དཔལ་རིམ་པ་བཞི་པའི་གཞུང་གི་འགྲེལ་ཆེན་གསང་བ་རབ་གསལ།
དཔལ་རིམ་པ་བཞི་པའི་གཞུང་གི་འགྲེལ་ཆེན་གསང་བ་རབ་གསལ་ཞེས་བྱ་བ་བཞུགས།
ཨོཾ་སྭ་སྟི། དཔལ་རིམ་པ་བཞི་པའི་གཞུང་གི་རྣམ་པར་བཤད་པ། གསང་བའི་དོན་རབ་ཏུ་གསལ་བ་ཞེས་བྱ་བ་བླ་མ་ལ་ཕྱག་འཚལ་ལོ། །གང་གི་ཤིན་ཏུ་བཟློག་དཀའི་ཉོན་མོངས་ཡང༌། །གང་གི་དྲིན་གྱིས་སྐད་ཅིག་གིས་བཟློག་འགྱུར། །གང་ལས་མཐའ་ཡས་ཡོན་ཏན་ཉེར་བསྟེན་པ། །གང་འདིར་བླ་མ་མཆོག་གིས་རྗེས་བཟུང་མཛོད། །དཔག་ཡས་རྒྱལ་བའི་ཆོས་ཀྱི་ལམ། །དཔག་པར་དཀའ་བ་རྡོ་རྗེའི་ཚིག །དཔག་མེད་རྒྱལ་བའི་དགོངས་པ་བཞིན། །དཔག་པར་འདོད་པའང་རྨད་དུ་བྱུང༌། །སྤྱོད་པའི་རྡོ་རྗེས་གསལ་བྱས་པ། །ཡེ་ཤེས་རྡོ་རྗེ་ཅན་གྱིས་གསང༌། ཁྱབ་བདག་རྡོ་རྗེའི་ལུགས་བཞིན་དུ། །རྣམ་མང་རྡོ་རྗེའི་ཚིག་བཞིན་བཤད། །དེ་ཡང་བཅོམ་ལྡན་འདས་ཀྱིས་མདོ་སྡེ་ལ་སོགས་པ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་པའི། ཐོག་མར་འདི་སྐད་བདག་གིས་ཐོས་པ་ལ་སོགས་པ་དྲང་དོན་དུ་བསྡུད་པ་པོ་བདག་ཉིད་ཚད་མར་སྟོན་པའི་ཕྱིར། ཕྱི་རོལ་གྱི་ཕུན་སུམ་ཚོགས་པ་ལྔ་སྟོན་པ་ཡིན་ལ། ངེས་པའི་དོན་དུ་ནི་རྒྱུད་ཀྱི་རིམ་པ་ལ་
སོགས་པ་རིམ་པ་བཞི་སྟོན་པ་ཉིད་ཀྱིས། སྡེ་སྣོད་གསུམ་དང་རྒྱུད་སྡེ་བཞི་ལ་སོགས་པ། ཆོས་ཀྱི་ཕུང་པོ་མ་ལུས་པའི་བརྗོད་བྱ་མཐའ་དག་མདོར་བསྟན་པ་ཡིན་ནོ། །དེ་ཉིད་དཔལ་ཧེ་རུ་ཀའི་ལུང་ལས་དང༌། བླ་མ་དམ་པའི་མན་ངག་ལས་དང༌། སློབ་དཔོན་སྤྱོད་པ་པ་ཉིད་ཀྱིས་ཉམས་སུ་མྱོང་བ་ལས་ཀྱང་རབ་ཏུ་རྟོགས་ལ། དེ་གསལ་བར་བྱ་བའི་ཕྱིར་རིམ་པ་བཞི་པ་ཞེས་བྱ་བའི་གཞུང་འདི་མཛད་དོ། །དེ་ལ་གཞུང་འདིའི་གླེགས་བམ་ཕལ་ཆེར་ལས། ཐོག་མར་མཚན་སྨོས་པ་ནི་མེད་ལ། གཞུང་འདིའི་འགྲེལ་པ་རྒྱས་པ་ཞིག །ལས་ཀྱི་རྡོ་རྗེ་ཞེས་བྱ་བས་མཛད་པ། པཎྜི་ཏ་ཤྲཱི་དྷ་རའི་རང་འགྱུར་གྱི་གླེགས་བམ་ལས། ཨཱ་ལོ་ཀ་ཙཏུཥྟ་ཞེས་སྒྲོན་མ་བཞི་པ་ཞེས་པར་བསྒྱུར་ཡང༌། གཞུང་འདིའི་མིང་ནི་ཨོ་ལ་པ་ཏི་ཞེས་བྱ་ཏེ། དེ་ཡང་སྐད་རིགས་བཞི་ལས་ཟུར་ཆག་གི་སྐད་དུ། ཨོ་ལ་ནི་རིམ་པ། པ་ཏི་ནི་གྲངས་ཀྱི་བཞིའོ། །དཔལ་འཇམ་པའི་རྡོ་རྗེ་ལ་ཕྱག་འཚལ་ལོ། །ཞེས་པ་ནི་ལོ་ཙཱ་བའི་འགྱུར་གྱི་ཕྱག་གོ །གཞུང་དངོས་ལ།
བཤད་པའི་གཞི་འགོད་པ་དང༌། དེ་ཉིད་རྒྱས་པར་བཤད་པའོ། །དང་པོ་ནི་ཨེ་ཝཾ་མ་ཡཱ་ཞེས་པ་སྟེ། དེ་ལ་ཨེ་ནི་ལྷན་ཅིག་སྐྱེས་པའི་དེ་ཁོ་ན་ཉིད། ཝཾ་ནི་ཐུགས་ཀྱི་དེ་ཁོ་ན་ཉིད། མ་ནི་གསུང་གི་དེ་ཁོ་ན་ཉིད། ཡཱ་ནི་སྐུའི་དེ་ཁོ་ན་ཉིད་དོ། །དེ་དག་ཀྱང་སངས་རྒྱས་ཉིད་ཀྱིས་བརྡའ་མཛད་པ་ཡིན་གྱི། ལེགས་པར་སྦྱར་བ་དང༌། ཡུལ་སྐད་ཀྱི་སྒོ་ནས་སྒྲ་བཤད་བྱར་མེད་དོ། །དོན་ནི་འདི་ལྟར་ཡིན་ཏེ། ཨེ་ནི་རྣམ་པ་ཐམས་ཅད་པའི་སྟོངཔ་དང་ཟུང་དུ་འཇུག་པས་ཁྱད་པར་དུ་བྱས་པའི། རང་བཞིན་གྱི་བདེ་བ་ཡིན་པས། བདེ་སྟོངགཉིས་སུ་མེད་པར་འཇོག་ཚུལ་ཅིག་དང༌། ཝཾ་ཡིག་ནི་སོ་སོ་རང་གི་རིག་པས་ཉམས་སུ་མྱོང་བའི་བདེ་བ་རང་བཞིན་སྒོམ་པའམ། མཚན་མའམ་གཟུང་འཛིན་གྱིས་གདོད་མ་ནས་གོས་མ་མྱོང་བའི་ཡེ་ཤེས་ཏེ། བདེ་སྟོང་ཟུང་འཇུག་ཏུ་འཇོག་ཚུལ་གཉིས་པའོ། །མ་ཡིག་ནི་ངོ་བོ་སྒྲ་རྟོག་གི་ཡུལ་ལས་འདས་པའི་བརྗོད་བྲལ་གྱི་ཡེ་ཤེས་གཅིག་ཉིད་སྲིད་འདས་ཀྱི་སྒྲ་སྐད་ཐམས་ཅད་དུ་ཅིག་ཅར་ཤར་བའི་རྣམ་པ་ཅན་ནོ། །ཡཱ་ཡིག་ནི་བདེ་སྟོང་གི་ཡེ་ཤེས་དེ་ཉིད། སྤྲོས་བྲལ་ལས་མ་གཡོས་བཞིན་དུ། འཁོར་འདས་ཐམས་ཅད་ཀྱི་གཟུགས་བརྙན་འཆར་བ་སྟེ། བཞི་པོ་དེ་དག་ཀྱང་མཚན་ཉིད་ཀྱི་ལྡོག་ཆས་ཕྱེ་བ་ཙམ་མ་གཏོགས། ངོ་བོས་དབྱེ་བ་མེད་དོ། །ཡེ་ཤེས་གཅིག་ཉིད་ལ་མཚན་ཉིད་དེ་དག་ཐམས་ཅད་ཚང་བ་ཡིན་ལ། དེ་ཉིད་ཆོས་ཀྱི་དབྱིངས་དང༌། སྟོང་པ་ཉིད་དང༌། དེ་བཞིན་ཉིད་དང༌། སྤྲོས་བྲལ་དང༌། དོན་དམ་བདེན་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་དང༌།
རང་བཞིན་ལྷན་ཅིག་སྐྱེས་པ་དང༌། ངོ་བོ་ཉིད་ཀྱི་སྐུ་དང༌། ཆོས་ཀྱི་སྐུ་ཞེས་བྱ་བ་ཏེ། གཞི་ལམ་འབྲས་གསུམ་གྱིས་བསྡུས་པའི་བརྟན་གཡོ་ཐམས་ཅད་ལ་མཉམ་པ་ཉིད་དུ་ཁྱབ་པའོ། །དེ་ལྟར་ཡང་སྙིང་པོ་བསྡུས་པ་ལས། ཨེ་ཞེས་བྱ་བ་དེ་བཞིན་ཉིད། །སྲོག་ཆགས་ཀུན་ལ་གནས་པ་ཡི། །བདེ་བ་ལྷན་ཅིག་སྐྱེས་པར་བརྗོད། །དེ་ཉིད་སྣང་བ་ཀུན་ཏུ་སྣང༌། །བཾ་ཡིག་བརྗོད་པ་གང་གང་དུ། །རབ་ཏུ་རིག་ཅིང་རང་མྱོང་བ། །འཛིན་པ་པོ་དང་རིག་གཞི་མེད། །དེ་ནི་ཡོད་དང་མེད་ལས་འདས། །དེ་འོག་མ་ཡིག་ཞེས་བརྗོད་པ། །ནམ་མཁའ་དང་ནི་མཉམས་པ་ཡི། །སྒྲ་ཡི་དེ་ཉིད་ཞེས་བརྗོད་དེ། །སྣ་ཚོགས་དུ་མའི་སྐད་དུ་སྦྱར། །དེ་ནས་དེ་ལས་སླར་ཡང་ཡང༌། །དབང་པོའི་དྲ་བ་ཇི་བཞིན་གཟུགས། །རང་བཞིན་མེད་པའི་རང་བཞིན་ཅན། །འདི་ནི་དེ་ལས་ཡང་སྤང་ངོ༌། །ལྷན་ཅིག་སྐྱེས་པ་དང་པོ་སྟེ། །དེ་ལས་གསང་བ་གསུམ་འབྱུང་བ། །དངོས་དང་དངོས་མེད་མ་ལུས་པའི། །རང་བཞིན་དེ་ཉིད་ཅེས་བྱའོ། །ཞེས་གསུངས་ལ། རྗེ་བཙུན་གང་བའི་རྡོ་རྗེའི་ཞལ་སྔ་ནས། འདི་སྐད་ཀྱང་གསུང་སྟེ། ཨེ་ནི་ཨེ་ཀ་ཏེ་བདེ་བ་གཅིག་པུ། ཝཾ་ནི་ཝཾ་ཤ་སྟེ་སྤྲོས་པ་དང་བྲལ་བའི་རིགས་སམ་རུས། མ་ནི་མ་ཧཱ་ན་ད་སྟཻ་སྒྲ་ཆེན་པོ། ཡ་ནི་ཀཱ་ཡ་སྟཻ་སྐུའི་དོན་ཡིན་ཞེས་གསུངས་ལ། གནས་ལུགས་དེ་ཁོ་ན་ཉིད་བཞི་པོ་དེ་བསྟན་པས་འཁོར་བ་ཀུན་རྫོབ་ཀྱི་བཞི་ཚན་རྣམས་ཀྱང་ཤུགས་ལ་བསྟན་པར་འགྱུར་ཏེ། བཞི་པོ་དེའི་དབང་དུ་བྱས་པའི་གློ་བུར་གྱི་དྲི་མ་ཡིན་པའི་ཕྱིར་དང༌། ལམ་རིམ་
པ་བཞིའང་བསྟན་ཏེ། གསང་རིམ་བདེ་བ་ཆེན་པོའི་ལམ། །ལྷན་ཅིག་སྐྱེས་པའི་སྦྱོང་བྱེད་དང༌། ཡེ་ཤེས་རིམ་པ་ཐིག་ལེའི་རྣལ་འབྱོར་ཐུགས་ཀྱི་སྦྱོང་བྱེད་དང༌། སྔགས་རིམ་རླུང་གི་རྣལ་འབྱོར་གསུང་གི་སྦྱོང་བྱེད་དང༌། རྒྱུད་རིམ་རྩའི་རྣལ་འབྱོར་སྐུ་སྦྱོང་བྱེད་ཀྱི་ལམ་ཡིན་པའི་ཕྱིར་རོ། །འབྲས་བུ་སྐུ་བཞི་ཡང་བསྟན་པ་ཡིན་ཏེ། དེ་ཉིད་བཞི་པོ་དེ་རྣམས་དག་པ་གཉིས་ལྡན་དུ་སོང་ཚུལ་ལ། འབྲས་བུ་སྐུ་བཞིའི་རྣམ་གཞག་བྱེད་པ་ཙམ་ཡིན་པའི་ཕྱིར་རོ། །གཞི་ལམ་འབྲས་བུའི་འབྲེལ་རྩི་བའི་གཞི། །རྩ་འཁོར་ལོ་བཞི་ལ་སོགས་པ་ཡང་བསྟན་པར་འགྱུར་ཏེ། དེ་ཉིད་བཞི་པ་མཚོན་བྱེད་ཀྱི་གཞི་དེ་རྣམས་ཡིན་པའི་ཕྱིར་རོ། །དེ་ལྟར་ན་མདོར་བསྟན་པའམ། དོན་གྱི་སྙིང་པོ་ནི་དེ་ཉིད་བཞི་པོ་དེ་ཡིན་ལ། གཞི་ལམ་འབྲས་བུ་ཆོས་རྣམས་ནི་དེའི་རྒྱས་བཤད་དམ་ཡན་ལག་ཏུ་འགྱུར་ཏེ། དེ་ཉིད་བཞི་པོ་ལ་ཤིན་ཏུ་ངེས་པ་སྟེར་བར་བྱེད་པའི་ཕྱིར་རོ། །དེ་ལྟར་ན། རྒྱུད་སྡེ་འགའ་ཞིག་ལས། རྡོ་རྗེ་བཞི་དང༌། རྣལ་འབྱོར་བཞི་དང༌། བྱང་ཆུབ་བཞི་ལ་སོགས་པར་གསུངས་པ་དང༌། ཁ་ཅིག་ལས་སྐུ་དང༌། གསུང་དང༌། ཐུགས་ཀྱི་གསང་བ་དོན་དམ་པའི་གནས་ལུགས་སུ་བཤད་པ་དང༌། གཞན་དག་ཏུ་ལྷན་ཅིག་སྐྱེས་པ་གཅིག་པུ། གནས་ལུགས་ཀྱི་དོན་དུ་གསུངས་པ་སོགས་ཀྱང་དོན་གྱི་གནད་གཅིག་པ་ཁོ་ནའོ། །གཉིས་པ། རྒྱས་པར་བཤད་པ་ལ་གང་ལ་གནད་དུ་བསྣུན་པའི་གཞི་རྒྱུད་ཀྱི་དངོས་པོ་རྒྱས་པར་གཏན་ལ་ཕབ་པ་དང༌། དེ་ལ་གནད་དུ་
བསྣུན་པའི་ཐབས་རིམ་པ་བཞི་འབྲས་བུ་དང་བཅས་པ་བསྟན་པའོ། །དང་པོ་ལ་དཀྱིལ་འཁོར་གསུམ་ངོས་བཟུང་བ་དང༌། དེ་དང་འབྲེལ་བའི་ཆོས་རྣམས་ཞིབ་མོར་བཤད་པའོ། །དང་པོ་ནི། ཨེ་ལས་ཀྱི་ཕྱག་རྒྱའོ། །བཾ་ཆོས་ཀྱི་ཕྱག་རྒྱའོ། །མ་ཕྱག་རྒྱ་ཆེན་པོའོ། །ཡ་དམ་ཚིག་གི་ཕྱག་རྒྱའོ། །ཨེ་ཤེས་རབ་བོ། །བཾ་ཐབས་སོ། །སྤྲུལ་པའི་འཁོར་ལོ་དང༌། ཆོས་ཀྱི་འཁོར་ལོ་དང༌། ལོངས་སྤྱོད་ཀྱི་འཁོར་ལོ་དང༌། བདེ་བ་ཆེན་པོའི་འཁོར་ལོའོ། །ཨཱ་ལི་ཀཱ་ལི། གཡོན་པ་དང༌། གཡས་དག་ཏུའོ། །ཨཱ་ཨཱི་ཨཱུ་ཨཻ་ཨཽ་ཨཿ ཨ་ཀ་ཙ་ཊ་ཏ་པ་ཡ་ཤ་ཨི། སྤྲུལ་པའི་འཁོར་ལོ་ལའོ། །བྲུཾ་ཨོཾ་ཛྲིཾ་ཁཾ་ཧཱུཾ་ལཾ་མཱཾ་བཾ་ཏཱཾ། ཆོས་ཀྱི་འཁོར་ལོ་ལའོ། །ཨོཾ་ཨ་ཨི་ཨུ་ཨེ་ལོངས་སྤྱོད་ཀྱི་འཁོར་ལོ་ལའོ། །ཧཾ་བདེ་བ་ཆེན་པོའི་འཁོར་ལོ་ལའོ། །འོག་ཏུ་བསྲུང་བའི་ཡི་གེ་ཀྵའོ། །ཟླ་བ་དང་ཉི་མ་དག་ནི་འོག་དང་སྟེང་གི་སྒོ་གཉིས་སོ། །གནད་འབྱེད་པ་དང་གསེར་གྱི་སྒོ་སྟེ་འགྲོ་བ་དང་འོང་བའོ། །དེ་ལ་ཨེ་ཝཾ་མ་ཡའི་བརྡས་རྩ་འཁོར་ལོ་བཞི་བསྟན་པ་དང༌། སྤྲུལ་པའི་འཁོར་ལོ་ཞེས་སོགས་འཁོར་ལོའི་མིང་དང༌། གཡོན་པ་དང་གཡས་དག་ཅེས་པ་རྣམས་སྡོམས་པའི་ནི་རྩའི་དཀྱིལ་འཁོར་བསྟན་ནོ། །ཨཱ་ལི་ཀཱ་ལི་ཞེས་པ་དང༌། ཨཱ་ཨཱི་སོགས་དང༌། ཀྵ་ཡིག་གི་བར་དུ་ནི་ཡི་གེའི་དཀྱིལ་འཁོར་རོ། །ཟླ་བ་དང་ཉི་མ་ཞེས་པས་ནི་བདུད་རྩིའི་དཀྱིལ་འཁོར་རོ། སྒོ་གཉིས་དང་འགྲོ་འོང་སོགས་ནི་དཀྱིལ་འཁོར་གསུམ་ཆར་དང་འབྲེལ་བའོ། དེ་ཡང་ཨ་སྟེ་ལྟེ་བ་སྤྲུལ་པའི་འཁོར་ལོ་ནི། ལས་ཀྱི་ཕྱག་
རྒྱ་ཞེས་བྱ་སྟེ། གཏུམ་མོ་འབར་བའི་ལས་བྱེད་པའི་ཕྱིར་དང༌། ཤེས་རབ་མའི་གསང་བའི་པདྨ་དང་མཚུངས་པར། རྩ་མདུད་ཨེ་གྲུ་གསུམ་གྱི་རྣམ་པར་གནས་པའི་ཕྱིར་རོ། བཾ་སྟེ་སྙིང་གའི་འཁོར་ལོ་ནི་ཆོས་ཀྱི་ཕྱག་རྒྱ་སྟཻ། སེམས་གནས་པའི་གཙོ་བོ་འདི་ཡིན་པ་དང༌། སེམས་ཀྱི་སྣང་བ་ལས་ཆོས་ཐམས་ཅད་འབྱུང་བའི་ཕྱིར་རོ། །མ་ཡིག་ཏེ་མགྲིན་པའི་འཁོར་ལོ་ནི། ཕྱག་རྒྱ་ཆེན་པོ་སྟེ། ངག་གྲགས་སྟོང་སྒྲ་དབྱངས་ཐམས་ཅད་པ་ནམ་མཁའ་དང་མཉམ་པ་མངོན་དུ་གྱུར་པའི་ཕྱིར་དང༌། རྨི་ལམ་དང་བར་དོ་ལ་སོགས་པའི་གསལ་སྣང་ཅན་ཀྱི་ལྷ་སྐུ་ནི་འདི་ལས་འབྱུང་བའི་ཕྱིར་རོ། །ཡཱ་ཡིག་ཏེ་སྤྱི་བོ་ནི་དམ་ཚིག་གི་ཕྱག་རྒྱ་སྟཻ། དམ་ཚིག་གི་དོན་འདའ་བར་མི་བྱ་བ་ཡིན་ལ། བདེ་བ་ཆེན་པོ་དང་པོ་གང་ལས་འབྱུང་བའི་གནས་དང༌། །མཐར་གང་དུ་ཐིམ་ནས་བརྟན་པ་ཐོབ་ཅིང་མི་འདའ་བའི་གནས་ཡིན་པའི་ཕྱིར་རོ། །བླ་མ་རྗེ་བཙུན་ལྷོ་ཕྱོགས་པའི་ཞལ་ནས། རྩ་འཁོར་ལོ་བཞི་པོ་དེ་དག་སོ་སོ་ལ་གནད་དུ་བསྣུན་པས། ཕྱག་རྒྱ་བཞི་དང་མཐུན་པའི་ཡེ་ཤེས་སྐྱེ་བ་ཡིན་ཏེ། ལྟེ་བར་གནད་དུ་བསྣུན་པ་ལས། ལས་ཀྱི་ཕྱག་རྒྱ་དང་རྗེས་སུ་མཚུངས་པའི་ཉམས་རྟོགས་སྐྱེ་བར་འགྱུར་རོ། །དེས་གཞན་རྣམས་ལ་ཡང་མཚོན་པ་དང༌། ལས་ཀྱི་ཕྱག་རྒྱ་བསྒོམས་པས་ལྟེ་བའི་རྩ་མདུད་ཤིན་ཏུ་གྲོལ་བར་འགྱུར་རོ། །དེ་བཞིན་དུ་ལྟེ་བའི་རྩ་མདུད་ལ་གནད་དུ་བསྣུན་པས་ཀྱང༌། ལས་ཀྱི་ཕྱག་རྒྱའི་མཆོག་རྣམས་ཀྱི་འདུ་བ་ཐོབ་པར་འགྱུར་བ་སྟེ། དེ་དང་དེས་འཁོར་ལོ་དང་ཕྱག་རྒྱ་གཞན་རྣམས་ལའང་རིགས་འགྲེའོ། །
རྒྱུ་མཚན་དེའི་ཕྱིར། འཁོར་ལོ་བཞི་ཕྱག་རྒྱ་བཞི་ལ་སྦྱར་བ་ཡིན་ཞིང༌། དེ་དག་ཀྱང་གཙོ་ཆེ་བའི་དབང་དུ་བྱས་པ་སྟཻ། སྤྱིར་རྫོགས་རིམ་གྱི་ལམ་གྱི་ལུས་ལ་ཕྱག་རྒྱ་བཞི་ཚང་དགོས་པ་དང༌། ཕྱག་རྒྱ་རེ་རེས་ཀྱང་འཁོར་ལོ་བཞི་ཆར་གྱི་རྩ་མདུད་ཆ་ཤས་ཆ་ཤས་ནས་གྲོལ་བར་བྱེད་པ་མ་ཡིན་ནོ། །ལྟེ་བར་བསྒོམས་པས་བདེ་སྟོང་མཐུག་པོ་དང༌། སྙིང་ག་ལས་མངོན་ཤེས་སོགས་ཀྱི་གསལ་སྣང་དང༌། །མགྲིན་པ་ལས་འགྲོ་བ་ཐ་དད་པའི་སྐད་ཤེས་ཤིང་ཆོས་སྣ་ཚོགས་སྟོན་ནུས་པ་དང༌། སྤྱི་བོ་ལས་བདེ་གསལ་གྱི་ཉམས། གཟུགས་སྣང་དུ་མ་དང་བཅས་པ་འབྱུང་སྟཻ། རྒྱུ་མཚན་དེའི་ཕྱིར་ཡང༌། ཕྱག་རྒྱ་བཞི་སོ་སོ་དང་འབྲེལ་བའི་ཕྱིར། དེ་ལྟར་བཤད་པ་ཡིན་ཞེས་གསུང་སྟཻ། ཤིན་ཏུ་ལེགས་པར་ཡང་རྟོགས་སོ། །དེ་དག་ལས་ཨེ་ནི། གསང་བའི་པདྨའི་དབྱིབས་མཐུན་དུ་སྦྱོར་ཞིང༌། བཾ་ཡིག་ལ་ཆོས་ཀྱི་སྐད་དོད་དྷརྨ་ནི་དྷ་ར་ཞེས་པ་འཛིན་པ་སྟཻ། སེམས་ཉིད་ཡུལ་སྣ་ཚོགས་ཀྱི་རྣམ་པ་འཛིན་པའོ། །དེའི་རྒྱུ་མཚན་ཡང་སྙིང་ག་ནས་གཟུང་འཛིན་གྱི་རླུང་རྒྱུ་བ་ལ་ཐུགས་ཞིང༌། མ་ནི་མ་ཧཱ་མུ་དྲ་ཞེས་པ་སྟེ་ཕྱག་རྒྱ་ཆེན་པོ་དང༌། ཡ་ནི་ས་མ་ཡ་སྟེ། དམ་ཚིག་གི་དོན་ལ་ཡི་གེ་བསྣན་པའི་ངེས་པའི་ཀྱང༌། ཕྱག་རྒྱ་བཞི་པོ་དག་གི་བརྡར་བཏགས་པ་ཡིན་པར་འགའ་ཞིག་བཞེད་དོ། །དེ་ལྟར་ཡང་དཔལ་ཁ་སྦྱོར་ཐིག་ལེ་ལས། ཨེ་ཡིག་ས་རུ་ཤེས་བྱ་སྟཻ། །ལས་ཀྱི་ཕྱག་རྒྱ་སྤྱན་མ་དང༌། །བརྩེ་བ་ཆེ་དང་ཐབས་ཆེན་པོ། །སྣ་ཚོགས་སྤྱོད་ཡུལ་རང་བཞིན་ཏེ། །ལྟེ་བར་སྣ་ཚོགས་འདམ་སྐྱེས་ཀྱི། །
སྤྲུལ་པའི་འཁོར་ལོ་གནས་པ་ཡིན། །བཾ་ཡིག་ཆུ་རུ་ཤེས་བྱ་སྟེ། །ཆོས་ཀྱི་ཕྱག་རྒྱ་མ་མཱ་ཀཱི། །བྱམས་པ་ཆེ་དང་སྨོན་ལམ་ནི། །ལྷ་མོ་རྡོ་རྗེ་རིགས་རྗེས་འགྲོ། །སྙིང་གར་ཆུ་སྐྱེས་འདབ་བརྒྱད་པའི། །ཆོས་ཀྱི་འཁོར་ལོ་ཡང་དག་གནས། །མ་ཡིག་མེ་རུ་བསྟན་པ་སྟཻ། །ཕྱག་རྒྱ་ཆེན་པོ་གོས་དཀར་མོ། །དགའ་དང་སྟོབས་ཀྱི་སྦྱོར་བ་ཡིས། །ལྷ་མོ་པདྨའི་རིགས་ལས་བྱུང༌། །མགུལ་པར་བརྒྱད་གཉིས་འདབ་མ་ཡི། །ཆུ་སྐྱེས་ལོངས་སྤྱོད་འཁོར་ལོ་གནས། །ཡ་ཡིག་རླུང་གི་ངོ་བོ་ནི། །ཉོན་མོངས་ཐམས་ཅད་རབ་འཇོམས་པ། །དམ་ཚིག་ཕྱག་རྒྱ་ཆེན་པོ་ཉིད། །སྒྲོལ་མ་འཁོར་བ་ལས་སྒྲོལ་མ། །བཏང་སྙོམ་ཡེ་ཤེས་སྦྱོར་བ་ཡིས། །ལྷ་མོ་ལས་ཀྱི་རིགས་ལས་བྱུང༌། །སུམ་ཅུ་རྩ་གཉིས་འདམ་སྐྱེས་ནི། །བདེ་བ་ཆེན་པོའི་འཁོར་ལོ་ཆེ། །ཞེས་སོགས་རྒྱས་པར་གསུངས་སོ། །སྐབས་འདིའི་ས་ལ་སོགས་པ་དེ་དག་ཀྱང༌། རང་བཞིན་བདེ་བ་ཆེན་པོར་གནས་པ་ཉིད་ཀྱིས་འཁོར་བ་མི་སྐྱེད་དེ། བདེ་བ་ཆེན་པོར་རོ་མཉམ་པའོ། །ཡང་འཁོར་ལོ་བཞི་པོ་དེ་དག་ཡི་གེ་གཉིས་སུ་བསྡུ་བ་ནི། ཨེ་ཞེས་པའི་བརྡས་ལྟེ་བ་དང༌། སྤྱི་བོ་ནི་ཤེས་རབ་ཀྱི་འཁོར་ལོ་ཡིན་པར་བསྟན་ལ། བཾ་གྱི་བརྡས་སྙིང་ག་དང་མགྲིན་པ་ནི་ཐབས་ཀྱི་འཁོར་ལོའོ། དེ་དག་ཀྱང་སྙིང་ག་བཾ་ཡིག་དང་ལྟེ་བ་ཨེ་ཡིག་ཐབས་ཤེས་སུ་སྦྱོར་ཞིང༌། མགྲིན་པ་ཝཾ་ཡིག་དང་སྤྱི་བོ་ཐབས་ཤེས་སུའོ། །དེ་ལྟར་ཡང༌། ཁ་སྦྱོར་ལས། ལྟེ་བ་སྤྱི་བོར་གནས་འཁོར་ལོ། །ཨེ་ཡིག་རྣམ་
པར་ཡང་དག་གནས། །སྙིང་ག་མགྲིན་པར་ལེགས་གནས་པ། །བཾ་ཡིག་འདྲ་བར་འདོད་པའོ། །ཡང་རོ་མ་དང་རྐྱང་མ་དག་ཀྱང་ཐབས་ཤེས་འདིས་བསྟན་པར་འགྱུར་ཏེ། རྐྱང་མ་ཤེས་རབ་རང་བཞིན་ཏེ། །ཐབས་ཀྱི་རོ་མ་ཡང་དག་གནས། །ཞེས་གསུངས་པས་སོ། །འཁོར་ལོ་བཞི་པོ་དེ་དག་ལ། རང་རང་གི་མཚན་ཉིད་རང་མཚན་པར་མིང་བསྟན་པ་ནི། ལུས་དང་པོར་འཆགས་པའི་གཞི་ཡིན་པ་དང༌། རྣམ་པ་སྣ་ཚོགས་པའི་སྣང་བ་དང༌། བདེ་བ་འཕེལ་བའི་རྒྱུ་གཏུམ་མོའི་མེ་སྤྲུལ་ཞིང་འབྱེད་པར་བྱེད་པའི་གནས་ཡིན་པའི་ཕྱིར། ལྟེ་བའི་འཁོར་ལོ་ནི་སྤྲུལ་པའི་འཁོར་ལོ་དང༌། ཡུལ་དང་དབང་པོ་སོགས་རང་གི་མཚན་ཉིད་ཐ་དད་པར་འཛིན་པའི་ཆོས་ཀྱི་སྣང་བ་རྣམས་བསྐྱེད་པར་བྱེད་པའི་གནས་ཡིན་པའི་ཕྱིར། སྙིང་གའི་འཁོར་ལོ་ནི་ཆོས་ཀྱི་འཁོར་ལོ་དང༌། རོ་དྲུག་ལ་ལོངས་སྤྱོད་པའི་གནས་ཡིན་པའི་དོན་དང༌། གཟུང་འཛིན་གྱི་སྣང་བ་སྣ་ཚོགས་པ་རྣམས་ལ། མིང་ཚིག་བརྗོད་པའི་རྣམ་པ་དུ་མས། སྨྲ་ཞིང་ལོངས་སྤྱོད་པའི་གཞི་ཡིན་པས་ཕྱིར། མགྲིན་པའི་འཁོར་ལོ་ལ་ནི་ལོངས་སྤྱོད་ཀྱི་འཁོར་ལོ་དང་རྩ་སུམ་ཅུ་རྩ་གཉིས་ཀྱི་དྭངས་མ། བྱང་ཆུབ་ཀྱི་སེམས་སུམ་ཅུ་རྩ་གཉིས། བདེ་བ་བསྐྱེད་པའི་དོན་དུ་འཕེལ་བའི་གནས་ཡིན་པའི་ཕྱིར། སྤྱི་བོའི་འཁོར་ལོ་ནི་བདེ་བ་ཆེན་པོ་ཞེས་བྱའོ། །འཁོར་ལོ་བཞི་པོ་དེ་དག་ཏུ་གཞི་འཁོར་བའི་དུས་དང་ལམ་བསྒོམ་པའི་དུས་སུ། གང་ཅི་ཡང་རུང་བའི་བྱ་བ་བྱེད་པ་དེ་ཐམས་ཅད་ནི། རོ་རྐྱང་དབུ་མ་གསུམ་གྱི་ལམ་ནས་འགྲོ་འོང་བྱེད་པ་ཡིན་པ་ལས། འཁོར་བའི་དུས་ཀྱི་ལམ་རོ་རྐྱང་
གཉིས་གཙོ་བོ་ཡིན་ཏེ། དེ་ཡང་གཡོན་དུ་རྐྱང་མ་དང་གཡས་སུ་རོ་མ་དག་ཏེ། དེ་ལ་གནས་པའི་ཡི་གེའི་དཀྱིལ་འཁོར་གྱི་དབང་དུ་བྱས་ནས། རྐྱང་མ་ལ་ཨཱ་ལི་དང༌། རོ་མ་ལ་ཀཱ་ལི་དག་གོ །ཨཱ་ཨཱི་ཞེས་པ་ལ་སོགས་པ་ལ། ཨ་ཀ་ཙ་ཊ་ཏ་པ་ཡ་ཤ་སྟེ། སྡེ་ཚན་བརྒྱད་ཀྱི་དང་པོ་རྣམས་སྨོས་པས། ལྟེ་བ་སྤྲུལ་པའི་འཁོར་ལོའི་ནང་སྐོར་རྩ་འདབ་བརྒྱད་ལ་ཡི་གེ་བརྒྱད་པོ་ཉིད་གནས་པའང་བསྟན་མོད། ཕྱི་སྐོར་ལ་སྡེ་ཚན་བརྒྱད་ཀྱི་ཡི་གེ་ལྔ་བཅུ་གནས་པར་ཡང་ངེས་པར་བསྟན་ནོ། །དེའི་སྟེང་དུ་ཨཱ་ཨཱི་ཨཱུ་ཨཻ་ཨཽ་ཨཱཿ རྣམས་ཀྱང་ཕྱི་སྐོར་ལ་བསྣན་པས། ལྔ་བཅུ་ང་དྲུག་ཡིན་ལ། དེ་ལྟར་ན་ནང་སྐོར་ལ་བརྒྱད། ཕྱི་སྐོར་ལ་ལྔ་བཅུ་ང་དྲུག་སྟེ། སྡོམས་པས་རྩ་འདབ་དྲུག་ཅུ་རྩ་བཞི་དང་སྦྱོར་བ་བྱེད་དོ། །ཡི་གེའི་འཁོར་ལོ་དམིགས་པས་སྒོམ་པའི་ཚེ་དེ་ལྟར་ཡིན་ལ། གཞུང་དོན་དངོས་ནི་ལྟེ་བའི་འཁོར་ལོ་ནས། ངག་གི་བརྗོད་པ་མཐའ་དག་འབྱུང་བའི་གཞི་རླུང་རྣམས་རྒྱུ་བ་ཡིན་ཞིང༌། ཡི་གེ་གཞན་རྣམས་ཀྱི་ནུས་པ་ལས་ཀྱང༌། དབྱིངས་རིང་པོ་རྣམས་འབྱུང་བའི་ནུས་པ་ཅུང་ཟད་སྟོབས་ཆེ་བའི་ཕྱིར། རིང་པོ་དྲུག་པོ་ལོགས་སུ་སྨོས་པ་དང་བཅས་ཏེ་བསྟན་པ་ཡིན་པས། གཞིའི་གནས་ཐབས་ཀྱི་སྒོ་ནས་གསུངས་པ་ཡིན་ནོ། །གཞི་ལ་དེ་ལྟར་གནས་པ་མཚོན་བྱེད་ཀྱི་བརྡ་ཙམ་དུ། གཏུམ་མོ་སྒོམ་པའི་ཚེ་ཡི་གེ་དེ་ལྟར་འགོད་པ་ཡིན་མོད། གཞུང་གི་དགོངས་དོན་ནི་གཏུམ་མོ་འཁོར་ལོ་བཞིའི་དམིགས་པ་ཙམ་སྟོན་པ་མིན་གྱི། གཞིའི་གནས་ཐབས་སྟོན་པ་ཡིན་པ་འོག་མ་རྣམས་ལའང་འདིས་རིགས་འགྲེའོ། །
དེས་ན་ཡི་གེ་བརྒྱད་ཀྱིས་སྡེ་ཚན་བརྒྱད་བསྟན་ཞིང༌། རིང་པོ་དྲུག་སླར་ཡང་སྨོས་པས། དེ་དག་ཤུགས་ཆེ་བ་ཙམ་དུ་གོ་དགོས་པ་ཡིན་ནོ། ཨཾ་ནི་འཁོར་ལོ་དེའི་ལྟེ་བར་འགོད་རྒྱུའི་ཡི་གེ་སྟཻ། ཆོས་ཉིད་བརྗོད་བྲལ་གྱི་ཡི་གེ གཞོམ་མེད་ཀྱི་སྒྲའི་ཡེ་ཤེས་དང༌། དེའི་བརྟེན་ལྟེ་བའི་དབུས་ན་གནས་པའི་ཁམས་དམར་ཆའི་དྭངས་མ་དང་བཅས་པ་མཚོན་པ་ཡིན་ཞིང༌། དེ་ནི་སྤྲོས་པ་ཐམས་ཅད་དང་བྲལ་བ་དང༌། ཀུན་རྫོབ་ཀྱི་ཆ་ལས་ཡི་གེ་ཐམས་ཅད་འབྱུང་བའི་གཞི་དང༌། དོན་དམ་གྱི་ཆ་ལས་གཞོམ་མེད་ཀྱི་སྒྲ་དབྱངས་དང༌། ཆོས་ཀྱི་ཕུང་པོ་ཐམས་ཅད་འབྱུང་བའི་གཞི་ཡིན་པའི་ཕྱིར་ན། ཨ་ཐུང་གི་བརྡར་བཏགས་པ་ཡིན་ཏེ། ཨ་ཐུང་དེ་ནི་ཡི་གེ་ཐམས་ཅད་ཀྱི་གཞི་ཡིན་པར་འཇིག་རྟེན་དུ་གྲགས་པའི་ཕྱིར་རོ། །དེ་ཉིད་རྡོ་རྗེ་གསུམ་གྱི་དེ་ཁོ་ན་ཉིད་ཀྱི་ངོ་བོར་གནས་པའི་ཕྱིར། སྟེང་དུ་ཟླ་ཕྱེད་ཐིག་ལེ་ནཱ་ད་རྣམས་ཀྱིས་མཚོན་པའི་བརྡར་བྱས་སོ། །སྙིང་ག་ཆོས་ཀྱི་འཁོར་ལོ་ལ་ནི། ཕུང་པོ་ལྔ་དང་འབྱུང་བ་བཞིའི་རླུང་རྒྱུའོ་ཞེས་མཚོན་པས། བྲུཾ་ལ་སོགས་པའི་ཡི་གེ་དགུ་འགོད་པ་སྟེ། མདུན་གྱི་རྩ་འདབ་ལ་གཟུགས་ཕུང་གི་རླུང་བྲུཾ་གཡས་ཀྱི་ལ་ཚོར་བའི་ཨཾ། རྒྱབ་ཀྱི་ལ་འདུ་ཤེས་ཀྱི་ཛྲིཾ། གཡོན་གྱི་ལ་འདུ་བྱེད་ཀྱི་ཁཾ། དབུས་ཀྱི་ལྟེ་བ་ལ་རྣམ་ཤེས་ཀྱི་ཕུང་པོའི་རླུང་ཧཱུཾ་གི་བརྡས་བསྟན་ནོ། །དེ་དག་ཀྱང་རིམ་པས་ས་ཆུ་མེ་རླུང་ནམ་མཁའི་ཁམས་ཀྱི་རླུང་ཡིན་ཏེ། འོན་ཀྱང་ཐབས་ཀྱི་ཆ་གཙོ་བོའོ། །ཤར་ལྷོར་ས་ཁམས་ཀྱི་རླུང་ལཱཾ་ཡིག་དང༌། ལྷོ་ནུབ་ཏུ་ཆུ་ཁམས་ཀྱི་རླུང་མཱཾ་ཡིག་དང༌། ནུབ་བྱང་དུ་མེ་
ཁམས་ཀྱི་རླུང་བཱཾ་ཡིག་དང༌། བྱང་ཤར་དུ་རླུང་ཁམས་ཀྱི་རླུང་ཏཱཾ་ཡིག་རྣམས་ཀྱིས་མཚོན་པ་སྟཻ། འདི་རྣམས་ཤེས་རབ་ཀྱི་ཕྱོགས་གཙོ་བོར་གྱུར་པའོ། །འདི་ལའང་མཁའ་ཁམས་ཡོད་མོད་ཀྱི། དབུས་ཀྱི་ལྟེ་བར་སྔ་མ་དང་རོ་མཉམ་དུ་འདྲེས་པའི་དབང་དུ་བྱས་ནས་ལོགས་སུ་མ་སྨོས་སོ། །དཔེ་འགའ་ཞིག་ལས་བྲུཾ་སོགས་ཀྱི་དོད་དུ་ཨོཾ་ཏྲཱཾ་ཧྲཱིཿཨཱཿ སོགས་བྱས་པའང་ཡོད་དེ། དངོས་པོའི་གནས་ཐབས་ལ་ཡིག་གཟུགས་སུ་གྲུབ་པ་མ་ཡིན་པས། རིགས་ལྔའི་ས་བོན་གང་སྒོམ་ཀྱང་འགལ་བ་མེད་དོ། །དཔྱིད་ཐིག་ཏུ་བཤད་པ་དང་ཡི་གེའི་འགོད་ཚུལ་ཅུང་ཟད་མི་མཐུན་ཡང༌། དེ་རྡོ་རྗེ་མཁའ་འགྲོ་དང་ཁ་སྦྱོར་ལས་བཤད་ཅིང༌། འདི་དགྱེས་པ་རྡོ་རྗེའི་ལུགས་ཡིན་ཞེས། བླ་མ་གོང་མ་རྣམས་གསུངས་ལ། འོན་ཀྱང་རང་ལུགས་ལ་མཚོན་དོན་ནི་གཅིག་པས་འདི་དག་རྣམ་གྲངས་ཐ་དད་པར་གསུངས་པར་མངོན་ནོ། །མགྲིན་པ་ལོངས་སྤྱོད་ཀྱི་འཁོར་ལོ་ལ། ལྟེ་བར་ཨོཾ་ནི་ཡི་གེ་ཀུན་གྱི་མགོ་འདྲེན་པས་ན། ངག་གི་བརྗོད་པ་མངོན་འགྱུར་ཐམས་ཅད་འབྱུང་བའི་ནུས་པ་མཚོན་པ་དང༌། རོ་རྣམས་མྱང་བའི་ནུས་པས་ཕུང་ཁམས་སྐྱེ་མཆེད་ཐམས་ཅད་བརྟས་པར་བྱང་བ་ནི། ཨོཾ་ཡིག་མཆོད་སྔགས་ཡིན་པའི་དོན་དང༌། རིགས་སྔགས་མཐའ་དག་འགྲུབ་པའི་གཞི་ཡིན་པ་ནི། ཨོཾ་ཡིག་ལ་བསྔགས་ཏེ་སྔགས་ཀྱི་ཆོ་ག་སྔགས་ཐམས་ཅད་ཀྱི་མགོ་འདྲེན་པར་བྱེད་པའི་དོན་གྱིས་སོ། ཨ་ཨི་ཨུ་ཨེ་ནི་དབྱངས་ཐུང་ངུ་ཏེ། མགྲིན་པའི་ནང་སྐོར་ཀྱི་ཡི་གེ་བཞི་དང༌། བཞི་པོ་དེ་རྣམས་ཉིད་ཀྱི་རྣམ་འགྱུར་ལས་བྱུང་བ།
