དཔལ་གུར་གྱི་མགོན་པོའི་དམར་ཆེན་གཏོར་བཟློག་གི་ཆོ་ག་བར་ཆད་ཀུན་སེལ།
དཔལ་གུར་གྱི་མགོན་པོའི་དམར་ཆེན་གཏོར་བཟློག་གི་ཆོ་ག་བར་ཆད་ཀུན་སེལ་ཞེས་བྱ་བ་བཞུགས་སོ། །
ཨོཾ་སྭཱ་སྟི། བླ་མ་དམ་པ་རྣམས་ལ་ཕྱག་འཚལ་ལོ། །འདིར་དཔལ་ནག་པོ་ཆེན་པོ་གུར་གྱི་མགོན་པོའི་གཏོར་མའི་ལས་ཚོགས་ལས། བཟློག་པ་གཙོ་བོར་གྱུར་པའི་དམར་ཆེན་གཏོར་མའི་རིམ་པ་ནི་འདི་ཡིན་ཏེ། ཡིད་དང་མཐུན་པའི་གནས་སུ་བྲིས་སྐུ་སོགས་རྟེན་དགྲམ། གཏོར་མ་ལྔ་ཚར་མཆོད་པ་བསྐང་གཏོར་སོགས་བཤམས། དེ་དག་གི་མདུན་སོགས་ཇི་ལྟར་འོས་པར་རྡུལ་ཚོན་ནམ་ཆུ་ཚོན་གྱིས་དཀྱིལ་འཁོར་འབྲི་སྟེ། དབུས་སུ་ཆོས་འབྱུང་གྲུ་གསུམ་མཐིང་ནག་མཐའ་མེ་རིས་བསྐོར་བ། དེའི་དབུས་སུ་མཚོན་ཆ་འཁོར་ལོ་སྔོན་པོ་རྩིབས་དྲུག་པ། མུ་ཁྱུད་ནག་པོ་ལ་རྡོ་རྗེ་སྔོན་པོའི་ཕྲེང་བའམ། ཐོད་སྐམ་གྱི་ཕྲེང་བས་བསྐོར། རྩིབས་ཀྱི་བར་རྣམས་དམར་པོར་བྱ། རྩིབས་ལས་ལྟེ་བ་སུམ་འགྱུར་གྱི་ཆེ་བར་བྱེད་ཅིང་ལྟེ་བ་ལ་རེ་ཁ་ཉིས་རིམ་འཐེན། དེའི་ནང་དུ་ཆོས་འབྱུང་གྲུ་གསུམ་དམར་ནག་གཅིག་བྱ། དེའི་གྲུ་ཆད་ལྗང་ཁུ་ཡིན། ཆོས་འབྱུང་ནང་མ་ལ་ཡང་མེ་
རིས་འབྲི་ཐུབ་ན་ལེགས། དེའི་དབུས་སུ་ཉི་གདན་ལ་གྲི་གུག་དང༌། རྩིབས་རྣམས་ལ་ཉི་གདན་གྱི་སྟེང་དུ་ཕྱག་མཚན་ནམ་ཚོམ་བུ་ནག་པོ་རེ་འགོད། དཀྱིལ་འཁོར་གྱི་དབུས་མཉྫིའི་སྟེང་དུ། ལྕགས་སྣོད་ཡངས་པར་ནས་ནག་རྗེན་བཏགས་བྲེ་ལྔ་ལས་མི་ཉུང་བ། ཚ་བ་གསུམ་དང༌། ལྕགས་ཕྱེ་ཟངས་ཕྱེ་སོགས་བརྡར་བ་ལ་ཁྲག་དང་ཆང་བསྲེས་པའི་ཆུས་སྦྲུས་ཏེ། དབུས་སུ་གཏོར་མ་སྙིང་གཟུགས་མ་ལ་ཁྱད་པར་རྩེ་མོ་རྣོ་ཞིང་ཟུར་དོད་པ། འཁོར་བཤོས་བུ་གྲུ་གསུམ་ཕྲ་སང་ངེ་བ་དྲུག་གིས་བསྐོར་བ། དེ་རྣམས་གཙོ་བོའི་གཏོར་མའི་སུམ་ཆ་ཙམ་དུ་སླེབ་པ། དེ་དག་གི་བར་མཐེབ་སྐྱུས་བཀང་ནས་གཏོར་སྣོད་ཀྱི་ཁ་མཚམས་དང་མཉམ་པར་ཟན་གྱི་མུ་ཁྱུད་ལྕགས་རི་བཞིན་དུ་བསྐོར་བ། གཏོར་མ་དེ་ལ་གྲི་ཁྲག་དང་དུག་སྦྱར་བའི་ཁྲག་གཙང་མས་བྱུགས། །ཡུངས་གར་དང༌། མཚེ་དང་སྐྱེར་པ་སོགས་དུག་ཤིང་དང་ཚེར་མའི་རྩང་ཁྲག་གིས་བྱུགས་པས་བརྒྱན། ཟན་གྱི་མུ་ཁྱུད་ལ་རྩང་ཉི་ཤུ་རྩ་གཅིག་
སྲིན་མོ་འགྲོས་སུ་གཟུགས། གཞན་ཡང་ལིང་ཆུང་མགོ་བོ་ཐུར་དུ་ལྟ་བ་དང༌། མི་མགོ་སྐམ་རློན་སོགས་འཇིགས་སུ་རུང་བའི་རྒྱན་ཇི་ལྟར་འོས་པས་བརྒྱན། གཏོར་མ་དང་ཆོས་འབྱུང་གཉིས་ཀའི་ཟུར་རང་ལ་མི་སྟོན་པར་བཞེད། དེའི་མདུན་ནས་སླར་ཡང་ཆོས་འབྱུང་ངམ་མི་ལྤགས་སོགས་ཀྱི་གདན་ལ་ལྕགས་སྡེར་ལ་སོགས་པའི་སྣོད་དུ་ཟོར་གཏོར་གྲུ་གསུམ་མར་ནག་དུག་ཁྲག་གིས་བྱུགས་པ། ངོས་གསུམ་ལ་ཟན་གྱིས་འབུར་དོད་བྱས་ཏེ། ངོས་གཅིག་ལ་ཧཱུཾ། གཡས་སུ་བྷྱོཿ གཡོན་དུ་བཟློག་ཅེས་པ་ཡོང་བ་བྱ། འདི་ལའང་འབུལ་གཏོར་ལ་སོགས་པ་ཐུན་གཏོར་འདྲ་བ་གཅིག་ཀྱང་བཤམས། ཟོར་གཏོར་དེའི་གཡས་ནས་ཕར་རིམ་པ་བཞིན་དུ་སྐམ་ཐུན་རྣམས་བཤམ་སྟེ། རྡོ་ནག་གྲུ་གསུམ་ལ་དུག་ཁྲག་གིས་ཁྲམ་རིས་དང་བྷྱོཿ བྲིས་པ་བདུན་ལ་སོགས་པ་དང༌། དེ་འཕེན་པའི་འུར་རྡོ་སྐོར་ཐག་ནི་ཡུག་སྐྲ་རོ་སྐྲ་བསྲེས་པ་དང༌། འུར་མཐིལ་མི་ལྤགས་ལས་བྱས་པ་སོགས་བཞག །ལྕགས་སྣོད་དུ་ཡུངས་དཀར་ནག །ལྕགས་ཕྱེ་ཟངས་ཕྱེ་རྡོ་ཕྱེ་སྐེ་ཚེ་ཤིང་ཚེ་སོགས་སྣོད་སོ་སོར་བླུག་པའམ་གཅིག་ཏུ་བསྲེས་ལ་བཞག །མཚེ་ཤིང་ཁྲག་གིས་བསྐུས་པ་དང༌། འབྱོར་ན་ཐལ་ཆེན་ཡང་བཤམ། མདའ་འུག་སྒྲོ་མ་སྐྱེར་མ་དེ་གྲུ་གསུམ་མདེའུ་ལ་ཧཱུཾ་བཟློག་བྷྱོཿ བྲིས། ལྟོང་ལ་ལས་མཁན་གྱི་བསད་སྔགས་བྲིས། གཞུའི་མཆོག་མ་གཡས་གཡོན་ལ་རྦོད་རྦད་ཀྱི་སྔགས་བྲིས་པའང་བཤམ། ཟོར་གཏོར་གྱི་གཡོན་དུ་གྲི་ཁྲག་ལ་སོགས་པའི་ཁྲག་སྣ་སྣ་ཚོགས་ལ་དུག་སྣ་སྣ་ཚོགས་སྦྱར་བ་ཁྲག་ཐུན་དངོས་དང༌། ཁྱུ་མཆོག་གི་རྭ་གཡས་པའི་ནང་དུ་ཡང་དུག་ཁྲག་བླུག་པ་རེབས་ཁ་ཕུར་བ་དང༌། དུག་དང་ཆང་གིས་སྡུས་པའི་ཀོང་ཟོར་བདུན་དུ་ཡང་དུག་ཁྲག་ཅུང་ཟད་རེ་བླུག་པ་དང༌། །གྱོ་ཚལ་དང་ཐོད་ཚལ་དུ་ཡང་དུག་ཁྲག་བླུག་པ། ཅི་རིགས་བཤམས།
དེ་དག་གི་མདུན་དུ་རཀྟའི་མཆོད་ཡོན་དབང་ལྔའི་མེ་ཏོག་ཤ་རུས་ཀྱིས་བརྒྱན་པའི་ཞལ་ཟས་གྲུ་གསུམ་རྐང་གླིང་སོགས་དྲག་པོའི་མཆོད་པ་སྣ་ཚོགས་བཤམ། །སྒྲུབ་པ་པོའི་མདུན་ནམ། དམར་ཆེན་གཏོར་མའི་མདུན་དུ་འབྲུབ་ཁུང་གྲུ་གསུམ་མཐིང་ནག་མེ་རིས་འབར་བའི་ནང་དུ་ཚ་བ་གསུམ་དང་སྐེ་ཚེ་གྲི་ཁྲག་སོགས་སྦྱར་བའི་བག་ཟན་ལ་ལིང་ག་བཅོས། བྲིས་པའི་ལིང་ག་སྔགས་ཅན་དེའི་སྙིང་གར་བཅུག་ན་བཟང༌། དེ་མིན་དར་དམར་པོའི་རས་མ་གཅིག་ཚོན་སྐུད་སྣ་ལྔའམ་སྔོ་དམར་གྱིས་བསྡམས་ཏེ་སྙིང་གར་བཅུག དེའི་སྣེ་མོ་སྙིང་གའི་ཐད་ནས་ཕྱིར་བཏོན་ཏེ་སྐེ་ལ་སེ་ཆིངས་བཏབ། སྣོ་མོ་ཟངས་ཀྱི་ཕུར་པ་ལ་བཏགས་ཏེ་ཟོར་གཏོར་ལ་འཛུགས། གཞན་ཡང་ཡོ་བྱད་ཐམས་ཅད་ཚང་བར་བྱ་སྟེ། ཤ་དུམ་སྣ་ཚོགས་དང༌། ཕུད་མ་ཉམས་པ་དང༌། ཁྲག་གཙང་མ་སོགས་འོག་ཏུ་དགོས་པ་ཐམས་ཅད་འཛོམ་པར་བྱའོ། །དེ་དག་ནི་དེའི་ཐུན་མོང་མ་ཡིན་པའི་ཤོམས་ཡིན་ལ། དེའི་སྔོན་དུ་བསྐང་གསོའི་ཤོམས་ཐམས་ཅད་ཚང་བར་བྱ་དགོས་སོ། །དེ་ནས་སྒྲུབ་པ་པོ་རྣམས་འདུས་ཏེ། སྔོན་འགྲོ་གཏོར་མ་ཡི་དམ་གང་བྱེད་རང་རང་གི་ཆོ་གའི་ལུགས་བཞིན་བཏང༌། དེ་མ་ཐག་བགེགས་གཏོར་ཡང་སྤྱི་དང་མཐུན་པར་གཏོང་སྟེ་ཆ་གསུམ་བཞིན་ནོ། །དེ་ནས་གནས་ཡོ་བྱིན་རླབས་ཡི་དམ་གྱི་ཆོ་ག་གང་ཡིན་དེའི་ལུགས་བཞིན་དུ་བྱ། དེ་རྗེས་བདག་བསྐྱེད་བཟླས་པ་དང་བཅས་པ་དཀྱིལ་འཁོར་ཉེར་བསྡུའི་བར་དུ་བྱའོ། །དེ་ནས་མདུན་བསྐྱེད་ཀྱི་བྱ་བ་ལ་གཉིས་ལས། མདུན་བསྐྱེད་སྤྱིའི་བྱ་བ་ནི། ཡི་དམ་ཆོས་སྐྱོང་གི་གཏོར་བསྔོ་ནས་གཞི་བདག་གཏོར་མའི་བར་དུ་གཏོར་ཆོག་དཀྱུས་ཙམ་གཏོང་བའམ། བསྐང་གསོ་དང་འབྲེལ་ནའང་དེའི་བྱ་བ་ཚར་གཅིག་སྐབས་འདིར་རྫོགས་པར་བྱས་ན་ལེགས་སོ། །གཉིས་
