གཟུངས་གྲྭ་ལྔའི་དཀྱིལ་ཆོག་བར་ཆད་ཀུན་སེལ།
གཟུངས་གྲྭ་ལྔའི་དཀྱིལ་ཆོག་བར་ཆད་ཀུན་སེལ་བཞུགས། །
ཨོཾ་སྭཱ་སྟི། སངས་རྒྱས་ལ་ཕྱག་འཚལ་ལོ། །སྲུང་བ་ལྔའི་དཀྱིལ་འཁོར་གྱི་ཆོ་ག་བར་ཆད་ཀུན་སེལ་ཞེས་བྱ་བ། བཅོམ་ལྡན་འདས་མ་སོ་སོར་འབྲང་མ་ལ་ཕྱག་འཚལ་ལོ། །རྒྱལ་བ་སྟོན་པ་ཤཱཀྱ་སེངྒེ་ནི། །གཟུངས་ཀྱི་ལྷ་མོར་བཅས་ལ་གུས་བཏུད་ནས། །སྲུང་བ་ལྔ་ཡི་གཟུངས་མདོའི་དགོངས་པ་མཆོག །ལག་ལེན་ཆོ་གའི་སྙིང་པོ་འདིར་བཤད་བྱ། །དེ་ལ་འདི་ནི་གསང་སྔགས་རྡོ་རྗེ་ཐེག་པའི་ནང་ཚན་བྱ་བའི་རྒྱུད་ལ། རིགས་དྲུག་ཡོད་པ་ལས་དེ་བཞིན་གཤེགས་པའི་རིགས་སོ། །དེ་ལ་ཡང་ནང་ཚན་མང་དུ་ཡོད་པ་ལས། རིགས་ཀྱི་ལྷ་མོའི་རྒྱུད་སྡེར་གཏོགས་སོ། །དེ་ལས་སྟོང་ཆེན་རབ་འཇོམས་དང༌། རྨ་བྱ་ཆེན་མོ་དང༌། སོ་སོར་འབྲང་མ་དང། གསང་སྔགས་རྗེས་འཛིན་དང༌། བསིལ་བའི་ཚལ་ཆེན་མོ་ཏེ། ལྔ་པོ་འདི་ལ་སྲུང་བ་ལྔའམ། གཟུངས་གྲྭ་ལྔར་གྲགས་ལ། ལྔ་པོ་དེ་དག་ཆབས་གཅིག་པར་བྱེད་པའི་
ཁུངས་ནི། སྟོང་ཆེན་གྱི་འཇུག་གི་ཆ་དང༌། སོར་འབྲང་གི་དབུས་ཀྱི་ཆ་ན་གསལ་ལོ། །དེ་བས་ན་རྒྱུད་ཐ་དད་ནས་བཤད་པ་ཡིན་པས་སོ་སོར་ཡང་སྒྲུབ་ཏུ་རུང་ལ། ཆབས་གཅིག་ཏུ་བསྒོམ་ཞིང་སྒྲུབ་པ་ནི་ཆེས་མཆོག་ཏུ་གྱུར་པ་ཡིན་ནོ། །དེ་ལ་རྣལ་འབྱོར་རྫོགས་འཕྲེང་ལས་གསུངས་པའི་དཀྱིལ་འཁོར་ཁྱད་པར་ཅན་ཡང་བཞུགས་མོད་ཀྱི། འདིར་རྩོད་དུས་ཀྱི་ཐམས་ཅད་མཁྱེན་པ། རིན་ཆེན་འབྱུང་གནས་ཞི་བའི་སྒྲུབ་ཐབས་ལ་བརྟེན་ཞིང་ལོ་པན་གྱི་མན་ངག་རྒྱུན་མ་ཆད་པ་བླ་མ་གོང་མ་རྣམས་ཀྱིས་ཡིག་རིགས་མང་པོ་མཛད་པ་ལ་བརྟེན་ནས་བྲི་བར་བྱའོ། །དེ་ལ་དང་པོར་སྔོན་འགྲོ་གཏོར་མ། ཨོཾ་ཨ་མྲྀ་ཏེ་ཧཱུཾ་ཕཊ་ཀྱིས་བསངས། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ་གིས་སྦྱངས། སྟོང་པའི་ངང་ལས་བྷྲཱུཾ་ལས་བྱུང་བའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། ཨོཾ་ལས་བྱུང་བའི་གཏོར་མ་འདོད་དགུའི་རྒྱ་མཚོ་ཆེན་
པོར་གྱུར། ན་མཿསརྦ་ཏ་ཐཱ་ག་ཏ་བྷྱོཿབི་ཤྭ་མུ་ཁེ་བྷྱཿ སརྦ་ཐཱ་ཁཾ་ཨུད་ག་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱཧཱ། ལན་གསུམ་བརྗོད། སྲིད་པ་གསུམ་གྱི་འབྱུང་པོའི་ཚོགས་ཐམས་ཅད་གཏོར་མ་ལེན་པའི་གནས་སུ་ཨཱ་ཀརྵ་ཡ་ཛཿ ཨོཾ་ཨ་ཀཱ་རོ་མུ་ཁཾ་སརྦ་དྷརྨ་ཎཱཾ། ཨ་དྱ་ནུཏྤནྣ་ཏྭ་ཏ་ཨོཾ་ཨཱཿཧཱུཾ་ཕཊ་སྭཱཧཱ་ལན་བདུན་གྱིས་གཏོར་མ་ཕུལ། ཨོཾ་བཛྲ་ཨརྒྷཾ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ནས།ཤཔྟའི་བར་གྱི་མཆོད། རྣལ་འབྱོར་བདག་ཅག་འཁོར་བཅས་ལ། ཞེས་པ་ནས། ཡིད་ལ་འདོད་པ་ཀུན་གྲུབ་ཤོག ཅེས་པའི་བར་གྱིས་འདོད་དོན་གསོལ་བ་བཏབ། ཚིག་ལྷུག་པས་འཕྲིན་ལས་གཞོལ་བ་སྤྱི་དང་འདྲ། རོལ་མོའི་སྒྲ་དང་བཅས་ཏེ་གཏོར་མ་ས་གཙང་བའི་ཕྱོགས་སུ་དོར་རོ། །སྤྱིར་བྱ་སྤྱོད་རང་རྐང་གི་ལུགས་ལ་གནས་ཁང་བྱིན་རླབས་མི་དགོས་ཀྱང༌། རྒྱུད་སྡེ་གོང་མ་དང་སྒོ་བསྟུན་ནས་སྒྲུབ་པའི་ལུགས་འདི་རིགས་ལ། དེ་བྱེད་པ་བཟང་བས་གནས་ཡོ་བྱིན་རླབས་བྱ་སྟེ། ཨ་མྲྀ་ཏས་བསངས། སྭབྷཱ་ཝས་སྦྱངས། སྟོང་པའི་ངང་ལས་གནས་ཁང་བྷྲཱུཾ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་མེད་ཁང་གྲུ་བཞི་སྒོ་བཞི། རྟ་བབས་བཞིས་བརྒྱན་པ། མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ། ཨོཾ་ལས་བྱུང་བའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། སླར་ཡང་ཨོཾ་ལས་བྱུང་བའི། མཆོད་ཡོན། ཞབས་བསིལ།མེ་ཏོག བདུག་སྤོས། མར་མེ། དྲི་ཆབ། ཞལ་ཟས།
རོལ་མོ་ལ་སོགས་པའི་མཆོད་པའི་བྱེ་བྲག་རྣམས། རང་བཞིན་གཉིས་སུ་མེད་པའི་ཡེ་ཤེས། རྣམ་པ་མཆོད་རྫས་ཀྱི་སྤྲིན་ཕུང༌། བྱེད་ལས་རང་བཞིན་འཇིག་རྟེན་དང་འཇིག་རྟེན་ལས་འདས་པའི་ལྷ་ཐམས་ཅད་ཟག་མེད་ཀྱི་བདེ་བ་ཆེན་པོས་ཚིམ་པར་བྱེད་པ། ཡུལ་དང་དུས་ཡོངས་སུ་ཆད་པ་མེད་པར་འཇུག་པ། བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི། མཆོད་པའི་སྤྲིན་ཕུང་ལྟ་བུར་གྱུར། ཨོཾ་བཛྲ་ཨརྒྷཾ་སྭཱཧཱ། དེ་བཞིན་དུ། པཱདྱཾ། ཨོཾ་བཛྲ་པུཥྤེ་ཨཱཿཧཱུཾ། དེ་བཞིན་དུ། དྷཱུ་པེ་ཨཱ་ལོ་ཀེ་གེནྡྷ་ནཻ་ཝེ་དྱ། ཨོཾ་བཛྲ་ཤཔྟ་ཨཱཿཧཱུཾ། ཨོཾ་བཛྲ་སྥ་ར་ཎ་ཁཾ། ཨོཾ་སརྦ་བིད་པཱུ་ར་པཱུ་ར་སུ་ར་སུ་ར་ཨ་བརྟ་ཡ་ཨ་བརྟ་ཡ་ཧོཿ ན་མཿསརྦ་ཏ་ཐཱ་ག་ཏ་བྷྱོ་བི་ཤོ་མུ་ཁེ་བྷྱཿ སོགས་ནམ་མཁའ་མཛོད་ཀྱི་སྔགས་རིང་པོ་གོང་བཞིན་ཏེ། སྔགས་ཚན་གསུམ་པོ་དེ་ལན་གསུམ་གསུམ་བརྗོད། རོལ་ཆེན་དང་བཅས་ཏེ། ན་མོ་བྷ་ག་ཝ་ཏེ་བཛྲ་སཱ་ར་པྲ་མརྡྷ་ན་ཡེ། ཏ་ཐཱ་ག་ཏཱ་ཡ། ཨརྷ་ཏེ་སམྱཀ་སཾ་བུདྡྷ་ཡ། ཏདྱ་ཐཱ། ཨོཾ་བཛྲེ་བཛྲེ། མཧཱ་བཛྲེ་མཧཱ་ཏེ་ཛ་བཛྲེ། མཧཱ་བོདྡྷི་ཙིཏྟ་བཛྲེ། མཧཱ་བོ་དྷི་མནྚ་ཨུ་པ་སཾ་ཀྲ་མ་ཎེ་སརྦ་ཀརྨ་ཨ་བ་ར་ཎ་བི་ཤོ་དྷ་ནི་སྭཱཧཱ། སྐྱབས་འགྲོ་སེམས་བསྐྱེད་སྤྱི་དང་འདྲ་བ་དང༌། འགྲོ་རྣམས་སྒྲལ་འདོད་བསམ་པ་ཡིས་སོགས་སམ། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། སོགས་རང་རུང་ཞིག་བརྗོད། ཨོཾ་ཨཱཿཧཱུཾ་རཀྵ་རཀྵ་ཧཱུཾ་ཕཊ། ལན་གསུམ་བརྗོད། བདག་དང་གནས་དང་རྣལ་འབྱོར་བསྲུང་བའོ། །རང་གི་སྙིང་
གར་པདྨ་དང་ཟླ་བའི་སྟེང་དུ། པྲཾ་ཡིག་དཀར་ལ་སེར་བའི་མདངས་ཅན། དེ་ལས་འོད་འཕྲོས། སྲུང་བ་ལྔའི་དཀྱིལ་འཁོར་གྱི་ལྷ་ཚོགས་བླ་མ་དང་བྱང་ཆུབ་སེམས་དཔའི་ཚོགས་དང་བཅས་པ་མདུན་གྱི་ནམ་མཁར་བཛྲ་ས་མཱ་ཛཿ བླ་མ་མཆོག་དང་བཅོམ་ལྡན་སོ་སོར་འབྲང་མ་དང༌། །སྟོང་ཆེན་རབ་འཇོམས་དེ་བཞིན་རྨ་བྱ་ཆེན་མོ་དང༌། །གསང་སྔགས་རྗེས་འཛིན་བསིལ་བའི་ཚལ་ཏེ་ལྷ་མོ་ལྔ། །འཁོར་དང་བཅས་ལ་སྒོ་གསུམ་གུས་པས་ཕྱག་འཚལ་ལོ། །ཨོཾ་སརྦ་ཏ་ཐཱ་ག་ཏ་པཉྩ་རཀྵ་དེ་བ་ཙཀྲ་མཎྜ་ལ་ས་པཱ་རི་ཝ་ར་ཨརྒྷཾ་པྲ་ཏཱིཙྪ་པུ་ཛ་མེ་བྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ་དེ་བཞིན་དུ། ཨརྒྷཾ་གྱིས་གནས་སུ། པཱ་དྱཾ། པུཥྤེ།དྷུ་པེ།ཨཱ་ལོ་ཀེ།གནྡྷེ།ནཻ་ཝི་ཏེ། ཤཔྟ་ཞེས་པ་རྣམས་བཅུག་ལ་མཆོད། དཀོན་མཆོག་གསུམ་ལ་བདག་སྐྱབས་མཆི་སོགས་རྒྱུན་བཤགས་བྱ། རྫུ་འཕྲུལ་ཚད་དང་ལྡན་པ་ལྷ་མོ་ལྔ་རྣམས་ལ། །ལྷ་གང་མངོན་པར་རབ་ཏུ་དང་པ་ཡོད་པ་ཡི། །ལྷ་དེ་མགུ་ཞིང་ཡིད་ནི་རབ་ཏུ་དགའ་གྱུར་ཏེ། །རབ་ཏུ་དང་བའི་སེམས་ཀྱིས་བདག་ལ་སྲུང་དུ་གསོལ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིགསོགས་ཚད་མེད་བཞི་སྤྱི་དང་འདྲ། ཨོཾ་ཤཱུ་ནྱ་ཏ་ཛྙཱ་ན་བཛྲ་སྭཱ་བྷཱ་ཝ་ཨཱཏྨ་ཀོ྅ཧཾ། སྟོང་པའི་ངང་ལས་རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་ལས་སྣ་ཚོགས་རྡོ་རྗེའི་རྭ་རྣམས་ཤར་སྔོ། ལྷོ་སེར། ནུབ་དམར། བྱང་ལྗང༌། དབུས་དཀར་བའི་ལྟེ་བ་ལ་ཧཱུཾ། དེ་ལས་འོད་ཟེར་འཕྲོས།
འོག་རྡོ་རྗེ་ས་གཞི། ཁོར་ཡུག་རྡོ་རྗེའི་རྭ་བ། སྟེང་རྡོ་རྗེ་གུར་དང་བླ་རེ། ཕྱི་རོལ་རྡོ་རྗེའི་དྲ་བ་དང༌། ཡེ་ཤེས་ཀྱི་མེད་དཔུང་འབར་བའི་སྲུང་བའི་འཁོར་ལོར་གྱུར། དེའི་ནང་དུ་ཡཾ་ལས་རླུང་གི་དཀྱིལ་འཁོར་སྔོན་པོ་དབུས་སུ་གཞུའི་དབྱིབས་ཀྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་དབུས་སུ་གྲུ་གསུམ་གྱིས་མཚན་པ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་དབུས་སུ་ཟླུམ་པོས་མཚན་པ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་དབུས་སུ་གྲུ་བཞིས་མཚན་པ། དེའི་སྟེང་དུ་སུཾ་ལས་རིའི་རྒྱལ་པོ་རི་རབ། ཤར་ཤེལ། ལྷོ་བཻཌཱུརྱ། ནུབ་པདྨ་རཱ་ག །བྱང་གསེར་ལས་གྲུབ་པ། ལྕོག་བརྒྱད་དང་ལྡན་པའོ། །དེའི་སྟེང་དུ་པཾ་ལས་སྣ་ཚོགས་པདྨའི་ལྟེ་བར་ཧཱུཾ་ལས་སྣ་ཚོགས་རྡོ་རྗེའི་ལྟེ་བ་ལ་བྷྲཱུཾ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་མེད་ཁང༌། གྲུ་བཞི་སྒོ་བཞི་རྟ་བབས་བཞིས་བརྒྱན་པ། སྔོ་སེར་དམར་ལྗང་དཀར་བའི་རྩིག་པ་རིམ་པ་ལྔ་དང་ལྡན་པ། དེའི་སྟེང་དུ་རིན་པོ་ཆེའི་ཕ་གུ་སེར་པོ་དང༌། དྲ་བ་དང་དྲ་བ་ཕྱེད་པའི་ས་དང་བྱ་འདབས་ལས་ཐུར་དུ་དཔྱངས་པའི་ཤར་བུའི་འཕྲེང་བ་དང༌། སྟེང་དུ་མདའ་ཡབ་དང༌། རྩིག་པའི་ཕྱི་རོལ་འདོད་ཡོན་གྱི་སྣམ་བུ་མཆོད་པའི་གཟུངས་མ་རྣམས་དང་བཅས་པ། སྒོ་དང་སྒོ་འཁྱུད་ཀྱི་འཚམས་ལ་ཟླ་ཕྱེད་རྡོ་རྗེ་དང༌། སྟེང་ཐོག་ལེགས་པར་ཕུབ་པའི་དབུས་ཀྱི་རྩེ་མོ། །རྡོ་རྗེ་རིན་པོ་ཆེའི་ཏོག་གིས་སྤྲས་པའོ། །ནང་གི་ལྷ་སྣམ་ཤར་སྔོ། ལྷོ་སེར་ནུབ་དམར་
