ལྷ་ཆེན་ལྕམ་དྲལ་གྱི་སྒྲུབ་ཐབས་དགྲ་བགེགས་ཀུན་འཇོམས།
ལྷ་ཆེན་ལྕམ་དྲལ་གྱི་སྒྲུབ་ཐབས་དགྲ་བགེགས་ཀུན་འཇོམས་ཞེས་བྱ་བ་བཞུགས་སོ། །
ན་མོ་གུ་རུ་མཧཱ་ཀཱ་ལཱ་ཡ། རབ་འཇིགས་དྲེགས་པ་འདུལ་མཛད་དཔའ་བོ་ཆེ། །སྒྲུབ་ལ་བུ་གཅིག་ལྟར་བརྩེ་དངོས་གྲུབ་སྩོལ། །བླ་མ་དང་ནི་ནག་པོ་ཆེན་པོ་ལ། །གུས་པས་བཏུད་ནས་གཏོར་མའི་ཆོ་ག་བཤད། །འདིར་བྲིས་སྐུ་དང་མཆོད་གཏོར་བཤམས། བདག་བསྐྱེད་དང་ཡི་དམ་གྱི་མཆོད་གཏོར་སྔོན་དུ་འགྲོ་བས་འདི་སྐད་ཅེས་བྱའོ། །ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་རང་གི་མདུན་དུ་འབྱུང་བཞི་རི་རབ་དང་བཅས་པའི་རྩེ་མོར། དུར་ཁྲོད་ཆེན་པོའི་གནས། ཤིན་ཏུ་གཏུམ་པའི་ལྗོངས། དྲེགས་པ་བདུད་ཀྱི་ཡུལ། དུག་གི་ན་བུན་འཐུལ་བ། དྲག་པོའི་གློག་འཁྱུག་ཅིང༌། རྒྱོབ་སོད་ཀྱི་འབྲུག་སྒྲ་སྒྲོག་པ། གནམ་ལྕགས་ཀྱི་ཐོག་དང་མཚོན་ཆ་སྣ་ཚོགས་ཀྱི་སེར་བ་འབབ་ཅིང༌། མ་མོ་འདུ་བའི་གནས། མཚན་
མོ་མེ་འབར་བ། ཉིན་མོ་རླུང་ནག་འཚུབ་ཅིང༌། ན་བུན་རྣག་ཁྲག་དང་ཞག་ཏུ་འབབ་པ། མི་རོ་སྐམ་རློན་རིད་གསུམ་སྣ་ཚོགས་བཅལ་དུ་བཀྲམ་ཞིང༌། ཁྲག་ཞག་གི་རྦ་ཀློང་འཁྲུག་པ། གཅན་གཟན་གཏུམ་པོ་རྣམས་ངར་སྐད་འབོད་པའི་དབུས་ན། རྨངས་གཞི་ལྕགས་ལས་གྲུབ་པའི་སྟེང་དུ། ཤར་མིའི་ཐོད་པས་བརྩིགས་པ། ལྷོར་རྟའི་ཐོད་པས་བརྩིགས་པ། ནུབ་སྤྲེའུའི་ཐོད་པས་བརྩིགས་པ། བྱང་ལུག་གི་ཐོད་པས་བརྩིགས་པའི་ཕོ་བྲང་ཆེན་པོ། ཕྱི་རིན་པོ་ཆེའི་གཞལ་ཡས་ཁང་ལ། ནང་ཐོད་པའི་མཁར་དུ་ཡོད་པ། གྲུ་བཞི་སྒོ་བཞི་པ་ཤིན་ཏུ་འཇིགས་ཤིང་རབ་ཏུ་འབར་བ། ཟུར་བཞི་ཟངས་ལ་བྱས་པ། སྒོ་བཞི་བསེ་ལས་བྱས་པ། གསེར་གྱི་རེ་ཆ་གསལ་བ། མུ་མིན་འཕྲུལ་གྱི་གཡག་
ཤིང་ཅན། །རྟ་བབས་དུང་ལ་གྲུབ་པ། ཟངས་ལྕགས་ཀྱི་ཁྲག་གི་བང་ཡོད་པ། ནང་ཀེ་རུས་ཀྱི་ཀ་གདུང་རྣམས་ཀྱིས་ཕུབ་པ། རུས་པའི་དྲྭ་བ་དྲྭ་ཕྱེད་དང༌། མི་མགོ་བརྩིགས་པའི་ཏོག་གིས་མཚན་པ། ངོས་རྣམས་ལ་ཁྲག་གི་ཟར་ཆུ་འབབ་པ། དེའི་ནང་མི་རོ་རྟ་རོ་བཅལ་དུ་བཀྲམ་པ། མི་ཁྲག་རྟ་ཁྲག་མཚོ་རུ་བསྐྱིལ་བ། མི་ལྤགས་རྟ་ལྤགས་ཡོལ་བར་བྲེས་པ། གསུར་ཆེན་དུད་པ་ཕྱོགས་བཅུར་འཐུལ་བ། ཕྱི་རོལ་རྨང་གཞིའི་སྟེགས་བུ་ལ་རོ་ལངས་ཀྱིས་ཤོན་བྱེད་པ། །ཀེང་རུས་ཀྱི་གར་མཁན་འཁྲབ་པ། ཕྱོགས་ཐམས་ཅད་དུ་ཞིང་ཆེན་གྱི་བླ་བྲེ། མི་རོའི་རྒྱལ་མཚན་དང་བ་དན། རྒྱུ་རློན་གྱི་ལྡ་ལྡི། མགོ་བོ་སྣ་ཚོགས་ཀྱི་དོ་ཤལ་དང༌། །སྐྲའི་རྔ་ཡབ་ལ་སོགས་པ་ཉམ་ང་ལ་བག་ཚ་བའི་རྒྱན་དང་ལྡན་པའི་ཕོ་བྲང་གི་ལྟེ་བར་ནག་པོ་བདུན་བརྩེགས་མཁར་ཟུར་དྲུག་པ་ལ་མཐིང་བཟང་གཡུའི་སྐས་བཙུགས་པའོ། །དེའི་དབུས་སུ་མཐིང་ནག་གྲུ་གསུམ་འབར་བའི་དཀྱིལ་འཁོར་ལ་རིན་པོ་ཆེའི་ཁྲི་པདྨ་དང་ཉི་མའི་སྟེང་དུ་མི་རོ་རྟ་རོ་ལ་གནས་པའི་རཾ་ལས་དུག་སྡཽང་རཾ་གྱིས་མཚན་པ་ལས་འོད་འཕྲོས། དགྲ་བགེགས་ཐམས་ཅད་ཚར་བཅད། ཚུར་འདུས་ཡོངས་སུ་གྱུར་པ་ལས་ལྷ་ཆེན་དཔལ་འབར་མཧཱ་ཀཱ་ལ་སྲོག་བདུད་ནག་པོ་ཐོད་པའི་ཕྲེང་བ་ཅན་སྐུ་མདོག་སྨུག་ནག་བདུད་རྟ་ནག་པོ་རྟིང་དཀར་ལ་ཆིབས་པ། ཞལ་གཉིས་ཕྱག་བཞི་པ། གཡས་ཤྭ་ན་མུ་ཁའི་གདོང་ཤེལ་མིག་གྱེན་དུ་ཕྱོགས་པས་དགྲ་བགེགས་ལ་ཟུག་ཅིང་བླ་འགུགས་པ།
ཞལ་གཉིས་ཀའང་མཆེ་བ་གཙིགས་པ། ལྗགས་འགྲིལ་ཞིང་རྐན་སྒྲ་སྡེབ་པ། ཧཱུཾ་ཕཊ་ཀྱི་གད་མོ་དང་ང་རོ་དྲག་པོ་སྒྲོག་པ། ཕྱག་གཡས་གཉིས་ཀྱིས་དུང་གི་སྡོང་པོ་མེ་འབར་བ་དང་བདུད་ཞགས། གཡོན་གཉིས་ཀྱིས་ཁྲམ་ཤིང་དང་ཐོད་པ་སྙིང་བཅས་ཁྲག་གིས་གང་བ་འཛིན་པ། དམར་ལ་ཟླུམ་པའི་སྤྱན་གསུམ་སྡང་མིག་ཏུ་བསྒྲད་པ། སྨ་ར་དང་སྨིན་མ་དང་སྐྲ་ཁམས་ནག་གྱེན་དུ་བརྫེས་པ་ལ་སྦྲུལ་ནག་དང་དར་ནག་གི་ཅོད་པན་ཅན། མི་མགོ་སྐམ་པོ་ལྔས་དབུ་ལ་བརྒྱན་ཅིང༌། རློན་པ་ཁྲག་འཛགས་པ་ལྔ་བཅུའི་དོ་ཤལ་འཆང་བ། དུག་སྦྲུལ་སྟོང་གི་ཆུན་པོས་བརྒྱན་པ། སྐུ་ལ་དར་ནག་གི་འཇོལ་བེར་སུམ་བརྩེགས་མུན་པའི་གཡུང་དྲུང་རིས་དང་གསེར་གྱི་སྐ་རགས་ཅན། དེའི་སྟེང་ན་དྲེད་མོའི་བཅང་སླག་སེང་གེ་སྔོན་པོའི་གོང་ལག་ཅན་གསོལ་བ། ཞབས་ལ་སག་ཏིའི་ལྷམ་གྱོན་པ། སྙན་ནས་འབྲུག་སྟོང་ལྡིར་ཞིང༌། དྲི་འཛིན་ནས་ནག་པོ་བརྩེགས་པའི་རླུང་དམར་ལྡང་བ། སྡང་མིག་ལས་མེ་འོད་སྤྲོ་ཞིང༌། ཞལ་དུ་ཤ་ཁྲག་གི་རྒྱ་མཚོ་འཁྱིལ་བ། སྒོ་དགུ་ནས་ཉམས་པ་ལ་དུག་གི་ཆར་སྤྲིན་འབེབས་པ། སྤྱི་བོ་ལ་ཉི་ཟླས་བརྒྱན་པ། སྐུ་ཆེ་ལ་ཡན་ལག་རགས་པ། ཁམས་གསུམ་འདར་ཞིང་སྐྲག་པར་བྱེད་པ། དགྲ་བགེགས་དང་ལོག་པར་ལྟ་བ་ཐམས་ཅད་སྐད་ཅིག་གིས་རྡུལ་དུ་རློག་པའོ། །དེའི་གཡོན་དུ་བྷྱོཿལས་རལ་གྲི་བྷྱོཿས་མཚན་པ་ཞུ་བ་ལས་དཔལ་ལྡན་ལྷ་མོ་གཉན་གྱི་རེ་མ་ཏཱི་སྐུ་མདོག་ནག་མོ། ཞལ་གཅིག་ཕྱག་
བཞི་མ། ཞལ་རས་ཕྱི་རྒྱབ་ཏུ་ཕྱོགས་པས་གཟིགས་པ། མི་རོ་ཞལ་དུ་གསོལ་བཞིན་པས་མཆེ་བ་གཙིགས་ཤིང་སྤྱན་གསུམ་དང་ལྡན་པ། དབུ་སྐྲ་རལ་བ་དམར་སེར་གཡོན་ངོས་སུ་འཁྱིལ་བ། ཕྱག་གཡས་གཉིས་ན་ཞིང་ཆེན་དང་རལ་གྲི་སྡིག་པའི་ཡུ་བ་ཅན་མེ་འབར་བ། གཡོན་གཉིས་ན་ནེའུ་ལེའི་རྐྱལ་པ་ནོར་བུའི་ཆར་འབེབས་པ་དང༌། ཐོད་པ་ཁྲག་གིས་གང་བ་འཛིན་པ། ཐོད་སྐམ་གྱི་དབུ་རྒྱན་དང༌། རློན་པའི་དོ་ཤལ་ཅན། སྙན་གཡས་གཡོན་ལ་དུག་སྦྲུལ་དང་སེང་གེས་བརྒྱན་པ། ཞལ་ནས་དྲག་སྔགས་ཀྱི་འོ་དོད་འབོད་ཅིང༌། མིག་ནས་ཁྲག་གི་ཆར་པ་འབབ་པ། ཤངས་ནས་ནད་