ཁ་ཆེ་པཎ་ཆེན་ནས་བརྒྱུད་པ་གྲི་གུག་མའི་སྒྲུབ་ཐབས།

[Full Size]

ཨོཾ་སྭཱ་སྟི། དཔལ་ལྡན་རྡོ་རྗེ་འཆང་བ་ཉིད། །དྲག་གཏུམ་མི་ཟད་ཕོ་ཉའི་སྐུར། །སྟོན་འཛིན་ནག་པོ་ཆེན་པོ་ལ། །བཏུད་ནས་སྒྲུབ་ཐབས་བཤད་པར་བྱ། །བྲིས་སྐུ་ལ་སོགས་པའི་དྲུང་དུ་མཆོད་གཏོར་བཤམ། ཡེ་ཤེས་ཁྲོ་བོ་གང་ཡང་རུང་བའི་བདག་བསྐྱེད་སྔོན་དུ་འགྲོ་བས། མཆོད་པ་རྣམས་སྤྱི་དང་མཐུན་པར་བྱིན་གྱིས་བརླབས། ཐོད་པའི་སྣོད་དུ་ཧཱུཾ་ལས་བྱུང་བའི་གཏོར་མ་བདུད་རྩིའི་རྒྱ་མཚོ་ཆེན་པོ་དང༌། མཾ་ལས་བྱུང་བའི་མྱོས་བྱེད་དང༌། རཾ་ལས་བྱུང་བའི་རཀྟ་ཤ་ཁྲག་གི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ། ལན་མང་དུ་བརྗོད། སྟོང་པའི་ངང་ལས་མདུན་དུ་སྐད་ཅིག་གིས་ནག་པོ་ཆེན་པོ་དུས་ཀྱི་མུན་པ་ལྟ་བུ་ཞལ་གཅིག་ཕྱག་གཉིས་གཡས་གྲི་གུག་འཕྱར་བ། གཡོན་ཐོད་ཁྲག་ཐུགས་ཀར་འཛིན་པ། གཡོན་བརྐྱང་གི་སྟབས་ཀྱི་མི་རོའི་གདན་ལ་གནས་པ། སྟག་ལྤགས་

[Full Size]

དང་སྦྲུལ་གྱིས་བརྒྱན་པ། ཐོད་སྐམ་གྱི་དབུ་རྒྱན་དང༌། ཐོད་རློན་གྱི་དོ་ཤལ་ཅན། སྤྱན་གསུམ་སྨ་ར་སྨིན་མ་དབུ་སྐྲ་སེར་པོ་གྱེན་དུ་བརྫེས་པ། མིའུ་ཐུང་གི་རྣམ་པ་ཆེས་གཏུམ་པ། མི་བསྐྱོད་པའི་དབུ་རྒྱན་ཅན། མེ་འོད་དྲག་ཏུ་འཕྲོ་བའོ། །དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རང་གི་སྙིང་ག་ནས་འོད་ཟེར་འཕྲོས། ནག་པོ་ཆེན་པོ་འཁོར་བཅས་སྤྱན་དྲངས། སྙིང་པོའི་མཐར། མཧཱ་ཀཱ་ལ་ཨཱ་གཙྪ་ཨཱ་གཙྪ་ཞེས་བརྗོད། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཨརྒྷཾ་ནས་ཤཔྟའི་བར་གྱིས་མཆོད། ཨོཾ་མཧཱ་ཀ་ལ་ཧ་ན་ཧ་ན་བཛྲེ་ཎ་སྭཱཧཱ། སྙིང་པོ་འབུམ་ཕྲག་བཞི་བཟླས་པའི་མཐར། ཨོཾ་ཨ་སི་མུ་ས་ལ། ཏྲི་ཤུ་ལ། ཨེ་ཧྱེ་ཧི། མཧཱ་ཀཱ་ལ། སརྦ་ཤ་ཏྲུན་ནིརྒྷ་ཏ་ཡ། ཛཱ་ར་ཎ། གྲྀཧྞ་པཱ་ཡ། གྲྀཧྣ་པཱ་ཡ་ཧཱུཾ་ཕཊ། ཁྲི་ཕྲག་གཅིག་བཟའ་བ་སྤངས་ནས་བཟླའོ། དེ་ལྟར་ལན་གསུམ་གྱི་མཐར་སྙིང་པོ་ཉིས་འབུམ་བཟླས་པ་བསྙེན་པ་གྲུབ་པའོ། །ཐུན་འཇོག་ཁར། ཨོཾ་མཧཱ་ཀཱ་ལ་ཧ་ན་ཧ་ན། རཀྵ་རཀྵ་བཱ་ལིཾ་གྲྀཧྞ་ཀ་ར་ཡཾ་ཀུ་རུ་ཛ་ཛཿ ཞེས་ལན་གསུམ་གྱིས་གཏོར་མ་ཕུལ། སྙིང་པོ་ལན་གསུམ་གསུམ་གྱིས་རཀྟ་དང་ཆང་བསྒྲེངས། སྤོས་སྦྱོར་བསྲེགས། ཅང་ཏེའུ་བརྡུངས་ཤིང་སྲིན་གཟུགས་མ་འདོན་ནོ། །རྟེན་ཡོད་ན་བརྟན་བཞུགས་བྱ། མེད་ན་མུཿཞེས་གཤེགས་སུ་གསོལ། འདིའི་རྗེས་གནང་ནི། རྡུལ་ཚོན་

[Full Size]

གྱི་མཎྜལ་ནག་པོ་གྲུ་གསུམ་ལ་ཚོམ་བུ་ནག་པོ་བཀོད། ཛཾ་བུ་ཊི་ཀ་དང་ཤ་དང་སྲན་ཆན་བཏབ་པའི་གཏོར་མ་དང༌། མྱོས་བྱེད་རཀྟའི་མཆོད་པ་རྣམས་བཤམས། བསྟོད་པའི་བར་གོང་བཞིན་ཉམས་སུ་བླངས། རྗེས་གནང་གི་ངོ་བོ་ནི། པཎ་ཆེན་ཤཱཀྱ་ཤྲཱི་ནས་བརྒྱུད་པའི་རྗེས་གནང་གཞན་དང་འདྲའོ། །གསོལ་བཏབ་སྐྱབས་འགྲོ་སེམས་བསྐྱེད། སྐུ་བསྐྱེད་བསྟིམ། གསུམ་བཟླས་ལུང༌། ཐུགས་ཕྱག་མཚན་བསྟིམ་པ་རྣམས་ཡིན་ལ། ཕྱིས་ཀྱི་ལག་ལེན་ལ་གཏོར་དབང་བྱེད་པའང་འདུག་པས། དེ་ལྟ་ན་མཎྜལ་གྱི་སྟེང་དུ་མཉྫི་ལ་གཏོར་མའང་བཤམ་མོ། །ཆོས་སྐྱོང་ཀུན༵་གྱི་སྒྲུབ་ཐབས་ནི། །རྙིང་མའི་ལུགས་དང་འདྲེས་པ་མང༌། །འཕགས་ཡུལ་མཁས་པའི་གསུང་དྲི་མེད། །མཆོག་ཏུ་དག༵འ་བའི་སྙིང༵་པོ༵་འདིའོ། ཁ་ཆེ་པཎ་ཆེན་ནས་བརྒྱུད་པ་གྲི་གུག་མའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །