གདུག་པ་འདུལ་མཛད་བྱ་ཁྱུང་གི་སྒྲུབ་ཐབས།

[Full Size]

ཨོཾ་སྭཱ་སྟི། ཡེ་ཤེས་ལྔ་ལྡན་དུས་འཁོར་ནི། །གདུག་པ་འདུལ་མཛད་བྱ་ཁྱུང་ཚུལ། །དེ་ལ་བཏུད་ནས་སྒྲུབ་ཐབས་ནི། །རྒྱུད་དོན་བཞིན་ཏུ་གསལ་བར་བྲི། །སྐྱབས་སེམས་སྔོན་དུ་འགྲོ་བས། ཤཱུ་ནྱ་ཏཱའི་སྔགས་ཀྱིས་སྟོང་པར་སྦྱངས། རང་གི་སྙིང་གར་པདྨ་ཟླ་བ་ཉི་མ་བརྩེགས་པའི་གདན་ལ་ཀྵིཾ་ཁ་དོག་ལྔ་ལྡན་དུ་ཞུ་བ་ལས། རང་ཉིད་འདབ་ཆགས་ཀྱི་མགོན་པོ་ཞལ་གཅིག་ཕྱག་གཉིས་པ། རྐང་མཐིལ་ནས་དཔྱིའི་བར་སེར་པོ། དེ་ནས་ལྟེ་བའི་བར་དཀར་བ། དེ་ནས་མགྲིན་པའི་བར་དམར་བ། དེ་ནས་སྨིན་

[Full Size]

མའི་བར་ནག་པ། དེ་ཡན་ཆད་ལྗང་ཁུ་སྤྱན་གསུམ་དང་ལྡན་པ། རྒྱལ་བ་ལྗང་ཁུ་དང་རྣམ་རྒྱལ་སྔོན་པོས་དབུ་སྐྲ་བཅིངས་པ། སྟོབས་རྒྱུ་དང་པདྨ་ནག་པོས་སྙན་ཆ། ནོར་རྒྱས་དང་དུང་སྐྱོང་དམར་པོས་ཕྱག་གདུབ། འཇོག་པོ་དང་པད་ཆེན་སེར་པོས་ཞབས་གདུབ། མཐའ་ཡས་དང་རིགས་ལྡན་དཀར་པོས་འོག་པག་དང་མགུལ་རྒྱན་བྱས་པ། གཤོག་པ་ཁ་དོག་སྣ་ཚོགས་པ་འོད་ཟེར་སྣ་ཚོགས་འཕྲོ་བ། རིགས་ལྔས་དབུ་བརྒྱན་པ། ཀླུ་རྒྱལ་གདུག་པ་ཅན་སྦྲུལ་གྱི་རྣམ་པ་སྐེད་པ་ནས་ཕྱག་གཉིས་ཀྱིས་བཟུང་ཞིང་མགོ་བོ་ཞལ་དུ་གསོལ་བ། མཇུག་མ་ཞབས་འོག་ཏུ་མནན་པའོ། །ལྟེ་བར་སའི་དཀྱིལ་འཁོར་ལ་ལཾ། སྙིང་གར་ཆུ་ལ་ཨུ། མགྲིན་པར་མེ་ལ་རཾ། དཔྲལ་བར་རླུང་ལ་ཨི། གཙུག་གཏོར་དུ་ནམ་མཁའ་ལ་ཨ། ཐུགས་ཀར་ཉི་མ་ལ་ཀྵིཾ། དེ་ལ་སྔགས་ཀྱིས་བསྐོར་བ་ལ་དམིགས་ཏེ། ཨོཾ་པཀྵིཾ་སྭཱཧཱ། ཞེས་ཅི་འགྲུབ་ཏུ་བཟླ། འཇུག་ཏུ་དགེ་བ་བསྔོ། དེ་ལྟར་བྱེ་བ་བཟླས་ན། ཇི་སྐད་བཤད་པའི་ལས་ཐམས་ཅད་འགྲུབ་བོ། །འདིའི་རྗེས་གནང་བྱ་བར་འདོད་ན། མཎྜལ་པདྨ་འདབ་མ་བརྒྱད་པའམ། ཡང་ན་མཎྜལ་ལ་འབྲུའི་ཚོམ་བུ་བཀོད། མཆོད་པ་བཅུ་གཉིས་ཀྱི་རྣམ་པ་བཤམ། བདག་བསྐྱེད་སྔོན་དུ་འགྲོ་བའི་སྒོ་ནས་མཆོད་པ་བྱིན་རླབས་དུས་འཁོར་ཁྲོས་པ་རྡོ་རྗེ་ཤུགས་དང་འདྲ། མདུན་བསྐྱེད་ཨོཾ་ཨཱཿཧཱུཾ་ཧྲ་ཕཊ་ཀྱིས་བསངས། སྭ་བྷཱ་ཝས་

