ཞིང་སྐྱོང་གཟི་ལྡན་དབང་ཕྱུག་གི་གཏོར་མ་ཆེན་པོ་སྒྲུབ་འཕེན་གྱི་ལག་ལེན་ཆོ་ག་ལས་བཞི་ལྷུན་གྲུབ།
ཞིང་སྐྱོང་གཟི་ལྡན་དབང་ཕྱུག་གི་གཏོར་མ་ཆེན་པོ་སྒྲུབ་འཕེན་གྱི་ལག་ལེན་ཆོ་ག་ལས་བཞི་ལྷུན་གྲུབ་ཞེས་བྱ་བ་བཞུགས་སོ། །
ན་མོ་གུ་རུ་བཛྲ་དྷྲི་ཀ་ཨཱརྱ་ཏཱ་རཱ་ཡེ། འདིར་དཔལ་ལྡན་ནག་པོ་ཧ་ཧ་སྒྲོག་པའི་ཞིང་སྐྱོང་ཆེན་པོ་ཞལ་བཞི་པའི་གཏོར་ཆོག་ལས་རིམ་གྱི་མན་ངག་མདོ་ཙམ་བཤད་པར་བྱའོ། །དེ་ཡང་གནས་དང་དུས་འཛོམ་པ་ན། དང་པོར། སྒྲུབ་པ་པོ་དམ་ལྡན་ཡི་དམ་གྱི་བསྙེན་པ་འཐེམས་པོར་སོང་བ་ཞིག་ངེས་པར་དགོས་ལ། དེ་ཡང་གསང་བ་འདུས་པ་ཡེ་ཤེས་ཞབས་ལུགས་ཀྱི་དཀྱིལ་འཁོར་ལྟ་བུའམ། དཔལ་ཧེ་རུ་ཀ་དང་རྡོ་རྗེ་ཁྲོ་བོའི་རིགས་གང་གིས་ཀྱང་རུང་ཞིང༌། ཁྱད་པར་དུ་འདི་ལ་རྒྱུད་འཇམ་ཞིང་འཁུལ་ཆེ་བའི་གནད་ཡིན་པས། བཅོམ་ལྡན་འདས་མ་སྒྲོལ་མའི་རིགས་ཀྱི་བསྙེན་པ་ཚར་གཅིག་སོང་ན་གནད་དུ་ཆེ་བར་བཞེད། དེ་ཡང་བརྒྱུད་པ་གཅིག་པའི་རྟེན་འབྲེལ་གྱིས། གཉན་སྒྲོལ་ཉིད་བསྔགས་པར་གྲགས་ལ། གཞན་ཀུ་རུ་ཀུལླེ་ལ་སོགས་པས་ཀྱང་རུང་ངོ༌། །
དེ་ལྟར་ཡི་དམ་གྱི་བསྙེན་པ་སྔོན་དུ་སོང་ནས། དཔལ་མགོན་པོ་འདི་ཉིད་ཀྱི་བསྙེན་སྒྲུབ་ཀྱི་རིམ་པ་ཡང༌། །ལན་གསུམ་སྐྱར་བ་ལྟ་བུ་བྱུང་ན་རབ། ཚར་གཅིག་སོང་བ་ཞིག་མེད་དུ་མི་རུང་སྟེ། འོན་ཀྱང་བོད་འདིར་ཕྱིས་དང་ད་ལྟའི་ལག་ལེན་ལྟར་ཆོག་གྲྭ་ངོམ་པ་གཙོ་བོར་བྱེད་ན། ཚོགས་ཀྱི་གཙོ་བོ་དེ་དཔལ་མགོན་འདིའི་བསྙེན་པའང་སོང་བ་མེད་དུ་མི་རུང་ལ། གཞན་རྣམས་ནི་ཡི་དམ་གང་རུང་རེའི་བསྙེན་པ་སོང་ན། འདིའི་ཆོག་གྲྭ་ལ་འཇུག་རུང་ཙམ་ཡིན་ནོ། །ཆོས་སྐྱོང་འདི་ལ་གོང་གནོན་གྱི་མགོན་པོ་གཞན་དགོས་སམ་མི་དགོས་སྙམ་ན། སྤྱིར་ངེས་པར་དགོས་པ་ནི་མ་ཡིན་ཏེ། ཡི་དམ་ཁྲོ་བོས་གཅུན་ཞིང༌། བཅོམ་ལྡན་འདས་མས་གནད་ནས་བསྐུལ་བས་ཆོག་པའི་ཕྱིར་རོ། །འོན་ཀྱང་བོད་ཡུལ་འདི་ན། སྒྲུབ་པ་པོ་གཅིག་གིས་ཆོས་སྐྱོང་རིགས་མི་གཅིག་པ་དུ་མ་བསྟེན་པའི་སྲོལ་ཡོད་པས། དེའི་
དབང་གིས་མན་ངག་གི་ཡི་གེ་རྣམས་ན། གོང་གནོན་རེ་མཛད་པར་གདའ་བ། བླ་ཆེན་ས་སྐྱ་བ་མན་ཆད་ངེས་པར་གུར་མགོན་གྱིས་མཛད་པས་ལེགས་པར་བྱུང་ལ། སྤྱིར་དེ་ལྟར་བྱེད་པར་འདོད་ན། དེ་ཁོ་ནར་མ་ཟད་དཔལ་མགོན་པོ་བཞི་སྦྲག་གམ། སྒང་སྟོན་ལུགས་ཀྱི་གྲི་གུག་ཅན་ནམ། ཡེ་ཤེས་མགོན་པོ་ཕྱག་བཞི་དྲུག་སོགས། མགོན་ཆེན་གང་ལ་བརྟེན་ཀྱང་རུང་ངོ༌། །དེ་ལྟ་ན་ཡང༌། སྤྱིར་མགོན་པོ་འདི་ཁོ་ན་སྒྲུབ་པ་གཅིག་ཡོད་དགོས་ལ་འདི་རང་གི་སྒྲུབ་ཐབས་དངོས་རྣམས་ཀྱང་དེ་ལྟ་བུའི་དབང་དུ་བྱས་པ་ཡིན་དགོས་པས་དེ་གཙོ་བོར་འཆད་དོ། །དེ་ལ་གཏོར་སྒྲུབ་གཏོར་སྐྱོང་ཙམ་གྱི་དབང་དུ་བྱས་ན། ཡི་དམ་ལེགས་པར་བསྙེན་ན་ཆོས་སྐྱོང་གི་སྒོས་བསྙེན་མ་སོང་ཀྱང་མི་རུང་བ་མ་ཡིན་ལ། གཏོར་ཆེན་འཕེན་པ་ལ་ནི་འདི་རང་གི་སྒོས་བསྙེན་མ་སོང་ན། རང་གཞན་ཐམས་ཅད་ཕན་པ་མ་ཡིན་པ་སྐྱེད་པར་བྱེད་དོ། །ད་ནི་ཇི་ལྟར་བྱ་བའི་རིམ་པ་བཤད་པར་བྱ་སྟེ། གནས་དེར་བླ་བྲེ་ཡོལ་བ་སོགས་མཛེས་བྱེད་ཅི་རིགས་པར་བྱ། སྟེགས་བུ་མཐོ་བ་ལ་བླ་མའི་གཏོར་མ་དང་ཡི་དམ་སྤྱི་དང༌། ཆོས་སྐྱོང་དངོས་དང་མཁའ་འགྲོ་སྤྱི་དང༌། གཞི་བདག་གི་བར་གྱི་གཏོར་མ་ལྔ་ཚར་རྣམས་བཤམས། ཡང་ན་ཡི་དམ་ལ་གཅིག །རིགས་དྲུག་གི་གཏོར་མ་སྟེ་ལྔའོ། །སྒྲོལ་མ་སོགས་ཡི་དམ་སྒོས་ཀྱི་གཏོར་མ་དང་བསྐང་གཏོར་དཀྱུས་མ་ནོར་གཟུགས་བཤོས་ཕྲན་ཟུར་གསུམ་བཞི་ཐོད་གཟུགས་བཞི་དང་ལྡན་པ་བཤམས། འགྲུབ་ན་རྟེན་རྡོའི་སྟེང་དུ་ཆོས་འབྱུང་གྲུ་གསུམ་དབུས་ནག་ལ། མུ་རན་དམར་བ། དེ་ལ་དབུས་དང་ཕྱོགས་བཞིར་ཉི་གདན་