པ་ཁྱད་པར་གྱི་མདུན་བསྐྱེད་སྒྲུབ་པ་ནི། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ་ཀྱིས་བསངས། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོཧཾ། གིས་སྦྱངས། སྟོང་པའི་ངང་ལས་རང་གི་མདུན་དུ་ཡི་གེ་ཁཾ་ལས་དགྲ་བགེགས་སྒྲོལ་བའི་གཞལ་མེད་ཁང་མཐིང་ནག་གྲུ་གསུམ་འབར་བ། སྒོ་མེད་ལྕགས་ཀྱི་མུན་ཁང་རྒྱ་དང་ཚད་ཡོངས་སུ་ཆད་པ་མེད་པ། ཕྱི་རོལ་མེ་རླུང་འཚུབས་ཤིང༌། ནང་ཁྲག་ཞག་འཁྲུགས་པ། ཕྱི་ནང་ཐམས་ཅད་དུར་ཁྲོད་འཇིགས་སུ་རུང་བས་ཁྱབ་པ། དེའི་དབུས་སུ་བྷྲཱུཾ་ལས་བྱུང་བའི་འཁོར་ལོ་ནག་པོ་རྩིབས་དྲུག་པ། གནམ་ལྕགས་འབར་བའི་རང་བཞིན་རྩེ་མོ་རྣོ་བ། དགྲ་བགེགས་ཐམས་ཅད་མནན་པའི་སྟེང་འཁོར་ལོའི་ལྟེ་བར་པཾ་ལས་པདྨ་དང༌། རཾ་ལས་ཉི་མའི་སྟེང་དུ་ཧཱུཾ། ཞེས་པ་ནས། དབུས་ན་བཞུགས་པའོ།།ཨོཾ་ཤྲཱི་མཧཱ་ཀཱ་ལ་ཡ་ཧཱུཾ་ཧཱུཾ་ཕཊ་སྭཱཧཱ། ཞེས་པའམ། སྤེལ་ཚིག་ཅན་ལན་གསུམ་གྱིས་གཙོ་བོ་བསྐྱེད། འཁོར་ལོའི་མདུན་གྱི་རྩིབས་ལ་མཾ་ལས་ཨེ་ཀ་ཛ་ཊྀ། ཞེས་པ་ནས། སྒྲ་སྒྲོགས་པའོ། །ཨོཾ་རོ་རུ་རོ་རུ་བི་ཏིཥྛ་བ་ཏོ་སི་ཀ་མ་ལ་རཀྵ་སི་ཧཱུཾ་བྷྱོཿཧཱུཾ། ཞེས་པའམ་དེ་ཉིད་སྤེལ་ཚིག་དང་བཅས་པས་ཡུམ་ཆེན་དང་ལྷ་མོ་བསྐྱེད། གཞན་ཡང་ལྕམ་དྲལ་ནས། བསྐོར་བར་གྱུར། ལྷོ་སྟོད་ཀྱི་རྩིབས་ལ་ཡ་ལས་ནག་པོ་གནོད་སྦྱིན་སོགས། རྣ་ཆ་ཅན། ཨོཾ་ཀཱ་ལ་ཡཀྵ་ཡེ་ཧཱུཾ་ཕཊ། ལྷོ་སྨད་ཀྱི་རྩིབས་ལ་མཾ་ལས་ནག་མོ་གནོད་སྦྱིན་སོགས། ལན་ཚར་ཅན། ཨོཾ་ཀཱ་ལི་ཡཀྵ་ཎི་ཧཱུཾ་ཕཊ། ནུབ་ཀྱི་རྩིབས་ལ་ཏྲི་ལས་བུ་ཊ་སོགས།
ན་བཟའ་ཅན། ཨོཾ་ཡཀྵ་པུ་ཊ་ཡེ་ཧཱུཾ་ཕཊ། བྱང་སྟོད་ཀྱི་རྩིབས་ལ་དྲི་ལས་བྷ་ཌ་སོགས། འཛིན་ཞིང་གསོལ་བ། ཨོཾ་རུ་ཊ་བྷ་ཊ་ཡེ་ཧཱུཾ་ཕཊ། བྱང་སྨད་ཀྱི་རྩིབས་ལ་བྷྱོཿལས་སྲིང་མོ་སོགས། མེ་འབར་བ། ཨོཾ་རུ་ལུ་རཀྵ་སི་ཧཱུཾ་ཕཊ། ལྔ་ཆར་ཡང་ཞེས་པ་ནས། བསྐོར་བར་གྱུར། ཨ་ལི་ཨ་ལི་མ་ཛ་ཛ་ཤཾ་ཤཾ་ལི་ཤི་ངེད་ཨ་ཤྭ་ངེད་མུ་སྨུགས་པུ་ཊི་ཨ་ལི་མ་ཛ་ཛཿ ནག་མོ་ཤ་ལ་རུབས་རུབས་ཛ་ཛཿ ཞེས་པ་ལན་གསུམ་དང༌། ཨོཾ་རོ་རུ་རོ་དུ་ཏྲི་ཙ་པ་ལ་ཨ་ཤུག་མེ་མ་ཧཱུཾ་མ་བྷྱོཿཛཿཛཿ ལན་གསུམ་གྱིས་ལྷ་རྣམས་བསྐྱེད་ཟིན་པ་བྱིན་གྱིས་བརླབས། ཟོར་གཏོར་སོགས་ལ་དམིགས་ནས། དཀྱིལ་འཁོར་ཆེན་པོའི་མདུན་ཕྱོགས་སུ་དུར་ཁྲོད་ཆེན་པོའི་དབུས་མེ་རླུང་འཁྲུགས་པའི་ནང་ཁྲག་མཚོ་ཁོལ་མའི་སྟེང་དུ་མཐིང་ནག་གྲུ་གསུམ་འབར་བའི་དཀྱིལ་འཁོར་པད་ཉི་ལ་དགྲ་བགེགས་ཕོ་མོ་བསྒྱེལ་བའི་སྟེང་དུ་ཧཱུཾ་མཐིང་ནག་འབར་བ་ལས་འོད་འཕྲོས། དགྲ་བགེགས་གདུག་པ་ཅན་ཐམས་ཅད་ཚར་བཅད། ཚུར་འདུས་ཡོངས་སུ་གྱུར་པ་ལས། གསོད་བྱེད་ལས་ཀྱི་མགོན་པོ་སྐུ་མདོག་མུན་པ་ལྟར་གནག་པ། ཕྱག་གཡས་གྲི་གུག་འཕྱར་ཞིང་སྡིགས་པས་དགྲ་བགེགས་ཀྱི་སྲོག་རྩ་གཅོད་པ། ཕྱག་གཡོན་ཐོད་ཁྲག་སྙིང་བཅས་ཐུགས་ཀར་འཛིན་ཞིང་ཞལ་དུ་གསོལ་བ། སྤྱན་གསུམ་གནོད་བྱེད་ལ་སྡང་མིག་ཏུ་གཟིགས་ཤིང་ཞལ་གདངས་པ། མཆེ་བ་ཟངས་ཡག་ཏུ་གཙིགས་པ། སྐྲ་སེར་གྱེན་དུ་བརྫེས་པ། གད་རྒྱངས་དྲག་པོས་བདུད་སྡེ་
འཇོམས་པ། དར་ནག་གི་འཇོལ་བེར་དང༌། གསེར་གྱི་སྐེ་རགས་དང་སག་ཏིའི་ལྷམ་གྱོན་པ། ཐོད་པ་སྐམ་རློན་གྱི་ཕྲེང་བ་དང་སྦྲུལ་གྱིས་བརྒྱན་པ། ཞབས་གཉིས་གཡོན་བརྐྱང་བས་གྱད་ཀྱི་དོར་སྟབས་ཀྱི་བཞུགས་ཤིང༌། འཁོར་གཤིན་རྗེ་ཕོ་མོ་དང༌། སྲིན་པོ་ཕོ་མོའི་ཚོགས་ཀྱིས་བསྐོར་བའོ། །ཨོཾ་མཧཱ་ཀཱ་ལ་རུ་ཏྲ་ས་མ་ཡ་ཧཱུཾ་ཕཊ། གཡས་ཀྱི་སྐམ་ཟོར་རྣམས་ཡི་གེ་ཏྲི་ནག་པོ་ལས་དྲེགས་པ་ཕོ་སྔོ་སྐྱ་གཡས་མཚོན་ཆ་སྣ་ཚོགས་དང༌། གཡོན་ཞགས་པ་འཕེན་པ་དཔག་ཏུ་མེད་པ་རླུང་དམར་འཚུབ་མའི་དབུས་ན་གནས་པ་དང༌། གཡོན་ཕྱོགས་ཀྱི་རློན་ཟོར་རྣམས་མཾ་ལས་དྲེགས་པ་མོ་ཚོགས་བུད་མེད་དམར་ནག །གཡས་ཁྲམ་ཤིང་དང་གཡོན་ནད་རྐྱལ་ཐོགས་པ་དཔག་ཏུ་མེད་པ་རྣམས་དུག་མཚོ་དང་ཁྲག་མཚོར་རྒྱུ་བའོ། །དེ་དག་གི་མཐའ་སྐོར་དུ་བདུད་དང་མ་མོ་དང་ལྷ་སྲིན་སྡེ་བརྒྱད་ལ་སོགས་པ་དྲེགས་པའི་ཚོགས་དཔག་ཏུ་མེད་པ་ས་དང་བར་སྣང་ཐམས་ཅད་ཁྱབ་པར་གྱུར། ཐམས་ཅད་ཀྱི་དཔྲལ་བར་ཨོཾ་ཞེས་པ་ནས། འོག་མིན་རྣམ་པར་སྣང་མཛད་ཀྱི་ཐུགས་ཀ་ནས་མགོན་པོ་རང་བཞིན་གྱི་གནས་ནས་ལྷ་མོ། རྡོ་རྗེ་གདན་གྱི་སྤོ་ནས་ལས་མགོན་མིང་སྲིང་རྣམས་དང༌། དུར་ཁྲོད་ཆེན་པོ་རོ་ཐང་ནག་པོ་ནས་ལས་ཀྱི་མགོན་པོ་མཧཱ་ཀཱ་ལ་ཟངས་གྲི་ཅན་དང༌། དུར་ཁྲོད་ཆེན་པོ་བརྒྱད་ལ་སོགས་པ་ཕྱོགས་མཚམས་ཐམས་ཅད་ནས་དྲེགས་པ་ཕོ་མོ་བསམ་གྱིས་མི་ཁྱབ་པ་དང་བཅས་པ་བཛྲ་ས་མཱ་ཛཿ
ཧཱུཾ་རྡོ་རྗེ་འཆང་གི་སྤྱན་སྔ་རུ། །ཇི་ལྟར་ཁས་བླངས་དམ་བཅས་པའི། །དམ་ཚིག་ཚུལ་བཞིན་དྲན་མཛོད་ལ། །བདག་གི་དོན་ཕྱིར་གཞལ་ཡས་འདིར། །ནག་པོ་ཆེན་པོ་སྤྱན་འདྲེན་ན། །རང་གི་དམ་ཚིག་སེམས་ཤིང་བྱོན། །བོས་པའི་ཚེ་ན་སྙན་མ་སྲ། །གཡབས་པའི་ཚེ་ན་སྤྱན་མ་བརྟུལ། །རྦད་པའི་ཆེ་ན་མཐུ་མ་ཆུང༌། །བསྟེན་པའི་ཚེ་ན་རྒྱང་མ་རིང༌། ཀྱཻ། བོས་སོ་ནག་པོ་སྙན་མ་སྲ། །གཡབས་སོ་ནག་པོ་སྤྱན་མ་བརྟུལ། །རྦད་དོ་ནག་པོ་མཐུ་མ་ཆུང༌། །བསྟེན་ནོ་ནག་པོ་རྒྱང་མ་རིང༌། །སྒྲུབ་པོ་ནག་པོ་ཐུགས་མ་གཡེལ། །བཀུར་རོ་ནག་པོ་འཕྲད་མ་དོག །དུར་ཁྲོད་མི་རོའི་ཐང་ཆེན་ནས། །ཏིང་འཛིན་སྔགས་དང་ཕྱག་རྒྱ་ཡིས། །ནག་པོ་ཆེན་པོའི་ཐུགས་དམ་བསྐུལ། །གདུག་ཅན་མ་ལུས་ཚར་གཅོད་ཅིང༌། །སངས་རྒྱས་བསྟན་པ་བསྲུང་མཛད་ཕྱིར། །སྤྱན་འདྲེན་མྱུར་དུ་གཤེགས་སུ་གསོལ། །བཀའ་ཡི་ལས་མཁན་སྟོབས་པོ་ཆེ། །བདུད་དང་སྲིན་པོ་འདུལ་བྱེད་ཅིང༌། །མདོག་ནག་གཟུགས་ཐུང་གཟི་བརྗིད་ཅན། །བསྟན་པ་ཡོངས་ཀྱི་དགྲ་ལྷ་སྟེ། །དམ་ཅན་ཡོངས་ཀྱི་ཚེ་འཛིན་པ། །དམ་ཉམས་རྣམས་ཀྱི་སྲོག་གཅོད་མཛད། ཁྱོད་ཀྱི་ཐུགས་དམ་བདག་བསྐུལ་ན། །གནས་འདིར་སྤྱན་འདྲེན་གཤེགས་སུ་གསོལ། །མགོན་པོ་གནས་འདིར་བྱོན་ནས་ཀྱང༌། །འཕྲིན་ལས་རྣམ་བཞི་སྒྲུབ་ཏུ་གསོལ། །ཨོཾ་ཨེ་ཧྱེ་ཧི་མཧཱ་ཀ་རུ་ཎི་ཀ་མཧཱ་ཀཱ་ལ་ཛཿཧཱུཾ་བཾ་ཧོ། ས་མ་ཡ་ཨཾ་གུ་ཤ་ཛཿ རོལ་ཆེན་རྒྱུན་བསྲིངས། ཧཱུཾ་ཚོགས་ཆེན་ཚོགས་གཉིས་འཇིགས་པའི་སྐུ། །
མཐིང་ནག་ཆེན་པོ་དྲག་ཤུལ་ཅན། །དུར་ཁྲོད་གནས་ཤུལ་དཔའ་བོ་ཆེ། །ལྷ་ཡི་དཔའ་བོ་བདུད་འདུལ་རྣམས། །དགྲ་བགེགས་བསྒྲལ་བའི་ཏི་ར་དང༌། །འབར་བའི་གདན་ལ་བཞུགས་སུ་གསོལ། །འབར་བའི་གདན་ལ་བཞུགས་ནས་ཀྱང༌། །བདག་གིས་བཅོལ་བའི་ལས་ཀུན་སྒྲུབས། །སྔོན་གྱི་དམ་ཚིག་མ་གཡེལ་བར། །དགྱེས་ཤིང་མཆོད་པ་བཞེས་ནས་ཀྱང༌། །སངས་རྒྱས་བསྟན་པ་བསྲུང་བ་དང༌། ཁྱད་པར་སྡེ་འདིའི་མགོན་མཛོད་ཅིག །བསྟན་ལ་གནོད་བྱེད་དགྲ་དང་བགེགས། །སྣ་ཚོགས་ཐབས་ཀྱིས་འདུལ་བའི་ཕྱིར། །མཆོད་པའི་གནས་མཆོག་དམ་པ་འདིར། །དགྱེས་ཤིང་བརྟན་པར་བཞུགས་སུ་གསོལ། ཨོཾ་མཧཱ་ཀཱ་ལ་ཡེ་ས་མ་ཡ་ཀ་མ་ལ་ཡེ་སུརྱ་ཡེ་ཤེ་བ་ཡེ་ཏིཥྠ་ལྷན། པདྨ་ཀ་མ་ལ་ཡེ་སྟྭཾ། དེ་ནས། ཨོཾ་ཤྲཱི་མཧཱ་ཀཱ་ལ་ཡེ་མཧཱ་ཀཱ་ལི་དེ་བཱི་ཡེ་གྲྀཧྞེ་དཾ་ཨརྒྷཾ་ནས། རྒྱས་པར་མཛད་དུ་གསོལ་གྱི་བར་མཆོད་པ་དང་དམ་བཞག་གཏོར་ཆོག་ལྟར་བྱ། རང་གི་སྙིང་ག་ནས་འོད་ཟེར་འཕྲོས། གནོད་བྱེད་དགྲ་བགེགས་བྱད་མ་དང་བཅས་པ་ཐམས་ཅད་བཀུག་སྟེ་གཏོར་མ་ལ་ཐིམ་པར་གྱུར། བར་འདིར་གཏོར་ཆོག་ལྟར་གཏོར་མ་སྔགས་ཙམ་གྱིས་ཕུལ། མཆོད་བསྟོད་བསྡུས་པ་གཏོར་བསྔོ་བཞིན་བྱས་ལ། ཧཱུཾ་དུར་ཁྲཽད་ཆེན་པོ་འབར་བའི་དཀྱིལ་འཁོར་ནས། །མགོན་པོ་ནག་པོ་ཆེན་པོ་འཇིགས་པའི་སྐུ། །སངས་རྒྱས་བསྟན་པ་ཤིན་ཏུ་རྒྱས་མཛད་མགོན། །ཆོས་སྐྱོང་ཆེན་པོ་ཁྱོད་ལ་བདག་བསྟོད་དོ། །ཕྱི་ནང་ལས་བྱེད་གདུག་པ་སྲིན་པོའི་ཚུལ། །དམ་ཚིག་བསྲུང་ལ་རྟག་ཏུ་གྲོགས་མཛད་ཅིང༌། །དམ་ཚིག་ཉམས་པའི་འཆི་
བདག་གཙོ་བོ་མཛད། །མགོན་པོ་དམ་ཚིག་ཅན་ལ་བདག་བསྟོད་དོ། །ལས་ཀྱི་མགོན་པོ་མཧཱ་ཀཱ་ལ་ནི། །སངས་རྒྱས་སྟོང་གི་བསྟན་པ་བསྲུང་བ་པོ། །བླ་མ་དམ་པའི་སྐུ་དགྲ་འདུལ་བ་པོ། །ལས་ཀྱིས་མགོན་པོ་ཁྱོད་ལ་ཕྱག་འཚལ་ལོ། །སྔོན་ཚེ་བདེ་གཤེགས་སྤྱན་སྔར་བཀའ་བསྒོས་ཏེ། །བསྟན་པ་སྲུང་དང་འགྲོ་ལ་ཕན་གདགས་ཕྱིར། །དམ་བཅས་མ་འདའ་དམ་ཚིག་རྗེས་དགོངས་ལ། །གསོལ་གདབ་ལས་མཛོད་བདག་དོན་ཡོངས་རྫོགས་མཛོད། །ལས་ཀྱི་མགོན་པོ་མཧཱ་ཀཱ་ལ་ནི། །ཤ་ཟ་གནོད་སྦྱིན་མ་མོ་མཁའ་འགྲོར་བཅས། །འདིར་གཤེགས་རྒྱན་གྱི་གཏོར་མ་འདི་བཞེས་ཤིག །ཅེས་པ་ལ་སོགས་པས་བསྟབ་པོ། །སྐབས་འདིར་ཡང་བསྐང་བ་ཇི་ལྟར་འོས་པ་བྱ། ཧཱུཾ་ནག་པོ་ཆེན་པོ་འཁོར་བཅས་ལ། །མཐུན་པའི་དམ་རྫས་འབུལ་བ་ནི། །དམར་གྱི་ཨརྒྷཾ་རྒྱ་མཚོ་དང༌། །དབང་པོ་ལྔ་ཡི་མེ་ཏོག་དང༌། །སྨན་སྦྱར་ཚུལ་ཆེན་བདུག་སྤོས་དང༌། །ཤ་རུས་དམར་གྱི་གཏོར་མ་དང༌། །ཏིལ་དང་ཞུན་ཆེན་མར་མེ་དང༌། །སྨན་དང་ཨ་མྲྀ་ཏ་དང་དྲི། །འབྲུ་ནག་མར་གྱིས་བྱུགས་པའི་བཤོས། །རྐང་གླིང་རྔ་དང་ཆ་ལང་སྒྲ། །ཕྱི་ནང་གསང་བ་དེ་ཉིད་ཀྱི། །མཆོད་རྫས་ནམ་མཁའི་མཐའ་ཀླས་པ། །ལྷ་ཆེན་དཔལ་འབར་ཁྱོད་ལ་འབུལ། །བསྟན་པ་རྒྱས་པར་བྱ་བའི་ཕྱིར། ཁྱོད་ཀྱི་ཐུགས་དམ་གཉན་སྐོང་ནས། །བཞེས་ཤིག་རོལ་ཤིག་དགྱེས་པར་མཛོད། །ཨོཾ་ཤྲཱི་མཧཱ་ཀཱ་ལ་ཡ་ཨི་དཾ་ཨརྒྷཾ། པུཥྤེ། དྷཱུ་པེ།
ཨཱ་ལོ་ཀེ གནྡྷེ། ནཻ་ཝེ་ཏེ། ཤཔྟ་མཧཱ་པཱུ་ཛ་ས་མ་ཡ་ཧཱུཾ། ཧཱུཾ་ཁྲོ་བོ་གདུག་པ་འདུལ་མཛད་པའི། །དཔལ་ལྡན་ནག་པོ་ཆེན་པོ་དང༌། །ལྷ་མོ་ནག་མོ་ལ་སོགས་པའི། །ལས་ཀྱི་མགོན་པོ་ཕོ་ཉར་བཅས། །གསོད་དང་གཅོད་ལ་དགའ་བ་རྣམས། །ཤ་ཁྲག་དམར་ལ་དགའ་བ་ཡི། །བཤན་པ་འཁོར་བཅས་མ་མོ་དང༌། །མཁའ་འགྲོ་གཏུམ་མོའི་ཚོགས་བཅས་ལ། །ཤ་ཆེན་དམར་གྱི་གཏོར་མ་དང༌། །རཀྟའི་རྒྱ་མཚོ་རང་བསྐྱིལ་ནས། །ཀེང་རུས་རི་ལྟར་སྤུངས་པ་དང༌། །ཚོགས་དང་མཆོད་པ་གཏོར་མ་འདིས། །ཆོས་སྐྱོང་ཁྱོད་ཀྱི་ཐུགས་དམ་བསྐང༌། །གདུག་པ་ཅན་རྣམས་བསྒྲལ་བའི་ཕྱིར། །གསོལ་ཞིག་འཐུང་ཞིག་དགེས་པར་མཛོད། །རོལ་ཞིག་དགོངས་ཤིག་ཁ་རཾ་ཁཱ་ཧི། ཧཱུཾ་འབྲུ་སྣ་ཤ་སྣ་ཁྲག་སྣ་སོགས། །ཚོགས་ཀྱི་འཁོར་ལོའི་ཡོ་བྱད་འདིས། །མགོན་པོ་ནག་པོ་འཁོར་བཅས་ཀྱི། །ཐུགས་དམ་གཉན་པོ་སྐོང་གྱུར་ཅིག །གཡར་དམ་གཉན་པོ་གསོ་བར་གསོལ། །དེ་ལྟར་ཐུགས་དམ་གཉན་སྐོང་བས། །རྒྱུ་སྦྱོར་ཡོན་གྱི་བདག་པོ་དང༌། །བདག་གི་བར་ཆད་བཟློག་ཏུ་གསོལ། །བསྟན་པ་ལ་སྡང་ལོག་ལྟ་ཅན། །སེམས་ཅན་ཡོངས་ལ་གནོད་བྱེད་ཅིང༌། །བདག་ལ་ལོག་པར་སེམས་པ་རྣམས། །ཟོ་ཞིག་འཐུངས་ཤིག་ཁ་རཾ་ཁཱ་ཧི། ཧཱུཾ་དུར་ཁྲོད་ཆེན་པོའི་གཞལ་ཡས་ཁང༌། །རོ་ཐང་འབར་བ་ནག་པོ་ནས། །སྨུག་ནག་འབར་བའི་ཀློང་དཀྱིལ་ནས། །ཤིན་ཏུ་མི་བཟད་འབར་བའི་སྐུ། །གཏུམ་ཆེན་མཧཱ་ཀཱ་ལ་ཁྱོད། །སྐུ་མདོག་མཐིང་ནག་འབར་བ་ལ། །
ཐལ་ཆེན་ཞག་གིས་ཀུན་ཏུ་བྱུགས། །དཔལ་ལྡན་མགོན་པོ་ནག་པོ་ཡི། །ཡོན་ཏན་འཕྲིན་ལས་བསམ་མི་ཁྱབ། །སིང་གྷ་ལ་ཡི་དུར་ཁྲོད་དུ། །བདུད་དང་སྲིན་པོ་འདུལ་མཛད་པའི། །རྒྱལ་བའི་ཐུགས་རྗེས་སྐུ་སྤྲུལ་པ། །གསོད་བྱེད་མཧཱ་ཀཱ་ལ་ཁྱོད། ཕྱོགས་མཚམས་སྟེང་འོག་ཐམས་ཅད་ནས། །སྤྲུལ་པ་ཕོ་ཉའི་ཚོགས་ཀྱིས་བསྐོར། །མཐུན་པའི་དམ་རྫས་འདི་དག་གིས། །བསྐང་ངོ་ཁྱེད་ཀྱི་ཐུགས་དམ་བསྐང༌། །ཟློག་ཅིག་བདག་གི་རྐྱེན་རྣམས་བཟློག །བསྐང་བཟློག་མཆོད་པ་བཞེས་སུ་གསོལ། །ཡུམ་ཆེན་ལྷ་མོ་ནག་མོ་དང༌། །མ་མོ་མཁའ་འགྲོའི་འཁོར་གྱིས་བསྐོར། །དྲག་ཤུལ་སྟོབས་ལྡན་གསུས་པོ་ཆེ། །མཐིང་ནག་འབར་བ་འཇིགས་པའི་སྐུ། །དུར་ཁྲོད་ཆས་ཀྱིས་རབ་ཏུ་བརྒྱན། །ལྟོ་འགྲོ་རྣམས་ཀྱིས་ཡན་ལག་དཀྲིས། །དབུ་སྐྲ་གྱེན་དུ་བརྫེས་པ་ཡིས། །སྟེང་གི་ལྷ་རྣམས་འདར་ཞིང་དངངས། །ལྗགས་ནི་དྲག་པོའི་གློག་ལྟར་འགྱུ། །སྟོང་གསུམ་དགྲ་ལ་ནད་འབེབས་ཤིང༌། །མཆེ་བ་ཟངས་ཡག་གཙིགས་པ་ཡིས། །དགྲ་བགེགས་ཀུན་གྱི་དོན་སྙིང་འབྱིན། །དཔའ་བོ་སྟག་གི་ཤམ་ཐབས་ཅན། །ལོག་ལྟ་ཚར་གཅོད་ཐོད་ཕྲེང་གསོལ། །རྣམ་རྟོག་གཅོད་མཛད་གྲི་གུག་གཡས། །ཉོན་མོངས་ཟད་མཛད་བནྡྷ་གཡོན། །གདུག་པ་འདུལ་མཛད་འཁྲུགས་པའི་སྐུ། །དྲག་པོ་མེ་སྟག་ཕྱོགས་བཅུར་འགྱེད། །མ་རུང་འཇོམས་པའི་ལས་ལ་དཔའ། །དགྲ་བགེགས་ཐམས་ཅད་རླག་བྱེད་པ། །འཁོར་བཅས་ཁྱེད་ཀྱི་ཐུགས་དམ་བསྐང༌། །ཕོ་ཉ་རྔམས་
བྱེད་དགྲ་ལ་རྒྱུག །བཅོལ་བའི་འཕྲིན་ལས་སྒྲུབ་པར་མཛོད། །ཅེས་པ་འདི་གཙོ་བོར་ལས་མགོན་ཟངས་གྲི་ཅན་གྱི་བསྐང་བ་ཡིན་ནོ། །དེ་ནས་ལིང་ག་བསྒྲལ་བའི་ལས་ནི། བསྐྱེད་དང་དགུག་གཞུག་དམོད་བསྐུལ་བྱ། །ལྷ་དབྱེ་སྒྲོལ་ཞིང་ལིང་རོ་བསྟབ། །ཅེས་པ་ལྟར་དོན་ཚན་དྲུག་གོ །དང་པོ་བསྐྱེད་པ་ནི། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཁཾ་ལས་བྱུང་བའི་དྲག་པོའི་ལས་ཀྱི་འབྲུབ་ཁུང་གནམ་ལྕགས་འབར་བ་ལས་གྲུབ་པ་ཁ་དོག་ནག་པོ་དབྱིབས་གྲུ་གསུམ་རྒྱ་ཆེ་བ་གཏིང་ཟབ་པ། ནང་ཁྲག་ཞག་འཁྲུགས་པ། དུག་གི་ན་བུན་དང༌། ནད་ཀྱི་འཚུབ་མ་དང༌། ཚོན་ཆའི་སེར་བ་འཁྲུགས་པ་བྱ་དང་གཅན་གཟན་གདུག་པ་ཅན་དང་གཤེད་མ་མ་རུངས་པ་དང༌། འབར་བའི་མེས་ཡོངས་སུ་ཁྱབ་པ་ལས་ཀྱི་བཙོན་ཁང་ཆེན་པོའི་ནང་དུ་ཎཱྀ་ལྗང་ཁུ་ལས་བྱུང་བའི་དགྲ་བོ་ཕོ་མོའི་ཚོགས་དང༌། ཏྲི་དཀར་པོ་ལས་ཕོ་གདོན་སྲི་སེར་པོ་ལས་མོ་གདོན་རྣམས་ཕུང་ཁམས་སྐྱེ་མཆེད་དབང་པོ་རྣམས་ཚང་བ་འཇིགས་ཤིང་སྐྲག་ལ་འདར་ཞིང་ཉམས་ཐག་པ་མགོན་སྐྱབས་དང་བྲལ་བའི་རྣམ་པ་ཅན་དུ་གྱུར། དེ་ལྟར་ལན་གསུམ་སོགས་ཡང་ཡང་གསལ་བཏབ་ན་བཟང་ངོ། །གཉིས་པ་དགུག་གཞུག་ནི། ཧཱུཾ་བྷྱོཿ ཤར་ཕྱོགས་སྒོ་མ་སེང་གེའི་གདོང༌། །ཕྱག་ན་ལྕགས་ཀྱུ་འབར་བ་ཐོགས། །དགྲ་བགེགས་འགུགས་པའི་ལས་མཛད་མ། །གྲངས་མེད་འཁོར་གྱིས་བསྐོར་བ་སྟེ། །ལྕགས་ཀྱུ་ཐོགས་པ་སྤྲིན་ལྟར་གཏིབས། །དེ་འདྲ་གཅིག་པུར་མ་ངེས་ཏེ། ཁམས་གསུམ་ཁྱབ་པར་སྤྲུལ་ནས་ཀྱང༌། །དགྲ་བགེགས་གནོད་
བྱེད་ད་ཁུག་ཅིག །ཉམས་པའི་ཁྲག་ལ་མངའ་མཛད་མ། །བསྟན་པ་གཤིགས་པའི་དགྲ་རྣམས་ཀྱི། །ཆུ་ཁམས་ནུས་པ་ཐམས་ཅད་ཆོམ། །བརླན་གཤེར་ཁྲག་གི་མདངས་ཕྲོལ་ཞིག །ཨོཾ་སིང་ཧ་མུ་ཁ་ཧཱུཾ་ཕཊ། བཛྲ་ཨཾ་གུ་ཤ་ཛཿ ལྷོ་ཕྱོགས་སྒོ་མ་གཟིག་གི་གདོང༌། །ཕྱག་ན་ཞགས་པ༴ དགྲ་བགེགས་གཞུག་པའི༴ གྲངས་མེད༴ ཞགས་པ་ཐོགས་པ༴ དེ་འདྲ་གཅིག་པུར༴ ཁམས་གསུམ༴ དགྲ་བགེགས་གནོད་བྱེད་ད་ཆིངས་ཤིག །ཉམས་པའི་རུས་ལ༴ བསྟན་པ༴ས་ཁམས༴ སྲ་བ་རུས་པའི་མདངས་ཕྲོལ་ཞིག །ཨོཾ་ཙི་ཏཱ་མུ་ཁ་ཧཱུཾ་ཕཊ། བཛྲ་པཱ་ཤ་ཧཱུཾ། ནུབ་ཕྱོགས་སྒོ་མ་དོམ་གྱི་གདོང༌། །ཕྱག་ན་ལྕགས་སྒྲོག༴ དགྲ་བགེགས་བཅིང་པའི༴ གྲངས་མེད༴ ལྕགས་སྒྲོག་ཐོགས་པ༴ དེ་འདྲ༴ ཁམས་གསུམ༴ དགྲ་བགེགས་གནོད་བྱེད་ད་སྡོམས་ཤིག །ཉམས་པའི་དྲོད་ལ༴ བསྟན་པ༴ མེཁམས༴ འཇུ་བྱེད་དྲོད་ཀྱི་མདངས་ཕྲོལ་ཞིག །ཨོཾ་རཾ་ཀྵ་མུ་ཁ་ཧཱུཾ་ཕཊ། བཛྲ་སྤོ་ཊ་བཾ། བྱང་ཕྱོགས་སྒོ་མ་དྲེད་ཀྱི་གདོང༌། །ཕྱག་ན་དྲིལ་བུ༴ དགྲ་བགེགས་ལྟུང་བའི༴ གྲངས་མེད༴ དྲིལ་བུ་ཐོགས་པ༴ དེ་འདྲ༴ ཁམས་གསུམ༴ དགྲ་བགེགས་གནོད་བྱེད་མྱོས་པར་གྱིས། ཉམས་པའི་དབུགས་ལ༴ བསྟན་པ༴ རླུང་ཁམས༴ འགྱུ་བ་དབུགས་ཀྱི་མདངས་ཕྲོལ་ཞིག །ཨོཾ་ཏཱ་རཀྵུ་མུ་ཁ་ཧཱུཾ་ཕཊ། བཛྲ་ཨཱ་བེ་ཤ་ཧོཿ དགུག་གཞུག་བདེན་བ་དར་བརྗོད་པ་ནི། ན་མོ་རྗེ་བཙུན་རྩ་བ་དང་བརྒྱུད་
པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང༌། ཕྱོགས་བཅུ་དུས་གསུམ་གྱི་སངས་རྒྱས་རྣམས་ཀྱི་བཀའ་བདེན་པ་དང༌། ལུང་དང་རྟོགས་པས་བསྡུས་པ་དམ་པའི་ཆོས་རྣམས་ཀྱི༴ ཐེག་པ་གསུམ་ལ་གནས་པ་འཕགས་པའི་དགེ་འདུན་རྣམས་ཀྱི༴ དེ་བཞིན་གཤེགས་པ་དང་རྡོ་རྗེ་རིན་པོ་ཆེ་དང་པདྨ་དང་ལས་ཀྱི་རིགས་སུ་བཞུགས་པའི་ལྷ་ཚོགས་རྣམས་ཀྱི༴ སྙིང་པོ་དང་ཕྱག་རྒྱ་དང་གསང་སྔགས་དང་རིགས་སྔགས་ཀྱི་ལྷ་ཚོགས་རྣམས་ཀྱི། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་བདེན་པ་དང༌། ཀུན་རྫོབ་རྒྱུ་འབྲས་བསླུ་བ་མེད་པའི་བདེན་པ་དང༌། བྱ་བའི་རྒྱུད། སྤྱོད་པའི་རྒྱུད། རྣལ་འབྱོར་རྒྱུད། རྣལ་འབྱོར་བླ་ན་མེད་པའི་རྒྱུད་དེ་རྒྱུད་སྡེ་ཆེན་པོ་བཞི་དང་འབྲེལ་བའི་ཡི་དམ་ཞི་ཁྲོ་རབ་འབྱམས་ཀྱི་ལྷ་ཚོགས་རྣམས་ཀྱི་བཀའ་བདེན་པ་དང༌། ཁྱད་པར་དུ་ཡང་བཅོམ་ལྡན་འདས་འདི་ཞེས་བྱ་བའི་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞེས་སྐབས་དེར་ཡི་དམ་གང་ལ་བརྟེན་ནས་བསྒྲུབས་པའི་མཚན་ནས་སྨོས་སོ། །དཔལ་ནག་པོ་ཆེན་པོ་གུར་གྱི་མགོན་པོ། ཡུམ་ཆེན་ཨེ་ཀ་ཛ་ཊི། དཔལ་ལྡན་ལྷ་མོ་འདོད་པ་ཁམས་ཀྱི་དབང་ཕྱུག་མ། གསོད་བྱེད་ལས་ཀྱི་མགོན་པོ། བྲན་བདུད་གཤེན་རྗེ་ནག་པོ་དམ་ཅན་གནོད་སྦྱིན་ཡབ་ཡུམ་བཀའ་སྔོད་པུ་ཊ་མིང་སྲིང༌། ཕྱག་བརྙན་སྒོ་སྲུང་གདོང་བཞི། ལས་བྱེད་སྡེ་བཞི་རུ་འདྲེན། རྣམ་འཕྲུལ་གཎྜིའི་ཁྲོ་ཚོགས། དྲེགས་པ་ཕོ་རྒྱུད། མོ་རྒྱུད་བཀའ་ཉན་སྡེ་བརྒྱད་ཀྱི་དམག་ཚོགས་འཁོར་དང་
