སྒྲོལ་དཀར་ཡིད་བཞིན་འཁོར་ལོའི་ཆོག་སྒྲིག་ལེགས་པར་བཀོད་པ་ངག་འདོན་རབ་གསལ།
སྒྲོལ་དཀར་ཡིད་བཞིན་འཁོར་ལོའི་ཆོག་སྒྲིག་ལེགས་པར་བཀོད་པ་ངག་འདོན་རབ་གསལ་བཞུགས་པའི་དབུ་ཕྱོགས་སོ། །
ན་མཤྩིཏྟ་བཛྲ་ཡ། ལྷ་མོ་ཡིད་བཞིན་འཁོར་ལོའི་ཞབས་ལ་གུས་པར་ཕྱག་འཚལ་ལོ། །ཡར་ངོའི་ཚེས་བརྒྱད་ལ་སོགས་པ། གཟའ་སྐར་དུས་སྦྱོར་བཟང་བ་ལ། དབེན་པའི་གནས་སུ་མཎྜལ་དྲི་བཟང་གིས་བྱུགས་ལ། པདྨ་འདབ་བརྒྱད་དཀར་པོ་བྲིས་པའི་ལྟེ་བར་ལྷ་མཚན་ནམ། །ཏཱཾཿཡིག་དཀར་པོ་བྲིས་པའི་སྟེང་དུ་ཁྲེའུའཾ་མཉྫིའི་སྟེང་དུ། བུམ་པ་མཚན་ཉིད་དང་ལྡན་པ་བཀོད་པའི་ནང་དུ། ནས། ཏིལ། གྲོ། སྲན་མ། འབྲས་ཏེ་འབྲུ་ལྔ། གསེར། དངུལ། མུ་ཏིག །མུ་མེན། བྱི་རུ་སྟེ་རིན་པོ་ཆེ་ལྔ། ཚུ་དག །དབང་ལག །སླེ་ཏྲེས། ཀནྷ་ཀ་རི། ཨུཏྤ་ལ་སྟེ་སྨན་ལྔ་དང༌། ག་བུར། ཛཱ་ཏི། གུར་གུམ། ཙནྡན་དཀར་དམར། ཨ་ཀ་རུ་སྟེ་དྲི་ལྔ་དང༌། ཏིལ་ལམ། གསེར། ལན་ཚྭ། མར། བུ་རམ། སྦྲང་རྩི་སྟེ་སྙིང་པོ་ལྔ། མདོར་ན་སྨན་བཟང་པོ་ཅི་འཛོམ་བཅུག །ཆུ་གཙང་མ་སྲོག་ཆགས་མེད་པས་སུམ་གཉིས་ཙམ་བཀང་ལ། རས་སམ་དར་དཀར་པོ་སྣ་ཚང་ལ་སོགས་པའི་མགུལ་འཆིངས་སྤྲོག་གསུམ་པ་བྱ། དཔག་བསམ་གྱི་ཤིང་ངམ།
འབྲས་བུ་ཅན་གྱི་ཤིང་རློན་པས་ཁ་བརྒྱན། མེད་ན་ཀུ་ཤའི་མྱུ་གུ་བཅུག་པའི་དབུས་སུ། དུང་ཆོས་དྲི་བཟང་པོའི་ཆུས་བཀང་བ་བཞག །རྡོ་རྗེ་གཟུངས་ཐག་དང་བཅས་པ་བཀོད། འདི་ཉིད་ཀྱི་རྟེན་བཞུགས་སུ་གསོལ། རྟེན་བྱིན་བརླབས་ཅན་གཞན་ཡང་མང་དུ་བཅའོ། །མཎྜལ་གྱི་མཐའ་མཆོད་པས་བསྐོར། རིན་པོ་ཆེའི་སྣོད་དུ་དཀར་གསུམ་ལས་གྲུབ་པའི་གཏོར་མ་ཟླུམ་པོ་ཆེ་ཆུང་ཅི་རིགས་པ་གང་འབྱོར་བཤམས་ལ། དཔོན་སློབ་སྟན་བདེ་བ་ལ་འདུག་ནས། ལས་ཀྱི་སློབ་མས་སྔོན་འགྲོ་གཏོར་མ་བཤམས་པ་ལ། ཨོཾ་བཛྲ་ཡཀྵ་ཧཱུཾ། གསུམ་བརྗོད། ཨོཾ་སྭ་བྷཱ་ཝ་ཤུདྡྷ་སརྦ་དྷརྨཿསྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཨོཾ་ཨཱཿཧཱུཾ་འོད་དུ་ཞི་བ་ལས་བྱུང་བའི་ལྷ་རྫས་ལས་གྲུབ་པའི་གཏོར་མ་དྭངས་ཤིང་ཐོགས་པ་མེད་པ། ས་དང་ནམ་མཁའ་བར་སྣང་ཁྱབ་པ། ཟག་པ་མེད་པའི་བདེ་བ་ཁྱད་པར་ཅན་བསྐྱེད་
པར་བྱེད་པའི་རང་བཞིན་དུ་གྱུར། ཨོཾ་ཨཱཿཧཱུཾ་ཧ་ཧོཿཧྲིཿ ཕྱག་རྒྱ་དང་བཅས་པས་ལན་གསུམ་གྱི་བྱིན་གྱིས་བརླབས། དེ་ནས་སྡེ་བརྒྱད་སྤྱན་དྲངས་བར་བསམ་ལ། ལྷ་དང་ཀླུ་དང་གནོད་སྦྱིན་ལྟོ་འཕྱེ་གྲུལ། །ནམ་མཁའ་ལྡིང་དང་འདབ་བཟང་ལུས་སྲུལ་པོ། །དྲི་ཟ་སྲིན་པོ་གདོན་གྱི་རིགས་རྣམས་དང༌། །གང་དག་ས་ལ་གནས་པའི་རྫུ་འཕྲུལ་ཅན། །བུམ་སྨད་བཅས་ཤིང་གཡོག་འཁོར་བཅས་པ་ལ། །བདག་གི་པུས་མོ་ས་ལ་གཙུགས་ནས་ནི། །ཐལ་མོ་སྦྱར་ནས་ཁྱེད་ལ་གསོལ་འདེབས་ཀྱིས། །གསན་ནས་ཕན་གདགས་སླད་དུ་འདིར་གཤེགས་ཤིག །གཏོར་མའི་ཕྱོགས་འཚམས་བརྒྱད་དུ་འཁོད་པར་གྱུར། པདྨ་ཀ་མ་ལ་ཡེ་སྟྭཾ། ཨོཾ་དེ་བ། ནཱ་ག ཡཀྵ། གན་དྷརྦྷ། ཨ་སུ་ར། ག་རུ་ཌ། ཀིན་ན་ར། མ་ཧོ་རཱ་ག །མ་ནུ་ཥྱ། ཨ་མ་ནུ་ཥྱ་ས་པཱ་རི་ཝཱ་ར་ན་མཿསརྦ་ཏ་ཐཱ་ག་ཏེ་བྷྱོཿ བི་ཤྭ་མུ་ཥེ་བྷྱཿ སརྦ་ཐཱ་ཁཾ། ཨུརྒ་དེ་སྥ་ར་ཎ་ཨི་མཾ་ག་ག་ན་ཁཾ། གྷྀཧྞ་དཾ་བ་ལིཾ་ཏྱེ་སྭཱཧཱ། ལན་གསུམ་གྱིས་འབུལ། ཨོཾ་བཛྲ་ཨརྒྷཾ་པྲ་ཏིཙྪ་ཡེ་སྭཱཧཱ། པཱ་ཏྱཾ་པྲ་ཏཱིཙྪ་ཡེ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ཨོཾ་དྷུ་པེ་ཧཱུཾ། ཨོཾ་ཨཱ་ལོ་ཀེ་ཧཱུཾ། ཨོཾ་གྷནྡྷེ་ཧཱུཾ། ཨོཾ་ནྱེ་ཝི་ཏྱེ་ཧཱུཾ། ཨོཾ་ཤཔྟ་ཨཱཿཧཱུཾ། འབྱུང་པོ་གང་དག་རི་རབ་སྟེང་གནས་དང༌། །དགའ་བའི་ཚལ་དང་ལྷ་ཡི་གནས་རྣམས་དང༌། །ཤར་ནུབ་རི་དང་ཉི་ཟླའི་ཁྱིམ་རྣམས་དང༌། །རི་བོ་ཀུན་
ལ་གང་དག་གནས་པ་དང༌། །རིན་ཆེན་གླིང་ན་ལྷག་པར་གནས་པ་དང༌། །ཆུ་བོ་ཀུན་དང་ཆུ་ཡི་མདོ་རྣམས་དང༌། །མཚོ་དང་རྫིང་བུ་ལྡིང་ཀ་ཆུ་ངོགས་དང༌། །གཡའ་ཆུ་སིལ་མ་ཅན་ན་གང་གནས་དང༌། །གྲོང་དང་ཕྱུགས་ལྷས་གྲོང་ཁྱེར་སྟོང་པ་དང༌། ཁང་སྟོང་དག་དང་ལྷ་ཡི་ཁང་པ་དང༌། །གཙུག་ལག་ཁང་དང་མཆོད་རྟེན་གནས་རྣམས་དང༌། །དཀའ་ཐུབ་གནས་དང་གླང་ཆེན་བྲེས་རྣམས་དང༌། །རྒྱལ་པོའི་དཀོར་ཁང་དག་ན་གང་གནས་དང༌། །ལམ་སྲང་གསུམ་མདོ་དང་ནི་བཞི་མདོ་དང༌། །གང་དག་ལམ་པོ་ཆེ་དང་ཤིང་གཅིག་དྲུང༌། །དུར་ཁྲོད་ཆེན་པོ་ནགས་ཚལ་ཆེན་པོ་དང༌། །སེང་གེ་དྲེས་དང་གཅན་གཟན་གནས་དག་དང༌། །འབྲོག་ཆེན་འཇིགས་སུ་རུང་ལ་གང་གནས་དང༌། །གང་དག་གླིང་མཆོག་དག་ན་གནས་པ་དང༌། །ལྷུན་པོ་དུར་ཁྲོད་དག་ན་གནས་པ་རྣམས། །རབ་ཏུ་དགྱེས་ཤིང་མགུ་བར་གྱུར་ནས་སུ། །ཕྲེང་བ་མེ་ཏོག་དྲི་དང་བྱུག་པ་དང། །བསྟོད་དང་གཏོར་མ་མར་མེ་གུས་འབུལ་བས། །འདི་དག་གསོལ་ཞིང་ལེགས་པར་བསྣམས་ནས་ཀྱང༌། །བདག་གི་ལས་ཀྱི་འབྲས་བུ་མཆིས་པ་མཛོད། །མཆོད་སྦྱིན་གཏོར་མ་འདི་བསྣོམས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང༌། །དཔལ་དང་གྲགས་དང་སྐལ་བ་བཟང༌། །ལོངས་སྤྱོད་རྒྱ་
ཆེན་ཀུན་ཐོབ་ཅིང༌། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱི་བདག་ལ་བསྲུངས། །དངོས་གྲུབ་ཀུན་གྱི་གདོང་གྲོགས་མཛོད། །དུས་མིན་འཆི་དང་ནད་རྣམས་དང༌། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོ། །འཇིག་རྟེན་བདེ་ཞིང་ལོ་ལེགས་དང༌། །འབྲུ་རྣམས་འཕེལ་ཞིང་ཆོས་འཕེལ་བ། །བདེ་ལེགས་ཕུན་སུམ་ཚོགས་པ་དང༌། །ཡིད་ལ་འདོད་པ་ཀུན་འགྲུབ་མཛོད། །འབྱུང་པོ་མཐུ་བོ་ཆེ་དཀར་པོའི་ཕྱོགས་ལ་དགའ་བ་རྣམས་ཀྱི་དཀྱིལ་འཁོར་གྱི་བྱ་བ་མཐར་ཕྱིན་པར་མཛོད་ཅིག །གང་དག་ནག་པོའི་ཕྱོགས་གསང་སྤྱོད་ལྟ་བར་མི་དབང་བ་རྣམས། འདིར་མ་གནས་པར་གཞན་དུ་སོང་ཞིག ཨོཾ་སུམ་བྷ་ནི་སུམ་བྷ་ཧཱུཾ་ཧཱུཾ་ཕཊ། ཨོཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ། ཨོཾ་གྲྀཧྞ་པཱ་ཡ་གྲྀཧྞ་པཱ་ཡ་ཧཱུཾ་ཧཱུཾ་ཕཊ། ཨོཾ་ཨཱཿན་ཡ་ཧོ། བྷ་ག་ཝཱན་བིདྱ་རཱ་ཛཱ་ཧཱུཾ་ཧཱུཾ་ཕཊ། ཨོཾ་སརྦ་བུད་ཏ་གད་ཚ། བསྡུས་པ་ན་གོང་གི་སྔགས་ཀྱིས་སྤྱན་འདྲེན། སྔགས་འབུལ། སྔགས་མཆོད། འབྱུང་པོ་གང་དག་ནས། བདག་གི་ལས་ཀྱི་འབྲས་བུ་མཆིས་པར་མཛོད་ཅེས་པའི་བར་བྱས་ལ། ཨོཾ་སརྦ་བུད་ཏ་གད་གཉིས་ཚ་ཞེས་བརྗོད་དོ། །མཆོད་རྫས་རྣམས་ལ་དམིགས་ནས། ཨོཾ་བཛྲ་ཡཀྵ་ཧཱུཾ། གིས་བསང༌། ཨོཾ་སྭ་བྷཱ་ཝ་ཤུདྡྷ་སརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་
རྒྱ་ཆེ་བ་རྣམས་ཀྱི་ནང་དུ། ཧཱུཾ་ཧཱུཾ་དཔག་ཏུ་མེད་པ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ། ས་དང་ནམ་མཁའ་བར་སྣང་ཐམས་ཅད་ཁྱབ་པ། ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་ཕུང་ལྟ་བུ་བསམ་གྱིས་མི་ཁྱབ་པ་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བའི་ཁྱད་པར་ཅན་བསྐྱེད་ནུས་པ། ནམ་མཁའ་དང་མཉམ་པར་གྱུར། ཨོཾ་ཨརྒྷཾ་པྲ་ཏཱིཙྪ་སྭཱཧཱ། པཱ་ཏྱཾ་པྲ་ཏཱིཙྪ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་དྷུ་པེ་ཨཱཿཧཱུཾ། ཨོཾ་བཛྲ་ཨཱ་ལོ་ཀེ་ཨཱཿཧཱུཾ། ཨོཾ་བཛྲ་གནྡྷེ་ཨཱཿཧཱུཾ། ཨོཾ་བཛྲ་ནྱེ་ཝེ་ཏེ་ཡེ་ཨཱཿཧཱུཾ། ཨོཾ་བཛྲ་ཤཔྟ་ཨཱཿཧཱུཾ། ཨོཾ་བཛྲ་གནྡྷེ། ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུད་ཏ་ཀྵེ་ཊ་པྲ་ཙ་ལི་ཏེ། པྲཛྙཱ་པ་ར་མི་ཏ། ནཱ་ཏ་སཾ་བྷ་ཝེ་ཏ། བཛྲ་དྷརྨཱ་ཧྲི་ཏ་ཡ། སནྟོ་ཥ་ནི་ཧཱུཾ་ཧཱུཾ་ཧཱུཾ་ཧོ་ཧོ་ཧོཿཨ་ཁཾ་སྭཱཧཱ། བདག་དང་འགྲོ་བ་ཁམས་གསུམ་ནམ་མཁའ་དང་མཉམ་པའི་སེམས་ཅན་ཐམས་ཅད་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི། ངོ་བོ་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག་རྩ་བ་དང་རྒྱུད་པར་
བཅས་པའི་དཔལ་ལྡན་བླ་མ་དམ་པ་རྣམས་དང༌། ཡི་དམ་དཀྱིལ་འཁོར་གྱི་ལྷ་ཚོགས་རྣམས་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ཆོ་ག་ཚར་རེ་ལ་ལན་བརྒྱ་དང་བརྒྱད་དམ། ལྔ་བཅུའམ། ཉི་ཤུ་རྩ་གཅིག་གམ། བདུན་ལས་ཉུང་བར་མི་བྱ། དེ་ནས། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ་བྱ། རང་སྐད་ཅིག་གིས་སྒྲོལ་མ་དཀར་མོར་གསལ་བའི་ཐུགས་ཀར་ཟླ་བའི་དཀྱིལ་འཁོར་གྱི་དབུས་སུ། རང་སེམས་ཏཱཾཿཡིག་དཀར་པོར་གྱུར་པ་ལས་འོད་འཕྲོས། ལུས་ཀྱི་ནང་དཀར་མེར་གང༌། ཚེ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་སྦྱངས། འོད་ཕྱིར་འཕྲོས་པས། པོ་ཏ་ལ་ནས་རྗེ་བཙུན་མ་སྒྲོལ་མ་དཀར་མོ་ལ་སངས་རྒྱས་བྱང་སེམས་དཔག་ཏུ་མེད་པས་བསྐོར་བ་ལ། བླ་མ་འོད་དཔག་མེད་ཀྱི་རྣམ་པ་ཅན་གྱི་གཙོ་མོའི་དབུ་བརྒྱན་པ། མདུན་གྱི་ནམ་མཁའ་སྤྱན་དྲངས། བསམ་ལ། ན་མོ་གུ་རུ་བྷྱཿ ན་མཿཨཱརྱ་ཏཱ་རེ་བུདྡྷ་བོ་དྷི་སཏྭ་ས་པ་རི་ཝཱ་ར་མཎྜ་ལ་བྷྱཿ གང་གི་དྲིན་གྱིས་བདེ་ཆེན་ཉིད། །སྐད་གཅིག་ཉིད་ལ་འཆར་བ་གང༌། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །སངས་རྒྱས་ཀུན་གྱི་རང་བཞིན་སྐུ། །སློབ་
དཔོན་ལ་ནི་བདག་སྐྱབས་མཆི། །དང་པོར་མེ་ཏོག་ཕོག་པ་ཡི། །དཀྱིལ་འཁོར་ལྷ་ཚོགས་རྣམས་ལ་འདུད། །ཅེས་ཕྱག་བྱས་སོ་སོའི་ཕྱག་རྒྱ་དང་བཅས་པས། ན་མོ་གུ་རུ་ཨཱརྱ་ཏཱ་རེ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུཾ། དེ་བཞིན་དུ་ཐོག་མཐའ་འདྲ་བ་ལ། པཱ་ཏྱེཾ། པུཥྤེ། དྷུ་པེ། ཨཱ་ལོ་ཀེ གྷནྡྷེ། ནྱེ་ཝེ་ཏེ་ཡེ། ཤཔྟ་རྣམས་ཀྱིས་མཆོད། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་བཟུང༌། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །རང་གཞན་དོན་ནི་རབ་གྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། སེམས་ཅན་ཐམས་ཅད་བདག་གི་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་གསུམ་བྱ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ལ་གནས་པར་གྱུར་ཅིག །ཅེས་པ་ལན་གཅིག་བྱ།
ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོཧཾ། རང་བཞིན་གྱི་སྟོང་པ་ཉིད་དུ་གྱུར། ཨོཾ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྟོང་པ་ཉིད་ཡེ་ཤེས་རྡོ་རྗེའི་ངོ་བོར་གྱུར། སྟོང་པའི་ངང་ལས། པཾ་ལས་པདྨ་དཀར་པོ་འདབ་མ་བརྒྱད་པའི་སྟེང་དུ། ཨ་ལས་ཟླ་བའི་དཀྱིལ་འཁོར་དེའི་སྟེང་དུ་རང་གི་སེམས་ཏཱཾཿཡིག་དཀར་པོ་ལས་འོད་འཕྲོས། སེམས་ཅན་གྱི་དོན་བྱས་ཚུར་འདུས་ཡོངས་སུ་གྱུར་པ་ལས། རང་ཉིད་རྗེ་བཙུན་མ་སྒྲོལ་མ་དཀར་མོ་ཡིད་བཞིན་འཁོར་ལོ་སྐུ་མདོག་སྟོན་ཀའི་ཟླ་བའི་འོད་ལྟར་དཀར་བ། ཞལ་གཅིག་ཕྱག་གཉིས་མ། ཞབས་གཉིས་རྡོ་རྗེ་སྐྱིལ་ཀྲུང་གི་བཞུགས་པ། ཞི་བའི་ངང་ཚུལ་ཅན་གྱི་དབུ་ལ་སྤྱན་གསུམ་དང་ཕྱག་ཞབས་བཞིའི་མཐིལ་དུ་ཡང་སྤྱན་རེ་རེ་སྟེ། ཡེ་ཤེས་ཀྱི་སྤྱན་བདུན་དང་ལྡན་པ། ཕྱག་གཡས་མཆོད་སྦྱིན་དང༌། གཡོན་ཨུཏྤལ་དཀར་པོ་སྙན་གྱི་ཐད་ཀར་ཁ་བྱེ་བའི་ཡུ་བ་མཐེབ་སྲིན་གྱི་ཐུགས་ཀར་འཛིན་པ། དེ་ཡང་དུས་གསུམ་གྱི་སངས་རྒྱས་མཚོན་པའི་བརྡར། རྩ་བ་གཅིག་ལ་རྩེ་མོ་གསུམ་གྱེས་པ། དབུས་ཀྱི་མེ་ཏོག་ཁ་ཤག་བྱེ་བ། གཡས་ཀྱི་རྩེ་མོ་མེ་ཏོག་བུང་བའི་འབྲས་བུ་དང༌། གཡོན་གྱི་རྩེ་མོ་མེ་ཏོག་ཁ་མ་བྱེ་བ་བུམ་པར་ཡོད་པ། དར་དམར་པོའི་ཤམས་ཐབས་དང༌། དར་སྣ་ཚོགས་ཀྱི་སྟོད་གཡོགས་དབང་པོའི་གཞུ་ལྟར་བཀྲ་བ། དབུ་སྐྲ་ནག་པོ་སྤྱི་བོར་བཅིངས་
ཤིང༌། རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། ལོ་བཅུ་དྲུག་ལོན་པའི་ན་ཚོད་ཅན། གཞོན་ནུའི་ཉམས་དང་སྒེག་པའི་རྣམ་པས་ཡིད་འཕྲོག་ཅིང་མཛེས་པར་གྱུར་པ། ཟླ་བའི་རྒྱབ་ཡོལ་དང༌། འོད་ཟེར་དཀར་པོ་སྤྲོ་ཞིང་བསྡུ་བའི་སྐུ་ཅན། དེའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཧཱུཾ་གི་སྟེང་དུ་ཟླ་བའི་གདན་ལ་འཁོར་ལོ་དཀར་པོ་རྩིབས་སྟོང་བརྒྱད་པ། མུ་ཁྱུད་ལྔ་དང་ལྡན་པའི་ལྟེ་བར་ཏཱཾཿཡིག་གིས་མཚན་པ། ཐུགས་ཀའི་ཧཱུཾ་དང་ཏཱཾཿལས་འོད་འཕྲོས། པོ་ཏ་ལ་ནས་རྗེ་བཙུན་སྒྲོལ་མ་དཀར་མོ་ལ་སངས་རྒྱས་བྱང་སེམས་དཔག་ཏུ་མེད་པས་བསྐོར་བ་སྤྱན་དྲངས། ཨོཾ་ཨཱརྱ་ཏཱ་རེ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་པཱུ་ཛ་མེ་ག་ས་མུ་ཏྲ་སྥ་ར་ན་ས་མ་ཡེ་ཨཱཿཧཱུཾ། དེ་བཞིན་དུ་ཐོག་མཐའ་འདྲ་བ་ལ། པཱ་ཏྱེཾ། པུཥྤེ། དྷུ་པེ། ཨཱ་ལོ་ཀེ གནྡྷེ། ནྱེ་ཝེ་ཏེ་ཡེ། ཨོཾ་ཨཱརྱ་ཏཱ་རེ་ས་པ་རི་ཝཱ་ར་ཤཔྟ་པཱུ་ཛ་མེ་ག་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུཾ། དགུག་གཞུགས་བཅིང་མཉེས་ཀྱི་ཕྱག་རྒྱ་བྱས་ལ། ཛཿཧཱུཾ་བཾ་ཧོཿ གཉིས་སུ་མེད་པར་གྱུར། སླར་ཡང་ཐུགས་ཀའི་ཧཱུཾ་དང་ཏཱཾཿལས་འཕྲོས་པས། དབང་གི་ལྷ་རིགས་ལྔ་འཁོར་བཅས་སྤྱན་དྲངས། པཉྩ་ཀུ་ལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། པཱ་ཏྱེཾ་པྲ་ཏཱིཙྪ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་དྷུ་པེ་ཨཱཿཧཱུཾ། ཨོཾ་བཛྲ་ཨཱ་ལོ་ཀེ་ཏེ་ཨཱཿཧཱུཾ། ཨོཾ་བཛྲ་གྷནྡྷེ་ཨཱཿཧཱུཾ། ཨོཾ་བཛྲ་ནྱེ་ཝེ་ཏྱེ་
ཨཱཿཧཱུཾ། ཨོཾ་བཛྲ་ཤཔྟ་ཨཱཿཧཱུཾ། ཞེས་དབང་ལྷ་ལ་མཆོད་ནས། ཨོཾ་སརྦ་ཏཱ་ཐ་ག་ཏ་ཨ་བྷི་ཥིཉྩ་ཏུ་མཾ་ཞེས་གསོལ་བ་བཏབ་པས་རིགས་ལྔས། ཨོཾ་བཛྲིར་བྷ་ཝ་ཨ་བྷི་ཥིཉྩ་ཧཱུཾ་ཞེས་གསུང་ཞིང༌། བུམ་ཆུས་དབང་བསྐུར་བས། སྐུ་གང་དྲི་མ་དག །ཆུ་ལྷག་མ་ཡར་ལུད་པས། འོད་དཔག་མེད་སྤྲུལ་སྐུའི་རྣམ་པ་ཅན་གྱི་དབུ་བརྒྱན་པར་གྱུར་པ་ལ། སྙིང་གའི་ཧཱུཾ་ལས་འོད་སྤྲོས་པའི་མཆོད་པའི་ལྷ་མོ་རྣམས་ཀྱིས། བདག་ཉིད་ལ་མཆོད་ཅིང་བསྟོད་པར་གྱུར། འཇིག་རྟེན་ཁམས་ནི་དཔག་མེད་ན། །མཆོད་ཡོན་ཇི་སྙེད་ཡོད་པ་རྣམས། །སྒྲོལ་མ་འཁོར་དང་བཅས་ལ་འབུལ། །བཞེས་ནས་བདག་ལ་དགྱེས་པར་མཛོད། ཨོཾ་སརྦ་ཏ་ཐཱ་ག་ཏ་ཨཱརྱ་ཏཱ་རེ་ས་པ་རཱི་ཝ་ར་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུཾ། དེ་བཞིན་དུ་ཨརྒྷཾ་གྱི་གནས་སུ། པཱ་ཏྱེཾ། པུཥྤཾ། དྷུ་པེ། ཨཱ་ལོ་ཀེ གནྡྷེ། ནྱེ་ཝེ་ཏེ། ཤཔྟ་རྣམས་འདོན་པ་སྤོས་ལ་མཆོད། དེ་བཞིན་དུ་ཐོག་མཐའ་འདྲ་བ་ལ། ཞབས་བསིལ་ཇི་སྙེད་ཡོད་པ་རྣམས། །མེ་ཏོག་ཇི་སྙེད་ཡོད་པ་རྣམས། །བདུག་སྤོས་ཇི་སྙེད་ཡོད་པ་རྣམས། །སྣང་གསལ་ཇི་སྙེད་ཡོད་པ་རྣམས། དྲི་ཆབ་ཇི་སྙེད་ཡོད་པ་རྣམས། །ཞལ་ཟས་ཇི་སྙེད་ཡོད་པ་རྣམས། །རོལ་མོ་ཇི་སྙེད་པ་རྣམས། །ཞེས་པ་རེ་རེའི་མཚམས་སུ་བཅུག་པས་མཆོད་དོ། །ལྷ་དང་ལྷ་མིན་ཅོད་པན་གྱི། །ཞབས་
ཀྱི་པདྨོ་ལ་གཏུགས་ཏེ། །འཕོངས་པ་ཀུན་ལས་སྒྲོལ་མཛད་མ། །སྒྲོལ་མ་ཡུམ་ལ་ཕྱག་འཚལ་ལོ། །ཞེས་པས་བསྟོད་དོ། །ལྷའི་སྐུ་སྣང་ལ་རང་བཞིན་མེད་པར་གྱུར་པའི་ཐུགས་ཀའི་འཁོར་ལོའི་ལྟེ་བའི་ཏཱཾཿཡིག་གི་གཡས་སུ་ཨོཾ། གཡོན་དུ་ཧཱ། དེའི་མཐར་མདུན་ནས་གཡས་སྐོར་གྱི། མ་མ་ཨ་ཡུ་པུཎྱེ་ཛྙཱ་ན་པུཥྟིཾ་ཀུ་རུ། རྩིབས་བརྒྱད་ལ་མདུན་ནས་གཡས་བསྐོར་གྱི་ཏཱ་རེ་ཏུཏྟཱ་རེ་ཏུ་རེ་སྭཱཧཱ་རྣམས་རྩིབས་རེའི་སྟེང་དུ། ཡི་གེ་རེ་རེ་ཡོད་པ། མུ་ཁྱུད་དང་པོ་ལ་མདུན་ནས་གཡོན་སྐོར་གྱི། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ གཉིས་པ་ལ་གཡས་སྐོར་གྱི། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ གསུམ་པ་ལ་གཡས་བསྐོར་གྱི། ཡེ་དྷརྨཱ་ཧེ་ཏུ་པྲ་བྷཱ་ཝཱ། ཧེ་དུན་ཏེ་ཥཱན་ཏ་ཐཱ་ག་ཏོ་ཧྱ་བ་དད། ཏེ་ཥཱཉྩ་ཡོ་ནི་རོ་དྷ་ཨེ་བཾ་བཱ་ཏཱི་མཧཱ་ཤྲ་མ་ཎཿ བཞི་པ་ལ་རྡོ་རྗེ་སེར་པོའི་ཕྲེང་བ་དང༌། ལྔ་པ་ལ་འོད་ཟེར་དམར་ནག་གི་ཕྲེང་བས་སྐོར་བ། ཡིག་འབྲུ་རྣམས་ཁ་དོག་དཀར་པོ། ཡིག་འབྲུ་དེ་རྣམས་ལས་འོད་ཟེར་དཀར་པོ་འཕྲོས། ལུས་ཀྱི་ནང་གང་བས། དུས་དང་དུས་མ་ཡིན་པས་འཆི་བའི་འཇིགས་པ་དང༌། ནད་གདོན་སྡིག་སྒྲིབ་ཐམས་ཅད་བསལ། འོད་ཟེར་ཕྱིར་འཕྲོས་པས། སྒྲོལ་མ་དཀར་མོ་དང་སངས་
རྒྱས་བྱང་སེམས་ཐམས་ཅད་ཀྱི། ཐུགས་གཉིས་སུ་མེད་པའི་ཡེ་ཤེས་དང༌། འཆི་མེད་ཚེའི་དངོས་གྲུབ་འོད་ཟེར་དཀར་པོའི་རྣམ་པར་སྤྱན་དྲངས་སྙིང་ཀར་ཐིམ་པས་བདག་སོགས་སེམས་ཅན་ཐམས་ཅད་ཀྱི་ཚེ་དང་བསོད་ནམས་ཡོན་ཏན་ཐམས་ཅད་རྒྱས་པར་གྱུར། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། ཞེས་ཡི་གེ་བར་པ་ཉིད་མྱུར་བུལ་སོགས་ཀྱི་སྐྱོན་དང་བྲལ་ཞིང༌། གསལ་ལ་དག་པ། དམིགས་པ་ལ་སེམས་མ་གཡེངས་པ་ཅི་ནུས་ཀྱི་ཆོ་ག་ཚར་རེ་ལ་བརྒྱ་སྟོང་སོགས་བཟླས་ནས། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། མ་མ་ཨ་ཡུ་པུཎྱེ་ཛྙཱ་ན་པུཥྟིཾ་ཀུ་རུ་སྭཧཱ། ཞེས་པ་བདུན་ནམ། ཉི་ཤུ་རྩ་གཅིག་གམ། བརྒྱའི་བར་དུ་ཐུན་རེ་ལ་:འདས [ བཟླས]པའི་རྗེས་སུ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ལན་གསུམ། ཀ་ཁ་ག་གྷ་ང། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ ཞེས་ལན་གསུམ། ཡེ་དྷརྨཱ་ཧེ་ཏུ་པྲ་བྷ་ཝཱ། ཧེ་ཏུན་ཏེ། ཥཱན་ཏ་ཐཱ་ག་ཏོ་ཧྱ་བ་དད། ཏེ་ཥཱཉྩ་ཡོ་ནི་རོ་དྷ་ཨེ་བཾ་ཝཱ་ཏཱི་མཧཱ་ཤྲ་མ་ཎཿ ལན་གསུམ་གྱིས་ལྷག་ཆད་བསྐང༌། བསྡུས་པར་འདོད་ན། མདུན་བསྐྱེད། བསྟོད་པ། ཟུང་འཇུག་གི་རྣལ་འབྱོར། །སྤྱོད་ལམ་ཟས་ཀྱི་རྣལ་འབྱོར། ཉལ་བའི་རྣལ་འབྱོར། ཐུན་མཚམས་སུ་གཏོར་མ་གཏོང་པ་རྣམས་གཞུང་བཞིན་བྱའོ། །བུམ་བསྐྱེད་ཀྱི་མཆོད་པ་ལ་དམིགས་ནས་བསངས་སྦྱངས་བྱིན་བརླབ་སྔར་ལྟར་བྱེད། བུམ་པ་ལ་དམིགས་ནས། ཨོཾ་བཛྲ་ཡཀྵ་ཧཱུཾ། ཞེས་བརྗོད་པས་བགེགས་རྣམས་བསངས། ཨོཾ་སྭ་བྷཱ་ཝ་ཤུདྡྷ་སརྦ་དྷརྨཱཿ
སྭ་བྷཱ་ཝ་ཤུདྡྷོ྅ཧཾ། གིས་སྟོང་པར་སྦྱངས། སྟོང་པའི་ངང་ལས་པདྨ་དང་ཟླ་བའི་གདན་གྱི་སྟེང་དུ། བྷྲུཾ་ལས་རིན་པོ་ཆེའི་བུམ་པ་དཀར་པོ། ཡངས་ཤིང་རྒྱ་ཆེ་བ་དྭངས་ཤིང་ཐོགས་པ་མེད་པ་མཚན་ཉིད་ཐམས་ཅད་ཡོངས་སུ་རྫོགས་པ། ལྷའི་གོས་ཀྱི་མགུལ་བཅིངས་དང༌། དཔག་བསམ་གྱི་ཤིང་གིས་ཁ་བརྒྱན་པ། ནང་ལྔ་ཚན་ལྔ་དང༌། བདུད་རྩིའི་ཆུས་གང་བའི་དབུས་སུ་པཾ་ལས་པདྨ་དཀར་པོ་འདབ་མ་བརྒྱད་པའི་སྟེང་དུ། ཨ་ལས་ཟླ་བའི་དཀྱིལ་འཁོར་དེའི་སྟེང་དུ་ཏཱཾཿཡིག་དཀར་པོ། དེ་ལས་འོད་ཟེར་འཕྲོས་འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། རྗེ་བཙུན་མ་སྒྲོལ་མ་དཀར་མོ་ཡིད་བཞིན་འཁོར་ལོ་སྐུ་མདོག་སྟོན་ཀའི་ཟླ་བའི་འོད་ལྟར་དཀར་བ། ཞལ་གཅིག་ཕྱག་གཉིས་མ། ཞབས་གཉིས་རྡོ་རྗེའི་སྐྱིལ་ཀྲུང་གི་བཞུགས་པ། ཞེས་པ་ནས། འོད་ཟེར་དཀར་པོ་སྤྲོ་ཞིང་བསྡུ་བའི་སྐུ་ཅན། ཞེས་པའི་བར་གྱི་བདག་བསྐྱེད་བཞིན་དམ་ཚིག་པ་བསྐྱེད། དེའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཧཱུཾ་གི་སྟེང་དུ་ཟླ་བའི་གདན་ལ་འཁོར་ལོ་དཀར་པོ་རྩིབས་བརྒྱད་པ། མུ་ཁྱུད་ལྔ་དང་ལྡན་པའི་ལྟེ་བར་ཏཱཾཿཡིག་གིས་མཚན་པ། སྐུ་གསུང་ཐུགས་བྱིན་གྱིས་བརླབས། ཐུགས་ཀའི་ཧཱུཾ་དང་ཏཱཾཿལས་འོད་འཕྲོས། པོ་ཏ་ལ་ནས་རྗེ་བཙུན་མ་དཀར་མོ་ལ་སངས་རྒྱས་དང་བྱང་སེམས་དཔག་ཏུ་མེད་པས་བསྐོར་བ། བཛྲ་ས་མ་
ཛཿ ཨོཾ་ཨཱརྱ་ཏཱ་རེ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུཾ། དེ་བཞིན་དུ་ཐོག་མཐའ་འདྲ་བ་ལ། ཨརྒྷཾ། པཱ་ཏྱེཾ། པུཥྤེ། དྷུ་པེ། ཨཱ་ལོ་ཀེ གྷནྡྷེ། ནྱེ་ཝེ་ཏེ། ཤཔྟ། ཡི་བར་གྱིས་ཡེ་ཤེས་པ་མཆོད། བསྟོད་པར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡི་རྣམ་ཀུན་ཏུ། །མཆོག་ཏུ་དད་པས་བསྟོད་པར་གྱིས། །ཞེས་པས་ཡེ་ཤེས་པ་ལ་བསྟོད། ཨ་གུ་ཤ་ཛཿཧཱུཾ་བཾ་ཧོཿགཉིས་སུ་མེད་པར་གྱུར། གྱིས་ཡེ་ཤེས་པ་དང་དམ་ཚིག་པ་རོ་གཅིག་ཏུ་འདྲེས་པར་བསམ། སླར་ཡང་ཐུགས་ཀའི་ཧཱུཾཾ་དང་ཏཱཾཿལས་འོད་འཕྲོས་པ། དབང་གི་ལྷ་རིགས་ལྔ་འཁོར་དང་བཅས་པ་བཛྲ་ས་མཱ་ཛཿ པཉྩ་ཀུ་ལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་ཡེ་སྭཱཧཱ། པཱ་ཏྱེཾ་པྲ་ཏཱིཙྪ་ཡེ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་དྷུ་པེ་ཨཱཿཧཱུཾ། ཨོཾ་བཛྲ་ཨཱ་ལོ་ཀེ་ཏེ་ཨཱཿཧཱུཾ། ཨོཾ་བཛྲ་གྷནྡྷེ་ཨཱཿཧཱུཾ། ཨོཾ་བཛྲ་ནྱེ་ཝེ་ཏེ་ཨཱཿཧཱུཾ། ཨོཾ་བཛྲ་ཤཔྟཨཱཿཧཱུཾ། ཞེས་པས་དབང་གི་ལྷ་རྣམས་ལ་མཆོད་པ་ཕུལ་བར་བསམ། དེ་བཞིན་གཤེགས་པ་རྣམས་ཀྱིས་འདི་ལ་དབང་བསྐུར་དུ་གསོལ་ཞེས་གསོལ་བ་བཏབ་པས། རིགས་ལྔས་ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱི་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་དབང་བསྐུར་རོ། །ཞེས་བཛྲིར་བྷ་ཝ་ཨཱ་བྷཱི་ཥིཉྩ་ཧཱུཾ། ཞེས་གསུང་ཞིང་བུམ་ཆུས་དབང་བསྐུར། སྐུ་གང་དྲི་མ་དག །ཆུ་ལྷག་མ་ཡར་ལུད་
པས། འོད་དཔག་མེད་སྤྲུལ་སྐུའི་རྣམ་པ་ཅན་གྱི་དབུ་བརྒྱན་པར་གྱུར། པ་ནི་ལྷ་ཡན་ལག་བཞི་རྫོགས་སུ་གྲུབ་པ་ཡིན་པས། དེ་ལ་རང་གི་སྙིང་ག་ནས་སྤྲོས་པའི་ལྷ་མོ་རྣམས་ཀྱི་མཆོད་ཅིང་བསྟོད་པར་བསམས་ནས། རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཇི་སྙེད་ཡོད་པ་དང༌། །བདག་གིས་གུས་པར་བཤམས་པ་འདི། །ཡིད་བཞིན་འཁོར་ལོའི་ལྷ་ཚོགས་དང༌། །རྒྱལ་བ་སྲས་དང་བཅས་ལ་འབུལ། །ཚེ་དང་ཡེ་ཤེས་དངོས་གྲུབ་སྩོལ། །ཨོཾ་སརྦ་ཏ་ཐཱ་ག་ཏ་ཨཱརྱ་ཏཱ་རེ་ས་པཱ་རི་ཝཱ་ར་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུཾ། དེ་བཞིན་ཐོག་མཐའ་འདྲ་བ་ལས། མཆོད་ཡོད་གྱི་གནས་སུ། ཞབས་བསིལ་ཇི་སྙེད་ཡོད་པ་དང༌། །མེ་ཏོག་ཇི་སྙེད་ཡོད་པ་དང༌། །བདུག་སྤོས་ཇི་སྙེད་ཡོད་པ་དང༌། །སྣང་གསལ་ཇི་སྙེད་ཡོད་པ་དང༌། །དྲི་ཆབ་ཇི་སྙེད་ཡོད་པ་དང༌།།ཞལ་ཟས་ཇི་སྙེད་ཡོད་པ་དང༌། །རོལ་མོ་ཇི་སྙེད་ཡོད་པ་དང༌། །བདག་གིས་གུས་པར་བཤམས་པ་འདི། །ཡིད་བཞིན་འཁོར་ལོའི་ལྷ་ཚོགས་དང༌། །རྒྱལ་བ་སྲས་དང་བཅས་ལ་འབུལ། །ཚེ་དང་ཡེ་ཤེས་དངོས་གྲུབ་སྩོལ། །ཨརྒྷཾ་གྱི་གནས་སུ། པཱ་ཏྱེཾ། པུཥྤེ། དྷུ་པེ། ཨཱ་ལོ་ཀེ གྷནྡྷེ། ནྱེ་ཝེ་ཏེ། ཤཔྟ་པྲ་ཏཱིཙྪ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུཾ། འཁོར་བ་ལས་སྒྲོལ་ཏཱ་རེ་མ། །ཏུཏྟཱ་རེ་ཡིས་འཇིགས་བརྒྱད་སྒྲོལ། ཞེས་སོགས་ནས།
མཆོག་དང་ཐུན་མོང་དངོས་གྲུབ་ཀུན། །མ་ལུས་བདག་ལ་གནང་བར་མཛོད། །བསྡུ་ན་ལྷ་དང་ལྷ་མིན་ཅོད་པན་གྱིས་ཞེས་སོགས་ཤོ་ལོ་ཀ་གཅིག་གིས་བསྟོད། གཟུངས་ཐག་སྤྱི་ལ་བཀྲམ་པའམ་སློབ་དཔོན་གྱིས་བཟུང་ལ། བདག་བསྐྱེད་ཀྱི་ཐུགས་ཀའི་ཡིག་འབྲུ་རྣམས་ལས་སྔགས་ཕྲེང་འོད་ཟེར་དཀར་པོའི་རྣམ་པར་བྱུང་བ། གཟུངས་ཐག་ལ་ཁྲིལ་ནས་བུམ་བསྐྱེད་ཀྱི་ཐུགས་ཀར་ཕོག་པས་ཐུགས་རྒྱུད་བསྐུལ། སྐུའི་ཆ་ཐམས་ཅད་ནས་འཆི་མེད་ཚེའི་བདུད་རྩི་བབས་པས་བུམ་པ་གང་བར་གྱུར། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། ཞེས་པ་ཆོ་ག་ཚར་རེ་ལ་ཁྲི་སྟོང་ངམ་བརྒྱ་ལས་ཉུང་བ་མི་བཟླ། དེ་ནས་མ་མ་ཨ་ཡུ་པུཎྱེ་དང༌། ཨ་ལི་ཀ་ལི། ཡེ་དྷརྨཱ་རྣམས་ཀྱི་གྲངས་གོང་དུ་བཤད་པ་ལྟར་བཟླའོ། །ཨོཾ་ཨཱརྱ་ཏཱ་རེ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། པཱ་ཏྱེཾ་པྲ་ཏཱིཙྪ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་དྷུ་པེ་ཨཱཿཧཱུཾ། ཨོཾ་བཛྲ་ཨཱ་ལོ་ཀེ་ཨཱཿཧཱུཾ། ཨོཾ་བཛྲ་གྷནྡྷེ་ཨཱཿཧཱུཾ། ཨོཾ་བཛྲ་ནྱེ་ཝེ་ཏེ་ཨཱཿཧཱུཾ། ཨོཾ་བཛྲ་ཤཔྟ་ཨཿཧཱུཾ། བསྟོད་པར་འོས་པ་ཐམས་ཅད་ལ། །ཞིང་རྡུལ་ཀུན་གྱི་རྡུལ་སྙེད་ཀྱི། །ལུས་བཏུད་པ་ཡི་རྣམ་ཀུན་ཏུ། །མཆོག་ཏུ་དད་པས་བསྟོད་པར་གྱིས། །ཞེས་མཆོད་བསྟོད་ནས། གཟུངས་ཐག་བསྡུད་པ་དང་བསྟུན་ལ། ཨོཾ་བཛྲ་སཏྭ་ཧཱུཾ། ཨོཾ་བཛྲ་སཏྭ་ཧཱུཾ། འགའ་ཡར་བཟླས་པས་ལྷག་ཆད་ཁ་བསྐང་བར་བསམ་ནས། དུང་ཆོས་ཀྱི་བུམ་པ་བླུག་ལ། ལྷ་རྣམས་འོད་དུ་ཞུ་བ་ལས་བྱུང་བའི་བུམ་པའི་ཆུར་གྱུར། བུམ་སྒྲུབ་
འདི་ནི་སྐབས་གཞན་དུ་ཡང་བྱས་ལ། བུམ་ཆུ་འཐུང་བ་དང་འཁྲུས་བྱས་ནས་ཕན་ཡོན་དཔག་ཏུ་མེད་དོ། །ཞེས་གཞུང་ལས་བྱུང་ངོ༌། །མདུན་བསྐྱེད་བྱེད་པ་ནི། མཆོད་པ་བྱིན་བརླབ་སྔར་ལྟར་བྱས་ལ། མདུན་བསྐྱེད་ཀྱི་དཀྱིལ་འཁོར་ལ་དམིགས་ཏེ། ཨོཾ་བཛྲ་ཡཀྵ་ཧཱུཾ། གིས་མི་གཙང་བ་དང་བགེགས་རྣམས་བསངས། ཨོཾ་སྭ་བྷཱ་ཝ་ཤུདྡྷ་སརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། གིས་སྟོང་པར་སྦྱངས་བར་བསམ། སྟོང་པའི་ངང་ལས། མདུན་གྱི་ནམ་མཁར་པཾ་ལས་པདྨ་དཀར་པོ་འདབ་མ་བརྒྱད་པའི་སྟེང་དུ་ཨ་ལས་ཟླ་བའི་དཀྱིལ་འཁོར་དེའི་སྟེང་དུ། ཏཱཾཿལས་ཨུཏྤལ་དཀར་པོ་ཏཱཾཿགྱིས་མཚན་པ་ལས་འོད་འཕྲོས། འཕགས་པ་མཆོད། སེམས་ཅན་གྱི་དོན་བྱས་ཚུར་འདུས་ཡོངས་སུ་གྱུར་པ་ལས། རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོ། ཞེས་སོགས་ནས། ཐུགས་ཀའི་ཧཱུཾ་དང་ཏཱཾཿལས་འོད་འཕྲོས། ཞེས་པའི་བར་བདག་བསྐྱེད་ཇི་ལྟ་བ་བྱས་ལ། པོ་ཏ་ལ་དང༌། རང་བཞིན་གྱི་གནས་ནས་རྗེ་བཙུན་མ་སྒྲོལ་མ་དཀར་མོ་ཡིད་བཞིན་འཁོར་ལོའི་ལྷ་ཚོགས་དང་སངས་རྒྱས་བྱང་ཆུབ་སེམས་དཔའ་དཔག་ཏུ་མེད་པས་སྐོར་བ་སྤྱན་དྲངས་པར་གྱུར། །མ་ལུས་སེམས་ཅན་ཀུན་གྱི་མགོན་གྱུར་ཅིང༌། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་འདིར་ནི་གཤེགས་སུ་གསོལ། །བཅོམ་ལྡན་བསྐལ་པ་གྲངས་མེད་དུ་མ་རུ། །འགྲོ་ལ་བརྩེ་ཕྱིར་ཐུགས་རྗེས་
རྣམ་སྦྱངས་ཤིང༌། །སྨོན་ལམ་རྒྱ་ཆེན་དགོངས་པ་ཡོངས་རྫོགས་པ། ཁྱེད་བཞེད་འགྲོ་དོན་མཛད་དུས་འདི་ལགས་ན། །དེ་ཕྱིར་ཆོས་དབྱིངས་ཕོ་བྲང་ལྷུན་གྲུབ་ནས། །རྫུ་འཕྲུལ་བྱིན་བརླབས་སྣ་ཚོགས་སྟོན་མཛད་ཅིང༌། །མཐའ་ཡ་སེམས་ཅན་ཚོགས་རྣམས་བསྒྲལ་བྱའི་ཕྱིར། །ཡོངས་དག་འཁོར་དང་བཅས་ཏེ་གཤེགས་སུ་གསོལ། །ཆོས་རྣམས་ཀུན་གྱི་དབང་ཕྱུག་གཙོ། །བཙོ་མ་གསེར་གྱི་མདོག་འདྲ་ཞིང༌། །ཉི་མ་ལས་ལྷག་གཟི་བརྗིད་ཆེ། །དད་པས་སྤྱན་ནི་དྲང་བར་བགྱི། །ཞི་ཞིང་ཐུགས་རྗེ་ཆེ་ལྡན་པ། །དུལ་ཞིང་བསམ་གཏན་ས་ལ་བཞུགས། །ཆོས་དང་ཡེ་ཤེས་ཆགས་བྲལ་བ། །ཀུན་ཏུ་མི་ཟད་ནུས་པར་ལྡན། །ཚུར་བྱོན་ཚུར་བྱོན་ཞི་བདག་ལྷ། །ཐུབ་པའི་སྐྱེས་མཆོག་ཐམས་ཅད་མཁྱེན། །ཤིན་ཏུ་ལེགས་བྱས་གཟུགས་བརྙན་ནི། །མཆོད་པས་གནས་འདིར་གཤེགས་སུ་གསོལ། །འདིར་ནི་གཟུགས་དང་ལྷན་གཅིག་ཏུ། །འགྲོ་བའི་དོན་དུ་བཞུགས་ནས་ཀྱང༌། །ནད་མེད་ཚེ་དང་དབང་ཕྱུག་དང༌། །མཆོག་རྣམས་ལེགས་པར་བསྩལ་དུ་གསོལ། །ཛཿཧཱུཾ་བཾ་ཧོཿཨེ་ཧྱེ་ཧི། ཨཱརྱ་ཏཱ་རེ་ས་པ་རི་ཝཱ་ར་ཏྲི་ཤྱ་ཧོཿ བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་ལ་མཆོད་ཡོན་བཞེས་ནས་ཀྱང༌། །ཐུགས་ལ་དགོངས་ཤིང་གནང་བར་མཛོད། །བདེ་བར་གཤེགས་སོ་བཅོམ་ལྡན་འདས། །
ཚུར་གཤེགས་འདིར་ནི་བཞུགས་སུ་གསོལ། །བདག་གི་མཆོད་ཡོན་བཞེས་ནས་ཀྱང༌། །འདི་ཉིད་དུ་ནི་བཞུགས་སུ་གསོལ། །མཆོད་ཡོན་གྱི་ཕྱག་རྒྱ་བཅས་ལ། ཨོཾ་སརྦའོ། །ཨོཾ་ཨཱརྱ་ཏཱ་རེ་ས་པ་རི་ཝཱ་ར་ག་ག་ན་ས་མ་ཡེ་ཧཱུཾ། ཇི་ལྟར་བལྟམས་པ་ཙམ་གྱི་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གི་ཁྲུས་བགྱིའོ། །དུང་ཆོས་སམ་བུམ་པ་ནས་འཐོར་ཡབ་ཀྱི་གཏོར་ལ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །པདྨའི་ཕྱག་རྒྱ་བྱས་ལ། ཨོཾ་སརྦ་ཏ་ཐཱ་ག་ཏ་ཨཱརྱ་ཏཱ་རེ་ས་པ་རི་ཝཱ་ར་པདྨ་ཀ་མ་ལ་ཡ་སྟྭཾ། མདུན་བསྐྱེད་ཀྱི་ཡེ་ཤེས་པ་ལ་བསམས་ནས། ཞིང་འདིའམ་རྒྱ་ཆེན་ཞིང་གཞན་ན། །ལྷ་རྫས་མེ་ཏོག་ཡིད་འོང་བ། །ཆུ་དང་ཐང་ལས་སྐྱེས་པ་རྣམས། །སྒྲོལ་མ་འཁོར་དང་བཅས་ལ་འབུལ། །ལྷ་ལ་སོགས་པའི་དྲི་ཡི་རྫས། །ཕྱོགས་རྣམས་ཀུན་ན་གང་ཡོད་པ། །སིམ་བྱེད་ཡིད་འོང་ལྡན་པ་འདི། །སྒྲོལ་མ་འཁོར་དང་བཅས་ལ་འབུལ། །ཕྱོགས་དུས་ཀུན་ན་བདུག་སྤོས་ནི། །ལྷ་རྫས་སྤོས་ཀྱི་ཤིང་ལ་སོགས། །དྲི་ཞིམ་ཡིད་འོང་གང་ཡོད་པ། །སྒྲོལ་མ་འཁོར་དང་བཅས་ལ་འབུལ། །འཇིག་རྟེན་འདིའམ་ཕྱོགས་རྣམས་
ན། །ལྷ་དང་མི་ལ་སོགས་པའི་རྫས། །ཡོན་ཏན་ཀུན་ལྡན་གང་ཡོད་དེ། །སྒྲོལ་མ་འཁོར་དང་བཅས་ལ་འབུལ། །འཇིག་རྟེན་འདིའམ་ཕྱོགས་བཅུ་ཡི། །རིན་ཆེན་མར་མེ་ལ་སོགས་པ། །སྣང་བའི་ཁྱད་པར་གང་ཡོད་དེ། །སྒྲོལ་མ་འཁོར་དང་བཅས་ལ་འབུལ། །ཞེས་པས་མཆོད། ཉེར་སྤྱོད་སོ་སོའི་མཐར་སྔགས་དང་ཕྱག་རྒྱ་བྱས་ཀྱང་རུང༌། བསྟོད་པར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡི་རྣམ་ཀུན་ཏུ། །མཆོག་ཏུ་དད་པས་བསྟོད་པར་གྱིས། །ཞེས་པས་མཆོད་ནས། དགུགས་གཞུགས་བཅིང་མཉེས་ཀྱི་ཕྱག་རྒྱ་བྱས་ལ། ཨོཾ་བཛྲ་ཨ་གུ་ཤ་ཛཿ ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་བཛྲ་ཨཱ་བེ་ཤཿ གཉིས་སུ་མེད་པར་གྱུར། དམ་ཚིག་པ་དང་ཡེ་ཤེས་པ་རོ་གཅིག་ཏུ་འདྲེས་པར་བསམས་ནས། སླར་ཡང་ཐུགས་ཀའི་ཧཱུཾ་དང་ཏཱཾཿལས་འོད་འཕྲོས་པས། དབང་གི་ལྷ་རིགས་ལྔ། ཡུམ་བཞི། བྱང་ཆུབ་སེམས་དཔའ་བརྒྱད། ཁྲོ་བོ་བཅུ། ལྷ་མོ་དྲུག་དང་བཅས་པ་པཉྩ་ཀུ་ལ་ས་པ་རི་ཝཱ་ར་བཛྲ་ས་མ་ཡ་ཛཿ པཉྩ་ཀུ་ལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། ཨོཾ་བཛྲ་པཱ་ཏྱཾ་པྲ་ཏིཙྪ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་གྷནྡྷེ་ཨཱཿཧཱུཾ། ཨོཾ་བཛྲ་དྷུ་པེ་ཨཱཿཧཱུཾ། ཨོཾ་བཛྲ་ནྱེ་ཝེ་ཏེ་ཨཱཿཧཱུཾ། ཨོཾ་བཛྲ་ཨཱ་ལོ་ཀེ་ཨཱཿཧཱུཾ། ཨོཾ་བཛྲ་ཤཔྟ་ཨཱཿཧཱུཾ། དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་དུ་གསོལ། ཞེས་གསོལ་བ་
བཏབ་པས། རིགས་ལྔས། ཇི་ལྟར་བལྟམས་པ་ཙམ་གྱི་ནི། །ཞེས་སོགས་ནས། ཨོཾ་བཛྲིར་བྷཱ་ཝ་ཨཱ་བྷི་ཥིཉྩ་ཧཱུཾ། ཞེས་གསུང་ཞིང་བུམ་པའི་ཆུས་དབང་བསྐུར། བྱང་ཆུབ་སེམས་དཔའ་རྣམས་ཀྱི་བཀྲ་ཤིས་བརྗོད། ཁྲོ་བོ་རྣམས་ཀྱི་བགེགས་བསྐྲད། མཆོད་པའི་ལྷ་མོ་རྣམས་ཀྱི། གུར་གུམ་གྱི་ཆར་འབེབས། སྤོས་ཀྱི་ངད་ཐུལ། རོལ་མོའི་སྒྲ་སྒྲག་བཞིན་པས་དབང་བསྐུར། སྐུ་གང་དྲི་མ་དག །ཆུ་ཞབས་གྱེན་དུ་འཁྱིལ་བ་ལས། འོད་དཔག་མེད་སྤྲུལ་སྐུའི་རྣམ་པ་ཅན་གྱི་དབུ་བརྒྱན་པར་གྱུར། འདིའི་མཚམས་སུ། མདུན་བསྐྱེད་ཀྱི་ཐུགས་ཀའི་ཡིག་འབྲུ་རྣམས་ལ་དམིགས་ནས། ཡི་གེ་བཅུ་པ་བརྒྱ་ལ་སོགས་གང་གྲུབ་དང༌། མ་མ་ཨཱ་ཡུ་པཱུཎྱེ་ཉི་ཤུ་རྩ་གཅིག །དབྱངས་དང་གསལ་བྱེད། རྟེན་འབྲེལ་སྙིང་པོ་རྣམས་ལན་གསུམ་གསུམ་ཡིད་མ་ཡེངས་པར་མྱུར་བུལ་གྱི་སྐྱོན་སྤངས་ནས་བཟླའོ། །དྲི་མེད་གཙང་ཞིང་ཡན་ལག་བརྒྱད་ལྡན་ཆུ། །ཐང་སྐྱེས་ཆུ་སྐྱེས་ཆུ་ཆེན་མེ་ཏོག་བཅས། །དྲི་ཞིམ་ཡིད་འོང་ལྡན་པའི་མཆོད་ཡོན་འདི། །རྒྱལ་བ་བསྐྱེད་པའི་ཡུམ་ལ་མཆོད་པར་འབུལ། །ཨོཾ་སརྦ་ཏ་ཐཱ་ག་ཏ་ཨཱརྱ་ཏཱ་རེ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུཾ། དྲི་མེད་གཙང་ཞིང་ཡན་ལག་བརྒྱད་ལྡན་ཆུ། །ཐང་སྐྱེས་ཆུ་སྐྱེས་ཆུ་ཆེན་མེ་ཏོག་བཅས། །དྲི་ཞིམ་ཡིད་འོང་ལྡན་པའི་ཞབས་བསིལ་འདི། །རྒྱལ་བ་བསྐྱེད་
པའི་ཡུམ་ལ་མཆོད་པ་འབུལ། །ཨོཾ་སརྦ་ཏ་ཐཱ་ག་ཏ་ཨཱརྱ་ཏཱ་རེ་ས་པ་རི་ཝཱ་ར་པཱ་ཏྱཾ་པྲ་ཏཱིཙྪ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུཾ། རང་རྗེ་བཙུན་མར་གསལ་བའི་ཐུགས་ཀའི་ཏཱཾཿཡིག་ལས་མཆོད་པའི་ལྷ་མོ་དེ་དང་དེ་སྤྲོས་ནས་མདུན་བསྐྱེད་ལ་མཆོད་པར་བསམ། དུས་གསུམ་རྒྱལ་བའི་དབུ་ལ་མཆོད་འབུལ་མ། །པུཥྤེ་དཀར་མོ་ཞལ་གཅིག་ཕྱག་གཉིས་མ། །ཐང་སྐྱེས་ཆུ་སྐྱེས་མེ་ཏོག་དཀོན་མང་བསྣམས། །རྒྱལ་བ་བསྐྱེད་པའི་ཡུམ་ལ་མཆོད་པ་འབུལ། །ཨོཾ་སརྦ་ཏ་ཐཱ་ག་ཏ་ཨཱརྱ་ཏཱ་རེ་ས་པ་རི་ཝཱ་ར་པུཥྤེ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུཾ། དུས་གསུམ་རྒྱལ་བའི་ཤངས་ལ་མཆོད་འབུལ་མ། །སྤོས་མ་དུད་ཁ་ཞལ་གཅིག་ཕྱག་གཉིས་མ། ལྷན་ཅིག་སྦྱར་དང་ཡོངས་གྱུར་སྤོས་ཁང་བསྣམས། །རྒྱལ་བ་བསྐྱེད་པའི་ཡུམ་ལ་མཆོད་པར་འབུལ། །ཨོཾ་སརྦ་ཏ་ཐཱ་ག་ཏ་ཨཱརྱ་ཏཱ་རེ་ས་པ་རི་ཝཱ་ར་དྷུ་པེ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུཾ། དུས་གསུམ་རྒྱལ་བའི་སྤྱན་ལ་མཆོད་འབུལ་མ། །དཱི་པཾ་དམར་སྐྱ་ཞལ་གཅིག་ཕྱག་གཉིས་མ། །ཉི་ཟླ་རིན་ཆེན་སྣང་གསལ་སྣ་ཚོགས་བསྣམས། །རྒྱལ་བ་བསྐྱེད་པའི་ཡུམ་ལ་མཆོད་པ་འབུལ། ཨོཾ་སརྦ་ཏ་ཐཱ་ག་ཏ་ཨཱརྱ་ཏཱ་རེ་ས་པ་རི་ཝཱ་ར་ཨཱ་ལོ་ཀེ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུཾ། དུས་གསུམ་རྒྱལ་བའི་ཐུགས་ལ་མཆོད་འབུལ་མ། །དྲི་མ་ལྗང་ཁུ་ཞལ་གཅིག་ཕྱག་གཉིས་མ། །ཨ་དཀར་ཙན་དན་ག་བུར་དུང་
ཆོས་བསྣམས། །རྒྱལ་བ་བསྐྱེད་པའི་ཡུམ་ལ་མཆོད་པ་འབུལ། །ཨོཾ་སརྦ་ཏ་ཐཱ་ག་ཏ་ཨཱརྱ་ཏཱ་རེ་ས་པ་རི་ཝཱ་ར་གྷནྡྷེ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུཾ། དུས་གསུམ་རྒྱལ་བའི་ལྗགས་ལ་མཆོད་འབུལ་མ། །རོ་མ་དམར་མོ་ཞལ་གཅིག་ཕྱག་གཉིས་མ། །རོ་དང་བཅུད་ལྡན་ལྷ་རྫས་ཞལ་ཟས་བསྣམས། །རྒྱལ་བ་བསྐྱེད་པའི་ཡུམ་ལ་མཆོད་པ་འབུལ། །ཨོཾ་སརྦ་ཏ་ཐཱ་ག་ཏ་ཨཱརྱ་ཏཱ་རེ་ས་པ་རི་ཝཱ་ར་ནཻ་ཝེ་ཏྱེ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུཾ། དུས་གསུམ་རྒྱལ་བའི་སྙན་ལ་མཆོད་འབུལ་མ། །སྒྲ་མ་སྔོན་མོ་ཞལ་གཅིག་ཕྱག་གཉིས་མ། །པི་ཝང་གླིང་བུ་སིལ་སྙན་སྣ་ཚོགས་བསྣམས། །རྒྱལ་བ་བསྐྱེད་པའི་ཡུམ་ལ་མཆོད་པ་འབུལ། །ཨོཾ་སརྦ་ཏ་ཐཱ་ག་ཏ་ཨཱརྱ་ཏཱ་རེ་ས་པ་རི་ཝཱ་ར་ཤཔྟཔཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུཾ། འཛམ་བུ་གླིང་ངམ་གླིང་གཞན་ན། །གཟུགས་མཆོག་ཚོགས་ཀྱིས་གང་བ་ཡང༌། །རྗེ་བཙུན་འཕགས་མ་སྒྲོལ་མ་ལ། །ཞུམ་པ་མེད་པར་བྱས་ཏེ་འབུལ། །ཨོཾ་སརྦ་ཏ་ཐཱ་ག་ཏ་ཨཱརྱ་ཏཱ་རེ་ས་པ་རི་ཝཱ་ར་རཱུ་པ་ཀ་མ་གུ་ཎ་བཛྲ་པཱུ་ཛི་ཏེ་ཨཱཿཧཱུཾ། དེ་བཞིན་དུ་ཐོག་མཐའ་འདྲ་བ་ལས། སྒྲ་སྙན། དྲི་མཆོག །རོ་མཆོག །རེག་འཇམ་ཚོགས་ཀྱི་བཀང་བ་ཡང༌། །རྗེ་བཙུན་འཕགས་མ་སྒྲོལ་མ་ལ། །ཞུམ་པ་མེད་པར་བྱས་ཏེ་འབུལ། །ཞེས་པ་དང༌། སྔགས་ཀྱི་ཐོག་མཐའ་འདྲ་བ་ལས། རཱུ་པའི་གནས་སུ། ཤཔྟ། གྷནྡྷེ། ར་ས།
པར་ཤ །རྣམས་བཅུག །འཛམ་བུ་གླིང་ངམ་གླིང་གཞན་ན། །འཁོར་ལོ་རིན་ཆེན་བཀང་བ་ཡང༌། །སྟོང་གསུམ་ལ་སོགས་དེ་བཞིན་ཏེ། །ཞུམ་པ་མེད་པར་བྱས་ཏེ་འབུལ། །ཨོཾ་སརྦ་ཏ་ཐཱ་ག་ཏ་ཨཱརྱ་ཏཱ་རེ་ས་པ་རི་ཝཱ་ར་ཙཀྲ་རཏྣ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡ་ཨཱཿཧཱུཾ། དེ་བཞིན་དུ། ནོར་བུ་དང༌། མ་ཎི། བཙུན་མོ་དང༌། ཝཱ་སྟི། བློན་པོ་དང༌། མཧཱ་ཏ། གླང་པོ་དང༌། ཧསྟི། རྟ་མཆོག་དང༌། ཏུ་རཾ་ག་ཨ་ཤྭ། དམག་དཔོན་དང༌། ཁདྒ། རྣམས་བཅུག་པས་མཆོད། ལྷ་ཡི་དབང་པོ་ལྷ་མིན་གཡུལ་རྒྱལ་ཏེ། །བཀྲ་ཤིས་ལྷ་མོ་བརྒྱད་ཀྱི་མཆོད་པ་ལྟར། །རྒྱལ་བ་རྣམས་དང་བྱང་ཆུབ་སེམས་དཔའ་ལ། །བཀྲ་ཤིས་རྫས་བརྒྱད་དག་གིས་མཆོད་པར་གྱིས། །ཨོཾ་སརྦ་ཏ་ཐཱ་ག་ཏ་ཨཱརྱ་ཏཱ་རེ་ས་པ་རི་ཝཱ་ར་མངྒ་ལཾ་ཨཥྟ་ཌ་ཝི་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུཾ། བདག་དང་ཕ་མས་གཙོར་བྱས་སེམས་ཅན་ཐམས་ཅད་ལུས་ངག་ཡིད་གསུམ་གུས་པས་རྩེ་གཅིག་ཏུ། མགྲིན་སྡེབས་ཏེ། འཕགས་མའི་ཡོན་ཏན་དྲན་བཞིན་བསྟོད་པར་བསམས་ནས། འཁོར་བ་ལས་སྒྲོལ་ཏ་རེ་མ། །ཏུཏྟཱ་ར་ཡིས་འཇིགས་བརྒྱད་སྒྲོལ། །ཏུ་རེས་ན་བ་རྣམས་ལས་སྒྲོལ། །སྒྲོལ་མ་ཡུམ་ལ་ཕྱག་འཚལ་ལོ། །པདྨ་དཀར་པོའི་དབུས་གནས་པ། །ཟླ་བའི་གཟུགས་ཀྱི་གདན་སྟེང་དུ། །རྡོ་རྗེ་སྐྱིལ་ཀྲུང་བཅས་མཛད་མ། །མཆོག་སྦྱིན་མ་ལ་ཕྱག་འཚལ་ལོ། །སྟོན་ཀའི་ཟླ་བའི་མདོག་འདྲ་ཞིང༌། །ཟླ་བ་ལ་ནི་རྒྱབ་རྟེན་མ། །
རྒྱན་རྣམས་ཐམས་ཅད་ཡོངས་སུ་རྫོགས། །ཨུཏྤལ་བསྣམས་ལ་ཕྱག་འཚལ་ལོ། །བཅུ་དྲུག་ལོ་ལོན་ལུས་དང་ལྡན། །རྫོགས་སངས་རྒྱས་ཀུན་དེ་ཡི་སྲས། །འདོད་སྦྱིན་ཀུན་ནི་འཆང་བའི་ཡུམ། །འཕགས་མ་སྒྲོལ་ལ་ཕྱག་འཚལ་ལོ། །འཁོར་ལོ་དཀར་པོ་འོད་ཟེར་དཀར། །རྩིབས་བརྒྱད་ལ་ནི་ཡི་གེ་བརྒྱད། །ཡོངས་སུ་བསྐོར་བའི་རྣམ་པ་ཅན། །འཁོར་ལོ་ཅན་ལ་ཕྱག་འཚལ་ལོ། །ཞིང་ཁམས་ཐམས་ཅད་ཡོངས་སུ་དག་པ་ལ། །རིན་ཆེན་མེ་ཏོག་མང་པོ་བཅལ་དུ་བཀྲམ། །དུས་གསུམ་སངས་རྒྱས་ཐམས་ཅད་བསྐྱེད་པའི་ཡུམ། །ཡུམ་གྱུར་སྒྲོལ་མ་ཁྱོད་ལ་ཕྱག་འཚལ་ལོ། །འཕགས་མ་སྒྲོལ་མ་སྒྲོལ་མཛད་ཡུམ། །ཡིད་བཞིན་འཁོར་ལོ་ཚེ་འཕེལ་མ། །ལྷ་མོ་ཁྱོད་ལ་གསོལ་བ་ནི། །བདག་གི་ཚེ་ཡི་བར་ཆད་དང༌། །ནད་དང་སྡུག་བསྔལ་ཐམས་ཅད་ལས། །ནུས་ལྡན་ཁྱོད་ཀྱི་བསྐྱབ་ཏུ་གསོལ །མཆོག་དང་ཐུན་མོང་དངོས་གྲུབ་ཀུན། །མ་ལུས་བདག་ལ་གནང་བར་མཛོད། །འཕགས་མ་ཁྱེད་ལ་དད་བྱེད་པ། །དེ་ལ་རྟག་ཏུ་བུ་བཞིན་དགོངས། །བདག་ཀྱང་ཁྱོད་ལ་གསོལ་འདེབས་ཀྱི། །ཐུགས་རྗེའི་ལྕགས་ཀྱུས་བཟུང་དུ་གསོལ། །ལྷ་མོ་སྐུ་མདོག་ཟླ་འདྲའི་མདོག །སྒེག་ཅིང་དུལ་བའི་ཆ་བྱད་ཅན། །གཟུགས་བཟང་རིན་ཆེན་རྒྱན་གྱིས་སྤྲས། །མཛེས་པའི་དར་གྱི་སྨད་གཡོགས་ཅན། །པདྨ་
ཟླ་བའི་གདན་དབུས་སུ། །ཞབས་གཉིས་རྡོ་རྗེའི་སྐྱིལ་ཀྲུང་མཛད། །ཞལ་གཅིག་ཕྱག་གཉིས་འཛུམ་བག་ཅན། །དུས་གསུམ་སངས་རྒྱས་བསྐྱེད་པའི་ཡུམ། །ལྷ་མོ་ཁྱོད་ལ་རྟག་ཏུ་འདུད། ཁྱོད་ལ་བག་ཙམ་བསྟོད་པ་འདིས། །བདག་ཅག་བྱང་ཆུབ་བསྒྲུབ་པ་ལ། །དུས་འདི་ནས་བཟུང་བྱང་ཆུབ་བར། །མི་མཐུན་ཕྱོགས་རྣམས་ཞི་གྱུར་ཏེ། །མཐུན་རྐྱེན་ཕུན་སུམ་ཚོགས་པར་ཤོག །ཅེས་པ་བརྒྱ་སྟོང་ངམ། ཉི་ཤུ་རྩ་གཅིག་གམ། བདུན་ལ་ཉུང་མཐའ་བྱས་པ་ཆོ་ག་ཚར་རེའི་སྐབས་སུ་བརྗོད། གཏོར་མ་དམིགས་པ་གཏད་དེ། ཨོཾ་བཛྲ་ཡཀྵས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། ཨོཾ་ཨཱཿཧཱུཾ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་གཏོར་མ་དྭངས་ཤིང་ཐོགས་པ་མེད་པ། ས་དང་ནམ་མཁའ་བར་སྣང་ཐམས་ཅད་ཁྱབ་པ། ཟག་པ་མེད་པའི་བདེ་བ་ཁྱད་པར་ཅན་བསྐྱེད་པའི་རང་བཞིན་དུ་གྱུར། ཨོཾ་ཨཱཿཧཱུཾ་ཧ་ཧོཿཧྲིཿ ཞེས་ལན་གསུམ་གྱིས་བྱིན་གྱིས་བརླབས། རྗེ་བཙུན་མའི་ལྗགས་འོད་ཀྱི་སྦུ་གུས། བདུད་རྩི་གཏོར་མ་ལ་ཟུག་ནས་གསོལ་བས། ཟག་པ་མེད་པའི་བདེ་བས་མཉེས་པར་བསམས་ཏེ། གཏོར་མ་འབུལ་བའི་ཕྱག་རྒྱ་བྱས་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། ན་མ་སརྦ་ཏ་ཐཱ་ག་ཏེ་བྷྱོཿ བི་ཤྭ་མུ་ཥེ་བྷྱཿ སརྦ་ཐཱ་ཁཾ་ཨུཏྒ་དེ། སྥ་ར་ཎ་ཨི་མཾ། ག་ག་ན་ཁཾ། གྷྲིཧྞེ་དཾ་བ་ལིཾ་ཏྱེ་སྭཱཧཱ། ཞེས་གསུམ་མམ། ལྔའམ། བདུན་གྱིས་
འབུལ། ཨོཾ་ཨཱརྱ་ཏཱ་རེ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། པཱཏྱཾ་པྲ་ཏཱིཙྪ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་གྷནྡྷེ་ཨཱཿཧཱུཾ། ཨོཾ་བཛྲ་དྷུ་པེ་ཨཱཿཧཱུཾ། ཨོཾ་བཛྲ་ནྱཻ་ཝེ་ཏྱེ་ཨཱཿཧཱུཾ། ཨོཾ་བཛྲ་ཨཱ་ལོ་ཀེ་ཨཱཿཧཱུཾ། ཨོཾ་བཛྲ་ཤཔྟ་ཨཱཿཧཱུཾ། ཞེས་སོགས། ལྷ་དང་ལྷ་མིན་ཅོད་པན་གྱི། །ཞེས་སོགས་ཤོ་ལོ་ཀ་གཅིག་གིས་བསྟོད། མཆོད་སྦྱིན་གཏོར་མ་འདི་བསྣོམས་ལ། །ཞེས་སོགས་ནས། ཡིད་ལ་འདོད་པ་ཀུན་འགྲུབ་ཤོག །དེ་ནས་གཏོར་མ་གཉིས་པ་ལ་དམིགས་ནས། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎ་ཨཱདྱེ་ནུཏྤནྣ་ཏྭ་ཏ་ཨོཾ་ཨཱཿཧཱུཾ། གསུམ་གྱི་བྱིན་གྱིས་བརླབས། ཨོཾ་ཡུལ་བདག །གནས་བདགགཞི་བདག །གཉུག་མར་གནས་པ། ས་པ་རི་ཝཱ་ར་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཏཏྑ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་བ་ལིཾ་ཏ་སྭཱ་ཧཱ། གང་དག་འདི་ནི་གནས་པའི་ཡུལ་བདག །གནས་བདག །གཞི་བདག །གཉུག་མར་གནས་པ་འཁོར་དང་བཅས་པ་རྣམས་ཀྱིས། སངས་རྒྱས་ཀྱི་བསྟན་པ་དར་བ། སེམས་ཅན་ལ་བདེ་སྐྱིད་འབྱུང་བའི་འཕྲིན་ལས་མཛད་དུ་གསོལ། གཏོར་མ་རྒྱས་པར་བསྔོ་བ་འདོད་ན་ཡང༌། འདིའི་འདས་གཏོར་གྱི་རྗེས་ལ་རང་གང་བྱེད་ཀྱི་བླ་མ་ཡི་དམ་མཁའ་འགྲོ་ཆོས་སྐྱོང་རྣམས་ལ་ཤ་ཁྲག་གིས་བརྒྱན་བའི་གཏོར་མ་ཡང་བྱིན་བརླབས་གོང་དུ་བྱས་ལ་བསྔོའོ། །མདུན་བསྐྱེད་ལ་བཟླས་པ་ཅུང་ཟད་དང་མཆོད་པ་རྒྱས་པ། གཏོར་མ། འདོད་དོན་ལ་གསོལ་བ་རྣམས་བྱས་ནས། བདག་འཇུག་ཀྱང་བླང་ངོ་ཞེས་གསུང་པ་ལ་རྟེན། ཆོ་
ག་ཁ་ཚང་བ་དང༌། དམ་ཚིག་སོར་ཆུད་ཅིང་དངོས་གྲུབ་མྱུར་དུ་འབྱུང་བས་ན་བདག་འཇུག་བྱ་བ་ནི། མདུན་བསྐྱེད་དང་བླ་མ་ཐ་མི་དད་དུ་བསམས་ནས། ཁྲུས་དང་གཙང་སྦྲ་སྔོན་དུ་འགྲོ་བས། མཎྜལ་དབུལ་བ་ནི། ཨོཾ་བཛྲ་བྷུ་མེ་ཨཱཿཧཱུཾ། དབང་ཆེན་གསེར་གྱི་ས་གཞི། ཨོཾ་བཛྲ་རེ་ཁེ་ཨཱཿཧཱུཾ། ཕྱིའི་ལྕགས་རི་ཁོར་ཡུག་གིས་སྐོར་བའི་དབུས་སུ། ཧཱུཾ་རིའི་རྒྱལ་པོ་རི་རབ། ཤར་ལུས་འཕགས་པོ། ལྷོ་འཛམ་བུ་གླིང༌། ནུབ་བ་གླང་སྤྱོད། བྱང་སྒྲ་མི་སྙན། ཉི་མ། ཟླ་བ། དབུས་སུ་ལྷ་དང་མི་ཡི་ལོངས་སྤྱོད་ཕུན་སུམ་ཚོགས་པ་མ་ཚང་བ་མེད་པ། ལུས་ལོངས་སྤྱོད་དུས་གསུམ་དུ་བསགས་པའི་དགེ་བའི་རྩ་བ་དང་བཅས་པ་འདི་ཉིད། བླ་མ་དང་རྗེ་བཙུན་མ་སྒྲོལ་མ་དཀར་མོ་ཡིད་བཞིན་གྱི་འཁོར་ལོ་ཐ་དད་མ་མཆིས་པའི་དྲུང་དུ། རྗེ་བཙུན་མ་སྒྲོལ་མ་དཀར་མོའི་སྐུ་གསུང་ཐུགས་ཡོན་ཏན་འཕྲིན་ལས་དང་བཅས་པའི་བྱིན་བརླབ་དང༌། རྗེས་སུ་གནང་བ་ཞུ་བའི་ཡོན་དུ་དབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །བཞེས་ནས་བྱིན་གྱིས་བརླབ་ཏུ་གསོལ། །གུ་རུ་ཨི་དཾ་མཎྜ་ལ་ཁཾ། ནིརྱ་ཏ་ཡ་མི། མདུན་བསྐྱེད་དང་བླ་མ་ཐ་མི་དད་པར་བསམས་ནས། དབང་གི་དོན་དུ་ཕྱག་འཚལ་བར་མོས་ཏེ། གང་གི་དྲིན་གྱིས་བདེ་ཆེན་ཉིད། །སྐད་གཅིག་ཉིད་ལ་འཆར་བ་གང༌། །བླ་མ་རིན་ཆེན་ལྟ་བུའི་སྐུ །རྡོ་རྗེ་ཅན་ཞབས་པད་ལ་འདུད། །ཅེས་ལན་གསུམ། འཁོར་བ་ལས་སྒྲོལ་ཏཱ་རེ་མ། །ཏུཏྟཱ་རེ་ཡིས་འཇིགས་
བརྒྱད་སྒྲོལ། །ཏུ་རེས་ན་བ་རྣམས་ལས་སྒྲོལ། །སྒྲོལ་མ་ཡུམ་ལ་ཕྱག་འཚལ་ལོ། །ལན་གསུམ། དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོར་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་བསྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་བསྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་འཇུག་པར་འཚལ། །ལན་གསུམ་བརྗོད། རྒྱས་པར་སྤྲོ་ན། རྟོག་པ་བསྡུ་བ། སྣང་བ་སྦྱིན་པ། རྒྱུན་བཤགས། གནས་གསུམ་བྱིན་བརླབ། སྡོམ་བཟུང༌། ནང་གི་སེམས་བསྐྱེད། དམ་བཞག་སོགས་ཀྱང་བྱ་གསུང༌། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་བཟུང༌། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་སྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གི་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་གསུམ་བརྗོད། མདུན་
བསྐྱེད་ཀྱི་རྗེ་བཙུན་མ་དང་ཐ་མི་དད་པས། རང་ཉིད་སྦྱངས་ནས། རྗེ་བཙུན་མར་བསྐྱེད་པར་བསམ་ལ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས། པདྨ་དང་ཟླ་བའི་གདན་གྱི་སྟེང་དུ། རང་ཉིད་རྗེ་བཙུན་མ་སྒྲོལ་མ་དཀར་མོ། ཞེས་པ་ནས། ལྔ་པ་ལ་འོད་ཟེར་དམར་ནག་གིས་བསྐོར་བ་ཞེས་པའི་བར་བདག་བསྐྱེད་བཞིན་མངོན་རྟོགས་ཚང་བར་གསལ་བཏབ། མདུན་བསྐྱེད་ལ་དམིགས་ནས་རང་གི་གསོལ་བ་བཏབ་པ་ནི། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེས་བདག་ཅག་དུས་དང་དུས་མ་ཡིན་པར་འཆི་བའི་འཇིགས་པ་ཐམས་ཅད་བསལ་ནས། རྗེ་བཙུན་མ་སྒྲོལ་མའི་སྐུ་གསུང་ཐུགས་ཡོན་ཏན་འཕྲིན་ལས་དང་བཅས་པའི་བྱིན་བརླབས་དང༌། རྗེས་སུ་གནང་བ་བསྩལ་དུ་གསོལ། ཞེས་ལན་གསུམ། ཞེས་གསོལ་བ་གདབ་པས། བདག་དང་མདུན་བསྐྱེད་ཀྱི་ཐུགས་ཀ་ནས་འོད་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་རྒྱུད་བསྐུལ། དེ་རྣམས་ཀྱི་ཐུགས་གཉིས་སུ་མེད་པའི་ཡེ་ཤེས་འཁོར་ལོ་ཡིག་འབྲུ་དང་བཅས་པའི་རྣམ་པར་སྤྱན་དྲངས། ནམ་མཁའ་ལ་ཁ་བ་བུ་ཡུག་འཚུབས་པ་བཞིན་དུ་བྱོན། རང་གི་སྙིང་གའི་འཁོར་ལོ་དང་ཡིག་འབྲུ་ལ་ཐིམ། མདུན་བསྐྱེད་ཀྱི་ཐུགས་ཀ་ནས་ཀྱང༌། འཁོར་ལོ་ཡིག་འབྲུ་དང་བཅས་པ་དཔག་ཏུ་མེད་པ་བྱོན། རང་ཉིད་ལ་ཐིམ་པས། སངས་རྒྱས་ཐམས་ཅད་དང་ཁྱད་པར་རྗེ་བཙུན་མ་སྒྲོལ་མའི་
བྱིན་བརླབས་ཞུགས་པས། སྙིང་གའི་འཁོར་ལོ་ཡིག་འབྲུ་དང་བཅས་པའི་འོད་ཀྱི་ལུས་ཐམས་ཅད་གང༌། སྡིག་སྒྲིབ་ཐམས་ཅད་སྦྱངས། དུས་དང་དུས་མ་ཡིན་པར་འཆི་བ་ལ་སོགས་པ། བར་ཆད་ཐམས་ཅད་བསལ་བར་གྱུར། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། ཨ་བེ་ཤ་ཡ་ཨ་ཨཱཿ ཞེས་པ་ལན་གསུམ་གསུམ་བྱ། སྤོས་དང་རོལ་མོ་བྱ་ཞིང་གོང་གི་དམིགས་པ་གསལ་བ་གལ་ཆེའོ། །རྡོ་རྗེ་སྤྱི་བོར་བཞག་ནས། ཏིཥྛ་བཛྲ། ཞེས་བརྗོད་པས་བརྟན་པར་བསམ་མོ། །མདུན་བསྐྱེད་ཀྱི་ཐུགས་ཀ་ནས་སྒྲོལ་མ་འཇིགས་པ་བརྒྱད་སྐྱོབ་ལ་དབང་གི་ལྷ་རིགས་ལྔ། ཡུམ་བཞི། བྱང་ཆུབ་སེམས་དཔའ་བརྒྱད། ཁྲོ་བོ་བཅུ། ལྷ་མོ་དྲུག་དང་བཅས་པ་ནམ་མཁར་སྤྱན་དྲངས། རྡོ་རྗེ་བསྡུས་པའི་ཕྱག་རྒྱ་བྱས་ལ། བཛྲ་ས་མ་ཛཿ པཉྩ་ཀུ་ལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། པཱ་ཏྱཾ་པྲ་ཏཱིཙྪ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་དྷུ་པེ་ཨཱཿཧཱུཾ། ཨོཾ་བཛྲ་ཨཱ་ལོ་ཀེ་ཨཱཿཧཱུཾ། ཨོཾ་བཛྲ་གནྡྷེ་ཨཱཿཧཱུཾ། ཨོཾ་བཛྲ་ནྱེ་ཝེ་ཏེ་ཨཱཿཧཱུཾ། ཨོཾ་བཛྲ་ཤཔྟ་ཨཱཿཧཱུཾ། བྱང་ཆུབ་རྡོ་རྗེ་སངས་རྒྱས་ལ། །མཆོག་ཆེན་ཇི་ལྟར་བསྩལ་བ་ལྟར། །བདག་ཀྱང་སྐྱབས་པའི་དོན་གྱི་ཕྱིར། །ནམ་མཁའི་རྡོ་རྗེས་དེང་བདག་སྩོལ། །ཞེས་ལན་གསུམ། ཞེས་གསོལ་བ་གདབ་པས། དབང་གི་ལྷ་དེ་རྣམས་ཀྱི་རིན་པོ་ཆེའི་བུམ་པ་བདུད་རྩི་བྱང་སེམས་ཀྱི་བཀང་བ་ཐོགས་ནས། སྤྱི་བོར། ཇི་ལྟར་བལྟམས་པ་ཙམ་གྱི་ནི། །ལྷ་རྣམས་ཀྱིས་
ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡི། །དེ་བཞིན་བདག་གིས་དབང་བསྐུར་རོ། །ཨོཾ་ཏཱ་རེ་ཏུཏྟཱ་ཏེ་ཏུ་རེ་སྭཱཧཱ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་གསུང་ཞིང་བུམ་པའི་ཆུས་དབང་བསྐུར་བས། སྤྱི་བོ་བདེ་བ་ཆེན་པོའི་རྩ་འདབ་ཐམས་ཅད་གང༌། ལུས་ཀྱི་སྒྲིབ་པ་དག །ལུས་སྐུ་རྡོ་རྗེར་གྱུར། དབང་དང་པོ་བུམ་པའི་དབང་ཐོབ། བསྐྱེད་རིམ་སྒོམ་པ་ལ་དབང༌། སྤྲུལ་སྐུ་འགྲུབ་པའི་རྟེན་འབྲེལ་མངོན་དུ་བྱས། ཡང་དབང་གིས་ལྷ་དེ་རྣམས་ཀྱི་མགྲིན་པར། ཇི་ལྟར་བལྟམས་པ་ནས། དེ་བཞིན་བདག་གི་དབང་བསྐུར་རོ། །ཞེས་པའི་བར་དང༌། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། ཨོཾ་སརྦ་ཏ་ཐཱ་ག་ཏ་གྷུ་ཧྱེ་ཨ་བྷི་ཥེ་ཏ་ས་མ་ཡ་ཤྲཱི་ཡེ་ཧཱུཾ། ཞེས་གསུང་ཞིང་དབང་བསྐུར་བས་ངག་གི་སྒྲིབ་པ་དག །ངག་གསུང་རྡོ་རྗེར་གྱུར། དབང་གཉིས་པ་གསང་བའི་དབང་ཐོབ། ལམ་རྩ་རླུང་ཐིག་ལེ་སྒོམ་པ་ལ་དབང༌། ལོངས་སྐུ་འགྲུབ་པའི་རྟེན་འབྲེལ་མངོན་དུ་བྱས། ཡང་དབང་གི་ལྷ་དེ་རྣམས་ཀྱི་སྙིང་གར། ཇི་ལྟར་བལྟམས་པ་ཙམ་གྱི་ནི། །ཞེས་སོགས་ནས། དེ་བཞིན་བདག་གི་དབང་བསྐུར་རོ། །ཨོཾ་ཏཱ་རེ་དང༌། ཨོཾ་སརྦ་ཏ་ཐཱ་ག་ཏ་པྲཛྙཱ་ཛྙཱ་ན་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་གསུང་ཞིང་བུམ་པའི་ཆུས་དབང་བསྐུར་བས། སྙིང་ག་ཆོས་ཀྱི་འཁོར་ལོ་མེར་གྱིས་གང༌། ཡིད་ཀྱི་སྒྲིབ་པ་དག །སེམས་ཐུགས་རྡོ་རྗེར་གྱུར། དབང་གསུམ་པ་ཤེས་
རབ་ཡེ་ཤེས་ཀྱི་དབང་ཐོབ། ཐབས་ཤེས་སྙིང་རྗེ་སྒོམ་པ་ལ་དབང༌། ཆོས་སྐུ་འགྲུབ་པའི་རྟེན་འབྲེལ་མངོན་དུ་བྱས། ཡང་དབང་གི་ལྷ་དེ་རྣམས་ཀྱི་ལྟེ་བར། ཇི་ལྟར་བལྟམས་པ་ཙམ་གྱི་ནི། །ཞེས་སོགས་ནས། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། ཨོཾ་སརྦ་ཏ་ཐཱ་ག་ཏ་ཙ་ཏུར་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་གསུང་ཞིང་དབང་བསྐུར་བས། ལྟེ་བ་སྤྲུལ་པའི་འཁོར་ལོ་མེར་གྱིས་གང༌། ལུས་ངག་ཡིད་གསུམ་གྱི་སྒྲིབ་པ་བག་ཆགས་དང་བཅས་པ་ཐམས་ཅད་དག །སྐུ་གསུང་ཐུགས་མི་ཕྱེད་པ་རྡོ་རྗེ་གསུམ་དུ་གྱུར། བཞི་པ་ཚིག་དབང་རིན་པོ་ཆེ་ཐོབ། རིག་སྟོང་དབྱེར་མེད་སྒོམ་པ་ལ་དབང༌། ངོ་བོ་ཉིད་ཀྱི་སྐུ་འགྲུབ་པའི་རྟེན་འབྲེལ་མངོན་དུ་བྱས། དེ་ལྟར་དབང་བསྐུར་བའི་ཆུ་རྒྱུན་དེས་རྐང་མཐིལ་ཡན་ཆད་ཀྱི་ལུས་ཕྱི་ནང་ཐམས་ཅད་གང་བས་འཕྲིན་ལས་བཞི་ཐོགས་པ་མེད་པར་གྲུབ། འཆི་མེད་ཚེའི་རིགས་འཛིན་ཐོབ། ཆུ་ཞབས་གྱེན་དུ་འཁྱིལ་བ་ལས། འོད་དཔག་མེད་སྤྲུལ་སྐུའི་ཆ་ལུགས་ཅན་གྱི་དབུ་བརྒྱན་པར་གྱུར་པ་ལ། དབང་གི་ལྷ་དེ་རྣམས་ཀྱིས་རང་ཉིད་ལ་མཆོད་པར་བསམས་ནས། ཨོཾ་བཛྲ་པུཥྤེ་ཨཱཿཧཱུཾ། ནས་ཤཔྟ་ཡི་བར་གྱིས་མཆོད་པ་ནི་སྐུའི་རྗེས་གནང་ངོ༌། །གསུང་གི་རྗེས་གནང་ནི། མདུན་བསྐྱེད་དང་བླ་མ་ཐ་མི་དད་པའི་ཐུགས་ཀའི་ཡི་གེ་བཅུ་པ་ལས་སྔགས་ཕྲེང་མར་མེ་གཉིས་ཆད་ཀྱི་ཚུལ་དུ་བྱུང༌། ཞལ་ནས་ཐོན། རང་གི་ཁར་ཞུགས།
སྙིང་ཁའི་ཡི་གེ་སོ་སོ་ལ་ཐིམ་པར་གྱུར། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། འདིའི་རྗེས་ཟློས་ལ། དཔལ་ལྡན་བླ་མ་བསོད་ནམས་རྒྱལ་མཚན་པའི་རྗེས་གནང་གི་ཡི་གེ་དང༌། སྤྱན་སྔ་རིན་པོ་ཆེ་ཆོས་ཀྱི་གྲགས་པའི་ཡི་གེ་དང་གཉིས་ཀ་ལ་ཡང་བརྒྱ་དང་བརྒྱད་བཟླའོ་གསུང་ངོ༌། །འདི་ཉིད་ཀྱི་གཞུང་ལས་ཀྱང་ཡི་གེ་བཅུ་པ་བརྒྱ་རྩ་ལ་སོགས་པའི་རྗེས་ཟློས་སྐབས་དང་བསྟུན་ནས་བྱ་ཞེས་འཐུན་པ་བཞིན་དུ། བརྒྱ་དང་བརྒྱད་བཟླའོ། །སྙིམ་པ་མེ་ཏོག་དང་བཅས་པའི་ཐལ་མོ་སྦྱར་ནས། བཅོམ་ལྡན་བདག་ལ་བསྩལ་ལགས་ཀྱི། །བཅོམ་ལྡན་བདག་ལ་བྱིན་གྱིས་རློབས། །ཞེས་ལན་གསུམ་གསོལ་བ་བཏབ་པས། བླ་མ་དང་རྗེ་བཙུན་མ་ཐ་མི་དད་པས་མེ་ཏོག་སྤྱི་བོར་བཞག་པས་བསམས་ནས། དངོས་སུ་རང་གི་སྤྱི་བོརའཇོགས་པ་ཡིན་ནོ། །བཅོམ་ལྡན་འདི་ལ་བསྩལ་ལགས་ཀྱི། །བཅོམ་ལྡན་འདི་ལ་བྱིན་གྱིས་རློབས། །ཞེས་ལན་གསུམ་བརྗོད། སྔགས་ཀྱི་དངོས་གྲུབ་བསྩལ་དུ་གསོལ། །རྗེ་བཙུན་སྒྲོལ་མའི་བྱིན་བརླབས་ཀྱིས། །མཁའ་སྤྱོད་གནས་སུ་དྲངས་སུ་གསོལ། །འཕྲིན་ལས་རྫོགས་པར་མཛད་དུ་གསོལ། །ཞེས་པ་ནི་གསུང་གི་རྗེས་གནང་ངོ༌། །དབང་གི་ལྷ་དེ་ཐམས་ཅད་རང་ལ་ཐིམ་པས། རང་ལུས་ལྷ་སྐུ་སྣང་ལ་རང་བཞིན་མེད་པར་གྱུར། པ་ཡུན་ཅི་གནས་སུ་བཞག་པ་ནི། ཟུང་འཇུག་ཕྱག་རྒྱ་ཆེན་པོ་མངོན་དུ་བྱས། ཐུགས་ཀྱི་རྗེས་གནང་ངོ༌། །འཕྲིན་ལས་བཞིའི་རྗེས་གནང་ཡང་བྱས་ཆོག་གསུང་ཡང༌། ཡིག་ཆ་ཁུངས་མ་ཆོད་པས་འདིར་མ་བྲིས་སོ། །དམ་ཚིག་སྡོམ་པ་བསྒྲགས་པ་ལ་སོགས་པ་སྤྱི་དང་ཁྱད་པར་གྱི་སྡོམ་པ་དང་དམ་ཚིག་ཐམས་ཅད་བསྲུང་བར་ཁས་བླངས་པར་བསམས་ནས། གཙོ་བོས་ཇི་ལྟར་
བཀའ་སྩལ་པ། །དེ་དག་ཐམས་ཅད་བདག་གིས་བགྱིད། །ལན་གསུམ་བརྗོད། ཨོཾ་བཛྲ་བྷུ་མེ་ཨཱཿཧཱུཾ། ནས། རྗེ་བཙུན་མ་སྒྲོལ་མ་དཀར་མོའི་སྐུ་གསུང་ཐུགས་ཡོན་ཏན་འཕྲིན་ལས་དང་བཅས་པའི་བྱིན་བརླབས་དང༌། རྗེས་སུ་གནང་བ་ཞུ་བའི་ཡོན་དུ་འབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །བཞེས་ནས་བྱིན་གྱིས་བརླབ་ཏུ་གསོལ། །གུ་རུ་ཨི་དཾ་མཎྜ་ལ་ཀཾ་ནིར་ཡ་ཏ་ཡ་མི། བདག་གི་ལུས་ཀྱང་འབུལ་བར་བསམས་ནས། དེང་ནས་བརྩམས་ཏེ་བདག་བྲན་པ། ཁྱེད་ལ་བདག་ནི་འབུལ་ལགས་ན། ཁྱེད་ཀྱི་སློབ་མར་བཟུང་བ་དང༌། །ཆ་ཡི་ཀྱང་ནི་སྤྱད་དུ་གསོལ། །ལན་གསུམ། རང་གི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རྗེས་ཀྱི་ཆོ་ག་ནི། མཆོད་པ་བྱིན་བརླབས་སྔར་ལྟར་བྱས་ནས། མཆོད་ཡོན་ཕལ་ཆེར་མཆོད་ཡོན་བླ་རེ་དང༌། །མཆོད་ཡོན་བཀོད་པའི་འོད་ཟེར་རབ་བཀྱེ་སྟེ། །མཆོད་ཡོན་སྣ་ཚོགས་ཀུན་ཏུ་བཀྲམ་བྱས་ནས། །བདག་ཉིད་ཆེན་པོ་སྒྲོལ་མ་འཁོར་བཅས་མཆོད། །ཨོཾ་སརྦ་ཏ་ཐཱ་ག་ཏ་ཨཱརྱ་ཏཱ་རེ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུཾ། དེ་བཞིན་དུ་ཐོག་མཐའ་དང་འདྲ་བ་ལ། མཆོད་ཡོན། གནས་སུ། ཞབས་བསིལ། མེ་ཏོག བདུག་སྤོས། མར་མེ། དྲི་ཆབ། ཞལ་ཟས། སིལ་སྙན། ཨརྒྷཾ་གྱི་གནས་སུ། པཱ་ཏྱཾ། པུཥྤེ། དྷུ་པེ། ཨཱ་
ལོ་ཀེ གནྡྷེ། ནྱེ་ཝེ་ཏེ། ཤཔྟ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུཾ། ཞེས་པས་མཆོད། གློག་དང་འདྲ་བའི་སྤྱན་མངའ་མ། །དཔའ་མོ་ཏཱ་རེ་ཏུཏྟཱ་རེ། །སངས་རྒྱས་ཞལ་གྱི་པདྨོ་ཡི། །གེ་སར་ལས་བྱུང་ཁྱོད་ལ་འདུད། །སྟོན་ཀའི་ཟླ་བ་རྒྱས་པ་ཡི། །དཀྱིལ་འཁོར་དང་མཚུངས་ཞལ་མངའ་བ། །མཆོག་སྦྱིན་ཕྱག་རྒྱ་ཨུཏྤ་ལ། །བསྣམས་མ་ཁྱོད་ལ་ཕྱག་འཚལ་ལོ། །འཁོར་བའི་གཟེབ་ལས་ཏུཏྟཱ་རེ། །སྭཱཧཱས་ཉོན་མོངས་ཞི་བར་མཛད། །ཨོཾ་གྱིས་ངོ་བོ་ཉིད་ཀྱི་ནི། །ཚངས་པའི་སྒོ་འབྱེད་ཁྱོད་ལ་འདུད། །འཇིགས་པ་ཆེན་པོ་བརྒྱད་ལས་ནི། །འཇིག་རྟེན་ཐམས་ཅད་སྐྱོབ་པར་མཛད༌། །ཀུན་གྱི་མ་རུ་གྱུར་པ་ཡི། །སྒྲོལ་མ་ཡུམ་ལ་ཕྱག་འཚལ་ལོ། །ལྷ་དང་ལྷ་མིན་ཅོད་པན་གྱི། །ཞབས་ཀྱི་པདྨ་ལ་བཏུད་དེ། །འཕོངས་པ་ཀུན་ལས་སྒྲོལ་མཛད་མ། །སྒྲོལ་མ་ཡུམ་ལ་ཕྱག་འཚལ་ལོ། །བསྟོད་པར་འོས་པ་ནས། མཆོག་ཏུ་དད་པས་བསྟོད་པར་བགྱིས། ཞེས་པའི་བར་གྱིས་བསྟོད། རྗེ་བཙུན་བཅོམ་ལྡན་འདས་མ་ཐུགས་རྗེ་ཅན། །ཞེས་སོགས་ནས། ཡར་ངོའི་ཟླ་ལྟར་འཕེལ་ཞིང་རྒྱས་པར་མཛོད། །ཅེས་པའི་བར་གྱི་གསོལ་བ་བཏབ། ཨོཾ་བཛྲ་ཏཱ་རེ་ས་མ་ཡ། མ་ནུ་པཱ་ལ་ཡ། བཛྲ་ཏཱ་རེ་ཏྭེ་ནོ་པ་ཏིཥྛ། ཌི་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོ་ཥྱོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨཱ་སུ་ཙ་མེ་ཙིཏྟཾ་ཤྲེ་ཡཾཿ
ཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་ཝན། བཛྲ་ཏཱ་རེ་མཱ་མེ་མུཉྩ། བཛྲ་ཏཱ་རེ་བྷ་ཝ། མཧཱ་ས་མ་ཡ་སཏྭ་ཨཱཿ ལན་གསུམ་བྱས་ལ། སྙིང་ཀར་ཐལ་མོ་སྦྱར་ཏེ། མ་འབྱོར་བ་དང་ཉམས་པ་དང༌། །གང་ཡང་བདག་རྨོངས་བློ་ཡི་ནི། །ཉེས་པ་བགྱིས་དང་བགྱིད་བསྩལ་བ། དེ་ཀུན་མགོན་པོས་བཟོད་པར་གསོལ། །ལྷག་པ་དང་ནི་ཆད་པ་དང༌། །ཆོ་གའི་ཡན་ལག་ཉམས་པ་དང༌། །བདག་གིས་བརྗེད་ངས་ཅི་བགྱིས་པ། །དེ་ཡང་བཟོད་པར་མཛད་དུ་གསོལ། །ནུབ་སྔ་མ་རྣམས་ལ། བདག་མདུན་བུམ་གསུམ་གྱི་ཡེ་ཤེས་པ་རྣམས། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །ཡེ་ཤེས་པ་འཁོར་བཅས་བཛྲ་མུཿ རྡུལ་ཚོན་གྱི་དམ་ཚིག་པ་རྣམས། བདག་དང་འགྲོ་ལ་ཐུགས་བརྩེ་ཕྱིར། །ཉིད་ཀྱི་རྫུ་འཕྲུལ་མཐུ་ཡི་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །པདྨ་ཀ་མ་ལ་ཡ་སྟཾ།དགེ་བ་འདི་ཡི་མྱུར་དུ་བདག །ཡིད་བཞིན་འཁོར་ལོ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། ཁྱོད་ཀྱི་ས་ལ་འཁོད་པར་ཤོག །ནུབ་ཐ་མ་ཡིན་ན། བཛྲ་མུཿ ཞེས་ཡེ་ཤེས་པ་གཤེགས་པའི་རྗེས་སུ། མདུན་བསྐྱེད་ཀྱི་དམ་ཚིག་པ་རང་གི་སྙིང་གར་ཐིམ་པར་གྱུར། བསྔོ་བ་དང་སྨོན་ལམ་བཀྲ་
ཤིས་སྔར་ལྟར་བྱ། རྡུལ་ཚོན་གྱི་དཀྱིལ་འཁོར་གཤེགས། ལས་ཀྱི་རྗེས་མི་མངོན་པར་བྱས་ལ། ས་ཕྱོགས་དེ་དག་ཏུ་ཤིས་པ་རྒྱས་པར་བྱའོ། །རྒྱལ་མཚན་རྩེ་མོ་དབང་གི་རྒྱལ་པོ་ལྟར། །ལྷག་པར་ལྷ་ཡི་གཙུག་གི་རྒྱན་གྱུར་པ། །སྒྲུབ་པ་པོ་ལ་དངོས་གྲུབ་མཆོག་སྩོལ་བའི། །དཔལ་ལྡན་བླ་མ་རྣམས་ཀྱི་བཀྲ་ཤིས་ཤོག །བདག་གིས་ཚེ་རབས་ཀུན་ཏུ་བསྒྲུབས་པའི་ལྷ། །དུས་གསུམ་སངས་རྒྱས་ཀུན་གྱི་འཕྲིན་ལས་མ། །སྐུ་མདོག་དཀར་གསལ་ཞལ་གཅིག་ཕྱག་གཉིས་ཀྱི། །ཡུམ་གྱུར་ཨུཏྤལ་བསྣམས་པའི་བཀྲ་ཤིས་ཤོག །ཆེ་བའི་ཆེ་མཆོག་སྟོན་མཆོག་བླ་ན་མེད། །ཆོས་རྗེ་ཉི་མ་རྒྱལ་བའི་བྱིན་བརླབས་ཀྱིས། །བདུད་དང་བགེགས་རིགས་གནོད་པའི་དགྲ་ཞི་སྟེ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །ཆོས་ཉིད་བདེན་པའི་ཆོས་མཆོག་བླ་ན་མེད། །དམ་ཆོས་བདུད་རྩི་བདེན་པའི་བྱིན་བརླབས་ཀྱིས། །ཉེས་པའི་སྐྱོན་བྲལ་དགེ་ཚོགས་རྣམས་འཕེལ་བའི། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །དགེ་འདུན་ཡོན་ཏན་རིན་ཆེན་དཔལ་འབར་བ། །རྒྱལ་སྲས་ཕན་མཛད་བདེན་པའི་བྱིན་བརླབས་ཀྱིས། །ཉོན་མོངས་སྡུག་བསྔལ་གདུང་བའི་དགྲ་ཞི་སྟེ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །ཚངས་དང་ལྷ་དབང་བསྲུང་མའི་བྱིན་བརླབས་ཀྱིས། །ཕན་མཛད་ལྷ་ཡི་བཀྲ་ཤིས་གནས་གྱུར་ཏེ། །བདེ་ལེགས་
བསམ་པ་ཡིད་བཞིན་འགྲུབ་པ་དང༌། །ཚེ་རིང་ནད་མེད་བདེ་དང་ལྡན་པར་ཤོག །མི་འགྱུར་ལྷུན་པོ་སྐུ་ཡི་བཀྲ་ཤིས་ཤོག །ཡན་ལག་དྲུག་ཅུ་གསུང་གི་བཀྲ་ཤིས་ཤོག །མཐའ་བྲལ་དོན་རྟོགས་ཐུགས་ཀྱི་བཀྲ་ཤིས་ཤོག །རྒྱལ་བའི་སྐུ་གསུང་ཐུགས་ཀྱི་བཀྲ་ཤིས་ཤོག །ཉིན་མོ་བདེ་ལེགས་མཚན་བདེ་ལེགས། །ཉིན་མའི་གུང་ལ་བདེ་ལེགས་ཤིང༌། །ཉིན་མཚན་རྟག་ཏུ་བདེ་ལེགས་པའི། །དཀོན་མཆོག་གསུམ་གྱི་བདེ་ལེགས་ཤོག །སངས་རྒྱས་སྐུ་གསུམ་བརྙེས་པའི་བྱིན་བརླབས་དང༌། །ཆོས་ཉིད་མི་འགྱུར་བདེན་པའི་བྱིན་བརླབས་དང༌། །དགེ་འདུན་མི་ཕྱེད་འདུས་པའི་བྱིན་བརླབས་ཀྱིས། །ཇི་ལྟར་བསྔོས་བཞིན་སྨོན་ལམ་འགྲུབ་པར་ཤོག །འདོད་དོན་གསོལ་བས་དངོས་གྲུབ་གྲུབ་པར་བསམ་ནས་སྦྱིན་བསྲེག་བྱེད་ན་སྦྱིན་བསྲེག་ལ་འཇུག་སྟེ་ཞི་བའི་ཐབ་ཁུང་མཚན་ཉིད་དང་ལྡན་པའི་གཡས་སུ་བསྲེག་རྫས། གཡོན་དུ་མཆོད་རྫས། མདུན་དུ་རྡོ་རྗེ་དྲིལ་བུའི་བར་དུ་དགང་གཟར་བླུགས་གཟར་ཁ་སྦྱར་ལ་བཞག །ཁ་ཤར་དུ་བལྟས་ཏེ་སྐིུལ་ཀྲུང་ངམ། ཙོག་པུར་འདུག་ལ་ལྷའི་ང་རྒྱལ་དང་ལྡན་པས་མེ་སྦར་ཤིང་གིས་ཐབ་ལ་གཡས་སུ་སྐོར་ཞིང༌། ཏཱ་རེ་ཏུཏྟཱ་རེ་ཏུ་རེའི་སྔགས་ལན་གསུམ་གྱི་རྗེས་སུ་ཛྭ་ལ་རཾ་ཞེས་པས་མེ་སྦར། ཡང་ཛྭ་ལ་གསུམ་གྱིས་དགང་བླུགས་ཀྱི་མར་བླུག་ཡོ་ག་ལྟར། རྡོ་རྗེ་གནོད་སྦྱིན་གྱི་སྔགས་རྒྱས་ཐབ་དང༌། ཡོ་བྱད་བསངས། ཨོཾ་ཨཱཿསྭཱཧཱ། ཨོཾ་ཥྟིཾ་སྭཱཧཱ། ཨོཾ་ཛིཾ་སྭཱཧཱ། ཨོཾ་ཀུ་རུ་ཀུ་རུ་སྭཱཧཱ། ཡོ་བྱད་
དང་ཐབ་སྦྱངས། སྭ་བྷཱ་ཝས། སྟོང་པའི་ངང་ལས། ཐབ་པཾ་ལས་པདྨ། རཾ་ལས་ཉི་མའི་སྟེང་དུ་ཧཱུཾ་ལས་ཐབ་ཁུང་དཀར་པོ་དྭངས་ཤིང་ཐོགས་པ་མེད་པ། རྒྱར་ཁྲུ་གང་པ། དཔངས་སུ་ཁྲུ་ཕྱེད་པ། ཁ་ཁྱེར་ལ་རྡོ་རྗེའི་ཕྲེང་བས་བསྐོར་བ། ཕྱི་རོལ་ཀྱི་གྲྭ་བཞིར་རྡོ་རྗེ་ཕྱེད་པས་མཚན་པ། དབྱིབས་ཟླུམ་པ། མཚན་ཉིད་ཕུན་སུམ་ཚོགས་པ་དང་ལྡན་པར་གྱུར། ཡང་མཆོད་རྫས་བསྲེག་རྫས་ཀྱང༌། སྭ་བྷཱ་ཝས། སྟོང་པའི་ངང་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ལྷ་རྫས་ལས་གྲུབ་པའི་མཆོད་རྫས་བསྲེག་རྫས་དྭངས་ཤིང་ཐོགས་པ་མེད་པ་ས་དང་ནམ་མཁའ་བར་སྣང་ཐམས་ཅད་ཁྱབ་པ། ཀུན་ཏུ་བཟང་པོའི་རྣམ་འཕྲུལ་ལས་བྱུང་བའི་མཆོད་པའི་སྤྲིན་ཕུང་ལྟ་བུ་བསམ་གྱི་མི་ཁྱབ་པར་མོས་ལ། ཨརྒྷཾ་ནས། ཤཔྟེའི་བར་དང༌། ཨོཾ་བྷོ་དྷི་བྷྲིཀྵ་ལ་སོགས་པས་བྱིན་གྱིས་བརླབས། དེ་ནས་ཐབ་ཀྱི་ནང་དུ། པཾ་ལས་པདྨ་དང་རཾ་ལས་བགྲང་ཕྲེང་རཾ་གྱིས་མཚན་པ་ལས་འོད་འཕྲོས་འདུས་གཅིག་ཏུ་གྱུར་པ་ལས། མེ་ལྷ་སྐུ་མདོག་དམར་པོ་འོད་ཟེར་དཀར་པོ་འཕྲོ་ཞིང་འདུ་བ། ར་སྐྱེས་ལ་ཞོན་པ། ཞལ་གཅིག་ཕྱག་གཉིས་ཀྱི་གཡས་བགྲང་ཕྲེང་དང་གཡོན་གྱི་སྤྱི་བླུགས་འཛིན་པ། གསུས་ཁྱིམ་ཆེ་བ། རལ་པའི་ཐོར་ཚུགས་ཅན། ཨག་ཚོམས་འཕྱང་བ། དྲང་སྲོང་གི་ཚོགས་ཀྱིས་བསྐོར་བའི་དཔྲལ་བར་ཨོཾ། མགྲིན་པར་ཨཱཿ
ཐུགས་ཀར་ཧཱུཾ། བསམ། རང་གི་སྙིང་གའི་ས་བོན་ལས་འོད་འཕྲོས། ཤར་ལྷོ་ནས་མེ་ལྷ་སྤྱན་དྲངས་པར་མོས་ཏེ། དབྱུག་གུ་གསུམ་པའི་ཕྱག་རྒྱ་རྣ་དྲུང་དུ་བཅས་ལ། ཚུར་བྱོན་ཚུར་བྱོན་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །བསྲེག་བླུགས་ཞལ་ཟས་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་སྒྲུབ་པ་པོ། །ཐུགས་རྗེས་སེམས་ཅན་དོན་མཛད་པ། །འདི་ཉིད་དུ་ནི་བཞུགས་སུ་གསོལ། ཨོཾ་ཨགྣེ་ཡེ་མཧཱ་ཏེ་ཛ་སརྦ་ཀརྨཱ་པྲ་སྭ་ད་ཀ མཧཱ་བྷུ་ཏ་དེ་ཝཱ་རི་ཤི་དྭི་ཛ། ས་ད་མ་གྲ་ཧ། ཨ་ཧཱུ་ཏི། ཨ་ཧ་ར། ཨསྨིན་སནྣི་ཧི་ཏོ་བྷ་ཝ། ཞེས་པས་སྤྱན་དྲངས། པདྨ་ཀ་མ་ལ་ཡ་སྟྭཾ་གི་མེ་ཏོག་གཏོར་ལ་གདན་ལ་བཞུགས་པར་བསམ། ཨོཾ་ཨགྣེ་ཡེ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱས་མཆོད། པཱ་ཏྱཾ་གྱི་ཞབས་བསིལ་ཕུལ་ནས། རྡོ་རྗེ་རྩེ་ལྔ་པའི་ཕྱག་རྒྱ་བཅས་ཏེ། ཨོཾ་བཛྲ་ཨ་ན་ལ་མཧཱ་བྷུ་ཏ་ཛྭ་ལ་ཡ་བྷསྨིན་ཀུ་རུ་སརྦ་དུཥྟན་ཧཱུཾ་ཕཊ། དྲྀ་ཤྱ་ཛཿཧཱུཾ་བཾ་ཧོཿ ས་མ་ཡ་སྟྭཾ་གྱིས་དམ་ལ་བཞག །ཨོཾ་བཛྲ་ཨཾ་ཀུ་ཤ་ཛཿ ལ་སོགས་པས་དགུག་གཞུག་བཅིང་དབང་དུ་བྱ། གོང་ལྟར་དབང་བསྐུར། ཨོཾ་ཀུ་ཤ་འདི་ནི་གཙང་ཞིང་དགེ །ས་ལས་སྐྱེས་པའི་སྙིང་པོ་མཆོག །དཀོན་མཆོག་གསུམ་གྱི་དག་བྱེད་དེ། །ཚངས་པ་ཡི་ཡང་དག་བྱེད་ཡིན། །འདི་ནི་བདག་ཅག་གི་བགེགས་ཞི་ཞིང༌། མི་མཐུན་པའི་ཕྱོགས་ཐམས་ཅད་ཉེ་བར་ཞི་བར་གྱུར་
ཅིག ཨོཾ་བཛྲ་སཏྭ་ཨཱཿ ཞེས་པས་ཀུ་ཤ་རྩེ་མོ་གཡས་སུ་བསྟན་ཏེ་ཐབ་ཀྱི་ཕྱོགས་བརྒྱད་དུ་བསྐོར་ཞིང༌། ཡཀྵ་བཟླས་པའི་ཆུ་དང་རྡོ་རྗེ་གནོད་སྦྱིན་གྱི་སྔགས་རྒྱས་བསངས། དེ་ནས་མེ་ལྷའི་ལྕེ་ཧཱུཾ་ལས་རྡོ་རྗེ་རྩེ་ལྔ་པར་གྱུར།པའི་ཁ་དང་གཟར་བུ་གཉིས་ཀྱི་ཁ་ལ་རཾ་བཀོད་དེ། ཨོཾ་ཨགྣེ་ཡེ་སྭཱཧཱས་ལན་བདུན་མར་གྱིས་བཀང་སྟེ། གཟར་བུ་ཁ་སྦྱར་ལ། ཨོཾ་ཨགྣེ་ཡེ་དི་བྱཱ་དི་བྱཱ་བི་ཤུདྡྷེ་མཧཱ་ཤྲཱི་ཧ་བྱཱ་ཀ་བྱཱ་བྷ་ཡ་ཧ་ན་ཡ་ཧཱུཾ་ཕཊ་སྭཱཧཱས་མེར་བླུགས་པ་ལན་གསུམ་གྱིས། མེ་ལྷའི་ཞལ་དུ་ཕུལ་བར་བསམ། ཨོཾ་ཨགྣེ་ཡེ་ས་པ་རི་ཝཱ་ར་སྔོན་དུ་འགྲོ་བའི། ཨརྒྷཾ་ལ་སོགས་པའི་མཆོད་པ་རྣམས་ཀྱིས་མཆོད། འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པོ་ཁོ་བོས་དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་བསྲེག །ཞི་བྱེད་མེ་ལྷ་ཉིད་ལ་རྣམ་པར་འདུད། །ཅེས་པས་བསྟོད། ཨོཾ་ཨགྣེ་ཡེ་འབའ་ཞིག་གིས་རྫས་ཐམས་ཅད་ཕུལ་ནས། རིན་པོ་ཆེ་རེ་རེའི་མཇུག་ཏུ་སྤེལ་ཞིང་ཚིག་བརྗོད་དེ། ཡམ་ཤིང་ལ་གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤནྟིཾ་ཀུ་རུ་སྭཱཧཱ། མར་ལ་འབྱོར་པ། ཏིལ་ལ་དགེ་བ། ཟས་མཆོག་ལ་བདེ་བ། འབྲས་ལ་བསོད་ནམས་རྒྱས་པ། སོ་བ་ལ་ནོར་དང་འབྲུ། ནས་ལ་ཤུགས། སྲན་མ་ལ་སྟོབས། གྲོ་ལ་ནད་མེད་པ། དུར་བ་ལ་ཚེ། ཀུ་ཤ་ལ་བསྲུང་བ་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤནྟིཾ་ཀུ་རུ་སྭཱཧཱ། སྤེལ་རྫས་སོ་སོའི་སྔགས་ཀྱིས་འབུལ་ན། རིམ་པ་བཞིན། ཨོཾ་བོ་དྷི་བྷྲིཀྵ་ཡ་སྭཱཧཱ། ཨོཾ་ཨགྣེ་ཡེ་སྭཱཧཱ།
ཨོཾ་སརྦ་པ་པཾ་ད་ཧ་ན་བཛྲ་ཡེ་སྭཱཧཱ། ཨོཾ་སརྦ་སཾ་བྷ་དེ་སྭཱཧཱ། ཨོཾ་བཛྲ་པུཥྟ་ཡེ་སྭཱཧཱ། ཨོཾ་བཛྲ་བི་ཛ་ཡེ་སྭཱཧཱ། ཨོཾ་མ་ཧཱ་བེ་གཱ་ཡེ་སྭཱཧཱ། ཨོཾ་མ་ཧཱ་པཱ་ལ་ཡེ་སྭཱཧཱ། ཨོཾ་གྷསྨ་རི་སྭཱཧཱ། ཨོཾ་བཛྲ་ཨཱ་ཡུ་ཥེ་སྭཱཧཱ། ཨོཾ་ཨཱཿཔྲ་ཏི་ཧེ་ཏ་ཡ་སྭཱ་ཧཱས་ཕུལ་ལ། སྔར་བཞིན་མཆོད་བསྟོད། བསང་གཏོར་དང་ཞབས་བསིལ་ཕུལ་ལ། ཨོཾ་བཛྲ་ཛྭ་ལ་རཾ་གྱི་མེ་ལྷ་མེ་འབར་བའི་རྣམ་པར་གྱུར་པར་བསམ། དེ་ནས་ཐབ་ཀྱི་དབུས་སུ་བདག་བསྐྱེད་ཀྱི་སྐབས་ལྟར་དམ་ཚིག་པ་བསྐྱེད། སྐུ་གསུང་ཐུགས་བྱིན་གྱིས་བརླབས། དམིགས་མེད་མཁའ་ལྟར་དག་ཅིང་ཁྱབ་པའི་སྐུ། །ཆོས་སྐུ་ནམ་མཁའ་ལྟ་བུར་དབྱེར་མེད་ཀྱང༌། །ཐབས་དང་ཤེས་རབ་གཟུགས་བརྙན་སྐུར་སྟོན་པ། །བཅོམ་ལྡན་འཁོར་བཅས་འདིར་ནི་གཤེགས་སུ་གསོལ། །མ་ལུས་སེམས་ཅན་ཀུན་གྱི་མགོན་གྱུར་ཅིང༌། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་འདིར་ནི་གཤེགས་སུ་གསོལ། །ཞེས་པ་དང༌། སྔར་གྱི་སྔགས་ལ་སོགས་པས་སྤྱན་དྲངས། ཡེ་ཤེས་པ་གཞུག །དབང་བསྐུར། རིགས་བདག་གི་རྒྱས་གདབ་པ་བདག་བསྐྱེད་ལྟར་བྱས་ལ། ལྷའི་ཞལ་ཅུང་ཟད་གདངས་པར་བསམ་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། མར་ལ་བསྔགས་ཏེ། ཨོཾ་གནྡྷེ་ཡེ་སྭཱཧཱ། ཞེས་ལན་བདུན་གྱིས་བཀང་ལ། ཨོཾ་ཨགྣེ་ཡེ་དི་བྱ་དི་བྱ་བི་ཤུདྡྷེ་མཧཱ་ཤྲཱི་ཧ་བྱ་ཀ་བྱ་བ་ཧ་ན་ཧཱུཾ་ཕཊ། བདག་ཅག་དཔོན་སློབ་ཡོན་མཆོད་རྣམས་ཀྱི་འགལ་རྐྱེན་མི་དང་མི་མ་ཡིན་པའི་ཉེ་བར་འཚེ་བ་དང༌། དུས་མ་
ཡིན་པར་འཆི་བ་ཐམས་ཅད་ཤནྟིཾ་ཀུ་རུ་སྭཱཧཱས་མར་བླུགས་ལ་ལན་གསུམ་བྱ། སྔར་བཞིན་མཆོད་བསྟོད། དེ་ནས་རྫས་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱས་འབུལ་བ་ལས། སྤེལ་ཚིག་མེ་ལྷའི་སྐབས་དང་འདྲ་ལ། ཏིལ་སུམ་བརྒྱ་ལ་སོགས་པ་མང་དུ་འབུལ། གཞན་བརྒྱ་དང་རེ་རེ་འབུལ། མཐར་ལན་བདུན་འབུལ་བ་གོང་བཞིན་དང༌། འོག་ལྟར་གཏོར་མ་བཏང༌། འདོད་དོན་གསོལ་ལ་བཟོད་པ་ཞུ། ཡེ་ཤེས་པ་གཤེགས་སུ་གསོལ། དམ་ཚིག་པ་བདག་ལ་བསྡུ། བཛྲ་ཛྭ་ལའི་སྔགས་ཀྱི་མར་དགང་བླུགས་གསུམ་ཐབ་ཏུ་བླུགས་ལ་མེ་ལྷའི་སྐུར་བཞེངས་པར་བསམ་ལ། གོང་གི་མེ་ལྷའི་སྐབས་ལྟར་ལྷག་མ་བསྲེག་རྫས་ཉི་ཤུ་རྩ་རེ་དང༌། མར་བྱིན་ཟན་ལྟར་ཕུལ་ལམ་མཆོད། གཏོར་མ་ཨོཾ་ཨགྣེའི་མཐར། ཨཱ་ཀ་རོ་བཏགས་ལ་འབུལ། སྔར་གྱི་བསྟོད་པའི་རྗེས་སུ། ཚངས་པ་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །འབྱུང་པོ་ཡོངས་སུ་བསྐྱབ་པ་དང༌། །ཐུགས་རྗེའི་དབང་གིས་སྐུར་སྤྲུལ་པ། །རིག་སྔགས་གྲུབ་པའི་དྲང་སྲོང་མཆོག །ཉོན་མོངས་བསྲེགས་པའི་ཤེས་རབ་འོད། །བསྐལ་པའི་མེ་ལྟར་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱི་སྤྲུལ་པའི་ཐེག་པ་བཅིབས། །རིག་སྔགས་གསུང་གི་བགྲང་ཕྲེང་འཛིན། །བདུད་རྩིའི་བཅུད་ལྡན་གྷུནྚེ་བསྣམས། །ཆོས་ཀྱི་བདུད་རྩིས་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །
དེ་བས་བསྟོད་དེ་ཕྱག་ཀྱང་འཚལ། ཞེས་པས་བསྟོད། འདོད་དོན་བསམ། བསང་གཏོར་སྔར་བཞིན་འཐོར་འཐུང་པྲོཀྵ་ནཾ་པྲ་ཏཱིཙྪ་ཡེ་སྭཱཧཱས་ཕུལ་ལ། བདག་གི་དོན་དང་གཞན་གྱི་དོན། །བྱིན་ཟ་ཁྱོད་ཀྱི་སྒྲུབས་ཀྱི་གཤེགས། །ཇི་ལྟར་གནས་སུ་སླར་གཤེགས་ཏེ། །བདག་གི་འདོད་པ་ཐམས་ཅད་བསྒྲུབས། །ཨོཾ་ཨགྣེ་ཡེ་ཡ་ཧི་ཞེས་པ་དང༌། སྤྱན་དྲངས་བའི་ཕྱག་རྒྱ་ལས། མཛུབ་མོ་དང་ལག་པ་ཕྱིར་བསྐྱེད་དེ། མེ་ལྷ་གཤེགས་སུ་གསོལ། དམ་ཚིག་པ་བདག་ལ་བསྡུ། ལྷག་ཆད་ཁ་སྐང་བའི་ཡི་གེ་བརྒྱ་པ་བཟླས། སྟོན་མཆོག་དམ་པའི་བཀྲ་ཤིས་བརྗོད། དེ་ནས་གཏོར་མ་བཞི་བཤམས་པའི་དང་པོ་རྡོ་རྗེ་གནོད་སྦྱིན་གྱི་སྔགས་རྒྱས་བསངས། རྡོ་རྗེ་མེ་ཡི་ཕྱག་རྒྱས་སྦྱངས། རྡོ་རྗེ་བསྡམས་པ་འདེབས་ཚུལ་དང༌། ཨ་ཀཱ་རོས་བདུད་རྩིར་གྱུར། ལྷའི་ལྗགས་རྡོ་རྗེ་རྩེ་ལྔ་པའི་སྦུ་གུས་གཏོར་མ་གསོལ་བར་བསམ་ཞིང་སྙིང་པོའི་མཐར། བྷ་ལིང་ཏ་ཁ་ཁ་ཁཱ་ཧི་ཁཱ་ཧི། ཞེས་བརྗོད་པས་འབུལ། མཆོད་བསྟོད། མཆོད་སྦྱིན་གཏོར་མ་འདི་བསྣོམས་ལ། སོགས་ཀྱི་ཕྲིན་ལས་གཞོལ། དེ་ནས་གཏོར་མ་གཉིས་ཕྱོགས་སྐྱོང༌། གསུམ་པ་འབྱུང་པོ། བཞི་པ་བགེགས་ལ་ཆ་གསུམ་ལྟར་བསྔོས་ལ། མཆོད་བསྟོད། འདོད་དོན་ཞུ། མ་འབྱོར་པ་དང་ཉམས་པ་དང༌། ཞེས་པ་ལ་སོགས་པས་བཟོད་པར་གསོལ། ཨོཾ་ཁྱོད་ཀྱིས་སེམས་ཅན་དོན་ཀུན་མཛད། །ལ་སོགས་པའི་མཐར། ཨོཾ་ཨཱཿཧཱུཾ་བཛྲ་མུཿ། རང་དང་མདུན་གྱི་ཡེ་ཤེས་
པ་གཤེགས། མདུན་གྱི་དམ་ཚིག་པ་བདག་ལ་བསྡུ། རྟེན་ཡོད་ན་གཤེགས་གསོལ་མི་དགོས་བརྟན་བཞུགས་བྱ། སྨོན་ལམ་དང་བཀྲ་ཤིས་བརྗོད། གནས་གསུམ་ཡི་གེ་གསུམ་གྱིས་བསྲུང༌། རྗེས་བསྡུའོ། །དེ་དག་གི་རང་བཞིན་གྱི་དོན་དུ་ལྷ་མཉེས་པའི་ཆོ་ག་སྦྱིན་བསྲེག་དང་བཅས་པ་བསྟན་ཟིན་ཏོ། །འཕགས་མ་ཞི་བ་རིན་ཆེན་བཞི་གྲགས་ལས། །ཕན་བདེ་ཆོས་ཅན་མདའ་ཆེན་འཕངས་པ་ང༌། །མཉམ་དུ་བློ་ཡི་མུན་ཚོགས་དཔུང་བཅོམས་ནས། །བདག་བློ་ཐར་པའི་གྲོང་དུ་འདྲེན་ལ་འདུད། །རྒྱལ་བས་ཆོས་ཀྱི་སྒོ་མོ་མཐའ་ཡས་ཀྱིས། །མཆོག་ཏུ་གྱུར་པའི་སྙིང་པོ་རྣམས་ལས་ནི། །ཡིད་བཞིན་འཁོར་ལོ་མན་ངག་གདམས་པ་མཆོག །དེང་འདིར་རྡོ་རྗེ་པདྨ་འབྱུང་གནས་ཀྱིས། །ཆོས་ཚུལ་ངོ་མཚར་འཐུང་བའི་པུཎྱཻ་བི་ཛ་ཡིས། །ངོ་མཚར་ཆོས་རིགས་རྐང་འཐུང་རྩེ་མོ་དེར། །གསུམ་བརྩེན་ལྷ་མིའི་རྒྱལ་པོ་རྣམ་འཕྲུལ་བ། །མངའ་འབངས་བདེ་བའི་སར་འགོད་འཛུམ་ཞལ་ཅན། །ལུགས་གཉིས་མངོན་པར་མཐོ་ཞིང་དབང་འབྱོར་བས། །བདག་གི་ཕུ་བོ་ས་སྐྱོང་དམ་པ་བྱུང༌། །རྣམ་དཀར་དད་དང་ལྷག་བསམ་འབྱོར་པའི་དཔལ། །འདི་དང་ཕྱི་མར་འཆི་མེད་ཚེ་བསྒྲུབ་ཕྱིར། །རབ་སྤེལ་པར་གྱིས་འཕྲུལ་ཡིག་འདི་བསྒྲུབས་སོ། །ཡི་གེའི་བྱེད་པོ་ཤེས་རབ་ཀུན་དགས་བྲིས། །སོར་མོའི་ཟློས་གར་འཕྲུལ་ལས་བྱུང་བའི་བརྐོས། །སྒོ་གསུམ་བརྩོན་པས་བསྒྲུབས་པའི་དཔོན་ཆེན་ནི། །བསོད་ནམས་བསྟན་པ་ཞེས་པས་ལེགས་པར་བགྱིས། །ཡི་གེ་དག་བྱེད་བཀྲ་ཤིས་བཟང་པོ་དང༌། །བཀྲ་ཤིས་བྱང་ཆུབ་གཉིས་ཀྱིས་རྣམ་དཔྱོད་ལེགས། །འདིར་འབད་དགེ་ཚོགས་འོད་དཀར་གང་མཆིས་པ། །ཕ་མས་གཙོ་
བྱས་འགྲོ་ཀུན་ཇི་སྙེད་དང༌། །བདག་ཅག་མཆེད་ལྕམ་མ་ལུས་འཁོར་བཅས་རྣམས། །ཡིད་བཞིན་འཁོར་ལོའི་གོ་འཕང་ཐོབ་པར་ཤོག །འདི་ལྟར་བསྒྲུབས་ལས་བྱུང་བའི་དགེ་བ་དང༌། རྒྱལ་བའི་སྐུ་གསུང་ཐུགས་རྟེན་བཞེངས་པའི་མཐུས། །ཚེ་རིང་ནད་མེད་བདེ་བ་ཐོབ་པ་དང༌། །ཆབ་སྲིད་དབང་ཕྱུག་རྣམས་ནི་གོང་དུ་འཕེལ། །རང་འབྱུང་པདྨའི་ཆོས་ཚུལ་རབ་རྒྱས་ནས། །འཕྲིན་ལས་ནམ་མཁའི་མཐའ་རུ་ཁྱབ་ནས་ཀྱང༌། །འགྲོ་ཀུན་སེམས་ཅན་མཐའ་ཡས་ཐམས་ཅད་ཀྱིས། །སྐྱབས་དང་སྐྱོབ་པའི་བླ་མར་བདག་གྱུར་ཅིག །ཤུ་བྷཾ་སྟུ་སརྦ་ཛ་ག་ཏཾ། བཀྲ་ཤིས་སོ། །