ལ། འབྲུ་ནག་གི་ཚོམ་བུ་ལྔ་བཀོད་པའམ། ཡང་ཚོམ་བུ་བཅུ་བདུན་འགོད་པ་ལྟར་ན། ཆོས་འབྱུང་འབྲི་མི་དགོས། དེའི་སྟེང་དུ་དར་ནག་གི་གུར་ཕུབ་པའོ། །རྟེན་རྡོ་མེད་ཀྱང༌། གཏོར་ཆོག་འདི་དག་ལ་དགོས་ངེས་མ་ཚང་བར་མི་འགྱུར་རོ། །གང་ལྟར་ནའང༌། ཡི་དམ་གཏོར་མའི་མདུན་གྱི་ཕྱོགས་ས་གཞི་སྟབས་བདེ་བ་ཞིག་ཏུ། སྟེགས་བུ་གྲུ་བཞི་དངོས་སུ་ཡོད་པའམ། མེད་ན་རྡུལ་ཚོན་སོགས་ཀྱིས་དམར་པོའམ། ནག་པོ་གྲུ་བཞི་པ་བྲི། དེར་པདྨ་འདབ་བརྒྱད་ཆེན་པོ་ལྟེ་བ་ནག །འདབ་མ་སྔོ། མུ་ཁྱུད་ལྗང་ཁུར་བྱ། ལྟེ་བའི་སྟེང་དུ་མཉྫི་སོགས་སྟེགས་མཐོ་བ་ལ། ལྕགས་སྣོད་ཡངས་པར། སྲན་ནག་གི་ཆན་དང༌། མེ་ཏོག་ནག་པོ་རྙིང་པ་དང༌། མི་རུས་ཀྱི་ཕྱེ་མ་བཏབ་པའི་སྒྲུབ་གཏོར་སྙིང་གཟུགས་མ་ཕྱོགས་བཞིར་བཤོས་ཕྲན་ཟུར་གསུམ་ཅན་མཚམས་རྣམས་སུ་མཐེབ་ཀྱུ་ཉེར་བདུན་རེ་བརྩེགས་པས་མཐེབ་ཀྱུ་བརྒྱ་རྩ་བརྒྱད་ཀྱིས་བསྐོར་བའོ། །དེ་ལ་ཤ་ཁྲག་སོགས་རྒྱན་གྱིས་བརྒྱན། ཟས་ཕུད་སྣ་ཚོགས་ཀྱིས་བསྐོར་རོ། །པད་འདབ་བརྒྱད་ཀྱི་སྟེང་དུ། སྟེགས་བུ་ཅུང་ཟད་དམའ་བ་རེ་བཞག་སྟེ། མདུན་མ་ལ་རཀྟའི་སྣོད། གཞན་བདུན་ལ་བཤོས་བུ་གྲུ་གསུམ་རེ་རེ་བཤམས། དེ་ཐམས་ཅད་ལ་ལིང་རྐྱང་རེ་འཛུགས། མཐའི་སྟེགས་དུ་རྣམས་དབུས་ཀྱི་སྟེགས་བུའི་ཕྱེད་དང་གཏོར་ཕྲན་རྣམས་དབུས་ཀྱི་གཏོར་མའི་ཕྱེད་དུ་སླེབ་པ་བྱེད་གསུང་ན་དེ་ལས་མཐོ་བ་མི་རུང་བའི་དོན་ཡིན། གཞན་ཚད་ངེས་པ་མེད། དེ་དག་གི་མཐའ་དྲག་པོའི་
མཆོད་གཏོར་སྤྱི་དང་མཐུན་པས་བསྐོར་བ་ལས། ཞལ་ཟས་བཤོས་བུ་དམར་ནག་གྲུ་གསུམ་ལྔ་ཚོམ་མམ་ལྔ་སྒྲེངས་བྱས་ཀྱང་རུང་དབུས་མ་མཐོ་ཙམ་བྱེད། ཕྱི་རྟེན་རྟ་ལུག་གཡག་ཁྱི་སོགས་ནང་རྟེན་ཞྭ་ནག་གོས་ནག་ཕྱག་མཚན་གསང་མཚན་གྲི་སྙིང་འཁོར་ལོ་ཅན་སོགས། དངོས་སུ་ཡོད་ན་ལེགས། མེད་ན་གཟུགས་ཡས་སམ་སོགས་ཐུང་ཙམ་གྱིས་ཀྱང་རུང་བར་འདོད། སྒྲུབ་ཁང་གི་སྟེང་དུ་རྔ་ཐུག་རེ་ཡང་འཛུགས། དེ་ཡང་ལྔ་ཚོམ་བྱེད་པའི་སྲོལ་ཡོད་སྤྱན་འདྲེན་པའི་བརྡ་ཡིན་ཟེར། གཞན་ཡང་སྤྱན་གཟིགས་སྣ་ཚོགས། །གཡབ་དར། རྡོ་དྲིལ། ཌཱ་རུ་ཐོད་པ་རོལ་མོ་སྣ་ཚོགས་འགྲུབ་ན་ཚོགས་ཀྱི་ཡོ་བྱད་རྣམས་ཀྱང་བཤམ་མོ། །དེ་ནས་སྔོན་འགྲོ་གཏོར་མ། གནས་ཡོ་བྱིན་རླབས། བདག་བསྐྱེད། མདུན་བསྐྱེད་ཡི་དམ་གཏོར་བསྔོ་ཡན་ཆད་ངེས་པར་སྔོན་དུ་འགྲོ་བར་བྱ། དེ་ནས་གོང་གནོན་བྱེད་ན། དེའི་གཏོར་ཆོག་ཙམ་མམ། བསྐང་བ་རྣམས་ཀྱང་བྱ། མི་བྱེད་ན་དེར་ཟད། དཀྱུས་ཀྱི་ཡི་དམ་ལ་མེད། ཆོ་གའི་ཡན་ལག་རང་མ་ཡིན་ཀྱང་བར་འདིར་གཉན་སྒྲོལ་གྱི་གཏོར་བསྔོ་བཟླས་པ་དང་བཅས་པ་རེ་བྱས་ན་ཤིན་ཏུ་ལེགས་སོ། །དེ་ནས་དཔལ་མགོན་པོ་ཉིད་ཀྱི་ཆོ་ག་ལ་འཇུག་སྟེ། གཏོར་མ་ཐམས་ཅད་ལ་ཐུན་མོང་དུ་ཡི་དམ་གྱི་གཏོར་མ་ལྟར་བྱིན་གྱིས་བརླབས། མདུན་བསྐྱེད། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། བསྲུང་བའི་འཁོར་ལོ་འབྱུང་བཞི་ལས་ཀྱི་གུར་ཁང་ཡངས་ཤིང་
རྒྱ་ཆེ་བའི་ནང་དུ། རྡོ་རྗེ་བྲག་རི་དམར་ནག་འཇིགས་ཤིང་ལྷུན་ཆགས་པའི་སྟེང་དུ། བྷྲཱུཾ་ལས་གནམ་ལྕགས་འབར་བའི་གཞལ་མེད་ཁང་ཡངས་ཤིང་རྒྱ་དང་ཚད་ཆད་པ་མེད་པ། མི་རོའི་གདན་དང༌། ཞིང་གི་འཕན་གདུགས། སྐྲའི་རྔ་ཡབ། མི་མགོའི་ཕྲེང་བ། ཙིཏྟའི་ཕོན་ཐོ། རྒྱུ་རློན་གྱི་ལྡ་ལྡི་སོགས་འཇིགས་ཤིང་སྐྱི་གཡའ་བའི་རྒྱན་ཐམས་ཅད་ཀྱིས་བརྒྱན་པ། ཕྱི་ནང་ཐམས་ཅད་དུ་ཞིང་ཆེན་གསར་རྙིང༌། ཨཾ་སའི་ལྷུ་དུམ། ཀེང་རུས་ཆལ་ཆོལ། རཀྟའི་ལྟེང་ཀ བྱ་དང༌། གཅན་གཟན་མི་བསྲུན་པའི་ཚོགས་དང༌། གདུག་པའི་སྦྲུལ་ནག་སོགས་སྲོག་ཆགས་མ་རུངས་པས་གང་བ། ཤ་ཟ། སྲིན་པོ། མ་མོ། མཁའ་འགྲོ་བདུད་དང༌། གཤིན་རྗེ་རོ་ལངས་ཀྱི་ཚོགས་ལང་ལོང་དུ་རྒྱུ་ཞིང་གར་བྱེད་པ། འཇིགས་པའི་ང་རོས་ཁྱབ་པ། ཕྱི་རོལ་དུར་ཁྲོད་ཆེན་པོས་ཁོ་ར་ཁོར་ཡུག་ཏུ་བསྐོར་བ། དེའི་དབུས་སུ་གྲུ་གསུམ་མཐིང་ནག་ཆེན་པོའི་དཀྱིལ་འཁོར། དེའི་ཕྱོགས་བཞིར་ཡང༌། ཨེ་ཁྲཾ་གྱི་དཀྱིལ་འཁོར་བཞི་སྟེ། ཐམས་ཅད་ཀྱང་འབར་བའི་ཕྲེང་བ་འཁྲུག་པའོ། །དབུས་སུ་པཾ་ལས་པདྨ་དང༌། རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་ཡིག་མཐིང་ནག་ལས་རྡོ་རྗེ་གྲི་གུག་ཧཱུཾ་གིས་མཚན་པ། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། དགྲ་བགེགས་གདུག་པ་ཅན་ཐམས་ཅད་ཚར་
