སྨོན་ལམ་དགོས་པ་ཀུན་འབྱུང་།
སྨོན་ལམ་དགོས་པ་ཀུན་འབྱུང་ཞེས་བྱ་བ་བཞུགས་སོ། །
ན་མོ་གུ་རུ། ཐོག་མེད་དུས་ནས་འཁོར་བ་ཇི་སྲིད་བར། །དགེ་བ་གང་དག་བགྱིས་དང་བགྱིད་རྩལ་དང༌། །ཡི་རང་བསྔགས་པ་བརྗོད་པའི་ལེགས་བྱས་སོགས། །མདོར་ན་བདག་གི་དུས་གསུམ་དགེ་བ་ཀུན། །མཁའ་ཁྱབ་འགྲོ་བའི་དགེ་རྩ་མཐའ་ཡས་དང༌། །སངས་རྒྱས་བྱང་སེམས་ཉན་རང་འཕགས་ཚོགས་ཀྱི། །རྣམ་དཀར་འཕྲིན་ལས་ལེགས་བྱས་རྒྱ་མཚོའི་ཚོགས། །མ་ལུས་གཅིག་ཏུ་བསྡཽམས་པའི་མཐུ་སྟོབས་ལས། །སྨོན་ལམ་འདི་ཀུན་ངེས་པར་འགྲུབ་པ་དང༌། །མྱུར་དུ་འགྲུབ་ཅིང་གེགས་མེད་འགྲུབ་པ་དང༌། །མཆོག་ཏུ་རྒྱ་ཆེན་སྟོབས་ལྡན་འགྲུབ་པར་ཤོག །སྐྱེ་བ་ཀུན་དུ་བླ་མ་དཀོན་མཆོག་ལ། །མི་ཕྱེད་དད་པ་རྣམ་གསུམ་འབྲལ་མེད་ལྡན། །བཅོས་མ་མིན་པར་སྙིང་རྗེ་བྱང་ཆུབ་སེམས། །ནམ་ཡང་རྒྱུན་མི་ཆད་པར་སྐྱེ་བར་ཤོག །རྟག་ཏུ་རབ་བྱུང་དགེ་
སློང་གནས་ཐོབ་སྟེ། །ཉིས་བརྒྱ་ལྔ་བཅུ་ལ་སོགས་བསླབ་པའི་གནས། །འདུལ་བ་རྒྱ་མཚོར་ཇི་སྐད་གསུངས་པ་བཞིན། །ཅུང་ཟད་ཙམ་ཡང་མ་ཉམས་བསྲུང་བར་ཤོག །བྱང་ཆུབ་སེམས་དཔའི་བསླབ་གཞི་མཐའ་དག་ལ། །རྒྱལ་སྲས་རྣམས་ཀྱིས་ཇི་ལྟར་མཛད་བཞིན་སྤྱོད། །ཕ་རོལ་ཕྱིན་བཅུའི་ཉམས་ལེན་མཐར་ཕྱིན་ནས། །བསོད་ནམས་ཡེ་ཤེས་ཚོགས་གཉིས་རྫོགས་པར་ཤོག །ཁྱད་པར་རྡོ་རྗེ་ཐེག་པའི་སྒོར་ཞུགས་ཏེ། །ཟབ་མོའི་དཀྱིལ་འཁོར་ཀུན་དུ་ཞུགས་ཤིང་མཐོང༌། །རྨད་བྱུང་དབང་གི་རིམ་པ་ཀུན་ཐོབ་ནས། །སྐུ་བཞིའི་ས་བོན་མཐའ་དག་གསོས་འདེབས་ཤོག །དམ་ཚིག་མཆོག་ལ་ཉེས་ལྟུང་དྲི་མས་དབེན། །རིག་འཛིན་རྣམས་ཀྱིས་འདའ་བར་མི་དཔྱོད་པའི། །བླང་དོར་དགག་སྒྲུབ་མཉམ་བཞག་རྗེས་སྤྱོད་ཀྱི། །
དམ་ཚིག་མཐའ་དག་ཚུལ་བཞིན་བསྲུང་བར་ཤོག །རྡོ་རྗེ་སློབ་དཔོན་ཀུན་དང་ཁྱད་པར་དུ། །རྗེ་བཙུན་སྒྲོལ་བའི་མགོན་པོ་ཁྱོད་ཉིད་དང༌། །རྟག་ཏུ་མི་འབྲལ་རྟག་ཏུ་རྗེས་འཛིན་ཞིང༌། །རྟེན་འབྲེལ་ལེགས་ཕྱོགས་ཁོ་ནར་འགྲིགས་པར་ཤོག