གསང་བ་སྤྱིའི་ཆོ་ག་ཞི་བ་ལས་ཐམས་ཅད་པའི་སྦྱིན་སྲེག་གི་ཆོ་ག་འབྲིང་པོ།
གསང་བ་སྤྱིའི་ཆོ་ག་ཞི་བ་ལས་ཐམས་ཅད་པའི་སྦྱིན་སྲེག་གི་ཆོ་ག་འབྲིང་པོ་བཞུགས་སོ། །
ན་མོ་གུ་རུ། འདིར་གསང་བ་སྤྱིའི་ཆོ་ག་ལས་བརྩམས་ཏེ། ཞི་བ་ལས་ཐམས་ཅད་པའི་སྦྱིན་སྲེག་གི་ཆོ་ག་འདི་ལྟར་བྱའོ། །བདག་ཉིད་རྡོ་རྗེ་ཁྲོ་བོ་ཧཱུཾ་མཛད་རྡོ་རྗེ་དང་དྲིལ་བུ་འཛིན་པར་གྱུར། ཨོཾ་སུཾ་བྷ་ནི་སུཾ་བྷ་ཧཱུཾ། གྲིཧྞ་གྲིཧྞ་ཧཱུཾ། གྲིཧྞ་པཱ་ཡ་གྲིཧྞ་པཱ་ཡ་ཧཱུཾ། ཨཱ་ན་ཡ་ཧོ་བྷ་ག་ཝཱན་བིདྱཱ་རཱ་ཛ་ཧཱུཾ་ཕཊ། ལན་བདུན་ཙམ་བཟླས། རང་རང་གི་ལུགས་ལྟར་སྔོན་འགྲོ་གཏོར་མ་བཏང༌། ལག་པ་གཡས་རྡོ་རྗེ་དང་བཅས་པ་ས་ལ་བཞག ཨོཾ་ཨཱཿཧཱུཾ། ཨོཾ་ཧ་ན་ཧ་ན་ཀྲོ་དྷ་ཧཱུཾ་ཕཊ། ཅེས་པ་ལན་མང་དུ་བཟླ། དེ་རྗེས་ས་གཞི་དེར། བརྐོས་ཐབ་བྱེད་ན། སྟེགས་བུ་མཐོ་གང་གི་དཔངས་དང་ལྡན་པ་བྱས་ལ། སྒོམ་དོན་དང་མཐུན་པར་རྩིག་པ་དང་ས་བརྐོ་དགོས་ཤིང༌། བྲིས་ཐབ་ཏུ་བྱེད་ན། ཚང་ཐིག་ཟུར་ཐིག་བཏབ། དབུས་སུ་ཐིག་སྐུད་མཐོ་གང་གིས་ཟླུམ་པོར་བསྐོར། དེ་ནས་སོར་བཞི་པ་གཉིས་རིམ་ཅན་དུ་བསྐོར་ཏེ། ཐབ་དང་མུ་རན་དང་ཁ་ཁྱེར་རྣམས་སོ། །ལྟེ་བ་ནས་མུ་རན་གྱི་མཐར་གཟུང་བ་ཉིས་གྱུར་ཟུར་ཐིག་གི་སྟེང་དུ་བྱ་རྗེས་བྱས་པའི་སྟེང་ནས། ཕྱོགས་བཞིར་གྲུ་བཞིར་བཏབ། དེ་ལ་སླར་ཡང་སོར་གཉིས་བསྣན། དབུས་སུ་པདྨ་འདབ་བརྒྱད་དང༌། མུ་རན་ལ་ཟེའུ་འབྲུ། ཁ་ཁྱེར་ལ་པདྨ་
འདབ་བརྒྱད་རྣམས་འབྲི། དེ་དག་གི་བར་རྣམས་དཀར་པོ་འགེངས། །སྟེགས་བུ་སེར་པོ་ཟུར་བཞིར་ཟླ་ཕྱེད་རྡོ་རྗེ་དཀར་པོ། དེ་དག་གི་བཅད་མཛེས་ཚོན། དབུས་ཀྱི་པདྨའི་ལྟེ་བར་རྡོ་རྗེ་སོར་བརྒྱད་པ། ལྷ་གཙོ་བོ་གང་ཡིན་གྱི་སྐུ་མདོག་དང་མཚུངས་པའི་ཁ་ཏོག་ཅན་འབྲི། འདབ་མ་བརྒྱད་ལ་མཚན་མ་མ་བཀོད་ཀྱང་ཆོག །ཡང་ན་རིགས་དང་མཐུན་པའི་ཕྱག་མཚན་དབུས་སུ་བྲིས་ཀྱང་རུང་བ་ཡིན་ནོ། །དེ་ནས་ཟླུམ་ཐིག་ནང་མའི་ནང་ནས། དྲི་ཞིམ་པོའི་བུད་ཤིང་གིས་ཟླུམ་པོར་བརྩིགས། རང་གི་གཡས་ཕྱོགས་སུ་བསྲེག་རྫས་རྣམས་རིམ་ཅན་དུ་སྒྲིགས། དེ་རྣམས་ཀྱི་བར་གྱི་ཆ་ནས། ཅི་རིགས་པ་རེ་བླངས་ནས་སྣོད་གཅིག་ཏུ་བསྲེས། གཡོན་གྱི་ཆ་ལ། མཆོད་ཡོན་ཀྱི་སྣོད་ཆེ་ཆུང་གཉིས་དང༌། བསང་གཏོར་གྱི་སྣོད་ཅིག་བཤམས། དེའི་འཕྲོ་མཐུད་ནས་ཉེར་སྤྱོད་སོགས་མཆོད་པ་རྣམས་ཕྱི་ནང་རིམ་པ་གཉིས་ཀྱང་བཤམས། རང་དང་ཐབ་ཀྱི་བར་དུ་མེ་ཡོལ་བརྩིག །མེ་ཡོལ་དང་རང་གི་
བར་དུ་དྲིལ་བུ་དང༌། དེའི་མདུན་དུ་རྡོ་རྗེ་གཞག །རྡོར་དྲིལ་གྱི་བར་དུ་དགང་བླུག་ཀྱང་བཞག། མར་ཁུ་དང་ཡམ་ཤིང་ཡང་གཡས་ཕྱོགས་སུ་འཇོག་སྟེ། ཇི་ལྟར་བདེ་བར་ཡང་བྱའོ། །དེ་ནས་ཡི་དམ་གང་ཡིན་གྱི་བདག་བསྐྱེད་བཟླས་པ་དང་བཅས་པའི་བར་བྱ་སྟེ། དཀྱིལ་འཁོར་རྫོགས་པར་བསྒོམས་པ་ཡིན་ན་རང་ལ་བསྡུའོ། །ཀུ་ཤ་ནས་བཟུང༌། བསང་ཆུ་ལ་དམིགས་ཏེ། ཨོཾ་བཛྲ་ཨ་མྲྀ་ཏ་ཀུནྡ་ལི་ཧ་ན་ཧ་ན་ཧཱུཾ་ཕཊ། བརྒྱ་རྩ་བརྒྱད་བཟླས་པའི་བྱིན་གྱིས་བརླབས། ནང་མཆོད་དགོས་པའི་རིགས་ཡིན་ཞིང༌། བདག་བསྐྱེད་ཀྱི་སྐབས་གྲུབ་ན་དེས་ཆོག མ་གྲུབ་ན་སྐབས་འདིར་རང་རང་གི་ལུགས་ཀྱི་ནང་མཆོད་བྱིན་རླབས་བྱ། དེ་ནས་ཨ་མྲྀ་ཏ་བཟླ་ཤིང༌། བསང་ཆུས་གནས་ཁང་དང་ཡོ་བྱད་ཀུན་ལ་གཏོར། ནང་མཆོད་དགོས་པའི་རིགས་ཡིན་ན་དེས་ཀྱང་གཏོར་ལ། ཨོཾ་ཨཱཿཧཱུཾ་ལན་མང་དུ་བརྗོད། དེ་ནས་རང་རང་གི་ལུགས་བཞིན་མཆོད་པ་བྱིན་རླབས་བྱ། སྲེག་རྫས་རྣམས་ལ་རྡོ་རྗེ་རྩེ་གཅིག་པའི་ཕྱག་རྒྱ་གཏད་ནས་ཨོཾ་སྭཱཧཱ། ལན་གསུམ་གྱིས། མ་དག་པ་བཀྲུས་པར་བསམ། ཨོཾ་ཨཱཿསྭཱཧཱ། གསུམ་གྱིས་ཡམ་ཤིང་དང༌། ཨོཾ་ཤྲཱི་སྭཱཧཱ། གསུམ་གྱིས་ཞུན་མར་དང༌། ཨོཾ་ཛྲིཾ་སྭཱཧཱ། གསུམ་གྱིས་འབྲུ་ཐམས་ཅད་དང༌། ཨོཾ་ཀུ་རུ་ཀུ་རུ་སྭཱཧཱ། གསུམ་གྱིས་རྫས་གཞན་རྣམས་བྱིན་གྱིས་བརླབས། ཨོཾ་ཨཱཿཧཱུཾ་གིས་མེ་བླངས། སྒྲོན་མེ་སྦར། ཨ་མྲྀ་ཏས་དེ་ལ་བསང་ཆུས་གཏོར། ཨ་མྲྀ་ཏ་བཟླ་བཞིན་ཏུ་ཐབ་ལ་གཡས་བསྐོར་བྱ། ཨོཾ་བཛྲ་ཛྭ་ལ་ཛྭ་ལ་ཧཱུཾ། ཞེས་མེ་སྒྲོན་ཐབ་ནང་དུ་གཞུག ཧཱུཾ་ཧཱུཾ་ཞེས་བརྗོད་ཅིང༌། རླུང་གཡབ་ཀྱིས་མེ་སྦར་རོ། །ཐབ་ཁུང་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལ་ཧཱུཾ་ལས་
བྱུང་བའི་ཞི་བའི་ཐབ་ཁུང་དཀར་པོ་ཟླུམ་པོ་ཁྲུ་གང་བ། མུ་རན་དང་ཁ་ཁྱེར་གྱིས་བསྐོར་ཞིང༌། སྟེགས་བུའི་གྲྭ་ལ་ཟླ་ཕྱེད་རྡོ་རྗེས་མཚན་པ་པདྨ་རྒྱས་པའི་དབྱིབས་ཅན། དྭངས་ཤིང་ཐོགས་པ་མེད་པར་གྱུར། དེའི་ནང་དུ་རཾ་ལས་མེའི་དཀྱིལ་འཁོར་རཾ་གྱིས་མཚན་པ་ཡོངས་སུ་གྱུར་པ་ལས། ཞི་བའི་མེ་ལྷ་དཀར་པོ། ཕྱག་གཡས་བགྲང་འཕྲེང་དང་གཡོན་སྤྱི་བླུགས་འཛིན་པ། རང་འོད་ཀྱི་རིག་མ་དང་གཉིས་སུ་མེད་པ། རྣམ་སྣང་གི་དབུ་རྒྱན་ཅན། མེ་ལྕེ་དཀར་པོའི་འཕྲེང་བ་དཀྲིགས་ཤིང༌། ར་སྐྱེས་དཀར་པོའི་སྟེང་ན་རྡོ་རྗེའི་སྐྱིལ་ཀྲུང་གིས་བཞུགས་པ། རྒྱན་དང་ན་བཟའ་དཀར་པོ་ཅན། རལ་བའི་ཐོར་ཚུགས་དང་ལྡན་པའོ། །རང་གི་ཐུགས་ཀ་ནས་འོད་ཟེར་འཕྲོས། ཤར་ལྷོ་ནས་མེ་ལྷ་འཁོར་དང་བཅས་པ་ཐམས་ཅད་སྤྱན་དྲངས་ཏེ་བྱོན་པར་གྱུར། སྐྱབས་སྦྱིན་གྱི་ཕྱག་རྒྱ་ལས་མཐེ་བོང་རྣ་བའི་དྲུང་དུ་གཡབ་ཅིང༌། ཨོཾ་ཚུར་བྱོན་ཚུར་བྱོན་འབྱུང་པོ་ཆེ། །ལྷ་ཡི་དྲང་སྲོང་བྲམ་ཟེ་མཆོག །བསྲེགས་བླུགས་ཞལ་ཟས་བཞེས་སླད་དུ། །འདིར་ནི་ཡང་དག་བསྙེན་པར་མཛོད། །ཨོཾ་ཊཀྐི་ཧཱུཾ་ཛ། ཞེས་སྤྱན་དྲངས། བསང་ཆུ་གཏོར་ཞིང་ཨ་མྲྀ་ཏས་བགེགས་བསྐྲད། ཛཿཧཱུཾ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར། ཀུ་ཤའི་ཆུན་པོས་བསང་གཏོར་བྱེད་པ་དང་ལྷན་ཅིག་ཏུ། མཆོད་ཡོན་ཀྱི་སྣོད་ཆུང་བ་ནས་བཟེད་ཞལ་དུ་བླུག་སྟེ། ཨོཾ་ཨཱཿཧྲཱིཿཔྲ་ཝ་ར་སཏྐ་རཱ་རྠཾ་ཨརྒྷཾ་པྲ་ཏཱིཙྪ་ཧཱུཾ་སྭཱཧཱ། ཞེས་བརྗོད། ཨོཾ་བཛྲ་པུཥྤེ་ཨཱཿཧཱུཾ། ནས་ཤཔྟའི་བར་གྱིས་ཉེར་སྤྱོད་ཕུལ། འཇིག་རྟེན་དབང་ཕྱུག་ཚངས་དབང་མགོན་གྱི་
སྲས། །མེ་ལྷའི་རྒྱལ་པོ་ཊཀྐིས་དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་སྲེག །འཛིན་བྱེད་མེ་ལྷ་ཉིད་ལ་རྣམ་པར་འདུད། །ཅེས་པས་བསྟོད། ཨོཾ་བཛྲ་ཨ་ན་ལ་མཧཱ་བྷཱུ་ཏ་ཛྭ་ལ་ཛྭ་ལ་སརྦ་བྷསྨི་ཀུ་རུ་སརྦ་དུཥྟན་ཧཱུཾ་ཕཊ། དྲྀ་ཤྱ་ཛཿཧཱུཾ་བཾ་ཧོཿ ས་མ་ཡ་སྟྭཾ། ས་མ་ཡ་ཧོ། ཞེས་ལན་གསུམ་གྱིས་དམ་ལ་བཞག །དེ་ནས། མེ་ལྷའི་ཐུགས་ཀར་ཧཱུཾ། ལྗགས་ལ་རྡོ་རྗེ་རྩེ་གཅིག་པ་རཾ་གྱིས་མཚན་པ། དགང་བླུགས་ཀྱི་ཁ་ལ་ཡང་ཧཱུཾ་གིས་མཚན་པར་གྱུར། ཨོཾ་ཨཀན་ཡེ། ཨཱ་དཱི་བྱ་ཨཱ་དཱི་བྱ། ཨཱ་བི་ཤ་ཨཱ་བི་ཤ མཧཱ་ཤྲི་ཡེ་ཧ་བྱ་ཀ་བྱ་ཝཱ་ཧཱ་ནཱ་ཡ། བདག་གི་སྡིག་སྒྲིབ་བར་ཆད་ནད་གདོན་བཀྲ་མི་ཤིས་པ་མི་མཐུན་པའི་ཕྱོགས་ཐམས་ཅད་ཤནྟིཾ་ཀུ་རུ་ཡེ་སྭཱཧཱ། ཞེས་ལན་བདུན་གྱིས་དགང་བླུགས་འབུལ། དེ་བཞིན་དུ་སྔགས་དེ་ཉིད་ཀྱིས། ཡམ་ཤིང་ལན་གསུམ་ཕུལ། སླར་ཡང་སྔགས་དེ་ཉིད་ལན་ཇི་ལྟར་འོས་པས། སྲེག་རྫས་ཐམས་ཅད་བསྲེག་པ་དེ་ནས་ཅི་རིགས་པར་འབུལ་ལོ། །ཨོཾ་ཨགྣ་ཡེ་སྭཱཧཱ། ཞེས་པས་མར་བླུགས་གཟར་གང་ཐབ་དུ་ཕུལ་འཇིག་རྟེན་པའི་མེ་ལྷ་མཆོད་པའོ། །སླར་ཡང་བསངས་སྦྱངས། མེ་ལྷའི་ཐུགས་ཀར་རབ་ཏུ་ཡངས་པའི་དབུས་སུ་ཞེས། མཚམས་སྦྱར་ནས། ལྷག་གང་ལ་མཆོད་པ་འབུལ་རྒྱུའི་ལྷག་པའི་ལྷ་དེ་ཉིད་ཀྱི་མདུན་བསྐྱེད་མཆོད་པའི་ཆོ་ག་ཇི་ལྟ་བ་བཞིན་དུ་བསྐྱེད་ནས་ཡེ་ཤེས་པ་སྤྱན་འདྲེན་དང་དབང་བསྐུར་རྒྱས་གདབ་ལ་སོགས་པ་ཡང་རང་རང་གི་ལུགས་བཞིན་དུ་བྱ། རིག་བདག་རང་ཆས་སུ་བསྒོམས་ནས། དབང་བསྐུར་རྒྱས་གདབ་མི་དགོས་སོ། །མཆོད་ཡོན་གྱི་སྣོད་གཉིས་པ་ནས། ཀུ་ཤས་བསང་གཏོར་འབུལ་བཞིན་དུ། གཟེད་ཞལ་དུ་བླུག་ལ། ལྷ་སོ་སོའི་སྙིང་པོའི་མཐར་གོང་གི་མཆོད་ཡོན་གྱི་སྔགས།
སྦྱར་བས་མཆོད་ཡོན་འབུལ། མེ་ཏོག་ནས་རོལ་མོའི་བར་གོང་བཞིན་དུ་འབུལ་བ་དང༌། བསྟོད་པ་ཡང་སོ་སོའི་བསྟོད་པ་ཤོ་ལོ་ཀ་རེ་རེ་ཙམ་རེ་བྱེད་པའམ། སོ་སོའི་ཆོ་ག་ལས་བྱུང་བའི་མཆོད་འཕྲེང་རྒྱས་པ་ཡོད་ན། དེ་ལྟར་མཆོད་བསྟོད་ཕུལ་ན་ཡང་ལེགས་པ་ཡིན་ནོ། །དེ་ནས་སྲེག་རྫས་འབུལ་བ་ནི། ཐོག་མར་ལྷག་པའི་ལྷའི་སྔགས་རྣམས་ཀྱི་མཐར་རྫས་སོ་སོའི་སྔགས་སྦྱར་ལ། མཇུག་ཏུ་ལས་སྔགས་སྦྱོར་བ་ཡིན་ཏེ། དཔེར་མཚོན་ན། འཕགས་མ་སྒྲོལ་མའི་རིག་སྔགས་ལ་བསྲེག་རྫས་ལན་བདུན་འབུལ་ན། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། ཞེས་པ་ལན་གཅིག ཨོཾ་ཨགྣ་ཡེ་སྭཱཧཱ། ཞེས་པ་ལན་བདུན། བདག་གི་སྡིག་སྒྲིབ་བར་ཆད་ནད་གདོན་བཀྲ་མི་ཤིས་པ་མི་མཐུན་པའི་ཕྱོགས་ཐམས་ཅད་ཤནྟིཾ་ཀུ་རུ་སྭཱཧཱ། ཞེས་པ་ལན་གཅིག་སྤེལ་བ་ལྟ་བུའོ། །དེ་ལ། ཨོཾ་ཨགྣ་ཡེ་སྭཱཧཱ། ཞེས་པ་ནི་མར་ཁུའི་སྔགས་སོ། །ཨོཾ་བྷོ་དྷི་པྲིཀྵ་ཡ་སྭཱཧཱ། ཡམ་ཤིང་གི་སྔགས་སོ། །ཨོཾ་སརྦ་པཱ་པཾ་ད་ཧ་ན་བཛྲ་ཡེ་སྭཱཧཱ། ཏིལ་དང༌། ཨོཾ་བཛྲ་ཨཱ་ཡུ་ཥེ་སྭཱཧཱ། དུར་བ་དང༌། ཨོཾ་བཛྲ་པུཥྟཱ་ཡེ་སྭཱཧཱ། འབྲས་མ་གྲུགས་པ་དང༌། ཨོཾ་སརྦ་སཾ་པ་དེ་སྭཱཧཱ། ཞོ་ཟན་དང༌། ཨོཾ་ཨ་པྲ་ཏི་ཧ་ཏ་བཛྲ་ཡེ་སྭཱཧཱ། ཀུ་ཤ་དང༌། ཨོཾ་བཛྲ་བི་ཛ་ཡེ་སྭཱཧཱ། འབྲས་སོ་བ་དང༌། ཨོཾ་བཛྲ་མཧཱ་བེ་ག་ཡེ་སྭཱཧཱ། ནས་དང༌། ཨོཾ་བཛྲ་མཧཱ་བ་ལ་ཡ་སྭཱཧཱ། སྲན་མ་དང༌། ཨོཾ་བཛྲ་གྷསྨ་རི་ཡེ་སྭཱཧཱ། གྲོ་དང༌། ཨོཾ་སརྦ་ཨརྠ་སིདྡྷ་ཡེ་སྭཱཧཱ། ཡུངས་དཀར་གྱིས་སྔགས་སོ། །གཞན་ཡང་མཆོད་པ་རྣམ་པ་སྣ་ཚོགས་པས་མཆོད་པར་བྱ་སྟེ། སྙིང་
པོའི་སྔགས་ཀྱིས་འབུལ་བར་བྱའོ། །དེ་ལ་མར་དང་ཡམ་ཤིང་ནི་མེད་དུ་མི་རུང་བ་ཡིན་ཞིང༌། རྫས་གཞན་དེ་དག་ཇི་ཙམ་རྙེད་པ་དེ་ཙམ་འབུལ་བ་ཡིན་ཀྱང༌། ལས་ཐམས་ཅད་པ་ལ་ལྟ་ཅི་སྨོས། ཞི་བ་རྐྱང་པ་ལ་ཡང་རྫས་དེ་དག་འཛོམ་ན་ལེགས་ཤིང༌། རབ་གནས་དང༌། རང་གཞན་གྱི་ཞི་བའི་ལས་སྤྱི་འགྲོ་ཙམ་སྒྲུབ་པ་ལ། སྲེག་རྫས་སོ་སོ་རེ་ནས་བརྒྱ་ཕྲག་རེ་རེ་ཙམ་དང༌། རྫས་སྔགས་ཀྱང་དེ་ཙམ་འབུལ་བ་ཡིན་ལ། ཚེའི་བར་ཆད་ཁོ་ན་ཞི་བར་བྱེད་པ་སོགས། ཞི་བའི་ལས་ཉི་ཚེ་བ་ལ། སོ་སོའི་རྫས་དང་སྔགས་སྣ་རེ་རེ་དེ་ཁོ་ན་བྱེད་པ་སོགས་ཡོད་ཀྱང༌། དངོས་གྲུབ་ཀྱི་དོན་དང༌། བསྙེན་པའི་ཁ་སྐོང་ལ་ཐོག་མར་མར་ཁུ། ཡམ་ཤིང་མང་ཙམ་དང༌། ལྷག་མ་སྲེག་རྫས་སོ་སོ་ལ་གྲངས་མཉམ་པ་མང་ཉུང་གང་འོས་རེ་ཕུལ་བའི་རྗེས་སུ། སྙིང་པོའི་སྔགས་ཁོ་ནས་སྲེག་པར་བྱེད་པ་ཉིད་ལ་ཇི་ཙམ་དགོས་པའི་གྲངས་འཛིན་པ་ཉིད་བཟང་བ་ཡིན་ནོ། །སྲེག་རྫས་རྫོགས་པའི་མཐར། སོ་སོའི་མངོན་རྟོགས་ནས་འབྱུང་བའི་གཏོར་འབུལ་མཆོད་བསྟོད་འདོད་གསོལ་རྣམས་བྱས་ལ། ཡིག་བརྒྱ་ལན་གསུམ་བཟླས། གང་ཡང་བདག་བློ་རྨོངས་པ་ཡིས། །ཉེས་བྱས་ཅུང་ཟད་གང་བགྱིས་པ། །གང་ཕྱིར་ལུས་ཅན་སྐྱབས་ཡིན་ཕྱིར། །མགོན་ཁྱེད་དེ་རིང་བཟོད་མཛད་རིགས། །མ་རྙེད་ཡོངས་སུ་མ་ཤེས་དང༌། །གང་ཡང་ནུས་པ་མ་མཆིས་པས། །འདིར་ནི་བྱ་བ་གང་བགྱིས་པ། །དེ་ཀུན་ཁྱོད་ཀྱིས་བཟོད་མཛད་རིགས། །བདག་ལ་དངོས་གྲུབ་མཆོག་སྩོལ་ལགས། །ཏིང་འཛིན་ཀུན་གྱི་འབྲས་བུ་སྩོལ། །སེམས་ཅན་ཀུན་ལ་ཅི་འདོད་པར། །དངོས་གྲུབ་བླ་ན་མེད་པའང་སྩོལ། །སླར་
ཡང་གཤེགས་པར་མཛད་པའི་ཕྱིར། །རང་གི་གནས་གཤེགས་བཛྲ་མུཿ ཞེས་ཡེ་ཤེས་ཀྱི་འཁོར་ལོ་རང་བཞིན་གྱི་གནས་སུ་གཤེགས་ཤིང༌། དམ་ཚིག་པ་རང་ལ་བསྡུ་བའམ། གཉིས་ཀར་ཡང་རང་གི་སྙིང་གར་བསྡུ་བ་སྐབས་སུ་གང་བབ་སྦྱོར་ཏེ། འཇིག་རྟེན་ལས་འདས་པའི་མེ་ལྷ་མཆོད་པའོ། །དེ་ནས། ཨོཾ་ཨགྣ་ཡེ་སྭཱཧཱ། ཞེས་པས་མར་བླུགས་གཟར་གང་ཕུལ། མཆོད་ཡོན་ནས་རོལ་མོའི་བར་གྱི་མཆོད་པ་གོང་བཞིན་ཕུལ། ཚངས་པ་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །འབྱུང་པོ་ཡོངས་སུ་སྐྱབས་པའི་ཕྱིར། །ཐུགས་རྗེའི་དབང་གིས་སྐུར་སྤྲུལ་པ། །རིག་སྔགས་གྲུབ་པའི་དྲང་སྲོང་ཚུལ། །ཉོན་མོངས་སྲེག་པའི་ཤེས་རབ་འོད། །བསྐལ་པའི་མེ་ལྟར་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱིས་སྤྲུལ་པའི་ཐེག་པ་ཆིབས། །རིག་སྔགས་གསུང་གི་བགྲང་འཕྲེང་འཛིན། །བདུད་རྩིའི་བཅུད་ལྡན་གྷན་དྷེ་བསྣམས། །ཆོས་ཀྱི་བདུད་རྩི་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །དེ་ལ་བསྟོད་དེ་ཕྱག་ཀྱང་འཚལ། །ཞེས་པས་བསྟོད། མེ་ལྷའི་གཏོར་མ་བསངས་སྦྱངས། སྟོང་པའི་ངང་ལས་ཨོཾ་ཨཱཿཧཱུཾ་ལས་བྱུང་བའི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་ཧ་ཧོཿཧྲཱིཿ ཨོཾ་ཨགྣ་ཡེ་ཨཱ་དཱི་བྱ། ནས། ཝཱ་
