འཕྲིན་ལས་ཐམས་ཅད་འབྱུང་བའི་སྒྲོལ་མ་འདུས་པ་དོན་དམ་པ་ཞེས་བྱ་བ་རྣལ་འབྱོར་མའི་རྒྱུད་ཀྱི་རྒྱལ་པོ།
འཕྲིན་ལས་ཐམས་ཅད་འབྱུང་བའི་སྒྲོལ་མ་འདུས་པ་དོན་དམ་པ་ཞེས་བྱ་བ་རྣལ་འབྱོར་མའི་རྒྱུད་ཀྱི་རྒྱལ་པོ་བཞུགས།
ན་མ་སྟཱ་རཱ་ཡཻ། རྒྱ་གར་སྐད་དུ། ས་མ་ཛ་པ་ར་མཱརྠ་སརྦ་ཀརྨོ་ད་ཡ་ནཱ་མ་ཏཱ་རཱ་ཡོ་གི་ནཱི་ཏནྟྲ་ནཱ་ཛ། བོད་སྐད་དུ། འཕྲིན་ལས་ཐམས་ཅད་འབྱུང་བའི་སྒྲོལ་མ་འདུས་པ་དོན་དམ་པ་ཞེས་བྱ་བ་རྣལ་འབྱོར་མའི་རྒྱུད་ཀྱི་རྒྱལ་པོ། སྒྲོལ་མ་ལ་ཕྱག་འཚལ་ལོ། །དེ་ནས་[ལམ་གྱི་ཕན་ཡོན་མདོར་བསྟན་པ་ནི།] དངོས་གྲུབ་ཐམས་ཅད་ནི། །རབ་ཏུ་སྒྲུབ་བྱེད་བཤད་པར་བྱ། །བུད་མེད་[ས་ཀྱི་དངོས་གྲུབ། ]བྱེ་བ་ཕྲག་བརྒྱ་ཡང༌། །བདག་ལ་དད་པས་འདུད་པར་བྱེད། །ལྷ་དང་ལྷ་མིན་རིག་འཛིན་དང༌། །མི་ཡི་གཙོ་བོ་དབང་དུ་བྱེད། །ཉི་མ་ཟླ་བ་དང་མཚུངས་ཤིང༌། །མཁའ་ལྡིང་རྒྱལ་པོས་རྣམ་པར་འདུད། །ཀླུ་རྣམས་སྡིགས་པར་བྱེད་པ་དང༌། །མི་དང་མི་མིན་གང་གིས་[རྫོགས་རིམ་གྱི་རྒྱུ་བདེ་བ་འགྲུབ་]ཡང༌། །བུ་མོ་ཐམས་ཅད་འཛག་བྱེད་པ། །སྐྱེས་པ་གཅིག་གིས་འདོད་ཆེན་གྱིས། །མི་ཡི་
བུ་མོ་ཁྲི་ཕྲག་དང༌། །ཉིན་རེར་ལྷ་དང་ལྷ་མིན་མོ། །བུད་མེད་འབུམ་ཕྲག་ཟིལ་གནོན་པ། ཁུ་བ་རེངས་པའི་བྱེད་པ་ལས། །གཅིག་གིས་ཐམས་ཅད་འདོད་སྤྱོད་པ། །རྡོ་རྗེར་བྱེད་པ་རབ་ཏུ་བཤད། །འཇིགས་པ་ཀུན་ལས་ཐར་པ་དང༌། །བསྐལ་པ་ཆེན་པོར་ཚེ་ཡང་གནས། །མཁའ་[འཇིག་རྟེན་པའི་དངོས་གྲུབ་གཞན་བསྟན་པ།]ལ་འགྲོ་དང་མི་སྣང་དང༌། །རི་ལུ་ལ་སོགས་རིག་འཛིན་དང༌། །བཅུད་ཀྱིས་ལེན་དང་གནོད་སྦྱིན་མོ། །རབ་ཏུ་སྒྲུབ་བྱེད་སྔགས་ཆེན་པོ། ཁྲག་ཁྲིག་བཅུ་གཉིས་མཁའ་འགྲོ་མ། །འབྱུང་པོ་བྱེ་བ་མཐུ་ཆེན་དང༌། །གྲོང་ཁྱེར་གསུམ་འཇོམས་ཚངས་སོགས་ལྷ། །མངག་གཞུག་ཉིད་དུ་བྱེད་པར་འགྱུར། འདས་[རྒྱུད་ཀྱི་བྱུང་ཚུལ།] པའི་དུས་ན་རྡོ་རྗེ་ཅན། །
སངས་རྒྱས་དབུགས་དབྱུང་དཀྱིལ་འཁོར་སྤྲུལ། །བདེ་མཆོག་བདེ་མཆོག་དགོས་རྡོ་རྗེ། །ཡིད་བདེ་ཐིག་ལེ་ལ་སོགས་བསྟན། །འབུམ་ཕྲག་བརྒྱ་པ་སྒྲོལ་མ་ཡི། །སྔགས་ཀྱི་རྒྱལ་པོ་སྔོན་བཤད་པ། །རྫོགས་ལྡན་དུས་སུ་མི་རྣམས་སྤྱོད། །དེ་ནས་འབུམ་ཕྲག་དྲུག་པ་བཤད། །དེ་ཡང་ནུབ་ནས་ཁྲི་ཉིས་སྟོང༌། །ཕྱི་མའི་དུས་སུ་བཤད་པ་ཡིན། །དེ་ཡི་སྙིང་པོ་རྩོད་དུས་འདིར། །གཡོན་པའི་སྤྱོད་པས་རྣམ་སྤྱོད་པས། །ངེས་བརྗོད་འབུམ་གྱི་རྗེས་འབྲང་པ། །སླར་ཡང་རྒྱུད་འདི་སྣང་བར་འགྱུར། །ངེས་པར་[གསུངས་པའི་དགོས་པ།]འདོད་ཆགས་ཆགས་ཆེན་འདིས། །འདོད་ལྡན་[ལོངས་སྤྲུལ།]རྣམས་ལ་བྱང་ཆུབ་སྟེར། །སངས་རྒྱས་ཕྲིན་ལས་ཐམས་ཅད་འབྱུང༌། །དམ་ཚིག་སྒྲོལ་མ་ཞེས་བྱའི་སྔགས། །མཁའ་འགྲོ་མ་ཀུན་འདུས་པ། ལས། །དམ་པའི་དོན་ཡང་འགྲུབ་པའོ། །དེ་ནས་བདེ་ཆེན། བཅོམ་ལྡན་འདས་མ་དམ་ཚིག་སྒྲོལ་མས་རིག་སྔགས་ཀྱི་རྒྱལ་མོ་འདི་གསུངས་སོ། །ཨོཾ་ཏཱ་རེཏུཏྟཱ་རེ་ཏུ་རེ་སྭཱ་ཧཱ། འདི་ནི། [ཆོས་སྐུ།]དངོས་གྲུབ་ཐམས་ཅད་བྱེད་པའོ། །ཨོཾ་ཀུ་རུ་ཀུལླེ་ཧྲཱིཿསྭཱཧཱ། ཀུ་རུ་ཀུལླེའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཧཱུཾ་ཕཊ། སྙིང་པོའོ། ཨོཾ་ཏཱ་རེ་སྭཱཧཱ། གསུང་བསྐུལ་བར་བྱེད་པའོ། །ཨོཾ་ཨཱཿཏཱཾ་ཧཱུཾ། ཐུགས་བསྐུལ་བར་བྱེད་པའོ། །ན་མོ་རཏྣ་ཏྲ་ཡཱ་ཡ། ན་མོ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས ཏྭཱ་ཡ། མཧཱ་སཏྭཱ་ཡ། མཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་དུཥྟཾ། པྲ་དུཥྟཾ་མ་མ་ཀྲྀ་ཏེ། ཛམྦྷ་ཡ། སྟཾ་བྷ་ཡ། མོ་ཧཱ་ཡ། བནྡྷ་ཡ་
ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། སརྦ་དུཥྟཾ་སྟཾ་བྷ་ནི་ཏཱ་རེ་སྭཱཧཱ། འདི་ནི་ལས་ཐམས་ཅད་བྱེད་པའོ། །ལཾ་མཾ་པཾ་ཏཾ་ཧཱུཾ། ལྷ་མོ་ལྔའི་འོ། །ཨོཾ་ཨ་རལླི་བྷྱོ་བྷྱོ་ཧ་ཧ་ཧ་ཧ་སི་སི་སི་སི། ཞེས་པ་ནི་ཧེ་རུ་ཀའི་སྔགས་སོ། །ཨོཾ་ཨ་རལླྀ་རྀ་གི་ཕེཾ་ཕེཾ་ཕེཾ་བྷྱོ་སྭཱཧཱ། ཞེས་པ་ནི་སྔགས་གཉིས་པའོ། །ཨོཾ་བཛྲ་བཱ་ར་ཧཱི་ཨ་བེ་ཤཱ་ཡ་སརྦ་ཛྭ་ར་ཎ་ཧྲཱིཿསྭཱཧཱ། རྡོ་རྗེ་ཕག་མོའི་འོ། ཨོཾ་མཱ་རི་ཙཻ་མཾ་སྭཱཧཱ། འོད་ཟེར་ཅན་མའི་འོ། ཨོཾ་ཧྲིཾ་ཧྲིཾ་ཧཱུཾ་ཕཊ། རལ་གཅིག་མའི་འོ། ཨོཾ་སྭཱཧཱ། ཞི་བར་བྱེད་པའོ། །ཨོཾ་ཨོཾ་རྒྱས་པར་བྱེད་པའོ། །ཨོཾ་བཱི་ཥ་ཊ་ཧོ་དབང་དུ་བྱེད་པའོ། །ཨོཾ་ཕཊ་གསོད་པར་བྱེད་པའོ། །སྭཱ་ཧཱ་ལཾ་ལཾ་ལཾ་ཧྲཱིཿཛཿཕཊ་ཕཊ། ཅེས་པ་ནི་ལས་བརྒྱད་བྱེད་པའོ། །ཛཿཧཱུཾ་བཾ་ཧོཿ དགུག་པར་བྱེད་པའོ། །ཨོཾ་བཛྲ་རཀྵ་རཀྵ་ཧཱུཾ་ཧཱུཾ་ཕཊ་སྭཱཧཱ། བསྲུང་བའི་འོ། །སྥ་ར་ཎ་ཕཊ། སྤྲོ་བའི་འོ། ཨོཾ་ཨ་ཀྲོ་དྷཻ་ཀ་ཡ་མཱནྟ་ཀ་ཧཱུཾ། གཤིན་རྗེ་གཤེད་ཀྱིའོ། །ཨོཾ་ན་མོ་ཨ་ཙ་ལ་ཀཱ་ན་ཙེཊྚ་ཙེཊྚ་མོཊྚ་མོཊྚ་ཏུཊྚ་ཏུཊྚ་གྷ་གྷ་གྷཱ་ཏ་ཡ་གྷཱ་ཡ་ཧཱུཾ་ཕཊ། གཏུམ་པོའི་འོ། །ཨོཾ་པདྨན་ཏ་ཀྲྀ་ཏ་བཛྲ་ཀྲོ་དྷ་ཧ་ཡ་གྲཱྀ་བ་ཧཱུཾ་ཧུ་ལུ་ཧུ་ལུ་ཧཱུཾ་ཕཊ། རྟ་མགྲིན་གྱིའོ། །ན་མཿས་མནྟ་བུདྡྷོ་བྷྱོ་ན་མོ་མཧཱ་བཛྲ་ཀྲོ་དྷཱ་ཡ། མཧཱ་དོཥྟོཏྐི་ཊི་བྷཱི་ཥ་ཎ་བྷཻ་ར་བཱ་ཡ། བཛྲ་སནྡོ་ཧ་དརྦཱ་ཡ། ཨོཾ་ཨ་མྲྀ་ཏ་ཀུཎྜ་ལི་ཧཱུཾ་ཕཊ། བདུད་རྩི་འཁྱིལ་བའི་འོ། །ཨོཾ་ཧཱུཾ་ཤྲཱི་ཡ་དེ་བཱི་ཀ་ལཱི་ཀ་ལཱི་མཧཱ་ཀ་ལཱི་ཧཱུཾ་བྷྱོ། ཨོཾ་མཧཱ་ཀ་ལཱི་དེ་བཱི་ཀ་ར་ལཱི་བི་ཀྲནྟ་ཀཱ་ལ་རཱ་ཏྲཱི་ཙཎྜ་རཱུ་པི་ཎཱི་ཧཱུཾ་ཕཊ། ལྷ་མོ་ནག་མོའི་སྔགས་སོ། །ཨོཾ་བཛྲ་ཀི་ལི་ཀི་ལཱ་ཡ་
