ཞལ་བཞི་གདོང་བརྙན་ཅན་གྱི་སྒྲུབ་ཐབས།― TNT15_Page_1011 ―
[མ་དཔེ་གཟིགས་ན་འདིར་གནོན།]
ཨོཾ་སྭཱ་སྟི། རབ་འབར་སྟོབས་འཕྲོག་དབང་པོ་ནི། །དྲེགས་པ་བཞི་ལྡན་ལ་བཏུད་ནས། །རབ་འཇིགས་གདོང་བརྙན་ཅན་གྱི་ནི། །སྒྲུབ་ཐབས་ཁྱད་པར་ཅུང་ཟད་བཤད། །འདི་ཡང་བསྙེན་དུས་ཉིད་ལ་འདོན་པ་སྤོས་པས་ཆོག་སྟེ། དཔལ་ནག་པོ་ཆེན་པོ་སྐུ་མདོག་ནག་པོ་འཇིགས་སུ་རུང་བ། ཁམས་གསུམ་ཟ་བར་བྱེད་ཅིང་ལྷ་དང་ལྷ་མ་ཡིན་སྡིགས་པར་བྱེད་པའི་ཞལ་བཞི་སྟེ། རྩ་ཞལ་མགོན་པོའི་ཞལ་གཤིན་རྗེ་ལྟར་ཁྲོས་པ། གཡས་ཞལ་ལྷ་ཁྲོས་པ་གླང་པོ་ཆེའི་གདོང་དཀར་པོ། གཡོན་ཞལ་སྲིན་པོ་ཁྲོས་པ་མ་ཧེའི་གདོང་དམར་པོ། རྒྱབ་ཞལ་རྒྱལ་པོ་ཁྲོས་པ་སེང་གེའི་གདོང་སྔོན་པོ། ཕྱག་དང་པོ་གཉིས་གྲི་གུག་དང༌། ཐོད་ཁྲག་ཐུགས་ཀར་སྟེང་འོག་ཏུ་འཛིན་པ། གཡས་གཉིས་པ་ན་དབྱུག་ཐོ། གསུམ་པ་ན་དགྲ་སྟ། གཡོན་གཉིས་པས་རང་གི་ ― TNT15_Page_1012 ―
[མ་དཔེ་གཟིགས་ན་འདིར་གནོན།]
སྟོད་གཡོགས་གླང་པོའི་པགས་པའི་རྐང་པ་གཡོན་པ་འཛིན་པ། གསུམ་པས་ཞགས་པ་བསྣམས་པ། རྔམ་པའི་སྒོ་ནས་ཞབས་ས་ལ་རྡེབ་པ། ཞེས་དང༌། དེའི་གཡས་སུ་གཏུམ་མོ་སྔོན་མོ། གཡས་ཐོད་པ་དང༌། གཡོན་དར་ནག་ཐོགས་པ། གཡོན་དུ་གཡུང་མོ་དམར་མོ་ལུག་གུ་རྒྱུད་དང་ཞགས་པ་འཛིན་པ། མདུན་དུ་སྲིན་མོ་དང༌། རྒྱབ་ཏུ་སིངྒ་གླིང་མ་ནག་མོ་གྲི་ཐོད་འཛིན་པ་ཞེས་བྱ། སྙིང་པོའི་སྔགས་ནི། ཨོཾ་མཧཱ་ཀ་ལ་ཀ་ལ་གུ་ཎ་ཧྲི་ད་ཨེ་ཀ་ཛ་ཊི་ཧཱུཾ་ཕཊ། ཅེས་པའོ། །ལྷག་མ་གཏོར་ཆོག་ཉམས་སུ་བླང་ཚུལ་དང༌། སློབ་མ་ལ་རྗེས་གནང་བྱེད་ཚུལ་ཐམས་ཅད་བསྙེན་དུས་ཀྱི་སྐབས་ཉིད་ལ་འདོན་པ་སྤོ་བ་ཡིན་ལ། འོན་ཀྱང་འདི་ཉིད་ལ་ཐུན་མོང་མ་ཡིན་པའི་ལས་ཚོགས་རྣམས་ནི་མང་དུ་ཡོད་དོ། །འབུམ་ཕྲག་གསུམ་པའི་མན་ངག་ནི། །ཀུན༵་དུ་གབ་ཅིང་རབ་དག༵འ་བ། །ཀླུ་སྒྲུབ་ཀྱིས་མཛད་གཞུང་གི་དོན། །ཡང་སྙིང༵་ཁྱད་པར་གསལ་པོ༵ར་བརྗོད། །ཞལ་བཞི་གདོང་བརྙན་ཅན་གྱི་སྒྲུབ་ཐབས་ཀྱི་ལེ་ཚན་ནོ།། །།མངྒ་ལཾ། ། |
