སྒྲུབ་ཐབས་རིན་ཆེན་འབྱུང་གནས་ལས་དེ་བཞིན་གཤེགས་པ་ཆགས་བྲལ་གྱི་རྣམ་པ་ཅན་གྱི་སྒྲུབ་ཐབས་བཤད་པའི་སྐབས་ཏེ་གསུམ་པ།
ཐུབ་པ་རྡོ་རྗེ་གདན་གྱི་སྒྲུབ་ཐབས།
ཨོཾ་སྭཱ་སྟི། ན་མོ་བུདྡྷཱ་ཡ། རྒྱལ་བ་སྟོན་པ་ཤཱཀྱའི་ཏོག །དེ་ལ་དད་པས་རབ་བཏུད་ནས། །སྒྲུབ་ཐབས་ཆུ་གཏེར་ཡོན་ཏན་གྱི། །རིན་ཆེན་འབྱུང་གནས་འདིར་འཇུག་བྱ། །དེ་ལ་ཐོག་མ་སྒྲུབ་ཐབས་བརྒྱ་རྩའི་ཆིངས་ཤེས་པའི་དོན་དུ། དེའི་ཐོག་མ་ཐུབ་པ་རྡོ་རྗེ་གདན་གྱི་མངོན་རྟོགས་དང༌། རྗེས་གནང་གི་ཆོ་ག་བཤད་པར་བྱ་ཞིང༌། བརྒྱ་རྩའི་རྗེས་གནང་གཞན་དང་སྦྲེལ་ཚུལ་ཡང་བརྗོད་ན། དུས་བཟང་པོ་ལ་སློབ་དཔོན་བཟང་པོས་སློབ་མ་བཟང་པོ་ལ་བྱིན་ཏེ། དེ་ཡང་སྟེགས་བུ་གྲུ་བཞི་པ་རས་བཟང་པོས་གཡོགས་པའི་དབུས་སུ་མཎྜལ་གུར་གུམ་གྱིས་བྱུགས་པར་རྡོ་རྗེ་གདན་གཙོ་འཁོར་གསུམ་གྱི་ཚོམ་བུ་དབུས་མ་ཆེ་བ། གཡས་གཡོན་དུ་ཆུང་བ་རེ་རེ་ལྷོ་བྱང་དུ་མཚར་དུ་བསྒྲིགས། བྱང་ཤར་དུ་མཚམས་འཛིན་གྱི་མེ་ཏོག །ཤར་དུ་མཆོད་ཡོན། ཤར་ལྷོར་ཞབས་བསིལ། ལྷོར་མེ་ཏོགལྷོ་ནུབ་ཏུ་བདུག་སྤོས། ནུབ་ཏུ་མར་མེ། བྱང་ནུབ་ཏུ་དྲི་ཆབ། བྱང་དུ་ལྷ་བཤོས། དྲི་ཆབ་དང་ལྷ་བཤོས་ཀྱི་བར་དུ་གཏོར་མ་བཤམས། རྗེས་གནང་དུ་མ་ཞིག་རྗེས་ལ་སྦྲེལ་ནས་བྱེད་ན་ཇི་ཙམ་བྱེད་པའི་ལྷ་བཤོས་ཀྱི་གྲངས་དང༌། གཏོར་གསོས་ཀྱི་མཐེབ་ཀྱུ། མེ་ཏོག་གསོ་ཆས། སྤོས་འབུལ་རྒྱུ། མཆོད་ཡོན་ཞབས་བསིལ། དྲི་ཆབ་གསོ་བ་དང༌། གཏོར་མ་སྦྱངས་ཆས་ཀྱི་ཆུ་རྣམས་སྟ་གོན་བྱ། སློབ་དཔོན་གྱི་མདུན་དུ་ལྕོག་རྩེའི་སྟེང་དུ་ཏིང་ཤགས་དང་རྡོར་དྲིལ་གང་འོས། སློབ་མ་རྣམས་ལ་འཐོར་རྒྱུའི་མེ་ཏོག་ཏིང་ཕོར། སློབ་མ་རྣམས་ལ་འགྱེད་རྒྱའི་མེ་ཏོག་ཀ་ཏོར་བ་རེ། ལས་ཀྱི་རྡོ་རྗེའི་མདུན་དུ་མཎྜལ་དང༌། དེ་ལ་བྱུག་པའི་ཆུ་དང་བཅས་པ་བཤམས། དེ་ནས་སློབ་དཔོན་གྱིས་འདི་སྐད་ཅེས། ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་ལ་སྐྱབས་སུ་མཆིའོ། །སངས་རྒྱས་ལ༴ ཆོས་ལ༴ དགེ་འདུན་ལ༴ ལན་བདུན་མཛད། སངས་
རྒྱས་ཆོས་དང་ཚོགས་ཀྱི་མཆོག་བཅས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ། སེམས་ཅན་ཐམས་ཅད་བདེ་བ་བདེ་བའི་རྒྱུ་དང་ལྡན་པ་གྱུར་ཅིགསྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་དང་བྲལ་བའི་བཏང་སྙོམས་ཚད་མེད་པ་ལ་གནས་པར་གྱུར་ཅིག །རང་སྐད་ཅིག་གིས་ཐུབ་པ་རྡོ་རྗེ་གདན་དུ་གསལ་བའི་སྙིང་གར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཧཱུཾ་གསེར་གྱི་མདོག་ཅན་དེ་ལས་འོད་འཕྲོས། མདུན་གྱི་ནམ་མཁར་ཐུབ་པ་ཆེན་པོ་གཙོ་འཁོར་གསུམ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་བཛྲ་ས་མཱ་ཛཿ ཨོཾ་ཤཱཀྱ་མུ་ནི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་དྷུ་པེ་ཨཱཿཧཱུཾ། ཨོཾ་བཛྲ་ཨཱ་ལོ་ཀེ་ཨཱཿཧཱུཾ། ཨོཾ་བཛྲ་གནྡྷེ་ཨཱཿཧཱུཾ ཨོཾ་བཛྲ་ནཻ་ཝེ་ཏེ་ཨཱཿཧཱུཾ། ཨོཾ་བཛྲ་ཤཔྟ་ཨཱཿཧཱུཾ། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་བཟུང༌། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་སྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་
ཤོག །ལན་གསུམ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་རིན་པོ་ཆེའི་ཁྲི་ཕྱོགས་བཞིར་བདུད་བཞི་མཚམས་བཞིར་སེང་གེ་བཞིས་བཏེག་པའི་སྟེང་དུ། པདྨ་དང་ཟླ་བའི་དཀྱིལ་འཁོར་ལ་ཧཱུཾ་ལས་རྡོ་རྗེ་སེར་པོ་ཧཱུཾ་གིས་མཚན་པ། དེ་ཡོངས་སུ་གྱུར་པ་ལས་བདག་ཉིད་ཐུབ་པ་རྡོ་རྗེ་གདན་སྐུ་མདོག་གསེར་བཙོ་མ་ལྟ་བུ་ཞལ་གཅིག་ཕྱག་གཉིས་པ་གཡས་ས་གནོན། གཡོན་ཏིང་ངེ་འཛིན་གྱི་ཕྱག་རྒྱ་ཅན། ཞབས་རྡོ་རྗེའི་སྐྱིལ་ཀྲུང་གིས་བཞུགས་ཤིང༌། ན་བཟའ་ཆོས་གོས་ངུར་སྨྲིག་གསོལ་བ། དབུ་གཙུག་ཏོར་དང་བཅས་པ། ཚངས་པར་སྤྱོད་པའི་ཆ་ལུགས་ཅན། དེའི་གཡས་སུ་བྱམས་པ་སེར་པོ། གཡས་རིན་པོ་ཆེའི་རྔ་ཡབ། གཡོན་ཀླུ་ཤིང་གི་ཡལ་ག་མེ་ཏོག་དང་བཅས་པ་བསྣམས་པ། གཡོན་ན་སྤྱན་རས་གཟིགས་དཀར་པོ། གཡས་རིན་པོ་ཆེའི་རྔ་ཡབ། གཡོན་པདྨ་བསྣམས་པ། གཉིས་ཀའང་རིན་པོ་ཆེའི་རྒྱན་དང༌། དར་སྣ་ཚོགས་ཀྱི་ཤམ་ཐབས་ཅན། བཅོམ་ལྡན་འདས་ཀྱི་ཞལ་ལ་ལྟ་བའོ། །དེ་རྣམས་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཧཱུཾ་ལས་འོད་ཟེར་འཕྲོས་པས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད། ཐུབ་པ་རྡོ་རྗེ་གདན་གཙོ་འཁོར་གྱི་རྣམ་པར་ཨོཾ་བཛྲ་ས་མཱ་ཛཿ ཨོཾ་བཛྲ་ཨཾ་ཀུ་ཤ་ཛཿ ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་བཛྲ་ཨ་བེ་ཤ་ཨཱཿ གཉིས་སུ་མེད་པར་ཐིམ། དེ་དག་གི་ཕྱག་རྒྱ་སྤྱི་འགྲོ་ལྟར་མཛད། ཡང་སྙིང་གའི་ཧཱུཾ་ལས་འོད་འཕྲོས། དེ་བཞིན་གཤེགས་པ་རིགས་ལྔ་འཁོར་དང་བཅས་པ་བཛྲ་ས་མཱ་ཛཿ ཁྱེད་རྣམས་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ།
ཞེས་གསོལ་བ་བཏབ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་གསུངས་ཤིང་དབང་བསྐུར་བས། བཅོམ་ལྡན་འདས་ལ་མི་བསྐྱོད་པ། བྱམས་པ་ལ་རྣམ་སྣང༌། སྤྱན་རས་གཟིགས་ལ་འོད་དཔག་མེད་ཀྱིས་དབུ་བརྒྱན། ཨོཾ་ཨཱཿབཛྲ་ཧཱུཾ་སྭཱཧཱ། ཞེས་བཟླས་ལ་མཐར་སྐུ་གསུང་ཐུགས་ཡོན་ཏན་འཕྲིན་ལས་ཀྱིས་བདག་དང་སེམས་ཅན་ཐམས་ཅད་ལ་བྱིན་གྱིས་བརླབ་ཏུ་གསོལ། ཛཿཧཱུཾ་བཾ་ཧོཿ འཁོར་གཉིས་རང་ལ་ཐིམ། ཨོཾ་ཨ་མྲྀ་ཏེ་ཧཱུཾ་ཕཊ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཨོཾ་ཞུ་བ་ལས་བྱུང་བའི་མཆོད་ཡོན། ཞབས་བསིལ། མེ་ཏོག བདུག་སྤོས། མར་མེ། དྲི། ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ། འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལྟ་བུ་དཔག་ཏུ་མེད་པར་གྱུར། ཨོཾ་ཨརྒྷཾ་ཨཱཿཧཱུཾ། ཨོཾ་པཱདྱཾ་ཨཱཿཧཱུཾ། ཨོཾ་བཛྲ་པུཥྤེ་ཨཱཿཧཱུཾ། ནས། ཤཔྟ་ཨཱཿཧཱུཾ། ཨོཾ་བཛྲ་སྥ་ར་ཎ་ཁཾ། ཨོཾ་སྭ་བྷཱ་ཝ་ཤུདྡྷ་སོགས། སྟོང་པའི་ངང་ལས་དྲིའི་མཎྜལ་གྱི་དབུས་སུ་རིན་པོ་ཆེའི་ཁྲི་ཞེས་པ་ནས་མདུན་བསྐྱེད་ཡིན་པས་བདག་ཉིད་མི་ཟེར། ཁྱེད་ཀྱིས་འདི་ལ་དབང་བསྐུར་ཟེར་ནས་འདོན་པ་སྤོ། གཞན་དབུ་བརྒྱན་པའི་བར་གོང་གི་བདག་བསྐྱེད་དང་འདྲ་བར་མཛད་ནས། ཨོཾ་ཤཱཀྱ་མུ་ནི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། ནས། ཤཱཀྱ་མུ་ནི་ས་པ་རི་ཝཱ་ར་ཤཔྟ་ཨཱཿཧཱུཾ་གི་བར་དང༌། ན་མ་སརྦ་བུདྡྷ་བོ་དྷི་སཏྭཱ་ནཱཾ། ཨོཾ་སརྦ་བིད། པུ་ར་པུ་ར། སུ་ར་སུ་ར། ཨ་ཝརྟ་ཡ་བྷྱཿསྭཱཧཱ། མཆོད་ཡོན་སོགས་ཀྱི་ཕྱག་རྒྱ་བཅིང་དགྲོལ། སརྦ་བིད་ལ་གང་བའི་ཕྱག་རྒྱ་མཛད། ཐབས་མཁས་ཐུགས་རྗེ་
