དཔལ་ལེགས་ལྡན་ནག་པོ་ཏྲཀྴད་ཀྱི་གཏོར་སྒྲུབ་ཀྱི་ལག་ལེན་མན་ངག
དཔལ་ལེགས་ལྡན་ནག་པོ་ཏྲཀྴད་ཀྱི་གཏོར་སྒྲུབ་ཀྱི་ལག་ལེན་མན་ངག་བཞུགས་སོ། །
ན་མོ་གུ་རུ་བཛྲ་དྷཱ་རཱ་ཡ། ལེགས་ལྡན་ནག་པོའི་འདིའི་གཏོར་སྒྲུབ་ཀྱི་མན་ངག་ནི། མཎྜལ་ཆོས་འབྱུང་མཐིང་ཁ་མེ་རི་ཅན་རྩེ་མོ་ཕར་བསྟན་པ། དབུས་སུ་ཉི་གདན་ལ་རཾ་དང་བྷྱོས་མཚོན་པ་བསྡུས་པ་དང༌། དེའི་ཕྱི་རོལ་ཟླུམ་བསྐོར་གྱི་ནང་ལྗང་ཁུ། ཕྱི་རོལ་ཐོད་པའི་ཕྲེང་བ་དང༌། རྡོ་ར་མེ་རི་རྣམས་བྱེད་པ་འབྲིང་པོ་དང༌། བསྐྱེད་ཆོག་དང་མཐུན་པའི་དཀྱིལ་འཁོར་ཡོངས་རྫོགས་འབྲི་བ་རྒྱས་པའོ། །དབུས་སུ་མཉྫིའི་སྟེང་དུ་ཡབ་ཡུམ་ལ་སྒྲུབ་གཏོར་གཅིག །མདུན་དུ་གཙོ་བོའི་འབུལ་གཏོར་དང༌། ལྷ་མོའི་འབུལ་གཏོར། གཡས་གཡོན་དུ་མོན་པ་ཕོ་མོའི་གཏོར་མ་བདུན་བདུན། མདུན་དུ་ཁྱི་མོ་བདུན་གྱི་གཏོར་མ། གཡས་སུ་སྨན་དང་གཡོན་དུ་རཀྟ། མཆོད་པ་སོགས་ལག་ལེན་བཞིན་བཤམས། མདའ་དར་གྲི་སྙིང་ཅན་ཡོད་ན་རབ་མེད་ནའང་སྒྲུབ་གཏོར་ལ་མདའ་དར་ནང་རྟེན་གྱི་ཚུལ་དུ་གཟུགས། བྲིས་སྐུ་མེད་ན་ངེས་པར་ཙ་ཀ་ལི་འཛུགས།
དེ་ནས་སྒྲུབ་པ་པོ་རྣམས་བཤགས་བསྡམ་ལ་སོགས་པ་སྔོན་དུ་འགྲོ་བས། བདག་བསྐྱེད་དང་ཡི་དམ་གྱི་གཏོར་བསྔོ་དང༌། མགོན་པོའི་གཞལ་ཡས་ཁང་བསྐྱེད་པ་ཡན་ཆད་བྱ། སྒྲུབ་གཏོར་ཆེན་པོ་དེ་གཏོར་བསྔོ་ལྟར་བྱིན་གྱིས་བརླབས། བདུད་རྩི་འབབས་པའི་དམིགས་པ་དང་བཅས་གཏོར་མ་ལ་གཟུངས་ཐག་བཞག་སྟེ། ཨོཾ་མཧཱ་བཱ་ལིང་ཏ་སོགས་ཀྱི་སྔགས་བརྒྱ་རྩ་བརྒྱད་བཟླས་ལ། ཡིག་བརྒྱ་དང་རྟེན་འབྲེལ་སྙིང་པོ་ཚར་གསུམ་གསུམ་གྱིས་བརྟན་པར་བྱ། དེ་ནས་གཟུངས་ཐག་བརྡོག །དེ་ལྟ་བུའི་གཏོར་མ་ལ་དམིགས་ནས། གཏོར་མ་དང་བྲིས་སྐུ་ལྷན་ཅིག་ཏུ་ལྷར་བསྐྱེད་པ་ཡིན་ཏེ། ཚིག་ཆ་མངོན་རྟོགས་བཞིན་བཞུགས་གསོལ་གྱི་བར་དུ་བྱ། མཆོད་པ་ཚན་གཅིག་བྱིན་གྱིས་བརླབས་ཏེ། མཆོད་བསྟོད་བསྡུས་པ་དཀྱུས་མ་དེ་བྱས་ལ། དམིགས་པ་ཤུགས་དྲག་པོས་བཟླས་པ་གང་མང་བྱའོ། །སྒྲུབ་པ་པོ་ཡི་དམ་དང་མགོན་པོའི་
