དགྱེས་པ་རྡོ་རྗེའི་ལག་ལེན་གསལ་བར་བྱེད་པ་དཔལ་ཧེ་རུ་ཀ་དགྱེས་པ།
དགྱེས་པ་རྡོ་རྗེའི་ལག་ལེན་གསལ་བར་བྱེད་པ་དཔལ་ཧེ་རུ་ཀ་དགྱེས་པ་ཞེས་བྱ་བ་བཞུགས།
ཨོཾ་སྭཱ་སྟི། དགྱེས་པ་རྡོ་རྗེའི་ལག་ལེན་གསལ་བྱེད། དཔལ་ཧེ་རུ་ཀ་དགྱེས་པར་བྱེད་པ་ཞེས་བྱ་བ། བླ་མ་དང་ལྷག་པའི་ལྷ་ལ་ཕྱག་འཚལ་ལོ། །དཔལ་ལྡན་ལྷན་ཅིག་སྐྱེས་དགའི་རོལ་རྩེད་ནི། །ཟབ་གསལ་ཁྲག་འཐུང་དཔལ་གྱི་དཀྱིལ་འཁོར་དང༌། །གཉུག་མའི་རིག་མཆོག་རྡོ་རྗེ་བདག་མེད་དེ། །འཁོར་བ་སྒྲོལ་མཛད་དེ་ལ་གུས་བཏུད་ནས། །བླ་མ་མཆོག་གི་མན་ངག་ལ་བརྟེན་ཅིང༌། །རང་གི་མོས་པ་གཙོ་བོར་མ་བྱས་པར། །རྒྱུད་རྒྱལ་མཆོག་གི་དགོངས་དོན་ཇི་བཞིན་དུ། །རྩ་བ་ཁ་སྐོང་སྦས་པའི་ལུགས་བཤད་བྱ། །ཤནྟི་པ་སོགས་ཡེ་ཤེས་ཞབས་ལུགས་ལེན། །ནཱ་རོ་མཻ་ཏྲི་ཌོམ་བྷི་ཆུང་བ་སོགས། །གུར་བརྟག་གཅིག་ཏུ་བྲིས་ལ་ཁ་སྐོང་གཞན། །མི་ཐུབ་སོགས་ཀྱིས་རྒྱུད་སྡེ་སྣ་ཚོགས་བླངས། །མཚོ་སྐྱེས་ལུགས་ལའང་འཁྲུགས་སྡེབས་མང་དུ་དགོས། །སྔ་ཕྱི་བོད་ལའང་འདོད་ལུགས་དཔག་ཏུ་མེད། །དེ་དག་ཀུན་ཀྱང་བྱིན་རླབས་ཆེ་ལྡན་ཞིང༌། །ཕྱོགས་རེ་ནས་ནི་རྒྱུད་ཀྱི་དགོངས་པའང་ལགས། །འོན་ཀྱང་གདུལ་བྱ་སྣ་ཚོགས་ལ། །སྟོན་པས་ཆོས་
ལམ་མཐའ་ཡས་གསུངས། །རྩ་བཤད་ཆ་མཐུན་རྒྱུད་རྣམས་ཀྱང༌། །ཆོ་ག་གཅིག་ཏུ་བསྲེ་མི་དགོས། །འདིར་ནི་རྒྱུད་རྐྱང་མན་ངག་གི །ལུགས་བཞིན་གསལ་བར་བྲི་བྱ་སྟེ། །དཔལ་ལྡན་ཞི་བ་སྦས་པ་དང༌། །ལྷ་འབྱུང་བླ་མ་མཆོག་ལས་བརྒྱུད། །དེ་ལ་དོན་ཚན་ཉི་ཤུ་རྩ་གཉིས་ཏེ། །སྙིང་པོ་དགྱེས་རྡོར་སྒྲུབ་ཐབས་དང༌། །གཏོར་ཆོག་ཡུམ་གྱི་སྒྲུབ་ཐབས་དང༌། །མདོར་བསྡུས་ཧེ་རུ་ཀ་གསུམ་གྱི། །སྒྲུབ་ཐབས་རྒྱས་པ་རེ་རེ་དང༌། །དེ་བཞིན་འབྲིང་དང་བསྡུས་པ་དང༌། །རྫོགས་པའི་རིམ་པའི་སྒྲུབ་ཐབས་དང༌། །ས་ཆོག་སྟ་གོན་དཀྱིལ་འཁོར་ཞག ། སྒྲུབ་མཆོད་བདག་འཇུག་དབང་བསྐུར་དང༌། །སླར་བསྡུ་བ་དང་རབ་གནས་དང༌། །སྦྱིན་བསྲེག་ཚོགས་འཁོར་མཎྜལ་མཆོད། །ལས་ཚོགས་ཕྲ་མོའི་རིམ་པ་དང༌། །རྣལ་འབྱོར་ལམ་གྱི་རིམ་པ་སྟེ། །ལག་ལེན་རིམ་པ་འདི་ཤེས་ནས། །རྒྱུད་རྒྱལ་བླ་མ་མཆོག་ལ་ཞུས། །དེ་ནས་རྩེ་གཅིག་སྒྲུབས་གྱུར་ན། དངོས་གྲུབ་འགྲུབ་འགྱུར་ཐེ་ཚོམ་མེད། །མདོར་བསྟན་པའི་སྡོམས་སོ། །དེ་ཡང་སྐྱབས་འགྲོ་སེམས་བསྐྱེད་རྡོ་རྗེ་སེམས་དཔའི་སྒོམ་བཟླས་རྣམས་སྔོན་དུ་འགྲོ་བས། རང་སྐད་ཅིག་གིས་དགྱེས་རྡོར་དུ་གསལ་བའི་སྙིང་
གར་ཉི་མ་ལ་ཧཱུཾ། དེའི་འོད་ཀྱིས་བླ་མ་དང་དཀྱིལ་འཁོར་གྱི་འཁོར་ལོ་མདུན་དུ་སྤྱན་དྲངས། དཀར་མོ་རི་དྭགས་ནས། སྐུ་ལ་འཁྱུད་པ་ཉིད། །དཀོན་མཆོག་གསུམ་ལ་བདག་སྐྱབས་མཆི། །སོགས་ལན་གསུམ། སེམས་ཅན་ཐམས་ཅད་བདེ་བ་དང་སོགས། ཚད་མེད་བཞི་སོགས་སྤྱི་དང་འདྲ། ཨོཾ་ཤཱུ་ནྱ་ཏ་སོགས། སྟོང་པའི་ངང་ལས་རཾ་ལས་ཉི་མའི་དཀྱིལ་འཁོར་གྱི་དབུས་སུ་ཧཱུཾ་ལས་སྣ་ཚོགས་རྡོ་རྗེ་རྭ་བཅུ་གཉིས་པ་ཧཱུཾ་གིས་མཚན་པ་ལས་འོད་འཕྲོས། རྡོ་རྗེའི་ས་གཞི་ར་བ་དྲ་བ་གུར་བླ་རེ་མེ་དཔུང་འབར་བ་དང་བཅས་པའི་བསྲུང་འཁོར་དུ་གྱུར། ཨོཾ་རཀྵ་རཀྵ་ཧཱུཾ་ཧཱུཾ་ཧཱུཾ་ཕཊ་སྭཱཧཱ། དེའི་ནང་དུ་ཨེ་ལས་ཆོས་འབྱུང་དཀར་པོ། དེའི་དབུས་སུ་ལཾ་ལས་སའི་དཀྱིལ་འཁོར། བཾ་ལས་ཆུའི་དཀྱིལ་འཁོར། རཾ་ལས་མེའི་དཀྱིལ་འཁོར། ཡཾ་ལས་རླུང་གི་དཀྱིལ་འཁོར་རྣམས་བརྩེགས་པ། དེའི་དབུས་སུ་རང་གི་རྣམ་པར་ཤེས་པ་གནས་ཏེ། འབྱུང་བཞི་ཡོངས་སུ་གྱུར་པ་ལས། པད་ཉི་སྣ་ཚོགས་རྡོ་རྗེའི་ལྟེ་བ་ལ་གནས་པའི་གཞལ་ཡས་ཁང༌། ཕྱི་རོལ་དུར་ཁྲོད་བརྒྱད་ཀྱིས་ཡོངས་སུ་བསྐོར་བ། མཚན་ཉིད་ཐམས་ཅད་ཡོངས་སུ་རྫོགས་པའི་ནང་གི་ལྷ་སྣམ་ཤར་དཀར། ལྷོ་སེར། ནུབ་དམར། བྱང་ལྗང༌། དབུས་སྔོ་བའི་སྟེང་དུ་སྣ་ཚོགས་པདྨ་འདབ་མ་བརྒྱད་པ། ལྟེ་བ་ལ་ཉི་མའི་དཀྱིལ་འཁོར་གྱི་སྟེང་དུ། བདུད་བཞི་འགྱེལ་བའི་གདན། འདབ་མ་བརྒྱད་ལ། ཉི་མའི་སྟེང་དུ། ཤར་དུ་ཚངས་པ་སེར་པོ། ལྷོར་དབང་པོ་ཁམ་སེར། ནུབ་ཏུ་ཉེ་དབང་ནག་པོ། བྱང་དུ་དྲག་པོ་དཀར་པོ་
བྱང་ཤར་དུ་གཤིན་རྗེ་སྔོན་པོ། ཤར་ལྷོར་ནོར་བདག་སེར་པོ། ལྷོ་ནུབ་ཏུ་སྲིན་པོ་ནག་པོ། ནུབ་བྱང་དུ་ཐགས་བཟང་རིས་དུད་ཁ་རྣམས་གན་རྐྱལ་དུ་གནས་པ། དབུས་ཀྱི་གདན་གྱི་སྟེང་དུ་གཡོན་བསྐོར་གྱི་ཨ་ཨཱ་ནས། མཉམ་པ་ཉིད་ཀྱི་ཡེ་ཤེས་ཞེས་པའི་བར། དེ་གཉིས་ཀྱི་བར་དུ་ཧཱུཾ་ལས་ཐོད་པ་དང་ཨཾ་ལས་གྲི་གུག་ཧཱུཾ་དང་ཨཾ་གིས་མཚན་པ་སོ་སོར་རྟོག་པའི་ཡེ་ཤེས། དེ་ལས་དཀྱིལ་འཁོར་གྱི་ལྷ་ཚོགས་འོད་ཟེར་དང་བཅས་པ་དཔག་ཏུ་མེད་པ་འཕྲོས། སྣོད་བཅུད་ཐམས་ཅད་དཀྱིལ་འཁོར་གྱི་འཁོར་ལོར་བྱས། སླར་འདུས་ཏེ་ཐིམ་པ་ནི་བྱ་བ་སྒྲུབ་པའི་ཡེ་ཤེས། དེ་ལས་སྐུ་ཡོངས་སུ་རྫོགས་པ་ཆོས་ཀྱི་དབྱིངས་ཀྱི་ཡེ་ཤེས་ཏེ། རང་ཉིད་རྒྱུ་རྡོ་རྗེ་འཛིན་པ་དཔལ་རྡོ་རྗེ་སེམས་དཔའ་སྐུ་མདོག་མཐིང་ནག་ཞལ་བརྒྱད་ཕྱག་བཅུ་དྲུག་ཞབས་བཞི་པ། རྩ་བའི་ཞལ་ནག་པོ། གཡས་དཀར་གཡོན་དམར་ལྷག་མ་རྒྱབ་ཞལ་བཞི་གནག་པ། སྟེང་ཞལ་དུད་ཁ་ཆེར་ཁྲོས་པ། སྤྱི་བོར་སྣ་ཚོགས་རྡོ་རྗེས་བརྒྱན་པ། ཞལ་རེ་རེ་ལ་སྤྱན་དམར་པོ་གསུམ་གསུམ་དང་ལྡན་ཞིང༌། ཐོད་སྐམ་ལྔ་ལྔས་དབུ་རྒྱན་ཅན། མཆེ་བའི་མྱུ་གུ་བཞི་བཞི་གཙིགས་པ། དབུ་སྐྲ་སེར་པོ་གྱེན་དུ་བརྫེས་པ། ཧཱུཾ་གི་སྒྲ་སྒྲོག་ཅིང་འཇིགས་པའང་འཇིགས་པར་མཛད་པ། ཕྱག་བཅུ་དྲུག་གིས་ཐོད་པ་བཅུ་དྲུག་བཟུང་བའི་ནང་གི་གཡས་ཀྱི་དང་པོ་ན་གླང་པོ་ཆེ། གཡོན་གྱི་དང་པོ་ན་སའི་ལྷ་མོ་དང་བཅས་པ་འཛིན་པས་ཡུམ་ལ་འཁྱུད་པ། གཡས་ཀྱི་གཉིས་པ་ན་རྟ། གསུམ་པ་ན་བོང་བུ།
བཞི་པར་གླང༌། ལྔ་པ་ན་རྔ་མོང༌། དྲུག་པ་ན་མི། བདུན་པ་ན་ཤ་ར་བྷ། བརྒྱད་པ་ན་བྱི་ལ། གཡོན་གྱི་གཉིས་པ་ན་ཆུ་ལྷ། གསུམ་པ་ན་རླུང་ལྷ། བཞི་པ་ན་མེ་ལྷ། ལྔ་པ་ན་ཟླ་བའི་ལྷ། དྲུག་པ་ན་ཉི་མའི་ལྷ། བདུན་པ་ན་གཤིན་རྗེ། བརྒྱད་པ་ན་ནོར་བདག་གོ །ཞབས་བཞིའི་མདུན་མ་གཉིས་གཡོན་བསྐུམ་གཡས་བརྐྱང་པས་ཚངས་པ་དང་དྲག་པོ། རྒྱབ་མ་གཉིས་གར་སྟབས་ཀྱིས་དབང་པོ་དང་ཉེ་དབང་མནན་པ། སྐུ་ལ་ཐལ་ཆེན་གྱིས་ཉེ་བར་བྱུགས་ཤིང༌། རུས་པའི་ཕྱག་རྒྱ་ལྔ་དང༌། མི་མགོའི་དོ་ཤལ་ཅན། སྒེག་པ་དཔའ་བ་ནས། ལྡན་པ་ཉིད་ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པའོ། །ཡུམ་རྡོ་རྗེ་བདག་མེད་མ་སྐུ་མདོག་སྔོན་མོ་ཞལ་གཅིག་ཕྱག་གཉིས་སྤྱན་གསུམ་མ་གྲི་གུག་དང་ཐོད་པ་འཛིན་ཅིང་གཡོན་བརྐྱང་གི་སྟབས་ཀྱིས་ཡབ་ལ་འཁྱུད་པ། མི་མགོ་སྐམ་པོ་ལྔ་བཅུའི་དོ་ཤལ་ཅན། ཐལ་བ་སྤངས་པ། གཞན་བཅོམ་ལྡན་འདས་དང་མཚུངས་པའོ། །ཡབ་ཀྱི་གསང་གནས་ཧཱུཾ་ལས་རྡོ་རྗེ་སྔོན་པོ་ལྟེ་བར་ཧཱུཾ་གིས་མཚན་པ། ཡུམ་གྱི་མཁའ་ཨ་ལས་བྱུང་བའི་པདྨ་དམར་པོ་ཨས་མཚན་པ། ཨོཾ་བཛྲ་མཧཱ་དྭེ་ཥ་སོགས། ཨོཾ་པདྨ་སུ་ཁ་སོགས། ཡབ་ཡུམ་སྙོམས་པར་ཞུགས་པའི་བྱང་ཆུབ་ཀྱི་སེམས་ལས་ལྷ་མོ་བརྒྱད་དུ་གྱུར། མཁའ་ནང་ནས་ཕྱྀར་སྤྲོས། འདབ་མ་བརྒྱད་ཀྱི་སྟེང་དུ་དབང་པོ་ལ་སོགས་པའི་གདན་ལ་འཁོད་པ་ནི། ཤར་དུ་གཽ་རཱི་ནག་མོ་གཡས་གྲི་གུག་དང༌།
གཡོན་ཉ་རོ་ཧི་ཏ་འཛིན་པ། ལྷོར་ཙཽ་རཱི་དམར་མོ་གཡས་ཌ་མ་རུ་དང༌། གཡོན་ཕག་པ། ནུབ་ཏུ་བེཏྟ་ལཱི་སེར་མོ་གཡས་རུས་སྦལ་དང༌། གཡོན་ཐོད་པ་བདུད་རྩིས་གང་བ། བྱང་དུ་གྷསྨ་རཱི་ལྗང་ཁུ་གཡས་སྦྲུལ། གཡོན་ཐོད་པ་བདུད་རྩིས་གང་བ། བྱང་ཤར་དུ་པུཀྐ་སཱི་སྔོ་ནག་གཡས་སེང་གེ །གཡོན་དགྲ་སྟ། ཤར་ལྷོར་ཤཱ་བཱ་རཱི་དཀར་མོ་གཡས་དགེ་སློང༌། གཡོན་འཁར་གསིལ། ལྷོ་ནུབ་ཏུ་ཙཎྜ་ལི་སྔོ་བསངས་གཡས་འཁོར་ལོ། གཡོན་ཐོང་གཤོལ། ནུབ་བྱང་དུ་ཌོམྦི་ནི་ཁྲ་མོ་གཡས་རྡོ་རྗེ། གཡོན་སྡིགས་མཛུབ། ཐམས་ཅད་ཀྱང་གཡོན་རྐྱང་གི་གར་སྟབས་དང༌། མགོ་རློན་གྱི་དོ་ཤལ་ཅན། ལྷག་མ་བཅོམ་ལྡན་འདས་མ་དང་མཚུངས་པའོ། །སླར་ཡང་ཡབ་ཡུམ་སྙོམས་པར་ཞུགས་པས་རྗེས་སུ་ཆགས་པ་བྱང་ཆུབ་ཀྱི་སེམས་སུ་ཞུ་བར་གྱུར་ཏེ། ཡབ་ཡུམ་འོད་ཀྱི་གོང་བུར་གྱུར་པ་ལས། མཚམས་ཀྱི་ལྷ་མོ་བཞིས་བསྐུལ་བ་ནི། རྗེ་བཙུན་སྙིང་རྗེའི་ནས། མ་མཛད་ཅིག །ལྷ་མོ་བརྒྱད་པོ་ཡང་ཐིག་ལེ་ལ་ཐིམ། ཐིག་ལེ་དེ་ཉིད་ཧཱུཾ་དང་ཨཾ་དུ་གྱུར། དེ་ལས་འབྲས་བུ་རྡོ་རྗེ་འཛིན་པ་དཔལ་ཧེ་རུ་ཀ་དགྱེས་པ་རྡོ་རྗེ་སྐུ་མདོག་མཐིང་ནག་ནས། བཅོམ་ལྡན་འདས་དང་མཚུངས་པའོའི་བར་གོང་བཞིན། སླར་ཡང་གོང་བཞིན་མཁའ་གསང་བྱིན་གྱིས་རླབས། ཡབ་ཡུམ་སྙོམས་པར་ཞུགས་པའི་དགའ་བའི་སྒྲས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས། ཞལ་དུ་ཞུགས་བྱང་ཆུབ་ཀྱི་སེམས་སུ་ཡོངས་སུ་ཞུ་སྟེ།
རྡོ་རྗེ་ལམ་ནས་ཡུམ་གྱི་མཁར་བབས་པ། ཧཱུཾ་ཨཾ་གཾ་ཙཾ་བཾ་གྷཾ་པཾ་ཤཱཾ་ལཾ་ཌཾ་རྣམས་སུ་གྱུར། དེ་ལས་གཙོ་བོ་ཡབ་ཡུམ་ལྷ་མོ་བརྒྱད་དང་བཅས་པ་རྣམས་སུ་གྱུར། དེ་རྣམས་མཁའ་ནང་ནས་ཕྱིར་སྤྲོས། ནམ་མཁའི་དབྱིངས་ཐམས་ཅད་ཡོངས་སུ་གང༌། སེམས་ཅན་ཐམས་ཅད་ཀྱི་ཕུང་པོ་ལྔ་དང་ཉོན་མོངས་པ་ལྔ་དང་འབྱུང་བ་བཞི་ནང་གི་ཁམས་བཞི་རྣམས་སྦྱངས། ཡེ་ཤེས་ལྔ་དང་ཚད་མེད་བཞི་ལ་བཀོད། ཚུར་འདུས་ལྷ་དགུའི་དཀྱིལ་འཁོར་དུ་གྱུར། གཙོ་བོ་ཡབ་ཡུམ་རང་ཉིད་ལ་ཐིམ་སྟེ་བདག་པོར་བཞུགས། ལྷ་མོ་བརྒྱད་པོ་ཕྱོགས་མཚམས་ཀྱི་གདན་ལ་འཁོད་པ་ནི། ཤར་དུ་གཽ་རི་ནས། བཅོམ་ལྡན་འདས་མ་དང་མཚུངས་པའོ། །རང་གི་སྙིང་གར་རང་དང་འདྲ་བའི་ཡེ་ཤེས་སེམས་དཔའ། དེའི་ཐུགས་ཀར་ཏིང་ངེ་འཛིན་སེམས་དཔའ་ཉི་མ་ལ་གནས་པའི་ཧཱུཾ། ལྷ་མོ་བརྒྱད་ཀྱི་ཐུགས་ཀར་ཡང་ཉི་མའི་གདན་ལ་གཾ་ཙཾ་སོགས། ཐམས་ཅད་ཀྱི་མིག་ཏུ་མོཾ་ལས་གཏི་མུག་རྡོ་རྗེ་མ་དཀར་མོ། རྣ་བར་དྭཻ་ལས་ཞེ་སྡང་རྡོ་རྗེ་མ་ནག་མོ། སྣར་ཁཾ་ལས་སེར་སྣ་རྡོ་རྗེ་མ་སེར་མོ། ལྕེར་རཾ་ལས་འདོད་ཆགས་རྡོ་རྗེ་མ་དམར་མོ། དཔྲལ་བར་ཨིཾ་ལས་ཕྲག་དོག་རྡོ་རྗེ་མ་ལྗང་ཁུ། ལྟེ་བར་ནི་ལས་བདག་མེད་རྡོ་རྗེ་མ་ནག་མོ། སྤྱི་བོར་ཨོཾ་ལས་ས་འོག་སྤྱོད་མ་དཀར་མོའི་ཐུགས་ཀར་སྐུ་རྡོ་རྗེ་ཨོཾ། མགྲིན་པར་ཨཱཿལས་ས་སྤྱོད་མ་དམར་མོའི་ཐུགས་ཀར་ཡང་གསུང་རྡོ་རྗེ་ཨཱཿ སྙིང་གར་ཧཱུཾ་ལས་མཁའ་སྤྱོད་མ་ནག་མོའི་ཐུགས་ཀར་
ཡང་ཐུགས་རྡོ་རྗེ་ཧཱུཾ། དེ་ཐམས་ཅད་གྲི་གུག་དང་ཐོད་པ་འཛིན་པའོ། །རང་གི་སྙིང་ག་ནས་འོད་ཟེར་འཕྲོས། ཡེ་ཤེས་སེམས་དཔའ་དཀྱིལ་འཁོར་གྱི་འཁོར་ལོ་མདུན་གྱི་ནམ་མཁར་བཛྲ་ས་མཱ་ཛཿ ཛཿཧཱུཾ་བཾ་ཧོཿ སླར་ཡང་སྙིང་གའི་ཧཱུཾ་ལས་འོད་ཟེར་འཕྲོས། དབང་གི་ལྷ་རིགས་ལྔ་ཡུམ་བཞི་སེམས་དཔའ་སེམས་མ་ཁྲོ་བོ་ཁྲོ་མོའི་ཚོགས་དང་བཅས་པ་བཛྲ་ས་མཱ་ཛཿ ཨརྒྷཾ་ནས། ནཻ་ཝི་ཏྱའི་བར་གྱིས་མཆོད། ཨོཾ་ཨ་བྷི་ཥིཉྩ་ཏུ་མཾ་སརྦ་ཏ་ཐཱ་ག་ཏ་ཞེས་གསོལ་བ་བཏབ་པས། དེ་བཞིན་གཤེགས་པ་རྣམས་ཀྱི་ཐུགས་ཀ་ནས་སྤྲུལ་པའི་རྡོ་རྗེ་མཁའ་འགྲོ་མ་རྣམས་ཀྱིས་རིན་པོ་ཆེའི་བུམ་པ་ཐོགས་ཏེ་དབང་བསྐུར། སྤྱན་མ་ལ་སོགས་པའི་རྡོ་རྗེ་གླུ་བླངས། གཟུགས་རྡོ་རྗེ་མ་ལ་སོགས་པའི་མཆོད། མཁའ་དབྱིངས་གང་བའི་སངས་རྒྱས་རྣམས་ཀྱིས་གུར་གུམ་དང་མེ་ཏོག་གི་ཆར་ཕབ། རྔ་བོ་ཆེ་སྒྲ་སྒྲགས། ཤིས་པ་བརྗོད་པ་སྔོན་དུ་འགྲོ་བས། དབང་བསྐུར་རྡོ་རྗེ་ཆེན་པོ་ནི། ཁམས་གསུམ་ཀུན་གྱི་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་བཛྲི་བྷ་བ་ཨ་བྷི་ཥིཉྩ་ཧཱུཾ། ཞེས་གསུངས་ཤིང་དབང་བསྐུར། འཁོར་ལོ་བཞིར་བདུད་རྩིའི་ཆུ་རྒྱུན་གྱིས་གང་བས། རྡོ་རྗེ་བཞི་རྣམ་པར་དག་ཅིང༌། གཙོ་བོ་ཡབ་ཡུམ་དང་གཽ་རཱི་དང༌། པུཀྐ་སཱི་ལ་མི་བསྐྱོད་པ། ཙཽ་རཱི་དང་ཤཱ་བཱ་རཱི་ལ་རྣམ་པར་སྣང་མཛད། བེཏྟ་ལཱི་དང་ཙཎྜ་ལཱི་ལ་རིན་ཆེན་འབྱུང་
ལྡན། གྷསྨ་རཱི་དང་ཌོམ་བཱི་ནི་ལ་འོད་དཔག་མེད་ཀྱིས་དབུ་རྒྱན། དཀར་མོ་རི་དྭགས། སོགས་ཀྱིས་མཆོད། མཆེ་བ་གཙིགས་ཤིང་འཇིགས་པ་ཆེ། །སྔགས་ཀྱི་མེ་ཏོག་འཕྲེང་བས་བརྒྱན། །ཤ་ཆེན་རབ་ཏུ་གསོལ་མཛད་པའི། །ཧེ་རུ་ཀ་དཔལ་ཕྱག་འཚལ་བསྟོད། །ཅེས་པས་བསྟོད། བར་འདིར་རྫོགས་པའི་རིམ་པ་ཅུང་ཟད་བསྒོམ། དེ་ནས་སྔགས་ཀྱི་བཟླས་པའི་དམིགས་པ་གསལ་བཏབ་སྟེ། ཨཥྟ་དང༌། དེ་བ་པི་ཙུ་ཅི་ནུས་བཟླ། འཁོར་གྱི་སྙིང་པོ་ནི། ཨོཾ་ཨཱཿཨཾ་ཧཱུཾ། ཨོཾ་ཨཱཿགཾ་ཧཱུཾ། ཨོཾ་ཨཱཿཙཾ་ཧཱུཾ། ཨོཾ་ཨཱཿབཾ་ཧཱུཾ། ཨོཾ་ཨཱཿགྷཾ་ཧཱུཾ། ཨོཾ་ཨཱཿཔཾ་ཧཱུཾ། ཨོཾ་ཨཱཿཤཱཾ་ཧཱུཾ། ཨོཾ་ཨཱཿལཾ་ཧཱུཾ། ཨོཾ་ཨཱཿཌཾ་ཧཱུཾ། ཅེས་པའོ། །རང་གི་སྙིང་ག་ནས་འོད་ཟེར་འཕྲོས། དཀྱིལ་འཁོར་གྱི་འཁོར་ལོ་རང་གི་སྙིང་གར་ཐིམ། དམ་ཚིག་སེམས་དཔའ་ཡེ་ཤེས་སེམས་དཔའ་ལ། དེ་ཏིང་ངེ་འཛིན་སེམས་དཔའ་ལ། དེ་ཡང་ནཱ་དའི་བར་དུ་སྦྱངས་ཏེ་མི་དམིགས་པར་བཞག །སླར་ཕྱག་གཉིས་པའི་ཧེ་རུ་ཀར་གྱུར། མིག་ཏུ་མོཾ་ལས་ནས། འཛིན་པའོ། །དགེ་བ་བསྔོ། སྙིང་པོ་དགྱེས་པ་རྡོ་རྗེའི་སྒྲུབ་ཐབས་ཀྱི་སྐབས་ཏེ་དང་པོའོ། །གཏོར་མའི་ཆོ་ག་ནི། གཏོར་མ་འདུས་བྱས་ལ། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། ཡཾ་ལས་རླུང༌། རཾ་ལས་མེ་ཨོཾ་ཨཱཿཧཱུཾ་ལས་མི་མགོའི་སྒྱེད་པུ་གསུམ། ཨཿལས་ཐོད་པ་དཀར་པོ་རྣམས་བརྩེགས་པ། ཐོད་པའི་ནང་གི་དབུས་སུ་ཧཱུཾ་ལས་ཤ་ཆེན་དང་དྲི་ཆུ། ཤར་དུ་བྷྲུཾ་ལས་དྲི་ཆེན། ལྷོར་ཨཾ་ལས་
རཀྟ། ནུབ་ཏུ་ཧྲཱིཿལས་བྱང་སེམས། བྱང་དུ་ཁཾ་ལས་ཤ་ཆེན་གྱི་དྭངས་མ། ཤར་ལྷོར་བྷྲུཾ་ལས་བ་གླང་གི་ཤ །ལྷོ་ནུབ་ཏུ་ཧཱུཾ་ལས་ཁྱིའི་ཤ །ནུབ་བྱང་དུ་ཧྲཱིཿལས་རྟའི་ཤ །བྱང་ཤར་དུ་ཏྲཾ་ལས་གླང་པོ་ཆེའི་ཤ །ཧ་ཧོ་ཧྲཱིཿ ལན་གསུམ། དྲི་དང་ཁ་དོག་དང་རོ་ནུས་ངན་པ་རྣམས་བསལ། རླུང་གཡོས་མེ་སྦར་རྫས་རྣམས། ཡོངས་སུ་ཞུ་བའི་རླངས་པ་ཧཱུཾ་ལས་སྐྱེས་པའི་རྡོ་རྗེ་དཀར་པོ་གྱུར། དེ་ལས་བདུད་རྩིའི་རྒྱུན་ལན་གསུམ་བབས་ཤིང༌། དེ་ཉིད་ཀྱང་རྫས་རྣམས་ལ་ཐིམ། སླར་ཡང་སྟེང་དུ་ཨོཾ་ལས་བྱུང་བའི་ཟླ་བ་ལ་གནས་པའི་ཨོཾ་ཨཱཿཧཱུཾ། དེ་ལས་འོད་ཟེར་འཕྲོས། དེ་བཞིན་གཤེགས་པ་རྣམས་ཀྱི་བྱང་ཆུབ་སེམས་ཀྱི་བདུད་རྩི་དང་རྒྱ་མཚོ་ལ་སོགས་པར་གནས་པའི་བདུད་རྩི་རྣམས་བཀུག་སྟེ། ཡི་གེ་འབྲུ་གསུམ་ཟླ་བ་དང་བཅས་པ་ལ་ཐིམ། དེ་ཡང་བདུད་རྩིར་ཞུ་སྟེ་གཏོར་མ་ལ་ཐིམ་པར་གྱུར། ཨོཾ་ཨཱཿཧཱུཾ་ལན་གསུམ་སོགས་ཅི་རིགས་བརྗོད། རང་གི་སྙིང་གའི་ཧཱུཾ་ལས་འོད་ཟེར་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་མ་ལུས་པ་དགྱེས་པ་རྡོ་རྗེ་ལྷ་དགུའི་དཀྱིལ་འཁོར་རྟེན་དང་བརྟེན་པར་བཅས་པའི་རྣམ་པ་དང༌། སྲིད་པ་གསུམ་གྱི་སེམས་ཅན་ཐམས་ཅད་དུར་ཁྲོད་ཀྱི་ས་གཞི་ལ་གནས་པའི་ཕྱོགས་སྐྱོང་བ་བཅུ། ལྷ་ཀླུའི་ཚོགས་དང་བཅས་པའི་རྣམ་པར་ཨོཾ་བཛྲ་ས་མཱ་ཛཿ རང་གི་སྙིང་ག་ནས་འོད་ཟེར་འཕྲོས། ཕྱོགས་སྐྱོང་ལྷ་ཀླུ་དང་བཅས་པ་ལ་རེག་པས།