བཅད། ཚུར་འདུས་ཡོངས་སུ་གྱུར་པ་ལས། ནག་པོ་ཆེན་པོ་ཞིང་སྐྱོང་སྟོབས་འཕྲོག་དབང་པོ་ཞལ་བཞིས། སྐུ་མདོག་དུས་མཐའི་སྤྲིན་དང་མཚུངས་ཤིང༌། གཟི་བརྗིད་བཟོད་པར་དཀའ་བ་ཉི་མ་སྟོང་དུས་གཅིག་ཏུ་ཤར་བ་དང་མཚུངས་པ། རྩ་ཞལ་ནག་པོ་ཆེས་ཆེར་ཁྲོས་པས། བསྟན་དགྲ་བསྒྲལ་བའི་མི་རོ་ཆམ་ཆོམ་དུ་གསོལ་བ། གཡས་ཞལ་དཀར་པོ་རྒྱ་ཆེར་བཞད་པ། གཡོན་ཞལ་དམར་པོ་རབ་ཏུ་འཇིགས་པ། །སྟེང་ཞལ་དུད་ནག་ཡ་སོས་མ་མཆུ་མནན་པས་མཆེ་བ་ཟངས་ཡག་ཏུ་གཙིགས་པ། ཞལ་ནས་ཧ་ཧ་དང༌། ཧཱུཾ་ཧཱུཾ་དང༌། ཀྵཾ་ཀྵཾ་གི་སྒྲ་དྲག་པོ་བསྒྲགས་པས། སྲིད་གསུམ་འདར་བར་མཛད་པ། ཕྱག་གཡས་ཀྱི་དང་པོས་རྡོ་རྗེས་མཚན་པའི་གྲི་གུག་གིས་ལོག་པར་ལྟ་བ་ཐམས་ཅད་ཀྱི་མགོ་ལུས་གཅོད་པ། གཡོན་གྱི་དང་པོས་ཀ་པཱ་ལ་གནོད་བྱེད་ཀྱི་ཁྲག་གིས་གང་ཞིང༌། དམ་ཉམས་ཀྱི་སྙིང་དང་བཅས་པ་ཐུགས་ཀར་འཛིན་ཞིང་ཞལ་དུ་གསོལ་བ། གཡས་འོག་མས་རལ་གྲི་འབར་བ་འཕྱར་བས་བདུད་སྡེ་མ་ལུས་པ་འཇོམས་པར་མཛད་ཅིང༌། ལ་ལར་དགྲ་ལ་ལ་ལར་མདུང་ཐུང་བསྣུན་པ། གཡོན་འོག་མས་མདུང་རྩེ་གསུམ་པ་དང༌། རུས་འཕྲེང་འགག་ཐབས་སུ་འཕྱར་བ། མཆན་ཁུང་དུ་གསེར་གྱི་བུམ་པ་བདུད་རྩིས་གང་བར་བསྣམས་པ། གཡོན་བརྐྱང་གཡས་བསྐུམ་བཞེངས་པའི་སྟབས་ཀྱི་གྱད་ཀྱི་འདོར་སྟབས་ཆེན་པོས་དགྲ་བགེགས་ཐམས་
ཅད་གཅིག་ཏུ་འདུས་པའི་ངོ་བོ་བམ་ཆེན་བསྣོལ་བའི་ལུས་ལ་ཉེད་པ། ཞལ་གདངས་མཆེ་གཙིགས་ལྗགས་བསྐྱོད་པ། དམར་ལ་ཟླུམ་པའི་སྤྱན་གསུམ་གསུམ་ཉི་མའི་དཀྱིལ་འཁོར་ལྟ་བུ་དགྲ་བགེགས་ལ་སྡང་མིག་ཏུ་གཟིགས་པ། མཆུ་འཕྱང་ཞིང༌། སྨ་ར་སྨིན་མ་དབུ་སྐྲ་དམར་སེར་གྱེན་དུ་བརྫེས་པ། སྟག་ལྤགས་གསར་པའི་ཤམ་ཐབས་དང་མི་མགོ་སྐམ་པོ་དབུ་རྒྱན། རློན་པའི་དོ་ཤལ། རུས་པའི་ཕྱག་རྒྱ། ཚངས་པའི་སྐུད་པ་གདུག་པའི་སྦྲུལ་ཆེན་པོ། དྲིལ་བུ་གཡེར་ཁའི་འཕྲེང་བ་ལ་སོགས་པས་བརྒྱན་པ། དྲག་ལ་རྔམ་པའི་ཆ་ལུགས་ཅན། བསྐལ་པའི་མེ་ལྟ་བུའི་མེ་དཔུང་འབར་བའི་དབུས་ན་བཞུགས་པའོ། །དཻ་ལྟར་གཙོ་བོ་བཞེངས་པ་ན་ལུས་དང་གྲིབ་མའི་ཚུལ་དུ། ཨེ་ཁྲཾ་གྱི་དཀྱིལ་འཁོར་བཞི་ལ། ལས་བྱེད་རྣལ་འབྱོར་མ་བཞི་དང༌། གཞན་ཡང་སྲོག་གཅོད་བཤན་པ་ལྔ་སོགས་ཀྱང་གྲུབ་པར་གྱུར་པ་ནི། གཡས་སུ་ཡུམ་ཆེན་གཡུང་མོ་ནག་མོ། གཡོན་དུ་ལས་མཛད་གཏུམ་མོ་ལྗང་ཁུ། མདུན་དུ་དམར་ནག་སྲིན་མོ་ཆེན་མོ། རྒྱབ་ཏུ་སེར་ནག་སིང་ག་གླིང་མ་རྣམས་ཁྲོ་ཞིང་གཏུམ་པ་ལང་ཚོ་ལ་བབ་པ། གཅེར་བུ་རྒྱན་མེད་པ། རབ་ཏུ་གྲིལ་ཞིང༌། དྲག་ཤུལ་ཆེན་མོ། ཕོ་ཉ་མོའི་ཆ་ལུགས་ཅན། གཡས་གྲི་གུག་འཕྱར་ཞིང༌། གཡོན་ཐོད་ཁྲག་འཛིན་པ། དབུ་སྐྲ་ཁམས་སེར་
ལྷུག་པར་གྲོལ་བ་མུན་ལྟར་གཏིབས་པ། ཁམས་གསུམ་གྱི་སྲོག་ལ་མངའ་མཛད་པའོ། །གཞན་ཡང་བཤན་པ་ནག་པོ་ལྕགས་ཀྱུ་འཛིན་པ། བཤན་པ་སེར་པོ་ཞགས་པ་འཕེན་པ། བཤན་པ་དམར་པོ་ལྕགས་སྒྲོག་སྐོར་བ། བཤན་པ་ལྗང་ཁུ་རལ་གྲི་འདེབས་པ། བཤན་པ་སྔོན་པོ་མདའ་གཞུ་འགེངས་པ། ཐམས་ཅད་ཀྱང་སྲིན་པོའི་ལུས་ལ་མོན་བུ་ལིངས་པ་ཆེན་པོའི་ཆ་ལུགས་ཅན། དགྲ་བགེགས་ཀྱི་བླ་ཚེ་སྐད་ཅིག་ལ་འགུགས་ཤིང་གསོད་པའི་ཤྭ་ན་ཁྲིད་པ། གཞན་ཡང་དེ་དག་གི་ཕྱི་རོལ་དུ་བདུན་གཅོད་ཀྱི་བཤན་པ་ཉེར་གཅིག །སྲིད་པའི་རྒྱལ་མོ་མུ་ཁ་ལེ་སྲིན་མོ་རལ་པ་གཅིག་མ། བདུད་འདུལ་གྱི་དམག་ཉི་ཁྲི་ཆིག་སྟོང༌། དམག་དཔོན་ཆེན་པོ་གཤིན་རྗེ་ཁྲོ་ཚོགས་སོགས་པ་དྲེགས་པ་ལྷ་མ་སྲིན་སྡེ་བརྒྱད་ཀྱི་ཚོགས་ས་གཞི་བར་སྣང་མཁའ་དབྱིངས་ཐམས་ཅད་ཡོངས་སུ་གང་བ་འཁོད་པར་གྱུར། དེ་ཐམས་ཅད་ཀྱི་དཔྲལ་བར་ཨོཾ། སོགས་དཀྱུས་དང་འདྲ། སྦྱར་སྤོས་སྲེག་ཅིང༌། ཧཱུཾ་ལྷ་མཆོག་མཧཱ་ཀཱ་ལ་མཐུ་བོ་ཆེ། ནས། ཕྱོགས་བཅུའི་ཞིང་ནས་འཁོར་བཅས་གཤེགས་སུ་གསོལ། །ལྷ་མཆོག་མཧཱ་ཀཱ་ལ་གཤེགས་སུ་གསོལ། ལྷ་ཆེན་ནག་པོ༴ ཞིང་སྐྱོང་གཟི་ལྡན༴ བྲམ་ཟེའི་གཟུགས་ཅན༴ ཡུམ་ཆེན༴ ལས་མཛད༴ དམར་ནག༴ སེར་ནག༴ འཁོར་གྱི༴ དྲེགས་པ་སྡེ་བརྒྱད་འཁོར་བཅས་གཤེགས་སུ་གསོལ། །མ་ལུས་འཁོར་བཅས་འདིར་
