གྲུབ་ཆེན་ནག་པོ་སྤྱོད་པའི་དོ་ཧའི་འགྲེལ་པ་ཟབ་དོན་ལྡེ་མིག
གྲུབ་ཆེན་ནག་པོ་སྤྱོད་པའི་དོ་ཧའི་འགྲེལ་པ་ཟབ་དོན་ལྡེ་མིག་ཅེས་བྱ་བ་བཞུགས།
ན་མོ་གུ་རུ། གང་གི་ཐུགས་རྗེའི་ཟླ་འོད་ཀྱིས། །སྙིང་གི་ཀུ་མུད་ཁ་འབྱེད་པ། །བླ་མའི་ཞབས་ལ་ལེགས་བཏུད་ནས། །ཟབ་མོའི་གཞུང་མཆོག་བཤད་པར་བྱ། །འདིར་གྲུབ་པའི་སློབ་དཔོན་ཆེན་པོ་ནག་པོ་སྤྱོད་པ་པའི། དོ་ཧ་རྡོ་རྗེའི་གླུ་འདི་འཆད་པར་བྱེད་པ་ལ། དང་པོར། རྒྱ་གར་སྐད་དུ། དོ་ཧ་ཀོ་ཤ་ཅེས་པ་ལ། དོ་ཧ་ནི་འགྱུར་བྱེད་འགའ་ཞིག་གིས་ཚིགས་སུ་བཅད་པ་དང༌། ཁ་ཅིག་གིས་མི་ཟད་པ་ཞེས་པར་བསྒྱུར་ཞིང༌། ས་སྐྱ་པནྚི་ཏའི་ཞལ་ན་རེ། རྒྱ་སྐད་དོ་ཧ་ཞེས་བྱ་བ། །བོད་སྐད་ལྷུག་པ་མ་བཅོས་པ། །ཞེས་གསུངས་པ་ལྟར་ཡང་ཡིན་ཏེ། དོན་ཤུགས་འབྱུང་གི་ཚིག་ཅེས་བྱའོ། །བོད་རྙིང་མང་པོ་ཞིག གང་བའི་དོན་དུ་འཆད་པ་ལ། རྩེ་ཐང་བ་རྗེ་གཞོན་ནུ་དཔལ་བས་ནི་སྒྲུབ་བྱེད་འགོད་དེ། རྒྱ་སྐད་ལ། དུ་ཧ་
འཇོ་བ་ལ་འཇུག དུ་དོར་འགྲོ་བ་ནི་ཆེན་པོར་སོང་བའི་དོན་ཡིན་པས། འོ་མ་ལྟ་བུ་མང་དུ་བཞོས་པས་སྣོད་གང་བ་ལྟ་བུའོ། །ཞེས་འཆད་ཀྱང༌། ཨུ་ཤ་ཊ་རའི་བཤད་པ་བཞིན་དུ། གཞན་དག་མགོ་རྨོངས་བྱེད་དུ་འདུག་པ་དང༌། ཁྱད་པར་དུ་ཡང༌། གངབའི་དོན་འཇོ་བ་ནས་རིམ་པས་སྐོར་ལོག་ཏུ་སྒྲུབས་དགོས་པ་ཧ་ཅང་ཐལ་ཞིང་མི་འགྲིག་བཞིན་དུ་སྒྲིག་པ་ཕོངས་པའི་རྒྱུ་ཁོ་ནར་གནང་ངོ༌། །ཀོ་ཤ་ནི་མཛོད་དོ། །དེ་ལྟར་ན་མཚན་གྱི་དོན་ནོ། །དཔལ་ཧེ་རུ་ཀ་ལ་ཕྱག་ཚལ་ལོ། །ཞེས་པ་ནི་འགྱུར་གྱི་ཕྱག་ཀྱང་ཡིན་མོད་ཀྱི། །རྒྱ་དཔེ་ཉིད་ལའང་ཡོད་པར་མངོན་ནོ། །ད་ནི་གཞུང་དངོས་བཤད་པ་ལ། དེ་ཁོ་ན་ཉིད་རྟོགས་པར་དཀོན་པར་བསྟན་པ་དང༌། དེ་ཁོ་ན་ཉིད་རྒྱས་པར་བཤད་པ་དང༌། དོན་བསྡུའི་ཚིགས་སུ་བཅད་པ་སྟེ་གསུམ་ལས། དང་པོ་ནི། ང་ནི་
དམ་པའི་དོན་མཁས་པར། །འཇིག་རྟེན་སྙེམས་པ་ཡང་དག་འཆད། །བྱེ་བའི་ནང་ན་གལ་ཏེ་གཅིག །དྲི་མ་མེད་པར་ཞུགས་པར་གྱུར། །ལུང་དངརིག་བྱེད་སྔོན་རབས་ཀྱིས། །མཁས་པར་ང་རྒྱལ་བྱེད་པ་དང༌། །དཔལ་འབྲས་སྨིན་པའི་ཕྱི་རོལ་གྱི། །བུང་བ་བཞིན་དུ་དེ་དག་འཁྱམ། །ཞེས་པ་སྟེ། ཚིག་རྐང་དངཔོ་གཉིས་ལ་ལོ་ཙཱ་བ་ཆོས་སྐྱོང་བཟང་པོས། ང་ནི་དོན་དམ་ལ་མཁས་ཞེས། །འཇིག་རྟེན་པ་ནི་ང་རྒྱལ་བྱེད། །ཅེས་སྒྱུར་བ་དང༌། ཚིག་རྐང་ཐ་མ་གཉིས་ནི། རྒྱ་གར་བཻ་རོར་ཡང་གྲགས་པ། གྲུབ་ཐོབ་བེ་རོ་ཙཱ་ན་བཛྲ་གྱི་རང་འགྱུར་ལས། དཔལ་འབྲས་སྨིན་པ་ལ་ནི་བུང་བ་བཞིན། །དེ་ནི་ཕྱི་རོལ་དག་ཏུ་འཁོར་བར་བྱེད། །ཅེས་འབྱུང་བ་གོ་བདེའོ། །འཇིག་རྟེན་ཅེས་པ་ནི་མུ་སྟེགས་བྱེད་དང༌། ཉན་ཐོས་སྡེ་པ་དང༌། ཐེག་ཆེན་ཚུལ་གཉིས་ལ་ཞུགས་པར་རློམ་པའི་ཡང༌། ཐ་སྙད་གཙོ་བོར་བྱེད་པ་རྣམས་ཏེ། དེ་ལྟར་ཐམས་ཅད་ལ་འཇུག་ཀྱང༌། སྐབས་འདིར་གཙོ་བོར་ནང་བའི་འཇིག་རྟེན་པ་དེ་རྣམས་ཀྱང༌། རང་རང་སོ་སོའི་གནས་ན་འདུག་སྟེ། གཞན་དག་གིས་ནི་དེ་ཁོ་ན་ཉིད་མི་ཤེས་ཏེ། ང་ཉིད་ཁོ་ན་དམ་པའི་དོན་ལ་མཁས་སོ་ཞེས། །ཤིན་ཏུ་ང་རྒྱལ་ཆེན་པོས་སྙེམས་པ་འཆད་པ་བྱེད་དོ། །དེ་ལྟ་ན་དེ་ཁོ་ན་ཉིད་རྟོགས་པར་ཁས་འཆེ་བ་ན། ཤིན་ཏུ་མང་ནི། དེ་དག་གིས་དོན་དམ་རྟོགས་པ་བདེན་ནམ་ཞེ་ན། མ་ཡིན་ཏེ། དེ་ལྟར་ཁས་འཆེ་བ་བྱེ་བའི་གྲངས་ཙམ་གྱི་ནང་ན། གལ་ཏེ་ཅིག་ཙམ་ཞིག དྲི་མ་མེད་པ་
སྟེ། འདོད་ཆགས་ལ་སོགས་པ་ཉོན་མོངས་པའི་རྡུལ་དང་བྲལ་བའི་ཡེ་ཤེས་ལ་ཞུགས་པར་གྱུར་པ་ནི་སྲིད་པ་ཙམ་མོ། །གལ་ཏེ་ཞེས་པའི་ཚིག་གིས་ཅི་སྟེ་ན། བྱེ་བའི་ནང་ན་དེ་ལྟ་བུ་གཅིག་ཀྱང་མེད་པ་ཡང་སྲིད་ཅེས་པའོ། །འདིར་དྲི་མ་མེད་པའམ་རྡུལ་དང་བྲལ་བ་ནི། བདེན་པ་མཐོང་བ་འམ་གནས་ལུགས་རྟོགས་པ་ལ་བྱེད། དེའི་ཚད་ཀྱང༌། སྤྱི་ལ་གྲགས་པའི་མཐོང་ལམ་ཁོ་ན་ལ་འཇོག་དགོས་པའངམིན་ཏེ། རྫོགས་རིམ་གྱི་ཡེ་ཤེས་མངོན་སུམ་ལམ་བྱེད་ཐོབ་པ་ནས། བདེན་པའི་གནས་ལུགས་རྟོགས་པ་དང༌། དེའི་ཚེ། ཉོན་མོངས་ལམ་བྱེད་ཇི་བཞིན་དུ་ནུས་པའི་ཕྱིར། རྡུལ་བྲལ་དང་དྲི་མ་མེད་པར་ཡང་འཇོག་གོ །དེའི་ས་མཚམས་ཀྱང་ངོ་མི་ཤེས་ན། །རྡོ་རྗེའི་བཟླས་པའི་རིམ་པ་མཐར་ཕྱིན་པའམ། སྔགས་ཀྱི་རིམ་པའི་རྟོག་པ་སྐྱེས་པའམ། ཐོག་མར་དགེ་བ་མཐར་ཕྱིན་ཏེ། སྲོག་རྩོལ་ལ་ཞུགས་པ་ལྟ་བུ་ལ་མཚོན་པར་བྱ་སྟེ། ས་མཚམས་ཆ་ཤས་ཕྲ་མོ་ལ་ནི་ངེས་པ་མེད་དོ། །ཚིག་བཅད་གཉིས་པ་མུ་སྟེགས་ཅན་ལ་འགོག་པ་ནི། ལུང་དང་སོགས་ཏེ། ཚིག་གི་དངོས་བསྟན་ལ། སྔོན་རབས་སོགས་ཤེས་པའི་ང་རྒྱལ་ཅན་རྣམས་ལ་དཔེ་དང་སྦྱར་བ་ཙམ་ལས་མེད་ཀྱང༌། དེའི་ཁོངས་ན་དོན་འདི་གནས་ཏེ། གོང་དུ་སྨོས་པ་ལྟར། མུ་སྟེགས་འདི་དག་གིས་ནི་དེ་ཁོ་ན་ཉིད་རྟོགས་པ་མ་ཡིན་ཏེ། དྲག་པོ་དབང་ཕྱུག་ཆེན་པོས་བཤད་པའི་ལུང་རྒྱུད་སྡེ་འབུམ་པ་དང༌། རིག་བྱེད་བཞི་ཡན་
ལག་དྲུག་དྲན་པའི་གཞུང་ལྟ་བ་དྲུག་གི་གཞུང་དང་བཅས་པ་དང༌། སྔོན་རབས་བཅོ་བརྒྱད་བྷ་ར་ཏ་སྒོམ་པའི་ཆོས་དང་བསྟན་བཅོས་བཅུ་བཞིར་བཅས་པ་སྟེ། མུ་སྟེགས་བྱེད་ཀྱི་གཞུང་ལུགས་གྲགས་ཆེ་བ་རྣམས་དང༌། གཞན་ཡང་འཇིག་རྟེན་རྒྱང་ཕན་དང༌། གཅེར་བུའི་གཞུང་ལ་སོགས་པ། ཕྱིན་ཅི་ལོག་གི་གཞུང་ལུགས་རྣམས་ལ་མངོན་པར་ཞེན་པའི་འཇུག་པ་ཙམ་ཡིན་པའི་ཕྱིར་དང༌། འགའ་ཞིག་ལུང་རིགས་ལྟར་སྣང་ལ། ཡང་དག་པར་འཁྲུལ་པའི་ཕྱིར་དང༌། ཏིང་ངེ་འཛིན་སྒྲུབ་པར་བྱེད་པ་རྣམས་ཀྱང༌། དེ་ཁོ་ན་ཉིད་རྫུས་མ་ལ་འཇུག་པའི་ཕྱིར་རོ། །དཔེར་ན་ཤིང་ཐོག་དཔལ་གྱི་འབྲས་བུ་ཞེས་བྱ་བ། ཁ་དོག་མཛེས་ཤིང་དྲི་བཟང་ཅུང་ཟད་ཡོད་པ་ལ། བུང་བ་རྣམས་སྦྲང་རྩི་འདོད་པས། ཕྱི་རོལ་དུ་འཁོར་ཞིང་འཁྱམས་པ་བྱེད་དེ། དེ་ནི་ཁ་དོག་དང་དྲི་ཡིད་དུ་འོང་བ་ཙམ་གྱིས་བསླུས་པར་ཟད་ཀྱི། སྦྲང་རྩི་ཐོབ་རྒྱུ་མེད་པ་བཞིན་ནོ། །དེས་ན་ཚིགས་བཅད་སྔ་མ་ནི་སྐལ་བ་བཟང་ཞིང་དད་པ་དང་ལྡན་པ། མོས་པའི་དགེ་བ་ཅན། བླ་མ་དམ་པས་ཡོངས་སུ་བཟུང་བ་རེ་རེ་ཙམ་ཡོད་པ་ནི་མ་གཏོགས། རྩོད་དུས་བྱུང་བའི་སངས་རྒྱས་པར་མཁས་འཆེ་བ་དག་གིས་ཀྱང་དེ་ཁོ་ན་ཉིད་རྟོགས་པར་མི་འགྱུར་ཏེ། གནས་ལུགས་མངོན་སུམ་དུ་མཚོན་པའི་ལམ་མ་རྙེད་པའི་ཕྱིར་དང༌། སྒྲ་ཙམ་གྱི་རྗེས་སུ་འབྲངས་བའི་ལེན་འདོར་གྱི་རྣམ་རྟོག་མང་པོས་གཡེན་བཅོས་པའི་ཕྱིར་དང༌། ང་རྒྱལ་དང་རྟོག་དཔྱོད་དང༌། ཆགས་སྡང་
གིས་དཀྲུགས་པས་བླ་མ་དམ་པའི་བྱིན་རླབས་མི་འཇུག་པའི་ཕྱིར་རོ། །ཚིགས་བཅད་ཕྱི་མས་ནི། སངས་རྒྱས་ཀྱི་བསྟན་པ་ལས་ཕྱི་རོལ་དུ་གྱུར་པ་རྣམས་ལ་ནི་རྣམ་པ་ཀུན་ཏུ་གྲོལ་བ་མེད་དེ། གནས་ལུགས་ལ་ཕྱིན་ཅི་ལོག་པའི་འདུ་ཤེས་དམ་པོར་འཛིན་པ་ཁོ་ན་ཡིན་པའི་ཕྱིར་རོ། །ཞེས་སྟོན་ལ། སངས་རྒྱས་པའི་གྲུབ་མཐའ་སྨྲ་བ་ཕལ་གྱིས་ཀྱང༌། ད་ལྟ་དེ་ཁོ་ན་ཉིད་མངོན་སུམ་དུ་བྱེད་མི་ནུས་ཀྱང༌། མ་འོངས་པ་ཞིག་ན་རིམ་པས་རྟོགས་པར་འགྱུར་བའི་བག་ཆགས་འཇོག་ལ། མུ་སྟེགས་པ་རྣམས་ལ་དེ་ཡང་མེད་ཅིང༌། བྱེ་བའི་ནང་ན་གལ་ཏེ་གཅིག་ཅེས་པ་ལྟ་བུའི་གཅིག་སྲིད་པའང་མིན་པས། ངལ་བ་འབྲས་མེད་ཁོ་ནའོ། །ཞེས་པའི་དོན་ནོ། །གྲུབ་ཐོབ་ས་ར་ཧའི་དོ་ཧ་ལས་ཀྱང༌། གཞུང་གི་ཐོག་མར། ཕྱི་ནང་གི་གྲུབ་མཐའ་སྨྲ་བ་ཐམས་ཅད་ལ་འགོག་བྱེད་མཛད་པ་དང༌། གཞུང་འདིར་ཡང་ཐོག་མར་དེ་ལྟར་འཆད་པ་གཉིས། འཆད་ཚུལ་མཚུངས་པ་ཡིན་ནོ། །འོ་ན་གཞན་རྣམས་དེ་ལྟར་བདེན་སྲིད་ཀྱང༌། དབུ་མའི་ཚུལ་ལུགས་ལ་ཞུགས་པ་རྣམས་ནི་ངེས་པར་གྲོལ་བ་འགྱུར་ཏེ། མཐའ་བྲལ་གྱི་གནས་ལ་ཐེ་ཚོམ་ཟ་བ་ཡང༌། སྲིད་པ་ཧྲུལ་བོར་བྱེད་ན། ངེས་པ་སྐྱེད་པ་རྣམས་ལྟ་ཅི་སྨོས་སྙམ་ན། གྲུབ་མཐའ་སྨྲ་བ་སྡེ་བཞིའི་ནང་གི་དབུ་མ་པའི་སྡེ་པར་ཆུད་པའི་དབུ་མ་པ་ཡིན་པ་ཙམ་གྱིས་ནི་ཅིར་ཡང་མི་ཕན་ཏེ། དེ་ཙམ་གྱི་ནང་ན་ནི་ཆོས་སུན་འབྱིན་ཅིང་མཚམས་མེད་ལ་སོགས་པ་བྱེད་པའི་སྡིག་ཅན་ཡང་ཆེས་
མང་དུ་ཡོད་པའི་ཕྱིར་དང༌། བློ་གྲིམ་པོ་ཅིག་གིས་རིག་པ་བསླབས་ན། སྡིག་པ་ཆེན་པོ་ལ་སྤྱོད་བཞིན་དུ་ཡང༌། གཞུང་ལུགས་མང་པོ་འཆད་པར་ནུས་པའི་ཕྱིར། ག་གེ་མོ་ནི་དབུ་མ་པའི་པནྚི་ཏ་ཆེན་པོ་ཡིན་ནོ། །ཆེ་གེ་མོ་ནི་དབུ་མ་པའི་སློབ་དཔོན་ཡིན་ནོ། །ཞེས་ངོམ་པ་ནི། དོན་གྱིས་སྟོང་པའི་ཚེ་ཚིག་ཙམ་དུ་ཟད་ལ། ཡང་འདི་དང་འདི་དག་ནི་སྡིག་པ་སྤྱོད་ཅིང་མི་མཁས་ཀྱང༌། དབུ་མ་པ་ཡིན་པས་བཟང་ལ། དེ་དང་དེ་དག་ནི། ཚུལ་ཁྲིམས་དང་ལྡན་ཞིང་མཁས་ཀྱང༌། བྱེ་མདོ་དང་སེམས་ཙམ་པ་ཡིན་པས། ངན་ནོ་ཞེས་སྨྲ་བ་ནི། ཁོག་ནས་བདུད་ཀྱིས་བྱིན་གྱིས་རླབས་ཤིང༌། དངོས་སུ་ན་ཕྱོགས་འཛིན་ཀོ་ལོང་ཤིན་ཏུ་དམ་པའི་ཁྲེལ་མེད་ཀྱི་སྨྲ་བ་ཡིན་པས་ཤེས་ལྡན་སུས་ཀྱང་རྟོགས་ནུས་ལ། དཔེར་ན། འཇིག་རྟེན་སྐྱེ་བོ་ཕྱོགས་ཡོ་ཅན་ཞིག རང་ཕྱོགས་ཀྱི་མི་ཕ་བསད་པ་ཞིག་ཡིན་ཀྱང༌། མི་བཟང་ཡིན་པའི་རྒྱུ་མཚན་འཆད་པ་དང༌། ཕ་རོལ་པོ་སྐྱེ་བོ་ཐམས་ཅད་བདེ་བར་བྱེད་ནུས་པ་ལའང༌། སྐྱོན་མེད་བཞིན་དུ་སྐྱོན་སྣ་ཚོགས་འཚོལ་བར་བྱེད་པ་དག་དང་འདྲ་སྟེ། རྒྱ་བོད་ཀྱི་མཁས་པར་གྲགས་པ་མང་པོ་ཞིག་ལ་ཡང་སྐྱོན་འདི་ནི་རིགས་ཀྱི་རང་བཞིན་དུ་བབས་སོ། །ལེགས་ལྡན་དང༌། ཟླ་གྲགས་དང༌། ཡེ་ཤེས་སྙིང་པོ་དང༌། པདྨའི་ངང་ཚུལ་སོགས་ཀྱང་ནན་ཏར་ན་དམ་པ་མ་ཡིན་ཏེ། སྡིག་པའི་སྤྱོད་པ་ཅན་གྱི་ཕྱིར་ཏེ། ཕྲག་དོག་གི་གདོན་གྱིས་ཟིན་པའི་ཕྱིར་ཏེ། རྩོད་བྲལ་གྱི་དམ་པ་མཆོག་ལ་སྐུར་པ་འདེབས་པའི་ཕྱིར་དང༌། གཡོ་སྒྱུའི་ཚིག་མ་རུང་བ་སྨྲ་བའི་
ཕྱིར་རོ། །དེ་མ་ངེས་སོ་སྙམ་ན། འོ་ན་དེ་བཞིན་གཤེགས་པ་སྐྱོན་མེད་དང༌། ཚངས་པ་ཁྱབ་འཇུག་སོགས་སྐྱོན་དང་ལྡན་པར་སྒྲུབ་པའི་རིགས་པ་རྣམས་ཀྱང་མ་ངེས་པར་ཐལ་བར་འགྱུར་པ་དང༌། ལྷ་ལས་ཕུལ་དུ་བྱུང་བ་དང༌། ཁྱད་པར་འཕགས་བསྟོད་དང༌། དཔའ་བོ་དང༌། ཤྲཱིཧརྵ་ལ་སོགས་པས་དེ་བཞིན་གཤེགས་པ་ལ་བསྟོད་པ་བྱས་པ་དེ་དག་ཀྱང༌། ངག་གི་སྒྲིབ་པ་བསགས་པར་ཐལ་བར་འགྱུར་རོ། །གོང་གི་འཕྲོས་ལས་བརྩམས་ན། འདི་དག་དམ་པ་མཆོག་ལ་སྨོད་དེ། རྒྱལ་བས་ལུང་བསྟན་པའི་འཕགས་པ་ཐོགས་མེད་སོགས་མང་པོ་ཞིག་ལ་སྐུར་པ་འདེབས་པའི་ཕྱིར་རོ། །གཡོ་སྒྱུའི་སྤྱོད་པ་ཡིན་ཏེ་ལྟག་གཅོད་ཀྱི་རིགས་པ་མང་དུ་སྨྲ་བའི་ཕྱིར་དང༌། ལག་ཏུ་མི་ལེན་པའི་ཚིག་གི་མཛེས་ཁྲིགས་ཀྱང་མང་དུ་འདུག་པའི་ཕྱིར་དང༌། ཀླུ་སྒྲུབ་ལུང་བསྟན་པ་ཡང་ཡང་ངོམས་ཞིང༌། ཐོགས་མེད་ལུང་བསྟན་པ་དང༌། འཕགས་པ་མིན་ལ་འཕགས་པའི་མིང༌། །ཞེས་གསུངས་པ་སོགས། ཤིན་དུ་རྦེད་ཅིང་གསང་བར་བྱེད་པའི་ཕྱིར་རོ། །དེ་ལྟ་ན་ས་ར་ཧས་ཀྱང༌། ཁ་ཅིག་ཐེག་ཆེན་དེ་ལ་རྒྱུ་བྱེད་ཅིང༌། །ཞེས་པ་དང༌། གཞན་དག་སྟོང་པ་ཉིད་ལ་བལྟ་བྱེད་དེ། །ཕལ་ཆེར་མི་མཐུན་ཕྱོགས་ལ་ཞུགས་པ་ཡིན། །ཞེས་དབུ་མ་པའི་སྡེ་བ་རྣམས། ཕལ་ཆེར་ཐེག་ཆེན་གྱི་དོན་འཆད་པ་ལ་གཡོ་སྒྱུ་བྱེད་ལ། མཐར་ཐུག་སྤྲོས་བྲལ་གྱི་སྟོང་པ་ཙམ་ལ་བློ་གཏད་འཆའ་བ་ནི། གནས་ལུགས་ལ་མི་མཐུན་པར་ཞུགས་པའོ། །ཞེས་གསུངས་པ་དང༌། ལྷ་ལྕམ་ལཀྵྨི་ག་རས། ལྷན་ཅིག་སྐྱེས་གྲུབ་ལས་ཀྱང༌། དབུ་མའི་
འདོད་ལུགས་གཞུང་གི་ཚུལ། །དེ་ནི་རྩོད་པ་ཀུན་ལ་མོས། །བསྐལ་བ་ཡལ་ག་ངལ་བས་ཀྱང༌། །བྱང་ཆུབ་ཐོབ་པར་མི་ནུས་སོ། །ཞེས་སྡོང་པོ་ཤིན་ཏུ་རྒྱས་པའི་ཡལ་གའི་གྲངས་ཙམ་གྱིས་བསྐལ་བར་འབད་ཀྱང༌། རང་སྟོང་གི་ལྟ་བ་ཙམ་གྱིས་བྱང་ཆུབ་ཐོབ་པར་མི་ནུས་ཤིང༌། རྩོད་པས་འཇུག་པས་ཕྱིར། བྱིན་གྱིས་བརླབས་པའི་རིམ་པ་མེད་པའོ། །ཞེས་པའོ། །རྩོད་པས་འཇུག་པ་ནི་ངེས་པར་ཡིན་ཏེ། རྩོད་པ་ལ་མ་ཞུགས་ན་རང་སྟོང་གི་གྲུབ་མཐའ་སྟོན་མི་ཤེས་པའི་ཕྱིར་དང༌། གཞུང་ཐམས་ཅད་རྩོད་ཡིག་འབའ་ཞིག་ཏུ་འདུག་པའི་ཕྱིར་དང༌། སྟོང་པ་ཉིད་ཀྱི་རྩད་བྱས་ཚེ། །ཞེས་སོགས་ཀླུ་སྒྲུབ་ཉིད་ཀྱིས་ཀྱང་རིགས་ཚོགས་རྩོད་ཆོས་ཡིན་པར་གསུངས་པའི་ཕྱིར་དང༌། གྲུབ་མཐའ་སྨྲ་བ་གཞན་ཐམས་ཅད་ལ་ཡང༌། རིགས་ཚོགས་རྗེས་འབྲང་དང་བཅས་པ་རྩོད་ཆོས་ཡིན་པར་ཁ་མཐུན་དུ་གྲགས་པའི་ཕྱིར་དང༌། རྗེས་འབྲང་རྣམས་ཀྱིས་ཀྱང་མནོང་ཁུར་ཏེ། རྩོད་ཆོས་མ་ཡིན་པའི་རྒྱུ་མཚན་འགངས་ཆུང་ཐར་ཐོར་རེ་ཡང་ཡང་འཆད་ཀྱིན་འདུག་པའི་ཕྱིར་རོ། །དེས་ན་རྩོད་ཆོས་ནི་རྒོལ་བ་ཟློག་བྱེད་ཡིན་གྱི། གནས་ལུག་མངོན་སུམ་དུ་རྟོགས་བྱེད་མ་ཡིན་ནོ། །དེ་ལྟ་བས་ན་སློབ་མ་སྣོད་དང་ལྡན་པ་ལ། ཁ་བཤད་ཙམ་མ་ཡིན་པར་བླ་མ་དམ་པའི་བྱིན་གྱིས་བརླབས་ཤིང༌། དཔེ་དངདོན་གྱི་སྒོ་ནས་ལྷན་ཅིག་སྐྱེས་པའི་ཡེ་ཤེས། ལག་ལེན་དང་སེམས་ཐོག་ཏུ་གཏན་ལ་ཕབ་ན་ནི། གནས་ལུགས་དེ་དངོས་སུ་རྟོགས་པར་ནུས་ཀྱི། ཐབས་གཞན་གྱི་ནི་མ་ཡིན་ནོ། །འཕྲོས་པས་ཆོག་གོ །༈ གཉིས་པ་དེ་
ཁོ་ན་ཉིད་རྒྱས་པར་བཤད་པ་ལ། གནས་ལུགས་ཀྱི་གསང་བ་བཤད་པ་དང༌། ལམ་དང་འབྲས་བུའི་གསང་བ་བཤད་པའོ། ། དང་པོ་ལ། རྟེན་འབྲེལ་གྱི་གསང་བ་བཤད་པ་དང༌། དོན་དམ་པའི་གསང་བ་བཤད་པ་གཉིས་སོ། །དང་པོ་ལ་སྲིད་པ་འཆར་བའི་གཞི་ལུས་ཀྱི་གནས་ཐབས། ལུས་དེ་ལ་འཁོར་བའི་སེམས་ཇི་ལྟར་བརྟེན་པའི་ཚུལ། སྲིད་པ་སྐྱེ་བའི་རིམ་པ་བཤད་པའོ། །དང་པོ་ནི། །བྱང་ཆུབ་སེམས་དང་རྡུལ་གྱིས་བརྒྱན། །མི་བསྐྱོད་པ་ཡིས་འཁྱུད་གྱུར་པ། །པདྨའི་ས་བོན་རང་བཞིན་གྱིས། །དག་པ་སྙུག་[གཉུག་]མའི་ལུས་ལ་མཐོང༌། །ཞེས་པ་སྟེ། འགྲེལ་པ་ན། འདིའི་གོང་དུ། སྤྲོས་པའི་རྣམ་པ་ལས་སྐྱེས་པ། །སྤྲོས་པས་སྤྲོས་པ་མེད་པ་བྱ། །ཞེས་པའི་ཚིག་ལ་བཤད་པ་མཛད་པ་ཞིག་བྱུང་ནའང༌། ལུང་འདྲེན་ལ་འབྲུ་བཤད་མཛད་པར་མངོན། གཞུང་རྩ་བ། མར་དོ་དང་རྣམ་སྣང་རྡོ་རྗེའི་འགྱུར་གཉིས་ཀ་ལ་མི་སྣང་ཞིང༌། སྔ་ཕྱིའི་ཚིག་དང་འགྲེལ་བར་ཡང་མི་འདུག་པས་མ་སྨོས་སོ། །དེས་ན་རྒྱུ་རྒྱུད་སེམས་གདོད་མ་ནས་རང་བཞིན་གྱིས་རྣམ་པར་དག་པ་དེ་ལ། པདྨའི་བརྡས་བསྟན་པ་ཐིག་ལེ་འགྱུར་བདེའི་བག་ཆགས་ཀྱི་ས་བོན་གནས་པ་ས་བོན་དང་རང་བཞིན་དག་པའི་སེམས་དེ་ཡང་དབྱེར་མེད་པར་འདྲེས་སོ་ཞེས་བྱ་བ་འགྱུར་བདེ་ལ་པདྨའི་བརྡས་བསྟན་པ་ནི། ཇི་སྐད་དུ། ཇི་ལྟར་པདྨ་འདམ་སྐྱེས་དེ། །མདུན་དུ་གྱུར་ན་ཡིད་དགའ་དང༌། །ཕྱི་ནས་དགའ་བ་མེད་འགྱུར་པ། །འོད་ཆགས་དགའ་བ་དེ་བཞིན་ནོ། །ཞེས་གསུངས་
