རྡོ་རྗེ་ཕག་མོ་དོན་གྲུབ་མའི་སྒྲུབ་ཐབས།

[Full Size]

ཨོཾ་སྭཱ་སྟི། གང་གི་ཞལ་གྱི་བཀའ་དྲིན་གྱིས། །འཁོར་བ་མྱ་ངན་འདས་པར་མཛད། །བླ་མ་དམ་པའི་ཞབས་བཏུད་ནས། །སངས་རྒྱས་ཀུན་གྱི་གཏེར་གྱུར་པ། །དངོས་གྲུབ་ཐམས་ཅད་སྩོལ་བའི་ལྷ། །ཤེས་རབ་ཕ་རོལ་ཕྱིན་རང་བཞིན། །རྡོ་རྗེ་རྣལ་འབྱོར་མ་དཔལ་མཆོག །སྒྲུབ་པའི་ཐབས་ནི་བདག་གིས་བཤད། །དེ་ལ་འདིར་རྣལ་འབྱོར་པ་དབང་བསྐུར་བ་ཐོབ་ཅིང་དམ་ཚིག་དང་ལྡན་པས་ཡིད་དང་རྗེས་སུ་མཐུན་པའི་གནས་སུ། འདི་ཉིད་ཀྱི་གསང་བའི་རས་བྲིས་བཀྲམ་སྟེ། དེའི་སྤྱན་སྔར་རྗེ་བཙུན་རྡོ་རྗེ་རྣལ་འབྱོར་མ་དོན་ཐམས་ཅད་གྲུབ་པ་ཞེས་བྱ་བའི་སྒྲུབ་པ་བརྩམས་ཏེ། སྐྱབས་འགྲོ་སེམས་བསྐྱེད་སྤྱི་དང་མཐུན་

[Full Size]

པར་བྱས་ལ། དམ་ཚིག་གིས་བཀང་བའི་ཀ་པཱ་ལ། སུམ་བྷའམ། ཁཎྜ་རོ་ཧའི་སྔགས་ཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཡཾ་ལས་རླུང༌། རཾ་ལས་མེ། ཨ་ལས་ཐོད་པ་དཀར་པོ་དུམ་བུ་གསུམ་པའི་ནང་དུ། ཧཱུཾ་བྷཱུཾ་ཨཾ་ཛྲིཾ་ཁཾ་ལས་ཤ་ལྔ། པཾ་བཾ་ལཾ་མཾ་ཏཾ་ལས་བདུད་རྩི་ལྔ། དེ་རྣམས་འོད་དུ་ཞུ། བདུད་རྩིའི་རྒྱ་མཚོ་ཆེན་པོར་གྱུར་པའི་དབུས་སུ། ཆོས་འབྱུང་གི་ལྟེ་བར་ཧྲཱིཿཟུར་གསུམ་ལ་གཡོན་བསྐོར་གྱི། ཨོཾ་ཧཱུཾ་ཧ། དེའི་འོད་ཀྱིས་སྣོད་བཅུད་ཐམས་ཅད་དང་ཁྱད་པར་རྒྱལ་བ་སྲས་བཅས་ཐམས་ཅད་ཀྱི་སྐུ་གསུང་ཐུགས་ཀྱི་བདུད་རྩི་བྱང་ཆུབ་སེམས་སུ་སྤྱན་དྲངས་ནས་ཐིམ། ཨོཾ་ཨཱཿཧཱུཾ་ཧ་ཧོ་ཧྲཱིཿ བདུད་རྩི་བདག་དང་གནས་ལ་གཏོར་ཏེ། ཨོཾ་ཧྲཱིཿགྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྟཾ་ཧཱུཾ་ཕཊ་སྭཱཧཱ། ཁྲོ་མོ་རྣམས་ཀྱིས་བགེགས་རྣམས་ཚར་བཅད། བསྲུང་བའི་འཁོར་ལོར་གྲུབ་པར་གྱུར། རང་གི་གནས་རྣམས་སུ། ཨོཾ་བཾ་སོགས་གོ་ཆ་དྲུག་དགོད། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། ཨོཾ་བཛྲ་ཤུདྡྷ་སརྦ་དྷརྨ་བཛྲ་ཤུདྡྷོ྅ཧཾ། ཨོཾ་ཡོ་ག་ཤུདྡྷ་སརྦ་དྷརྨ་ཡོ་ག་ཤུདྡྷོ྅ཧཾ། སྟོང་པའི་ངང་ལས་ཆོས་འབྱུང་གི་དབུས་སུ། པདྨ་དམར་པོ་འདབ་མ་བཞི་པའི་ལྟེ་བར་འོད་སྟོང་བདག་པོའི་དཀྱིལ་འཁོར་ལ་གནས་པའི་དབུགས་བྲལ་གྱི་སྙིང་གར་རང་སེམས་ཧྲཱིཿཡིག་དམར་པོ་བསྐལ་པའི་མེ་ལྟར་སྣང་བ། དེ་ཡོངས་སུ་གྱུར་པ་ལས་བདག་ཉིད་རྡོ་རྗེ་ཕག་མོ་ལི་ཁྲིའི་མདངས་ལྟར་དམར་བའི་མདོག་ཅན་པདྨ་དང་ཉི་མ་ཡི་དྭགས་ཀྱི་གདན་ལ་གཡས་

