དེ་ཉིད་བདུན་པའི་རྣམ་པར་བཤད་པ་རིན་ཆེན་སྙེ་མ།
དེ་ཉིད་བདུན་པའི་རྣམ་པར་བཤད་པ་རིན་ཆེན་སྙེ་མ་བཞུགས།
ཨོཾ་སྭཱ་སྟི་པྲ་ཛ་བྷྱ༔ ཡེ་ཤེས་མཆོག་གི་འབྲས་རབ་སྩོལ་བ་པོ། །དེ་ཉིད་རིག་པ་རིག་པའི་བརྟུལ་ཞུགས་ཅན། །ནང་གི་འོད་སྣང་མཆོག་གིས་ཀུན་གསལ་བ། །དཔལ་ལྡན་བླ་མ་རིགས་ཀྱི་མགོན་བཏུད་དེ། །དེ་གསུང་དྲི་མེད་རྡོ་རྗེ་འཛིན་པ་ཡི། །རྒྱུད་ཀུན་སྣང་བྱེད་ཟབ་དང་རྒྱ་ཆེ་བ། །ཟབ་དོན་མཐའ་དག་ལྟ་བའི་མིག་གཅིག་ནི། །འགྲོ་ལ་སྦྱིན་གྱིས་སྐལ་ལྡན་དེང་འདིར་ལོང༌། དབང་ཕྱུག་ཙམ་གྱིས་ཆོག་ཤེས་ཆེར་རློམ་རྣམས། །ཆོས་བརྒྱད་མཐོ་དམའི་ལམ་དུ་རྡེག་འཆོས་ནས། །མ་སྦྱངས་མན་ངག་མི་ཤེས་མི་སྒོམ་པར། །བརྗོད་འདོད་དབང་གི་རབ་བརྟགས་གཡང་དུ་ལྷུང༌། །ཕྲག་དོག་འཛིན་ཁྲིས་གང་བའི་ཡིད་མཚོ་རུ། །ལེགས་བཤད་གྲུ་ཆེན་འཇུག་པ་དཀའ་མོད་ཀྱི། །པདྨའི་གཉེན་གྱིས་པདྨའི་
མཚོ་ལ་བཞིན། །སྐལ་བཟང་བློ་ཡི་པད་ཚལ་རྒྱས་བྱེད་ཡིན། །དོན་བྲལ་གླེགས་བམ་རི་བོའི་ལུས་འཆང་བས། །སྔོན་གྱི་ཤིང་རྟ་ཆེ་ལ་འགྲན་པ་མཐོང༌། །དེ་ལྟར་འདི་མིན་སྔོན་ཆད་འདི་མ་གྲགས། །ཉུང་གསལ་གོ་བདེའི་ངག་གིས་བཤད་པར་འདོད། །དེ་ལ་ཐར་འདོད་རྣམས་ཀྱི་འཇུག་ངོགས་ནི་རྒྱལ་བའི་བསྟན་པ་གཅིག་པུ་ཡིན་ལ། དེ་ཉིད་ཀྱང་གདུལ་བྱ་རྣམས་ཀྱི་སྐལ་བའི་རིམ་པས་ཐེག་པ་དུ་མར་འགྱུར་བ་ཡིན་ཏེ། ལང་གར་གཤེགས་པ་ལས། ལྷའི་ཐེག་དང་ཚངས་པའི་ཐེག ཉན་ཐོས་ཀྱི་ཡང་དེ་བཞིན་ནོ། །དེ་བཞིན་གཤེགས་དང་རང་རྒྱལ་གྱི། །ཐེག་པ་དེ་དག་ངས་བཤད་དོ། །ཐེག་པ་རྣམ་པ་མང་བཤད་པ། །སེམས་ཅན་རྣམས་ནི་དྲང་བའི་ཕྱིར། །ཐེག་པ་ཐ་དད་ངས་
བཤད་དོ། །ཐེག་པ་གཅིག་ཏུ་ངས་བསྟན་ཏོ། །ཇི་སྲིད་སེམས་ནི་འཇུག་པའི་བར། །ཐེག་པ་དག་ནི་ཐུག་པ་མེད། །སེམས་ནི་ཡོངས་སུ་གྱུར་པ་ན། །ཐེག་པ་མེད་ཅིང་འགྲོ་བའང་མེད། །ཅེས་པ་ལྟར་མཐའ་ཡས་པའི་ཐེག་པ་དེ་དག་ཀྱང་མཐར་གྱིས་བླ་ན་མེད་པའི་ཐེག་པ་ལ་ཉེ་བར་གཞོལ་བ་ཁོ་ན་ཡིན་པའི་ཕྱིར། ཐམས་ཅད་ཀྱང་སངས་རྒྱས་ཀྱི་རྒྱུ་ཕུན་སུམ་ཚོགས་པ་ཁོ་ནར་གྱུར་པ་སྟེ་ལན་གཅིག་དད་པ་སྐྱེས་པ་ཙམ་གྱིས་ཀྱང༌། ཚེ་རབས་མང་པོར་གསགས་པའི་བསོད་ནམས་ལས་ཀྱང་ཆེས་བླ་ལྷག་ཏུ་འགྱུར་ཏེ། མདོ་ལས་ཀྱང་ཟླ་བ་རེ་རེར་མཆོད་སྦྱིན་སྟོང༌། །ལོ་བརྒྱར་བྱེད་པ་གང་ཡིན་ཏེ། །དམ་པའི་ཆོས་ལ་དད་པ་ཡིས། །བཅུ་དྲུག་ཆར་ཡང་མི་ཕོད་དོ། །ཞེས་དང༌། མི་ནི་ལོ་བརྒྱད་ནགས་ཚལ་ན། །མེ་ལ་ཡོངས་བརྟེན་གང་ཡིན་དང༌། །གང་ཞིག་སྒོམ་ལ་ཡུད་ཙམ་ཞིག །མཆོད་པ་བྱེད་པ་གང་ཡིན་པ། །མཆོད་བྱེད་དེ་ཉིད་ཆེས་རུང་གི །ལོ་བརྒྱར་སྦྱིན་སྲེག་བྱེད་མི་རུང༌། །ཞེས་སོ། །དེ་ལྟར་ཐེག་གཅིག་ཐེག་པ་དུ་མར་བསྟན་པ་དེ་རྣམས་ཀྱི་རྩེ་མོར་གྱུར་པ་ནི། རྣལ་འབྱོར་བླ་ན་མེད་པ་འདི་ཉིད་ཡིན་ལ། ཐེག་པ་དེ་ཉིད་ཀྱང་ཟུང་དུ་འཇུག་པའི་ཡེ་ཤེས་ཡིན་ཅིང༌། ཡེ་ཤེས་དེའི་རང་བཞིན་གསལ་བར་སྟོན་པ་རྣལ་འབྱོར་བླ་ན་མེད་པའི་རྒྱུད་ཐམས་ཅད་ཀྱི་རྒྱ་ཆེར་འགྲེལ་ཡི་གེ་ཉུང་ངུར་གྱུར་པ་འདི་ནི་དཔལ་དང་ལྡན་པའི་རྡོ་རྗེ་སློབ་དཔོན་ཆེན་པོ་སངས་རྒྱས་སྦས་པའི་ཞལ་སྔ་ནས་ཀྱིས། བློ་དམན་རྣམས་ལ་ཕན་པའི་ཕྱིར་དུ་ཡི་གེའི་ལམ་དུ་མཚོན་པར་མཛད་དེ། བསྟན་བཅོས་འདིའི་མིང་ནི། དེ་ཁོ་ན་ཉིད་བདུན་གྱི་འགྲེལ་པ་ཞེས་བྱ་སྟེ། རྒྱུད་སྡེ་གང་དུ་དེ་ཁོ་ན་ཉིད་ཅེས་གསུངས་པ།
ཐམས་ཅད་གསལ་བར་བྱེད་ཅིང༌། སློབ་དཔོན་ཆེན་པོ་ཛ་ལནྡྷ་རའི་ཞལ་སྔ་ནས། དེ་ཉིད་གཅིག་སྟེ་བདུན་གྱི་མིང་ཡིན་ནོ། །ཞེས་གསུངས་པའི་དོན་རྒྱ་ཆེར་འགྲེལ་པའི་ཕྱིར། དེ་སྐད་ཅེས་བཏགས་སོ། །རྒྱུད་གང་ལ་བརྟེན་པ་ནི་གཙོ་བོར་འཁོར་ལོ་བདེ་མཆོག་ལ་བརྟེན་མོད་ཀྱི་བླ་མེད་ཐམས་ཅད་ཀྱི་སྤྱི་འགྲེལ་དུ་འགྱུར་ལ། འདི་འཆད་པར་བྱེད་པ་ལ། སྤྱི་དོན་དང༌། གཞུང་གི་དོན་གཉིས་ལས། དང་པོ་ལ། དེ་ཁོ་ན་ཉིད་ནོད་པར་བྱ་བའི་ཡུལ། གང་ལ་འདོམས་པའི་སློབ་མ། ཇི་ལྟར་གདམས་པའི་ཚུལ། གདམས་བྱ་དེ་ཁོ་ན་ཉིད་དངོས་ཏེ་བཞི་ལས། དང་པོ་ནི། བླ་མ་དམ་པ་མན་ངག་དང་ལྡན་པ་ཞིག་ཡིན་ཏེ། མན་ངག་མེད་པའི་མཁས་སྨྲ་ལ། འདིའི་གཏམ་ཡང་ཡོད་མ་ཡིན། །ཞེས་གསུངས། གཉིས་པ་ནི། འཕགས་པ་ལྷའི་ཞལ་སྔ་ནས། ཇི་ལྟར་སྨན་པ་མཁས་གྱུར་པས། །ནད་པ་བསྒྲུབ་མེད་དཀོན་དེ་བཞིན། །བྱང་ཆུབ་སེམས་དཔའི་སྟོབས་བརྙེད་ནས། །གདུལ་བྱ་མ་ཡིན་ཤིན་ཏུ་དཀོན། །ཞེས་སེམས་ཅན་གྱི་ཁམས་ཤས་ཆེ་བ་ཡང་ཡིན་མོད་ཀྱི་འོན་ཀྱང༌། གང་ཞིག་གང་ལ་གང་དགའ་བ། །དེ་ཡིས་དེ་དེ་སྔར་བཤད་བྱ། །ཉམས་པར་གྱུར་པ་དམ་ཆོས་ཀྱི། །སྣོད་ནི་ཅིས་ཀྱང་མ་ཡིན་ནོ། །ཞེས་གསུངས་པ་ལྟར་དངོས་སུ་གང་ལ་བསྟན་པ་ནི། རྡོ་རྗེ་ཐེག་པའི་རིགས་སད་པ་དང༌། དམ་ཚིག་དང་ལྡན་པ་དང༌། བླ་མ་ལ་གུས་པས་བསྙེན་བཀུར་བ་དང༌། སྙིང་རྗེ་དང་ལྡན་པ་སྟེ་མཚན་ཉིད་བཞི་དང་ལྡན་པའི་སློབ་མའོ། །གསུམ་པ་ནི། ཇི་སྐད་དུ་ཀྱཻ་རྡོ་རྗེ་ལས། དང་པོ་གསོ་སྦྱོང་སྦྱིན་པར་བྱ། །ཞེས་པ་ནས་བརྩམས་ཏེ། སྔགས་ཀྱི་རིམ་པ་ཀུན་
ཤེས་ནས། །དེ་རྗེས་ཀྱཻ་རྡོ་རྗེ་བརྩམས། །ཞེས་གསུངས་པ་ལྟར། ལམ་ཐུན་མོང་པས་རྒྱུད་སྦྱངས་ཞིང༌། ཤེས་རབ་ཡེ་ཤེས་ཀྱི་དབང་ཡན་ཆད་རིམ་ཅན་དུ་ནོད་ཟིན་པ་ལ། བཞི་པ་བསྟན་པར་བྱ་བ་ཡིན་ཅིང༌། དེ་ཡང་དེ་ཉིད་དང་བདུན་དང་ལྡན་པར་སློབ་དཔོན་གྱི་སྟོན་དགོས་པ་ཡིན་ཅིང༌། གཞན་ཡང་བསྐྱེད་རིམ་དང་རྫོགས་རིམ་དང་འབྲས་བུ་འགྲུབ་པའི་གནས་སྐབས་སུ་ཕྱི་རོལ་གྱི་དུས་ཁྱད་པར་ཅན་ལ་བརྟེན་ནས་དབང་བསྐུར་བའི་དབང་གི་ཡེ་ཤེས་ལ། དེ་ཉིད་བདུན་དུ་ངོ་སྤྲོད་པ་ཡིན་ནོ། །བཞི་པ་ལ། ཟུང་འཇུག་གི་ཡེ་ཤེས་ཀྱི་མཚན་ཉིད། སྐུ་བཞི་ཡན་ལག་བདུན་ཚང་ཚུལ། གཞི་ལམ་འབྲས་བུའི་ཁྱད་པར་རོ། །དང་པོ་ལ། གཞིའི་དུས་དང༌། སོ་སོ་སྐྱེ་བོའི་ལམ་གྱི་སྐབས་དང༌། འཕགས་ལམ་གྱི་ཡེ་ཤེས་ཀྱི་མཚན་ཉིད་སྟེ་གསུམ་ལས། དང་པོ་ནི། དྲི་མ་ཅུང་ཟད་ཀྱང་མ་སྦྱངས་པའི་དེ་བཞིན་ཉིད་གང་ཞིག སྟོང་ཉིད་དང་རྟེན་འབྲེལ་རོ་གཅིག་པའི་སེམས་ཀྱང་ཡིན། རང་བཞིན་འགྱུར་བ་མེད་པའོ། །གཉིས་པ་ནི། དྲི་བཅས་དེ་བཞིན་ཉིད་ཀྱི་སྣང་བ་གང་ཞིག་ཞུ་བདེ་དང་མཚུངས་ལྡན་དུ་གྱུར་པའི་ལྷ་སྐུ་སྣང་སྟོང་ངོ༌། །དེ་ལ་ཡང༌། བསྐྱེད་རིམ་དང༌། རྒྱུའི་རྫོགས་རིམ་དང་འབྲས་བུའི་རྫོགས་རིམ་གྱི་སྐབས་གསུམ་པོ་ལ་རིམ་པས་རབ་བརྟགས་ལས་བྱུང་བ་དང༌། བཅོས་མིན་གྱི་ལྷའི་སྐུ་སྣང་སྟོང་མི་བརྟན་པ་དང་བརྟན་པ་ཞེས་ཁྱད་པར་དུ་སྦྱར་རོ། །གསུམ་པ་ལ། སློབ་པ་དང་མི་སློབ་པའི་ཡེ་ཤེས་གཉིས་ཏེ། དང་པོ་ལ་འཕགས་རྒྱུད་ཀྱི་ཡེ་ཤེས་གང་ཞིག་ཞུ་བདེ་དང་མཚུངས་ལྡན་དུ་འབྱུང་བའི་ལྷ་སྐུ་ཁ་སྦྱོར་དང༌། གཉིས་པ་ནི། དག་པ་གཉིས་ལྡན་གྱི་ཡེ་ཤེས་མཐར་ཐུག་གང་ཞིག ཁ་སྦྱོར་ལ་སོགས་པའི་
ཡན་ལག་བདུན་དང་ལྡན་པའོ། །འདིར་འབྲས་བུའི་རྫོགས་རིམ་ཡིན་ཙམ་གྱི། གཞི་ལམ་འབྲས་བུ་གསུམ་གྱི་ཟླས་ཕྱེ་བའི་འབྲས་བུས་ནི་མ་ཁྱབ་སྟེ། འཕགས་པ་སློབ་པ་རྣམས་དང༌། ཡེ་ཤེས་ཀྱི་སྐུ་དངོས་སུ་གྲུབ་པའི་སོ་སོ་སྐྱེ་བོའི་ལམ་གྱི་རྫོགས་རིམ་བཞིན་ནོ། །གཉིས་པ་ལ། སྐུ་བཞི་ཇི་ལྟར་ཚང་ཚུལ་དང༌། དེ་ཉིད་བདུན་ཚང་ཚུལ་ལོ། །དང་པོ་ནི། སེམས་རང་བཞིན་གྱི་འོད་གསལ་བའི་སྣང་བ་ལས་ཁམས་གསུམ་ཀུན་སྣང་བ་ཡིན་ཏེ། ཀུན་གཞི་རྣམ་པར་ཤེས་པ་ལ་ས་བོན་བཞག་པས་རྒྱུ་བྱས་ཤིང༌། ལས་ཉོན་གྱི་རྐྱེན་བྱས་པས་སྣང་བ་ཡིན་ནོ། །དེ་རྣམས་ཀྱི་རང་བཞིན་མེད་པའི་ཆ་ནི་ཆོས་ཀྱི་སྐུ་ཡིན་ཏེ། ཆོས་རྣམས་ཀུན་གྱི་ལུས་ཡིན་ཕྱིར། །བསམ་ཡས་ཡེ་ཤེས་ཡུལ་ཡིན་ཕྱིར། །རིགས་པའི་རྗེས་འབྲང་ངོ་བོའི་ཕྱིར། །སྐྱོབ་པ་རྣམས་ཀྱི་ཆོས་སྐུར་འདོད། །ཅེས་ཆོས་ཐམས་ཅད་ཀྱི་ལུས་སམ་རང་བཞིན་ནི་སྟོང་པ་ཉིད་ཡིན་པས་ན། སྟོང་པ་ཉིད་དེ་ཆོས་སྐུའོ་ཞེས་པ་དང་མཐུན་པ་ཡིན་ནོ། །གཉིས་སྣང་གི་ཆ་ནི། ལོངས་སྤྱོད་རྫོགས་པའི་སྐུ་དང༌། རྟེན་འབྲེལ་ཡན་ལག་བཅུ་གཉིས་ཀྱི་ཚུལ་གྱིས་འཁོར་བར་འཁོར་བའི་ཆ་ནི་སྤྲུལ་པའི་སྐུ་དང༌། དེ་གཉིས་སྟོང་པ་དང་རོ་གཅིག་པའི་ཟུང་འཇུག་གི་ཆ་ནི་བདེ་བ་ཆེན་པོའི་སྐུའོ། །གཞན་ཡང་འཆི་བའི་སྲིད་པ་ནི་ཆོས་ཀྱི་སྐུ་དང༌། བར་སྲིད་ནི་ལོངས་སྤྱོད་རྫོགས་པའི་སྐུ་དང༌། སྐྱེ་སྲིད་ནི་སྤྲུལ་པའི་སྐུ་དང༌། དེ་གསུམ་ཀའི་འགྱུར་བྱས་ཀྱི་བདེ་བའི་ཆ་ནི་བདེ་བ་ཆེན་པོའི་སྐུའོ། །དེ་ལྟར་ཡང༌། མི་གཡོ་བ་རྣལ་འབྱོར་བླ་ན་མེད་པ་ལས། སྐུ་བཞི་རང་བཞིན་དབྱེར་མེད་པས། །ཐ་དད་མེད་པའི་ཡིད་ཀྱིའོ། །སླར་
ཡང་བྱང་ཆུབ་དབྱེར་མེད་པས། །ཐབས་དང་ཤེས་རབ་ཉིད་དུ་འདོད། །འཆི་བ་ཉིད་ནི་ཆོས་སུ་བརྗོད། །ལོངས་སྤྱོད་རྫོགས་པ་བར་སྲིད་དང༌། །འགྲོ་བ་དྲུག་གཟུགས་སྤྲུལ་པ་དང༌། །འདོད་པའི་ལོངས་སྤྱོད་བདེ་ཆེན་པོ། །སྐུ་བཞི་ཡི་ནི་རང་བཞིན་འདི། །ཞེས་གསུངས་པས་ན། སྨྲ་བའི་དབང་ཕྱུག་གང་དག སྐྱེ་བ་སྤྲུལ་སྐུ་ཞེས་པའི་ཐ་སྙད་ཚད་ལྡན་མི་སྣང་ངོ་ཞེས་པ་ནི། སྲེ་བ་དགུའི་གདམས་ངག་མཐར་ཐུག་ཏུ་བྱེད་པ་རྣམས་ལ་སྡང་སེམས་ཀྱི་དབང་དུ་གྱུར་པའི་བབ་ཆོལ་ལོ། །གཞིའི་སྐུ་བཞི་པོ་འདི་དག སྐུ་གཞི་དངོས་ནི་མ་ཡིན་ལ། གནས་གྱུར་དང་དག་བྱ་དག་བྱེད་ཀྱི་དབང་དུ་བྱས་པ་སྟེ། གཉིས་སྣང་གི་ཆ་གནས་གྱུར་པ་དང༌། དག་བྱ་བར་སྲིད་ཀྱི་བག་ཆགས་དག་པ་ལས་ལོངས་སྤྱོད་རྫོགས་པའི་སྐུ་འགྲུབ་པས་ན། དེ་ལོངས་སྐུར་བཞག་པ་སྟེ། གཞན་རྣམས་ལ་ཡང་དེ་བཞིན་དུ་སྦྱར་རོ། །ལམ་གྱི་དུས་སུ་ཇི་ལྟར་ལྡན་པའི་ཚུལ་ལ། དབང་ལ་སྦྱར་བ་དང༌། སྐྱེད་པའི་རིམ་པ་ལ་སྦྱར་བ་དང༌། རྫོགས་པའི་རིམ་པ་ལ་སྦྱར་བ་གསུམ་ལས། དང་པོ་ནི། དབང་བཞི་རིམ་བཞིན་སྐུ་བཞི་ལ་སྦྱར་བའང་ཡིན་མོད་ཀྱི། འདིར་དབང་བཞི་ཀའི་ཡེ་ཤེས་ལ་སྐུ་བཞི་སྦྱོར་ཏེ། ལྷ་སྐུར་སྣང་བ་ལོངས་སྤྱོད་རྫོགས་པ་དང༌། དེ་འབྱུང་ལུས་དང་གོ་ས་གཅིག་པར་སྣང་བ་སྤྲུལ་པ་དང༌། རང་བཞིན་མེད་པར་ཤེས་པ་ཆོས་དང༌། སེམས་ཞུ་བདེའི་ངོ་བོར་སྐྱེས་པ་ནི་བདེ་བ་ཆེན་པོའོ། །གཉིས་པ་ལ། སྟོང་པའི་ངང་ལས་སྐྱེད་པ་དང༌། ཞུ་བའི་ཐིག་ལེར་ཐིམ་པ་དང༌། སྟོང་པས་རྒྱས་འདེབས་པ་ནི་ཆོས་དང༌། ནད་ལ་སོགས་པ་དང༌། ཡིད་ངོར་ལྷ་སྐུའི་གསལ་སྣང་ནི་ལོངས་སྤྱོད་དང༌། མངོན་བྱང་ལྔས་
བསྐྱེད་པ་དང༌། འབྱུང་ལུས་ཀྱི་སྣང་བ་དང་བསྲེ་བ་སོགས་ནི་སྤྲུལ་པ་དང༌། ཞུ་བདེ་ནི་བདེ་བ་ཆེན་པོའོ། །གསུམ་པ་ནི། སྤྲོས་བྲལ་གྱི་ངོ་བོ་ལ་རྣམ་པར་མི་རྟོག་པའི་ཚུལ་གྱི་འཇུག་པ་ཆོས་དང༌། རང་ལུས་དང་གཞན་ལུས་ལ་བརྟེན་པའི་ལྷན་སྐྱེས་གཉིས་བསྐྱེད་པ་ནི་བདེ་བ་ཆེན་པོ་དང༌། དེ་དང་གཅིག་ཏུ་སྲེས་པའི་ཡེ་ཤེས་ཀྱི་སྐུ་ནི་ལོངས་སྤྱོད་རྫོགས་པ་དང༌། དེ་ཉིད་རགས་པའི་ལུས་རྟེན་ལ་འཇུག་པས། དེ་དག་པར་བྱེད་པ་ནི་སྤྲུལ་པའོ། །གསུམ་པ་ལ། ཆོས་ཐམས་ཅད་ཀྱི་རང་བཞིན་སྟོང་པ་ཉིད་མངོན་དུ་གྱུར་པ་ནི། ཆོས་དང་སྟོང་པ་ཉིད་མངོན་དུ་གྱུར་པ་ན། ཆོས་དང་སྟོང་པ་དེ་རྟོགས་པའི་འགྱུར་མེད་བདེ་བའི་ཡེ་ཤེས་རང་བཞིན་ལྷན་སྐྱེས་མཐར་ཐུག་པ་ནི་བདེ་བ་ཆེན་པོ་དང༌། ཡེ་ཤེས་དེ་ཉིད་ཀྱི་སྣང་བའི་ཆ་དག་པའི་དཀྱིལ་འཁོར་དུ་སྣང་བ་ལོངས་སྤྱོད་རྫོགས་པ་དང༌། འགྲོ་བ་ཐམས་ཅད་ཀྱི་ཁམས་སོགས་མཁྱེན་པའི་ཡེ་ཤེས་དམིགས་པ་མེད་པའི་སྙིང་རྗེ་དང་མཚུངས་པར་ལྡན་པ་ནི་སྤྲུལ་པའོ། །དེ་ལྟར་སྐུ་བཞི་པོ་དེ་ནི་ངོ་བོ་གཅིག་ཅིང༌། སངས་རྒྱས་རང་སྣང་ཁོ་ན་ལས་གཞན་གཟུགས་ཀྱི་སྐུ་ནི་འདིར་དངོས་སུ་མི་བསྡུད་དེ། དེ་དག་ནི་སྨོན་ལམ་གྱི་སྟོབས་ལས་གདུལ་བྱ་ལ་སྣང་བ་ཙམ་ཡིན་ནོ། །སངས་རྒྱས་ཀྱི་རང་སྣང་ལ་ཁ་སྦྱོར་སོགས་ཡན་ལག་བདུན་ལྡན་གྱི་དག་པའི་དཀྱིལ་འཁོར་མི་སྣང་སྟེ། དེ་དག་ནི་ཀུན་རྫོབ་ཡིན་པའི་ཕྱིར། སངས་རྒྱས་ཀྱི་ཡེ་ཤེས་ནི་སྤྲོས་བྲལ་ཁོ་ན་གཟིགས་པའོ། །ཞེས་སྨྲ་བ་ནི། ཨིནྡྲ་བྷུ་ཏིའི་ཞལ་སྔ་ནས་ཡེ་ཤེས་གྲུབ་པར། སྔར་ཡོད་པ་ནི་ཐམས་ཅད་ཞིག སྔར་མེད་པ་ནི་འདིར་མེད་པས། སངས་རྒྱས་
ཉིད་ཀྱང་འདི་འདྲ་ན། དེ་ལས་གཞན་དག་དོན་མེད་དོ། །ཞེས་དང༌། གཞན་ཡང༌། གལ་ཏེ་ཡེ་ཤེས་སྣང་མེད་ཡིན་ན་ནི། །གཉིད་ལོག་འདྲ་བར་བསྒྲུབ་བྱ་ཉིད་དུ་འགྱུར། །གང་ཡང་དབང་པོ་རྣམས་ནི་འགོག་པ་དང༌། །ཡེ་ཤེས་བྱེ་བྲག་སྨྲ་བའི་ལུགས་ཡིན་ནོ། །ཞེས་དེ་ཉིད་མཁྱེན་པ་རྣམས་ཀྱིས་བཀག་གོ །གལ་ཏེ་ལོངས་སྤྲུལ་གཉིས་གཟུགས་ཀྱི་སྐུ་ཡིན་ནམ་ཞེ་ན། མ་ཡིན་ཏེ། དེ་སྐད་དུ་གསེར་འོད་དམ་པ་ལས། སྐུ་གསུམ་གྱི་ལེའུར། དེ་བཞིན་དུ་ཆོས་ཀྱི་དབྱིངས་ལ་རྣམ་པར་རྟོག་པ་ཐམས་ཅད་མི་སྐྱེ་བའི་ཕྱིར། རྣམ་པར་དག་པ་ཞེས་བྱ་སྟེ། སངས་རྒྱས་རྣམས་ཀྱི་ཡང་དག་པའི་སྐུ་ནི་མེད་པ་མ་ཡིན་ནོ། །གཞན་ཡང་རིགས་ཀྱི་བུ་ཆོས་ཀྱི་སྐུ་ནི་ཉོན་མོངས་པའི་སྒྲིབ་པ་རྣམ་པར་དག་པས་ལོངས་སྤྱོད་རྫོགས་པའི་སྐུར་སྣང་བར་འགྱུར་རོ། །ལས་ཀྱི་སྒྲིབ་པ་རྣམ་པར་དག་པས་སྤྲུལ་པའི་སྐུར་སྣང་བར་འགྱུར་རོ། །ཡེ་ཤེས་ཀྱི་སྒྲིབ་པ་རྣམ་པར་དག་པས་ཆོས་ཀྱི་སྐུར་སྣང་བར་འགྱུར་རོ། །དཔེར་ན་ནམ་མཁའ་ལ་བརྟེན་ནས་གློག་འབྱུང་བར་འགྱུར་རོ། །གློག་ལ་བརྟེན་ནས་འོད་སྣང་ངོ༌། །དེ་བཞིན་དུ་ཆོས་ཀྱི་སྐུ་ལ་བརྟེན་ནས་ལོངས་སྤྱོད་རྫོགས་པའི་སྐུ་སྣང་བར་འགྱུར་རོ། །ལོངས་སྤྱོད་རྫོགས་པའི་སྐུ་ལ་རྟེན་ནས་སྤྲུལ་པའི་སྐུར་སྣང་བར་འགྱུར་རོ། །དེ་ལ་རང་བཞིན་རྣམ་པར་དག་པའི་ཕྱིར་ཆོས་ཀྱི་སྐུ་སྣང་ངོ༌། །ཡེ་ཤེས་རྣམ་པར་དག་པས་ལོངས་སྤྱོད་རྫོགས་པའི་སྐུ་སྣང་ངོ༌། །ཏིང་ངེ་འཛིན་རྣམ་པར་དག་པས་སྤྲུལ་པའི་སྐུ་སྣང་ངོ༌། །དེ་གསུམ་རྣམ་པར་དག་པ་ནི། ཆོས་ཀྱི་དེ་བཞིན་ཉིད་དང༌། གཞན་མ་ཡིན་པའི་དེ་བཞིན་ཉིད་དང༌། རོ་གཅིག་པའི་དེ་བཞིན་ཉིད་དང༌། རྣམ་པར་གྲོལ་བའི་དེ་བཞིན་ཉིད་དང༌།
མཐས་ཀླས་པའི་དེ་བཞིན་ཉིད་ཀྱི་ཕྱིར། སངས་རྒྱས་ཐམས་ཅད་ཀྱི་སྐུ་ནི་ཐ་མི་དད་དོ། །རིགས་ཀྱི་བུའམ་རིགས་ཀྱི་བུ་མོ་གང་དེ་བཞིན་གཤེགས་པ་ནི་བདག་གི་སྟོན་པ་ཆེན་པོའོ་ཞེས་སྨྲ་ཞིང་མོས་པ་དེ་ནི་དེ་བཞིན་གཤེགས་པའི་སྐུ་གཉིས་སུ་མེད་པར་བསམ་པ་ཐག་པས་ཤེས་པ་ཡིན་ནོ་ཞེས་གསུངས་ཏེ། སངས་རྒྱས་རྣམས་ཀྱི་ཡང་དག་པའི་སྐུ་ཞེས་བྱ་བའི་སྐུ་གསུམ་ཀ་ཡིན་ལ། མེད་པ་ཞེས་པ་ནི་དོན་དམ་པར་མེད་པ་སྟེ་ཀུན་རྫོབ་ཡིན་ལ། འདིར་དེ་རྣམས་དེ་མ་ཡིན་པར་བསྟན་ཅིང༌། གཟུགས་ཀྱི་སྐུ་ནི་ཀུན་རྫོབ་ཡིན་ནོ། །ཉོན་མོངས་པའི་སྒྲིབ་པ་ནི་ཁམས་གསུམ་གྱི་ཉོན་མོངས་ཐམས་ཅད་ཡིན་མོད་ཀྱི། འདིར་གཙོ་བོར་བདག་ཏུ་འཛིན་པ་དང་མཚུངས་པར་ལྡན་པའི་ཡིད་དོ། །ལས་ཀྱི་སྒྲིབ་པ་ནི། ཟག་བཅས་ཀྱི་ལས་ཐམས་ཅད་དོ། །ཡེ་ཤེས་ཀྱི་སྒྲིབ་པ་ནི་ཤེས་བྱའི་སྒྲིབ་པའོ། །དེ་རྣམས་དག་པའི་ལྡོག་ཆ་ནས་སོ་སོར་རྟགས་པ་ཡིན་གྱི། ངོ་བོའི་སྒོ་ནས་ཆོས་ཀྱི་སྐུ་གཅིག་པུ་ཡིན་པས་ཆོས་ཀྱི་སྐུ་ནི་ཞེས་ཐོག་མར་སྨོས་སོ། །སྣང་ངོ་ཞེས་པ་ནི་སངས་རྒྱས་རང་སྣང་ལ་སྣང་བ་ཡིན་ཏེ། གདུལ་བྱ་གཞན་སྣང་ལ་ཆོས་སྐུ་སྣང་བ་མེད་ཅིང་མེད་པར་ཐམས་ཅད་མཐུན་པའི་ཕྱིར་རོ། །གློག་གི་དཔེ་དོན་སྦྱར་བ་ནི། རང་བཞིན་རྣམ་དག་མངོན་དུ་གྱུར་པའི་ཆ་ཆོས་ཀྱི་སྐུ་ཡིན་ཅིང༌། དེ་གློ་བུར་རྣམ་དག་མཐར་ཐུག་པས་ཁྱད་པར་དུ་བྱས་པ་ན། ཤིན་ཏུ་རྣམ་པར་དག་པའི་ཡེ་ཤེས་ཀྱི་གཟིགས་པ་ཆོས་ཐམས་ཅད་ལ་རྗེས་སུ་འཇུག་ཅིང༌། ཕྱིན་ཅི་ལོག་གི་སྣང་བ་གཏན་ནས་སྤངས་པའི་དག་པ་རབ་འབྱམས་སུ་སྣང་བའི་ཡེ་ཤེས་ལོངས་སྤྱོད་རྫོགས་པའི་སྐུ་འབྱུང་
ཞིང༌། ཡེ་ཤེས་དེའི་མཐུས་འགྲོ་བའི་དོན་བྱེད་པས་དེའི་ནུས་པའི་ཆ་ནི་སྤྲུལ་པའི་སྐུ་སྟེ། དེའི་ཕྱིར་དེ་དེ་ལས་བྱུང་བ་ཡིན་ཅིང༌། དེ་གཉིས་ཀྱང་གཞན་དོན་གྱི་སྐུ་ཡིན་ནོ། །ཕྱི་མ་གཉིས་ཆོས་སྐུ་དང་ངོ་བོ་གཅིག་ཡིན་ན་དོན་དམ་པའི་སྐུར་འགྱུར་རོ་ཞེ་ན། རང་གི་ངོ་བོས་ནི་འདོད་ཅིང༌། ལྡོག་པའི་ཆ་ནས་ནི་ཆོས་ཀྱི་སྐུར་མི་འཇོག་པས་སྐྱོན་མེད་ལ། འོན་ཀྱང་ཇི་ལྟ་བ་དང་ཇི་སྙེད་པ་མཁྱེན་པའི་དབྱེ་བས་དང་པོ་གཉིས་དོན་དམ་གྱི་སྐུ་དང་ཕྱི་མ་ཀུན་རྫོབ་ཀྱི་སྐུར་ནི་འཇོག་ལ། དེ་བརྡའི་སྐུར་ནི་མ་ཡིན་ནོ། །དེ་ལྟར་ན་ཡང་རྒྱུད་བླ་མ་ལས། རང་དོན་གཞན་དོན་དོན་དམ་སྐུ་དང་ནི། །དེ་ལ་བརྟེན་པ་ཀུན་རྫོབ་སྐུ་ཉིད་དེ། །བྲལ་དང་རྣམ་པར་སྨིན་པའི་འབྲས་བུ་ནི། །ཡོན་ཏན་དབྱེ་བ་དྲུག་ཅུ་བཞི་འདི་དག །ཅེས་ཀུན་རྫོབ་ཀྱི་སྐུ་གཟུགས་ཀྱི་སྐུར་བཤད་པ་མ་ཡིན་ནམ་ཞེ་ན་ཡིན་མོད་ཀྱི། ཀུན་རྫོབ་ཀྱི་སྐུ་ལ་གཟུགས་སྐུས་ཁྱབ་པར་མ་བཤད་པས་འགལ་བ་མ་ཡིན་ནོ། །དེ་གསུམ་རྣམ་པར་དག་པ་ཞེས་པ་ནི་དེའི་སྐུ་གསུམ་སྟེ། ཆོས་རྣམས་སྟོང་པ་ཉིད་སྤྲོས་པ་དང་བྲལ་བའི་རང་བཞིན་ཡིན་པའི་ཕྱིར་དེ་བཞིན་ཉིད་དང༌། དོན་གཞན་དུ་འགྱུར་བ་མེད་པའི་ཕྱིར་གཞན་མ་ཡིན་པ་དང༌། མཉམ་པ་ཉིད་དུ་གཟིགས་པས་ན་རོ་གཅིག་པ་དང༌། སྤང་བྱ་ལས་རྣམ་པར་གྲོལ་བ་དང༌། མཐས་ཀླས་པའི་དངོས་པོ་ཐམས་ཅད་ལ་ཉེ་རིང་མེད་པ་རྣམ་གསུམ་ཀ་ལ་ཚང་བའི་ཕྱིར་སྐུ་གསུམ་པོ་ཐམས་ཅད་ཐ་མི་དད་དོ། །དེ་ལྟར་སྐུ་གསུམ་གཉིས་སུ་མེད་པར་ཤེས་པ་ན་སྟོན་པ་འདི་ཉིད་གཞན་པས་ཀྱང་ཆེས་ཆེན་པོའོ་ཞེས་མོས་ཞིང་དང་བར་འགྱུར་ཞེས་པ་ནི་རིགས་ཀྱི་བུའམ་ཞེས་སོགས་ཀྱི་བསྟན་ནོ། །ལོངས་སྤྲུལ་རྗེས་སུ་མཐུན་པ
འམ་བཏགས་པ་བ་གཟུགས་ཀྱི་སྐུ་གཉིས་ཇི་ལྟར་འབྱུང་ཞེ་ན། སྔར་བཤད་པའི་སྐུ་གཉིས་པོ་དེ་དག་མེད་པར་ནི་གདུལ་བྱའི་སེམས་དག་ཀྱང་མི་འབྱུང་ལ། འོན་ཀྱང་གདུལ་བྱའི་སེམས་རྒྱུད་ཀྱི་བསྡུས་པ་ནི་ཡིན་ཅིང་གདུལ་བྱའི་སེམས་དག་པ་དང༌། ཡེ་ཤེས་དེ་གཉིས། སྔོན་གྱི་སྨོན་ལམ་དང་རྐྱེན་ཉེ་བར་ཕྲད་པ་ལས་སྣང་བ་ཡིན་ནོ། །དེའི་ཕྱིར་སེམས་དག་པ་ནི་ཉེར་ལེན་དང༌། གཉིས་ནི་ལྷན་ཅིག་བྱེད་པའོ། །གཟུགས་ཀྱི་སྐུ་སངས་རྒྱས་སུ་འདོད་པ་མཛངས་པ་མ་ཡིན་པའི་གཏམ་རྒྱ་ཆེན་པོ་དག་ནི་འདི་ལྟར་རྟག་པར་བྱ་སྟེ། ལུང་འགལ་ཕྱིར་དང་ལུས་མེད་དང༌། །དོན་སྨྲས་དོན་དམ་མིན་འདོད་ཅིང༌། །རིག་པས་གནོད་ཕྱིར་ཐེག་ཆེན་ལ། །སངས་རྒྱས་གཟུགས་སུ་རིགས་མ་ཡིན། །ཅི་འདི་བེམ་པོའམ་ཡང་ན་ཤེས། །གཉིས་འདུས་ན་ནི་བཏགས་ཡོད་ཙམ། །བེམ་པོའི་རྒྱལ་བ་ངོ་མཚར་རྨད། །ཤེས་ན་སོ་སོ་སྐྱེ་སོགས་ཀྱིས། །རྒྱལ་བའི་ཡེ་ཤེས་མཐོང་འགྱུར་ཞིང༌། །མིག་ཤེས་ཡུལ་ན་གཟུགས་ཉིད་དམ། །རྣམ་པ་དེ་ཕྱིར་བྱས་སོགས་རྒྱུད། །རྒྱལ་དང་སེམས་ཅན་རྒྱུད་གཅིག་འགྱུར། །དེ་ལྟས་ཀུན་རྫོབ་བདེན་པ་སྟེ། །སངས་རྒྱས་གཉིས་སུ་ཐལ་མིན་ནམ། །གཅིག་ན་ཆོས་ཀྱི་སྐུར་འགྱུར་རོ། །ལྷ་མིག་གཅིག་པུས་ཀུན་ཤེས་སོ། །སངས་རྒྱས་གཅིག་ཉིད་ལུང་དུ་གསུངས། །རྒྱལ་ཡོང་གཟུགས་མེད་ཡོད་མེད་གཉིས། །འགལ་བ་མི་ཟད་སྨྲ་དེ་བླུན། །གཟུགས་སྐུ་སྐྱེས་བུར་འདོད་པ་ནི། །གཞུང་ལུགས་མ་ཀླགས་བློ་རྩིང་པ། །སྐྱེས་བུར་དབང་པོ་སོགས་འདོད་པ། །ཐེག་ཆེན་འདི་ལ་
གདོན་ཆེན་པོ། ། སེམས་ཅན་ཀྱང་དེ་མ་ཡིན་ན། །བླུན་པོའི་སྤྱོད་པ་མུ་མེད་དོ། །ཡེ་ཤེས་མི་ལྡན་པར་འགྱུར་ན། །གདོང་ལས་མེ་ལོང་གཟུགས་འབྱུང་ཡང༌། །དེ་མིན་དེ་ལ་གདོང་ཅི་ཡོད། །དེ་ལྟར་འདི་ལ་དེ་མེད་དོ། །ངན་སེམས་ཁྲག་ཕྱུང་ཅི་ཞེ་ན། །རྒྱལ་ལ་དམིགས་ཤིང་ལས་རྫོགས་པས། །གནོད་དེ་ཁམས་གསུམ་སེམས་ཙམ་ཡང༌། ། དགེ་དང་སྡིག་པས་འགྲོ་གཉིས་བགྲོད། །དེ་ལྟ་བས་ན་རེ་ཞིག་འདིར། །ཡང་ན་ཕྱི་རོལ་དོན་དུ་སྨྲོས། །རང་བཟོ་ཐེག་པ་ཆེན་པོར་མིན། །དེ་ཡང༌། དེ་བཞིན་གཤེགས་པའི་ཡོན་ཏན་དང་ཡེ་ཤེས་བསམ་གྱིས་མི་ཁྱབ་པ་ལ་འཇུག་པའི་མདོ་ལས། འཇམ་དཔལ་དེ་བཞིན་གཤེགས་པ་ནི་ཆོས་ཀྱི་སྐུ་སྟེ་དེ་ནི་མ་སྐྱེས་པ། མི་འབྱུང་བ། མི་འགགས་པའོ། །ཞེས་པ་དང༌། ཏིང་ངེ་འཛིན་རྒྱལ་པོར་ཡང༌། ནམ་མཁའ་འདྲ་ཞིང་རྡུལ་བྲལ་གཟུགས་འཆང་བ། །ཤེས་རབ་སྲས་པོ་ལུས་དང་མཚན་མི་མངའ། །ཡོན་ཏན་རྒྱ་མཚོ་རབ་ཟབ་ཐུགས་རྗེ་ཅན། །མཚུངས་མེད་ཕྱག་ནི་བདག་གི་སྤྱི་བོར་བཞག །ཅེས། སངས་རྒྱས་ལ་རྡུལ་ལས་གྲུབ་པ་དང༌། ལུས་ཀྱི་སྐྱེ་མཆེད་མེད་པར་བཤད་པ་དང༌། གང་དག་ང་ལ་གཟུགས་སུ་མཐོང༌། །གང་དག་ང་ལ་སྒྲར་ཤེས་པ། །ལོག་པའི་ལམ་དུ་ཞུགས་པ་སྟེ། །སྐྱེ་བོ་དེ་དག་ང་མི་མཐོང༌། །སངས་རྒྱས་རྣམས་ནི་ཆོས་ཀྱི་སྐུ། །ཞེས་དང༌། བསྟན་བཅོས་ལས་ཀྱང༌། མདོའི་རྗེས་སུ་འབྲངས་ཏེ། ཇི་ལྟར་བཻ་ཌུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། །དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོ་སྐུ་
ཡི་གཟུགས་བརྙན་འཆར། །ཞེས་གདུལ་བྱའི་སེམས་ཀྱི་སྣང་བར་གསལ་བར་བཤད་ཅིང༌། དེ་དག་ལ་སོགས་པ་འཁོར་ལོ་བར་པ་དང་ཐ་མའི་མདོ་སྡེའི་ལུང་འབྱམས་ཀླས་པ་དང་འགལ་བར་འགྱུར་ལ། དེ་དག་དགོངས་པ་ཅན་ནོ་ཞེ་ན་དེ་ལྟར་སྟོན་པའི་ལུང་མེད་ཅིང༌། དེར་མ་ཟད་གཟུགས་ཀྱི་སྐུ་སངས་རྒྱས་དངོས་ཡིན་པར་སྟོན་པ་ཙམ་གྱི་ལུང་ཡང་བསྟན་བཅོས་རྣམ་པར་དག་པ་ལས་ཀྱང་མ་མཐོང་ན། ཞལ་ནས་གསུངས་པ་ལྟ་ཅི་ཞིག སྔགས་ཀྱི་ཐེག་པ་འདིར་ཡང༌། ཁོང་སྟོང་ཁྱོད་ཀྱི་སྐུ་ལ་མེད། །ཤ་དང་རུས་པ་ཁྲག་མེད་པས། །ནམ་མཁའ་ལ་ནི་འཇའ་ཚོན་ལྟར། ཁྱོད་ཀྱི་སྐུ་ནི་སྟོན་པར་མཛད། །ཅེས་དང༌། དག་པའི་སེམས་ནི་བཟུང་གྱུར་ན། །རྡོ་རྗེའི་ལུས་ནི་རྣམ་སྒོམ་པས། ། བརྟན་ལུས་ཁོང་སྟོང་མ་ཡིན་པ། །རྡོ་རྗེའི་སྐུ་ནི་ངེས་ཐོབ་འགྱུར། །ཞེས་རྒྱུན་ཆད་པ་མེད་པ་དང་ཁོང་སྟོང་མ་ཡིན་པ་དང་ཤ་ཁྲག་སོགས་ཀྱི་རྣམ་པ་རྡོ་རྗེའི་སྐུ་ལ་གཏན་མི་མངའ་བར་གསུངས་ལ། མཆོག་གི་སྤྲུལ་པའི་སྐུ་རྣམས་ལ་ནི། དེ་དག་མངའ་སྟེ་མྱ་ངན་ལས་འདའ་བ་དང༌། སྐུ་སྙུན་པོ་དང༌། སྐུ་མཚལ་དབྱུང་བར་བསྟན་པ་བཞིན་ནོ། །དེ་ལྟ་ན་ཡང་ངེས་པ་ལྔ་ལྡན་གྱི་ལོངས་སྤྱོད་རྫོགས་པའི་སྐུ་ནི་སངས་རྒྱས་རང་སྣང་གི་རྡོ་རྗེའི་སྐུའོ་སྙམ་ན། དེ་ཡང་སྤྱིར་རྒྱུན་མི་འཆད་པར་ནི་བཞག་ཏུ་རུང་མོད་ཀྱི་གདུལ་བྱ་གཅིག་ལ་བལྟོས་ནས་ནི་རྒྱུན་མི་འཆད་པ་མ་ཡིན་ཏེ། བདག་ཉིད་མངོན་པར་རྫོགས་པར་སངས་རྒྱས་པའི་ཚེ། བདག་ཉིད་ལོངས་སྤྱོད་རྫོགས་པའི་སྐུར་སྣང་གི་ཕྱི་རོལ་གྱི་སྟོན་པ་ངེས་པ་ལྔ་ལྡན་གྱི་སྣང་བ་
འགག་པ་ཡིན་ཅིང༌། གཞན་ཡང་སྐུ་དེ་གཉིས་ལ་སྐབས་འདིར་རྣམ་པར་དབྱེ་བར་མི་འཐད་དོ། །གལ་ཏེ་བླ་ན་མེད་པའི་བྱང་ཆུབ་ཐོབ་ནས་ཀྱང་སྔར་གྱི་ལོངས་སྐུའི་རྣམ་པ་དེ་ཉིད་རྒྱུན་མི་འཆད་པར་སྣང་ན་ལོངས་སྐུ་གཉིས་སུ་ཐལ་བར་འགྱུར་ཞིང༌། མེད་ཀྱང་སྣང་བ་དང༌། ཡོད་ཀྱང་མི་སྣང་བ་ནི་རྒྱལ་བ་ལ་ཡོད་པར་ཁྱེད་ཅག་ཀྱང་མི་འདོར་གྲང༌། གཞན་ཡང་སྔར་ཡོད་པ་ལས་ཕྱིས་མེད་པར་གྱུར་ན་རྒྱུན་ཆད་པར་འགྱུར་བ་དང༌། སྔོན་ཉིད་ནས་ཀྱང་མེད་པ་གསལ་སྣང་ཡིན་ན་ནི་སངས་རྒྱས་སུ་ཅི་ལྟར་འགྱུར། འོན་ཏེ་ཁོང་སྟོང་མ་ཡིན་པ་སོགས་ཀྱི་ལུང༌། དོན་ལ་མེད་པ་ཡིན་གྱི་ཚུལ་སྟོན་པ་མི་འགལ་ཏེ། འཕགས་པ་ལྷས། ཇི་ལྟར་ཕྱོགས་བཅུར་བཞུགས་པའི་རྒྱལ་དབང་པོ། །དེའི་སྐུ་ལ་རྐང་རུས་ཤ་མེད་ཀྱང༌། །སེམས་ཅན་ཕན་ཕྱིར་རིང་སྲེལ་འཇོག་པར་མཛད། །སྤྲུལ་པའི་སྐུ་ཡི་བྱ་བ་མཛད་པ་ལྟར། །ཞེས་པ་ལྟར་ལོངས་སྤྱོད་རྫོགས་པའི་སྐུ་ལ་དེ་ལྟར་མི་མངའ་ཡང༌། སྤྲུལ་པའི་སྐུ་ལ་སྣང་བ་ནི་སྤྲུལ་པ་ཡིན་ནོ་ཞེ་ན། དེ་ལྟར་སྤྲུལ་པ་ཡིན་པ་ཉིད་ཀྱི་སྐྱེས་བུ་མ་ཡིན་པར་གྲུབ་བོ། །དེའི་ཕྱིར་སངས་རྒྱས་ཅི་ལྟར་ཡིན། སྤྲུལ་པའི་སྐྱེས་བུ་ཞེས་བཤད་པ་མ་ཡིན་ནམ། དེ་ལྟ་ན་ནི་སྒྱུ་མའི་སྐྱེས་བུ་ཡང༌། བཤད་པས་སྒྱུ་མ་ཡང་སྐྱེས་བུར་ཐལ་བར་གྱུར་རོ། །དོན་སྨྲ་བ་རྣམས་ཀྱང༌། གཟུགས་ཀྱི་སྐུ་ནི་སངས་རྒྱས་དངོས་སུ་མི་འདོད་ཅིང༌། ནོར་བུ་དང་ཟ་མ་ཏོག་གི་དཔེས་ཡེ་ཤེས་ཆོས་ཀྱི་སྐུ་ཁོ་ན་སངས་རྒྱས་དངོས་སུ་འདོད་ན་ཁྱེད་ཅག་ནི་དེ་བས་ཀྱང་དམན་པ་ཞིགགཞན་ཡང་ཅི་གཟུགས་ཀྱི་སྐུ་ནི་བེམ་པོའམ་ཤེས་པའམ་དེ་དག་གི་ཁྱད་པར་ལ་
གདགས། གསུམ་པ་ལྟར། གཉིས་ཚོགས་པའི་ཆ་ཙམ་མམ་གཉིས་ཀ་མ་ཡིན་ན་ནི། བཏགས་ཡོད་ཙམ་དུ་ཐལ་བ་དང༌། དངོས་མེད་ནི་གདུལ་བྱ་ལ་སྣང་བ་དང་འགྲོ་བའི་དོན་བྱེད་པར་མི་རུང་བ་དང༌། འཇིག་རྟེན་པའི་བློས་རྣམ་པར་བརྟགས་པའི་ཆོས་གཅིག་སངས་རྒྱས་སུ་ཁས་བླངས་པས་ཤིན་ཏུ་ཐ་ཆད་པའི་ཕྱིར་རོ། །གཉིས་པ་ལྟར་ན་ཡང༌། བེམ་པོ་དང་སངས་རྒྱས་ཀྱི་གཞི་མཐུན་པ་ཁས་བླངས་པས་འགལ་བ་ལ་མ་འཁྲུལ་བའི་ཚད་མ་ཡ་མཚན་ཆེ་སྟེ། བེམ་པོ་དང་ཤེས་པ་འགལ་བའི་ཕྱིར་རོ། །དང་པོ་ལྟར་ན་སེམས་ཅན་གྱི་རྒྱུད་དུ་གཏོགས་སམ་སངས་རྒྱས་ཀྱི་རྒྱུད་དུ་གཏོགས། དང་པོ་ལྟར་ན་ནི་སེམས་ཅན་དང་སངས་རྒྱས་རྒྱུད་གཅིག་པར་འགྱུར་བ་དང༌། སངས་རྒྱས་དེ་ཡང་ཀུན་རྫོབ་སླུ་བའི་ཆོས་ཅན་དུ་ཐལ་བ་དང༌། སྒྲིབ་པ་དང་བཅས་པར་ཐལ་བའམ། ཡང་ན་སེམས་ཅན་དེ་ཉིད་སངས་རྒྱས་ཡིན་པར་ཐལ་བ་དང༌། ཆོས་ཀྱི་སྐུ་རྒྱུད་ལྡན་ཡིན་པར་ཡང་ཐལ་བར་འགྱུར་ཏེ། གཟུགས་སྐུའི་རྒྱུད་ལ་ཆོས་སྐུ་ཡོད་པར་ཁྱེད་ཉིད་འདོད་པའི་ཕྱིར་རོ། །གལ་ཏེ་གཉིས་པ་ལྟར་ན་ཡང་སངས་རྒྱས་ཀྱི་ཡེ་ཤེས་སེམས་ཅན་གྱིས་མཐོང་བར་ཐལ་ཞིང༌། མཚན་དང་དཔེ་བྱད་སོགས་མིག་ཤེས་ཀྱི་མཐོང་ན་ནི། གཟུགས་སམ་གཟུགས་ཀྱི་རྣམ་པ་གང་དུ་འདོད། དང་པོ་ལྟར་ན་ནི་སྐྱོན་སྔར་བསྟན་ཟིན་ལ། ཕྱི་མ་ལྟར་ན་ནི་སེམས་ཅན་གྱི་རྒྱུད་དུ་ཁས་བླངས་པ་ཡིན་ནོ། །གཞན་ཡང་སངས་རྒྱས་ནི་གཉིས་མེད་ཀྱི་ཡེ་ཤེས་ཡིན་ཅིང༌། དེ་ཡོད་པར་འདོད་ལ་གཟུགས་སོགས་ཀུན་རྫོབ་ནི་མེད་པར་འདོད་པས། ཡོད་
མེད་གཉིས་དོན་གཅིག་ལ་འདུས་པར་འདོད་པས་ཤིན་ཏུ་ནོངས་པ་དང༌། སྐུ་གཉིས་ངོ་བོ་ཐ་དད་པ་སངས་རྒྱས་སུ་ཁས་བླངས་པས་གང་ཟག་གཅིག་རྣམ་པར་གྲོལ་བ་ལ་ཡང་སངས་རྒྱས་ངོ་བོ་ཐ་དད་པ་དུ་མ་འབྱུང་བར་ཐལ་ཞིང༌། ལུང་ལས་ནི་གང་ཟག་དུ་མ་ཡང་སངས་རྒྱས་པའི་ཚེ་གཅིག་ཏུ་གསུངས་པ་དང༌། དེ་བཞིན་གཤེགས་པའི་ལྷའི་སྤྱན་གཅིག་པོས་ཤེས་བྱ་ཐམས་ཅད་མཁྱེན་པར་གསུངས་པ་སོགས་ཡེ་ཤེས་ངོ་བོ་གཉིས་པ་མེད་པར་གསུངས་པ་དང༌། བསྟན་བཅོས་ལས་ཀྱང༌། སངས་རྒྱས་ཉིད་དུ་ཞུགས་ན་དེ་དག་ཀུན། །རྟེན་ཀྱང་གཅིག་ཅིང་རྟོགས་པ་ཆེ་ལ་གཅིག །ཞེས་སོགས་རྣམ་པ་མང་པོ་དག་དང་འགལ་ཆེས་སོ། །གཞན་ཡང་གཟུགས་ཀྱི་སྐུ་ནི་སྨོན་ལམ་གྱི་སྤྲུལ་པ་ཡིན་གྱི་འབྱུང་པོ་རྣམས་ཀྱིས་གཟུགས་ཡོངས་སུ་བསྒྱུར་བ་ལྟ་བུ་མ་ཡིན་པས་སྐྱེས་བུར་མི་འགྱུར་ཞིང༌། དེའི་ཕྱིར་རྣམ་མཁྱེན་རྒྱུད་མི་ལྡན་ཐལ་བར་འཕེན་པ་ནི་ཁོ་བོ་ཅག་འདོད་པར་བྱེད་དེ། རྣམ་པ་ཐམས་ཅད་མཁྱེན་པ་ནི་སངས་རྒྱས་རང་སྣང་གི་སྐུ་གཉིས་ཁོ་ན་ལ་བདག་ཉིད་གཅིག་པའི་ཚུལ་གྱི་ལྡན་ཏེ། ཕྲག་ཁུར་ཐོགས་པའི་ཚུལ་གྱིས་ནི་མ་ཡིན་ནོ། །གཞན་ཡང་སྐྱེས་པའི་ངོ་བོ་དབང་པོ་དྲུག་ལ་སོགས་པར་འདོད་པ་ནི། ཐེག་པ་ཆེན་པོ་འདི་ལ་མི་བཟད་པའི་གདོན་ཡིན་ཏེ། འདིས་ནི་དབང་པོ་རྣམས་ཡང་སྲིད་པའི་ལེན་པར་བྱེད་ཅེས་ལོག་པའི་ཆོས་བསྟན་པ་ལ་བསྲེ་བར་བྱེད་པའི་སྙད་དོ། །དེ་བས་ན་སེམས་ཅན་ཀྱང་ཀུན་གཞིའི་རྣམ་པར་ཤེས་པ་ལ་བཞག་དགོས་པ་ཡིན་ན། སངས་རྒྱས་ཀྱི་སྐྱེས་བུ་གཟུགས་ཀྱི་སྐུར་འདོད་པ་ནི་ག་ལ་ཞིག ཆོས་ཀྱི་སྐུ་ལས་གཟུགས་ཀྱི་སྐུ་འབྱུང་བ་ནི་ཡིན་
མོད་ཀྱི། གདོང་ལས་མེ་ལོང་གི་གཟུགས་བརྙན་འབྱུང་ཡང་གཟུགས་བརྙན་གདོང་མ་ཡིན་ཞིང་དེའི་རྒྱུད་ལ་དེ་མེད་དོ། །དེ་སངས་རྒྱས་མ་ཡིན་ན་དེ་ལ་ངན་སེམས་ཀྱི་ཁྲག་བྱུང་བས་དེ་བཞིན་གཤེགས་པ་ལ་ངན་སེམས་ཀྱི་མཚལ་ཕྱུང་བར་ཅིའི་ཕྱིར་འགྱུར། དེ་ནི་འཇིག་རྟེན་ལ་གྲགས་པའི་དབང་དུ་མཛད་པ་ཡིན་ཏེ། གཞན་དུ་ན་དེ་བཞིན་གཤེགས་པ་ལ་ལྟ་ཞོག ཕྱིར་མི་ལྡོག་པ་ཐོབ་པའི་བྱང་ཆུབ་སེམས་དཔའ་ལ་ཡང་བདུད་ཀྱི་ཚོགས་ཐམས་ཅད་ཀྱིས་ལྟ་བར་ཡང་མི་ནུས་ན་དེ་བཞིན་གཤེགས་པ་ལ་སུ་ཞིག་གི་སྐུ་མཚལ་འབྱིན་ཏེ། རི་བོང་གིས་རྭས་བསྣུན་ན་མཚམས་མེད་པར་འགྱུར་ཞེས་བྱ་བར་མི་འགྱུར་རམ། དེ་བས་ན་གཟུགས་ཀྱི་སྐུ་དེ་ཡང་འཇིག་རྟེན་ལ་དེ་བཞིན་གཤེགས་པར་གྲགས་སོ། །མཚམས་མེད་པར་ནི་འགྱུར་ཏེ། སངས་རྒྱས་ལ་དམིགས་ཤིང་ལས་དེ་ཉིད་ཟིན་པའི་ཕྱིར་དེར་འགྱུར་བའི་རྒྱུ་རྐྱེན་མ་ཚང་བ་མེད་དོ། །དཔེར་ན་ཁམས་གསུམ་པོ་ཐམས་ཅད་རང་སེམས་ཀྱི་སྣང་བ་ཡིན་ཀྱང༌། དེ་དག་ལ་དམིགས་ནས་ལས་བྱས་པས་འབྲས་བུ་མྱོང་བར་འགྱུར་བ་བཞིན་ནོ། །གཟུགས་ཀྱི་སྐུ་རྒྱལ་པའི་རྒྱུད་དུ་གཏོགས་ཤིང་ཕྱི་རོལ་གྱི་དོན་དུ་སྨྲ་ན་ནི། དྲང་དོན་གྱི་མདོ་རྣམས་ཀྱི་རྗེས་སུ་འབྲངས་ལ་དོན་སྨྲ་པ་རྣམས་ཀྱི་ལུགས་རྟེན་ཅིག རང་བཟོའི་སྡེ་སྣོད་བརྩམས་པར་མི་བྱའོ། །འོ་ན། འཇིག་རྟེན་དག་དང་དཀྱིལ་འཁོར་དུ། །སྣང་ལ་ལྷ་དང་མི་རྣམས་ཀྱི། །རྣམ་པ་ཀུན་ཏུ་མི་མཐོང་ངོ༌། །ཞེས་སྐུ་གཉིས་གཟུགས་ཀྱི་སྐུར་བཤད་པ་མ་ཡིན་ནམ་ཞེ་ན། འདིའི་སྐུ་གཉིས་ལ་སྣང་ཚུལ་དང་གནས་ཚུལ་གྱི་སྐུ་སོ་སོར་འབྱེད་པ་སྔོན་གྱི་བླ་མ་རྣམས་
ཀྱི་ལུགས་ནི་ལེགས་པ་ཡིན་ཏེ། ཐུན་མོང་མ་ཡིན་པའི་རྐྱེན་སངས་རྒྱས་ལས་བྱུང་བ་ཡིན་པའི་ཕྱིར། གཟུགས་སྐུ་ལ་ཡང་སངས་རྒྱས་ཀྱི་སྐུ་ཞེས་པ་བཏགས་མིང་ནི་འཇུག་ལ། དེས་ན་སངས་རྒྱས་དང་འབྲེལ་བའི་སྐུ་ཐམས་ཅད་སྐུ་གསུམ་དུ་བསྡུས་པའི་ཚེ་གཟུགས་སྐུ་གཉིས་ཀྱང་ལོངས་སྤྲུལ་གཉིས་སུ་བསྡུ་སྟེ། ལོངས་སྤྱོད་རྫོགས་པའི་ཡེ་ཤེས་དང་སྤྲུལ་པའི་ཡེ་ཤེས་གཉིས་ལས་དེ་དག་བྱུང་བའི་ཕྱིར། ཐུན་མོང་མིན་པའི་རྒྱུའི་ཕྱིར། དེའི་ཐ་སྙད་དབང་པོས་བྱས། །ཞེས་པ་ལྟར་ཐུན་མོང་མ་ཡིན་པའི་རྒྱུའི་སྒོ་ནས་ལོངས་སྤྲུལ་གྱི་སྐུར་མིང་འདོགས་པ་ཡིན་ལ། དངོས་བཏགས་མ་ཕྱེ་བའི་ཚེ་ན་དེ་དང་དེ་ཡིན་ནོ། །ཤིན་ཏུ་སྤྲོས་པས་ཆོག་གོ །འོན་ཀྱང་ལམ་འདི་ལ་ལོངས་སྤྱོད་རྫོགས་པ་དང་སྤྲུལ་པའི་སྐུར་བསྲེ་བའི་མན་ངག་རྣམས་ནི་གཅིག་ལ་ཡང༌། སྣང་ཚུལ་དང་གནས་ཚུལ་གྱི་སྐུ་གཉིས་ཀ་དང་མཐུན་དགོས་ཏེ། འདིའི་གནད་ཞིབ་ཏུ་ཤེས་དགོས་པ་ཞིག་ཡོད་དོ། །གཉིས་པ་ཡན་ལག་བདུན་ཚང་ཚུལ་ལ། དབང་བཞི་སོ་སོ་ལ་སྦྱར་བ། བསྐྱེད་རིམ་ལ་སྦྱར་བ། གནས་སྐབས་ཀྱི་རྫོགས་རིམ་ལ་སྦྱར་བ། མཐར་ཐུག་གི་རྫོགས་རིམ་ལ་སྦྱར་བ། སངས་རྒྱས་ཀྱི་ཡེ་ཤེས་ལ་སྦྱར་བ་སྟེ། འདི་དག་རྣམས་ནི་རྒྱ་ཆེར་གཞན་དུ་བྲི་བར་བྱའོ། གསུམ་པ་ལ། གཞི་ལམ་འབྲས་བུ་གསུམ་ལས། གཞིའི་དེ་ཉིད་བདུན་ནི། སེམས་ཉིད་རང་བཞིན་སྟོང་པ་ཉིད་ནི་ཟབ་པ། སྣང་བ་ཐམས་ཅད་དུ་ཁྱབ་པའི་ཕྱིར་རྒྱ་ཆེ་བ། ཉེ་རིང་མེད་པའི་ཕྱིར་ཁྱབ་པ། རྒྱུན་མི་འཆད་ཅིང་རང་བཞིན་འགྱུར་བ་མེད་པའི་ཕྱིར་རྟག་པ། གསལ་བའི་འཆར་སྒོ་མ་འགགས་པ་ལུས་སུ་སྣང་བའི་ཕྱིར་ཡེ་ཤེས་ཀྱི་སྐུ། སྣང་སྟོང་དབྱེར་མེད་པའི་ཕྱིར།