བྱང་ལྗང༌། དབུས་དཀར་བའི་སྟེང་དུ་པཾ་ལས་སྣ་ཚོགས་པདྨའི་ལྟེ་བར། ཨ་ལས་ཟླ་བའི་དཀྱིལ་འཁོར་རོ། །དེའི་སྟེང་དུ་པྲཾ་ཡིག་དཀར་ལ་སེར་བའི་མདངས་ཅན། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། སླར་འདུས་ཏེ་ཐིམ་པ་ཡོངས་སུ་གྱུར་པ་ལས། རང་ཉིད་བཅོམ་ལྡན་འདས་མ་སོ་སོར་འབྲང་མ། སྐུ་མདོག་དཀར་ལ་ཡིད་ཙམ་སེར་བ། དབུ་ལ་མཆོད་རྟེན་གྱིས་བརྒྱན་པ། རྩ་ཞལ་དཀར་སེར། གཡས་ནག །རྒྱབ་སེར། གཡོན་དམར་བའི་ཞལ་བཞི་པ། ཞལ་རེ་རེ་ལ་ཞི་བའི་སྤྱན་གསུམ་གསུམ་དང་ལྡན་པ། ཕྱག་བརྒྱད་ཀྱི་གཡས་དང་པོས་འཁོར་ལོ། །གཉིས་པས་རྡོ་རྗེ་གསུམ་པས་མདའ། བཞི་པས་རལ་གྲི གཡོན་དང་པོས་རྡོ་རྗེའི་ཞགས་པ། གཉིས་པས་རྩེ་གསུམ། གསུམ་པས་གཞུ། བཞི་པས་དགྲ་སྟ་འཛིན་པ། ཟླ་བའི་གདན་ལ་ཞབས་རྡོ་རྗེའི་སྐྱིལ་ཀྲུང་གིས་བཞུགས་ཤིང་ཉི་མའི་རྒྱབ་ཡོལ་ཅན། ལོ་མ་དང༌། འདབ་མ་དང༌། འབྲས་བུ་རྒྱས་པའི་བྱང་ཆུབ་ཀྱི་ཤིང་དྲུང་ན་བཞུགས་པའོ། །ཤར་དུ་ཧཱུཾ་ལས་སྟོང་ཆེན་མོ་རབ་ཏུ་འཇོམས་མ། སྐུ་མདོག་དང༌། རྩ་ཞལ་སྔོན་མོ། །གཡས་དཀར། རྒྱབ་སེར། གཡོན་དམར་བའི་ཞལ་བཞི། དམར་ལ་ཟླུམ་པའི་སྤྱན་གསུམ་གསུམ་དང་ལྡན་ཞིང༌། ཞལ་གདངས་པ། མཆེ་བ་གཙིགས་པ་ལྗགས་འགྲིལ་བ། ཕྱག་བརྒྱད་ཀྱི་གཡས་པ་རྣམས་ཀྱིས་རྡོ་རྗེ་དང་བཅས་པའི་མཆོག་སྦྱིན་ལྕགས་ཀྱུ་མདའ་དང་
རལ་གྲི། གཡོན་བཞི་ན་ཞགས་པ་དང་བཅས་པའི་སྡིགས་མཛུབ། དགྲ་སྟ་གཞུ་དང་རིན་པོ་ཆེ་ཟུར་དྲུག་པས་མཚན་པའི་པདྨ་རྣམས་འཛིན་པ། དྲག་མོའི་ཚུལ་ཅན། སྟག་ལྤགས་ཀྱི་ཤམས་ཐབས་དང༌། སྦྲུལ་དང་རིན་པོ་ཆེ་དང་རུས་འཕྲེང་གིས་བརྒྱན་པ། ཐོད་སྐམ་གྱི་དབུ་རྒྱན་དང༌། མི་མགོའི་དོ་ཤལ་ཅན། ཉི་མ་ལ་གཡས་བརྐྱང་གི་རོལ་པས་བཞུགས་ཤིང༌། མེ་དཔུང་གི་རྒྱབ་ཡོལ་ཅན། ཤིང་ནྱ་གྲོ་དྷའི་སྡོང་པོ་ལ་རྒྱབ་བསྟེན་པའོ། །ལྷོར་མཾ་ཡིག་ལས་རྨ་བྱ་ཆེན་མོ་གསེར་གྱི་མདོག་ཅན་སེར་ནག །དམར་བའི་ཞལ་གསུམ། སྤྱན་གསུམ་གསུམ་གྱིས་མཛེས་པ། ཕྱག་གཡས་བཞི་ན་མཆོག་སྦྱིན། རིན་པོ་ཆེའི་རྒྱུན་འབབ་པའི་བུམ་པ། འཁོར་ལོ་རལ་གྲི་གཡོན་བཞི་ན་ལྷུང་བཟེད་ཀྱི་ནང་དུ་གནས་པའི་དགེ་སློང༌། རྨ་བྱའི་མཇུག་སྒྲོ། སྣ་ཚོགས་རྡོ་རྗེས་ཁ་རྒྱན་པའི་བུམ་པ། རིན་པོ་ཆེའི་རྒྱལ་མཚན་རྣམས་འཛིན་པ། མྱ་ངན་མེད་པའི་ཤིང་དྲུང་ན་བཞུགས་པའོ། །ནུབ་ཏུ་ཤཾ་ལས་གསང་སྔགས་རྗེས་སུ་འབྲང་མ་སྐུ་མདོག་དམར་སྐྱ། དམར་ནག་དཀར་བའི་ཞལ་གསུམ། སྤྱན་གསུམ་གསུམ་པ། ཕྱག་དང་པོ་གཉིས་ཆོས་འཆད། གཉིས་པ་གཉིས་མཉམ་བཞག །ལྷག་མ་གཡས་བཞི་མཆོག་སྦྱིན། སྐྱབས་སྦྱིན་རྡོ་རྗེ། མདའ་གཡོན་བཞི་ཞགས་པ་དང་བཅས་པའི་སྡིགས་མཛུབ། པདྨས་བརྒྱན་པའི་བུམ་པ། རིན་པོ་ཆེའི་སྙེ་མ་དང་གཞུ་རྣམས་འཛིན་པ། ཤིང་ཤི་རི་ཤའི་སྡོང་པོ་ལ་རྒྱབ་བསྟེན་པའོ། །
བྱང་དུ་གཾ་ལས་བསིལ་བ་ཚལ་ཆེན་མོ་ལྗང་ཁུ། ལྗང་དཀར་དམར་བའི་ཞལ་གསུམ། སྤྱན་གཉིས་གཉིས་དང་ལྡན་པ། ཕྱག་དྲུག་གི་གཡས་གསུམ་མི་འཇིགས་པའི་ཕྱག་རྒྱ་དང༌། རྡོ་རྗེ་དང་མདའ། གཡོན་གསུམ་ཞགས་པ་དང་བཅས་པའི་སྡིགས་མཛུབ་དང༌། རིན་པོ་ཆེའི་རྒྱལ་མཚན་དང༌། གཞུ་རྣམས་ཤིང་ཤིང་ཙམ་པ་ཀའི་སྡོང་པོ་ལ་རྒྱབ་བསྟེན་པ་ལ། དེ་གསུམ་ཆར་ཡང་སེམས་མའི་སྐྱིལ་མོ་ཀྲུང་གིས་བཞུགས་པ། དབུ་སྐྲ་ནག་པོ་ཕྱེད་བཅིངས་ཕྱེད་གྲོལ་བ། གཙོ་མོ་དང་མཚུངས་པར་བཟླ་གདན་དང༌། ཉི་མའི་རྒྱབ་ཡོལ་ཅན། སྟོང་ཆེན་མ་གཏོགས་པ་གཙོ་འཁོར་བཞི་ཆར་ཡང་རབ་ཏུ་ཞི་བ། དར་སྣ་ཚོགས་པའི་ནམ་བཟའ་དང༌། མུ་ཏིག་གི་དོ་ཤལ་ལ་སོགས་པ་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པའོ། །མཚམས་ཀྱི་འདབ་མ་བཞི་ལ། རིན་པོ་ཆེའི་བུམ་པ་ཡེ་ཤེས་ཀྱི་བདུད་རྩིས་གང་བ། དཔག་བསམ་ཤིང་གི་ཁ་རྒྱན་དང་བཅས་པ་རེ་རེའོ། །གཙོ་འཁོར་ལྔ་ཆར་གྱི། དཔྲལ་པར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུཾ་ནག་པོ་ཐུགས་ཀའི་དབུས་རྣམས་སུ། པྲཾ་ཧུཾ་མཾ་ཤཾ་གཾ་རང་རང་གི་སྐུ་མདོག་དང་མཐུན་པའི་འོད་ཟེར་འཕྲོ་བའོ། །ས་བོན་རྣམས་ལས་འོད་ཟེར་འཕྲོས་ཡེ་ཤེས་སེམས་དཔའ་སྲུང་བ་ལྔའི་ལྷ་ཚོགས་ལ། སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ། ཨོཾ་བཛྲ་ས་མཱ་ཛཿ ཨོཾ་བཛྲ་པུཥྤེ་ཨཱཿཧཱུཾ། ནས། ནཻ་ཝི་ཏེའི་བར་གྱིས་མཆོད། ཛཿཧཱུཾ་བཾ་ཧོཿ ཡང་གཙོ་མོའི་ཐུགས་ཀ་ནས་
འོད་ཟེར་འཕྲོས་དབང་གི་ལྷ་རིགས་བཛྲ་ས་མཱ་ཛཿ གོང་བཞིན་མཆོད། ཨོཾ་སརྦ་ཏ་ཐཱ་ག་ཏ་ཨབྷི་ཥིཉྩ་ཏུ་མཾ། ཞེས་གསོལ་བ་བཏབ་པས། དབང་གི་ལྷ་རྣམས་ཀྱིས། ཇི་ལྟར་བལྟམས་པ༴ སོགས། ཨོཾ་སརྦ་ཏ་ཐཱ་ག་ཏ་ཨབྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། ཞེས་གསུངས་ཤིང༌། བུམ་པའི་ཆུས་དབང་བསྐུར། སྒོ་གསུམ་གྱི་དྲི་མ་སྦྱངས། ཡེ་ཤེས་བདུད་རྩིའི་ཆུ་རྒྱུན་གྱིས་སྐུ་ལུས་གང༌། ཆུའི་ལྷག་མ་སྤྱི་བོར་འཁྱིལ་བ་ལས། གཙོ་འཁོར་ཐམས་ཅད་ལ་རྡོ་རྗེ་སེམས་དཔས་དབུ་རྒྱན། དེ་ནས། ཨོཾ་སརྦ་ཏ་ཐཱ་ག་ཏ་པཉྩ་རཀྵ་སོགས་གོང་ཚོགས་ཞིང་གི་སྐབས་ལྟར་མཆོད། རང་བཞིན་དག་པ་ཉིད་ལས་བྱུང༌། །རྡོ་རྗེ་སེམས་དཔའི་བདག་ཉིད་མཆོག །དུང་དང་ཀུན་དའི་འོད་དང་མཚུངས། །སོ་སོར་འབྲང་མ་ཕྱག་འཚལ་བསྟོད། ཁ་དོག་ནག་མོ་མི་བཟད་འཇིགས། །རྔམ་ཞིང་ཞལ་འགྱུར་ཁྲོ་གཉེར་ཅན། །གདུལ་དཀའི་འབྱུང་པོ་ཡང་དག་འདུལ། །རྡོ་རྗེ་ཁྲོ་མོར་ཕྱག་འཚལ་བསྟོད། །ལྷ་མོ་ཡེ་ཤེས་ལས་བྱུང་ཆེ། །གསེར་གྱི་འོད་ལྟར་རབ་འབར་བའི། །རྨ་བྱ་ཆེ་ལ་རབ་དད་པས། །རིག་པའི་རྒྱལ་མོ་ཕྱག་འཚལ་བསྟོད། །པདྨ་ཁ་ཕྱེའི་ཞལ་མངའ་བ། །ཞལ་མཛེས་མ་ལ་སྤྱན་ཡངས་ཤིང༌། །པདྨ་རཱ་ག་ལྟར་དམར་བའི། །འགྲོ་བའི་མར་གྱུར་ཕྱག་འཚལ་བསྟོད། །མཐིང་ག་ནམ་མཁའི་འོད་དང་མཚུངས། །འདོད་པའི་འདོད་ཆགས་ཀྱིས་སྒེག་མ། །དུག་རྣམས་འཇོམས་པར་བྱེད་པ་མོ། །སྐུ་མཛེས་མ་ལ་ཕྱག་འཚལ་བསྟོད། །ཨོཾ་
མ་ཎི་དྷ་རི་བཛྲ་ཎི་མཧཱ་པྲ་ཏི་སཱ་རེ་ཧཱུཾ་ཧཱུཾ་ཕཊ་ཕཊ་སྭཱཧཱ། སོ་སོར་འབྲང་མའི་འོ། །ཨོཾ་ཨ་མྲྀ་ཏ་ཝ་རེ་ཝ་ར་པྲ་ཝ་ར་བི་ཤུདྡྷེ་ཧཱུཾ་ཧཱུཾ་ཕཊ་ཕཊ་སྭཱཧཱ། སྟོང་ཆེན་མོའི་འོ། །ཨོཾ་ཨ་མྲྀ་ཏ་བུ་ལོ་ཀི་ནི་གརྦྷ་ས་མ་རཀྵ་ཎི་ཨ་ཀརྵ་ཎི་ཧཱུཾ་ཧཱུཾ་ཕཊ་ཕཊ་སྭཱཧཱ། རྨ་བྱ་ཆེན་མོའི་འོ། །ཨོཾ་བི་མ་ལེ་བི་པཱུ་ལེ་ཛ་ཡ་ཝ་རེ་ཨ་མྲྀ་ཏ་བི་ར་ཛེ་ཧཱུཾ་ཧཱུཾ་ཕཊ་ཕཊ་སྭཱཧཱ། གསང་སྔགས་རྗེས་འཛིན་གྱིའོ། །ཨོཾ་བྷ་ར་བྷ་ར་སམྦྷ་ར་སམྦྷ་ར་ཨིནྡྲི་ཡ་བ་ལ་བི་ཤྭ་དྷ་ནི་ཧཱུཾ་ཧཱུཾ་ཕཊ་ཕཊ་རུ་རུ་ཙ་ལེ་སྭཱཧཱ། བསིལ་བའི་ཚལ་གྱིའོ། །དེ་ནས་ཡང་ཨརྒྷཾ༴ ནས་ཤཔྟའི་བར་ཕྱིས་མཆོད། སྤྲོ་ན་གོང་བཞིན་བསྟོད་པའམ། སོར་སོར་འབྲང་དང་སྟོང་ཆེན་རབ་འཇོམས་དང༌། །རྨ་བྱ་ཆེན་མོ་གསང་སྔགས་རྗེས་སུ་འབྲང༌། །བསིལ་བའི་ཚལ་ཏེ་ཡེ་ཤེས་ལྔ་ཡི་སྐུ། །གཟུངས་སྔགས་རྒྱལ་མོ་ལྔ་ལ་ཕྱག་འཚལ་བསྟོད། ཅེས་པས་བསྟོད། རང་གི་སྙིང་ག་ནས་འཕྲོས་པའི་འོད་ཟེར་གྱིས་དྲངས་ནས། དཀྱིལ་འཁོར་གྱི་འཁོར་ལོ་མ་ལུས་པ་བདག་ཉིད་ཀྱི་ཐུགས་ཀར་ཐིམ། དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ཤིང༌། །བསོད་ནམས་ཡེ་ཤེས་ལས་འབྱུང་བའི། །དམ་པ་གཉིས་པོ་ཐོབ་པར་ཤོག །ཅེས་པ་ནི་བདག་བསྐྱེད་དོ། །དེ་ནས་འབྱུང་པོ་སྤྱི་གཏོར་གཅིག་བཤམས། སའི་ལྷ་མོའི་ཚོམ་བུ་དང༌། མཆོད་གཏོར་ཡང་སྒྲིགས་ནས། ཨོཾ་ཨ་མྲྀ་ཏེ་ཧུཾ་ཕཊ། ནས། ཤཔྟའི་བར་གོང་སྔོན་འགྲོ་གཏོར་མའི་སྐབས་བཞིན་ལས་རྣལ་འབྱོར་བདག་ཅག་སོགས་ཀྱི་ཚབ་ཏུ། གང་ཡང་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །ས་འདི་བདག་གིས་བླང་བར་བགྱི། །དཀྱིལ་འཁོར་
དོན་དུ་ཁྱོད་ཀྱིས་སྩོལ། །ཞེས་དྲིལ་གསིལ་དང་བཅས་ཏེ་ལན་གསུམ་གསོལ་བ་བཏབ་ལ་ཕྱིར་རོལ་དུ་དོར། བསངས་སྦྱངས། སྟོང་པར་གྱུར། སྟོང་པའི་ངང་ལས། པཾ་ལས་བྱུང་བའི་སའི་ལྷ་མོ་སེར་མོ་བུམ་པ་ཐོགས་པ་རྒྱན་ཐམས་ཅད་ཀྱིས་བརྒྱན་པ། ས་གཞིའི་དབུས་པདྨ་དཀར་པོའི་ནང་ནས་ལུས་ཀྱི་ཕྱེད་ཕྱུང་བ། ཧཱུཾ་ཧཱུཾ་ཧཱུཾ་ས་འོག་ནས་སའི་ལྷ་མོ་འཁོར་དང་བཅས་པ་བཛྲ་ས་མཱ་ཛཿ ཛཿཧུཾ་བཾ་ཧོཿ མཆོད་པ་བསངས་སྦྱངས། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེའི་སྣོད༴ ཅེས་པ་ནས། སྥ་ར་ཎ་ཁཾ། གི་བར་གོང་བཞིན་མཆོད་པར་བྱིན་རླབས་བྱ། ཨོཾ་པྲི་ཐི་ཝཱི་དེ་བཱི་ས་པཱ་རི་ཝ་ར་ཞེས་མགོ་བོར་སྦྱར་ནས་ཨརྒྷཾ་སྭཱཧཱ། དེ་བཞིན་དུ་པཱ་དྱཾ། ཨོཾ་བཛྲ་པུཥྤེ་ཨཿཧཱུཾ། ནས་ཤཔྟའི་བར། ཨོཾ་པྲི་ཐི་བི་དེ་བཱི། ན་མཿསརྦ་ཏ་ཐཱ་ག་ཏ་བྷྱོཿ ཞེས་པ་ནས། ག་ག་ཎ་ཁཾ་གྲྀཧྞེ་དཾ་བ་ལིཾ་ཏ་སྭཱཧཱ། ལན་ལྔའམ། བདུན་ལ་སོགས་པས་ཕུལ། དྲིལ་གསིལ་དང་བཅས་ཏེ། སྐྱོབ་པ་སངས་རྒྱས་ཐམས་ཅད་ཀྱིས། །སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེངྒེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ཏེ་དཀྱིལ་འཁོར་བྲི། ལན་གསུམ། རིག་པ་འཛིན་པ་དཀྱིལ་འཁོར་གྱི་ལས་ཅི་བདེ་བར་གྱིས་ཤིག །སའི་ལྷ་མོ་སླར་ཡང་ས་དེ་ཉིད་ལ་ཐིམ། ས་བླང་བའོ། །ཨོཾ་ཨ་མྲྀ་ཏེ་ཧཱུཾ་ཕཊ་ཅེས་མང་དུ་བཟླ་ཞིང༌། ཡུངས་ཀར་དར་ཐལ་བས་དཀྱིལ་འཁོར་གྱི་ས་གཞི་ལ་གཏོར་རོ། །དཀྱིལ་འཁོར་གྱི་ས་གཞི་སྟོང་པ་ཉིད་དང་སྙིང་རྗེ་དབྱེར་མེད་
