སློབ་མ་དབང་བསྐུར་བར་བྱེད་པའི་ཚུལ།
སློབ་མ་དབང་བསྐུར་བར་བྱེད་པའི་ཚུལ་བཞུགས་སོ། །
སློབ་མ་དབང་བསྐུར་བར་བྱེད་པར་འདོད་ན། ནང་པར་དཀྱིལ་འཁོར་དུ་འཇུག་པ་བྱེད་རྒྱུའི་དེང་གི་ཉིན་པར་ཏེ། དགོངས་ཁའི་དུས་སུ་སློབ་མ་རྣམས། དཀྱིལ་འཁོར་ཁང་པར་འཚོག་ན་དཀྱིལ་འཁོར་ལ་ཡོལ་བ་འཐུག་པོ་བཏང་སྟེ་བསྒྲིབས། དཀྱིལ་འཁོར་མ་བཤམས་པའི་སྔོན་དུ་ཡིན་ན་ཡང༌། རྡུལ་ཚོན་བུམ་པ་སོགས་མི་མཐོང་བའི་ཕྱིར་སྒྲིབ་པ་ལེགས། དཀྱིལ་ཆོག་རྡོ་རྗེ་ལས་རིམ་ལྟར་ན་སྤྱི་དང་མཐུན་ཡང༌། ཕུར་པའི་ཆོས་སྐོར་གྱི་རྩ་བའི་གཞུང་རྣམས་ཀྱི་བཞེད་དགོངས་མིན་པས། སྟ་གོན་རྣམ་བཞིའི་རིམ་པ་སོགས་གསར་མ་དང་སྦྱར་བ་དགོས་པའི་ངེས་པ་མེད་པས། སློབ་མ་སྟ་གོན་ཇི་ལྟར་སྐབས་སུ་བབ་པ་ལ་བྱ། དེ་ཡང་སློབ་མ་རྣམས་གུ་གུལ་གྱིས་བདུག་ཁྲུས་བྱས། གྲལ་ལ་འཁོད། མེ་ཏོག་བཀྱེ་བསྡུ་བྱ། བླ་མས་ཆོས་བཤད་བྱས་ནས་མཎྜལ་འབུལ་དུ་བཅུག །སྐྱེ་རྒ་ན་དང་འཆི་བ་ཡི། །ཆུ་སྲིན་ལ་སོགས་འཇིགས་བྱེད་ལས། །འདོན་པར་མཛད་པ་ཁྱོད་འབའ་ཞིག །དགའ་ཆེན་ཁྱོད་བདག་སྟོན་པ་སྟེ། །ཞེས་པ་ནས། མགོན་པོས་
བདག་ནི་གཞུག་ཏུ་གསོལ། ཞེས་ལན་གསུམ་རྗེས་ཟློས་ཀྱི་གསོལ་བ་བཏབ། བུ་ཚུར་གསང་བའི་ཆོ་ག་ནི། ཁྱོད་ལ་ཡང་དག་བསྟན་པར་བྱ། ཁྱོད་ནི་གསང་བའི་སྣོད་ཡིན་ཏེ། །དམ་ཚིག་དམ་པ་བསྟན་པར་བྱ། །བྱང་ཆུབ་སེམས་ཀྱང་བསྐྱེད་པར་བྱ། །འཁོར་བ་དག་ལས་བསྐྱབ་པར་བྱ། །དཀྱིལ་འཁོར་ཆེན་པོར་བཞུག་པར་བྱ། །ཕྱི་ནང་གསང་བའི་དབང་བསྐུར་རོ། །ད་ནི་དད་པ་བསྐྱེད་པར་བགྱི། ཞེས་པ་ཙམ་མམ་སྤྲོ་ན། རྫོགས་པའི་སངས་རྒྱས་གང་འདས་དང༌། ཞེས་པའང་བརྗོད་དེ་སྤྲོ་བ་བསྐྱེད། བདག་གི་སྡིག་པ་བགྱིས་པ་དང༌། །བགྱིད་དུ་སྩལ་དང་ཡི་རང་བ། །སངས་རྒྱས་སྤྱན་སྔར་མཆིས་ནས་སུ། །མ་ལུས་དེ་དག་བཤགས་པར་བགྱི། །སངས་རྒྱས་བྱང་ཆུབ་སེམས་དཔའ་དང༌། །སྒོམ་དང་བཟླས་བརྗོད་བསོད་ནམས་ཀྱི། །ཚོགས་ལ་བདག་ནི་ཡིད་རང་ངོ༌། །སེམས་བསྐྱེད་མངོན་པར་སངས་རྒྱས་ནས། །ཆོས་ཀྱི་འཁོར་ལོ་བསྐོར་བ་དང༌། །བྱང་ཆུབ་སེམས་དཔའི་
ཐབས་ཀྱི་མཆོག །དེ་ལ་བདག་ནི་སྐྱབས་སུ་མཆི། །སེམས་ཅན་མ་ལུས་སྲིད་པར་ལྷུང༌། །འགྲོ་བ་རྣམས་ལ་ཕན་པའི་ཕྱིར། །བདག་གི་དེ་རིང་ཉིད་དུ་ནི། །བྱང་ཆུབ་སེམས་ནི་བསྐྱེད་པར་བགྱི། །བདེ་གཤེགས་རྒྱལ་བ་འཁོར་བཅས་པ། །མ་ལུས་བདག་ལ་དགོངས་སུ་གསོལ། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །ཞེས་པ་ནས། མཆོད་པའི་ལས་ཀྱང་ཅི་ནུས་བགྱི། །ཚུལ་ཁྲིམས་ཀྱིས་ནི་བསླབ་པ་དང༌། ནས། སོ་སོར་བརྟན་པོར་བཟུང་བར་བགྱི། །སེམས་ཅན་ཀུན་གྱི་དོན་གྱི་ཕྱིར། །སངས་རྒྱས་ཉིད་དུ་བསྒྲུབས་ནས་ནི། །འཁོར་བའི་རྒྱ་མཚོར་བྱིང་བ་རྣམས། །བྱང་ཆུབ་གནས་སུ་སྒྲོལ་བར་ཤོག རྒྱུན་གཤགས་དང་སྡོམ་བཟུང་འདི། རྩ་བ་ལུགས་ཀྱི་དབང་བསྐུར་ལ་བྱེད་ལ་མནའ་སྣམ་པའི་ལུགས་དང་ཀྱི་ལུགས་སོགས་ལ་མི་བྱེད་དོ། །དངོས་སུ་མཎྜལ་ཚོམ་བུ་ལྔ་པ་ཞིག་བཤམས། ཁྱེད་རང་རྣམས་ཀྱི་མོས་པ་ལ། མཎྜལ་འདི་ཉིད་གཞལ་མེད་ཁང་དུ་མོས། །ཚོམ་བུ་ལྔ་པོ་གདོད་ནས་གྲུབ་པའི་རྒྱལ་བ་རིགས་ལྔར་གྱུར། པུཥྤེ་སོགས་མཆོད་པ་ལྔ་ཕུལ། ཨོཾ་བི་ཤུདྡྷེ་སརྦ་ཧི་ན་ཧཱུཾ་ཕཊ། ཅེས་སློབ་མ་བསངས། ཡུངས་ཀར་གཏོར་ལ་སུམྦྷ་བཟླས་པས་བགེགས་བསྐྲད། མཎྜལ་གྱི་དབུས་ཀྱི་རྡོ་རྗེ་སེམས་དཔའ་ལས་རྡོ་རྗེ་སེམས་དཔའ་གཉིས་པ་ཆད་ནས་ཁྱེད་རང་རྣམས་ལ་ཐིམ། ཁྱེད་རང་རྣམས་རྡོ་རྗེ་སེམས་དཔའི་སྐུར་གྱུར། གནས་གསུམ་དུ་བདུད་རྩིའི་ཐིག་ལེ་བྱས་ལ། ཨོཾ་ཙཀྲ་སྭཱ་ཧཱ་ཨོཾ། ཨཱཿཔདྨ་སྭཱ་ཧཱ་ཧྲཱིཿ
