སྒྲུབ་ཐབས་རིན་ཆེན་འབྱུང་གནས་ལས་དབང་སྡུད་ཀྱི་ལྷའི་སྒྲུབ་ཐབས་བཤད་པའི་སྐབས་ཏེ་བཅུ་བཞི་པ།
རྗེ་བཙུན་རིག་བྱེད་ལྷ་མོའི་སྒྲུབ་ཐབས།
ཨོཾ་སྭཱ་སྟི། རྗེ་བཙུན་རིག་བྱེད་ལྷ་མོ་ལ། །བཏུད་ནས་དེ་ཡི་སྒྲུབ་ཐབས་ཀྱི། །མཆོག་ཏུ་གྲགས་པ་ལྷ་ལྔ་དང༌། །རྗེས་འབྲེལ་ཆོ་གའི་ཁྱད་པར་བཤད། །འདི་ལ་སྒྲུབ་ཐབས་དང་རྗེས་གནང་གི་བྱ་བ་གཉིས་ལས། དང་པོའི་སྐབས་སུ། རཾ་ལས་
ཉི་མའི་དཀྱིལ་འཁོར་གྱི་སྟེང་དུ་ལྷ་ཆེན་དབང་ཕྱུག་དང་ཨུ་མ་བསྣོལ་བའི་གདན། དེའི་སྟེང་དུ་རཱ་ཧུ་ལ་ནག་པོ་མདའ་གཞུ་འཛིན་པ་ཁ་བུབ་ཏུ་བསྒྱེལ་བ་ལ་ཧྲཱིཿལས་ཨུཏྤལ་དམར་པོ་ཧྲཱིཿས་མཚན་པ་ལས་འོད་ཟེར་ལྕགས་ཀྱུ་སོགས་ཞེས་དང༌། མེ་དཔུང་འབར་བའི་དབུས་སུ་བཞུགས་པའོ། །ཞེས་དང༌། ཤར་དུ་ཧ་ལས་རྡོ་རྗེ་མཁའ་འགྲོ་མ་དཀར་མོ། ལྷོ་རུ་རི་ལས་རིན་ཆེན་མཁའ་འགྲོ་མ་སེར་མོ། ནུབ་ཏུ་ནི་ལས་པདྨ་མཁའ་འགྲོ་མ་དམར་མོ། བྱང་དུ་ས་ལས་ལས་ཀྱི་མཁའ་འགྲོ་མ་ལྗང་ཁུ་རྣམས་ཌཱ་མ་རུ་དང་ཁ་ཊྭཱཾ་ག་ཐོད་པ་འཛིན་པ་གར་སྟབས་ཀྱིས་བཞུགས་པའོ། །སྤྱི་བོར་ཧྲཱིཿལས་ཁྲོ་བོ་རྟ་མགྲིན་དམར་པོ་དབྱུག་པ་དང་སྡིགས་མཛུབ་ཅན། དེའི་ཐུགས་ཀར་ཧྲཱིཿདང་རྟ་མགོའི་མདུན་དུ་བླ་མའི་སྐུ་གཟུགས་ཀྱིས་བརྒྱན་པ། རང་གི་སྙིང་གར་པདྨ་འདབ་བཞི་ལ་རིག་བྱེད་མ་ལྷ་ལྔ་དང༌། ཁྲོ་རྒྱལ་རྟ་མགྲིན་བླ་མར་བཅས་པ། གཙོ་མོའི་ཐུགས་ཀར་ཧྲཱིཿཡིག་གི་མཐར་སྔགས་ཀྱི་འཕྲེང་བས་བསྐོར་བ། རིགས་བཞི་མཁའ་འགྲོའི་ཐུགས་ཀར་ཡང་རང་རང་གི་ས་བོན། དེ་རྣམས་ཀྱི་སྤྱི་བོར་ཨོཾ་ཞེས་སོགས་བྱ། ལྷ་དབང་བསྐུར་བ་མི་དགོས། བཟླས་པའི་སྔགས་ནི། ཨོཾ་ཀུ་རུ་ཀུལླེ་ཧྲཱིཿཧཱུཾ་ཧཱུཾ་ཕཊ་ཕཊ། ཨོཾ་ཨཱཿཧཱུཾ་ཧྲི་ཧྲི་ཧྲི་ཧ་རི་ནི་ས་ཧྲི་ཛཿཨ་ཀརྵ་ཡ་ཧཱུཾ་ཛཿ བ་སུ་ཝ་ཤཾ་ཀུ་རུ་ཨངྐུ་ཤ་ཧྲི་ཝ་ཤཾ་ཀུ་རུ་ཧཱུཾ་ཧཱུཾ་ཛ་ཛཿ ཞེས་དྲག་ཏུ་བཟླའོ། །གཉིས་པའི་སྐབས་སུ་མཎྜལ་པདྨ་དམར་པོ་འདབ་བརྒྱད། ཐོད་པ་ཆང་གིས་གང་བ། སིནྡྷུ་རའི་དཀྱིལ་འཁོར། ཆོས་འབྱུང་པདྨ་འདབ་བཞི། ས་བོན་དང་བཅས་པ་བྲིས་པ་རྣམས་བརྩེགས། མཐའ་
མཆོད་གཏོར་གྱིས་བསྐོར། སྔོན་འགྲོ་གཏོར་མ་བཏང་གནས་ཡོ་བྱིན་རླབས་བྱ། བདག་བསྐྱེད་མདུན་བསྐྱེད་གཏོར་འབུལ་ཡན་ཆད་སོང་ནས། བུམ་པ་གཉིས་བཤམས་ལ། གཅིག་ཏུ་ཀུ་རུ་ཀུལླེ་ལྷ་ལྔ་དང༌། གཅིག་ཏུ་རྟ་མགྲིན་སྐད་ཅིག་གིས་བསྐྱེད་ལ། བཟླས་པ་ཅུང་ཟད་བྱ། མཆོད་བསྟོད་བྱ་ཞིང༌། བུམ་ནང་གི་ལྷ་འོད་དུ་ཞུ་ནས་བདུད་རྩིར་གྱུར། དཀྱིལ་འཁོར་ཡོལ་བས་བཅད། སློབ་མས་མཎྜལ་ཕུལ། རྒྱུན་བཤགས་རིགས་ལྔའི་སྡོམ་བཟུང༌། མིག་དར་བཅིངས་མེ་ཏོག་གཏད། ལས་བུམ་གྱི་ཆུ་དང༌། ཨོཾ་བཛྲ་ཀྲོ་དྷ་ཧ་ཡ་གྲྀ་ཝ་ཧཱུཾ་ཕཊ་ཀྱིས་བགེགས་བསྐྲད། འབྲུ་གསུམ་གྱིས་བདུད་རྩི་ལྕེ་ལ་བཞགདེ་ནས་ཡོལ་བ་བསལ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ཤིག །རྗེ་བཙུན་རིག་བྱེད་མ་བདག་ལ་དབབ་ཏུ་གསོལ། ཞེས་གསོལ་བ་བཏབ། སློབ་མའི་སྙིང་གར་པདྨ་འདབ་བཞི་ས་བོན་ལྔ་དང་བཅས་པ་བསྒོམ་དུ་བཅུག་ལ། རིག་བྱེད་མ་དཔག་ཏུ་མེད་པ་སྤྱན་དྲངས་ཏེ་བསྟིམ། ཨོཾ་ཀུ་རུ་ཀུལླེ་ཧྲིཿཧྲིཿཧྲིཿཨ་བེ་ཤ་ཡ་ཧྲི་ཧྲི་ཧྲི། ཞེས་དྲག་ཏུ་བཟླས་མེ་ཏོག་ཕུལ། བཛྲ་ཙཀྵུ་ཙཀྵུ་བཛྲ། ཞེས་མིག་དར་ཕྱེ། མཎྜལ་ཕུལ། སློབ་མ་རིག་བྱེད་མ་དམ་ཚིག་སེམས་དཔའ་གཙོ་རྐྱང་ལ་སྙིང་གའི་ལྷ་ལྔ་དང༌། སྤྱི་བོའི་རྟ་མགྲིན་ཡོངས་སུ་རྫོགས་པ་སྐད་ཅིག་གིས་བསྐྱེད། ཨོཾ་ཨ་བྷི་ཥིཉྩ་ཏུ་མཾ་སརྦ་ཏ་ཐཱ་ག་ཏ། ཞེས་གསོལ་བ་བཏབ་པས། ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུཾ་ཞེས་བརྗོད་ཅིང་དབང་བསྐུར། དབུ་རྒྱན་སྤྱི་བོར་གཏུགས། སྔགས་དེ་ཉིད་བརྗོད། ཕྱག་མཚན་བཞི་པོ་གཏད་ལ། ཐབས་ཤེས་མདའ་དང་གཞུ་སྦྱར་བཀང་བྱས་ལ། །
མི་ཤེས་ནད་སེལ་མ་རིག་དབུག་པར་བྱ། །ཨུཏྤལ་མཛེས་པ་ལྷ་མོའི་ཕྱག་མཚན་ཉིད། །དེ་རིང་བུ་ཁྱོད་ལ་ནི་སྦྱིན་པར་བྱ། །མི་ཤེས་འདམ་ནས་འདྲེན་མཛད་པ། །རྒྱལ་བའི་ཕྱག་མཚན་ལྕགས་ཀྱུ་བཟུང་ཞེས་དང༌། རིགས་ལྔའི་ཕྱག་མཚན་གཏད་ལ། རྡོ་རྗེ་འཁོར་ལོ་རིན་པོ་ཆེ། །པདྨ་རྡོ་རྗེ་རྒྱ་གྲམ་རྣམས། །མཁའ་འགྲོ་རྣམས་ཀྱི་ཕྱག་མཛད་དེ། །དེ་རིང་ཁྱོད་ཀྱིས་བཟུང་བར་བྱ། མཁའ་འགྲོ་རྟག་ཏུ་བྱིན་རློབ་འགྱུར། །ཨོཾ་ཌཱ་ཀི་ནཱི་སརྦ་ཨ་བྷི་ཥིཉྩ་མི་སརྦ་ཏ་ཐཱ་ག་ཏ་ས་མ་ཡ་ཧཱུཾ། དེ་ནས་བཟླས་ལུང་སྤྱི་དང་མཐུན་པར་སྦྱིན། སྙིང་པོའི་མཐར་རྡོ་རྗེའི་མིང་བཏགས་ལ་མིང་དབང་བསྐུར་ཏེ། བུམ་དབང་ངོ༌། །མཎྜལ་དབུས་ཀྱི་ཀ་པཱ་ལའི་བདུད་རྩི་སྦྱིན་ཏེ་གསང་དབང༌། གནས་གསུམ་དུ་སིནྡྷུ་རའི་ཐིག་ལེ་བྱས་ཏེ་ལྷ་རྣམས་བསྟིམ་པ་ཤེར་དབང་ངོ༌། །སྟོང་པ་ཉིད་ལ་མཉམ་པར་འཇོག་ཏུ་བཅུག་དབང་བཞི་པའོ། །རྗེས་ཀྱི་བྱ་བ་རྣམས་སྤྱི་དང་འདྲའོ། །འདི་ལ་འཁོར་མཁའ་འགྲོ་བཞི་པ་བསྐྱེད་པ་ནི། ཕག་མོ་ལྷ་ལྔའི་འདྲེས་ཡིན་ནོ། །ཞེས་མཁྱེན་ལྡན་དམ་པ་རྣམས་བཞེད་ཀྱང༌། ཡིག་རྙིང་ཕལ་ཆེར་ན་ཡོད་པ་དང༌། དེང་སང་ལག་ལེན་བྱེད་པའི་གྲགས་པ་དབང་བཙན་པར་བྱོས་ནས་འདིར་བཀོད་པ་ཡིན་ནོ། །དཱ་ན་ཤཱི་ལས་ཌོཾ་བི་བའི། །མན་ངག་ཀུན༵་དག༵འ་རྒྱལ་མཚན་དཔལ། །ས་སྐྱ་པཎ་ཆེན་ལ་གནང་བའི། སྙིང༵་པོ༵་མདོ་ཙམ་བཀོད་པ་ཡིན། །ཀུ་རུ་ཀུལླེ་གསང་སྒྲུབ་ཏུ་གྲགས་པའི་སྒྲུབ་ཐབས་ཀྱི་ལེ་ཚན་ནོ།། །།
དཔལ་མོ་སྙིང་གི་གསེར་ཐིག་གི་སྒྲུབ་ཐབས།
ཨོཾ་སྭཱ་སྟི། ཡེ་ཤེས་ལྷ་མོ་སྒྲོལ་མ་དང༌། །ལས་ཀྱི་ལྷ་མོ་ལ་བཏུད་ནས། །ཤིན་ཏུ་ཟབ་པར་གྲགས་པ་ཡི། །དབང་གི་ལས་ལ་ཉེར་མཁོ་བཤད། །དཔལ་མོ་སྙིང་གི་གསེར་ཐིག་ཅན་དུ་གྲགས་པའི་སྒྲུབ་པ་ལས་
སྦྱོར་གྱི་རིམ་པ་ཡིག་རྙིང་ལས་ཤེས་པར་བྱ་བ་དང༌། འདིར་བསྙེན་པ་ཙམ་དང་རྗེས་གནང་གི་ཚེ་ཉེ་བར་མཁོ་བའི་དབང་དུ་བྱས་ཏེ་ཅུང་ཟད་བརྗོད་ན། ཙན་དན་དམར་པོས་བྱུགས་པའི་མཎྜལ་གྱི་དབུས་སུ་ཆོས་འབྱུང་གྲུ་གསུམ་རྩེ་མོ་རང་ལ་བསྟན་པ། དབུས་སུ་མེ་ཏོག་དམར་པོའི་ཚོམ་བུ་བྱ། ལོགས་གཅིག་ཏུ་བུམ་པ་ཡང་བཤམས། མཁའ་འགྲོ་སྤྱི་གཏོར་དང་སྔོན་འགྲོའི་གཏོར་མ་དང༌། གནས་ཡོ་བྱིན་རླབས་སྤྱི་དང་མཐུན་པར་བྱ། སྐྱབས་སེམས་ཚད་མེད་བཞི་རྣམས་སྤྱི་དང་མཐུན་པར་བྱ། ཤཱུ་ནྱ་ཏཱས་སྟོང་པར་སྦྱངས། པཾ་ལས་པདྨ་དང་ཨ་ལས་ཟླ་བའི་སྟེང་དུ། ཏཱཾ་ལས་ཨུཏྤལ་ཏཱཾ་གིས་མཚན་པའི་འཕྲོ་འདུ་ལས། རང་ཉིད་སྒྲོལ་མ་སྐུ་མདོག་ལྗང་ཁུ་གཡས་སྐྱབས་སྦྱིན། གཡོན་ཨུཏྤལ། ཞབས་གཡས་བརྐྱང་གི་རོལ་པས་བཞུགས་པ། ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ ཐུགས་ཀར་པད་ཟླའི་སྟེང་དུ་ཏཱཾ་ལ་སྔགས་འཕྲེང་གིས་བསྐོར་བ་བསྒོམས་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། ཞེས་ཅི་ནུས་སུ་བཟླའོ། །མདུན་བསྐྱེས་བསངས་སྦྱངས། པད་ཟླའི་སྟེང་དུ་ཧྲཱིཿཡིག་འོད་ཀྱི་འཕྲོ་འདུ་ལས། ལྷ་མོ་ཀུ་རུ་ཀུལླེ་དམར་མོ་ཞལ་གཅིག་ཕྱག་བཞི་མ། དང་པོ་གཉིས་མདའ་གཞུ། འོག་མ་གཉིས་ལྕགས་ཀྱུ་དང་ཨུཏྤལ། གཡོན་བརྐྱང་གི་གར་སྟབས་ཅན། དེའི་ཐུགས་ཀ་རང་འདྲའི་ཡེ་ཤེས་སེམས་དཔའ། དེའི་ཐུགས་ཀར་པད་ཟླ་ལ་ཧྲཱིཿཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ ཨོཾ་ཀུ་རུ་ཀུལླེ་ཧྲཱིཿསྭཱཧཱ། བསྒྲུབ་བྱ་ཨ་ཀརྵ་ཡ་ཛཿ ཞེས་ཅི་འགྲུབ་བཟླའོ། །བུམ་པ་བསངས་སྦྱངས།
བུམ་པའི་ནང་དུ་སྐད་ཅིག་གིས་རྗེ་བཙུན་མ་འཕགས་མ་སྒྲོལ་མ། དེའི་སྟེང་གི་ཆ་ལ་བརྒྱུད་པའི་བླ་མ། ཤར་དུ་གང་བཟང་དཀར་པོ། རིན་པོ་ཆེས་མཚན་པའི་བུམ་པ་བསྣམས་པ། ལྷོར་ཚོགས་བདག་སེར་པོ་རིན་པོ་ཆེ་དང་གསེར་གྱི་གའུ་བསྣམས་པ། ནུབ་ཏུ་རྣམ་སྲས་དམར་པོ་རིན་པོ་ཆེ་དང་ལྗོན་ཤིང༌། བྱང་དུ་ཛམྦྷ་ལ་ནག་པོ་རིན་པོ་ཆེ་དང་ནེའུ་ལེ། ཤར་ལྷོར་དབང་གི་སྒྲོལ་མ་ལྗང་ཁུ་རིན་པོ་ཆེ་དང་ཨུཏྤལ། ལྷོ་ནུབ་ཏུ་ཀུ་རུ་ཀུལླེ་དམར་མོ་ཨུཏྤལ་དང་ནོར་བུས་མཚན་པའི་ལྕགས་ཀྱུ། ནུབ་བྱང་དུ་ནོར་རྒྱུན་མ་སེར་མོ་རིན་པོ་ཆེ་དང་འཕྲེང་བ། དབང་ལྡན་དུ་གདུགས་དཀར་མོ་རིན་པོ་ཆེ་དང་དེས་མཚན་པའི་པདྨ་བསྣམས་པའོ། །སྒྲོལ་མ་དང་ཀུ་རུ་ཀུལླེའི་སྙིང་པོ་ལ་ཨ་ཀཱ་རོ་བཏགས་པ་ལན་གསུམ་གྱིས་འབུལ། དེ་ནས་སློབ་མས་མཎྜལ་འབུལ། གུར་ནས་འབྱུང་བའི་རྒྱུད་བཤགས་བྱ། རྗེ་བཙུན་རྗེས་ཆགས་རྣལ་འབྱོར་མ། །ཐུགས་རྗེའི་བདག་ཉིད་འགྲོ་བ་སྐྱོབས། །རིག་བྱེད་མ་ཡི་བྱིན་བརླབ་པ། །བདག་ལ་ཉེ་བར་སྩལ་དུ་གསོལ། །ཞེས་ལན་གསུམ་གསོལ་བ་བཏབ། སྒྲོལ་མའི་སྐུའི་རྗེས་གནང་སྤྱི་དང་འདྲ་བར་བྱས། མདུན་བསྐྱེད་ཀྱི་ཐུགས་ཀ་ནས་སྤྲོས་པའི་ཀུ་རུ་ཀུལླེ་སློབ་མ་ལ་བསྟིམ་པས། སློབ་མ་ཀུ་རུ་ཀུལླེ་གྱུར་པ་ལ་ཡེ་ཤེས་པ་བཅུགདྲིལ་བུ་དང་བཅས་པའི་རོལ་མོའི་སྒྲ་བྱ། ཀུ་རུ་ཀུལླེ་པྲ་བེ་ཤ་ཡ་ཧཱུཾ། ཝ་ཤཾ་ཀུ་རུ་ཧོ། ཞེས་ལན་བརྒྱ་རྩ་བརྒྱད་བརྗོད། ཏིཥྛ་བཛྲ་གྱིས་བརྟན་པར་བྱ། སྔགས་ཀྱི་བཟླས་ལུང་སྤྱི་དང་མཐུན་པར་སྦྱིན། སློབ་མ་ཀུ་རུ་ཀུལླེ་སེམས་དཔའ་གསུམ་བརྩེགས། དེའི་གནས་གསུམ་ནས་འོད་ཟེར་ལྕགས་ཀྱུ་ལྟ་བུ་འཕྲོས་ཏེ།
ཁམས་གསུམ་གྱི་འགྲོ་བ་ཐམས་ཅད་ཀྱི་སྙིང་ནང་ནས་སེམས་ཀྱི་ངོ་བོ་ཨ་དཀར་ལ་དམར་བའི་མདངས་ཆགས་པ་བཀུག་སྟེ། སློབ་མའི་གནས་གསུམ་དུ། རོལ་མོ་དང་སྔགས་གོང་བཞིན། དེ་བཞིན་དུ་སྣོད་ཀྱི་འཇིག་རྟེན་གྱི་བཅུད་དང༌། སངས་རྒྱས་བྱང་སེམས་རྣམས་ཀྱང་བསྡུ། རེ་རེ་བཞིན་རོལ་མོ་དང་སྔགས་གོང་བཞིན། མཐར་ལྷ་སྐུ་རྗེས་གཞིག་གི་རིམ་པས་འོད་གསལ་དུ་བསྡུ་བའི་དམིགས་པ་འབོགས། སློབ་མ་དང་མདུན་བསྐྱེད་ཀྱི་རྗེས་ནི་སྤྱི་དང་འདྲའོ། །འགྲོ་ཀུན༵་དབང་བསྡུད་གདམས་ངག་ཅེས། །གཉན་ལོའི་གདམས་ངག་དག༵འ་བར་གྲགས། །གོང་བསྙེན་ཙམ་དང་རྗེས་གནང་གི །སྙིང༵་པོ༵འི་ཡི་གེར་ངོ་མཚར་སྨད། །དམར་ཆུང་སྐོར་གསུམ་དུ་གྲགས་པ་ལས། དཔལ་མོ་སྙིང་གི་གསེར་ཐིག་གི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ནོར་རྒྱུན་དམར་མོའི་སྒྲུབ་ཐབས།
ཨོཾ་སྭཱ་སྟི། རྡོ་རྗེ་ཕག་མོ་ལ་བཏུད་ནས། །དེ་ཡི་བཀའ་ཉན་ཕོ་ཉ་མོ། །ནོར་རྒྱུན་དམར་མོར་གྲགས་པ་ཡི། །སྒྲུབ་ཐབས་རྗེས་གནང་ཅུང་ཟད་བཤད། །འདིའི་བསྙེན་པ་དང་ལས་སྦྱོར་ནི། ཡིག་རྙིང་ཇི་ལྟ་བ་བཞིན་ཡིན་ལ། འདིའི་རྗེས་གནང་དང་འབྲེལ་བའི་སྒྲུབ་ཐབས་ནི། མཎྜལ་ཁྲུ་གང་པ་བ་བྱུང་དང་དྲི་བཟང་གིས་བྱུགས་པ་ཞིག་ལ་ར་ཁྲག་གིས་ཆོས་འབྱུང་གྲུ་གསུམ་དུ་བྲིས། ནང་ཆག་ཆག་བཏབ། དབུས་སུ་མེ་ཏོག་དམར་པོའི་ཚོམ་བུ་གཅིག་དང༌། མཎྜལ་གྱི་ཐ་མར་མེ་ཏོག་དམར་པོའི་ཚོམ་བུ་ཉི་ཤུ་རྩ་གཅིག་དགོད། མདུན་དུ་གཏོར་མ་ཤས་བརྒྱན་པ་དང༌། གཏོར་མར་བསེ་གྲམ་གྱི་ཁྲག་གིས་སྦྲན་པ་དང་གཞན་ཡང་མཆོད་པ་སྤྱི་དང་མཐུན་པར་བཤམ། ཕག་མོ་གང་ཡང་རུང་བའི་བདག་བསྐྱེད་སྔོན་དུ་འགྲོ་བས། མཎྜལ་གྱི་དབུས་ཀྱི་ཚོམ་བུ་སྐད་ཅིག་གིས་ལྷ་