པ་ལྟར་རོ། །ཇི་ལྟར་ན་དབྱེར་མེད་དུ་འདྲེས་པ་ཡིན་ཞེ་ན། ངོ་བོ་གཅིག་པ་ནི་མ་ཡིན་ཞིང༌། རྫས་ཐ་དད་པ་གཅིག་ཏུ་འདྲེ་བ་ཡང་མི་སྲིད། མཚན་ཉིད་ཀྱི་སྒོ་ནས་ནི་ཤིན་ཏུ་ཐ་དད་པ་ཡང་ཡིན་པའི་ཕྱིར། ངེས་པར་གཅིག་ཏུ་འདྲེས་པ་ནི་མ་ཡིན་ནོ། །འོ་ན་ཅི་ཞེ་ན། སེམས་ཅན་རྣམས་ལ་རང་བཞིན་དག་པ་དེ་ཉིད། རང་བཞིན་དག་པར་སྣང་ཡང་མི་སྣང༌། དག་པའི་བྱ་བ་སེམས་ཅན་རྣམས་ཉིད་ལ་བྱེད་ཀྱང་མི་བྱེད་དེ། བག་ཆགས་ཀྱི་ས་བོན་ཉིད་ཀྱིས་ཆོ་འཕྲུལ་སྣང་ཞིང༌། དེའི་བྱ་བ་ཡང་བྱེད་པས། ཀུན་རྫོབ་སེམས་ཅན་རྣམས་ཉིད་ལ། རང་བཞིན་དག་པ་དང་ས་བོན་དབྱེ་བ་མེད་པར་སོང་བ་ཡིན་ནོ། །དོན་དམ་པར་བག་ཆགས་ཀྱི་ས་བོན་དེ་ཡང༌། གདོད་ནས་ཡོད་མ་མྱོང་བའི་ཕྱིར། གནས་ཚུལ་ལ་དབྱེ་བ་ཡོད་མེད་གཉིས་ཀ་མ་ཡིན་ནོ། །རང་བཞིན་དག་པ་བག་ཆགས་དང་བཅས་པ་དེ་ཡང༌། གཉུག་མའི་ལུས་ལ་གནས་པ་ཡིན་ཏེ། གཉུག་མའི་ལུས་ཞེས་བྱ་བ་ནི། དག་པའི་སེམས་ས་བོན་དང་བཅས་པ་དེའི་སྣང་ཆ་རླུང་གི་དྭངས་མར་ཤར། དྭངས་མ་དེའི་ཁྱད་ཆོས་ནི། ཁམས་གསུམ་འཁོར་འདས་ཐམས་ཅད་ཀྱི་ལུས་སུ་སྣང་དུ་རུང་བའི་ནུས་པ་ཅན་ཡིན་ཞིང༌། དངོས་སུ་ན་རྐྱེན་གང་གིས་སད་པར་བྱས་པ་དེར་སྣང་ངོ༌། །དེ་འདྲ་བའི་ལུས་སེམས་དབྱེ་བ་མེད་པ་དེ་ལ། བྱང་ཆུབ་ཀྱི་སེམས་ཏེ་དཀར་པོའི་ཆ་དང༌། རྡུལ་ཏེ་དམར་པོའི་ཆ་དང༌། ཐུགས་མི་བསྐྱོད་པའི་བརྡས་བསྟན་པ་མུན་པའི་ཡོན་ཏན་གསུམ་པོ་མཉམ་པར་འདྲེས་པས་ཁྱབ་པ་སྟེ། འདིར་རྒྱན་ཞེས་པ་དང༌། འཁྱུད་གྱུར་པ་ཞེས་པ་ནི། ཚིག་རྒྱན་
ཙམ་སྟེ་དེ་ལ་དེ་ལྡན་པའི་དོན་ནོ། །ཚིག་རྒྱན་དེ་ཡང་ཏིང་ངེ་འཛིན་གྱི་རྒྱན་ཞེས་བྱའོ། །དེ་ལྟར་ཡང༌། དང་པོའི་སངས་རྒྱས་ལས། ཐིག་ལེ་ཟླ་བ་ཁུ་བའི་སྐུ། །རྣམ་པར་བཅད་པ་རྡུལ་ཉི་གསུངས། །ཨ་ཡིག་མུན་ཅན་ཐུགས་རབ་བརྗོད། མཁའ་ཁམས་ཨ་ལ་རྣམ་པར་གནས། །ཞེས་གསུངས་པ་ལྟར། རང་བཞིན་དག་པའི་སེམས་མཁའ་ཁམས་ལ་དེ་གསུམ་གནས་པས། འཁོར་བ་སྐྱེད་པར་བྱེད། ཅེས་བྱའོ། །དེ་ལྟར་ན་སྙིང་སྟོབས་རྡུལ་མུན་གསུམ་པོ་དེས་ཉོན་མོངས་པ་མངོན་གྱུར་པ་སྐྱེད། དེས་འགྱུར་པའི་བདེ་བ་སྐྱེད་པར་བྱེད་ལ། དེ་རྗེས་འགྱུར་བདེའི་ས་བོན་སེམས་ལ་གནས་ནས། ཡང་ཕྱིས་ཡོན་ཏན་གསུམ་པོ་དེ་སྐྱེ་བར་འགྱུར་ཞིང༌། དེ་ལས་དུག་གསུམ་གྱི་རྣམ་རྟོག་མངོན་གྱུར་བ་དག་བྱུང་ནས། ལས་བསགས་ཏེ་སྡུག་བསྔལ་ལ་སྦྱོར་བར་བྱེད་དེ་འཁོར་ལོ་བཞིན་དུ་འཁོར་བར་བྱེད་དོ། །དེ་ལ་འགྱུར་བདེའི་ས་བོན་ནི། ས་བོན་གྱི་རྣམ་ཤེས་དང་དོན་གཅིག་ལ། ཡོན་ཏན་གསུམ་མཉམ་པར་གནས་པ་ནི། རྣམ་སྨིན་གྱི་རྣམ་ཤེས་དང་དོན་གཅིག་གོ །དེ་ལྟ་བུའི་དཀར་དམར་རླུང་གསུམ་ལ། རིམ་ལྔ་སྤྱོད་བསྡུས་སོགས་ལས་གསུངས་པའི་སྣང་བ་གསུམ་གྱི་མིང་གི་རྣམ་གྲངས་དུ་མ་དང་བཅས་པ་འགྲེལ་པར་བྲིས་མོད་ཀྱང་འདིར་མངས་པར་འགྱུར་པའི་མི་འབྲི་ལ། གནད་འབྱེད་པའི་སྒོ་སོགས་དང༌། མྱུར་བ་དང༌། རླངས་པ་སོགས་དང༌། དེ་ཁོ་ན་ཉིད་བཞི་སོགས་དང༌། སྦྱོར་བ་བཤད་འདུག་ནའང་འབྲེལ་མི་ཆེའོ། །འགྲེལ་པ་རྣམ་སྣང་རྡོ་རྗེའི་འགྱུར་ལས། ར་ཧུ་དུས་མེ་
དག་གི་སེམས་འདི་ནི། །ཨེ་དང་ཝཾ་ནི་འགྲོ་ཀུན་ས་བོན་གཅིག །ཅེས་ལུང་འདྲེན་གྱི་ཚུལ་དུ་བྱུང་ཞིང༌། ཆོས་སྐྱོང་བཟང་བོའི་འགྱུར་གསར་ལས་འགྲེལ་པའི་ཚིག་ཏུ་བྱས་སོ། །དེའི་དོན་ནི། ཨེ་དུས་མེ་དང་ཝཾ་སྒྲ་ཅན་ཏེ། དེ་གཉིས་རོ་མཉམ་པ་ནི་སྤྱིར་དངོས་པོ་ཐམས་ཅད་དང༌། ཁྱད་པར་དུ་སེམས་ཅན་ཐམས་ཅད་ཀྱི་སྐྱེད་བྱེད་ཀྱི་ས་བོན་ནོ། །དེ་ལ་སྒྲ་གཅན་ནི་ཤེས་རབ་དང་འདྲེས་པའི་ཐབས་ཀྱི་མཆོག་སྟེ། རང་བཞིན་དག་པའི་སེམས་དེ་ཡིན་ལ། དུས་མེ་ནི་ཐབས་དང་རོ་གཅིག་པའི་ཤེས་རབ་སྟེ་གཉུག་མའི་ལུས་སོ། །དེ་གཉིས་ནི། རིམ་པས་མི་འགྱུར་བའི་བདེ་བ་དང༌། རྣམ་ཀུན་མཆོག་ལྡན་ཡིན་པས། ངོ་བོ་ཡང་གཅིག་ཅིང་ཆོས་གཞན་བཞི་པོས་མ་གོས་པ་ཡིན་མོད་ཀྱི། དེ་རྣམས་ཀྱི་རོ་བཅུད་གདོད་ནས་གནས་པའང་ཡིན་ནོ། །ཡོན་ཏན་གསུམ་དང༌། དག་པ་དང༌། བག་ཆགས་དང༌། གཉུག་མའི་ལུས་རྣམས་གཅིག་ཏུ་སྡོམ་པ་དེ་ནི། ཨེ་ཝཾ་ཡི་གེ་ཞེས་བྱ་སྟེ། གཉུག་མའི་ལུས་ནི་ཨེ་ཡིག་དང་རྣམ་དག་ས་བོན་དང་བཅས་པ་ནི་ཝཾ་ཡིག་དང༌། ཡོན་ཏན་གསུམ་ནི། དེ་གཉིས་ཀ་ལ་འཇུག་མོད་ཀྱི། དངོས་སུ་ན་ཝ་ཡིག་གི་ན་རོ་ཐིགས་པ་སྟེང་ཆ་རྣམས་ཡིན་ནོ། །ཡོན་ཏན་གསུམ་དང་གཞི་གསུམ་སྟེ། ལྡོག་ཆའི་སྒོ་ནས་དྲུག་ཏུ་ཕྱེ་ཡང༌། ལྔ་པོ་ནི་རྫས་གཅིག་ཅིང་ལྡོག་ཆ་དང་མཚན་ཉིད་སོ་སོས་ཕྱེ་བ་ཡིན་ལ། རྣམ་དག་གི་སེམས་ནི་དེ་ཀུན་ལ་ཁྱབ་པའི་རང་བཞིན་ཆོས་ཉིད་དོ། །དེ་ལྟ་བུའི་ཨེ་ཝཾ་ཡི་གེ་དེའི་རྟེན་འབྲེལ་ལས། འཁོར་བའི་ཆོས་འདི་ཐམས་ཅད་གསལ་
བར་སྣང་བ་ཡིན་ཏེ། ཡང་གལ་ཏེ་རྒྱུ་གཅིག་ལས་འབྲས་བུ་དུ་མ་འབྱུང་བ་མི་འཐད་དོ་སྙམ་ན། མ་ཡིན་ཏེ། ཡང་དག་པར་ན་རྒྱུ་ལའང་གཅིག་དང་དུ་མ་མེད༌། འབྲས་བུའང་གཅིག་དང་དུ་མར་བྲལ་མོད་ཀྱི། སྣང་བ་མ་འགགས་པ་ཙམ་གྱི་དབང་དུ་ན། རྒྱུ་གཅིག་ལས་འབྲས་བུ་གཅིག་དང་དུ་མའི་རྣམ་གཞག་ཀྱང་རུང༌། རྒྱུ་གཅིག་དང་དུ་མ་ལས་འབྲས་བུ་གཅིག་དང་དུ་མའི་རྣམ་གཞག་ཀྱང་རུང་སྟེ། འཁྲུལ་ངོར་སྣང་བ་ཙམ་ལ། ངེས་པ་མེད་ཅིང་སྤྱད་པ་མི་འཇུག་པས། རྒྱུ་རྐྱེན་ཇི་ལྟར་སྣང་བ་ལྟར་གཞག་དུ་རུང་བའི་ཕྱིར་རོ། །འདིར་རྟེན་འབྲེལ་ཙམ་གྱི་སྐྱེ་བ་དང༌། མཐའ་བཞི་འགོག་ཚུལ་ཟུར་སྨོས་ཙམ་འགྲེལ་པ་ན་ཡོད་དོ། །གཉིས་པ་ནི། གནམ་ཆུ་འོད་དཔག་མེད་འདམ་བྱས། །རྩ་བར་རྣམ་པར་རྟོག་པར་བྱས། །སྡིག་སྤང་རྩ་བའི་སྡོང་བུར་བྱས། །ཡི་གེ་ཧཾ་གི་རྣམ་པར་སྐྱེས། །རྐྱང་མ་རོ་མའི་ཚལ་གཉིས་ནི། །ལོགས་གཉིས་སུ་ནི་གནས་པ་སྟེ། །འདབ་བཞིའི་རིམ་པས་རྩ་ལག་བཞི། །བདེ་བ་ཆེན་པོའི་གནས་ན་གནས། །ཞེས་པ་སྟེ། དེ་ཡང་གོང་དུ་བཤད་པའི། རྟེན་བརྟེན་པ་རླུང་སེམས་ཀྱི་ཆོས་དྲུག་ལ། སྙུག་གཞུག་མའི་ལུས་དང༌། ཤིན་དུ་ཕྲ་བའི་དཀར་པོ་སྙིང་སྟོབས་གཉིས་ལུས་ཀྱི་ཆོས་དང༌། ཤིན་དུ་ཕྲ་བའི་དམར་པོ་རྡུལ་ངག་དང༌། རྣམ་རྟོག་དང་ལྷན་ཅིག་པའི་རླུང་གི་དྭངས་མ་དང༌། ནག་པོའི་ཁམས་མུན་པ་དང༌། བག་ཆགས་ཀྱི་ས་བོན་ཏེ་གསུམ་པོ་དེ་སེམས་ཀྱི་ཆོས་སུའང་འཇོག་ཅིང༌། ཡང་རྡུལ་དང་རླུང་དག་དང༌། རྣམ་
རྟོག་དང་བག་ཆགས་སེམས་སོ་ཞེས་ཆ་ཤས་ཀྱི་སྒོ་ནས་འཇོག་མོད་ཀྱི། ངེས་པར་ན་དེ་ཐམས་ཅད་སེམས་ཁོ་ན་ཡིན་ནོ། །དེ་ལ་རེ་ཞིག་ལུས་སེམས་ཐ་དད་པར་སྣང་བ་འདི་ཉིད་གཞིར་བཞག་སྟེ། དཔྱད་པ་མེད་པར་བཤད་ན། དེ་ལྟར་གོང་དུ་བཤད་པའི་ཨེ་ཝཾ་འཁོར་བཅས་ཀྱི་སེམས་དེ་ནི། ད་ལྟར་ལུས་ལ་བརྟེན་ཅིང་གནས་ལ། ས་བོན་དང་ཡོན་ཏན་གསུམ་དང༌། གཉུག་མའི་ལུས་ཀྱི་ནང་ནས་འབྱུང་ལུས་ཕྲ་མོ་དང་བཅས་པ་སྟེ། ཚོགས་པ་གསུམ་པོ་དེ་ལས་སྔོན་དུས་ཀྱི་ཚོགས་པ་གསུམ་ནི། ད་ལྟའི་སྒོ་གསུམ་གྱི་རྒྱུ་ཡིན་ཅིང༌། ད་ལྟའི་སྒོ་གསུམ་པོ་འདི་དག་མ་འོངས་པའི་ཚོགས་པ་གསུམ་ལ་ཐིམ་པར་འགྱུར་བས། མ་འོངས་པའི་ཚོགས་པ་གསུམ་ནི་འདི་དག་གྀ་འབྲས་བུའོ། །དེའི་རྒྱུ་མཚན་ནི་ཐིམ་པའི་གོ་དོན་དུས་མཉམ་པ་ཅིག་གི་ནང་དུ་ཅིག་ཤོས་ཞུགས་པ་ལྟ་བུ་དོན་མ་ཡིན་གྱི། མར་གསར་བཞུ་བ་ལས་དེའི་སྙིགས་མ་རྣམས་རིམ་གྱིས་ཟད་དེ། ཞུན་མར་གྱི་སྙིང་པོར་གྱུར་པ་ན། མར་གྱི་གོང་བུ་ཞུའོ་འདི་ལ་ཐིམ་མོ་ཞེས་ཟེར་བ་ལྟ་བུ་སྟེ། དེའི་ཚེ་ཞུན་མར་ནི་གོང་བུའི་འབྲས་བུའོ། །དེ་བཞིན་དུ་རགས་པའི་ལུས་འདི་ལས་དང་དུས་ཀྱི་དབང་གིས་དེངས་པར་གྱུར་པ་ན། སྲིད་པ་བར་མ་ལ་ཚོགས་པ་གསུམ་ཁོ་ན་གནས་སོ། །འདིར་མ་ཟད་རགས་པ་ཕྲ་བའི་དབྱིངས་སུ་སངས་པ་ལ་ཐིམ་པའི་ཐ་སྙད་གཞན་ལ་ཡང་ཡོད་དེ། སྤྲིན་རྣམས་ནམ་མཁའ་ལ་ཐིམ་པ་ཞེས་པ་ལྟ་བུའོ། །ཡང་དེ་ལྟ་བུའི་སྲིད་པ་བར་མ་ཚོགས་པ་གསུམ་
ཙམ་ལས་སླར་ཡང་རགས་པའི་ལུས་འདི་འབྱུང་ཞིང༌། དེ་ལ་བརྟེན་བཅས་ཏེ་གནས་པར་ཡང་བྱེད་དོ། །ཞེས་བྱ་བ་འདི་སྤྱིར་ངེས་པར་བྱས་ནས། ཚིག་དོན་ནི། གནམ་སྟེ་ནམ་མཁའི་ཆུ་ཞེས་བྱ་བ་ལ། ནམ་མཁའ་ནི། བདེ་བ་ནམ་མཁའ་ཉིད་ཀྱི་ཁམས། །ཞེས་པ་ལྟར། འདོད་ཆགས་ཀྱི་རྣམ་པར་རྟོག་པ་མངོན་འགྱུར་བ་ས་བོན་དང་བཅས་པ་རྣམས་ཡིན་ལ། དེ་ཉིད་ཆུ་དང་འདྲ་སྟེ་རིག་པའི་བདག་ཉིད་ཀྱི་ཕྱིར་གསལ་ཞིང་དྭངས་པས་སོ། །འོད་དཔག་མེད་ཀྱི་བརྡས། རྟེན་ཞུ་བ་སྟེ། དངོས་སུ་དཀར་པོ་སྨོས་ཀྱང༌། རྡུལ་ཡང་ཞོར་ལ་འཕངས་པ་ཡིན་ཏེ། ཁུ་རྡུལ་གཉིས་ཚོགས་པ་ལས་བདེ་བ་རྫོགས་པ་ཡིན་གྱི་དཀར་པོ་ཉག་གཅིག་གིས་མ་ཡིན་པའི་ཕྱིར་རོ། །འབྱུང་ལུས་རགས་པའི་དཀར་དམར་དེ་གཉིས་ནི། རགས་པ་ཉིད་ཀྱི་ཕྱིར་སའི་གོང་བུ་དང་འདྲ་ཞིང༌། དེ་བརྟེན་པ་ཆགས་རྟོག་གི་བདེ་བའི་ཆུ་དང་བསྲེས་པ་ལས་འདམ་དུ་བྱེད་པ་ཞེས་འགྱུར་བ་དེ་བརྟེན་དང་བཅས་པ་ནི། ལུས་ཀྱི་ཆོས་དེ་དག་འབྱུང་བའི་གཞི་ཡིན་པའི་ཕྱིར། པདྨའི་སྡོང་བོ་གང་ལས་སྐྱེས་པའི་འདམ་དང་འདྲ་བར་དགོངས་སོ། །རྩ་བ་སོགས་ལ་རྣམ་སྣང་འགྱུར་ལས། དེ་ནི་རྩ་བ་རབ་ཏུ་སྤངས་ནས་བྱས། །ཞེས་འབྱུང་སྟེ། པི་ཀལྤ་དང༌། བི་བརྫའི་ཡི་གེའི་ཁྱད་པར་ཏེ་རྒྱ་དཔེ་མི་འདྲ་བ་ལས་བྱུང་བར་མངོན། འགྲེལ་པ་འགྱུར་གསར་རྙིང་གཉིས་ཀར་དུ། པདྨའི་རྩ་བ་སྡོང་བུ་ཅན་ཞེས་པ་ཅིག་ལ་འབྲུ་མནན་ཏེ་དཔེར་ན་ས་བོན་དང་ཆུ་དང་འདམ་ལས་མྱུ་གུ་
དང་སྡོང་བུ་འབྱུང་བ་བཞིན་དུ། ཆོས་དབྱིངས་ཀྱི་ས་བོན་དང༌། ནམ་མཁའི་ཆུ་དང༌། ཁུ་རྡུལ་གྱི་འདམ་ལས་སྲིད་པ་གསུམ་གྱི་ཆུ་བ། སྡོང་བོ། འདབ་མ། མེ་ཏོག་རྣམས་བྱུང་ཞེས་འཆད་ལ། འགྱུར་བདེ་དེ་ཡང་བདེ་ཆེན་དུ་རོ་མཉམ་པར་གནས་པས། དེའི་མིང་གིས་བཏགས་ཏེ། དང་པོའི་དབྱངས་ཀྱི་རང་བཞིན་ཏེ། །བློ་ཞེས་སངས་རྒྱས་རྣམས་ཀྱིས་བཏགས། །ཞེས་ལུང་དྲངས་སོ། །ཡང་ཙ་བ་རབ་ཏུ་སྤངས་ཞེས་པ་ལྟར་ན། དོན་དམ་པར་སྐྱེ་བའི་རྒྱུ་མེད་པས་རྩ་བ་སྤངས་ཞེས་འཆད་དགོས་ཀྱང༌། དཀྱུས་ཀྱི་འགྱུར་ལྟ་ན། འགྱུར་བའི་ས་བོན་དང་ཁུ་རྡུལ་དྭངས་མ་རྟེན་བརྟེན་པའི་འགྲེལ་པ་ཅན་དེ། ལུས་འབྱུང་བའི་བཞི་རྩ་ཡིན་ཡང༌། སྲིད་པ་མངོན་འགྱུར་བ་མེད་ན་ལུས་ལེན་མི་ཐུབ་པས། ལུས་ལེན་པའི་རྩ་བར་འགྱུར་བདེ་འདོད་ཆགས་ཀྱི་རྣམ་པར་རྟོག་པ་མངོན་འགྱུར་བ་ཉིད་རྣམ་པར་བཞག་པར་བྱས་ཞེས་པ་སྟེ། འགྱུར་འདི་ལྟར་དོན་ལ་གནས་ཤིང༌། རྩ་བ་དེས་ལུས་བླང་ཏེ་སྡོང་བུ་ནི། སྡིག་སྤངས་ཏེ་རྩ་དབུ་མ་སྡོང་བུའི་གཟུགས་རྒྱན་དུ་བཀོད་པར་བྱས་ལ། ལུས་ཀྱི་ཡན་ལག་དང་ཉིང་ལག་དང༌། རྩ་ཁམས་གཞན་ཐམས་ཅད་ནི་སྡོང་བུ་དེའི་ཡལ་གའོ། །སྤྱི་བོའི་ཡི་གེ་ཧཾ་ཡིག་མི་ཤིགས་པ་ནི། སྡོང་བུ་དེའི་མེ་ཏོག་ས་བོན་དང་བཅས་པའི་རྣམ་པ་སྙན་ངག་གི་གཟུགས་སུ་སྐྱེས་པ་སྟེ་བཀོད་པའོ། །སྐབས་འདིར་གཟུགས་ཞེས་བརྗོད་པ་རྣམས་གཟུགས་ཅན་གྱི་རྒྱན་དུ་གོ་བར་བྱའོ། །དབུ་མའི་སྡོང་བུ་ལས་གཡོན་དུ་རྐྱང་མ་དང༌། གཡས་སུ་རོ་མ་གྱེས་ཤིང༌།
དེ་གཉིས་ལས། རྩ་དང་རླུང་གི་བཀོད་པ་དུ་མ་བྱུང་བ་ནི། མེ་ཏོག་གི་ཚལ་དངའདྲ་བ་སྟེ། པད་ཚལ་གཉིས་པོ་དེ་ནི་གཡས་དང་གཡོན་གྱི་ལོགས་གཉིས་སུ་གནས་པའོ། །སྐབས་འདིར་རོ་རྐྱང་དབུ་མ་གསུམ་འདུས་པ་ལས། མི་ཕྱེད་མ་སོགས་རྩ་ལྷག་མ་ཉེར་དགུ་དང༌། འཁོར་ལོ་བཞི་སོགས་རྩའི་རྣམ་གཞག་རྒྱས་པར་རྟོགས་པར་བྱ་ཞིང༌། རླུང་ཡང་དུས་སྦྱོར་བཅུ་གཉིས་དཀྱིལ་འཁོར་དྲུག་བཅུ་འབབ་ཚུལ། དཔལ་དུས་ཀྱི་འཁོར་ལོར་གསུངས་པ་དང༌། མགོན་པོ་དང་ལྷ་མོའི་རླུང༌། རྡོ་རྗེ་འཕྲེང་བར་གསུངས་པ་སོགས་ཀྱང༌། རྒྱས་པར་ཤེས་པར་བྱ་སྟེ། འདིའི་འགྲེལ་པ་ན་ཡང་ཅི་རིགས་པར་དྲངས་སྣང་སྟེ། རྒྱས་པར་གཞན་དུ་བཤད་ཟིན་པས་འདིར་མ་སྤྲོས་སོ། །འདབ་བཞི་ཞེས་པ་ལ། བཻ་རོ་དང༌། འགྱུར་གསར་གྱི། པདྨ་འདབ་བཞི་རྩ་བ་བཞི་ཞེས་བསྒྱུར་ཏེ། རྩ་དེ་ཐམས་ཅད་ལས་ཀྱང་གཙོ་བོར་གྱུར་པ་གཙུག་ཏོར་གྱི་འཁོར་ལོ་ནི་འདབ་མ་བཞི་པ་སྟེ། རྩ་ལག་བཅས་པ་ལྟར་ན་རྩ་འཁོར་གཞན་རྣམས་སྐྱེད་ཅིང་ཕན་འདོགས་པའི་དོན་ཡིན་ལ། རྩ་བ་ཞེས་པ་ལྟར་ནའང་སྐྱེད་བྱེད་ཡིན་པས། དོན་གཅིག་ལ་འབབ་པར་བཤད་དུ་རུང་ནའང༌། རྩ་བ་དང་རྩ་ལག་སྐད་དོད་མི་གཅིག་པར་སེམས་སོ། །གང་ལྟར་ནའང༌། འདབ་མ་བཞྀའི་རིམ་པས་རྩ་འཁོར་གཞན་བཞི་སྐྱེད་དེ། མདུན་གྱི་འདབ་མས་སྙིང་ག་དང༌། གཡས་པས་མགྲིན་པ་དང་གཡོན་པས་དཔྲལ་བ་དང༌། རྒྱབ་མས་ལྟེ་བའི་འཁོར་ལོ་རྣམས། དང་པོར་བསྐྱེད་ཅིང་ཕྱིས་ཕན་འདོགས་
པར་བྱེད་དོ། །དངོས་བསྟན་ལ་དེ་ལས་མ་གསུངས་ཀྱང༌། ལྟེ་བས་ནི། གསང་བའི་འཁོར་ལོ་རྣམས་བསྐྱེད་པ་ཡང་དོན་གྱིས་ཐོབ་བོ། རྩ་རྣམས་ཀྱིས་དང་པོའི་བསྐྱེད་གཞི་གཙུག་ཏོར་ཡིན་པའི་ཕྱིར། མཐར་རྩ་རྣམས་ཐམས་ཅད་གཙུག་ཏོར་དུ་ཐིམ་འགྲོ་བ་ཡིན་པས། དེ་ལྟར་ཐིམ་འགྲོ་བའི་གནད་འདི་གཞུང་འདི་ཁོ་ན་ལས་གསལ་བར་བྱུང་ངོ༌། །རྩ་ཐམས་ཅད་ཀྱི་རྩ་བ་འདབ་མ་བཞི་པོ་དེ་དག་གང་ན་གནས་ཞེ་ན། བདེ་བ་ཆེན་པོའི་གནས་གཙུར་ཏོར་ན་གནས་ཞེས་པ་སྟེ། སྦྱོར་བ་ཡན་ལག་དྲུག་ལ་སོར་སྡུད་ཡེ་ཤེས་ཀྱི་ཁམས་ཡིན་པས་ཀུན་ལ་ཁྱབ་པ་དང༌། བསམ་གཏན་ཡང་ནམ་མཁའི་ཁམས་ཡིན་པའི་ཕྱིར། ཡན་ལག་དང་འབྱུང་བ་ཕྱི་མ་ཀུན་གྱི་སྤྱི་ཁྱབ་དུ་འཇུག་ཅིང༌། སྤྱི་ཁྱབ་ཀྱི་ཡན་ལག་དེ་གཉིས་གཙུག་ཏོར་གྱི་འཁོར་ལོར་གནད་དུ་བསྣུན་པ་ལས་འབྱུང་བ་དང༌། གཙུག་ཏོར་དུ་བསྒོམས་པས་གསང་བའི་རྩ་མདུད་འབྱོངས་པ་དང༌། འཛིན་པའི་སྐབས་གསང་བའི་བུམ་ཅན་གྱི་གཙུག་ཏོར་དུ་ཐིག་ལེ་བརྟན་པར་བྱེད་པ་དང༌། ཏིང་ངེ་འཛིན་གྱི་མཐར་རྩ་ཁམས་རླུང་གསུམ་གཙུག་ཏོར་དུ་ཐིམ་པར་བྱེད་དགོས་པའི་རྒྱུ་མཚན་རྣམས་གནད་འདི་གཅིག་པུས་རྟོགས་ནུས་པས། འདབ་བཞིའི་རིམ་པས་རྩ་ལག་བཞི། །བདེ་བ་ཆེན་པོའི་གནས་ན་གནས། །ཞེས་པའི་ཚིག་རྐང་གཉིས་པོ་འདི་ཁོ་ནས་ཀྱང༌། དུས་འཁོར་སོགས་ཀྱི་རྒྱུད་སྡེ་མང་པོ་ལ་ངེས་པ་སྟེར་པ་འདི་ནི་ངོ་མཚར་ཆེའོ། །མན་ངག་གི་གཞུང་བྱ་བ། རྒྱུད་དོན་གྱི་མདུད་པ་འགྲོལ་ནུས་པ་འདི་ལྟ་བུ་དགོས་ཀྱི། མན་ངག་དང་རྒྱུད་
བཤད་རྒྱབ་འགལ་དུ་འགྲོ་བ་དང༌། གྲུབ་ཐོབ་ཀྱི་གསུང་ཡིན་ཟེར་ནས་སངས་རྒྱས་ཀྱི་གསུང་དང་འགལ་བ་མང་པོ་དག་སྣང་སྟེ། རྩོད་དུས་ཀྱི་མཐའ་མ་འདིར། སྐལ་མེད་རྣམས་ཀྱི་སྙིང་ལ་ནི་ཤིན་ཏུ་:འགྲོད་[འཕྲོད་]ཀྱང༌། ཟབ་དོན་གྱི་སྐལ་བ་ཅན་བློ་གྲོས་མཆོག་རྣམས་ཀྱིས་ནི། མཛོད་ཕུགས་མི་གཙང་བས་བཀང་བ་དང་འདྲ་བར་མཐོང་ངོ༌། །༈ གསུམ་པ་ནི་ཨེ་ཝཾ་ས་བོན་བླངས་ནས་ནི། །པདྨའི་མེ་ཏོག་ཁ་བྱེ་བར། །བུང་བའི་གཟུགས་ཀྱིས་རབ་དགའ་བའི། །དཔའ་བོ་སྦྲང་རྩི་མནོམ་པར་བྱེད། །ཅེས་པ་སྟེ། འདི་ལ་ཤུད་ཀེ་ལོ་ཙཱ་བ་གྲགས་རྒྱལ་གྱིས། ཨེ་ཝཾ་ཡི་གེའི་ས་བོན་ལེན། །ཆུ་སྐྱེས་ཀྱི་ནི་མེ་ཏོག་ལ། །སྦྲང་རྩིར་བྱེད་པའི་གཟུགས་ཀྱིས་ནི། །རབ་དགའི་དཔའ་བོ་སྦྲང་རྩི་མནོམ། །ཞེས་འདོན་པ་གོ་བདེ་ཞིང་བརྗོད་བླ་བ་ཙམ་སྣང་ངོ༌། །འདིའི་དོན་འགྲེལ་བར། ཨེ་ཝཾ་ཕ་མའི་ས་བོན་བླངས་པ་དང༌། པདྨ་མངལ་གནས་དང༌། བུང་བ་དྲི་ཟ་དང༌། རབ་དགའ་དཀར་དམར་གྱི་དབུས་སུ་སེམས་རྒྱལ་བ་ལ་འཆད་ཀྱང་དེ་གཞུང་གི་དོན་དུ་མི་སྣང་ངོ༌། །ཨེ་ཝཾ་ནི་གོང་དུ་བཤད་པ་ལྟར་གྱི། སྒྲ་གཅན་དང་དུས་མེ་ཡིན་ཅིང༌། དེ་ཡང་སྐབས་འདིར་བདེ་བའི་ཕྱོགས་ནས་བསྟན་པས། རྡོ་རྗེ་ཧཾཀྵཿ དང་ངོ་བོ་གཅིག་གོ །དེ་ཡང་བློ་ཡུལ་དུ་ཡིད་འོང་གི་རྣམ་པ་ཤར་བ་ལ། སེམས་ཀྱི་ཀུན་ཏུ་ཆགས་པར་བྱེད་པ་ནི། ལུས་མེད་དེ་བདུད་ཀྱི་ལས་ཡིན་ལ། ཡིད་འོང་དང་ཆགས་པ་དེ་གཉིས་རྫས་གཅིག་ཀྱང༌། རྟེན་བརྟེན་པ་དང༌། ཡུལ་ཡུལ་ཅན་གྱི་རྣམ་པར་འདུག་གོ །དེའི་
རང་བཞིན་ཤེས་པས། ཡིད་འོང་གི་རང་བཞིན་རྣམ་པ་ཀུན་ལྡན་དང༌། ཆགས་པའི་རང་བཞིན་འགྱུར་མེད་བདེ་བ་ཡིན་ཞིང༌། དེ་གཉིས་ཀྱང་ཡུལ་ཡུལ་ཅན་དང༌། རྟེན་བརྟེན་པའི་ཚུལ་དུ་ཡོད་ཀྱང་ངོ་བོ་གཅིག་ཡིན་ནོ། །དེ་ལྟ་བུའི་རང་བཞིན་བདེ་བ་དང༌། དེ་རྟོགས་པའི་ཡེཤེས་ལ་ནི། ལུས་མེད་རྡོ་རྗེ་ཞེས་བྱ་སྟེ། རྡོ་རྗེ་ཧཾ་ཀྵཿས་མཚོན་པའོ། ། ཞེས་པའོ། །དེ་ལྟ་བུའི་ཨེ་ཝཾ་ལུས་མེད་རྡོ་རྗེ་དེ་ལུས་མེད་ཀྱི་ས་བོན་འཛག་བདེའི་བག་ཆགས་རྒྱུད་ལ་བླངས་པས་ནི། པདྨའི་མེ་ཏོག་སྟེ་རྩ་འཁོར་ལོ་རྣམས་རབ་ཏུ་རྒྱས་པའི་དབུས་སུ་སེམས་བུང་བ་ལྟ་བུའི་གཟུགས་སྟེ་ཚུལ་གྱིས་རང་བཞིན་འགྱུར་མེད་ཡིན་ཀྱང༌། རྣམ་པ་འགྱུར་བདེའི་རབ་ཏུ་དགའ་བས་མྱོས་པའི་སེམས་ཀྱི་བུང་བ་དཔའ་བོ་དེ་ནི་རྩ་འཁོར་གྱི་ལྟེ་བའི་དབུ་མ་མི་ཤིགས་པས་ཐིག་ལེའི། སྦྲང་རྩིའི་དྲི་མནོམ་ཞིང་རོ་མྱང་བར་བྱེད་དོ། །ཅེས་པ་སྟེ། འགྱུར་བདེའི་བག་ཆགས་ཡོད་པའི་ནུས་པས་སེམས་རྩ་འཁོར་གྱི་ཐིག་ལེ་ལ་གནས་ཏེ། ལུས་སེམས་ཀྱི་འབྲེལ་པ་མ་ཆད་པར་བྱེད་དོ། །དེས་ན་ལུས་སེམས་རྟེན་བརྟེན་པའི་འབྲེལ་བ་མ་སྤངས་ན། གྲོལ་བ་མེད་ཅིང༌། འགྱུར་མེད་ཐོབ་ན་དེ་སྤོང་ཞེས་བཤད་པའི། རྟེན་བརྟེན་པའི་འབྲེལ་པ་ནི་ཡིད་འོང་དང་ཆགས་པ་ཉིད་དོ། །འདི་ལ་མར་པ་དོ་བའི་གསུང་སྒྲོས་མཆན་བུ་ཞིག་ན། ཨེ་ནི་ལྟེ་བ་དང། སྤྱི་བོ། ཝཾ་སྙིང་ག་དང༌། མགྲིན་པར་བྱས་པས། དེ་རྣམས་ཉིད་པདྨའི་མེ་ཏོག་བཅས་པ་དང་གཅིག་པར་སྦྱར་ནས། ས་བོན་ཞེས་པ་སོ་སོའི་ཡིག་འབྲུ་ཐིག་ལེ་ལ་ངོས་བཟུང༌། རྩ་འཁོར་ཁ་སྦྱོར་དུ་གནས་པའི་ནང་ན། སེམས་ཀྱི་བུང་བ་རོལ་ཞེས་འཆད་དོ། །༈ བཞི་པ་ནི། འབྱུང་ཆེན་ལྔ་ཡིས་ས་བོན་ནི། །བླངས་ཏེ་ཚོགས་པ་ལས་སྐྱེ་བ། །སྲ་བ་ས་སྟེ་གཤེར་བ་ཆུ། །ཚ་བ་
སྲེག་ཟར་ཡང་དག་སྐྱེས། །ཡང་དག་སྐྱོད་རླུང་བདེ་ནམ་མཁའ། །ཡོངས་སུ་རྫོགས་པ་མ་ལུས་པའི། །ལྷ་དང་ལྷ་མིན་འདི་ལས་སྐྱེས། །ཞེས་པ་སྟེ། དེ་ཡང་སེམས་ཀྱི་ཆོས་ཉིད་གདོད་མའི་ཡེ་ཤེས་ལྔར་གནས་ལ། དེའི་གློ་བུར་གྱི་དྲི་མ་འབྱུང་བ་ལྔའི་སེམས་སུ་ཤར་རོ། །དེ་ཡང་དགྱེས་རྡོར་ལས། སེམས་ནི་ཆེན་པོ་གཅིག་ཉིད་ལ། ལྔ་ཡི་གཟུགས་ཀྱིས་རྣམ་པར་མཚོན། །ཞེས་འབྱུང་ཞིང༌། སྟོང་པ་ཆེན་པོ་ཡི་གེ་ལྔ། །ཞེས་པ་ཡང་འདིའི་ཁོ་ནའོ། །འབྱུང་བ་ལྔ་ཡི་སེམས་དེ་ཡང༌། འགྱུར་བདེའི་བག་ཆགས་ཀྱིས་བརླན་པ་ཡིན་པས། འབྱུང་བ་རགས་པ་གཞན་རྣམས་ལེན་པའི་ནུས་པ་ཅན་ནོ། །དེའི་ཕྱིར་ཡང་འབྱུང་བ་ལྔའི་སེམས་དེ་འབྱུང་བ་ཆེན་པོ་ལྔའི་ས་བོན་ཞེས་བྱ་སྟེ། འབྱུང་བ་རགས་པ་རྣམས་དེ་ལས་སྐྱེ་བའི་ཕྱིར་རོ། །དེས་ན་སེམས་དེས་འབྱུང་བའི་ས་བོན་དེ་དག་བླངས་ཏེ། དེ་ལ་བརྟེན་ནས་སྐྱེ་བ་ལེན་པར་འགྱུར། དེ་ཡང་རྒྱུད་གཞན་གྱི་ཚོགས་པ་བླངས་པ་ལ་བརྟེན་ནས་སྐྱེ་སྟེ། སེམས་ཀྱི་ས་བོན་བླངས། ས་བོན་གྱིས་རགས་པ་བླངས་པའོ། །དེ་ཡང་མངལ་སྐྱེས་ཀྱི་དབང་དུ་བྱེད་ན། ཇི་སྐད་དུ། བོ་ལ་ཀཀྐོ་ལ་སྦྱོར་བས། །རེག་པ་སྲ་བའི་བག་ཆགས་ཀྱིས། །ས་ནི་དེ་ལས་སྐྱེ་བར་འགྱུར། །ཞེས་པ་ལྟར། ས་ཁམས་ཀྱི་སེམས་དེ་འགྱུར་བདེས་བརླན་པའི་ཕྱིར། ཕ་མ། རྡོ་རྗེ་པདྨ་སྙོམས་པར་འཇུག་པའི་གནས་སྐབས་ཀྱི་སྲ་བ་སའི་ཁམས་ཀྱི་འཛག་བདེ་ཉམས་སུ་མྱོང་བ་དང་ཕྲད་པ་ན། འགྱུར་བདེ་རིགས་མཐུན་གྱི་དབང་
གིས། ཕ་མའི་ཐིག་ལེའི་ས་ཁམས་ཀྱི། ས་ཁམས་ཀྱི་རྣམས་ཤེས་འདྲེས་པའི་ཚུལ་གྱིས། རྣམ་ཤེས་དེས་ས་ཁམས་རགས་པ་ལེན་པར་འགྱུར་ཏེ། དེ་བཞིན་དུ་དེས་རིགས་འགྲེ་སྦྱར་ནས། བྱང་སེམས་ཁུ་བའི་རྣམ་པ་ལས། །ཆུ་ཡི་ཁམས་ནི་འབྱུང་བར་འགྱུར། །ཞེས་པ་ལྟར་ཕ་མ་གཤེར་བའི་འཛག་བདེ་ཉམས་སུ་མྱོང་བ་དང༌། ཆུ་ཁམས་ཀྱི་སེམས་ཕྲད་པ་ལས། ཆུ་ཁམས་རགས་པ་ལེན་པ་དང༌། སྐྱཽད་པ་ལས་ནི་དྲོད་སྐྱེ་སྟེ། །ཞེས་པ་ལྟར། ཚ་བ་དྲོད་ཀྱི་འཛག་བདེ་མྱོང་བ་ལ། མེ་ཁམས་ཀྱི་སེམས་འདྲེས་པས། སྲེག་བཟའ་མེ་རགས་པ་ཡང་དག་པར་སྐྱེས་པར་འགྱུར་བ་དང༌། ཐིག་ལེ་གནས་ནས་སྐྱོད་ཅིང་པདྨར་འགྲོ་བ་རླུང་གིས་བྱེད་པའི་འཛག་བདེ་མྱོང་བ་དང༌། རླུང་གིས་སེམས་འདྲེས་པས་རླུང་རགས་པ་ལེན་པ་དང༌། དེ་དག་ཐམས་ཅད་ལ་ཁྱབ་པར་ཕ་མས་འགྱུར་བའི་བདེ་བ་ཙམ་མྱོང་པ་ལ། བར་དོའི་ནམ་མཁའི་སེམས་འདྲེས་པས། ནམ་མཁའི་ཁམས་རགས་པ་བླང་སྟེ། འབྱུང་བ་ལྔ་དང་ལྡན་པའི་ལུས་རགས་པ་ལེན་པར་འགྱུར་རོ། །དེ་ལྟར་ཐོག་མར་མངལ་དུ་ཞུགས་ཙམ་ན། ལྔ་པོ་དེ་བླངས་ལ། དེ་རྗེས་རིམ་པར་ས་ཁམས་ཀྱི་ཤ་རུས་ལྤགས་པ་སོགས་དང༌། ཆུས་ཁྲག་དང་ཆུ་སེར་སོགས་མེས་དྲོས་དང་འཁྲིས་པ་སོགས། རླུང་གིས་དབུགས་རྒྱུ་བ་དང༌། གཡོ་འགུལ་སོགས། ནམ་མཁས་ལུས་ནང་གི་ཁོག་སྟོང་སོགས་སྐྱེད་ནས། མ་ལུས་ཤིང་ལུས་པ་མེད་པའི་ལུས་ཡོངས་སུ་རྫོགས་པར་བྱེད་པའོ། །བཻ་རོས། བླངས་ནས་རྫོགས་པར་བྱེད་པ་དག་ཏུ་་འགྱུར། །ཞེས་པ་གོ་བདེའོ། །མངལ་སྐྱེས་
སུ་མ་ཟད་ལྷ་དང་ལྷ་མིན་ལ་སོགས་པའི་འགྲོ་བ་ཐམས་ཅད་ཀྱང་འབྱུང་བ་ལྔའི་ས་བོན་འདི་ལས་སྐྱེས་ཏེ། སྒོང་སྐྱེས་ནི། མངའ་སྐྱེས་དང་ཕལ་ཆེལ་འདྲ་ལ། དྲོད་གཤེར་སྐྱེས་དང་བརྫུས་སྐྱེས་ནི། སེམས་ཅན་གྱི་རྒྱུད་དུ་མ་སྐྱེས་པའི་ཕྱིའི་འབྱུང་བ་ལས་འབྱུང་བ་གཞན་ལེན་པ་བྱེད་དོ། །དེ་ལ་ཕ་རོལ་པོས་བདེ་བ་མྱོང་བ་མེད་ཀྱང༌། ཕྱིའི་འབྱུང་བ་དང༌། འབྱུང་བའི་སེམས་རིགས་མཐུན་འདྲེས་པས་ལེན་པའང་ཡིན། ཡང་སྐྱེ་བ་ཐམས་ཅད་སྲེད་པས་མཚམས་སྦྱོར་བར་ཀུན་ཏུ་གྲུབ་ལ། དེའི་དུས་ཀྱི་དྲི་དང་གནས་ལ་སྲེད་པ་གང་ཡིན་པ་དེའང༌། འགྱུར་བདེ་ལ་སྲེད་པའི་ས་བོན་གྱི་ནུས་པ་ཡིན་ཏེ། དཔེར་ན་གཉིས་སྦྱོར་གྱི་སྲེད་པ་མངོན་གྱུར་ཡོད་པའི་ནུས་པས། ཕོ་མོ་ལུས་ཀྱི་གཟུགས་སྒྲ་དྲི་རོ་དང༌། ཡོ་བྱད་དང༌། གནས་དང༌། འཁོར་གཡོག་དང༌། ཉེ་དུ་སོགས་ལའང་སྲེད་པ་སྐྱེ་བ་བཞིན་ནོ། །དེའི་ཕྱིར། སྐྱེ་གནས་གཞན་གཉིས་ཀྱང༌། འཛག་བདེའི་ས་བོན་གྱིས་སྐྱེད་པས་སྲིད་པས་མཚམས་སྦྱོར་བ་ཡིན་པའི་ཕྱིར། སྲིད་པར་སྐྱེ་བ་ཐམས་ཅད་འགྱུར་བདེ་བྱེད་པ་ཁོ་ནའོ། །འདིས་ལུས་འགྲུབ་ཚུལ་ལ། འགྲེལ་བ་ལས་འདི་སྐད་ཅེས་འབྱུང་སྟེ། ཕ་དང་མའི་དཀར་དང་དམར། །དེ་བཞིན་སྲོག་དང་ཐུར་སེར་གཉིས། །ཐུགས་ཀྱི་རྡོ་རྗེ་ཡང་དག་ལྡན། །ལུས་ཀྱིས་སྐྱེད་པར་བྱེད་པའི་རྒྱུ། །འོད་དཔག་མེད་དང་རིན་ཆེན་འཛིན། །སྲོག་དང་ཐུར་སེལ་རིམ་ཇི་བཞིན། །ལུས་ངག་ཡིད་དང་ཆགས་པ་རྣམས། །ཐུགས་ཀྱི་རྡོ་རྗེའི་ཞལ་རྣམས་སོ། །ཁུ་བ་ལས་ནི་ཟླ་
བ་སྐྱེད། ཁྲག་ལས་ཉི་མ་ཡང་དག་འབྱུང༌། །སྲོག་ལས་སྒྲ་གཅན་འགྲུབ་པ་སྟེ། །དུས་ཀྱི་མེ་ནི་ཐུར་སེལ་ལས། ཁུ་བ་ལས་ནི་རྩ་རྣམས་དང༌། །རུས་པ་ཡང་དག་འབྱུང་བ་སྟེ། །རྡུལ་ལས་ཁྲག་ནི་ཀུན་དུ་འབྱུང༌། ཁྲག་ལས་ཤ་ནི་འབྱུང་བར་འགྱུར། །ཤ་ལས་ལྤགས་པ་སྐྱེ་འགྱུར་ཏེ། །རུས་པ་ལས་ནི་རྐང་འབྱུང་ངོ༌། །ཟླ་བ་ལས་ནི་ཆུ་སྐྱེ་ཞིང༌། ཁྲག་ལས་མེ་ནི་འབྱུང་བར་འགྱུར། །སྒྲ་གཅན་ལས་ནི་སྲོག་སྐྱེ་ཞིང༌། །མེ་ལས་ཐུར་དུ་སེལ་བར་བརྗོད། །ལུས་ཅན་རྣམས་ཀྱི་ལྕེ་དང་ནི། །ལྕེ་ཆུང་ཁུ་བ་དག་གིས་སྐྱེད། །གཡས་པ་དང་ནི་གཡོན་པ་ཡི། །མིག་དག་རྡུལ་གྱིས་སྐྱེད་པ་སྟེ། །དེ་བཞིན་སྣ་ཡི་བུ་ག་གཉིས། །སྲོག་གིས་ངེས་པར་སྐྱེད་པ་ཡི། །དེ་བཞིན་སྣ་བའི་བུ་ག་གཉིས། །སྟོང་པ་ལས་ནི་ངེས་པར་སྐྱེ། །དེ་བཞིན་འོག་གི་བུ་ག་གཉིས། །ཐུར་སེལ་གྱིས་ནི་ཀུན་ཏུ་སྐྱེད། །དེ་བཞིན་ནུ་མའི་བུ་ག་གཉིས། །སྒྲ་གཅན་གྱིས་ནི་བསྐྱེད་པར་འགྱུར། །དེ་བཞིན་འབྲས་བུ་ཟུང་དག་ནི། །ཐུར་སེལ་རྒྱས་ལས་ཡང་དག་འབྱུང༌། ཞེས་སོ། དེ་ལྟར་ན་སྐྱེ་བ་འཇུག་ཚུལ་གཞུང་འདིར་གསལ་བར་གསུངས་པ་དེ་ཡིན་ལ། བཟློག་པ་འཆི་བའི་ཚུལ་ཤུགས་ལ་རྟོགས་པར་འགྱུར་བས། གཞུང་དུ་གསལ་བར་མ་སྨོས་སོ། །ཡང་ཨཱཪྱ་དེ་བས་བདག་བྱིན་རླབས་པ་ལས། ས་ལ་སོགས་པ་བཞི་པོ་དང༌། །དེ་བཞིན་སྟོང་པ་བཞི་པོ་དག །སྐྱེ་དང་འཇིག་པའི་རྒྱུ་ཉིད་དུ། །དངོས་པོ་རྒྱད་པོ་རྣམས་ཞེས་བྱ། །འོད་གསལ་ལས་ནི་སྟོང་ཆེན་སྟེ། །དེ་ལས་ཐབས་ནི་འབྱུང་བར་འགྱུར། །དེ་ལས་ཀྱང་ནི་ཤེས་རབ་འབྱུང༌། །དེ་ལས་རླུང་ནི་འབྱུང་བར་
འགྱུར། །རླུང་ལས་མེ་ནི་འབྱུང་འགྱུར་ཏེ། །མེ་ལས་ཆུ་ནི་འབྱུང་བར་འགྱུར། །ཆུ་ལས་ས་ནི་འབྱུང་འགྱུར་ཏེ། །འདི་ནི་སེམས་ཅན་རྣམས་འབྱུང་པའོ། །ས་ཁམས་ཆུ་ལ་ཐིམ་གྱུར་ཏེ། །ཆུ་ནི་མེ་ལ་ཐིམ་པར་འགྱུར། །མེ་ནི་ཕྲ་བ་ཁམས་ལ་ཐིམ། །རླུང་ནི་སེམས་ལ་ཐིམ་པར་འགྱུར། །སེམས་ནི་སེམས་བྱུང་ལ་ཐིམ་འགྱུར། །སེམས་ལས་བྱུང་བས་མ་རིག་པར། །དེ་ཡང་འོད་གསལ་བར་འགྲོ་སྟེ། །སྲིད་པ་གསུམ་པོ་འདི་ལྟར་འགག །ཅེས་འབྱུང་བ་ལྟར། ཕྲ་རགས་ཐིམ་ཚུལ་སོགས་རྒྱས་པར་རྟོགས་དགོས་མོད་ཀྱི། རིམ་ལྔའི་འགྲེལ་པར་བཤད་ཟིན་ཏོ། །གཉིས་པ་དོན་དམ་པའི་གསང་བ་བཤད་པ་ལ། དོན་དམ་པའི་རང་བཞིན། ཡོད་མེད་ཀྱི་དབྱེ་བ། དེ་རྟོགས་དཀའ་བར་བསྟན་པའོ། །དང་པོ་ནི། རྨོངས་པས་འདི་དག་སྟོང་ཉིད་ཡིན། །ས་ཆུ་མེ་དང་རླུང་དང་མཁའ། །ཡུལ་གྱི་བློས་བླང་ཡོངས་ཤེས་ཀྱིས། །བརླབས་མེད་མཉམ་པ་ལྷན་སྐྱེས་ཚུལ། །ཉེས་པ་མ་ལུས་དང་བྲལ་པ། །དེ་ལ་སྡིག་གསོད་གཅིག་ཀྱང་མེད། །གསལ་བ་ནག་པོས་སྨྲས་པ་ཡིན། །ཅེས་པ་སྟེ། ཀྱཻ་རྨོངས་པ་ཞེས་བོས་ནས། རྟེན་འབྲེལ་སྣ་ཚོགས་འཆར་བའི་གཞི་དང༌། རྟེན་འབྲེལ་གྱི་དངོས་པོ་ལུས་སེམས་དང༌།ཇི་ལྟར་འབྲེལ་ཚུལ་སྐྱེ་སོགས་ཀྱི་རྣམ་འགྱུར་འདི་དག་ཐམས་ཅད་རང་བཞིན་གང་དུ་ཡང་མ་གྲུབ་པའི་སྟོང་པ་ཁོ་ན་ཉིད་ཡིན་ནོ། །ས་དང་ཆུ་དང་མེ་དང་རླུང་དང་ནམ་མཁའི་ཁམས་ཏེ། ཕྱི་རོལ་གྱི་དངོས་པོར་སྣང་བ་འདི་རྣམས། ཡུལ་གྱི་བློ་སྟེ་ཡུལ་གཟུང་དོན་ཕྱི་རོལ་དུ་འཛིན་པའི་བག་ཆགས་ཀྱི་བློ་སྟོབས་ཆེ་
ཞིང་བརྟན་པ་དེ། གསལ་བར་མངོན་འགྱུར་དུ་བླངས་བས་ཡུལ་གཟུང་དོན་དུ་སྣང་བ་ཡིན་པར་ཡོངས་སུ་ཤེས་པར་གྱིས་ཤིག བླང་བའི་དོན་སྔར་མི་གསལ་བར་གབ་པ། མངོན་གྱུར་དུ་ལངས་པ་ལྟ་བུར་འཆད་པའང་ཡོད་མོད། དོན་ལ་མི་འགལ་བར་འདུག་ཀྱང༌། ཚིག་གི་སྒོ་ནས་མི་ལེགས་ཏེ། སྐད་དོད་དང་ཡང་མི་འགྲིག་པའི་རིགས་སུ་འདུག་ཅིང༌། བོད་ཡིག་གི་བརྡ་དང་འགལ་ཏེ། བླངས་པ་དང་བསླངས་པ་བརྡ་དོན་ཐ་དད་པའི་ཕྱིར་རོ། །དེས་ན་བླངས་པའི་དོན་ནི། གཟུང་འཛིན་ཞེས་པའོ། །བཻ་རོས། བློ་ཡི་ཡུལ་དུ་བླངས་པ་ཤེས་པར་གྱིས། །ཞེས་འགྱུར་རོ། །དེ་ལྟར་ན་གཟུང་བའི་ཆོས་ཐམས་ཅད་དང་བྲལ་བ་ཡིན་པ། དེར་མ་ཟད་འཛིན་པ་སེམས་བྱུང་གི་རྦ་རླབས་མེད་དེ། རྦ་རླབས་ཀྱི་དོན་ནི་རྣམ་འགྱུར་སྣ་ཚོགས་དང་སྐྱེ་འཇིག་འབྱུང་ཟློག་སྣ་ཚོགས་པའོ། །དེའི་ཕྱིར་ན་འཛིན་པའི་ངོ་བོ་ཡང་མ་གྲུབ་སྟེ། གཉྀས་མེད་སྤྲོས་པ་ཐམས་ཅད་དང་བྲལ་བ། བདེ་བ་ཆེན་པོ་ནི། ཟུང་འཇུག་མཉམ་པ་ཉིད་ཡིན་ལ། དེ་ཡང་ལྷན་ཅིག་སྐྱེས་པ་གདོད་མའི་གནས་ཚུལ་ལ་ཞུགས་པའོ། །འགྲེལ་པ་ལས། སྐབས་འདིས་ས་སོགས་སྣ་བུག་དུ་རྒྱུ་བའི་ས་རླུང་གི་དཀྱིལ་འཁོར་སོགས་ལ་འཆད་པ་དང༌། རྦ་རླབས་མེད་པ་རླུང་འབྱུང་འཇུག་མེད་པ་དང༌། མཉམ་པ་བུམ་པ་ཅན་ལས་འདས་པ་ཞེས་རླུང་ཐིམ་པ་ལ་འཆད་པ་སོགས། སྐབས་དོན་ལས་ཕྱིར་ཕྱོགས་པ་ཡིན་པས་ལེགས་པར་མ་མཐོང་ངོ༌། །ལྷན་ཅིག་སྐྱེས་པའི་རང་བཞིན་དེ་ནི། སྒྲིབ་པ་གཉིས་ཀྱིས་བསྡུས་པའི་