[Full Size]

བརྐྱང་བའི་གྱད་ཀྱི་དོར་སྟབས་ཀྱིས་ས་གསུམ་གནོན་པ། ཞལ་གཅིག་པ་སྤྱན་གསུམ་པ་ཁྲོ་གཉེར་བསྡུས་པ། དྲག་མོ་ཆེན་མོ། འཇིགས་སུ་རུང་བའི་ཞལ་ཕག་གི་གདོང་ཅན་ཤིན་ཏུ་ཁྲོས་པ་རྡོ་རྗེའི་མེ་འོད་འབར་ཞིང་ལྗགས་བསྐྱོད་པ། དབུ་སྐྲ་ཁམ་པ་གྱེན་དུ་འཁྱིལ་བ། བ་སྤུ་དང༌། གསང་བའི་སྤུ་གྱེན་དུ་འཕྲེང་བ། ཐུང་ཞིང་གསུས་པ་འཕྱང་བ། ཐོད་སྐམ་ལྔས་དཔྲལ་བར་བརྒྱན་པ། ཁྲག་འཛག་མགོ་བོའི་འཕྲེང་བས་སྐུ་ལ་བརྒྱན་པ། ཕྱག་རྒྱ་ལྔས་མཛེས་པ། གཅེར་བུ་ཕྱག་བཞི་པ། གཡས་ན་རྡོ་རྗེ་དང་རྡོ་རྗེ་ལྕགས་ཀྱུ། གཡོན་ན་ཐོད་ཁྲག་དང་སྡིགས་མཛུབ་དང་བཅས་པའི་ཞགས་པ་འཛིན་པ། མཆན་ཁུང་དུ་ཁ་ཊྭཱཾ་ག གདུག་པ་ཅན་ཐམས་ཅད་ཀྱིས་བཟོད་པར་དཀའ་བའི་གད་མོ་རྒོད་པ། མེ་དཔུང་འབར་བའི་དབུས་ན་བཞུགས་པ། འབར་བའི་ཕྱག་རྒྱ་དང་བཅས། ཕཻཾ་ཞེས་ཡེ་ཤེས་པ་སྤྱན་དྲངས། ཛཿཧཱུཾ་བཾ་ཧོཿ ཨོཾ་ཡོ་ག་ཤུདྡྷ་སོགས། ལྟེ་བ་ཨོཾ་བཾ་དམར་མོ་རྡོ་རྗེ་ཕག་མོ་སོགས་གོ་ཆ་བཀོད། ལྟེ་བའི་ཧྲཱིཿལས་འོད་ཟེར་འཕྲོས། དབང་གི་ལྷ་ཧེ་རུ་ཀ་ཡབ་ཡུམ་འཁོར་བཅས་སྤྱན་དྲངས། ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུཾ། ཞེས་དབང་བསྐུར་བ་ལས་རིགས་ལྔའི་ངོ་བོ་སྣ་ཚོགས་རྡོ་རྗེས་དབུ་བརྒྱན། ཨརྒྷཾ་སོགས་ཀྱི་མཆོད་པ་རྣལ་འབྱོར་མ་སྤྱི་དང་མཐུན་པར་བྱས་ལ། འབྲུ་གསུམ་གྱིས་བདུད་རྩི་མྱངས། སྟོང་ཉིད་སྙིང་རྗེ་དབྱེར་མེད་པ། ཁམས་གསུམ་པ་ཡི་ངོ་བོ་ཉིད། །བསྐལ་པའི་མེ་