སོགས་དང༌། བྱམས་ཆེན་མེ་སོགས་དང༌། སྐྱོན་གྱི་མ་གོས་སོགས་ཀྱིས་བསྟོད། བཟླས་པ་བདུན་ཙམ་གྱི་མཉེས་པར་བྱས། ཨོཾ་ཨཱཿཧཱུཾ་གིས་གཏོར་མ་བྱིན་གྱིས་བརླབས། ཨོཾ་ཤཱཀྱ་མུ་ནི་ས་པ་རི་ཝཱ་ར་ཨ་ཀཱ་རོ་ལན་གསུམ་གྱིས་འབུལ། བཅོམ་ལྡན་འདས་བདག་དང་སེམས་ཅད་ཐམས་ཅད་ལ་དངོས་གྲུབ་མ་ལུས་པ་སྩལ་དུ་གསོལ། ཞེས་བརྗོད། དེ་ནས་མཆོད་གཡོག་པ་གཅིག་གིས་ཐམས་ཅད་ལ་ཁྲུས་ཀྱི་ཕྱིར་ཆབ་བཏང༌། ནང་གི་མཆོད་གཡོག་པས་མེ་ཏོག་འགྱེད་བསྡུད་སྐབས་ཆ་གཉིས་བྱས་ལ། མེ་ཏོག་ཕྱེད་ཕྱེད་སློབ་མ་སོ་སོ་རང་གིས་ཚགས་བྱེད་དུ་གཞུགགསོལ་བཏབ་ཀྱི་དུས་སུ་ཐལ་མོ་སྟོང་པར་མ་སོང་བ་བྱེད། ཕྱེད་བསྡུས་ལ་མཎྜལ་ཕུལ། གྲལ་དང་མེ་ཏོག་བཀྲམ་བསྡུ་ཟིན་པ་དང༌། འདི་སྐད་ཅེས། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་དུ་དམ་པའི་ཆོས་ཟབ་མོ་གསན་དགོངས་པ་བྱང་ཆུབ་ཀྱི་མཆོག་ཏུ་སེམས་བསྐྱེད་པ་གསལ་བཏབ་ནས་གསན་པར་ཞུ། འདིར་རྒྱུད་སྡེ་བཞི་ལས་སྒྲུབ་ཐབས་དུ་མ་གསུངས་པ་རྣམས་ལ། རྒྱ་གར་གྱི་སློབ་དཔོན་སོ་སོས་སྒྲུབ་ཐབས་མཛད་པ་རྣམས་ཕྱོགས་གཅིག་ཏུ་བསྡུས་པའི་སྒྲུབ་ཐབས་རྒྱས་འབྲིང་བསྡུས་གསུམ་བཞུགས་པ་ཡིན་ལ། བསྡུས་པ་བ་རི་བས་བསྒྱུར་བ་འདི་ལ་སྒྲུབ་ཐབས་གཟུངས་དང་བཅས་པ་དཔེ་སྣ་དགུ་བཅུ་གོ་དྲུག་ཡོད། ས་སྐྱ་པ་གོང་མ་རྣམས་ལས་བརྒྱུད་ཅིང་ཐུགས་རྩིས་སུ་མཛད་པ་ཡིན་ལ། འདི་ནི་རྒྱ་གཞུང་རྣམས་ལས་གཅོད་དང་དཀའ་གནས་གཅོད་པའི་མཆན་བུ་དང་ཊཱིཀྐ་རྣམས་ཡོད་པས་གཞུང་ཡང་ལེགས་པར་བཤད་ནུས་ཤིང༌། ཤིན་ཏུ་ཡིད་ཆེས་པའི་གནས་ཡིན་པས། དེའི་ལུགས་ཀྱི་རྗེས་གནང་གི་ཆོ་ག་
སྒྲུབ་པར་བགྱིད་པ་ལས། དང་པོ་ཐུབ་པ་རྡོ་རྗེ་གདན་གྱི་རྗེས་གནང་སྒྲུབ་པར་བྱེད་པ་ལ། སློབ་དཔོན་གྱིས་བདག་བསྐྱེད་བཟླས་པ་དང་བཅས་པ། མདུན་དུ་དྲིའི་མཎྜལ་གྱི་དབུས་སུ་བཅོམ་ལྡན་འདས་བསྐྱེད་པ་ལ་མཆོད་བསྟོད། བཟླས་པས་མཉེས་པར་བྱ་བ་དང༌། གཏོར་མ་རྣམས་སྔོན་དུ་སོང་ནས། ད་རྗེས་གནང་ཞུ་བའི་ཡོན་དུ་མཎྜལ་ཕུལ་མཛོད། སློབ་མས་འདིར་མཎྜལ་ཕུལ། ཡང་བླ་མས་མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་གསུངས་ཤིགདུས་གསུམ་སངས་རྒྱས་ཐམས་ཅད་དང༌། །ལྷག་པའི་ལྷ་ཡི་ངོ་བོ་ཉིད། །དཔལ་ལྡན་བླ་མའི་བཀའ་དྲིན་གྱིས། །བདག་ལ་རྗེས་གནང་སྩལ་དུ་གསོལ། །ལན་གསུམ། རྒྱུད་དག་པར་བྱ་བའི་ཕྱིར། མདུན་བསྐྱེད་ཀྱི་ལྷ་དང་སངས་རྒྱས་བྱང་སེམས་རྣམས་ཀྱི་དྲུང་དུ་རྒྱུན་བཤགས་དང་སྐྱབས་གསུམ་སྔོན་དུ་འགྲོ་བའི་བྱང་ཆུབ་ཀྱི་སེམས་བཟུང་བ་ལ་སོགས་པ་བགྱིད་སྙམ་པའི་བསམ་པས་འདིའི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི་སོགས་གསུམ་དང༌། ཁྱད་པར་དུ་ཐུབ་པ་རྡོ་རྗེ་གདན་གྱི་རྗེས་གནང་སྩལ་དུ་གསོལ་སྙམ་པའི་འདུན་པས་འདིའི་རྗེས་ཟློས་ཀྱང་གསུངས་ཤིགསློབ་དཔོན་དགོངས་སུ་གསོལ། བདག་ལ་བཅོམ་ལྡན་འདས་ཐུབ་པ་རྡོ་རྗེ་གདན་གྱི་རྗེས་གནང་མ་ལུས་པ་སྩལ་དུ་གསོལ། ཞེས་ལན་གསུམ་གྱིས་གསོལ་བ་བཏབ་ནས། ད་སྦྱོར་བ་རྗེས་གནང་གི་གཞི་དགོད་པའི་སླད་དུ་དམིགས་པ་འདི་བཞིན་དུ་མཛད་པ་ཞུ། ཨོཾ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཕྱི་ནང་གི་དངོས་པོ་ཐམས་ཅད་མི་དམིགས་པ་སྟོང་པ་ཉིད་དུ་གྱུར་པའི་ངང་ལས། རིན་པོ་ཆེའི་ཁྲི་སོགས་དང་ཁྱེད་རང་རྣམས་བཅོམ་ལྡན་འདས་
ཐུབ་པ་ཞེས་སོགས་ནས་ལྟ་བའོ། །ཞེས་པའི་བར་གཙོ་འཁོར་གསུམ་བདག་བསྐྱེད་བཞིན་གསལ་བཏབ་བོ། །དེ་ནས་སློབ་དཔོན་ཡང་རང་གིས་བསྒོམ་པ་དང་འདྲ་བའི་ཐུབ་པ་རྡོ་རྗེ་གདན་དངོས་ཡིན་སྙམ་པའི་མོས་གུས་བྱས་པས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ལྷའི་ཐུགས་རྒྱུད་བསྐུལ། དེའི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྒྱུད་བསྐུལ་བས། སློབ་དཔོན་དང་མདུན་བསྐྱེད་ཀྱི་ལྷ་དང༌། ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀ་ནས་ཐུབ་པ་རྡོ་རྗེ་གདན་འཁོར་དང་བཅས་པའི་སྐུ་ཆེ་ཆུང་མ་ངེས་པ་དཔག་ཏུ་མེད་པ་བྱོན། ཁྱེད་རང་རྣམས་ཀྱི་སྤྱི་གཙུག་ལ་སོགས་པ་དང་བ་སྤུའི་བུ་ག་རྣམས་ནས་ཆར་བབས་པ་བཞིན་དུ་སིབ་སིབ་ཐིམ་པར་མོས་མཛོད། ཛཿཧཱུཾ་བཾ་ཧོཿགཉིས་སུ་མེད་པར་ཐིམ། དེ་དག་ནི་རྗེས་གནང་གི་གཞི་དགོད་པའོ། །རྗེས་གནང་དངོས་ལ། ལུང་གསུམ་ལས། དང་པོ་རྗེས་སུ་བཟླས་པའི་ལུང་བླང་བའི་ཕྱིར། སློབ་དཔོན་གྱི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་སེར་པོ། དེ་ལས་སྔགས་ཀྱི་ཕྲེང་བ་བྱུང་སློབ་དཔོན་གྱི་ཁ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། ཐུགས་ཀར་ཟླ་བའི་སྟེང་དུ་ཧཱུཾ་སེར་པོ་གནས་པ་ལ་ཐིམ། དེའི་དུས་སུ་ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་རྣམས་ཀྱི་མཁྱེན་བརྩེ་ནུས་མཐུ་ཐམས་ཅད་འོད་ཟེར་གྱི་རྣམ་པར་སྔགས་འཕྲེང་དང་ལྷན་ཅིག་ཞལ་དུ་ཞུགས། སྙིང་གའི་ཧཱུཾ་ལ་ཐིམ་པའི་མོས་པ་མཛོད་ལ། སྔགས་འདིའི་རྗེས་ཟློས་ལན་གསུམ་གསུངས་ཤིགཨོཾ་ཨཱཿབཛྲ་ཧཱུཾ་སྭཱཧཱ། དང་པོས་བྱིན་
གྱིས་བརླབས། གཉིས་པས་དབྱེར་མེད་དུ་འདྲེས། གསུམ་པས་བརྟན་པར་བྱས་པའི་མོས་པ་མཛོད། གཉིས་པ་བྱིན་གྱིས་བརླབ་པའི་ལུང་ནི། སློབ་དཔོན་ལ་མེ་ཏོག་འཐོར་བཞིན་དུ་འདིའི་རྗེས་ཟློས་མཛོད་ཅིགབཅོམ་ལྡན་བདག་གིས་བཟུང་ལགས་ཀྱི། །བདག་ལ་འགོ་བར་མཛད་དུ་གསོལ། །ཅེས་ལན་གསུམ། དེ་ལྟར་ཕུལ་བའི་མེ་ཏོག་དེ་ཉིད་སླར་ཡང་བྱིན་གྱིས་བརླབས་ཏེ། ཁྱེད་རང་གི་སྤྱི་བོར་ཕུལ་བར་མོས་པ་མཛོད་ཅིགསློབ་དཔོན་གྱིས་མེ་ཏོག་གཏོར་ཞིང༌། བཅོམ་ལྡན་འདི་ལ་སྩལ་ལགས་ཀྱི། །འདི་ལ་འགོ་བར་མཛད་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །སྔགས་ཀྱི་དངོས་གྲུབ་སྩལ་དུ་གསོལ། །རིག་པ་འཛིན་པ་འདི་རྣམས་ལ་བཅོམ་ལྡན་འདས་ཐུབ་པ་རྡོ་རྗེ་གདན་འཁོར་དང་བཅས་པའི་སྐུ་གསུང་ཐུགས་ཀྱི་བྱིན་རླབས་མ་ལུས་པ་འཇུག་པར་གྱུར་ཅིགགསུམ་པ་དམ་བཅའ་བའི་ལུང་གི་ཕྱིར། བཅོམ་ལྡན་འདས་ཐུབ་པ་རྡོ་རྗེ་གདན་འདི་ཉིད་ཇི་སྲིད་བྱང་ཆུབ་མ་ཐོབ་བར་ཀྱི་ཡི་དམ་དུ་བཟུང་ངོ༌། །བདག་ཐུགས་ཀྱིས་མ་བཏང་ཞིག་སྙམ་པའི་བསམ་པས་འདིའི་རྗེས་ཟློས་གསུངས་ཤིགསློབ་དཔོན་དགོངས་སུ་གསོལ། བདག་རིག་པ་འཛིན་པ་མིང་འདི་ཞེས་བགྱི་བ་དུས་འདི་ནས་གཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། བཅོམ་ལྡན་འདས་ཐུབ་པ་རྡོ་རྗེ་འདས་འཁོར་དང་བཅས་པ་ཡི་དམ་གྱི་ལྷར་བཟུང་ནས། འདིའི་གསང་སྔགས་ཉི་མ་རེ་རེ་བཞིན་འདི་ཙམ་རེ་འདོན་པར་དམ་བཅའ་ལགས་སོ། །ཞེས་ལན་གསུམ་བརྗོད། དེས་དངོས་གཞི་
