སྤྱན་རས་གཟིགས་ཡིད་བཞིན་ནོར་བུ་ལྷ་ལྔའི་སྒྲུབ་ཐབས།

[Full Size]

འཕགས་པ་སྤྱན་རས་གཟིགས་དབང་ནི། །ཡིད་བཞིན་ནོར་བུ་ལྷ་ལྔ་ཡི། །ཚོགས་བཅས་གུས་པས་བཏུད་བཅས་ཏེ། །ཨ་ཏི་ཤ་ཡི་གཞུང་བཞིན་བྲི། །སྐྱབས་སེམས་སྔོན་དུ་འགྲོ་བས། སྤྲོ་ན་གཞུང་ནས་འབྱུང་བ་ལྟར། ཚོགས་ཞིང་སྤྱན་དྲངས་ཏེ། བདུན་རྣམ་དག་བྱ། ཤཱུ་ནྱ་ཏས་སྟོངས་པར་སྦྱངས། ཡཾ་རཾ་བཾ་ལཾ། སུཾ་ལས་འབྱུང་བཞི་རི་རབ་དང་བཅས་པའི་རྩེ་མོར་པཾ་ལས་པདྨ་འདབ་བརྒྱད་ཀྱི་ལྟེ་བར་ཨ་ལས་ཟླ་བ་དེར་ཧྲཱིཿཡིག་འོད་ཀྱི་འཕྲོ་འདུ་ལས། འཕགས་པ་སྤྱན་རས་གཟིགས་སྐུ་མདོག་དམར་པོ། ཕྱག་དང་པོ་གཉིས་པདྨ་དམར་པོའི་སྡོང་བུ་འཛིན་ཞིང་ཁ་འབྱེད་པ། གཉིས་པ་གཉིས་ཀྱིས་བགྲང་འཕྲེང་དང༌། གྷུནྡྷེ་འཛིན་པ། རྡོ་རྗེ་སྐྱིལ་ཀྲུང་གིས་བཞུགས་པ། རི་དྭགས་ཀྱི་པགས་པ་དང༌། རྒྱན་ཐམས་ཅད་ཀྱིས་བརྒྱན་པ། འོད་དཔག་མེད་ཀྱིས་དབུ་བརྒྱན། ཐུགས་ཀར་ཟླ་བ་ལ་རྡོ་རྗེའི་ལྟེ་བར་པདྨ་ཧྲཱིཿས་མཚན་པ། དེ་ལས་ལྷ་མོ་བཞི་སྤྲོས་ཏེ་ཕྱོགས་ཀྱི་འདབ་མར་འཁོད་པ་ནི། ཤར་དུ་ཧ་ལས་རྡོ་རྗེ་ཞགས་པ་མ་ཞགས་པ་དང་ནོར་བུ་འཛིན་པ། ལྷོ་རུ་ཏྲཾ་ལས་རྡོ་རྗེ་རིན་ཆེན་མ་ནོར་བུ་དང་དྲིལ་བུ་འཛིན་པ། ནུབ་ཏུ་ཧྲཱིཿལས་རལ་གཅིག་མ་པདྨ་དང་བགྲང་འཕྲེང་འཛིན་པ། བྱང་དུ་ཊ་ལས་ཁྲོ་གཉེར་མ་སྣ་ཚོགས་རྡོ་རྗེ་དང་། གྷུནྡྷེ་བསྣམས་པ། སྐུ་མདོག་ཆ་ལུགས་གཙོ་བོ་དང་མཚུངས་པའོ། །ཡེ་ཤེས་དགུག་གཞུག་སྤྱི་དང་འདྲ། དབང་བསྐུར་ཡང་སྤྱི་དང་འདྲ་བ་ལས། ཡུམ་བཞིའི་དབང་བསྐུར། རིགས་བདག་རྒྱས་གདབ་མི་དགོས།

[Full Size]

གནས་གསུམ་བྱིན་རླབས་དྲན་པར་བྱས་ནས་བཟླས་པ་བྱ་སྟེ། སྙིང་གར་འཁོར་ལོ་རྩིབས་དྲུག་པའི་ལྟེ་བ་དང་རྩིབས་ལ་ཉེ་སྙིང་བཀོད། མུ་ཁྱུད་ལ་རྩ་བའི་སྔགས་བསྒོམ་སྟེ། ན་མོ་རཏྣ་ཏྲ་ཡཱ་ཡ། ན་མོ་ཨཱཪྱ་ཨ་བ་ལོ་ཀེ་ཏེ་ཤྭ་རཱ་ཡ། བོ་དྷི་སཏྭ་ཡ། མ་ཧཱ་ས་ཏྭཱ་ཡ། མཧཱ་ཀ་རུ་ཎི་ཀ་ཡ། ཏདྱ་ཐཱ། ཨོཾ་ཙཀྲ་ཝརྟི་ཙིནྟ་མ་ཎི་མཧཱ་པདྨ་རུ་རུ་ཏིཥྛ་ཛྭ་ལ། ཨ་ཀརྵ་ཡ་ཧཱུཾ་ཕཊ་སྭཱཧཱ། ཞེས་རྩ་སྔགས་དང༌། ཨོཾ་བྷ་ར་ཏ་པདྨེ་ཧཱུཾ། ཞེས་ཉེ་སྙིང་གང་ནུས་བཟླས་ལ། སྙིང་པོ་བཟླ་བ་ལ་མོས་ན། ཨོཾ་པདྨ་ཙིནྟ་མ་ཎི་ཛྭ་ལ་ཧཱུཾ། ཞེས་བཟླའོ། །འདིའི་རྗེས་གནང་གི་ཆོ་ག་ནི། སྒྲུབ་ཐབས་བརྒྱ་རྩ་ཇི་ལྟ་བ་བཞིན་ཡིན་ལ། སྔོན་སྒྲུབ་ཐབས་བརྒྱ་རྩའི་ནང་ན་བཞུགས་པ། བར་སྐབས་སུ་ལོགས་སུ་གར་བ་ཡིན་གསུང༌། ས་སྟེང་ཀུན༵་ཏུ་རྙེད་དཀའ་བ། །རབ་དག༵འ་འཕགས་པའི་སྒྲུབ་ཐབས་འདི། །སྙིང༵་ནས་གུས་པ་ཆེན་པོ༵་ཡིས། །བསྒྲུབས་ན་འཕྲལ་དུ་དོན་ཆེན་འགྲུབ། །སྤྱན་རས་གཟིགས་ཡིད་བཞིན་ནོར་བུ་ལྷ་ལྔའི་སྒྲུབ་ཐབས་ཀྱི་ལེ་ཚན་ནོ།། །།