ལེགས་ལྡན་མཧཱ་ཀཱ་ལ་འཁོར་མང་གི་བསྟོད་པ་འཕྲིན་ལས་ཀུན་འགྲུབ།
ལེགས་ལྡན་མཧཱ་ཀཱ་ལ་འཁོར་མང་གི་བསྟོད་པ་འཕྲིན་ལས་ཀུན་འགྲུབ་ཅེས་བྱ་བ་བཞུགས་སོ། །
ཨོཾ་སྭཱ་སྟི། དཔལ་ལེགས་ལྡན་མཧཱ་ཀཱ་ལའི་བསྟོད་པ་འཕྲིན་ལས་ཀུན་འགྲུབ་ཅེས་བྱ་བ། བླ་མ་དང་མགོན་པོ་ལ་ཕྱག་འཚལ་ལོ། །ལྷ་ཆེན་དཔལ་འབར་མཐུ་སྟོབས་བསམ་མི་ཁྱབ། །ཐུགས་རྗེའི་བདག་ཉིད་འགྲོ་བའི་གཉེན་གཅིག་པུ། །རྒྱལ་བའི་ཡེ་ཤེས་མཁྱེན་པ་ཐུགས་སུ་ཆུད། །ལེགས་ལྡན་ནག་པོ་འཁོར་བཅས་བསྟོད་པར་བགྱི། ཁམས་གསུམ་འཇིག་རྟེན་ཀུན་ཁྱབ་རྟག་པའི་གཙོ། །དུས་གསུམ་སངས་རྒྱས་ཀུན་གྱི་བསྟན་པ་སྲུང༌། །ཕྱོགས་བཅུའི་ཞིང་ཁམས་ཀུན་ལ་དབང་སྒྱུར་བ། །དགེ་ལ་སྤྱོད་པ་ཀུན་གྱི་སྟེང་འཛིན་ཞིང༌། །དམ་ཚིག་ཉམས་པ་ཀུན་གྱི་སྲོག་གཅོད་མཁན། །འཁོར་ལོའི་དབང་ཕྱུག་ཀུན་གྱི་བཀའ་སྡོད་དེ། །གསང་སྔགས་ཆོས་རྣམས་ཀུན་དུ་སྐྱོང་བའི་མགོན། །ཏྲཀ་ཤད་མཧཱ་ཀཱ་ལ་ཁྱེད་ལ་བསྟོད། །འཇིག་རྟེན་མཐུན་ཕྱིར་མཧཱ་དེ་བའི་སྲས། །རེས་འགའ་མི་བཟད་དུག་གི་ནགས་
སུ་འཁྲུངས། །ཕལ་ཆེར་འཇིག་རྟེན་དབང་པོའི་ཐུགས་ལས་སྤྲུལ། །གཞན་དུ་གསང་བའི་བདག་པོའི་ལས་བྱེད་མཆོག །གཟི་བརྗིད་ཁྲོ་རྒྱལ་འཆོལ་བ་སྟོབས་པོ་ཆེ། །གཤིན་རྗེ་གཤེད་པོའི་གཅན་པ་འཇིགས་གཟུགས་ཅན། །རྟག་པར་མ་མོའི་ཚོགས་དང་ལྷན་ཅིག་རོལ། །བདུད་འཇོམས་དྲག་པོའི་སྐུ་ལ་ཕྱག་འཚལ་བསྟོད། །སངས་རྒྱས་སྟོང་དང་ལྷན་ཅིག་ཐུགས་བསྐྱེད་པ། ཁྱེད་ནི་འདྲེན་མཆོག་ཤཱཀྱའི་རྒྱལ་པོ་ཡིས། །བསྟན་སྲུང་ཀུན་གྱི་རྒྱལ་པོར་མངའ་གསོལ་མཛད། །སྡིག་ཅན་ཡོངས་ཀྱི་གཤེད་མ་དཔའ་བོ་ཁྱེད། །མ་རུངས་ཀུན་ལ་སྲོག་གཅོད་མཐར་བྱེད་ཉིད། །ཆོས་གཞི་ཀུན་གྱི་སྲུང་མ་མེལ་ཚེ་མཁན། །ཆོས་བཞིན་སྤྱོད་པ་ཀུན་གྱི་དགྲ་ལྷའི་རྒྱལ། །སྲིད་པའི་བྱེད་པོ་ཁྱེད་ལ་ཕྱག་འཚལ་བསྟོད། །ཨུ་ཙ་ལ་ཡི་དུར་ཁྲོད་ཆེན་པོ་ནི། །མི་དང་འབྱུང་པོའི་བམ་
