ་པའི་ངོ་བོའི་བར། འཁོར་རྣམས་ཀྱི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། སླར་ཡང༌། ནས། དབང་ལྷ་སྤྱན་འདྲེན༴ ནས། དམ་ཚིག་འཁོར་ལོ་པ་རྣམས་ལ་དོན་ཡོད་གྲུབ་པའི་དབུ་རྒྱན། ཞེས་པས་བར་དབང་བསྐུར་ཡང་དཀྱིལ་འཁོར་རྒྱལ་མཆོག་བཞིན་བྱས་ལ། དར་དཔྱངས་དང༌། རིན་པོ་ཆེའི་ཕྲེང་བའི་སྔགས་གོང་བཞིན། ཨཽཾ་པ་ཏྲ་ལཾ་པ་ཨ་བྷི་ཥིཉྩ་བཛྲ་ཏུཥྟྱ། ཨོཾ་རཏྣ་མ་ལ་ཨ་བྷི་ཥིཉྩ་དྲཾ། ཞེས་བརྗོད། དེ་ནས་ལྷ་ཐམས་ཅད་སེམས་
དཔའ་སུམ་བརྩེགས་སུ་གྱུར། གཙོ་བོའི་ཏིང་ངེ་འཛིན་སེམས་དཔའི་ཐིག་ལེའི་ནང་དུ་དཀྱིལ་འཁོར་ཡོངས་སུ་རྫོགས་པ། ཕྱི་ནང་གི་ལྷ་ཐམས་ཅད་འོད་ཟེར་དཀར་པོ་འབར་བ་ཞི་བའི་ཐུགས་ཅན་དུ་གྱུར། དེ་ནས་སྤྲོ་ན་མདུན་བསྐྱེད་བཞིན་ནམ། བསྡུ་ན་དཀྱིལ་འཁོར་རྒྱལ་མཆོག་བཞིན་མཆོད་བསྟོད་རྫོགས་པར་བྱ། དེ་ནས་སྲེག་རྫས་འབུལ་ཚུལ། ལྷ་སྔགས་རྒྱས་པ་ནི་ལྷ་རང་རང་གི་རྩ་སྔགས་བརྗོད་པ་དང༌། འབྲིང་ལ་གཙོ་བོ་ཡབ་ཡུམ་ལ་རང་སྔགས་གཞན་རྣམས་ལ་ས་བོན། བསྡུས་པ་ལ། ཨོཾ་སརྦ་ཏ་ཐཱ་ག་ཏ་ཤྲཱི་ཙཀྲ་སཾ་བྷ་ར་མཎྜལ་ཙཀྲ་སརྦ་བཱི་ར་ཡོ་གི་ནི། སོགས་སྦྱོར་ཚུལ་མང་དུ་གསུངས་ཀྱང་ཕྱག་ལེན་ལ་དང་པོ་ཡམ་ཤིང་ལ། རང་སྔགས་རྫོགས་པའི་ལྷ་སྔགས་ཀྱིས་རྗེས་སུ། ཨོཾ་བཛྲ་ཛྭ་ལ་ཡེ་སྭཱཧཱ། ཉེར་གཅིག་གིས་ཕུལ་ནས། ལས་སྔགས་ནི། བདག་དང་སེམས་ཅན་ཐམས་ཅད་ཀྱི་སརྦ་པཱ་པཾ་ཤིནྟཾ་ཀུ་རུ་སྭཱཧཱ། སརྦ་བིགྷན། སརྦ་རོ་ཥ། སརྦ་དུཥྛ་ན། སརྦ་བྱཱ་ཧེ། སརྦ་ཛྭ་ར། སརྦ་གྲ་ཧེ། སརྦ་དུར་མི་ཏི། སརྦ་དུར་སོཔྣི། སརྦ་ཨ་ཀ་ལ་མྲྀ་དྱུར་ཤིནྟཾ་ཀུརུ། དེ་ནས་གོང་བཞིན་སྲེག་རྫས་ཚར་རེ་ལ་ལྷ་སྔགས་གཙོ་བོ་ཡབ་ཡུམ་གྱི་སྙིང་པོའམ། ཉེ་སྙིང་གང་རུང་གི་མཐར། རྫས་སྔགས་ཀྱི་གྲངས་ཉེར་གཅིག་སོགས་ཇི་ཙམ་འོས་པའི་འབུལ་ལ། མཇུག་ཏུ་ལས་སྔགས་གོང་བཞིན་ལན་རེ་རེ་བརྗོད། དེ་ནས་སླར་ཡང་གྲངས་ཀྱི་ངོ་བོ་ཏིལ་སྔགས་འབའ་ཞིག་ལ་གྲངས་འཛིན་པ་ཡིན་ནོ། །ཡང་ན་གྲངས་འཛིན་པའི་སྐབས་འདིར། ཨོཾ་ཤྲཱི་ཧེ་རུ་ཀ་བི་མ་ཧེ་བི་དྱ་རཱ་ཛ་དྷི་