ལུང་གསུམ་སོང༌། ད་ནི་རྗེས་བྱིན་གྱིས་བརླབས་པའི་ཕྱིར། མདུན་བསྐྱེད་ཀྱི་ལྷ་ལ་མོས་གུས་དུང་དུང་པ་དང་བདག་གི་རྒྱུད་བྱིན་གྱིས་བརླབ་ཏུ་གསོལ། སྙམ་པ་མཛད་པས། མདུན་བསྐྱེད་ཀྱི་ལྷའི་ཐུགས་ཀ་ནས་ཐུབ་པ་རྡོ་རྗེ་གདན་གྱི་སྐུ་སོར་ཚད་ཙམ་ཞིག་རྒྱངས་ཏེ་བྱོན། ཁྱེད་རང་རྣམས་ཀྱི་སྙིང་གའི་ས་བོན་དང་དབྱེར་མེད་དུ་འདྲེས། རྒྱུད་བྱིན་གྱིས་བརླབས་པའི་མོས་པ་མཛོད། འདི་ཡིག་རྙིང་ན་མེད་ནའང་ཕྱག་ལེན་ལ་མཛད། དེ་ནས་འདིའི་རྒྱ་གཞུང་སྒྲུབ་ཐབས་ཀྱི་ལུང་ཡང་སྤྲོ་ན་བྱའོ། །དེ་དག་ནི་ཐུབ་པ་རྡོ་རྗེ་གདན་གྱི་རྗེས་གནང་ལུང་དང་བཅས་པའོ། །འདི་གཅིག་པུ་ཡིན་ན། གཙོ་བོས་ཇི་ལྟར་སོགས་འོག་བཞིན་བྱ། གཞན་དང་སྦྲེལ་ནས་བྱེད་ན་སློབ་མ་རྣམས་ཀྱིས། སློབ་དཔོན་ཆོ་ག་སྒྲུབ་པའི་བར་ལ་མདོ་འདོན་པ་སོགས་བྱེད་དོ། །སློབ་དཔོན་གྱིས་ཨོཾ་བཛྲ་མུཿ ཚོམ་བུའི་ཡེ་ཤེས་པ་གཤེགས། ཛཿཧཱུཾ་བཾ་ཧོཿ དམ་ཚིག་པ་རང་ལ་ཐིམ། ཆོས་ཐུན་རེ་ལ་རྗེས་གནང་མང་པོ་སྦྲེལ་ནས་མཛད་ན། སྤྱིར་སློབ་དཔོན་གྱི་བྱ་བ་ལ་སྐྱབས་འགྲོ་སེམས་བསྐྱེད་ཀུན་ལ་འདྲ། ཚོགས་ཞིང་དང༌། ཚད་མེད་རྟིང་མ་རྣམས་ལ་མི་མཛད་པར་སྟོང་ཉིད་ལས་དམ་ཚིག་པ་བསྐྱེད་པ་སོ་སོར་འགྲེ། གནས་གསུམ་བྱིན་རླབས་འདྲ། ཡེ་ཤེས་པ་ལྷ་དེ་དང་དེའི་རྣམ་པར་སྤྱན་འདྲེན་དབང་བསྐུར་འདྲ། རིགས་བདག་སོ་སོར་ཡོད་དེ་འགྲེ། བཟླས་པ་སོ་སོ། འདོད་དོན་གསོལ་བཏབ་འདྲ། འཁོར་ཡོད་ན་གཙོ་བོ་ལ་བསྡུད་པའང་འདྲ། མཆོད་པ་བྱིན་རླབས་མཎྜལ་བསངས་སྦྱངས་འདྲ། སྟོང་པའི་ངང་ལས་དྲིའི་མཎྜལ་གྱི་དབུས་སུ། དམ་ཚིག་པ་བསྐྱེད་པ་ལས། བདག་ཉིད་ཞེས་པ་འཇོག གཞན་སོ་སོའི་བསྐྱེད་ཆོག་བཞིན་བསྐྱེད་
རྗེས། སོ་སོའི་ཡེ་ཤེས་པ་སྤྱན་འདྲེན་ཏེ་གཞན་འགྲེ། བཟླས་ལུང་སོ་སོར་འབྱུང༌། དམ་བཅའི་ལུང་ལ་འདོན་པ་སྤོ། བྱིན་གྱིས་བརླབས་པ་ལ་སོ་སོའི་ལྷ་བྱོན་པའི་དམིགས་པ་སྤོ། སྔ་མ་ཚོ་ལ་ལུང་གསུམ་ཚར་རྗེས་དེ་དག་གིས་ནི་ལྷ་འདི་ཞེས་བྱ་བའི་རྗེས་གནང་གི་ཆོ་གའོ་ཞེས་བརྗོད། མདུན་བསྐྱེད་ཀྱི་ཡི་དམ་གཤེགས་སྡུད་ཀྱང་འདྲ། རྗེས་ལུང་ཚར་ཚར་བཞུགས་སུ་བཅུག་སྟེ་མཆོད་པ་འབུལ། ཉིན་གཅིག་གི་རྗེས་གནང་རྟིང་མ་ལ། དེ་ནས་གཙོ་བོས་ཇི་ལྟར་སོགས་གསུམ་གྱིས་དམ་ཚིག་བཟུང༌། གཏང་རག་གི་མཎྜལ་དང༌། དེང་ནས་བརྩམས་ཏེ་ཚར་གསུམ་བྱ། འདིར་སྒྲུབ་ཐབས་བརྒྱ་རྩའི་རྗེས་གནང་ལས་བཅོམ་ལྡན་འདས་ཐུབ་པ་རྡོ་རྗེ་གདན་གྱི་རྗེས་གནང་ཞེས་སམ། རྡོ་རྗེ་གདན་ལ་སོགས་པ་ལྷ་ཁྱད་པར་དུ་འཕགས་པ་འགའ་ཞིག་གི་རྗེས་གནང་གསན་པ་ཡིན་པས་དེས་རང་གཞན་གྱི་དོན་རྒྱ་ཆེན་པོ་མཛོད། ཅེས་བྱས་ནས། བླ་མས་རྗེས་གནང་རྟིང་མའི་ལྷ་ཚོགས་སངས་རྒྱས་བྱང་སེམས་རྣམས་ལ་མཆོད་པ་གོང་མདུན་བསྐྱེད་སྒྲུབ་པའི་སྐབས་ཀྱིས་འགྲེ་ཞིང༌། འདིར་སྐབས་རྔ་བརྡུང༌། བསྟོད་པ་མཉམ་ཉིད་མི་གཡོ་མ་བྱེད། དགོས་འདོད་ཀྱི་དངོས་གྲུབ་བླང༌། ཡིག་བརྒྱ་བརྗོད། བཟོད་པར་གསོལ། ཡེ་ཤེས་པ་གཤེགས། དམ་ཚིག་པ་བསྡུ། བཀྲ་ཤིས་བརྗོད་པའི་ཚིག་སྟོན་མཆོག་དམ་པ་སོགས་ཏེ། རོལ་མོ་རྒྱ་ཆེར་མཛད་དོ། །བསྟན་པ་འདི་ལ་ལྷག་པའི་ལྷ། ཀུན༵་གྱི་རྩ་བ་འདི་ཡིན་པས། རབ་དག༵འ་སེམས་ཀྱིས་བསྒྲུབས་གྱུར་ན། སྙིང༵་པོ༵་མཆོག་གི་དངོས་གྲུབ་ཐོབ། །ཐུབ་པ་རྡོ་རྗེ་གདན་གྱི་སྒྲུབ་ཐབས་ཀྱི་ལེ་ཚན་ནོ།། །།
དམ་ཚིག་གསུམ་བཀོད་ལྷ་ལྔའི་སྒྲུབ་ཐབས།
ཨོཾ་སྭཱ་སྟི། བཅོམ་ལྡན་དམ་ཚིག་གསུམ་བཀོད་ལ། །བཏུད་ནས་སྒྲུབ་ཐབས་རྒྱ་མཚོ་ཡི། །རྗེས་གནང་ལག་ལེན་ཆིངས་ཤེས་ཕྱིར། །གང་འདིའི་སྒྲུབ་ཐབས་བཤད་པར་བྱ། །དེ་ཡང་སྟེགས་བུ་གྲུ་བཞི་པ་རས་བཟང་པོས་གཡོགས་པའི་སྟེང་དུ་མཎྜལ་རྡུལ་ཚོན་གྱི་པད་འདབ་བརྒྱད། ལྷ་གྲངས་དང་མཉམ་པ་སྐུ་མདོག་དང་མཚུངས་པའི་ཚོམ་བུ་ཅན་ནམ། བསྡུ་ན་མཎྜལ་ལ་འབྲུའི་ཚོམ་བུ་བཀོད། ཆུ་གཉིས་དང་ཉེར་སྤྱོད་ལྔ། གཏོར་མ་རྣམས་ཅི་བདེར་བསྒྲིགས། སློབ་དཔོན་གྱི་མདུན་དུ། ཏིང་ཤགས་དང༌། རྡོར་དྲིལ་གང་འོས། སློབ་མ་རྣམས་ལ་འཐོར་རྒྱུའི་མེ་ཏོག་ཏིང་ཕོར། འགྱེད་རྒྱུའི་མེ་ཏོག་ཀ་ཏོར་བ་རེ། ལས་ཀྱི་རྡོ་རྗེ་མདུན་དུ་མཎྜལ། ཆུ་དང་བཅས་པ་བཤམ། དེ་ནས་སློབ་དཔོན་གྱིས་འདི་སྐད་ཅེས། ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་ལ་སྐྱབས་སུ་མཆིའོ། །སངས་རྒྱས་ལ༴ ཆོས་ལ༴ དགེ་འདུན་ལ༴ ལན་བདུན་མཛད། སངས་རྒྱས་ཆོས་དང་ཚོགས་ཀྱི་མཆོག་བཅས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོགལན་གསུམ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིགསྡུག་བསྔལ་དང་སྡུག་བསྔལ་གྱི་རྒྱུད་དང་བྲལ་བར་གྱུར་ཅིགསྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིགཉེ་རིང་ཆགས་སྡང་དང་བྲལ་བའི་བཏང་སྙོམས་ཚད་མེད་པ་ལ་གནས་པར་གྱུར་ཅིགརང་སྐད་ཅིག་གིས་ཐུབ་པ་དམ་ཚིག་གསུམ་བཀོད་དུ་གསལ་བའི་སྙིང་གར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ། ཧྲི་:ཏྲཾ་ཡིག་གསེར་གྱི་མདོག་ཅན་དེ་
ལས་འོད་འཕྲོས། མདུན་གྱི་ནམ་མཁར་ཐུབ་པ་ཆེན་པོ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་བཛྲ་ས་མཱ་ཛཿ ཨོཾ་སརྦ་ཏ་ཐཱ་ག་ཏ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་དྷུ་པེ་ཨཱཿཧཱུཾ། ཨོཾ་བཛྲ་ཨཱ་ལོ་ཀེ་ཨཱཿཧཱུཾ། ཨོཾ་བཛྲ་གནྡྷེ་ཨཱཿཧཱུཾ། ཨོཾ་བཛྲ་ནཻ་ཝེ་ཏེ་ཨཱཿཧཱུཾ། ཨོཾ་བཛྲ་ཤཔྟ་ཨཿཧཱུཾ། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་བཟུང༌། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་བཞིན་དོན་ནི་རབ་སྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱིས། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་པཾ་ལྗང་ཁུ་ལས་སྣ་ཚོགས་པདྨ་པཾ་གྱིས་མཚན་པ་དང༌། ཨ་ལས་ཟླ་བའི་གདན་ལ་ཏྲཾ་ཡིག་གསེར་གྱི་མདོག་ཅན། དེ་ལས་འོད་འཕྲོས་འདུས་ཡོངས་སུ་གྱུར་པ་ལས། རང་ཉིད་བཅོམ་ལྡན་འདས་དམ་ཚིག་གསུམ་བཀོད་རྒྱལ་པོ་སྐུ་མདོག་གསེར་ལྟར་འབར་བ། ཚངས་པར་སྤྱོད་པའི་ཆ་ལུགས་ཅན། མཚན་དང་དཔེ་བྱད་ཡོངས་སུ་རྫོགས་པ། ཞབས་རྡོ་རྗེའི་སྐྱིལ་ཀྲུང་ཅན། ཕྱག་གཉིས་ཐུགས་ཀར་ཆོས་འཆད་ཀྱི་ཕྱག་རྒྱ་མཛད་པ། ན་བཟའ་ཆོས་གོས་རྣམ་གསུམ་གསོལ་བའོ། །སྐུའི་གཡས་སུ་རྡོ་རྗེ་འཛིན་
སེར་པོ་ཕྱག་གཉིས་ཐུགས་ཀར་ཐལ་མོ་སྦྱར་བས་རྡོ་རྗེ་སེར་པོ་འཛིན་པ། གཡོན་དུ་རྡོ་རྗེ་འཛིན་མ་སེར་མོ་གཡས་ནོར་བུ་དང༌། གཡོན་རྡོ་རྗེ་འཛིན་པ། གཡོན་གྱི་མདུན་དུ་བུ་མོ་མཐའ་ཡས་མ་ལྗང་ཁུ་གཡས་ཕྱག་འཚལ་ཚུལ་དང༌། གཡོན་པདྨ་འཛིན་པ། འཁོར་དེ་གསུམ་ཞི་བ། དར་དང་རིན་པོ་ཆེས་བརྒྱན་ཞིང་བཞུགས་པའོ། །གཡས་ཀྱི་མདུན་དུ་ཁྱེའུ་མཐའ་ཡས་པ་དམར་པོ་གཡས་གྲི་གུག་དང༌། གཡོན་ཐོད་པ་མེ་ཏོག་གིས་གང་བ་འཛིན་པ། ཁྲོ་བོའི་ཆ་བྱད་རྫོགས་ཤིང༌། སྟག་ལྤགས་དང༌། སྦྲུལ་གྱིས་བརྒྱན་པ། གཡོན་བརྐྱང་པའི། དེ་རྣམས་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཧཱུཾ་ལས་འོད་ཟེར་འཕྲོས་པས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཐུབ་པ་དམ་ཚིག་གསུམ་བཀོད་གཙོ་འཁོར་གྱི་རྣམ་པར་ཨོཾ་བཛྲ་ས་མཱ་ཛཿ ཨོཾ་བཛྲ་ཨངྐུ་ཤ་ཛཿ ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་བཛྲ་ཨ་བེ་ཤ་ཨཱཿ གཉིས་སུ་མེད་པར་ཐིམ། ཡང་སྙིང་གའི་ཧཱུཾ་ལས་འོད་འཕྲོས། དེ་བཞིན་གཤེགས་པ་རིགས་ལྔ་འཁོར་དང་བཅས་པ་བཛྲ་ས་མཱ་ཛཿ ཁྱེད་རྣམས་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་གསུང་ཞིང་དབང་བསྐུར་བའི་བཅོམ་ལྡན་འདས་ལ་རྣམ་སྣང༌། འཁོར་རྣམས་ལ་གཙོ་བོས་དབུ་བརྒྱན། ན་མཿསྟྲཻ་ཡ་དྷི་ཀཱ་ནཱཾ། ཏ་ཐཱ་ག་ཏ་ཀཱ་ནཾ། སརྦ་ཏྲ་ཨ་པྲ་ཏི་ཧ་ཏ་བཱསྟི། དྷརྨ་ཏཱ་བཱ་ལི་ནཾ། ཨཾ་ཨ་ས་མ། ས་མནྟ་ཏོ། ཨ་ནནྟ་བཱསྟེ་ཤཱ་ས་ནཱཾ། ཧ་ར་ཧ་ར། སྨ་ར་སྨ་ར་ཎ། བི་ག་ཏཱ་རཱ་ག
བུདྡྷ་དྷརྨ་ཏེ། ས་ར་ས་ར། ས་མ་བཱ་ལ། ཧ་ས་ཧ་ས། ཏྲ་ཡ་ཏྲ་ཡ། ག་ག་ན་མཧཱ་ཝ་ར་ཎ། ལཀྵ་ཎེ། ཛྭ་ལ་ཛྭ་ལ། ན་སཱ་ག་རེ་སྭཱཧཱ། ཞེས་བཟླས་ལ། མཐར་སྐུ་གསུང་ཐུགས་དང་ཡོན་ཏན་འཕྲིན་ལས་ཀྱིས། བདག་དང་སེམས་ཅན་ཐམས་ཅད་ལ་བྱིན་གྱིས་བརླབ་ཏུ་གསོལ། ཛཿཧཱུཾ་བཾ་ཧོཿ འཁོར་བཞི་པོ་རང་ལ་ཐིམ། ཨོཾ་ཨ་མྲྀ་ཏེ་ཧཱུཾ་ཕཊ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་ཞུ་བ་ལས་བྱུང་བའི་མཆོད་ཡོན། ཞབས་བསིལ། མེ་ཏོགབདུག་སྤོས། མར་མེ། དྲི། ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ། འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལྟ་བུ་དཔག་ཏུ་མེད་པར་གྱུར། ཨོཾ་ཨརྒྷཾ་ཨཱཿཧཱུཾ། པཱདྱཾ་ཨཱཿཧཱུཾ། ཨོཾ་བཛྲ་པུཥྤེ་ཨཱཿཧཱུཾ་ནས། ཤཔྟ་ཨཱཿཧཱུཾ། ཨོཾ་བཛྲ་སྥ་ར་ཎཱ་ཁཾ། ཨོཾ་སྭ་བྷཱ་ཝ་ཤུདྡྷ་སོགས། སྟོང་པའི་ངང་ལས་དྲིའི་མཎྜལ་གྱི་དབུས་སུ་པཾ་ལྗང་ཁུ་ཞེས་པ་ནས། མདུན་བསྐྱེད་ཡིན་པས་བདག་ཉིད་མི་ཟེར། ཁྱེད་ཀྱིས་འདི་ལ་དབང་བསྐུར་ཟེར་ནས་འདོན་པ་སྤོ། གཞན་དབུ་བརྒྱན་པའི་བར་བདག་བསྐྱེད་དང་འདྲ་བར་མཛད། ཨོཾ་སརྦ་ཏ་ཐཱ་ག་ཏ་ས་པཱ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། ནས། ཨོཾ་སརྦ་ཏ་ཐཱ་ག་ཏ་ས་པཱ་རི་ཝཱ་ར་ཤཔྟ་ཨཱཿཧཱུཾ་གིས་བར་དང༌། མགོན་པོ་ཐུགས་རྗེ་ཆེ་ལྡན་པ་སོགས་དང༌། གསང་སྔགས་བདག་དང་གཟུངས་སྔགས་རྒྱལ། །རིག་རྒྱལ་རིགས་ཀྱི་ལྷ་མོ་སྟེ། །བཅོམ་ལྡན་དམ་ཚིག་གསུམ་བཀོད་རྒྱལ། །མཉེས་པར་མཛད་ལ་ཕྱག་འཚལ་ལོ། །
ཞེས་པས་བསྟོད། བཟླས་པ་བདུན་ཙམ་གྱིས་མཉེས་པར་བྱས། ཨོཾ་ཨཱཿཧཱུཾ་གིས་གཏོར་མ་བྱིན་གྱིས་བརླབས། ཨོཾ་སརྦ་ཏ་ཐཱ་ག་ཏ་ས་པཱ་རི་ཝཱ་ར་ཨ་ཀཱ་རོ་གསུམ་གྱིས་ཕུལ། བཅོམ་ལྡན་འདས་བདག་དང་སེམས་ཅན་ཐམས་ཅད་ལ་དངོས་གྲུབ་མ་ལུས་པ་སྩལ་དུ་གསོལ། ཞེས་བརྗོད། དེ་ནས་མཆོད་གཡོག་པ་གཅིག་གིས་ལས་ཐམས་ཅད་ལ་ཁྲུས་ཀྱིས་ཕྱིར་ཆབ་བཏང༌། ནང་གི་མཆོད་གཡོག་པས་མེ་ཏོག་འགྱེད་བསྡུད་སྐབས་ཆ་གཉིས་བྱས་ལ། ཕྱེད་སློབ་མ་སོ་སོས་བཟུང་སྟེ། གསོལ་བཏབ་ཀྱི་དུས་སུ་ཐལ་མོ་སྟོང་པར་མ་སོང་བ་བྱེད། ཕྱེད་བསྡུས་ལ་མཎྜལ་ལ་ཕུལ། གྲལ་དང་མེ་ཏོག་བཀྲམ་བསྡུ་ཟིན་པ་དང༌། འདི་སྐད་ཅེས། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་གྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་དམ་པའི་ཆོས་ཟབ་མོ་གསན་དགོངས་པ་བྱང་ཆུབ་ཀྱི་མཆོག་ཏུ་སེམས་བསྐྱེད་པ་གསལ་བཏབ་ནས་གསན་པར་ཞུ། འདིར་རྒྱུད་སྡེ་བཞི་ལས་སྒྲུབ་ཐབས་དུ་མ་གསུངས་པ་རྣམས་ལས་རྒྱ་གར་གྱི་སློབ་དཔོན་སོ་སོས་སྒྲུབ་ཐབས་མཛད་པ་རྣམས་ཕྱོགས་གཅིག་ཏུ་བསྡུས་པའི་སྒྲུབ་ཐབས་རྒྱས་འབྲིང་བསྡུས་གསུམ་བཞུགས་པ་ཡིན་ལ། དེ་ལས་རྒྱས་པ་སློབ་དཔོན་ཆེན་པོ་ཨ་བྷ་ཡཱ་ཀ་རས་བསྡུས་པ་སྒྲུབ་ཐབས་ཀུན་ལས་བཏུས་སམ། སྒྲུབ་ཐབས་རྒྱ་མཚོར་གྲགས་པ་འདི་ལ། ཆོས་ཚན་ཉིས་བརྒྱ་བཞི་བཅུ་ལྷག་བཅས་ཡོད་པ་ལས། ཐོག་མར་གྱུར་པ་དམ་ཚིག་གསུམ་བཀོད་ཀྱི་རྗེས་གནང་ལ་ངེད་ཀྱིས་བྱ་བ་རྣམས་སྔོན་དུ་སོང་བ། རྗེས་གནང་ཞུ་བའི་ཡོན་དུ་མཎྜལ་ཕུལ་མཛོད། སློབ་མས་འདིར་མཎྜལ་ཕུལ། ཡང་བླ་མས་
མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་གསུངས་ཤིགརྡོ་རྗེ་འཛིན་པ་དགོངས་སུ་གསོལ། །བདག་ནི་འགྲོ་ལ་ཕན་དོན་དུ། །གཙོ་ཆེན་ཁྱེད་ལ་གསོལ་འདེབས་ཀྱི། །མ་ལུས་རྗེས་གནང་སྩལ་དུ་གསོལ། །ལན་གསུམ། རྒྱུད་དག་པར་བྱ་བའི་ཕྱིར་མདུན་བསྐྱེད་ཀྱི་ལྷ་དང་སངས་རྒྱས་བྱང་སེམས་རྣམས་ཀྱི་དྲུང་དུ་སྐྱབས་གསུམ་སྔོན་དུ་འགྲོ་བས་བྱང་ཆུབ་ཀྱི་སེམས་བཟུང་སྙམ་པས་འདིའི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི། །སོགས་གསུམ་དང༌། ཁྱད་པར་དུ་ཐུབ་པ་དམ་ཚིག་གསུམ་བཀོད་ཀྱི་རྗེས་གནང་སྩལ་དུ་གསོལ་སྙམ་པའི་འདུན་པས་འདིའི་རྗེས་ཟློས་ཀྱང་གསུངས་ཤིགསློབ་དཔོན་དགོངས་སུ་གསོལ། བདག་ལ་ཐུབ་པ་དམ་ཚིག་གསུམ་བཀོད་ཀྱི་རྗེས་གནང་མ་ལུས་པ་སྩལ་དུ་གསོལ། ཞེས་ལན་གསུམ་གྱི་གསོལ་བ་བཏབ་ནས། ད་རྗེས་གནང་གི་གཞི་དགོད་པའི་སླད་དུ་དམིགས་པ་འདི་བཞིན་མཛད་པ་ཞུ། ཨོཾ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཕྱི་ནང་གི་དངོས་པོ་ཐམས་ཅད་མི་དམིགས་ཏེ་སྟོང་པ་ཉིད་དུ་གྱུར་པའི་ངང་ལས། པཾ་ལྗང་ཁུ་ལ་སོགས་དང༌། ཁྱེད་རང་རྣམས་བཅོམ་ལྡན་འདས་ཐུབ་པ་ཞེས་སོགས་ནས། ཐུགས་ཀར་ཧཱུཾ་ཞེས་པའི་བར་གཙོ་འཁོར་ལྔ་བདག་བསྐྱེད་བཞིན་གསལ་བཏབ་བོ། །དེ་རྗེས་གནང་དངོས་གཞི་ལ་གསུམ་ལས། དང་པོའི་སྐུའི་རྗེས་གནང་ནི། དེ་ནས་སློབ་དཔོན་ཡང་རང་གིས་བསྒོམ་པ་དང་འདྲ་བའི་ཐུབ་པ་དམ་ཚིག་གསུམ་བཀོད་དངོས་ཡིན་སྙམ་པའི་མོས་གུས་བྱས་པས་
སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ལྷའི་ཐུགས་བརྒྱུད་བསྐུལ། དེའི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱི་ཐུགས་རྒྱུད་བསྐུལ་བས། སློབ་དཔོན་དང་མདུན་བསྐྱེད་ཀྱི་ལྷ་དང་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀ་ནས་ཐུབ་པ་དམ་ཚིག་གསུམ་བཀོད་འཁོར་དང་བཅས་པའི་སྐུ་ཆེ་ཆུང་མ་ངེས་པ་དཔག་ཏུ་མེད་པ་བྱོན། ཁྱོད་རང་རྣམས་ཀྱི་སྤྱི་གཙུག་ལ་སོགས་པ་དང་བ་སྤུའི་བུ་ག་རྣམས་ནས་ཆར་བབས་པ་བཞིན་དུ་སིབ་སིབ་ཐིམ་པར་མོས་པ་མཛོད། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། དྲིལ་བུ་དང་ཏིང་ཤག་འཁྲོལ། རོལ་མོ་བྱ། མངོན་རྟོགས་ཀྱི་དབང་བསྐུར་བའི་དམིགས་པ་དེ་ཕོག་ལ། དབུ་རྒྱན་གྱི་བར་བརྗོད་དོ། །གཉིས་པ་གསུང་གི་རྗེས་གནང་ནི། སློབ་དཔོན་གྱི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་སེར་པོ། དེ་ལས་སྔགས་ཀྱི་ཕྲེང་བ་བྱུང༌། སློབ་དཔོན་གྱི་ཁ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། ཐུགས་ཀར་ཟླ་བའི་སྟེང་དུ་ཧཱུཾ་སེར་པོ་གནས་པ་ལ་ཐིམ། དེའི་དུས་སུ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མཁྱེན་བརྩེ་ནུས་མཐུ་ཐམས་ཅད་འོད་ཟེར་གྱི་རྣམ་པར་སྔགས་ཕྲེང་དང་ལྷན་ཅིག་ཞལ་དུ་ཞུགས། སྙིང་གའི་ཧཱུཾ་ལ་ཐིམ་པས་མོས་པ་མཛོད་ལ། སྔགས་འདིའི་རྗེས་ཟློས་ལན་གསུམ་གསུངས་ཤིག ན་མཿསྟྲཻ་སོགས་བརྗོད། དང་པོས་བྱིན་གྱིས་བརླབས། གཉིས་པས་དབྱེར་མེད་དུ་འདྲེས། གསུམ་པས་བརྟན་པར་བྱས་པའི་མོས་པ་
མཛོད། སློབ་དཔོན་ལ་མེ་ཏོག་འཐོར་བཞིན་དུ་འདིའི་རྗེས་ཟློས་མཛོད་ཅིགབཅོམ་ལྡན་བདག་གིས་བཟུང་ལགས་ཀྱི། །བདག་ལ་འགོ་བར་མཛོད་དུ་གསོལ། །ཅེས་ལན་གསུམ། དེ་ལྟར་ཕུལ་བའི་མེ་ཏོག་དེ་ཉིད་སླར་ཡང་བྱིན་གྱིས་བརླབས་ཏེ། ཁྱེད་རང་གི་སྤྱི་བོར་ཕུལ་བས་མོས་པ་མཛོད་ཅིགསློབ་དཔོན་གྱིས་མེ་ཏོག་གཏོར་ཞིང༌། བཅོམ་ལྡན་འདི་ལ་སྩལ་ལགས་ཀྱི། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་སྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །རིག་པ་འཛིན་པ་འདི་རྣམས་ལ། །བཅོམ་ལྡན་འདས་ཐུབ་པ་དམ་ཚིག་གསུམ་བཀོད་འཁོར་དང་བཅས་པའི་སྐུ་གསུང་ཐུགས་ཀྱི་བྱིན་རླབས་མ་ལུས་པ་འཇུག་པར་གྱུར་ཅིག །གསུམ་པ་ཐུགས་ཀྱི་རྗེས་གནང་ནི། མདུན་བསྐྱེད་ཀྱི་ལྷ་ལ་མོས་གུས་དུང་དུང་བར་དང༌། བདག་གི་རྒྱུད་བྱིན་གྱིས་རློབ་ཏུ་གསོལ་སྙམ་པ་མཛད་པས། མདུན་གྱི་ལྷའི་ཐུགས་ཀ་ནས། ཕྱག་མཚན་གྱི་ཚོགས་དཔག་ཏུ་མེད་པ་རྒྱངས་ཏེ་བྱོན། ཁྱེད་རང་རྣམས་ཀྱི་སྙིང་གའི་ས་བོན་དང་དབྱེར་མེད་དུ་འདྲེས། རྒྱུད་བྱིན་གྱིས་བརླབས་པའི་མོས་པ་མཛོད། དེ་ནས་འདིའི་རྒྱ་གཞུང་སྒྲུབ་ཐབས་ཀྱི་ལུང་ཡང་སྤྲོ་ན་བྱའོ། །དེ་དག་ནི་ཐུབ་པ་དམ་ཚིག་གསུམ་བཀོད་ཀྱི་རྗེས་གནང་ལུང་དང་བཅས་པའོ། །དེ་ནས། གཙོ་བོས་ཇི་ལྟར་སོགས་གསུམ་གྱིས་དམ་ཚིག་བཟུང༌། གཏང་རག་གི་མཎྜལ་དང༌། དེང་ནས་བརྩམས་ཏེ་ཚར་གསུམ་བྱ། འདི་ཉིད་གཅིག་པུ་བྱེད་པ་དང༌། རྗེས་གནང་
གཞན་དང་སྦྲེལ་ཚུལ་སོགས་ནི། སྒྲུབ་ཐབས་བརྒྱ་རྩའི་སྐབས་དང་འདྲ་བ་ཡིན་པས། ཐུབ་པ་རྡོ་རྗེ་གདན་གྱི་སྐབས་སུ་བཤད་པ་ལས་འདིར་རིགས་བསྒྲེས་ཏེ་ཤེས་པར་བྱའོ། །རྗེས་ཆོག་ལ། མཆོད་བསྟོད་མདུན་བསྐྱེད་བསྒྲུབ་པའི་སྐབས་ཀྱིས་འགྲེ་ཞིང༌། འདི་སྐབས་རྔ་བརྡུང༌། བསྟོད་པ་མཉམ་ཉིད་མི་གཡོ་མ་བྱེད། དགོས་འདོད་ཀྱི་དངོས་གྲུབ་བླང༌། ཡིག་བརྒྱ་བརྗོད། བཟོད་པར་གསོལ། ཡེ་ཤེས་པ་གཤེགས་དམ་ཚིག་པ་བསྡུ། བཀྲ་ཤིས་བརྗོད་པའི་ཚིག་སྟོན་མཆོག་དམ་པ་སོགས་ཏེ། རོལ་མོ་རྒྱ་ཆེར་མཛོད། དཀྱིལ་འཁོར་ཀུན༵་ཏུ་དབང་ཐོབ་ཅིང༌། །ཅི་དག༵འ་སྤྱོད་པས་འགྲུབ་འགྱུར་སོགས། །སྙིང༵་པོ༵་ཡིག་བརྒྱ་འདིའི་ཕན་ཡོན། །མཐའ་ཡས་རྒྱུད་ལས་གསུངས་པ་ལགས། །དམ་ཚིག་གསུམ་བཀོད་ལྷ་ལྔའི་སྒྲུབ་ཐབས་ཀྱི་ལེ་ཚན་ནོ།། །།
ཐུབ་པ་གནས་བརྟན་བཅུ་དྲུག་དང་བཅས་པའི་སྒྲུབ་ཐབས།
ཨོཾ་སྭཱ་སྟི། སྟོན་པ་གཽ་ཏམ་ལྷག་པའི་ལྷ། །འཁོར་དང་བཅས་པ་ལ་བཏུད་ནས། །སངས་རྒྱས་བསྟན་པ་སྤེལ་བྱེད་ཀྱི། །ཐབས་མཆོག་སྒྲུབ་ཐབས་བྲི་བར་བྱ། །སྒོམ་དོན་དང་མཐུན་པའི་དཀྱིལ་འཁོར་རམ། དྲི་བཟང་གི་མཎྜལ་ཚོམ་བུ་ཅན་བཀོད་ཀྱང་རུང་སྟེ། མཆོད་པ་རྣམས་སྤྱི་དང་མཐུན་པར་བྱིན་གྱིས་བརླབས་པའམ། མཆོད་པའི་སྤྲིན་གྱི་གཟུངས་ཀྱིས་བྱིན་གྱིས་བརླབས། བདག་བསྐྱེད་ཡི་དམ་གང་ཡང་རུང་བ་ཞིག་གི་རྣལ་འབྱོར་ལ་གནས་པའམ། འདིའི་རང་ལུགས་ལ་བདག་བསྐྱེད་མེད་ཀྱང་ཆོག་སྟེ། མདུན་བསྐྱེད་ཀྱི་གཞི་སྟོང་པའི་ངང་ལས། ཞིང་ཁམས་རྣམ་པར་དག་པ་རྒྱན་ཐམས་ཅད་ཀྱིས་རྣམ་པར་བརྒྱན་པ། དབུས་སུ་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་
གྲུ་བཞི་སྒོ་བཞི་པ། རིན་པོ་ཆེ་སྣ་ཚོགས་པའི་ཁམས་ལས་གྲུབ་ཅིང༌། ཡོ་བྱད་སྣ་ཚོགས་པས་ཡོངས་སུ་གང་བ། དེའི་དབུས་སུ་རིན་པོ་ཆེའི་ཁྲི་པདྨ་དང་ཟླ་བའི་གདན་དང་བཅས་པ། མཐའ་སྐོར་དུ་པདྨའི་གདན་བཅུ་དྲུག །ཤར་སྒོའི་ནང་དང་སྒོ་བཞིར་རིན་པོ་ཆེའི་གདན་དང་བཅས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བ་དང་མཚུངས་པའི་མཆོད་སྤྲིན་བསམ་གྱིས་མི་ཁྱབ་པ་དང་བཅས་པ་འབྱུང་བར་གྱུར་ཅིགཅེས་ལན་གསུམ་བརྗོད། སྤོས་བཏུལ་ཤིང༌། རོལ་མོས་སྒྲ་དང་བཅས་ཏེ། མ་ལུས་སེམས་ཅན་སོགས་ཀྱི་མཐར། འགྲོ་བའི་མགོན་པོ་ཤཱཀྱ་སེངྒེ་ཡིས། །སངས་རྒྱས་བསྟན་པ་གང་གི་ཕྱག་ཏུ་བཞག །གསུང་རབ་རིན་ཆེན་སྒྲོམ་གྱི་ཁ་འབྱེད་པ། །ཆོས་སྐྱོང་དགྲ་བཅོམ་ཆེན་པོ་བཞུགས་སུ་འཚལ། །དམ་ཆོས་སྤེལ་བའི་སླད་དུ་སྤྱན་འདྲེན་གྱི། །འགྲོ་བའི་དོན་དུ་མཆོད་ཕྱིར་གཤེགས་སུ་གསོལ། །སྤངས་དང་ཡེ་ཤེས་ཕུན་ཚོགས་སངས་རྒྱས་ཏེ། །གདུལ་བྱའི་དབང་གིས་ཉན་ཐོས་ཚུལ་འཛིན་ཞིང༌། ཁྱད་པར་ཅན་གྱི་འཕྲིན་ལས་ཆོས་སྐྱོང་བའི། །གནས་བརྟན་བཅུ་དྲུག་འདིར་བྱོན་གདན་ལ་བཞུགས། །ཞེས་བརྗོད་པས་རང་བཞིན་གྱི་གནས་ནས། ཐུབ་པ་གནས་བརྟན་ཆེན་པོ་བཅུ་དྲུག་གི་འཁོར་དང་བཅས་པ་ཕྱི་བཞིན་འབྲང་བ་དགེ་བསྙེན་དྷརྨཱ་པཱ་ལ། རྒྱལ་པོ་ཆེན་པོ་སྡེ་བཞིའི་ཚོགས་དང་བཅས་པ་རང་རང་གི་གདན་ལ་བཞུགས་པར་གྱུར། དབུས་སུ་བཅོམ་ལྡན་འདས་དེ་བཞིན་གཤེགས་པ་དཔལ་རྒྱལ་བ་ཤཱཀྱ་ཐུབ་པ་སྐུ་གསེར་མདོག་གཡས་ས་གནོན་དང༌། གཡོན་
མཉམ་བཞག་གི་ཕྱག་རྒྱ་མཛད་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། ཕྱི་བསྐོར་གྱི་པདྨ་རྣམས་ལ་ཤར་ནས་རིམ་པ་བཞིན་དུ་གཡས་སྐོར་གྱིས། ཡན་ལག་འབྱུང་སྤོས་ཕོར་དང་རྔ་ཡབ། མ་ཕམ་པ་མཉམ་བཞག །ནགས་ན་གནས་སྡིགས་མཛུབ་དང་རྔ་ཡབ། དུས་ལྡན་གསེར་གྱི་རྣ་བསྐོར། རྡོ་རྗེ་མོའི་བུ་སྡིགས་མཛུབ་དང་རྔ་ཡབ། བཟང་པོ་ཆོས་འཆད་མཉམ་བཞགགསེར་བེའུ་རིན་པོ་ཆེའི་ཞགས་པ། བྷ་ར་དྷྭ་ཛ་གསེར་ཅན་མཉམ་བཞགབ་ཀུ་ལ་ནེའུ་ལེ། སྒྲ་གཅན་འཛིན་རིན་པོ་ཆེའི་དཔྲོག་ཞུ། ལམ་ཕྲན་བརྟན་མཉམ་བཞགབྷ་ར་དྷྭ་ཛ་བསོད་སྙོམས་ལེན་གླེགས་བམ་ལྷུང་བཟེད། ལམ་བརྟན་ཆོས་འཆད་གླེགས་བམ། ཀླུའི་སྡེ་བུམ་པ་མཁར་བསིལ། སྦེད་བྱེད་གླེགས་བམ། མི་ཕྱེད་པ་བྱང་ཆུབ་མཆོད་རྟེན་འཛིན་པ་རྣམས་དགྲ་བཅོམ་གནས་བརྟན་དབང་པོ་དུལ་བའི་ཆ་ལུགས་ཅན། ཤར་སྒོའི་ནང་དུ་དགེ་བསྙེན་ཆེན་པོ་ཆོས་ཉིད་རྔ་ཡབ་དང་བུམ་པ་འཛིན་ཞིང༌། དབུ་སྐྲ་ཐོར་ཅོག་ཅན། གླེགས་བམ་གྱི་ཁུར་པོ་བསྣམས་པ། སངས་རྒྱས་སྣང་བ་མཐའ་ཡས་ལ་གཟིགས་ཤིང༌། པུས་མོ་གཡས་པ་ལས་སྟག་སྤྲུལ་བ། ཤར་སྒོར་ཡུལ་འཁོར་སྲུང་དཀར་པོ་པི་ཝང་འཛིན་པ། ལྷོ་སྒོར་འཕགས་སྐྱེས་པོ་སྔོན་པོ་རལ་གྲི་འཛིན་པ། ནུབ་སྒོར་མིག་མི་བཟང་དམར་པོ་སྦྲུལ་ཞགས་དང་མཆོད་རྟེན་འཛིན་པ། བྱང་སྒོར་རྣམ་ཐོས་སྲས་སེར་པོ་ཡིད་བཞིན་གྱི་རྒྱལ་མཚན་དང་ནེའུ་ལེ་འཛིན་པ་རྣམས་རང་རང་གི་འཁོར་བསམ་གྱིས་མི་ཁྱབ་པ་དང༌། བཅས་ཏེ་
བཞུགས་པར་གྱུར། ཨརྒྷཾ་ནས་ཤཔྟའི་བར་གྱིས་མཆོད། མཚུངས་མེད་ལྟ་བས་མི་ངོམས་ཞིང༌། །ཞེས་སོགས་ཀྱི་བསྟོད་པས་བསྟོད། ཨོཾ་མུ་ནེ་མུ་ནེ་མཧཱ་མུ་ན་ཡེ་སྭཱཧཱ། ཞེས་ཅི་ནུས་སུ་བཟླ། སྤྲོ་ན་རེ་རེ་ཞིང་མཆོད་པ་དང་བསྟོད་པ་དང༌། ཚིག་ལྷུག་པའི་གསོལ་འདེབས་བྱ་ཞིང༌། གཙོ་བོའི་སྔགས་ཉིད་བཟླ་བ་ཡིན་ནོ། །ཐུན་གྱི་མཐར། རྒྱལ་ཆེན་བཞི་ལ་གཏོར་མ་སྤྱི་དང་མཐུན་པར་བསྔོ། ཆ་གསུམ་དང་གཞི་བདག་གཏོར་མ་ཡང་སྤྲོ་ན་བྱ། རྒྱས་པ་ལ་མོས་ཤིང་ཤེས་ན། གནས་བརྟན་སྒྲུབ་ཡིག་ལས་འབྱུང་བའི་ཡན་ལག་བདུན་པ་རྒྱས་པ་རྣམས་ཀྱང་བྱ་ཞིང༌། བསྡུ་ན་བཟང་སྤྱོད་ཀྱི་ཡན་ལག་བདུན་པ་ཉིད་ཚར་གསུམ་ལ་སོགས་པ་བྱའོ། །འདིར་རིག་གཏད་བྱེད་པར་འདོད་པས་གཏོར་འབུལ་ཡན་ཆད་སོང་བའི་མཚམས་སུ་སློབ་མས་མཎྜལ་ཕུལ། ཐུབ་པ་མཆོག་དང་འཕགས་པའི་ཚོགས། །འགྲོ་བའི་མུན་སེལ་དགྲ་བཅོམ་གྱི། །ཚོགས་ལའང་བདག་ནི་སྐྱབས་སུ་མཆི། །རྗེས་སུ་གནང་བ་སྩལ་དུ་གསོལ། །ཞེས་ལན་གསུམ་གསོལ་བ་བཏབ། མདུན་བསྐྱེད་གསལ་བཏབ་ལ་བཟང་སྤྱོད་ཀྱི་ཡན་ལག་བདུན་པ་ཚར་གསུམ་བྱ། སྐྱབས་སེམས་རྒྱས་བསྡུས་གང་རུང་དང༌། གསོལ་འདེབས་ཚིག་ལྷུག་པས་གསོལ་བ་འདེབས་སུ་བཅུགསློབ་མ་ཐུབ་པའི་དབང་པོར་སྐད་ཅིག་གིས་བསྐྱེད་ལ། ལྷ་ཚོགས་ཐམས་ཅད་ཀྱི་ཐུགས་ཀ་ནས་སྔགས་འཕྲེང་སྤྲོ་བའི་བཟླས་ལུང་སྤྱི་དང་མཐུན་པར་སྦྱིན། དེ་ཙམ་གྱིས་དོན་འགྲུབ་པ་ཡིན་ཏེ། རྗེས་ཀྱི་བྱ་བ་རྣམས་སྤྱི་དང་འདྲ་བ་ལས། སངས་རྒྱས་སྤྲུལ་པ་དགྲ་བཅོམ་འཕགས་པའི་ཚོགས། །ཞེས་པ་ནས། གནས་བརྟན་ཆེན་པོ་རྣམས་ཀྱི་བཀྲ་ཤིས་
ཤོག་གི་བར་ངེས་པར་འདོན་ནོ། །ཀུན༵་ཏུ་བྱིན་རླབས་ཆེར་གྲགས་པ། །མཆོག་ཏུ་དག༵འ་བས་རབ་ཞུས་ཏེ། །གསོལ་འདེབས་སྙིང༵་པོ༵ར་བྱས་ན་ནི། བྱིན་རླབས་རྒྱ་ཆེར་འཕེལ་བར་འགྱུར། །ཐུབ་པ་གནས་བརྟན་བཅུ་དྲུག་དང་བཅས་པའི་སྒྲུབ་ཐབས་ཀྱི་ལེ་ཚན་ནོ།། །།
བཀའ་གདམས་ལྷ་བཞི་ལས་དེ་བཞིན་གཤེགས་པ་ཤཱཀྱ་ཐུབ་པའི་སྒྲུབ་ཐབས།
ཨོཾ་སྭཱ་སྟི། སངས་རྒྱས་ཀུན་ལས་ཆེས་ལྷག་པའི། །ལྷག་བསམ་སྨོན་ལམ་དགེ་བ་ཅན། །ཤཱཀྱ་སེངྒེ་ལ་བཏུད་ནས། །དེའི་སྒྲུབ་ཐབས་བྲི་བར་བྱ། །ཡན་ལག་བདུན་པ་དང༌། སྐྱབས་འགྲོ་སེམས་བསྐྱེད་རྣམས་སྔོན་དུ་བཏང༌། སྟོང་པའི་ངང་ལས་རང་གི་སྙིང་གར་ཨ་ལས་ཟླ་བའི་སྟེང་དུ་ཧཱུཾ་སེར་པོའི་འོད་ཀྱིས་ལུས་གང༌། རང་ཉིད་ཐུབ་པའི་དབང་པོའི་སྐུར་གྱུར་པ་ནི། སྐུ་མདོག་གསེར་བཙོ་མ་ལྟ་བུ་ཕྱག་གཡས་ས་གནོན་དང༌། གཡོན་མཉམ་བཞག་མཛད་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། རབ་ཏུ་བྱུང་པའི་ཆ་ལུགས་ཅན། མཚན་དང་དཔེ་བྱད་ཡོངས་སུ་རྫོགས་ཤིང༌། ཆོས་གོས་རྣམ་གསུམ་གསོལ་བ། འོད་ཟེར་དཔག་ཏུ་མེད་པ་འཕྲོ་ཞིང༌། ཐུགས་མཉམ་པར་བཞག་པའི་བདག་ཉིད་དུ་གྱུར། ཐུགས་ཀར་ཟླ་བ་ལ་གནས་པའི་ཧཱུཾ། དེ་ལས་འོད་འཕྲོས་ཐུབ་པ་ཡེ་ཤེས་སེམས་དཔའི་ལྷ་ཚོགས་བཛྲ་ས་མཱ་ཛཿ ཡིད་ཀྱིས་ཕྱག་མཆོད་བྱ། ཛཿཧཱུཾ་བཾ་ཧོཿ སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་དཀར་ཧཱུཾ་སྔོན་པོ། ས་བོན་གྱི་མཐར་སྔགས་ཀྱི་འཕྲེང་བས་བསྐོར་བར་བསྒོམས་ལ། ཨོཾ་མུ་ནེ་མུ་ནེ་མཧཱ་མུ་ན་ཡེ་སྭཱཧཱ། ཞེས་ཅི་ནུས་སུ་བཟླ། ཐུན་འཇོག་ཁར་ཡེ་ཤེས་པ་མདུན་དུ་
བཞུགས་པ་ལ། ཨརྒྷཾ་ནས་ཤཔྟའི་བར་གྱིས་མཆོད། འདོད་དོན་གསོལ་པ་གདབ། དགེ་བ་བསྔོ། ཨོཾ་མུཿ ཞེས་གཤེགས་སུ་གསོལ། རང་དམ་ཚིག་པའི་ང་རྒྱལ་གྱིས་སྤྱོད་ལམ་བྱ།འདིའི་ལུང་འབོགས་ཚུལ་ནི། ཐུབ་པའི་སྐུ་གཟུགས་བྲིས་འབུར་གང་རུང་ཞིག་གི་མདུན་དུ་མཎྜལ་ལ་མེ་ཏོག་གིས་ཚོམ་བུ་བཀོད། མཆོད་པ་རྒྱ་ཆེར་བཤམས། ཨོཾ་ལས་བྱུང་བའི་མཆོད་པར་མོས། ཨོཾ་ན་མོ་བྷ་ག་ཝ་ཏེ། བཛྲ་སཱ་ར་པྲ་མརྡ་ནཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ཨོཾ་བཛྲེ་བཛྲེ། མཧཱ་བཛྲེ། མ་ཧཱ་བིདྱེ་བཛྲེ། མཧཱ་ཏེ་ཛ་བཛྲེ། མཧཱ་བོ་དྷི་ཙིཏྟ་བཛྲེ། མཧཱ་བོ་དྷི་མནྡྲོ་པ་སཾ་ཀྲ་མ་ཎེ་སརྦ་ཀརྨ་ཨ་བ་ར་ཎཻ་བི་ཤོ་དྷ་ནི་སྭཱཧཱ། ཞེས་མཆོད་སྤྲིན་གྱིས་གཟུངས་བཟླས། བདག་བསྐྱེད་མདུན་བསྐྱེད་མཆོད་བསྟོད་རྣམས་བྱ། སློབ་མས་མཎྜལ་འབུལ། བཟང་སྤྱོད་ཀྱི་ཡན་ལག་བདུན་པ་བྱ། སྐྱབས་འགྲོ་སེམས་བསྐྱེད་སྔོན་དུ་འགྲོ་བས། སྒྲུབ་ཐབས་ལྟར་སྒོམ་ལུང་དང་བཟླས་ལུང་འབོགས་པ་ཉིད་ཡིན་ན། ལྷ་བཞིའི་མི་གཡོ་བ་ལ་བཟླས་ལུང་འབོགས་པ་དང༌། རྗེས་གནང་གཉིས་ཀ་ཡོད་ཅིང༌། གཞན་གསུམ་ལ་ཐུན་མོང་མ་ཡིན་པའི་བཟླས་ལུང་འབོགས་ཚུལ་ཙམ་ལས་མེད་ཀྱང༌། ཕྱིས་སྒྲུབ་ཐབས་བརྒྱ་རྩ་རྒྱ་མཚོ་སོགས་དང་མཐུན་པའི་རྗེས་གནང་བྱེད་པ་ནི། སྙིང་པོས་དབེན་པར་ཤེས་སོ། །ཐུབ་པ་སངས་རྒྱས་ཀུན༵་འདུས་ཀྱི། །སྒྲུབ་ཐབས་ཉམས་ལེན་རབ་དག༵འ་བ། །སྙིང༵་ནས་བཀའ་གདམས་ལ་མོས་ན། །ནན་ཏན་ཆེན་པོ༵ས་འདི་སྒྲུབས་ཤིག །བཀའ་གདམས་ལྷ་བཞི་ལས་དེ་བཞིན་གཤེགས་པ་ཤཱཀྱ་ཐུབ་པའི་སྒྲུབ་ཐབས་ཀྱི་ལེན་ཚན་ནོ།། །།
བཅོམ་ལྡན་འདས་སྨན་བླའི་སྒྲུབ་ཐབས།
ཨོཾ་སྭཱ་སྟི། རྒྱལ་བ་སྨན་གྱི་དབང་པོ་ལ། །བཏུད་ནས་དེའི་སྒྲུབ་ཐབས་ནི། །ཨ་ཏི་ཤ་ཡི་མན་ངག་བཞིན། །མདོར་བསྡུས་ཙམ་ཞིག་གསལ་པོར་བྲི། །སྐྱབས་སེམས་སྔོན་དུ་སོང་ནས། རང་གི་སྙིང་གར་ཨ་ལས་ཟླ་བའི་སྟེང་དུ་ཨོཾ་སྔོན་པོའི་འོད་ཀྱི་འཕྲོ་འདུ་ལས། རང་སྐད་ཅིག་གིས་བཅོམ་ལྡན་འདས་སྨན་གྱི་བླ་བཻཌཱུཪྱ་འོད་ཀྱི་རྒྱལ་པོ་སྐུ་མདོག་མཐིང་ག་རབ་ཏུ་བྱུང་བའི་ཆ་ལུགས་ཅན། ཕྱག་གཡས་མཆོག་སྦྱིན་གྱི་མཐིལ་ན་ཨ་རུ་ར་རྒྱས་པ་འཛིན་པ། གཡོན་མཉམ་བཞག་གི་སྟེང་ན་བཻཌཱུཪྱའི་ལྷུང་བཟེད་བདུད་རྩིས་གང་བ་བསྣམས་པ། དར་དམར་པོས་ཆོས་གོས་རྣམ་གསུམ་གསོལ་བ། པད་ཟླ་ལ་རྡོ་རྗེའི་སྐྱིལ་ཀྲུང་གིས་བཞུགས་པ། མཚན་དཔེ་ཡོངས་སུ་རྫོགས་པའི་སྐུར་གྱུར། ཐུགས་ཀར་ཟླ་བ་ཨོཾ་སྔོན་པོ། དེ་ལས་འོད་ཟེར་ལྕགས་ཀྱུ་དང་ཞགས་པ་ལྟ་བུ་སྤྲོས། ཡེ་ཤེས་པ་བཛྲ་ས་མཱ་ཛཿ ཛཿཧཱུཾ་བཾ་ཧོཿ གཡས་སུ་ཨ་ལས་བྱང་སེམས་ཟླ་བ་ལྟར་སྣང་བྱེད་དཀར་པོ། གཡོན་དུ་མཾ་ལས་ཉི་མ་ལྟར་སྣང་བྱེད་དམར་སེར། གཉིས་ཀའང་ཐལ་མོ་སྦྱར་བ་རྒྱན་ཐམས་ཅད་ཀྱིས་བརྒྱན་པའོ། །རང་གི་སྤྱི་བོར་ཨོཾ། མགྲིན་པ་ཨཱཿ ཐུགས་ཀར་ཧཱུཾ། ན་མོ་བྷ་ག་ཝ་ཏེ། བྷཻ་ཥ་ཛྱེ་གུ་རུ་བཻཌཱུཪྱ། པྲ་བྷ་རཱ་ཛ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ཨོཾ་བྷཻ་ཥ་ཛྱེ་བྷཻ་ཥ་ཛྱེ། མཧཱ་བྷཻ་ཥ་ཛྱེ། ས་མུད་ག་ཏེ་སྭཱཧཱ། ཞེས་པ་དང༌།
ཨོཾ་མན་ཆད་ཁོ་ན་བཟླ་བའི་ལུགས་ཀྱང་ཡོད་དེ། འབུམ་བཟླས་པས་བསྙེན་པའོ། །འཇུག་ཏུ་ཡེ་ཤེས་པ་མདུན་དུ་བཞུགས་པར་མོས་ལ། བཟང་སྤྱོད་ནས་འབྱུང་བའི་ཡན་ལག་བདུན་པ་བྱ། འདོད་དོན་གསོལ་བཏབ་དགེ་བ་བསྔོ། ཡིག་བརྒྱ་གཤེགས་གསོལ་རྣམས་སྤྱི་དང་མཐུན་པར་བྱ། འདིའི་རྗེས་གནང་བྱ་ཐབས་ནི། མཎྜལ་གཅིག་ལ་ཚོམ་བུ་བདུན་གྲལ་རིམ་དུ་བཀོད། མཆོད་པ་རྒྱ་ཆེར་བཤམས། བྱིན་རླབས་མདོ་ཆོག་བཞིན་བྱས་ཀྱང་རུང་མོད་ཀྱི། སྤྱི་དང་མཐུན་པར་བྱ། བདག་བསྐྱེད་གོང་བཞིན་སྔོན་དུ་བཏང་ནས། མཎྜལ་བྷྲུཾ་ལས་བྱུང་བའི་གཞལ་ཡས་ཁང་གི་དབུས་སུ། ཚོམ་བུ་རྣམས་པད་ཟླའི་གདན་རེ་རེར་གྱུར། རང་གི་སྙིང་ག་ནས་འོད་ཟེར་འཕྲོས། བདེ་བར་གཤེགས་པ་བདུན་འཁོར་དང་བཅས་པ་བཛྲ་ས་མཱ་ཛཿ མ་ལུས་སེམས་ཅན་མ་ཚར་གཅིག་བརྗོད། པདྨ་ཀ་མ་ལ་ཡ་སྟྭཾ་ལན་བདུན། དབུས་སུ་བཅོམ་ལྡན་འདས་སྨན་གྱི་བླ་ཞེས་པ་ནས། བརྒྱན་པའོ། །གཡས་ཀྱི་གདན་གསུམ་ལ་རིམ་པས། དེ་བཞིན་གཤེགས་པ་མངོན་མཁྱེན་རྒྱལ་པོ་སྐུ་མདོག་དམར་པོ་གཡས་མཆོག་སྦྱིན་དང༌། གཡོན་མཉམ་བཞག །ཆོས་སྒྲགས་རྒྱ་མཚོའི་དབྱངས་སྐུ་མདོག་དམར་པོ་གཡས་མཆོག་སྦྱིན་དང་གཡོན་མཉམ་བཞགམྱ་ངན་མེད་མཆོག་དཔལ་སྐུ་མདོག་དམར་སྐྱ་ཕྱག་གཉིས་མཉམ་བཞགགཡོན་གྱི་གདན་གསུམ་ལ་རིམ་པས། གསེར་བཟང་དྲི་མེད་སྐུ་མདོག་དཀར་སེར་གཡས་ཆོས་འཆད། གཡོན་མཉམ་བཞག རིན་ཆེན་ཟླ་བ་སྐུ་མདོག་
དམར་སེར་གཡས་ཆོས་འཆད། གཡོན་མཉམ་བཞག མཚན་ལེགས་སྐུ་མདོག་སེར་པོ། གཡས་ཆོས་འཆད། གཡོན་མཉམ་བཞག་མཛད་པའོ། །ཨརྒྷཾ་ནས་ཤཔྟའི་བར་གྱིས་མཆོད། རྒྱལ་སྲིད་སྣ་བདུན། འདོད་ཡོན་སྣ་ལྔ། བཀྲ་ཤིས་རྟགས་བརྒྱད། རྫས་བརྒྱད་སོགས་ཀྱིས་མཆོད་པའང་སྤྲོ་ན་བྱ། བཟང་སྤྱོད་ཀྱི་ཡན་ལག་བདུན་པ་ཚར་གསུམ། དེ་ནས་བཟླས་པ་ཅི་འགྲུབ་བྱའོ། །གལ་ཏེ་མདོ་ཆོག་ཡོངས་རྫོགས་ལ་བརྟེན་ནས་བསྒྲུབས་ན། བདག་བསྐྱེད་སྔོན་དུ་བཏང་ནས། རྗེས་ཆོག་མ་གཏོགས་ཆོ་ག་ཚར་བ་ན་བཟླས་པ་གང་འགྲུབ་བྱའོ། །སློབ་མའི་བྱ་བ་ནི་ཁྲུས་བྱས་མཎྜལ་ཕུལ་ཞིང༌། བླ་མ་རྡོ་རྗེ་འཛིན་པ་ལ་སོགས་པ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ། དུས་འདི་ནས་གཟུང་སྟེ། སྙིང་པོ་བྱང་ཆུབ་ལ་མཆིས་ཀྱི་བར་དུ། བཅོམ་ལྡན་འདས་སྨན་གྱི་བླ་བཻཌཱུརྻ་འོད་ཀྱི་རྒྱལ་པོ་ཡི་དམ་དུ་འཚལ་གྱི། སློབ་དཔོན་གྱིས་བདག་ལ་ལུང་སྩལ་དུ་གསོལ། ལན་གསུམ། བཟང་སྤྱོད་ཀྱི་ཡན་ལག་བདུན་པ་ལན་གསུམ། སྐྱབས་སེམས་རྒྱས་པར་འབོགས་པའམ། སངས་རྒྱས་ཆོས་དང་མ་ལན་གསུམ། དེ་ནས་འདི་སྐད་ཅེས། ཁྱེད་རང་རྣམས་ཐ་མལ་བར་གནས་པའི་སྤྱི་བོར་བཅོམ་ལྡན་འདས་སྨན་གྱི་བླ་ཞེས་པ་ནས། བརྒྱན་པའོ། །དབུ་གཙུག་ཏུ་བླ་མའི་ངོ་བོའི་ནོར་བུ་རིན་པོ་ཆེ་དབང་གི་རྒྱལ་པོ་དང༌། དེའི་དབུ་གཙུག་ཏུ་མངོན་མཁྱེན་རྒྱལ་པོ་སྐུ་མདོག་དམར་པོ་ཞེས་སོགས་གཅིག་གི་དབུ་གཙུག་ཏུ་གཅིག་རིམ་པས་གསལ་འདེབས། དེ་རྣམས་ལ་མོས་གུས་དུང་
པ་བྱས་པས། དེ་བཞིན་གཤེགས་པ་མཚན་ལེགས་འོད་དུ་ཞུ་ནས། རིན་ཆེན་ཟླ་བའི་སྐུ་ལ་ཐིམ། དེ་བཞིན་དུ་རིམ་པས་སྦྱར་ཏེ། མངོན་མཁྱེན་རྒྱལ་པོ་འོད་དུ་ཞུ་ནས། སྨན་པའི་རྒྱལ་པོ་ལ་ཐིམ། དེའི་སྐུ་ལས་འོད་ཟེར་དཔག་ཏུ་མེད་པ་བྱུང་སྟེ། སྤྱི་བོ་ནས་རྐང་མཐིལ་གྱི་བར་ཐམས་ཅད་གང༌། ནད་གདོན་སྡིག་སྒྲིབ་ཐམས་ཅད་སྦྱངས། ལུས་ཤེལ་གོང་གཡའ་དག་པ་བཞིན་དུ་གྱུར་པར་མོས། ཡང་སྨན་པའི་རྒྱལ་པོའི་དབུ་གཙུག་ཏུ་མངོན་མཁྱེན་རྒྱལ་པོ་གསལ་འདེབས་པ་ནས། སྡིག་སྒྲིབ་བཀྲུས་པའི་བར་གོང་བཞིན་ལན་གཉིས་ཏེ། ཡོངས་དྲིལ་ལན་གསུམ་གྱི་མཐར། སྨན་པའི་རྒྱལ་པོ་འོད་དུ་ཞུ་ནས་ཐིམ་པ་ལས། ཁྱེད་རང་རྣམས་བཅོམ་ལྡན་འདས་སྨན་གྱི་བླ་ཞེས་པ་ནས། བརྒྱན་པའོ། །སློབ་དཔོན་གྱི་ཐུགས་ཀའི་འོད་ཟེར་གྱིས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་སངས་རྒྱས་སྨན་གྱི་བླའི་རྣམ་པར་སྤྱན་དྲངས། སློབ་མའི་སྤྱི་བོ་ནས་ཞུགས། སྙིང་གའི་ཨོཾ་སྔོན་པོ་ལ་ཐིམ། དཔྲལ་བར་ཨོཾ་སོགས་འབྲུ་གསུམ་བཀོད། ཨོཾ་ཨཱཿཧཱུཾ་ཞེས་བརྗོད་བཞིན་དུ། མེ་ཏོག་སྤྱི་བོར་བཞགསྔགས་ཀྱི་བཟླས་ལུང༌། དམ་བཅའི་ལུང་སྤྱི་དང་མཐུན་པར་སྦྱིན། སླར་ཡང་མཆོད་པ་གསར་པ་ཞིག་བཤམས་ལ། དཔོན་སློབ་རྣམས་ལྷན་ཅིག་པས་བྱིན་གྱིས་བརླབས། རབ་འབྱམས་རྒྱ་མཚོ་མའི་ཚིགས་བཅད་ཀྱིས་འབུལ། མཐར་རོལ་ཆེན་དང༌། མཆོད་པའི་སྤྲིན་གྱི་གཟུངས་བརྗོད་ནས། བཅོམ་ལྡན་བདག་ལ་སྩལ་ལགས་ཀྱི་སོགས་ཀྱི་བྱིན་གྱིས་བརླབས་པའི་ལུང་བྱའོ། །སློབ་མའི་རྗེས་ཀྱི་བྱ་བ་སྤྱི་དང་འདྲ་ཞིང༌། ཆོས་སྐྱོང་གི་གཏོར་མ་བཏང༌། ཆ་གསུམ་གྱི་གཏོར་མ་སོགས་དང༌། མདུན་བསྐྱེད་ཀྱི་རྗེས་ཀྱི་བྱ་བ་ཡང་སྤྱི་དང་འདྲའོ། །སྨན་བླའི་སྒྲུབ་ཐབས་ཡི་གེ་ནི། །ཀུན༵་ལས་དག༵འ་ཞིང་གསལ་བ་འདི། །ཤོག་གྲངས་མང་བ་མི་ངོམ་ཀྱང༌། །སྙིང༵་པོ༵འི་དོན་བཟང་ངོམ་དུ་རུང༌། །བཅོམ་ལྡན་འདས་སྨན་བླའི་སྒྲུབ་ཐབས་ཀྱི་ལེ་ཚན་ནོ། །
ཀླུ་དབང་རྒྱལ་པོ་སྒྲུབ་ཐབས།
ཨོཾ་སྭཱ་སྟི། ཀླུ་རྣམས་ཀྱི་ནི་སྟོན་པ་མཆོག །ཀླུའི་ནད་རྣམས་ཞི་མཛད་པ། །ཀླུ་དབང་རྒྱལ་པོ་ལ་བཏུད་ནས། །ཀླུ་རྣམས་འདུལ་བའི་ཐབས་ལ་འཇུག །ཨོཾ་ཨ་ཀཱ་རོ་མུ་ཁཾ་སརྦ་དྷརྨ་ཨཱདྱ་ནུཏྤནྣ་ཏྭད། ཨོཾ་ཨཱཿཧཱུཾ་ཕཊ་སྭཱཧཱ། ལན་བདུན་གྱིས་སྔོན་འགྲོ་གཏོར་མ་བཏང༌། ཨོཾ་ཨཱཿབིགྷྣཱན་ཏ་ཀྲྀཏ་ཧཱུཾ་ཕཊ། ལན་བདུན་གྱིས་བགེགས་བསྐྲད། སྐྱབས་སེམས་ཚད་མེད་བཞི་རྣམས་སྤྱི་དང་མཐུན། སྤྲོ་ན་བར་འདི་ཚོགས་ཞིང་སྤྱན་དྲངས་ནས། ཕྱག་མཆོག་ཡན་ལག་བདུན་པ་རྣམས་བྱ་སྟེ། མདོར་བསྡུས་པའི་ཚེ། མ་བྱས་ཀྱང་རུང་ངོ༌། །ཨོཾ་སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་པཾ་ལས་པདྨ། ཨ་ལས་ཟླ་བ། དེའི་སྟེང་དུ་ཧཱུཾ་སྔོན་པོའི་འོད་ཀྱི་འཕྲོ་འདུ་ལས། རང་ཉིད་དེ་བཞིན་གཤེགས་པ་ཀླུ་དབང་རྒྱལ་པོ་རིན་པོ་ཆེ་མི་པོགས་པའི་ཁ་དོག་ལྟ་བུ། ཞལ་རས་དཀར་ཞིང་སྐུ་སྔོ་བ། ཞབས་རྡོ་རྗེའི་སྐྱིལ་ཀྲུང་གིས་བཞུགས་ཤིང༌། ཕྱག་གཉིས་ཐུགས་ཀར་སེམས་ཅན་རྣམས་ངན་འགྲོའི་སྐྱེ་གནས་ལས་འདོན་པར་མཛད་པའི་ཕྱག་རྒྱ་མཛད་པ། མཚན་དང་དཔེ་བྱད་ཡོངས་སུ་རྫོགས་ཤིང༌། ན་བཟའ་ཆོས་གོས་ངུར་སྨྲིག་རྣམ་གསུམ་གསོལ་བ། ཚངས་
པར་སྤྱོད་པའི་ཆ་ལུགས་ཅན། མེ་ཏོག་སྣ་ཚོགས་པའི་རྒྱབ་ཡོལ་དང༌། སྦྲུལ་མགོའི་གདེངས་ཀ་བདུན་དང་ལྡན་པ། དེའི་མདུན་དུ་སྒྲིབ་པ་རྣམ་སེལ་དཀར་པོ་ཕྱག་གཡས་ན་རིན་པོ་ཆེའི་མྱུ་གུ་དང༌། གཡོན་ནུ་བུམ་པ་བསྣམས་པ། གཡས་སུ་བྱམས་པ་དམར་པོ་ཀླུ་ཤིང་གི་མེ་ཏོག་དང༌། སྤྱི་བླུགས་འཛིན་པ། རྒྱབ་ཏུ་འཇམ་དཔལ་སེར་པོ་ཨུཏྤལ་བསྣམས་པ། གཡོན་དུ་སྤྱན་རས་གཟིགས་དཀར་པོ་པདྨ་བསྣམས་པ། དེ་ཐམས་ཅད་པད་ཟླའི་གདན་ལ་བཞུགས་ཤིང༌། བཅོམ་ལྡན་འདས་ཀྱི་ཞལ་ལ་བལྟ་བའོ། །གཞན་ཡང་གཡས་ཕྱོགས་སུ་བྱང་ཆུབ་སེམས་དཔའི་དགེ་འདུན་དང༌། གཡོན་ཕྱོགས་སུ་དགྲ་བཅོམ་པའི་ཚོགས་དང༌། འོག་ཕྱོགས་སུ་ཀླུའི་ཚོགས་དཔག་ཏུ་མེད་པ་དང་བཅས་པའོ། །རང་གི་སྙིང་ག་ནས་འོད་ཟེར་འཕྲོས། ཡེ་ཤེས་སེམས་དཔའ་བཛྲ་ས་མཱ་ཛཿ པུཥྤེ་ནས། ནཻ་ཝེ་ཏེའི་བར་གྱིས་མཆོད། བཅོམ་ལྡན་འདས་དེ་བཞིན་གཤེགས་པ་ཀླུ་དབང་རྒྱལ་པོའི་བདག་ལ་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཏདྱ་ཐཱ། ཏ་ཐཱ་ག་ཏེ་བྷ་ག་ཝན་ནཱ་ག་རཱ་ཛེ་ཤྭ་ར་ཨ་དྷི་ཥྛ་ན་ཨ་དྷི་ཥྛ་ཏེ་སྭཱཧཱ། ཞེས་ཅི་ནུས་སུ་བཟླ། ཐུན་འཇོག་ཁར་ལྷ་སྐུ་སྟོང་པར་སྦྱངས་ཤིང་དགེ་བ་བྱང་ཆུབ་ཏུ་བསྔོ། འདིའི་བཟླས་པ་འབུམ་ཙམ་སོང་ནས། བྲིས་སྐུ་རབ་གནས་ཅན་གྱི་དྲུང་དུ། མཆོད་པ་ལ་བརྩོན་པས་མདུན་བསྐྱེད་སྒྲུབ་ཚུལ་གྱིས་བསྒྲུབས་ན། མཆོག་ཏུ་བྱིན་རླབས་ཆེའོ། །ཐུན་མཚམས་སུ་མདོ་སྡེ་མེ་
ཏོག་བཀོད་པ་ནས་གསུངས་པའི་གཟུངས་འདོན་ནོ། །གཏོར་མ་འབུལ་བར་འདོད་ནའང༌། འོག་ནས་འབྱུང་བ་བཞིན་བྱ།འདིའི་རྗེས་གནང་བྱ་བར་འདོད་ན། མཎྜལ་ལ་མེ་ཏོག་གིས་ཚོམ་བུ་ལྔ་བཀོད། དཀར་གཏོར་ཆ་གཉིས་བཤམས། ཆུང་བ་དེ་ལ་ཀླུ་སྨན་བསྲེ། མཆོད་པ་རྒྱ་ཆེར་བཤམས། གོང་དུ་བསྟན་པ་ལྟར་བདག་བསྐྱེད་བཟླས་པའི་བར་སྔོན་དུ་འགྲོ་བས། མཆོད་པ་རྣམས་སྤྱི་དང་མཐུན་པར་བྱིན་གྱིས་བརླབས། མདུན་བསྐྱེད་ཨ་མྲྀ་ཏས་བསངས། སྭ་བྷཱ་ཝ་ནས། ཛཿཧཱུཾ་བཾ་ཧོཿའི་བར་བདག་བསྐྱེད་འདྲ། ཨརྒྷཾ་ནས་ནཻ་ཝེ་ཏེའི་བར་སྤྱི་དང་མཐུན་པས་མཆོད། རོལ་མོ་སོགས་མཆོད་པ་ཐམས་ཅད་བསྔོ་བའི་ཚེ། ཨོཾ་སརྦ་བི་ཤྭ་དྷ་ར་པཱུ་ཛ་མེ་གྷ་སྥ་ར་ཎ་ས་མུད་དྲེ་ཧཱུཾ། ཞེས་བརྗོད། ཆོས་དབྱིངས་སྐྱེ་མེད་ངང་ལས་ཆོས་སྐུར་བཞེངས། །གཟི་བརྗིད་རྒྱལ་པོ་ཉི་མ་འབུམ་ཤར་འདྲ། །མཚན་དང་དཔེ་བྱད་འབར་བ་དཔལ་གྱི་སྐུ། །འགྲོ་བའི་སྡུག་བསྔལ་དུག་སེལ་མཆོག་ལ་འདུད། །ཅེས་བསྟོད། བཟླས་པ་ཅུང་ཟད་བྱ། གཏོར་མ་ཨ་མྲྀ་ཏས་བསངས། སྭ་བྷཱ་ཝས་སྦྱངས། གཏོར་མ་དང་པོ་ཨོཾ་ལས་བྱུང་བའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། གཏོར་མ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ། ལན་བདུན་གྱིས་བྱིན་གྱིས་བརླབས། སྙིང་པོ་ལན་གསུམ་གྱིས་བཅོམ་ལྡན་འདས་དང༌། ཡང་ཨ་ཀཱ་རོ་དང༌། ཁ་འབར་མའི་སྔགས་ལན་བདུན་བརྗོད་པས་བརྟན་པར་བྱིན་གྱིས་བརླབས་ནས། ཨོཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་གྱིས་འཁོར་ཐམས་ཅད་ལ་ཕུལ་ནས། བླ་མ་དཀོན་མཆོག་གསུམ་པོ་དང༌། །ཡི་དམ་མཁའ་འགྲོ་
རིག་པ་འཛིན། །བཅོམ་ལྡན་ཀླུ་རྒྱལ་དཀྱིལ་འཁོར་ཚོགས། །ལྷན་ཅིག་སྐྱེས་དང་བསྲུང་བྱེད་པའི། །འཇིག་རྟེན་སྐྱོང་བ་ཐམས་ཅད་དང༌། །ལན་ཆགས་སྙིང་རྗེར་བཅས་པ་རྣམས། །མཆོག་སྦྱིན་འདི་ཡིས་མཉེས་ཚིམ་ནས། །ཚོགས་བསོགས་བར་ཆད་ཞི་གྱུར་ཅིག །ཅེས་སོགས་འདོད་དོན་གསོལ་བ་བཏབ། གཏོར་མ་གཙང་སར་གཏང༌། གཏོར་མ་གཉིས་པ་ལ་དམིགས་ནས། གཏོར་སྣོད་པཾ་སེར་པོ་ལས་པདྨའི་སྣོད་དུ་ཧྲཱིཿཡིག་དཔག་ཏུ་མེད་པ་གནས་པ་སྟེང་དུ་སྤྲིན་འཁྲིགས་ནས། བདུད་རྩིའི་ཆར་ཆེན་པོ་བབས་ནས་འདོད་དགུའི་རྒྱ་མཚོར་གྱུར། རང་གི་སྙིང་ག་ནས་འོད་འཕྲོས། ནོར་རྒྱས་སེར་པོ་སྙིང་གར་ཐལ་མོ་སྦྱར་བས། རིན་པོ་ཆེའི་སྒྲོམ་བུ་འཛིན་པ་ལ་སོགས་པ་ཀླུ་ཐམས་ཅད་བཛྲ་ས་མཱ་ཛཿ ཨོཾ་དེ་བཞིན་གཤེགས་པ་ཀླུ་དབང་རྒྱལ་པོ་ལ་ཕྱག་འཚལ་ལོ། །ནཱ་ག་རཱ་ཛ་ས་པ་རི་ཝཱ་རེ་བྷྱཿ ཞེས་པ་ལ་ཁ་འབར་མའི་སྔགས་བཏགས་པ་ལན་བདུན་གྱིས་བསྔོས་ནས། ཡེ་དྷར་གྱི་མཐར། སྡིག་པ་ཅི་ཡང་མི་བྱ་ཞིང༌། །ཞེས་སོགས་ཆོས་བཤད། ཨོཾ་བཛྲ་མུཿ ཞེས་གཤེགས་སུ་གསོལ། གཏོར་མ་དེ་ཀླུ་གནས་སར་བཏང་ངོ༌། །སློབ་མའི་བྱ་བ་ནི། སྔོན་འགྲོ་རྒྱས་པར་ནི། བཟང་སྤྱོད་ནས་འབྱུང་བའི་ཡན་ལག་བདུན་པ་དང༌། སྐྱབས་འགྲོ་སེམས་བསྐྱེད་རྒྱས་པར་ཕོག་པའི་རྗེས་སུ། འཇུག་པ་སེམས་བསྐྱེད་ཀྱི་སྡོམ་པ་མདོར་བསྡུས་སུ་ལེན་པ་རྣམས་བྱ། བསྡུ་ན། སངས་རྒྱས་ཆོས་དང་མ་དང༌། གུར་ནས་འབྱུང་བའི་རྒྱུན་བཤགས་བྱ། དངོས་གཞི་ལ། སློབ་དཔོན་བདག་ལ་དགོགས་སུ་གསོལ། །བདག་ནི་ཀླུ་དབང་རྒྱལ་པོ་
ཡི། །དམ་ཚིག་དངོས་གྲུབ་འཚལ་བ་སྟེ། །བདག་ལ་གཟུངས་སྔགས་སྩལ་དུ་གསོལ། །ཞེས་ལན་གསུམ་གསོལ་བ་བཏབ། སྐུའི་རྗེས་གནང་དང༌། གསུང་གི་རྗེས་གནང་སྤྱི་དང་འདྲ། ཐུགས་ཀྱི་རྗེས་གནང༌། སློབ་མའི་སྙིང་གའི་འོད་ཀྱིས་ཁམས་གསུམ་སྣོད་བཅུད་ལྷ་ལ་བསྡུ། ལྷ་ཡང་ཧཱུཾ་ལ། དེ་ཡང་སྟོང་པར་བསྡུའོ། །སློབ་མ་དང་མདུན་བསྐྱེད་ཀྱི་རྗེས་ཀྱི་བྱ་བ་སྤྱི་དང་འདྲའོ། །ཀུན༵་ལས་ཟབ་ཅིང་ཨ་ཏི་ཤས། །དག༵འ་བར་བསྔགས་པའི་སྒྲུབ་ཐབས་འདི། །དེང་སང་སྒྲུབ་པ་དཀོན་པའི་ཕྱིར། །གཞན་ལ་ཕན་ཕྱིར་སྙིང༵་པོ༵ར་དྲིལ། །ཀླུ་དབང་རྒྱལ་པོ་སྒྲུབ་ཐབས་ཀྱི་ལེ་ཚན་ནོ། །སྒྲུབ་ཐབས་རིན་ཆེན་འབྱུང་གནས་ལས། དེ་བཞིན་གཤེགས་པ་ཆགས་བྲལ་གྱི་རྣམ་པ་ཅན་གྱི་སྒྲུབ་ཐབས་བཤད་པའི་སྐབས་ཏེ་གསུམ་པའོ། །ཞུས་དག །