དཔལ་འཁོར་ལོ་སྡོམ་པའི་ཆོ་གའི་ཡན་ལག་འབྱུང་པོ་ཐམས་ཅད་པའི་གཏོར་ཆོག་ཆེན་མོ།
དཔལ་འཁོར་ལོ་སྡོམ་པའི་ཆོ་གའི་ཡན་ལག་འབྱུང་པོ་ཐམས་ཅད་པའི་གཏོར་ཆོག་ཆེན་མོ་བཞུགས།
ན་མཿཤྲི་ཧེ་རུ་ཀ་མཎྜ་ལེ་བྷྱཿ འདིར་དཔལ་འཁོར་ལོ་སྡོམ་པའི་རྣལ་འབྱོར་ལ་གནས་པ་དག་གིས། དཔལ་རྡོ་རྗེ་མཁའ་འགྲོ་དང་མཁའ་འགྲོ་རྒྱ་མཚོའི་རྒྱུད་ལས་འབྱུང་བ་ལྟར། འབྱུང་པོ་ཐམས་ཅད་པའི་གཏོར་མའི་ཆོ་ག་འདི་ཉིད་སྒྲུབ་པར་བྱའོ། །དེ་ལས་ནི་ལས་དང་དངོས་གྲུབ་ལ་སོགས་པ་འདོད་པའི་ཁྱད་པར་ཤིན་ཏུ་མང་པོ་དག་འགྲུབ་པར་འགྱུར་ཞིང༌། སྐྱེ་བོ་མང་པོ་དག་ལའང་མཆོག་ཏུ་ཕན་པ་ཡིན་ནོ། །དེ་ལ་དུས་ནི་རྒྱུན་གྱི་རྣལ་འབྱོར་དང་འབྲེལ་ན། ཐུན་སོ་སོའི་འཇུག་གི་ཆའམ། ལྷག་པར་མཆོག་ཏུ་བསྔགས་པ་ནམ་ཕྱེད་ཀྱི་ཐུན་མཚམས་ལ་ཡིན་ཞིང༌། ཁྱད་པར་གྱི་དུས་ནི། དཔལ་མཁའ་འགྲོ་རྒྱ་མཚོ་ལས། ཚེས་བརྒྱད་དང་ནི་ཁྱད་པར་དུ། །བཅོ་ལྔ་དང་ནི་ཚེས་བཅུ་བཞིར། །གྲུབ་འདོད་རྣལ་འབྱོར་རྣམས་
ཀྱིས་ནི། །འབད་པའི་གཏོར་མ་སྦྱིན་པར་བྱ། །ཞེས་གསུངས་ཤིང༌། དེ་དག་ལ་ཡར་ངོ་དང་མར་ངོའི་དབྱེ་བས་དྲུག་དང༌། སྤྱིར་གཏོར་ཆོག་འདི་ཚེས་བཅུ་མཆོད་པའི་ཡན་ལག་ཡིན་པའི། ཚེས་བཅུ་རྣམ་པ་གཉིས་ཏེ། ཟླ་བ་གཅིག་གི་ནང་དུ་ཉི་མ་བརྒྱད་པོ་དེ་དག་སྔགས་ལ། ལོ་དུས་ཀྱི་དབང་ལྟར་ན་དགུན་ཟླ་འབྲིང་པོའི་ཚེས་བཅུ་ལ་ལྷག་པར་བསྔགས་སོ། །དེ་ཡང་རྩ་བའི་སྔགས་བཟླ་བཞིན་དུ། རྡོ་རྗེ་དང་བཅས་པའི་བ་དན་རྩེ་གསུམ་པའི་ཕྱག་རྒྱས་ནང་མཆོད་བླངས་ཏེ་ས་གཞི་ལ་བྱུགས་པའི་སྟེང་དུ། ཐིག་བཏབ་ནས་ཆོས་འབྱུང་བསྲུང་འཁོར་དང་བཅས་པ་སྒོམ་དོན་བཞིན། རྡུལ་ཚོན་གྱི་འབྲི་བའམ། རས་བྲིས་ཀྱི་དཀྱིལ་འཁོར་སོགས་ཡོད་ནའང་ལེགས་ལ། ཡང་ན་ཆོས་འབྱུང་གི་དབུས་སུ་ཟླུམ་བསྐོར་གསུམ། ལྟེ་བ་ལེ་ཚེ་
དགུ་དང་བཅས་པ་འབྲི་བའམ། དེ་ཡང་མ་གྲུབ་ན་ཆོས་འབྱུང་པདྨ་འདབ་བརྒྱད་དང་བཅས་པ་ཙམ་མོ། །ཡང་ན་ཐིག་བཏབ་ནས་ཚོམ་བུ་བཀོད་ཀྱང་རུང་ལ། ཡང་རས་བྲིས་མེད་ཅིང་རྡུལ་ཚོན་གྱིས་བྲི་བ་མི་ལྕོགས་ན། མཎྜལ་ལ་ནང་མཆོད་ཀྱིས་ཆོས་འབྱུང་བྲིས་པའི་དབུས་སུ། ལྷ་གྲངས་དང་མཉམ་པའི་མེ་ཏོག་གམ་འབྲུའི་ཚོམ་བུ་བཀོད་པས་ཀྱང་རུང་ངོ༌། །དེ་ནས་གཏོར་མ་གཅིག་གམ་གཉིས་སམ། འཁོར་ལོའི་གྲངས་དང་མཉམ་པའི་ལྔའམ། ལྷ་གྲངས་དང་མཉམ་པ་སོགས་ཤ་ཁྲག་གཉིས་ཤ་ཆང་དང་སྒོག་ཙོང་ལ་སོགས་པའི་བརྒྱན་པ་ཟས་བཟང་རྒུས་སྦགས་པ་བཞག །ཆུ་གཉིས་ཉེར་སྤྱོད་ལྔ་སོགས་སྤྱི་དང་མཐུན་པར་བཤམས། ནང་མཆོད་བྱིན་རླབས་དང༌། གནས་ཡོ་བྱིན་རླབས་སྔོན་དུ་འགྲོ་བས། བདག་བསྐྱེད་རྒྱས་བསྡུས་གང་ཡང་རུང་བ་ཞིག་སྒོམ་ནས། གཏོར་མ་ཆང་ཆུ་ནང་མཆོད་ཀྱིས་བྲན། སོ་སོའི་སྒྲུབ་ཐབས་ནས་ཇི་སྐད་འབྱུང་བ་ལྟར། གཏོར་མ་བྱིན་གྱིས་རླབས། གཏོར་མའི་དཀྱིལ་འཁོར། སུམ་བྷས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨེ་ལས་ཆོས་འབྱུང་ནམ་མཁའི་ཁམས་ཀྱི་ནང་དུ། དུར་ཁྲོད་ཆེན་པོའི་ས་གཞི་ལ། བཾ་ལས་ཆུ་ཁམས་ཀྱི་དཀྱིལ་འཁོར་དཀར་པོ་དེའི་ནང་དུ་ཡཾ་ལས་རླུང་ཁམས་ཀྱི་དཀྱིལ་འཁོར་ནག་པོ། དེའི་ནང་དུ་རཾ་ལས་མེ་ཁམས་ཀྱི་དཀྱིལ་འཁོར་དམར་པོ་དེའི་ནང་དུ་ལཾ་ལས་ས་ཁམས་ཀྱི་དཀྱིལ་འཁོར་སེར་པོའོ། །དེ་རྣམས་གྲུ་བཞི་སྒོ་བཞི་པ་རྟ་བབས་དང་བྲལ་བ། དཀྱིལ་འཁོར་ནང་མའི་དབུས་སུ་པཾ་ལས་སྣ་ཚོགས་པདྨ་འདབ་