མ་ཡེ་བི་ར་པྲ་ཙོ་ཐ་ཡ་ཨཱཿཧཱུཾ་སྭཱཧཱ། ཞེས་པ་དབྱངས་སྐྱོང་གི་སྔགས་ཀྱིས་ཕུལ་ཡང་རུང་ངོ༌། །བསྲེག་རྫས་འབུལ་བ་རྫོགས་པ་དང༌། སྒྲུབ་ཐབས་ཀྱི་དཀྱིལ་འཁོར་རྒྱལ་མཆོག་ལྟར་མཆོད་བསྟོད་བྱས་ལ། སྒྲུབ་ཐབས་ནས་འབྱུང་བ་ལྟར་ཡི་དམ། ཆོས་སྐྱོང་མཁའ་འགྲོ་སྤྱི་གཏོར་སོགས་གཏོར་མ་འབུལ་བར་བྱའོ། །དེ་ནས་བཀྲ་ཤིས་རྒྱས་བསྡུས་གང་རུང་བྱས་ལ། ཧེ་རུ་ཀའི་ཡིག་བརྒྱ་ལན་བདུན་ཙམ་བཟླས་ནས། ལྷག་ཆད་ཁ་བསྐང༌། མ་འབྱོར་པ་དང་སོགས་ཀྱིས་བཟོད་པར་གསོལ། ཡིག་བརྒྱའི་མཐར། ཨོཾ་ཧེ་རུ་ཀ་མུ། ཞེས་པས་ཡེ་ཤེས་པ་གཤེགས། སྦྱིན་སྲེག་གི་ཐལ་བ་ཅུང་ཟད་བླངས། རང་གི་གནས་གསུམ་དུ་བྱུགས་ལ། ཛཿཧཱུཾ་བཾ་ཧོཿ དམ་ཚིག་པ་རྣམས་རང་ལ་ཐིམ། ཞེས་བརྗོད། དེ་དག་ནི་འཇིག་རྟེན་ལས་འདས་པའི་མེ་ལྷ་མཆོད་པའི་ཆོ་གའོ། །གསུམ་པ་མཇུག་ནི། སླར་ཡང་མར་བླུག་གཟར་གང་ཕུལ་བའི་རྐྱེན་གྱིས། མེ་ལྷ་ཐུགས་དཀྱིལ་དང་བཅས་པ་སྔར་བཞིན་གྲུབ་པར་གྱུར། གོང་འཇིག་རྟེན་པའི་མེ་ལྷའི་སྐབས་ལྟར། སྲེག་རྫས་རྣམས་ཚར་གཅིག་རྫོགས་པར་ཕུལ་ལ། གོང་ལྟར་མཆོད་བསྟོད་བྱ། སླར་ཡང་སྔགས་བདུན་གྱིས་དགང་བླུགས་གང་ཕུལ། མེ་ལྷའི་གཏོར་མ་བསངས་སྦྱངས། ཨོཾ་ཨཱཿཧཱུཾ་ཧ་ཧོཿཧྲཱིཿ ཨོཾ་ཧེ་རུ་ཀ་མཧཱ་བཛྲ་པཱ་པ་ཀ་ཨགྣ་ཡེ་ས་པ་རི་ཝཱ་ར་ན་མཿསརྦ་ཏ་ཐཱ་ག་ཏ་བྷྱ་སོགས་ལན་གསུམ་གྱིས་ཕུལ། ཨོཾ་ཨགྣ་ཡེ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། འཇིག་རྟེན་དབང་ཕྱུག་ཚངས་པ་མགོན་གྱིས་སྲས། །མེ་ལྷའི་རྒྱལ་པོ་ཊཀྐིས་དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་སྲེག །