ཆེན་རི་ལྟར་སྤུངས། །རུས་པའི་གྲམ་ཁྲོད་དུ་མས་ཕྱོགས་ཀུན་ཁྱབ། །ཞག་དང་ཀླད་པའི་འདམ་རྫབ་ལྟེང་ཀ་འཁྱིལ། ཁྲག་རྒྱུན་དྲོན་མོའི་ཆུ་ཀླུང་བརྒྱ་ཕྲག་འབབ། །མི་བསྲུན་བྱ་དང་གཅན་གཟན་ཚོགས་ཀུན་རྒྱུ། །ཤ་ཟ་སྲིན་པོ་བྲོ་བརྡུང་གླུ་གར་བྱེད། །དྲག་པོའི་ཞིང་མཆོག་དེ་ལའང་བསྟོད་པར་བགྱི། །རིན་ཆེན་སྣ་ཚོགས་ལས་གྲུབ་གཞལ་མེད་ཁང༌། །དེ་དབུས་ཐོད་མཁར་མེ་རླུང་འཚུབ་མའི་ནང༌། །འདེགས་བྱེད་གླང་ཆེན་སེང་གེ་བྱ་ཁྱུང་ཅན། །གསེར་གྱི་ཁྲི་མཆོག་པདྨ་ཉི་ཟླས་སྤྲས། །བསྟན་དགྲ་བསྒྲལ་བའི་མི་རོ་རྟ་རོ་འབུམ། །དུད་སྤྲིན་འཐུལ་ཞིང་མེ་སྟག་འཕྲོ་བ་ཡི། །དུག་གི་མེ་ཏོག་བཅས་པར་བཀྲམ་པའི་གཞི། །ཡེ་ཤེས་ལས་སྤྲུལ་གནས་མཆོག་དེ་ལ་འདུད། །གྲུ་གསུམ་མཐིང་ནག་བརྩེགས་པའི་དཀྱིལ་འཁོར་དུ། །དཔལ་ཆེན་མགོན་ནག་སྲིན་པོ་ཁྲོས་པའི་ཚུལ། །ཤྭ་ནའི་ཞལ་གྱིས་འགལ་བྱེད་བླ་ཚེ་རྔུབ། །དུག་སྡོང་འབར་བས་སྟོང་ཁམས་ཁྱབ་པར་བསྲེགས། །བདུད་ཞགས་ནག་པོས་ལོག་འདྲེན་ཁྲག་ཁྲིག་འཆིང༌། །ངན་སེམས་ཅན་ཀུན་བདུད་ཀྱི་ཁྲམ་ལ་འདེབས། །དགྲ་སྙིང་ཕུང་པོ་ཐོད་པར་བླུག་སྟེ་གསོལ། །ཕྱག་བཞིས་བདུད་བཞི་འཇོམས་པའི་དཔའ་བོ་ཆེ། །རབ་ཁྲོས་གཏུམ་པོ་ཁྱོད་ལ་ཕྱག་འཚལ་བསྟོད། །སྡང་མིག་ཉིན་བྱེད་བྱེ་བའི་འོད་དང་མཉམ། །མཆེ་གཙིགས་སྟོན་ཟླ་འབུམ་གྱི་འོད་དཀར་འགྱེད། །གློག་དམར་གྲངས་མེད་འགྱུ་བ་ལྟ་བུའི་ལྗགས། །བསྐལ་པའི་མེ་མཚུངས་སྨ་ར་སྨིན་མ་སེར། །རལ་པ་བསྐྱོད་པས་ས་གསུམ་མུན་པར་འཇུག །