སྐད་ཅིག་གིས་འོད་གསལ་དུ་ཞུགས་ནས་དགྱེས་པ་རྡོ་རྗེ་ཕྱག་གཉིས་པ་ཤེས་རབ་མ་དང་བཅས་པའི་རྣམ་པར་བཞེངས། ཨོཾ་ཛཿཧཱུཾ་བཾ་ཧོཿཁཾ་རཾ། ཨོཾ་ནི་རི་ཏི་ཧཱུཾ་ཁཾ་ཞེས་ཆུ་གཉིས་དང༌། ཨོཾ་དེ་བ་པི་ཙུ་བཛྲ་ཨི་མཾ་བ་ལིཾ་གྲིཧྞ་གྲིཧྞ་མ་མ་ཤིནྟཾ་རཀྵཉྩ་ཀུ་རུ་ཧཱུཾ་ཧཱུཾ་ཧཱུཾ་ཕཊ་སྭཱཧཱ། ལན་བདུན་གྱིས་བཅོམ་ལྡན་འདས་ལ་ཕུལ། དེ་བཞིན་དུ་སྦྱར་ཏེ། ཨོཾ་ཨ་ནཻ་རཱཏྨ་ཨཾ་ཨི་མཾ་སོགས། གཽ་རཱི་གཾ །ཙཽ་རཱི་ཙཾ། བཻཏྟ་ལཱི་བཾ། གྷསྨ་རཱི་གྷཾ། པུཀྐསཱི་སཾ། ཤཱ་བཱ་རཱི་ཤཾ །ཙཎྜ་ལཱི་ལཾ། ཌོམྦི་ནཱི་ཌཾ། ཞེས་པ་རྣམས་ལ་མགོར་ཨོཾ་ཨཱཿདང༌། མཇུག་ཏུ་ཨི་མཾ་སོགས་སྦྱར་བ་ལན་གསུམ་མམ་རེ་རེས་ཕུལ། ཕྱི་རོལ་འབྱུང་པོའི་ཚོགས་ལ་དམིགས་ཏེ། ཨོཾ་ཨིན་ད་ཛ་མ་སོགས་ལན་གསུམ་གྱིས་ཕུལ། ཐམས་ཅད་ལ་ཐུན་མོང་དུ། གོང་བཞིན་ཆུ་གཉིས་དང༌། ཨོཾ་བཛྲ་པུཥྤེ་ཨཱཿཧཱུཾ་སྭཱཧཱ། དེ་བཞིན་དུ་ནཻ་བི་ཏྱེའི་བར་དང༌། ཤཔྟ་ཡང་ཕུལ། སྙིང་པོའི་མཐར་འབྲུ་གསུམ་གྱིས་ནང་མཆོད། མཆེ་བ་གཙིགས་ཤིང་འཇིགས་པ་ཆེ། །སོགས་དང༌། རྡོ་རྗེ་རྣལ་འབྱོར་མ་བརྒྱད་དང༌། །འཇིག་རྟེན་སྐྱོང་བའི་ཚོགས་རྣམས་ནི། །ལྷ་ཡི་ཚོགས་རྣམས་མ་ལུས་དང༌། །ཀླུ་ཡི་ཚོགས་རྣམས་མ་ལུས་དང༌། །གནོད་སྦྱིན་ཚོགས་རྣམས་མ་ལུས་དང༌། །ནས།ཀུན་འགྲུབ་ཤོག་གི་བར་གྱིས་འཕྲིན་ལས་གཞོལ། ཀོལླ་ཨི་རི་ཋི་སོགས་རྡོ་རྗེའི་གླུ་བླངས། ཨོཾ་ཕུན་སུམ་ཚོགས་པ་མངའ་བ་སོགས་བཀྲ་ཤིས་བརྗོད། རིགས་སུ་སྐྱེས་དང་དམ་ཚིག་ཅན། །སོགས་སྨོན་ལམ་བཏབ། རྡོ་རྗེ་སེམས་དཔའི་ཡི་གེ་བརྒྱ་པ་ལ། སུ་པོ་ཥྱོ་མེ་བྷ་བ། ཤ་ཤྭ་ཏོ་མེ་བྷ་བ། ཧྲི་ད་ཡ་མེ། ཨ་དྷི་ཏིཥྛ་
སརྦ་སིདྡྷི་མེ་སོགས་དང༌། མཇུག་ཏུ་མུ་བསྣན་པ་ཡི་གེ་བརྒྱ་དང་བཅོ་ལྔ་པས་བཟོད་པར་གསོལ་ཞིང་གཤེགས་སུ་གསོལ་བའམ། ཅུང་ཟད་སྤྲོས་པ་ལ་དགའ་ན། ཡིག་བརྒྱ་བཟོད་གསོལ། གཤེགས་གསོལ་རྣམས་སྤྱི་དང་མཐུན་པར་བྱའོ། །གཏོར་མའི་ཆོ་གའི་སྐབས་ཏེ་གཉིས་པའོ། །གལ་ཏེ་ཚུལ་འདིས་བདག་མེད་ལྷ་མོ་བཅོ་ལྔ་བསྒོམ་པར་འདོད་ན། རང་སྐད་ཅིག་གིས་བདག་མེད་མར་གསལ་བའི་སྙིང་གར་ཟླ་བ་ལ་ཨཾ། དེའི་འོད་ཟེར་གྱི་ནས། མཚན་ཉིད་ཐམས་ཅད་ཡོངས་སུ་རྫོགས་པ། ནང་འཕར་མ་གཉིས་དང་བཅས་པའི་ལྷ་སྣམ་ཤར་དཀར་ནས། སྣ་ཚོགས་པདྨ་འདབ་མ་བརྒྱད་པ་ཉིས་རིམ། ལྟེ་བ་དང་འདབ་མ་རྣམས་དང༌། སྟེང་གི་ཡ་ཕུགས་ཀྱི་ནང་དང་འོག་ཏུ་ས་གཞིའི་ནང་དུ་ཟླ་བའི་གདན་རེ་རེ། མཚམས་ཀྱི་པད་འདབ་ནང་མ་བཞི་ལ། བུམ་པ་བདུད་རྩིས་གང་བ་རེ་རེ་དང༌། གཞན་རྣམས་ཀྱི་སྟེང་དུ་མི་རོའི་གདན་རེ་རེའོ།། དབུས་ཀྱི་གདན་གྱི་ནས། བར་དུ་ཨཾ་ལས་གྲི་གུག་ཨཾ་གིས་མཚན་པ་སོ་སོར་རྟོག་པ་ནས། རང་ཉིད་རྡོ་རྗེ་བདག་མེད་མ་སྐུ་མདོག་མཐིང་ནག་དྲག་མོ་ཆེན་མོ་ཞལ་གཅིག་ཕྱག་གཉིས་སྤྱན་གསུམ་དམར་བ། དབུ་སྐྲ་སེར་པོ་གྱེན་དུ་བརྫེས་པ། ཕྱག་གཡས་རྡོ་རྗེས་མཚན་པའི་གྲི་གུག་འཕྱར་ཞིང༌། གཡོན་པས་ཐོད་ཁྲག་ཐུགས་ཀར་འཛིན་པ། མཆན་ཁུང་དུ་ཊྭཱཾ་ག་དཀར་པོ་བསྒྲེང་བ། སྒེག་ཅིང་ལང་ཚོ་ལ་བབ་པ། སྟག་གི་པགས་པའི་ཤམ་ཐབས་ཅན། ཞབས་གཡོན་བརྐྱང་བའི་སྐྱིལ་ཀྲུང་ཕྱེད་པའི་གར་སྟབས་ཀྱིས་ཡི་དྭགས་ཀྱི་གདན་ལ་གནས་པ། ཐོད་སྐམ་ལྔའི་དབུ་བརྒྱན་དང༌།
རུས་པའི་ཕྱག་རྒྱ་ལྔ་དང༌། མི་མགོའི་དོ་ཤལ་ཅན། མེ་དཔུང་འབར་བའི་དབུས་ན་བཞུགས་ཤིང༌། ཟླ་བའི་འོད་འཕྲོ་ཞིང༌། ཟླ་བའི་རྒྱབ་ཡོལ་ཅན་ནོ། །ཐུགས་ཀ་ནས་ཨཱ་ལི་ཚར་བཅུ་བཞི་སྤྲོས། རོ་གདན་བཅུ་བཞིའི་སྟེང་དུ་འཁོད། ཟླ་བའི་དཀྱིལ་འཁོར་རྣམས་སུ་གྱུར། ཀཱ་ལི་ཚར་བཅུ་བཞི་སྤྲོས་ཏེ་དེའི་སྟེང་དུ་འཁོད་པ་ཉི་མའི་དཀྱིལ་འཁོར་རྣམས་སུ་གྱུར། ཨཱ་ཨི། ཨཱི་ཨུ། ཨཱུ་རྀ། རཱྀ་ལྀ། ལཱྀ་ཨེ། ཨཻ་ཨོ། ཨཽ་ཨཾ་རྣམས་སྤྲོས་ཏེ་ཉི་ཟླ་རྣམས་ཀྱི་བར་དུ་འཁོད་པ་གྲི་གུག་བཅུ་བཞིར་གྱུར། དེ་རྣམས་ལས་འོད་ཟེར་འཕྲོས། སླར་འདུས་ཏེ་ཐིམ། སོ་སོའི་གནས་སུ་དེ་རྣམས་གཅིག་ཏུ་འདྲེས་ཏེ་ཡོངས་སུ་གྱུར་པ་ལས། ནང་གི་ཤར་དུ་རྡོ་རྗེ་མ། ལྷོར་གསང་བའི་དཀར་མོ། ནུབ་ཆུའི་རྣལ་འབྱོར་མ། བྱང་དུ་མཁའ་འགྲོ་མ། འཕར་མ་ཕྱི་མའི་འདབ་མ་ལ་དབང་ལྡན་དུ་པུཀྐ་སཱི། མེར་རི་ཁྲོད་མ། བདེན་བྲལ་དུ་གདོལ་པ་མོ། རླུང་དུ་གཡུང་མོ། ཤར་དུ་གཽ་རཱི། ལྷོར་ཙཽ་རཱི། ནུབ་ཏུ་བེསྟ་ལཱི། བྱང་དུ་གྷསྨ་རཱི། སྟེང་དུ་མཁའ་སྤྱོད་མ། འོག་ཏུ་ས་སྤྱོད་མ། དེ་ཐམས་ཅད་ཀྱང་འཁོར་ལོའི་དབང་ཕྱུག་མ་དང་མཚུངས་པའི་སྐུ་ཅན་ནོ། །རང་གི་སྙིང་ག་ནས། འཛིན་སེམས་དཔའ་ཟླ་བ་ལ་གནས་པའི་ཨཾ། ཐམས་ཅད་ཀྱི་མིག་ཏུ་ནས། རྡོ་རྗེ་བཞི་རྣམ་པར་དག་ཅིང༌། གཙོ་མོ་དང་གཽ་རཱི་དང༌། པུཀྐ་སཱི་ལ་མི་བསྐྱོད་པ། རྡོ་རྗེ་མ་དང་ཙཽ་རཱི་དང་ཤཱ་བཱ་རཱི་དང་ས་སྤྱོད་མ་རྣམས་ལ་རྣམ་པར་སྣང་མཛད། གསང་བའི་གཽ་རཱི་དང་བཻཏྟ་ལཱི་དང་ཙཎྜ་ལཱི་ལ་རིན་ཆེན་
འབྱུང་ལྡན། གྷསྨ་རཱི་དང་ཌོམ་བི་ནཱི་དང་ཆུའི་རྣལ་འབྱོར་མ་དང་མཁའ་སྤྱོད་མ་རྣམས་ལ་འོད་དཔག་མེད། རྡོ་རྗེ་མཁའ་འགྲོ་མ་ལ་དོན་ཡོད་གྲུབ་པས་དབུ་རྒྱན། བསྟོད་པ་ནི། བུད་མེད་ཀྱིས་འདུལ་འགྲོ་གཟིགས་ནས། །བདག་མེད་རྣལ་འབྱོར་མ་ཉིད་གྱུར། །ཕྱག་འོས་ཐུབ་པ་ཕ་རོལ་ཕྱིན། །སྒྱུ་མའི་ཕྱག་རྒྱ་ཕྱག་འཚལ་བསྟོད། །བར་འདིར་དང་པོར་ནག་པོ་རབ་ཏུ་བསྒོམ་ཞེས་སོགས་ལ་བསླབ་བོ། །བཟླས་བྱའི་སྔགས་ནི། ཨོཾ་ཨཾ་ཧཱུཾ་ཕཊ་སྭཱཧཱ། ཞེས་གཙོ་མོའི་དང༌། ཨོཾ་ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཕཊ་སྭཱཧཱ། ཞེས་པ་ནི་གཙོ་འཁོར་ཐམས་ཅད་ཀྱི་སྔགས་སོ། །ཉེ་བར་བསྡུ་བ་ནི། གོང་བཞིན་ལས་སླར་ཡང་རྡོ་རྗེ་བདག་མེད་མར་གྱུར། ཅེས་འདོན་པ་སྤོ། གཏོར་ཆོག་གི་སྐབས། དགྱེས་པ་རྡོ་རྗེ་ལྷ་དགུའི་དཀྱིལ་འཁོར་ཞེས་པའི་ཚབ་ཏུ། རྡོ་རྗེ་བདག་མེད་མ་ལྷ་མོ་བཅོ་ལྔའི་དཀྱིལ་འཁོར་ཞེས་དང༌། གཏོར་སྔགས་གྱི་སྐབས། དེ་བ་པི་ཙུ་བཛྲ་གྱི་ཐད་དུ་ཨོཾ་ཨ་ཨཱ་ནས། ཨོཾ་ཨཾ་གི་བར་བཅུག་པ་ཁོ་ནས་གཙོ་འཁོར་རྣམས་ལ་དུས་གཅིག་ཏུ་འབུལ་བ་དང༌། བསྟོད་པའི་སྐབས། བུད་མེད་ཀྱིས་འདུལ་སོགས་ཁྱད་པར་རོ། །བདག་མེད་མའི་སྒྲུབ་ཐབས་ཀྱི་སྐབས་ཏེ་གསུམ་པའོ།། །།སྐུ་གསུང་ཐུགས་ཀྱི་ཧེ་རུ་ཀའི་དཀྱིལ་འཁོར་སྒོམ་པར་འདོད་ན། མངོན་རྟོགས་རྒྱས་འབྲིང་བསྡུས་གསུམ་གང་ཡང་རུང་བ་ཞིག་སྒོམ་པས་ཆོག་པ་ལས། རྒྱས་པ་ནི་འདི་ཡིན་ཏེ། རང་སྐད་ཅིག་གིས་དགྱེས་རྡོར་དུ་ཞེས་པ་ནས། ཧཱུཾ་ཧཱུཾ་ཕཊ་སྭཱཧཱ། དེའི་ནང་དུ་རྡོ་རྗེའི་ས་གཞི་ལ་གནས་པའི་དུར་ཁྲོད་ཆེན་པོ་བརྒྱད་ཀྱི་དབུས་སུ། སྣ་ཚོགས་པདྨའི་ལྟེ་བ་ལ། ཉིན་མའི་སྟེང་དུ་རོའི་གདན། འདབ་མ་བརྒྱད་ལ་ཡང་རོའི་གདན་རེ་རེ། དབུས་ཀྱི་གདན་གྱི་སྟེང་དུ་ནས། དེ་གཉིས་ཀྱི་བར་དུ་ཧཱུཾ་ལས་རྡོ་རྗེ་ཧཱུཾ་གིས་
མཚན་པ་སོ་སོར་རྟོགས་པའི་ནས། བྱ་བ་སྒྲུབ་པའི་ཡེ་ཤེས། དེ་ལས་དཀྱིལ་འཁོར་གྱི་ལྷ་ཚོགས་ཡོངས་སུ་རྫོགས་པ་ཆོས་ཀྱི་དབྱིངས་ཀྱི་ཡེ་ཤེས་ཏེ། དབུས་སུ་དཔལ་ཧེ་རུ་ཀ་སྐུ་མདོག་མཐིང་ནག་དྲག་པོ་ཆེན་པོ་ཞལ་གཅིག་ཕྱག་གཉིས་སྡང་མིག་འབར་བའི་སྤྱན་གསུམ་དམར་བ། དབུ་སྐྲ་སེར་པོ་གྱེན་དུ་བརྫེས་པ། ཕྱག་གཡས་རྡོ་རྗེ་ནག་པོ་རྩེ་དགུ་པ་ནམ་མཁའ་ལ་འཕྱར་བ། གཡོན་པས་སྣ་ཚོགས་རྡོ་རྗེས་མཚན་པའི་ཐོད་ཁྲག་ཐུགས་ཀར་ཞེས་པ་ནས། མེ་དཔུང་འབར་བའི་དབུས་ན་བཞུགས་པའོ། །ཞེས་པའི་བར་བདག་མེད་མ་དང་འདྲ་བ། འདབ་མ་བརྒྱད་ལ་ཤར་དུ་གཽ་རཱི། ལྷོར་ཙཽ་རཱི། ནུབ་ཏུ་བཻཏྟ་ལཱི། བྱང་དུ་གྷསྨ་རཱི། བྱང་ཤར་དུ་པུཀྐ་སཱི། ཤར་ལྷོར་ཤཱ་བཱ་རཱི། ལྷོ་ནུབ་ཏུ་ཙཎྜ་ལཱི། ནུབ་བྱང་དུ་ཌོམྦུ་ནཱི་རྣམས་ནག་མོ་གྲི་གུག་ཐོད་པ་ཁ་ཊྭཱཾ་ག་བསྣམས་པ། གཡོན་རྐྱང་གི་སྟབས་ཀྱིས་བཞུགས་པ། ཞེས་བརྗོད་ཅིང༌། དོན་བདག་མེད་མའི་སྐབས་བཞིན་དྲན་པར་བྱའོ། །རང་གི་སྙིང་གར་རང་དང་འདྲ་བའི་ནས། གནས་པའི་ཧཱུཾ། ཐམས་ཅད་ཀྱི་མིག་ཏུ་ནས། ཧེ་རུ་ཀ་དཔལ་ཕྱག་འཚལ་བསྟོད། །བཟླས་པའི་སྐབས། ཨོཾ་ཏྲཻ་ལོ་ཀྱ་ཨཀྵེ་བ་ཧཱུཾ་ཧཱུཾ་ཧཱུཾ་ཕཊ་སྭཱཧཱ། ཞེས་བཟླ་བ་དང༌། གཏོར་མའི་སྐབས་གཏོར་སྔགས་ཀྱང༌། ཨོཾ་ཏྲཻ་ལོ་ཀྱ་ཨ་ཀྵེ་པ་ཨི་མཾ་བ་ལིཾ་སོགས་འདོན་པ་སྤོ་བ་ནི་ཁྱད་པར་ཏེ། གཞན་སྙིང་པོ་དགྱེས་པ་རྡོ་རྗེ་བཞིན་བྱས་པས་ལེགས་པར་འགྲུབ་བོ། །སྐུ་དགྱེས་པའི་རྡོ་རྗེའི་སྒྲུབ་ཐབས་ཀྱི་སྐབས་ཏེ་བཞི་པའོ།། །།
གསུང་གི་ཧེ་རུ་ཀ་སྒོམ་པར་འདོད་ནའང་འདི་ཉིད་དང་འདྲ་བ་ལས། དེ་ལས་དཀྱིལ་འཁོར་གྱི་ལྷ་ཚོགས་ཡོངས་སུ་རྫོགས་པ་ཆོས་ཀྱི་དབྱིངས་ཀྱི་ཡེ་ཤེས་ཏེ། དབུས་སུ་དཔལ་ཧེ་རུ་ཀ་སྐུ་མདོག་མཐིང་ནག་ཞལ་གཅིག་ཕྱག་བཞི་སྡང་མིག་འབར་བའི་སྤྱན་གསུམ་དམར་བ། དབུ་སྐྲ་སེར་པོ་གྱེན་ཏུ་བརྫེས་པ། ཕྱག་དང་པོ་གཉིས་ཀྱིས་ཡུམ་རྡོ་རྗེ་ཕག་མོ་བཅོམ་ལྡན་འདས་དང་མཚུངས་པ་ལ་འཁྱུད་པ། གཡས་འོག་མས་རྡོ་རྗེ་ནམ་མཁའ་ལ་འཕྱར་ཞིང༌། གཡོན་འོག་མས་སྐྱེས་པའི་ཐོད་པ་ལྷ་དང་ལྷ་མ་ཡིན་གྱི་ཁྲག་གིས་གང་བ་བསྣམས་པ། ཞབས་གཡོན་བརྐྱང་བའི་ཞེས་པ་ནས།དབུས་ན་བཞུགས་པའོ། །དེ་མན་ཆད་སྐུ་རྡོ་རྗེའི་སྐབས་དང་འདྲ་བ་ལས། བཟླས་པའི་སྔགས་ནི། ཨོཾ་ཛྭ་ལ་ཛྭ་ལ་བྷྱོ་ཧཱུཾ་ཧཱུཾ་ཧཱུཾ་ཕཊ་སྭཱཧཱ། གཏོར་སྔགས་ཀྱང་རིགས་འགྲེའོ། །གསུང་དགྱེས་པ་རྡོ་རྗེའི་སྒྲུབ་ཐབས་ཀྱི་སྐབས་ཏེ་ལྔ་པའོ།། །།ཐུགས་ཀྱི་ཧེ་རུ་ཀ་སྒོམ་པར་འདོད་པས། ཡེ་ཤེས་ཏེ། དབུས་སུ་དཔལ་ཧེ་རུ་ཀ་སྐུ་མདོག་མཐིང་ནག་ཞལ་གསུམ་ཕྱག་དྲུག་སོགས། གྱེན་དུ་བརྫེས་པ་གཡས་དཀར་གཡོན་དམར་དབུས་སྔོ་བའི་ཞལ་ཅན། ཕྱག་གཡས་ཀྱི་དང་པོས་རྡོ་རྗེ་འཕྱར་བ། གཉིས་པ་ན་གྲི་གུག །གཡོན་གྱི་དང་པོ་མདུང་རྩེ་གསུམ་པ། གཉིས་པ་ན་དྲིལ་བུ། ཕྱག་ཐ་མ་གཉིས་ཀྱིས་ཡུམ་རྡོ་རྗེ་ལུ་གུ་རྒྱུད་མ་བཅོམ་ལྡན་འདས་དང་མཚུངས་པ་ལས། ཞལ་གཅིག་ཕྱག་གཉིས་པ་གྲི་གུག་དང་ཐོད་པ་འཛིན་པ་ལ་འཁྱུད་པ། ཞབས་གཡོན་བརྐྱང་བའི་སྐྱིལ་ཀྲུང་ཕྱེད་པའི་གར་སྟབས་
ཀྱིས་ཁམས་གསུམ་གྱི་བདག་ཉིད་ཅན་གྱི་རོ་གདན་ལ་གནས་པ། ཐོད་སྐམ་ལྔའི་དབུ་རྒྱན། ཞེས་པ་མན་ཆད་སྐུའམ་གསུང་གི་ཧེ་རུ་ཀ་དང་འདྲ། བཟླས་པའི་སྔགས་ནི། ཨོཾ་ཀི་ཊི་ཀི་ཊི་བཛྲ་ཧཱུཾ་ཧུཾ་ཧཱུཾ་ཕཊ་སྭཱཧཱ། ཞེས་པ་སྟེ་གཏོར་སྔགས་ཀྱང་རིགས་འགྲེའོ།། དེ་ལྟར་ན་ཧེ་རུ་ཀ་གསུམ་གྱི་སྐབས་འདིར་མངོན་རྟོགས་རྒྱས་པའོ། །ཐུགས་དགྱེས་པ་རྡོ་རྗེའི་སྒྲུབ་ཐབས་ཀྱི་སྐབས་ཏེ་དྲུག་པའོ།། །།ད་ནི་ཧེ་རུ་ཀ་གསུམ་པོ་དེ་དག་གི་མངོན་རྟོགས་འབྲིང་དུ་སྒོམས་པར་འདོད་པས། སེམས་ཅན་ཐམས་ཅད་བདེ་བ་ནས། ཕཊ་སྭཱཧཱ། དེའི་ནང་དུ་པད་ཉི་དང་མི་རོའི་གདན། རང་གི་སྙིང་གར་རཾ་ལས་ཉི་མའི་སྟེང་དུ་ཧཱུཾ། དེ་ལས་བྱུང་བའི་རྡོ་རྗེ་ནག་པོ་རྩེ་དགུ་པ་ཧཱུཾ་གིས་མཚན་པ། དེ་ཡོངས་སུ་གྱུར་པ་ལས། རང་ཉིད་དཔལ་ཧེ་རུ་ཀ་ཞེས་མཚམས་སྦྱར་ལ། སྐུ་གསུང་ཐུགས་ཀྱི་ཧེ་རུ་ཀ་གསུམ་པོ་གང་རིགས་གོང་བཞིན་གསལ་བཏབ་ནས། རང་གི་སྙིང་གར་རང་དང་འདྲ་བའི་ནས། ཧཱུཾ། མིག་ཏུ་མོཾ་ལས་གཏི་མུག་ནས། རྡོ་རྗེ་བཞི་རྣམ་པར་དག་ཅིང་མི་བསྐྱོད་པས་དབུ་རྒྱན། མཆོད་ཡོན་ཞབས་བསིལ་མེ་ཏོག་སོགས་ཀྱིས་མཆོད། གོང་བཞིན་བསྟོད་ལྷག་མ་སྔར་དང་འདྲ། གཏོར་ཆོག་གི་སྐབས་སུ། ལྷ་དགུ་ཀ་ལ་ཕུལ་བས་ཆོག་ཀྱང༌། གཙོ་རྐྱང་ལ་འབུལ་བར་མོས་ན། ལྷ་དགུའི་ཞེས་དང༌། ལྷ་མོ་རྣམས་ཀྱི་གཏོར་སྔགས་བོར་བས་ཆོག་གོ །ཧེ་རུ་ཀ་གསུམ་གྱི་སྒྲུབ་ཐབས་འབྲིང་པོའི་སྐབས་ཏེ་བདུན་པའོ།། །།བསྡུས་པ་བསྒོམ་པར་འདོད་པས། ཚད་མེད་བཞིའི་རྗེས་ལ། ཤཱུ་ནྱ་ཏས་སྟོང་པར་སྦྱངས། སྟོང་པའི་ངང་ལས་རང་སེམས་ཧཱུཾ་གི་རྣམ་པ་ཡོངས་སུ་གྱུར་པ་ལས།
རང་ཉིད་དཔལ་ཧེ་རུ་ཀ་ཞེས་མཚམས་སྦྱར་ནས་གསུམ་པོ་གང་རུང་དུ་བསྐྱེད་ལ། རང་གི་སྙིང་གར་ནས། ཧཱུཾ། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རང་གི་སྙིང་ག་ནས་འོད་ཟེར་འཕྲོས་ཡེ་ཤེས་སེམས་དཔའ་མདུན་གྱི་ནམ་མཁར་བཛྲས་མཱ་ཛཿ ཛཿཧཱུཾ་བཾ་ཧོཿ མན་ཆད་འབྲིང་པོའི་སྐབས་དང་འདྲ། དེ་ལྟར་ན་འབྲིང་བསྡུས་གཉིས་ལ་འཁོར་གྱི་ལྷ་ཚོགས་སྒོམ་མི་དགོས་སོ། །ཧེ་རུ་ཀ་འདི་གསུམ་འདམ་སྐྱེས་སྔོན་པོ་འདྲ་བའི་མདོག །ཡང་ན་སྔོ་དང་ཉི་མའི་མདོག །ཅེས་གསུངས་པའི་མཐིང་གའམ། སྨུག་ནག་གང་མོས་པ་ཞིག་གི་ཆོག་པར་གསལ་ལོ། །དེ་བཞིན་དུ་གར་སྟབས་མཛད་པ་རྣམས་ལ་རོའམ། ལྷའི་གདན་གྱི་སྙིང་གར་ཉི་ཟླའི་གདན་བྱེད་པའང་རུང་ཞིང༌། སྙིང་པོ་ཧེ་རུ་ཀ་ལ་གཽ་རཱི་སོགས། སྒོ་མཚམས་ལ་འགོད་པ་དང༌། བདག་མེད་མ་ལ་པད་འདབ་རིམ་གཅིག་དང༌། གཽ་རཱི་སོགས་ལྷ་སྣམ་ལ་བཀོད་ཀྱང་ཆོག་གོ །ཧེ་རུ་ཀ་གསུམ་གྱི་སྒྲུབ་ཐབས་བསྡུས་པའི་སྐབས་ཏེ་བརྒྱད་པའོ།། །།ད་ནི་རྫོགས་པའི་རིམ་པའི་སྒྲུབ་ཐབས་བཤད་པར་བྱ་སྟེ། དབྱུང་བ་ཉིད་ཀྱིས་ལྟུང་བར་བྱེད། །ཞེས་སོགས་ལྟར་རླུང་ཕྱིར་དབྱུང་བ་རྔུལ་མཐའ་ཅན་དང༌། ནང་དུ་བཅིང་དགང་བ་དང༌། ཁ་སྦྱོར་དུ་གནས་པ་བུམ་པ་ཅན་དང༌། མ་ནིང་གི་སྦྱོར་བ་གཞིལ་བ་སྟེ། དེ་རྣམས་ལྟ་སྟངས་དང་བཅས་པས་ལེགས་པར་བསླབ་པ་ནི། ཕྲ་མོའི་སྦྱོར་བ་ཡིན་ལ། ཐིག་ལེའི་རྣལ་འབྱོར་ནི་གཏུམ་མོ་སྟེ། རྩ་གསུམ་འཁོར་ལོ་བཞི་མན་ངག་བཞིན་གསལ་འདེབས་པ་ལས། དེ་ཡང་ལྟེ་བ་འཁོར་ལོ་དཀར་པོ། སྙིང་གའི་ནག་པོ། མགྲིན་པའི་དམར་པོ། སྤྱི་བོའི་འཁོར་ལོ་ལྗང་ཁུའམ། ཁ་དོག་སྣ་ཚོགས་པའམ།