བྱོན་བདག་ལ་དགོངས། །རྣལ་འབྱོར་ཉམས་ཆགས་བསྐང་ཕྱིར་གཤེགས་སུ་གསོལ། །ཡང་ན། བསྟན་དགྲ་གནོད་བྱེད་འདུལ་ཕྱིར་གཤེགས་སུ་གསོལ། །ཞེས་པ་ལྟ་བུ་སྐབས་སུ་གང་བབ་དང་སྦྱར་ཏེ་ཤེས་པར་བྱའོ། །ཉེ་སྙིང་གི་མཐར། པདྨ་ཀ་མ་ལ་ཡ་སྟྭཾ། དེ་ནས་དངོས་གཞི་ལ། སྡོམ་ནི། མཆོད་བསྟོད་གཏོར་བསྔོ་མཆོད་བསྟོད་དང༌། །བཤགས་བསྟོད་གཏོར་བཤགས་ལན་བདུན་དང༌། །སླར་ཡང་བསྐངས་ཤིང་མཆོད་བསྟོད་དོ། །དེ་ཡང་མཆོད་བསྟོད། གཏོར་བསྔོ། སླར་ཡང་མཆོད་བསྟོད། བཤགས་བསྟོད། ཡང་གཏོར་བསྔོ་སྔོན་དུ་འགྲོ་བའི་བཤགསས་པ་ལན་བདུན། སླར་ཡང་བསྐང་བ་མཆོད་བསྟོད་རྒྱས་པ་སྟེ། དོན་ཚན་དྲུག་གོ །དང་པོ་ནི། བསྐང་རྫས་ལྟར་མཆོད་པ་བྱིན་གྱིས་བརླབས། གཏོར་སྐྱོང་སྐབས་འདིའི་མཆོད་ཕྲེང་འདི་ལ་རྔ་ཚིགས་བྱེད་དེ། འཇིག་རྟེན་ཁམས་ཀྱི་དགྲ་བགེགས་རྣམས། །བསྒྲལ་བའི་ཁྲག་གི་ཨརྒྷཾ་འདི། །ཞལ་བཞི་གཉན་པོའི་སྤྱན་སྔར་འབུལ། །དེ་རྗེས་ཁྲག་གི་ཨརྒྷཾ་ཞེས་པའི་ཚབ་ཏུ། དབང་ལྔ་མེ་ཏོག་འདི། སྤྱན་སྔར་འབུལ་གྱི་དོད་དུ་དབུ་ལ་འབུལ། དེ་བཞིན་དུ། ཚིལ་ཆེན་བདུག་སྤོས། ཤངས་ལ། ཞུན་ཆེན་མར་མེ་ཆེ། སྤྱན་ལ། འཁྲིས་པའི་དྲི་ཆབ། ཐུགས་ཀར། ཤ་རུས་ཞལ་ཟས། ཞལ་དུ། རྐང་གླིང་རོལ་མོ། སྙན་ལ། ཞེས་བརྗོད། རོལ་ཆེན་གྱི་སྒྲ་ལ། ཨརྒྷཾ་ནས། ཤཔྟའི་བར་གྱི་སྔགས་བརྗོད། ལྔ་ལྔ་ལྔ་ཡི་དམ་རྫས་འདི། །ཡེ་ཤེས་བདུད་རྩི་ཨ་མྲྀ་ཏ། །འདོད་ཡོན་
རྣམ་ལྔ་རྫོགས་པར་སྤྲུལ། །སྟོབས་འཕྲོག་ནག་པོའི་ཞལ་དུ་འབུལ། །མཆོད་སྤྲིན་རི་ལ་མཾ་སའི་ཐང༌། །ཕྱོགས་བཅུར་རྦ་ཀླུང་གཡོ་བ་ཡི། རཀྟའི་རྒྱ་མཚོ་བཅུད་ཀྱི་མཆོག །སྟོབས་འཕྲོག་འཁོར་དང་བཅས་ལ་འབུལ། །ཉམས་ཆགས་བསྐང་ཕྱིར་བཞེས་སུ་གསོལ། །རོལ་མོའི་སྐབས། སྙིང་པོའི་མཐར་འབྲུ་གསུམ་བཏགས། སྐུ་གསུམ་མངོན་གྱུར་རྡོ་རྗེ་འཆང་དབང་གི །རྣམ་གསུམ་བསྟན་པ་སྤེལ་ཞིང་བསྲུང་བའི་ཕྱིར། །དུག་གསུམ་བདུད་དཔུང་མ་ལུས་འཇོམས་མཛད་པ། །འཕྲུལ་གསུམ་མངའ་བ་ཁྱོད་ལ་ཕྱག་འཚལ་བསྟོད། ཁམས་གསུམ་མེ་ལྕེ་དམར་ནག་འབར་བའི་དབུས། །སྟོང་གསུམ་ཟིལ་གནོན་ཞིང་སྐྱོང་རྒྱལ་པོའི་སྐུ། །ས་གསུམ་འདར་བྱེད་ཁྲོ་གཏུམ་རྔམ་བརྗིད་ཆེ། །སྲིད་གསུམ་དབང་གྱུར་ཁྱོད་ལ་ཕྱག་འཚལ་ལོ། །དུས་གསུམ་རྒྱལ་བའི་ངོ་བོ་བླ་མ་དང༌། །སྒོ་གསུམ་རྡོ་རྗེས་བསྲུངས་པ་བདག་ཅག་ལ། །ལུས་ངག་ཡིད་གསུམ་སྡང་བས་རབ་འཁྲུགས་པའི། །དགྲ་བགེགས་ལོག་འདྲེན་རྣམ་གསུམ་ཚར་གཅོད་མཛོད། །ཅེས་སོ། །ཨོཾ་མཧཱ་ཀཱ་ལ་ཀཱ་ལ་བི་ཀཱ་ལ་ར་ཏྲི་ཏ་ས་མ་ཡ་སྨ་ར་ས་མ་ཡ། མ་ཏི་ཀྲ་མ་ཡེ། ས་མ་ཡ་རཀྵནྟུ། དཔལ་རྡོ་རྗེ་ནག་པོ་ཆེན་པོ་ཞལ་བཞི་པ་ཕོ་ཉ་བྲན་གཡོག་བཀའ་སྡོད་འཁོར་དང་བཅས་པ་ཐམས་ཅད་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ། རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་སངས་རྒྱས་སྲས་བཅས་ཀྱི་བཀའ་དང་དམ་ལས་
མ་མདའ་བར། དམ་ཚིག་སྲུངས། བསྟན་པ་སྐྱོངས། དཀོན་མཆོག་གི་དབུ་འཕངས་བསྟོད་ཁྱད་པར་དུ་བསྟན་པ་དང་བསྟན་པ་འཛིན་པ་རྣམས་དང༌། རྣལ་འབྱོར་པ་བདག་ཅག་འཁོར་དང་བཅས་པ་ལ་གནོད་ཅིང་འཚེ་བ། ལམ་སྒྲུབ་པ་ལ་བར་དུ་གཅོད་པར་བྱེད་པའི་དགྲ་བགེགས་ལོག་པར་འདྲེན་པའི་ཚོགས་རྣམས་ཀྱི། བསམ་ངན་སྦྱོར་རྩུབ་ཐམས་ཅད་ཞི་བའི་ཐབས་ཀྱིས་འདུལ་བར་མཛད་དུ་གསོལ། གལ་ཏེ་ཞི་བས་འདུལ་དུ་མ་འཚལ་ན། གང་ལ་གང་འཚམས་པའི་ཆད་པས་བཅད་པ་དང༌། བསྐྲད་ཅིང་གཟིར་བ་དང༌། །དབྱེ་བ་དང༌། སྡིགས་ཤིང་དཔའ་སྐོང་བར་མཛོད་དུ་གསོལ། མདོར་ན་ཆོས་སྒྲུབ་པའི་འགལ་རྐྱེན་བར་ཆད་ཐམས་ཅད་ཞི་བ་དང༌། བསམ་སྦྱོར་ཆོས་དང་མཐུན་པ་ཐམས་ཅད་ཡིད་བཞིན་དུ་འགྲུབ་ཅིང༌། བསྟན་པ་དང༌། བསྟན་པ་འཛིན་པ་དང༌། འཇིག་རྟེན་དུ་བདེ་ལེགས་རྒྱས་པར་མཛད་དུ་གསོལ། འདིའི་སྔགས་ཀྱི་སྐབས་རྡོ་རྗེ་རྩེ་ལྔའི་ཕྱག་རྒྱ་སྟོན་ཏེ་དམ་ལ་འཇོག་གོ །གཉིས་པ་ནི། དེ་ནས་དབུས་ཀྱི་གཏོར་མ་ལ་དམིགས་ཏེ། བསངས་སྦྱངས། སྟོང་པའི་ངང་ལས། ཨ་ལས་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་དགྲ་བགེགས་མ་ལུས་པ་བསྒྲལ་བ་ལས་བྱུང་བའི་མཾ་སའི་ས་གཞི། རུས་པའི་རི་བོ། རཀྟའི་རྒྱ་མཚོ་ས་གཞི་བར་སྣང་ཐམས་ཅད་ཁྱབ་པ། ཟག་མེད་བདུད་རྩིའི་རང་བཞིན་ཡེ་ཤེས་རྣམ་པ་ལྔའི་ངོ་བོར་གྱུར། ཨོཾ་ཨཱཿཧཱུཾ་ཧ་ཧོཿཧྲཱིཿས་ཁ་གསོའོ། །འདི་ཐོབ་ཐང་གཏོར་ཆེན་
གྱི་ཡིན་ཡང༌། གཏོར་སྐྱོང་ལ་ཡང་བྱེད་དོ། །དེ་ནས་སྔགས་རིང་ཚར་གསུམ་མམ་བདུན་གྱིས་གཙོ་བོ་ཡབ་ཡུམ་རྣམས་ལ་ཕུལ། གཏོར་མ་གཞན་རྣམས་ཨ་ཀཱ་རོའི་སྔགས་ཉི་ཤུ་རྩ་གཅིག་གིས་དྲེགས་པ་ཕོ་མོ་མཐའ་དག་ལ་བསྔོ། གསུམ་པ་ནི། ཧཱུཾ་དུར་ཁྲོད་ཆེན་པོའི་གནས་བརྒྱད་དང༌། ཁྱད་པར་བྱང་ཤར་འཇིགས་པའི་གནས། །བསིལ་བའི་ཚལ་སོགས་ཐམས་ཅད་ནས། །ཆོས་སྐྱོང་མགོན་པོ་ཞལ་བཞི་པ། །སྤྱན་འདྲེན་གནས་སུ་ད་ཚུར་བྱོན། ཁྱད་པར་དོ་ནུབ་གནས་འདིར་བྱོན། །འཕྲིན་ལས་སྒྲུབ་ཕྱིར་གུས་ཕྱག་འཚལ། །ཕྱི་ནང་གསང་བའི་རྟེན་རྣམས་འཛུགས། །མཆོད་ཡོན་མེ་ཏོག་བདུག་སྤོས་དང༌། །མར་མེ་དྲི་ཆབ་ཞལ་ཟས་དང༌། །རོལ་མོ་བླ་བྲེ་འཕན་དང་གདུགས། །ཤེས་རབ་མ་ད་ན་ཡི་ཆང༌། །ཐབས་མཆོག་མཾ་ས་བཱ་ལིཾ་ཤ །དམ་རྫས་རྒྱན་གྱི་ཚོགས་ཕུད་འདི། །དཔལ་ལྡན་མགོན་པོའི་ཞལ་དུ་འབུལ། །དམ་ཚིག་ལྡན་པའི་ཚོགས་ཁང་ན། །ས་ནག་སྟེང་ན་ཐོད་ནག་སྣོད། །མི་ནག་ཤ་ལ་ཁྲག་ཕྱུང་བ། །བསུར་ནག་དྲི་ལ་དར་ནག་ཕོད། དཀར་གསུམ་དངར་གསུམ་རྒྱན་གྱིས་བརྒྱན། །ཤ་ལྔ་བདུད་རྩི་ལྔར་ལྡན་པའི། །དམ་རྫས་རྒྱན་གྱི་གཏོར་མ་འདི། །ཏིང་འཛིན་སྔགས་དང་ཕྱག་རྒྱ་ཡིས། །གཉིས་མེད་བདུད་རྩིར་བྱིན་རླབས་ནས། །དཔལ་ལྡན་མགོན་པོའི་ཐུགས་དམ་བསྐང༌། །སྩོལ་ཞིག་དགོངས་ཤིག་དགེས་མཛོད་ལ། །རྣལ་འབྱོར་བཅོལ་བའི་འཕྲིན་ལས་མཛོད། །བར་ཆད་བདུད་དང་འགལ་རྐྱེན་སྤོངས། དཀོན་མཆོག་
གསུམ་གྱི་དབུ་འཕང་བསྟོད། །སངས་རྒྱས་བསྟན་པ་གཉན་པོ་སྲུངས། །ཞེས་རོལ་ཆེན་དང་བཅས་ནམ་མཁའ་མཛོད་ཀྱི་སྔགས་བརྗོད། ཧཱུཾ་རྒྱལ་བ་ཀུན་གྱི་ཐུགས་ལས་སྤྲུལ་པའི་སྐུ། །ཐུགས་རྗེས་དྲག་ཏུ་ཁྲོས་པ་རྔམ་པའི་སྐུ། །སྡིག་ཅན་ཚོགས་རྣམས་ཐལ་བར་མཛད་པའི་སྐུ། །ཡེ་ཤེས་གཟི་འོད་ཕྱོགས་བཅུར་རྒྱས་པའི་སྐུ། །ནག་པོ་ཆེན་པོ་ཁྱོད་ལ་བདག་བསྟོད་དོ། ཁྱེད་སྐུ་ལྷུན་པོའི་དཔལ་ལྟར་རབ་ཏུ་བརྗིད། ཁྱོད་གསུང་འབྲུག་སྟོང་ལྡིར་འདྲའི་ཧཱུཾ་སྒྲ་སྒྲོག ཁྱོད་ཐུགས་རྒྱ་མཚོ་ནམ་མཁའ་ལྟ་བུར་ཡངས། ཁྱོད་ཀྱི་ཡོན་ཏན་བསམ་འཕེལ་རིན་པོ་ཆེ། །འཕྲིན་ལས་ཕྱོགས་བཅུར་རྒྱས་ལ་ཕྱག་འཚལ་བསྟོད། །ཡུམ་ཆེན་བཞི་དང་ལས་ཀྱི་བཤན་པའི་ཚོགས། །མ་ལུས་འཁོར་བཅས་རྣམས་ལའང་བསྟོད་པ་འབུལ། །བཞི་པ་ནི། གང་ཕྱིར་རྡོ་རྗེ་འཛིན་པ་ཡི། །དངོས་གྲུབ་སློབ་དཔོན་རྗེས་འབྲང་གསུངས། །དེ་བས་དེ་ལ་བརྙས་པ་ནི། །རྩ་བའི་ལྟུང་བ་དང་པོར་བཤད། །རྩ་ལྟུང་དང་པོས་གོས་པ་རྣམས། །མཐོལ་ལོ་བཤགས་སོ་དག་པར་མཛོད། །བདེ་གཤེགས་བཀའ་ལས་འདས་པ་ནི། །ལྟུང་བ་གཉིས་པ་ཡིན་པར་བཤད། །རྩ་ལྟུང་གཉིས་པས་གོས་པ་རྣམས། །མཐོལ་ལོ་བཤགས་སོ་དག་པར་མཛོད། །ཅེས་པ་ནས། ཤེས་རབ་རང་བཞིན་བུད་མེད་ལ། །སྨོད་པར་བྱེད་པ་བཅུ་བཞི་པ། །བཅུ་བཞི་པ་ཡིས་གོས་པ་རྣམས། །མཐོལ་ལོ་བཤགས་སོ་དག་པར་མཛོད། །མཐུ་ཆེན་སྡང་བ་དགྲ་ཡི་དགྲ། །ཕས་རྒོལ་མུ་སྟེགས་བདུད་