དབྱངས་བཅུ་གཉིས་མ་ནིང་བཞི་སྤངས་པ་ནི། ཕྱི་སྐོར་ལ་འགོད་པར་བྱ་བ་ཡིན་ཏེ། །མགྲིན་པའི་རྩ་འཁོར་ན་ཡི་གེ་རྣམས་ཀྱི་བྱ་བ་བྱེད་པའི་རླུང་གནས་པ་མཚོན་པའི་ཕྱིར། །དབྱིངས་རྣམས་གཙོ་བོར་བཀོད་པ་ཡིན་ནོ། །སྤྱི་བོ་བདེ་བ་ཆེན་པོའི་འཁོར་ལོ་ལ་ནི། ཧཾ་ཡིག་ཏེ་ཇི་སྲིད་དུ་ལུས་གནས་ཀྱི་བར་དུ། བྱང་ཆུབ་ཀྱི་སེམས་མི་སྙེམ་ཞིང་རྟག་ཏུ་ལུས་ལ་གནས་པའི་མཚན་ཉིད་ཅན། ཧ་ཡིག་གི་སྒྲ་དང་བཅས་ཏེ་གནས་པའམ། ཡང་ནམ་མཁའི་ཁམས་བདེ་བའི་མཚན་ཉིད་ཅན་ཡང་ཡིན་ལ་དྲོད་དང་ལྡན་པ་མཚོན་པའི་ཕྱིར་ཡང་ཧ་ཡིག་དང༌། ཡང་ན་ཨ་ན་ཧ་ཏ་མི་ཤིགས་པའི་དོན་ཡིན་ཏེ། གོང་དུ་བཤད་པ་ལྟར་མི་སྙེམ་པའི་དོན་དང༌། དེའི་མིང་གི་དབུས་ཀྱི་ཡི་གེ་མཚོན་པའི་ཕྱིར། ཧ་ཡིག་ཏུ་འཆད་དོ། །ཟླ་ཕྱེད་སོགས་གསུམ་གྱི་མཚོན་དོན་ནི་སྔར་དང་འདྲའོ། །འདབ་མ་ལ་དབྱངས་ཚར་གཉིས་འགོད་པ་ནི། ཁམས་དཀར་པོ་གནས་པ་ཉིད་ལས་འཕོ་བ་སོ་གཉིས་གྱི་ཐིག་ལེ་མཚོན་པ་དང༌། དབྱངས་བཅུ་དྲུག་དང་གསལ་བྱེད་བཅུ་དྲུག་འགོད་པ་ལྟར་ན། ཁམས་འཕོ་བ་བཅུ་དྲུག་གི་རྒྱུ་ཐིག་ལེ་རེ་རེ་ལའང༌། ཐབས་དང་ཤེས་རབ་ཀྱི་ཆ་གཉིས་གཉིས་ཡོད་པ་མཚོན་ནོ། །ལྟེ་བའི་འོག་སོར་བཞིའི་གནས་སུ་ཚངས་པའི་མེ་ཞེས་བྱ་བ་གང་ལས་དྲོད་དང༌། ཆགས་པའི་རྟོག་པ་མངོན་འགྱུར་དུ་སྐྱེད་པར་བྱེད་པའི་མཐུ་ཅན། སྲུང་བ་ཏེ་དབུ་མའི་མས་སྣ་འགག་པར་བྱེད་པའི་ཡི་གེ་ནི་ཀྵ་ཡིག་གོ །དེ་ཡང་ལམ་དུ་བྱས་ན་འཆི་བ་ལ་སོགས་པ་བསྲུང་བར་བྱེད་ལ། ལམ་དུ་མ་བྱས་
ན། ན་བ་དང་རྒས་པ་དང་འཆི་བ་སྟེར་བའི་ཕྱིར། སྲིན་པོའི་ཡི་གེ་ཞེས་བྱ་སྟེ། རཀྵའི་སྒྲ་བསྲུང་བ་དང་སྲིན་པོའི་སྒྲ་གཉིས་ཀ་ལ་འཇུག་པས་སོ། །མཐར་ཟད་ཀྱི་ཡི་གེ་ཀྵ་ནི་ཡི་གེའི་ནང་ནས་ཆེས་རྩུབ་ཅིང་དྲག་པོ་ཡིན་ཏེ་ཟད་མཐའ་ཡིན་པའི་ཕྱིར་དང༌། ཚངས་པའི་མེ་ཡང་ཁམས་རྣམས་ཀྱི་ནང་ནས་ཆེས་དྲག་པོ་ཡིན་པའི་ཕྱིར་དཔེ་དོན་སྦྱོར་ལ། ཀ་ཡིག་ས་ཁམས་དང་ཥ་ཡིག་མེ་ཁམས་མཚོན་པས། འདི་ནི་ས་མེ་གཉིས་ཤས་ཆེར་འདུས་པའི་ཐིག་ལེའོ། །དེ་ལྟར་ན་ཡི་གེའི་དཀྱིལ་འཁོར་དུ་གང་བཤད་པ་ཐམས་ཅད་ནི། གནས་རྩ་དང་ཡོ་བྱད་ཁམས་ཀྱི་ཁྱད་པར་ལ་བརྟེན་ནས། སྒྲ་གཟུགས་སྣ་ཚོགས་སུ་འགྱུར་བའི་རླུང་རྣམས་ཉིད་ཡིན་ཏེ། ཡི་གེ་ཞེས་བྱ་བ་ངོ་བོ་གཞན་དུ་མི་བསམ་མོ། །ཟླ་བ་དང་ཞེས་སོགས་ལ་ཟླ་བའི་སྒོ་འོག་ཏེ་རྩ་རྐྱང་མ་ལ་ལྟེ་བའི་ཐད་དུ་ཁུ་བ་འཕེན་སྡོམ་གྱི་སྒོ་ཡོད་པ་ནི། ཁམས་དང་རླུང་འོང་བའི་ལམ་དང༌། ཉི་མའི་སྒོ་རྩ་རོ་མ་ལ་བརྟེན་པའི་ཁའམ་བུ་ག་སྟེང་གི་མགྲིན་པར་གནས་པ་ནི། གཏུམ་མོ་མེ་དང་རླུངའགྲོ་བའི་སྒོ་ཏེ། ཐུགས་ཀྱི་སྒོ་གཉིས་སུ་གྲགས་པ་དེ་ཡིན་ལ། སྤྱིར་དབུ་མའི་ཡས་སྣ་དང་མས་སྣའི་སྒོ་དང་སྙིང་གའི་སྟེང་དང་ལྟེ་བའི་འོག་གི་སྒོ་ཡང༌། ཟླ་བ་ཉི་མ་དང་ཐུགས་ཀྱི་སྒོ་ཡང་ཡིན་ནོ། །དེ་བཞི་གནས་ཐབས་ཀྱི་དབང་དུ་བྱས་ལ། ལམ་སྒོམ་པའི་ཚེ་གནད་འབྱེད་པའི་སྒོ་མཛོད་བུ་ནི་གཏུམ་མོ་འགྲོ་བ་དང༌། གསེར་གྱི་སྒོ་ཏེ་སྤྱི་གཙུག་ཚངས་པའི་བུ་ག་ནི། བྱང་ཆུབ་ཀྱི་སེམས་འོང་པའི་སྒོའོ། །སྐབས་འདི་དག་ཏུ་རྩ་གསུམ་འཁོར་ལོ་བཞི་སྐུའྀ་སྒོ་དགུ། གསུང་གི་སྒོ་བཞི། ཐུགས་ཀྱི་སྒོ་གཉིས།
ཡི་གེ་དང་ཐིག་ལེའི་རྣམ་བཞག་ཞིབ་མོར་ཤེས་པ་གལ་ཆེ་མོད་ཀྱི། དཔལ་དཔྱིད་ཀྱི་ཐིག་ལེའི་འགྲེལ་པར་བཤད་པའི་འདིར་མི་སྤྲོའོ། །གཉིས་པ་དེ་དང་འབྲེལ་བའི་ཆོས་རྣམས་ཞིབ་མོར་བཤད་པ་ནི། སྦྱོར་བ་བཞི་ནི་ཞེས་པ་ནས། སྐྱེ་ཞིང་གནས་ལ་འཇིག་པའོ། །ཞེས་པའི་བར་ཏེ། དེ་ལ་སྡོམ་ནི། སྦྱོར་བཞི་རྒྱུ་བའི་ཚུལ་བཞི་དང༌། །ཏིང་འཛིན་གསུམ་དང་ལས་གསུམ་དང༌། །ཡན་ལག་བདེན་པ་སྡེ་པ་དང༌། །དབྱེ་བ་སྐད་ཅིག་དགའ་བ་འབྲས། །མཆོག་གནས་དེ་ཉིད་རྣམ་པ་བཞི། །འཁོར་གསུམ་ཤེས་རབ་གཉིས་དང་ནི། །དབུག་དབྱུང་གཉིས་དང་སྐུ་གསུམ་དང༌། །ཕུང་པོ་ལྔ་དང་ཡེ་ཤེས་ལྔ། །ལྷ་མོ་བཞི་དང་དབང་པོ་དྲུག །འཁོར་ལོ་བཞི་ལ་ཐུན་བཞིའི་རླུང༌། །ས་བཅུ་ཡུལ་ནི་ཉེར་བཞི་དང༌། །ཀུན་སྤྱོད་བདུན་ཅུ་རྩ་གཉིས་སོ། །ཤེས་རབ་དབུགས་དབྱུང་གཉིས་ཚན་གཉིས། །ཏིང་འཛིན་ལས་དང་དཀྱིལ་འཁོར་དང༌། །སྐུ་ཏེ་གསུམ་ཚན་བཞི་ཡིན་ལ། །རླུང་དང་རྒྱུ་བ་སྙེན་སྒྲུབ་སོགས། །སྡེ་ཚན་བཅུ་དང་ལྷ་མོ་དང༌། །ཐུན་ཏེ་བཞི་ཚན་བཅུ་བཞིའོ། །ཕུང་པོ་ཡེ་ཤེས་ལྔ་ཚན་གཉིས། །དྲུག་དང་བཅུ་དང་ཉེར་བཞི་དང༌། བདུན་ཅུ་གཉིས་ལ་རེ་རེའོ། །ཞེས་པ་བློ་ལ་བཞག་ནས། སྦྱོར་བ་བཞི་དང༌། དཀྱིལ་འཁོར་གྱི་རླུང་རྒྱུ་བའི་ཚུལ་བཞི་དང༌། ཏིང་འཛིན་གསུམ་དང༌། ལས་གསུམ་དང༌། སྙེན་སྒྲུབ་ཡན་ལག་བཞི་དང༌། བདེན་པ་བཞི་དང༌། སྡེ་པ་བཞི་དང༌། དབྱེ་བ་བཞི་དང༌། སྐད་ཅིག་མ་བཞི་དང༌། དགའ་བ་བཞི་དང༌། འབྲས་བུ་བཞི་དང༌། མཆོག་བཞི་དང༌།
གནས་བཞི་དང༌། དེ་ཁོ་ན་ཉིད་བཞི་དང༌། དཀྱིལ་འཁོར་གསུམ་དང༌། ཤེས་རབ་གཉིས་དང༌། དབུགས་དབྱུང་གཉིས་དང༌། སྐུ་གསུམ་དང༌། ཕུང་པོ་ལྔ་དང༌། ཡེ་ཤེས་ལྔ་དང༌། ལྷ་མོ་བཞི་དང༌། དབང་པོ་དྲུག་དང༌། འཁོར་ལོ་བཞི་ལ་ཐུན་བཞིར་རྒྱུ་བའི་རླུང་དང༌། ས་བཅུ་གཉིས་དང༌། ཡུལ་ཉི་ཤུ་རྩ་བཞི་དང༌། ཀུན་སྤྱོད་བདུན་ཅུ་རྩ་གཉིས་ཏེ། སྡེ་ཚན་ཉི་ཤུ་རྩ་དྲུག་གམ་ཤེས་རབ་དང་དབུགས་དབྱུང་གཅིག་ཏུ་སྡོམས་ན་ཉི་ཤུ་རྩ་ལྔ་གསུངས་པ་ལས། ཤེས་རབ་དབུགས་དབྱུངས་ལ་གཉིས་གཉིས་ཏེ་གཉིས་ཚན་གཉིས་དང༌། ཏིང་ངེ་འཛིན་གསུམ་དང༌། ལས་གསུམ་དང༌། སྐུ་གསུམ་ཏེ་སུམ་ཚན་བཞི་དང༌། སྦྱོར་བ་དང༌། དཀྱིལ་འཁོར་གྱི་རླུང་རྒྱུ་ཚུལ་དང༌། ཡན་ལག་དང༌། དེ་བཞིན་དུ། བདེན་པ། སྡེ་པ། དབྱེ་བ། སྐད་ཅིགདགའ་བ། འབྲས་བུ། མཆོགགནས། དེ་ཁོ་ན་ཉིད། ལྷ་མོ་ཐུན་ཚོད་ཀྱི་རླུང་ཏེ་བཞི་ཚན་བཅུ་བཞི་དང༌། ཕུང་པོ་དང༌། ཡེ་ཤེས་ཏེ་ལྔ་ཚན་གཉིས་དང༌། དྲུག་ཚན། བཅུ་ཚན། ཉེར་བཞི་ཚན། བདུན་ཅུ་རྩ་གཉིས་ཚན་རྣམས་སྡེ་ཚན་རེ་རེའོ། །དེ་ལ་ཐབས་དང་ཤེས་རབ་གཉིས་ཀྱི་དབྱེ་བས་གཉིས་ཚན་དང་རྩ་གསུམ་མམ། རྡུལ་མིན་སྙིང་སྟོབས་གསུམ་གྱི་དབྱེ་བའི་གསུམ་ཚན་དང༌། འཁོར་ལོ་བཞིའམ་སྐུ་བཞིའི་དབྱེ་བས་བཞི་ཚན་དང༌། ཡེ་ཤེས་ལྔའམ་འབྱུང་བ་ལྔའི་དབྱེ་བའི་ལྔ་ཚན་དང༌། ཁམས་དྲུག་གི་དབྱེ་བས་དྲུག་ཚན་དང་དེ་ཉིད་ཉིས་འགྱུར་རམ། ཕར་ཕྱིན་བཅུའི་དབྱེ་བའི་བཅུ་ཚན་དང༌། བརྒྱད་ལ་སྐུ་གསུང་ཐུགས་ཀྱི་དབྱེ་བས་ཉེར་བཞི་དང༌།
དེ་ལའང་སྐུ་གསུམ་གྱི་དབྱེ་བས་བདུན་ཅུ་རྩ་གཉིས་སོ། །རྒྱས་བཤད་ཀྱི་སྐབས་འདིར་ནི་དེ་ཙམ་ཡིན་མོད་ཀྱི། ཉིས་ཚན་གྱི་སྐབས་ཡི་གེ་གཉིས། དབྱངས་གསལ་གཉིས། གཡས་གཡོན་གཉིས། ཟླ་ཉི་གཉིས། སྟེང་འོག་གཉིས། སྒོ་གཉིས། འགྲོ་འོང་གཉིས་ཏེ་གཉིས་ཚན་བདུན་དང༌། ཡི་གེ་ཕྱག་རྒྱ་འཁོར་ལོ་སྟེ་བཞི་ཚན་གསུམ་ཡང་གོང་དུ་བཤད་པས། སྤྱིར་གཞུང་འདི་ནས། གཉིས་ཚན་གྱི་སྐབས་སུ་དགུ་དང༌། བཞི་ཚན་གྱི་སྐབས་སུ་བཅུ་དྲུག་ཡོད་དོ། །སྡེ་ཚན་དེ་རྣམས་དོན་གྱི་རིགས་ཇི་ལྟར་མཐུན་མཐུན་དུ་འཁྲུགས་སྡེབས་ཏེ་བཤད་ན། མི་འཛིངས་ཤིང་གོ་བདེ་བའི་ཕྱིར་དེ་ལྟར་བརྗོད་པར་བྱའོ། །དེ་ལ་གནས་ལུགས་དེ་ཁོ་ན་ཉིད་ཀྱི་རང་བཞིན་དང༌། གཞི་ལམ་འབྲས་བུ་ཆོས་སོ་སོར་དབྱེ་བའོ། །དང་པོ་ལ་བདེན་པ་གཉིས་ཀྱི་རང་བཞིན་དང༌། གནས་ལུགས་འཁོར་འདས་དབྱེར་མེད་ཀྱི་དཀྱིལ་འཁོར་དུ་བསྟན་པའོ། །དང་པོ་ནི་གཉིས་ཚན་གཉིས་ཏེ། དེ་ཡང་ཤེས་རབ་གཉིས་ནི་དམིགས་པ་དང་བཅས་པ་དང༌། དམིགས་པ་མེད་པའོ། །དམིགས་པ་དང་བཅས་པ་ནི་དེ་བཞིན་གཤེགས་པའི་དབུགས་དབྱུང་བ་དེ་འཁོར་བའོ། །དམིགས་པ་མེད་པ་ནི་རྡོ་རྗེ་འཆང་གི་དབུགས་དབྱུང་བ་སྟེ་མྱ་ངན་ལས་འདས་པའོ། །ཞེས་སོ། །གཞུང་འདིའི་རྣམ་གྲངས་ཀྱི་དོན་ནི། གཞིའི་དུས་སུ་སེམས་དང་ལུས་གཉིས་ལས། །སེམས་ཀྱི་བདེ་བ་དང་གསལ་བའི་ཆ་ནི། དམིགས་བཅས་དེ་བཞིན་གཤེགས་པའི་དབུགས་དབྱུང་ཏེ། བདེ་བའི་རང་བཞིན་མ་ཤེས་པས་སྲེད་པ་སྐྱེ་ཏེ་འཁོར་བའི་རྒྱུ་དང༌། གསལ་བ་ལ་འཁྲུལ་པ་
ལས། འབྲས་བུ་འཁོར་བའི་སྣང་བ་ཉིད་འཆར་བའི་འཁོར་བ་ཞེས་བརྗོད། སེམས་གཟུང་འཛིན་གཉིས་སྟོང་གི་ཆ་ནི། རྡོ་རྗེ་འཆང་གི་དབུགས་དབྱུང་བ་སྟེ། དབྱིངས་ཀྱི་ཕྱོགས་འཛིན་པ་དང༌། བདེ་གསལ་དེ་རྣམས་ཀྱི་རོ་མཉམ་པའི་ལྡོག་ཆ་བསྟན་པས། ཁྱབ་བྱེད་ཀྱི་ཚུལ་ལ་ཞུགས་པའི་ཕྱིར། དེ་བཞིན་གཤེགས་པ་རྣམས་ལ་རྡོ་རྗེ་འཆང་ཆེན་པོས་ཁྱབ་པའི་ཚུལ་དང་མཚུངས་ཤིང༌། གནས་ལུགས་གཟུང་འཛིན་དང་བྲལ་བ་དེ་ཉིད་ལ་ལམ་བསྒོམས་པས། །མྱ་ངན་ལས་འདས་པ་མངོན་སུམ་དུ་བྱེད་པའི་ཕྱིར། དེ་ལ་མྱང་འདས་ཞེས་བྱའོ། །འཁོར་བ་ལུས་ཀྱི་ཆ་ནས། བདུད་རྩི་ལྔའི་དྭངས་མ་ནི་བདེ་བའི་བརྟེན་ཡིན་པས། རྡོ་རྗེ་འཆང་གི་དབུགས་དབྱུང་དང༌། ཁམས་ཉེར་བཞི་སོགས་ནི་རྣམ་འགྱུར་སྣ་ཚོགས་པས་ལུས་བསྐྱེད་པའི་ཕྱིར། དེ་བཞིན་གཤེགས་པའི་དབུགས་དབྱུང་ངོ༌། །ལམ་དང་སྦྱར་བ་ལ། བདེ་གཤེགས་དབུགས་འབྱིན་གསུངས་པ་ནི། །དག་པའི་ལུས་ནི་སྐྱོན་མེད་པ། ཞེས་ཀུན་སྤྱོད་སོགས་ལས་གསུངས་པ་ལྟར་ཏེ། རྫོགས་རིམ་རྣམ་པ་དང་བཅས་པ་རྣམས་ནི། བདེ་གཤེགས་དབུགས་འབྱིན་དང༌། དེ་རྣམས་ལ་ཁྱབ་པ་བདེ་སྟོང་དབྱེར་མེད་ཀྱི་ལམ་རྣམ་མེད་ཀྱི་ཆ་ནི་རྡོ་རྗེ་འཆང་གི་དབུགས་དབྱུང་ངོ༌། །འབྲས་བུ་ལ་སྦྱར་ན་སྐུ་རྣམ་པ་ཐམས་ཅད་པ་ནི་བདེ་གཤེགས་དབུགས་དབྱུང་དང༌། ཐུགས་ལྷན་ཅིག་སྐྱེས་པ་ནི། རྡོ་རྗེ་འཆང་གི་དབུགས་དབྱུང་དུ་འཇོག་པར་ཤེས་པར་བྱ་ལ། གཞི་ལམ་འབྲས་བུ་འབྲེལ་བ་ནི། ཨེ་ཡིག་གི་འཁོར་ལོ་གཉིས་ལས།
གཞི་ལམ་འབྲས་བུའི་རྡོ་རྗེ་འཆང་གི་དབུགས་དབྱུང་འཆར་བ་དང༌། བཾ་ཡིག་གི་འཁོར་ལོ་གཉིས་ལས་གཞི་ལམ་འབྲས་བུའི་བདེ་གཤེགས་དབུགས་དབྱུང་རྣམས་འཆར་རོ། །ཞེས་རྒྱུ་མཚན་དང་བཅས་པ་ཞིབ་མོར་ངེས་པར་བྱའོ། །དེ་རྣམས་ལས་གཞུང་འདིའི་དོན། དངོས་སམ་གཙོ་བོ་ནི་འདི་ཡིན་ཏེ། འདིར་ཤེས་རབ་ཅེས་བྱ་བ། རྟོགས་བྱའི་ཡུལ་ཆོས་ཉིད་ལ་བཞག་པ་དང༌། རྟོག་བྱེད་ཀྱི་ཤེས་པ་ལམ་བདེན་ལ་བཞག་པ་གཉིས་ལས། འདིར་དང་པོ་སྟེ། དེས་ན་ཆོས་ཉིད་ལ་ངོ་བོའི་སྒོ་ནས་རྣམ་པར་དབྱེ་བ་ནི་མེད་ཀྱང་མཚན་ཉིད་ནི་རྣམ་པ་གཉིས་ཏེ། དམིགས་པ་དང་བཅས་པ་རྣམ་པ་ཐམས་ཅད་པར་གདོད་མ་ནས་ཤར་བའི་ཡེ་ཤེས་དང༌། དམིགས་པ་མེད་པ་རང་བཞིན་འགྱུར་མེད་བདེ་བ་ཆེན་པོ་ལ་གཟུང་འཛིན་གྱི་སྣང་བས་མ་གོས་པའི་རང་རིགས་ཏེ། དེ་གཉིས་ཟུང་དུ་འཇུག་པ་ནི་ཆོས་ཉིད་དོ། །དེ་ལྟར་ཤེས་རབ་གཉིས་པོ་དེ་ནི། གང་དུ་དབུགས་འབྱིན་པའི་གནས་ཡིན་ལ། དེར་དབུགས་འབྱིན་པའི་ཚུལ་ནི་རྣམ་པ་གཉིས་ཏེ། གདོད་མ་ནས་རྣམ་པ་ཐམས་ཅད་པའི་ཡེ་ཤེས་ཡིན་ཡང༌། ལས་དང་ཉོན་མོངས་པ་དང༌། སྡུག་བསྔལ་གྱི་རྣམ་པ་མཐའ་ཡས་པས་ཡོངས་སུ་གཡོགས་པ་དེ་ལམ་དམིགས་བཅས་ལྷ་སྐུ་དང་རྩ་དང་རླུང་དང༌། ཐིག་ལེ་ལ་སོགས་པ་དང༌། དད་པ་དང༌། ངེས་པར་འབྱུང་བ་དང༌། སྙིང་རྗེ་དང༌། མཆོད་པ་དང་བསྔོ་བ་ལ་སོགས་པ། ཐབས་སྣ་ཚོགས་བསྟན་པས། མ་དག་པའི་སྣང་བ་ཐམས་ཅད་པ་དེ་དག་ནས། གཞི་གདོད་མའི་གནས་ལུགས་དག་པའི་སྣང་བ་ཐམས་ཅད་པ་མངོན་
དུ་གྱུར་པ་དེ་ནི། དེ་བཞིན་གཤེགས་པའི་དཀྱིལ་འཁོར་གྱི་འཁོར་ལོར་དབུགས་དབྱུང་བ་ཞེས་བྱ་སྟེ། རྣམ་པ་ཐམས་ཅད་པ་དེ་ཡང་འཁོར་བའི་གནས་ཚུལ་དང་ཆོས་ཉིད་ཡིན་པས། འཁོར་བའི་མིང་གིས་བཏགས་པའམ། དོན་དམ་པའི་འཁོར་བའོ། །དམིགས་པ་མེད་པའི་ལམ་སྟོང་པའི་ཕྱོགས་དང་བདེ་བའི་ཕྱོགས་རོ་གཅིག་ཏུ་གོམ་པ་ལས་གནས་ལུགས་རང་རིགས་བདེ་ཆེན་གཟུང་འཛིན་གཉིས་བྲལ་དེ་ལ་སྒྲིབ་བྱེད་ཀྱི་དྲི་མ་ནི་མཚན་ཉིད་འདི་དག་ཚང་བ་དེ་དངོས་པོ་ལ་མཚན་མར་འཛིན་པ་དང༌། བདག་དང་བདག་གིར་འཛིན་པ་དང༌། རྣམ་པ་མི་གསལ་བའི་མ་རིག་པ་དང༌། རང་བཞིན་བདེ་བ་ལ་བློ་འཁྲུལ་པར་ཞུགས་པའི་འགྱུར་བདེ་བག་ཆགས་དང་བཅས་པ་དེ་འགག་པ་ལས། རང་བཞིན་རང་རིག་དེ་མངོན་དུ་གྱུར་པ་ནི། རྡོ་རྗེ་འཆང་བདེ་བ་ཆེན་པོར་དབུགས་དབྱུང་བ་སྟེ། མྱ་ངན་ལས་འདས་པའི་ཆོས་ཉིད་དེ། འདིར་རྩོད་པ་གཉིས་འབྱུང་བར་འགྱུར་ཏེ། ཇི་སྐད་དུ། ཆོས་ཉིད་ཀྱི་རབ་ཏུ་ཕྱེ་བ་ནི་ཐེག་པ་གསུམ་གྱི་མྱ་ངན་ལས་འདས་པའོ། །ཞེས་གསུངས་པས། ཆོས་ཉིད་ཉིད་མྱང་འདས་མ་ཡིན་ནམ། མྱང་འདས་ཆོས་ཅན་དང་རང་རིག་བདེ་ཆེན་ཆོས་ཉིད་དུ་ཇི་ལྟར་འཐད་མཉམ་པ་ནི་རྩོད་པ་དང་པོའོ། །དམིགས་པ་མེད་པ་ནི་རང་བཞིན་གྱི་མྱང་འདས་ཡིན་ཡང༌། དམིགས་བཅས་དཀྱིལ་འཁོར་གྱི་འཁོར་ལོ་འཆར་བ་དེ་ནི། གློ་བུར་རྣམ་དག་ཁོ་ན་ལས་ཡིན་པས། སེམས་ཅན་རྣམས་ལ་མེད་པའི་ཕྱིར། དེ་གཉིས་ངོ་བོ་གཅིག་པར་ཡང་མི་འཐད་ཅིང༌། དཀྱིལ་འཁོར་དེ་འདྲ་འབྲས་བུ་མཐར་ཐུག་གི་སྐབས་ཡིན་པས། འཁོར་བ་ཇི་ལྟར་འགྱུར།
འདི་འཁོར་འདས་གཉིས་སུ་བཅད་པའི་མྱང་འདས་ཀྱི་ཟླས་དྲངས་པའི་འཁོར་བ་དེ་ཡིན་པས། འཁོར་བ་དངོས་སམ་ཀུན་རྫོབ་ཀྱི་ཆ་ལས་འོས་མེད་པའི་སོ་སྙམ་པའོ། །དང་པོའི་ལན་ནི། གང་མྱ་ངན་ལས་འདས་པའི་ཆོས་སུ་གཏོགས་ཚད་ལ། ཆོས་ཉིད་ཀྱིས་ཁྱབ་མཐའ་འཛིན་པ་ནི་མ་ཡིན་ཏེ། དྲི་མ་གསར་དུ་སྤངས་པ་ལ་སོགས་པ་དང༌། མ་ཐོབ་པ་གསར་དུ་ཐོབ་པར་སྣང་བ་དེ་ཐམས་ཅད་དང༌། གདུལ་བྱ་གཞན་སྣང་གིས་བསྡུས་པ་རྒྱུ་དང་བཅས་པ་རྣམས་ནི། །ཀུན་རྫོབ་སྒྱུ་མ་ལྟ་བུ་ཙམ་ཡིན་པའི་ཕྱིར་དང༌། ཆོས་ཉིད་ཀྱི་གནས་ལུགས་མ་ཡིན་པའི་ཕྱིར་རོ། །ཡང་གློ་བུར་གྱི་འཁྲུལ་པ་གནས་ལུགས་ལ་ཡོད་མ་མྱོང་བས། དེ་སྤངས་པར་སྣང་བ་ཡང་ཅིའི་ཕྱིར་འཁྲུལ་པ་མ་ཡིན། དེས་ན་སྐབས་འདིར་ཆོས་ཅན་དུ་འགྱུར་བའི་མྱ་ངན་ལས་འདས་པ་ནི། དེ་རྣམས་ཡིན་ལ་དེ་དག་ཀྱང་གཟུང་འཛིན་གདོད་མ་ནས་ཡོད་མ་མྱོང་བའི་རྒྱུ་མཚན་གྱིས་འཁྲུལ་པ་དེ་སངས་པ་ཡིན་པའི་ཕྱིར། གནས་ལུགས་དེ་དང་གསར་ཐོབ་ཀྱི་མྱ་ངན་ལས་འདས་པ་དེ་ཡང༌། རྒྱུ་མཚན་གྱི་སྒོ་ནས་འབྲེལ་ཞིང༌། དེ་ཡང་དེའི་རྗེས་སུ་འགྲོ་ལྡོག་བྱེད་པའི་ཕྱིར་ཆོས་ཅན་དང་ཆོས་ཉིད་དུ་བཞག་གོ །ཆོས་ཉིད་ཀྱི་རབ་ཏུ་ཕྱེ་བ་མྱ་ངན་ལས་འདས་པར་བཞག་པ་ཡང༌། དོན་འདི་ཉིད་ཡིན་པས། ལུང་དེའི་དོན་ཡང་ལེགས་པར་བཤད་པ་ཡིན་ཏེ། རང་བཞིན་གྱི་མྱ་ངན་ལས་འདས་པ་ནི་ཆོས་ཉིད་དངོས་ཡིན་ལ། གློ་བུར་དྲི་བྲལ་གྱི་མྱང་འདས་ཀྱང༌། ཆོས་ཉིད་ལ་རྒྱུ་མཚན་གྱི་སྒོ་ནས་འབྲེལ་བ་ཅན་དུ་འཇུག་པའི་ཕྱིར་རོ། གཉིས་པའི་ལན་ནི། རྣམ་པ་ཐམས་ཅད་པའི་ཆ་
དང༌། རང་རིག་བདེ་ཆེན་ཀྱི་ཆ་ནས། གཉིས་ཀ་ཡང་འཁོར་བ་དང་མྱ་ངན་ལས་འདས་པ་གཉིས་ཀའི་ཆོས་ཉིད་ཡིན་པས། ངོ་བོ་ཐ་དད་དུ་འགྱུར་བའི་སྐྱོན་མེད་ལ། ལྡོག་ཆ་གཉིས་པོ་ནི་འཁོར་འདས་སོ་སོའི་ཆོས་ཉིད་དུ་འགྲོ་ཚུལ་སོ་སོ་ཡིན་མོད་ཀྱང༌། དེས་ཆོས་ཉིད་ཐ་དད་དུ་མི་འགྱུར་ཏེ། ལྡོག་ཆ་ནི་བློས་བཏགས་པ་ཀུན་རྫོབ་དང་འབྲེལ་བའི་ཆ་ཙམ་ཡིན་པའི་ཕྱིར་རོ། །དེས་ན་རྣམ་པ་ཐམས་ཅད་པ་འཁོར་འདས་གཉིས་ཀར་གྱི་ཆོས་ཉིད་ཡིན་པ་ལ་ཉེ་རིང་མེད་ཀྱང༌། རྣམ་པ་ཐམས་ཅད་པའི་ལྡོག་ཆ་ནས་འཁོར་བའི་ཆོས་ཉིད་དུ་སོང་བ་དང༌། རང་རིག་བདེ་ཆེན་འཁོར་འདས་ཐམས་ཅད་ཀྱི་ཆོས་ཉིད་ཡིན་ཡང་རང་རིག་བདེ་བའི་ལྡོག་ཆ་ནས། གསར་དུ་མྱ་ངན་ལས་འདས་པའི་ཆོས་ཉིད་དུ་གཙོ་བོར་སོང་བ་ཡིན་ནོ། དེའི་ཕྱིར་མྱ་ངན་ལས་འདས་པའོ་ཞེས་པ་མྱང་འདས་ཀྱི་ཆོས་ཉིད་ཡིན་པས། འཁོར་བའོ་ཞེས་པ་ཡང་དེའི་ཆོས་ཉིད་དུ་གྲུབ་བོ། །ཡང་གོང་གི་དམིགས་བཅས་ངོས་འཛིན་པ་ན་བདེ་གཤེགས་དབུགས་དབྱུང་དེའི་མཚན་ཉིད་དུ་འཆད་ཅིང༌། མཚན་གཞི་ཆོས་ཅན་ཕུང་པོ་ལྔ་སོགས་སུ་བཤད་ནས། འཁོར་བ་དངོས་སུ་འདོད་པ་ནི་ཤིན་ཏུ་འཁྲུལ་བ་སྟེ། ཤེས་རབ་གཉིས་མ་ཞེས་པའི་གཞུང་ཚིག་དང་དངོས་སུ་འགལ་བའི་ཕྱིར་རོ། །དེས་ན་དབུགས་དབྱུང་བའི་དོན་ནི་སྡུག་བསྔལ་སངས་ཏེ་བདེ་བ་ལ་གནས་པ་ཏེ་ལམ་བསྒོམས་པའི་གཞིའི་གནས་ལུགས་བདེ་བ་ལ་འཁོད་པའི་དོན་ནོ། །འོ་ན་མྱ་ངན་ལས་འདས་པ་དོན་དམ་དུ་ཡང་ནས་ཡང་དུ་གསུངས་པ་མ་ཡིན་ནམ་སྙམ་ན་དེ་ནི་ངེས་པར་ཡིན་ཏེ། དེ་ཉིད་ཀྱིས་ན་མྱང་
འདས་གོ་ཆོད་པོ་ནི། རང་བཞིན་གྱི་མྱང་འདས་ཁོ་ནར་ངེས་ལ། གསར་དུ་མྱ་ངན་ལས་འདས་པ་ནི་འཁོར་བའི་ཟླས་དྲངས་པའི་སྐབས་མྱང་འདས་དངོས་སུ་འཇོག་དགོས་པའང་ཡོད་མོད་ཀྱི་སྤྱི་ལྡོག་ནས་རྗེས་སུ་མཐུན་པའི་མྱང་འདས་ཞེས་བྱའོ། །གཉིས་པ་ནི། དེ་བཞིན་གཤེགས་པ་ལྔ་ནི། གཟུགས་དང་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའོ། །ཡེ་ཤེས་ལྔ་ནི། མེ་ལོང་ལྟ་བུ་དང༌། མཉམ་པ་ཉིད་དང༌། སོ་སོར་རྟོག་པ་དང༌། བྱ་བ་གྲུབ་པ་དང༌། ཆོས་ཀྱི་དབྱིངས་རྣམ་པར་དག་པའོ། །ལྷ་མོ་བཞི་ནི། ས་དང་ཆུ་དང་མེ་དང་རླུང་ངོ༌། །བྱང་ཆུབ་སེམས་དཔའ་རྣམས་ནི་མིག་ལ་སོགས་པ་དབང་པོ་དྲུག་གོ །ཞེས་ཏེ་གཟུགས་ཀྱི་ཕུང་པོའི་ཆོས་ཉིད་ནི། དོན་དམ་མཁའ་ཁྱབ་ཀྱི་རྣམ་པར་སྣང་མཛད་དང༌། དེ་བཞིན་དུ་ཚོར་བའི་ནི། རིན་ཆེན་འབྱུང་ལྡན་དང༌། འདུ་ཤེས་ཀྱི་ནི་འོད་དཔག་མེད་དང༌། འདུ་བྱེད་ཀྱི་ནི་དོན་ཡོད་གྲུབ་པ་དང༌། རྣམ་པར་ཤེས་པའི་ཕུང་པོའི་ཆོས་ཉིད་ནི། དོན་དམ་ཀུན་ཁྱབ་ཀྱི་མི་བསྐྱོད་པའོ། །ཞེས་པ་ནི་དོན་དམ་ཀུན་ཁྱབ་ཀྱི་དེ་བཞིན་གཤེགས་པ་ལྔའོ། །དེ་བཞིན་དུ་དོན་དམ་ཀུན་ཁྱབ་ཀྱི་ཡེ་ཤེས་ལྔ་ནི། ཤེས་བྱ་ཐམས་ཅད་ཀྱི་ཆོས་ཉིད་དུ་ཞུགས་ཤིང་རང་གི་རིག་པ་ནི། མེ་ལོང་ལྟ་བུ་དང༌། ཆོས་ཐམས་ཅད་ཀྱི་ཆོས་ཉིད་དུ་སོང་ཤིང༌། ཀུན་རྫོབ་ཤེས་བྱའི་རབ་དཔེ་མཐའ་ཡས་ཀྱང༌། ཆོས་ཉིད་དབྱེ་བ་མེད་པ་ནི། མཉམ་པ་ཉིད་དེ། དེ་ཡང་མེ་ལོང་ལྟ་བུས་ནི། ཀུན་འགྲོ་དང༌། དུས་གསུམ་པ་དང༌། རྣམ་པ་ཐམས་ཅད་པར་བསྟན་ལ། མཉམ་
པ་ཉིད་ཀྱི་ནི་དུས་མེད་པ་དང༌། ཆ་མེད་དང༌། རང་བཞིན་མི་འགྱུར་བར་བསྟན་ནོ། །སོ་སོར་རྟོག་པ་ནི། རང་བཞིན་རྣམ་པ་ཐམས་ཅད་པ་ཉིད་རྣམ་པ་ཐམས་ཅད་པ་ཉིད་དུ་དང༌། མཉམ་པ་ཉིད་ཀྱང་མཉམ་ཉིད་ཀྱི་ངོ་བོ་ཤེས་པ་དེ་ཡིན་ལ། བྱ་བ་གྲུབ་པ་ནི། ཤེས་བྱ་མཁའ་ཁྱབ་ལ་སྐབས་སུ་བབ་པའི་འཕྲིན་ལས་མ་འཛིངས་པ་ཉིད་དང༌། འབད་རྩོལ་མེད་པ་ཉིད་དུ་འབྱུང་བའི་ནུས་མཐུའོ། །ཆོས་ཀྱི་དབྱིངས་ཤིན་ཏུ་རྣམ་པར་དག་པའི་ཡེ་ཤེས་ནི། ཤེས་བྱ་ཐམས་ཅད་ལ་ཕྱོགས་ཆ་ཉེ་རིང་མེད་པར་ཁྱབ་པའི་རིག་པ། གློ་བུར་གྱི་དྲི་མ་གང་གིས་ཀྱང་གདོད་མ་ནས་གོས་མ་མྱོང་བ་དེའོ། །འབྲས་བུའི་དུས་སུ་ཀུན་གཞི་རྣམ་ཤེས་ལ་སོགས་པ་གནས་གྱུར་པའི། ཡེ་ཤེས་བཞི་ནི་ལམ་བདེན་ཀུན་རྫོབ་པ་ཡིན་ལ། འདིར་བསྟན་ལྔ་ནི་ཆོས་ཉིད་དོན་གྱི་ཡེ་ཤེས་ཁོ་ནའོ། །དོན་དམ་པའི་ལྷ་མོ་བཞི་ལ། ས་ཁམས་ཀྱི་ཆོས་ཉིད་ནི། དོན་དམ་ཀུན་ཁྱབ་ཀྱི་སངས་རྒྱས་སྤྱན་མ་དང༌། དེ་བཞིན་དུ་ཆུ་ཡི་ནི་མཱ་མ་ཀཱི་དང༌། མེ་ཡི་ནི་གོས་དཀར་མོ་དང༌། རླུང་གི་ནི་སྒྲོལ་མའོ། །དེ་བཞིན་དུ་དོན་དམ་ཀུན་ཁྱབ་ཀྱི་བྱང་ཆུབ་སེམས་དཔའ་ནི། དོན་དམ་པའི་མིག་ལ་སོགས་པ་དབང་པོ་དྲུག་ཏེ། མིག་གི་སྐྱེ་མཆེད་ཀྱི་ཆོས་ཉིད་ནི་དོན་དམ་ཀུན་ཁྱབ་ཀྱི་སའི་སྙིང་པོའོ། །དེ་བཞིན་དུ་རྣ་བའི་ནི་ཕྱག་ན་རྡོ་རྗེ་དང༌། སྣའི་ནི་ནམ་མཁའི་སྙིང་པོ་དང༌། ལྕེ་ཡི་ནི་འཇིག་རྟེན་དབང་ཕྱུག་དང༌། ལུས་ཀྱི་ནི་སྒྲིབ་པ་རྣམ་སེལ་དང༌། ཡིད་ཀྱི་སྐྱེ་མཆེད་ཀྱི་ཆོས་ཉིད་ནི་དོན་དམ་ཀུན་ཁྱབ་ཀྱི་ཀུན་ཏུ་བཟང་པོའོ། །སོགས་ཀྱི་སྒྲས་སྐྱེ་མཆེད་ཡུལ་དྲུག་ཀྱང་འཕངས་པས། གཟུགས་
ཀྱི་སྐྱེ་མཆེད་ཀྱི་ཆོས་ཉིད་ནི། ཀུན་ཁྱབ་ཀྱི་གཟུགས་རྡོ་རྗེ་མ་དང༌། སྒྲ་ཡི་ནི་སྒྲ་རྡོ་རྗེ་མ་དང༌། དྲི་ཡི་ནི་དྲི་རྡོ་རྗེ་མ་དང༌། རོ་ཡི་ནི་རོ་རྡོ་རྗེ་མ་དང༌། རེག་བྱའི་ནི་རེག་བྱ་རྡོ་རྗེ་མ་དང༌། ཆོས་ཁམས་ཀྱི་ནི་ཆོས་ཁམས་རྡོ་རྗེ་མའོ། །དེ་ལྟར་ན་ཤེས་རབ་གཉིས་དང་དབུགས་དབྱུང་གཉིས་ཟུང་དུ་འཇུག་པའི་ཡེ་ཤེས་དེ་ནི་རིགས་ལྔ་ཡུམ་བཞི་བྱང་ཆུབ་སེམས་དཔའ་སེམས་མ་ལ་སོགས་པའི་དཀྱིལ་འཁོར་གྱི་འཁོར་ལོ་རབ་འབྱམས་སུ་གདོད་མ་ནས་འགྲུབ་ཅིང༌། ཆོས་ཉིད་གཅིག་ལས་ཡེ་ཤེས་ལྔར་སྣང་བ་ཉིད། དེ་ཐམས་ཅད་ཀྱི་རྩ་བར་བཞག་དགོས་ཏེ། ཡེ་ཤེས་ལྔ་པོ་དེ་ཉིད་དོན་དམ་པའི་རིགས་ལྔ་ཡང་ཡིན་ལ། དེ་ཉིད་ཕུང་པོ་ལྔའི་དྭངས་མ་དང༌། ཁམས་ལྔའི་དྭངས་མ་དང༌། དབང་པོ་དང༌། ཡུལ་ལ་སོགས་པའི་ཡང་དྭངས་མ་ཆེན་པོའམ། སྲོག་ཆེན་པོ་ཡིན་པར་བསྟན་ནོ། །བླ་མ་གོང་མ་རྣམས་ནི། འདི་དག་ཕལ་ཆེར་ལམ་གྱི་ཡེ་ཤེས་ལ་སྦྱོར་བར་མཛད་ཅིང༌། ཀུན་རྫོབ་འདི་དག་གི་རང་བཞིན་མེད་ཚུལ་ཙམ་དོན་དམ་ལ་འཆད་མོད་ཀྱང༌། དེ་ཙམ་གྱིས་ནི་གཞུང་དོན་དཔྱིས་ཕྱིན་པ་མི་ཡོང་བར་སྣང་ངོ༌། །འདིའི་ལྷ་མོ་བཞི་པོ་ནི་གོང་དུ་དྲངས་པའི་ལས་ཀྱི་ཕྱག་རྒྱ་སྤྱན་མ་ཉིད། ཅེས་སོགས་དང་དོན་གཅིག་པར་འཆད་པའང་ཡོད་མོད་ཀྱི། གཞུང་དེ་ནི་དྭངས་མ་བཞི་པོ་དེ་དག་དང་དེ་དག་ལ་གནད་དུ་བསྣུན་པའི་ཐབས་དང་འབྲེལ་བར་སྟོན་པའི་སྐབས་ཡིན་པས་འགལ་བ་ཆེན་པོ་ཡང་མི་སྣང་མོད་ཀྱི། གཞུང་གི་གནས་སྐབས་སོ་སོའི་སྐབས་ཐོབ་ཀྱི་དོན་མ་འདྲེས་པར་བཤད་ན་ལེགས་སོ། །གཞིའི་གནས་ལུགས་དེ་ལྟར་ཡིན་པའི་རྒྱུ་མཚན་