དཀར་དམར་ནག་གསུམ་འདྲེས་པ། དབུས་སུ་རིམ་པ་བཞིན་དུ། ཨཱཾ་ཧཱུཾ་ཨོཾ་ཧཾ་དམར་སེར་དང་སྔོ་སྐྱ་དང་དམར་པོ་དང་དཀར་ལ་དམར་བའི་མདངས་ཆགས་པའི་མདོག་ཅན་རྣམས་གསལ་བཏབ་ལ། ཐུར་སེལ་གྱི་རླུང་གིས་བདེ་བ་བསྐུལ་ཞིང༌། བུམ་པ་ཅན་མ་ནིང་གི་རླུང་སྦྱོར་ལ་བརྟེན་ནས། ཆུ་ཚོད་རེ་རེ་འཁོར་ལོ་གཞན་གསུམ་ལ་སེམས་གཏད་ཅིང༌། ཆུ་ཚོད་དགུ་ལྟེ་བའི་ཨཾ་ཡིག་ལ་མཉམ་པར་འཇོག་པའམ། དེ་ཙམ་བཞག་པར་མི་ནུས་ན་ཆུ་སྲང་གི་གྲངས་ལ་དེ་ལྟར་སྦྱར་ཏེ་སྒོམ། དེ་ལ་གོམ་ནས་དབུ་མའི་ནང་གི་འབར་འཛག་ལ་བསླབ་པ་ནི་སྤྱི་དང་འདྲའོ། །ཅི་སྟེ་གཏུམ་མོ་བསྡུས་པ་བསྒོམ་པར་འདོད་ན། ལྟེ་བའི་དབུས་སུ་ཆོས་འབྱུང་དཀར་པོའི་ནང་དུ་ཨ་ཐུང་དམར་པོ་ལ་མཉམ་པར་འཇོག་པ་ནི་ཁྱད་པར་རོ། །དེ་དག་ནི་དམ་ཚིག་གི་ཕྱག་རྒྱའོ། །ཐུན་མཚམས་སུ་སྣང་བ་ཐམས་ཅད་ལ་ལྷ་སྐུ་སྒྱུ་མ་ལྟ་བུར་མོས་ཤིང༌། དམ་ཚིག་གི་ཕྱག་རྒྱ་སྒོམ་པའི་ཉམས་ཀྱིས་ཡང་ཡང་རྒྱས་བཏབ་པ་ན། སྣང་བ་གང་ཤར་ཐམས་ཅད་བདེ་གསལ་སྟོང་བ་གང་རུང་གི་གྲོགས་སུ་གྱུར་པའི་ཚེ། དེ་ཉིད་ཀྱི་ཉམས་བསྐྱང་བར་བྱ་སྟེ་ཆོས་ཀྱི་ཕྱག་རྒྱའོ། །ཡིད་ཀྱིས་སྒོམ་པའི་རིག་མའམ། པདྨ་ཅན་ལ་སོགས་པ་དངོས་ཀྱི་རིག་མ་ལ་བརྟེན་པ་དང༌། རྟེན་གྱི་དབང་གིས་ཐབས་ལས་ཀྱང་སྟེ། ལྷན་ཅིག་སྐྱེས་པའི་ཡེ་ཤེས་ངོས་བཟུང་ཞིང༌། དེ་ལས་བྱུང་བའི་ཉམས་བདེ་སྟོང་ལ་མཉམ་པར་འཇོག་པ་ནི་ལས་ཀྱི་ཕྱག་རྒྱའོ། །དེ་རྣམས་ཀྱི་རླུང་སེམས་དབུ་མར་ཐིམ་པ་ན་འདོད་ཆགས་ཆེན་པོའི་ཡེ་ཤེས་ཞེས་བྱ་བ་རྣམ་པར་མི་རྟོག་པའི་བདེ་བ་ཆེན་པོའི་སེམས་དང༌། དེ་ལས་རང་ཤར་དུ་བྱུང་བའི་དཀྱིལ་འཁོར་གྱི་འཁོར་ལོ་ལ་སོགས་པ་ཤེས་བྱ་ཐམས་ཅད་ཀྱི་གཟུགས་བརྙན་སྣང་བ་ནི། ཕྱག་རྒྱ་ཆེན་པོ་དངོས་ཡིན་ལ།
དེའི་རྒྱུད་བསྐྱེད་པའི་རིམ་པ་དང༌། ཕྱག་རྒྱ་སྔ་མ་གསུམ་དང༌། བྱ་སྤྱོད་ཐམས་ཅད་དང༌། སྣང་གྲགས་ཐམས་ཅད་རྣམ་པར་མི་རྟོག་པས་ཟིན་པར་བྱེད་པ་ཡང༌། རྒྱུ་ལ་འབྲས་བུའི་མིང་བཏགས་པ་སྟེ་ཕྱག་རྒྱ་ཆེན་པོའོ། །དེ་ཡང་རྣལ་འབྱོར་ཡན་ལག་དྲུག་པའི་ངེས་པས་སྒོམ་སྟེ། དེ་རྣམས་ཀྱི་མན་ངག་བླ་མའི་ཞལ་ལས་རྟོགས་པར་བྱ་ཞིང༌། གོ་དོན་ནི་རྒྱུད་ཀྱི་རྒྱལ་པོ་ལས་ཤེས་པར་བྱའོ། །རྫོགས་པའི་རིམ་པའི་སྒྲུབ་ཐབས་ཀྱི་སྐབས་ཏེ་དགུ་པའོ།། །།ད་ནི་དཀྱིལ་འཁོར་གྱི་ལས་རིམ་རྣམས་མདོར་བསྡུས་པའི་ཚུལ་གྱིས་བརྗོད་པར་བྱ་སྟེ། དེ་ལས་ཆོ་ག་དང༌། སྟ་གོན་དང༌། དཀྱིལ་འཁོར་ཞག་གི་ཆོ་ག་དང༌། དཀྱིལ་འཁོར་སྒྲུབ་པ་དང༌། དབང་གི་བྱ་བའི་ལས་དང༌། དཀྱིལ་འཁོར་ཉེར་བསྡུའི་ཆོ་ག་སྟེ་དྲུག་ལས། དང་པོ་ནི། རྒྱས་པར་ན་སྤྱི་དང་འདྲ་ཡང༌། མདོར་བསྡུས་པ་ལ་མངོན་པར་དགའ་བས་ནི། ཨོཾ་ཨིན་ད་སོགས་ཀྱིས་འབྱུང་པོ་ཐམས་ཅད་པའི་གཏོར་མ་བཏང་ལ། གང་ཡང་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །ས་འདི་བདག་གིས་བསླང་བར་བགྱི།། དཀྱིལ་འཁོར་དོན་དུ་ཁྱོད་ཀྱིས་སྩོལ། །ཅེས་གསོལ་བ་བཏབ། སའི་ལྷ་མོ་ལས་ཀྱང་བསླང་བ་ལས། མཆོད་གཏོར་ཕུལ་ནས། སྟེང་གི་ནམ་མཁར་བཞུགས་སུ་གསོལ། ཨ་མྲྀ་ཏ་བཟླས་ལ་བ་བྱུང་གིས་དཀྱིལ་འཁོར་གྱི་ས་ལ་བྱུག་ཅིང༌། དྲི་བཟང་གིས་ཆུས་གཏོར་ལ། ཨོཾ་བྷུ་ཁཾ་ནམ་མཁའི་རང་བཞིན་དུ་གྱུར། ཧཱུཾ་ལཾ་ཧཱུཾ། ཨོཾ་མེ་དྷི་ནི་བཛྲིར་བྷ་བ་བཛྲ་བནྡྷ་ཧཱུཾ། རྡོ་རྗེའི་རང་བཞིན་དུ་གྱུར། ཨོཾ་ཧ་ན་ཧ་ན་བཛྲ་ཀྲོ་དྷ་ཧཱུཾ་ཕཊ། ཅེས་བརྗོད། དེ་ནས་དཀྱིལ་འཁོར་
གྱི་ས་གཞིར་རང་ཉིད་འདུག་ལ། སྐྱབས་སེམས་ནས་བརྩམས་བཟླས་པའི་བར་བྱ། ཨོཾ་བཛྲ་ཨུ་ཏིཥྛ་ཞེས་དཀྱིལ་འཁོར་གྱི་འཁོར་ལོ་ནམ་མཁར་བཏེག །མཆོད་བསྟོད་ཅུང་ཟད་བྱ། རང་ཉིད་གཙོ་བོའི་ཐུགས་ཀ་ནས་སྤྲོས་པའི་ཧེ་རུ་ཀ་ཕྱག་གཉིས་པའི་རྣམ་པར་གྱུར། ཧཱུཾ་ཞེས་སྙེམས་པ་དང་བཅས་པས་དཀྱིལ་འཁོར་གྱིས་གཞི་བཅག་པར་བྱའོ། །སྤྲོ་ན། ཨོཾ་གྷ་གྷ་སོགས་ཕུར་གདབ་བྱ། མཐར་ཨོཾ་རཀྵའི་སྔགས་ཀྱི་ས་གཞི་བགེགས་དང་བྲལ་བར་བསམ་མོ། །ས་ཆོག་གི་རིམ་པའི་སྐབས་ཏེ་བཅུ་པའོ།། །།གཉིས་པ་སྟ་གོན་ལ། སྔོན་འགྲོ་གཏོར་མ། མཆོད་པ་བྱིན་རླབས། བདག་བསྐྱེད་རྣམས་སྔོན་དུ་འགྲོ་བའི་སྒོ་ནས། སའི་ལྷ་མོའི་སྟ་གོན་སྤྱི་དང་འདྲ་བ་ལས། གསོལ་བཏབ་ཀྱི་སྐབས། མ་མ་རིན་ཆེན་སྣ་ཚོགས་འཛིན་སོགས་ཀྱིས་གསོལ་བ་བཏབ། སའི་ལྷ་མོ་ས་དེ་ཉིད་ལ་བསྟིམ། ས་ཆོག་བྱས་པའི་ཕྱོགས་ལ་ཁར་སང་ནམ་མཁར་བཏེག་པའི་སའི་ལྷ་མོ་དེ་སྔོན་དུ་ཡེ་ཤེས་པའི་ཚུལ་གྱིས་བསྟིམ་དགོས་སོ། །གཉིས་པ་ལྷ་སྟ་གོན་ནི། རྡུལ་ཚོན་འདྲི་ན་ལས་ཐིག་བཏབ་པའམ། མིན་ནའང་ལྷ་གནས་མ་འཆོལ་པར་དགོས་པས། ནང་བར་ལྷ་མཚན་འབྲི་སར་དྲི་བཟང་གི་ཚོམ་བུའི་སྟེང་དུ་མེ་ཏོག་གི་ཚོམ་བུ་བཀོད། ལག་ལེན་བཞིན་མཆོད་གཏོར་བཤམས། མདུན་བསྐྱེད་བསངས་སྦྱངས། སྟོང་པའི་ངང་ལས་མདུན་གྱི་གནས་སུ་སྣ་ཚོགས་པདྨ་འདབ་མ་བརྒྱད་པའི་ནས། ཐགས་བཟང་རིགས་དུད་ཁ་རྣམས་གན་རྐྱལ་དུ་གནས་པར་གྱུར། ས་ཆོག་བྱས་ན། ནམ་མཁར་བཏེག་པའི་ལྷ་སྤྱན་འདྲེན་པ་ཡིན་ལ། ས་ཆོག་མ་བྱས་པའི་ཕྱོགས་ལ་དེ་བཞིན་གཤེགས་པ་མཁའ་ཁྱབ་སྤྱན་འདྲེན་པ་བློ་ཡུལ་དུ་བཞག་ནས། རང་གི་སྙིང་ག་ནས་འོད་ཟེར་
འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་འདུས་པའི་ངོ་བོ། བཅོམ་ལྡན་འདས་དཔལ་དགྱེས་པ་རྡོ་རྗེ་ལྷ་དགུའི་དཀྱིལ་འཁོར་བ་ཐམས་ཅད་ཨོཾ་བཛྲ་ས་མཱ་ཛཿ མཆོད་ཡོན་དང་ཞབས་བསིལ་ཕུལ་ལ། སོ་སོའི་གདན་གྱི་སྟེང་དུ་བཞུགས་པར་གྱུར་པ་ནི། དབུས་སུ་བཅོམ་ལྡན་འདས་དཔལ་དགྱེས་པ་རྡོ་རྗེ་སྐུ་མདོག་མཐིང་ནག་ནས། བཅོམ་ལྡན་འདས་དང་མཚུངས་པའོ། །ཤར་དུ་གཽ་རཱི་ནག་མོ་ནས། བཅོམ་ལྡན་འདས་མ་དང་མཚུངས་པའོ། །བར་དེར་མཆོད་པ་གསར་དུ་བཤམས་ཡོད་ན། མཆོད་པ་བྱིན་རླབས་མདོར་བསྡུས་སྤྱི་དང་མཐུན་པར་བྱ། བསྡུ་ན། ཧཱུཾ་ལས་བྱུང་བའི་མཆོད་པ་ནམ་མཁའི་མཐས་ཀླས་པར་གྱུར། ཨོཾ་ཨཱཿཧཱུཾ་ཞེས་ལན་མང་དུ་བརྗོད། ཆུ་གཉིས་ལ་གོང་དུ་བཤད་པའི་སྔགས་ལན་གསུམ་རེ་བཟླས་ལ། དེ་བ་པི་ཙུ་ལན་བདུན་གྱི་མཐར། ཨོཾ་ཨཱཿཧྲི་པྲ་བ་ར་སཏྐ་ར་ཨར་ཐཾ་བཛྲ་ཨརྒྷཾ་པྲ་ཏཱིཙྪ་སྭཱཧཱ། ཞེས་པ་དང༌། སྤྲོ་ན་དཀྱིལ་འཁོར་བ་གཞན་རྣམས་ཀྱི་སྔགས་ཀྱི་མཐར་ཡང་དེ་བཞིན་དུ་སྦྱར་ཏེ་མཆོད་ཡོན་ཕུལ། དེ་བཞིན་དུ། ཨརྒྷཾ་གྱི་གནས་སུ་པཱདྱཾ་སྦྱར་བས་ཞབས་བསིལ་ཕུལ། ཨོཾ་མེ་ཏོག་བཟང་པོ་མཛེས་ཤིང་གཙང༌། །གཙང་མའི་གནས་སྐྱེས་འདི་རྣམས་ནི། །བདག་གིས་གུས་པས་འབུལ་ལགས་ན། །སོ་སོར་བཞེས་ཏེ་དགྱེས་པར་མཛོད། །ཨོཾ་བཛྲ་པུཥྤེ་ཨཱཿཧཱུཾ་སྭཱཧཱ། ཡིད་དགའི་སྙིང་པོ་རོ་མཆོག་ལྡན། །བདུག་སྤོས་བླ་རེ་དྲི་ཞིམ་འདི། །བདག་གིས༴ །སོ་སོར༴ །དྷུ་པེ། སྲིན་པོ་འཇོམས་ཤིང་དག་བྱེད་ལ། །དགེ་
ཞིང་མུན་པ་རྣམས་སེལ་འདི། །བདག་གིས༴ །སོ་སོར༴ །ཨཱ་ལོ་ཀེ །གཙང་ཞིང་གཙང་ལ་དགེ་བའི་དྲི། །སྐྱེ་གནས་གཙང་མར་ལྡན་འདི་རྣམས། བདག་གིས༴ །སོ་སོར༴ །གནྡྷེ། སྨན་རྣམས་བཅུད་གཙང་ཡིད་འོང་དགེ །སྔགས་ཀྱི་ཞལ་ཟས་བཤོས་འདི་དག །བདག་གིས༴ །སོ་སོར༴ །ནཻ་བི་ཏྱ། དེ་ལས་གཞན་ཡང་སོགས། ཤཔྟ། རྩ་རྒྱུད་ཀྱི་བླ་མ་ཐམས་ཅད་ཀྱི་ཞལ་དུ་ཨོཾ་ཨཱཿཧཱུཾ། ཞེས་དངོས་སུ་རིགས་བདག་ལ་ཕུལ། ལྷ་སོ་སོའི་སྙིང་པོའི་མཐར་འབྲུ་གསུམ་བཏགས་པས་ནང་མཆོད་འབུལ། མཁའ་གསང་བྱིན་གྱིས་རླབས་པ་ཡིད་ཀྱིས་དྲན་པར་བྱས་ནས། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ན་བཛྲ་སྭ་བྷཱ་བ་ཨཏྨ་ཀོ྅ཧཾ། ཞེས་གསང་བའི་མཆོད་པའོ། ཁྱོད་ནི་རྣལ་འབྱོར་མ་ཚོགས་ཡོངས་སུ་བསྐོར། ཁྱོད་ནི་ཉིད་ཀྱི་ཐུགས་ཀྱི་དགོངས་པ་འགྲུབ། །རྒྱུ་དང་མི་རྒྱུའི་འཁོར་བ་ཀུན་འགྲུབ་ཁྱོད། །སྙིང་རྗེའི་ཐུགས་ཀྱི་སེམས་ཅན་བྱང་ཆུབ་སྟེ། །ཀུན་རྫོབ་སྒྱུ་མ་བྱང་ཆུབ་སྒྲུབ་པའི་ཡིད། །དགྱེས་པའི་རྡོ་རྗེ་ཧེ་རུ་ཀ་དཔལ་བསྟོད། །ཅེས་བསྟོད་པ་དང་ལྷན་ཅིག་རོལ་མོའི་སྒྲ་བྱ་ཞིང༌། སྤྲོ་ན་དེའི་རྗེས་སུ་མཚོ་སྐྱེས་ཀྱིས་མཛད་པའི་བསྟོད་པ་ཉི་ཤུ་པ་སོགས་ཇི་ལྟར་རིགས་པས་བསྟོད་དོ། །དེ་ནས་གཏོར་མ་འབུལ་བ་ནི། རང་གི་སྙིང་གའི་ཧཱུཾ་ལས་འོད་ཟེར་འཕྲོས། ཞེས་པ་ནས། བཛྲ་ས་མཱ་ཛཿ ཛཿཧཱུཾ་བཾ་ཧོཿ མདུན་བསྐྱེད་ཀྱི་དཀྱིལ་འཁོར་དང་གཉིས་སུ་མེད་པར་ཐིམ། རང་གི་སྙིང་ག་ནས་འོད་ཟེར་འཕྲོས། ཕྱོགས་སྐྱོང་ལྷ་ཀླུ་ཞེས་པ་མན་ཆད་སྔར་དང་འདྲ་བ་ལས། གཤེགས་གསོལ་
གྱི་སྐབས་གཏོར་མགྲོན་འཇིག་རྟེན་པ་རྣམས་ཁོ་ན་གཤེགས་སུ་གསོལ་བ་ཡིན་ནོ། །དེ་ནས་ཐོད་པའི་སྣོད་དུ་ཤ་ཆེན་གྱི་སྤོས་སྦྱར་བའམ། དེ་ལྟར་མོས་ལ། གཉིས་མེད་ཡེ་ཤེས་ལས་བྱུང་བའི། ཁྱབ་བདག་དངོས་ཀུན་བདག་ཉིད་ཆེ། །སྟོན་པའི་གཙོ་བོ་ཁྲག་འཐུང་དཔལ། །བདག་མེད་ལྷན་ཅིག་ཡང་དག་སྦྱོར། །ཞེས་སོགས་ཀྱི་སྙན་གསན་ཕབ། ཨོཾ་བཛྲ་ཨུ་ཏིཥྛ་ཞེས་རྡོ་རྗེ་གཙུག་ཏོར་གྱི་ཕྱག་སྤྱི་བོར་ལྡོག་སྟེ། དཀྱིལ་འཁོར་གྱི་ལྷ་ཚོགས་མདུན་གྱི་ནམ་མཁར་བཏེགས། ཆུ་གཉིས་སྔོན་དུ་འགྲོ་བའི་ཉེར་སྤྱོད་རོལ་མོ་དང་བཅས་པ་སྔགས་ཙམ་གྱིས་ཕུལ། སྤྱན་མ་དྲངས་ཀྱི་བར་དུ་འདིར་བཞུགས་ལ་བསྲུང་བ་ཆེན་པོ་མཛད་པ་དང༌། ནངས་པར་དཀྱིལ་འཁོར་ཆེན་པོ་བྱིན་གྱིས་རླབས་ཏེ། བདག་ལ་བྱིན་གྱིས་རླབས་པའམ། བདག་སློབ་མར་བཅས་པ་ལ་བྱིན་གྱིས་བརླབ་ཏུ་གསོལ། ཞེས་སོགས་ཅི་རིགས་པས་གསོལ་བ་བཏབ། རཀྵའི་སྔགས་ལན་གསུམ་གྱིས་བསྲུང་བས་བསྐོར། གསུམ་པ་བུམ་པ་སྟ་གོན་ནི་དབང་བུམ་དགུ་དང་ལས་བུམ་གཅིག་ཏེ་བཅུའམ། བསྡུ་ན་རྣམ་རྒྱལ་དང་ལས་བུམ་གཉིས་ལེགས་པར་བཀྲུས་ཤིང༌། གོས་གཙང་མ་དཀར་པོའམ་སེར་པོས་གཡོགས། མགྲིན་པར་སྲད་བུས་ལན་བདུན་དུ་དཀྲིས་ཤིང༌། གུ་གུལ་གྱིས་བདུགས། དྲི་བཟང་གི་ཆུ་གཙང་མས་བཀང༌། རིན་པོ་ཆེ་ལྔ་དང༌། སྨན་ལྔ་དང༌། འབྲུ་སྣ་ལྔ་རྣམས་བླུགས། ཤ་ལྔ་བདུད་རྩི་ལྔ་ཡང་སྦྱར། ཡལ་གས་ཁ་རྒྱན་མེ་ཏོག་འཕྲེང་བ་དང་བཅས་པའི་རྡོ་རྗེ་བཞག །བུམ་པའི་སྟེང་ངམ་སྟེགས་བུ་གཞན་དུ། དུང་ཆོས་སམ་ཐོད་པའི་སྣོད་དུ་མཆོད་ཡོན་བཤམས། དེ་ལ་མཆོད་པའང་བཤམས་ཤིང༌། མཆོད་པ་བྱིན་གྱིས་རླབས། བུམ་པ་
བསངས་སྦྱངས། བསྐྱེད་ཆོག་སྤྱི་དང་འདྲ་བ་ལས། བུམ་པ་དགུ་ཡོད་ན་དབུས་ཀྱི་བུམ་པར། བཅོམ་ལྡན་འདས་དཔལ་དགྱེས་པ་རྡོ་རྗེ་སོགས་དང༌། ཤར་གྱི་བུམ་པར་གཽ་རཱི་ནག་མོ་སོགས་བསྐྱེད་ལུགས་རིགས་པས་བསྒྲེ་ཞིང༌། རྣམ་པར་རྒྱལ་བའི་བུམ་པ་གཅིག་པུ་ཡིན་ན། རྣམ་རྒྱལ་བུམ་པའི་ནང་དུ་སྣ་ཚོགས་པདྨ་འདབ་མ་བརྒྱད་པ་ཞེས་པ་ནས། གན་རྐྱལ་དུ་གནས་པའི་བར། དབུས་ཀྱི་གདན་གྱི་སྟེང་དུ་བཅོམ་ལྡན་འདས་དཔལ་དགྱེས་པ་རྡོ་རྗེ་ནས། བཅོམ་ལྡན་འདས་དང་མཚུངས་པའོ། །ཤར་དུ་གཽ་རཱི་ནས། བཅོམ་ལྡན་འདས་མ་དང་མཚུངས་པའོ། །རང་གི་སྙིང་ག་ནས་འོད་ཟེར་འཕྲོས། ཡེ་ཤེས་སེམས་དཔའ་དཀྱིལ་འཁོར་གྱི་འཁོར་ལོ་མདུན་གྱི་ནམ་མཁར་བཛྲ་ས་མཱ་ཛཿ ཆུ་གཉིས་ཕུལ། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། དེའི་རྗེས་སུ་སླར་ཡང་ཆུ་གཉིས་ཉེར་སྤྱོད་རོལ་མོ་རྣམས་སྔགས་ཀྱི་ཕུལ་ཞིང༌། ཁྱོད་ནི་རྣལ་འབྱོར་མ་སོགས་ཀྱིས་བསྟོད། ཡབ་ཡུམ་འདོད་ཆགས་ཆེན་པོས་སྙོམས་པར་ཞུགས་པས། དཀྱིལ་འཁོར་གྱི་ལྷ་ཐམས་ཅད་བྱང་ཆུབ་སེམས་ཀྱི་ངོ་བོར་ཞུ་སྟེ། བུམ་པ་གང་བར་གྱུར། གཙོ་བོའི་སྙིང་པོ་བརྒྱ་རྩ་དང༌། འཁོར་རྣམས་ཀྱི་སྔགས་ཅི་རིགས་པར་བཟླ་ཞིང༌། མཐར་ཨ་བྷི་ཥེ་ཀ་ཏའི་སྔགས་ཀྱང་བཟླའོ། །དེ་བཞིན་དུ། ལས་ཐམས་ཅད་པའི་བུམ་པར་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས། ཁྲོ་བོ་བདུད་རྩི་འཁྱིལ་པ་གཡས་པ་རྡོ་རྗེ་འཕྱར་ཞིང༌། གཡོན་སྡིགས་མཛུབ་བསྡིགས་པ། ཁྲོ་བོའི་ཆ་བྱད་ཡོངས་སུ་རྫོགས་པར་གྱུར། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ།
བརྒྱ་རྩ་ལས་མི་ཉུང་བར་བཟླས། སྔ་མ་བཞིན་མཆོད་ལ། འཇིགས་པའི་ཧཱུཾ་སྒྲ་ངེས་སྒྲོག་ཅིང༌། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་མ་ལུས་སྩོལ་བའི་ལྷ། །བགེགས་ཀྱི་དགྲ་ལ་ཕྱག་འཚལ་བསྟོད། །དཀྱིལ་འཁོར་གྱི་བྱ་བ་མཐར་མ་ཕྱིན་གྱི་བར་དུ་བགེགས་ཐམས་ཅད་བསྲུང་ཞིང་བཟློག་པའི་འཕྲིན་ལས་མཛོད་ཅིག །མཆོད་ཡོན་གྱི་ལྷག་མ་དེ་རྫོགས་པར་བླུག་ལ། ཨོཾ་ཨཱཿཧཱུཾ་ཞེས་བརྗོད། འདི་སྐད་ཅིག་གིས་བསྐྱེད་ཅིང༌། ཡེ་ཤེས་པ་སྤྱན་དྲངས་པ་མེད་པས་གཤེགས་པའམ་བཞུགས་པ་གང་ཡང་མི་དགོས་སོ། །སློབ་མ་སྟ་གོན་ནི། མདོར་བསྡུ་ན། བྱང་ཆུབ་ཏུ་སེམས་བསྐྱེད་པ་གསལ་འདེབས་སུ་བཅུག་ཅིང༌། དགའ་ཆེན་ཁྱོད་བདག་སྟོན་པ་སྟེ། །སོགས་གསོལ་བ་འདེབས། བུ་ཚུར་ཐེག་པ་ཆེན་པོ་ཡི། །སོགས་སྤྲོ་བ་བསྐྱེད། དཀོན་མཆོག་གསུམ་ལ་བདག་སྐྱབས་མཆི། །སོགས་རྒྱུན་བཤགས་བྱ། སྙིང་པོའི་སྔགས་ཀྱིས་སློབ་མ་ལ་བསྲུང་བ་བྱས། གནས་གསུམ་དུ་འབྲུ་གསུམ་བཀོད་ཅིང་བདུད་རྩིས་ཐིག་ལེ་བྱ། དེ་ལ་མེ་ཏོག་བདུག་སྤོས་མར་མེ་དྲི་ཆབ་རྣམས་ཕུལ། དེ་ནས་སོ་ཤིང་དོར་བ་དང༌། ཁྱོར་ཆུ་བྱིན་པ་དང༌། བསྲུང་སྐུད་བྱིན་པ་དང༌། ཀུ་ཤ་སྟེར་བ་རྣམས་དང༌། འཇིག་རྟེན་དུ་ནི་ཀུན་མཁྱེན་རྣམས། །ཞེས་སོགས་བརྗོད་པ་ཟབ་མོའི་ཆོས་ལ་སྤྲོ་བ་བསྐྱེད་པ་དང༌། རྨི་ལམ་བརྟག་ཅིང་ངན་ན་བསྲུང་བ་རྣམས་ངེས་པར་བྱ་ལ། རྡོ་རྗེ་སློབ་དཔོན་གྱི་དབང་བསྐུར་ན། གསོལ་བཏབ་ཀྱི་སྔོན་དུ་ནང་དབང་བསྐུར་བ་དང༌། རྨི་ལམ་བརྟག་པའི་མཐར་རིགས་ལྔའི་སྡོམ་པ་བཟུང་བའི་དོན་བཤད་ནས། དགོངས་གསོལ་སྔོན་དུ་འགྲོ་བའི། ཇི་ལྟར་དུས་གསུམ་མགོན་པོ་རྣམས། །