ཀྱི་བདུད། །ཞལ་བཞི་མངའ་བ་ལྷ་ཡི་ལྷ། ཁྱེད་ལ་བདག་གིས་བསྟོད་པས་བསྟོད། །འདིར་གཤེགས་འདིར་བྱོན་དམ་ལ་མནོས། །འདིར་གཤེགས་འདིར་བྱོན་མཆོད་པ་བཞེས། །འདིར་གཤེགས་འདིར་བྱོན་འཕྲིན་ལས་མཛོད། །འདིར་གཤེགས་འདིར་བྱོན་བཟོད་པར་བཞེས། །བདག་ཅག་དམ་ལྡན་སློབ་མར་བཅས། །བྱང་ཆུབ་སྙིང་པོར་མཆིས་ཀྱི་བར། །ནག་པོ་ཆེན་པོ་ཁྱོད་ཀྱིས་སྲུངས། །འཕྲིན་ལས་རྣམ་བཞི་གྲུབ་པར་མཛོད། །དེ་ལྟར་བཤགས་པ་དང་བསྟོད་པ་སྦྲེལ་བ་དེ་ཚར་གསུམ་བྱའོ། །ལྔ་པ་ནི། གཏོར་མ་རྣམས་ཁ་གསོས་བྱིན་རླབས་གོང་ལྟར་བྱས་ཏེ། འབུལ་ཚུལ་ཡང་སྔ་མ་དང་འདྲ། སླར་ཡང་བསྐང་བའི་དཀྱུས་ན་ཡོད་པ་བཞིན། ཧཱུཾ་རྩ་རྒྱུད་བླ་མའི་ཚོགས་རྣམས་དང༌། །ཞེས་པ་ནས། དག་ཚངས་ཆེན་པོ་མཛད་དུ་གསོལ། །ཞེས་པའི་བར་བརྗོད་ནས་ཡིག་བརྒྱ་ཚར་གསུམ་བཟླ། དེ་ལྟར་ན་གཏོར་མ་ཁ་གསོ། བྱིན་རླབས། གཏོར་འབུལ་བཤགས་པ་ཡིག་བརྒྱ་རྣམས་ཁྲིགས་ཆགས་སུ་བྱས་པ་དེ་ལན་བདུན་བྱའོ། །དྲུག་པ་སླར་ཡང་བསྐང་བ་མཆོད་བསྟོད་ནི། བསྐང་རྫས། ཨ་མྲྀ་ཏས་བསངས་པ་ནས་གཟུང༌། རྣལ་འབྱོར་བཅོལ་བའི་ལས་མཛོད་ཅིག །ཅེས་པའི་བར་བསྐང་བ་རྒྱས་པ་ཉིད་བྱ་ལ། ཡང་གོང་དུ་བསྐང་བ་བྱས་ཟིན་ན། སྟོབས་ཆེན་ཤུགས་དྲག་ནས། རྣལ་འབྱོར་སྐྱོང་ཕྱིར་བསྣམས་སུ་གསོལ། །ཞེས་པའི་བར་དུ། ཕྱག་མཚན་དང་རྟེན་ཕུལ། ཨོཾ་མཧཱ་ཀཱ་ལ་ཀཱ་ལ་བི་ཀཱ་ལ་ར་ཏྲི་ཏ་ས་པ་རི་ཝཱ་རེ་བྷྱཿ ཨརྒྷཾ་སོགས་ནས་ཤཔྟ་ཨཱཿཧཱུཾ། སྙིང་པོའི་
མཐར། ཨོཾ་ཨཱཿཧཱུཾ་ནང་མཆོད་ཕུལ། བར་འདིར་སློབ་དཔོན་རིན་ཆེན་རྡོ་རྗེས་མཛད་ཟེར་བའི་བསྟོད་པ་དེ་མཛད་པར་སྣང་ངོ༌། །རྡོ་རྗེ་འཆང་གིས་བཀའ་བསྒོས་པའི། །སོགས་དང༌། རྒྱལ་བ་ཀུན་སོགས་ཀྱིས་ཀྱང་བསྟོད་དེ། དེ་ནས་བར་འདིར་གཏོར་བསྔོ་གཞན་དགོས་པ་རྣམས་དང་མཁའ་འགྲོ་སྤྱི་གཏོར། གཞི་བདག་གཏོར་མ་སོགས་བཏང་ངོ༌། །དེས་གཏོར་མ་སྒྲུབ་པ་དངོས་གཞིའི་ཆོ་ག་བསྟན་ཟིན་ཏོ། །གལ་ཏེ་ཉམས་ཆགས་ཤིན་ཏུ་ཤས་ཆེ་ན། རྡོ་རྗེ་སེམས་དཔའི་བུམ་སྒྲུབ་བམ། གྲིབ་སེལ་གྱི་བུམ་སྒྲུབ་གང་ཡང་རུང་བ་ཞིག་བྱས་ལ། རང་གི་སྙིང་གར་སྙིང་རིན་པོ་ཆེ་པདྨ་དམར་པོ་འདབ་བརྒྱད་ཁ་གྱེན་བསྟན། གློ་བ་རིན་པོ་ཆེ་པདྨ་དཀར་པོ་འདབ་བརྒྱད་ཁ་ཐུར་བསྟན། ཁ་སྦྱོར་བར་མཚམས་མེད་པའི་ནང་དུ། རྩ་བའི་བླ་མ་མི་བསྐྱོད་པ་ཧེ་རུ་ཀའི་རྣམ་པ་ཅན་དུ་བཞུགས། ཧེ་རུ་ཀའི་ཡི་གེ་བརྒྱ་པ་གང་མང་བཟླས་ཞིང༌། མཐར། མཧཱའ་ཀཱ་ལ་ཙ་ཏུར་མུ་ཁ་ས་མ་ཡ་མ་ནུ་སོགས་མགོན་པོའི་ཡི་གེ་བརྒྱ་པ་ཡང༌། ཉི་ཤུ་རྩ་རེ་སོགས་ཇི་ལྟར་འོས་པ་བཟླས་ནས། བུམ་པ་ལ་དམིགས་ཏེ། ཨོཾ་བི་ཤུདྡྷེ་སྭ་བྷཱ་ཝ་ཤུདྡྷོ྅ཧཾ་སྭཱ་ཧཱ། ཞེས་ཀྱང་མང་དུ་བཟླས་ཏེ། གཏོར་སྣོད་རིན་པོ་ཆེའི་གཞལ་ཡས་ཁང་དུ་ཆོས་སྐྱོང་འཁོར་བཅས་བསྐྱེད་ནས། ཁྲུས་ཆུ་གཏོར་མ་ལ་ལྡུགས་ཤིང༌། ཁྲུས་གསོལ་གྱི་འདོན་པ་སྤྱི་དང་འདྲ་བར་བྱའོ། །འདི་ཇོ་བོ་རྗེས་མགོན་པོ་སེང་ཞོན་གྱི་མན་ངག་བླངས་པ་ཡིན་ནོ། །དེ་ནས་གཏང་རག་དགའ་སྟོན་དཔའ་བོའི་སྟོན་མོ་བྱས་ལ་མཐར། དབང་དང༌། རྒྱས་པ་དང༌། ཞི་བ་སྤྱི་ལ་བསྡུ་ན་ཁང་སྟེང་དུ། སྤྱི་
སྟབས་ཙམ་གྱིས་ཕུལ་ཀྱང་ཆོག་ལ། སྤྲོ་ན་ཁང་སྟེང་དུ་ཆོ་ག་ད་ལྟར་འཆད་འགྱུར་ལྟར་བྱས་ཀྱང་རུང་ངོ༌། །ཡང་ལར་ནས་ཞི་བ་སོགས་ཡིན་ཀྱང༌། དམིགས་གསལ་བཟློག་པ་ལྟ་བུ་ལ་གཏོར་མ་རྣམས་གོ་མཚོན་རོལ་མོ་དང་བཅས་པས་ཁྱེར་ཏེ། གནོད་བྱེད་ཀྱི་ཕྱོགས་སམ་བཞི་མདོ་སོགས་སུ་མེ་ཏོག་གི་ཚོམ་བུ་དགུ་བཀོད་པའི་སྟེང་དུ་སྟེགས་བུ་ལ་བཞག །ཆུ་ཆང་ནང་མཆོད་ཀྱིས་བྲན། སྤྱན་འདྲེན་ཚིགས་བཅད་རྒྱས་བསྡུས་ཇི་ལྟར་འོས་པ་བྱ། གདན་འབུལ་དམ་བཞག །སྔགས་རིང་གིསགཏོར་མ་བསྔོ། མི་རྟོག་དབྱིངས་ལས་ཐུགས་རྗེའི་སྐུར་བཞེངས་ཤིག་ནས། གདོང་བཞི་ཏེ་སེའི་ཞིང་སྐྱོང་མཛད་ལ་བསྟོད། །མདོག་ནག་མེའི་དབུས་ནས་ཕྱག་བཞི་པ། །གྲི་ཐོད་རལ་གྲི་མི་རུས་ཕྲེང་བ་འཛིན། །མཁའ་འགྲོ་བཞི་དང་དྲེགས་པའི་འཁོར་གྱིས་བསྐོར། །གཡོག་དང་བཅས་ལ་གུས་པས་ཕྱག་འཚལ་བསྟོད། །རྫོགས་པའི་སངས་རྒྱས་སྤྱན་སྔ་རུ། །ཞེས་སོགས་བྱ། འདི་སྟབས་གཏོར་དགྲ་ཕྱོགས་སུ་གཏོང་བ་ཙམ་ཀ་ཡིན་པས། སྒོ་དབྱེར་འཕྲང་སོལ་གསེར་སྐྱེམས་ཟོར་ལམ་དབྱེ་བ་སོགས་གལ་མི་ཆེ་ལ། ཅི་སྟེ་སྤྲོས་པ་ལ་མོས་ན། གསེར་སྐྱེམས་དང༌། ལམ་སེལ་ཅུང་ཟད་བྱས་ཀྱང་མི་འགལ་ལོ། །ཐོག་མར་སྤྱི་སྟབས་བྱ་སྟེ། ཧཱུཾ་ལྷ་ཆེན་ཐུགས་ཀྱི་སྤྲུལ་པ་དྲག་ཤུལ་ཅན། །སྲིད་གསུམ་དབང་སྒྱུར་ཞིང་སྐྱོང་འཇིགས་པའི་སྐུ། ཁམས་གསུམ་སྲོག་གི་མངའ་བདག་ཡུམ་ཆེན་བཞི། །གསོད་བྱེད་དྲེགས་པ་ཕོ་ཉའི་ཚོགས་དང་བཅས། །སྣང་སྲིད་དྲེགས་པ་སྡེ་བརྒྱད་
འཁོར་དང་བཅས། །འདིར་གཤེགས་རྒྱན་གྱིས་གཏོར་མ་འདི་བཞེས་ཤིག །ཅེས་སོགས་སྤྱི་དང་མཐུན་པར་སྦྱར་ནས་རོལ་ཆེན་ཡུན་རིང་དུ་བྱའོ། །དེ་ནས་གཏོར་མ་དགྲ་ཕྱོགས་སུ་གཏོང་ན། རོལ་མོ་དྲག་ཏུ་བསྐུལ་ཞིང༌། ཧཱུཾ་བྷྱོཿ རིག་འཛིན་བརྒྱུད་པའི་བཀས་བསྐུལ་ཞིང༌། །དཀོན་མཆོག་གསུམ་གྱི་བདེན་པའི་མཐུས། །ཆོས་སྐྱོང་སྲུང་མའི་དམག་དཔུང་འགྱེད། །བྷྱོཿབྷྱོཿ དེ་ནི་དགྲ་ལ་བྷྱོཿ ཆོས་ཆོས་དེ་ནི་དགྲ་ལ་ཆོས། །འགྲེས། ནུས་མཐུ་རྨད་བྱུང་སྲུང་མའི་གཙོ། །གདོང་བཞི་མགོན་པོ་འཁོར་དང་བཅས། །རུ་མཚོན་དགྲ་བོའི་ཡུལ་དུ་འགྱེད། །བྷྱོ༴ ཆོས༴ ཞལ་བཞིའི་ཀློང་ནས་མེ་འབར་ཞིང༌། །ཕྱག་བཞིས་འཇིགས་པའི་མཚོན་ཆ་བསྡིགས། །ཞབས་གཉིས་དོར་སྟབས་བསྐྱོད་བཞིན་དུ། །བྷྱོ༴ ཆོས༴ ཡུམ་ཆེན་བཞིའི་དཔུང་བསྡུས་ནས། །ནག་མོ་འབར་མ་མ་མོའི་ཚོགས། །ནད་ཡམས་དལ་ཡམས་བདག་མོ་རྣམས། །བྷྱོ༴ ཆོས༴ མ་རུ་རྩེའི་དུར་ཁྲོད་ནས། །བཤན་པའི་རྒྱལ་པོ་ཟངས་ཁྲབ་ཅན། །རུ་མཚོན་གློ་སྙིང་ཐོགས་ནས་ཀྱང༌། །བྷྱོ༴ ཆོས༴ ཟངས་གྲི་ཀླད་ལ་བསྐོར་ཞིང་འགྱིང༌། །རྒྱུ་ཞགས་འདོམ་དགུ་འཕེན་ཞིང་རྒྱུག །ཕོ་བདུད་བཤན་པ་ནག་པོ་བདུན། །བྷྱོ༴ ཆོས༴ ཟངས་ཀྱི་ཁྱི་མོ་ཁྲག་ཁ་མ། །ལན་བུ་ཅན་གྱི་མ་མོ་བདུན། །དགྲ་བོའི་བླ་སྲོག་ལེན་པའི་ཕྱིར། །བྷྱོ༴ ཆོས༴ དམར་ནག་ཁྲག་གི་རལ་པ་ཅན། །གྲི་ཕུབ་སྐོར་ཞིང་བསྐྱོད་
འགྲོས་ཀྱིས། །དགྲ་བོའི་བདུན་བརྒྱུད་གཅོད་བྱེད་པ། །བྷྱོ༴ ཆོས༴ ཕོ་བདུན་མོ་བདུན་སྤྲུལ་པ་བདུན། །ལས་བྱེད་བཤན་པ་ཉེར་གཅིག་ཚོགས། །དམག་དཔུང་བསྐྱེད་ལ་རུ་མཚོན་ཕྱོར། །བྷྱོ༴ ཆོས༴ གཞན་ཡང་མགོན་པོའི་བཀའ་ཉན་པ། །དཔལ་མགོན་བདུན་བཅུ་རྩ་ལྔའི་ཚོགས། །རང་འཁོར་དམག་དཔུང་ལྡན་པ་ཡང༌། །བྷྱོ༴ ཆོས༴ སྟེང་ནས་སྤྲུལ་པའི་དམག་དཔུང་ནི། །ལྷ་དམག་འབུམ་སྡེ་བརྒྱ་བྱིན་བཅས། །ས་སྲུངས་ཞོན་པའི་མཐུ་བོ་ཆེ། །བྷྱོ༴ །ཆོས༴ བར་ནས་སྤྲུལ་པའི་དམག་དཔུང་ནི། །བདུད་དམག་འབུམ་སྡེ་ཁྱབ་འཇུག་བཅས། །མཁའ་ལྡིང་ཞོན་པའི་མཐུ་བོ་ཆེ། །བྷྱོ༴ ཆོས༴ འོག་ནས་སྤྲུལ་པའི་དམག་དཔུང་ནི། །ཀླུ་གཉན་འབུམ་སྡེ་ལྟོ་འཕྱེར་བཅས། །སྤྲུལ་ནག་ཞོན་པའི་མཐུ་བོ་ཆེ། །བྷྱོ༴ ཆོས༴ བར་སྣང་ཁམས་ལ་དབང་བསྒྱུར་བ། །སྡེ་བརྒྱད་དབང་བསྒྱུར་རཱ་ཧུ་ལ། །མཧཱ་དེ་བ་དྲག་ཤུལ་ཅན། །བྷྱོ༴ ཆོས༴ འདི་ལྟར་ཁྱེད་ལ་བསྐུལ་བ་ཡང༌། །ཤཱཀྱའི་བསྟན་ལ་གནོད་བྱེད་པའི། བདུད་སྡེའི་བསམ་སྦྱོར་ངན་པ་རྣམས། །འདི་ཡང་དམར་ཆེན་གཏོར་མས་བཟློག །ལས་ངན་གཞན་འཕྲུལ་དབང་བྱེད་མཐུས། །ཆོས་མིན་ཆོས་ལྟར་བཅོས་པའི་བློས། །ཉིན་མཚན་བདུད་ཀྱི་འཁོལ་བ་མཐོང༌། །འདི་ཡང་༴ བླ་མ་རྡོ་རྗེ་སློབ་དཔོན་ལ། །སྨོད་ཅིང་བཤུད་པའི་སྡིག་ལྟ་མཁན། །ལས་ངན་འབྱུང་པོས་མནར་བ་ཡང༌། །འདི་ཡང་༴ སྐུ་གསུང་ཐུགས་