སརྦ་བིགྷྣནྦྷནྡྷ་ཧཱུཾ་ཕཊ། ཕུར་བུས་གདབ་པའི་འོ། །སྔགས་ཀྱི་ལེའུ་སྟེ་དང་པོའོ། །དེ་ནས་[ལམ་གྱི་སྔོན་འགྲོ་ཕུར་གདབ། ལས་ཏིང་ངེ་འཛིན་གྱི་ཕུར་གདབ་ནི་]བཅོམ་ལྡན་འདས་མའི་ཐུགས་ཀ་ནས་ཞགས་པ་དང་ལྕགས་ཀྱུའི་ཚོགས་སྤྲོས་ཏེ། ན་མཿས་མནྟ་ཀཱ་ཡ་ཝཱཀྩིཏྟི་བཛྲ་ཎཾ། ཨོཾ་ཊཀྐི་ཧཱུཾ་ཛཿ ཞེས་པའི་སྔགས་འདི་ཕྱུང་ངོ༌། །གདུག་པ་ཐམས་ཅད་བཀུག་ནས་ཀྱང༌། །ནམ་མཁའི་དབྱིངས་སུ་བསྒྱེལ་ནས་ནི། །རྡོ་རྗེ་ཕུར་བུའི་ཚོགས་སྤྲོས་ནས། །གནས་ལྔ་དག་ཏུ་ཕུར་བུས་བཏབ། །བདུད་རྩི་འཁྱིལ་བ་ཁྲོ་བོ་ཆེ། །རྡོ་རྗེ་ཕུར་བུ་བསྐུལ་བར་མཛོད། །སྟོང་གསུམ་དག་གི་ཁོར་ཡུག་ལ། །བགེགས་རྣམས་ཐམས་ཅད་བཅིངས་པར་མཛད། །ཨོཾ་ལཾ་སྟམྦྷ་ཡ་ལཾ། གྲོང་[དགྲ་ལ་ཕུར་གདབ་]མཁར་ས་ལ་གཟུགས་བྱས་ནས། །རྐང་པ་གཡོན་པས་མནན་བྱས་ལ། །མི་རུས་ལས་སྐྱེས་ཕུར་བུ་ཡིས། །བཏབ་ན་དེ་ཡི་མོད་ལ་འཆི། །སྦུལ་[གནོད་བྱེད་གཞན་ལ་གདབ་པ་]དང་སེདྒེ་གླང་པོ་དང༌། རྐུན་པོའི་ཡན་ལག་དག་ལ་གདབ། །འདི་ཡིས་གདུག་ཅིང་སྡང་སེམས་ལྡན། །ལོག་འདྲེན་དག་ལ་གདབ་པར་བྱ། །ཡེ་ཤེས་པདྨ་ཁ་ཕྱེ་ནས། །རྡོ་རྗེ་ཕུར་བུའི་རབ་སྦྱོར་བས། །རང་རང་རིགས་ཀྱི་ཁྲོ་བོར་བཅས། །རྡོ་རྗེ་སེམས་སོགས་སྔགས་ལ་གདབ། །འདི་ཡིས་རྡོ་རྗེ་འགྲུབ་པར་འགྱུར། རྡོ་རྗེ་[རྡོ་རྗེ་སེམས་དཔའ་ལ་ཕུར་གདབ]ཕུར་བུས་བཏབ་པ་ན། ཕུང་པོ་རབ་ཏུ་འཇིག་པ་དང༌། རྡོ་རྗེའི་གནས་ཀྱང་ཐོབ་པར་འགྱུར། །ཞེས་གསུངས་སོ། །དེ་ལ་འདི་ནི་རྣལ་འབྱོར་ཆེན་པོའི་དམ་ཚིག་གོ །ཟླ་འབྲས་བུ་རྣལ་འབྱོར་ཆེན་པོ་བ་ཉི་མའི་
རླུང་གི་དབུས། །རང་སྔགས་ས་བོན་བསྒོམ་པར་བྱ། །ལྷ་ཡི་དེ་ཉིད་དམིགས་གྱུར་ན། །བཅུ་དྲུག་པ་ལ་དེ་འགྲུབ་འགྱུར། །སེམས་ནི་ནམ་མཁར་གྱུར་པ་ལ། །ཟླ་བ་ཉི་མ་ནུབ་པ་དང༌། །མུན་པའི་ཡེ་ཤེས་ཐིམ་པ་ན། །རྡོ་རྗེའི་ལྷ་ནི་འགྲུབ་པར་འགྱུར། །ཡང་ན་རྡོ་རྗེའི་བརྟུལ་ཞུགས་ཀྱིས། །ལུས་ཀྱི་དྲི་མ་རབ་སྦྱངས་ནས། །ཡེ་ཤེས་ཆེན་པོ་རང་སྔགས་ལྷ། །ཟླ་བ་ཉ་ལ་འགྲུབ་པར་འགྱུར། །རང་སྔགས་ས་བོན་འོད་ཟེར་གྱིས། །རྡོ་རྗེ་གུར་སོགས་བརྟག་པར་བྱ། །འཇིགས་པ་བརྒྱད་ལས་བསྲུང་བ་དང༌། །ལུས་མེད་རྣམས་ཀྱིས་ཀྱང་མི་མཐོང༌། །སྤུ་ལས་ནད་རྣམས་སྤྲེའུ་འམ། ཁྱི་དང་འདྲ་བར་རབ་ཏུ་དབྱུང༌། །ཡེ་ཤེས་སེམས་དཔའི་དམ་ཚིག་འདིས། །རྡོ་རྗེ་མཚོན་ཆས་བསྣུན་པར་བྱ། །ནམ་མཁའི་དབྱིངས་ཀྱི་དབུས་སུ་ནི། །ཡེ་ཤེས་མེ་དཔུང་དཀར་པོ་བསམ། །སེམས་ཅན་ཁམས་ནི་མ་ལུས་པའི། །གནས་ལས་མེ་ནི་འབར་བར་བསྒྲུབ། །མཚམས་མེད་ལྔ་དག་བྱེད་པ་ཡང༌། །གཙང་མའི་གནས་སུ་འགྲོ་བར་འགྱུར། །སྡིག་པ་རྡོ་རྗེའི་ཡེ་ཤེས་འདིས། །སྐད་ཅིག་གིས་ནི་དཔལ་ལྡན་འགྱུར། །ལྟེ་བའི་[རྫོགས་རིམ་རྣལ་འབྱོར་ཆེན་པོ།]དབུས་སུ་རེ་ཁ་བསམ། །ཨ་ནི་མཆོག་ཏུ་ཕྲ་བ་སྟེ། །མི་འགྱུར་ཉམས་དགའ་བདེ་བའི་གནས། །མི་ཤིགས་ཚངས་པ་འགྲུབ་པར་འགྱུར། །རང་སྔགས་ཧཱུཾ་དང་ཡི་གེ་ཨོཾ། །རྡོ་རྗེ་ཨཱཿཡིག་བསམ་པར་བྱ། །རླུང་གི་དེ་ཉིད་རབ་གྲུབ་ནས། །མི་འགྲོ་དྲག་པོའི་ངག་ཏུ་འགྱུར། །འོད་ཟེར་རྣམ་ལྔ་སྙིང་གར་གནས། །པདྨས་རྡོ་རྗེ་རབ་དབྱེ་བ། །ཐིག་ལེ་རྡོ་རྗེ་བྱེད་པ་སྟེ། །
ཡེ་ཤེས་ཁྱབ་འཇུག་རྒྱལ་པོར་འགྱུར། [རྒྱས་བཤད་ནི།] དེ་ནས་རྡོ་རྗེ་སྙིང་པོ་ལ་སོགས་པ་རྣལ་འབྱོར་གྱི་དབང་ཕྱུག་རྣམས་ཀྱིས་གསོལ་པ། བཅོམ་ལྡན་འདས་མ་འདི་ཅི་ཞིག་ལགས། ལྟེ་བ་ལས་ནི་རླུང་ཁམས་འབྱུང༌། །ཅི་ཕྱིར་ལུས་ཀྱི་ཆོས་སུ་འགྱུར། །བདུད་ལས་འདས་པའི་ལམ་བསྒོམས་པས། །ཇི་ལྟར་ཚངས་པ་ལ་སོགས་འགྱུར། །པདྨས་རྡོ་རྗེ་འབྱེད་བྱེད་ཅི། །འདི་དག་ཅི་ཕྱིར་འགལ་མི་འགྱུར། །དམ་ཚིག་དེ་ཉིད་མཁྱེན་པས་གསུངས། །ཉོན་ཅིག་རྡོ་རྗེ་ཇི་བཞིན་ཉོན། །ལུས་ནི་གཞན་དག་ཡོད་མ་ཡིན། །སེམས་ཀྱི་རང་བཞིན་རྣམ་གཡོ་བ། །དེ་ལས་འཁྲུལ་བའི་ལུས་པོ་བྱུང༌། །ལྟེ་བ་སྐུ་ཞེས་བཤད་པ་དེ། །དེ་དག་དེ་ལས་བྱུང་བ་ཡིན། །བྲམ་ཟེ་མོ་ལ་འདོད་སྤྱོད་པ། །རྡོ་རྗེ་སྐུ་རུ་འགྱུར་བའོ། །རླུང་གིས་སྨྲ་བར་བྱེད་པའི་ཕྱིར། །རྡོ་རྗེའི་ངག་སྟེ་དེ་ཉིད་བརྗོད། །དབྱངས་མཁན་བུ་མོའི་དམ་ཚིག་གིས། །རྡོ་རྗེ་གསུང་དུ་འགྱུར་བ་ཡིན། །འཁྲུལ་བས་གཉིས་སུ་རྟོག་པའི་སེམས། །ཐིག་ལེ་འདི་ལས་བྱུང་བའི་ཕྱིར། །མིག་མཛེས་གཡུང་མོའི་དམ་ཚིག་གིས། །རྡོ་རྗེ་ཐུགས་སུ་འགྱུར་བའོ། །ང་ནི་འགྲོ་བས་མི་ཤེས་ཏེ། །ཚངས་པ་ཁྱབ་འཇུག་དབང་ཕྱུག་ཆེ། །འཕྲུལ་ལྡན་ལྷ་ཞེས་འཇིག་རྟེན་རྟོག །སྐུ་དང་གསུང་ཐུགས་རྡོ་རྗེ་སྟེ། །ཐམས་ཅད་ང་ཡི་རྣམ་པར་འཕྲུལ། །སྐུ་ཡི་རྡོ་རྗེ་ཚངས་པར་འགྱུར། །གསུང་གི་རྡོ་རྗེ་དབང་ཕྱུག་ཆེ། །འཇུག་སེལ་ཐུགས་ཀྱི་རྡོ་རྗེའོ། །འདི་ན་ཡང་དག་རྫོགས་སངས་རྒྱས། །སེམས་ཅན་ཁམས་ལ་དབྱེར་མེད་དེ། །དེ་དག་རྣམས་ཀྱི་ལུས་ངག་
ཡིད། །མཉམ་འགྱུར་ཚངས་ལ་སོགས་པར་སྣང༌། །ལུས་ནི་སྤྲུལ་པའི་འཁོར་ལོར་གནས། །མགྲིན་པར་དེ་བཞིན་རྨི་ལམ་མོ། །གཉིད་ཀྱི་རྣལ་འབྱོར་སྙིང་གར་དགོད། །བདེ་བ་སྤྱི་བོར་མངོན་པར་བརྗོད། །གཞན་ཡང་རྩ་ལྕུག་ལྗོན་པ་དང༌། །རི་བོང་སྟག་སོགས་ཆུ་བོ་དང༌། །ཉིན་མཚན་ལ་སོགས་དངོས་ཀུན་ཏུ། །སངས་རྒྱས་གར་མཁན་ཟློས་གར་མཛད། །གཉིད་ལ་རྡོ་རྗེས་རྣམ་བསྒོམ་པ། །ཚངས་པའི་དམ་ཚིག་གཏི་མུག་སྤོང༌། །གཞན་གྱིས་གཉིད་དག་སྤོང་བར་དཀའ། །བུད་མེད་བྲལ་ལ་སྡོམ་བརྩོན་མེད། །འདོད་ལྡན་ཚངས་སྤྱོད་ཆེན་པོ་ནི། །ཞི་བའི་དམ་ཚིག་འདོད་ཆགས་སྤོང༌། །ཞེ་སྡང་རྡོ་རྗེར་རྣམ་བསྒོམས་ན། །རྨོངས་སེལ་ཁྱབ་འཇུག་དམ་ཚིག་གོ །གཞན་དུ་བྱམས་པས་སྤང་བར་དཀའ། །རྣམ་པ་འདི་གསུམ་གསང་ཆེན་པོ། །ལྷ་ཡི་བདེ་བ་སེར་སྣར་བཅས། །བརྩོན་འགྲུས་ཕྲག་དོག་དམ་ཚིག་སྟེ། །གཡོ་སྒྱུས་བཏུད་རྣམས་འདུལ་བྱེད་པ། །དམ་ཚིག་ཤིན་ཏུ་འདའ་བར་དཀའ། །པདྨའི་སྙིང་པོ་བདེ་བ་ཅན། །ཇི་སྲིད་མ་རྙེད་འབྲས་བུ་མེད། །རྡོར་དབྱིངས་དབང་ཕྱུག་རྩ་འདི་ཡིས། །རྡོ་རྗེ་གཉིས་སྤངས་འབྱེད་པར་བྱེད། །ཤེས་རབ་རྟོགས་པར་བྱེད་པ་ཐབས། །ཤེས་རབ་མེད་ལ་ཐབས་མཁས་མེད། །རྡོ་རྗེས་པདྨ་རྒྱས་བྱེད་ཀྱི། །པདྨས་རྡོ་རྗེ་འབྱེད་པར་བྱེད། །སྤྲུལ་པ་བདེ་ཆེན་འཁོར་ལོས་ཀྱང༌། །ཆོས་དང་ལོངས་སྤྱོད་རྣམ་པར་འབྱེད། །དེ་ལྟས་འདི་ནི་གསང་ཆེན་ཏེ། །རྒྱུད་གཞན་དུ་ནི་འབད་པས་སྦས། །དེ་ལ་འདི་ནི་སྐུ་གསུམ་
རྡོ་རྗེའི་གསང་བའོ། །སེམས་མེད་གནས་དང་འཁྲུལ་བསྐྱེད་དང༌། །སྔོན་ནས་རྣམ་པར་འཁྲུལ་བ་ཡི། །འཇིག་རྟེན་འདི་ལ་སྐུ་གསུམ་གནས། ཆོས་དང་ལོངས་སྤྱོད་རྫོགས་སྤྲུལ་པའོ། །རང་བྱུང་ངོ་བོ་བརྗོད་མེད་པ། །ཆོས་ཀུན་རང་བཞིན་ཞི་བ་བརྙེས། །རྐྱེན་ནི་རྣམ་པར་བཀྲ་བ་མཁྱེན། །རྡོ་རྗེ་ཅན་གྱིས་ཆོས་སྐུའོ། །མེ་ལོང་གཟུགས་བརྙན་ལྟར་སེམས་འདི། །ཕྲ་ཞིང་ལུས་ནི་རྡུལ་མེད་པ། །སྐད་ཀྱང་སྒྲ་བརྙན་ལྟ་བུ་སྟེ། །དག་པའི་དཀྱིལ་འཁོར་སྣང་བའོ། །སེམས་ཅན་བསམ་པ་ཇི་བཞིན་དུ། །སྤྲུལ་པ་ཐ་དད་སྣ་ཚོགས་འཇུག །ལོངས་སྤྱོད་རྫོགས་དང་སྤྲུལ་པ་སྟེ། །གཅིག་གྱུར་འདྲེན་པ་བདེ་བ་ཆེ། །རྩ་ཡི་དྲ་བ་ལྷ་མོ་སྟེ། །དེ་བཞིན་ཁམས་དང་ཉེར་བཅས་པ། །བུད་མེད་རྣལ་འབྱོར་མའི་དཀྱིལ་འཁོར། །སྤངས་ནས་རི་མོ་སུ་ཞིག་ལེན། །དེ་ལ་འདི་ནི་རྗེས་སུ་རྣལ་འབྱོར་གྱི་དམ་ཚིག་གོ །དྲི་མས་སེམས་ནི་མངོན་བསྒོམ་པས། །རྣམ་ཤེས་ཡེ་ཤེས་དག་མི་འགྱུར། །ཐེག་པ་མཆོག་གིས་བགྲོད་པའི་གནས། །ཡེ་ཤེས་དབང་མོ་ཉན་པར་འཚལ། །ཉོན་ཅིག་ཇི་བཞིན་རྡོ་རྗེ་ཉོན། །དངོས་པོ་བདེན་བརྫུན་རྣམ་དཔྱད་ན། །བརྫུན་པའི་རྡོ་རྗེ་ཡང་དག་མཐོང༌། །རང་བཞིན་དག་པའི་དེ་ཁོ་ན། །ཨ་ཞེས་བྱ་བ་ནི་མ་སྐྱེས་པའི་གཟུངས་ཀྱི་སྒོའོ། །ཧཱུཾ་ཞེས་བྱ་བ་ནི་ཡེ་ཤེས་དང་ལྡན་པའི་གཟུངས་ཀྱི་སྒོའོ། །ཕཊ་ཅེས་བྱ་བ་ནི་དགས་པར་བྱེད་པའི་གཟུངས་ཀྱི་སྒོའོ། །ཏྲཾ་ཅེས་བྱ་བ་ནི་ཉི་མའི་འོད་ཀྱི་གཟུངས་ཀྱི་སྒོའོ། །ཨཱཿ
ཞེས་བྱ་བ་ནི་སྨྲ་བ་ཐམས་ཅད་ཀྱི་གཟུངས་ཀྱི་སྒོའོ། །ཧ་ཞེས་བྱ་བ་ནི་འཆི་བ་མེད་པའི་གཟུངས་ཀྱི་སྒོའོ། །ཧྲཱིཿཞེས་བྱ་བ་ནི་རྗེས་སུ་ཆགས་པའི་གཟུངས་ཀྱི་སྒོའོ། །ཨོཾ་ཞེས་བྱ་བ་ནི་ལུས་འཇིག་པར་བྱེད་པའི་གཟུངས་ཀྱི་སྒོའོ། ཁཾ་ཞེས་བྱ་བ་ནི་ནམ་མཁའ་ལྟ་བུའི་གཟུངས་ཀྱི་སྒོའོ། །ཨཾ་ཞེས་བྱ་བ་ནི་བདེ་བ་ཆེན་པོའི་གཟུངས་ཀྱི་སྒོའོ། །ཀྵ་ཞེས་བྱ་བ་ནི་རབ་ཏུ་མི་གནས་པའི་གཟུངས་ཀྱི་སྒོའོ། །ཨཿཞེས་བྱ་བ་ནི་གཉིས་སུ་མེད་པའི་གཟུངས་ཀྱི་སྒོའོ། །ཡ་ཞེས་བྱ་བ་ནི་རྡོ་རྗེ་རླུང་སྟེ་གཟུངས་ཀྱི་སྒོའོ། །ར་ཞེས་བྱ་བ་ནི་རྡོ་རྗེའི་མེ་སྟེ་གཟུངས་ཀྱི་སྒོའོ། །ཝ་ཞེས་བྱ་བ་ནི་རྡོ་རྗེ་ཆུ་སྟེ་གཟུངས་ཀྱི་སྒོའོ། །ལ་ཞེས་བྱ་བ་ནི་རྡོ་རྗེའི་ས་སྟེ་གཟུངས་ཀྱི་སྒོའོ། །ཏཾ་ཞེས་བྱ་བ་ནི་རྡོ་རྗེའི་སེམས་ཏེ་གཟུངས་ཀྱི་སྒོའོ། །ཨིཾ་ཞེས་བྱ་བ་ནི་རྡོ་རྗེའི་དབང་པོ་རྣམས་ཏེ་གཟུངས་ཀྱི་སྒོའོ། །བཾ་ཞེས་བྱ་བ་ནི་ནམ་མཁའི་ཁམས་སུ་བྱེད་པ་སྟེ་གཟུངས་ཀྱི་སྒོའོ། །ཨཱཿཞེས་བྱ་བ་ནི་ཆོས་ཐམས་ཅད་ཀྱི་གཟུངས་ཀྱི་སྒོའོ། །རྣམ་ཤེས་ཡེ་ཤེས་རྣལ་འབྱོར་ཏེ། །དེ་དག་རྡོ་རྗེ་རབ་སྦྱོར་བས། །རྣལ་འབྱོར་ལ་ནི་རྣལ་འབྱོར་བསྒོམ། །རྗེས་ཀྱི་རྣལ་འབྱོར་ཞེས་བྱའོ། །དེ་ལ་འདི་ནི་ཤིན་ཏུ་རྣལ་འབྱོར་གྱི་དམ་ཚིག་གོ །སྤྲེའུ་དང་གློག་ལྟར་མི་གནས་པ། །རབ་ཏུ་བཟུང་བར་དཀའ་བའི་སེམས། །འདོད་པའི་རྡོ་རྗེ་རྣམ་དཔྱད་པ། །ཡེ་ཤེས་དབང་མོ་ཉན་པར་འཚལ། །ཉོན་ཅིག་ཇི་བཞིན་རྡོ་རྗེ་ཉོན། །གསེར་ཁམས་རྡོ་ལ་རྣམ་གནས་པ། །མངོན་པར་ཞི་བ་ཡོད་མ་ཡིན། །སྲེག་དང་དབྱེ་