པ་བྱང་ཆུབ་ཀྱི་སེམས་ཀྱི་ངོ་བོའོ། །ས་སྦྱངས་བའོ། །དྲི་བཟང་གི་ཆུ་ལ། ཨོཾ་མ་ཎི་དྷ་རི་སོགས་གཙོ་མོའི་སྔགས་ཉེར་གཅིག་ཙམ་དང༌། ཨ་མྲྀ་ཏ་བརྒྱ་ཙམ་བཟླས། ཆུ་དེ་ཀུ་ཤས་བླངས་ཏེ་དཀྱིལ་འཁོར་གྱི་ས་གཞིར་འཐོར་བཞིན་དུ། ཨོཾ་མ་ཎི་སོགས་དང༌། ཨོཾ་ཨ་མྲྀ་ཏ་བེ་ར་སོགས། ཨོཾ་ཨ་མྲྀ་ཏ་བི་ལོ་སོགས། ཨོཾ་བི་མ་ལེ་སོགས། ཨོཾ་བྷ་ར་སོགས། སྔགས་རྣམས་ལན་བདུན་བདུན་སོགས་ཇི་ལྟར་འོས་པ་བརྗོད། སའི་ཕྱོགས་འདིར་རིག་པ་འཛིན་པ་བདག་གིས་དཀྱིལ་འཁོར་ཆེན་པོ་བྲི་བར་བགྱིའོ། །ཞེས་བརྗོད། དེ་ནི་ས་བཟུང་བ་སྟེ། དེ་དག་ནི་སའི་ཆོ་གའོ། །དེ་ནས་དཀྱིལ་འཁོར་གྱི་ས་གཞིར་དྲིའི་ཐིག་ལེའམ། ཡང་ན་མེ་ཏོག་ཙམ་བཀྲམ། མཆོད་པ་བཤམས༌། བསངས་སྦྱངས། སྟོང་པའི་ངང་ལས། ཡིག་གེ་བྷྲཱུཾ་ལས་བྱུང་བའི་ཞིང་ཁམས་རྣམ་པར་དག་པ་རྒྱན་ཐམས་ཅད་ཀྱིས་བརྒྱན་པ། རིན་པོ་ཆེའི་པདྨ་དང་ཉི་མ་དང༌། ཟླ་བ་ལ་སོགས་པ་ལྷའི་གདན་དཔག་ཏུ་མེད་པས་གཏམས་པར་གྱུར། རང་གི་སྙིང་ག་ནས་འོད་ཟེར་འཕྲོས། བཅོམ་ལྡན་འདས་དཔལ་རྒྱལ་བ་ཤཱཀྱ་ཐུབ་པ་ལ་སོགས་པ་སངས་རྒྱས་དང་བྱང་ཆུབ་སེམས་དཔའ་དང༌། རིག་པའི་རྒྱལ་པོ་དང༌། ཕོ་ཉ་དང་ཕྱག་བརྙན་གྱི་ཚོགས་ཐམས་ཅད་དང༌། ཁྱད་པར་ཏུ་ཡང་བཅོམ་ལྡན་མ་སྲུང་བ་ལྔའི་ལྷ་ཚོགས་ཐམས་ཅད་བཛྲ་ས་མཱ་ཛཿ འོག་དངོས་གཞིའི་སྐབས་སུ་འབྱུང་བ་ལྟར། མ་ལུས་སེམས་ཅན་ཀུན་གྱི་ཞེས་པ་ནས། ཏིཥྛཱནྟུ་སྭཱཧཱ། ཞེས་པའི་བར་དང༌། མཆོད་པ་ཨ་མྲྀ་ཏས་བསངས། ཞེས་པ་ནས། སྤྲིན་རྣམས་སོ་སོར་གནས་གྱུར་ཅིག །ཤཔྟའི་བར་དང༌།
རང་བཞིན་དག་པ་ཉིད་ལས་བྱུང༌། ཞེས་སོགས་ཀྱི་གོང་བཞིན་བསྟོད་ཅིང༌། མགོན་པོ་ཐུགས་རྗེ་ཆེ་ལྡན་པ་ཞེས་སོགས་ཤོ་ལོ་ཀ་གསུམ་དང༌། གཞན་ཡང་སྤྲོ་ན་སངས་རྒྱས་བྱང་སེམས་ཀྱི་སྤྱི་བསྟོད་ཇི་ལྟར་འོས་པས་བསྟོད། དེ་ནས་ལྷའི་བུམ་པ་མཚན་ཉིད་དང་ལྡན་པ་ལྔའམ། མ་འབྱོར་ན་གཅིག་གིས་ཀྱང་རུང་ལ། ཁྲུས་ཀྱི་བུམ་པ་གཅིག་བཤམས་ཏེ། དཀྱིལ་འཁོར་གྱི་ཤར་ཕྱོགས་སམ། རང་གི་མདུན་དུ་བཤམས། གཞན་བུམ་པ་བཤམས་ལུགས་སྤྱི་དང་འདྲ། བསངས་སྦྱངས། སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ། པཾ་ལས་བྱུང་པའི་ཡེ་ཤེས་ཀྱི་བུམ་པ། མཚན་ཉིད་ཐམས་ཅད་ཡོངས་སུ་རྫོགས་པ། ནང་ཡེ་ཤེས་ཀྱི་བདུད་རྩིའི་ཆུ་རྒྱུན་གྱིས་གང་བའི་སྟེང་བུམ་པའི་བསྟོད་ཀྱི་ཆ་ལ། པཾ་ལས་སྣ་ཚོགས་པདྨའི་ལྟེ་བ་ཞེས་པ་ནས། རྡོ་རྗེ་སེམས་དཔས་དབུ་རྒྱན་གྱི་བར། བདག་བསྐྱེད་གཙོ་འཁོར་ལྔ་ཆར་བསྐྱེད། རང་ཉིད་ཅེས་པ་དོར། གཟུངས་ཐག་ནས་བཟུང་ལ། ཨོཾ་མ་ཎི་དྷ་རི་སོགས་སྙིང་པོའི་སྔགས་ལྔ་པོ་རེ་རེ་བཞིན་བརྒྱ་རྩ་ལས་མི་ཉུང་བ་བཟླ། ཁྲུས་བུམ་ལ་ཨ་མྲྀ་ཏ་བརྒྱ་རྩ་དང༌། ཐུན་མོང་དུ་ཨ་བྷི་ཥེ་ཀེའི་སྔགས་ཀྱང་བཟླ། ཨོཾ་སརྦ་ཏ་ཐཱ་ག་ཏ་པཉྩ་རཀྵ་སོགས་ཚོགས་ཞིང་གི་སྐབས་ལྟར་མཆོད། རང་བཞིན་དག་པ་སོགས་ཀྱིས་བསྟོད། རྡོ་རྗེ་སེམས་དཔའི་ཡིག་བརྒྱ་ལན་གསུམ་སོགས་ཇི་ལྟར་འོས་པ་དང༌། མ་འབྱོར་པ་དང་སོགས་ཀྱིས་བཟོད་པར་གསོལ། ཨོཾ་ཨཱཿཧཱུཾ། ཞེས། དུང་ཆོས་ཀྱི་ཆུ་དང་མེ་ཏོག་འབུལ། བཛྲ་མུཿ ཞེས། ཡེ་ཤེས་པ་གཤེགས། དམ་ཚིག་པ་ཞུ་བ་
ལས་བྱུང་བའི་བུམ་པའི་ཆུར་གྱུར། དེ་ནས་བདུག་སྤོས་བརྡུལ་ཞིང༌། དྲིལ་གསིལ་དང་བཅས་ཏེ། བཅོམ་ལྡན་འདས་མ་སྲུང་བ་ལྔ། །རིགས་སྔགས་རྒྱལ་མོ་ཕྱག་འཚལ་འདུད། །སློབ་མ་རྣམས་ལ་བརྩེ་ཕྱིར་དང༌། ཁྱེད་རྣམས་ལ་ཡང་མཆོད་པའི་ཕྱིར། །མགོན་པོ་ཐུགས་རྗེ་བདག་ཉིད་ཅན། །དཀྱིལ་འཁོར་འབྲི་བར་བདག་ཕྱག་འཚལ། །དེ་ཕྱིར་བཅོམ་ལྡན་བདག་གུས་ལ། །བཀའ་དྲིན་གནང་བར་མཛད་པའི་རིགས། །སངས་རྒྱས་འགྲོ་འཁོར་བྱ་དོན་སྩོལ། །བྱང་ཆུབ་སེམས་དཔའ་འབྲས་གནས་དང༌། །གཞན་ཡང་གང་དག་གསང་སྔགས་ལྷ། །ལྷ་དང་འཇིག་རྟེན་སྐྱོང་བ་དང༌། །འབྱུང་པོའི་བྱང་ཆུབ་བསྟན་གནས་དང༌། །སེམས་ཅན་བསྟན་ལ་མངོན་དགའ་བ། །གང་སུ་རྡོ་རྗེའི་སྤྱན་མངའ་རྣམས། །བདག་ལ་ཡང་དག་དགོངས་སུ་གསོལ། །བདག་ནི་ཆེ་གེ་རྡོ་རྗེ་ཅན། །ཆེ་གེ་འབྱུང་བའི་དཀྱིལ་འཁོར་ནི། །ཇི་ལྟར་ནུས་པས་ཉེར་སྤྱོད་པ། །འགྲོ་བ་སྦྱང་ཕྱིར་འབྲི་བར་བྱ། །དེ་ཕྱིར་བདག་དང་སློབ་མ་ལ། །རྗེས་སུ་བརྩེ་བས་ཉེར་བཟུང་ནས། །དཀྱིལ་འཁོར་དང་བཅས་ཐམས་ཅད་ནི། །ཉེ་བར་འབྱོན་པར་མཛད་པའི་རིགས། །ཞེས་ལན་གསུམ་གསོལ་བ་བཏབ། སླར་ཡང༌། རབ་འབྱམས་རྒྱ་མཚོ་དཔག་མེད་ན། སོགས་པ། ཇི་སྙེད་བཅོམ་ལྡན་འདས་མའི་ཚོགས། ཞེས་བསྒྱུར་ཏེ། མཆོད་པ་དང༌། གོང་བཞིན་བསྟོད། ཡིག་བརྒྱ་བཟོད་གསོལ་གཤེགས་གསོལ་རྣམས་གོང་བུམ་བསྐྱེད་ཀྱི་སྐབས་དང་འདྲ་སྟེ། དེ་དག་ནི་སྟ་གོན་གྱི་ཆོ་ག་ཡིན་ལ། སྤྱིར་ལྷ་སྟ་གོན་གྱི་
རིགས་ལ། དཀྱིལ་འཁོར་ངེས་པའི་ལྷག་གནས་དང༌། གསོལ་བ་གདབ་པའི་ལྷག་གནས་གཉིས་ཡོད་པ་ལས། དང་པོ་ནི། ཕལ་ཆེར་ལ་ཡོངས་སུ་གྲགས་པ་དེ་ཡིན་ལ། གཉིས་པ་ནི། འདིར་བཀོད་པ་ལྟ་བུ་དེ་སྤྲོས་པ་ཆུང་བའི་ལུགས་སོ། །གལ་ཏེ་སློབ་མ་ལ་དབང་བསྐུར་ན་སྐབས་འདིར། རྒྱུད་སྡེ་འོག་མའི་ལུགས་ཀྱི་སློབ་མ་སྟ་གོན་ཡང་བྱས་ན་ལེགས་ཏེ། གསང་བ་སྤྱིའི་རྒྱུད་ལས་དེ་བྱེད་པར་གསུངས་པའི་ཕྱིར་རོ། །འོན་ཀྱང་ལག་ལེན་བསྡུས་པའི་སྐབས་སུ་ནི། བླ་མ་གོང་མ་རྣམས་ཀྱི་ཕྱག་ལེན་ལྟར་མ་བྱས་ཀྱང་རུང་ཙམ་ཡིན་ནོ། །གལ་ཏེ་བྱེད་ན་དམ་ཚིག་གསུམ་བཀོད་ལ་སོགས་པའི་ཆོ་གར་བལྟའོ། །དེ་ནས་ཐིགས་སྐུད་དང་རྔུལ་མཚོན་ལེགས་པར་བཀྲུས། བསངས་སྦྱངས། སྟོང་པའི་ངང་ལས་ཨོཾ་ལས་བྱུང་བའི་ཐིག་སྐུད་དང་རྡུལ་ཚོན་རྣམས་དང་བཅས་ཤིང་ཐོགས་པ་མེད་པར་གྱུར། ཨ་མྲྀ་ཏའི་སྔགས་བརྒྱ་རྩ་སོགས་དང༌། ལྷ་མོ་ལྔ་པོའི་སྙིང་པོ་རྣམས་ཇི་ལྟར་འོས་པ་བཟླ། ཡི་གེ་བརྒྱ་པས་བརྟན་པར་བྱས་ཏེ། ཨ་མྲྀ་ཏ་བཟླ་བཞིན་པས་ཐིག་བཏབ། ཡེ་ཐིག་དང་ལས་ཐིག་གི་དབྱེ་བ་འདི་ལ་མི་དགོས། དེའི་འོག་ཏུ་གཙོ་མོའི་སྙིང་པོ་བཟླ་བཞིན་ཏུ་རྡུལ་མཚོན་འགྱེད་དེ་དཀྱིལ་འཁོར་འབྲི་བའོ། །མཐར། རྡུལ་ཚོན་དང་ཐིག་སྐུད་ཀྱི་བྱིན་རླབས་རྣམས་འོད་ཟེར་གྱི་རྣམ་པས་རང་གི་ལུས་ལ་ཐིམ་པར་མོས། ཨ་མྲྀ་ཏ་དང་སྙིང་པོ་མང་དུ་བཟླས། ཛཿཧཱུཾ་བཾ་ཧོཿ ཞེས་བརྗོད། དེ་ནས་ཡིག་བརྒྱ་བཟླས་ཤིང་རྡོ་རྗེ་གསོར་དྲིལ་བུ་དཀྲོལ། ལྷག་ཆད་ཁ་བསྐང༌། བཀྲ་མི་ཤིས་པ་ཐམས་ཅད་བསལ་བར་མོས་སོ། འདིར་དཀྱིལ་འཁོར་ཅུང་ཟད་བསྡུས་པ་ནི།
བདག་སྐྱེད་ཇི་ལྟ་བ་བཞིན་དུ། ལྷ་ལྔ་ཙམ་གྱིས་ཀྱང་ཆོ་ག་སྟེ། དེའི་ཚེ་ཕྱོགས་སྐྱོང་གཟའ་སྐར་རྒྱལ་ཆེན་སོགས་གཏོར་མགྲོན་གྱི་ལྷ་ཙམ་དུ་བྱེད་པ་ཡིན་ཏེ། དེ་ལྟར་བྱས་ནའང་གཞུང་གི་དགོངས་པ་དང་མཐུན་ཞིང་ཤིན་ཏུ་ལེགས་པར་འགྱུར་རོ། །འོན་ཀྱང་བླ་མ་གོང་མ་རྣམས་ཀྱི་མན་ངག་ལྟར་བྱེད་པ་ནི་དཀྱུས་སུ་འབྱུང་བ་འདི་ཉིད་དོ། །དེ་ནས་རྒྱན་དགྲམ་པ་ནི་སྤྲོས་པ་ལ་མི་དགའ་ན། མཆོད་གཏོར་བཟང་དུ་བཤམས། འོག་ཏུ་དགོས་པའི་ཡོ་བྱད་རྣམས་ཚོགས་པར་བྱས། ས་རྒྱན་གནམ་རྒྱན་ཅི་རིགས་པ་ཙམ་བཀོད་པས་ཆོག་གོ །ཅུང་ཟད་སྤྲཽས་པ་ལ་དགའ་ན། དཀྱིལ་འཁོར་གྱི་ཕྱོགས་མཚམས་བརྒྱད་དུ། གདན་གྲུ་བཞི་བརྟན་པ་རེ་བཞག་ལ། དེ་ལ་མདའ་བརྒྱད་བཙུགས། ཚོན་སྐུད་སྣ་ལྔའི་དྲ་བ་བྱ་སྟེ། དབང་ལྡན་གྱི་མདའི་རྩ་བ་སྟེ་མདེའུ་ཕྱོགས་ལ་མཚོན་སྐུད་ཀྱི་སྣེ་མོ་དམ་དུ་བཏགས་ནས། དེའི་ཤར་གྱི་མདའི་ལྟོང་རྩེ་མོར་དཀྲིས། དེའི་ཤར་ལྷོའི་རྩ་བར་འཐེན་ཞིང་དཀྲིས། རིམ་པ་དེ་ཁའི་ཕྱོགས་བཞིའི་རྩེ་མོ་དང༌། མཚམས་བཞིའི་རྩ་བ་འཐེན་པ་ལས། བྱང་གི་རྩེ་ནས་རྩ་བའི་བར་དུ་མཐེན་ཏེ་དཀྲིས་ནས། སླར་བྱང་ཤར་གྱི་རྩེ་མོར་འཐེན་པ་སོགས། མཚམས་བཞིའི་རྩེ་མོ་དང༌། ཕྱོགས་བཞིའི་རྩ་བར་དཀྲིའོ། །དེ་ནས་ཡང་བྱང་གི་རྩ་བ་ནས་རྩེ་མོ་བར་དུ་འཐེན་ཞིང་ལྟོང་ལ་དཀྲིས་ནས། བྱང་གི་རྩ་ནས་ཤར་ལྷོར་བཏང་ཤར་ལྷོ་ནས་ནུབ་ཏུ་བཏང་བ་སོགས། འཁོར་ལོ་རྩིབས་བརྒྱད་ཀྱི་རྣམ་པར་བྲིས། མཐར་མདའ་བརྒྱད་པོའི་ལྟོང་ནས་ལྟོང་གི་བར་དུ་སྐོར་ཏེ་འཁོར་ལོའི་མུ་ཁྱུད་ཀྱི་རྣམ་པར་བྱས་ནས། སྣེ་མོ་ནི་བྱང་ཤར་གྱི་
མདའི་རྩ་བར་དྲངས་ནས་བསྡུའོ། །ཕུར་པ་བརྒྱད་དང༌། རལ་གྲི་བརྒྱད་རྩེ་མོར་ཐུར་དུ་བསྟན་ལ། མདའ་རེ་རེའི་འཁྲིས་སུ་བཙུགས། མེ་ལོང་བརྒྱད། རྨ་བྱའི་མདོངས་བརྒྱད། འཕན་བརྒྱད་རྣམས་ཀྱང་མདའི་རྩེ་མོར་བཏགས། ཕྱོགས་བཞིའི་མདའ་ལ་རྒྱལ་ཆེན་བཞིའི་ཙ་ཀ་ལི་བཀྲམ་མོ། །དེ་དག་ཡོངས་རྫོགས་མ་འབྱོར་ན། ཇི་ལྟར་འབྱོར་བས་ཆོག་གོ །རེ་རེ་ནས་མཐའ་གཅིག་ཏུ་མེད་མི་རུང་བ་མ་ཡིན་ནོ། །ད་ལྟ་ནི་རས་བྲིས་ཀྱི་ཕྱོགས་ལ་མདའ་མཚོན་གྱི་དྲྭ་བ་བྱེད་ཅིང༌། རྡུལ་ཚོན་ལ་མི་བྱེད་པ་མང་མོད་ཐོབ་ཐང་ནི་རྡུལ་ཚོན་ལ་དགོས་ཀྱིས་རས་བྲིས་ལ་མེད་ཀྱང་ཆོག་གོ །བྱང་ཤར་དུ་མཚམས་འཛིན་གྱི་མེ་ཏོག། ཤར་དུ་མཆོད་ཡོན། ཤར་ལྷོར་ཞབས་གསིལ་སོགས་མཆོད་པ་སྐོར་ཏེ་བཤམས་ཀྱང་ཆོག། དཀྱིལ་འཁོར་གྱི་གཡས་སུ་གཏོར་མགོ་ཡང་མདུན་བསྐྱེད་ཉིད་ཀྱི་གཡས་སུ་བསྟན་ཏེ། འདས་གཏོར་གཅིག་གོ །ཕྱོགས་སྐྱོང་བཅུ་ལ་གཅིག །རྒྱལ་ཆེན་བཞི་ལ་རེ་རེ། གཟའ་ལ་གཅིག །རྒྱུ་སྐར་ལ་གཅིག །ཡང་དཀར་གཏོར་གཉིས། དམར་གཏོར་ལྔ། ཡང་ཀླུ་དང་འབྱུང་པོ་བཞི་བདག་གསུམ་ལ་དཀར་གཏོར་རེ་རེ། བགེགས་གཏོར་གཅིག་གོ །དེ་ལྟར་ན་གཏོར་མ་བཅོ་བརྒྱད་གྲལ་སྒྲྀགས་སུ་བྱ། རྒྱལ་ཆེན་གྱི་སྡེབས་ལ་དབུས་ཀྱི་གཏོར་མ་བྱེད་ན་བཅུ་དགུའོ། །ཆོས་སྐྱོང་དགོས་ཀྱི་གཏོར་མ་བྱེད་ན་ཟུར་དུ་བཤམས། རེ་རེ་བཞིན་རས་དཀར་པོའི་བ་དན་འཛུགས། དེ་ནས་དངོས་གཞིའི་ཆོ་ག་ནི། གོང་དུ་བཤད་པ་ལྟར། སྔོན་འགྲོ་གཏོར་མ། གནས་ཡོ་བྱིན་
རླབས། སྐྱབས་འགྲོ་ནས་བརྩམས་ཏེ། དམ་པ་གཉིས་པོ་ཐོབ་པར་ཤོག་གི་བར་བདག་བསྐྱེད་རྫོགས་པར་སྒོམས། དེ་རྗེས་སྤྲོ་ན་མདུན་བསྐྱེད་ལ་བགེགས་སྦྱང་བ། སྡིག་པ་སྦྱང་བ། ཁྲུས་གསོལ་བ་སོགས་ཀྱང་བྱ་སྟེ། མདུན་བསྐྱེད་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་ལས་སྣ་ཚོགས་རྡོ་རྗེ་ཞེས་པ་ནས། དབུས་དཀར་བའི་སྟེང་དུ་འཁོར་ལོ་སྔོན་པོ་རྩིབས་བརྒྱད་པ། དེའི་ལྟེ་བ་ལ་པདྨ་འདབ་མ་བརྒྱད་པའི་གདན། ཡང་དེའི་དབུས་སུ། པཾ་ལས་སྣ་ཚོགས་པདྨ༴ ཞེས་པ་ནས། ཁ་རྒྱན་དང་བཅས་པ་རེ་རེའོ། །ཞེས་པའི་བར་བདག་བསྐྱེད་དང་འདྲ་བ་ལས་རང་ཉིད་ཅེས་པ་དོར། ཕྱི་རོལ་གྱི་པདྨའི་འདབ་མ་བརྒྱད་ལ། ཤར་དུ་ཚངས་པ་དང་བརྒྱ་སྦྱིན་ཤར་ལྷོར་མེ་ལྷ། ལྷོར་གཤིན་རྗེ། ལྷོ་ནུབ་དུ་སྲིན་པོ། ནུབ་ཏུ་ཆུ་ལྷ་དང༌། སའི་ལྷ་མོ། ནུབ་བྱང་རླུང་ལྷ། བྱང་དུ་གནོད་སྦྱིན། བྱང་དུ་དབང་ལྡན་ཏེ་ཕྱོགས་སྐྱོང་བཅུའོ། །དེའི་ཕྱི་རོལ་འཁོར་ལོའི་རྩིབས་བརྒྱད་པ་རྣམས་ལ། ཤར་དུ་ཉི་མ་དང༌། ཟླ་བ། ཤར་ལྷོར་མིག་དམར། ལྷོར་གཟའ་ལྷག །ལྷོ་ནུབ་ཏུ་ཕུར་བུ། ནུབ་ཏུ་པ་སངས། ནུབ་བྱང་དུ་སྤེན་པ། བྱང་སྒྲ་གཅན་ལུས་ཕྱེད་ཤིན་རྟ་ལ་གནས་པ། བྱང་ཤར་དུ་དུ་བ་མཇུག་རིངས་སོ། །དེའི་ཕྱི་རོལ་ལྷ་རྣམས་ཀྱི་སྟེང་ཟླུམ་པོར་སྐོར་བ་ལ། ཤར་དུ་
སྨིན་དྲུག སྣར་མ་མགོ་ལག ནམ་སོ། རྒྱལ། སྐག་རྣམས་སྐུ་མདོག་དཀར་བ། ལྷོར་མཆུ། བྲེ། དབོ། མེ་བཞི། ནག་པ། ས་རི། ས་ག །རྣམས་སྐུ་མདོག་སེར་པོ། ནུབ་ཏུ་ལྷ་འཚམས། སྣོན་སྣུབས་ཆུ་སྟོད་ཆུ་སྨད་གྲོ་ཞིན། བྱི་ཞིན་རྣམས་སྐུ་མདོག་དམར་མོ། བྱང་དུ་མིན་བྲེ། མིན་གྲུ་ཁྲུམས་སྟོད། ཁྲུམས་སྨད། ནམ་གྲུ། རྒྱལ། ཐ་སྐར། བྲ་ཉེ་རྣམས་སྐུ་མདོག་ལྗང་ཁུའོ། །ཐམས་ཅད་ཀྱང་ལྷ་མོའི་ལུས་ཅན། ཐལ་མོ་སྤྱི་བོར་སྦྱར་བ་བསྟན་ནང་ཚངས་ཅན་ལ་བཞུགས་པའོ། །ཤར་སྒོར་རྒྱལ་པོ་ཡུལ་འཁོར་སྲུང༌། ལྷོ་སྒོར་རྒྱལ་པོ་འཕགས་སྐྱེས་པོ། ནུབ་སྒོར་རྒྱལ་པོ་སྤྱན་མི་བཟང༌། བྱང་སྒོར་རྒྱལ་པོ་རྣམ་ཐོས་བུ་རྣམས། རང་རང་གི་འཁོར་ཚོགས་དཔག་ཏུ་མེད་པ་དང་བཅས་ཏེ་བཞུགས་པར་གྱུར། དེ་ནས་རང་སྔགས་ཀྱི་ལྷར་སྒྲུབ་པ་ནི། དབུས་ཀྱི་གཙོ་མོ་ལྔ་ལ། མ་ཎི་དྷ་རི་སོགས་སྔགས་ཚན་ལྔ་པོ་རེ་རེ་བཞིན་ལན་བདུན་བདུན་དང༌། ལྷག་མ་འཇིག་བརྟེན་པའི་སྔགས་འདི་རྣམས་ལ་ལན་གསུམ་གསུམ་བྱེད་དེ། ཨོཾ་ཨིནྡྲ་ཡེ་སྭཱཧཱ། ཨོཾ་ཨགྣ་ཡེ་སྭཱཧཱ། ཨོཾ་ཡ་མ་ཡེ་སྭཱཧཱ། ཨོཾ་ནི་རི་ཏི་ཡེ་སྭཱཧཱ། ཨོཾ་བ་རུ་ཎཱ་ཡ་སྭཱཧཱ། ཨོཾ་བ་ཡ་བེ་སྭཱཧཱ། ཨོཾ་ཀུ་བཻ་རཱ་ཡ་སྭཱཧཱ། ཨོཾ་ཨི་ཤཱ་ན་ཡེ་སྭཱཧཱ། ཨོཾ་པྲ་ཧྨཱ་སྭཱཧཱ། ཨོཾ་པྲ་ཐི་བཱི་དི་བཱི་སྭཱཧཱ། ཕྱོགས་སྐྱོང་རྣམས་སོ། ཨོཾ་མཻ་གོ་ལྐ་ཡེ་སྭཱཧཱ། ཨོཾ་ཤཱི་ཏཱཾ་ཤ་བེ་སྭཱཧཱ། ཨོཾ་རཀྵ་ཨཾ་ག་ཀུ་མ་ར་སྭཱཧཱ། ཨོཾ་བུདྡྷ་ཡ་སྭཱཧཱ། ཨོཾ་པྲི་ཧསྤ་ཧེ་སྭཱཧཱ། ཨོཾ་
ཤུ་ཀྲ་ཡ་སྭཱཧཱ། །ཨོཾ་ཀྲྀཥྞ་བརྞ་སྭཱཧཱ། ཨོཾ་ཨ་མྲྀ་ཏ་པྲི་ཡ་སྭཱཧཱ། ཨོཾ་ཛྱོ་ཏི་ཀེ་ཏ་ཝེ་སྭཱཧཱ། གཟའ་རྣམས་སོ། །ཨོཾ་ཀིརྟི་ཀ་སྭཱཧཱ། ཨོཾ་རོ་ཧི་ཎི་སྭཱཧཱ། ཨོཾ་མྲི་ག་ཤཱི་ར་སྭཱཧཱ། ཨོཾ་ཨ་ར་དྲ་སྭཱཧཱ། ཨོཾ་པུ་ན་ར་བ་སུ་སྭཱཧཱ། ཨོཾ་པུུ་ཥྱ་སྭཱཧཱ། ཨོཾ་ཨསྨ་ཤཱ་སྭཱཧཱ། ཨོཾ་མ་གྷ་སྭཱཧཱ། ཨོཾ་པུརྦ་ཕ་ལ་གུ་ནི་སྭཱཧཱ། ཨོཾ་ཨུཏ་ཏེ་ར་ཕ་ལྐུ་ནེ་སྭཱཧཱ། ཨོཾ་ཧསྟ་སྭཱཧཱ། ཨོཾ་ཙི་ཏྲ་སྭཱཧཱ། ཨོཾ་སྭ་སྟི་སྭཱཧཱ། ཨོཾ་བཱི་ཤཱ་ཁ་སྭཱཧཱ། ཨོཾ་ཨ་ནུ་རཏྫ་སྭཱཧཱ། ཨོཾ་ཛེ་ཥྟ་སྭཱཧཱ། ཨོཾ་མཱུ་ལ་སྭཱཧཱ། ཨོཾ་པུརྺ་ཨ་ཤནྡྷ་སྭཱཧཱ། ཨོཾ་ཨུཏ་ཏ་ར་ཨ་ཤརྡྷ་སྭཱཧཱ། ཨོཾ་ཤྲ་མ་ཎཱ་སྭཱཧཱ། ཨོཾ་ཨ་བྷེ་ཏཱ་སྭཱཧཱ། ཨོཾ་དྷ་ནིཥྟི་སྭཱཧཱ། ཨོཾ་ཤ་ཏ་བྷེ་ཥཱ་སྭཱཧཱ། ཨོཾ་སུརྦ་བྷ་དྲ་པ་ད་སྭཱཧཱ། ཨོཾ་ཨུད་ཏ་ར་བྷ་དྲ་ར་ད་སྭཱཧཱ། ཨོཾ་རེ་བ་ཏི་སྭཱཧཱ། ཨོཾ་ཨི་ཤཱེ་ནེ་སྭཱཧཱ། ཨོཾ་བྷ་ར་ཎི་སྭཱཧཱ། སྐར་མ་རྣམས་ཀྱིའོ། །ཨོཾ་དྷྲཱི་ཏི་རཥྟ་ཡ་སྭཱཧཱ། ཨོཾ་བི་རུ་ཌྷ་ཀཱ་ཡ་སྭཱཧཱ། ཨོཾ་བི་རུ་པཱ་ཀྵ་ཡ་སྭཱཧཱ། ཨོཾ་བཻ་ཤྲ་མ་ཎཱ་ཡ་སྭཱཧཱ། རྒྱལ་ཆེན་བཞིའི་འོ། །གཙོ་འཁོར་ཐམས་ཅད་ཀྱི་དཔྲལ་པར་ཨོཾ༴ ནས། ཧཱུཾ་ནག་པོ། རང་གི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས། ཡེ་ཤེས་སེམས་དཔའ་སྲུང་བ་ལྔའི་དཀྱིལ་འཁོར་གྱི་ལྷ་ཚོགས་ལ། སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿ ཚིགས་བཅད་རེ་རེའི་མཐར་དྲིལ་གསིལ་དང་བཅས་རྡོ་རྗེ་གཡབ་ཅིང༌། དབྱངས་དང་བཅས་པའམ་མེད་ཀྱང་རུང་སྟེ། ཆོས་དབྱིངས་རང་བཞིན་རྣམ་པར་དག་པའི་ངང༌། །ཀུན་དུ་ཁྱབ་པའི་གནས་མཆོག་སྡུག་པོ་དང༌། །
རྣམ་པར་དག་པའི་ཞིང་ཁམས་རབ་འབྱམས་ནས། །ཡེ་ཤེས་དཀྱིལ་འཁོར་མཐའ་དག་གཤེགས་སུ་གསོལ། །བདེ་གཤེགས་ཀུན་ཀྱི་ཐུགས་རྗེ་སྟོབས་ཉིད་དང༌། །བདག་ཅག་དད་པའི་བསམ་པ་རྣམ་དག་པས། །ཐུགས་དམ་བསྐུལ་ཞིང་སྤྱན་འདྲེན་གསོལ་འདེབས་ན། །འགྲོ་བའི་དོན་ཕྱིར་གནས་འདིར་བྱོན་ཏུ་གསོལ། །ཏིང་འཛིན་སྔགས་དང་ཕྱག་རྒྱ་མ་ཉམས་ཤིང༌། །རྗེས་མཐུན་མཆོད་པ་ཡོ་བྱད་ཐམས་ཅད་ཚང༌། །འགྲོ་བའི་དོན་གྱི་དུས་ལའང་བབས་ལགས་ན། །སྲིད་ཞིའི་རྒྱུད་པ་བསལ་ཕྱིར་གཤེགས་སུ་གསོལ། །རིགས་སྔགས་རྒྱལ་མོ་སྟོང་ཆེན་རྨ་བྱ་ཆེ། །འཁོར་ལོའི་གཙོ་མོ་བཅོམ་ལྡན་སོ་སོར་འབྲང༌། །ཐུབ་དཀར་གསང་སྔགས་རྗེས་འཛིན་བསིལ་བའི་ཚལ། །གཟུངས་ཀྱི་ལྷ་མོ་འཁོར་བཅས་གནས་འདིར་སྤྱོན། །མ་ལུས་སེམས་ཅན་ཀུན་ཀྱི་མགོན་གྱུར་ཅིང༌། །ཞེས་པ་ནས། ཡོངས་དག་འཁོར་དང་བཅས་ཏེ་གཤེགས་སུ་གསོལ། །བཛྲ་ས་མཱ་ཛཿ བཅོམ་ལྡན་ཐུགས་རྗེས་བྱོན་པ་ལེགས། །བདག་ཅག་བསོད་ནམས་སྐལ་པར་ལྡན། །བདག་གི་མཆོད་ཡོན་བཞེས་གནས་སུ། །འདི་ཉིད་དུ་ནི་བཞུགས་སུ་གསོལ། །ཨོཾ་བཛྲ་ཨགྷཾ་སྭཱཧཱ། ཇི་ལྟར་བལྟམས་པ༴ ཞེས་པ་ནས། ས་མ་ཡ་ཤྲི་ཧཱུཾ་གིས་ཁྲུས་གསོལ། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་
བཞུགས་སོ་གསོལ། །ཨོཾ་ཨཱ་ས་ན་ཏཎྵཱནྟུ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ནས་ཤཔྟའི་བར་གྱིས་མཆོད། ཨོཾ་བཛྲ་ཨཾ་གུ་ཤ་ཛཿ ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་བཛྲ་ཨཱ་བེ་ཤ་ཨཿ ཡང་གཙོ་མོའི་ཐུགས་ཀ་ནས་འོད་ཟེར་འཕྲོས། ཞེས་པ་ནས། རྡོ་རྗེ་སེམས་དཔའི་དབུ་རྒྱན། ཡང་ན། འཇིག་རྟེན་པའི་ལྷ་རྣམས་ལ་གཙོ་མོའི་དབུ་རྒྱན་པར་བྱས་ཀྱང་རུང་ངོ༌། །དེ་ནས་མཆོད་པ་ཨ་མྲྀ་ཏས་བསངས། སྭ་དྷ་ཝས་སྦྱངས། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེའི་སྣོད༴ ཅེས་པ་ནས། བི་ཤོ་དྷ་ནི་སྭཱཧཱའི་བར་གྱིས་བྱིན་གྱིས་རླབས། ཨོཾ་བདེ་བར་གཤེགས་སོ་བཅོམ་ལྡན་འདས། །ཚུར་གཤེགས་འདིར་ནི་བཞུགས་སུ་གསོལ། །བདག་གིས་མཆོད་ཡོན་བཞེས་ནས་ཀྱང༌། །ཐུགས་ལ་དགོངས་ཤིང་གནང་བར་མཛོད། །ཨོཾ་སརྦ་ཏ་ཐཱ་ཏ་པཉྩ་རཀྵ་དེ་བ་ཏ་ས་པཱ་རི་ཝ་ར་ཨརྒྷཾ་པྲ་ཏཱིཙྪ་པུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། མཆོད་ཡོནཞེས་པར་ཞབས་བསིལ་དང༌། ཨརྒྷཾ་ཞེས་པར་པཱདྱཾ་སྦྱར་ཏེ་ཞབས་གསིལ་འབུལ། གཙང་ཞིང་གཙང་མར་སྐྱེས་པ་ཡི། །མེ་ཏོག་དམ་པ་འདིར་དག་ནི། བདག་གི་དད་པས་འབུལ་ལགས་ཀྱི། །བཞེས་ནས་བདག་ལ་དགྱེས་པར་མཛོད། པུཥྤེ༴ དྲི་ཡིས་རྒྱས་པ་ལྷ་ཡི་རྫས། །ནགས་ཚལ་བཅུད་ནི་ཡིད་འོང་འདི། །བདག་གི་དད་པས༴ བཞེས་ནས་བདག༴ དྷུ་པེ༴ གདོན་རྣམས་འཇོམས་ཤིང་བཀྲ་ཤིས་ལ། །དགེ་ཞིང་མུན་པ་རྣམ་སེལ་འདི། །བདག་གིས༴
བཞེས་ནས༴ ཨཱ་ལོ་ཀེ༴ །གཙང་ཞིང་གཙང་མ་ལས་བྱུང་བའི། །ལྷ་རྫས་བཟང་པོའི་དྲི་འདི་དག །བདག་གིས༴ བཞེས་ནས༴ གནྡྷེ༴ སྨན་རྣམས་བཅུད་ནི་ཡིད་གར་འོང༌། །སྔགས་ཀྱི་ཞལ་ཟས་བཤོས་འདི་དག །བདག་གིས༴ བཞེས་ནས༴ ནཻ་ཝི་ཏྱ༴ དེ་ལས་གཞན་ཡང་མཆོད་པའི་ཚོགས། །རོལ་མོ་དབྱངས་སྙན་ཡིད་འོང་ལྡན། སེམས་ཅན་སྡུག་བསྔལ་ཚིམ་བྱེད་པའི། །སྤྲིན་རྣམས་སོ་སོར་གནས་གྱུར་ཅིག ཤཔྟ༴ ལྷ་རྫས་ལས་གྲུབ་ལྟེ་བ་ཤིན་ཏུ་ཟླུམ། ཞེས་པ་ནས། འཁོར་ལོ་རིན་ཆེན་ནམ་མཁའ་བཀང་སྟེ་འབུལ། ཙཀྲ་རཏྣ་པུ་ཛ་མེ་གྷ༴ སོགས། དེས་མཚོན་ཏེ། དམག་དཔོན་གྱི་བར་ལ་སྦྱར་རོ། །དེ་ནས། ཁ་དོག་དབྱིབས་ལེགས་ཡིད་འོང་རྒྱན་འཕྲེང་ལྡན། ཞེས་སོགས་འདོད་ཡོན་ལྔའི་ཚིགས་བཅད་སྤྱི་དང་འདྲ་བས་ཕུལ། སྔགས་རྣམས་གོང་གིས་རིགས་འགྲེ་སྟེ། ཨོཾ་སརྦ་ཏ་ཐཱ་ག་ཏ་པཉྩ་རཀྵ་དེ་བ་ཏཱ་ས་པཱ་རི་ཝཱ་ར་སྤར་ཤ་ཀཱ་མ་གུ་ཎ་པུ་ཛ་མེ་ག་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཞེས་པ་ལྟ་བུའོ། །ལྷ་ཡི་དབང་པོ་ལྷ་མིན་གཡུལ་རྒྱལ་ཚེ། །བཀྲ་ཤིས་ལྷ་མོ་བརྒྱད་ཀྱིས་མཆོད་པ་ལྟར། །སྲུང་བ་ལྔ་འདུས་དཀྱིལ་འཁོར་ལྷ་ཚོགས་ལ། །བཀྲ་ཤིས་རྫས་བརྒྱད་དག་གིས་མཆོད་པར་བགྱི། མངྒ་ལ་ཨཥྟ་དྲ་བྱ། ཞེས་འདོན་པ་བསྒྱུར་རོ། །ཡང་དེ་དང་འདྲ་བ་ལས། བཀྲ་ཤིས་རྟགས་བརྒྱད་ཅེས་དང༌། མངྒ་ལ་ཨཥྟ་ཨཾ་ག་ཞེས་བསྒྱུར་རོ། །དེ་ནས་བསྟོད་པ་ནི། གཟུགས་ཕུང་གནས་གྱུར་གཏི་མུག་