གོམས་སྟབས་ཤུགས་ཀྱིས་རྩོམ་ཆེན་རླུང་ཡང་བསྒུལ། །ཤུགས་དྲག་ཕྱག་གིས་སྟོང་གསུམ་སྐད་ཅིག་ཉུལ། །ནག་པོ་གཟི་ལྡན་ཁྱོད་ལ་ཕྱག་འཚལ་བསྟོད། །གད་རྒྱངས་གཅིག་གིས་རི་དབང་སྟོང་ཕྲག་སྒྱེལ། །ལྷབ་ལྷུབ་ན་བཟའ་གཡོ་བས་མཁའ་དབྱིངས་འགེངས། །སྣ་ཚོགས་རྒྱན་གྱི་སྣང་བས་ཞིང་ཀུན་ཁྱབ། །ལྟ་ཟེར་འབར་བས་ལྷ་མིན་གྲོང་ཁྱེར་བསྲེགས། །སྙན་ནས་གློག་འགྱུ་འབྲུག་སྟོང་དུས་གཅིག་ལྡིར། །ཤ་ཁྲག་རུས་པའི་རི་བོ་ཞལ་དུ་འདེབས། །ཤངས་ཀྱི་ཁོང་ནས་དུས་མཐའི་རླུང་ཡང་ལྡང༌། །སྲིད་གསུམ་བྱེད་པོ་ཁྱོད་ལ་ཕྱག་འཚལ་བསྟོད། །ཚངས་དང་དབང་པོས་མདུན་ནས་གུས་པས་བསུ། །གཤིན་རྗེ་སྲིན་པོ་བཀའ་ཉན་ལས་ལ་འགྱེད། །གདོང་དྲུག་ཚོགས་བདག་ལྷ་དམག་སྐུལ་མར་གཏོང༌། །གཟའ་དང་གནོད་སྦྱིན་ཐམས་ཅད་ཕྱི་ཡི་བྲན། །ཀླུ་དང་གསང་བ་པ་རྣམས་ནང་གི་འབངས། །རླུང་དང་སྲེག་ཟའི་ལྷ་ཡིས་ལོགས་ནས་བསྟོད། །ལྷ་ཡི་ལྷ་མཆོག་ཁྱོད་ལ་ཕྱག་འཚལ་བསྟོད། །རྫུ་འཕྲུལ་རྟ་ནག་ཆིབས་ནས་ཕྱོགས་ཀུན་གནོན། །སེང་གེ་ཆིབས་ནས་ཕ་རོལ་གཡུལ་ངོ་ཟློག །འཕྲུལ་གྱི་བྱ་ཁྲ་གཏེར་བདག་ཚོགས་རྣམས་ཀུན། །སྔོན་དུ་རྒྱུ་ཞིང་སྔ་དགྲ་དར་བ་འཇོམས། །གསོད་བྱེད་གཤིན་རྗེ་རྔམ་པ་གཅན་གཟན་ཚུལ། །ཕྱི་བཞིན་འབྲངས་ནས་ཕྱིའི་དགྲ་རྡུལ་དུ་རློག །རུ་མཚོན་ཐོགས་ཏེ་ལྷ་རྣམས་དབུགས་ཀྱང་འབྱིན། །སྡེ་བརྒྱད་དམག་དཔོན་ཆེན་པོར་ཕྱག་འཚལ་བསྟོད། །བདུད་འདུལ་ཙན་དན་བང་ཆེན་ཐོགས་པའི་ཚེ། །དམག་ཚོགས་
མཁའ་དབྱིངས་ཁྱབ་པའི་སྤྲུལ་པ་སྟོན། །བདུད་རྒྱལ་ཉི་ཁྲི་ཆིག་སྟོང་སྐུ་ལས་སྤྲུལ། །བྱེ་བ་དུང་ཕྱུར་བདུད་དམག་ལིངས་ལ་འགྱེད། །གཡས་ནས་ལྷ་དམག་དཀར་པོ་འབུམ་སྡེ་འཕྱོ། །གདུག་རྩུབ་གཅེར་བུ་འབུམ་སྡེ་གཡོན་ནས་རྒྱུག །སྲིན་པོའི་དམག་ཚོགས་གྲངས་མེད་བཀའ་ལ་སྡོད། །གཟི་བྱིན་མཐའ་ཡས་ཁྱོད་ལ་ཕྱག་འཚལ་བསྟོད། །ཕྱོགས་བཅུའི་སྡེ་བརྒྱད་མ་ལུས་ལས་ལ་འཁོལ། །སངས་རྒྱས་ཀུན་གྱི་དགོངས་པ་ཁྱོད་ཀྱིས་སྒྲུབ། ཁྱོད་སྐུ་དྲན་པ་ཙམ་གྱིས་དགྲ་ཚོགས་སྟོངས། །མཚན་སྨོས་ཙམ་ན་བགེགས་ཀུན་ཕྱོགས་བཅུར་འབྲོས། ཁྱོད་ལ་དད་གུས་སྐད་ཅ།