གཏོར་མ་བརྒྱ་རྩའི་ངག་འདོན།
གཏོར་མ་བརྒྱ་རྩའི་ངག་འདོན་བཞུགས་སོ། །
སྐྱབས་འགྲོ་སེམས་བསྐྱེད་སྔོན་དུ་བཏང༌། རང་གི་སྙིང་གའི་ཧཱུཾ་ལས་འོད་ཟེར་འཕྲོས། འཇིག་རྟེན་དང་འཇིག་རྟེན་ལས་འདས་པའི་གཏོར་མགྲོན་ཐམས་ཅད་བཛྲ་ས་མཱ་ཛཿ ན་མོ་བདེ་གཤེགས་སྙིང་པོ་འགྲོ་ཀུན་ཡོངས་ལ་ཁྱབ། །སེམས་ནི་རྒྱ་ཆེན་མཆོག་ཏུ་རབ་བསྐྱེད་དེ། །འགྲོ་བ་འདི་དག་མ་ལུས་སངས་རྒྱས་རྒྱུ། །འདི་ན་སྣོད་མིན་སེམས་ཅན་གང་ཡང་མེད། །བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷ། །དུས་ལས་མི་འདའ་ཐུགས་རྗེའི་དབང་གིས་ནི། །སེམས་ཅན་དོན་ལ་དགོངས་པའི་དཀོན་མཆོག་གསུམ། །ཡིད་ཀྱིས་སྤྲུལ་ཞིང་བཤམས་པའི་གནས་འདིར་རུ། །གཏན་པ་མེད་པའི་མཆོད་སྦྱིན་རྒྱལ་པོ་ལ། །སྤྱན་འདྲེན་འཁོར་དང་བཅས་ཏེ་གཤེགས་སུ་གསོལ། །རྒྱལ་བ་སྲས་བཅས་རང་
རྒྱལ་ཉན་ཐོས་དང༌། །ལྷ་སྲིན་སྡེ་བརྒྱད་འགྲོ་དྲུག་སེམས་ཅན་རྣམས། །བགེགས་རྣམས་གཏན་པ་མེད་པའི་མཆོད་སྦྱིན་ལ། །སྤྱན་འདྲེན་འཁོར་དང་བཅས་ཏེ་གཤེགས་སུ་གསོལ། །ཡོ་བྱད་ཚོགས་ཤིང་ལག་ལེན་ལྟར་བཤམས་ལ། ཐམས་ཅད་སྤྱི་མཐུན་དུ། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོཧཾ། གིས་སྟོང་པར་སྦྱངས། ཟན་བཅུ་ཆུས་སྦྱངས་ལ། ཨོཾ་ཨཱཿཧཱུཾ་ལན་གསུམ་གྱིས་བྱིན་གྱིས་བརླབས། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ། ཨོཾ་སཾ་བྷ་ར་སཾ་བྷ་ར་ཧཱུཾ། ཞེས་ལན་ཉེར་གཅིག་བརྗོད། རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང༌། ཡི་དམ་དཀྱིལ་འཁོར་གྱི་ལྷ་ཚོགས་སངས་རྒྱས་བྱང་ཆུབ་སེམས་དཔའ་འཕགས་པའི་ཚོགས་དང་བཅས་པ་རྣམས་