གྱིས། ལམ་གྱི་དུས་སུ་ཡང༌། བསྐྱེད་རིམ་དང་རྫོགས་རིམ་གྱི་ལྷའི་དཀྱིལ་འཁོར་དང༌། རྣམ་པ་ཐམས་ཅད་པ་དང༌། མཉམ་པ་ཉིད་ཀྱི་ཚུལ་དུ་སྒོམས་པས། འབྲས་བུའི་དུས་སུ་གནས་ལུགས་དེ་ཉིད་མངོན་དུ་འགྱུར་བ་ནི། སྐབས་འདིའི་གཞི་འབྲས་ཀྱི་འབྲེལ་བ་ཡིན་ལ། ཆོས་ཅན་ཀུན་རྫོབ་ཀྱི་ཕུང་པོ་དང༌། ཁམས་དང་དབང་ཡུལ་དང༌། ཀུན་གཞི་རྣམ་ཤེས་ལ་སོགས་པ་རྣམས་ནི། སྦྱང་བྱ་གློ་བུར་གྱི་དྲི་མ་ཡིན་པར་ཤེས་པར་བྱའོ། །དེས་ན་གཞུང་འདིའི་ཤུགས་བསྟན་ལ། འབྲས་བུ་དག་པ་གཉིས་ལྡན་གྱི་ལྷ་དང་ཡེ་ཤེས་རྣམས་ཀྱང་བསྟན་པ་ཡིན་ནོ། །དོན་ཚན་འདི་ནི་དཔྱིད་ཀྱི་ཐིག་ལེའི་ལེའུ་གཉིས་པ་དང༌། བཅུ་པའི་མཇུག་གི་ཆ་ལས་ཀྱང་རྒྱས་པར་རྟོགས་པར་བྱའོ། །གཉིས་པ་གཞི་ལམ་འབྲས་བུའི་ཆོས་སོ་སོར་དབྱེ་བ་ལ། གཞིའི་ཆོས་གཙོ་བོར་བསྟན་པ་དང༌། ལམ་གྱི་ཆོས་གཙོ་བོར་བསྟན་པ་དང༌། འབྲས་བུའི་ཆོས་གཙོ་བོར་བསྟན་པའོ། །དང་པོ་ལ་རླུང་གི་རྣམ་པར་བཞག་པ་དང༌། རྩ་འཁོར་ལོ་བཞིའི་རྣམ་པར་བཞག་པའོ། །དང་པོ་ལ་རླུང་རྒྱུ་བའི་ངོ་བོ་ཇི་ལྟར་ཡིན་པ་དང༌། དེ་ཉིད་ཇི་ལྟར་རྒྱུ་བའི་རྣམ་གཞག་རྒྱས་པར་བཤད་པའོ། །དང་པོ་ནི། སྦྱོར་བཞི་ནི། མྱུར་བ་དང༌། རླངས་པ་དང༌། རྣམ་པར་འཆིང་བ་དང༌། སྣ་ཚོགས་གནས་པ་སྟེ་ཞེས་སོ། །མྱུར་བ་ནི། མེའི་རླུང་དང༌། རླངས་པ་ནི། རླུང་གི་རླུང་དང༌། རྣམ་པར་འཆིང་བའམ། རྣམ་པར་འདུད་པ་ནི། སའི་རླུང་དང༌། སྣ་ཚོགས་གནས་པའམ་དལ་བ་ཅན་ནི་ཆུའི་རླུང་ཏེ། སྣ་བུག་གཡས་དང་
གཡོན་དང༌། གཉིས་ཀ་ནས་དལ་བ་དང༌། གཉིས་ཀ་ནས་དྲག་པོར་རྒྱུ་བ་སྟེ། རེ་རེ་ཡང་དགུ་བརྒྱ་པ་ཕྲག་རེ་རེ། རྒྱུ་བ་ཡིན་ལ། དེ་ཡང་པདྨའི་མགོན་པོ་མགྲིན་པ་དང༌། རྡོ་རྗེ་མགོན་པོ་སྙིང་ག་དང༌། ལས་ཀྱི་མགོན་པོ་སྤྱི་བོ་དང༌། རིན་ཆེན་མགོན་པོ་ལྟེ་བའི་འཁོར་ལོ་རྣམས་ཀྱི་དབང་བྱས་པ་ལས་བྱུང་བ་ཡིན་ནོ། །དེ་ལྟར་བུར་ལན་དྲུག་ཉིན་ཞག་ཅིག་ལ། ཉི་ཁྲི་ཆིག་སྟོང་དྲུག་བརྒྱ་རྒྱུའོ། ཡང་མྱུར་བ་ཕྱིར་འགྲོ་བ་དང༌། རླངས་པ་ནང་དུ་མ་འོང་བའི་བར་དང༌། དལ་བ་འཇུག་པ་དང༌། འཆིང་བ་གནས་པ་ལ་འཆད་པའང་ཡོད་དེ། རིམ་པ་བཞིན་དུ། མེ་དང༌། རླུང་དང༌། ཆུ་དང༌། སའི་བྱེད་ལས་རླུང་འགྲོ་བ་སོགས་ཡིན་པ་ལ་བསམ་པར་སྣང་ངོ༌། །དེ་དག་ནི་མགོན་པོ་བཞིའི་རླུང་ཏེ། སྦྱོར་བའམ་རྣལ་འབྱོར་ཞེས་བྱ་བའི་དོན་ནི། རླུང་དེ་རྣམས་སྔགས་དང་དབྱེར་མེད་དུ་སྦྱོར་བའི་ཚུལ་གྱིས་གདོད་ནས་གནས་པའི་དོན་ནོ། །དེ་ཉིད་ཇི་ལྟར་རྒྱུ་བའི་ཚུལ་ལ་གསུམ་གྱི། དང་པོ་སྣ་སྒོ་ནས་རྒྱུ་བའི་ཚུལ་ནི། སྟེང་དང་ལོགས་དང་ཐད་ཀ་དང་འོག་ཏུའོ་ཞེས་ཏེ། སྦྱོར་བ་བཞི་པོ་རེ་རེ་ལའང༌། ནང་ཚན་འབྱུང་ཕྲན་བཞི་བཞིས་ཕྱེ་བ་ཡིན་ཏེ། དང་པོ་གོས་དཀར་མོའི་རྒྱུ་བ་མེ་རླུང་སྣ་སྒོའི་སྟེང་དང༌། གཉིས་པ་སྒྲོལ་མའི་རྒྱུ་བ་རླུང་གི་རླུང་ལོགས་དེ་མཁུར་ཚོས་ཀྱི་ཕྱོགས་དང༌། གསུམ་པ་སྤྱན་མའི་རྒྱུ་བ་ས་རླུང་ཐད་ཀ་སྟེ། སྣའི་བར་ཀ་ཕྱོགས་དང༌། བཞི་པ་མཱ་མ་ཀཱིའི་རྒྱུ་བ་ཆུ་རླུང་འོག་ཏེ། མཆུའི་ཕྱོགས་སུ་རྒྱུ་བ་ཡིན་ཏེ་དེ་དག་རེ་རེའང་གྲངས་ཉིས་བརྒྱ་ཉི་ཤུ་རྩ་ལྔའོ། །གོས་དཀར་མོའི་
རྒྱུ་བ་མགྲིན་པ་དང༌། སྒྲོལ་མའི་རྒྱུ་བ་སྤྱི་བོ་དང༌། མཱ་མ་ཀཱིའི་རྒྱུ་བ་སྙིང་ཁ་དང༌། སྤྱན་མའི་རྒྱུ་བ་ལྟེ་བའི་འཁོར་ལོ་རྣམས་ཀྱི་དབང་བྱས་པ་ལས་བྱུང་བ་ཡིན་ནོ། །གཉིས་པ་འཁོར་ལོ་བཞི་ནས་རྒྱུ་བའི་ཚུལ་ནི། ཆུ་ཚོད་ནི་སུམ་ཅུ་རྩ་གཉིས་སོ། །དབྱུག་གུ་ནི་དྲུག་ཅུ་རྩ་བཞིའོ། །འཕོ་བ་ནི་བཅུ་དྲུག་གོ །ཐུན་ནི་བཞིའོ་ཞེས་ཏེ། དེ་དག་ཐམས་ཅད་མཉམ་པར་ཉི་ཁྲི་ཆིག་སྟོང་དྲུག་བརྒྱ་རེ་རྒྱུ་བ་ཡིན་པས། ལྟེ་བའི་རྩ་འདབ་རེ་ནས། སུམ་བརྒྱ་སུམ་ཅུ་སོ་ཕྱེད་དང་བརྒྱད་རེ་དང༌། སྤྱི་བོའི་རྩ་འདབ་རེ་ལ་དྲུག་བརྒྱ་བདུན་ཅུ་དོན་དྲུག་རེ་དང༌། མགྲིན་པའི་རྩ་འདབ་རེ་ལ་སྟོང་སུམ་བརྒྱ་ང་གཉིས་རེ་དང༌། སྙིང་གའི་རྩ་འདབ་རེ་ལ་ཉིས་སྟོང་བདུན་བརྒྱ་བཞི་རེ་རྒྱུ་བ་ཡིན་ཏེ། རྩ་འདབ་ཐམས་ཅད་ལ་ཉིས་ཁྲི་ཆིག་སྟོང་དྲུག་བརྒྱའི་རླུང་ཐམས་ཅད་མི་རྒྱུ་བ་མ་ཡིན་མོད་ཀྱང༌། ལས་བྱེད་པ་པོའི་རླུང་རྩ་འདབ་རྣམས་ལ་འཕོ་ཚུལ་ནི་དེ་ལྟར་ཡིན་ཏེ། དེ་བས་ན་སྤྱི་བོའི་རྩ་འདབ་རེ་ལ་ཆུ་ཚོད་རེ་སྟེ། དེ་འདྲ་སུམ་ཅུ་རྩ་གཉིས་སོ། །ལྟེ་བའི་རྩ་འདབ་རེ་ལ་དབྱུག་གུ་རེ་སྟེ། དེ་འདྲ་དྲུག་ཅུ་རྩ་བཞིའོ། །མགྲིན་པའི་རྩ་འདབ་རེ་ལ་འཕོ་བ་རེ་སྟེ་དེ་འདྲ་བཅུ་དྲུག་གོ །སྙིང་གའི་རྩ་འདབ་བཞི་ལ་ཐུན་བཞི་དང༌། །སླར་ཡང་བཞི་ལ་ཐུན་མཚམས་བཞི་སྟེ། རྩ་འདབ་རེ་ལ་ཐུན་ཚད་རེ་སྟེ་བརྒྱད་དོ། །གསུམ་པ་ཉི་ཤུ་རྩ་བཞིའི་གནས་ལ་ཀུན་སྤྱོད་ཀྱི་རླུང་བདུན་ཅུ་རྩ་གཉིས་རྒྱུ་བ་ནི། པུ་ལི་ར་མ་ལ་ཡར་དབང་དུ་བྱས་སོ། །ཛ་ལནྡྷ་རར་ལོངས་སྤྱོད་དོ། །ཨཽ་རྒྱན་དུ་འཇུག་གོ །ཛ་ལནྡྷ་རར་དབང་དུ་བྱེད་དོ། །ཨོ་རྒྱན་དུ་ལོངས་སྤྱོད་དོ། །
ཨརྦུ་ཏར་བརྟེན་ནོ་ཨོ་རྒྱན་དུ་དབང་དུ་བྱེད་དོ། །ཨར་བུ་ཏར་ལོངས་སྤྱོད་དོ། །གོ་ད་ཝ་རིར་བརྟེན་ནོ། །ཨར་བུ་ཏར་དབང་དུ་བྱེད་དོ། །གོ་ད་ཝ་རིར་ལོངས་སྤྱོད་དོ། །རསྨི་ཤྭ་རར་བརྟེན་ཏོ། །གོ་ད་ཝ་རིར་དབང་དུ་བྱེད་དོ། །རསྨི་ཤྭ་རར་ལོངས་སྤྱོད་དོ། །དེ་ཝི་ཀོ་ཊར་བརྟེན་ནོ། །རསྨི་ཤྭ་རར་དབང་བྱེད་དོ། །དེ་བཱི་ཀོ་ཊར་ལོངས་སྤྱོད་དོ། །མཱ་ལ་བར་བརྟེན་ནོ། །དེ་བཱི་ཀོ་ཊར་དབང་བྱེད་དོ། །མཱ་ལ་ཝར་ལོངས་སྤྱོད་དོ། །ཀཱ་མ་རུ་པར་བརྟེན་ཏོ། །མཱ་ལ་བར་དབང་བྱེད་དོ། །ཀཱ་མ་རཱུ་པར་ལོངས་སྤྱོད་དོ། ཨོ་ཏྲེར་བརྟེན་ནོ། །ཀཱ་མ་རཱུ་པར་དབང་བྱེད་དོ། །ཨོ་ཏྲེར་ལོངས་སྤྱོད་དོ། །ཏྲི་ཤ་ཀུ་ནེར་བརྟེན་ནོ། །ཨོ་ཏྲེར་དབང་བྱེད་དོ། །ཏྲི་ཤ་ཀུ་ནེར་ལོངས་སྤྱོད་དོ། །ཀོ་ས་ལར་བརྟེན་ནོ། །ཏྲི་ཤ་ཀུ་ནེར་དབང་བྱེད་དོ། །ཀོ་ས་ལར་ལོངས་སྤྱོད་དོ། །ཀ་ལིང་ཀར་བརྟེན་ནོ། །ཀོ་ས་ལར་དབང་བྱེད་དོ། །ཀ་ལིང་ཀར་ལོངས་སྤྱོད་དོ། །ལཾ་པ་ཀར་བརྟེན་ནོ། །ཀ་ལིང་ཀར་དབང་བྱེད་དོ། །ལམ་པ་ཀར་ལོངས་སྤྱོད་དོ། །ཀཉྩིར་བརྟེན་ནོ། །ལམ་པ་ཀར་དབང་བྱེད་དོ། །ཀཉྩིར་ལོངས་སྤྱོད་དོ། །ཧི་མ་ལ་ཡར་བརྟེན་ནོ། །ཀཉྩིར་དབང་བྱེད་དོ། །ཧི་མ་ལ་ཡར་ལོངས་སྤྱོད་དོ། །པྲེ་ཏ་པུ་རིར་བརྟེན་ནོ། །ཧི་མ་ལ་ཡར་དབང་བྱེད་དོ། །པྲེ་ཏ་པུ་རིར་ལོངས་སྤྱོད་དོ། །གྲི་ཧ་དེ་བ་ཏར་བརྟེན་ནོ། །པྲེ་ཏ་པུ་རིར་དབང་བྱེད་དོ། །གྲི་ཧ་དེ་ཝར་ལོངས་སྤྱོད་དོ། །སཽ་རཥྟ་ར་བརྟེན་ནོ། །གྲིཧ་དེ་བ་དར་དབང་བྱེད་དོ། །སཽ་རཥྟར་ལོངས་སྤྱོད་དོ། །སུ་བརྞྞ་དྭི་པར་བརྟེན་ནོ། །སཽ་རཥྟར་དབང་དུ་བྱེད་དོ། །སུ་བརྞྞ་དཱི་པར་ལོངས་སྤྱོད་དོ། །ན་ག་
རར་བརྟེན་ནོ། །སུ་བརྞྞ་དྭི་པར་དབང་བྱེད་དོ། །ན་ག་རར་ལོངས་སྤྱོད་དོ། །སིནྡྷུར་བརྟེན་ནོ། །ན་ག་རར་དབང་བྱེད་དོ། །སིནྡྷུར་ལོངས་སྤྱོད་དོ། །མ་རུར་བརྟེན་ནོ། །སིན་དྷུར་དབང་བྱེད་དོ། །མ་རུར་ལོངས་སྤྱོད་དོ། །ཀུ་ལུ་ཏར་བརྟེན་ནོ། །མ་རུར་དབང་བྱེད་དོ། །ཀུ་ལུ་ཏར་ལོངས་སྤྱོད་དོ། །ཡན་ལག་ཐམས་ཅད་དུ་བརྟེན་ནོ། །གནས་འདི་དག་རྣམས་སུ་དེ་བཞིན་གཤེགས་པ་རྣམས་ཀྱི་བདེ་བ་ཆེན་པོའི་ཡེ་ཤེས་ཇི་ལྟར་རིམ་པ་ཇི་ལྟ་བ་བཞིན་དུ། ཆོས་དང་ལོངས་སྤྱོད་རྫོགས་པ་དང༌། སྤྲུལ་པའི་སྐུའི་རང་བཞིན་སྐྱེ་ཞིང་གནས་ལ་འཇིག་པའོ། །ཞེས་ཏེ་དེ་ལ་བརྟེན་པ་ཞེས་བྱ་བ་ནི། མགོ་བརྩམ་པ་སྟེ་མལ་གྱི་འགྱུར་ཏེ། གཞན་པ་ཅིག་ལས། འཇུག་པ་ཞེས་བསྒྱུར་བ། གོ་བདེ་སྟེ། རླུང་གི་ཀུན་ཏུ་སྤྱོད་པ་གསར་དུ་འཇུག་བཞིན་པའོ། །ལོངས་སྤྱོད་པ་ནི་ཞུགས་ནས་དེར་རླུང་དང་ཐིག་ལེ་རྒྱུ་བརྡོ་བའོ། །དབང་དུ་བྱེད་པ་ནི་རྒྱུས་ཟིན་མ་ཐག་པ་ལ་དེ་ལྟ་མི་རྒྱུ་བ་དེ་འགགས་པའོ། །སེམས་འགྲེལ་སྐོར་གསུམ་ལས་ནི། བཞི་པ་བདག་པོར་གྱུར་པ་ཞེས་པའང་བཤད་དེ། རེ་ཞིག་གཞུང་འདིར་དེའི་རྣམ་གཞག་མ་བྱུང་ངོ༌། །དེས་ན་དགུན་ཟླ་འབྲིང་པོའི་ཚེས་གཅིག་གི་ནམ་ལངས་བའི་དུས་ནི། སྤྱི་བོ་པུ་ལླིར་མ་ལ་ཡར་སྔ་མའི་འཕྲོས་ཀྱི་རླུང་དང་ཁམས་ཐིམ་ཟིན་མ་ཐག་པ་ནི། དབང་དུ་བྱེད་པ་དང༌། སྤྱི་གཙུག་ཛ་ལནྡྷ་རར་རླུང་ཐིག་རྒྱུ་བརྡོ་བ་ནི་ལོངས་སྤྱོད་པ་དང༌། རྣ་བ་གཡས་པ་ཨོ་ཊི་ཡ་ནར་རླུང་ཐིག་གསར་དུ་རྒྱུ་བཞིན་པ་ནི་བརྟེན་པའོ། །དེ་ལྟར་ན་གནས་སོ་སོ་གསུམ་པོ་དེར་དབང་བྱེད་ལོངས་སྤྱོད་བརྟེན་པ་གསུམ་འཛོམ་པ་ལ་
རླུང་དགུ་བརྒྱ་པ་ཕྲག་གཅིག་གོ །དེ་ནས་སྔ་དྲོའི་ཐུན་གཉིས་པ་ལ། སྔར་གྱི་རྒྱུན་ལས་ཛ་ལན་དྷ་རའི་གནས་སུ་ལོངས་སྤྱོད་པ་དེ་ནི་ཐིམ་པར་གྱུར་པ་དང༌། ཨོ་ཊི་ཡ་ནི་གནས་སུ་མགོ་ཚུགས་ཤིང་བརྟེན་པ་དེ་ནི་ལོངས་སྤྱོད་པར་འགྱུར་བ་དང༌། ཨར་བུ་ཏའི་གནས་སུ་གསར་དུ་མགོ་རྩོམ་པར་གྱུར་ཏེ། དེ་ལྟར་དབང་སྦྱོང་བརྟེན་གསུམ་འཛོམ་པ་ལ། རླུང་དགུ་བརྒྱ་ཕྲག་གཅིག་གོ །དེ་ལྟར་ན་དབང་དུ་བྱེད་པ་ནི་རླུང་རྒྱུས་ཟིན་ནས་ད་ལྟ་མི་རྒྱུ་ཡང་རྒྱུས་པའི་ནུས་པ་རབ་ཏུ་གནས་པ་ཡིན་ལ། ལོངས་སྤྱོད་པ་དང་བརྟེན་པ་ནི། རྒྱུ་བ་ཡིན་ཏེ། ཡུལ་ཆེན་རིའི་རྩ་ལ་བརྟེན་པ་དགུ་བརྒྱ་དང་ལོངས་སྤྱོད་པ་དགུ་བརྒྱ་སྟེ། སྟོང་བརྒྱད་བརྒྱ་རེ་རྒྱུ་བ་ནི། རྒྱུད་གཞན་ལས་སྟོང་བརྒྱད་བརྒྱའི་འཕོ་ཆེན་གསུངས་པ་དང་གནད་གཅིག་གོ །དེ་བཞིན་དུ་འདིའི་དགུ་བརྒྱ་པ་དང༌། མགོན་པོའི་རླུང་དགུ་བརྒྱ་པ་རེ་ཡང་དོན་གཅིག་སྟེ། གནས་ཐ་དད་པར་ལོངས་སྤྱོད་ཚུལ་གྱི་དབྱེ་བས་རྣམ་གཞག་ཐ་དད་དུ་བྱུང་བ་ཡིན་ནོ། །རིམ་པ་དེ་ཉིད་ཀྱིས་གཞན་རྣམས་ལའང་རིགས་འགྲེས་ཏེ། ཀུ་ལུ་ཏར་བརྟེན་ནོ། །ཞེས་པའི་བར་གོ་སླའོ། །མ་རུ་ར་དབང་བྱེད་དོ། །ཀུ་ལུ་ཏར་ལོངས་སྤྱོད་དོ། །ཡན་ལག་ཐམས་ཅད་ལ་བརྟེན་ནོ། །ཞེས་པ་ལ་སྤྱིར་སྐབས་འདིས་དང་པོ་དེ་ཉིད་ཀྱི་མཚན་མོའི་ཐུན་ཐ་མ་ལ་ཆ་བཞིར་བྱས་པའི་གསུམ་པའི་གནས་སྐབས་སུ། སྔར་མ་རུ་ར་རྒྱུ་བརྡོ་བའི་གནས་སྐབས་རེ་སོང་ནས་སྐབས་དེར་རྒྱུ་བ་འགགས། སྔར་ཀུ་ལུ་ཏར་མགོ་ཟུག་པའི་གནས་སྐབས་དེ་ཡོལ་ནས། །
རྒྱུ་བརྡོ་བར་སོང༌། སྔར་གསར་དུ་འཇུག་པའི་གནས་སྐབས་ཀྱི་རྒྱུན་དེ། ཚིགས་སུམ་བརྒྱ་དྲུག་ཅུའི་འཁོར་ལོ་ལ་སོགས་པ། ལུས་ཀྱི་ཆ་ཐམས་ཅད་དུ་རགས་པའི་ཁམས་སྐྱེད་བྱེད་ཀྱི་མགོ་རྩོམ་པར་འགྱུར། ཞེས་པའི་དོན་ཡིན་ལ་ཀུ་ལུ་ཏར་དབང་བྱེད་དོ། །ཡན་ལག་ཐམས་ཅད་ལ་རྒྱུའི་ཚུལ་གྱི་ལོངས་སྤྱོད་དོ། །འབྲས་བུའི་ཚུལ་གྱི་བརྟེན་ནོ་ཞེས་ཤུགས་བསྟན་ལ་ཡོད་པ་ཁ་བསྐང་སྟེ། ཐུན་དེའི་ཆ་བཞི་པའི་གནས་སྐབས་སུ། སྔར་གྱི་རྒྱུན་དེའི་དབང་དུ་བྱས་པ་ལ། ཀུ་ལུ་ཏར་རྒྱུ་བ་འགགས། ཡན་ལག་ཐམས་ཅད་ལ་རྒྱུ་ཁ་མས་རགས་པ་སྐྱེད་པའི་ནུས་པ་ཤིན་ཏུ་རྒྱས། འབྲས་བུ་བདེ་སྡུག་མྱོང་བའི་མགོ་རྩམས་པའོ། །དེའི་རྩ་རླུང་ཐིག་ལེའི་ཀུན་སྤྱོད་ཚར་གཅིག་སོང་ལ། ཀུན་སྤྱོད་ཕྱི་མ་མགོ་རྩོམ་པའི་དབང་དུ་བྱས་ན། ཐུན་ཐ་མའི་ཆ་གསུམ་པའི་གནས་སྐབས་སུ། མ་རུ་ར་དབང་བྱེད་དོ། །ཀུ་ལུ་ཏར་ལོངས་སྤྱོད་དོ། །པུ་ལི་ར་མ་ལ་ཡར་བརྟེན་ནོ། །ཞེས་སྦྱོར་དགོས་པ་ལས། པུ་ལི་ར་མགོ་རྩོམ་པ་འདི་ཀུན་སྤྱོད་གསར་པ་ཡིན་གྱི་སྔ་མའི་འཕྲོས་མ་ཡིན་ནོ། །དེ་བཞིན་ཏུ་ཆ་བཞི་པའི་གནས་སྐབས་སུ། ཀུ་ལུ་ཏར་དབང་དུ་བྱེད་དོ། །པུ་ལི་ར་མ་ལ་ཡར་ལོངས་སྤྱོད་དོ། །ཛ་ལནྡྷ་རར་བརྟེན་ནོ་ཞེས་སྦྱོར་དགོས་ཏེ། ཀུ་ལུ་ཏར་འགགས་པ་ཀུན་སྤྱོད་སྔ་མའི་འཕྲོས་ཡིན་ཀྱང༌། ཕྱི་མ་གཉིས་པོ་ཀུན་སྤྱོད་རྟིང་མའི་འཕོ་བ་གཉིས་པ་ཡིན་ནོ། དེ་ནས་ཡང་ཞག་པོ་ཕྱི་མ་ལ། ཉིན་མོའི་ཐུན་དང་པོ་ལ་ཆ་བཞིར་བྱས་པའི་དང་པོ་ལ། པུ་ལི་ར་མ་ལ་ཡར་དབང་དུ་བྱས་སོ་ཞེས་སོགས།
སྔར་བསྟན་པ་བཞིན་དུ་རྒྱུ་བ་ཡིན་ནོ། །འདི་ནི་རྒྱུན་ཆགས་སུ་གནས་པའི་བཞི་ལུས་ཀྱི་འཕོ་བའི་དབང་དུ་བྱས་པ་ཡིན་ལ། གློ་བུར་དུ་འཇུག་པ་ནི། དཔེར་མཚོན་ན། ཉིན་མོའི་གུང་ཐུན་གྱི་ཆ་དང་པོ་ལྟ་བུ་ལ། ཁ་ཟས་དང་སྨན་དང༌། དུག་དང༌། ནད་དང་མཚོན་དང༌། འཁྲིག་སྦྱོར་ལ་སོགས་པའི་གནས་སྐབས་གང་དུ་བབ་པ། དེ་དང་དེའི་མགོ་རྩོམ་པ་ཡིན་ཏེ། རྒྱུན་ཆགས་ཀྱི་དབང་དུ་བྱས་ན། སྐབས་དེར་ཀཱ་མ་རུ་པར་ནུབ། ཨོ་ཏྲར་རྒྱས། ཏྲི་ཤ་ཀུ་ནེར་མགོ་རྩོམ་པའི་སྐབས་ཡིན་ཀྱང༌། ལས་དེ་རྣམས་ཉིད་ཀྱི་པུ་ལཱིར་མགོ་རྩོམ་པ་ཡིན་ལ། དེ་ནས་ཆ་གཉིས་པའི་སྐབས་སུ་ཛ་ལནྡྷ་རར་མགོ་རྩོམ། པུ་ལླིར་རྒྱས། ཆ་གསུམ་ལ། ཨོ་ཊི་ཡ་ནར་མགོ་རྩོམ། ཛ་ལནྡྷ་རར་རྒྱས། པུ་ལླིར་འགགས་པ་ལ་སོགས་པ་ནས། དེའི་ནང་པར་ཉིན་མོའི་གུང་ཐུན་ལ། ཡན་ལག་ཐམས་ཅད་ལ་འཇུག་གོ་ཞེས་པ་སྤྱིར་བཏང་ཡིན་ལ། དམིགས་བསལ་ནུས་པ་འཕྲལ་དུ་སྐྱེད་པ་དང༌། ཞག་མང་པོའི་རྗེས་སུ་ནུས་པ་བསྐྱེད་པ་སོགས་ལ། གོ་རིམ་ནི་སྔར་བསྟན་པ་དེ་ཁོ་ན་ཡིན་ཀྱང༌། འཕོ་བའི་ཡུལ་དབུགས་དགུ་བརྒྱའི་ཚད་ཁོ་ནར་མི་སྦྱོར་ཏེ། མང་ཉུང་སྣ་ཚོགས་པ་འབྱུང་བར་ཤེས་པར་བྱའོ། །འདི་རྣམས་གཙོ་བོར་སྙིང་གའི་རྩ་འདབ་བརྒྱད་ལས་ཉེར་བཞིར་གྱེས་པའི་འཕོ་བ་ཡིན་ཞིང༌། དེ་དག་གི་ལས་བྱེད་པའི་རྩའི་སྒོ་རྣམས་སྤྱི་བོ་ནས་པུས་མོའི་བར་གནས་ཉེར་བཞི་ན་གནས་པ་ཡིན་ནོ། །ཉེར་བཞིའི་འཕོ་བའི་རླུང་དང་
ཐིག་ལེ་གཉིས་ཡོད་པ་ལས། ཐིག་ལེ་ནི་སོ་དང་སེན་མོ་རྣམས་བསྐྱེད་པའི་རྒྱུ་བྱང་ཆུབ་ཀྱི་སེམས་རྣམས་ཡིན་ལ། རླུང་ནི་ལུས་ཀུན་ལ་ནི་གནས་པའི་རླུང༌། ཞེས་པའི་དགོངས་པར་བྱས་ནས། སྔ་མ་མང་པོ་ཞིག་ཁྱབ་བྱེད་ཀྱི་རླུང་བཞེད་ནའང༌། དེར་མ་ངེས་ཏེ་ཆ་ཤས་ནི། རླུང་བཅུ་ཀར་གྱི་ཆ་ཤས་ཡོད་ལ། རང་བཞིན་ནི་རླུང་བཅུ་ལྟ་བུ་ཉེ་ཚེ་བར་རིགས་སུ་ཆད་པ་མ་ཡིན་ཏེ། ཀུན་ལ་ཁྱབ་པ་འབྱུང་བ་ལྔ་འདྲེས་པའི་རླུང་ཡིན་ནོ། །དེ་ལྟར་ན་གནས་རྩ་ཉི་ཤུ་རྩ་བཞི་འདི་དག་རྣམས་སུ། དེ་བཞིན་གཤེགས་པ་ཕུང་ཁམས་སྐྱེ་མཆེད་ཀྱི་དྭངས་མ། རླུང་དང་ཐིག་ལེ་རྣམས་ཀྱི་ཀུན་ཏུ་སྤྱོད་པ་ཏེ་མགོ་རྩོམ་པའི་གནས་སྐབས་ཉེར་བཞི། རྒྱས་པའི་གནས་སྐབས་ཉེར་བཞི། འགགས་མ་ཐག་པའི་གནས་སྐབས་ཉེར་བཞིའི་རིམ་པས། བདེ་བ་ཆེན་པོའི་ཡེ་ཤེས་ཏེ། ཐིག་ལེ་བདེ་བ་བསྐྱེད་པ་དེ་ནི། ཇི་ལྟར་དབང་སྤྱོད་པ་རྟེན་གསུམ་གྱི་རིམ་པ་ཇི་ལྟ་བ་བཞིན་དུ་ཆོས་ཀྱི་སྐུ་དང༌། ལོངས་སྤྱོད་རྫོགས་པའི་སྐུ་དང༌། སྤྲུལ་པའི་སྐུའི་རང་བཞིན་ཞེས་བྱ་བའམ། སྐྱེ་གནས་འཇིག་གསུམ་དང་རིམ་གྱིས་སྦྱོར་རོ། །དེ་ཡང་དབང་དུ་བྱས་པ་ནི། བྱ་བ་བྱས་ཟིན་པས་སེམས་མི་རྟོག་པ་དང་འབྲེལ་བའི་ཕྱིར། ཆོས་སྐུ་དང་འདྲ་བས་དེའི་མིང་གི་བཏགས་ལ། ལོངས་སྤྱོད་པ་ནི་ཚོར་བ་གསལ་ཞིང་ཤས་ཆེ་བ་ཉམས་སུ་མྱོང་བའི་སྐབས་ཡིན་པས། བདེ་བ་དང་འབྲེལ་བའི་ཕྱིར་ལོངས་སྐུ་དང་འདྲ་བ་དང༌། བརྟེན་པ་ནི་གསར་དུ་ཐོབ་པའི་ཕྱིར་གསལ་བ་ཤས་ཆེ་བ་དང༌། གསར་དུ་བསྐྱེད་ཅིང་གསར་དུ་སྤྲུལ་པ་ཡིན་པའི་ཕྱིར།
སྤྲུལ་སྐུ་དང་འདྲ་བས་དེ་དང་དེའི་མིང་གིས་བཏགས་སོ། །དེ་ཡང་ཕྱོགས་རེ་འདྲ་བ་ཁོ་ནས་དེ་དང་དེར་བརྡ་སྦྱོར་བ་ཙམ་ལ་ནི་དགོས་པ་ཆུང་མོད་ཀྱི། ཆོས་ཉིད་ཀྱི་སྐུ་གསུམ་པོའི་གློ་བུར་གྱི་དྲི་མའི་སྣང་ཆ་སོ་སོར་ཤར་བ་ཡིན་པས་མ་འབྲེལ་བ་ཡང་མ་ཡིན་ཏེ། གསེར་དངུལ་ཟངས་གསུམ་གྱི་གཡའ་ལ་དེ་དང་དེའི་མིང་འདོགས་པ་བཞིན་དང༌། དེ་གསུམ་རྣལ་འབྱོར་པས་ལམ་དུ་བྱས་ན། སྐུ་གསུམ་རྟོགས་པའི་ཐབས་སུའང་འགྱུར་བའི་ཕྱིར་རོ། །ཡང་མགོ་རྩོམ་པ་ནི་རྒྱུ་བ་གསར་སྐྱེས་ཆ་ཡིན་ཞིང༌། རྒྱས་པ་ནི་དེའི་རྒྱུན་ལ་གནས་པའི་ཆ་ནས་ཡིན་ལ། འགགས་པ་ནི་རྒྱས་པའི་གནས་སྐབས་འཇིག་པའི་ཆོས་བསྟན་པ་ཡིན་ནོ། །རླུང་གི་བགྲོད་པ་འདི་གསུམ་གྱི་ལུས་ཀྱི་ཟུངས་སམ། ནད་དམ། དབང་རྟེན་ཁོག་པ་ཉིད་ཀྱི་གཞི་དང་ཁམས་རྣམས་གསར་དུ་སྐྱེ་བ་དང༌། འཕེལ་ཞིང་གནས་པ་དང༌། སྔར་ཡོད་ཀྱི་སྟོབས་ཉམས་པར་བྱེད་ཅིང༌། དེ་བཞིན་དུ་གཟུགས་སོགས་ཡུལ་གྱི་སྣང་བ་འཆར་བ་དང༌། རྣམ་རྟོག་སྔ་མའི་རྒྱུན་འགག་པ་སོགས་ཀྱང༌། བརྟེན་སྤྱོད་དབང་གསུམ་གྱི་ནུས་པ་ཡིན་ལ། ཅི་སྟེ་དེ་དག་ལམ་དུ་བྱས་ན་ནི། མངོན་ཤེས་ལ་སོགས་པའི་ཡོན་ཏན་སྐྱེད་པ་དང༌། ཡང་དག་པའི་ཏིང་ངེ་འཛིན་ལ་གནས་པ་དང༌། ཉོན་མོངས་པ་འགག་པའི་བྱ་བ་ཡང་བྱེད་དེ། དབང་ནི་དབུ་མའི་བྱེད་པ་དང༌། ལོངས་སྤྱོད་ནི་རོ་མ་དང༌། བརྟེན་པ་ནི་རྐྱང་མའི་བྱེད་པ་ཅན་ཡང་ཡིན་ནོ། །དོན་འདི་དག་ལས་བརྩམ་ཏེ་ད་དུང་ཞིབ་མོར་བཤད་དགོས་པའང་ཡོད་དོ། གཉིས་པ་རྩ་འཁོར་ལོ་བཞི་དང་འབྲེལ་བའི་ཆོས་རྣམ་
པར་བཤད་པ་ལ། འཕགས་པའི་བདེན་པ་བཞི་ནི་སྡུག་བསྔལ་དང༌། ཀུན་འབྱུང་དང་འགོག་པ་དང༌། ལམ་མོ། །ཞེས་ཏེ་ལྟེ་བ་དང་སྡུག་བསྔལ། སྙིང་ག་དང་ཀུན་འབྱུང་མགྲིན་པ་དང༌། འགོག་པ། སྤྱི་བོ་དང་ལམ་སྦྱོར་བ་ལས། བླ་མ་སྔ་མ་མང་པོ་ཞིག་ནི། གཏུམ་མོ་འབར་བའི་ལས་དུ་མ་དང༌། གདུང་བ་རྩོམ་པས་སྡུག་བསྔལ། ཆོས་ཀུན་གྱི་རྩ་བ་སེམས་འབྱུང་བས་ཀུན་འབྱུང༌། རོ་དྲུག་འགོག་པས་འགོག་པ། ཐིག་ལེ་འབྱུང་བའི་ལམ་ཡིན་པའི་ལམ་ཞེས་སོགས་དང༌། ཐིག་ལེ་གཅིག་ལས་མེད་པས་སྡུག་བསྔལ། བདེ་བ་འབྱུང་བའི་ཀུན་འབྱུང༌། ཐིག་ལེ་དང་པོར་འགོད་པ་ཞེས་སོགས་འཆད་པ་ལ་ནི་སྒྲ་བཤད་ཙམ་མ་གཏོགས་གནད་དོན་གང་ཡང་མི་སྣང་ངོ༌། །དེས་ན་རང་ལུགས་ནི། གཞིའི་དུས་སུ་སྣོད་ཀྱི་འཇིག་རྟེན་ལུས་དང་ལོངས་སྤྱོད་ལ་སོགས་པ་སྡུག་བསྔལ་བདེན་པའི་སྣང་བ་འདི་ཐམས་ཅད། སྤྲུལ་འཁོར་གྱི་རྩ་རླུང་ཐིག་ལེའི་བྱེད་པ་ཅན་ཡིན་པ་དང༌། དུག་ལྔ་སོགས་ཉོན་མོངས་དང་ལས་རྣམས་ནི། ཆོས་འཁོར་གྱི་རྩ་རླུང་ཐིག་ལེའི་མཐུ་ལས་འབྱུང་བ་དང༌། འཇིག་རྟེན་དང་འཇིག་རྟེན་ལས་འདས་པའི་ཆོས་གང་ཡིན་ན་ཡང་རུང་སྟེ། ཉོན་མོངས་པ་མངོན་འགྱུར་རམ། ས་བོན་འགག་པ་ལོངས་སྤྱོད་འཁོར་ལོའི་རྩ་རླུང་ཐིག་ལེ་ཅི་རིགས་པ་དག་པའི་མཐུ་ལས་སྣང་བ་དང༌། ཐར་པའི་རྒྱུ་ཆོས་དགེ་བ་རྣམས་འཆར་བ་ནི། བདེ་ཆེན་འཁོར་ལོའི་རྩ་རླུང་ཐིག་ལེའི་མཐུ་བརྟས་པ་ལས་འབྱུང་བ་ཡིན་པའི་ཕྱིར། འཁོར་ལོ་བཞི་བདེན་བཞིར་འཇོག་པའམ།
ཡང་རྩ་འཁོར་ལོ་བཞི་རྣམ་པར་དག་པ་ལས། བདེན་བཞིའི་དོན་མངོན་སུམ་དུ་རྟོགས་པར་འགྱུར་བའི་ཕྱིར་ཡང་དེར་བཞག་པ་ཡིན་ནོ། །དབྱེ་བ་བཞི་ནི། ཆུང་ངུ་དང༌། འབྲིང་དང༌། ཆེན་པོ་དང༌། ཆེན་པོའི་ཆེན་པོའོ། །ཞེས་ཏེ་དེ་ཡང་ལྟེ་བ་ན་ཐིག་ལེ་དང་ནཱ་ད་ཆ་གཅིག་པ་ཆུང་ངུ་དང༌། སྙིང་གར་ཆ་གཉིས་པ་འབྲིང་དང༌། མགྲིན་པར་ཆ་གསུམ་པ་ཆེན་པོ་དང༌། སྤྱི་བོར་ཆ་བཞི་པ་ཆེན་པོའི་ཆེན་པོ་སྟེ། དེ་རྣམས་ལམ་དུ་མ་བྱས་པ་གཞི་འཁོར་བའི་དུས་ན། འདུ་ཤེས་ཆུང་འབྲིང་ཆེ་རབ་བཞི་སྐྱེའོ། །དེ་ཡང་སྐྱེས་བུ་གང་ལས་ལྷ་སྦྱིན་ནོ་ཞེས་གཅིག་ཏུ་འཛིན་པ་ལྟ་བུ་འདུ་ཤེས་ཆུང་ངུ་དང༌། ཁ་དོག་ནི་མཛེས་ལ་དབྱིབས་ནི་ངན་ནོ། སྙམས་པ་ལྟ་བུའམ་ཐེ་ཙོམ་ཟ་བ་ལ་སོགས་པ་གཉྀས་སུ་འཛིན་པ་ནི་འབྲིང་དང༌། ད་ལྟའི་མི་འདི་ནི་སྔོན་ནི་སྡུག་བསྔལ་ལ་ད་བཟོད་བདེ་བར་འགྱུར་རོ། །སྙམས་པ་ལྟ་བུར་རང་བཞིན་འགལ་བ་གསུམ་གྱི་འདུ་ཤེས་འཇུག་པ་ནི་ཆེན་པོ་དང༌། བདག་ནི་གཟུགས་བཟང་བ། སྐད་སྙན་པ། དཔའ་བ། བློ་གྲོས་དང་ལྡན་པ་ཞེས་སོགས་ཡུལ་གཅིག་ལ་ཁྱད་པར་དུ་མར་སྒྲོ་འདོགས་པ་ནི། འདུ་ཤེས་ཆེན་པོའི་ཆེན་པོའམ་རབ་བོ། །ལམ་དུ་བྱས་པའི་དུས་སུ་ནི་སྣང་བ་སྣ་ཚོགས་པ་རང་བཞིན་མཉམ་ཉིད་དུ་རྟོགས་པ་དང༌། འགལ་འདུས་སྐྱོན་མེད་དུ་འཆར་བ་དང༌། དུས་གསུམ་ཅིག་ཅར་རྟོགས་པ་དང༌། དངོས་པོ་མི་འདྲ་བ་དུ་མ་ཅིག་ཅར་ཤེས་པ་ལ་སོགས་པའི་ཡོན་ཏན་སྐྱེ་བའོ། །སྐད་ཅིག་མ་བཞི་ནི་རྣམ་པ་སྣ་ཚོགས་དང༌། རྣམ་པར་སྨིན་པ་དང༌། རྣམ་པར་ཉེད་པ་
དང༌། མཚན་ཉིད་བྲལ་བའོ། དགའ་བ་བཞི་ནི། དགའ་བ་དང༌། མཆོག་ཏུ་དགའ་བ་དང༌། ཁྱད་པར་གྱི་དགའ་བ་དང༌། ལྷན་ཅིག་སྐྱེས་པའི་དགའ་བའོ། །ཞེས་པ་བཞི་ཚན་གཉིས་ལ། འདི་ལྟར་གོ་དགོས་ཏེ། སྤྱིར་དང་རང་བཞིན་གྱི་གནས་པའི་དགའ་བ་བཞི་དང༌། སྐད་ཅིག་མའི་དགའ་བ་བཞི་དང༌། ལམ་གྱི་དགའ་བ་བཞིའོ། །དང་པོ་ནི་གོང་མདོར་བསྟན་གྱི་སྐབས་སུ་བསྟན་པ་ལྟར་གྱི། རྡོ་རྗེ་བཞིའམ་དེ་ཉིད་བཞི་པོ་དེ་ཐམས་ཅད་རང་བཞིན་བདེ་བ་ཆེན་པོར་གདོད་ནས་གནས་པ་དེ་ཡིན་ཏེ། སྐུ་གསུང་ཐུགས་དང་ལྷན་སྐྱེས་བཞི་ལ། དགའ་བ་སོགས་བཞི་པོ་རིམ་ཅན་དུ་སྦྱར་རོ། །འདི་དག་ཀྱང་དཔྲལ་མགྲིན་སྙིང་ག་ལྟེ་བ་བཞི་དང་སྦྱོར་ཏེ། བཞིའི་དུས་སུ་གནས་ལུགས་དེ་ཉིད་བཞི་ཡིན་པའི་ནུས་པས། འཁོར་བ་ལུས་ལ་རྩ་འཁོར་ལོ་བཞི་པོ་གྲུབ། ལམ་དུས་སུ་འཁོར་ལོ་བཞི་ལ་གནད་དུ་བསྣུན་པས། ལམ་གྱི་དགའ་བ་བཞི་སྐྱེས། དེའི་འཁོར་ལོ་བཞིའི་དྲི་མ་དག་པས་འབྲས་བུ་སྐུ་བཞི་མངོན་དུ་འགྱུར་རོ། །གཉིས་པ་ནི། ལམ་དུ་མ་བྱས་པ་འཁོར་བའི་སེམས་ཅན་རྣམས་ཀྱང༌། ཆགས་རྟོག་གཉིས་སྦྱོར་དང་འབྲེལ་བ་ན་སྐད་ཅིག་བཞི་དང༌། དགའ་བཞི་འཆར་བ་ཡིན་ཏེ། འདི་ལ་ཡས་བརྟན་དང་མས་བརྟན་ཞེས་བརྟན་པའི་མཚན་ཉིད་དེ་མེད་པས། ཡས་བབས་ཙམ་པོ་ཁོ་ན་ཡིན་ནོ། །དབང་དང་ལམ་གྱི་དུས་སུ་ཐབས་མཁས་ཀྱི་ལམ་དུ་བྱས་པ་ལ་ནི། ཡས་བབས་དང་མས་བརྟན་གྱི་ཆ་ཤས་གཉིས་ཀར་ཡོད་པའི། ཡས་བརྟན་ལ་ནི།
དགའ་སོགས་བཞི་སྤྱི་མགྲིན་སྙིང་ལྟེའི་རིམ་པས་འཆར་ལ། མས་བརྟན་ལ་ནི་ལྟེ་སྙིང་མགྲིན་སྤྱིའི་རིམ་པས་འབྱུང་ཡང༌། སྐད་ཅིག་མ་རེ་རེར་ཤར་ཞིང་ནུབ་པར་བྱེད་ཀྱི། བདེ་བ་དེ་ལ་རྟག་ཏུ་གནས་པ་ནི་མ་ཡིན་ནོ། །གསུམ་པ་ལ་ཡང༌། ཡས་བབས་དང་མས་བརྟན་གྱི་དགའ་བ་གཉིས་དང༌། དེ་དག་འཁོར་ལོ་བཞི་ལ་སྦྱོར་ཚུལ་བཤད་མ་ཐག་པ་བཞིན་ཡིན་མོད་ཀྱི། སྤྱིར་བཏང་གི་དབང་དུ་བྱས་ན་འདི་ནི་བྱ་རྩོལ་གྱི་རིམ་པ་གཅིག་ལ་རྫོགས་པར་སྐྱེ་བ་མ་ཡིན་པ་དང༌། དགའ་བའི་ས་སོ་སོ་གང་དང་གང་རྒྱུད་ལ་སྐྱེས་ཤིང་གོམས་པ་བྱེད་པ་དེ་ནི། མི་ཉམས་ཤིང་དེའི་རྒྱུན་ལ་རྟག་ཏུ་གནས་པ་ཡིན་ནོ། །དམིགས་བསལ་ལ་ནི། མདོ་ལམ་གྱི་སྦྱོར་ལམ་བཟོད་པ་མན་ཆད་སྔོན་དུ་བྱས་པ་ཞིག་སྔགས་ཀྱི་ལམ་འདིར་ཞུགས་ན། ཡས་བབས་ཀྱི་དགའ་བཞིའི་ས་སྦྱོར་བ་གཅིག་ལ་བརྟེན་ནས་མངོན་དུ་བྱེད་པར་ངེས་ཤིང༌། བཟོད་པ་ཆེན་པོ་ལ་གནས་པ་ཡན་ཆད་ལ། དགའ་བའི་ས་བརྒྱད་ཐུན་གཅིག་ལ་མངོན་དུ་བྱེད་པའང་ཡོད་ལ། གཞན་ཡང་དང་པོ་ཉིད་ནས་སྔགས་ལམ་པ་ཡིན་ནམ། མདོ་ལམ་ནས་སྔགས་ལ་ཞུགས་པ་ཡིན་ཡང་རུང་ཏེ་དགའ་བའི་ས་ཐོབ་མ་ཐགལེ་ལོའམ་གཡེང་རྐྱེན་གྱི་དབང་གིས་བརྟན་པར་བྱེད་པའི་ཐབས་མ་བྱས་པ་རྣམས་ནི་རྟོགས་པ་ཉམས་པར་འགྱུར་བ་ཡང་སྲིད་དོ། །དེ་ལྟར་ན་འཁོར་ལོ་བཞི་དང༌། སྐད་ཅིག་མ་དང་དགའ་བའི་སྦྱོར་ཚུལ་རགས་པ་ཙམ་གྲུབ་མོད་ཀྱི། གཞུང་འདིས་ཡས་བབས་དང་མས་བརྟན་གྱི་
དགའ་བ་གཉིས་ཀར་བསྟན་ནམ། ཡ་གྱལ་རེ་བསྟན་པ་ཡིན་ཞེ་ན། བླ་མ་གོང་མ་རྣམས་ནི། མས་བརྟན་ཁོ་ན་བསྟན་པར་བཞེད་ཀྱང༌། གཉིས་ཀར་བསྟན་པར་བྱས་ན་ལེགས་པ་ཡིན་ནོ། །དེ་ལ་བདེ་བའི་ཉམས་མྱོང་རྣམ་འགྱུར་མི་འདྲ་བ་ཕྲ་མོ་སྣ་ཚོགས་ཤར་བ་ནི། རྣམ་པ་སྣ་ཚོགས་པའི་སྐད་ཅིག་མ་དང༌། འབད་རྩོལ་ཆུང་ཡང་བདེ་བའི་ཉམས་མྱོང་རིགས་གཅིག་པ། སྔར་ལས་འགྱུར་ཁྱད་མང་པོས་ཆེ་བ་ཤར་བ་ནི། རྣམ་པར་སྨིན་པའི་སྐད་ཅིག་མ་དང༌། རྣམ་པ་དེ་ཉིད་དང་འདྲ་བའི་ཡེ་ཤེས་ཞིག་སླར་ཡང་སྐྱར་གྱིན་འབྱུང་བའི། སྔ་མ་ལས་ཆེས་བོགས་ཆེ་བ་ནི་རྣམ་པར་ཉེད་པ་དང༌། དཔེའམ་མཚོན་བྱེད་བྲལ་བའི་བདེ་བ་ཆེན་པོ་རང་གི་རིག་ཅིང༌། རྣམ་རྟོག་ཉུང་བས་ཆགས་པའི་མཚན་ཉིད་སྤངས། བདེ་བ་རྒྱས་པས་ཆགས་བྲལ་གྱི་མཚན་ཉིད་སྤངས་པ་ནི། མཚན་ཉིད་དང་བྲལ་བའི་སྐད་ཅིག་མའོ། །ཞུ་བདེའམ་རང་བཞིན་གྱི་བདེ་བ་གང་ཡིན་ཡང་རུང་ཏེ། བདེ་བའི་ཏིང་ངེ་འཛིན་ཆུང་ངུ་ལ་གནས་པ་ནི། དགའ་བ་དང་པོའོ། །བདེ་བ་རྒྱས་པས་གཟུང་འཛིན་གྱི་སྣང་བ་ཅི་རིགས་པར་ནུབ་པ་ནི་མཆོག་དགའོ། །བདེ་བ་ཆེར་རྒྱས་པས་གཟུང་འཛིན་གྱི་སྣང་བ་ཤིན་ཏུ་ནུབ་ཅིང་བྲལ་བ་ནི། བྲལ་བའི་དགའ་བའམ་དགའ་བ་དང་པོ་གཉིས་ཀྱི་འགྱུར་ཁྱད་ལས་སྐབས་འདིར་ཆེས་ལྷག་པའི་འགྱུར་ཁྱད་འབྱུང་བས་ཁྱད་པར་གྱི་དགའ་བའོ། །བདེ་བ་མཐར་ཕྱིན་པ་རྫོགས་པ་ན། གཟུང་འཛིན་གྱི་སྣང་བ་ཐམས་ཅད་ནུབ་པས། གནས་ལུགས་གདོད་མའི་རང་བཞིན་གསལ་བའི་མཚོན་ནུས་པ་ནི། ལྷན་
ཅིག་སྐྱེས་པའི་དགའ་བའོ། །མཚན་ཉིད་འདི་ནི་ལམ་གྱི་སྐད་ཅིག་དང་དགའ་བ། ཡས་བབས་མས་བརྟན་གཉིས་དང༌། སྐད་ཅིག་རྣམ་པའི་དགའ་བཞི་དང་སྐད་ཅིག་བཞི་རྣམས། ཐམས་ཅད་ལ་འཇུག་པའི་ཐུན་མོང་གི་མཚན་ཉིད་ཡིན་ལ། ནང་སེལ་མི་འདྲ་བའི་ཁྱད་པར་གཞན་རྣམས་ནི་སོ་སོར་ཤེས་དགོས་སོ། །རང་བཞིན་གནས་པའི་དགའ་བཞི་ལ་ནི། མཚན་ཉིད་དེ་དག་མི་འཇུག་ཏེ། སྐུ་རྣམ་པ་ཐམས་ཅད་པ་ནི་བདེ་ཆེན་ཉིད་ཡིན་ཡང༌། སྐུ་ཡིན་པའི་རྒྱུ་མཚན་ནས་བདེ་བར་མི་འཇོག་པས། དགའ་བ་ཞེས་ཆུང་ངུའི་མིང་གིས་བསྟན་པར་བྱས་ཤིང༌། དེ་ཉིད་རྣམ་པ་ཐམས་ཅད་པའི་ཕྱིར་རྣམ་པ་སྣ་ཚོགས་པའོ། །གསུང་ནི་བདེ་བ་ཡང་ཡིན་ལ། བདེ་བ་བསྐུལ་བྱེད་རྡུལ་དང་རླུང་དང་རྣམ་པར་དག་པའི་ངོ་བོ་ཡང་ཡིན་པའི་ཕྱིར། མཆོག་ཏུ་དགའ་བ་ཞེས་སྔ་མ་ལས་བདེ་བའི་ངོས་ནས་ཆེ་བའི་ཚིག་ཏུ་བརྗོད་པ་དང༌། ཐུགས་དང་ཡེ་ཤེས་ནི་རང་རང་གི་ལྡོག་པ་ནས་ཀྱང་བདེ་ཆེན་ཉིད་ལ་འཇོག་མོད་ཀྱི། ཐུགས་ནི་བདེ་ཆེན་གཅིག་ཏུ་རོ་མཉམ་པའི་མཚན་ཉིད་ཡིན་པས། ཁྱད་པར་འཕགས་པའམ་སྤྲོས་པ་དང་བྲལ་བའི་ཕྱིར། བྲལ་དགའ་དང་ཁྱད་དགའ་ཞེས་བྱ་ལ། ཡེ་ཤེས་ནི་བདེ་བ་དེ་ཡང་རྣམ་པ་ཐམས་ཅད་པར་ཤར་བའི་ལྡོག་པ་ནས་འཇོག་པས། རོ་མཉམ་གྱི་མཚན་ཉིད་ལས་ཀྱང་ཆེ་བར་སྟོན་པ་དང་བདེ་བ་དང་རྣམ་པ་ཐམས་ཅད་པ། ངོ་བོ་གཅིག་པ་ཉིད་ཀྱི་ཕྱིར། གདོད་ནས་ལྷན་ཅིག་སྐྱེས་པས་ལྷན་ཅིག་སྐྱེས་དགའོ། །དེ་བཞིན་དུ་སྐུའི་དེ་སྔར་དང་འདྲ། གསུང་གི་དེ་ཉིད་
ལས། གདུལ་བྱ་གཞན་སྣང་ལ་སེམས་ཅན་སྨིན་པར་བྱེད་པའི་ཕྱིར་རྣམ་པར་སྨིན་པ་དང༌། ཐུགས་རྟག་ཏུ་མཉམ་པར་བཞག་པ་ནི། རྣམ་པ་མི་འདྲ་བར་འཕོ་བ་མེད་ཀྱི། སྔ་མ་ཉིད་ལ་རྟག་ཏུ་གནས་པའི་ཕྱིར། སྔོན་མ་ཉིད་སྐྱར་ཞིང་གབས་པ་འདྲ་བ་ཡིན་པས་རྣམ་པར་ཉེད་པ་དང༌། བདེ་བ་དང་རྣམ་པ་སོགས་གཅིག་ཏུ་འདྲེས་པ་ནི། མཚན་ཉིད་གཅིག་ཏུ་མ་ངེས་པས་མཚན་ཉིད་དང་བྲལ་བའོ། །དེས་ན་དགའ་བ་དང་སྐད་ཅིག་འདི་དག་གི་སྐབས་སུ། སྤྱི་བོའི་གནས་གཅིག་ཉིད་ལ་ཡས་བབས་ལ་དགའ་བ་དང༌། མས་བརྟན་ལ་ལྷན་སྐྱེས་འབྱུང་བ་ལྟ་བུ་ལ། ཁ་ཅིག་ཐིག་ལེ་གཅིག་གི་ནུས་པས་གཉིས་ཀར་འབྱུང་བར་བཞེད་ཅིང༌། གཞན་དགའ་འཁོར་ལོ་རེ་རེ་ལ་ཡང་ཁ་ཡར་བསྟན་དང༌། མར་བསྟན་གྱི་ཆ་རེ་ཡོད་པས། འཁོར་ལོ་འོག་མ་རྣམས་ཀྱི་རྩ་ཐིག་ཡས་བརྟན་གྱི་དགའ་བ་སྐྱེད་བྱེད་དང༌། གོང་མ་རྣམས་ཀྱི་མས་བརྟན་གྱི་དགའ་བ་སྐྱེད་བྱེད་དུ་འཆད་པའང་སྣང་བ་ལས། ཕྱི་མ་འདི་ཡེ་ཤེས་ཐིག་ལེ་སོགས་ཀྱི་དགོངས་པ་དང་མཐུན་པས་ལེགས་པར་མཐོང་ངོ༌། །འབྲས་བུ་བཞི་ནི་རྒྱུ་མཐུན་པ་དང༌། རྣམ་པར་སྨིན་པ་དང༌། སྐྱེས་བུ་བྱེད་པ་དང༌། དྲི་མ་དང་བྲལ་བའོ། །ཞེས་པ་ལ། མཐར་ཐུག་གི་འབྲས་བུ་དང་སྦྱར་ན། ལྷན་ཅིག་སྐྱེས་པའི་སྐུ་ནི་རྒྱུ་མཐུན་པ་སྟེ། རྒྱུའི་ངོ་བོ་ཉིད་དུ་གནས་པའི་ཕྱིར་དང༌། རྒྱུ་བདེ་བ་ལས་འབྲས་བུ་བདེ་བ་མངོན་དུ་གྱུར་པའི་ཕྱིར་རོ། །དེ་ནི་ལྟེ་བའི་རྩ་རླུང་ཐིག་ལེ་རྣམ་པར་དག་པ་ལས་མངོན་དུ་འགྱུར་བ་དང༌། ཆོས་ཀྱི་སྐུ་ནི་
རྣམ་པར་སྨིན་པ་སྟེ། རྒྱུ་སྤྲོས་པ་མེད་ཀྱང་འབྲས་བུ་ཤེས་བྱ་ཐམས་ཅད་མཁྱེན་པའི་ཕྱིར་རོ། །དེ་ནི་སྙིང་ག་དག་པ་ལས་མངོན་དུ་གྱུར་པ་དང༌། ལོངས་སྤྱོད་རྫོགས་སྐུ་ནི་སྐྱེས་བུ་བྱེད་འབྲས་ཏེ། སྐུ་དང་ཞིང་ཁམས་དང་འཁོར་དང་མཛད་པ་ཐམས་ཅད་ཇི་ལྟར་བཞེད་པ་ལྟར་སྤྱོད་པའི་ཕྱིར་དང༌། ཇི་ལྟར་བཞེད་པར་ཆོས་སྟོན་པའི་ཕྱིར་རོ། །དེ་ནི་མགྲིན་པ་དག་པ་ལས་འབྱུང་བ་དང༌། སྤྲུལ་པའི་སྐུ་ནི་བྲལ་བའི་འབྲས་བུ་ཞེས་བྱ་སྟེ། བདག་ཉིད་ཀྱི་ཕུན་སུམ་ཚོགས་པ་ལ། ཆགས་པ་དང་བྲལ་བའམ། སེམས་ཅན་གཞན་གྱི་སྒྲིབ་པ་བྲལ་བར་མཛད་པའམ། སྒྲིབ་པ་ཐམས་ཅད་དང་བྲལ་བའི་མཐུ་ལས། ཞོར་བྱུང་དུ་སྤྲུལ་པ་སྟོན་པའི་ཡེ་ཤེས་ཡིན་པའི་ཕྱིར་རོ། །དེ་ནི་སྤྱི་བོ་དག་པ་ལས་འབྱུང་ངོ༌། །ལམ་དུས་སུ་ནི་ལས་ཀྱི་རླུང་ཤུགས་ཆེ་ཆུང་དང་མཐུན་པའི་གཏུམ་མོ་ཡང་ཆེ་ཆུང་དུ་འབར་བའི་གནས་ཡིན་པའི་ཕྱིར། ལྟེ་བ་རྒྱུ་མཐུན་དང༌། རྐྱེན་ལས་ཀྱི་རླུང་གིས་བསྒྲུབ་པ་ལ་རག་མ་ལུས་པར། ཡེ་ཤེས་ཆེན་པོ་ཁོ་ན་འབྱུང་བའི་གནས་ཡིན་པས། སྙིང་ག་རྣམ་སྨིན་དང༌། ལྟེ་བའི་གཏུམ་མོ་འབར་བའི་བྱེད་པས་མགྲིན་པའི་གཏུམ་མོ་ཡང་གསར་དུ་འབར་བར་བྱེད་པའི་གནས་ཡིན་པས། མགྲིན་པ་སྐྱེས་བུ་བྱེད་པ་དང༌། གཏུམ་མོ་གནས་དེར་སླེབ་པ་ན། ཐིག་ལེ་རྣམས་ཀྱི་སྐྱོན་བྲལ་བར་བྱེད་པའི་གནས་ཡིན་པའི་ཕྱིར། སྤྱི་བོར་དྲི་མ་དང་བྲལ་བའི་འབྲས་བུའོ། །འདི་ནི་གཙོ་བོར་མས་བརྟན་གྱི་ས་བཞི་དང་སྦྱར་བའི་སྐབས་ཡིན་ལ། སྤྱིར་སྐད་ཅིག་རྣམ་པའི་དགའ་བཞི་འབྱུང་ཟློག་གཉིས་དང༌། ལམ་གྱི་དགའ་བཞི་འབྱུང་ཟློག་གཉིས་ཏེ།
བཞི་ཆར་ལ་ཡང་འབྲས་བུ་བཞི་བཞི་སྦྱོར་དགོས་ལ། སྤྱི་ལྡོག་ནས་གཞི་འཁོར་བའི་དུས་སུ་རྩ་འཁོར་ལོ་བཞི་རླུང་དང་ཐིག་ལེ་བཅས་པ་རྣམས་ལ། གང་ཅི་ཡང་རུང་བ་འབྲས་བུ་བཞིའི་སྣང་བ་འཆར་བའི་ནུས་པ་གདོད་ནས་གནས་པ་ཡིན་ནོ་ཞེས་ཀྱང་ཤེས་པར་བྱའོ། །མཆོག་བཞི་ནི། བདག་གི་མཆོག་དང་གཞན་གྱི་མཆོག་དང༌། དུས་ཀྱི་མཆོག་དང༌། ཡེ་ཤེས་ཀྱི་མཆོག་གོ །མཆོག་ཅེས་བྱ་བ་འགྱུར་གཞན་ལས་བཟང་པོ་དང་གསལ་བ་ཞེས་འདོན་ནོ། །བདག་གི་མཆོག་ནི། མཆོག་གི་བདག་ཅེས་སྒྱུར་ན་བདེ་སྟེ། བདེ་བ་གཅིག་པའི་ཡེ་ཤེས་ཏེ། ལྟེ་བར་གནད་དུ་བསྣུན་པ་ལས་དེ་རྟོགས་པའི་ཐབས་སུ་འགྱུར་རོ། །གཞན་གྱི་མཆོག་ནི་སྤྲོས་བྲལ་རྣམ་པ་ཐམས་ཅད་པ་སྟེ། སྙིང་གར་གནད་དུ་རེག་པ་ལས་དེ་རྟོགས་པའོ། །དུས་ཀྱི་མཆོག་ནི་སྐྱེ་འཇིག་གནས་གསུམ་དང་བྲལ་བའི་གནས་ལུགས་ཏེ། མགྲིན་པར་གནད་དུ་བསྣུན་པ་ལས་དེ་རྟོགས་པའོ། །ཡེ་ཤེས་ཀྱི་མཆོག་ནི་རྣམ་པར་མི་རྟོག་བཞིན་དུ་ཤེས་བྱ་ཤེས་པ་སྟེ། སྤྱི་བོར་གནད་དུ་རེག་པ་ལས་དེ་རྟོགས་པའི་ཐབས་སུ་འགྱུར་རོ། །འདི་དག་ལ་བདག་ནི་གཏུམ་མོ་དང༌། གཞན་ནི་དེ་ལས་གཞན་པའི་སྙིང་གའི་ཐིག་ལེ་དང༌། དུས་ནི་འབར་འཛག་བརྟན་པའི་དུས་དང༌། ཡེ་ཤེས་ནི་བདེ་བའི་རྒྱུ་སྤྱི་བོའི་ཐིག་ལེ་ཡིན་པར་སྔ་རབས་རྣམས་འཆད་དོ། །གནས་བཞི་ནི་བདག་གི་གནས་དང༌། གཞན་གྱི་གནས་དང༌། རྣལ་འབྱོར་གྱི་གནས་དང༌། དེ་ཁོ་ན་ཉིད་ཀྱི་གནས་སོ། །གནས་ཀྱི་སྐད་དོད། པི་ཋ་ཞེས་
པ་གདན་ལ་ཡང་འཇུག་པས། གདན་བཞི་ཞེས་བྱ་བར་རབ་ཏུ་གྲགས་སོ། །དེ་ལ་བདག་དང་གཞན་ནི་བཤད་མ་ཐག་པ་དེ་ཡིན་ལ། རྣལ་འབྱོར་ནི་སྦྱོར་བ་དེ་སྔགས་དང་ལས་ཚོགས་ལ་སོགས་པ་ཀུན་རྫོབ་རྟེན་འབྲེལ་རྒྱུ་རྐྱེན་མ་ལུས་པ་ཡང་དག་པ་མཁྱེན་པའི་ཡེ་ཤེས་སོ། །དེ་ཁོ་ན་ཉིད་ནི་དོན་དམ་རྟོག་བྱེད་ཀྱི་ལམ་དང༌། རྟོག་བྱ་དོན་དམ་ཉིད་མཁྱེན་པའི་ཡེ་ཤེས་ཏེ། འཁོར་ལོ་བཞི་ལ་གནད་དུ་བསྣུན་པས་དེ་དག་ཐོབ་པར་འགྱུར་བའི་ཕྱིར། འཁོར་ལོ་བཞི་ནི་གནས་ཡིན་ཏེ། ལྟེ་བ་བདག་གི་གནས་དང༌། སྙིང་ག་གཞན་གྱི་གནས་དང༌། མགྲིན་པ་རྣལ་འབྱོར་གྱིས་གནས་དང༌། སྤྱི་བོ་ནི་གསང་བའམ་དེ་ཁོ་ན་ཉིད་ཀྱི་གནས་སོ། །བཟང་པོ་དང་གནས་འདི་དག་གི་གློ་བུར་གྱི་དྲི་མ་ལ་ཡང་དེ་དང་དེའི་མིང་འདོགས་ཏེ། །བདག་ཏུ་རྟོག་པ་དང༌། གཞན་ཏུ་རྟོག་པ་དང༌། དུས་ཀྱི་རྣམ་རྟོག་དང༌། ཡུལ་ཤེས་པའི་རྣམ་རྟོག་རྣམས་ཀྱང་འཁོར་ལོ་བཞི་ལ་རིམ་བཞིན་སྦྱོར་བ་དང༌། བདག་ཏུ་སྣང་བ་དང༌། གཞན་ཏུ་སྣང་བ་དང༌། རྒྱུ་རྐྱེན་དུ་སྣང་བ་དང༌། གྲོལ་བར་ལྟ་བ་རྣམས་ཀྱང་རིམ་བཞིན་སྦྱར་རོ། །དེ་ཡན་ཆད་ཀྱིས་ནི་གཞིའི་ཆོས་རྣམས་ལུས་ལ་གནས་པར་བསྟན་ཟིན་ཏོ། །གཉིས་པ་ལམ་གྱི་ཆོས་གཙོ་བོར་བསྟན་པ་ལ། སྡེ་བ་བཞི་ནི། གནས་བསྟན་པ་དང༌། ཐམས་ཅད་ཡོད་པར་སྨྲ་བ་དང༌། ཀུན་གྱིས་བཀུར་བ་དང༌། དགེ་འདུན་ཕལ་ཆེན་སྡེའོ། །ཞེས་པ་ལ། གནས་བརྟན་པ་ལྟེ་བ་དང༌། ཡོད་སྨྲ་བ་སྙིང་ག་དང༌། མང་བཀུར་བ་མགྲིན་པ་དང༌། ཕལ་ཆེན་
པ་སྤྱི་བོ་དང་སྦྱོར་ཏེ་འདིའི་དོན་སྒྲ་དྲང་ཐད་ནི། ལྟེ་བའི་རླུང་སེམས་འདུས་པའི་ཕྱེད་པ་ལས། གནས་བརྟན་སྡེ་པ་གཉིས་ཀྱི་ཐུན་མོང་མ་ཡིན་པའི། ལྟ་སྤྱོད་ཀྱི་ཁྱད་པར་རྣམས། ངེས་པ་དང་བཅས་པར་བློ་ལ་ཤར་བ་ཡིན་ཏེ། རྣམ་བ་གསུམ་ཡང་དེས་རིགས་འགྲེ། སྒྲ་དོན་ཅན་གྱི་སྒོ་ནས་མིང་མཚུངས་པར་སྦྱར་བ་ཡང་དགྱེས་པའི་རྡོ་རྗེ་ལས་གསུངས་ཏེ། ལུས་འཆག་འཇིག་གི་གནས་ཀྱི་གཙོ་བོ་ཡིན་པས། ལྟེ་བ་གནས་བརྟན་པ་དང༌། ཆོས་སྣ་ཚོགས་ལ་བརྟེན་པའི་རྣམ་རྟོག་འབྱུང་བའི་གནས་ཡིན་པས། སྙིང་ག་ཐམས་ཅད་ཡོད་སྨྲ་དང༌། རོ་དྲུག་གིས་བཀུར་བའི་གནས་ཡིན་པས། མགྲིན་པ་མང་པོས་བཀུར་བ་དང༌། བདེ་བ་ཆེན་པོའི་རྒྱུ་བྱང་ཆུབ་ཀྱི་སེམས་ཕལ་ཆེར་གནས་པའི་གཞི་ཡིན་པས། སྤྱི་བོ་དགེ་འདུན་ཕལ་ཆེན་པའོ། །འདི་ཡང་འཁོར་ལོ་བཞི་དང་འབྲེལ་བའི་སྐོར་རོ། །ཏིང་ངེ་འཛིན་གསུམ་ནི། དང་པོ་སྦྱོར་བ་དང༌། དཀྱིལ་འཁོར་རྒྱལ་པོ་མཆོག་དང༌། ལས་རྒྱལ་པོ་མཆོག་གོ །ཞེས་པ་ལ། སྐྱེད་རིམ་གྱི་སྐབས་སུ་གཙོ་བོ་བརྟེན་དང༌། བཅས་པ་སྐྱེད་པ་ནི། དང་པོ་སྦྱོར་བ། དཀྱིལ་འཁོར་སྤྲོ་བ་ནི་དཀྱིལ་འཁོར་རྒྱལ་པོ་མཆོག །མཆོད་པ་དང༌། །ལས་ལ་སྦྱོར་བ་སོགས་ཆོ་གའི་ཡན་ལག་རྣམས་ལས་རྒྱལ་པོ་མཆོག་གོ །དེ་ཉིད་རྫོགས་པའི་རིམ་པ་དང་སྦྱོར་བ་ལ། རླུང་དབུ་མར་འཇུག་པ་དང་པོ་སྦྱོར་བ། གནས་པ་དཀྱིལ་འཁོར་རྒྱལ་མཆོག །ཐིམ་ཞིང་འབར་འཛག་བྱེད་པ་ལས་རྒྱལ་མཆོག་གོ་ཞེས་འཆད་པ་དང༌། སྔགས་
རིམ་དུ་རླུང་དགག་པ་ནི་དང་པོ་སྦྱོར་བ། ཡེ་ཤེས་རིམ་པར་བདེ་བ་བསྐྱེད་པ་ནི་དཀྱིལ་འཁོར་རྒྱལ་མཆོག གསང་རིམ་དུ་བདེ་བ་མཐར་ཐུག་རྫོགས་པར་བྱེད་པ་ནི། ལས་རྒྱལ་མཆོག་གོ་ཞེས་ཀྱང་ཁ་ཅིག་བཞེད་དེ། དེ་དག་ཀྱང་རུང་བར་ནི་མངོན་ནོ། །འོན་ཀྱང་རང་ལུགས་ནི་རོ་རྐྱང་གི་རྒྱུ་བ་བཀག །ལས་ཀྱི་རླུང་གིས་ཚངས་པའི་མེ་སྦར་བ་ནི། སྒོང་སྐྱེས་ཕྱོགས་ལ་མངོན་བྱང་གསུམ། མངལ་སྐྱེས་ཕྱོགས་ལ་མངོན་བྱང་ལྔ་ལས་རྒྱུ་རྡོ་རྗེ་འཛིན་པར་བཞེངས་པས། ཡང་མེ་རླུང་འབར་བ་ནི་མངལ་སྐྱེས་ལ་ཞུ་བ་གླུས་བསྐུལ་ལམ་སྒོང་སྐྱེས་ལ་འོད་ཟེར་སྤྲོ་བསྡུའོ། །ལྟེ་བའི་གཏུམ་མོ་འབར་བ་ནི་འབྲས་བུ་རྡོ་རྗེ་འཛིན་པར་བཞེངས་པ་ཡིན་ཏེ། དང་པོ་སྦྱོར་བའོ། །གཏུམ་མོ་འབར་བའི་འོད་ཀྱི་རྩ་གནས་ཅི་རིགས་པར་ཁྱབ་པ་ནི། ལྷ་སྐུ་སྤྲོ་བ་ཡིན་པས་དཀྱིལ་འཁོར་རྒྱལ་མཆོག་དང༌། ཞུ་བདེ་སྐྱེས་པ་ནི་ཕུང་ཁམས་སོགས་ལ་མཆོད་པ་ཡིན་པས། ལས་རྒྱལ་མཆོག་གོ །འདི་ནི་འབར་འཛག་ཁ་སྦྱོར་དུ་ནུས་པའི་རྫོགས་རིམ་གྱི་རྣལ་འབྱོར་ཐམས་ཅད་ལ་ཚང་བ་ཡིན་ནོ། །དང་པོ་སྦྱོར་བས་དབུ་མ་དང༌། དཀྱིལ་འཁོར་རྒྱལ་མཆོག་གི་རོ་མ་དང༌། ལས་རྒྱལ་མཆོག་གི་རྐྱང་མ་དག་པར་ཡང་བྱེད་དེ། དབུ་མར་འབར་བ་དང༌། ཁམས་ཁུ་རྡུལ་དག་བྱེད་ཡིན་པས་སོ། །ཡན་ལག་བཞི་ནི་བསྙེན་པ་དང༌། ཉེར་སྒྲུབ་དང༌། སྒྲུབ་པ་དང༌། སྒྲུབ་པ་ཆེན་པོའོ། །ཞེས་པ་ལ་བསྙེན་སྒྲུབ་ཡན་ལག་བཞི་པོ་འདི་རིམ་པ་བཞི་ལ་རིམ་ཅན་དུ་སྦྱར་ན། དུས་འཁོར་སོགས་ཀྱི་དགོངས་པ་དང་མཐུན་པར་འགྱུར་
ཚུལ་དུ་བཤད་ནུས་མོད་ཀྱི། རེ་ཞིག་འདིར་མི་བརྗོད་དོ། །ཡང་སྔ་མ་འགའ་ཞིག་གིས་དབྱེ་བ་བཞི་དང་སྦྱར་བ་ཞིག་གསུང་ཡང་ལེགས་པར་མ་མཐོང་ལ། དེས་ན་འདི་ལྟར་སྦྱར་དགོས་ཏེ། དེ་ལ་བསྐྱེད་རིམ་གྱི་བསྙེན་པའི་ཡན་ལག་ནི། ལྷ་དམ་ཚིག་པ་བསྐྱེད་པ་དང༌། ཉེར་སྒྲུབ་ནི་སྐྱེ་མཆེད་བྱིན་གྱིས་རླབས་པ་དང༌། སྒྲུབ་པ་ནི་སྐུ་གསུང་ཐུགས་སོགས་བྱིན་གྱིས་རླབས་པ་དང༌། སྒྲུབ་ཆེན་ནི་དགུག་གཞུག་དང་སེམས་དཔའ་གསུམ་བརྩེག་ཀྱང་ཡིན་ལ། དབང་བསྐུར་རྒྱས་བཏབ་ནི་ངེས་པར་བྱའོ། །དེ་དག་ནི་ལྷ་གཅིག་གི་སྐྱེད་ཆོག་ཡན་ལག་བཞི་ལྡན་དུ་བྱེད་པའི་ལུགས་ཡིན་ལ། ཡང་ན་བསྙེན་པ་ནི། དང་པོ་ལྷ་དང་ཉེ་བའི་ཕྱིར། སྒོམ་པ་དང་བཟླས་པ་ལ་བརྩོན་པར་བྱེད་པ་དེ་ཡིན་ལ། ཉེར་སྒྲུབ་བམ་ཉེར་བསྙེན་ནི། བསྙེན་སྒྲུབ་སྦྲག་མར་ཡང་གྲགས་པ་དེ་ཡིན་ཏེ། ཉེ་བར་བསྙེན་པའི་ལྷ་དེ་དགྱེས་པར་བྱ་བའི་དོན་དུ། མཆོད་བཟླས་ལ་བརྩོན་པར་བྱེད་པ་ཡིན་ལ། སྒྲུབ་པ་ནི་མཉེས་པར་བྱས་ཟིན་པའི་ལྷ་དེ་ལ་དངོས་གྲུབ་ཀྱི་དོན་དུ་གསོལ་བ་གདབ་པའི་ཕྱིར། དཀྱིལ་འཁོར་སྒྲུབ་པ་ཡིན་ཞིང༌། སྒྲུབ་པ་ཆེན་པོ་ནི་ལས་ཆེན་པོ་ལ་སྦྱོར་བ་སྟེ། དངོས་གྲུབ་རབ་འབྲིང་ཐ་མ་གསུམ་གྱི་ལས་ཀྱི་ཆོ་ག་ལ་ཞུགས་ནས་དེ་གྲུབ་པའི་བར་རོ། །འདི་ནི་ལྷ་སྒྲུབ་པའི་བྱ་བའི་རིམ་པ་ལས་ཕྱེ་བའི་བསྙེན་སྒྲུབ་ཡན་ལག་བཞི་ཡིན་ནོ། །སྐབས་འདིར་འདི་བཞི་ཚན་གྱི་ཆོས་ཡིན་པས། འཁོར་ལོ་བཞི་ལ་རིམ་ཅན་དུ་སྦྱོར་དགོས་པ་ལ། ཡས་རིམ་མས་རིམ་གཉིས་ཀར་ལ་སྦྱོར་དགོས་པ་ཡིན་ཏེ། དགའ་
བའི་ས་བཞི་ལ་སྔ་ཕྱི་རིམ་པ་གཉིས་ཡོད་པའི་ཕྱིར་རོ། །དེ་ཡང་རྒྱུ་རྐྱེན་དུ་མས་ལྟེ་བའི་གཏུམ་མོ་འབར་བ་ནི། ཞུ་བདེ་ཁྱད་པར་ཅན་ལ་བསྙེན་པ་ཙམ་ཡིན་ལ་དེའི་སྙིང་གའི་རྩ་མདུད་བཅོམ་པ་ནི། ལྷ་མཉེས་པར་བྱེད་པ་དང་འདྲ་བར། བདེ་བ་ཆེན་པོ་མྱུར་དུ་འགྲུབ་རུང་དུ་སོང་བ་ཡིན་ཏེ་ཉེ་བསྙེན་ནོ། མགྲིན་པ་དང་ལྟེ་བའི་གཉིས་འཛོམ་པའི་ཚེ། གཏུམ་མོ་སྟོབས་ཆེན་པོས། བདེ་བ་ཆེན་པོ་འཕྲལ་དུ་སྐྱེ་ངེས་པ་ན། ལྷས་དངོས་གྲུབ་གནང་བར་ཞལ་གྱིས་བཞེས་པ་ལྟ་བུ་ཡིན་ཏེ་སྒྲུབ་པའོ། །སྤྱི་བོ་ལ་རེག་པས་དངོས་སུ་བདེ་བའི་དངོས་གྲུབ་སྩོལ་བའི་ཕྱིར། ལྷས་དངོས་གྲུབ་སྩལ་བ་དང་མཚུངས་པར་སྒྲུབ་ཆེན། དེ་བཞིན་དུ་དགའ་བའི་ས་དང་པོ་ནི། བསྙེན་པ་དང༌། མཆོག་དགའི་ས་ནི་ཉེར་སྒྲུབ་དང༌། དགའ་བྲལ་གྱི་ས་ནི་སྒྲུབ་པ་དང༌། ལྷན་སྐྱེས་ས་སྒྲུབ་ཆེན་དུ་འཇོག་ཅིང༌། དེ་བཞིན་དུ་མས་བརྟན་གྱིས་ས་བཞི་ལའང་སྦྱར་བར་བྱའོ། །ཡང་ལས་ཀྱི་ཕྱག་རྒྱའམ། རྣལ་འབྱོར་ལམ་ལ་བརྟེན་པ་ཡིན་ཡང་རུང་ཏེ། སྐད་ཅིག་རྣམ་པའི་དགའ་བཞི་ལུགས་འབྱུང་ལུགས་བཟློག་ལ་ཡང༌། ཡན་ལག་བཞིའི་ཆ་ཤས་ཙམ་ཚང་བ་ཡིན་ནོ། །དེ་བཞིན་དུ་དཔྱིད་ཐིག་ཏུ་བཤད་པ་ལྟར་ལུས་གཞལ་མེད་ཁང་དང༌། སྤྱི་བོའི་འཁོར་ལོ་ཧཾ་ཡིག་ཡིག་འབྲུ་དང་བཅས་པ་ནི། མངོན་བྱང་ལྔ་ལས་གཙོ་བོ་སྐྱེད་པ་དང༌། མགྲིན་པའི་ཡིག་འབྲུ་བཅུ་གཉིས་སོགས་ནི་སྐྱེ་མཆེད་བྱིན་རླབས་དང༌། སྙིང་གའི་དཔྱིད་དཀར་དམར་རླུང་གསུམ་གྱི་བདག་ཉིད་ནི་རྡོ་རྗེ་གསུམ་སྒྲུབ་པ་དང༌།
ལྟེ་བའི་ཨཾ་ཡིག་ལ་བྱང་ཆུབ་ཀྱི་སེམས་ཐིམ་པ་ནི། ཡེ་ཤེས་དགུག་གཞུག་དང་དབང་སྐུར་རྒྱས་བཏབ་ཀྱང་ཡིན་པས། བསྙེན་སྒྲུབ་ཡན་ལག་བཞི་ཚང་བ་དང༌། ཡང་ལྟེ་བའི་ཡི་གེ་ཨཱ་ལི་ཀཱ་ལི་འདྲེས་པ་དང་གཏུམ་མོ་འབར་བ་ནི། མངོན་བྱང་ལྔ་ལས་གཙོ་བོར་བཞེངས་པ་དང༌། གཏུམ་མོ་འབར་བས་སྙིང་ག་སྲེག་པ་ན། གཟུང་འཛིན་གྱི་རླུང་རྣམས་འགག་པ་ནི། སྐྱེ་མཆེད་བྱིན་རླབས་དང༌། མགྲིན་པར་ཕྱིན་པས། ཡོན་ཏན་གསུམ་གྱི་བདག་ཉིད་རླུང་དང་གཏུམ་མོ་འདྲེས་པ་ནི། སྐུ་གསུང་ཐུགས་བྱིན་བརླབས་ཀྱང་ཡིན་ལ་སྔགས་ཀྱི་བདག་པོ་བསྐུལ་བ་དང༌། རང་སྔགས་གཏུམ་མོ་དང༌། རྡོ་རྗེ་ཅན་སྙིང་གའི་ཐིག་ལེ་འདྲེས་པ་དགུག་གཞུག་དང༌། ཡང་གཏུམ་མོ་སྤྱི་བོར་སླེབ་ཅིང་ཧཾ་གི་བྱང་སེམས་གཏུམ་མོའི་སྤྱི་བོར་སླེབ་པ་ནི། རིགས་བདག་རྒྱས་འདེབས་ཏེ། སྒྲུབ་པ་ཆེན་པོའོ། །འཁོར་ལོ་བཞིའི་དབྱིབས་དགའ་བའི་ས་བཞི་ཚན་གཉིས་ལའང་དེ་དག་རིམ་ཅན་དུ་འབྱོར་བ་འགྱུར་རོ། །སྐྱེད་རིམ་ཏིང་ངེ་འཛིན་གསུམ་དང་བསྙེན་སྒྲུབ་བཞི་ལ་སོགས་པའི་ཕན་ཡོན་ཐམས་ཅད་འདི་ལས་ཡུད་ཀྱིས་འབྱུང་བ་དང༌། དེ་ཤིན་ཏུ་གོམས་པ་མེད་ཀྱང་འདིས་དེའི་དང་པོ་ཐུབ་པ་ལ་སོགས་པའི་དོན་ནོ། །ལས་གསུམ་ནི། སྤྱན་དྲངས་པ་དང༌། གཤེགས་སུ་གསོལ་བ་དང་བཞུགས་པའོ། །ལྷ་མཆོད་པ་དང༌། རབ་ཏུ་གནས་པ་དང༌། དཀྱིལ་འཁོར་སྒོམ་པ་ལ་ཡང་རུང་ཏེ། སྤྱན་འདྲེན་པ་དང༌། བཞུགས་སུ་གསོལ་ནས། མཆོད་པའི་མཉེས་པར་བྱེད་པ་དང༌། སླར་ཡང་གཤེགས་སུ་གསོལ་བའི་རིམ་པས་སྒྲུབས་
ཤིང་མཆོད་ན། ལྷ་མཉེས་པ་དང༌། དངོས་གྲུབ་སྩོལ་བ་སོགས་མཛད་དོ། །རྫོགས་པའི་རིམ་པའི་སྐབས་འདིར་རླུང་གི་དེ་ཁོ་ན་ཉིད་ཤེས་པའི་རྣལ་འབྱོར་པས། རླུང་ནང་འཇུག་སྤྱན་འདྲེན་པ། གནས་པ་ནི་བཞུགས་པ། ཕྱིར་འགྲོ་བ་ནི་གཤེགས་སུ་གསོལ་བའོ། །ཐིག་ལེ་ལ་སྦྱར་ན། བྱང་ཆུབ་ཀྱིས་སེམས་སྤྱི་བོ་ནས་འོང་བ་སྤྱན་འདྲེན་པ། འཁོར་བཞིར་ཡས་བབས་དང༌། མས་བརྟན་དུ་བྱེད་པ་ནི་བཞུགས་པ། ལུས་ཐམས་ཅད་ལ་ཁྱབ་པར་བྱེད་པ་ནི་གཤེགས་སུ་གསོལ་བའོ། །འདི་དག་སྐུ་གསུམ་ལམ་དུ་བྱེད་པར་ཡང་འགྱུར་ལ། གནས་སྐབས་སུ་སྤྱན་འདྲེན་གཤེགས་སུ་གསོལ་བ་ལ་སོགས་པས། ལྷ་མཉེས་པ་དང༌། ཐུགས་རྒྱུད་བསྐུལ་བ་དང༌། དངོས་གྲུབ་སྩོལ་བ་སོགས་ཀྱི་ཕན་ཡོན་གང་ཡིན་ཐམས་ཅད་རླུང་དང་ཐིག་ལེའི་འགྲོ་འོང་འདི་དག་ལ་ལྷག་དང་བཅས་པར་ཡོད་དེ། དེ་ཁོ་ན་ཉིད་ཤེས་པའི་རྣལ་འབྱོར་པ་ལའོ། །སྤྱན་འདྲེན་པ་ནི་རྐྱང་མ་དང༌། གཤེགས་སུ་གསོལ་བ་ནི་རོ་མ་དང༌། བཞུགས་པ་ནི་དབུ་མའི་ཆོས་དང་འབྲེལ་བ་ཡིན་ནོ། །འདི་ཡང་དཔྱིད་ཀྱི་ཐིག་ལེའི་ལེའུ་གསུམ་པར། རྣམ་སྣང་ལ་སོགས་སངས་རྒྱས་རྣམས། །སྟེང་གི་སྒོར་ནི་གཡོ་ཞིང་གནས། ཞེས་པ་ལ་སོགས་པའི་སྐབས་སུ་རྒྱས་པར་ཤེས་པར་བྱའོ། །དེ་ཁོ་ན་ཉིད་བཞི་ནི། སྔགས་ཀྱི་དེ་ཁོ་ན་ཉིད་དེ། ལྷའི་དེ་ཁོ་ན་ཉིད་དང༌། དཀྱིལ་འཁོར་གྱི་དེ་ཁོ་ན་ཉིད་དང༌། །ཡེ་ཤེས་ཀྱི་དེ་ཁོ་ན་ཉིད་དོ། །རང་བཞིན་རྣམ་པར་དག་པ་ཡེ་ཤེས་ཀྱི་རླུང༌། སྒྲ་སྐད་ཐམས་ཅད་པ་བརྗོད་བྲལ་དེ་ནི། སྔགས་ཀྱི་དེ་
ཁོ་ན་ཉིད་དངོས་ཡིན་ལ། དེ་ཉིད་ལྟེ་བའི་གཏུམ་མོ་འབར་བས་རྟོགས་པར་འགྱུར་བའི་ཕྱིར། ལྟེ་བ་ནི་སྔགས་ཀྱི་དེ་ཉིད་དོ། །ཀུན་རྫོབ་ཏུ་ལུས་ནི་ལྷ་ཞེས་བྱ་ན། ལུས་ཀྱི་སྣང་བ་འབྱུང་བའི་གཞི་ཡིན་པ་དང༌། ལུས་ཐོག་མར་འགྲུབ་པ་དང༌། མཐར་འཆི་བའི་ཚེ་བསྡུད་པའི་གནས་དང༌། བར་དོར་ལྡང་བ་སོགས་སྙིང་ག་ནས་བྱེད་པ་དང༌། བསྐྱེད་རིམ་གྱི་སྐབས་དཀྱིལ་འཁོར་གྱི་འཁོར་ལོ་ཡང་སྙིང་ག་ནས་སྤྲོ་བའོ། །ལུས་འཆག་པའི་རྩ་བ་སྙིང་ག་དང༌། ལྟེ་བ་གཉིས་ཅི་རིགས་སུ་འཆད་པ་མི་འགལ་ཏེ། གའུ་ཁ་ཕྱེ་བའི་དཔེས་མཚོན་ནོ། །གཞན་ཡང་དོན་དམ་པར་ན་སྣོད་བཅུད་གཟུགས་སུ་སྣང་བ་ཆོས་ཉིད། རྣམ་པ་ཐམས་ཅད་པའི་དཀྱིལ་འཁོར་དུ་གདོད་མ་ནས་གནས་པ་ནི་ལྷའི་དེ་ཁོ་ན་ཉིད་ཡིན་ལ། དེ་ཉིད་སྙིང་གའི་དཔྱིད་ལ་གནད་དུ་བསྣུན་པ་ལས་རྟོགས་པར་འགྱུར་བས་ན། སྙིང་ག་ནི་ལྷའི་དེ་ཉིད་དང༌། གཞི་དུས་སུ་རྨི་ལམ་དང་བར་དོ་ལ་སོགས་པའི་གསལ་སྣང་སྣ་ཚོགས་པ་ཡང་མགྲིན་པ་ལས་འབྱུང་ཞིང༌། ཡང་དག་པའི་ཞིང་ཁམས་དང་འཁོར་དང་མཆོད་པ་སྣ་ཚོགས་པ་དེ་དག་ཀྱང༌། འཁོར་ལོ་དེ་དག་པའི་སྣང་བ་ལས་འབྱུང་བའི་ཕྱིར། མགྲིན་པ་ནི་དཀྱིལ་འཁོར་གྱི་དེ་ཉིད་དོ། །དེ་ལ་རྣམ་པ་ཐམས་ཅད་པའི་དཀྱིལ་འཁོར་ལས་ལྷ་སྐུ་དངོས་ནི་ལྷའི་དེ་ཉིད་དང༌། ཞིང་ཁམས་དང་འཁོར་དང་གཞལ་མེད་ཁང་མཆོད་པའི་ཁྱད་པར་ནི། དཀྱིལ་འཁོར་གྱི་དེ་ཉིད་ཅེས་སོ་སོར་བཞག་པ་ཡིན་ནོ། །སེམས་ཉིད་བདེ་བ་ཆེན་པོར་གདོད་ནས་གནས་པ་ནི། ཡེ་ཤེས་ཀྱི་དེ་ཉིད་དངོས་ཡིན་ཞིང༌། དེ་ཡང་ཞུ་
བདེ་ལས་ངེས་པར་རྟོག་པར་འགྱུར་བ་ཡིན་ལ། ཞུ་བདེ་འབྱུང་བའི་རྩ་བའི་གནས་སྤྱི་བོ་ཡིན་པའི་ཕྱིར། སྤྱི་བོ་ནི་ཡེ་ཤེས་ཀྱི་དེ་ཉིད་དུ་བཞག་གོ །ཡང་སྔགས་ཀྱི་དེ་ཉིད་གཏུམ་མོའི་མེ་ཡིན་ཏེ་ལྟེ་བ་ན་གནས་པ་དང༌། ལྷ་ནི་དཔྱིད་ཀྱི་རྒྱལ་པོ་དེ་སྙིང་ག་ན་གནས་པ་དང༌། དཀྱིལ་འཁོར་ནི་སྙིང་པོ་འཛིན་པའི་ཕྱིར་ཐིག་ལེའི་བདེ་བ་སྟེ་དེ་དང་པོར་ཞུ་བའི་བདེ་བ་མྱང་བའི་གནས་མགྲིན་པ་ཡིན་པ་དང༌། ཡེ་ཤེས་ནི་བདེ་བ་ཕྱིན་ཅི་མ་ལོག་པ་མྱོང་བ་ཡིན་ལ། དེ་ཡང་མས་བརྟན་གྱི་ཚེ་སྤྱི་བོར་ཐོབ་པའོ། །ཞེས་མར་པ་དོལ་པ་གསུངས་སོ། །གསུམ་པ་འབྲས་བུའི་ཆོས་གཙོ་བོར་བསྟན་པ་ལ། གནས་སྐབས་ཀྱི་འབྲས་བུ་དང་མཐར་ཐུག་གི་འབྲས་བུ་གཉིས་ལས། དང་པོའི་དབང་དུ་བྱས་ནས། ས་བཅུ་ནི་གནས་དང་ཉེ་བའི་གནས་དང༌། ཞིང་དང༌། ཉེ་བའི་ཞིང་དང༌། ཚན་དོ་ཧ་དང༌། ཉེ་བའི་ཚན་དོ་ཧ་དང༌། འདུ་བ་དང༌། ཉེ་བའི་འདུ་བ་དང༌། དུར་ཁྲོད་དང༌། ཉེ་བའི་དུར་ཁྲོད་དོ། །ཉི་ཤུ་རྩ་བཞི་ནི། དབྱེ་བས་ཐ་དད་དེ། པུལླ་རི་མ་ལ་ཡ་དང༌། ཛ་ལནྡྷ་ར་དང༌། ཨོ་ཊི་ཡ་ན་དང༌། ཨརྦུ་ཏ་ནི་གནས་སོ། །གོ་ད་པ་རི་དང༌། རསྨི་ཤྭ་ར་དང༌། དྭི་བཱི་ཀོ་ཊ་དང༌། མཱ་ལ་བ་ནི་ཉེ་བའི་གནས་སོ། །ཀཱ་མ་རུ་པ་དང༌། ཨོ་ཏྲེ་ནི་ཞིང་ངོ༌། །ཏྲི་ཤ་ཀུ་ནི་དང༌། །ཀོ་ས་ལ་ནི་ཉེ་བའི་ཞིང་ངོ༌། ཀ་ལིང་ཀ་དང༌། ལམྦ་ཀ་ནི་ཚན་དོ་ཧའོ། །ཀཉྩི་དང༌། ཧི་མ་ལ་ཡ་ན་ཉེ་བའི་ཚན་ད་ཧའོ། །པྲེ་ཏ་པུ་རི་དང༌། གྲི་བ་དེ་བ་ཏ་ནི། འདུ་བའོ། །
སཽ་རཥྟ་དང༌། སུ་བརྞ་དྭི་པ་ནི་ཉེ་བའི་འདུ་བའོ། །ན་ག་ར་དང༌། སིནྡྷུ་ནི་དུར་ཁྲོད་དོ། །མ་རུ་དང༌། ཀུ་ལུ་ཏ་ནི་ཉེ་བའི་དུར་ཁྲོད་དོ། །འདིར་རིམ་པ་ཇི་ལྟ་བར། མགོ་བོ་དང༌། སྤྱི་གཙུག་དང༌། རྣ་བ་གཡས་པ་དང༌། རྒྱབ་དང༌། རྣ་བ་གཡོན་པ་དང༌། སྨིན་མཚམས་དང༌། མིག་གཉིས་དང༌། དཔུང་པ་དག་དང༌། མཆན་ཁུང་དག་དང༌། ནུ་མ་གཉིས་དང༌། ལྟེ་བ་དང༌། སྣ་རྩེ་དང༌། ཁ་དང༌། ལྐོག་མ་དང༌། སྙིང་ག་དང༌། འདོམས་པར་དང༌། མཚན་མ་དང༌། བཤང་ལམ་དང༌། བརླའི་ཕྱོགས་དང༌། བྱིན་པ་གཉིས་དང༌། སོར་མོ་རྣམས་དང༌། རྐང་པའི་བོལ་དང༌། མཐེ་བོ་དག་དང༌། པུས་མོ་དག་ཏུ་བལྟའོ། །འདིར་དངོས་སུ་ས་བཅུ་ཁོ་ན་བསྟན་པ་ནི། འཕགས་པའི་ས་དངོས་ས་བཅུ་པོ་རྣམས་ཡིན་པ་དང༌། གསང་རིམ་གྱི་ས་དངོས་ཀྱང་ས་བཅུར་འདོད་དེ། སྡོམ་པ་ཉུང་ངུའི་རྒྱུད་ལས་ཀྱང༌། ཕ་རོལ་ཕྱིན་བཅུའི་ས་རྣམས་ནི། །ཞེས་བཅུ་ཁོ་ན་གསུངས་པའི་དབང་དུ་བྱས་པའོ། །འོན་ཀྱང་མཐུད་གཅོད། ཉེ་བའི་མཐུང་གཅོད་གཉིས་པོ་ཡང༌། ས་བཅུ་པོའི་རྒྱུ་དང་འབྲས་བུར་གནས་པའི་ཕྱིར། ཞོར་བྱུང་དུ་བཤད་ན་གོ་བ་ཆེའོ། །དེ་ཡང་ཡེ་ཤེས་ཀྱི་རིམ་པའི་སྐབས། དུར་ཁྲོད་བརྒྱད་ཀྱི་དག་པ་བུ་ག་བརྒྱད་ཀྱི་རྩ་རྣམས་དག་པས་རྒྱུ་བྱས་ནས། གསང་རིམ་གྱི་ཐོག་མའི་སྐབས་སུམ་སྐོར་མ་སོགས་སྙིང་གའི་ནང་སྐོར་གྱི་རྩ་བཞི་ཐིག་ལེས་གང༌། ནོར་བུའི་རྩ་མདུད་བཞི་གྲོལ་བའང༌། བྱང་སེམས་གཉིས་ཀྱིས་གང་བས། །མཐུང་གཅོད་དམ་
སྤྱི་མིང་བྱེ་བྲག་ལ་བཏགས་ཏེ་མོས་པས་སྤྱོད་པའི་སའོ། །དེ་བཞིན་དུ་རྡོ་རྗེའི་སྐེད་པའི་རྩ་མདུད་བཞི་གྲོལ། མི་ཕྱེད་མ་ལ་ཆོ་ག་བཞི་ཏེ། དེ་རྣམས་བྱང་ཆུབ་ཀྱི་སེམས་ཀྱི་གང་བས། གནས་དང༌། རབ་ཏུ་དགའ་བའི་སའོ། གསང་གནས་ཀྱི་བཞི་དང་ཐུང་ངུ་མ་སོགས་བཞི་སྦྱར་ཏེ། ཉེ་གནས་དང་དྲི་མ་མེད་པའི་སའོ། །ལྟེ་བའི་གཉིས་དང་སྐྱོན་མ་སོགས་གཉིས་སྦྱར་ཏེ། ཞིང་དང་འོད་བྱེད་པའི་སའོ། །ཡང་ལྟེ་བའི་གཉིས་དང་མ་མོ་སོགས་གཉིས་སྦྱར་ཏེ། ཉེ་བའི་ཞིང་དང་འོད་འཕྲོ་བའོ། །སྙིང་གའི་གཉིས་དང་བསིལ་སྦྱིན་མ་སོགས་སྦྱར་ཏེ་ཚན་དོ་དང༌། སྦྱངས་དཀའ་བའི་སའོ། །སླར་ཡང་སྙིང་གའི་གཉིས་དང༌། གཞོལ་མ་སོགས་སྦྱར་ཏེ་ཉེ་བའི་ཚན་དོ་དང༌། མངོན་དུ་གྱུར་པའི་སའོ། །མགྲིན་པའི་གཉིས་དང༌། ཤིན་ཏུ་གཟུགས་ཅན་མ་སོགས་སྦྱར་ཏེ་འདུ་བ་དང༌། རིང་དུ་སོང་བའི་སའོ། །སླར་ཡང་མགྲིན་པའི་གཉིས་དང༌། རྒྱུ་ཅན་མ་སོགས་སྦྱར་ཏེ། ཉེ་འདུ་དང་མི་གཡོ་བའི་སའོ། །དཔྲལ་བའི་གཉིས་དང༌། སྡུག་གུ་མ་སོགས་སྦྱར་ཏེ། དུར་ཁྲོད་དང་ལེགས་པའི་བློ་གྲོས་ཀྱི་སའོ། །ཡང་དཔྲལ་བའི་གཉིས་དང༌། འཚེད་མ་སོགས་གཉིས་སྦྱར་ཏེ་ཉེ་བའི་དུར་ཁྲོད་དང༌། ཆོས་ཀྱི་སྤྲིན་གྱི་སའོ། །ཐམས་ཅད་ཀྱི་མཐར་གཙུག་ཏོར་གྱི་རྩ་མདུད་བཞི་གྲོལ་ཞིང་ཐིག་ལེས་གང༌། རོ་རྐྱང་དབུ་མ་མདུད་འབྲལ་བཞི་དང༌། སྙིང་གའི་ཕྱི་སྐོར་གྱི་རྩ་བརྒྱད་བུ་ག་
བརྒྱད་དང་བཅས་པ་ཡང༌། སྔར་ནས་བྱང་ཆུབ་ཀྱི་སེམས་ཀྱིས་གང་བའི་རྒྱུན། སྐབས་འདིར་གང་བ་མཐར་ཐུག་པ་དུས་མཉམ་པར་འགྱུར་ཏེ། ཉེ་བའི་མཐུང་གཅོད་དམ། སངས་རྒྱས་ཀྱི་སའི་མིང་ཅན་དུ་འགྱུར་ཏེ། དངོས་སུ་ན་མཐོང་ལམ་རྣམ་པར་མི་རྟོག་པའི་ཡེ་ཤེས་དང༌། དེའི་རྗེས་ལ་ཐོབ་པའི་ཟུང་འཇུག་གི་སྐུ་དང་པོའོ། དེའི་རྗེས་སུ་ལམ་གྱི་ཡེ་ཤེས་ལས་བྱུང་བའི་སྣང་བ་ཙམ་གྱིའམ། བག་ཆགས་ཀྱི་རང་བཞིན་རྩ་མདུད་ལ་སོགས་པ་དག་ཅིང༌། ཡེ་ཤེས་ཀྱི་ཐིག་ལེ་དངོས་ཀྱིས་གང་བས། འཕགས་པའི་ས་རབ་ཏུ་དགའ་བ་ལ་སོགས་པ་བཅུ་གོང་དུ་བཤད་པའི་རིམ་པ་དང་མཚུངས་པ་ཐོབ་པར་འགྱུར་ལ། མཐར་ས་བཅུ་རྒྱུན་མཐའི་སྦྱོར་བ་འཐུང་གཅོད་དང༌། རྒྱུན་མཐའ་བར་ཆད་མེད་ལམ་ཉིད། ཉེ་བའི་མཐུང་གཅོད་དང༌། འདི་ནི་སློབ་ལམ་ཉིད་ལ་ས་བཅུ་གཉིས་བྱེད་པའི་ལུགས་ཡིན་ལ།འདི་ལྟར་ན་རྫོགས་པའི་སངས་རྒྱས་ཀྱི་ས་ནི་ཉེ་བའི་འཐུང་གཅོད་དུ་མི་འཇོག་པར་བཅུ་གསུམ་རྡོ་རྗེ་འཛིན་པའི་ས་ཞེས་བྱའོ། །ཡང་ན་གོང་དུ་བསྟན་པའི་གསང་རིམ་གྱི་ས་ཐམས་ཅད་གཅིག་ཏུ་སྡོམས་ནས་མཐུང་གཅོད་དང༌། རྒྱུན་མཐའ་ལ་སོགས་པའི་དབྱེ་བ་མི་བྱེད་པར། འཕགས་ལམ་ཀྱི་ས་བཅུ་ཉིད་གནས་ལ་སོགས་པ་བཅུ་དང༌། ཉེ་བའི་མཐུང་གཅོད་ནི། འབྲས་བུ་རྫོགས་པའི་སངས་རྒྱས་ཀྱི་ས་ཉིད་ལ་འཇོག་ཏེ། ས་ཐམས་ཅད་ས་བཅུ་གཉིས་སུ་བསྡུ་བའི་ལུགས་སོ། །
ཉི་ཤུ་རྩ་བཞིའི་དབྱེ་བས་ཐ་དད་དེ། ཞེས་པ་ནི་གནས་སོགས་བཅུ་པོ་དེ་དག་ནང་ཚན་ཉི་ཤུ་རྩ་བཞིར་དབྱེ་ཞེས་པའི་དོན་དང༌། འདིར་རིམ་པ་ཇི་ལྟ་བར་ཞེས་པ་ནི། པུལླི་ར་མ་ལ་ཡ་ནས། ཀུ་ལུ་ཏའི་བར་ལ། རེ་རེ་ཞིང་མགོ་བོ་ནས། པུས་མོའི་བར། ཕྱི་ནང་དག་པ་གཅིག་ཏུ་སྦྱོར་རོ་ཞེས་པ་སྟེ། དེ་ལ་གནས་ཀྱི་སའམ་རབ་ཏུ་དགའ་བ་ལ་དབྱེ་ན། ཡུལ་ལམ་སྤྱོད་ཡུལ་བཞིར་འགྱུར་ཏེ། མི་ཕྱེད་མ་སོགས་རྩ་རེ་ཐིག་ལེས་གང་བ་དང༌། རྩ་མདུད་རེ་གྲོལ་བ་དུས་མཉམ་པར་སྦྱར་ཏེ། གནས་ཀྱི་རྩ་བཞི་པོ་རྣམས་དུས་གཅིག་ཁོ་ནར་གང་བ་མ་ཡིན་པར། སྔ་ཕྱི་རིམ་ཅན་དུ་གང་བར་འགྱུར་བའི་ཕྱིར། ནང་ཚན་སའི་རིམ་པ་བཞིར་འགྱུར་བ་ལ་སོགས་པ་སྔར་གྱི་རིམ་པའི་འགྲེས་པས། སའམ་ཡུལ་ཆེན་ཉི་ཤུ་རྩ་བཞིར་འགྱུར་རོ། །འདིར་ཡུལ་ཆེན་ཞེས་པ་ཕྱིའི་ཡུལ་ཁོ་ན་ལ་མི་གཟུང་ཏེ། ཡང་དག་པའི་ཡེ་ཤེས་ཀྱི་སྤྱོད་ཡུལ་ཡིན་པའི་ཕྱིར་ཡུལ་ཆེན་ཞེས་པ་སའི་དབྱེ་བ་ཕྲ་མོ་རྣམས་ལའང་འཇུག་གོ །སྤྱི་བོ་ལ་སོགས་པའི་གནས་ཉེར་བཞི་སྨོས་པ་ནི། མི་ཕྱེད་མ་ལ་སོགས་པ་རྩ་ཉེར་བཞི་དག་ཚུལ་གོང་དུ་སྨོས་པ་ལྟར་ཡིན་ལ། ཕྱི་རོལ་གྱི་ཉེར་བཞི་སྨོས་པའི་དགོས་པ་ནི། གསང་རིམ་ཀྱི་ས་བཅུ་ལ། འཛམ་བུ་གླིང་གི་ཡུལ་ཆེན་ཉེར་བཞི་རྣམས་སུ། རིག་པ་བརྟུལ་ཞུགས་ཀྱི་སྤྱོད་པ་སྤྱད་པས། གནས་སོ་སོའི་དཔའ་བོ་དང་རྣལ་འབྱོར་མའི་འདུ་བ་ཐོབ་པ་ན། ནང་གི་རྩ་ཁམས་དེ་རྣམས་དག་དེ་ས་དེ་དང་དེ་རྣམས་ཐོབ་པར་
འགྱུར་བའམ། ཞིང་དུ་མི་རྒྱུ་བར་གནས་གཅིག་ཏུ་སྡོད་པ་ཡིན་ན། ནང་གི་རྩ་ཁམས་དེ་དང་དེ་རྣམས་དག་པར་ཉེ་བ་ན། གནས་སོ་སོའི་དཔའ་བོ་དང་རྣལ་འབྱོར་མ་རྣམས་ཀྱི་འདུ་བ་ཁང་ཁྱིམ་ཉིད་དུ་ཐོབ་པར་འགྱུར་ཞིང༌། སྒྲུབ་པ་པོ་གང་དུ་གནས་པའི་ས་དེ་ཉིད། གནས་དེ་དང་དེར་བྱིན་གྱིས་རློབས་པ་ཡིན་ཏེ། རྒྱུད་དེ་ལས་རྩ་དེ་དག་ཤིན་ཏུ་རྣམ་པར་འགྱུར་རོ། །འཕགས་པའི་ས་བཅུ་ལ་ནི༌། ཁྱིམ་དུ་འདུག་པ་དང༌། ཞིང་དུ་རྒྱུ་བ་ཞེས་བྱ་བའི་དབྱེ་བ་མི་དགོས་ཏེ། འོན་ཀྱང་དེའི་དོད་དུ་ཞིང་ཁམས་གཅིག་ཏུ་རྒྱུ་བ་དང༌། སྣ་ཚོགས་སུ་རྒྱུ་བ་ཞེས་ཐ་སྙད་ཙམ་བྱེད་ལ། གང་ལྟར་ཡང་དག་པའི་ཞིང་དུ་གཏོགས་པའི་ཡུལ་ཉི་ཤུ་རྩ་བཞིར་སྤྱོད་པ་ཞེས་བྱའོ། །ནང་ཚན་རྒྱས་པར་ཕྱེ་བའི་སྐབས་འདིར་ཡང༌། མོས་སྤྱོད་ཀྱི་ས་ལ་རྩ་བཞི་དག་པའི་ས་བཞི། ཉེ་བའི་མཐུང་སྤྱོད་རྩའི་གཙོ་མོ་བཞི་དག་པའི་ས་བཞི་སྟེ་བརྒྱད་པོ་དག །སྔར་གྱི་ཉེར་བཞི་དང་སྡོམ་པས། ཡུལ་ཆེན་པོ་གཉིས་ཀྱི་སར་བྱས་ན། དགྱེས་རྡོར་ལ་སོགས་པ་རྒྱུད་འགའ་ཞིག་གི་ཕུགས་ཀྱི་དགོངས་པར་འགྱུར་ལ། །འཐུང་གཅོད་ལ་བུ་ག་བརྒྱད་ཀྱི་རྩའི་དབྱེ་བའི་ས་བརྒྱད། ཉེ་བའི་མཐུང་གཅོད་ལ། རྩའི་གཙོ་མོ་བཞི་གཅིག་ཏུ་སྡོམ་པ་དང༌། སྙིང་གའི་ནང་སྐོར་གྱི་རྩ་བཞིའི་དབྱེ་བས། ས་ལྔར་ཕྱེ་ནས་སུམ་ཅུ་རྩ་བདུན་དུ་བྱེད་པ་འཁོར་ལོ་སྡོམ་པའི་དགོངས་པ་ཡིན་ནོ། །དེ་ལ་བུ་ག་བརྒྱད་དང༌། སྙིང་ཁའི་ཕྱི་ནང་གི་རྩ་བརྒྱད་བརྒྱད་དང༌། རྩའི་གཙོ་མོ་
བཞི་པོ་རྣམས་ནི། ཀུན་དུ་ཁྱབ་པའི་རྩ་ཞེས་བྱ་ཏེ། རྩ་ཉི་ཤུ་རྩ་བཞི་རྣམས་དག་པའི་མགོ་མ་ཚུགས་པ་ནས་ཀྱང་དེ་དག་གི་དག་ཚུལ་ཡོད་ལ། ཉེར་བཞི་དག་པ་དང་ལྷན་ཅིག་ཏུ་ཡང་དེའི་དག་ཚུལ་འཇུག་ཅིང༌། ཉེར་བཞི་པོ་ཡོངས་རྫོགས་དག་པའི་རྗེས་སུ་ཡང༌། འདི་རྣམས་ཀྱི་དག་པ་མཐར་ཕྱིན་རྒྱུ་སླར་ཡང་ཡོད་པས། མཐུང་གཅོད་དང་ཉེ་བའི་མཐུང་གཅོད་ཀྱི་རྩ་དག་ཚུལ་ལ། མ་ངེས་པ་ཅི་རིགས་པར་འབྱུང་ཡང་མི་འགལ་ལོ། །འདི་ཡང་རྩ་འཁོར་ལོ་བཞི་བྱང་ཆུབ་ཀྱི་སེམས་ཀྱི་གང་བ་སོགས་སྟོན་པའི་ཕྱིར། འཁོར་ལོ་བཞི་དང་འབྲེལ་བའི་སྡེ་ཚན་ནོ། །གཉིས་མཐར་ཐུག་གི་འབྲས་བུ་ལ། དཀྱིལ་འཁོར་གསུམ་ནི། སྐུའི་དཀྱིལ་འཁོར་དང༌། གསུང་གི་དཀྱིལ་འཁོར་དང༌། ཐུགས་ཀྱི་དཀྱིལ་འཁོར་རོ། དེ་ལ་ཡང་དག་པའི་ཡེ་ཤེས་ཀྱི་རྩ་ནི་སྐུའི་དཀྱིལ་འཁོར་དང༌། ཡེ་ཤེས་ཀྱི་རླུང་དང་ཐིག་ལེ་ནི་གསུང་གི་དཀྱིལ་འཁོར་དང༌། དོན་དམ་པའི་བདེ་ཆེན་ནི་ཐུགས་ཀྱི་དཀྱིལ་འཁོར་ཡིན་པ་ལས། དེ་རྣམས་ཉིད་ལ་གསེར་དང་གཡའ་ལྟར་ལུས་རྩའི་དྲ་བ་དང༌། ངག་ཡི་གེ་ཐིག་ལེ་དང༌། སེམས་འགྱུར་བཅས་ཀྱི་བདེ་བ་རྣམས་བྱུང་ཏེ། འོན་ཀྱང་དེ་རྣམས་ཉིད་ལ་གནད་དུ་བསྣུན་པས། ལམ་གྱི་ཡེ་ཤེས་སྐྱེས་པ་ན། དྲི་མ་དེ་དག་རིམ་གྱི་སྦྱོང་བ་ནི་ཤིང་ལས་བྱུང་བའི་མེའི་ཤིང་ཉིད་ཚིག་པར་བྱེད་པ་བཞིན་ནོ། །དེ་སྦྱངས་པས་གདོད་མའི་དཀྱིལ་འཁོར་གསུམ་ཡོན་ཏན་ཐམས་ཅད་ཀྱི་བརྒྱན་པ། ས་འོག་གི་གཏེར་
ཁ་ཕྱེ་བ་བཞིན་མངོན་དུ་གྱུར་པ་ནི། སྐྱེས་བུ་དེའི་གནས་སྐབས་དེ་ལ་ལྟོས་ནས། དག་པ་གཉིས་ལྡན་འབྲས་བུ་མཐར་ཐུག་ཅེས་བརྗོད་དོ། །དེ་ལ་སྐུའི་དཀྱིལ་འཁོར་ནི་གཡོན་རྐྱང་མ་དང༌། གསུང་གི་དཀྱིལ་འཁོར་ནི་གཡས་རོ་མ་དང༌། ཐུགས་ཀྱི་དཀྱིལ་འཁོར་ནི་དབུས་དབུ་མ་དང་ཆོས་ཆོས་ཉིད་ཀྱི་འབྲེལ་བ་ཅན་ཡིན་པས། རྩ་གསུམ་རྣམ་པར་དག་པ་ལས་དེ་དག་མངོན་དུ་གྱུར་པའང་ཡིན་ནོ། །སྐུ་གསུམ་ནི་ཆོས་དང་ལོངས་སྤྱོད་རྫོགས་པ་དང་སྤྲུལ་པའོ། །དེ་ལ་ཆོས་ཀྱི་སྐུ་ནི་སྤྲོས་པ་ཐམས་ཅད་དང་བྲལ་བའི་ཡེ་ཤེས་གཅིག་ཉིད་ཆོས་ཐམས་ཅད་ཀྱི་ཆོས་ཉིད་དམ་སྲོག་ཏུ་སོང་བས། རང་གི་ངོ་བོ་རང་རིག་པའི་ཚུལ་གྱིས་རྟོགས་ཤིང༌། ཤུགས་ལ་ཀུན་རྫོབ་ཇི་སྙེད་པ་མཁྱེན་པ་ཡང་དེ་ཡིན་ལ། ལོངས་སྤྱོད་རྫོགས་པ་ནི་གཉིས་སྣང་མེད་བཞིན་དུ། རང་སྣང་གི་ཡེ་ཤེས་གཅིག་ཉིད། སྐུ་དང་ཞིང་ཁམས་དང་མཆོད་པ་ལ་སོགས་པ་མཐའ་ཡས་པར་ཤར་བ་དང༌། གསུང་ཆོས་ཀྱི་སྒྲ་དབྱངས་རྣམ་པ་ཐམས་ཅད་དུ་ཁྱབ་པ་དེ་ཡིན་ཞིང༌། སྤྲུལ་པའི་སྐུ་ནི་ལོངས་སྤྱོད་རྫོགས་པ་དེའི་གྲིབ་མའམ། གཟུགས་བརྙན་ལྟ་བུར་གྱུར་པ། སེམས་ཅན་གང་ལ་གང་འདུལ་དུ་སྐུ་དང་གསུང་གི་སྣང་བ་མཐའ་ཡས་པ་འཇུག་ཅིང༌། ཕན་པ་དང་བདེ་བ་དཔག་ཏུ་མེད་པའི་འཕྲིན་ལས་ཅན་དེ་ལ་ནི་སྤྲུལ་པ་ཞེས་བྱ་ཞིང༌། དེའི་རྒྱུ་སྤྲུལ་པ་སྟོན་པ་པོ་དམིགས་པ་མེད་པའི་སྙིང་རྗེ་མཁའ་ཁྱབ་དེ་ནི་སྤྲུལ་པའི་སྐུའོ། །སྐུ་གསུམ་པོ་དེ་ཡང་གདོད་མའི་ཆོས་ཉིད་ཡིན་མོད་ཀྱི།
འཁོར་བའི་ལུས་ངག་ཡིད་གསུམ་དང༌། དེའི་རྩ་བ་དཀར་དམར་རླུང་གསུམ་དང༌། ཡང་ན་སེམས་སེམས་བྱུང་གི་བསྡུས་པའི་ཀུན་རྟོག་དང༌། ལུས་ངག་གནས་གསུམ་གྱི་སྣང་བ་དང༌། བྱ་བྱེད་ལས་གསུམ་ལོངས་སྤྱོད་བཅས་པ་སྟེ། མདོར་ན་དྲི་མ་གློ་བུར་བ་དེ་དག་གི་སྒྲིབས་པ་ལས། རྡོ་རྗེ་རྣམ་གསུམ་དབྱེར་མི་ཕྱེད་པ་ལམ་དུ་བྱས་ཤིང་སྒོམས་པས། དྲི་མ་དེ་བྲལ་བ་ན། འབྲས་བུ་མཐར་ཐུག་དག་པ་གཉིས་ལྡན་གྱི་སྐུ་ཞེས་གནས་སྐབས་དེ་ལ་ལྟོས་ཏེ་བཞག་གོ །རྡོ་རྗེ་གསུམ་དབྱེར་མི་ཕྱེད་པའི་ལམ་ཡང་ཇི་ལྟ་བུ་ཞེ་ན། འདིར་བརྗོད་པར་བྱ་རྒྱུ་ཤིན་ཏུ་མང་མོད་ཀྱི། སྟོང་པ་དང༌། བདེ་བ་དང༌། གསལ་བའི་ཡེ་ཤེས་གསུམ་ལ་འཆད་ཅིང༌། དེ་ཉིད་ལམ་གྱི་སྐུ་གསུམ་དུ་ཡང་འདོད་དོ། །འོན་ཀྱང་སྟོང་བདེ་གསལ་གསུམ་གྱི་ཏིང་ངེ་འཛིན་ཡིན་པ་ཙམ་གྱིས་དེར་མི་འགྱུར་ལ། དེ་རྣམས་ཉིད་བདེན་བཞིའི་རྣམ་པ་ཅན་ཙམ་མམ། སྤྲོས་བྲལ་གྱི་རྣམ་པ་ཅན་ཙམ་དང༌། སྙིང་རྗེའི་རྣམ་པར་ཤར་ཙམ་གྱིས་ཀྱང་དེར་མི་འགྱུར་རོ། །འོ་ན་ཅིའི་ཞེ་ན། སྤྲོས་བྲལ་གྱི་རྣམ་པ་ཅན་གདངས་སྙིང་རྗེར་འཆར་བ་གཞིར་བཞག་པ་ལ། རྐྱེན་གཏུམ་མོ་འབར་བ་ལས་བྱུང་ཞིང༌། ངོ་བོ་རང་རིག་བདེ་བའི་མཚན་ཉིད་ཅན་གྱི། སྟོང་པའི་ཡེ་ཤེས་ནི་ཆོས་སྐུ་དང༌། རྐྱེན་དབུ་མར་འབབ་པའི་ཞུ་བདེ་དང༌། ངོ་བོ་མི་འགྱུར་བའི་མཚན་ཉིད་ཅན་གྱི་བདེ་བ་དང༌། རྐྱེན་རླུང་འགགས་པ་ལས་བྱུང་ཞིང༌། ངོ་བོ་རང་སེམས་ཀྱི་གཟུགས་བརྙན་རྣམ་པ་ཐམས་ཅད་པར་ཤར་བའི་མཚན་ཉིད་ཅན་
གྱི་གསལ་བ་རྣམས། རིམ་པས་ལམ་དུས་ཀྱི་ཆོས་ལོངས་སྤྲུལ་གསུམ་མོ། །ཡང་འགའ་ཞིག་རླུང་འགགས་པའི་སྟོང་པ་དང༌། ཐིག་ལེའི་བདེ་བ་དང༌། གཏུམ་མོའི་གསལ་བ་ཞེས་འཆད་ན། དེའི་གོ་དོན་སྔགས་རིམ་སོགས་རིམ་པ་གསུམ་ལ་ངོས་འཛིན་པར་བྱེད་ན་ནི། འགལ་བ་མེད་པར་འགྱུར་མོད། ཚིག་མི་གསལ་བ་ལས་ནི་དོན་གྱི་རྣམ་པ་ཡང་མི་གསལ་ལོ། །དེས་ན་སྟོང་པའི་སྐབས་ཀྱི་རླུང་འགགས་པ་དང༌། མཉམ་བཞག་ཏུ་རོ་རྐྱང་གི་རྒྱུ་བ་འགགས་པ་དང༌། གཏུམ་མོ་འབར་བ་ཡང་རགས་པའི་གཏུམ་མོར་བྱས་ལ་གསལ་བའི་སྐབས་ཀྱི་རླུང་འགགས་པ་ནི་ལས་རླུང་རྩ་བ་ནས་འགགས་པ་དང༌། གཏུམ་མོ་འབར་བ་ཡང་ཡེ་ཤེས་ཀྱི་གཏུམ་མོ་ཕུང་ཁམས་དག་པར་བྱེད་པ་ལ་ངོས་བཟུང་ན་མི་འགལ་བར་འགྱུར་རོ། །སྤྱིར་ཡང་སྤྲོས་བྲལ་གྱི་སྟོང་པ་དང༌། ཁྱད་པར་ཅན་གྱི་ཞུ་བདེ་འཛག་མེད་དང༌། རྣམ་པ་ཐམས་ཅད་པའི་གསལ་སྣང་རྣམས་ལམ་གྱི་སྐུ་གསུམ་ཙམ་དུ་ནི་ངེས་པར་འགྱུར་མོད། དཔྱིད་ཐིག་དང་ཁ་སྦྱོར་ལས་གསུངས་པའི། སྐུ་གསུམ་ཀྱི་ལམ་ཐུན་མོང་མ་ཡིན་པའི་རྣམ་གཞག་དེ་ནི། སྔར་སྨོས་པ་དེ་ཡིན་ནོ། ད་ལྟར་ན་ཆོས་སྐུ་དབུ་མ་དང༌། ལོངས་སྐུ་རོ་མ་དང༌། སྤྲུལ་སྐུ་རྐྱང་མ་རྣམས་ལ་ཆོས་ཉིད་ཀྱི་འབྲེལ་བ་ཅན་ཡིན་ནོ། །འབྲས་བུ་སྐབས་འདི་དག་ཏུ། ཡེ་ཤེས་ལྔ་དང་རིགས་ལྔ་ལ་སོགས་པ་སྔར་བཤད་པ་དེ་དག་གི་ནང་ནས་གཞི་འབྲས་ཀྱི་ཕྱོགས་བསྟན་པ་རྣམས་བླངས་ཏེ་ཁ་བསྐང་ཡང་རུང་ངོ༌། །དེ་ལྟར་ན་གཞུང་དེ་རྣམས་ནི་ལམ་རིམ་པ་བཞིའི་ནང་ཚན་གཅིག་ཁོ་ན་སྟོན་
པའི་ཆེད་དུ་མ་ཡིན་ཏེ། །རྒྱུད་ཀྱི་དངོས་པོ་ཞེས་བྱ་བ། གཞི་ལམ་འབྲས་བུའི་བཞུགས་ཚུལ་སྤྱི་དང༌། ཁྱད་པར་ཆོས་ཐམས་ཅད་རང་ཉིད་ལ་གནས་པར་བསྟན་པའོ། །ཅིའི་ཕྱིར་རྒྱུད་ཅེས་བྱ་བ། ཐབས་ཀྱི་རྒྱུད་ལྟར་ཕན་ཚུན་འབྲེལ་བ་སྟེ། ཕྱིའི་དངོས་པོ་ཐམས་ཅད་ནང་གི་ལུས་ཀྱི་སྣང་བ་ལས་བྱུང་ལ། དེ་ཡང་སེམས་ཀྱི་བག་ཆགས་ལ་བརྟེན་ཞིང༌། བག་ཆགས་ཀྱང་ཆོས་ཉིད་ལ་བརྟེན་ནོ། །ཡང་སེམས་ལས་ལུས་འགྲུབ། ལུས་ལས་ཕྱི་རོལ་གྱི་སྣང་བ་ཤར། ལུས་དང་ཕྱི་རོལ་གྱི་སྣང་བ་གཉིས་ལས་ནི་སེམས་ལ་བག་ཆགས་བགོ་བར་བྱེད་ཅིང༌། ཕྱི་ལ་ཡང་བག་ཆགས་ཀྱི་ཁྱབ་པ་དང༌། ཆོས་ཉིད་ལ་ཡང་བག་ཆགས་སྒྲིབ་པའི་ཚུལ་གྱིས་འབྲེལ་བ་དང༌། ཆོས་ཉིད་ནི་ཕྱི་ནང་སེམས་གསུམ་ལ་ཁྱབ་ཅིང༌། དེ་གསུམ་ཡང་ཆོས་ཉིད་ལ་བརྟེན་ཞིང་གཡོགས་པ་དང༌། ཕྱི་འགྱུར་བའི་ནང་འགྱུར་ཞིང༌། ནང་འགྱུར་བའི་ཀྱང་དེ་འགྱུར་བ་དང༌། བག་ཆགས་འགྱུར་བས་ཕྱི་ནང་འགྱུར་ཞིང༌། ཕྱི་ནང་འགྱུར་བས་ཀྱང་བག་ཆགས་གསོས་འདེབས་ཏེ། དེའི་ཕྱིར་འབྲེལ་བ་ཅན་ནོ། །དེས་ན་གཞུང་འདི་འཆད་པའི་བོད་ཕལ་ཆེར་རྒྱུད་རིམ་ཐོས་བསམ་གྱི་གཏན་ལ་ཕབ་ཅེས་འཆད་ཀྱང་མི་ལེགས་པས། རྒྱུད་ཀྱི་དངོས་པོ་ཐོས་བསམ་གྱི་གཏན་ལ་ཕབ་ཅེས་བརྗོད་ན། ལེགས་པར་འགྱུར་རོ། །ཡང་འདི་སྙམ་དུ། སྡེ་ཚན་འདི་རྣམས་ཀྱི་གོ་རིམ། གཞུང་གི་བཞུགས་ཚུལ་དང་མི་མཐུན་པར་སྒྱུར་དགོས་ན། སློབ་དཔོན་མེད་པར་རང་གར་འཇུག་པ་དགག་པའི་དོན་དུ་དཀྲུགས་པ་
ཡིན་ནམ་ཞེ་ན། མ་ཡིན་ཏེ། རྒྱུད་ལ་ནི་དེ་ལྟར་སྲིད་ཀྱང་དགོངས་འགྲེལ་གྱི་བསྟན་བཅོས་ལ་ནི་མི་མཛེས་པས་སོ། །འོ་ན་ཅི་ཞེ་ན། འདིར་གོང་དུ་བཤད་པའི་ཚུལ་འདི་ནི་མངོན་རྟོགས་ཀྱི་རིམ་པར་སྡེབས་པ་ཡིན་ལ་གཞུང་གི་དངོས་བསྟན་ནི་ཚིག་གི་འབྲེལ་རྩིས་པ་ལས་དེ་ལྟར་བྱུང་ངོ༌། །ཇི་ལྟར་ཞེ་ན་འགྲོ་བ་དང་འོང་བ་ཞེས་པ་ལ། དེ་ནི་རླུང་རྒྱུ་བའི་ཚུལ་ཡིན་པས་དེ་དང་འབྲེལ་བར་སྦྱོར་གཞི་སོགས་བསྟན་པ་དང༌། ལས་རྒྱལ་པོ་མཆོག་ལས་འཕྲོས་ནས་ལས་གསུམ་དང་གོང་གི་བཞི་ཚན་ལས་འཕྲོས་ནས། ཡན་ལག་བཞི་ནས་དེ་ཉིད་བཞིའི་བར་དང༌། དཀྱིལ་འཁོར་གྱི་དེ་ཉིད་ལས་འཕྲོས་ནས་དཀྱིལ་འཁོར་གསུམ་དང༌། ཡེ་ཤེས་ལས་འཕྲོས་ནས་ཤེས་རབ་གཉིས་དང༌། མྱང་འདས་ལས་འཕྲོས་ནས་སྐུ་གསུམ་དང༌། དེ་ཉིད་ལས་འཕྲོས་ནས་དེ་བཞིན་བཤེགས་པ་ལྔ་ལ་སོགས་པ་དང༌། སྔགས་ལས་འཕྲོས་ནས་ཆུ་ཚོད་ལ་སོགས་པ་དང༌། ཡུལ་ཉེར་བཞི་ལས་འཕྲོས་ནས་ཀུན་སྤྱོད་དོན་གཉིས་ལ་སོགས་པ། མིང་དང་དོན་མཐུན་རུང་ལས་འཕྲོས་པ་ཤས་ཆེའོ། །གཉིས་པ་དེ་ལ་གནད་དུ་བསྣུན་པའི་ཐབས་རིམ་བཞི་འབྲས་བུ་དང་བཅས་པ་སྟོན་པ་ལ། མར་དོལ་སོགས་གོང་མ་རྣམས་བདེ་བ་སྔོན་དུ་སོང་ནས། སྟོང་ཉིད་སྒོམ་པ་དབང་གི་ཡེ་ཤེས་ཀྱི་ལམ་འཁྲིད་པ། ལས་རྒྱ་ལམ་རྫོགས་ལྟ་བུ་དང༌། རླུང་བཀག་པ་ལ་བརྟེན་ནས་སྟོང་པས་བདེ་འདྲེན་པ། སྟོང་པ་སྔོན་སོང་གི་བདེ་བ་སྒོམ་པ། གཏུམ་མོ་ལམ་སློངས་ལྟ་བུ་ཞེས་འཆད་
