བདེ་མཆོག་ཁྲོ་བོ་རེག་ཚིག་བཞུགས།
བདེ་མཆོག་ཁྲོ་བོ་རེག་ཚིག་བཞུགས།
ཨོཾ་སྭཱ་སྟི། ཨོཾ་སྭ་བྷ་བ་ཤུདྡྷ་སྭཱ་བྷཱ་དྷརྨ་སྭབྷ་བ་ཤུདྡྷོ྅ཧཾ། རྡོ་རྗེའི་ས་གཞི་རྭ་གུར་མེ་དཔུང་དང་བཅས་པར་གྱུར། རྩ་གསུམ་རྡོ་རྗེའི་འཁོར་ལོའི་ར་བ་གསུམ་ཡང་གྲུབ། བྷྲུཾ་བྷྲུཾ་བྷྲུཾ་དབུས་སུ་འཁོར་ལོ་རྩིབས་བཅུ་པའི་རང་ཉིད་བདེ་མཆོག་ཁྲོ་བོ་རེག་ཚིག་ནག་པོ། གཡས་རྡོ་རྗེའི་རྩེ་ལ་མེའི་འཁོར་ལོ་རྩིབས་བརྒྱད་པ་དང༌། གཡོན་རྩེ་གསུམ་གྱི་རྩེ་ལ་རླུང་གི་འཁོར་ལོ་རྩིབས་བཞི་པས་བསྐོར་བ། ཞབས་གཡོན་བསྐུམ། གཡས་བརྐྱང་བས་འཇིགས་བྱེད་དུས་མཚན་མནན་པ། འཁོར་ལོ་དང་སྣ་ཚོགས་རྡོ་རྗེ་བརྩེགས་པས་སྤྱི་བོ་རུས་བརྒྱན་དང་དུར་ཁྲོད་ཆས་བརྒྱད་རྫོགས་པ། ཡུམ་རྡོ་རྗེ་ཕག་མོ་དམར་མོ་གྲི་གུག་དང་ཏྲི་ཤུ་ལ་འཛིན་པས་འཁྱུད་པ། མེ་དཔུང་འབར་བའི་དབུས་ན་བཞུགས་པའོ། །དཔྲལ་པར་བྷྲུཾ་དཀར་པོ། སྙིང་གར་ཧཱུཾ་སྔོན་པོ། ལྟེ་བར་ཨ་སེར་པོ། བོལ་དུ་ཏཾ་ལྗང་ཁུ། མིག་ལ་ཏྲཾ་དཀར་པོ།
རྣ་བར་ཧཱུཾ་སེར་པོ། སྣ་ལ་ཏྲི་དུད་ཁ། ལྕེ་ལ་ཨཱཿདམར་པོ། ལུས་ལ་ཁ་ལྗང་ཁུ། ཡིད་ལ་ཏུཾ་མཐིང་ཁའོ། །རྩིབས་བཅུ་ལ་རང་དང་འདྲ་བའི་ཁྲོ་བོ་ཁྲོ་མོ་སྤྲོས། ཨརྒྷཾ་ནས། ཤབྟའི་བར་གྱིས་མཆོད། ཁྲོ་བོ་རེག་ཚིག་སྟོབས་པོ་ཆེ། །མུན་པ་ལྟ་བུའི་སྐུ་འཛིན་ཞིང༌། །ཕཊ་ཀྱི་སྒྲ་འབྱིན་མེ་དཔུང་འབར། །མགོན་དུ་གྱུར་ལ་ཕྱག་འཚལ་བསྟོད། །ཨོཾ་བྷ་ཡ་ནཱ་ཤཱ་ནི། ཏྲ་ས་ནི། སརྦ་མཱ་ར། པྲ་ཏྱངྒི་ར་བི་ནཱ་ཤ་ཡ། ཡེ་ཀེ་ཙིཏྟ། དུཥྟནྶ་ཏྭ་མ་མ་བི་རཱུ་པ་ཀིཾ། ཀུརྦནྟི་ཏ་ནི། སརྦ་མཱ་ར། པྲ་དྱངྐ་རི། ནི་བ་ཏ་ཧཱུཾ་ཕཊ། མེ་རླུང་སྟེང་དུ་དགྲ་བགེགས་བྱད་མ་བཀུག །འཁོར་ལོ་འཁོར་བས་རྩིབས་ཀྱིས་གཏུབས་པར་བསམ་མོ་ཅི་ནུས་བཟླ་ཞེས་ཐལ་མོ་གདེང་ཞིང༌། དཀོན་མཆོག་གསུམ་གྱིས་བདེན་པའི་སྟོབས་ཀྱིས་སུ་གང་དག་བདག་ལ་སྡང་བའི་སེམས་ཅན་དགྲ་བགེགས་བྱད་མ་ཐམས་ཅད་ཀྱི་ལུས་བཅིང་པར་བགྱིའོ། །ངག་བཅིང་པར་བགྱིའོ། །ཡིད་བཅིང་བར་བགྱིའོ། །མཐུ་བརླག་པར་གྱུར་ཅིག །སྟོབས་བརླག་པར་གྱུར་ཅིག རྫུ་འཕྲུལ་བརླག་པར་གྱུར་ཅིག དེས་བསྒྲུབས་པའི་སྔགས་ཀྱི་དེ་ཉིད་བརླག་པར་ཅིག དེས་བསྒྲུབས་པའི་ལྷ་འདྲེ་དེ་ཉིད་ཀྱི་ཤ་ལ་ཟ་བར་གྱུར་ཅིགདེས་བྱས་པའི་སྦྱོར་བ་ཐམས་ཅད་དེ་ཉིད་ལ་བཟློག་པར་གྱུར་ཅིག སྣ་ཚོགས་རྡོ་རྗེ་དང་ཉི་ཟླའི་བར་དུ་བཏགས་པར་བསམ་ལ། ཐལ་མོ་བརྡབ། ཁྲོ་བོ་འབར་བའི་
ཚོགས་རྣམས་ཀྱིས། །དགྲ་བགེགས་རྣམས་ནི་ཐམས་ཅད་ཀྱི། །ལུས་ངག་ཐལ་བ་རྡུལ་དུ་རློགས། རྣམ་ཤེས་ཆོས་ཀྱི་དབྱིངས་སུ་སྒྲོལ། །བགེགས་དང་ལོག་པར་འདྲེན་པ་རྣམས། གདུལ་དཀའ་འདུལ་ཕྱིར་དཔའ་བོ་ནི། །ཤིན་ཏུ་གཏུམ་པའི་ཁྲོ་གཟུགས་ཀྱིས། །མ་རུང་པ་རྣམས་ཚར་གཅོད་ཤོག །ཨོཾ་བཛྲ་རཀྵ་རཀྵ་ཧཱུཾ་ཧཱུཾ་ཕཊ་སྭཱཧཱ། ཞེས་པའང་ས་སྐྱོང་མིའི་དབང་པོ་གཞོན་ནུ་ཀུན་དགའ་རབ་བརྟན་དབང་གི་རྒྱལ་པོའི་ཐུགས་དམ་དུ་ཏཱ་ར་ནཱ་ཐས་སྨྲས་པའོ། །གཅིག་ཞུས། མངྒ་ལཾ།། །།