སྒྲ་དབྱངས་ལྷ་མོའི་མངོན་རྟོགས་ཤིན་ཏུ་མདོར་བསྡུས་པ།― TNT15_Page_0476 ―
[མ་དཔེ་གཟིགས་ན་འདིར་གནོན།]
ན་མོ་གུ་རུ། བླ་མ་དང་ནི་ལྷ་མོ་ལ། །བཏུད་ནས་སྒྲ་དབྱངས་ལྷ་མོ་ཡི། །མངོན་རྟོགས་ཤིན་ཏུ་མདོར་བསྡུས་པ། །མདོ་ཙམ་རྣམ་པར་བཀོད་པར་བྱ། །དབྱངས་ཅན་མ་དམར་མོ་བསྒོམ་པར་འདོད་པས། རང་གི་མདུན་དུ་བའི་ལྕི་བའི་མཎྜལ་བྱ། རྫ་བུམ་གཙང་མར་གཞོན་ནུ་མའི་ཆུ་བླུག །བུམ་རྫས་བཟང་བ་སིནྡྷུ་ར་དང་ཡོངས་གྲགས་རྣམས་མེ་ལོང་དུ་བསྲེས་ཏེ་གཞུགདར་ལེབ་རྒན་གྱིས་བཀབ་བོ། །སྐྱབས་སེམས་སྔོན་དུ་འགྲོ་བས་ཧྲཱིཿལས་རང་ཉིད་དབྱངས་ཅན་མ་དམར་མོ། ཕྱག་གཡས་ན་ནོར་བུ། གཡོན་མེ་ལོང་བསྣམས་པ། དར་དང་རིན་པོ་ཆེའི་བརྒྱན་པ། ཞབས་གཡས་བརྐྱང་བའི་བཞུགས་པའི་ཐུགས་ཀར་ཧྲཱིཿསྔགས་ཀྱིས་བསྐོར་བ། ཨོཾ་སྭ་ར་སྭ་སྟྱཻ་ཧྲིཾ་ཧྲིཾ་ཧྲིཾ་སྭཱཧཱ། ཐུན་འཇོག་ཁར་བདག་བསྐྱེད་ཀྱི་ལྷ་མོ་བུམ་པའི་ནང་དུ་བཞུགས་པར་བསམ། ཨརྒྷཾ་ནས་ཤཔྟའི་བར་གྱིས་མཆོད། དངོས་གྲུབ་ཐམས་ཅད་སྩལ་དུ་གསོལ། བྱས་པས་གཞན་ཐམས་ཅད་ཀྱི་བློ་གྲོས་ཕྲོགས་ནས་རང་ལ་ཐིམ་པར་བསམ། དཀར་གཏོར་བསངས་སྦྱངས། རིན་པོ་ཆེའི་སྣོད་དུ་འབྲུ་གསུམ་ལས་བདུད་རྩིར་གྱུར་པར་བསམ། སྔགས་སྙིང་པོའི་མཐར་ཨི་དཾ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི་སྭཱཧཱ། ཞེས་ལན་བདུན་གྱིས་ཕུལ། འདི་བློ་གྲོས་བསྐྱེད་པ་ལ་ཆེས་མྱུར། བསྙེན་ ― TNT15_Page_0477 ―
[མ་དཔེ་གཟིགས་ན་འདིར་གནོན།]
སྒྲུབ་ཐོན་ནས་བུམ་ཆུ་འཐུང་ངོ༌། །མངོན་རྟོགས་རྒྱས་པ་བསྒོམ་པར་འདོད་ན། ཡི་གེ་རྙིང་པ་འགའ་ཞིག་ཏུ་ཤེས་པར་བྱའོ། །འདིའི་རྗེས་གནང་བྱེད་ན། གཙང་སྦྲ་ཤིན་ཏུ་ཆེ་བའི་ངང་ནས། མཎྜལ་པད་མ་འདབ་མ་བརྒྱད་ཀྱི་སྟེང་དུ་བུམ་པ་བཅའ། སྔོན་འགྲོ་གཏོར་མ་བགེགས་གཏོར་གྱི་ཚུལ་དང༌། གཞི་བདག་གཏོར་མའང་སྤྱི་དང་མཐུན་པར་བཏང༌། མཆོད་པ་བྱིན་གྱིས་བརླབས། བདག་བསྐྱེད་སྔར་བཞིན་བསྒོམ་ནས། མདུན་བསྐྱེད་བུམ་པ་བསྐྱེད་ཆོག་སྤྱི་དང་མཐུན། བུམ་པའི་ནང་དུ་བདག་བསྐྱེད་བཞིན་ལྷ་མོ་བསྐྱེད་ལ་བཟླས་པ་བྱ། ཨརྒྷཾ་ལ་སོགས་པས་མཆོད། བསྟོད་པས་བསྟོད། དེ་ནས་སློབ་མའི་བྱ་བ་ནི། མཎྜལ་ཕུལ་ལ། བཟང་སྤྱོད་ཀྱི་ཡན་ལག་བདུན་པ་དང༌། སྐྱབས་སེམས་རྒྱས་བསྡུས་ལོང་སྐབས་དང་སྦྱར། སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ཁྱོད་ཀྱིས་ལྷ་མོ་ཡི། །སྐུ་གསུང་ཐུགས་ཀྱི་དངོས་གྲུབ་དང༌། །བྱིན་གྱིས་བརླབ་པ་སྩལ་དུ་གསོལ། །ཞེས་ལན་གསུམ་གསོལ་བ་བཏབ། སློབ་མ་དམ་ཚིག་པ་འཇམ་དབྱངས་དམར་སེར་དུ་སྐད་ཅིག་གིས་བསྐྱེད་པ་ལ། ཡེ་ཤེས་པ་དབྱངས་ཅན་ལྷ་མོར་བསྟིམ། བུམ་པའི་ཆུས་དབང་བསྐུར། སྙིང་པོའི་མཐར་ཇི་ལྟར་བལྟམས་པ་སོགས་བརྗོད། ལྷ་མོའི་སྐུ་ལས་བདུད་རྩིའི་རྒྱུན་བྱུང་སྟེ་སྤྱི་བོར་ཐིམ། གསུང་བཟླས་ལུང་སྤྱི་དང་འདྲ། ཐུགས་རྗེས་གཞིག་གི་རིམ་པས་སྟོང་པ་ཉིད་དུ་བསྡུ་བ་མཛད། ལྷག་མ་སྤྱི་དང་འདྲའོ། །དབྱངས་ཅན་སྒྲུབ་ཐབས་མ་ལུས་པ། ཀུན༵་ལས་བབ་ཅིང་དག༵འ་བའི་ཏོག །སྙིང༵་པོ༵་མདོར་བསྡུས་ཡི་གེ་བཀོད། །དགེ་དེས་བློ་གྲོས་མཚུངས་མེད་ཤོག །དབྱངས་ཅན་མ་དམར་མོ་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། སྒྲུབ་ཐབས་རིན་ཆེན་འབྱུང་གནས་ལས། ཤེས་རབ་ཀྱི་ལྷའི་སྒྲུབ་ཐབས་བཤད་པའི་སྐབས་ཏེ་བཅུ་གཉིས་པའོ། །ཞུས་དག ། |