ལ་དབུལ་ལོ། །བདག་ཅག་དཔོན་སློབ་རྒྱུ་སྦྱོར་བ་དང་བཅས་པས་གཙོ་བྱས་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཨོཾ་བཛྲ་ཨརྒྷཾ་སྭཱཧཱ། ཨོཾ་བཛྲ་པཱདྱཾ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་དྷུ་པེ་ཨཱཿཧཱུཾ། ཨོཾ་བཛྲ་ཨཱ་ལོ་ཀེ་ཨཱཿཧཱུཾ། ཨོཾ་བཛྲ་གནྡྷེ་ཨཱཿཧཱུཾ། ཨོཾ་བཛྲ་ནཻ་ཝི་ཏྱེ་ཨཱཿཧཱུཾ། ཨོཾ་བཛྲ་ཤཔྟ་ཨཱཿཧཱུཾ། བཞི་པ་ཡན་ཆད་ལ་སྔགས་ཉེར་གཅིག་རེས་བསྔོ་བ་དང༌། དེ་མན་ཆད་ལ་བདུན་བདུན་བསྔོ། ཐོག་མར་འབྲུ་གསུམ་གྱིས་བྱིན་གྱིས་བརླབས་པ་དང༌། བཞི་པ་ཡན་ཆད་ལ་ཨརྒྷཾ་ལ་སོགས་པའི་མཆོད་པ་ཡང་གོང་གིས་རིགས་འགྲེ་བར་བྱས་ནས། ཁྱད་པར་སོ་སོ་ལ་གཉིས་པ་ནི། སངས་རྒྱས་མཁའ་འགྲོ། རྡོ་རྗེ་མཁའ་འགྲོ། རིན་ཆེན་མཁའ་འགྲོ། པདྨ་མཁའ་འགྲོ། སྣ་ཚོགས་མཁའ་འགྲོ་སྟེ། དཔའ་བོ་མཁའ་འགྲོའི་ཚོགས་ཐམས་ཅད་དང༌། རྡོ་རྗེ་ནག་པོ་ཆེན་པོ་དང༌། དཔལ་ལྷ་མོ་འཁོར་དང་བཅས་པ་རྣམས་དང༌། ལྷ་ཆེན་བརྒྱད། ཀླུ་ཆེན་བརྒྱད། ཕྱོགས་སྐྱོང་བཅུ། གཟའ་ཆེན་བརྒྱད། རྒྱུ་སྐར་ཉི་ཤུ་རྩ་བརྒྱད། འཇིགས་བྱེད་དགུ། རྒྱལ་པོ་ཆེན་པོ་སྡེ་བཞི་སྟེ། དཔལ་གཙང་རིགས་ཀྱི་མགོན་པོ་བདུན་ཅུ་རྩ་ལྔ་འཁོར་དང་བཅས་པ་རྣམས་དང༌། ལག་ན་རྡོ་རྗེ་ལྔ་བརྒྱ་ལ་སོགས་ཏེ་དཀར་ཕྱོགས་སྐྱོང་བ་ཁྱད་པར་ཅན་བསྟན་པ་ལ་མངོན་པར་དགའ་
བའི་ལྷ་ཀླུ་འབྱུང་པོའི་ཚོགས་ཐམས་ཅད་ལ་དབུལ་ལོ། །སངས་རྒྱས་ཀྱི་བསྟན་པ་དར་བ་དང༌། བདག་ཅག་ཆོས་སྒྲུབ་པའི་འགལ་རྐྱེན་བར་ཆད་ཐམས་ཅད་ཞི་བར་མཛད་དུ་གསོལ། གསུམ་པ་ནི། རིག་པ་འཛིན་པའི་ས་ལ་གནས་པ་རྣམས་དང༌། དགེ་སྦྱོང་དང༌། བྲམ་ཟེ་དང༌། ལྷའི་དྲང་སྲོང་མངོན་པར་ཤེས་པ་ལྔ་དང་ལྡན་པ་ངག་ཚིག་གི་མཐུ་གྲུབ་པ་རྣམས་ལ་དབུལ་ལོ། །སངས་རྒྱས་ཀྱི་བསྟན་པ་དར་བ་དང༌། སེམས་ཅན་ལ་བདེ་སྐྱིད་འཕེལ་བ་དང༌། བདག་ཅག་ལ་འགལ་རྐྱེན་ཞི་བ་དང༌། མཐུ་རྐྱེན་འགྲུབ་པའི་སྨོན་ལམ་བཟང་པོ་གདབ་ཏུ་གསོལ། བཞི་པ་ནི། བདག་ཅག་འགྲོ་བ་རྣམས་ཀྱི་ལྷན་ཅིག་སྐྱེས་པའི་ལྷ་དང༌། རྣམ་ཐོས་སྲས་ལ་སོགས་པ་ནོར་ལྷའི་ཚོགས་རྣམས་དང༌། བསྲུང་སྐྱོབ་མཛད་པའི་ལྷ་ཚོགས་འཁོར་དང་བཅས་པ་རྣམས་ལ་དབུལ་ལོ། །ནད་དང་དབུལ་འཕོངས་ཞི་ཞིང༌། འཇིགས་པ་ལས་བསྐྱབ་པ་དང༌། ཚེ་དང་དཔལ་འབྱོར་རྒྱས་པར་མཛད་དུ་གསོལ། འདི་མན་ཆད་ལ་ཨརྒྷཾ་ལ་སོགས་པ་མཆོད་པའི་དོད་དུ། དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །དེ་བཞིན་གཤེགས་པ་གཟུགས་མཛེས་དམ་པ་ལ་ཕྱག་འཚལ་ལོ། །དེ་བཞིན་གཤེགས་པ་སྐུ་འབྱམས་ཀླས་ལ་ཕྱག་འཚལ་ལོ། །དེ་བཞིན་གཤེགས་པ་འཇིགས་པ་ཐམས་ཅད་དང་ཡོངས་སུ་བྲལ་བ་ལ་ཕྱག་
འཚལ་ལོ། །ཞེས་བརྗོད་དགོས་ཤིང༌། ལྔ་པ་ནི། རྡོ་རྗེ་གདན་གྱིས་གཙོ་བྱས་འཛམ་བུའི་གླིང་གི་གཞི་བདག་རྣམས་དང༌། ཁྱད་པར་བོད་ཁམས་སྐྱོང་བའི་བརྟན་མ་བཅུ་གཉིས། སྒོས་ཡུལ་ཕྱོགས་འདི་ཉིད་ལ་གནས་པའི་གཞི་བདག་རྣམས་ཀྱིས་གཙོ་བྱས་པའི། སྡེ་བརྒྱད་མཐུ་བོ་ཆེ་ཐམས་ཅད་ལ་དབུལ་ལོ། །འཇིག་རྟེན་གྱི་ཁམས་སུ་ཆར་ཆུ་དུས་སུ་འབེབ་པ་དང༌། ནད་དང་མུ་གེ་དང་འཁྲུག་པ་རྣམས་ཞི་བ་དང༌། ཁྱད་པར་དུ་བདག་ཅག་གི་མཐུན་རྐྱེན་སྒྲུབ་པའི་གནས་པོ་བཟང་པོ་མཛད་དུ་གསོལ། དྲུག་པ་ནི། གནོད་སྦྱིན་གྱི་དེད་དཔོན་ཆེན་པོ་ནོར་བུ་བཟང་པོ་དང༌། འབྲོག་གནས་མཆེད་ལྔ་དང༌། ཕྱོགས་མཚམས་བསྲུང་བ་ཉི་ཤུ་རྩ་བརྒྱད། སྟོབས་ཆེན་སུམ་ཅུ་རྩ་གཉིས། འཕྲོག་མ་བུ་ལྔ་བརྒྱ་དང་བཅས་པ་སོགས་གནོད་སྦྱིན་མཐུ་བོ་ཆེ་འཁོར་དང་བཅས་པ་ཐམས་ཅད་ལ་འབུལ་ལོ། །སེམས་ཅན་ལ་གནོད་ཚེའི་བསམ་པ་ཞི་བ་དང༌། བདག་ཅག་ལ་བར་ཆད་བསྲུང་ཞིང༌། བསམ་དོན་ཡིད་བཞིན་དུ་འགྲུབ་པར་མཛད་དུ་གསོལ། བདུན་པ་ནི། བགེགས་རིགས་སྟོང་ཕྲག་བརྒྱད་ཅུ། བྱིས་པའི་གདོན་ཆེན་བཅོ་ལྔ། ནད་བདག་རིམས་བདག་ལ་སོགས་པ་གནོད་སྦྱིན་ཐམས་ཅད་ལ་སྦྱིན་ནོ། །དེང་ཕྱིན་ཆད་བསམ་ངན་སྦྱོར་རྩུབ་ཐམས་ཅད་ཞི་བ་
དང༌། གཞན་ཕན་བྱང་ཆུབ་ཀྱི་སེམས་རྒྱུད་ལ་སྐྱེ་བར་གྱུར་ཅིག །བདག་ཅག་ལ་ཕན་སེམས་མཆོག་དང་ལྡན་པར་གྱུར་ཅིག བརྒྱད་པ་ནི། འགྲོ་བ་རིགས་དྲུག །ལམ་རྒྱུད་ལྔ། སྐྱེ་གནས་རྣམ་པ་བཞིས་བསྡུས་པའི་སེམས་ཅན་ཐམས་ཅད་ལ་སྦྱིན་ནོ། །རིགས་དྲུག་སོ་སོའི་ལན་ཆགས་བུ་ལོན་བྱང་ཞིང༌། སྡུག་བསྔལ་མཐའ་དག་དང་བྲལ་ནས། ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་གྱུར་ཅིག དགུ་པ་ནི། ཡི་དྭགས་ཀྱི་གཙོ་མོ་ཁ་ལ་མེ་འབར་མ་ལ་སོགས་ཏེ་ཡི་དྭགས་ཀྱི་ཚོགས་ཐམས་ཅད་ལ་སྦྱིན་ནོ། །སོ་སོའི་མདུན་དུ་ཟས་སྐོམ་བདུན་རྩིའི་ཆར་ཆེན་པོ་བབས་ནས། བདེ་བར་ལོངས་སྤྱོད་པས་ཚིམ་པར་གྱུར་ཅིག །སེར་སྣའི་སྡིག་སྒྲིབ་བྱང་ཞིང་དབུལ་འཕོངས་ཀྱི་སྡུག་བསྔལ་ཐམས་ཅད་ཞི་བར་གྱུར་ཅིག བཅུ་པ་ནི། བདག་ཅག་ལ་ཚེ་རབས་སྔ་མ་ནས་ལན་ཆགས་པའི་མགྲོན་བུ་ལོན་མ་ཁྱེར་བ་དང་ཚེ་འདིར་ཡང་ཐུགས་ཟུར་དང༌། སྐུ་ཟུར་དང་སྤྱན་ཟུར་ལ་ཕོག་པ་རྣམས་དང༌། གནོད་བྱེད་ཀྱི་གདོན་ངོས་མ་ཟིན་པ་རྣམས་ལ་སྦྱིན་ནོ། །ལན་ཆགས་བྱང་ཞིང་བུ་ལོན་ཁྱེར་བར་གྱུར་ཅིག ཁྱེད་རྣམས་གཏོར་མ་འདིས་ཚིམ་ཞིང༌། རེ་བ་ཐམས་ཅད་སྐོངས་བར་གྱུར་ཅིག བཅུ་གཅིག་པ་ནི། མདང་ད་ནང་བསད་པ་ཤི་བ་ད་ལྟ་སྲིད་པ་བར་དོར་
འཁྱམས་པའི་བར་དོའི་སེམས་ཅན་ཐམས་ཅད་ལ་སྦྱིན་ནོ། །བར་དོའི་འཇིགས་པ་ལས་གྲོལ་ནས། ལོངས་སྤྱོད་རྫོགས་པའི་སྐུ་མྱུར་དུ་ཐོབ་པར་གྱུར་ཅིག བཅུ་གཉིས་པ་ནི། མ་ཐོབ་པ་མ་སླེབ་པ་ཁས་ཞན་ཅིང་དབང་ཆུང་བ། ལྷག་མ་ལ་དབང་བ་རྣམས་དང༌། གློ་བུར་དུ་ལྷག་པ་རྣམས་ལ་སྦྱིན་ནོ། །སོ་སོར་ཟས་སྐོམ་གྱིས་ཚིམ་པ་དང༌། མྱུར་དུ་རྣམ་པ་ཐམས་ཅད་མཁྱེན་པ་སངས་རྒྱས་ཀྱི་གོ་འཕང་ཐོབ་པར་གྱུར་ཅིག པཾ་ཨཿཧྲཱིཿཧཱུཾ། བདག་ཉིད་འཕགས་པ་སྤྱན་རས་གཟིགས་སུ་གྱུར། འཕགས་པ་སྤྱན་རས་གཟིགས་དབང་གི །ཕྱག་ནས་འབབ་པའི་འོ་རྒྱུན་གྱིས། །ཡི་དྭགས་རྣམས་ནི་ཚིམས་བྱས་ནས། ཁྲུས་བྱས་རྟག་ཏུ་བསིལ་བར་ཤོག