རྡོ་རྗེ་ཐེག་པའི་ལམ་གྱི་རིམ་པ་ནམ་མཁའི་རྡོ་རྗེ་རབ་ཏུ་གསལ་བ།
རྡོ་རྗེ་ཐེག་པའི་ལམ་གྱི་རིམ་པ་ནམ་མཁའི་རྡོ་རྗེ་རབ་ཏུ་གསལ་བ་ཞེས་བྱ་བ་བཞུགས།
ཨོཾ་སྭཱ་སྟི། རྡོ་རྗེ་ཐེག་པའི་ལམ་རིམ་མདོར་བསྟན་པ། །བླ་མ་རྣམས་ལ་བསྟོད་ཅིང་ཕྱག་འཚལ་ལོ། །རང་བཞིན་ལྷན་སྐྱེས་འགྱུར་མེད་དངོས། །བླ་མའི་ཞབས་ལ་དང་པོར་འདུད། །བདེ་བ་ཆེ་དང་གཉིས་མེད་སྦྱོར། །ཤེས་རབ་ཕ་རོལ་ཕྱིན་ཕྱག་འཚལ། །སྐུ་བཞི་ཡེ་ཤེས་ལྔ་ཡི་བདག །ཧེ་རུ་ཀ་དཔལ་དེ་ལ་ཡང༌། ། སོར་བཅུ་སྤྱི་བོར་ངེས་བྱས་ནས། །བདེན་པ་གཉིས་ཀྱིས་ཕྱག་འཚལ་ལོ། །སེམས་ཅན་ཀུན་གྱི་འོད་གསལ་བ། །འདི་ནི་ཡེ་ཤེས་དོན་དམ་སྟེ། །སྟོང་པ་ཆེན་པོ་རང་ངོ་བོ། །ནམ་མཁའི་རི་མོ་འཛིན་པའོ། །གང་གི་རང་བཞིན་དག་པ་དངོས་ཀུན་ཁྱབ། །ནམ་མཁའ་འདི་ལ་མཐའ་དང་དབུས་མེད་བཞིན། །རང་བཞིན་དག་པ་སངས་རྒྱས་ས་བོན་
འདི། །འགྲོ་བ་ཀུན་ལ་རོ་མཉམ་གྱུར་བའོ། །སྐྲ་ཤད་ལྟ་བུར་རྣམ་རྟོག་གིས་ཉོན་མོངས། །མེད་པར་རྟོགས་ན་འདིར་གང་འཆིང་མི་འགྱུར། ། རང་བཞིན་དག་པའི་དེ་ཉིད་ཡོན་ཏན་བཅས། །མི་རྟོག་ལས་ཀུན་མཛད་འདི་བསམ་ཡས་ཏེ། །འདི་ལ་སྲིད་དང་ཞི་བའི་བྱེ་བྲག་མེད། །དེ་ཕྱིར་ཡོན་ཏན་ཐམས་ཅད་འདི་ལ་ཡོད། །སྐྱོན་བྲལ་ཆོས་རྣམས་དག་པའི་རང་བཞིན་གྱི། །དེ་ཁོ་ན་འདི་མཁས་པས་རིག་ཅེས་བྱ། །རང་བཞིན་སེམས་འདི་རྒྱུ་ཞེས་བྱ་བ་སྟེ། །རྒྱ་མཚོའི་རླབས་ལྟར་དེ་ལས་ལས་ཀྱི་རླུང༌། །དེ་ལས་འོད་ཟེར་ལྔ་དང་ཡོན་ཏན་འབྱུང༌། ། དེ་དག་ལས་ཀྱང་ཀུན་ཏུ་རྒྱུ་སོགས་རླུང༌། །དེ་མཐར་ལས་ཀྱི་བག་ཆགས་བགོ་བྱེད་དེ། །རྣམ་ཤེས་དེ་བཞིན་ཡིད་དག་དབང་
ཤེས་སོ། །བག་ཆགས་ལས་ཀྱི་རླུང་དང་ཡོན་ཏན་ལས། །བདག་ལ་ཆགས་སོགས་འདི་ན་བསྐྱེད་པར་བྱེད། །བག་ཆགས་རྣམ་པར་ཤེས་པ་ལས་རླུང་གིས། ། དཀྲུགས་པས་གཟུང་འཛིན་སྣང་བའི་ངེས་པས་སོ། །སྙིང་པོས་རྡུལ་དང་མུན་པས་སྣོད་ཀྱི་ནི། །འཇིག་རྟེན་འགྲོ་བའི་ལུས་དང་བཅས་པ་བསྒྲུབ། །དེ་བཞིན་རྣམ་པར་འཇིག་ཅིང་ལུས་ཅན་གྱི། །རླུང་སོགས་གཟུང་དང་འཛིན་པའི་རང་བཞིན་ནོ། །འདིར་གང་རྐྱེན་བཞི་བག་ཆགས་དང་སྣང་བ། །གང་དག་འགགས་པ་དེ་འདིར་རྣམ་པར་རིག །དེ་ལྟར་རང་བཞིན་མི་འགྱུར་བ། །ནམ་མཁའ་ལྟ་བུའི་དངོས་འདི་ནི། །གཞི་དང་ལམ་དུ་གཉིས་མིན་པ། །མི་འཕྲཽགས་དབྱེ་བ་ཉིད་ལ་ཡང༌། །ཡོན་ཏན་གསུམ་གྱིས་སྐྱེ་ཞིང་འཇིག །དེ་ཡི་འོད་ཀྱིས་ཁམས་གསུམ་སྒྲུབ། །ཁུ་རྡུལ་རླུང་གི་ཚོགས་ཕྲ་བ། །གནས་སྐབས་བཞི་ཡི་རང་བཞིན་ཉིད། །དེ་ལྟར་དག་པའི་དངོས་འདི་སྦྱོང་བའི་ལམ། །འདིར་ནི་ཤེས་རབ་ཡེ་ཤེས་དཔལ་དང་ལྡན། །འདི་ནི་རང་བཞིན་འོད་གསལ་རྒྱལ་བའི་རིགས། རང་བཞིན་དག་པས་གསར་དུ་དག་པའོ། །ལྷན་ཅིག་སྐྱེས་པ་འཕོ་བ་མེད་པ་སྟེ། །བདེ་ཆེན་འདུས་མ་བྱས་དང་དེ་བཞིན་དུ། །རང་རིག་པ་དང་རྣམ་པ་ཐམས་ཅད་པ། །ནམ་མཁའ་ལྟ་བུའི་འོད་གསལ་དམ་པའི་དོན། །དེ་ནི་བླ་མའི་ཞལ་ལས་རྟོགས་བྱ་སྟེ། དངོས་གྲུབ་དོན་དུ་སློབ་དཔོན་བསྟེན་པར་བྱ། །བླ་མ་
བསྟེན་ཚུལ་དོན་དམ་བསྙེན་པ་དང༌། །རྒྱུད་སྡེ་རྣམས་དང་ལྔ་བཅུ་པ་སོགས་ལྟོས། །དེ་ནས་སློབ་དཔོན་གྱིས་ནི་ཐུན་མོང་དང༌། །ཐུན་མོང་མིན་པའི་དབང་བསྐུར་ཡང་དག་བརྩམ། །རུང་བར་བགྱིས་པའི་སེམས་ནི་འདི་ན་དབང༌། །རྡོ་རྗེ་སློབ་དཔོན་ཆོ་ག་ལས་ལ་སོགས། །དམ་ཚིག་མ་ཉམས་སྐབས་བཞིན་བསྲུང་བ་ཡི། །བུ་བཟང་དེ་ལ་ལམ་ཡང་བསྟན་པར་བྱ། །རྒྱུད་དང་བླ་མ་དག་ལ་ཡིད་ཆེས་པས། །ཐོག་མར་རྒྱུད་སྡེ་ཟབ་མོ་རྣམས་ཐོས་ནས། །ཐོས་དང་བསམ་པའི་ཤེས་རབ་དྲི་མེད་དང༌། །ཆོས་རྣམས་རབ་ཏུ་འབྱེད་པ་དམིགས་མེད་བཅས། །དེ་མཐར་ལམ་ནི་རྣམ་གཉིས་ཡོངས་སུ་བརྟག། འདི་དག་ཆོས་ལ་མོས་པ་ལ་སོགས་ཏེ། །དེ་ཕྱིར་ལམ་ལ་མི་འཕྲོད་པར་འཛིན་པ། །དེ་སོགས་སྒྲིབ་པ་བཞི་ཡང་དོན་གྱིས་བསྟན། །སྒྲིབ་པའི་གཙོ་བོ་བག་ཆགས་རྣམ་བཞི་སྟེ། །སད་རྨི་གཉིད་སྟུག་བཞི་པ་ཞེས་བྱའོ། །སོ་སོའི་ངེས་པས་ལམ་ཡང་ཉེ་ཚེ་ནི། །ཞི་གནས་མཐར་ཡང་བསྐྱེད་རིམ་གཏུམ་མོ་དང༌། །ཕྱག་རྒྱའི་ལམ་ལས་སློབ་མ་འཁྲིད་པར་བྱེད། །ཕྱི་ནས་བཞི་པའི་ལམ་གྱིས་བཀྲི་ན་མཛེས། །བཞི་པ་དོན་དམ་ཤེས་རབ་ཡེ་ཤེས་ནི། །རྟག་ཏུ་ཁྱབ་ཅིང་ལམ་ཀུན་འདི་ནའོ། །བསྐྱེད་རིམ་བཅོས་མ་གློ་བུར་ཉེ་ཚེ་བ། །དེ་ཡི་འབྲས་བུ་དྲི་བྲལ་ཁྱབ་རྟག་ཅི། །འདི་ན་བདེ་བ་དམ་པ་རྫོགས་རིམ་སྟེ། །སྐུ་
བཞིའི་དངོས་ལ་རེག་པར་རྒྱལ་བས་གསུངས། །ཕུང་པོ་ཁམས་དང་སྐྱེ་མཆེད་རང་བཞིན་གང༌། །ཡོངས་སུ་དག་པ་དེ་ཡི་ལམ་ཡང་འདི། །དག་པར་ཤེས་ནས་མཉམ་པར་བཞག་གྱུར་ཏམ། །དྷཱུ་ཏཱིའི་དབུས་སུ་མི་ཤིགས་ཐིག་ལེ་ལས། །རྣམ་ཀུན་འོད་གསལ་སྒྲུབ་པར་བྱེད་པའམ། །གཞན་དུ་རྒྱུད་ཀྱི་རིམ་པ་ཞེས་ཀྱང་བསྟན། །ནམ་མཁའ་ཡིད་དང་མིག་དང་རླུང་བཅིངས་པས། །དཔྱིད་ཀྱི་སྒྲུབ་བྱེད་དྷཱུ་ཏཱིར་གཟུགས་མཐོང་སྟེ། །དུ་བ་ལ་སོགས་རྣམ་བཅུར་དངོས་ཀུན་རིག །བསྙེན་པའི་ཡན་ལག་མཆོག་ཏུ་གསུངས་པ་སྟེ། །རླུང་བཅུ་དབུ་མར་ཞུགས་གནས་ཐིམ་པའི་ཚུལ། །རླུང་གི་རང་བཞིན་རྡོ་རྗེ་གསུམ་བཟླས་ཞེས། །དེ་བཞིན་གཞན་ལས་ས་བོན་དང་བྲལ་བའི། །སྣ་ཚོགས་རྡོ་རྗེ་རིམ་དང་ནོར་བུ་འགེངས། །སྔགས་ཀྱི་རིམ་པ་ཞེས་ཀྱང་གསུངས་པ་སྟེ། །སྲོག་རྩོལ་བཀག་ནས་དབུ་མར་འབབ་པ་གང༌། །འཁོར་ལོ་དྲུག་ཏུ་སྲོག་ཐུར་མཉམ་སྦྱོར་བ། །འབྱུང་བ་དྲུག་གི་ཉི་ཟླའི་བགྲོད་པ་འགོག །འདི་ནི་ཉེ་བར་བསྒྲུབ་པའི་ཡན་ལག་གོ །སྒྱུ་མའི་དངོས་པོར་ཆོས་ཀུན་བདེན་པ་སྟེ། །ཡེ་ཤེས་རིམ་དང་ཛ་ལནྡྷ་ར་ཡི། །རིམ་པ་མཆོག་ཅེས་རྒྱུད་སྡེ་འགའ་ལས་འབྱུང༌། །ཕྱག་རྒྱ་གསུམ་ལས་དབང་པོའི་དབྱེ་བ་ཡིས། །སོ་སོའི་རིམ་དང་ཐ་མར་ཕྱག་རྒྱ་ཆེ། །ནོར་བུར་ལྷན་སྐྱེས་བདེ་བ་རང་འདོད་ཀྱི། །རྣམ་བཅུའི་སྒྱུ་ལུས་
