སྒྲུབ་ཐབས་རིན་ཆེན་འབྱུང་གནས་ལས་སྣ་ཚོགས་པའི་སྡེའི་སྒྲུབ་ཐབས་བཤད་པའི་སྐབས་ཏེ་བཅོ་ལྔ་པ།
རྡོ་རྗེ་རྣམ་འཇོམས་ཀྱི་སྒྲུབ་ཐབས།
ཨོཾ་སྭཱ་སྟི། མ་ལུས་རྒྱལ་བའི་ཐུགས་རྡོ་རྗེ། །བདུད་རྩི་འཁྱིལ་བའི་སྐུར་བསྟན་ནས། །བདུད་བཞིའི་སྟོབས་འཇོམས་ལས་བཞི་སྒྲུབ། །རྡོ་རྗེ་རྣམ་འཇོམས་ལ་འདུད་དོ། །སྐྱབས་སེམས་སྔོན་དུ་འགྲོ་བས། རང་གི་སྙིང་གར་པད་ཉི་ལ་ཧཱུཾ་ལྗང་སྔོན་དེ་ལས་འོད་འཕྲོས། ལུས་གང༌། སྡིག་སྒྲིབ་སྦྱངས། སྣ་བུག་ནས་ཕྱིར་འཕྲོས་རང་བཞིན་གྱི་གནས་ནས་རྡོ་རྗེ་རྣམ་པར་འཇོམས་པ་ལ་སངས་རྒྱས་དང་བྱང་ཆུབ་སེམས་དཔས་བསྐོར་བ་བཛྲ་ས་མཱ་ཛཿ ཨོཾ་བཛྲ་བི་དཱ་ར་ཎ་ཡ་ས་པ་རི་ཝཱ་ར་ཨརྒྷཾ་ནས་ཤཔྟའི་བར་གྱིས་མཆོད། དཀོན་མཆོག་གསུམ་ལ་བདག་སྐྱབས་མཆི་སོགས་ཡན་ལག་བདུན་པ་བྱ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག་སོགས་ཚད་མེད་བཞི་བསྒོམ། སྭ་བྷཱ་ཝས་སྟོང་བར་སྦྱངས། སྟོང་པའི་ངང་ལས་པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་ལས་སྣ་ཚོགས་རྡོ་རྗེའི་ལྟེ་བ་ལ་ཧཱུཾ་གིས་མཚན་པ་དེ་ལས་འོད་འཕྲོས། རྡོ་རྗེའི་ས་གཞི་རྭ་བ་དྲ་བ་གུར་བླ་བྲེ། ཡེ་ཤེས་ཀྱི་མེ་དཔུང་འབར་བའི་བསྲུང་བའི་འཁོར་ལོ་ཡངས་ཤིང་རྒྱ་ཆེ་བའི་དབུས་སུ། པདྨ་དང་ཉི་མའི་དཀྱིལ་འཁོར་གྱི་གདན་ལ། ཧཱུཾ་ལྗང་སྔོན་ལས་སྣ་ཚོགས་རྡོ་རྗེའི་ལྟེ་བ་ལ་ཧཱུཾ་ལྗང་སྔོན་གྱིས་མཚན་པ། དེ་ལས་འོད་
འཕྲོས་འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། རང་ཉིད་བཅོམ་ལྡན་འདས་རྣམ་པར་འཇོམས་པ་སྐུ་མདོག་ལྗང་སྔོན་ཞལ་གཅིག་ཕྱག་གཉིས། ཕྱག་གཡས་རྡོ་རྗེ་ཐུགས་ཀར་གཏོད་ཅིང༌། གཡོན་དེས་ཡུ་བ་བྱས་པའི་དྲིལ་བུ་དཀུར་བརྟེན་པ། ཞལ་ཁྲོ་མ་འཛུམ་གྱི་རྣམ་པ་ཅན། མཆེ་བའི་མྱུ་གུ་ཅུང་ཟད་གཙིགས་པ། སྤྱན་གསུམ་དང་ལྡན་ཞིང་དབུ་སྐྲ་རལ་པའི་ཐོར་ཚུགས་ཅན། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་ཤིང༌། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། གཟི་བརྗིད་མཐའ་ཡས་པ་མངའ་ཞིང༌། མ་ལུས་པའི་སྤྲུལ་པ་འཆང་བའོ། །དཔྲལ་བར་ཨོཾ། མགྲིན་པ་ཨཱཿ ཐུགས་ཀར་ཧཱུཾ། དེ་ལས་འོད་ཟེར་འཕྲོས། རང་བཞིན་གྱི་གནས་ནས་རྡོ་རྗེ་རྣམ་པར་འཇོམས་པ་འཁོར་དང་བཅས་པ་བཛྲ་ས་མཱ་ཛཿ ཨརྒྷཾ་ནས་ཤཔྟའི་བར་གྱིས་མཆོད། ཨོཾ་བཛྲ་ཨངྐུ་ཤ་ཛཿ ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་བཛྲ་ཨཱ་བེ་ཤ་ཨ། སླར་ཡང་སྙིང་གའི་ཧཱུཾ་ལས་འོད་ཟེར་འཕྲོས། དབང་གི་ལྷ་རིགས་ལྔ་འཁོར་དང་བཅས་པ་བཛྲ་ས་མཱ་ཛཿ ཨོཾ་པཉྩ་ཀུ་ལ་ས་པ་རི་ཝཱ་ར་ཞེས་སྦྱར་ཏེ། ཨརྒྷཾ་ནས་ཤཔྟའི་བར་གྱིས་མཆོད། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ། ཞེས་གསོལ་བ་བཏབ་པས། ཇི་ལྟར་བལྟམས་པ་ནས་ཤྲཱི་ཡེ་ཧཱུཾ། ཞེས་དབང་བསྐུར། སྐུ་གང༌། དྲི་མ་དགཆུའི་ལྷ་མ་ཡར་ལུད་པ་ལས། རྡོ་རྗེ་སེམས་དཔས་དབུ་བརྒྱན། སླར་ཡང་ཨརྒྷཾ་ནས་ཤཔྟའི་བར་གྱིས་མཆོད། བཟླས་པའི་དམིགས་པ་གསལ་བཏབ་
ལ། འདི་སྐད་བདག་གིས་ནས་སྨྲས་སོའི་བར་གླེང་གཞི་ཚར་གཅིག་བཏོན། གཟུངས་ཀྱི་བཟླས་པ་ཅི་རིགས་པར་བྱེད་པ་ལས། གཟུངས་ཡོངས་སུ་རྫོགས་པ་དང༌། ཉེ་སྙིང་ཁོ་ན་བཟླ་བ་གཉིས་འདམ་ཀ་ལས་གཞན་མེད་པར་གྲགས་ནའང༌། རྩ་སྔགས་དང་སྙིང་པོ་ཉེ་སྙིང་གསུམ་ཇི་ལྟར་རིགས་པར་བཟླས་པས་ཆོག་གོ །འཇུག་ཏུ་ཕན་ཡོན་ཚར་གཅིག་བཏོན་པ་ལ། ཡེ་ཤེས་པ་མདུན་གྱི་ནམ་མཁར་བཞུགས། གོང་བཞིན་མཆོད། གང་ཐུགས་གཉིས་སུ་མེད་པའི་ཡེ་ཤེས་ལས། །རྡོ་རྗེའི་རྭ་གུར་མེ་དཔུང་འབར་བའི་མཐུས། །བདུད་བཞིའི་སྟོབས་རྣམས་རྣམ་པར་འཇོམས་མཛད་པའི། །རྡོ་རྗེ་རྣམ་པར་འཇོམས་ལ་ཕྱག་འཚལ་ལོ། །ཞེས་བསྟོད། བཅོམ་ལྡན་འདས་རྡོ་རྗེ་རྣམ་པར་འཇོམས་པའི་ལྷ་ཚོགས་འཁོར་དང་བཅས་པ་རྣམས་ཀྱིས་བདག་ལ་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་བཏབ། ཡིག་བརྒྱ་ལན་གསུམ། མ་འབྱོར་པ་དང་སོགས་བཟོད་པར་གསོལ། ཨོཾ་བཛྲ་མུཿ ཞེས་གཤེགས་སུ་གསོལ། རང་ཉིད་དམ་ཚིག་པར་གསལ་བའི་གནས་གསུམ་དུ་ཡི་གེ་འབྲུ་གསུམ་བཀོད། སྨོན་ལམ་དང་བཀྲ་ཤིས་ཅི་རིགས་པར་བྱའོ། །འདིའི་རྗེས་གནང་བྱེད་པར་འདོད་པས། རྗེས་གནང་གི་བྱ་བ་དངོས་ནི། སྒྲུབ་ཐབས་བརྒྱ་རྩ་དང་འདྲ་ལ། འོན་ཀྱང་བུམ་ཆོག་དང་སྦྲེལ་བར་འདོད་ན། མཎྜལ་པདྨ་འདབ་བརྒྱད་ཚོམ་བུ་དང་བཅས་པའི་སྟེང་དུ་བུམ་པ་བཤམ་པའམ། མ་འགྲུབ་ན་བུམ་གདན་ཅི་བདེ་བ་ལ་བུམ་པ་ཁ་རྒྱན་དུང་ཆོས་ཆུར་བཅས། གཟུངས་ཐག་རྡོ་རྗེ་དང་བཅས་པ་བཀོད། སྤྲོ་ན་དེ་ཉིད་ལ་དགོས་མཆོད་ཀྱང་བཤམ། བདག་བསྐྱེད་མདུན་བསྐྱེད་སོང་བའི་མཚམས་སམ། མདུན་བསྐྱེད་དང་བུམ་བསྐྱེད་ལྷན་
ཅིག་ཏུ་བྱས་ཀྱང་ཆོག་སྟེ། གང་ལྟར་ཡང་མཆོད་པ་བྱིན་གྱིས་བརླབས། བུམ་པ་བསངས་སྦྱངས། སྟོང་པའི་གང་ལ་པཾ་ལས་པདྨ་དང༌། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲུཾ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ་ལྟོ་བ་ཡངས་ཤིང་མགྲིན་པ་ཕྲ་བ་མཆུ་འཕྱང་བ། ལྷའི་གོས་ཀྱི་མགུལ་ཆིངས་དང་ལྡན་པ། དཔག་བསམ་ཀྱི་ཤིང་གིས་ཁ་བརྒྱན་པ། ནང་ཆུ་དང་བཅུད་ཐམས་ཅད་ཀྱིས་ཡོངས་སུ་གང་བའི་དབུས་སུ། པདྨ་དང་ཉི་མའི་གདན་ཞེས་པ་ནས། དབུ་རྒྱན་གྱི་བར་བདག་བསྐྱེད་ཉིད་འདོན་པ་སྤོས་པ་རུང་བ་ལས། ཁྱད་པར་ནི། ཡེ་ཤེས་པ་བཛྲ་ས་མཱ་ཛཿ ཞེས་སྤྱན་དྲངས་པའི་རྗེས་སུ། མ་ལུས་སེམས་ཅན་ནས་ཡོངས་དག་འཁོར་དང་བཅས་ཏེ་གཤེགས་སུ་གསོལ། །ཨོཾ་སརྦ་ཏ་ཐཱ་ག་ཏ་བཛྲ་བི་ད་ར་ཎ་ས་པ་རི་ཝཱ་ར་ཨེ་ཧྱ་ཧི། ཞེས་བརྗོད། དེ་ནས་མཆོད་བསྟོད་བྱས་ལ། གཟུངས་ཐག་ནས་བཟུང་སྟེ་དམིགས་པ་དང་བཅས་པས་གཟུངས་མདོ་འདོན་ཅིང་བཟླས་པ་བྱེད་ཚུལ་བདག་བསྐྱེད་ཀྱིས་རིགས་འགྲེ། མཐར་བུམ་པའི་ལྷ་ལ་མཆོད་བསྟོད་དང༌། མ་འབྱོར་པ་དང་སོགས་བཟོད་གསོལ་བྱ། བཛྲ་མུཿ ཞེས་ཡེ་ཤེས་པ་གཤེགས། དུང་ཆོས་ཀྱི་ཆུ་བླུགམཆོད་ཡོན་ཕུལ་བས་དམ་ཚིག་པ་འོད་དུ་ཞུ་སྟེ་བུམ་པའི་ཆུར་གྱུར་ཞེས་བརྗོད། དེ་ནས་འཇིག་རྟེན་འདས་པའི་གཏོར་འབུལ་དང༌། འཇིག་རྟེན་པའི་གཏོར་མ་ཆ་གསུམ་བཞིན་དུ་བཏང༌། སློབ་མའི་བྱ་བའི་སྐབས། རྗེས་གནང་དངོས་གཞི་སོང་མཚམས་སུ། བཀྲུ་བྱབས་བསྲུང་གསུམ་བྱ་སྟེ། འདི་སྐད་བདག་གིས་ནས། ཉེ་སྙིང་ཡན་ཆད་རྫོགས་པར་བཏོན་མཚམས་ཉེ་སྙིང་གི་
མཐར། སརྦ་པཱ་པཾ་ཤཱནྟིངྐུ་རུ་སྭཱཧཱ། དེ་བཞིན་དུ་སྦྱར་ཏེ། སརྦ་བིགྷྣཱན། སརྦ་རོ་ཥ། སརྦ་དུཥྟཾ། སརྦ་ཛྭ་རེ། སརྦ་ཨུ་པ་དྲ་བེ། སརྦ་ཨ་ཀ་ལ་མྲྀ་ཏུ། སརྦ་དུར་སོབ་ནི། སརྦ་དུར་མི་ཏི། སརྦ་ཙིཏྟ་ཀུ་ལེ་བྷྱཿ ཤཱནྟིཾ་ཀུ་རུ་སྭཱཧཱ། ཞེས་བུམ་པའི་ཆུས་སློབ་མ་ལ་ཁྲུས་བྱ་ཞིང༌། མཐར་ཁ་བཤལ་ལོ། །དེ་བཞིན་དུ་རྨ་བྱའི་མདོངས་སོགས་ཀྱིས་བྱབས་ཏེ། ཤཱནྟིཾ་ཀུ་རུ་སྭཱཧཱའི་དོད་དུ་ཨ་པ་ན་ཡེ་སྭཱཧཱ། ཞེས་བརྗོད། དེ་ནས་བསྲུང་བ་བྱ་སྟེ། རེ་རེའི་མཐར་རཀྵ་རཀྵ་ཞེས་བརྗོད་ཅིང༌། སྤྱི་བོ་སྙིང་ག་སོག་ཕྲག་དཔུང་པ་གཡས་གཡོན། དཔྱི་གཡས་གཡོན་རྣམས་ལ་རྡོ་རྗེ་རྒྱ་གྲམ་དུ་བཞག་ནས། མཐར་རྒྱལ་བ་སྲས་བཅས་བདེན་པའི་བྱིན་རླབས་དང༌། །རྡོ་རྗེ་རྣམ་པར་འཇོམས་པའི་མཐུ་སྟོབས་ཀྱིས། །འགྲོ་བ་འདི་ལ་བདག་གིས་བསྲུངས་ཟིན་གྱི། །འདི་ལ་སུས་ཀྱང་གནོད་པར་མ་བྱེད་ཅིག །ཅེས་བརྗོད་ལ་མེ་ཏོག་དོར་ཞིང༌། རོལ་མོ་དང་བཅས་པའི་བཀྲ་ཤིས་བྱའོ། །དེ་ནས་གཙོ་བོས་ཇི་ལྟར་སོགས་དམ་ཚིག་ཁས་བླངས། གཏང་རག་གི་མཎྜལ་འབུལ། དེང་ནས་སོགས་ཡོན་དབུལ། དགེ་བ་བསྔོ། མདུན་བསྐྱེད་ཀྱི་མཆོད་པ་ཁ་གསོས་ནས་བྱིན་གྱིས་བརླབས་ཏེ། མཆོད་བསྟོད། གསོལ་བཏབ། ཡིག་བརྒྱ། བཟོད་གསོལ། གཤེགས་གསོལ། སྨོན་ལམ་བཀྲ་ཤིས་རྣམས་བྱའོ། །འདིའི་བཟླས་ལུང་གི་སྐབས་ལོང་སྐབས་མེད་ཅིང་མི་སྤྲོ་བ་དང༌། རྒྱུན་གྱི་ཉམས་ལེན་བདག་བསྐྱེད་སྐབས་དང་རྒྱས་པ་མི་ལྕོགས་ན། ན་མ་ཤྩཎྜ་བཛྲ་ཀྲོ་དྷཱ་ཡ། ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུཾ་ཕཊ།
ཅེས་ཉེ་སྙིང་གཅིག་པུ་བཟླས་པས་ཆོག་ཅིང༌། བཀྲུ་བྱབས་བསྲུང་གསུམ་དང་བྲལ་བའི་རྗེས་གནང་ཁོ་ན་ཡང་སྐབས་སུ་བབ་པ་དག་ལ་སྦྱིན་པ་དང༌། བསྡུ་ན་སྔོན་འགྲོ་ཚོགས་ཞིང་ཚོགས་བསག་རྣམས་ཀྱང་བོར་བས་རུང་ངོ༌། །རྣམ་འཇོམས་མཐིང་ཀར་གྲགས་པའི་ལུགས་ཀྱང་ཆོ་གའི་བྱ་བ་འདི་ཁོ་ན་ལ། བཅོམ་ལྡན་འདས་སྐུ་མདོག་མཐིང་ནག་གཡས་རྡོ་རྗེ་རྩེ་ལྔ་པ་འཕྱར་ཞིང༌། གཡོན་དྲིལ་བུ་དཀུར་བརྟེན་པ། སྐྲ་སེར་གྱེན་དུ་བརྫཻས་པ། གཡོན་བརྐྱང་བའི་སྟབས་ཅན། སྟག་ལྤགས་དང་སྦྲུལ་གྱི་རྒྱན་ཅན། མེ་དཔུང་འབར་བའི་དབུས་ན་བཞུགས་པའོ། །ཕྱོགས་བཅུར་སྐད་ཅིག་ཙམ་གྱིས་སྤྲུལ་པའི་ཁྲོ་བོ་བཅུ་རང་དང་མཚུངས་པའི་རྣམ་པ་ཅན་ནོ། །ཞེས་བསྐྱེད་པ་ནི་ཁྱད་པར་རོ། །འདི་ལ་གཏོར་མའི་ཆོ་ག་རྣལ་འབྱོར་རྒྱུད་ལྟར་བྱེད་པའི་ལུགས་ཀྱང་ཡོད། རྣམ་པ་གཅིག་ཏུ་ན་འཇིག་རྟེན་འདས་གཏོར་མེད་ཀྱང་ཆོག་པས་ཅི་བདེ་བར་བྱའོ། །མཁས་རྨོངས་ཀུན༵་ལ་ཆེར་གྲགས་ཤིང༌། །སྔགས་རྒྱུད་ངོ་མཚར་དག༵འ་བའི་ཏོག །གཟུངས་སྔགས་སྙིང༵་པོ༵འི་བྱིན་རླབས་ཅན། །སྒྲུབ་ཐབས་མདོར་བསྡུས་ཨེ་མ་ཧོ། །རྡོ་རྗེ་རྣམ་པར་འཇོམས་པ་ལྗང་སྔོན་གྱི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
གསང་བའི་བདག་པོའི་སྒྲུབ་ཐབས།
ཨོཾ་སྭཱ་སྟི། ཁྲོ་བོ་བདུད་རྩི་འཁྱིལ་བའི་དངོས། །གསང་བའི་བདག་པོ་ཐུགས་ལས་སྤྲུལ། །དེ་ལ་བཏུད་ནས་དེའི་སྒྲུབ་ཐབས། །མདོར་བསྡུས་ཙམ་ཞིག་བྲི་བར་བྱ། །དེ་ལ་གནས་ཡིད་དུ་འོང་བར་རས་བྲིས་དགྲམ། དབུས་དང་ཕྱོགས་བཞིར་མཎྜལ་
བྱ། དབུས་ཀྱི་མཎྜལ་དུ་བུམ་པ་སྤྱི་དང་མཐུན་པར་བཅའ། མཆོད་པ་དང་གཏོར་མ་ཆ་བཞི་དང༌། བཀྲ་ཤིས་ཀྱི་རྫས་ཀྱང་ཚོགས་ཚད་བཤམ། མཆོད་པ་ཡང་རྒྱ་ཆེར་བཤམ། ཤར་གྱི་མཎྜལ་དུ་མཉྫི་ལ་རྡོ་རྗེ་སེམས་དཔའི་སྐུ་གཟུགས་བཞགསངས་རྒྱས་ཀྱི་རས་བྲིས་ཀྱང་དགྲམ། ཕྱོགས་གསུམ་གྱི་མཎྜལ་ལ་གཟུངས་མདོའི་གླེགས་བམ་རེ་བཞག་ཅིང༌། མཎྜལ་བཞི་པོ་ལ་ཡང་མཆོད་པ་ཚར་རེ་བཤམ། དུང་ཆོས་སུ་སྙིང་པོའི་སྔགས་ཀྱིས་བསངས་ཆུ་བསྒྲུབས། གནས་དང་ཡོ་བྱད་ལ་བགེགས་སྦྱང་བ་ལག་ལེན་སྤྱི་དང་མཐུན་པར་བྱས་ལ། བསངས་ཆུས་གཏོར། བསྲུང་བའི་འཁོར་ལོར་མོས། གནས་ཡོ་བྱིན་རླབས་སྤྱི་དང་མཐུན་པར་བྱས་ལ། ཤར་གྱི་མཆོད་པ་བྱིན་གྱིས་བརླབས། རང་གི་སྙིང་ག་ནས་འོད་ཟེར་འཕྲོས། བཅོམ་ལྡན་འདས་ཤཱཀྱ་ཐུབ་པ་རྡོ་རྗེ་རྣམ་འཇོམས་ཀྱི་ཚོགས་དང་བཅས་པ་སྤྱན་དྲངས་པར་མོས་ལ། མ་ལུས་སེམས་ཅན་མ་བརྗོད། མཆོད་ཡོན་ཕལ་ཆེར་སོགས་སྔགས་དང་ཕྱག་རྒྱས་མཆོད་པ་འབུལ། ཡན་ལག་བདུན་པ་བྱ། སྐྱབས་འགྲོ་སེམས་བསྐྱེད་ཚད་མེད་བཞི་རྣམས་སྤྱི་དང་མཐུན་པར་བརྗོད། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་པད་ཟླ་ལ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ཡོངས་སུ་གྱུར་པ་ལས། རང་ཉིད་རྡོ་རྗེ་རྣམ་པར་འཇོམས་པ་སྐུ་མདོག་དཀར་པོ་ཞལ་གཅིག་ཕྱག་གཉིས་གཡས་རྡོ་རྗེ་རྩེ་དགུ་པ་ཐུགས་ཀར་གཏོད་པ། གཡོན་དྲིལ་བུ་དཀུར་བརྟེན་པ། ཞབས་སེམས་དཔའི་སྐྱིལ་མོ་ཀྲུང་གིས་བཞུགས་
པ། མཆེ་བ་ཅུང་ཟད་བརྩིགས་ཤིང༌། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། ཟླ་བའི་འོད་ཀྱི་རྒྱབ་ཡོལ་ཅན་ནོ། །ཐུགས་ཀར་ཟླ་བ་ལ་རྡོ་རྗེ་རྩེ་དགུ་པའི་ལྟེ་བར་ཟླ་བའི་སྟེང་དུ་ཧཱུཾ། དེའི་མཐའ་སྐོར་དུ་སྔགས་ཀྱིས་ཡོངས་སུ་བསྐོར་བར་མོས། ཡེ་ཤེས་པ་བསྟིམ་པ་སྤྱི་དང་འདྲ། བདག་བསྐྱེད་ལ་དབང་བསྐུར་མི་མཛད། རྩ་སྔགས་སྙིང་པོ་ཉེ་སྙིང་གསུམ་གང་ནུས་སུ་བཟླ། མདུན་བསྐྱེད་བུམ་པ་བསངས་སྦྱངས། བུམ་པར་བསྐྱེད་ལ། དེའི་ནང་དུ་དམ་ཚིག་པ་བསྐྱེད། ཡེ་ཤེས་པ་བསྟིམ། གནས་གསུམ་བྱིན་གྱིས་བརླབས། དབང་བསྐུར་ཏེ་མི་བསྐྱོད་པས་རྒྱས་འདེབས། དབུས་ཀྱི་མཆོད་པ་བྱིན་གྱིས་བརླབས་ནས། ཨརྒྷཾ་ནས་ཤཔྟའི་བར་གྱིས་མཆོད། རྣམ་འཇོམས་སྤྱི་དང་མཐུན་པའི་བསྟོད་པས་བསྟོད། གཞན་སྒྲུབ་པ་པོ་དམ་ཚིག་ལྡན་པ་གསུམ་གྱིས་ཕྱོགས་གསུམ་གྱི་མཎྜལ་གྱི་སྟེང་གི་གཟུངས་མདོ་ཀློག་ཅིང༌། སློབ་དཔོན་གྱིས་གཟུངས་ཐག་ནས་བཟུང་ལ། འདི་སྐད་བདག་གིས་ཐོས་པ་ནས། སྨྲས་སོ། །ཞེས་པའི་བར་ལན་གཅིག་བརྗོད། སྔགས་གསུམ་པོ་གང་ནུས་བཟླས་ལ། མཐར་ཕན་ཡོན་ཚར་གཅིག་བརྗོད། ཕྱོགས་གསུམ་གྱི་ཀློག་མཁན་རྣམས་ཀྱིས་མདོ་ཡོངས་རྫོགས་སྐྱར་གྱིན་འདོན་པ་ཡིན་པ་ལ། ཉེར་གཅིག་འདོན་ན་རེ་རེས་བདུན་བདུན་བྱ། ཡང་ན་བརྒྱད་བརྒྱད་དམ་སོ་དྲུག་སོ་དྲུག་འདོན། དེ་དག་གི་མཐར་རེ་རེས་མཆོད་པ་བྱིན་གྱིས་བརླབས། བུམ་པའི་ལྷ་ལ་དམིགས་ནས་མཆོད་བསྟོད་བྱེད། བུམ་པའི་ལྷ་ལ་འདོད་དོན་གསོལ་བ་བཏབ། སློབ་མ་རྗེས་