མ་བརྒྱད་པ། མུ་འཁྱུད་ལ་རྡོ་རྗེའི་འཕྲེང་བས་བསྐོར་བ་ནི་ཡེ་ཤེས་ཀྱི་དཀྱིལ་འཁོར་རོ། །པདྨའི་ལྟེ་བར་ཉི་མ་དང་མི་རོའི་གདན་ལ། ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས། བཅོམ་ལྡན་འདས་དཔལ་ཧེ་རུ་ཀ་སྐུ་མདོག་སྔོན་པོ། གར་གྱི་ཉམས་དགུ་དང་ལྡན་པ། ཕྱག་བཞིའི་[མཁའ་འགྲོ་རྒྱ་མཚོ་ལྟར་ན།]དང་པོ་གཉིས་ཌཱ་མ་རུ་དང་ཁ་ཊྭཱཾ་ག །འོག་མ་གཉིས་ཀྱིས་གྲི་གུག་དང་ཐོད་པ་འཛིན་པ། [ཡང་རྡོ་རྗེ་མཁའ་འགྲོ་ལྟར་ན།] ཕྱག་དང་པོ་གཉིས་གཡས་བ་དན་རྩེ་གསུམ་པའི་ཕྱག་རྒྱས་འཛིན་ཞིང་གསོར་པའི་རྡོ་རྗེ་དང༌། གཡོན་བཤོར་གྱི་རྣམ་པའི་ཐོད་ཁྲག འོག་མ་གཉིས་ཀྱི་མདའ་གཞུ་འགེངས་པ། དྲག་པོ་ཆེན་པོ། སུམ་བཅུ་རྩ་གསུམ་པ་ཐམས་ཅད་ཀྱང་འཇིགས་པར་མཛད་པ། ཧེ་རུ་ཀའི་རྒྱན་དང་ཆ་བྱད་ཐམས་ཅད་ཡོངས་སུ་རྫོགས་པའོ། །འདབ་མ་རྣམས་ལ་ཤར་དུ་ཕྲུཾ་ལས་མཁའ་འགྲོ་རྒྱལ་དབང་མ་དཀར་མོ་ཐལ་མོའི་རྩེ་མོ་ཁར་བཅུག་པ། བྱང་དུ་ཕྲཻཾ་ལས་འབར་བྱེད་མ་སེར་མོ་ཐལ་མོ་སྦྱར་བ་སྤྱི་བོར་བཞག་པ། ནུབ་ཏུ་ཕྲོཾ་ལས་འཇིབ་བྱེད་མ་དམར་མོ། སྙིམ་པ་ཁྲག་གིས་བཀང་བ་ཞལ་དུ་གསོལ་བ། ལྷོར་ཕྲིཾ་ལས་གཡོ་ལྡན་མའམ་ངག་འཕྲོག་མ་སྔོན་མོ། ཕྱག་གཉིས་གཏུན་ཤིང་དང་སྡིགས་མཛུབ་ཅན། བཞི་ཀར་ཡང་སྐྲ་དམར་པོ་གྲོལ་ཞིང༌། མི་རོའི་གདན་ལ་བཞེངས་པ། གཅེར་བུ་སྦྲུལ་དང་རུས་པ་ལ་
སོགས་པ་རྒྱན་ཐམས་ཅད་ཡོངས་སུ་རྫོགས་པའོ། །མཚམས་ཀྱི་འདབ་མ་རྣམས་ལ་ཐོད་པ་བདུད་རྩིས་གང་བ་བཞིའོ། །ས་ཁམས་འཁོར་ལོའི་སྒོ་བཞིར་ཧྲིཿཕྲཻཾ་ཧི་ཧོཿ མཚམས་བཞིར་ཨོཾ་གཾ་བིཾ་ཨིཾ་རྣམས་ཡོངས་སུ་གྱུར་པ་ལས། ཤར་སྒོར་ཕག་མོ་སྔོན་མོ་ཕག་གདོང་ཅན། །རབ་ཁྲོས་མདའ་གཞུ་རྒྱལ་མཚན་ཐོད་པ་འཛིན། །ལྷོ་སྒོར་ཞི་བ་མ་ནི་དམར་མོ་སྟེ། །ཐོད་པ་ལྕགས་ཀྱུ་ཁ་ཊྭཱཾ་ཅང་ཏེའུ་འཛིན། །ནུབ་སྒོར་གཞོན་ནུ་མ་ནི་སེར་མོ་སྟེ། ཏྲི་ཤཱུ་ལ་བ་དན་གསུམ་པ་གཞུ་དང་མདའ། །བྱང་སྒོར་ཙ་མུཎྜི་ནི་སྐུ་མདོག་ནག ཁ་ཊྭཾ་ཐོད་པ་རྔེ་ཆུང་ཆང་སྣོད་འཛིན། །བྱང་ཤར་ཟུར་དུ་ཚངས་པ་ཁ་དོག་དཀར། །འཁོར་ལོའི་དང་ནི་ཐོད་པ་མདའ་གཞུ་བསྣམས། །ཤར་ལྷོར་ཚོགས་ཀྱི་དབང་མོ་ལྗང་ཁུ་སྟེ། །རྩེ་གསུམ་ཐོད་པ་བགྲང་ཕྲེང་ལ་དུ་འཛིན། །ལྷོ་ནུབ་ཁྱབ་འཇུག་མ་ནི་ནམ་མཁའི་མདོག ། འཁོར་ལོ་ཐོད་པ་ཞགས་པ་རལ་གྲི་འཛིན། །ནུབ་བྱང་མཚམས་སུ་དབང་མོ་མདངས་འོད་སེར། །ཤཀ་ཏི་ཐོད་པ་སྡིགས་མཛུབ་ཞགས་པ་འཛིན། །དེ་ཐམས་ཅད་ཀྱང་ཞལ་གཅིག་ཕྱག་བཞི་སྤྱན་གསུམ་པ། དབུ་སྐྲ་གྱེན་དུ་བརྫེས་པ། སྟག་ལྤགས་ཀྱི་ན་བཟའ་དང་རྒྱན་ཐམས་ཅད་ཀྱིས་བརྒྱན་པ། མི་རོའི་གདན་ལ་བཞུགས་པའོ། །དཀྱིལ་འཁོར་གཉིས་པའི་བྱང་ཤར་ནས་བརྩམས་ཏེ། གཡས་བསྐོར་གྱིས་ཕྱོགས་མཚམས་བརྒྱད་ལ། ཨཱིཾ་ཨིཾ་ཨཾ་ཨཾ་ནེཾ་པཱཾ་བཾ་
ཀུཾ་རྣམས་ཡོངས་སུ་གྱུར་པ་ལས། འབྱུང་པོར་དབང་ལྡན་དཀར་པོ་ཁྱུ་མཆོག་ཆིབས། །ཕྱག་ན་མདུང་རྩེ་གསུམ་དང་ཐོད་པ་བསྣམས། །ཤར་དུ་ས་སྲུང་བུ་ལ་དབང་པོ་སེར། །རྡོ་རྗེ་དང་ནི་ཐོད་པ་ཕྱག་གིས་འཛིན། །ཤར་ལྷོར་མེ་ལྷ་ལུག་ལ་ཞོན། །དམར་པོ་ཕྱག་ན་མེ་ཐབ་འཛིན། །ལྷོ་ཕྱོགས་གཤིན་རྗེ་ནག་པོ་སྟེ། །མ་ཧེའི་གདན་སྟེང་དབྱུག་ཐོ་འཛིན། །ལྷོ་ནུབ་སྲིན་པོ་སྔོ་སྐྱ་སྟེ། །རལ་གྲི་འཕྱར་ཞིང་ཁྱི་ལ་ཆིབས། །ཆུ་སྲིན་ལ་གནས་ཆུ་ལྷ་དཀར། །ཞགས་པ་ཐོགས་པ་ནུབ་ཕྱོགས་སུའོ། །རླུང་ལྷ་དུང་མདོག་བ་དན་འཛིན། །ནུབ་བྱང་རི་དྭགས་སྟེང་ན་གནས། །གཏེར་བུམ་སྟེང་ན་ལུས་ངན་སེར། །རིན་པོ་ཆེ་འཛིན་བྱང་དུ་གནས། །དེ་ཐམས་ཅད་ཕྱག་བཞིའི་གཡོན་གྱི་དང་པོ་ཐོད་པ་བཅུད་ཀྱིས་གང་བ་དང༌། འོག་མ་གཉིས་སྤྱི་བོར་ཐལ་མོ་སྦྱོར་བས་གཙོ་བོ་ལ་འདུད་པའོ། །དཀྱིལ་འཁོར་གསུམ་པའི་ཤར་ནས་གཡས་བསྐོར་གྱི། སུཾ་ཙཾ་མཾ་བུཾ་བྲྀཾ་ཤྀཾ་ཤཾ་རཾ་ཀེཾ་རྣམས་ཡོངས་སུ་གྱུར་པ་ལས། ཤར་དུ་ཉི་མ་དམར་སེར་རྟ་མཆོག་དཀར་པོ་ཆིབས། །ཉི་མའི་དཀྱིལ་འཁོར་གྱིས་མཚན་པདྨ་ཕྱག་ན་བསྣམས། །ཟླ་བ་དཀར་པོ་ཟླ་དཀྱིལ་ཕྱེད་པའི་མཚན་པ་ཡི། །ཀུ་མུད་འཛིན་པ་ངང་པ་ལ་གནས་ཤར་ལྷོར་བཞུགས། །ལྷ་སྒོར་མིག་དམར་དམར་པོར་སྐྱེས་ལ་གནས་ཤིང༌། །གཡས་པ་གྲི་ཐུང་གཡོན་པས་མི་མགོ་བཟུངས་ཏེ་ཟ། །པད་གདན་ལ་གནས་གཟའ་ལྷག་སེར་པོ་
བདེན་བྲལ་ན། །མདའ་གཞུ་འགེངས་ཤིང་ཞི་བའི་ལྟ་བས་གནས་པའོ། །ནུབ་སྒོར་ཕུར་བུ་སེར་སྐྱ་རླུང་དུ་པ་སངས་དཀར། །གཉིས་ཀའང་པདྨ་ལ་གནས་བགྲང་ཕྲེང་སྤྱི་བླུགས་འཛིན། །སྤེན་པ་སྔོ་ནག་རུས་སྦལ་ལ་ཆིབས་རབ་ཏུ་ཁྲོས། །དབྱུག་པ་ཕྱར་ཞིང་ཁུ་ཚུར་དཀུར་བསྟེན་བྱང་སྒོར་བཞུགས། །དབང་ལྡན་ཟུར་དུ་སྒྲ་ཅན་དམར་ནག་སྲིན་པོའི་ལུས། །སྤྲིན་གྱི་གསེབ་ནས་ལུས་སྟོང་ཕྱུང་སྟེ་ཉི་ཟླ་འཛིན། །དེ་དང་ལྷན་ཅིག་མཇུག་རིངས་སྔོན་པོ་སྦྲུལ་མཇུག་ཅན། །ཀླུ་གཟུགས་རབ་ཏུ་ཁྲོས་པ་རལ་གྲི་ཞགས་པ་འཛིན། །དེ་དག་ཀུན་ཀྱང་རང་གི་ཁང་པའི་སྟེང་ན་བཞུགས། །རྒྱུ་སྐར་ལ་སོགས་གདོན་གྱི་ཚོགས་ཀྱིས་རབ་ཏུ་བསྐོར། །རྫུ་འཕྲུལ་ཆེན་པོ་སྟོབས་ལྡན་རང་གི་དམ་ཚིག་སྤྱོད། །དཀྱིལ་འཁོར་ཕྱི་མའི་ཕྱོགས་བཞིར་གཡོན་བསྐོར་གྱིས། །བྲཾ་བིཾ་ཏུཾ་ཀཾ་མཚམས་བཞིར་མཾ་རཾ་བཾ་ཡཾ་རྣམས་ཡོངས་སུ་གྱུར་པ་ལས། དབང་པོ་ཚངས་པ་དཀར་པོ་ནི། །ཞལ་བཞི་ཐོད་པ་ཟླས་འཕྲེང་དང༌། །སྤྱི་བླུགས་པདྨ་འཛིན་པའོ། །ནོར་སྦྱིན་ཕྱོགས་སུ་ཁྱབ་འཇུག་ནག །ཕྱག་བཞི་རལ་གྲི་འཁོར་ལོ་དང༌། །ཐོད་པ་ག་དེའི་དབྱུག་པ་འཛིན། །གཤིན་རྗེར་དྲག་པོ་དུ་བའི་མདོག །མདུང་རྩེ་གསུམ་པ་ཐོད་ཁྲག་དང༌། །ཞགས་པ་བཟླས་འཕྲེང་ཕྱག་ན་བསྣམས། །ཆུ་བདག་ཕྱོགས་སུ་གཞོན་ནུ་སེར། །གདོང་བ་དྲུག་ལྡན་མདུང་ཐུང་དང༌། །དབྱུག་ཏོ་ཐོད་པ་བགྲང་
ཕྲེང་འཛིན། །དབང་ལྡན་ས་ཡི་དཀྱིལ་འཁོར་ལ། །པད་མ་ལ་གནས་ནོར་འཛིན་མ། །སེར་མོ་གོས་དཀར་བུམ་པ་དང༌། །མི་འཇིགས་སྦྱིན་པའི་ཕྱག་རྒྱ་ཅན། །བྱིན་ཟེར་མེ་ཡི་དཀྱིལ་འཁོར་ལ། །མེ་ལྕེ་འབར་བའི་སྟེང་དུ་ནི། །མེ་ཡིས་ལྷ་མོ་མེ་ལྷ་མཚུངས། །སྲིན་པོར་ཆུའི་དཀྱིལ་འཁོར་སྟེང༌། །ཆར་སྤྲིན་ལ་གནས་ཆུ་ལྷ་མོ། །མདོག་དབྱིབས་ཕྱག་མཚན་ཆུ་ལྷ་བཞིན། །གཡོ་བའི་ཕྱོགས་སུ་རླུང་དཀྱིལ་ལ། །འཚུབས་མ་རླུང་རས་གཡོ་བས་མཚན། །དེར་གནས་རླུང་གི་ལྷ་མོ་ནི། །ཕྱོགས་སྐྱོང་རླུང་ལྷ་ཉིད་དང་མཚུངས། །དེའི་ཕྱི་རོལ་གཞལ་ཡས་ཁང་གི་སྒོ་གཡས་གཡོན་ལ། ཡི་གེ་ཕུཿཡིག་བརྒྱད་ལས་ཀླུ་ཆེན་པོ་བརྒྱད། སྒོའི་ཕྱི་རོལ་གྱི་ཁྱམས་ལ་ལྷ་མ་ཡིན་དང༌། ལུས་སྲུལ་པོ་ལ་སོགས་པའི་ཚོགས་དང༌། ཕྱི་རོལ་དུར་ཁྲོད་ཀྱི་གནས་ལ། ཞིང་སྐྱོང་ཆེན་པོ་རྣམས་སྲིད་པ་གསུམ་གྱི་འབྱུང་པོའི་ཚོགས་དང་བཅས་པ་འཁོད་པར་གྱུར། དེ་ཐམས་ཅད་ཀྱི་དཔྲལ་པར་ཨོཾ། མགྲིན་པར་ཨཿ ཐུགས་ཀར་ཧཱུཾ། རང་གི་སྙིང་གའི་ས་བོན་ལས་འོད་ཟེར་འཕྲོས། འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་གྱི་འཁོར་ལོ་དཔའ་བོ་དང་རྣལ་འབྱོར་མ། སངས་རྒྱས་དང་བྱང་ཆུབ་སེམས་དཔའི་ཚོགས་མ་ལུས་པ་རྣམས་དང༌། སྲིད་པ་གསུམ་ན་གནས་པའི་འབྱུང་པོའི་ཚོགས་ཀྱིས་བསྐོར་བ། མ་ལུས་ཤིང་ལུས་པ་མེད་པ་ཐམས་ཅད་
བྱོན་པར་གྱུར། ཕྲཻཾ། ཨོཾ་སུམྦྷ། སོགས་ཀྱིས་བསངས། ཨརྒྷཾ། ནས། ཤཔྟའི་བར་གྱིས་མཆོད། ཛཿཧཱུཾ་བཾ་ཧོཿ ལན་མང་དུ་བརྗོད། ཨོཾ་ཡོ་ག་ཤུདྡྷཿ སོགས། སླར་ཡང༌། ཨོཾ་བཱི་ནི་བཛྲི་ཎི་ཧཱུཾ་ཧཱུཾ་ཕཊ། ཨོཾ་ཝཾ་སེ་བཛྲི་ཎེ་ཧཱུཾ་ཧཱུཾ་ཕཊ། ཨོཾ་མྲྀ་ཏཾ་གེ་བཛྲི་ཎི་ཧཱུཾ་ཧཱུཾ་ཕཊ། ཨོཾ་མུ་ར་ཛེ་བཛྲི་ཎི་ཧཱུཾ་ཧཱུཾ་ཕཊ། ཨོཾ་ཧ་སྱེ་བཛྲི་ཎི་ཧཱུཾ་ཧཱུཾ་ཕཊ། ཨོཾ་ལ་སྱེ་བཛྲི་ཎི་ཧཱུཾ་ཧཱུཾ་ཕཊ། ཨོཾ་གིརྟི་བཛྲི་ཎི་ཧཱུཾ་ཧཱུཾ་ཕཊ། ཨོཾ་ནྀ་ཏི་བཛྲི་ཎི་ཧཱུཾ་ཧཱུཾ་ཕཊ། ཨོཾ་པུཥྤེ་བཛྲི་ཎི་ཧཱུཾ་ཧཱུཾ་ཕཊ། ཨོཾ་དྷུ་པེ་བཛྲི་ཎི་ཧཱུཾ་ཧཱུཾ་ཕཊ། ཨོཾ་དེ་པེ་བཛྲི་ཎི་ཧཱུཾ་ཧཱུཾ་ཕཊ། ཨོཾ་གནྡྷེ་བཛྲི་ཎི་ཧཱུཾ་ཧཱུཾ་ཕཊ། ཨོཾ་རུ་པ་བཛྲི་ཎི་ཧཱུཾ་ཧཱུཾ་ཕཊ། ཨོཾ་ར་སེ་བཛྲི་ཎི་ཧཱུཾ་ཧཱུཾ་ཕཊ། ཨོཾ་སྤརྵེ་བཛྲི་ཎི་ཧཱུཾ་ཧཱུཾ་ཕཊ། ཨོཾ་དྷརྨ་དྷ་ཏུ་བཛྲི་ཎི་ཧཱུཾ་ཧཱུཾ་ཕཊ། ཅེས་པའི་རིག་མ་བཅུ་དྲུག་དང༌། ཨོཾ་སརྦ་ཏ་ཐ་ག་ཏ་ཤྲཱི་ཧེ་རུ་ཀ་མཎྜ་ལ་ས་པ་རི་ཝ་རེ་བྷྱཿ བཛྲ་ཨརྒྷཾ་པྲ་ཏཱིཙྪ་སྭཱཧཱ། དེ་བཞིན་དུ་པཱ་དྱཾ། པུཥྤེ་ཨཱ་ཧཱུཾ་ནས་ཤཔྟའི་བར་གྱིས་མཆོད། མི་བསྐྱོད་རྡོ་རྗེ་ཡེ་ཤེས་ཆེ་རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་མཁའ་འགྲོ་ཕྱག་འཚལ་བསྟོད། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་ཆེན་པོ། །རང་བཞིན་གྱི་ནི་འོད་གསལ་མཆོག །སངས་རྒྱས་མཁའ་འགྲོ་ཕྱག་འཚལ་བསྟོད། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མེད་མཁའ། །རང་བཞིན་དག་པ་གོས་པ་མེད། །རིན་ཆེན་
