གསེར་སྐྱེམས།
གསེར་སྐྱེམས་བཞུགས་སོ། །
ནང་མཆོད་བྱིན་རླབས་བྱ། ཧཱུཾ་ང་ནི་དཔལ་ལྡན་རྡོ་རྗེ་འཆང༌།།ཧཱུཾ་ང་ནི་དཔལ་ལྡན་ཧེ་རུ་ཀ །ཧཱུཾ་ང་ནི་སངས་རྒྱས་ཀུན་གྱི་དངོས། །ཧཱུཾ་ང་ནི་དཔལ་ལྡན་[ཁྲོ་བོའི་རྒྱལ་]དུས་འཁོར་ལོ། །ཧཱུཾ་ང་ནི་ཁྲོ་རྒྱལ་[གཤིན་རྗེ་གཤེད་]རྡོ་རྗེ་ཤུགས། །ཧཱུཾ་ང་ནི་ཁམས་གསུམ་དབང་ཕྱུག་བདག །སྐྱེད་དང་སྡུད་པའི་བྱེད་པོ་ཡིན། །སྲིད་ཞི་ཀུན་གྱི་གཙོ་བོའོ། །རྒྱལ་བ་ཡབ་ཡུམ་དཀྱིལ་འཁོར་ལྷ། །བྱང་ཆུབ་སེམས་དཔའ་ལྷ་མོར་བཅས། །ཡེ་ཤེས་ཁྲོ་བོ་ཁྲོ་མོ་རྣམས། །འདིར་བྱོན་མཆོད་སྤྲིན་རྒྱ་མཚོ་བཞེས། །མཆོག་དང་ཐུན་མོང་དངོས་གྲུབ་སྩོལ། །སྐུ་བཞིའི་བདག་ཉིད་སངས་རྒྱས་དང༌།།རིགས་ལྡན་[རིག་འཛིན་]སྤྲུལ་པའི་ཚོགས་རྣམས་དང༌། །རྩ་བརྒྱུད་བླ་མ་ཐམས་ཅད་ཀྱང༌། །འདིར་བྱོན༴ མཆོག་དང་༴ ཡི་དམ་དཀྱིལ་འཁོར་ལྷ་ཚོགས་དང༌། །ཐེག་གསུམ་འཕགས་ཚོགས་མ་ལུས་དང༌། །བཀའ་སྡོད་ཆོས་སྐྱོང་སྲུང་མ་
ཀུན། །འདིར་བྱོན་༴ མཆོག་དང་༴ ཧཱུཾ་བཀའ་སྲུང་དམ་ཅན་རྒྱ་མཚོ་དང༌། །ལས་བྱེད་མ་མོ་མཁའ་འགྲོ་དང༌། །སྣང་སྲིད་ལྷ་སྲིན་སྡེ་བརྒྱད་རྣམས། །ང་ཡི་བཀའ་ལས་མ་འདའ་ཞིག །ཧཱུཾ་དུས་གསུམ་བདེ་གཤེགས་བཀའ་ཉན་གཙོ། [།དཔལ་གྱི་མགོན་པོ་མཐུ་རྩལ་ཅན། །ལེགས་ལྡན་ནག་པོ་ཆེན་པོའི་ཚོགས། །ལྷ་ཆེན་དཔལ་འབར་འཕྲིན་ལས་མགོན། །ཏྲཀྴད་ལྕམ་དྲལ་འཁོར་དང་བཅས།] །སྡེ་དྲུག་སྲུང་མ་དྲུག་བཅུའི་ཚོགས། །རྡོ་རྗེ་ནག་པོ་ཆེན་པོ་དང༌། །དཔལ་གྱི་ལྷ་མོ་རྫུ་འཕྲུལ་ཅན། །དཔལ་ལྡན་རྒྱལ་པོ་རྣམ་ཐོས་བུ། །ཧ་ཧ་རྒོད་པའི་ཞིང་སྐྱོང་ཆེ། །གཞན་ཡང་ལས་མཁན་པུ་[ཤྭ་ན་]ཏྲ་སོགས། །འཁོར་ཚོགས་བསམ་མི་ཁྱབ་བཅས་ལ། །གསེར་སྐྱེམས་བདུད་རྩི་འདི་འབུལ་ལོ། །བར་ཆད་སོལ་ལ་འདོད་དོན་སྒྲུབ། །ཧཱུཾ་ཕྱོགས་སྐྱོང་བཅུ་དང་རྒྱལ་ཆེན་བཞི། །ལྷ་ཆེན་བརྒྱད་དང་ཀླུ་ཆེན་བརྒྱད། །འཇིགས་བྱེད་དགུ་དང་གཟའ་ཆེན་