བཟུང་བྱ་བར་འདོད་ན་སྐབས་འདིར་བྱ་སྟེ། མཎྜལ་ཕུལ་ལ། ཡན་ལག་བདུན་པ་གང་འོས་ཞིག་བྱ། རྡོ་རྗེ་འཛིན་པ་དགོངས་སུ་གསོལ་སོགས་ཀྱི་གསོལ་བ་བཏབ། བགེགས་སྦྱངས་བ་དང༌། སྡིག་པ་སྦྱང་བ་བྱས་པའི་རྗེས་སུ་བཀྲུ་བྱབས་བསྲུང་གསུམ་སོགས་བྱེད་ལུགས་རྣམ་འཇོམས་ལྗང་སྔོན་དང་འདྲ་བ་ལས། དམིགས་པའི་ཁྱད་པར་བུམ་ནང་གི་ལྷ་ལས་བདུད་རྩིའི་རྒྱུན་བྱུང་བཀྲུ་བ་སོགས་བྱེད་ཅིང༌། ཧེ་ཕུ་ཕུ་ཞེས་པའི་སྐབས་སུ་ཁྲོ་བོ་ཕུར་བུ་ཐོགས་པ་དཔག་ཏུ་མེད་པ་སྤྲོས་ཏེ། བར་ཆད་དང་བགེགས་ཐམས་ཅད་ཕུར་བུས་བཏབ་པར་བསམ། དེ་དག་གི་མཐར་ལྷ་སྐུ་བསྒོམ་པའི་རྗེས་གནང་སྤྱི་དང་འདྲ་བ་ལས། ཡེ་ཤེས་པ་བསྟིམ་པའི་མཐར། སླར་ཡང་བུམ་པའི་ཆུས་དབང་བསྐུར། དེ་དག་གི་མཐར་བཟླས་ལུང་སྦྱིན། དེ་ལ་སློབ་མས་གང་ལ་ལུང་ལེན་པའི་མདུན་བསྐྱེད་དེ། ཤར་གྱི་རྡོ་རྗེ་སེམས་དཔའི་སྐུ་གཟུགས་ལས་བྱེད་པ་འདིའི་ཁྱད་ཆོས་ཡིན། རྗེས་གནང་གི་རྗེས་ཀྱི་བྱ་བ་སྤྱི་དང་འདྲ། སླར་མཆོད་པ་རྣམས་ཁ་གསོས་ཏེ་རྗེས་ཆོག་བྱེད་ཚུལ་སྤྱི་དང་འདྲ་བ་ལས། བུམ་པའི་ལྷ་ཡེ་ཤེས་པ་གཤེགས། དམ་ཚིག་པ་རང་ལ་བསྡུ། ཤར་གྱི་སྐུ་གཟུགས་ལ་རབ་གནས་བྱེད། དེ་ནས་ལས་རྗེས་མི་མངོན་པར་བྱས་ཏེ། སྨོན་ལམ་དང་བཀྲ་ཤིས་རྒྱ་ཆེར་བྱའོ། །ཀུན༵་ནས་གྲུ་དང་དམར་གྱི་ལུགས། །ལག་ལེན་ངོ་མཚར་དག༵འ་བའི་ཕུལ། །ཤིན་ཏུ་མང་བའི་ཡིག་ཚོགས་ལས། །སྙིང༵་པོ༵་ཙམ་ཞིག་བཀོད་པ་ལགས། །རྡོ་རྗེ་རྣམ་འཇོམས་དཀར་པོའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ཉེར་མཁོའི་སྒྲུབ་ཐབས།
ན་མོ་གུ་རུ་ཝེ། བླ་མ་རྡོ་རྗེ་འཛིན་བཅས་ལ། །གུས་པས་ཡོངས་སུ་བཏུད་ནས་དེའི། །གསུང་དང་གོང་མའི་མན་ངག་བཞིན། །ཀུན་ལ་ཉེར་མཁོའི་སྒྲུབ་ཐབས་བཤད། །གང་ཞིག་བགེགས་འཇོམས་པར་འདོད་པ་དང༌། བསྙེན་པ་ཐམས་ཅད་ཀྱི་སྔོན་དུ་ཉེ་བར་མཁོ་བའི་ཕྱིར། དཔལ་སངས་རྒྱས་ཡེ་ཤེས་ཞབས་ཀྱི་མན་ངག་ལྟར། བགེགས་མཐར་བྱེད་ཀྱི་མན་ངག་བསྒོམ་པར་འདོད་པས། སྐྱབས་སེམས་སྤྱི་དང་མཐུན། རང་གི་སྙིང་གར་ཉི་མ་ལ་གནས་པའི་ཧཱུཾ། དེའི་འོད་ཀྱིས་བླ་མ་དང་བདུད་རྩི་འཁྱིལ་བའི་དཀྱིལ་འཁོར་མདུན་གྱི་ནམ་མཁར་བཛྲ་ས་མཱ་ཛཿ ཨརྒྷཾ་ནས་ཤཔྟའི་བར་གྱིས་མཆོད། གང་ཞིག་ཐོག་མེད་སྲིད་པའི་ཆུ་ཀླུང་དུ། །ཞེས་སོགས་རྒྱུན་བཤགས་བྱ། གལ་ཏེ་དེ་ཙམ་མི་ལྕོག་ན། དཀོན་མཆོག་གསུམ་ལ་བདག་སྐྱབས་མཆི། སོགས་བྱ། ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལས་པད་ཉིའི་སྟེང་དུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ཡོངས་སུ་གྱུར་པ་ལས་བདག་ཉིད་བདུད་རྩི་འཁྱིལ་བ་སྐུ་མདོག་ལྗང་ཁུའམ། ནག་པོ་ཞལ་གསུམ་ཕྱག་དྲུགརྩ་ཞལ་སྐུ་ལུས་དང་མཚུངས་ཤིང༌། གཡས་དཀར་གཡོན་དམར་བ། ཕྱག་དང་པོ་གཉིས་ཀྱིས་རང་སྣང་གི་ཡུམ་ལ་འཁྱུད་པ། ལྷག་མ་གཡས་གཉིས་ཀྱིས་རྡོ་རྗེ་ནག་པོ་ཁ་གྱེས་པ་དང་རལ་གྲི། གཡོན་གཉིས་ཀྱིས་རིན་པོ་ཆེ་དང་པདྨ་འཛིན་པ། ཞབས་གཡས་བསྐུམ་པས་བདུད་སྡིག་ཅན་ཆུང་མ་དང་བཅས་པ་དང༌། གཡོན་བརྐྱང་བས་ཚོགས་བདག་མནན་པ། སྤྱན་གསུམ། སྐྲ་སེར་སྟག་ལྤགས་ཀྱི་ཤམ་ཐབས་སོགས་ཁྲོ་བོའི་རྒྱན་དང་ཆ་
ལུགས་ཡོངས་སུ་རྫོགས་ཤིང༌། ཀླུའི་རྒྱལ་པོ་མཐའ་ཡས་སྔོན་པོས་དབུ་སྐྲ་བཅིངས་པ། འཇོག་པོ་དམར་པོས་རྣ་རྒྱན་བྱས་པ། རིགས་ལྡན་ཁྲ་བོས་དཔུང་པ་བརྒྱན་ཞིང༌། དུང་སྐྱོང་སེར་པོས་ཕྱག་གདུབ་བྱས་པ། པདྨ་དཀར་པོས་མགུལ་བ་བརྒྱན་ཞིང༌། སྟོབས་རྒྱུ་ལྗང་ཁུས་མཆོད་ཕྱིར་ཐོགས་བྱས་པ། ནོར་རྒྱས་ཀྱི་བུ་བདུད་རྩིའི་ཁ་དོག་ལྟ་བུས་སྐེ་རགས་བྱས་ཤིང༌། པདྨ་ཆེན་པོ་དཀར་པོས་ཞབས་གདུབ་བྱས་པ། སྐུ་ལས་སྐྱེས་པའི་ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པའོ། །ཨོཾ་ཨཱཿབིགྷྣཱནྟ་ཀྲྀཏ་ཧཱུཾ་ཧཱུཾ། ཞེས་བརྗོད་ཅིང་གསལ་བར་བསྐྱེད་དོ། །མིག་ཏུ་ཀྵིཾ། རྣ་བར་ཛྲིཾ། སྣ་ལ་ཁཾ། ལྕེ་ལ་གཾ དཔྲལ་བར་སྐཾ། ལྟེ་བར་སཾ། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། དེ་བཞིན་གཤེགས་པ་ཐམས་ཅད་ཁྲོ་བོ་བདུད་རྩི་འཁྱིལ་བའི་རྣམ་པར་བཛྲ་ས་མཱ་ཛཿ ཛཿཧཱུཾ་བཾ་ཧོཿགཉིས་སུ་མེད་པར་ཐིམ། རང་གི་སྙིང་གར་རང་འདྲའི་ཡེ་ཤེས་སེམས་དཔའ། དེའི་ཐུགས་ཀར་ཏིང་ངེ་འཛིན་སེམས་དཔའ་ཧཱུཾ། དབང་གི་ལྷ་འཁོར་དང་བཅས་པ་བཛྲ་ས་མཱ་ཛཿ ཨོཾ་བཛྲི་བྷཱ་ཝ་ཨ་བྷི་ཥིཉྩ་ཧཱུཾ། ཞེས་དབང་བསྐུར། སྐུ་གང༌། དྲི་མ་དགཆུའི་ལྷག་མ་ཡར་ལུད་པ་ལས། མི་བསྐྱོད་པས་དབུ་བརྒྱན། བཟླས་པ་ནི། ཏིང་ངེ་འཛིན་སེམས་དཔའི་འོད་ཟེར་འཕྲོ་འདུ་ལ་སེམས་གཏད་དེ། ཨོཾ་ཨཱཿབིགྷྣཱནྟ་ཀྲྀཏ་ཧཱུཾ་ཕཊ། ཅེས་པ་ཉེ་སྙིང་དང༌། ཨོཾ་ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། ཨ་མྲྀ་ཏེ་ཧཱུཾ་ཕཊ། ཅེས་པ་སྙིང་པོ་དང༌། ཨོཾ་ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ།
ཧ་ན་ཧ་ན། ད་ཧ་ད་ཧ། གརྫ་གརྫ། བི་སྥོ་ཊ་ཡ། བི་སྥོ་ཊ་ཡ། སརྦ་བིགྷྣན་བི་ན་ཡ་ཀ་ན་མཧཱ་ག་ན་པ་ཏི་ཛི་ཝི་ཏཱནྟ་ཀཱ་ར་ཡ་ཧཱུཾ་ཕཊ། ཅེས་པ་ནི། རྩ་བའི་སྔགས་ཆུང་བའོ། །ན་མཿས་མནྟ་ཀཱ་ཡ་ཝཱཀ་ཙིཏྟ་བཛྲི་ཎཾཾ། ན་མོ་མཧཱ་བཛྲ་ཀྲོ་དྷཱ་ཡ། མཧཱ་དཾཥྟོ་ཏ་ཀ་ཊ་བྷཻ་ར་ཝཱ་ཡ། ཨ་སི་མུ་ས་ལ་པ་ར་ཤུ་པ་ཤ་ཧསྟཱ་ཡ། ཨོཾ་ཨ་མྲྀ་ཏ་ཀུཎྜ་ལི་ཁ་ཁ་ཁཱ་ཧི་ཁཱ་ཧི། ཏིཥྛ་ཏིཥྛ། མན་ཆད་བརྗོད་མ་ཐག་པ་སྟེ། རྩ་སྔགས་ཆེ་བའོ། །འདི་རྣམས་རེ་རེས་བསྙེན་པ་རྫོགས་པར་བྱེད་ན། གྲངས་ནི་རིམ་པས་འབུམ་ཕྲག་སོ་གཉིས། བཅུ་དྲུགབརྒྱད། བཞི་རྣམས་ཡིན་ལ། ཐམས་ཅད་སྡོམས་པས་བྱེད་ན། འབུམ་ཕྲག་བརྒྱད། བཞི། གཉིས། གཅིག་རྣམས་སོ། །ཐུན་མཚམས་སུ་དགེ་བའི་རྩ་བ་བྱང་ཆུབ་ཏུ་བསྔོའོ། །གཏོར་མ་ཉེ་སྙིང་གིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་བདུད་རྩི་ལྔའི་ཕུང་པོ། ཧཱུཾ་བྷྲུཾ་ཨཾ་ཛྲིཾ་ཁཾ་གིས་མཚན་པ། དེ་རྣམས་འོད་དུ་ཞུ་བ་ལས་བདུད་རྩིའི་རྒྱ་མཚོ་ཆེན་པོར་གྱུར། འབྲུ་གསུམ་ལན་ལྔས་བྱིན་གྱིས་བརླབས། རང་གི་སྙིང་གའི་ས་བོན་གྱི་འོད་ཟེར་གྱིས་བདུད་རྩི་འཁྱིལ་བའི་ལྷ་ཚོགས་བཛྲ་ས་མཱ་ཛཿ སྙིང་པོའི་མཐར་པཉྩ་ཨ་མྲྀ་ཏ་ཨཱཿཧཱུཾ། ལན་གསུམ་གྱིས་ཕུལ། ཨརྒྷཾ་ནས་ཤཔྟའི་བར་གྱིས་མཆོད། འཇིགས་པའི་ཧཱུཾ་སྒྲ་ངེས་སྒྲོག་ཅིང༌། །སོགས་ཀྱིས་བསྟོད། མཆོད་སྦྱིན་གཏོར་མ་སོགས་ཀྱིས་འདོད་དོན་གསོལ་བ་བཏབ། ཡིག་བརྒྱ་བཟླས། མ་འབྱོར་པ་དང་སོགས།
ཁྱེད་ཀྱིས་སེམས་ཅན་སོགས། སྨོན་ལམ་དང་བཀྲ་ཤིས་གང་འགྲུབ་བྱ། བསྙེན་པ་མཐར་ཕྱིན་ནས་སྒོམ་པ་དང༌། བྲིས་པའི་སྲུང་བ་དང༌། ལས་བཞིའི་སྦྱིན་བསྲེགསེར་བ་སྲུང་བ། སྲིའུ་གསོ་བ་སོགས་གོང་མ་རྣམས་ཀྱིས་མན་ངག་ལས་འབྱུང་བའི་ལས་ཚོགས་རྣམས་དང༌། གཞན་ཡང་གསང་འདུས་སྒྱུ་དྲ་རྡོ་རྗེ་གུར་རྣམས་ལས་འབྱུང་བའི་ལས་ཚོགས་རྣམས་དང༌། གཞན་ཡང་རྒྱུད་སྡེ་བཞི་ནས་གསུངས་པའི་བདུད་རྩི་འཁྱིལ་བའི་ལས་ཐམས་ཅད་སྒྲུབ་པ་ལ་དབང་ངོ༌། །འདི་ཉིད་ངོ་བོ་གསང་བའི་བདག་པོ་ཡིན་པའི་ཕྱིར། གསང་བདག་གི་སྔགས་རྒྱུད་ལས་འབྱུང་བའི་ལས་ཚོགས་མཐའ་དག་ཀྱང་སྒྲུབ་པ་ལ་དབང་བར་མངོན་ནོ། ཁྱད་པར་འདིའི་བསྙེན་པ་སྔོན་དུ་སོང་བས། ལྷ་གཞན་ཅི་ལྟ་བུ་བསྒྲུབས་ཀྱང་དེ་དང་དེའི་བསྙེན་སྒྲུབ་ལས་གསུམ་ལ་བར་དུ་གཅོད་པ་མི་འབྱུང་ཞིང༌། རང་གཞན་གྱི་བགེགས་བསྲུང་བའི་ཐབས་འགྲན་ཟླ་མེད་པའོ། །འདིའི་རྗེས་གནང་ལག་ལེན་སྤྱི་དང་འདྲའོ། ཁྲོ་བོའི་ལུས་ཅན་ཀུན༵་གྱི་རྒྱལ། །གང་དེའི་སྒྲུབ་ཐབས་རིག་འཛིན་མཆོག །དག༵འ་སྐྱེད་ཤིན་ཏུ་རྙེད་དཀའ་བ། །སྙིང༵་པོ༵ས་ཡི་གེ་ལམ་དུ་བྱས། །ཞེས་པ་ནི་ཁྲོ་བོ་བགེགས་མཐར་བྱེད་ཀྱི་སྒྲུབ་པའི་ཐབས་ཀྱི་ལེ་ཚན་ནོ།། །།མངྒལཾ། །དུས་ཀྱི་འཁོར་ལོ་ལ་བཏུད་ནས། །
ནད་ཀུན་ཞི་བྱེད་སྒྲུབ་ཐབས།
ཨོཾ་སྭཱ་སྟི། ཆ་མེད་ཀུན་འགྲོ་ཆོས་ཀྱི་དབྱིངས། །བདེ་སྟོང་ཟུང་འཇུག་ལྷན་སྐྱེས་སྐུ། །དུས་ཀྱི་འཁོར་ལོ་ལ་བཏུད་ནས། །ནད་ཀུན་ཞི་བྱེད་སྒྲུབ་ཐབས་བཤད། །སྐྱབས་སེམས་ཚད་མེད་བཞི་རྣམས་སྔོན་དུ་སོང་ནས། ཤཱུ་ནྱ་ཏཱའི་སྔགས་དོན་བསམ།
རང་གི་སྙིང་གར་པཾ་ལས་པདྨ་དང་ཨ་ལས་ཟླ་བའི་སྟེང་དུ་ཕྲཻཾ་དཀར་པོའི་འོད་ཀྱི་འཕྲོ་འདུ་ལས། རང་ཉིད་བཅོམ་ལྡན་འདས་མ་སྣ་ཚོགས་ཡུམ་ཟླ་བ་ནོར་བུའི་འོད་ལྟར་སྐུ་མདོག་དཀར་བ་ཞི་ཞིང་སྒེག་པའི་ཉམས་ཅན་ཞལ་གཅིག་ཕྱག་གཉིས་སྤྱན་གསུམ་པ། གཡས་མཆོག་སྦྱིན་དང༌། གཡོན་པདྨ་དཀར་པོའི་རྩ་བ་མཐེབ་སྲིན་གྱིས་ཐུགས་ཀར་འཛིན་པ། འདབ་བརྒྱ་སྙན་དྲུང་དུ་རྒྱས་པ། རིན་པོ་ཆེའི་རྒྱན་དང༌། དར་གྱི་ན་བཟའ་དཀར་པོས་སྤྲས་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་ཤིང༌། ཟླ་འོད་འཕྲོ་བ། རྡོ་རྗེ་སེམས་དཔའི་དབུ་རྒྱན་ཅན་ནོ། །དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾཾ། ལྟེ་བར་ཧོཿ སངས་རྒྱས་སྲས་དང་བཙུན་མོར་བཅས་པ་ཐམས་ཅད་ཡེ་ཤེས་སེམས་དཔའི་ཚུལ་དུ་ཨོཾ་བཛྲ་ས་མཱ་ཛཿ ཧཱུཾ་བཾ་ཧོ་ཧི། གཉིས་སུ་མེད་པར་གྱུར། མདོར་བསྡུ་ན། རྡོ་རྗེ་བཞི་བྱིན་གྱིས་རླབས་པ་དང༌། ཡེ་ཤེས་བསྟིམ་པ་མེད་ཀྱང་ཆོག་གོ །སྙིང་གར་ཟླ་བ་ལ་ཕྲཻཾ་གྱི་མཐར་སྔགས་ཀྱིས་འཕྲེང་བས་བསྐོར་བ་ལས་འོད་འཕྲོས། སངས་རྒྱས་ཐམས་ཅད་སྣ་ཚོགས་ཡུམ་གྱི་རྣམ་པར་སྤྱན་དྲངས་ནས་སྙིང་གའི་ས་བོན་སྔགས་འཕྲེང་དང་བཅས་པ་ལ་ཐིམ། རང་གཞན་གྱི་ནད་གདོན་སྡུག་བསྔལ་ཐམས་ཅད་ཞི་ཞིང༌། ཚེ་དང་བསོད་ནམས་ཐམས་ཅད་རྒྱས་པར་གྱུར། ཨོཾ་ཕྲཻཾ་བི་ཤྭ་མཱ་ཏཿ བཛྲ་ཀཎྜ་ཀཾ ནཱ་ཤ་ཡ། ནཱ་ཤ་ཡ། མ་མ་སཱནྟིཾ་ཀུ་རུ་ཀུ་རུ་སྭཱཧཱ།
ཅི་ནུས་སུ་བཟླས་པའི་མཐར། ཨོཾ་ཕྲཻཾ་བི་ཤྭ་མཱ་ཏཱ་བཛྲ་ཨརྒྷཾ་ཨཱཿཧཱུཾ། ཤཔྟའི་བར་སྤྱི་དང་མཐུན་པར་མཆོད་པའམ། ཡང་ན་མཆོད་པ་བཅུ་གཉིས་བྱ། ཕྲ་རབ་རྡུལ་གྱི་ཆོས་ཉིད་འདས། །ཞེས་སོགས་སམ། སངས་རྒྱས་ཀུན་གྱིས་བསྐྱེད་མཛད་མ། །སྐྱེ་བ་དང་ནི་འཇིག་པ་སྤངས། །ཀུན་ཏུ་བཟང་པོའི་སྤྱོད་པ་ཅན། །སྣ་ཚོགས་ཡུམ་དེ་ལ་ཕྱག་འཚལ། །ཞེས་བསྟོད། དགེ་བ་བྱང་ཆུབ་ཏུ་བསྔོ། འདིའི་རྗེས་གནང་ནི། མཎྜལ་པདྨ་དཀར་པོ་འདབ་བརྒྱད་ཚོམ་བུ་ཅན་ཞིག་བྱས་ལ། མཐའ་མཆོད་གཏོར་གྱིས་བསྐོར། སྒྲུབ་ཚུལ་སྤྱི་དང་འདྲ། གཏོར་མ་འབུལ་བ་གཅིག་དུ་དགོས་པ་མ་ཡིན་ཀྱང༌། ཕྱིས་ཀྱི་ལག་ལེན་ལྟར་བྱེད་ན། དུས་འཁོར་ཉིད་ཀྱི་གཏོར་ཆོག་ལྟར་བྱིན་གྱིས་བརླབས་པའམ། ཨོཾ་ཨཱཿཧཱུཾ་ཧྲཿཕཊ་ཀྱིས་བསངས། སྭ་བྷཱ་ཝས་སྦྱངས། ཨོཾ་ཨཱཿཧཱུཾ་ཧོཿས་བྱིན་གྱིས་བརླབས། སྙིང་པོ་མཐར། ཨ་ཀཱ་རོ་བཏགས་ཏེ་འབུལ་བར་བྱའོ། །རྗེས་གནང་གི་ངོ་བོ་ཡང༌། སྐུ་བསྐྱེད་བསྟིམ། གསུང་བཟླས་ལུང༌། ཐུགས་ཕྱག་མཚན་བསྟིམ་པ་རྣམས་ཡིན་པས་སྤྱི་དང་འདྲ་ལ། སྔོན་འགྲོ་རྡོ་རྗེ་འཛིན་པ་སོགས་ཀྱིས་གསོལ་བཏབ་དང༌། གུར་ནས་འབྱུང་བའི་རྒྱུན་བཤགས་བྱེད་པའི་ལུགས་ཀྱང་ཡོད་མོད་ཀྱི། རྡོ་རྗེ་ཤུགས་ཀྱི་རྗེས་གནང་གི་སྐབས་དང་མཐུན་པར་བྱས་ན་ལེགས་པ་ཡིན་ཏེ། དུས་འཁོར་ལྷན་སྐྱེས་དང༌། ཛཾ་བྷ་ལ་ལྗང་ཁུ་དང༌། དུས་འཁོར་རྒྱུད་ལུགས་ཀྱི་ཁྱུང་ཁྲ་རྣམས་ལའང་དེ་བཞིན་དུ་གོ་དགོས་སོ། །ཤིན་ཏུ་ཟབ་པར་རབ་གྲགས་པ། །རྒྱུད་འགྲེལ་ཉིད་ལས་གསལ་བའི་ཕྱིར། །མཁས་པ་ཀུན༵་གྱི་ཡིད་དག༵འི་གནས། །སྙིང༵་པོ༵་མདོར་བསྡུས་ཙམ་ཞིག་བྲིས། །སྣ་ཚོགས་ཡུམ་དཀར་མོའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
སོ་སོར་འབྲང་མ་སྒྲུབ་པའི་ཐབས།
ཨོཾ་སྭཱ་སྟི། བླ་མ་ཡི་དམ་ཕྱག་འོས་ལ། །དངོས་པོ་ཀུན་གྱིས་ཕྱག་བཙལ་ནས། །སོ་སོར་འབྲང་མ་སྒྲུབ་པའི་ཐབས། །རྡོ་རྗེའི་གུར་ལས་འབྱུང་བཞིན་བཤད། །སྐྱབས་སེམས་ཚད་མེད་བཞི་རྣམས་སྔོན་དུ་སོང་ནས། ཤཱུ་ནྱ་ཏས་སྟོང་བར་སྦྱངས། སྟོང་པའི་ངང་ལས་པཾ་ལས་སྣ་ཚོགས་པདྨ་དང་ཨ་ལས་ཟླ་བའི་སྟེང་དུ་རང་སེམས་ཏྲཾ་ཡིག་དཀར་པོ་ལས། རང་ཉིད་སོ་སོར་འབྲང་མ་སྐུ་མདོག་དཀར་མོ། ཞལ་གཅིག་ཕྱག་གཉིས། གཡས་རལ་གྲི་འཕྱར་ཞིང༌། གཡོན་འཁོར་ལོ་དཀར་པོ་ཐུགས་ཀར་འཛིན་པ། ཞབས་གཉིས་ཟླུམ་པོའི་སྟབས་ཀྱིས་བཞུགས་པ། སྒེགས་ཅིང་འཛུམ་པ་དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པའོ། །དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རང་གི་སྙིང་ག་ནས་འོད་འཕྲོས། ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ དབང་གི་ལྷ་རྣམས་ཀྱིས། ཨོཾ་བཛྲི་བྷ་ཝ་ཨ་བྷཱི་ཥིཉྩ་ཧཱུཾ། ཞེས་གསུང་ཞིང་དབང་བསྐུར། རྣམ་པར་སྣང་མཛད་ཀྱིས་དབུ་བརྒྱན། སྤྲོས་བསྡུའི་དམིགས་པ་གསལ་བཏབ་ལ། ཨོཾ་མ་ཎི་དྷ་རི་བཛྲི་ཎི་མཧཱ་པྲ་ཏི་སཱ་རེ་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་ཅི་ནུས་སུ་བཟླས་ཤིང༌། མཐར་མཁའ་ནང་ནས། འཇམ་པའི་དབྱངས་ཀྱི་སྐུ་དཔག་ཏུ་མེད་པ་སྤྲུལ། སེམས་ཅན་གྱི་དོན་བྱས་པར་བསམས་ལ། ཉེར་གཅིག་བཟླ། འདོད་དོན་གསོལ་བ་བཏབ། དགེ་བ་བསྔོ། ཐུན་
མཚམས་སུ་མཆོད་གཏོར་བླ་མེད་སྤྱི་དང་མཐུན་པའི་བྱིན་རླབས་མདོར་བསྡུས་ཞིག་བྱ། རང་གི་སྙིང་ག་ནས་འོད་ཟེར་འཕྲོས། བཅོམ་ལྡན་འདས་མ་སོ་སོར་འབྲང་མ་འཁོར་དང་བཅས་པ་བཛྲ་ས་མཱ་ཛཿ པདྨ་ཀ་མ་ལ་ཡེ་སྟྭཾ། སྙིང་པོའི་མཐར་ཨ་ཀཱ་རོ་བཏགས་པ་ལན་གསུམ་མམ་བདུན་གྱིས་ཕུལ། ཨརྒྷཾ་ལ་སོགས་པས་མཆོད། རྡོ་རྗེ་སེམས་དཔའི་རང་བཞིན་ཅན། །ཆོས་དབྱིངས་ཡེ་ཤེས་ངོ་བོ་ཉིད། །དུང་དང་ཀུནྡ་ཟླ་བའི་འོད། །སོ་སོར་འབྲང་མ་ལ་ཕྱག་འཚལ། །མཆོད་སྦྱིན་གཏོར་མ་འདི་བཞེས་ལ་སོགས། འདོད་དོན་གསོལ་བ་བཏབ། ཡིག་བརྒྱ། བཟོད་གསོལ། གཤེགས་གསོལ་རྣམས་སྤྱི་དང་མཐུན་པར་བྱ། འདིའི་རྗེས་གནང་གི་བྱ་བ་ཡང༌། རྗེས་གནང་སྤྱིའི་ཆོ་ག་ལས་ཟུར་ཁྱད་མེད་ཅིང༌། ཐུགས་ཀྱི་རྗེས་གནང་ལ་ཕྱག་མཚན་བསྟིམ་པ་ཁོ་ན་ཡིན་ནོ། །ནད་པ་ལ་སོགས་པ་འགའ་ཞིག་གི་དོན་དུ་བུམ་པ་བཅའ་ཞིང༌། སྦྱང་བ་དང་བཅས་པའི་བཀྲུ་བྱབ་སྲུང་གསུམ་བྱ་བ་ཡིན་ལ། རྗེས་གནང་གི་ཆོ་གའི་ཡན་ལག་ཏུ་སྦྱར་ནས་ཐོབ་དགོས་པ་ནི་མ་ཡིན་ནོ། །ཀུན༵་ལས་འཁྱེར་བདེ་བླ་མེད་ལུགས། །འདུས་གསལ་མཆོག་ཏུ་དག༵འ་བ་འདི། །མན་ངག་སྙིང༵་པོ༵་ཙམ་བླངས་ནས། །རྒྱུད་དོན་ཇི་བཞིན་བརྗོད་པ་ཡིན། །རྡོ་རྗེ་གུར་ལས་འབྱུང་བ་སོ་སོར་འབྲང་མའི་སྒྲུབ་ཐབས་ཀྱི་ལེ་ཚན་ནོ།། །།