ཀྱི་ན་བུན་འཐུལ་བ། ལྟེ་བའི་ཐད་ཀ་ནས་ཉི་མ་འཆར་ཞིང༌། སྤྱི་བོའི་གཙུག་ཏུ་ཟླ་བ་རྒྱས་པ། མི་ལྤགས་ཀྱིས་སྟོད་གཡོགས་ཤིང༌། རེ་ལྡེས་སྨད་དཀྲིས་པ། སྦྲུལ་རིགས་བཞིའི་སྐ་རགས་བཅིངས་པ། ཞབས་ལ་དབང་གི་ལྕགས་སྒྲོག་འཁྲོལ་བ། སྲིན་པོའི་བོང་བུ་གྭ་དམར་ལ་ཆིབས་པ། ནད་ཀྱི་རྐྱལ་པ་མཚོན་གྱི་གྲུ་གུ་བྱང་དམར་གྱི་ཁྲེས་པོ། ཤོ་རྡེའུ་དཀར་ནག་བདུད་ཀྱི་ཁྲམ་བམ་སྟེ་སྤྲུལ་པའི་མཚོན་ཆ་ལྔ་དང་བཅས་པ། སྲིན་པོའི་ཡ་འཁལ་ལ་སྔ་རུ་དང་མ་འཁལ་ལ་ཕྱི་རུ་བྱས་པ། གོང་སྨེད་སྦྲུལ་ལས་བགྱིས་ཤིང་རཀྟའི་རྒྱ་མཚོར་རྒྱུ་བ། ཡབ་ཡུམ་གཉིས་ཀའང་མེ་དཔུང་རབ་ཏུ་འབར་བའི་དབུས་ནས་བཞུགས་པའོ། །ཟུར་དྲུག་ཏུ་བྷྱོཿདྲུག་ལས་སྤྲུལ་པ་ཕོ་ཉ་མོན་མོ་ཤྭ་ན་ནག་མོ་དྲུག་སྐད་ཅིག་གིས་གྲུབ་པ་ནི། གསེར་མིག་མ། དངུལ་མིག་
མ། ཟངས་མིག་མ། འཁར་མིག་མ། གཡུ་མིག་མ། མཆོང་མིག་མ་རྣམས་ཁྱིའི་གདོང་ཅན་ཞལ་གཅིག་ཕྱག་གཉིས་མ་སྐུ་མདོག་ནག་མོ་གཡས་རྡོ་རྗེ་ནམ་མཁའ་ལ་གསོར་ཞིང༌། གཡོན་ཞགས་པ་ནག་པོ་འཕེན་པ། གཅེར་བུ་རུས་པའི་རྒྱན་ཅན། རལ་པས་རྟིང་པར་སླེབས་པ། ཕྱག་རྒྱ་བསྒྱུར་ཞིང་གར་བྱེད་པ། ཁྱི་སྐད་འདོན་ཞིང་རི་རབ་བསྐོར་བ། ལྷང་ལྷང་ངུ་ཞིང་དུར་ཁྲོད་ཉུལ་བ། བྱང་ཕྱོགས་ཀྱི་གནོད་སྦྱིན་ཆེན་པོ་བརྒྱད་ནི་ལྕགས་ཀྱི་བྱ་ཁྲ་བརྒྱད་དུ་སྤྲུལ་ནས་སྔོན་ལ་ལྡེང་བས་སྔ་དགྲ་དར་བ་རྡུལ་དུ་རློག་པ། ལྷོ་ཕྱོགས་ཀྱི་གཤིན་རྗེ་ཆེན་པོ་བརྒྱད་ནི། སྟག །གཟིག །དོམ། དྲེད། འཕར་བ། སེང་གེ །ཅེ་སྤྱང༌། ཁྱི་རྣམས་སུ་སྤྲུལ་ནས་ཕྱི་བཞིན་དུ་འབྲེང་བས་ཕྱི་དགྲ་སེམས་པ་རྡུལ་དུ་རློག་པའོ། །ཕྱི་བསྐོར་དུ་སྐུ་གསུང་ཐུགས་ཀྱི་སྤྲུལ་པ་བདུད་ཕོ་སེང་གེའི་གདོང་ཅན་གསུམ་དང་རི་བདུན་དང་མ་བདུན་ལས་བྱུང་བའི་སྤྲུལ་པའི་མོན་པ་ཕོ་བདུན་མོ་བདུན་རྣམས་དང༌། གཞན་ཡང་སྤྲུལ་པ་དང་ཡང་སྤྲུལ་གྱི་ཚོགས་རྣམས་དང༌། བདུད་ཀྱི་དམག་ཉིས་ཁྲི་ཆིག་སྟོང༌། ལྷ་དམག་འབུམ་སྡེ་དང་བཅས་ཤིང༌། ལྷ་མ་སྲིན་སྡེ་བརྒྱད་རྣམས་དང་བཅས་པ་ཐམས་ཅད་ཀྱང་གཅེར་བུ་འདབ་ཆགས་ཐང་ལ་བོར་བ་ལྟར་འདར་ཡེད་ཡེད་འདུག་པ་ཐམས་ཅད་ཀྱང་སྒྲུབ་པ་པོའི་བཀའ་སྡོད་པར་གྱུར། རང་གི་ཐུགས་ཀའི་ཧཱུཾ་ལས་འཕྲོས་པའི་འོད་ཀྱིས་རང་བཞིན་གྱིས་གནས་ནས་མགོན་པོ་འཁོར་དང་བཅས་པ་བཛྲ་ས་མཱ་ཛཿ སྤྱན་རས་གཟིགས་