ཟུང་འཇུག ཡུལ་ཡུལ་ཅན་རོ་གཅིག་ཏུ་ཡེ་ནས་འདྲེས་པའི་ཕྱིར་བདེ་བ་ཆེན་པོའོ། །ལམ་ནི། གཞི་ལ་དེ་ལྟར་གནས་པ་དེ་ཉིད་མངོན་དུ་འགྱུར་པའི་ཕྱིར་གཞི་འབྲས་གཉིས་ཀ་དང་རྣམ་པ་མཐུན་པར་སྒོམ་པ་ཡིན་ནོ། །དེ་ཡང་རང་བཞིན་མེད་པར་སྒོམ་པ་ནི་ཟབ་པ་དང༌། དེ་ཉིད་དངོས་པོ་ཐམས་ཅད་དུ་འཆར་ཡང་རང་རིག་པའི་བདག་ཉིད་དུ་འཆར་བ་ལ་བསླབ་པ་ནི་རྒྱ་ཆེ་བ་དང༌། དེ་ཉིད་དངོས་པོ་ཐམས་ཅད་ལ་ཁྱབ་པར་བྱེད་པ་ནི་ཁྱབ་པ་དང༌། སེམས་ཀྱི་རང་བཞིན་འགྱུར་བ་མེད་པ་ལ། སློབ་པ་ནི་རྟག་པ་དང༌། ལྷའི་དཀྱིལ་འཁོར་དུ་འཆར་བ་ལ། སླབ་པ་ནི་ཡེ་ཤེས་ཀྱི་སྐུ་དང༌། ལྷ་སྐུའི་སྣང་བ་དང་བདེ་སྟོང་རོ་གཅིག་ཏུ་བསྲེ་བ་ནི་ཟུང་འཇུག་དང༌། ཞུ་བདེ་ལ་བརྟེན་ནས་རང་བཞིན་ལྷན་སྐྱེས་མཚོན་པར་བྱེད་པས་མི་འགྱུར་བའི་བདེ་བ་སྟེ། འདི་རྣམས་ལ་དབང་དང་བསྐྱེད་རྫོགས་ལ་སོགས་པའི་དབྱེ་བས་སོ་སོར་སྒོམ་ཚུལ་རྒྱས་པར་སྦྱོར་དགོས་མོད་ཀྱི་ཚེགས་ཆུང་བའི་ཕྱིར་དང་ཡི་གེ་མངས་ཀྱི་དོགས་སོ། །གསུམ་པ་འབྲས་བུ་སངས་རྒྱས་ཀྱི་ཡེ་ཤེས་ལ་སྦྱར་བ་ནི། ཇི་ལྟ་བའི་གནས་ལུགས་སྤྲོས་བྲལ་མཁྱེན་པའི་ཕྱིར་ཟབ་པ། ཇི་སྙེད་པ་རྟེན་ཅིང་འབྲེལ་འབྱུང་ཐམས་ཅད་མཁྱེན་པའི་ཡེ་ཤེས་ནི་རྒྱ་ཆེ་བ། གནས་ཚུལ་གྱི་སྐུ་གསུམ་པོ་ནམ་མཁའི་མཐས་གཏུགས་པ་ལ་ཉེ་རིང་མེད་ཅིང༌། གཟུགས་སྐུ་གཉིས་ཀྱང་མཐའ་ཡས་པའི་འཇིག་རྟེན་དུ་མཐའ་ཡས་པའི་གདུལ་བྱ་ལ་ནམ་ཞིག་དུས་ལ་བབ་པ་ན་དེ་ཉིད་དུ་འབྱུང་བར་འགྱུར་བ་སོགས་དངོས་པོ་ཐམས་ཅད་ལ་གཅིག་ཅར་ཁྱབ་པ་ལྟར་གནས་པས་ན་ཁྱབ་པའམ་གར་ཡང་ཕྱིན་པ་ཞེས་བྱའོ། །སྐུ་གསུམ་པོ་ལ་འཇིག་པ་མེད་ཅིང་ངོ་བོ་ནམ་དུ་ཡང་འགྱུར་བ་མེད་པ་ནི་
རྟག་པ། རང་སྣང་དང་དེའི་རྐྱེན་གྱིས་གཞན་ལའང་ཁ་སྦྱོར་ཡན་ལག་བདུན་ལྡན་དུ་སྣང་བ་ནི་ཡེ་ཤེས་ཀྱི་སྐུ་ཡིན་ལ། གདུལ་བྱ་རྣམས་ལ་སྤྲུལ་པའི་སྐུ་སྣ་ཚོགས་སུ་སྣང་བ་ཡང་འདིའི་ཁོངས་སུ་བསྡུའོ། །སྐུ་དང་ཡེ་ཤེས་དབྱེར་མེད་པ་ནི་ཟུང་འཇུགརང་བཞིན་ལྷན་སྐྱེས་མི་འགྱུར་བའི་བདེ་བ་རྟེན་བརྟེན་པ་དབྱེར་མེད་དུ་གྱུར་པ་ནི་བདེ་བའོ། །གཉིས་པ་གཞུང་གི་དོན་ལ། བཤད་པ་ལ་འཇུག་པའི་བྱ་བ་དང༌། བཤད་པ་ཉིད་ཉེ་བར་དགོད་པ། བཤད་པ་མཐར་ཕྱིན་པའི་བྱ་བའོ། །དང་པོ་ལ། མཆོད་པར་བརྗོད་པ་དང༌། བརྩོམ་པར་དམ་བཅའ་བའོ། །དང་པོ་ནི། སློབ་དཔོན་དང་འགྲོ་བའི་བླ་མ་སངས་རྒྱས་དབྱེར་མེད་པ་ལ་བཏུད་ཅེས་པའོ། །དེ་ལྟར་ཕྱག་འཚལ་ནས་ཅི་ཞིག་བགྱིད་ན། གཉིས་པ་ནི། རྒྱུད་སྡེ་རྣམས་ནས་དེ་ཁོ་ན་ཉིད་ཅེས་གསུངས་པ་དེ་རྣམས་རབ་ཏུ་གསལ་བར་བཤད་པར་བྱའོ་ཞེས་པའོ། །གཉིས་པ་ལ། དེ་ཁོ་ན་ཉིད་ཀྱི་བསྔགས་པ་དང༌། རྒྱུད་ལས་དེ་ཁོ་ན་ཉིད་གསུངས་པའི་རྣམ་གྲངས་དང༌། སྐབས་དོན་དེ་ཉིད་བདུན་རྒྱས་པར་བཤད་པ་དང༌། ཞར་བྱུངས་དང་ལམ་གྱི་རྣམ་པར་བཞག་པའོ། །དང་པོ་ནི། ཐུབ་པ་ཆེན་པོའི་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞི་པོ་རྣམས་ཐམས་ཅད་ཐོས་ཀྱང༌། དེ་དག་གི་དེ་ཁོ་ན་ཉིད་གང་གིས་མི་ཤེས་པ་དེའི་ཐོས་པ་དེ་ཐམས་ཅད་འབྲས་བུ་མེད་པ་ཉིད་ཡིན་ཏེ། དེ་རྣམས་ཀྱི་རྣམ་པར་གྲོལ་བའི་ལམ་མི་ཤེས་པའི་ཕྱིར་རོ། །དེ་སྐད་དུ་ཡང༌། མདོ་ལས། ཇི་ཙམ་མང་དུ་སྨྲ་བྱེད་པ། །དེ་དག་དམ་ཆོས་འཛིན་པ་མིན། །གང་དག་འདི་ན་ཐོས་ཉུང་ཡང༌། །ལུས་ཀྱི་ཆོས་དག་མངོན་སུམ་བྱས། །རིམ་ལྔ་ལས་ཀྱང༌། བདག་ལ་བྱིན་གྱིས་བརླབ་པའི་རིམ། །གང་གིས་བརྙེད་པར་མ་གྱུར་པ། །
མདོ་སྡེ་རྒྱུད་དང་རྟོག་པ་ལ། །དེ་ཡིས་ངལ་བ་དོན་མེད་ཡིན། །ཞེས་པ་ལྟར་རོ། །དེ་ལ་གཞུང་ཚིགས་བཅད་གཅིག་པོ་འདི་ནི། ལྷ་མོ་བཞིས་ཞུས་པའི་རྒྱུད་ལས་འབྱུང་བ་ཡིན་ནོ། །དེ་བས་ན་དེ་ཁོ་ན་ཉིད་ནི་རྒྱུད་ཐམས་ཅད་ཀྱི་དོན་གྱི་བཅུད། སངས་རྒྱས་ཀྱི་གོ་འཕང་ཚེ་འདི་ཉིད་ལ་འགྲུབ་པའི་ཐབས་བླ་ན་མེད་པ་ཡིན་པས་བཅུད་ལེན་དམ་པ་དང་མཚུངས་ཏེ། དེའི་ཕྱིར་ཚིག་རྒྱ་ཆེན་པོའི་མདོ་རྒྱུད་དག་ལས་སྙིང་པོའི་དོན་དེ་ཁོ་ན་ཉིད་ཡང་དག་པར་ལེན་འོས་པ་ཡིན་ནོ། །གཉིས་པ་ལ། དེ་ཁོ་ན་ཉིད་གཅིག་པུར་བཤད་པ། དེ་ཉིད་གཉིས་སུ་བསྟན་པ། བཞིར་བསྟན་པ། བཅུ་བཞིར་བཤད་པ། བདུན་དུ་བཤད་པ། རྣམ་གྲངས་ཐོར་བུ་པ་གཞན་བཤད་པ། དེ་ཉིད་བཅུ་གཉིས་སུ་བསྟན་པ་རྣམས་ལ། དང་པོ་ནི། དེ་ཁོ་ན་ཉིད་གཅིག་པུར་བཤད་པའི་དེ་ཁོ་ན་ཉིད་ནི། སྤྲོས་པ་ཐམས་ཅད་དང་བྲལ་བ། རང་གིས་རིག་པའི་མཚན་ཉིད་ཅན་ནི་སྟོང་པ་ཉིད་དེ། དེ་ལྟར་ཡང༌། སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་བའི་མཆོག །ཡང་དག་གྲུབ་པ་གཅིག་པུ་ཉིད། །ཇི་ལྟར་འདོད་པ་བཞིན་དུ་སྦྱར། ། རྟོག་པའི་ཆོ་ག་ཐམས་ཅད་ལ། །གྲུབ་པ་དམ་པ་མཆོག་གི་མཆོག །ཅེས་སངས་རྒྱས་མཉམ་སྦྱོར་གྱི་དགོངས་པ་སྟེ། སྔགས་དང་རྒྱུད་ཀྱི་སྦྱོར་བ་ཐམས་ཅད་དང༌། ལམ་སྒོམ་པ་ཐམས་ཅད་ལ་འདི་ཡོད་ན་གྲུབ་པ་ཀུན་གྱི་མཆོག་གི་ཡང་མཆོག་ཏུ་འགྱུར་ཞེས་པ་སྟེ། རྒྱུད་གཞན་རྣམས་སུ་ཡང་འདིའི་དོན་ཤིན་ཏུ་མང་ངོ༌། །གཉིས་པ་ནི། དེ་ཁོ་ན་ཉིད་ཅེས་གསུངས་པ་འགའ་ཞིག་རིམ་པ་གཉིས་ལ་བརྗོད་པར་བྱ་སྟེ། དེ་ཉིད་ཐོབ་པ་ཤིན་ཏུ་སྦེད་ཅེས་གསུངས་པ་ལྟ་བུ་སྟེ། འདི་ནི་དེ་ཉིད་ཅེས་གསུངས་
པའི་དོན་གཉིས་པའོ། །གསུམ་པ་ནི། དེ་ཉིད་ཅེས་གསུངས་པ་གཞན་ཁ་ཅིག་ནི། དཀྱིལ་འཁོར་གྱི་དེ་ཉིད་དང༌། ལྷའི་དེ་ཉིད་དང༌། སྔགས་ཀྱི་དེ་ཉིད་དང༌། ཡེ་ཤེས་ཀྱི་དེ་ཉིད་དེ་བཞི་པོ་ལ་ཡང་རབ་ཏུ་བརྗོད་པ་ཡོད་དོ། །འདི་ནི་འཁོར་ལོ་བདེ་མཆོག་གི་ལེའུ་གསུམ་པའི་དོན་ཏེ། །ཀྱེ་རྡོ་རྗེར་འདི་དང་ཅུང་ཟད་མི་འདྲ་བར་བཤད་ལ། བྱ་བའི་རྒྱུད་དུའང་མིང་ཕྱོགས་འདྲ་བར་བཤད་མོད་ཀྱི་དོན་ཁྱད་ཆེའོ། །བཞི་པ་ནི། འཁོར་ལོ་བདེ་མཆོག་ལེའུ་ལྔ་བཅུ་རྩ་གཅིག་པར། དེ་ཉིད་བཅུ་བཞི་བཤད་པ་ལས། དེ་དག་ནང་རྫོགས་རིམ་ལ་སྦྱར་ན་འདི་ལྟར་ཡིན་ཏེ། གང་ལ་གནད་དུ་བསྣུན་པའི་ལུས་ནི་གནས་ཀྱི་དེ་ཉིད་དང༌། ལྷའི་ཆ་ལུགས་སུ་འཇུག་པ་སྤྲོས་བཅས་ཀྱི་སྤྱོད་པ་ལ་སོགས་པ་སྤྱོད་པ་གསུམ་ནི་ཕྱག་རྒྱ་ལྔའི་དེ་ཉིད་དང༌། ཕྱག་རྒྱ་གསུམ་གྱི་བྷ་གས་བདེ་ཆེན་འདྲེན་པ་ནི་ཤེས་རབ་ཡན་ལག་གི་དེ་ཉིད་དང༌། བྱང་ཆུབ་ཀྱི་སེམས་ཁུ་བ་སྟེང་དུ་བཅིངས་པའི་སྦྱོར་བ་ནི་དེ་བཞིན་དུ་སྲུང་བའི་འཁོར་ལོའི་དེ་ཉིད་དང༌། གཡོན་དང་སྲོག་ཟླ་བའི་རླུང་དང༌། གཡས་དང་ཐུར་སེལ་ཉི་མའི་རླུང་དབུ་མར་དགག་པ་ཨཱ་ལི་ཀཱ་ལིའི་དེ་ཉིད་དང༌། བདག་གཉིས་མེད་པའི་དོན་གྱི། སྟོང་པ་ཉིད་སྒོམ་པ་ནི་སྟོང་པའི་དེ་ཉིད་དང༌། རྫོགས་རིམ་པའི་ཡེ་ཤེས་ཀྱི་སྐུ་རླུང་སེམས་ཙམ་གྱི་སྣང་བ་ལས་གྲུབ་པའི་སྒྱུ་མའི་སྐུ་ནི་སྒ་[སྒྲ་]ཚུལ་གྱི་དེ་ཉིད་དང༌། དེ་དག་འོད་གསལ་བར་འཇུག་པ་ནི་བསྡུས་པའི་རྣལ་འབྱོར་གྱི་དེ་ཉིད་དང༌། བྱང་ཆུབ་ཀྱི་སེམས་ཞུ་བ་ལུས་ཀྱི་གནས་རྣམས་སུ་ཕྱིན་པ་དགའ་བ་བཞིའི་རང་བཞིན་གྱི་ཁུ་བའི་བདེ་བ་ནི་བདུད་རྩི་ཚིམ་བྱེད་ཀྱི་དེ་ཉིད་དེ། འདིར་ལུས་བདེ་བ་ཞེས་གསུངས་པས་ངེས་པར་ཞུ་བདེའོ། །ཡང་དག་པའི་མཐའ་ལས་ལོངས་སྤྱོད་རྫོགས་པ་རྡོ་རྗེའི་སྐུར་བཞེངས་པ་མི་གནས་པའི་
མྱ་ངན་ལས་འདས་པ་ནི། མྱང་འདས་ཀྱི་དེ་ཉིད་དེ། འདི་གཅིག་པུ་འབྲས་བུའི་སྐབས་ལ་སྦྱར་ཞིང༌། དེ་ཡང་རྡོ་རྗེ་ལྟ་བུའི་ཏིང་ངེ་འཛིན་གྱི་སྒྲིབ་གཉིས་བག་ཆགས་བཅས་སྤངས་པས། སྡུག་བསྔལ་དང་ཀུན་འབྱུང་གཏན་ནས་ལོག་པའི་ཕྱིར་འཁོར་བར་མི་གནས། འཁོར་བའི་མཐའི་བར་དུ་སྐུ་གསུམ་རྒྱུན་ཆད་མེད་པས་འགྲོ་བའི་དོན་སྤྱོད་པས་ཞི་བ་ལ་མི་གནས་པ་ཡིན་ལ། དེ་གཉིས་ཡང་དག་པའི་མཐའ་དང་རྡོ་རྗེའི་ལུས་ཐོབ་པས་འགྲུབ་པ་ཡིན་ནོ། །རྩ་འཁོར་ལོ་རྣམས་ཀྱི་ལྟེ་བར་གནས་པའི་ཁམས་རྣམས་ཀྱི་དྭངས་མ་ནི་རང་གི་ཐིག་ལེ་སྟེ། དེ་ཕྱག་རྒྱའི་མཆོག་ཕྱག་རྒྱ་ཆེན་པོ་དང་སྦྱར་བའི་ཕྱག་རྒྱ་བཞི་པོ་གང་རུང་གིས་ལས་རླུང་འགགས་པའི་སྟོབས་ཀྱི་རང་གནས་སུ་བཅིངས་པ་ལག་མཆོད་ཀྱི་དེ་ཉིད་དང༌། ཉེ་རྒྱུ་སྤྱོད་པའི་གནས་སྐབས་གསུམ་དུ་རྒྱལ་བ་སངས་རྒྱས་རྣམས་ཀྱིས་དབང་བསྐུར་བ་ཐོབ་པས་ལྷན་ཅིག་སྐྱེས་པའི་མཆོག རིམ་པ་གསུམ་གནས་སྐབས་གསུམ་གང་ཡང་རུང་བར་མངོན་དུ་བྱེད་པ་ནི་དབང་བསྐུར་བའི་དེ་ཉིད་དང༌། མི་ཕྱེད་མ་ལ་སོགས་པ་རྩ་ཉི་ཤུ་རྩ་བཞིར་རྒྱུ་བའི་རླུང་རྣམས་འཇུག་པ་དང༌། གནས་པ་དང༌། དབང་དུ་བྱེད་པའི་རིམ་པས་དབུ་མར་ཐིམ་པ་ནི་གོ་ཆ་ཆེན་པོ་དེ་ཉིད་དང༌། དེར་མ་ཟད་དེ་བཞིན་དུ་རྡོ་རྗེའི་བཟླས་པ་དང༌། དེ་ལ་སོགས་པའི་སྟོབས་ཀྱི་རླུང་གནས་པ་དང༌། སྟོང་པ་ཉིད་ལ་ཐིམ་པ་རྣམས་ཀུན་རྫོབ་རྫོགས་རིམ་གྱི་སྔགས་དང༌། བདེ་བ་ཆེན་པོའི་ཡེ་ཤེས་ནི་དོན་དམ་པའི་སྔགས་ཀྱི་དེ་ཉིད་དང༌། ཡིད་མཚན་རྟོག་ལས་སྐྱོབ་པར་བྱེད་པའི་གཙོ་བོ་ཡིན་པའི་ཕྱིར་རོ། །དེ་དག་ནི་རྫོགས་པའི་རིམ་པའི་ཕྱོགས་ཡིན་གྱི་བསྐྱེད་པའི་རིམ་པ་ནི་འདིར་མ་བྲིས་སོ། །དེ་ཉིད་བཞི་དང་བཅུ་བཞི་དང་བཅུ་གཉིས་ལ་སོགས་པ་ནི། དེ་ཁོ་ན་ཉིད་གཉིས་
ལས་ཕྱཻ་བ་ཡིན་ཅིང། འཆད་པར་འགྱུར་པ་དེ་ཁོ་ན་ཉིད་བདུན་དུ་ནི། དེ་ཉིད་གཅིག་པུ་ཡང་དག་གྲུབ་པ་དང༌། རིམ་པ་གཉིས་ཀར་འདུས་པ་ཡིན་ནོ། །ལྔ་པ་ལ། དེ་ཉིད་བདུན་དངོས་བཤད་པ། དེའི་ཡན་ལག་རྣམས་བཤད་པ། དེ་རྣམས་ཀྱི་རབ་དབྱེ་བཤད་པ་གསུམ་ལས། དང་པོ་ལ་བཤད་པ་དང་དོན་བསྡུ་ལས། དང་པོ་ནི། ཟབ་པ་དང༌། རྒྱ་ཆེ་བ་དང༌། ཁྱབ་པ་དང༌། རྟག་པ་དང༌། ཡེ་ཤེས་ཀྱི་སྐུ་དང༌། ཟུང་དུ་འཇུག་པ་དང༌། མི་འགྱུར་བའི་བདེ་བ་སྟེ་ཡེ་ཤེས་ཀྱི་རང་བཞིན་ངོ་བོ་གཅིག་ལས། ཆད་རྣམ་པར་ཕྱེ་བས་བདུན་དུ་བསྒྲགས་པ་སྟེ་བཤད་ལ། ངོ་བོ་ཙམ་བསྟན་པ་ནི། དང་པོའི་རྒྱུད་དེ་མདོར་བསྡུས་པ་བརྗོད་པ་ཡིན་ལ། རེ་རེ་ལ་ཡང་གཞི་གང་ཡིན་པ་དང༌། རིགས་མཐུན་རྒྱུ་གང་ཡིན་པ་དང༌། མངོན་དུ་བྱེད་པའི་རྐྱེན་ནམ་ཐབས་གང་ཡིན་པ་དང༌། དམིགས་པ་གང་ཡིན་པ་དང༌། རྣམ་པའམ་འཛིན་སྟངས་གང་ཡིན་པ་དང༌། བྱེད་པ་གང་ཡིན་པ་དང༌། ལས་གང་ཡིན་པ་དང༌། འབྲས་བུ་གང་ཡིན་པ་སྟེ། དོན་བརྒྱད་བརྒྱད་ཀྱི་སྟོན་པ་ནི་གཉིས་པའི་རྒྱུད་སྡེ་རྒྱས་བཤད་དོ། །དེ་ཡང་མདོར་བསྡུས་སུ་མཚོན་ན། གཞིའམ་རྟེན་ནི་རྣམ་ཤེས་དང་ཡེ་ཤེས་ཀྱི་ཆ་མ་ཕྱེ་བར་ཀུན་གཞི་ཙམ་སྟེ་བདུན་པོ་ཐམས་ཅད་དུ་འདྲའོ། །ཟབ་པའི་རིགས་མཐུན་གྱི་རྒྱུ་ནི་སེམས་ཉིད་རང་བཞིན་ཅིར་ཡང་མ་གྲུབ་པའོ། །རྐྱེན་ནི་དེ་ལྟར་སྟོང་ཉིད་དུ་གནས་པ་ཚུལ་ཇི་བཞིན་དུ་སྒོམ་པ་གོམས་པར་བྱེད་པའོ། །དམིགས་པ་ནི་ཆོས་ཐམས་ཅད་ཡིན་ལ། རྣམ་པ་ནི་སྤྲོས་པ་ཐམས་ཅད་ཉེ་བར་ཞི་བའོ། །བྱེད་པ་ནི་རང་གི་རང་བཞིན་མངོན་དུ་བྱེད་པ་ཡིན་ལ། བྱེད་ལས་ནི་མཚན་མ་དང་མཚན་མེད་ཀྱི་རྣམ་རྟོག་ཐམས་ཅད་གཅོད་པ་ཡིན་ལ། འབྲས་བུ་ནི། ལམ་གྱི་ཡེ་ཤེས་ཀྱི་དབང་དུ་བྱས་ན་ཆོས་སྐུའི་ཕྱོགས་གཅིག་མངོན་དུ་བྱེད་དེ་སྟོང་པ་ཉིད་དོ། །
རྒྱ་ཆེ་བ་ལ་གཞི་ནི་འདྲའོ། །རྒྱུ་ནི་སེམས་ཉིད་སྣང་བ་སྣ་ཚོགས་སུ་འཆར་པའོ། རྐྱེན་ནི་ཐབས་སྣ་ཚོགས་ལ་བསླབ་པའོ། །དམིགས་པ་ནི་སྣང་བའི་ཆོས་ཐམས་ཅད་དོ། །རྣམ་པ་ནི་བརྟེན་ཅིང་འབྲེལ་བར་འབྱུང་བའི་རྣམ་པའོ། །བྱེད་པ་ནི་རང་གི་རང་བཞིན་རྟེན་འབྱུང་མངོན་དུ་བྱེད་པ་ཡིན་ལ། བྱེད་ལས་ནི་ལྟ་བ་མཆོག་ཏུ་འགྱུར་བ་ཡིན་ཅིང༌། འབྲས་བུ་ནི་ཆོས་སྐུའི་ཕྱོགས་གཅིག་གོ ཁྱབ་པ་ལ། རྒྱུ་ནི་སེམས་ཉིད་རིས་མེད་པ་ཡིན་ལ། རྐྱེན་ནི་སྣང་བ་ཐམས་ཅད་ལ་རྩལ་སྦྱངས་པའོ། །དམིགས་པ་ནི་དང་པོ་དང་འདྲ་ལ། རྣམ་པ་ནི་མཉམ་པ་ཉིད་ཀྱི་ཚུལ་ཡིན་ཅིང༌། བྱེད་པ་ཅིག་ཅར་འཕྲིན་ལས་སྣ་ཚོགས་སྤྱོད་པ་ཡིན་ལ། ལས་ནི་ཐག་རིང་ཐུང་དང་རྒྱ་ཆེ་ཆུང་ལ་ཆགས་ཐོགས་མེད་པའོ། ། འབྲས་བུ་སྐུ་གསུམ་ཀར་གྱི་ཕྱོགས་གཅིག་གོ །རྟག་པ་ལ་རྒྱུ་ནི་སེམས་འགྱུར་བ་མེད་པའི་ཆ་རྐྱེན་ནི་དེ་ཉིད་ལ་དེ་ལྟར་ཤེས་པ། དམིགས་པ་ནི་ཆོས་རྣམས་ཀྱི་རང་བཞིན། རྣམ་པ་ནི་སེམས་མི་གཡོ་བ་བྱེད་པ་ནི་ཟབ་པ་དང་འདྲ་ལ། ལས་ནི་རྐྱེན་གང་གིས་ཀྱང་མི་རྫི་བ། འབྲས་བུ་ཆོས་སྐུའི་ཕྱོགས་གཅིག་གོ །སྐུ་ལ། རྒྱུ་ནི་ལུས་ཀྱི་ཆོས་སུ་སྔོན་ནས་སྣང་བ། ཇི་སྐད་དུ། ཞལ་ཕྱག་རྣམ་པའི་ཚུལ་ཅན་དུ། །སྐྱེས་པ་ཙམ་གྱིས་རྣམ་པར་གནས། །འོན་ཀྱང་བག་ཆགས་ཕལ་པས་སོ། །ཞེས་པ་ལྟར་དྲི་བཅས་ཡེ་ཤེས་ཀྱི་སྐུའོ། །རྐྱེན་ནི་ཡིད་ངོར་གསལ་སྣང་ཐོབ་པའི་ལྷ་སྐུ། དམིགས་པ་ནི་རླུང་སེམས་ཙམ། རྣམ་པ་ནི་སངས་རྒྱས་རྣམས་ཀྱི་སྐུ་གསུང་ཐུགས་དང་མཐུན་པ། བྱེད་པ་ནི་ལུས་སེམས་རོ་གཅིག་ཏུ་སྣང་བ་ལས་མ་དག་པའི་སྣང་བ་འཕྲལ་དུ་འགོག་པ་འབྲས་བུ་ནི་ལོངས་སྤྲུལ་གྱི་ཕྱོགས་རེའོ། །ཟུང་འཇུག་གི་རྒྱུ་ནི་རང་བཞིན་ལ་གཉིས་ཆོས་མེད་པའི་ཆ། རྐྱེན་ནི་
ཐམས་ཅད་ལ་རོ་གཅིག་པར་ལྷ་སྐུ་རྣམ་པར་མི་རྟོག་པས་འཇུག་པ། དམིགས་པ་ནི་དང་པོ་དང་འདྲ་ལ་རྣམ་པ་གཉིས་སྣང་རང་བཞིན་མེད་པ། བྱེད་པ་ནི་ཟབ་པ་དང་འདྲ་ཞིང༌། ལས་ནི་གཟུང་འཛིན་གྱི་སྣང་བ་འགོག་པ། འབྲས་བུ་གནས་ཚུལ་གྱི་སྐུ་གསུམ་གའི་ཕྱོགས་གཅིག་གོ །བདེ་བ་ལ། རྒྱུ་ནི་སེམས་ཀྱི་རང་བཞིན་བདེ་བར་གནས་པ། རྐྱེན་ནི་ཞུ་བདེ་ལྷན་སྐྱེས་གཙོ་བོར་གྱུར་པའི་ཞུ་བདེ་ཐམས་ཅད། དམིགས་པ་ལུས་སེམས་སུ་སྣང་བ། རྣམ་པ་ལུས་སེམས་ཀྱི་བདེ་བ་ལ་རྣམ་པར་མི་རྟོག་པས། བྱེད་པ་རང་བཞིན་བདེ་བ་མངོན་དུ་བྱེད་པ། ལས་རང་གཞན་གྱི་སྡུག་བསྔལ་འཕྲལ་དུ་འགོག་ཅིང་སྟོང་པ་ཉིད་ལ་ཆེས་བོགས་འབྱིན་པ། འབྲས་བུ་ནི། ཆོས་སྐུ་དང༌། ལོངས་སྐུ། དེའི་གཟུགས་སྐུ་དང་བཅས་པའི་ཕྱོགས་གཅིག་གོ །དེ་ལ་རྒྱུ་ནི་ཉེར་ལེན་དང་རྐྱེན་ནི་ལྷན་ཅིག་བྱེད་པ་སྟེ། ཟབ་པ་ལ་སོགས་པའི་ཡེ་ཤེས་ཀྱི་རྒྱུ་རྐྱེན་ཡིན་ལ། དེ་ཡང་དེ་ཉིད་བདུན་དངོས་ཀྱི་འཇོག་མཚམས་འཕགས་ལམ་ཁོ་ན་ལ་བྱེད་ཅིང་དོན་བརྒྱད་དུ་སྟོན་པ་འདི་ནི་ལམ་དུས་ཀྱི་ཡེ་ཤེས་ཡིན་ལ། འོག་ནས་འབྱུང་བའི་ཡན་ལག་བཞི་བཅུ་ནི་འབྲས་བུ་ལ་གཙོ་བོར་སྦྱོར་ཞིང༌། དེ་ལ་བྱེད་པ་ནི་འཕྲལ་དུ་མངོན་དུ་བྱེད་པའི་གནས་སྐབས་ཀྱི་འབྲས་བུ་དང༌། འབྲས་བུ་ནི་མཐར་ཐུག་ལ་སྦྱར་བ་ཡིན་ཏེ། རྡོ་རྗེ་ལྟ་བུའི་ཏིང་ངེ་འཛིན་ལ་ནི་དེ་གཉིས་ཐ་དད་དུ་བཞག་མི་དགོས་སོ། །འདིས་མཚོན་པར་བྱས་ཏེ། ཞིབ་ཏུ་སློབ་དཔོན་ལས་མཉམ་པར་བྱའོ། གཉིས་པ་ནི། དེ་ཉིད་གཅིག་ཏུ་བཤད་པ་བསྡུས་པ་དང༌། དང་པོའི་རྒྱུད་དུ་བཤད་པ་རྒྱས་པ་དང༌། གཉིས་པའི་རྒྱུད་དུ་བཤད་པ་ནི་ཆེར་རྒྱས་པ་རྣམས་སོ། །གཉིས་པ་དེའི་ཡན་ལག་བཤད་པ་ལ། ཟབ་པའི་དང༌། རྒྱ་ཆེ་བའི་དང༌། ཁྱབ་པའི་
