ལྷ་སོ་སོའི་བསྙེན་པ་སྤྱི་ཁྱབ་ཏུ་བྱེད་ཚུལ་བསྡུས་པ།
ཨོཾ་སྭཱ་སྟི། དཔལ་ལྡན་བླ་མ་དམ་པ་རྡོ་རྗེ་འཆང་ཏཱ་ར་ནཱ་ཐས་མཛད་པའི་ལྷ་སོ་སོའི་བསྙེན་པ་སྤྱི་ཁྱབ་ཏུ་བྱེད་ཚུལ་བསྡུས་པ་ནི། སྤྱིར་བསྙེན་པ་གང་ལའང་ཐོག་མར་མཚམས་འོག་ཏུ་མི་མང་ཉུང་གང་བཅུག་ཀྱང་ཆོག་ཅིང་ཐོག་མར་མཚམས་འོག་ཏུ་མ་བཅུག་པ་ཕྱིས་མི་འཇུག མཚམས་འདི་མི་ཚེ་གང་བྱ་ཞིང༌། གྲོལ་བ་སྔ་དྲོ་གྲོལ་བར་བྱའོ། །ཐུན་གྱི་སྐབས་ངག་བསྡམས་ཤིང་ངག་བཅད་པའི་སྔགས་དེ་གྲངས་དུ་རྩི་ཞིང༌། ཐུན་མཚམས་རྣམས་སུ་ངག་བཅད་གཅིག་ཏུ་མི་དགོས། སྔགས་གང་འགྲུབ་བགྲངས། ཐུན་མཚམས་ཀྱི་སྔགས་གྲངས་སུ་མི་རྩི། བསྙེན་པའི་འཕྲེང་བ་མི་གཞན་གྱི་མི་མཐོང་བར་བྱེད། ཁྱད་པར་ཡི་དམ་གང་སྒོམ་པའི་སྐབས་མཚམས་ཐོ་བརྩིགས་ན་དེར་སྔོན་འགྲོ་གཏོར་མ་བཏང༌། དེ་སྐབས་ཕྱོགས་འདིར་བདག་ལྷའི་དཀྱིལ་འཁོར་སྒྲུབ་པ་སོགས། ཚིག་བསྒྱུར་འཕྲིན་ལས་བཅོལ། སྤྱིར་ཐུན་བཞི་བཤད་ནའང་སྔགས་འགྲོ་ཆེ་བའི་སྔ་ཐུན་དགོང་ཐུན་གཉིས་མཛད། ཐུན་མཚམས་ཉིན་གོང་བར་མཛད། གཏོར་མ་དགོང་ཐུན་གྱི་མཇུག་སྲོད་ཀྱི་དུས་དེར་བསྔོ། བསྙེན་པ་གྲོལ་བའི་ཚེ་གཏང་རག་གི་ཚུལ་དུ་གཏོར་མ་རྒྱས་པ་རེ་བཏོང་ཞིང༌།
འགྲུབ་ན་བསྙེན་པ་རྫོགས་མཚམས་ནང་དུ་རྫོགས་པར་བྱ། མཚམས་གྲོལ། བསྙེན་པའི་ཐུན་མཚམས་སྐབས་གཏམ་ཅལ་ཅོལ་མང་པོ་མི་སྨྲ་ཞིང་སྒྲུབ་གཡོགས་པའི་ཀྱང་སྐད་ཆ་གསལ་བ་ཆེ་བ་རྣམས་མི་བཤད། བཟླས་པའི་སྐབས་སྔར་མི་དྲན་པ་མང་པོ་དྲན་པ་དང༌། དཔེ་ཆ་ལྟ་བ་དང༌། ཤོར་བ་སོགས་བསྙེན་པ་ཉིད་མ་ཡིན་པའི་བྱ་བ་གང་འདོད་ཀྱང་བར་ཆད་དུ་གོ་བར་བྱས་ནས་སྤང་པ་གཙོ། ཚོགས་གསོགས་དང༌། བསྲུང་འཁོར་དམིགས་པ་གང་གསལ་དེ་སྒོམ་པའི་བར་ཆད་མི་སྣང་བ་ཡིན། ཁྱད་པར་བསྙེན་པ་ལ་འདོད་པ་བསྡུག་པ་དང༌། དགོངས་པ་ཚབ་ཚོབ་མི་བྱེད་པར་བློ་བདེ་བའི་ངོས་ནས་བྱེད། ཉི་མ་གཅིག་ལ་གྲངས་འདི་ཙམ་སོང་མ་སོང་མི་བྱེད། སྤྱོད་ལམ་བག་ཡང་ཙམ་བྱའོ། །རིག་པ་གཙུར་གཙུར་མི་བྱ། སྐྲ་སེན་མི་འདྲེག གདན་མི་བསྒུལ། བླ་མ་ལ་གསོལ་བ་འདེབས་པ་གཏོར་མའི་སྐབས་གསོལ་འདེབས་འདོན་པ་གལ་ཆེ། ཞེས་པ་འདི་ཡང་སློབ་མ་འགའ་ཞིག་གིས་བསྐུལ་བ་ལྟར་ཏཱ་ར་ནཱ་ཐས་ཆོས་ལུང་བྱང་རྩེར་སྦྱར་བའོ།། །།སརྦ་མངྒ་ལཾ།