མ་ཎི་ཉེར་གཅིག་དང༌། ཨོཾ་ཨཱཿཧྲཱིཿཧཱུཾ། ཞེས་ཆུ་སྦྱིན། ཨོཾ་ཛྭ་ལ་མི་དཾ་སརྦ་པྲེ་ཏ་བྷྱཿསྭཱཧཱ། ས་གཙང་སར་ཆུ་བླུགས། སེ་གོལ་གཅིག་གཏོགས། བདག་གི་བསམ་པའི་སྟོབས་དང་ནི། །དེ་བཞིན་གཤེགས་པའི་སྦྱིན་སྟོབས་དང༌། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །འཕགས་པ་རྣམས་ལ་མཆོད་པ་དང༌། །སེམས་ཅན་ཀུན་ལ་ཕན་བཏགས་ཕྱིར། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་པ། །འཇིག་རྟེན་ཁམས་འདི་མ་ལུས་པར། །ཐོགས་པ་མེད་པར་འབྱུང་གྱུར་ཅིག །ཆོས་རྣམས་གང་དག་ནས།
ངེས་པར་གྲོལ་གྱི་བར་དང༌། ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་འབྱུང༌། །ངོ་བོ་ཉིད་མེད་གནས་མེད་པར། །དེ་ལྟར་ཆོས་རྣམས་ཤེས་ཀྱིས་ལ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སྐྱོབ་པའི་སྲས་སུ་སྐྱེ། ཁམས་གསུམ་དག་པའི་ཞིང༌། །སྲིད་གསུམ་སྙིང་རྗེའི་མགྲོན། །མ་ལུས་ཁྱབ་པའི་རྫས། །ཆོས་ཉིད་རྟོགས་པའི་མཐུས། །མི་ཟད་གཏེར་དུ་བསྔོ། །གཏོར་མ་མི་ཟད་པའི་གཏེར་ལ་ལོངས་སྤྱོད་པའི་སྐལ་བ་དང་ལྡན་པར་གྱུར་ཅིག །བསོད་ནམས་འདི་ཡིས་སོགས། དགེ་བ་བསྔོ། ཨོཾ་བཛྲ་མུཿ ཡེ་ཤེས་པ་རྣམས་གཤེགས། མཆོད་སྦྱིན་གནས་འདིར་གང་ལྷགས་པ། །འབྱུང་པོ་ས་འོག་རྒྱུ་བ་དང༌། །གང་ཡང་ས་སྟེང་འཁོད་པ་དང༌། །ས་བླར་འཁོད་པ་གང་ཡིན་པ། །མགུ་བར་གྱིས་ལ་རང་གནས་སུ། །ཐམས་ཅད་ཐམས་ཅད་འགྲོ་བར་གྱིས། །སརྦ་བྷཱུ་ཏ་གཙྪ། སརྦ་པྲེ་ཏ་གཙྪ། སརྦ་བིགྷྣཱན་གཙྪ། ཨོཾ་ཨ་མྲྀ་ཏེ་ཧཱུཾ་ཕཊ། དགེ་བ་འདི་ཡིས་སྐྱེ་བོ་ཀུན། །སོགས་སྨོན་ལམ་དང་བཀྲ་ཤིས་གང་འོས་བྱ།། །།གཏོར་མ་བརྒྱ་རྩའི་ངག་འདོན་རྒྱལ་ཁམས་པ་ཏཱ་ར་ནཱ་ཐས་སྨྲས་པའོ། །བཀྲ་ཤིས། ཞུས་དག། ༈ ཨོཾ་སྭཱ་
སྟི། དཀོན་མཆོག་གསུམ་ལ་ཕྱག་འཚལ་ལོ། །བསུར་གྱི་ལག་ལེན་འདོད་པས། སྐྱབས་སེམས་སྔོན་དུ་བཏང་ནས། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། གིས་སྟོང་པར་སྦྱངས། སྟོང་པའི་ངང་ལས་བྷྲཱུཾ་ལས་བྱུང་བའི་བསུར་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ལས་བྱུང་བའི་བསུར་ལྷ་རྫས་ལས་གྲུབ་པ། ཁ་དོག་དྲི་རོ་རེག་བྱ་ཕུན་སུམ་ཚོགས་པ་དང་ལྡན་པར་གྱུར། ཨོཾ་ཨཱཿཧཱུཾ། གསུམ་བརྗོད་ལ། ཨོཾ་ཨ་ས་པྲ་ཏི་སུ་ར་ཕུག་པ་སྭཱཧཱ། ཞེས་ལན་བདུན། ན་མཿསརྦ་ཏ་ཐཱ་ག་ཏ་ཨཱ་ཝ་ལོ་ཀི་ཏེ། ཨོཾ་སམྦྷ་ར་སམྦྷ་ར་ཧཱུཾ། ཞེས་བརྗོད་ནས། དེ་བཞིན་གཤེགས་པ་རྒྱལ་བ་རིན་ཆེན་མང་ལ་ཕྱག་འཚལ་ལོ། །དེ་བཞིན་གཤེགས་པ་གཟུགས་མཛེས་དམ་པ་ལ་ཕྱག་འཚལ་ལོ། །དེ་བཞིན་གཤེགས་པ་སྐུ་འབྱམས་ཀླས་ལ་ཕྱག་འཚལ་ལོ། །དེ་བཞིན་གཤེགས་པ་འཇིགས་པ་ཐམས་ཅད་དང་ཡོངས་སུ་བྲལ་བ་ལ་ཕྱག་འཚལ་ལོ། །བརྗོད་ལ། བསུར་འདོད་པའི་ཡོན་ཏན་ལྔ་དང་ལྡན་པ་འདི་ཉིད། དྲི་ཟའི་རྒྱལ་པོ་རབ་དགའ་དང༌། ནམ་མཁའ་ལྡིང་དང༌། མིའམ་ཅིའི་རྒྱལ་པོ་ལྗོན་པ་རྟ་མགོ་ཅན། དྲི་ཟའི་རྒྱལ་པོ་ཟུར་ཕུད་ལྔ་པ་ལ་སོགས་པ་དྲི་ཟ་ཞིང་དྲི་ལ་ལོངས་སྤྱོད་པའི་རིགས་སུ་གཏོགས་པ་རྣམས་ལ་འབུལ་ལོ། །དྲིའི་འདོད་པས་ཚིམ་ནས་གནོད་འཚེ་མེད་ཅིང་གཞན་ཕན་བྱང་ཆུབ་ཀྱི་
སེམས་དང་ལྡན་པར་གྱུར་ཅིག །གཞན་ཡང་སེམས་ཅན་མདང་ད་ནང་ཤི་བ་བསད་པ། ལྕེབས་པ་སྲིད་པ་བར་དོ་ན་གནས་པ། ལུས་སྔ་ལུས་བོར་ནས། ཕྱི་ལུས་མ་ལོན་པ་རིག་པ་གཏད་མེད་དུ་འཁྱམས་པ། བར་དོའི་སྡུག་བསྔལ་གྱིས་གཟིར་བ་རྣམས་ལ་བསྔོའོ། །བར་དོར་བཟའ་བཏུང་ལོངས་སྤྱོད་ཆར་བཞིན་བབས་ནས་ལུས་གཟུགས་སྐུ་རྣམ་གཉིས་དང༌། སེམས་ཆོས་སྐུར་མངོན་པར་རྫོགས་པར་སངས་རྒྱ་བར་གྱུར་ཅིག །སེམས་ཅན་ཐམས་ཅད་མངོན་པར་རྫོགས་པར་སངས་རྒྱ་བར་གྱུར་ཅིག །ངན་སོང་སྡུག་བསྔལ་མ་མྱོང་ཞིང༌། །དཀའ་བ་སྤྱད་པ་མེད་པ་ཡང༌། །ལྷ་བས་ལྷག་པའི་ལུས་ཀྱིས་ནི། །དེ་ཡི་སངས་རྒྱས་མྱུར་ཐོབ་ཤོག །སྐྱེ་ཞིང་སྐྱེ་བ་དག་ནི་སོགས་བརྗོད་ཅེས་པའང་ཏཱ་ར་ནཱ་ཐས་སྨྲས་པའོ། །དགེ་ལེགས་འཕེལ། ཞུས་དག །