དཔལ་འཁོར་ལོ་སྡོམ་པའི་ཚེས་བཅུའི་ཆོ་ག
དཔལ་འཁོར་ལོ་སྡོམ་པའི་ཚེས་བཅུའི་ཆོ་ག་བཞུགས། ཨོཾ་སྭཱ་སྟི། དཔལ་འཁོར་ལོ་སྡོམ་པའི་ཚེས་བཅུའི་ཆོ་ག་བྱེད་པར་འདོད་པས། ཐོག་མར་དཀྱིལ་འཁོར་གྱི་ཆོ་ག་རགས་པ་ཙམ་ཞིག་བློ་ལ་ངེས་པར་བྱའོ། །དེ་ནས་ཆོ་གའི་གོ་རིམ་གྱི་སྡོམ་ནི་འདི་ཡིན་ཏེ། གནས་ཁང་བྱི་དོར་བརྒྱན་བྱས་ལ། །མཎྜལ་བཤམས་ཤིང་ཡོ་བྱད་ཚོགས། །བྱིན་རླབས་སྔོན་འགྲོ་གཏོར་མ་བཏང༌། །གནས་དང་
ཡོ་བྱད་བྱིན་གྱིས་རླབས། །སློབ་དཔོན་ཡོད་ན་ཞུ་འབུལ་བྱ། །བདག་བསྐྱེད་བཟླས་པ་ལག་བྱིན་རླབས། །མདུན་བསྐྱེད་ཡེ་ཤེས་སྤྱན་དྲངས་ནས། །མཆོད་དང་གཏོར་མ་ལ་སོགས་བྱ། །དེ་ནས་ཚོགས་ཀྱི་འཁོར་ལོ་དང༌། །མཐར་ནི་རྗེས་ཆོག་བྱ་བ་ཡིན། །སྤྲོ་ཞིང་ཤེས་ན་མཆོད་པ་ཡི། །སྔོན་དུ་ལག་མཆོད་བྱ་བར་བཤད། །མ་གྲུབ་ན་ཡང་ཉེས་པ་མེད། །ཅེས་བྱའོ། ། མཎྜལ་བཤམས་པ་ནི། དབུས་སུ་དྲི་བཟང་གི་ཐིག་ལེ་གྲུ་བཞི། ལྷའི་གནས་གཞན་རྣམས་སུ་ཐིག་ལེ་ཟླུམ་པོ་རེ་རེ། དྲི་བཟང་གི་ལྡེ་གུའི་ཚོམ་བུ་དང་བཅས་པ་བཤམས། དྲི་བཟང་གི་ལྡེ་གུའི་ཚོམ་བུ་མ་འབྱོར་ན། དྲི་བཟང་གི་ཆུའི་ཐིག་ལེ་སྟེང་དུ། མེ་ཏོག་གམ་འབྲུའི་ཚོམ་བུ་བྱ། སོ་སོར་འགོད་ལོང་མ་བྱུང་ན། མཎྜལ་ལ་མེ་ཏོག་བཀྲམ་ཞིང༌། དབུས་སུ་སྤུངས་པས་ཆོག མདུན་བསྐྱེད་ཞལ་ཚུར་བསྟན་པའི་གཡོན་དུ་ཡི་དམ་གཏོར་མ་དང༌། གཡས་སུ་འཇིག་རྟེན་པའི་གཏོར་མ་བཤམས་མཆོད་པ་རྣམས་ཅི་བདེ་བར་བསྒྲིགས་པས་ཆོག རྡོར་དྲིལ། ཌཱ་མ་རུ། ནང་མཆོད། རོལ་མོ་སོགས་འཛོམས་པར་བྱས་ནས་རྡོ་རྗེ་གསོར། དྲིལ་བུ་དཀྲོལ་ལ་སུཾ་བྷ་བརྗོད། ཡང་རྡོ་རྗེ་དང་བཅས་པའི་ལག་པ་ས་ལ་རེག སུཾ་བྷ་བཟླས། ཐོག་མ་ཉིད་དུ་ནང་མཆོད་བྱིན་རླབས་བྱ། དེ་ནས་སྔོན་འགྲོ་གཏོར་མ་བཏང༌། གནས་ཡོ་བྱིན་རླབས་བྱ། ཚོགས་པ་ཡོད་ཅིང་ཚོགས་ཀྱི་སློབ་དཔོན་ཡོད་ན་སྒྲུབ་མཆོད་ལྟར་ཞུ་འབུལ་རྒྱས་པར་བྱ། ཚོགས་པ་ཡོད་སློབ་