མོད་ཀྱང༌། ངེས་པ་མེད་ལ། ལས་ཀྱི་རྡོ་རྗེས་རིམ་པ་དང་པོ། ལུས་དབེན་དང༌། ངག་དབེན་ཏེ་རྡོ་རྗེའི་བཟླས་པའི་རིམ་པ། གཉིས་པ་ངག་དབེན། གསུམ་པ་བདག་བྱིན་བརླབ་པ། བཞི་པ་འོད་གསལ། དེའི་འབྲས་བུ་ཟུང་འཇུག་གོ་ཞེས་འཆད་པ་ནི། དོན་ལ་ཤིན་ཏུ་གནས་པས་ལེགས་པར་བཤད་པ་ཡིན་ལ། དེ་ལྟར་ན་སྐབས་འདིར་འདི་སྐད་ཅེས་བྱ་སྟེ། རྒྱུད་ཀྱི་རིམ་པ་དང༌། སྔགས་ཀྱི་རིམ་པ་དང༌། ཡེ་ཤེས་ཀྱིས་རིམ་པ་དང༌། གསང་རིམ་འབྲས་བུ་དང་བཅས་པའོ། །དང་པོ་རྒྱུད་ཀྱི་རིམ་པ་བཤད་པ་ནི། འདི་རྣམས་ལས་གཙོ་བོ་ཇི་ལྟར་ཨོ་རྒྱན་དང༌། གནད་འབྱེད་པའི་སྒོ་ནས་རྡོ་རྗེ་མཁའ་འགྲོ་མ་བསྐུལ་ཞིང༌། ཛ་ལན་དྷ་རར་ནི། བདེ་བ་ཆེན་པོའི་ཡེ་ཤེས་དང་འདྲེས་ཏེ། ཕྱིས་ནི་དེ་བཞིན་གཤེགས་པ་རྣམས་ཀྱི། ཆོས་རྣམས་བསྡུད་པའོ། །དེ་ཉིད་ལ་དཀྱིལ་འཁོར་དང༌། སྦྱིན་སྲེག་དང༌། མཆོད་སྦྱིན་དང༌། བསམ་གཏན་དང༌། སྒོམ་བྱ་དང༌། གཟུངས་དང༌། རྡུལ་ཚོན་དབྱེ་བ་ལ་སོགས་པར་རྟོགས་པར་བྱའོ། །ཞེས་ཏེ་འདི་ལ་སྔ་རབས་མང་པོ་ཞིག་སྔར་བསྟན་པའི་ཀུན་སྤྱོད་ཀྱི་འཕྲོས་ཡིན་པར་འཆད་པ་ནི་ལེགས་པ་མ་ཡིན་ཏེ། ལམ་མ་བསྒོམས་པར་གཞི་དུས་ཀྱི་འཁོར་བའི་རླུང་རྒྱུ་བ་ལ། དེ་བཞིན་གཤེགས་པའི་ཆོས་བསྡུ་བ་དང༌། སྒོ་གཉིས་ཀྱིས་བསྐུལ་བ་དང་འབབ་པའི་དབྱེ་བ་སོགས་མི་བདེ་བའི་ཕྱིར་རོ། །དེས་ན་འདིས་ནི་རྒྱུད་རིམ་གྱི་ཏིང་ངེ་འཛིན་གྱི་མཚན་ཉིད་གསལ་བར་བསྟན་པ་སྟེ།
དེ་ལ་འདིར་རྒྱུད་ཅེས་བྱ་བ་ནི། གནས་པ་རྩ། གཡོ་བ་རླུང༌། བཀོད་པ་བྱང་ཆུབ་ཀྱི་སེམས། རང་བཞིན་ཆོས་ཉིད་དང་བཅས་པའི་མིང་ཡིན་ལ། དེ་རྣམས་བཞུགས་ཚུལ་དང་རྗེས་སུ་མཐུན་པར། སྒོམ་པའི་རིམ་པ་ནི། རྒྱུད་ཀྱི་རྣལ་འབྱོར་ཡིན་ཞིང༌། རྩ་དབུ་མར་གཏུམ་མོ་འབར་བ་སོགས་རིམ་པ་གོང་མའི་ཡོན་ཏན་དང་མི་ལྡན་ཞིང་དེ་ཙམ་ཡིན་པ་ནི་རྒྱུད་ཀྱི་རིམ་པའོ། །འོན་ཀྱང་ལས་དང་པོ་པའི་ཞུགས་གནས་ཐིམ་ཚུལ་ཕྲ་མོ་དང༌། རྩ་གནས་གཞན་གྱི་འབར་འཛག་དང༌། དབུ་མ་ཉིད་ལ་ཡང་ཆ་ཤས་ཕྲ་མོ་རེག་པའི་དགའ་བཞི་ཙམ་ནི་ཡོད་དོ། །དེས་ན་འདི་ཡང་དམིགས་པ་གཅིག་ཏུ་མ་ངེས་ཏེ། རྩ་འཁོར་ལོ་མང་པོ་སྒོམ་པའམ། གནས་དང་ལྡན་པའི་འཁོར་ལོ་ཅིག་སྒོམ་པའམ། ཡི་གེའི་ཁྱད་པར་མང་པོའམ། ཡི་གེ་གང་ཡང་རུང་བ་ཅིག་སྒོམ་པའམ། ཐིག་ལེའི་འདུ་འཕྲོད་དང༌། ཐིག་ལེ་གནས་པ་དང༌། རླུང་དགང་དབྱུང་དང༌། བུམ་པ་ཅན་དང༌། རླུང་གི་ཁ་དོག་གམ་དབྱིབས་སྒོམ་པ་དང༌། ཁྱད་པར་ཅན་གྱི་རྣམ་པར་མི་རྟོག་པ་ཉིད་ལ་འཇོག་པ་ཡང་རུང་ཏེ། གཞིའི་གནས་ཐབས་དང་མཐུན་པ་ཞིག་བསྒོམས་པས་དེ་ལ་ཅུང་ཟད་གསལ་སྣང་ཐོབ་ཏེ། རླུང་དབུ་མར་ཞུགས་གནས་ཐིམ་གསུམ་བྱེད་ཅིང༌། བདེ་སྟོང་གསལ་བའི་ཉམས་ཆ་ཕྲ་བ་ལ་སྦྱོར་བ་ནི། རིམ་པ་འདིའི་རྣལ་འབྱོར་ཡིན་ཏེ། ཨ་བ་དྷུ་ཏཱིར་གཏུམ་མོ་གསལ་བར་སྤོར་ནུས་པ་མ་ཡིན་པའི་རྫོགས་རིམ་གྱི་རྣལ་འབྱོར་ལས་དང་པོ་པའི་ས་ལ་གནས་
པ་མཐའ་དག རྒྱུད་ཀྱི་རིམ་པ་ཡིན་གྱི། དམིགས་པ་གཅིག་ཁོ་ན་ལ་རྒྱུད་རིམ་ཡིན་པར་འདོད་པ་ནི་མི་འཐད་ལ། རྩ་རླུང་ཐིག་ལེའི་བཞུགས་ཚུལ་ཙམ་རྒྱུད་རིམ་ཡིན་པར་འདོད་པ་ཡང་ཤིན་ཏུ་འཁྲུལ་ལོ། །དེས་ན་རིམ་བཞིར་གྲགས་པའི་འཁྲིད་ཚུལ་ལས་བྱུང་བའི་དམིགས་པ་འདི་རྣམས་ནི། སྡོམ་པ་རྩ་རྒྱུད་ཀྱི་མན་ངག་ལས་རྩམས་ནས། སློབ་དཔོན་ནག་པོ་སྤྱོད་པའི་གདམས་ངག་གཅིག་ནས་གཅིག་ཏུ་བརྒྱུད་དེ་ད་ལྟར་བརྙེད་པའི་དམིགས་པ་ནི་འདི་ཙམ་མོ་ཞེས་པ་ཡིན་གྱི། རྒྱུད་གང་ལ་བརྟེན་ཡང་རུང་སློབ་དཔོན་སུའི་མན་ངག་ཡིན་ཡང་རུང་ཏེ། རྒྱུད་རིམ་ལ་སོགས་པའི་མཚན་ཉིད་སོ་སོར་ཚང་བ་ཐམས་ཅད་དེ་དང་དེ་ཡིན་པས། རྫོགས་རིམ་མཐའ་དག་ལ་རིམ་པ་བཞིས་ཁྱབ་པ་ཡིན་ནོ། །འདི་ལ་ས་མཚམས་རྣམ་པར་བཞག་ན། ཚོགས་ཀྱི་ལམ་དུ་སྒོམ་པའི་རྫོགས་རིམ་ཐམས་ཅད་རྒྱུད་ཀྱི་རིམ་པའོ་ཞེས་བརྗོད་པར་བྱའོ། །འོ་ན་དམིགས་པ་དང་བཅས་པ་འདི་དག །གཞི་དངོས་པོའི་བཞུགས་ཚུལ་སྒོམ་པར་ཇི་ལྟར་འགྱུར་སྙམ་ན། རྟོག་པས་བཏག་པ་ཡིན་མོད་ཀྱང༌། དངོས་པོའི་བཞུགས་ཚུལ་དང་ཤིན་ཏུ་མཐུན་པར་སྒོམས་པ་ཡིན་པའི་ཕྱིར། དེ་སྐད་ཅེས་བྱའོ། །གཞུང་དོན་ལ་གཉིས་ཀྱི་དང་པོ་བྱེད་ལས་ཀྱི་མཚན་ཉིད་བསྟན་པ་ནི། འདི་རྣམས་ལས་ཞེས་པ་ནི། གོང་དུ་རྒྱས་པར་བསྟན་པའི་རྩ་གསུམ་འཁོར་ལོ་བཞི། ཡི་གེ་རླུང་དང་བཅས་པ། དེ་རྣམས་ཀྱི་ནང་ནས་ཇི་ལྟར་རིགས་པ་སྒོམས་པ་ལས། གཙོ་བོ་སྟེ་རྩ་དབུ་མ་ཇི་ལྟ་བར་རྩ་གཞན་རྩ་འདབ་བརྒྱ་ཉི་ཤུ་ལ་
སོགས་པའི་ཁོང་སྟོང་ནི་ཨོ་ཊི་ཡ་ན་སྟེ། རྩ་དེ་རྣམས་ཀྱི་གནད་འབྱེད་པའི་སྒོ་ཞེས་བྱ་བ་རྩ་མདུད་ཀྱི་སྒོ་རྣམས་ནས་རླུང་འཇུག་པས་དབུ་མ་ཅུང་ཟད་ཁ་དབྱེ་ཞིང༌། རྩའི་ཁོང་སྟོང་དེ་རྣམས་སུ། རྡོ་རྗེ་མཁའ་འགྲོ་མ་གཏུམ་མོ་བསྐུལ་བ་ལ་ཞུགས་པ་དེ། དབུ་མར་དངོས་སུ་འབར་བའམ་དངོས་ཀྱི་སྦྱོར་བ་ལ་རེག་པ་ནི་མ་ཡིན་པ་དང༌། ཛ་ལན་དྷ་ར་སྟཻ་ལྟེ་བ་ནས་ལྟེ་འོག་སོར་བཞིའི་བར་རོ། །དེ་ལྟར་ཡང་གྲུབ་ཆེན་དྲིལ་བུ་པའི་རིམ་ལྔ་ལས། ད་ནི་ཛ་ལན་དྷ་རའི་རིམ་པ་བརྗོད་པར་བྱ་ཏེ། ལྟེ་བ་ཆུ་སོའི་མཚམས་སུ་ནི། མདོག་ལྔར་ལྡན་པའི་ཐིག་ལེ་ནི། །སངས་རྒྱས་ལྔ་རྣམས་ཀྱིས་མཚོན་པ། །འཁོར་ལོ་གྲུ་གསུམ་དཀར་དམར་ནི། །ཞེས་དབུ་མའི་མས་སྣ་རྩ་མདུད་གྲུ་གསུམ་ལ་སོགས་པའི་གནས་དེ་ནི་ཛ་ལན་དྷ་རའི་གནས་ཞེས་བྱ་ཏེ། དེར་བདེ་བ་ཆེན་མོའི་ཡེ་ཤེས་དང་འདྲེས་པ་ནི། ཁམས་སུམ་ཅུ་རྩ་གཉིས་ཀྱི་དྭངས་མ། ཁམས་ལྔའི་སྡེ་ཚན་དུ་བཅད་ནས། རླུང་དང་ཁམས་རྣམས་རྩའི་མདུད་སྒོར་ཚོགས་པ་ཡིན་ཏེ། དེ་དག་ལ་བདེ་བ་ཆེན་པོའི་ཡེ་ཤེས་ཞེས་བྱ་བ་ནི། བདེ་བའི་བརྟེན་ཡིན་པ་ལ་དགོངས་པའོ། །དེ་ལྟར་འདུས་པ་དེའི་ཕྱིས་ནི་དེ་བཞིན་གཤེགས་པ་ཞེས་པའི་བརྟས། ཕུང་པོ་ལྔ་དང་འབྱུང་བ་ལྔ་དང༌། དབང་ཡུལ་རྣམས་ཀྱིས་རླུང་དང་བདུད་རྩི་ཐིག་ལེ་རྣམས་ཏེ། ཆོས་དེ་རྣམས་ཀྱང་མདུད་པའི་སྒོར་འདུ་ཞིང༌། དབུ་མའི་ནང་དུ་ཅུང་ཟད་འཇུག་པའོ། །ཕྱོགས་འདིར་བི་རུ་བའི་མན་ངག་ཏུ་
གྲགས་པ་ལས། ཚོགས་ལམ་གྱི་སྐབས་སུ་ཁམས་རྣམས་དབུ་མའི་མདུད་སྒོར་འདུ་ཞིང་ཚོགས་པའོ། །ཞེས་འདོད་པ་ཡང༌། གནས་སྐབས་འདི་དང་མཐུན་རུང་ཡིན་ནོ། །དེ་ལྟར་ན་རྩའི་མདུད་སྒོ་ནས་རླུང་འཇུག་ཅིང༌། དབུ་མ་དང་རྩ་འདབ་རྣམས་ཀྱི་ཁོང་སྟོང་དུ། འཇུག་པ་དང༌། གནས་པ་དང༌། ཐིམ་པས་རིམ་པས་གཏུམ་མོ་བསྐུལ་བར་ནི་བྱེད་ལ། དབུ་མའི་ཁ་ཅུང་ཟད་བྱེ་ཞིང་རླུང་འདུས་པའི་བརྟེན་འབྲེལ་གྱིས། དང་པོ་སྤྱི་བོ་ལ་བརྟེན་པའི་ཁམས་སོ་གཉིས་ཀྱི་ཆ་ཤས་དང༌། ཕྱིས་སྙིང་མགྲིན་ལ་བརྟེན་པའི་ཕུང་ཁམས་སྐྱེ་མཆེད་ཀྱི་དྭངས་མ་རླུང་དང་བཅས་པ་ཡང་ཅི་རིགས་པར་མདུད་སྒོར་འདུ་ཞིང་དབུ་མར་ཡང་ཅུང་ཟད་འཇུག་པ་ནི་ཡིན་ལ། རླུང་ཐིམ་ཚུལ་སྟོབས་ཆུངས་བས། ཚངས་པའི་མེ་ཡན་ཆད་གསལ་བར་འབར་མ་ནུས་པའི་གནས་སྐབས་ནི། རྒྱུད་རིམ་གྱི་མཚན་ཉིད་དོ་ཞེས་པ་ནི་གྲུབ་དོན་ནོ། །སྐབས་འདིར་ཐེ་ཚོམ་འདི་འབྱུང་ཏེ། ཐོག་མར་སྙིང་ག་ལ་སོགས་པ་རྩ་འཁོར་ལོ་གཞན་ལ་གནད་དུ་བསྣུན་པ་ལས། སོ་སོའི་གནས་དེ་དག་ཏུ་རླུང་འགག་ཅིང༌། ཁམས་འདུ་བ་འཐད་ཀྱི། དབུ་མའི་མས་སྣ་ཁོ་ནར་འདུའོ། །ཞེས་འཆད་པ་འདི་མི་བདེའོ། །སྙམ་ན་དམིགས་པའི་ཁྱད་པར་མི་འདྲ་བ་སྣ་ཚོགས་པས་ནི། ཐོག་མ་ཉིད་དུ་དེ་དང་དེར། ཉམས་ཀྱི་སྣེ་འདྲེན་པའི་ཚུལ་གྱིས། རླུང་ཐིམ་ཚུལ་དང༌། ཁམས་འདུ་ཚུལ་དང༌། ཉམས་མི་འདྲ་བ་སྣ་ཚོགས་
འཆར་སྲིད་ཀྱང༌། རྩ་རྣམས་ཕན་ཚུན་འབྲེལ་བའི་རྒྱུ་མཚན་གྱིས་གཅིག་ལ་གཅིག་ཕན་བཏགས་པའི་ཚུལ་དུ་མཐར་ཐམས་ཅད་མཚུངས་པར། དབུ་མའི་མས་སྣར་རླུང་འགག་ཅིང་ཁམས་འདུ་བ་ཡིན་པས། དེ་ལ་ཐོག་མ་ངེས་པར་དབུ་མའི་མས་སྣར་དམིགས་པ་གཏོད་དགོས་པ་ནི་མ་ཡིན་ནོ། །སྐབས་འདིའི་གནད་འབྱེད་པའི་སྒོ་ནས། ཛ་ལན་དྷ་ར་ཞེས་པ་སྨིན་མཚམས་དང༌། སྤྱི་གཙུག་ལ་འཆད་པ་མང་མོད་ཀྱི། དེ་ལྟར་ན་རྒྱུད་ཀྱི་རིམ་པའི་སྐབས་སུ། དེ་བཞིན་གཤེགས་པའི་རྒྱུད་ལ་འགྲོ་འོང་འབྱུང་བའི་སྐྱོན་དང༌། འོག་གི་ཡེ་ཤེས་རིམ་པ་དང་ཟློས་པའི་སྐྱོན་དུ་ཡང་འགྱུར་རོ། གཉིས་པ་རྒྱུད་རིམ་སྒོམ་པའི་མཚན་གཞི་ངོས་བཟུང་བ་ནི། མཚན་ཉིད་དེ་ལྟ་བུ་ལྡན་པ་ལས། སྒོམ་བྱ་དམིགས་པའི་ཁྱད་པར་ནི། རྩ་སྒོམ་པ་དང༌། ཡི་གེ་སྒོམ་པ་དང༌། ཐིག་ལེའི་གཟུགས་སྒོམ་པ་དང༌། རླུང་གི་མདོག་དབྱིབས་སྒོམ་པ་སོགས་དང༌། ལུས་ངག་ཡིད་གསུམ་གྱི་བྱེད་བཅིང་ཁྱད་པར་རྣམས་ནི་དཀྱིལ་འཁོར་དང༌། འབར་འཛག་ལ་སོགས་པའི་རྣམ་པ་སྒོམ་པ་ནི་སྦྱིན་སྲེག་དང༌། འོད་གསལ་བསྡུ་བ་སོགས་མཆོད་སྦྱིན་དང༌། མི་རྟོག་པ་བྱེད་བཅིང་གི་གནད་དང་ལྡན་པ་ལྟ་བུ་ནི་བསམ་གཏན་དང༌། ལྷའི་རྣམ་པ་སོགས་ནི་སྒོམ་པ་དང༌། རྡོར་བཟླས་དང་བུམ་པ་ཅན་སོགས་གཟུངས་སྔགས་དང༌། བཙན་ཐབས་ཀྱི་སྦྱོར་བས་འབྱུང་བ་ལྔའི་རླུང་དང༌། བདུད་རྩི་ལྔའི་དྭངས་མ་དགག་པ་སོགས། རྡུལ་ཚོན་དབྱེ་བ་སྟེ། དེ་དག་ལ་སོགས་པ་སྒོམ་བྱ་ཡིན་
པར་རྟོག་པར་བྱའོ། །འོ་ན་འདིར་དཔྱིད་ཀྱི་ཐིག་ལེའི་བརྒྱད་པ་དང༌། དགུ་པ་ལས་བཤད་པ་ལྟར། དཀྱིལ་འཁོར་གྱི་དེ་ཁོ་ན་ཉིད་ལ་སོགས་པ་དེ་དག་ཁོ་ན་འདིར་བསྟན་པའི་ཡིན་ནམ་སྙམ་ན། དཀྱིལ་འཁོར་ལ་སོགས་པ་ཆོས་དེ་དང་དེར་འཇོག་པའི་རྒྱུ་མཚན་གྱི་སྒོ་ནས་གནད་གཅིག་ཀྱང༌། སྟོན་ཚུལ་མི་གཅིག་ཏེ། དེར་བཤད་པ་ནི། སྔགས་རིམ་ཕན་ཆད་གྱི་ཡེ་ཤེས་ལ། དེ་དག་ཚང་ཚུལ་བཤད་པ་ཡིན་ཞིང༌། འདིར་ནི་ལས་དང་པོ་པའི་དམིགས་པའི་ཡུལ་སོ་སོ་ལ་དེ་དག་གི་མིང་བསྟན་པ་ཡིན་ནོ། །ཡང་རྣམ་པ་གཅིག་ཏུ་ན། གཏུམ་མོ་དྷུ་ཏིར་འབར་བ་ནི་སྔགས་ཡིན་པས། དེ་སྒྲུབ་བྱེད་ཀྱི་ཐབས་ནི་རྒྱུད་དེ་རྒྱུད་ཀྱི་སྦྱོར་བའམ་ཆོ་གའོ། དེ་ལྟ་བུར་བྱ་བའི་རིམ་པ་ཡིན་པས་ན་ལམ་འདི་ནི་རྒྱུད་ཀྱི་རིམ་པའོ། །ཞེས་ངེས་པར་བྱ་སྟེ། གཞུང་ལས་རྒྱུད་ཀྱི་རིམ་པའོ། །ཞེས་པ་ནི་གཞུང་གི་ས་མཚམས་བཅད་པའོ།། ༈ །གཉིས་པ་སྔགས་ཀྱི་རིམ་པ་ནི། སྲུབ་བྱ་སྲུབ་བྱེད་ཡང་དག་པར་སྦྱོར་བས། ཡེ་ཤེས་ཀྱི་མེ་ལས་ཀྱི་རླུང་གིས་སྦར་ཏེ། ལྟེ་བའི་དཀྱིལ་འཁོར་དུ་དྲོ་བ་དང༌། དུ་བ་འཐུལ་བ་དང༌། འབར་བ་དང༌། གནས་པ་དང༌། གསལ་བ་དག་གིས། དམ་ཚིག་གི་འཁོར་ལོར་སོན་པ་དག་གི་དེ་བཞིན་གཤེགས་པ་རྣམས་སྲེགས་ནས་ལོངས་སྤྱོད་ཀྱི་འཁོར་ལོར་སོན་པའི་ཐབས་ལ། སྐོར་བ་ལན་གསུམ་བྱས་ཏེ། མཛོད་པུར་སོང་ནས་གནད་འབྱེད་པའི་སྒོ་ཨོ་རྒྱན་གྱི་མིང་ཅན་ནས་བྱུང་སྟེ། འཇིག་རྟེན་གྱི་ཁམས་རྣམས་
སུ་སོན་པའི་དེ་བཞིན་གཤེགས་པ་རྣམས་ཀྱི་ཐུགས་ཀ་ནས་བསྡུས་པ་དང༌། སྤྱི་གཙུག་གི་བུ་ག་ནས་སོང་ནས། གསེར་གྱི་སྒོ་ཛཱ་ལན་དྷ་རའི་མིང་ཅན་ནས་ཞུགས་ཏེ། སྔ་མ་ལྟར་དམ་ཚིག་གི་འཁོར་ལོ་སྲེག་གོ །འབྱུང་བ་དང་འཇུག་ཡང་མི་མཐོང་སྟེ། སྐྲའི་རྩེ་མོ་བརྒྱ་སྟོང་གི་ཚད་ཀྱི་ཆའི་ཕྱིར་རོ་ཞེས་བྱའོ། །ཞེས་པ་སྟེ། དེ་ཡང་སྔགས་ཀྱི་རིམ་པ་ཞེས་པ་ལ། སྔགས་ནི་ཙཎྚ་ལི་ལྟེ་བའི་གཏུམ་མོ་སྟེ་ཇི་སྐད་དུ་སྒྲ་ནི་སྲོག་ཏུ་བརྗོད་པ་སྟེ། །འཁོར་བར་བྱེད་པ་བཟླས་པར་བརྗོད། །ཅེས་པ་ལྟར་ཡིན་ལ། རིམ་པ་ཞེས་པ་ནི་དེ་ཉིད་རྣམ་རྟོག་གི་རྩོལ་བས་བསྐྱེད་པ་དང༌། ཉམས་སྣང་དུ་ཤར་བ་ཙམ་མ་ཡིན་པར། རྡོ་རྗེའི་ལུས་ལ་དངོས་སུ་འབར་བའི་ལམ་གྱི་རིམ་པ་ཡིན་པའི་དོན་ནོ། །དེས་ན་འདི་ནི་ས་མཚམས་སུ་སྦྱར་བའི་ཚེ། སྦྱོར་ལམ་དྲོད་ཀྱི་ཕྱེད་སྔ་མའམ། འོག་མ་ཡིན་ནོ། དེ་ཡང་སྲུབ་པར་བྱ་བ་རྐྱང་མ་དང་སྲུབ་པར་བྱེད་པོ་རོ་མ་ཡང་དག་པར་སྦྱོར་བ་སྟེ། རོ་རྐྱང་གི་རྒྱུ་བ་གཅིག་ཏུ་སྒྲིལ་བའི་ནི། མཉམ་བཞག་ཏུ་རོ་རྐྱང་གི་ལམ་དེ་གཉིས་འགགས་ཏེ། དབུ་མར་ཐིམ་པའི་ཡེ་ཤེས་སྐྱེ་བར་འགྱུར་རོ། །འདི་ལ་ནི་དང་པོར་གཡས་གཡོན་འགགས་པས་སྲོག་དང་ཐུར་སེལ་བསྲེ་བ་དང༌། དང་པོར་སྲོག་ཐུར་བསྲེས་པས་གཡས་གཡོན་ཡང་འགག་པའི་རིམ་པ་གཉིས་ཡོད་པ། གང་ལྟར་ཡང་འདྲ་སྟེ། རོ་རྐྱང་བཀག་པས་དབུ་མ་རྒྱས་ལ། དེ་ལས་ཡེ་ཤེས་སྐྱེ་བ་ནི་ཆོས་ཉིད་ཡིན་ནོ། །དཔལ་དྲི་མ་མེད་པའི་འོད་ལས་ཀྱང༌།
དེ་བཞིན་སེམས་ཀྱི་འོད་གསལ་རྟོག་པ་ཡི། །སྒོམ་པའི་ཐབས་དག་གིས་ནི་མི་མཐོང་སྟེ། །དེ་ཉིད་དུས་ནི་རྐྱང་མ་དག་དང་ནི། །རོ་མ་གཅིག་ཏུ་སྦྱོར་བའི་མཐོང་བར་འགྱུར། །ཞེས་སོ། །ཡེ་ཤེས་ཀྱི་མེ་ཞེས་པ་རྗེ་བཙུན་མར་དོལ་ནི་ལྟེ་བའི་ཨཾ་ལ་འཆད་ཅིང༌། རྗེ་བཙུན་མལ་གྱི་རྗེ་འབྲངས་རྣམས། ལྟེ་འོག་གི་ཀྵ་ཡིག་ལ་འཆད་པ་སྐབས་འདིར་ཕྱེ་མ་ལྟར་འཐད་པས། རོ་རྐྱང་འགགས་པ་ལས། གསང་བ་ནས་དབུ་མའི་མས་སྣའི་བར་དུ། དབུ་མ་རྒྱས་པས་ལས་ཀྱི་རླུང་གསར་དུ་སྐྱེས་པ་དེས་དབུ་མའི་མས་སྣའི་དམར་ཆ་ཀྵ་ཡིག་ཚངས་པའི་མེ་འབར་བར་འགྱུར་ལ། ལས་ཀྱི་རླུང་དེའི་རྒྱུ་དང་ཚངས་པའི་མེ་འདྲེས་པས། ལྟེ་བའི་ཨཾ་ཡིག་གསོས་ཏེ། དྲོད་དང༌། འཕར་གཡོ་ལ་སོགས་པའི་རྟགས་དུ་མ་འབྱུང་བ་ནི། ལྟེ་བའི་དཀྱིལ་འཁོར་དུ་དྲོ་བ་དང་ཞེས་པའི་དོན་ནོ། །ལྟེ་བའི་མེ་དེ་ཅུང་ཟད་བརྟན་པར་གྱུར་པ་ན། སླར་ཡང་རིམ་གྱིས་རོ་མ་ནས་འབར་ཏེ། འཁོར་ལོ་གོང་མ་གསུམ་སྲེག་ཅིང༌། ཧཾ་གི་ཕྱི་ཤུན་ཞུ་བ་རྣམས་རྐྱང་མའི་ལམ་ནས་བབས་ཏེ་སྔར་སྲེག་པའི་འཁོར་ལོ་རྣམས་གསོས་ཤིང༌། ལྟེ་བའི་ཨཾ་ཡིག་ལ་འདུ་འཕྲོད་འབྱུང་བའོ། །དེ་དག་གི་བར་དུ་ངེས་པ་དང་མ་ངེས་པའི་རྟགས་སྣ་ཚོགས་འབྱུང་ཞིང༌། ཁྱད་པར་སྐབས་དེར་གཏུམ་མོ་འབར་བའི་སྟོབས་ཀྱིས་ཐོབ་པའི་རྟགས་ནི་དུ་བ་མཐུལ་བ་དང༌། ཞེས་པ་མཚོན་པར་བྱེད་པ་སྟེ། དུ་བ་དང་སྨིག་རྒྱུ་དང༌། སྲིན་བུ་མེ་ཁྱེར་དང༌། མར་མེ་འབར་བ་དང༌། ནམ་མཁའ་སྤྲིན་མེད་པ་ལྟ་བུ་
སྟེ་རྟགས་ལྔ་འབྱུང་བའོ། །དེ་ལྟར་དུ་བ་སོགས་ནི་རོ་རྐྱང་གི་འབར་འཛག་འབྱུང་བའི་སྐབས་ཡིན་ལ། འབར་བ་ཞེས་པ་ནི་གཏུམ་མོའི་འབར་སྣང་འབྱུང་བའོ། །གནས་པ་ནི། རླུང་གི་རྒྱུ་བ་འགགས་པའི། གཟུང་འཛིན་གྱི་སྣང་བ་ཡང་འགག་ཅིང༌། རང་རིགས་ཙམ་ལ་གནས་པའོ། །གསལ་བ་ཞེས་པ་ནི་ཇི་ལྟ་བའི་ཕྱོགས་ནས་གནས་ལུགས་ལ་གསལ་སྣང་ཅུང་ཟད་སྐྱེས་ཤིང༌། ཇི་སྙེད་པའི་ཕྱོགས་ལ། དག་པའི་སྣང་བ་སྣ་ཚོགས་པ་འཆར་བའོ། །སྐབས་འདིར་འབར་བ་སྨིག་སྒྱུ་དང༌། གནས་པ་མེ་ཁྱེར་དུ་འཆད་པ་སོགས་ནི། ཚིག་དོན་ལ་མ་ཞུགས་པ་ཡིན་ནོ། །དེ་ལྟར་རྟགས་དེ་རྣམས་དང་ལྡན་པས། གཏུམ་མོའི་མེ་ཤིན་ཏུ་ཕྲ་བ་འབར་བ་དེས། དབུ་མའི་ལམ་གྱི་སྒོ་ཕྱེ་ནས་འཇུག་སྟེ། གང་དབུ་མར་གཏུམ་མོ་འབར་ཕྱིན་ཆད་ནས། བདུན་ཁྲི་ཉིས་སྟོང་གི་རྩ་དེའི་འོད་ཀྱིས་ཁྱབ་ཅིང༌། བ་སྤུའི་ཁུང་བུ་ཐམས་ཅད་ཀྱི་བར་དུ་ཡང༌། གཏུམ་མོའི་མེ་དྲོད་འཇུག་པ་དང༌། ལྷ་དང་ལྷ་མིན་སོགས་ཀྱིས་སྒྲུབ་པ་པོ་དེ་མི་མཐོང་བ་དང༌། འབར་བ་དང༌། སྒྲ་དང༌། མཁའ་འགྲོ་མ་དང་སྲིན་པོའི་གཟུགས་སྣ་ཚོགས་ཀྱིས་མ་རུང་བ་རྣམས་ལ་སྡིག་པར་བྱེད་དོ། །དེས་ལྟེ་བའི་སྟེང་གི་རྩ་མདུད་བཅོམ་ཞིང་དབུ་མར་རིང་དུ་འབར་ཏེ། སྙིང་གའི་རྩ་མདུད་ཀྱང་གཞིག་ཅིང༌། ཆོས་ཀྱི་འཁོར་ལོ་མེས་གང་བ་ན། དེར་གནས་པའི་རླུང་ཕུང་པོ་ལྔའི་རང་བཞིན་ཅན་རྣམས་གཏུམ་མོའི་མེ་དང་འདྲེས་པར་འགག་པར་འགྱུར་ཞིང༌། དེའི་མཐུ་ལས་ཕུང་པོ་ལྔའི་རྣམ་རྟོག་ཅི་རིགས་པ་འགག །མངོན་ཤེས་ལྔ་ཅི་རིགས་པ་འཆར།
འབྱུང་བ་ལྔ་ལ་ཅུང་ཟད་དབང་བསྒྱུར་བར་ནུས། དེ་ལ་དམ་ཚིག་གི་འཁོར་ལོ་ཞེས་བྱ་བ་ནི། སྙིང་ཁ་ཆོས་ཀྱི་འཁོར་ལོ་ཡིན་ཏེ། དགྱེས་རྡོར་ལས། རྟག་ཏུ་དམ་ཚིག་ལ་སྤྱོད་ཕྱིར། །དམ་ཚིག་སེམས་དཔར་བརྗོད་པར་བྱ། །ཞེས་དམ་ཚིག་སེམས་དཔའ་ནི་ཐུགས་རྡོ་རྗེ་ཡིན་ལ། དེའི་ཕྱིར་ཐུགས་ཀྱི་འཁོར་ལོ་སྟེ་སྙིང་གའོ། །དེར་གཏུམ་མོའི་མེ་སོན་པ་དག་གིས། དེ་བཞིན་གཤེགས་པ་སྟེ་ཕུང་པོ་ལྔའི་རྣམ་རྟོག་རླུང་དང་བཅས་པ་སྲེགས་ནས། སླར་ཡང་གཏུམ་མོའི་མེ་དེ་ལོངས་སྤྱོད་ཀྱི་འཁོར་ལོ་མགྲིན་པར་སོན་པའི་ཚེ། སྔར་འབྱུང་བ་བཞིའམ་ལྔའི་རླུང་ཅུང་ཟད་འགག་བཞིན་པའི་རྒྱུན་ལ། འདིར་ཤིན་ཏུ་འགག་པར་འགྱུར་ཞིང༌། སྤྱིར་གཟུང་འཛིན་གྱི་རླུང་བཅུ་གཉིས། ལྟེ་སྙིང་མགྲིན་གསུམ་གྱི་འཁོར་ལོ་ཐམས་ཅད་ལ་གནས་པ་ཡིན་པ་ལས། སྐབས་འདིར་མགྲིན་པར་གནས་པའི་དེ་རྣམས། གཏུམ་མོའི་མེ་དང་འདྲེས་པའི་ཚུལ་གྱིས། མཉམ་བཞག་ཏུ་རྒྱུ་བ་འགག་པར་འགྱུར་ལ། ཁམས་ལྔའི་རྣམ་རྟོག་ཅི་རིགས་པ་སྤངས་པ་དང༌། དབང་ཡུལ་ཐམས་ཅད་བདེ་བའི་རྣམ་པར་ཡང་ཡང་འཆར་བ་དང༌། བདེན་ཚིག་འགྲུབ་ཅིང་ལྕེ་དང་དཔུང་པ་འཕེལ་ལ་ལུས་སྟོབས་རྒྱས་ཤིང༌། མ་སླབས་པའི་བསྟན་བཅོས་ཤེས་པ་ལ་སོགས་པ་འབྱུང་ངོ༌། །ཐབས་ལ་སྐོར་བ་ལན་གསུམ་བྱས་པའི་དོན་ནི། མགྲིན་པའི་ཨོཾ་ཡིག་དེ་ཉིད། མེའི་ཐབས་སུ་སྟོན་པའི་དོན་མ་ཡིན་གྱི། གཏུམ་མོའི་མེའི་ཐབས་ནི་སྙིང་གའི་ཐིག་ལེའོ། །ལན་གསུམ་
སྐོར་བའི་དོན་ལ། ལོ་པཎ་གོང་མ་རྣམས་མེ་ལན་གསུམ་ཟློག་པའི་དོན་དུ། བཞེད་པ་ཤིན་ཏུ་ལེགས་ཏེ་རྒྱུད་སྡེ་གཞན་ལས་ཀྱང་རྒྱས་པར་བཤད་དོ། དེས་ན་མགྲིན་པའི་འོག་ལོགས་ཀྱི་རྩ་མདུད་ལ་རིག་པའི་ཚེ། དེའི་རླན་གཤེར་དང་རླུང་གིས་ལན་གཅིག་མེ་སྟེ་ལྟེ་བའི་བར་དུ་བཟློག་པར་འགྱུར་ལ། དེ་ནས་མགྲིན་དབུས་ཀྱི་ཐིག་ལེ་དམར་པོ་ཉིད་དང་འཕྲད་པའི་ཚེ། དེའི་རླུང་ཤུགས་ཀྱིས་ལན་གཅིག་བཟློག་པ་དང༌། དེ་ནས་མགྲིན་པའི་མེ་ཡང་གསོས་ཏེ། མེ་ལྕེ་གཅིག་ཏུ་གྱུར་ནས་མགྲིན་པའི་སྟེང་གི་རྩ་མདུད་ཀྱི་སྒོ་གླེག་བཅོམ་པ་ན། སྤྱི་བོ་དང་ཉེ་བའི་རླུང་བསིལ་བ་མཐུར་དུ་བབས་པའི་ནུས་པས། སླར་ཡང་མེ་ལྕེ་ལན་གཅིག་པ་ཟློག་ཏེ་བཟློག་ཚུལ་དེ་ནི་འཁོར་བ་ལྟ་བུ་ཡིན་པས། ཐབས་སྙིང་གའི་ཐིག་ལེ་ལ་སྐོར་བ་ལན་གསུམ་བྱས། ཞེས་གསུངས་པ་ཡིན་ལ། སོན་པའི་ཐབས་ལ་ཞེས་འབྱུང་བ་ནི། ལོངས་སྤྱོད་ཀྱི་འཁོར་ལོ་གཏུམ་མོའི་མེ་སོན་པའི་གནས་སྐབས་སུ། མེ་དེ་ཉིད་རང་གི་ཐབས་ལ་སྐོར་བ་ལན་གསུམ་བྱས་ཞེས་པའི་དོན་དེ། མགྲིན་པར་གནས་པའི་ཐབས་ལ་མེས་སྐོར་བ་བྱེད་ཅེས་པའི་དོན་ནི་མ་ཡིན་ནོ། །རྒྱུད་གཞན་ལས་ནི་འཁོར་ལོ་ཐམས་ཅད་ལ་ཡང་བཟློག་པར་བཤད་དོ། དེ་ནས་མགྲིན་པའི་སྟེང་དུ་འབར་ཏེ། རོ་མས་བསྡུས་པའི་རྩ་རྣམས་མེ་འོད་ཀྱི་གང་བས་ནང་དུ་གནས་པའི་ཐིག་ལེ་མང་པོ་ཕྱིར་གཡོ་བ་དང༌། རྐྱང་མས་བསྡུས་པའི་རྩ་རྣམས་གང་བས། ཕྱིའི་ཐིག་ལེ་རྣམས་ནང་དུ་འདུ་བར་འགྱུར་ལ། དེ་
གཉིས་ལ་རིམ་པ་བཞིན་གསལ་བ་དང༌། སྟོང་པའི་ཉམས་མཐའ་དབུས་མེད་པ་འབྱུང་ངོ༌། །འབར་བ་སྤྱི་བོར་ཕྱིན་པ་ན། ཧཾ་ཡིག་གི་སྙིང་པོ་ཅུང་ཟད་ཞུ་ཡང་སྟོབས་ཆུང་བས་འཛག་པར་མི་ནུས་ཏེ། གཏུམ་མོའི་མེ་གྱེན་དུ་འབར་བའི་ཤུགས་ཀྱང་དེ་མཚམས་ནས་ལོགས་ཏེ། དབུ་མ་ཉིད་ཀྱི་ཡལ་ག་ཁ་འཕྲེད་ལྟས་ཞིག་གི་ནང་ནས་ཚུར་འཁྱོགས་ཏེ། མཛོད་སྤུ་སྟེ་སྨིན་འཚམས་སུ་སོང་ནས། གནད་འབྱེད་པའི་སྒོ་ཞེས་བྱ་བ། ཡལ་གའི་རྩ་དེ་ཉིད་ཀྱི་རྩེ་མོ་ལ། རྩ་འདབ་དྲུག་པའི་འཁོར་ལོ་ཞིག་གནས་པ་དེའི་ལྟེ་བའི་རྩ་མདུད་ཕྱེ་སྟེ་འགྲོ་བ་ཡིན་ལ། སྒོ་དེ་ནས་གཏུམ་མོ་སོང་བ་ནི། རྩ་སྟོང་ཕྲག་བདུན་ཅུ་རྩ་གཉིས་ཀྱི་ཁོང་སྟོང་ཐམས་ཅད་དུ་རྒྱུ་བའི་ལམ་དང་འབྲེལ་བ་ཡིན་པས། རྩ་སྦུགས་སྟོང་པ་རྣམས་ནི། གཏུམ་མོ་དང་རླུང་འཕུར་ཞིང་འགྲོ་བའི་གནས་ཡིན་ལ། དེར་འཇུག་པའི་སྒོ་ཡིན་པའི་སྨིན་མཚམས་གནད་ཀྱི་སྒོ་ལ་ཨོ་ཊི་ཡ་ན་ཞེས་མིང་བཏགས་པ་སྟེ། ཨོ་ཊི་ཡ་ན་ཞེས་པ་བོད་སྐད་དུ་སྒྱུར་བ་ནི་འཕུར་འགྲོ་ཞེས་པ་ཡིན་ནོ། །དོན་འདི་བཞིན་མ་གོ་བར། ཨོ་རྒྱན་རྣ་བ་གཡས་པའི་མིང་ཡིན་བསམ་ནས། གཏུམ་མོའི་མེ་རྣ་བ་གཡས་པ་ནས་སྤྲོ་བར་འདོད་པ་སོགས་ནི་གད་མོའི་གནས་སོ། །འཇིག་རྟེན་གྱི་ཁམས་ཏེ། ལུས་ཀྱི་ཆ་ཐམས་ཅད་དུ་སོན་ཞིང་གནས་པའི་དེ་བཞིན་གཤེགས་པ་སྟེ། ཕུང་ཁམས་སྐྱེ་མཆེད་ཀྱི་རྩ་རླུང་ཁམས་རྣམས་གཏུམ་མོའི་མེས་ཁྱབ་ཅིང༌། དེ་རྣམས་ཞུ་བས་སྙིགས་མའི་ཆ་རྣམས་འབྲིད་པར་བྱེད་ཅིང༌། དྭངས་མའི་ཆ་རྣམས་རྒྱས་པར་