ཧཱུཾ་བཛྲ་སྭཱ་ཧཱ་ཧཱུཾ། ཞེས་བརྗོད་ལ། སྐུ་གསུང་ཐུགས་སུ་སྦྱོར་བ་ཡི། །ལུས་ངག་ཡིད་གསུམ་སྲུང་བ་དང༌། །རྣམ་ཐར་གསུམ་ལ་འགོད་པའི་ཕྱིར། །བྱིན་གྱིས་རླབས་པའི་གནས་མཛོད་ཅིག དཔུང་སྐུད་བཅིང་པའང་སྤྱི་དང་འདྲ་སྟེ། ཧཱུཾ་ཞེས་དྲག་ཏུ་བཟླ་བ་དང༌། སྙིང་པོ་འབྲུ་བཅུ་དྲུག་པས་བསྲུང་བ་བྱ། རྡོ་རྗེ་སྲུང་བའི་དོན་དུ་ནི། །བདུད་རྩི་འཁྱིལ་བའི་སྔགས་ཀྱིས་བཏབ། །ལུས་ཀྱི་ཉེས་པ་བསལ་བ་དང༌། །སྲུང་དང་སྟ་གོན་གནས་པར་མཛོད། ཅེས་བརྗོད། སོ་ཤིང༌། ཨོཾ་བཛྲ་དན་ད་སམྦ་ར་ཏིཀྵ་ཎ་སྭཱ་ཧཱ། ཞེས་པས་བྱིན་གྱིས་རླབས་ཤིང་སློབ་མར་གཏད། །ངག་གི་ཉེས་པ་བསལ་བའི་ཕྱིར། །དུར་ཁྲོད་སོ་ཤིང་དམ་པ་ནི། །དཀྱིལ་འཁོར་སྟེང་དུ་རབ་ཏུ་དོར། །དབང་གི་ལྷ་རྣམས་བསྟན་དུ་གསོལ། ཞེས་བརྗོད་ནས་འདོར་དུ་གཞུག།ཁྱོར་ཆུ་སྦྱིན་པ་སྤྱི་དང་འདྲ། །ཟབ་མོའི་ཆོས་བཤད་པའི་སྒོ་ནས་སྤྲོ་བ་བསྐྱེད་པ་ནི། ཡོད་མེད་དག་ལས་རྣམ་པར་འདས། །ནམ་མཁའ་ལྟ་བུར་དྲི་མ་མེད། །རབ་ཏུ་རྟོག་མེད་གནས་མེད་པ། །སྤྲོས་པ་ཐམས་ཅད་སྤངས་པ་ཡིན། ཞེས་བརྗོད་ཅིང་དེའི་དོན་བསམ་དུ་གཞུག།འདི་ནི་ཡིད་དག་པར་བྱེད་པ་སྟེ། སྤྲོ་ན་དེའི་རྗེས་སུ། འཇིག་རྟེན་དུ་ནི་ཀུན་མཁྱེན་དག ཅེས་སོགས་སྤྲོ་བ་བསྐྱེད་པའང་འགྲུབ་ན་ལེགས། དེ་རྗེས་ཡི་གེ་འབྲུ་གསུམ་གྱིས་བསྔགས་པའི་རྩྭའི་སྔས་དང་གདན་གཏད། བུ་ཀྱེ་སང་ནས་དཀྱིལ་འཁོར་མཆོག །ཅེས་སོགས་ཉལ་བར་གདམས་ཤིང་རྨི་ལམ་བརྟག་པ་སྤྱི་དང་མཐུན་ཏེ་སློབ་མ་སྟ་གོན་གྱི་ཆོ་གའོ། །
ནང་པར་དངོས་གཞིའི་སྐབས་སུ། བདག་འཇུག་དང་སློབ་མ་ལ་དབང་བསྐུར་བ་ནི། ལྷག་གཏོར་གྱིས་བྱེད་ཀྱང་ལེགས་པའི་སྐབས་ཞིག་ཡོད་མོད། འོན་ཀྱང་བཟླས་པའི་གཞུག་གི་བསྟོད་པ་སོང་བའི་མཚམས་དེར། དང་པོར་བདག་འཇུག་ལེན་པར་སྤྲོ་ན་འདི་ལྟར་བྱ་སྟེ། དེ་ལ་སྡོམས་ནི། གསོལ་བཏབ་དྲི་ལན་ལྷ་ལ་ཞུ། །ནང་འཇུག་ཕྱག་འཚལ་རྒྱུན་བཤགས་བྱ། །སྡོམ་བཟུང་མིག་དར་མེ་ཏོག་གཏད། །དམ་བཞག་ཡེ་ཤེས་དབབ་པ་དང༌། །ལྟས་བརྟག་མེ་ཏོག་འབུལ་བ་དང༌། །མིག་དར་བསལ་ལ་མེ་ཏོག་བཅིངས། །བལྟར་བསྐུལ་ལྷ་ངོ་དེ་ཉིད་བསྟན། །གསོལ་བཏབ་བགེགས་བསྐྲད་ཆུ་དབང་དང༌། །དབུ་རྒྱན་རྡོ་དྲིལ་མིང་ཕྱག་མཚན། །སློབ་དཔོན་དབང་ལ་གསོལ་གདབ་དང༌། །སློབ་མ་ལྷར་བསྐྱེད་རྡོ་དྲིལ་གཏད། །ཆུ་དབང་བསྐུར་ལ་བརྟན་བཞུགས་བྱ། །རིགས་ལྔའི་ཕྱག་མཚན་ཆོས་དུས་གཏོད། །བཀའ་ཡི་གནང་བ་རྗེས་གནང་ཡིན། །གསང་བའི་དབང་ལ་གསོལ་གདབ་དང༌། །དབང་བསྐུར་དངོས་དང་ལུང་བསྟན་ནོ། །ཤེར་དབང་གསོལ་བཏབ་ཐོག་མར་གདམས། །དྲི་བ་དྲི་ལན་གདབས་པ་དང༌། །རིག་མ་གཏད་དེ་དབུགས་དབྱུང་བྱ། །བཞི་པ་ལ་ཡང་གསོལ་བཏབ་དང༌། །བདུད་རྩི་སྦྱིན་ནས་བརྗོད་བྲལ་བསྒོམ། །དེ་རྗེས་དམ་ཚིག་བརྟན་པར་བྱ། དེ་ལྟར་སྡོམས་བློ་ཡུལ་དུ་ངེས་པར་བྱས་ནས། །དང་པོ་གསོལ་བཏབ་ནི། །བླ་མ་སངས་རྒྱས་ཀུན་དང་མཉམ། །སློབ་དཔོན་ལ་ནི་སྐྱབས་སུ་མཆི། །རྡོ་རྗེ་གཞོན་ནུ་འཁོར་དང་བཅས། །ལྷ་རྣམས་ལ་ཡང་ཕྱག་འཚལ་ལོ། །མྱ་ངན་འདས་པའི་གྲོང་ཁྱེར་དུ། །སློབ་