ཉེས་པ་མ་ལུས་པ་དང་གདོད་ནས་བྲལ་བ་ཡིན་ཏེ། དེའི་ཕྱིར་ལྷན་སྐྱེས་དེ་ལ་རྣལ་འབྱོར་དུ་བྱེད་པ་དེ་ནི། སྡུག་བསྔལ་མྱོང་བའི་རྒྱུ་སྡིག་པ་དང༌། འཁོར་བའི་བདེ་བ་སྐྱེད་པའི་བསོད་ནམས་མ་ཡིན་ཏེ། རྣམ་པར་གྲོལ་བ་ཁོ་ནར་བྱེད་པ་བྲལ་བའི་རྒྱུ་ཟག་པ་མེད་པའི་དགེ་བ་ཁོ་ནའོ། །ལྷན་སྐྱེས་སྒོམ་པ་ཆོས་ཅན། སྡིག་བསོད་གང་ཡང་མ་ཡིན་ཏེ། ཁྱོད་ཀྱི་དམིགས་པ་དོན་དམ་ལྷན་སྐྱེས་དེ་ལ། སྡིག་པ་དང་བསོད་ནམས་གཅིག་ཀྱང་གྲུབ་པ་མེད་པའི་ཕྱིར་རོ། །གཟུང་འཛིན་གྱི་སྣང་བ་ཡོད་མ་མྱོང་ཞིང༌། ཉེས་པ་ཀུན་གྱིས་གོས་མ་མྱོང་བའི། གདོད་མ་ལྷན་སྐྱེས་ཀྱི་བདེ་ཆེན་འདི་ཉིད། ཤེས་བྱ་གཤིས་ཀྱི་གནས་ལུགས་སོ་ཞེས། གསལ་བར་ནག་པོ་སྤྱོད་པ་བདག་གིས་སྨྲས་པ་ཡིན་ནོ་ཞེས་སོ། །གང་ཡང་འདི་ན་ཐེག་ཆེན་པར་ཁས་འཆེ་བ་དག་ལ། ཆོས་དབྱིངས་མེད་དགག་གི་མཚན་ཉིད་ཅན་དུ་འདོད་པའང་སྣང༌། ཟུང་འཇུག་ཡིན་ཅེས་མིང་འདོགས་པ་དང༌། ཡེ་ཤེས་ཙམ་མོ་ཞེས་སྨྲ་བའང་སྣང་སྟེ། རང་བཞིན་སྒྲིབ་པས། མ་གོས་པར་འདོད་བཞིན་དུ། ཡོན་ཏན་དང་ལྡན་པ་ལ་ཞེ་སྡང་པ་དེ་དག་ལ་བརྗོད་པ། ཤེས་བྱ་ལ་མི་སྲིད་པ་ནི་དཔྱད་གཞིར་མི་ཡོང་བར་གོ་བར་གྱིས། གཤིས་ཀྱི་གནས་ལུགས་སམ་ཆོས་དབྱིངས་སམ་དོན་དམ་བདེན་པའམ། གཉིས་མེད་ཀྱི་ཡེ་ཤེས་སམ། སངས་རྒྱས་ཀྱི་སྙིང་པོ་ཞེས་པ་སོགས་སོ་སོ་འདོད་པའམ་ཁས་བླང་བསྟུན་ནས་ཆོས་ཅན་དུ་བཟུང་ནས། ཡོན་ཏན་ཐམས་ཅད་དང་ལྡན་པ་ཡིན་ཏེ་ཁྱོད་སྲིད་སྐྱོན་གང་གིས་ཀྱང་མ་གོས་
པའི་ཕྱིར། དེ་ལ་ཁྱབ་པ་ཡོད་དེ། ཡོན་ཏན་དང་མི་ལྡན་པ་དེ་ཉིད་སྐྱོན་ཡིན་པའི་ཕྱིར། དེས་ན་ཡོན་ཏན་མེད་པ་དེ་སྐྱོན་གྱི་ངོ་བོ་ཡིན། གཞི་གཅིག་ལ་སྦྱར་ན། ཆོས་དབྱིངས་ཆོས་ཅན། ཁྱོད་གནས་དང་གནས་མ་ཡིན་པ་མི་ཤེས་པའི་སྒྲིབ་པས་མ་གོས་པ་མ་ཡིན་པ་ཐལ། ཁྱོད་ཀྱིས་གནས་དང་གནས་མ་ཡིན་པ་མི་ཤེས་པའི་ཕྱིར། དེ་ལ་བེམ་པོ་སོགས་ཀྱིས་མ་ངེས་སོ་སྙམ་ན། རིགས་པས་དཔྱད་པའི་སྐབས་འདིར་བེམ་པོ་རང་མཚན་པ་ཁས་མི་ལེན་ཀྱང༌། རེ་ཞིག་ཡོད་རུང་དུ་ཞོག་ལ། བརྟན་པའི་དངོས་པོའང༌། དངོས་མེད་རྣམས་ཆོས་ཅན། དེ་ལྟ་བུའི་སྒྲིབ་པ་དང་བཅས་པ་ཡིན་ཏེ། ཁྱོད་སྒྲིབ་པའི་ངོ་བོ་ཡིན་པའི་ཕྱིར་ཏེ། འཁྲུལ་སྣང་ཙམ་གྱིས་བཞག་པ་ཡིན་པའི་ཕྱིར། དེས་མཚོན་ཏེ་ཡང༌། སྒྲིབ་པ་རང་བཞིན་གྱིས་མེད་པ་ཡིན། སྤྱིར་དེ་ལ་དབྱིངས་ལ་སྒྲིབ་པ་ཡོད་དོ་སྙམ་ན། འོ་ན་རང་བཞིན་གྱི་ཡོན་ཏན་ཐམས་ཅད་དང་ལྡན་པར་འགྲུབ་སྟེ། རང་བཞིན་གྱི་སྐྱོན་ཐམས་ཅད་དང་བྲལ་བའི་ཕྱིར་རོ། །དེ་འདོད་ན་ཁོ་བོ་ཅག་གི་འདོད་པ་དེས་གྲུབ་བོ། །ཡང་ཆོས་དབྱིངས་ཆོས་ཅན། ཁྱོད་ལ་མཚན་དཔེའི་ཡོན་ཏན་ཡོད་པར་ཐལ། ཁྱོད་ལ་མཚན་དཔེ་འབྱུང་བ་ལ་བར་དུ་གཅོད་པའི་སྒྲིབ་པས་མ་གོས་པའི་ཕྱིར། ཡང་སྒྲིབ་པས་མ་གོས་ཀྱང་ཐོབ་བྱེད་ཀྱི་རྒྱུ་ལ་བསགས་པའི་ཕྱིར། དེ་མེད་དོ་སྙམ་ན། ཁོ་བོ་ཅག་གི་ལུགས་ལ་གདོད་མའི་ཡོན་ཏན་ཡིན་པའི་ཕྱིར། ཐོབ་བྱེད་ཀྱི་རྒྱུ་གསོག་མི་དགོས་ཀྱང༌། རེ་ཞིག་ཁྱེད་ཀྱི་ངོར་གཏམ་འདི་བོར། འོ་ན་དེ་ཆོས་ཅན། དེ་ཐོབ་པ་ལ་བར་དུ་
གཅོད་པའི་སྒྲིབ་པའི་ཉེས་སྐྱོན་གྱིས་གོས་པར་ཐལ། དེ་ཐོབ་བྱེད་ཀྱི་རྒྱུ་མ་བསྒྲུབས་པ་གང་ཞིག མ་བསྒྲུབས་པ་དེ་སྐྱོན་ཡིན་པའི་ཕྱིར། ཞེས་པ་འདི་ཁྱེད་ལ་ཟློག་ཏུ་མེད་ལ། ཐལ་བ་དེ་ངེད་ལ་སླར་ཟློག་པར་བྱེད་ན། ཁོ་བོ་ཅག་ནི་མཚན་དཔེ་སོགས་ཡོན་ཏན་རྣམས། ཆོས་ཀྱི་དབྱིངས་ལ་རང་བཞིན་གྱིས་གྲུབ་པ་རེ་རེ་དང༌། འཕགས་པའི་གང་ཟག་གི་རྒྱུད་ལ། རྐྱེན་གྱིས་སྒྲུབས་པ་རེ་རེ་སོ་སོར་ཡོད་པས། གང་ཟག་ལ་ནི་སྐྱོན་གྱིས་གོས་པར་འདོད། ཆོས་དབྱིངས་ལ་ནི་དེ་དང་དེ་ཐབས་ཀྱིས་མ་སྒྲུབས་པ། སྐྱོན་ཡིན་པ་རྟགས་མ་གྲུབ་བོ། །ཡང་གདོད་མའི་གཉིས་མེད་ཀྱི་ཡེ་ཤེས་ཆོས་ཅན། ཁྱོད་ཀྱིས་གནས་དང་གནས་མ་ཡིན་པ་ཤེས་པ་ཡིན་ཏེ། ཁྱོད་ལ་གནས་དང་གནས་མ་ཡིན་པ་ཐམས་ཅད་ཤེས་པ་རང་གི་ངོ་བོར་ཡོད་པའི་ཕྱིར་ཏེ། ཁྱོད་ལ་གནས་དང་གནས་མ་ཡིན་པ་མི་ཤེས་པ་རང་གི་ངོ་བོར་མེད་པའི་ཕྱིར། མ་གྲུབ་ན་གནས་དང་གནས་མ་ཡིན་པ་མི་ཤེས་པའི་སྒྲིབ་པ་དང་སྐྱོན་གྱིས་གོས་པར་ཐལ་པར་འགྱུར་རོ། །དེ་ལ་མ་ཁྱབ་སྙམ་ན། དུད་འགྲོ་ལ་གནས་དང་གནས་མ་ཡིན་པ་མི་ཤེས་པའི་སྒྲིབ་པས་མ་གོས་པར་ཐལ། གནས་དང་གནས་མ་ཡིན་པ་མི་ཤེས་པས་ནི་དེའི་སྒྲིབ་པའི་གོ་མི་ཆོད། དོན་འདི་གནས་དང་གནས་མ་ཡིན་པ་མི་ཤེས་པ་ལས་ལྷག་པའི། གནས་དང་གནས་མ་ཡིན་པ་མི་ཤེས་པའི་སྒྲིབ་པར་འཇོག་བྱེད་གཞན་མི་འདུག་པའི་ཕྱིར། ལན་མེད་དོ། །དེ་ལྟར་ན་གང་མི་ཤེས་པ་དང༌། དགོས་པ་མ་བསྒྲུབས་པ་དང༌། དོན་མ་བསྒྲུབས་པ་དང༌། མ་གྲུབ་
པ་ཐམས་ཅད་དང༌། ལེགས་པའི་ཆོས་དང་མི་ལྡན་པ་ཐམས་ཅད་སྐྱོན་ཡིན། སྐྱོན་ཐམས་ཅད་དང་བྲལ་ཙ་ན་དེ་དག་ཐམས་ཅད་དང་བྲལ་དགོས། མི་ཤེས་པ་ལས་ལོག་ཙ་ན་ཤེས། མ་བསྒྲུབས་པ་ལས་ལོག་ཙ་ན་གྲུབ། མི་ལྡན་པ་ལས་ལོག་ཙ་ན་ལྡན་པ་མ་ལགས་སམ། དེ་དག་མ་ཡིན་ན། དེ་དང་དེ་ལས་ལོག་པ་ཡང་མི་འགྱུར་རོ། །དེས་ན་སྐྱོན་ཐམས་ཅད་དང་གདོད་ནས་བྲལ་བ་དེ་ནི། ཡོན་ཏན་ཐམས་ཅད་དང་གདོད་ནས་ལྡན་པར་གྲུབ་བོ། །དེས་ན་ཚུལ་འདི་ནི་དེ་བཞིན་གཤེགས་པས་ཆོས་ཐམས་ཅད་དུ་སྒོ་ཐམས་ཅད་ནས་གསུངས་ཀྱང༌། བོད་ཡུལ་འདིར་ནི་དཔལ་ཇོ་ནང་བའི་མཁས་པ་རྣམས་མ་གཏོགས། གཞན་ཆེས་མཁས་པར་གྲགས་པ་རྣམས་ཀྱིས་ཀྱང་མ་རྟོགས་ན། སྲང་ཁར་འཁྱམས་པའི་རྟོག་གེ་པ་རྣམས་དང༌། སྒོམ་ཆེན་པར་རློམ་པར་གླེན་བླུན་རྣམས་ཀྱིས་ཏ་ག་ལ་རྟོགས། འཕགས་ཡུལ་ན་ཡང་མཆོག་གཟིགས་པའི་མཁས་གྲུབ་ཀྱིས་ནི་རྟོགས་ཤིང་བཤད་མོད་ཀྱི། གྲུབ་ཐོབ་ཕལ་པ་རྣམས་དང༌། མདོ་སྔགས་ཀྱི་པཎྜི་ཕལ་རྣམས་ཀྱིས་མ་རྟོགས་ཏེ། དེའི་ཕྱིར། དེ་བཞིན་གཤེགས་པའི་སྙིང་པོ་ཡོན་ཏན་ཅན་གྱི་གཏམ་ལ་སོགས་པ་ངེས་དོན་ཆོས་སྐད་མཐའ་ཡས་པ་ཞིག་གཞན་ལ་མ་བརྟེན་པར་རང་གི་མཁྱེན་རབ་ཀྱི་སྟོབས་ཀྱིས་གསལ་བར་མཛད་པ། ཀུན་མཁྱེན་དོལ་པོ་པ་དེ་ནི། སྟོན་པ་སངས་རྒྱས་ཉིད་སླར་ཡང་བྱོན་པ་ཁོ་ནའོ། །ཧ་ཅང་སྤྲོས་སོ། གཉིས་པ་ནི། ཕྱི་རོལ་དུ་ནི་བྱུང་བ་དཔྱོད་པ་ལས། སྟོང་དང་སྟོང་པ་མ་ཡིན་པ་ལ་ཞུགས། །སྟོང་དང་སྟོང་མིན་དེ་གཉིས་ཀྱི་དབུས་སུ། །ཀ་ཡེ་
རྨོངས་པ་ཅི་ཡང་མ་མཐོང་ངོ༌། །ལྷན་སྐྱེས་འབའ་ཞིག་གཅིག་པུ་དེ་ཉིད་ཡོད། །ཅེས་པ་སྟེ། ཚིག་རྐང་དང་པོ་ལ། བཻ་རོས། ཕྱི་རོལ་འབྱུང་བ་དག་ནི་དཔྱད་བྱས་ནས། །སྟོང་དང་སྟོང་མིན་དག་ལ་འཇུག་པར་གྱིས། །ཞེས་བསྒྱུར་བ་གོ་བདེའོ། །དེ་ཡང་ཕྱི་རོལ་གྱི་དངོས་པོ་སྣ་ཚོགས་སུ་སྣང་བ་རྣམས་ནི། བློ་ལ་ཕྱི་དོན་དུ་འབྱུང་བ་ལྟར་སྣང་ཡང༌། ཡང་དག་པའི་ཤེས་རབ་ཀྱིས་བརྟགས་ཤིང་དཔྱོད་པ་ལས། ཇི་ལྟར་སྣང་བ་དེ་དག་ནི། རྟེན་འབྲེལ་སྣང་བ་སྣ་ཚོགས་པར་འཆར་པའི་ཕྱིར། སྟོང་པ་མ་ཡིན་པ་ལའང་ཞུགས་ལ། རང་བཞིན་ནི་གང་དུ་ཡང་མ་གྲུབ་པའི་ཕྱིར། སྟོང་པ་ལ་ཡང་ཞུགས་སོ། །འདིར་ཕྱི་རོལ་ཅེས་པ་ཕྱི་རོལ་གྱི་དོན་གཅིག་པུར་མ་ཟད། རྟགས་[བཏགས་]ཆོས་ཐམས་ཅད་བསྡུས་པ་ཡིན་ཏེ། དེ་དག་ཀྱང༌། འདོགས་བྱེད་ཀྱི་བློ་ལས་ཕྱི་རོལ་དུ་སྣང་བའི་ཕྱིར་རོ། །དེ་བས་ན་བཟུང་བའི་རྣམ་པ་ཐམས་ཅད་སྣང་བ་དང་དབྱེ་བ་མེད་པའི་ཕྱིར། ཕྱི་རོལ་མེད་ན་གཟུང་རྣམ་མ་གྲུབ་ལ། དེ་མ་གྲུབ་ན་འཛིན་རྣམ་ཡང་མ་གྲུབ་སྟེ། གཟུང་རྣམ་ཀྱི་རང་གཟུགས་ཙམ་ཡིན་པའི་ཕྱིར། ཏིལ་མེད་ན་ཏིལ་མར་མི་འབྱུང་བ་བཞིན་ནོ། །དཔེར་ན་གསེར་ལས་བྱས་པའི་རྒྱན་བརྒྱད་ཡོད་ན། གོ་ས་དེ་ན་གནས་པའི་གསེར་གྱི་དངོས་པོ་ཙམ་ནི། འཛིན་རྣམ་དང་འདྲ་ལ། རྣ་རྒྱན་དང༌། མགུལ་རྒྱན་དང༌། གདུ་བུ་ལ་སོགས་པ་རྒྱན་ཡིན་པའི་ཆ་ནི། གཟུང་རྣམ་སྟེ་ཤེས་པ་གཅིག་ཉིད་རང་གི་ངོ་བོ་རིག་པ་ཙམ་ཡིན་པ་ལ་འཛིན་རྣམ་དང༌། སྣང་བ་སྣ་ཚོགས་པར་ཤར་བའི་སྒོ་ནས་གཟུང་རྣམ་དུ་བཞག་གོ །དེའི་
ཕྱིར་དེ་གཉིས་དངོས་པོ་གཅིག་པས་ན། བདེན་བརྫུན་གྱི་དབྱེ་བ་མི་འོས་སོ། །འོན་ཀྱང་བཏགས་པ་རྣམས་ནི་བྱ་བ་བྱེད་ནུས་སུ་མེད་ལ། ཤེས་པ་ཙམ་ནི་བྱ་བ་བྱེད་ནུས་སུ་ཡོད་དོ། །དེ་ལ་སྣ་ཚོགས་སུ་སྣང་བས་ནི། རྒྱུ་འབྲས་ཀྱི་བྱ་བ་བྱེད་ལ། རང་རིག་པ་ཙམ་གྱིས་ནི། རྒྱུ་འབྲས་གཉིས་ཀའི་བརྟེན་གྱི་བྱ་བ་བྱེད་དོ། །དེ་ཡང་རྣམ་པར་ཤེས་པའི་ངོ་བོ་ཡིན་གྱི། རྣམ་པར་མི་རྟོག་པའི་ཡེ་ཤེས་ཀྱི་གཟིགས་ངོར་ནི་མ་ཡིན་ཅིང༌། དོན་དམ་དཔྱོད་བྱེད་ཀྱི་རིག་ངོར་ཡང་མ་ཡིན་ནོ། །དབུ་མ་པར་ཁས་འཆེ་བ་གང་དག །ཐག་ཁྲིའི་སྦྲུལ་གྱིས་དངངས་པར་བྱེད་པ་དང༌། རྨི་ལམ་གྱི་སེམས་ལ་བདེ་སྡུག་འབྱུང་བ་སོགས་རྒྱུ་མཚན་དུ་བྱས་ནས། འཁྲུལ་ངོར་བྱ་བ་བྱེད་ནུས་ཙམ། སྣང་བ་ལོག་པ་དེ་དག་ལ་ཡང་ཡོད་ལ། དོན་དམ་པ་ནི་རྣམ་ཤེས་ཙམ་གྱིས་ཀྱང་བྱ་བ་མི་བྱེད་པའི་ཕྱིར། དེ་གཉིས་ལ་དོན་བྱེད་ནུས་མི་ནུས་ཀྱི་ཁྱད་པར་མེད་དོ་ཞེས་སྨྲ་ཡང༌། མ་བརྟགས་པའི་ཧལ་ཧོལ་རྒྱུ་མཚན་དུ་བྱས་པའི་ལྟག་མཆོད་ཡིན་པས་སྙིང་པོ་མེད་དོ། །ཇི་ལྟར་ཞེ་ན། ཐག་ཁྲའི་སྦྲུལ་གྱིས་ཀུན་རྫོབ་ཏུ་སྦྲུལ་གྱི་བྱ་བ་བྱེད་ནུས་ན། ཐག་ཁྲར་རིག་པས་འཁྲུལ་ངོར་དུག་ནད་འབྱུང་དགོས་པ་ལས་མ་ཡིན་པའི་ཕྱིར་དང༌། ཐག་ཁྲའི་སྦྲུལ་དེ་སྦྲུལ་མ་ཡིན་པ་གཞན་ཞིག་གི་བྱ་བ་བྱེད་ན། གང་གི་བྱ་བ་བྱེད་མོད་སྨྲོས་ཤིག །དེས་ན་འཇིགས་སྐྲག་སྐྱེད་པའི་བྱ་བ་བྱེད་མཁན་དེ་ནི། སྦྲུལ་འཛིན་གྱི་ཤེས་པ་ཡིན་པས། གཞན་དབང་གི་བྱ་བ་བྱས་པ་ཡིན་གྱི། ཐག་པ་ལ་སྦྲུལ་ནི་གཏན་ནས་མེད་ན། བྱ་བ་གང་ཞིག་བྱེད་སྦྲུལ་འཛིན་གྱི་རྟོག་པའི་འཛིན་སྟངས་ཀྱི་གཟུང་
བྱ། ཐག་སྦྲུལ་གྱི་དོན་སྤྱི་དེ་ཡང༌། རྟཽག་པ་དེའི་ཞེན་སྟངས་ཀྱི་འཁྲུལ་ལུགས་ཙམ་ཡིན་གྱི། དེས་འཇིགས་སྐྲག་བསྐྱེད་པ་ཡང་མ་ཡིན་ལ། དེས་སྦྲུལ་འཛིན་གྱི་རྟོག་པ་དེ་བསྐྱེད་པ་ཡང་མ་ཡིན་ནོ། །དེས་ན་རེ་ཞིག་ཀུན་རྫོབ་མི་འགགས་པའི་དབང་དུ་བྱས་ནས། ཐག་ཁྲར་སྣང་བའི་ཤེས་པ་ལས་སྦྲུལ་འཛིན་གྱི་རྟོག་པ་འཁྲུལ་པ་སྐྱེ། དེས་འཇིགས་སྐྲག་སྐྱེད་པས་གསུམ་ཀར་ཤེས་པ་ཡིན་པས་ཤེས་པས་ཤེས་པ་སྐྱེད་པའི་བྱ་བྱེད་ཡིན་གྱི། དངོས་མེད་ཀྱི་དངོས་པོ་སྐྱེད་པ་མ་ཡིན་ནོ། །དེ་བཞིན་དུ་རྨི་ལམ་གྱི་མེས་རྨི་ལམ་དུ་ཚིག་པའི་བྱ་བ་བྱེད་དོ་ཞེས་པ་ཡང་མི་འཐད་དེ། རྨི་ལམ་གྱི་མེས་རྨི་ལམ་དུ་མེའི་བྱ་བ་མི་བྱེད་དེ། རྨི་ལམ་དུ་མེ་བསིལ་བར་སྣང་བ་ཡང་འབྱུང་བའི་ཕྱིར་རོ། །གལ་ཏེ་མེ་མ་ཡིན་པའི་བྱ་བ་བྱེད་ན་དེ་སྨོས་ཤིག །དེས་ན་རྨི་ལམ་དུ་མེ་མེད་པས་བྱ་བ་བྱེད་རྒྱུ་མེད་ལ། རེས་འགའ་རྨི་ལམ་དུ་མེས་ཚིག་པ་ལྟར་སྣང་བ་འབྱུང་བ་དེ་ནི། སྐབས་དེར་མེར་འཛིན་པའི་རྣམ་རྟོག་དང༌། སྔར་མེའི་རེག་པ་རྒྱུས་ཡོད་པའི་བག་ཆགས་འཛོམས་པ་ལས་བྱུང༌། དེ་མེར་སྣང་བ་ལས་བྱུང་སྟེ། མེར་སྣང་དེ་ཡང་རྣམ་པར་རིག་པ་ཙམ་ཡིན་པས། རྣམ་རིག་ལས་རྣམ་རིག་བྱུང་བ་ཡིན་ཏེ། མེར་འཛིན་གྱི་བློས་བཏགས་པའི་བཏགས་ཆ་མེའི་དོན་སྤྱི་ནི། མེར་འཛིན་གྱི་ཞེན་ཡུལ་ཙམ་ཡིན་གྱི། དེས་མེར་འཛིན་སྐྱེད་པ་ཡང་མ་ཡིན་ལ། དེས་ཚ་བར་སྣང་བ་ཡང་མ་ཡིན་ནོ། དེས་ན་ཐག་ཁྲར་སྣང་བ་དང༌། རྨི་ལམ་དུ་དམར་ལམ་པར་སྣང་བ་ནི། འཁྲུལ་སྣང་ནི་
ཡིན་མོད་ཀྱི། བྱ་བ་ཅུང་ཟད་བྱེད་པ་ནི་ཤེས་པ་ཡིན་པའི་རྒྱུ་མཚན་གྱིས་སོ། །དེ་ལྟ་བུ་ལ་སྦྲུལ་དང་མེ་ནི་ནམ་ཡང་མེད། དེ་དག་ལ་དམིགས་ནས་སྦྲུལ་འཛིན་དང་མེར་འཛིན་གྱི། སྦྲུལ་དང་མེར་བཏགས་པའི་བཏགས་ཆ་དེ་ནི། རྟོག་པ་དེ་དག་ལ་མི་གསལ་བར་ཤར་བ་ཙམ་ཡིན་གྱི། བྱ་བ་གང་ཡང་མི་བྱེད་དོ། ། དེས་ན་སྦྲུལ་དང་མེར་སྣང་བ་ཡང་མ་ཡིན། སྦྲུལ་འཛིན་མེར་འཛིན་གྱི་བཏགས་ཆ་ཡང་མ་ཡིན། ཐག་ཁྲ་དང་མེ་ཡང་མ་ཡིན་པའི། ཐག་སྦྲུལ་དང་རྨི་ལམ་གྱི་མེ་ཞིག བསྟན་བཅོས་དང༌། འཇིག་རྟེན་གྲགས་པ་དང༌། མངོན་སུམ་གང་གིས་ཀྱང་མ་གྲུབ་ན། འཁྲུལ་ངོར་ཡང་དེ་འདྲ་འཇོག་ཏུ་མི་རུང་བས། ཁྱེད་ཀྱི་སྣང་ལོག་བྱ་བ་བྱེད་ནུས་དེ་གོང་ན་ཡོད། འཇིག་རྟེན་གཞན་ངོར་ཁས་ལེན་ནོ་སྙམ་ན། དེ་འདྲ་འཇིག་རྟེན་པ་སུ་ལ་ཡོད། སུ་ཟེར། གཞན་ལས་སྐྱེ་བ་འཇིག་རྟེན་ལས་ཀྱང་མེད་ཅེས་སོགས་འཇིག་རྟེན་པ་རྣམས་མི་འདོད་ཚུལ་ཁོ་ན་ལ། ལྕེ་དང་མཆུ་ངལ་བར་གྱུར་པ་དེ་ཡང་སྐབས་འདིར་དོན་མེད་དུ་བྱས་སོ། ཁོ་བོ་ཅག་ཐ་སྙད་རྣམ་པར་འཇོག་པའི་ཚེ། ཐག་ཁྲར་སྣང་བའི་ཤེས་པ་ལས་སྦྲུལ་འཛིན་གྱི་རྣམ་རྟོག་སྐྱེ་བ་དང༌། །དེ་ལས་སྐྲག་སེམས་སྐྱེ་བར་འདོད་པ་འདི་ནི་རྟགས་མངོན་སུམ་གྱིས་གྲུབ་པ་ཡིན་ཅིང༌། དེ་ཡང་ཐག་ཁྲར་སྣང་བའི་ཤེས་པ་ལས་སྦྲུལ་འཛིན་སྐྱེ་ཡི། ཐག་ཁྲ་ལས་སྦྲུལ་འཛིན་སྐྱེ་བ་མ་ཡིན་ཏེ། ཡིན་ན་ཐག་ཁྲ་མཐོང་ཚད་ལ་སྦྲུལ་འཛིན་སྐྱེ་བར་ཐལ་བ་དང༌། དེ་ཡོད་ཀྱི་བར་དུ་སྦྲུལ་འཛིན་རྒྱུན་མི་ཆད་པར་འཇུག་བར་ཐལ་བའི་ཕྱིར་རོ། །དེས་ན་ཀུན་བཏགས་ལོག་པའི་ཀུན་རྫོབ་