བའི་ཐབས་ཀྱིས་ནི། །ཉི་མ་བཞིན་དུ་རྣམ་པར་གསལ། །ལྕགས་བཞིན་མེ་ལ་རྣམ་བཟོད་ན། །གཞན་དག་ཅི་ཕྱིར་མི་བཟོད་བྱེད། །དེ་ཕྱིར་ཡེ་ཤེས་རྣམ་ཤེས་དག །ཆ་གཉིས་རྣམ་པར་རྟོག་མི་བྱ། །ཆ་གཉིས་ལས་ནི་སྡིག་པ་འབྱུང༌། །སྡིག་པས་བསོད་ནམས་ཟད་པར་འགྱུར། །སྡུག་བསྔལ་སྡིག་པ་ཞེས་བརྗོད་དེ། །བླ་མེད་བདེ་བ་བསོད་ནམས་སོ། །བདེ་དང་སྡུག་བསྔལ་མཉམ་གྱུར་པ། །བསོད་ནམས་སྡིག་མེད་རྣམ་པར་ཐར། །སྡུག་བསྔལ་གྱིས་ནི་སེམས་གཡེངས་ཏེ། །དགེ་དང་སྡིག་པ་རྣམ་པར་འབྱེད། །བུ་མོའི་ལོངས་སྤྱོད་བདེ་བ་ཡིས། །རྣམ་པར་མི་རྟོག་གཉིས་མེད་འགྲུབ། །རི་བོ་ཉམས་ནི་དགའ་བ་དང༌། །ནགས་ཚལ་དབེན་པའི་ས་ཕྱོགས་སུ། །མིག་བཟང་བརྟན་པའི་བློ་ལྡན་བཟུང༌། །དང་པོར་འདུས་པ་བྱས་ནས་ནི། །རྡོ་རྗེ་ཆོ་ག་རབ་ཏུ་བསྒྲུབ། །དེ་བཞིན་གཤེགས་པའི་བཙུན་མོའི་མཆོག །དམ་ཚིག་ཆེན་པོར་བྱིན་གྱིས་བརླབས། ཁྱོགས་དང་བརླ་ཞེས་བྱ་བ་དང༌། །དེ་བཞིན་ཤིན་ཏུ་བརྐྱང་བ་དང༌། ཁབ་དང་གྲུ་མོའི་མཚན་ཉིད་ཀྱི། །བུང་བ་ལྟ་བུར་ཨི་ཡི་སྒྲ། །ངེས་པར་བློ་དང་ལྡན་པས་བསྐུལ། །སྒེག་འཆོས་སྟབས་ཀྱིས་འཁྱུད་ནས་ནི། །མགོ་བོའི་སྐྲ་བཟུང་ལྐོག་མ་གཟིར། །མ་མཆུའི་སྦྲང་རྩི་གཞིབ་པར་བྱ། །རྡོ་རྗེ་འཁྱུད་པས་འཁྱུད་པ་དང༌། །རྡོ་རྗེ་འོ་ཡིས་འོ་གདབ་ཅིང༌། །སོ་དང་སེན་མོས་བསྣུན་པར་བྱ། །རྡོ་རྗེ་པདྨར་རབ་འཇུག་ཅིང༌། །སཱིད་ཀྱི་སྒྲ་རྣམས་བྱེད་པ་དང༌། །ནུ་མ་འཚིར་དང་སྐྱེས་པའི་ཚུལ། །སྦྱོར་བ་ཐམས་ཅད་བྱ་བར་བྱ། །
ནུ་མ་སོར་མོ་སྐེ་དང་མ་མཆུ་དང༌། །རྣ་བ་མིག་དང་སྤྱི་བོ་བྷ་གར་ཡང༌། །འོ་བྱ་རྣ་བ་མཆན་ཁུང་སྐེ་དང་རྟགས། །སེན་མོས་བཏབ་བྱ་ནུ་མ་མཆན་ཁུང་དང༌། །མཁུར་ཚོས་འགྲམ་དང་རྐང་ལག་མཐིལ་དག་ཏུ། །མཉེད་པར་བྱ་ཞིང་འཁྱུད་པའི་སྟབས་བརྒྱད་བྱ། །སོར་མོ་ལིང་ག་ལྕེ་དང་ལྕེས་བསྐྱོད་ནས། །པདྨ་བསྐུལ་ཞིང་རྩ་མཆོག་སད་པར་བྱ། །ཟབ་ཆེས་པ་དང་ཤིན་ཏུ་ཆུང་བ་དང༌། ལྷོད་པ་དང༌། རྩུབ་པ་དང༌། རྟག་ཏུ་འཛག་པ་དང༌། དྲོད་དང་གཤེར་བ་དཔྲལ་བའི་བྷ་ག་ནི་སྤང་ངོ༌། །དཔངས་མཐོ་བ་དང༌། འཇམ་པ་དང༌། སྟོང་མཉམ་པ་དང༌། ཁ་རྒྱས་ཤིང་དམ་པ་དང༌། ཁྲག་དང་ཁུ་བར་ལྡན་པ་དང༌། སྤུ་ཉུང་བ་དང༌། དུས་མ་ཡིན་པར་མི་འཛག་པ་དང༌། རིང་ཞིང་སྙིང་པོ་ཟླུམ་པ་ནི་སྐལ་པ་བཟང་མོའོ། །དེ་ཡོངས་སུ་བསྐུལ་བས་ཇི་སྲིད་དུ་ཁོང་ནས་སཱིཏ་ཀྱི་སྒྲ་འབྱུང་བ་དེ་སྲིད་དུའོ། །ཧཿཞེས་བྱ་བས་མཆོག་ཏུ་དགའ་བའི་ཚེ་བཅིངས་པར་བྱའོ། །ཡང་ན་ཧཱུཾ་ཞེས་བྱ་བ་སྙིང་ག་ལ་གནས་པའི་སྒྲ་ཡིས་སོ། །ཡང་ན་ཧྲིཾ་ཧ་ཞེས་བྱ་བ་མགྲིན་པ་ལ་གནས་པའི་སྒྲ་ཡིས་སོ། །ཧཱུཾ་དང་ཕཊ་ཀྱི་བྱ་བ་དང༌། མདའ་བོ་ཆེའི་སྦྱོར་བ་བྱས་ལ་ཁུ་བ་བཅིང་བར་བྱའོ། །གཞན་ཡང་ཆ་བཞི་པའི་ཕྱེད་ཀྱི་མཚམས་སུ་ལྷན་ཅིག་སྐྱེས་པ་བསྒོམ་པར་བྱ་སྟེ་གལ་ཏེ་བྷ་གའི་ཟེ་འབྲུ་ལ་གནས་པའི་ཐིག་ལེ་ཡང་རྡོ་རྗེའི་ཁས་བཏུང་བར་བྱའོ། །བསྐོར་བ་ལ་སོགས་པའི་སྦྱོར་བ་དང༌། །རླུང་གི་སྦྱོར་བས་མཉམ་པར་བྱའོ། །འདི་ལ་དགང་བ་དང༌། གཞིལ་བ་
དང༌། རེངས་པ་དང༌། །བུམ་པ་ཅན་གྱི་སྦྱོར་བས་དག་པར་བྱས་ནས། མི་མོ་རྣམས་ཀྱི་སྦྱོར་བ་ལ་འཇུག་སྟེ། ལུས་འདི་ཉིད་ཀྱིས་དངོས་གྲུབ་ཐོབ་པ་ཞེས་བྱའོ། །དེ་ལས་དགའ་བ་བཞིའི་དབྱེ་བས་སྒྲུབ་པ་པོ་ལ་རེངས་པ་དང༌། རྔུལ་བ་དང༌། བ་སྤུ་ལྡང་བ་དང༌། དབུགས་འགྱུར་བ་དང༌། འདར་བ་དང༌། ཁ་དོག་ལོག་པ་དང༌། མཆི་མ་འབྱུང་བ་དང༌། ཐིམ་པ་ཞེས་བྱ་བ་སྙིང་སྟོབས་བརྒྱད་འབྱུང་ངོ༌། །བུ་མོས་ཡེ་ཤེས་ཐོབ་པ་ནི། སྙིང་ནི་འགུལ་ཞིང་བསྐྱོད་པ་དང༌། །འདར་དང་དྲན་པ་ཉམས་པ་དང༌། །སྐྲ་གྲོལ་གཅེར་བུ་གཤེར་བས་ཁྱབ། །མདོག་དམར་རབ་ཏུ་ཕྲ་བའི་མིག །ཡེ་ཤེས་ལྔ་ཡི་རྣམ་པར་འཕྲུལ། །བུད་མེད་ཤེས་རབ་ཡེ་ཤེས་ཏེ། །དེ་ལས་ཡེ་ཤེས་ལྔ་ཐོབ་འགྱུར། །རྡོ་རྗེ་ཆུ་སྐྱེས་སྦྱོར་ལྡན་པ། །སྐུ་ཡི་རྡོ་རྗེ་བསྙེན་པར་བརྗོད། །རླུང་ནི་མཉམ་པར་གྱུར་པ་དང༌། །སཱིཏ་ཀྱི་སྒྲ་དང་སྐད་འགྱུར་བ། །གསུང་ནི་ཉེ་བར་བསྒྲུབ་པའོ། །བསྐྱོད་པ་ལས་ནི་རབ་ཞུ་བ། །ནོར་བུ་བཅུ་དྲུག་ཆ་བབས་ཏེ། །ཡིད་ཀྱི་བདེ་བས་གཉིས་འགགས་པ། །ཐུགས་ཀྱི་དེ་ཉིད་བསྒྲུབ་པར་བརྗོད། །གཞུ་ཡི་གཟུགས་ཅན་རབ་སྦྱོར་བས། །དུང་དང་ཀུནྡ་ལྟར་ཐིག་ལེ། །སྡོམ་བརྩོན་བདེ་བས་བཟུང་བར་བྱ། །རང་གིས་རིག་པའི་ཡེ་ཤེས་མཆོག །བསྒྲུབ་པ་ཆེན་པོའི་དེ་ཉིད་དེ། །རྣམ་ཤེས་ཡེ་ཤེས་དག་པར་བྱེད། །འདི་ཡིས་རྡོ་རྗེ་བདག་ཉིད་ཆེ། །སྐུ་གསུམ་མི་ཕྱེད་ལས་བྱུང་བ། །ཡེ་ཤེས་རྒྱ་མཚོ་འགྲུབ་པར་འགྱུར། །ཡེ་ཤེས་ཆེན་པོར་རབ་སྦྱོར་བས། །ཤིན་ཏུ་རྣལ་འབྱོར་མཁས་པས་བསྟོད། །བུད་