དང༌། རྟག་པའི་དང༌། སྐུའི་དང༌། ཟུང་འཇུག་གི་དང༌། བདེ་བའི་ཡན་ལག་བདུན་ལས། དང་པོ་ནི། རྟེན་ཅིང་འབྲེལ་པར་འབྱུང་བའི་ཕྱིར་རང་བཞིན་མེད་པའི་མཚན་ཉིད་དང༌། རིག་ཙམ་གྱི་ངོ་བོར་སྐྱེས་པ་རིག་བྱ་རིག་བྱེད་གཉིས་དང་བྲལ་བར་རང་རིག་པ་དང༌། ཡོན་ཏན་རང་བཞིན་དང་དབྱེར་མེད་དུ་ལྡན་པའི་ཕྱིར་ངོ་བོའི་ཆ་ནས་ཡོན་ཏན་འཕེལ་བ་མེད་པ་དང༌། ཇི་སྐད་དུ། ཆུ་ཁམས་གསེར་དང་ནམ་མཁའ་ནི། །དག་པ་བཞིན་དུ་དག་པར་འདོད། །ཅེས་རང་བཞིན་ནི་དྲི་མ་གཏན་དུ་བྲལ་བ་ཡིན་པས། སྤང་བྱ་བྲི་བ་མེད་པ་ནི་འཕེལ་འགྲིབ་མེད་པ་དང༌། མཚན་འཛིན་གྱི་རྣམ་རྟོག་གི་ཡུལ་མ་ཞིང་མཚན་མས་རྣམ་པར་མི་རྟོག་པའི་བདག་ཉིད་དུ་གནས་པ་དང༌། རྣམ་པར་མི་རྟོག་པ་དེ་ཉིད་ལས་དངོས་པོ་ཐམས་ཅད་ཀྱི་གཟུགས་བརྙན་དུ་སྣང་བ་པོ་སྟེ། ཟབ་པའི་ཡེ་ཤེས་ནི། ཡན་ལག་གམ་མཚན་ཉིད་ལྔ་པོ་དེ་དག་དང་ལྡན་པ་ཡིན་ནོ། །གཉིས་པ་ནི། རྒྱུ་བསོད་ནམས་རྒྱ་ཆེ་བ་དང༌། ཡེ་ཤེས་རྒྱ་ཆེ་བ་དང༌། ཡེ་ཤེས་ཀྱི་སྤྱོད་ཡུལ་ཏེ་དེའི་སྣང་བ་རྒྱ་ཆེ་བ་དང༌། སངས་རྒྱས་ཀྱི་ཆོས་ཐམས་ལ་དམིགས་པའི་ཕྱིར་དམིགས་པ་རྒྱ་ཆེ་བ་དང༌། ཆོས་ཐམས་ཅད་ཀྱི་རྣམ་པས་འཇུག་པའི་ཕྱིར་འཇུག་པ་རྒྱ་ཆེ་བ་དང༌། སེམས་ཅན་ཐམས་ཅད་ཀྱི་དོན་སྒོ་ནས་ཐམས་ཅད་ནས་སྦྱོར་བའི་ཕྱིར་ལས་རྒྱ་ཆེ་བ་སྟེ། རྒྱ་ཆེ་བའི་མཚན་ཉིད་དམ་ཡན་ལག་ལྔ་ཡིན་ནོ། །གསུམ་པ་ནི། ཡེ་ཤེས་དེ་ཡུལ་ཐམས་ཅད་དུ་ཉེ་རིང་མེད་པ་དང༌། དུས་ཐམས་ཅད་དུ་ཉེ་རིང་མེད་པ་དང༌། གཞི་ལམ་འབྲས་བུ་གསུམ་ངོ་བོ་ཁྱད་པར་མེད་པས་ཁྱབ་པ་དང༌། སྟོང་པ་ཉིད་དེ། དེ་བཞིན་ཉིད་ཐ་དད་མེད་པའི་ཕྱིར་ཁྱབ་པ་དང༌། ཆོས་ཐམས་ཅད་རྣམ་པར་མི་རྟོག་པས་མཉམ་པ་ཉིད་དུ་གཟིགས་པའི་ཕྱིར་ཁྱབ་པ་སྟེ་ཁྱབ་པའི་ཡན་ལག་ལྔའོ། །
བཞི་པ་ནི། སྐུ་དང་ཡེ་ཤེས་ཟུང་དུ་འཇུག་པ་དེ་ལ་རྒྱུན་ཆད་མི་སྲིད་པས་རྒྱུན་མི་འཆད་པ་དང༌། ལྷག་མེད་དུ་འཇུག་པ་ལྟ་བུའི་འགོག་པ་མེད་པ་དང༌། སྐུ་ལ་རྡུལ་ཕྲ་རབ་ཀྱི་ཆོས་མེད་པ་དང༌། ཇི་སྐད་དུ། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། ། ཞེས་པ་ལྟར། རང་བཞིན་ལ་གནས་སྐབས་ཐམས་ཅད་དུ་འགྱུར་བ་གཏན་མེད་པ་དང༌། རྒྱལ་སྲས་ཆེན་པོ་རྣམས་ཀྱིས་ཀྱང་བསམ་པའི་ཡུལ་ལས་འདས་པའི་ཕྱིར་བསམ་ཡས་ཡེ་ཤེས་ཏེ། ལྔ་པོ་རྟག་པའི་ཡན་ལག་ཉིད་དོ། །ལྔ་པ་ནི། ཟབ་པའི་དོན་དུ་འགྱུར་བ་ལྟར་སྣང་མོད། སངས་རྒྱས་ཀྱི་ཡེ་ཤེས་མངོན་དུ་མི་བྱེད་པའི་བར་དུ་ནི། གློ་བུར་གྱི་ཡེ་ཤེས་རྣམས་རང་བཞིན་འགྱུར་བ་ཅན་ཡིན་ཅིང་དེ་རྣམས་ཀྱི་ཡུལ་མ་ཡིན་པའི་ཕྱིར་འགྱུར་བ་མེད་པའི་ཡན་ལག་ཏུ་འབྲེལ་ལ། རྟག་པ་ནི་འགྱུར་བ་མེད་པའི་དོན་ཡིན་ཏེ། །ནམ་མཁའ་ལྟར་རྟག་པ་མིན་གསུང༌། ལྔ་པ་ནི། སྐུ་ཐབས་ཤེས་ཡབ་ཡུམ་ཁ་སྦྱོར་གྱི་རྣམ་པ་དང༌། ཐུགས་རང་བཞིན་འགྱུར་བ་མེད་པའི་བདེ་བར་གནས་པ་དང༌། རྣམ་པ་སྙིང་རྗེ་ཆེན་པོ་གསུམ་དབྱེར་མེད་པའི་རང་བཞིན་དུ་གནས་པ་དང༌། བདེ་ཆེན་གྱི་འགལ་ཟླ་ཡིན་ཏེ། རྣམ་རྟོག་གི་ཉེ་བར་སྦྱོར་བ་ཐིམ་པ་དང༌། དེའི་བཞོན་པ་ལས་རླུང་ཡང་ཐིམ་ཞིང་འགགས་པ་དང༌། ཞུ་བའི་རྐྱེན་གྱིས་བདེ་བ་ཐོབ་པ་ལས་མངོན་དུ་འགྱུར་པ་དང༌། བྱང་ཆུབ་ཀྱི་སེམས་རང་གནས་ལས་མི་འཛག་པའི་བདེ་བའི་ངོ་བོར་གནས་པ་སྟེ། བདེ་བའི་ཡན་ལག་བདུན་ནོ། །སྙིང་རྗེ་ཆེན་པོ་བདེ་བར་བཤད་པ་ནི། རང་དང་གཞན་གྱི་སྡུག་བསྔལ་ཉེ་བར་འགོག་པ་དང༌། འགྱུར་མེད་ཀྱི་སྐད་ཅིག་རེ་རེ་སྐྱེས་པ་ན། འགྱུར་བཅས་ཀྱི་སེམས་ཅན་རྣམས་ལ་སྙིང་རྗེ་དམིགས་པ་མེད་པའི་རྣམ་པ་ཅན་རྒྱ་ཆེན་པོ་འདྲེན་
པར་འགྱུར་ཞིང༌། བདེ་ཆེན་དེ་ཉིད་ཀྱང་དེའི་རྣམ་པར་འཆར་པ་ཡིན་པས། ལས་དང་པོ་པས་ཀྱང་འདྲ་མཚུངས་སུ་སྒོམ་པའི་མན་ངག་ཤེས་དགོས་སོ། །དེ་ལྟར་ཤེས་ན། ཐམས་ཅད་མཁྱེན་པ་གཉིས་པ་ཨ་བྷ་ཡ་ཀ་ར་གུཔྟས། མི་འཇིགས་པའི་གཞུང་འགྲེལ་དུ། བདེ་བ་ཆེན་པོ་སྒྲུབ་པར་བྱེད་པ་ཉིད་ཀྱིས་ན་གཙོ་བོར། ཡུལ་རེག་བྱ་དང་དེའི་དབང་པོ་དང་དེའི་རྣམ་པར་ཤེས་པ་སྙིང་རྗེ་ལ་སོགས་པའི་ངོ་བོར་དང་ཤེས་རབ་ལྔའི་ངོ་བོར་ཡང་སྒྲུབ་པའི་ཆེད་དུ་གསུངས་པ། ཞེས་གསུངས་པ་ལ་ལེགས་བཤད་ཆེན་པོར་ཤེས་ཤིང༌། གྲུབ་ཆེན་དྲིལ་བུ་པས། བདེ་ཆེན་ཐུགས་རྗེའི་བདག་ཉིད་ཅན། །ཞེས་གསུངས་པ་དང༌། སྣང་བ་གསུམ་སྙིང་རྗེ་གསུམ་དུ་བཤད་པ་སོགས་ལ་ངེས་པ་དཔྱིས་ཕྱིན་པ་སྟེར་བར་འགྱུར་མོད་ཀྱི། འདི་ན་ཕྱོགས་ཙམ་རྟོགས་པའང་ཉུང་བར་སྣང་ངོ༌། །དྲུག་པ་ནི། ཐམས་ཅད་སྟོང་པ་ཉིད་ཀྱི་ཡེ་ཤེས་ལས་བྱུང་ཞིང་སྐྱེས་པ་དང༌། མ་དག་པའི་ལས་སྣང་གི་སྡུག་བསྔལ་འགོག་པ་དང༌། གར་ཡང་ཕྱིན་པ་དང༌། རྐྱེན་གང་གིས་ཀྱང་མི་གཡོ་བ་སྟེ་འགྱུར་བ་མི་སྟེན་[བརྟན་]པ་དང༌། ཡིད་དེ་སེམས་ཀྱི་སྣང་བ་ཙམ་གྱི་སྐུ་དང༌། རླུང་གི་དྭངས་མ་ཙམ་གྱི་ལུས་ཅན་དང༌། དུས་མཐུའི་སྐད་ཅིག་ལ་ཡུལ་དུས་ཀྱི་བསྡུས་པའི་ཤེས་བྱ་ཀུན་སྟོན་ཡང་མི་འགལ་བ་དང༌། མཚན་དང་དཔེ་བྱད་དང་ལྡན་ཞིང་རང་དང་འདྲ་བའི་སྤྲིན་སྤྲོ་བ་སྟེ། དེ་ལྟར་བདུན་པོ་དེ་ནི་རྡོ་རྗེའི་སྐུའི་ཡན་ལག་ཏུ་གསུངས་སོ། །འདིར་རླུང་སེམས་ཀྱི་ལུས་གཅིག་ཏུ་བསྡོམས་པས་བདུན་ཡིན་ལ། རླུང་ཞེས་བྱ་བ་བེམ་པོ་རང་མཚན་པ་ལ་གོ་བར་མི་བྱའོ། །བདུན་པ་ནི། གཉིས་སྣང་ཐམས་ཅད་གཏན་ནས་ལོག་པས་གཉིས་མིན་དང༌། སེམས་སེམས་བྱུང་གི་རྒྱུ་བ་ཆད་དེ་ཡང་དག་མིན་རྟོག་འགགས་པས་མི་རྟོག་པ་དང༌། ཆོས་
རྣམས་ཀྱི་རང་བཞིན་ཇི་ལྟ་བ་ལ་ཞུགས་པ་དང༌། གཉིས་སྣང་མེད་པས་དག་པ་རབ་འབྱམས་འབའ་ཞིག་ཏུ་སྣང་བ་དང༌། ཡུལ་དུས་ཀུན་ཏུ་རྣམ་པ་ཀུན་ནས་འགྲོ་བའི་དོན་མཛད་པར་སྣང་བ་དང༌། ནམ་ཡང་གོ་འཕང་དེ་ལས་གཡོ་བ་མེད་པའི་ཕྱིར། རྡོ་རྗེ་སེམས་དཔའི་ཡེ་ཤེས་ནི་ཟུང་འཇུག་གོ །ཞེས་ཟུང་འཇུག་གི་ཡན་ལག་དྲུག་གོ །སྣང་བ་མེད་པ་ཞེས་པ་ཇི་ལྟར་སྣང་བ་ཐམས་ཅད་རང་བཞིན་མེད་པར་གཟིགས་པ་དང༌། ཀུན་ཏུ་སྣང་བ་རང་སྣང་གི་དག་པའི་དཀྱིལ་འཁོར་ལ་འཆད་པའང་ཡོད་གསུང་ཞིང༌། དེ་ལྟར། ཡན་ལག་བཞི་བཅུ་པོ་འདི་རྣམས་རྡོ་རྗེ་སྤོའི་རྒྱུད་ལས་རྒྱས་པར་འབྱུང་བ། མན་ངག་གི་དོན་བསྡུས་པ་ཡིན་ཞེས་རྒྱུད་དེ་ཉིད་ཀྱི་ལུང་ཚིགས་སུ་བཅད་པ་དྲུག་ཅུ་ཙམ་འདྲེན་པར་མཛད་དེ་བཟུང་བར་མ་ནུས་སོ། །འདི་རྣམས་ཀྱང་འབྲས་བུ་སངས་རྒྱས་ཀྱི་ཡེ་ཤེས་ལ་ཐམས་ཅད་ཚང་ཞིང་དེའི་ཕྱིར་ཡེ་ཤེས་ངོ་བོ་གཅིག་ཉིད་ཡིན་གྱི་ཐ་དད་དུ་གོ་བར་མི་བྱའོ། །གསུམ་པ་རབ་དབྱེ་བཤད་པ་ལ། དེ་ཉིད་བདུན་དང་ཡན་ལག་ཅི་རིགས་པ་དག་ལ། ཡང་ན་སོ་སོ་ཀུན་གྱི་གཞི་གང་ཡིན་པ་དང༌། འཇིག་རྟེན་པའི་དབང་གི་སྐབས་སུ་ཇི་ལྟར་ཐོབ་པ་དང༌། འཇིག་རྟེན་འདས་པ་ཉེ་རྒྱུའི་དབང་གི་ཐོབ་ཚུལ་དང༌། བློ་ལྡན་སྔགས་པ་རྣམས་ཀྱིས་བསྐྱེད་རིམ་དང༌། རྫོགས་རིམ་རྣམས་སུ་འབྱུང་བའི་ཚུལ་དང༌། སྐུ་གསུམ་གང་དུ་བསྡུད་པ་དང༌། དེ་དག་དེ་ལ་ལྡན་ཚུལ་གྱི་སྒོ་ནས་ཀྱང་བཤད་པར་བྱ་ལ། ཡན་ལག་བདུན་གྱི་རང་བཞིན་གང་ཡིན་པ་དང༌། ཐོབ་པ་ལ་གེགས་བྱེད་ཀྱི་སྤང་བྱ་དང༌། སྒྲུབ་བྱེད་ཀྱི་ལམ་གྱི་གྲོགས་དང་དེའི་འགལ་ཟླ་དང༌། གྱ་ནོམ་ཏེ་སྐྱོན་མེད་པ་དང་སྐྱོན་དང་བཅས་པའི་ཁྱད་པར་དང༌། ཟག་བཅས་དང་ཟག་པ་མེད་པའི་ཁྱད་པར་དང༌། རྒྱུན་ཆད་པ་དང་རྟག་པ་སྟེ་མི་བརྟན་པ་དང་བརྟན་པའི་ཁྱད་
པར་དང༌། ལ་སོགས་ཀྱི་སྒྲས་འཛག་བཅས་འཛག་མེད་དང༌། ལུས་སེམས་ཀྱི་ཡེ་ཤེས་དང༌། ཞི་གནས་ལྷག་མཐོང་དང༌། རང་སྣང་གཞན་སྣང་དང༌། ཕ་རོལ་དུ་ཕྱིན་པ་དྲུག་དང་སླབ་པ་གསུམ་ལ་སོགས་པ་རབ་ཏུ་དབྱེ་བའི་ཁྱད་པར་མཐའ་ཡས་པས་དེ་ཁོ་ན་ཉིད་བདུན་ལ་ཐེ་ཚོམ་བསལ་བ་ཡིན་ནོ། །དེ་ལ་དོན་ལྔར་བཤད་པ་དེ་ནི། སྔ་ཕྱིར་བརྟགས་པས་ཤུགས་ལ་གོ་བ་ཡིན་ཅིང༌། གཉིས་ཚན་དང་པོ་ལས། རང་བཞིན་ནི་སྤྱི་དོན་གྱི་སྐབས་སུ་བཤད་ཟིན་ལ། དེ་རྟོགས་པ་ལ་གེགས་བྱེད་པའི་སྤང་བྱ་ནི། ཟབ་དང་རྒྱ་ཆེ་ཁྱབ་པ་སོགས་ཀྱི་གཞུང་ཚིག་གི་གོ་རིམ་དང་སྦྱར་ན་བདེན་པར་ཞེན་པ་དང༌། སྟོང་པ་ལ་ཞེན་པ་དང༌། བདག་གཞན་དུ་ཞེན་པ་དང༌། འགྱུར་བར་འཁྲུལ་བ་དང། ཐ་མལ་དུ་ང་རྒྱལ་བ་དང༌། གཉིས་སུ་སྣང་བ་མངོན་གྱུར་བ་དང༌། སེམས་སྡུག་བསྔལ་དུ་འཁྲུལ་བ་རྣམས་སོ། །དེ་དག་ཀྱང་རེ་རེར་རང་བཞིན་བརྒྱད་ཅུའི་རྣམ་རྟོག་གི་འཁོར་དང་བཅས་པ་དྲི་བཅས་ཀྱི་སྣང་བ་གསུམ་དང་བཅས་པ་སྟེ། མཐོང་སྤངས་དང་སྒོམ་སྤངས་ཀྱི་དབྱེ་བ་དང་བཅས་པ་རྣམས་ཏེ། དེ་དག་ནི་ཕྱོགས་གཞན་དུ་གཏན་ལ་དབབ་པར་བྱའོ། །གྲོགས་ནི་སྔར་བཤད་པའི་རྐྱེན་རྣམས་སོ། །འགལ་ཟླ་ནི་དེ་མ་ཐག་ཏུ་བཤད་པའི་སྤང་བྱའོ། །གྱ་ནོམ་ནི་བཟང་པོའི་མཆོག་ཏུ་གྱུར་པའི་མིང་སྟེ། དེ་ཡང་ཟག་མེད་ཀྱི་སེམས་རྒྱུད་མངོན་དུ་གྱུར་པ་ན། དེའི་ཆོས་དེ་ཉིད་བདུན་པོའང་ཟག་མེད་ཡིན་པས་དེ་འཕགས་པ་ལ་ཡོད་ཅིང༌། སོ་སོ་སྐྱེ་བོ་རྣམས་ནི་སྐྱོན་དང་བཅས་པའོ། །དེ་བཞིན་དུ་ཟག་བཅས་ཟག་མེད་ཀྱང་ཡིན་ཅིང༌། དེ་ཡང་རགས་པ་ཉོན་སྒྲིབ་ཀྱི་དབང་དུ་བྱས་ཀྱི། སྤྱིར་སྐྱོན་ཅན་དང་སྐྱོན་མེད་ནི་སློབ་མི་སློབ་ལ་བཞག་ན་ལེགས་སོ། །བརྟན་མི་བརྟན་ལ་སོ་སོ་སྐྱེ་བོའི་ནི་རྒྱུན་ཆད་ཅིང་འཇུག་པ་ཡིན་ལ། འཕགས་ལམ་དུ་ནི་ཡེ་ནས་རྒྱུན་ཆད་
པ་མ་ཡིན་མོད། འོན་ཀྱང་མ་དག་ས་བདུན་དུ། མཉམ་རྗེས་སོ་སོར་ཡོད་པས་མི་བརྟན་པ་དང༌། དག་པའི་ས་གསུམ་དུའང་ད་དུང་ཁྱད་པར་དུ་འགྱུར་པའི་ཕྱིར། མི་རྟག་པ་ཞེས་བྱ་ལ། སངས་རྒྱས་ནས་ནི་རང་བཞིན་དང་གནས་སྐབས་ཅུང་ཟད་ཀྱང་འགྱུར་བ་མེད་པས་རྟག་པ་ཞེས་བཏགས་པ་ཡིན་ནོ། །རབ་ཏུ་དབྱེ་བ་ཞིབ་མོ་འདིའི་གཏམ་ཙམ་ཡང་མན་ངག་མེད་བཞིན་དུ་བདག་མཁས་པའོ་ཞེས་ཁེངས་གཏམ་སྨྲ་བ་དེ་རྣམས་ལ་ཡོད་པ་མ་ཡིན་ན། ཉམས་སུ་མྱོང་བ་ལྟ་ག་ལ་ཞིག དྲུག་པ་རྣམ་གྲངས་ཐོར་བུ་པ་བཤད་པ་ལ། ཇི་སྐད་དུ། ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེ་ཡོངས་གང་རྒྱུན་མི་འཆད་དང་འགོག་པ་མེད། །ཅེས་པའི་ཡན་ལག་བདུན་ལ་དེ་ཉིད་བདུན་དུ་བཤད་པ་དང༌། འོག་ནས་འབྱུང་བའི་ཐབས་ཤེས་ཀྱི་དེ་ཉིད་བདུན་དང༌། སྟོང་པ་ཉིད་དང་སྙིང་རྗེ་བདེ་ཆེན་དབྱེར་མེད་པ་དོན་དམ་པའི་དབང་བསྐུར་བ་བཞི་པའི་ཡེ་ཤེས་རིམ་པ་བཞིན་གོང་ན་མེད་པས་བླ་ན་མེད་པ། དེ་ནི་དོན་དམ་པའི་ཤེས་རབ་ཡེ་ཤེས་ཏེ། ཤེས་རབ་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པའམ་རྣམ་མེད་ཕྱག་ཆེན་ལས་སྐྱེས་པའི་ཡེ་ཤེས་སེམས་ཀྱི་རང་བཞིན་ཇི་ལྟ་བུའི་གནས་ཚུལ་ལོ། །ཞེས་པ་སྟེ། དབང་བཞི་པའི་ཡེ་ཤེས་ཀྱི་ངོས་འཛིན་དེ་ཉིད་བདུན་དུ་བཤད་པ་གསུམ་པོ་འདི་དག་གང་རུང་ལས་ཤེས་དགོས་པ་ཡིན་ནོ། །མེ་ལོང་ལྟ་བུའི་ཡེ་ཤེས་ལ་སོགས་པ་ཡེ་ཤེས་ལྔ་ནི་དེ་ཉིད་ལྔ་རུ་བཤད་པའང་ཡོད་ལ། ངོ་བོ་ཉིད་ཀྱི་སྐུ་དང༌། ཡེ་ཤེས་ཆོས་ཀྱི་སྐུ་དང༌། ལོངས་སྤྱོད་རྫོགས་པའི་སྐུ་དང༌། སྤྲུལ་པའི་སྐུ་སྟེ། སྐུ་བཞི་ནི་སྐུའི་དེ་ཉིད་རྣམ་པ་བཞིར་བཤད་པ་དང༌། དབང་ཕྱུག་བརྒྱད་ལ་དེ་ཁོ་ན་ཉིད་བརྒྱད་དུ་བཤད་པའང་ཡོད་པས། སྤྱིར་དེ་ཉིད་ཅེས་པ་རྒྱུད་སྡེ་རྣམས་སུ་དགོངས་པ་སྣ་ཚོགས་ལ་གསུངས་པས། ཕྱོགས་གཅིག་ཁོ་ན་ལ་
ཨ་མཐས་བར་མི་བྱའོ། །བདུན་པ་ནི། ཨེ་མ་ཧོ། ཞེས་པ་ནས། ཕྱག་འཚལ་ལོ་ཞེས་པའི་བར་སྡོམ་འབྱུང་ལས་འབྱུང་ཞིང༌། དེ་ཡང་ལྷན་ཅིག་སྐྱེས་དང་ཞེས་སོགས་བཅུ་གཉིས་པོའི་མིང་བཤད་པས་མདོར་བསྟན། རྒྱུད་ཚིག་གི་རྒྱས་པར་བཤད་པ་འདིར་ཚིག་ཚོགས་ཆུང་ངུར་སྡོམ་ན། འདི་ལྟར། ཨེ་མ་ཧོ། ཞེས་པ་ནི་རྫོགས་རིམ་གྱི་དེ་ཉིད་འདི་རྣམས་ལ་ངོ་མཚར་སྐྱེས་པ་ལྟར་སྟོན་པ་སྟེ། ལྷན་སྐྱེས་དང༌། མཁྱེན་པས་ཁྱབ་པ་དང༌། སྐུས་ཁྱབ་པ་དང༌། ལས་ཀྱི་ཁྱབ་པ་དང༌། དགའ་བ་དང༌། འོད་གསལ་རྣམས་དོན་གྱི་གཙོ་བོ་ཡིན་པའི་ཕྱིར་བསྔགས་པ་ཡིན་ཅིང༌། སྒྱུ་མའི་ཚུལ་ཡང་དོན་གྱི་གཙོ་བོ་ཡིན་པའི་ཕྱིར། ལམ་འདི་ཉིད་ལ་ཕྱག་འཚལ་ལོ་ཞེས་གསུངས་སོ། །དེ་ཡང་ལྷན་ཅིག་སྐྱེས་པ་ནི་ས་ཧ་ཛ་ཞེས་པ་ལུས་སེམས་སུ་སྣང་བའི་རྟེན་བརྟེན་པ་ནི་ཐོག་མ་མེད་པ་ནས་ལྷན་ཅིག་ཏུ་བྱུང་བ་ཡིན་ལ། འོན་ཀྱང་སྐད་ཅིག་རེ་རེར་ཕན་ཚུན་གཅིག་ལ་བརྟེན་པ་ནི་ཡ་མཚན་ཏོ་ཞེས་ལྷན་སྐྱེས་ཀྱི་དེ་ཉིད་དང༌། བདག་ཉིད་ཆེན་པོ་ནི། དེ་ལྟར་ཡང༌། བདག་དང་བདག་མེད་སྤྲོས་པ་དག ཉེ་བར་ཞུ་བས་དམ་པའི་བདག །ཅེས་པ་ལྟར། སེམས་ཀྱི་རང་ཞིན་ནི་བདག་དང་གཞན་དུ་དབྱེ་བ་དང༌། བདེན་རྫུན་སོགས་གཉིས་ཆོས་ཀྱི་སྤྲོས་པ་ཉེ་བར་ཞི་བའི་རང་བཞིན་དུ་གནས་པའི་ཕྱིར་དམ་པ་ཡིན་ལ། དེ་ཉིད་ནམ་ཡང་རྒྱུན་ཆད་པ་མེད་པས་ཡོན་ཏན་སྒྲུབ་པའི་གཞི་དང༌། ལས་དང་འབྲས་བུ་མྱོང་བར་བྱེད་པའི་ཕྱིར་བདག་སྟེ། དེ་ལྟར་ཡང་ལེན་པའི་རྣམ་པར་ཤེས་པ་ཟབ་ཅིང་ཕྲ། །ས་བོན་ཐམས་ཅད་ཆུ་བོའི་རྒྱུན་བཞིན་འབབ། །བདག་ཏུ་རྟོག་པར་འགྱུར་ན་མི་རུང་ཞེས། །བྱིས་པ་རྣམས་ལ་འདི་ནི་ངས་མ་བསྟན། །ཞེས་གསུངས་ཏེ། ཤིན་ཏུ་རྟོགས་དཀའ་བའི་ཕྱིར་ཕྲ་བའི་བདག་གི་དེ་ཉིད་དང༌།
ཆོས་རྣམས་ཀུན་གྱི་རང་བཞིན་ནི་སྟོང་པ་ཉིད་དེ། ཆོས་ཅན་ལ་དབྱེ་བ་ཡོད་ཀྱང༌། དེ་རྣམས་ཀྱི་རང་བཞིན་མེད་པ་ལ་ནི་དབྱེ་བ་མེད་དེ། སྟོང་པ་ཉིད་གཉིས་པ་མེད་པས་ན་དངོས་པོ་ཀུན་གྱི་རང་བཞིན་ཏེ། རང་བཞིན་མེད་པའི་དེ་ཉིད་དང༌། ཆོས་ཐམས་ཅད་ཀྱི་ཇི་སྙེད་པའི་ཚུལ་སྣ་ཚོགས་པ་མངོན་སུམ་གྱི་ཁོང་དུ་ཆུད་ཅིང་རྟོགས་པ་ནི་རྒྱ་ཆེ་བའི་དེ་ཉིད་དང༌། དེ་ཡང་རང་བཞིན་མེད་པར་མཁྱེན་པ་ལས་ངོ་བོ་ཐ་དད་དུ་ཡོད་པ་ནི་མ་ཡིན་ནོ། །དེ་ལྟར་ཡང་དབུ་མ་ལ་འཇུག་པ་ལས། ཇི་ལྟར་སྣོད་ཀྱི་དབྱེ་བས་མཁའ་ལ་དབྱེ་བ་མེད་དེ་ལྟར། །དངོས་བྱས་དབྱེ་བ་འགའ་ཡང་དེ་ཉིད་ལ་མེད་དེ་ཡི་ཕྱིར། །རོ་མཉམ་ཉིད་དུ་ཡང་དག་ཐུགས་སུ་ཆུད་པར་མཛད་གྱུར་པ། །མཁྱེན་བཟང་ཁྱོད་ཀྱི་སྐད་ཅིག་གི་ནི་ཤེས་བྱ་ཐུགས་སུ་ཆུད། །ཅེས་སོ། །ལྷན་ཅིག་སྐྱེས་པའི་བདེ་བ་ཆེན་པོ་དངོས་པོ་ཐམས་ཅད་ལ་རྣམ་པར་མི་རྟོག་པས་འདོད་པ་སྟེ། དེར་སྣང་བ་ཐམས་ཅད་བདེ་ཆེན་གྱི་ངོ་བོར་རྒྱས་འདེབས་པ་ནི་མཁྱེན་པས་ཁྱབ་པ་དང༌། དེ་ཉིད་ཀྱི་སྣང་བ་ཡེ་ཤེས་ཀྱི་སྐུས་ས་གསུམ་པོ་ཐམས་ཅད་དུ་གང་ཞིང་ཁྱབ་པ་སྟེ་དེ་ནི་སྐུས་ཁྱབ་པའི་དེ་ཉིད་དང༌། སེམས་ཅན་གྱི་བསམ་པ་ཇི་ལྟ་ཇི་ལྟ་བ་དེ་ལྟ་དེ་ལྟར་འགྲོ་བའི་དོན་སྤྱོད་པ་ནི་ལས་ཀྱི་ཁྱབ་པའི་དེ་ཉིད་དང༌། དེ་ལ་བཟའ་ཞེས་བྱ་བ་ནི་སྤྱོད་པའི་དོན་ཏེ། སེམས་ཅན་གྱི་བསམ་པ་བཞིན་དུ་དམ་པའི་ཆོས་ལ་ལོངས་སྤྱོད་པའི་དོན་ནོ། །ཞི་བ་ནི་ནང་གི་ཞི་བའི་ལྟུང་བ་ཡིན་པའམ་གང་ཞུ་བའི་བདེ་བ་སྐྱེས་ན་མཚན་མ་མཐའ་དག་ཉེ་བར་ཞི་བའི་བྱང་ཆུབ་སེམས་ཀྱི་བདེ་བ་རྩ་བདུན་ཁྲི་ཉིས་སྟོང་ཐམས་ཅད་ནས་ཨ་བ་དྷཱུ་ཏཱིར་འབབ་པ་ནི་ཐིག་ལེའི་དེ་ཉིད་དེ། བདེ་བའི་རྟེན་དང༌། བདེ་བ་ཞེས་པ་ནི་བརྟེན་པ་ཞུ་བདེ་སྟཻ་བདེ་བའི་དེ་ཉིད་དང༌། བདེ་བ་ཆེན་པོ་ཞེས་པ་ནི་རང་བཞིན་ལྷན་སྐྱེས་ཀྱི་བདེ་ཆེན་ཏེ་དོན་གྱི་འོད་གསལ་ལམ་འོད་གསལ་གྱི་དེ་ཉིད་དོ། །
ཡེ་ཤེས་ཀྱི་སྐུའི་དེ་ཉིད་ནི་འགྲོ་བ་ཐམས་ཅད་སྒྱུ་མའི་རྣམ་འཕྲུལ་ལྟར་རང་བཞིན་མེད་ཀྱང་རྒྱུ་རྐྱེན་ཚོགས་པ་ལས་སྣང་བ་མི་འགག་པར་དངོས་པོ་རྣམས་ལ་ཀུན་རྫོབ་དང་དོན་དམ་པའི་གནས་ཚུལ་ཇི་ལྟ་བ་དེ་ཉིད་དེ་ལྟར་ཤེས་པས། སྐྱོ་བ་སྟེ་སྡུག་བསྔལ་དང༌། དགའ་བ་སྟེ་བདེ་བར་སྣང་བ་ཐམས་ཅད་དོན་ལ་མེད་པར་ཤེས་པས་སྤང་བླང་མེད་པར་མཉམ་པ་ཉིད་དུ་རབ་ཏུ་སྤྱོད་ཅིག །འཇིགས་པ་དང༌། འཇིགས་པར་བྱ་བ་དང༌། འཇིགས་པར་བྱེད་པ་ལས་དང་ཉོན་མོངས་པ་ཡང་རང་གི་ངོ་བོ་ཉིད་ཀྱིས་མེད་པར་ཤེས་ཤིང་མྱ་ངན་ལས་འདས་པའི་བདེ་བ་དང་དེ་འབྱུང་བའི་ལམ་ལ་ཡང་རང་བཞིན་སྐྱེ་བ་མེད་ལ་རྒྱུ་འབྲས་ཀྱང་འགག་མེད་པར་ཤེས་ཏེ། དེ་ལྟར་རྣལ་འབྱོར་པ་ནི་དེ་བཞིན་ཉིད་ཀྱི་རང་བཞིན་ཇི་ལྟ་བའི་རྗེས་སུ་ཡེ་ཤེས་ཀྱི་སྣང་བ་འཇུག་སྟེ། འགྲོ་བའི་གཟུགས་སུ་སྣང་བ་ཐམས་ཅད་ཆུ་ནང་གི་ཟླ་བའི་གཟུགས་བརྙན་ཇི་བཞིན་དུ་མཐོང་བར་གྱུར་ཅིང༌། སྒྲ་ཐོས་པ་ཐམས་ཅད་ནི་བྲག་ཆ་དང་ཁྱད་པར་མེད་པར་ངོ་བོ་གཅིག་ཏུ་ཡང་དག་པར་འཇུག་པ་དང༌། རང་གཞན་གྱི་སེམས་ཀྱི་ཀུན་ཏུ་རྟོག་གཡོ་བ་ཡང་མྱ་ངན་གྱི་ཐང་གི་སྨིག་རྒྱུ་ལྟ་བུར་བྱ་ཤིང་བཟའ་བ་དང་བཏུང་བ་ནམ་མཁའ་ལྟ་བུར་རང་བཞིན་མེད་པ་དང༌། གང་གི་ཚེ་དྲི་མནམ་པ་དག་ནི་དེའི་རང་བཞིན་ནམ་མཁའི་མེ་ཏོག་གི་དྲི་ལྟ་བུར་མེད་པ་དང༌། ཟླ་བ་ཉི་མ་རྣམ་པར་རྟོག་པ་མེད་བཞིན་དུ་བསྐོར་བ་བྱེད་པ་ཇི་ལྟ་བ་བཞིན་དུ་བསྐོར་བ་བྱེད་པའི་ཡིད་དང༌། ཡང་དག་པར་ལུས་གནས་པ་ན་ཡང་སྡོད་པར་བྱའོ་མཉམ་པ་ལ་སོགས་པའི་རྣམ་རྟོག་མེད་པ་རི་རབ་དང་དེ་མཚུངས་ཏེ་གང་ལ་དམིགས་པ་ན་ཡང༌། གཞོན་ནུ་མའི་རྨི་ལམ་ཇི་བཞིན་དུ་བརྗོད་དུ་མེད་པར་མཉམ་པར་འཇོག་པ་དང༌། ཐ་སྙད་དུ་ཡོངས་སུ་བཏགས་པའི་ཆོས་རྣམས་ནི་སྒྱུ་མ་དང༌།
མིག་འཕྲུལ་ལྟ་བུར་སྣང་ལ་རང་བཞིན་མེད་པར་གསལ་བར་རྟོགས་པའི། དེ་ལ་སྤྱིར་ཡེ་ཤེས་ཀྱི་སྐུ་ནི་སྒྱུ་མའི་ལུས་ལ་བཤད་པ་མང་ན་ཡང༌། སྐབས་འདིར་ཆོས་ཐམས་ཅད་སྒྱུ་མ་ལྟར་སྟོང་པ་ཉིད་དང་རྟེན་འབྲེལ་ཟུང་འཇུག་ཏུ་རྟོགས་པའི་ཡེ་ཤེས་སྤྱི་དོན་གྱི་སྒྱུ་ལུས་ཡེ་ཤེས་ཐམས་ཅད་ཀྱི་གཙོ་བོ་ཡིན་པའི་ཕྱིར་ཡེ་ཤེས་ཀྱི་ལུས་སུ་བསྟན་པ་ཡིན་ནོ། །སྒྱུ་མའི་ཚུལ་གྱི་དེ་ཉིད་ནི། ཡེ་ཤེས་ཀྱི་སྐུའི་དེ་ཉིད་ཇི་ལྟ་བ་བཞིན་དུ་སྒྱུ་མའི་ལུས་ཀྱང་དེ་ལྟར་ཡིན་ཏེ། ལྷན་ཅིག་སྐྱེས་པའི་བདེ་བ་སེམས་རྣམ་པར་དབེན་པ་ཆེན་པོ་ལས་འབྱུང་བའི་སྐུ་དེ་ཡང་དེ་བཞིན་དུ་དངོས་པོའི་རང་བཞིན་ཐམས་ཅད་དང་བྲལ་བ། སྤྲོས་བྲལ་གྱི་དབྱིངས་ནི་བསམ་པའི་ཡུལ་ལས་འདས་པའི་ཕྱིར་བསམ་གྱིས་མི་ཁྱབ་པ་དེ་ལྟ་བུའི་ཚུལ་ལས་ཡན་ལག་བདུན་ལྡན་གྱི་དཀྱིལ་འཁོར་རབ་འབྱམས་རྟག་ཏུ་འཆར་བ་བདེ་བར་གཤེགས་པའི་ལམ། ལམ་བདེན་གྱི་མཆོག་ལ་ཕྱག་འཚལ་ལོ། །དེ་ལྟར་ན་དེ་ཁོ་ན་ཉིད་ནང་ལ་མཆོག་ཏུ་གཞོལ་བ་དག་གི་རྣལ་འབྱོར་འདིར་བཤད་ཀྱི། སྔགས་ལ་མཆོག་ཏུ་གཞོལ་བ་དག་གི་དེ་ཉིད་བཅུ་ལ་སོགས་པ་ནི་འདིར་མི་འཆད་དོ། །གསུམ་པ་དེ་ཉིད་བདུན་རྒྱས་པར་བཤད་པ་ལ། ཡན་ལག་དང་པོ་གཉིས་རྒྱས་པར་བཤད་པ། ལྷག་མ་ལྔ་བཤད་པ། དེ་ཁོ་ན་ཉིད་རྣམས་ཀྱི་བསྡུ་བའོ། །དང་པོ་ལ་མདོར་བསྟན་པ་དང་རྒྱས་པར་བཤད་པའོ། །དང་པོ་ནི། བདེ་བ་དང༌། རྣམ་པ་ཐམས་ཅད་པ་དང༌། སོ་སོར་འབྱེད་པ་དང༌། རང་བཞིན་སྟོང་པ་དང༌། ལྷུན་གྱིས་གྲུབ་པ་དང༌། མཉམ་པ་ཉིད་དེ་དྲུག་དང༌། མཉམ་ཞེས་པས་ནི་ཟུང་དུ་འཇུག་པ་སྟེ། ཐབས་ཤེས་ཡན་ལག་བདུན་གྱི་ཟུང་འཇུག་ནི། ཟུང་འཇུག་གི་རིམ་པ་དང་དོན་གཅིག་ཀྱང་འཇོག་ཚུལ་ཅུང་ཟད་མི་འདྲ་སྟེ་འདིར་བདེ་བ་དང༌།
སྟོང་པ་དབྱེར་མེད་པ་དང༌། རྣམ་པ་ཐམས་ཅད་པ་དང་ལྷུན་གྲུབ་དབྱེར་མེད་པ་དང༌། སོ་སོར་འབྱེད་པ་དང་མཉམ་ཉིད་དབྱེར་མེད་པ་སྟེ། ཐབས་ཤེས་ཡན་ལག་དྲུག་ངོ་བོ་དབྱེར་མེད་པ་ནི་ཟུང་འཇུག་ཅེས་བྱ་བས་དེ་ལྟར་ཡན་ལག་བདུན་ནོ། །དེ་རྣམས་ཉིད་ལས་དང་པོ་གསུམ་ནི་རྒྱ་ཆེ་བ་དང་ཐབས་ཀྱི་ཡན་ལག་ཡིན་ལ། བར་པ་གསུམ་ནི་ཟབ་པ་དང་ཤེས་རབ་བོ། ཐ་མ་ནི་ཐུན་མོང་ཡིན་མོད་ཀྱི། ངོ་བོས་ནི་ཟབ་པར་བསྡུའོ། །གཉིས་པ་ལ། བརྒྱད་ལས། དང་པོ་བདེ་བ་རྒྱས་པར་བཤད་པ་ནི། འདིར་རེ་ཞིག་བདེ་བ་ནི་འགྱུར་བ་མེད་པའི་བདེ་བ་ཡིན་ལ། དེ་ཡང་གང་ཞིག་འགྱུར་བ་མེད་པ་ཡིན་ཞེ་ན། རྟེན་བརྟེན་པ་བཅུ་གཉིས་འགྱུར་བ་མེད་པའི་རང་བཞིན་ཅན་བདེ་བ་སྟེ། དེ་ཡང་མི་འགྱུར་བ་ཉིད་བདེ་བའི་དོན་དུ་ཇི་ལྟར་འགྱུར། ཇི་ལྟར་མི་རྟག་པ་ལས་སྡུག་བསྔལ་བའི་འདུ་ཤེས་སྐྱེ་སྟེ། གང་མི་རྟག་པ་དེ་ནི་གདོན་མི་ཟ་བར་འཇིགས་པས་ན་གནོད་དོ་ཞེས་སྡུག་བསྔལ་གྱི་འདུ་ཤེས་རབ་ཏུ་འཇུག་གོ །མི་རྟག་པ་ནི་སྡུག་བསྔལ་གྱི་མཚན་ཉིད་ཅན་ཡིན་པ་བཞིན་དུ། འགྱུར་བ་མེད་པ་ཡང་བདེ་བའི་མཚན་ཉིད་ཅན་ཡིན་ནོ། །དེ་ལ་རྟེན་དང་བརྟེན་པ་བཅུ་གཉིས་ནི་རེ་ཞིག་རགས་རིམ་ནས་བརྗོད་ན། ལུས་ཀྱི་ཆོས་རགས་པ། ཁུ་བ་ཕྲ་རགས་གསུམ་དང༌། དེ་བཞིན་དུ་རླུང་ཡང་ཕྲ་རགས་གསུམ་དང༌། དགའ་བ་ལ་སོགས་པའི་སེམས་གསུམ་དང༌། སྣང་བ་ལ་སོགས་པ་ཡེ་ཤེས་གསུམ་སྟེ། བཅུ་གཉིས་འགྱུར་བ་མེད་པ་ནི་བདེ་བ་དམ་པ་སྟེ་ཟག་པ་མེད་པ་ཡིན་ནོ། །དེ་ལ་ཁུ་བ་ཕྲ་བ་ནི། ཁམས་རྣམས་ཀྱི་དྭངས་མའི་དྭངས་མ་དབུ་མར་གནས་པ་དག་ཡིན་ལ། ཤིན་ཏུ་ཕྲ་བ་ནི། སེམས་ཐིག་ལེ་དེ་དང་འདྲེས་པས་ཟག་བཅས་
ཀྱི་བདེ་བའི་ངོ་བོར་གནས་པ་ཡིན་ནོ། །རླུང་རགས་པ་ནི། གསལ་བར་རྒྱུ་བ་རྣམ་རྟོག་རགས་པའི་བཞོན་པ་ཡིན་ལ། ཕྲ་བ་ན་ནི་སྣང་བ་གསུམ་གྱི་བཞོན་པ་དང༌། ཤིན་ཏུ་ཕྲ་བ་ནི་འོད་གསལ་གྱི་བཞོན་པའོ། །དེ་ལྟར་ན་ཁུ་བ་རྣམས་འཛག་མེད་དུ་བྱས་པ་དང༌། རླུང་རྣམས་འགགས་པས་སེམས་དང་རྣམ་ཤེས་གསུམ་པོ་ཡང༌། ལྷན་སྐྱེས་སམ་འོད་གསལ་དུ་གནས་གྱུར་བ་ན་རྩ་བ་བཅད་པས་སྡོང་པོ་སོགས་འགྱེལ་བ་ལྟར་གཟུང་འཛིན་གྱི་སྣང་བ་ཐམས་ཅད་ལྷན་སྐྱེས་རང་གི་ངོ་བོར་དག་ནས་སེམས་རང་གི་ངོ་བོ་འགྱུར་བ་མེད་པ་གདོད་མ་ནས་གནས་པ་དེའི་ཚེ་མངོན་དུ་གྱུར་པ་ཡིན་ཅིང༌། རང་བཞིན་འགྱུར་བ་ནི་སྔོན་ནས་ཀྱང་མེད་མོད་མོད། །འགྱུར་མེད་དུ་རང་ངོ་མ་ཤེས་པས་འགྱུར་བཅས་སུ་འཁྲུལ་བ་ཡིན་ལ། འདིར་ནི་རང་བཞིན་མངོན་དུ་གྱུར་པས། དཔེར་ན་ཞུ་བདེ་ལ་ལྷག་པར་སྤྱོད་པ་ན་བདེ་བ་དེ་ཉིད་ཀྱང་རང་བཞིན་མ་དམིགས། དེ་ལ་འདོད་ཆགས་སྐྱེས་པ་ལྟར་སྣང་ཡང༌། འདོད་ཆགས་ཉིད་སྐྱེ་བ་དང༌། གནས་པ་དང་འགག་པ་ཡང་རང་བཞིན་མ་དམིགས་པས་ཆེད་ཀྱི་མི་འགོག་ཅིང་གཉེན་པོ་གཞན་མེད་ཀྱང་སེམས་ཀྱི་རྣམ་པ་དངོས་སུ་འགྱུར་བ་མི་བསྟེན་པ་དང༌། འགྱུར་བཅས་ཀྱི་ས་བོན་མི་འཇོག་པར་མ་ཟད། ཞུ་བདེའི་རང་བཞིན་བདེ་སྟོང་སེམས་ཀྱི་འོད་གསལ་དང་དབྱེར་མེད་དུ་སྣང་བ་དེས་ནི་ཉོན་མོངས་པ་ཐམས་ཅད་རང་བཞིན་གྱི་གྲུབ་པ་མེད་པར་རང་མཚང་རིག་པས་གྲོལ་བར་འགྱུར་ཏེ། མདོ་ལས། མི་མཆོག་གང་དག་མྱ་ངན་འདས་པ་དང༌། །དེ་དག་གིས་ཀྱང་སེམས་ཅན་མང་བཀྲོལ་བ། །མཁས་རྣམས་རང་བཞིན་འོད་གསལ་སྟོང་པ་ཡི། ཆོས་རྣམས་དེ་ལྟར་མཁྱེན་པས་རྣམ་པར་གྲོལ། །ཞེས་ཆོས་རྣམས་རང་བཞིན་གྱི་དག་པ་ལ་དེ་ལྟར་མཁྱེན་པས་གྲོལ་ཞེས་
པའོ། །གསེར་མཆོག་འོད་དཔལ་གྱིས་ཞུས་པ། འཇམ་དཔལ་རྣམ་པར་རོལ་པའི་མདོར་ཡང༌། བུ་མོ་སྐྱེ་བོའི་ཚོགས་ཐམས་ཅད་ཀྱིས་ཁྱོད་མཐོང་ཡང༌། ཕྱིར་ཞིང་ཆགས་པ་མེད་ན་ཁྱཽད་ཀྱི་ཉོན་མོངས་པ་དེ་གང་དུ་བཞག །བུ་མོས་སྨྲས་པ། འཇམ་དཔལ་སེམས་ཅན་ཐམས་ཅད་ཀྱི་ཉོན་མོངས་རྣམས་ནི་ཡེ་ཤེས་དང་རྣམ་པར་གྲོལ་བ་ལ་གནས་པ་དང༌། ཆོས་ཀྱི་དབྱིངས་ལ་གནས་པ་སྟེ། དེ་དག་ཀྱང་མ་སྐྱེས་པ་དང༌། མ་བསྒྱུར་བ་དང༌། མ་བཀག་པ་སྟེ། དེ་ལྟར་བདག་གིས་རྟོགས་སོ། །ཉོན་མོངས་པའི་རང་བཞིན་གང་ལགས་པ་དེ་ཡང༌། བདག་གིས་རྟོགས་ལགས་སོ། །ཞེས་དང༌། གཟུངས་ཀྱི་དབང་ཕྱུག་རྒྱལ་པོས་ཞུས་པ། དེ་བཞིན་གཤེགས་པའི་ཐུགས་རྗེ་ཆེན་པོ་བསྟན་པའི་མདོར་ཡང༌། རིགས་ཀྱི་བུ་སེམས་རང་བཞིན་གྱིས་འོད་གསལ་བའི་ཕྱིར། བྱང་ཆུབ་རང་བཞིན་གྱིས་འོད་གསལ་བའོ། །ཅིའི་ཕྱིར་རང་བཞིན་གྱིས་འོད་གསལ་བ་ཞེས་བྱ་ཞེ་ན། རང་བཞིན་གང་ཡིན་པ་དེ་ནི་ཀུན་ནས་ཉོན་མོངས་པ་མེད་པ་ནམ་མཁའ་དང་མཚུངས་པ་ནམ་མཁའི་རང་བཞིན་ནམ་མཁའ་དང་མཉམ་པར་གཞོལ་བ། ནམ་མཁའ་དང་མཉམ་པས་མཉམ་པ་སྟེ། རང་བཞིན་དེ་ནི་ཤིན་ཏུ་འོད་གསལ་བ་ཉིད་དོ། །བྱིས་པ་སོ་སོའི་སྐྱེ་བོ་རྣམས་ཀྱིས་ནི་རང་བཞིན་འདི་ཁོང་དུ་མ་ཆུད་པས་གློ་བུར་གྱི་ཉེས་པ་རྣམས་ཀྱིས་ཀུན་ནས་ཉོན་མོངས་ཏེ། རང་བཞིན་འོད་གསལ་བ་དེ་དག་གིས་ཁོང་དུ་ཆུད་པར་བྱའོ། །སྙམ་དུ་སེམས་ཅན་རྣམས་ལ་དེ་བཞིན་གཤེགས་པའི་ཐུགས་རྗེ་ཆེན་པོ་འཇུག་གོ་ཞེས་དང༌། དེ་ལྟར་སེམས་ནི་ནམ་མཁར་ལྟར་རང་བཞིན་འཕེལ་འགྲིབ་མེད་པ་ཡང༌། ལྷའི་བུ་བློ་གྲོས་རབ་གནས་ཀྱིས་ཞུས་པར། ལྷའི་བུས་སྨྲས་པ།
འཇམ་དཔལ་ཡང་དག་པ་ཞེས་བགྱི་བ་ཅི་ལགས། ལྷའི་བུ་ཡང་དག་པ་ཞེས་བྱ་བ་ནམ་མཁའ་སྟེ། ནམ་མཁའ་ནི་འཕེལ་བའམ། འགྲིབ་པའམ། འབྱུང་བའམ། འཇིག་པར་མི་འགྱུར་བས། དེའི་ཕྱིར་ནམ་མཁའ་ནི་ཡང་དག་པའོ། །ཡང་དག་པ་ནི་སྟོང་པ་ཉིད་དོ། །ཡང་དག་པ་ནི་དེ་བཞིན་ཉིད་དོ། །ཡང་དག་པ་ནི་ཆོས་ཀྱི་དབྱིངས་སོ། །ཡང་དག་པ་ནི་ཡང་དག་པའི་མཐའ་འོ། །ཡང་དག་གང་ཡིན་པ་དེ་ནི་མ་བྱུང་བའོ་ཞེས་དང༌། འཇམ་དཔལ་རྣམ་པར་རོལ་པ་དེ་ཉིད་དུ་ཡང༌། སྲིང་མོ་འདི་ལྟ་སྟེ་དཔེར་ན་ནམ་མཁའ་གང་ལ་མེ་འབར་ཡང་ནམ་མཁའ་ནི་མེ་དེས་ཚིག་པར་མི་ནུས་སོ། །སྲིང་མོ་དེ་བཞིན་དུ་གང་རང་བཞིན་གྱིས་འོད་གསལ་བ་ལ་གློ་བུར་གྱི་ཉོན་མོངས་པ་བྱུང་ཡང༌། རང་བཞིན་གྱིས་འོད་གསལ་བ་དེ་ནི་གློ་བུར་གྱི་ཉོན་མོངས་པ་དེས་ཀུན་ནས་ཉོན་མོངས་པར་ཡང་བྱེད་མི་ནུས་སོ། །བདེ་བ་རང་བཞིན་མེད་པར་རྣམ་པར་མི་རྟོག་པས་ཤེས་ན་འཛག་མེད་ཀྱི་བདེ་བ་འདི་ནི་ཚུལ་ཁྲིམས་ཀྱི་ཚོགས་རྣམ་པར་དག་པར་འགྱུར་ཏེ། འོད་སྲུང་གིས་ཞུས་པ་ལས་ཀྱང༌། འོད་སྲུང་བཞི་པོ་འདི་དག་ནི་ཚུལ་ཁྲིམས་འཆལ་བ་ཚུལ་ཁྲིམས་དང་ལྡན་པར་བཅོས་པ་ཡིན་ཏེ། བཞི་གང་ཞེ་ན། འོད་སྲུང་འདི་ལ་དགེ་སློང་ཁ་ཅིག་ཚུལ་ཁྲིམས་ལྡན་ཞེས་སོགས་ནས་འཚོ་བ་ཡོངས་སུ་དག་ཀྱང་བདག་ཏུ་སྨྲ་བ་ཡིན་ཏེ། འོད་སྲུང་དེ་ནི་ཚུལ་ཁྲིམས་འཆལ་བ་ཚུལ་ཁྲིམས་དང་ལྡན་པ་ལྟར་འཆོས་པ་དང་པོའོ། །དེ་བཞིན་དུ་སྦྱར་ཏེ་འཇིགས་ཚོགས་ལ་ལྟ་བ་ལས་མི་བསྐྱོད་པ་གཉིས་པ་དང༌། བྱམས་པ་དང་ལྡན་པ་ཡིན་ཡང་འདུ་བྱེད་སྐྱེ་བ་མེད་པ། ཐོས་ན་སྐྲག་སྟེ་ཀུན་ཏུ་དང་བ་གསུམ་པ་དང༌། སྦྱངས་པའི་ཡོན་ཏན་ལ་གནས་ཀྱང་ངར་འཛིན་པ་དང་ང་ཡིར་འཛིན་ན་བཞི་པར་གསུངས་ཤིང༌། འོད་སྲུང་
ཚུལ་ཁྲིམས་ཚུལ་ཁྲིམས་ཞེས་བྱ་བ་ནི་གང་ལ་བདག་མེད་པ་དང་བདག་གི་བ་མེད་པ་དང༌། བྱ་བ་མེད་པ་དང༌། མི་བྱ་བ་མེད་པ་དང༌། བྱེད་པ་མ་ཡིན་པ་བྱེད་པ་མེད་པ། རྒྱུ་བ་མི་རྒྱུ་བ། རབ་ཏུ་སྤྱོད་པ། རབ་ཏུ་སྤྱོད་པ་མེད་པ། མིང་དང་གཟུགས་མ་ཡིན་པ་ཞེས་པ་ནས། རྟེན་མེད་པ་དང་བརྟེན་མེད་པའང་མ་ཡིན་པ་དང༌། བདག་གི་ཚུལ་ཁྲིམས་ལ་མི་བསྟོད་པ་དང༌། ཚུལ་ཁྲིམས་ཀྱིས་རློམ་སེམས་སུ་མི་བྱེད་པ་དང་ཚུལ་ཁྲིམས་ལ་མི་རྟོག་པ་ཡིན་ཏེ་ཞེས་སོགས་གསུངས་པ་མཐུན་ནོ། །འོན་ཀྱང་མདོའི་དགོངས་པ་ནི། ཟླ་བ་གྲགས་པའི་ཞལ་སྔ་ནས་ཀྱང༌། གང་ཕྱིར་དེ་ནི་ཁྲིམས་དག་རང་བཞིན་ལྟ། །དེ་ཕྱིར་དེ་ནི་ཚུལ་ཁྲིམས་དག་མི་འགྱུར། ། དེ་ཕྱིར་དེ་ནི་རྟག་ཏུ་གསུམ་ཅར་ལ། །གཉིས་བློའི་རྒྱུ་བ་ཡང་དག་བྲལ་བར་འགྱུར། །ཞེས་དང༌། རློམ་སེམས་མེད་པའི་ཚུལ་ཁྲིམས་ཀྱིས། །ཞེས་པ་ལྟར་འཁོར་གསུམ་མི་དམིགས་པས་ཡོངས་སུ་ཟིན་ན་ཚུལ་ཁྲིམས་རྣམ་པར་དག་པར་འགྱུར་ཞེས་པ་ཙམ་སྟོན་པ་ཡིན་ལ། འདིར་ཚུལ་ཁྲིམས་ནི་འཛག་མེད་ཀྱི་ཚུལ་ཁྲིམས་ཏེ་བདེ་སྟོང་གཉིས་སུ་མེད་པ་སྟོན་པའི་ཕྱིར་ཐུན་མོང་མ་ཡིན་པའི་ཁྱད་པར་ནི་དབྱེར་ཡོད་དོ། །དེ་ལྟར་ན་སྔར་བཤད་པ་ལྟར་འདོད་ཆགས་ལ་སོགས་པ་རང་བཞིན་མེད་པ་དེ་ཉིད་སྟོང་པ་ཉིད་དེ་ཆོས་ཀྱི་སྐུ་དང་ངོ་བོ་གཅིག་པ་ཡིན་ལ། འདིར་རང་བཞིན་མེད་པའི་དོན་ཡང༌། དཔེར་ན་འདོད་ཆགས་ཀྱི་རང་བཞིན་ནམ་ཡིན་ལུགས་ནི་མི་བདེ་ཞིང་མེད་པ་སྟེ། འདོད་ཆགས་ཉིད་རང་བཞིན་མེད་པ་ཡིན་པ་དང༌། གནས་ཚུལ་ལ་མེད་པ་དེ་ཉིད་ཁོ་ན་ལ་སྣང་བའི་ཆ་འདོད་ཆགས་ལ་སོགས་པར་སྣང་བ་དེ་ཉིད་རང་བཞིན་མེད་པའི་དོན་ཡིན་གྱི་དེ་དང་དེའི་རང་བཞིན་མེད་པ་ཐ་དད་
དུ་གོ་བར་མི་བྱའོ། །དེ་ཡང་ཐ་སྙད་དུ་འཇོག་ན་དེ་ཡང་ཡིན་ལ། བརྟགས་ན་མི་སྙེད་པའི་རང་བཞིན་མེད་པ་ཡིན་པས་དེ་རང་བཞིན་མེད་པར་འཇོག་དགོས་ལ། དོན་དུ་ནི་དེ་རང་བཞིན་མེད་པའི་ཕྱིར་འཇོག་རྒྱུ་མེད་དོ། །དེ་ལྟར་མེད་པ་ལ་མེད་པར་ཤེས་པའི་ཚེ་ན། ཆགས་སྡང་ལ་སོགས་པའི་སྣང་བ་བརྒྱ་ཕྲག་དུ་མ་ཤར་ཡང༌། སྐྱེས་ཙམ་ཉིད་ན་རང་བཞིན་སྟོང་བར་མཐོང་བའི་ཕྱིར། སེམས་འགྱུར་བཅས་སུ་འཁྲུལ་པ་གཏན་མེད་པར་འགྱུར་རོ། །ཅི་འདི་ལྟར་སེམས་འགྱུར་བ་མེད་པ་ནི། ཕ་རོལ་ཏུ་ཕྱིན་པའི་ཚུལ་ལས་ཀྱང་འབྱུང་ལ། དེ་ཉིད་མི་འགྱུར་བའི་བདེ་བ་ཡིན་ནོ་གསང་སྔགས་ཀྱི་ཐུན་མོང་མ་ཡིན་པར་ཅི་ལྟར་འགྱུར། དེ་ལ་འདི་ལྟར་བརྗོད་པར་བྱ་སྟེ། ཁོ་བོ་ཅག་གིས་འདི་ལྟར་ཞུ་བདེ་ལ་ཡང་དང་ཡང་དུ་བསྔགས་པ་བརྗོད་པ་མ་ཐོས་སམ། གང་ཐུན་མོང་དེ་དག་ནི་ཐུན་མོང་པར་བསྟན་ལ། ཐུན་མོང་མ་ཡིན་པ་རྣམས་ཀྱང་བཤད་ཅིང་འཆད་པར་འགྱུར་མོད་ཀྱི། འོན་ཀྱང་ངག་དོན་ནི། ཇི་སྲིད་འགྱུར་མེད་ཉིད་ཀྱི་བར། །རྟེན་དང་བརྟེན་པའི་འབྲེལ་བར་བཅས། །སེམས་ཀྱི་འགྱུར་མེད་ཉིད་ཐོབ་ནས། །རྟེན་དང་བརྟེན་པའི་འབྲེལ་བ་མེད། །ཅེས་པ་ལྟར། ལུས་ཀྱང་སེམས་ཀྱི་སྣང་བ་ཡིན་པ་དང༌། འགྱུར་མེད་ཐོབ་པ་ན་རྟེན་བརྟེན་པ་ཐ་དད་དུ་སྣང་བ་འགག་པས་སེམས་འགྱུར་མེད་ཀྱི་གནས་ཚུལ་རྟོགས་པ་གལ་ཆེ་བས། ལུས་ནི་འགྱུར་མེད་ཉིད་ཐོབ་ནས་ཞེས་ནི་མ་གསུངས་ལ། དེ་ལྟར་ན་སྔར་བཤད་པ་ལྟར་འགྱུར་མེད་དེ་ཉིད་རྡོ་རྗེ་སྐུ་གཞིག་ཏུ་མེད་པ་དང་རོ་གཅིག་པ་ཡིན་ལ། འགྱུར་བ་མེད་པའི་སེམས་དེ་ཡང་སྡུག་བསྔལ་ལོག་ཙམ་མ་ཡིན་པ་སྟེ། རང་བཞིན་མངོན་དུ་གྱུར་པའི་སྒཽ་གསུམ་གྱི་བདེ་བ་ཟག་མེད་རོ་གཅིག་པའི་བདག་ཉིད་ཡིན་ལ། དེ་ཉིད་སྒྲུབ་
པར་བྱེད་པའི་ཐབས་ཕྱག་རྒྱ་ཆེན་མོས་ལུས་ཀྱི་ཆོས། ཐིག་ལེ་འཛག་མེད་དུ་བཅིངས་པས་ལུས་སེམས་རོ་གཅིག་འགྱུར་མེད་བདེ་བར་འགྱུར་པ་ཡིན་ནོ། །ཐུན་མོང་མ་ཡིན་པའི་རྒྱུ་ཡིན་པའི་ཕྱིར། སངས་རྒྱས་ཀྱི་བདེ་བ་ལ་ཡང་ཐིག་ལེ་འགྱུར་མེད་ཀྱི་བདེ་བ་ཞེས་བྱ་ལ། དེ་ཞུ་བདེ་དང་རྣམ་པ་མཐུན་པ་ཡིན་པ་དང༌། དེ་མངོན་དུ་བྱེད་པ་ལ་སྒྲིབ་པ་ནི་ཤེས་སྒྲིབ་ཀྱི་ཁྱད་པར་སེམས་ཀྱི་རང་བཞིན་སྡུག་བསྔལ་དུ་འཁྲུལ་བའི་བག་ཆགས་ཀྱི་ས་བོན། གཟུང་འཛིན་གཉིས་སྣང་གི་ཆ་ཤས་ཕྲ་མོ་ཞིག་ཡིན་པ། ལམ་གཞན་གྱི་འཇོམ་པར་མི་ནུས་ཏེ། ལྷན་སྐྱེས་གཉིས་རོ་མཉམ་པའི་རྣམ་པ་ཅན་གྱི་རྡོ་རྗེ་ལྟ་བུའི་ཏིང་ངེ་འཛིན་ཁོ་ནས་འཇོམས་པར་བྱེད་པའི་ཕྱིར་དང༌། དེའི་རྒྱུད་ལས་དང་པོ་པ་ནས་ཀྱང་ཐབས་རྒྱ་ཆེན་པོ་དག་ཡོད་དེ། མདོ་ལས་ནི། རྫོགས་པའི་བྱང་ཆུབ་ཀྱི་བདེ་བ་དང༌། བདེ་བ་དམ་པའི་ཕ་རོལ་ཏུ་ཕྱིན་པ་དང༌། བསྟན་བཅོས་ལས་ཀྱང༌། ཡིད་ཀྱི་རང་བཞིན་ཕུང་པོ་དང༌། །དེ་རྒྱུ་ལོག་ཕྱིར་བདེ་བ་ཉིད། །ཅེས་ཡིད་ལུས་དང༌། མ་རིག་བག་ཆགས་ཀྱིས། ལོག་པས་བདེ་བར་བཞག་པ་སོགས་དོན་གྱིས་འགྱུར་མེད་ཀྱི་བདེ་བའང་ཕྱོགས་ཙམ་བསྟན་མོད་ཀྱི་ལྷན་སྐྱེས་ཀྱི་བདེ་བར་ནམ་ཡང༌། མ་བསྟན་པ་དང༌། ལས་དང་པོ་པའི་སྐབས་སུ་དད་པར་བྱ་བ་ལས་གཞན་ཉེ་བར་མཁོ་བའི་ཐབས་ནི་མ་གསུངས་པས་མདོ་དང་ཐུན་མོང་དུ་ཅི་ལྟར་འགྱུར། དེ་ལྟར་ཡང༌། རྩོད་དུས་ཀྱི་ཐམས་ཅད་མཁྱེན་པ་ཨ་བྷ་ཡ་ཀ་རའི་ཞལ་སྔ་ནས། འོ་ན་བསམ་གཏན་དང་པོ་ཐོབ་པ་རྣམས་དང་འཁོར་ལོས་སྒྱུར་པ་རྣམས་བཞིན་དུ་བདེ་བ་ཉེ་བར་བསྟན་ན་བདག་མེད་པ་གཉིས་ཀ་རྟོགས་པས་ཅི་ཞིག་བྱ། དེ་ལྟར་ནི་དགའ་བ་ལྷག་པ་ཁོ་ན་ལས་དང་པོའི་ས་ནི་རབ་ཏུ་དགའ་བར་
