དཔལ་ལྷ་མོ་རྡོ་རྗེ་རབ་བརྟན་མའི་གཏོར་ཆོག་ངག་འདོན།

[Full Size]

དཔལ་ལྷ་མོ་རྡོ་རྗེ་རབ་བརྟན་མའི་གཏོར་ཆོག་ངག་འདོན་བཞུགས་སོ། །

[Full Size]

ཨོཾ་སྭཱ་སྟི། དཔལ་ལྷ་མོ་རྡོ་རྗེ་རབ་བརྟན་མའམ་རྡོ་རྗེ་གཤོག་རྒོད་མའི་མཚན་དུ་གསོལ་བ་འདི་ལ། གཏོར་མའི་མཆོད་པ་འབུལ་ཞིང་བསྙེན་པར་འདོད་ན། གཏོར་མ་སྙིང་གཟུགས་མ་ཤ་ཁྲག་གིས་བརྒྱན་པ་ཇི་ལྟར་འོས་པས་ཀྱང་རུང་ལ། འཁོར་ལས་མཁན་གཉིས་ལ་བཤོས་ཕྲན་ཟུར་བཞི་སྦྲུལ་ཐོད་ཅན་རེ། གཙོ་མོའི་གཏོར་མའི་མདུན་དུ་བཤོམ་པའང་འདུག་པ་རུང་མོད། ལ་ལས་གསུམ་པོ་སྡམས་པ་ལ་འཐེབ་ཀྱུས་སྐོར་བའི་ལག་ལེན་བྱེད་པའང་འདུག་སྟེ། དེ་ནི་མི་ལེགས་པར་མངོན་ནོ། །ལས་མཁན་གཉིས་ཀྱི་གཏོར་མ་ལོགས་སུ་བྱེད་ན། སྣོད་ལོགས་པར་བཅུག་སྟེ་འོག་ཏུ་བཤམས་ན་ལེགས། འོན་ཀྱང་བསྐང་བའི་སྐབས་ཡིན་ན་མ་གཏོགས། རྒྱུན་གྱི་ཉམས་ལེན་དང་བསྙེན་པའི་སྐབས། དེ་གཉིས་ལ་ལོགས་སུ་གཏོར་མ་བཤམ་མི་དགོས་ཞོར་བྱུང་གིས་ཆོག་གོ །དེའི་མདུན་དུ་ནང་མཆོད་དང་རཀྟ་བཤམ། ཆུ་དང་ཉེར་སྤྱོད་སོགས་སྤྱི་དང་

[Full Size]

མཐུན་པར་བསྒྲིག །ཡང་རྒྱུན་ཁྱེར་ཤིན་ཏུ་བསྡུས་པའི་སྐབས་གཏོར་མ་གྲུ་གསུམ་རང་ཞིག་བཅས་ཏེ། དེ་ཉིད་འདོད་ཡོན་ཀུན་འདུས་ཡིན་པས་མཆོད་པ་གཞན་མ་བཤམ་ཀྱང་བསྔོ་རུ་རུང་ངོ༌། །དེ་ནས་ཡི་དམ་གང་ཡང་རུང་བའི་བདག་བསྐྱེད་བཟླས་པ་དང་བཅས་པ་སྔོན་དུ་སོང་ནས། ཡི་དམ་གང་ཡིན་དེ་ཀའི་ལུགས་ཀྱི་གཏོར་མ་དང་ནང་མཆོད་ལྷན་ཅིག་བྱིན་རླབས་བྱས་པས་རུང་ལ། རཀྟ་ཡང་ནང་མཆོད་ཀྱི་ཞོར་ལ་འགྲུབ་པའི་ལུགས་སམ། ཡང་ན་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཡཾ་གསུམ་ལས་རླུང་གི་དཀྱིལ་འཁོར་གསུམ་གྱི་སྟེང་དུ་རཾ་གསུམ་ལས་མེའི་དཀྱིལ་འཁོར་རེ་རེ། དེ་རྣམས་ཀྱི་སྟེང་དུ་ཨ་གསུམ་ལས་ཐོད་པའི་སྣོད་ཡངས་ཤིང་རྒྱ་ཆེ་བ་གསུམ། གཏོར་མའི་གནས་སུ་བཟའ་བ་དམ་རྫས་ཀྱི་ཁྱད་པར་སྣ་ཚོགས་པ་ཐམས་

[Full Size]

ཅད་ཤ་ལྔའི་རྣམ་པར་གྱུར་ཏེ། དབུས་སུ་མི་ཤ་ཧཱུཾ་སྔོན་པོས་མཚན་པ། ཤར་དུ་བ་ལང་གི་ཤ་ཨོཾ་དཀར་པོས་མཚན་པ། ལྷོར་ཁྱིའི་ཤ་ཏྲཾ་སེར་པོས་མཚན་པ། ནུབ་ཏུ་རྟའི་ཤ་ཧྲཱིཿདམར་པོས་མཚན་པ། བྱང་དུ་གླང་པོ་ཆེའི་ཤ་ཨཿལྗང་ཁུས་མཚན་པ། བདུད་རྩི་སྨན་གྱི་གནས་སུ་བཏུང་བ་དང་བཾ་རྫས་ཀྱི་བྱེ་བྲག་རྣམས་བདུད་རྩི་ལྔར་གྱུར་པ་ནི། དབུས་སུ་བྱང་སེམས་མུཾ་ཡིག་སྔོན་པོས་མཚན་པ། ཤར་དུ་དྲི་ཆེན་མཾ་དཀར་པོས་མཚན་པ། ལྷོར་དྲི་ཆུ་མཾ་སེར་པོས་མཚན་པ། ནུབ་ཏུ་རཀྟ་པཾ་དམར་པོས་མཚན་པ། བྱང་དུ་ཤ་ཆེན་གྱི་དྭངས་མ་ཏཱཾ་ལྗང་ཁུས་མཚན་པ་རྣམས་སུ་གྱུར། རཀྟའི་གནས་སུ་དགྲ་བགེགས་བསྒྲལ་བའི་ཤ་ཁྲག་ཕུང་པོར་རཾ་ཡིག་གིས་མཚན་པ་སྟེ། དེ་ཐམས་ཅད་ལ་རང་དང་འོག་གི་རླུང་གཡོས་མེ་སྦར་རྫས་རྣམས་ཞུ་ཞིང་ཁོལ་མ་དག་པ་རྣམས་སྦྱངས། ཨོཾ་ཨཱཿཧཱུཾ་ལན་གསུམ། ཡེ་ཤེས་ཀྱི་བདུད་རྩི་ཁ་དོག་དྲི་རོ་ཕུན་སུམ་ཚོགས་པར་གྱུར། ཐམས་ཅད་ཀྱི་སྟེང་དུ་ཨོཾ་དཀར་པོ་རེ་རེ། དེ་ལས་འོད་ཟེར་འཕྲོས། འཁོར་འདས་སྣོད་བཅུད་ཐམས་ཅད་ཀྱི་དྭངས་མ། ཡེ་ཤེས་ཀྱི་བདུད་རྩིར་སྤྱན་དྲངས་ཏེ་ཨོཾ་ལ་ཐིམ། ཨོཾ་ཡིག་རྣམས་འོད་དུ་ཞུ་ནས་རྫས་ལ་ཐིམ་པས། ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་མཧཱ་བ་ལིང་ཏ་ཏེ་ཛོ་བ་ལང་ཏ་བ་ལ་བ་ཏེ་གུ་ཧྱ་སིདྡྷི་ས་མ་ཡ་ཧཱུཾ་ཧྲཱིཿཐ། ཨོཾ་སརྦ་པཉྩ་ཨ་མྲྀ་ཏ་ལ་ཧཱུཾ་ཧྲཱིཿཐ། ཨོཾ་མཧཱ་རཀྟ་ཛྭ་ལ་མཎྜ་ལ་ཧཱུཾ་ཧྲཱིཿཐ།

[Full Size]

ཞེས་བྱིན་གྱིས་བརླབ་བོ། །ཤིན་ཏུ་བསྡུས་པའི་སྐབས་གཏོར་མ་དམར་གྱི་རྒྱན་དང་མྱོས་བྱེད་ཀྱིས་སྦྲན་པ་ཉིད་ལ་གཏོར་སྨན་རག་གསུམ་ཚངས་པ་ཡིན་ནོ། །ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། མེ་རླུང་འཚུབ་མའི་དབུས། རྡོ་རྗེའི་ས་གཞི་དང་ལྕགས་རིས་བསྐོར་བའི་ནང༌། རཀྟའི་རྒྱ་མཚོ་ཆེན་པོ་རྦ་ཀློང་འཁྲུགས་པའི་དབུས་སུ། བྷྲཱུཾ་ལས་གཞལ་ཡས་ཁང་བསེ་མཁར་དམར་པོ་གྲུ་བཞི་པ། ངོས་བཞི་གསེར་དང༌། ཟུར་བཞི་མཆོང་ལས་གྲུབ་པ། རྨངས་གཞི་ལྕགས་ལས་གྲུབ་ཅིང༌། ཤེལ་གྱི་:སྐྲས་[སྐས]བཙུགས་པ། དེའི་དབུས་སུ་མི་རོ་རྟ་རོ་གཅལ་དུ་བཀྲམ་པའི་གནས་ལ། ཉི་མའི་སྟེང་དུ་ཀཾ་ལས་རལ་གྲི་ཀཾ་གིས་མཚན་པ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། དགྲ་བགེགས་གདུག་པ་ཅན་ཐམས་ཅད་ཚར་བཅད། ཚུར་འདུས་ཡོངས་སུ་གྱུར་པ་ལས། དཔལ་ལྡན་གཉན་གྱི་རེ་མ་ཏཱི་ལྷ་མོ་རྡོ་རྗེ་རབ་བརྟན་མ། སྐུ་མདོག་སྨུག་ནག །ཞལ་གཅིག་ཕྱག་གཉིས་མ། ཕྱག་གཡས་པས་རལ་གྲི་འཕྱར་བས་བསྟན་པ་བསྲུང་ཞིང་གདུག་ཅན་ཚར་གཅོད་པ། གཡོན་གཏེར་གྱི་ནེའུ་ལེ་འཛིན་པས་སྒྲུབ་པ་པོ་ལ་དངོས་གྲུབ་སྩོལ་བ། དམར་ལ་ཟླུམ་པའི་སྤྱན་གསུམ་དང་ལྡན་ཞིང་མཆེ་བ་གཙིགས་པ། དབུ་སྐྲ་དམར་སེར་སྤྱི་བོར་འཁྱིལ་བ། མིའི་པགས་པའི་སྟོད་གཡོགས་དང༌། བ་གླང་གི་པགས་པས་སྨད་དཀྲིས་པ། རེ་ལྡེའི་ཤམ་བུ་ཅན། སྦྲུལ་རིགས་བཞིའི་སྐེ་

[Full Size]

རགས་བཅིངས་པ། ཐོད་སྐམ་གྱི་དབུ་རྒྱན་དང༌། མི་མགོའི་དོ་ཤལ་དང༌། རུས་པ་དང་སྦྲུལ་གྱིས་བརྒྱན་པ། ལྟེ་བ་ནས་ཉི་མ་དང༌། སྤྱི་གཙུག་ནས་ཟླ་བ་འཆར་བ། ཁྲག་ཞག་གི་ཐིག་ལེས་བརྒྱན་ཞིང་སྐུ་ལས་མེ་འོད་འཕྲོ་བ། རླུང་ནག་འཚུབ་མའི་དབུས་ན་དྲེལ་རྟ་རྐང་གསུམ་ལ་ཆིབས་པའོ། །འདིར་ལྷ་མོ་འདི་རྡོ་རྗེའི་གཤོག་པ་ཅན་དུ་བྱེད་པའི་ལུགས་གཅིག་ཀྱང་ཡོད་པ་ཤིན་ཏུ་ལེགས་པ་ཞིག་ཀྱང་ཡིན་ནོ། །འཁོར་ལས་ཀྱི་ལྷ་མོ་ཆུ་སྲིན་གདོང་ཅན་དང༌། བ་ལཾ་མ་དྲེལ་སྣ་དང༌། ཁྲི་སྨན་ས་ལེ་དང༌། ལས་བཞིའི་ལྷ་མོ་དང༌། དུས་བཞིའི་རྒྱལ་མོ་དང༌། མ་མོའི་ཚོགས་དཔག་ཏུ་མེད་པས་བསྐོར་བའོ། །དེ་ཙམ་གྱི་ཀྱང་ཆོག་ལ། ལས་མཁན་གཉིས་བསྐྱེད་པར་འདོད་ན། ཕུཿཏྲི་ཛཿ འོག་ཕྱོགས་གཡས་ཟུར་དུ་མིང་པོ་ཀླུ་ཆེན་ཐོད་དཀར་སྐུ་མདོག་དཀར་པོ། སྦྲུལ་མགོའི་གདེངས་ཀ་ཅན། གཡས་ཁྲམ་ཤིང་དང༌། གཡོན་གཏེར་གྱི་བུམ་པ་འཛིན་པ། ཀླུ་རྟ་སྔོན་པོ་ལ་ཞོན་པ། དུ་ཏྲི་ཛཿ གཡོན་ཟུར་དུ་ལས་མཁན་ཀླུ་བདུད་ནག་པོ། གཡས་རལ་གྲིའམ་རུ་མཚོན། གཡོན་སྦྲུལ་ཞགས་འཛིན་པ། བདུད་རྟ་ནག་པོ་ལ་ཞོན་པའོ། །ཞེས་བསྐྱེད་དོ། །ཡེ་ཤེས་ལྷ་མོའི་སྐུའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས་པས། རང་བཞིན་གྱི་གནས་ནས་དཔལ་གྱི་ལྷ་མོ་འཁོར་དང་བཅས་པ་བཛྲ་ས་མཱ་ཛཿ བྷྱོཿ དཔལ་ལྡན་གཉན་གྱི་རེ་མ་ཏཱི། ཁྱོད་ཀྱི་སྤྱི་བོའི་གཙུག་རུམ་ནས། །ཉི་མ་ཟླ་བའི་འོད་ཟེར་འཕྲོས། །ནག་མོ་མི་བཟད་

[Full Size]

ཆོ་འཕྲུལ་ཅན། །མིང་པོས་འབོད་ཀྱི་ད་ཚུར་བྱོན། ཁྱོད་ཀྱི་ཐུགས་ཀྱི་དཀྱིལ་འཁོར་ནས། །འདོད་ཁམས་མ་མོ་སྟོང་སྟོང་འགྱེད། །མ་ཡི་གསང་བའི་དཀྱིལ་འཁོར་ནས། །ལས་ཀྱི་མ་མོ་སྟོང་ཕྲག་འགྱེད། །མ་ཡི་ཞབས་མཐིལ་གཡས་གཡོན་ནས། །ཕོ་ཉ་འབུམ་དང་ཉི་ཁྲི་འཁྱེད། །བདུད་དང་ལྷ་འདྲེ་ངན་སེམས་ཅན། །དགྲ་བོ་ཀུན་འདུལ་གནས་འདིར་བྱོན། །རཀ་མོ་དུ་ར་དུན་ཏིང་བྷྱོཿ ཁ་ཁ་དུ་ར་དུན་ཏིང་བྷྱོཿ ཧེ་ར་དུ་ར་དུན་ཏིང་བྷྱོཿ ཨེ་ཨ་ར་ལི་ཧྲཾ་ཧྲིཾ་ཛཿ ཞེས་སྤྱན་དྲངས། ཨརྒྷཾ་ནས་ཤཔྟའི་བར་གྱིས་མཆོད། བྷྱོཿབྷྱོཿའདོད་པ་ཁམས་ཀྱི་དབང་ཕྱུག་མ། །བདུད་ཀྱི་ཡུམ་ལ་གཤིན་རྗེའི་ལྕམ། །དཔལ་ལྡན་རྡོ་རྗེ་གཤོག་རྒོད་རྩལ། །བདག་ནི་བརྡ་ཡི་ཕྱག་འབུལ་ལོ། །མ་མོ་ནག་མོ་རཀ་མོ་ས་མ་ཡ་ཨ་ཏི་པཱུ་ཧོ། པྲ་ཏི་པཱུ་ཧོ། ས་མ་ཡ་ཕུ་ཧོ། ཞེས་ཕྱག་བཙལ། མཧཱ་ཀཱ་ལི་དེ་བི་ས་མ་ཡ་སྟྭཾ། ཞེས་དམ་ལ་བཞག བྷྱོཿ སྲིད་གསུམ་དབང་བསྡུད་ནག་མོ་རེ་མ་ཏཱི། །མཐིང་ནག་རལ་པ་སྤྲིན་སྤུངས་འཐིབས་པ་འདྲ། །ཏི་རའི་གནས་ནས་བྱིས་པའི་དུར་བྱེད་མ། །མི་དུར་གཅོད་བྱེད་ནག་མོ་བཞུགས་སུ་གསོལ། །མ་མོ་ནག་མོ་ས་ཡ་ཏིཥྛ་ལྷན། ཞེས་བཞུགས་སུ་གསོལ། ཛཿཧཱུཾ་བཾ་ཧོཿལན་མང་དུ་བརྗོད། གཉིས་སུ་མེད་པར་བསྟིམ། ཏདྱ་ཐཱ། རུ་རུ་བི་ཏིཥྛ་བ་ཏོ་སི། མ་མོ་རཀ་མོ་ཙིཏྟཾ་ཁ་རག་མ་བྷྱོཿབྷྱོཿསྭཱཧཱ། ཞེས་བཟླས་པ་ཅུང་ཟད་བྱ། ཨོཾ་ཨཱཿཧཱུཾ་ཧ་ཧོ་ཧྲཱིཿཞེས་གཏོར་མ་བྱིན་

[Full Size]

རླབས་ཁ་གསོས་ལ། སྔགས་སྙིང་པོ་དེ་ཉིད་ཚར་གཅིག་གི་རྗེས་ལ་འདི་འདོགས་ཏེ། ཨོཾ་བ་ལིང་ཏ་ཁ་རཾ་ཁཱ་ཧི། ཨོཾ་ཡོ་གི་ནཱི་ཁ་རཾ་ཁཱ་ཧི། ཌཱ་ཀི་ནཱི་ཁ་རཾ་ཁ་ཧཱི། སྟྭཾ་པ་བྷ་ག་ཏ་ཨ་ཀ་ས་ལ་ཧོ། ཞེས་པ་ལན་བདུན་གྱིས་གཏོར་མ་ཕུལ། དེ་བཞིན་དུ་སྙིང་པོའི་མཐར། ཨོཾ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཡོ་གི་ནི་སོགས་གོང་བཞིན། ལན་གཅིག་གམ་གསུམ་གྱིས་བདུད་རྩི་ཕུལ། དེ་བཞིན་དུ་ཨོཾ་མཧཱ་རཀྟ་ཁ་རཾ་སོགས་སྦྱར་བ་ལན་གཅིག་གམ་གསུམ་གྱིས་རཀྟ་ཕུལ། རྟེན་ཅིང་འབྲེལ་བར་འབྱུང་བ་ཡི། །ལྷ་རྫས་དམ་པའི་མཆོད་ཡོན་འདི། །ལྷ་མོ་འཁོར་དང་བཅས་ལ་འབུལ། །བཞེས་ནས་བདག་ལ་དགྱེས་པར་མཛོད། །ཨོཾ་མཧཱ་ཀཱ་ལི་རེ་མ་ཏཱི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། དེ་བཞིན་དུ། ཞབས་བསིལ། ནས། རོལ་མོའི་བར་དང༌། པཱདྱཾ་ནས། ཤཔྟའི་བར་གྱིས་འདོན་པ་སྤོ། བསྡུས་ན་སྔགས་ཙམ་གྱིས་ཆོག བྷྱོཿ ལྷ་ལ་དབང་བསྒྱུར་ལྷ་མོ་དཔལ་འབར་མ། །དབང་ཕྱུག་ཆེན་མོ་སྲས་མོ་གཟི་ལྡན་མ། །སུམ་ཅུ་རྩ་གསུམ་གནས་ཀྱི་བདག་མོ་སྟེ། །ལྷ་མོ་རེ་མ་ཏཱི་ལ་ཕྱག་འཚལ་བསྟོད། །བདུད་ལ་དབང་བསྒྱུར་བདུད་མོ་དཔལ་འབར་མ། །རེ་ཏི་མགོ་ཡག་བུ་མོ་རེ་མ་ཏཱི། །ནག་མོ་རྩེ་དགུའི་གནས་ཀྱི་བདག་མོ་སྟེ། །བདུད་མོ་རེ་མ་ཏཱི་ལ་ཕྱག་འཚལ་བསྟོད། །ཀླུ་ལ་དབང་བསྒྱུར་ཀླུ་མོ་དཔལ་འབར་མོ། །གཙུག་ན་རིན་ཆེན་བུ་མོ་ཡིད་འོང་བྱམས། །རོལ་མཚོ་བདུན་གྱི་གནས་ཀྱི་གཙོ་མོ་སྟེ། །ཀླུ་མོ་རེ་མ་ཏཱི་ལ་ཕྱག་འཚལ་བསྟོད། །གནོད་སྦྱིན་དབང་བསྒྱུར་གནོད་སྦྱིན་དཔལ་འབར་མ། །གང་བ་བཟང་པོའི་བུ་མོ་ཤམ་ཤམ་མ། །

[Full Size]

ནག་ཚལ་དྲ་བ་ཅན་གྱི་གཙོ་མོ་སྟེ། །གནོད་སྦྱིན་རེ་མ་ཏཱི་ལ་ཕྱག་འཚལ་བསྟོད། །ཅེས་པས་བསྟོད། བྷྱོཿ དཔལ་ལྡན་རྡོ་རྗེ་རབ་བརྟན་མ། །སྐུ་མདོག་མཐིང་ནག་ཆེན་པོ་ལ། །ཞལ་གཅིག་ཕྱག་གཉིས་སྤྱན་གསུམ་མ། །ཕྱག་གཡས་རལ་གྲི་འབར་བ་བསྣམས། །གཡོན་པའི་ཕྱག་གིས་ནེའུ་ལེ་འཛིན། །ཆིབས་སུ་དྲེའུ་རྟ་རྐང་གསུམ་ཆིབས། །སྐུ་ལ་མི་ལྤགས་གཡང་གཞི་གསོལ། །ལྷ་མོ་རྡོ་རྗེ་དབང་སྒྲུབ་མ། །འཕྲིན་ལས་བཅོལ་བའི་དུས་ཀྱི་ཚེ། །ཉིན་གསུམ་ཁྲ་ལྟར་འཁྱུག་ཅིང་བྱོན། །མཚན་གསུམ་གློག་ལྟར་འཁྱུག་ཅིང་བྱོན། །བསྟན་པ་བསྲུང་བའི་དུས་ལ་བབས། །མ་གཅིག་རྡོ་རྗེ་རབ་བརྟན་མ། །དགྲ་བོ་འཇོམས་པའི་དུས་ལ་བབ། །དཔལ་ལྡན་རྡོ་རྗེ་རེ་མ་ཏཱི། །རཀྟའི་མཆོད་པ་འདི་བཞེས་ཤིག །བདུད་རྩི་སྨན་གྱི་མཆོད་པ་གསོལ། །ཤ་ཁྲག་གཏོར་མ་འདི་བཞེས་ཤིག ཁྱེད་ཀྱི་ཐུགས་དམ་དུས་ལ་བབ། །བཅོལ་བའི་འཕྲིན་ལས་སྒྲུབ་པར་མཛོད། །རྣལ་འབྱོར་བདག་གིས་བསམ་པ་སྒྲུབས། །དེ་རྗེས། མཆོད་སྦྱིན་གཏོར་མ་འདི་བཞེས་ལ་ནས། ཀུན་འགྲུབ་ཤོག་གི་བར་སྤྱི་དང་མཐུན་པར་ཡང་འཕྲིན་ལས་བཅོལ། ཡིག་བརྒྱ་བཟླས། མ་འབྱོར་བ་དང་སོགས་ཀྱིས་བཟོད་པར་གསོལ། རྟེན་ཡོད་ན་བརྟན་བཞུགས་བྱ། ཨོཾ་ཁྱོད་ཀྱིས་སེམས་ཅན་སོགས་གཏོར་མགྲོན་རྣམས་གཤེགས། སྨོན་ལམ་དང་བཀྲ་ཤིས་སོགས་སྤྱི་དང་མཐུན་པར་བྱའོ། །དཔལ་ལྷ་མོ་རྡོ་རྗེ་རབ་བརྟན་མའི་གཏོར་ཆོག་ངག་འདོན་འདི་ཡང་དོན་གཉེར་མང་པོས་བསྐུལ་བའི་ངོར། རྒྱལ་ཁམས་པ་ཏཱ་ར་ནཱ་ཐས་སྨྲས་པའོ། །འདིའི་གཏོར་ཆོག་ངག་འདོན་ཕྱིས་བསྒྲིགས་པ་འགའ་རེ་འདུག་ཀྱང༌། རྙིང་མ་ལ་གསར་མ་བས་དབང་བཟས་པའི་སྟབས་དགོས་ངོས་ཤེས་པ་འགའ་རེ་ཆད་འདུག་པ་སྐབས་འདིར་ཆ་འགྲིག་པར་བྱས་སོ། །གཅིག་ཞུས། །མངྒ་ལཾ།།