འཇིགས་བྱེད་མེ་ལྷ་ཉིད་ལ་རྣམ་པར་འདུད། །མེ་ལྷ་དྲང་སྲོང་འཁོར་དང་བཅས། །མཆོད་སྦྱིན་གཏོར་མ་འདི་བཞེས་ལ་སོགས་ཀྱི་འདོད་དོན་གསོལ་འདེབས། ཨོཾ་ཨིནྡྲ་ཡེ་ནས། པྲྀ་ཐི་ཝི་དེ་ཝི་བྷྱཿ ཨོཾ་ཨ་ཀཱ་རོ་སོགས་ཀྱིས་ཕྱོགས་སྐྱོང་རྣམས་ལ་གཏོར་མ་ཕུལ། ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། ཨོཾ་ཨཱཿཧཱུཾ་གི་ནང་མཆོད། ཧེ་རུ་ཀ་དཔལ་ཡེ་ཤེས་ནི། །གང་ལ་གང་འདུལ་ཐབས་སྤྲུལ་པ། །ཕྱོགས་སྐྱོང་བཅུ་པོ་འཁོར་བཅས་རྣམས། །ཐོགས་མེད་ལས་ཀུན་མཛད་ལ་བསྟོད། །ཕྱོགས་སྐྱོང་བཅུ་པོ་འཁོར་བཅས་རྣམས། །མཆོད་སྦྱིན་གཏོར་མ༴ སོགས་ཀྱི་འཕྲིན་ལས་གཞོལ། སླར་ཡང་གཤེགས་སྐྱེམས་ཀྱི་ཚུལ་དུ། ཨོཾ་ཨགྣ་ཡེ་སྭཱཧཱ། ལན་བདུན་གྱིས་དགང་གཟར་བཀང་ལ། ཨོཾ་ཧེ་རུ་ཀ་སོགས་གོང་གི་སྔགས་དང་བཅས་པའི་མར་དགང་བླུགས་ལན་གསུམ་ཕུལ་ལ་ཡིག་བརྒྱ་ལན་གསུམ་བཟླས། མ་འབྱོར་བ་སོགས། སྤྱན་འདྲེན་པའི་ཕྱག་རྒྱ་རྣ་བའི་དྲུང་དུ་ཕྱིར་བསྐྱེད་ལ། བདག་གི་དོན་དང་གཞན་གྱི་དོན། །བྱིན་ཟ་ཁྱོད་ཀྱིས་མཛད་ལགས་ཀྱི། །མགུ་ཞིང་ཚིམ་པར་གྱུར་ནས་ཀྱང༌། །རང་གནས་བདེ་བར་གཤེགས་སུ་གསོལ། །ཨོཾ་ཨགྣ་ཡེ་ཡ་ཧི་བཛྲ་མུཿ སྔར་ཕུར་གདབ་དངོས་སུ་ཕུར་བུ་བཅུ་དང་ལྔ་ལ་བརྟེན་ནས་བྱས་པ་ཡིན་ན། རང་རང་གི་ཕུར་པ་འབྱིན་སྔགས་དང་ཕྱག་རྒྱས་དབྱུང༌། ཡིད་ཀྱིས་བཏབ་པ་ཙམ་ལ་ནི་ཕུར་བ་དབྱུང་བར་བསམས་པ་ཙམ་ལས་སྔགས་དང་ཕྱག་རྒྱ་མི་དགོས་སོ། །དེ་ནས་བདག་ཉིད་གོ་ཆ་གསུམ་གྱིས་བསྲུངས་ནས། སྨོན་ལམ་དང་བཀྲ་ཤིས་སོགས་བྱའོ། །
མེ་མ་ཤི་བར་མི་དཀྲུག་ཅིང༌། རང་ཤི་ལ་སོང་བ་ན་བུམ་པར་བླུག་ལ་ཆུ་བོར་སྤྱན་འདྲེན་པ། རྡུལ་ཚོན་ཆུ་བོར་སྤྱན་འདྲེན་པ་དང་འདྲའོ། །དེ་དག་གི་ལག་ལེན་དང་མཐར་གཅོད་པ་ནི་གཞན་དང་གཞན་ལ་བལྟ་བར་བྱའོ། །དེ་རྣམས་ཀྱི་སྡོམ་ནི། ས་ཆོག་ཐབ་ཁུང་བཅའ་བ་དང༌། །ཡོ་