དཔལ་སངས་རྒྱས་ཐོད་པའི་སྒྲུབ་ཐབས་དེ་ཁོ་ན་ཉིད་གསལ་བ།
དཔལ་སངས་རྒྱས་ཐོད་པའི་སྒྲུབ་ཐབས་དེ་ཁོ་ན་ཉིད་གསལ་བ་ཞེས་བྱ་བ་བཞུགས།
ཨོཾ་སྭཱ་སྟི། དམ་པའི་བདེ་མཆོག་བདུད་རྩིས་ངེས་བྲན་པའི། །ཤེས་རབ་མཛེས་མའི་ཚོགས་ཀྱིས་རྩེན་པའི་སྐུ། །དཔྱིད་ཀྱི་དགའ་བས་སེམས་ཅན་ཕན་དགེས་ཀྱང༌། །བདུད་ཀྱི་སྟོབས་འཇོམས་ཧེ་རུ་ཀ་ལ་འདུད། །མགོན་པོ་དེ་ཡིས་ངེས་པར་ཡང༌། །བྱང་ཆུབ་ལ་སྦྱར་མཁས་རྣམས་ཀྱིས། །རྣམ་དག་གཞུང་ལམ་བསྟན་པ་ལ། །བྱེད་པ་ཅི་ཡང་དགེ་ལེགས་ཉིད། །འདིར་དཔལ་སངས་རྒྱས་ཐོད་པ་ལས་འབྱུང་བ། ཧེ་རུ་ཀའི་དཀྱིལ་འཁོར་རྒྱས་པ་སྒོམ་པར་འདོད་པས། སྐྱབས་འགྲོ་སེམས་བསྐྱེད་རྡོ་རྗེ་སེམས་དཔའི་སྒོམ་བཟླས་རྣམས་བྱས་ལ། ཧཱུཾ་ཕཊ། ཅེས་བཟླས་པས། བདག་དང་གནས་དང་རྣལ་འབྱོར་སྲུང་བ་བྱས་ཤིང༌། འོག་ནས་འཆད་པ་ལྟར་ནང་མཆོད་བྱིན་གྱིས་རླབས་ཏེ། ཨོཾ་ཨཱཿཧཱུཾ་གིས་བདུད་རྩི་མྱངས་པར་འདིར་འབྱུང་པོ་ཐམས་ཅད་པའི་གཏོར་མ་སྦྱིན་པར་མི་འཇིགས་པའི་གཞུང་འགྲེལ་ལས་འབྱུང་བ་ལྟར་བྱས་ཀྱང་ལེགས། མ་འགྲུབ་ཀྱང་འགལ་བ་མེད་དོ། །རང་གི་སྙིང་གར་ཉི་མ་ལ་གནས་པའི་རྡོ་རྗེ་ཧཱུཾ་གིས་མཚན་པ། དེའི་འོད་ཀྱིས་དཔལ་ཧེ་རུ་ཀ་གཉུག་མའི་དགའ་མ་སྣ་ཚོགས་བདེ་མས་
འཁྱུད་པ། ཕྲེང་བཟང་མ་ལ་སོགས་པ་རྡོ་རྗེ་རོལ་པ་མོ་ཉི་ཤུ་རྩ་བཞིས་བསྐོར་བ་སྤྱན་དྲངས་ཏེ། རང་ལ་མངོན་དུ་ཕྱོགས་པས་བཞུགས་པར་གྱུར། འོད་ཟེར་རྣམས་སྙིང་གའི་ཧཱུཾ་ལ་ཐིམ། ཡང་སྙིང་གའི་ཧཱུཾ་ལས་ལྷ་མོ་བརྒྱད་ཅིག་ཅར་སྤྲུལ་ནས་མཆོད་པར་གྱུར། འཛག་པ་དེ་ལས་རྣལ་འབྱོར་མ། །བརྒྱད་པོ་བུ་མོ་རྣམས་ཀྱི་མཆོག །མཆོད་པ་སྣ་ཚོགས་འཛིན་པ་ཡིས། །མགོན་པོ་ཧེ་རུ་ཀ་མཆོད་དོ། །རྡོ་རྗེ་མགོན་པོའི་ཤར་གནས་པ། རྡོ་རྗེ་མཆེ་བ་མ་ཡིས་ནི། །ཐོད་པ་ཁྲག་གིས་བཀང་བཟུང་སྟེ། །གཟི་བརྗིད་ཆེན་པོ་གསོལ་བར་མཛོད། །རྡོ་རྗེ་ཕོ་ཉ་བདག་ཉིད་ཆེ། དབང་ལྡན་དུ་ནི་ཅང་ཏེའུ་བརྡུང༌། །རྡོ་རྗེ་གདོད་མ་དྲི་སྣོད་དང༌། །མེ་ཡི་ཕྱོགས་སུ་རྣམ་པར་གནས། །རྡོ་རྗེ་ཅན་མ་གྲགས་ཆེན་མོ། །མཆོད་ཡོན་སྣོད་ཅན་བདེན་བྲལ་ནི། །རྡོ་རྗེ་གཙིགས་མ་ལྷོ་ཡི་ནི། །ཕྱག་ན་རྔ་བོ་ཆེ་འཛིན་གསུངས། །རླུང་དུ་རྡོ་རྗེ་ལྟེ་བ་མ། །རི་བོང་ཅན་གྱི་སྣོད་འཛིན་ནོ། །ནུབ་ཏུ་རྡོ་རྗེ་འཇིགས་མ་ནི། །ལྕེ་སྤྱང་ཕྱག་ན་འཛིན་པར་
གསུངས། །བྱང་དུ་འདོད་ཆགས་རྡོ་རྗེ་མ། །ལྷ་མོའི་ཆགས་པས་གཙོ་བོ་མཆོད། །དེ་ལྟར་ཧེ་རུ་ཀ་བསམ་ནས། །རྣལ་འབྱོར་མ་ནི་བརྒྱད་ཀྱིས་མཆོད། །སྣ་ཚོགས་ཟས་དང་སྣ་ཚོགས་སྐོམ། །སྣ་ཚོགས་རོལ་མོ་མཆོག་གསུངས་དང༌། །དྲི་ཞིམ་ལྔ་དང་མེ་ཏོག་སྤོས། །འདི་དག་གིས་ནི་གཙོ་བོ་མཆོད། །མཆོད་ཡོན་ཞལ་བསིལ་དེ་བཞིན་ཁྲུས། །གླུ་ཡི་མཆོག་ནི་རྣམ་མང་པོས། །མགོན་པོ་ཁྲག་འཐུང་བདག་ཉིད་ཆེ། །འདི་དག་གིས་ནི་མཆོད་པར་བྱ། །ཞེས་པ་ནི་མཆོད་པའོ། །རྒྱས་པ་ལ་སྤྲོ་ན། འོག་ནས་འབྱུང་བའི་མཆོད་སྔགས་རྣམས་ཀྱིས་མཆོད་དོ། ཁྲག་འཐུང་ཡོན་ཏན་ཟབ་མངའ་བ། །དངོས་པོ་ཀུན་གྱི་རང་བཞིན་མཆོག །སེམས་ཅན་ཀུན་ལ་ཕན་དགྱེས་དང༌། །སྣ་ཚོགས་སྡེ་ལ་རྟག་ཏུ་འདུད། །དཔལ་ལྡན་ཁྲག་འཐུང་རྒྱལ་པོ་ཆེ། །ཉི་ཤུ་རྩ་བཞིའི་དྲ་བ་སྡོམ། །དངོས་ཀུན་རང་བཞིན་འགྲོ་བ་སྐྱོབ། །སྣ་ཚོགས་སྡེ་ལ་ཕྱག་འཚལ་ལོ། །ཞེས་ཕྱག་བྱ། བདག་གིས་བདག་ཉིད་ཀྱི་སྡིག་པ་ཐམས་ཅད་འཆགས་ཤིང་སླར་ཡང་མི་བགྱིད་དོ། །སངས་རྒྱས་དང་བྱང་ཆུབ་སེམས་དཔའ་དང༌། འཕགས་པ་དང༌། སོ་སོའི་སྐྱེ་བོ་ཐམས་ཅད་ཀྱི་བསོད་ནམས་ཐམས་ཅད་ལ་རྗེས་སུ་ཡི་རང་ངོ༌། །བདག་ཉིད་ཀྱི་དགེ་བ་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །སངས་རྒྱས་དཀོན་མཆོག་དང༌། ཤེས་རབ་ཀྱི་ཕ་རོལ་དུ་ཕྱིན་པ་ཆོས་དཀོན་མཆོག་དང༌། ཕྱིར་མི་ལྡོག་པའི་བྱང་ཆུབ་སེམས་
