སྨར་ཁྲིད་ཚོམ་བུ་ལུགས།
སྨར་ཁྲིད་ཚོམ་བུ་ལུགས་བཞུགས།
ཨོཾ་སྭཱ་སྟི། འཕགས་པ་ཐུགས་རྗེ་ཆེན་པོའི་མན་ངག་ལས་བརྩམས་ནས། ཡི་དམ་ཀུན་གྱི་སྨར་ཁྲིད་ཉམས་སུ་བླང་བར་འདོད་པས་འདི་ལྟར་བྱ་སྟེ། དེ་ཡང་སྔོན་འགྲོ་དངོས་གཞི་རྗེས་ཀྱི་ཁྲིད་གསུམ་མོ། །དང་པོ་ནི། དལ་འབྱོར་རྙེད་དཀའ་བ་དང༌། འཆི་བ་མི་རྟག་པ་དང༌། འཁོར་བའི་སྡུག་བསྔལ་དང༌། ལས་རྒྱུ་འབྲས་བསམ་པ་རྣམས་སྤྱི་དང་འདྲ་སྟེ། སྐྱེས་བུ་གསུམ་གྱི་ལམ་གྱི་རིམ་པ་སོགས་གཞན་ལས་ཤེས་པར་བྱའོ། །ཐུན་མོང་མ་ཡིན་པའི་སྔོན་འགྲོ་ལ། ཆོས་སྤྱོད་ཐམས་ཅད་ཀྱི་སྔོན་དུ་འགྲོ་བ་སྐྱབས་འགྲོ་སེམས་བསྐྱེད། སྡིག་སྒྲིབ་སྦྱོང་བ་རྡོ་རྗེ་སེམས་དཔའི་སྒོམ་བཟླས། ཚོགས་རྫོགས་ཤིང་བྱིན་རླབས་འཇུག་པ་མཎྜལ། བླ་མའི་རྣལ་འབྱོར་དང་བཅས་པ་རྣམས་ཡིན་ཏེ། དེ་དག་ཀྱང་རྒྱས་པར་ཟབ་ལམ་རྡོ་རྗེའི་རྣལ་འབྱོར་གྱི་སྔོན་འགྲོའི་ཁྲིད་ཡིག་ཏུ་
བལྟ་བར་བྱའོ། །བསྡུ་ན་ཐུན་འགོའི་སྐྱབས་འགྲོ་སེམས་བསྐྱེད་དང༌། བླ་མའི་རྣལ་འབྱོར་ཙམ་གྱིས་ཀྱང་ཆོག གཉིས་པ་དངོས་གཞི་ལ། བསྐྱེད་རིམ་དང་རྫོགས་རིམ་གཉིས་ལས། དང་པོ་ལ། ཐུན་གྱི་སྔོན་འགྲོ་ནི། བླ་མ་ཡི་དམ་སངས་རྒྱས་བྱང་སེམས་ཐམས་ཅད་ལ་དམིགས་ཏེ། ཅི་མཛད་ཁྱེད་རང་ཤེས་སོ་སྙམ་པའི་བློས་འགེལ་གྱི་སྐྱབས་འགྲོ་དང༌། མཁའ་མཉམ་སེམས་ཅན་ཐམས་ཅད་ལ་དམིགས་ནས་སྙིང་རྗེས་ཀུན་ནས་བསླངས་པའི་སངས་རྒྱས་ཐོབ་འདོད་ཀྱི་སེམས་བསྐྱེད་གསལ་བཏབ་སྟེ། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །ཞེས་སོགས་ཡིད་མ་ཡེངས་པར་མང་དུ་བརྗོད། སྤྱི་བོར་བླ་མ་བསྒོམ། མོས་གུས་དུང་བ་དང་བཅས་པས་ཡིག་བརྒྱ་མང་དུ་བཟླས། བདག་ལ་བྱིན་གྱིས་བརླབ་ཏུ་གསོལ། ཅེས་གསོལ་བ་བཏབ་པས། འོད་དུ་ཞུ་ནས་རང་ལ་ཐིམ་པར་