གཞན་གྱིས་མི་ཐུབ་མའི་སྒྲུབ་ཐབས།
ཨོཾ་སྭཱ་སྟི། དེ་བཞིན་གཤེགས་པའི་གཙུག་ཏོར་ལས། །རབ་སྤྲུལ་ཕྱིར་བཟློག་ཆེན་མོའི་སྐུ། །གཞན་གྱིས་མི་ཐུབ་ལ་བཏུད་ནས། །དེ་ཡི་སྒྲུབ་ཐབས་བྲི་བར་བྱ། །སྐྱབས་སེམས་ཚད་མེད་བཞི་སྔོན་དུ་འགྲོ་བས། སྭཱ་བྷ་ཝས་སྟོང་པར་སྦྱངས།
པད་ཉི་ལ་གནས་པའི་ཧཱུཾ་ལས་སྣ་ཚོགས་རྡོ་རྗེ་ཧཱུཾ་གིས་མཚན་པ་ལས་བསྲུང་བའི་འཁོར་ལོ་ཡངས་ཤིང་རྒྱ་ཆེ་བར་གྱུར་བའི་དབུས་སུ། བགེགས་དང་ལོག་འདྲེན་ཐམས་ཅད་འོག་ཏུ་མནན་པའི་པད་ཉིའི་གདན་ལ་རང་སེམས་གདུགས་དཀར་པོ་ཨོཾ་གྱིས་མཚན་པ་ལས་འོད་འཕྲོས། སེམས་ཅན་གྱི་དོན་བྱས། སངས་རྒྱས་ཐམས་ཅད་ཀྱི་གཙུག་ཏོར་ནས་གདུགས་དཀར་ཅན་གྱི་སྔགས་ཀྱི་ཡིག་འབྲུ་དཔག་ཏུ་མེད་པ་སྤྱན་དྲངས་ཏེ་ཐིམ་པ་ཡོངས་སུ་གྱུར་པ་ལས་རང་ཉིད་འཕགས་མ་གཞན་གྱིས་མི་ཐུབ་མ་སྐུ་མདོག་དཀར་མོ། དབུའི་སྟེང་དུ་གདུགས་དཀར་པོ་གསེར་གྱི་ཡུ་བ་ཅན་དང་བཅས་པ། དབུས་དཀར་གཡས་སྔོ་གཡོན་དམར་བའི་ཞལ་གསུམ་ལ་སྤྱན་གསུམ་གསུམ་དང་ལྡན་པ། ཕྱག་གཡས་གསུམ་ན་རྡོ་རྗེ་མདའ་ལྕགས་ཀྱུ། གཡོན་གསུམ་ན་སྡིགས་མཛུབ་ཞགས་པ་གཞུ། ལྷག་མ་ཉམས་སྣ་ཚོགས་ཅན་གྱི་དབུ་སྟོང་མངའ་བ། ཕྱག་རྒྱ་མ་ངེས་པ་སྣ་ཚོགས་པས་རྡོ་རྗེ་འཁོར་ལོ་ནོར་བུ་པདྨ་རལ་གྲི་མདའ་ལྕགས་ཀྱུ་གཞུ་ཐོ་བ་ཞགས་པ་ལ་སོགས་པ་མཚོན་ཆ་སྣ་ཚོགས་པ་འཛིན་པའི་ཕྱག་སྟོང་དང༌། སྐུ་ལུས་ཀྱི་ཆ་ཐམས་ཅད་དུ་ཁྱབ་པ། རྣམ་འགྱུར་མ་ངེས་པའི་སྤྱན་བྱེ་བ་བརྒྱ་སྟོང་ཅན། མེ་དཔུང་འབར་བའི་དབུས་ན་བཞུགས་པའོ། །ཕོ་ཉ་དང་ཕོ་ཉ་མོ་དང་མཆོད་པའི་སྤྲིན་གྱི་འོད་ཟེར་འཕྲོ་བ། སངས་རྒྱས་ཀུན་གྱིས་དབང་བསྐུར་བ། བྱང་ཆུབ་སེམས་དཔའ་རྣམས་ཀྱི་རིམ་གྲོ་བྱེད་པ། འཇིག་རྟེན་སྐྱོང་བ་ཐམས་ཅད་ཀྱིས་མཆོད་ཅིང་བསྟོད་ལ་བཀའ་སྒྲུབ་པའི་སྐུ་ཅན་དུ་གྱུར།
འབྲིང་དུ་ན་རྩ་བའི་ཞལ་གསུམ་ཕྱག་དྲུག་ཙམ་དུ་གསལ་བཏབ་ཀྱང་རུང༌། ཤིན་ཏུ་བསྡུ་ན་སྐྱབས་སྦྱིན་དང་གདུགས་དཀར་པོ་ཅན་བསྒོམ། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཡེ་ཤེས་སེམས་དཔའ་དང་དབང་གི་ལྷ་རྣམས་སྤྱན་དྲངས། བཛྲ་ས་མཱ་ཛཿ ཨརྒྷཾ་ལ་སོགས་པས་མཆོད། ཛཿཧཱུཾ་བཾ་ཧོཿ དམ་ཡེ་གཉིས་སུ་མེད་པར་ཐིམ། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་དུ་གསོལ། ཞེས་གསལ་བ་བཏབ་པས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་དབང་བསྐུར། རྣམ་པར་སྣང་མཛད་ཀྱིས་དབུ་བརྒྱན། ཏདྱ་ཐཱ། ཨོཾ་ཨ་ན་ལེ། ཨ་ན་ལེ། ཁ་ས་མེ། ཁ་ས་མེ། བཻ་ར། བཻ་ར། སོ་མེ། སོ་མེ། སརྦ་བུདྡྷ་ཨ་དྷིཥྛ་ན་ཨ་དྷིཥྛི་ཏེ། སརྦ་ཏ་ཐཱ་ག་ཏ་ཨུཥྞི་ཥ་སི་ཏ་ཏ་པ་ཏྲེ་ཧཱུཾ་ཕཊ། ཧཱུཾ་མ་མ་ཧཱུཾ་ནི་སྭཱཧཱ། ཞེས་སྙིང་པོ་ཉིད་གང་འགྲུབ་བཟླའོ། །མཐར་ཡེ་ཤེས་པ་མདུན་དུ་བཞུགས་པ་ལ། ཨརྒྷཾ་ལ་སོགས་པས་མཆོད། ཕྱིར་བཟློག་ཆེན་མོ་རིགས་སྔགས་རྒྱལ། །གཞན་གྱིས་མི་ཐུབ་སྟོབས་ཆེན་མ། །གདུགས་དཀར་ཆེན་མོ་སངས་རྒྱས་དང༌། །བྱང་ཆུབ་སེམས་དཔའི་ཚོགས་བཅས་བསྟོད། །ཅེས་བསྟོད་བཟོད་པ་གསོལ་ཞིང་བཛྲ་མུཿ ཞེས་གཤེགས་སུ་གསོལ། འདི་ལ་འཇིག་རྟེན་འདས་པའི་གཏོར་མ་ནི་མི་དགོས་སོ། །བྱེད་པར་སྤྲོ་ན། དཀར་གཏོར་ཨ་ཀཱ་རོས་འབུལ། འཇིག་རྟེན་པའི་གཏོར་མ་གཙང་མའི་ཟས་སྣ་སྣ་ཚོགས་བཏབ་པའི་དཀར་གཏོར་ཞིག་དང༌། ཤ་ཆང་སྒོག་ཙོང་སོགས་སྣ་ཚོགས་ཀྱི་སྦགས་པའི་དམར་གཏོར་ཞིག་བཤམས། སྔགས་དྲུག ཕྱག་རྒྱ་དྲུག་གིས་
བྱིན་གྱིས་བརླབས། ཨ་ཀཱ་རོ་ལན་བདུན་བདུན་གྱིས་གཙང་རིགས་རྣམས་དང༌། འབྱུང་པོ་རྣམས་ལ་སྦྱིན། དེ་ནས་ཆ་གསུམ་གཏོར་མའང་གཏོང་ངོ༌། །ཐུན་མཚམས་སུ་བྲིས་སྐུའི་མདུན་དུ་གཟུངས་མདོ་ཅི་ནུས་སུ་འདོན་པའམ་ཀློག་གོ །འདིའི་རྗེས་གནང་ནི། སྒྲུབ་ཐབས་རྒྱ་མཚོའི་རྗེས་གནང་གི་ཆོ་ག་ཉིད་སྦྱར་བར་བྱའོ། །རིགས་སྔགས་ཀུན༵་ལས་ཕྱིར་བཟློག་པ། །ཕུན་ཚོགས་ཀུན་གྱི་དག༵འ་བསྐྱེད་འདི། །གདུགས་དཀར་སྒྲུབ་ཐབས་རྒྱ་མཚོ་ཡི། །སྙིང༵་པོ༵ར་མཁས་རྣམས་ངེས་ཤེས་བསྐྱེད། །གཙུག་ཏོར་གདུགས་དཀར་གྱི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
རི་ཁྲོད་མའི་སྒྲུབ་ཐབས།
ཨོཾ་སྭཱ་སྟི། རྣམ་འཕྲུལ་དུ་མ་མཐའ་ཡས་པས། །འགྲོ་བའི་ནད་གདོན་ཞི་མཛད་པ། །རི་ཁྲོད་མ་ལ་རབ་བཏུད་ནས། །སྒྲུབ་ཐབས་མདོ་ཙམ་བྲི་བར་བྱ། །སྐྱབས་སེམས་སྔོན་དུ་འགྲོ་བས། །རང་གི་སྙིང་གར་པད་ཟླ་ལ་པཾ། དེ་ལས་འོད་འཕྲོས། བླ་མ་མི་བསྐྱོད་པའི་རྣམ་པ་ཅན་གྱི་དབུ་བརྒྱན་པའི་ལྷ་མོ་རི་ཁྲོད་མ་ལ་སངས་རྒྱས་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿ ན་མོ་གུ་རུ་བྷྱཿ ན་མཿཔརྞ་ཤ་ཝ་རཱི་བུདྡྷ་བོ་དྷི་སཏྭ་ས་པཱ་རི་ཝཱ་རེ་བྷྱཿ ཞེས་ཕྱག་འཚལ། ཨོཾ་པརྞ་ཤ་ཝ་རཱི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། ནས་ཤཔྟ་ཨཱཿཧཱུཾ་གི་བར་གྱིས་མཆོད། དཀོན་མཆོག་གསུམ་ལ་བདག་སྐྱབས་མཆི་སོགས་རྒྱུན་བཤགས་ལན་གསུམ། ཨོཾ་བཛྲ་མུཿ ཞེས་གཤེགས་སུ་གསོལ། སེམས་ཅན་ཐམས་ཅད་བདེ་བ་དང་སོགས་ཀྱི་ཚད་མེད་བཞི་བསྒོམ། ཨོཾ་སྭ་བྷཱ་ཝ་སོགས་ཀྱིས་སྟོང་པར་སྦྱངས། སྟོང་
པའི་ངང་ལས་རིན་པོ་ཆེའི་རི་བོ་མེ་ཏོག་དང་འབྲས་བུས་བརྒྱན་པའི་ནགས་ཚལ་སྣ་ཚོགས་དང་བཅས་པའི་རྩེ་མོར་པཾ་ལས་པདྨ་དང༌། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་རང་སེམས་པཾ་སེར་པོ་ལས་འོད་འཕྲོས། འཕགས་པ་མཆོད། སེམས་ཅན་ཐམས་ཅད་ཀྱི་ནད་དང་སྡུག་བསྔལ་བསལ། སླར་འདུས་ཏེ་ཐིམ་པ་ཡོངས་སུ་གྱུར་པ་ལས། རང་ཉིད་བཅོམ་ལྡན་འདས་མ་རི་ཁྲོད་མ་ལོ་མ་ཅན་སྐུ་མདོག་གསེར་བཙོ་མ་ལྟ་བུ། ཞལ་གསུམ་ཕྱག་དྲུག་རྩ་ཞལ་སེར་བ་ཁྲོ་ཞིང་སྒེག་པའི་ཉམས་ཅན། གཡས་ཞལ་དཀར་ཞིང་ཞི་བ། གཡོན་ཞལ་དམར་ཞིང་ཆགས་པ། ཞལ་རེ་རེ་ལ་སྤྱན་གསུམ་གསུམ་པ། ཕྱག་གཡས་ཀྱི་དང་པོ་རྡོ་རྗེ་གསོར་བ། གཉིས་པས་དགྲ་སྟ། གསུམ་པས་མདའ། གཡོན་གྱི་དང་པོ་རྡོ་རྗེའི་ཞགས་པ་དཀྲིས་པའི་སྡིགས་མཛུབ། གཉིས་པས་མེ་ཏོག་དང་འབྲས་བུར་བཅས་པའི་ཤིང་ལོ་གསར་བའི་སྦྲང་ཡབ། གསུམ་པས་གཞུ་འཛིན་པ། ཞབས་གཡས་ཀྱི་རྟིང་པ་གསང་བར་བསྟད་ཅིང༌། དེ་ཉིད་ཀྱི་པུས་མོ་དང་གཡོན་གྱི་མཐིལ་གདན་ལ་བརྟེན་པས་ཕྱེད་བཞེངས་ཀྱི་སྟབས་ཀྱི་འགྱིང་བག་ཅན། དར་དམར་པོའི་སྟོད་གཡོགས་དང་ཤིང་ལོ་གསར་པ་བཤིབས་པའི་སྨད་གཡོགས་ཅན། རིན་པོ་ཆེ་དང་མེ་ཏོག་གི་རྒྱན་གྱིས་བརྒྱན་པ། སྦྲུལ་དཀར་པོས་སེ་རལ་ཁར་བྱས་པ། དབུ་སྐྲ་ཕྱེད་བཅིངས་སུ་བྱས་ཤིང༌། ལང་ཚོ་གསར་དུ་བདོ་བ།
མཛེས་ཤིང་གྲིམ་ལ་ཅུང་ཟད་ཁྲོ་བའི་ཉམས་ཅན། འབར་བའི་འོད་དཔུང་མཐའ་ཡས་པ་དཀྲིས་པའོ། །དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུཾ་སྔོན་པོ། སྙིང་གི་ནང་དུ་ཉི་མ་ལ་གནས་པའི་པཾ་དེ་ལས་འོད་འཕྲོས། རང་བཞིན་གྱི་གནས་ནས་ལྷ་མོ་རི་ཁྲོད་མ་འཁོར་དང་བཅས་པ་བཛྲ་ས་མཱ་ཛཿ ཛཿཧཱུཾ་བཾ་ཧོཿ ཡང་འོད་འཕྲོས་དབང་གི་ལྷ་དེ་བཞིན་གཤེགས་པ་འཁོར་དང་བཅས་པ་བཛྲ་ས་མཱ་ཛཿ ཨོཾ་བཛྲ་ཨརྒྷཾ་པྲ་ཏཱིཙྪ་སྭཱཧཱ་ནས། ཤཔྟ་ཨཱཿཧཱུཾ་གིས་མཆོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས། ཇི་ལྟར་བལྟམས་པ་ནས། ས་མ་ཡ་ཤྲཱི་ཡེ་ཧཱུཾ། ཞེས་གསུངས་ཤིང༌། བུམ་པའི་ཆུས་དབང་བསྐུར། སྐུ་ལུས་ཐམས་ཅད་གང༌། དྲི་མ་དགཆུ་ལྷག་མ་སྤྱི་བོར་ལུད་པ་ལས་མི་བསྐྱོད་པས་དབུ་བརྒྱན། ཨརྒྷཾ་ནས་ཤཔྟའི་བར་གོང་ཚོགས་ཞིང་གི་སྐབས་ལྟར་མཆོད། རྒྱལ་བ་ཀུན་གྱི་ཡེ་ཤེས་སྒྱུ་མ་ཡི། །ཆོ་འཕྲུལ་རྣམ་པར་འཕྲུལ་བ་ལས་བྱུང་བ། །ལྷ་མོ་གང་གི་བསྒྲུབ་པས་ནད་གདོན་བགེགས། །ཀུན་ཏུ་ཞི་མཛད་མ་ལ་ཕྱག་འཚལ་ལོ། །དེ་ནས་བཟླས་པ་ནི། ཨོཾ་པི་ཤ་ཙཱི་པརྞ་ཤ་ཝ་རཱི་ཧྲཱི་ཧཿཧཱུཾ་ཕཊ་སྭཱཧཱ། སྙིང་པོ་དང༌། ཨོཾ་པི་ཤ་ཙཱི་པརྞ་ཤ་ཝ་རཱི་སརྦ་ཛྭ་ར་པྲ་ཤ་མ་ཎ་ཡེ་སྭཱཧཱ། ཞེས་ལས་སྔགས་ཅི་ནུས་བཟླ་ཞིང༌། ཤེས་ཤིང་སྤྲོ་ན་གཟུངས་ཀྱང་བཟླའོ། །
ཐུན་འཇོག་ཁར་བདག་བསྐྱེད་ཀྱི་ལྷ་ལ་གསོལ་བ་བཏབ་ཅིང༌། ཡེ་ཤེས་པ་མདུན་གྱི་ནམ་མཁར་བཞུགས་པར་བསམ་ལ། གོང་བཞིན་མཆོད་བསྟོད་བྱ། རྡོ་རྗེ་སེམས་དཔའི་ཡི་གེ་བརྒྱ་པ་ལན་གསུམ། མ་འབྱོར་པ་དང་སོགས་བཟོད་པར་གསོལ། ཨོཾ་ཁྱེད་ཀྱིས་སེམས་ཅན་ནས་མུཿ ཞེས་གཤེགས་སུ་གསོལ། རང་ཉིད་དམ་ཚིག་པའི་ང་རྒྱལ་ཙམ་གྱིས་ཐུན་མཚམས་ཀྱི་བྱ་བའོ། །གཏོར་མ་དཀར་གཏོར་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བར་ཨོཾ་ཨཱཿཧཱུཾ་ལས་གཏོར་མ་ཁ་དོག་དྲི་རོ་ནུས་མཐུ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་ལན་བདུན། རང་གི་སྙིང་ག་ནས་འོད་ཟེར་འཕྲོས་ལྷ་མོ་རི་ཁྲོད་མ་འཁོར་དང་བཅས་པ་བཛྲ་ས་མཱ་ཛཿ ཞེས་སྤྱན་དྲངས་ཨོཾ་པི་ཤ་ཙཱི་པརྞ་ཤ་ཝ་རཱི་ས་པ་རི་ཝཱ་ར་ཨི་དཾ་བཱ་ལིཾ་གྲྀཧྞ་པཱ་ཡ་གྲྀཧྞ་པཱ་ཡ། སརྦ་ཛྭ་ར་པྲ་ཤ་མ་ཎ་ཡེ་སྭཱཧཱ། ལན་གསུམ་གྱིས་ཕུལ། གོང་བཞིན་མཆོད་བསྟོད་དང༌། མཆོད་སྦྱིན་གཏོར་མ་ནས་ཀུན་འགྲུབ་ཤོག་གི་བར་གྱིས་འདོད་དོན་གསོལ་བཏབ་བྱ། ཡིག་བརྒྱ། བཟོད་གསོལ། གཤེགས་གསོལ། སྨོན་ལམ་རྣམས་ཀྱང་གོང་དང་འདྲའོ། །དེའི་རྗེས་གནང་གི་ཆོ་ག་ནི་སྒྲུབ་ཐབས་བརྒྱ་རྩ་དང་འདྲ་ལ། འོན་ཀྱང་དེའི་རྗེས་གནང་གི་གཞི་འགོད་པ་ལ། འདིར་སྐུའི་རྗེས་གནང་དང༌། དངོས་གཞི་ལུང་གསུམ་ལ་གསུང་གི་རྗེས་གནང་དང༌། རྗེས་སྙིང་གར་ལྷ་བསྟིམ་པ་ལ་ཐུགས་ཀྱི་རྗེས་གནང་གི་ཐ་སྙད་མཛད་
པ་ནི། ཟུར་བཀར་གྲགས་པ་འདིའི་ཁྱད་པར་ཡིན་ཞིང༌། བསྙེན་པའི་ཐུན་ཐུན་མཚམས་སྐབས་དང༌། རྗེས་གནང་གི་རྗེས་ཆོག་གི་སྐབས་བདག་བསྐྱེད་ཀྱི་ཡེ་ཤེས་པ་གོང་བཞིན་གཤེགས་སུ་གསོལ་བ་ཡང་ལག་ལེན་གྱི་ཁྱད་པར་སྣང་ངོ༌། །རྗེས་གནང་གི་རྗེས་ཆོག་གི་ཚེ། བདག་བསྐྱེད་ཀྱི་ཡེ་ཤེས་པ་སྔོན་དུ་གཤེགས་ནས། དམ་ཚིག་པའི་ང་རྒྱལ་གྱིས་རྗེས་ཆོག་བྱེད་པ་དང༌། མདུན་བསྐྱེད་ཀྱི་རྗེས་ཆོག་གྲུབ་ནས་བདག་བསྐྱེད་གཤེགས་པ་དང༌། བདག་བསྐྱེད་ཀྱི་ཡེ་ཤེས་པ་མདུན་གྱི་ནམ་མཁར་བཞུགས་པར་གྱུར། ཞེས་བརྗོད་ནས། མཆོད་བསྟོད་མན་ཆད་ཆབས་གཅིག་ཏུ་བྱེད་པའི་ལག་ལེན་གསུང་སྣང་བ། དང་པོ་མི་བདེ་ཞིང༌། ཕྱི་མ་གཉིས་པོ་གང་རུང་བྱའོ། །འདི་ལྟ་བུའི་སྒྲུབ་མཆོད་བྱེད་པའི་རིགས་ལ། བདག་མདུན་གྱི་བར་དུ་བདག་བསྐྱེད་ཀྱི་ཡེ་ཤེས་པ་གཤེགས་སུ་གསོལ་བའི་ལག་ལེན་གྱིས་དེང་སང་ས་སྟེང་ཁྱབ་མོད་ཀྱི། ཤིན་ཏུ་ནོར་བ་ཡིན་པས་མི་བྱ་ལ། སྤྱིར་ཆོ་གའི་ཡན་ལག་གཞན་ཐམས་ཅད་བླ་མེད་དང་ཆོག་སྒྲོས་ཐུན་མོང་ཡིན་པའི་ཕྱིར། བདག་བསྐྱེད་ཀྱི་ཡེ་ཤེས་པ་གཤེགས་སུ་གསོལ་བ་བྱེད་མི་དགོས་མོད། བ་རི་ལོ་ཙྪ་བ་ཚུན་ཆད་ཀྱི་བླ་མ་གོང་མ་རྣམས་ཀྱི་ཕྱག་ལེན་ཡིན་ཞིང༌། འདི་ཉིད་ཐུགས་ལ་བཞག་ནས་བདག་བསྐྱེད་སྒྲུབ་ཐབས་ཡོད་པ་ནི། རྣལ་འབྱོར་རྒྱུད་ཀྱི་རྗེས་འབྲངས་ནས། ཞེས་སྒྲོག་པར་མཛད་པ་ཡིན་ནོ། །འདིའི་མཚོན་ནས། འདི་རིགས་ཀྱི་སྒྲུབ་ཐབས་གོང་འོག་ཐམས་ཅད་ལ་རིགས་འགྲེ་བར་བྱའོ། །རྒྱལ་བ་ཀུན༵་གྱིས་བྱིན་རླབས་པས། །རི་ཁྲོད་
ལྷ་མོའི་སྒྲུབ་ཐབས་ནི། །ཉུང་གསལ་དགའ༵་བ་འདིར་བཤད་ཀྱི། །སྙིང༵་པོ༵་ལེན་འདོད་རྣམས་ཀྱིས་ལོང༌། །རི་ཁྲོད་མ་ལོ་མ་གྱོན་མ་སེར་མོའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
རི་ཁྲོད་མ་ལོ་མ་གྱོན་མ་སེར་མོའི་སྒྲུབ་ཐབས།
ཨོཾ་སྭཱ་སྟི། ན་མོ་གུ་རུ། བགེགས་དང་བར་ཆད་ཀུན་འཇོམས་པའི། །ལྷ་མོ་དེ་ལ་གུས་བཏུད་ནས། །གང་དེའི་སྒྲུབ་ཐབས་མི་འདྲ་བའི། ཁྱད་པར་ཅུང་ཟད་བཤད་པར་བྱ། །རི་ཁྲོད་མ་ལོ་མ་གྱོན་མ་སེར་མོའི་སྒྲུབ་ཐབས་ལེགས་པར་ཤེས་པར་བྱས་ལ། ལྷག་མ་རིགས་བཞི་པོ་རྣམས་ལ་འདོར་ལེན་ཅུང་ཟད་ཙམ་གྱིས་འགྲུབ་པར་འགྱུར་བས་སོ་སོར་བཤད་པར་བྱ་སྟེ། དེའི་ཡང་དམར་མོ་ཕྱག་གཉིས་མའི་སྒྲུབ་ཐབས་ལ། སྔོན་འགྲོ་ཚོགས་བསག་གི་སྐབས་བླ་མ་མི་བསྐྱོད་པའི་རྣམ་པ་ཅན་གྱིས་དབུ་བརྒྱན་པ་ཞེས་པའི་དོད་དུ། བླ་མ་འོད་དཔག་མེད་ཀྱི་རྣམ་པ་ཅན་གྱིས་དབུ་བརྒྱན་ཞེས་འདོན་པ་སྤོ། བསྐྱེད་ཆོག་གི་སྐབས་རང་སེམས་པཾ་སེར་པོའི་དོད་པཾ་དམར་པོ། ཞལ་ཕྱག་གི་སྐབས། རང་ཉིད་རི་ཁྲོད་མ་ལོ་མ་གྱོན་མ་སྐུ་མདོག་དམར་མོ་ཞལ་གཅིག་ཕྱག་གཉིས་གཡས་རྡོ་རྗེ་དང་བཅས་པའི་ཁུ་ཚུར་གྱིས་བགེགས་ཚོགས་ལ་བསྣུན་ཞིང༌། གཡོན་ཐུགས་ཀར་སྡིགས་མཛུབ་མཛད་པ། གནོད་བྱེད་ཐམས་ཅད་ལ་གཟིར་བ། དམར་ལ་ཟླུམ་པོའི་སྤྱན་གསུམ་དང་ལྡན་ཞིང༌། མཆེ་བ་གཙིགས་པ། སྐུ་ཐུང་སྦོམ་ལ་དབུ་སྐྲ་གྱེན་དུ་བརྫེས་པ། སྟག་ལྤགས་དང་རིན་པོ་ཆེ་དང༌། རུས་པ་དང༌། སྦྲུལ་གྱིས་བརྒྱན་པ། གཡོན་
བརྐྱང་གི་སྟབས་ཀྱིས་མེ་དཔུང་འབར་བའི་དབུས་ན་བཞུགས་པའོ། །ཞེས་དང༌། རིགས་བདག་གི་སྐབས། འོད་དཔག་མེད་ཀྱིས་དབུ་བརྒྱན། ཞེས་འདོན་པ་སྤོ་བ་རྣམས་ཁྱད་པར་རོ། །དེ་བཞིན་དུ་སྔོན་མོ་ལ་བླ་མ་དོན་ཡོད་གྲུབ་པའི་རྣམ་པ་ཅན་གྱི་ཞེས་དང༌། པཾ་སྔོན་པོ་ལས་ཞེས་དང༌། རང་ཉིད་རི་ཁྲོད་མ་ལོ་མ་གྱོན་མ་སྐུ་མདོག་ནམ་མཁའ་ལྟར་སྔོ་སངས་ཞལ་གཅིག་ཕྱག་བཞི། གཡས་ཀྱི་དང་པོས་ལྷའི་ཤིང་གི་ཡལ་ག་འབྲས་བུ་དང་བཅས་པ་འཛིན་པས་ནད་ཞི་བར་མཛད་པ། གཉིས་པས་དགྲ་སྟ་འཛིན་པས་གདུག་པ་ཅན་ལ་བརྡེག་པ། གཡོན་གྱི་དང་པོ་ཞགས་པས་བགེགས་རྣམས་འཆིང་བ། གཉིས་པས་རྔ་ཡབ་ནོར་བུའི་ཡུ་བ་ཅན་འཛིན་པས་ནད་སེལ་བར་མཛད་པ། སྒེག་ཅིང་ཁྲོ་ལ་རིན་པོ་ཆེ་དང་རུས་པ་དང་སྦྲུལ་གྱིས་བརྒྱན་པ། སྟག་ལྤགས་ཀྱི་ཤམ་ཐབས་དང༌། ཤིང་ལོའི་སྟོད་གཡོགས་ཅན། ཉི་མའི་གདན་ལ་གཡོན་བརྐྱང་གི་སྟབས་ཀྱིས་བཞུགས་པ། ཉི་མའི་འོད་ཀྱི་རྒྱབ་ཡོལ་ཅན། ཞེས་པ་དང༌། དོན་ཡོད་གྲུབ་པས་དབུ་བརྒྱན་ཞེས་པ་རྣམས་ཁྱད་པར་རོ། །རི་ཁྲོད་དྲག་མོ་ཀངྐ་ལ་ཆིབས་པའི་སྒྲུབས་ཐབས་ལ་སྔོན་འགྲོ་ཚོགས་བསག་མི་དགོས། སྐྱབས་སེམས་སྔོན་དུ་འགྲོ་བས། པད་ཉིའི་གདན་ལ་པཾ་ནག་པོ་ལས་རི་ཁྲོད་མ་ལོ་མ་གྱོན་མ་སྐུ་མདོག་ནག་མོ་ཞལ་གཅིག་ཕྱག་གཉིས་སྤྱན་གསུམ་དབུ་སྐྲ་གྱེན་བརྫཻས་ཆེར་ཁྲོས་པའི་ཉམས་ཅན། སྟག་ལྤགས་དང་།