བརྗོད་དོ་ཞེ་ན། བདེན་ཏེ། འདི་ལྷན་ཅིག་སྐྱེས་པའི་དགའ་བ་ནི་མ་ཡིན་ཞིང༌། དེ་ཉིད་ཀྱི་ཕྱིར་བདེ་བ་ཆེན་པོ་མ་ཡིན་ལ། ལས་དང་པོ་པའི་གནས་སྐབས་སུ་ཐབས་སུ་གྱུར་པ་ཡང་མ་ཡིན་ཏེ། ཞེས་དང༌། འོ་ན་ཤེས་རབ་ཀྱི་ཕ་རོལ་ཏུ་ཕྱིན་པར། གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བདེ་བའོ་ཞེས་གསུངས་པ་མ་ཡིན་ནམ་ཞེ་ན། འདི་ནི་གསུངས་མོད། འདིའི་ཐབས་བསྟན་པ་ནི་མ་ཡིན་ཏེ། ཐབས་སུ་གྱུར་པ་ལྷན་ཅིག་སྐྱེས་པའི་བདེ་བ་ཆེན་པོ་ཉེ་བར་མ་བསྟན་པའི་ཕྱིར་རོ། །དེ་ཉིད་ཀྱི་ཕྱིར་དེ་ཡང་རིམ་པ་འདི་ཁོ་ནས་གོ་བར་བྱའོ་ཞེས་དང༌། མཐར་ཐུག་པ་ན་ཡང་ཐབས་འདི་ལ་ངེས་པར་བལྟོས་སོ་ཞེས་མི་འཇིགས་པའི་གཞུང་འགྲེལ་དང༌། མན་ངག་སྙེ་མར་ཡང་དེ་བཞིན་དུ་གསུངས་སོ། །དེ་ལ་བསམ་གཏན་དང་པོ་ཞེས་སོགས་ནི། བསམ་གཏན་གྱི་ཡན་ལག་རྣམས་ལ་བདེ་བའི་ཡན་ལག་ཞེས་པའང་ཡོད་པ་དང༌། ས་དང་པོ་རབ་ཏུ་དགའ་བ་སོགས་ཀྱི་མིང་འཁྲུལ་གཞི་མང་དུ་ཡོད་པ་རྣམས་ལྷན་སྐྱེས་ཀྱི་བདེ་བར་འཁྲུལ་བའི་དོགས་པ་བཀོད་པ་ཡིན་ལ། གཞན་རྣམས་ཀྱི་དོན་སྔར་བཤད་ཟིན་ཏོ། །སྤྲོས་པས་ཆོག་གོ །དེ་ལྟར་ཐབས་སུ་གྱུར་པའི་ཞི་བདེ་དེ་ཡང་དགའ་བ་བཞིའི་བདག་ཉིད་ཅན་ཡིན་པ་ལས་དགའ་བ་གཞན་གསུམ་ལྷན་སྐྱེས་ཀྱི་ངོ་བོར་གནས་སམ་མི་གནས་ཞེ་ན། ཡང་ན་ཞེས་པ་འགའ་ཞིག་གི་དོན་ཏེ། རླུང་དབུ་མར་ཐིམ་པ་བརྟན་པའི་བདེ་སྟོང་གཉིས་སུ་མེད་པའི་ལྷན་སྐྱེས་མངོན་དུ་གྱུར་པའི་མས་བརྟན་གྱི་དགའ་བ་ཐམས་ཅད་དང༌། རང་བཞིན་ལྷན་སྐྱེས་མངོན་དུ་གྱུར་ནས་ནི། དགའ་བ་བཞི་པོ་ཐམས་ཅད་ཀྱང་ལྷན་སྐྱེས་དེ་ཉིད་ཀྱི་བདག་ཉིད་ཡིན་ལ། དེ་དག་མ་ཡིན་པ་ལ་ནི། དགའ་བ་གསུམ་པོ་ལྷན་སྐྱེས་མ་ཡིན་ནོ། །དེའི་ཕྱིར་དེ་ཀུན་གྱི་ལྷན་སྐྱེས་སྤངས་ཞེས་
པ་སྟེ། འོན་ཀྱང་མས་བརྟན་གྱི་དགའ་བ་ཐམས་ཅད་ལ་ལྷན་སྐྱེས་དང་རྣམ་པ་མཐུན་པ་ནི་ངེས་པར་ཡོད་ཅིང༌། དེ་ལྟར་ན་ཡང་རླུང་དབུ་མར་མས་བརྟན་གྱི་བར་དུ་མས་བརྟན་གྱི་དགའ་བ་གསུམ་པོ་ལ། སྤྲོས་པ་མཐའ་དག་ནུབ་པའི་རྣམ་པ་ཅན་དུ་མི་འབྱུང་བས་ལྷན་སྐྱེས་སུ་ནི་མི་འཇོག་གོ །བརྟན་ནས་ནི་ཡས་བབས་ཀྱི་ལྷན་སྐྱེས་ཀྱི་སྐབས་སུ་སྤྲོས་པ་ཐམས་ཅད་ནུབ་པ་ལས། སླར་མས་བརྟན་གྱི་སྐབས་ཀྱང་རླུང་སེམས་དྷཱུ་ཏཱིར་ཐིམ་པ་ཞེས་པ་དེ་ལ་གནས་པས་སེམས་སྤྲོས་མེད་ཁོ་ནར་འབྱུང་བ་དང༌། ཡས་བབས་ཀྱི་ལྷན་སྐྱེས་པས། མས་བརྟན་གྱི་དགའ་བ་དང་པོ་ཡང་བདེ་བ་ཆེ་བ་དང༌། མས་བརྟན་བཞི་པོ་ཡང་ཕྱི་མ་ཕྱི་མ་བདེ་བ་ཆེ་བ་ཡིན་ནོ། །འོ་ན་ཕྱག་རྒྱ་ཆེན་པོ་ཐིག་ལེར། དགའ་བཞི་སྣང་བ་བཞི་དང་གཅིག་པར་བཤད་པ་མ་ཡིན་ནམ། སྣང་བ་གསུམ་གྱི་འོད་གསལ་ཐམས་ཅད་སྟོང་པར་འཇོག་པ་ནི་ནམ་ཡང་མེད་པ་ལྟ། ཞེ་ན། སྨྲས་པ། བདེན་མོད་ཀྱི་སྤྱིར་ནི་སྣང་བ་བཞིའི་བདེ་བ་དགའ་བཞི་ཡིན་མོད་ཀྱི། ཡས་བརྟན་དང་མས་བརྟན་གྱི་དགའ་བཞི་དང༌། རླུང་སྙིང་ཁར་འདུས་པའི་སྣང་བ་བཞི་ནི་རྣམ་པ་ཕྱོགས་མཐུན་ན་ཡང༌། ངོ་བོ་མི་ཅིག་པས་སྐྱོན་དེ་ཡོད་པ་མ་ཡིན་ལ། ཡོངས་ཡེ་མས་བརྟན་གྱི་དགའ་བ་བཞི་ལ་ཡང་སྟོང་པ་བཞི་ལུགས་བཟློག་གི་ཐ་སྙད་འཇོག་མོད་ཀྱི། འཁོར་ལོའི་རིམ་པ་ལུགས་བཟློག་ཡིན་གྱི། སྣང་བ་བཞིའི་རིམ་པ་ནི་ལུགས་འབྱུང་ལྟར་སྦྱོར་ཞིང༌། རླུང་སྙིང་ཁར་ཐིམ་པ་ལས་སྡང་བའི་དུས་ཀྱི་སྟོང་པ་བཞི་ལུགས་བཟློག་ལ། དགའ་བཞི་ལུགས་བཟློག་སྦྱོར་མོད་ཀྱི། གོ་རིམ་ནི་ལྷན་སྐྱེས་ནས་དགའ་བའི་བར་དུའོ། །འདིར་གཞན་ཡང་ཞིབ་ཏུ་དགོས་མོད་ཀྱི་ཡི་གེ་མངས་པར་འགྱུར་བའི་ཕྱིར་རེ་ཞིག་བཞག་གོ །དེ་ལྟར་བདེ་སྟོང་གཉིས་སུ་མེད་པའི་ཡེ་ཤེས་འདི་
ནི་བསམ་གྱིས་མི་ཁྱབ་པའི་ཡེ་ཤེས་ཞེས་བྱ་ལ།འདི་ལས་ནི། རྒྱུ་བ་བཅུད་དང་ལྷ་ཚོགས་དང༌། མི་རྒྱུ་བ་སྣོད་དང་དཀྱིལ་འཁོར་སོགས་དག་པ་དང་མ་དག་པའི་འཇིག་རྟེན་གསུམ་གྱི་གཟུགས་བརྙན་ཐམས་ཅད་འཆར་ཞིང་འགྲོ་བའི་ཡོན་ཏན་ཏེ་ཐུན་མོང་གི་དངོས་གྲུབ་ཀུན་ཡང་གཡོན་དེ་བདེ་སྟོང་ལས་བྱུང་བ་ཡིན་ནོ། །དེ་ལྟར་ཡང་གྲུབ་ཆེན་རྟོག་རྩེ་པས་བསམ་མི་ཁྱབ་ཀྱི་གཞུང་དུ། ཀུན་མཁྱེན་གནས་ཀྱི་སྦྱོང་བ་ནི། །བསམ་གྱིས་མི་ཁྱབ་མི་རྟོག་པ། །ཀུན་ཏུ་བཟང་པོ་ཞེས་བྱའི་ལྷ། །ཡིད་བཞིན་ནོར་བུ་ལྟ་བུ་འབྱུང༌། །ས་འོག་རལ་གྲི་རིལ་བུ་དང༌། །ཤིང་ལྷམ་བུམ་པ་གནོད་སྦྱིན་མོ། །བཅུད་དང་མིག་སྨན་བཟང་པོ་ཡང༌། །རང་ཉིད་འགྲུབ་སྟེ་གཞན་དུ་མིན། །སྔགས་པས་དངོས་པོ་སྒོམ་མི་བྱ། །དངོས་མེད་ཉིད་ཀྱང་སྒོམ་བྱ་མིན། །རྣམ་པར་མི་རྟོག་མོས་པ་ཡིས། །ཐམས་ཅད་རང་ཉིད་སྐྱེ་བར་འགྱུར། །སངས་རྒྱས་ཉིད་ཀྱང་འགྲུབ་འགྱུར་ན། །ཞི་བ་ཁྱབ་འཇུག་སོགས་ཅི་སྨོས། །ཞེས་དང༌། སངས་རྒྱས་ཐམས་ཅད་མཉམ་པར་སྦྱོར་བ་སྒྱུ་མ་བདེ་མཆོག་ལས། །སྙིང་དང་དགའ་དང་བདེ་ཀུན་གྱི། །ངན་པར་སྤོང་པའང་འགྲུབ་པར་འགྱུར། །དེ་བས་བདེ་བ་ཉིད་ཀྱི་ནི། །སངས་རྒྱས་བདེ་བ་ཀུན་འཐོབ་བོ། །ཞེས་གསུངས་སོ། །གཉིས་པ་རྣམ་པ་ཐམས་ཅད་པ་བཤད་པ་ལ་ཡེ་ཤེས་འཇུག་ཚུལ། ངོ་བོ་ཇི་ལྟར་ཡིན་པ། གཞི་ལ་གནས་ཚུལ། དེ་རྣམས་ལུང་གི་སྒྲུབ་པའོ། །དང་པོ་ནི། ཐབས་ཤེས་གཉིས་སུ་མེད་པའི་རྣལ་འབྱོར་ཅན་གྱི་ཡེ་ཤེས་ནི། ཡུལ་དང་དུས་ཐམས་ཅད་དུ་རྣམ་པ་སྣ་ཚོགས་པ་ཚུལ་ཐམས་ཅད་ཀྱི་ཡེ་ཤེས་འཇུག་པ་ཡིན་ནོ། །གཉིས་པ་ནི། ཇི་ལྟ་བ་དང་ཇི་སྙེད་པ་མཁྱེན་པའི་ཡེ་ཤེས་ཀྱི་དཀྱིལ་འཁོར་དཔག་ཏུ་མེད་པ་རྣམས་སོ། །གསུམ་པ་ནི། ས་
བོན་གྱི་མཐུས་བག་ཆགས་ཀྱི་སྣང་བ་བརྟས་པ་ལས། རྩ་ལ་སོགས་པ་ཕྱི་ནང་གི་ཆོས་ཇི་སྙེད་པར་སྣང་བའི་སེམས་འདི་ཉིད་ཀྱི་རང་བཞིན་ནི་རྣམ་པ་ཐམས་ཅད་པའི་ཡེ་ཤེས་ཡིན་ཏེ། མི་ཕྱེད་མ་ལ་སོགས་པའི་རྩ་རྣམས་ཐམས་ཅད་རབ་གཏུམ་མ་ལ་སོགས་པའི་མཁའ་འགྲོ་མ་དང༌། དེའི་ཤུགས་ལས་ཁམས་རྣམས་དཔའ་བོ་དང༌། ཕུང་པོ་ལྔ་ཡང་སངས་རྒྱས་རིགས་ལྔའི་དཀྱིལ་འཁོར་ཏེ། དེ་ལྟར་བསྟན་པའི་ཤུགས་ལ་འབྱུང་བ་བཞི་ལྷ་མོ་བཞི་དང༌། སྐྱེ་མཆེད་རྣམས་ནི་སེམས་དཔའ་ཡབ་ཡུམ་དང༌། ཡན་ལག་རྣམས་ནི་ཁྲོ་བོར་ཡང་སྟོན་ནོ། །གཙོ་བོ་ལུས་ཡིན་མོད་ཀྱི་དེར་མ་ཟད་འདི་ལྟར་སྣང་བ་སྟེ་ཐོག་བཅས་གཟུགས་ཅན་རྣམས་དང༌། མི་སྣང་བ་སྟེ་བསྟན་དུ་མེད་ཅིང་ཐོགས་པ་མེད་པའི་ཆོས་རྣམས་ཀུན་ཡང་དཀྱིལ་འཁོར་དམ་པ་ཉིད་དུ་ཤེས་པར་བྱའོ། །བཞི་པ་ལ་གཉིས་ལས་མངོན་བརྗོད་བླ་མའི་ལུང་ནི། ཡི་གེ་བརྒྱ་པ་ཞེས་དང་པོར་འབྱུང་བའི་ཚིགས་བཅད་གཅིག་ནི། ཡི་གེ་བརྒྱ་པས་ཐམས་ཅད་དུ། གསང་སྔགས་བསྟན་པར་བསྒོམས་ནས་སུ། །རང་གི་མིང་དང་ལྡན་པར་ནི། །གཅིག་པུ་སྤེལ་ནས་བཟླས་པ་བྱ་ཞེས་ངེས་པར་བརྗོད་པར་འདི་གསུངས་པའོ། །དེ་ཉིད་དགོངས་པས་བཤད་པ་ནི། ཡི་གེའི་སྐད་དོད་ཨཀྵར་འགྱུར་མེད་དེ། སྤྱོད་བསྡུས་སྒྲོན་མ་ལས་རྒྱས་པར་འབྱུང་བ་ལྟར། གཞི་དུས་ཀྱི་ཕུང་ཁམས་དམ་པ་རིགས་བརྒྱའི་ངོ་བོར་གནས་པ་སྟེ་དེ་རྣམས་ཀྱི་རང་བཞིན་སྟོང་པའི་ཡེ་ཤེས་ནི་འགྱུར་མེད་དེ། དེ་རྣམས་རྣམ་པ་ཐམས་ཅད་པའམ། རྣམ་པ་ཀུན་ཏུ་འཆར་བའི་ལྷའི་དཀྱིལ་འཁོར་དུ་སྣང་བ་གཞོམ་མེད་ཀྱི་ནཱ་དའི་དབྱངས་ཀྱི་གསང་སྔགས་དང་ལྡན་པའི་ཕྱི་རོལ་གྱི་རྐྱེན་གྱིས་མི་འགྱུར་བས་བརྟན་པར་བསྒོམས་ལ། གཅིག་པུ་ཞེས་པ་བདག་ཉིད་ཀྱི་སེམས་ཏེ།
དེ་དང་སྤེལ་བ་ནི་དེའི་རང་བཞིན་དུ་ཤེས་པ་དང༌། རང་གི་མིང་དང་ལྡན་པ་ནི་དངོས་པོ་ཀུན་ཏེ། སེམས་དེ་ཡང་མིང་ཙམ། དེའི་ཕྱིར་དེའི་སྣང་བ་ཀུན་ཡང་མིང་ཙམ་སྟེ་དོན་དུ་རང་བཞིན་མེད་དོ། །ཟུང་འཇུག་གི་ཡེ་ཤེས་ཀྱང་དོན་དམ་པར་མིང་ཙམ་སྟེ། རྟོག་རྩེ་པས། གཉིས་སུ་མེད་པ་མིང་ཙམ་སྟེ། །དེ་ལ་མིང་ཡང་ཡོད་མ་ཡིན། །གཉིས་མེད་མིང་དུ་བཟུང་བ་ལ། །བདག་ལ་རྣལ་འབྱོར་པས་བཟོད་མཛོད། །ཅེས་གསུངས་སོ། །གཉིས་མེད་མིང་དུ་བཟུང་བ་ནི་སྒྲ་སྤྱི་སྣང་བ་ཞིག་ལ་ཟུང་འཇུག་ཏུ་ཞེན་པའོ། །དེ་ལྟར་ན། ལྷ་སྐུར་སྣང་བ་ཡང་སྟོང་པ་ཉིད་དུ་ཤེས་པས་བདེ་སྟོང་འོད་གསལ་བར་འཇུག་པའི་བཟླས་པ་བྱའོ་ཞེས་རྣམ་པ་ཐམས་ཅད་པ་རྒྱ་ཆེ་བ། དེ་ཡང་ཟབ་པ་དང་སྒྲོལ་ལོ། །གཉིས་པ་རྣལ་འབྱོར་མ་ཀུན་སྤྱོད་ཀྱི་ལུང་ནི། འགྲོ་བ་འདི་ཀུན་སངས་རྒྱས་ལྔའི་བདག་ཉིད་དེ། སེམས་རང་བཞིན་གྱི་འོད་གསལ་བ་འདི་ནི། གང་ཡང་དྲུག་པའི་སངས་རྒྱས་རྡོ་རྗེ་སེམས་དཔའ་དང༌། ཀུན་ཏུ་བཟང་པོ་དང༌། དང་པོའི་སངས་རྒྱས་ཞེས་བྱ་བ་ཡིན་ལ། འདི་ཉིད་གཅིག་པུ་གཞི་ལམ་འབྲས་བུའི་ཉམས་ནི་དུ་མ་ལ་གར་མཛད་དེ། སོ་སོ་སྐྱེ་བོ་དང༌། འཕགས་པ་དང༌། སངས་རྒྱས་ཞེས་གནས་སྐབས་ཐ་དད་ནི་གར་མཁན་གཅིག་ཉིད་ཚུལ་སྣ་ཚོགས་སུ་བསྒྱུར་བ་ལྟ་བུ་དང༌། མ་དག་པ་དང་དག་པའི་ཆོས་ཇི་སྙེད་སྣང་བ་ནི་ཐམས་ཅད་སེམས་གཅིག་པུའི་བཀོད་པ་ཡིན་པའི་ཕྱིར། རི་མོ་མཁན་མཁས་པས་རི་མོ་སྣ་ཚོགས་འདྲི་བ་ལྟར་སྣང་ངོ༌། །གསུམ་པ་སོ་སོར་འབྱེད་པ་ལ། ཡོངས་སུ་འབྱེད་པའི་ཤེས་རབ་ཀྱི་རང་བཞིན། དེའི་དབྱེ་བ་དང་རྟོགས་ཚུལ་ལོ། །དང་པོ་ནི། ཡེ་ཤེས་གང་ལ་དངོས་པོ་ཀུན་གྱི་རྣམ་པ་གསལ་བར་ཤར་བ་སྟེ་རྩོལ་བ་དང་རྣམ་པར་རྟོག་པས་ཅུང་ཟད་ཀྱང་མ་རྟོགས་
པར་ཡང་ཤེས་བྱ་ཐམས་ཅད་ཡེ་ཤེས་གཅིག་ཅར་མཁྱེན་པའོ། །གཉིས་པ་ལས་དབྱེ་བ་ནི། ཇི་ལྟ་བ་མཁྱེན་པ་དང༌། ཇི་སྙེད་པ་མཁྱེན་པ་གཉིས་ཏེ། དེ་ཡང༌། ཆས་ཕྱེ་བ་ལས་ངོ་བོ་གཉིས་པ་ནི་མེད་དེ། ཡེ་ཤེས་གང་གིས་ཆོས་ཐམས་ཅད་ཀྱི་རང་བཞིན་སྟོང་པ་ཉིད་དེ་རྣམ་པར་ཤེས་པ་དེའི་ཚེ་ཇི་སྙེད་པ་ཐམས་ཅད་ཤེས་པར་འགྱུར་ཏེ། ཆོས་ཀུན་གྱི་ངོ་བོ་ཤིན་ཏུ་རྟོགས་དཀའ་བར་རབ་ཏུ་ཤེས་པས་དེའི་རྣམ་པ་རྟོགས་པ་སླ་བ་ཀུན་ཤེས་པ་ཉིད་དུ་འགྱུར་བ་རིགས་པས་སོ། །རྟོགས་ཚུལ་ནི་གནས་ལུགས་ཇི་ལྟ་བ་དང་སྣང་ཚུལ་ཇི་སྙེད་པ་ཇི་ལྟར་གནས་པ་ཀུན་དེ་ལྟར་རྟོགས་པ་ནི་དཔེ་དང་གཏན་ཚིགས་ལ་བརྟེན་ཏེ་བྱུང་བའི་རྗེས་དཔག་གིས་ནི་མ་ཡིན་ལ། རྣལ་འབྱོར་གྱི་མངོན་སུམ་གྱི་ནི་ཚད་མས་རྟོགས་པར་བྱེད་དོ། །དེས་ན་ཐ་སྙད་གདགས་པར་ནི་གཞལ་བྱ་དང་འཇལ་བྱེད་དུ་འཇོག་ལ། ངོ་བོ་ནི་ཇི་ལྟ་བ་དང་ཇི་སྙེད་པ་དང་དེ་གཉིས་མཁྱེན་པའི་ཡེ་ཤེས་རྣམས་ངོ་བོ་གཅིག་ཡིན་ཏེ། གཞན་གྱི་གཞན་རྟོགས་པ་དོན་དམ་ལ་མི་རུང་བའི་ཕྱིར། དེས་ན་དོན་དམ་པ་ལ་གཞལ་བྱ་འཇལ་བྱེད་ཀྱི་དབྱེ་བ་མེད་པས་རྟོག་གེ་ལས་འདས་པ་ཡིན་ནོ། །སངས་རྒྱས་ལ་དབང་ཡིད་ཀྱི་མངོན་སུམ་ཡོད་ཟེར་བ་དང༌། གཉིས་སྣང་ཡོད་ཀྱང་མ་འཁྲུལ་བར་བཞེད་པ་སོགས་ནི་འཐད་པར་མི་སྣང་ཡང་ཡི་གེའི་འཇིགས་པས་བཏང་སྙོམས་སུ་བྱས་སོ། །བཞི་པ་སྟོང་པ་ཉིད་ལ། སྟོང་ཉིད་དངོས་བཤད་པ་དང༌། ལྷུན་གྲུབ་དང་ཐུན་མོང་གི་དོན་བཤད་པའོ། །དང་པོ་ནི། དངོས་པོ་ཐམས་ཅད་རྒྱུ་དང་རྐྱེན་ཉེ་བར་ཕྲད་པ་ལས་བྱུང་བའི་ཕྱིར་རང་གི་ངོ་བོས་མ་གྲུབ་པའམ། ཆོས་ཐམས་ཅད་ནི་གཞན་ལ་ཉེ་བར་ལྟོས་པའི་བརྟེན་ཅིང་འབྲེལ་བར་འབྱུང་བ་ཡིན་པས་
ན་རང་བཞིན་གྱི་སྟོང་པ་སྟེ། དཔེར་ན་ཆུང་ངུ་ལ་ལྟོས་ནས་ཆེན་པོ་བཞག་པ་ཡིན་གྱི། རང་གི་ངོ་བོས་ནི་ཆེན་པོར་གྲུབ་རྒྱུ་མེད་ལ། ཆུང་ངུ་ཡང་དེ་ལ་ལྟོས་ནས་དེར་བཞག་པ་ཡིན་པས། ཕན་ཚུན་བརྟེན་པའི་ཕྱིར་གཉིས་ཀའང་འགྲུབ་པ་མེད་པ་ཡིན་ནོ། །སྐྱེ་བ་མེད་པ་ནི་བདག་དང་གཞན་དང་གཉིས་ཀ་དང༌། རྒྱུ་མེད་པ་ལས་མི་སྐྱེ་བ་སྟེ། སྐྱེ་བ་རང་བཞིན་གྱིས་མེད་དེ། བསྐྱེད་བྱ་སྐྱེད་བྱེད་ཐམས་ཅད་རང་བཞིན་གྱིས་དམིགས་རྒྱུ་མེད་པའི་ཕྱིར་རོ། །དེ་ལྟར་ཡང་སློབ་དཔོན་འཕགས་པའི་ཞལ་ནས། བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །དངོས་པོ་གང་དང་གང་ན་ཡང༌། །སྐྱེ་བ་ནམ་ཡང་ཡོད་མ་ཡིན། །ཞེས་གསུངས་པ་སོགས་རྒྱ་ཆེར་སྦྱར་ན་འོས་པ་ཡིན་ནོ། །དེ་ལྟར་བརྟེན་ཅིང་འབྲེལ་འབྱུང་གི་ཕྱིར་སྐྱེ་བ་མ་དམིགས་ལ། དེའི་ཕྱིར་དངོས་པོ་ཐམས་ཅད་ཀྱི་ངོ་བོ་ཡོད་པ་མ་ཡིན་ཏེ། རྣམ་པ་ཐམས་ཅད་དུ་མ་དམིགས་པའི་ཕྱིར་དང༌། མེད་ཅེས་ཀྱང་མི་བྱ་སྟེ་རྒྱུ་འབྲས་བསླུ་བ་མེད་པར་སྣང་བ་མི་འགགས་པའི་ཕྱིར། དེ་ལྟར་ཡང་འཕགས་པས། རྒྱུ་དང་བཅས་པ་སྐྱེ་མཐོང་བས། །མེད་པ་ཉིད་དུ་ཁས་མི་ལེན། །རྒྱུ་དང་བཅས་པ་འགགས་མཐོང་བས། །ཡོད་པ་ཉིད་དུའང་ཁས་མི་ལེན། །ཞེས་གསུངས་སོ། དེ་ཉིད་ཀྱིས་གཉིས་ཀ་ཡིན་པ་ཁེགས་ཤིང༌། གཞན་ཕྱོགས་བཞི་པ་ནི་སྲིད་པ་མ་ཡིན་ནོ། །དེ་གསུམ་ལས། འདས་པས་སྤྲོས་པ་མེད་ཅིང་བརྗོད་པ་དང་བྲལ་བའོ། །ཅི་དངོས་པོ་རྣམས་ནི་རྒྱུ་དང་རྐྱེན་གྱིས་འདུས་བྱས་པ་ཡིན་ན་ཆོས་ཉིད་ནི་ཇི་ལྟ་བུ། བརྗོད་པ་དངོས་པོ་རྣམས་ལས་གཞན་དུ་ཆོས་ཉིད་ཞིག་མེད་མོད་ཀྱི། ཆོས་ཉིད་རང་གི་ཆ་ནས་རྒྱུ་དང་རྐྱེན་གྱི་འདུས་མ་བྱས་པ་སྟེ། དོན་དམ་པ་ལ་རྒྱུ་དང་རྐྱེན་མེད་པའི་ཕྱིར་རོ། །
རང་བཞིན་གྱི་མེད་པའི་རྒྱུ་མཚན་ཅི་ཞེ་ན། ཡོད་ན་རང་བཞིན་གཅིག་དང་དུ་མ་གང་རུང་དུ་གྲུབ་དགོས་པ་ལས། བརྟགས་ཤིང་དཔྱད་ན་དེ་དང་བྲལ་བའི་ཕྱིར་རོ། །འདིར་སྤྲོ་ན། :རིག་[རིགས་]པའི་ཚུལ་རྒྱ་ཆེར་ཡང་བརྗོད་དུ་རུང་མོད་ཀྱི་ཡི་གེ་མངས་པར་འགྱུར་པ་དང༌། སྙིང་པོའི་དོན་ཇི་ཙམ་གསུངས་བ་དེ་ཙམ་མོ། །གཉིས་པ་ནི། སེམས་ཉིད་ལ་ཐོག་མ་དང་ཐ་མའི་མཐའ་མེད་པས་སྟོང་པ་ཉིད་ཀྱང་ཡིན་ལ་ལྷུན་གྲུབ་ཀྱང་ཡིན་པ་དང༌། དེ་བཞིན་དུ་འོག་མ་རྣམས་ལ་ཡང་རེ་རེས་དེ་གཉིས་ཀའི་དོན་དུ་ཤེས་པར་བྱ་སྟེ། སེམས་ཀྱི་ངོ་བོ་གདོད་མ་ནས་ཟག་པ་མེད་པ་དང༌། ཡུལ་དང་དུས་ལས་ཡོངས་སུ་འདས་ཤིང་མ་བཟུང་བ་དང༌། ངོ་བོ་ལ་གཟུང་འཛིན་གྱི་རང་བཞིན་མེད་པ་དང༌། ཁམས་ཏེ་དབྱིངས་གདོད་མ་དེ་ཡང་རང་བཞིན་མེད་པ་དང༌། བདག་མེད་པའི་ཆོས་ཉིད་ལས་སེམས་ཀྱི་སྣང་བ་དག་འབྱུང་བ་སྟེ། རྒྱུ་རྐྱེན་མ་ཚང་བ་མེད་པར་འབྱུང་བ་དང༌། ཐོག་མ་ནས་རང་རིག་བདེ་བ་ཆེན་པོར་འདུག་པ་འདི་ནི་དོན་དམ་པ་སྟོང་པའི་དཀྱིལ་འཁོར་ཏེ། མཎྜལ་ཞེས་པའི་སྒྲ་ལས་དྲངས་ན། མཎྜལ་ནི་སྙིང་པོ་ལ་ནི་ལེན་པ་སྟེ། སྙིང་པོའི་དོན་ཡང་དབུས་ན་འདུག་པའི་ཕྱིར་རྙེད་དཀའ་བ་དང༌། འགྱུར་བ་མེད་པའི་ཕྱིར་སྲ་བའི་དོན་ཏེ་དེའི་ཕྱིར་མཎྜལ་ལོ། །དེས་ན་ཆོས་ཐམས་ཅད་ཀྱི་སྙིང་པོ་རང་བཞིན་འགྱུར་བ་མེད་པ་ནི། སྟོང་པ་ཉིད་གཅིག་པུ་སྟེ། དེ་ལེན་པའི་ཕྱིར་དཀྱིལ་འཁོར་ནི། དེ་ཁོ་ན་ཉིད་དུ་ཡང་དག་པར་རིག་ཅིང་སྟོང་པ་དེ་ཡང་རྣམ་པ་ཐམས་ཅད་པ་དང༌། དེ་རྟོགས་ཤིང་ལེན་པ་པོ་ཡང་སྤྲོས་པའི་མཚན་ཉིད་ཐམས་ཅད་དང་བྲལ་བའི་བདེ་ཆེན་གྱི་ཡེ་ཤེས་རང་གི་རིག་པ་སྟེ། ངག་དོན་ནི་སེམས་བདེ་བ་ཆེན་པོའི་རང་བཞིན་སྤྲོས་བྲལ་རིག་བྱ་རིག་བྱེད་དབྱེར་མེད་པར་རྟོགས་པ་