ཁྱེད་ལ་མོས་གུས་གདུང་ཤུགས་འབྲལ་མེད་དང༌། ཁྱེད་དང་རྟེན་འབྲེལ་ནམ་ཡང་མི་འཆུག་ཅིང༌། ཁྱེད་ཀྱི་བཀའ་ལས་ཇི་སྐད་འབྱུང་བ་བཞིན། །དགའ་ཞིང་སྤྲོ་བའི་ཡིད་ཀྱིས་བསྒྲུབ་པར་ཤོག །བཀའ་བཞིན་བསྒྲུབ་ཚེ་མནར་མེད་གནས་སུ་ཡང༌། །འཇུག་པར་སྤྲོ་ན་གཞན་ལྟ་སྨོས་ཅི་དགོས། །རང་འདོད་མེད་པར་ཁྱེད་ཀྱིས་ཅི་གསུངས་དང༌། །ཐུགས་སུ་ཅི་དགྱེས་ཐམས་ཅད་བསྒྲུབ་པར་ཤོག ཁྱེད་ནི་འཁོར་འདས་ཀུན་ཁྱབ་མཛད་པ་ཅན། །གང་འདུལ་ལྷུན་གྱིས་གྲུབ་པའི་འཕྲིན་ལས་ཏེ། །སྣང་ངོར་སྤྱོད་ཚུལ་བཟང་ངན་ཅི་སྟོན་ཡང༌། །རྒྱལ་བའི་མཛད་པ་ཁོ་ནར་རྟོགས་གྱུར་ཅིག །ལོག་ལྟའི་དྲི་མ་ཙམ་ཡང་མི་སྐྱེ་ཞིང༌། །མདོ་རྒྱུད་ཀུན་ནས་ཇི་སྐད་གསུངས་པ་ལྟར། །སྒོ་གསུམ་ལོངས་སྤྱོད་བྱ་བ་ཐམས་ཅད་ཀྱིས། །བླ་མ་དམ་པ་རྟག་ཏུ་མཉེས་བྱེད་ཤོག །སྐྱེ་བ་ཀུན་དུ་ཁྱེད་ཀྱི་དགོངས་པ་སྐྱོང༌། ཁྱོད་ཀྱི་གསུང་འཛིན་ཁྱོད་ཀྱི་འཕྲིན་ལས་བསྒྲུབ། །འགྲོ་ཀུན་ཁྱོད་ཀྱིས་རྗེས་སུ་འཇུག་པ་དང༌། ཁྱེད་ཀྱི་བསྟན་ལ་བྱ་བ་བྱེད་པར་ཤོག ཁྱེད་གསུང་ཆོས་ཀྱིས་ས་གསུམ་ཀུན་ཁྱབ་ནས། །མི་དང་མི་མིན་ཐམས་ཅད་དེར་རྗེས་འཇུག །རྣམ་དག་གྲུབ་མཐའ་ལྟ་སྤྱོད་བཟང་པོ་འདི། །ཕྱོགས་དུས་ཀུན་དུ་སྤེལ་བར་བདག་གྱུར་ཅིག ཁྱཽད་ཀྱི་ཐུགས་དགོངས་ཇི་བཞིན་
རྟོགས་པ་དང༌། །གསུང་གི་གསང་བ་མཐའ་དག་ལེགས་བཟུང་ནས། །དགོངས་དོན་ཇི་བཞིན་ཤེས་ལ་འཁྲུལ་བའི་དྲི། །ཏིལ་གྱི་ཟེགས་མ་ཙམ་ཡང་སྤངས་བར་ཤོག །སྐྱེ་ཞིང་སྐྱེ་བར་འབད་མེད་ལྷུན་གྲུབ་ཏུ། །ཆོས་ཀུན་འཛིན་པའི་ཤེས་རབ་མཆོག་ཐོབ་ཅིང༌། །མི་བརྗེད་གཟུངས་ཐོབ་བརྩོན་འགྲུས་མཆོག་དང་ལྡན། །དམ་པའི་ཆོས་བཞིན་རྟག་ཏུ་སྤྱོད་པར་ཤོག །བདུད་དང་མུ་སྟེགས་ལྟ་ངན་ལོག་ལྟ་ཅན། །ཐམས་ཅད་ཚར་བཅད་ཆོས་ལ་འགོད་པ་དང༌། །མ་དད་པ་རྣམས་དད་པའི་གནས་ལ་འགོད། །དེ་འདྲའི་ཐབས་ཚུལ་མཐའ་ཡས་འགྲུབ་པར་ཤོག །ནད་མེད་རིགས་གཟུགས་ལོངས་སྤྱོད་དབང་ཐང་གྲོགས། །འཁོར་གཡོག་ལ་སོགས་ཐམས་ཅད་ཕུན་ཚོགས་ཤིང༌། །རྟག་ཏུ་དགེ་བའི་ཆོས་ལ་སྤྱོད་པ་ཡིས། །རང་གཞན་དོན་གྱི་མཆོག་ཀུན་འགྲུབ་པར་ཤོག །རྗེ་བཙུན་ཁྱོད་ཀྱི་བསྟན་པའི་མི་མཐུན་ཕྱོགས། །མ་ལུས་སྐད་ཅིག་རེ་རེར་ཕྱིར་བསལ་ནས། །རྒྱལ་ཁྱོད་བསྟན་པའི་ཉི་འོད་ཕྱོགས་ཀུན་དུ། ཁྱབ་པར་བྱེད་པའི་འཕྲིན་ལས་སྒྲུབ་པར་ཤོག །སྡིག་གྲོགས་ལོག་འཚོ་འགལ་རྐྱེན་ཀུན་སྤངས་ཤིང༌། །ཆོས་ཕྱིར་དཀའ་བ་སྤྱོད་ཀྱང་ཡིད་མི་གཡོ། །རྟག་ཏུ་མཐའ་ཡས་འགྲོ་བ་སྨིན་པར་བྱེད། །རྒུད་པར་གྱུར་ཀྱང་ཆོས་བཞིན་སྤྱོད་པར་ཤོག །མྱུར་དུ་ཏིང་འཛིན་ཆོས་ཀྱི་སྟོབས་ཐོབ་ནས། །ལ་ལར་མཁས་དང་ལ་ལར་གྲུབ་པ་དང༌། །རྒྱལ་པོ་རྒྱལ་ཕྲན་བློན་པོ་ཕོ་ཉ་འཁོར། །སྣ་ཚོགས་སྤྲུལ་པས་བསྟན་པ་གསལ་བྱེད་ཤོག །
བླ་མེད་བྱང་ཆུབ་མྱུར་དུ་ཐོབ་པ་དང༌། །དེ་སྲིད་དུ་ཡང་སྲིད་དང་ཞི་བ་ཡི། །ཕུན་ཚོགས་བསམ་གྱིས་མི་ཁྱབ་རྟག་པར་འབྱོར། །བསྟན་དང་འགྲོ་བའི་དོན་ཆེན་འགྲུབ་པར་ཤོག །བསྐྱེད་རིམ་ལྷ་ཡི་རྣལ་འབྱོར་བརྟན་པ་ཐོབ། །རིག་སྔགས་བཟླས་པའི་ནུས་པ་མཐར་ཕྱིན་ནས། །ཞི་སོགས་ལས་ཀུན་ཐོགས་མེད་འགྲུབ་པ་དང༌། །ཐུན་མོང་འཇིག་རྟེན་དངོས་གྲུབ་ཀུན་ཐོབ་ཤོག །ལྷན་སྐྱེས་ཡེ་ཤེས་རྫོགས་པའི་རིམ་པ་བརྟན། །ཡེ་ཤེས་སྨྲ་བ་པོ་ལ་ཡེ་ཤེས་ཉིད། །གཅིག་པུས་འདོད་པའི་དོན་ཀུན་འགྲུབ་འགྱུར་བ། །འཇིག་རྟེན་འདས་པ་ཕྱག་རྒྱ་ཆེ་ཐོབ་ཤོག །ཇི་སྐད་བཤད་པའི་ལམ་གྱི་ཡོན་ཏན་རྣམས། །བར་ཆད་མེད་པར་མྱུར་དུ་མཐར་ཕྱིན་ནས། །ཡེ་ཤེས་ལྔ་དང་སྐུ་བཞིའི་བདག་ཉིད་ཅན། །རྡོ་རྗེ་འཆང་ཆེན་མྱུར་དུ་ཐོབ་པར་ཤོག །ཁམས་གསུམ་སྐྱེ་འགྲོ་ཀུན་ཡང་དེ་ལ་འགོད། །བརྟན་གཡོ་མཐའ་དག་དཔལ་ལྡན་བླ་མ་ཡི། །ཐུགས་གྱི་རྒྱ་མཚོར་རོ་གཅིག་འཇུག་པ་ལ། །གློ་བུར་དྲི་མའི་འཁྲུལ་བ་སངས་བར་ཤོག །སྨོན་ལམ་དེ་ཀུན་འཕྲལ་དུ་འགྲུབ་པར་ཤོག །ཇི་བཞིན་འགྲུབ་ཅིང་རྒྱ་ཆེན་འགྲུབ་པར་ཤོག །གེགས་མེད་འགྲུབ་ཅིང་འབད་མེད་འགྲུབ་པར་ཤོག །བཀྲ་ཤིས་དགེ་ལེགས་ཕུན་སུམ་ཚོགས་པར་ཤོག །ཅེས་པ་འདི་ཡང་དད་ལྡན་ཀུན་དགའ་ལྷུན་གྲུབ་གྱིས་བསྐུལ་ནས་ཏཱ་ར་ནཱ་ཐས་སྨྲས་པའོ། །