ཀྱི་འགལ་རྐྱེན་ལ། །སྤང་བྱ་མི་མཐུན་ཕྱོགས་རྣམས་དང༌། །བྱད་ཁ་རྦོད་གཏོང་མ་ལུས་པ། །འདི་ཡང་དམར་ཆེན་གཏོར་མས་བཟློག །བདག་ཅག་ཡོན་མཆོད་འཁོར་བཅས་ལ། །གཞན་གྱི་བསམ་སྦྱོར་ངན་པ་ཡིས། །བྱད་ཁ་ཕུར་ཁ་གནོད་པའི་ཚོགས། །འདི་ཡང་དམར་ཆེན་གཏོར་མས་བཟློག །རྨི་ལྟས་རྩུབ་ཅིང་མཚན་མ་ངན། །མོ་ངན་ཕྱོགས་ངན་ལོ་སྐེག་དང༌། །རྒྱུ་སྐར་ངན་པའི་སྦྱོར་བ་རྣམས། །འདི་ཡང་དམར་ཆེན་གཏོར་མས་བཟློག །མོན་མོ་བསེའི་རྣ་ཆ་ཅན། །ལག་ན་ཐུན་དང་དུག་ཕྱེ་ཐོགས། །དེ་ནི་མ་མོའི་རྦོད་གཏོང་སྟེ། །འདི་ཡང་༴ ཧ་ལ་ནག་པོ་འཇིགས་པའི་གཟུགས། །རྒྱུ་རློན་ག་ཤ་ལུས་ལ་ཐོགས། །དེ་ནི་གཤིན་རྗེའི་རྦོད་གཏོང་སྟེ། །འདི་ཡང་༴ ནམ་མཁའ་གློག་དང་སེར་ཕྲན་འཁྲིགས། །རི་བོའི་རྩེ་ནས་ཐོགས་འབབ་པ། དེ་ནི་ཕུར་པའི་རྦོད་གཏོང་སྟེ། །འདི་ཡང་༴ སྟོང་གསུམ་མིག་གིས་གང་བའི་གཟུགས། །འུར་འུར་སྒྲ་སྒྲོག་མཁའ་ལ་བསྐྱོད། །དེ་ནི་གཟའ་མཆོག་རྦོད་གཏོང་སྟེ།འདི་ཡང་༴ གཙུག་ལག་འཇིག་ཅིང་གླེགས་བམ་འཁུར། །སྐུ་གཟུགས་གཡོ་ཞིང་མཆི་མ་འཛག །དེ་ནི་མུ་སྟེགས་རྦོད་གཏོང་སྟེ། །འདི་ཡང་དམར་ཆེན་གཏོར་མས་བཟློག །མཐུ་སྟོབས་དབང་ཕྱུག་ལྷ་ཡི་ལྷ། ཁྱོད་ཀྱིས་མི་བཟློག་གང་ཡང་མེད། །བྱད་ཁ་རྦོད་གཏོང་གནོད་པའི་ཚོགས། །ཐམས་ཅད་དམར་ཆེན་གཏོར་མས་བཟློག །
བདག་ཅག་དཔོན་སློབ་འཁོར་བཅས་ཀྱི། །སྔོན་ལས་འཕྲན་རྐྱེན་གྱུར་པ་ཡི། །ནད་གདོན་མི་མཐུན་ཕྱོགས་རྣམས་ཀུན། །བཟློག་སྒྱུར་འཕྲིན་ལས་གཉན་པོ་མཛོད། །ཅེས་པའི་མཐར་རྩ་སྔགས་དཀྱུས་མ་དང༌། །བསད་སྔགས་རིང་ཐུང་གང་རུང་དང་བཅས། གཏོར་མ་དེ་ཉིད་དེ་ཀར་དགྲ་ཕྱོགས་སུ་རྩེ་བསྟན་ནས་འཇོག་པའམ། ཡང་ན་གཏོར་སྟེགས་སུ་བཞག་གོ །ཡང་དེཉིད་ནས་ཟོར་དུ་འཕང་པའི་ལུགས་ཀྱང་ཡོད། ཡང་གཏོར་མའི་སྙིང་པོ་རྩེ་མོ་དགྲ་ཕྱོགས་སུ་བསྟན། གཞན་རྣམས་འཕེན་པའི་ལུགས་ཀྱང་འདུག །གཏོར་མ་དགྲ་ཕྱོགས་སུ་མི་གཏོང་བའི་ཕྱོགས་ལ། དྲག་བསྐུལ་ནི་མི་དགོས། སྤྱི་སྟབས་ཀྱི་མཐར་གཏོར་མའི་སྙིང་པོ་མ་སྒྱེལ་བར་འཐེབ་ཀྱུ་སོགས་ཐུར་ལ་ཉིལ་དུ་འཇུག་པའི་སྲོལ་ཡོད་དོ། །དེ་ནས། སྲིད་ཞིའི་དཔལ་ཡོན་སོགས་དགེ་ལེགས་ཀྱི་ཚིག་བརྗོད། ནང་དུ་ཡོང༌། མཆོད་པ་ཁ་གསོས་བྱིན་གྱིས་བརླབས། འཇིག་རྟེན་ཁམས་ཀྱི་སོགས་གོང་བཞིན་ལས། འཕྲིན་ལས་སྒྲུབ་ཕྱིར་བཞེས་སུ་གསོལ། ཞེས་འདོན་པ་སྤོས་ནས་མཆོད་པ་འབུལ། ཧཱུཾ་ཡོན་ཏན་མྱུར་རྫོགས་དངོས་གྲུབ་མངའ་བའི་ལྷ། །མ་ལུས་རྨད་བྱུང་ཕན་པའི་དགོངས་པ་ཅན། །འཕྲིན་ལས་རྣམ་བཞིས་བདུད་དཔུང་ཚར་གཅོད་པའི། །ལེགས་ལྡན་མགོན་པོ་འཁོར་དང་བཅས་ལ་འདུད། །མི་རྟོག་དབྱིངས་ལས་ཐུགས་རྗེས་སྐུར་བཞེངས་ཤིག །འབྱུང་བ་གུར་ཆེན་བརྩེགས་པའི་གཞལ་ཡས་ནས། །བདེ་གཤེགས་བཀའ་ཡི་སྲུང་མ་དམ་ཚིག་ཅན། །རྡོ་རྗེ་ནག་པོ་ཆེན་པོ་དབྱིངས་ནས་
གཞེངས། །དཔལ་ལྡན་དབང་ལྡན་སྲིད་གསུམ་དབང་བསྒྱུར་ཞིང༌། །མཆེ་བ་གཙིགས་ཤིང་མཆུ་འཆང་ཤུགས་ཆེ་བ། །སྒྲ་སྒྲོག་དྲིལ་བུའི་འཕྲེང་བས་བརྒྱན་པ་ཡི། །གདོང་བཞི་ལྡན་ཁྱོད་ཏེ་སེའི་ཞིང་སྐྱོང་མཛད། །རྫོགས་པའི་སངས་རྒྱས་སྤྱན་སྔ་རུ། །བསྟན་པ་བསྲུང་བར་ཞལ་བཞེས་པའི། །ནག་པོ་ཆེན་པོ་ཞལ་བཞི་པ། །ཡུམ་ཆེན་སྲིང་མོ་བཞི་དང་བཅས། །ཤ་ཆེན་ཟན་དང་མེ་ཏོག་སྤོས། །ཆང་ཕུད་ཤ་ཁྲག་དག་གིས་མཆོད། །རྒྱལ་བའི་བསྟན་པ་སྐྱོང་བ་དང༌། །བཅོལ་བའི་འཕྲིན་ལས་གྲུབ་པར་མཛོད། །ཡིག་བརྒྱ། བཟོད་གསོལ། རྟེན་ལ་བརྟན་བཞུགས། མགྲོན་གཤེགས་གསོལ་རྣམས་བྱའོ། །དམ་ཚིག་པ་རང་ལ་སྟིམ། སྨོན་ལམ་དང༌། བཀྲ་ཤིས་རྣམས་ཀྱང་བྱའོ། །འདི་ཉིད་དཀྱུས་ཀྱི་གཏོར་སྐྱོང་ཉམས་ལེན་འཇམ་པོའི་ལུགས་གཙོ་བོར་གྱུར་པ་ཡིན་པས། ཡང་ཡང་སྒྲུབ་ན་ལེགས་ཤིང༌། དེ་ཡང༌། ཉིན་ཞག་མང་པོར་སྦྲེལ་ཏེ། སྒྲུབས་ན་བཟང་བས་ཞག་སྔ་མ་རྣམས་ལ་དངོས་གཞིའི་ས་བཅད་དྲུག་པོ་རྣམས་རྫོགས་པར་བྱ། ཁྲུས་གསོལ་ཉིན་རེ་བཞིན་བྱེད་མི་བྱེད་སྐབས་དང་སྦྱར། ཐུན་གྱི་མཐར། རྗེས་ཆོག་ནི། མཆོད་བསྟོད། གསོལ་བཏབ། ཡིག་བརྒྱ། བཟོད་གསོལ། བརྟན་བཞུགས་རྣམས་བྱ། འདི་དག་ཏུ་གཏོང་མགྲོན་གཤེགས་གསོལ་མི་དགོས། སྨོན་ལམ་དང་བཀྲ་ཤིས་ཇི་ལྟར་འོས་པའོ། །དེ་དག་ནི་གཏོར་སྒྲུབ་བམ་གཏོར་སྐྱོང་ལག་ཏུ་བླངས་བའི་རིམ་པ་མདོ་ཙམ་དུ་བཤད་ཟིན་ཏོ།། །།བཀྲ་ཤིས། །