བཛྲ་བྷཻ་ར་བའི་སྦྱིན་སྲེག་བསྡུས་པ།
བཛྲ་བྷཻ་ར་བའི་སྦྱིན་སྲེག་བསྡུས་པ་བཞུགས།
འདིར་སྦྱིན་སྲེག་བསྡུས་པ་ནི། ས་སྟེགས་གྲུ་བཞི་ཁྲུ་ཕྱེད་དོ་ཞིག་གི་སྟེང་དུ་ཐབས་ཁུང་གྲུ་གསུམ་ནང་གི་རྒྱ་ལ་ཆེ་ན་ཁྲུ་གང༌། འབྲིང་ལ་ཡང་སོར་ཉི་ཤུ། ཆུང་ན་མཐོ་གང་ཡོད། དཔང་དུ་རྒྱའི་ཆ་ཕྱེད་སྲབ་འཐུག་རྩེ་མོར་སོར་གསུམ་གཅིག་བྱ། རང་གི་མདུན་དུ་ཧོམ་ཁུང་གི་ནང་དུ་ལིངྒ་ཁྲག་གིས་བྱུགས་པ་གཅིག་བཅུག དམར་གཏོར་གྲུ་གསུམ་དང་མཆོད་པ་སྤྱི་དང་མཐུན་པ་དང༌། རཀྟ་ནང་མཆོད་ལ་སོགས་པ་ཡང་བཤམས། ཐབ་ཀྱི་ནང་དུ་དྲག་པོ་ལ་ཚེར་མ་ཅན་དང༌། ཞི་བ་ལ་ལྕི་སྐམ་མམ་དགེ་བའི་ཤིང་གིས་གང་བར་བྱེད། དྲག་པོ་ལ་ཚེར་མ་ཅན་གྱི་ཤིང་དང༌། ཤིང་བྲུལ་སོགས་ཀྱིས་གང་བར་བྱེད། ཐབས་ཀྱི་ནང་དུ་ཏིང་ལོ་ཞིག་བཞག་གོ །ཐབས་ནང་གི་འབུད་ཤིང་དང་མཚུངས་པའི་ཡམ་ཤིང་རང་གི་གཡོན་ཕྱོགས་སུ་བསག དེ་བཞིན་དུ་རྒྱས་དབང་གསུམ་ལ་དཀར་གྱི་མར་ཁུ་དང༌། དྲག་པོ་ལ་རྐེ་ཚེས་མར་ཁུ་དགོས། འབྲུ་མར་གཞན་ནས་ཇི་ལྟར་འོས་པ་གཉིས་ཀ་ལ་ཕུལ་བའི་
ཆོག གཞན་སྲེག་རྫས་ཀྱི་དངོས་པོ་འབྲུ་རྣམ་པ་སྣ་ཚོགས་དང༌། རྩ་ཀུ་ཤ ཞི་རྒྱས་དབང་གསུམ་ལ་ཟས་མཆོག དྲག་པོ་ལ་ཤ་ཁྲག་སྣ་ཚོགས་དང༌། བོང་བུའི་སྦངས་དང༌། སྐྲ་ཤད་དང༌། དུར་ཁྲོད་ཀྱི་རུས་པ་ལ་སོགས་པ་དགོས་ཤིང༌། མེས་བསྲེགས་པར་འོས་པ་གང་འཛོམས་པ་དེ་ཕུལ་བས་ཆོག དེ་ནས་སྔོན་འགྲོ་གཏོར་མ་དང༌། གནས་ཡོ་བྱིན་རླབས་དང༌། བདག་བསྐྱེད་སྔོན་དུ་འགྲོ་བར་བྱ་སྟེ། ནང་མཆོད་གཏོར་མ་བྱིན་གྱིས་བརླབས། ཨོཾ་ཨཱཿཧཱུཾ་དང༌། ཡ་མནྟ་ཀ༴ མང་དུ་བཟླས། བསྲེག་རྫས་རྣམས་ལ། ཨོཾ་ཨོཾ་སྭཱཧཱ། ཨོཾ་ཨཱཿསྭཱཧཱ། ཨོཾ་ཧྲཱིཾ་སྭཱཧཱ། ཨོཾ་ཀུ་རུ་ཀུ་རུ་སྭཱཧཱ། ཞེས་ལན་གསུམ་རེ་བཟླས། ཨོཾ་ཛྭ་ལ་ཛྭ་ལ་ཧཱུཾ། ཞེས་དཔའ་འབར་གྱིས་མེ་སྦར་ཏེ་ཐབས་ནང་གི་ཏིང་ལོ་སྦར་རོ། །ཧཱུཾ་ཧཱུཾ་ཞེས་རླུང་ཡབ་ཀྱིས་གཡབས་སོ། །སྤྱིར་སྦྱིན་སྲེག་གི་མེ་རླུང་ཡབ་ཀྱིས་གཡབ། སྦུད་པས་འབུད་དུ་རུང༌། ཁས་འབུད་པར་མི་