བཅས་པའི་བཀའ་བདེན་པ་དང༌། ཡང་སྐབས་འདིར་གཏོར་གྲལ་ལ་བཞུགས་པའི་ཆོས་སྐྱོང་གཞན་ཡོད་ན་ཡང་དེ་དང་དེའི་མཚན་ནས་སྨོས་ཤིང་བདེན་པ་བདར། གཞན་ཡང་དཔལ་མགོན་དམ་པ་ཆོས་སྐྱོང་བའི་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྫུ་འཕྲུལ་གྱི་ཞབས་དང་ལྡན་པ། མཐུ་སྟོབས་ཀྱི་རྩལ་དང་ལྡན་པ་རྣམས་ཀྱི་བདེན་པ་དང༌། ཞེས་སོགས་མཚམས་སྦྱར་ནས། བདེན་པ་དང་བདེན་པ་ཆེན་པོའི་བྱིན་གྱིས་བརླབས་ཀྱིས། སྤྱིར་སངས་རྒྱས་བསྟན་པའི་སྤྱི་དགྲ། དཔལ་ལྡན་བླ་མའི་སྐུ་དགྲ། དགེ་འདུན་ཚོགས་ཀྱི་སྡང་དགྲ། སྐྱེ་འགྲོ་སེམས་ཅན་ཡོངས་ལ་འཚེ་བ་རྣམས་དང༌། ཁྱད་པར་དུ་རྣལ་འབྱོར་པ་བདག་ཅག་འཁོར་དང་བཅས་པ་དམ་པའི་ཆོས་སྒྲུབ་པ་ལ་བར་དུ་གཅོད་ཅིང༌། བསམ་སྦྱོར་ཕྱིན་ཅི་ལོག་བྱེད་པའི་མིར་གྱུར་པའི་དགྲ་མི་མ་ཡིན་པའི་བགེགས། རྦད་འདྲེ་རྦོད་གཏོང་བྱད་མ་སྔ་དགྲ་ལག་ཏུ་ཁྱེར་བ། ཕྱི་དགྲ་ཡིད་ལ་སེམས་པ། ད་ལྟ་དངོས་སུ་སྦྱོར་བའི་ལས་ངན་གྱི་དགྲ་བོ། བསམ་པ་ངན་པ། སྦྱོར་བ་རྩུབ་པ། ཕོད་འཛུགས་པ། དོ་བདོ་བའི་དགྲ་བགེགས་བྱད་མ་གང་ཡིན་པ་དེ་དག་ཐམས་ཅད། མཐོ་སྲིད་པའི་རྩེ་མོ་ནས། དམའ་དམྱལ་ཁམས་ཡན་ཆོད། བར་སྟོང་གསུམ་གྱི་འཇིག་རྟེན་གྱི་ཁམས། ཕྱོགས་བཞི་མཚམས་བརྒྱད་གང་ན་གནས་ཀྱང་སྐད་ཅིག་ཐང་ཅིག་ཡུད་ཙམ་འདི་ལ་མིང་དང་རུས་སུ་སྨོས་པ་གཟུགས་དང་རྟགས་སུ་བྱས་པའི་མཚན་མ་རྫས་ཀྱི་ལིང་ག་འདི་ཉིད་ལ་ཁུག་ཤིག ཕོབ་ཅིག་ཎྲྀ་ཡཾ་ཛཿ དྲི་ཡཾ་ཛཿ ཞེས་དང༌། ཨ་ལི་ཨ་ལི་མ་སོགས། :བོད་[འབོད་]སྔགས་ཀྱི་གཤམ་དུ། སརྦ་བིགྷྣཱན་ཤཱ་ཏྲུན་ཨཱ་ཀརྵ་
ཡ་ཛཿཛཿ ཞེས་བཏགས་པ་མང་དུ་བཟླ། རོལ་མོའི་སྒྲ་དྲག་ཏུ་བྱའོ། །དེ་ལྟར་ལན་གསུམ་ལ་སོགས་པ་ཡིད་ཆེས་རྙེད་ཀྱི་བར་དུ་དགུག་གཞུག་བྱ། །གསུམ་པ་དམོད་བསྐུལ་ནི། ཧོཿ རྡོ་རྗེ་སློབ་དཔོན་དཀོན་མཆོག་གསུམ་པོ་ཡི། །བཀའ་ཡི་སྲུང་མ་ཐམས་ཅད་དགོངས་སུ་གསོལ། །བསྟེན་བསྟེན་བསྒྲུབས་བསྒྲུབས་པ་རྣམས་དགོངས་སུ་གསོལ། །གསོལ་གསོལ་མཆོད་མཆོད་པ་རྣམས་དགོངས་སུ་གསོལ། །ཆོས་སྐྱོང་བསྟན་པ་མི་སྲུང་ཅི་ཞིག་སྲུང༌། །དམ་ཅན་དམ་ལ་མི་གནས་ཅི་ལ་གནས། །སྔགས་བདག་དགྲ་བགེགས་མི་སྒྲོལ་ཅི་ཞིག་སྒྲོལ། །ཕྱག་བརྙན་འཕྲིན་ལས་མི་སྒྲུབ་ཅི་ཞིག་སྒྲུབ། །བདག་ཅག་རྣལ་འབྱོར་སྒྲུབ་པ་པོ། །སྲུང་མ་དམ་ཅན་ཁྱེད་རྣམས་བསྟེན། །སྡང་བྱེད་དགྲ་ལ་མཐུ་མ་ཆུང༌། །གནོད་བྱེད་བགེགས་ལ་རྩལ་མ་ཞན། །བཅོལ་བའི་ལས་ལ་བང་མ་བུལ། །རེ་ལྟོས་དཔུང་གཉེན་ཁྱེད་ལ་ཞུ། །དམག་དཔུང་རམ་མདར་ཁྱོད་སྦྲོན་གྱི། །དམ་བཅས་མ་ཡེལ་མཐུ་རྩལ་བསྐྱེད། །ལྷ་ཁང་གནས་གཞིའི་སྲུང་མ་མཛོད། །ཡུལ་ཁྱིམ་འཁོར་གྱི་མེལ་ཚེ་མཛོད། །མི་ནོར་ཕྱུགས་ཀྱི་གཉེར་ཁ་མཛོད། །གནོད་བྱེད་འཇོམས་པའི་དགྲ་ལྷ་མཛོད། །བདག་གིས་མ་ཉེས་མ་ཡོའོ། །གཟུ་དང་དཔང་དུ་དཀོན་མཆོག་བཞུགས། །ཞལ་ལྕེ་སྡེ་བརྒྱད་ཡོངས་ཀྱིས་ཆོད། །བདེན་པའི་ལས་ཀྱི་རྒྱབ་དཔུང་ཞུ། །གནོད་བྱེད་ལས་ངན་དགྲ་བོ་འདི། །སྤྱིར་གྱི་དཀོན་མཆོག་དབུ་འཕང་སྨད། །སྐྱེ་འགྲོ་ཡོངས་ཀྱི་བདེ་སྐྱིད་བཅོམ། །སྒོས་སུ་རྣལ་འབྱོར་སྒྲུབ་ལ་སྡང༌། །བདག་གིས་ཞི་བའི་ཐབས་བྱས་ཀྱང༌། །གདུག་
སེམས་ཅན་དེ་ཕྱིར་ཞིང་འཁྲུག །འདི་འདྲ་ཞི་བས་མི་ཐུལ་གྱི། །འདི་ཡི་གནས་ལུས་ལོངས་སྤྱོད་ཀུན། །ད་ལྟ་ཉིད་དུ་རྡུལ་དུ་རློགས། །གནམ་གྱི་འཇུ་ཐག་སྟེང་ནས་ཆོད། །ས་ཡི་ལྟེ་ཕུར་འོག་ནས་ཕྱུང༌། །དཀོན་པའི་ཚེ་སྲོག་གཉིས་དང་ཕྲོལ། །ལས་ཀྱི་རླུང་གིས་རྒྱབ་ནས་ཕུལ། །དུས་ཀྱི་མུན་པས་མདུན་ནས་བསུས། །ལོ་དང་ཟླ་བར་མ་བཞག་ཅིག །ཞག་དང་ཟ་མར་རྟགས་ཕྱུང་ཞིག །ཅེས་རོལ་མོའི་སྒྲ་དང་བཅས་ཏེ། རྦོད་རྦད་བསད་གསུམ་གྱི་སྔགས་དྲག་ཏུ་བཟླ་བ་གལ་ཆེ། །བཞི་པ་ལྷ་དང་དབྱེ་བ་ནི། གོང་བཞིན་བདེན་བདར་དྲག་ཏུ་བྱས་ནས། དགྲ་བགེགས་བྱད་མ་དེ་ཐམས་ཅད་སྲུང་སྐྱོབས་བྱེད་པའི་ལྷ་དང་ཕྱེ་ཤིག །ཕོ་ལྷ་དགྲ་ལྷ་ཞང་ལྷ་སྲོག་ལྷ་ཡུལ་ལྷ་ལ་སོགས་པ་མགོན་སྐྱབས་གདོང་གྲོགས་བྱེད་པའི་ལྷ་དང་ཕྱེ་ཤིག །འཇིག་རྟེན་དང་འཇིག་རྟེན་ལས་འདས་པའི་སྲུང་བ་དང་བྱིན་རླབས་རང་དང་གཞན་གྱིས་བྱས་པའི་ནུས་མཐུ་དང་ཕྱེ་ཤིག ཅེས་ལན་གསུམ་བརྗོད་པའི་མཐར་རོལ་མོ་དྲག་ཏུ་བརྡུང་ཞིང༌། ལིང་ག་ལ་གུ་གུལ་གྱིས་བདུག །ལྕམ་དྲལ་གྱི་སྙིང་པོ་དང༌། ཤཱ་ས་ན་དང༌། རྦོད་རྦད་བསད་གསུམ་གྱི་མཐར། དགྲ་བགེགས་འདི་རྣམས་འགོ་བའི་ལྷ་ཐམས་ཅད་དང་བི་དྭེ་ཤཱ་ཡ་ཧཱུཾ་ཕཊ། ཅེས་བཏགས་པ་དྲག་ཏུ་བཟླ། བསྒྲུབ་བྱའི་གནས་གསུམ་ནས་འཇིག་རྟེན་འཇིག་རྟེན་འདས་པའི་སྲུང་བ་དང་བྱིན་རླབས་གང་ཡོད་ཡི་གེ་འབྲུ་གསུམ་གྱི་རྣམ་པས་ཚུར་བསྡུས་ཏེ་རང་ལ་བསྟིམ་པའི་དམིགས་པ་བྱའོ། །ལྔ་པ་ལིངྒ་སྒྲོལ་བ་ནི། ཕུར་པ། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཧཱུཾ་ལས་གསོད་བྱེད་ལས་ཀྱི་མགོན་པོ་སྐུ་མདོག་ནག་པོ་
སྐུ་སྟོད་ཁྲོ་བོ་གྲི་གུག་འཕྱར་ཞིང་ཐོད་ཁྲག་འཛིན་པ། ལྟེ་བ་མན་ཆད་ཕུར་བུའི་རྣམ་པ་དགྲ་བགེགས་ཐམས་ཅད་འཇོམས་པའི་མཐུ་དང་ལྡན་པར་གྱུར། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། འཇིག་རྟེན་འཇིག་རྟེན་འདས་པའི་མཐུ་སྟོབས་ཐམས་ཅད་བཛྲ་ས་མཱ་ཛཿ ཛཿཧཱུཾ་བཾ་ཧོཿ ཨོཾ་ཤྲཱི་མཧཱ་ཀཱ་ལ་ཡེ་བཛྲ་ཀཱི་ལི་ཀཱི་ལ་ཡ་གནོད་བྱེད་མཱ་ར་ཡ་ཧཱུཾ་ཕཊ། ཅེས་ཉི་ཤུ་རྩ་གཅིག་ཙམ་བཟླས། ཤཱ་ས་ན་ཚར་གསུམ་དང༌། ཡེ་དྷརྨ་ཚར་གསུམ་བརྗོད་ལ། ཕུར་པ་ལ་ཁྲག་དང་ཡུངས་ཀར་གཏོར། དེ་ནས་ཕུར་བུ་ལག་ཏུ་ཐོགས་ནས་བསྒྲིལ་ཞིང༌། ཧཱུཾ་ཁྲོས་པའི་གཟུགས་ཅན་གདུག་པ་གང༌། །ཇི་ལྟར་རྒྱལ་བས་མི་འདུལ་བ། །དམ་བཅས་ཇི་བཞིན་རྗེས་དགོངས་ལ། །ད་ལྟ་ཉིད་དུ་འདིར་ཁུག་ཅིག །འབར་བ་མེ་ཡི་ཁུང་བུ་རུ། །རབ་ཏུ་འཆིངས་ནས་མནར་བ་ཡི། །གཟུགས་ཀྱི་ལིང་གར་ཕུར་བུ་ཆེ། །ནག་པོ་ཆེན་པོ་ཕྱག་གཉིས་པ། གནམ་ལྕགས་འབར་བའི་ཟུར་གསུམ་དབལ། །རབ་ཏུ་བསྣུན་ནོ་མནར་བའི་སེམས།།རྣམ་རྟོག་མ་རིག་བྲལ་གྱུར་ནས། །ནག་པོ་ཆེན་པོས་རྗེས་བཟུང་ཤོག །སརྦ་ཤ་ཏྲུན་བིགྷྣཱན་ཀཱི་ལི་ཀཱི་ལ་ཡ་མཱ་ར་ཡ་ཧཱུཾ་ཕཊ་དང༌། སྔགས་དྲག་ཏུ་བཟླས་ཤིང༌། ཕུར་བུ་ལིང་གའི་སྙིང་གར་བཏབ། བསྒྲུབ་བྱ་གནས་སྤར་བའི་དམིགས་པ་བྱ། དེ་ནས་རོལ་ཆེན་ཡུན་བསྲིང་བའི་ངང་ནས། ཤཱ་ས་ན་དང༌། ཐུན་སྔགས་བཟླ་བཞིན་དུ་སྐམ་ཐུན་རློན་ཐུན་སོགས་ཅུང་ཟད་བརྡེག །ཤཱ་ས་ན་དང་རྦོད་རྦད་བསད་གསུམ་བཟླ་བཞིན་དུ་རལ་གྲིའམ་གྲི་གུག་གིས་རྐང་པ་ནས་མགོ་བོའི་