དབང་པོ་ཐམས་ཅད་པའོ། །འདི་ནི་སྒྲུབ་པའི་ཡན་ལག་དེ་ནས་གཞན། །སྣང་གསུམ་མཐར་ཡང་དྲི་མེད་འོད་གསལ་བ། །གཟུང་དང་འཛིན་པར་སྣང་བ་དག་པ་ཅན། །མངོན་བྱང་ཆུབ་ཅེས་དཔལ་ལྡན་འདུས་པར་དང༌། །གཞན་ལས་བསམ་མི་ཁྱབ་དང་གསང་བའི་རིམ། །ལས་རླུང་ཉི་ཁྲི་ཆིག་སྟོང་དྲུག་བརྒྱར་འགོག །དེ་སྙེད་མི་འགྱུར་བདེ་ཆེན་ཐོབ་པ་སྟེ། །གཙུག་ཏོར་མཆོག་ཏུ་བྱང་ཆུབ་སེམས་བརྟན་པ། །རང་བཞིན་ལྷན་ཅིག་སྐྱེས་པའི་བྱེད་པའོ། །འདི་ནི་བསྒྲུབ་པ་ཆེན་པོའི་ཡན་ལག་སྟེ། །དཔལ་ལྡན་ཏིང་འཛིན་ཅེས་གང་གསུངས་པའོ། །རྡོ་རྗེའི་རྦ་རླབས་ཞེས་པའང་འདི་ཁོ་ན། །འཛག་བདེའི་དངོས་ཀྱི་གཉེན་པོ་འདི་ཡིན་ནོ། །འདི་ནི་དཔལ་ལྡན་ཕྱག་རྒྱ་ཆེན་པོ་སྟེ། །རང་བྱུང་ཡེ་ཤེས་མངོན་དུ་བྱས་པ་ཡིན། །སེམས་ཉིད་གསལ་ཙམ་རིག་ལས་འདི་ཁྱད་འཕགས། །རིས་མེད་བདེ་བ་ཆེན་འདི་རྒྱུད་སྡེའི་དོན། །དེང་སང་གནས་ལུགས་ཕྱག་རྒྱ་ཆེར་གྲགས་པ། འཁོར་ལོ་ཐ་མའི་མདོ་ལུགས་སྒོམ་རིམ་ཞིག །དབང་པོའི་རིམ་པས་སྔགས་དང་གོ་བསྟུན་པས། །འགྲོ་བ་རྣམས་ལ་སྒྲོན་མེ་ལྟ་བུར་གྱུར། །ལམ་འབྲས་པ་ཡི་སྣང་གསུམ་སོགས་དང་མཚུངས། །བདེ་སྟོང་ཕྱག་རྒྱར་གྲགས་དང་འདི་མཚུངས་མོད། །འོན་ཀྱང་དེ་ནི་ཆེར་ཡང་ལམ་བཞིན་བཀྲི། །དེ་ལྟར་དེ་ནི་རྣལ་འབྱོར་པ་ཡི་ལམ། །དེ་ནས་སྤྱོད་པ་བྱ་