ཞེས་སོགས་རིགས་ལྔའི་སྡོམ་བཟུང་ལན་གསུམ། དེ་དག་ཐམས་ཅད་ཆོ་ག་སྤྱི་དང་འདྲའོ། །ལྷག་གནས་སྟ་གོན་གྱི་སྐབས་ཏེ་བཅུ་གཅིག་པའོ།། །།གསུམ་པ་དཀྱིལ་འཁོར་ཞག་གི་བྱ་བ་ནི། ནངས་པར་སྔར་ལངས་ཏེ། ཐིག་ཚོན་རྣམས་ཀྱི་མདུན་དུ་མཆོད་པ་བཤམས། རང་ཕྱག་གཉིས་པའི་ང་རྒྱལ་གྱིས་མཆོད་པ་བྱིན་གྱིས་རླབས། ཐིག་ཚོན་རྣམས་བསངས་སྦྱངས། སྟོང་པའི་ངང་ལས། ཧཱུཾ་ལས་བྱུང་བའི་ཐིག་སྐུད་དང་རྡུལ་ཚོན་སྔོན་པོ་མི་བསྐྱོད་པའི་ངོ་བོ། ཨོཾ་ལས་བྱུང་བའི་སོགས་གོང་བཞིན་སྦྱར། དཀར་པོ་རྣམ་སྣང་གི༴ ཨཾ་ལས་བྱུང་བའི༴ སེར་པོ་རིན་ཆེན་འབྱུང་ལྡན་གྱི་ངོ་བོ། ཛྲིཾ་ལས་བྱུང་བའི༴ དམར་པོ་འོད་དཔག་མེད་ཀྱི་ངོ་བོ། ཁཾ་ལས་བྱུང་བའི་ཐིག་སྐུད་དང་རྡུལ་ཚོན་ལྗང་ཁུ་དོན་ཡོད་གྲུབ་པའི་ངོ་བོ། རང་གི་སྙིང་ག་ནས་འོད་ཟེར་འཕྲོས། དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་སྲད་བུ་དང་རྡུལ་ཚོན་བཛྲ་ས་མཱ་ཛཿ ཛཿཧཱུཾ་བཾ་ཧོཿ ལན་བཅུ། གཉིས་སུ་མེད་པར་ཐིམ། འབྲུ་གསུམ་ལན་མང་དུ་བརྗོད་པས་བྱིན་གྱིས་རླབས། ཧཱུཾ་བྷྲུཾ་ཨཾ་ཛྲིཾ་ཁཾ་ཞེས་བཟླ་ཞིང་ཐིག་སྐུད་བསྒྲིལ། ཛྫཿཛྫཿཛྫཿ ཞེས་ཐིག་སྣེ་སློབ་མ་ལ་གཏད། དང་པོར་ཡེ་ཤེས་ཀྱི་ཐིག་ཐིག་ཆེན་བརྒྱད་བཏབ། ཨོཾ་བཛྲ་སཱུ་ཏྲ་ས་མ་ཡ་མ་ཏྲི་ཀྲ་མ་ཧཱུཾ། ཞེས་སོ། །དེ་ནས་ལས་ཐིག་གི་ཆ་དབྱེ་བར་བྱ་སྟེ། དེ་ལ་ཡབ་ཀྱི་དཀྱིལ་འཁོར་ནི་འཕར་མ་གཅིག་པ་ཡིན་པས། ནང་གི་ཟླུམ་ཐིག་ཕྱི་མ་སྒོ་བཞིའི་ཚངས་ཐིག་དང་འབྲེལ་བའི་ཐད། རྩ་ཐིག་ལ་རེག་པར་གདབ་ཅིང༌། རྡོ་རྗེ་བདག་མེད་མའི་དཀྱིལ་འཁོར་ལ་ནི་འཕར་མ་གཉིས་པ་ཡིན་པའི་ཕྱིར། པདྨ་ཉིས་རིམ་དུ་བྱས་ན་ནི། ཟླུམ་ཐིག་ཕྱི་མ་ཡབ་ཀྱི་དེ་དང་འདྲ་བ་ལས། ཟླུམ་ཐིག་ནང་མ་ནི་གཡས་གཡོན་དུ་ཆ་ཆུང་བཅུ་པའི་སྟེང་ནས་བསྐོར་བར་བྱ་བ་ཡིན་ལ། པད་
འདབ་རིམ་པ་ཕྱི་མ་མེད་པ་ལ་ནི་ཆ་ཆུང་བཅུ་པའི་ཟླུམ་ཐིག་སྐོར་བ་ཁོ་ནའམ། བཅུ་གཉིས་པའི་མཚམས་ནས་བསྐོར་བ་ཇི་ལྟར་བདེ་བས་རུང་ངོ༌། ཁ་ཅིག་ནི་པདྨའི་ལྟེ་བ་ཆ་ཆུང་བརྒྱད་པར་བྱས་ནས། འདབ་མའི་ཐིག་ལ། ཟླུམ་པོ་ནང་མ་བཅུ་པ་དང༌། ཕྱི་མ་བཅུ་དྲུག་གི་མཚམས་ནས་བསྐོར་བར་འདོད་དེ། དེ་ཐམས་ཅད་མི་འགལ་བར་མངོན་ནོ། །ཐིག་གི་བྱ་བ་ཟིན་པ་ན། ཨོཾ་བཛྲ་ཙི་ཏྲ་ས་མ་ཡ་ཧཱུཾ། ཞེས་ལན་མང་དུ་བཟླས་ནས། ཨོཾ་བཛྲ་བེ་གཱ་ཀྲ་མ་ཧཱུཾ། ཞེས་རྡོ་རྗེ་གཙུག་ཏོར་གྱི་ཕྱག་རྒྱས་ཐིག་རྣམས་བཏེག་པར་མོས་ལ། སློབ་དཔོན་དབུས་སུ་ཞུགས་ཏེ། ཧཱིཿཧཱིཿཞེས་སྒོའི་ཐད་ཀའི་རྩ་ཐིག་ཕྱེས། དབུས་ཀྱི་ཕུར་ཁུང་རྡུལ་ཚོན་གྱིས་བགང་ཞིང༌། དང་པོར་སློབ་དཔོན་གྱིས་ཇི་ལྟར་རིགས་པ་ནས་བྲིའོ། །དེ་ལ་སྙིང་པོའི་ཧེ་རུ་ཀའི་དཀྱིལ་འཁོར་ལ་དབུས་ཀྱི་མཚན་མ་སྣ་ཚོགས་རྡོ་རྗེས་མཚན་པའི་ཐོད་པ་ཉིད་ཡིན་གྱི། རྒྱུད་ལས་མ་གསུངས་པས་གྲི་གུག་འབྲི་མི་དགོས་ལ། སྣ་ཚོགས་རྡོ་རྗེ་ཐབས་དང་ཐོད་ཁྲག་ཤེས་རབ་མཚོན་པའི་ཡུམ་གྱི་མཚོན་དོན་ཡང་ཚང་ངོ༌། །ལེགས་པར་བྲིས་ཟིན་པ་ན་རོལ་མོའི་སྒྲ་དང་བཅས་པས་སློབ་དཔོན་གྱིས་རྡོ་རྗེ་གསོར་བཞིན་དུ། ཡིག་བརྒྱ་ལན་མང་དུ་བཟླས། བོད་རྙིང་པ་རྣམས་ཀྱི་ལག་ལེན་དང་མཐུན་པར། བགེགས་སྦྱང་བ་དང༌། སྡིག་པ་སྦྱང་བ་དང༌། ཁྲུས་གསོལ་རྣམས་ཀྱང་བྱས་ན་ལེགས་པར་འགྱུར་ཞིང༌། མཆོད་གཏོར་དང་རྒྱན་བཀྲམ་ཞིང༌། བུམ་པ་རྣམས་ཀྱང་རོལ་མོའི་སྒྲ་དང་བཅས་ཏེ་དཀྱིལ་འཁོར་ལ་ལན་གསུམ་བསྐོར་ནས་གཙོ་བོའི་བུམ་པ་ཤར་སྒོའི་གཡས་དང༌། ལས་བུམ་གཡོན་དུ་བཞག །གཞན་རྣམས་ལྷ་རང་རང་སོ་སོའི་གནས་སམ། དེ་དང་དེའི་ཐད་ཀྱི་ཕྱི་རོལ་ཏུ་བཞག་གོ །མི་བདེ་བ་མེད་
ན་གཙོ་བུམ་ཡང་དབུས་སུ་འཇོག་པར་སློབ་དཔོན་སྔ་མ་རྣམས་བཞེད་པ་ལྟར་བྱ་ལ། དཀྱིལ་འཁོར་དུ་འཇོག་པར་མི་བདེ་ན། བཞག་པར་མོས་ཤིང་ཕྱོགས་གཞན་དུ་བཞག་ཀྱང་ཆོག་གོ །རྣམ་རྒྱལ་བུམ་པ་གཅིག་པུ་ཡིན་ན། ལྷ་སོ་སོའི་སྔགས་དང་བཅས་ཐམས་ཅད་དུ་འཇོག་ཚུལ་བྱས་ནས། མཐར་རང་གནས་སུ་བཞག་གོ །དཀྱིལ་འཁོར་ཞག་གི་བྱ་བའི་སྐབས་ཏེ་བཅུ་གཉིས་པའོ།། །།བཞི་པ་དཀྱིལ་འཁོར་སྒྲུབ་པ་ནི། འདི་ལ་བདག་མདུན་ཐ་དད་དུ་སྒྲུབ་པ་ལ་མོས་ན་ཐ་དད་དང༌། གཅིག་ཏུ་སྒྲུབ་པ་ལ་མོས་ན་གཅིག་ཏུ་སྟེ། དང་པོ་ལྟར་ན་བདག་བསྐྱེད་སྔོན་དུ་འགྲོ་བའི་སྒོ་ནས། བྲིས་པའི་དཀྱིལ་འཁོར་རྣམས་ལེགས་པར་བསྐྱེད་ཅིང༌། དེའི་གཙོ་བོ་དང་བདག་ཉིད་དབྱེར་མེད་དུ་མོས་ཤིང༌། རིག་མ་དང་སྙོམས་པར་ཞུགས་པའི་སྒྲས། སངས་རྒྱས་རྣམས་སྤྱན་དྲངས་ཏེ། བགེགས་བསལ་ལ་ལུས་ནང་དུ་བཅུག །གསང་བའི་པདྨ་ནས་དཀྱིལ་འཁོར་གྱི་ལྷ་ཚོགས་ཀྱི་རྣམ་པར་སྤྲོས་ཏེ། ནམ་མཁར་བཞུགས་པ་ལ་མཆོད་ཅིང་གསོལ་བཏབ་ནས། བྲིས་པའི་དཀྱིལ་འཁོར་ལ་གཞུག །སྟ་གོན་གྱི་ལྷ་དང་བསྲེ་བ་དང༌། དབང་བསྐུར་བ་རྣམས་བྱེད་པ་ཡིན་པ། རྡོ་རྗེ་གུར་སོགས་ལས་རིམ་གཙོ་བོར་སྟོན་པའི་རྒྱུད་ལ་ཆོ་ག་རྒྱས་པ་འོས་ཤིང༌། དེའི་ཕྱིར་འདིར་ཡང་དེ་བཞིན་བྱེད་པ་སྐྱོན་དང་བྲལ་བའི་ལུགས་ཡིན་ནོ། །འོན་ཀྱང་བརྟག་པ་གཉིས་པ་འདིར་ནི་སྒོམ་པ་ཁོ་ན་གཙོ་བོར་གསུངས་ཤིང༌། ལས་ཀྱི་རིམ་པའི་སྤྲོས་པ་ཤིན་ཏུ་ཉུང་བ་དང༌། དཀྱིལ་འཁོར་ཡང་བསྡུས་པ་ཙམ་བསྟན་པའི་ཕྱིར། སྙིང་པོའི་དགོས་དོན་མ་ཚང་བ་མེད་པའི་སྤྲོས་པ་ཆུང་བ་ཉིད་བསྔགས་པ་ཡིན་པས། འདིར་ཡང་བདག་མདུན་དབྱེར་མེད་དུ་སྒྲུབ་པ་ཉིད་བཟང་ངོ༌། །དེ་ལྟར་ན་འདི་སྐད་ཅེས་བྱ་སྟེ། སྔོན་འགྲོ་གཏོར་མ་དང༌། གནས་དང་ཡོ་བྱད་བྱིན་གྱིས་བརླབས་པ་དང༌། སྤྲོ་ན་སྐྱབས་འགྲོ་
སོགས་སྔོན་འགྲོ་རྣམ་པ་གསུམ་ཡང་བྱས་ལ། ནང་མཆོད་བྱིན་གྱིས་བརླབས། མདུན་བསྐྱེད་ཀྱི་དཀྱིལ་འཁོར་བསངས་སྦྱངས། སྟོང་པའི་ངང་ལས་ནས། བསྲུང་འཁོར་དུ་གྱུར། ཅེས་པ་ནས། ར་ལས་དང༌། ཧཱུཾ་ལས་དང༌། ཧཱུཾ་གིས་མཚན་པ་ལས་འོད་འཕྲོས་རྣམས་དོར། དེའི་ནང་དུ་གཞལ་ལས་ཁང་ནས། གན་རྐྱལ་དུ་གནས་པ། དབུས་སུ་ཐོད་པ་སྣ་ཚོགས་རྡོ་རྗེས་མཚན་པ། ཤར་དུ་གྲི་གུག །ལྷོར་ཌ་མ་རུ། ནུབ་ཏུ་རུས་སྦལ། བྱང་དུ་སྦྲུལ། བྱང་ཤར་དུ་སེང་གེ །ཤར་ལྷོར་དགེ་སློང༌། ལྷོ་ནུབ་ཏུ་འཁོར་ལོ། ནུབ་བྱང་དུ་རྡོ་རྗེ་རྣམས་ལྷ་དགུའི་བདག་ཉིད་དུ་གནས་པར་གྱུར། དབུས་ཀྱི་ཐོད་པའི་གནས་སུ། རང་སྐད་གཅིག་གིས་དགྱེས་རྡོར་དུ་གསལ་བའི་ཞེས་པ་ནས། གྲི་གུག་དང་ཐོད་པ་འཛིན་པའོའི་བར་བདག་བསྐྱེད་བཞིན། དེ་ནས། རང་གི་སྙིང་ག་ནས་སྤྲོས་པའི་འོད་ཟེར་ལྕགས་ཀྱུ་ལྟ་བུས། ལྷག་པར་གནས་པའི་དཀྱིལ་འཁོར་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ ཨ་མྲྀ་ཏ་ལན་གསུམ་གྱིས་བགེགས་བསྐྲད། ཆུ་གཉིས་ཉེར་སྤྱོད་རོལ་མོ་དང་བཅས་པ་ཕུལ། ཨོཾ་བཛྲ་ཨཾ་གུ་ཤ་ཛཿ ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་བཛྲ་གྷཎྜེ་ཧོཿ ཞེས་པའམ། ཨོཾ་གཽ་རཱི་ཛཿ ཨོཾ་ཙཽ་རཱི་ཧཱུཾ། ཨོཾ་བཻཏྟ་ལཱི་བཾ། ཨོཾ་གྷསྨ་རཱི་ཧོཿ ཞེས་པ་གང་རུང་གིས་དགུག་གཞུག་བཅིང་མཉེས་བྱའོ། །སླར་ཡང་རང་གི་སྙིང་ག་ནས་འོད་ཟེར་འཕྲོས། ཡེ་ཤེས་ནས། ས་མཱ་ཛཿ གོང་བཞིན་བགེགས་བསྐྲད། མཆོད་པ་ཕུལ། དགུག་གཞུག་བྱ། སླར་ཡང་སྙིང་གའི་ནས། བཟླས་པའི་བར་དུའང་སྒྲུབ་ཐབས་བཞིན་ལས།
རྫོགས་རིམ་སྒོམ་པ་དཀྱུས་ལ་མི་དགོས་སོ། །བཟླས་པ་ཅི་རིགས་པ་གྲུབ་ནས། དཀྱིལ་འཁོར་གྱི་གཙོ་བོའི་ཐུགས་ཀ་ནས་རང་ལས་ཀྱི་ཧེ་རུ་ཀ་ཕྱག་གཉིས་པ་སྤྲོས་ཏེ་མཆོད་པའི་ལས་མཛད་པར་གྱུར། མཆོད་པ་བྱིན་རླབས། མཆོད་བསྟོད་གཏོར་མ་འབུལ་ཚུལ་རྣམས་གོང་དུ་བཤད་པ་བཞིན་ནོ། །དེ་ཡང་འཇིག་རྟེན་ལས་འདས་པའི་གཏོར་མ་བར་ཆད་བསྲུང་བའི་དོན་དུ་རེ་ཤིག་བཞག་ལ། བདག་འཇུག་གི་མཐར་གཏོང་བའམ། སློབ་མ་དབང་བསྐུར་ཟིན་པའི་རྗེས་སུ་ཁང་སྟེང་དུ་གཏོར། ཕྱི་རོལ་གཏོར་མ་བཏང་བ་ཡིན་ན། དེའི་རྗེས་ཐོགས་འདས་གཏོར་བཏང་ཀྱང་རུང་ངོ༌། །འཇིག་རྟེན་པའི་གཏོར་མ་ནི། སྐབས་འདི་ཉིད་དུ་གཏོང་བའམ། ཚོགས་ཀྱི་འཁོར་ལོ་ཡོད་ན་ལྷག་གཏོར་དང་ལྷན་ཅིག་གཏོང་བ་ལས། ཚོགས་འཁོར་ཡང་སྐབས་འདིར་བྱའམ། བདག་འཇུག་གི་མཐར་བྱས་ཀྱང་རུང་ངོ༌། །དེ་བཞིན་དུ་སྦྱིན་བསྲེག་ཀྱང་གནས་སྐབས་གཉིས་པོ་འདིར་བྱ་སྟེ། དེ་གཉིས་ལས་ཀྱང་གཙོ་བོར་སྐབས་འདིར་བྱེད་པ་ལེགས་སོ། །དེ་བཞིན་དུ་ཕྱི་རོལ་གཏོར་མ་གཏོང་ནའང༌། གནས་སྐབས་གཉིས་པ་དེར་བྱ་ལ། ཕྱི་རོལ་གཏོར་མ་མཐའ་གཅིག་ཏུ་ངེས་པར་དགོས་པའང་མ་ཡིན་ནོ། །འོན་ཀྱང་ཁོ་བོ་ཅག་གི་བླ་མ་གསང་སྔགས་རིག་པ་དེ་དག་འདི་ལྟར་བཞེད་དེ། ནང་གཏོར་འདས་པ་དང་འཇིག་རྟེན་པ་གཉིས་ཕུལ་ཞིང༌། ཕྱི་རོལ་ཏུ་མ་བཏང་བར། བར་འདིར་སྦྱིན་བསྲེག་གིས་ལྷ་རྣམས་མཉེས་པར་བྱས། དེ་ནས་ཕྱི་རོལ་བའི་གཏོར་མ་བཏང་ཞིང༌། སླར་ནང་དུ་འོངས་ནས། བདག་ཉིད་འཇུག་ཅིང་དབང་བླང་བ་ཡིན་ལ། སློབ་མ་ལ་དབང་བསྐུར་བའི་ཚེ་ཡོ་བྱད་འཛོམས་ན། སླར་ཡང་སྦྱིན་བསྲེག་དང་ཚོགས་ཀྱི་འཁོར་ལོས་ལྷ་མཉེས་པར་བྱ་སྟེ། སློབ་མའི་དོན་དུ་གསོལ་བ་
ཡང་ཡང་གདབ་པར་བྱའོ། །ཞེས་པ་འདི་ཉིད་ལག་ལེན་དུ་བཟུང་བར་བྱའོ། །ཅི་སྟེ་དུས་དང་ཡོ་བྱད་མ་འཛོམས་ན་སྦྱིན་བསྲེག་དང་ཚོགས་འཁོར་འདི་དག་ཡིད་ཀྱིས་སྒོམ་པ་ཁོ་ནས་ཀྱང་རུང་ངོ༌། །དེའི་དབང་དུ་བྱས་ནས་འོག་ཏུ་འཆད་པར་འགྱུར་བ་ལྟར་གྱི། སྦྱིན་བསྲེག་དང་ཚོགས་ཀྱི་འཁོར་ལོ་གཉིས་ཟིན་པ་ན། དཀྱིལ་འཁོར་ཁང་པའི་ཕྱི་རོལ་ཏུ་ཕྱི་རོལ་གཏོར་མ་མཆོད་པ་དང་བཅས་པ་ཁྱེར། མཆོད་པ་བྱིན་རླབས་བསྡུས་པ་སྔོན་དུ་འགྲོ་བས། གོང་བཞིན་གཏོར་མ་བྱིན་གྱིས་བརླབས། རང་གི་སྙིང་གའི་ཧཱུཾ་ལས་འོད་ཟེར་འཕྲོས་ཏེ། སྲིད་པ་གསུམ་གྱི་སེམས་ཅན་ཐམས་ཅད་ཕྱོགས་སྐྱོང་བ་བཅུ་ལྷ་ཀླུའི་ཚོགས་དང་བཅས་པའི་རྣམ་པར་ཨོཾ་བཛྲ་ས་མཱ་ཛཿ ཨོཾ་ཛཿཧཱུཾ། སོགས་ཀྱིས་ཆུ་གཉིས་ཕུལ། ཨོཾ་ཨིན་ད་ཛ་མ་སོགས་ལན་གསུམ་གྱིས་གཏོར་མ་ཕུལ། གོང་བཞིན་ཉེར་སྤྱོད་རོལ་མོ་ཡང་ཕུལ། འཇིག་རྟེན་སྐྱོང་བའི་ཚོགས་རྣམས་ནི། །ཞེས་པ་ནས། ཀུན་འགྲུབ་ཤོག་གི་བར་གྱི་འཕྲིན་ལས་བཅོལ། བཀྲ་ཤིས་སྨོན་ལམ་བཟོད་གསོལ་གཤེགས་གསོལ་རྣམས་ཀྱང་གོང་བཞིན་བྱས་ལ། རོལ་མོའི་སྒྲ་དྲག་པོ་དང་བཅས་ཏེ་གཏོར་མ་རིང་དུ་བཏང་ངོ༌། །སློབ་དཔོན་གྱིས་ཨཥྟ་བཟླ་ཞིང་ཚམས་རྔམ་བྱ། སླར་ནང་དུ་འོངས་ཏེ་ལས་བུམ་གྱི་ཆུས་ཉེ་རེག་བྱས་ཏེ། བདག་འཇུག་གི་བྱ་བ་ལ་འཇུག་གོ །སྤྲོས་པ་དོར་བའི་སྐབས་འདིར་སྒོ་དབྱེ་བ་ལ་སོགས་པ་ཡང་མི་དགོས་སོ། །དཀྱིལ་འཁོར་སྒྲུབ་ཅིང་མཆོད་པའི་སྐབས་ཏེ་བཅུ་གསུམ་པའོ།། །།ལྔ་པ་ལ་བདག་ཉིད་འཇུག་ཅིང་དབང་བླང་བ་དང༌། སློབ་མ་གཞུག་ཅིང་དབང་བསྐུར་བ་གཉིས་ལས། དང་པོ་ནི། མཎྜལ་ཕུལ། ཆོས་རྣམས་གཟུགས་བརྙན་ལྟ་བུ་སྟེ། །ཞེས་པ་ནས། ཀུན་གྱི་སྒྲིབ་མེད་མཐོང་བར་ཤོག །ཅེས་ལན་གསུམ།
ཨཱཿཁཾ་བཱི་ར་ཧཱུཾ་གིས་མིག་དར་བཏང༌། སྔགས་དེ་ཉིད་ཀྱིས་མེ་ཏོག་བཟུངས་ཨ་མྲྀ་ཏས་བགེགས་བསྐྲད་ཅིང༌། ལས་བུམ་གྱིས་ཆུས་གཏོར། གནས་གསུམ་དུ། ཨོཾ་ཨཱཿཧཱུཾ། ཀྱེ་ཁྱོད་སུ་ཡིན། བདག་ནི་རྒྱལ་བའི་སྲས་སོ། །སྙིང་གར་ཟླ་བ་ལ་གནས་པའི་རྡོ་རྗེ། ཨོཾ་སརྦ་ཡོ་ག་སོགས་དང༌། ཨོཾ་སུ་ར་ཏེ་ས་མ་ཡ་སོགས། ཨཱཿཁཾ་བཱི་ར་ཧཱུཾ་ཞེས་དཀྱིལ་འཁོར་ཁང་པའི་ནང་དུ་བཅུག་པར་གྱུར། སྤྲོ་ན་ཕྱོགས་བཞི་ཕྱག་འཚལ་བར་བྱེད། རྒྱུད་ལས་དེ་ཉིད་བསྡུས་པ་ལ་ཁ་འཕངས་མཛད་པའི་ཕྱིར་མཆོག་ཏུ་ལེགས་ལ། བསྡུ་ན། ཨོཾ་ན་མ་ཏེ་ཧཱུཾ། ན་མོ་མི་ཧཱུཾ། ན་མོ་ན་མ་ཧཱུཾ་སྭཱཧཱ། ཞེས་པ་འདི་ཙམ་གྱིས་ཀྱང་ཆོག་གོ །དེ་ལ་ཕྱོགས་བཞི་ནས་ཕྱག་འཚལ་གྱི་སྔགས་ནི། ཨོཾ་སརྦ་ཏ་ཐཱ་ག་ཏ་པཱུ་ཛ་ཨུ་པསྠཱ་ནཱ་ཡ་ཨཏྨ་ནཾ་ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་སཏྭ་ཨ་དྷི་ཏིཥྛ་མཾ། ཞེས་ཤར་དང༌། ཨོཾ་སརྦ་ཏ་ཐཱ་ག་ཏ་པཱུ་ཛ་ཨ་བྷི་ཥེ་ཀ་ཡ་ཨཏྨ་ནཾ་ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་རཏྣ་ཨ་བྷི་ཥིཉྩ་མཱཾ། ཞེས་ལྷོ་དང༌། ཨོཾ་སརྦ་ཏ་ཐཱ་ག་ཏ་པཱུ་ཛ་པྲ་བརྟ་ན་ཡ་ཨཱཏྨ་ནཾ་ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་དྷརྨ་པྲ་བརྟ་ཡ་མི། ཞེས་ནུབ་ཕྱོགས་དང༌། ཨོཾ་སརྦ་ཏ་ཐཱ་ག་ཏ་པཱུ་ཛ་ཀརྨ་ནཾ་ཨཏྨ་ནཾ་ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་ཀརྨ་ཀུ་རུ་མཾ། ཞེས་བྱང་ཕྱོགས་ནས་སོ། །དེའི་རྗེས་སུ་དམ་བཞག་རྣམ་པ་བཞི་ནི་སྤྱི་དང་འདྲ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ཤིག །དཔལ་རྡོ་རྗེ་སེམས་དཔའ་བདག་ལ་དབབ་ཏུ་གསོལ། ལན་གསུམ། རང་ཧེ་རུ་ཀ་ཕྱག་གཉིས་པ་རྡོ་རྗེ་དང་ཐོད་ཁྲག་འཛིན་པའི་ཐུགས་ཀར་དགྱེས་པའི་རྡོ་རྗེ་ཕྱག་གཉིས་པ་ཤེས་རབ་མ་དང་བཅས་པ། ཡབ་ཡུམ་སྙོམས་པར་ཞུགས་པའི་སྦྱོར་
མཚམས་ནས་འོད་ཟེར་དམར་པོའི་ཚོགས་སྤྲོས་ཏེ། ལུས་ཐམས་ཅད་གང་བས་ལུས་སེམས་ཐམས་ཅད་བདེ་བས་ཁྱབ། མདུན་བསྐྱེད་དཀྱིལ་འཁོར་གྱི་གཙོ་བོའི་ཐུགས་ཀ་ནས་འོད་ཟེར་འཕྲོས། ནམ་མཁའ་གང་བའི་སངས་རྒྱས་སྲས་དང་ཁྲོ་བོའི་དབང་པོ་བཙུན་མོར་བཅས་པ་རྣམས་དགྱེས་རྡོར་ལྷ་དགུའི་ལྷ་ཚོགས་ཀྱི་རྣམ་པར་སྤྱན་དྲངས་སྟེ། རང་གི་བ་སྤུའི་བུ་ག་ནས་ཞུགས་ཏེ། གཉིས་སུ་མེད་པར་ཐིམ། ཨོཾ་ཏིཥྛ་མཧཱ་ཀྲོ་དྷ་ཨ་བེ་ཤ་ཡ་ཧཱུཾ། ཞེས་དྲག་ཏུ་བཟླ་ཞིང༌། རྡུལ་གྱི་གོས་པའི་རས་དང༌། བྱི་ལ་ནག་པོའི་བྲུན་གུ་གུལ་དང་བསྲེས་པའི་དུད་པས་གདུག ། རོལ་མོའི་སྒྲ་བྱའོ། །ཏིཥྛ་བཛྲ། ཡང་དག་པ་ཡི་དཀྱིལ་འཁོར་འདི། །བདག་གི་སློབ་མ་གཞུག་པར་བགྱི། །ལྷ་རྣམས་རིགས་ཀྱི་རིམ་པ་ནི། །བསོད་ནམས་ཅི་འདྲ་དེ་འདྲར་ཤོག །རིགས་ནི་གང་གི་སྣོད་དུ་འགྱུར། །འདི་ཡི་དངོས་གྲུབ་ཅི་འདྲར་འགྱུར། །བསོད་ནམས་མཐུ་ཡང་གང་འདྲ་བ། །དེ་འདྲ་དཀྱིལ་འཁོར་དུ་གྱུར་ཅིག །ཨོཾ་པྲ་ཏིཥྛ་བཛྲ་ཧོ། པྲ་ཏི་གྲྀཧྞ། སོགས། ཧེ་རུ་ཀ་དཔལ་དེང་ཁྱོད་སོགས་མིག་དར་དགྲོལ། ཧེ་བཛྲ་པཱ་ཤྱ། ལྟོས་ཤིག་ལྟོས་ཤིག་སེམས་དཔའ་ཆེ། །སོགས་ཀྱི་བལྟ་བར་བསྐུལ། རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་མངོན་སུམ་དུ་གསལ་བར་གྱུར། རྡོ་རྗེ་སློབ་མའི་དབང་གི་དོན་དུ་མཎྜལ་ཕུལ་ལ། བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་སྐྱབས་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཅེས་ལན་གསུམ། ཨ་མྲྀ་ཏ་ལན་གསུམ་དང༌།