དཔོན་མེད་ན་མཆོད་གཡོག་པས་མཎྜལ་ཕུལ་ཏེ། ཀུན་བཟང་རྣམ་སྤྲུལ༴ སོགས་ཀྱིས་གསོལ་བ་ལན་གསུམ་བཏབ། ཚོགས་པ་མེད་ན་ནི་ཞུ་འབུལ་མི་དགོས་སོ། །དེ་ནས་སྤྲོ་ཞིང་ལོང་ཡོད་ན་མངོན་རྟོགས་རྫོགས་པར་བདག་བསྐྱེད་བསྒོམ། བསྡུ་ན་སྐྱབས་འགྲོ་སེམས་བསྐྱེད། ཡིག་བརྒྱ་རྣམས་སོང་བའི་རྗེས་སུ་དག་པ་གསུམ་ཙམ་མོ། །ལྷན་སྐྱེས་ཙམ་ཞིག་བསྒོམ་ཀྱང་རུང་མོད་ཀྱི། འདིར་འབྲིང་པོའི་དབང་དུ་བྱས་ནས། སྐྱབས་འགྲོ་ནས་བརྩམས་ཏེ། བར་དུ་གཅོད་པ་ཐམས་ཅད་བསྲུང་བར་མཛད་ཀྱི་བར་བསྲུང་འཁོར་རྫོགས་པར་བསྒོམ། དེའི་དབུས་སུ་པད་ཉིའི་གདན་ལ་ནམ་མཁའི་ནཱ་ད་བབས་ཏེ། ཧཱུཾ་དང་ཨཾ་གཉིས་སུ་གྱུར། དེ་ལས་དཔལ་ཧེ་རུ་ཀ་སྐུ་མདོག་མཐིང་ནག ཅེས་པ་ནས་བདེ་བ་ཆེན་པོས་རྒྱུད་གང་བར་གྱུར་ཅེས་པའི་བར་བསྒོམ། རྐང་བརྒྱད་གཉིས་ཀྱིས་བསྟོད་ནས་བཟླས་པ་ཅུང་ཟད་བྱ། རང་གི་སྙིང་གའི་ཧཱུཾ་ལས་འོད་ཟེར་འཕྲོས་ཏེ། ཁམས་གསུམ་སྣོད་བཅུད་ཐམས་ཅད་འོད་དུ་ཞུ་ནས་རང་ལ་ཐིམ། རང་ཉིད་ཧེ་རུ་ཀ་ཕྱག་གཉིས་པར་གྱུར། ཅེས་པ་ནས། རང་བཞིན་དུ་རྣམ་པར་དག་པའོ། །ཞེས་སྤྱོད་ལམ་གྱི་རྣལ་འབྱོར་ལྟར་བྱ་སྟེ་བདག་བསྐྱེད་དོ། །དེ་ནས་ལག་པ་བྱིན་གྱིས་རླབས་པ་ནི། ལག་པ་གཡས་པའི་སྲིན་ལག་གིས་གཡོན་པ་ལ་ནང་མཆོད་གཏོར། བསངས་སྦྱངས། ལག་མཐིལ་དུ་པདྨ་འདབ་མ་ལྔ་པའི་ལྟེ་བ་དང༌། འདབ་མ་རྣམས་ལ་གཡོན་བསྐོར་དུ།