དགུ །རྒྱུ་སྐར་ཉེར་བརྒྱད་འཁོར་དང་བཅས། །མིང་པོ་གསུམ་དང་སྲིན་མོ་བཞི། །མ་བདུན་དབང་ཕྱུག་ཉི་ཤུ་བརྒྱད། །ཞིང་དུ་སྤྱོད་པའི་མཁའ་འགྲོ་མ། །བཞི་བཅུ་རྩ་བརྒྱད་ལ་སོགས་པ། །ཞིང་སྐྱོང་བཞི་བཅུ་ཞེ་བརྒྱད་དང༌། །ཕྱོགས་བཞི་སོ་སོར་གནས་པ་ཡི། །ཐུབ་པ་འབྱུང་པོ་ཉེར་བརྒྱད་དང༌། །དམག་དཔོན་གནོད་སྦྱིན་ཉི་ཤུ་བརྒྱད། །སྟོབས་ཆེན་སུམ་ཅུ་རྩ་གཉིས་དང༌། །གྲོང་ཁྱེར་སྐྱོང་བ་བཅུ་དྲུག་དང༌། །ལྗོངས་ཆེན་སྐྱོང་བ་ལྔ་བརྒྱ་སོགས། །ལངྒ་ལ་སོགས་སྲིན་པོའི་ཚོགས། །ཕོ་ཉ་སུམ་བརྒྱ་དྲུག་ཅུ་དང༌། །གྲུབ་པ་དྲང་སྲོང་འཕྲོག་མ་དང༌། །ཉི་ཁྱིམ་ཆ་ཡི་ལྷ་རྣམས་དང༌། །སྦྱོར་བ་ཉེར་བདུན་བྱེད་པ་བཅུ། །གཤིན་རྗེའི་རྒྱལ་པོ་འཁོར་བཅས་དང༌། །གཞན་ཡང་བསྟན་མ་བཅུ་གཉིས་དང༌། །སྐྱེས་བུ་གྱིང་ཆེན་བཅོ་བརྒྱད་དང༌། །དགེ་བསྙེན་མཐུ་ཆེན་ཉི་ཤུ་གཅིག །རྗེ་ཡི་མགུར་ལྷ་སུམ་ཅུ་སོགས། །བོད་ཡུལ་གནས་པའི་སྡེ་བརྒྱད་ཀུན། །རང་རང་བུད་མེད་གཡོགས་དང་འཁོར། །མཛའ་བཤེས་གཉེན་འདུན་གྲོགས་བཅས་ལ། །གསེར་སྐྱེམས༴ ཁྱད་པར་གནས་འདིའི་ཆོས་སྐྱོང་བ། །སྨན་བཙུན་ནགས་སྨན་རྒྱལ་མོ་དང༌། །ནང་འཁོར་སྨན་མོ་འབུམ་སྡེ་དང༌། །ཆེ་བཙན་དམག་དཔོན་འཁོར་དང་བཅས། །ཡུལ་འདིའི་ལྷ་ཀླུ་གཞི་བདག་ནི། །རྣམ་པ་སྣ་ཚོགས་དཔག་ཡས་ལ། །གསེར་སྐྱེམ༴ གཞན་ཡང་ལྷ་དང་གནོད་སྦྱིན་དང༌། །གཤིན་རྗེ་དྲི་ཟ་གྲུལ་བུམ་དང༌། །ལྟོ་འཕྱེ་མཁའ་ལྡིང་མིའམ་ཅི། །ཀླུ་དང་ས་བདག་གཉན་གྱི་སྡེ། །རྒྱལ་པོ་བཙན་དང་མ་མོ་བདུད། །གཟའ་དང་ཐེ་རང་འགོང་པོ་རྨུ། །
རི་དང་ནགས་ཚལ་ཤིང་གི་ལྷ། །དུར་ཁྲོད་ལམ་སྲང་བཞི་མདོ་དང༌། ཁྱིམ་དང་མཚན་གཅིག་གནས་ལ་སོགས། །མདོར་ན་འཇིག་རྟེན་དྲེགས་པ་ཅན། །སྲིད་གསུམ་གནས་པ་མ་ལུས་ཀུན༴ གསེར་སྐྱེམ༴ འཇིག་རྟེན་འཇིག་རྟེན་འདས་པ་ཡི། །མཐུ་ལྡན་དམ་པ་ཁྱེད་ཀུན་གྱིས། །སངས་རྒྱས་བསྟན་པ་བསྲུང་བ་དང༌། །བསྟན་འཛིན་དགེ་འདུན་འཕེལ་བ་དང༌། །རྒྱལ་ཁམས་སེམས་ཅན་བདེ་བ་དང༌། །གནོད་བྱེད་གདུག་པ་ཚར་ཆོད་ཅིག །ཧཱུཾ་ཁྱད་པར་ངེས་དོན་བསྟན་པ་གསལ་མཛད་པ། །ཆོས་ཀྱི་རྒྱལ་པོ་དཔལ་ལྡན་ཇོ་ནང་བའི། །བསྟན་པ་ཡུལ་རྣམས་ཀུན་ཏུ་དར་བ་དང༌། །སྲིད་མཐར་མི་ནུབ་རྒྱལ་མཚན་བསྒྲེང་བ་དང༌། །བར་ཆད་མི་མཐུན་ཕྱོགས་ཀུན་ཞི་བ་དང༌། །རྣལ་འབྱོར་བདག་ཅག་གསང་སྔགས་ཟབ་མོ་ཡི། །འཕྲིན་ལས་བསྒྲུབ་པའི་དམ་ཚིག་གྲོགས་མཛོད་ཅིག །ཅི་བསམ་ཡིད་བཞིན་འགྲུབ་པར་མཛད་དུ་གསོལ། །འདི་རྒྱས་པ་ཡིན། བསྡུས་པ་ཕྱོགས་སྐྱོང་བཅུ་དང་སོགས་ཤླཽ་ཀ་བདུན་པོ་ཙམ་གྱིས་ཀྱང་ཆོག་གོ །ཞུས་དག། མངྒ་ལཾ།།