དཔོན་གྱི་ནི་བདག་གཞུག་གསོལ། གཉིས་པ་དྲི་བ་ནི། བུ་ཁྱོད་སུ་ཡིན་ཅི་ལ་དགའ། །འདོད་དོན་གང་ཡིན་ཁྱོད་ཀྱིས་སྨྲོས། གསུམ་པ་ལན་ནི། སྐལ་བཟང་བདག་ནི་བདེ་ཆེན་ལའོ། །བདག་ནི་གསང་བའི་དཀྱིལ་འཁོར་དུ། །རབ་ཏུ་འཇུག་པར་འཚལ་ལགས་སོ། །བཞི་པ་ལྷ་ལ་ཞུ་བ་ནི། དེ་བཞིན་གཤེགས་པ་ཀུན་གྱི་གནས། །རྡོ་རྗེ་གཞོན་ནུའི་དཀྱིལ་འཁོར་མཆོག །སྙིང་པོའི་དཀྱིལ་འཁོར་འདི་རུ་ནི། །བདག་གི་སློབ་མ་གཞུག་པར་བགྱིད། ལྔ་པ་ནང་དུ་འཇུག་པ་ནི། ཨོཾ་བཛྲ་ཀཱི་ལི་སོགས་དང་ཨཱ་ཁཾ་པཱི་ར་སོགས། སློབ་མ་དབང་བསྐུར་གྱི་དུས་སྐབས་འདིར་ཡོལ་བ་བསལ། དྲུག་པ་ཕྱག་འཚལ་བ་ནི། དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ངོ་བོ་ཉིད། །བདེ་གཤེགས་རྒྱལ་བ་འཁོར་བཅས་ལ། །ལུས་ངག་ཡིད་གསུམ་ཕྱག་འཚལ་ལོ། །རྒྱུན་བཤགས་ཀྱི་སྔོན་དུ། སྡོམ་པ་སྒྲགས་པ་བྱེད་པར་སྤྲོ་ན། སངས་རྒྱས་ཆོས་དང་དགེ་འདུན་ཏེ། ཞེས་པ་ནས། ཅི་ནུས་བགྱི། ཞེས་པའི་བར་སྤྱི་དང་མཐུན་པ་བྱེད་པར་བཤད་ཀྱང༌། བསྡུ་ན་ངེས་པར་དགོས་པའང་མིན་པས། བདག་གི་སྡིག་པ་ཞེས་པ་ནས། གནས་སུ་སྒྲོལ་བར་ཤོག གི་བར་སློབ་མ་སྟ་གོན་གྱི་བར་བཞིན། བདུན་པ་རྒྱུན་བཤགས་དང༌། བརྒྱད་པ་སྡོམ་བཟུང་ལན་གསུམ་བྱ། དགུ་པ་མིག་དར་ནི། ཨཱ་ཁཾ་བཱི་ར་ཧཱུཾ་གིས་བཅིངས། བཅུ་པ་མེ་ཏོག་ཀྱངཨཱ་ཁཾ་བཱི་ར་ཧཱུཾ་གིས་བཟུང༌། །བཅུ་གཅིག་པ་དམ་ལ་
བཞག་པ་ནི། རིགས་ཀྱི་བུ་ཁྱོད་ཚུར་ཉོན་ཅིག། དེ་རིང་བདེ་གཤེགས་ཐམས་ཅད་ཀྱི། །ནང་དུ་ཁྱོད་ནི་བཞུགས་པ་ཡིན། །སློབ་དཔོན་ལུང་བསྟན་ངས་ཀྱང་ནི། །བཅོམ་ལྡན་རྡོ་རྗེ་གཞོན་ནུ་ཡི། །ཡེ་ཤེས་ཁྱོད་ལ་བསྐྱེད་པར་བྱ། །རྣལ་འབྱོར་བུ་མཆོག་ཁྱོད་ཀྱིས་ནི། །དེ་བཞིན་གཤེགས་པའི་དཀྱིལ་འཁོར་གྱི། །དངོས་གྲུབ་དམ་པ་ཐོབ་འགྱུར་ན། །དངོས་གྲུབ་གཞན་རྣམས་ལྟ་ཅི་སྨོས། །དཀྱིལ་འཁོར་ཆེན་པོ་མ་མཐོང་བའི། དྲུང་དུ་སྨྲ་བར་མ་བྱེད་ཅིག ཅེས་དང༌། བཅོམ་ལྡན་རྡོ་རྗེ་གཞོན་ནུ་ནི། །དེ་རིང་ཁྱོད་ཀྱི་སྙིང་ལ་ཞུགས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། ཞེས་དང༌། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །རྡོ་རྗེ་བདུད་རྩིའི་ཆུས་འདིས་འགྲུབ། ཨོཾ་བཛྲ་པཉྩ་ཨ་མྲྀ་ཏ་ཧ་ན་ཧ་ན་ཌ་ཧཱུཾ་ཕཊ། ཅེས་དང༌། དེང་ནས་བརྩམས་ཏེ་ཐམས་ཅད་དུ། །རྡོ་རྗེ་གཞོན་ནུ་ང་ཡིན་གྱི། །ང་ཡིས་སྨྲས་པ་བུ་ཡིས་གྱིས། །ང་ལ་བརྙས་པར་མ་བྱེད་ཅིག ཁྱོད་ཀྱིས་གལ་ཏེ་བརྙས་ན་ནི། ཁྱོད་ནི་སྡུག་བསྔལ་དང་བཅས་ཏེ། །ཚེ་ཡི་འདུ་བྱེད་བཏང་ནས་ནི། །སེམས་ཅན་དམྱལ་བ་ཆེན་པོར་ལྷུང༌། བཅུ་གཉིས་པ་ཡེ་ཤེས་དབབ་པ་ནི། སློབ་དཔོན་ཆེན་པོ་དགོངས་སུ་གསོལ། །སེམས་ཅན་ཀུན་ལ་ཕན་བྱའི་ཕྱིར། །རྡོ་རྗེ་གཞོན་ནུའི་འཁོར་བཅས་རྣམས། །དེ་རིང་བདག་ལ་དབབ་
ཏུ་གསོལ། ལན་གསུམ། རང་གི་སྙིང་གར་ཧཱུཾ་ཡིག་སྔགས་ཀྱི་འཕྲེང་བ་དང་བཅས་པ་མེ་འོད་རབ་ཏུ་འབར་བ་དང་བཅས་པ་འཁོད་པར་གྱུར། བླ་མ་དང་དཀྱིལ་འཁོར་གྱི་གཙོ་བོ་དབྱེར་མ་མཆིས་པའི་ཐུགས་ཀ་ནས། རྡོ་རྗེ་མཁའ་འགྲོ་མ་ལྕགས་ཀྱུ་ཐོགས་པ་དཔག་ཏུ་མེད་པ་སྤྲུལ་ཞིང་སྤྲོས། ཕྱོགས་བཅུ་ན་བཞུགས་པའི་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་ཐམས་ཅད། རྡོ་རྗེ་གཞོན་ནུའི་དཀྱིལ་འཁོར་གྱི་ལྷ་ཚོགས་ཀྱི་རྣམ་པར་སྤྱན་དྲངས། རང་གི་བ་སྤུའི་བུ་ག་ནས་ཞུགས། སྙིང་གའི་ས་བོན་སྔགས་བཅས་ལ་ཐིམ། སྡིག་སྒྲིབ་དག །སྐུ་གསུང་ཐུགས་ཀྱི་བྱིན་རླབས་ཞུགས། ལུས་ནང་ཐམས་ཅད་འོད་ཀྱིས་གང་བར་གྱུར། འབྲུ་བཅུ་དྲུག་པའི་སྔགས་ཀྱི་མཐར། ཨོཾ་བཛྲ་ཨ་བེ་ཤ་ཡ་ཨ་ཨ་ཨ། ཞེས་ལན་བརྒྱ་རྩ་སོགས་བརྗོད། ཏིཥྛ་བཛྲ་བཅུ་གསུམ་པ་ལྟས་བརྟག་པ་ནི། །ལས་དང་མཐུན་པའི་ནམ་མཁའི་ཁ་དོག་མཐོང༌། སློབ་མ་དབང་བསྐུར་གྱི་སྐབས། ནམ་མཁའི་ཁ་དོག་སྐབས་འདིར་འབྲི། བཅུ་བཞི་པ་མེ་ཏོག་བུལ་བ་ནི། ཨོཾ་དྲི་ཞིམ་མེ་ཏོག་དམ་པ་འདི། །དཀྱིལ་འཁོར་དམ་པར་དབུལ་བར་བགྱི། ཨོཾ་པྲཏཱིཙྪ་བཛྲ་ཧོ། བཅོ་ལྔ་པ་མིག་དར་བསལ་བ་ནི། སྔོན་གྱི་མིག་མཁན་རྒྱལ་པོ་ཡིས། །འཇིག་རྟེན་ལིང་ཐོག་བསལ་བ་ལྟར། །བཅོམ་ལྡན་རྡོ་རྗེ་གཞོན་ནུ་ཡིས། ཁྱོད་ཀྱི་མི་ཤེས་རབ་རིབ་བསལ། ཨོཾ་པྲ་བ་ར་ཤ་ཡ་ཕཊ།
བཅུ་དྲུག་པ་མེ་ཏོག་བཅིངས་པས་དབང་བསྐུར་བ་ནི། སྟོབས་དང་ལྡན་པའི་སེམས་ཅན་ཁྱོད། །མེ་ཏོག་འཕྲེང་བས་དབང་བསྐུར་རོ། །ཨོཾ་ཨཱཿཧཱུཾ ཨ་བྷི་ཥིཉྩ་མཾ། མེ་ཏོག་སྤྱི་བོར་བཅིངས། བཅུ་བདུན་པ་བལྟ་བར་བསྐུལ་བ་ནི། དཀྱིལ་འཁོར་བཟང་པོ་འདི་ལ་ལྟོས། །ཤེས་རབ་རྣམ་གསུམ་རབ་ཏུ་སྐྱེད། །ཁྱོད་ནི་ཐུགས་ཀྱི་རིགས་སུ་སྐྱེ། །བདེ་བར་གཤེགས་པས་བྱིན་གྱིས་བརླབས། །དངོས་གྲུབ་ཐམས་ཅད་མངོན་དུ་འགྱུར། །རིགས་དྲུག་སེམས་ཅན་ཐམས་ཅད་ལ། །བུ་བཞིན་སྙིང་རྗེ་ཀུན་ནས་བསྐྱེད། །གསང་བའི་ཆོས་ལ་དད་པར་གྱིས། བཅོ་བརྒྱད་པ་ལྷ་ངོ་ནི། སློབ་མ་དབང་བསྐུར་གྱི་སྐབས། རྟེན་གྱི་དཀྱིལ་འཁོར་གྲུབ་པ་ནི། ནམ་མཁའི་ཁམས་སུ་ཞེས་པ་ནས། གདན་རྣམས་སུ་གྱུར། ཞེས་པའི་བར་དང༌། བཅོམ་ལྡན་འདས་དཔལ་ཆེན་པོ་ཧེ་རུ་ཀ་ནས། གཉིས་མེད་འཁྱུད་ཅེས་པའི་བར་དང༌། ཁྲོ་བོ་བཅུ་འཁོར་དང་བཅས་པར་གྱུར་པ་ནས། དཔག་ཏུ་མེད་པ་དང་བཅས་པར་གྲུབ་པར་གྱུར། ཞེས་པའི་བར་ས་བོན་དང་སྔགས་རྣམས་བོར་བའི་སྒོ་ནས་ལྷ་ངོ་བོ་བསྟན། སྐབས་འདིར་རྟེན་དང་བརྟེན་པར་བཅས་པའི་དཀྱིལ་འཁོར་མངོན་སུམ་བཞིན་དུ་གསལ་བར་གྱུར་ཞེས་བརྗོད། བཅུ་དགུ་པ་དེ་ཁོ་ན་ཉིད་ཀྱི་བསྟན་པ་ནི། དཀྱིལ་འཁོར་གྲུ་བཞིར་གྱུར་པ་ནི། །ཚད་མེད་བཞི་རྣམས་དག་པའི་རྟགས། །སྒོ་བཞི་དྲན་པ་ཉེར་བཞག་བཞི། །གསལ་བར་དག་པའི་རྟགས་ཡིན་ནོ། །རྟ་བབས་ཡང་དག་སྤོང་བ་བཞི། །རྣམ་པར་
དག་པའི་རྟགས་ཡིན་ནོ། །དྲ་བ་དྲ་ཕྱེད་འཕྱང་བ་ནི། །ཉོན་མོངས་ཉེ་ཉོན་རྣམ་དག་པའོ། །ཀ་བ་བརྒྱད་ཀྱིས་དབུས་བརྒྱན་པ། །འཕགས་ལམ་བརྒྱད་པོ་རྣམ་དག་རྟགས། །རིན་ཆེན་ཕ་གུ་ལ་སོགས་རྒྱན། །ཚུལ་ཁྲིམས་རྣམ་པར་དག་པའོ། །རྡོ་རྗེའི་རྭ་བས་བསྐོར་བ་ནི། །ཆོས་ཀྱི་འཁོར་ལོ་དག་པའི་རྟགས། །བཅོམ་ལྡན་རྡོ་རྗེ་གཞོན་ནུ་ནི། །རྣམ་ཤེས་ཚོགས་བརྒྱད་རྣམ་དག་པའོ། ཁྲོ་བོ་ཆེན་པོ་བཅུ་རྣམས་ནི། །མི་དགེ་བཅུ་རྣམས་དག་པ་སྟེ། །དེ་རྣམས་ཀུན་གྱི་ཡོན་ཏན་གྱི། །ཆོས་རྣམས་རྣམ་དག་ཡུམ་རྣམས་སོ། །སྟོབས་བཅུ་རྣམ་དག་ཁྲོ་བོ་དང༌། །དབང་བཅུ་རྣམ་དག་ཡུམ་རྣམས་ཏེ། །སྟོང་ཉིད་རྣམ་དག་ཕྱག་བརྙན་ལ། །ཚངས་གནས་དག་པའི་སྒོ་སྲུང་སོ། །དེ་ལྟར་ན་དཀྱིལ་འཁོར་དུ་ཞུགས་པ་ནི། དད་པའི་ས་ཚོགས་ཀྱིས་ལམ་མོ། །ཉི་ཤུ་པ་དབང་དངོས་གཞིའི་དོན་དུ་གསོལ་བ་གདབ་པ་ནི། མཎྜལ་ཕུལ་ལ། སློབ་དཔོན་དམ་པ་དགོངས་སུ་གསོལ། །རྡོ་རྗེ་གཞོན་ནུའི་དབང་བསྐུར་བ། །སེམས་ཅན་ཀུན་ལ་ཕན་གདགས་ཕྱིར། །ཕྱིར་མི་ལྡོག་པའི་དབང་སྩོལ་ཅིག ལན་གསུམ། ཉེར་གཅིག་ལ་བགེགས་བསྐྲད་པ་ནི། སློབ་མ་དབང་བསྐུར་གྱི་སྐབས། གུ་གུལ་བདུག །ཡུངས་ཀར་གྱིས་བྲབས། །བདེན་པ་ངར་དང་བཅས་ཏེ་བགེགས་སྐྲོད་པའི་ཚིག་བརྗོད་དགོས་ལ། བདག་འཇུག་གི་སྐབས ཀཱི་ལི བཟླས་ཤིང་རྡོ་རྗེ་གསོར་རོ། ཉེར་གཉིས་པ་ཆུ་དབང་ནི། ཨོཾ་སྭ་བྷཱ་ཝ་བི་ཤུདྡྷ་སརྦ་དྷརྨཿསྭ་བྷཱ་ཝ་བི་ཤུདྡྷོ྅་ཧཾ།
བདག་དང་དབང་རྫས་སྟོང་པའི་ངང་ལས། པད་ཉི་ལ་གནས་པའི་ཧུཾ་ལས་རྡོ་རྗེ་ཧཱུཾ་གིས་མཚན་པ་ལས། བཛྲ་ཧེ་རུ་ཀ་ཡབ་ཡུམ་སྐུ་མདོག་མཐིང་ནག །རྡོ་རྗེ་དང་དྲིལ་བུ་འཛིན་པ། དུར་ཁྲོད་ཀྱི་ཆས་ཐམས་ཅད་རྫོགས་པའོ། །དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧུཾ། ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧུཾ་བཾ་ཧོཿ གཉིས་སུ་མེད་པར་ཐིམ། དབང་རྫས་ཀྱི་ལྷ་ཞུ་བ་ལས་ཡེ་ཤེས་བུམ་པའི་ཆུར་གྱུར། ཆེ་བའི་ཡོན་ཏན་ཀུན་རྫོགས་ཤིང༌། །བྱང་ཆུབ་སེམས་ཆུས་རབ་གང་བ། །རྣམ་པར་དག་པའི་བུམ་པ་འདིས། དེ་རིང་བུ་ཁྱོད་དབང་བསྐུར་རོ། །ཨོཾ་བཛྲ་ཨབྷི་ཥིཙྪ་ཧཱུཾ། ཨརྒྷ྄ཾ་པུཥྤེ་ནས་ཤབྷའི་བར་གྱིས་མཆོད། ཉེར་གསུམ་པ་ཅོད་པན་གྱི་དབང་ནི། གཞན་རྣམས་དེ་དང་འདྲ་བ་ལས། པདྨ་དང་ཉི་མའི་སྟེང་དུ་སྭཱ་ལས་རིན་པོ་ཆེ་སྭཱས་མཚན་པ་ལས། རཏྣ་ཧེ་རུ་ཀ་ཡབ་ཡུམ་སྐུ་མདོག་སེར་པོ། རིན་པོ་ཆེ་དང་དྲིལ་བུ་འཛིན་པ། དུར་ཁྲོད་ཀྱི་ནས། ཞུ་བ་ལས་བྱུང་བའི་ཅོད་པན་དུ་འགྱུར་གྱི་བར་གོང་བཞིན། དེ་བཞིན་གཤེགས་པ་ཀུན་གྱི་རྒྱན། །སངས་རྒྱས་ཀུན་གྱིས་བསྔགས་པ་ཡི། །དབུ་རྒྱན་རིན་ཆེན་དམ་པ་དང༌། །དར་དཔྱངས་དག་གིས་དབང་བསྐུར་རོ། །ཨོཾ་བཛྲ་མུ་ཀུ་ཊ་རཏྣ་ཨ་བྷི་ཥིཉྩ་ཏྲཾ། གོང་བཞིན་མཆོད། ཉེར་བཞི་པ་རྡོ་རྗེའི་དབང་ནི། སྔ་མ་གཉིས་ལ་འདོན་པ་བསྒྱུར་ཏེ། ཨ་ལས་པདྨ་ཨས་མཚན་པ། པདྨ་ཧེ་རུ་ཀ་ཡབ་ཡུམ་སྐུ་མདོག་དམར་པོ། པདྨ་དང་དྲིལ་བུ་འཛིན་པ༴ རྡོ་
རྗེར་གྱུར། འདི་ནི་སངས་རྒྱས་ཐམས་ཅད་ཀྱི། །ཡེ་ཤེས་བྱང་ཆུབ་སེམས་ཡིན་ཏེ། །གཉིས་མེད་དོན་གྱི་ངོ་བོ་འདིས། །དེ་རིང་ཁྱོད་ལ་དབང་བསྐུར་རོ། ཨོཾ་བཛྲ་བོདྷི་ཙིཏྟ་ཨ་བྷི་ཥིཉྩ་ཧཱུཾ། མཆོད། ཉེར་ལྔ་པ་དྲིལ་བུའི་དབང་ནི། ཧཱ་ལས་རྒྱ་གྲམ་ཧཱས་མཚན་པ་ལས། ཀརྨ་ཧེ་རུ་ཀ་ཡབ་ཡུམ་སྐུ་མདོག་ལྗང་ཁུ། །རལ་གྲི་དང་དྲིལ་བུ་འཛིན་པ༴ དྲིལ་བུར་གྱུར། འདི་སྟེ་སངས་རྒྱས་ཐམས་ཅད་ཀྱི། །བྱང་ཆུབ་སྒོམ་ཕྱིར་རང་བཞིན་ནོ། །ཤེས་རབ་དབྱངས་ཀྱི་རྗེས་འགྲོ་བ། །དེ་རིང་ཁྱོད་ལ་འདིས་དབང་བསྐུར། ཨོཾ་བཛྲ་ཨ་ཏི་པ་ཏི་ཨ་བྷི་ཥིཉྩ་ཧཱུཾ། ཉེར་དྲུག་པ་མིང་གི་དབང་ནི། ཨོཾ་ལས་འཁོར་ལོ་ཨོཾ་གྱིས་མཚན་པ། བུདྡྷ་ཧེ་རུ་ཀ་ཡབ་ཡུམ་སྐུ་མདོག་དཀར་པོ་འཁོར་ལོ་དང་དྲིལ་བུ་འཛིན་པ༴ རྡོ་རྗེ་དང་དྲིལ་བུར་གྱུར། འདི་སྟེ་སངས་རྒྱས་དངོས་ཡིན་ཏེ། །རབ་ཏུ་བསྔགས་པ་གསང་བའི་མིང༌། །རྡོ་རྗེ་ཆེ་གེ་མོ་ཞེས་པས། །དེ་རིང་ཁྱོད་ལ་དབང་བསྐུར་རོ། །ཨོཾ་བཛྲ་སཏྭ་བཛྲ་ན་མཿཨ་བྷི་ཥིཉྩ་ཧཱུཾ། སློབ་མ་དབང་བསྐུར་གྱི་སྐབས་གསང་མིང་འདོགས་ཏེ། སྤྱི་དང་མཐུན་པ་ཉིད་ལེགས་ཤིང༌། རྙིང་མ་བ་རང་ལུགས་ཀྱི་རྡོ་རྗེ་ཐོད་འཕྲེང་རྩལ་སོགས་རིགས་ལྔ་དང་མི་འགྱུར་ལྷུན་གྲུབ། མི་ལྡོག་ཡང་དག །དྲི་མེད་གྲུབ་པ་རྣམས་ལ་རྩལ་གྱི་མཐའ་ཅན་དུ་བྱེད་པ་སོགས་ཀྱང་འདུག་ཅིང༌། མེ་ཏོག་གང་ལ་ཕོག་པའི་ལྷའི་མཚན་རྟགས་ཀྱང་ལེགས་པ་ཡིན་ནོ། །མཆོད། དེ་ལྟར་ན་དབང་ལྔ་བསྐུར་བས། ཉོན་མོངས་ལྔ་ཡེ་ཤེས་
ལྔར་གྱུར། ཕུང་པོ་ལྔ་རྒྱལ་བ་ལྔའི་ངོ་བོར་སངས་རྒྱས་པ་ཡིན་ནོ། །ཉེར་བདུན་པ་ཕྱག་མཚན་གྱི་དབང་ནི། བདག་ཉིད་བཛྲ་ཧེ་རུ་ཀ་རྡོ་རྗེ་གཞོན་ནུའི་ངོ་བོར་གྱུར། ཨ་ལས་བྱུང་བའི་བནྡྷ་ཧཱུཾ་ལས་བྱུང་བའི་རྡོ་རྗེ་རྩེ་དགུ་པའོ། །ཤེས་རབ་པདྨའི་སྣོད་ཀྱི་མཆོག །ཐབས་མཆོག་རྡོ་རྗེ་རྩེ་དགུ་པ། །ཐབས་དང་ཤེས་རབ་ཕྱག་མཚན་འདི། །དེ་རིང་ཁྱོད་ལ་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་པྲཛྙ་ཨུ་པ་ཡ། ས་མ་ཨ་བྷི་ཥིཉྩ་ཧཱུཾ། སྤྲོ་ན་ཅོད་པན་དང་འདིའི་བར་ལ། བརྟེན་བྱེད་ཀྱི་ཆུ་དབང་རེ་ཡང་བསྐུར་བར་འདུག་གོ །ཉེར་བརྒྱད་པ་སློབ་དཔོན་གྱི་དབང་ལས་དོན་ཚན་ཐོག་མ་གསོལ་བཏབ་ནི། མཎྜལ་ཕུལ་ནས། སློབ་དཔོན་དམ་པ་དགོངས་སུ་གསོལ། །སེམས་ཅན་ཀུན་ལ་ཕན་བཏགས་ཕྱིར། །བདག་ནི་རྟག་ཏུ་སློབ་དཔོན་བགྱིད། །དེ་རིང་བདག་ལ་ལུང་བསྟན་སྩོལ། ལན་གསུམ། དོན་ཚན་གཉིས་པ་ལྷར་བསྐྱེད་པ་ནི། དབང་སྟཻགས་ཀྱི་སྟེང་དུ་རང་ཉིད་རྡོ་རྗེ་གཞོན་ནུ་ཤེས་རབ་མ་དང་བཅས་པའི་སྐུར་གྱུར། སྟེང་དུ་གདུགས་དཀར་པོ། མཐའ་སྐོར་དུ་མཆོད་པའི་སྤྲིན་གྱི་ཕུང་པོ་དང་བཅས་པའོ། །དོན་ཚན་གསུམ་པ་རྡོར་དྲིལ་གཏད་པ་ནི། ཧཱུཾ་ལས་བྱུང་བའི་རྡོ་རྗེ་དང༌། ཨ་ལས་བྱུང་བའི་དྲིལ་བུ། ཐབས་མཆོག་ཡེ་ཤེས་རྡོ་རྗེ་དང༌། །ཤེས་རབ་ཆོས་ཀྱི་དྲིལ་བུ་གཟུང༌། །ཕྱག་རྒྱ་ཆེན་པོར་བྱིན་གྱིས་བརླབས། དམ་ཚིག་གསུམ་པོ་རབ་ཏུ་བརྟན། དོན་ཚན་བཞི་པ་ཆུ་དབང་བསྐུར་བ་ནི། སངས་རྒྱས་ཐམས་ཅད་གཅིག་བསྡུས་པ། །དཔལ་ཆེན་རྡོ་རྗེ་གཞོན་ནུ་ཡི། ཁམས་གསུམ་
ཆོས་ཀྱི་རྒྱལ་པོ་རུ། །དེ་རིང་ཁྱོད་ལ་དབང་བསྐུར་རོ། །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུཾ་ཕཊ། བཛྲ་ཨ་བྷི་ཥིཉྩ་ཧཱུཾ། དོན་ཚན་ལྔ་པ་བརྟན་བཞུགས་ནི། པུཥྤེ་ལ་སོགས་པས་མཆོད། མེ་ཏོག་གཏོར་ཞིང་རོལ་ཆེན་དང་བཅས་པས། ཨོཾ་སུ་པྲ་ཏིཥྛ་བཛྲ་ཡེ་སྭཱཧཱ། དེ་རྣམས་སློབ་དཔོན་གྱི་དབང་ངོ༌། །ཉེར་དགུ་པ་རྗེས་གནང་ལ། རིགས་ལྔའི་ཕྱག་མཚན་གྱི་རྗེས་གནང་ནི། འཇིག་རྟེན་ཁམས་ནི་ཐམས་ཅད་དུ། །ཇི་ལྟ་ཇི་ལྟར་འདུལ་འགྱུར་བ། །སེམས་ཅན་ཀུན་གྱི་དོན་གྱི་ཕྱིར། །དེ་ལྟར་ཆོས་ཀྱི་འཁོར་ལོ་བསྐོར། དེ་བཞིན་དུ་རྡོ་རྗེ་རིན་ཆེན། པདྨ། རལ་གྲི་རྣམས་ལ་གོང་བཞིན་སྦྱར་དུང་གཏད་པའི་རྗེས་གནང་ནི། ཚིག་སྔ་མ་གསུམ་འདྲ་བ་ལས། ཁྱོད་ཀྱི་ཆོས་ཀྱི་དུང་བུས་ཤིག །བཀའི་གནང་བ་སྦྱིན་པ་ནི། སློབ་མ་དམ་པ་ཁྱོད་ཀྱིས་ཀྱང༌། །ཇི་ལྟར་འདུལ་བའི་འཕྲིན་ལས་ཀྱང༌། །སློབ་དཔོན་ལས་རྣམས་ཅི་རིགས་པར། །དེ་རིང་ཕན་ཆད་སྒྲུབ་པར་གྱིས། དེ་ལྟར་ན་བུམ་པའི་དབང་བསྐུར་བ་ནི། མོས་པའི་སྤྱོད་པའི་ས་སྦྱོར་བའི་ལམ་མོ། །སུམ་ཅུ་པ་གསང་དབང་ལ་མཎྜལ་ཕུལ། གསོལ་བ་གདབ་པ་ནི། སློབ་དཔོན་དམ་པ་བདེ་གཤེགས་གཙོ། །རྒྱལ་བ་འཁོར་དང་བཅས་པ་ལ། །ལུས་ངག་ཡིད་ཀྱིས་ཕྱག་འཚལ་ལོ། །གསང་གསུམ་དམ་པའི་དབང་མཆོག་འདི། །དེ་རིང་བདག་ལས་གནང་བར་གསོལ། གསང་དབང་བསྐུར་བ་དངོས་ནི། རང་ཉིད་རྡོ་རྗེ་གཞོན་ནུ་དཔའ་བོ་གཅིག་པའི་སྐུར་གྱུར། སློབ་དཔོན་དཀྱིལ་འཁོར་གྱི་གཙོ་བོ་བཅོམ་ལྡན་འདས་ཡབ་ཡུམ་ཐབས་ཤེས་གཉིས་