ཁོ་ནས། འཁྲུལ་ངོར་ཡང་བྱ་བ་མི་བྱེད་པ་དང༌། གཞན་དབང་རྣམ་པར་རིག་པ་ཙམ་ཀུན་རྫོབ་ཏུ་དོན་བྱེད་ནུས་པར་འཇོག་པ་ནི་འཐད་པའི་ཕྱོགས་ཁོ་ནའོ། །དབུ་མ་པར་ཁས་འཆེ་བ་རྣམས་ཡང་ལོག་གི་དབྱེ་བ་མི་བྱེད་ཟེར་བ་ན། ཀུན་བཏགས་རང་དང་ཀུན་བཏགས་ཀྱི་རྣམ་ཆ་དེ་དང་དེར་སྣང་བའི་རྣམ་རིག་གི་དབྱེ་བ་གཏན་ནས་མ་ཕྱེད་པས་ཉེས་པ་འབའ་ཞིག་གོ །དེ་ལྟར་ན། མཚན་ཉིད་ཀྱིས་སྟོངས་པ་ཀུན་བཏགས་དང༌། དེས་སྟོངས་པ་མ་ཡིན་པ་གཞན་དབང་སྟེ། མདོར་ན་ཀུན་རྫོབ་གཟུང་འཛིན་ཆར་གཏོགས་དང་བཅས་པ་དེ་རྣམས་ཀྱི་དབུས་ཏེ་གཞན་དབང་དང༌། ཀུན་བཏགས་དེ་དག་གི་ནང་ནི། ཡང་དག་པར་བདེན་དངོས་སུ་གྲུབ་པ་ནི་ཅི་ཡང་མ་མཐོང་ངོ༌། །ཀྭ་ཡེ་རྨོངས་པ་ཞེས་འཇིག་རྟེན་རྣམས་ལ་བོད་པའོ། །འོ་ན་དེ་འདྲ་བའི་སྟོང་པ་དང༌། སྟོང་མིན་གྱི་ཆོས་དེ་དག་ལ་ཡོད་པ་མི་སྲིད་ན། ཁྱེད་དོན་དམ་པར་ཡོད་པ་ཞེས་བྱ་བ་གཏན་ནས་མི་འདོད་དམ་ཞེ་ན། དོན་དམ་རང་བཞིན་ལྷན་ཅིག་སྐྱེས་པའི་བདེ་བ་ཆེན་པོ་རྣམ་པ་ཐམས་ཅད་པ། བདེ་གཤེགས་སྙིང་པོ། རང་བཞིན་གྱི་འོད་གསལ་བའི་སེམས་ཉིད་འབའ་ཞིག་གཅིག་པུ་དེ་ཉིད་ཡོད་དེ། ཀུན་ཏུ་ཁྱབ་པའི་ཆོས་དབྱིངས་སོ། །དེ་ལྟར་ན་སྟོང་པ་དང་སྟོང་མིན་གྱི་ཆོས་རྣམས་ངོ་བོས་མ་གྲུབ་པ་དང༌། དོན་དམ་བདེ་ཆེན་ནམ་ཡང་མི་འཇིག་པར་ཡོད་དོ་ཞེས་ནག་པོ་སྤྱོད་པ་ང་ཡིས་རབ་ཏུ་ཤེས་སོ། །ཞེས་བདག་ཉིད་ཀྱི་ཉམས་མྱོང་ཚད་མ་རྗེས་སུ་དྲན་པས་ལྷུག་པར་བརྗོད་པའོ། །གསུམ་པ་ནི། བསྟན་བཅོས་དང་
ནི་ལུང་མང་ཀློག་ཉན་ཀྱང༌། །རྨོངས་པ་དག་གིས་ཅི་ཡང་མི་ཤེས་སོ། །འདི་ལ་བསྟན་བཅོས་ནི༌། ཕྱི་ནང་གི་སྐྱེ་བོས་བྱས་པ་དང༌། ལུང་ནི་དེ་བཞིན་གཤེགས་པའི་བཀའ་ཞེས་འཆད་པ་ལྟར་བདེ་ལ། ཡང་བསྟན་བཅོས་གྲུབ་མཐའ་ལུང་སྔགས་རྒྱུད་ཀྱི་སྦྱོར་བ་ལ་ཟེར་བའང་ཡོད་དོ། །འདིར་སྐལ་བ་དང་ལྡན་པ་འགའ་ཞིག་ལ། ལྷན་ཅིག་སྐྱེས་པའི་ཡེ་ཤེས་རྫོགས་པའི་རིམ་པ་དེ་སྐྱེས་པར་གྱུར་ན། དོན་དམ་པའི་གསང་བ་འདི་རྟོགས་པ་འགྱུར་གྱི། གཞན་ཐོས་བསམ་ལ་སོགས་པའི་ཐབས་གང་གིས་ཀྱང༌། ལྷན་སྐྱེས་བདེ་ཆེན་རྟག་པ་འདི་ཤེས་པ་མ་ཡིན་པས། སྡེ་སྣོད་གསུམ་དང་རིག་གནས་ལྔ་ལ་བྱང་ཆུབ་པས་ཀྱང་དགོས་དོན་མཐར་ཐུག་ནི་མི་ཤེས་པས་ཀྭ་ཡེ་རྨོངས་པ་ཞེས་བོས་པའོ། །གཉིས་པ་ལམ་དང་འབྲས་བུའི་གསང་བ་བཤད་པ་ལ། རྩ་བ་གྱུར་པའི་ལམ་གཉིས་བཤད། འབྲས་བུའི་གནས་ཐབས་མདོ་ཙམ་བསྟན། མངོན་པར་འགྲུབ་བྱེད་ཀྱི་ལམ་རིམ་བསྟན་པའོ། །དང་པོ་ལ། ལས་རླུང་འགོག་བྱེད་ཀྱི་རྣལ་འབྱོར་འཕྲོས་དང་བཅས་པ་དང༌། སྟོང་གཟུགས་སྒྲུབ་བྱེད་ཀྱི་རྣལ་འབྱོར་འཕྲོས་དང་བཅས་པའོ། །དང་པོ་ལ་དངོས་དང་འཕྲོས་དོན་གཉིས། དང་པོ་ནི། འོག་དུ་མི་འགྲོ་བ་དང་སྟེང་མི་འབྱུང༌། །གཉིས་བྲལ་དེ་ནི་མི་གཡོ་བར་གནས་ཏེ། །ཡིད་གར་མི་འགྲོ་བར་ནི་ནག་པོས་སྨྲས། །མི་གཡོ་བ་རླུང་ཁྱིམ་བདག་མོ་ཁྱིམ་གནས། །ཅེས་པ་སྟེ། འདི་ལ་ཤུད་ཀེས། འོག་དང་སྟེང་དུ་འཇུག་གཉིས་དང༌། །བྲལ་ཞིང་དེ་ལ་མི་གཡོར་གནས། །ཀྭཧྞས་སྨྲས་པ་སེམས་ཉིད་ནི། །གང་དུ་མི་གཡོ་
ཆད་པ་མེད། །མི་གཡོ་བ་ཡི་རླུང་ཉིད་ཀྱིས། །ཁྱིམ་མི་མོ་ཡི་ཁྱིམ་ན་འཁོར། །ཅེས་བསྒྱུར་བ་དོན་ལ་ཁྱད་མེད་ཀྱང་ཚིག་ལེགས་ཤིང་གོ་བདེ་བར་སྣང་ངོ༌། །དེ་ཡང༌། རྣལ་འབྱོར་གྱི་སྟོབས་ཀྱིས་རླུང་དབུ་མར་བཀག་པས། འོག་གི་རྩ་གསུམ་ལས། གཡས་གཡོན། བཤང་གཅིའི་ལམ་གྱི་རྩ་ལ་རྒྱུ་བའི་རླུང༌། དབུས་དུང་ཅན་མ་ཁུ་བའི་ལམ་གྱི་རྩར་འགགས་ཤིང༌། དེ་ཡང་འོག་ཏུ་མི་འགྲོ་བར་ལྟེ་བར་བཅིངས་པ་དང༌། སྟེང་གཡས་གཡོན་རོ་རྐྱང་གི་རྩ་ལ་རྒྱུ་བའི་རླུང༌། དབུས་ཨ་ཝ་དྷཱུ་ཏཱིར་འགགས་ཤིང༌། དེ་ཡང་སྟེང་དུ་འབྱུང་འཇུག་མི་བྱེད་པར་ལྟེ་བར་བཅིངས་ལ། ལྟེ་བའི་གནས་དེ་ཉིད་དུའང་གཉིས་ཀྱི་མཚན་ཉིད་དང་བྲལ་ཏེ་གཅིག་ཏུ་འདྲེས་པ་སྟེ། སྲོག་རྩོལ་གྱི་རིམ་པའི་གནས་སྐབས་སུ། སྲོག་ཐུར་ཁྱུ་གཅིག་ཏུ་འདྲེས་པ་དང༌། འཛིན་པའི་རིམ་པ་ལ་དངོས་པོ་གཅིག་ཏུ་འདྲེས་པ་གཉིས་ཀ་བསྟན་ནོ། །དེ་ལྟར་ཡང་དང་པོའི་སངས་རྒྱས་ལས། གཟུགས་བརྙན་མཐོང་ན་དེ་ནས་ནི། །བར་མ་ཆད་པར་སྲོག་རྩོལ་བྱ། །སྟེང་འོག་རྩ་གསུམ་པོ་རྣམས་ལ། །ལུས་ངག་སེམས་ནི་འགོག་པ་ལས། །ཆུ་མི་སྟོང་པ་ས་རླུང་དང༌། །ཡེ་ཤེས་ཁམས་རྣམས་སྐྱེས་རྣམས་ལ། །གང་ཞིག་ཟླ་ཉི་མུན་ཅན་དང༌། །བཤང་གཅི་ཁུ་བ་འབབ་མ་རྣམས། །སྲོག་དང་ཐུར་སེལ་རིམ་པ་ལས། །ལུས་ངག་སེམས་ཀྱི་རྩ་རྣམས་སོ། །ཞེས་པ་དང༌། སྟེང་འོག་རིགས་དྲུག་འདི་རྣམས་ནི། །སྐུ་གསུང་ཐུགས་ཀྱི་རྣལ་འབྱོར་ལས། །ཤེས་རབ་ཐབས་དངོས་ཡན་ལག་གི །ལུས་ཅན་ཀུན་ལ་ཡང་དག་གནས། །
ཞེས་གསུངས་པ་ལྟར། ཁམས་དྲུག་གི་རང་བཞིན་ཏེ་རྡོ་རྗེ་གསུམ་ལ་ཐབས་ཤེས་ཀྱིས་ཕྱེ་བའི་དྲུག་གི་ངོ་བོ་རྩ་དྲུག་གི་རླུང་རྣམས་ཚོགས་པ་གཅིག་ཏུ་འཆིང་པ་ནི་སྲོག་རྩོལ་ཡིན་ལ། དེ་ལྟ་བུའི་རྒྱུན་དེ་སླར་ཡང་ལྟེ་བ་ལ་སོགས་པ། དབུ་མ་དངོས་ཀྱི་རྩ་འཁོར་བཞིའམ་དྲུག་ལ་སོགས་པ་དེར་ནི། མི་ཤིགས་པའི་ཐིག་ལེ་རྣམས་ལ་ཐིམ་ཞིང་མི་གཡོ་བར་གནས་པའི་སྒོ་ནས་བཅིངས་པས། རླུང་ཐམས་ཅད་བདེ་བའི་རླུང་དུ་གྱུར་པ་ན། འཛིན་པའི་རིམ་པ་སྟེ། དངོས་པོ་གསལ་བའི་རྗེས་སུ་འགྲོ་བའི་དེ་ཁོ་ན་ཉིད་གྲུབ་པ་ལས། རང་གནས་ལ་གནས་ལྷན་ཅིག་སྐྱེས་པའི་རླུང༌། །རྟོག་པའི་དྲ་བ་དག་ལས་རབ་དུ་གྲོལ། །རང་གི་ནང་དུ་དགའ་སྐྱེད་བརྗོད་དུ་མེད། །དེ་ནི་སྟོང་པ་ཉིད་ཀྱི་རང་བཞིན་ནོ། །ཞེས་གསུངས་ཏེ། རླུང་རྣམས་ཐིག་ལེ་ལ་ཐིམ་པས་ལྷན་སྐྱེས་ཀྱི་རླུངདུ་གྱུར་པ་ན། རྣམ་རྟོག་འགགས་པའི་སྟོང་ཉིད་དང༌། བདེ་ཆེན་རྒྱུན་མི་ཆད་པའོ། །ཡིད་རྣམ་པར་རྟོག་པ་ཉོན་མོངས་པའམ། འཛིན་ཞེན་དང་བཅས་པ་གང་དུ་ཡང་མི་འགྲོ་བ་སྟེ། མདོར་ན། མཉམ་གཞག་ཏུ་རྣམ་རྟོག་མེད་ཅིང༌། བདེ་སྟོང་གི་རིག་པ་རྒྱུན་མི་འཆད་པ་དང༌། རྗེས་ཐོབ་ཏུའང་ཉོན་མོངས་རྣམ་རྟོག་གཟུགས་བརྙན་ཙམ་མ་གཏོགས་སྟོབས་དང་ལྡན་པའི་གཡོ་བ་མི་འབྱུང་ཞིང༌། བདེ་སྟོང་གི་བརླན་དང་མ་བྲལ་བ་སྟེ། དེའི་རྒྱུ་ཁྱིམ་བདག་མོ་ཡེ་ཤེས་ཀྱི་གཏུམ་མོའི་ཁྱིམ་རྩ་ཨ་ཝ་དྷཱུ་ཏཱིར། བདེ་བ་མི་གཡོ་བ་ལྷན་ཅིག་སྐྱེས་པའི་རླུང་རྟག་པར་གནས་པ་ཡིན་ནོ། །འཛིན་པའི་རིམ་པ་གྲུབ་པའི་རྣལ་འབྱོར་པ་ནི་དེ་འདྲའོ་ཞེས།
ནག་པོ་སྤྱོད་པ་བདག་གིས་སྨྲས་ཏེ། རང་གི་ཉམས་མྱོང་ཚད་མ་ཅན་ནོ། །གཉིས་པ་ལ། འགྱུར་བའི་ཉེས་པ་དང༌། འགྱུར་མེད་མ་ཐོབ་ན་གནས་ལུགས་མི་རྟོགས་པའི་ཚུལ་གཉིས་སོ། །དང་པོ་ནི། རི་བོ་མཆོག་གི་སུལ་ཟབ་ནས། །འགྲོ་རྣམས་མ་ལུས་ཆད་པར་འགྱུར། །དྲི་མེད་ཆུ་ནི་སྐམས་གྱུར་ཏེ། །དུས་ཀྱི་མེ་ནི་འཇུག་པར་འགྱུར། །ཞེས་པ་སྟེ། འཛིན་པ་གྲུབ་ན་ཞུ་བདེ་འགྱུར་མེད་ཐོབ་པ་ཡིན་ཀྱང༌། དེ་མ་ཐོབ་པའི་འཁོར་བ་པ་རྣམས་ཀྱི་ཞུ་བདེ་ནི་འཛག་བཅས་ཡིན་ནོ། དེ་ཡང་གཉིས་སྦྱོར་གྱི་འདོད་ཆགས་ལས་དམར་ཆ་དྲོད་ཀྱི་རང་བཞིན་རྩ་ནང་དུ་རྒྱས་པ་ན། རི་བོ་མཆོག་མགོན་པོའི་སུལ་ཟབ་མོ། །སྤྱི་བོའི་འཁོར་ལོའི་དབུས་ནས། བྱང་ཆུབ་ཀྱི་སེམས་ཞུ་བ་འཛག་པའི་ངང་ཚུལ་ཅན་དང༌། འགྲོ་བ་སྟེ་འབྱུང་བ་ལྔ་པོ་མ་ལུས་པའི་དྭངས་མ་རྣམས་ཀྱང་ཆད་ཅིང་ཉམས་པར་འགྱུར་བ་དང༌། དེ་ཡང་གཙུག་ཏོར་ནས་ནོར་བུའི་བར་དུ་རབ་ཏུ་གང་ཞིང་རྒྱས་པའྀ་ཚུལ་ཡིན་ཡང༌། ནོར་བུ་ནས་ལྷུང་བའི་འགོ་བརྩམས་ནས། འབྱུང་བ་རྣམས་རིམ་པས་ནུས་པ་མ་ལུས་བར་ཆད་ཅིང༌། དྲི་མ་མེད་པའི་ཆུ་རྒྱུན་བྱང་ཆུབ་ཀྱི་སེམས་ནི། ནང་གི་འཁོར་ལོའི་གནས་ཐམས་ཅད་དུ་སྐམ་པར་འགྱུར་ཏེ། དུས་ཀྱི་མེ་སྒྲ་གཅན་རབ་ཏུ་འཇུག་པར་འགྱུར་ཞེས་པ་སྟེ། དཔེར་ན། ཚེས་གཅིག་ནས་བཅོ་ལྔའི་བར་དུ་ཟླ་བའི་འཕེལ་བ་རྫོགས། བཅུ་དྲུག་གི་མཚམས་སུ་སྒྲ་གཅན་དུས་མེ་རབ་ཏུ་ཞུགས་ནས་ཟླ་བའི་ཆ་ཐམས་ཅད་སྒྲིབ་པར་བྱེད་དོ། །དེ་བཞིན་དུ་གཙུག་
ཏོར་ནས་ནོར་བུ་བར་དུ། དགའ་བ་བཅོ་ལྔའི་བར་དུ་གོང་འཕེལ་དུ་རྒྱས་ཀྱང༌། བཅུ་དྲུག་པ་ནོར་བུ་ལས་ཉམས་པ་དང་ལྷན་ཅིག །དུས་མེ་འབར་བས་ནོར་བུ་ནས་གཙུག་ཏོར་གྱི་བར་གྱི་བྱང་ཆུབ་ཀྱི་སེམས་ཀྱི་གནས་ཐམས་ཅད་དེའི་འོད་ཀྱིས་ཁྱབ་ཅིང༌། དེའི་མཐར་དུས་མེའི་མདངས་ཀྱང་སྟེང་ཕྱོགས་སུ་ཡལ་བར་འགྱུར་རོ། །དུས་མེ་ཞེས་པ་ནི་སྤྱིར་འབྱུང་བ་ལྔའི་དྭངས་མ་ཟོས་པའི་དམར་ཆ་ཤིན་ཏུ་དྭངས་བ་ཞིག་གི་མིང་ཡིན་ཡང༌། འདིར་སྒྲ་གཅན་དུས་མེ་གཉིས་འདུས་ཡིན། སྤྱིར་སྒྲ་གཅན་ཡང་འབྱུང་བ་ལྔའི་དྭངས་མ་དམར་ཆ་ཟོས་པའི་དཀར་ཆ་དྭངས་པོ་ཞིག་ཡིན་ཡང་ཁ་དོག་ནག་པོར་སྣང་བས་མུན་པ་ཞེས་བྱའོ། །འདི་གཉིས་ལམ་དུ་བྱས་ན་རྡོ་རྗེའི་སྐུ་འགྲུབ་ཀྱང༌། ལམ་དུ་མ་བྱས་པ་རྣམས་ལ་རྒ་ནད་འཆི་བ་སོགས་སྡུག་བསྔལ་ཐམས་ཅད་སྟེར་བ་ཡིན་ཏེ། སྐབས་འདིར་ཡང་ཐིག་ལེ་ཉམས་པའི་མཐར། མེ་དང་མུན་པས་སྡུག་བསྔལ་སྟེར་བའོ། །སྐབས་འདིར་འབྱུང་བ་ལྔ་ནི་རེག་པ་སྲ་བ་སོགས་རགས་བཤད་དུ་བྱས་ཀྱང་རུང་ལ། དུས་འཁོར་ནས་འབྱུང་བ་ལྟར། ཆ་བཅོ་ལྔ་ལ་འབྱུང་བ་ལྔ་ལན་གསུམ་དུ་ལྔ་བས་པ། །ཚེས་བཅོ་ལྔ་དབྱངས་བཅོ་ལྔ་སོགས་དང་སྦྱར་བའི་བཤད་པའང་རུང་ངོ༌། །དེ་ལྟར་དབང་མདོར་བསྟན་ལས། ཁུ་བ་ཟླ་འཆར་གཙུག་ཏོར་དུ། །རྫོགས་པ་གསང་བའི་མཚོ་སྐྱེས་ལ། བཅུ་དྲུག་ཆ་གང་དེ་ནོར་བུའི། །པདྨ་རྡོ་རྗེའི་རྩེ་མོར་གནས། །དེ་སྟེང་འཕོ་བའི་དུས་སུ་འགྱུར། ནག་པོའི་ཚེས་གཅིག་འོངས་པ་ན། །
འདོད་ཆགས་བྲལ་བའི་གནམ་སྟོང་ལ། །ཉི་མ་མཛོད་པུའི་གནས་སུ་འགྲོ། །དེ་ཡི་ཆ་ཤས་བཅུ་དྲུག་ལ། །གཙུག་ཏོར་པདྨར་སོན་པའོ། །ཟླ་བ་ཉམས་པ་ཞེས་བརྗོད་དེ། །ཆགས་པའི་བདེ་ལས་ཆགས་བྲལ་ཕྱིར། །ཞེས་གསུངས་པ་དང་གནད་ཅིག་སྟེ། གཞུང་འདིར། དུས་མེ་འཇུག་ཅེས་གཟའ་འཛིན་དང་སྦྱར་ནས། མར་ངོ་དང་དངོས་སུ་མ་སྦྱར་ཡང༌། ཤུགས་ལ་ནག་ཕྱོགས་ཀྱི་ཚེས་བཅུ་དྲུག་དང་སྦྱོར་ཚུལ་ཡང་གོ་བར་བྱའོ། །གཉིས་པ་ནི། འདི་དེ་ས་འཛིན་ལས་ནི་བཟུང་བར་དཀའ། །མཉམ་དང་མི་མཉམ་རྒལ་པར་མི་ནུས་སྟེ། མཚོན་དཀའ་གཏིང་དཔག་དཀའ་བར་ནག་པོ་སྨྲ། ཞེས་པ་སྟེ། འདི་ལའང་ཤུད་ཀེས། འདི་ནི་གཟུང་དཀའི་རི་བོ་ཡི། །མཉམ་དང་མི་མཉམ་འཛིན་པར་བྱེད། །ཀཧྞས་སྨྲས་པ་མཚོན་དཀའ་དང༌། བརྗོད་དཀའ་གང་གི་ཡིད་ཀྱིས་སྒོམ། །ཞེས་བསྒྱུར་བ། ཚིག་དོན་གཉིས་ཀར་གྱི་ཕྱོགས་ནས་འགྱུར་ལེགས་པར་སྣང་ངོ༌། །དེ་ཡང་ས་འཛིན་ནི་རི་བོ་སྟེ། སྒལ་ཚིགས་ཀྱི་དབྱུ་གུའོ། །དེ་དང་ལྷན་ཅིག་སྲོག་རྩ་དང༌། ཨ་ཝ་དྷཱུ་ཏཱིའང་གནས་པའི་ཕྱིར། མདོར་ན་ཨ་ཝ་དྷཱུ་ཏཱིའི་མས་སྣ་གསང་བའི་འཁོར་ལོ་ཡན་ཆད་ནི། ས་འཛིན་རི་བོའི་བརྡས་བསྟན་ནོ། །མཉམ་དང་མི་མཉམ་ཅེས་པ་འབྲེལ་པ་ལས། ལུག་སོགས་དང་གླང་སོགས་ཀྱི་དུས་སྦྱོར་གྱི་རླུང་སོགས་ལ་བཤད་ལ། དེ་ཡང་མི་འགལ་མོད། སྐབས་འདིར་རོ་རྐྱང་གི་མས་སྣ་བཤང་གཅི་འབབ་པ། ལུག་དང་སེར་སྐྱ་ཞེས་བྱ་བའི་རྩ་གཉིས་རླུང་དང་བཅས་
པ་ལ་ངོས་འཛིན། མཉམ་དང་མི་མཉམ་འཛིན་པར་བྱེད་ཅེས་བསྒྱུར་བ་ལྟར། འོག་བཤང་གཅིའི་རྩ་གཉིས་བསྡམས། རླུང་གི་རྒྱུ་བ་བཀག་པས་དབུས་དྲུང་ཅན་མར་རྒྱུ་བའི་རླུང་ཡར་ལོག་པས་ཐིག་ལེ་འཛིན་པར་བྱེད་པའི་དོན་དུ་འཆད་པ་ལེགས་སོ། །དཀྱུས་ཀྱི་འགྱུར་ལྟར་ན། འདི་སྟེ་ཐིག་ལེ་ས་འཛིན་གྱི་མས་སྣ་གསང་བ་མན་ཆད་ནས་འགྲོ་བ་ནི། རྣལ་འབྱོར་དང་མི་ལྡན་པ་རྣམས་ཀྱིས་བཟུང་བར་དཀའ་ལ། མཉམ་མི་མཉམ་རོ་རྐྱང་གི་མས་སྣ་གཉིས་ཀྱིས་ཀྱང༌། དུང་ཅན་མ་འགོག་པ་ལ་རྒལ་ཞིང་རྩོལ་བར་མི་ནུས་ཏེ་ཞེས་པར་འགྱུར་རོ། །ཚིག་རྐང་ཐ་མ་ནི་འགྱུར་གཉིས་ཀ་ལའང་དོན་ཅིག་སྟེ། ཞུ་བདེ་འགྱུར་མེད་ཐོབ་ན་དེའི་གནས་ལུགས་མཚོན་པའི་སྒོ་ནས་རྟོགས་པར་ནུས་ཀྱང༌། དེ་མ་ཐོབ་ན་ཐབས་གཞན་གྱི་དཔེ་དོན་གྱི་སྒོ་ནས་མཚོན་དཀའ། ངོ་བོའི་སྒོ་ནས་མི་རྟོགས་ཤིང་གཏིང་དཔག་དཀའ་བར་ནག་པོ་པ་ང་སྨྲའོ། །མཆན་རྙིང་འགའ་ལས། མཉམ་པ་ཆོས་དབྱིངས། མི་མཉམ་པ་ཀུན་རྫོབ། རྒལ་བ་ངོས་འཛིན་པའི་དོན་དུའང་འཆད་པར་ཡང་སྣང་ངོ༌། །གཉིས་པ་སྟོང་གཟུགས་སྒྲུབ་བྱེད་ཀྱི་རྣལ་འབྱོར་འཕྲོས་དང་བཅས་པ་ལ། དངོས་དང༌། འཕྲོས་དོན་གཉིས་ལས། དང་པོ་ལ། སོ་སོར་སྡུད་པའི་མཚན་ཉིད་དང༌། བསམ་གཏན་གྱི་མཚན་ཉིད་དོ། །དང་པོ་ནི། སུ་ཞིག་གིས་ནི་ཡིད་ཀྱིས་ཡོངས་སུ་རྟོགས། །གང་ཞིག་ཉིན་རེར་ལྷན་སྐྱེས་འཕྲོ་བའོ། །ཞེས་པ་སྟེ། བཻ་རོའི་འགྱུར་དང་འགྱུར་གསར་ལས། ཡིད་ཀྱི་རིན་ཆེན་ཞེས་འབྱུང་
བ་རིན་ཆེན་གྱི་དོན། རྣམ་པ་ཐམས་ཅད་པར་རྗེས་སུ་འགྲོ་བའི་སྟོང་གཟུགས་ཡིན་ནོ། །དེས་ན། སྟོང་བར་རྩེ་གཅིག་ཡིད་བྱས་ཏེ། །ཉི་མ་གཅིག་ཏུ་ཡོངས་སུ་བརྟག །ཅེས་པའི་ཚུལ་དུ་སྒྲུབ་པོ་སུ་ཞིག་གིས་ནི། མུན་པའམ་སྤྲིན་དང་བྲལ་བའི་ནམ་མཁའ་ལ་བལྟ་ཞིང་སྟོང་པའི་ཚུལ་དུ་ཡིད་ཀྱིས་བསྒོམས་པས། སེམས་ནམ་མཁའི་རྣམ་པ་སྤྲོས་བྲལ་དུ་ཤར་ཞིང་རྟོགས་པ་ན། གང་ཞིག་རྣལ་འབྱོར་པ་དེ་ལ། ཉིན་རེ་བཞིན་དུ་ལྷན་ཅིག་སྐྱེས་པའི་འོད་ཟེར་སྟོང་གཟུགས་ཀྱི་རྟགས་སྣང་རྣམས། གོང་ནས་གོང་དུ་འཕྲོ་ཞིང་རྒྱས་པར་འགྱུར་ཏེ། དང་པོའོ་སངས་རྒྱས་ལས། དུ་བ་རྨིག་རྒྱུ་ཁ་སྣང་དང༌། །སྒྲོན་མེ་འབར་བ་ཟླ་ཉི་མ། །མུན་ཅན་ཆ་དང་ཐིག་ལེ་ཆེ། །སྣ་ཚོགས་གཟུགས་བརྙན་འོད་གསལ་བ། །ཞེས་པའི་ཚུལ་གྱིས་འཆར་བ་སྟེ། གཙུག་ཏོར་དུ་རླུང་སེམས་ཀྱི་བྱེད་པ་བཅིངས་བ་ལས་སོ། །འགྲེལ་པར་ཚིག་འདི་རྗེས་དྲན་ལ་སྦྱོར་བ་ནི། ལྷན་སྐྱེས་འཕྲོ་བ་ཞེས་པའི་ཚིག་དང༌། གོང་སྲོག་འཛིན་བཤད་པའི་རྗེས་ཐོགས་སུ་བྱུང་བ་ལ་བསམ་པར་འདུག་ནའང༌། རྒྱུ་མཚན་དེ་ཙམ་ནི་མ་ངེས་ཤིང༌། འགྲེལ་བ་རང་དུའང་དེ་མ་ཐག བསྙེན་པའི་དུས་སུ་གཙུག་ཏོར་ཆེ། ། སོགས་དང༌། བསམ་པ་ཐམས་ཅད་ཡོངས་སྤངས་ཏེ། །སོགས་ལུང་དྲངས་ནས། ཡིད་ནི་རིན་ཆེན་སོགས་ཀྱི་གཞུང༌། །སོར་བསམ་ལ་སྦྱོར་བའི་ཕྱིར། སྔ་ཕྱིའི་ཚིག་མི་འགྲིག་པར་འགྱུར་རོ། །དེ་བས་ན་གཞུང་དོན་ནི་བཤད་ཟིན་འདི་ལས་མི་འདའོ། །གཉིས་པ་བསམ་གཏན་གྱི་མཚན་ཉིད་ནི། ཡིད་ནི་རིན་
