ཀླུ་དབང་རྒྱལ་པོ་སྒྲུབ་ཐབས།― TNT15_Page_0120 ―
[མ་དཔེ་གཟིགས་ན་འདིར་གནོན།]
ཨོཾ་སྭཱ་སྟི། ཀླུ་རྣམས་ཀྱི་ནི་སྟོན་པ་མཆོག །ཀླུའི་ནད་རྣམས་ཞི་མཛད་པ། །ཀླུ་དབང་རྒྱལ་པོ་ལ་བཏུད་ནས། །ཀླུ་རྣམས་འདུལ་བའི་ཐབས་ལ་འཇུག །ཨོཾ་ཨ་ཀཱ་རོ་མུ་ཁཾ་སརྦ་དྷརྨ་ཨཱདྱ་ནུཏྤནྣ་ཏྭད། ཨོཾ་ཨཱཿཧཱུཾ་ཕཊ་སྭཱཧཱ། ལན་བདུན་གྱིས་སྔོན་འགྲོ་གཏོར་མ་བཏང༌། ཨོཾ་ཨཱཿབིགྷྣཱན་ཏ་ཀྲྀཏ་ཧཱུཾ་ཕཊ། ལན་བདུན་གྱིས་བགེགས་བསྐྲད། སྐྱབས་སེམས་ཚད་མེད་བཞི་རྣམས་སྤྱི་དང་མཐུན། སྤྲོ་ན་བར་འདི་ཚོགས་ཞིང་སྤྱན་དྲངས་ནས། ཕྱག་མཆོག་ཡན་ལག་བདུན་པ་རྣམས་བྱ་སྟེ། མདོར་བསྡུས་པའི་ཚེ། མ་བྱས་ཀྱང་རུང་ངོ༌། །ཨོཾ་སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་པཾ་ལས་པདྨ། ཨ་ལས་ཟླ་བ། དེའི་སྟེང་དུ་ཧཱུཾ་སྔོན་པོའི་འོད་ཀྱི་འཕྲོ་འདུ་ལས། རང་ཉིད་དེ་བཞིན་གཤེགས་པ་ཀླུ་དབང་རྒྱལ་པོ་རིན་པོ་ཆེ་མི་པོགས་པའི་ཁ་དོག་ལྟ་བུ། ཞལ་རས་དཀར་ཞིང་སྐུ་སྔོ་བ། ཞབས་རྡོ་རྗེའི་སྐྱིལ་ཀྲུང་གིས་བཞུགས་ཤིང༌། ཕྱག་གཉིས་ཐུགས་ཀར་སེམས་ཅན་རྣམས་ངན་འགྲོའི་སྐྱེ་གནས་ལས་འདོན་པར་མཛད་པའི་ཕྱག་རྒྱ་མཛད་པ། མཚན་དང་དཔེ་བྱད་ཡོངས་སུ་རྫོགས་ཤིང༌། ན་བཟའ་ཆོས་གོས་ངུར་སྨྲིག་རྣམ་གསུམ་གསོལ་བ། ཚངས་ ― TNT15_Page_0121 ―
[མ་དཔེ་གཟིགས་ན་འདིར་གནོན།]
པར་སྤྱོད་པའི་ཆ་ལུགས་ཅན། མེ་ཏོག་སྣ་ཚོགས་པའི་རྒྱབ་ཡོལ་དང༌། སྦྲུལ་མགོའི་གདེངས་ཀ་བདུན་དང་ལྡན་པ། དེའི་མདུན་དུ་སྒྲིབ་པ་རྣམ་སེལ་དཀར་པོ་ཕྱག་གཡས་ན་རིན་པོ་ཆེའི་མྱུ་གུ་དང༌། གཡོན་ནུ་བུམ་པ་བསྣམས་པ། གཡས་སུ་བྱམས་པ་དམར་པོ་ཀླུ་ཤིང་གི་མེ་ཏོག་དང༌། སྤྱི་བླུགས་འཛིན་པ། རྒྱབ་ཏུ་འཇམ་དཔལ་སེར་པོ་ཨུཏྤལ་བསྣམས