དར་དང་རིན་པོ་ཆེས་བརྒྱན་པ། ཕྱག་གཡས་ན་གཅོད་པའི་དགྲ་སྟ་དང༌། གཡོན་ཤིང་ལོ་གསར་པའི་སྦྲང་ཡབ་འཛིན་པ། ཞབས་གཡོན་བརྐྱང་གི་སྟབས་ཀྱིས་འདབ་ཆགས་ཀངྐའི་སྟེང་ན་བཞུགས་པའོ། །ཡན་ལག་ལྷག་མ་སེར་མོའི་སྐབས་དང་འདྲ་བ་ལས། རྣམ་སྣང་གིས་དབུ་རྒྱན་ཅན་ནོ། །སྔགས་ནི། ཨོཾ་པི་ཤ་ཙཱི་པརྞ་ཤ་ཝ་རཱི་སརྦ་རོ་ག་ཚེ་ད་ནི་ཧཱུཾ་ཕཊ། ཅེས་པ་རྣམས་ཁྱད་པར་རོ། །འདི་ཉིད་སྐུ་མདོག་དཀར་མོ་ཅུང་ཟད་ཞི་བའི་ཉམས་ཅན་དུ་བྱེད་པའང་ཡོད་དོ། ལྗང་ཁུའི་སྒྲུབ་ཐབས་ནི། བཤད་མ་ཐག་པ་འདི་ཉིད་ལས་ས་བོན་པཾ་ལྗང་ཁུ། རང་ཉིད་རི་ཁྲོད་མ་སྐུ་མདོག་ལྗང་ཁུ་ཞི་བའི་ཉམས་ཅན། དར་དང་རིན་པོ་ཆེས་བརྒྱན་པ། ཞལ་གཅིག་ཕྱག་གཉིས་གཡས་རྨ་བྱའི་སྒྲོ་ཡབ་དང༌། གཡོན་སྨན་སྣ་ཚོགས་ཀྱིས་གང་བའི་སྣོད་འཛིན་པ། སྐྱིལ་ཀྲུང་ཕྱེད་པའི་རོལ་པས་རྨ་བྱའི་གདན་ལ་བཞུགས་པའོ། །ཞེས་པ་དང༌། རིན་ཆེན་འབྱུང་ལྡན་གྱིས་དབུ་རྒྱན་ཞེས་པ་དང༌། ཨོཾ་པི་ཤ་ཙཱི་པརྞ་ཤ་ཝ་རཱི་སརྦ་ཛྭ་ར་སཱནྟིཾ་རུ་སྭཱཧཱ། ཞེས་བཟླ་བ་རྣམས་ཁྱད་པར་རོ། །ལྷག་མ་སྒྲུབ་ཐབས་དང་རྗེས་གནང་གི་བྱ་བ་ཐམས་ཅད་སེར་མོའི་སྐབས་ཇི་ལྟ་བ་བཞིན་ནོ། །ཀུན༵་ནས་མོས་པ་ཐ་དད་རྣམས། །དགའ་ཞིང་གུས་པའི་རྣམ་ཆ་ནི། །སྣ་ཚོགས་འདི་ཡང་ངོ་མཚར་རྨད། །འདོར་ལེན་བྱེད་ཚུལ་སྙིང༵་པོ་ཙམ། །རི་ཁྲོད་མ་རིགས་བཞིའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
བགེགས་ཀུན་འཇོམས་པར་མཛད་པ་རིག་པའི་རྒྱལ་མོའི་སྒྲུབ་ཐབས།
ཨོཾ་སྭཱ་སྟི། རྒྱལ་བ་ཀུན་གྱིས་བྱིན་བརླབས་པ། །བགེགས་ཀུན་འཇོམས་པར་མཛད་པ་མོ། །རིག་པའི་རྒྱལ་མོ་ལ་བཏུད་ནས། །དེ་ཡིས་སྒྲུབ་ཐབས་བྲི་བར་བྱ། །སྐྱབས་སེམས་ཚད་མེད་བཞི་སྔོན་དུ་འགྲོ་བས། སྭ་བྷཱ་ཝས་སྟོང་པར་སྦྱང༌། སྟོང་པའི་ངང་ལས་པད་ཟླའི་སྟེང་དུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས། རང་ཉིད་རིག་པའི་རྒྱལ་མོ་གཟའ་ཡུམ་སྐུ་མདོག་དཀར་མོ། དཀར་སྔོ་དམར་བའི་ཞལ་རེ་རེ་ལ་སྤྱན་གསུམ་གསུམ་དང་ལྡན་པ། ཕྱག་དྲུག་གི་དང་པོ་གཉིས་ཆོས་འཆད། བར་པ་གཉིས་རྡོ་རྗེ་དང་པདྨ། ཐ་མ་གཉིས་མདའ་གཞུ་འཛིན་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། ལྷ་རྫས་ཀྱི་རྒྱན་དང་ན་བཟའ་ཅན་ནོ། །གནས་གསུམ་བྱིན་རླབས་ཡེ་ཤེས་དགུག་གཞུག་དབང་བསྐུར་རྒྱས་བཏབ་རྣམས་སྤྱི་དང་འདྲ་བ་ལས། རྣམ་སྣང་གི་དབུ་རྒྱན། ཨོཾ་སརྦ་བིདྱ་ཧཱུཾ་ཧཱུཾ་ཕཊ་སྭཱཧཱ། ཞེས་པ་སྙིང་པོ་དང༌། ཨོཾ་ན་མོ་བྷ་ག་ཝ་ཏཱི་སྭཱཧཱ། ཞེས་པ་ཉེ་སྙིང་གང་ནུས་སུ་བཟླ། བཟླས་པ་ཚར་བ་དང་ཨརྒྷཾ་ནས་ཤཔྟའི་བར་གྱིས་མཆོད། གང་གི་མཚན་ཙམ་བཟུང་བས་ཀྱང༌། །གཟའ་དང་རྒྱུ་སྐར་གདོན་རྣམས་ཀྱི། །ཉེར་འཚེ་མཐའ་དག་ཞི་མཛད་པ། །རིག་པའི་རྒྱལ་མོ་ཁྱོད་ལ་བསྟོད། །ཅེས་བསྟོད། ཨོཾ་སརྦ་བིདྱ་བཛྲ་མུཿ ཞེས་ཡེ་ཤེས་པ་གཤེགས། གཏོར་མ་འབུལ་བར་འདོད་ན། དཀར་གཏོར་མཆོད་པ་དང་བཅས་པ་བཤམ། ཨོཾ་བཛྲ་ཡཀྴ་ཧཱུཾ་གིས་བསངས། བཛྲ་ཛྭ་ལའི་སྔགས་རྒྱས་གང་བར་བྱས། ཨ་ཀཱ་རོས་བཞེད་དོན་འགྲུབ་པར་བྱིན་གྱིས་བརླབས། རང་གི་སྙིང་ག་ནས་འོད་ཟེར་འཕྲོས། རིག་པའི་རྒྱལ་མོ་གཟའ་ཡུམ་ལ་སངས་རྒྱས་བྱང་ཆུབ་སེམས་
དཔའ་གཟའ་དང་རྒྱུ་སྐར་འབྱུང་པོའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿ ཨོཾ་སརྦ་བིདྱ་སརྦ་བུདྡྷ་བོ་དྷི་སཏྭཱ་ནཱཾ། སརྦ་གྲ་ཧ་ནཀྵ་ཏྲ། སརྦ་བྷུ་ཏི་བྷྱཿ ཨི་དཾ་བཱ་ལིང་གྲྀཧྞ་པཱ་ཡ། གྲྀཧྞ་པཱ་ཡ། ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་ལན་གསུམ་གྱིས་ཕུལ། མཆོད་བསྟོད་འདོད་དོན་གསོལ་བཏབ་རྣམས་བྱས་ལ། དེ་དག་གི་རྒྱུད་བསྐུལ་བའི་ཕྱིར་གཟུངས་མདོ་འདོན་པར་བྱ་ཞིང༌། མཐར་ཡིག་བརྒྱ། བཟོད་གསོལ། གཤེགས་གསོལ། རྣམས་བྱའོ། །འདིའི་རྗེས་གནང་གི་ཆོ་ག་ནི་སྒྲུབ་ཐབས་རྒྱ་མཚོའི་སྐབས་དང་འདྲའོ། །འགྲོ་ཀུན༵་དགེ་ལེགས་མཛད་པ་ཡི། །ལྷ་མོའི་སྒྲུབ་ཐབས་རབ་དག༵འ་བ། །ཤིན་ཏུ་རྒྱས་པའི་སྙིང༵་པོ༵་ཉིད། །གཞན་ལ་ཕན་ཕྱིར་བཀོད་པ་ཡིན། །གཟའ་ཡུམ་རིག་པའི་རྒྱལ་མོའི་སྒྲུབ་ཐབས་ཀྱི་ལེ་ཚེན་ནོ།། །།དར་རྒྱས་འཕེལ། །
བ་རི་ལོ་ཙྪའི་ལུགས་དུད་ཁར་གྲགས་པའི་སྒྲུབ་ཐབས།
ཨོཾ་སྭཱ་སྟི། ཁྲོ་རྒྱལ་འཆོལ་བ་ལ་བཏུད་ནས། །སྒྲུབ་ཐབས་ཤིན་ཏུ་རྣམ་མང་ལས། །འདི་ནི་བ་རི་ལོ་ཙྪའི་ལུགས། །དུད་ཁར་གྲགས་པའི་སྒྲུབ་ཐབས་བཤད། །སྐྱབས་སེམས་སྔོན་དུ་འགྲོ་བས། རང་གི་སྙིང་གའི་ཧཱུཾ་ལས་འོད་ཟེར་འཕྲོས། ཁྲོ་རྒྱལ་རྨེ་བརྩེགས་མདུན་གྱི་ནམ་མཁར་བཛྲ་ས་མཱ་ཛཿ ཨོཾ་ཨུ་ཙུཥྨ་མཧཱ་ཀྲོ་དྷ་རཱ་ཛ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་ཧཱུཾ་ནས། ཤཔྟའི་བར་གྱིས་མཆོད། ཁྲོ་བོའི་རྒྱལ་པོ་རྨེ་བརྩེགས་ནི། །ཞལ་གསུམ་ཕྱག་དྲུག་ཞབས་གཉིས་བགྲད། །དུད་ཁ་མེ་རིའི་དབུས་ན་བཞུགས། །སྟོབས་པོ་ཆེ་ལ་ཕྱག་འཚལ་ལོ། །དཀོན་མཆོག་གསུལ་བདག་སྐྱབས་མཆི་སོགས་རྒྱུན་བཤགས་བྱ།
ཚད་མེད་བཞི་སྤྱི་དང་མཐུན་པར་བསྒོམ། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ་རང་སེམས་ཧཱུཾ་ཡིག་དུད་ཁ་ལས་འོད་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས་རང་ཉིད་ཁྲོ་བོའི་རྒྱལ་པོ་རྨེ་བརྩེགས་སྟོབས་པོ་ཆེའི་སྐུར་གྱུར་པ་ནི། ཞལ་གསུམ་ཕྱག་དྲུག་རྩ་ཞལ་དང་སྐུ་མདོག་དུད་ཁ། གཡས་དཀར་གཡོན་དམར་བའི་ཞལ་སྤྱན་གསུམ་གསུམ་དང་ལྡན་ཞིང༌། མཆེ་བ་བཞི་བཞི་གཙིགས་པ། ཐོད་སྐམ་ལྔ་ལྔས་དབུ་ལ་བརྒྱན་པ། དབུ་སྐྲ་ཁམ་སེར་གྱེན་དུ་བརྫེས་པ་ལ་སྦྲུལ་སྔོན་པོ་ལྟོ་སེར་གྱིས་དཀྲིས་པ། སྨ་ར་སྨིན་མ་ཕྱག་དྲུག་གཡས་ཀྱི་དང་པོ་ན་རྡོ་རྗེ་རྒྱ་གྲམ། གཉིས་པ་ན་རྡོ་རྗེ་རྩེ་ལྔ་པ། གསུམ་པ་ན་རྡོ་རྗེ་ལྕགས་ཀྱུ། གཡོན་གྱི་དང་པོ་ན་རྡོ་རྗེ་དབྱུག་པ། གཉིས་པ་ན་རྡོ་རྗེ་ཞགས་པ། གསུམ་པ་རྡོ་རྗེའི་སྡིགས་མཛུབ་མཛད་པ། ཕྱག་ཐམས་ཅད་བརྐྱང་ཞིང༌། ཐོད་སྐམ་གྱི་སེ་རལ་ཁ་དང༌། ཡན་ལག་སྦྲུལ་གྱིས་བརྒྱན་པ། སྟག་ལྤགས་ཀྱི་ཤམ་ཐབས་ཅན། ཞབས་གཉིས་བགྲད་པའི་སྟབས་ཀྱིས་ཉི་མའི་གདན་ལ་བཞུགས་པ་ཡེ་ཤེས་ཀྱི་མེ་འབར་བའི་དབུས་ན་འགྱིང་བའོ། །དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཧཱུཾ་ལས་འོད་ཟེར་འཕྲོས་པས་རང་བཞིན་གྱི་གནས་ནས། བླ་
མ་ཡི་དམ་སངས་རྒྱས་བྱང་ཆུབ་སེམས་དཔའི་ཚོགས་ཐམས་ཅད་ཁྲོ་རྒྱལ་རྨེ་བརྩེགས་ཀྱི་རྣམ་པར་བཛྲ་ས་མཱ་ཛཿ ཞེས་པ་ནས། ཁྲོ་རྒྱལ་འཁོར་བཅས་གནས་འདིར་གཤེགས་སུ་གསོལ། གོང་བཞིན་མཆོད། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཡང་ཐུགས་ཀའི་ཧཱུཾ་ལས་འོད་འཕྲོས། རང་བཞིན་གྱི་གནས་ནས་དབང་གི་ལྷ་རིགས་ལྔ་འཁོར་དང་བཅས་པ་བཛྲ་ས་མཱ་ཛཿ ཨོཾ་པཉྩ་ཀུ་ལ་ས་པ་རི་ཝཱ་ར་བཛྲ་པུཥྤེ་ཨཱཿཧཱུཾ། སོགས་ཉེར་སྤྱོད་ལྔས་མཆོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས། དབང་གི་ལྷ་རྣམས་ཀྱིས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ག་ཏ་ས་མ་ཡ་ཤྲཱི་ཡེ་ཧཱུཾ། ཞེས་གསུངས་ཤིང༌། བུམ་པའི་ཆུས་དབང་བསྐུར་ལུས་ཐམས་ཅད་གང༌། དྲི་མ་ཐམས་ཅད་དགཆུ་ལྷག་མ་ཡར་ལུད་པ་ལས་མི་བསྐྱོད་པས་དབུ་བརྒྱན། ཨརྒྷཾ་ནས་ཤཔྟའི་བར་གྱིས་མཆོད། རབ་ཞི་ཆོས་སྐུའི་ངང་ལས་མ་གཡོས་ཀྱང༌། །གདུག་པ་འདུལ་ཕྱིར་རབ་ཏུ་ཁྲོས་པའི་སྐུ། །རྒྱལ་བ་ཀུན་གྱི་འཕྲིན་ལས་གཅིག་བསྡུས་པ། ཁྲོ་རྒྱལ་རྨེ་བ་བརྩེགས་ལ་ཕྱག་འཚལ་ལོ། །ཞེས་པས་བསྟོད། ཨོཾབྷུར་ཁུཾ་མཧཱ་པྲ་ན་ཡེ་བྷུརྩི་བྷུར་ཁི་བི་མ་ན་སེ་ཨུ་ཙུཥྨ་མཧཱ་ཀྲོ་དྷ་ཧཱུཾ་ཕཊ། ཨོཾ་བྷུར་ཁུཾ་རི་ལི་ཤུ་བ་ར་ཤ་ཧུར་ཤི་བི་མ་ལེ་ཨུ་ཙུཥྨ་མཧཱ་ཀྲོ་དྷ་ཧཱུཾ་ཕཊ། ཅེས་ཅི་ནུས་སུ་བཟླའོ། །མངོན་རྟོགས་བསྡུས་པ་སྒོམ་པར་འདོད་ན། སྐྱབས་སེམས་སྟོང་ཉིད་སྔོན་དུ་
བཏང་ནས། སྙིང་གའི་ཧཱུཾ་གི་འོད་ཀྱིས་སྡིག་སྒྲིབ་དང༌། མི་གཙང་བ་སྦྱང་བ་ནས། རང་ཉིད་ཁྲོ་བོ་ཆེན་པོར་བསྐྱེད། ཡན་ལག་ལྷག་མ་རྣམས་མི་དགོས་པར་བཟླས་པ་འཇུག་པའོ། །འདིའི་རྗེས་གནང་གི་བྱ་བ་ནི། མཎྜལ་པདྨ་འདབ་བརྒྱད་ཀྱི་དབུས་སུ་མེ་ཏོག་གི་ཚོམ་བུ་བཀོད། མཎྜལ་གྱི་དབུས་སམ་གཡས་གཡོན་ཅི་བདེ་བར་བུམ་པ་བཅས་ལ་གཏོར་མ་གསུམ་དང་མཆོད་པ་བཤམ། མཆོད་པ་བྱིན་རླབས་སྤྱི་དང་མཐུན་པར་བྱ། སྐྱབས་འགྲོ་ནས་བཟླས་པའི་བར་བདག་བསྐྱེད་རྫོགས་པར་བྱ། མདུན་བསྐྱེད་བསངས་སྦྱངས། སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་སྟེང་དུ་བྷྲུཾ་ལས་རིན་པོ་ཆེའི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དང༌། མཎྜལ་གྱི་དབུས་སུ་པཾ་ལས་པདྨ་ནས། དབུ་བརྒྱན་གྱིས་བར་བདག་བསྐྱེད་ལྟར་བསྒོམ། རང་གི་སྙིང་ག་ནས་སྔགས་ཀྱི་འཕྲེང་བ་གཟུངས་ཐག་ལ་འཁྲིལ་ནས་སོང༌། བུམ་ནང་གི་ལྷའི་སྐུ་ལས་བདུད་རྩིའི་རྒྱུན་བབས་ཏེ་བུམ་པ་གང་བར་གྱུར། བཟླས་པ་ཅི་འགྲུབ་བྱ། མཆོད་བསྟོད་རྒྱས་པའམ། བསྡུ་ན་བདག་བསྐྱེད་བཞིན་བྱ། གཏོར་མ་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུཾ། ཞུ་བ་ལས་བྱུང་བའི་གཏོར་མ་བདུད་རྩིས་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་ཧ་ཧོ་ཧྲཱིཿ གཏོར་མ་དང་
པོ་སྙིང་པོའི་མཐར། ཨ་ཀཱ་རོ་བཏགས་པ་ལན་ལྔས་ཁྲོ་བོ་ཆེན་པོ་ལ་འབུལ། མཆོད་སྦྱིན་གཏོར་མ་འདི་བཞེས་ལ་སོགས་ཀྱིས་གསོལ་བ་བཏབ། གཉིས་པ་ཆོས་སྐྱོང་ནག་པོ་ཆེན་པོ་ལ་འབུལ། གསུམ་པ་ཁ་འབར་མའི་སྔགས་ཀྱིས་རིགས་དྲུག་ལ་བསྔོ། སླར་ཡང་བུམ་བསྐྱེད་ཀྱི་ལྷ་ལ་མཆོད་བསྟོད་བྱ། ཡིག་བརྒྱ་དང༌། མ་འབྱོར་པ་དང་སོགས་བཟོད་གསོལ་དང༌། ཨོཾ་ཨཱཿཧཱུཾ་ཞེས་མཆོད་ཡོན་ཕུལ། ཡེ་ཤེས་པ་གཤེགས། དམ་ཚིག་པ་ཞུ་བ་ལས་བྱུང་བའི་བུམ་པའི་ཆུ་ནུས་པ་ཀུན་དང་ལྡན་པར་གྱུར། ཞེས་བརྗོད་དེ། །སློབ་དཔོན་གྱི་བྱ་བའོ། །སློབ་མ་ལ་བྱ་བ་ནི། ཕལ་ཆེར་སྒྲུབ་ཐབས་རྒྱ་མཚོའི་ཆིངས་དང་མཐུན་པ་ལས། རྒྱུན་བཤགས་སོང་བའི་རྗེས་སུ་སྐུའི་རྗེས་གནང་གི་གསོལ་འདེབས་འདི་སྐད་ཅེས་བྱ་སྟེ། དུས་གསུམ་སངས་རྒྱས་ཐམས་ཅད་ཀྱི། །སྐུ་ཡི་ངོ་བོ་སློབ་དཔོན་གྱིས། །བདག་ལ་ཁྲོ་རྒྱལ་རྨེ་བརྩེགས་ཀྱི། །སྐུ་ཡི་རྗེས་གནང་སྩལ་དུ་གསོལ། །ཞེས་ལན་གསུམ་གྱིས་གསོལ་བ་འདེབས། སྐུའི་རྗེས་གནང་གི་ཡེ་ཤེས་པ་བསྟིམ་པ་སོང་མཚམས་སུ་མངོན་རྟོགས་ལྟར་ལྷ་དབང་བསྐུར་བའི་དམིགས་པ་འབོགས། གསུང་དང་ཐུགས་ཀྱི་རྗེས་གནང་གི་འགོར་ཡང༌། སྐུའི་ཞེས་པར་གསུང་གི་ཞེས་པ་དང༌། ཐུགས་ཀྱི་ཞེས་འདོན་པ་སྤོས་ལ་གསོལ་བ་བཏབ། ཐུགས་ཀྱི་རྗེས་གནང་གི་མཐར་བུམ་པའི་ཆུས་བཀྲུ་བ་དང༌།
བྱབས་སྲུང་བྱ་སྟེ་སྔགས་ཀྱི་ཁྱད་པར་མ་གཏོགས། རྡོ་རྗེ་རྣམ་འཇོམས་ལྗང་ཁུའི་སྐབས་དང་འདྲའོ། །སློབ་མའི་རྗེས་ཀྱི་བྱ་བ་དང༌། མདུན་བསྐྱེད་ཀྱི་རྗེས་ཀྱི་བྱ་བ་ཡང་སྤྱི་དང་འདྲའོ། །ཤིན་ཏུ་ཟབ་མོར་རབ་གྲགས་པ། །ཡིག་རྙིང་མན་ངག་ཀུན༵་མཐོང་ནས། །དག༵འ་བས་སྙིང༵་པོ༵་ཙམ་ཞིག་བསྡེབས། །དགོས་འདོད་སྒྲུབ་ལ་འདི་ཡིས་ཆོག །རྨེ་བརྩེགས་དུད་ཁའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
སྟོབས་ཆེན་འཆོལ་བའི་སྒྲུབ་ཐབས།
ཨོཾ་སྭཱ་སྟི། གསང་བདག་དང་ནི་དེའི་སྤྲུལ་པ། །སྟོབས་པོ་ཆེ་ལ་ཕྱག་འཚལ་ནས། །སྟོབས་ཆེན་འཆོལ་བའི་སྒྲུབ་ཐབས་ནི། །ཇོ་བོའི་ལུགས་སུ་གྲགས་པ་བཤད། །སྐྱབས་སེམས་ཚད་མེད་བཞི་སྔོན་དུ་སོང་ནས། རང་གི་སྙིང་གའི་ཧཱུཾ་གི་འོད་ཀྱིས་སྡིག་སྒྲིབ་དང་མ་དག་པའི་སྣང་བ་ཐམས་ཅད་བསྲེགས། སྟོང་པའི་ངང་ལས་རང་ཉིད་ཁྲོ་རྒྱལ་རྨཻ་བརྩེགས་སྐུ་མདོག་ལྗང་ཁུ། ལྗང་སྔོན་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཐུགས་ཀར་སྡིགས་མཛུབ་བསྣོལ་བ། བར་པ་གཉིས་རྡོ་རྗེ་དང་དྲིལ་བུ། ཐ་མ་གཉིས་ལྕགས་ཀྱུ་དང་ཞགས་པ་འཛིན་པ། ཞབས་གཉིས་གཡས་བསྐུམ་གཡོན་བརྐྱང་བས་བགེགས་ཀྱི་ཚོགས་ཐམས་ཅད་གནོན་པར་མཛད་པ། མི་མགོའི་དབུ་རྒྱན་དང་དོ་ཤལ། མི་ལྤགས་གླང་ལྤགས་སྟག་ལྤགས་ལ་སོགས་པ་དཔལ་གྱི་ཆས་ཡོངས་སུ་རྫོགས་པ་མེ་དཔུང་འབར་བའི་
དབུས་ན་བཞུགས་པའོ། །གནས་གསུམ་བྱིན་རླབས། ཡེ་ཤེས་པ་སྤྱན་འདྲེན། དབང་བསྐུར་རྒྱས་བཏབ་རྣམས་བྱ་ཞིང༌། རིགས་བདག་ནི་དོན་གྲུབ་བོ། །བཟླས་པའི་སྙིང་པོ་ནི་དུད་ཁའི་སྐབས་དང་འདྲ། གྲིབ་སེལ་བའི་སྔགས། ཨི་ཧོ་ཤུདྡྷེ་ཤུདྡྷེ། བི་ཧོ་ཤུདྡྷེ་ཤུདྡྷེ། རཾ་ཧོ་ཤུདྡྷེ་ཤུདྡྷེ། ཨི་བི་རཾ་ཤུདྡྷེ་ཤུདྡྷེ། ཨ་ཨ་ཨ་སྭཱཧཱ། ཞེས་པའང་བཏགས་ཏེ་བཟླས། ཐུན་འཇོག་ཁར། ཨརྒྷཾ་ལ་སོགས་པས་མཆོད། དུས་གསུམ་སངས་རྒྱས་ཐམས་ཅད་ཀྱི། །བཀའ་ཡི་འཕྲིན་ལས་ཀུན་སྒྲུབ་པ། ཁྲོ་བོའི་རྒྱལ་པོ་སྟོབས་པོ་ཆེ། །གདུལ་དཀའ་འདུལ་མཛད་ཁྱོད་ལ་བསྟོད། །ཅེས་བསྟོད་དོ། །ལྷ་སྐུ་སྟོང་པ་ཉིད་དུ་སྦྱངས་ནས། ཐུན་མཚམས་ལ་འཇུག་གོ །རྗེས་གནང་བྱེད་ཚུལ་ནི། མཎྜལ་པདྨ་འདབ་བརྒྱད་ཀྱི་ལྟེ་བར་བུམ་པ་སྤྱི་དང་མཐུན་པར་བཤམ། གཏོར་མ་གསུམ་དང༌། མཆོད་པ་ཡང་བཤམ། བདག་བསྐྱེད་གོང་བཞིན་བྱས། མཆོད་པ་བྱིན་རླབས་སྤྱི་དང་མཐུན། མདུན་བསྐྱེད་བུམ་པ་སངས་སྦྱངས། བུམ་པའང་སྤྱི་དང་མཐུན་པར་བསྐྱེད་ནས། བུམ་པའི་ནང་དུ་མངོན་རྟོགས་ལྟར་ལྷ་བསྐྱེད། ཨརྒྷཾ་ནས་ཤཔྟའི་བར་གྱིས་མཆོད། གོང་བཞིན་བསྟོད། གཏོར་མ་རྣམས་འབྲུ་གསུམ་གྱིས་བྱིན་གྱིས་བརླབས། ནམ་མཁའ་མཛོད་ཀྱི་སྔགས་རྒྱས་སྤེལ་ནས། གཙོ་བོ་ལ་སྙིང་པོའི་མཐར་ཨི་དཾ་བཱ་ལིཾ་ཁ་ཁ་ཁཱ་ཧི་ཁཱ་ཧི། བཏགས་པས་