དཔའ། འཕགས་པའི་དགེ་འདུན་དཀོན་མཆོག་ལ་བྱང་ཆུབ་ཀྱི་བར་དུ་སྐྱབས་སུ་མཆིའོ། །ཀྱེ་མ་མ་ལ་བདག་གིས་སེམས་ཅན་ཀུན་གྱི་དོན་དང༌། ཕན་པ་དང༌། བདེ་བ་དང༌། ཇི་སྲིད་དུ་དེ་རྣམས་ཤིན་ཏུ་མཐར་ཐུག་པའི་མྱ་ངན་ལས་འདས་པ། བླ་ན་མེད་པ་དེ་བཞིན་གཤེགས་པའི་ཡེ་ཤེས་ལ་བཀོད་པའི་བར་དུ་དེའི་ལམ་སྒྲུབ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་བྱང་ཆུབ་པར་བགྱིའོ། །ཞེས་ལན་གསུམ་མོ། །སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་དང་བྲལ་བའི་བཏང་སྙོམས་ཚད་མེད་པ་ལ་གནས་པར་གྱུར་ཅིག །འོག་གི་རླུང་གིས་བསྐུལ་བས་འབར་བའི་གཏུམ་མོའི་མེས་འཁྱུད་པའི་སྙིང་གའི་ཧཱུཾ་ལས། འོད་ཟེར་འཕྲོས་ཁམས་གསུམ་མ་ལུས་པ་བསྲེགས་ཏེ་སྟོང་པར་སྦྱངས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨུཏྤ་ཀོ྅ཧཾ། སྟོང་པའི་ངང་ལས། སྔོན་གྱི་སྨོན་ལམ་གྱི་མཐུ་ལས། རཾ་ལས་བྱུང་བའི་ཉི་མའི་སྟེང་དུ། ཧཱུཾ་ལས་སྣ་ཚོགས་རྡོ་རྗེ་ལྟེ་བ་ཧཱུཾ་གིས་མཚན་པ། དེ་ལས་འོད་འཕྲོས། རྡོ་རྗེའི་ས་གཞི་རྭ་གུར་བླ་རེ་མདའི་དྲ་བ། མེ་དཔུང་འབར་བ་དང་བཅས་པའི་དབུས་སུ། ཨེ་ལས་ཆོས་ཀྱི་འབྱུང་གནས་གྲུ་གསུམ་དཀར་པོའི་ནང་དུ། ཡཾ་ལས་རླུང་གི་དཀྱིལ་འཁོར་སྔོན་པོ་ཟླ་
གམ་བ་དན་དང་ཡཾ་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་འབར་བ་བདུན་དང་རཾ་གྱིས་མཚན་པ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པ་དང་བཾ་གྱིས་མཚན་པ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞི་རྡོ་རྗེ་དང་ལཾ་གྱི་མཚན་པ། དེ་ལྟར་འབྱུང་བ་བཞི་རོ་གཅིག་ཏུ་འདྲེས་པ་ལས། རིན་པོ་ཆེ་སྣ་ཚོགས་ལས་གྲུབ་པའི་གཞལ་མེད་ཁང་གྲུ་བཞི་པ། སྒོ་བཞི་པ། རྟ་བབས་བཞིས་བརྒྱན་པ། སྔོ་དཀར་སེར་དམར་ལྗང་བའི་རྩིགས་པ་རིམ་པ་ལྔ་དང་ལྡན་པ། རིན་པོ་ཆེའི་ཕ་གུ་དང༌། དྲ་བ་དང༌། དྲ་བ་ཕྱེད་པ་དང༌། ཤར་བུ་དང༌། མངའ་ཡབ་དང་ལྡན་པ། རྩིགས་པའི་ཕྱི་རོལ་དུ་མཆོད་པའི་གཟུངས་མ་རྣམས་དང་ལྡན་པའི་ཁ་ཁྱེར་གྱིས་བསྐོར་བ། རིན་པོ་ཆེ་ཐམས་ཅད་ཀྱི་རང་བཞིན་ལས་བྱུང་བ་ཀ་བ་དང༌། དྲིལ་བུ་ལ་སོགས་པ་རྒྱན་ཐམས་ཅད་ཀྱིས་བརྒྱན་པ། སྟེང་ཐོག་རིམ་པར་ཕུབ་པའི་དབུས་ཕྱུར་བུའི་རྩེ་མོར་རྡོ་རྗེ་རིན་པོ་ཆེའི་ཏོག་གིས་བརྒྱན་པ། ནང་གི་ལྷ་སྣམ་ཤར་དཀར་བྱང་སེར་ནུབ་དམར་ལྷོ་ནག །དབུས་སྔོ་བའི་ས་གཞིའི་སྟེང་དུ། སྐུའི་འཁོར་ལོ་དཀར་པོ་རྩིབས་བརྒྱད་པ། རྩིབས་ཆན་སྔོན་པོ། མུ་ཁྱུད་ལ་རྡོ་རྗེ་དཀར་པོའི་ཕྲེང་བས་བསྐོར་བ། དེའི་ལྟེ་བར་གསུང་གི་འཁོར་ལོ་དམར་པོ་རྩིབས་བརྒྱད་པ། རྩིབས་ཆན་ལྗང་ཁུ་མུ་ཁྱུད་ལ་རྡོ་རྗེ་དམར་པོའི་རྭ་བས་བསྐོར་བ། དེའི་ལྟེ་བར་ཐུགས་ཀྱི་འཁོར་ལོ་ནག་པོ་རྩིབས་བརྒྱད་པ། མུ་ཁྱུད་ལ་རྡོ་རྗེ་སྔོན་པོས་རྭ་བས་བསྐོར་བ། འཁོར་ལོའི་ལྟེ་བ་སྣ་
ཚོགས་པདྨ་འདབ་མ་བརྒྱད་པས་ཁྱབ་པ། དེའི་ལྟེ་བ་སྔོན་པོ་ལ་སླར་ཡང་པདྨ་ལ་གནས་པའི་ཆོས་ཀྱི་དབྱིངས་ཀྱི་རང་བཞིན་མི་རོའི་སྙིང་གར་ཉི་མའི་དཀྱིལ་འཁོར་དང༌། ཕྱོགས་ཀྱི་འདབ་མ་བཞི་དང༌། འཁོར་ལོ་ཕྱི་མ་གཉིས་ཀྱི་རྩིབས་རྣམས་སུ་པད་ཉི་དང༌། སྒོ་བཞིར་པདྨ་ཉི་མ་མི་རོའི་གདན་རྣམས་སོ། །མེ་ལྕེའི་ཁོར་ཡུག་གི་ཕྱི་རོལ་དུ། དུར་ཁྲོད་ཆེན་པོ་བརྒྱད་ཀྱིས་ཡོངས་སུ་བསྐོར་བ་ནི། ཤིང་བརྒྱད་ཀྱི་རྩེ་མོར་ཞིང་སྐྱོང་བརྒྱད་དང༌། རྩ་བ་ན་ཕྱོགས་སྐྱོང་བ་རྣམས་དང༌། ཀླུའི་དབང་པོ་བརྒྱད་དང༌། སྤྲིན་གྱི་བདག་པོ་བརྒྱད་དང༌། མངོན་པར་འཕགས་པའི་རི་བརྒྱད་དང༌། དེ་ལ་གནས་པའི་མཆོད་རྟེན་བརྒྱད་དང༌། དྲག་ཏུ་འབབ་པའི་ཆུ་ཀླུང་བརྒྱད་དང༌། རབ་ཏུ་འབར་བའི་མེ་བརྒྱད་དང༌། བྱ་དང་གཅན་གཟན་སྣ་ཚོགས་དང༌། སྦྲུལ་གྱིས་ཁྱབ་པ། གསལ་ཤིང་གིས་ཕུག་པ་དང༌། ཤིང་ལ་དཔྱངས་པ་དང༌། ཕྱེད་ཚིག་པ་དང༌། དུམ་བུར་གྱུར་པ་དང༌། མ་གྱུར་པའི་མི་རོ་སྣ་ཚོགས་དང༌། རུས་པའི་དུམ་བུས་ཁྱབ་པ། རོ་ལངས་དང༌། སྲིན་པོ་དང༌། མཁའ་འགྲོ་མ་དང༌། གྲུབ་པ་ཐོབ་པ་དང༌། དཔའ་བོ་དང་རྣལ་འབྱོར་མའི་ཚོགས་ཡོངས་སུ་རྒྱུ་བས་ངོ་མཚར་བར་བྱེད་པའོ། །གཞལ་ཡས་ཁང་གི་དབུས་ཀྱི་གདན་གྱི་སྟེང་དུ། གཡོན་བསྐོར་གྱིས། ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨཿ ཕྲག་གཉིས་མཚན་བཟང་པོ་སུམ་ཅུ་རྩ་གཉིས་ཀྱི་ངོ་བོ་དེ་རྣམས་ཞུ་བ་ལས་བྱུང་བའི་ཟླ་བའི་དཀྱིལ་འཁོར་མེ་ལོང་ལྟ་བུའི་ཡེ་ཤེས་སོ། །དེའི་སྟེང་དུ་གཡས་བསྐོར་