རྣམ་དག་པ། །མེ་ལོང་ཡེ་ཤེས་རང་བཞིན་ལྷ་མོའི་སྐུ། །རྒྱལ་བ་ཀུན་གྱི་སྐུ་ཡི་རིགས་ལས་བྱུང༌། །སོ་སོར་འབྲང་མའི་ཞབས་ལ་ཕྱག་འཚལ་ལོ། །གདོང་བཞི་ཞི་བ་དགའ་བྱེད་གོས་སེར་ཅན། །མཁའ་ལྡིང་ཀླུ་དབང་གནོད་སྦྱིན་དྲི་ཟ་དང༌། །མི་འམ་ཅི་ཡི་ཚོགས་ཀྱིས་གུས་མཆོད་པ། །བྱང་ཆུབ་ཤིང་དྲུང་བཞུགས་ལ་ཕྱག་འཚལ་ལོ། །ཉོན་མོངས་ཞགས་པས་འཆིང་བ་གཅོད་མཛད་ཅིང༌། །གཞན་གྱི་སྔགས་དང་ཕྱག་རྒྱ་རྫས་སྦྱོར་དང༌། །བྱད་སྟེམས་བྱེད་དང་དྲག་ཤུལ་རྣམ་པ་ཀུན། །རབ་ཏུ་འཇོམས་པ་ཁྱོད་ལ༴ དཀོན་མཆོག་ལ་མཆོད་མངོན་པར་བརྩོན་པ་དང༌། །བརྩེ་བས་གཞན་དོན་གཅིག་ཏུ་ལྷུར་ལེན་ཞིང༌། །ཐེག་པ་མཆོག་གི་བརྟུལ་བཞུགས་འཛིན་པ་རྣམས། །ཡོངས་སུ་སྐྱོང་པ་ཁྱོད་ལ༴ རྣམ་ཤེས་གནས་གྱུར་ཞེ་སྡང་རྣམ་དག་ལ། །ཆོས་དབྱིངས་ཡེ་ཤེས་ལས་བྱུང་ལྷ་མོའི་སྐུ། །རྒྱལ་བ་ཀུན་གྱི་ཐུགས་ཀྱི་རིགས་ལས་བྱུང༌། །སྟོང་ཆེན་རབ་འཇོམས་ཞབས་ལ༴ ཉི་མར་རོལ་པས་འགེགས་དང་འབྱུང་པོ་མནན། །མ་མོ་བདུན་དང་སྲིན་མོ་ཤ་ཟ་མོ། །གནོད་སྦྱིན་མོ་རྣམས་རབ་ཏུ་སྐྲག་མཛད་མ། །བྷ་ཊའི་ཤིང་དྲུང་བཞུགས་ལ༴ རླུང་དང་བད་ཀན་མཁྲིས་པའི་ནད་སེལ་ཞིང༌། །ཐོག་དང་སེར་བ་རླུང་སོགས་གནོད་པ་སེལ། །དུས་མིན་འཆི་བ་ངེས་པར་འཇོམས་མཛད་མ། །འཇིགས་བྱེད་ཁྲོ་མོའི་ཞབས་ལ༴ ཚོར་བ་གནས་གྱུར་སེར་སྣ་རྣམ་དག་པ། །མཉམ་
ཉིད་ཡེ་ཤེས་རང་བཞིན་ལྷ་མོའི་སྐུ། །རྒྱལ་བ་ཀུན་གྱི་ཡོན་ཏན་རིགས་ལས་བྱུང༌། །རྨ་བྱ་ཆེན་མོའི༴ བདེན་པ་གྲུབ་པའི་དྲང་སྲོང་རྣམས་ཀྱི་མཆོད། །སྲིན་མོའི་ཚོགས་འཇོམས་ཀླུ་རྣམས་སྐྲག་མཛད་ཅིང༌། །ལྷ་མ་ཡིན་རྣམས་ཀུན་ཏུ་རྨོངས་བྱེད་པ། །མྱ་ངན་མེད་པའི་ཤིང་དྲུང་བཞུགས་ལ་འདུད། །བརྟན་དང་གཡོ་བའི་དུག་རྣམས་རབ་འཇོམས་ཤིང༌། །དམོད་པའི་མདའ་དང་འཁྲུལ་འཁོར་འཇིགས་པར་བྱེད། །སྒྲུབ་པོ་དྲི་མེད་བདེ་ལ་འགོད་མཛད་པ། །རིགས་སྔགས་རྒྱལ་མོའི་ཞབས་ལ༴ །འདུ་ཤེས་གནས་གྱུར་འདོད་ཆགས་རྣམ་དག་པ། །ཀུན་རྟོགས་ཡེ་ཤེས་རང་བཞིན་ལྷ་མོའི་སྐུ། །རྒྱལ་བ་ཀུན་གྱི་གསུང་གི་རིགས་ལས་བྱུང༌། །གསང་སྔགས་རྗེས་སུ་འཛིན་ལ༴ འཇིག་རྟེན་སྐྱོང་བ་རྣམས་ཀྱིས་ཞབས་མཆོད་ཅིང༌། །རྒྱལ་ཆེན་བཞི་ཡིས་རྟག་པར་རིམ་གྲོ་བྱེད། །རིག་པ་འཛིན་པ་རྣམས་ཀྱི་གུས་བཏུད་པ། །ཤིར་ཤའི་ཤིང་དྲུང་བཞུགས་ལ༴ ཡེ་ཤེས་སྒྱུ་མའི་སྤྲུལ་པ་རྣམ་རོལ་ཞིང༌། སྔགས་ཀྱི་སྦྱོར་བས་འགྲོ་བ་ཡོངས་སུ་འཛིན། །ལྷ་དང་ལྷ་མིན་ཀླུ་དབང་ཚོགས་རྣམས་ཀུན། །དབང་དུ་མཛད་པ་ཁྱོད་ལ༴ འདུ་བྱེད་གནས་གྱུར་ཕྲག་དོག་རྣམ་དག་པ། །བྱ་གྲུབ་ཡེ་ཤེས་རང་བཞིན་ལྷ་མོའི་སྐུ། །རྒྱལ་བ་ཀུན་གྱི་འཕྲིན་ལས་རིགས་ལས་བྱུང༌། །བསིལ་བའི་ཚལ་གྱི་ཞབས་ལ༴ ལྷ་དང་གྲུབ་པ་རིག་འཛིན་གྱིས་མཆོད་ཅིང༌། །སྨྱོ་
བྱེད་བརྗེད་བྱེད་ལ་སོགས་འབྱུང་པོའི་ཚོགས། །ཀུན་ཏུ་སྐྲག་མཛད་བྱ་ཡི་གདོན་རྣམས་འཇོམས། །ཙམ་པའི་ཤིང་དྲུང་བཞུགས་ལ་ཕྱག་འཚལ་ལོ། །ཞི་དང་རྒྱས་དང་དབང་དང་དགུག་པ་དང༌། །སྐྲད་དང་དབྱེ་བ་བསད་པ་ལ་སོགས་ཏེ། །ལས་རྣམས་ཐམས་ཅད་སོ་སོར་སྩོལ་མཛད་པ། །དོན་ཀུན་སྒྲུབ་བྱེད་མ་ལ༴ གླང་ཆེན་ས་སྲུངས་བུ་ལ་ནི། །རོལ་བའི་བཞུགས་པ་གསེར་མདོག་ཅན། །རྡོ་རྗེ་འཆང་པ་ལྷ་ཡི་རྗེ། །བརྒྱ་སྦྱིན་ལ་ཡང་ཕྱག་འཚལ་ལོ། །རྣམས་པར་བསྒྱིངས་པའི་མ་ཧེ་ལ། །མཉམ་པར་གནས་པ་ཨ་བྷྲ་མདོག །བེ་ཅོན་འཆང་བ་མ་མོའི་རྗེ། །གཤིན་རྗེ་ལ་ཡང་༴ ཆུ་སྲིན་ལ་གནས་ཆུ་ཤེལ་མདོག །ནོར་བུ་དང་བཅས་གདེང་ཀས་རྒྱན། །སྦྲུལ་ཞགས་འཛིན་པ་ཀླུ་ཡི་རྗེ། །ཆུ་ལྷ་ལ་ཡང་ཕྱག་འཚལ༴ །རྟ་མཆོག་བཞོན་པ་གསེར་མདོག་ཅན། །ནོར་བུས་མཚན་པའི་དབྱུག་ཐོ་དང༌། །ནེའུ་ལེ་འཛིན་པ་གནོད་སྤྱིན་རྗེ། །ལུས་ངན་པོ་ལ༴ ཁྱུ་མཆོག་ལ་གནས་འཇིགས་ཆེན་པོ། །ཕྱུགས་བདག་ཆེན་པོ་ཀུན་དའི་མདོག །རྩེ་གསུམ་འཆང་བ་འབྱུང་པོའི་རྗེ། །དབང་ལྡན་ལ་ཡང་༴ ར་སྐྱེས་ཞོན་ཞིང་ཆེས་དམར་བ། །མཆོག་སྦྱིན་དབྱུག་གུ་བགྲང་འཕྲེང་དང༌། །གྷུནྡྷཱ་འཛིན་པ་དྲང་སྲོང་ཆེ། །མེ་ཡི་ལྷ་ལ༴ གད་རྒྱངས་སྒྲོགས་པའི་རོ་ལངས་ལ། །བརྟན་པར་གནས་པ་ཆར་སྤྲིན་མདོག རལ་གྲི་འཆང་བ་སྲིན་པོའི་རྗེ། །བདེན་བྲལ་ལ་ཡང་༴ ཤིན་ཏུ་མགྱོགས་པའི་རི་དྭགས་ཀྱི། །བཞོན་པ་ལ་གནས་མར་གད་མདོག །བ་དན་འཛིན་པ་
རིག་འཛིན་རྗེ། །རླུང་གི་ལྷ་ལ༴ ངང་པའི་རྒྱལ་པོ་ལ་གནས་པ། །གསེར་མདོག་གདོང་བཞི་པདྨ་དང༌། །བགྲང་འཕྲེང་གྷུན་རྡེ་གླེགས་བམ་འཛིན། །སྐྱེ་རྒུའི་མེས་པོར༴ ཕག་ལ་ཞོན་ཞིང་བརྟན་པར་གནས། །ཤིན་ཏུ་འབར་བའི་གསེར་མདོག་ཅན། །བདུད་རྩིས་གང་བའི་བུམ་པ་འཛིན། །སྐྱེ་རྒུའི་མ་ལ༴ ལི་ཁྲིའི་མདོག་མཚུངས་རབ་མཛེས་ཤིང༌། །ཤིང་རྟའི་སྟེང་ན་ཉི་དཀྱིལ་བཞུགས། །པདྨ་དམར་པོའི་སྡོང་བུ་འཛིན། །གཟི་བརྗིད་རྒྱས་ལ༴ ཀུན་ད་ལྟར་དཀར་ཟླ་བ་ནི། །བསིལ་ཟེར་བྱེད་པའི་དབུས་ན་བཞུགས། །ཀུ་མུད་ཏ་ཡི་སྡོང་བུ་འཛིན། །ཞི་མཛད་དེ་ལ༴ མིག་དམར་པདྨ་རཱ་གའི་མདོག །ར་སྐྱེས་བཞོན་ཞིང་ཁྲོ་ཚུལ་ཅན། །གྲི་གུག་དང་ནི་མི་མགོ་འཛིན། །མཐུ་ཆེན་དེ་ལ༴ གཟའ་ལྷག་མར་གད་ལྟར་ལྗང་ཞིང༌། །པདྨ་ལ་གནས་ཞི་བའི་སྐུ། །མཛེས་ཤིང་རབ་སྒེག་མདའ་གཞུ་འཛིན། བདེ་མཛད་དེ་ལ༴ དྲང་སྲོང་ཕུར་བུ་གསེར་མདོག་ཅན། །གླང་ཆེན་སྟེང་ན་རོལ་པས་བཞུགས། བགྲང་འཕྲེང་རོལ་བ་སྤྱི་བླུགས་འཛིན། །ཐུགས་རྗེ་ཅན་ལ༴ པ་སངས་གངས་རིའི་མདོག་མཚུངས་པ། །པདྨ་ལ་གནས་བཞད་པའི་ཞལ། །ཤེལ་འཕྲེང་དང་ནི་རིལ་བ་འཛིན། །ཕན་མཛད་དེ་ལ༴ སྤེན་པ་མིག་སྨན་ལྟར་གནག་ཅིང༌། །ལྷོ་ཕྱེ་ལ་ཞོན་འཇིགས་པའི་ཚུལ། །འཕྲེང་པ་དང་ནི་དབྱུག་གུ་འཛིན། །མཐུ་ཆེན་དེ་ལ༴ ལྷ་མིན་དབང་པོ་སྒྲ་གཅན་ནི། །སྐུ་མདོག་དམར་ནག་
འཇིགས་ཆེན་པོ། །ཕྱག་གཉིས་ཉི་མ་ཟླ་བ་འཛིན། །སྟོབས་ཆེན་དེ་ལ༴ མཇུག་རིངས་བྲག་རིའི་སྟེང་ན་བཞུགས། ཁ་དོག་སྐྱ་སངས་དྲག་པོའི་གཟུགས། །སྦྲུལ་ཞགས་དང་ནི་རལ་གྲི་འཛིན། །གཏུམ་ཆེན་དེ་ལ༴ གང་དག་ཤར་གྱི་ཕྱོགས་གནས་པའི། །སྨིན་དྲུག་དང་ནི་སྣར་མ་དང༌། །མགོ་ལག་ནམ་སོ་རྒྱལ་སྐག་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །ལྷོ་ཡི་ཕྱོགས་ན་འཁོད་པ་ཡི། །མཆུ་དང་བྲེ་དབོ་མེ་བཞི་དང༌། །ནག་པ་ས་ག་ས་རི་དང༌། །མཆོད་ཅིང་བསྟོད་དེ་ཕྱག་ཀྱང་འཚལ། །གང་དག་ནུབ་ཀྱི་ཕྱོགས་གནས་པའི། །ལྷ་འཚམས་སྣོན་སྣྲུབས་ཆུ་སྟོད་དང༌། །ཆུ་སྨད་བྱི་བཞིན་གྲོ་ཞུན་ལ། །མཆོད་ཅིང་༴ བྱང་ཕྱོགས་གནས་པའི་མོན་གྲེ་དང༌། །མོན་གྲུ་ཁྲུམ་སྟོད་ཁྲུམ་སྨད་དང༌། །ནམ་གྲུ་ཐ་སྐར་བྲ་ཉེ་ལ། །མཆོད་ཅིང་བསྟོད་དེ་ཕྱག་འཚལ་ལོ། །རྒྱལ་པོ་ཆེན་པོ་དཔལ་ལྡན་པ། །མར་གད་མདོག་མཚུངས་པི་ཝཾ་འཛིན། །དྲི་ཟའི་ཚོགས་ལ་དབང་བསྒྱུར་བ། །ཡུལ་འཁོར་སྲུང་ལ༴ དཔའ་བོ་ཆེན་པོ་སྟོབས་པོ་ཆེ། ཁ་དོག་སྔོན་པོ་རལ་གྲི་འཛིན། །གྲུལ་བུ་ཚོགས་ལ་དབང་བསྒྱུར་པ། །འཕགས་སྐྱེས་པོ་ལ༴ མངའ་བདག་ཆེན་པོ་མཐུ་བོ་ཆེ། ཁ་དོག་དམར་པོ་སྦྲུལ་ཞགས་འཛིན། །ཀླུ་ཡི་ཚོགས་ལ་དབང་བསྒྱུར་བ། མིག་མི་བཟའ་ལ༴ སྡེ་དཔོན་ཆེན་པོ་གསེར་མདོག་ཅན། །བེ་ཅོན་དང་ནི་ནེའུ་ལེ་འཛིན། །གནོད་སྦྱིན་ཚོགས་ལ་དབང་བསྐྱུར་བ། །རྣམ་ཐོས་སྲས་ལ་ཕྱག་འཚལ་ལོ། །
དེ་ནས་གཏོར་མ་རྣམས་ཆུས་སྦྱངས། བགེགས་གཏོར་ལ་ནི་ཆང་ཡང་སྒྲོན། ཨ་མྲྀ་ཏས་བསངས། སྭཱབྷཱ་ཝས་སྦྱངས། སྟོང་པའི་ངང་ལས་བྷྲཱུཾ་ལས་བྱུང་བའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ལས་བྱུང་བའི་གཏོར་མ་འདོད་དགུའི་རྒྱ་མཚོ་ཆེན་པོར་འགྱུར། ན་མཿསརྦ་ཏ་ཐཱ་ག་ཏ་བྷྱོཿབི་ཤྭ་མུ་ཁེ་བྷྱེཿ སརྦ་ཐཱ་ཁཾ་ཨུད་ག་དེ་སྥ་ར་ཎ་ཨི་མཾ་ག་ག་ན་ཁཾ་སྭཱཧཱ། ཞེས་སྔོན་འགྲོ་གཏོར་མའི་སྐབས་ལྟར་བྱིན་གྱིས་རླབས། ཨོཾ་མ་ནི་དྷཱ་རི་བཛྲི་ཎི་མཧཱ་པྲ་ཏི་སཱ་རེ་ཧཱུཾ་ཧཱུཾ་ཕཊ་ཕཊ་སྭཱཧཱ། ཨོཾ་ཨ་ཀཱ་རོ་མུ་ཁཾ་སརྦ་དྷརྨ་ཎཱཾ་ཨདྱ་ནུཏྤནྣ་ཏྭ་ཏ་ཨོཾ་ཨཱཿཧཱུཾ་ཕཊ་སྭཱཧཱ། ཞེས་ལན་གསུམ་ལ་སོགས་པས་སོ་སོར་འབྲང་མ་ལ་འབུལ། དེའི་རིགས་འགྲེས་ཏེ། ཨོཾ་ཨ་མྲྀ་ཏ་བ་རེ་པྲ་ཝ་ར་བི་ཤུདྡྷེ་ཧཱུཾ་ཧཱུཾ་ཕཊ་ཕཊ་སྭཱཧཱ། ཨོཾ་ཨ་ཀ་རོ་སོགས་དང༌། ཨོཾ་ཨཱ་མྲྀ་ཏ་བི་ལོ་ཀི་ནི་གརྦྷས་མ་རཀྵ་ཎི་ཨ་ཀརྵ་ཎི་ཧཱུཾ་ཧཱུཾ་ཕཊ་ཕཊ་སྭཱཧཱ། ཨ་ཀཱ་རོ༴ སོགས་དང༌། ཨོཾ་བི་མ་ལེ་བི་པུ་ལེ་བི་པཱུ་ལེ་ཛ་ཡ་ཝ་རེ་ཨ་མྲྀ་ཏ་བི་ར་ཛེ་ཧཱུཾ་ཧཱུཾ་ཕཊ་ཕཊ་སྭཱཧཱ། ཨ་ཀཱ་རོ༴ སོགས་དང༌། ཨོཾ་བྷ་ར་བྷ་ར་སམྦྷ་ར་སམྦྷ་ར་ཨིནྡྲ་ཡ་པ་ལ་བི་ཤྭ་དྷ་ནི་ཧཱུཾ་ཧཱུཾ་ཕཊ་ཕཊ་རུ་རུ་ཙ་ལ་སྭཱཧཱ། ཨོཾ་ཨ་ཀཱ་རོ་མུ༴ བཏགས་ཏེ། བཅོམ་ལྡན་འདས་མ་བཞི་པོ་མ་འབུལ་ལོ། །ཨརྒྷཾ༴ ནས་ཤཔྟའི་བར་སྔགས་རྒྱས་བསྡུས་གང་རུང་གིས་མཆོད། ཡེ་ཤེས་ལྔའི་ངོ་བོ་ཉིད། །འགྲོ་བའི་དུག་ལྔ་སེལ་མཛད་པ། །སྲུང་བའི་འཕྲིན་ལས་བླ་ན་མེད། །ལྷ་མོ་ལྔ་ལ་ཕྱག་འཚལ་བསྟོད། །རྣལ་འབྱོར་བདག་ཅག་འཁོར་བཅས་ལ། ནས། ཡིད་ལ་འདོད་པ་ཀུན་འགྲུབ་ཤོག །ཅེས་པའི་
བར་གྱིས་འཕྲིན་ལས་གཞོལ། བར་འདིར་སྒྲུབ་པ་པོ་རང་ཉིད་བསྟེན་ཅིང་སྒྲུབ་པའི་ཆོས་སྐྱོང་རྣམས་ཀྱི་གཏོར་བསྔོ་བྱ། དེ་ནས་ཕྱོགས་སྐྱོང་གི་གཏོར་མ་ཆ་གསུམ་གྱི་ནང་བཞིན་ཕུལ། དེ་ནས་རྒྱལ་ཆེན་བཞིའི་གཏོར་མ་ནི། ཨོཾ་ཌྷི་ཏ་རཥྟ་ཡེ་ཞེས་པ་ལ། ན་མཿ སརྦ་ཏ་ཐཱ་ག་ཏ་བྷྱོཿབི་ཤྭ༴ ཞེས་པ་ནས། ག་ག་ཎ་ཁཾ་གྲྀཧྞེ་དཾ་བ་ལིཾ། ཏ་ཡེ་སྭཱཧཱ། ཞེས་ནམ་མཁའ་མཛོད་ཀྱི་གཏོར་སྔགས་བཏགས་པ་ལན་གསུམ་གྱིས་འབུལ། ཨོཾ་བཛྲ་ཨརྒྷཾ་ནས་ཤཔྟའི་བར་གྱིས་མཆོད། ཚངས་པ་དང་ནི་བརྒྱ་བྱིན་དང༌། །འཇིག་རྟེན་སྐྱོང་དང་དབང་ཕྱུག་ཆེ། །གནོད་སྦྱིན་སྡེ་དཔོན་ཐམས་ཅད་དང༌། །འཕྲོག་མ་བུ་དང་བཅས་རྣམས་ཀྱིས། །བདག་གིས་མེ་ཏོག་སྤོས་རྣམས་དང༌། །གཏོར་མ་འདི་ནི་བླང་བར་མཛོད། །དེ་རྣམས་ཀྱི་ནི་བཙོན་འགྲུས་དང༌། །གཟི་བརྗིད་དབང་ཕྱུག་སྟོབས་ཀྱིས་ཀྱང༌། །ནད་རྣམས་ཐམས་ཅད་འཇོམས་གྱུར་ཅིག །བདག་ཅག་སློབ་དཔོན་ཡོན་མཆོད་འཁོར་དང་བཅས་པ་ཐམས་ཅད། ཤར་ཕྱོགས་སུ་བདེ་ལེགས་སུ་གྱུར་ཅིག་སྭཱཧཱ། རྒྱལ་པོ་ཆེན་པོ་ཡུལ་འཁོར་སྲུང་གི་མིང་དང་སྟོབས་དང་དབང་ཕྱུག་དང་གཟི་བྱིན་གྱིས། བདག་ཅག་སློབ་དཔོན་ཡོན་མཆོད་རྣམས་གདོན་ཐམས་ཅད་དང་གནོད་པ་ཐམས་ཅད་ལས་ཐར་བར་གྱུར་ཅིག་སྭཱཧཱ། ཞེས་སོ། སྟོད་སྨད་ཀུན་ཏུ་བདག་ཅག་དཔོན་སློབ་ཡོན་མཆོད་རྣམས་ཞེས་སོགས་ཀྱི་ཚབ་ཏུ་གཞན་དམིགས་བསལ་ཡོད་ན་དེའི་མིང་བཅུག །ཆོ་ག་དེས་གཞན་གསུམ་ལའང་རིགས་འགྲེས་ཏེ། ཨོཾ་བི་རུ་དྷ་ཀ་ཡ་ན་མཿསརྦ་ཏ་ཐཱ་ག་ཏ་བྷྱོཿ སོགས་ལན་གསུམ། ཚངས་པ་དང་ནི༴
ནས། ལྷོ་ཕྱོགས་སུ་བདེ་ལེགས་སུ་གྱུར་ཅིག་སྭཱཧཱ། རྒྱལ་པོ་ཆེན་པོ་འཕགས་སྐྱེད་པོའི་མིང་དང༌། ཞེས་པ་ནས། ཐར་བར་གྱུར་ཅིག་སྭཱཧཱ། དེ་བཞིན་དུ། ཨོཾ་བི་རུ་པཀྵ་ཡ་ནཱ་མཿསརྦ་ཏ་ཐཱ་ག་ཏ་བྷྱོཿ སོགས་ལན་གསུམ། ཚངས་པ་དང་ནི༴ ནས། ནུབ་ཕྱོགས་སུ་བདེ་ལེགས་སུ་གྱུར་ཅིག་སྭཱཧཱ། རྒྱལ་པོ་ཆེན་པོ་མིག་མི་བཟང་གི་མིང་དང་༴ ནས། ཐར་བར་གྱུར་ཅིག་སྭཱཧཱ། དེ་བཞིན་དུ། ཨོཾ་བཻཤྲ་བ་ཎ་ཡེ་ན་མཿསརྦ་ཏ་ཐ་ག་ཏ་བྷྱོཿ སོགས་ལན་གསུམ། ཚངས་པ་དང་ནི༴ ནས། བྱང་ཕྱོགས་སུ་བདེ་ལེགས་སུ་འགྱུར་ཅིག་སྭཱཧཱ། །རྒྱལ་པོ་ཆེན་པོ་རྣམ་ཐོས་བུའི་མིང་དང༌། ནས། ཐར་བར་གྱུར་ཅིག་སྭཱཧཱ། དེ་ནས་དབུས་ཀྱི་གཏོར་མ་བྱེད་དེ། གོང་ཕྱོགས་སྐྱོང་གི་ནང་དུ་ཚང་བས་ལོགས་སུ་མེད་ཀྱང་ཆོག་མོད། བྱེད་པར་སྤྲོ་ན། ཨོཾ་པྲ་མཧཱ་བ་སུ་དྷ་རི་ཎི་ན་མཿསརྦ་ཏ་ཐཱ་ག་ཏ་བྷྱོཿ སོགས་ལན་གསུམ། ཚངས་པ་དང་ནི༴ ནས། སྟེང་དང་འོག་དང་ཕྱོགས་མཚམས་ཐམས་ཅད་དུ་བདེ་ལེགས་སུ་གྱུར་ཅིག་སྭཱཧཱ། དེ་བཞིན་གཤེགས་པ་ཐམས་ཅད་དང་ཚངས་པ་དང་སའི་ལྷ་རྣམས་ཀྱི་མིང་དང༌། ནས། ཐར་བར་གྱུར་ཅིག་སྭཱཧཱ། ཞེས་བྱ་ཏེ། སྐབས་འདིར་སྒྲུབ་པ་པོ་དཔོན་སློབ་ཕྱོགས་སོ་སོར་འགྲོ་བར་བྱ་བ་སྲོལ་ཡོད་མོད་ཕྱི་རོལ་དུ་མཐོ་རྩིགས་ཡོད་ན་དེ་བཞིན་དུ་བྱ་ལ། །མེད་ན་དེ་ལྟར་མི་དགོས་སོ། །དེ་ནས་གཟའ་དང་སྐར་མའི་གཏོར་མ་ནི། ཨོཾ་མེ་གོལྐ་ཡ་སྭཱཧཱ། ཞེས་པ་ནས། ཨོཾ་བྷ་ར་ཎི་སྭཱཧཱ།
ཞེས་པའི་བར་ལ་འགྲུབ་ན་སྔགས་རེ་རེ་བཞིན། ན་མཿསརྦ་ཏ་ཐཱ་ག་ཏ་བྷྱོཿསོགས། ནམ་མཁའ་མཛོད་ཀྱི་གཏོར་སྔགས་བཏགས་པ་ལན་གསུམ་གསུམ་གྱིས་འབུལ། བསྡུ་ན་སྔགས་རྣམས་སྟེབས་གཅིག་ཏུ་བརྗོད་པའི་མཐར། ནམ་མཁའ་མཛོད་ཀྱི་སྔགས་ཚར་གཅིག་བཏགས་པ་ལན་གསུམ་གྱི་གཟའ་སྐར་རྣམས་ལ་འབུལ། ཨོཾ་ཉི་མ་དང་ནི་ཟླ་བ་དང༌། །ཕུར་བུ་དང་ནི་པ་སངས། །དམན་པ་བཀྲ་ཤིས་ལྷག་པ་དང༌། །སྒྲ་གཅན་དུ་བ་མཇུག་རིངས་ཏེ། །འཇིག་རྟེན་དུ་ནི་ཟད་འཕེལ་བྱེད། གཟི་ཆེན་རྫུ་འཕྲུལ་ཆེན་པོ་དག །རབ་ཏུ་དང་བའི་སེམས་ཀྱི་སུ། །རིགས་སྔགས་རྗེས་སུ་ཡི་རང་བྱོས། །དེ་དག་གིས་ཀྱང་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ལ་སྲུང་བར་གྱིས་ཤིག །ལོ་བརྒྱ་འཚོ་བར་གྱུར་ཅིག །སྟོན་བརྒྱ་མཐོང་བར་ཤོག་ཤིག །སྨིན་དྲུག་དང་ནི་སྣར་མ་དང༌། །མགོ་དང་ལག་དང་ནམ་སོ་དང༌། རྒྱལ་ནི་བཀྲ་ཤིས་ཕུན་སུམ་ཚོགས། །དེ་ལྟར་སྐག་ཏེ་བདུན་པོ་ཡིན། དེ་ལྟར་རྒྱུ་སྐར་བདུན་པོ་དེ་དག་ནི། ཤར་གྱི་ཕྱོགས་ན་གནས་པ་དག་སྟེ། ཤར་ཕྱོགས་སྐྱོང་ཞིང་སྲུང་བར་བྱེད་པ་དག་གོ །དེ་དག་གིས་ཀྱང་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་སྲུང་བར་གྱིས་ཤིག །ལོ་བརྒྱ་འཚོ་བར་གྱུར་ཅིག །སྟོན་བརྒྱ་མཐོང་བར་ཤོག་ཤིག །འདིས་འོག་མ་སྡེ་ཚན་གསུམ་ལའང་རིགས་འགྲེ་སྟེ། མཆུ་ནི་མི་ཟད་འཇོམས་པ་དང༌། །དེ་བཞིན་བྲེ་དང་དབོ་དང་ནི། །
མེ་བཞི་ནག་པ་ས་རི་དང༌། །ས་ག་དེ་ལྟར་བདུན་པོའོ། །དེ་ལྟར་རྒྱུ་སྐར་བདུན་པོ་དེ་དག་ནི། ལྷོའི་ཕྱོགས་ན་གནས་པ་དག་སྟེ། ལྷོ་ཕྱོགས་སྐྱོང་ཞིང་སྲུང་བར་བྱེད་པ་དག་གོ །དེ་དག་གིས་ཀྱང་བདག་ཅག༴ ནས། མཐོང་བར་ཤོག་ཅིག །ལྷ་འཚམས་གཟི་བརྗིད་ཆེན་མོ་དང༌། །དེ་བཞིན་སྣྲོན་དང་སྣྲུབས་དང་ནི། །ཆུ་སྟོད་དང་ནི་ཆུ་སྨད་དང༌། །བྱི་བཞིན་དང་ནི་གྲོ་ཞུན་ཏེ། དེ་ལྟར་སོགས། ནུབ་ཀྱི་ཕྱོགས་ན་སོགས། ནུབ་ཕྱོགས་སྐྱོང་ཞིང་ནས། མཐོང་བར་ཤོག་ཅིག །མོན་གྲུ་དང་ནི་མོན་བྲེ་དང༌། ཁྲུམས་སྟོད་དང་ནི་ཁྲུམས་སྨད་དང༌། །ནམ་གྲུ་ཐ་སྐར་བྲ་ཉེ་སྟེ། །རྒྱུ་སྐར་མཐུ་དང་དཔལ་ལྡན་པའོ། །དེ་ལྟར་སོགས། བྱང་གི་ཕྱོགས་ནས། བྱང་ཕྱོགས་སྐྱོང་ཞིང་ནས། མཐོང་བར་ཤོག་ཅིག ཨོཾ་རྒྱལ་པོ་ཆེན་པོ་བཞི་རྣམས་ཀྱིས། །ལམ་དང་ལམ་མིན་གནས་པ་བཞི། །བཀྲ་ཤིས་ལྡན་དང་ཀུན་ཤེས་དང༌། །གང་པོ་དགའ་བ་དཔལ་རྣམས་སོ། ཞེས་པ་ལ། ན་མཿསརྦ་ཏ་ཐཱ་ག་ཏ་བྷྱོཿ སོགས་བཏགས་ཏེ་ལན་གསུམ། ཨོཾ་རྒྱལ་པོ་ཆེན་པོ༴ ཞེས་པ་ནས། དཔལ་རྣམས་སོ། ཁྱེད་རྣམས་ལ་གསོལ་ལོ། །གསོལ་བ་འདེབས་སོ་འདས་པ་དང་མ་བྱོན་པ་དང༌།
ད་ལྟར་བྱུང་བས་སངས་རྒྱས་བཅོམ་ལྡན་འདས་རྣམས་ཀྱི་བཀས། བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ལ་སྲུང་བ་དང༌། ཡོངས་སུ་སྐྱབས་པ་དང༌། ཡོངས་སུ་བཟུང་བ་དང༌། ཞི་བ་དང༌། བདེ་ལེགས་སུ་འགྱུར་བ་དང༌། ཆད་པ་བཟློག་པར་གྱིས་ཤིག །ཨོཾ་ལག་ན་རྡོ་རྗེའི་བུ་མཐུ་བོ་ལག་མྱུར་ཞེས་བྱ་བ་གྲོང་ཁྱེར་ཁོར་ཡུག་ན་གནས་པའོ། །ན་མཿསརྦ་ཏཱ་ཐཱ་ག་ཏ་བྷྱོཿ སོགས་ལན་གསུམ། ཨོཾ་ལག་ན་རྡོ་རྗེའི་ནས། གནས་པའོ། ཁྱེད་རྣམས་ལ་གསོལ་ལོ། །གསོལ་བ་འདེབས་སོ༴ ནས། བཟློག་པར་གྱིས་ཤིག །ཨོཾ་སྟོབས་ལྡན་དྲི་མེད་སྒྲ་ཆེན་དང༌། །རབ་གཉེན་འཇིགས་བྱེད་འཛམ་བུ་མགྲིན། །མཆོག་ལེན་བླ་མ་གྲགས་མ་དང༌། །མཐབ་དགའ་མ་དང་སྣང་གྲགས་མ། །རྩེ་མོ་དགའ་དང་ས་འཛིན་དང༌། །འཐབ་འཇུག་མ་སྟེ་བཅུ་བཞིའོ། །ཙ་ཏུ་ར་ད་ཤ་མཧཱ་རཀྞ་སི། ན་མཿསརྦ་ཏ་ཐཱ་ག་ཏ་བྷྱོཿ སོགས་ལན་གསུམ། ཨོཾ་སྟོངས་ལྡན༴ ནས། བཅུ་བཞིའོ། །ཁྱེད་རྣམས་ལ་གསོལ་ལོ། །ནས། བཟློག་པར་གྱིས་ཤིག ཨོཾ་རྭ་དང་ཐུབ་མེད་ངན་སློབ་དང༌། །ཕྲ་མ་ཅན་དང་བྲན་མོ་དམར། རབ་ཆེན་མ་དང་མིག་བཟང་མ། བརྒྱད་པ་འཇིགས་བྱེད་མ་ཡིན་ནོ། །ཨཥྟ་མཧཱ་རཀྵ་སི་ན་མཿ སརྦ་ཏ་ཐཱ་ག་ཏ་བྷྱོཿ སོགས་ལན་གསུམ། ཨོཾ་རྭ་དང་༴ ནས། ཡིན་ནོ། །ཁྱེད་རྣམས་ལ་གསོལ་ལོ༴ ནས། བཟློག་པར་གྱིས་ཤིག ཨོཾ་གཟི་བརྗིད་མཆོག་དང་དགའ་རྩེགས་དང༌། །སྣ་ཚོགས་སྦྱིན་
སྤོང་དེ་བཞིན་དུ། །བྲན་མོ་དཀར་བཟང་འཇུག་གདོང་དང༌། །གྲོང་ཁྱེར་ཁོར་ཡུག་མ་དང་ནི། །བདུན་པ་རིགས་སྲུངས་མོ་ཞེས་བྱ། །སཔྟ་མཧཱ་རཀྵ་སི་ན་མཿསརྦ་ཏ་ཐཱ་ག་ཏ་བྷྱོཿ སོགས་ལན་གསུམ། ཨོཾ་གཟི་བརྗིད༴ ནས། ཞེས་བྱ། ཁྱེད་རྣམས་ལ་གསོལ༴ ནས། བཟློག་པར་གྱིས་ཤིག ཨོཾ་ཀཱ་ལི་མཧཱ་རཀྵ་སི་ན་མཿསརྦ་ཏ་ཐཱ་ག་ཏ་བྷྱོཿ སོགས། སྲིན་མོ་ནག་མོ་ཆེན་པོ་བུ་སྟོང་དང་ལྡན་པ་ལ་གསོལ་ལོ་ནས། བཟློག་པར་གྱིས་ཤིག ཨོཾ་རྟག་ཏུ་མྱོས་དང་རྗེས་སུ་མྱོས། །སྟོབས་ཀྱི་རྒྱགས་དང་འོད་མའི་སྦུབས། །འབྱོར་ལྡན་མ་རྣམས་གནོད་སྦྱིན་ནི། །འབུམ་ཕྲག་བདུན་ཅུ་རྩ་བདུན་བཅས། །འཛམ་གླིང་མི་རྣམས་སྲུང་ཞིང་སྐྱོང༌། པཉྩ་མཧཱ་རཀྵ་སི་ན་མཿསརྦ་ཏ་ཐཱ་ག་ཏ་བྷྱོཿ སོགས་ལན་གསུམ། ཨོཾ་རྟག་ཏུ་ནས། སྲུང་ཞིང་སྐྱོང༌། ཁྱེད་རྣམས་ལ་གསོལ་ལོ། ནས། ཆད་པ་བཟློག་པར་གྱིས་ཤིག ཅེས་པའི་བར་བྱ་སྟེ། སྤྱིར་ནི་དེ་ཙམ་གྱིས་ཆོག་ལ། སྤྲོས་པ་ལ་དགའ་ན། དེ་ཡན་ཆད་ཀྱིས་གཏོར་ཚན་རེ་རེའི་འགོར། གཏོར་མ་བྱིན་རླབས་རེ་རེ་སྦྱར་ཞིང༌། རྒྱལ་པོ་ཡུལ་འཁོར་སྲུང་མན་ཆད་ཀྱི་གཏོར་ཚན་ཐམས་ཅད་ལ། གཏོར་མའི་རྗེས་སུ་ཨརྒྷཾ༴ སོགས་ཀྱི་མཆོད་པ་དེ་ཡང་འཇུག གསོལ་འདེབས་ཚིག་ལྷུག་པའི་རྗེས་སུ། མཆོད་སྦྱིན་གཏོར་མ་འདི་བཞེས་ལ། རྣལ་འབྱོར་བདག་ཅག་འཁོར་བཅས་ལ། སོགས་ཀྱི་འདོད་དོན་གསོལ་བཏབ་ཏེ་བྱས་ན་ཡང་ལེགས་པར་འགྱུར་རོ། །མཆོད་པའི་རྗེས་སུ་བསྟོད་པ་ཡང༌། རྒྱུ་སྐར་ཡན་ཆད་
ལ་གོང་དུ་བསྟན་པ་བཞིན་དང༌། དེ་མན་ཆད་ཀྱི་གཏོར་ཚན་བདུན་པོ་ལ། བསྟོད་པ་ནི་ལོགས་སུ་མེད་ཀྱང་ཆོག་མོད། སྤྲོ་ན། ཨོཾ་རྒྱལ་པོ་ཆེན་པོ་བཞི་རྣམས་ཀྱི། །ལམ་དང་ལམ་མིན་གནས་པ་བཞི། །བཀྲ་ཤིས་ལྡན་དང་ཀུན་ཤེས་དང༌། །གང་པོ་དགའ་བའི་དཔལ་རྣམས་སོ། །གང་དེའི་མིང་རུས་ཤིས་པ་ལ། །རྒྱལ་པོ་ཆོམ་རྐུན་མེ་དང་ཆུ། །མི་དང་མི་མིན་འཇིག་པ་མེད། ཁྱེད་རྣམས་ལ་ཡང་བསྟོད་ཕྱག་འཚལ། ཞེས་དང༌། མཁའ་ལ་ཡོངས་སུ་སྤྱོད་པ་ཡི། །གྲོང་ཁྱེར་ཁོར་ཡུག་ཅེས་བྱ་ན། །རོལ་ཞིང་རྩེ་བ་ལག་མྱུར་མིང༌། །ལག་ན་རྡོ་རྗེ་བུ་ཐུ་བོ། །གང་དེའི་མིང་རུས་ཤེས་པ་ལ། །རྒྱལ་པོ་ཆོམ་རྐུན་མེ་དང་ཆུ། །མི་དང་མི་མིན་འཇིགས་པ་མེད། །ཁྱེད་རྣམས་ལ་ཡང་བསྟོད་ཕྱག་འཚལ། །ཨོཾ་སྟོབས་ལྡན་དྲི་མེད་སྒྲ་ཆེན་དང༌། །རབ་གཉེན་འཇིགས་བྱེད་ཛམ་བུ་མགྲིན། །མཆོག་ལེན་བླ་མ་གྲགས་མ་དང༌། །འཐབ་དགའ་མ་དང་སྣང་གྲགས་མ། །རྩེ་མོ་དགའ་དང་ས་འཛིན་དང༌། །འཐབ་འཇུག་མ་སྟེ་བཅུ་བཞིའོ། །བྱང་ཆུབ་སེམས་དཔའི་སྐུ་སྲུང་མ། །སྲིན་མོ་ཆེན་མོ་མཐུ་ཆེན་རྣམས། གང་དེའི་མིང་རུས་ཤིས་པ་ལ། །རྒྱལ་པོ་ཆོམ་རྐུན་མེ་དང་ཆུ། །མི་དང་མི་མིན་འཇིགས་པ་མེད། ཁྱེད་རྣམས་ལ་ཡང་བསྟོད་ཕྱག་འཚལ། ཨོཾ་རྭ་དང་ཐུབ་མེད་ངན་སློབ་དང༌། ཕྲ་མ་ཅན་དང་བྲན་མོ་དམར། །རབ་ཆེན་མ་དང་མིག་བཟང་མ། །བརྒྱད་པ་འཇིགས་བྱེད་མ་ཡིན་ནོ། །སྐྱེས་པ་བུད་མེད་གཉིད་ལོག་གམ། །མ་ལོག་ན་ཡང་གཟི་བརྗིད་