ཆེན་ཡང་དག་པར་རིག་པ། དེ་འབའ་ཞིག་གིས་ཆོས་ཀྱི་ངོ་བོ་ཤེས། །བརྗོད་ཀྱང་གཞན་གྱིས་ཤེས་པར་འགྱུར་རམ་ཅི། ཞེས་པ་སྟེ། འདི་ལ་གཉིས་ལས། དོན་ཚན་དང་པོ་བསམ་གཏན་གྱི་རིམ་པའི་ངོ་བོ་ནི། ཡིད་སོགས་ཏེ་དེ་ཡང་རྟག་ཏུ་གཟུགས་དེ་བསྒོམ་པར་བྱ། ཞེས་པའི་ཚུལ་གྱིས་དང་པོར་ཤེས་རབ་ཀྱི་རིམ་པས།རང་ཡིད་སྟོང་གཟུགས་ལ་དྲག་ཏུ་གཏད། རྟོག་པའི་རིམ་པས་བག་ཙམ་འདྲེས། སྤྱོད་པའི་རིམ་པས་རང་གི་ཡིད་ནི་སྟོང་གཟུགས་ཀྱི་རིན་པོ་ཆེར་ཡང་དག་པར་གྱུར་པར་རིག་ཅིང་དེ་ལས་དགའ་བ་དང་བདེ་བའི་རིམ་པ་འབྱུང་ངོ༌། །འདིར་ཡིད་ཅེས་པ་དྲུག་ཡིད་ཁོ་ན་མིན་ཏེ། ལུས་ངག་ཡིད་གསུམ་ཟེར་པའི་དུས་ཀྱི་ཡིད་དེ་ཡིན་པས། རང་གི་ཤེས་པ་ཞེས་པའི་དོན་ཡིན། དེའི་ནང་ཚན་ན་དྲུག་ཡིད་ཡོད་པའང་མི་འགལ་མོད། གནས་ཚུལ་ལ་ཆོས་ཉིད་ཀྱི་སེམས། འོད་གསལ་སྟོང་གཟུགས་སུ་གདོད་ནས་གྲུབ་པ་ཡིན་ཡང༌། བློའི་འཆར་ཚུལ་ལ་སྟོང་གཟུགས་དང་རིམ་པས་འདྲེས་ཏེ་གཅིག་དུ་གྱུར་པའི་སྣང་བ་འབྱུང་བ་ལྟར་འདིར་ཡང་བཤད་པ་ཡིན། དེ་ཡང་ཤེས་པ་ཙམ་གྱི་ངོ་བོར་རྟོག་པ་ཡིན་གྱི། བསམ་གཏན་གྱི་རིམ་པས་སྐབས་འདིར། ཆོས་ཉིད་ཀྱི་སེམས་དང༌། འཁོར་བའི་སེམས་དབྱེ་བ་ཕྱེད་པ་ནི་མེད་དོ། །དོན་ཚན་གཉིས་པ་བསམ་གཏན་གྱི་ཡན་ལག་གི་བྱེད་ལས་ནི། དེ་འབའ་ཞིག་སོགས་ཏེ། དཔལ་དུས་ཀྱི་འཁོར་ལོའི་རྒྱུད་ཕྱི་མ་ལས་ཀྱང༌། དེ་ལ་གཅིག་ཏུ་བྱེད་པའི་བསམ་གཏན་གྱིས་ཀྱང་ཕྱི་རོལ་གྱི་ནི་དངོས་པོ་རྣམ་པར་སྤོང་བར་བྱེད། ཅེས་
གསུངས། དེ་ལ་བསམ་གཏན་གྱི་རིམ་པ་ནས་བརྩམས་ཏེ། ཏིང་ངེ་འཛིན་གྱི་རིམ་པའི་བར་དུ་ཡོད་པའི་བསམ་གཏན་གྱི་ཡན་ལག་དེ་ཐམས་ཅད་ཀྱི་བྱེད་ལས་ནི། མ་དག་པའི་སྣང་བ་སྟོང་གཟུགས་སུ་རིམ་པས་སྦྱོང་བ་ཡིན་པས། གཟུགས་སེམས་དབྱེར་མེད་པ་དེ་འབའ་ཞིག་ལ་མཉམ་པར་བཞག་པའི་རྣལ་འབྱོར་གྱིས། སྣང་གྲགས་ཀྱི་ཆོས་ཐམས་ཅད་ཀྱི་ངོ་བོ་གདོད་ནས་སྟོངས་པ་ལས། རང་བཞིན་རྣམ་པ་ཐམས་ཅད་པར་ཡོངས་སུ་ཤེས་ཀྱི། དཔེ་དང་གཏན་ཚིགས་དང༌། གཞུང་ལུགས་ཀྱི་བྱེ་བྲག་མང་པོ་བརྗོད་ཀྱང༌། གཟུགས་སེམས་དབྱེར་མེད་བསྒོམ་པ་ལས་གཞན་གྱི་གནས་ལུགས་དེ་ཤེས་པར་འགྱུར་རམ་ཅི་སྟེ་མི་འགྱུར་ཞེས་པའོ། །ཐབས་འདི་དང་བྲལ་ན་མི་རྟོག་པ་ཙམ་བསྒོམས་པས་ཀྱང་མ་ཡིན། རིག་པའི་དཔྱད་སྒོམ་ཙམ་གྱིས་ཀྱང་མ་ཡིན། སྦྱིན་སོགས་ཚོགས་ཙམ་བསགས་པས་ཀྱང་མ་ཡིན་ཏེ། ཚེ་གཅིག་གམ་སྐྱེ་བ་བདུན་ཚུན་ཆད་དུ། ཀུན་རྫོགས་བདེན་མེད་ཙམ་ཡང་རྟོགས་པར་མི་འགྱུར་ན། རྣམ་པ་ཐམས་ཅད་པ་དངོས་སུ་རྟོགས་པ་ལྟ་ཅི་སྨོས། གསུམ་པ་འཕྲོས་དོན་སོར་བསམ་གཉིས་ཀྱི་ཡོན་ཏན་ཕྱིས་འབྱུང་བ་ལ། དོན་དེ་སྤྱིར་བཤད་པ་དང༌། མི་འགྱུར་བ་བྱེ་བྲག་ཏུ་འགྲུབ་ཚུལ་གཉིས་ལས། དང་པོ་ནི། ལམ་དུ་འགྲོ་བ་གཉུག་མའི་ཡིད། །གང་ཞིག་གིས་ནི་བཅིངས་བྱས་ཏེ། །དེ་ཡི་གནས་གསུམ་མ་ལུས་པ། །སྤྲོས་ཏེ་སླར་ཡང་བསྡུས་པ་ཡིན། །ཞེས་པ་སྟེ། གཟུགས་ལ་སོགས་པ་
ཡུལ་རྣམས་ཀྱི་ལམ་དུ་འགྲོ་བ། རྣམ་པར་ཤེས་པའི་ཚོགས་དྲུག་པོ་རྣམས། གཉུག་མའི་ལུས་ཀྱི་ངོ་བོ་ཡིད་ཀྱི་རང་བཞིན་གྱི་རླུང་དང་ལྷན་ཅིག་ཏུ་ལྟོས་མེད་བཞིའམ་མི་གཡོ་བ་གསུམ་མམ། དབེན་པ་གསུམ་མམ། ཉིན་མཚན་གྱི་རྣལ་འབྱོར་གཉིས་སམ། སྣ་རྩེ་གསུམ་གཅིག་ཏུ་བསྡུ་བ་ལྟ་བུའི་རྩོལ་བྲལ་རྣམ་པར་མི་རྟོག་པའི་ཐབས་གང་ཞིག་གིས་བཅིང་པར་བྱས་པ་ལས། ཞེས་པ་སྟེ། བྱེད་པ་བཅིང་བའི་སྦྱོར་བ་འདི་ནི། སོ་སོར་སྡུད་པའམ་བསམ་གཏན་གྱི་ཡན་ལག་གི་ངོ་བོ་ཡིན་ལ། རྣལ་འབྱོར་རྣམ་པ་གཉིས་པོ་དེ་ནི་ལས་དང་པོ་པ་ནས་མཐར་ཐུག་གི་བར་དུ་རྒྱུན་མ་ཆད་པར་ཡོད་པའི་ཕྱིར། སོར་བསམ་གྱི་རིམ་པ་ཁོ་ན་ལ་བརྩི་བར་མི་བྱའོ། །དེ་ལྟ་བུའི་མི་རྟོག་པ་དང་སྟོང་གཟུགས་ལ་དམིགས་པའི་རྣལ་འབྱོར་དེ་ཡིས་ནི། ཡེ་ཤེས་ཀྱི་གཏུམ་མོ་འབར་ཏེ། ལུས་ངག་ཡིད་ཀྱི་གནས་གསུམ་མ་ལུས་པར། ཡས་བབས་ཀྱི་དགའ་བ་བཞི་དང་བཅུ་དྲུག་གི་རིམ་པས་བདེ་བ་སྤྲོས་ཏེ། སླར་ཡང་ནོར་བུ་ནས་མས་བརྟན་གྱི་དགའ་བ་བཞི་དང་བཅུ་དྲུག་གི་རིམ་པས། གཙུག་ཏོར་གྱི་བར་དུ་ཐིག་ལེའི་བགྲོད་པ་བསྡུས་པར་གྱུར་པ་ཡིན་ནོ། །བྱེད་ལས་འདི་རྗེས་མཐུན་པ་སྲོག་རྩོལ་གྱི་རིམ་པའི་སྐབས་ཀྱི། སོར་བསམ་ལ་ཡང་ཡོད་ཅིང༌། དངོས་ཐོག་མར་གྲུབ་པ་ནི་འཛིན་པའི་སྐབས་ཀྱི་སོར་བསམ་ཡིན་ཅིང༌། དྲན་ཏིང་སྐབས་ཀྱི་སོར་བསམ་ལ་བྱེད་ལས་ལྷག་པོ་དང་བཅས་པར་ཡོད་དོ། །ཡང་མི་རྟོག་པ་དང་སྟོང་གཟུགས་ཀྱི་རྣལ་འབྱོར་དེ་ཡིས། ལུས་དང་ངག་དང་ཡིད་ཀྱི་གནས་གསུམ་མ་ལུས་
པར། ཁམས་གསུམ་གྱི་གཟུགས་བརྙན་གྱི་སྟོང་གཟུགས་དང༌། གཞོམ་མེད་ཀྱི་སྒྲ་རྣམ་པ་ཐམས་ཅད་པ་དང༌། ཞུ་བདེ་འགྱུར་མེད་ཀྱི་བདེ་བ་རྣམས། རྣལ་འབྱོར་པའི་བློ་ངོར་གསར་དུ་སྤྲོས་ཏེ། སླར་ཡང་བདེ་སྟོང་ཙམ་དུ་བསྡུ་བའི་སྤྲོ་བསྡུ་ཡང་ཡང་འབྱུང་བ་ཡིན་ནོ། །བྱེད་ལས་འདི་ནི་འཛིན་པའི་རིམ་པ་ལ་སོར་བསམ་གཉིས་ཀྱིས་ཅུང་ཟད་བྱེད་ཅིང༌། ཕྱི་མ་གཉིས་ཀྱི་གནས་སྐབས་ཀྱི་སོར་བསམ་གཉིས་ཀྱིས་རྒྱ་ཆེར་བྱེད་དོ། །གཉིས་པ་ནི། ཅི་ཡི་ཕྱིར་ན་དེ་བཞིན་གཤེགས། །ལྷ་མོ་ཁྲོ་བོའི་ཚོགས་ལ་ཆགས། །དཀྱིལ་འཁོར་འཁོར་ལོ་རྣམ་སྤངས་ཏེ། །ལྷན་ཅིག་སྐྱེས་པའི་དགའ་བར་བསྡད། །ཅེས་པ་སྟེ། འདིར་དཀྱིལ་འཁོར་འཁོར་ལོ་ཞེས་པ་ལ། འཆད་ཚུལ་མི་འདྲ་བ་གསུམ་ཡོད་དེ། འགྲེལ་པ་ལས་བསྐྱེད་རིམ་ལ་འཆད་པ། སྤྱིར་བསྐྱེད་རིམ་གྱི་རྣམ་རྟོག་སྤངས་པ་ནན་ལྟར་ཡིན་མོད། དེ་ནི་རྫོགས་རིམ་ལ་ཞུགས་པའི་དུས་ནས་སྤངས་ཟིན་པས། སྐབས་འདིར་སྦྱར་ཀྱང་ནུས་པ་ཆུང་ངོ༌། །ཡང་ཁ་ཅིག་དཀྱིལ་ནི་སྙིང་པོ་ཞེས་བརྗོད་དེ་སོགས་ཀྱི་དོན་དུ་བསམས་ནས། ཞུ་བདེ་ལ་འཆད་མོད་ཀྱང༌། ཞུ་བདེ་འགག་པའི་དུས་དེ་གནས་སྐབས་འདིར་ཡིན་པས། དོན་ལ་འགལ་བ་མེད་ཀྱང༌། དགྱེས་རྡོར་དུ་དཀྱིལ་འཁོར་འཁོར་ལོར་གསུངས་པ་དེ། ཞུ་བདེ་ཁོ་ན་མ་ཡིན་བདེ་ཆེན་སྤྱི་ལ་གསུངས་པ་ཡིན་པས། ཚིག་དོན་ལ་མི་འགྲིག་གོ །དེས་ན་མ་དག་པའི་ལུས་སེམས་ཀྱི་སྣང་བ་ལ་འཆད་པ་ལྟར་ལེགས་སོ། །དེས་ནས་འདི་སྐད་ཅེས་བྱ་
སྟེ། ཐ་མལ་པའི་ལུས་སེམས་ཀྱི་རང་བཞིན་ཁུ་རྡུལ་རླུང་གསུམ་གྱིས་བསྡུས་པའི་མ་དག་སྣང་བའི་དཀྱིལ་འཁོར་གྱི་འཁོར་ལོ་འདི་སྟོང་གཟུགས་ཕྱག་རྒྱ་ཆེན་པོ་གནས་གྱུར་པའི་ཚུལ་གྱིས་རྣམ་པར་སྤངས་ནས། དེ་ཉིད་མི་འགྱུར་བའི་ཐིག་ལེར་གྱུར་པས། དེ་ཕྱིན་ཆད་རྟེན་ཐིག་ལེ་དང༌། བརྟེན་པ་བདེ་བ་ངོ་བོ་གཅིག་ཅིང༌། འཕོ་འགྱུར་ཉམས་ཆད་གང་ཡང་མེད་པས། རྟག་ཏུ་ལྷན་ཅིག་སྐྱེས་པའི་དགའ་བ་མི་འགྱུར་པ་ལ་བསྡོད་ཅིང་གནས་པར་འགྱུར་རོ། །བཻ་རོས། ལྷན་སྐྱེས་སྐད་ཅིག་ལ་ནི་བདག་གནས་བྱ། །ཞེས་པར་བསྒྱུར་རོ། །དེ་ལྟར་གནས་པའི་རྒྱུ་མཚན་ཅིའི་ཕྱིར་ཞེ་ན། སངས་རྒྱ་ཡབ་ཡུམ་ཕུང་ཁམས་དང༌། །བྱང་ཆུབ་སེམས་དཔའ་དབང་པོ་དང༌། །ལྷ་མོ་གཟུགས་སོགས་ཡུལ་དྲུག་དང༌། །ཁྲོ་བོ་ཁྲོ་མོ་ལས་དབང་ངམ་ལུས་ཀྱི་ཁེག་པ་སྟེ། དེ་ཐམས་ཅད་ཀྱི་རང་བཞིན་དྭངས་མ་གནས་ལུགས་ནི། བདེ་ཆེན་དང་གཟུགས་བརྙན་ཟུང་འཇུག་དེ་ཡིན་ལ། འདིར་དེ་ལ་ཡང་དག་པར་ཆགས་པ་སྟེ། དངོས་སུ་སྦྱོར་ནུས་པ་གང་ཞིག གནས་ཚུལ་ལ་དངོས་སུ་འབྱོར་ན་འཇིག་པ་མི་འཐད་པའི་ཕྱིར་རོ། །གཞུང་གི་དཀྱུས་ལ་དགའ་བར་བསྡད་ཅེས་འབྱུང་བ་ནི། སློབ་དཔོན་རང་ཉིད་རྣལ་འབྱོར་ཅན་མཆོག་ཏུ་ཞལ་གྱིས་བཞེས་པ་སྟེ། ནག་པོ་པ་རང་ཉིད། སེམས་ལྷན་ཅིག་སྐྱེས་པའི་དགའ་བར་མི་འགྱུར་བར་བསྡད་ཅེས་པའོ། །གཉིས་པ་འབྲས་བུའི་གནས་ཐབས་མདོར་བསྟན་པ་ནི། གཉུག་མའི་ཡིད་རྒྱལ་རོ་མཉམ་པར། །ལྷན་སྐྱེས་མི་གཡོར་གང་གིས་བྱས། །
དེ་ནི་དུས་དེར་འགྲུབ་པ་སྟེ། །རྒས་དང་འཆི་བའི་འཇིགས་པ་མེད། །མི་གཡོ་རྣམ་པར་མི་རྟོག་མི་འགྱུར་བ། །འཆར་དང་ནུབ་པ་དང་བྲལ་དེ་སྙིང་པོ། །གང་ལ་ཡིད་དང་ཡིད་བྱུང་ཅང་མི་བྱེད། །དེ་ལྟ་བུ་དེ་མྱ་ངན་འདས་པར་བརྗོད། །གང་གིས་ཨེ་ཝཾ་ཡི་གེ་ཤེས། །མ་ལུས་པ་ཀུན་ཤེས་པ་ཡིན། །ཀྱཻ་དེ་ཆོས་ཀྱི་ཟ་མ་ཏོག །མངའ་བདག་གཉུག་མའི་ཆ་བྱེད་དོ། །ཞེས་པ་སྟེ། གཉུག་མ་སྟེ་གདོད་མའི་ཡིད་ཀྱི་རྒྱལ་པོ། །དེ་བཞིན་གཤེགས་པའི་སྙིང་པོ་བདེ་ཆེན་རྣམ་པ་ཐམས་ཅད་པ་དེ་ལ། ཀུན་རྫོབ་ལས་སྣང་རྣམས་ནུབ་ཅིང༌། ལམ་གྱི་ཡེ་ཤེས་རྣམས་ཀྱང་རོ་མཉམ་པར་ཐིམ་པ་ན། དོན་དམ་ལྷན་ཅིག་སྐྱེས་པའི་ཡེ་ཤེས་དེ། རྐྱེན་གང་གིས་ཀྱང་ཁ་དོག་མི་བསྒྱུར་བས། རྣལ་འབྱོར་པ་གང་གིས་ཐོབ་པར་བྱས་པ་དེའི་ཚེ། སྐྱེས་བུ་མཆོག་དེ་ནི། དུས་དེར་ཕྱག་རྒྱ་ཆེན་པོ་མཆོག་གི་དངོས་གྲུབ་རྫོགས་པའི་སངས་རྒྱས་འགྲུབ་པ་ཞེས་བྱ་སྟེ། དེ་ནས་ནི་སངས་རྒྱས་ཀྱི་སྐུ་དང་ཡེ་ཤེས་དེ་ལ། རྣམ་པ་འགྱུར་བའི་རྒས་པ་དང༌། ངོ་བོ་སྐད་ཅིག་གིས་འཇིགས་པའི་འཆི་བ་སོགས། ལས་ཉོན་སྡུག་བསྔལ་གྱིས་བསྡུས་པའི་འཇིགས་པ་ཅུང་ཟད་ཀྱང་མེད་ཅེས་བྱའོ། །དེ་ཡང་དོན་དམ་པར་སྤངས་ཐོབ་དང༌། བྲི་གང་དང༌། གསལ་མི་གསལ་གྱི་རིམ་པ་གང་ཡང་མེད་དེ། གདོད་ནས་ལྷུན་གྱིས་གྲུབ་པའི་ཆོས་ཉིད་ཡིན་པའི་ཕྱིར་རོ། །མེད་བྱ་བ་ཡང་བདེན་མེད་ཙམ་མ་ཡིན་གྱི་དོན་དམ་ལ་དེ་དག་གཏན་ནས་མེད་པའོ། །འོན་ཀྱང་རྫོགས་པའི་སངས་རྒྱས་མངོན་དུ་བྱེད་ཁ་མའི་རྣལ་
འབྱོར་ཅན་གྱི་བློའི་སྣང་ཚུལ་ལ། རྒྱུན་མཐའི་སྔ་ལོགས་སུ་ལས་སྣང་གཟུང་འཛིན་ཐམས་ཅད་མེད་པར་མཐོང༌། རྒྱུན་མཐའི་སྐད་ཅིག་མ་ལ། གཉུག་མའི་སེམས་དེ་ཉིད་གཟུང་འཛིན་ཐམས་ཅད་ཀྱི་གནས་ལུགས་སུ་མྱོང་བས། སྣང་བ་ཐམས་ཅད་ཡེ་ཤེས་སུ་ཐིམ་ཞེས་ཐ་སྙད་ཐོབ། དེའི་སྐད་ཅིག་གཉིས་པར་ལམ་གྱི་ཡེ་ཤེས་ཀྱི་སྣང་བ་མཐའ་ཡས་པ་དེ་ཡང་གཉུག་མའི་སེམས་བདེ་ཆེན་གྱི་ངོ་བོར་རང་བཞིན་མཉམ་པར་རྟོགས་ཤིང༌། ལམ་གྱི་རྣམ་པ་མཐའ་ཡས་པ་རྣམས་ཀྱང་གཉུག་མའི་རྣམ་པ་མཐའ་ཡས་པ་རྣམས་ལས་གཞན་དུ་མེད་པར་མྱོང་པས་ལམ་རྣམས་ཀྱང་ཆོས་དབྱིངས་སུ་ཐིམ་པ་ཞེས་མིང་ཐོབ་པོ། །དེ་ནས་ནི། གཞི་ལམ་འབྲས་གསུམ་གྱི་སྤྲོས་པ་ཐམས་ཅད་ཐིམ་ཟིན་པས། གཉུག་མའི་སེམས་ཉིད་བདེ་ཆེན་པོ་ཟུང་འཇུག་ཁྱབ་བརྡལ་འབའ་ཞིག་གོ །འོ་ན་རྒྱུན་མཐའི་དུས་སུ་ལམ་དབྱིངས་སུ་མི་ཐིམ་པར། དེའི་སྐད་ཅིག་གཉིས་པ་ཞེས་པ་ཅི་སྙམ་ན། རྒྱུན་མཐའ་ནི་འབྲས་བུ་ལ་མ་སླེབ་པར། ལམ་ཉིད་ཁོ་ན་ཡིན་པས་ལམ་དངོས་ལ་གནས་བཞིན་པ་ལམ་མ་དོར་བའི་སྐབས་ཡིན་པས་ལམ་ཐིམ་པ་མི་ཤེས་ཏེ། གཟིངས་ནང་དུ་གནས་བཞིན་པས་གཟིངས་འགྲོ་བ་མི་ཤེས་པ་བཞིན་ནོ། །དེ་དང་མུ་འབྱོར་བའི་སྐད་ཅིག་མ་གཉིས་པ་རྣམ་གྲོལ་ལམ་གྱི་མིང་ཅན་དེ་ནི། ལམ་ལས་འཕགས་ཏེ་འབྲས་བུར་སླེབ་ཙམ་ཡིན་པས་དེ་ནི་ལམ་ལས་མཆོག་གི་གནས་སྐབས་སུ་སླེབ་པས། ལམ་རང་བཞིན་མེད་པར་རྟོགས་པ་མཐར་ཕྱིན་ནས། ལམ་ཀུན་གཅིག་ཀྱང་མ་ལུས་པ་མདོར་
བཞིན་པའི་སྐབས་ཡིན་པས་སོ། །དེ་ཕྱིན་ཆད་ནས་ཀུན་ཁྱབ་ཀྱི་ཆོས་ཉིད་འབའ་ཞིག་མ་གཏོགས་གང་ཡང་མེད་མོད་ཀྱི། རྣམ་གྲོལ་ལམ་ཚུན་ཆད་ཀྱི་གང་ཟག་སྒྲུབ་པོ་དེ་ལ་ལྟོས་ནས། དེ་ཕན་ཆད་ཁྱད་པར་ལམ་ཞེས་བརྗོད་ཀྱི་དངོས་གནས་ལ་དེ་ཡང་མ་ཡིན་ནོ། །དེ་ནི་འབྲས་བུའི་དོན་ཚན་དང་པོ་འབྲས་བུ་འགྲུབ་ཚུལ་བཤད་པའོ། །ཉམས་པའི་གནས་སྐབས་མེད་པས་མི་གཡོ་བ། གཟུང་འཛིན་གཉིས་སྣང་གི་འཁྲུལ་པ་ཐམས་ཅད་སྤངས་པས་རྣམ་པར་མི་རྟོགས་པ་དང༌། འདོད་ཆགས་ཆགས་བྲལ་ལས་འདས་པའི་བདེ་བ་ཆེན་པོ་མི་འགྱུར་བ་དང༌། རྣམ་པར་འགྱུར་བ་ཅན་གྱི་སྐྱེ་འཇིག་ལྟ་ཅི་སྨོས། ངོ་བོ་འཕོ་བའི་སྐད་ཅིག་གི་སྐྱེ་འཇིག་ཀྱང་མེད་པས། འཆར་བ་སྐྱེ་བ་དང༌། ནུབ་པ་འཇིག་པ་དང་བྲལ་བའོ། །འགྲེལ་པ་ལས། བར་འདིར་ཤིན་ཏུ་མཛེས་པ་ནི་བདེ་བ་ཆེན་པོ་ཉིད་ཀྱི་ཕྱིར་ཅེས་འབྱུང༌། རྩ་བའི་འགྱུར་རྙིང་གཉིས་ཀར་དུ། མཛེས་པ་ཞེས་བྱ་བའི་ཚིག་མ་བྱུང་སྟེ། རྒྱ་དཔེའི་ཁྱད་པར་ཞིག་གོ །རང་བཞིན་གྱིས་འོད་གསལ་བ་རྣམ་འགྱུར་མེད་པའི་ཕྱིར་སྙིང་པོའོ། །གང་ལ་ཞེས་སོགས་ལ་བཻ་རོས། དེས་ནི་ཡིད་ཀྱི་ང་རྒྱལ་ཅི་ཡང་མི་བྱེད་དོ། །ཞེས་ཟེར་ཞིང༌། འགྱུར་གསར་ལས། གང་ལ་སེམས་དང་སེམས་ལས་བྱུང་བ་མེད། ཅེས་འབྱུང༌། འགྲེལ་པ་ལས། སྣང་མཆེད་ཐོབ་གསུམ་དང༌། རང་བཞིན་བརྒྱད་ཅུ་སྤངས་པ་ལ་བཞེད་དོ། །གང་ལྟར་ཡང་མི་འགལ་མོད་ཀྱི། འདིར་ནི་ཡེ་ཤེས་གང་ལ་ཡིད་རྣམ་པར་ཤེས་
པ་དང༌། ཡིད་བྱུང་རྣམ་པར་རྟོག་པའི་བྱ་བ་ཅུང་ཟད་ཀྱང་མི་བྱེད་པ་དེ་ལྟ་བུ་ནི། མྱ་ངན་ལས་འདས་པ་ཆོས་ཀྱི་སྐུ་ཡིན་པར་བརྗོད་དོ། །འདིར་དགག་པའི་སྒོ་ནས་ཆོས་ཀྱི་སྐུའི་མཚན་ཉིད་བསྟན་པས། ཤུགས་ལ་སྒྲུབ་པའི་མཚན་ཉིད་བསྟན་ཏེ། འཆར་ནུབ་བྲལ་བ་དང་མི་གཡོ་བས། རྟག་པ་དང༌། མི་རྟོག་པ་དང༌། ཡིད་ཡིད་བྱུང་བྲལ་བས། སྤྲོས་བྲལ་དང༌། མི་འགྱུར་བས་བདེ་བ་དང༌། སྙིང་པོས་གསལ་བ་རྣམ་པ་ཐམས་ཅད་པ་བསྟན་ནོ། །དེས་ནི་དོན་ཚན་གཉིས་པ་ཆོས་སྐུའི་མཚན་ཉིད་བསྟན་ནོ། །ཨེ་ཝཾ་ཞེས་བྱ་བ་ནི། ལྷའི་དབང་པོས་ཞུས་པ་ལས། ཨེ་ནི་སྟོང་པའི་རང་བཞིན་ཏེ། །ཝཾ་ནི་ཐུགས་རྗེ་ཆེན་པོར་བརྗོད། ཐིག་ལེ་གཉིས་མེད་སྦྱོར་བ་ཡིས། །འདི་ཡིས་ཟུང་འཇུག་དྲན་པར་བྱ། །ཞེས་གསུངས། ཨེ་རྣམ་ཀུན་མཆོག་ལྡན་གྱི་སྟོང་ཉིད་དང༌། ཝ་ཡིག་ཐུགས་རྗེ་ཆེན་པོ་མི་འགྱུར་བའི་བདེ་བ། ཐིག་ལེ་དེ་གཉིས་ཟུང་དུ་འཇུག་པ་སྟེ། ཟུང་འཇུག་དེ་ལ་ཨེ་ཝཾ་གྱི་ཡི་གེ་ཞེས་བྱའོ། །དེ་ཉིད་བདེ་བ་ཆེན་པོ་ལྷན་ཅིག་སྐྱེས་པའི་སྐུ་ཡིན་ཏེ། དེ་ཐོབ་པ་ནི་དེ་ཤེས་པའོ། །རང་ཉིད་ཨེ་ཝཾ་དེའི་ངོ་བོར་གྱུར་ན་ཨེ་ཝཾ་ཤེས་པ་ཡིན་གྱི། རྣམ་གཞག་ཕྱོགས་རེ་འཆད་ཤེས་པ་ཙམ་གྱིས་ནི་མ་ཡིན་ནོ། །དེས་ན་སྐྱེས་བུ་གང་གིས་ཨེ་ཝཾ་གྱི་ཡི་གེ་ཐོབ་པའི་སྒོ་ནས་ཤེས་པ་དེས་ནི། ཤེས་བྱ་མ་ལུས་པ་ཀུན་གྱིས་ཇི་ལྟ་བ་དང་ཇི་སྙེད་པ་མཐའ་དག་ཤེས་པ་ཡིན་ནོ། །དེས་ན་ཡེ་ཤེས་གཅིག་ཉིད་ཡིན་ཡང༌། བདེ་བ་ཆེན་པོའི་སྒོ་ནས་ཇི་ལྟ་བ་དང༌། རྣམ་པ་ཐམས་ཅད་པའི་སྒོ་ནས་ཇི་སྙེད་པ་མཁྱེན་ཞེས་
