གཏོར་མ་ཆེན་པོའི་ཆོ་ག་བར་ཆད་ཀུན་སེལ།
གཏོར་མ་ཆེན་པོའི་ཆོ་ག་བར་ཆད་ཀུན་སེལ་བཞུགས་སོ། །
ཨོཾ་སྭཱ་སྟི། འདིའི་ལོ་རྒྱུས་ནི། བླ་མ་བ་རི་བས་བལ་ཡུལ་དུ་བྱོན་ནས། པཎྜི་ཏ་ཞིག་སྤྱན་དྲངས་ནས་བྱོན་པ་དང༌། གསེར་མེད་ནས་པུ་ཧྲངས་སུ་ཕྱིན་ནས་བཙད་པོ་རྩེ་སྡེ་དང་མཇལ་ནས། རྒྱལ་པོ་ལ་དབང་བསྐུར་བྱས། ཆོས་བཤད་པས་རྒྱལ་པོས་གསེར་སྲང་བརྒྱ་ཕུལ་སྐད། དེ་རྣམས་པཎྜི་ཏས་ཚགས་བྱས་ནས་བླ་མས་བདག་ལ་བག་ཙམ་ཞིག་གནང་བ་ཞུ་བྱས་པས། མ་ཕྱིན་པར་སླར་ཡང་རྒོལ་བ་དང་ཁྲོ་བ་ལ་སོགས་པ་བྱེད་དུ་བྱུང་བས། ཤིན་ཏུ་སུན་ཏེ་པཎྜི་ཏ་བལ་ཡུལ་དུ་སྐྱེལ་དུ་ཕྱིན་སྐད། དེ་ནས་བལ་ཡུལ་དུ་སླེབ་པའི་ལམ་དུ་མུ་སྟེགས་ཀྱི་པཎྜི་ཏ་གཅིག་དང་འཕྲད་ནས། ཁོ་ན་རེ། ཁྱོད་ཀྱི་ང་ཡི་ལོ་ཙཱ་བ་གྱིས་ལ་བོད་དུ་འགྲོ་དགོས་ཟེར་ནས་བྱུང་སྐད། དེ་ལ་བླ་མས་མི་བྱེད་བྱས་པས། ཁོ་ན་རེ་ངས་མུ་སྟེགས་ཀྱི་ཆོས་མི་འཆད་པར། སངས་རྒྱས་པའི་ཆོས་བཤད་ཟེར་ཀྱང་བླ་མས་མ་གསན་པས། ཁོ་ན་རེ། ཁྱོད་ལ་མཐུ་བྱེད་ཟེར་བ་ལ། ངས་ཁྱོད་ལ་ཉེས་པ་མ་བྱས་པར་མཐུ་བྱས་པས་ཤ་གས་མེད་བྱས་ནས། རྒྱ་གར་དུ་བྱོན་སྐད། དེ་ནས་བླ་མ་རྡོ་རྗེ་
གདན་པ་དང་མཇལ་ནས་ཆོས་གསན་གྱི་ཡོད་ཙ་ན། རྡོ་རྗེ་གདན་པ་ན་རེ། ཁྱོད་ལ་མུ་སྟེགས་ཀྱི་གནོད་པ་ཡོང་བར་འདུག་གསུང་བས། །མི་ཡོང་བྱས་པས་འོང་བར་འདུག་གསུངས་པས། འོ་ན་བལ་ཡུལ་དུ་མུ་སྟེགས་སྐལ་ལྡན་རྒྱལ་པོ་བྱ་བ་དང་འཕྲད་ནས་འདི་ལྟར་བྱུང་ལགས་ཞུས་པས་འོ་ན་དེ་ཀའི་ཡིན་གསུང་ནས། བླ་མས་བྷ་ཡ་ནའི་སྔགས་བཟླས། གཏོར་ཆེན་ལན་གསུམ་བཏང་བས་ཐ་མ་ལ་ཤི་སྐད། དེས་ན་འདི་བྱིན་རླབས་ཆེ་བ་ཡིན་གསུང༌། རྡོ་རྗེ་གདན་པ། བླ་མ་བ་རི་བ། བླ་མ་ཆེན་པོ། འདི་ལོ་རྒྱུས་དག་པ་ཡིན་གསུང༌། བཅོམ་ལྡན་འདས་ཐུགས་རྗེ་ཆེན་པོ་ལ་ཕྱག་འཚལ་ལོ། །འགྲོ་རྣམས་སྲིད་མཚོ་ལས་བསྒྲལ་ཞེས། །བློ་ཆེན་དད་ལྡན་བླ་མ་དང༌། །དཔལ་ལྡན་འཇིག་རྟེན་དབང་ཕྱུག་ལ། །བཏུད་དེ་གཏོར་མའི་ཆོ་ག་བྲི། །ངན་རྟོག་སྨྲ་བའི་དྲི་བྲལ་ཞིང༌། །ཕན་པ་བྱིན་པར་བྱེད་པ་འདི། །གང་ཟག་གནས་དུས་ཡོ་བྱད་དང༌། །ཆོ་ག་ཕན་ཡོན་སྡོམ་དྲུག་ཡིན། །དེ་ལ་གཏོར་མ་གཏོང་བའི་སློབ་དཔོན་དང༌། བུམ་པ་ལ་
བཟླས་པ་བྱེད་པའི་རྣལ་འབྱོར་པ་གཉིས་ནི། དམ་ཚིག་དང་སྡོམ་པ་ལྡན་ཞིང་ཁྲོ་བོ་གང་ཡང་རུང་བའི་བསྙེན་པ་སྔོན་དུ་སོང་བས་བྱའོ། །གཏོར་གཡོག་ཀྱང་ལྷའི་རྣལ་འབྱོར་དང་ལྡན་ཞིང་སྲུང་བ་དང་ལྡན་པ་སྟེ། དེ་ལྟར་བཞི་ཀ་གཏོར་མའི་བྱ་བ་མ་ཚར་གྱི་བར་དུ་ངག་བཅད་པར་བྱའོ། །གཉིས་པ་ནི། མི་དང་དུད་འགྲོ་ལ་སོགས་པས་དབེན་པ། གཙང་བ། སྒོ་ལ་གཏོར་སྣོད་ཤོང་བའི་ས་དེར་ཕྱག་དར་ལེགས་པར་བྱ་བ་དང༌། མེ་ཏོག་ལ་སོགས་པ་དགྲམ་པར་བྱའོ། །གསུམ་པ་ནི། གཟའ་དང་སྐར་མ་བཟང་པོ་འཛོམ་པའི་ཚེ་བྱའོ། །བཞི་པ་རྟེན་གྱི་དཀྱིལ་འཁོར་ཕྱོགས་རེ་ལ་ཁྲུ་བཞི་བཞི་ཡོད་པ་གྲུ་བཞི་པ། དེ་མ་ཤོང་ན་ཡང་ཁྲུ་གསུམ་ལས་ཆུང་བ་མི་རུང༌། བ་བྱུང་ལྔ་དང་ཙནྡན་གྱིས་ལེགས་པར་བྱུགས་ལ། དེའི་ནང་དུ་ཆོས་འབྱུང་རྩེ་མོ་ཕར་ཕྱོགས་བསྒྲུབ་བྱའི་ཕྱོགས་སུ་བསྟན་པ། དབུས་སུ་གཏོར་སྣོད་ཆེན་པོ་རྫའམ་ཟངས་གཞོང་དུ་རུང་བ་ཚོན་རྩི་རེ་ཁ་དཀར་པོས་བྲིས་པ་རྡོ་རྗེའི་སྟེགས་ལ་བཞག །མཆོད་པ་ནི་མེ་ཏོག་སོགས་ལྔའམ་བདུན་སློབ་དཔོན་དང་དཀྱིལ་འཁོར་གྱི་བར་དུ་གཡོན་ནས་རིམ་པ་བཞིན་དུ་བཤམ་མོ། །གཏོར་མའི་ཡོ་བྱད་ནི། ཡུལ་གང་ཡིན་གྱི་བྲེས་བཅལ་བའི་སྲད་ཕྱེད་ལེགས་པར་སྦྲུས་ལ། ཕྱེད་ཆན་དུ་བཙོ། །ཕྱེད་ཟན་དུ་བྱའོ། །དེ་མ་འབྱོར་ན་བྲེ་བཅུ་གཉིས་ལ་སྔ་མ་བཞིན་བྱའོ། །ཟན་ལ་མཐེབ་སྐྱུ་བརྒྱ་རྩ་བརྒྱད་དུ་བྱ་ཞིང༌། ཆན་ལའང་དེ་བཞིན་དུ་མཉམ་པོར་སྣོད་གཅིག་གིས་གཞལ་ཞིང་བྱའོ། །བུམ་པ་ནི་ཟག་རྡོལ་མེད་པ་ཆུ་བྲེ་གསུམ་ཤོང་བ། དེ་མ་ཡིན་ན་ཡང་ཆུ་བྲེ་གང་ཤོང་པ་དེ་ལ་མགུལ་བཅིངས་སོགས་བུམ་རྫས་དང་ཆུས་བཀང་བགེགས་བསལ་ལ། དེ་སློབ་དཔོན་གྱི་གཡས་སུ་དཀྱིལ་འཁོར་ལ་ཁ་ཕྱོགས་པར་བུམ་མཆོག་པའི་མདུན་དུ་བཞག །བུམ་པ་ལ་མཆོད་པ་རྣམས་ཀྱིས་སྐོར། བཟློག་གླུད་ནི་རྗེན་ཕྱེ་བཙོས་པ་ལ་འབྲུ་སྣ་ཚོགས་ཀྱིས་བརྒྱན་ཏེ།
ནད་པ་ལ་སོགས་པ་བསྒྲུབ་བྱ་གང་ཡིན་གྱི་གྲུ་གང་པ་བྱས་ལ། ལུང་ཐང་གི་མིག་དང༌། འགྲོན་བུའི་སོ་དང༌། སྐྲ་ཚབ་དང༌། ནོར་བུ་ལ་སོགས་པས་བརྒྱན་དང༌། ཞྭ་ལ་སོགས་པ་བྱའོ། །དེ་ཆོས་འབྱུང་གི་རྩེ་མོར་སྣོད་ཀྱི་ནང་མཐོང་བ་ཙམ་དུ་བཞག་གོ །གཞན་དག་བྱེད་ཁ་བྱེད་པ་སོགས་ཡོད་ན། རང་གི་འཁོར་དུ་ཡོད་པ་ལ་ཟན་ཁམ་རེ་གཏད་ལ་བསྲུང་བ་བྱའོ། །དེ་ལྟར་དཀྱིལ་འཁོར་མཆོད་པ་བཤམས། གཏོར་མའི་ཡོ་བྱད་བཤམས་པ་དང༌། བུམ་པ་བཟློག་པའི་གླུད་བཤམས་པ། རྣམ་པ་ལྔ་ཡི་ཡོ་བྱད་བཤམས། ལྔ་པ་ནི། གང་ཟག་བཞི་ཁྲུས་ལེགས་པར་བྱས་ལ། སློབ་དཔོན་སྟན་བདེ་བ་ལ་འདུག །གཏོར་གཡོག་གཉིས་བདེ་ཆས་སུ་གཞུག སློབ་དཔོན་དང་བུམ་ཆོག་པ་གཉིས་ཀས་བདག་བསྐྱེད་ལྷན་ཅིག་རྣམ་འཇོམས་བསྒོམས། གཟུངས་ཅི་རིགས་པ་བཟླས། མཆོད་བསྟོད་གཏོར་བསྡུས་བྱ། དེ་ནས་བུམ་ཆོག་པས་བུམ་པར་ལྷ་བསྐྱེད་བཟླས་པ་སོགས་ཆོ་ག་ལྟར་བྱེད་ཅིང༌། དེ་ནས་གཡས་ཀྱི་གཏོར་གཡོག་གིས་འབྲུ་ཆན་བླུགས། གཡོན་གྱི་གཏོར་གཡོག་གིས་ཟན་དང་ཨརྒས་བཀང༌། སློབ་དཔོན་གྱིས་འདི་ལ་སྦྱིན་དང་མི་སྦྱིན་པའི་དམིགས་པ་གང་ཡང་མི་བྱ་བར། མདུན་གྱི་གཏོར་མ་ཆན་སོགས་ལ་དམིགས་ནས། ལག་གཡོན་རྡོ་རྗེ་དང་བཅས་སྙིང་གར་ཁུ་ཚུར་བཅངས། གཡས་དྲིལ་བུ་དང་བཅས་གཏོར་མ་ལ་བརྟེན་མཆོག་སྦྱིན་ཕྱག་རྒྱ་ལ་མཐེ་བོང་དཀྱིལ་དུ་བཀུག་ནས་སྲིན་ལག་གི་རྩ་བ་ནོན་པའི་ཆོས་སྦྱིན་གྱི་ཕྱག་རྒྱ་བྱ། སེམས་ཀྱིས་ལག་གཡས་མཐིལ་དུ་རཾ་དམར་རོ། །དེའི་སྟེང་དུ་ཨ་དཀར་པོ་རཾ་ལས་མེ་འབར་ཨ་ཞུ་ནས་བདུད་རྩིའི་རྒྱུན་བབས་པར་བསམ། སམྦྷ་རའི་སྔགས་བདུན་
རེ་བརྗོད། ལག་པ་གཡས་ཀྱི་ཕྱག་རྒྱ་སྔར་གྱི་དེ་ཁ་ཕུལ་ལ། མཆོད་པ་རྣམས་ལ་རིམ་པས་རེག་རིང་སོ་སོའི་སྔགས་དང་དྷརྨ་ར་ཎི་ཏ་བརྗོད། དེ་བཞིན་གཤེགས་པ་བཞིའི་མཚན་ནས་བརྗོད་པ་མེད། དེ་ནས་གཏོར་གཡོག་ཆན་བླུགས་པ་ངོས་ཀྱི་སྣོད་ཆེན་པོར་བླུགས་ལ་བཤལ་ལོ། །དེ་ལྟ་བུ་ལྔ་བཅུ་རྩ་བཞི་བཏང་ལ། གླུད་དེ་སྣོད་དེའི་ནང་དུ་གཞུག །དེ་ནས་ཡང་ལྔ་བཅུ་རྩ་བཞིའི་བར་དུ་བཏང་ནས། དེ་ནས་དཔང་གཟུགས་ནི། རྩ་བརྒྱུད་བླ་མའི་ཚོགས་ཐམས་ཅད། །དཔང་པོར་བཞུགས་ལ་དགོངས་སུ་གསོལ། །བདག་ཅག་རྒྱུ་སྦྱོར་འཁོར་བཅས་ཀྱི། །བདེན་པའི་དོན་འདི་འགྲུབ་གྱུར་ཅིག །ཡི་དམ་དཀྱིལ་འཁོར་ལྷ་ཚོགས་རྣམས། །དཔང་པོར༴སོགས་ཚིག་གསུམ་འདྲ། ཕྱོགས་བཅུའི་སངས་རྒྱས་བྱང་སེམས་རྣམས། །དཔང་པོར་སོགས། དཔའ་བོ་མཁའ་འགྲོ་ཁྲོ་ཚོགས་རྣམས། དཔང་པོར་སོགས། དཔལ་མགོན་བདུན་ཅུ་རྩ་ལྔ་རྣམས། དཔང་པོར་སོགས། སྣང་སྲིད་ལྷ་སྲིན་སྡེ་བརྒྱད་རྣམས། དཔང་པོར་སོགས། དཀར་ཕྱོགས་སྐྱོང་བ་མཐུ་ཆེན་རྣམས། །དཔང་པོར་སོགས། གནས་བདག་གཞི་བདག་ཞིང་སྐྱོང་ཚོགས། དཔང་པོར་སོགས། མནའ་དང་མཐོ་ཡི་ཤན་འབྱེད་པ། །ཉེས་མེད་རྣམས་ཀྱི་སྟངས་འཛིན་པ། །ཉེས་ཅན་ཀུན་གྱི་ཚར་གཅོད་མཁན། །ལེགས་ཉེས་ཁྲིམས་ཀྱི་རྗེས་གཅོད་པ། །སྲིད་པའི་ཞལ་ལྕེ་གཅོད་པ་ཀུན། དཔང་པོར་སོགས། བདག་ཅག་དཔོན་སློབ་འཁོར་བཅས་ཀུན། ཡང་ན། རྒྱུ་སྦྱོར་འཁོར་བཅས་ཞེས་བརྗོད། ལྷ་རུ་དཀོན་མཆོག་གསུམ་པོ་མཆོད། །ལག་
ལེན་དགེ་བ་བཅུ་དང་འབྲེལ། །བྱམས་དང་ངོ་ཚ་ཁྲེལ་ཡོད་བསྒོམ། །མི་རིགས་ངན་པའི་ལས་ཀུན་སྤངས། །བདེན་ཚིག་བརྒྱ་དང་ལྡན་པ་ལགས། །མ་རུངས་སྡིག་ཅན་འདི་པ་ནི། །སྤྱིར་གྱི་དགེ་བའི་ཆོས་ལ་སྨོད། །སྡང་ཞིང་གཏུམ་ལ་དྲག་ཤུལ་ཆེ། །རྫུན་དང་གཡོ་སྒྱུས་རང་གཞན་བསླུ། །འཇིག་རྟེན་ཕུང་བྱེད་མ་གཟིགས་སམ། །མཐུ་རྩལ་ཅན་རྣམས་རྟགས་ཕྱུང་ཤིག །བདག་ཅག་སྡེ་དང་བཅས་པ་ཡི། །མི་མཐུན་འཇོམས་པའི་དུས་ལ་བབ། །བར་ཆད་སེལ་བའི་དུས་ལ་བབ། །འདོད་དོན་སྒྲུབ་པའི་དུས་ལ་བབ། །ཅེས་རོལ་ཚིག་དང་བཅས་ཏེ། དཔོན་སློབ་བཞིའམ། ཀུན་གྱིས་མཉེས་པའི་དཔང་གཟུགས་བྱ། གླུད་རབས། གླུད་བཤད། གླུད་རྫོངས། བསྐུལ་སོགས་སྤྲོས་པ་བྱེད་ན་སྡེབས་གཅིག་ལ་སྐབས་འདིར་བྱེད་པ་ཐོབ་ཐང་ཡིན་པར་འདུག་གོ །གཏོར་བསྔོའི་སྔོན་ལ་བྱེད་པ་ནི་མི་ལེགས། ཡང་ན་འོག་ཏུ་བདེན་བརྡར་གྱི་གོང་ལ་བྱས་ནའང་རུང་ངོ༌། །གླུད་རབས་ནི། ཀྱཻ་གླུད་བྱུང་དང་པོ་གང་ནས་བྱུང༌། །དང་པོ་ལྷའི་ཡུལ་ནས་བྱུང༌། །ལྷ་དབང་བརྒྱ་བྱིན་སྙུང་གིས་ཟིན། །བཅོམ་ལྡན་ཤཱཀྱ་ཐུབ་པ་ཡིས། །དར་གྱི་གླུད་ཆེན་བཏང་བ་ཡིས། །ལྷ་དབང་བརྒྱ་བྱིན་སྙུང་ལས་ཐར། །གླུད་བྱུང་བར་པ་གང་ནས་བྱུང༌། །བར་པ་རྒྱ་གར་ཡུལ་ནས་བྱུང༌། །རྒྱལ་པོ་དར་མ་འདུན་རྒྱལ་ནི། །མི་སྙུང་དེ་ནི་དགུ་རུ་སྙུང༌། །རྗེ་བཙུན་བྱམས་པ་མགོན་པོ་ཡིས། །གླུད་ཆེན་བཏང་བས་སྙུང་ལས་ཐར། །གླུད་བྱུང་
ཐ་མ་གང་ནས་བྱུང༌། །ཐ་མ་བོད་ཀྱི་ཡུལ་ནས་བྱུང༌། །རྒྱལ་པོ་ཁྲི་སྲོང་ལྡེ་བཙན་གྱིས། །གླུད་ཆེན་རྒྱན་དང་ལྡན་པ་འདི། །སློབ་དཔོན་པདྨ་འབྱུང་གནས་ཀྱིས། །སྡེ་བརྒྱད་རྣམས་ལ་བཏང་བ་ཡིས། །བར་ཆད་ཐམས་ཅད་ཞི་བར་བྱས། །ད་ལྟ་སྔགས་འཆང་བདག་ཅག་གིས། །སྦྱིན་པའི་བདག་པོའི་གླུད་ཆེན་འདི། །འདྲེ་སྲིན་རྣམས་ལ་བསྔོས་པ་ཡིས། །ནད་དང་གདོན་ལས་གྲོལ་བར་འགྱུར། །གནམ་ས་གཉིས་ལ་སྲིད་པའི་གླུད། །གླུད་ཀྱི་དེ་ནི་ཕ་སྨོས་པ། །གནམ་གྱི་དེ་ནི་ཀ་ཡང་རྩེ། །གླུད་ཀྱི་དེ་ནི་མ་སྨོས་པ། །ས་ལ་སྲོག་མོ་གླུད་ཀྱི་ཡུམ། །དེ་ལས་དར་གྱི་གླུད་ཆེན་བྱུང༌། །ཀྱཻ་སྣང་སྲིད་ལྷ་འདྲེ་ཚུར་གསོན་དང༌། །སྦྱིན་པའི་བདག་པོ་འཁོར་བཅས་ལ། །ལན་ཆགས་བུ་ལོན་སྙེགས་པ་ཡིས། །སྡེ་བརྒྱད་འདྲེ་སྲིན་ཐམས་ཅད་ཀུན། །གླུད་ཆེན་གཟུགས་མཆོག་རྒྱན་ལྡན་འདི། །འབྱུང་བ་ལྔ་ལས་གྲུབ་པའི་གླུད། །ཏིང་འཛིན་རྒྱལ་པོས་དབང་བསྐུར་བས། །སྦྱིན་པའི་བདག་པོའི་གླུད་དུ་གཏོང༌། །དེ་སྐད་དེ་ནི་བགྱིས་པ་ལས། །གླུད་མཆོག་གོམ་གསུམ་ཕར་འཕར་ནས། །སླར་ཡང་ལོག་སྟེ་འདི་སྐད་སྨྲས། །སྔགས་འཆང་རྒྱལ་པོ་ཚུར་གསོན་དང༌། །འབྲུ་མཆོག་དར་གྱི་མི་པོ་ཆེ། །མི་ཡིས་གླུད་དུ་གཏོང་ལགས་ན། །འབྱུང་བ་བཞི་དང་དབང་པོ་ལྔ། །ཡན་ལག་ལྔ་དང་ཚོགས་དྲུག་དང༌། །ཕུང་ཁམས་སྐྱེ་མཆེད་ཀུན་དང་ལྡན། །
གོས་དང་རྒྱན་དང་དཀོར་ཆ་སོགས། །དེ་རྣམས་བདག་ལ་འཚལ་ལགས་ན། །སྐྱེ་འགྲོའི་གླུད་དུ་འགྲོ་བར་བགྱི། །དེ་སྐད་དེ་ནི་ཞུས་པ་ལས། །སྔགས་འཆང་རྒྱལ་པོའི་ཞལ་ན་རེ། །དར་གྱི་གླུད་ཆེན་ཚུར་ཉོན་དང༌། །འབྱུང་བ་གཟུགས་སོགས་ཁྱོད་ལ་ཚང། །ཤ་མེད་འབྱུང་བ་ས་ལ་བྱས། ཁྲག་མེད་འབྱུང་བ་ཆུ་ལ་བྱས། །དྲོད་མེད་འབྱུང་བ་མེ་ལ་བྱས། །དབུགས་མེད་འབྱུང་བ་རླུང་ལ་བྱས། །དུང་ཕོར་དཀར་པོར་རུས་པར་བྱས། །རྡོ་རྒྱུས་བྱང་བལ་རྒྱས་པར་བྱས། །རེག་འཇམ་དེ་ནི་ལྤགས་པར་བྱས། །ཆག་ཚང་ཀུ་བ་ཁྱོད་ཀྱི་མགོ །མགོ་བསྒྱུར་དེ་ནི་ཤིགས་སེ་ཤིགས། །ཟེར་མོ་འཕན་བཟང་ཁྱོད་ཀྱི་སྐྲ། །སྐྲ་ལོ་དེ་ནི་ཤིགས་སེ་ཤིགས། །ལུང་ཐང་འབར་བ་བལྟ་བའི་མིག །ནག་དང་དེ་ནི་ཧྲིགས་སེ་ཧྲིག །སྙན་ཆ་བཟང་མོ་སྙན་དུ་བྱས། །སྒྲ་སྙན་དེ་ནི་ལྷངས་སེ་ལྷང༌། །ཀ་ཀོལ་དྲི་བསྲུང་སྣོམ་པའི་སྣ། །དྲི་བསྲུང་ངད་པ་བྱིངས་སེ་བྱིངས། །ལེབ་རྒན་དམར་པོ་སྨྲ་བའི་ལྕེ། །སྨྲས་མཁས་དེ་ནི་ཐོལ་ལོ་ལོ། །འགྲོན་བུ་ཐོད་དཀར་བཞད་པའི་སོ། །དཀར་དངས་དེ་ནི་ཁྲིགས་སེ་ཁྲིགས། །དབང་པོ་ལག་པ་གཡོབ་པའི་ལག །སོར་བཅུ་དེ་ནི་ཁྲབས་སེ་ཁྲབས། །རྐང་པ་ཐབས་ཤེས་ཟངས་ལྕགས་བྱས། །འགྲོ་མཁས་དེ་ནི་ཤམས་སེ་ཤམས། །མོན་ལུག་བརླ་སྒང་ཁོག་པའི་སྙིང༌། །
