རྡོ་རྗེ་འཇིགས་བྱེད་ཆེན་པོའི་མངོན་རྟོགས་ཚིགས་བཅད་མ།
རྡོ་རྗེ་འཇིགས་བྱེད་ཆེན་པོའི་མངོན་རྟོགས་ཚིགས་བཅད་མ་བཞུགས། ན་མོ་བཛྲ་བྷཻ་ར་ཝ་ཡ། སྐྱབས་སེམས་སྔོན་དུ་བཏང༌། ཚད་མེད་བཞི་བསྒོམ། ཤཱུ་ནྱ་ཏས་སྟོང་པར་སྦྱངས། སྟོང་པའི་ངང་ལས་བསྲུང་འཁོར་དབུས། །ཨེ་ལས་ཆོས་ཀྱི་འབྱུང་གནས་དབུས། །ཁྲག་ཞག་འཁྲུགས་པའི་རྒྱ་མཚོའི་ནང༌། །ཐོད་རུས་འབར་བའི་གཞལ་ཡས་ཁང༌། །དུར་ཁྲོད་ཆེན་པོས་བསྐོར་བའི་དབུས། །ཡཾ་ལས་རླུང་དཀྱིལ་དུ་བའི་མདོག །དེ་སྟེང་ཟླ་བར་དྷཱིཿཡིག་ལས། །འཇམ་དབྱངས་དམར་སེར་པོད་རལ་འཛིན། །ཐུགས་ཀར་ཉི་མ་ལས་འོད་འཕྲོས། །སངས་རྒྱས་ལ་སོགས་བཀུག་ནས་བསྟིམ། །འཇམ་དཔལ་གདན་བཅས་ཉི་མ་ལ། །ཐིམ་པར་དཔག་ཚད་བརྒྱ་སྟོང་གི །ཚད་ཅན་ཉི་མར་ཧཱུཾ་མཐིང་ནག །དེ་ལས་རྡོ་རྗེ་རྩེ་དགུ་གདེངས། །མེ་དང་མཚོན་ཆའི་ཚ་ཚ་འཕྲོས། །སྡང་དང་གདུག་ཅན་ཚར་བཅད་ནས། །རྒྱལ་བ་སྲས་བཅས་འཇིགས་མཛད་ཀྱི། །རྣམ་པར་སྤྱན་དྲངས་འདྲེས་པ་ལས། །སངས་རྒྱས་ཀུན་གྱི་ཡེ་ཤེས་སྐུ། །གཅིག་ཏུ་བསྡུས་པ་འཇམ་པའི་
དབྱངས། །ཐུགས་རྗེས་གདུག་པ་འདུལ་བའི་ཕྱིར། །ཁྲོ་བོར་གྱུར་པའི་གཤིན་རྗེ་གཤེད། །ཞལ་དགུ་སུམ་ཅུ་རྩ་བཞིའི་ཕྱག །བཅུ་དྲུག་ཞབས་ཀྱི་གཡས་རྣམས་བསྐུམ། །གཡོན་བརྐྱང་རྣམ་པར་འགྱིང་པས་བཞུགས། །རྩ་ཞལ་མ་ཧེ་ཁྲོས་པའི་གདོང༌། །ཧཱུཾ་དང་ཕཊ་ཀྱིས་སྒྲ་ཆེན་སྒྲོགས། །སྟེང་ཞལ་དམར་མོ་རྒྱ་ཆེན་བཞད། །དེ་སྟེང་འཇམ་དཔལ་གཞོན་ནུའི་ཞལ། །གསེར་གྱི་མདོག་ཅན་ཅུང་ཟད་ཁྲོ། །གཡས་པའི་རྭ་ཡི་ཕྱོགས་ཀྱི་ཞལ། དང་པོ་སྔོན་པོ་མཆེ་བ་གཙིགས། ། གཉིས་པ་དམར་པོ་ལྗགས་འདྲིལ་ཞིང༌། །གསུམ་པ་སེར་པོ་ཁྲོ་གཉེར་ཅན། ། གཡོན་པའི་རྭ་ཡི་ཕྱོགས་ཀྱི་ཞལ། །དང་པོ་དཀར་པོ་རྨོངས་པར་བྱེད། །གཉིས་པ་དུད་ཁ་རེངས་པར་བྱེད། །གསུམ་པ་ནག་པོ་གསོད་པར་བྱེད། །ཞལ་རྣམས་ཐམས་ཅད་སྤྱན་གསུམ་ལྡན། །གཡས་པའི་ཕྱག་ན་རིམ་པ་བཞིན། །གྲི་གུག་འཕང་མདུང་བཏུན་ཤིང་དང༌། །ཆུ་གྲི་རྡོ་རྗེ་རྩེ་གཅིག་པ། །དགྲ་སྟ་གདུང་མདའ་ལྕགས་ཀྱུ་དང༌། །དབྱུག་པ་ཁ་ཊྭཱཾ་འཁོར་ལོ་དང༌། །རྡོ་རྗེ་རྩེ་ལྔ་ཐོ་བ་དང༌། །རལ་གྲི་རྡེའུ་ཆུང་རིམ་བཞིན་འཛིན། །གཡོན་པའི་ཕྱག་རྣམས་རིམ་པ་བཞིན། ཁྲག་གིས་གང་བའི་ཐོད་པ་དང༌། །མགོ་ཕུབ་རྐང་པ་ཞགས་པ་གཞུ། །རྒྱུ་མ་དྲིལ་བུ་ལག་པ་དང༌། །རོ་རས་སྐྱཻས་བུ་གསལ་ཤིང་ཕུག །མེ་ཐབ་ཐོད་ཚལ་སྡིགས་མཛུབ་དང༌། །འཕན་རྩེ་གསུམ་པ་རླུང་རས་འཛིན། །ཐ་མ་ཡི་
ནི་ཕྱག་གཉིས་ཀྱིས། །གླང་ཆེན་ཀོ་རློན་གོས་སུ་གྱོན། །ཞབས་གཡས་རྣམས་ཀྱི་རིམ་བཞིན་སུ། །མི་དང་མ་ཧེ་གླང་བོང་བུ། །རྔ་མོང་ཁྱི་ལུག་ལྕེ་སྤྱང་མནན། །གཡོན་རྣམས་རིན་བཞིན་བྱ་རྒོད་དང༌། །འུག་པ་བྱ་རོག་ནེ་ཙོ་དང༌། ཁྲ་དང་ཁྱུང་ཆེན་རི་སྐེག་བཞད། །མནན་ཅིང་ཞབས་རྣམས་ཐམས་ཅད་ཀྱིས། །ཚངས་པ་དབང་པོ་ཉེ་དབང་དང༌། དྲག་པོ་གཞོན་ནུ་གདོང་དྲུག་དང༌། །ཚོགས་བདག་ཉི་མ་ཟླ་བ་རྣམས། །བསྒྱཻལ་ནས་ཁ་བུབ་ཉིད་དུ་མནན། །མི་མགོ་སྐམ་པོ་ལྔ་ལྔ་ཡིས། །ཁྲོ་ཞལ་རྣམས་ཀྱི་དབུ་ལ་བརྒྱན། །མི་མགོ་ཁྲག་འཛག་ལྔ་བཅུ་དང༌། །སྦྲུལ་ནག་ཆེན་པོའི་དོ་ཤལ་ཅན། །དབུ་སྐྲ་དམར་སེར་གྱེན་དུ་འབར། །སྤྱན་རྩ་དམར་མོ་གློག་ལྟར་འཁྱུག །རུས་རྒྱན་དྲུག་གིས་སྐུ་ལ་བརྒྱན། །ཐལ་ཆེན་མཆོག་གི་ཚོམ་བུ་དང༌། །ཁྲག་ཞག་དམར་པོའི་ཐིག་ལེ་དང༌། །ཞག་ཆེན་ཟོ་རིས་རྣམས་ཀྱི་མཚན། །ལིང་ག་དམར་པོ་གྱེན་དུ་ལངས། །སྐུ་ལས་སྤྲུལ་པའི་ཕོ་ཉ་འཕྲོ། །སྒེག་པ་དཔའ་བ་མི་སྡུག་པ། །རྒོད་ཅིང་དྲག་ཤུལ་འཇིགས་སུ་རུང༌། །སྙིང་རྗེ་རྔམས་དང་ཞི་བ་ཡིས། །གར་དགུའི་རོལ་དང་ལྡན་པ་ཉིད། །ཡེ་ཤེས་མེ་དཔུང་དབུས་ལ་བཞུགས། །མིག་ཏུ་ཀྵིཾ་དཀར་ས་སྙིང་དངོས། །རྣ་བར་ཕྱག་རྡོར་ཛྲིཾ་ནག་པོ། །སྣ་ལ་ཁཾ་སེར་ནམ་མཁའི་སྙིང༌། །ལྕེ་ལ་གཾ་དམར་འཇིག་རྟེན་རྗེ། །དཔྲལ་བར་སྒྲིབ་སེལ་སྐཾ་ལྗང་ཁུ། །ལྟེ་བར་ཀུན་བཟང་སཾ་སྔོན་པོ། །
དཔྲལ་བར་སྐུ་ཡི་རྡོ་རྗེ་ཨོཾ། །མགྲིན་པར་གསུང་གི་རྡོ་རྗེ་ཨཱཿ །སྙིང་གར་ཐུགས་ཀྱི་རྡོ་རྗེ་ཧཱུཾ། །ནམ་མཁའ་གང་བའི་བཅོམ་ལྡན་འདས། །འཇིགས་མཛད་རྣམ་པར་སྤྱན་དྲངས་ཏེ། དགུག་དང་གཞུག་དང་བཅིངས་མཉེས་པས། །བདག་ལ་གཉིས་སུ་མེད་པར་བསྟིམས། །བཛྲ་བྷཻ་ར་ཝ་ས་པ་རི་ཝཱ་ར་བཛྲ་ས་མཱ་ཛཿ ཨོཾ་ཧྲཱིཿཧ་བྷོ་མཧཱ་ཀྲོ་དྷ་ཨ་གཙྪ་ཨ་གཙྪ་ཨརྨ་དྷ་ར་པཱུ་ཛ་པྲ་ཏི་གྷྲྀཧྣནྟུ་པྲ་ས་བྷ་མི་དྷི་མན་ཀུ་རུ་ཀུ་རུ་སྭཱཧཱ། ཛཿཧཱུཾ་བཾ་ཧོཿ མཁའ་དབྱིངས་གང་བའི་བདེ་གཤེགས་ཀྱིས། །བདག་ལ་དབང་བསྐུར་བྱིན་གྱིས་རློབས། །བྱང་ཆུབ་རྡོ་རྗེ་སངས་རྒྱས་ལ། ནས། ནམ་མཁའི་རྡོ་རྗེ་དེང་བདག་སྩོལ། །དབང་བསྐུར་རྡོ་རྗེ་ཆེན་པོ་ལ། །ནས། གནས་ལས་བྱུང་བའི་སྦྱིན་པར་བྱ། ཨོཾ་བཛྲ་བྷ་ཝ་ཨ་བྷི་ཥིཉྩ་ཧཱུཾ། མི་བསྐྱོད་རྒྱལ་པོས་དབུ་བརྒྱན་ཅན། །སྙིང་གར་འཇམ་དཔལ་གཞོན་ནུ་བསམ། །དེ་ཡི་ཐུགས་ཀར་རྡོ་རྗེ་ནག །ཧཱུཾ་ཡིག་ནག་པོ་འབར་བས་མཚན། །ནམ་མཁའ་ཁྱབ་པ་ལྷ་མོའི་ཚོགས། སྤྲུལ་ནས་བདག་ལ་མཆོད་པར་འགྱུར། །ཨོཾ་ཧྲཱིཿཥྟཱིཿཧཱཿ ཨོཾ་ཧཱུཾ་ཧཱུཾ་ཕཊ། ཨོཾ་ཀུ་མ་ར་རུ་པི་ནི་ཛ་ཛ༔ ཨོཾ་ཧྲཱིཿཧ་ཧེ་ཕཊ། ཨོཾ་ཏིབྟ་ལོ་ཙ་ན། བི་ཀྲི་ཏཱ་ན་ན་མཧཱ་ཨཊྚ་ཊྚ་ཧ་ས་ན་དི་ནེ་ཏིབྟ་ཡ་སྭཱཧཱ། ཨོཾ་བི་ཀྲྀ་ཏཱ་ན་ན་དུཥྟཾ་སཏྭ་ད་མ་ཀ་ག་ག་ག ཨོཾ་མཧཱ་བྷུ་ཏ་ཨ་དྷི་པ་ཏི་ཨི་མཾ་བ་ལིཾ་གྲྀཧྞ་པ་ཏ་ཡ་སྭཱཧཱ།
ཨོཾ་ཨཱཿཧཱུཾ། གཟུགས་སྒྲ་ལ་སོགས་དྲུག་པོ་ནི། །ཞེས་སོགས་ཀྱི་མཐར། ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷ་ཝ་ཨཏྨ་ཀོ྅ཧཾ། དུར་ཁྲོད་རྒྱན་གྱིས་ལེགས་བརྒྱན་པའི། །ཞེས་པ་ནས། དུད་ཁ་མུན་ཅན་ཁྱོད་ལ་འདུད། །ཨོཾ་སརྦ་ཏ་ཐཱ་ག་ཏ་པཱུ་ཏ་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཨོཾ་ཡ་མ་ར་ཛ། ས་དོ་མེ་ཡ། ཡ་མེ་དོ་རུ། ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡ་ཀྵེ་ཡཙྪ། ནི་ར་མ་ཡ་ཧཱུཾ་ཕཊ། ཨོཾ་ཧྲཱིཿཥྟཱིཿབི་ཀྲི་ཏཱ་ན་ན་ཧཱུཾ་ཕཊ། ཨོཾ་ཡ་མནྟ་ཀ་ཧཱུཾ་ཕཊ། ཁམས་གསུམ་དཀྱིལ་འཁོར་རང་ལ་ཐིམ། །བདག་ཉིད་འོད་གསལ་དུ་བསྡུས། །སླར་ཡང་ཞལ་གཅིག་ཕྱག་གཉིས་པའི། །རྡོ་རྗེ་འཇིགས་མཛད་སྐུར་གྱུར་རོ། །གོང་བཞིན་སྐྱེ་མཆེད་བྱིན་རླབས་དང༌། །སྐུ་གསུང་ཐུགས་ཀྱི་གོ་ཆ་བཀོད། །དགེ་བ་བསྔོ། ཞེས་པ་རྡོ་རྗེ་འཇིགས་བྱེད་ཀྱི་སྒྲུབ་ཐབས་བློ་དམན་གྱི་ཉེར་མཁོ་ཞེས་བྱ་བ་འདི་ཡང་ཏཱ་ར་ནཱ་ཐས་ཡར་འབྲོག་སྟག་ལུང་དུ་སྦྱར་བའོ།། །།བཀྲ་ཤིས། །