གྱིས། ཀ་ཁ་ག་གྷ་ང༌། ཙ་ཚ་ཛ་ཛྙཱ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ་ཤ་ཥ་ས་ཧ་ཀྵ། ཡ་ར་ལ་ཝ་ཌ་ཌྷ། ཕྲག་གཉིས་དཔེ་བྱད་བཟང་པོ་བརྒྱད་ཅུའི་ངོ་བོ་དེ་རྣམས་ཞུ་བ་ལས་བྱུང་བའི་ཉི་མའི་དཀྱིལ་འཁོར་མཉམ་པ་ཉིད་ཀྱི་ཡེ་ཤེས་སོ། །དེ་གཉིས་ཀྱི་བར་དུ་ཧཱུཾ་ལས་རྡོ་རྗེ་སྔོན་པོ་རྩེ་ལྔ་པ། ལྟེ་བ་ལ་ཧཱུཾ་གིས་མཚན་པ་ཐབས་དང་ཤེས་རབ་ཟུང་དུ་འཇུག་པའི་རང་བཞིན་ནི་སོ་སོར་རྟོག་པའི་ཡེ་ཤེས་སོ། །དེ་ལས་འོད་ཟེར་འཕྲོས། སེམས་ཅན་ཐམས་ཅད་བླ་ན་མེད་པའི་བྱང་ཆུབ་ལ་བཀོད་པ་ནི། བྱ་བ་སྒྲུབ་པའི་ཡེ་ཤེས་སོ། །ཟླ་ཉི་རྡོ་རྗེ་ཧཱུཾ་ཡིག་དང་བཅས་པ་རོ་གཅིག་ཏུ་འདྲེས་པ་ལས། སྐུ་ཡོངས་སུ་རྫོགས་པར་གྲུབ་པ་ནི་ཆོས་ཀྱི་དབྱིངས་ཀྱི་ཡེ་ཤེས་སོ། །དེ་ཡང་བཅོམ་ལྡན་འདས་ཡབ་ཡུམ་གྲུབ་པ་ན། ནོར་བུ་དང་ནོར་བུའི་འོད་ཟེར་གྱི་ཚུལ་གྱིས། རྣལ་འབྱོར་མ་ཉི་ཤུ་རྩ་བཞི་ཡང༌། ཧཱུཾ་ཡིག་དེ་ཉིད་ཀྱི་སྣང་བ་ལས་གྲུབ་སྟེ། དབུས་ཀྱི་གདན་གྱི་སྟེང་དུ་རྒྱུ་རྡོ་རྗེ་འཛིན་པ། ཀུན་ད་དང་ཟླ་འོད་ལྟར་དཀར་ཞིང་འཚེར་བའི་སྐུ་ལས་ནོར་བུའི་འོད་ཟེར་འཕྲོ་བ། ཕྱག་གཡས་གཉིས་ན་ཅང་ཏེ་དང་གྲི་གུག །གཡོན་གཉིས་ན་ཁ་ཊྭཱཾ་ག་དང་ཐོད་པ་བསྣམས་པ། འབྲས་བུ་རྡོ་རྗེ་འཛིན་པ་ལྟར་མཚན་ཉིད་ཐམས་ཅད་ཡོངས་སུ་རྫོགས་པ། བཅོམ་ལྡན་འདས་མ་སྣ་ཚོགས་བདེ་མ་དམར་མོས་འཁྱུད་པའོ། །སྤྱིར་རྒྱུ་རྡོ་རྗེ་འཛིན་པ་སྔོན་པོས་ཀྱང་རུང་ལ། བྲམ་ཟེ་ཆེན་པོས་མཛད་པར་གྲགས་པའི་སྒྲུབ་ཐབས་ནི། སྐབས་འདིར་གཡས་གཉིས་གྲི་ཐོད་གཡོན་གཉིས་ཁ་ཊྭཱཾ་རྡོ་རྗེ། ཡུམ་ཡང་དཀར་
མོ་ཕྱག་གཉིས་མས་ཕྱག་མཚན་བཞི་བཟུང་བ་སྟེ། གཡས་ཅང་ཏེའི་སྟེང་ན་གྲི་གུག་དང༌། གཡོན་ཁ་ཊྭཱཾ་ཐོད་པ་ལྷན་ཅིག་པར་བཤད་པའང་སྣང་ངོ༌། །ཐུགས་ཀྱི་འཁོར་ལོའི་འདབ་མ་རྣམས་ལ། ཤར་དུ་འཕྲེང་བཟང་མ། བྱང་དུ་ཐོད་ཅན་མ། ནུབ་ཏུ་འཇིགས་བྱེད་མ། ལྷོར་ཐུབ་དཀའ་མ། དབང་ལྡན་ལ་སོགས་པའི་མཚམས་ཀྱི་འདབ་མ་བཞི་ལ། གཡས་བསྐོར་གྱི་ཁུ་བ་དང༌། རྡུལ་དང༌། བདུད་རྩི་ལྔ་དང༌། སྒྲོན་མ་ལྔས་གང་བའི་ཐོད་པའོ། །ཐུགས་ཀྱི་འཁོར་ལོའི་རྩིབས་བརྒྱད་ལ། ཤར་དུ་དགེ་བའི་སྐ་རགས་ཅན་མ། བྱང་དུ་གཟུགས་ཅན་མ། ནུབ་ཏུ་རྣམ་རྒྱལ་མ། ལྷོར་འབྱུང་གནས་མ། དབང་ལྡན་དུ་དུས་ཅན་མ། མེར་མཚོ་ཆེན་མ། བདེན་བྲལ་དུ་བྱེད་ཅན་མ། རླུང་དུ་སྡུད་བྱེད་མའོ། །སྐུའི་འཁོར་ལོའི་རྩིབས་བརྒྱད་ལ། ཤར་དུ་སྒྲོལ་བྱེད་མ། བྱང་དུ་འཇིགས་མཐོང་མ། ནུབ་ཏུ་ལེགས་མཐོང་མ། ལྷོར་མི་ཕམ་མ། དབང་ལྡན་དུ་དགེ་བ་མ། མེར་གྲིབ་གནོན་མ། བདེན་བྲལ་དུ་དུས་མཚན་མ། རླུང་དུ་གྲགས་ཆེན་མ། ཤར་སྒོར་མཛེས་སྡུག་མ། བྱང་སྒོར་ནོར་འཛིན་མ། ནུབ་སྒོར་སྐལ་བཟང་མ། ལྷོར་སྒོར་ཡིད་འོང་མ། འདི་དག་ཀྱང་མཚན་ཉིད་དཀྱིལ་འཁོར་རྒྱལ་མཆོག་གི་སྐབས་དང་འདྲའོ། །ལྷ་མོ་ཉི་ཤུ་རྩ་བཞིའི་ཐོད་པར་གནས་པའི་བདུད་རྩིས་བཅོམ་ལྡན་འདས་ལ་ཡང་དག་པར་མཆོད་ཅིང༌། ཡུམ་གྱི་དཔྲལ་བར་ཨོཾ། མགྲིན་པར་ཨཱཿ སྙིང་གར་ཧཱུཾ། གསང་བར་སྭཱ། བརླ་གཉིས་ལ་ཧཱ། དེ་རྣམས་
ཀྱི་འོད་ཀྱིས་སྐུ་གང༌། ཡུམ་གྱི་བྷ་ག་ཧྲཱིཿལས་བྱུང་བའི་པདྨ་དམར་པོ། ལྟེ་བ་ལ་ཨཱཿཡིག་དམར་པོས་མཚན་པ། ཡབ་ཀྱི་ལིངྒ་ཧཱུཾ་ལས་བྱུང་བའི་རྡོ་རྗེ་ནག་པོ་རྩེ་མོ་ལ་ཨོཾ་དཀར་པོས་མཚན་པ། ལྷ་མོ་ཉི་ཤུ་རྩ་བཞི་སྣ་ཚོགས་བདེ་མ་དང་ལྷན་ཅིག་དབྱེར་མེད་པས། བཅོམ་ལྡན་འདས་ལ་འདོད་པ་མཛད་དེ་བཅོམ་ལྡན་འདས་ཀྱིས་ཀྱང་ངོ༌། །ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཏྨ་ཀོ྅ཧཾ། རྗེས་སུ་ཆགས་པའི་མེས་ཤེས་རབ་མའི་འཁོར་ལོ་བཅོམ་ལྡན་འདས་དང་ལྷན་ཅིག་ཞུ་བར་གྱུར་པ། ཉི་མའི་དཀྱིལ་འཁོར་གྱི་གདན་ལ་ཁུ་བའི་གཟུགས་ཀྱིས་གནས་པར་གྱུར་ཏོ། །དང