འབུལ། གཏོར་མ་གཉིས་པ་ཕྱོགས་སྐྱོང་བཅུ་དང༌། གསུམ་པ་བགེགས་ལ་ཁ་འབར་མའི་སྔགས་ཀྱིས་གཏོང་བའི་ལག་ལེན་ནམ་ཆ་གསུམ་གྱི་ཆོ་གས་འབུལ། སྤྲོ་ན་གཞི་བདག་གཏོར་མའང་བྱ། བུམ་པ་ལ་དམིགས་ནས་བཟླས་པ་ཅི་འགྲུབ་བྱ་ཞིང༌། མཐར་བུམ་པའི་ལྷ་འོད་དུ་ཞུ། དེ་ནས་སློབ་མ་ཁྲུས་བྱ། མཎྜལ་འབུལ། བགེགས་གཏོར་བཏང༌། ཨ་མྲྀ་ཏས་བསྲུངས། གསོལ་བཏབ་ནི། ཇོ་བོའི་ལུགས་ཀྱི་རྗེས་གནང་གཞན་དང་འདྲ། སྐྱབས་འགྲོ་སེམས་བསྐྱེད་རྒྱུན་བཤགས་བྱ། སློབ་མའི་སྤྱི་བོར་ཧཱུཾ་ལས་ཁྲོ་བོ་བསྐྱེད་རིགས་བདག་རྒྱས་འདེབས་ཀྱི་བར་བྱས་ཏེ། བླ་མའི་ཐུགས་ཀའི་ཧཱུཾ་གི་འོད་ཀྱིས། སློབ་མའི་ལུས་བྱིན་གྱིས་བརླབས་ནས། བཅོམ་ལྡན་འདས་བདག་གི་ལུས་བྱིན་གྱིས་བརླབ་ཏུ་གསོལ་ཞེས་གསོལ་བ་བཏབ་པས། ཁྲོ་བོ་འོད་དུ་ཞུ་ནས་སློབ་མ་ཁྲོ་བོའི་སྐུར་གྱུར། རྡོ་རྗེ་ཅན་གྱིས་སངས་རྒྱས་ལ་སོགས་ཀྱིས་གསོལ་བ་བཏབ་པས། དབང་བསྐུར་རྡོ་རྗེ་ཆེན་པོ་ནི་སོགས་ཀྱི་མཐར། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཧཱུཾ། ཞེས་བརྗོད་ཅིང༌། བུམ་པའི་ཆུས་དབང་བསྐུར། རིགས་བདག་གི་རྒྱས་གདབ་སྟེ་སྐུའི་རྗེས་གནང་ངོ༌། །གསུང་གི་རྗེས་གནང་བཟླས་ལུང་དང་བྱིན་གྱིས་བརླབ་པའི་ལུང་སྤྱི་དང་འདྲ། ཐུགས་ཀྱི་རྗེས་གནང་སློབ་མའི་སྙིང་གའི་སྔགས་འཁོར་ལས་འོད་འཕྲོས། ཁམས་གསུམ་འོད་དུ་ཞུ་བ་ནས་སྙིང་གའི་ཧཱུཾ་གི་
ནཱ་དའི་བར་དུ་བསྡུས་ཏེ། སྟོང་པ་ལ་མཉམ་པར་བཞགསླར་ཡང་ལྷ་སྐུར་ལྡང་ངོ༌། །རྗེས་གནང་གི་རྗེས་ཀྱི་བྱ་བ་དང༌། མདུན་བསྐྱེད་ཀྱི་རྗེས་ཆོག་ཀྱང་སྤྱི་དང་འདྲ། འདིའི་གྲིབ་སེལ་གྱི་རིམ་པ་ནི། བུམ་པ་སྔ་མ་བཞིན་བསྒྲུབས། མཐེབ་ཀྱུ་ཉེར་གཅིགཆང་བུ་ཉེར་གཅིགདམར་གཏོར་གཅིག་དང་སྲད་བུ་ནག་པོ་རྣམས་བཤམས། དང་པོར་བཀྲུ་བ་དང་བྱབ་པ་གཉིས་བྱ། ཆང་བུ་རེ་དང་མཐེབ་ཀྱུ་རེ་ལ། ན་མཿས་མནྟ་བུདྡྷཱ་ནཱཾ། ན་མཿ་སརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ། ཨོཾ་སཾ་བྷ་ར་སཾ་བྷ་ར་ཧཱུཾ། ཞེས་ལན་གསུམ་གསུམ་བཟླ་ཞིང་བསྐོར། གྲིབ་སེལ་བའི་སྔགས་ཀྱང་རེ་རེ་བཏགས། བསྒྲུབ་བྱ་ལ་གུ་གུལ་གྱིས་བདུགདྲག་སྔགས་བཟླ་ཞིང་ཡུངས་ཀར་གྱིས་བྲབས། སྲིན་མཛུབ་བཞི་ལ་སྲད་བུ་ནག་པོ་བཏགས། བྱབས་པའི་ཚུལ་གྱིས་གྲིབ་རྣམས་སྲད་བུ་ལ་བསྟིམ་པར་མོས། དེ་ཉིད་ཁྲོ་བོའི་སྔགས་གྲིབ་སེལ་གྱི་སྔགས་དང་སྦྲགས་པས་བཅད་ནས་གཏོར་མའི་ནང་དུ་བོར། གཏོར་མ་གོང་གི་སྔགས་ཀྱིས་བགེགས་རྣམས་ལ་བསྔོས། བདེན་པ་བདར་ཏེ། ཁྲུས་ཁུ་དང་གཏོར་མ་སོགས་ལམ་གྱི་བཞི་མདོར་བསྐྱལ། དེ་ནས་སྲུང་བ་དང་ཤིས་བརྗོད་བྱའོ། །གཞན་ཡང་ལམ་གཏོར་གྱིས་ཕྱོགས་སེལ་བ། ཆུ་མིག་མཚོ་རྫིང་ཡུལ་ཕྱོགས་སོགས་ཀྱི་གྲིབ་སེལ་བ་དང༌། སྲུང་སྐུད། སྲིའུ་གསོ་བ། སྦྱིན་བསྲེག་ལ་བརྟེན་ནས་ལས་བཞི་སྒྲུབ་པ་སོགས་ཀྱང་བསྙེན་
པ་སྔོན་སོང་གི་རྣལ་འབྱོར་པས་ཅི་རིགས་པར་སྒྲུབ་བོ། །འདི་ཡི་གདམས་པ་ངོ་མཚར་ཞེས། །བཀའ་གདམས་པ་ཀུན༵་སྒྲོག་ཅིང་དག༵འ། །ཡིག་རྙིང་རྣམས་ཀྱི་སྙིང༵་པོ༵་ཙམ། འདུས་ལ་གསལ་བར་བཀོད་པ་ཡིན། ཁྲོ་བོ་རྨེ་བརྩེགས་ལྗང་ཁུའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ།
ཁྲོ་མོ་རྨཻ་བརྩེགས་ཀྱི་སྒྲུབ་ཐབས།
ཨོཾ་སྭཱ་སྟི། བླ་མ་མཆོག་དང་ཁྲོ་བོའི་རྒྱལ། །དེ་བཞིན་མཁའ་འགྲོ་མར་བཅས་ལ། །བཏུད་ནས་སྒྲུབ་ཐབས་བཟླས་ལུང་གི །བྱ་བ་ཅུང་ཟད་བཤད་པར་བྱ། །སྐྱབས་སེམས་སྔོན་དུ་འགྲོ་བས། སྟོང་པའི་ངང་ལས་རང་སེམས་ཧཱུཾ་མཐིང་ནག་གི་འོད་ཀྱི་འཕྲོ་འདུ་ལས་མཁའ་འགྲོ་མ་རྨེ་བརྩེགས་སྐུ་མདོག་སོལ་བ་ལྟར་གནག་པ། ཁྲོ་མོའི་ཆ་ལུགས་སྤྱན་གསུམ་པ། ཕྱག་གཉིས་ཀྱིས་དག་བྱེད་ཀྱི་བདུད་རྩིས་གང་བས་བུམ་པ་ཐུགས་ཀར་འཛིན་པ། སྐྲ་ལྷུག་པར་གྲོལ་ཞིང་རྒྱན་སྤངས་པ། དར་ནག་གི་ན་བཟའ་ལྷུག་པར་འཕྱང་བ། པད་ཉི་ལ་མཉམ་པའི་སྟབས་ཀྱིས་བཞེངས་པའོ། །གནས་གསུམ་བྱིན་རླབས། ཡེ་ཤེས་དགུག་གཞུགདབང་བསྐུར་ཞིང་མི་བསྐྱོད་པས་རྒྱས་བཏབ། ཨརྒྷཾ་ལ་སོགས་པས་མཆོད། དཔལ་ལྡན་རྡོ་རྗེ་མཁའ་འགྲོ་མ་སོགས་ཀྱིས་བསྟོད། ཨོཾ་ཨར་ཁཾ་ཙིར་ཁཾ་བི་མ་ན་སེ་ཨུ་ཙུཥྨ་མཧཱ་ཀྲོ་དྷ་ཧཱུཾ་ཕཊ། ཅེས་བཟླ། གཏོར་མ་འབྲུ་གསུམ་གྱིས་བྱིན་གྱིས་བརླབས་ལ། ཨོཾ་བཛྲ་ཌཱ་ཀི་ནཱི་ཨུ་ཙུཥྨ་ཀྲོ་དྷ་ཁ་ཁ་ཁཱ་ཧི་ཁཱ་ཧི།
ཞེས་པས་འབུལ། སློབ་མའི་བྱ་བ་ནི། སྒོམ་ལུང་འབོགས་པ་སྟེ། སྔགས་ཀྱི་བཟླས་ལུང་སྦྱིན་པ་ཁོ་ན་ཡིན། བུམ་ཆོག་ནི་གཞི་དཀར་པོའི་སྟེང་དུ། འབྲུ་དཀར་གྱིས་གཡུང་དྲུང་རིས་བྲིས་ཏེ། དེར་བུམ་པ་སྤྱི་དང་མཐུན་པར་བཅས་ལ། དངོས་གཞི་བུམ་པ་སྒྲུབ་ཚུལ། བཀྲུ་བྱབས་སྲུང་གསུམ་དང་བཅས་པ་ནི། རྨེ་བརྩེགས་དུད་ཁའི་བུམ་ཆོག་དང་འདྲ་ལ། གྲིབ་སྲུང་བའི་སྒོམ་བཟླས་ནི། རང་གི་སྤྱི་བོར་མཁའ་འགྲོ་མ་སྐད་ཅིག་གིས་བསྐྱེད་ལ། བུམ་ཆུས་བཀྲུས་པར་བསམས་ཏེ་བཟླས་བརྗོད་བྱེད། མཐར་མཁའ་འགྲོ་མ་རང་ལ་བསྟིམ། ཀུན༵་ཏུ་ཟབ་ཅིང་ཆེས་བླ་བ། །དོན་ཆེན་འགྲུབ་པ་ཡིད་དག༵འི་གནས། །གཞན་འགའི་སྙིང༵་ལའང་དགའ་བསྐྱེད་པའི། །འདུས་པོ༵ར་བྲིས་འདི་ཨེ་མ་ཧོ། ཁྲོ་མོ་རྨཻ་བརྩེགས་ཀྱི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
སྒྲུབ་ཐབས་ཤིན་ཏུ་རྣམ་མང་ལས་ཤིན་ཏུ་བསྡུས་པའི་ཚུལ་ལུགས།
ཨོཾ་སྭཱ་སྟི། ཧེ་རུ་ཀ་དཔལ་ཁྲོས་པའི་སྐུ། །འཇིགས་པ་འཇོམས་པ་ལ་བཏུད་ནས། །སྒྲུབ་ཐབས་ཤིན་ཏུ་རྣམ་མང་ལས། །ཤིན་ཏུ་བསྡུས་པའི་ཚུལ་ལུགས་བྲི། །སྐྱབས་སེམས་ཚད་མེད་བཞི་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། བྷྲུཾ་གསུམ་ལས་རྩེ་གསུམ། རྡོ་རྗེ་འཁོར་ལོའི་སྲུང་བའི་འཁོར་ལོ་གསུམ་སྦྲག་ཏུ་གནས་པའི་ནང་དུ། ཆོས་འབྱུང་ལ་གནས་པའི་རླུང་མེ་ཆུ་སའི་འོག་གཞི་དང་གུར་ཁང༌། དེའི་ནང་དུར་ཁྲོད་ཆེན་པོའི་དབུས་སུ་འཁོར་ལོ་རྩིབས་བཅུ་པ་ལྟེ་
བ་ལ་ཧཱུཾ་དང་བཾ་ལས་རྡོ་རྗེ་དང་ཏྲི་ཤུ་ལ་རྣམས་སུ་གྱུར་པ་ལས། རང་ཉིད་བཅོམ་ལྡན་རེག་ཚིག་སྐུ་མདོག་ནག་པོ། ཕྱག་གཡས་རྡོ་རྗེའི་སྟེང་ན་མེའི་འཁོར་ལོ་རྩིབས་བརྒྱད་པ་དང༌། གཡོན་ཏྲི་ཤུ་ལའི་རྩེ་མོར་རླུང་གི་འཁོར་ལོ་རྩིབས་བཞི་པ་བསྣམས་པ། སྐུ་སྦོམ་ཐུང་ཁྲོ་བོའི་ཆ་བྱད་རྫོགས་ཤིང༌། དུར་ཁྲོད་ཀྱི་ཆས་བརྒྱད་དང་ལྡན་པ། འཁོར་ལོ་དང་སྣ་ཚོགས་རྡོ་རྗེས་སྤྱི་བོ་བརྒྱན་པ། ཞབས་གཡས་བརྐྱང་བའི་དུས་མཚན་མ་དང༌། གཡོན་བསྐུམ་པས་འཇིགས་བྱེད་མནན་པ། ཡུམ་གཡས་གྲི་གུག་དང༌། གཡོན་ཏྲི་ཤུ་ལ་འཛིན་པས་འཁྱུད་པ། གཉིས་ཀའང་མེ་འབར་བའི་དབུས་ན་བཞུགས་པའི་དཔྲལ་བར་ཨོཾ་དཀར་པོ། སྙིང་གར་ཧཱུཾ་སྔོན་པོ། ལྟེ་བར་ཨ་སེར་པོ། བོལ་དུ་ཏཾ་ལྗང་ཁུ། མིག་ལ་ཏྲཾ་དཀར་པོ། རྣ་བར་ཧཱུཾ་སེར་པོ། སྣ་ལ་ཏྲི་དུད་ཁ། ལྕེ་ལ་ཨཱཿདམར་པོ། ལུས་ལ་ཁཾ་ལྗང་ཁུ། ཡིད་ལ་ཏུཾ་མཐིང་ཁ་རྣམས་སུ་གྱུར། ཡེ་ཤེས་པ་བསྟིམ་པ་དང༌། དབང་བསྐུར་སྤྱི་དང་འདྲ་བ་ལས་མི་བསྐྱོད་པས་དབུ་བརྒྱན། ཡབ་ཡུམ་སྙོམས་པར་ཞུགས་པའི་བྱང་ཆུབ་ཀྱི་སེམས་ཀྱི་ཐིག་ལེ་འཁོར་ལོའི་རྩིབས་རྣམས་སུ་སྤྲོས། རང་དང་འདྲ་བའི་ཁྲོ་བོ་དང་ཁྲ་གདོང་མ་ལ་སོགས་པའི་སྒོ་མཚམས་ཀྱི་ཁྲོ་བོ་ཡབ་ཡུམ་ཞལ་སྦྱོར་རྣམས་སུ་གྱུར། སྟེང་དང་འོག་ཏུ་གཙོ་བོ་ཡབ་ཡུམ་གྱི་སྐུ་རེ་རེ། ཨརྒྷཾ་ནས་ཤཔྟའི་བར་གྱིས་མཆོད། ཁྲོ་རྒྱལ་
རེག་ཚིག་སྟོབས་པོ་ཆེ། །མུན་ནག་ལྟ་བུའི་སྐུ་འཛིན་ཞིང༌། །ཕཊ་ཀྱི་སྒྲ་འབྱིན་མེ་དཔུང་འབར། །མགོན་དུ་གྱུར་ལ་ཕྱག་འཚལ་བསྟོད། །བསྐལ་པ་མེ་ལྟར་འབར་བའི་ཀློང་དཀྱིལ་ན། ཁྲོ་རྒྱལ་འཁོར་བཅས་སྡང་བའི་སྟབས་ཀྱིས་བཞུགས། །ཞལ་དུ་མ་ལུས་དགྲ་བགེགས་དོན་སྙིང་གསོལ། །གཏུམ་ཆེན་མེ་འབར་ལས་རྣམས་གྲུབ་པར་མཛོད། །ཅེས་བསྟོད། དེ་ནས་བཟླས་པའི་དམིགས་པ་གསལ་བཏབ་ནས། ཨོཾ་བྷ་ཡ་ནཱ་ཤ་ནི་ཏྲཱ་ས་ནི། སརྦ་མཱ་ར། པྲ་ཏྱེཾ་གི་ར། བི་ནཱ་ཤ་ཡ། ཡེ་ཀེ་ཙི་ཏ། དུཥྛཾ་སཏྭ་བ་ད་ཀི མ་མ་བི་རཱུ་བ། ཀུར་བྷནྟི་ཏ་ནི། སརྦ་མཱ་ར། པྲ་ཏྱེཾ་ག་རི་ཎེ་པ་ཏ་ཏུ་ཧཱུཾ་ཕཊ་སྭཱཧཱ། ཞེས་ཅི་འགྲུབ་ཏུ་བཟླའོ། །འབུམ་ཕྲག་བཅོ་ལྔས་བསྙེན་པ་འགྲུབ་པར་བཤད། ཐུན་འཇུག་ཏུ་དཀྱིལ་འཁོར་འོད་གསལ་དུ་བསྡུ་ཞིང་དགེ་བ་བསྔོ། གཏོར་མ་བྱིན་རླབས་བླ་མེད་གང་ཡང་རུང་བ་ཞིག་དང་མཐུན་པར་བྱས་ནས། དགྲ་བགེགས་ཐམས་ཅད་བཀུག་སྟེ་གཏོར་མ་ལ་ཐིམ་པར་མོས། ཁྲོ་བོ་ཆེན་པོ་འཁོར་བཅས་བཛྲ་ས་མཱ་ཛཿ ཨོཾ་བྷ་ཡ་ནཱ་ཤ་ནི། ཏྲཱ་ས་ནི། བཛྲ་ཀྲོ་དྷ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཐུམྦཱ་ཐུམྦཱ་ཁཱ་ཧི་ཁཱ་ཧི། མཧཱ་མཾ་ས་ཁ་ཁཱ་ཧི། མཧཱ་རཀྟ་ཁ་ཁཱ་ཧི། གཏི་མུག་ཤ་ཡི་མཆོད་པ་བཞེས། །ཞེས་སྡང་རུས་པའི་མཆོད་པ་བཞེས། །འདོད་ཆགས་ཁྲག་གི་མཆོད་པ་བཞེས། །མ་ར་ཡ་ཙིཏྟ་སྲོག་ཐུན་ཁ་ཁཱ་ཧི། ཞེས་ལན་བཅུ་གཅིག་གིས་བསྟབ། མཆོད་
བསྟོད་ནས། གཤེགས་གསོལ་གྱི་བར་སྤྱི་དང་འདྲའོ། །འདིའི་རྗེས་གནང་ནི་ཆོས་འབྱུང་ནག་པོ་གྲུ་གསུམ་གྱི་སྟེང་དུ་རྟེན་གཏོར་བཀོད། རྗེས་གནང་གི་བྱ་བ་སྒྲུབ་ཐབས་བརྒྱ་རྩས་རིགས་འགྲེ་བ་ལས་མཐར་གཏོར་དབང་བྱེད་པ་ཉིད་ཡིན། མུ་སྟེགས་ངན་སྔགས་ཀུན༵་བཟློག་ཅེས། །རྡོ་རྗེ་གདན་པའི་བ་རི་ལ། །དག༵འ་བར་བསྔགས་པའི་གསེར་ཆོས་ཀྱི། །སྙིང༵་པོ༵་མདོ་བསྡུས་འདི་བཞིན་ལགས། །སྤྱིར་འདི་ལ་དབང་བཞི་སོགས་ཆོས་སྐོར་ཤིན་ཏུ་ཚོགས་ཆེ་བར་ཡོད་ནའང༌། བསྡུས་པ་འདི་རྗེས་གནང་ཙམ་གྱིས་འགྲུབ་པ། བདེ་མཆོག་ཁྲོ་བོ་རེག་ཚིག་གི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ཁྲག་འཐུང་མཁའ་ལྡིང་སྒྲུབ་ཐབས།
ཨོཾ་སྭཱ་སྟི། ཧེ་རུ་ཀ་ལ་བཏུད་བྱས་ནས། །མངོན་བརྗོད་རྒྱུད་རྒྱལ་ལས་གསུངས་པ། །མན་ངག་ཁ་བསྒྱུར་དང་བཅས་པའི། ཁྲག་འཐུང་མཁའ་ལྡིང་སྒྲུབ་ཐབས་བཤད། །སྐྱབས་སེམས་ཚད་མེད་བཞི་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལས་པཾ་ལས་རྒྱ་མཚོའི་དབུས་སུ་པཾ་ལས་པདྨ་འདབ་བརྒྱད་ཀྱི་ལྟེ་བར་རཾ་ལས་ཉི་མ། དེར་རང་སེམས་ཧཱུཾ་ལས་རྡོ་རྗེ་འབར་བ་ཧཱུཾ་གིས་མཚན་པ་ཡོངས་སུ་གྱུར་པ་ལས། རང་ཉིད་དཔལ་འཁོར་ལོ་བདེ་མཆོག་སྐུ་མདོག་མཐིང་ག་རྩ་ཞལ་གནག་པ། གཡས་ཞལ་དུད་ཁ་དང་དམར་པོ། གཡོན་ཞལ་ལྗང་ཁུ་དང་དུད་ཁ། སྟེང་ཞལ་
མཁའ་ལྡིང་གི་གདོང་དམར་པོ། ཉི་མ་བཅུ་གཉིས་ཀྱི་གཟི་བརྗིད་ཅན་ཕྱག་དང་པོ་གཉིས་རྡོ་རྗེ་དང་དྲིལ་བུ་འཛིན་པས། ཡུམ་ལ་འཁྱུད་པ། དེའི་འོག་མ་གཉིས་ཀྱིས་གྲི་གུག་དང༌། ཚངས་པའི་མགོ་བོ་བསྣམས་པ། གཡས་གསུམ་པ་མཐའ་ཡས་དཀྲིས་པ་རྡོ་རྗེ་འབར་བ་གསོར་བ། བཞི་པ་པདྨ་དཀྲིས་པའི་ལྕགས་ཀྱུ། ལྔ་པ་མ་དྲོས་པ་དཀྲིས་པའི་ཌ་མ་རུ། གཡོན་གསུམ་པ་ནོར་རྒྱས་ཞགས་པའི་ཚུལ་དུ་འཛིན་པས་སྡིགས་མཛུབ། བཞི་པ་འཇོག་པོ་བ་དན་དུ་བཏགས་པའི་ཁ་ཊྭཱཾ་ག་དང་ཐོད་པ། ལྔ་པ་པད་ཆེན་གྱིས་དཀྲིས་པའི་མདུང༌། ཐ་མ་གཉིས་དབང་པོའི་པགས་པ་སྟོད་གཡོགས་སུ་བསྣམས་པ་ལས་གཡས་ཀྱིས་སྟོབས་རྒྱུ་དང༌། གཡོན་གྱིས་དུང་སྐྱོང་འཛིན་པའོ། །ཆུ་ལྷ་ཕོ་མོའི་སྟེང་ན་གཡས་རྐྱང་གི་སྟབས་ཀྱིས་བཞུགས་ཤིང༌། ཁ་དོག་ལྔ་དང་ལྡན་པའི་རྡོ་རྗེའི་གཤོག་པ་བརྡེབ་པ། ཧེ་རུ་ཀའི་རྒྱན་དང་ཆ་ལུགས་ཡོངས་སུ་རྫོགས་ཤིང༌། ཡུམ་རྡོ་རྗེ་ཕག་མོ་སེར་མོ་གྲི་ཐོད་འཛིན་པས་འཁྱུད་པ། མེ་དཔུང་འབར་བའི་དབུས་ན་བཞུགས་པའོ། །སྙིང་ཁར་རང་དང་འདྲ་བའི་ཡེ་ཤེས་སེམས་དཔའ། དེའི་ཐུགས་ཀར་ཏིང་འཛིན་སེམས་དཔའ་ཧཱུཾ་ནཾ་ཧཱུཾ། སྤྱི་བོར་མཁའ་འགྲོ་མ་གསང་བར་ལཱ་མ། མགྲིན་པར་དུམ་སྐྱེས་མ། ལྟེ་བར་གཟུགས་ཅན་མ། སྤྱི་བོ་ལ་སོགས་པའི་གནས་རྣམས་སུ་དཔའ་བོ་དཔའ་མོ་བཞི་བཅུ་ཞེ་བརྒྱད། ཁར་ཁྭ་གདོང་མ། སྣ་
བུག་གི་འདོམ་སོར་འུག་གདོང་མ། གསང་བར་ཁྱི་གདོང་མ། གཤང་སྒོར་ཕག་གདོང་མ། མིག་གཡས་སུ་གཤིན་རྗེ་བརྟན་མ། རྣ་བ་གཡས་སུ་གཤིན་རྗེ་ཕོ་ཉ་མ། རྣ་བ་གཡོན་དུ་གཤིན་རྗེ་མཆེ་བ་མ། མིག་གཡོན་དུ་གཤིན་རྗེ་འཇོམས་མ། ཐམས་ཅད་ཀྱང་ཕྱག་གཉིས་པ། དཔའ་བོ་ཐམས་ཅད་རྡོ་རྗེ་དྲིལ་བུ་འཛིན་པ། རྣལ་འབྱོར་མ་རྣམས་གྲི་གུག་དང་ཐོད་པ་བསྣམས་པ། མཁའ་ལྡིང་གི་ཞལ་དང་རྡོ་རྗེའི་གཤོག་པ་ཅན་ནོ། །དེ་ནས་གོ་ཆ་གཉིས་འགོད། གནས་གསུམ་བྱིན་རླབས། དམ་ཡེ་བསྲེ་བ། དབང་བསྐུར་རྒྱས་བཏབ་རྣམས་བྱ་སྟེ། སྡོམ་པའི་མངོན་རྟོགས་གང་ཡང་རུང་བ་ཞིག་དང་བསྟུན་ནོ། །སྙིང་གར་ཉི་མའི་སྟེང་དུ་ཧཱུཾ་གི་མཐའ་སྐོར་དུ་སྔགས་ཀྱི་ཕྲེང་བས་བསྐོར་བར་བསམས་ལ། ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་བཛྲ་ག་རུ་ཌ་ཧཱུཾ། ཌཱ་ཀི་ནཱི་ཛཱ་ལ་སམྦྷ་ར་ཧཱུཾ་ཕཊ། ཅེས་འབུམ་ཕྲག་ཉི་ཤུ་རྩ་གཉིས་སུ་བཟླའོ། །དེ་ནས་ཨོཾ་ག་རུ་ཌ་ས་མ་ཡ་ཧཱུཾ་ཛཿ ཞེས་བཏགས་པ་འབུམ་བཟླ། དེ་ནས་ཏཾ་ཀ་ར་ཀཾ་ཀ་ར། ཙྪ་ཏི། ཙྪ་ཏི། ཁྱུང་ཧུར་རྦད། ཞེས་བཏགས་པ་འབུམ་བཟླས་པས་གདོན་ཐམས་ཅད་དང༌། ཁྱད་པར་ཀླུ་ནད་ཞི་ཞིང༌། འབྱུང་པོ་ཐམས་ཅད་མངག་གཞུག་ཏུ་འགྱུར་རོ། །རང་གཞན་གྱི་ཀླུ་གདོན་དྲག་པོ་འདུལ་ན། ནཱ་ག་སྲོག་ཚིག་ནན་རྦད་མཱ་ར་ཡ་ཧཱུཾ། ཞེས་བཏགས་པ་འབུམ་ཕྲག་བཟླས་ཏེ་ལས་ལ་སྦྱར་རོ། །རྗེས་ལྷ་སྐུ་སྟོང་པར་སྦྱངས། སྟོང་པའི་ངང་ལས་ལྷ་སྐུར་ལངས་ཏེ་གོ་ཆ་བཀོད་