བྱ་ལ། དེ་ཡང་མཚན་ཉིད་སོ་སོའི་བྱ་བ་ཐ་དད་པ་བྱེད་པ་མ་ཡིན་གྱི། ཡེ་ཤེས་གཅིག་པུས་ཤེས་བྱ་ཐམས་ཅད་མཁྱེན་པ་དེ་ལ་རྣམ་པ་ཐམས་ཅད་པ་ཟེར་ཞིང༌། མཁྱེན་མཁན་དེ་ཁོ་ནས་ཇི་ལྟ་བ་ཡང་མཁྱེན་པ་ལ་བདེ་བ་ཆེན་པོར་བཞག་པས་ན། ཇི་ལྟ་བ་གནས་ལུགས་བདེ་བ་ཆེན་པོ་དེ་ཡི་ངོ་བོར་སོང་བའི་སྒོ་ནས་མཁྱེན་པའི་ཕྱིར་རོ། །དེ་ལྟར་ན་ཤེས་བྱ་ཐམས་ཅད་ཀྱི་ཇི་སྙེད་པ་མཁྱེན་པའི་ཆ་ནས་ཨེ་ཝཾ་གྱི་ཡེ་ཤེས་དེ་ཉིད་སྤྲུལ་པའི་སྐུར་བཞག་གོ །ཀྱཻ་ཨེ་ཝཾ་གྱི་ཡི་གེ་དེ་ནི། སངས་རྒྱས་ཀྱི་ཆོས་ལུང་དང་རྟོག་པས་བསྡུས་པ་ཐམས་ཅད་ཀྱི་ཟ་མ་ཏོག་ཡིན་ཏེ། ཆོས་ཐམས་ཅད་དེར་ཆུད་པ་དང༌། དེ་ལས་འབྱུང་བའི་ཕྱིར་རོ། །ལུང་གི་ཆོས་འབྱུང་བའི་ཕྱིར་གསུང་རྡོ་རྗེ་ཡིན་ལ། དེ་ཉིད་ནི་ཡེ་ཤེས་ཀྱི་དཔའ་བོ་མཁའ་འགྲོ་སོགས་དག་པའི་འཁོར་རྣམས་ཀྱི་གཙོ་བོ་མངའ་བདག་ཆོས་གསུང་བ་པོ་སྟེ། མཚན་དཔེ་དང༌། ཡབ་ཡུམ་དང༌། འཁོར་ཚོགས་དང༌། གཞལ་མེད་ཁང་དང༌། ཞིང་ཁམས་དང༌། མཆོད་པའི་བཀོད་པ་དང༌། བ་སྤུའི་ཁུང་བུ་གཅིག་ནས་ཀྱང༌། དུས་གསུམ་གྱི་ཤེས་བྱ་མཐའ་དག་གི་སྣང་བརྙན་འཆར་བ་སོགས་རོལ་པ་མཐའ་ཡས་པའི་ཆ་བྱད་ཅན་ཡིན་ལ། ཆ་བྱད་དེ་ཐམས་ཅད་ཀྱང་རྐྱེན་ལས་བྱུང་བའི་གསར་པ་མ་ཡིན་གྱི། གདོད་ནས་ལྷུན་གྱིས་གྲུབ་པ་ཡིན་པའི་ཕྱིར། གཉུག་མའི་ཆ་བྱད་ཅེས་བྱའོ། །ཚིག་རྐང་ཐ་མ་གཉིས་ཀྱིས་ནི་ལོངས་སྐུ་བསྟན་ཏེ། དེ་ལྟར་ན་དོན་ཚན་གསུམ་གྱི་ཐ་མ་སྐུ་ལྷག་མ་གསུམ་བཤད་པའོ། །
གསུམ་པ་མངོན་པར་འགྲུབ་བྱེད་ཀྱི་ལམ་རིམ་བསྟན་པ་ལ། རྗེས་དྲན་གྱི་དོན་བཤད་པ། ཏིང་ངེ་འཛིན་གྱི་དོན་བསྟན་པ། འཕྲོས་དོན་ལྷན་ཅིག་སྐྱེས་པ་སྒོམ་པར་གདམས་པའོ། །དང་པོ་ནི། གལ་ཏེ་རླུང་ནི་འགྲོ་བའི་སྒོར། །སྒོ་ལྕགས་དམ་པོར་འཇུག་བྱེད་ཅིང༌། །གལ་ཏེ་མུན་པ་དྲག་པོ་དེར། །ཡིད་ཀྱི་མར་མེ་གཏོང་བར་བྱེད། །རྒྱལ་བའི་རིན་པོ་ཆེ་སྟེང་དུ། །ནམ་མཁའ་གལ་ཏེ་འཇུག་པ་ན། །སྲིད་པར་རོལ་ཞིང་མྱང་འདས་ཀྱང༌། །འགྲུབ་པ་རུ་ནི་ནག་པོ་སྨྲ། །ཞེས་པ་སྟེ། གལ་ཏེ་རླུང་འགྲོ་བའི་སྒོ། དབུ་མའི་སྟེང་འོག་གི་སྒོ་དང༌། བུ་ག་དགུ་དང༌། བ་སྤུའི་བུ་ག་ལ་སོགས་པ་རྣམས་སུ་རླུང་དགག་པའི་སྒོ་ལྕགས་དམ་པོ་ཞུ་བདེ་འགྱུར་མེད་འཇུག་པར་བྱེད་ཅིང་སྟེ། ཞུ་བདེ་འགྱུར་མེད་གྲུབ་པ་ན། རྗེས་ཆགས་ཀྱི་མེ་སྦར་བས་ཀྱང༌། བ་སྤུའི་ཁུང་བུ་ཕྱིན་ཆད་ཀྱི་རྩ་རྣམས་དང༌། དབང་པོ་རྣམས་ཀྱི་དྭངས་མ་དཀར་ཆ་རྣམས་ཞུ་བ་འཁོར་ལོའི་རིམ་པས་འོངས་ཏེ། ནོར་བུར་ཕྱིན་པ་རྩོལ་མེད་དུ་བཅིངས་པས། འབད་རྩོལ་མེད་པར་གཙུག་ཏོར་དུ་སོང་ནས། ལུས་ཀྱི་ཆ་ཐམས་ཅད་དུ་ཁྱབ་ཅིང་བརྟན་པ་ན། དབང་པོའི་སྒོ་དང་བ་སྤུ་སོགས་ཕྱིར་འགྲོ་བའི་སྒོ་ཐམས་ཅད་དཀར་ཆས་བཀག་པས། དམར་ཆ་ཕྱིར་འགྲོས་མེད་དེ། ནང་དུ་འདུས་ཐུར་དུ་ལོག་ནས། ནོར་བུའི་ནང་ཡན་ཆད་དུ་གནས་ཏེ། ཕྱག་རྒྱ་གསུམ་ལས་ཞུ་བདེ་འགྱུར་མེད་དེ་ལྟར་སྒྲུབ་པ་དང༌། གལ་ཏེ་ཀུན་དར་མ་དང་དུང་ཅན་མའི་ནང་གི་མུན་པ་དང་དུས་མེའི་སྡུག་བསྔལ་དྲག་པོ་སྐྱེད་བྱེད་དེ་དག་གནས་པའི་སར། ཡིད་དེ་སེམས་
ཀྱི་སྣང་བ་ཙམ་གྱི་སྟོང་གཟུགས་ཀྱི་གཏུམ་མོའི་མར་མེ་གཏོང་བར་བྱེད་དེ། དེ་ལས་རྒྱལ་བའི་རིན་པོ་ཆེ་ཁམས་གསུམ་གྱི་གཟུགས་བརྙན་དང་བཅས་ཏེ་སྟེང་དུ་གནས་པའི་ནམ་མཁའི་ཕྱོགས་ཞེས། སྟོང་གཟུགས་ཀྱི་གཏུམ་མོ་སྟེང་དུ་འབར་བས། དང་པོར་ཐིག་ལེ་བཞུ། སླར་ཐིག་ལེ་ལྡོག་པས་རང་གི་ལུས་ནང་དང༌། ཕྱི་རོལ་གྱི་ནམ་མཁའ་ལ། འདོད་པའི་ལྷ་དང་དོན་དམ་སྲིད་གསུམ་འཇུག་ཅིང་འཆར་བ་ན། སྲིད་པ་ཕྱག་རྒྱའི་རོལ་པ་འདོད་ཆགས་ཆེན་པོའི་སྤྱོད་པ་ལ་གནས་བཞིན་དུ། ཟག་མེད་མྱ་ངན་ལས་འདས་པ་ཐོབ་པའི་རྒྱུར་ཡང་འགྱུར་རོ། །ཞེས་འཆད་པ་ལྟར་ཡང་རུང་ལ། བདག་གི་རྣམ་པར་རྟོག་པ་ནི། འབྲས་བུའི་དུས་སུ་སྟོང་གཟུགས་རྣམ་པ་ཐམས་ཅད་པས། སྐུ་སྣ་ཚོགས་བསྟན་པས་སྲིད་པར་རོལ་ཞིང༌། བདེ་བ་འགྱུར་བ་མེད་པས་མྱ་ངན་ལས་འདས་པའི་མཆོག་ཏུ་འགྱུར་བ་བཞིན། །རྗེས་དྲན་གྱི་སྐབས་འདིར་ཡང༌། རྗེས་མཐུན་ཙམ་གྲུབ་པའི་དོན་དུ་སེམས་སོ། །དེ་ལྟར་ན་བདེ་བ་དང་གཟུགས་བརྙན་ལས། མི་གནས་པའི་མྱ་ངན་ལས་འདས་པ་འགྲུབ་པོ་ཞེས། རང་གི་ཉམས་མྱོང་ལ་བརྟེན་ནས། ནག་པོ་སྤྱོད་པ་བ་ང་ཉིད་སྨྲའོ། །དེ་ལྟར་ཡང་དཔལ་དུས་ཀྱི་འཁོར་ལོ་ལས། དབུ་མར་སྲོག་ནི་རབ་གཞུག་ཉི་མ་དང་བཅས་རི་བོང་ཅན་གྱི་སྒྲོད་པ་གཡས་དང་གཡོན་ལ་བཅིངས། །ཕྱག་རྒྱ་རབ་ཏུ་འགྲོགས་ལ་སེམས་དང་མཆོག་གི་བདེ་བ་ལ་གནས་རྡོ་རྗེ་ཡང་དག་བླང་བ་ཡང༌། །པདྨར་རྡོ་རྗེའི་སྒྲའམ་རང་གི་ལག་གི་ཆུ་སྐྱེས་དག་
གིས་གསོར་བ་བདེ་པའི་སླད་དུ་སྟེ། །ས་བོན་གཏོང་བ་མིན་པའི་བདེ་བ་དེ་ནི་འཆི་བའི་འཇིགས་འཕྲོག་དཔལ་ལྡན་བླ་མའི་ཞལ། །ཞེས་གསུངས་སོ། །གཉིས་པ་ཏིང་ངེ་འཛིན་གྱི་དོན་བསྟན་པ་ནི། ཆོས་གྱི་ཡི་གེ་དེ་དག་ལ། མི་གཡོར་གྱིས་ལ་ཡིད་སྦྱོར་ཞིག །དེ་མ་ཐག་ཏུ་རླུང་འཆིང་ཞིང༌། །ཡུལ་ལའང་རེ་བ་མེད་པར་འགྱུར། །གང་དུ་མཆོག་དང་ཁྱད་དགའ་གཉིས་མཐོང་བ། །དབུས་དེར་ཆོས་ཀྱི་ཡི་གེ་མཚོན་པར་གྱིས། །འདི་ལྟའི་མན་ངག་གལ་ཏེ་བསྒྲུབ་པ་ན། །དེ་ཚེ་ཁྱིམ་བདག་མོ་རླུང་མི་གཡོ་འཆིང༌། །རི་བོ་མཆོག་རྩེ་མཐོ་བའི་ཐང༌། །གང་དུ་རི་ཁྲོད་གནས་བཅས་པས། །སེང་གེ་ཡིས་ཀྱང་མ་མཆོད་ན། །གླང་ཆེན་རེ་བ་ལྟ་ཐག་རིང༌། །ཞེས་པ་སྟེ། འདི་ལ་དོན་ཚན་གསུམ་མོ། །དང་པོ་ཏིང་ངེ་འཛིན་གྱི་རིམ་པའི་ངོ་བོ་ནི། ཝཾ་ཡིག་ཐིག་ལེ་ཞུ་བ་ཨེ་ཡིག་སྟོང་གཟུགས་ཀྱི་ནོར་བུར་བཅིངས་པའི། །ཨེ་ཝཾ་ཆོས་ཀྱི་ཡི་གེ་དེ་དག་ལ། ཡིད་མི་གཡོ་བར་སེམས་རྩེ་གཅིག་པར་གྱིས་ལ། བདེ་བ་ཆེན་པོའི་ཡིད་སྟོང་གཟུགས་ལ་སྦྱོར་བར་གྱིས་ཤིག དེ་མ་ཐག་ཏུ་ལས་རླུང་ཉི་ཁྲི་ཆིག་སྟོང་དྲུག་བརྒྱ་ལས། གཅིག་ནི་ངེས་པར་འཆིང་ཞིང་འགག་པར་འགྱུར་ཏེ། དེའི་ཚེ་ཁམས་དཀར་པོའི་ཆ་ཤས་གཅིག་ནོར་བུར་བཅིངས་པས་གཙུག་ཏོར་དུ་ལོག་ཅིང་ཐིམ། དེ་རྗེས་དམར་ཆ་གཅིག་རང་ཤུགས་ཀྱི་གཙུག་ཏོར་དུ་འཆིང་ནས། མར་ལོག་སྟེ་ནོར་བུར་ཐིམ་པས་དཀར་དམར་རླུང་གསུམ་གྱི་ཚོགས་པ། རྣམ་པ་ཐམས་ཅད་པའི་སྟོང་པར་གྱུར་ནས་ཡེ་ཤེས་ཀྱི་སྣང་བས་ཀུན་ཏུ་ཁྱབ་པས་ན། གཟུགས་སོགས་ཐ་མལ་གྱི་
ཡུལ་རྣམས་ལ་རེ་བ་སྟེ་ཆགས་པ་སྤངས་ཏེ་མེད་པར་ཡང་འགྱུར་རོ། །དེ་ཡང་དམར་པོ་ཐིམ་པས་ནི་ཡུལ་དང༌། དཀར་པོ་ཐིམ་པས་ནི་དབང་པོ་དང༌། རླུང་ཐིམ་པས་ནི་རྣམ་པར་ཤེས་པ་ཡིད་བྱེད་དང་བཅས་པ་མི་འགྱུར་བའི་ཐིག་ལེ་དང་བདེ་བ་ཟུང་དུ་འཇུག་པའི་ངོ་བོར་གནས་གྱུར་བ་ཡིན་ནོ། །འདིར་དེ་དག་ལ་ཞེས་འབྱུང་བ་ནི། མང་པོའི་དོན་ལ་གཉིས་ཚིག་སྟེ། དག་ཅེས་པ་ཆོས་ཀྱི་ཡི་གེ་དེ་ཡང་ཡང་བསྒོམ་པས། སྔ་ཕྱི་རྣམ་གྲངས་མང་པོ་སྟེ། ལན་གཅིག་ཁོ་ན་མ་ཡིན་པའི་དོན་ནོ། །གཉིས་པ་དུ་མཚམས་ནི། གང་དུ་ཞེས་པའི་གང་ནི་སྤྱི་སྒྲ་ཡིན་ཡང༌། འདིར་ཚིག་གྲོགས་ཀྱི་དབང་གིས། གཙུག་ཏོར་གྱི་ཐིག་ལེ་དབུ་མའི་ལམ་ནས་བརྒྱུད་དེ་འོངས་པ་དེ། གང་ནོར་བུའི་རྩེ་མོའི་གནས་སུ་འོངས་པའི་དུས་སུ་ཞེས་པའོ། །དེ་ཡང་དགའ་བ་དང༌། རྣམ་པ་སྣ་ཚོགས་པའི་སྐད་ཅིག་མ་སྔོན་དུ་འདས། མཆོག་དགའ་རྣམ་པར་སྨིན་པའི་སྐད་ཅིག་མ་ཡང་འདས་མོད་ཀྱི། གཞན་གྱིས་བར་མ་ཆོད་པའི་འདས་མ་ཐག་པའི་ཕྱིར་མཐོང་བ་ཞེས་བྱ། འདིར་ཁྱད་དགའ་ནི་མས་བརྟན་ཡིན་ཏེ། རྣམ་ཉེད་ཁྱད་དགའ་དང༌། འདིའི་བར་དུ་ཡང་དུས་གཞན་གྱི་བར་མཆོད་པའི་ཕྱིར་ཁྱད་དགའ་མཐོང་ཞེས་བྱ་སྟེ། ལྷན་སྐྱེས་སྐད་ཅིག་མ་གཅིག་གིས་སྔ་ཕྱི་གཉིས་ཅར་ལ་ལྟ་བ་ཡིན་ཡང༌། སྐད་ཅིག་ཐོག་མཐའ་གཉིས་ཀྱི་ལྟ་བའི་ཕྱིར་ཡང༌། དགའ་བ་དང་ཁྱད་དགའ་གཉིས་མཐོང་བ་ཞེས་སྨོས་ཏེ། དཔེར་ན་ལག་སྡང་གི་འགྲོ་བ་བཞིན་ནོ། །ཞེས་ཟེར་རོ། །
དེས་ན་མཆོག་དགའ་དང་ཁྱད་དགའ་གཉིས་ཀྱི་བར་རམ་དབུས་དེར། །ཨེ་ཡིག་གིས་ཝཾ་ཡིག་བཅིངས་པའི་ཆོས་ཀྱི་ཡི་གེ་མཚན་བྲལ་ལྷན་ཅིག་སྐྱེས་པ་ཞུ་བདེ་དེས་རྣམ་པ་ཀུན་ལྡན་གྱི་གཟུགས་ལ་རྩེ་གཅིག་ཏུ་དམིགས་པའི་དོན་གྱིས་མཚོན་པར་གྱིས་ཤིག །གལ་ཏེ་འདི་ལྟ་བུའི་མན་ངག་གིས་བསྒྲུབས་པ་ན། དེའི་ཚེ་ཁྱིམ་ཨ་ཝ་དྷཱུ་ཏཱིའི་བདག་མོ་ཡེ་ཤེས་ཀྱི་རླུང་མི་གཡོ་བར་གནས་པས་ཐ་མལ་གྱི་རླུང་དབྱིངས་སུ་འཆིང་བར་འགྱུར་རོ། །འདི་ནི་མི་འགྱུར་བའི་ཐིག་ལེ་འཕྲལ་དུ་འགྲུབ་བྱེད་ཀྱི་རྒྱུ། ཞུ་བདེ་འགྱུར་མེད་ཁྱད་པར་ཅན་སྒོམ་པའི་དུས་མཚམས་བསྟན་པ་ཡིན་ལ། ལྷན་སྐྱེས་དེས་མཆོག་ཁྱད་གཉིས་མཐོང་བའི་གོ་དོན་དངོས་ནི། བྱང་ཆུབ་ཀྱི་སེམས་ནོར་བུར་དྲག་ཏུ་བཅིངས་པའི་སྐབས་དེར། ཐིག་ལེ་དེ་ལ་རྗེས་ཆགས་ཀྱི་མཐུས། འབར་ཞིང་གཡོ་བའི་ཆ་ཅིག་ཀྱང་ཡོད། དྲག་ཏུ་བཅིངས་པའི་སྟོབས་ཀྱིས། ཡར་ཟློག་ཚད་པའི་ཆ་ཅིག་ཀྱང་ཡོད་དེ། ཉི་མའི་རླུང་འགྲོས་རང་འགྲོས་གཉིས་ཐུག་པ་དང༌། གྱད་ཀྱིས་སྟག་མོ་བཟུང་བའི་དཔེ་དང་སྦྱར་རོ། །དེ་ཡང་འབར་གཡོའི་ཆ་ཡོད་པས། རྩ་གནས་ན་གནས་པའི་དྭངས་མ་གཞན་རྣམས་ཀྱང་ཞུ་ཚད་ཚད་པ། ཞུ་བ་ལ་ཕྱོགས་རུང་བ་ཡོད་པས། མཆོག་དགའ་ཡོད་ལ་ཁད་ཀྱང་ཡོད་པ་ལྟར་སྣང་ལ། བཅིངས་པའི་ནུས་པས་ཐིག་ལེ་དེ་རྣམས་ཀྱང༌། ཟློག་ཚད་ཚད་པ་རང་གནས་སུ་ཐིམ་རུང་དུ་ཡོད་པས། ཁྱད་དགའ་འཆར་ཚད་པ་ལྟར་སྣང་བའོ། །འདི་མ་གོ་ན། མཆོག་གི་མཐའ་དང་དགའ་བྲལ་དབུས། །
ཞེས་འདོན་ཞིང༌། བཤད་པ་ཡལ་ཡུལ་འདྲ་བྱེ་པ་རྣམས། འདི་ང་ལ་བླ་མས་ཀྱང་མ་བཤད། ང་རང་གིས་ཀྱང་མ་གོ་ཟེར་བའི་དཔེ་དང་འདྲ་ལ། འདི་གོ་ན་མཻ་ཏྲི་པས་ཀྱང་གཉིས་ཤོར་གཉིས་མཉམ་ཡང་སྐྱོད་མེད་དུ་སྒྲུབ་ཐུབ་པ་ཡོད་དོ། །གསུམ་པ་མཐར་ཐུག་པའི་གནས་སྐབས་ནི། རི་བོ་མཆོག་གི་རྩེ་དབུ་མའི་ཡས་སྣ་གཙུག་ཏོར་གྱི་འཁོར་ལོ་དེ་ཡེ་ཤེས་ཀྱི་སྣང་བ་དཔག་ཏུ་མེད་པར་རོལ་ཞིང་རྩེ་བའི་གནས་ཡིན་པའི་ཕྱིར། ཐང་ཆེན་པོའམ་མཆོག་གོ །གང་གནས་དེ་ལྟ་བུར་མི་ཤིགས་པའི་ཧཾ་ཡིག་སོགས། བྱང་ཆུབ་ཀྱི་སེམས་སུམ་བཅུ་རྩ་གཉིས་ཀྱི་རི་ཁྲོད་པ་དག་གནས་པར་བྱས་པའོ། །དེ་ཡང་རི་རྩེའི་ས་བདེ་མོ་ལ་རི་ཁྲོད་པ་རི་དྭགས་རྔོན་པ་དག་སྡོད་པའི་དཔེ་ཚུལ་གྱིས་བརྡ་ཐབས་མཛད་པའང་ཡིན་ལ། ཡང་རི་ཁྲོད་པ་ཞེས་པ་ཧེ་རུ་ཀ་དཔའ་བོའི་མཚན་གྱི་རྣམ་གྲངས་སུ་མངོན་བརྗོད་སྣ་ཚོགས་གསལ་བ་ལས་བཤད་པ་ལྟར་ཡང་ཡིན་པས། ཧཾ་ཡིག་མི་ཤིགས་པའི་ཐིག་ལེ་དཔལ་ཧེ་རུ་ཀའི་ངོ་བོ་དེ་གནས་པ་ལ་ཡང་བྱ་བས། སྦྱར་བའི་རྒྱན་ལྟ་བུར་ཡང་རུང་ངོ༌། །སེང་གེ་ནི་གདོང་ལྔ་པ་ཞེས་བྱ་སྟེ། གདོང་དང༌། སྦར་ཁྱིམ་བཞི་སྟེ་ལྔ་ཀས་སྲོག་ཆགས་རེ་རེ་དུས་མཉམ་དུ་གསོད་ནུས་པས། གདོང་ངམ་ཁའི་བྱ་བ་བྱེད་པ་ལྔ་ཡོད་པའི་ཕྱིར་རོ། །དེ་དང་མཚུངས་པར་འབྱུང་བ་ལྔའི་དཀྱིལ་འཁོར་ཅན་གྱི་ལས་རླུང་ནི། སེང་གེའི་བརྡས་བསྟན་ཏོ། །གླང་ཆེན་ནི་ཕྱུགས་ཏེ། ཤིན་ཏུ་བླུན་པའི་གཏི་མུག་བསྐྱེད་པའི་ཕྱིར་ཉི་ཟླ་རོ་རྐྱང་གི་བྱེད་པ་ཅན་གྱི་རྩ་རླུང་ཐིག་ལེར་རྣམས་སོ། །
དེ་ཡང་འགའ་ཞིག་ས་བོན་གྱི་ངོ་བོ་དང༌། འགའ་ཞིག་མངོན་འགྱུར་བ་དང༌། འགའ་ཞིག་རྐྱེན་གྱི་ནུས་པའི་ངོ་བོར་གནས་པ་ལས། ཁམས་གསུམ་སྲིད་པ་མཐའ་དག་གི་ཆོས་རང་རྒྱུད་ལ་ཡོད་པ་རྣམས་ལ་སྔར་རོ་རྐྱང་གི་དབང་བྱས་པའི་ཆ་ཤས་རེ་ཐམས་ཅད་ལ་ཡོད་ཅིང༌། ཁམས་ལྔའི་དྲི་མས་བསྒྲིབས་པ་ལས། འདིར་རོ་རྐྱང་ཁམས་ལྔའི་ཆོས་རྣམས་གཙུག་ཏོར་ཏུ་ཐིག་ལེ་བཅིངས་པའི་ནུས་པས། རང་སངས་ལ་སོང་ནས་དབུ་མ་འབའ་ཞིག་གིས་དབང་བྱེད་པ་དང༌། དྲི་བྲལ་ཡེ་ཤེས་ཀྱི་ཁམས་ཁོ་ནར་འགྱུར་རོ། །དེས་ན་རོ་རྐྱང་དང་ཁམས་ལྔ་པོ་དེ་གཙུག་ཏོར་དུ་དྲངས་པའི་རྗེས་ལ། བཅིངས་ཀྱང་འཆིང་མ་ནུས་པར་གཞན་དུ་སོང་བའམ། གནས་དེར་རྒྱས་པར་གྱུར་ན། གནས་དེ་ནས་མཆོངས་ཏེ་ཕར་སོང་བ་དང་འདྲ་ཡང༌། དེ་རྣམས་གནས་དེར་སླེབས་ནས། ཐིམ་ཞིང་གནས་གྱུར་པ་ནི། གནས་དེ་ནས་མཆོངས་མ་ནུས་པར་ལུས་པའམ། མཆོངས་ཀྱང་ཕ་རོལ་ཏུ་མ་སླེབས་པར་ལྷུང་སྟེ་ཤི་བ་དང་འདྲ་བར་དགོངས་ན། མི་ཤིགས་པའི་རི་ཁྲོད་པ་གནས་པའི་ཐང་དེར། ཁམས་ལྔའི་སེང་གེས་ཀྱང་མཆོངས་མ་ཐུབ་ན། རོ་རྐྱང་གི་སྟོབས་གླང་ཆེན་གྱི་རེ་བ་ལྟ་ཡང་ཐག་རིང་སྟེ། རེ་ཐག་ཆད་དོ་ཞེས་པའོ། །དེ་ཡང་ཁམས་ལྔ་ཕྲ་ལ། རོ་རྐྱང་རགས་པས། གནས་གྱུར་ཞིང་སྤོང་པ་ལ་དཀའ་མི་དཀའི་ཁྱད་པར་ཡོད་པ་ལྟར་སྣང་བས། ཕྲ་བ་ཡང་གནས་གྱུར་ན་རགས་པ་ལྟ་ཅི་སྨོས། ཞེས་པའི་དོན་ནོ། །དེས་ན་ཏིང་ངེ་འཛིན་གྱི་མཐར་ཐུག་ཏུ། རྩ་རླུང་ཐིག་ལེའི་བགྲོད་པ་ཐམས་ཅད་གཙུག་ཏོར་དུ་