་པ། གཡོན་དུ་སྤྱན་རས་གཟིགས་དཀར་པོ་པདྨ་བསྣམས་པ། དེ་ཐམས་ཅད་པད་ཟླའི་གདན་ལ་བཞུགས་ཤིང༌། བཅོམ་ལྡན་འདས་ཀྱི་ཞལ་ལ་བལྟ་བའོ། །གཞན་ཡང་གཡས་ཕྱོགས་སུ་བྱང་ཆུབ་སེམས་དཔའི་དགེ་འདུན་དང༌། གཡོན་ཕྱོགས་སུ་དགྲ་བཅོམ་པའི་ཚོགས་དང༌། འོག་ཕྱོགས་སུ་ཀླུའི་ཚོགས་དཔག་ཏུ་མེད་པ་དང་བཅས་པའོ། །རང་གི་སྙིང་ག་ནས་འོད་ཟེར་འཕྲོས། ཡེ་ཤེས་སེམས་དཔའ་བཛྲ་ས་མཱ་ཛཿ པུཥྤེ་ནས། ནཻ་ཝེ་ཏེའི་བར་གྱིས་མཆོད། བཅོམ་ལྡན་འདས་དེ་བཞིན་གཤེགས་པ་ཀླུ་དབང་རྒྱལ་པོའི་བདག་ལ་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཏདྱ་ཐཱ། ཏ་ཐཱ་ག་ཏེ་བྷ་ག་ཝན་ནཱ་ག་རཱ་ཛེ་ཤྭ་ར་ཨ་དྷི་ཥྛ་ན་ཨ་དྷི་ཥྛ་ཏེ་སྭཱཧཱ། ཞེས་ཅི་ནུས་སུ་བཟླ། ཐུན་འཇོག་ཁར་ལྷ་སྐུ་སྟོང་པར་སྦྱངས་ཤིང་དགེ་བ་བྱང་ཆུབ་ཏུ་བསྔོ། འདིའི་བཟླས་པ་འབུམ་ཙམ་སོང་ནས། བྲིས་སྐུ་རབ་གནས་ཅན་གྱི་དྲུང་དུ། མཆོད་པ་ལ་བརྩོན་པས་མདུན་བསྐྱེད་སྒྲུབ་ཚུལ་གྱིས་བསྒྲུབས་ན། མཆོག་ཏུ་བྱིན་རླབས་ཆེའོ། །ཐུན་མཚམས་སུ་མདོ་སྡེ་མེ་ ― TNT15_Page_0122 ―
[མ་དཔེ་གཟིགས་ན་འདིར་གནོན།]
ཏོག་བཀོད་པ་ནས་གསུངས་པའི་གཟུངས་འདོན་ནོ། །གཏོར་མ་འབུལ་བར་འདོད་ནའང༌། འོག་ནས་འབྱུང་བ་བཞིན་བྱ།འདིའི་རྗེས་གནང་བྱ་བར་འདོད་ན། མཎྜལ་ལ་མེ་ཏོག་གིས་ཚོམ་བུ་ལྔ་བཀོད། དཀར་གཏོར་ཆ་གཉིས་བཤམས། ཆུང་བ་དེ་ལ་ཀླུ་སྨན་བསྲེ། མཆོད་པ་རྒྱ་ཆེར་བཤམས། གོང་དུ་བསྟན་པ་ལྟར་བདག་བསྐྱེད་བཟླས་པའི་བར་སྔོན་དུ་འགྲོ་བས། མཆོད་པ་རྣམས་སྤྱི་དང་མཐུན་པར་བྱིན་གྱིས་བརླབས། མདུན་བསྐྱེད་ཨ་མྲྀ་ཏས་བསངས། སྭ་བྷཱ་ཝ་ནས། ཛཿཧཱུཾ་བཾ་ཧོཿའི་བར་བདག་བསྐྱེད་འདྲ། ཨརྒྷཾ་ནས་ནཻ་ཝེ་ཏེའི་བར་སྤྱི་དང་མཐུན་པས་མཆོད། རོལ་མོ་སོགས་མཆོད་པ་ཐམས་ཅད་བསྔོ་བའི་ཚེ། ཨོཾ་སརྦ་བི་ཤྭ་དྷ་ར་པཱུ་ཛ་མེ་གྷ་སྥ་ར་ཎ་ས་མུད་དྲེ་ཧཱུཾ། ཞེས་བརྗོད། ཆོས་དབྱིངས་སྐྱེ་མེད་ངང་ལས་ཆོས་སྐུར་བཞེངས། །གཟི་བརྗིད་རྒྱལ་པོ་ཉི་མ་འབུམ་ཤར་འདྲ། །མཚན་དང་དཔེ་བྱད་འབར་བ་དཔལ་གྱི་སྐུ། །འགྲོ་བའི་སྡུག་བསྔལ་དུག་སེལ་མཆོག་ལ་འདུད། །ཅེས་བསྟོད། བཟླས་པ་ཅུང་ཟད་བྱ། གཏོར་མ་ཨ་མྲྀ་ཏས་བསངས། སྭ་བྷཱ་ཝས་སྦྱངས། གཏོར་མ་དང་པོ་ཨོཾ་ལས་བྱུང་བའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། གཏོར་མ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ། ལན་བདུན་གྱིས་བྱིན་གྱིས་བརླབས། སྙིང་པོ་ལན་གསུམ་གྱིས་བཅོམ་ལྡན་འདས་དང༌། ཡང་ཨ་ཀཱ་རོ་དང༌། ཁ་འབར་མའི་སྔགས་ལན་བདུན་བརྗོད་པས་བརྟན་པར་བྱིན་གྱིས་བརླབས་ནས། ཨོཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་གྱིས་འཁོར་ཐམས་ཅད་ལ་ཕུལ་ནས། བླ་མ་དཀོན་མཆོག་གསུམ་པོ་དང༌། །ཡི་དམ་མཁའ་འགྲོ་ ― TNT15_Page_0123 ―
[མ་དཔེ་གཟིགས་ན་འདིར་གནོན།]
རིག་པ་འཛིན། །བཅོམ་ལྡན་ཀླུ་རྒྱལ་དཀྱིལ་འཁོར་ཚོགས། །ལྷན་ཅིག་སྐྱེས་དང་བསྲུང་བྱེད་པའི། །འཇིག་རྟེན་སྐྱོང་བ་ཐམས་ཅད་དང༌། །ལན་ཆགས་སྙིང་རྗེར་བཅས་པ་རྣམས། །མཆོག་སྦྱིན་འདི་ཡིས་མཉེས་ཚིམ་ནས། །ཚོགས་བསོགས་བར་ཆད་ཞི་གྱུར་ཅིག །ཅེས་སོགས་འདོད་དོན་གསོལ་བ་བཏབ། གཏོར་མ་གཙང་སར་གཏང༌། གཏོར་མ་གཉིས་པ་ལ་དམིགས་ནས། གཏོར་སྣོད་པཾ་སེར་པོ་ལས་པདྨའི་སྣོད་དུ་ཧྲཱིཿཡིག་དཔག་ཏུ་མེད་པ་གནས་པ་སྟེང་དུ་སྤྲིན་འཁྲིགས་ནས། བདུད་རྩིའི་ཆར་ཆེན་པོ་བབས་ནས་འདོད་དགུའི་རྒྱ་མཚོར་གྱུར། རང་གི་སྙིང་ག་ནས་འོད་འཕྲོས། ནོར་རྒྱས་སེར་པོ་སྙིང་གར་ཐལ་མོ་སྦྱར་བས། རིན་པོ་ཆེའི་སྒྲོམ་བུ་འཛིན་པ་ལ་སོགས་པ་ཀླུ་ཐམས་ཅད་བཛྲ་ས་མཱ་ཛཿ ཨོཾ་དེ་བཞིན་གཤེགས་པ་ཀླུ་དབང་རྒྱལ་པོ་ལ་ཕྱག་འཚལ་ལོ། །ནཱ་ག་རཱ་ཛ་ས་པ་རི་ཝཱ་རེ་བྷྱཿ ཞེས་པ་ལ་ཁ་འབར་མའི་སྔགས་བཏགས་པ་ལན་བདུན་གྱིས་བསྔོས་ནས། ཡེ་དྷར་གྱི་མཐར། སྡིག་པ་ཅི་ཡང་མི་བྱ་ཞིང༌། །ཞེས་སོགས་ཆོས་བཤད། ཨོཾ་བཛྲ་མུཿ ཞེས་གཤེགས་སུ་གསོལ། གཏོར་མ་དེ་ཀླུ་གནས་སར་བཏང་ངོ༌། །སློབ་མའི་བྱ་བ་ནི། སྔོན་འགྲོ་རྒྱས་པར་ནི། བཟང་སྤྱོད་ནས་འབྱུང་བའི་ཡན་ལག་བདུན་པ་དང༌། སྐྱབས་འགྲོ་སེམས་བསྐྱེད་རྒྱས་པར་ཕོག་པའི་རྗེས་སུ། འཇུག་པ་སེམས་བསྐྱེད་ཀྱི་སྡོམ་པ་མདོར་བསྡུས་སུ་ལེན་པ་རྣམས་བྱ། བསྡུ་ན། སངས་རྒྱས་ཆོས་དང་མ་དང༌། གུར་ནས་འབྱུང་བའི་རྒྱུན་བཤགས་བྱ། དངོས་གཞི་ལ། སློབ་དཔོན་བདག་ལ་དགོགས་སུ་གསོལ། །བདག་ནི་ཀླུ་དབང་རྒྱལ་པོ་ ― TNT15_Page_0124 ―
[མ་དཔེ་གཟིགས་ན་འདིར་གནོན།]
ཡི། །དམ་ཚིག་དངོས་གྲུབ་འཚལ་བ་སྟེ། །བདག་ལ་གཟུངས་སྔགས་སྩལ་དུ་གསོལ། །ཞེས་ལན་གསུམ་གསོལ་བ་བཏབ། སྐུའི་རྗེས་གནང་དང༌། གསུང་གི་རྗེས་གནང་སྤྱི་དང་འདྲ། ཐུགས་ཀྱི་རྗེས་གནང༌། སློབ་མའི་སྙིང་གའི་འོད་ཀྱིས་ཁམས་གསུམ་སྣོད་བཅུད་ལྷ་ལ་བསྡུ། ལྷ་ཡང་ཧཱུཾ་ལ། དེ་ཡང་སྟོང་པར་བསྡུའོ། །སློབ་མ་དང་མདུན་བསྐྱེད་ཀྱི་རྗེས་ཀྱི་བྱ་བ་སྤྱི་དང་འདྲའོ། །ཀུན༵་ལས་ཟབ་ཅིང་ཨ་ཏི་ཤས། །དག༵འ་བར་བསྔགས་པའི་སྒྲུབ་ཐབས་འདི། །དེང་སང་སྒྲུབ་པ་དཀོན་པའི་ཕྱིར། །གཞན་ལ་ཕན་ཕྱིར་སྙིང༵་པོ༵ར་དྲིལ། །ཀླུ་དབང་རྒྱལ་པོ་སྒྲུབ་ཐབས་ཀྱི་ལེ་ཚན་ནོ། །སྒྲུབ་ཐབས་རིན་ཆེན་འབྱུང་གནས་ལས། དེ་བཞིན་གཤེགས་པ་ཆགས་བྲལ་གྱི་རྣམ་པ་ཅན་གྱི་སྒྲུབ་ཐབས་བཤད་པའི་སྐབས་ཏེ་གསུམ་པའོ། །ཞུས་དག ། |