མོ་ནོར་རྒྱུན་མ་དམར་མོ་ཉི་མ་ལ་བརྐྱང་བསྐུམ་ཀྱིས་བཞུགས་པ། གཡས་རིན་པོ་ཆེའི་སྙེ་མ་དང་གཡོན་ཐོད་ཁྲག་འཛིན་པ། སྐྲ་སེར་གྱེན་དུ་བརྫེས་པ། འཛུམ་ཁྲོ་སྒྲུབ་པ་པོ་ལ་དགྱེས་པས་ལྟ་བ། ལང་ཚོ་ལ་བབ་ཅིང་རིན་པོ་ཆེ་དང་རུས་པས་བརྒྱན་པའོ། །མཐའ་སྐོར་གྱི་ཚོམ་བུ་རེ་ནས་མེ་ཏོག་རེ་བླངས་ལ་དབུས་མ་ལ་འབུལ་ཞིང་སྔགས་རེ་བརྗོད། ཚུལ་དེས་ཉེར་གཅིག་སོང་བ་ན་སྙིང་པོའི་མཐར་ཨི་དཾ་བཱ་ལིང་ཏ་ཁ་ཁ་ཁཱ་ཧི་ཁཱ་ཧི། ཞེས་བཏགས་པ་ལན་བདུན་གྱིས་གཏོར་མ་བསྟབ། དམར་གྱི་ཨརྒྷཾ་ནས་གཏོར་ཞིང་སྔགས་ཀྱི་མཐར་ཨརྒྷཾ་ན་མཿཞེས་བརྗོད། མཆོད་པ་གཞན་རྣམས་ཡིད་ཀྱིས་ཕུལ། སྔགས་ཉི་ཤུ་རྩ་གཅིག་བཟླ་བ་ཉིད་བསྟོད་པ་ཡིན་ནོ། །སྔགས་ནི། ཨ་ཡ་བྷི་བྷི། བྷུ་ཊི་བྷུཊྚ། ཀ་མ་རཀྐཾ་མ། སཱ་མ་པཱ་ཏི། སརྦ་ཝི་སི་ཏི། ཀུ་རུ་ཎི་རེ། ག་རུ། ཞེས་པའོ། །དེ་ནས་ལུང་བླང་བ་ནི། སློབ་མས་མཎྜལ་ཞིག་ཕུལ་ལ། ཡན་ལག་བདུན་པ་བྱ། མདུན་བསྐྱེད་ཀྱི་ལྷ་མོ་གསལ་བཏབ་ལ། སློབ་དཔོན་གྱིས་སྔགས་བརྗོད། སློབ་མས་མེ་ཏོག་ལན་ཉི་ཤུ་རྩ་གཅིག་འབུལ། སློབ་མ་ལྷ་མོར་བསྐྱེད། སྔགས་ཀྱི་བཟླས་ལུང་སྤྱི་དང་མཐུན་པར་སྦྱིན། སློབ་མའི་རྗེས་ཀྱི་བྱ་བ་སྤྱི་དང་འདྲ། མདུན་བསྐྱེད་ཀྱི་མེ་ཏོག་གི་ཚོམ་བུ་ཁ་གསོས་ལ། གོང་བཞིན་མེ་ཏོག་དང་ཨརྒྷཾ་ཕུལ། གཙྪ་གཙྪ་སྭ་བྷཱ་ཝཱ་ནཾ། ཞེས་རང་བཞིན་གྱི་གནས་སུ་གཤེགས་པར་བསམ། དབང་སྡུད་ཀུན༵་ལས་མྱུར་རོ་ཞེས། །དག༵འ་བར་བསྔགས་མོད་སྙིང༵་པོ༵འི་དོན། །སྒོམ་པ་རྣམས་ལ་མི་དགོས་ཀྱང༌། །བློ་དམན་རྗེས་སུ་བཟུང་ཕྱིར་ཡིན། །ནོར་རྒྱུན་མ་དམར་མོའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ལྷ་མོ་ཏི་ནུའི་སྒྲུབ་ཐབས།
ཨོཾ་སྭཱ་སྟི། ཤེས་རབ་མར་བཅས་ཧེ་རུ་ཀར། །བཏུད་ནས་དེ་ཡི་ཕོ་ཉ་མོ། །དུས་མཚན་དམར་མོའི་རྣམ་འཕྲུལ་ནི། །ལྷ་མོ་ཏི་ནུའི་སྒྲུབ་ཐབས་བཤད། །བདེ་མཆོག་ཡབ་ཡུམ་གང་རུང་གི་བསྙེན་པ་སྔོན་དུ་སོང་བ་ཞིག་གིས། མདུན་དུ་སིནྡྷུ་རའི་མཎྜལ་ལ་ལྟེ་བར་བསྒོམ་རྒྱུའི་སྔགས་འཁོར་ལྟ་བུ་ཞིག་བྲི། མེ་ཏོག་དམར་པོ་དང་ཆང་དང་མཆོད་པ་སྣ་ལྔ་བཤམ། སེམས་བསྐྱེད་ཚད་མེད་བཞི་སྔོན་དུ་སོང་ནས། རང་སྐད་ཅིག་གིས་ལྷ་མོ་ཏི་ནུ་སྐུ་མདོག་དམར་མོ་གཡས་གྲི་གུག་འཕྱར་ཞིང༌། གཡོན་ཐོད་ཁྲག་ཐུགས་ཀར་འཛིན་པ། ཞབས་གཡོན་བརྐྱང་གི་སྐྱིལ་ཀྲུང་ཕྱེད་པའི་གར་སྟབས་ཅན་པད་ཟླ་ལ་བཞུགས་པ། ཁྲོ་ཞིང་སྒེག་པ། རུས་པའི་རྒྱན་ཅན་ནོ། །ལྟེ་བར་ཟླ་བ་ལ་དབུས་སུ་ཧྲཱིཿ ཤར་དུ་ས། ལྷོ་རུ་ཧི། ནུབ་ཏུ་ཀ བྱང་དུ་ལ། མདུན་དུ་མཎྜལ་གྱི་གནས་སུ་ཡང་སྔགས་ཀྱི་འཁོར་ལོ་ཡིག་འབྲུ་རྣམས་ལྷའི་རང་བཞིན་དུ་གྲུབ་པར་གྱུར། ལྷ་མོའི་ཐུགས་ཀ་ནས་སྔགས་འབྲུ་བཀུག་ལ་བསྟིམ་པ་ཡིད་ཀྱིས་བྱ། མདུན་གྱི་ཡི་གེ་ལྔ་ཆར་ལ་མཐེབ་སྲིན་གྱིས་ཆང་དང་མེ་ཏོག་བླངས་ལ་གཏོར། ལྟེ་བའི་ཧྲཱིཾཿལས་སྔགས་འཕྲེང་ཐོལ་ཐོལ་འོང་བར་བསམས་ལ། ས་ཧི་ཀ་ལ་ཧྲིཿ ཞེས་བཟླའོ། །དེ་ལྟར་སྔགས་འབུམ་ཕྲག་ཉི་ཤུས་འདིའི་བསྙེན་པ་རྫོགས་པ་ཡིན་ནོ། །འདིའི་རྗེས་གནང་ནི། པདྨ་དམར་པོ་འདབ་བརྒྱད་པའི་སྟེང་དུ་མཉྫི་ལ་ཐོད་པ་ཆང་གིས་བཀང་བ། དེའི་སྟེང་དུ་སིནྡྷུའི་རའི་སྔགས་འཁོར། དེའི་སྟེང་དུ་བྲིས་སྐུ་ཞིག་བཀོད། མདུན་བསྐྱེད་མི་དམིགས་ཏེ་སྟོང་པའི་ངང་ལས་བདག་བསྐྱེད་བཞིན་ལྷ་མོར་བསྐྱེད། གོང་བཞིན་མེ་ཏོག་དང་ཆང་གིས་མཆོད། སློབ་མས་མཎྜལ་ཕུལ། གང་གི་དྲིན་སོགས་
དང༌། སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་བདག་སྐྱབས་མཆི། །བདག་ལ་ལྷ་མོ་ཏི་ནུ་ཡི། །རྗེས་སུ་གནང་བ་སྩལ་དུ་གསོལ། །ལན་གསུམ། གུར་ནས་འབྱུང་བའི་རྒྱུན་བཤགས་ལན་གསུམ། སློབ་མ་ལྷ་མོར་བསྐྱེད། སློབ་དཔོན་གྱི་སྲིན་ལག་གཡོན་པས་མདུན་གྱི་བདུད་རྩི་ནས་བླངས། སློབ་མའི་དཔྲལ་བར་ཐིག་ལེ་ལན་གསུམ་བྱ། སྔགས་བརྗོད་ཅིང་ནང་མཆོད་ལན་གསུམ་སྦྱིན། མདུན་གྱི་ལྷ་མོའི་བྷ་ག་ལས་རཀྟ་བྱུང་སྟེ་འཐུངས་པས་ལུས་གང་བར་མོས་སུ་འཇུགལྷ་མོ་ལས་ལྷ་མོ་བྱུང༌། སློབ་མའི་དཔྲལ་བར་ཐིམ། སྔགས་ཀྱི་མཐར་ཨོཾ་མང་དུ་བརྗོད། མཎྜལ་གྱི་ཡིག་འབྲུ་ལས་སྲིན་ལག་གཡོན་པས་སིནྡྷུ་ར་བླངས་ཏེ། སློབ་མའི་མགྲིན་པར་ཐིག་ལེ་བྱ། ལྷ་མོའི་ལྟེ་བའི་ཡི་གེ་རྣམས་ལྷ་མོའི་མགྲིན་པར་ཐིམ་པར་བསམ། སྔགས་ཀྱི་མཐར་ཨ་མང་དུ་བརྗོད། དྲིལ་བུ་དཀྲོལ། འགྲོ་ཀུན་ཆགས་པས་འོད་དུ་ཞུ། སློབ་མའི་སྙིང་གར་དཀྲོལ་བས་དེ་ཐམས་ཅད་སློབ་མ་ལ་ཐིམ། ལྷ་མོའི་ཐུགས་ཀ་ནས་ལྷ་མོ་བྱུང་སྟེ་སྙིང་གར་ཐིམ། སྔགས་ཀྱི་མཐར་ཧཱུཾ་མང་དུ་བཟླ་ཞིང༌། དྲིལ་བུ་དེ་སློབ་མས་འཁྲོལ་དུ་གཞུགརྗེས་སུ་བཟླས་པའི་ལུང་དང༌། བྱིན་གྱིས་བརླབས་པའི་ལུང་སྤྱི་དང་འདྲ་བ་ལས། སྔགས་འཁོར་ལྟེ་བར་བྱེད་པ་དང༌། སློབ་དཔོན་དང་མདུན་བསྐྱེད་གཉིས་ཀའི་ཞལ་ནས་བྱུང་བ། སློབ་མའི་ཁར་ཉིས་སྦྲག་གི་ཚུལ་གྱིས་བྱུང་བར་སྒོམ་པ་ནི་ཁྱད་པར་རོ། །རྗེས་ཀྱི་བྱ་བ་ཡང་སྤྱི་དང་འདྲའོ། །ཀུན༵་དུ་གབ་པའི་མན་ངག་ནི། །གསལ་བར་བསྟན་ན་དག༵འ་སྤྲོ་སྐྱེ། །སྙིང༵་ནས་ལས་ཚོགས་སྒྲུབ་ན་ཀོ །གསོང་པོ༵ར་སྨྲ་ལ་འདུན་པ་སྐྱེ། །ལྷ་མོ་ཏི་ནུའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ཐོད་པ་རྒྱན་གྱི་སྒྲུབ་ཐབས།