དྲན་པ་དེ་ནི་རྒྱ་ཆེར་ལྡན། །གླ་གོར་ཞོ་ཤ་གློ་བར་བྱས། །མཁལ་སྲན་དྲེ་བོ་མཁལ་མར་བྱས། །ཕོ་ལོང་ལྒང་པ་མཚན་མར་བྱས། །རྣམ་ཤེས་བརྒྱད་དང་ཚོགས་དྲུག་དང༌། ཁམས་དང་སྐྱེ་མཆེད་ཁྱོད་ལ་ཚང། །གོས་དང་རིན་ཆེན་རྒྱན་གྱིས་སྤྲས། །མི་ནོར་སྣ་དགུ་རྒྱབ་ཏུ་ཁུར། །སྔགས་དང་ཕྱག་རྒྱས་བྱིན་རླབས་པའི། །འདི་འདྲའི་གླུད་མཆོག་ཡ་མཚན་ཅན། །སྒང་བུ་དེ་ནི་མཐོ་མཐོ་ནས། །གསུང་དབྱངས་དེ་ནི་ཀྱུ་རུ་རུ། །བཤོད་བུ་དེ་ནི་དམའ་དམའ་ནས། །འགྲོ་མཁས་དེ་ནི་ཤམས་སེ་ཤམས། །ལྕགས་ཐག་དེ་ནི་བརྡར་བརྡར་ནས། །སྐྱེས་པ་དམག་ལ་ཆས་པ་འདྲ། །རྒྱན་ཆ་མང་པོ་པུར་རུ་རུ། །མོ་བཙུན་བག་མར་ཆས་པ་འདྲ། །དེ་ཙམ་དེ་ནི་འཚལ་བས་ན། །སྐྱེ་འགྲོ་ཡོངས་ཀྱི་གླུད་དུ་སོང༌། །ཀྱཻ་སྣང་སྲིད་ལྷ་འདྲེ་ཚུར་ཉོན་དང༌། །དེ་རིང་བདེན་པའི་ངག་ཉོན་ལ། །སྦྱིན་པའི་བདག་པོ་འཁོར་བཅས་ལ། །ལན་ཆགས་བུ་ལོན་རྙོག་པ་ཡིས། །འདྲེ་སྲིན་འབྱུང་པོའི་ཚོགས་བཅས་ཀུན། །གླུད་ཆེན་གཏོར་མ་འདི་ལོང་ལ། །འགལ་རྐྱེན་བར་ཆད་བཟློག་ཏུ་གསོལ། །ལམ་དང་ཡུལ་བསྟན་པ་ནི། སྡེ་བརྒྱད་འབྱུང་པོའི་ཚོགས་བཅས་ཀུན། །དར་གྱི་མི་ཆེན་ཞལ་ན་རེ། །འགྲོ་བའི་ལམ་དང་ཡུལ་སྟོན་ཟེར། །ཀྱཻ་ལྟོ་མཁན་རྒྱལ་པོའི་ཞལ་ན་རེ། །དཔྱིད་ཟླ་གསུམ་དང་དབྱར་ཟླ་གསུམ། །རླུང་དང་ཆར་ཟིལ་ལྟོ་ཡི་ལམ། །སྟོན་ཟླ་གསུམ་
དང་དགུན་ཟླ་གསུམ། །ལོ་ཏོག་གཙང་ཆབ་ལྟོ་ཡི་ལམ། །སྟོང་ལམ་ཤུལ་རིང་ལྟོ་བའི་ལམ། ཁྱོད་ཀྱི་ལམ་ཡང་དེ་རུ་བསྟན། །གླུད་ཆེན་འདྲེ་སྲིན་དེར་སོང་ཞིག །ཅེས་བསྔོ་ཞིང་ཡུལ་བསྟན་པ་ནི། ཕྱོགས་ཕྱོགས་བྱ་བ་ཕ་གི་ན། །ཉི་མ་ཤར་ཕྱོགས་ཕ་གི་ན། །ཡུལ་ཡང་ཤེལ་གྱི་ཡུལ་ལ་བྱས། །མཁར་ཡང་ཤེལ་གྱི་མཁར་ལ་བྱས། །མི་ཡང་ཤེལ་གྱི་མི་ལ་བྱས། །སྨྲ་རེ་མཁས་ལ་ངག་རེ་འཇམ། །ཤེལ་གྱི་རྟ་ཆུང་རྒོ་བ་ཙམ། །འགྲོ་རེ་མཁས་ལ་བང་རེ་མགྱོགས། །ལྷ་འདྲེའི་ཚོགས་པ་དེ་ན་ཆེ། །སྦྱིན་པའི་བདག་པོ་འཁོར་བཅས་ཀྱི། ཁྱིམ་སྒོ་ལམ་འཕྲང་འདི་ཀུན་དུ། །འདྲེ་སྲིན་སྡོད་པའི་གནས་མ་མཆིས། །དེ་ཕྱིར་དཔོན་ཤོང་ལགས་ཀྱང་གཡོག་མི་ཤོང༌། །རྟ་བཤོང་ལགས་ཀྱང་སྒ་མི་ཤོང༌།།མཛོ་ཤོང་ལགས་ཀྱང་ཁལ་མི་ཤོང༌། །ད་རྒྱུག་དེ་ནི་འགྲོ་རེ་རན། །ཉི་མ་ལྷོ་ཕྱོགས་ཕ་གི་ན། །ཡུལ་ཡང་གསེར་གྱི་ཡུལ་ལ་བྱས། །མཁར་ཡང་གསེར་གྱི་མཁར་ལ་བྱས། །མི་ཡང་གསེར་གྱི་མི་ལ་བྱས། །སྨྲ་རེ་མཁས་ལ་ངག་རེ་འཇམ། །གསེར་གྱི་རྟ་ཆུང་རྒོ་བ་ཙམ། །འགྲོ་རེ་མཁས་ལ་བང་རེ་མགྱོགས། །ལྷ་འདྲེའི་ཚོགས་པ་དེ་ན་ཆེ། །སྦྱིན་པའི་བདག་པོ་འཁོར༴ ཁྱིམ་སྒོ་ལམ་འཕྲང་༴ འདྲེ་གདོན་སྡོད་པའི༴ དེ་ཕྱིར་དཔོན་ཤོང་༴ རྟ་ཤོང་ལགས་ཀྱང་༴ མཛོ་ཤོང་ལགས་ཀྱང་༴ ད་རྒྱུག་
དེ་ནི་འགྲོ་རེ་རན། །ཉི་མ་ནུབ་ཕྱོགས་ཕ་གི་ན། །ཡུལ་ཡང་ཟངས་ཀྱི་ཡུལ་ལ་བྱས། མཁར་ཡང་ཟངས་ཀྱི་མཁར་ལ་བྱས། །མི་ཡང་ཟངས་ཀྱི་མི་ལ་བྱས། །སྨྲ་རེ་མཁས་ལ་ངག་རེ་འཇམ། །ཟངས་ཀྱི་རྟ་ཆུང་སྒོ་བ་ཙམ། །འགྲོ་རེ་མཁས་ལ་བང་རེ་མགྱོགས། །ལྷ་འདྲེའི་ཚོགས་པ་དེ་ན་ཆེ། །སྦྱིན་པའི་བདག་པོ་འཁོར་བཅས་ཀྱི། ཁྱིམ་སྒོ་ལམ་འཕྲང་འདི་ཀུན་དུ། །འདྲེ་སྲིན་སྡོད་པའི་གནས་མ་མཆིས། །དེ་ཕྱིར་དཔོན་ཤོང་ལགས་ཀྱང་གཡོག་མི་ཤོང། །རྟ་ཤོང་ལགས་ཀྱང་སྒ་མི་ཤོང༌། །མཛོ་ཤོང་ལགས་ཀྱང་ཁལ༴ ད་རྒྱུག༴ ཉི་མ་བྱང་ཕྱོགས་ཕ་གི་ན། །ཡུལ་ཡང་གཡུ་ཡི་ཡུལ་ལ་བྱས། །མཁར་ཡང་གཡུ་ཡི་མཁར་ལ་བྱས། །མི་ཡང་གཡུ་ཡི་མི་ལ་བྱས། །སྨྲ་རེ་མཁས་ལ་ངག་རེ་འཇམ། །གཡུ་ཡི་རྟ་ཆུང་རྒོ་བ་ཙམ། །འགྲོ་རེ་མཁས་ལ་བང་རེ་མགྱོགས། །ལྷ་འདྲེའི༴ སྦྱིན་པའི༴ ཁྱིམ༴ འདྲེ་གདོན༴ དེ་ཕྱིར་དཔོན༴ རྟ་བཤོང་༴ མཛོ་བཤོང་༴ ད་རྒྱུག༴ ཕྲག་དོག་རྒྱལ་པོའི་སྡེ་ལ་འབུལ། །ནད་གཏོང་མ་མོའི་སྡེ༴ འདོད་གཡེང་ལྷ་ཡི༴ གཏི་མུག་ཀླུའི༴ སྲེད་ལེན་གནོད་སྦྱིན༴ ང་རྒྱལ་བཙན་གྱི༴ བཙུན་པ་རྨུ་ཡི༴ དྲང་སྲོང་གཟའ་ཡི༴ སེར་སྣ་ཡི་དྭགས༴ ཤ་ཡི་གླུད་འདི་ས་ལ་གཏོང༌། །ས་ལ་གནས་པའི་ལྷ་འདྲེ་ཀུན། །གླུད་ཆེན་གཏོར་མ་འདི་བཞེས་ལ། །རྒྱུ་སྦྱོར་ཡོན་མཆོད་འཁོར་བཅས་ལ། །གནོད་དང་འཚེ་བ་མ་བྱེད་