མཁའ་འགྲོ་ཕྱག་འཚལ་བསྟོད། རྡོ་རྗེ་དཔག་མེད་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །པདྨ་མཁའ་འགྲོ་ཕྱག་འཚལ་བསྟོད། །དོན་ཡོད་རྒྱལ་པོ་རྫོགས་སངས་རྒྱས། །བསམ་པ་ཐམས་ཅད་རྫོགས་མཛད་པ། །དངོས་ཉིད་དག་པ་ཉིད་ལས་བྱུང༌། །སྣ་ཚོགས་མཁའ་འགྲོ་ཕྱག་འཚལ་བསྟོད། སོགས་དེ་ཉིད་ལྔ་པས་བསྟོད། དེ་ལའང་མཁའ་འགྲོ་ལྔའི་མིང་སྦྱོར། སྤྲོས་པ་ལ་དགའ་ན་ལྷ་སོ་སོའི་བསྟོད་པ་སྦྱར་ན་ཡང་ལེགས། བསྡུ་ན་མི་དགོས། རང་གི་ལག་པ་གཡོན་པར་ཨཱ་ལི་ལས་ཟླ་བ། གཡས་པར་ཀཱ་ལི་ལས་ཉི་མ། སྙིམ་པ་ཁ་སྦྱོར་གྱི་དབུས་སུ་ཧཱུཾ་སྔོན་པོ། ཨོཾ་ཨ་ནོ་ནྱ་ཨ་ནུ་ག་ཏཱ་སརྦ་དྷརྨ་ཧཱུཾ། ཨོཾ་པ་ར་སྤ་ར་ཨ་ནུ་པྲ་པྲིཥྟ་སརྦ་དྷརྨ་ཧཱུཾ། ཨོཾ་ཨ་ཏྱཱ་ནཱ་ཨ་ནུ་པྲ་པྲིཥྟ་སརྦ་དྷརྨ་ཧཱུཾ། ལག་པ་རྡོ་རྗེ་རྩེ་ལྔ་པར་གྱུར། པད་བསྐོར་བྱ་ཞིང༌། ལྷ་མོ་ཚད་མ་དམ་ཚིག་ཚད་མ་དང༌། །དེས་གསུངས་ཚིག་ཀྱང་ཚད་མའི་མཆོག་ཡིན་ཏེ། །བདེན་པ་དེ་ཡི་ལྷ་མོ་དེ་དག་གི །བདག་ལ་རྗེས་སུ་འཛིན་པའི་རྒྱུར་གྱུར་ཅིག །མགྲོན་རྣམས་ཀྱི་ལྗགས་ཧཱུཾ་དཀར་པོ་ལས་བྱུང་བའི་རྡོ་རྗེར་གྱུར། ཨོཾ་ཨ་རལླི་ཧོཿ ཛཿཧཱུཾ་བཾ་ཧོཿ བཛྲ་ཌ་ཀི་ནྱ་ཡ་ས་མ་ཡ་སྟྭཾ་དྲི་ཤྱ་ཧོཿ ཞེས་པ་ལན་ལྔའམ་བདུན་ལ་སོགས་པས་འཇིག་རྟེན་ལས་འདས་པའི་ལྷ་ཚོགས་ལ་འབུལ། བར་འདིར་སྤྲོ་ན། ཨོཾ་ཌཱ་ཀི་ནི་ཕྲུཾཿཕུ་སྭཱཧཱ། ཨོཾ་དཱི་པི་ནི་ཕྲེཾ་ཕུཿསྭཱཧཱ། ཨོཾ་
ཙི་ཥི་ཎི་ཕྲེཾ་ཕུཿསྭཱཧཱ། ཨོཾ་ཀཾ་པོ་ཛ་ཕྲཻཾ་ཕུཿསྭཱཧཱ། སྔགས་དེ་བཞི་པོའི་མཐར། ཨོཾ་བྷཀྵ་བྷཀྵ། སོགས་སྦྱོར། འཇིག་རྟེན་པའི་ལྷ་རྣམས་ལ་སོ་སོའི་མཚན་སྔགས་སམ། ཡང་ན། ཨོཾ་ཨཱཿཧྲཱིཿཧཱུཾ་ཕཊ་སྭཱཧཱ། ལ། ཨ་ཀཱ་རོ་བཏགས་པའམ། ཨོཾ་བྷཀྵ་བྷཀྵ་སརྦ་ཡོ་གེ་ཤྭ་རི་ཧཱུཾ་ཧཱུཾ་ཛཿསྭཱཧཱ། བཏགས་པའི་ཕག་མོ་ལ་ཕུལ། དེས་གཞན་རྣམས་ལའང་རིགས་འགྲེའོ། །ཨོཾ་ཨཱཿཕྲཻཾ་ཧཱུཾ་ཕཊ་སྭཱཧཱ། ཨོཾ་ཨཱཿཧིཿཧཱུཾ་ཕཊ་སྭཱཧཱ། ཨོཾ་ཨཱཿཧོ་ཧཱུཾ་ཕཊ་སྭཱཧཱ། ཨོཾ་ཨཱཿཨོཾ་ཧཱུཾ་ཕཊ་སྭཱཧཱ། ཨོཾ་ཨཱཿགཾ་ཧཱུཾ་ཕཊ་སྭཱཧཱ། ཨོཾ་ཨཱཿཔེཾ་ཧཱུཾ་ཕཊ་སྭཱཧཱ། ཨོཾ་ཨཱཿཨིཾ་ཧཱུཾ་ཕཊ་སྭཱཧཱ། མ་མོ་གཞན་བདུན་གྱི་སྔགས་སོ། །ཨོཾ་ཨཱཾཿཨིཾ་ཧཱུཾ་ཕཊ་སྭཱཧཱ། ཨོཾ་ཨཱཿཨིཾ་ཧཱུཾ་ཕཊ་སྭཱཧཱ། ཨོཾ་ཨཱཿཨཾ་ཧཱུཾ་ཕཊ་སྭཱཧཱ། ཨོཾ་ཨཱཿཡཾ་ཧཱུཾ་ཕཊ་སྭཱཧཱ། ཨོཾ་ཨཱཿནྱ་ཧཱུཾ་ཕཊ་སྭཱཧཱ། ཨོཾ་ཨཱཿཔཱཾ་ཧཱུཾ་ཕཊ་སྭཱཧཱ། ཨཽཾ་ཨཱཿཔཾ་ཧཱུཾ་ཕཊ་སྭཱཧཱ། ཨོཾ་ཨཱཿཀུཾ་ཧཱུཾ་ཕཊ་སྭཱཧཱ། ཕྱོགས་སྐྱོང་རྣམས་ཀྱིའོ། །ཨོཾ་ཨཱཿསུཾ་ཧཱུཾ་ཕཊ་སྭཱཧཱ། ཨོཾ་ཨཱཿཙཾ་ཧཱུཾ་ཕཊ་སྭཱཧཱ། ཨོཾ་ཨཱཿམཾ་ཧཱུཾ་ཕཊ་སྭཱཧཱ། ཨོཾ་ཨཱཿབུཾ་ཧཱུཾ་ཕཊ་སྭཱཧཱ། ཨོཾ་ཨཱཿབྲིཾ་ཧཱུཾ་ཕཊ་སྭཱཧཱ། ཨོཾ་ཨཱཿཤུཾ་ཧཱུཾ་ཕཊ་སྭཱཧཱ། ཨོཾ་ཨཱཿཤཾ་ཧཱུཾ་ཕཊ་སྭཱཧཱ། ཨོཾ་ཨཱཿརཾ་ཧཱུཾ་ཕཊ་སྭཱཧཱ། ཨོཾ་ཨཱཿཀཻཾ་ཧཱུཾ་ཕཊ་སྭཱཧཱ། གཟའ་དགུ་པོ་རྣམས་ཀྱིའོ། །ཨོཾ་ཨཱཿབྲཾ་ཧཱུཾ་ཕཊ་སྭཱཧཱ། ཨོཾ་ཨཱཿབིཾ་ཧཱུཾ་ཕཊ་སྭཱཧཱ། ཨོཾ་ཨཱཿཏུཾ་ཧཱུཾ་ཕཊ་སྭཱཧཱ། ཨོཾ་ཨཱཿཀཾ་ཧཱུཾ་ཕཊ་སྭཱཧཱ། ཨོཾ་ཨཱཿལཾ་ཧཱུཾ་ཕཊ་སྭཱཧཱ། ཨོཾ་ཨཱཿརཾ་ཧཱུཾ་ཕཊ་སྭཱཧཱ། ཨོཾ་ཨཱཿབཾ་ཧཱུཾ་ཕཊ་སྭཱཧཱ།