སུ་མེད་པའི་ཚོགས་བདེ་བ་ཆེན་པོའི་ཉམས་བསྐྱེད། ཐུགས་ཀའི་ཧཱུཾ་གི་འོད་ཟེར་གྱིས་སྤྱན་དྲངས་པའི་བདེ་བར་གཤེགས་པ་རྣམས་ཞལ་དུ་ཞུགས། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷ་ཝ་ཨཏྨ་ཀོ྅ཧཾ། །ཐུགས་ཀར་བྱང་ཆུབ་ཀྱི་སེམས་སུ་ཞུ། སྐུའི་དབྱིབས་བརྒྱུད། བདག་གི་ལྕེ་ཐོག་ཏུ་བཞག བྱང་ཆུབ་སེམས་ཀྱི་རྡོ་རྗེ་འདི། །སེམས་ཀྱི་རྣམ་རྟོག་མུན་བཅོམ་ནས། །གསང་བའི་གནས་མཆོག་དམ་པ་ནས། །དེ་རིང་ཁྱོད་ལ་དབབ་པར་བྱ། བདུད་རྩི་མྱངས། དེ་རིང་སངས་རྒྱས་ཀུན་དང་མཉམ། །བདག་ནི་བསོད་ནམས་སྐལ་པ་ཆེ། །དཔལ་ལྡན་ཡོན་ཏན་ཀུན་གྱི་རྒྱན། །རྡོ་རྗེ་གཞོན་ནུ་བདག་ཉིད་དོ། །ལུང་བསྟན་པ་ནི་བྱེད་ཚུལ་སྤྱི་དང་འདྲ་བ་ལས། ཚིག་འདི་སྐད་ཅེས། ཇི་ལྟར་ང་ཡིས་ལུང་བསྟན་ཏེ། །བཅོམ་ལྡན་རྡོ་རྗེ་གཞོན་ནུ་དང༌། །དུས་གསུམ་སངས་རྒྱས་ཐམས་ཅད་ཀྱིས། །སྲིད་པའི་ངན་འགྲོ་ལས་ཁྱོད་བཏོན། ཨོཾ་སརྦ་ཏ་ཐཱ་ག་ཏ་བྷུརྦྷུ་བ་སྭ། ཞེས་པའོ། །དེ་ལྟར་ན་གསང་པའི་དབང་བསྐུར་བ་ནི། དོན་དམ་པའི་སེམས་དང་པོ་བསྐྱེད་པ་མཐོང་བའི་ལམ་མོ། །སོ་གཅིག་པ་ཤེས་རབ་ཡེ་ཤེས་ཀྱི་དབང་ལ་མཎྜལ་ཕུལ་ལ་གསོལ་བ་གདབ་པ་ནི། སྔོན་གྱི་སངས་རྒྱས་ཐམས་ཅད་ཀྱི། །ཇི་ལྟར་མཁྱེན་པའི་ཐུགས་ཆུད་པ། །དེ་ལྟར་རྗེས་སུ་བདག་ལ་ནི། །ཤེས་རབ་ཡེ་ཤེས་དབང་བསྐུར་སྩོལ། ཐོག་མར་གདམས་པ་ནི། སྔོན་གྱི་རྒྱལ་བ་ཐམས་ཅད་ཀྱང༌། །ཤེས་རབ་མ་ལ་བརྟེན་པས་འགྲུབ། །ཡེ་ཤེས་སྐྱེ་བའི་
གཞི་ཡིན་ཕྱིར། ཁྱོད་ཀྱིས་འདོད་ཆགས་མ་སྡངས་ཤིག དྲི་བ་དྲི་ལན་ནི། བུ་ཁྱོད་ཚུར་ཤོག་རྡོ་རྗེ་ཅན། །གཞི་མཉམ་གླ་རྩི་སྤྱོད་ནུས་སམ། །རཀྟ་ག་བུར་བཟའ་བ་དང༌། །བུད་མེད་དད་པས་བསྟེན་ནུས་སམ། །པདྨར་འོ་བྱེད་མི་རྟོག་གམ། །སྨྲོས་ཤིག་སྣོད་ལྡན་ངང་ཚུལ་ཅན། ལན་ནི། ཤེས་རབ་དད་པས་བདག་བསྟེན་ཏོ། །བདུད་རྩི་ལྔ་ལ་གུས་པར་བགྱིད། །བདེ་བ་སྒྲུབ་པར་གདབ་པ་ནི། སྨད་བྱུང་ང་ཡི་པདྨ་ནི། །བདེ་བ་ཐམས་ཅད་འདི་ལས་རྙེད། །བདེ་བར་གཤེགས་པ་ཐམས་ཅད་ཀུན། །རྟག་ཏུ་འདི་དང་མི་འབྲལ་ཏེ། །པདྨ་འདི་ནི་ཆོས་དབྱིངས་ཡིན། །སངས་རྒྱས་ཐམས་ཅད་འདི་ལས་འབྱུང༌། །སེམས་ཅན་ཐམས་ཅད་འདི་རུ་གྲོལ། །ནང་གི་རྩ་ཡི་འཁོར་ལོ་ལ། །པདྨ་ཞེས་བྱར་རབ་ཏུ་གསུངས། །པདྨ་ནང་གི་ནམ་མཁའ་ཞེས། །འབྱུང་བ་ལྔ་པོ་རང་བཞིན་གནས། །ལྟེ་བ་དང་ནི་གེ་སར་བཅས། །པདྨ་བརྒྱད་ཀྱིས་རྣམ་པར་བརྒྱན། །ཟེའུ་འབྲུ་དབུས་ནས་འབྱུང་བ་ཡིན། །དེ་ཉིད་བདུད་རྩི་དམ་པ་སྟེ། །སངས་རྒྱས་ཀུན་གྱི་སྙིང་པོའོ། །ཞེས་གདམས་པ་ཐོབ། ཤེས་རབ་དམ་པ་འདི་ཡིས་ནི། ཁྱོད་ཀྱི་ཡེ་ཤེས་སྐྱེད་བྱེད་པས། དད་པས་རབ་ཏུ་བསྟེན་པར་གྱིས། ཞེས་སློབ་དཔོན་གྱིས་བདག་ལ་ཤེས་རབ་ཡང་དག་པར་གཏད། ཐ་མལ་གྱི་རྟོག་པ་སྤངས་ནས་ལྷ་དང་སྔགས་དང་ཆོས་ཀྱི་ཐབས་མཁས་སུ་བསྒྱུར་ནས། རྗེས་ཆགས་སྙོམས་འཇུག་བདེ་བ་ཆེན་པོ་ལ་བརྟེན་ནས། ཞུ་བདེ་ལྷན་ཅིག་སྐྱེས་པ་མངོན་དུ་བྱས།