མགོན་ཐུགས་ཀྱི་འཕྲིན་ལས་ལས། །རྣམ་འཕྲུལ་ཞི་བས་འདུལ་བར་མི་སྤྱོད་ཅིང༌། །དྲག་པོའི་སྟོབས་ཀྱིས་གདུག་པ་ཚར་གཅོད་པ། །འཇིགས་པའི་གཟུགས་ཅན་ཁྱོད་ནི་འདིར་བྱོན་ཅིག །ལྷ་ཆེན་ཐུགས་ཀྱི་ཕོ་ཉ་མཐུ་བོ་ཆེ། ཁྱོད་ཀྱི་རྣམ་འཕྲུལ་ཕྱོགས་བཅུ་མ་ལུས་ཁྱབ། །ཡབ་གཅིག་རྟག་ཏུ་འདོད་རྒྱལ་ཁང་བཟང་ན། །ཕལ་ཆེར་ཨུ་ཙ་ལ་ཡི་དུར་ཁྲོད་ན། །རེས་འགའ་བསིལ་བའི་ཚལ་ན་སྲིན་པོའི་གཟུགས། །ད་ལྟ་ཙ་རི་རོང་གི་ཕོ་བྲང་ན། ཁྱོད་ཀྱི་བརྟེན་ས་རྩུབ་མོའི་བྲག་ཕུག་ན། །རྣལ་འབྱོར་དམ་ཚིག་ལྡན་པའི་རྗེས་འབྲང་ཞིང༌། །གང་གིས་བཅོལ་བའི་ལས་རྣམས་སྒྲུབ་མཛད་པ། །དྲག་པོ་དབང་ཕྱུག་གཟི་ལྡན་འདིར་བྱོན་ཅིག །སྔོན་ཚེ་ཕྱག་ན་རྡོ་རྗེའི་སྤྱན་སྔ་རུ། །ཏྲཀྴད་ཁྱོད་ཀྱིས་ཇི་ལྟར་ཁས་བླངས་བཞིན། །དྲག་པོའི་ལས་ལ་གནས་འདིར་སྤྱན་འདྲེན་གྱི། །སངས་རྒྱས་བསྟན་པ་བསྲུང་ཕྱིར་གཤེགས་སུ་གསོལ། །ཨེ་ཧྱ་ཧི་མཧཱ་ཀཱ་ལ་ཏྲཀྴད་ས་པ་རི་ཝཱ་ར་བཛྲ་ས་མཱ་ཛཿ ཨརྒྷཾ་ནས། ཤཔྟའི་བར་གྱིས་མཆོད། འབྲུ་གསུམ་གྱི་ནང་མཆོད་ཕུལ། ཧཱུཾ་ལྷ་མིན་དམག་ཚོགས་གཡུལ་བཟློག་ཅིང༌། །ལྷ་དམག་དཀར་པོའི་དབུག་འབྱིན་པ། །ལྷ་ཆེན་དཔལ་འབར་འཁོར་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །ཞེས་བསྟོད་ལ། ཛཿཧཱུཾ་བཾ་ཧོཿགཉིས་སུ་མེད་པར་བསྟིམ། སླར་ཡང་འོད་འཕྲོས། རིགས་ལྔ་འཁོར་བཅས་ཨོཾ་བཛྲ་ས་མཱ་ཛཿ ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུཾ་ཞེས་དབང་བསྐུར། སྐུ་གང་དྲི་མ་དག་ཆུ་ལྷག་མ་ཡར་ལུད་པ་ལས་གཙོ་འཁོར་
ཐམས་ཅད་ལ་མི་བསྐྱོད་པས་དབུ་བརྒྱན། བཟླས་པའི་དམིགས་པ་གསལ་བཏབ་ལ། ཨོཾ་ཤྲཱི་མཧཱ་ཀཱ་ལ་ཏྲཀྴད་མཧཱ་ཀཱ་ལ་སིདྡྷི་ཏྲི་ཡཾ་དུན་ཛ་ཛཿ ཞེས་དཔལ་མགོན་པོ་དང༌། ཨོཾ་རོ་རུ་རོ་རུ་ཙ་པ་ལ་ཨ་ཤུག་མེ་མ་ཧཱུཾ་མ་བྷྱོ་ཛཿཛཿ ཞེས་དཔལ་ལྷ་མོའི་སྔགས་སོ། །དེ་ནས་གཏོར་མ་བསངས་སྦྱངས། སྟོང་པ་ཉིད་དུ་གྱུར། སྟོང་པའི་ངང་ལས་ཡཾ་ལས་རླུང༌། རཾ་ལས་མེའི་སྟེང་དུ་ཀཾ་ལས་མི་མགོའི་སྒྱེད་པུ་གསུམ། དེའི་སྟེང་དུ་ཨ་ལས་ཐོད་པ་ཕྱི་དཀར་ལ་ནང་དམར་བའི་ནང་དུ་བི་མུ་ཤུ་མ་ར་ལས་བདུད་རྩི་ལྔ། གོ་ཀུ་ད་ཧ་ན་ལས་ཤ་ལྔ་བསྐྱེད། སྙིང་གའི་ས་བོན་གྱི་འོད་ཀྱིས་མདུན་གྱི་ནམ་མཁའ་ལ་རྡོ་རྗེ་ཧཱུཾ་དང་བཅས་པར་གྱུར། དེ་ལས་འོད་ཟེར་འོག་ཏུ་འཕྲོས་པས་རླུང་གཡོས། རླུང་གིས་མེ་སྦར་བའི་ཤ་ལྔ་བདུད་རྩི་ལྔ་ཡི་གེ་དང་བཅས་པ་ཞུ་ཞིང་ཁོལ་བས་ལྦུ་བ་ཨོཾ་དུ་གྱུར། དེ་ལས་འོད་ཟེར་ཁ་དོག་ལྔ་འཕྲོས་པས་ཡེ་ཤེས་ཀྱི་བདུད་རྩི་བཀུག་ནས། དེ་ལ་ཐིམ་པས་ཡེ་ཤེས་ཀྱི་བདུད་རྩིའི་རྒྱ་མཚོར་གྱུར། ཨོཾ་ཨཱཿཧཱུཾ། ལན་གསུམ། རྡོ་རྗེ་ཐལ་མོ་ཁ་གྱེན་དུ་ཕྱེ་ལ། མགོན་པོ་ཡབ་ཡུམ་འཁོར་བཅས་ཀྱི་ལྗགས་གཏོར་མ་བདུད་རྩིའི་རང་བཞིན་ཅན་ལ་རེག་ཅིང་གསོལ་བས་ཚིམ་ཞིང་མཉེས་པར་གྱུར། ཨོཾ་མཧཱ་ཀཱ་ལ་ཏྲི་ཡཾ་ཛཿ ས་མ་ཡ་ས་མ་ལོ་ཀི་ནི་མུན་བྷྱོ་ཧཱུཾ་ཕཊ་བཱ་ལིཾ་ཨི་དཾ་གྲྀཧྞ་ཁ་ཁ་ཁཱ་ཧི་ཁཱ་ཧི་བྷུཉྫ་ཧོ། རཀྟ་པི་བ་ཏོ་ས་མ་ཡ་སྭཱཧཱ། ཨོཾ་དེ་ཝི་མཧཱ་ཀཱ་ལི་རེ་མ་ཏི་མཧཱ་བཱ་ལིང་ཏ་ཁཱ་ཧི། མཧཱ་མང་ས་ཁ་ཧཱི། རཀྟ་ཁཱ་ཧི། ཙིཏྟ་ལ་ཁཱ་ཧི། མཧཱ་གོ་རོ་ཙ་ན་ལ་ཁཱ་ཧི། མཧཱ་པཉྩ་ཨ་མྲྀ་ཏ་བཱ་