ཐིམ་ནས། ལུས་ངག་ཡིད་གསུམ་རྡོ་རྗེའི་རང་བཞིན་གཉིས་སུ་མེད་པའི་ཡེ་ཤེས་ཀྱི་སྐུ་འགྲུབ་པའོ། །གསུམ་པ་འཕྲོས་དོན་ལྷན་ཅིག་སྐྱེས་པ་སྒོམ་པར་གདམས་པ་ནི། འདི་སྟེ་རི་མཆོག་ཏུ་ངས་བརྗོད། དེ་ཉིད་བདེ་བ་ཆེན་པོའི་གནས། བདེ་ཆེན་མ་ཐོབ་བར་དུ་འདིར། །ཀྭ་ཡེ་ལྷན་ཅིག་སྐྱེས་དགའ་སྒྲུབས། ཞེས་པ་སྟེ། གཉིས་སུ་མེད་པའི་སྐུ་ཟུང་འཇུག་གི་ཡེ་ཤེས་འདི་ཉིད་དེ། ནམ་དུ་ཡང་མི་འཇིག་ཅིང་མི་གཡོ་ལ། རྣམ་པར་རྟོག་པ་དང་ཡང་བྲལ་བའི་ཕྱིར། རི་བོ་མཆོག་དང་འདྲ་བ་ཉིད་དུ་ངས་བརྗོད་དོ། །མདོ་ལས་ཀྱང༌། བརྟན་རྣམས་རི་བོའི་སྤོ་དག་ལས། ས་སྟེང་བྱིས་པ་རྣམས་ལ་བལྟ། །ཞེས་དང༌། མདོ་སྡེ་རྒྱན་ལས་ཀྱང༌། བྱང་ཆུབ་སེམས་དཔའ་དེ་ནི་དེར་བཞུགས་ཏེ། །རི་དབང་མཐོ་སྟེང་བཞུགས་ཤིང་འགྲོ་ལ་གཟིགས། །ཞི་ལ་མངོན་དགའི་འགྲོ་ལ་ཐུགས་རྗེ་ན། །སྲིད་ལ་མངོན་དགའི་སྐྱེ་བོ་གཞན་ཅི་སྨོས། །ཞེས་གསུངས་པ་བཞིན། རང་ཉིད་བརྟན་ས་ཟིན་ནས་འབད་རྩོལ་དང་དཀའ་བ་མེད་པར་གཞན་དོན་མཛད་པའོ། །དེ་ལྟར་ན་ཟུང་འཇུག་འདི་ཉིད། བདེ་བ་ཆེན་པོའི་གནས་འཕོ་འགྱུར་མེད་པ་དེ་ཡིན་པས། བདེ་ཆེན་མ་ཐོབ་བར་དུ་ལམ་འདིར་ཞུགས་ནས་ལྷན་ཅིག་སྐྱེས་པ་འབད་པས་སྒྲུབས་པར་གྱིས་ཤིག ཀྭ་ཡེ་ཞེས་སོ། །དེ་འདྲའི་བདེ་བ་ཆེན་པོའི་གནས་དེ་ཡང་ཅི་ཞེ་ན། གསུངས་པ། འགྲོ་ཀུན་ལུས་ངག་ཡིད་བསྡུས་ནས། །ཀྭ་ཡེ་དེར་ནི་རྣམ་འཕྲོ་དེ། །དེ་ཉིད་གཅིག་པུ་ཉམས་རྣམས་ཀྱི། །བདེ་ཆེན་རྗེ་བོ་ཉིད་ཡིན་ནོ། །འགྲོ་བ་ནི་ཕུང་པོ་
ཁམས་སྐྱེ་མཆེད་ལ་སོགས་པ་སྟེ། འཁོར་བའི་ཆོས་འདི་རྣམས་ཀུན་གྱི་རང་བཞིན་ནི། སྣང་སྟོང་རྣམ་པ་ཐམས་ཅད་པའི་ལུས་དང༌། གྲག་སྟོང་བརྗོད་བྲལ་གཞོམ་མེད་སྒྲ་སྐད་ཐམས་ཅད་པའི་ངག་དང༌། བདེ་སྟོང་ཐམས་ཅད་རིག་ཅིང་དམིགས་པ་མེད་པའི་སྙིང་རྗེའི་ཡིད་དེ། སྐུ་གསུང་ཐུགས་རྡོ་རྗེ་དེ་ཡང་བདེ་བ་ཆེན་པོའི་ངོ་བོར་གཅིག་ཏུ་བསྡུས་ནས། ཡང་དེར་དག་པའི་སྣང་བ་རབ་འབྱམས་འཁོར་འདས་ཐམས་ཅད་ཀྱི་རྣམ་པར་འཕྲོ་བར་བྱེད་དེ། ཇི་སྐད་དུ། འཁོར་ལོ་སྡོམ་པ་ལས། ཧེ་རུ་ཀ་དཔལ་རྒྱལ་ཆེན་པོ། །འདོད་པ་ཀུན་གྱི་དབང་ཕྱུག་གཙོ། །ཀུན་ཏུ་ཕྱག་དང་ཞབས་ལྡན་ཞིང༌། །ཀུན་ཏུ་སྤྱན་དང་དབུ་དང་ཞལ། །ཀུན་ཏུ་སྙན་ལྡན་འཇིག་རྟེན་ན། །ཐམས་ཅད་གཡོགས་པས་རྣམ་པར་བཞུགས། །ཞེས་གསུངས་པའི་དོན་རྗེས་མཐུན་པ་གྲུབ་པ་དང༌། དགྱེས་རྡོར་ལས། མཐོ་རིས་མི་ཡུལ་ས་འོག་རྣམས། །སྐད་ཅིག་གིས་ནི་གཟུགས་གཅིག་འགྱུར། །ཞེས་སོ། །བདེ་བ་ཆེན་པོ་དེ་ནི་ཆོས་ཐམས་ཅད་ཀྱི་རྗེ་བོ་སྟེ། གཙོ་བོ་དང༌། རྒྱལ་པོ་དང༌། སྲོག་དང༌། དྭངས་མ་དང༌། ཆོས་ཉིད་ཡིན་ཅིང༌། རང་བཞིན་དེ་ཉིད་གཅིག་པུ་དེ་ཤེས་བྱ་ལ་སྲིད་ཚད་ཀྱི་ཉམས་འགྱུར་སྣ་ཚོགས་རྣམས་རོལ་ཞིང་སྣང་བར་བྱེད་དོ། །དེ་ལྟར་ཡང༌། རྣལ་འབྱོར་མ་ཀུན་སྤྱོད་ལས། འགྲོ་བ་འདི་དག་སངས་རྒྱས་ལྔ་དག་ཉིད། །གར་མཁན་དང་ནི་རི་མོ་བཟང་ལྟར་སྣང༌། །གང་ཡང་དྲུག་པའི་སངས་རྒྱས་ཞེས་བྱ་བ། །གཅིག་པུ་ཉམས་ནི་དུ་མས་གར་མཛད་དོ། །ཞེས་གསུངས་པའི་དོན་ཉིད་དོ། །མི་སློབ་པའི་ཟུང་འཇུག་ནི་འབྲས་བུ་
དངོས་ཡིན་ལ། སློབ་པའི་ཟུང་འཇུག་ཀྱང་དེ་དང་རྣམ་པ་འདྲ་བའི་ཕྱིར། ཚིག་འདི་དག་གིས་འབྲས་བུའི་རྣམ་གཞག་ཀྱང་བསྟན་པ་ཡིན་ལ། ལར་ནི་ཚིགས་བཅད་སྔ་མའི་འདི་སྟེ་རི་མཆོག་སོགས་ཀྱི་འཕྲོས་དོན་ནོ། །ཡང་གསུངས་པ། སྔགས་དང་རྒྱུད་དག་གཅིག་ཀྱང་མི་བྱ་སྟེ། །གཉུག་མའི་ཁྱིམ་བདག་མོ་བླང་རོལ་པར་བྱེད། །ཇི་སྲིད་རང་ཁྱིམ་ཁྱིམ་མོ་མི་གནས་པ། །དེ་སྲིད་རིགས་ལྔ་དག་ལ་སྤྱོད་དམ་ཅི། །བཟླས་པ་སྦྱིན་སྲེག་དཀྱིལ་འཁོར་ལས་འདི་ཡིས། །ཉི་མ་རེ་རེ་ཀུ་རེས་ཅི་ཕྱིར་གནས། །ཞེས་པ་སྟེ། སྤྲོས་བཅས་ཀྱིས་སྔགས་དང་རྒྱུད་ཀྱི་སྦྱོར་བ་ལ་འཇུག་པ་གཅིག་ཀྱང་མི་བྱ་སྟེ། འབད་པར་མེད་པར་ཡུན་ཙམ་རེས་རང་གཞན་གྱི་དོན་དཔག་ཏུ་མེད་པར་འགྲུབ་པར་འགྱུར་པའི་ལྷན་སྐྱེས་སྒོམ་པ་དོར་ནས། དོན་མེད་དམ་དོན་ཆུང་ངུ་ཙམ་གྱི་ཕྱིར། ཀུ་རེ་རྩེད་མོ་དང་འདྲ་བའི་ལས་ཚོགས་དང་འཇིག་རྟེན་པའི་དངོས་གྲུབ་སྒྲུབ་པའི་ཐབས། བཟླས་པ་དང༌། སྦྱིན་སྲེག་དང༌། དཀྱིལ་འཁོར་གྱི་ལས་འདི་དང་འདིས། ཉི་མ་རེ་རེ་བཞིན་དུས་འདས་ནས་ཅིའི་ཕྱིར་གནས་ཏེ། ཟབ་མོའི་ལམ་རྙེད་པའི་སྐབས་འདིར། རྣམ་གཡེང་དེ་དག་བྱེད་ལོང་མེད་དེ། དོན་ཆུང་ངུ་དེ་དག་ལ་མགོ་མ་འཁོར་བར། ལྷན་ཅིག་སྐྱེས་པ་ལ་བརྩོན་པར་བྱ་དགོས་སོ། །གཉུག་མ་གདོད་མའི་ཁྱིམ་བདག་མོ་རྣམ་པ་ཀུན་ལྡན་གྱི་ཕྱག་རྒྱ་ཆེན་མོ་བླངས་ཤིང་ཐོབ་པར་བྱས་ནས། རྟག་ཏུ་སྒོམ་པའི་ཐབས་ཀྱིས་རོལ་བར་བྱེད་དོ། །ཞེས་ཏེ། སློབ་དཔོན་བདག་ཉིད་ཀྱིས་དེ་ལྟར་མཛད་པ་བཞིན་དུ། སྐྱེ་བོ་རྣམས་ལའང་དེ་ལྟར་
སྒྲུབས་ཤིག །ཅེས་གདམས་སོ། །ཇི་སྐད་དུ། སེམས་ཀྱི་སྣང་བ་ཙམ་སྟེ་རང་གི་ཡིད་ལས་སྐྱེས་པ་མེ་ལོང་གི་ནི་གཟུགས་བརྙན་ལྟ་བུ་ཉིད། །གང་ཞིག་མཐའ་དག་རྒྱལ་བའི་སྲས་དང་སངས་རྒྱས་རྣམས་ཀྱི་བསྟེན་པ་རྣལ་འབྱོར་དབང་པོས་བརྟེན་བྱ་སྟེ། །ཡེ་ཤེས་མེ་ལྕེ་རབ་ཏུ་རྒྱས་པ་དེ་ནི་བདུད་ཚོགས་ཡུལ་དང་བཅས་པ་མཐའ་དག་སྲེག་བྱེད་ཅིང༌། །ལུས་ལ་ཆགས་པ་ལ་སོགས་ཀྱང་སྟེ་རྣལ་འབྱོར་རྣམས་ལ་ལོ་ཡི་སྦྱོར་བས་བདེ་ཉམས་སྟེར་བར་བྱེད། །ཅེས་གསུངས་སོ། །འོ་ན་སྤྲོས་བཅས་ཀྱི་སྤྱོད་པའི་རིམ་པ་སྔགས་དང་རྒྱུད་ཀྱི་སྦྱོར་བ་ལ་འཇུག་པ་ནི། རྣལ་འབྱོར་ཆེན་པོའི་སྤྱོད་པ་མ་ཡིན་ནམ། སྔགས་རྒྱུད་ཅིའི་ཕྱིར་སྤོང་སྙམ་ན། ཇི་སྲིད་རང་ཁྱིམ་རྩ་ཨ་ཝ་དྷཱུ་ཏཱིའི་ཁྱིམ་བདག་མོ་ཡེ་ཤེས་ཀྱི་སྣང་བའི་གཏུམ་མོ་བརྟན་ཅིང་གཡོ་བ་མེད་པར་མི་གནས་པ། དེ་སྲིད་དུ་རིགས་ལྔ་དག་ལ་སྤྱོད་དམ་ཅི་སྟེ། སྤྱོད་པ་དེ་སྤྱད་ཀྱང་འབྲས་བུ་མེད་པས་སྤྱོད་དུ་མི་རུང་ལ། དེ་གྲུབ་ནས་ནི་དེ་ཉིད་སྔགས་དང་རྒྱུད་དང་དཀྱིལ་འཁོར་སོགས་ཐམས་ཅད་ཀྱི་ངོ་བོ་ཡིན་པས། སྤྲོས་བཅས་དེ་དག་ངེས་པར་སྤྱོད་དགོས་པའང་མིན་ལ། གཡེང་རྐྱེན་དུ་མི་འགྱུར་ན་དེ་དག་སྤྱོད་ཀྱང་འགལ་བ་མེད་དེ། དེ་ཐམས་ཅད་ཀྱང་ཡེ་ཤེས་དེའི་རྣམ་རོལ་དུ་འགྱུར་བའི་ཕྱིར་རོ། །འདིར་རིགས་ལྔ་ཞེས་པ་བཻ་རོ་དང་འགྱུར་གསར་ལས། དེ་སྲིད་འདོད་ཡོན་ལྔ་ལ་སྤྱོད། །ཅེས་བསྒྱུར་ཞིང༌། འགྲེལ་པར་མངོན་བྱང་ལྔ་ལ་བཤད་པའང་ཡོད་དེ། གཞུང་གི་ཚིག་དོན་ནི། སྤྲོས་བཅས་ཀྱི་དུས་
སུ་རིགས་ལྔ་ལས་བྱུང་བའི་ལས་ཀྱི་ཕྱག་རྒྱ་མོའམ། ཡང་ན་རྒྱལ་བ་རིགས་ལྔའི་ཚོགས་ཀྱི་དཀྱིལ་འཁོར་སྒྲུབ་པ་ལ་བྱ་དགོས་སོ། །དེས་ན་འདིར་ཉེ་རྒྱུའི་སྤྱོད་པ་ལ་ནི་སྤྲོས་མེད་དང༌། ཤིན་ཏུ་སྤྲོས་མེད་ཀྱིས་ཀྱང་ཆོག་པས། སྤྲོས་བཅས་ངེས་པར་དགོས་པ་མིན་ཅིང༌། ཕྱག་ཆེན་སྒོམ་པ་ལ་སྤྲོས་བཅས་གཡེང་རྐྱེན་དུ་མི་འགྱུར་ཞིང༌། གཞན་དོན་དུ་འགྱུར་ན་བྱེད་པའང་ཡིན་མོད་ཀྱི། ཡེ་ཤེས་ཀྱི་གཏུམ་མོ་མ་བཞེངས་པར་ལ། རྫོགས་རིམ་གྱི་སྤྱོད་པ་དོན་ཆུང་བར་དགོངས་སོ། །དེས་ན་འདིས་ནི། དྲོད་ཆུང་ངུའམ། སྲོག་རྩོལ་གྱི་རིམ་པ་མ་ཐོབ་བར་དུ། རྫོགས་རིམ་གྱི་སྤྱོད་པ་ལྟར་སྣང་བྱེད་པ་ངན་སོང་གི་རྒྱུ་ཡིན་ཅིང༌། དེ་ཐོབ་ཀྱང་དྲོད་ཆེན་པོའམ་འཛིན་པ་ཕྲ་མོ་མ་ཐོབ་ཀྱི་བར་དུ་སྤྲོས་བཅས་ཀྱི་སྤྱོད་པ་དཀའ་ལ་དོན་ཆུང་བ་དང༌། སྤྲོས་མེད་ཀྱི་སྤྱོད་པའང་དེ་དང་ཕྱོགས་འདྲ་ལ། སྤྱིར་ཤིན་ཏུ་སྤྲོས་མེད་ཙམ་ཡོད་དུ་ཆུག་ཀྱང༌། རྫོགས་རིམ་གྱི་ཤིན་ཏུ་སྤྲོས་མེད་ནི་སྐབས་དེར་མི་འབྱུང་ངོ༌། །ཚིག་རྐང་གཉིས་པོ་འདི། སྔགས་རྒྱུད་གཅིག་ཀྱང་མི་བྱ་བའི་དོགས་གཅོད་འཕྲོས་དོན་ཡིན་མོད། ལམ་གྱི་བོགས་འདོན་སྤྱོད་པ་ཡང་ཟུར་གྱིས་བསྟན་པ་ཡིན་ནོ། །གསུམ་པ་དོན་བསྡུའི་ཚིགས་སུ་བཅད་པ་ནི། །ན་ཆུང་མ་ལ་ཆགས་པ་དེ་མེད་ན། ལུས་འདི་ཡིས་ནི་བྱང་ཆུབ་འགྲུབ་བམ་ཅི། །གང་གིས་བར་མེད་ལྷན་ཅིག་སྐྱེས་དགའ་རྟོགས། །རིག་བྱེད་སྔོན་གྱི་རབས་ཀྱིས་ཅི་ཞིག་བྱ། །དེས་ནི་འགྲོ་བའི་རྣམ་རྟོག་མ་ལུས་དང༌། །ང་རྒྱལ་མ་ལུས་པ་ནི་འཇོམས་པར་གྱུར། །གཉུག་མའི་ཁྱིམ་
བདག་མོ་བླངས་ནས། །རིན་ཆེན་ཡིད་ནི་མི་གཡོར་བྱས། །ཀྭ་ཡེ་དེ་ཉིད་རྡོར་སེམས་མགོན། །དམ་པའི་དོན་དུ་བདག་གིས་བརྗོད། །ཇི་ལྟར་ལན་ཚྭ་ཆུར་ཞུགས་པ། །དེ་ལྟར་ཁྱིམ་བདག་མོ་བླངས་སེམས། །དེ་དང་གལ་ཏེ་ལྷན་ཅིག་ན། །ཀཱ་ཡེ་དུས་དེར་རོ་མཉམ་འགྱུར། །ཞེས་པ་སྟེ། སྔར་བསྟན་པའི་དོན་ཐམས་ཅད་བསྡུ་ན། ཕྱག་རྒྱ་ཆེན་པོའི་བདེ་བ་སྤེལ་བ་དང༌། རང་སེམས་སྟོང་པ་མཉམ་ཉིད་དུ་མཉམ་པར་འཇོག་པ་གཉིས་སུ་འདུས་ཤིང༌། དེ་གཉིས་ཀྱང་ཐ་དད་རེས་འཇོག་ཏུ་མ་ཡིན། མཉམ་ཉིད་ཀྱི་སེམས་དེ་བདེ་ཆེན་དུ་ཤར་བར་བྱེད་དགོས། དེ་ཁོ་ནས་སྒྲིབ་པ་ཐམས་ཅད་རང་སངས་དང༌། དོན་དམ་པའི་ཡོན་ཏན་ཐམས་ཅད་མངོན་འགྱུར་དང༌། ཟུང་འཇུག་གདོད་མའི་མགོན་པོ་སྤངས་ཐོབ་མེད་པའི་ཚུལ་གྱིས་འཕྲལ་དུ་ཐོབ་པར་འགྱུར། ཞེས་འཆད་པ་ཡིན་ནོ། །དེ་ཡང་ལས་དང་ཡེ་ཤེས་ཀྱི་ཕྱག་རྒྱ་དང༌། སྟོང་གཟུགས་ཕྱག་རྒྱ་ཆེན་མོ་རྣམས་ཀྱི་ན་ཆུང་མ་ལ་ཆགས་པའི་སྦྱོར་བ་སྒོམ་པ་དེ་མེད་ན། ཚེ་གཅིག་དང་ལུས་གཅིག་འདི་ཡིས་ནི། ཟུང་འཇུག་ཕྱག་རྒྱ་ཆེན་པོའི་ཟུང་འཇུག་འགྲུབ་བམ་ཅི་སྟེ་འགྲུབ་པ་མེད་དོ། །དེ་ཡང་སྟོང་གཟུགས་ཕྱག་རྒྱ་ཆེན་པོས་ཐིག་ལེ་བཞུ་ཞིང་བཅིང་བ་མེད་ན། ལུས་གནས་གྱུར་བའི་ཟུང་འཇུག་འགྲུབ་པ་མེད་ལ། སྟོང་གཟུགས་ཕྱག་ཆེན་གྱི་ནུས་པ་འཕེལ་བ་ལ་གཞན་གཉིས་དགོས་ཤིང༌། ཁྱད་པར་ཡེ་རྒྱ་མེད་ཀྱང་རུང་ཙམ་ཡིན་མོད། ལས་རྒྱ་ནི་ལན་ཅིག་ངེས་པའོ། །དེ་ལྟར་ཡང༌། ཕྱག་རྒྱ་འགྲོགས་པ་རབ་ཉམས་
སྐྱེས་བུ་རྣམས་ཀྱི་སྐྱེ་བ་འདི་ལ་མཆོག་གི་བདེ་བ་སྟེར་བ་མེད། །ཅེས་གསུངས་ཏེ། སྐབས་འདིའི་ཕྱག་རྒྱ་ནི་ལས་རྒྱའོ། །དེ་ལྟར་གང་གིས་བར་ཆད་མེད་ཅིང་རྒྱུན་མི་འཆད་པར། ཕྱག་རྒྱ་གསུམ་ལས་ལྷན་ཅིག་སྐྱེས་པའི་དགའ་བ་རྟོགས་ཏེ་བསྒོམ་པར་བྱ་ཡི། རིག་བྱེད་དང་སྔོན་རབས་ལ་སོགས་པ་ཐ་སྙད་མང་པོ་རྣམས་ཀྱིས་ཅི་ཞིག་བྱ་སྟེ་རྙེད་པ་དང་གྲགས་པའི་དོན་ཙམ་ཡིན་པའི་ཕྱིར་རོ། །གཉུག་མའི་ཁྱིམ་བདག་མོ་སྤྲོས་བྲལ་ནམ་མཁའི་རྣལ་འབྱོར་རྣམ་པ་ཐམས་ཅད་པར་ཤར་བ་དེ། དམིགས་པའི་ཡུལ་དུ་བླངས་ནས། ཡིད་བཞིན་ནོར་བུ་རིན་པོ་ཆེ། ཡིད་ཐིག་ལེ་ནི་གཡོ་བ་མེད་པར་བྱའོ། །དེ་ལྟར་རྟག་ཏུ་འཆར་བའི་ཕྱག་རྒྱ་ཆེན་པོ་ལྷན་ཅིག་སྐྱེས་པའི་བདེ་པའི་སེམས་དེས། རྣམ་པ་ཐམས་ཅད་པའི་ཁྱིམ་བདག་མོ་བླངས་ནས། དེ་དང་དེ་གལ་ཏེ་ལྷན་ཅིག་ཏུ་སྒོམ་པ་གོམས་པར་བྱས་ནས། མི་རིང་བར། ཇི་ལྟར་ལན་ཚྭ་ཆུ་ལ་ཞུགས་པ་དེ་ལྟར། དབྱེར་མེད་རོ་མཉམ་ཟུང་འཇུག་ཏུ་འགྱུར་ཏེ། ཤིན་ཏུ་གོམས་པའི་དུས་དེར་སྐད་ཅིག་གཅིག་ལ་དེ་ལྟར་མངོན་དུ་འགྱུར་རོ། །ཐིག་ལེ་མི་གཡོ་བར་བྱེད་པ་དང༌། སྟོང་གཟུགས་བརྟན་པར་བྱེད་པའི་ཐབས་ནི། ནམ་མཁའི་རྣལ་འབྱོར་དང༌། ལས་རླུང་དགག་པའོ། །དེ་ལྟར་སྒོམ་པ་དེས་ནི་འགྲོ་བའི་རྣམ་པར་རྟོག་པ། འདོད་ཆགས་ཞེ་སྡང་ལ་སོགས་པ་མ་ལུས་པ་དང༌། ང་རྒྱལ་ཞེས་པ་ཅུང་ཟད་སྒྲ་ཡང་བར་བྱས་ཏེ། བདག་མེད་ལ་བདག་ཏུ་ང་རྒྱལ་བའི་བདག་འཛིན་དང༌། བདེན་མེད་ལ་བདེན་པར་ང་རྒྱལ་བའི་དངོས་འཛིན་དང༌།
ཐ་མལ་གྱི་རྣམ་རྟོག་དང་འཛག་བདེའི་བག་ཆགས་ཀྱི་བདག་ལ་ཆགས་པའི་ང་རྒྱལ་ལ་སོགས་པ་ཀུན་ནས་ཉོན་མོངས་པ་མ་ལུས་པ་ནི། ནམ་མཁའ་ལ་སྤྲིན་དེངས་པ་བཞིན་དུ། རང་སངས་པའི་ཚུལ་གྱིས་འཇོམས་པར་འགྱུར་ལ། སེམས་ཉིད་གདོད་ནས་བདེ་བ་རྣམ་པ་ཐམས་ཅད་པར་བཞུགས་ཤིང༌། ལམ་གྱི་ཡེ་ཤེས་ལ་དེ་ལྟར་ཤར་བ་དེ་ཉིད། དཔལ་རྡོ་རྗེ་སེམས་དཔའ་དང་པོའི་མགོན་པོ། སངས་རྒྱས་ཐམས་ཅད་ཀྱི་བདག་ཉིད་ཡིན་ཅིང༌། དེ་ཉིད་དམ་པའི་དོན་གྱི་གནས་ལུགས་མཆོག་ཏུ་ཡང༌། སྤྱོད་པའི་རྡོ་རྗེ་བདག་གིས་བརྗོད་ཅིང་བསྟན་ནོ། །ཀྭ་ཡེ་ཞེས་སྐྱེ་བོ་རྣམས་ལ་བོད་པར་མཛད་དོ། །རྡོ་རྗེ་ཞེས་པས་སྤངས་པའི་ཡོན་ཏན་རྣམས་དང༌། སེམས་དཔའ་ཞེས་པས་རྟོགས་པའི་ཡོན་ཏན་རྣམས་དང༌། མགོན་པོ་ཞེས་པས་སེམས་ཅན་ཐམས་ཅད་ཀྱི་མགོན་དུ་གྱུར་པས་འཕྲིན་ལས་དང༌། ཆོས་ཐམས་ཅད་ཀྱི་མགོན་དུ་གྱུར་པས། ཆོས་དབྱིངས་ཀུན་ཁྱབ་ཏུ་བསྟན་ཅིང༌། ཡོན་ཏན་དེ་ཐམས་ཅད་ཀྱང་དོན་དམ་པས་རབ་ཏུ་ཕྱེ་བ་ཡིན་ནོ། །ཚིགས་སུ་བཅད་པའི་མཛོད་རྫོགས་སོ།། །།འདི་ནི་ནག་པོ་སྤྱོད་པའི་ཞལ་སྔ་ནས་མཛད་པའོ། །ཞེས་པ་ནི་མཛད་བྱུང་ངོ༌། །བཻ་རོ་ཙཱ་ནའི་འགྱུར་ལ། རྣལ་འབྱོར་གྱི་དབང་ཕྱུག་ཆེན་པོ་སློབ་དཔོན་ནག་པོ་སྤྱོད་པའི་རྡོ་རྗེས་མཛད་པའི་དོ་ཧ་མཛོད་ཅེས་བྱ་བ་རྫོགས་སོ། །ཞེས་པ་སྣང་ངོ༌། །རྒྱ་གར་གྱི་མཁན་པོ་དཱི་པཾ་ཀ་ར་རཀྵི་ཏའི་ཞལ་སྔ་ནས་དང༌། བོད་ཀྱི་ལོ་ཙཱ་བ་ཨཱ་ཙཪྱ་མར་པ་ཆོས་ཀྱི་དབང་ཕྱུག་གིས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །
ཞེས་པ་ནི་འགྱུར་བྱང་ངོ༌། །འདིའི་པཎྜི་ཏ་དེ་ནི་བལ་པོ་ཐུགས་རྗེ་ཆེན་པོ་མེ་ཙ་གླིང་པར་གྲགས་པ་དེ་ཡིན་ལ། ལོ་ཙཱ་བ་ནི་མཁས་པ་མར་བ་དོ་པ་ཞེས་གྲགས་པའོ། །ཡང་སྤྱོད་པའི་གླུའི་མཛོད་འགྲེལ་ཞེས་བྱ་བ་ན། གཞུང་འདིའི་ལུང་དྲངས་པ་རྣམས་འགྱུར་ལེགས་ཁྱད་ཆེ་བར་འདུག་ཀྱང༌། གཞུང་རྫོགས་པར་མི་སྣང་ཞིང༌། འགྱུར་ཁྱད་ཅི་རིགས་པ་མ་གཏོགས། རྒྱ་གར་བཻ་རོ་ཙཱ་ནའི་འགྱུར་དང༌། འགྱུར་གསར་གཉིས་ལས་མར་དོ་འགྱུར་ཉིད་དབྱིངས་ཆེ་ཞིང་བཟང་བར་མཐོང་ངོ༌། །བོད་ཀྱི་མཁས་པ་གཞན་གྱིས་མ་བཤད་པའི། །གཞུང་བཟང་འདི་ཡང་ཏཱ་ར་ནཱ་ཐས་བཤད། །དེ་ལྟར་བཤད་པའི་དགེ་བ་གང་ཡིན་པ། །འགྲོ་ཀུན་བདེ་ཆེན་ཐོབ་པའི་རྒྱུ་རུ་བསྔོ། །ཞེས་སློབ་དཔོན་ཆེན་པོ་ནག་པོ་སྤྱོད་པའི་དོ་ཧ་མཛོད་ཀྱི་རྣམ་བཤད། ཟབ་དོན་ལྡེ་མིག་ཅེས་བྱ་བ་འདི་ཡང༌། རྒྱལ་ཁམས་པ་ཏཱ་ར་ནཱ་ཐས་སྦྱར་བའོ།། །།རྒྱལ་གཉིས་པ་ཀུན་མཁྱེན་ཇོ་ནང་པའི། །རྣམ་སྤྲུལ་རྗེ་བཙུན་ཡོན་ཏན་བཟང་པོ་ཡིས། །སྤྱི་ལོ་༡༩༩༧ལོར། རྒྱལ་བསྟན་མི་ཉམ་གོང་དུ་འཕེལ་བའི་ཕྱིར། །ཀུན་མཀྱེན་ཏཱ་ར་ནཱ་ཐའི་བཀའ་འབུམ་གྱི། ཤིང་བར་འཛམ་ཐང་གཙང་བའི་ཆོས་གྲྭ་ཆེར། །བསྐྲུན་པའི་དགེ་བ་འོད་དཀར་དྲི་མེད་ཀྱིས། །མ་གྱུར་འགྲོ་ལ་རྫོགས་སངས་རྒྱས་ཐོག་ཤོག། དགེ་ལེགས་འཕེལ། །མངྒ་ལཾ། །