མེད་སྒྱུ་མའི་ཕྱག་རྒྱ་འདི། །དམ་ཚིག་རྣམས་ཀྱི་མཆོག་གི་མཆོག།ངན་ཟོས་ངན་སྤྱོད་ཐམས་ཅད་ཀྱིས། །སྒྲིབ་པ་དག་ཏུ་ཡོངས་མི་འགྱུར། །དེ་སྐད་ཅེས་གསུངས་སོ། །དེ་ལ་འདི་ནི་རྣལ་འབྱོར་དང་པོའི་དམ་ཚིག་གོ །ཨུཏྤལ་མི་འཇིགས་ཕྱག་རྒྱ་ཅན། །ཕྱག་གཉིས་རྣལ་འབྱོར་བསྒོམས་བྱས་ལ། །ནམ་མཁའ་དབྱིངས་ཀྱི་དབུས་གནས་པར། །དཀྱིལ་འཁོར་གྲུ་བཞི་སྒོ་བཞི་པ། །དབུས་སུ་ཀུན་ནས་ཟླུམ་པོ་སྟེ། །ལས་ཀྱི་སྣམ་བུ་ལྔ་དང་ལྡན། །ཨུཏྤལ་དམར་པོ་སིལ་མར་བཀྲམ། །ཟླ་བ་ཉི་མའི་སྦྱོར་བ་ལས། །དམ་ཚིག་སྒྲོལ་མ་བསམ་པར་བྱ། །ལྗང་སྔོན་འོད་ཟེར་དམར་པོ་འཁྱིལ། །མཆེ་བ་གཙིགས་པ་མེ་སྟག་འབར། །མཆོག་སྦྱིན་གྲི་གུག་ཌཱ་མ་རུ། །མདའ་དང་ཨུཏྤལ་སྡོང་བུ་དང༌། །ཐོད་པ་ཁྲག་ཅན་རྩེ་གསུམ་དང༌། །བཞི་པ་མེ་ཏོག་གཞུ་འཛིན་པའོ། །དུར་ཁྲོད་རྒྱན་དང་ཨུཏྤལ་རྒྱན། །གཡས་བརྐྱང་རོལ་པའི་སྐྱིལ་ཀྲུང་ཅན། །རང་རང་སྔགས་ལས་ལྷ་མོའི་ཚོགས། །སྙིང་གའི་དབུས་ནས་སྤྲོ་བར་བྱ། །ཨོཾ་ཏཱ་རེ་སྭཱཧཱ། མིག་ལའོ་ཨོཾ་ཏུཏྟཱ་རེ་སྭཱཧཱ། རྣ་བ་ལའོ། །ཨོཾ་ཏུ་སྭཱཧཱ། ལྕེ་ལའོ། །ཨོཾ་རེ་སྭཱཧཱ། སྙིང་ག་ལའོ། །ཨོཾ་ཏྭཱ་རེ་ཎི་སྭཱཧཱ། སྤྱི་བོ་ལའོ། །སྔགས་ཀྱི་བདག་པོས་བྱིན་རླབས་དང༌། ཡེ་ཤེས་དམ་ཚིག་མཉམ་པར་བྱ། །དབང་གི་དོན་ནི་བསྒོམས་བྱས་ལ། །རང་ལྷར་སེམས་ནི་བརྟན་བྱའོ། །རྣལ་འབྱོར་ཆེན་པོའི་ལེའུ་སྟེ་གཉིས་པའོ། །དེ་ནས་སྒྲོལ་མས་བཀའ་སྩལ་པ། ཨོཾ་ལཾ་མཾ་པཾ་ཏཾ་
ཧཱུཾ་བཛྲ་ཨ་བྷི་ཥིཉྩ་ཧཱུཾ། ཨོཾ་བྲུཾ་ཨཾ་ཛྲིཾ་ཁཾ་ཧཱུཾ། རཏྣ་མུ་ཀུ་ཊ་ཨ་བྷི་ཥིཉྩ་ཧཱུཾ། ཨོཾ་ཧཱུཾ་ཁཾ་ཧཱུཾ་བཛྲ་ཨ་བྷི་ཥིཉྩ་ཧཱུཾ། ཨོཾ་ཧཱུཾ་ཏཾ་ཧཱུཾ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ཧཱུཾ། ཨོཾ་ཛཿཧཱུཾ་བཾ་ཧོཿབཛྲ་སཏྭ། སྟྭཾ་བཛྲ་ན་མ་ཨ་བྷི་ཥིཉྩ་ཧཱུཾ། དབང་བསྐུར་བའི་སྔགས་སོ། །རྡོ་རྗེ་དཀྱིལ་འཁོར་བྲི་བར་བྱ། །ཀ་བ་བརྒྱད་ཀྱིས་ཉེ་བར་མཛེས། །ཐིག་བཞི་དང་ནི་ཡང་དག་ལྡན། །ཕྱི་རོལ་ར་བ་མེ་རིར་བཅས། །དུར་ཁྲོད་དག་ཀྱང་བྲི་བར་བྱ། །དབུས་སུ་ཨུཏྤལ་མཐིང་ཁ་དགོད། །ཤར་དུ་ཞི་བའི་ཨུཏྤལ་དང༌། །བྱང་དུ་བུམ་པ་བྲི་བར་བྱ། །ནུབ་ཏུ་ལྕགས་ཀྱུ་འབར་བ་སྟེ། །རལ་གྲི་ལྷོ་རུ་དགོད་པར་བྱ། །ཞི་དང་རྒྱས་དང་དབང་དང་ནི། །གསོད་བྱེད་རྣམས་ཀྱི་མཚན་མའོ། །གྲྭ་བཞིར་རིགས་ཀྱི་ལྷ་མོ་སྟེ། །ཨུཏྤལ་མཛེས་པ་རེ་རེ་བྲི། །ལྕགས་ཀྱུ་ལ་སོགས་སྒོ་རུ་དགོད། །སྟོབས་ཆེན་ཕ་རོལ་གནོན་པ་ཡི། ཁྲོ་བོ་རྣམས་ཀྱང་གྲྭར་དགོད་དོ། །ལས་རྣམས་བྱེད་པའི་ལྷ་མོའི་ཚོགས། །ཕྱི་རོལ་དག་ཏུ་བྲི་བར་བྱ། །དབུས་སུ་བདག་ཉིད་གནས་བྱས་ནས། །རྡོ་རྗེ་མཚན་མའི་ཚོགས་སྤྲོས་པས། །སེམས་ཅན་ཁམས་རྣམས་སྦྱངས་པར་བྱ། །མཆོད་པའི་སྤྲིན་གྱིས་ནམ་མཁའི་ཁམས། །མཆོག་ཏུ་གང་བ་སྤྲོ་བར་བྱ། །མེ་ཏོག་ག་བུར་མ་ཉམས་པ། །བྷ་ག་མཆོག་ལས་ཡང་དག་བླངས། །རྣལ་འབྱོར་མ་ཡི་འཁོར་ལོས་མཆོད། །ཡང་གསུངས་པ། སྒོ་དགུ་ངེས་པར་བཀག་བྱས་ནས། །རྒྱས་པ་ལྔ་ཡི་མཆོད་རྟེན་ལས། །སྲོག་ཤིང་རྩེ་མོར་རང་གིས་སེམས། །མདའ་གཞུའི་སྦྱོར་བས་འཕོ་
བར་བྱ། མཚམས་མེད་ལྔ་པོ་བྱེད་པ་ཡང༌། །འདི་ཡིས་གྲོལ་འགྱུར་ཐེ་ཚོམ་མེད། །རིག་པའི་བརྟུལ་ཞུགས་སྤྱད་བྱ་སྟེ། །མི་ལྤགས་རས་རྙིང་བགོ་བའམ། །གཅེར་བུའི་བརྟུལ་ཞུགས་བྱས་ནས་ནི། །དོགས་པའི་སེམས་ནི་ཀུན་སྤངས་ནས། །ཇི་ལྟ་བུར་ན་སྣང་བ་འདི། །འདོད་སྤྱོད་བདེ་བ་ལ་བསྡུས་ནས། །ངན་ཟོས་ངན་སྤྱོད་ཐམས་ཅད་ཀྱིས། །བླ་མེད་བྱང་ཆུབ་བསྒྲུབ་པར་བྱ། །དེ་ལ་འདི་ནི་རྡོ་རྗེ་དམ་ཚིག་གོ །གང་ལས་སློབ་དཔོན་དབང་བསྐུར་བ། །སློབ་དཔོན་གཅིག་ཏུ་གྱུར་པ་ཡི། །སྲིང་མོ་སྒྲོལ་མ་དང་མཉམ་བརྟག །རྡོ་རྗེ་སློབ་དཔོན་དེ་བཞིན་དུ། །རིག་མའམ་བདག་གི་རིག་མ་ཡང༌། །སློབ་དཔོན་མཆོག་ཏུ་ཡོངས་སུ་བརྗོད། །བླ་མ་སངས་རྒྱས་ཀུན་མཉམ་པས། །དེ་ཡི་གྲིབ་མའང་འགོམ་མི་བྱ། །འོན་ཀྱང་དགའ་མ་དགེས་དབང་མོ། །གཉིས་ཀྱི་སྒོ་དགུ་ལས་བྱུང་བ། །མི་རྟོག་སྣོད་གཅིག་ཟ་བ་དང༌། །གཙང་སྦྲའི་སེམས་ཀྱིས་ཙུམ་པ་དབུལ། །ལྷན་ཅིག་མལ་སྟན་ལོངས་སྤྱད་ནས། །ལག་གིས་རྡོ་རྗེ་བཟུང་གསོར་ཏེ། །ཡོ་ནིར་སོར་བྱ་དམ་འཁྱུད་ནས། །ཚིག་དང་ཡི་གེས་དགེས་བསྐུལ་བས། །སོ་དང་སེན་རིས་འདྲུད་པ་དང༌། །འཇིབ་དང་སྒོ་ཡིས་ཟས་འབུལ་བ། །གུས་དང་ཕྱག་བཅས་བག་བརྐྱང་བས། །འགོངས་པ་འདི་ལ་ཉེས་མེད་དེ། །སློབ་དཔོན་དགེས་ལས་དངོས་གྲུབ་ཀུན། །བཟང་མོ་དེ་ཡིས་རྟག་ཏུ་ཐོབ། །ཡུ་ཛ་གུས་པས་གཞིབ་པ་དང༌། །ཕྱག་བྱ་གལ་ཏེ་སེམས་ལྷུང་