ཨོཾ་ཨོཾ་བཾ། ཨོཾ་ཧཾ་ཡོཾ། ཨོཾ་ཧྲཱིཾ་མྃ། ཨོཾ་ཧྲིཾ་ཧྲིཾ། ཨོཾ་ཧཱུཾ་ཧཱུཾ། ཨོཾ་ཕཊ་ཕཊ། སོར་མོ་ལྔ་ལ་མཐེ་བོང་ནས་བརྩམས་ཏེ། ཨོཾ་ཨོཾ་ཧ། ཨོཾ་ན་མ་ཧི། ཨོཾ་སྭཱཧཱ་ཧཱུཾ། ཨོཾ་བཽ་ཥཊྚཧེ། ཨོཾ་ཧཱུཾ་ཧཱུཾ་ཧོ། སེན་མོ་རྣམས་གཅིག་ཏུ་འདུས་པ་ལས། ཨོཾ་ཕཊ་ཧཾ། དེ་རྣམས་གོ་ཆའི་ལྷ་བཅུ་གཉིས་ཀྱི་ངོ་བོར་གྱུར། ལག་པའི་ས་ཁམས་ལྟུང་བྱེད་མ། ཆུ་ཁམས་གསོད་བྱེད་མ། མེ་ཁམས་འགུགས་བྱེད་མ། རླུང་ཁམས་གར་དབང་མ། མཁའ་ཁམས་དྲ་བ་ཅན་གྱི་ངོ་བོར་གྱུར། ཨརྒཾ་ནས། ཤབྟའི་བར་གྱིས་མཆོད། ཨོཾ་ཨཱཿཧཱུཾ། ཞེས་ནང་མཆོད་གཏོར་བ་ཙམ་བྱ། མདུན་གྱི་མཎྜལ་ལ། བསངས་སྦྱངས། ནང་མཆོད་གཏོར་ནས། ཡུལ་ཉི་ཤུ་རྩ་བཞི་དུར་ཁྲོད་བརྒྱད་དང་བཅས་པ་རང་བཞིན་གྱིས་གྲུབ་པའི་ངོ་བོར་གྱུར། མཎྜལ་ལ་རེག་པའམ་རེག་པར་མོས་ལ། ཨོཾ་པི་ཋ་ཨུ་པ་པི་ཐ་ཡ་སྭཱཧཱ། ཨོཾ་ཀྵེ་དྲ་ཨུ་པ་ཀྵེ་ཊ་ཡ་སྭཱཧཱ། ཨོཾ་ཚནྟོ་ཧ་ཨུ་པ་ཚནྟོ་ཧ་ཡ་སྭཱཧཱ། ཨོཾ་མེ་ལ་ཀ་ཨུ་པ་མེ་ལ་ཀ་ཡ་སྭཱཧཱ། ཨོཾ་ཤྨ་ཤ་ན་ཨུ་པ་ཤྨ་ཤ་ན་ཡ་སྭཱཧཱ། ཨོཾ་པི་ལ་པ་ཨུ་པ་པི་ལ་ཡ་སྭཱཧཱ། ཞེས་བརྗོད། རྟེན་གྱི་དཀྱིལ་འཁོར་གདན་དང་བཅས་པ་སྐད་ཅིག་གིས་གྲུབ་པར་འགྱུར། ཕེཾ། རང་གི་སྙིང་ག་ནས་དཀྱིལ་འཁོར་གྱི་འཁོར་ལོ་སྤྲོས་ཏེ་མདུན་གྱི་མཎྜལ་ལ་འཁོད་པ་ནི། དབུས་ཀྱི་གདན་གྱི་སྟེང་དུ་བཅོམ་ལྡན་འདས་དཔལ་འཁོར་ལོ་བདེ་མཆོག་ནས་དབུས་
ན་བཞུགས་པའོ། །བདེ་ཆེན་འཁོར་ལོའི་འདབ་མ་བརྒྱད་ལ་ཤར་དུ་མཁའ་འགྲོ་མ་ནས་རྡོ་རྗེ་ཕྲེང་བས་མཚན་པའོའི། བར་མཁའ་ནང་དུ་དཀྱིལ་འཁོར་བསྐྱེད་པ་བཞིན་ནོ། །སྙིང་གའི་ཧཱུཾ་ཡིག་ནས་ཡོ་ག་ཤུདྡྷོ྅འི་སྔགས་ཀྱི་བར་དཀྱིལ་འཁོར་རྒྱལ་མཆོག་བཞིན་ནོ། །དེ་ནས་མཆོད་པ་རྣམས་བྱིན་གྱིས་བརླབས་ནས། ཆུ་གཉིས་འབུལ་བ་ནས་བརྩམས་ཏེ། །རྡོ་རྗེའི་གླུའི་བར་མཆོད་པ་སྡེ་ཚན་བཅུ་གཉིས་དཀྱིལ་ཆོག་གི་མཆོད་པའི་སྐབས་སུ་འབུལ་བ་ལྟར་ཕུལ་ལ། སླར་ཡང་ལག་པ་གཡོན་པའི་མཐེབ་སྲིན་གྱིས། ཨོཾ་ཨཱཿཧཱུཾ། ཞེས་མེ་ཏོག་བླངས་ཏེ་དཀྱིལ་འཁོར་གྱི་དབུས་སུ་ལན་གཉིས་དོར། དེ་ནས་གཙོ་བོ་ཡབ་ཡུམ་གྱི་སྙིང་པོ་དང་ཉེ་སྙིང་གཉིས། འཁོར་རྣམས་ལ་སོ་སོའི་སྔགས་དང་ཐོད་པ་བཞི་ལ། ཨོཾ་ཨཱཿཧཱུཾ་གིས་སྔར་བཞིན་མེ་ཏོག་རེ་རེ་མཎྜལ་དུ་གཏོར་དེ་ནས་ལག་པ་གཡས་པ་མེ་ཏོག་རེ་རེ་ལག་པའི་ལྷ་རྣམས་ཀྱི་གནས་སུ་བཞག་ལ། ཨོཾ་བཾ་སོགས་དང༌། ཨོཾ་ཧ་སོགས་བརྗོད། རྐང་བརྒྱད་གཉིས་འདོན་པ་བཞིན་དུ་ལག་པ་གཡོན་པའི་མེ་ཏོག་དེ་ཡང་མཎྜལ་ལ་འཐོར་བར་བྱའོ། །པད་སྐོར་གྱི་མཐར་ཐལ་སྦྱར་སྤྱི་བོར་བཞག་པས་ཡོ་ག་ཤུདྡྷོ྅་བརྗོད། ལག་པའི་ལྷ་རྣམས་གོ་ཆའི་གནས་སུ་ཐིམ་པར་མོས། གོང་གི་ལག་པ་བྱིན་རླབས་དང་འདི་སྡེབས་པས་ལག་མཆོད་བསྡུས་པ་ཡང་ཚང་བ་ཡིན་ནོ། །སུམྦྷས་བསངས་བ་ནས། ཧ་ཧོ་ཧྲིའི་བར་གཏོར་མ་བྱིན་རླབས་ཀྱང་མངོན་རྟོགས་བཞིན། མགྲོན་འདིར་སྤྱན་འདྲེན་མི་དགོས་པས། ཨོཾ་ཨ་རལླི་ཧོ་ས་མ་སྟྭཾ་ནས་ཀུན་འགྲུབ་
ཤོག་གི་བར་གྱིས་གཏོར་མ་གཉིས་པོ་ཕུལ་ཞིང་འཕྲིན་ལས་བཅོལ། དེ་ནས་ཡན་ལག་བདུན་པ་དང༌། རིགས་ལྔའི་སྡོམ་བཟུང་སོགས་དང༌། སྐྱབས་འགྲོ་སེམས་བསྐྱེད་སྨོན་ལམ་སོགས་ཀྱང་ཅི་ཤེས་བྱའོ། །དེ་རྗེས་ཚོགས་རྫས་བྱིན་གྱིས་བརླབས་པ་དང༌། བྱིན་དབབ། ཚོགས་ཕུད་དང་པོར་བཅད། ཚོགས་བསྲེས། ཡང་ཕུད་ཅིག་ཕུད་དང་པོ་དང་བསྲེ་བར་ཕུད་གཅིག་བཅད་ལ་བཞག