ཨོཾ་ཨཱཿཡཾ་སྭཱཧཱ། ཞེས་པ་རྣམས་ལ་སྔར་བཞིན་སྦྱར་རོ། །རེ་རེ་བཞིན་ཚར་གསུམ་མམ་བསྡུ་ན་ལན་གཅིག་གིས་ཕུལ་ལ། ཐམས་ཅད་ལ་ཐུན་མོང་དུ། ཨོཾ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ་རཀྵ་ས། བྷུ་ཏ། པྲེ་ཏ། བི་ཤཱ་ཙ། ཨུནྨཱ་ཏ། ཨ་པསྨ་ར། ཌཱ་ཀ ཌཱ་ཀི་ནྱ་ད་ཡ། ཨི་མི་བ་ལིཾ་གྲྀཧྞ་ཏུ་ས་མ་ཡ་རཀྵནྟུ་མ་མ་སརྦ་སིདྡྷི་མེ་པྲ་ཡཙྪནྟུ། ཡ་ཐཻ་བཾ། ཡ་ཐེཥྟཾ། བུཉྫ་ཐ། བི་བ་ཐ། ཛི་གྷ་ཐ། མཱ་ཏི་ཀྲ་མ་ཐཱ། མ་མ་སརྦ་ཀདྠ་ཡཾ། སད་སུ་ཁཾ་བི་ཤུདྡྷ། མ་མ་ས་ཧ་ཡི་ཀ་བྷ་ཝནྟུ་ཧཱུཾ་ཧཱུཾ་ཕཊ་སྭཱཧཱ། ཞེས་ལན་གསུམ་ལ་སོགས་པས་ཕུལ། གཡས་ཐོད་པའི་ཕྱག་རྒྱ་དང༌། གཡོན་བ་དན་གསུམ་གདེངས་པའི་ཕྱག་རྒྱས་བཏབ་ཅིང༌། ཨོཾ་ཧེ་ཧོ་ཧྲིཿསྭཱཧཱ། ཞེས་ལན་གསུམ་བཟླས་པས་ནང་མཆོད་བྱིན་རླབས་ཁ་གསོས། ཨོཾ་ཨཱཿཧཱུཾ་ལན་མང་པོས་གཡོན་པའི་མཐེབ་སྲིན་གྱིས་ཐིགས་ཐོར་འབུལ། བླ་མ་དང་དཀྱིལ་གྱི་ལྷ་ཚོགས་མགྲོན་ཐམས་ཅད་མཉེས་པར་བསམ། དཔལ་ཧེ་རུ་ཀའི་རྐང་བརྒྱད་གཉིས་དང༌། དེ་ཉིད་ལྔ་པ་ལ་སོགས་པས་བསྟོད། ལྷ་ཡི་ཚོགས་རྣམས་མ་ལུས་དང༌། ཀླུ་ཡི་ཚོགས་རྣམས་མ་ལུས་དང༌། གནོད་སྦྱིན༴ སྲིན་པོའི༴ འབྱུང་པོའི༴ ཡི་དྭགས༴ ཤ་ཟའི༴ སྨྱོ་བྱེད༴ བརྗེད་བྱེད༴ མཁའ་འགྲོའི་ཚོགས༴ མ་མོའི༴ མ་ལུས་པར་ནི་ཐམས་ཅད་དག།འདི་གཤེགས་བདག་ལ་དགོངས་སུ་གསོལ། །བསྟན་པ་བསྲུང་དང་འགྲོ་བའི་དོན་མཛད་ཕྱིར། །ཐུགས་དམ་བཅས་ཤིང་ཞལ་གྱིས་མཆེས་པ་
རྣམས། །དཔལ་ཆེན་བཀའ་སྡོད་ཡིད་ལྟར་མགྱོགས་པ་ཡི། །འཇིགས་པའི་གཟུགས་ཅན་དྲག་གཏུམ་མི་ཟད་པ། །གདུག་པ་འདུལ་མཛད་ནག་པོའི་ཕྱོགས་རྣམས་འཇོམས། །རྣལ་འབྱོར་ལས་ལ་འབྲས་བུ་སྟེར་མཛད་ཅིང༌། །མཐུ་སྟོབས་བྱིན་རླབས་བསམ་གྱིས་མི་ཁྱབ་པའི། །གནོད་སྦྱིན་ཚོགས་སོགས་བརྒྱད་ལ་ཕྱག་འཚལ་བསྟོད། །སྡེ་བརྒྱད་བཙུན་མོ་སྲས་དང་གཡོག་བཅས་པས། །དངོས་གྲུབ་ཀུན་གྱི་བཀའ་དྲིན་བདག་ལ་སྩོལ། རྣལ་འབྱོར་བདག་ཅག་འཁོར་བཅས་ལ། ནད་མེད་ཚེ་དང་དབང་ཕྱུག་དང༌། །དཔལ་དང་གྲགས་དང་སྐལ་བར་བཟང༌། །ལོངས་སྤྱོད་རྒྱ་ཆེན་ཀུན་ཐོབ་ཅིང༌། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་བསྲུང༌། །སྲུང་མས་རྟག་ཏུ་གྲོགས་མཛོད་ཅིང༌། །དུས་མིན་འཆི་དང་ནད་རྣམས་དང༌། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང༌། །འབྲུ་རྣམས་འཕེལ་དང་ཆོས་འཕེལ་དང༌། །བདེ་ལེགས་ཐམས་ཅད་བྱུང་བ་དང༌། །ཡིད་ལ་འདོད་པ་ཀུན་འགྲུབ་ཤོག་གིས་བར་གྱིས་འཕྲིན་ལས་བཅོལ། ལས་སོ་སོ་དང་འབྲེལ་ན་དེ་དང་དེའི་ལས་ལ་བསྐུལ་བ་དྲག་ཏུ་བྱ། དེ་ནས་རྡོ་རྗེ་གླུ་འདི་བླང་བར་བྱ་སྟེ། འགྲོ་བ་ཀུན་གྱི་མཆོག་ཏུ་དགའ་བའི་རང་བཞིན་ཏེ། །རྣལ་འབྱོར་
མ་ཡི་འཁོར་ལོའི་རང་བཞིན་དུ་གནས་ཀྱྀས། །ཨ་རེ་རེ་རེ་གཏི་མུག་ཕྱུགས་ཀྱིས་མི་ཤེས་སོ། །ལྷན་སྐྱེས་མཛེས་མ་བླངས་ནས་བདེ་བ་ཆེ་ལ་མནོས། ཤམ་དུ། །ས་གསུམ་མ་ལུས་འགྲོ་བ་སངས་རྒྱས་ཀྱི་རང་བཞིན། །སྙིང་རྗེའི་གཞོན་ནུ་མ་དང་ལྷན་ཅིག་རོལ་པར་བྱོས། ཨ་རེ། གང་གི་དོན་དམ་ལ་ནི་མ་སྒོམས་པས། དེ་ཡི་སངས་རྒྱས་ཉིད་ནི་ཐོབ་པ་མ་ཡིན་ཏེ། ཨ་རེ། ནང་དང་ཕྱི་ནི་དབྱེ་བ་མེད་པར་གྱིས། །འཇིག་རྟེན་ཐམས་ཅད་བསྒྲལ་བར་ནུས་པའོ། །ཨ་རེ། ཞེས་བྱ་བ་དང༌། ཧཱུཾ་ཁྲོ་བོ་བདེ་བ་དགྱེས་པ་ཡིན། །བདེ་བའི་ལོངས་སྤྱོད་ལས་བྱུང་བ། །བདེ་བ་དབབ་པའི་སྦྱོར་བ་ཡི། །རབ་ཏུ་རྨོངས་པ་བསྟེན་པར་བྱེད། ཨ་ལ་ལ་ལ་ལ་ཧོ། ཨ་ཨི་ཨཱ་ཨ་རལླྀ་ཧོ། བདེ་ཆེན་བདེ་བའི་གར་གྱིས་རོལ། །རྣལ་འབྱོར་མ་མཆོག་པདྨའི་བདེ། །ཨ་ལ་ལ་ལ་ལ་ཧོ། དགྱེས་པ་རྣམས་ཀྱི་བདེ་བ་མཆོག །རྣལ་འབྱོར་མ་མཆོག་མཆོད་པར་མཛོད། །ཨ་ཨི་ཨ་ཨ་རལླྀ་ཧོ། རབ་རྒྱས་མགོན་པོ་ཁྱེད་བཞུགས་མཛོད། །མཁའ་འགྲོ་དྲ་བའི་བདེ་བ་སྩོལ། །དགྱེས་པའི་བདེ་བ་གསོལ་བར་མཛོད། །ཞི་བའི་གར་གྱི་གར་མཛད་པ། །བདག་ལ་བདེ་ཆེན་བདེ་བ་སྩོལ། །ཐར་པའི་མཚན་ཉིད་ལྡན་པ་ཁྱོད། །ཨ་ལ་ལ་ལ་ལ་ཧོ། ཨ་ཨི་ཨ་ཨ་རལླྀ་ཧོ། བདེ་བ་སྤང་བས་གྲོལ་མི་འགྱུར། །བདེ་མེད་སྡུག་བསྔལ་གྱིས་མི་