ནི་དོན་དམ་པའི་དཀྱིལ་འཁོར་ལྷུན་གྱིས་གྲུབ་པ་སྟེ། ངོ་བོའི་སྒོ་ནས་གསར་བྱུང་མ་ཡིན་པར་ལྷུན་གྱིས་གྲུབ་པ་དང༌། རྣམ་པ་ཐམས་ཅད་པའི་དཀྱིལ་འཁོར་ཡང་ཡིན་ནོ། །དེ་ལྟར་ཡང་དཀྱིལ་ནི་སྙིང་པོ་ཞེས་བརྗོད་དེ། །བྱང་ཆུབ་སེམས་ནི་བདེ་ཆེན་པོ། །ལེན་པར་བྱེད་པས་དཀྱིལ་འཁོར་ཉིད། །འདུས་པ་དཀྱིལ་འཁོར་ཉིད་དུ་བརྗོད། །ཅེས་བདེ་སྟོང་ཟུང་འཇུག་གི་དཀྱིལ་འཁོར་དང༌། རང་རིག་བདག་ཉིད་དག་པ་ཉིད། །དག་པ་གཞན་གྱིས་རྣམ་གྲོལ་མིན། །ཡུལ་གྱི་དངོས་པོ་དག་པའི་ཕྱིར། །རང་གི་རིག་པ་བདེ་བ་མཆོག །ཅེས་བདེ་བ་མཆོག་དེ་རང་རིག་ཏུ་ཡང་གསུངས་སོ། །ལྔ་པ་ལྷུན་གྲུབ་ནི། རང་བཞིན་དྲི་མ་དང་གཏན་ནས་བྲལ་བ་ལྷུན་གྱིས་གྲུབ་པ་ཡིན་ཅིང༌། ནང་སྟེ་རང་བཞིན་གྱི་བདེ་སྟོང་རྟོགས་པའི་ཡོན་ཏན་ཐམས་ཅད་ངོ་བོ་ཡང་ལྷུན་གྱིས་གྲུབ་པར་གནས་པ་ཡིན་པས་ན། སེམས་གང་ལ་ཆོས་ཀྱི་སྐུ་ནི་ལྷུན་གྱིས་གྲུབ་པ་ཡིན་ནོ། །དེ་ལ་ལྷུན་གྱིས་གྲུབ་པ་ཞེས་བྱ་བ། རྣམ་པར་རྟོག་མེད་ལྷུན་གྱིས་གྲུབ་ཅེས་གསུངས་པ་ལྟར་རྣམ་པར་མི་རྟོག་བཞིན་དུ་ཡོན་ཏན་དང་མཛད་པ་ཐམས་ཅད་འབད་རྩོལ་མེད་པར་འབྱུང་བ་ལ་བཤད་པ་མང་ཤིང༌། ཐེག་ཆེན་རྒྱུད་བླ་མའི་བསྟན་བཅོས་དང༌། ཡོན་ཏན་དང་ཡེ་ཤེས་བསམ་གྱིས་མི་ཁྱབ་པ་ལ་འཇུག་པའི་མདོ་ལ་སོགས་པར་ཡང་དེ་ཁོ་ན་ལ་འཆད་ཅིང་འབྲས་བུའི་སྐབས་སུ་སྦྱོར་བར་མཛད་དོ། །འདིར་ནི་ཡེ་ནས་གནས་ཤིང་ཐོག་མ་ནས་ཡོད་པའི་དོན་ལ་སྦྱོར་ཏེ་འབྲས་བུའི་ཡེ་ཤེས་ཀྱི་ངོ་བོའི་ཆ་གཞིའི་དུས་ནས་ཀྱང་གྲུབ་བོ་ཞེས་སྟོན་པའོ། །དྲུག་པ་མཉམ་པ་ཉིད་ནི། གཉིས་ཆོས་སུ་འཛིན་པ་ཐམས་ཅད་རྣམ་པར་སྤངས་པ་དང༌། ཆོས་ཐམས་ཅད་ཀྱི་རང་བཞིན་གཅིག་པ་ཉིད་མངོན་དུ་གྱུར་པ་དང་མ་དག་པའི་སྣང་བ་མེད་ཅིང་རྣམ་
པར་རྟོག་པའི་གཡོ་བ་མེད་ལ། ཀུན་རྫོབ་གཟིགས་པའི་ཆ་ནས་ཀྱང་ཙནྡན་གྱི་བྱུགས་པ་དང༌། ལྟེའུས་གཞོགས་པ་ལ་བྱམས་སྡང་མེད་པར་བཏང་སྙོམས་པ་སྟེ། ཉོན་མོངས་སྤངས་པའི་འབྲས་བུ་དང་གཅིག་དང་དུ་མ་དང་ཉེ་རིང་ལ་སོགས་པ་མཉམ་པར་གྱུར་པ་སྟེ། ཆོས་ཐམས་ཅད་ལ་ཡངས་དོག་མེད་པ་ནི་ཤེས་སྒྲིབ་སྤངས་པའི་འབྲས་བུ་སྟེ། མཉམ་པ་ཉིད་ཀྱི་དོན་ཡིན་ནོ། །བདུན་པ་ཟུང་འཇུག་ནི། ཐབས་སྐུའི་ཆོས་ཀུན་རྫོབ་བདེན་པ་དང༌། ཤེས་རབ་ཡེ་ཤེས་ཀྱི་ཆོས་དོན་དམ་བདེན་པ་གཉིས་མཉམ་པ་ཉིད་དུ་གྱུར་པ་ནི་ཟུང་འཇུག་སྟེ། ཡུལ་གྱི་གནས་ལུགས་ལ་གཉིས་ཀྱི་ཆོས་མེད་པ་བཞིན་དུ་ཡེ་ཤེས་དེ་ལའང་གཉིས་སུ་མི་སྣང་ངོ༌། །དེ་ཡང་སྔར་བཤད་པའི་ཆོས་དྲུག་པོ་གཉིས་སུ་མེད་ཅིང་མི་སྣང་བ་ཡིན་ནོ། །བརྒྱད་པ་ལམ་དང་འབྲས་བུ་ཐབས་ཤེས་ཀྱི་ཡན་ལག་བདུན་གྱི་མཚན་ཉིད་ཅན་དེ་ལ་རྣམ་རྟོག་གི་ཞེན་ཞུགས་ཙམ་གྱི་མི་རྟོགས་པ་བསྟན་པ་ནི་ཀུན་སྤྱོད་ཀྱི་རྒྱུད་ལས་དྲངས་པའི་ཚིགས་བཅད་གཅིག་སྟེ། ཇི་ལྟ་བུ་བུད་མེད་གཞོན་ནུ་མར་གྱུར་པ་བྱིས་པའི་གཏམ་སྟེ་འདོད་པའི་གཏམ་ལ་དགའ་བས་རྗེས་སུ་ཡིད་རང་བ་འདོད་པའི་ཡུལ་དང་ཕེབས་པར་སྨྲ་ཞིང༌། ཕྲད་པའི་གཏམ་ཡང་བརྗོད་པར་བྱེད་མོད་ཀྱི་དགའ་བ་མི་མྱོང་བ་དེ་ལྟར་རྣལ་འབྱོར་གྱི་ལམ་ངན་པ་ཡང་འབྲས་བུ་མེད་པའོ། །དེ་ལ་ལམ་ངན་པ་ནི་སྒྲ་རྟོག་ལ་མཆེལ་པ་དང༌། འཕགས་པའི་མན་ངག་མེད་པར་སོ་སོ་སྐྱེ་བོས་བསྟན་པའོ། །ངན་པའི་ལམ་དེ་ཉིད་སྟོན་ཅིང་སྔགས་པ་ཡང་བརྗོད་ལ། ཡོངས་སུ་ཞེན་ན་འཆིང་བར་བྱེད་པས་ན། ལམ་ཐམས་ཅད་ལ་རློམ་
སེམས་མེད་པའི་ཞེན་མེད་གལ་ཆེ་བ་ཡིན་ནོ། །གཉིས་པ་ཡན་ལག་ལྷག་མ་ལྔ་བཤད་པ་ལ། ཁྱབ་པ་དང༌། བདེ་བ་དང༌། རྟག་པ་དང༌། སྐུ་དང༌། ཟུང་འཇུག་སྟེ་ལྔ་ལས། དང་པོ་ལ། སྤངས་པའི་ཆ་དང་རྟོགས་པའི་ཆ་གཉིས་ལས། དང་པོ་ནི། ཁྱབ་པའི་སྐད་དོད། །བི་བྷུ་ཞེས་པའི་སྒྲ་ལས་དྲངས་ན། ཡང་དག་པར་རབ་ཏུ་ཐོབ་པ་དང༌། བྲལ་བ་ལས་འབྱོར་བ་ཞེས་པའི་དོན་དུ་འགྱུར་ཏེ། སྒྲིབ་པ་ཐམས་ཅད་ཡོངས་སུ་བྲལ་བ་ནི་མི་མཐུན་པའི་ཕྱོགས་སྤངས་པ་ལས་འབྱོར་པ་ཡིན་ཏེ། དགྲ་དང་བྲལ་བ་ལས་རྒྱལ་སྲིད་ཀྱི་འབྱོར་པ་ཐོབ་པ་བཞིན། ཡང་དག་པ་ལས་རབ་ཏུ་ཐོབ་པ་ནི། གདོད་ནས་དྲི་མ་ཞིག་ཡོད་ན་ནི་སྤོང་མི་ནུས་པ་ལས་ཐོག་མ་མེད་ནས་དྲི་མས་ཡོངས་སུ་དག་པའི་ཕྱིར་དྲི་མ་སྤངས་པའི་འགོག་པ་ཐོབ་པ་ཡིན་ཏེ། འགོག་པའི་བདེན་པ་འདུས་མ་བྱས་པ་ཆོས་ཉིད་དེ་ལ་དབྱེ་བ་མེད་པས་དངོས་པོ་ཐམས་ཅད་ལ་ཁྱབ་པའི་དོན་ནོ། །གཉིས་པ་ནི། ཡུལ་ལ་ཉེ་རིང་མེད་པ་དང༌། གང་ཟག་སྟེ་སྐྱེས་བུ་ཐམས་ཅད་ལ་ཁྱབ་པ་དང༌། དུས་གསུམ་དུ་ཉེ་རིང་མེད་པའི་ཕྱིར་ཁྱབ་པའོ། །གཉིས་པ་རྟག་པ་ནི། ཐུགས་ཡེ་ཤེས་འགྱུར་བ་མེད་པ་དང༌། རང་སྣང་གི་སྐུ་རྒྱུན་མི་འཆད་པ་དང༌། གཞན་སྣང་གི་སྐུ་ཡང་འཕྲིན་ལས་ཆད་པའི་དུས་མི་སྲིད་པས་རྒྱུན་མི་འཆད་པའི་ཕྱིར་རྟག་པའོ། །དེ་ལྟར་ཡང་གང་གིས་སྲིད་པ་ཇི་སྲིད་པར། །འགྲོ་ལ་ཕན་པ་སྣ་ཚོགས་དག །མཉམ་དུ་མཛད་པའི་སྐུ་དེ་ནི། །ཐུབ་པའི་སྤྲུལ་སྐུ་རྒྱུན་མི་འཆད། །ཞེས་གསུངས་སོ། །གསུམ་པ་བདེ་བ་ལ། མདོར་བསྟན། རྒྱས་བཤད་གཉིས་ལས། དང་པོ་ནི། ལས་ཀྱི་ཕྱག་རྒྱའི་བདེ་བ་ནི། ཉོན་མོངས་པའི་རྙོག་པ་ཅན་ཏེ། དགའ་བའི་སྐད་ཅིག་མ་དྲུག་ཅུ་རྩ་བཞི་དང༌། ཕྱི་རོལ་
གྱི་བྱེད་པའང་དྲུག་ཅུ་རྩ་བཞིའི་དབྱེ་བ་དང་ལྡན་པས་ན་སྤྲོས་པ་རྣམ་པ་དུ་མ་ཅན་ཡིན་ནོ། །རྣམ་བཅད་དང་རྣམ་མེད་ཀྱི་སྟོང་ཉིད་ཕྱག་རྒྱ་ཆེན་པོ་ལས་སྐྱེས་པའི་བདེ་བ་ཆེན་པོ་ནི། རྒྱུ་འབྲས་ཐམས་ཅད་དུ་སྤྲོས་པ་མེད་ཅིང་ཡང་དག་མ་ཡིན་པའི་ཀུན་རྟོག་འཇོམས་པ་ལ་ཤིན་ཏུ་མཐུ་ཆེ་བ་ཡིན་ནོ། །གཉིས་པ་ལ། ཞུ་བདེའི་དགོས་པ། ཀཱ་ར་ཎའི་དབྱེ་བ་དྲུག་ཅུ་རྩ་བཞི། ལས་རྒྱའི་མཐར་ཐུག་གི་དགོངས་པ། སྤྲོས་མེད་ཀྱི་བདེ་ཆེན་བཤད་པ་སྟེ་བཞི་ལས། དང་པོ་ནི། ཆགས་ཅན་རྗེས་སུ་བཟུང་བའི་ཕྱིར་ཏེ། སྒྲོན་གསལ་ལས་ཀྱང༌། སྐྱེ་བོ་འདོད་ཆགས་ཅན་དོན་དུ་ཞེས་གསུངས་ཤིང༌། དོན་གྱི་གཙོ་བོ་ནི་ལས་ཀྱི་ཕྱག་རྒྱ་དང་སྦྱོར་བའི་ཐབས་སྟོང་དུ་གཅིག་གིས་མ་ཆོག་པ་དྲག་པོ་དབང་ཕྱུག་ཆེན་པོས་ནི་གང་བཤད་པ་དེ་ལྟ་བུར་ཡང༌། དེ་བསྟན་པ་ནི་སྟོང་ཉིད་ཀྱི་ཕྱག་རྒྱ་ལས་སྐྱེས་པའི་བདེ་ཆེན་སྒྲུབ་པར་བྱེད་པའི་ཐབས་སོ། །དེ་ལྟར་ཡང་ཕྱག་རྒྱ་ཆེན་པོ་ཐིག་ལེ་ལས། ཇི་ལྟར་མུན་པའི་སྣོད་རྣམས་ནི། །མར་མེ་མེད་ན་མཐོང་མི་འགྱུར། །མར་མེས་མཐོང་པར་གྱུར་ཙམ་ན། །ཕྱི་ནས་མར་མེ་དོར་བར་བྱ། །སྣོད་ནི་འབད་དེ་བསྲུང་བར་བྱ། །མར་མེའི་མཚན་ཉིད་འདི་རུ་རྩ། །རྩ་ནི་ཤེས་རབ་མཚན་ཉིད་དོ། །ཐབས་ནི་བདེ་བ་ཞེས་སུ་གྲགས། །བདེ་བ་ཡེ་ཤེས་ཞེས་བྱར་དྲན། །བདེ་བའི་ཡེ་ཤེས་རང་བཞིན་ནི། །གང་གིས་ཤེས་རབ་མ་ལས་རྙེད། །དེ་ནི་ཤེས་རབ་ཡེ་ཤེས་དབང༌། །དེ་ནི་རྫོགས་པས་རིམ་པའོ། །ཞེས་གསུངས་སོ། །སྦྱོར་ཐབས་སྟོང་དུ་མ་ཆོག་པ་ནི། དྲག་པོའི་རྒྱུད་སྟོང་ཕྲག་སུམ་ཅུ་པར་ཀཱ་ར་ཎའི་དབྱེ་བ་བྲིས་པ་ལས། ས་འདིའི་རྡུལ་ནི་ཇི་ཙམ་པ། །དེ་ཙམ་རོལ་པ་མཐའ་ཡས་ལས། །སྐར་མ་རྣམས་ཀྱི་གྲངས་ཀྱི་
ཚད། །འབྱུང་པོ་རྣམས་ཀྱི་སྤྱོད་པ་ཡིན། །རབ་དགའི་དབང་མོ་མི་རྣམས་ཀྱིས། །སྒྱུ་རྩལ་དག་ནི་སྟོང་ཕྲག་གཅིག །ཅེས་པ་ནས་བརྩམས་ཏེ་བསྟན་པ་ལས། དགུ་བརྒྱ་པ་དང་དགུ་བཅུ་རྩ་དགུ་བསྟན་ཟིན་པ་ན། ཐ་མ་དེ་ཤིན་ཏུ་ཟབ་པ་ཞིག་ཡིན་པས། དྲང་སྲོང་རྒྱལ་བ་དམ་པས་ཕྲག་དོག་གིས་འཁོར་གཞན་རྣམས་ཀྱི་རྣ་བ་བཀག་པ་ཡིན་ཅེས་ཟེར་རོ། །གཉིས་པ་ནི། འཁྱུད་དང་ཙུམྤ་དེ་བཞིན་དུ། །སོ་ཡིས་བཏབ་དང་སེན་རིས་བརྒྱབ། །སྦྱོར་དང་སྨྲ་དང་ཉེད་པ་དང༌། །སྐྱེས་པའི་ཚུལ་བརྒྱད་དྲུག་ཅུ་བཞི། །ཞེས་པ་སྟེ། འཁྱུད་པ་ནས་བརྩམས་ཏེ་སྐྱེས་པའི་ཚུལ་གྱིས་བར་བརྒྱད་ལ། བརྒྱད་བརྒྱད་དུ་ཕྱེ་བ་དྲུག་ཅུ་རྩ་བཞི་སྟེ། ལག་ལེན་ལས་ཤེས་པའམ་བྷ་བ་བྷ་དྲས་རྡོ་རྗེ་མཁའ་འགྲོའི་འབྲེལ་བར་ཡང་བཤད་པས་དེར་བལྟ་བར་བྱའོ། །གསུམ་པ་ནི། འདྲེན་པ་བཅོམ་ལྡན་འདས་བདེན་པ་ཁོ་ན་ཉིད་གསུང་མོད། འོན་ཀྱང་འགྲོ་བའི་དོན་དང་ལྡན་པས་དེར་འགྱུར་ན། དོན་གཞན་ལ་དགོངས་ཏེ། ཚིག་གཞན་ནི་གསུངས་ཏེ། ལས་དང་ཡེ་ཤེས་ཀྱི་ཕྱག་རྒྱ་དེ་འདྲའི་ཚུལ་གྱི་གཞན་ཕྱག་རྒྱ་ཆེན་པོ་ཉིད་གསུང་པ་མི་འགལ་ཏེ། དགོངས་ལྡེམ་དགོངས་བརྒྱད་གསུངས་པའི་ཕྱིར་རོ། བཞི་པ་ལ་ལོག་རྟོག་གསལ་བ་ངོ་བོ་བཤད་པ། ཐུན་མོང་མ་ཡིན་པར་བསྟན་པའོ། །དང་པོ་ནི། མི་མོ་ལས་ཀྱི་ཕྱག་རྒྱ་དང༌། མི་དམིགས་ལ་སོགས་པ་དམ་ཚིག་གི་ཕྱག་རྒྱ་དང༌། རྟགས་པའི་ཆོས་ཀྱི་ཕྱག་རྒྱ་རྣམས་སྤྲོས་པ་ཅན་དང༌། ཕྱག་རྒྱ་ཆེན་མོ་སྤྲོས་མེད་ཀྱི་བདེ་ཆེན་འདྲེན་པའོ། །ཞེས་བརྗོད་ཅིང་ཞེན་ན་དེ་ཡང་སྤྲོས་པ་དང་བཅས་པ་ཡིན་པ་དེའི་ཕྱིར། དེ་འདྲའི་བདེ་བ་ཡང་དེ་ཁོ་ན་ཉིད་མ་ཡིན་ནོ། །སྟོང་པ་ཉིད་ལ་དཔེ་དང་གཏན་ཚིགས་དང་རྟོག་གེས་དཔྱོད་པ་ཁོ་ན་ལྷུར་བྱེད་པ་དང༌། མེད་པ་
སྟེ་བཙལ་བས་མ་བརྙེད་པ་ལ་འཇོག་པ་ལ་ལྷུར་བྱེད་པ་དང༌། མེད་པ་ལ་དངོས་པོར་ཞེན་པའི་སྟོང་ཉིད་རྣམས་དང༌། ལུས་ཀྱི་སྦྱོར་བ་སོགས་ལས་བྱུང་བ་ལས་ནི། བདེ་བ་ཆེན་པོར་འགྱུར་བ་མིན་ཏེ། དེ་དག་ནི་རྩོལ་བ་དང་བཅས་པའི་ཕྱིར་དང༌། མཚན་མར་འཛིན་པའི་ཕྱིར་རོ། །གཉིས་པ་ནི། བདེ་ཆེན་དེ་ནི་སོ་སོར་རང་གི་རིག་པའི་མཚན་ཉིད་ཅན་ཉིད་དེ། མཐའ་འབྲས་མངོན་དུ་གྱུར་པ་མི་འགྱུར་བའི་བདེ་བའོ། །གསུམ་པ་ནི། རང་བཞིན་ལྷན་སྐྱེས་དེ་ཐེག་པ་གཞན་དུ་མ་བསྟན་སྟེ། གསང་སྔགས་བླ་ན་མེད་པ་ཁོ་ནར་བསྟན་པའི་ཐུན་མོང་མ་ཡིན་པའི་ཁྱད་ཆོས་ཞིག་ཡིན་ཏེ། དྷཱུ་ཏཱིའི་ནང་དུ་འབར་འཛག་གི་ཐོབ་པའི་ཞུ་བ་དང་བདེ་བ་ནི་རང་གཞན་གྱི་ལམ་གཞན་ཀུན་དང་ཐུན་མོང་མིན་པ་སྟེ། ལམ་དེ་ཡིས་ཁྱད་པར་དུ་བྱས་པའི་རང་བཞིན་གྱི་བདེ་བ་མངོན་དུ་གྱུར་པ་ཡིན་པའི་ཕྱིར་རོ། །བཞི་པ་ཡེ་ཤེས་ཀྱི་སྐུ་ལ། སྐུའི་ངོ་བོ་བཤད་པ་དང༌། དེ་རྣམ་པ་ཐམས་ཅད་པར་བསྟན་པ། རྡོ་རྗེ་སྐུའི་སྒྲ་དོན་བསྟན་པའོ། །དང་པོ་ལ་དབྱེ་བ་དང་ངོ་བོ་གཉིས་ལས། དང་པོ་ནི། ཡེ་ཤེས་ཀྱི་སྐུ་ནི། ཡེ་ཤེས་ཀྱི་སྐུ་ཙམ་པོ་དང༌། རྣམ་པར་དག་པའི་སྐུ་གཉིས་སོ། །གཉིས་པ་ལ། རྣམ་པར་དག་པའི་སྐུ་ནི་ཁ་སྦྱོར་ལ་སོགས་པ་སྦྱོར་བ་བདུན་དང་ལྡན་པ་སྟེ། དེ་ཡང་ཡན་ལག་བདུན་དངོས་ནི། ས་དང་པོའི་རྗེས་ཐོབ་ཀྱི་ཐོག་མ་ནས་འབྱུང་བ་ཡིན་ནོ། །དེས་ན་དག་པའི་སྒྱུ་ལུས་ཏེ། དག་པའི་གོ་དོན་ཡང་རང་བཞིན་བརྒྱད་ཅུ་དང་གཉིས་སྣང་རགས་པ་དག་པ་ཡིན་ནོ། །སྤྱིར་སྒྱུ་མའི་ལུས་དངོས་ཐམས་ཅད་ལ་ཡེ་ཤེས་སྐུ་ཞེས་གསུངས་མོད་ཀྱི། རྣམ་པར་ཕྱེ་ན་ཟག་བཅས་ཟག་མེད་ཀྱི་དབྱེ་བས་མཐོང་ལམ་མན་ཆད་ཀྱི་སྣང་བ་གསུམ་ལ་
རྣམ་ཤེས་གསུམ་དང༌། དེ་ཡན་ཆད་ཡེ་ཤེས་གསུམ་དུ་བརྗོད་ཅིང༌། དེའི་འབྲས་བུ་སྐུ་ལ་ཡང༌། དེ་དང་དེ་ཉིད་ཀྱི་ཕྱེ་བས། རྣམ་ཤེས་དང་ཡེ་ཤེས་ཀྱི་སྐུ་གཉིས་སོ། །སྐུ་འདི་དག་ཤེས་པར་གསུངས་ཀྱི་བེམ་པོར་རང་མཚན་པར་གསུངས་པ་ནི་མ་མཐོང་ངོ༌། །རིམ་ལྔ་ལས་ཀྱང༌། དེ་ཉིད་གླུད་དང་ཡང་དག་ལྡན། །རྣམ་ཤེས་གསུམ་པོ་སླར་ཡང་ནི། །རྣལ་འབྱོར་པའི་ལུས་སུ་འགྱུར། །སྒྱུ་མའི་ལུས་ཞེས་དེ་ལ་བཤད། །ཅེས་རྣམ་ཤེས་གསུམ་པོ་ཉིད་ཀྱི་སྣང་བ་ཡིན་པར་བཤད་པ་དང༌། སྒྱུ་མ་བདེ་མཆོག་ལས་ཀྱང༌། གཟུགས་བརྙན་ལུགས་མ་ལ་སོགས་ལས། །རྣལ་འབྱོར་བསྐྱེད་པར་མི་འགྱུར་གྱི། །བྱང་ཆུབ་སེམས་ལ་རབ་བརྩོན་ན། །དེ་ལས་རྣལ་འབྱོར་ལྷར་འགྱུར་རོ། །བྱང་ཆུབ་སེམས་ནི་རྡོ་རྗེ་སྟེ། །སངས་རྒྱས་ཀུན་གྱི་བདག་ཉིད་ཡིན། །དེ་བས་ཐམས་ཅད་བདག་སྦྱོར་བས། །སངས་རྒྱས་ཐམས་ཅད་ཐོབ་པར་འགྱུར། །བདག་ཉིད་སངས་རྒྱས་ཐམས་ཅད་དང༌། །དཔའ་བོ་ཐམས་ཅད་བདག་ཡིན་ནོ། །ཞེས་བྱང་ཆུབ་ཀྱི་སེམས་ནི་རྡོ་རྗེ་སྟེ་འོད་གསལ་བ་ཡིན་ལ། འོད་གསལ་གྱི་ཡེ་ཤེས་ལས་བེམ་པོ་ཅི་ལྟར་འབྱུང་ཞེས་དཔྱད་དོ། །གཉིས་པ་ལ། འཁོར་ལོ་བདེ་མཆོག་རྩ་རྒྱུད་ནས་འབྱུང་བ་དང༌། བཤད་རྒྱུད་ཀུན་སྤྱོད་ནས་འབྱུང་བའོ། །དང་པོ་ནི། ཧེ་རུ་ཀ་དཔལ་དག་པའི་འཁོར་གྱི་བསྐོར་བའི་ཕྱིར་རམ། འཁོར་འདས་ཐམས་ཅད་ན་མཐར་ཐུག་པ་ཕུལ་དུ་དབྱུང་དུ་མེད་པའི་བདེ་བ་རྙེས་པས་ན་རྒྱལ་པའོ། །དབང་ཕྱུག་བརྒྱད་དང་ལྡན་པའི་ཕྱིར་ཅི་བཞེད་པ་ཐམས་ཅད་འགྲུབ་པས་འདོད་པ་ཀུན་གྱི་དབང་ཕྱུག་གི་གཙོ་བོ། དེའི་སྐུ་ནི་རྣམ་པ་ཐམས་ཅད་པ་སྟེ། ཕྱག་དང་ཞབས་རྣམ་པ་ཀུན་ཏུ་སྟོན་པ་དང༌། དེ་བཞིན་དུ་ཞལ་དང་དབུ་ཡང་རྣམ་
པ་ཀུན་གྱི་མཆོག་དང་ལྡན་པ་སྟེ། ཡེ་ཤེས་གཅིག་ཉིད་རྣམ་པར་རྟོག་པ་མེད་བཞིན་དུ་ཇི་ལྟར་འདུལ་བ་དེ་ལྟར་སྣང་བའོ། །སྤྱན་རྣམ་པ་ཐམས་ཅད་པ་ནི་ཐམས་ཅད་ཅིག་ཅར་གཟིགས་པ་སྟེ། དེ་བཞིན་གཤེགས་པའི་གཙུག་ཏོར་གྱིས་གཟིགས་སོ་མཛོད་སྤུས་ཀྱང་གཟིགས་སོ་ཞེས་སོགས་དད་པའི་སྟོབས་སྐྱེད་པའི་མདོ་ལས་གསུངས་སོ། །འཇིག་རྟེན་གྱི་ཁམས་ཀུན་ན་སྒྲ་ཇི་སྙེད་ཡོད་པ་གསན་པའི་མཁྱེན་པ་དང་ལྡན་ཅིང་འཇིག་རྟེན་ཀུན་ཏུ་གར་ཡང་ཕྱིན་པས་ཐམས་ཅད་ལ་གཡོགས་པ་སྟེ་ཁྱབ་པས་རྣམ་པར་བཞུགས་སོ། །གཉིས་པ་ནི། མཐོ་རིས་ཏེ་ནམ་མཁའ་ལ་སྤྱོད་པ་དང༌། ས་སྟེང་མིའི་ཡུལ་དང༌། ས་འོག་སྟེ་སྲིད་པ་གསུམ་གྱི་དངོས་པོ་ཐམས་ཅད་ལ། ཡེ་ཤེས་ཀྱི་སྐུ་སྤྲོས་པས་ཐམས་ཅད་སྐད་ཅིག་གཅིག་གིས་ཡེ་ཤེས་གཟུགས་གཅིག་གི་ངོ་བོར་འགྱུར་ཞིང༌། ས་བོན་སོགས་མེད་པར་སྐད་ཅིག་གི་གྲུབ་པའི་ལྷའི་རྣམ་པའི་རྣལ་འབྱོར་གྱིས་སྐད་ཅིག་གིས་ནི་གཞོམ་མེད་ཀྱི་སྒྲའི་གསང་སྔགས་བརྗོད་དོ། །དེ་ཡང་འོད་གསལ་དུ་འཇུག་པ་དང༌། དེ་ལས་སྒྱུ་ལུས་སུ་ལྡང་བའི་ཚེ་གཞོམ་མེད་ཀྱི་ནཱ་ད་ཆེན་པོ་འབྱུང་བ་ཡིན་ལ། གཞན་ཡང་ཡེ་ཤེས་ཀྱི་སྐུ་གཅིག་གི་རང་སྣང་ལ་ཁམས་གསུམ་གྱི་གཟུགས་བརྙན་ཐམས་ཅད་སྣང་བ་དང༌། ཁམས་གསུམ་གྱི་སྣང་བ་ཐམས་ཅད་ཡེ་ཤེས་ཀྱི་སྐུ་གཅིག་ཏུ་སྣང་བའང་ཡིན་ནོ། །གསུམ་པ་ནི། ཡེ་ཤེས་ཀྱི་སྐུ་དེ་ལ་རྡོ་རྗེའི་སྐུ་ཞེས་བྱ་སྟེ། ཡེ་ཤེས་སྔ་ཕྱིར་འགྱུར་བ་མེད་པ་སྟེ། སྔོན་ནས་ཇི་ལྟར་གནས་པ་དེ་ལྟར་ཕྱིས་ཀྱང་འགྱུར་བ་མེད་པ་དང༌། རྡོ་རྗེའི་སྐུ་ཡང་དག་པའི་སྐུ་ནི་ནམ་ཡང་འགྱུར་བ་མེད་པ་དང༌། མ་དག་པའི་སྐུ་ཡང་འོད་གསལ་དུ་འཇུག་
པ་ལས་གཞན་གྱིས་གཞིག་མི་ནུས་པ་དང༌། རང་དང་གཞན་གྱི་སྒྲིབ་གཉིས་འཇོམས་པར་བྱེད་པའི་ཕྱིར་རྡོ་རྗེའི་སྐུ་ཞེས་གསུངས་ཏེ། རྡོ་རྗེ་ནི་ངོ་བོ་མི་འགྱུར་བ་དང་གཞན་གྱི་མི་གཞོམ་པ་དང༌། ཕ་རོལ་གཞན་རྣམས་འཇོམས་ནུས་པ་སྟེ། རྡོ་རྗེ་ཆོས་གསུམ་དང་མཚུངས་པའོ། །ལྔ་པ་ནི། རྡོ་རྗེ་འཆང་གི་ཟུང་འཇུག་གི་སྐུ་ནི་དཔེ་གསུམ་གྱིས་མཚོན་པ་སྟེ། མེ་ལོང་ནང་གི་གཟུགས་བརྙན་དང༌། ཆུ་ཟླ་དང༌། འཇའ་ཚོན་ལྟ་བུར་ནི་ཤེས་རབ་ཡེ་ཤེས་ཀྱི་དབང་དང་སྐྱེད་པའི་རིམ་པར་ཡང་མཚོན་པར་བྱ་དགོས་ཏེ། གཞི་ལ་གནས་པ་དེ་ལྟར་ལམ་བསྒོམས་པས་འབྲས་བུ་འགྲུབ་པ་ཡིན་ནོ། །དེ་ལ་དཔེ་གསུམ་གྱི་དོན་ནི། རིམ་ལྔ་ལས། མེ་ལོང་གི་ནི་གཟུགས་བརྙན་གྱི། །སྒྱུ་མའི་ལུས་ནི་མཚོན་པར་བྱ། །ཁ་དོག་རྣམས་ནི་འཇའ་ལྟ་བུ། ཁྱབ་པ་ཆུའི་ཟླ་བས་སོ། །རྡོ་རྗེ་སེམས་པ་[དཔའ་]ལེགས་བྲིས་པ། །མེ་ལོང་དྲི་མ་མེད་པ་ལ། ། གཟུགས་བརྙན་གསལ་བར་སྣང་དང་མཚུངས། །རྣམ་པ་ཀུན་གྱི་མཆོག་ལྡན་པ། ། སྐུ་ནི་ལྟ་བས་མི་ངོམས་ཤིང༌། །ཞེས་དང༌། ལོངས་སྤྱོད་རྫོགས་པའི་སྐུ་ཡང་དེ། ། དེ་ཉིད་དྲི་ཟའི་སེམས་ཅན་གྱུར། །རྡོ་རྗེའི་སྐུ་ཡང་དེ་ཉིད་ཡིན། །རྡོ་རྗེ་སེམས་དཔའ་བདག་ཉིད་དེ། །ཞེས་མེ་ལོང་གི་གཟུགས་བརྙན་ལྟར་སྐད་ཅིག་གི་ཞལ་ཕྱག་ཐམས་ཅད་གྲུབ་པ་དང༌། འཇའ་ཚོན་ལྟར་བརྟན་འབྱུང་ཙམ་ལས་བྱུང་ཞིང་ཁ་དོག་མ་འདྲེས་པར་གསལ་བ་ལྟར་མཚན་དཔེ་གསལ་ལ་མ་འདྲེས་པ་དང༌། ཟླ་བ་གཅིག་ཤར་བའི་གཟུགས་བརྙན་ཆུ་ཀླུང་ཀུན་ཏུ་ཅིག་ཅར་སྣང་བ་ལྟར་ཡེ་ཤེས་ཀྱི་སྐུ་གཅིག་པུ་དངོས་པོ་ཐམས་ཅད་ལ་ཁྱབ་པ་སྟེ། དཔེ་བཅུ་གཉིས་ཀྱི་ནང་ནས་གཙོ་བོ་གསུམ་བཟུང་བ་སྟེ། མཚན་ཉིད་དེ་དང་ལྡན་པའི་སྒྱུ་མའི་སྐུ་དེས་བར་དོའི་སྲིད་པ་སྦྱོང་ཞིང་ལོངས་
སྤྱོད་རྫོགས་པའི་སྐུའི་རིགས་མཐུན་གྱི་རྒྱུ་བྱེད་པ་ཡིན་ནོ། །འདི་དག་གི་མན་ངག་དང་གོ་བ་ཤིན་ཏུ་གལ་ཆེ་བ་ཞིག་ཡིན་པས། འདུས་པ་ལུགས་གཉིས་སུ་རྒྱས་པར་རིག་པར་བྱའོ། །གསུམ་པ་བསྡུ་བ་ནི། དེ་ཉིད་གཅིག་དང་རིམ་པ་གཉིས་དང༌། རྡོ་རྗེ་གསུམ་གྱི་རྣལ་འབྱོར་དང་སྐུ་གསུམ་སོགས་དེ་ཉིད་གསུམ་དང༌། དཀྱིལ་འཁོར་གྱི་དེ་ཉིད་ལ་སོགས་པ་དེ་ཉིད་བཞི་བ་དང་པོ་དང༌། སྐུའི་དེ་ཉིད་བཞི་དང༌། དེ་ཉིད་བདུན་པ་ཚན་གསུམ་དང༌། དེ་ཉིད་བཅུ་བཞི་སོགས་པ་རྣམས་རེ་རེའི་ནང་དུ་ཕན་ཚུན་བསྡུ་བར་བྱ་བ་ཡིན་པས་ངོ་བོའི་སྟེང་ནས་རྒྱ་ཆེ་ཆུང་མེད་དོ། །འདིར་དེ་ཉིད་བདུན་པ་སོགས་པ་ཁ་ཅིག་བསྐྱེད་རིམ་དང་དབང་གི་དུས་ལ་སོགས་པ་ཕྱོགས་མཐུན་རྣམས་ཀྱང་བསྡུ་དགོས་པས་དེ་ལྟར་ཤེས་པར་བྱ་ལ་སྔར་བཤད་པ་རྣམས་ལ་གོ་བ་ལེགས་པར་ཆགས་ན་རྟོགས་བླ་བའི་ཕྱིར་དང་ཡི་གེ་མངས་པར་འགྱུར་བའི་ཕྱིར་དང༌། ཁོ་བོ་སྙིང་པོ་ལ་དགའ་བས་སྤྲོས་པས་རྣམ་པར་མ་ཕྱེའོ། །ཞེས་པའོ། །འདི་དག་གི་བསྡུ་བ་ཞིབ་མོ་དག་ལས་ཤེས་པར་བྱའོ། །དེ་ལྟར་ཡང་དག་པར་རྫོགས་པའི་སངས་རྒྱས་ཀྱི་གཉིས་སུ་མེད་པ་ཟུང་འཇུག་གི་སྐུ་ནི་དེ་ཉིད་བདུན་པོ་འདིས་ནི་གཙོ་བོར་ཉེ་བར་མཚོན་པ་སྟེ། རྣམ་པ་གཞན་ལམ་དང་གཞི་ནི། དངོས་བསྟན་དང༌། གཙོ་བོའི་དོན་ལས་གཞན་ཤུགས་བསྟན་དང་ཞར་ལ་བསྟན་ལ། འདི་ནི་བླ་མའི་མན་ངག་གདམ་པ་སྟེ། གཞན་མན་ངག་མེད་པ་རྣམས་ཀྱིས་ཡོངས་སུ་མི་ཤེས་སོ། །བཞི་པ་ཞར་བྱུང་ས་དང་ལམ་གྱི་རྣམ་བཞག་ལ། ས་ལམ་བརྩི་ཚུལ་གཞན་དུ་ཁ་འཕངས་པ། དངོས་གྲུབ་ཀྱི་རྟགས་བརྒྱད་བཤད་པ། གང་ཟག་གསུམ་གྱི་འཚང་རྒྱ་བའི་དུས་སོ། །དང་པོ་ནི་ས་བཅུ་གཉིས་དང༌། ལམ་ལྔ་ལ་
སོགས་པའི་ཚུལ་ཞིབ་མོ་དང༌། གཞན་ཡང་རིམ་པ་གཉིས་དང་སྤྱོད་པ་ལ་སོགས་པ་གཞན་དག རྒྱུད་ཀྱི་འགྲེལ་པ་དང༌། བསྟན་བཅོས་གཞན་རྣམས་སུ་སྔོན་གྱི་སློབ་དཔོན་རྣམས་ཀྱིས་བཀྲོལ་ཟིན་པ་དང་མདོར་བསྡུས་ཙམ་ཚིགས་སུ་བཅད་པ་བཅུ་པར་བཀོད་ཟིན་པས་འདིར་མ་འབྲི་ཞེས་དགོས་སོ། །གཉིས་པ་ནི། མཆོག་གི་དངོས་གྲུབ་དེ་འགྲུབ་པའི་རྟགས་ཀྱི་རིམ་པ་ནི་རྣམ་པ་བརྒྱད་དུ་དྲན་ཏེ་དང་པོར་རླུང་དབུ་མར་ཞུགས་པ་ལས། ཕྱོགས་ཐམས་ཅད་གསལ་བར་བྱེད་པའི་སྒྲོན་མེ་འོད་ཟེར་ནི་དང་པོའི་མཚན་མ་དག་ཏུ་བརྟག་པར་བྱ་ལ། གསལ་བར་བྱེད་པ་གློག་གི་ཆ་ཤས་ཙམ་ནི་མཚན་མ་གཉིས་པ་ཡིན་པར་བརྟགས་ལ། དཀར་པོ་ལ་སོགས་པའི་འོད་ཀྱི་དཀྱིལ་འཁོར་གྱི་ཚུལ་ཅན་ཟླུམ་པོ་རྣམས་ནི་ཕྱོགས་བཅུ་གང་བ་དག་ཏུ་ལྟ་བ་སྟེ་མཐོང་བར་བྱ་སྟེ། རླུང་དབུ་མར་ཞུགས་པས་གཟུང་འཛིན་རགས་པའི་ཉོན་མོངས་འབྱིན་ཅིང་འགག་པ་ནི་གསུམ་པ་ཡིན་ཏེ་རྟགས་ལྔ་གསུམ་དུ་བསྡུས་པའོ། །ཡང་དང་པོས་ནི། དུ་བ་སྨིག་རྒྱུ་གཉིས། གཉིས་པ་སྲིན་བུ་མེ་ཁྱེར་དང་མར་མེ་གཉིས། གསུམ་པས་ནམ་མཁའ་སྤྲིན་མེད་པ་ལྟ་བུ་ལ་སྣང་བའི་མེ་འབར་བ་དང༌། ཟླ་འོད་ཉི་འོད་མུན་པ་གློག་དང་ཐིག་ལེ་རྣམས་བསྡུ་བ་ཡིན་ཏེ། དེ་ལྟར་རྟགས་ལྔའམ་བཅུ་རིམ་པས་རྣལ་འབྱོར་པ་ཡི་རྣམ་པར་རྟག་གོ །དེ་ལྟར་གསུམ་པོ་དེ་ནི། གསལ་བ་དང་འབར་བ་དང་ཐིག་ལེའི་མཚན་མ་གསུམ་མོ། །དེར་ཞུ་བདེ་ཅི་རིགས་པ་སྐྱེ་བ་ནི་འདོད་པའི་ལྷའི་ལོངས་སྤྱོད་སྟེ། དེ་ནི་རྣམ་ཤེས་ཏེ་མཚན་མའི་ཡེ་ཤེས་བཞི་པར་རབ་ཏུ་བསྟན་ནོ། །གཟུགས་སྒྲ་དྲི་རོ་རེག་བྱ་ལ་སོགས་པ་སྟོང་པ་ཉིད་ཀྱི་གཟུགས་བརྙན་རྣམ་པ་ཀུན་གྱི་མཆོག་དང་ལྡན་པའི་སྟོང་གཟུགས་ཀྱི་ལྷ་མོའི་སྣང་བ་ནི་ཕྱོགས་ཐམས་ཅད་དུ་ཁྱབ་པ་སྟེ་ཡེ་ཤེས་སམ་
མཚན་མ་ལྔ་པ་ཡིན་ནོ། །གཟུགས་སོགས་ཕྱི་རོལ་གྱི་ཡུལ་སྣང་མེད་ཅིང་མི་སྣང་བར་སེམས་གནས་པ་ནི་རླུང་དབུ་མར་ཐིམ་པའི་ཡེ་ཤེས་སམ་རྟགས་དྲུག་པ་སྟེ། སྔ་མའི་རྗེས་ཐོག་ཏུ་འགྱུར་རོ། །རླུང་ཐིམ་ཟིན་པའི་ཞུ་བདེ་ཁྱད་པར་ཅན་སྐྱེ་བས་སྣང་བ་བཞིའི་རིམ་པས་ཆོས་ཀྱི་དབྱིངས་ཏེ་འོད་གསལ་ལྷན་སྐྱེས་འཆར་བ་དག་ནི་བདུན་པའོ། །བརྒྱད་པ་ནི། སྟོང་པ་འདི་ཉིད་ལས་རང་ཉིད་ཇི་ལྟར་འདོད་བཞིན་དུ་སངས་རྒྱས་ཀྱི་སྐུ་སྒྱུ་མ་ལྟ་བུའི་འབྲས་བུ་འབྱུང་བ་དག་ཡིན་ནོ། །གསུམ་པ་ལ། ཚེ་འདི་དང་ཕྱི་མ་དང་བར་དོ་གསུམ་དུ་སོ་སོར་འཚང་རྒྱ་ལ། འདིར་ཡང་དབང་པོ་རྣོ་རྟུལ་དུ་བཞེད་ཅིང༌། དེས་ན་བོད་ཀྱི་བླ་མ་སྔ་མ་རྣམས་བརྩོན་འགྲུས་ཅན་ཚེ་འདིར་འཚང་རྒྱ་བ་དང༌། ལེ་ལོ་ཅན་བར་དོར་འཚང་རྒྱ་བ་དང༌། བར་ཆད་ཅན་སྐྱེ་བ་བརྒྱུད་མ་ནས་འཚང་རྒྱའོ་ཞེས་གསུངས་པ་དང་མཐུན་པར་ཐ་སྙད་སྦྱར་ནའང་ལེགས་པ་ཡིན་ནོ། །དེ་ལ་དང་པོ་ནི། གང་ཞིག་ལམ་འདི་འདི་ནི་བརྩོན་འགྲུས་ཆེན་པོས་རྟག་ཏུ་སྒོམ་པ་དེ་ནི་སའི་སྟེང་དུ་འདོད་པ་ཀུན་གྱི་དབང་ཕྱུག་སྟེ། དབང་ཕྱུག་བརྒྱད་དང་ལྡན་པའི་གོ་འཕང་ཚེ་འདི་ཉིད་ལ་དེ་བཞིན་གཤེགས་པ་སངས་རྒྱས་ཀྱི་ས་ཐོབ་ཅིང༌། མཐོང་བའི་ཆོས་ལ་སངས་རྒྱས་པ་ཞེས་བྱ་ཏེ། དེ་ཡང་ཤིན་ཏུ་དབང་པོ་རྣོན་པོར་གྱུར་པས་ནི་རྫོགས་པའི་སངས་རྒྱས་ཀྱི་གོ་འཕང་མངོན་དུ་བྱེད་པ་ཡིན་ལ། གཞན་དུ་འཕགས་ལམ་མངོན་དུ་གྱུར་པ་ལ་ཡང་སངས་རྒྱས་ཞེས་ཐ་སྙད་འདོགས་ཏེ་མིང་དང་དོན་ཕྱོགས་མཐུན་པ་ཡིན་ནོ། །དེས་ན་སངས་རྒྱ་བ་ཞེས་བྱ་བ་མཆོག་གི་དངོས་གྲུབ་ཐོབ་པ་ལ་བྱའོ། །གཉིས་པ་ནི། ཚེ་འདི་ཉིད་ལ་གྲོལ་བར་མ་ནུས་ཀྱང༌། ལྷན་སྐྱེས་ཀྱི་བདེ་ཆེན་མངོན་དུ་གྱུར་པའི་
རྣལ་འབྱོར་པ་རྣམས་འདི་ནས་ཕ་རོལ་ཏུ་འཕོ་བའི་ཚེ་དཔལ་ཁྲག་འཐུང་ཧེ་རུ་ཀ་ལ་སོགས་པ་དཔའ་བོ་དང་རྣལ་འབྱོར་མ་རྣམས་མེ་ཏོག་སྣ་ཚོགས་ལག་ན་ཐོགས་ཤིང༌། རྒྱལ་མཚན་དང་བ་དན་སྣ་ཚོགས་དང་རོལ་མོའི་སྒྲ་སྣ་ཚོགས་པ་དང༌། གླུ་དང་གར་གྱི་མཆོད་པ་སྣ་ཚོགས་པ་དང་བཅས་པ་བསུ་བར་བྱེད་ལ། འཆི་བ་ཞེས་བྱ་བའི་རྣམ་པར་རྟོག་པ་སེམས་ཅན་རྣམས་ལ་འབྱུང་བ་དེ་ཉིད་སླར་སེམས་ལ་དམིགས་པ་མཐར་ཐུག་པ་ལ་ཉེ་བ་མངོན་དུ་བྱས་ན་དེར་ཞུ་བདེ་ལྷན་སྐྱེས་ཆེན་པོར་འགྱུར་ཞིང༌། བར་དོར་རྡོ་རྗེའི་སྐུ་མངོན་དུ་བྱེད་ཅིང༌། ཚེ་འདིར་རྡོ་རྗེའི་སྐུ་ཐོབ་པས་ནི་འཆི་བའི་ཚེ་དོན་གྱི་འོད་གསལ་མཐོང་ལམ་ཐོབ་ནས་བར་དོར་ཟུང་འཇུག་གི་སྐུ་མངོན་དུ་བྱེད་པ་ཡིན་ལ། དེས་ན་མཁའ་སྤྱོད་ཀྱི་གནས་སུ་འཁྲིད་པ་ནི། དེ་འདྲ་བའི་རྣལ་འབྱོར་པ་དང༌། བསྐྱེད་པའི་རིམ་པ་ཤིན་ཏུ་མཐར་ཕྱིན་པ་ཁ་ཅིག་ཀྱང་ནམ་མཁའི་གནས་ན་གསང་སྔགས་ལ་སྤྱོད་པའི་བྱང་ཆུབ་སེམས་དཔའ་རྣམས་ཀྱི་གནས་ཁྱད་པར་ཅན་དུ་ཁྲིད་དེ། རིག་པ་འཛིན་པ་རྣམས་དང་སྐལ་བ་མཉམ་པར་འགྱུར་ཏེ། འཇམ་དཔལ་ཞལ་ལུང་ལས། གལ་ཏེ་སྐུ་གསུམ་མ་ཐོབ་ན། །རིག་པ་འཛིན་པའི་གཙོ་བོར་འགྱུར། །ཞེས་པ་ལྟར་ཡིན་ལ། །དེས་ན་རྣམ་ཤེས་གོང་དུ་འཕོ་བའི་ཐབས་ཁྱད་པར་ཅན་གྱིས་ཀྱང་མཁའ་སྤྱོད་དེར་འཕོ་ནུས་པ་ཡིན་ནོ། །འོན་ཀྱང་འདིར་མཁའ་སྤྱོད་ཅེས་བྱ་བ་ནི་ནམ་མཁའ་འོད་གསལ་སྟོང་པ་ཉིད་དེ་ཆོས་ཀྱི་སྐུ་དངོས་དང་རྗེས་མཐུན་རྣམས་ཡིན་ལ། དེར་སྤྱོད་པ་ནི་དེ་ཐོབ་པའི་དོན་ཡིན་ནོ། །དེས་ན། ཕྱག་རྒྱ་གྲུབ་པའི་སྐྱེས་བུ་ནི་འགྲོ་འོང་གནས་པ་ཐམས་ཅད་དང་བྲལ་བར་སྟོན་པ་འདི་ལྟར་སཾ་བུ་ཊཱི་ལས། རིག་མའི་སྐྱེས་བུ་གྲུབ་པ་ནི་གང་དུ་ཡང་མི་འགྲོ་གང་
དུ་ཡང་མི་གནས་ཐོག་མ་དང་ཐ་མ་དང་དབུས་དང་བྲལ་བ་ཞེས་གསུངས་སོ། །སྒྱུ་མ་བདེ་མཆོག་ལས་ཀྱང༌། ཌཱ་ནི་ནམ་མཁར་འགྲོ་མ་ཞེས། །སྐད་ཀྱི་བྱིངས་ལས་མངོན་པར་རྟོགས། །ནམ་མཁའ་ཀུན་ཏུ་སྤྱོད་གྲུབ་པ། །མཁའ་འགྲོ་མ་ཞེས་རབ་ཏུ་གྲགས། །ཞེས་འོད་གསལ་བདེ་སྟོང་དབྱེར་མེད་པ་ལ་ནམ་མཁའ་ཞེས་བྱའོ། །གསུམ་པ་ནི། ཚེ་འདིར་རྫོགས་རིམ་གྱི་རྟོག་པ་མངོན་དུ་མ་གྱུར་པ་རྣམས་དེར་ཡང་གྲོལ་བར་མ་ནུས་ན། སྐྱེ་ཤིང་སྐྱེ་བ་ཐམས་ཅད་དུ་བདེ་གཤེགས་ཀྱི་རིགས་སུ་སྐྱེ་ཞིང་བསོད་ནམས་མཆོག་གི་མཐུས་ཆོས་དང་ལྡན་པའི་རྒྱལ་པོར་འགྱུར་བའམ། ལྷར་སྐྱེ་ཤིང་རྟེན་དེ་ལས་བརྟེན་ནས་སྒྲིབ་པ་སྦྱངས་ཏེ་མཆོག་གི་དངོས་གྲུབ་ཐོབ་པར་འགྱུར་ཏེ། འཁོར་ལོ་བདེ་མཆོག་རྩ་བའི་རྒྱུད་ལས། བསམ་གཏན་སེམས་པ་ཙམ་གྱིས་སམ། །ཀློག་ཅིང་ཁ་དོན་བགྱིས་པ་ཡིས། །མཐོ་རིས་ལོངས་སྤྱོད་ཐོབ་འགྱུར་པའམ། །ཡང་ན་འཁོར་ལོས་བསྒྱུར་བ་ཐོབ། །ཅེས་པའོ། །དེ་ལ་དངོས་གྲུབ་འགྲུབ་པའི་ཚེ། རྣམ་པ་ཐམས་ཅད་དུ་གོང་དུ་བཤད་པ་ལྟར་དཔའ་བོ་དང་མཁའ་འགྲོ་མ་ལ་སོགས་པ་རྣམས་ཀྱི་མཆོད་པ་སྔར་ལྟར་འབྱུང་བ་ཡིན་པས་འཆི་བའི་དུས་རྐྱང་པ་མ་ཡིན་ནོ། །དེ་ལ་དངོས་གྲུབ་འགྲུབ་པའི་ལྟས་དང་གྲུབ་ཟིན་ནས་ཇི་ལྟར་འབྱུང་ཚུལ་གཉིས་ལས། དང་པོ་ནི་སཾ་པུ་ཊི་ལས། དེ་ནས་གང་དུ་རིག་མ་སྐྱེས་བུ་གྲུབ་པ་དེར་འདི་ལྟ་བུའི་ཕུན་སུམ་ཚོགས་པ་འབྱུང་སྟེ། ས་འདི་དག་དགའ་ཞིང་མགུ་ལ་རངས་པས་རྣམ་པ་དྲུག་ཏུ་གཡོས་ནས། བདུད་ཀྱི་གནས་སུ་ཆ་ལང་ལྟ་བུའི་སྒྲ་གྲགས་པ་དང། ཕྱོགས་བཅུར་བསྐལ་པའི་མེ་ལྟ་བུའི་སྐར་མདའ་ལྟུང་བ་དང༌། རྒྱ་མཚོ་ཆེན་པོ་
འཁྲུགས་པའི་སྒྲ་དང༌། ཐམས་ཅད་དུ་གནམ་རྡོ་ལྟུང་བ་དང༌། དེ་ཉིད་དུ་བསྐལ་པའི་མེའི་གཟུགས་ལྟ་བུའི་ཡེ་ཤེས་ཀྱི་སྣང་བ་འབར་བ་དང༌། ཕྱག་རྒྱའི་སྐྱེ་གནས་ཀྱི་སྙིང་པོ་ཁམས་གསུམ་ཐམས་ཅད་སྣང་བ་དང༌། ཚངས་པ་དང༌། ཁྱབ་འཇུག་དང༌། ཆུ་བདག་དང༌། བརྒྱ་བྱིན་དང༌། དྲག་པོ་དང༌། མེ་དང༌། སྟོབས་བཟང་པོ་དང༌། ཉི་མ་དང༌། ཟླ་བ་དང༌། གནོད་སྦྱིན་དང༌། གྲུབ་པ་དང༌། དྲི་ཟ་དང༌། མིའམ་ཅི་དང༌། ལྟོ་འཕྱེ་དང༌། ལྷའི་མཆོག་དང། རིག་པ་འཛིན་པ་དང༌། ཆུང་བྱུང་ལ་སོགས་པ་གང་ཞིག་གཞན་ཡང་སུམ་ཅུ་རྩ་གསུམ་དུ་གནས་པའི་ལྷ་རྣམས་དེར་འོངས་ནས་ཡང་དག་པར་དགའ་བས་མེ་ཏོག་གིས་མཆོད་པར་བྱེད་དོ། །པི་ཝཾ་དང༌། གླིང་བུ་དང༌། མུ་ཀུན་ད་དང༌། ཏམ་བུ་ར་དང༌། དུང་དང༌། ཟངས་དུང་དང༌། ནན་ཏི་དང༌། པ་ཊ་ཧ་དང༌། རྫ་རྔས་ནམ་མཁར་གནས་ཏེ། དེས་རྟག་ཏུ་མཆོད་པར་བྱེད་དོ། །ལྷའི་བུ་མོ་དང༌། རིག་པ་འཛིན་པའི་རྒྱལ་པོའི་བུ་མོ་ཐམས་ཅད་ཀྱིས་གར་བྱེད་པ་དང༌། སིལ་སྙན་དུ་མ་བྱེད་པ་དང༌། མིའམ་ཅི་དང་གནོད་སྦྱིན་གྱིས་གླུ་ལེན་པར་བྱེད་ཅིང༌། དེ་ལ་དགའ་བ་དང་བཅས་པས། རྒྱལ་བ་རྒྱལ་ཞེས་བྱ་བའི་སྒྲས་རྟག་ཏུ་རོལ་བར་བྱེད་པ་དང༌། གང་ཞིག་གྲུབ་པ་ནམ་མཁར་གནས་པའི་ལྷ་རྣམས་ཀྱིས་ནི་ལེགས་སོའི་རྣམ་པ་རབ་ཏུ་གསོལ་བར་མཛད་དོ། །གང་ཞིག་དགའ་ལྡན་དུ་གནས་པའི་ལྷ་རབ་མཆོག་དང༌། གང་ཞིག་ལྷའི་བུ་དང༌། རིག་པ་འཛིན་པ་དང༌། འོག་མིན་གྱི་བར་དུ་འོངས་ནས་ཕྱག་འཚལ་ཞིང༌། མེ་ཏོག་སྣ་ཚོགས་ཀྱི་རྣམ་པ་དང༌། དྲི་སྣ་ཚོགས་ཀྱིས་དྲིའི་ཆར་དང༌། བདུག་པ་སྣ་ཚོགས་ཀྱི་ཁྱད་པར་གྱིས་གུས་པའི་ཚུལ་གྱིས་མཆོད་པར་བྱེད་དོ། །གཞན་ཡང་ཁྱོད་ལ་རྒྱས་པར་བཤད་པའི་ཚུལ་གྱིས་ཅི་ཞིག་དགོས་ཏེ། བསྒྲུབ་པར་བྱ་བའི་བསོད་ནམས་ཀྱིས་ཁམས་གསུམ་དུ་སྐྱེས་པའི་
མཆོད་པ་དེ་རྣམས་ཀྱིས་མཆོད་པར་བྱེད་དོ། །ཞེས་གསུངས་ཏེ། ས་གཡོ་བ་དང༌། བདུད་རྣམས་ལ་སྒྲོན་པ་དང༌། འབར་བར་སྣང་བ་དང༌། ལྷ་ལ་སོགས་པས་མཆོད་པ་དང༌། གཞན་ཡང་སྲིད་ཞིའི་ཕུན་སུམ་ཚོགས་པ་ཐམས་ཅད་འགྲུབ་པར་གསུངས་སོ། །གཉིས་པ་ནི། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུན་གསུམ་དུ་མཆོད་པར་བྱེད་དེ། །དེ་ལྟར་ཡང་འཇམ་དཔལ་ཞལ་ལུང་ལས། སངས་རྒྱས་བྱང་ཆུབ་སེམས་དཔའ་དང༌། །རིག་པའི་ལྷ་མོ་ཁྲོ་བོ་སོགས། །མེ་ཏོག་ལ་སོགས་མཆོད་པར་བཅས། །ཞག་གཅིག་སྐྱ་རེངས་དང་པོ་དང༌། །ཕྱེད་ནི་དྲོས་པའི་དུས་ཉིད་དང༌། །ཆལ་ཆིལ་མཚམས་སུ་ནམ་མཁའ་ལས། །མཆོད་པ་བྱས་ནས་བསྔགས་བརྗོད་ཅིང༌། །རང་གི་ཞིང་དུ་འགྲོ་བར་འགྱུར། །ཞེས་དང༌། འབྲས་བུ་སྨིན་བྱེད་སྔགས་པའི་ཡིད་ལས་ཡང་དག་འབྱུང་བ་ཡི། །དངོས་གྲུབ་རྒྱ་ཆེན་ཐོབ་ནས་གང་གཱའི་ཇི་སྙེད་དཔག་མེད་ཀྱི། །འཁོར་གྱིས་བསྐོར་ནས་འཇིག་རྟེན་ཁམས་ཀུན་ཐམས་ཅད་རབ་ཏུ་བགྲོད། །ཞེས་པ་ལྟར་རོ། །གསུམ་པ་བཤད་པ་མཐར་ཕྱིན་པའི་བྱ་བ་ལ། ལམ་བསྒྲུབ་པར་གདམས་པ། དགེ་བ་བསྔོ་བ། གང་གིས་དོན་དུ་མཛད་པ་སྟེ་གསུམ་ལས། དང་པོ་ནི། སངས་རྒྱས་ཀྱི་ཡེ་ཤེས་དེ་ཁོ་ན་ཉིད་བདུན་དང་ལྡན་པ་འདི་བཞིན་དུ། འཇིག་རྟེན་དང་འཇིག་རྟེན་ལས་འདས་པའི་དབང་དང༌། བསྐྱེད་པ་དང་རྫོགས་པའི་རིམ་པ་ཡང་དེ་ཁོ་ན་ཉིད་བདུན་པ་འདྀ་འབད་དེ་སྒོམ་པར་བྱའོ། །གཉིས་པ་ནི། དགེ་བ་འདི་དང་གཞན་ཡང་ལེགས་བྱས་ཀྱི། །དཔག་ཏུ་མེད་པའི་འགྲོ་བ་མ་ལུས་པ་སྒྲིབ་པ་གཉིས་ཀྱི་སྐྱོན་ཐམས་ཅད་བྲལ་ན་ཅི་མ་རུང༌། ནམ་ཞིག་ཡོན་ཏན་ཐམས་ཅད་དང་འགྱུར་ཞིང་སངས་རྒྱས་ཀྱི་ཡོན་ཏན་སྤངས་པ་དང་རྟོགས་
པའི་བདག་ཉིད་ཐམས་ཅད་རྫོགས་པར་གྱུར་ཅིག་ཅེས་སྨོན་ནོ། །གསུམ་པ་ནི། དཔལ་ལྡན་འཁོར་ལོ་སྡོམ་པ་རྩ་བཤད་ཀྱི་རྒྱུད་རྣམས་སུ་ཤིན་ཏུ་རྒྱས་པའི་སྒོ་ནས་ཡང་དག་པར་བསལ་བ་གྲུབ་ཆེན་ཛ་ལན་དྷ་རའི་རྡོ་རྗེའི་གླུར་བླངས་པའི་དོན་དེ་ཁོ་ན་ཉིད་བདུན་གྱི་འགྲེལ་པ་མན་ངག་གི་གནས་འདི་འབད་པ་སྟེ་བསྒྲིམས་ཏེ་དོན་གྱི་གནས་ལ་དྲི་མ་ཐམས་ཅད་བྲལ་བར་བྱས་པའོ། །སུ་ཞིག་གི་དོན་དུ་མཛད་པ་ནི་སྒྲོལ་བའི་མགོན་པོ་བདག་གིས་གསོལ་བ་བཏབ་པར་གྱུར་པ་ལས་སོ། །ཞེས་པ་ནི་དེ་ཁོ་ན་ཉིད་བདུན་གྱི་འགྲེལ་བ་ཤར་ཕྱོགས་ཀམྤ་ལ་དང་གཉིས་སུ་མ་མཆིས་པ་སངས་རྒྱས་སྦས་པའི་ཞལ་སྔ་ནས་མཛད་པའོ། །ཞེས་པ་ནི་བདག་གིས་སྦྱར་བའོ། །གཞུང་འདི་ནི་རྡོ་རྗེ་སློབ་དཔོན་ཆེན་པོ་གུ་རུ་ལྷོ་ཕྱོགས་པ་དེ་ཉིད་དང༌། ཀུན་དགའ་སྙིང་པོ་བདག་གིས་བཤད་པ་ཞིབ་མོ་དང་མན་ངག་རྣམས་ནོད་ནས་གཡར་ཁྲལ་དུ་བསྒྱུར་བའོ། །གཞུང་འདི་དང༌། རྣམ་པར་གྲོལ་བའི་སྙེ་མ་གཉིས་ལེགས་པར་སྦྱར་བ་ལས་རྒྱུད་སྡེ་མཐའ་དག་ལ་ངེས་པ་མཆོག་:གཏེར་[སྟེར་]བར་འགྱུར་རོ། །འདིར་སྨྲས་པ། འདྲེན་པ་ཀུན་གྱི་བགྲོད་ཅིག་ལམ་བཟང་པོ། །ཕྱོགས་རེ་མ་ཡིན་ཟུང་འཇུག་དཀྱིལ་འཁོར་ནི། འདིར་གསལ་བྱས་ཀྱི་བློ་ལྡན་དེང་ལོང་ལ། །ངེས་དོན་འདོད་པ་འཇོ་བ་ལྷུར་བྱོས་ཤིག །ཅེས་པ་དེ་ཁོ་ན་ཉིད་བདུན་གྱི་འགྲེལ་པའི་རྣམ་པར་བཤད་པ་རིན་ཆེན་སྙེ་མ་ཞེས་བྱ་བ་བཞེད་པ་ཐུན་མོང་མ་ཡིན་པ་རྣམས་གསལ་བར་བྱས་ཞིང་ས་བཅད་དང་མཐའ་གཅོད་ཅི་རིགས་པས་ཀྱང་བརྒྱན་ཏེ། མདོ་རྒྱུད་ཀྱི་གཞུང་ལུགས་དང་འགལ་བའི་རང་བཟོ་འབད་པས་སྤངས་ནས། མན་ངག་འཁྲུལ་མེད་ཇི་ལྟ་བ་
བཞིན་དུ་རྒྱལ་ཁམས་པ་ཏཱ་ར་ནཱ་ཐས་རང་ལོ་ཉེར་བཞིར་ཉེ་བ་ན་རྣམ་འཕྱང་གི་ལོ་དབོའི་ཟླ་བའི་ཉེར་ལྔ་ལ་ནགས་རྒྱལ་གྱི་དབེན་གནས་ཇོ་མོ་ནང་དུ་སྦྱར་བའི་ཡི་གེ་པ་ནི་གྲགས་པ་བཟང་པའོ། །སྤར་ཡིག་ཀུན་དགའ་ལེགས་པས་བྲིས། །འདི་ཡི་དགེ་བས་ཀུན་ཏུ་བདག བླ་མ་མཆོག་གི་བྲིན་འབྱེད་ཅིང༌། །འགྲོ་བའི་མགོན་དུ་འགྱུར་བ་དང༌། །དོན་གཉིས་ཕུན་སུམ་ཚོགས་གྱུར་ཅིག །ཤུབྷམ་སྟུས་སརྦ་ཛག་ཏཱཾ།། །།དགེ་ལེགས་འཕེལ། བསོད་ནམས་བསགས་སྒོ་དེ་ཡིས། །འཁོར་བར་འཁྱམ་པའི་འགྲོ་ཀུན། །སྲིད་པའི་སྡུག་ལ་གྲོལ་ཏེ། །སྤངས་རྟོགས་མཐར་ཕྱིན་ཏུ་ཤོག །ཅེས་པ་འདི་ཡང་ཆོས་གྲོགས་ཀྱི་ངོར་མ་ཏིས་སྨྲས་པའོ། །