[Full Size]

བཞིན་གཟི་བརྗིད་འབར། །རྡོ་རྗེ་ཕག་མོ་ལ་འདུད་དོ། །ཞེས་བསྟོད། གསང་བར་རྒྱལ་བའི་ཕོ་བྲང་དམར་པོ་ཟུར་གསུམ་པའི་ནང་དུ། ཨོཾ་ཧྲཱིཿཧཱུཾ་ཧ། སྔགས་ཀྱི་འཕྲེང་བ་སྤྲོ་བསྡུ་དང་བཅས་པར་ཡིད་གཏད་ནས། ཨོཾ་བཛྲ་ཝཱ་རཱ་ཧཱི་ཨ་བེ་ཤ་ཡ་སརྦ་དུཥྟཾ་ཧྲཱིཿསྭཱཧཱ། ཞེས་བཟླས་པར་བྱའོ། །ཐུན་བསྡུ་བ་ནི་སྤྱི་དང་འདྲའོ། །གཏོར་མ་འབུལ་བར་འདོད་ན། ནང་མཆོད་ལྟར་བྱིན་གྱིས་བརླབས་ཤིང༌། ཕཻཾ་ཞེས་སྤྱན་དྲངས། ཨོཾ་ཧྲཱིཿཧཾ་ཧཾ་ཧེ་ཧེ་ཧ་ཧ་ཧི་ཧི། ཕཻཾ་ཕཻཾ་ཕཻཾ། ཞེས་ལན་བདུན་གྱིས་ཕུལ་ནས། མཆོད་བསྟོད་སོགས་སྤྱི་དང་མཐུན་པ་ལས། ཤ་ཆེན་གྱི་བདུག་པ་འབུལ་བའི་སྔགས་ནི། ཨོཾ་ཨཱཿཧྲི་ཧཱུཾ་ཧ་ཧ། ཞེས་ལན་ཉི་ཤུ་རྩ་གཅིག་གིས་འབུལ་ལོ། །དོན་ཀུན་གྲུབ་པའི་སྒྲུབ་ཐབས་ནི། །འབད་པས་སྦྱར་ལ་ལྷ་མོ་ཡིས། །རྗེས་སུ་བརྩེ་བས་ཉེར་བཟུང་ནས། །ཧེ་རུ་ཀ་ཉིད་འགྲུབ་པར་མཛོད། །འདིའི་བྱིན་རླབས་ཀྱི་ཆོ་ག་ནི། ཕག་མོ་ཞལ་གཉིས་མ་དཔྱལ་ལུགས་ཀྱི་ཆོ་ག་ཉིད་འདོན་པ་སྤོས་པས་ཆོག་གོ །ལས་རྣམས་ཀུན༵་ལ་མཐུ་ལྡན་པ། །རབ་དག༵འི་སྒྲུབ་ཐབས་ཡིད་ཆེས་ཅན། །གྲགས་པ་ཆེ་ཡང་དེང་དུས་ནི། །ནུབ་ལ་ཉེ་བས་སྙིང༵་པོ༵ར་དྲིལ། །རྡོ་རྗེ་ཕག་མོ་དོན་གྲུབ་མའི་སྒྲུབ་ཐབས་ཀྱི་ལེ་ཚན་ནོ།། །།དགེ་ལེགས་འཕེལ། །