གྲོལ། །བདེ་དེ་ཆུ་སྐྱེས་དབུས་ན་གནས། །ཆགས་པའི་དངོས་པོར་ཁྱེད་མ་གྱུར། །བདེ་བ་ཆེ་ཡིས་གྲོལ་བར་མཛོད། །པདྨ་རྒྱས་པའི་རོ་ཉིད་ཀྱིས། །བུང་བ་ལྟ་བུར་ཚིམ་པར་མཛོད། །འདི་ཡིས་མགོན་པོ་བསྐུལ་ན་ནི། །དཀྱིལ་འཁོར་དུ་ནི་ངེས་པར་འགྲུབ། །སྙན་ཞིང་འཇེབས་པའི་དབྱངས་ཀྱིས་ནི། །དཔྱིད་ཀྱི་རྒྱལ་པོའི་གླུ་བླང་བས། །དྲི་མེད་མཁའ་འགྲོ་དྲ་བ་ཡིས། །གཟིགས་ཤིང་ལས་ཀུན་མཛད་པ་ཡིན། །ཨོཾ་ཕུན་སུམ་ཚོགས་པ་མངའ་བ་གསེར་གྱི༴ སོགས་བཀྲ་ཤིས་བརྗོད། སེམས་ཅན་ཐམས་ཅད་བདེ་གྱུར་ཅིག །སེམས་ཅན་ཐམས་ཅད་སྐྱོན་མེད་པར། གང་གི་ལམ་གྱིས་གྲོལ་གྱུར་པ། །དེ་ཡིས་སངས་རྒྱས་མྱུར་ཐོབ་ཤོག །ལྷ་མོ་ཚད་མ། སོགས། སྲིད་དང་ཞི་བ་མཉམ་པ་ཆགས་དང་ཀུན་རྟོག་ཆགས་པ་བཅོམ། ཁྱོད་ཀྱིས་དངོས་ཀུན་རང་བཞིན་ནམ་མཁའ་དང་ནི་འདྲར་གཟིགས་ཀྱང༌། །མགོན་པོ་ཤིན་ཏུ་ལྕི་བའི་ཐུགས་རྗེ་ཆུ་རྒྱས་སེམས་ལ་ནི། །མཛོད་ཅིག་ལྷ་མོ་རྣམས་ཀྱིས་བདག་ལ་རྗེས་བརྩེར་མཛད་དུ་གསོལ། །བདག་ལ་འཕྲིན་ལས་དང་དངོས་གྲུབ་ཐམས་ཅད་གེགས་མེད་པར་སྩལ་བ་དང༌། །མྱུར་དུ་དཔལ་ཧེ་རུ་ཀ་ཉིད་ཀྱི་གོ་འཕང་ཐོབ་པར་མཛད་དུ་གསོལ། ཞེས་སོགས་འདོད་དོན་གསོལ་བ་བཏབ། ཡིག་བརྒྱ་ལན་གསུམ་དང༌། བཟོད་གསོལ་སྤྱི་དང་འདྲ། ཨོཾ་ཁྱེད་ཀྱིས་སེམས་ཅན༴ སོགས་ཀྱི་མཐར།
འཐེབ་མཛུབ་གཉིས་བཀུག་སྟེ་ཟླུམ་པོར་བྱས་ལ། སོར་མོ་གཞན་རྐྱང་པ་མིག་གིས་ཕྱག་རྒྱ་བསྟན་རྗེས། པད་སྐོར་དང་ལྟེ་བར་འཁྱུད་རྒྱ་བྱས་ལ། མཐེབ་སྲིན་གྱིས་སེ་གོལ་ཕྱིར་གཏོགས་ཏེ། ཨོཾ་བཛྲ་མཎྜ་ལ་མུཿ ཡེ་ཤེས་པའི་དཀྱིལ་འཁོར་རྣམས་བདག་གིས་དཔྲལ་པར་ཐིམ་པ་དང༌། ཨོཾ་ཡོ་ག་ཤུདྡྷ། སོགས། འཇིག་རྟེན་པ་རྣམས་རང་གནས་སུ་གཤེགས་པར་མོས། རོལ་མོའི་སྒྲ་དང་བཅས་ཏེ་འཇིག་རྟེན་པའི་གཏོར་མ་ལམ་གྱི་བཞི་མདོ་སོགས་སུ་བསྐྱལ། ཐམས་ཅད་ཀྱིས་སུམ་བྷ་དྲག་ཏུ་བཟླས། ནང་དུ་འོངས་ནས་གཏོར་སྐྱེལ་བ་ལ་བསངས་ཆུའམ་ནང་མཆོད་ཀྱིས་གཏོར། ཡོན་བདག་ལ་སོགས་པ་གཞན་གྱི་དོན་དུ་གཏོར་མ་བཏང་བ་ཡིན་ན། མཁའ་འགྲོ་མ་རྣམས་འདུས་ལ་གུས་པས་མཆོད་པ་དང༌། དཔའ་བོ་རྣམས་ལ་བཟའ་དང་བཏུང་བ་ཁྱོད་ཀྱི་དྲངས། ཁྱེད་ལ་རྟག་ཏུ་བསྲུང་དང་མཆོག་གི་འབྱོར་པ་དང༌། །ཡང་ན་ཡིད་ལ་འདོད་པ་ཕུན་སུམ་ཚོགས་པར་ཤོག །སྐྱེ་བ་ཀུན་ཏུ་མཆོག་ཏུ་བདེ་བར་གཤེགས་པ་ཡི། གྲུབ་པའི་འཇིག་རྟེན་དབུས་སུ་འགྲོ་བར་འགྱུར་བར་ཤོག །ཅེས་བརྗོད། རང་གཞན་གྱི་དོན་གང་ཡིན་ཀྱང་ཐུན་མོང་དུ། སྨོན་ལམ་དང་བཀྲ་ཤིས་ཇི་ལྟར་འོས་པ་བརྗོད་ཅིང༌། དཔའ་བོ་གཉིས་མེད་མཆོད་པས་སྐྱེ་བ་འདི་ལ་ནི། །སྒྲིབ་པ་ཟད་དང་ཕྱག་རྒྱའི་དངོས་གྲུབ་འགྲུབ་པར་ཤོག །སྐྱེ་བ་ཀུན་ཏུ་མཆོག་ཏུ་བདེ་བར་གཤེགས་པ་ཡི། །གྲུབ་པའི་འཇིག་རྟེན་དབུས་སུ་འགྲོ་བ་ཉིད་གྱུར་ཏེ། །ཞིང་དང་ཉེ་བའི་
ཞིང་སོགས་གནས་བཅུ་གཉིས། །དམ་ཚིག་བརྡ་དང་བདེ་སྤྱོད་རོལ་པ་ཡི། །བུ་བཞིན་དགོངས་པས་བདག་སྒྲིབ་དག་གྱུར་ཅིག །བདེ་བ་མཆོག་གིས་ས་ལ་འགོད་པར་ཤོག །བླ་མའི་ཞབས་ལ་རྟག་ཏུ་འདུད་བྱེད་ཅིང༌། །རྡོ་རྗེའི་དབང་མོའི་ཞབས་དྲན་གྱུར་ནས་ཀྱང༌། །བཙུན་མོའི་ཤུ་ཀྲའི་ཚོགས་ལ་རྟག་སྤྱོད་ཅིང༌། །གསང་བའི་པདྨོར་རོལ་ཞིང་མཆོད་བྱེད་ཤོག །དཔལ་ལྡན་དཔའ་བོ་དཔའ་མོ་ཉི་ཤུ་བཞིའི། །ཞལ་མཐོང་དེ་ཡི་ངོ་བོར་བདག་གྱུར་ཏེ། །འགྲོ་བ་བདེ་བ་དམ་པས་འཕོང་རྣམས་ཀྱི། །ཉེར་འཚོ་རིན་ཆེན་ལྟ་བུར་བདག་གྱུར་ཅིག །རྣམ་པ་མང་པོའི་བསོད་ནམས་འདི་དག་ཀྱང༌། །བདག་གཞན་དགེ་བ་མཆོག་ནི་བསྐྱེད་པའི་གཞི། །དེ་ཉིད་གསལ་བྱེད་རྨོངས་པ་རབ་འཇོམས་པ། །འགྲོ་ལ་མི་འཇིགས་སྟེར་བའི་མངའ་བདག་ཤོག །རྣམ་པར་རྟོག་པ་ཀུན་ལས་འདས་པ་ཡི། །བདེ་ཆེན་འཁོར་ལོ་ཟག་པ་མེད་པའི་དབྱིངས། །ཨཱ་ལི་ཀཱ་ལི་རྟོག་མེད་སྙོམས་འཇུག་མར། །བསགས་པའི་དགེ་རྣམས་ཡོངས་སུ་བསྔོ་བར་བགྱི། །བདག་གི་བསོད་ནམས་འདི་ཡི་ཡང་ཡང་སྐྱེ་བའི་རིམ་པ་རྣམས་སུ་ཡང༌། །ཡུན་རིང་འགྲོ་བའི་དོན་བསྒྲུབ་དོན་ལ་འཇིགས་པ་མེད་པར་དགའ་བ་དང༌། །གཙོ་བོར་སྐུ་ཡི་འོད་ཟེར་ནམ་མཁའ་ཁྱབ་པར་འགྲོ་བས་དབང་བསྐུར་བ། །སྲིད་གསུམ་རྡོ་རྗེ་རོལ་བར་ལྷན་ཅིག་དེ་ཡི་གོ་འཕང་ཐོབ་པར་ཤོག །