ཨོཾ་སྭཱ་སྟི། རྡོ་རྗེ་ཕག་མོའི་བདག་ཉིད་ཅན། །ཟིལ་གནོན་མཐུ་སྟོབས་དཔག་ཏུ་མེད། །ཐོད་པ་རྒྱན་ཞེས་བྱ་བ་ཡི། །མཁའ་འགྲོ་རྒྱ་མཚོའི་གཙོ་ལ་འདུད། །འདིའི་སྒྲུབ་ཐབས་ནི། ཐོག་མར་སྟོང་ཉིད་བསྒོམ། དེ་ནས་སྙིང་རྗེ་བསྒོམ། དེ་ནས་རང་གི་སྙིང་གར་ཨོཾ་ལས་འོད་འཕྲོས་དོན་གཉིས་བྱས། སླར་འདུས་ཏེ་ཐིམ་པ་ཡོངས་སུ་གྱུར་པ་ལས་སྔགས་ཀྱི་སྒྲ་དང་བཅས་པ་ལྷ་མོའི་སྐུར་གྱུར་བ་ནི། རྡོ་རྗེ་རྣལ་འབྱོར་མ་སྐུ་མདོག་དམར་མོ། ཞལ་གཅིག་ཕྱག་བཞི་སྤྱན་གསུམ་སེང་གེའི་གདོང་ཅན་རལ་པ་འཕྱར་བ། རུས་པའི་རྒྱན་གྱིས་བརྒྱན་པ། ཕྱག་གཡས་ཀྱི་དང་པོ་གྲི་གུགགཉིས་པ་རལ་གྲི་འཕྱར་བ། གཡོན་གྱི་དང་པོ་ཐོད་ཁྲག་ཞལ་དུ་གསོལ་བ། གཉིས་པ་ཁ་ཊྭཱཾ་རྩེ་གསུམ་འཛིན་པ། པདྨ་ཉི་ཟླ་བརྩེགས་པའི་སྟེང་དུ། མཁའ་འགྲོ་སྡེ་ལྔས་བཏེགས་པའི་རིན་པོ་ཆེའི་གདན་མི་རོ་བསྣོལ་བ་དང་བཅས་པའི་སྟེང་དུ་གཡོན་བརྐྱང་བའི་ཕྱེད་ཀྲུང་ཅན། སྙིང་གི་ནང་དུ་སྔགས་ཀྱི་ཡི་གེ་གཡས་སུ་འཁོར་བ། དེ་ལས་འོད་འཕྲོས། འདོད་ཁམས་དམར། གཟུགས་ཁམས་དཀར། གཟུགས་མེད་ཁམས་ནག་གི་སེམས་ཅན་རྣམས་ཀྱི་སྲོག་རྩ་ཞལ་དུ་བཅུགསྙིང་ཁྲག་ཞལ་དུ་གསོལ་བས། སྒྲིབ་པ་དག་ཅིང་སྐྱེ་འཆི་རྩད་ནས་བཅད་པར་གྱུར། ཨོཾ་དུ་ཁ་ཡེ་ན་མ། ཞེས་ཟླ་བ་ཕྱེད་དུ་བཟླའོ། །དེ་ནས་དེ་ལ་ཨོཾ་ཧ་ར་ཎི་ས་ཨཱཿརི་ནི་ས་ཧ་ཧཱུཾ་ནི་ཧ་ས་རི། ཞེས་པ་བཏགས་ལ་ཞག་བདུན་བཟླས་པས་མི་དང་མི་མ་ཡིན་དབང་དུ་འདུ། བདུད་ཚོགས་ཟིན་གྱིས་གནོན། མཁའ་འགྲོ་སྤྲིན་བཞིན་དུ་འདུ་བ་ཡིན་ནོ། །ཐོད་པ་མཚན་ལྡན་དུ་
དཀར་གཏོར་ཆང་གིས་བརྒྱན་པ་ཁ་རང་ལ་བསྟན་པ་ཞིག་བཤམ། འབྲུ་གསུམ་གྱིས་བྱིན་གྱིས་བརླབས་ནས། སྙིང་པོ་ལ་ཁཱ་ཧི་བཏགས་པ་ལན་གསུམ་གྱིས་འབུལ། ཕུད་མེ་ལ་བསྲེག་ཅིང་ལྷག་མ་ཟའོ། །དཔུང་པ་གཉིས་སུ་སེང་གེ་རལ་པ་དཀྲུག་པ། མཁལ་ལོགས་གཉིས་སུ་སྟག་མོ་མི་རོ་ཟ་བ། བརླ་སྒང་གཉིས་སུ་སྦྲུལ་ནག་ཁ་ནས་མེ་འབར་བ་བསྒོམས་ནས། ལས་ལ་སྦྱོར་བ་ཡིན་ནོ། །འདིའི་ཏིང་ངེ་འཛིན་གྱི་དབང་ནི་ཚོགས་འཁོར་བཟང་བ་བཤམ། ཉོན་མོངས་དུག་གསུམ་དབང་དུ་བསྡུ། །རིག་པ་ནམ་མཁའི་དབྱིངས་དང་བསྲེ། །ལྷ་སྐུ་ཇེ་ཆེ་ཇེ་བསྟིམ་བྱ། །འཛབ་བཟླས་བྱ་ཞིང་གཏོར་དབང་བསྐུར། །དམ་རྫས་ཚོགས་ལ་རོལ་བར་བྱ། །ཞེས་པ་ལྟར་ཏེ། བླ་མའི་མན་ངག་ལས་ཤེས་པར་བྱའོ། །པདྨའི་མན་ངག་གཉན་སྟོན་གྱིས། །ལེགས་གྲུབ་ཀུན༵་དུ་ཞལ་གཟིགས་པའི། །ཟིལ་གནོན་སྒྲུབ་ཐབས་རབ་དག༵འ་བ། སྙིང༵་པོ༵་མདོ་ཙམ་བྲིས་པ་ཡིན། །རྗེ་བཙུན་མ་ཐོད་པ་རྒྱན་གྱི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
འཕྲིན་ལས་མྱུར་སྒྲུབ་དབང་གི་ལྷ་མོའི་སྒྲུབ་ཐབས།