བསྙེན་པ་སོང་བ་ཤ་སྟག་ཡིན་ན། སྔགས་བརྒྱ་ཙམ་ལ་གཟི་བྱིན་བསྐྱེད་པའི་དམིགས་པ་བྱ། དེ་ནས་དུས་སྐབས་དང་བསྟུན་པའི་ལས་བཞིའི་དམིགས་པ་ཉིད་ཀྱི་གཞུང་བསྲང༌། གཞུག་ཏུ་ཉེར་གཅིག་ཙམ་ལ་དངོས་གྲུབ་བླང་བའི་དམིགས་པ་བྱའོ། །མགོན་པོའི་བསྙེན་པ་མ་སོང་ན་ཕལ་ཆེར་བསྙེན་པའི་དམིགས་པ་དང༌། མཇུག་ཏུ་སྔར་ལྟར་བྱའོ། །དེ་ནས་གཏོར་མ་ཐམས་ཅད་ཕྱོགས་གཅིག་ཏུ་བྱིན་གྱིས་བརླབས་ལ། ཡང་སོ་སོར་དམིགས་ཏེ་གཙོ་བོའི་འབུལ་གཏོར་ལ་འབྲུ་གསུམ། ལན་ཉེར་གཅིག་དང་གཞན་རྣམས་ལ་གསུམ། ཐུན་མོང་དུ་སྔགས་དྲུག་ཕྱག་རྒྱ་དྲུག་གིས་བྱིན་གྱིས་བརླབས། གཙོ་བོ་ཡབ་ཡུམ་གྱི་སྔགས་ཀྱི་མཐར། ཨི་དཾ་བཱ་ལིང་ཏ་ཁ་ཁ་ཁཱ་ཧི་ཁཱ་ཧི། བཏགས་པ་ལན་བདུན་བདུན་དང༌། འཁོར་རྣམས་ཀྱི་སྔགས་ལ་དེ་བཏགས་པ་གསུམ་གསུམ་དང༌། ཐུན་མོང་དུ་གཏོར་སྔགས་དཀྱུས་མ་དང༌། ཤཱ་ས་ན་ལན་གསུམ་གྱིས་འབུལ། དཔལ་ཡེ་ཤེས་ཀྱི་ཞེས་སོགས་བསྟབ་པའི་ཚེ་རོལ་མོ་རྒྱུན་ཆགས་བྱ། སླར་ཡང་གཏོར་ཆུང་ཉི་ཤུ་རྩ་དྲུག་བྱིན་གྱིས་བརླབས། འབྲུ་གསུམ་ཉི་ཤུ་རྩ་དྲུག་ཏུ་བཟླས། མཆོད་པ་རྣམས་ཀྱང་བྱིན་གྱིས་བརླབས། མཆོད་འཕྲེང་དང་སྨན་རཀྟ་གཏོར་མ་གསུམ་གྱིས་གཞུང་བསྲང༌། དེ་སྐབས་གཏོར་མ་ཉི་ཤུ་རྩ་བཞི་པོ་ཐམས་ཅད་ལ་སྨན་དང་རཀྟ་ལྡུགས། གཏོར་ཆུང་རྣམས་གོང་བཞིན་བསྔོས་ནས། ལས་ཀྱི་རྡོ་རྗེས་དཔྲལ་བའི་ཐད་ཙམ་དུ་གཏོར་སྣོད་བཟུང་ལ་ཐམས་ཅད་ཀྱིས་འདི་ལྟར་གྱེར་ཏེ། ཧཱུཾ་དད་པ་དང་ནི་དམ་ཚིག་གིས། །དཔལ་ལྡན་མགོན་པོ་སྤྱན་འདྲེན་ན། །སངས་རྒྱས་བསྟན་པ་བསྲུང་བའི་ཕྱིར། །མཆོད་པའི་གནས་འདིར་གཤེགས་སུ་གསོལ། །ཨོཾ་མཧཱ་ཀཱ་ལ་ཏྲཀྵད་ས་