ཅིག ཁྲག་གི་གླུད་འདི་ཆུ་ལ་གཏོང༌། །ཆུ་ལ་གནས་པའི་ལྷ་འདྲེ་ཀུན། །གླུད་ཆེན་གཏོར་མ༴ རྒྱུ་སྦྱོར༴ གནོད་དང་༴ དྲོད་ཀྱི་གླུད་འདི་མེ་ལ་གཏོང༌། །མེ་ལ་གནས་པའི་ལྷ༴ གླུད་ཆེན༴ རྒྱུ་སྦྱོར༴ གནོད་དང་༴ དབུགས་ཀྱི་གླུད་འདི་རླུང་ལ་གཏོང༌། །རླུང་ལ་གནས་པའི་ལྷ་འདྲེ་ཀུན། །གླུད་ཆེན༴ རྒྱུ་སྦྱོར༴ གནོད་དང་༴ སེམས་ཀྱི་གླུད་འདི་མཁའ་ལ་གཏོང༌། །མཁའ་ལ་གནས་པའི་ལྷ་འདྲེ་ཀུན། །གླུད་ཆེན་གཏོར་མ་འདི་བཞེས་ལ། །རྒྱུ་སྦྱོར་ཡོན་བདག་འཁོར་བཅས་ལ། །གནོད་དང་འཚེ་བ་མ་བྱེད་ཅིག །ཅེས་ཡུལ་བསྟན་ནོ། །ཁ་འབར་མའི་གླུད་རབས། སློབ་དཔོན་པདྨས་མཛད་པར་གྲགས་ཀྱང༌། འདི་འདྲའི་རིགས་བོན་ལ་རྙིང་མ་པས་འདྲ་དཔེ་བླངས། དེ་གསར་ལུགས་ལ་སྦྱར་བ་ཡིན་ཀྱང༌། བོད་ཀྱི་སྡེ་བརྒྱད་མགུ་བར་བྱེད་པས་སྐྱོན་མེད་དོ།།བསྐུལ་ནི། ཧཱུཾ་བྷྱོཿ བྱམས་མགོན་ཐུགས་རྗེ་ཤཱཀྱ་ཐུབ་པ་ཡིས། །སྲས་ཀྱི་ཐུ་བོ་པར་བུའི་ནང་དུ་སྦས། །གདུང་བས་བླང་ནས་སྲོག་གི་སྙིང་པོ་ཕུལ། །བཀའ་གཉན་ཁ་འབར་ཆེན་མོ་ལས་ལ་བྷྱོཿ སྐུ་མདོག་སྔོ་ནག་དུ་བའི་མདོག་འདྲ་ལ།།བཞིན་འཛུམ་མི་སྡུག་ཁྲོ་གཉེར་མཛོད་སྤུར་བསྡུས། །དམ་ཉམས་དགྲ་བགེགས་ཐམས་ཅད་ཟིལ་གྱིས་གནོན། །འཇིགས་བྱེད་ཁ་འབར་ཆེན་མོ༴ སྐུ་མདོག་དམར་མོ་བྱེ་རུའི་མདོག་འདྲ་ཞིང༌། །བཞིན་འཛུམ་མི་སྡུག་ཁྲོ་གཉེར༴ ནད་དང་གནོད་དང་དགྲ་བགེགས་
བརླག་པར་བྱེད། །བརླག་བྱེད་ཁ༴ ཁ་ནས་མེ་འབར་རྒྱ་མཚོ་གཏིང་ནས་སྐེམས། །མིག་ནས་ཐོག་འཛག་རི་རབ་ཐལ་པར་རློག། སྐད་ཅིག་ཙམ་ལ་ཁམས་གསུམ་དབང་དུ་བསྡུད། །གྱད་མོ་ཁ་འབར་ཆེན་མོ་ལས་ལ་བྷྱོཿ དབུ་སྐྲ་རལ་པ་ཁམས་ནག་བརྫུས་པ་ཡིས། །འཇིག་རྟེན་ལྷ་ཆེན་བརྒྱད་རྣམས་འདར་བར་བྱེད། །ཞབས་གཉིས་བརྐྱང་བསྐུམ་བགྲད་ནས་བཞུགས་པ་ཡིས། །འཇིག་རྟེན་ཀླུ་ཆེན་བརྒྱད་རྣམས་ཟིལ་གྱིས་གནོན། །ཞལ་ནས་རྔམ་པའི་ང་རོ་སྒྲོགས་པ་ཡིས། །གདོན་ཆེན་བཅོ་བརྒྱད་ཚོགས་རྣམས་འབར་བར་བྱེད། །བདུད་དང་འདྲེ་རྣམས་སྐད་ངན་ཙེ་རེ་རེ། །སྟོབས་ཆེན་ཁ་འབར་ཆེན༴ ཤངས་ནས་ཡམ་དང་ནད་ཀྱི་དུ་བ་འཐུལ། །སྦར་ཁྱིམ་སྡང་ནས་དགྲ་བགེགས་སྲོག་རྩ་གཅོད། །ཟ་བྱེད་མཆེ་བ་དྲག་ཏུ་གཙིགས་པ་ཡིས། །དམ་ཉམས་དགྲ་བགེགས་སྲོག་རྩ་མྱུར་དུ་གཅོད། །སྲོག་གཅོད་ཁ་འབར་ཆེན་མོ་ལས་ལ་བྷྱོཿ ཧཱུཾ་བྷྱོཿ བཀའ་ཉན་ཕོ་ཉ་ལྔ་བརྒྱ་ལས་ལ་བྷྱོཿ ལེགས་ཉེས་སྟངས་འཛིན་དམ་ཚིག་རྗེས་གཅོད་མ། །དམ་ཚིག་ཅན་ལ་མཐུ་དང་སྡོང་གྲོགས་མཛོད། །ཆོས་སྐྱོང་ཁ་འབར༴ ཧཱུཾ་བྷྱོཿ གཙང་རིགས་དཔལ་མགོན་རྣམས་ཀྱི་དེད་དཔོན་མཛད། །སྨོན་ལམ་དབང་གིས་སངས་རྒྱས་བསྟན་པ་བསྲུང༌། །འཕྲིན་ལས་དབང་གིས་སྒྲུབ་ལ་དངོས་གྲུབ་སྟེར། །གཟུགས་སྒྲ་དྲི་རོ་རེག་བྱ་འདོད་ཡོན་ལྔ། །བཞེས་ནས་ཁ་འབར༴ ཧཱུཾ་བྷྱོཿ བཀའ་ཡི་གཏོར་མ་རྒྱ་ཆེན་འདི་བསྣོམ་
ལས། །འདྲེན་པ་ཤཱཀྱ་ཐུབ་པའི་བསྟན་པ་འདི། །ཕྱོགས་དུས་ཀུན་དུ་དར་ཞིང་རྒྱས་པ་དང༌། ཁམས་གསུམ་སེམས་ཅན་མ་ལུས་ཐམས་ཅད་ཀྱི། །བླ་མེད་བྱང་ཆུབ་ཐོབ་པའི་སྡོང་གྲོགས་མཛོད། །བཅོམ་ལྡན་འདས་ཀྱི་སྤྱན་སྔར་ཁས་བླངས་པའི། །སངས་རྒྱས་བསྟན་པ་འཛིན་སྐྱོང་བསྲུང་སྤེལ་དང༌། །གཙུག་ལག་འཁོར་བཞི་ཆོས་བྱེད་སྐྱོང་བར་ཆད། །ད་དུང་སངས་རྒྱས་བསྟན་པ་མ་ནུབ་པས། །སྔོན་གྱི་དམ་བཅས་ཁས་བླངས་མ་འདོར་ཅིག །རྣལ་འབྱོར་ཞི་རྒྱས་དབང་དང་མངོན་སྤྱོད་ཀྱི། །ལས་ཀྱི་འབྲས་བུ་མྱུར་དུ་གྲུབ་པར་མཛོད། །ཧཱུཾ་བྷྱོཿ བཀའ་ཡི་གཏོར་མ་འདི་ལོང་ལ། །ཡས་ཀྱི་བདུད་གཡོས་ཐམས་ཅད་བཟློག །མས་ཀྱི་སྲི་ལངས་ཐམས་ཅད་བཟློག །ཕ་རོལ་རྦོད་གཏོང་༴ དམ་སྲིའི་བར་ཆད་ཐམས་ཅད༴ རྨི་ལམ་ངན་པ་ཐམས་ཅད༴ མཚན་མ་རྩུབ་པ་ཐམས་ཅད༴ ལྟས་ངན་བརྒྱད་ཅུ་རྩ་བཞི༴ བགེགས་རིགས་སྟོང་ཕྲག་བརྒྱད་ཅུ༴ ནད་རིགས་བཞི་བརྒྱ་རྩ་བཞི༴ གདོན་རིགས་སུམ་བརྒྱ་དྲུག་ཅུ༴ ཡེ་འཕྲོག་སུམ་བརྒྱ་དྲུག་ཅུ༴ དུས་མིན་འཆི་བ་རྣམ་དགུ༴ དྲང་སྲོང་དམོད་ངན་འདོར་བ༴ ཕུར་པའི་དབལ་ཁྲ་འཕེན་པ༴ ཡུངས་ཀར་ཐུན་ཟོར་འཕེན་པ༴ སྐྱེས་པའི་མདའ་ཟོར་འཕེན་པ༴ བུད་མེད་དམོད་ཟོར་འཕེན་པ༴ ཐེའུ་རང་ཚེ་ལ་རྐུ་བ༴ མུ་སྟེགས་བར་ཆད་བྱེད་པ༴ ནད་ཁ་རིམས་ཁ་དལ་ཁ༴ སྔ་དགྲ་དར་བ་ཐམས་ཅད༴ ཕྱི་དགྲ་སེམས་