ཚོགས་ཕུད་དེ་གཉིས་ལྷན་ཅིག་ཏུ་འབུལ་ཞིང་བསྔོ། ཚོགས་ཀྱི་ཡོ་བྱད་རྣམས་བཀྱེ་སྟེ་ཚོགས་ལ་ལོངས་སྤྱད། མཐར་བར་ཕུད་བཞག་པ་དེ་ལྷག་གཏོར་དང་བསྲེ། ཚོགས་ལྷག་བསྡུས་པ་ལ་ཁ་ཁྲུས་བཏབ། དེ་རྣམས་སྣོད་གཅིག་ཏུ་སྤུངས། ཚོགས་ལྷག་བསྔོས་ཏེ་ཕྱིར་གཏོང་བའི་སྐབས། འཇིག་རྟེན་པའི་གཏོར་མ་ཡང་ཕྱིར་བཏང་ངོ༌། །ཚོགས་མཆོག་ངག་འདོན་ནི་ལོགས་སུ་ཤེས་པར་བྱའོ། །རྗེས་ཆོག་ནི། མཆོད་པ་ཁ་གསོས། བྱིན་རླབས། ཕྱི་མཆོད། ནང་མཆོད། རྗེས་ཆགས། རྐང་བརྒྱད་ཀྱི་བསྟོད་པ་རྣམས་བྱ། འདོད་དོན་ཞུ། ཡིག་བརྒྱ། བཟོད་གསོལ། ཡོ་ག་ཤུདྡྷོའི་སྔགས་ཀྱིས་དཀྱིལ་འཁོར་རང་ལ་བསྡུ། མགྲོན་གཞན་རྣམས་ལ་གཤེགས་གསོལ། བྲིས་སྐུ་སོགས་རྟེན་ཡོད་ན་བརྟན་བཞུགས། བདག་སྲུང་བ། སྨོན་ལམ། བཀྲ་ཤིས་རྣམས་བྱ་སྟེ། ཕལ་ཆེར་དཀྱིལ་འཁོར་གྱི་ཆོ་གར་བཤད་པའི་རྗེས་ཆོག་དང་འདྲའོ། །མདུན་བསྐྱེད་ཀྱི་མཆོད་པ་འབུལ་བའི་སྐབས། ཆུ་གཉིས་ཉེར་སྤྱོད་སོགས་ཕྱི་མཆོད་དང༌། གོས་ཟུང༌། རིག་མ་བཅུ་དྲུག ནང་མཆོད། གསང་བའི་མཆོད་པ། བསྟོད་པ་རྒྱས་བསྡུས་གང་ཡང་རུང་བ། དཔྱིད་ཀྱི་རྒྱལ་
པོའི་གླུ། མེ་ཏོག་འབུལ་བ་རྣམས་མ་ཆད་པར་བྱ། གཞན་ཇི་ལྟར་འོས་པ་སྐབས་དང་སྦྱར་ཞིང༌། དེ་དག་ལ་ཡང་སྔགས་ཙམ་བརྗོད་པ་དང༌། ཚིགས་བཅད་སྦྱར་བ་སོགས་ལོང་སྐབས་དང་བསྟུན་ཏེ། རྒྱས་བསྡུས་ཇི་ལྟར་འོས་པ་སྦྱར། སྐབས་འདིའི་རྗེས་ཆོག་ལ་རིག་མ་བཅུ་དྲུག་གི་མཆོད་པ་མེད་ཀྱང་ཆོག་གོ །ཇི་སྐད་བཤད་པ་འདི་དག་ལ་གོ་རིམ་ཅུང་ཟད་བསྒྱུར་ཀྱང་ཆོག་པའི་སྐབས་འགའ་རེ་ཡོད་དོ། །དེ་ལྟར་ན་ཕྱི་རོལ་མཆོད་པ་ལ་བརྟེན་ཏེ་ཚེས་བཅུའི་མཆོད་པ། དཔལ་འཁོར་ལོ་སྡོམ་པ་ནག་པོ་ཞབས་ལུགས་དང་འབྲེལ་བར་སྒྲུབ་ཚུལ་གྱི་ཡི་གེ་མདོ་ཙམ་སྨོས་པ་འདི་ཡང་རྒྱལ་ཁམས་པ་ཏཱ་ར་ནཱ་ཐས་སོ། །བཀྲ་ཤིས་པར་གྱུར་ཅིག། །།