གྱུར་པ། རྩའི་ལམ་གཅིག་ནས་གཅིག་ཏུ་རྒྱུད་ཅིང༌། །མཐར་སྤྱི་གཙུག་གི་གནས་དབུ་མའི་ཡས་སྣའི་སྒོར་འདུས་པ་ནི། ཐུགས་ཀ་ནས་བསྡུས་པའི་དོན་ཏེ། དེ་ནས་སྤྱི་གཙུག་ཚངས་པའི་བུ་ག་ལས། །ནང་དུ་འོང་བའི་རླུང་གི་ཁམས་དེ་དག་རྒྱས་ཤིང་དྭངས་མར་ཡང་བྱེད་ལ། །ཚངས་བུག་ནས་སྤྱི་བོའི་འཁོར་ལོའི་ལྟེ་བའི་གནས་ཀྱི་བར་ནི། གསེར་གྱི་སྒོའམ་ཛ་ལན་དྷ་རའི་མིང་ཅན་ཏེ། དེ་ནས་ཞུགས་ཏེ་རྩ་འདབ་སོ་གཉིས་ནས་བབས་ཤིང་རྒྱས་པར་གྱུར་པའི་ཐིག་ལེ་དང་འདྲེས་པ་རྣམས། ཧཾ་ཡིག་ལ་འདྲེས་པ་ན། སྔར་ཅུང་ཟད་ཞུ་བ། རྒྱབ་དཔུང་སྟོབས་དང་ལྡན་པར་གྱུར་ནས། སྔོན་ཇི་ལྟར་སྲེག་པའི་རིམ་པ་ལྟར་འོངས་པ་སྟཻ། ཧཾ་ཞུ་བའི་བྱང་ཆུབ་ཀྱི་སེམས་དབུ་མའི་ལམ་ནས་འོང་ཞིང༌། འཁོར་ལོ་སོ་སོའི་མདུད་པའི་ལམ་ནས་བབས་ཏེ། སྔར་གཏུམ་མོའི་མེས་སྲེག་པ་རྣམས་གསོ་བའི་ཚུལ་དང༌། མགྲིན་པ་དང་སྙིང་གའི་ཐིག་ལེ་ཞུ་བ་དང་ཡང་འདྲེས་ནས། ལྟེ་བར་དཔྱིད་ཐིག་ཁ་སྦྱོར་དུ་འགྱུར་ལ། ཡང་དམ་ཚིག་གི་འཁོར་ལོ་སྲེག་པ་སོགས་སྔོན་བཞིན་དུ་འབར་འཛག་ཐུན་དང་ཐུན་ལ་རྟག་ཏུ་འབྱུང་བར་འགྱུར་རོ། །དེ་ལྟར་དབུ་མར་དཔྱིད་ཐིག་ཁ་སྦྱོར་དུ་གྱུར་པའི་སྐབས་ནི། སྤྱིར་རྟགས་ལྔ་ལ་སོགས་པས་བསྡུས་པའི་སྣང་བ་སྣ་ཚོགས་པ་དང༌། ཁྱད་པར་ལྷའི་འཁོར་ལོ་རབ་འབྱམས་འབྱུང་བར་འགྱུར་རོ། །དེ་ལ་སྲེག་པའི་དོན་ནི་དེ་དང་གཏུམ་མོས་ཁྱབ་པ་དྲོད་ཀྱི་རང་བཞིན་དུ་གྱུར་པ་དང༌། ཁམས་སྙིགས་མ་རྣམས་ཅུང་ཟད་ཅུང་ཟད་བྲི་བའི་དོན་དེ་ཉམས་སྐྱོན་ཡོན་འདྲེས་མའམ།
བདེ་སྡུག་སྤེལ་མར་འབྱུང་བ་ཡིན་ལ། བསོས་པའི་དོན་ནི་ཧཾ་གི་ཟེགས་མས་ཁྱབ་པས་སྙིགས་མ་རྣམས་བྲི་བའི་ཤུལ་དུ་དྭངས་མ་རྒྱས་ཤིང་བདེ་བ་དང༌། ཡོན་ཏན་འབའ་ཞིག་སྐྱེས་པའོ། །འདིར་འཇུག་པ་དང་འབྱུང་བ་ཞེས་པ་ལ། སྔ་མ་རྣམས་འབར་འཛག་གི་དོན་ལ་འཆད་ཀྱང༌། རླུང་འགྲོ་འོང་ལ་བཤད་ན་ལེགས་ཏེ། དེས་ན་མཉམ་བཞག་ཏུ་རོ་རྐྱང་གི་རླུང་འཇུག་པ་དང༌། འབྱུང་བ་འགགས་པས་མངོན་གྱུར་དུ་མཐོང་བ་མེད་དོ། །ད་དུང་གཉིས་སྣང་ཕྲ་མོ་འབྱུང་བའི་རྒྱུ། རོ་རྐྱང་གི་རྒྱུ་བ་ཕྲ་མོ་ཡོད་མོད་ཀྱང༌། སྐྲའི་རྩེ་མོ་བརྒྱ་སྟོང་གི་ཚད་ལྟར་ཤིན་ཏུ་ཕྲ་བའི་ཕྱིར་མི་མངོན་ཞེས་བྱའོ། །སྔགས་ཀྱི་རིམ་པ་ཞེས་པ་ནི་གཞུང་གི་ས་མཚམས་བཅད་པའོ། །གསུམ་པ་ཡེ་ཤེས་ཀྱི་རིམ་པ་ནི། དེ་ནས་དེ་བཞིན་གཤེགས་པ་རྣམས་ཀྱི་ཐུགས་ཀར་སོན་ནས་དམ་ཚིག་གི་འཁོར་ལོ་ལ་བསྡུས་ཏེ། ཆོས་ཀྱི་དབྱིངས་ཡེ་ཤེས་བདུད་རྩི་བླངས་ནས་སྔར་གསུང་བའི་སྒོ་ནས་འབྱུང་སྟེ། འོ་མའི་རྒྱུན་ལྟར་འོངས་ནས་སྒོ་དེ་ཉིད་དུ་ཞུགས་ཏེ། སོའི་མཚམས་ཀྱི་ནང་དུ་སོན་པའི་བུ་ག་ནས། ལོངས་སྤྱོད་ཀྱྀ་འཁོར་ལོར་ངལ་བསོ་སྟེ། བསྲེགས་པའི་དེ་བཞིན་གཤེགས་པ་དག་དམ་ཚིག་གི་འཁོར་ལོར་སོན་པ་རྣམས་ལ་དགའ་བསྐྱེད་ནས་ལྟེ་བའི་དཀྱིལ་འཁོར་དུ་གནས་པ་ཡིན་ནོ། །འདིར་ཡང་འགྱུར་བ་དང༌། འགྲོ་བ་དང༌། འོང་བ་ནི་མི་མཐོང་སྟེ། སྐྲའི་རྩེ་མོ་བརྒྱ་སྟོང་གི་ཆའི་ཕྱིར་རོ། །ཞེས་བྱའོ་ཡེ་ཤེས་ཀྱི་རིམ་པའོ། །དེ་ལ་ཡེ་ཤེས་རིམ་པ་ཞེས་པའི་ཡེ་ཤེས་ནི། ལམ་གྱི་དགའ་བ་བཞི་ཡིན་པ་ལས། །འདིའི་
ཁྱད་པར་གྱི་དོན་དུ། ཡས་བབས་ཀྱི་དགའ་བའི་ས་བཞི་བཟུང་ངོ༌། །དེ་ལྟར་བུ་ཐོབ་པར་བྱེད་པའི་ཐབས་ནི་རིམ་པའོ། །དེ་ཡང་གཏུམ་མོ་དབུ་མའི་ནང་དུ་ཐོག་མར་འབར་བ་ནས། གཏུམ་མོ་སྨིན་འཚམས་སུ་སླེབ་ཀྱི་བར་ལ། །ལམ་གྱི་ཡོན་ཏན་ཆེ་ཆུང་གི་ཁྱད་པར་མི་འདྲ་བ་དང་ལྡན་པའི་སའི་རིམ་པ་བཞིའམ་ལྔ་འབྱུང་བ་ནི། བརྩོན་འགྲུས་དང་ལྡན་པའི་ལོ་ཙམ་གྱིས་རྫོགས་པར་འགྱུར་བ་ཡིན་ལ། དེ་དག་ལ་གཏུམ་མོ་འབར་བའི་ས་ཞེས་ཐ་སྙད་འཇོག་ཀྱང༌། དེ་ནས་བྱང་ཆུབ་ཀྱི་སེམས་སྤྱི་བོར་འདུས་ཀྱི་བར་ནི། དེ་བཞིན་གཤེགས་པའི་རྒྱུད་ལ་འགྲོ་འོང་བྱེད་པ་སྟེ། དེ་སྐབས་སྔར་གྱི་ལམ་ལས་འཁོར་ལོ་བཞིར་བྱང་ཆུབ་ཀྱི་སེམས་འོང་བ་ན། དགའ་བ་བཞི་སྐྱེ་བ་ཡང༌། སྐད་ཅིག་ལ་སྐྱེ་ཞིང་སྐད་ཅིག་ལ་འགག་པ་ཡིན་པའི་ཕྱིར་དང༌། དགའ་བ་བཞིའི་ཡོན་ཏན་རྣམས་མ་ཐོབ་པའི་ཕྱིར། དགའ་བའི་ས་ཞེས་མི་བྱའོ། །དེ་ནས་སྔགས་རིམ་ཕྱི་མཇུག་ཏུ། གཏུམ་མོ་འབར་འཛག་དེ་སྐད་ཅིག་སྐད་ཅིག་ལ་ཡང་ཡང་སྒོམ་པས་ནམ་ཞིག་ན་ནུས་པ་སྨིན་ཏེ། ཐིག་ལེའི་ཡོན་ཏན་གྱི་རིམ་པ་ཆེ་བ་རེ་རྒྱུད་ལ་སྐྱེས་པ་ན་ཡེ་ཤེས་ཀྱི་རིམ་པའི་ས་ཞེས་བྱའོ། །འདིར་ཡང་དེ་བཞིན་གཤེགས་པའི་རྒྱུད་ལ་འགྲོ་འོང་བཤད་པ་ནི། དེ་བཞིན་གཤེགས་པའི་རྒྱུད་ཀྱི་འགྲོ་འོང་ཡང་ཡང་ཤིན་ཏུ་གོམ་པ་ལས་ཡེ་ཤེས་ཀྱི་རིམ་པ་རྒྱུད་ལ་སྐྱེ་བའི་དོན་ཡིན་གྱི་སྔར་གྱི་དེ་ལ་བསྐྱར་བཟློས་བྱས་པ་མིན་ནོ། །དེ་ཡང་སྔགས་རིམ་ལ་བརྩོན་པར་བསྒོམས་པ་དེ་ནས། དེ་བཞིན་གཤེགས་པ་དེ། ཕུང་ཁམས་སྐྱེ་མཆེད་ཀྱི་རྩ་རླུང་ཐིག་ལེ་
རྣམས་ཀྱི་ཐུགས་ཀར་སོན་པ་ཞེས་པ་ནི། ནང་གི་དྭངས་བཅུད་རྣམས་གཏུམ་མོ་མེ་འོད་དེ་རྣམས་ཀྱི་ནང་དུ་སོང་བས། རྩ་སོགས་དེ་རྣམས་ཀྱི་དམ་ཚིག་གི་འཁོར་ལོའམ་སྙིང་ག་ནས་བསྡུས་པ་ནི་ནང་ནས་བསྡུས་པའི་དོན་ཏེ། ཆོས་ཀྱི་དབྱིངས་ཞེས་པ་ནི། ཆོས་རྩ་རླུང་ཐིག་ལེ་རྣམས་ཀྱི་དབྱིངས་དྭངས་མའི་མཆོག །རྩ་ཡིག་གི་བདུད་རྩི་བླངས་ནས་ཏེ་འདྲེས་པའི་དོན་ནོ། །སྔར་གསུངས་པའི་སྒོ་སྤྱི་བོ་ནས་ཡོངས་སུ་འོངས་ཏེ། ཇི་ལྟར་འོངས་ན་དཀར་ཞིང་བདེ་བ་འོ་མའི་རྒྱུན་ལྟ་བུར་ཚངས་བུག་ནས་འཁོར་བ་སྒོ་དེ་ཉིད་དེ། དབུ་མའི་ལམ་ནས་ཞུགས་ཤིང༌། བདེ་བ་ཆེན་པོའི་འཁོར་ལོ་གང༌། དེ་ལྟར་ཉིན་ཞག་མང་པོའི་སྦྱོར་བས་རིམ་གྱི་དབུ་མའི་རྒྱུན་ནས། མགྲིན་པའི་འཁོར་ལོ་གང་ཞིང་དེ་གོམས་ཤིང་བརྟན་པ་ན། དེ་ཡན་ཆད་ཀྱི་ཞུ་བདེའི་ཐིག་ལེ་ལ་དབང་འབྱོར་བའི་ཡས་བབས་ཀྱི་དགའ་བའི་ས་དང་པོ་ཡིན་ལ། དེའི་ཚེ་རིགས་སྔགས་མཐའ་དག་འགྲུབ་པ་དང༌། འགྲོ་བ་ཐམས་ཅད་དབང་དུ་བསྡུ་བ་དང༌། སྐད་ཐམས་ཅད་ཤེས་ཤིང༌། དེ་དག་ཏུ་ཆོས་སྟོན་པ་དང༌། ངག་གི་དབང་ཕྱུག་ཅི་རིགས་པ་འགྲུབ་པར་འགྱུར་རོ། །སོའི་མཚམས་ཀྱི་ནང་དུ་སོན་པ་ཞེས་པ་ལ། །རྒྱ་བོད་ཀྱི་འགྲེལ་པ་ཕལ་ཆེར་ན། སོ་ཞེས་པ་སུམ་ཅུ་སོ་གཉིས་ཀྱི་བརྡའ་ཐབས་ཡིན་པས། དོན་སྤྱི་བོར་འདོད་པ་དང༌། ཁ་ཅིག་སོ་དེ་རོ་རྐྱང་གཉིས་ཀྱི་མཚམས་དབུ་མ་ནས་ཞེས་འཆད་ཀྱང༌། སོའི་མཚམས་ཀྱི་ནང་ནི། བྱང་ཆུབ་ཀྱི་སེམས་ཀྱིས་ཡས་སོའི་མཚམས་
ཡན་ཆད་གང་བས། དེའི་ནང་དུ་སོན་པའི་ལྕེའུ་ཆུང་ཁྱབ་པ་དང༌། དེ་ལས་ལྕེ་སྟེང་དུ་བདུད་རྩི་འཛག་ཅིང༌། དེ་ལས་རྒྱུད་ནས། མགྲིན་པ་ལོངས་སྤྱོད་ཀྱི་འཁོར་ལོར་ངལ་བསོ་ཞིང་བརྟན་པར་འགྱུར་བའི་དོན་ཡིན་པས། མཆོག་ཡོན་ཏན་སྐྱེད་པའི་ཐིག་ལེ་ནི་དབུ་མ་ནས་འགྲོ་ཞིང༌། ཡོན་ཏན་གྱི་ཁྱད་པར་གཞན་སྐྱེད་པ་ནི། ལྕེའུ་ཆུང་ནས་འབྱུང་བའི་དོན་ཡིན་ནོ། །དེ་ནས་ཡུན་རིང་དུ་གོམས་པ་ལས་དབུ་མའི་ལམ་ནས་རྒྱུད་དེ། སྙིང་གར་གོམས་པ་བརྟན་པར་གྱུར་པས་ནི། སྔར་བསྲེགས་པའི་དེ་བཞིན་གཤེགས་པ་སྟེ། ཕུང་པོ་ལྔའི་རྩ་དང་རླུང་ཁམས་སྙིང་ཁ་དམ་ཚིག་གི་འཁོར་ལོར་སོན་ཞིང་གནས་པ་རྣམས་ཀྱི་དྭངས་མའི་ཆ་ཡོན་ཏན་སྐྱེད་བྱེད་རྣམས། རྒྱས་པ་ནི་དགའ་བ་སྐྱེད་པ་སྟེ་མཆོག་དགའི་ས་ཐོབ་པ་ཡིན་ལ། དེའི་ཚེ་མཉམ་བཞག་ཏུ་སྟོང་པ་ཉིད་ཀྱི་ཏིང་ངེ་འཛིན་ཤིན་ཏུ་བརྟན། རྗེས་ཐོབ་ཏུ་སྒྱུ་མ་ལྟར་འཆར། སྙིང་རྗེ་ཆེན་པོ་འགྲུབ། རྟེན་འབྲེལ་སྣ་ཚོགས་པ་ཤེས་པར་འགྱུར་རོ། །ལྟེ་བའི་དཀྱིལ་འཁོར་དུ་ཞེས་པ་ནི། ལྟེ་བ་མན་ཆད་ཀྱི་དཀྱིལ་འཁོར་དུ་ཞེས་པའི་དོན་ཡིན་པས། ལྟེ་བ་ནས་ནོར་བུའི་བར་ཡན་ཆད་ཐམས་ཅད་བཟུང་ངོ༌། །དེ་ཡང་སྙིང་གའི་མས་སྣ་ནས་རྩམས་ཏེ། དབུ་མའི་ནང་དུ་རིམ་གྱིས་བསྟན་ཞིང་གང་བ་ལས། དུས་རིང་ཞིག་ན་སྤྲུལ་པའི་འཁོར་ལོ་གང་ཞིང་བརྟན་པ་ན་ཁྱད་དགའི་ས་ཐོབ་པ་ཡིན་ཏེ། འདོད་ཡོན་ཐམས་ཅད་ཡེ་ཤེས་སུ་འཆར་བ་དང༌། ལྷའི་མཆོག་ལས་སྐྱེས་པ་སོགས། བུད་མེད་མཐུ་ཅན་རྣམས་ཀྱི་འདུ་བ་ཐོབ་པར་འགྱུར་བ་དང༌། འོད་འཕྲོ་བ་དང་ཅིག་ཅར་
ལུས་མང་པོར་སྟོན་ཞིང་བསྡུད་པ་སོགས་ཐོབ་པར་འགྱུར་རོ། །དེ་ནས་ཡང་རིམ་གྱིས་གང་སྟེ། དུས་གཞན་ཞིག་ཏུ་ནོར་བུའམ། གསང་བའི་འཁོར་ལོ་ཡན་ཆད་གང་ཞིང་བསྟན་པས། ནང་གི་བདེ་བ་རྒྱུན་མི་འཆད་པ་དང༌། འབྱུང་བ་དང་སེམས་ཅན་གྱི་གནོད་པའི་མི་ཚུགས་པ་དང༌། གདུག་པ་ཅན་ཕལ་ཆེར་ཟིལ་གྱིས་གནོན་པར་ནུས་པ་དང༌། ས་ཆུ་མེ་རླུང་ནམ་མཁའ་དང་འབྲེལ་བའི་ཆོ་འཕྲུལ་མང་པོ་སྟོན་པར་ནུས་ཏེ། ཡས་བབས་ཀྱི་ལྷན་ཅིག་སྐྱེས་པའི་སའོ། །ལྷན་སྐྱེས་ཀྱི་ས་འདིའི་མཐར་གཏུམ་མོ་དང་ཐིག་ལེ་འདྲེས་པའི་ལྷར་སྣང་མང་པོ་ཞིག་མས་བརྟན་བཅུ་དྲུག་གི་སྐབས་སུ་འབྱུང་བའི། རྐྱེན་བྱས་ཏེ་ཡེ་ཤེས་ཀྱི་སྐུ་འགྲུབ་པ་དང༌། རྗེས་དྲན་བཅུ་དྲུག་ཐོབ་པ་ཞེས་བྱ་ལ། འོན་ཀྱང་རྗེས་དྲན་གྱི་ས་ཐོབ་པ་ནི་མ་ཡིན་ནོ། །ཡེ་ཤེས་ཀྱི་རིམ་པའི་དུས་འདིར་ཡང་རླུང་དང་སེམས་ཀྱི་འཇུག་པ་འབྱུང་བ་སྟེ་གནས་པ་དང༌། །འགག་པ་འགྲོ་བ་དང༌། སྐྱེ་བ་འོང་བ་རྣམས་མཉམ་བཞག་ཏུ་ཡང་ཕྲ་མོ་ཙམ་ཡོད་མོད་ཀྱི། རང་གི་མྱོང་བས་མཐོང་བ་ནི་མ་ཡིན་ཏེ། །སྐྲའི་རྩེ་མོ་བརྒྱ་སྟོང་གི་ཆ་ལྟར་ཕྲ་བས་འགག་པ་ལྟར་སྣང་བའི་ཕྱིར་རོ། །ཡེ་ཤེས་ཀྱི་རིམ་པའོ། །ཞེས་པ་ནི་གཞུང་གི་ས་མཚམས་བཅད་པའོ། །དེ་ལྟར་སྔགས་རིམ་དང་ཡེ་ཤེས་ཀྱི་རིམ་པའི་གཞུང་འདི་དག་མངོན་བརྗོད་བླ་མའི་རྒྱུད་ཚིག་ཉིད་དྲངས་པ་ཡིན་ཞིང༌། དེ་བཞིན་གཤེགས་པས་བརྡའི་ཚུལ་གྱིས། ཕྲ་ཐིག་གི་རྣལ་འབྱོར་སྟོན་པ་ལྟར་མཛད་ནས། དོན་རྫོགས་པའི་རིམ་པའི་ལམ་གྱི་ཉམས་མྱོང་གི་རིམ་པ་གསལ་བར་
བསྟན་པ་ཡིན་ལ། འདིའི་དངོས་བསྟན་ལ་འཁྲུལ་ནས། ཕྲ་ཐིག་ཙམ་གཞུང་འདིའི་དགོངས་པར་སྨྲ་བ་ནི། སོར་མོའི་རྩེ་མོས་བསྟན་པ་ན། །ནམ་མཁའ་མཐོང་ཞེས་བླུན་པོ་འཁྲུལ། །ཞེས་པ་ལྟར་འགྱུར་བ་དང༌། དེ་ལྟ་བུ་ལ་སྔགས་དང་ཡེ་ཤེས་ཀྱི་རིམ་པ་ཐ་དད་དུ་འཆད་པ་ཡང་མི་འཐད་དེ། དུས་གཅིག་ལ་སྒོམ་རྒྱུའི་དམིགས་པ་གཅིག་ཉིད་ཡིན་པའི་ཕྱིར་རོ། །ཡེ་ཤེས་ཀྱི་རིམ་པས་ས་བཞི་པོ་འདི་ནི། ས་མཚམས་ཀྱི་དབང་དུ་བྱས་ན། སྦྱོར་ལམ་དྲོད་ཆུང་ངུ་དང༌། འབྲིང་དང༌། ཆེན་པོ་དང༌། མཆོག་རྣམས་ལ་རིམ་པས་བཞག་གོ། དེ་ལྟར་ན་སྔགས་དང་ཡེ་ཤེས་ཀྱི་རིམ་པའི་སྐབས་འདི་དག་ལ། གཏུམ་མོ་འབར་བ་དང༌། ཐིག་ལེ་ཞུ་བ་དང༌། ཐིག་ལེ་བརྟན་པའི་རིམ་པ་སོགས་རྣལ་འབྱོར་པའི་ལུས་ངག་ཡིད་གསུམ་ལ། རིམ་པས་དངོས་སུ་འབྱུང་ཚུལ་སྟོན་པ་ཡིན་གྱི། དེ་དང་འདྲ་བའི་དམིགས་པ་བསྒོམ་ཚུལ་གཅིག་ཁོ་ན་སྟོན་པ་ཡིན་པས། །འདི་དག་ཐོབ་པའི་རྒྱུ་ཡང༌། འབར་འཛག་ཁོ་ན་སྒོམ་དགོས་པ་མིན་གྱི། རང་ལུས་ཐབས་ལྡན་ནམ། གཞན་ལུས་ཤེས་རབ་བམ། ཤིན་ཏུ་རྣལ་འབྱོར་ལ་སོགས་པ་གང་སྒོམ་ཀྱང་འདྲ་བ་ཡིན་ནོ། །བཞི་པ་གསང་བའི་རིམ་པ་འབྲས་བུར་བཅས་པ་བཤད་པ་ལ། གསང་རིམ་འབྲས་བུ་དང་བཅས་པ་ངོས་བཟུང་བ་དང༌། དེ་ཉིད་ལུང་དང་སྦྱར་བའོ། །དང་པོ་ནི། དེ་ནི་སྔགས་དང་རྒྱུད་དང་ཡེ་ཤེས་སྤངས་པ། སྒོ་གཉིས་འགག་པ། །འགྲོ་འོང་ལས་རྣམ་པར་གྲོལ་བ། ཕུང་པོ་དང༌། ཁམས་དང་སྐྱེ་མཆེད་དང་བྲལ་བ། ཡུལ་རྣམས་ལས་ངེས་པར་
འདས་པ། །མུན་ནག་སྟུག་པོ་ལ་ནོར་བུ་ཆུ་ཤེལ་ལྟར་འོད་གསལ་བ། རྡུལ་དང་བྲལ་བ། སྟོང་པའི་མཆོགམཚན་མ་མེད་པ། སྨོན་པ་མེད་པའི་ཡེ་ཤེས། རང་གཞན་རིག་པ་དང་བྲལ་བ། མཆོག་ཏུ་ཞི་བ། འདོད་ཆགས་དང་ཆགས་བྲལ་འདྲེས་པ། མར་ལ་མར་བཞག་པ་ལྟར་མྱ་ངན་ལས་འདས་པ་བདག་མེད་པའི་བྱང་ཆུབ་ཀྱི་སེམས་ཏེ། ཞེས་པའོ། །དེ་ལ་གསང་བ་ཞེས་བྱ་བ་ནི། ཀུན་རྫོབ་ཀུན་ནས་ལྟ་བུའི་བྱང་ཆུབ་ཀྱི་སེམས་དང༌། དོན་དམ་བདེ་སྟོང་གི་ཡེ་ཤེས་དབྱེར་མེད་རོ་གཅིག་ཏུ་འདྲེས་པའི་མིང་ཡིན་ལ། འདྲེས་པའི་དོན་དེ་ཡང་ཀུན་རྫོབ་དེ་དོན་དམ་གྱི་དབྱིངས་སུ་ཐིམ་པ་ལ་འཆད་དགོས་ཤིང༌། དང་པོ་ཆ་ཤས་ཕྲ་མོ་འདྲེས་པ་ནས་རྩམས་ཏེ། མཐར་ཡོངས་སུ་རྫོགས་པར་འདྲེས་ཀྱི་བར་དུ་བྱང་ཆུབ་ཀྱི་སེམས་གཉིས་བསྲེ་བའི་ཐབས་ལ་ནི། དེའི་རིམ་པ་ཞེས་བྱ་བ་དང༌། ཡོངས་སུ་རྫོགས་པར་འདྲེས་ཟིན་པ་ཕན་ཆད་གསང་རིམ་གྱི་འབྲས་བུ་གསང་བ་ཆེན་པོ་ཞེས་བྱ་ཞིང༌། སྐབས་འདིར་པཎྜི་ཏ་ག་ཡ་དྷ་རའི་མན་ངག་གི་བཤད་རྒྱུན། འབྲོག་འགོས་རྗེས་འབྲང་དང་བཅས་པ་ནི། གཉིས་སུ་མེད་པའི་རིམ་པ་ཞེས་ཐ་སྙད་མཛད་ན། གཉིས་སུ་མེད་པ་ནི་ཟུང་འཇུག་གི་དོན་ཡིན་པས་ཤིན་ཏུ་ལེགས་མོད། རིམ་པ་ལྔ་པའི་ཐ་སྙད་ནི་མི་བྱ་སྟེ། རིམ་བཞིར་ཀུན་ཏུ་གྲགས་པས་གནོད་པར་འགྱུར་བའི་ཕྱིར་རོ། །དེས་ན་ལམ་ནི་རིམ་པ་བཞི་ཡིན་ལ། གཉིས་སུ་མེད་པ་ནི་འབྲས་བུར་བསྡུའོ། །ཞེས་བརྗོད་ན་ནི་ཤིན་ཏུ་ལེགས་པོར་འགྱུར་རོ། །འདི་ལ་དགའ་བའི་ས་བཞིའམ་བཅུ་དྲུག་སྟེ། དེ་ཡང་བྱང་ཆུབ་སེམས་ཀྱི་བགྲོད་པ། མས་
བརྟན་གྱི་ཚུལ་གྱིས་ནོར་བུ་ནས་ལྟེ་བའི་བར་དུ་གང་ཞིག་བརྟན་པ་ནི། མས་བརྟན་གྱི་དགའ་བའི་ས་སྟེ། ལུས་ཀྱི་བཀོད་པ་མང་པོ་ཅིག་ཅར་སྤྲུལ་པ་ལ་སྔ་མ་ཡེ་རིམ་གྱི་དུས་ལས་ཆེས་ལྷག་པར་འགྱུར་བ་དང༌། ཚེ་དང་སྟོབས་དང་འགྱོགས་པ་ལ་སོགས་པའི་ཡོན་ཏན་དང༌། རྒ་ཤི་ཟིལ་གྱིས་མི་གནོན་པ་ལ་སོགས་པ་འབྱུང་ངོ༌། །ལྟེ་བ་ནས་སྙིང་གའི་བར་དུ་བརྟན་པ་ནི། མཆོག་དགའི་ས་སྟེ། སྟོང་གསུམ་མང་པོ་ཅིག་ཅར་མཐོང་བའི་མངོན་ཤེས་ལྔ་དང༌། དུག་ལྔ་མངོན་གྱུར་གཏན་ནས་འགག་པ་དང༌། དེའི་དོད་དུ་ཉོན་མོངས་དང་རྣམ་པ་འདྲ་ཆོས་ཅུང་ཟད་ཡོད་པའི། ཡེ་ཤེས་རིགས་ལྔ་ལ་བརྟེན་ནས་སེམས་ཅན་གྱི་དོན། རྒྱ་ཆེར་སྤྱོད་ནུས་པར་འགྱུར་རོ། །སྙིང་གའི་ཡ་མཐའ་ནས་མགྲིན་པའི་འཁོར་ལོའི་བར་གང་བ་ནི། ཁྱད་པར་གྱི་དགའ་བའི་ས་སྟེ། མི་བརྗེད་པའི་གཟུང་ཐོབ་པ་དང༌། སངས་རྒྱས་རྣམས་ལས་ཅིག་ཅར་ཆོས་ཐོས་པ་དང༌། བརྟན་གཡོ་ཐམས་ཅད་ལས་ཆོས་ཀྱི་སྒྲ་རྟག་ཏུ་འབྱུང་བ་དང༌། རིགས་སྔགས་མང་པོ་གསར་དུ་བྱེད་ནུས་པ་དང༌། ངག་ཚིག་ལས་སེམས་ཅན་མང་པོ་བསམ་པ་དང་མཐུན་པའི་ཆོས་དུ་མ་འབྱུང་བ་སོགས་ཀྱི་ཡོན་ཏན་ཐོབ་བོ། །དེའི་རྗེས་སུ་མགྲིན་པའི་ཡ་མཐའ་ནས་གཙུག་ཏོར་གྱི་བར་དུ་བརྟན་པས། སྣང་བ་ཐམས་ཅད་དཀྱིལ་འཁོར་དུ་ཅིག་ཅར་སྣང་བ་དང༌། སངས་རྒྱས་མང་པོ་ཅིག་ཅར་མཐོང་ཞིང་མཆོད་པའི་འབྱོར་བ་རྒྱས་པ་དང༌། མཉམ་བཞག་ཏུ་ངར་འཛིན་པ་དང་བདེན་འཛིན་མངོན་འགྱུར་པ་ཟད་ཅིང༌། ཏིང་ངེ་འཛིན་མི་འདྲ་བ་དུ་མ་རང་ཤུགས་སུ་ཐོབ་པ་སྟེ། མས་བརྟན་གྱི་ལྷན་
ཅིག་སྐྱེས་པའི་སའོ། །དེ་དག་ལ་ནང་ཚན་བཞི་བཞིས་ཕྱེ་བས། མས་བརྟན་རྗེས་དྲན་བཅུ་དྲུག་གི་ས་ཞེས་བྱ་བ་ཡིན་ཏེ། འདི་ཐམས་ཅད་ལ་རྒྱུ་རྩ་མང་དུ་གནས་པའི་བྱང་ཆུབ་ཀྱི་སེམས་དྭངས་མ་གཙོ་བོར་གྱུར་པའི། རྩ་ཁམས་རླུང་སྣ་ཚོགས་པ་དག་གི་ཆ་ཤས་རེ་ནས། དབུ་མའི་ལམ་དུ་ཞུགས་ཤིང༌། འབྱུང་ལུས་ཀྱི་དངོས་པོ་ཆ་ཤས་རེ་ནམ་མཁའ་ལ་སྤྲིན་ཡལ་བ་ལྟར་ངེས་ནས། དེའི་དོད་དུ་ཡེ་ཤེས་ཀྱི་རང་བཞིན་གྱི་རྩ་རླུང་ཐིག་ལེ་གནས་པ་དེ་ནི། བྱང་ཆུབ་ཀྱི་སེམས་གཉིས་ཟུང་དུ་འཇུག་པའི་གང་བ་ཞེས་བྱ་ལ། དེ་ལས་འབྲས་བུ་བདེ་སྟོང་གི་ཡེ་ཤེས་མཐའ་དབུས་མེད་པ་དང༌། ལྷར་སྣང་དཀྱིལ་འཁོར་གྱི་འཁོར་ལོ་རབ་འབྱམས་མཆེད་པར་འགྱུར་བས། ལྷ་སྐུ་དང་བདེ་བ་རྗེས་སུ་དྲན་པ་ཡིན་པའི་ཕྱིར། རྗེས་དྲན་ཞེས་བྱ་སྟེ། མཚན་ཉིད་དེ་ཙམ་དུ་མཐུན་པ་ལ། །རྟོག་པ་མཐོ་དམན་གྱི་དབྱེ་བ་བཅུ་དྲུག་ཡོད་དོ། གོང་དུ་བཤད་པའི་ས་བཅུ་གཉིས་ཀྱང་འདིར་སྦྱོར་ཏེ། བཅུ་དྲུག་ལས་དང་པོ་བཞི་ནི། མཐུང་གཅོད། གནས། ཉེ་གནས། ཞིང༌། ཉེ་ཞིང༌། མཆོག་དགའ་བཞི་ནི། མདུན་རྟོག་དང༌། ཉེ་བདུན་ཁྱད་དགའ་བཞི་ནི། འདུ་བ་དང༌། ཉེ་འདུ། ལྷན་སྐྱེས་བཞི་ནི། དུར་ཁྲོད། ཉེ་བའི་དུར་ཁྲོད། ཉེ་བའི་མཐུང་གཅོད་རྣམས་ཡིན་ལ། ཡང་མཐུང་གཅོད་ས་བཅུ་གཅིག་པར་འཇོག་པ་ལྟར་ན། དང་པོ་བཞི་ལ་གནས་སོགས་བཞི་དང༌། ལྷན་སྐྱེས་བཞི་ལ། དུར་ཁྲོད། ཉེ་དུར། མཐུང་གཅོད། ཉེ་མཐུང་རྣམས་སྦྱོར་བ་ནི་ཁྱད་པར་རོ། །དེ་ལྟར་སྤྱི་དོན་མདོ་ཙམ་ངེས་ནས་གཞུང་གི་དོན་ལ། རིམ་པ་
གསུམ་བཤད་ཟིན་ནས། ད་ནི་གསང་རིམ་གྱི་མཚན་ཉིད་འཆད་དེ། སྔགས་ཐ་མལ་གྱི་རླུང་དང༌། རྒྱུད་མ་དག་པའི་རྩ་དང༌། ཡེ་ཤེས་ཏེ་འཕོ་འགྱུར་ཕྱེད་པའི་ཐིག་ལེ་རྣམས་རང་རང་སོ་སོ་དང་འབྲེལ་བའི་རྣམ་རྟོག་དང་བཅས་པ་སྤངས་པ་སྟེ། ཡེ་ཤེས་ཀྱི་རླུང་དང༌། རྩ་དང༌། ཐིག་ལེ་ལ་ཐིམ་པའོ། །དེ་ཡང་གསང་རིམ་གྱི་ཐོག་མ་ནས། ཆ་ཤས་ཅུང་ཟད་སྤངས་ནས། མཐར་རྫོགས་པར་སྤངས་པའི་བར་རོ། །སྒོ་གཉིས་ནི། གཟུང་འཛིན་གྱི་སྣང་བ་སྐྱེད་པའི་ཕྱིར་རོ་རྐྱང་ངམ། རླུང་དང་ཐིག་ལེ་འགྲོ་འོང་བྱེད་པའི་ཐུགས་ཀྱི་སྒོ་གཞན་ཡང་དེ། དེ་དག་གི་བྱེད་ལས་དང༌། འགྲོ་འོང་རིམ་གྱི་འགག་པ་དང༌། དེ་འགག་པའི་རླུང་དང་ཐིག་ལེ་དང་སེམས་རྣམ་པར་རྟོག་པ་གཡོ་བའི་འགྲོ་འོང་ཇེ་ཉུང་ལ། མཐར་དེ་ལས་རྣམ་པར་གྲོལ་བ་དང༌། རྒྱུ་འཁོར་བའི་རྩ་རླུང་ཐིག་ལེ་རྣམས་དག་པས། རང་རྒྱུད་ཀྱིས་བསྡུས་པས་ཕུང་པོ་དང༌། ཁམས་དང༌། སྐྱེ་མཆེད་རྣམས་ཀྱྀ་འཁོར་བའི་ཆོས་དང་བྲལ་བ་སྟེ། ལུས་པྲ་ཕབ་བརྒྱད་ལྟ་བུའི་ཡེ་ཤེས་ཀྱི་སྐུར་གྱུར་པ་དང༌། དང་པོ་ཡེ་ཤེས་ཀྱི་སྐུར་འགྱུར་བའི་མགོ་རྩམས་པ་ནས་མཐར་ཡོངས་སུ་རྫོགས་པར་གྱུར་གྱི་བར་དུའོ། །ཡུལ་གཟུགས་སྒྲ་དྲི་རོ་རེག་བྱ་རྣམས་ལ། མངོན་པར་ཞེན་པ་ནུབ་ཅིང༌། མཉམ་བཞག་ཏུ་དེ་རྣམས་ལས་ངེས་པར་འདས་པ་སྟེ་མ་དག་པའི་སྣང་བ་ནུབ་པས། ཐ་མལ་དེ་ལས་ངེས་པར་འདས་པའི། ཡེ་ཤེས་ཀྱི་གཟུགས་སྒྲ་སོགས་རབ་འབྱམས་རྟག་ཏུ་སྣང་བ་དང༌། སྔར་སྨོས་ཤིང་མི་ཤེས་པ་དང༌། དེ་ལས་དངོས་པོར་མངོན་པར་ཞེན་པའི་མ་རིག་པ། མུན་ནག་མཐུག་པོ་ལྟ་བུ་འབྱུང་ཞིང་ཡོད་པ་ལ། ནོར་བུ་ཆུ་ཤེལ་ཏེ་ཟླ་བ་ཉ་གང་བ་ལྟ་བུའི་ཡེ་ཤེས་ཀྱི་འོད་གསལ་ཏེ།
མ་རིག་པ་སངས་ནས་རིག་པའི་ཡེ་ཤེས་སྐྱེས་པའོ། །དེ་ཡང་དཔེ་ནི་སྔར་མུན་ནག་འབྱུང་བའི་དུས་མཚན་མོ་ཡིན་ཡང༌། །ཟླ་བ་ཉ་གང་བ་ཤར་བས། མུན་ནག་འབྱུང་བའི་རང་དུས་དེ་ཉིད་ནས། འོད་ཀྱི་སྣང་བར་གྱུར་པ་ལྟར། སྔར་ཉོན་མོངས་པ་འཆར་བའི་དུས་དེ་ཉིད་དུ་ཡེ་ཤེས། རང་ཤར་བའི་དཔེ་ཡིན་ལ། ཟླ་བ་སྨོས་པ་ནི་བྱང་ཆུབ་ཀྱི་སེམས་མི་འགྱུར་བའི་བདེ་བར་ཡང་བསྟན་ནོ། །དེས་ན་ཐིག་ལེ་མི་འགྱུར་བའི་བདེ་བས་ཉོན་མོངས་རང་དག་སྟེ། ཆེད་དུ་སྒྲུབ་ཅིང་བརྟགས་པ་མ་ཡིན་ཡང༌། སྔར་ཉོན་མོངས་འབྱུང་བའི་དོད་ལ། ཡེ་ཤེས་ཀྱི་སྣང་བ་རབ་འབྱམས་འབད་རྩོལ་མེད་པར་འཆར་ཞེས་པའོ། །རྡུལ་དང་བྲལ་བ་ནི། མཉམ་བཞག་ཏུ་རྣམ་པར་རྟོག་པ་འགག་པ་དང༌། སྟོང་པ་ནི་གཟུང་འཛིན་གྱི་སྣང་བ་ཐམས་ཅད་བྲལ་བ་ཡིན་ལ། མཆོག་ཅེས་པའི་དེ་ཉིད་ཡེ་ཤེས་སུ་བསྟན་པ་ཡིན་ནོ། །མཚན་མ་མེད་པ་ནི། ཆེ་ཆུང་དང་བཟང་ངན་དང་མཐའ་དབུས་ལ་སོགས་པ་དང་བྲལ་བར་མཉམ་ཉིད་དུ་གནས་པ་དང༌། སྨོན་པ་མེད་པ་ནི། རང་བཞིན་དང་འབྲས་བུ་དབྱེ་བ་མེད་པའི་ཕྱིར་དེ་ཁོ་ན་ཉིད་གཞན་དུ་འཚོལ་བས་ངེས་པའོ། །གཟུང་འཛིན་གྱི་སྣང་བ་གང་ཡང་མེད་པས་ནི། མཚན་མ་རྣམས་བློས་བཏགས་པ་ཙམ་དུ་གྲུབ་སྟེ། མཉམ་པ་ཉིད་དུ་རྟོགས་ལ། ཐམས་ཅད་མཉམ་པ་ཉིད་ལ་ནི། བཟང་ངན་མེད་པའི་ཕྱིར་གཞན་ལ་སྨོན་པ་ཡང་མི་འབྱུང་ངོ༌། །དེས་ན་སྨོན་པ་མེད་དེ་མཚན་མ་མེད་པའི་ཕྱིར། མཚན་མ་མེད་དེ་སྟོང་པ་ཉིད་ཀྱི་ཕྱིར་རོ། །ཞེས་འབྲེལ་ཅན་དུ་འབྱུང་ལ།
སྐབས་འདིར་དེ་དག་ཅིར་ཡང་མ་གྲུབ་པས་སྟོང་རྐྱང་ཞིག་གོ་སྙམ་ན་དེ་དགག་པའི་ཕྱིར་ཡེ་ཤེས་སྨོས་ནས། གདོད་ནས་སྤྲོས་པ་དང་བྲལ་བའི་ཡེ་ཤེས་སོ། །བདག་དང་གཞན་དུ་རིག་པ་དང་བྲལ་བ་ནི། རང་གཞན་ལ་སོགས་པ་གཉིས་སུ་སྣང་བའི་ཆོས་རྣམས་སྤངས་པ་སྟེ། རིམ་གྱིས་སྤོང་བར་འགྱུར་བའི་དོན་ནོ། །མཆོག་ཏུ་ཞི་བ་ནི་སྡུག་བསྔལ་ཞི་བ་སྟེ། ལུས་སེམས་ལ་གདུང་བ་ཐམས་ཅད་སྤངས་པའོ། །འདོད་ཆགས་དང་ཆགས་བྲལ་འདྲེས་པ་ནི། བདེ་བ་ཆེན་པོའི་ལྷག་པར་ཉམས་སུ་བལྟར་བའི་ཕྱིར། །འདོད་ཆགས་ཡིན་ལ་མངོན་པར་ཞེན་པ་མེད་པའི་ཕྱིར། ཆགས་བྲལ་ཡང་ཡིན་ཏེ། དེ་གཉིས་གཅིག་ལ་ཚང་བའི་ཕྱིར་འདྲེས་པའོ། འདིའི་འདོད་ཆགས་ནི་ཉོན་མོངས་འདོད་ཆགས་མིན་ཞིང༌། ཆགས་བྲལ་ཡང་སྡང་བའི་རྣམ་པ་ཅན་དང༌། ཡིད་འབྱུང་བའི་མཚན་ཉིད་ཅན་ནི་མ་ཡིན་པར་ཤེས་སོ། །མར་ལ་མར་བཞག་པ་ལྟ་བུ་ནི། ཡུལ་ཅན་སྟོང་ཉིད་རྟོགས་པའི་ཡེ་ཤེས་ཡིན་ཡང༌། ཡུལ་སྟོང་པ་ཉིད་ནི་ནམ་མཁའ་ལྟར་ཅི་ཡང་མ་ཡིན་པའོ། །སྙམ་ན་དེ་འདྲ་ནི་བློས་བཏགས་པ་ཙམ་དུ་ཟད་པ། གནས་ལུགས་ཀྱི་སྟོང་ཉིད་མ་ཡིན་ནོ། །དེས་ན་སྟོང་ཉིད་ཉིད་ཡེ་ཤེས་ཡིན་ལ། ཡེ་ཤེས་ཉིད་སྟོང་ཉིད་ཡིན་པའི། སྟོང་ཉིད་སྟོང་ཉིད་རྟོགས་པའི་ཡེ་ཤེས་ལ། ཤེས་པ་དང་ཤེས་བྱའམ། ཡུལ་དང་ཡུལ་ཅན་གྱི་དབྱེ་བ་མེད་པར། མར་ཁུ་ལ་མར་ཁུ་བླུག་པ་ལྟ་བུའོ། །ཞེས་པའོ། །མྱ་ངན་ལས་འདས་པ་ཞེས་པ་ལ། མྱ་ངན་ནི་སྡུག་བསྔལ་གྱི་དོན་ཡིན་ཞིང༌། དེ་ཡང་མཐར་གཏུགས་ན།