གྱུར། །འདབ་ལྡན་ལས་བྱུང་ཟ་བར་བྱ། །ཡོ་ནིས་ཙ་རུ་དབུལ་བ་དང༌། །འཁྲིག་ཐབས་འཁྲུལ་འཁོར་ཉེས་མེད་དེ། །གང་དེས་དེ་ཉིད་མཉེས་བྱེད་པའོ། །དེ་ནས་ལས་སྣ་ཚོགས་པ་རྣམས་གསུངས་པ་ཕྱོགས་བཞི་དང་གྲྭ་བཞིར་ཨུཏྤལའི་གཟུགས་བྱ། །རེ་རེ་ཡང་ཏཱཾ་གསུམ་གྱིས་མཚན་པ། ལྟེ་བ་ཀུན་ནས་ཟླུམ་པོ་ལ། ཨོཾ་པྲ་སནྣ་ཏཱ་རེ་ཨ་མྲྀ་ཏ་མུ་ཁི་ཨ་མྲྀ་ཏ་ལོ་ཙ་ནི། སརྦ་ཨརྠ་སྭ་དྷ་ནི། སརྦ་སཏྭ་བཱ་ཤཾ་ཀ་རི། སྟྲི་བཱ་སུ་རུ་ཥོ་བཱ་རཱ་ཛཱ་ནོ་བཱ་བ་ཤཾ་ཀུ་རུ་ཏཱཾ་སྭཱཧཱ། ཞེས་པ་ལྟེ་བར་བཀོད་པ། འཁོར་ལོ་རྩིབས་བཅུ་པར་པདྨ་ལ་ཡི་གེ་བཅུ་པའོ། །ཧྲཱིཿ གཉིས་ཀྱི་ནང་དུ་མིང་ཆུད་པར་བྱས་ན་དབང་དུ་བྱེད་དོ། །ཡང་ན་རྩིབས་བརྒྱད་པ། ཡི་གེ་ཡང་བརྒྱད་པ་སྟེ་དབུས་སུ་ཟླ་བ་ལ་ཏཱཾ་ཡིག་གོ །འཁོར་ལོ་ཁ་སྦྱོར་དུ་བྱས་ན་ཉི་མ་བདུན་ན་ངེས་པར་དབང་དུ་འགྱུར་རོ། །ཡང་ན་རྩིབས་དྲུག་པ་ཡི་གེ་ཡང་དྲུག་པའོ། །དབུས་སུ་ཧྲིཿ བཱ་ཤཾ་ཀུ་རུ་ཧྲིཿསྭཱཧཱ། གོ་རོ་ཙ་ན་དང་ཙནྡན་དམར་པོ་དང༌། རྒྱ་སྐྱེགས་དང༌། ཁྲག་གི་བྷོ་ཛ་པ་ཊ་ལ་བྲི་བར་བྱ་སྟེ། སྲིད་པ་གསུམ་ཡང་དབང་དུ་བྱེད་དོ། །གུར་གུམ་ལ་སོགས་འཁོར་ལོ་ནི། །རྩིབས་བརྒྱད་མར་དང་སྦྲང་རྩིར་བཅས། ཁ་སྦྱོར་སྦྱོར་བས་དབང་དུ་བྱེད། །སརྦ་མོ་ཧཱ་ནི་ཏཱ་རེ་ཏུཏྟཱ་རེ་སརྦ་དུཥྟཾ་མོ་ཧཱ་ཡ་བྷ་ག་ཝཱ་དཱི་སརྦ་དུཥྟ་ནཾ་བནྡྷ་བནྡྷ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱཧཱ། གོས་ཀྱི་མཐའ་ནི་མདུད་བྱས་ན། །ཆོམ་རྐུན་འཆིང་བར་བྱེད་པའི་མཆོག །ཨུཏྤལ་ལ་མངོན་བསྔགས་པས། །
གང་ལ་བྱིན་པ་དེ་དབང་འགྱུར། །ཨུཏྤ་ལས་མཚན་འཁོར་ལོའོ། །ཆུ་དབུས་སྣ་ཚོགས་རྡོ་རྗེའི་ལྟེར། །ཐོད་ལེས་མིང་མཐར་ཧྲཱིའི་བྲིས་ལ། ཁམ་པོར་དབུས་སུ་བཞག་ན་རེངས། །འདབ་བརྒྱད་པདྨར་ག་ཡིག་ནང༌། །ཆུད་ཅིག་ལྟེ་བར་ག་བརྒྱད་བྲིས། །ཡུང་བས་རྡོ་ལེབ་དག་ལ་སྟེ། ཁ་ཕུབ་བཞག་ན་ཤིན་ཏུ་རེངས། །འཁོར་ལོ་དེ་ནི་དུག་དང་ཁྲག །སྐེ་ཚེ་མི་རུས་བཏགས་པའི་ཆུས། །ཐོད་པར་ཧཱུཾ་ཕཊ་མཚན་པར་བྲི། །འདི་ཡིས་ངེས་པར་གསོད་པར་བྱེད། །གྲོ་གར་གུར་གུམ་གྱིས་བྲིས་ལ། །ཨོཾ་བཅས་མེ་ཏོག་སེར་པོས་མཆོད། །ཡང་ན་སྭཱཧཱར་ཆུད་པར་བྲི། །རྒྱས་དང་བསྲུང་བ་བྱེད་པའི་མཆོག །རྩིབས་བཅུ་ཨ་ཡིག་ནང་ཆུད་པ། །ཙནྡན་ཆུས་བྲི་ཁམ་ཕོར་བཅས། །མེ་ཏོག་དྲི་བཟང་གིས་མཆོད་ན། །ཤིན་ཏུ་ཞི་བའི་ལས་ལ་མཆོག །བྷ་ག་ལིངྒ་ཧྲཱིཿཡིག་གིས། །བསྐོར་བ་མིང་དང་བསྐུལ་སྔགས་བཅས། །འདི་ཡིས་བསྒྲུབ་བྱ་འགུགས་པར་འགྱུར། །པདྨ་འདབ་མ་ཉི་ཤུ་བཞིར། །རེ་ཁ་གསུམ་བསྐོར་ཨོཾ་ཧྲིཾ་ཀླིཾ། །རྒྱལ་ལ་བྲིས་ནས་རེག་བྱས་ན། །བྲན་ཕོ་བྲན་མོ་ལྟར་ལས་བྱེད། །འཁྲུལ་འཁོར་གྲུ་བཞི་སྒོ་བཞི་པ། །སྣ་ཚོགས་རྡོ་རྗེ་སྟེགས་བུས་བརྒྱན། །ཐོ་བ་དབྱིག་ཐོ་པདྨ་དང༌། །རལ་གྲི་སྒོ་དང་ཨུཏྤ་ལ། །ཐོད་བཅས་ལྕགས་ཀྱུ་མཚམས་སུའོ། །དེ་དབུས་འདབ་མ་བཅུ་པ་བྲི། །ཨོཾ་པྲ་སན་ཏཱ་རེ་ཨ་མྲྀ་ཏ་མུ་ཁི་ཨ་མྲྀ་ཏ་ལོ་ཙ་ནེ་སརྦ་ཨརྠ་སཱ་དྷ་ནི་སྭཱཧཱ། དབང་དུ་བྱེད་པའི་སྔགས་
སོ། །དེ་ནས་བཀའ་སྩལ་པ། །ཨོཾ་སརྦ་མོ་ཧ་ནི་ཏཱ་རེ་ཏུཏྟཱ་རེ་སརྦ་དུཥྟན་མོ་ཧ་ཡ་བྷ་ག་བ་ཏཱི་སརྦ་དུཥྟཱ་ནཾ་བནྡྷ་བནྡྷ་ཧཱུཾ་ཧཱུཾ་ཕཊ་སྭཱཧཱ། དེ་དབུས་ཟླ་བ་ཏཱཾ་ཡིག་བཅས། །དབུས་རྩིབས་དྲུག་ལ་ཀུ་རུ་ཀུལླེ། །སྔགས་ནི་ཧྲཱིཿགཉིས་དབུས་ཆུད་པའི། །མིང་དང་བསྐུལ་བས་ལས་ཀུན་བྱེད། །འབུམ་ཕྲག་བཟླས་པས་ས་གཡོ་ཞིང༌། །རྒྱ་མཚོ་བདུན་བསྐམས་དུག་ཞིར་བྱེད། །གྱོ་མོའི་སྦྱོར་བས་འབྱུང་བོ་ཀུན། །བཅིངས་ནས་ཀླུ་དང་མཁའ་འགྲོ་མའི། །སྦྱོར་བ་འཕྲོག་ཅིང་ཆར་འབེབས་དང༌། །མཚོན་ཆས་མི་གནོད་ལུས་སུ་འགྱུར། །དཔྱིད་ཟླ་ར་བར་བུ་མོ་མཛེས། །རྡུལ་ལྡན་གྱི་ནི་རས་བཏགས་ལ། །ཟླ་མཚན་གྱིས་བསྒོས་དེ་ལ་ནི། །རི་མོར་དམ་ཚིག་ལྡན་པས་བྲི། །སྒྲོལ་མ་འོད་ཟེར་ཅན་མ་དང༌། །ཕག་མོའི་གཟུགས་ལ་མངོན་མཆོད་ན། །གང་གང་འདོད་པའི་ལས་ཐམས་ཅད། །ཐོགས་པ་མེད་པར་འགྲུབ་པར་འགྱུར། །གཞན་ཡང་རྩ་བའི་གཟུངས་ཀྱི་མཐུ་གསུངས་པ། གོས་མཐའ་འམ་སྐྲ་ལ་མངོན་བསྔགས་བཅིངས། །འབྲོག་དགོན་དག་ཏུ་འཇིགས་མེད་འགྱུར། །ཨུཏྤལ་སྦྱིན་སྲེག་བརྒྱ་རྩ་ཡིས། །ངེས་པར་དབང་དུ་བྱེད་པ་ཡིན། །ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཾ་མེ་བ་ཤ་མ་ན་ཡེ་སྭཱཧཱ། བྱ་རོག་གཤོག་པར་བསྔགས་ནས་ནི། །དགྲ་བོའི་ཁྱིམ་དུ་སྦོས་ན་སྐྲོད། །ཨོཾ་ཏཱ་རེ་ཏུཏྟཱ་རེ་ཏུ་རེ་ཙ་ལ་པྲ་ཙ་ལ་ཤཱི་གྷྲཾ་ག་མི་ནི་དེ་བ་ད་ཏྟཾ་ཨུཏ་ཙ་ཊ་ཡ་ཧཱུཾ་ཕཊ། སོ་སོ་འཆའ་དང་ཡུངས་ཀར་དང༌། །ཐང་ཕྲོམ་ཨ་ཤྭ་ཀའི་མེ་