བྱའོ། །ཨོཾ་ཨ་མྲྀ་ཏེ་ཧཱུཾ་ཕཊ། ཨོཾ་སྭ་བྷཱ་ཝས་སྦྱངས། སྟོང་པའི་ངང་ལས་བྷྲུཾ་ལས་བྱུང་བའི་ཐབ་ཡངས་ཤིང་རྒྱ་ཆེ་བའི་ནང་དུ། རཾ་ལས་མེའི་ཕུང་པོ་ཉིད་དྲང་སྲོང་ཆེན་པོ་མེ་ལྷ། ཞི་རྒྱས་དབང་གསུམ་ལ། བགྲང་ཕྲེང་དང་སྤྱི་བླུགས་འཛིན་པ། དྲག་པོ་ལ། ནག་པོ་སྲིན་པོ་ལྟར་ཁྲོས་པ་གྲི་གུག་འཛིན་པའོ། །ཡང༌། ཡ་མནྟ་ཀས་བསངས། སྭ་བྷ་ཝས་སྦྱངས། མེ་ལྷའི་སྙིང་གར་རབ་ཏུ་ཡངས་པའི་དབུས་སུ་རྡོ་རྗེ་འཇིགས་བྱེད་ཆེན་པོ། བདག་བསྐྱེད་ལྟར་ཡོངས་སུ་རྫོགས་པར་བསྐྱེད་དེ། དབུ་རྒྱན་གྱི་རྒྱས་བཏབ་པའི་འབར་རོ། །ཡང་ན་སྐད་ཅིག་གིས་བསྐྱེད་པའི་ཀྱང་ཆོག ཨརྒྷཾ་ནས་ཤབྟའི་བར་གྱིས་མཆོད། གཟུགས་སྒྲ་ལ་སོགས་པ་ནས་དུད་ཁ་མུན་ཅན་གྱི་བར་བརྗོད། ཧྲཱིཿཥྟཱིཿའི་མཐར། ཨོཾ་ཨགྣ་ཡེ་སྭཱཧཱ། བདག་གི་བར་ཆད་ཐམས་ཅད་ཞི་བར་མཛོད་ཅིག ཅེས་པའམ། དགྲ་བོ་འདི་ཞེས་བྱ་བ་མ་ར་ཡ་ཧཱུཾ་ཕཊ། ཅེས་མར་ཁུ་འབུལ་ལོ། །ཧྲཱིཿཥྟཱིཿའི་མཐར། ཨོཾ་བཛྲ་ཨ་ཏ་ཡ་ཧཱུཾ་ཕཊ། སྤེལ་ཚིག་གོང་བཞིན་སྦྱར། ཡམ་ཤིང་འབུལ། དེ་ནས་སྲེག་རྫས་གཞན་རྣམས་ལ། ཨོཾ་ཧྲཱིཿཥྟཱིཿ་བི་ཀྲྀ་ཏ་ན་ན། ཆྒཻ་མོ་མ་ར་ཡ་ཧཱུཾ་ཕཊ། ཞེས་བཏགས་པ་ཁོ་ནས་འབུལ་ལོ། །ཞི་བ་ལ་ཆྒཻ་མོ་མར་ར་ཡའི་ཚབ་ཏུ་མ་མ་ཤནྟིཾ་ཀུ་རུ་ཞེས་པའོ། །དྲག་པོའི་ལས་ལ་བར་འདིར་ལིངྒ་དགུག་གཞུག་ནས་སྒྲོལ་ཚིག་གི་བར་དྲུག་ཅུ་པའི་གཏོར་ཆོག་ནས་བཤད་པ་བཞིན་བྱ་ལ། ལིང་རོ་རྣམས་གོང་བཞིན་ལྟར་གསད་སྔགས་སྤེལ་བ་དེས་འབུལ།
དེ་རྗཻས་གཏོར་མ་ལ་དམིགས་ནས་མངོན་རྟོགས་ནས་བཤད་པ་ལྟར་གཏོར་ཆོག་ཡོངས་རྫོགས་བྱ། འདོད་དོན་གསོལ་བ་བཏབ། ཡིག་བརྒྱ་བཟླ། མ་འབྱོར་པ་དང་ཉམས་པ་དང༌། སོགས། ཁྱེད་ཀྱིས་སེམས་ཅན་དོན་ཀུན་མཛོད་སོགས། སྨོན་ལམ་དང་བཀྲ་ཤིས་ཅི་འགྲུབ་བྱ། དཔལ་རྡོ་རྗེ་འཇིགས་བྱེད་ཀྱི་སྦྱིན་སྲེག་བསྡུས་པ་ལས་ཀྱང་ཤིན་ཏུ་བསྡུས་པ་འདི། ཆོས་བཟང་ཉི་མས་བསྐུལ་ནས། ཏཱ་ར་ནཱ་ཐས་སྨྲས་པའོ།། །།མངྒ་ལཾ།།