ལྷ་མོ་དཔལ་ཆེན་མོའི་སྒྲུབ་ཐབས།

[Full Size]

ཨོཾ་སྭཱ་སྟི། རྒྱལ་བ་སྟོན་པ་ལ་བཏུད་ནས། །རྣམ་ཐོས་སྲས་ཀྱི་བཙུན་མོར་གྲགས། །ལྷ་མོ་དཔལ་གྱི་སྒྲུབ་ཐབས་ནི། །ཤིན་ཏུ་རྙེད་པར་དཀའ་ཕྱིར་བཤད། །གཙང་སྦྲ་ཅན་གྱི་མཆོད་གཏོར་རྒྱ་ཆེར་བཤམ། བསངས་སྦྱངས། སྟོང་པའི་ངང་ལས། གཏེར་གྱི་བུམ་པ་དགུའི་སྟེང་དུ་པད་ཟླ་ལ་སེང་གེའི་གདན། དེའི་སྟེང་ཏུ་ཤྲིཾ་ཡིག་ཡོངས་སུ་གྱུར་པ་ལས། ལྷ་མོ་དཔལ་ཆེན་མོ་ལྗང་ཁུ། སྒེག་ཅིང་བཞད་ལ་སྤྱན་གདངས་པ། དར་དང་རིན་པོ་ཆེས་བརྒྱན་པ། ཕྱག་གཡས་ནོར་བུས་མཚན་པའི་པདྨ་དང༌། གཡོན་སྐྱབས་སྦྱིན་མཛད་པ། འཁོར་གནོད་སྦྱིན་མ་མོའི་ཚོགས་ཀྱིས་ཡོངས་སུ་བསྐོར་བའོ། །གནས་གསུམ་བྱིན་བརླབས། ཡེ་ཤེས་སྤྱན་འདྲེན། དབང་བསྐུར་རྒྱས་བཏབ་རྣམས་སྤྱི་དང་མཐུན་པ་ལས། རིགས་བདག་ནི་གཤིན་རྗེ་གཤེད་དོ། །ཨརྒྷཾ་ལ་སོགས་པས་མཆོད། ཤེས་རབ་ཕ་རོལ་ཕྱིན་པ་མོ། །ནམ་མཁའ་མཛོད་ཀྱི་ཏིང་འཛིན་ལས། །སྒྲུབ་ལ་དངོས་གྲུབ་སྩོལ་བའི་ཚུལ། །དཔལ་གྱི་ལྷ་མོ་དེ་ལ་བསྟོད། །ཨོཾ་ཀ་མ་ལ་ཝ་སི་ནི། ཀ་མ་ལེ། མཧཱ་ལཀྵི་མ་ར་ཛྱ་མེ། དེ་ཧི་དེ་ཧི་བ་ར་དེ་སྭཱཧཱ། ཞེས་ཅི་འགྲུབ་ཏུ་བཟླས། གཏོར་མ་འབྲུ་གསུམ་གྱིས་བྱིན་གྱིས་བརླབས་ནས། ཨོཾ་ཤྲཱི་དེ་ཝཱི་ས་པ་རི་ཝཱ་ར་བྷྱཿ ལ་ཨ་ཀཱ་རོ་བཏགས་

[Full Size]

པས་འབུལ། མཆོད་བསྟོད། འདོན་དོན་གསོལ་བཏབ། ཡིག་བརྒྱ། བཟོད་གསོལ། གཤེགས་གསོལ་རྣམས་སྤྱི་དང་འདྲའོ། །འདི་ལ་བསྒོམ་ལུང་འབོགས་པ་ལས་གཞན་པའི་རྗེས་གནང་མི་དགོས། དཔའ་བོ་ཆིག་སྒྲུབ་ཀྱི་རྒྱུད་ལ་བརྟེན་པར་མངོན་ཞིང༌། ཇོ་བོའི་མན་ངག་བཀའ་གདམས་པ་རྣམས་ལས་བརྒྱུད་པའི་གདམས་པ་ངོ་མཚར་ཅན་ཡིན་ནོ། །ཀུན༵་ལ་མ་གྲགས་རྙེད་དཀའ་བ། །ཐོས་པ་ཉུང་བའི་སྐྱོན་ཡིན་ཏེ། །སྔགས་རྒྱུད་ཤེས་རྣམས་ཡིད་དག༵འི་གནས། །སྙིང༵་ནས་ཡིད་ཆེས་གསལ་པོ༵ར་བཀོད། །ལྷ་མོ་དཔལ་ཆེན་མོའི་སྒྲུབ་ཐབས་ཀྱི་ལེ་ཚན་ནོ།། །།དགེའོ། །