ིག་གཅིག་བསྐྱེད་པས། །ནད་མེད་ཚེ་རིང་འབྱོར་བ་ཐམས་ཅད་འབྱུང༌། སྙིང་པོ་བཟླས་པ་ཙམ་གྱིས་སྒྲིབ་ཀུན་སེལ། །ཐུགས་རྗེའི་དབང་ཕྱུག་ཁྱོད་ལ་ཕྱག་འཚལ་འདུད། །གནས་མཆོག་འདོད་པའི་རྒྱལ་པོའི་ཁང་བཟང་ན། །ལྷ་རྫས་འདོད་ཡོན་ཀུན་ལ་དགེས་རྒུར་རོལ། །མི་བཟད་འཇིགས་ཆེན་དུར་ཁྲོད་བརྒྱད་པོ་རུ། །མཚན་མོ་རྒྱུ་བ་ཀུན་གྱི་སྡེ་དཔོན་ཚུལ། །ཨོ་རྒྱན་ལ་སོགས་ཉེར་བཞིའི་ཡུལ་ཆེན་དུ། །དཔའ་བོ་རྣལ་འབྱོར་མ་ཡི་ཚོགས་ཀྱི་དབང༌། །འཕགས་མཆོག་ཁྱོད་ནི་རྡོ་རྗེ་ཐེག་པ་འདིར། །རྒྱུད་ཀུན་བདག་པོར་གྱུར་ལ་ཕྱག་འཚལ་བསྟོད། །དཔའ་བོ་ཆེ་ཁྱོད་རེས་འགའ་ས་སྟེང་རྒྱུ། །དུག་དང་མེ་དཔུང་མཚོན་ཆའི་ཆར་སྤྲིན་འཁྲུག །ནག་ཕྱོགས་འདྲེ་ཀུན་དྭངས་ཤིང་སྙིང་ཁྲག་སྐྱུག །ངན་སེམས་ཅན་གྱི་མི་རྣམས་སྲོག་རྩ་འཆད། །ལན་འགའ་བར་སྣང་མཁའ་ལ་གཤེགས་ཙ་ན། །ཉི་ཟླ་གཟའ་སྐར་ཚོགས་ཀྱིས་མེ་
ཏོག་འཐོར། །བདུད་རྣམས་སྐྲག་ཅིང་མྱོས་ལ་ཀླད་པ་འགེམས། །སྟོབས་ཆེན་ཕ་རོལ་གནོན་ལ་ཕྱག་འཚལ་འདུད། །དུས་གཞན་དག་ཏུ་ས་འོག་འཇིག་རྟེན་རྒྱུ། །རི་རབ་དང་བཅས་ས་གཞིར་འདར་ཞིང་བསྐྱོད། །རྒྱ་མཚོ་བདུན་ཡང་འར་འུར་ཆལ་ཆིལ་འཁྲུགས། །འབུམ་ཕྲག་གྲུབ་པའི་སྡེ་རྣམས་གར་ཡང་བསྒྱུར། ཁྲག་ཁྲིག་བཅུ་གཉིས་གདེངས་ཅན་བུ་མོ་ཡིས། །གླུ་དབྱངས་སྟོང་དང་རོལ་མོ་བྱེ་བས་མཆོད། །མཐའ་དག་ལྷ་མིན་དབང་པོས་ཐལ་མོ་སྦྱོར། །མཆོད་འོས་མཐུ་ལྡན་ཁྱོད་ལ་ཕྱག་འཚལ་བསྟོད། །མགོན་ཁྱོད་འཛམ་བུའི་གླིང་དུ་རྟག་བཞུགས་ཚེ། །གཙུག་ལག་ཁང་རྣམས་གཡེལ་མེད་བསྲུང་བ་དང༌། །དགེ་འདུན་ཐམས་ཅད་ཆོས་བཞིན་སྤྱོད་དུ་འཇུག །སངས་རྒྱས་བསྟན་ལ་སངས་རྒྱས་ཉིད་དང་མཚུངས། །བདུད་དང་བགེགས་དང་ལྷ་མིན་གནོད་པ་བཟློག