ཚམ་རྔམ་བྱས་ལ་ཐུན་མཚམས་ལ་འཇུག་གོ །གཏོར་ཆོག་ལཱུ་ཧི་པ་དང་འདྲ། སྔགས་ཀྱི་ཤམ་བུ་བཟླ་བ་ནས་བཟུང་སྟེ། བདག་བསྐྱེད་དང་གཏོར་ཆོག་གཉིས་ཀར་ལ་ཧེ་རུ་ཀ་བྱ་ཁྱུང་གི་འཁོར་གྱིས་བསྐོར་བ་བསྒོམ་པ་དང༌། གཏོར་ཆོག་གི་སྐབས། བཟླས་གཏོར་གྱི་རྗེས་ལ། ཨོཾ་མཧཱ་ག་རུ་ཌ་ཨི་དམ་བཱ་ལིང་ཏ་ཁ་ཁ་ཁཱ་ཧི་ཁཱ་ཧི། ཞེས་བཏགས་པས་འབུལ། འདིའི་རྗེས་གནང་ནི། མཎྜལ་པདྨ་འདབ་བརྒྱད། དབུས་སུ་བུམ་པ་བཅའ། མཆོད་གཏོར་རྒྱ་ཆེར་བཤམས། བདག་བསྐྱེད་སྔོན་དུ་འགྲོ་བས་མཆོད་པ་བྱིན་གྱིས་བརླབས། མདུན་བསྐྱེད་བསངས་སྦྱངས། བུམ་པ་བསྐྱེད་ཆོག་སྤྱི་དང་མཐུན། བུམ་པའི་ནང་དུ་བདག་བསྐྱེད་ལྟར་ལྷ་བསྐྱེད་མཆོད་པ་ཕྱི་ནང་གསང་བ་ཚང་བ་དང༌། རྐང་བརྒྱད་ཀྱིས་བསྟོད། གཏོར་མ་འབུལ། ཀླུ་གཏོར་ཡང་བཏང་ལ་བཟླས་པ་ཅི་ནུས་ཞི་བྱའོ། །སློབ་མས་མཎྜལ་ཕུལ། དོན་དམ་སྨྲ་བའི་སེང་གེ་སོགས་ཀྱིས་གསོལ་བ་བཏབ། རྒྱུན་བཤགས། རིགས་ལྔའི་སྡོམ་བཟུང༌། དམ་ཚིག་ཉེར་གཉིས་བཟུང་བ་རྣམས་བྱ། ལྷའི་སྐུ་ལས་བྱུང་བའི་བདུད་རྩིས་བཀྲུ་བར་བསམས་ཏེ། བུམ་ཆུ་སྤྱི་བོ་ནས་གཏོར་ཞིང་འཐུང་དུ་འཇུག །ཚད་མེད་བཞི་ནས་རིགས་བདག་རྒྱས་འདེབས་ཀྱི་བར་བདག་བསྐྱེད་བཞིན་དམིགས་པ་ཕོག །དབང་བསྐུར་གྱི་སྐབས། བུམ་ཆུས་དངོས་སུ་དབང་བསྐུར། དེ་ནས་སྔགས་ཀྱི་བཟླས་ལུང་བྱིན་ཏེ། ཤམ་བུ་རྣམས་བྱིན་
མི་དགོས། སླར་ཡང་བུམ་པའི་ཆུས་གནས་སོ་སོར་གཏོར་ལ། ལྷ་ཐམས་ཅད་ཀྱི་སྔགས་ལ་ཨ་བྷི་ཥིཉྩ་ཞེས་བཏགས་ལ་དབང་བསྐུར་རོ། །འདི་ལ་ཕྱག་མཚན་གཏོད་པ་དང༌། གཏོར་དབང་བྱེད་པ་ཞིག་ཀྱང་སྣང་སྟེ། བློས་བཏགས་ཡིན་ཡིན་འདྲ་བའི་མི་དགོས་པར་མངོན་ནོ། །རྗེས་ཀྱི་བྱ་བ་སྤྱི་དང་འདྲ། འདི་རྒྱུད་ལས་ཆར་འབེབས་ཀྱི་སྐབས་སུ། བསྙེན་པ་སོང་ན་ལས་དེ་ལ་ལྷག་པར་བསྔགས་ཤིང༌། འདི་ཉིད་ཀྱི་བཀའ་ཉན་སྲིན་མོ་རལ་གཅིག་མ་བསྒྲུབ་པར་བྱ་སྟེ། ལོགས་སུ་བསྟན་པ་ཞིག་ཡིན་ནོ། །ཀུན༵་ལས་ཁྱད་འཕགས་མཁའ་ལྡིང་གི །སྒྲུབ་ཐབས་མཆོག་ཏུ་དག༵འ་བའི་ཏོག །རྭ་ལོའི་གདམས་པར་གྲགས་པ་ཡི། །སྙིང༵་པོ༵་ཉུང་ངུ་ཙམ་ཞིག་བྲིས། །བདེ་མཆོག་རྡོ་རྗེ་མཁའ་ལྡིང་གི་སྒྲུབ་ཐབས་ཀྱི་ལེ་ཚན་ནོ།། །།དགེའོ། །
གདུག་པ་འདུལ་མཛད་བྱ་ཁྱུང་གི་སྒྲུབ་ཐབས།
ཨོཾ་སྭཱ་སྟི། ཡེ་ཤེས་ལྔ་ལྡན་དུས་འཁོར་ནི། །གདུག་པ་འདུལ་མཛད་བྱ་ཁྱུང་ཚུལ། །དེ་ལ་བཏུད་ནས་སྒྲུབ་ཐབས་ནི། །རྒྱུད་དོན་བཞིན་ཏུ་གསལ་བར་བྲི། །སྐྱབས་སེམས་སྔོན་དུ་འགྲོ་བས། ཤཱུ་ནྱ་ཏཱའི་སྔགས་ཀྱིས་སྟོང་པར་སྦྱངས། རང་གི་སྙིང་གར་པདྨ་ཟླ་བ་ཉི་མ་བརྩེགས་པའི་གདན་ལ་ཀྵིཾ་ཁ་དོག་ལྔ་ལྡན་དུ་ཞུ་བ་ལས། རང་ཉིད་འདབ་ཆགས་ཀྱི་མགོན་པོ་ཞལ་གཅིག་ཕྱག་གཉིས་པ། རྐང་མཐིལ་ནས་དཔྱིའི་བར་སེར་པོ། དེ་ནས་ལྟེ་བའི་བར་དཀར་བ། དེ་ནས་མགྲིན་པའི་བར་དམར་བ། དེ་ནས་སྨིན་
མའི་བར་ནག་པ། དེ་ཡན་ཆད་ལྗང་ཁུ་སྤྱན་གསུམ་དང་ལྡན་པ། རྒྱལ་བ་ལྗང་ཁུ་དང་རྣམ་རྒྱལ་སྔོན་པོས་དབུ་སྐྲ་བཅིངས་པ། སྟོབས་རྒྱུ་དང་པདྨ་ནག་པོས་སྙན་ཆ། ནོར་རྒྱས་དང་དུང་སྐྱོང་དམར་པོས་ཕྱག་གདུབ། འཇོག་པོ་དང་པད་ཆེན་སེར་པོས་ཞབས་གདུབ། མཐའ་ཡས་དང་རིགས་ལྡན་དཀར་པོས་འོག་པག་དང་མགུལ་རྒྱན་བྱས་པ། གཤོག་པ་ཁ་དོག་སྣ་ཚོགས་པ་འོད་ཟེར་སྣ་ཚོགས་འཕྲོ་བ། རིགས་ལྔས་དབུ་བརྒྱན་པ། ཀླུ་རྒྱལ་གདུག་པ་ཅན་སྦྲུལ་གྱི་རྣམ་པ་སྐེད་པ་ནས་ཕྱག་གཉིས་ཀྱིས་བཟུང་ཞིང་མགོ་བོ་ཞལ་དུ་གསོལ་བ། མཇུག་མ་ཞབས་འོག་ཏུ་མནན་པའོ། །ལྟེ་བར་སའི་དཀྱིལ་འཁོར་ལ་ལཾ། སྙིང་གར་ཆུ་ལ་ཨུ། མགྲིན་པར་མེ་ལ་རཾ། དཔྲལ་བར་རླུང་ལ་ཨི། གཙུག་གཏོར་དུ་ནམ་མཁའ་ལ་ཨ། ཐུགས་ཀར་ཉི་མ་ལ་ཀྵིཾ། དེ་ལ་སྔགས་ཀྱིས་བསྐོར་བ་ལ་དམིགས་ཏེ། ཨོཾ་པཀྵིཾ་སྭཱཧཱ། ཞེས་ཅི་འགྲུབ་ཏུ་བཟླ། འཇུག་ཏུ་དགེ་བ་བསྔོ། དེ་ལྟར་བྱེ་བ་བཟླས་ན། ཇི་སྐད་བཤད་པའི་ལས་ཐམས་ཅད་འགྲུབ་བོ། །འདིའི་རྗེས་གནང་བྱ་བར་འདོད་ན། མཎྜལ་པདྨ་འདབ་མ་བརྒྱད་པའམ། ཡང་ན་མཎྜལ་ལ་འབྲུའི་ཚོམ་བུ་བཀོད། མཆོད་པ་བཅུ་གཉིས་ཀྱི་རྣམ་པ་བཤམ། བདག་བསྐྱེད་སྔོན་དུ་འགྲོ་བའི་སྒོ་ནས་མཆོད་པ་བྱིན་རླབས་དུས་འཁོར་ཁྲོས་པ་རྡོ་རྗེ་ཤུགས་དང་འདྲ། མདུན་བསྐྱེད་ཨོཾ་ཨཱཿཧཱུཾ་ཧྲ་ཕཊ་ཀྱིས་བསངས། སྭ་བྷཱ་ཝས་
སྦྱངས། སྟོང་པའི་ངང་ལས་ཞེས་པ་ནས། ཉི་མ་ལ་ཀྵིཾ་གི་བར་གོང་བཞིན། དེ་ནས་སོ་སོའི་ཕྱག་རྒྱ་དང་བསྟུན་ཏེ། ཨོཾ་པཀྵིཾ་བཛྲ་གནྡྷཾ་པྲ་ཏཱིཙྪ་ན་མཿཞེས་པ་ལ་སོགས་པ། པཀྵིཾ་ཞེས་པ་མགོ་བོར་སྦྱར་ནས། ཨོཾ་པཀྵིཾ་ཀཱ་མཾ་པྲ་ཏིཙྪ་ན་མཿའི་བར་དུ་མཆོད་པ་བཅུ་གཉིས་རྡོ་རྗེ་ཤུགས་དང་འདྲ། འདི་ལ་གཏོར་ཆོག་མི་དགོས་ཤིང༌། གལ་ཏེ་བྱེད་པར་སྤྲོ་ན་རྡོ་རྗེ་ཤུགས་ཀྱི་སྐབས་བཞིན་པས། བཛྲ་བྷེ་ར་ཝ་བྷིསྐ་ར་ཞེས་པའི་ཚབ་ཏུ། པཀྵིཾ་ཏྲ་ཞེས་བརྗོད། སློབ་མའི་བྱ་བ་ཡང་དུས་འཁོར་ལྷན་སྐྱེས་ཀྱི་སྐབས་འདོན་པ་སྤོས་པས་རུང་ངོ༌། །རྒྱུད་འགྲེལ་གྱི་དངོས་བསྟན་འདི་ལྟར་ན་ནམ་མཁའ་ལྡིང་ལ་རྭ་མི་དགོས་ཤིང༌། ཞལ་རས་ལྷ་ཞལ་ལ་བྱའི་མཆུ་ཡོད་པར་བྱ། མཁའ་ལྡིང་གི་མངོན་རྟོགས་ཐམས་ཅད་ན་མཇུག་མའི་གསལ་ཁ་མེད་ཀྱང་འཇུག་སྒྲོ་དགོས་ཤིང༌། པུས་མོ་མན་ཆད་བྱའི་རྐང་པའི་རྣམ་པ། ཕྱག་ཞབས་ཐམས་ཅད་ལ་སེན་མོ་ལྕགས་ཀྱུ་ལྟར་རྣོ་བ། དབུ་སྐྲ་ནག་པོ་ཐོར་ཚུགས་སམ། སེར་པོ་གྱེན་བརྫེས་གང་རུང་དང༌། ཞལ་བཞི་ན་ཞི་ཁྲོ་སྐབས་དང་སྦྱར། རིགས་ལྔའི་དབུ་རྒྱན་གྱི་སྟེང་དུ་རིན་པོ་ཆེའི་དབུ་རྒྱན་ཡང་བྱའོ། །དེ་ལྟར་བྱས་ན་རྒྱ་གར་ཡུལ་གྱི་མཁའ་ལྡིང་གི་བཀོད་པ་དང་ཡང་མཐུན་ཞིང༌། རྒྱུད་འགྲེལ་གྱི་དགོངས་པ་ཡང་དེ་ལས་མི་འདའོ། །བྱ་ཁྱུང་རྭ་ཅན་ནི། བལ་པོ་དང་ལི་དང་རྒྱ་ནག་སོགས་ཡུལ་གཞན་གྱི་བཀོད་
པ་ལས་འབྱུང་ཞིང་དེ་ནས་དེ་དག་ལས་འབྱུང་བའི་སྒྲུབ་ཐབས་དང༌། བོད་རྙིང་མ་དང༌། རྒྱ་གར་ལ་ཁ་འཕངས་པའི་བོད་མ་སོགས་ལ་དེ་ཉིད་ཀྱི་རང་ལུགས་ཡིན་པས་བྱ་ཡི། རྒྱ་གར་གྱི་ཡིན་ངེས་རྣམས་ལ་དེའི་རིགས་འགྲེ་མི་སྦྱོར་ཞིང༌། བྲིས་རྒྱུད་ནོར་བ་རྒྱ་འབྱམས་པ་ལའང་སྙིང་པོ་མེད་དོ། ཁྱུང་སྒྲུབ་ཀུན༵་ལ་ཡོད་མོད་ཀྱི། །རྒྱ་གར་ཡུལ་དང་མཐུན་ན་དག༵འ། །རྙིང་མའི་སྙིང༵་པོ༵་གསར་མ་ལ། །སྦྱོར་བ་འདི་ཡང་གད་མོའི་གནས། །ཡེ་ཤེས་ཁྱུང་ཁྲ་རྒྱུད་ལུགས་ཀྱི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ཡེ་ཤེས་ཁྱུང་ཁྲའི་སྒྲུབ་ཐབས།
ཨོཾ་སྭཱ་སྟི། ཡེ་ཤེས་ལྔ་ཡི་རང་བཞིན་མཆོག །རིགས་ལྔ་མཁའ་ལྡིང་ལ་བཏུད་ནས། །ཡེ་ཤེས་ཁྱུང་ཁྲའི་སྒྲུབ་ཐབས་ནི། །མལ་ལོའི་མན་ངག་བཞིན་དུ་བྲི། །སྐྱབས་སེམས་སྔོན་དུ་འགྲོ་བས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་པད་ཉིའི་སྟེང་དུ་ཕུཿཡིག་ལས་ཀླུ་རྒྱལ་སོག་མ་མེད་ཉལ་སྟབས་སུ་གནས་པའི་སྟེང་དུ། ཀྵིཾ་མཐིང་ཁ་ལས་བདག་ཉིད་ཡེ་ཤེས་ཁྱུང་ཁྲ་ཙོག་པུའི་ཚུལ་གྱིས་བཞུགས་པ། བརླ་མན་ཆད་སའི་རང་བཞིན་སེར་པོ། ལྟོ་བ་ཆུའི་རང་བཞིན་དཀར་པོ། སྟོད་མེའི་རང་བཞིན་དམར་པོ། མགོ་བོ་རླུང་གི་རང་བཞིན་ནག་པོ། སྤྱི་གཙུག་ཡེ་ཤེས་ཀྱི་རང་བཞིན་སྔོན་པོ། གཤོག་པ་ནམ་མཁའི་རང་བཞིན་ཁ་དོག་སྣ་ཚོགས་པ། སྤྲིན་སྣ་ལྔ་ལ་རྒྱབ་བརྟེན་པ། ཕྱག་གཡས་སྐྱབས་སྦྱིན་དང༌། གཡོན་སྡིགས་མཛུབ་མཛད་པ། གནམ་ལྕགས་ཀྱི་རྭ་གཉིས་ཀྱི་
དབུས་ན་ཀླུའི་རྒྱལ་པོའི་གཙུག་གི་ནོར་བུ་ཕྲོགས་པ་རྒྱན་དུ་མཛད་པ། མེ་དཔུང་དྲག་ལ་རྩུབ་པའི་དབུས་ན་བཞུགས་པ། དེའི་མགྲིན་པར་ཁྱུང་རིགས་ལྔ་སྙིང་གར་སྙིང་པོ་ཡི་གེ་ལྔ། ཡེ་ཤེས་པ་སྤྱན་དྲངས། དབང་བསྐུར་ནས་མི་བསྐྱོད་པས་རྒྱས་བཏབ། ཨརྒྷཾ་ནས་ཤཔྟའི་བར་གྱིས་མཆོད། བརྟན་དང་གཡོ་བའི་དུག་རྣམས་ཀུན། །མེ་དང་ཆུ་བཞིན་འཇོམས་མཛད་པའི། །ཡེ་ཤེས་ལྔ་ཡི་ངོ་བོ་ཉིད། །མཁའ་ལྡིང་ཁྱོད་ལ་ཕྱག་འཚལ་ལོ། །འབྱུང་བ་ལྔ་དང་དུག་ལྔ་འཇོམས། །རིགས་ལྔ་ཁྱུང་ལ་ཕྱག་འཚལ་ལོ། །བརྟན་གཡོའི་དུག་རྣམས་རབ་ཞི་ནས། །དུག་ལྔ་ཡེ་ཤེས་མངོན་འགྱུར་ཤོག །ཨོཾ་པཀྵིཾ་སྭཱཧཱ། ཞེས་པ་ཅི་ནུས་བཟླ་ཞིང༌། བཛྲ་ག་རུ་ཌ་ཧཱུཾ་ཕཊ། རཏྣ། པདྨ། ཁཌྒ། བུདྡྷ་ག་རུ་ཌ་ཧཱུཾ་ཕཊ། ཅེས་བཏགས་པའང་ཅུང་ཟད་བཟླ། མཐའ་སྟོང་པར་སྦྱངས་ནས་དགེ་བ་བསྔོ། གཏོར་མ་བསངས་སྦྱངས། རིན་པོ་ཆེའི་སྣོད་དུ་ཨོཾ་ལས་བྱུང་བའི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ། རང་གི་སྙིང་ག་ནས་འོད་ཟེར་འཕྲོས། ཡེ་ཤེས་ཁྱུང་ཁྲ་འཁོར་བཅས་བཛྲ་ས་མཱ་ཛཿ སྔགས་ཚན་དྲུག་གི་རྗེས་སུ། ཨ་ཀཱ་རོ་བཏགས་པ་ལན་བདུན་གྱིས་ཕུལ། མཆོད་བསྟོད། མཆོད་སྦྱིན་གཏོར་མ་འདི་བཞེས་ལ་སོགས་ཀྱིས་འདོད་དོན་གསོལ་བ་བཏབ། ཡིག་བརྒྱ། བཟོད་གསོལ། གཤེགས་གསོལ། སྨོན་ལམ་བཀྲ་ཤིས་རྣམས་བྱའོ། །འདྀའི་རྗེས་གནང་བྱེད་པར་འདོད་པས་མཎྜལ་
པདྨ་འདབ་བརྒྱད་ཚོམ་བུ་ལྔ་དང་བཅས་པ་མཐའ་མཆོད་གཏོར་གྱིས་བསྐོར་བ། མཎྜལ་གྱི་སྟེང་དུ་མཉྫི་ལ་གཏོར་མ་ཆེ་བ་གཅིག་རྣམས་བཞགམཆོད་པ་བྱིན་རླབས་དང༌། བདག་བསྐྱེད་སྔོན་དུ་འགྲོ་བས་མདུན་བསྐྱེད་བསངས་སྦྱངས། སྟོང་པའི་ངང་ལས་གཙོ་བོ་གོང་བཞིན། དེའི་ཐུགས་ཀར་ཉི་མ་ལ་ཀྵིཾ་ལས་སངས་རྒྱས་མཁའ་ལྡིང་དཀར་པོ། གཡས་འཁོར་ལོ་དང༌། གཡོན་སྦྲུལ་དཀར་བཟུང་ནས་བཟའ་བ། ཕྱོགས་ཀྱི་འདབ་མ་བཞིར་ཉི་མ་ལ་ཀྵིཾ་རེ་རེ་ཡོངས་སུ་གྱུར་པ་ལས་ཤར་དུ་རྡོ་རྗེ་མཁའ་ལྡིང་གཡས་རྡོ་རྗེ། ལྷོར་རིན་ཆེན་མཁའ་ལྡིང་གཡས་རིན་པོ་ཆེ། ནུབ་དུ་པདྨ་མཁའ་ལྡིང་གཡས་པདྨ། བྱང་དུ་རལ་གྲི་མཁའ་ལྡིང་གཡས་རལ་གྲི། དེ་རྣམས་རིམ་པས་སྐུ་མདོག་སྔོ་སེར་དམར་ལྗང་བ། ཕྱག་གཡོན་པར་རང་མདོག་དང་མཚུངས་པའི་སྦྲུལ་བཟུང་ནས་བཟའ་ཞིང་སྐུའི་དབྱིབས་གཙོ་བོ་དང་མཚུངས་པའོ། །ཡེ་ཤེས་སྤྱན་འདྲེན། དབང་བསྐུར་རྒྱས་བཏབ། མཆོད་པ་བྱིན་རླབས། བཟླས་པ་མཆོད་བསྟོད་གཏོར་འབུལ་རྣམས་བྱས་ལ། སློབ་མས་ཕྱག་བྱས། མཎྜལ་ཕུལ། ཀུན་མཁྱེན་ཡེ་ཤེས་སོགས་ཤོ་ལོ་ཀ་གཉིས་ཀྱིས་གསོལ་བ་བཏབ། གུར་ནས་འབྱུང་བའི་རྒྱུན་བཤགས་བྱ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང༌། སློབ་དཔོན་བདག་ལ་དགོངས་སུ་གསོལ། བདག་ལ་བཅོམ་ལྡན་འདས་ཡེ་ཤེས་ཁྱུང་ཁྲའི་རྗེས་སུ་གནང་བ་མ་ལུས་པ་སྩལ་དུ་
གསོལ། ཞེས་ལན་གསུམ། རྗེས་གནང་གི་ངོ་བོ་ནི། སྐུ་བསྐྱེད་བསྟིམ། གསུང་བཟླས་ལུང༌། ཐུགས་ཕྱག་མཚན་བསྟིམ་པ། འཕྲིན་ལས་གཏོར་མའི་བཀའ་བསྒོ་དང་བཅས་པ་ཡིན་པ་ལས། ཡེ་ཤེས་པ་བསྟིམ་པའི་སྐབས། མཁའ་སྤྱོད་ཀྱི་གནས་ནས་ཁྱུང་རིགས་ལྔ་དཔག་ཏུ་མེད་པ་སྤྱན་དྲངས་ནས་བསྟིམ་པ་དང༌། བཟླས་ལུང་གི་སྐབས། མདུན་བསྐྱེད་ལྷ་དྲུག་སོ་སོའི་ཐུགས་ཀར་ནས་རང་རང་གི་སྔགས་བྱུང་སྟེ། སློབ་མའི་སྙིང་གར་བསྟིམ་པ་དང༌། དེའི་རྗེས་སུ་སངས་རྒྱས་ཐམས་ཅད་ཀྱི་ཐུགས་ཀ་ནས་སྔགས་འགུགས་ཤིང་བསྟིམ་པ་རྣམས་མཛད། དམ་བཅའ་བའི་ལུང་མི་དགོས། ལྷག་མ་རྗེས་ཀྱི་བྱ་བ་རྣམས་སྤྱི་དང་འདྲ། འདི་ནི་དུས་ཀྱི་འཁོར་ལོའི་རྒྱུད་ལ་བརྟེན་པ་ཡིན་མོད་ཀྱི། གཙོ་བོར་ནཱ་རོ་པའི་མན་ངག་ཕམ་ཐིང་པ་ནས་བརྒྱུད་པ་དང༌། ས་སྐྱ་པའི་ལྕགས་རི་ཁོངས་ལས་མི་འདའ་བའི་གསེར་ཆོས་ཀྱི་ནང་ཚན་ཡིན་པས་ཟབ་མོར་གྲགས་ཤིང༌། ལས་ཚོགས་ཀྱང་ཀླུ་ནད་གསོ་བ། གག་ལྷོག་བཅོས་པ། དུག་གི་བཅུད་ལེན། བྱ་ཁྱི་གནམ་གསུམ་བཅོས་ཐབས་སོགས་མན་ངག་རྣོན་པོ་མང་དུ་ཡོད་དོ། །རིགས་ཀུན༵་འདུས་པའི་ཡེ་ཤེས་ཀྱི། །རྣམ་ཆ་ཤིན་ཏུ་དག༵འ་བའི་ཕུལ། །ཡི་གེ་སྔ་ཕྱི་རྒྱ་མཚོ་ལས། །སྙིང༵་པོ༵་བསྡུས་པ་ཨེ་མོ་ཧོ། ཁྱུང་ཁྲ་མན་ངག་ལུགས་སུ་གྲགས་པའི་སྒྲུབས་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
རྡོ་རྗེ་མཁའ་ལྡིང་གི་སྒྲུབ་ཐབས་མདོར་བསྡུས།
ཨོཾ་སྭཱ་སྟི། གསང་བའི་བདག་པོའི་བྱིན་བརླབས་པའི། །རྡོ་རྗེ་མཁའ་ལྡིང་ལ་བཏུད་ནས། །དེ་ཡི་སྒྲུབ་ཐབས་མདོར་བསྡུས་པ། །ཅུང་ཟད་ཙམ་ཞིག་བྲི་བར་བྱ། །སྐྱབས་སེམས་ཕྱག་རྡོར་གྱི་བདག་བསྐྱེད་རྣམས་སྔོན་དུ་བཏང་ནས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་རང་སེམས་ཀྱི་སྣང་བའི་ཧཱུཾ་ཡིག་བཛྲ་བ་ཏི་ག་རུ་ཌ་ཞེས་པའི་སྒྲ་དང་བཅས་པ་ཞིག་མདུན་དུ་ཆད་པ་ཡོངས་སུ་གྱུར་པ་ལས། རིན་པོ་ཆེ་འབར་བ་ཧཱུཾ་གི་མཚན་པ། དེའི་འོད་ཀྱི་འཕྲཽ་འདུ་ལས་མཁའ་ལྡིང་གི་རྒྱལ་པོར་གྱུར། རི་ཛ་པྲི་ཛ་ཧཱུཾ། བྱ་ཁྱུང་གསེར་གྱི་གཤོག་པ་དང་རྡོ་རྗེའི་མཆུ་ཅན། ལུས་རྡོ་རྗེའི་རང་བཞིན་མེ་འབར་བ། ཕྱག་གཡོན་ན་ནོར་བུ་རིན་པོ་ཆེ་དང༌། གཡས་ན་ཀླུ་མགོ་བོ་གསུམ་པ་འཛིན་པ། རིན་པོ་ཆེ་དང་མུ་ཏིག་དང་གསེར་གྱི་དབུ་རྒྱན་ཅན། སྦྲུལ་མགོ་དགུ་པས་རྒྱན་དུ་བྱས་པ། ཀླུ་བརྒྱད་ཞབས་འོག་ཏུ་མནན་པ། འཁོར་མཁའ་ལྡིང་གི་ཚོགས་ཐམས་ཅད་ཀྱིས་བསྐོར་བར་གྱུར། མཁའ་ལྡིང་གི་ཕྱག་རྒྱ་བཅས་ལ། ཨོཾ་སུ་པྲ་ཏིཥྛ་བཛྲ་དུནྟི་མི་ལི་མི་ལི་སྭཱཧཱ། ཞེས་ལན་གསུམ་གྱིས་བརྟན་པར་བྱས། རང་གི་སྙིང་ག་ནས་འོད་ཟེར་འཕྲོས། མཁའ་ལྡིང་འཁོར་དང་བཅས་པ་བཛྲ་ས་མཱ་ཛཿ ཛཿཧཱུཾ་བཾ་ཧོཿ བཟླས་པ་ན། ཨོཾ་བཛྲ་བ་ཏི་ག་རུ་ཌ་བེ་གེ་ཏ་ཧཱུཾ་ཧཱུཾ་ཛ་ཛཿ རི་ཛ་པྲི་ཛ་ཧཱུཾ་ཕཊ། ཅེས་ཉིན་རེ་བཞིན་སྟོང་ནས་ཁྲིའི་བར་བཟླའོ། །ཐུན་འཇོག་ཁར། ཨརྒྷཾ་ནས་ཤཔྟའི་བར་གྱིས་མཆོད། དམིགས་མེད་ཐུགས་རྗེ་ཆེན་པོའི་ངང་ཉིད་ནས། །ཐབས་ལས་མཁས་པས་གདུག་པ་