བར་རྒྱལ་པས་བཤད། །རེ་ཤིག་གསངས་ཏེ་སྤྱོད་པ་བྱ་བ་སྟེ། །ཕྱི་ནས་ཨ་ཝ་དྷཱུ་ཏཱིའི་སྤྱོད་པ་དང༌། །སྤྲོས་བཅས་ལ་སོགས་ཕྱོགས་ལས་རྣམ་རྒྱལ་གྱི། །སྤྱོད་པ་ཡིན་ཞེས་ཆེན་པོ་འགའ་ཞིག་གསུང༌། །ལ་ལ་ཤིན་ཏུ་སྤྲོས་མེད་བྷུ་སུ་ཀུ། །སྤྲོས་མེད་ཨ་ཝ་དྷཱུ་ཏཱིའི་སྤྱོད་པ་དང༌། །བརྡའ་དང་ཚོགས་ཀྱི་རིམ་པ་རྣམ་མང་པོ། །སྤྲོས་བཅས་ཨིནྡྲ་བྷུ་ཏིས་མཛད་པ་སྟེ། །འདིས་ན་ཚོགས་ཀྱི་འཁོར་ལོ་དབང་བསྐུར་ཞེས། །གསུངས་ཏེ་འདི་གཉིས་འགལ་བ་ཡོད་མ་ཡིན། །གནས་འདིར་ཕྱག་རྒྱ་ཆེན་པོ་ཁོ་ནའང་ཡོད། །ཤིན་ཏུ་སྤྲོས་མེད་ཀུན་ཏུ་བཟང་པོ་ཞེས། ། གསུངས་པ་རྣམས་ཀྱང་འདི་ལ་དགོངས་པ་ཡིན། །འདི་ནི་གྲུབ་པ་རྣམས་ཀྱི་ལམ་ཡིན་ཏེ། །བསྐྱེད་པའི་རིམ་པས་རྫས་ཀྱི་རིག་འཛིན་དང༌། །ལས་རྒྱས་འདོད་པའི་རིག་པ་འཛིན་པ་གྲུབ། །ཡེ་ཤེས་ཕྱག་རྒྱས་གཟུགས་ཁམས་ཕྱག་ཆེན་གྱིས། །ཡེ་ཤེས་ཟུང་འཇུག་སྐུ་ལ་སྔ་ནས་སྦྱོར། །རྣམ་ཀུན་ཏིང་འཛིན་བསྒོམ་པ་ནི། །ནམ་མཁའ་མཛོད་ལ་སོགས་པའོ། །དེ་མཐར་ཐབས་ཀྱི་ཏིངའཛིན་གྱིས། །སྙིང་རྗེ་ཆེན་པོ་བསྒྲུབ་ཅེས་བྱ། །སྟོང་དང་བརྒྱད་བརྒྱའི་འཕོ་བ་འགོག་པ་ན། །རེ་རེ་ཞིང་ཡང་ས་ནི་ཐོབ་པར་འགྱུར། །ས་གསུམ་གསུམ་ནི་བསྙེན་པ་ལ་སོགས་ཏེ། །ཡེ་ཤེས་སྐུ་ཆེན་སྒྲུབ་པར་བྱེད་པས་ནའོ། །ལུས་ངག་ཐིག་ལེ་འཕོ་བའི་བག་ཆགས་དང༌། ཡན་ལག་བཅུ་
གཉིས་དུས་སྦྱོར་བཅས་པ་བཟློག །ཐ་མལ་སྒོ་གསུམ་ཐིག་ལེར་བཅས་བཟློག་པས། །བདེ་བའི་རྡོ་རྗེ་རྣམ་བཞི་འཐོབ་པར་འགྱུར། །ཡན་ལག་རྣམ་བཞི་ཆོས་མོས་སོགས་སྦྱོར་བས། །ཆོས་སྐུ་གཙང་དང་ཡེ་ཤེས་བདེ་བ་དང༌། ལོངས་སྤྱོད་རྫོགས་སྐུ་འདིར་ཡང་དམ་པའི་བདག །སྤྲུལ་སྐུ་རྟག་པ་དམ་པ་འབྲས་བུ་བཞི། །ཐབས་དང་ཤེས་རབ་དབྱེ་བས་གཞི་དང་ནི། །ལམ་དུའང་རྣམ་པ་གཉིས་སུ་བཤད་པ་སྟེ། །དེ་ཕྱིར་ཡེ་ཤེས་སྔགས་ཀྱི་སྐུ་རྣམ་གཉིས། །བདེན་གཉིས་ངོ་བོ་གཅིག་པ་རྣམ་པར་རིག །འདི་ནི་ཟུང་འཇུག་མི་གནས་མྱང་འདས་རིམ། །གསང་རིམ་བསམ་མི་ཁྱབ་དང་ཏིང་འཛིན་འབྲས། །ཡེ་ཤེས་ལུས་ལས་ཐ་མལ་བ་ལ་མིན། །གཞོམ་མེད་སྒྲ་དང་འགྱུར་བྲལ་བདེ་ཆེན་ཐོབ། །བདེ་བ་ཆེ་དང་རྣམ་ཀུན་པའི། །ཡུལ་གྱི་དབྱེ་བས་ཡེ་ཤེས་སྐུ། །གཞོམ་མེད་ནཱ་ད་དང་སྙིང་རྗེས། །གཟུགས་སྐུ་རྣམ་པ་གཉིས་སུ་ཤེས། །མ་རིག་བག་ཆགས་ས་དང་ཡིད་ཀྱི་ལུས། །མི་ཤིགས་ཐིག་ལེར་འགྱུར་བའི་བདེ་བ་དང༌། །གནས་སྐབས་བཞི་དང་རླུང་སེམས་ཕྲ་མོ་དང༌། །རླུང་དང་རྣམ་ཤེས་ཁུ་རྡུལ་ཚོགས་པ་དང༌། །དོན་དམ་སྟོང་ཉིད་དེ་བཞིན་རྣམ་ཀུན་པ། །སྣང་གསུམ་རྩ་རླུང་ཐིག་ལེ་འོད་གསལ་དང༌། །ཞུ་བདེ་ལྷན་སྐྱེས་རང་བཞིན་ལྷན་སྐྱེས་དང༌། །ཡེ་ཤེས་ལུས་དང་ལོངས་
སྤྱོད་རྫོགས་སྐུ་དང༌། །འཕོ་མེད་བདེ་ཆེན་གཞོམ་དུ་མེད་པའི་སྒྲ། །གཞན་ཡང་སངས་རྒྱས་ཡེ་ཤེས་རང་བཞིན་དང༌། །གློ་བུར་རྣམ་དག་དེ་བཞིན་སྤྱན་ལྔ་དང༌། །ཕྱག་རྒྱ་གསུམ་དང་དགའ་བའི་སྐད་ཅིག་དང༌། །སྤྱོད་པ་གསུམ་པ་རྣམས་དང་དགུ་སོགས་དང༌། །བདེན་དོན་བཅུ་གཉིས་དེ་བཞིན་བཅུ་དྲུག་གི །རྣམ་པའི་རབ་དབྱེ་ཤེས་ན་གསང་སྔགས་ཀྱི། །ངེས་པའི་དོན་ལ་ད་གཟོད་སྤོབས་པ་འཐོབ། ། འདི་ནི་ཀུན་དགའ་སྙིང་པོ་ཡིས། །རང་གི་ལྟ་བའི་འདོད་པ་རྣམས། །འགྲོ་ལ་བརྩེ་བའི་སེམས་གྲིམ་པོས། །མདོ་ཙམ་ཡོངས་སུ་བཤད་པ་ཡིན། །ཆོས་འདིའི་མིང་ནི་རྡོ་རྗེ་ཐེག་པའི་ལམ་གྱི་རིམ་པ་ནམ་མཁའི་རྡོ་རྗེ་རབ་ཏུ་གསལ་བ་ཞེས་བྱའོ། ། ཤཱཀྱའི་དགེ་སློང་ཀུན་དགའ་སྙིང་པོས་བྲིས་པའི་དགེ་བས་རྟག་བརྟན་གཡུ་དྲུང་དཔལ་ལ་གནས་པར་གྱུར་ཅིག །དིརྒྷཱ་ཡུཿ ཛ་ཡནྟུ། རྡོ་རྗེ་སློབ་དཔོན་ཐུགས་ཀྱི་གསང་བའི་མཛོད། །རབ་ཕྱེ་ནམ་མཁའི་རྡོ་རྗེ་གསལ་བའི་གཞུང༌། །འདིར་འབད་དགེ་བས་ཚེ་རབས་ཐམས་ཅད་དུ། །ཐོས་བསམ་བསྒོམས་པས་འདི་དོན་རྟོགས་པར་ཤོག །ཞུས་དག། ཤུབྷ་མ་སྟུ་སརྦ་ཛཱ་ག་ཏཾ། དགེ་ལེགས་འཕེལ།། །།