[Full Size]

སྦྱངས། སྟོང་པའི་ངང་ལས་ཞེས་པ་ནས། ཉི་མ་ལ་ཀྵིཾ་གི་བར་གོང་བཞིན། དེ་ནས་སོ་སོའི་ཕྱག་རྒྱ་དང་བསྟུན་ཏེ། ཨོཾ་པཀྵིཾ་བཛྲ་གནྡྷཾ་པྲ་ཏཱིཙྪ་ན་མཿཞེས་པ་ལ་སོགས་པ། པཀྵིཾ་ཞེས་པ་མགོ་བོར་སྦྱར་ནས། ཨོཾ་པཀྵིཾ་ཀཱ་མཾ་པྲ་ཏིཙྪ་ན་མཿའི་བར་དུ་མཆོད་པ་བཅུ་གཉིས་རྡོ་རྗེ་ཤུགས་དང་འདྲ། འདི་ལ་གཏོར་ཆོག་མི་དགོས་ཤིང༌། གལ་ཏེ་བྱེད་པར་སྤྲོ་ན་རྡོ་རྗེ་ཤུགས་ཀྱི་སྐབས་བཞིན་པས། བཛྲ་བྷེ་ར་ཝ་བྷིསྐ་ར་ཞེས་པའི་ཚབ་ཏུ། པཀྵིཾ་ཏྲ་ཞེས་བརྗོད། སློབ་མའི་བྱ་བ་ཡང་དུས་འཁོར་ལྷན་སྐྱེས་ཀྱི་སྐབས་འདོན་པ་སྤོས་པས་རུང་ངོ༌། །རྒྱུད་འགྲེལ་གྱི་དངོས་བསྟན་འདི་ལྟར་ན་ནམ་མཁའ་ལྡིང་ལ་རྭ་མི་དགོས་ཤིང༌། ཞལ་རས་ལྷ་ཞལ་ལ་བྱའི་མཆུ་ཡོད་པར་བྱ། མཁའ་ལྡིང་གི་མངོན་རྟོགས་ཐམས་ཅད་ན་མཇུག་མའི་གསལ་ཁ་མེད་ཀྱང་འཇུག་སྒྲོ་དགོས་ཤིང༌། པུས་མོ་མན་ཆད་བྱའི་རྐང་པའི་རྣམ་པ། ཕྱག་ཞབས་ཐམས་ཅད་ལ་སེན་མོ་ལྕགས་ཀྱུ་ལྟར་རྣོ་བ། དབུ་སྐྲ་ནག་པོ་ཐོར་ཚུགས་སམ། སེར་པོ་གྱེན་བརྫེས་གང་རུང་དང༌། ཞལ་བཞི་ན་ཞི་ཁྲོ་སྐབས་དང་སྦྱར། རིགས་ལྔའི་དབུ་རྒྱན་གྱི་སྟེང་དུ་རིན་པོ་ཆེའི་དབུ་རྒྱན་ཡང་བྱའོ། །དེ་ལྟར་བྱས་ན་རྒྱ་གར་ཡུལ་གྱི་མཁའ་ལྡིང་གི་བཀོད་པ་དང་ཡང་མཐུན་ཞིང༌། རྒྱུད་འགྲེལ་གྱི་དགོངས་པ་ཡང་དེ་ལས་མི་འདའོ། །བྱ་ཁྱུང་རྭ་ཅན་ནི། བལ་པོ་དང་ལི་དང་རྒྱ་ནག་སོགས་ཡུལ་གཞན་གྱི་བཀོད་

[Full Size]

པ་ལས་འབྱུང་ཞིང་དེ་ནས་དེ་དག་ལས་འབྱུང་བའི་སྒྲུབ་ཐབས་དང༌། བོད་རྙིང་མ་དང༌། རྒྱ་གར་ལ་ཁ་འཕངས་པའི་བོད་མ་སོགས་ལ་དེ་ཉིད་ཀྱི་རང་ལུགས་ཡིན་པས་བྱ་ཡི། རྒྱ་གར་གྱི་ཡིན་ངེས་རྣམས་ལ་དེའི་རིགས་འགྲེ་མི་སྦྱོར་ཞིང༌། བྲིས་རྒྱུད་ནོར་བ་རྒྱ་འབྱམས་པ་ལའང་སྙིང་པོ་མེད་དོ། ཁྱུང་སྒྲུབ་ཀུན༵་ལ་ཡོད་མོད་ཀྱི། །རྒྱ་གར་ཡུལ་དང་མཐུན་ན་དག༵འ། །རྙིང་མའི་སྙིང༵་པོ༵་གསར་མ་ལ། །སྦྱོར་བ་འདི་ཡང་གད་མོའི་གནས། །ཡེ་ཤེས་ཁྱུང་ཁྲ་རྒྱུད་ལུགས་ཀྱི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །