རབ་གསལ་ཡེ་ཤེས་ཀྱི་སྤྱན།
བླ་མ་དཔལ་ཧེ་རུ་ཀ་ལ་ཕྱག་འཚལ་ལོ། །ཟླ་འོད་ཉི་འོད་ཉི་ནུབ་སྨག །སྣང་བ་གསུམ་གྱི་ཕྱི་ཡི་དཔེ། །སྐྱ་རེངས་འཆར་དུས་སྒྲིབ་མེད་ནི། །ཕྱི་ཡི་མངོན་བྱང་འོད་གསལ་དེས། །མངོན་བྱང་ཆུབ་པའི་ཁྱད་པར་དུས། །ཉི་ནུབ་ཐོབ་པ་རབ་འདས་ནས། །འོད་གསལ་འཆར་བ་ནང་གི་ནི། །མངོན་བྱང་ཉིད་དུ་ཤེས་པར་བྱ། །དེ་རྒྱུ་རིག་མས་མངོན་བྱེད་པ། །རྡོ་རྗེ་ཁུ་བ་ཉི་མ་རྡུལ། ཁུ་བ་ཉི་མའི་གནས་སོན་པ། །དེ་ཡང་དབུ་མར་ནུབ་པ་ན། །ལྷན་སྐྱེས་མི་འགྱུར་སྐྱ་རེངས་འཆར། །མངོན་བྱང་དངོས་དང་དཔེ་ཡང་འགྲུབ། །འབྲས་བུའི་མངོན་བྱང་ཞེས་བྱ་ལྔ། །ཐབས་ཤེས་གཉི་གའི་ཁུ་བ་ཡི། །ཚོགས་པ་ཕྲ་མོ་ཞུ་བ་ནི། །ཟླ་བ་ཉིད་ཡིན་རྡུལ་དང་འདྲེས། །ཉི་མའོ་ཕྲ་མོའི་རླུང་སྣ་རྩེར། །སོན་པ་མཚན་མ་ཡིན་པར་བརྗོད། །རླུང་ཐིམ་ཁུ་ཁྲག་ཀྱང་ཐིམ་པ། །ཐམས་ཅད་གཅིག་གྱུར་ནན་ཏན་ཡིན། །དེ་ཡི་ཡང་དག་མཐར་ཞུགས་ཏེ། །ལོངས་སྐུར་རྫོགས་པ་ལྔ་པ་ཡིན། ཁུ་བ་འབབ་ཐིམ་
སྣང་བ་དང༌། །རྡུལ་དང་འདྲེས་ཐིམ་མཆེད་པར་བཤད། །རླུང་ཐིམ་སྣང་བ་ཉེར་ཐོབ་པ། །གསུམ་པ་ཞིག་ཚེ་ཐམས་ཅད་སྟོང། །ཕྱི་མ་གཏན་ནས་ཐིམ་པ་ཡིན། །དང་པོ་གསུམ་གྱི་སྐབས་སུ་ནི། །ནུབ་པ་སྙིང་གར་ཐིམ་ཞིང་ཟད། །ངོ་བོ་སྣ་རྩེར་གཤེགས་པ་ཡིན། །ཕྱི་མ་ལས་བརྟན་སྙིང་ག་རུ། །ཚོགས་པ་ཞིག་ནས་ཐིམ་པའོ། །དང་པོ་གསུམ་གྱིས་བཟང་རྟོག་དང༌། །ཕྱི་མས་འཛིན་པའི་བག་ཆགས་བཅོམ། །ཤེས་སྒྲིབ་ཕྲ་མོའང་རབ་ལོག་ནས། །ཆོས་སྐུ་མངོན་དུ་བྱེད་པར་འགྱུར། །སེམས་ནི་སྐྱ་རེངས་ཆོས་སྐུ་ལ། །ལུས་ནི་མི་སློབ་དག་པའི་སྐུ། །རིག་མར་ལྷན་ཅིག་འགྲུབ་པར་གསུངས། །རང་འོད་ཀྱིས་ཀྱང་འགྲུབ་མོད་ཀྱི། །ཕྱི་ཡི་ཕྱག་རྒྱས་རབ་སྒྲུབས་ན། །གཉི་གའང་རྒྱུད་གཅིག་བཞིན་དུ་གྲོལ། །ལུས་ཀྱི་ཁུ་ཁྲག་རླུང་དག་པས། །རླུང་སེམས་འགྱུར་མེད་ལོངས་སྐུ་དང༌། །སེམས་འགྱུར་གཉིས་སྣང་ཐིམ་པ་ལས། །ཆོས་སྐུ་བདེ་སྟོང་འགྱུར་མེད་ཐོབ། །འཕྲོས་དོན་རྣལ་འབྱོར་གྱི་རྒྱུད་དུ། །དོན་འགྲུབ་འགུལ་བསྐྱོད་འབྱུང་རྔུབ་དང༌། །སེམས་གཡོ་མེད་ལས་རྒྱལ་བས་སྐུལ། །སེམས་ཀྱི་རང་བཞིན་མ་མཐོང་ལ། །སྔགས་གསུངས་སེམས་ནི་རང་བཞིན་མེད། །སྟོང་ཉིད་བཅུ་དྲུག་སོ་སོར་རྟོགས། །ཀུན་གཞིའི་རང་བཞིན་སྟོང་པ་ནི། །སྟོང་ཉིད་བཅུ་དྲུག་རྗེས་ཐོབ་ཏུ། །ཨཱ་ལི་བཅུ་དྲུག་ལས་བཟླ་བར། །བསྐྱེད་ནས་རྟོགས་ཚད་ཕུལ་བ་ནི། །དང་པོའི་དེ་ལས་འོད་གསལ་བའི། །སེམས་བསྐྱེད་རྗེས་ཐོབ་ཡང་བཟླ་བའོ། །རང་བཞིན་གདོད་མའོ་འོད་གསལ་བ། །གླཽ་བུར་
དྲི་མ་མེད་པའི་མིང༌། །གསུམ་པ་གཟུང་བྱ་མི་དམིགས་པའི། །སྟོང་ཉིད་རྗེས་ཐོབ་རྡོ་རྗེའོ། །བཞི་པ་འཛིན་བྱེད་ཡེ་ཤེས་ཀྱང༌། །མི་དམིགས་སངས་རྒྱས་ཀུན་བྱིན་རླབས། །ལྔ་པ་ལོངས་སྤྱོད་རྫོགས་རྟག་པ། རིམ་བཞིན་མི་བསྐྱོད་རིན་ཆེན་འབྱུང༌། །སྣང་བྱེད་དོན་གྲུབ་རྣམ་སྣང་མཛད། །རིགས་ལྔའི་སྔགས་རྒྱས་སྒྲུབ་པར་བྱེད། །དང་པོའི་གཟུང་འཛིན་རགས་པ་སྤོངས། །གཉིས་པས་བག་ཉལ་གསུམ་པ་ཡིས། རྗེས་ཐོབ་རྟོག་པའང་རབ་སྤངས་ནས། །བཞི་པས་སྟོང་པའི་ཡེ་ཤེས་སྤོངས། །ཆོས་སྐུ་མངོན་བྱེད་ལྔ་པ་ཡིས། །རྣམ་ཀུན་མཆོག་ལྡན་ཆད་མཐའ་སྤངས། །གཉིས་ཀྱིས་བསོད་ནམས་གསུམ་པ་ཡིས། །ཡེ་ཤེས་ཚོགས་རྫོགས་བཞི་པས་ནི། །ཆོས་དང་ལྔ་པས་ལོངས་སྐུ་སྒྲུབས། །ཟག་མེད་ཕུང་པོ་ཉི་ཤུ་ལྔ། །གཟུགས་ཕུང་གནས་གྱུར་བདེ་བཤེགས་ལྔ། །ཚོར་བ་གནས་གྱུར་ཏིང་འཛིན་ལྔ། །འདུ་ཤེས་གནས་གྱུར་གདམ་ངག་ལྔ། །འདུ་བྱེད་གནས་གྱུར་སྤངས་བ་ལྔ། །རྣམ་ཤེས་གནས་གྱུར་རྟོག་པ་ལྔ། །འདིར་ནི་ཕྱོགས་མཚོན་ཙམ་སྨོས་ཀྱི། །ཞིབ་པར་ཚད་ལྡན་རྣམ་བཤད་ལས། །མ་གཏོགས་ཇི་བཞིན་རྟོགས་དཀའ་འོ། །རྒྱུད་སྡེའི་ཟབ་གནད་རྟོགས་དཀའ་བ། །མདོ་ཙམ་མཐའ་གཅོད་བྲིས་པ་ཡི། །དགེ་བས་ཧེ་རུ་ཀར་གྱུར་ནས། །འགྲོ་ཀུན་རྡོ་རྗེ་སེམས་གྲུབ་ཤོག །ཅེས་པ་འདི་རྡོ་རྗེ་ཉི་མ་སོགས་ཀྱི་དོན་རྡོ་རྗེ་ཉི་མའི་དོན་རྒྱས་པས་ཞེས་མ་གཏོགས་རྒྱས་བཤད་ཆེར་མ་བྱུང་བ་དེའི་མཐའ་གཅོད་ཞིབ་བཤད་དུ་འཕྲོས་དང་བཅས་བྲིས་པ་རབ་གསལ་ཡེ་ཤེས་ཀྱི་སྤྱན་ཞེས་བྱ་བ་ཀུན་དགའ་སྙིང་པོ་ཏཱ་ར་ནཱ་ཐས་དབེན་གནས་དམ་པ་
འཁོར་ལོ་སྡོམ་པའི་གནས་ཆེན་བསམ་གཏན་སྡིངས་སུ་རང་ལོ་ཉེར་གཅིག་ཉེ་བ་ལ་སྦྱར་བའོ།། །།བཀྲ་ཤིས། །