་པོ་སྦྱོར་བའི་ཏིང་ངེ་འཛིན་ནོ། །དེ་ནས་ཐིག་ལེ་ལས་སྤྲུལ་པའི་ལྷ་མོ་རྣམས་ཀྱིས། གདུང་བ་དང་བཅས་པས་བསྐུལ་བ་ནི། །བྱམས་པའི་རང་བཞིན་འཕྲེང་བཟང་མས། །ཅི་སྟེ་འཇིག་རྟེན་སྙན་མནན་ན། །ཅི་སྟེ་ཁྱོད་ནི་མི་དགྱེས་གྱུར། །གལ་ཏེ་ཁྱོད་བདག་ཚིག་གསན་ན། །མི་དགྱེས་གྱུར་བ་མཐའ་དག་ཐོང༌། །སྙིང་རྗེའི་རང་བཞིན་ཐོད་ཅན་མས། །སྟོང་པའི་གཟུགས་ནི་མ་མཛད་པར། །ཉིད་ཀྱི་དགོངས་པ་གྲགས་པར་མཛོད། །སྲིད་འཇིགས་སྐྱེ་བོ་ཀུན་བསླུ་བས། །རྣལ་འབྱོར་མ་ཡི་གྲོགས་པོ་བཞེངས། །དགའ་བའི་རང་བཞིན་འཇིགས་བྱེད་མས། །བདག་པོ་སྔོན་གསུངས་དྲན་པར་མཛོད། །བྱ་བར་སྒྱིད་ལུག་མ་མཛད་ཅིག ཁྱོད་མི་སྣང་ན་སྐྱེ་བོ་ཀུན། །ལྷུང་བས་འགྲོ་བ་མི་དགར་འགྱུར། །བཏང་སྙོམས་རང་བཞིན་ཐུབ་དཀའ་མས། །ལོག་པའི་ང་རྒྱལ་མ་མཛད་པར། །མཛའ་བོ་སྟོང་
པའི་རང་བཞིན་ཐོང༌། །དངོས་པོ་མཐའ་ཡས་ཁྱོད་ཐོང་ལ། །རྣལ་འབྱོར་མ་ཡི་ཚོགས་ལ་སྤྱོད། །ཚིགས་བཅད་འདི་དག་མི་འཇིགས་པའི་གཞུང་འགྲེལ་འགྱུར་གསར་ན་དྲངས་པ་རྣམས་གོ་བདེ་ཞིང་འགྱུར་ལེགས་པར་སྣང་ཡང༌། ལག་ལེན་མཛད་པའི་རྒྱུན་ལ་གྱི་ཇོའི་འགྱུར་བཞིན་མཛད་ཀྱིན་སྣང་བས་དེ་ལྟར་དྲངས་སོ། །ས་ར་ཧས་མཛད་ཟེར་བའི་སྒྲུབ་ཐབས་ལྟར་ན། གཙོ་བོ་ཡབ་ཡུམ་ཞུ་བ་མ་གཏོགས་འཁོར་གྱི་ལྷ་མོ་རྣམས་གནས་ཤིང་དེའི་ཕྱིར་ཐིག་ལེ་ལས་ལྷ་མོ་སྤྲོ་བ་མེད་ལ། བསྐུལ་མཁན་ཡང་མཛེས་སྡུག་མ་ལ་སོགས་པ་སྒོ་མ་བཞིས་བྱེད་དོ། །དེ་ལྟར་བསྐུལ་མ་ཐག་ཏུ་ཐིག་ལེ་དེ་ཉིད་ཧཱུཾ་དུ་གྱུར་ཞིང༌། ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས། བཅོམ་ལྡན་འདས་དཔལ་ཧེ་རུ་ཀ་སྐུ་མདོག་སྔོན་པོ་ཆུ་ཤིང་གི་མེ་ཏོག་གསར་དུ་ཁ་བྱེ་བ་ལྟ་བུའི་མདངས་ཅན། ཞལ་གཅིག་ཕྱག་བཞིའི་གཡས་ཀྱི་དང་པོས་ཅང་ཏེའུ་སྟེང་དུ་འཁྲོལ་ཞིང༌། གཡོན་གྱི་དང་པོས་ཁ་ཊྭཱཾ་ག་དཀར་པོ་གྱེན་དུ་བསྒྲེང་བ། གཡས་འོག་མས་གྲི་གུག་བསྣུན་པའི་ཚུལ་ཅན། གཡོན་འོག་མས་ཐོད་པ་བདུད་རྩིས་གང་བ་འཛིན་པས་ཡུམ་ལ་འཁྱུད་པ། སྣ་ཚོགས་པདྨའི་ལྟེ་བར་པདྨ་དམར་པོ་དང་མི་རོའི་སྙིང་ག་ལ་གནས་པའི་ཉི་མའི་དཀྱིལ་འཁོར་ལ། གཡོན་བརྐྱང་བའི་སྐྱིལ་ཀྲུང་ཕྱེད་པའི་གར་གྱིས་བཞུགས་པ། འཇིགས་ཤིང་ཁྲོས་ལ་དྲག་པོའི་སྐུ་ཅན། ཉི་མའི་དཀྱིལ་འཁོར་གསར་དུ་ཤར་བ་ལྟ་བུའི་སྤྱན་གསུམ་པ། ཞལ་ནས་ཧཱུཾ་གི་སྒྲ་སྒྲོག་པས་བདུད་དང་ཕས་ཀྱི་རྒོལ་བ་ཐམས་ཅད་སྡིགས་ཤིང་ཕྱེ་མར་མཛད་པ། མི་བཟད་པའི་མཆེ་བ་རྣོན་པོ་གཙིགས་པ། ཐལ་བ་
ཆེན་པོས་སྐུ་ལ་ཉེ་བར་བརྒྱན་པ། སྟག་གི་ལྤགས་པའི་ཤམ་ཐབས་རྒྱབ་ཀྱི་ཆར་འཛིན་པ། མིའི་རྒྱུ་མ་རློན་པའི་ཚངས་སྐུད་དང༌། དཔྲལ་བར་ཐོད་པ་ལྔའི་ཕྲེང་བས་བརྒྱན་ཞིང༌། ཐོད་རློན་ལྔ་བཅུའི་དོ་ཤལ་ཅན། སྣ་ཚོགས་རྡོ་རྗེ་དང་ཟླ་བ་ཕྱེད་པས་དབུ་ལ་བརྒྱན་པ། དབུ་སྐྲ་དམར་སེར་གྱེན་དུ་བརྫེས་པ། འཁོར་ལོ་དང༌། རྣ་ཆ་དང༌། མགུལ་རྒྱན་དང༌། གདུབ་བུ་དང༌། སྐེ་རགས་ཏེ་རུས་པའི་ཕྱག་རྒྱ་ལྔས་བརྒྱན་པ། གར་གྱི་ཉམས་དགུ་དང་ལྡན་ཞིང༌། ཐུགས་རྗེ་ཆེན་པོས་ལུས་ཅན་རྣམས་འཁོར་བ་ལས་འདོན་པར་མཛད་པའོ། །དེ་ལ་འཁྱུད་པའི་སྣ་ཚོགས་བདེ་མ་རྣལ་འབྱོར་མའི་དབང་མོ་ནི། སྐུ་མདོག་བནྡྷུ་ལྟར་དམར་བ། རུས་པའི་རྒྱན་ཅན། རྣམ་པར་འགྱུར་པའི་ཞལ། དབུ་སྐྲ་ཁམ་སེར་གྲོལ་ཞིང་གྱེན་དུ་འབར་བ། ཞལ་གཅིག་ཕྱག་གཉིས། སྤྱན་གསུམ་མཆེ་བའི་མྱུ་གུ་གཙིགས་པ། ཕྱག་གཡོན་པས་ཐོད་པ་རང་བྱུང་སིཧླའི་རྒྱུན་གྱིས་གང་བ་འཛིན་ཞིང་ཡབ་ལ་འཁྱུད་པ། གཡས་གྲི་གུག་དང་བཅས་པ་སྟེང་དུ་སྒྲེང་བས། གདུག་པ་ཐམས་ཅད་ལ་བསྣུན་པར་མཛད་པ། སྒེག་ཅིང་གཡོ་བས་རྩེན་པའི་སྐུ། ཤིད་ཀྱི་སྒྲ་དང་བཅས་པའི་སྒྱུ་རྩལ་དང་རྩེད་འཇོས་རོལ་པ་ཅན་ནོ། །མི་འཇིགས་པའི་གཞུང་འགྲེལ་ལས་ཡབ་ཧེ་རུ་ཀ་དབུ་སྐྲ་ནག་པོ་རལ་པའི་ཅོད་པན་དུ་བྱས་པར་བཤད་དེ་གདམ་ང་ཡིན་པས་མི་འགལ་ལོ། །གཙོ་བོ་ཡབ་ཡུམ་གྲུབ་པ་དང༌། རྣལ་འབྱོར་མ་ཉི་ཤུ་རྩ་བཞི་ཡང་སྐད་ཅིག་གིས་གྲུབ་པར་གྱུར་ཏེ། ཐུགས་ཀྱི་འཁོར་ལོའི་འདབ་མ་རྣམས་ལ། ཞེས་པ་ནས། ལྷོ་སྒོར་ཡིད་འོང་མ་སྟེ་
