འཕགས་པ་ཛམྦྷ་ལ་སེར་པོའི་སྒྲུབ་ཐབས།
ཨོཾ་སྭཱ་སྟི། རྒྱལ་བ་ཐུགས་རྗེའི་མངའ་བདག་ནི། །གཏེར་གྱི་བདག་པོར་སྐུ་སྤྲུལ་པ། །དེ་ལ་བཏུད་ནས་དེའི་སྒྲུབ་ཐབས། །ཆ་ཙམ་གསལ་བར་བཤད་པར་བྱ། །སྐྱབས་སེམས་ཚད་མེད་བཞི་སྔོན་དུ་འགྲོ་བས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་ཧཱུཾ་ཡིག་ལས་བྱུང་བའི་སྲུང་འཁོར་གྱི་དབུས་སུ། པཾ་ལས་པདྨ་དང༌། ཨ་ལས་ཟླ་བའི་དཀྱིལ་འཁོར་གྱི་སྟེང་དུ། རང་སེམས་ཛཾ་ཡིག་སེར་པོ་ཡོངས་སུ་གྱུར་པ་ལས་འོད་འཕྲོས། འཕགས་པ་མཆོད། སེམས་ཅན་གྱི་དབུལ་བའི་སྡུག་བསྔལ་ཞི་བར་བྱས། འདོད་དགུའི་ཆར་ཕབ། སླར་འདུས་ཡོངས་སུ་གྱུར་པ་ལས་རང་ཉིད་འཕགས་པ་ཛམྦྷ་ལ་གསེར་བཙོ་མ་ལྟར་འབར་བ། ཞལ་གཅིག་ཕྱག་གཉིས་
གཡས་མཆོག་སྦྱིན་གྱི་མཐིལ་ན་ཤིང་ཐོག་བི་ཛ་པུ་ར་ཀ་བསྣམས་པ། གཡོན་གཏེར་གྱི་ནེའུ་ལེ་འཛིན་པས་ཡིད་བཞིན་ནོར་བུ་རིན་པོ་ཆེའི་ཆར་འབེབས་པ། ཞི་ཞིང་སྒེག་པ་ཤ་ཉམས་རྒྱས་པའི་ཧུར་བག་ཆགས་པ། རབ་ཏུ་དགྱེས་པའི་སྤྱན་གདངས་ཤིང་དབུ་སྐྲ་ནག་པོའི་ཐོར་ཅོག་ཅན། རིན་པོ་ཆེའི་དབུ་རྒྱན་དང་བཅས་པ། ཞབས་གཡས་བརྐྱང་བའི་རོལ་པའི་སྟབས་ཀྱིས་དུང་གི་མགོ་དང༌། པདྨའི་མགོ་ཞེས་བྱ་བ་ལ་སོགས་པ་གཏེར་ཆེན་པོ་རྣམས་ལ་ཞབས་བརྟེན་པ། དར་སྣ་ཚོགས་ཀྱི་ལྷབ་ལྷུབ་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། ཨུཏྤལ་སྔོན་པོའི་དོ་ཤལ་ཅན། འོད་ཟེར་རབ་ཏུ་འབར་བའི་སྐུ་ཅན་དུ་གྱུར། རང་གི་སྙིང་ག་ནས་འོད་ཟེར་འཕྲོས། ཡེ་ཤེས་སེམས་དཔའ་འཕགས་པ་ཛཾ་བྷ་ལ་འཁོར་བཅས་བཛྲ་ས་མཱ་ཛཿ ཛཿཧཱུཾ་བཾ་ཧོཿ དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། དབང་གི་ལྷ་རིགས་ལྔ་འཁོར་དང་བཅས་པ་བཛྲ་ས་མཱ་ཛཿ ཁྱེད་རྣམས་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས། དབང་གི་ལྷ་རྣམས་ཀྱིས། ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུཾ། ཞེས་གསུང་ཞིང་དབང་བསྐུར། སྐུ་གང་དྲི་མ་དག ཆུའི་ལྷག་མ་ཡར་ལུད་པ་ལས། རིན་ཆེན་འབྱུང་ལྡན་གྱིས་དབུ་བརྒྱན། ཨོཾ་ཨཱཪྱ་ཛམྦྷ་ལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ།
པུཥྤེ་ནས། ཤཔྟའི་བར་གྱིས་མཆོད། ནོར་གྱི་དབང་ཕྱུག་རིན་ཆེན་གཏེར་མངའ་ཞིང༌། །གནོད་སྦྱིན་ནོར་འཆང་མང་པོ་ཀུན་གྱི་རྗེ། །བྱང་ཕྱོགས་སྐྱོང་བའི་མགོན་བོ་ཛམྦྷ་ལ། །དངོས་གྲུབ་མཆོག་སྩོལ་ཁྱོད་ལ་ཕྱག་འཚལ་ལོ། །ཞེས་པས་བསྟོད། ཨོཾ་ཛམྦྷ་ལ་ཛ་ལེནྡྲ་ཡེ་སྭཱཧཱ། ཞེས་ཅི་ནུས་བཟླ། མཐར་ལྷ་སྐུ་མི་དམིགས་པར་སྦྱངས་ཏེ་མཉམ་པར་བཞགསླར་ཡང་ལྷ་སྐུར་ལངས་ཏེ་དགེ་བ་བསྔོ། ཐུན་མཚམས་སུ་ཇི་སྐད་བཤད་པའི་