དབུགས་དབྱུང་བ་ནི། དུས་གསུམ་སངས་རྒྱས་ཐམས་ཅད་ཀྱི། །ངོ་བོ་ཉིད་དུ་ཁྱོད་གྱུར་ཏོ། ཁམས་གསུམ་བདག་པོར་ཁྱོད་གྱུར་ཏོ། །བྱང་ཆུབ་སེམས་དཔའ་ཁྱོད་གྱུར་ཏོ། །བདུད་དང་མུ་སྟེགས་ཐམས་ཅད་ལས། །རྒྱལ་བར་གྱུར་བ་ཁྱོད་ཡིན་ནོ། །གྲོང་ཁྱེར་ལས་ཀྱང་གྲོང་ཁྱེར་ཏེ། །མྱ་ངན་འདས་པའི་གྲོང་ཁྱེར་དུ། །བློ་ལྡན་སྣོད་ཅན་ཁྱོད་བཞུགས་པས། །སངས་རྒྱས་འགྲུབ་པའི་རྒྱུ་འདི་ཡིན། དེ་ལྟར་ན་ཤེས་རབ་ཡེ་ཤེས་ཀྱི་དབང་བསྐུར་བ་ནི། ས་དགུའི་བདག་ཉིད་སྒོམ་པའི་ལམ་མོ། །སོ་གཉིས་པ་དབང་བཞི་པ་ལས། གསོལ་བཏབ་ནི། ཁྱོད་ཞབས་པདྨོའི་བཀའ་དྲིན་གྱིས། །སངས་རྒྱས་ཀུན་ཀྱི་བྱང་ཆུབ་སེམས། །དོན་ཆེན་ཟབ་མོས་ཉོན་མོངས་འཇོམས། །དེ་རིང་བདག་ལ་གནང་བར་ཞུ། ལན་གསུམ། རྒྱུའི་མཐར་ཕྱིན་པ་བདུད་རྩི་སྦྱིན་པ་ནི། རང་ཉིད་ཧེ་རུ་ཀ་ཡབ་ཡུམ་རྗེས་སུ་ཆགས་པའི་སྙོམས་པར་ཞུགས་པའི། བྱང་ཆུབ་ཀྱི་སེམས་དབང་གི་གནས་སུ་ཕྱིན་པའི་ཡེ་ཤེས་དཔེར་མཚོན་པར་བྱས། ཨོཾ་མཧཱ་བོ་དྷི་ཙིཏྟ་ཨ་བྷི་ཥིཉྩ་ཧཱུཾ། བྱང་ཆུབ་ཀྱི་སེམས་མཁའི་དཀྱིལ་འཁོར་ལས་རོ་འཛིན་གྱི་བླང་སྟེ་མྱངས་པའི་ཉམས་མྱོང་ལ་མཉམ་པར་བཞག འབྲས་བུ་མཐར་ཕྱིན་བརྗོད་བྲལ་སྒོམ་པ་ནི། འདི་ལྟར་མཐའ་ཡས་སྣང་བ་ཀུན། །སྐད་ཅིག་གཅིག་ལ་དམིགས་མེད་དེ། །བརྗོད་པའི་ཐ་སྙད་ཀུན་
དང་བྲལ། །རང་བྱུང་ཡེ་ཤེས་ཞེས་བྱར་བརྗོད། །དེ་ལྟར་ན་བཞི་པའི་དབང་བསྐུར་བ་ནི། མཐར་ཕྱིན་མི་སློབ་པའི་ལམ་མོ། །སོ་གསུམ་པ་དམ་ཚིག་སྒྲགས་པ་ནི། རྡོ་རྗེ་སློབ་དཔོན་མཆེད་ལྕམ་ལ། །སྒོ་གསུམ་སྒོ་ནས་གནོད་པ་བྱེད། །སྐུ་ཡི་དམ་ཚིག་ཉམས་པར་འགྱུར། །དེ་ལས་ལྡོག་ཏེ་ཕན་པར་བྱ། །སྔགས་དང་སྙིང་པོ་བར་ཆད་ཅིང༌། །གསང་བ་བསྲུང་པར་མ་ནུས་པ། །གསུང་གི་དམ་ཚིག་ཉམས་པ་ཡིན། །ཕྱག་རྒྱ་བཞི་གསལ་དེ་ལས་བཟློག །གསང་བཅུ་ལ་སོགས་གཉེར་གཏད་པ། །སྣོད་མིན་པ་ལ་གསང་མ་ཐུབ། །ཐུགས་ཀྱི་དམ་ཚིག་ཉམས་པ་སྟེ། །དེ་ལས་བཟློག་ཏེ་གསང་བ་བསྲུང༌། །སྦྱོར་སྒྲོལ་མ་སྦྱིན་ལེན་དང་རྫུན་དུ་སྨྲ། །ཚིག་རླངས་ལ་སོགས་དམ་ཚིག་ལྔ་རྣམས་ནི། །འགྲོ་བའི་དོན་དུ་གཞུང་བཞིན་སྤྱད་པར་བགྱི། །འདོད་ཆགས་ཞེ་སྡང་གཏི་མུག་ང་རྒྱལ་དང༌། །ཕྲག་དོག་ལ་སོགས་ཉོན་མོངས་ལྔ་རྣམས་ནི། །ཡེ་ཤེས་ངོ་བོ་ཉིད་ཀྱི་སྤང་མི་བྱ། །དྲི་ཆེན་དྲི་ཆུ་དམར་ཆེན་ཟིལ་པ་དང༌། །མདངས་ཆེན་ལ་སོགས་དམ་རྫས་ལྔ་རྣམས་ནི། །གཉིས་མེད་ཚུལ་གྱིས་དང་དུ་བླང་བར་བྱ། །ཕུང་པོ་ལྔ་དང་འབྱུང་བ་ཆེན་པོ་ལྔ། ཁ་དོག་ལྔ་དང་ཡུལ་ལྔ་དབང་པོ་ལྔ། །རྣམ་ཤེས་ལྔ་དང་ཡུལ་ལྔ་ཡེ་ཤེས་ལྔ། །ཡབ་ལྔ་ཡུམ་ལྔ་སྦྱོར་ཞིང་ཤེས་པར་བྱ། །རྡོ་རྗེ་རིགས་དང་དེ་བཞིན་གཤེགས་པའི་རིགས། །རིན་ཆེན་རིགས་དང་བདེ་བཞིན་པདྨའི་རིགས། །ལས་ཀྱི་རིགས་ཏེ་རྒྱལ་བ་རིགས་ལྔ་པོ། །
ལེ་ལོ་སྤངས་ཏེ་ཏིང་འཛིན་གྲུབ་པར་བྱ། སྐབས་འདིར་དམ་ཚིག་ཉི་ཤུ་རྩ་བརྒྱད་པོ་དེ་ཙམ་ཞིག་བསྟན་ནོ། །རྗེས་ཀྱི་བྱ་བ་ནི། གཙོ་བོས་ཇི་ལྟར་སོགས་མཎྜལ་འབུལ་བ་དང༌། དེང་ནས་བརྩམས་ཏེ་སོགས་དང༌། དགེ་བ་བསྔོ་བ་རྣམས་བྱའོ། །སློབ་མ་ལ་དབང་བསྐུར་པའི་དངོས་གཞིའི་ཆོ་ག་ནི། བདག་འཇུག་ཤེས་ན་འབད་མེད་དུ་གོ་བའི་ཕྱིར་དང༌། ཡི་གེ་ཉུང་བ་ལ་དགའ་བའི་ཕྱིར་འདིར་མ་བརྗོད་དོ།། །།ཞུས་སོ། །བཀྲ་ཤིས། །བྲི་བཞེངས་འདི། འགྲོ་ཀུན་ཀྱིས། གནས་ལུགས་མཆོག །རྟོགས་རྐྱེན་ཏུའོ། །མ་ཏིས་སོ། །