རྣལ་འབྱོར་མ་ཉི་ཤུ་རྩ་བཞི་པོ་ཐམས་ཅད་ཀྱང་སྔོན་མོ་ཨིནྡྲ་ནཱི་ལས་འོད་ཟེར་འབར་བ། ཞལ་གཅིག་ཕྱག་གཉིས་སྤྱན་གསུམ་མ་གཡས་གྲི་གུག་འཕྱར་ཞིང༌། གཡོན་ཐོད་ཁྲག་ཐུགས་ཀར་འཛིན་པ། འཛུམ་ཁྲོས་མཆེ་བ་གཙིགས་ཤིང་སྐྲ་སེར་གྱེན་དུ་གྲོལ་བ། མེ་ཏོག་མནྡྷ་ར་བ་ཁ་བྱེ་བ་ལྟ་བུའི་ཉི་མའི་གདན་ལ་གནས་པ། སྒོ་སྐྱོང་མ་བཞི་ནི་དབུགས་བྲལ་གྱི་གདན་ལ་གཡོན་བརྐྱང་གི་སྟབས་དང་གཞན་རྣམས་གཡོན་བརྐྱང་པའི་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པ། རྣལ་འབྱོར་མ་ཉི་ཤུ་རྩ་ལྔ་པོ་ཐམས་ཅད་མི་མགོའི་དབུ་རྒྱན་དང་ཕྲེང་བ་སྤངས་ཤིང་རུས་པའི་ཕྱག་རྒྱ་ལྔ་དང༌། ཕྱོགས་ཀྱི་གོས་ཅན། ཞལ་ནས་ཁྲག་ཆེན་གྱི་ཟེགས་མ་འཐོར་བ། རབ་ཏུ་ཆགས་པས་ཟླ་བའི་རྒྱུན་འབབ་པའོ། །ཡང་ན་གདམ་ང་ལ་ཐུགས་འཁོར་བ་རྣམས་ནག་མོ་གསུང་འཁོར་བ་རྣམས་དཀར་སེར། སྐུ་འཁོར་བ་རྣམས་ལྗང་ཁུ། སྒོ་སྐྱོང་རྣམས་ནག་མོར་ཡང་བསྡུས་པའི་རྒྱུད་ཉིད་ལས་བཤད་པ་ལྟར་བྱ་ལ། །ཡང་ཐུགས་འཁོར་བ་དང་སྒོ་སྐྱོང་རྣམས་ཕྱོགས་མདོག །གསུང་འཁོར་པ་རྣམས་དམར་མོ། སྐུ་འཁོར་པ་རྣམས་དང༌། སྣ་ཚོགས་བདེ་མ་ཡང་དཀར་མོར་ས་ར་ཧའི་གཞུང་དུ་གྲགས་པ་ལས་འབྱུང་ཞིང༌། དེ་ཉིད་རྩ་རྒྱུད་ཀྱི་དགོངས་པ་ཡིན་པར་ཡང་གྲགས་ལ། གཞན་དེ་དང་འདྲ་བ་ལས། འཇིགས་བྱེད་མ་དཀར་མོར་འདོད་པ་ཡང་བཤད་པ་དང༌། རྫོགས་འཕྲེང་ལས་གཙོ་བོ་ཧེ་རུ་ཀའི་སྨད་གཡོགས་གླང་པོ་ཆེའི་པགས་པ་ཡང་བཤད་ལ། འཁོར་ཉེར་བཞི་སྟག་ལྤགས་རྒྱབ་ཏུ་འཕྱར་བ་བྱེད་པའང་ཡོད་པ་དང༌། དེ་བཞིན་དུ། ཡུམ་སྣ་ཚོགས་བདེ་མ་ཕྱག་བཞི་ཕྱག་མཚན་ཡབ་དང་འདྲ་བ་ཡང་ད་ལྟའི་རྒྱུད་འདི་ལས་གསུངས་ཏེ། དེ་དག་ལས་རང་ཉིད་ཇི་ལྟར་མོས་པ་ཞིག་བསྒོམ་པར་བྱའོ། །བཅོམ་ལྡན་
འདས་ཀྱི་ཐུགས་ཀར་ཨོཾ། དཔྲལ་བར་ཧཾ། མགྲིན་པར་ཧེཾ། སྤྱི་བོར་ཧཻཾ། ཕྲག་པ་གཉིས་ལ་ཧོཾ། མིག་གཉིས་ལ་ཧཽཾཽཾ། གསང་བ་ལ་ཧི། ལུས་ཐམས་ཅད་ལ་ཧཿ ཞེས་པ་གོ་ཆའོ། །ཐུགས་ཀར་ཧཱུཾ་ལས་རྡོ་རྗེ་ནག་པོའི་ལྟེ་བར་ཧཱུཾ་གིས་མཚན་པ། མགྲིན་པར་ཨཿལས་པདྨ་དམར་པོ་ཨས་མཚན་པ། སྤྱི་བོར་ཨོཾ་ལས་འཁོར་ལོ་དཀར་པོ་ཨོཾ་གྱིས་མཚན་པ། སྙིང་གར་ཉི་མ་ལ་གནས་པའི་རྡོ་རྗེའི་ལྟེ་བ་ལ་ཧཱུཾ་དེ་ལས་འོད་འཕྲོས། དཔལ་སངས་རྒྱས་ཐོད་པ་ལྷ་ཉི་ཤུ་རྩ་ལྔའི་དཀྱིལ་འཁོར། ཡེ་ཤེས་སེམས་དཔའ་བཛྲ་ས་མཱ་ཛཿ ཧཱུཾ་ཞེས་བགེགས་བསྐྲད། ཨོཾ་ཨཱཿཧྲཱིཿཔྲ་ཝ་ར་སད་ཀ་རཱ་ར་ཐཾ། བཛྲ་ཨརྒྷཾ་པྲ་ཏཱིཙྪ་སྭཱཧཱ། ཛཿཧཱུཾ་བཾ་ཧོཿ སྒོ་མ་བཞི་པོས་དགུག་གཞུག་བཅིང་མཉེས་བྱ། ཨོཾ་བུདྡྷ་ཀ་པཱ་ལི་ནཱི་ཨཱཿཁཾ་བྲཾ་དྲུཾ་སྲུཾ་ཨཱཾ་ཨཱཾ་ཨཱཾ་ཧཱུཾ་ཧཱུཾ་ཧཱུཾ་ཕཊ་ཕཊ། ཞེས་ཡེ་ཤེས་སེམས་དཔའ་དང་རོ་མཉམ་གཅིག་ཏུ་འདྲེས་པར་གྱུར། དེ་ནས། ལྟེ་བར་གཏུམ་མོ་འབར་བས་བདེ་བ་ཆེན་པོའི་འཁོར་ལོར་གནས་པའི་བདུད་རྩི་ཞུ་ཞིང་བབས་ཏེ། ཆོས་ཀྱི་འཁོར་ལོའི་ས་བོན་ལ་ཁྲུས་གསོལ་བའི་དུས་སུ། དེའི་རྩ་བརྒྱད་ཀྱི་རང་བཞིན་མཁའ་འགྲོ་མ་བརྒྱད། སྒེག་ཅིང་མཛེས་སྡུག་ཕུན་སུམ་ཚོགས་པ། ལོ་བཅུ་གཉིས་ལོན་པའི་ན་ཚོད་ཅན་རྣམས་ཀྱིས། བྱང་ཆུབ་ཀྱི་སེམས་ཀྱིས་གང་བའི་བུམ་པ་ཐོགས་ཏེ། འཛུམ་པའི་འོད་ཟེར་དང་བཅས་པ་ཕྱིར་སྤྲོས། སྙིང་གའི་ས་བོན་ལས་འོད་ཟེར་འཕྲོས་པས་སྤྱན་དྲངས་པའི་ཕྱོགས་བཅུའི་དེ་བཞིན་གཤེགས་པ་རིག་པའི་ལྷ་མོར་བཅས་པ་རྣམས། རབ་ཏུ་དྭངས་ཤིང་བཞད་པའི་