བསྒོམ། ཅུང་ཟད་སེམས་ངལ་གསོ། ཐུན་གྱི་དངོས་གཞིའི་རྣལ་འབྱོར་ནི། རྣམ་པ་གསུམ་སྟེ། རང་ཡི་དམ་ཀུན་འདུས་སུ་བསྒོམ་པ། སྤྱི་བོར་བླ་མ་ཀུན་འདུས་སུ་བསྒོམ་པ། མཁའ་ཁྱབ་བཟླས་པའི་རྣལ་འབྱོར་རོ། །དང་པོ་ནི། སྭཱབྷཱ་ཝའི་སྔགས་ལན་གསུམ་བརྗོད་པས། སྣང་བ་ཐམས་ཅད་འཇའ་ཡལ་བ་བཞིན་དུ་སོང༌། སེམས་སྤྲོས་བྲལ་ལ་ཅུང་ཟད་མཉམ་པར་བཞག ཆོས་ཉིད་སྟོང་པ་ཉིད་ལ་བྱང་ཆུབ་པའོ། །དེའི་ངང་ལས་ཟླ་བའི་དཀྱིལ་འཁོར་ཞིག་བསམ་སྟེ། སྐུ་ཟླ་བ་ལ་བྱང་ཆུབ་པའོ། །དེའི་སྟེང་དུ་ཧྲཱིཿདཀར་པོ་བསམ་སྟེ། གསུང་ཡིག་འབྲུ་ལ་བྱང་ཆུབ་པའོ། །དེ་ལས་པདྨ་དཀར་པོ་སྡོང་བུ་དང་བཅས་པ་ལྟེ་བ་ལ་ཧྲཱིཿས་མཚན་པར་གྱུར་པ་ནི། ཐུགས་ཕྱག་མཚན་ལ་བྱང་ཆུབ་པའོ། །དེ་ལས་འོད་འཕྲཽས། འཕགས་པ་མཆོད། སེམས་ཅན་གྱི་དོན་བྱས། སླར་འདུས་ཏེ་ཐིམ། ཟླ་བས་ས་བོན་ཕྱག་མཚན་རོ་གཅིག་ཏུ་འདྲེས་པ་ལས་བདག་ཉིད་འཕགས་པ་སྤྱན་རས་གཟིགས་ཀྱི་སྐུར་གྲུབ་པ་ནི། ལྷ་སྐུ་ཡོངས་སུ་རྫོགས་པ་ལ་བྱང་ཆུབ་པའོ། །དེ་ནས་སྐུ་མདོག་དཀར་པོ་ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་འོག་མས་ཕྲེང་བ། གཡོན་འོག་མས་པདྨ་དཀར་པོ། ཞབས་རྡོ་རྗེའི་སྐྱིལ་ཀྲུང་གིས་པད་ཟླ་ལ་བཞུགས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ་སོགས་མཚན་ཉིད་སྤྱི་དང་མཐུན། དེའི་ཐུགས་ཀ་ནས་འོད་ཟཻར་འཕྲོས། བླ་མ་ཡི་དམ་སངས་རྒྱས་བྱང་ཆུབ་སེམས་དཔའ། རྒྱུད་སྡེ་བཞིའི་ལྷ་ཚོགས་
ཞི་ཁྲོ་རབ་འབྱམས་ཐམས་ཅད་འཕགས་པ་སྤྱན་རས་གཟིགས་ཀྱི་རྣམ་པར་སྤྱན་དྲངས་ཏེ་རང་ལ་ཐིམ། བཛྲ་ས་མཱ་ཛཿ ཛཿཧཱུཾཿབཾ་ཧོ་ཞེས་བརྗོད། རང་ཉིད་རྣམ་པ་མ་འགྱུར་པ་འཕགས་པ་སྤྱན་རས་གཟིགས་ཡིན་ལ། ངོ་བོ་ཡང་མ་གྱུར་པ་འཕགས་པ་སྤྱན་རས་གཟིགས་ཀྱི་རང་བཞིན་ལ། མཚན་ཉིད་ཁྱད་པར་གྱི་ཆོས་ཡི་དམ་ཀུན་འདུས་པའི་ངོ་བོ་ཡིན་སྙམ་དུ་མོས་པ་དྲག་པོ་བྱ། དེ་ཉིད་ལན་གསུམ་སོགས་བསྐྱར་གྱིན་བསྒོམ་མོ། །ཉམས་ཁྲིད་དུ་བྱེད་ན་རེ་ཞིག་དེ་ལ་དམིགས་སྐོར་གཅིག་ཏུ་བྱེད་དོ། །གཉིས་པ་ནི། མདུན་གྱི་ནམ་མཁར་རྩ་བའི་བླ་མ་སངས་རྒྱས་འོད་དཔག་མེད་ཀྱི་རྣམ་པར་བྱོན། བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས། ཨོཾ་བཛྲིར་བྷ་ཝ་ཨ་བྷི་ཥིཉྩ་ཧཱུཾ། ཞེས་བུམ་པའི་ཆུས་དབང་བསྐུར། སྤྱི་བོ་ནས་རྐང་མཐིལ་གྱི་བར་ལུས་ཀྱི་ནང་ཐམས་ཅད་གང༌། སྡིག་སྒྲིབ་དག ཡོན་ཏན་ཐམས་ཅད་རྫོགས། བླ་མ་འོད་དཔག་མེད་རང་གི་སྤྱི་བོར་བཞུགས། དེའི་ཐུགས་ཀ་ནས་འོད་འཕྲོས། དངོས་སུ་ཆོས་འབྲེལ་ཐོབ་པའི་རྩ་བའི་བླ་མ་རྣམས་དང༌། དངོས་སུ་མ་མཇལ་ཡང་ཆོས་བརྒྱུད་ལ་བཞུགས་པའི་བརྒྱུད་པའི་བླ་མ་ཐམས་ཅད་སྤྱན་དྲངས་ཏེ། རྩ་བའི་བླ་མ་འོད་དཔག་མེད་ལ་ཐིམ་པས། དེ་ཉིད་བླ་མ་ཀུན་འདུས་སུ་གྱུར། དེ་ལ་མོས་གདུང་དྲག་པོས་རྩེ་གཅིག་ཏུ་གསོལ་བ་གདབ་པར་བྱའོ། །འདི་ཡང་དམིགས་སྐོར་གཅིག་གོ གསུམ་པ་ནི།
དེ་ནས། ཨོཾ་མ་ཎི་པདྨེ་ཧཱུཾ། ཞེས་བཟླས་པ་ན། རང་ཡི་དམ་ཀུན་འདུས་ཡིན་པས་ཡི་དམ་ཐམས་ཅད་ཀྱི་བཟླས་པར་གྱུར་ལ། རིགས་བདག་བླ་མས་གསུངས་པས་བླ་མ་ཐམས་ཅད་ཀྱི་བཟླས་པར་སོང༌། རང་གི་སྐྲ་ཉི་ཁྲི་ཆིག་སྟོང༌། བ་སྤུ་བྱེ་བ་ཕྲག་ཕྱེད་དང་བཞི། སྲིན་བུ་བརྒྱད་ཁྲི་བཞི་སྟོང་སོགས་ཀྱང་ལྷའི་ངོ་བོར་གནས་པས། དེ་ཐམས་ཅད་ལས་ཡིག་དྲུག་གི་སྒྲ་རེ་བྱུང༌། མཁའ་མཉམ་གྱི་སེམས་ཅན་ཐམས་ཅད་ལྷར་གསལ་བ་དང༌། ནམ་མཁའ་གང་བའི་སངས་རྒྱས་རྣམས་དང༌། ས་རྡོ་རི་བྲག་རྩི་ཤིང་ནགས་ཚལ་ཐམས་ཅད་ལས་ཀྱང་ཡིག་དྲུག་གི་སྒྲ་རྒྱུན་མི་འཆད་པར་འབྱུང་ནས། སྣང་སྲིད་ཐམས་ཅད་ཡིག་དྲུག་ཏུ་འུ་རུ་རུ་འདུག་པར་མོས་ཏེ། མ་ཎི་གང་ནུས་སུ་བཟླ་བ་ཉིད་དོ། །ཐུན་གཅིག་གོ །དེ་ཐམས་ཅད་ལ་ཐུན་གྱི་རྗེས་ནི། ལྷ་སྐུ་སྟོང་པ་ཉིད་དུ་སྦྱངས་ལ་ཅུང་ཟད་བཞག དེ་ལྟར་བསྒོམས་པའི་དགེ་བས་བདག་དང་སེམས་ཅན་ཐམས་ཅད་འཕགས་པ་སྤྱན་རས་གཟིགས་ཀྱི་གོ་འཕང་ཐོབ་པའི་རྒྱུར་གྱུར་ཅིག་སྙམ་པས་བསྔོ་བ་སྨོན་ལམ་གདབ། གཉིས་པ་རྫོགས་པའི་རིམ་པ་ནི། ཐུན་གྱི་སྔོན་འགྲོ་སྔར་དང་འདྲ། ལུས་གནད་རྐང་པ་རྡོ་རྗེའི་སྐྱིལ་ཀྲུང་ངམ། དེ་ཡེ་ནས་མ་ལྕོགས་ན་སེམས་དཔའི་སྐྱིལ་ཀྲུང་བྱ། ལག་པ་མཉམ་གཞག་གམ། ཁུ་ཚུར་བརླ་བཞག སྒ་ཚིགས་བསྲང༌། སོ་མཆུ་རང་སར་བཞག ལྕེ་རྐན་ལ་སྦྱར། དཔུང་པ་ཕྱིར་བཀྱེད། མིག་ལྟ་སྟངས་ཅུང་ཟད་གྱེན་དུ་
གཏད་དེ། དེ་རྗེས་རླུང་རོ་གསུམ་བསལ་ནས་རླུང་རང་སོར་བཞག སེམས་དུས་གསུམ་གྱི་རྣམ་རྟོག་ཡིད་བྱེད་སྤྲོས་པ་ཐམས་ཅད་སྤངས་ནས། མ་བསྒྲིམས་མ་གློད་གང་ཡང་མ་བསམ་པར་ཆམ་མེ་བཞག བྱིང་རྨུགས་དང་འཕྲོ་རྒོད་བྱུང་ན། ཅུང་ཟད་བསྒྲིམས་ཤིང་བསྒྲིམས་འཕྲོ་ལ་གློད། ཐུན་གྱི་རྗེས་སྔ་མ་དང་འདྲ་སྟེ་དམིགས་སྐོར་གཅིག་གོ །དེ་ལྟར་ན་སེམས་གནས་པ་དེ་ཉིད་ངོས་བཟུང་བྲལ་ཞིང༌། སྣང་ཆ་མ་འགགས་པ་ངོས་ཟིན་པར་བྱ་སྟེ། ཡང་དམིགས་སྐོར་གཅིག་གོ །ཡང་སྣང་བ་གང་ཤར་ཐམས་ཅད་གསལ་ལ་ངོས་བཟུང་མེད་པར་གདོད་མ་ནས་གནས་པས། དགག་སྒྲུབ་སྤང་བླང་མེད་པས་གང་ཤར་དེ་ཁའི་ངང་སྐྱོང་བ་སྟེ། ཡང་དམིགས་སྐོར་གཅིག་གོ །རྒྱས་པར་ན་སོར་སྡུད་བསམ་གཏན་སོགས་ཀྱི་མན་ངག་ཀྱང་འདིར་ཅི་རིགས་པ་བསྟན་དགོས་ལ། ཡང་ན་ཕྱག་རྒྱ་ཆེན་པོར་གྲགས་པ་སོགས་ལྟ་ཁྲིད་གཞན་དང་མཐུན་པར་ངོ་སྤྲད་ཀྱང་རུང་ངོ༌། །མདོར་བསྡུ་ན། རྫོགས་རིམ་དམིགས་སྐོར་གསུམ་པོ་ཉིད་ལ་གནད་ཐམས་ཅད་ཚང་བས་འདི་ཙམ་གྱིས་ཆོག་ཤེས་པར་ཡང་བྱའོ། །དེས་དངོས་གཞིའི་ཁྲིད་ཚར། གསུམ་པ་རྗེས་ཀྱི་ཆོས་དྲུག་སྟེ། བཟའ་བ་ཟས་ཀྱི་རྣལ་འབྱོར། བགོ་བ་གོས་ཀྱི་རྣལ་འབྱོར། འདུག་ས་གནས་ཁང་གི་རྣལ་འབྱོར། གཉིད་ལོག་འོད་གསལ་གྱི་རྣལ་འབྱོར། འཆི་ཁར་སངས་རྒྱ་བ་འཕོ་བའི་རྣལ་འབྱོར། བར་དོར་སངས་རྒྱ་བར་དོའི་རྣལ་འབྱོར་རོ། །དང་པོ་ནི།
བཟའ་བཏུང་ཆེ་ཆུང་གང་ལ་ལོངས་སྤྱོད་ཀྱང༌། ཨོཾ་ཨཱཿཧཱུཾ། ཞེས་ཡེ་ཤེས་ཀྱི་བདུད་རྩིའི་རྒྱ་མཚོ་ཟད་མི་ཤེས་པར་གྱུར། དེ་ནས་འབྲུ་གསུམ་ཁོ་ན་མང་དུ་བརྗོད་ལ། ཕུད་བླ་མ་ཡི་དམ་མཁའ་འགྲོ་ཆོས་སྐྱོང་རྣམས་ལ་ཕུལ། བདག་ཉིད་ལྷའི་ང་རྒྱལ་གྱིས་ལོངས་སྤྱོད་དོ། །གཉིས་པ་ནི་དེ་དང་འདྲ་བ་ལས། གོས་ལྷ་རྫས་ཀྱི་ན་བཟའ་དཔག་ཏུ་མེད་པར་བྱིན་གྱིས་རློབ། གསུམ་པའང་དེ་དང་འདྲ་བ་ལས། གནས་ཁང་ངམ་འདུག་ས་གང་ཡིན་པ་དེ། གཞལ་མེད་ཁང་དུ་བྱིན་གྱིས་བརླབས་ནས་མང་པོར་སྤེལ་བའོ། །བཞི་པ་ནི། སྙིང་གར་ཡི་དམ་འཕགས་པ་སྤྱན་རས་གཟིགས་སོར་བཞི་ཙམ་པ་གསལ་བཏབ། སྤྱི་བོར་བླ་མ་འོད་དཔག་མེད་བསྒོམ། གཉིས་ཀ་ལ་མོས་གུས་དུང་དུང་པ་སྤེལ་མར་བསྒོམ། ཉལ་པའི་ཚེ་སྤྱི་བོའི་བླ་མ་འོད་དཔག་མེད་ཚངས་བུག་ནས་ཞུགས། སྙིང་གའི་ཡི་དམ་ལ་ཐིམ་པའམ། དེའི་རིགས་བདག་གི་ཚུལ་དུ་བཞུགས་པ་གང་མོས་པ་ཞིག་བསྒོམས་ལ། སྙིང་གའི་བླ་མ་ཡི་དམ་ལ་སེམས་གཏད་དེ། གཉིད་དུ་འགྲོ་བར་བྱས་པས་འོད་གསལ་ཟིན་པར་འགྱུར་རོ། །ལྔ་པ་ལ་སྦྱང་བ་དང༌། ལས་ལ་སྦྱར་བ་གཉིས་ཀྱི། དང་པོ་ནི། སྤྱི་བོར་བླ་མ། སྙིང་གར་ཡི་དམ། ལྟེ་བར་ཆོས་འབྱུང་དཀར་པོའི་ནང་དུ་ཐིག་ལེ་སྔོ་དམར། ཚངས་བུག་རྒྱ་མཐོང་ཁ་བྱེ་བ་བཞིན་དུ་སྐྱ་ཐལ་ལེ་ཡངས་པོ་ཞིག་བསྒོམ། རླུང་རོ་བསལ། རླུང་བག་ཙམ་བཟུང་བས་ལྟེ་བའི་ཐིག་ལེ་སྔོ་