ཆུ་སྦྱིན་ལ་སོགས་པ་ལ་ནན་ཏན་དུ་བྱ་ཞིང༌། མཆོད་གཏོར་ལ་ཡང་ནན་ཏན་དུ་བྱའོ། །འདིའི་རྗེས་གནང་བྱེད་པར་འདོད་པས། མཎྜལ་པདྨ་འདབ་བརྒྱད་ཚོམ་བུ་ཅན་ནམ། མ་འགྲུབ་ན་རྗེས་གནང་སྤྱི་དང་མཐུན་པར་བྱ། དཀར་གཏོར་མཆོད་པ་ཛཾ་བཤོས་ཟངས་གཞོང་ཟངས་བུམ་ཆུས་གང་བ་སོགས་ཡོ་བྱད་རྣམས་ཚང་བར་བྱ། མཆོད་པ་བྱིན་བརླབས་སྤྱི་དང་མཐུན། གོང་བཞིན་བདག་བསྐྱེད་བྱས་ལ། མདུན་བསྐྱེད་ཀྱང་བདག་བསྐྱེད་འདོན་པ་སྤོས་པས་ཆོག་ཅིང༌། བཟླས་པའི་མཐར་གཏོར་མ་ལ་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་བྷྲཱུཾ་ལས་བྱུང་པའི་རིན་པོ་ཆེའི་སྣོད་དུ་ཨོཾ་ཞུ་བ་ལས་གཏོར་མ་འདོད་དགུའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ། སྙིང་པོ་མཐར་ཨི་དཾ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི་བཏགས་པ་ལན་གསུམ་མམ་ལྔས་ཕུལ། ཨརྒྷཾ་ནས། ཤཔྟའི་བར་གྱིས་མཆོད། གོང་བཞིན་བསྟོད་ལ། སེར་སྣའི་ལས་ཀྱི་མེ་ཡིས་གདུངས་པ་དག །སྐྱེ་བ་སྐྱེ་བར་
ཁྱོད་ལ་སྐྱབས་སུ་མཆི། །རིན་ཆེན་གཏེར་གྱི་བདུད་རྩིའི་ཆར་རྒྱུན་གྱིས། །སེམས་ཅན་དབུལ་བའི་སྡུག་བསྔལ་ཞི་བར་མཛོད། །ཅེས་གསོལ་བཏབ། སྐབས་འདིར་ཡང་ཆུ་སྦྱིན་སྤྲོ་ན་བྱ། རྗེས་གནང་གི་ངོ་བོ་སྒྲུབ་ཐབས་རྒྱ་མཚོ་དང་འདྲ། ཐུགས་ཀྱི་རྗེས་གནང་གི་མཐར། སློབ་མས་ཕུལ་བར་མོས་ཏེ། ཆུ་སྦྱིན་འབུལ་བ་ནི། ཟངས་གཞོང་གི་དབུས་སུ། སྟོང་པའི་ངང་ལས་འཕགས་པ་ཛཾ་བྷ་ལ་གོང་བཞིན་བསྐྱེད། ཡེ་ཤེས་པ་བསྟིམ། གནས་གསུམ་བྱིན་རླབས་དང༌། དབང་བསྐུར་བྱེད་མི་དགོས། རང་གི་ལག་པ་གཡས་ཀྱི་མཐིལ་དུ་ཟླ་བ་ལ་གནས་པའི་ཨོཾ་ཧཱུཾ་ཏྲཱཾ་ཧྲཱི་ཨ། དེ་རྣམས་ལས་འོད་ཟེར་འཕྲོས། སངས་རྒྱས་ཐམས་ཅད་ཀྱི་བྱིན་རླབས་རྣམས་བདུད་རྩིའི་རྣམ་པར་བཀུག་སྟེ་ཐིམ། ཨོཾ་ཨཱཿཧཱུཾ། ཞེས་ཆུ་བྱིན་གྱིས་བརླབས་ཏེ། སྙིང་པོའི་སྔགས་བརྒྱ་རྩ་བརྒྱད་ཀྱིས་ཆུ་ཁྱོར་བ་བརྒྱ་རྩ་བརྒྱད་དམ། བུམ་པའི་ཆུ་རྒྱུན་མི་འཆད་པར་དབུལ་བར་བྱའོ། །མཐར་ཛཾ་བཤོས་ཆུ་ནང་དུ་བཅུག་ལ། གོང་གཏོར་མ་འབུལ་བའི་སྔགས་ཀྱིས་ཕུལ། གོང་བཞིན་མཆོད་བསྟོད་གསོལ་བཏབ་ལན་གསུམ་བྱ། དེ་ནས་འཕགས་པ་ཛམྦྷ་ལ་དགྱེས་ཏེ། སློབ་མ་ལ་ཡིད་བཞིན་གྱི་ནོར་བུ་དང༌། བདུད་རྩིའི་དངོས་གྲུབ་བྱིན་པར་མོས་ལ། ཛཾ་བཤོས་ནས་ཅུང་ཟད་བཅད་ཅིང་སྟེར་བ་དང༌། ཆུ་ཅི་དགར་འཐུང་དུ་གཞུག་གོ །རྗེས་ཀྱི་བྱ་བ་ནི་སྤྱི་དང་འདྲའོ། །ཀུན༵་ནས་གྲགས་ཆེ་ཆེས་ཟབ་པ། །ནོར་གྱི་སྒྲུབ་ཐབས་རབ་དག༵འ་ནི། །སྔ་ཕྱིའི་ཡིག་ཚོགས་དཔག་མེད་ལས། །སྙིང༵་པོ༵་ཙམ་ཞིག་ཉེར་མཁོར་བཀོད། །འཕགས་པ་ཛམྦྷ་ལ་སེར་པོའི་སྒྲུབ་ཐབས་ཀྱི་ལེ་ཚན་ནོ།། །།