པ་ཐམས་ཅད༴ བདུད་ཀྱི་ཐོ་ངན་བྱེད་པ༴ བཙན་གྱི་རྟ་དྲེལ་འཁྲབ་པ༴ ཀླུའི་བྱད་དུ་བཅུག་པ༴ ལོ་སྐེག་ཟླ་སྐེག་ཞག་སྐེག༴ ཆགས་ཆེ་ཉམས་ང་ཐམས་ཅད༴ མི་མཐུན་འགལ་རྐྱེན་བར་ཆད༴ བཟློག་གོ་བསྒྱུར་རོ་དགྲ་ལ་བསྒྱུར། །ལོག་འདྲེན་བདུད་དང་བར་ཆད་དང༌། །ལྟས་ངན་དགྲ་བགེགས་བར་ཆད་རྣམས། །འདི་ཡིས་བཟློག་པར་མཛད་དུ་གསོལ། །བདག་གིས་བཅོལ་བའི་ལས་རྣམས་སྒྲུབས། །མཆོད་པ་རྣམས་དང་ཟན་དང་ཨརྒྷའི་ལྷག་མ་ཐམས་ཅད་སྣོད་དེར་བླུགས་ལ། བདག་གི་བསམ་པའི་སྟོབས་དང་ནི། །དེ་བཞིན་གཤེགས་པའི་སྦྱིན་སྟོབས་དང༌། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་པ། །འཇིག་རྟེན་ཁམས་འདིར་མ་ལུས་པ། །ཐོགས་པ་མེད་པར་འབྱུང་འགྱུར་ཅིག །ཅེས་བདེན་སྟོབས་ལན་གསུམ་བརྗོད་དེ། ཁྱད་པར་དུ་ཀླུའི་ནད་སེལ་ན། ཀླུའི་སྨན་སྣ་ཚོགས་དང་བའི་འོ་མ་གུང་དུ་བཤམས་ལ། འབྲས་ཡོས་དང་ཡོས་མར་སྦྱར་བ་བླུག་གོ །གཞན་བགེགས་གང་གནོད་ཀྱང་སྔ་མའི་ཆོག་གོ །དེ་ནས་སློབ་དཔོན་གྱིས་འཁོར་རྣམས་ལ་བསྲུང་བ་བྱས། གཏོར་མ་ཕྱི་ལ་གཏོང་བར་བྱ་སྟེ། དེའང་གཏོར་མའི་སྔོན་དུ་དུང་ལ་སོགས་པའི་སྒྲ་འགྲོ། གཏོར་མ་ཁྱེར་བ་དང་བུམ་ཆོག་པས་གཡས་ངོས་ནས་རང་གི་ཁྲོ་བོའི་སྔགས་དྲག་ཏུ་བཟློས་ཤིང༌། བུམ་པའི་ཆུ་སྒྲེང་ཞིང་འགྲོའོ། །སློབ་དཔོན་གྱིས་ཕྱིས་ནས་རྡོ་རྗེ་གསོར་ཞིང༌། དྲིལ་བུ་སིལ་ཞིང༌། ན་མ་ཙཎྜ་བཛྲ་ཀྲོ་དྷཱ་ཡ། ཧུ་ལུ་ཧུ་ལུ། ཏིཥྛ་ཏིཥྛ། བྷནྡྷ་བྷནྡྷ། ཧ་ན་ཧ་ན་ཨ་མྲྀ་ཏེ་ཧཱུཾ་ཕཊ།
ཅེས་སྔགས་བཟླས་ཤིང༌། རྐང་པ་ཁྲོ་བོའི་འགྲོས་ཀྱིས་འགྲོ་བར་བྱའོ། །དེ་ནས་གནོད་པའི་བགེགས་ཡོད་པའི་སའམ། དགྲའི་ཡུལ་མཐོང་བའི་སར་སླེབ་པ་དང༌། བུམ་ཆུས་ཆོས་འབྱུང་བྲིས་པའི་སྟེང་དུ་གཏོར་མ་བཞག་སྟེ། སློབ་དཔོན་གྱིས་ཧཱུཾ་མཛད་ཀྱི་ཕྱག་རྒྱ་བཅས་ལ། ངག་ཏུ། ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང༌། ཕྱོགས་བཅུ་དུས་གསུམ་གྱི་སངས་རྒྱས་རྣམས་ཀྱི༴ ལུང་དང་རྟོགས་པས་བསྡུས་པའི་དམ་པའི་ཆོས་རྣམས་ཀྱི༴ ཐེག་པ་གསུམ་ལ་གནས་པའི་འཕགས་པའི་དགེ་འདུན་རྣམས་ཀྱི༴ དེ་བཞིན་གཤེགས་པ་དང༌། །རྡོ་རྗེ་དང༌། །རིན་པོ་ཆེ་དང༌། །པདྨ་དང༌། །ལས་ཀྱི་རིགས་སུ་བཞུགས་པའི་ལྷ་ཚོགས་རྣམས་ཀྱི༴ སྙིང་པོ་དང་ཕྱག་རྒྱ་དང་གསང་སྔགས་དང་རིགས་སྔགས་ཀྱི་ལྷ་ཚོགས་རྣམས་ཀྱི༴ དོན་དམ་ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་བདེན་པ་དང༌། ཀུན་རྫོབ་རྒྱུ་འབྲས་བསླུ་བ་མེད་པའི་བདེན་པ་དང༌། བྱ་བའི་རྒྱུད། སྤྱོད་པའི་རྒྱུད། རྣམ་འབྱོར་རྒྱུད། རྣལ་འབྱོར་བླ་ན་མེད་པའི་རྒྱུད་དེ། །རྒྱུད་སྡེ་ཆེན་པོ་བཞི་དང་འབྲེལ་བ་ཡི་དམ་ཞི་ཁྲོ་རབ་འབྱམས་ཀྱི་ལྷ་ཚོགས་རྣམས་ཀྱི༴ ཁྱད་པར་དུ་ཡང་རྡོ་རྗེ་རྣམ་པར་འཇོམས་པའི་ལྷ་ཚོགས་རྣམས་ཀྱི༴ དཔལ་མགོན་དམ་པ་ཆོས་སྐྱོང་བའི་བསྲུང་མ་ཡེ་ཤེས་ཀྱི་སྤྱན་དང་ལྡན་པ། རྫུ་འཕྲུལ་གྱི་ཞབས་དང་ལྡན་པ་མཐུ་སྟོབས་ཀྱི་རྩལ་དང་ལྡན་པ་རྣམས་ཀྱི༴ ལས་བྱེད་
འཇིག་རྟེན་ཕོ་ཉ་དྲག་པོའི་མཐུ་རྩལ་ནུས་པ་ཅན་རྣམས་ཀྱི༴ བདེན་པ་ཆེན་པོའི་བྱིན་གྱིས་བརླབས་ཀྱི༴ ཞེས་སྤྱིར་སྨོས་ནས། དགྲ་ཡིན་ན། སངས་རྒྱས་བསྟན་པའི་སྤྱི་དགྲ། དཔལ་ལྡན་བླ་མའི་སྐུ་དགྲ། དམ་པའི་ཆོས་ཀྱི་སྨོད་དགྲ། དགེ་འདུན་ཚོགས་ཀྱི་སྡང་དགྲ། སྐྱེ་འགྲོ་སེམས་ཅན་ཡོངས་ལ་འཚེ་བ་རྣམས་དང༌། ཁྱད་པར་དུ་རྣལ་འབྱོར་པ་བདག་ཅག་འཁོར་དང་བཅས་པ་དམ་པའི་ཆོས་སྒྲུབ་པ་ལ་བར་དུ་གཅོད་པ་དང༌། སྦྱིན་པའི་བདག་པོ་འཁོར་དང་བཅས་པའི་ལུས་ངག་ཡིད་གསུམ་ལ་གནོད་པར་བྱེད་ཅིང༌། བསམ་སྦྱོར་ཕྱིན་ཅི་ལོག་བྱེད་པའི་བྱད་མ་འདི་ཞེས་སམ། སྔ་དགྲ་ལག་ཏུ་ཁྱེར་བ། ཕྱི་དགྲ་ཡིད་ལ་སེམས་པ། ད་ལྟ་དངོས་སུ་སྦྱོར་བའི་ལས་ངན་གྱི་དགྲ་བོ་བསམ་པ་ངན་པ་སྦྱོར་བ་རྩུབ་པ་ཕོད་འཛུགས་པ། དོ་བསྡོ་བ་འདི་རྣམས་ཀྱི་ཕོ་ལྷ། དགྲ་ལྷ། ཞང་ལྷ། ཡུལ་ལྷ། ལྷན་ཅིག་སྐྱེས་པའི་ལྷ། སྲོག་གི་ལྷ། བསྲུང་སྐྱོབས་རྒྱུད་བསྐུལ་བའི་འཇིག་རྟེན་འདས་མ་འདས་གང་ཡིན་ཡང་རུང༌། མཐོ་སྲིད་པའི་རྩེ་མོ་ནས། དམའ་དམྱལ་ཁམས་ཡན་ཆོད། བར་སྟོང་གསུམ་གྱི་འཇིག་རྟེན་གྱི་ཁམས་ཕྱོགས་བཞི་མཚམས་བརྒྱད་གང་ན་གནས་པ་ཐམས་ཅད་ཉོན་ཅིག །ཅེས་པ་དང༌། ནད་ཡམ་སོགས་བགེགས་ཡིན་ན། བདག་ཅག་སློབ་དཔོན་ཡོན་མཆོད་རྣམས་ཀྱི་གནས་ལུས་ལོངས་སྤྱོད་འཁོར་ཚོགས་དང༌། ཆོས་སྤྱོད་དང༌། དཔལ་འབྱོར་