ཨོཾ་སྭཱ་སྟི། སྤྱན་རས་གཟིགས་དབང་ཐུགས་རྗེ་ལས། །མཁའ་འགྲོ་གསང་བ་ཡེ་ཤེས་སྤྲུལ། །འཕྲིན་ལས་མྱུར་སྒྲུབ་དབང་གིས་ལས། །མཆོག་སྩོལ་མ་ལ་གུས་པས་འདུད། །ཡིག་དྲུག་གི་བསྙེན་པ་སྔོན་དུ་སོང་བ་ཞིག་གིས་སྐྱབས་སེམས་ཚད་མེད་བཞི་སྤྱི་དང་མཐུན་པའི་རྗེས་སུ། རང་གི་སྙིང་གར་ཧྲཱིཿདམར་པོ། དེའི་འོད་ཀྱིས་ལུས་ཁར། འོད་དུ་ཞུ་བ་ལས་རང་ཉིད་གསང་བ་ཡེ་ཤེས་ཀྱི་མཁའ་འགྲོ་མ་སྐུ་མདོག་དམར་མོ་ཞལ་གཅིག་ཕྱག་བཞི། ཞབས་གཉིས་གར་སྟབས་ཀྱིས་པདྨ་ལ་བཞུགས་པ། ཁྲོ་ཆགས་འདྲེས་པའི་ཉམས་ཅན། གཡས་དང་པོ་གྲི་གུག འོག་མ་རལ་གྲི།
གཡོན་དང་པོ་ཐོད་ཁྲག འོག་མ་རྩེ་གསུམ་གྱིས་མཚན་པའི་ཁ་ཊྭཱཾ་ག་བསྣམས་པ། གཅེར་བུ་སྐྲ་གྲོལ་མགོ་འཕྲེང་དང་རུས་རྒྱན་ཅན། མཁའ་འགྲོ་རིགས་བཞིས་གདན་གྱི་ཕྱོགས་བཞི་ནས་འདེགས་པ། ལྷ་འདྲེ་མི་གསུམ་དབང་དུ་སྡུད་པ། ཐུགས་ཀར་སྤྱན་རས་གཟིགས་དམར་པོ་མུ་ཏིག་གི་འཕྲེང་བ་དང་པདྨ་འཛིན་པ་ཟླ་གདན་ལ་བཞུགས་པའོ། །ཐུགས་ཀར་ས་བོན་དང་སྔགས་འཕྲེང་གསལ་བཏབ་ལ། ཨོཾ་མ་ཎི་པདྨེ་ཧཱུཾ། ཨོཾ་དྷུ་མ་གྷ་ཡཻ་ན་མ་སྭཱཧཱ། ཨོཾ་ཧ་རི་ནི་ས་ར་ཙ་ཧྲི་ཡ། ཞེས་ཅི་འགྲུབ་བཟླ། གཏོར་མ་བསངས་སྦྱངས། འབྲུ་གསུམ་གྱིས་བྱིན་གྱིས་བརླབས། རང་གི་མདུན་དུ་སྐད་ཅིག་གིས་མཁའ་འགྲོ་གསང་བ་ཡེ་ཤེས་འཁོར་དང་བཅས་པ་བཞུགས་པར་གྱུར། སྔགས་ཀྱི་མཐར་ཨི་དཾ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་པ་བཏགས་པ་ལན་ལྔས་བདག་མདུན་གྱི་ལྷ་གཉིས་ཆར་ལ་ཕུལ། ཨརྒྷཾ་ནས་ཤཔྟའི་བར་གྱིས་མཆོད། རྡོ་རྗེ་མི་འཆི་འདོད་ཆགས་ཆེ། །མི་རྟོག་ནམ་མཁའི་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །པདྨ་མཁའ་འགྲོ་ཕྱག་འཚལ་ལོ། །ཐུགས་རྗཻ་ཆེན་པོའི་སྐུ་སྤྲུལ་པ། །ལྷ་འདྲེ་མི་གསུམ་དབང་དུ་སྡུད། །མཁའ་འགྲོ་གསང་བ་ཡེ་ཤེས་ནི། །མཁའ་འགྲོའི་ཚོགས་དང་བཅས་ལ་བསྟོད། །མཆོད་སྦྱིན་གཏོར་མ་འདི་བཞེས་ལ་སོགས་འདོད་དོན་གསོལ་བ་བཏབ། མདུན་བསྐྱེད་རང་གི་སྙིང་གར་ཐིམ། རང་ཉིད་མི་དམིགས་པར་བྱས་ལ། དགེ་བ་བསྔོ། འདི་ལ་དབང་རྗེས་གནང་སོགས་མི་དགོས། སྒོམ་ལུང་ཕོག་པ་ཉིད་ཀྱིས་ཆོག་གོ །ཀུན༵་ནས་ཟབ་པ་པདྨའི་གསུང༌། །འདི་ལ་བརྟེན་ནས་ལས་ཚོགས་རྣམས། །
དག༵འ་བས་བསྒྲུབས་ནས་མྱུར་འགྲུབ་སྟེ། །སྙིང༵་པོ༵འི་སྒྲུབ་ཐབས་འདི་ཙམ་ཡིན། །འདི་ནི་བསྙེན་པ་ཙམ་སྟེ། མེ་མཆོད་ལ་སོགས་པ་ལས་ཚོགས་མང་དུ་ཡོད་དོ། །མཁའ་འགྲོ་གསང་བ་ཡེ་ཤེས་ཀྱི་སྒྲུབ་ཐབས་ཀྱི་ལེ་ཚན་ནོ།། །།སྒྲུབ་ཐབས་རིན་ཆེན་འབྱུང་གནས་ལས། དབང་སྡུད་ཀྱི་ལྷའི་སྒྲུབ་ཐབས་བཤད་པའི་སྐབས་ཏེ་བཅུ་བཞི་པའོ། །དར་རྒྱས་འཕེལ། །