པ་རི་ཝཱ་ར་བཛྲ་ས་མཱ་ཛཿ འདི་སྐབས་སུ་འཐོར་བ་བསྡུ་བའི་དམིགས་པ་བྱ། དེ་ནས། ཧཱུཾ་བསྟན་དགྲ་མ་ལུས་བསྒྲལ་བ་ཡི། །སྙིང་ཁྲག་དྲོན་མོའི་མཆོད་ཡོན་དང༌། །དབང་པོ་སྣ་ལྔའི་མེ་ཏོག་བཤམས། །ཚིལ་ཆེན་བསྲེགས་པའི་བདུག་སྤོས་སྤྲིན། །ཞུན་ཆེན་སྣང་གསལ་མར་མེའི་འོད། །ཀླད་པ་མཁྲིས་པའི་དྲི་ཆབ་དང༌། །ཤ་ཆེན་སྐམ་རློན་ཞལ་ཟས་མཆོག །ཐོད་རྔ་རྐང་གླིང་རོལ་མོའི་སྒྲ། །གཏོར་མ་བཟའ་བ་སྣ་ཚོགས་རི། །བཏུང་བ་ཁྲག་གི་རྒྱ་མཚོ་སྟེ། །སྟོབས་བཅུའི་རང་བཞིན་བདུད་རྩི་སྨན། །ཞིང་གི་བླ་རེ་རྒྱལ་མཚན་གདུགས། །རྒྱུ་རློན་ལྡ་ལྡི་ཀེང་རུས་ཏེ། །གསང་ཆེན་མཆོག་གི་མཆོད་པ་འདི། །དཔལ་མགོན་འཁོར་དང་བཅས་ལ་འབུལ། །བཞེས་ནས་ཐུགས་དམ་སྐོང་གྱུར་ཅིག །ཨོཾ་མཧཱ་ཀཱ་ལ་ཏྲཀྴད་ས་པ་རི་ཝཱ་ར་ཨརྒྷཾ་པཱ་དྱཾ་སོགས། ཤཔྟ་པྲ་ཏཱིཙྪ་སྭཱཧཱ། མཧཱ་བ་ལིང་ཏ་ཁཱ་ཧི། མཧཱ་རཀྟ་ཁཱ་ཧི། མཧཱ་ཙིཏྟ་ཁཱ་ཧི། མཧཱ་གོ་རོ་ཙ་ན་ཁཱ་ཧི། མཧཱ་པཉྩ་ཨ་མྲྀ་ཏ་ཁཱ་ཧི། ཞེས་བརྗོད་ཅིང༌། གཙོ་བོའི་འབུལ་གཏོར་ལ་གཏོར་ཆུང་བཏབ། དེ་ནས་བསྟོད་པ་དང༌། འཕྲིན་བཅོལ་བསྡུས་པ་ནི། ཧཱུཾ་རཾ་ལས་བྱུང་བའི་སྟོབས་པོ་ཆེ། །བདུད་ཀྱི་རྒྱལ་པོ་ཁྲོ་གཏུམ་ཅན། །རྟ་ནག་ཞོན་པ་རྫུ་འཕྲུལ་བདག །སྡིག་ཅན་སྒྲོལ་མཛད་ཁྱོད་ལ་འདུད། །བྷྱོཿ ནད་ཀྱི་བདག་མོ་རེ་མ་ཏཱི། །གཤིན་རྗེའི་ལྕམ་མོ་ཨ་ལ་ལ། །འབྱུང་པོ་
ཀུན་གྱི་ཤ་ལ་རྔམས། །འདོད་ཁམས་དབང་ཕྱུག་མ་ལ་བསྟོད། །ལྷ་ཆེན་ཡབ་ཡུམ་འཁོར་བཅས་ཀྱི། །དམ་ཚིག་དུས་ལ་བབ་པོ་ས་མཱ་ཡ། ཁྱི་མོ་ཤེས་རབ་གསལ་གྱི་དུས་ལ་བབ། །ནག་མོ་གསེར་མིག་མའི༴ ནག་མོ་དངུལ་མིག༴ དམར་མོ་ཟངས་མིག༴ སྔོན་མོ་འཁར་མིག༴ ནག་མོ་མཆོང་མིག༴ ནག་མོ་གདོང་བརྒྱ་མའི༴ ནག་མོ་ཕག་གདོང་མའི༴ དུར་ཁྲོད་བདག་མོ་ཟ་བྱེད་མ། །ཚངས་མ་དབང་མོ་གཞོན་ནུ་མ། །ལྷ་ཆེན་མ་དང་རྟོག་འདོད་མ། །རྒན་བྱེད་མ་དང་སྣ་ཆེན་མོ། །མོན་མོ་བདུན་གྱི་དུས་ལ་བབ། །ལྷ་དང་གཤིན་རྗེ་གནོད་སྦྱིན་དང༌། །ཀླུ་དང་སྲིན་པོ་གྱིང་ཆེན་དང༌། །འཇིག་རྟེན་མགོན་པོ་ནག་པོ་སྟེ། །མོན་པ་བདུན་གྱི་དུས་ལ་བབ། །བདུད་དམག་བྱེ་བའི་དུས་ལ་བབ། །ལྷ་དམག་འབུམ་གྱི་དུས་ལ་བབ། །ལྷ་སྲིན་སྡེ་བརྒྱད་དུས་ལ་བབ། །མཆོད་གཏོར་བདུད་རྩི་འདིར་བཞེས་ལ། །སྔོན་གྱི་དམ་ཚིག་གཉན་དགོངས་ལ། །རྣལ་འབྱོར་བདག་གི་བསམ་པ་སྒྲུབས། །ཕྱི་ནང་འགལ་རྐྱེན་ཞི་བ་དང༌། །ཆོས་དང་དཔལ་འབྱོར་རྒྱས་པར་སྤེལ། །ལྷ་འདྲེ་མི་གསུམ་དབང་དུ་བསྡུས། །སྡང་བའི་དགྲ་བགེགས་མྱུར་དུ་སྒྲོལ། །ལུས་དང་གྲིབ་མ་བཞིན་དུ་འགྲོགས། །བཅོལ་བའི་འཕྲིན་ལས་མ་ལུས་མཛོད། །ལྷ་ཆེན་དཔལ་འབར་འཁོར་དང་བཅས་པ་རྣམས་བདག་གི་གུས་པས་མཆོད་གཏོར་ཕུལ་བ་འདི་བཞེས་ལ། སྤྱིར་སངས་རྒྱས་ཀྱི་བསྟན་པ་དར་བ་དང༌། སེམས་
ཅན་རྣམས་བདེ་སྐྱིད་འཕེལ་བར་མཛོད་ཅིག །ཁྱད་པར་བདག་ཅག་དཔོན་སློབ་ཡོན་མཆོད་རྒྱུ་སྦྱོར་བ་འཁོར་དང་བཅས་པ་རྣམས་ཀྱི་འགལ་རྐྱེན་བར་ཆད་ཐམས་ཅད་ཞི་བར་མཛད་དུ་གསོལ། རྨི་ལམ་ངན་པ་དང་མཚན་མ་ངན་པ་ཐམས་ཅད༴ ཕ་རོལ་གྱི་བྱད་ཁ་ཕུར་ཁ་མཐུ་གཏད་སྦྱོར་བ་ངན་པ༴ ཀེག་ཀི་ཀཾ་མ་གཤིན་རྒྱལ་སེན་སོགས་བགེགས་དང་ལོག་འདྲེན་གྱིས་བར་དུ་གཅོད་པ་ཐམས་ཅད་བཟློག་པར་མཛད་དུ་གསོལ། ཚེ་དང་བསོད་ནམས་དང་ལོངས་སྤྱོད་དང་དཔལ་འབྱོར་རྒྱས་པར་མཛད་དུ་གསོལ། སྐྱེ་བོ་དམ་པའི་ཆོས་ལ་འཇུག་པའི་དོན་དུ་རྒྱན་བློན་རྒྱལ་ཕྲན་ཡུལ་མི་གཙོ་བོ་མཐའ་དག་དབང་དུ་བསྡུ་བར་མཛད་དུ་གསོལ། ཞི་བས་མི་འདུལ་བ་སྡང་བ་དང་གདུག་པའི་སེམས་དང་ལྡན་པ་བསམ་སྦྱོར་ངན་པ་ཅན་གྱི་མི་དང་མི་མ་ཡིན་པ་ཐམས་ཅད་བསད་པ་དང་བསྐྲད་པ་དང་དབྱེ་བ་དང་རེངས་པ་དང་བཅིངས་པ་ལ་སོགས་པ་ཚར་གཅོད་པར་མཛད་དུ་གསོལ། མདོར་ན་བདག་ཅག་འཁོར་དང་བཅས་པ་ལ་ཕན