ཏོག། འདབ་བཅས་སྦྱིན་སྲེག་བྱེད་པའམ། །ཡང་ན་མངར་གསུམ་བསྲེགས་བྱས་ན། །ཉིན་བདུན་བུ་མོ་མཆོག་ཐོབ་འགྱུར། །ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀ་བྷི་དྷ་ནཱཾ། །ཀུ་མཱ་རཱི། མ་ཧྱ་མུདྤ་ཏེ་ན་ཏ་སྱཱཿསི་ཏ་པྲ་ཡཙྪནྟུ་སྭཱཧཱ། ཟླ་མཚན་རས་ལ་སྒྲོལ་མ་ནི། །ཨུཏྤལ་ཞགས་པ་བསྣམས་པ་བྲི། །མཆོད་ཅིང་ལྔ་སྟོང་བཟླས་ནས་ནི། །ཞགས་པ་ལྕགས་ཀྱུའི་སྦྱོར་བས་སྤྱད། །ཨོཾ་ཏཱ་རཻ་ཏུཏྟཱ་རེ་ཏུ་ཡེ་ཨ་མུ་ཀཱི་མ་མ་བ་སི་ཏཾ། སྭ་སྣ་ཀརྞེ་ཀ་ཐཱ་ཡ་ཧཱུཾ་ཕཊ། རེག་ཕྲུག་ཚེར་མ་ཟླ་མཚན་བཅས། །སྲེག་བླུགས་སྟོང་ཕྲག་གཅིག་གིས་ནི། །མི་བདག་བུ་མོ་མཆོག་ཀྱང་འགུགས། །ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀ་བི་དྷ་ནཾ་སྭསྠཱ་ནཱ་དཱ་ཀརྵཱ་ཡ་མ་མཱནྟི་ཀེ་ཛཿ ཟླ་བ་གཟས་བཟུང་འཇིག་རྟེན་དབང༌། །དུང་དང་བཏགས་ཏེ་འདོད་མར་སྦྱིན། །ཡང་ན་སྦྲུལ་མགོ་གཉིས་པའི་ཤ །ཨརྐའི་བལ་ལ་དྲིལ་བྱས་ལ། །བ་དམར་མར་ཁུས་མིག་སྨན་བྱ། །རྡོ་རྗེ་ཆོས་དང་ཉི་མ་དང༌། །རྟ་རྒྱལ་མཆོག་གི་སྤོས་བདུག་ནས། །བལྟས་པས་པདྨ་གར་དབང་འབབ། །ཧ་ལ་ཧ་ལའི་མཇུག་མ་དང༌། །འཇམ་འབྲས་རྩངས་པའི་མཇུག་མ་དང༌། །འགྲོན་བུ་རོར་བཅས་ཁུ་བ་འཛིན། །སྡིག་པའམ་སྦལ་པའི་ཞག་གིས་སམ། །འོ་མ་རྣམ་གསུམ་སྦྱར་བ་དང༌། །ཨ་ཕུ་མཚལ་དང་སྦྱར་བ་ནི། །གུ་གུལ་བཅས་པའི་རིལ་བུས་ཀྱང༌། །རྟག་ཏུ་ཁུ་བ་རེངས་པར་འགྱུར། །
ཨོཾ་ཏཱ་རེ་ཏུཏྟཱ་རེ་ཏུ་རེ་སནྟ་ར་ཎི་ཧྲཱིཿ དེ་བ་དཏྟ་བཱ་ཤཾ་ཀུ་རུ་ཧོ། པདྨ་ལྕགས་ཀྱུ་བཅས་པ་ཡི། །སྤུ་ཏ་ལིངྒས་འགུགས་པར་བྱ། །ཞགས་པ་ལྕགས་ཀྱུ་བསྣམས་པ་ཡི། །ལྷ་མོས་འགུགས་པར་བྱེད་པ་ཡིན། །ཨོཾ་ཙ་ཏུརྦྷ་ཛ་ཥཎྨུ་ཁ་བི་ཀྲི་ཏཱ་ན་ན་ཀརྞ་བི་ཤཱ་ཙི་ཧཱུཾ་ཕཊ། གཤིན་རྗེ་གཤེད་ཀྱི་བྲིས་སྐུའི་མདུན་དུ་ཞག་བདུན་བཟླས་ན། རྣ་བར་སྒྲོག་པ་གྲུབ་བོ། །ཨོཾ་བུདྷ་ཙུ་རུ་མཱ་ཙུ་རུ་ཀེ་སྭཱཧཱ། མཆོད་རྟེན་གྱི་དྲུང་དུ་གཙང་སྦྲ་དང་བཅས་པས་བཟླས་ན། བདག་ཉིད་གང་དུ་སྐྱེ་བར་འགྱུར་བ་དང༌། ཚེ་ཟད་པ་དང༌། རིང་དུ་འཚོ་བ་ཡང་ཤེས་པར་འགྱུར་རོ། །སྦྲུལ་གྱིས་སྦལ་པའི་བཟུང་བ་ན། །དེ་དག་དུད་མེད་ཐལ་བར་བྱ། །སྦྲང་རྩིར་སྦྱར་བ་མཆན་ཁུང་དུ། །ཐིག་ལེ་བྱས་ན་འགུགས་པར་འགྱུར། །མི་ཚིལ་མི་ཡི་ཐོད་པར་བཞག །ནརྨའི་བལ་གྱིས་སྡོང་བུར་བྱ། །གཟུགས་འཚོང་ཐོད་པ་དག་ལས་ནི། །སྣག་ཚ་བླངས་ཏེ་བུ་མོ་ལ། །ཐིག་ལེ་བྱས་ན་འགུགས་པར་འགྱུར། །ཨོཾ་བཛྲ་ཏཱིཀྵ་ཡ་ཧཱུཾ་སྭཱཧཱ། འོ་མ་ལ་ལན་བདུན་མངོན་པར་བསྔགས་ནས་བཀྲུས་ན་མིག་གི་རབ་རིབ་སེལ་བར་འགྱུར་རོ། །མིའི་རྟིང་པའི་ཤ་དང༌། བྱི་ལ་ནག་མོའི་མཆིན་པའི་བདུག་པས་གནས་དང་རྫས་ཀྱི་འབྱུང་པོ་སྐྲོད་པར་འགྱུར་རོ། །ནིརྒུ་ཊ་དང་མུནྚི་དང་བྷདྒ་ར་ནག་པོ་དང༌། །བྷདྒ་དང་ནིམྦ་ཏིག་ཏ་རྣམས་གྲིབ་མ་ལ་བསྐམས་པ་དང༌། བེ་ལ་ཝ་དང༌། ཛདྒི་ཧ་རི་ཏ་ཀི་རྣམས་བུ་རམ་ལ་སྦྱར་ནས་དང་པོ་ལྔ་
དང་ཕྱི་ནས་ཆུ་ཚོད་གཅིག་ནས་ལྷག་མ་ཡང་སོར་མོ་གསུམ་གྱི་ཚད་དུ་ཟོས་ན་ཟླ་བ་དྲུག་ནས་རྒན་པོ་ཡང་གཞོན་ནུར་བྱེད་པ་ལ་ཐེ་ཚོམ་མེད་དོ། །ན་མོ་བི་ག་ཏ་རཱ་ག་མེ་ཏྲི་ཡ་སིདྷ་ལོ་ཙ་ནེ་སྭཱཧཱ། ཞེས་པས་ཀྱང་རབ་རིབ་སེལ་བར་བྱེད་དོ། །ཟླུམ་པོ་མཚམས་སུ་རྡོ་རྗེས་བརྒྱན། །ཧཱུཾ་བཞིས་རྡོ་རྗེ་ལེགས་པར་མཚན། །ཨོཾ་པ་ད་ཀྲ་མ་སཱི། པ་ར་ཀྲ་མ་སཱི། ཨུ་ད་ཡ་མ་སཱི། ནིརྨ་མ་སཱི། ཨརྐ་མ་སཱི། མརྒ་མ་སཱི། ཨུརྨ་མཱ་སཱི། བ་ན་མ་སཱི། གུལྨ་མ་སཱི། ཙི་བ་ར་མ་སཱི། མཧཱ་ཙི་བ་ར་མ་སཱི། ཨནྟདྡྷ་ན་མ་སཱི་སྭཱཧཱ། ལྟེ་བ་ལ་བྲི་སྟེ་ཨོཾ་ནི་ཐམས་ཅད་དུའོ། །དབུས་སུ་རྡོ་རྗེའི་གཡས་དང་གཡོན་དུ། ཨོཾ་བརྟ་ལཱི་ཨོཾ་བ་རཱ་ལི། ཨོཾ་བ་རཱ་ཧ་མུ་ཁཱི་ཞེས་བྲིའོ། །མཚམས་སུ་ཡང༌། ཨོཾ་མཱ་རི་ཙྱེ་ཞེས་བྲིའོ། །དབུས་སུ་ཨོཾ་བཱ་རཱ་ལཱི། ཨོཾ་བ་ཏཱ་ལཱི། ཨོཾ་པ་རཱ་ཧ་མུ་ཁཱི་སརྦ་དུཥྟཾ་པྲ་དུཥྟཾ་ཀཱ་ཡེ་བཱཀྩིཏྟེ་མུ་ཁཾ་ཛམྦྷ་ཡ། སྟཾ་བྷ་ཡ་ཞེས་སོ། །དབུས་སུ་མཾ་ཡིག་གོ །དེའི་ནང་དུ་དེ་བ་དཏྟ་རཀྵ་རཀྵའོ། །འདི་ནི་གྲོ་ག་ལ་གུར་གུམ་གྱིས་བྲིས་ན་ཐམས་ཅད་དུ་བསྲུང་བ་སྟེ། འོད་ཟེར་ཅན་མའི་འཁོར་ལོའོ། །ཡང་གསུངས་པ། དབུས་སུ་ལྷ་མོ་གསེར་མཚུངས་པ། །གསེར་གྱི་རྣ་ཆ་གཡོ་བ་ཅན། །ཞལ་བཞི་ཕྱག་བརྒྱད་འདོད་པའི་གཟུགས། །རྡོ་རྗེ་འཛིན་མའི་དཀྱིལ་འཁོར་བསྒོམ། །རྣལ་འབྱོར་མ་ནི་བཅུ་དང་བཅས། །གྲྭ་བཞིར་འབྱུང་བ་བཞི་ཡང་