ཡུངས་ཀར་གཏོར་བས་བགེགས་བསྐྲད། དབང་རྫས་ལ་ཡང་ལས་བུམ་གྱིས་གསང་གཏོར་བྱ། སྭ་བྷཱ་ཝས་སྦྱངས། སྟོང་པའི་ངང་ལས། ཧཱུཾ་ལས་རང་ཉིད་དཔལ་ཧེ་རུ་ཀ་དགྱེས་པའི་རྡོ་རྗེ་ཞེས་པ་ནས། མཚུངས་པའོ། །དབང་རྫས་རྣམ་རྒྱལ་བུམ་པའི་ཆུ་ཡང་ཧཱུཾ་ཡིག་ལས་བྱུང་བའི་མི་བསྐྱོད་པའི་རྡུལ་ཕྲ་རབ་ཀྱི་ངོ་བོར་གྱུར། དཀྱིལ་འཁོར་གྱི་གཙོ་བོའི་ཐུགས་ཀ་ནས་འོད་ཟེར་འཕྲོས། དབང་གི་ལྷ་རིགས་ལྔ་ནས། རྔ་བོ་ཆེའི་སྒྲ་བསྒྲགས་ཏེ་ཤིས་པ་བརྗོད་པར་གྱུར། ཨོཾ་ཕུན་སུམ་ཚོགས་པ་སོགས། དབང་བསྐུར་རྡོ་རྗེ་ནས། ཥིཉྩ་ཧཱུཾ་ཞེས་དབང་བསྐུར། སྟོང་པའི་ངང་ལས་ཨཾ་ཡིག་ལས་བྱུང་བའི་དེ་བཞིན་གཤེགས་པ་རིགས་ལྔའི་སྐུ་གཟུགས་ཀྱི་མཚན་པའི་རིན་པོ་ཆེའི་ཅོད་པན་རིན་ཆེན་འབྱུང་ལྡན་གྱི་ངོ་བོར་གྱུར། ཨོཾ་བཛྲ་རཏྣ་མུ་ཀུ་ཊ་ཨ་བྷི་ཥིཉྩ་ཧཱུཾ། བཛྲ་ར་ག་ཏ་བཛྲ་ཤཱ་ལི་ཧོ། ཞེས་ཅོད་པན་གྱི་དབང་བསྐུར། གོང་བཞིན་ཆུ་དབང་གི་སྔགས་ཀྱི་ཀྱང་བརྟན་པར་བྱས། སྟོང་པའི་ངང་ལས་ཛྲིཾ་ལས་རྡོ་རྗེ་རྩེ་ལྔ་པ་འོད་དཔག་ཏུ་མེད་པའི་ངོ་བོར་གྱུར། སངས་རྒྱས་ཀུན་གྱི་རྡོ་རྗེ་དབང༌། །དེ་རིང་ཁྱོད་ལ་སྦྱིན་པར་བྱ། །འདི་སྟེ་སངས་རྒྱས་ཐམས་ཅད་ཉིད། །རབ་ཏུ་གྲུབ་ཕྱིར་རྡོ་རྗེ་ལོང༌། །ཞེས་རྡོ་རྗེའི་དབང་བསྐུར། ཆུ་དབང་གིས་ཀྱང་བརྟན་པར་བྱས། སྟོང་པའི་ངང་ལས་ཁཾ་ལས་བྱུང་བའི་དྲིལ་བུ་དོན་ཡོད་གྲུབ་པའི་ངོ་བོར་གྱུར། སངས་རྒྱས་ཀུན་གྱྀ་དྲིལ་བུའི་དབང༌། །ཞེས་རྡོ་རྗེའི་སྐབས་ལ་འདོན་པ་སྤོ། ཨོཾ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ཧཱུཾ། ཏིཥྛ་བཛྲ་ས་མ་ཡ། ཞེས་དྲིལ་བུའི་དབང་བསྐུར།
ཆུ་དབང་གིས་ཀྱང་བརྟན་པར་བྱས། སྟོང་པའི་ངང་ལས་བྷྲུཾ་ལས་བྱུང་བའི་མེ་ཏོག་འཕྲེང་བ་རྣམ་པར་སྣང་མཛད་ཀྱི་ངོ་བོར་གྱུར། རྡོ་རྗེའི་མིང་གི་དབང་བསྐུར་བས། །བྱང་ཆུབ་སྙིང་པོའི་བར་དུ་ནི། །ཅིས་ཀྱང་མི་ཤིགས་མི་གཡོ་བ། །རྡོ་རྗེའི་མིང་དུ་རབ་ཏུ་བསྒྲགས། །ཨོཾ་བཛྲ་སཏྭ་སྟྭཾ་ཨ་བྷི་ཥིཉྩ་ཧཱུཾ། བཛྲ་ནཱ་མ་ཨ་བྷི་ཥི་ཀ་ཏ་ཧེ་ཤྲཱྀ་ཆྒཻ་མོ་རྡོ་རྗེ་ཞེས་མིང་གི་དབང་བསྐུར། ཆུ་དབང་གིས་ཀྱང་བརྟན་པར་བྱས། ཉེར་སྤྱོད་ལྔས་མཆོད། དེ་ལྟར་ན་དབང་རྣམ་པ་ལྔ་པོ་དེ་བསྐུར་བས། ཕུང་པོ་ལྔ་རྒྱལ་བ་རིགས་ལྔར་རྣམ་པར་དག་ཅིང༌། ཉོན་མོངས་པ་ལྔའི་རང་བཞིན་རྣམ་པར་དག་པ་ཡེ་ཤེས་ལྔ་མངོན་དུ་བྱས། འབྱུང་བ་ལྔ་རྣམ་པར་དག་པ་ལྷ་མོ་ལྔ། དབང་པོ་ལྔ་རྣམ་པར་དག་པ་སེམས་དཔའ་ལྔ། ཡུལ་ལྔ་རྣམ་པར་དག་པ་རྡོ་རྗེ་མ་ལྔར་བྱིན་གྱིས་རླབས། བྱ་བ་ལས་དང་བཅས་པ་ཡང་ཁྲོ་བོ་དང་ཁྲོ་མོའི་རང་བཞིན་དུ་རྣམ་པར་དག་པར་གྱུར། དཀྱིལ་འཁོར་གྱི་གཙོ་བོའི་ཐུགས་ཀ་ནས་སྔགས་ཀྱི་འཕྲེང་བ་བྱུང༌། རང་གི་ཁ་སྒོ་ནས་ཞུགས་ཏེ་སྙིང་གར་འཁོད། རྩ་སྔགས་དང་སྙིང་པོ་ལན་གསུམ་གསུམ། བཅོམ་ལྡན་བདག་ལ་སོགས། བཅོམ་ལྡན་འདི་ལ་སོགས་སྔགས་དབང་ངོ༌། །སྟོང་པའི་ངང་ལས་ཧཱུཾ་ལས་བྱུང་བའི་རྡོ་རྗེ་རྡོ་རྗེ་སེམས་དཔའི་ངོ་བོ་ཅན། འདི་སྟེ་སངས་རྒྱས་ཐམས་ཅད་ཉིད། །ཧེ་རུ་ཀ་དཔལ་གོ་འཕང་གནས། ཁྱོད་ཀྱི་ཀྱང་ནི་རྟག་ཏུ་བཟུངས། །ཕྱག་ན་རྡོ་རྗེ་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་སྟྭཾ་དྷཱ་ར་ཡཱ་མི་བཛྲ་སཏྭ་ཧཱིཿཧི་ཧི་ཧི་ཧི་ཧཱུཾ། ཞེས་རྡོ་རྗེའི་བརྟུལ་
ཞུགས་བྱིན་པས། ཕུང་ཁམས་དབང་ཡུལ་དྲུག་པ་རྣམས་རྣམ་པར་དག་ཏེ་རྡོ་རྗེ་སེམས་དཔའི་ངོ་བོ་ཅན། ཧཱུཾ་ལས་བྱུང་བའི་ཅང་ཏེ་ཐོད་པ་ཁ་ཊྭཱཾ་ག་རྣམས་ཧེ་རུ་ཀ་ཡབ་ཡུམ་གྱི་ངོ་བོར་གྱུར་པའི། ཧེ་རུ་ཀ་དཔལ་ཕྱག་རྒྱ་འདི། །ཕྱི་དང་ནང་དུ་ཡང་དང་གནས། ཁ་ཊྭཱཾ་ཅང་ཏེ་ལྷུང་བཟེད་དག །བྱིན་པ་དཔའ་བོའི་བཟུང་བར་བགྱི། །ཞེས་པ་ནི་སྤྱོད་པའི་བརྟུལ་ཞུགས་ཏེ། བརྟུལ་ཞུགས་ཀྱི་སྤྱོད་པ་ལ་བརྟེན་ནས་དངོས་གྲུབ་སྒྲུབ་པ་ལ་དབང་ངོ༌། །རྡོ་རྗེ་སློབ་དཔོན་གྱི་དབང་གི་དོན་དུ་མཎྜལ་ཕུལ་ནས། འཁོར་ལོ་ཕྱིར་མི་ལྡོག་པའི་དབང༌། །དམ་པ་བདག་ལ་སྩལ་ནས་ཀྱང༌། །མགོན་པོ་འཁོར་ལོ་ལྷ་དག་གི །དེ་ཉིད་སློབ་དཔོན་འཕྲིན་ལས་དང༌། །སངས་རྒྱས་ཀུན་ཀྱི་དམ་ཚིག་དང༌། །སྡོམ་པ་གསང་མཆོག་བཤད་དུ་གསོལ། །སེམས་ཅན་ཀུན་གྱྀ་དོན་བགྱིད་ཕྱིར། །བདག་ནི་རྟག་ཏུ་སློབ་དཔོན་འགྱུར། །ཞེས་ལན་གསུམ། དེ་ནས་རིགས་ལྔའི་སྡོམ་བཟུང་ལན་གསུམ་བྱ། དཀྱིལ་འཁོར་གྱི་གཙོ་བོའི་ཐུགས་ཀའི་འོད་ཟེར་གྱིས་བདག་གི་ལུས་རྣམ་པར་སྦྱངས། འོད་ཀྱི་གོང་བུར་གྱུར། གཙོ་བོའི་ཞལ་དུ་ཞུགས། བྱང་ཆུབ་ཀྱི་སེམས་སུ་ཞུ་བ་རྡོ་རྗེའི་ལམ་ནས་ཡུམ་གྱི་མཁར་བབས། ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས། དཔལ་རྡོ་རྗེ་འཆང་ཆེན་པོ་སྐུ་མདོག་དཀར་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པ། ཕྱག་རྒྱ་དྲུག་གིས་བརྒྱན་པ། རལ་པའི་ཐོར་ཚུགས་ཅན་དུ་གྱུར། མཁའ་ནང་ནས་ཕྱིར་སྤྲོས་ཏེ། ཤར་གྱི་ལྷ་སྣམ་ལ་དབང་སྟེགས་རིན་པོ་ཆེའི་ཁྲི་རིམ་པ་གསུམ། པད་ཉིའི་
གདན་དང་བཅས་པ་ལ་འཁོད། ཧཱུཾ་ལས་བྱུང་བའི་རྡོ་རྗེ་རྡོ་རྗེ་སེམས་དཔའི་རང་བཞིན། འདི་སྟེ་སངས་རྒྱས་ནས། ཧི་ཧཱུཾ་གི་བར་གོང་བཞིན། ཐོག་མཐའ་མེད་པའི་སེམས་དཔའ་ནི། །སོགས། ཨཱཿལས་བྱུང་བའི་དྲིལ་བུ་རྡོ་རྗེ་སྙེམས་མའི་ངོ་བོ། འདི་ནི་རྣལ་འབྱོར་མ་ཀུན་གྱྀ། །སོགས། ཨཱཿསྲིད་པ་ངོ་བོ་ཉིད་ཀྱིས་དག་སོགས། ཤེས་རབ་མ་ལོ་བཅུ་དྲུག་ལོན་པ་ཡོངས་སུ་གྱུར་པ་ལས། རྡོ་རྗེ་སྙེམས་མ་གྲི་གུག་དང་ཐོད་པ་འཛིན་པར་གྱུར། དེ་ལ་ཡོངས་སུ་འཁྱུད་པ་ལས་བྱུང་བའི་ཡེ་ཤེས་ཐོབ་སྟེ། ཤེས་རབ་བཅུ་དྲུག་ལོན་པ་ལ་ནས། དབང་དུ་བརྗོད། རྡོ་རྗེ་ཆེ་དང་དྲིལ་བུ་ཆེ། །ཞེས་སོགས་ཤོ་ལོ་ཀ་གཅིག །དཀྱིལ་འཁོར་གྱི་གཙོ་བོ་ཡབ་ཡུམ་སྙོམས་པར་ཞུགས་པའི་དགའ་བའི་སྒྲས། དབང་གི་ལྷ་རྣམས་དང༌། ཕྱོགས་བཅུའི་དེ་བཞིན་གཤེགས་པ་ཐམས་ཅད་སྤྱན་དྲངས། གཙོ་བོའི་ཞལ་དུ་ཞུགས། བྱང་ཆུབ་ཀྱི་སེམས་སུ་ཞུ། རྡོ་རྗེ་ལམ་ནས་ཡུམ་གྱི་མཁར་སྤྲོས་ཤིང༌། དེ་ལས་དབང་གི་ལྷ་དཔའ་བོ་རྣལ་འབྱོར་མ་དཔག་ཏུ་མེད་པ་ཡེ་ཤེས་ཀྱི་ཆུས་གང་བའི་བུམ་པ་ཐོགས་པ་རྣམས་སུ་གྱུར་ཏེ། ཨོཾ་ཕུན་སུམ་ཚོགས་པ་སོགས། དབང་བསྐུར་རྡོ་རྗེ་ནས། སྦྱིན་པར་བྱ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། དེ་ལྟར་བུམ་པའི་ཆུས་དབང་བསྐུར། སྡིག་སྒྲིབ་ཐམས་ཅད་དག །དབང་རྟགས་རྡོ་རྗེ་འཆང་གིས་དབུ་བརྒྱན་པར་གྱུར། དབང་གི་ལྷ་ཐམས་ཅད་ཀྱང་རང་ཉིད་ལ་
ཐིམ། ཨོཾ་སུ་པྲ་ཏིཥྛ་བཛྲ་ཡེ་སྭཱཧཱ། ཉེར་སྤྱོད་ལྔས་ཀྱང་མཆོད། དེའི་རྗེས་སུ་བཀའ་བསྒོ་བར་བྱ་སྟེ། དེ་ཉིད་རིག་པའི་རྣལ་འབྱོར་པས། །མི་བྱ་བ་ནི་ཅི་ཡང་མེད། །དེ་ཉིད་ཤེས་ནས་དེ་ནས་ནི། །དཔའ་བོས་འདོད་པ་ལྔ་སྤྱོད་དོ། །བདག་ཉིད་དཔའ་བོ་ཀུན་གྱྀ་གནས། །བདག་ཉིད་ལྷ་མོ་ཀུན་གྱི་དངོས། །དེ་ཕྱིར་བདག་གིས་ཐམས་ཅད་བྱ། །བདག་ཉིད་ཧེ་རུ་ཀ་དཔལ་མཆོད། །རྟེན་ཅིང་འབྲེལ་བར་འབྱུང་ཆོས་ཅན། ཁམས་གསུམ་སྒྱུ་མའི་རང་བཞིན་ཏེ། །སེམས་ཅན་དེ་ལྟར་ཤེས་ནས་ནི། །འགྲོ་བའི་དོན་ནི་མཉམ་མེད་བྱོས། །ཞེས་པ་ཙམ་གྱིས་ཀྱང་ཆོག་ལ། ཅི་སྟེ་རྒྱས་པ་ལ་མོས་ན། སློབ་དཔོན་གྱི་དབང་གི་རྗེས་ཐོགས་སུ། ཐམས་ཅད་མཉམ་པ་ཉིད་ནི་དཀྱིལ་འཁོར་གྲུ་བཞི་མ་ཉམས་པ། ཆོས་རྗེས་སུ་དྲན་པ་རྡོ་རྗེའི་ཐིག །ཚད་མེད་བཞི་ནི་ཟུར་བཞི། སྒོ་བཞི་ནི་རྣམ་ཐར་བཞི། ཡང་དག་སྤོང་བ་བཞི་ནི་རྟ་བབས་བཞི། དྲན་པ་ཉེར་བཞག་བཞི་ནི་ཁ་ཁྱེར་བཞི། རྫུ་འཕྲུལ་གྱི་རྐང་པ་བཞི་ནི་སྒོ་ཁང་བཞི། དབང་པོ་ལྔ་དང་སྟོབས་ལྔ་ནི་རྩིགས་པ་རིམ་པ་ལྔ། རྒྱན་རྣམས་ནི་བྱང་ཆུབ་ཡན་ལག་བདུན། ཀ་བ་བརྒྱད་ནི་འཕགས་པའི་ལམ་ཡན་ལག་བརྒྱད་དོ། །ཞེས་དཀྱིལ་འཁོར་གྱི་དེ་ཁོ་ན་ཉིད་དང༌། སྙིང་རྗེས་སྤྱན་ནི་དམར་པོ་ལ། །ཞེས་པ་ནས། གདུག་པ་འདུལ་ཕྱིར་ཁྲོ་བོ་ཉིད། །རྡོ་རྗེ་གསུམ་གྱི་དག་པའི་སྤྱན། །སྤྱི་བོའི་འཁོར་ལོ་མི་བསྐྱོད་པ། །ནས། དོན་ཡོད་གནས། གཟུགས་ཕུང་གཽ་རཱིར་བཤད་པ་སྟེ། །ཚོར་བ་ལ་
ནི་ཆོམ་རྐུན་མ། །འདུ་ཤེས་རོ་ལངས་མ་ཡིན་ཏེ། །འདུ་བྱེད་གྷསྨ་རཱིར་རབ་གྲགས། །རྣམ་ཤེས་ཕུང་པོའི་ཚུལ་གྱིས་ནི། །བདག་མེད་རྣལ་འབྱོར་མ་གནས་སོ། །ས་ནི་པུཀྐ་སི་ཞེས་བཤད། ནས། རླུང་ནི་གཡུང་མོར་རབ་ཏུ་གྲགས། །ཞེས་ལྷའི་དེ་ཁོ་ན་ཉིད་དང༌། དེང་ཁྱོད་རྡོ་རྗེ་སློབ་དཔོན་དུ་གྱུར་པས། སློབ་དཔོན་གྱི་བྱ་བ་ནི་འདི་ལྟ་སྟེ། དཀྱིལ་འཁོར་དང༌། ཏིང་ངེ་འཛིན་དང༌། ཕྱག་རྒྱ་དང༌། སྟངས་སྟབས་དང༌། འདུག་སྟངས་དང༌། བཟླས་བརྗོད་དང༌། སྦྱིན་བསྲེག་དང༌། མཆོད་སྦྱིན་དང༌། རབ་ཏུ་གནས་པ་དང༌། དཀྱིལ་འཁོར་བྲི་བ་དང༌། དབང་བསྐུར་བ་དང༌། ཞི་བ་དང༌། རྒྱས་པ་དང༌། དབང་དང༌། མངོན་སྤྱོད་དང༌། དབབ་པ་ལ་སོགས་པ་འདི་དག་གིས་གཞན་ལ་ཕན་འདོགས་དགོས་པ་ཡིན་ནོ། །ཞེས་པ་ནི་སློབ་དཔོན་གྱི་དེ་ཁོ་ན་ཉིད་དོ། །དེ་ནས་ལྷ་མཆོད་པའི་རྗེས་སུ་གནང་བ་དང༌། མིག་ཐུར། མེ་ལོང༌། དྲིལ་བུ། མདའ་གཞུ། ཆོས་བཤད་རྣམས་ཀྱི་རྗེས་སུ་གནང་བ་དང༌། ལུང་སྟོན་པ་དང༌། དེ་རིང་དཀྱིལ་འཁོར་སློབ་དཔོན་གྱུར། །ཞེས་སོགས་དབུགས་དབྱུང་བ་དང༌། གཟེངས་བསྟོད་པ་རྣམས་ཀྱང་བྱ་སྟེ་གཞན་དུ་ཤེས་སོ། །དེ་རྣམས་ཀྱི་ཕྱི་རོལ་གཟུགས་བརྙན་གྱི་དཀྱིལ་འཁོར་དུ། བུམ་པའི་དབང་བསྐུར་བ་ཐོབ། ལུས་ཀྱི་དྲི་མ་དག །ལམ་བསྐྱེད་པའི་རིམ་པ་སྒོམ་པ་ལ་དབང༌། དམ་ཚིག་ཉི་ཤུ་རྩ་གཉིས་བསྲུངས། འབྲས་བུ་སྤྲུལ་སྐུ་མངོན་དུ་བྱས། དེ་ནས་གསང་དབང་གི་དོན་དུ་མཎྜལ་ཕུལ། བཅོམ་ལྡན་ཞི་བ་ཆེན་པོ་ཀྱཻ། །སོགས་ལན་གསུམ་གྱིས་གསོལ་བ་བཏབ།
ཨཱཿཁཾ་སོགས་ཀྱིས་མིག་དར་བཅིངས། དཀྱིལ་འཁོར་གྱི་གཙོ་བོ་ཡབ་ཡུམ་སྙོམས་པར་ཞུགས། ཐུགས་ཀའི་འོད་ཟེར་ཀྱི་སངས་རྒྱས་ཐམས་ཅད་སྤྱན་དྲངས། གཙོ་བོའི་ཞལ་དུ་ཞུགས། ཐུགས་ཀར་བྱང་ཆུབ་ཀྱི་སེམས་སུ་ཞུ་བ། རྡོ་རྗེ་ནོར་བུར་བརྟན་པའི་ཡེ་ཤེས་མངོན་དུ་བྱས་ནས། བདེ་བའི་རྟེན་ཀུན་ད་ལྟ་བུ་དེ་སྦོམ་པོ་དང་མིང་མེད་ཀྱིས་བླངས་ནས། རང་གི་ཁར་བབས་པར་གྱུར། ཇི་ལྟར་འདས་པའི་ནས། དབང་བསྐུར་རོ། །ཨོཾ་ཨཱཿཧཱུཾ། ཨ་ཧོ་མཧཱ་སུ་ཁཾ། ཨོཾ་ཨཱཿཧཱུཾ། མིག་དར་བསལ། ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་དུ་གསང་དབང་ཐོབ་པས། ངག་གི་དྲི་མ་སྦྱངས། ལམ་རླུང་གི་རྣལ་འབྱོར་སྒོམ་པ་ལ་དབང༌། དམ་ཚིག་ཏུ་བཟའ་བའི་དམ་ཚིག་རྣམས་སྒྲུབས། འབྲས་བུ་ལོངས་སྤྱོད་རྫོགས་པའི་སྐུ་མངོན་དུ་བྱས། ཤེས་རབ་ཡེ་ཤེས་ཀྱི་དབང་གི་དོན་དུ་མཎྜལ་ཕུལ། གོང་བཞིན་གསོལ་བ་གདབ། མིག་དར་བཅིངས། ལྷ་མོ་དགའ་སྦྱིན་ནས། མཆོད་པ་དག་ཏུ་བགྱིས། །ཀུན་ཏུ་རུ་གྱིས་རྡོ་རྗེ་འཛིན། །ཕྱག་རྒྱ་བདེ་བ་ལྡན་པ་ཁྱེར། །ཀྱེ་སེམས་དཔའ་ཆེན་པོ། ཞེས་བརྗོད་པས་ཕྱག་རྒྱ་གཏད། ཅུང་ཟད་རྒྱས་པར་སྤྲོ་ན། དྲི་བ་དྲི་ལན་བྱ་སྟེ། དཔའ་བོ་བྱང་ཆུབ་སེམས་བཟའ་བ།། ཁྱོད་ནི་སྤྲོ་བར་ཡིན་ནམ་ཅི། །རིགས་ལྔ་ལས་ནི་བྱུང་བ་ཡི། །རིག་མ་མཆོད་པ་རྟག་གུས་སམ། །བཤང་གཅི་སྟོབས་དང་ཁྲག་ལ་སོགས། །བཟའ་བ་ད་ལྟ་ཡིད་ཆེས་སམ། །རྗེས་སུ་མཐུན་སྨོས་དམ་ཚིག་བཟང༌། །ཇི་ལྟར་བདེ་བར་བུ་སྨྲོས་ཤིག །ཅི་གསུང་དམ་ཚིག་བརྟེན་པར་ནི། །ལྷ་མོ་བདག་གིས་བྱེད་པར་ནུས། །ཞེས་ཁས་བླངས། ཨེ་མ་ང་ཡི་པདྨ་ནི། །
ནས། རྟག་ཏུ་བཞུགས། ཐར་བ་བརྟེན་ཅིག་ཧོ། །ཞེས་པང་དུ་བྱོན། ཐབས་དང་ཤེས་རབ་རྗེས་སུ་ཆགས་པས་སྙོམས་པར་ཞུགས་པས། ལྷན་ཅིག་སྐྱེས་པའི་ཡེ་ཤེས་མངོན་དུ་བྱས། ཡེ་ཤེས་དེ་ཉིད་དབང་བཞིའི་དོན་ཅན། རྒྱུད་རྣམ་པ་བཞི་ལ་གནས་པ་སྟེ། རྒོད་པ་དག་པ་སློབ་དཔོན་ཉིད། །སོགས་དང༌། སྣ་ཚོགས་དང་པོའི་དགའ་བ་ཉིད། །སོགས་ཤླཽ་ཀ་རེ་རེ་བརྗོད། མིག་དར་བསལ། དེ་ལྟར་ན་བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་བསྐུར་བ་ཐོབ་པས། ཡིད་ཀྱི་དྲི་མ་དག །ལམ་ལས་དང་དམ་ཚིག་གི་ཕྱག་རྒྱ་སྒོམ་པ་ལ་དབང༌། དམ་ཚིག་ཏུ་ཤེས་རབ་མ་མི་སྤངས་པ་ཡིན། འབྲས་བུ་ཆོས་ཀྱི་སྐུ་མངོན་དུ་བྱས། དེ་ནས་དེའི་རྗེས་སུ་གནང་བ་བྱིན་པ་ནི། སྣ་ཚོགས་སྤངས་པའི་སྐད་ཅིག་ལ། །བདེ་བ་ཆེན་པོ་རྣམ་པར་བཟུང༌། །ཇི་སྲིད་བྱང་ཆུབ་བར་དུ་ནི། །སེམས་ཅན་དོན་བགྱིས་རྡོ་རྗེ་འཛིན། །ཞེས་བརྗོད། དབང་བཞི་པའི་དོན་དུ་མཎྜལ་ཕུལ་ལ། བྱང་ཆུབ་རྡོ་རྗེ་སོགས་ཀྱིས་གསོལ་བ་བཏབ། འདི་ལ་མིག་དར་བཅིངས་དགྲོལ་མི་དགོས། ཡེ་ཤེས་འདི་ནི་ཆེས་ཕྲ་ཞིང༌། །ནས། ཁྱོད་ཀྱི་ཕ་ནི་ཁྱོད་ཉིད་དོ། །ཞེས་བརྗོད། རང་གི་ཡེ་ཤེས་ཉིད་དུ་གྱུར། །ཞེས་སོགས་དང༌། འདི་ཉིད་ཡེ་ཤེས་ཆེན་པོ་ཉིད། །སོགས་དང༌། འདོད་ཆགས་མ་ཡིན་ཆགས་བྲལ་མིན།། སོགས་ཀྱི་དོན་ཡིད་ལ་བྱས་ཏེ་མཉམ་པར་བཞག་གོ །དེ་ལྟར་ན་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བཞི་པ་ཐོབ་པས། ལུས་ངག་ཡིད་གསུམ་གྱི་དྲི་མ་བག་ཆགས་དང་བཅས་པ་དག །ལམ་ཕྱག་རྒྱ་ཆེན་པོ་སྒོམ་པ་
ལ་དབང༌། དམ་ཚིག་ཏུ་ངེས་པའི་དོན་གྱི་བརྟུལ་ཞུགས་བརྟེན། འབྲས་བུ་ངོ་བོ་ཉིད་སྐུ་མངོན་དུ་བྱས། རྗེས་ཀྱི་བྱ་བ། གཙོ་བོས་ཇི་ལྟར་སོགས་དང༌། མཎྜལ་དང་ཡོན་འབུལ་བ་རྣམས་སྤྱི་དང་འདྲའོ། །བདག་ཉིད་འཇུག་ཅིང་དབང་བླང་བའི་སྐབས་ཏེ་བཅུ་བཞི་པའོ།། །།གཉིས་པ་སློབ་མ་གཞུག་ཅིང་དབང་བསྐུར་བ་ནི། ཆོ་གའི་རིམ་པ་གོང་དུ་བཤད་པ་དེ་ཁོ་ན་བཞིན་ལས། ལག་ལེན་གྱི་ཁྱད་པར་ཅུང་ཟད་མི་འདྲ་བ་རྣམས་མཐོང་བ་བརྒྱུད་པ་དང་དག་ལས་ཤེས་པར་བྱའོ། །ཅུང་ཟད་སྤྲོས་པ་ལ་དགའ་ན། དབང་རྫས་རིགས་ལྔ་སོགས་ལྷར་བསྐྱེད་པ་དང༌། སྤྲོ་ན་སློབ་མའང་རིགས་ལྔའི་ཏིང་ངེ་འཛིན་འཕོ་བ་དང༌། ཡོལ་བའི་ནང་བཅུག་གི་སྔོན་དུ་བགེགས་སྦྱང་བ་དང༌། དབང་གི་དངོས་བཞིའི་མགོར་རྣལ་འབྱོར་དྲུག་བཞི་ལྡན་གྱི་སྦྱང་བ་ཡང་བྱ་སྟེ། འོན་ཀྱང་དེ་དག་ངེས་པར་དགོས་པའང་མ་ཡིན་པས། འདིར་མ་བཤད་དེ་གཞན་དུ་ཤེས་སོ། །ལྷ་མོ་བཅོ་ལྔའི་དཀྱིལ་འཁོར་གྱི་བྱ་བ་ཡང༌། འདིས་འདོན་པ་བསྒྱུར་ཏེ་རྟོགས་པར་བྱ་བ་ཡིན་ལ། འདི་དག་ཐོབ་པས་ཧེ་རུ་ཀ་གཞན་གསུམ་ཤུགས་ལ་ཐོབ་པར་བཞེད་པ་ཡིན་ནོ། །སློབ་མ་དབང་བསྐུར་བའི་སྐབས་ཏེ་བཅོ་ལྔ་པའོ།། །།དྲུག་པ་ཉེ་བར་བསྡུ་བའི་ཆོ་ག་ནི། དེ་ལྟར་དབང་བསྐུར་བ་ཟིན་པ་ན། སླར་ཡང་སྦྱིན་བསྲེག་གི་ཆོ་གའི་ལྷ་མཉེས་པར་བྱ་ཞིང༌། ཕྱོགས་ཀྱི་གཏོར་མའམ། གོང་དུ་བཤད་པ་བཞིན་ཕྱི་རོལ་གཏོར་མ་ཡང་རྒྱས་པར་བཏང་ངོ༌། །དེའི་རྗེས་སུ་མཆོད་པ་བཤམས། སྔོན་བཞིན་བྱིན་གྱིས་བརླབས་ནས། ཆུ་གཉིས་སྔོན་དུ་འགྲོ་བའི་ཉེར་སྤྱོད་རོལ་མོ་དང་བཅས་པ་དང༌། ནང་མཆོད་གསང་མཆོད། བསྟོད་པ་བསྡུས་པ་དང་བཅས་པའང་སྔོན་བཞིན་བྱས་ལ། བདག་ཅག་སློབ་མར་བཅས་པའི་དགེ་བའི་རྩ་བ་འདིས། སེམས་ཅན་ཐམས་
ཅད་དགེས་པའི་རྡོ་རྗེའི་གོ་འཕང་མྱུར་དུ་ཐོབ་པར་གྱུར་ཅིག ཅེས་སྨོན་ལམ་བཏབ་ཅིང་བསྐོར་བ་ལན་གསུམ་བྱ། ཡིད་ལ་འདོད་པའི་དོན་རྣམས་གསོལ་བ་བཏབ་བོ། །ཡིག་བརྒྱ་ལན་གསུམ། མ་འབྱོར་བ་དང༌། སོགས་ཀྱིས་བཟོད་པར་གསོལ། ཨོཾ་ཁྱོད་ཀྱིས་ནས།གསོལ། ཨོཾ་ཨཱཿ ཧཱུཾ་བཛྲ་མུཿ ཞེས་ལན་གསུམ་གྱིས། ཡེ་ཤེས་པ་གཤེགས། སྤྲུལ་པའི་དཀྱིལ་འཁོར་རང་ལ་ཐིམ། ཨ་ཀཱ་རོའི་མཐར། ཨོཾ་ཨཱཿཧཱུཾ་མུཿ ཞེས་བཏགས་པས་དཀྱིལ་འཁོར་དབྱི་ཞིང༌། མགོ་ལ་རྡུལ་ཚོན་ཅུང་ཟད་བཞག །ཨོཾ་བཛྲ་ཀཱི་ལོ་ཏ་ཀཱི་ལ་ཡ་སརྦྦ་ཀཱི་ལ་ན་བཛྲ་དྷ་ར་ཨཱ་ཛྙཱ་པ་ཡ་ཧཱུཾ་ཧཱུཾ་ཧཱུཾ་ཧཱུཾ་ཕཊ་ཧོ། ཞེས་ཕུར་བུ་དབྱུང༌། ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷི་ལོ་ཙ་ནི་སརྦྦ་ཨརྠ་སཱ་དྷ་ནི་སྭཱཧཱ། ཞེས་འོ་མས་གཏོར། རྟེན་གཞན་ཡོད་ན་བརྟན་བཞུགས་བྱ། རྡུལ་ཚོན་ཆུ་བོར་སྤྱན་འདྲེན་ན་སྐབས་འདིར་བྱ་ཞིང༌། སླར་ཡང་སྨོན་ལམ་དང་བཀྲ་ཤིས་ཅི་འགྲུབ་བྱའོ། །དཀྱིལ་འཁོར་གྱི་མཇུག་ཏུ་སྦྱིན་བསྲེག་དང༌། གཏོར་མ་དང༌། ཚོགས་ཀྱི་འཁོར་ལོ་ཡང་བྱ་ཞིང༌། དགེ་འདུན་གྱི་སྟོན་མོ་དང༌། ཡུལ་ཕྱོགས་ཀྱི་སྐྱེ་བོ་རྣམས་ཚིམ་པར་བྱའོ། །རས་བྲིས་ཀྱི་ཕྱོགས་ལ་ནི། ས་ཆོག་དང༌། ཐིག་ཚོན་བྱིན་གྱིས་བརླབས་པ་དང༌། ཐིག་ཚོན་གྱི་ལས་དང༌། དཀྱིལ་འཁོར་གཤེགས་སུ་གསོལ་བ་རྣམས་མི་དགོས་པས། བཟོད་གསོལ་གྱི་མཇུག་ཁོ་ནར། དཀྱིལ་འཁོར་དང་རྟེན་གཞན་ལ་ཡང་བརྟན་བཞུགས་བྱ། དགེ་བ་བསྔོ་བ་དང༌། བཀྲ་ཤིས་ཀྱི་གླུ་དབྱངས་ཙམ་བྱའོ། །ཏིང་ངེ་འཛིན་གྱི་དཀྱིལ་འཁོར་དུ་དབང་བསྐུར་བ་བླ་མའི་ཞལ་གྱི་རིམ་པ་ནི། སྐུ་གསུང་ཐུགས་ཧེ་རུ་ཀའི་དཀྱིལ་འཁོར་ལ་ཡང་མཛད་དེ། ཏིང་ངེ་འཛིན་གྱི་སྒོ་ནས་ཆོ་ག་ཐམས་ཅད་སྔ་མ་བཞིན་དུ་སྤྱད་པ་ལས། མེ་ཏོག་འཕྲེང་བའི་དབང་བསྐུར་བའི་རྗེས་སུ། མཁའ་ནང་
དུ་དཀྱིལ་འཁོར་ཆེན་པོ་སྤྲུལ་ཏེ། ནང་དབང་གི་ཚུལ་གྱི་སློབ་མ་རྣམས་དཀྱིལ་འཁོར་དེར་བཅུག་སྟེ། རྫས་སྤངས་པའི་དབང་བསྐུར་བ་ཡིན་ཏེ། ཕྱོགས་འདི་ལ་ས་ཆོག་གི་དཀྱིལ་འཁོར་དང༌། སྟ་གོན་གྱི་དཀྱིལ་འཁོར་ཉེ་བར་བསྡུ་བའི་ཚེ། སྤྲུལ་པའི་དཀྱིལ་འཁོར་རང་ལ་བསྡུ་བ་ཁོ་ན་ཡིན་ལ། སྟ་གོན་གྱི་དཀྱིལ་འཁོར་ཡང་བདག་བསྐྱེད་ཀྱི་དཀྱིལ་འཁོར་ལས་གཞན་པ་མེད་དོ། །དཀྱིལ་འཁོར་ཉེར་བསྡུ་འཕྲོས་དང་བཅས་པའི་སྐབས་སྟེ་བཅུ་དྲུག་པའོ།། །།ལྷ་ལ་དབང་བསྐུར་བ་རབ་གནས་ཀྱི་ཆོ་ག་ནི། མདོ་ཙམ་དུ་ན། གོང་དུ་བཤད་པའི་དཀྱིལ་འཁོར་གྱི་ཆོ་ག་དེ་དག་ལས། གང་ཡང་རུང་བ་ཞིག་གིས་བྱ་སྟེ། ཏིང་ངེ་འཛིན་གྱི་ཆོ་གས་ཀྱང༌། འདི་ལ་མི་རུང་བའི་གནས་སྐབས་མེད་དོ། །དེ་ཡང་སྟ་གོན་ལྷག་གནས་ཀྱི་རིམ་པ་སྔར་བཞིན་བྱས་ལ། རབ་ཏུ་གནས་པར་བྱ་བ་ལ། བགེགས་སྦྱང་བ་ནི། བོད་རྙིང་པ་རྣམས་ཀྱི་ལག་ལེན་བཞིན་དུ་བྱ་ལ། དེ་མ་ཐག་ཏུ། ཨོཾ་ཨཱཿབིགྷྣཱན་ཏ་ཀྲྀཏ་ཧཱུཾ། ཡང་ཧཱུཾ་ལན་བདུན་བཟླས་ཏེ། ཨོཾ་སརྦ་པཱ་པཾ་ད་ཧ་ན་བཛྲ་ཡ། བཛྲ་སཏྭ་སྱ་སརྦ་བཱ་པཾ་ད་ཧ་ན་སྭཱཧཱ། ཞེས་ཡུངས་དཀར་རམ་ཏིལ་བསྐོར་ཏེ་མེ་ལ་དོར། ཨོཾ་ཧཱུཾ་ཏྲཾ་ཧྲཱིཿཨ། ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ན་ཡེ་སྭཱཧཱ། ཨོཾ་ཧཱུཾ་ཏྲཾ་ཧྲི་ཁཾ་ཁ། ཞེས་དྲི་བཟང་དང༌། འདག་རྫས་ཅི་འབྱོར་བ་དང༌། ཆུ་གཙང་གིས་དངོས་སུ་བཀྲུ་བར་འོས་པ་རྣམས་ལེགས་པར་བཀྲུ་ཞིང༌། བྲིས་སྐུ་དང་གླེགས་བམ་ལ་སོགས་པ་ནི་གཟུགས་བརྙན་ལ་བཀྲུའོ། །ནམ་མཁའ་གང་བའི་སངས་རྒྱས་རྣམས་ཀྱིས་ཁྲུས་གསོལ་བར་མོས་ལ། ཇི་ལྟར་བལྟམས་པ་སོགས་ཚིགས་བཅད་ཅི་རིགས་པ་བརྗོད་ཅིང༌། ཨ་བྷི་ཥེ་ཀ་ཏའི་སྔགས་དང་ལས་བུམ་གྱིས་ཁྲུས་གསོལ་ལ། སྐུ་ཕྱེས་དང་དྲིས་བྱུགས་པ་དང་ན་བཟའ་འབུལ་བ་རྣམས་བྱའོ། །རང་གི་སྙིང་གའི་ས་བོན་ལས་འོད་
ཟེར་འཕྲོས། ཡེ་ཤེས་སེམས་དཔའ་གཙོ་བོར་གྱུར་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རབ་ཏུ་གནས་བྱའི་སྟེང་གི་ནམ་མཁར་ཨོཾ་བཛྲ་ས་མཱ་ཛཿ པདྨ་ཀ་མ་ལ་ཡེ་སྟྭཾ། ཨརྒྷཾ་ནས།ཤཔྟའི་བར་གྱིས་མཆོད། བཅོམ་ལྡན་༵ཆྒཻ་རྡོ་རྗེ་མཆོག །རིག་པའི་རྒྱལ་པོ་ཁྱེད་ལ་འདུད། །སློབ་མ་རྣམས་ལ་བརྩེ་ཕྱིར་དང༌། ཁྱེད་རྣམས་ལ་ཡང་མཆོད་ཕྱིར་དང༌། །སེམས་ཅན་བསོད་ནམས་སྤེལ་དོན་དང༌། །བྱང་ཆུབ་སེམས་ནི་བསྐྱེད་པའི་ཕྱིར། །མགོན་པོ་ཐུགས་རྗེའི་བདག་ཉིད་ཆེ། ཁྱེད་ཀྱིས་རབ་གནས་བགྱིད་པར་འཚལ། །དེ་ཕྱིར་བཅོམ་ལྡན་བདག་གུས་ལ། །བཀའ་དྲིན་གནང་བར་མཛད་པའི་རིགས། །སངས་རྒྱས་འགྲོ་འཁོར་བྱ་དོན་སྩོལ། །བྱང་ཆུབ་སེམས་དཔའ་འབྲས་གནས་དང༌། །གཞན་ཡང་གང་དག་གསང་སྔགས་ལྷ། །ལྷ་དང་འཇིག་རྟེན་སྐྱོང་བ་དང༌། །འབྱུང་པོ་བྱང་ཆུབ་བསྟན་གནས་དང༌། །སེམས་ཅན་བསྟན་ལ་མངོན་དགའ་བ། །གང་གཞན་རྡོ་རྗེ་སྤྱན་ལྡན་རྣམས། །བདག་ལ་ཡང་དག་དགོངས་སུ་གསོལ། །རྡོ་རྗེ་ཅན་ཆེན་༵༵ཆྒཻ་བདག །ཆྒཻེ་རབ་ཏུ་གནས་པ་ནི། །བགྱིའོ་དེས་ན་ཁྱེད་རྣམས་ཀྱི། །ཉེ་བར་གནས་པར་མཛད་པའི་རིགས། །ཞེས་ལན་གསུམ་གྱིས་སྙན་གསན་ཕབ། རིགས་ལྔའི་བསྟོད་པས་བསྟོད། ཨོཾ་བཛྲ་པུ་ཎ་ར་ག་མ་ན་ཡ་མུཿ ཞེས་གཤེགས་སུ་གསོལ། སྐུ་གཟུགས་ཀྱི་གནས་གསུམ་ལ་སོགས་པར། ཨ་མྲྀ་ཏའི་སྔགས་ཀྱིས་རྡོ་རྗེ་དང་བཅས་པའི་ལག་པས་དྲི་བཟང་བྱུགས། ཕྱི་ནང་གི་གཏོར་མ་རྒྱ་ཆེར་བཏང་ངོ༌། །དེ་དག་ནི་སྟ་གོན་གྱི་བྱ་བའོ། །ནངས་པར་བདག་འཇུག་ཡན་ཆད་ཀྱི་བྱ་བ་རྣམས་ཟིན་པ་ན། སྔར་བཞིན་ལས་བུམ་གྱིས་
ཁྲུས་གསོལ། བསངས་སྦྱངས། སྟོང་པའི་ངང་ལས། རབ་ཏུ་གནས་བྱའི་ལྷ་དེ་ཉིད་ཀྱི་བསྐྱེད་ཆོག་ཤེས་ན་དེ་ལྟར་བྱ་ལ། མི་ཤེས་ན་མཆོད་རྟེན་དང༌། ཆགས་བྲལ་གྱི་སྐུ་གཟུགས་རྣམས་དང༌། གཙུག་ལག་ཁང་ལ་སོགས་པ་ནི་རྣམ་སྣང་དུ་བསྐྱེད། གླེགས་བམ་དང་ཡིག་འབྲུ་ནི་འོད་དཔག་མེད་དང༌། ཕྱག་མཚན་རྣམས་མི་བསྐྱོད་པ་དང༌། སློབ་དཔོན་དང་སྐུ་གཟུགས་གཞན་རྣམས་ནི་རྡོ་རྗེ་སེམས་དཔར་བསྐྱེད་དེ། སྐྱེ་མཆེད་དྲུག་དང་གནས་གསུམ་བྱིན་གྱིས་བརླབས་པ་སྒྲུབ་ཐབས་བཞིན་བྱས་ལ། རང་གི་སྙིང་ག་ནས་འོད་ཟེར་འཕྲོས། ཡེ་ཤེས་སེམས་དཔའ་སྤྱན་འདྲེན་པ་དང༌། མཆོད་བསྟོད་དང་གསོལ་བ་ལན་གསུམ་གདབ་པ་གོང་བཞིན་བྱས་ལ། སྒྲུབ་ཐབས་སུ་ཇི་སྐད་བཤད་པ་ལྟར་དབང་ལྷ་སྤྱན་འདྲེན། བཀྲ་ཤིས་ཀྱི་གླུ་བླང་བ་ནི་རྒྱས་བསྡུས་ཇི་ལྟར་རིགས་པ་བརྗོད་ལ། ཆུ་ཅོད་པན་རྡོ་རྗེའི་དྲིལ་བུ་མིང༌། སླར་ཡང་སློབ་དཔོན་གྱི་དབང་གི་དོན་དུ་ཆུ་དབང་བསྐུར་ནས། སུ་པྲ་ཏིཥྛ འི་བར་དང༌། གསང་དབང་ཤེས་རབ་ཡེ་ཤེས་བཞི་པ་རྣམས་ལ་གསོལ་བཏབ་དང༌། རྟོགས་བསྐྱེད་དང༌། མིག་དར་བཅིངས་གྲོལ་དང༌། དྲི་བ་དྲི་ལན་རྣམས་དོར་ནས། དངོས་གཞི་རྣམས་བདག་འཇུག་བཞིན་དབང་བསྐུར་ལ། མཆོད་བསྟོད་བསྡུས་པ་ཞིག་བྱའོ། །ཨོཾ་བཛྲ་ཝ་ས་སྱ་ཧཱུཾ་སོགས། ཨོཾ་ཨཱཿསརྦ་ཨ་བྷ་ར་ཎ་བི་བྷུ་ཥ་ཎྱ་སྭཱཧཱ། ཨོཾ་ཛྲཾ་སྭཱཧཱ། ཞེས་པ་རྣམས་ཀྱིས་གོས་དང་རྒྱན་དང་འབྲས་བུ་ལ་སོགས་པ་ཕུལ། ཨོཾ་ཙཀྵུཿཙཀྵུཿས་མནྟ་ཙཀྵུཿབི་ཤོ་དྷ་ནི་སྭཱཧཱ། ཞེས་མིག་ཐུར་གྱིས་སྤྱན་དབྱེ་ཞིང་མིག་སྨན་བཀུ་བའི་ཚུལ་དུ་བྱའོ། །དེ་ནས་ཞི་བ་ལ་སོགས་པའི་སྦྱིན་བསྲེག་བྱས་ལ། ཨོཾ་དི་བྱ་ཨགྣ་ས་མ་སིདྡྷྱ་ན་པྲི་ཎ་ནེ་སྭཱཧཱ། ཞེས་པས་སྦྱིན་བསྲེག་གི་མེའི་ལྷག་མ་ལ་འོ་ཐུག་སྒྲུབས་ཏེ་གཟུགས་བརྙན་
ཤར་བའི་ལྷའི་ཞལ་དུ་འབུལ་བར་བྱའོ། །ཨོཾ་ཧཱུཾ་ཏྲཾ་ཧྲཱིཿཨཿ ཞེས་ལན་མང་དུ་བཟླས་ལ། ལྷ་དེ་ཉིད་བསྐྱེད་པ་ཡིན་ན་མ་གཏོགས། གཞན་རྣམས་ཞལ་བསྒྱུར་ལ་རང་རང་གི་གཟུགས་སུ་བལྟའོ། །དེ་ནས་ཡུན་རིང་དུ་བཞུགས་པའི་དོན་དུ་གསོལ་བ་གདབས་པ་ནི། ཇི་ལྟར་སངས་རྒྱས་ཐམས་ཅད་ནི། །དགའ་ལྡན་དུ་ནི་རབ་བཞུགས་རྣམས། །ལྷ་མོ་སྒྱུ་འཕྲུལ་ལྷུམས་ཞུགས་ལྟར། །དེ་བཞིན་གཟུགས་བརྙན་ལྷན་ཅིག་ཏུ། །འདི་རུ་མགོན་པོ་རྟག་བཞུགས་ལ། །བྱང་ཆུབ་སེམས་ནི་བསྐྱེད་པ་དང༌། །སེམས་ཅན་ཀུན་གྱི་དོན་སླད་དུ། །བདག་གི་འབྱོར་བ་ཉིད་ཀྱིས་ནི། །ཅི་འབྱོར་བ་ཡི་མཆོད་པ་རྣམས། །མེ་ཏོག་ལ་སོགས་འདི་བཞེས་ཤིག །བདག་དང་སློབ་མར་བཅས་པ་ལ། །རྗེས་སུ་བརྩེ་བར་དགོངས་སུ་གསོལ། །ཀུན་ཀྱིས་འདི་ལ་བྱིན་རླབས་ཤིང༌། །འདི་ཉིད་དུ་ནི་བཞུགས་པའི་རིགས། །ཞེས་ལན་གསུམ་གསོལ་བ་བཏབ་ལ། སྤྲོ་ན་ལག་ལེན་བཞིན་ཚིག་ལྷུག་པས་ཀྱང་བྱ། རྟེན་འབྲེལ་སྙིང་པོ་བཟླས་ལ་མེ་ཏོག་དོར་དེ། དེ་ནས་རྡོ་རྗེ་གསོར་ཞིང་བདུད་རྩི་འཁྱིལ་བའི་སྔགས་ལན་བདུན་བཟླས་ལ། དེ་ཉིད་ལྔ་པའམ། མཉམ་ཉིད་མི་གཡོ་སོགས་ཀྱི་བསྟོད་པ་གླུར་བླང་ངོ༌། །བསྡུ་ན། ཞེ་སྡང་རྡོ་རྗེ་ཕྱག་འཚལ་བསྟོད། །གཏི་མུག་རྡོ་རྗེ་ཕྱག་འཚལ་བསྟོད། །སེར་སྣ་རྡོ་རྗེ་བདག་ལ་གསོལ། །འདོད་ཆགས་རྡོ་རྗེ་བདག་ལ་སྐྱོབས། །ཕྲག་དོག་རྡོ་རྗེ་ང་རྒྱལ་ཏེ། །སྒྱུ་འཕྲུལ་རྡོ་རྗེ་མགོན་པོ་ཀུན། །ལས་ཀུན་རབ་ཏུ་གྲུབ་བྱེད་པ། །ཐམས་ཅད་རྡོ་རྗེ་བདག་མགུར་འགྱུར། །ཞེས་བསྟོད། ཡིག་བརྒྱ་ལན་མང་དུ་བཟླས་ཏེ་ལྷག་ཆད་ཁ་བསྐངས། མ་འབྱོར་བ་དང་སོགས་ཀྱིས་
བཟོད་པར་གསོལ། བཀྲ་ཤིས་ཀྱི་ཚིགས་སུ་བཅད་པ་ཅི་རིགས་པར་བརྗོད། རྫོགས་སངས་རྒྱས་དང་དེ་ཡི་སྲས། །ཚངས་སོགས་ལྷ་ཡི་ཚོགས་རྣམས་དག །གང་དག་ཆོ་གའི་བྱ་བ་ལ།། ནོངས་གྱུར་དེ་དག་བཟོད་མཛད་རིགས། །ཀུན་ཏུ་ཞི་དང་རྒྱས་པ་རུ། །ཡོན་བདག་རྣམས་ལ་རབ་མཛད་ནས། །སངས་རྒྱས་ཡུལ་དུ་གཤེགས་པ་དང༌། །སླར་ཡང་འབྱོན་པར་མཛད་དུ་གསོལ། །ས་དང་ཆུ་དང་མེ་རླུང་ལས། །ལྷ་རྣམས་ཀྱིས་ནི་སྐུ་གཟུགས་ལ། །བསྐལ་པ་བརྒྱ་རུ་བསྲུང་བ་དང༌། །མཆོད་པ་ཆེན་པོ་མཛད་དུ་གསོལ། །དགྱེས་ཤིང་ཡིད་བཟང་གྱུར་ནས་སུ། །སློབ་དཔོན་སློབ་མར་བཅས་པ་ཡི། །བུ་དང་ཚ་བོ་བསྲུང་བ་དང༌། །གང་གནས་དགེ་པར་གཤེགས་སུ་གསོལ། །ཞེས་གསོལ་བ་བཏབ་ནས། མགྲོན་དུ་བྱོན་པའི་ལྷ་རྣམས་ཅི་བདེར་གཤེགས་ལ་བར་འདིར་ཆོས་སྐྱོང་དང༌། འཇིག་རྟེན་པའི་གཏོར་མ་རྒྱ་ཆེར་གཏོང༌། སླར་ཡང་སྐུ་གཟུགས་ལ་མཆོད་པ་རྒྱ་ཆེན་པོ་དང༌། ཤིས་བརྗོད་སོགས་རྒྱ་ཆེར་བྱའོ། །བགྲང་འཕྲེང་རབ་ཏུ་གནས་པ་ནི། བསངས་སྦྱངས། ཛྲིཾ་ལས་འོད་དཔག་མེད་ཡབ་ཡུམ་དུ་བསྐྱེད། གནས་གསུམ་བྱིན་གྱིས་རླབས། ཡེ་ཤེས་པ་བསྟིམ། དབང་བསྐུར། མཆོད་བསྟོད་བྱས་ལ། དེ་ཞུ་བས་བགྲང་འཕྲེང་དུ་གྱུར། ཨོཾ་ཨཱཿཛྲིཾ་ཧཱུཾ་ཕཊ་སྭཱཧཱ། ཞེས་བཟླས་པས་རབ་ཏུ་གནས་པར་འགྱུར་རོ། །རབ་ཏུ་གནས་པའི་རྣམ་གྲངས་གཞན་མང་པོ་དག་ནི་འདིར་མ་བཤད་དོ། །རབ་གནས་ཀྱི་ཆོ་གའི་སྐབས་ཏེ་བཅུ་བདུན་པའོ།། །།ད་ནི་སྦྱིན་བསྲེག་གི་ཆོ་ག་མདོར་བསྡུས་པ་བཤད་པར་བྱ་སྟེ། དེ་ཡང་གོང་དུ་བཤད་པ་བཞིན་གྱི་ས་ཆོག་ལས། དཀྱིལ་འཁོར་ཡོངས་རྫོགས་བསྒོམ་མི་དགོས་ཏེ།
དཀྱིལ་འཁོར་གྱི་གཙོ་བོའི་ང་རྒྱལ་ཙམ་ལ་གནས་པས་བྱའོ། །དེར་ཞི་བའི་ཐབ་ཁུང་བྱ་བ་ནི། སྟེགས་བུ་གྲུ་བཞི་པ་དཔངས་ཇི་ལྟར་རིགས་པ་ལ། དབུས་སུ་ཐབ་ཁུང་ཟབས་སུ་མཐོ་གང༌། རྒྱར་ཁྲུ་གང་ཟླུམ་པོ་ལ། དབུས་ཀྱི་མཐིལ་དུ་པདྨ་འདབ་བརྒྱད་རིགས་ལྔའི་ཕྱག་མཚན་ཅན་བྱ། མཆུ་སོར་བཞིས་བསྐོར་བ་ལ་ཟེ་འབྲུ་འབྲི། ཁ་ཁྱེར་དཔང་དང་རྒྱར་སོར་བཞི་པ་ལ། པང་འདབ་འབྲི་སྟེ་ཕྱོགས་བཞིར་རྡོ་རྗེ་རྒྱ་ཁྲམ་གྱིས་མཚན་པ། སྟེགས་བུའི་ཟུར་བཞིར་ཟླ་ཕྱེད་རྡོ་རྗེས་བརྒྱན་པ། ཕྱི་ནང་ཐམས་ཅད་དཀར་པོས་བྱུགས། སྒྲུབ་པ་པོའི་གདན་གྱི་གཡོན་དུ་ཆུ་གཉིས་དང་བུམ་པ་བཅའ། གཡས་སུ་བསྲེག་རྫས་དང་མཆོད་རྫས་དང༌། དེའི་ཕྱི་རོལ་ཏུ་མེ་ལྷའི་མཆོད་པ་རྣམས་བཤམས། གཏོར་མ་ཡང་ཇི་ལྟར་བདེ་བར་བཞག །ཀཻ་ལ་ཤ་ཡང་བརྩིགས་ལ། རྡོ་རྗེ་དྲིལ་བུ་དགང་བླུགས་རྣམས་རང་གི་མདུན་དུ་བཤམ་མོ། །དེ་ནས་སྔོན་འགྲོ་གཏོར་མ་བཏང༌། བདག་བསྐྱེད་རྒྱས་བསྡུས་ཅི་རིགས་པ་བསྒོམ་ལ། ལས་བུམ་སྒྲུབས། བུམ་པ་མེད་ན་བསང་ཆུ་སྒྲུབ་ཏེ། དུང་གི་ཆུ་ལ་འཁྱིལ་པ་བཟླས་པས་སོ། །དེ་ནས་ནང་མཆོད་ཀྱི་རྫས་རྣམས་བསངས། མཆོད་པ་བྱིན་རླབས་བྱ། ཨོཾ་ཨོཾ་སྭཱཧཱ། ཨོཾ་ཨཱཿསྭཱཧཱ། ཨོཾ་ཛྲིཾ་སྭཱཧཱ། ཨོཾ་ཀུ་རུ་ཀུ་རུ་སྭཱཧཱ། ཞེས་པས་བསྲེག་རྫས་རྣམས་བྱིན་གྱིས་བརླབས། ཨོཾ་ཨཱཿཧཱུཾ་དང༌། ཨ་མྲྀ་ཏ་བཟླས་པས་མེ་བཅུག་ལ། ཨོཾ་ཛྭ་ལ་ཛ་ལ་ཧཱུཾ། ཞེས་བརྗོད། ཧཱུཾ་བདུན་གྱིས་རླུང་ཡབ་གཡབ། ཨ་མྲྀ་ཏ་ལན་བདུན་གྱིས་བླུགས་གཟར་གཅིག་ཕུལ། ཨོཾ་བཛྲ་སཏྭ་ཨཱཿ ཞེས་ཀུ་ཤ་བཀྲམས་པར་མོས། ཐབ་བསངས་སྦྱངས། སྟོང་པའི་ངང་ལས་
བྷྲུཾ་ལས་བྱུང་བའི་ཐབ་ཁུང་གི་དབུས་སུ། འབར་བའི་མེ་རཾ་ལས་བྱུང་བའི་མེ་ལྷ་དཀར་པོ་ར་སྐྱེས་ལ་ཆིབས་པ། བགྲང་ཕྲེང་དང་སྤྱི་བླུགས་འཛིན་པ། རང་གི་སྙིང་ག་ནས་འོད་ཟེར་འཕྲོས། མེ་ལྷ་འཁོར་བཅས་བཛྲ་ས་མཱ་ཛཿ ཐལ་མོའི་མཐེ་བོང་གཡབ་པའམ། དབྱུག་གུ་རྩེ་གསུམ་གྱི་ཕྱག་རྒྱ་རྣ་བའི་དྲུང་དུ་གཡབ་ཅིང༌། ཨོཾ་གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་སྒྲུབ་པ་པོ། །སྙིང་རྗེས་སེམས་ཅན་དོན་ཀུན་མཛད། །འདིར་ནི་ཡང་དག་མཉེས་པར་མཛོད། །ཅེས་བརྗོད་ལ། ཨ་མྲྀ་ཏས་བསངས། ཛཿཧཱུཾ་བཾ་ཧོཿགཉིས་སུ་མེད་པར་ཐིམ། སྒྲུབ་ཐབས་བཞིན་དབང་བསྐུར་ལ་རྣམ་སྣང་གི་དབུ་བརྒྱན། ཆུ་གཉིས་སྔོན་དུ་འགྲོ་བའི་ཉེར་སྤྱོད་རོལ་མོ་དང་བཅས་པ་འབུལ། འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པཽ་ཊཀྐིས་དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་བསྲེག །འཛིན་བྱེད་མེ་ལྷ་ཉིད་ལ་རྣམ་པར་འདུད། །ཅེས་པས་བསྟོད། ཨོཾ་ཨགྣ་ཡེ་ཨཱ་དི་བེ་ཨཱ་དི་བེ་ཨཱ་བི་ཤ་ཨཱ་བི་ཤ་མཧཱ། ཤྲཱི་ཡེ་ཧ་བྱ་ཀ་བྱ་བཧྣ་ཡ་སྭཱཧཱ། ཨོཾ་ཨགྣ་ཡེ་སྭཱཧཱ། ཞེས་དགང་བླུགས་ལན་བདུན་སོགས་ཇི་ལྟར་རིགས་པ་ཕུལ། ན་མཿས་མནྟ་བུདྡྷ་ནཾ་ཨོཾ་ཨགྣ་ཡེ་སྭཱཧཱ། ཞེས་པས་བསྲེག་རྫས་མཐའ་དག་འབུལ་ཞིང༌། དེ་ནས་སླར་ཡང་བསྲེགས་བླུགས་གཅིག་ཕུལ་ཏེ། ཡང་ཐབ་ཀྱི་མེ་བསངས་སྦྱངས། སྟོང་པའི་ངང་ལས་གཞལ་ཡས་ཁང་གདན་དང་བཅས་པ་བསྐྱེད་པ་ཡན་ཆད་སྒྲུབ་ཐབས་དང་འདྲ། འོན་ཀྱང་འབྱུང་བཞི་ལ་རང་སེམས་བསྲེ་མི་དགོས། དབུས་ཀྱི་གདན་གྱི་སྟེང་དུ་ཧཱུཾ་དང་ཨཾ་ལས་བཅོམ་ལྡན་འདས་