ལིང་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་བདུན་གྱིས་ཕུལ་ལ། དཔལ་ཡེ་ཤེས་ཀྱི་མགོན་པོ་མཧཱ་ཀཱ་ལ་རྣལ་འབྱོར་གྱི་དགྲ་ལྷ། བདུད་འདུལ་གྱི་དབང་ཕྱུག དུག་གསུམ་གྱི་སྨན་པ། རིག་འཛིན་གྱི་སྲོག་ཤིང༌། གཙུག་ལག་ཁང་དང་དཀྱིལ་འཁོར་གྱི་སྲུང་མ། ལྷའི་དེད་དཔོན་ཆེན་པོ། སྲོག་བདུད་ནག་པོ་ཐོད་པའི་ཕྲེང་བ་ཅན་བཱ་ལིང་རྒྱན་གྱི་གཏོར་མ་འདི་བཞེས་ཤིག་ཁ་རཾ་ཁཱ་ཧི། དཔལ་ལྡན་གཉན་གྱི་རེ་མ་ཏཱི། བདུད་ཀྱི་ཡུམ་ལ་གཤིན་རྗེའི་ལྕམ། ནག་མོ་དྲེའུ་ལ་ཞོན་པ། གཅེར་མོ་བོང་བུ་ལ་ཞོན་པ། འགྱོགས་མ་རླུང་ལ་ཞོན་པ། བཱ་ལིང་རྒྱན་གྱི་གཏོར་མ་འདི་བཞེས་ཤིག་ཁ་རཾ་ཁཱ་ཧི། གཞན་ཡང་འཁོར་གྱི་མོན་མོ་དྲུག །བྱང་ཕྱོགས་ཀྱི་གནོད་སྦྱིན་ཆེན་པོ་བརྒྱད། ལྷོ་ཕྱོགས་ཀྱི་གཤེན་རྗེ་ཆེན་པོ་བརྒྱད། སྤྲུལ་པ་ཡང་སྤྲུལ་ཕོ་ཉ་འཁོར་གྱི་དམག་ཉིས་ཁྲི་ཆིག་སྟོང་སྡེ་བརྒྱད་དང་བཅས་པ་ཐམས་ཅད་བཱ་ལིང་རྒྱན་གྱི་གཏོར་མ་འདི་བཞེས་ཤིག་ཁ་རཾ་ཁཱ་ཧི། ཨོཾ་ཤྲཱི་མཧཱ་ཀཱ་ལ་ག་ན་པ་ཏི་ཡཀྵ་བཻ་ཏ་ལི་ས་པ་རི་ཝཱ་ར་ཨརྒྷཾ་ནས་ཤབྡའི་བར་གྱིས་མཆོད། ཡབ་ཡུམ་གྱི་སྙིང་པོའི་མཐར་འབྲུ་གསུམ་སྦྱར་ནས་ནང་མཆོད་ཕུལ། ཧཱུཾ་དད་པ་དང་ནི་དམ་ཚིག་གིས། །ཚུར་སྦྱོན་སྲོག་བདུད་མ་རུང་པ། །མངོན་ཤེས་རྫུ་འཕྲུལ་ཐབས་ཀྱི་གཙོ། །དྲག་པོའི་ཞལ་ལ་གཏུམ་པའི་སྐུ། །རྡོ་རྗེ་མཧཱ་ཀཱ་ལ་སྟེ། །ལྷ་ཆེན་ལྕམ་དྲལ་སྤྱན་འདྲེན་གྱི། །གནས་འདིར་མཆོད་ཀྱི་གཤེགས་སུ་གསོལ། །སྲོག་གི་བཀའ་སྡོད་མགོན་པོའི་སྐུ། །སྲིན་པོའི་གཟུགས་ཀྱིས་གདུག་པ་ཅན། །ཚར་གཅོད་བྱང་ཆུབ་སེམས་དཔའ་སྟེ། །
གྲོང་ཁྱེར་སུམ་བརྩེགས་འཇིགས་པར་བྱེད། །གཏུམ་པོ་ཁྱོད་ལ་བདག་བསྟོད་དོ། །མདོག་ནག་གཟུགས་ཆེན་བརྗིད་པ་ལ། །རལ་པ་ཁམས་ནག་གྱེན་དུ་འཁྱིལ། །སྟེང་གི་ལྷ་ཚོགས་དབང་དུ་བསྡུད། ཁྲོས་བས་ཞབས་བརྡབས་ས་གཞི་གཡོ། །འཇིགས་པའི་གད་མོས་རི་རབ་སྒྱེལ། །དབང་ཕྱུག་ཆེ་ལ་བདག་བསྟོད་དོ། །གཡས་པ་དུག་སྡོང་བདུད་ཞགས་བསྣམས། །གཡོན་པ་ཐོད་པ་སྙིང་བཅས་གསོལ། །དམ་ཚིག་ཉམས་པའི་སྙིང་འབྱིན་པའི། །དམ་ཚིག་ཅན་ལ་བདག་བསྟོད་དོ། །ལས་ཀྱི་སྲོག་བདུད་ཆེན་པོ་ནི། །བདུད་རྟ་ནག་པོ་རྟིང་དཀར་འཆིབས། །སྐུ་ཆེ་ཡན་ལག་རགས་ཤིང་བརྗིད། །སྤྱན་དམར་ཞལ་གདངས་ལྗགས་འགྲིལ་ཞིང༌། །སྐུ་ལ་བེར་ནག་སྨུག་པོ་གསོལ། །སག་ཏིའི་ལྷམ་ལ་པད་ཉིའི་གདན། །བསྐལ་པའི་མེ་དཔུང