འཛུམ་དམུལ་ཏེ། ཧེ་རུ་ཀ་རྒྱལ་བར་གྱུར་ཅིག །རྒྱལ་བར་གྱུར་ཅིག ཅེས་གསུང་བཞིན་གྱུར། ཡང་དང་ཡང་དུ་ཕྱག་འཚལ་ཏེ། །ཐལ་མོ་སྦྱར་ནས་གསོལ་འདེབས་ན། ཐུགས་རྗེ་ཆེ་དང་ལྡན་པ་རྣམས། །བདག་ལ་དབང་ནི་སྐུར་དུ་གསོལ། །བརྩེ་ལྡན་གྲགས་པ་ཆེན་པོ་པས། །རྡོ་རྗེ་རྣལ་འབྱོར་མ་དབང་བསྐུར། །འཁོར་བའི་འདམ་དུ་བྱིང་བ་བདག །དབང་བསྐུར་པ་ཡིས་བདག་སྒྲོལ་མཛོད། །ཨོཾ་ཨ་བྷི་ཥིཉྩ་ནྟུ་མཱཾ། སརྦ་ཡོ་གཱི་ཎྱོ་མུ་ཀུ་ཊེ་ཨ་ཏྲ་ཨ་དྷི་ཏིཥྛནྟུ་ཨཱ་གཙྪནྟུ་ཧཱུཾ་སྭཱཧཱ། ཞེས་གསོལ་བ་བཏབ་པས། གདུགས་དང་རྒྱལ་མཚོན་དང་བ་དན་དང༌། གོས་དང༌། རོལ་མོ་ལ་སོགས་པ་ཉེ་བར་མཁོ་བ་ཐམས་ཅད་དང་ལྡན་པ། ཡེ་ཤེས་ཀྱི་བདུད་རྩིས་གང་བའི་བུམ་པ་དཀར་པོ་འཛིན་པ་རྣམས་ཀྱིས་ཁྲུས་གསོལ་བ་དང༌། བཀྲ་ཤིས་དང༌། རྔ་བོ་ཆེའི་སྒྲ་དང༌། ཙནྡན་དང་གུར་གུམ་དང་མེ་ཏོག་ལ་སོགས་པའི་ཆར་ཕབ་ཅིང༌། ཕྱི་དང་གསང་བ་དང་ཤེས་རབ་ཡེ་ཤེས་དང༌། བཞི་པའི་དབང་བསྐུར་བར་མཛད་དོ། །དེ་ནས་དབང་ལྷ་རྣམས་སྙིང་གའི་རྩ་བརྒྱད་ལ་ཐིམ། གཙོ་བོ་རྡོ་རྗེ་སེམས་དཔའི་ངོ་བོ་ལ། མི་བསྐྱོད་པ་གཙོ་བོར་གྱུར་པའི་རིགས་ལྔས་དབུ་བརྒྱན་པ་དང༌། སྣ་ཚོགས་བདེ་མ་ལ་རྡོ་རྗེ་སེམས་དཔའ་དང༌། ཐུགས་འཁོར་བ་རྣམས་ལ་རིན་ཆེན་འབྱུང་ལྡན་དང༌། གསུང་འཁོར་བ་རྣམས་ལ་འོད་དཔག་མེད་དང༌། སྐུ་འཁོར་བ་རྣམས་ལ་རྣམ་པར་སྣང་མཛད་དང༌། སྒོ་སྐྱོང་རྣམས་ལ་དོན་ཡོད་གྲུབ་པས་དབུ་བརྒྱན་
རྩ་བརྒྱད་པོ་ལས་བྱུང་བའི་རྣལ་འབྱོར་མ་བརྒྱད་པོ་རྣམས་ཀྱི་གཙོ་བོ་ལ་མཆོད་པར་གྱུར། ཨོཾ་བུདྡྷ་ཀ་པཱ་ལི་ནི་མ་ཊ་མ་ཊ་ཨ་སྭཱཧཱ། མེ་ཏོག་འབུལ་བའི་སྔགས་སོ། །ཨོཾ་མཧཱ་ཀ་པཱ་ལ་བཛྲཱི་བ་ར་བ་ར་ཏ་ཊ་སྟ་ཊ་ཡ་སྟ་ཊ་ཡ་མ་ཊ་མ་ཊ་ཧཱུཾ་ཧེ་སྭཱཧཱ། དྲི་ཆབ་འབུལ་བའི་སྔགས་སོ། །ཨོཾ་བུདྡྷ་ཀ་པཱ་ལི་ནི་ཏ་ཊ་སྥོ་ཊ་ཡ་སརྦ་ཤུ་བྷ་པྲ་དཱ་ཡི་ནི་ཧཱུཾཾཾཾཾ་ཕཊ། སྦོས་འབུལ་བའི་སྔགས་སོ། །ཨོཾ་བུདྡྷ་ཀ་པཱ་ལི་ནི་གྲྀཧྞ་གྲྀཧྞ་གྲྀཧྞ་པ་ཡ་གྲྀཧྞ་པ་ཡ་བ་ར་བ་ར་ཏ་ཊ་ཏ་ཊ། སྟ་ཊ་ཡ་སྟ་ར་ཡ་མ་ཊ་ཧཱུཾ་ཧཱུཾཾ་སྭཱཧཱ། མར་མེ་འབུལ་པའི་སྔགས་སོ། །ཨོཾ་བུདྡྷ་ཀ་པཱ་ལི་ནི། གྲྀཧྞ་གྲྀཧྣ་གྲྀཧྣ་པ་ཡ་གྲྀཧྣ་པ་ཡ་ཁཱ་ཁཱ་ཧཱུཾ། ལྷ་བཤོས་འབུལ་བའི་སྔགས་སོ། །ཨོཾ་མཧཱ་ཀ་པཱ་ལི་བཛྲ་དྷརྨ་དྷརྨ་མེ་གྷེ་བ་རེ་པྲ་བ་རེ་བ་ར་བ་ར་ཀ་ར་ཀ་ར། ཏ་ཊ་ཏ་ཊ། ཧ་ཧེ་སྭཱཧཱ། གོས་འབུལ་བའི་སྔགས་སོ། །སྐབས་འདིར། སྤྲོ་ན་གོང་ཚོགས་ཞིང་གི་སྐབས་ལྟར། ཚིགས་བཅད་བརྗོད་པས། ཕྱི་ནང་གསང་བའི་མཆོད་པ་མཐའ་དག་འབུལ་བ་སྐབས་སུ་བབ་པའང་ཡིན་ནོ། །དེ་ནས། རྡོ་རྗེ་དང་ནི་པདྨ་འདུས་ཤིང་བདུད་རྩིས་བདེ་རྒྱས་ཤིང༌། །རིམ་གྱིས་ཡོངས་གྱུར་སྐུ་ཅན་སེམས་ཅན་དོན་དུ་གར་བྱེད་པ། །རྡོ་རྗེ་ལྷ་མོའི་རྩེད་མོའི་རོལ་བས་རྩེར་མཛོད་འགྲོ་རྨོངས་ལ། །འགྲོ་ལ་མི་དམན་ཀུན་དགའ་སྟེར་བ་ཁྱོད་ལ་བདག་འདུད་དོ། །ཞེས་བསྟོད། དེ་ནས་བདུད་རྩི་མྱང་བ་ནི། ཡབ་ཡུམ་སྙོམས་པར་ཞུགས་པའི་དགའ་བའི་སྒྲས་དེ་བཞིན་གཤེགས་པ་ལྔ་རྣམས་སྤྱན་དྲངས། སྤྱི་བོ་ནས་ཞུགས་ཐུགས་ཀར་བྱང་ཆུབ་ཀྱི་སེམས་དང་འདྲེས། རྡོ་རྗེའི་ལམ་ནས་ཡུམ་གྱི་པདྨར་བབས་པ། ཡེ་ཤེས་བདུད་རྩི་ལྔའི་རང་བཞིན་དུ་
གནས་པ་ལ། ལྷ་ཐམས་ཅད་ཀྱི་ལྗགས་ལས་བྱུང་བའི་འོད་ཟེར་གྱི་སྦུ་གུས་དྲངས་ནས། གསོལ་བས་ཚིམ་ཞིང་མཉེས་པར་གྱུར། ནང་གི་བདུད་རྩི་མྱང་བའོ། །ནང་མཆོད་བསངས་སྦྱངས། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་ཟུར་གསུམ་པ་འབར་བ་བདུན་གྱིས་མཚན་པ། དེའི་སྟེང་དུ་ཨོཾ་ཨཱཿཧཱུཾ་ལས་བྱུང་བའི་མི་མགོའི་སྒྱེད་པུ་གསུམ་གྱི་སྟེང་དུ། ཨཱཿལས་བྱུང་བའི་ཐོད་པ་དུམ་བུ་གསུམ་པ་ཕྱི་དཀར་ལ་ནང་དམར་བའོ། །དེའི་ནང་དུ་བྃ་རྃ་ཤཱུྃ་མྃ་མུྃ་རྣམས་ལས་དྲི་ཆེན་རཀྟ་བྱང་སེམས་ཀྱི་ཀླད་པ་དྲི་ཆུ་སྟེ་བདུད་རྩི་ལྔ་དང༌། གྃ་ཀུྃ་དྃ་ཧྃ་ནྃ་རྣམས་ལས་བ་གླང་ཁྱི་གླང་པོ་རྟ་མི་ཤ་སྟེ་སྒྲོན་མ་ལྔ་ལ། ཨོཾ་ཧཱུཾ་ཁཾ་སྭཱ་ཧཱུཾ་གིས་མཚན་པ། འོག་གི་རླུང་གཡོས་མེ་སྦར་བས་རྫས་བཅུ་ཡི་གེ་དང་བཅས་པ་ཞུ་བའི་རླངས་པ་རྣམས་སྟེང་གི་བར་སྣང་ལ་ཧཱུཾ་ལས་རྡོ་རྗེ་སྔོན་པོ་ཧཱུཾ་གིས་མཚན་པར་གྱུར་པ་ལ་རེག་པས་དེ་ཞུ་ནས་ཐོད་པར་ལྷུང་བ་རྫས་རྣམས་དང་རོ་གཅིག་ཏུ་འདྲེས་པར་གྱུར། ཡང་མཐོ་གང་ཙམ་གྱི་བར་སྣང་ལ། ཨོཾ་ལས་ཟླ་བ་ཨོཾ་གྱིས་མཚན་པ་ལས་འོད་འཕྲོས། ཕྱོགས་བཅུའི་དེ་བཞིན་གཤེགས་པ་རྣམས་ལས། བྱང་ཆུབ་ཀྱི་སེམས་ཀྱི་བདུད་རྩི་སྤྱན་དྲངས་པ་དང༌། ནོར་བུ་དང་སྔགས་དང་སྨན་གྱི་ནུས་པའི་བྱེ་བྲག་ཐམས་ཅད་བཀུག་སྟེ་རྫས་ལ་ཐིམ་པས། དེ་ཐམས་ཅད་དངུལ་ཆུའི་མདོག་ཅན་རབ་ཏུ་བསིལ་བའི་བདུད་
རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ། ལན་གསུམ་གྱིས་བྱིན་གྱིས་བརླབས། ཡང་ལན་གཅིག་གིས་བདུད་རྩི་མྱངས་ནས། ཧཱུཾ་དཀར་པོ་ལས་སྐྱེས་པའི་ལྗགས་རྡོ་རྗེ་རྩེ་གཅིག་པས་དྲངས་ཏེ་གསོལ་བར་བསམ་སྟེ། ཕྱིའི་བདུད་རྩི་མྱངས་བའོ། །དེ་དག་ནི་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་ནོ། །དཀྱིལ་འཁོར་གྱི་འཁོར་ལོའི་བདག་གཞན་སྣོད་བཅུད་དང་བཅས་པ་ཐམས་ཅད་རྨི་ལམ་ལྟ་བུར་བསམ་ཞིང༌། སྤྲུལ་པ་སྤྲོ་བསྡུས་སེམས་ཅན་གྱི་དོན་བྱེད་པ་ནི་ལས་རྒྱལ་པོ་མཆོག་གི་ཏིང་ངེ་འཛིན་ནོ། །དེ་ནས་མི་འཇིགས་པའི་གཞུང་འགྲེལ་ལྟར་ན། འཁོར་ལོ་སྡོམ་པའི་མན་ངག་དང་མཚུངས་པར། ལུས་དཀྱིལ་སྒོམ་པར་ཡང་མཛད་དེ། དེ་ལྟར་སྤྱིར་ཤིན་ཏུ་འཐད་ཅིང༌། ཕུན་སུམ་ཚོགས་པའི་ཡན་ལག་ཡིན་ཏེ། སྒོམ་པར་སྤྲོ་ན་གཞུང་འགྲེལ་ཉིད་ལས་ཚོལ་བར་བྱའོ། །འོན་ཀྱང་བསྡུས་རྒྱུད་འདིའི་དངོས་བསྟན་ལ་མེད་པས་ན། མེད་མི་རུང་གི་ཡན་ལག་ཏུ་མི་འགྱུར་བའི་ཕྱིར། བསྡུས་པ་ལ་དགའ་བའི་དོན་དུ་བརྩམས་པའི་སྐབས་འདིར་མ་བྲིས་སོ། །དེ་ནས་ཡང་འདི་ལྟར་སྒོམ་ཏེ། སྤྲུལ་པའི་འཁོར་ལོ་པདྨ་འདབ་མ་དྲུག་ཅུ་རྩ་བཞི་པའི་ཁ་སྟེང་དུ་ཕྱོགས་པའི། མདུད་པའི་བུ་གར་ཨཾ་སྔོན་པོའོ། །ཆོས་ཀྱི་འཁོར་ལོ་རྩིབས་བརྒྱད་པ་འོག་ཏུ་ཁ་ཕྱོགས་པའི་བུ་གར་ཧཱུཾ་སྔོན་པོའོ། །སྟེང་དུ་ཁ་ཕྱོགས་པའི་ལོངས་སྤྱོད་རྫོགས་པའི་འཁོར་ལོ་རྩིབས་བཅུ་དྲུག་པའི་བུ་གར་ཨོཾ་དམར་པོའོ། །བདེ་བ་ཆེན་པོའི་འཁོར་ལོ་རྩིབས་སུམ་ཅུ་རྩ་གཉིས་པོ་འོག་ཏུ་ཁ་ཕྱོགས་པའི་བུ་གར་ཧཾ་དཀར་པོའོ། །གསང་བའི་འཁོར་ལོར་གནས་པའི་རླུང་གིས་བསྐུལ་བའི་མེ་གཏུམ་མོའི་རང་བཞིན་ཨཾ་
ཡིག་འབར་བའི་འོད་ཟེར་གྱིས་བཞུ་བའི་ཧཱུཾ་ཡིག་ལ་སོགས་པ་ཡི་གེ་གསུམ་དང་ལྷན་ཅིག་དབྱེར་མེད་པའི་ཨཾ་ཡིག་ལྷན་ཅིག་སྐྱེས་པའི་དགའ་བའི་རང་བཞིན་གྱི་ཐིག་ལེར་གྱུར་པའི་དཔའ་བོ་སྒོམ་ཞིང༌། སྒོམ་པ་ཡོངས་སུ་སྨིན་པར་མོས༴ ནས། དེ་ཉིད་ལས་འོད་ཟེར་གྱི་རེ་ཁ་ཕྲ་མོ་མེ་ལྕེ་འབར་བ་ལྟར་གནས་པས་བལྟ་བར་བྱའོ། །དེ་མཐུས་བདུད་རྩི་འཛགས་པས་གང་སྟེ་དཔའ་བོ་བཀྲུས་པ་ན་འོད་ཟེར་གྱི་རེ་ཁ་དེ་ཡང་བསིལ་བར་གྱུར་ཏེ། དེ་ནས་དཔའ་བོ་ལ་སེམས་ངེས་པས། ཇི་སྲིད་དུ་སེམས་བརྟན་པ་ཐོབ་པར་མཚན་མ་རྣམས་ཀྱི་ཉེ་བར་དམིགས་པ་དེ་སྲིད་དུ་བལྟ་བར་བྱའོ། །བརྟན་པ་ཉེ་བར་མཚོན་པ་ན། འོད་ཟེར་གྱི་རེ་ཁ་དེའི་སྣང་བས་སྣ་ཚོགས་པ་གསལ་བར་སྣང་བར་བྱེད་པར་བསམ་སྟེ། ཐམས་ཅད་ལག་མཐིལ་གྱི་སྐྱུ་རུ་ར་ལྟར་བལྟའོ། །ཏིང་ངེ་འཛིན་ཐམས་ཅད་ཀྱང་མྱུར་དུ་རྫོགས་པར་བྱའོ། །ཞེས་པ་ཐིག་ལེའི་རྣལ་འབྱོར་རོ། །དེ་ནས་བཟླས་པ་ནི། རྡོ་རྗེའི་བཟླས་པ་ཐུན་མོང་དང༌། ཐུན་མོང་མ་ཡིན་པ་གང་ཡང་རུང་བ་སྔོན་དུ་འགྲོ་བས། ངག་བཟླས་བྱ་སྟེ། ཨོཾ་ཧྲཱིཿབུདྡྷ་ཧཱུཾ་ཀ་པཱ་ལི་ནི་ཨཱཿ ཞེས་པ་སྟེ་རྩ་བའི་སྔགས་སོ། །ཨོཾ་བུདྡྷ་ཀ་པཱ་ལི་ནཱི་ཨཱཿཧྲཱིཿཧཻ་ཧཱུཾ་ཕཊ། སྙིང་པོའོ། །ཨོཾ་བུདྡྷ་ཀ་པཱ་ལི་ནཱི་བཛྲི་ཎཱི་ཧཽ་དུར་ཛ་ཡ་དུར་ལཀྵེ་ཧཱུཾ་ཕཊ། ཅེས་པ་ནི་ཉེ་བའི་སྙིང་པོའོ། །དེ་ལྟར་ཅི་འགྲུབ་ཏུ་བཟླས་ལ། གཏོར་བསྔོ་མི་བྱེད་ན་འོག་ནས་འབྱུང་བ་ལྟར་དཀྱིལ་འཁོར་ཉེར་བསྡུ་བྱའོ། །འགྲུབ་ན་བཟླས་པའི་མཐར་གཏོར་མ་ངེས་པར་བྱ་སྟེ། གཏོར་མ་ནང་མེ་ཆོད་ལྟར་བྱིན་གྱིས་བརླབས། སྟོང་པའི་ངང་ལས་བསྲུང་བའི་འཁོར་ལོའི་