མར་དེའི་དཀྱིལ་ནས། ཐིག་ལེ་དཀར་སེར་ཡུངས་ཀར་ཙམ་ཞིག་ཐོན་ཧཱིཀ་རིང་པོ་བརྗོད་ཅིང་རླུང་ཁ་ནས་ཕྱིར་བསལ་བས་ཐིག་ལེ་དཀར་སེར་དེ་ཡང་ཧྲིལ་ལི་ལི་བྱུང༌། སྙིང་ཁའི་ཡི་དམ་ལ་བསྐོར་བ་ལན་གསུམ་བྱས་ཏེ། ཚངས་བུག་ནས་རྒྱང་སྟེ་ཐོན་ནས་བླ་མའི་ཐུགས་ཀར་ཐིམ། དེ་ལྟ་བུ་བསྐྱར་གྱིན་ལན་བདུན་སོགས་གང་མང་བསྒོམ། དེ་ནས་འབེབས་པ་ནི། ཡར་འཕོས་པ་ཐམས་ཅད་གཅིག་ཏུ་འདུད་པའི་ངོ་བོ་ཡུངས་འབྲུ་ལྟ་བུ་དེ་སྔར་གྱི་ལམ་བརྒྱུད་ནས་ལྟེ་བའི་ཐིག་ལེ་ལ་ཐིམ། དེ་ཉིད་ལན་མང་དུ་བྱས་ནས། ཐུན་འཇོག་པའི་ཚེ། བླ་མ་ཡང་འོད་དུ་ཞུ་ནས་ཐིམ། ཚངས་བུག་ཀྱང་ཟུམ་པར་བསམས་ནས་དགེ་བ་བསྔོ། གཉིས་པ་ལས་ལ་སྦྱར་བ་ནི། དུས་ལ་བབས་པའི་ཚེ་བྱ་སྟེ། འབེབས་པ་དང་བླ་མ་བསྟིམ་པ་དང་སྒོ་འགེགས་པ་གསུམ་སྤངས་པས་གཞན་སྔར་བཞིན་ནོ། །དྲུག་པ་ནི་སྣང་བ་འདི་ཐམས་ཅད་ལ་བར་དོ་ཡིན་སྙམ་པའི་འདུན་པ་དྲག་ཏུ་སྦྱངས། གནས་སྐབས་འདི་ཡར་འགྲོ་དང་མར་འགྲོའི་ས་མཚམས་ཆེན་པོ་ཡིན་པས། ཉོན་མོངས་པའི་དབང་དུ་སྐད་ཅིག་ཀྱང་མི་གཏོང་སྙམ་པའི་ཞེ་བཅད་དྲག་ཏུ་བྱས་ནས། གཟུགས་སུ་སྣང་ཚད་སྤྱན་རས་གཟིགས་ཀྱི་སྐུ། སྒྲ་གྲགས་ཚད་ཡི་གེ་དྲུག་པའི་སྔགས། དགྲ་གཉེན་ཆགས་སྡང་གི་ཡུལ་སོགས་བདག་གཞན་སྣོད་བཅུད་སྣང་སྟོང་སྒྱུ་མ་ལྟ་བུར་བསྒོམ། ཐུན་མཚམས་སུ་ཡང་དྲན་པའི་ལྕགས་ཀྱུས་བཟུང་སྟེ། སེམས་ཅན་མཐོང་ཚད་ཡི་དམ་དུ་བསྒོམ། ཆགས་སྡང་གི་ཡུལ་སོགས་གང་ཤར་ཐམས་ཅད་བདེན་མེད་སྒྱུ་མའི་རྩིས་ཟིན་པར་བྱེད་པ་གལ་ཆེའོ། །དེ་ལྟར་ན་སྨར་ཁྲིད་ཚིམ་བུ་ལུགས་ཀྱི་
སྙིང་པོ་བསྡུས་པ་འདི་ཡང་རྒྱལ་ཁམས་པ་ཏཱ་ར་ནཱ་ཐས་སྨྲས་པའོ།། །།ཞུས་དག །དགེ་ལེགས་འཕེལ། །