འདུལ་བའི་ཕྱིར། །ཕྱག་ན་རྡོ་རྗེའི་ལས་ཀྱི་ཕོ་ཉར་སྤྲུལ། །བདེ་གཤེགས་མཁའ་ལྡིང་ཚོགས་ལ་ཕྱག་འཚལ་ལོ། །ཞེས་བསྟོད། གུ་གུལ་གྱི་བདུག་སྤོས་བཏང༌། བཛྲ་མུཿ ཞེས་གཤེགས་སུ་གསོལ། དེ་ནས་ཐུན་མཚམས་སུ་སངས་རྒྱས་ཀྱི་སྐུ་གཟུགས་ཀྱི་དྲུང་དུ། ཕྱག་མཆོད་ཡན་ལག་བདུན་པ་དང༌། སྐྱབས་འགྲོ་སེམས་བསྐྱེད་ལེན་པ་གང་ནུས་བྱ། གཙང་སྦྲའི་སྤྱོད་པ་ལ་གནས་པར་བྱའོ། །ཡང་འདི་བདག་བསྐྱེད་དུ་བྱས་ཀྱང་རུང་བས་གོང་དུ་བཤད་པ་ལ་འདོད་པ་སྤོ་བར་བྱའོ། །འདི་ལ་རྗེས་གནང་སོགས་བྱེད་པ་མེད་དེ། ངག་གམ་གླེགས་བམ་ལས་ལུང་ཐོབ་པས་ཆོག །ཕྱག་ན་རྡོ་རྗེའི་གཟུངས་ཀྱི་ལས་ཚོགས་ཀྱི་ལྷ་ཡིན་ནོ། །ཨ་ཏི་ཤ་ཡི་མན་ངག་ཅེས། །བཀའ་གདམས་ཀུན༵་ལ་གྲགས་པ་ལྟར། །ཐོས་ནས་དག༵འ་བས་བྲིས་པ་ལགས། །ལེགས་པར་བསྒྲུབས་ན་སྙིང༵་པོ༵་འབྱུང༌། །རྡོ་རྗེ་མཁའ་ལྡིང་ཁྱུང་སེར་དུ་གྲགས་པ། བཀའ་གདམས་ལུགས་ཀྱི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
གསུང་གི་མངའ་བདག་འཇམ་དཔལ་ཞི་ཁྲོ་མིག་སྨན་གྱི་སྒྲུབ་ཐབས།
ཨོཾ་སྭཱ་སྟི། གསུང་གི་མངའ་བདག་འཇམ་དཔལ་ནི། །ཞི་ཁྲོ་མིག་སྨན་མདོག་འཆང་བ། །དེ་ལ་བཏུད་ནས་དེ་སྒྲུབ་ཐབས། །གསལ་ཞིང་འདུས་པ་བྲི་བར་བྱ། །སྐྱབས་སེམས་སྔོན་དུ་འགྲོ་བས། སྭ་བྷཱ་ཝས་སྟོང་པར་སྦྱངས། པཾ་ལས་པདྨ། ཨ་ལས་ཟླ་བ། རང་སེམས་དྷཱིཿ མཐིང་ནག་གི་འོད་ཀྱི་འཕྲོ་འདུ་ལས་རང་ཉིད་འཇམ་དཔལ་ནག་པོ་ཞལ་གཅིག་ཕྱག་གཉིས་གཡས་རལ་གྲི་འཕྱར་
ཞིང༌། གཡོན་ཨུཏྤལ་ཐུགས་ཀར་འཛིན་པ་སྙན་གྱི་ཐད་ཀར་ཁ་ཕྱེ་བའི་སྟེང་ན་ཤེར་ཕྱིན་གྱི་པོ་ཏི་བཞུགས་པ། ཞབས་རྡོ་རྗེའི་སྐྱིལ་ཀྲུང་ཅན་ཡིད་ཙམ་ཁྲོ་ཞིང་དར་དང་རུས་པ་དང་རིན་པོ་ཆེས་བརྒྱན་པ། མེ་དཔུང་འབར་བའི་དབུས་ན་བཞུགས་པའོ། །ཨོཾ་པྲ་སོད། ཆུ་སོད། དུར་ཏ་སོད། སྙིང་མགོ་ལ་ཆོད། ཁ་ལ་ཛྭ། ཀཾ་ཤཾ་ཏྲཾ་རྦད་ཕཊ་སྭཱཧཱ། བརྒྱ་རྩ་སོགས་གང་འགྲུབ་བཟླའོ། །རྣམ་རྟོག་ཆེ་ན་སྐུ་ཁྲོ་བོའི་ཆ་ལུགས་ཅན། དབུ་སྐྲ་བཅིངས་པ། ཕྱག་གཡོན་པོ་ཏི་ཐུགས་ཀར་བསྣམས་པ། གཡས་བསྐུམ་གཡོན་བརྐྱང་གི་སྟབས་ཅན་དུ་བསྒོམས་ལ། སྟོང་དང་ཉི་ཤུ་རྩ་གཅིག་རེ་བཟླའོ། །ཞལ་གདམས་བཅུ་གཅིག་གི་དོན་ནི། སྐྱ་རེངས་ཤར་བའི་དུས་ཁ་ཤར་དུ་བལྟ། སྒལ་ཚིགས་བསྲང༌། རླུང་གཡས་ནས་དྲངས་གཡོན་ལ་འབུད། བླ་མ་སྤྱི་བོར་བསྒོམ། སྔགས་ཀྱི་ཤམ་བུར། སརྦ་ཛྭ་ར་རོ་ཀ་དུཥྟ་བིགྷ་ནན་ཨུ་པ་ཏྲ་བེ། ཤཱནྟིཾ་ཀུ་རུ་ཡེ་སྭཱཧཱ། ཞེས་གདགས། རང་གི་རྐང་པའི་རྒྱུ་མོ་ཁུང་གཉིས་ཀྱི་དྲེག་པ་སྲིན་ལག་གཡོན་པས་བླངས་ནས། བུ་ག་དགུ་དང་དྲུག་མདོར་བྱུགདེ་རྣམས་ཕྱི་སྒོམ་ཕྱེ་བའི་སྔོན་དུ་བྱ། བཟླས་པའི་མཐར་རྐན་སྒྲ་དྲག་པོ་ལན་གསུམ་བྱ། རྐང་པ་གཡོན་པའི་སེན་མོས་གཡས་པའི་མཐེ་བོང་མནན། ཚངས་པའི་འཇིག་རྟེན་མན་ཆད་ཀྱི་གནོད་བྱེད་ཐམས་ཅད་མནན་པར་བསམ། ཤིན་ཏུ་རྟོག་པ་ཆེ་ན། གོས་མགོ་མཇུག་ཏུ་ཟློག ཐལ་མོ་གདབ། རླུང་
དྲག་ཏུ་འབུད། བཟླས་སྒོམ་རྒྱུན་མི་འཆད་པར་བྱའོ། །འདི་ཡིས་ནད་གདོན་གྲིབ་སོགས་མི་ཐུབ་པ་གང་ཡང་མེད་པར་གྲགས་ཤིང༌། བྱིན་རླབས་ཀྱང་ཆེ་བ་ཡིན་ནོ། །འདི་ལ་སྒོམ་ལུང་ཙམ་གྱིས་ཆོག །འགའ་ཞིག་གི་ལག་ལེན་ལྟར་རྗེས་གནང་བྱེད་ན། ཞི་བའི་སྐུ་ལ་བརྟེན་ནས་སྒྲུབས་ཐབས་བརྒྱ་རྩའི་ཆིངས་སྦྱོར་བ་ཡིན་ནོ། །ཀུན༵་ལས་ཟབ་པར་བསྔགས་པ་འདི། །གསར་མ་ཉིད་དུ་དག༵འ་བས་སྒྲོག །རྙིང་མའི་ཆོས་སུ་གསལ་བ་ལ། །བདག་སྙིང༵་ཡ་མཚན་ཆེན་པོ༵་སྐྱེས། །འཇམ་དབྱངས་ནག་པོའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ལྷ་མོ་ཤྲ་མ་ཎའི་སྒྲུབ་ཐབས།
ཨོཾ་སྭཱ་སྟི། འཕགས་མ་སྒྲོལ་མ་ལ་བཏུད་ནས། །དཔའ་བོ་གཅིག་སྒྲུབ་ལས་བྱུང་བའི། །རྨི་ལམ་ལུང་སྟོན་གདམས་ངག་ནི། །ཤིན་ཏུ་ཟབ་པར་གྲགས་པ་བྲི། །ཤིང་དྲུང་ངམ་བྲག་ཕུག་སོགས་ཤིན་ཏུ་དབེན་ཞིང་གཙང་བ་ཁྱི་སྒྲ་མེད་པའི་ཕྱོགས་སུ་ས་ཕྱོགས་བྱི་དོར་བྱས་གུ་གུལ་གྱིས་བདུགགཞི་བདག་གཏོར་མ་མང་དུ་བཏང༌། ཐུན་མོང་གི་སྲུང་འཁོར་བསྒོམས་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་རཀྵ་རཀྵ་སྭཱཧཱ། ཞེས་འབུམ་ཙམ་བཟླའོ། །དེ་ནས་ཞག་བདུན་ཙམ་དུ་རྡོ་རྗེ་སེམས་དཔའི་ཡིག་བརྒྱ་བསྒོམ་བཟླས་ལ་འབད་པར་བྱའོ། །དེ་དག་ཏུ་ཡང་ཁྲུས་དང་གཙང་སྦྲ་གལ་ཆེའོ། །དངོས་གཞི་ནི། སྟེགས་བུ་གྲུབ་བཞིའི་སྟེང་དུ་པདྨ་འདབ་བརྒྱད་བྲི། དེའི་སྟེང་དུ་བུམ་པ་དཀར་གསུམ་
དང༌། བུམ་སྨན་སྦྱར་བའི་ཆུ་གཙང་མས་གང་བ། ཤུག་པ་ལྟ་བུའི་ཤིང་གི་ཡལ་གས་ཁ་བརྒྱན། ཡོད་ན་དེ་ལ་ཙ་ཀ་ལི་འདོགཙ་ཀ་ལི་མེད་ཀྱང་བཏུབ། སྟེང་ནས་དར་སྔོན་པོའི་གདུགས་ཕུབ། མཐའ་མཆོད་པས་བསྐོར། སྒྲོལ་མའི་བྲིས་སྐུ་དང༌། དཀར་གཏོར་གསུམ་ཡང་བཤམ། ཨ་མྲྀ་ཏ་བཟླ་ཞིང་བགེགས་བསྐྲད། བདག་བསྐྱེད་སྒྲོལ་དཀར་གྱི་མངོན་རྟོགས་བཟླས་པ་དང་བཅས་པ་ཅི་རིགས་བྱ། མདུན་བསྐྱེད་སྭ་བྷཱ་ཝས་སྟོང་པར་སྦྱངས། བུམ་པ་རི་རབ་ལྷུན་པོར་གྱུར་པའི་རྩེ་མོར་ཁ་རྒྱན་དཔག་བསམ་གྱི་ཤིང་ཡལ་ག་ལོ་འདབ་མེ་ཏོག་འབྲས་བུ་རྒྱས་པ། རི་རབ་ཀྱི་སྟེང་དུ་པད་ཟླའི་གདན་ལ་ལྷ་མོ་ཤྲ་མ་ཎ་སྐུ་མདོག་སྔོན་མོ་ཞི་ཞིང་སྒེག་པ། རི་རབ་ལ་ཁྱེལ་བཞུགས་ཀྱི་ཚུལ་ཅན། དར་དང་རིན་པོ་ཆེས་བརྒྱན་པ། ཕྱག་གཡས་མེ་ལོང་ངམ་རྔ་ཡབ། གཡོན་དཔག་བསམ་ཤིང་གི་ཡལ་ག་འཛིན་པ། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། དེ་ལས་འོད་འཕྲོས། ལྷ་མོ་ཤྲ་མ་ཎ་བཛྲ་ས་མཱ་ཛཿ ཨརྒྷཾ་ལ་སོགས་པས་མཆོད། ཛཿཧཱུཾ་བཾ་ཧོཿགཉིས་སུ་མེད་པར་ཐིམ། འདོད་དོན་གསོལ་བ་དྲག་ཏུ་བཏབ། ལྷ་མོ་ལ་ཕུལ་བར་མོས་ཏེ། མེ་ཏོག་གཙང་མ་བུམ་པའི་ནང་དུ་ཕུལ། ཨོཾ་ཤྲ་མ་ཎ་པི་ཤ་ཙི་ནི་མུཎྜེ་སྭཱཧཱ། ཞེས་ཅི་ནུས་བཟླའོ། །ཐུན་འཇོག་ཁར། གཏོར་མ་དང་པོ། ཨོཾ་ཤྲ་མ་ཎ་པི་ཤ་ཙི་ཨི་དམ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་བདུན་གྱིས་ཕུལ། གཉིས་པ་ཆོས་སྐྱོང་དང༌། གསུམ་པ་གཞི་བདག་ལ་
འབུལ། ཐུན་མཚམས་སུ་ཡང་བཟླས་པ་རྒྱུན་མི་འཆད་པར་བྱ་ཞིང༌། ཁྱད་པར་ཉལ་ཁར་དྲག་ཏུ་བཟླའོ། །ཞག་བདུན་གྱིས་བསྙེན་པར་འགྲུབ་ཅིང༌། རང་གཞན་གྱི་དོན་ཕལ་ཆེར་དང་ཚེ་རིང་ཐུང་སྐྱེ་བ་སྔ་ཕྱི་སོགས་ཕལ་ཆེར་ལུང་སྟོན་པར་གྱུར་རོ། །གལ་ཏེ་མ་འགྲུབ་ན། གྲིབ་ཤས་ཆེ་བ་ཡིན་པས་ཁྲུས་ཆོག་དང༌། བཤགས་བསྡམས་བྱས་ལ། སླར་ཞག་བདུན་སྒྲུབ་བོ། །སྒྲོལ་མའི་བསྙེན་པ་སྔོན་དུ་སོང་ན། ཞག་ཉེར་གཅིག་གིས་མི་འགྲུབ་པ་ཡེ་མི་སྲིད་པར་གྲགས་སོ། །འདི་སྒྲུབ་དུས་བྱ་རྒྱུད་ནས་བཤད་པའི་བསྲུང་བྱ་གང་ཡོད་ཀྱི་སྟེང་དུ། མི་ཁྱི་དང་མི་འཕྲད། སྔོ་རྔད་མི་བཟའ། དཀོར་ཟས་དང༌། གྲིབ་ཟས་ལ་འཛེམ་པ་གལ་ཆེའོ། །འདི་ལ་རྗེས་གནང་མི་དགོས། ལུང་ཙམ་གྱིས་འགྲུབ་བོ། །ཟབ་མོ་ཡིན་ཞེས་ཀུན༵་ལ་གྲགས། །རྒྱུད་ལས་གསུངས་ཕྱིར་མཁས་རྣམས་དག༵འ། །ལུང་བསྟན་སྒྲུབ་པའི་སྙིང༵་པོ༵་འདི། །གཞན་པས་ངོ་མཚར་ཆེ་བར་འཁུམ། །ལྷ་མོ་ཤྲ་མ་ཎའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
མཁའ་འགྲོ་སེང་གེའི་གདོང་ཅན་སྔོན་མོའི་སྒྲུབ་ཐབས།
ཨོཾ་སྭཱ་སྟི། སངས་རྒྱས་ཀུན་གྱིས་བྱིན་བརླབས་པའི། །མཁའ་འགྲོ་མ་དཔལ་དྲག་ཤུལ་ཅན། །འཇིགས་མེད་ཞལ་ཅན་ལ་བཏུད་ནས། །སྒྲུབ་ཐབས་རྗེས་གནས་མདོ་ཙམ་བྲི། །སྐྱབས་འགྲོ་སེམས་བསྐྱེད་ཚད་མེད་བཞི། །གུར་ནས་འབྱུང་བའི་རྒྱུན་བཤགས་རྣམས་སྤྱི་དང་མཐུན་པར་བྱས་ལ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་ཨེ་ལས་ཆོས་འབྱུང་གྲུ་
གསུམ་མཐིང་ནག་རྒྱ་ཆེ་ཞིང་གཏིང་ཟབ་པ། འབར་བའི་འཕྲེང་བ་འཁྲུགས་པ། དེའི་དབུས་སུ་པཾ་ལས་པདྨ་ཆེན་པོ་དང༌། རཾ་ལས་ཉི་མ་ལ་གནས་པའི་མི་རོའི་སྙིང་གར་རང་སེམས་ཀྱི་ངོ་བོ་ཧཱུཾ་ཡིག་མཐིང་ཁ། དེ་ལས་འོད་འཕྲོས། དགྲ་བགེགས་ལོག་འདྲེན་བྱད་མ་ཐམས་ཅད་ཚར་བཅད། མཚན་ལྟས་ངན་པ་དང༌། ཉེར་འཚེ་ཐམས་ཅད་བསྲེགས། སླར་འདུས་ཧཱུཾ་ལ་ཐིམ་པ་ཡོངས་སུ་གྱུར་པ་ལས། རང་ཉིད་ཡེ་ཤེས་ཀྱི་མཁའ་འགྲོ་མ་སེང་གེའི་གདོང་པ་ཅན་སྐུ་མདོག་མཐིང་ནགསྐུ་བོང་ཆེ་བས་སྲིད་གསུམ་ཁྱབ་པ། ཡན་ལག་དང་ཉིང་ལག་མཁྲང་ཞིང་ཧྲགས་པ། རབ་ཁྲོས་སེང་གེའི་ཞལ་གདངས་ཤིང༌། ལྗགས་འགྲིལ་ལ་མཆེ་བ་གཙིགས་པ། དུག་གི་ཁ་རླངས་ན་བུན་ལྟར་འཐིབས་ཤིང༌། དམར་ལ་ཟླུམ་པའི་སྤྱན་གསུམ་པ། སྨ་ར་སྨིན་མ་དབུ་སྐྲ་དམར་སེར་མེ་ལྟར་འབར་ཞིང་ལ་ལ་ཐུར་དུ་འཕྱང་བ། ཕྱག་གཡས་རྡོ་རྗེ་གྲི་གུག་ནམ་མཁའ་ལ་འཕྱར་ཞིང༌། གཡོན་ཐོད་ཁྲག་ཐུགས་ཀར་འཛིན་པ། གྲུ་མོ་ན་ཁ་ཊྭཾ་ག་ལ་ཌཱ་མ་རུ་དང་འཕན་རྩེ་གསུམ་པ་འཕྱང་བ། ཞབས་གཡོན་བརྐྱང་པའི་སྐྱིལ་ཀྲུང་ཕྱེད་པའི་གར་སྟབས་ཅན། སྟག་ལྤགས་ཀྱི་ཤམ་ཐབས་དང༌། མི་ལྤགས་དང་གླང་ལྤགས་སྦྱར་བའི་སྟོད་གཡོགས་གསོལ་བ། ཐོད་པ་སྐམ་པོས་དབུ་བརྒྱན་ཞིང༌། སྦྲུལ་དང་རུས་རྒྱན་དང༌། མི་མགོའི་དོ་ཤལ་ཅན། ཁྲག་གི་ཐིག་ལེ། ཞག་གི་ཟོ་རིས། ཐལ་ཆེན་གྱི་ཚོམ་བུས་བརྒྱན་པ། ཡེ་ཤེས་ཀྱི་མེ་འོད་འབར་བའི་
དབུས་སུ་བཞུགས་ཤིང༌། མཁའ་འགྲོ་མ་བྱེ་བ་འབུམ་སྡེའི་ཚོགས་ཐམས་ཅད་ཀྱང་ཕྱག་གཡས་པ་རྣམས་ན་སྣ་ཚོགས་པའི་མཚོན་ཆ་འཛིན་ཞིང༌། གཡོན་གཙོ་བོ་དང་མཚུངས་པ། སེང་གེའི་ཞལ་ནས་དྲག་སྔགས་ཀྱི་སྒྲ་འུར་རུ་རུ་སྒྲོག་པར་གྱུར། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཧཱུཾ་ལས་འོད་འཕྲོས། ཨོ་རྒྱན་མཁའ་འགྲོའི་ཕོ་བྲང་ནས་མཁའ་འགྲོ་མ་སེང་གེའི་གདོང་པ་ཅན་འཁོར་དང་བཅས་པ་ཕེཾ་ཕེཾ། ཞེས་འབར་བའི་ཕྱག་རྒྱ་བསྐོར་བས་སྤྱན་དྲངས། ཨརྒྷཾ་ནས་ཤཔྟའི་བར་གྱིས་མཆོད། ཨོཾ་ཨཱཿཧཱུཾ། ཞེས་ནང་མཆོད་ཕུལ། དཔལ་ལྡན་རྡོ་རྗེ་མཁའ་འགྲོ་མ། །མཁའ་འགྲོ་མ་ཡི་འཁོར་ལོས་བསྒྱུར། །ཡེ་ཤེས་ལྔ་དང་སྐུ་གསུམ་ཉིད། །འགྲོ་བ་སྐྱོབ་ལ་ཕྱག་འཚལ་ལོ། །ཛཿཧཱུཾ་བཾ་ཧོཿ ཡང་འོད་འཕྲོས། དབང་གི་ལྷ་བཛྲ་ས་མཱ་ཛཿ ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུཾ། ཞེས་གསུངས་ཤིང༌། དེ་རྣམས་ཀྱིས་དབང་བསྐུར། སྐུ་གང༌། དྲི་མ་དགཆུ་ལྷག་མ་ཡར་ལུད་པ་ལས་རྣམ་པར་སྣང་མཛད་ཀྱིས་དབུ་བརྒྱན། ཨཿཀཿསཿམཿརཿཙཿཤཿདཿརཿསཿམཿརཿཡཿཕཊཿ ཅེས་དྲག་ཏུ་བཟླས་པས། དམིགས་པ་དང་བཅས་ཐལ་མོ་བརྡབ་ཅིང༌། མཐར། ཁྲོ་མོ་འབར་བའི་ཚོགས་རྣམས་ཀྱིས། །དགྲ་བགེགས་རྣམས་ནི་ཐམས་ཅད་ཀྱི། །ལུས་ངག་ཐལ་བ་རྡུལ་དུ་རློག །རྣམ་ཤེས་ཆོས་ཀྱི་དབྱིངས་སུ་སྒྲོལ། །མཐར་ལྷ་སྐུ་མི་དམིགས་པའི་ངང་ནས་དགེ་བ་བསྔོ། ཐུན་
མཚམས་སུ་ལྷའི་ང་རྒྱལ་དང་མ་བྲལ་བར་བྱ། གཏོར་མ་ཤ་ཁྲག་གིས་བརྒྱན་པ་བཤམས་ལ། ནང་མཆོད་བྱིན་གྱིས་བརླབས་ཏེ་བྲན། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨ་ལས་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ། ཨོཾ་ཨཱཿཧཱུཾ་ལས་བྱུང་བའི་གཏོར་མ་བདུད་རྩིའི་རྒྱ་མཚོ་ཆེན་པོ་འབྲུ་གསུམ་གྱིས་མཚན་པ། དེའི་འོད་ཀྱིས་ཡེ་ཤེས་ཀྱི་བདུད་རྩི་བཀུག་སྟེ། འབྲུ་གསུམ་ལ་ཐིམ། དེ་རྣམས་ཞུ་བ་ལས་བདུད་རྩིའི་རྒྱ་མཚོ་ཆེན་པོ་ཟད་མི་ཤེས་པར་གྱུར། ཨོཾ་ཨཱཿཧཱུཾ་ཧ་ཧོ་ཧྲཱིཿ གོང་བཞིན་ཡེ་ཤེས་པ་སྤྱན་དྲངས། ཨོཾ་སིངྷ་མུ་ཁ་ཌཱ་ཀི་ནཱི་ཨི་དམ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི་སྭཱཧཱ། ཨོཾ་ཨ་ཀཱ་རོ་མུ་ཁཾ་སོགས་བཏགས་པ་ལན་བདུན་གྱིས་ཕུལ། ཨོཾ་སིངྷ་མུ་ཁ་ཌཱ་ཀི་ནཱི་ས་པ་རི་ཝཱ་རེ་བྷྱཿ ཞེས་པ་འགོ་བོར་སྦྱར་ཏེ། ཨརྒྷཾ་ནས་ཤཔྟའི་བར་གྱིས་མཆོད། འབྲུ་གསུམ་གྱིས་ནང་མཆོད་འབུལ། བཅོམ་ལྡན་ཡེ་ཤེས་མཁའ་འགྲོ་མ། །འཇིགས་གཟུགས་དཔའ་བོ་ཆེན་མོ་ནི། །སེང་གེའི་གཟུགས་ཀྱིས་གདུག་པ་འདུལ། །རྔམ་པའི་ཞལ་ལ་ཕྱག་འཚལ་བསྟོད། །ཕྱག་གཡས་གྲི་གུག་བསྣམས་པ་ཡིས། །དགྲ་བགེགས་མ་ལུས་སྲོག་རྩ་གཅོད། །མི་མཐུན་བར་ཆད་སེལ་མཛད་མ། །མཐུ་སྟོབས་དྲག་མོ་ཕྱག་འཚལ་བསྟོད། །གཡོན་པ་ཐོད་ཁྲག་བསྣམས་པ་ཡིས། །བདུད་བཞི་ཞིང་བཅུའི་སྙིང་ཁྲག་གསོལ། །འཁོར་བའི་ཁྲག་རྒྱུན་རྩད་ནས་གཅོད། །བྱད་མ་སྒྲོལ་ལ་ཕྱག་འཚལ་བསྟོད། །
དུག་གསུམ་སྒྲོལ་མཛད་ཁ་ཊྭཱཾ་བསྣམས། །འཇིགས་པའི་སྐུ་ལ་ཐོད་འཕྲེང་ཅན། །ཞབས་གཉིས་ཉི་ཟླ་པད་སྟེང་དབུས། །མེ་དཔུང་ཀློང་བཞུགས་ཕྱག་འཚལ་བསྟོད། །དུག་གསུམ་རྣམ་དག་ཆོས་འབྱུང་ནི། །རྣམ་ཐར་སྒོ་གསུམ་ཡོངས་རྫོགས་པ། །མཐིང་ནག་གྲུ་གསུམ་མེ་རི་འབར། །ཨེ་ལས་དྲག་བྱེད་ཕྱག་འཚལ་བསྟོད། །བསྙེན་སྒྲུབ་མཆོད་བསྟོད་བགྱིས་པ་ཡིས། །ས་ལམ་བར་ཆད་ཞི་བ་དང༌། །ཚེ་དང་ལོངས་སྤྱོད་རྒྱས་པ་དང༌། །རྣམ་མཁྱེན་སངས་རྒྱས་མྱུར་ཐོབ་ཤོག །མཆོད་སྦྱིན་གཏོར་མ་ནས། ཀུན་འགྲུབ་ཤོག་གི་བར་སྤྱི་དང་མཐུན། བཛྲ་མུཿ ཞེས་གཤེགས་ལ། སྨོན་ལམ་དང་བཀྲ་ཤིས་ཅི་འགྲུབ་བྱའོ། །རྗེས་གནང་བྱེད་པར་འདོད་ན། ཆོས་འབྱུང་གྲུ་གསུམ་མཐིང་ནག་རེ་ཁ་དཀར་པོ་ཅན། དབུས་སུ་ཉི་གདན་ལ་ཚོམ་བུ་དཀར་པོ་དགོད། མཐའ་རྡོ་རྭ་མེ་རིས་ཟླུམ་སྐོར་བྱ། ཁྱམས་ཟླ་གམ་རྡུལ་ཚོན་དམར་པོས་དགང༌། དབུས་སུ་མཉྫིའི་སྟེང་དུ་དམར་གཏོར་གྲུ་གསུམ་རྒྱན་གྱིས་བརྒྱན་པ་བཞགམཐའ་མཆོད་གཏོར་གྱིས་བསྐོར། སྤྲོ་ན། གོ་སྐབས་ཡངས་པ་ཞིག་ཏུ་བུམ་པའང་འཆའ། མཉྫིའི་སྟེང་གི་གཏོར་མ་དང༌། བུམ་པ་བཅའ་བ་ཕྱག་ལེན་ཡིན་གྱི་ཡིག་རྙིང་ནི་མ་བཞུགས། གཏོར་དབང་བྱེད་པའང་དེ་དང་འདྲའོ། །རྡོར་དྲིལ་ཅང་ཏེའུ་ནང་མཆོད་སོགས་ཡོ་བྱད་ཐམས་ཅད་ཚོགས་པར་བྱས་ནས། མཆོད་པ་བྱིན་རླབས་སྤྱི་དང་མཐུན་པར་བྱ། གོང་བཞིན་
མངོན་རྟོགས་བླངས་ནས་བཟླས་པ་སོང་མཚམས་སུ། མདུན་བསྐྱེད་བསངས་སྦྱངས། སྟོང་པའི་ངང་ལས་ཞེས་པ་ནས། བཟླས་པའི་བར་བདག་བསྐྱེད་ཉིད་འདོན་པ་སྤོས་པས་ཆོགདེ་ནས་མཆོད་བསྟོད་བྱས་ལ། བུམ་པ་བཅས་ཡོད་ན། བུམ་པ་སྔགས་ཀྱི་ཡིག་འབྲུས་ཡོངས་སུ་གང་བར་གྱུར། སྔགས་ཅི་རིགས་པ་བཟླས་པའི་མཐར། ཡིག་འབྲུ་རྣམས་ཞུ་བ་ལས་བྱུང་བའི་དབང་གི་ཆུར་གྱུར། ཞེས་བརྗོད། དེ་ནས་གཏོར་ཆོག་གོང་བཞིན་ལས། མགྲོན་སྤྱན་འདྲེན་པ་མི་དགོས་སོ། །སློབ་མ་རྣམས་ཁྲུས་བྱས་གྲལ་ལ་འཁོད། སློབ་དཔོན་གྱིས་སློབ་མ་རྣམས་ལ་སེམས་བསྐྱེད་གསལ་བཏབ། སྔོན་འགྲོའི་ཆོས་རྒྱས་བསྡུས་ཅི་རིགས་པ་དང༌། འདི་ཉིད་ཀྱིས་ལོ་རྒྱུས་བཤད། མཎྜལ་འབུལ་བར་བསྐུལ། སློབ་མས་མཎྜལ་ཕུལ། ཀུན་མཁྱེན་ཡེ་ཤེས་ཕུང་པོ་ཅན་སོགས་ཀྱིས་གསོལ་བ་ལན་གསུམ་འདེབས་སུ་བཅུག །ཡང་ན། དགའ་ཆེན་ཁྱོད་བདག་སྟོན་པ་སྟེ། །ཞེས་སོགས་བྱས་ཀྱང་རུང༌། རྟོག་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་དང་ལྡན་པས་ཉོན། བརྗེད་ངས་བློ་ལ་རྡོ་རྗེ་སེམས་དཔའ་སོགས། །བདེ་བར་གཤེགས་པ་རྣམས་ཀྱིས་བྱིན་མི་རློབ། །ཅེས་གསུངས་པ་ལྟར། སྣོད་ཀྱི་སྐྱོན་གསུམ་སྤངས་ཏེ་གསན་པར་ཞུ། ཅེས་བརྗོད། རྒྱུན་བཤགས་ནི། དཀོན་མཆོག་གསུམ་ལ་བདག་སྐྱབས་མཆི་སོགས་སྤྱི་དང་མཐུན། དངོས་གཞི་ནི། སློབ་དཔོན་གྱི་ཐུགས་ཀ་ནས་འོད་
ཟེར་འཕྲོས། མདུན་བསྐྱེད་ཀྱི་ཐུགས་རྒྱུད་བསྐུལ། དེའི་འོད་ཀྱིས་སློབ་མའི་ལུས་སོགས་མ་དག་པའི་སྣང་བ་ཐམས་ཅད་སྦྱངས། ཨོཾ་སྭ་བྷཱ་ཝ་ནས། རྣམ་པར་སྣང་མཛད་ཀྱིས་དབུ་བརྒྱན་གྱི་བར་མངོན་རྟོགས་ལྟར་གྱི་དམིགས་པ་སྤྲོད་པ་ཡིན་པ་ལས། ཡེ་ཤེས་སྤྱན་འདྲེན་གྱི་སྐབས། རོལ་མོའི་བྱིན་འབེབས། བུམ་པ་བཅས་ན་དབང་བསྐུར་བའི་སྔགས་འདོན་བཞིན་དུ། བུམ་པ་སློབ་མའི་མགོ་ཐོག་ཏུ་བཞག་ཅིང་བུམ་ཆུང་སྦྱིན་ནོ། །དེ་དག་རྗེས་གནང་གི་གཞི་འགོད་པ་ཡིན། དེ་ནས་སློབ་དཔོན་གྱི་དཔྲལ་བའི་ཨོཾ་ལས། མཁའ་འགྲོ་སེང་གེའི་གདོང་ཅན་གྱི་སྐུ་དཔག་ཏུ་མེད་པ་བྱུང༌། ཁྱེད་རང་རྣམས་ཀྱི་དཔྲལ་བར་ཐིམ། སྐུའི་བྱིན་རླབས་ཞུགས་པར་མོས་མཛོད། ཅེས་བརྗོད་ལ་རོལ་ཆེན་བྱ། སྐུའི་རྗེས་གནང་ངོ༌། །སློབ་དཔོན་གྱི་མགྲིན་པའི་ཨཱཿལས་ཨཱ་ལི་ཀཱ་ལི་དང་སྔགས་འཕྲེང་དཔག་ཏུ་མེད་པ་བྱུང༌། མགྲིན་པར་ཐིམ། རོལ་ཆེན་བྱ། དེ་རྗེས་བཟླས་ལུང་དང༌། བཅོམ་ལྡན་བདག་གི་སོགས་བྱིན་གྱིས་བརླབས་པའི་ལུང་ཡང་སྤྱི་དང་མཐུན་པར་སྦྱིན། གསུང་གི་རྗེས་གནང་ངོ༌། །སློབ་དཔོན་དང་མདུན་བསྐྱེད་ཀྱི་ཐུགས་ཀའི་ཧཱུཾ་ལས། གྲི་གུག་རལ་གྲི་ཁ་ཊྭཱཾ་རྩེ་གསུམ་ཅང་ཏེ་ལ་སོགས་པའི་ཕྱག་མཚན་དཔག་ཏུ་མེད་པ་བྱུང༌། སློབ་མའི་སྙིང་ཀའི་ཧཱུཾ་ལ་ཐིམ། རོལ་ཆེན། ཐུགས་ཀྱི་རྗེས་གནང་ངོ༌། །སློབ་དཔོན་གྱི་གནས་གསུམ་ནས་ཡི་གེ་འབྲུ་གསུམ་དཔག་ཏུ་མེད་པ་སྤྲོས། སློབ་
མའི་གནས་གསུམ་དུ་བསྟིམ། རོལ་ཆེན། ཡོན་ཏན་གྱི་རྗེས་གནང་ངོ༌། །དེ་རྣམས་བུམ་དབང་ལ་སོགས་པ་དབང་བཞིའི་དོན་ཡིན་ནོ། །ཞེས་ཀྱང་ངོ་སྤྲད། དེ་ནས་གཏོར་མའི་བཀའ་བསྒོ་བ་ནི། གཏོར་མ་འདི་ཉིད་ཡེ་ཤེས་ཀྱི་མཁའ་འགྲོ་མ་སེང་གེའི་གདོང་པ་ཅན་མཁའ་འགྲོ་མ་བྱེ་བ་འབུམ་སྡེས་བསྐོར་བར་དངོས་སུ་བསྒོམ། དེ་ལ་མོས་གུས་དུང་བ་བྱས་པས། དེ་ཉིད་འུར་འུར་ཆེམ་ཆེམ་ཁྱེད་རང་གི་སྤྱི་བོར་བྱོན། ཕྱི་ནང་གི་བར་ཆད་ཐམས་ཅད་བསྲུང་བ་དང༌། གནོད་བྱེད་བགེགས་དང་ལོག་འདྲེན། མཐུ་གཏད་སྦྱོར་བ་ངན་པ་བྱེད་པའི་བྱད་མ་ཐམས་ཅད་ཞལ་དུ་ཆོམ་ཆོམ་གསོལ་བར་མོས་ཤིག་བྱས་ལ། གཏོར་མ་དེ་རྣམས་ཀྱི་སྤྱི་བོར་བཟུང༌། རོལ་ཆེན་དང་བཅས་པར་བཀའ་བསྒོ་དྲག་ཏུ་བྱའོ། །འཕྲིན་ལས་ཀྱི་རྗེས་གནང་ངོ༌། །རྗེས་གཙོ་བོས་ཇི་ལྟར་སོགས་དང༌། གཏང་རག་གི་མཎྜལ་དང༌། དེང་ནས་བརྩམས་ཏེ་སོགས་དང༌། བསོད་ནམས་འདི་ཡིས་སོགས་བྱའོ། །རྗེས་ཆོག་ནི། མདུན་བསྐྱེད་ཀྱི་མཆོད་པ་རྣམས་ཁ་གསོས། སྤྱི་དང་མཐུན་པར་བྱིན་གྱིས་བརླབས། གོང་བཞིན་མཆོད་བསྟོད་བྱས་ལ། ཡིག་བརྒྱ། བཟོད་གསོལ། ཡེ་ཤེས་པ་གཤེགས་པ། དམ་ཚིག་པ་བསྡུ་བ། རང་གི་གནས་གསུམ་བྱིན་གྱིས་བརླབས་པ། སྨོན་ལམ་གདབ་པ། བཀྲ་ཤིས་ཀྱིས་མཐའ་བསྟེན་པ་རྣམས་རིམ་པ་བཞིན་སྤྱི་དང་མཐུན་པར་བྱའོ། །ཀུན༵་ཁྱབ་ཟབ་པར་གྲགས་པ་ཡིས། །ཕྱིར་ཟློག་མན་ངག་རབ་
དག༵འ་བ། །སྒྲུབ་ཐབས་སྔ་ཕྱི་བགྲང་ཡས་ལས། །སྙིང༵་པོ༵་ཁོལ་བྱུང་ཙམ་ཞིག་བཀོད། །མཁའ་འགྲོ་སེང་གེའི་གདོང་ཅན་སྔོན་མོའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
སེང་གདོང་མཁའ་འགྲོ་དམར་མོའི་སྒྲུབ་ཐབས།
ཨོཾ་སྭཱ་སྟི། དབང་དུ་བྱེད་དང་ཕྱིར་བཟློག་ལ། །མཆོག་ཏུ་རྣོ་ཞིང་མྱུར་བ་ཡི། །སེང་གདོང་མཁའ་འགྲོའི་རིག་སྔགས་ལ། །བཏུད་ནས་དམར་མོའི་སྒྲུབ་ཐབས་བཤད། །སྐྱབས་སེམས་ཚད་མེད་བཞི་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལ་ཨེ་ལས་ཆོས་འབྱུང་མཐིང་ནག་ཡངས་ཤིང་རྒྱ་ཆེ་བའི་ནང་དུ་དུར་ཁྲོད་ཆེན་པོ་བརྒྱད། སྲུང་བའི་འཁོར་ལོ་ཡངས་ཤིང་རྒྱ་ཆེ་བའི་ནང་དུ། རང་སེམས་ཧྲཱིཿཡིག་དམར་པོ་ཡོངས་སུ་གྱུར་པ་ལས། རང་ཉིད་ཡེ་ཤེས་མཁའ་འགྲོ་མ་སེང་གེའི་གདོང་པ་ཅན་སྐུ་མདོག་དམར་མོ་ཞལ་གཅིག་ཕྱག་གཉིས། གཡས་གྲི་གུག་གསེར་མདོག་ནམ་མཁའ་ལ་འཕྱར་བ། གཡོན་ཐོད་ཁྲག་ཐུགས་ཀར་འཛིན་པ། གྲུ་མོ་ན་ཁ་ཊྭཱཾ་ག་དང་བཅས་པ། སྤྱན་གསུམ། སྐྲ་སེར་གྱེན་དུ་བརྫེས་པ། ཐོད་སྐམ་ལྔའི་དབུ་རྒྱན་དང་རློན་པ་ལྔ་བཅུའི་དོ་ཤལ་བྱས་པ། སྟག་ལྤགས་ཀྱི་ཤམ་ཐབས་དང༌། ཕྱག་རྒྱ་ལྔས་བརྒྱན་པ། པད་ཉི་རུ་ཊ་ཕོ་མོ་གན་རྐྱལ་དུ་བསྣོལ་བའི་སྟེང་དུ་ཞབས་གཡས་བསྐུམ་གཡོན་བརྐྱང་བས་ཡེ་ཤེས་ཀྱི་མེ་དཔུང་འབར་བའི་དབུས་ནས་བཞུགས་པའོ། །དཔྲལ་བར་ཨོཾ། མགྲིན་པར་ཨཱཿ ཐུགས་ཀར་
ཧཱུཾ་དང་ཧྲཱིཿདེ་ལས་འོད་འཕྲོས། ཡེ་ཤེས་སེམས་དཔའ་སྤྱན་དྲངས། ཨོཾ་སིདྷ་མུ་ཁ་ཌཱ་ཀི་ནཱི་བཛྲ་ས་མཱ་ཛཿ ཕཻཾ། ཛ་ཧཱུཾཿབཾ་ཧོཿ སླར་ཡང་འོད་ཟེར་འཕྲོས། དབང་གི་ལྷ་རིགས་ལྔ་བཛྲ་ས་མཱ་ཛཿ དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས། ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུཾ། ཞེས་གསུང་ཞིང་དབང་བསྐུར། རྣམ་པར་སྣང་མཛད་ཀྱིས་དབུ་རྒྱན། སྙིང་གར་པདྨ་དམར་པོ་འདབ་མ་བཅུ་བཞི་པའི་ལྟེ་བར་ཉི་མ་ལ་ཧྲཱིཿའདབ་མ་རྣམས་ལ་སྔགས་འཕྲེང་གཡས་སྐོར་དུ་འཁོར་བར་དམིགས་ལ། ཡི་གེ་བཅུ་བཞི་པ་ཉིད་བཟླའོ། །ཐུན་འཇོག་ཁར། ཨརྒྷཾ་ནས། ཤཔྟའི་བར་གྱིས་མཆོད། སྐུ་མདོག་དམར་མོ་དགྱེས་པའི་ཉམས་ལྡན་མ། །བདེ་བའི་ཉམས་ལྡན་དགྱེས་པའི་འཛུམ་ལྡན་མ། །ཐར་པའི་ལམ་སྟོན་མཆོག་གི་དངོས་གྲུབ་སྟེར། །མུ་སྟེགས་ཚར་གཅོད་དྲག་སྔགས་འབྲུག་ལྟར་སྒྲོག །སྔགས་ཀྱི་ཡིག་འབྲུས་མཁའ་འགྲོ་དབང་དུ་སྡུད། །སངས་རྒྱས་བསྟན་བསྲུང་དྲག་པོའི་སྤྱོད་པ་མཛད། །རྣལ་འབྱོར་བར་ཆད་བཟློག་ལ་རབ་བརྩོན་མ། །ཡེ་ཤེས་མཁའ་འགྲོ་མ་ལ་ཕྱག་འཚལ་བསྟོད། །ཅེས་བསྟོད། གཏོར་མ་བྱིན་རླབས་བསྡུས་པ་བླ་མེད་སྤྱི་དང་མཐུན་པ་ཞིག་བྱས་ལ། ཕཻཾ། ཞེས་འཁོར་བཅས་སྤྱན་དྲངས། ཨོཾ་སིདྷ་མུ་ཁ་ཌཱ་ཀི་ནཱི་པཉྩ་ཨ་མྲྀ་ཏ་ཁ་རཾ་ཁཱ་ཧི། ཨི་དཾ་བཱ་ལིཾ་ཏ་ཁ་རཾ་ཁཱ་ཧི། མཧཱ་རཀྟ་ཁ་རཾ་ཁཱ་ཧི། ཞེས་པ་ལྔའམ་བདུན་གྱིས་ཕུལ།
མཆོད་བསྟོད་འདོད་དོན་གསོལ་བ་བཏབ། བཛྲ་མུཿ ཞེས་གཤེགས་སུ་གསོལ། འདིའི་གསང་བ་ཐུན་མོང་མ་ཡིན་པའི་མན་ངག་ནི། ལྟེ་བར་མཁའ་འགྲོ་སྡེ་ལྔའི་ས་བོན་བསྒོམ། དེའི་འགོ་དྲངས་ནས་བཟླས་པ་བྱེད་པ་ཡིན་ནོ། །དབང་སྡུད་དང་བསྲུང་བཟློག་བསད་གསུམ་དང༌། གཞན་ཡང་ལས་ཚོགས་ཐོར་བུ་རྣམས་ནི་སྔ་ཕྱིའི་ཡི་གེ་རྣམས་ལས་ཤེས་པར་བྱའོ། །རྗེས་གནང་གི་བྱ་བ་ནི། བཅའ་གཞི་སྔོན་མོ་དང་མཚུངས་པ་ལས། མདུན་དུ་གྲི་གུགགཡས་སུ་ཐོད་པ། རྒྱབ་ཏུ་ཌཱ་མ་རུ། གཡོན་དུ་ཕུར་པ་རྣམས་བཀོད། མདུན་བསྐྱེད་སྒྲུབ་པ་དང༌། གཏོར་དབང་གི་བར་སེང་གདོང་སྔོན་མོའི་སྐབས་དང་མཚུངས་ཤིང་འདོན་པ་སྤོ། དེ་ནས་གྲི་གུག་གཏད་ལ། སྐལ་ལྡན་རིགས་ཀྱི་བུ་ཁྱོད་ལ། །སངས་རྒྱས་ཀུན་གྱིས་བྱིན་བརླབས་པ། །གྲི་གུག་མཚན་མའི་དབང་བསྐུར་བས། །ཞི་བའི་ལས་ཀྱི་དབང་ཐོབ་ཤོག །ཨོཾ་བཛྲ་ཤཱནྟིཾ་ཀུ་རུ་ཨ་བྷི་ཥིཉྩ་ཧཱུཾ། ཐོད་པ་གཏད་དེ། གྲི་གུག་མཚན་མའི་ཞེས་པའི་ཚབ་ཏུ། བདུད་རྩི་ཐོད་པའི་ཞེས་དང༌། ཞི་བའི་ཞེས་པ་ལ་རྒྱས་པའི་ཞེས་དང༌། ཤནྟིཾ་ཀུ་རུ་ལ་པུཥྟིཾ་ཀུ་རུ་ཞེས་འདོན་པ་སྤོ། དེ་བཞིན་དུ། ཌ་མ་རུ་འཁྲོལ་དུ་བཅུག་ལ། སྒྲ་སྙན་རྔེའུ་ཆུང་ཞེས་དང༌། དབང་གི་ཞེས་དང༌། ཝ་ཤཾ་ཀུ་རུ་ཞེས་འདོན་པ་སྤོ། ཕུར་བུ་གཏད་ལ། འཕྲིན་ལས་ཕུར་བུའི་ཞེས་དང༌། དྲག་པོའི་ཞེས ་དང༌། མཱ་ར་ཀུ་རུ་ཞེས་འདོན་པ་སྤོ། རྗེས་ཀྱི་བྱ་བ་ནི་སྤྱི་དང་འདྲའོ། །གལ་ཏེ་འདིའི་གསང་བའི་དབང་
བསྐུར་ན། མེ་ལོང་ལ་ཙནྡན་དམར་པོ་དང༌། གི་ཧཾ་དང་རང་བྱུང་གཙང་མ་སྦྱར་བས་མཁའ་འགྲོ་སྡེ་ལྔའི་ས་བོན་བྲི། ས་དམར་གྱི་མཎྜལ་ཆོས་འབྱུང་ས་བོན་སྔགས་འཕྲེང་དང་བཅས་པ་བྲི། བདག་མདུན་གྱི་སྐབས་གསང་བའི་སྔགས་བཟླ། རྗེས་གནང་སྔ་མ་བཞིན་རྫོགས་པའི་རྗེས་སུ་མེ་ལོང་གནས་ལྔར་གཏུགས། མཁའ་འགྲོ་རིགས་ལྔ་གནས་ལྔར་བསྟིམ། མཎྜལ་གྱི་ས་དམར་ནས་སློབ་དཔོན་གྱིས་མཐེབ་སྲིན་གྱིས་བླངས་ཏེ། སྤྱི་བོར་ཐིག་ལེ་གཅིག་བྱ། རིགས་བདག་བླ་མར་མོས། དཔྲལ་བར་ཐིག་ལེ་གཅིག་བྱ། ལུས་ལྷ་སྐུར་བསྒོམ་པའི་བརྡའ། སྙིང་གར་ཐིག་ལེ་བཅུ་བཞི་བཀོད། ཡིག་འབྲུ་བཅུ་བཞིར་མོས། ལྟེ་བར་ཐིག་ལེ་ལྔ་བཀོད། མཁའ་འགྲོ་སྡེ་ལྔར་བསྐྱེད་ཅིང་བསྟིམ། མེ་ལོང་གི་ཡི་གེ་རྣམས་ནང་མཆོད་ཀྱིས་བཀྲུས་ལ་སྤྱི་བོར་བླུག་འཐུང་དུ་གཞུགཁྲུས་ཀྱང་བྱར་གཞུག་གོ །འདི་བཀའ་གཉན་པར་བྱེད་པས་གང་ཐོད་ཐོད་དུ་མི་སྦྱིན་ནོ། །མཁའ་འགྲོ་སེང་གེ་གདོང་ཅན་གྱི། །སྒྲུབ་ཐབས་ཀུན༵་ལས་དག༵འ་བའི་ཕུལ། །བསྒྲུབ་བྱ་སྙིང༵་ནས་འགུགས་པ་དང༌། །དྲག་པོ༵འི་སྔགས་ཀྱི་ཕྱིར་བཟློག་ཡིན། །མཁའ་འགྲོ་མ་སེང་གེའི་གདོང་པ་ཅན་དམར་མོའི་སྒྲུབ་ཐབས་ཀྱི་ལེ་ཚན་ནོ།། །།
འཇམ་དཔལ་ནཱ་ག་རཀྴའི་སྒྲུབ་ཐབས།
ཨོཾ་སྭཱ་སྟི། འཇམ་དཔལ་སྤྲུལ་པའི་ཁྲོ་བོ་ནི། །ཀླུའི་གཤེད་པོ་ཀླུ་སྲིན་ཚུལ། །དེ་ལ་བཏུད་ནས་དེའི་སྒྲུབ་ཐབས། །ཀླུ་ནད་ཅན་ལ་ཕན་ཕྱིར་བྲི། །སྐྱབས་སེམས་སྔོན་དུ་འགྲོ་བས། རང་སེམས་ཕེ་ཡིག་ནག་པོ་ལས་ཕེ་
ཡིག་དཔག་ཏུ་མེད་པ་སྤྲོས། ཕེ་རཀྵ་ཀུ་རུ་ཧཱུཾ། རིན་པོ་ཆེ་བཀྲམས་པའི་རྒྱ་མཚོར་སྦྲུལ་ལས་བྱས་པའི་གཞལ་ཡས་ཁང་གི་ནང་དུ་ས་བདག་ཀླུ་གཉན་སྟན་དུ་བཏིང་བའི་སྟེང་དུ། རང་ཉིད་རིག་པའི་རྒྱལ་པོ་ནཱ་ག་རཀྴས་སྐུ་མདོག་ནག་པོ་དབུ་བཅུ་ཕྱག་བཅོ་བརྒྱད་པ། རྩ་ཞལ་སྲིན་པོའི་གདོང་ཤིན་ཏུ་ཁྲོས་པའམ། ཡང་ན་དབུ་དགུ་ཁྲོ་ཞལ་དུ་བྱས་ཀྱང་ལེགས། གང་ལྟར་ཡང་སྦྲུལ་མགོ་དགུ་བར་སྣང་ཁམས་སུ་འཕྱོ་བ། སྤྲུལ་མགོ་དབུས་མའི་སྤྱི་བོར་རྒྱལ་བ་མི་བསྐྱོད་པ་བཞུགས་པ། ཕྱག་གཡས་བརྒྱད་གྲི་གུག་གམ་རལ་གྲི། གཡོན་བརྒྱད་སྦྲུལ་ཞགས་འཛིན་པ། དང་པོ་གཉིས་ཐུགས་ཀར་བསྣོལ་བར་བྱས་པའང་ཡོད། སྐུ་སྟོད་སྲིན་པོའི་ལུས་རི་རབ་ལ་རྒྱབ་བརྟེན་པ། སྐུ་སྨད་སྦྲུལ་འཇུག་རྒྱ་མཚོའི་གཏིང་དུ་འཁྱིལ་བ། ཞལ་ཐམས་ཅད་ནས་ཨིག་ཤའི་སྒྲ་སྒྲོག་པ། རལ་པ་སྤྲུགས་པ་ལས་སྲོག་ཆགས་གདུག་པའི་ཚ་ཚ་འཕྲོ་བ། ཀླུ་ཆེན་བརྒྱད་ཀྱིས་སྐུ་ལ་བརྒྱན་པ། ཀླུ་རིགས་ཐམས་ཅད་ཟས་སུ་ཟ་བ། གདོལ་པ་ནག་པོ་འོག་ཏུ་གནོན་པ། མེ་དཔུང་འབར་བའི་དབུས་ན་བཞུགས་པའོ། །སྙིང་གར་ཡེ་ཤེས་སེམས་དཔའ་སྦྲུལ་དཀར་པོ་འཁྱིལ་ཞིང་གདེངས་ཀ་བྱས་པའི་སྙིང་ཀར་ཏིང་འཛིན་སེམས་དཔའ་ཉི་མ་ལ་གནས་པའི་ཕེ་ནག་པོ་ལ་སྔགས་ཀྱིས་བསྐོར་བ་ལ་དམིགས་ནས། ཨོཾ་ཕེ་ལཾ་ཧཱུཾ། ཞེས་ཡིག་འབྲུ་བཞི་པ་བཟླ་ཞིང༌། ནག་པོ་ཏི་པ་ཙ་ནཱ་ག་རཀྴ་ཨོཾ་ཕེ་ལཾ་ཧཱུཾ། ཞེས་པའི་
དྲག་སྔགས་ཀྱང་ཅུང་ཟད་བཟླ། བསྙེན་སྒྲུབ་བྱེད་ན་སྒྲུབ་ཡིག་ནས་བཤད་པ་བཞིན་ལས། བཟླས་པ་མང་ཉུང་སོགས་བློ་བཟོ་བྱར་མི་བཏུབ། གཏོར་མ་འབྲུ་གསུམ་གྱིས་བྱིན་གྱིས་བརླབས་ནས། སྙིང་པོའི་མཐར། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་བཏགས་ལ་ཕུལ། རྗེས་གནང་ནི། གཏོར་མ་གྲུ་གསུམ་གྱི་མཐའ་མཆོད་གཏོར་གྱིས་བསྐོར། བདག་བསྐྱེད་མདུན་བསྐྱེད་གཏོར་འབུལ་རྣམས་སོང་བའི་རྗེས་སུ་གཏོར་མ་ལྷ་སྐུར་གསལ་བའི་སྦྲུལ་མགོ་དབུས་མའི་རིན་པོ་ཆེའི་དཔྲོག་ཞུའི་ནང་དུ། བླ་མ་རྡོ་རྗེ་འཆང་གི་རྣམ་པ་ཅན་བཞུགས་པར་མོས་ལ། བླ་མ་རིན་པོ་ཆེ་བདག་ལ་འཇམ་དཔལ་ནཱ་ག་རཀྴ་སའི་རྗེས་སུ་གནང་བ་མ་ལུས་པ་སྩལ་དུ་གསོལ། ཞེས་ལན་གསུམ་གསོལ་བ་བཏབ། སློབ་དཔོན་གྱི་དཔྲལ་བའི་ཨོཾ་ལས་འོད་ཟེར་བྱུང༌། སློབ་མའི་དཔྲལ་བར་ཐིམ། བུམ་དབང་། དེ་བཞིན་དུ། མགྲིན་པའི་ཨཱཿལས་གསང་དབང༌། ཐུགས་ཀའི་ཧཱུཾ་ལས་ཤེར་དབང༌། གནས་གསུམ་གྱི་འབྲུ་གསུམ་ལས་དབང་བཞི་པ་ལེན་ཞིང༌། དེ་བཞིན་དུ་རིག་པའི་རྒྱལ་པོའི་སྐུ་ལས་ཀྱང་ལེན། དེ་རྣམས་རེ་རེའི་མཚམས་སུ་སྤོས་དང་རོལ་མོ་བྱ། གཏོར་མ་སྤྱི་བོར་བཞགབཀའ་བསྒོ་རེ་མཛད། ལྷ་ཞི་དྲག་གཉིས་ཀ་བསྒོམ་པ་དང༌། སྔགས་བཟླས་པའི་ལུང་འབོགས། རྗེས་ཀྱི་བྱ་བ་ནི་སྤྱི་དང་འདྲའོ། །འོག་གདོན་ཀུན་ལ་ཆེས་རྣོ་བའི། །གདམས་ངག་གུ་རུའི་གཏེར་མར་གྲགས། །ཀུན༵་ཏུ་ཉེར་མཁོ་རབ་དག༵འ་འདིའི། །རྗེས་གནང་བྱེད་ཚུལ་སྙིང༵་པོ༵ར་
བཀོད། །འཇམ་དཔལ་ནཱ་ག་རཀྴའི་སྒྲུབ་ཐབས་ཀྱི་ལེ་ཚན་ནོ།། །།སྒྲུབ་ཐབས་རིན་ཆེན་འབྱུང་གནས་ལས། སྣ་ཚོགས་པའི་སྡེའི་སྒྲུབ་ཐབས་བཤད་པའི་སྐབས་ཏེ་བཅོ་ལྔ་པའོ།། །།ཞུས་དག །དར་རྒྱས་འཕེལ། །