་ནང་ན་འགྱིང༌། །མཐུ་སྟོབས་ཅན་ལ་བདག་བསྟོད་དོ། །འདས་དང་མ་བྱོན་ད་ལྟར་གྱི། །དུས་གསུམ་སངས་རྒྱས་ཐམས་ཅད་ཀྱི། །བསྟན་པ་བསྲུང་བར་ཐུགས་བསྐྱེད་པ། །ནག་པོ་ཁྱོད་ནི་ཡིན་པ་སྟེ། །གང་ཞིག་དཀོན་མཆོག་གསུམ་པོ་དང༌། །བླ་མ་བརྙས་བྱེད་སེམས་ཅན་འཚེ། །བདག་ལ་གནོད་བྱེད་དགྲ་དང་བགེགས། །ཐམས་ཅད་ཁྱོད་ཀྱིས་གཞོམ་པ་དང༌། །བསྟན་པ་བསྲུང་བར་མཛད་དུ་གསོལ། །ནད་དང་གནོད་པ་ཞི་བ་དང༌། ཚེ་དང་བསོད་ནམས་འཕེལ་པ་དང༌། །ཐམས་ཅད་དབང་དུ་བསྡུ་བ་དང༌། །མི་མཐུན་ཕྱོགས་རྣམས་གཞོམ་པ་ཡི། །འཕྲིན་ལས་རྣམ་
བཞི་ཁྱོད་ཀྱིས་བགྱིས། །རྒྱན་གྱི་གཏོར་མ་འདི་ལོང་ལ། །བཅོལ་བའི་ལས་རྣམས་གྲུབ་པར་མཛོད། །བྷྱོཿ མ་ཡི་ནང་ནས་མ་གཅིག་མ། །སྲིང་གི་ནང་ནས་སྲིང་གཅིག་མ། །དཔལ་ལྡན་གཉན་གྱི་རེ་མ་ཏཱི། །བདུད་ཀྱི་ཡུམ་ལ་གཤིན་རྗེའི་ལྕམ། །ལྷ་ཡི་གནས་ན་ལྷ་མོ་ནམ་གྲུ་མ། །ཀླུ་ཡི་གནས་ན་ཀླུ་མོ་གློག་འགྱུ་མ། །སྲིན་པོའི་གནས་ན་སྲིན་མོ་ཤམ་ཤམ་མོ། །མི་ཡི་གནས་ན་བདུད་མོ་རེ་མ་ཏཱི། །མི་ལ་བདུད་དུ་ཁྱོད་ལས་ཆེ་བ་མེད། །གནས་ནི་བྱང་ཤར་མཚམས་ན་གནས། །རྒྱུ་ནི་བར་སྣང་མཁའ་ལ་རྒྱུ། །སྐྱེ་འགྲོ་ཡོངས་ཀྱི་དབུགས་འཆའ་མ། །རྐང་ལ་ལྕགས་ཀྱི་ལྷམ་གྱོན་མ། །སྐུ་ལ་མཛེས་པའི་རེ་ལྡེ་གསོལ། །མི་མགོ་རྟ་མགོ་མཁར་དུ་བརྩིགས། །ཐོད་པ་དགུ་བརྩེགས་གཞལ་ཡས་འདིར། །མ་ཅིག་ལྷ་མོ་སྤྱན་འདྲེན་ནོ། །དོ་ནུབ་ནམ་གྱི་གུང་སྟོད་ལ། །མིང་པོ་རྡོ་རྗེ་ལས་འཆོལ་གྱི། །སྲིང་མོ་དམ་ཅན་ལས་མཛོད་ལ། །བརྣག་པའི་ལས་རྣམས་གྲུབ་པར་མཛོད། །བོས་པའི་ཚེ་ན་སྙན་མ་སྲ། །སྒྲུབ་པའི་ཚེ་ན་ཟོར་མ་ལྕི། །:སྦད་[རྦད]པའི་ཚེ་ན་མཐུ་མ་ཆུང༌། །རྒྱན་གྱི་གཏོར་མ་འདི་ལོང་ལ། །བཅོལ་བའི་ལས་རྣམས་གྲུབ་པར་མཛོད། །ཧཱུཾ་སྲོག་བདུད་ནག་པོ་ཆེན་པོ་ཡི། །བཀའ་ཉན་སྒྲོལ་བྱེད་མ་མོ་དྲུག ཁྱི་མོ་ནག་མོ་ཤེས་རབ་གསལ། ཁྲོ་ཆུའི་ཞལ་ལ་རྡོ་རྗེའི་སྐུ། །རི་རབ་བསྐོར་ཞིང་རྫུ་འཕྲུལ་འགྱེད། །ལྷང་ལྷང་ངུ་ཞིང་དུར་ཁྲོད་ཉུལ། །སྡིག་ཅན་སྒྲོལ་བའི་མཐུ་མོ་ཆེ། །བདུད་ཀྱི་བུ་མོ་ལས་ལ་ཡ། ཁྱི་མོ་ནག་མོ་གསེར་མིག་མ། ཁྱི་མོ་ནག་
མོ་དངུལ་མིག་མ། ཁྱི་མོ་ནག་མོ་ཟངས་མིག་མ། ཁྱི་མོ་ནག་མོ་མཁར་མིག་མ། ཁྱི་མོ་ནག་མོ་གཡུ་མིག་མ། ཁྱི་མོ་ནག་མོ་མཆོང་མིག་མ། །བདུད་ཀྱི་བུ་མོ་ཁྱེད་དྲུག་ཀྱང༌། །ཤ་ཁྲག་གཏོར་མ་འདི་བཞེས་ལ། །ཉམས་པའི་དགྲ་བགེགས་སྒྲོལ་ལ་ཤོག །བསད་རྟགས་དོན་སྙིང་ཁྱེར་ལ་ཤོག །བར་ཆད་སོལ་ལ་མཐུན་རྐྱེན་སྒྲུབས། །བཅོལ་བའི་ལས་རྣམས་གྲུབ་པར་མཛོད། །མོན་མོ་ནག་མོ་ཤེལ་མིག་མ། །མོན་མོ་ནག་མོ་གསེར་མིག་མ། །ཟངས་མིག་མ། གཡུ་མིག་མ། དངུལ་མིག་མ། ལྕགས་མིག་མ། མོན་མོ་ནག་མོ་བསེ་མིག་མ། །མོན་མོ་ཆེན་མོ་ཁྱེད་བདུན་ཡང༌། །ཤ་ཁྲག༴སོགས་གོང་བཞིན། ཧཱུཾ་མོན་པ་ནག་པོ་བྱི་ལ་ཞོན། །མོན་པ་ནག་པོ་འབྲུག་ལ་ཞོན། །སྦྲུལ་ལ་ཞོན། གློག་ལ་ཞོན། སྟག་ལ་ཞོན། ཁྱུང་ལ་ཞོན། རླུང་ལ་ཞོན། བདུད་ཀྱི་བཤན་པ་ཁྱེད་བདུན་ཡང༌། །ཤ་ཁྲག༴ སོགས་གོང་བཞིན། གཞན་ཡང་སྤྲུལ་པ་ཡང་སྤྲུལ་དང༌། །ཕྱོགས་བཞིའི་རུ་འདྲེན་དམག་གི་ཚོགས། །བདུད་ཕོ་ཉིས་ཁྲི་ཆིག་སྟོང་དང༌། །ལྷ་དམག་དཀར་པོ་འབུམ་སྡེའི་ཚོགས། །གཞན་ཡང་ལྷ་སྲིན་སྡེ་བརྒྱད་རྣམས། ཤ་ཁྲག༴ སོགས་ཀྱིས་བསྐུལ་ཞིང་འཕྲིན་ལས་བཅོལ། ཐུན་གྱི་གཏོར་མ་མེད་ན་འཇུག་གི་ཆོ་ག་བྱའོ། །གལ་ཏེ་ཐུན་གཏོར་ཡོད་ན། སྐབས་འདི་ཉིད་དུ་གཏོང་སྟེ། ཧཱུཾ་སྲིད་གསུམ་དབང་བསྡུད་མགོན་པོ་ཡབ་ཡུམ་དང༌། །སྟོབས་ལྡན་ཕོ་ཉ་མངག་བཞུགས་འཁོར་དང་བཅས། །ཤིན་ཏུ་
འཇིགས་ཁྲོས་དྲག་ལ་རྔམ་པའི་གཟུགས། །རྣོ་བའི་མཚོན་འཛིན་འགྱོགས་པའི་ཤུགས་ཅན་རྣམས། །ཟག་མེད་བདུད་རྩིའི་གཏོར་མ་འདི་བཞེས་ཤིག །སྨན་རག་ཕུད་ཀྱི་མཆོད་པ་འདི་བཞེས་ཤིག །ཛ་གད་དཔའ་བོའི་སྨན་ཕུད་འདི་བཞེས་ཤིག །ཛམ་བུ་ཏི་བའི་མཆོད་པ་འདི་བཞེས་ཤིག །དམ་ཉམས་དགྲ་པོའི་ཤ་ཁྲག་འདི་བཞེས་ཤིག །སྔར་བཅོལ་ལས་ཀྱི་གཏང་རག་གཉན་པོར་འབུལ། ད་བཅོལ་ལས་ཀྱི་གསོལ་འདེབས་ཆེན་པོར་བཞེས། །བདག་ཅག་དཔོན་སློབ་ཡོན་མཆོད་འཁོར་བཅས་ཀྱི། །ནད་དང་གནོད་པའི་རྐྱེན་རྣམས་ཞི་བ་དང༌། །ཚེ་དང་བསོད་ནམས་དཔལ་འབྱོར་འཕེལ་བ་དང༌། ཁྱད་པར་སངས་རྒྱས་བསྟན་པ་སྐྱོང་བ་དང༌། །བླ་མས་བཅོལ་བའི་འཕྲིན་ལས་གྲུབ་པར་མཛོད། །རྒྱལ་བའི་བཀའ་དང་དམ་ཚིག་བདེན་པ་བཞིན། །བྱང་ཆུབ་སྒྲུབ་པའི་བར་ཆད་བྱེད་པ་ཡི། །སྡང་བའི་དགྲ་དང་གནོད་པའི་བགེགས་ལ་སོགས། །ཐམས་ཅད་རྡུལ་ཕྲན་བཞིན་དུ་བརླག་པར་མཛོད། །རྣལ་འབྱོར་བཅོལ་བའི་འཕྲིན་ལས་སྒྲུབ་པར་མཛོད། །བསྟན་པ་རྒྱས་པའི་ལས་འདི་མྱུར་དུ་སྒྲུབས། །ཕུན་སུམ་ཚོགས་པ་མངའ་བ༴ སོགས་བཀྲ་ཤིས་ཀྱི་ཚིགས་བཅད་བརྗོད། སླར་ཡང་ཨརྒྷཾ་ནས། ཤཔྟའི་བར་གྱིས་མཆོད། གོང་གི་བསྟོད་ཐུང་གིས་བསྟོད། བདག་ཅག་འཁོར་དང་བཅས་པ་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྒྲུབ་པའི་གདོང་གྲོགས་དང༌། ཕྱི་ནང་གསང་བ་གསུམ་གྱི་བར་ཆད་མི་མཐུན་པའི་ཕྱོགས་ཐམས་