་པ་དང་བདེ་བ་ཐམས་ཅད་སྩལ་དུ་གསོལ། ཞེས་དང༌། བྱེ་བྲག་འདོད་དོན་གསོལ་བ་ཡོད་ནའང་དྲག་ཏུ་བཏབ། མགོན་པོ་ཡབ་ཡུམ་འཁོར་བཅས་ཀྱི་སྔགས་དྲག་ཏུ་བཟླ། དེ་ནས་བསྐང་བ་བསྟོད་པ་བཤགས་པ་སོགས་ཀྱི་གཞུང་བསྲང་བར་བྱའོ། །བཤགས་པའི་སྔོན་དུ་ཡིག་བརྒྱ་གང་མང་བཟླའོ། །དེ་དག་ནི་དང་པོ་ཚུགས་པའི་ཐུན་ཐོག་མར་བྱ་བ་ཡིན་ལ། དེ་ཕྱིན་ཆད་ནས་ཐུན་རེ་རེ་བཞིན་དུ་གཏོར་མ་ཉི་ཤུ་
རྩ་བཞི་པོ་རྣམས་འཐེབ་ཀྱུ་རེས་གསོ་ཞིང༌། སྲོད་ཐུན་མ་གཏོགས་པ་ལ་གཏོར་ཆུང་གོང་གི་གྲངས་བཞིན་དང༌། །སྲོད་ཐུན་ལ་གཏོར་ཆུང་སུམ་ཅུ་བཏབ། དང་པོ་རང་དེ་མ་གཏོགས་གཏོར་ཆུང་བཏབ་པའི་སྐབས། གཏོར་ཆུང་སྔ་མ་རྣམས་ནས་གཅིག་གཉིས་རེས་སྒྲུབ་གཏོར་ཁ་གསོ། ཕྱི་མ་བཞི་པོ་དེ་རྒྱལ་ཆེན་བཞི་ལ་བསྔོ་བ་ཡིན། ཐོག་མའི་ཐུན་གཅིག་པོ་དེ་མ་གཏོགས་དམ་ཚིག་པ་སྔར་ཡོད་གསལ་འདེབས་ཀྱི་གསར་དུ་བསྐྱེད་མི་དགོས་པས་འདོན་བྱ་ལ་ས་བོན་རྣམས་བོར་བས་ཆོག་གོ །འགྲོལ་བའི་ཚེ་ཐོ་རངས་ནས་སྔ་དྲོའི་བར་གང་ཡང་རུང་བ་ཞིག་ལ་སྔར་བཞིན་ཆོ་ག་རྫོགས་པར་བཏང་ནས། །སྒྲུབ་གཏོར་ཆེན་མོའི་ལྷ་བྲིས་སྐུ་ལ་སྟིམ་པའི་དམིགས་པ་ལན་བདུན་བྱ། གཏོར་མའི་ལྷ་བྲིས་སྐུའི་ཐུགས་ཀར་ཐིམ་པར་གྱུར། ཛཿཧཱུཾ་བཾ་ཧོཿ ཞེས་ལན་བདུན་བརྗོད་སྒྲུབ་གཏོར་ཆེན་མོ་དེ་ཉིད་གཏོར་ཆོག་གིས་ཕུལ་ནས། གཏོར་མ་དེ་ཉིད་ཀྱི་སྙིང་པོ་མ་གཏོགས། གཏོར་མ་དང་འཐེབ་ཀྱུ་ཐམས་ཅད་ཁང་སྟེང་དུ་སྤྱིར་བཏབ་ཀྱིས་འབུལ་བ་མན་ཆད་དུས་གཏོར་དང་འདྲའོ། །གལ་ཏེ་འཕྲིན་ལས་བསྐང་གསོ་དང་མངའ་གསོལ་བྱེད་པར་འདོད་ན་ཉི་མ་སོ་སོར་བྱའོ། །ལེགས་ལྡན་ནག་པོ་ཆེན་པོ་དཔལ་མགོན་པོ་ཏྲཀྵད་ཀྱི་གཏོར་མའི་སྒྲུབ་པ་ཆེན་པོའི་མན་ངག་གསལ་བར་བཀོད་པ་འདི་ཡང་ཏཱ་ར་ནཱ་ཐས་སྨྲས་པའོ། །རྒྱལ་བའི་བསྟན་པ་རིན་པོ་ཆེ་དར་ཞིང་རྒྱས་པར་གྱུར་ཅིག །དགེའོ།།