རྣམ་རྟོག་གཏི་མུག་གྲོང་ཁྱེར་མཐའ་དག་བསལ་ནས་ཧེ་རུ་ཀ་གཙོ་མཁའ་འགྲོ་མའི། །འཁོར་ལོས་ཡོངས་བསྐོར་རྒྱལ་བ་བླ་མེད་ཡེ་ཤེས་འབྱུང་གནས་ཐར་པ་དམ་པའི་གྲོང༌། །སྦྱིན་པ་ལ་སོགས་རྣམས་ཀྱིས་འགྲོ་བའི་ཡིད་ལ་རེ་བ་ཡང་དག་རྫོགས་པའི་མཆོག །འདིར་ནི་ཤིན་ཏུ་བརྩེ་བ་ཆེ་ལྡན་འཕགས་པའི་དཔལ་འབྱོར་རྟག་པར་མྱོང་བར་ཤོག །ཅེས་སོགས་ཐུན་མོང་མ་ཡིན་པའི་སྨོན་ལམ་རྣམས་ངེས་པར་གལ་ཆེའོ། །དེ་ལྟར་ན་གཏོར་མའི་ཆོག་འདི་ལ། དཀྱིལ་འཁོར་རིམ་པ་བཞིར་བྱེད་པ་ནི། མཁའ་འགྲོ་རྒྱ་མཚོའི་དགོངས་པ་ཡིནཞིང༌། རྡོ་རྗེ་མཁའ་འགྲོ་ནས་གསུང་བ་ལྟར་ན། དཀྱིལ་འཁོར་རིམ་པ་གསུམ་ཡིན་པའི་འབྱུང་བ་བཞི་དང་མི་སྦྱོར་ལ། རྒྱུད་དེ་ཉིད་ནས་མདོར་བསྟན་གྱི་སྐབས་སུ། དཀྱིལ་འཁོར་ཕྱི་མའི་ལྷ་རྣམས་ལ་གཟའ་བརྒྱད་དང༌། སྒོ་འཁྱུད་བཞིར་ལྷ་ཆེན་བཞི། ཟུར་བཞིར་འབྱུང་བཞིའི་ལྷ་མོ་རྣམས་ཞལ་ཕྱག་ཅན་དུ་མི་མཛད་པར། པདྨ་དང་ཆར་སྤྲིན་ལ་སོགས་པའི་གཟུགས་སུ་མཛད། རྒྱས་བཤད་ཀྱི་སྐབས་དཀྱིལ་འཁོར་ནང་མའི་ལྷ་རྣམས་ལ་མ་མོ་བརྒྱད། དེའི་སྒོ་འཁྱུད་བཞིར་ཚངས་པ་སོགས་ལྷ་ཆེན་བཞིར་འགོད་པར་དངོས་སུ་བཤད་ཅིང༌། དེས་ཟུར་བཞིར་འབྱུང་བཞིའི་ལྷ་མོ་ཡང་འགོད་པར་དོན་གྱིས་ཐོབ། དེ་གཉིས་འདམ་ཁ་ཡིན་པས་གང་ལྟར་བྱས་ཀྱང་འདྲ། གཞལ་ཡས་ཁང་ཀུན་ལ་ལྷ་རྣམས་རིམ་པ་གཅིག་ཁོ་ན་ཡིན་པས། ཕྱི་ནང་གང་ལ་འགོད་ཀྱང་ལྷ་བརྒྱད་པ་རིམ་པ་གཉིས་འགོད་དགོས་པ་དེ་ལ། ལྷ་སྣམ་ཟླུམ་པོར་
བསྐོར། སྒོ་བཞིའི་གཡས་གཡོན་གྱི་རྩིག་པ་ལ་མ་རེག་ཙམ་བྱ། དེ་ལ་ལྷ་བརྒྱད་དང༌། སྒོ་བཞི་ལ་ལྷ་བཞི། གྲུ་ཆད་བཞི་ལ་འབྱུང་བཞིའི་ལྷ་མོ་བཀོད་པས་ལེགས་པར་འོང༌། དེ་ཡང་དཀྱིལ་འཁོར་ནང་མ་ལ་བཀོད་ན་ལག་ལེན་བདེ་ཞིང༌། ཡང་དབུས་སུ་པདྨ་འདབ་བརྒྱད་ཀྱི་དོན་ལ། ཟླུམ་བསྐོར་ལེ་ཚེ་དགུ་པ་ཕྱོགས་མདོག་ཅན་བྱས་ཀྱང་ལེགས་པར་འོང་ངོ༌། །དེ་ལྟར་འདིར་དཀྱུས་སུ་བཤད་པ་ནི། ཕྱི་གཏོར་གྱི་དབང་དུ་བྱས་པ་ཡིན་ལ། ནང་གཏོར་གྱི་དབང་དུ་བྱས་ན། པདྨའི་ལྟེ་བར་རབ་ཏུ་ཡངས་པའི་དབུས་སམ། ལེ་ཚེ་དགུའི་རེ་མིག་དབུས་མ། ཤིན་ཏུ་ཡངས་པར་གྱུར་པའི་གནས་སུ། དཔལ་འཁོར་ལོ་སྡོམ་པ་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་སྐད་ཅིག་གི་གྲུབ་པར་མོས། སྐད་ཅིག་རྣམ་པའི་སྔགས་ལན་གསུམ་བརྗོད་ཅིང༌། ཞལ་ཕྱག་རྣམས་རིམ་གྱིས་གསལ་བཏབ། དེ་ནས་ཡེ་ཤེས་པ་སྤྱན་འདྲེན་པ་མན་ཆད་བྱེད་ཅིང༌། འཇིག་རྟེན་འདས་གཏོར་གྱི་སྐབས། མངོན་རྟོགས་དཀྱུས་དང་འདྲ་ཁ་ཅིག་ལྷ་སུམ་ཅུ་སོ་བདུན་པོ་འདི་བསྐྱེད་པ་ལ། འབྱུང་པོ་ཐམས་ཅད་པའི་དཀྱིལ་འཁོར་རྒྱས་པ་དང༌། མཁའ་འགྲོ་སྤྱི་གཏོར་ཆེན་མོའི་དཀྱིལ་འཁོར་ལ་འབྱུང་པོ་ཐམས་ཅད་པའི་དཀྱིལ་འཁོར་འབྲིང་པོ་ཡིན་ཞེས་འཆད་པ་ནི། ལྷ་གྲངས་གཅིག་ཤོས་མང་ཞིང༌། བསྐྱེད་ཆོག་རྒྱས་བསྡུས་ཀྱི་ཁྱད་པར་ཡང་མེད་པས། རྒྱས་འབྲིང་གི་དབྱེ་བ་དེ་འདྲ་ནི་མི་འཐད་ལ། ཅིག་ཤོས་ཞིང་སྐྱོང་ཉིད་གཙོ་བོ་དང༌། འདི་འབྱུང་པོ་སྤྱིའི་དཀྱིལ་འཁོར་ཡིན་པས། ཡུལ་དང་དགོས་པ་གཉིས་ཀར་ཅུང་ཟད་མི་འདྲ་བའི་དཀྱིལ་འཁོར་གཞི་ནས་ཐ་དད་ཡིན་པས། ཕྱིར་ཡང་རྒྱས་བསྡུས་སུ་འཇོག་རྒྱུ་མ་ཡིན་ནོ། །འོན་ཀྱང་དཀྱིལ་འཁོར་གཉིས་པོ་སོ་སོ་དུས་གཅིག་ཏུ་བཞེངས་ནས། ཆོ་གའི་ཁྱད་པར་མི་འདྲ་བ་
རྣམས་སོ་སོར་སྐབས་དེ་ཉིད་དུ་ལྷག་པོར་སྦྱར། ཆོ་ག་བྱིངས་འདི་ཚར་གཅིག་གིས་འགྲོ་བར་བྱས་ན་ནི་ཤིན་ཏུ་རུང་ལ། ཡང་ཁོ་བོ་ཅག་གི་བླ་མ་དམ་པ་རྒྱ་གར་མཁས་པ་ཞིག་ནི། དབུས་སུ་གཙོ་བོ་མཁའ་འགྲོ་བཞི་དང་བཅས་པ། དེའི་མཐའ་ཟླུམ་བསྐོར་གསུམ་ལ་ཞིང་སྐྱོང་ཉི་ཤུ་རྩ་བཞི། ལྷག་མ་དཀྱིལ་འཁོར་བཞི་ལ་གོང་དུ་བཤད་པ་བཞིན་བྱས་ནས། ཕྱིའི་དུར་ཁྲོད་ལ་ནག་པོ་དྲག་པོ་སོགས་ཞིང་སྐྱོང་བརྒྱད། མཁའ་འགྲོ་སུམ་ཅུ་རྩ་གཉིས་དང་བཅས་པ་སྒོམ་ཞེས་བཀའ་སྩོལ་བར་མཛད་དོ། །འོན་ཀྱང་རེ་ཞིག་དཀྱིལ་འཁོར་གཉིས་སུ་བྱེད་པ་ཉིད་མི་ལེགས་ཤིང༌། བླ་མ་དམ་པ་དེའི་ལུགས་ལ། གཏོར་མའི་བཤོམས་ཀྱི་ཁྱད་པར། བུམ་པ་ཆང་གིས་བཀང་པའི་སྟེང་དུ། ཁ་ཟས་དང་དམར་གྱིས་གང་བའི་གཏོར་སྣོད་བཞག་པ་ཕྱོགས་མཚམས་བརྒྱད་དུ་རེ་རེ་དང༌། འདས་གཏོར་དེ་ཀ་འདྲ་བ་གཅིག །བརྒྱད་པོའི་ཕྱི་རོལ་ལྷོ་ཕྱོགས་སྟེགས་བུ་མཐོ་བ་ལ་འཇོག་ཅིང༌། ཐམས་ཅད་བ་དན་གྱིས་བརྒྱན་པ། སོ་སོར་དགོས་མཆོད་རེ་རེ་དང་བཅས་པ་ཕྱག་ལེན་དུ་མཛད་ཀྱིན་འདུག་པ་ནི། འདིར་ཡང་ལག་ལེན་དུ་བཏབ་ན་ལེགས་སོ། །ཡང་མཁའ་འགྲོ་རྒྱ་མཚོའི་གཏོར་ཆོག་ཛ་ན་སེ་ནས་མཛད་པ་སོགས་ལས། ཡེ་ཤེས་པ་སྤྱན་དྲངས་མ་ཐག་ཏུ། འཇིག་རྟེན་པ་རྣམས་འོད་གསལ་དུ་བཅུག་ནས། འཁོར་ལོ་སྡོམ་པའི་རྣམ་པ་ཅན་དུ་བཞེངས་གསུངས་པར་འདུག ལར་ཡང་འཕགས་ཡུལ་དང་བལ་པོ་ཕྱི་རབས་པ་རྣམས་གཏོར་ཆོག་ཕལ་ཆེར་ལ་ལྷ་རྣམས་བསྒྱུར་བ་འདི་ཀ་དར་བར་འདུག་པའི་རྩ་བའི་ཁུངས་སློབ་དཔོན་སངས་རྒྱས་ཡེ་ཤེས་ཞབས་
ཀྱི་གཏོར་མ་ཆེན་པོའི་ཆོ་ག་དེ་ཡིན་འདུག་ཅིང༌། དེའི་ལུགས་ལའང་ནང་གཏོར་ལ་ཡིན་གྱི་ཕྱི་རོལ་པ་དང༌། སྔོན་འགྲོ་གཏོར་མ་སོགས་ལ་མི་བཞེད་ལ། ནང་གཏོར་ལ་ཐུན་མོང་མ་ཡིན་པ་ནང་ཆོག་གིས་བསྐྱེད་པ་དང༌། ཐུན་མོང་བའི། ནང་ཚན་ཞི་བའི་ཕྱོགས་ལ། འོད་གསལ་དུ་འཇུག་ལྡང་བྱེད་པ་དང༌། དྲག་པོའི་ཕྱོགས་ལ་ཕུར་པས་བཏབ་ནས་གསེར་འགྱུར་རྩི་ལྟར་བསྒྱུར་བར་བྱེད། འདི་དག་ལ་ཡེ་ཤེས་ལྷའི་རྣམ་པར་བསྒྱུར་བ་ཡིན་ཀྱང༌། ཕྱག་མཚན་དང་ཕྱིབས་པ་སོགས་མི་འདྲ་བའི་ཁྱད་པར་ཅུང་ཟད་འབྱུང་ངོ༌། །འོན་ཀྱང་འདི་སློབ་དཔོན་དེ་ལས་བརྒྱུད་པ་མིན་པས། གོང་དུ་བཤད་པ་ཉིད་ཀྱིས་ཆོ་ག་ལ། གསང་སྔགས་ཀྱི་རྣལ་འབྱོར་པས་འགྲོ་བ་ཐམས་ཅད་ལྷག་པའི་ལྷར་ཤེས་པ་རྟག་ཏུ་དགོས་ལ། ཁྱད་པར་དུ་ཡང་གཏོར་མགྲོན་ཐམས་ཅད་ཧེ་རུ་ཀའི་ངོ་བོར་མོས་པ་བརྟན་པོ་ནི་ངེས་པར་དགོས་པ་གཞིར་བཞག་ཏུ་སྣང༌། ལྷའི་རྣམ་པ་བསྒྱུར་བ་ནི་མེད་མི་རུང་ཁོ་ན་ཡང་མིན་པས། འཁོར་ལོ་སྡོམ་པའི་ལུགས་གསལ་བར་མཛད་པའི་ཆེན་པོ་རྣམས་ཀྱི་བསྟན་བཅོས་ལས་མ་བཤད་ཅིང༌། མན་ངག་གི་རྒྱུན་ལ་མེད་ཕྱིན་མི་དགོས་སོ། །དེ་བཞིན་དུ་ཛ་ཡ་སེ་ནས་འདས་གཏོར་ཕུལ་མ་ཐག་དེ་དང༌། ཡིག་བརྒྱ་བཟླ་བའི་བར་དུ་ཆོ་ག་ལྷག་མ་མང་དུ་བཅུག་པ་ཡང་འགལ་བ་མེད་མོད་ཀྱི་ལྷག་པོ་ཡིན་ནོ། །གཏོར་མའི་དཀྱིལ་འཁོར་གྱི་སྐབས་སུ། སྒོ་ཕྲག་བཞི་པོ་དངོས་སུ་འབྲི་བ་ཡང་མ་གྲུབ། ཐིག་ཡོངས་རྫོགས་ཡང་གདབ་པར་མ་ནུས་ན། སྒོ་ཕྲག་གསུམ་མམ་བཞིའི་རྩ་ཐིག་དང་ཕྱིའི་
ཆོས་འབྱུང་དང་ནང་གི་ཟླུམ་ཐིག་དང་བཅས་བ་ཙམ་བཏབ་ཀྱང་ལེགས་པར་འགྱུར་ཞིང༌། རྡུལ་མཚོན་གྱིས་འབྲི་བའི་ཕྱོགས་ལ་ནི། གདན་དང་བཅས་པའི་ལྷ་རྣམས་ཀྱི་ཕྱག་མཚན་འབྲི་ནུས་ན་མཆོག་ཡིན་ལ། ཕྱག་མཚན་འབྲི་བ་མ་ནུས་ན་གདན་འབྲི་ཞིང༌། དེ་ཡང་མ་ནུས་ན་རྡུལ་ཚོན་གྱིས་ཚོམ་བུའོ། །རྡོ་རྗེ་མཁའ་འགྲོའི་འགྲེལ་པ་བྷ་ཝ་བྷ་དྲས་མཛད་པ་ན། ཉི་མ་སྤེན་པ་སྒྲ་གཅན་མཇུག་རིངས་རྣམས་ལ་ཉི་གདན་དང༌། གཟའ་གཞན་རྣམས་ལ་ཟླ་གདན་ཞེས་བཤད་ཀྱང༌། འདིར་ནི་དེ་ལྟ་བུ་མི་དགོས་སོ། །མཁའ་འགྲོ་རྒྱ་མཚོའི་རྒྱུད་ད་ལྟ་ཡོད་པ་འདིའི་འགྱུར་དང་དཔེ་ལ། འབར་བྱེད་མ་དང༌། ངག་འཕྲོག་མ་ལྷོ་བྱང་གོ་སྤོས་པར་ཡོད་ཀྱང༌། དཔེའམ་འགྱུར་གྱི་སྐྱོན་ཡིན་ཏེ། མཁའ་འགྲོ་བཞི་པོ་དེའི་བཞུགས་གནས་ཀྱི་ཕྱོགས་ནི་རྣམ་པ་ཀུན་ཏུ་གོང་བཞིན་ཡིན་ལ་རྒྱུད་དེའི་ཐུན་མོང་མ་ཡིན་པའི་ཁྱད་ཆོས་ལ། ད་ལྟར་འབྱུང་བའི་རྒྱུ་མཚན་ཡང་གཏན་ནས་མེད་ཅིང༌། འདིར་རྡོ་རྗེ་མཁའ་འགྲོ་དང་གདན་བཞི་དཔང་པོར་བཞག་པའོ།། །།དེ་ལྟར་ན་མཁའ་འགྲོ་སྤྱི་གཏོར་ཆེན་མོ་དང་འབྱུང་པོ་ཐམས་ཅད་པའི་གཏོར་མ་ཆེན་པོ་འདི་གཉིས། བདེ་མཆོག་གི་ཐུན་མོང་མ་ཡིན་པའི་ཁྱད་ཆོས་རེ་ཡང་ཡིན་ནའང༌། དེང་སང་ཕལ་ཆེར་གྱི་མིང་ཡང་མ་ཐོས་འདུག་པས་ཀུན་ལ་ཕན་པའི་ཕྱིར། ཏཱ་ར་ནཱ་ཐས་ངེས་པར་བརྗོད་པའོ།། །།དར་རྒྱས་འཕེལ། བཀྲ་ཤིས།།
ཤོག་སྟོང་།