དཔལ། སོགས་དང༌། ཤར་དུ་གཾ་ལས་གཽ་རཱི་སོགས། མིག་ཏུ་མོཾ་ལས་ནས། དབུ་བརྒྱན་གྱི་བར་མངོན་རྟོགས་བཞིན་ནོ། །ཆུ་གཉིས་ཉེར་སྤྱོད་རོལ་མོ་ན་བཟའ་ནང་མཆོད་གསང་མཆོད་བསྟོད་པ་རྣམས་རྒྱས་བསྡུས་གང་ཡང་རུང་བར་བྱས་ལ། མགོར་དེ་བ་པི་ཙུ་དང༌། མཇུག་ཏུ། མ་མ་ཤིནྟང་རཀྵན་ཙ་ཀུ་རུ་སརྦ་ཨརྠ་སཱའ་དྷཱ་ཡ་སྭཱཧཱ། ཞེས་པ་སྦྱར་ལ། བར་དུ་རྫས་སྔགས་རེ་དང་སྤེལ་བའི་བསྲེག་རྫས་འབུལ་བ་ནི། ཨོཾ་ཨགྣ་ཡེ་སྭཱཧཱ། མར་དང༌། ཨོཾ་བཛྲ་ལ་ཏ་ཡེ་སྭཱཧཱ་འམ་ཨོཾ་བོ་དྷི་པྲིཀྵ་ཡེ་སྭཱཧཱ། གང་རུང་གིས་ཡམ་ཤིང༌། ཨོཾ་སརྦ་པཱ་པཾ་ད་ཧ་ན་བཛྲ་ཡེ་སྭཱཧཱ། ཏིལ། ཨོཾ་བཛྲ་ཨ་ཡུ་ཥེ་སྭཱཧཱ། དུར་བ། ཨོཾ་བཛྲ་པུཥྟ་ཡེ་སྭཱཧཱ། འབྲས་མ་བྲུགས་པ་དང༌། ཨོཾ་སརྦ་སཾ་པ་དེ་སྭཱཧཱ། ཟས་མཆོག །ཨོཾ་ཨ་པྲ་ཏི་ཧ་ཏ་བཛྲ་ཡ་སྭཱཧཱ། ཀུ་ཤ །ཨོཾ་བཛྲ་བི་ཛ་ཡེ་སྭཱཧཱ། འབྲས་སོ་བ། ཨོཾ་མཧཱ་བེ་ག་ཡ་སྭཱཧཱ། ནས། ཨོཾ་མཧཱ་བ་ལ་ཡེ་སྭཱཧཱ། སྲན་མ། ཨོཾ་བཛྲ་གྷསྨ་རི་སྭཱཧཱ། གྲོ་སྟེ་དེ་ལྟར་ན་བསྲེགས་རྫས་སོ་སོར་ཅི་རིགས་པ་འབུལ་ལ། མདོར་བསྡུ་ན་ལྷ་སྔགས་ཁོ་ནས་ཕུལ་ཀྱང་རུང་ངོ༌། །དེ་ནས་འཇིག་རྟེན་དང་འཇིག་རྟེན་ལས་འདས་པའི་ལྷ་རྣམས་གཏོར་མའི་ཆོ་གས་ཚིམས་པར་བྱས་ལ། མཆོད་བསྟོད། གསོལ་གདབ། ཡིག་བརྒྱ། བཟོད་གསོལ། གཤེགས་གསོལ། དམ་ཚིག་པ་རང་ལ་བསྡུ་བ་རྣམས་བྱའོ། །སླར་ཡང་མེ་ལྷ་ཐབ་ཁུང་དུ་བྱོན་པ་ལ། གོང་བཞིན་མཆོད་བསྟོད་དང་བསྲེག་རྫས་ཀྱི་ལྷག་མ་རྣམས་ཕུལ་ནས། གཏོར་མ་འབྲུ་གསུམ་གྱིས་བྱིན་གྱིས་བརླབས་
ནས། ཨོཾ་ཨགྣ་ཡེ་ཨཱ་དཱི་བྱ། སོགས་ཀྱི་མཐར། ཨོཾ་དྷཱཾ་དྷཱཾ་ཞེས་བཏགས་པ་ལན་གསུམ་མམ་བདུན་གྱིས་བསྔགས་ནས་བླུགས་གཟར་གྱིས་བླངས་ཏེ་ཐབ་ཁུང་དུ་འབུལ། སླར་ཡང་སྔོན་བཞིན་དགང་བླུགས་ཕུལ་ལ། འདོད་དོན་གསོལ་བ་བཏབ། ཡིག་བརྒྱ་བཟོད་གསོལ་གཤེགས་གསོལ་རྣམས་སྤྱི་དང་འདྲ་བ་ལས། མེ་ལྷ་སྤྱན་འདྲེན་པའི་ཕྱག་རྒྱ་ཕྱིར་བཀྱེད་ཅིང༌། སྭ་ཨརྠ་ན་ཞེས་སོགས་སམ། ཡང་ན་བོད་སྐད་དུ་བྱ་སྟེ། བདག་གི་དོན་དང་གཞན་གྱི་དོན། །སྒྲུབས་ཀྱི་བཞུད་ཅིག་བྱིན་ཟ་ཁྱོད། །ཇི་བཞིན་དུས་སུ་སླར་བྱོན་ཅིག །བདག་ལ་དངོས་གྲུབ་ཐམས་ཅད་མཛོད། །ཅེས་དང༌། མེ་ལྷའི་སྔགས་ཀྱི་མཐར། ཨོཾ་མུཿ ཞེས་བརྗོད། སྨོན་ལམ་དང་བཀྲ་ཤིས་རྒྱ་ཆེར་བྱའོ། །འདི་ནི་ཞི་བའི་ཆོ་ག་སྙིང་པོ་ཙམ་སྟེ། ལས་གཞན་ཡང་འདི་ལས་དཔགས་ཏེ་རྟོགས་པར་བྱའོ། །སྦྱིན་བསྲེག་གི་སྐབས་ཏེ་བཅོ་བརྒྱད་པའོ།། །།དེ་ལྟར་ན་བཤད་ཟིན་པའི་དབང་བསྐུར་བ་དང༌། རབ་ཏུ་གནས་པ་དང༌། སྦྱིན་བསྲེག་ལ་སོགས་པ་འདི་རྣམས་མཚན་ཉིད་དང་ལྡན་པའི་ཆོ་ག་རྒྱས་པ་རྣམས་ལེགས་པར་ཤེས་པས་བསྡུས་པའི་ཁྱད་པར་འདི་དག་ངེས་པར་བྱ་དགོས་སོ། །ཚོགས་ཀྱི་འཁོར་ལོའི་བྱ་བ་མདོ་ཙམ་ནི། ཚོགས་ཀྱི་དཀྱིལ་འཁོར་བྱ་བ་ནི་སྤྱོད་པའི་སྐབས་སུ་འཆད་པར་འགྱུར་ལ། འདིར་ལས་དང་པོ་པ་རྣམས་ཀྱི་རིམ་པ་ལྟར་ན། དང་པོར་ཡོ་བྱད་ཚོགས་པར་བྱས་ནས། སྔོན་འགྲོ་གཏོར་མ། གནས་ཡོ་བྱིན་རླབས་ཞུ་འབུལ་རྣམས་སྔོན་དུ་འགྲོ་བས། ཇི་སྐད་བཤད་པའི་དཀྱིལ་འཁོར་རྣམས་ལས་བདག་གི་རྣལ་འབྱོར་རྫོགས་པར་བྱ། བཟླས་པ་ཅི་རིགས་པ་བྱས་ནས། དཀྱིལ་འཁོར་གྱི་འཁོར་
ལོར་རང་ཉིད་ལ་བསྡུའོ། །དེའི་འོག་ཏུ་མདུན་བསྐྱེད་ནི། འཆད་པར་འགྱུར་བ་མཎྜལ་གྱི་ཆོ་ག་དང་འདྲ་བར་བྱ། དེ་ནས་ཚོགས་ཀྱི་ཡོ་བྱད་གཏོར་མ་ལྟར་བྱིན་གྱིས་བརླབས་ལ། ཕུད་དང་པོ་བཤམས་ཏེ། འཇིག་རྟེན་དང་འཇིག་རྟེན་ལས་འདས་པའི་གཏོར་སྔགས་ཀྱིས་ཕུལ། དེ་ནས། གཟིགས་ཤིག་མཛེས་པ་དམ་པའི་ཆོས། །འདི་ལ་ཐེ་ཚོམ་བྱར་མི་རུང༌། །བྲམ་ཟེ་ཁྱི་དང་གདོལ་པ་རྣམས། །རང་བཞིན་གཅིག་པའི་ལྷན་ཅིག་རོལ། །ཅེས་དྲངས། དེ་རྣམས་ཀྱིས་ཀྱང༌། བདེ་བར་གཤེགས་ཤིག་ཆོས་ཀྱི་མཆོག །འདོད་ཆགས་དྲི་མ་རྣམ་པར་སྤངས། །གཟུང་དང་འཛིན་པ་དང་བྲལ་བའི། །དེ་བཞིན་ཉིད་ལ་བདག་ཕྱག་འཚལ། །ཞེས་བླངས་ཏེ་ཐམས་ཅད་ལ་བྲིམས། ལྷག་མ་སྣོད་ཅིག་ཏུ་བཞག་གོ །དེ་ནས་སོ་སོའི་ནས་ཕུད་བསྡུས་ལ་དེ་ཡང་སྔ་མ་ལྷར་འབུལ་ལོ། །དེ་ལྟར་ཚིམས་པར་ལོངས་སྤྱད། ལྷག་མ་རྣམས་བསྡུས་ལ་ཁ་ཕྲུས་བཏབ་ཅིང༌། སྔར་གྱི་ལྷག་མ་ཅིག་ཤོས་དང་ལྷན་ཅིག་འབྲུ་གསུམ་གྱིས་བྱིན་གྱིས་བརླབས་ནས། ཨོཾ་ཀུ་རུ་ཀུ་རུ་བྷྱཿཝརྟ་ལི་ཝརྟ་ལི། མཧཱ་ཝརྟ་ལི་ཚེ། དུར་ཁྲོད་གནས་མོ་དངོས་གྲུབ་ཞལ། ཁྲག་ལ་དགའ་མ་ཡི་དྭགས་གདོང༌། །གཏུམ་མོ་གཙིགས་བྱེད་ཁྲོ་མོ་སྟེ། །རྣལ་འབྱོར་ནམ་མཁའ་དམ་ཚིག་བསྲུངས། །ཀི་ལི་ཀི་ལི་སྒྲ་སྒྲོགས་མ། །ཕ་མེས་ནགས་ནང་གསོལ་ཞིག་བཞེས། །ཚོགས་དང་ཕོ་ཉར་བཅས་པ་ཡི། །གཏུམ་མོ་མཆེ་གཙིགས་དུད་སོལ་མ། །རང་གི་གནས་སུ་མཛོད་ཅིག་མཛོད། །ཧཱུཾ་ཧཱུཾ་ཧཱུཾ། བཟུང་ཞིག་བཟུང་ཞིག་གདུག་ཅན་ཀུན། །ཟོ་ཞིག་ཟོ་ཞིག་ཧོ་
ཕྲཻ༵ཾ། བདག་ཅག་རྣམས་ཀྱི་སརྦ་བིགྷྣཱན་ཤནྟིཾ་ཀུ་རུ་ཀུ་རུ་ཕཊ་སྭཱཧཱ། ཞེས་པ་དང༌། ཨ་ཀཱ་རོའི་སྔགས་ཀྱིས་ལན་གསུམ་བསྔོས་ལ། ཨོཾ་ཁ་ཁ་ཁཱ་ཧི་ཁཱ་ཧི་ཨུ་ཙིཥྟ་བཱ་ལིཾ་ཏ་བྷཀྵ་སི་སྭཱཧཱ། ཞེས་པས་ལྷག་གཏོར་བཏང༌། ལས་ཐམས་ཅད་པའི་སྔགས་ཀྱིས་མཚམས་བཅད། ཡང་རྡོ་རྗེའི་གླུ་བླངས་ཏེ་སྤྲོ་ན་གར་ལ་སོགས་པ་ཅི་རིགས་པ་བྱའོ། །ལྟེ་བར་གཏུམ་མོ་འབར་བ་ཡིས། །ཞེས་སོགས་ཤོ་ལོ་ཀ་གཅིག་བརྗོད་ཅིང་དོན་བསམ། ཨ་ནུ་རཱ་གའི་སྔགས་དང་ཕྱག་རྒྱ་ཏིང་ངེ་འཛིན་ལ་མཉམ་པར་བཞག །རིགས་སུ་སྐྱེ་དང་སོགས་སྨོན་ལམ་གདབ་ཅིང༌། རྒྱུད་གཞན་ལས་གསུངས་པས་ཀྱང་སྨོན་ལམ་བཏབ་ལ། བཀྲ་ཤིས་ཀྱི་ཚིགས་སུ་བཅད་པ་བརྗོད་དོ། །ཚོགས་ཀྱི་འཁོར་ལོའི་སྐབས་ཏེ་བཅུ་དགུ་པའོ།། །།མཎྜལ་མཆོད་པའམ། ཕྱི་རོལ་མཆོད་པ་ནི། ཞུ་འབུལ་མ་གཏོགས་བཤད་མ་ཐག་པ་དང་འདྲ། མཎྜལ་བསངས་སྦྱངས། སྟོང་པའི་ངང་ལས། ར་ལས་ཉི་མའི་ནས། གན་རྐྱལ་དུ་གནས་པ། ཨོཾ་ཧེ་བཛྲ་ཡ་ན་མཿ ཨོཾ་ནཻ་རཱཏྨ་ཡ་ན་མཿ ཨོཾ་གཽ་རཱི་ན་མཿ སོགས་ཀྱིས་བྱིན་གྱིས་བརླབས། ཨོཾ་དེ་བ་པི་ཙུ་བཛྲ་ཧཱུཾ་ཧཱུཾ་ཕཊ། དབུས་ཀྱི་གདན་གྱི་སྟེང་དུ་བཅོམ་ལྡན་འདས་དཔལ་ཧེ་རུ་ཀ་དགྱེས་པ་རྡོ་རྗེ་ནས། མཚུངས་པའོ། །ཨོཾ་ཨཱཿགཾ་ཧཱུཾ། ཤར་དུ་གཽ་རཱི་ནག་མོ། ཞེས་སོགས་སྦྱར་ཏེ། བཅོམ་ལྡན་འདས་མ་དང་མཚུངས་པའོ། །ཐམས་ཅད་ཀྱི་མིག་ཏུ་ཞེས་པ་ནས། དབུ་བརྒྱན། དེ་ནས་མཆོད་བསྟོད་གཏོར་མ་འབུལ་བ་རྣམས་བྱ་སྟེ་དཀྱིལ་འཁོར་གྱི་ཆོ་གའི་སྐབས་དང་འདྲ། ཡན་ལག་བདུན་པ་དང་རིགས་ལྔའི་སྡོམ་བཟུངས་རྣམས་བྱ་སྟེ། ཐུགས་བརྒྱུད་བསྐུལ་བའི་དོན་
དུ་བཟླས་པ་ཅུང་ཟད་བྱས་ལ། སླར་ཡང་མཆོད་བསྟོད་ནས་བཀྲ་ཤིས་ཀྱི་བར་རྗེས་ཆོག་རྣམས་སྤྱི་དང་འདྲའོ། །འདི་ལ་འགྲུབ་ཅིང་སྤྲོ་ན། མཆོད་པའི་སྐབས་སུ་ལྷ་རེ་རེའི་སྔགས་ཀྱི་མཐར། མཆོད་པའི་སྔགས་རེ་བཏགས་ཏེ་ཕུལ་ན་ཤིན་ཏུ་ལེགས་སོ། །ཕྱི་རོལ་མཆོད་པའི་སྐབས་ཏེ་ཉི་ཤུ་པའོ།། །།ད་ནི་ལས་ཚོགས་སྒྲུབ་པའི་རྣལ་འབྱོར་རྣམས་བཤད་པར་བྱ་སྟེ། དེ་ཡང་དཔལ་ཧེ་རུ་ཀ་དང་རྡོ་རྗེ་བདག་མེད་མའི་རྣལ་འབྱོར་ལ་གནས་པས། རང་གི་སྙིང་གར་ཨཱ་ལས་རྡོ་རྗེ་མ་དཀར་མོ་གྲི་ཐོད་ཁ་ཊྭཱཾ་རྣམས་འཛིན་པ། ཐུགས་ཀར་ཧཱུཾ་ཡིག་ཅན་སྒོམ་སྟེ། ཨོཾ་ཧཱུཾ་སྭཱཧཱ། འབུམ་ཕྲག་གཅིག་གམ་བཞི་འབུམ་དུ་བསྙེན་པ་བྱའོ། །དེ་ནས་ཁམ་ཕོར་ཁ་སྦྱོར་ལ་ཐོད་ལེ་སྐོར་གྱིས་འཁོར་ལོ་རྩིབས་བརྒྱད་པ་ལྟེ་བ་ལ། ཨོཾ་ཧཱུཾ་ཆྒཻ་མོ་སྟམ་བྷ་ཡ་སྟམ་བྷ་ཡ་ཧཱུཾ་སྭཱཧཱ། མཐའ་སྐོར་དུ་སཾ་ཡིག་གིས་སྐོར་བ་བྲིས། རྩིབས་བརྒྱད་ལ། ཨ་ཀ་ཙ་ཊ་ཏ་པ་ཡ་ཤ་མུ་ཁྱུད་ལ་སཾ་ཡིག་གམ་རྩ་སྔགས་སྤེལ་ཚིག་ཅན་བྲིས། ཁ་ཕོར་གཞན་སྣ་ཚོགས་རྡོ་རྗེ་དང་རི་རབ་བྲིས་པའི་སྟེང་ནས་བཀབ། དེ་རྡོག་པས་མནན་ཏེ་སྔགས་སྤེལ་ཚིགས་ཅན་ཁྲི་བཟླས་ཏེ། དེས་ཀྱང་མ་འགྲུབ་ན། མཆོད་རྟེན་ལ་སོགས་པར་སྦའོ། །འདི་ནི་སྤེལ་ཚིག་གི་དབྱེ་བས་ལུས་རེངས་པ་དང་ངག་རེངས་པ་གཉིས་ཅར་བྱེད་དོ། །དེ་བཞིན་དུ། ཨི་ལས་གཽ་རཱི་དམར་སེར་ལྕགས་ཀྱུ་དང་ཞགས་པ་ཐོགས་པ་ཐུགས་ཀར་ཨཾ་ཡིག་ལ་བསྒོམ་ལ། ཨོཾ་ཨཾ་སྭཱཧཱ། བསྙེན་པ་བྱ། དེ་ནས་བསྒྲུབ་བྱ་སྐྲ་གྲོལ་བ་སོགས་མདུན་དུ་བསམ་སྟེ། སྙིང་གའམ་སྐྱེ་གནས་སུ་ཨ་ཡིག་དམར་པོ་ལས་མེ་འབར་ཏེ་ཧཾ་ཡིག་རབ་ཏུ་ཞུ་བར་བསམ་སྟེ། ཨོཾ་ཨཾ་ཆྒཻེ་མོ་བདག་གིས་དབང་དུ་བསྡུས་ཤིག་ཨཾ་སྭཱཧཱ།
ཞེས་ཞགས་པ་ལྕགས་ཀྱུའི་སྦྱོར་བས་བཀུག་ཅིང༌། འཁོར་ལོ་འབྲི་བ་ནི་གྲོ་ག་ལ་རྒྱ་སྐྱེགས་ཀྱིས་བྲི་ཏེ། སཾ་གྱི་དོད་དུ་ཐཾ་ཡིག་གོ །དེ་བཞིན་དུ། ཨི་ལས་ཆུའི་རྣལ་འབྱོར་མ་སྔོན་མོ་ཐོ་བ་དང་སྡིགས་མཛུབ་ཅན། ཐུགས་ཀར་ཁཾ་ཡིག་གོ །ཨོཾ་ཁཾ་སྭཱཧཱ། བསྙེན་པ་བྱས་ལ། འཁོར་ལོ་རྔ་མོ་དང་བྱ་རོག་གི་ཁྲག་གིས་བྲིས་ལ་ཁཾ་གིས་བསྐོར་བ་རྔ་མོའི་རྒྱབ་ཏུ་གནས་པའོ། །དགུག་གཞུག་དྲག་ཏུ་བྱས་ཏེ། བསྒྲུབ་བྱ་གཅེར་བུ་སྐྲ་གྲོལ་བ་རྔ་མོང་ལ་བསྐྱོན་ཏེ་ཁྲོ་བོ་དབྱུག་པ་ཐོགས་པས་ལྷོ་ཕྱོགས་སུ་གདས་པར་བསམ། ཨོཾ་ཁཾ་ཆྒཻ་མོ་ཨུ་ཙི་ཊ་ཡ་ཁཾ་ཧཱུཾ་ཧཱུཾ་ཧཱུཾ་ཕཊ ཞེས་བསྐྲོད་པའོ། །དེ་བཞིན་དུ། ཨུ་ལས་རྡོ་རྗེ་མཁའ་འགྲོ་མ་ནག་མོ་རལ་གྲི་དང་ལྕགས་སྒྲོག་འཛིན་པ་ཐུགས་ཀར་ཛྲིཾ་ཡིག་སྒོམ་ལ། ཨོཾ་ཛྲིཾ་སྭཱཧཱ། བསྙེན་པ་བྱས་ལ། འཁོར་ལོ་རྟ་དང་མ་ཧེའམ་ཁཱ་དང་འུག་པའི་ཁྲག་གིས་འབྲི་སྟེ་ཛྲིཾ་གིས་བསྐོར་བའོ། །བསྒྲུབ་བྱ་དགུག་གཞུག་དྲག་ཏུ་བྱ་ཞིང༌། ཕན་ཚུན་དུ་སྲོག་ཆགས་དེ་དག་ཞོན་ཞིང་འཐབ་པར་བསམ་ནས། ཨོཾ་ཛྲིཾ་ཆྒཻ་མོ་དང་ཆྒཻེ་མོ་བི་དྭེ་ཥ་ཡ་ཛྲིཾ་ཧཱུཾ་ཧཱུཾ་ཧཱུཾ་ཕཊ། མི་དང་མི་མ་ཡིན་པ་དབྱེ་བ་འདྲའོ། །དེ་བཞིན་དུ། བདག་མེད་མ་ཨ་ལས་བྱུང་བ་དུད་ཁ་སྤྱི་དང་འདྲ་བར་བསྐྱེད་ལ། ཐུགས་ཀར་བུཾ་ཡིག་སྒོམ་ལ། ཨོཾ་བུཾ་སྭཱཧཱ། བསྙེན་པ་བྱས་ནས་འཁོར་ལོ་ནི་རིམས་ནད་ཀྱིས་ཤི་བའི་ཐོད་པ་ལ་དུག་དང༌། ཁྲག་དང༌། ཉེ་ཚེ་དང༌། ལན་ཚྭ་རྣམས་ཀྱི་འདྲི་སྟེ། ལྟེ་བར་ཟུར་དྲུག་པ་ལ་ཧཱུཾ་དྲུག །བུཾ་གྱིས་སྐོར་བ་ནི་ཁྱད་པར་རོ། །བསྒྲུབ་བྱའི་བྱ་བ་སྔ་མ་དང་མཚུངས་པ་ལས། ཉི་ཕྱེད་དང་ནམ་ཕྱེད་ཕུབ་མའི་མེ་ལ་གདུང་བར་བྱའོ། །ཨོཾ་བུཾ་ཆྒཻ་མོ་རིམས་ཀྱིས་ཐེབས་པར་མཛོད་ཅིག་བུཾ་ཧཱུཾ་ཧཱུཾ་ཧཱུཾ་ཕཊ། རིམས་ཀྱིས་ཐེབས་པར་བྱེད་པའོ། །
དེ་བཞིན་དུ། ཨཾ་ལས་བྱུང་བའི་མཁའ་སྤྱོད་མ་དམར་མོ། སྙིང་གར་ཧཱུཾ་ཨོཾ་ཧཱུཾ་སྭཱཧཱ། བསྙེན་པ་བྱས་ལ། འཁོར་ལོ་ཧཱུཾ་དང་ཧྲཱི་ཛས་བསྐོར་བ། ཤིང་ལོ་རླུང་གིས་ཁྱེར་བ་མ་ལྷུང་པ་ལ་བྲིས་ཏེ། རླུང་དང་མེའི་སྟེང་དུ་བསྒྲུབ་བྱ་མྱོས་པར་བསམ། སྙིང་ག་ནས་འོད་ཟེར་དམར་པོ་སྤྲོས། བསྒྲུབ་བྱའི་སྣ་སྒོ་གཡས་པ་ནས་ཞུགས། སྙིང་ག་ནས་བཅུད་ཕྲོགས་ཏེ་སྣ་གཡོན་ནས་བྱུང༌། རང་གི་སྙིང་གར་ཐིམ། དབུགས་ཀྱི་རླུང་གིས་བཀུག་པར་བསམས་ལ། ཨོཾ་ཧཱུཾ་ཆྒཻ་མོ་ཨཱ་ཀརྵ་ཡ་ཧཱུཾ་ཧྲི་ཛཿ ཞེས་པས་འགུགས་པའོ། །ཡང༌། ཨཽ་ལས་ས་སྤྱོད་མ་ནག་མོ་ཆེས་འཁྲུགས་པ། སྙིང་གར་གྷུ། ཨོཾ་གྷུ་སྭཱཧཱ། བསྙེན་པ་བྱས་ནས། རོ་རས་སམ་མིའི་ལྤགས་པ་ལ་རིམས་ཀྱི་འདེབས་པའི་སྐབས་དང་མཚུངས་པར་འཁོར་ལོ་འདྲི་བ་ལས། བུཾ་གྱི་དོད་དུ་གྷུ་བྲིས། དེ་ཉིད་བསྒྲུབ་བྱའི་རྐང་རྗེས་ཀྱི་ས་དང༌། མི་རོ་བསྲེགས་པའི་ཐལ་བ་བསྲེས་ནས། གཟུགས་བརྙན་བྱས་ཏེ་སྙིང་གར་བཅུག།དུག་དང་ཁྲག་དང་ཚེར་མ་རྣོན་པོས་བཏབ། རོ་སྐྲའི་དཀྲིས་ཏེ་འབྲུབ་ཁུང་དུ་བཞག །མངོན་སྤྱོད་ཀྱི་བྱ་བ་སྤྱི་དང་འདྲ་བར་བྱས་ནས། ཨོཾ་གྷུ་ཆྒཻ་མོ་མཱ་ར་ཡ་གྷུ་ཧཱུཾ་ཧཱུཾ་ཧཱུཾ་ཕཊ། ཅེས་བཟླ་ཞིང་དྲག་པོའི་རྫས་ཀྱིས་ཡང་ཡང་བྲབ། ཁུགས་པ་དང་བྲལ་བའི་མཚན་མ་གསལ་པོར་མཐོང་ན། རྡོ་རྗེ་མེ་ཁབ་ཀྱི་སྦྱོར་བ་དང་བཅས་ཏེ་དྲག་ཏུ་བཟླས་པས་གསོད་པར་འགྱུར་རོ། །ཅི་སྟེ་མ་གྲུབ་ན་ཐོད་པ་ཁ་སྦྱོར་གྱི་ནང་དུ་བཅུག་སྟེ། དུར་ཁྲོད་དུ་སྦས་ན་འགྲུབ་བོ། །འཁོར་ལོ་འདི་ནི་ཆར་འབེབས་པ་དང༌། རིམས་ཀྱིས་འདེབས་པ་དང༌། རབ་ཏུ་མྱོས་ལ་
དབང་དུ་བྱ་བ་རྣམས་ལའང་སྦྱར་བར་བྱའོ། །དེ་བཞིན་དུ། ཀུ་རུ་ཀུལླེ་སྒྲུབ་པ་ཡང་ཚད་མེད་བཞི་དང༌། སྟོང་པ་དང་བསྲུང་བའི་འཁོར་ལོ་སྔོན་དུ་འགྲོ་བས། གོང་ཧེ་རུ་ཀ་གསུམ་གྱི་སྐབས་སུ་བཤད་པའི་ཆོ་ག་དེ་ཉིད་སྦྱར་ལ། ཨོཾ་ཀུ་རུ་ཀུལླེ་ཧྲཱིཿསྭཱཧཱ། ཞེས་བསྙེན་པ་བྱས་ནས། འཁོར་ལོའི་ལྟེ་བར་ཧྲཱིཿཆྒཻ་མོ་ཨཱ་ཀརྵ་ཡ་ཧྲཱི་ཛཿ འདབ་མ་བརྒྱད་ལ་ཀུ་རུ་ཀུལླེ་ཧྲཱིཿསྭཱཧཱ། འཁོར་ཡུག་ཏུ་ཧྲཱིཿཛཱས་བསྐོར་བ་བྲིས་ལ། དབང་དང་དགུག་པའི་སྐབས་སུ་བཤད་པ་བཞིན་དུ་སྒྲུབས་ན། དེ་དག་ཐོགས་པ་མེད་པར་འགྲུབ་ཅིང༌། འདི་ནི་ལས་ཐམས་ཅད་བྱེད་པའང་ཡིན་ནོ། །གྲོང་ཁྱེར་བསྐྱེད་པའི་འཁོར་ལོ་ནི། འཁོར་ལོའི་ལྟེ་བ་ལ་སྤེལ་ཚིག་མིང་ཡིག་དང་བཅས་པ་བྲིས། འདབ་བརྒྱད་ཀྱི་ཡི་གེ་བརྒྱད་ལ། སྤེལ་ཚིགས་རེ་རེས་བསྐོར་བ་དང༌། ལྟེ་བའི་མཐའ་སྐོར་དུ་རྣལ་འབྱོར་མའི་སྔགས་ཕྲེང་དང༌། མུ་ཁྱུད་དང་པོ་ལ་རྩ་སྔགས། གཉིས་པ་ལ་ཨཱ་ལི། གསུམ་པ་ལ་ཀཱ་ལི། བཞི་པ་ལ་བསྐུལ་སྔགས་ཀྱིས་བསྐོར་བ་བྲིས། དེ་ཉིད་མང་པོར་བྱས་ལ། རབ་ཏུ་བརྩེགས་པ་ཐོད་པ་ཁ་སྦྱོར་གྱི་ནང་དུ་བཅུག་ལ། བསྐྲོད་པའམ་དབྱེ་བའི་ཚུལ་གྱིས་སྒྲུབས་ན། གྲོང་བསྐྲོད་པ་དང་གྲོང་འཐབ་པར་འགྱུར་རོ། །གཞན་ཡང་འཁོར་ལོ་འདིས་ལས་ཐམས་ཅད་སྒྲུབ་པར་བཤད་དེ། དེས་ན་གོང་དུ་བཤད་པའི་ལས་བདུན་དང༌། ཀུ་རུ་ཀུལླེ་དང༌། འདི་སྟེ་དགུ་པོ་འདི་ནི་རྣལ་འབྱོར་མའི་ལས་གཙོ་བོ་ཆེ་བ་ཡིན་ནོ། །ཆར་འབེབས་གཅོད་གཉིས། རྡོ་རྗེ་གྲི་གུག་གི་སྦྱོར་བ། ཉི་ཟླ་མནན་པ། རིམས་ཀྱིས་འདེབས་པ་རྣམས་ཧེ་རུ་ཀའི་ལས་གཙོ་ཆེ་ཞིང༌། ལྷག་མ་རྣམས་ཆ་མཉམ་པའོ། །ལས་འདི་ཀུན་ཡང་སྦྱིན་བསྲེག་དང་གཏོར་མས་ལས་ཀྱི་
གྲོགས་བྱེད་པ་མང་ལ། སྦྱིན་བསྲེག་ལས་རིགས་དང་བསྟུན་ཅིང༌། གཏོར་མའི་ཆོ་ག་གོང་དུ་བཤད་པའི་གཏོར་མ་ཆེན་པོས་ཀྱང་སྒྲུབ་དགོས་ལ། སོ་སོའི་བསྙེན་པའི་སྐབས་སུ་ནི་བསྡུས་པ་སྟེ། འཇིག་རྟེན་འདས་པ་ལ་སྔགས་ཀྱི་མཐར་ཨ་ཀཱ་རོ་བཏགས་པ་དང༌། འཇིག་རྟེན་པ་རྣམས་ལ་ཨ་ཀཱ་རོའི་སྔགས་ཉེར་གཅིག་གིས་འབུལ་བ་ཡིན་ནོ།། ཅི་སྟེ་ལས་ཀྱི་ལྷ་རྣམས་སྙིང་གར་སྒོམ་པ་ལ་མི་མོས་ན་མདུན་དུའོ། །ལས་ཚོགས་ཀྱི་སྐབས་ཏེ་ཉི་ཤུ་རྩ་གཅིག་པའོ།། །།ད་ནི་རྣལ་འབྱོར་འགྲུབ་པའི་རིམ་པ་བཤད་པར་བྱ་སྟེ། དང་པོ་སློབ་དཔོན་དང་སློབ་མའི་མཚན་ཉིད་ཤེས་པས་དབང་བསྐུར་བ་ཐོབ་པར་བྱའོ། །དེས་ནི་རྟག་ཏུ་དམ་ཚིག་ལ་གནས་དགོས་པས་དམ་ཚིག་གི་རིམ་པ་དང༌། དེ་ནས་བསྐྱེད་རིམ་དང༌། བཟླས་པ་དང༌། སྟོང་པའི་དེ་ཁོ་ན་ཉིད་བསྒོམ་པར་བྱེད་དགོས་ལ། དེ་དག་ཅུང་ཟད་བརྟན་པ་རྣམས་ཀྱིས། ལས་བཞི་སོགས་ཐོགས་པ་མེད་པར་འགྲུབ་ཅིང༌། ཉི་ཟླ་གནོན་པ་སོགས་སྒྱུ་འཕྲུལ་གྱི་རིག་སྔགས་རྣམས་ཀྱང་རིམ་གྱིས་འགྲུབ་བོ། །གལ་ཏེ་འདིར་སྤྱོད་པ་སྤྱད་ན་ཐུན་མོང་གི་དངོས་གྲུབ་ཆེན་པོ་རྣམས་ཀྱང་འགྲུབ་ཅིང༌། སྐྱེ་བ་བདུན་པའི་དམ་ཚིག་ལ་སོགས་པས་ཀྱང་འགྲུབ་པ་ཡོད་ལ། འོན་ཀྱང་དངོས་གྲུབ་མཆོག་ཚེ་འདི་ཉིད་ལ་སྒྲུབ་པར་འདོད་པ་རྣམས་ཀྱིས་ནི། བསྐྱེད་པའི་རིམ་པ་ལ་བརྟན་པ་ཐོབ་ན་ནི་ལེགས། མ་ཐོབ་ཀྱང་རིམ་གཉིས་ལྷན་ཅིག་ཏུ་བསྒོམས་པས། བརྟན་པ་ཡང་ལྷན་ཅིག་ཐོབ་པ་ཡོད་དེ། དེ་ལ་དང་པོར་རླུང་གི་རྣལ་འབྱོར་གྱིས་ལུས་སྦྱངས་བར་བྱ་ཞིང༌། ཕྱི་ནས་ཕྱག་རྒྱ་བཞིའི་རྣལ་འབྱོར་ལ་བརྟེན་ཏེ་སྒོམ་པས། མྱུར་དུ་དྲོད་ཐོབ་པར་འགྱུར་ལ། དེ་ནས་དངོས་གྲུབ་མྱུར་དུ་ཐོབ་པར་འདོད་ན། སྤྱོད་པ་སྤྱད་དགོས་
སོ། །དེ་ཡང་དང་པོར་ཟླ་བ་གཅིག་ཀུན་འདར་གསང་སྟེ་སྤྱོད་པ་སྤྱད་པས། ཡེ་ཤེས་འཕེལ་བར་གྱུར་ན་ནི། རང་གི་ནུས་པས་བཀུག་པའམ། སྦྱང་བ་ལས་བྱུང་བའམ། ལུང་བསྟན་པ་ལས་ཐོབ་པའི་གྲུབ་པའི་ཕྱག་རྒྱ་ཡང་རྙེད་པར་འགྱུར་ལ། དེ་ནས་ཀུན་འདར་འཇིག་རྟེན་པའི་མངོན་དུ་སྤྱོད་པ་ནི། བརྟག་པ་ཕྱི་མའི་ལེའུ་བཞི་པ་ལས། རང་བྱིན་གྱིས་རླབས་པའི་སྤྱོད་པར་གསུངས་པ་བཞིན་སྤྱད་དོ། །དེའི་ཚེ་གཞན་དོན་སྤྱོད་པའི་ནུས་པ་མཆོག་དང་ལྡན་པར་འགྱུར་ན། ཀུན་ཏུ་བཟང་པོའི་སྤྱོད་པ་སྤྱད་དེ། ཧེ་རུ་ཀའི་ཆས་སུ་ཞུགས་ཤིང་གྲུབ་པའི་ཕྱག་རྒྱ་དང་ལྷན་ཅིག་འདོད་པའི་ཡོན་ཏན་ལྔས་རྩེན་པར་བྱེད་པ་ནི། བརྟག་པ་དང་པོའི་ལེའུ་དྲུག་པར་བཤད་པ་བཞིན་ནོ། །དེའི་ཞིང་རྣམས་སུ་ཡོངས་སུ་རྒྱུ་བས། ནང་གི་རྩ་རྣམས་རབ་ཏུ་དག་སྟེ། ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་འགྱུར་རོ། །སྤྱོད་པ་དེ་དག་གི་གནས་སྐབས་སུ་སྤྲོས་བཅས་ཀྱི་སྤྱོད་པ་ལ་མོས་པ་རྣམས་ནི། ཚོགས་ཀྱི་དཀྱིལ་འཁོར་སྒྲུབ་པར་བྱེད་དེ། རྒྱུད་གཞན་ལས་ཀྱང༌། ཉིན་རེའམ་ཟླ་བ་རེ་རེའམ། །དེ་བཞིན་ལོ་ནི་རེ་རེར་ཡང༌། །ཇི་བཞིན་ཆོ་གས་བྱིན་རླབས་ནས། །སངས་རྒྱས་བདེ་མཆོག་གར་བྱའོ། །ཞེས་གསུངས་པ་ལྟར་རོ། །དེ་ཡང་དུར་ཁྲོད་ལ་སོགས་པའི་གནས་སུ། དུར་ཁྲོད་ཀྱི་རས་ལ་པད་ཉིའི་གདན་བྲིས་པའམ། སྟག་ལྤགས་སམ། མི་རོའི་གདན་ནམ་གཟུགས་བརྙན་ལྷ་གྲངས་དང་མཉམ་ཞིང༌། འགོད་ཚུལ་མཐུན་པར་བཤམས། དེ་ཡང་རྒྱས་པ་སྒྲུབ་པ་པོ་ཧེ་རུ་ཀ་དང༌། ཕྱག་རྒྱ་ལྷ་མོ་བཅོ་ལྔའི་དཀྱིལ་འཁོར་དང༌། འབྲིང་བོ་ནི་རིག་མ་དགུའི་དཀྱིལ་འཁོར་དང༌། རིག་མ་བརྒྱད་
ཀྱི་དཀྱིལ་འཁོར་ཡིན་ལ། བསྡུས་པ་ནི་རྡོ་རྗེ་གུར་ལས་ལྷ་ལྔ་མ་ཡང་གསུངས་པ་དང༌། དངོས་སུ་ཕྱག་རྒྱ་གཅིག་པའི་དཀྱིལ་འཁོར་ཡང་སློབ་དཔོན་རྣམས་འདོད་པ་ལྟར་འབྱུང་ངོ༌། །དེ་ལ་ངོ་བོ་ནི་ཚོགས་ཀྱི་འཁོར་ལོའི་བྱ་བ་ཡིན་ལ། བསྐྱེད་རིམ་གྱི་སྤྱོད་པ་ཡིན་ན་ནི་སྒོམ་པའི་རིམ་པ་ཡང་བསྐྱེད་རིམ་གྱི་སྒྲུབ་ཐབས་བཞིན་ཡིན་ལ། རྫོགས་པའི་རིམ་པའི་སྤྱོད་པ་ལ་ནི། བདེ་བ་དམ་པ་ལྷ་སྐུར་རང་ཤར་བའི་འཁོར་ལོ་སྒོམ་པ་ཉིད་དོ། །འདི་ནི་གཙོ་བོར་ཀུན་ཏུ་བཟང་པོའི་སྤྱོད་པའི་སྐབས་སུ་བྱེད་པ་མང་ངོ༌། །ཅི་སྟེ་ཕྱག་རྒྱ་ཆེན་པོའི་དངོས་གྲུབ་ཆུང་དུ་ཐོབ་ན་ནི། འཕགས་པར་གྱུར་པ་ཡིན་ལ། དེ་ནས་ཕྱོགས་ལས་རྣམ་རྒྱལ་གྱི་སྤྱོད་པ་སྤྱད་པས། ཡན་ལག་བདུན་དང་ལྡན་པའི་ཡེ་ཤེས་གོང་ནས་གོང་དུ་གྱུར་པ་ལས། འཕགས་པའི་ས་རྣམས་བགྲོད་དེ་དཔལ་རྡོ་རྗེ་འཛིན་པའི་སྐུར་འགྱུར་རོ། །དེ་ལྟར་ཐོབ་པའི་རྒྱུ་མཚན་ཡང༌། རང་བཞིན་གྱི་འོད་གསལ་བའི་སེམས། དེ་བཞིན་ཉྀད་སྤྲོས་པ་དང་བྲལ་བའི་དག་པ་དང༌། ལྷ་སོ་སོའི་དཀྱིལ་འཁོར་འཁོར་ལོའི་དག་པ། རང་རིག་པ་བདེ་བ་ཆེན་པོའི་དག་པས། རང་བཞིན་རྣམ་པར་དག་པ་ཡིན་པའི་ཕྱིར། ལམ་རྣམ་པ་གསུམ་སྒོམ་པས་དག་པ་གསུམ་པོ་རེ་རེར་ཡང༌། གློ་བུར་གྱི་དྲི་མ་བྲལ་ཏེ་དག་པ་གཉིས་ལྡན་དུ་འགྱུར་རོ། །དེ་ཡང་ལྷན་ཅིག་སྐྱེས་པའོ། །ལྷན་ཅིག་སྐྱེས་པ་དེ་ཡང༌། རིགས་ལྔ་དང་ཕུང་པོ་ལྔ་དང་ཁམས་ལྔ་ལ་སོགས་པའི་དབྱེ་བས་སྟོང་བ་ཆེན་པོ་ལྔའམ། བདེ་བ་ཆེན་པོ་ལྔ་ཞེས་རྣམ་པར་བཞག་པ་བྱས་སོ། །གདོད་མ་ནས་སངས་རྒྱས་ལྔའམ་དྲུག་གི་ངོ་བོར་གནས་པ་དེ། ལམ་ཡང་དེ་ལྟར་བསྒོམ་པས། འབྲས་བུ་ཡང་རིགས་ལྔ་ཐོབ་པ་ཡིན་ལ། གདོད་ནས་སྐུ་བཞིར་གནས་
པ་ལ། ལམ་རྣམ་པ་བཞི་སྒོམ་པས། འབྲས་བུ་ཡང་སྐུ་བཞི་མངོན་དུ་འགྱུར་རོ། །དེ་ལ་འབྲས་བུ་ནི། རྡོ་རྗེ་སེམས་དཔའ་ཆོས་སྐུ་དང༌། སེམས་དཔའ་ཆེན་པོ་ལོངས་སྐུ་དང༌། དམ་ཚིག་སེམས་དཔའ་སྤྲུལ་སྐུ་དང༌། དགྱེས་པ་རྡོ་རྗེ་བདེ་བ་ཆེན་པོའི་སྐུའོ། །གཞན་ཡང་རིགས་ལྔ་ནས་རིགས་བགྲང་བ་ལས་འདས་པའི་བར་དུ་ཡོངས་སུ་སྟོན་པར་བྱེད་དོ། །རྣལ་འབྱོར་ལམ་གྱི་རིམ་པའི་སྐབས་ཏེ་ཉི་ཤུ་རྩ་གཉིས་པའོ།། །།དེ་ལྟར་ན་གཙོ་ཆེ་བའི་དོན་རྣམས་བསྟན་ཟིན་ཏེ། ད་ནི་སྔར་བཤད་པ་རྣམས་སུ་ཉེ་བར་མཁོ་བའི་བསྟོད་པས་དཀྱིལ་འཁོར་ཆེན་པོ་ལ་བསྟོད་པ་ནི་འདི་ཡིན་ཏེ། ཐམས་ཅད་དངོས་པོའི་རང་བཞིན་མཆོག །གདོད་ནས་ཐམས་ཅད་བདག་ཉིད་གནས། །ཐབས་དང་ཤེས་རབ་གཉིས་མེད་པའི། །དགྱེས་པའི་རྡོ་རྗེ་ལ་ཕྱག་འཚལ། །བདག་མེད་མས་ནི་མགུལ་ལ་འཁྱུད། །དབུ་སྐྲ་སེར་པོ་གྱེན་དུ་འབར། །ཞལ་བརྒྱད་པ་ལ་སྤྱན་གསུམ་པ། །མགོན་པོ་དེ་ལ་གུས་ཕྱག་འཚལ། །སྤྱི་བོའི་སྟེང་ན་ནག་པོ་མཛེས། །དཀར་དང་དམར་པོ་གཡས་དང་གཡོན། །གང་གི་ལྷག་མའི་ཞལ་རྣམས་ནི། །གནག་པ་དེ་ལ་གུས་ཕྱག་འཚལ། །གླང་བོ་རྟ་བོང་གླང་རྔ་མོང༌། །མི་དང་ཤ་ར་བྷ་བྱི་ལ། །སྐྱེས་པ་ཁྱི་དང་མ་ཧེ་ཅན། །གཡས་པའི་ཕྱག་བརྒྱད་ལ་གནས་པའི། །ཐོད་པ་འཛིན་ལ་བདག་ཕྱག་འཚལ། །ས་དང་ཆུ་དང་རླུང་དང་མེ། །ཟླ་ཉི་གཤིན་རྗེ་གསང་བ་པ། །གཡོན་པའི་ཕྱག་བརྒྱད་ལ་གནས་པའི། །ཐོད་པ་འཛིན་ལ་བདག་ཕྱག་འཚལ། །ཞབས་
བཞི་ཡིས་ནི་བདུད་བཞི་པོ། །མཉམ་པར་མནན་ཅིང་གཅེར་བུ་ཉིད། །ཉི་མར་ཞབས་གཡས་བརྐྱང་དང་སྔོ། །གར་མཛད་དེ་ལ་བདག་ཕྱག་འཚལ། །འཁོར་ལོ་བཞི་ཡིས་བདག་ཉིད་མཛེས། །འཛག་པའི་མགོ་བོས་རྣམ་པར་བརྒྱན། །དེ་བཞིན་གཤེགས་པ་རྣམ་དག་པའི། །ཕྱག་རྒྱ་ལྔ་ཡིས་ཡང་དག་བརྒྱན། །སྣ་ཚོགས་རྡོ་རྗེ་སྤྱི་བོར་འཛིན།། དཔྲལ་བར་རིགས་ཀྱི་བདག་པོ་ཉིད། །དམ་པའི་དགའ་བ་ཡང་དག་ཐོབ། །བདེ་ཆེན་དེ་ལ་བདག་ཕྱག་འཚལ། །གཾ་ལས་སྐྱེས་པའི་གཽ་རཱི་ཤར། ཁ་དོག་གནག་ཅིང་གཡོན་པ་ཉ། །གཡས་པ་ན་ནི་གྲི་གུག་འཛིན། །ཚངས་པ་མནན་ལ་བདག་ཕྱག་འཚལ། །ཙཾ་ལས་སྐྱེས་པའི་ཆོམ་རྐུན་མ། །བཙོད་ཀྱི་ཁ་དོག་ལྷོ་ཕྱོགས་སུ། །ཕྱག་ན་ཕག་དང་ཅང་ཏེ་བསྣམས། །དབང་པོ་མནན་ལ་བདག་ཕྱག་འཚལ། །བཾ་ལས་སྐྱེས་པའི་སེར་མོ་ནུབ། །རོ་ལངས་མ་ནི་ཉེ་དབང་མནན། །ཕྱག་གཡོན་ལྷུང་བཟེད་གཡས་པ་ཡིས། །རུས་སྦལ་བསྣམས་ལ་བདག་ཕྱག་འཚལ། །གྷསྨ་རཱི་ནི་བྱང་གི་སྒོར། །ལྗང་ཁུ་གྷཾ་ལས་བྱུང་བ་ཡི། །ཕྱག་ན་སྦྲུལ་དང་ཐོད་པས་སྦྲེལ། །དྲག་པོ་མནན་ལ་བདག་ཕྱག་འཚལ། །གཤིན་རྗེ་མནན་ཅིང་པཾ་ལས་བྱུང༌། །གཡོན་པ་དགྲ་སྟ་སེང་གེ་གཡས། །དབང་ལྡན་དུ་ནི་འཇིགས་གཟུགས་མ། །ཕྱག་འཚལ་པུཀྐ་སཱི་སྔོ་ལ། །རི་ཁྲོད་མ་དཀར་ཤཾ་ལས་བྱུང༌། །མེ་རུ་གནོད་སྦྱིན་སྟེང་དུ་གནས། །གཡོན་ན་གསིལ་
བྱེད་གཡས་པ་ཡིས། །དགེ་སློང་འཛིན་ལ་བདག་ཕྱག་འཚལ། །གཏུམ་མོ་ནམ་མཁའི་སྔོ་བསངས་མ། །སྲིན་པོར་ཙཾ་ལས་བྱུང་བ་ཡི། །གཡོན་ན་ཐོང་གཤོལ་འཁོར་ལོ་གཡས། །ཕྱག་འཚལ་སྲིན་པོ་མནན་ཁྱོད་ལའོ། །ཌཾ་ལས་འཁྲུངས་པའི་གཡུང་མོ་ནི། །རླུང་མཚམས་ཐགས་བཟང་རིགས་སྟེང་གཤེགས། །ཕྱག་གཡོན་སྡིགས་མཛུབ་གཡས་རྡོ་རྗེ། །སྣ་ཚོགས་མདོག་ལ་ཕྱག་འཚལ་ལོ། །དཀྱིལ་ཀྲུང་ཕྱེད་པའི་གར་གྱིས་གནས། །ཕྱག་རྒྱ་ལྔ་ཡིས་རྣམ་པར་བརྒྱན། །གཅེར་བུ་སྤྱན་གསུམ་ཐམས་ཅད་ལ། །བདག་ནི་གུས་པས་ཕྱག་འཚལ་ལོ། །ཕུང་པོ་ཁམས་ནི་རྣམ་དག་པའི། །བྱང་ཆུབ་སེམས་ལས་བྱུང་བ་ཡི། །བདེ་རབ་སྟེར་འདི་ཐམས་ཅད་ལ། །དངོས་པོ་ཀུན་གྱིས་ཕྱག་འཚལ་ལོ། །ཉིད་ཀྱི་ཕྱག་ན་བཟུང་བ་ཡི། །ཕྱག་མཚན་ས་བོན་ལས་བྱུང་བའི། །བདེ་ཆེན་འདོད་པ་ཐམས་ཅད་ལ། །རྟག་ཏུ་ཡང་དག་ཕྱག་འཚལ་ལོ། །གང་ཞིག་ཉི་ཟླ་ཁ་སྦྱོར་གནས་ས་བོན། །གཉིས་ལས་སྐྱེས་པའི་གཙོ་བོ་རིག་མར་བཅས། །ཉིད་ཀྱི་ཉིད་ཀྱི་དཀྱིལ་འཁོར་འདི་ལ་ནི། །འཇིག་རྟེན་གསུམ་པོ་སྤྲུལ་པར་མཛད་དང་ལྡན། །ཉིད་ལས་འདི་དག་ཐམས་ཅད་མ་ལུས་པའི། །ཞི་བའི་བདེ་སྩོལ་རིག་མར་བསྡུད་བྱེད་པའི། །ཤེས་རབ་ཆགས་པས་བདུད་རྩིའི་རོ་ཉིད་ཀྱི། །གནས་སུ་ཞི་མཛད་དེ་ལ་ཕྱག་འཚལ་ལོ། །མཁའ་འགྲོ་མ་གཙོ་དགྱེས་རྡོ་རྗེ། །ལྷ་མོ་འཁོར་ལོ་བཅས་བསྟོད་པས། །བདག་གིས་བསོད་ནམས་གང་ཐོབ་
པ། །དེས་ནི་འཇིག་རྟེན་དེ་མཚུངས་ཤོག །ཅེས་པ་འདི་ནི་གྲུབ་པའི་སློབ་དཔོན་མཚོ་སྐྱེས་ཀྱིས་མཛད་པ་སྟེ། ད་ལྟར་བྱེད་པ་དང་སྦྱར་ན། སྐྱེས་པ་ཁྱི་དང་མ་ཧེ་ཅན། །ཞེས་པ། མི་དང་རྐང་བརྒྱད་བྱི་ལ་སྟེ། །ཞེས་དང༌། སྲིན་པོར་ཙཾ་ལས་བྱུང་བ་ཡི། །ཞེས་པ། སྲིན་པོར་ལཾ་ལས་བྱུང་པ་ཡི། །ཞེས་འདོན་པ་བསྒྱུར་ན་ལེགས་སོ། །བདག་མེད་མའི་དཀྱིལ་འཁོར་ལ་བསྟོད་པ་ནི། ཤེས་རབ་ཕ་རོལ་ཕྱིན་མ་མཆོག །ལྷ་མོའི་ཚུལ་གྱིས་འགྲོ་བ་སྒྲོལ། །ལྷ་ཅིག་སྐྱེས་མའི་བདེ་རྒྱས་མ། །དཀྱིལ་འཁོར་ལྷ་ཚོགས་རྣམས་ལ་འདུད། །ཞེ་སྡང་རྣམ་དག་གསལ་བའི་དངོས། །རྣམ་ཤེས་ཕུང་པོ་རྣམ་དག་པའི། །ཆོས་དབྱིངས་ཡེ་ཤེས་ངོ་བོ་ཉིད། །བདག་མེད་རྣལ་འབྱོར་མ་ལ་འདུད། །གཟུགས་ཕུང་གཏི་མུག་དག་པའི་ལྷ། །མེ་ལོང་ཡེ་ཤེས་རྡོ་རྗེ་མ། །ཚོར་པ་སེར་སྣ་དག་པའི་ལྷ། །མཉམ་ཉིད་གསང་བའི་གཽ་རཱིར་འདུད། །འདུ་ཤེས་འདོད་ཆགས་དག་པའི་ལྷ། །སོར་རྟོག་ཆུ་ཡི་རྣལ་འབྱོར་མ། །འདུ་བྱེད་ཕྲག་དོག་དག་པའི་ལྷ། །བྱ་སྒྲུབ་རྡོ་རྗེ་མཁའ་འགྲོར་འདུད། །ས་ཁམས་ཡེ་ཤེས་བྱམས་པ་ཆེ། །པུཀྐ་སཱི་ལ་ཕྱག་འཚལ་ལོ། །ཆུ་ཁམས་ཡེ་ཤེས་སྙིང་རྗེ་ཆེ། །ཤཱ་བཱ་རཱི་ལ་ཕྱག་འཚལ་ལོ། །མེ་ཁམས་ཡེ་ཤེས་དགའ་བ་ཆེ། །ཙཎྜ་ལཱི་ལ་ཕྱག་འཚལ་ལོ། །རླུང་ཁམས་ཡེ་ཤེས་བཏང་སྙོམས་ཆེ། །ཌོམྦི་ནཱི་ལ་ཕྱག་འཚལ་ལོ། །རྣམ་དག་རྡོ་རྗེ་དོན་དམ་གཟུགས། །ལྷ་མོ་གཽ་རཱི་ལ་ཕྱག་འཚལ། །རྣམ་
དག་རྡོ་རྗེ་དོན་དམ་སྒྲ། །ལྷ་མོ་ཙཽ་རཱི་ལ་ཕྱག་འཚལ། །རྣམ་དག་རྡོ་རྗེ་དོན་མ་དྲི། །ལྷ་མོ་རོ་ལངས་མར་ཕྱག་འཚལ། །རྣམ་དག་རྡོ་རྗེ་དོན་དམ་རོ། །ལྷ་མོ་གྷསྨ་རིར་ཕྱག་འཚལ། །དོན་དམ་སྲིད་པ་རྡོ་རྗེའི་རེག །ས་སྤྱོད་མ་ལ་ཕྱག་འཚལ་བསྟོད། །དོན་དམ་ཞི་བ་ཆོས་ཀྱི་ཁམས། །མཁའ་སྤྱོད་མ་ལ་ཕྱག་འཚལ་བསྟོད། །བདེ་ཆེན་བདུད་རྩི་ལྔ་ཡི་དངོས། །བུམ་པ་བཞི་ལ་ཕྱག་འཚལ་ལོ། །དངོས་གྲུབ་བརྒྱད་པོ་རྣམ་དག་པའི། །བཀྲ་ཤིས་བུམ་པ་བརྒྱད་ལ་འདུད། །བྱང་ཆུབ་ཕྱོགས་མཐུན་རྣམ་དག་པ། །གཞལ་མེད་ཁང་ལ་གུས་པའི་བསྟོད། །བདུད་རྣམས་མ་ལུས་བཅོམ་པའི་དངོས། །བསྲུང་བའི་འཁོར་ལོ་ལ་ཕྱག་འཚལ། །མ་མོ་འདུས་པ་ཉམས་དགའི་གནས། །དུར་ཁྲོད་གནས་པ་རྣམས་ལ་བསྟོད། །བསྟོད་པའི་དགེ་བས་འགྲོ་བ་ཀུན། །རྣལ་འབྱོར་མ་གཙོ་ཐོབ་པར་ཤོག །ཅེས་པའོ། །ཧེ་རུ་ཀ་གཞན་གསུམ་ལ་བསྟོད་པར་འདོད་ན། གོང་དུ་བཤད་པ་ལས་བསྡུ་བར་བྱ་སྟེ། ཐམས་ཅད་དངོས་པོའི་སོགས་ཚིགས་བཅད་གཅིག །ས་ཁམས་ཡེ་ཤེས་སོགས་ཤླཽ་ཀ་བཞི། ཕུང་པོ་ཁམས་ནི་སོགས་གཅིག །གང་ཞིག་ཉི་ཟླ་སོགས་གསུམ་བྱས་པས་ལེགས་པར་འགྲུབ་བོ། །བསྟོད་པའི་སྐབས་ཏེ་ཉི་ཤུ་རྩ་གསུམ་པའོ།། །།འདིར་སྨྲས་པ། རྒྱུད་སྡེ་ཀུན་གྱི་ཟབ་མོའི་མཐར་ཐུག་པ། །སྙིང་པོའི་དོན་སྟོན་དགྱེས་པ་རྡོ་རྗེ་ཡི། །དོན་གྱི་སྙིང་པོ་ལག་ལེན་ཆོ་གར་བཅས། །སྨྲ་བ་འདི་ཡང་བླ་མ་མཆོག་གི་དྲིན། །
གཞན་འདོད་མང་པོའི་རྗེས་སུ་འདི་མ་འབྲངས། །གང་བའི་རྡོ་རྗེ་ཞེས་བྱའི་སློབ་དཔོན་ནི། །རྡོ་རྗེ་འཆང་མཚུངས་དེ་ཡི་རིམ་པ་རྣམས། །རྒྱུད་དོན་དངོས་ལ་འབྱོར་ཕྱིར་ལྷག་པར་དང༌། །འཕགས་པའི་ཡུལ་དང་གངས་རིའི་ཁྲོད་འདི་རུ། །སྔོན་བྱོན་གྲུབ་ཐོབ་རྣམས་ཀྱི་དགོངས་པའང་འདི། །འོན་ཀྱང་རྟོག་གེའི་རྗེས་འབྲངས་མཁས་གྲགས་ཅན། །ཕྱི་རབ་མུ་ཅོར་སྨྲ་རྣམས་འབྲས་མེད་ཤེས། །བློ་ལྡན་རྣམས་ཀྱིས་བདེ་བླག་རྟོགས་པའི་ཕྱིར། །འདུས་གསལ་ཚང་ལ་གོ་བདེ་དོན་བཟང་ཞིང༌། །ངག་འདོན་བདེ་འདི་གུས་ལྡན་དོན་ཕྱིར་བཀོད། །རྒྱུད་ཀྱི་དོན་འགྲེལ་འདིས་ནི་དགེ་ལེགས་འགྱུར།། ཞེས་པ་དགྱེས་པའི་རྡོ་རྗེའི་ལག་ལེན་གསལ་བར་བྱེད་པ། དཔལ་ཧེ་རུ་ཀ་དགྱེས་པར་བྱེད་པ་ཞེས་བྱ་བ་འདི་ནི། སྐལ་ལྡན་འཕྲིན་ལས་དབང་མོ་སོགས་སྙིང་པོ་ལ་མོས་པའི་དོན་གཉེར་འགས་བསྐུལ་བའི་ངོར། རྒྱལ་ཁམས་པ་ཏཱ་ར་ནཱ་ཐས་སྨྲས་པ་སྟེ་ནགས་རྒྱལ་གྱི་དབེན་གནས་སུའོ།། །།མངྒ་ལཾ། འདི་ལ་ལྷ་སྟ་གོན་ནས་བརྩམས་ཏེ། དབུགས་དབྱུང་གཟེངསབསྟོད་ལ་སོགས་པ་འགའ་ཞིག་མ་གཏོགས། སློབ་དཔོན་ནག་པོ་སྤྱོད་པའི་ཞབས་ཀྱི་ལུགས་འཁོར་ལོ་སྡོམ་པའི་དཀྱིལ་ཆོག་བདེ་བ་ཆེན་པོའི་ཆར་ཡང་བཞིན་མཛད་པས་ཁ་འགེངས་པ་མན་ངག་ཡིན་ནོ། །མ་མ་བི་ཛ་ཡསྟུ།
ཤོག་སྟོང་།