ཅད་བསྲུང་ཞིང་བཟློག་པ་དང༌། དགྲ་བགེགས་ལོག་འདྲེན་ཐམས་ཅད་ཐལ་བ་རྡུལ་དུ་རློག་པ་དང༌། མི་འགྱུར་བའི་ཚེ། མི་ཟད་པའི་ལོངས་སྤྱོད། རབ་ཏུ་རྒྱས་པའི་དབང་ཐང༌། ཐུབ་པར་དཀའ་བའི་མཐུ་སྟོབས་རྣམས་སྩལ་བ་དང༌། མདོར་ན་བསམ་པའི་དོན་ཐམས་ཅད་ཡིད་བཞིན་དུ་འགྲུབ་པར་མཛད་དུ་གསོལ། ཡི་གེ་བརྒྱ་བ་ཅི་འགྲུབ་ཏུ་བཟླ་ཞིང༌། མ་འབྱོར་པ་དང་སོགས་ཀྱིས་བཟོད་གསོལ། རྟེན་ཡོད་ན་བརྟན་བཞུགས་དང༌། མེད་ན བཛྲ་མུཿ ཡེ་ཤེས་པ་གཤེགས། དམ་ཚིག་པ་རང་ཉིད་ལ་བསྟིམ། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ་གིས་བདག་བསྲུང༌། སླར་ཡང་སྨོན་ལམ་དང་བཀྲ་ཤིས་ཅི་རིགས་པར་བྱས་ལ་ཐུན་མཚམས་ལ་འཇུག་གོ །འདིར་མོན་པ་ཕོ་བདུན་མོ་བདུན་སོགས་ཀྱི་ཞལ་ཕྱག་བཞོན་པ་བསྐྱེད་པར་འདོད་ན། བསྐུལ་བ་རྒྱས་པ་སོ་སོ་དག་ནས་འབྱུང་བ་ལྟར་བསྐྱེད་ཀྱང་རུང་ལ། མན་ངག་ལྟར་ན་མོན་པ་བྱི་ལ་ལ་ཞོན་པ་བདུད་ཞགས་དང་ནད་རྐྱལ། འབྲུག་ལ་ཞོན་པ་རལ་གྲི་དང་ཐོད་ཁྲག །སྦྲུལ་ལ་ཞོན་པ་དུག་སྡོང་དང་བེ་ཅོན། གློག་ལ་ཞོན་པ་ཕྱག་གཉིས་ཀྱིས་བེ་ཅོན་ནག་པོ། སྟག་ལ་ཞོན་པ་སྤུ་གྲི་དང་སྙིང་ཞགས། ཁྱུང་ལ་ཞོན་པ་སྟ་རེ་དང་སྦྲུལ་ཞགས། རླུང་ལ་ཞོན་པ་རལ་གྲི་དང་ཞགས་པ་ནག་པོའོ། །ཧཱུཾ་གསུམ་ལས་སྐུ་གསུང་ཐུགས་ཀྱི་སྤྲུལ་པ་འཇིགས་བྱེད་བདུད་ཕོ་གསུམ་ཁྲམ་ཤིང་དང་ནད་རྐྱལ་འཛིན་པ་སེང་གེའི་གདོང་ཅན་སེང་གེ་ལ་ཞོན་པའོ། །མོན་མོ་ཤེལ་མིག་མ་ཤེལ་གྱི་རལ་པ་ཅན་ནས། བསེ་མིག་མ་བསེའི་རལ་པ་ཅན་གྱི་བར་རྡོ་རྗེ་དང་ནད་རྐྱལ་འཛིན་པ། ཐམས་ཅད་ཀྱང་སྐུ་མདོག་ནག་མོའོ། །གཞན་ཡང་དཔལ་མགོན་པོ་སྐུ་མདོག་ནག་པོ་ཡང་རུང་ཞིང༌། ལྷ་མོ་ཕྱག་དང་པོ་གཉིས་ཀྱིས་རྩེ་གསུམ་དང་མི་རོའི་རྒྱལ་མཚན་འཛིན་པ་དང༌། ནེའུ་ལེ་ནད་སྐྱལ་དུ་བསྒྱུར་ཞིང༌། དྲེ་རྟ་རྐང་གསུམ་
ལ་ཆིབས་པ་དང་ཕྱག་གཉིས་མ་སོགས་སྣ་ཚོགས་ཡོད་ཅིང༌། ཤྭ་ན་མོ་རྣམས་ཀྱང༌། གསེར། གཡུ། མཆོང༌། ཟངས༌། དུང༌། མཁར་བ། ལྕགས་རྣམས་ཀྱི་མིག་ཅན་དང༌། མིག་དང་མཐུན་པའི་རལ་པ་བྱེད་པ་སོགས་ཡོད་པ་འགའ་ཞིག་འདམ་ཀ་དང༌། འགའ་ཞིག་བསྙེན་སྒྲུབ་དང་ལས་ཚོགས་སོ་སོའི་སྐབས་ཡིན་ནོ། །ཤེལ་མིག་མའམ། དུང་མིག་མའམ། ཁྱི་མོ་ཤེས་རབ་གསལ་ཕྱག་བཞི་མར་བསྐྱེད་པར་ཡོད་དོ། །མན་ངག་ལོགས་སུ་བསྟན་པར་བྱའོ། །བསྙེན་པ་ཙམ་དང་ཉེར་འབྲེལ་བར། །སྒྲུབ་ཐབས་མཆོད་ཆོག་འདི་བྱས་པས། །བསྟན་དགྲ་བདུད་སྡེ་བཅས་བཅོམ་ནས། །འཕྲིན་ལས་རྣམ་བཞི་འགྲུབ་པར་ཤོག །ལྷ་ཆེན་ལྕམ་དྲལ་གྱི་སྒྲུབ་ཐབས་དགྲ་བགེགས་ཀུན་འཇོམས་ཞེས་བྱ་བ་འདི་ནི། འཇམ་དབྱངས་རྡོ་རྗེ་བླ་མའི་གཏོར་ཆོག་ལ་གཞི་བྱས་ཏེ། ཡིག་རྙིང་ནས་ཁ་བཀང་སྟེ་ལྷག་ཆད་ནོར་བའི་དྲི་མ་སྤངས་ཤིང༌། རྒྱས་བསྡུས་འཚམས་ལ་ཀླག་ཆོག་ཏུ་བྱས་པ་སྟེ། རྒྱལ་ཁམས་པ་ཏཱ་ར་ནཱ་ཐས་རང་ལོ་ཉེར་དགུ་པ་ལ་སྨྲས་པའོ། །འདིས་ཀྱང་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག བཀྲ་ཤིས། གཅིག་ཞུས་དག།