བྱད་བསགས་ཤིང་བུམ་པ་སྒྲུབ། །གཏོར་མ་གནས་ཡོ་བྱིན་རླབས་དང༌། །བདག་བསྐྱེད་ཆུ་གཉིས་སྒྲུབ་པ་དང༌། །རྫས་བྱིན་རླབས་ཤིང་མེ་སྦར་ཞིང༌། །ཐབ་ཁུང་མེ་ལྷ་ཕྱི་ནང་བསྐྱེད། །བྱིན་རླབས་སྤྱན་འདྲེན་གདན་ཕུལ་མཆོད། །བྱོན་ཟན་ཕུལ་སྟིམ་གོ་ཆ་དགོད། །དབང་བསྐུར་ཀུ་ཤ་མདའ་དྲང་བཅིངས། །མེ་བཀྲ་བརྟག་ཅིང་མཆོད་བསྟོད་བྱ། །བསྲེག་རྫས་མཆོད་བསྟོད་དགང་བླུགས་ཕུལ། །བསངས་སྦྱངས་བྱིན་རླབས་སྲུང་འཁོར་དང༌། །གཞལ་མེད་ཁང་དང་ལྷ་ཚོགས་བསྐྱེད། །སྤྱན་འདྲེན་མཆོད་བསྟོད་བྱོན་ཟན་འབུལ། །གོ་ཆ་བཅིངས་ནས་དབང་བསྐུར་བྱ། །སེམས་དཔའ་སུམ་བརྩེགས་ཞི་བའི་གཟུགས། །མཆོད་བསྟོད་བསྲེགས་རྫས་མཆོད་བསྟོད་འབུལ། །ཤིས་བརྗོད་ཡིག་བརྒྱ་བཟོད་པར་གསོལ། །གཤེགས་གསོལ་དམ་ཚིག་ཉེ་བར་བསྡུ། །དགང་བླུགས་བསྲེགས་རྫས་མཆོད་བསྟོད་དང༌། །དགང་བླུགས་མེ་ལྷ་ཕྱོགས་སྐྱོང་གི །གཏོར་འབུལ་གཤེགས་སྐྱེམས་ཁ་སྐོང་དང༌། །བཟོད་གསོལ་གཤེགས་གསོལ་ཕུར་བུ་དབྱུང༌། །ཉེར་བསྡུ་སྨོན་ལམ་བཀྲ་ཤིས་བྱ། །ཐལ་བ་ཆུ་བོར་སྤྱན་འདྲེན་ཏེ། །སྦྱིན་སྲེགས་ལས་ཀྱི་སྤྱི་སྡོམ་ཡིན། །དེ་ལྟར་མཆོག་དང་ཐུན་མོང་དངོས་གྲུབ་དོན། །མཐའ་དག་འཕྲིན་ལས་ཉེ་བར་སྒྲུབ་པའི་གཞི། །བསྲེགས་བླུགས་ཆོ་ག་མ་ནོར་སྐྱོན་བྲལ་བ། །མདོ་ཙམ་གོ་བདེའི་ངག་གིས་འདིར་
གསལ་བྱས། །འདི་བྲིས་དགེ་བའི་འགྲོ་བ་ཀུན། །སྔགས་རྒྱུད་སྦྱོར་བ་མཐར་ཕྱིན་ཏེ། །རྡོ་རྗེ་འཛིན་པའི་ས་གྲུབ་ནས། །དོན་གཉིས་ཕུན་སུམ་ཚོགས་པར་ཤོག། དཔལ་འཁོར་ལོ་སྡོམ་པའི་སྦྱིན་སྲེག་གི་ཆོ་ག་མདོར་བསྡུས་པ་དངོས་གྲུབ་སྙེ་མ་ཞེས་བྱ་བ། དོན་གཉེར་མང་པོའི་བསྐུལ་བའི་ངོར། རྒྱལ་ཁམས་པ་ཏཱ་ར་ནཱ་ཐས་རང་ལོ་ཉེར་བརྒྱད་པ་ལ་ཆོས་འཁོར་སྡིངས་སུ་ཉེ་བར་སྦྱར་བའོ། །ཞུས་དག།མངྒ་ལཾ།། །།དགེའོ་དགེའོ་དགེའོ།། །།
ཤོག་སྟོང་།