རྗེ་བཙུན་ནག་པོ་ཆེན་པོའི་སྒྲུབ་ཐབས།

[Full Size]

ཨོཾ་སྭཱ་སྟི། རྡོ་རྗེ་འཛིན་རྒྱལ་ཁྲོ་བོའི་སྐུ། །རྗེ་བཙུན་ནག་པོ་ཆེན་པོ་ལ། །བཏུད་ནས་དེའི་སྒྲུབ་ཐབས་ནི། །མདོ་ཙམ་བདག་གིས་བྲི་བར་བྱ། །འདིར་རྩ་བའི་མགོན་པོར་གྲགས་པ་ནག་པོ་ཆེན་པོ་ཕྱག་གཉིས་པའི་སྒྲུབ་ཐབས་རྡོ་རྗེ་གུར་གྱི་རྒྱུད་ལས་གསུངས་ཤིང༌། དེའི་མན་ངག་སློབ་དཔོན་ཀླུ་སྒྲུབ་ནས་བརྒྱུད་པའི་ཀླུའི་བྱང་ཆུབ་ཀྱིས་མཛད་པའི་སྒྲུབ་ཐབས་བཞིན་བསྒོམ་པར་འདོད་ན། མཆོད་གཏོར་དམ་རྫས་སོགས་ཚང་བར་བཤམས་ནས། སྐྱབས་འགྲོ་སེམས་བསྐྱེད་སྔོན་དུ་བཏང༌། རང་གི་སྙིང་གའི་ཧཱུཾ་ལས་འོད་ཟེར་འཕྲོས། བླ་མ་ཡི་དམ། ནག་པོ་ཆེན་པོ། སངས་རྒྱས་བྱང་ཆུབ་སེམས་དཔའི་ཚོགས་དང་བཅས་པ་བཛྲ་ས་མཱ་ཛཿ ཨརྒྷཾ་ནས། ཤཔྟའི་བར་གྱིས་མཆོད། དཀོན་མཆོག་གསུམ་ལ་བདག་སྐྱབས་མཆི་སོགས་ཡན་ལག་བདུན་པ་བྱ། བཛྲ་མུཿ ཞེས་གཤེགས་སུ་གསོལ། ཚད་མེད་བཞི་སྤྱི་དང་མཐུན་པར་བསྒོམ། ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལས་ཧཱུཾ་ཡིག་ལས་བྱུང་བའི་བསྲུང་འཁོར་གྱི་ནང་དུ། དུར་ཁྲོད་ཆེན་པོའི་ས་གཞིའི་དབུས་སུ། པདྨ་ཉི་མའི་གདན་ལ། རང་སེམས་ཧཱུཾ་ཡིག་མཐིང་ནགདེ་ལས་འོད་ཟེར་འཕྲོས། དགྲ་བགེགས་གདུག་པ་ཅན་ཐམས་ཅད་ཚར་བཅད༌། སླར་འདུས་ཏེ་ཐིམ་པ་ཡོངས་སུ་གྱུར་པ་ལས། རང་ཉིད་རྗེ་བཙུན་དཔལ་ལྡན་ནག་པོ་ཆེན་པོ་སྐུ་མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་པ། གཡས་གྲི་གུག་དང༌། གཡོན་ཐོད་པ་ཁྲག་གིས་གང་བ་ཐུགས་ཀའི་ཐད་ཀར་སྟེང་འོག་ཏུ་འཛིན་པའི་ཚུལ་གྱིས་ཡུམ་ལ་འཁྱུད་པ། མཆན་

[Full Size]

ཁུང་དུ་ཟུང་འཇུག་གི་རང་བཞིན་གྱི་ཁ་ཊྭཱཾ་ག་འཆང་བ། མཆེ་བ་རྣམ་པར་གཙིགས་ཤིང་འཇིགས་སུ་རུང་བ། ཞབས་གཉིས་མཉམ་པའི་སྟབས་ཀྱིས་མི་རོའི་གདན་ལ་གནས་པ། ཞལ་གྱི་གྲྭ་ནས་དམར་ཆེན་གྱི་ཆུ་ཀླུང་འཁྲུགས་པ། སྨ་ར་དང༌། སྨིན་མ་དང༌། དབུ་སྐྲ་དམར་སེར་མེ་ལྟར་འབར་བ། མི་བསྐྱོད་པས་དབུ་བརྒྱན་ཅན། སྟག་ལྤགས་གསར་པའི་ཤམ་ཐབས་འཕྱར་བ། མི་མགོ་སྐམ་པོ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ་བྱས་པ། ཀླུ་ཆེན་པོ་བརྒྱད་དང༌། ཕྱག་རྒྱ་ལྔས་བརྒྱན་པའོ། །དེའི་པང་དུ་ཧྲིཿལས་བྱུང་བའི་ནག་མོ་ཆེན་མོ་གཅེར་བུ་རྒྱན་སྤངས་པ་གྲི་གུག་དང༌། ཐོད་པ་འཛིན་པའི་ཕྱག་དང༌། བྱིན་པ་གཉིས་ཀྱིས་ཡབ་ལ་འཁྱུད་པ། ཡབ་དང་མཚུངས་ཤིང་ཡིད་ཙམ་ཞི་བ་གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །ཤར་དུ་ཀཾ་ལས་ནག་མོ། ལྷོར་ཀཾ་ལས་གཙིགས་མ། ནུབ་ཏུ་བཾ་ལས་བ་ར་ཌཱི་མ། བྱང་དུ་བེཾ་ལས་རོ་ལངས་མ། དེ་རྣམས་ཀྱང་གཅེར་བུ་སྐུ་མདོག་ནག་མོ། གྲི་གུག་དང་ཐོད་པ་འཛིན་པ། པད་ཉིའི་རོའི་གདན་ལ་གནས་པའོ། །གཙོ་འཁོར་ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཧཱུཾ་གི་འོད་ཟེར་གྱིས་ནག་པོ་ཆེན་པོ་འཁོར་དང་བཅས་པ་སྤྱན་དྲངས། བཛྲ་ས་མཱ་ཛཿ ཛཿཧཱུཾ་བཾ་ཧོཿ གཉིས་སུ་

[Full Size]

མེད་པར་ཐིམ། དེ་འདིར་ནག་པོ་ཆེན་པོ་བདག །དངོས་གྲུབ་ཐམས་ཅད་བསྒྲུབ་པར་བྱ། །འོད་གསལ་བར་ནི་རབ་ཏུ་བཞུགས། །བདག་ནི་རྣམ་ཀུན་ཡོངས་སུ་བསྐང༌། །ཞེས་བརྗོད། དེ་ནས་ཐལ་མོ་ཁོང་སྟོང་དུ་སྦྱར་བ་དམ་ཚིག་གི་ཕྱག་རྒྱ་བསྟན་ཏེ། ཨོཾ་ཤྲཱི་མཧཱ་ཀཱ་ལ་ཡ། ས་མ་ཡ། མ་ཏི་ཀྲ་མ་ཡ། ས་མ་ཡ་རཀྵནྟུ། ཞེས་པ་དང༌། སྤྲོ་ན། ལྷ་མོ་ལྔ་ལའང་འདོན་པ་སྤོས་ཏེ་བརྗོད། ཨརྒྷཾ་ནས། ཤཔྟའི་བར་གྱིས་མཆོད། འགྱེལ་བའི་རོ་ལ་ཞབས་མཆོག་མཉམ་པའི་སྟབས་ཀྱིས་བཞུགས་ཞིང་སྦོམ་ཐུང་དྲག་ལ་གསུས་ཁྱིམ་ཡངས། །ཀླུ་ཆེན་བརྒྱད་ཀྱིས་རྣམ་པར་བརྒྱན་ཞིང་དབུ་སྐྲ་དམར་སེར་གྱེན་བརྫཻས་གྲི་གུག་ཐོད་པ་འཛིན། །ཕྲག་པར་ཤེས་རབ་མ་ཡིས་འཁྱུད་ཅིང་ཞལ་གཅིག་དང་ལྡན་དཔལ་ལྡན་ཆོས་སྐྱོང་རྟག་པར་དགའ་རང་བཞིན། །ཤིན་ཏུ་གནག་པའི་ཁྱད་པར་འཕགས་པ་སྐུ་ལ་སྤྱན་གསུམ་ལྡན་པ་ཁྱོད་ལ་རྟག་ཏུ་འདུད། །ཅེས་དང༌། གཞན་ཡང་འདི་ཉིད་ཀྱི་བསྟོད་པ་ཅི་ཤེས་བྱ། གང་ཞིག་བྱང་ཆུབ་ཐོབ་པའི་རྒྱུ་ཕྱིར་རང་སྐྱབས་སོང་བའི་བགེགས་རྣམས་མ་ལུས་ཆོམས། །གང་ཞིག་འཁོར་བར་ལས་ཀྱི་ཞགས་ལས་སེམས་ཅན་རྣམས་ནི་སྙིང་རྗེ་དམ་པས་སྲུངས། །དེང་འདིར་རྣལ་འབྱོར་མ་རྣམས་ཀྱིས་ནི་མཐའ་དག་འགྲོ་བའི་སྡིག་མིན་ཕུང་པོ་བཅོམ། །དཔལ་ལྡན་རྡོ་རྗེ་ནག་པོ་ཆེན་པོ་རབ་དགའི་

[Full Size]

སྙིང་གི་དགེ་བ་བདག་ལ་སྩལ་དུ་གསོལ། །ཞེས་སོགས་འདོད་དོན་གསོལ་བ་དྲག་ཏུ་བཏབ། གཏོར་མ་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། ཨ་ལས་བྱུང་བའི་ཀ་པཱ་ལའི་ནང་དུ། བྷྲཱུཾ྄་ཨཾ་ཛྲིཾ་ཁཾ་ཧཱུཾ་ལས་ཤ་ལྔ། ལཾ་མཾ་པཾ་ཏཾ་བཾ་ལས་བདུད་རྩི་ལྔ། རླུང་གཡོས། མེ་སྦར། ཤ་ལྔ་བདུད་རྩི་ལྔ་འོད་དུ་ཞུ་སྟེ། བདུད་རྩིར་གྱུར་པ་ལ། ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་སྤྱན་དྲངས་ཏེ། གཅིག་ཏུ་འདྲེས་པས་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་ཧ་ཧོ་ཧྲིཿ ཨོཾ་ཤྲཱིཾ་ཀྵིཾ་ཨི་དཾ་བཱ་ལིཾ་གྲྀཧྞ་གྲྀཧྞ་ཧཱུཾ་ཕཊ། མཧཱ་མཾ་ས། པུཥྤེ། དྷུ་པེ། དཱི་པེ། རཀྵ་ཏ་ལ་སཱ་ཏ་ལེ། ཨུཥྟ་ནཱ་གདེ་ཝ་ཡཀྵ་རཀྵ་ས། གྲྀཧྞ་པཱ་ཡ། ཨི་དཾ་བཱ་ལིཾ་ཧ་ཧ་ཧཱུཾ་ཧཱུཾ། ཁ་ཁ་ཁཱ་ཧི་ཁཱ་ཧི། ཧཱུཾ་ཛཿཕེཾ། མཧཱ་ཨཊྚ་ཊྚ་ཧ་ས། གརྫྫ་ཡ། གརྫྫ། ཏརྫྫ་ཡ། ཨོཾ་ཀྲིཥྞཱ་ཡ། ཝརྞ་ཡ། ཕེཾ་ཕེཾ། ཕཊ། ཅེས་ལན་གསུམ་གྱིས་གཏོར་མ་ཕུལ། སླར་ཡང་གོང་བཞིན་མཆོད་བསྟོད་བྱས་ནས། སྙིང་གར་པད་ཉི་ལ་ཧཱུཾ་གི་མཐར་སྙིང་པོ་དང་རྩ་སྔགས་ཀྱིས་བསྐོར་བར་བསམས་ལ། ཨོཾ་ཤྲཱི་མཧཱ་ཀཱ་ལ་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་པ་དང༌། ཤཱ་ས་ན་ཅི་འགྲུབ་བཟླས། ཨོཾ་མཧཱ་ཀཱ་ལི་ཡེ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཀཱ་ལི་ཡེ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཀ་ར་ལི་ཡེ་ཧཱུཾ་ཧཱུཾ་ཕཊ་སྭཱཧཱ། ཨོཾ་བ་

[Full Size]

ར་ཌཱི་ཡེ་ཧཱུཾ་ཧཱུཾ་ཕཊ་སྭཱཧཱ། ཨོཾ་བཻ་ཏ་ལི་ཡེ་ཧཱུཾ་ཧཱུཾ་ཕཊ་སྭཱཧཱ། ཞེས་པ་རྣམས་ཀྱང་ཅི་ནུས་བཟླའོ། །དེ་ནས་རྗེས་བསྡུ་བ་ནི། རང་གི་སྙིང་ག་ནས་འོད་ཟེར་འཕྲོས། ལྷ་མོ་ལྔ་པོ་རང་གི་སྙིང་གར་ཐིམ། རང་ཡང་རང་གི་སྙིང་གའི་ཧཱུཾ་ལ་ཐིམ། འདི་ནི་མགོན་པོ་བདག་བསྐྱེད་དུ་སྒྲུབ་པའི་ལུགས་ཡིན། ཡང་མདུན་བསྐྱེད་དུ་སྒྲུབ་ན་ཡི་དམ་གྱི་བདག་བསྐྱེད་སྔོན་དུ་སོང་ནས་ཤཱུ་ནྱ་ཏཱས་སྟོང་པར་སྦྱང་བ་ནས་བཟུང༌། བཟླས་པའི་བར་གོང་བཞིན་ལས། རང་གི་མདུན་དུ་ཧཱུཾ་ཡིག་ལས་བྱུང་བའི་ཞེས་བརྗོད་ཅིང༌། རང་སེམས་ཞེས་པ་དང༌། རང་ཉིད་ཅེས་པ་དོར་ཞིང༌། རྗེས་བསྡུ་བའི་སྐབས། ཡི་གེ་བརྒྱ་པ་དང༌། མ་འབྱོར་པ་དང་སོགས་དང༌། བཛྲ་མུཿ ཡེ་ཤེས་པ་གཤེགས། དམ་ཚིག་པ་རང་གི་སྙིང་གར་བསྡུ། སྨོན་ལམ་དང་བཀྲ་ཤིས་ཅི་ཤེས་བྱའོ། །འདིའི་རྗེས་གནང་བྱ་བར་འདོད་ན། སྟེགས་བུ་ལ་ཆོས་འབྱུང་གྲུ་གསུམ་མེ་རི་དང་བཅས་པ། ནང་མཐིང་ནག་རྡོ་རྗེའི་མུ་ཁྱུད་ཅན། དབུས་སུ་ཉི་གདན་ལ་ཚོམ་བུ་ནག་པོ་ལྔ་བཀོད། དེའི་སྟེང་དུ་མཉྫི་ལ་གཏོར་མ་གྲུ་གསུམ་གཙོ་འཁོར་ལྔ་པའི་རྣམ་པ་ཅན་ཞིག་འགོད། མདུན་དུ་རཀྟའི་མཆོད་ཡོན་དང་གཏོར་མ། གཡས་སུ་ཆུ་བཞི། གཡོན་དུ་ཉེར་སྤྱོད་ལྔ་རྣམས་འགོད། རྒྱབ་ཏུ་བྲིས་སྐུ་སོགས་སྐུ་གཟུགས་བཞུགས་སུ་གསོལ། གོང་དུ་བཤད་པ་ལྟར་གྱི་བདག་བསྐྱེད། མདུན་བསྐྱེད་ཀྱི་རིམ་པ་རྣམས་སྔོན་དུ་སོང་ནས། བཟླས་པ་ལ་འབད་པར་བྱ། གོང་ལྟར་མཆོད། བསྟོད་པ་བརྒྱད་པས་བསྟོད་དེ། དེ་ཡང༌། སངས་རྒྱས་བསྟན་པ་བསྲུང་བ་རུ། །མགོན་པོ་གྲི་གུག་ཐོད་པ་ཅན། ཁ་

[Full Size]

དོན་ནག་པོ་རོ་ལ་གནས། །ནག་པོ་ཆེ་ལ་བདག་ཕྱག་འཚལ། ཁྲོ་བོའི་བཅུའི་རང་བཞིན་གྱི། །དཔའ་བོ་སྟག་ལྤགས་ཤམ་ཐབས་ཅན། །ཉི་མ་བཅུ་གཉིས་གཟི་བརྗིད་ལྡན། །ཞལ་ནི་མཆེ་བ་ཆེར་གཙིགས་ཞིང༌། །བསྐྱོད་པའི་ལྗགས་ཀྱིས་རབ་འཇིགས་མཛད། །ཀུན་དུ་དམར་ལ་ཟླུམ་པའི་སྤྱན། །མི་ཡི་མགོ་བོའི་འཕྲེང་བ་འཆང༌། །ཀླུ་ཡི་རྒྱལ་པོས་རྣམ་པར་བརྒྱན། །ཨག་ཚོམ་དང་ལྡན་སྦོམ་ཞིང་ཐུང༌། །ལྷ་དང་ལྷ་མིན་སྐྲག་པར་མཛད། །བདུད་ཀྱི་ཤ་དང་ཁྲག་གསོལ་བ། །དད་དང་གུས་རྣམས་སྐྱོབ་མཛད་པའི། །སྤྱན་གསུམ་སྨིན་མ་ཤིན་ཏུ་འཁྱོག །མགོ་སྐྱེས་དམར་སེར་གྱེན་དུ་འགྲེང༌། །དུས་མཐའི་མེ་དཔུང་ལྟ་བུ་ཡི། །སངས་རྒྱས་བསྟན་པ་རིན་ཆེན་ལ། །སྡང་བའི་སྐྱེ་བོ་འཚམས་པར་བསྡིགས། །རབ་གུས་དབུགས་འབྱིན་སྦྱིན་མཛད་པའི། །སངས་རྒྱས་ཐེག་པའི་རྗེས་བགྲོད་རྣམས། །འཁོར་བའི་ཆུ་གཏེར་ཕ་རོལ་དུ། །སྒྲོལ་བྱེད་དེད་དཔོན་དུ་གྱུར་པ། །ནག་པོ་ཆེན་པོའི་བསྟོད་པ་བརྒྱད། །འདི་གང་སྔ་དྲོའི་དུས་བཀླགས་ན། །འདོད་པའི་དོན་གང་རབ་ཏུ་འགྲུབ། །འཇིགས་རྣམས་དེ་ཡིས་འཇོམས་པར་འགྱུར། །ཞེས་པའོ། །དེ་ནས་སློབ་མའི་བྱ་བ་ནི། རྗེས་གནང་གི་སྤྱིའི་བྱ་བ་ལེགས་པར་ཤེས་པའི་ངོར་མདོ་ཙམ་བརྗོད་པར་བྱ་སྟེ། སློབ་མ་རྣམས་ཁྲུས་

[Full Size]

བྱས། མཎྜལ་འབུལ་དུ་གཞུགགུར་ནས་འབྱུང་བའི་རྒྱུན་བཤགས་བྱ། ཀུན་མཁྱེན་ཡེ་ཤེས་ཕུང་པོ་ཅན། །སོགས་ཀྱིས་གསོལ་བ་བཏབ། སློབ་དཔོན་དང་མདུན་བསྐྱེད་ནག་པོ་ཆེན་པོ་ལྷ་ལྔའི་སྐུར་སྒོམ་དུ་གཞུགསློབ་མ་སྟོང་པར་སྦྱང་བ་ནས། ཡེ་ཤེས་པ་བསྟིམ་པས་བར་བྱ་སྟེ། སྐུའི་རྗེས་གནང་ངོ༌། །བཟླས་ལུང་བྱིན་གྱིས་བརླབས་པའི་ལུང་སྤྱི་དང་མཐུན་པར་སྦྱིན་པར་བྱ་སྟེ། གསུང་གི་རྗེས་གནང་ངོ༌། །དེ་ནས་ཕྱག་མཚན་བསྟིམ་པ་ཐུགས་ཀྱི་རྗེས་གནང་ངོ༌། །སློབ་དཔོན་གྱི་ཐུགས་ཀའི་ཧཱུཾ་ལས་ཧཱུཾ་དཀར་དམར་མཐིང་གསུམ་རིམ་པས་སྤྲོས་ནས། སློབ་མས་སྙིང་གར་བསྟིམ་པ་ནི། ཡོན་ཏན་གྱི་རྗེས་གནང་ངོ༌། །ང་རྒྱལ་ལ་སོགས་སྐྱོན་དྲུག་རྣམས། །གཅོད་ཕྱིར་གྲི་གུག་རྣམ་པར་འཛིན། །སངས་རྒྱས་ཀུན་གྱི་བྱིན་བརླབས་པ། །དཔའ་བོའི་མཚན་མ་འདི་བཟུང་ཞིག །ཡི་གེ་བཅུ་གཉིས་པའི་སྔགས་བརྗོད་དེ། གྲི་གུག་ལག་ཏུ་གཏད། དངོས་དང་དངོས་མེད་རྣམ་རྟོག་གི །མགོ་བོའི་པདྨའི་སྣོད་དུ་ནི། །བདུད་རྣམས་རྣམ་པ་བཞི་ཡི་ཁྲག །དངོས་གྲུབ་ཕྱིར་ནི་བཏང་བར་བྱ། །ཨོཾ་མཧཱ་ཀཱ་ལི་ཧཱུཾ་ཧཱུཾ་ཕཊ་སྭཱཧཱ། ཞེས་པས་ཐོད་ཁྲག་ལག་པ་གཡོན་དུ་གཏད། སྟོང་པའི་རྣམ་པའི་ཁ་ཊྭཱཾ་ག །ཐབས་ཀྱི་གཟུགས་ཀྱི་ཅང་ཏེ་ཉིད། །ནག་པོ་ཆེན་པོའི་ཕྱག་རྒྱ་ནི། །ཕྱི་དང་ནང་དུ་ཡང་དག་གནས། །རྩ་སྔགས་བརྗོད་ཅིང༌། ཁ་ཊྭཱཾ་ག་མཆན་ཁུང་དུ་གཏོད་དོ། །གྲགས་པ་འབྱུང་

[Full Size]

གནས་པས་མཛད་པའི་རྗེས་གནང་གི་ཡི་གེ་ནི། རྩེ་གསུམ་གྱི་མཚན་པའི་ཁ་ཊྭཱཾ་ག་ཟེར་བ་ཡོད་ཀྱང༌། རྡོ་རྗེས་མཚན་པའི་ཁ་ཊྭཱཾ་ག་ཉིད་དོ། །དེ་རྣམས་འཕྲིན་ལས་ཀྱི་རྗེས་གནང་ངོ༌། །དེ་ནས་གཏོར་མའི་བཀའ་བསྒོ་སྤྱི་དང་མཐུན་པར་བྱ། སློབ་མའི་རྗེས་ཀྱི་བྱ་བ་དང༌། མདུན་བསྐྱེད་ཀྱི་རྗེས་བསྡུ་བ་ནི་སྤྱི་དང་འདྲའོ། །བསྟན་སྲུང་ཀུན༵་གྱི་རྩ་བ་ནི། །དག༵འ་ཆེན་ཧེ་རུ་ཀ་དཔལ་དངོས། །ཤེས་རབ་མར་བཅས་མགོན་པོ་ཡི། །སྒྲུབ་ཐབས་སྙིང༵་པོ༵་ཙམ་ཞིག་སྤེལ། །གུར་ཡུམ་བཅས་ཀྱི་སྒྲུབ་ཐབས་བཤད་པའི་ལེ་ཚན་ནོ།། །།དགེའོ། །