ཧཱ་ནཱ་ཡ། ཨ་ཀཱ་རོ་མུ་ཁཾ་སོགས་སྦྱར་བ་ལན་བདུན་གྱིས་གཏོར་མ་ཕུལ། ཡང་ཨརྒྷཾ། ནས། ཤཔྟའི་བར་གྱིས་མཆོད། མེ་སྟེ་བསྲེག་བྱ་ཟ་བའི་ལྷ། །དྲང་སྲོང་རྒྱལ་པོ་གདོན་གྱི་བདག །མེ་ལྷ་འཁོར་དང་བཅས་པ་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །མཆོད་སྦྱོན་གཏོར་མ་འདི་བཞེས་ལ། །རྣལ་འབྱོར་བདག་ཅག་ནས། ཀུན་འགྲུབ་ཤོག་གི་བར་གྱིས་འཕྲིན་ལས་བཅོལ། གོང་བཞིན་མཆོད་ཡོན་ཕུལ། གང་ཡང་བདག་བློ་རྨོངས་པ་ཡིས། །སོགས་བཟོད་པར་གསོལ། རང་གི་དོན་དང་གཞན་གྱི་དོན། །སྒྲུབ་བྱེད་བསྲེག་བྱ་ཟ་བ་གཤེགས། །ཇི་བཞིན་དུས་སུ་ཚུར་བྱོན་ཞིང༌། །བདག་གི་དངོས་གྲུབ་ཐམས་ཅད་སྒྲུབས། །ཨོཾ་ཨཱཿབཛྲ་མུཿ ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་འབར་བའི་མེའི་ངང་དུ་ཐིམ་པར་གྱུར། སྨོན་ལམ་དང་བཀྲ་ཤིས་ཅི་འགྲུབ་བྱ། མེ་རང་བཞིན་གྱིས་ཞི་བར་མ་གྱུར་ཀྱི་བར་དུ། དཀྲུག་པར་མི་བྱ་ལ། གློ་བུར་དུ་ལས་རྗེས་བསྡུ་དགོས་པ་བྱུང་ན། འོ་མ་དང་དྲི་བཟང་གི་ཆུ་ལ། ཨོཾ་རུ་རུ་སྤུ་རུ་ཛྭ་ལ་ཏིཥྟ་སིདྡྷི་ལོ་ཙ་ནི། སརྦ་ཨརྠ་སཱ་དྷ་ནི་སྭཱཧཱ། ཞེས་པ་བརྒྱ་རྩ་ཙམ་བཟླས་པས། མེ་ལ་བླུག །རྒྱས་པ་ལ་སོགས་པ་གཞན་རྣམས་ལ་ཡང་ཆོ་ག་འདིས་རིགས་འགྲེ་ལ། ལྷ་ཉུང་ངུའི་དཀྱིལ་འཁོར་དང་ཆོ་ག་བསྡུས་པའི་རིགས་དང༌། སྒྲུབ་ཐབས་ཕྲ་མོ་སོགས་ལ། དེ་དང་འབྲེལ་བར་མདོར་བསྡུས་འདི་ཙམ་ཁོ་ན་ལེགས་ཤིང་གཞན་གོང་ལྟར་ལས། དངོས་གཞིའི་སྐབས་རྫས་སྔགས་སོ་
སོ་བྱེད་པ་བོར་བ་ནི། ཤིན་ཏུ་བསྡུས་པའི་རིགས་སུ་གཏོགས་སོ། །གསང་བ་སྤྱིའི་སྦྱིན་སྲེག་གི་ཆོ་ག་རྒྱས་པ་ལ་མངོན་པར་དགའ་ན། ལོགས་སུ་འབྲི་བར་ཡང་འགྱུར་རོ། །ཞི་བ་ལས་ཐམས་ཅད་པའི་སྦྱིན་སྲེག་གི་ཆོ་ག་མདོ་ཙམ་འདི་ཡང༌། རྒྱལ་ཁམས་པ་ཏཱ་ར་ནཱ་ཐས་སྨྲས་པའོ། །མངྒལཾ། །