བར་དུ་གཏུབ་བོ། །དྲུག་པ་ཞལ་དུ་བསྟབ་པ་ནི། སྐབས་འདིར་བདུད་རྩི་ལྔ་མཆོད་མཚོན་བྱེད་གསར་པ་གཅིག་ཀྱང་བཤམས་ལ། ལས་ཀྱི་རྡོ་རྗེ་ཞིག་གིས་འཆམ་སྟབས་དང་བཅས་ནས། ལིང་རོ་སྟོབ་པའི་སྟངས་ཀ་བྱེད་པའི་སྲོལ་འདུག་པ་ལྟར་སྤྲོས་པ་ལ་དགའ་ན་བྱ་ཞིང༌། གང་ལྟར་ཡང་འདི་སྐད་ཅེས། ཧཱུཾ་དཀོན་མཆོག་བདེན་པའི་སྟོབས་དང་སྔགས་ཀྱི་མཐུས། །ཞིང་བཅུར་གྱུར་པའི་དགྲ་བགེགས་ཀུན་བསྒྲལ་བའི། །ཤ་ཁྲག་རུས་པར་བཅས་པའི་ཕུང་པོ་འདི། །ཡེ་ཤེས་བདུད་རྩིའི་རྒྱ་མཚོར་བྱིན་བརླབས་ནས། །རྩ་བརྒྱུད་བླ་མའི་ཞལ་དུ་ཁ་རཾ་ཁཱ་ཧི། །ཡི་དམ་ལྷ་ཚོགས་ཞལ་དུ་ཁ་རཾ་ཁཱ་ཧི། །ནག་པོ་ཆེན་པོའི་ཞལ་དུ༴ ཡུམ་ཆེན་རལ་གཅིག་ཞལ་དུ༴ འདོད་ཁམས་དབང་ཕྱུག་ཞལ་དུ༴ གསོད་བྱེད་ལས་མགོན༴ གནོད་སྦྱིན་ཡབ་ཡུམ༴ པུ་ཊ་མིང་སྲིང་ཞལ་དུ༴ སྒོ་སྐྱོང་ཁྲོ་མོའི་ཞལ་དུ༴ ཕོ་ཉ་ཡང་སྤྲུལ་ཞལ་དུ༴ གཎྜིའི་དམག་ཚོགས་ཞལ་དུ༴ རུ་འདྲེན་སྡེ་བཞིའི་ཞལ་དུ༴ དྲེགས་པ་ཕོ་མོའི་ཞལ་དུ༴ ལྷ་སྲིན་སྡེ་བརྒྱད་ཞལ་དུ༴ དམ་ཅན་རྒྱ་མཚོའི་ཞལ་དུ་ཁེ་ར་ཁཱ་ཧི། མཧཱ་མཾ་ས་ལ་ཁཱ་ཧི། མཧཱ་རཀྟ་ལ་ཁཱ་ཧི། མཧཱ་ཙིཏྟ་ལ་ཁཱ་ཧི། མཧཱ་ཀོ་རོ་ཙ་ན་ལ་ཁཱ་ཧི། ཞེས་པའི་མཐར་རྒྱུན་རོལ་དང་གཏོར་སྔགས་བྱ། ལིང་རོ་ནས་རྒྱུན་གཏོར་དང༌། བསྐང་གཏོར་ལ་ཅུང་ཟད་རེ་གསོས། སྤྲོ་ན་དྲག་པོའི་མཆོད་པ་བྱིན་རླབས་ཀྱི་ཚིག་བརྗོད། བསྡུ་ན་ཡིད་ཀྱིས་བསམ་པས་ཆོག་གོ །དགྲ་བགེགས་རྣམས་ནི་ཐམས་ཅད་ཀྱི། །རཀྟའི་རྒྱ་མཚོ་རབ་འཁྱིལ་བ། །སོགས། མཧཱ་ཀེང་ནི་རི་ཏི་
ཁཱ་ཧི་ཞེས་པའི་བར་དུ་བདུད་རྩི་ལྔ་མཆོད་ཀྱི་ཚིག་རྣམས་བརྗོད། རོལ་མོའི་ཚིག་འདོན་གྱི་སྐབས། དབྱངས་དང་རྔ་ཚིགས་བྱེད་ཅིང༌། གཞན་རྣམས་ལ་འདུར་གདངས་སྔགས་ཀྱི་སྐབས་ཕྱག་རྒྱ་དང་བཅས་པ་བྱེད་པ་ཕྱིས་ཀྱི་ལག་ལེན་དུ་སྣང་ལ། འོན་ཀྱང་མཐའ་གཅིག་ཏུ་མ་ངེས་སོ། །དེ་ནས་སྔར་ནས་སྡོགས་པའི་ཤ་དུམ་རྣམས་ཚོ་དགུར་བཅད། གཏོར་ཆེན་གྱི་གཡས་དང༌། ལིང་རོ་རྣམས་དུམ་བུ་མང་པོར་བཅས་པ་ཡང་ཚོ་དགུར་བྱས་པ་གཡོན་དུ་བཞག །ཆང་སྣོད་དང་རཀྟའི་སྣོད་ཇི་ལྟར་བདེ་བར་བཞག་ནས། ལས་ཀྱི་རྡོ་རྗེས་ལྕགས་སྣོད་གཅིག་ཏུ་ཤ་དུམ་དང་ལིང་རོ་ཚོ་རེ་བླུགས། །ཕུད་དང་རཀྟ་བྲན། མགོན་པོ་ལྕམ་དྲན་སོ་སོའི་གཏོར་སྔགས་ཚར་གསུམ། ཤཱ་ས་ན་ལན་གསུམ་གྱིས་ཕུལ་ཏེ། རོལ་ཆེན་དང་བཅས་གཏོར་ཆེན་ལ་བཏབ། དཔལ་ལྡན་མགོན་པོ་ནག་པོ་ས་བཅུའི་དབང་ཕྱུག་རྒྱལ་བ་ཀུན་གྱི་བཀའ་སྲུང༌། ལྷ་དམག་ཡོངས་ཀྱི་དེད་དཔོན། དུར་ཁྲོད་ཀུན་གྱི་ཞིང་སྐྱོང༌། ཆོས་གཞི་ཀུན་གྱི་སྲུང་མ། རིག་འཛིན་ཡོངས་ཀྱི་དགྲ་ལྷ། དམ་ཉམས་ཀུན་གྱི་སྲོག་གཅོད། གདུག་ཅན་ཀུན་གྱི་གཤེད་མ། བདུད་འདུལ་གྱི་དཔའ་བོ་ཆེན་པོ། ལྷ་ཆེན་དཔལ་འབར་ཁྱེད་ཀྱི་ཞལ་དུ་ཁ་ཁ་ཁཱ་ཧི་ཁཱ་ཧི། ཡང་ཚོ་གཉིས་པ་སྔར་བཞིན་བཤམ། ལྷ་མོའི་གཏོར་སྔགས་དང་དྲེགས་པ་ཕོ་མོའི་རྦོད་རྦད་བསད་གསུམ་ཡོངས་རྫོགས་སམ། བསྡུ་བ་བོད་སྔགས་ཙམ་གྱི་མཐར། ཨ་ཀཱ་རོ་བཏགས་པ་ལན་གསུམ་གྱིས་འཁོར་རྣམས་ལ་བསྔོས། གོང་བཞིན་རོལ་མོ་དང་བཅས་ཏེ་གཏོར་ཆཻན་ལ་བཏབ། དཔལ་ལྡན་ལྷ་མོ་ནག་མོ་འདོད་པ་ཁམས་ཀྱི་དབང་ཕྱུག་མ། གཤིན་རྗེའི་ལྕམ་གཅིག་བདུད་ཀྱི་ཡུམ་ཆེན། ནད་དོ་ཅོག་གི་བདག་མོ་འཁོར་མ་མོ་མཁའ་འགྲོའི་ཚོགས་དང་
བཅས་པ་རྣམས་དང༌། གནོད་སྦྱིན་ཕོ་མོ་མོན་བུ་ལྕམ་སྲིང༌། རུ་འདྲེན་སྤྲུལ་པའི་ཚོགས་དང་བཅས་པ་རྣམས་ཀྱི་ཞལ་དུ་ཁ་རཾ་ཁཱ་ཧི། གཞན་ཡང་དྲེགས་པ་ཕོ་རྒྱུད་མོ་རྒྱུད། ཕྱོགས་སྐྱོང་ཞིང་སྐྱོང་འཇིག་རྟེན་དང་འཇིག་རྟེན་ལས་འདས་པའི་བཀའ་ཉན་མགོན་པོ་གྲངས་མེད་པ་རྣམས་དང༌། སྣང་སྲིད་ལྷ་སྲིན་སྡེ་བརྒྱད་དང་བཅས་པའི་ཞལ་དུ་ཁ་རཾ་ཁཱ་ཧི། གསོལ་ལོ་མཆོད་དོ་མཆོད་པ་དམ་པར་འབུལ་ལོ། །ཡང་ཚོ་གསུམ་པ་སྔར་བཞིན་བཤམ། ཤཱ་ས་ན་ལན་གསུམ་གྱིས་ཕུལ་ལ། སྔར་བཞིན་བཏབ། རྡོ་རྗེ་འཛིན་པའི་བཀའ་དང་རྒྱལ་བའི་བསྟན་པ་རིན་པོ་ཆེ་སྲུང་བར་དགོངས་ཏེ། རབ་ཏུ་དགེས་ཤིང་མོས་པའི་ཐབས་ཀྱིས་བཞེས་ལ། བདག་ཅག་དཔོན་སློབ་འཁོར་དང་བཅས་པ་ཐམས་ཅད་ཀྱི་འགལ་རྐྱེན་ནད་དང་གནོད་པ་དང༌། གདོན་བགེགས་དང་བར་ཆད་ཐམས་ཅད་ཞི་བར་མཛད་དུ་གསོལ། ཚེ་དང་བསོད་ནམས་དང་དབང་ཐང་དང་ནུས་མཐུ་དང༌། སྙན་པ་དང་གྲགས་པ་ཐམས་ཅད་རྒྱས་པར་མཛད་དུ་གསོལ། མི་དང་མི་མ་ཡིན་པའི་འགྲོ་བ་ཕོ་མོ་ཐམས་ཅད་དབང་དུ་བསྡུ་བར་མཛད་དུ་གསོལ། གནོད་བྱེད་དགྲ་བགེགས་ལོག་པར་ལྟ་བ་ཐམས་ཅད་བསད་པ་དང༌། བསྐྲད་བ་དང༌། དབྱེ་བ་དང༌། རེངས་པ་ལ་སོགས་པའི་སྒོ་ནས་ཐལ་བ་རྡུལ་དུ་རློག་པར་མཛོད་ཅིག །སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། ཡིད་ལ་བསམ་པའི་དོན་ཐམས་ཅད་སྒྲུབས། ཇི་ལྟར་བཀའ་བསྒོས་ཤིང་བཅོལ་བའི་འཕྲིན་ལས་ཐམས་ཅད་མྱུར་བ་