དབུས་སུ། སྐད་ཅིག་ཙམ་གྱིས་ཡེ་ཤེས་སེམས་དཔའི་དཀྱིལ་འཁོར་གྱི་འཁོར་ལོ་རྫོགས་པར་བྱོན་པ། བདག་ཉིད་ཀྱིས་སྒོམས་པའི་དཀྱིལ་འཁོར་གྱི་འཁོར་ལོ་དང་གཉིས་སུ་མེད་པར་གྱུར། གོང་གི་དམ་ཡེ་བསྲེ་བའི་སྔགས་ལན་གསུམ་བཟླས། དུར་ཁྲོད་ཀྱི་ས་གཞི་ལ་ཕྱོགས་སྐྱོང་བ་ཐམས་ཅད་ཀྱང་གནས་པར་གྱུར། གོང་བཞིན་ཆུ་གཉིས་དང་ཉེར་སྤྱོད་ལྔ་དང་ལྷ་མོ་བརྒྱད་ཀྱི་ས་མཆོད། ཨོཾ་བུདྡྷ་ཀ་པཱ་ལི་ནི་བ་ལིཾ་གྲྀཧྞཱ་གྲྀཧྞཱ། གྲྀཧྞཱ་པ་ཡ་གྲྀཧྞཱ་པ་ཡ་ཁཱ་ཁཱ་ཧཱུཾ། ཞས་དཀྱིལ་འཁོར་གྱི་ལྷ་ཚོགས་རྣམས་ལ་ལན་བདུན་གྱིས་ཕུལ། ཨོཾ་བུདྡྷ་ཀ་པཱ་ལ་བཛྲ་ཙ་ཊེ་སུ་ཙེ་ཊེ། ཨ་（ལཾ་བ་ནེ+ཁཾ་བཱ་རེ）པྲཱི་ཎཱ་ཡ། སརྦྦ་བྷཱུ་ཏཱ་ན། མ་རཱ་ཡ་སརྦྦ་མཱ་རཱ་ན། ཀཱི་ལ་ཡ་སརྦྦ་དུཥྟཱ་ན། ཨུ་ཙ་ཊ་ཡ་སརྦྦ་བིགྷྣཱན། བི་དྲ་བཱ་ཡ། བྷོ་བྷ་ག་ཝ་ཏེ། ཡཀྵ་རཀྵ་ས། པཱི་ཤཱ་ཙ་ན། ཤོ་ཥ་ཡ། ཏཱ་ཌ་ཡ། སསྟ་པཱ་ཏཱ་ལ་ག་ཏཱ་ན། ས་ར་ས་ར། པྲ་ས་ར་པྲ་ས་ར། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། ཅེས་ལན་གསུམ་གྱི་འབྱུང་པོའི་ཚོགས་ལ་ཕུལ། ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྟོག་པ་མེད། །བཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་འབྱུང༌། །ངོ་བོ་ཉིད་མེད་གནས་མེད་པ། །དེ་ལྟར་ཆོས་རྣམས་ཤེས་ཀྱིས་ལ། །སེམས་ཅན་དོན་གྱི་མཉམ་མེད་བྱོས། །འོན་ཏེ་སངས་རྒྱས་སྲས་བུ་སྐྱེས། །ཞེས་ཆོས་བཤད་ནས། སེམས་ཅན་ཐམས་ཅད་བདེ་གྱུར་ཅིག །སེམས་ཅན་ཐམས་ཅད་སྐྱོན་མེད་པའི། །ལམ་དེ་ཉིད་དུ་ཞུགས་ནས་ཀྱང༌། །སངས་རྒྱས་ཉིད་དང་ཕྲད་གྱུར་ཅིག །མ་གྲོལ་བ་རྣམས་གྲོལ་བར་ཤོག །མ་བརྒལ་བ་རྣམས་བརྒལ་བར་ཤོག །རྣལ་འབྱོར་གཙུག་ལག་དམ་པ་ལ། །ད་ལྟ་ཉིད་དུ་གནས་པར་ཤོག །ཅེས་
དགེ་བ་བསྔོས་ནས། རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་༴ ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག་གི །བར་གྱིས་ཕྲིན་ལས་བཅོལ། ཨརྒྷཾ༴ ནས་ཤཔྟའི་བར་གྱིས་མཆོད་པ་སྤྱི་དང་འདྲ་བར་ཕུལ། ཡིག་བརྒྱ། བཟོད་གསོལ། གཤེགས་གསོལ་རྣམས་བྱས་ཏེ། ཁུ་ཚུར་ས་ལ་བརྐྱང་ནས་སེ་གོལ་གཏོགས་ཏེ། ཨོཾ་ཨཱཿཧཱུཾ་མུཿ ཞེས་པ་དང་དྲིལ་བུ་འཁྲོལ་བས་གཤེགས་སུ་གསོལ། དེ་ནས་དཀྱིལ་འཁོར་ཉེ་བར་བསྡུ་བ་ནི། རང་གི་སྙིང་ག་ནས་འོད་ཟེར་འཕྲོས། སྣོད་བཅུད་ཐམས་ཅད་རྟེན་དང་བརྟེན་པའི་དཀྱིལ་འཁོར་དུ་གྱུར་པ། བདག་གིས་སྒོམས་པའི་དཀྱིལ་འཁོར་ལ་ཐིམ། དུར་ཁྲོད་བརྒྱད་བསྲུང་བའི་འཁོར་ལོ༴ དེ་གཞལ་ཡས་ཁང་གདན་དང་བཅས་པ་ལ༴ དེ་ཡང་ལྷ་རྣམས་ལ༴ ལྷ་རྣམས་གཙོ་བོ་ཡབ་ཡུམ་ལ༴ གཙོ་བོ་ཡབ་ཡུམ་ཡང་ཐུགས་ཀའི་ཧཱུཾ་ལ༴ དེ་ཡང་འོད་གསལ་དུ་ཐིམ་པར་གྱུར། བར་སྐབས་དེར། ཅུང་ཟད་མཉམ་པར་བཞག །དེ་ལས་ཐུན་མཚམས་ཀྱི་ལྷ་སྐུ་བསྒོམས་ཏེ་དགེ་བ་བསྔོའོ། །གལ་ཏེ་དཀྱིལ་འཁོར་བསྡུས་པའི་རྗེས་སུ་གཏོར་མ་བསྔོ་ན། མདུན་བསྐྱེད་དམ་ཚིག་པ་ས་བོན་ནི་སྔགས་ཙམ་ལས་བསྐྱེད། ཡེ་ཤེས་པ་དང་བསྲེས་ནས་གཏོར་མ་འབུལ་བའམ། བསྡུ་ན་སྐད་ཅིག་གིས་བསྐྱེད་ནས་སྤྱན་དྲངས་ཀྱང་ཆོག་སྟེ། གཤེགས་གསོལ་གྱི་མཐར་ཡང་སྨོན་ལམ་དང་བཀྲ་ཤིས་གང་འགྲུབ་བྱའོ། །གཞན་རྣལ་འབྱོར་གྱི་ཡན་ལག་རྣམས་ནི། ཐེག་པ་བླ་ན་མེད་པའི་བསྐྱེད་རིམ་གྱི་སྒྲུབ་ཐབས་སྤྱི་དང་འདྲ་བས་འདིར་མ་བརྗོད་དོ། །དམ་པ་རྣམས་ནི་ཆོས་ཀྱི་བང་མཛོད་འཛིན། །གསར་པའི་ལེགས་བཤད་རྒྱས་ཀྱང་ངོམས་པ་མེད། །སྐྱེ་བོ་ཉོན་མོངས་ཅན་གྱི་ཐིབས་པོར་ཡང༌། །ཐེག་མཆོག་ཉི་འོད་འཇུག་པ་འགའ་ལ་སྲིད། །
དེ་ཕྱིར་མཆོག་ཏུ་རྙེད་དཀའ་བའི། །སྒྲུབ་ཐབས་བྱས་པའི་དགེ་བ་གང༌། །ཀུན་ལ་ཕན་པའི་སེམས་ཀྱིས་ཏེ། །མཁའ་ཁྱབ་ཧེ་རུ་ཀར་གྱུར་ཅིག། །།ཅེས་པ་དཔལ་སངས་རྒྱས་ཐོད་པའི་སྒྲུབ་ཐབས་དེ་ཁོ་ན་ཉིད་གསལ་བ་ཞེས་བྱ་བ་འདི་ཡང༌། རྒྱུད་ཀྱི་རྒྱལ་པོ་ཉིད་སློབ་དཔོན་ས་ར་ཧ་པས་མཛད་པར་བྱེད་པའི་གཞུང་འགྲེལ་བཞི་དང་བཅས་པ་དང༌། པདྨ་བཛྲ་གྱི་མཛད་པའི་རྒྱུད་འགྲེལ་འགྱུར་འཕྲོ་དང༌། ཨ་བྷ་ཡཱ་ཀ་རའི་ཞལ་སྔ་ནས་མཛད་པའི་འགྲེལ་ཆེན་མི་འཇིགས་པའི་གཞུང་འགྲེལ་རྣམས་ལ་ངེས་པ་ཅུང་ཟད་རྙེད་ཅིང༌། དེ་རྣམས་ལས་ཕལ་ཆེར་ཕྱི་མ་ཉིད་མཆོག་ཏུ་མཐོང་སྟེ། གཙོ་བོར་དེའི་རྗེས་སུ་འབྲངས་ནས། རྒྱལ་ཁམས་པ་ཏཱ་ར་ནཱ་ཐས་ཇོ་ནང་དཔལ་གྱི་རི་ཁྲོད་དུ་སྦྱར་བའོ། །བཀྲ་ཤིས།། །།བསོད་ནམས་སྟོབས་ཀྱིས་ལུས་འདི་བོར་མ་ཐག །པདྨ་འབྱུང་གནས་གང་འདུལ་རོལ་བའི་གར། །རྔ་ཡབ་གླིང་གི་མངའ་བདག་དགྱེས་བཞུགས་དྲུང་། །ཐུགས་སྲས་དམ་པའི་དགོངས་ཆེན་སྤྱོད་གྱུར་ཅིག །