ཀུན་རྫོབ་སྣང་ཞིང་གྲགས་པ་ཐམས་ཅད་ཡིན་པས། དེ་ལྟ་བུའི་མྱ་ངན་ལས། གསར་དུ་འདས་པ་མ་ཡིན་པར་གདོད་ནས་འདས་པ་སྟེ། གདོད་ནས་གོས་མ་མྱོང་བ་དེ་མངོན་དུ་གྱུར་པའོ། །བདག་མེད་པའི་བྱང་ཆུབ་ཀྱི་སེམས་ཞེས་བྱ་བ་ལ། དོན་དམ་བྱང་ཆུབ་ཀྱི་སེམས་བདེ་ཆེན་གྱི་ཡེ་ཤེས་དེ་མི་སྐྱེ་མི་འགགས་ལ་ནམ་དུ་ཡང་འགྱུར་བ་མེད་པའི་རྟག་པ་བརྟན་པ་དབྱེར་མེད་པ་ཀུན་ཏུ་ཁྱབ་པ་ཡིན་ཡང༌། གང་ཟག་གི་བདག་མ་ཡིན་ཞིང༌། རྟག་ཏུ་བདེན་ཞིང་ཉམས་སུ་མྱོང་བ་དང༌། རྣམ་པ་ཐམས་ཅད་པ་དང༌། ཡོངས་སུ་གྲུབ་པའི་མཚན་ཉིད་ཅན་ཡིན་ཡང༌། སྒྲ་རྟོག་གི་ཡུལ་ལས་འདས་པས་ན། ཆོས་ཀྱི་བདག་མ་ཡིན་ཏེ་བདག་མེད་པ་ཞེས་བྱའོ། །དེས་ན་སྒོ་གཉིས་འགག་པ་དང༌། འགྲོ་འོངས་སྤངས་པས། ལས་རླུང་འགག་པ་དང༌། སྔགས་སོགས་སྤངས་པས་ཁམས་འགགས་པ་དང༌། ཕུང་སོགས་བྲལ་བའི་ལུས་ཟག་མེད་སྐྲ་སེན་ལྟ་བུ་གྱུར་པ། ཡུལ་ལས་འདས་པས་སེམས་རྟོགས་མེད་ཡེ་ཤེས་ཀྱི་སྣང་བ་ཅན་དང༌། ཟླ་བའི་དཔེས་བདེ་ཆེན་གྱི་ཕན་ཡོན་ལས་ཉོན་མོངས་གནས་གྱུར་པ་རྣམས། དང་པོ་མགོ་བརྩམས་པ་ནས། ཕྱིས་མཐར་ཕྱིན་གྱི་བར་དུ་འབྱུང་བའི་གསང་རིམ་གྱི་ངོ་བོའམ་ཡོན་ཏན་བསྟན་པ་ཡིན་ལ། རྡུལ་དང་བྲལ་བ་ཞེས་པ་མན་ཆད་ཀྱི་གསང་རིམ་མཐར་ཕྱིན་པའི་གྲུབ་འབྲས་ཟུང་འཇུག་གི་མཚན་ཉིད་བསྟན་པ་ཡིན་ནོ། །དེ་ལ་ས་མཚམས་ནི། ཡེ་ཤེས་ཀྱི་རིམ་པ་རྫོགས་ནས། ཏིང་ངེ་འཛིན་གྱི་ལུས་སྒྱུ་མ་ལྟ་བུའི་སྐུ་འགྲུབ་པའི་སྐད་ཅིག་དེ་ནི། གསང་རིམ་
གྱི་ཐོག་མར་སླེབ་ཅིང༌། རྩེ་མོའི་ཡེ་ཤེས་ཀྱི་དང་པོ་ཡིན་ནོ། །དེ་ནས་རིང་དུ་གོམས་པ་ལས་མས་བརྟན་གྱི་ས་དང་པོ་ཐོབ་པ་ནི། བཟོད་པའི་དང་པོ་ནས་རྩམས་ཏེ། རྗེས་དྲན་བཅོ་ལྔའི་བར་དུ་བཟོད་པ་ཡིན་ལ། བཅུ་དྲུག་པ་ནི་ཆོས་མཆོག་གོ །དེའི་སྐད་ཅིག་གཉིས་པར་མཐོང་ལམ་གྱི་ཡེ་ཤེས་སྐྱེས་པ་ཕན་ཆད་ནི། གསང་རིམ་གྱི་འབྲས་བུར་འཇོག་ལ། དེ་ལ་མཐོང་ལམ་ནི་ཟུང་འཇུག་གི་སྦྱོར་བ་དང༌། དེའི་རྗེས་ཐོབ་ཉིད་ནི་ཟུང་འཇུག་སྟེ། སྡེ་སྣོད་འོག་མའི་ཆོས་མངོན་པ་ལས་སྐད་ཅིག་བཅུ་དྲུག་ཏུ་བཤད་པའི་ངེས་དོན་ཡང༌། མཐོང་ལམ་ནི་བདེ་ཆེན་གྱི་ཡེ་ཤེས་ཁོ་ན་ཡིན་ཞིང་དེ་ཡང་དགའ་བ་བཞི་དང༌། བཅུ་དྲུག་གི་མཚན་ཉིད་ལས་དགའ་བཞི་ནི་འཁོར་ལོ་བཞི་ལས་སྐྱེས་པའི་ཡེ་ཤེས་དང༌། འཁོར་ལོ་བཞི་བདེན་བཞིས་བསྡུས་པའི་ཆོས་ཐམས་ཅད་ཀྱི་རྩ་བར་བཤད་པ་འདི་ལ་ངེས་པ་བསྐྱེད་པར་བྱའོ། །གཉིས་སུ་མེད་པའི་རིམ་པ་འདི་ཐོབ་ནས་ནི། དག་པའི་ཞིང་ངམ། སངས་རྒྱས་ཀྱི་ཞིང་རབ་འབྱམས་ལ། ཡུལ་ཆེན་ཉེར་བཞི་ལ་སོགས་པར་བཞག་པ་དེ་རྣམས་སུ། མཉམ་བཞག་ཟུང་འཇུག་དང་རྗེས་ཐོབ་ཕྱོགས་ལས་རྣམ་རྒྱལ་གྱི་སྤྱོད་པ་སྤྱད་ནས། རིམ་པས་འཕགས་པའི་ས་བཅུ་གཉིས་མངོན་དུ་བྱས་ཏེ། །མཐར་ཐུག་ཟུང་འཇུག་རྡོ་རྗེ་འཆང་ཆེན་པོ་ལ་སྦྱོར་བར་བྱེད་དོ། །རིམ་པ་བཞི་པོ་འདི་མངོན་དུ་བྱེད་པ་ལ་སྤྱོད་པ་དགོས་སམ་མི་དགོས་ཞེ་ན། ཇི་སྲིད་དུ། སྔགས་ཀྱི་རིམ་པའི་ཡེ་ཤེས་མཐར་མ་ཕྱིན་གྱི་བར་དུ། དངོས་གྲུབ་མཆོག་སྒྲུབ་པའི་སྤྱོད་པ་མི་བྱའོ། །དེ་ནས་ཡེ་
ཤེས་ཀྱི་རིམ་པ་སྐྱེད་པའི་ཕྱིར་དང༌། དགའ་བའི་ས་སྔ་མ་སྔ་མ་ཐོབ་ནས་ཕྱི་མ་སྒྲུབ་པའི་ཕྱིར། སྤྱོད་པ་བྱས་ན་ལེགས་མོད་མ་བྱས་ཀྱང་འགྲུབ་ཏུ་རུང་ངོ༌། །གསང་བའི་རིམ་པའི་ས་རྣམས་གོང་ནས་གོང་དུ་བགྲོད་པའི་ཕྱིར་ནི། ངེས་པར་སྤྱོད་པ་དགོས་ལ། སྤྱོད་པ་གསུམ་པ་ནི་གང་ཡང་རུང་བས་ཆོག་པར་བཞེད་དོ། །དེ་དག་ལས་ལས་ཀྱི་ཕྱག་རྒྱ་ངེས་པར་འཇུག་ལྡོག་ནི། ཡེ་ཤེས་ཀྱི་རིམ་པའི་ས་བཞི་པ་དང༌། གསང་བའི་རིམ་པ་དང་པོར་སྒྲུབ་པ་ལས་ཀྱི་ཕྱག་རྒྱ་ལ་ངེས་པར་ལྟོས་ལ། གཞན་རྣམས་ལ་ཇི་ལྟར་རིགས་པར་སྦྱོར་བ་ལས་ངེས་པ་མེད་དོ། །གཉིས་པ་དེ་ཉིད་ལུང་དང་སྦྱར་བ་ལ། རྒྱུད་ཀྱི་གླེང་གཞིའི་དོན་བཤད་པ། མདོ་སྡེའི་སྙིང་པོ་ངེས་པར་བསྟན་པ། དེ་གཉིས་ཀའི་དོན་རང་བཞིན་རྣམ་དག་ཏུ་ངེས་པ་གསུམ་ལས། དང་པོ་ནི་བཙུན་མོའི་བྷ་ག་ལ་ནི་བདེ་བ་ཅན་གྱི་མིང་ཅན་ལའོ། །བཞུགས་སོ་ནི་གནས་པ་དང་ལྡན་པའོ། །ཐམས་ཅད་ཀྱང་ཡིན་ལ་དེ་བཞིན་གཤེགས་པ་ཡང་ཡིན་པའི་དེ་བཞིན་གཤེགས་པ་དེ་ཕུང་པོ་ལ་སོགས་པའོ། །དེ་རྣམས་ཀྱི་སྐུ་དང་གསུང་དང་ཐུགས་ནི་ཨོཾ་ཨཱཿཧཱུཾ་ཞེས་པ་ཡི་གེ་གསུམ་མོ། །དེ་རྣམས་ཀྱི་རྡོ་རྗེ་ནི་བྱང་ཆུབ་ཀྱི་སེམས་སོ། །དེའི་བཙུན་མོ་ནི་མི་ལ་སོགས་པའི་གཟུགས་སུ་གནས་པའོ། །དེའི་བྷ་ག་དེ་ལ་ཞེས་བྱ་བའི་དོན་ནོ། །ཨེ་བཾ་ཞེས་བྱ་བ་ནི། ཨེ་ཡི་ཆ་བྱད་བཟང་པོ་གང༌། །དབུས་སུ་བཾ་གྱིས་རྣམ་པར་བརྒྱན། །བདེ་བ་ཀུན་གྱི་གཞི་ཡིན་ཏེ། །སངས་རྒྱས་རིན་ཆེན་ཟ་མ་ཏོག །དེ་སྤྲུལ་པའི་སྐུ་བདག་གིས་ལོངས་སྤྱོད་རྫོགས་པའི་སྐུ་ལས་ཐོབ་པའོ། །
དེ་ལྟར་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ། བཙུན་མོའི་བྷ་ག་རྣམས་ལ་བཅོམ་ལྡན་འདས་བྱང་ཆུབ་ཀྱི་སེམས་དེ་ལྟར་བཞུགས་པའོ། །དུས་གཅིག་ན། ཞེས་བྱ་བ་ནི་ལན་གཅིག་གི་ཚེ་དུས་གཅིག་ན་སྟེ། འགོག་པའི་དུས་དང༌། དཔྱིད་ཀྱི་དུས་ཞེས་བྱའོ། །ཇི་སྲིད་དུ་གཡས་པ་དང༌། གཡོན་པའི་སྣ་བུག་ཏུ་སོན་པའི་རླུང་འགོག་པ་ན། ཞེས་བྱ་བའི་ཐ་ཚིག་གོ །ཞེས་གསུངས་ཏེ། རྡོ་རྗེ་བཙུན་མོའི་བྷ་ག་ཞེས་པ་ནི། བདེ་བ་ཅན་གྱི་མིང་ཅན་ཏེ། གང་ལས་ཡང་དག་པའི་བདེ་བ་དམ་པ་སྐྱེ་བར་འགྱུར་བ། རྩ་འཁོར་ལོ་བཞིའི་ལྟེ་བ་རྩ་དབུ་མའི་ནང་དུ་སྟེ། དེར་བཞུགས་སོ་ཞེས་པ་ནི། ཀུན་རྫོབ་ཀྱི་དབུ་མ་ལ་གནད་དུ་བསྣུན་པས་ཡེ་ཤེས་ཀྱི་དབུ་མ་ལ་རེག་སྟེ། ཡེ་ཤེས་ཀྱི་ཐིག་ལེའི་རང་བཞིན་དུ་སོང་ནས། དབྱེ་བ་མེད་པར་གནས་པའི་མཚན་ཉིད་དང་ལྡན་པའོ། །ཐམས་ཅད་ཀྱང་ཡིན་ལ་དེ་བཞིན་གཤེགས་པ་ཡང་ཡིན་ནོ་ཞེས་གཞི་མཐུན་བསྡུ་བར་བྱས་ནས། ཕུང་པོ་ལྔའི་རྩ་ཡིག་རླུང་ཁམས་རྣམས་དེ་བཞིན་གཤེགས་པ་དང༌། ཁམས་བཞིའི་རྩ་ཡིག་རླུངཁམས་རྣམས་ཡུམ་བཞི་དང༌། དབང་པོ་ཡུལ་བཅས་ཀྱི་རྩ་ཡིག་རླུང་ཁམས་རྣམས་བྱང་ཆུབ་སེམས་དཔའ་ཡབ་ཡུམ་ལ་སོགས་པར་སྦྱར་རོ། །དེ་རྣམས་ཀྱི་དྭངས་མ་ཁུ་བ་དང༌། རྡུལ་དང་རླུང་གི་ངོ་བོར་གྱུར་པ་ནི། སྐུ་གསུང་ཐུགས་དང་ཡིག་འབྲུ་གསུམ་ཏེ། དེ་རྣམས་ཡེ་ཤེས་བདེ་སྟོང་གཉིས་སུ་མེད་པར་ཐིམ་པའི་ཉམས་མྱོང་ནི་རྡོ་རྗེ་སྟེ་འོད་གསལ་བ་དོན་དམ་བྱང་ཆུབ་ཀྱི་སེམས་ཏེ།
བདེ་བ་ཀུན་རྫོབ་སྙིང་རྗེ་དང༌། སྟོང་པ་དོན་དམ་རྣམ་པ་ཐམས་ཅད་པ་གཉིས་ཟུང་དུ་འཇུག་པ་ནི། སྟོང་ཉིད་སྙིང་རྗེ་དབྱེར་མེད་པ། །བྱང་ཆུབ་སེམས་ཞེས་རབ་ཏུ་བརྗོད། །ཅེས་པ་ལྟར་རོ། །ཡང་རྣམ་པ་གཅིག་ཏུ་ན། བཙུན་མོའི་བྷ་ག་ནི། རྡོ་རྗེ་བྱང་ཆུབ་ཀྱི་སེམས་དེའི་རྒྱུའམ་ཐབས་ཀྱི་དབང་དུ་བྱས་ནས། དེའི་བཙུན་མོ་ནི་མིའི་གཟུགས་སུ་གནས་པའི་ལས་ཀྱི་ཕྱག་རྒྱ་དང༌། སོགས་ཞེས་པས་ན། ཡིད་ཀྱི་ཕྱག་རྒྱ་དང༌། ལྷ་རྫས་སྟོང་པའི་ཕྱག་རྒྱ་ལ་སོགས་པའོ། །དེའི་བྷ་ག་དེ་ལ་སྙོམས་པར་ཞུགས་པ་ལས་ཕུང་སོགས་ཀྱི་སྐུ་གསུང་ཐུགས་དོན་དམ་པའི་ཡི་གེ་གསུམ་ལ་ཐིམ་པར་འགྱུར་ཞེས་པའི་དོན་ནོ། །དེ་ནི་ཡི་གེ་གསུམ་གྱི་བརྡས་མཚོན་པ་སྟེ། མདོར་བསྟན་གྱི་སྐབས་སུ་བཤད་པ་ལྟར་གྱི་རྡོ་རྗེ་བཞི་ལས་རྡོ་རྗེ་དང་པོ་གསུམ་མོ། །དེ་དག་གིས་ནི་དོན་དམ་པའི་གནས་དང་སྟོན་པ་བཤད་ལ། ཆོས་ནི་ཟུང་འཇུག་སྟེ་དེ་ལ་ཨེ་ཝཾ་ཞེས་བྱ་བ་ནི། ཨེ་ཡི་ཆ་བྱད་བཟང་པོ་ཞེས་བྱ་བ། འགྱུར་གཞན་དུ་ཨེ་ཡི་རྣམ་པ་ལྷ་ཡི་གང༌། ཞེས་ཀྱང་འབྱུང་སྟེ། ཨེ་ཡིག་ནི་རྣམ་བཅས་ལྷའི་དཀྱིལ་འཁོར་རམ། ཆ་བྱད་བཟང་པོ་སྟེ། ཆོས་ཉིད་རྣམ་པ་ཐམས་ཅད་པ་དེ་བཞིན་གཤེགས་པ་རྣམས་ཀྱི་སྐུ་དང་ཞིང་ཁམས་སུ་གྱུར་པ་ལ། དབུས་སུ་བཾ་ཡིག་གིས་མཚོན་པ་ཐུགས་བདེ་བ་ཆེན་པོའི་ཡེ་ཤེས་ཨེ་ཡིག་དེ་ཉིད་ལ་རོ་གཅིག་ཏུ་བརྒྱན་པ་དོན་དམ་ཡེ་ཤེས་ཟུང་འཇུག་གི་བདེ་བ། དེ་ནི་འཇིག་རྟེན་ན་འདས་པའི་ཆོས་ཐམས་ཅད་ཀུན་གྱི་གཞི་ཡང་ཡིན་ཞིང༌།
སེམས་ཅན་རྣམས་ཀྱི་བློ་ངོ་ལ་ལྟོས་ནས། འཁོར་བ་ཀུན་གྱི་གཞི་ཡང་ཡིན་ཏེ། དེ་ནི་དོན་དམ་པའི་སངས་རྒྱས་ཀྱི་རིན་པོ་ཆེའོ། །ཡང་ཨེའི་རྣམ་པའི་ཆ་བྱད་རང་ལུས་རྩ་འཁོར་ལོའི་ཁོང་སྟོང་དང༌། གཞན་ལུས་ཤེས་རབ་གྱི་པདྨ་གང་ཞིག་ལ། དབུས་སུ་བཾ་ཡིག་ཐིག་ལེའམ་རྡོ་རྗེའི་ནོར་བུས་རྣམ་པར་བརྒྱན་པ་ལས་ནི་ཞུ་བདེ་འབྱུང་སྟེ། དེ་ཡང་འཕོ་མེད་དུ་བྱས་ནས། བདེ་བ་དེ་ཕུན་སུམ་ཚོགས་པ་ཀུན་གྱི་གཞིར་གྱུར་པ་སྟེ། གོང་གི་སངས་རྒྱས་རིན་ཆེན་ཏེ་སྣོད་ཟ་མ་ཏོག་ཏུ་གྱུར་པའོ། །སངས་རྒྱས་རིན་ཆེན་དེ་དེའི་ནང་དུ་སྦས་པའམ། ཡང་ན་དེ་རྟོགས་པའི་ཡེ་ཤེས་སྐྱེ་བ་དང་འཕེལ་བ་དང་གནས་པའི་རྒྱུ་ཡིན་པའི་ཕྱིར་ཟ་མ་ཏོག་གོ །དེ་ལྟར་དོན་དམ་པའི་ཨེ་བཾ་དེ་སྤྲུལ་པའི་སྐུ་སྟེ་འབྲས་བུ་གསང་རིམ་དུ་རྟོག་པའི་མས་བརྟན་གྱི་བདེ་བ་དེས་རྒྱུ་ལོངས་སྤྱོད་རྫོགས་སྐུ་སྟེ། ཡེ་ཤེས་ཀྱི་རིམ་པ་དང་རྟོགས་རིགས་མཐུན་ཞིང་ངོ་བོ་གསང་རིམ་དུ་གཏོགས་པའི་ཡས་བབས་ཀྱི་དགའ་བ་ལས་ཐོས་ཤིང་རྟོགས་པའོ། །ཐོས་པ་ནི་རྟོགས་པའི་དོན་ཡིན་ལ་རང་རྒྱུ་སྐད་ཅིག་དང་པོར་ཞུ་བདེ་འགྱུར་མེད་སྒོམ་པོ་དེས། གནས་ལུགས་མཚོན་ཞིང་རྟོགས་ནས། རང་འབྲས་སྐད་ཅིག་གཉིས་པར། རང་བཞིན་གྱི་བདེ་བའི་ཆ་ཤས་ཐོབ་པའོ། །འདིའི་ཞུ་བདེ་ཡང་གསང་རིམ་ཉིད་ཀྱི་ནང་དུ་གཏོགས་པར་བྱས་ན་ལེགས་སོ། །འདིར་སྤྲུལ་སྐུ་སྔགས་རིམ་དང༌། ལོངས་སྐུ་ཡེ་རིམ་དངོས་ལ་འཆད་པ་མི་ལེགས་ཏེ། གང་ལས་ཐོས་པའི་ཡུལ་ཕྱིས་འབྱུང་བ་ལ་བྱེད་པ་རིག་པས་ཀྱང་མི་འཐད་པའི་ཕྱིར་དང༌།
ཁ་སྦྱོར་དང༌། དཔྱིད་ཐིག་ལས། སྔགས་རིམ་ཆོས་སྐུའི་ལམ་དུ་ཡང་གསུངས་པའི་ཕྱིར་རོ། །ཡེ་ཤེས་ཀྱི་རིམ་པ་ལོངས་སྐུར་བཤད་ཀྱང༌། དེས་དེ་ལ་ཁྱབ་པ་ནི་མིན་ཏེ། ཞུ་བདེ་ཡས་བབས་ཀྱི་རིམ་པ་ལོངས་སྐུ་དང༌། མས་བརྟན་གྱི་རིམ་པ་སྤྲུལ་སྐུ་འཇོག་ཅིང༌། འདིར་དེ་ལྟར་སྦྱོར་ལ། ཡེ་རིམ་ལོངས་སྐུ་དང༌། གསང་རིམ་སྤྲུལ་སྐུར་འཇོག་པ་ནི། གཙོ་བོའི་དོན་ནམ། ཁྱད་པར་ཅན་གྱི་དབང་དུ་བྱས་པའོ། །དེ་ལྟར་ཨེ་ཝཾ་དེ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བཙུན་མོའི་བྷ་ག་ལ། བཅོམ་ལྡན་འདས་བྱང་ཆུབ་ཀྱི་སེམས་དེ་ལྟར་བཞུགས་པའོ། །ཞེས་ཐོས་ནས། དུས་གང་གི་ཚེ་ཐོས་ཞེས་པའི་ལན་ནི། དུས་གཅིག་ན་ཞེས་བྱ་བ་ནི། ལན་གཅིག་གི་ཚེ་ནི་དུས་གཅིག་གི་ཚེ་ན་སྟེ། དེ་ཡང་རང་བཞིན་རྟག་པ་ཉིད་དེ། རྟག་པ་ལ་ནི་དུས་གཅིག་ཁོ་ན་ལས་གཉིས་པ་མེད་པའི་ཕྱིར་དང༌། མི་རྟག་པ་ནི་དུས་མཐའི་སྐད་ཅིག་མ་ཡང་ཆ་དུ་མ་དང་བཅས་པའི་ཕྱིར། དུས་དུ་མར་འགྱུར་གྱི་གཅིག་པ་མི་སྲིད་དོ། །དེ་ཡང་འགོག་པའི་དུས་དང༌། དཔྱིད་ཀྱི་དུས་གཉིས་དངོས་སུ་བསྟན་པས། ཤུགས་བསྟན་ལས་དུས་གསུམ་པའང་གོ་སྟེ། བསམ་གྱི་མི་ཁྱབ་པའི་དུས་མངོན་དུ་གྱུར་པ་ལ་དུས་གཅིག་ཅེས་བྱའོ། །འགོག་པའི་དུས་གང་ཞེ་ན། དུས་ཇི་སྲིད་དུ་ན་དེ་དུས་སྐབས་ཞིག་ན། གཡས་པ་དང་གཡོན་པའི་སྣ་བུག་ཏུ་སོན་ཞིང་རྒྱུ་བའི་རླུང༌། ལས་རླུང་གི་དབུགས་ཐམས་ཅད་དོན་དམ་པའི་དབྱིངས་སུ་འགོག་པ་ན་ཞེས་བྱ་བའི་ཐ་ཚིག་སྟེ།
ངེས་པ་ཅན་གྱི་དོན་ནོ། །དེ་ལ་སྤྱི་ཁྱབ་ནས་འགོག་པའི་དུས་ནི་རོ་རྐྱང་གི་རླུང་དབུ་མར་འགགས་པ་ཐམས་ཅད་ལ་འཇུག་ཀྱང༌། སྐབས་འདིར་ལས་རླུང་རྩ་བ་ནས་འགག་པ། གསང་རིམ་འབྲས་བུ་དང་བཅས་པའི་སྐབས་སུའོ། །དཔྱིད་ཀྱི་དུས་ཞེས་པ་ནི། སྤྱིར་དབུ་མའི་ལམ་དུ་ཞུ་བདེ་སྐྱེས་པ་ཕན་ཆད་ཐུན་མོང་མ་ཡིན་པའི་བདེ་བར་སྐྱེས་པ་ཀུན་ལ་ཟེར་ནའང༌། སྐབས་འདིར་ནི་ཞུ་བདེ་ཡེ་ཤེས་ལ་ཐིམ་སྟེ་རང་བཞིན་གྱི་བདེ་བ་མངོན་དུ་གྱུར་པའི་མིང་ངོ༌། །བསམ་མི་ཁྱབ་ཀྱི་དུས་བྱ་བ། སྤྱི་རླུང་དབུ་མར་ཐིམ་པ་ལས་སྐྱེས་པའི་མི་རྟོག་པའི་ཡེ་ཤེས་ཐམས་ཅད་ལ་བྱ་ན། སྐབས་འདིར་ནི་ཆོས་ཉིད་བསམ་མི་ཁྱབ་མངོན་དུ་གྱུར་པ་ལ་བྱའོ། །གཉིས་པ་ནི། ཆོས་རྣམས་གང་དག་རྒྱུས་བྱུང་དེ་དག་གི དེའི་རྒྱུ་དང་འགོག་པ་གང་ཡིན་པ། །དེ་བཞིན་གཤེགས་པ་ཉིད་ཀྱིས་བཀའ་སྩལ་ཏེ། །དེ་སྐད་གསུང་པའི་ཚུལ་ཅན་དགེ་སྦྱོར་ཆེ། །ཞེས་པ་སྟེ། གཞི་ལམ་འབྲས་བུ་གསུམ་གྱི་ཆོས་རྣམས་གང་ཡིན་པ་དེ་དག་ནི། རྩ་གསུམ་འཁོར་ལོ་བཞི་ལ་སོགས་པ། བརྟེན་དཀྱིལ་འཁོར་གསུམ་གྱི་རྒྱུ་ལས་བྱུང་ཞིང༌། དེ་ཡང་ཆོས་ཉིད་འོད་གསལ་གྱི་དབྱིངས་ལས་ཤར་བ་ཡིན་པས། དེ་ལས་བྱུང་བར་འདྲའོ། །དེ་ལྟར་ན་རྒྱུ་ལས་བྱུང་བའི་འབྲས་བུ་ནི། གཞི་ལམ་འབྲས་གསུམ་གྱི་ཆོས་སྣ་ཚོགས་ཡིན་ལ། དེའི་རྒྱུ་ནི་དཀྱིལ་འཁོར་གསུམ་དང་ཆོས་དབྱིངས་སོ། །དེ་དག་གི་རྒྱུད་དང་འགོག་པ་ཞེས་པ་ལ། འགོག་པའི་བྲལ་རྒྱུ་ནི་ལམ་ཡིན་ཏེ། ཇི་སྐད་བསྟན་པའི་སྐུ་གསུམ་གྱི་ལམ་
ལ་སོགས་པའོ། །དེས་ལས་རླུང་ལ་སོགས་པ་འགག་པ་ནི་འགོག་པ་སྟེ། སྒྲིབ་བྱེད་དེ་འགག་པས་གདོད་མའི་རང་བཞིན་མངོན་དུ་གྱུར་པ་ནི། དོན་དམ་དབྱིངས་ཀྱི་བྲལ་བའི་འབྲས་བུ་དང༌། འགོག་པའི་བདེན་པའོ། དེ་བཞིན་གཤེགས་པ་ནི་ཇི་སྐད་དུ། དཔལ་ལྡན་དེ་བཞིན་ཉིད་གཤེགས་ཤིང༌། །དེ་བཞིན་སླར་ཡང་གཤེགས་པ་ཉིད། །ཅེས་པ་ལྟར། གདོད་ནས་དེ་བཞིན་ཉིད་ལ་ཞུགས་པའི་རང་བཞིན་རྣམ་དག་དེ། སླར་ཡང་གློ་བུར་གྱི་དྲི་མ་སྤངས་ཏེ། དེ་བཞིན་ཉིད་ལ་ཞུགས་པའི་དག་པ་གཉིས་ལྡན་ནོ། །དེ་བས་ན་བདེན་པ་བཞི་པོ་དེ་ནི་དེ་བཞིན་གཤེགས་པས་བཀའ་སྩལ་ཏེ། དེ་སྐད་གསུང་བའི་ཚུལ་གྱི་དེ་བཞིན་གཤེགས་པ་དེ་ཡང་ཅི་ཞེ་ན། དགེ་སྦྱོང་ཆེན་པོ་བཅོམ་ལྡན་འདས་ཤཱཀྱ་སེང་གེའོ། །འདི་ལ་ཚིག་རྐང་དང་པོས་རྒྱུད་རིམ་དང༌། རྒྱུད་སྔགས་རིམ། འགོགས་པ་ཡེ་རིམ། གང་ཡིན་པ་ཞེས་པ་སོགས་ཀྱིས་གསང་རིམ་བསྟན་པར་འཆད་པ་ནི་བརྗོད་འདོད་ཙམ་མོ། །གསུམ་པ་ནི། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །ད་ལྟར་བྱུང་བའི་རང་བཞིན་ལས། །འདའ་བར་བྱ་བ་ཐག་རིང་ཕྱིར། །ཞེས་པ་སྟེ། སྲིད་པ་ནི་སྲིད་པའི་རང་བཞིན་ཆོས་ཉིད་ཡིན་ལ། དེ་ནི་ངོ་བོ་ཉིད་ཀྱི་དྲི་མས་རྣམ་པར་དག་པས། ཟག་མེད་ཀྱི་ཆོས་ཐམས་ཅད་ཡོན་ཏན་གྱི་ཚུལ་དུ་གདོད་མ་ནས་གནས་པའོ། །དེ་ནི་ངོ་བོ་ཉིད་ཀྱིས་ཏེ་ངོ་བོ་ཉིད་གདོད་ནས་དྲི་བྲལ་དང་རྣམ་པ་མཐུན་པར་སྲིད་པ་འཁོར་བ་ཀུན་རྫོབ་ཀྱི་ཆོས་ཐམས་ཅད་དང་བྲལ་ཞིང་གློ་བུར་རྣམ་དག་ཏུ་
བྱས་པ་དེ་ནི་སངས་རྒྱས་ཡིན་པའོ། །ད་ལྟར་བྱུང་བའི་རང་བཞིན་ནི། རྟག་ཏུ་ད་ལྟར་བ་ལ་བཞུགས་པའི་དོན་ཏེ། དེ་ཉིད་ཀྱི་ཕྱིར་ན་འདས་མ་འོངས་ལྟར་མེད་པའམ་མེད་པར་འགྱུར་བ་མེད་པའི་ཕྱིར་འདའ་ཞིང་འཇིགས་པར་བྱ་བའི་དངོས་པོ་སུས་ཀྱང་མ་གོས་པས་ཐག་རིང་བའི་ཕྱིར་རོ། །དེ་ལྟར་ན་རྣམ་པ་འདི་དག་གིས་ཀྱང་དོན་དམ་རྣམ་པར་ངེས་པ་ཕྱིར་མི་ལྡོག་པའི་འཁོར་ལོའི་གཏམ་དབུ་མ་ཆེན་པོའི་གཞུང་བཙུགས་པ་ཡིན་ནོ། །གསང་བའི་རིམ་པའོ། །ཞེས་པ་ནི་གཞུང་གི་དུམ་བུའི་མཚམས་སྟོན་པའོ། །འགྱུར་གཞན་ལས་ནི་ཐ་ཚིག་གོ་ཞེས་པའི་རྗེས་ལ་ཚིག་བཅད་འདི་ཡོད་པའང་སྣང་ངོ༌། །དེའི་རྗེས་སུ་འདི་སྐད་ཅེས། དེ་བཞིན་གཤེགས་པའི་གསུང་རབ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ལས་ཕྱེ་སྟེ་སྦྱར་བའི་རིམ་པ་འདི་ནི་སྤྱོད་པའི་རྟུལ་ཞུགས་པ་སློབ་དཔོན་ནག་པོའི་མཛད་པའོ། །ཞེས་འབྱུང་བ་ནི་མཛད་བྱང་སྟེ། བརྒྱད་ཁྲི་བཞི་སྟོང་ལས་ཕྱེ་སྟེ་སྦྱར་ཞེས་པ། རྣམ་བཤད་རྣམ་པར་སྤྲོས་ཏེ་ཕྱེ་བའི་དོན་མ་ཡིན་ཏེ། དེ་ཐམས་ཅད་ཀྱི་སྙིང་པོའི་དོན་ལོགས་སུ་ཕྱེ་སྟེ་གོང་དུ་བྱུང་བའི་དོན་ཡིན་ལ། རིམ་པ་ཞེས་ནི་ཐ་སྙད་གཙོ་བོར་མ་བྱས་པ་སྟེ། སྒོམ་རིམ་གྱི་དབང་དུ་བྱས་ཞེས་པའོ། །རིམ་པ་བཞི་པ་རྫོགས་སོ།། །།རྒྱ་གར་གྱི་པཎྜི་ཏ་སུ་མ་ཏི་ཀིཏྟི་དང་བོད་ཀྱི་ལོ་ཙ་བ་པྲཛྙཱ་ཀྲིཏྟིས་བསྒྱུར་ཞིང་ཞུས་ཏེ་གཏན་ལ་ཕབ་པའོ། །པྲཛྙཱ་ཀིཏྟི་ནི་པུ་རངས་ལོ་ཆུང་ཤེས་རབ་གྲགས་ཏེ། མཚན་གཞན་གྲགས་འབྱོར་ཤེས་རབ་ཅེས་བྱའོ། །འགྱུར་བྱང་ལ་དེ་ཙམ་ལས་མེད་ཀྱང་གཞུང་འདི་ཡང་འབྲོག་
འགོས་གྱི་འགྱུར་ལ་འགྱུར་བཅོས་པ་ཡིན་ནོ། །གང་ཞིག་འཁོར་བ་ལས་ཀྱང་མྱང་ངན་འདས། །འབད་རྩོལ་མེད་པར་བརྙེས་འགྱུར་གསང་བའི་ལམ། །དཔག་ཡས་གྲུབ་མཆོག་ཀུན་གྱིས་བགྲོད་བྱས་ཏེ། །བླ་མ་དམ་པའི་དྲིན་ལས་འདིར་གསལ་བྱས། །བློ་ངན་སྦྲུལ་གདུག་གིས་གཟུང་བློན་པོ་ཡི། །ཡིད་ཀྱི་ཁང་པར་སྒྲོན་མེ་བྱེད་པ་ཅི། །རྣམ་དཔྱོད་འདབ་བརྒྱ་རྒྱས་པའི་སྐལ་བཟང་ལ། །ལེགས་བཤད་ཉིན་བྱེད་འོད་འདིས་བྱ་བ་བྱེད། །དེ་ལྟར་ཤིན་ཏུ་རྟོགས་དཀའ་བའི། །ཟབ་མོའི་གཞུང་མཆོག་འདི་བཤད་པས། །མཐའ་ཡས་འགྲོ་བ་མ་ལུས་པས། །ཧེ་རུ་ཀ་དཔལ་ཐོབ་གྱུར་ཅིག།དཔལ་རིམ་པ་བཞི་པའི་གཞུང་གི་རྣམ་པར་བཤད་པ་གསང་བའི་དོན་རབ་ཏུ་གསལ་བ་ཞེས་བྱ་བ་འདི་ཡང༌། རྒྱལ་ཁམས་པ་ཏཱ་ར་ནཱ་ཐས་སྦྱར་བ་སྟེ། ནག་པོ་སྤྱོད་པ་པའི་གཞུང་རྒྱ་བོད་ཀྱི་དགོངས་འགྲེལ་དུ་མ་དང་བཅས་པ་དང༌། འདི་དང་ཕྱོགས་མཚུངས་པའི་རྒྱུད་དང་བསྟན་བཅོས་ཐམས་ཅད་ལ་ངེས་པ་རྙེད་ནས། གཞུང་དོན་དཔྱིས་ཕྱིན་པར་སྨྲས་པ་ཡིན་ནོ། །མངྒ་ལཾ། སྤྱོད་པ་པའི་རྫོགས་རིམ་གཞུང་གསུམ་ལ་ཕྱོགས་འདིར་ལོ་སུམ་བརྒྱ་ཚུན་ཆད་དུ་བརྩམས་པའི་ཡིག་སྣ་མེད་པས་ཕྱིས་ཀྱི་ངག་སྒྲོས་ཀྱིས་བསླད་པ་ནི་མེད་ལ། གཞུང་འདི་ལ་པཎྜི་ཏ་ཀརྨ་བཛྲ་ཞེས་བྱ་བའི་བྱས་པའི་འགྲེལ་པ་རྒྱས་པ་ཞིག་ཡོད་པ། གསང་སྔགས་ལ་ཐོས་པ་དང་རྣམ་དཔྱོད་ཆེ་བ་ཞིག་གིས་བརྩམས་འདུག་ནའང༌། གཞུང་གསུམ་གྱི་ལམ་གྱི་རིམ་པས་སྙིང་པོ་མ་རྙེད་སྣང་བས། མན་ངག་མེད་པའི་རྩལ་བཤད་དུ་འདུག གཞན་རང་
འགྲེལ་དུ་ཁ་འཕངས་པའི་བསྡུས་པ་ཞིག་དང༌། ག་ཡ་དྷ་རའི་འགྲེལ་པ་མདོར་བསྡུས་ཞིག་ཀྱང་སྣང་བས། རྒྱ་འགྲེལ་གསུམ་མོ། །བོད་ཀྱི་སྦྱར་བ་ལ་འབྲོག་འགོས་རྭ་གསུམ་སོ་སོའི་སློབ་མས་བྲིས་པའི་མཆན་བུ་དང༌། ཡིག་སྣ་ཐན་ཐུན་ཡོད་ལ། མལ་ལོའི་འགྲེལ་བ་ཉུང་ངུ་དང༌། དེའི་རྗེས་འབྲང་རྗེ་བཙུན་ས་སྐྱ་བའི་ནག་འབུམ་གྱི་ནང་ན་ཡོད་པ་དང༌། ཨོ་ལ་པ་ཏིའི་མན་ངག་དང་འགྲེལ་པ་གཞན་ཡང་ཡོད་ཅིང་མར་པ་དོལ་པས་ཊཱི་ཀ་དང་པཱུ་རངས་ལོ་ཆུང་གི་སློབ་མ་འགའ་ཞིག་གི་མཆན་དང་ཡིག་སྣ་སོགས་སྣང་ལ། འོན་ཀྱང་དེ་དག་ཐམས་ཅད་ལ་ལེགས་བཤད་ཀྱང་མང་དུ་ཡོད་ཅིང༌། ཁྱད་པར་མར་དོལ་མལ་ལོ་ཆུང་གསུམ་ལ། མན་ངག་ལག་ལེན་ཟབ་མོ་ཁྱད་པར་ཅན་ཡོད་མོད་ཀྱི། བཤད་སྒྲོས་ན་རྒྱུད་དོན་མཐའ་དག་ལ། ངེས་པ་སྟེར་ནུས་པའི་འགངས་ཆེན་པོ་ཁོ་ནར་ཡང་མི་སྣང་བའི། འདིར་གཞུང་འདི་ཤེས་པ་དོན་གཉེར་དག་ཡོད་སྲིད་ན་ཕན་པར་འགྱུར་རོ་སྙམ་ནས་ཀླག་ཆོག་གི་ཚུལ་དུ་ཞིབ་ཅིང་གསལ་ལ་མ་ནོར་བ་ཟབ་ཅིང་རྒྱ་ཆེ་བའི་ཚུལ་གྱིས་བཤད་པ་ཡིན་ནོ། །ཤུ་བྷཾ།། །།བདག་གིས་དགེ་བ་གང་བསགས་འདི་ཡིས་ནི། །སེམས་ཅན་ཐམས་ཅད་བདེ་ཞིང་སྐྱིད་པ་དང་། །གནས་སྐབས་མཐར་ཐུག་ཕན་བདེ་མཆོག་སྤེལ་བའི། །བླ་མ་མེད་པའི་རྒྱུ་ཚོགས་ཉིད་གྱུར་ཅིག །ཅེས་པའི་དགེ་བ་བསྔོ་བའི་མ་ཏིས་བྲིས། །
རྗེ་བཙུན་པད་དཀར་འཆང་བའི་རྣམ་འཕྲུལ་མགོན། །སླུ་བའི་དབང་ཕྱུག་ཡོན་ཏན་བཟང་པོ་ཡིས། །སྤྱི་ལོ་གཅིག་སྟོང་དགུ་བརྒྱ་གོ་ལྔ་བར། །བསྟན་པ་སྤྱི་དང་ཁྱད་པར་ཇོ་ནང་བའི། །བཤད་སྒྲུབ་སླར་གསོ་བྱ་བ་སྤེལ་བའི་ཆེད། །འཇམ་མགོན་ཏཱ་ར་ནཱ་ཐའི་གསུམ་འབུམ་གྱི། །མི་ཟད་ཆོས་སྦྱིན་དཔལ་ལྡན་འཛམ་ཐང་དགོན། །གཙོང་བའི་ཆོས་གྲྭལ་བསྐྲུན་པའི་དགེ་བ་ཡིས། །མ་གྱུར་འགྲོ་ལ་གནས་སྐབས་བདེ་བ་དང་། །མཐའ་ཐུག་གཏན་བདེ་བླ་མེད་དབྱར་ཆུབ་མཆོག །མྱུར་དུ་ཐོབ་པའི་མཐུ་དཔུང་དམ་པ་རུ། །གཞི་དབྱིངས་མཆོག་གསུམ་དམ་པས་ཤིས་པ་རྩོལ། །འདི་ཡང་པུཎྱེ་ཤྲཱིས་བྲིས་པ་དགེ།
ཤོག་སྟོང་།