ཉིད་དུ་སྒྲུབས་ཤིག ཅེས་བརྗོད། དེ་ལྟར་གསོལ་ཁ་སྟོབ་ཚུལ་དེ་ཉིད་ཚར་གསུམ་སོང་བ་ན། བདུད་རྩི་ལྔ་མཆོད་ཀྱི་མཆོད་པ་དེ་ཡང་གཏོར་ཆེན་ནང་དུ་བཏབ་བོ། །དེ་ནས་ཟོར་བསྒྲུབ་པ་ནི། ཧཱུཾ་རྩ་བརྒྱུད་དཔལ་ལྡན་བླ་མ་ཡིས། །ཟོར་ཆེན་རྫས་ཀྱི་མཐུ་བསྐྱེད་ལ། །ཟོར་མཆོག་འདི་ལ་བྱིན་གྱིས་རློབས། །མི་མཐུན་ཕྱོགས་ཀུན་གཞོམ་དུ་གསོལ། །ཚིག་ལྷག་མ་གསུམ་འདྲ་བ་ལ། ཡི་དམ་དཀྱིལ་འཁོར་ལྷ་ཚོགས་ཀྱིས། །ཞེས་དང༌། དཔལ་ལྡན་ནག་པོ་ཆེན་པོ་ཡིས། །ཞེས་དང༌། མ་ཅིག་འདོད་ཁམས་གཙོ་མོ་ཡིས། །ཞེས་དང༌། ཕོ་ཉ་ལས་མཁན་ཚོགས་རྣམས་ཀྱིས། །ཞེས་དང༌། དཔའ་བོ་མཁའ་འགྲོའི་ཚོགས་ཀུན་གྱིས། །ཞེས་དང༌། དཀོན་མཆོག་གསུམ་གྱི་བདེན་སྟོབས་ཀྱིས། །ཞེས་སམ། སངས་རྒྱས་དཀོན་མཆོག སོགས་སོ་སོར་ཕྲལ་ཀྱང་རུང༌། རང་བཞིན་སྤྲོས་བྲལ་བདེན་པའི་མཐུས། །ཞེས་དང༌། ལས་འབྲས་བསླུ་མེད་བདེན་པའི་མཐུས། །ཞེས་སོགས་སྦྱར་རོ། །མགོན་པོ་ལྕམ་དྲལ་དང་ཟངས་གྲི་ཅན་གྱི་སྔགས་རྦོད་རྦད་བསད་གསུམ་ཅི་རིགས་པ་བཟླས་པའི་མཐར། ཤཱ་ས་ན་ཅི་མང་དང༌། ཁྱད་པར་གྱི་ཐུན་སྔགས། སུམ་ཏྲིག་རཀྴ་བྷྱོཿ ཐིབས་ཐིབས་ཙཀྲ་བྷྱོཿ སྙིང་ཁར་གདུན་ཏྲི་བྷྱོཿ རྦད་རྦད་ཏྲི་ན་ཤིག་ཤིག་སེ་ན་སྟུབས་སྟུབས། ཁ་རག་རྦད་རྦད་དུམ་བུ་བྷྱོཿ བཛྲ་ཙི་ཏྲི་རཀྴ་ཙི་ཏྲི་ཡ་མ་ར་ཡ་རྦད་བྷྱོཿབཟློག ཅེས་དྲག་ཏུ་བཟླ། དེ་ནས་སྤྲོས་པ་ལ་དགའ་ན་ཟོར་གྱི་བསྐུལ་བྱེད་པར་འདུག །དེ་ནི་ཡི་གེ་སྔ་མ་རྣམས་སུ་ལྟ་ལ། ངེས་པར་དགོས་པའང་མིན་པས་འདིར་མ་བྲིས་སོ། །དེ་ནས་བཟློག་པ་ནི། ཧཱུཾ་དཔལ་འབར་
མཧཱ་ཀཱ་ལ་ནི། །ཤར་གྱི་ཕྱོགས་ཀྱི་དུར་ཁྲོད་ནས། །དྲི་ཟ་འབུམ་ཚོགས་འཁོར་གྱིས་བསྐོར། །དམར་ཆེན་གཏོར་མས་ཐུགས་དམ་བསྐང༌། །ལས་སུ་སངས་རྒྱས་བསྟན་པ་སྲུངས། །ཟས་སུ་དགྲ་བགེགས་ཤ་ཁྲག་ཟོ། ཁྱོད་ཀྱི་ཐུགས་དམ་དུས་ལ་བབ། །དགྲ་བགེགས་གནོད་པ་བཟློག་ཏུ་གསོལ། །ཧཱུཾ་དཔལ་འབར་མཧཱ་ཀཱ་ལ་ནི། །ལྷོ་ཡི་ཕྱོགས་ཀྱི་དུར་ཁྲོད་ནས། །གཤིན་རྗེ་འབུམ་ཚོགས་འཁོར་གྱིས་བསྐོར། །དམར་ཆེན་གཏོར་མ་སོགས་ཚིག་རྐང་ལྔ་པོ་འདྲའོ། །དེ་བཞིན་དུ། ནུབ་ཀྱི་ཆུ་ལྷ༴ བྱང་གི་གནོད་སྦྱིན༴ བྱང་ཤར་དབང་ལྡན༴ ཤར་ལྷོ་མེ་ལྷ༴ ལྷོ་ནུབ་སྲིན་པོ༴ ནུབ་བྱང་རླུང་ལྷ༴ སྟེང་གི་ལྷ་དམག༴ འོག་གི་ཀླུ་གཉན༴ ཞེས་འདོན་པ་སྤོས་པ་མ་གཏོགས་སྔ་མ་བཞིན་ནོ། །དེ་ལྟར་ན་འདི་ལ་དུར་ཁྲོད་གནས་པའི་ཕྱོགས་སྐྱོང་གི་བསྐུལ་ཞེས་གྲགས་སོ། །དེ་ནས། ཧཱུཾ་ལྷ་ཆེན་དཔལ་འབར་མཐུ་མ་ཆུང༌། །ཞེས་པ་ནས། ད་ལྟ་ཉིད་དུ་གྲུབ་པར་མཛོད། །ཅེས་པའི་བར་བསྐང་བ་ལྟར་བྱ། ཧཱུཾ་དཔལ་ལྡན་མགོན་པོ་ད་གཤེགས་ཤིག །བཟློག་པའི་དམག་དཔུང་ད་མཛོད་ཅིག །སྡེ་བརྒྱད་དམག་སྣ་ཐམས་ཅད་བཟློག །བྱད་ཁ་ལྷ་འདྲེའི་ཆད་པ་རྣམས། ཁྱོད་ཀྱིས་མི་བཟློག་གང་ཡང་མེད། ཁྱོད་ཀྱིས་མི་འགྱུར་གང་ཡང་མེད། །ཡོན་མཆོད་འཁོར་བཅས་མཚན་མ་འཁྲུག །ཟློག་གོ་དམར་ཆེན་གཏོར་མས་བཟློག །ལྷ་དང་གནོད་སྦྱིན་གཤིན་རྗེ་དང༌། །ཀླུ་དང་རྒྱལ་པོ་བཙན་དང་བདུད། སྨུ་དང་ཐེ་རང་འགོང་པོ་དང༌། །
བྱང་སྨན་མ་མོ་བལ་མོ་དང༌། །ཡུལ་ལྷ་ནད་བདག་འབྱུང་པོ་སོགས། །གཟའ་དང་སྡེ་བརྒྱད་འཁྱམས་པོ་དང༌། །རྦོད་གཏོང་བྱད་ཁ་གཞན་གྱིས་བསྐུལ། །འཇིག་རྟེན་འཇིག་རྟེན་འདས་པ་ཡི། །གནོད་པ་བྱེད་པ་མ་ལུས་ཀུན། །བཟློག་གོ་དམར་ཆེན་གཏོར་མས་བཟློག །འབྱུང་པོའི་སྤྲུལ་པ་སྣ་ཚོགས་ཀུན། །བཟློག་གོ་དམར་ཆེན་གཏོར་མས་བཟློག །སྡེ་བརྒྱད་བྱོལ་ཁ་སྣ་ཚོགས་ཀུན། །བཟློག་གོ༴ ལྷ་སྲིན་ཆོ་འཕྲུལ་སྣ་ཚོགས་ཀུན། །བཟློག་གོ༴ ཕྱི་ནང་ལྟས་ངན་མཚན་མ་ངན། །བཟློག་གོ༴ དཔལ་ལྡན་མགོན་པོ་འཁོར་བཅས་དང༌། །དཔལ་ལྡན་ལྷ་མོ་འཁོར་བཅས་ཀྱི། །མི་མཐུན་ཕྱོགས་རྣམས་ཐམས་ཅད་ཀུན། །བསྒྱུར་ཞིང་བཟློག་པར་མཛད་དུ་གསོལ། །རྣལ་འབྱོར་བདག་གིས་བཅོལ་བ་ཡི། །འཕྲིན་ལས་མྱུར་དུ་འགྲུབ་པར་མཛོད། །རྣལ་འབྱོར་བདག་ཅག་འཁོར་བཅས་དང༌། །རྒྱུ་སྦྱོར་ཡོན་གྱི་བདག་པོ་ཡི། །བདུད་ཀྱི་བྱོལ་ཁ་དགྲ་ལ་སྒྱུར། །གཤིན་རྗེའི་ཁྲམ་ཁ་འདེབས་པ་སོགས། །ངན་པ་བཟློག་ལ་རྩུབ་མོ་རྣམས། །དགྲ་དང་བགེགས་གྱི་ཚོགས་ལ་སྒྱུར། །ཞེས་བརྗོད། སྤྲོས་པ་ལ་དགའ་ན་མདོས་ཆོག་ནས་འབྱུང་བ་བཞིན་བྱོལ་བཟློག་རྒྱས་པར་བྱེད་པ་ཡིན་པ་གདའ་ནའང་འདི་ཙམ་འཚམ་མོ། །དེར་རོལ་མོ་དྲག་པོ་དང་བཅས་གཏོར་ཆེན་ལ་ཡུངས་ཀར་གཏོར་ཏེ། དེ་ཡན་ཆད་དངོས་གཞི་སྒྲུབ་པའི་རིམ་པའོ། །དེ་ནས་གཏོར་ཆེན་དང༌། གཏོར་ཟོར་རྣམས་ལ་ཕུད་དང་རཀྟས་ཅུང་ཟད་གཏོར། མཆོད་བསྟོད་བསྡུས་པ་ཞིག་བྱས། ལྷ་ཚོགས་རྣམས་ཞུ་བ་ལས་དུག་དང་མེ་དང་མཚོན་ཆའི་ཕུང་པོར་གྱུར་བར་བསམ་པའམ། ཡང་ན་ཡིག་བརྒྱ་ལན་གསུམ་སྔོན་དུ་འགྲོ་བས། གཏོར་ཆེན་གྱི་ལྷ་
ནམ་མཁར་བཏེག །གཏོར་མ་གོང་བཞིན་བསམ་མོ། །ཟོར་གྱི་ལྷ་རྣམས་འདེགས་མི་དགོས་སྔར་བཞིན་བསམ་པ་ཁོ་ནས་ཆོག་གོ །དེ་ནས། དུས་གསུམ་རྒྱལ་བའི་སྤྱན་སྔར་རང་རང་གི ཞེས་སོགས་ལྕམ་དྲལ་གྱི་བསྐུལ་དང༌། གནོད་སྦྱིན་ཡབ་ཡུམ་འཇིགས་པའི་གཟུགས་སོགས་བསྟོད་པ་བསྐུལ་དུ་བསྒྱུར་ཏེ། བསྟན་སྲུང་ཡབ་ཡུམ་ལས་ལ་ཆོས། །ཞེས་པ་དང༌། པུ་ཊ་ནག་པོ་ལས་ལ་ཡ། །ཞེས་དང༌། བྟ་ཊ་ལ་ཡང་དེ་དང་འདྲ། ནག་མོ་ཁྱོད་ཀྱིས་ལས་མཛོད་ཅིག །ཅེས་དང༌། འཁོར་བཅས་ཐམས་ཅད་ལས་མཛོད་ཅིག །དགྲ་བགེགས་རྡུལ་བཞིན་བརླག་བར་མཛོད། །ཅེས་འདོན་པ་སྤོ། དེ་ནས་གསེར་སྐྱེམས་སོགས་ཀྱིས་སྣ་དྲངས་ཏེ། ཟོར་དང་གཏོར་མ་རྣམས་ཕྱིར་ཁྱེར། འོག་གཞྀ་དཀྱིལ་འཁོར་ཡང་གཏོར་མ་ལ་འདེབས་པའི་སྲོལ་ཡོད། སྒྲུབ་ཁང་གི་ཕྱི་རོལ་ཇི་ལྟར་འོས་པར་གཡང་གཞིའི་སྟེང་དུ་སྟེགས་བུ་ལ་ཐུན་གཏོར་བཤམས་ནས་སྤྱི་བཏབ་གྱེར་བས་འབུལ། དེ་ནས་གོམ་པ་བཞི་བཅུ་རྩ་དགུ་ལས་མི་ཐུང་པའི་ས་ཕྱོགས་སུ་སོང་སྟེ། གསེར་སྐྱེམ་སྔོན་དུ་འགྲོ་བས་ཟོར་ལམ་དབྱེ་བ་སྤྱི་དང་མཐུན་པར་བྱ་སྟེ། དཔལ་ལྡན་རྡོ་རྗེ་འཆང་གི་བཀའ། །འབྱུང་པོའི་ཚོགས་རྣམས་ཀུན་ཉོན་ཅིག །རྣལ་འབྱོར་རིག་འཛིན་བདག་ཅག་རྣམས། །གཏོར་ཟོར་དྲག་པོ་ཕོ་ཉར་འགྱེད། །ཟོར་འཕེན་ཕྱོགས་དང་ཉེ་བ་ན། །ཡུལ་ལྷའི་རིགས་དང་ཆུ་མིག་བྲག །ཤིང་དང་ས་ལ་གནས་པ་ཡི། །འབྱུང་པོ་ཐམས་ཅད་སྐུ་བཟུར་ཅིག །དོན་གཉེར་ཕྱོགས་སུ་འགྲོ་བ་དང༌། །ལམ་དུ་ཞུགས་དང་མཁའ་ལ་རྒྱུ། །དགྲ་བགེགས་མ་གཏོགས་འགྲོ་
བ་རྣམས། །རང་རང་ཕྱོགས་སུ་ཡོལ་བར་གྱིས། །བཟུར་བར་འདོད་ཀྱང་བསྐྱོད་མ་ནུས། །བརྟན་པར་གནས་པའི་ས་བདག་སོགས། །མཐོ་བ་རྣམས་ནི་ཞབས་བསྐུམས་ཤིག །དམའ་བ་རྣམས་ནི་དབུ་ཆུམས་ཤིག །བར་པ་རྣམས་ནི་སྐུ་བཟུར་ཅིག །བག་ཡངས་གནས་པ་བསྒྲིམ་པར་མཛོད། །ཟོར་ལམ་ཕྱེ་ལ་གྲོགས་མཛོད་ཅིག །བསྟན་པའི་དགྲ་བོ་སྡིག་ཅན་འདི། །སྐད་ཅིག་གཅིག་ལ་རྡུལ་དུ་རློགས། ཅེས་སོ། །དེ་ནས་སློབ་དཔོན་གྱིས་བདེན་པ་བདར་ཞིང་སླར་ཡང་གསེར་སྐྱེམས་གཏོང༌། གཞན་རྣམས་ཀྱིས་རོལ་ཆེན་བྱ། དེའི་རྗེས་སུ། ཧཱུཾ་བྷྱོཿ མཧཱ་ཀཱ་ལ་སྟོབས་པོ་ཆེ། །སོགས་དང༌། ཧཱུཾ། དཔལ་ཆེན་ལེགས་ལྡན་ནག་པོ་ཆེ། །སྟེང་ནས་འགྱེད་པའི་ཕོ་ཉ་ནི། །ཚངས་ལྷའི་ཚོགས་རྣམས་ཁྱུང་དུ་སྤྲུལ། ཁྱུང་ཆེན་མཐིང་ནག་བྱེ་བ་འབུམ། །འཕུར་ལྡིང་གཞུངས་ཤིང་དགྲ་ལ་རྒོལ། །དགྲ་བགེགས་ཤ་ཟོས་ཁྲག་ལ་འཐུང༌། །དེ་རྗེས་གཤམ་བུའི་ཚིག་ལ། བསང་གཏོར་གྱིས་སྐབས་ཡིན་ན། མི་ནོར་ཐལ་བ་རྡུལ་དུ་རློགས། །རིགས་བརྒྱུད་རྩད་ནས་ཆོད་ལ་ཤོག །ཅེས་དང༌། རིམ་འགྲོ་སོགས་ལ། རྐྱེན་ངན་བར་ཆད་ཐམས་ཅད་བཟློག །གནོད་བྱེད་ཐལ་བ་རྡུལ་དུ་རློགས། །ཞེས་བརྗོད། ཧཱུཾ་དཔལ་ཆེན༴ ཤར་ནས་འགྱེད་པའི༴ དྲི་ཟའི་ཚོགས་རྣམས་རྟ་པར་སྤྲུལ། །རྟ་དམག་མཚོན་ཐོགས་བྱེ་བ་འབུམ། །དྲག་གཏུམ་རྔམས་ཞིང་དགྲ་ལ་རྒོལ། །དགྲ་བགེགས་ཤ་སོགས་གོང་བཞིན་སྦྱར། ཧཱུཾ་དཔལ་ཆེན༴ ལྷོ་ནས༴ གཤིན་རྗེའི་
ཚོགས་རྣམས་སྟག་ཏུ་སྤྲུལ། གཅན་གཟན་དཔའ་བོ༴ མཆེ་གཙིགས་རྔམ་མཆོང་༴ དགྲ་བགེགས༴ ཧཱུཾ་དཔལ་ཆེན༴ ནུབ་ནས༴ ཀླུའི་ཚོགས་རྣམས་སྦྲུལ་དུ་སྤྲུལ། དུག་སྦྲུལ་རྔམས་པ༴ ཕུད་སྒྲ་སྒྲོག་ཅིང་དགྲ་ལ༴ དགྲ་བགེགས༴ ཧཱུ་དཔལ་ཆེན༴ བྱང་ནས༴ གནོད་སྦྱིན་ཚོགས་རྣམས་སེང་གེར་སྤྲུལ། །སེང་གེ་ཁྲོས་པ༴ སྦར་བ་གདེངས་ཤིང་༴ དགྲ་བགེགས༴ ཧཱུཾ་དཔལ་ཆེན༴ བྱང་ཤར༴ འབྱུང་པོའི་ཚོགས་རྣམས་གླང་དུ་སྤྲུལ། །འཐབ་གླང་མྱོས་པ༴ གནམ་ལྕགས་གྲི་འདེབས༴ དགྲ་བགེགས༴ ཧཱུཾ་དཔལ་ཆེན༴ ཤར་ལྷོའི་མཚམས་ནས༴ དྲང་སྲོང་ཚོགས་རྣམས་འཕར་བར་སྤྲུལ། །འཕར་སྤྱང་རྔམས་པ༴ མཆོང་རྒྱུག་ཁྲོས་པས༴ དགྲ་བགེགས༴ ཧཱུཾ་དཔལ་ཆེན༴ ལྷོ་ནུབ༴ སྲིན་པོའི་ཚོགས་རྣམས་རུ་ཏྲར་སྤྲུལ། །རུ་དྲ་ནག་པོ༴ རྔམས་ཤིག་དྲག་པོས༴ དགྲ་བགེགས༴ ཧཱུ་དཔལ་ཆེན༴ ནུབ་བྱང་༴ རིག་འཛིན་ཚོགས་རྣམས་རླུང་པོར་སྤྲུལ། །རླུང་ནག་མཚོན་ཆར༴ ས་གཞི་བསྐྱེད་ཅིང་༴ དགྲ་བགེགས༴ ཧཱུཾ་དཔལ་ཆེན༴ འོག་གི༴ ས་བདག་ཚོགས་རྣམས་སྡིག་པར་སྤྲུལ། །ལྕགས་སྡིག་མགོ་དགུ༴ རྒྱུག་མཆོང་འཁྲབ་ཅིང་༴ དགྲ་བགེགས༴ ཧཱུཾ་ལས་མཁན་ཆེན་པོ་འཁོར་བཅས་ཀྱི། །གཡས་ནས་དམག་གི་རུ་འདྲེན་པ། །གྱིང་གི་ཚོགས་རྣམས་དམག་མིར་སྤྲུལ། །སྐྱེས་པ་གོ་མཚོན་ཐོགས་པ་བརྒྱ། །གྱིང་དམག་བྱེ་བ་འབུམ་དང་བཅས། །མདའ་
ཟོར་མཚོན་ཆ་དགྲ་ལ་ཕོབ། །ཧཱུཾ་ལས་མཁན༴ གཡོན་ནས་དམག་གི༴ ར་ཙའི་ཚོགས་རྣམས་བཙུན་པར་སྤྲུལ། །དགྲ་བཅོམ་སེག་ཤང་ཐོགས་པ་བརྒྱ། །རྒྱལ་དམག་བྱེ་བ༴ གྱོ་ཟོར་སྐམ་ཐུན་དགྲ་ལ་རྒྱོབ། །ཧཱུཾ་ལས་མཁན༴ །སླད་ནས་དམག་གི༴ །གཟའ་རྒོད་ཚོགས་རྣམས་སྔགས་པར་སྤྲུལ། །སྔགས་ནག་ཕུར་བུ་ཐོགས་པ་བརྒྱ། །གཟའ་དམག་བྱེ་བ༴ རྭ་ཟོར་ཐུན་ཟོར་དགྲ་ལ་རྒྱོབ། །ཧཱུཾ་ལས་མཁན༴ སྔོན་ནས་དམག་གི༴ མ་མོའི་ཚོགས་རྣམས་སྲིན་མོར་སྤྲུལ། །བུད་མེད་གྲི་ཐོད་ཐོགས་པ་བརྒྱ། །མ་མོ་བྱེ་བ༴ ཁྲག་ཟོར་དུག་ཐུན་དགྲ་ལ་རྒྱོབ། །ནག་མོ་རལ་བ་གཡེངས་པའི་ཚོགས། །བྷྱོ་བྷྱོཿདེ་ནི་དགྲ་ལ་བྷྱོཿ སོགས་སྦྱར་ཏེ་བསྐུལ་བའི་མཐར། རོལ་མོ་དྲག་ལ་ཡུན་རིང་བར་བྱ། དེའི་ངང་ནས་ཐམས་ཅད་ཀྱིས་རྦོད་རྦད་བསད་གསུམ་དྲག་ཏུ་བཟླ། གཏོར་མའི་ལས་ཀྱི་སློབ་དཔོན་གྱིས་མདའ་ཟོར་ར་ཟོར་ཁྲག་ཟོར་ཚེ་ཟོར་ཡུངས་ཟོར་ཐ་མལ་རྡོ་ཟོར་འཕངས། དེ་ནས་ཟངས་གྲི་ཅན་གྱི་ཟོར་གཏོར་འཕངས། དེ་ནས་གཏོར་ཆེན་ཕྲག་པ་གཡས་སུ་ཐོགས་ཏེ། དམིགས་པ་གསལ་བཏབ། དམོད་པ་ཤེས་ཚད་བྱ་ཞིང་མི་ལ་ལབ་པ་ལྟར་ལས་བཅོལ། ཁ་བུབ་ཏུ་གདབ་པའམ། རྒྱང་དུ་འཕང་པ་གང་བདེ་བྱའོ། །དེ་ནས་གཏོར་ལམ་བཅད་བསྲུང་འཁོར་གསལ་བཏབ། ཐམས་ཅད་ཕྱི་མིག་མི་ལྟ་བར་སྒྲུབ་ཁང་དུ་འོངས་ནས་ཚོགས་ལ་རོལ། བཀྲ་ཤིས་ཀྱི་བར་གྱི་རྗེས་ཆོག་རྣམས་བྱའོ། །ཆོ་ག་འདི་ཞག་མང་པོར་སྦྲེལ་ནས་སྒྲུབ་ནའང༌། ཞག་སྔ་མ་རྣམས་ལ་
དངོས་གཞི་བཟློག་པ་ཡན་ཆད་སོང་བའི་རྗེས་སུ་སྤྱི་བཏབ་ཀྱིས་ཐུན་གཏོར་ཕུལ། ཚོགས་དང་རྗེས་ཆོག་བྱའོ། །ཞག་ཐ་མ་ལ་ནི་གོང་དུ་བསྟན་པ་ཉིད་དོ། །དམོད་པ་དང་འདོད་གསོལ་ཡི་གེ་རྙིང་པ་གྲོང་པའི་ཚིག་ཏུ་སྦྱར་བ་མང་པོ་ཡོད་པ་རྣམས་དབེན་པའི་གནས་སུ་ལས་སྒྲུབ་པ་དང༌། བླ་བརྒྱུད་ཆོས་བརྒྱུད་གཅིག་པ་རྟོག་དཔྱོད་ཉུང་བའི་ཚོགས་ནང་དུའང་བརྗོད་རྒྱུ་ཡིན་མོད་ཀྱི། སྐྱེ་བོ་བསམ་པ་ཐ་དད་པ་སྣ་ཚོགས་པའི་ནང་དུ་དབྱེ་བའི་གནས་སུ་འགྱུར་བའི་དགག་ཆ་ཡོད་པས་འདིར་རེ་ཞིག་བཏང་སྙོམས་སུ་བཞག་གོ། །།དེ་ལྟར་ན་དཔལ་གུར་གྱི་མགོན་པོའི་དམར་ཆེན་གཏོར་བཟློག་གི་རིམ་པ་མདོ་ཙམ་བརྗོད་པ་འདི་ཡང༌། རྒྱལ་ཁམས་པ་ཏཱ་ར་ནཱ་ཐས་ངེས་པར་བརྗོད་པའོ། མངྒ་ལཾ། རྒྱལ་བ་གཉིས་པ་ཀུན་མཁྱེན་ཇོ་ནང་བའི། །རྣམ་ཀུན་རྗེ་བཙུན་ཡོན་ཏན་བཟང་པོ་ཡིས། །སྤྱི་ལོ་༡༩༩༧ལོར་རྒྱལ་བརྟན་མི་ཉམས་གོང་དུ་འཕེལ་བའི་ཕྱིར། །ཀུན་མཁྱེན་ཏཱ་ར་ནཱ་ཐའི་བཀའ་འབྱམ་གྱི། །ཤིང་སྤར་འཛམ་ཐང་གཙང་བའི་ཆོས་གྲྭལ་ཆེར། །བསྐྲུན་པའི་དགེ་བ་འོད་དཀར་དྲི་མེད་ཀྱིས། །མ་གྱུར་འགྲོ་ལ་རྫོགས་སངས་རྒྱས་ཐོབ་ཤོག །