བདེ་སྐྱིད་ལ་གནོད་པར་བྱེད་པ་དང༌། བསྟན་པ་དང་འཕྲིན་ལས་ལ་བར་དུ་གཅོད་པའི་འབྱུང་པོ་གདོན་བགེགས། ལྷ་ཀླུ་གནོད་སྦྱིན། ལྷ་མ་ཡིན། རྒྱལ་འགོང་བདུད། བཙན། མ་མོ་དལ་ཡམས་ཀྱི་བདག་མོ་ལ་སོགས་པ། སྣང་སྲིད་ལྷ་སྲིན་སྡེ་བརྒྱད་ཀྱི་རིགས་གང་ཡིན་ཡང་རུང༌། ཞེས་འདོན་པ་སྤོ། མཆོད་སྦྱིན་གྱི་གཏོར་མ་གཟུགས་སྒྲ་དྲི་རོ་རེག་བྱ་འདོད་པའི་ཡོན་ཏན་ལྔ་དང་ལྡན་པ་འདི་དང༌། བཟློག་གླུད་ཕུང་པོ་དང་ཁམས་དང་སྐྱེ་མཆེད་དང་དབང་པོ་དྲུག་དང༌། ཡན་ལག་ཉིང་ལག་དོན་སྙིང་ཐམས་ཅད་ཚང་ཞིང༌། གོས་རྒྱན་སྣ་ཚོགས་དང་བཅས་པ་འདིས་ཚིམ་པར་གྱིས་ལ། ཁྱེད་རྣམས་གནོད་ཅིང་གདུག་པའི་བསམ་སྦྱོར་ཉེ་བར་ཞི་ནས་རང་གི་གནས་སུ་འགྲོ་བར་གྱིས་ཤིག །གང་དག་བསམ་སྦྱོར་ངན་པ་དེ་དག་མི་གཏོང་ན། དེ་བཞིན་གཤེགས་པ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ཀྱི་རྡོ་རྗེ་རབ་ཏུ་འབར་བས་མགོ་བོར་བསྣུན་ཞིང་བསྐལ་པའི་མེས་ཚིག་པར་གྱུར་ཅིག། བདག་ཅག་སློབ་དཔོན་ཡོན་མཆོད་རྣམས་ཀྱི་ལུས་ལ་གནོད་པའི་ནད་བཞི་བརྒྱ་རྩ་བཞི། གདོན་སྟོང་ཕྲག་བརྒྱད་ཅུ། ནད་ཡམས་དལ་ཁ་ཐམས་ཅད་ཕྱིར་བཟློག་པར་གྱུར་ཅིག །སྔོན་ཀྱི་ལས་དང་འཕྲལ་གྱི་རྐྱེན་ལས་གྱུར་པའི་འབྱུང་པོ་མི་དང་མི་མ་ཡིན་པའི་གནོད་པ་འཁོན་གྲིབ་ལྟས་ངན་བྱུར་དང་སྐལ་བ་ངན་པ་ཐམས་ཅད་ཕྱིར་བཟློག་པར་གྱུར་ཅིག །ཕ་རོལ་ཀྱི་མཐུ་དང་
བྱད་ཁ་མནན་གཏད་འཁྲུལ་འཁོར་ལ་སོགས་པའི་རྦོད་གཏོང་ཐམས་ཅད་ཕྱིར༴ དེས་བཟླས་པའི་སྔགས་དང་བྱད་ཁ་རྦད་འདྲེ་ཐམས་ཅད་དེ་ཉིད་ལ་བཟློག་པར༴ རྨི་ལམ་ངན་པ་དང༌། མཚན་མ་ངན་པ་དང༌། ལྟས་ངན་པ་དང༌། ལོ་སྐེག་ཟླ་སྐེག་ཞག་སྐེག་ཟ་མའི་སྐེག་ཆགས་ཆེ་ཉམས་ང་བ་བཀྲ་མི་ཤིས་པ་ཐམས་ཅད་ཕྱིར༴ གཞན་ཡང་སྡང་བར་བྱེད་པའི་དགྲ། གནོད་པར་བྱེད་པའི་བགེགས་གཟའ་དང་རྒྱུ་སྐར། དམུ་དང་བདུད། བཙན་དང་གཤིན་རྗེ། ཀླུ་གཉན་ས་བདག །རྒྱལ་འགོང་ཐེ་རང༌། དམ་སྲི་སེན་མོའི་རིགས་ཀྱི་གནོད་པ་ཐམས་ཅད་ཕྱིར༴ མདོར་ན་བདག་དང་ཡོན་བདག་འཁོར་དང་བཅས་པའི་ཕྱི་ནང་གསང་གསུམ་གྱི་ཉོན་མོངས་བར་ཆད་མི་མཐུན་པའི་ཕྱོགས་ཐམས་ཅད་ཕྱིར་བཟློག་པར་གྱུར་ཅིག །མེད་པར་གྱུར་ཅིག །ཞི་བར་གྱུར་ཅིག །མི་འབྱུང་བར་གྱུར་ཅིག །དཀོན་མཆོག་བསླུ་བ་མེད་པ་དང༌། །ཆོས་ཉིད་བདེན་པའི་བྱིན་རླབས་ཀྱིས། །དགྲ་བགེགས་གནོད་པ་བཟློག་པ་དང༌། །བསྲུང་སྐྱོབས་མཐུ་དང་ལྡན་གྱུར་ཅིག །ཨོཾ་སརྦ་དུཥྟན་པྲ་ཏྱངྒི་ར་ཕཊ། རཀྵ་རཀྵ་ཀུ་རུ་སྭཱཧཱ། ཞེས་གཏོར་མ་དྲག་ཏུ་འཕངས། ལྷག་མ་མ་ལུས་པར་བྱ། གཏོར་མ་ཁ་ཕུབ་བ་ལ་རྡོག་པ་གཡོན་པས་མནན་སྟངས་ཙམ་བྱ། ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་པཱ་ན་ཡེ། མཧཱ་ཡཀྵ་སེ་ན་པ་ཏ་ཡེ། ན་མོ་བཛྲ་ཀྲོ་དྷཱ་ཡ། མཧཱ་དཾཥྟོཊ་ཀ་ཊ་བྷཻ་ར་ཝཱ་ཡ། ཨ་སི་
མུ་ས་ལ། བ་ར་ཤུ་པ་ཧསྟཱ་ཡ། ཨོཾ་བཛྲ་ཨ་མྲྀ་ཏ་ཀུཎྜ་ལི། ཁ་ཁ་ཁཱ་ཧི་ཁཱ་ཧི། ཧུ་ལུ་ཧུ་ལུ། ཏིཥྛ་ཏིཥྛ། བྷནྡྷ་བྷནྡྷ། ཧ་ན་ཧ་ན། ད་ཧ་ད་ཧ། གརྫ་གརྫ། བི་སྤོ་ཊ་ཡ་བི་སྤོ་ཊ་ཡ། སརྦ་བིགྷྣཱན། བི་ནཱ་ཡ་ཀཱ་ན། མཧཱ་ག་ན་པ་ཏི། ཛི་ཝི་ཏ། ཨནྟ་ཀ་ར་ཡ་ཧཱུཾ་ཕཊ་སྭཱཧཱ། ཨོཾ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཅེས་དྲག་ཏུ་བཟླས་སོ། །དགྲ་ལ་བྱེད་ན། མཁར་ངོས་ལ་རྒྱག །ཀླུའི་གནོད་པ་བཟློག་ན། ཆུ་བོར་སྐྱལ་ལོ། །དེ་ནས་ཀུན་གྱི་ཕྱི་མིག་མི་བལྟ་བར་སློབ་དཔོན་གྱིས་རྟིང་མནན་ཏེ། བསྲུང་བའི་སྔགས་བཟློས་ཤིང་ལོག་ལ། གོང་གི་བདག་བསྐྱེད་ཀྱི་ཡེ་ཤེས་པ་ཕྱུང་ལ་མཆོད་བསྟོད་བསྡུས་པ་བྱེད། མ་ཕྱུང་པར་རྣལ་འབྱོར་བླ་མེད་ལྟར་བྱེད་ན། རང་ཉིད་ལ་མཆོད་བསྟོད་བྱས་ལ། རྡོ་རྗེ་སེམས་དཔའི་ཡི་གེ་བརྒྱ་བ་ཅི་རིགས་བཟླས་ནས། མ་འབྱོར་པ་དང་ཉམས་པ་དང༌། །ཞེས་སོགས་བཟོད་གསོལ་དང༌། ཡེ་ཤེས་པ་ཕྱུང་ན། བཛྲ་མུཿ ནམ་མཁའི་ཡེ་ཤེས་པ་རང་བཞིན་གྱི་གནས་སུ་གཤེགས། རང་གི་དཔྲལ་བར་ཨོཾ། མགྲིན་པར་ཨཱཿ སྙིང་གར་ཧཱུཾ། དགེ་བ་འདི་ཡིས་མྱུར་དུ་བདག།རྡོ་རྗེ་རྣམ་འཇོམས་འགྲུབ་གྱུར་ནས། །སོགས་དང༌། སྟོན་མཆོག་དམ་པ་སོགས་དང༌། ཞི་བ་ཆགས་བྲལ་སོགས། །ཚོགས་ཀྱི་དམ་པ་སོགས་བཀྲ་ཤིས་བྱའོ། །དཀྱིལ་འཁོར་གྱི་ལས་ཀྱི་རྗེས་མི་མངོན་པར་བྱའོ། །ཕན་ཡོན་ནི་ངེས་པར་འཆི་བ་བསླུ་བ་དང༌། གཞན་གྱི་རྦོད་གཏོང་ཕྱིར་བཟློག་པ་དང༌། གདུག་པའི་ཀླུའི་གནོད་པ་སེལ་བ་དང༌། རིམས་ནད་ལ་
སོགས་པ་བསྲུང་བར་ནུས་པ་དང༌། སྡང་བའི་དགྲ་བརླག་པར་བྱེད་པ་ལ་སོགས་པ་ཕན་ཡོན་དཔག་ཏུ་མེད་ཀྱང༌། འདིར་གཙོ་བོར་རང་གི་གནོད་པ་བསྲུང་ཞིང༌། གཞན་གྱི་གནོད་པ་བཟློག་པ་ཡིན་ནོ། །དེ་ལྟར་གཏོར་མའི་ཆོ་ག་གསལ་བར་བྱས་པ་ཡིས། །དགེ་བ་འདི་ཡིས་འདི་བྱེད་སྐྱེ་བོ་མ་ལུས་རྣམས། །གདུག་པའི་གདོན་ལས་རྣམ་གྲོལ་ཚེ་རིང་ནད་མེད་དང༌། །བདེ་བ་ཕུན་སུམ་ཚོགས་པའི་འབྲས་བུ་མྱུར་འབྱིན་ཤོག །དོན་གཉེར་འགའ་ཞིག་གིས་ནན་གྱིས་བསྐུལ་བ་ལ་བརྟེན། ཁ་འབར་མའི་གཏོར་ཆེན་གྱི་ཆོ་ག་བ་རི་བའི་མན་ངག །སློབ་དཔོན་བསོད་ནམས་རྩེ་མོས་སྦྱར་བར་གྲགས་པ་ལ་ཡིག་ནོར་དང་ལྷད་དུ་མངོན་པ་ཚོ་སྤངས། ཅུང་ཟད་ཁ་བསྐོངས་བྱས་པ་ནི་ཀུན་དགའ་སྙིང་པོས་ཡིན་ནོ།། །།མངྒ་ལཾ། །གཅིག་ཞུས། །
ཨོཾ་སྭཱ་སྟི། ཇ་མཆོད་བདུད་རྩིའི་འབྱུང་གནས་ཞེས་བྱ་བ། བླ་མ་ལ་ཕྱག་འཚལ་ལོ། །རྣམ་དག་ཡིད་འོང་བདུད་རྩིའི་རྒྱ་མཚོ་ཆེ། །ཐ་མལ་འཁྲུལ་བའི་སྣང་བ་རབ་སྦྱངས་ཤིང༌། །ཡེ་ཤེས་ཆེན་པོའི་ངོ་བོར་བྱིན་གྱིས་བརླབས། །ཏིང་འཛིན་སྔགས་དང་ཕྱག་རྒྱས་རྒྱ་ཆེར་སྤེལ། །ཨོཾ་ཨཱཿཧཱུཾ། འདི་ནི་ཡིད་ལ་བསམས་པས་ཀྱང་འགྲུབ་བོ། །རབ་འབྱམས་ནམ་མཁའི་མཐའ་ཀླས་པར། །ལྷ་རྫས་མཆོད་པ་དཔག་མེད་སྤྲུལ། །ཚད་མེད་མཆོད་སྤྲིན་གསང་སྔགས་དང༌། །ཡིད་སྤྲུལ་སྨོན་ལམ་སྟོབས་ལས་བྱུང༌། །བདག་པོས་ཡོངས་སུ་མ་བཟུང་དང༌། །བདག་གཞན་ལོངས་སྤྱོད་ཐམས་ཅད་ཀྱང༌། །མཚན་འཛིན་དྲི་མ་ཀུན་སྤངས་ནས། །ཞིང་ཀུན་གང་བར་བྱས་ཏེ་འབུལ། །ཀུན་བཟང་རྣམ་འཕྲུལ་རྗེས་འགྲོ་བ། ཁ་དོག་དྲྀ་རོ་རེག་བྱའི་མཆོག །སྤྲོས་བྲལ་ཟུང་འཇུག་བདེ་བའི་རོ། །ཡེ་ཤེས་མཆོད་ཡོན་བླ་ན་མེད། ཁྱབ་བདག་རྗེ་བཙུན་ཆོས་ཀྱི་རྗེ། །རྩ་བའི་བླ་མར་མཆོད་པ་འབུལ། །ཡི་དམ་དཀྱིལ་འཁོར་ལྷ་ཚོགས་དང༌། །མཆོད་འོས་རྒྱ་མཚོར་བཞེས་སུ་གསོལ། །མཆོད་བྱ་མཆོད་བྱེད་མ་དམིགས་ཀྱང༌། །གཉིས་མེད་ཡེ་ཤེས་རང་སྣང་དུ། །ཟག་མེད་བདེ་ཆེན་འཕེལ་བ་དང༌། །ཚོགས་
གཉིས་འབྱོར་བའི་གཙོ་བོར་ཤོག །ཅེས་པའང་རང་གི་སློབ་མ་གྲགས་པ་བཟང་པོས་བསྐུལ་ནས། ཏཱ་ར་ནཱ་ཐས་སྦྱར་བ་སྟེ། ས་གའི་ཟླ་བའི་ཚེས་དྲུག་ལ་དིང་རི་གླང་བསྐོར་དུའོ། ༈ ན་མོ་གུ་རུ། རིགས་ཀུན་ཁྱབ་བདག་རྡོ་རྗེ་འཆང༌། །འཁོར་ལོ་སྡོམ་པ་འབར་བའི་གཙོ། །ཡེ་ཤེས་བདུད་རྩིའི་མཆོད་པ་འབུལ། །མཆོག་དང་ཐུན་མོང་དངོས་གྲུབ་སྩོལ། །སྤྱོད་པའི་རྡོ་རྗེ་བྷ་ཧུ་ལ། །རོང་ཟོམ་ལོཙྪ་འབམ་རོང་པ། །ཡེ་ཤེས་བདུད་རྩིའི་མཆོད་པ་འབུལ། །མཆོག་དང་ཐུན་མོང་དངོས་གྲུབ་སྩོལ། །ཨ་ཝ་དྷཱུ་ཏཱི་ཞང་སྟོན་རྗེ། །གཉོས་ཆེན་སངྒྷ་བྷ་དྲའི་ཞབས། །ཡེ་ཤེས་བདུད་རྩིའི་མཆོད་པ་འབུལ། །མཆོག་དང་ཐུན་མོང་དངོས་གྲུབ་སྩོལ། །འཇམ་དབྱངས་ཆོས་རྗེ་པཎྜི་ཏ། །གྲུབ་པའི་དཔའ་པོ་ས་སྐྱོང་མཚན། །ཡེ་ཤེས་བདུད་རྩིའི་མཆོད་པ་འབུལ། །མཆོག་དང་ཐུན་མོང་དངོས་གྲུབ་སྩོལ། །སྲིད་ཞིའི་དཔལ་གྱུར་འགྲོ་བའི་མགོན། །ལུང་རྟོགས་བསྟན་པའི་རྒྱལ་མཚན་འཛིན། །འཇམ་མགོན་ཀུན་དགའ་སྙིང་པོའི་ཞབས། །རྩ་བརྒྱུད་བླ་མར་མཆོད་པ་འབུལ། །རྒྱལ་བ་སྲས་བཅས་ཐམས་ཅད་དང༌། །བསྟན་སྲུང་དམ་ཅན་རྒྱ་མཚོ་ལའང༌། །ཡེ་ཤེས་བདུད་རྩིའི་མཆོད་པ་འབུལ། །མཆོག་དང་ཐུན་མོང་དངོས་གྲུབ་སྩོལ།། །།མངྒ་ལཾ།།