ཁྱོད་ལ་མཆོད་ཅིང་ཁྱོད་ཀྱིས་བསྐྱངས་པ་ན། །ཆོས་སྤྱོད་བཅུ་པོ་ཡར་ངོའི་ཟླ་ལྟར་རྒྱས། །བར་ཆད་ཀུན་སེལ་ཆོས་སྲུང་ཁྱོད་ལ་འདུད། །མ་རུངས་གདུག་ཅན་འདུལ་བར་མཛད་ཙ་ན། །མི་སྙིང་རྫ་ལྟར་བརྙིལ་བ་ཁྱོད་ཀྱི་ཟས། ཁྲག་ཆེན་བཤྭའ་རྒལ་རྒྱུག་པ་སྐོམ་དུ་འཐུང༌། །མེ་འོད་འཁྲུགས་པ་ཁྱོད་ནི་དུར་ཁྲོད་དུ། །རོ་ལངས་ཆེན་པོ་རྣམས་དང་སྒྱུ་རྩལ་རྩེ། །རྣལ་འབྱོར་ཅན་ལ་ཉམས་ཀྱི་དྲོད་ཚད་ཉུལ། །དམ་ཚིག་ཅན་ལ་འབྲལ་མེད་གདོང་གྲོགས་མཛད། །སྔགས་རིག་དགྲ་ལྷ་ཁྱོད་ལ་ཕྱག་འཚལ་འདུད། །སྒྲུབ་པོ་མཆོག་ལ་རིག་འཛིན་དངོས་གྲུབ་སྩོལ། །རི་ལུ་མིག་སྨན་དངུལ་ཆུ་
གནོད་སྦྱིན་མོ། །རལ་གྲི་རྐང་མགྱོགས་གཏེར་ཆེན་ཁ་ཅིག་ལའོ། །སྐལ་བ་ཤིན་དུ་ཆུང་ཡང་ཞི་སོགས་ལས། །ཐོགས་མེད་རྩོལ་ཁྱོད་དངོས་གྲུབ་ཀུན་གྱི་བདག །མ་སྒྲུབས་བར་ཡང་དབང་ཐང་ཕུན་ཚོགས་ཐོབ། །བསད་བསྐྲད་དབྱེ་བས་དགྲ་འཇོམས་ནུས་པར་འགྱུར། །མཐུ་རྩལ་འགྲན་ཟླ་མེད་པ་ཁྱོད་ལ་བསྟོད། །འདི་ན་འཇིག་རྟེན་དབང་བསྒྱུར་དེ་ཀུན་གྱི། །མགོ་ལ་ཁྱོད་ཀྱི་ཞབས་པད་རྡུལ་ཕྲེང་གཡོགས། ཁྱོད་མཐོང་ཙམ་གྱིས་གཤིན་རྗེའི་ཕོ་ཉ་བྱེར། །ཕྱོགས་དང་ཕྱོགས་མཚམས་ས་གསུམ་ཐམས་ཅད་དུ། །མི་མཐུན་གཡུལ་ལས་རྒྱལ་བའི་རྔ་ཆེན་བརྡུངས། །ལྷ་མཆོག་ལེགས་ལྡན་མཧཱ་ཀཱ་ལ་དེ། །དྲག་ཤུལ་ཅན་ཁྱོད་རྟག་ཏུ་བདག་བསྟེན་ནོ། །དངོས་པོ་ཀུན་གྱིས་མཆོད་ཅིང་ཕྱག་འཚལ་ལོ། །དཔལ་གྱི་ཐུགས་ལ་དགྱེས་བདེ་བསྐྱེད་བྱེད་ཡུམ། །འཕྲིན་ལས་ཀུན་སྒྲུབ་དཔལ་ལྡན་རེ་མ་ཏཱི། །སྒྲུབ་པོ་དམ་ལྡན་མ་ཡིས་བུ་བཞིན་སྐྱོང༌། ཁམས་གསུམ་དབང་ཕྱུག་མ་ལ་ཕྱག་འཚལ་ལོ། །མངོན་གཅོད་འཕྲིན་ལས་སྒྲུབ་ལ་ཐགས་ཐོགས་མེད། །རི་རབ་ཡུད་ཀྱིས་བསྐོར་ཞིང་རྫུ་འཕྲུལ་འགྱེད། །འགྲོ་བ་དྲུག་གི་སྲོག་ལ་མངའ་མཛད་མ། །ལས་བྱེད་ཁྱི་གདོང་བདུན་ལ་ཕྱག་འཚལ་བསྟོད། །ཆོ་འཕྲུལ་མཐའ་ཡས་སྟོན་བྱེད་མིག་སྒྱུར་མ། །ནད་ཀྱི་བདག་མོ་དགྲ་བོའི་ཤ་ལ་རྔམ། །བར་ཆད་ལོག་འདྲེན་བགེགས་ཀྱི་ཁྲག་ལ་རོལ། །དུར་ཁྲོ་མ་མོ་བདུན་ལ་ཕྱག་འཚལ་བསྟོད། །རབ་གཏུམ་ཕོ་ཉ་མོན་པ་ནག་པོའི་ཚུལ། །འཇིག་རྟེན་དྲེགས་པའི་གཙོ་བོ་དམག་དཔོན་བདུན། །