འཕྲོག །གང་དེས་མིང་རུང་ཤེས་པ་ལ། །རྒྱལ་པོ་ཆོམ་རྐུན་མེ་དང་ཆུ༌། །མི་དང་མི་མིན་འཇིགས་པ་མེད། ཁྱེད་རྣམས་ལ་ཡང་བསྟོད་ཕྱག་འཚལ། །ཨོཾ་གཟི་བརྗིད་མཆོག་དང་དགའ་རྩེགས་དང༌། །སྣ་ཚོགས་སྦྱིན་སྤོང་དེ་བཞིན་དུ། །བྲན་མོ་དཀར་བཟང་འཇུག་གདོང་དང༌། །གྲོང་ཁྱེར་ཁོར་ཡུག་མ་དང་ནི། །བདུན་པ་རིགས་སྲུང་མོ་ཞེས་བྱ། །དེ་དག་ཁྲག་གི་དྲི་ཚོར་ན། །དཔག་ཚད་བརྒྱར་ཡང་རྒྱུག་པར་བྱེད། །གང་དེའི་མིང་རུས་ཤེས་པ་ལ། །རྒྱལ་པོ་ཆོམ་རྐུན་མེ་དང་ཆུ། །མི་དང་མི་མིན་འཇིགས་པ་མེད། ཁྱེད་རྣམས་ལ་ཡང་བསྟོད་ཕྱག་འཚལ། །སྲིན་མོ་ནག་མོ་ཆེན་མོ་ནི། །རྒྱ་མཚོ་ཆེན་པོའི་ངོགས་ན་གནས། །ནུབ་རེར་དཔག་ཚད་བརྒྱད་ཁྲིར་རྒྱུག །བུ་ནི་སྲིན་པོ་སྟོང་དང་བཅས། །གང་དེའི་མིང་རུས་ཤེས་པ་ལ། །རྒྱལ་པོ་ཆོམ་རྐུན་མེ་དང་ཆུ། །མི་དང་མི་མིན་འཇིགས་པ་མེད། ཁྱེད་རྣམས་ལ་ཡང་བསྟོད་ཕྱག་འཚལ། །ཨོཾ་རྟག་ཏུ་མྱོས་དང་རྗེས་སུ་མྱོས། །སྟོབས་ཀྱི་རྒྱགས་དང་འོད་མའི་སྤུབ། །འབྱོར་ལྡན་མ་རྣམས་གནོད་སྤྱིན་ནི། །འབུམ་ཕྲག་བདུན་བཅུ་རྩ་བདུན་བཅས། གང་དེའི་མིང་རུས་ཤེས་པ་ལ། །རྒྱལ་པོ་ཆོམ་རྐུན་མེ་དང་ཆུ། །མི་དང་མི་མིན་འཇིགས་པ་མེད། ཁྱེད་རྣམས་ལ་ཡང་བསྟོད་ཕྱག་འཚལ། །སོགས་གོང་བཞིན་སྦྱར་བས་ལེགས་པར་འགྲུབ་བོ། །འོན་ཀྱང་དཀྱུས་སུ་སྦྱར་བ་ནི་འབྲིང་པོ་ཉིད་དེ། །འདི་དག་ལ་གཏོར་འབུལ་གྱི་ཕྱག་རྒྱ་པད་སྐོར་སྔོན་དུ་འགྲོ་བས་རྡོ་རྗེ་ཐལ་མོ་ཁ་ཕྱེ་བ་ཡིན་ལ། གཏོར་སྔགས་ཀྱི་མགོའི་ཚིགས་བཅད་རྣམས་མ་
གཏོགས། ཚིགས་བཅད་གཞན་རྣམས་ལ་གདངས་ཐུང་བཅུག་ནས་དྲིལ་གསིལ་བྱེད། ཚིག་ལྷུག་གི་སྨོན་ལམ་དང་འདོད་གསོལ་གྱི་སྐབས། གཏོར་མ་དང་དཀྱིལ་འཁོར་ཕྱོགས་ལ་མེ་ཏོག་བོར། རེ་རེའི་མཇུག་ཏུ་རོལ་ཆེན་དང་བཅས། གཙོ་མོ་ལྔའི་སྙིང་པོ་བཟླས་པའི་མཐར། གཏོར་མགྲོན་ལ་འདོད་གསོལ་དྲག་པོ་རེ་བྱའོ། །དེའི་རྗེས་སུ་དཀར་གཏོར་ཆ་བཞིའི་ནང་ནས་འབྱུང་བ་ལྟ་བུ་ཆོ་ག་གང་ཡང་རུང་བས་ཀླུ་གཏོར་དང་གཏོང་ཞིང་དེ་རྗེས་ཆ་གསུམ་ནས་འབྱུང་བ་ལྟར། འབྱུང་པོ་སྤྱི་གཏོར་དང་གཞི་བདག་གཏོར་མ་དང་བགེགས་གཏོར་ཡང་གཏོང་ངོ༌། །བོད་ཀྱི་བླ་མ་རྣམས་གྲྭ་ལྔའི་སྔོན་འགྲོ་གཏོར་མར་འདོད་པ་དེ་ཡང་གཙོ་བོར་བགེགས་གཏོར་དུ་སྣང་བས། སྤྲོ་ན་སྐབས་འདིར་གཏོང་རྒྱུ་ཡིན་མོད་ཀྱི། རེ་ཞིག་འདིར་མ་བྲིས་སོ། །གལ་ཏེ་གཏོར་ཆོག་ཤིན་ཏུ་བསྡུས་པ་ལ་མོས་ན། འདས་གཏོར་དང༌། རྒྱལ་ཆེན་བཞི་དང༌། ཆ་གསུམ་ཙམ་གྱིས་ཀྱང་ཆོག་གོ །དེ་ནས་གཙོ་མོའི་བུམ་པའམ་བུམ་པ་གཅིག་ལས་མེད་ན་ལྷ་བུམ་གདན་གཙང་མའི་སྟེང་དུ་བཤམས། སྟ་གོན་གྱི་སྐབས་སུ་བཤད་པ་ལྟར་སླར་ཡང་བུམ་པ་སྒྲུབ། དེ་རྗེས་དཀྱིལ་འཁོར་དང་བུམ་པ་དང༌། དཀར་ཕྱོགས་སྐྱོང་བ་ཐམས་ཅད་ལ་དམིགས་ནས། ཞི་བའི་དོན་དུ་མེ་ཏོག་དང༌། རྒྱས་པའི་དོན་དུ་དུར་བ་འབུལ་ཏེ། དེ་ཡང་མེ་ཏོག་བསངས་སྦྱངས། སྟོང་པའི་ངང་ལས། ཀུཾ་ཡིག་ལས་བྱུང་བའི་མེ་ཏོག་ཀུན་ད་དཀར་པོའི་ཕུང་པོར་གྱུར། ཨོཾ་མ་ཎི་དྷ་རི་བཛྲ་ཎི་མཧཱ་པྲ་ཏི་སྭ་རེ་ཧཱུཾ་ཧཱུཾ་ཕཊ་ཕཊ་སྭཱཧཱ། པུཥྤེ་པྲ་ཏིཙྪ་ན་མཿ ལན་བདུན་གྱི་མཐར་
གཏོར་ཏེ། དབུས་ཀྱི་གཙོ་མོ་ལ་མེ་ཏོག་ཕུལ། དེ་བཞིན་དུ། ཨོཾ་ཨ་མྲྀ་ཏ་བ་རེ་སོགས་གཙོ་མོ་བཞི་པོ་ལའང་ལན་བདུན་བདུན་ཕུལ་ཏེ། བཅོམ་ལྡན་འདས་མ་སྲུང་བ་ལྔའི་ལྷ་ཚོགས། སངས་རྒྱས་དང་བྱང་ཆུབ་སེམས་དཔའི་ཚོགས་དང་བཅས་པ་ཐམས་ཅད་ཀྱིས། བདག་ཅག་དཔོན་སློབ་ཡོན་མཆོད་རྣམས་ཀྱི། ནད་དང༌། གདོན་དང༌། བགེགས་དང༌། བར་དུ་གཅོད་པ་ཐམས་ཅད་ཤཱན་ཏིཾ་ཀུ་རུ་ཡེ་སྭཱཧཱ། ཞེས་བརྗོད། དེ་བཞིན་དུ། ཨོཾ་ཨིནྡྲ་ཡ་སྭཱཧཱ། པུཥྤཾ་པྲ་ཏཱིཙྪ་ན་མ། ལན་གསུམ་གྱི་མཐར་མེ་ཏོག་དོར་ཏེ། པྲི་ཐི་བཱི་དེ་བཱིའི་བར་དུ་སྦྱར། ཕྱོགས་སྐྱོང་བ་བཅུ། སྲིད་པ་གསུམ་གྱི་འབྱུངཔོའི་ཚོགས་དང་བཅས་པ་ཐམས་ཅད་ཀྱིས་བདག་ཅག་དཔོན་སློབ་སོགས་ནས། ཀུ་རུ་ཡེ་སྭཱ་ཧཱའི་བར། ཨོཾ་མོ་གོ་ལྐཱ་ཡཾ་སྭཱཧཱ། པུཥྤཾ་པྲ་ཏཱིཙྪ་ན་མཿ ལན་གསུམ་གྱི་མཐར་མེ་ཏོག་དོར་དེ་བཞིན་དུ། ཛྱོ་ཏེ་ཀེ་ཏ་ཝེའི་བར་དུ་སྦྱར་ཏེ། གཟའ་ཆེན་པོ་དགུ་འཁོར་དང་བཅས་པ་རྣམས་ཀྱིས། བདག་ཅག་དཔོན་སློབ་ནས། ཀུ་རུ་ཡེ་སྭཱཧཱ། ཨོཾ་ཀརྟི་ཀ་ཡ་སྭཱཧཱ། པུཥྤེ་པྲ་ཏཱིཙྪ་ན་མཿ ལན་གསུམ་སོགས་བྷ་ར་ཎི་ཞེས་པའི་བར་དུ་སྦྱར། རྒྱུ་སྐར་ཉི་ཤུ་རྩ་བརྒྱད་འཁོར་དང་བཅས་པ་རྣམས་ཀྱིས་བདག་ཅག་དཔོན་སློབ་འཁོར་དང་བཅས་པ་ནས།ཀུ་རུ་ཡེ་སྭཱཧཱ། ཨོཾ་དྡྷི་ཏ་རཥྟ་ཡེ་སྭཱཧཱ། པུཥྤཾ་པྲ་ཏིཙྪ་ན་མཿ ལན་གསུམ་སོགས། བཻ་ཤྲ་མ་ཎའྀ་བར་དུ་སྦྱར་ནས། རྒྱལ་པོ་ཆེན་པོ་འཇིག་རྟེན་སྐྱོང་བ་སྟེ་
བཞི་འཁོར་དང་བཅས་པ་རྣམས་ཀྱིས། བདག་ཅག་དཔོན་སློབ་ནས།ཀུ་རུ་ཡེ་སྭཱཧཱ། དེས་རིགས་བསྒྲེས་ནས་དུར་བ་ལ་ཡང་འབུལ་ཏེ། བསངས་སྦྱངས། སྟོང་པའི་ངང་ལས། དུཾ་ལས་བྱུང་བའི་དུར་བ་གཞོན་ནུ་མྱུ་གུ་དང་བཅས་པ། ཕུན་སུམ་ཚོགས་པ་ཐམས་ཅད་འཕེལ་པའི་ནུས་པ་ཅན་དུ་གྱུར། ཨོཾ་མ་ཎི་དྷ་རི་བཛྲ་ཎི་མཧཱ་པྲ་ཏི་བ་རེ་ཧཱུཾ་ཧཱུཾ་ཕཊ་ཕཊ་སྭཱཧཱ། དུརྦ་ཏྲིཾ་ཎ་པྲ་ཏིཙྪ་ན་མཿཞེས་པ་ལན་བདུན་གྱིས་གཙོ་མོ་ལ་ཕུལ། དེ་བཞིན་དུ་གཞན་བཞི་ལའང་སྦྱར། བཅོམ་ལྡན་འདས་མ་སྲུང་བ་ལྔའི་ལྷ་ཚོགས་སངས་རྒྱས་བྱང་ཆུབ་སེམས་དཔའི་ཚོགས་དང་བཅས་པ་རྣམས་ཀྱིས། བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ཀྱི་ཚེ་དང་བསོད་ནམས་དང༌། དཔལ་དང་འབྱོར་པ་ཐམས་ཅད་པུཥྟཾ་ཀུ་རུ་ཡེ་ཨོཾ། དེ་བཞིན་དུ་གཞན་རྣམས་ལ་ཡང་སྦྱར་ཏེ། ཨོཾ་བཻ་ཤྲ་མ་ཎི་ཡེ་སྭཱཧཱ། དུརྦ་ཏྲི་ཎ་པྲ་ཏིཙྪ་ན་མཿ ལན་གསུམ། རྒྱལ་པོ་ཆེན་པོ་འཇིག་རྟེན་སྐྱོང་བ་སྡེ་བཞི་འཁོར་དང་བཅས་པ་རྣམས་ཀྱིས། བདག་ཅག་དཔོན་སློབ་ནས། ཀུ་རུ་ཡེ་ཨོཾ། ཞེས་པའི་བར་རོ། །དུར་བ་རྣམས་ཕྱོགས་གཅིག་ཏུ་སྡོམས་ཏེ། བྱང་བུམ་ལ་སོགས་པར་བཅུག་ནས་དཀྱིལ་འཁོར་གྱི་བྱང་ཕྱོགས་སུ་བཞག་གོ །དེ་དག་ནི་དཀྱིལ་འཁོར་སྒྲུབ་ཅིང་མཆོད་པ་ཡན་ལག་དང་བཅས་པའོ། །དེ་ནས་བདག་འཇུག་མི་བྱེད་ན། རྗེས་ཆོག་ཙམ་བྱས་པས། རྐྱེན་བཟློག་སོགས་རང་གཞན་གྱི་དོན་གང་ལ་ཡང་ཆོ་ག་ཚང་བར་འགྱུར་རོ། །བདག་འཇུག་བྱེར་པར་སྤྲོ་ན། འཇུག་པའི་དོན་དུ་མཎྜལ་ཕུལ། དགའ་ཆེན་ཁྱོད་བདག་སྟོན་
པ་སྟེ། སོགས་ཀྱི་གསོལ་བ་བཏབ། ཨཱ་ཁཾ་བཱི་ར་ཧཱུཾ། ལན་གཉིས་ཀྱིས་གདོང་གཡོགས་བཅིངས་ཤིང༌། མེ་ཏོག་བཟུང༌། ཨོཾ་ཨ་མྲྀ་ཏེ་ཧཱུཾ་ཕཊ། ཀྱི་བགེགས་བསྐྲད། སྙིང་ཁར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་སྟེང་དུ། དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་རྩེ་ལྔ་པ། ཨོཾ་སརྦ་ཡོ་ག་ཙིཏྟ་ཨུཏྤ་ཏ་ཡ་མི། སུ་ར་ཏེ་ས་མ་ཡ་སྟྭཾ། ཧོཿསིདྡྷི་བཛྲ་ཡ་ཐཱ་སུ་ཁཾ། རྡོ་རྗེ་སྙིང་གར་གཏུགས། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་བཞུགས་ཀྱི། དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བའི་དཀྱིལ་འཁོར་འདི། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་མ་ཞུགས་པ་རྣམས་ཀྱི་མདུན་དུ་སྨྲ་བར་མི་བྱ་སྟེ། མ་དད་པ་རྣམས་ལ་ཡང་མ་ཡིན་ནོ། །ཨ་ཁཱཾ་བཱི་ར་ཧཱུཾ་ཞེས་ཁྲིད་ནས། ཛཿཧཱུཾ་བཾ་ཧོཿ ཞེས་སྒོ་བཞི་ནས་ཞུགས། དངོས་སུ་ཡོལ་བ་བསལ་བའམ་བསལ་བར་མོས། ཨོཾ་ན་མ་ཏེ་ཧཱུཾ། ན་མོ་མཱི་ཧཱུཾ། ན་མོ་ན་མཿཧཱུཾ། ཞེས་ཕྱག་འཚལ། དཀོན་མཆོག་གསུམ་ལ་བདག་སྐྱབས་མཆི། ཞེས་སོགས་རྒྱུན་བཤགས་བྱ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ཤིག །དཔལ་རྡོ་རྗེ་སེམས་དཔའ་བདག་ལ་དབབ་ཏུ་གསོལ། རང་གི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ། པྲཾ་ཧཱུཾ་མཾ་ཤཾ་གཾ་རྣམས་སུ་གྱུར། མདུན་བསྐྱེད་ཀྱི་ཐུགས་ཀ་ནས་འོད་ཟེར་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀ་ནས་
སྔགས་ཀྱི་ཡིག་འབྲུའི་ཚོགས་དཔག་ཏུ་མེད་པ་སྤྱན་དྲངས། རང་གི་བ་སྤུའི་བུ་ག་རྣམས་ནས་ཐིམ། མདུན་བསྐྱེད་བཅོམ་ལྡན་འདས་མ་ལྔའི་ཐུགས་ཀ་ནས་ཀྱང་རང་དང་འདྲ་བའི་ལྷ་ཚོགས་དཔག་ཏུ་མེད་བྱོན་ཏེ། རང་ཉིད་ཀྱི་སྙིང་གར་ཐིམ་པར་གྱུར། རོལ་མོའི་སྒྲ་དང་བཅས། ཨོཾ་མ་ཎི་དྷ་རི་བཛྲི་ཎི་མཧཱ་པྲ་ཏི་ས་རི་ཧཱུཾ་ཧཱུཾ་ཕཊ་ཕཊ་སྭཱཧཱ། བཛྲ་ཨ་བེ་ཤ་ཡ་ཧཱུཾ། དེ་བཞིན་དུ་སྔགས་བཞི་པོའི་མཐར་ཡང་སྦྱར་ཏེ་ཡེ་ཤེས་ཕབ། ཏིཥྛ་བཛྲ་སྤྱི་བོར་རྡོ་རྗེ་རྒྱ་གྲམ་དུ་བཞག་སྟེ་བསྟན་པར་བྱ། ཡང་དག་པ་ཡི་དཀྱིལ་འཁོར་འདིར། །བདག་གི་སློབ་མ་གཞུག་པར་བགྱི། །ལྷ་རྣམས་རིགས་ཀྱི་རིམ་པ་དང༌། བསོད་ནམས་ཅི་འདྲ་དེ་འདྲར་ཤོག །དེ་ཡི་དངོས་གྲུབ་ཅི་འདྲར་འགྱུར། །རིགས་ནི་གང་གི་སྣོད་དུ་འགྱུར། །བསོད་ནམས་མཐུ་ཡང་ཅི་འདྲ་བ། །དེ་འདྲ་དཀྱིལ་འཁོར་དུ་གྱུར་ཅིག ལན་གསུམ་གྱིས་བདེན་སྟོབས་བརྗོད་ནས། ཨོཾ་པྲཏཱིཙྪ་བཛྲ་ཧོཿ ཞེས་མེ་ཏོག་ཕུལ། ཨོཾ་པྲ་ཏི་གྲྀཧྞ་སྟྭཾ་ཨི་མཾ་སཏྭ་མཧཱ་བ་ལ། ཞེས་སྤྱི་བོར་བཅིངས། རྡོ་རྗེ་སེམས་དཔའ་དེང་ཁྱོད་ཀྱི། མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་གྱུར་པ། །རྡོ་རྗེའི་མིག་ནི་བླ་ན་མེད། །ཨོཾ་བཛྲ་ནཻ་ཏྲ་ཨ་པ་ཧ་ར་པ་དྲ་ལཾ་ཧྲི་ཏྲཾ། མིག་དར་ཕྱེ། ཧེ་བཛྲ་པཱ་ཤྱ། དཀྱིལ་འཁོར་བཟང་པོ་འདི་ལ་ལྟོས། །ད་ནི་དང་བ་རབ་ཏུ་སྐྱེད། ཁྱོད་ནི་སངས་རྒྱས་རིགས་སུ་སྐྱེ། །སྔགས་དང་ཕྱག་རྒྱས་བྱིན་གྱིས་རླབས། །འགྲོ་བ་ཕུན་ཚོགས་དངོས་གྲུབ་དང༌། །
དངོས་གྲུབ་ཀུན་ཁྱོད་མངོན་དུ་འགྱུར། །དམ་ཚིག་ཐམས་ཅད་སྐྱང་བ་དང༌། །སྔགས་རྣམས་ལ་ཡང་བརྩོན་པར་གྱིས། །རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་མངོན་གསུམ་བཞིན་དུ་གསལ་བར་གྱུར། སློབ་མ་དབང་བསྐུར་གྱི་དུས་སྐབས་འདིར་ལྷ་ངོ་སྟོན་ཞིང། ནད་གདོན་གྱི་གཙེས་པ་དང༌། བྱུར་ཆགས་ཡོད་པ་སོགས་ལ་བྱང་གྲོལ་བྱེད་ན་ཡང༌། ལྷ་ངོ་བསྟན་མ་ཐག་པའི་སྐབས་འདིར་བྱས་ན་ལེགས་ཏེ་རྒྱུ་མཚན་དུ་མ་ཡོད་དོ། །དེ་ནས་དངོས་གཞིའི་དོན་དུ་མཎྜལ་ཕུལ། ཨོཾ་མུ་ནི་མུ་ནི་མུ་ནི་བ་རེ་དེ་བཞིན་གཤེགས་པ་ཐམས་ཅད་ཀྱི་རིག་པའི་དབང་བསྐུར་བ། རྡོ་རྗེའི་གོ་ཆ་ཆེན་པོའི་ཕྱག་རྒྱས་རྒྱས་བཏབ་པ་ཐམས་ཅད་ཀྱིས། བདག་ལ་དབང་བསྐུར་དུ་གསོལ། ཨོཾ་སརྦ་ཏ་ཐཱ་ག་ཏ་ཧྲི་ད་ཡ་དྷིཥྛི་ཏེ་མུ་དྲ་བཛྲ་སྭཱཧཱ། ལན་གསུམ། དཀྱིལ་འཁོར་གྱི་ལྷ་ལ་སློབ་དཔོན་གྱི་གསོལ་བ་བཏབ་པར་ཡང་མོས་ཏེ། བདག་ལ་ཞེས་པ་འདི་ལ་ཞེས་པར་འདོན་པ་བསྒྱུར། དེ་ནས་བུམ་པ་ལྔ་ཡོད་ན་གཞན་རྣམས་ཀྱི་ཆུ་གཙོ་བུམ་དུ་བསྡུས། མེད་ན་ལྷ་བུམ་གཅིག་པོ་ཉིད་ཐོགས། བདུག་སྤོས་བརྟུལ། མེ་ཏོག་མཐོར་བཞིན་དུ། ཨོཾ་ཕུན་སུམ་ཚོགས་པ་མངའ་བ༴ སོགས་ཀྱི་བཀྲ་ཤིས་བརྗོད། བུམ་པའི་ནང་དུ། ལྷ་ལྔ་བཞུགས་པ་ལས་བདུད་རྩིའི་རྒྱུན་བབས། རང་གི་སྤྱི་བོ་ནས་བཞུགས། ལུས་ཀྱི་ནང་ཐམས་ཅད་གང་བར་གྱུར། ཨོཾ་མ་ཎི་དྷ་རི་བཛྲི་ཎི་མཧཱ་པྲཏི་པཱ་རེ་ཧཱུཾ་ཧཱུཾ་ཕཊ་ཕཊ་སྭཱཧཱ། བཛྲ་ཨ་བྷི་ཥིཉྩ་ཧཱུཾ། ལན་གསུམ་ལ་སོགས་པ་དང༌། དེ་བཞིན་དུ་བཅོམ་
ལྡན་འདས་མ་བཞི་པོའི་སྔགས་ལའང་སྦྱར། བསྡུ་ན་དེ་ཙམ་གྱིས་ཆོ་ག་ལ། སྤྲོ་ན། ཨོཾ་ཨིནྡྲ་ཡ་སྭཱཧཱ། བཛྲ་ཨ་བྷི་ཥིཉྩ་ཧཱུཾ། ཞེས་པ་ནས། ཨོཾ་བཻ་ཤེ་མ་ཎ་ཡ་སྭཱཧཱ། བཛྲ་ཨ་བྷི་ཥིཉྩ་ཧཱུཾ། ཞེས་པའི་བར་དུ་ཡང་སྦྱར་ཏེ་ཆུ་དབང་བསྐུར་རོ། །དེ་ནས་གཙུག་ཏོར་གྱི་ཕྱག་རྒྱ་སྤྱི་པོར་གཏུགས་ཏེ། ཨོཾ་ཏ་ཐཱ་ག་ཏ་ཏོ་བྷ་ཝ་ཨ་བྷི་ཥིཉྩ་ཧཱུཾ། ཞེས་ཅོད་པན་གྱི་དབང་བླང༌། དེ་ནས། རང་གི་སྤྱི་བོར་སོ་སོར་འབྲང་མ། ཕྲག་པ་གཡས་སུ་སྟོང་ཆེན་རབ་འཇོམས། གཡོན་དུ་རྨ་བྱ་ཆེན་མོ། མཆན་ཁུང་གཡས་སུ་གསང་སྔགས་རྗེས་འཛིན། གཡོན་དུ་བསིལ་བའི་ཚལ་རྣམས་བཞུགས་ཏེ། སྲུང་བ་ཆེན་པོ་མཛད་པར་གྱུར། གནས་དེ་རྣམས་སུ་རྡོ་རྗེ་གཏུགས་ཤིང༌། ཨོཾ་མ་ཎི་སོགས་ཀྱིས་མཐར། རཀྵ་རཀྵ་མཾ། ཨོཾ་ཨ་མྲྀ་ཏ་བ་རེ་སོགས། རཀྵ་རཀྵ་མམ། ཨོཾ་ཨ་མྲྀ་ཏ་བི་ལོ་སོགས། རཀྵ་རཀྵ་མམ། ཨོཾ་བི་མ་ལེ་སོགས་རཀྵ་རཀྵ་མཾ། ཨོཾ་བྷ་ར་སོགས། རཀྵ་རཀྵ་མཾ། ཨོཾ་ཨིནྡྲ་ཡ་སོགས། རཀྵ་རཀྵ་མཾ། ཞེས་པ་ནི་ལྷའི་བསྲུང་བའོ། །དེ་ནི་ཆུ་ཅོད་པན་གྱི་དབང་གི་ཡན་ལག་གོ །དེ་ནས་སློབ་མ་ལ་དབང་བསྐུར་བའི་དུས་ཡིན་ན། མེ་ལོང་ལ་སོར་འབྲང་གི་སྙིང་པོ་བྲིས་པ་བུམ་ཆུས་བཀྲུས་ཏེ། སློབ་མ་ལ་འཐུང་དུ་གཞུག་པ་ཡིན། བདག་འཇུག་གི་སྐབས། ཁྲུས་བུམ་གྱི་ཆུ་ནས་ཅུང་ཟད་བཏུངས་ཏེ། མ་ཎི་དྷ་རི་སོགས་སྔགས་ལྔ་པོ་ཚར་གཅིག་བརྗོད། འདི་ལ་སྔགས་ཀྱི་སྲུང་བ་ཞེས་ཟེར་ཡང༌། སྔགས་དབང་དངོས་ཡིན་པས། དེའི་རྗེས་སུ་བཟླས་ལུང་དང་དམ་བཅའ་བ་དང་བྱིན་རླབས་ཀྱི་ལུང་རྣམས་བྱས་ཀྱང་ཤིན་ཏུ་ལེགས་ཞིང༌། གང་ལྟར་ཡང་དབང་གི་དངོས་གཞི་ནང་ཚན།
གལ་པོ་ཆེ་ཞིག་ཡིན་པ་ཞེས་པར་བཟུང་ངོ༌། །དེ་ནི་སློབ་མ་ལ་དབང་བསྐུར་ན། འོ་ཐུག་སྨན་དང་བཅས་པ་སྦྱིན་དགོས་ཤིང༌། བདག་འཇུག་ལ་ནི་ཁྲུས་བུམ་གྱི་ཆུ་ནས་བཏུངས་ཏེ། སངས་རྒྱས་རྣམ་གཟིགས་གཟི་བརྗིད་དང༌། །གཙུག་ཏོར་ཅན་གྱི་སྟོབས་རྣམས་དང༌། །ཐམས་ཅད་སྐྱོབ་ཀྱི་བདེན་ཚིག་དང༌། །ལོག་དད་སེལ་གྱི་ཏིང་འཛིན་དང༌། །གསེར་ཞེས་བྱ་བའི་ཡེ་ཤེས་དང༌། །འོད་སྲུངས་ཀྱི་ནི་རྫུ་འཕྲུལ་དང༌། །ཤཱཀྱ་སེངྒེའི་མཐུ་རྣམས་ཀྱིས། །སྨན་རྣམས་བདུད་རྩིར་འགྱུར་བར་ཤོག །རླུང་ལས་གྱུར་དང་མཁྲིས་ལས་གྱུར། །པད་དཀན་གྱུར་དང་འདུས་ལས་གྱུར། ནད་རྣམས་ཐམས་ཅད་རབ་བཅོམས་ཏེ། ཁྱེད་ལ་རྟག་ཏུ་བདེ་ལེགས་ཤོག །དེ་ལ་ནི་ཁ་ཟས་ཀྱི་སྲུང་བ་ཞེས་ཟེར་ཏེ། དགའ་སྟོན་གྱི་ཚུལ་ལོ། །བདེན་པ་དང་བདེན་པའི་ཚིག་གང་གིས། སེམས་ཅན་རྐང་པ་མེད་པའམ། རྐང་པ་གཉིས་པའམ། རྐང་པ་བཞི་པའམ། རྐང་མང་ངམ། གཟུགས་ཅན་ནམ། གཟུགས་ཅན་མ་ཡིན་པའམ། འདུ་ཤེས་ཅན་ནམ། འདུ་ཤེས་ཅན་མ་ཡིན་པའམ། འདུ་ཤེས་མེད། འདུ་ཤེས་མེད་མིན་གྱི་སེམས་ཅན་ཇི་སྙེད་པ་དེ་དག་ལས། དེ་བཞིན་གཤེགས་པ་མཆོག་ཅེས་བྱ་བ་དང༌། བདེན་པ་དང་བདེན་པའི་ཚིགས་གང་གིས། འདུས་བྱས་དང་འདུས་མ་བྱས་ཀྱི་ཆོས་ཇི་སྙེད་ཡོད་པ་དེ་དག་གིས་ནང་ནས། འདོད་ཆགས་དང་བྲལ་བ་མཆོག་ཅེས་བྱ་བ་དང༌། བདེན་པ་དང་བདེན་པའི་ཚིག་གང་གིས།
ཚོགས་པའམ་རིང་དུས་པའམ། མང་པོའམ། འཁོར་ཇི་སྙེད་ཡོད་པ་དེ་དག་གི་ནང་ནས། དེ་བཞིན་གཤེགས་པའི་ཉན་ཐོས་ཀྱི་དགེ་འདུན་མཆོག་ཅེས་བྱ་སྟེ། བདེན་པ་དང་བདེན་པའི་ཚིག་དེ་རྣམས་ཀྱིས། བདག་ཅག་དཔོན་སློབ་ཡོན་མཆོད་རྣམས་ལ་སྲུང་བར་བྱའོ། །ཡོངས་སུ་སྐྱབ་པ་དང༌། ཡོངས་སུ་བཟུང་བ་དང༌། ཡོངས་སུ་སྐྱངས་བ་དང༌། ཞི་བ་དང༌། བདེ་ལེགས་སུ་འགྱུར་བར་བྱའོ། །མཚམས་བཅད་པར་བྱའོ། །འབྱུང་པོ་ཐམས་ཅད་བཟློག་པར་བྱའོ། །གཟི་བརྗོད་འཕྲོག་པ་རྣམས་བཟློག་པར་བྱའོ། །ནད་རིགས་བཞི་བརྒྱ་རྩ་བཞི་ཟད་པར་གྱུར་ཅིག །མེད་པར་གྱུར་ཅིག །ཞི་བར་གྱུར་ཅིག །རབ་ཏུ་ཞི་བར་གྱུར་ཅིག །ཅེས་པ་ནི་བདེན་སྟོབས་བརྗོད་པས་བསྲུང་བའོ། །དེ་ནས་རང་ངམ་སྒྲུབ་བྱ་ལ་མེ་ཏོག་གཏོར་ཏེ། སྟོན་མཆོག་དམ་པ་ལྷ་མིས་མཆོད་འོས་པ། སངས་རྒྱས་ཕྱག་འཚལ་དེང་འདིར་བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་ལེགས་ཤོག །ཞི་བ་ཆགས་བྲལ་ལྷ་མིས་མཆོད་འོས་པ། །ཆོས་ལ་ཕྱག་འཚལ༴ ཚོགས་ཀྱི་མཆོག་རབ་ལྷ་མིས་མཆོད་འོས་པ། །དགེ་བདུན་ཕྱག་འཚལ༴ འབྱུང་པོ་གང་དག་འདིར་ནི་ལྷགས་གྱུར་ཏེ། །སའམ་འོན་ཏེ་བར་སྣང་འཁོར་ཀྱང་རུང༌། །སྐྱེ་རྒུ་ཀུན་ལ་རྟག་ཏུ་བྱམས་བྱེད་ཅིང༌། །ཉིན་དང་མཚན་དུ་ཆོས་ལ་སྤྱོད་གྱུར་ཅིག །འདི་ནི་རྒྱལ་བ་དགྲ་རྒྱལ་བདེན་གང་གི །ཤིན་ཏུ་བདེན་པ་གསུངས་ཞིང་བརྫུན་མེད་པ། །བདེན་པ་
དེ་ཡིས་འདིར་ནི་བདེ་ལེགས་ཤོག །དེ་ཀུན་འཇིགས་པ་ཆེ་ལས་ཐར་གྱུར་ཅིག ཅེས་པ་ནི་ཤིས་བརྫོད་དོ། དེ་རྗེས། གཙོ་བོས་ཇི་ལྟར་བཀའ་སྩལ་པ་སོགས་དང༌། མཎྜལ་འབུལ། དེང་ནས་བརྩམས་ཏེ༴ སོགས་བྱ། སྔར་བུམ་བསྐྱེད་དང༌། སྟ་གོན་གྱི་ལྷའི་སྐབས་སུ་བཤད་པ་ལྟ་བུ་གང་ཡང་རུང་བའི་རྗེས་མཆོག་བྱ་སྟེ། དེ་ཡང་མཆོད་པ་བྱིན་གྱིས་རླབས། མཆོད་བསྟོད་ཡིག་བརྒྱ་བཟོད་གསོལ་རྣམས་བྱ་ཞིང་རྡུལ་ཚོན་གྱི་ཞག་ཐ་མ་ཡིན་ན་གཤེགས་གསོལ་བྱེད་ཚུལ་སྤྱི་དང་འདྲ། རྟེན་གཞན་རྣམས་ལ་བརྟན་བཞུགས་བྱ། རྡུལ་མཚོན་ཡིན་ཡང་སྒྲུབ་མཆོད་ཞག་སྤྲེལ་མ་བྱེད་པའི་ཉི་མ་སྔ་མ་རྣམས་དང༌། རས་བྲིས་ཀྱི་དཀྱིལ་འཁོར་ལ་ནི་དཀྱིལ་འཁོར་ཉིད་ལ་བརྟན་བཞུགས་བྱ་ཞིང༌། ཨོཾ་ཁྱོད་ཀྱྀ་སེམས་ཅན་དོན་ཀུན་མཛད། སོགས་ཀྱིས་མགྲོན་རྣམས་གཤེགས་སུ་གསོལ། གང་ལྟར་ཡང་མཇུག་ཏུ་སྨོན་ལམ་དང་བཀྲ་ཤིས་གང་འགྲུབ་བྱའོ། །རས་བྲིས་ལ་བརྟེན་ན་ཐིག་ཚོན་གྱི་བྱ་བ་ནམ་ཡང་མི་དགོས་པ་དེར་གདའ། ས་ཆོག་དང་སྟ་གོན་ནི་འགྲུབ་ན་ཤིན་ཏུ་ལེགས་ཤིང༌། མ་འགྲུབ་ན་དངོས་གཞི་ཁོ་ན་བྱེད་པའི་ལག་ལེན་སྤྱིར་ཡང་མང་དུ་གདའ་བ་དང༌། ལུགས་འདི་ཉིད་ལ་ཡང༌། ལག་ལེན་དེ་ལྟར་བྱེད་པ་མང་སྟེ། རུང་བ་ཙམ་དུ་ནི་མངོན་ནོ། །དཀྱིལ་འཁོར་ཆོ་ག་འདི་སྒྲུབས་པས། །དགེ་བ་ཅུང་ཟད་གང་ཐོབ་པ། །དེས་ནི་འགྲོ་བ་མ་ལུས་པ། །བླ་མེད་གོ་འཕང་ཐོབ་པར་ཤོག །ཅེས་སྲུང་བ་ལྔའི་དཀྱིལ་འཁོར་གྱི་ཆོ་ག་བར་ཆད་ཀུན་སེལ་ཞེས་བྱ་བ་འདི་ཡང་དོན་གཉེར་དུ་མས་བསྐུལ་བའི་ངོར། ཏཱ་ར་ནཱ་ཐས་སྦྱར་བ་སྟེ་དཀྱིལ་
འཁོར་འདི་ལ་བླ་མ་གོང་མ་རྣམས་ཀྱིས་ཆོག་སྒྲིགས་ཤིན་ཏུ་རྒྱས་པ་མཛད་འདུག་ནའང༌། འདིའམ་འདི་ལྟ་བུ་དག་ན། རྩ་བའི་དཀྱིལ་འཁོར་དུ་བཟུང་ནས། ཉན་བཤད་སྒོམ་སྒྲུབ་ལག་ལེན་རྩལ་འདོན་དུ་བྱེད་བའི་གྲྭ་ད་ལྟ་ནི་མེད་ལ་སྔར་ཡང་མ་བྱུང་ཞིང༌། ཕྱིས་ཀྱང་འབྱུང་དཀོན་ཏེ་དེས་ན་ཞོར་བྱུང་དུ་བྱེད་དགོས་པའི་རིགས་འདི་འདྲ་ལ། ཆོ་ག་སྤྲོས་པ་ཆེས་ན། རྩ་བ་ནས་ནུབ་པའི་ཉེན་ཡོད་ཅིང༌། དུས་ཀྱི་ཐ་མ་འདི་ལྟ་བུར་ཤེས་རབ་ཆུང་ངུའི་སྐྱེ་བོ་ཉི་ཚེ་ལྟ་བུར་སྣང་བས་འདི་འདྲའི་རིགས་ལ་དོན་ཚང་ཕྱིན་ཁྱེར་བདེ་བ་ཁོ་ན་ལེགས་པར་མཐོང་སྟེ། དེ་བཞིན་དུ་སྦྱར་བ་ཡིན་ནོ།། །།གཅིག་ཞུས།། །།