དགོད། །དཀྱིལ་འཁོར་མཆོག་འདི་སྐུ་ཡི་ནི། །གསང་བའི་ཡེ་ཤེས་བླ་མེད་པའོ། །དེ་ནས་གསུང་གི་དཀྱིལ་འཁོར་ནི། །བྷ་གའི་དབུས་སུ་ཟླ་བ་བསྒོམ། །དམར་མོ་བཅུ་གཉིས་ལོ་ཡི་ཚུལ། །ཕྱག་རྒྱ་ལྔ་དང་ཐོད་པས་བརྒྱན། །ཞབས་བཞི་གཡས་བརྐྱངས་རོལ་པར་མཛད། །བདུད་བཞི་མཉམ་པར་མནན་པའོ། །སྤྱི་བོར་ཨུཏྤལ་ཕྲེང་བ་བཅིངས། །གཡས་པ་ནག་པོ་སེར་པོ་དང༌། །སྣ་ཚོགས་འབར་བས་རྣམ་པར་འཕྲོ། །དཀར་པོ་ལྗང་ཁུ་སྔོན་པོ་ནི། །གཡོན་གྱི་ཞལ་ལ་རིམ་པས་སོ། །སྟེང་ཞལ་དུད་ཁ་བོང་བུའི་གཟུགས། །རལ་གྲི་ཨུཏྤལ་མདའ་བོ་ཆེ། །རྡོ་རྗེ་ཀྱོ་བ་དབྱུག་པ་དང༌། །ཟངས་གྲི་མི་འཇིགས་ཕྱག་རྒྱའོ། །ཐོད་པ་སྡིགས་མཛུབ་དེ་ནས་གཞན། །གཞུ་དང་ཁ་ཊྭཱཾ་ཞགས་པ་དང༌། །མགོ་བོ་ནོར་བུ་བུམ་པར་བཅས། །མཆེ་གཙིགས་འདོད་པའི་གཟུགས་ཅན་མ། །ཧེ་རུ་ཀ་ཡི་སྒྲོལ་མའོ། །ཏཱཾ་ལས་ལྗང་ཁུ་ཞལ་གཅིག་མ། །མཆོག་སྦྱིན་ཨུཏྤལ་བསྣམས་པ་ཡིས། །འདོད་པ་ཐམས་ཅད་སྦྱིན་པར་བྱེད། །མི་འཇིགས་སྦྱིན་པའི་ཕྱག་རྒྱ་ཡིས། །འཇིགས་པ་བརྒྱད་ལས་སྐྱོབ་པ་སྟེ། །ཡི་གེ་བརྒྱད་བཟླས་ངེས་འགྲུབ་འགྱུར། །རྡོ་རྗེ་གདོང་ལྡན་ཕྱག་གཉིས་དམར། །ཧེ་རུ་ཀ་དཔལ་ཡུམ་གྱུར་པའམ། །འཁོར་ལོ་བདེ་མཆོག་རིམ་པ་ལས། །ཡང་ན་ཧེ་རུ་ཀ་སྦྱོར་བས། །གང་ལ་དགའ་བ་དེ་འགྲུབ་འགྱུར། །ཐོད་པ་རྡོ་རྗེ་ཁྲག་འཐུང་དང༌། །གྲི་གུག་ཕག་མོས་བསྣམས་པའོ། །བདུད་བཞི་པོ་ནི་
རྣམ་པར་མནན། །ཐལ་བ་འཚོ་བྱེད་ཁ་ཊྭཱཾ་བཅས། །བྷ་ག་ལིངྒ་ཟློག་པར་བྱ། རྡོ་རྗེས་བསྣུན་ནས་ཁྲག་འཐུངས་པས། །སྐད་ཅིག་གཅིག་གིས་གསོད་པར་བྱེད། །ཞགས་པ་ལྕགས་ཀྱུའི་སྦྱོར་བ་ཡིས། །བུ་མོ་ཐམས་ཅད་འགུགས་པར་འགྱུར། ཁུ་བ་ཁྲག་དང་ཆང་དང་ནི། །གོང་བུ་ལ་སོགས་དགུག་པར་བྱ། །ཨོཾ་སུམྦྷ་ནི་སུམྦྷ་ནི་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞ་པཱ་ཡ་གྲྀཧྞ་པཱ་ཡ་ཧཱུཾ། ཨཱ་ན་ཡ་ཧོ་བྷ་ག་ཝཱན་བི་དྱ་རཱ་ཛ་ཧཱུཾ་ཕཊ། ཧཱུཾ་གི་ཡེ་ཤེས་ལས་བྱུང་བ། །རྡོ་རྗེ་སུམྦྷ་རབ་ཏུ་གནག །རྡོ་རྗེ་འབར་བ་དུང་དམར་དང༌། །གཏུན་ཤིང་སྦྲུལ་གྱི་ཞགས་པ་བསྣམས། ཁྲོ་བོའི་རྒྱལ་པོ་རྟ་མགྲིན་ནི། །བསྐལ་པའི་མེ་བཞིན་གཟི་བརྗིད་འབར། །མདའ་གཞུ་དབྱུག་ཐོ་འཛིན་པའི་མཆོག །རྡོ་རྗེ་ཞགས་པ་སྡིགས་འཛུབ་ཅན། །སྤྱན་གསུམ་གཡོན་བརྐྱང་སྟབས་བསྒོམ་བྱ། །ལས་རྣམས་ཐམས་ཅད་བྱེད་པ་ཡི། །ལྷ་ཡི་རྒྱལ་པོ་འདི་དག་གོ །ལྷ་མོ་ནག་མོ་རྣལ་འབྱོར་བསྒོམ། །རལ་གྲི་དང་ནི་ཐོད་པའི་ལག །ལྷ་མིན་འཇོམས་པ་དགྲ་བོ་ཡི། །མགོ་གཅོད་ཏྲི་ཤཱུ་ལ་འཆང་མ། །བྱ་རྒོད་ལྕེ་སྤྱང་ཙཱི་ལ་སྤྲོ། །རྒྱུ་མ་མི་མགོའི་མེ་ཏོག་ཅན། །མ་མོ་བརྒྱད་ཀྱིས་ཡོངས་སུ་བསྐོར། །རོ་ལ་ཞོན་པ་རྣམ་པར་བསྒོམ། །ཡང་ན་སྟག་མོ་ལ་གནས་པ། །དྲག་ཤུལ་སྤྱོད་པས་བསྒོམ་པར་བྱ། ཁུ་བ་རྡོ་རྗེར་བྱས་པ་ལས། །རང་གི་སེམས་ནི་རྡོ་རྗེར་འགྱུར། །རྣམ་རྟོག་མེད་ཅིང་སྤྲོས་དང་བྲལ། །མཁའ་ལྟར་རང་བཞིན་
གོས་པ་མེད། །རང་རིག་བདེ་བ་ཆེན་པོ་སྟེ། །དབང་བསྐུར་མཆོག་ནི་འདི་དག་གོ །མེ་ལོང་གཟུགས་བརྙན་འདྲ་སེམས་ཀྱིས། །ཐིག་ལེ་རྡོ་རྗེར་བྱེད་པར་འགྱུར། །སྲོག་དང་ཐུར་སེལ་སྒོ་དབྱེ་བས། །བཙན་ཐབས་སྦྱོར་བས་དབུགས་བཀག་ན། ཁུ་བ་མི་འགྱུར་འཐོབ་པ་སྟེ། །ཐིག་ལེ་ནོར་བུར་བཀག་སྟེ་བསྒོམ། །ལྷ་མོའི་གཟུགས་བརྙན་བསྒྱུར་བར་བྱ། །སྒྲོལ་མ་སྒྲོལ་མ་ཅན་གྲུབ་འགྱུར། །ཡང་ན་ཐོགས་མེད་གཟུགས་ཀྱིས་ཏེ། །སྐྱེས་པ་བུད་མེད་ངེས་འགྲུབ་འགྱུར། །ལས་རབ་འབྱམས་ཀྱི་ལེའུ་སྟེ་གསུམ་པའོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས། །དམ་ཚིག་མཆོད་པའི་སྤྲིན་ཕུང་རབ་འབྱམས་དང༌། །བསྟོད་དབྱངས་རྒྱ་མཚོས་མངོན་པར་བསྟོད་བྱས་ནས། །ལག་ན་རྡོ་རྗེ་འཆང་ལ་རྒྱུད་འདི་གཏད། །འཕྲིན་ལས་ཐམས་ཅད་འབྱུང་བའི་སྒྲོལ་མ་འདུས་པ་དོན་དམ་པ་ཞེས་བྱ་བ་རྣལ་འབྱོར་མའི་རྒྱུད་ཀྱི་རྒྱལ་པོ་ལས་ཇི་སྙེད་པ་རྩ་བའི་རྟོག་པ་རྫོགས་སོ། །རྒྱ་གར་ལྷོ་ཕྱོགས་སུ་སྐུ་འཁྲུངས་པ་གྲུབ་ཆེན་བུདྡྷ་ནཱ་ཐའི་ཞབས་ལས་མནོས་ནས། སླར་རྒྱ་གར་གྱི་མཁན་པོ་ནིརྦཱ་ཎ་ཤྲཱིའི་ཞལ་སྔ་ནས་དང༌། རྒྱལ་ཁམས་པ་ཏཱ་ར་ནཱ་ཐས་ཕྱིས་བྱུང་གི་པཎྜི་ཏ་མིའི་ཉི་མའི་དཀའ་འགྲེལ་དང་བསྟུན་ཏེ་གཡར་ཁྲལ་དུ་བསྒྱུར་བའོ། །ཡང་སླད་ཀྱིས་བྷང་ག་ལར་འཁྲུངས་པའི་པཎྜི་ཏ་པུརྞ་བཛྲའི་དྲུང་དུ། །སློབ་དཔོན་ཆེན་པོ་མར་མེ་མཛད་དཔལ་ཡེ་ཤེས་ཀྱིས་མཛད་པའི་རྒྱས་འགྲེལ་ཆེན་པོ་དང་བསྟུན་ནས་ཅུང་ཟད་བཅོས་ཤིང༌། ཐམས་ཅད་དུ་གྲུབ་
ཆེན་ཞི་བའི་ཞབས་ཀྱི་ཞལ་ལུང་གི་རེག་ཟིག་སོ་སོ་རྣམས་དང༌། ཁྱད་པར་གུ་རུ་ལྷོ་ཕྱོགས་པ་ཆེན་པོའི་མན་ངག་དང་བསྟུན་ནས་ལེགས་པར་བཅོས་ཏེ་དག་པར་བགྱིས་པའོ།། །།ཞུས་དག། བཀྲ་ཤིས།།
ཤོག་སྟོང་།