བསྟན་ལ་འགལ་བྱེད་མིང་གི་ལྷག་མར་འཇོག །རྡོ་རྗེ་བཤན་པའི་ཚོགས་ལ་བསྟོད་པར་བགྱི། །མཐོ་རིས་ས་སྟེང་ས་འོག་སྲིད་གསུམ་ལ། །དབང་བྱེད་དྲག་གཏུམ་ཟིལ་གནོན་སེང་གེའི་གདོང༌། །སྡང་བའི་དགྲ་ལ་གནམ་ལྕགས་ཐོགས་ལྟར་རྒྱུག །གསང་བའི་ལས་མཁན་གསུམ་ལ་བསྟོད་པར་བགྱི། །དངོས་སུ་བཤམས་དང་ཡིད་བྱུང་མཆོད་པ་འབུལ། །བདེན་སྟོབས་ལས་བྱུང་མཆོད་སྤྲིན་རྒྱ་མཚོ་འབུལ། །ཕྱི་ནང་གསང་བའི་དམ་རྫས་མཐའ་དག་འབུལ། །ལེགས་ལྡན་དགྱེས་པའི་རྟེན་རྫས་དཔག་ཡས་འབུལ། །རྒྱ་ཆེན་ཕྱོགས་གྲོལ་ཁྱབ་པའི་མཆོད་པ་འབུལ། །རང་བཞིན་ཡེ་ཤེས་ཆེན་པོའི་ངོ་བོར་འབུལ། །རྣམ་འགྱུར་འདོད་ཡོན་བསམ་མི་ཁྱབ་པར་འབུལ། །ཉམས་མྱོངས་ལྷན་སྐྱེས་བདེ་བ་ཆེན་པོར་འབུལ། །བདག་དང་རྒྱུད་ལྔར་འཁོར་བའི་འགྲོ་རྣམས་ཀྱི། །ཉེས་བྱས་གང་ཡིན་ཆོས་དབྱིངས་ངང་དུ་བཤགས། ཁྱད་པར་དམ་ཚིག་འགལ་འཁྲུལ་གྱུར་པ་ཀུན། ཁྱེད་ཐུགས་སྙིང་རྗེའི་ཀློང་དུ་བཟོད་པར་གསོལ། །དཔལ་མཆོག་མགོན་པོ་ལྕམ་དྲལ་ཁྱེད་ཉིད་ལ། །ལས་འབྲེལ་འཇོག་པའི་དགེ་ལ་རྗེས་ཡི་རང༌། །འཁོར་བ་མ་སྟོངས་བར་དུ་འདིར་བཞུགས་ལ། །བླ་མེད་དམ་ཆོས་བདུད་རྩིའི་ཆར་ཆེན་ཕོབ། །དགེ་འདིས་དཔལ་ཆེན་ཁྲག་འཐུང་ལེགས་ལྡན་ཆེ། ཁྱེད་བཞིན་བདག་ཀྱང་དུས་གསུམ་རྒྱལ་ཀུན་གྱི། །འཕྲིན་ལས་རྒྱུན་མི་འཆད་པར་སྒྲུབ་པ་དང༌། །གང་ལ་གང་འདུལ་འགྲོ་དོན་ནུས་པར་ཤོག །ཅེས་པ་ལེགས་ལྡན་མཧཱ་ཀཱ་ལ་འཁོར་
མང་གི་བསྟོད་པ་འཕྲིན་ལས་ཀུན་འགྲུབ་ཅེས་བྱ་བ་འདི་ནི། ས་སྐྱོང་མིའི་དབང་པོ་ཀུན་དགའ་རབ་བསྟན་དབང་གི་རྒྱལ་པོའི་གསུང་གིས་བསྐུལ་ནས་ཏཱ་ར་ནཱ་ཐས་སྨྲས་པའོ། །མངྒ་ལཾ།།