སྒྲུབ་ཐབས་རིན་ཆེན་འབྱུང་གནས་ལས་ལེགས་ལྡན་མཧཱ་ཀཱ་ལའི་སྒྲུབ་ཐབས་བཤད་པའི་སྐབས་ཏེ་ཉི་ཤུ་པ།
མགོན་པོ་སྟག་ཞོན་དུ་གྲགས་པའི་སྒྲུབ་ཐབས།
ཨོཾ་སྭཱ་སྟི། སངས་རྒྱས་ཀུན་དངོས་བླ་མ་དང༌། །ཡི་དམ་ཀུན་དངོས་ཁྲག་འཐུང་ལ། །བཏུད་ནས་དཔལ་ལྡན་ནག་པོ་ཆེ། །སྟག་ཞོན་ཞེས་བྱའི་སྒྲུབ་ཐབས་བཤད། །འདིའི་བསྙེན་སྒྲུབ་ལས་གསུམ་གྱི་གདམས་པ་ཡིག་རྙིང་རྣམས་སུ་ཤེས་པར་བྱ་ལ། འདིར་གཏོར་ཆོག་དང་འབྲེལ་བའི་སྒྲུབ་ཐབས་དང༌། རྗེས་གནང་གི་ཡི་གེ་མདོ་ཙམ་ཞིག་བརྗོད་ན། མདུན་དུ་བྲིས་སྐུ་དང་མཆོད་གཏོར་བཤམ། བདག་ཉིད་ཡི་དམ་ཧེ་རུ་ཀ་དང༌། ཁྲོ་བོ་ཆེན་པོ་གང་རུང་གི་རྣལ་འབྱོར་ལ་གནས་པས། མདུན་བསྐྱེད་བསངས་སྦྱངས། དུར་ཁྲོད་ཆེན་པོའི་ས་གཞིར་ཨེ་ལས་བྱུང་བའི་ཆོས་འབྱུང་མཐིང་ནག་འབར་བའི་ནང་དུ། པད་ཉི་ལ་གནས་པའི་ཧཱུཾ་མཐིང་ནག་ལས་འོད་འཕྲོས། དགྲ་བགེགས་གདུག་པ་ཅན་ཐམས་ཅད་ཚར་བཅད་ཚུར་འདུས་ཡོངས་སུ་གྱུར་པ་ལས། དཔལ་ཡེ་ཤེས་ཀྱི་མགོན་པོ་ཆེ་བཙན་ནག་པོ་སྐུ་མདོག་
དུས་མཐའི་སྤྲིན་ལྟར་གནག་ཅིང༌། ཕྱག་གཡས་ཙནྡན་གྱི་བེང་ཆེན་ནམ་མཁར་འཕྱར་བ། གཡོན་གྱིས་ལྕགས་ཀྱི་པར་བུ་ཁྲག་ཆེན་གྱིས་གང་བ་བཟུང་ནས་ཞལ་དུ་གསོལ་བ། སྤྱན་གསུམ་འབར་ཞིང་མཆེ་བ་བཞི་ཟངས་ཡག་ཏུ་གཙིགས་པ། སྨ་ར་སྨིན་མ་དབུ་སྐྲ་མེ་ལྟར་འབར་བ། དར་ནག་གི་བེར་ཆེན་དགུ་བརྩེགས་གསོལ་བ། གསེར་གྱི་སྐེ་རགས་བཅིངས་ཤིང༌། སག་ཏིའི་ལྷམ་ཡུ་རིང་གསོལ་བ། ཐོད་སྐམ་གྱི་དབུ་རྒྱན། ཐོད་རློན་གྱི་དོ་ཤལ། སྦྲུལ་ནག་གི་ཐོད་བཅིངས། གསེར་གྱི་རྣ་ཆ་ལ་སོགས་པས་བརྒྱན་པ། ཆིབས་སུ་སྟག་ཆེན་རྔམ་པ་ཆིབས་ཤིང༌། སེང་གེ་དཀར་པོ་རོལ་དུ་ཁྲིད་པ། ལྕགས་ཀྱི་བྱ་ཁྲ་ཀླད་ལ་ལྡིང་ཞིང༌། ཅེ་སྤྱང་དོམ་དྲེད་ཕྱི་ནས་འབྲང་བ། མེ་དཔུང་འབར་བའི་དབུས་ན་བཞུགས་པའོ། །གཡོན་དུ་བྷྱོཿལས་ལྷ་མོ་དམར་ནག་སྤྱན་གསུམ་དབུ་སྐྲ་ལན་བུ་གཅིག་ཏུ་འཕྱང་བ། ཁྲམ་ཤིང་དང་ནད་རྐྱལ་འཛིན་པ། ལྕགས་ཀྱི་དྲེའུ་རྟ་རྐང་གསུམ་ལ་ཆིབས་ཤིང༌། རླུང་ནག་འཁྱིལ་བའི་དབུས་ན་བཞུགས་པའོ། །གཙོ་བོའི་སྐུ་ལས་སྤྲུལ་པའི་འཁོར་གྱི་ཚོགས་ནི། སྐུའི་མོན་པ་སྲོག་བདག་སྔོ་སྐྱ་ཏྲི་ཤུ་ལའི་རྩེ་ལ་མི་རོ་བཙུགས་པའི་རྒྱལ་མཚན་འཕྱར་བ། གསུང་གི་མོན་པ་ཤན་པ་དམར་ནགགཡས་མ་ཧེའི་རྭ་དུང་འབུད་པ། གཡོན་ལྕགས་ཀྱི་ཕུར་བུ་
འདེབས་ཤིང་ཉམས་པའི་མགུལ་ནས་བཅིངས་པའི་ཞགས་པ་ནག་པོ་འཛིན་པ། ཐུགས་ཀྱི་མོན་པ་ཐེའུ་ནག་པོ་སྤུ་གྲི་དང་མི་སྙིང་ཐོགས་པ། གཞན་ཡང་ཤ་ཟན་གྱི་མོན་པ། ཁྲག་འཐུང་གི་མོན་པ། སྲོག་གཅོད་ཀྱི་མོན་པ། བླ་འགུགས་ཀྱི་མོན་པ། སྙིང་འབྱིང་གྱི་མོན་པ། གཟེར་འདེབས་ཀྱི་མོན་པ། ཚེ་འཕྲོག་གི་མོན་པ་རྣམས་ལས་མཁན་གྱི་ཆ་ལུགས་ཅན། གཡས་རལ་གྲི་ལ་སོགས་པའི་མཚོན་ཆ་སྣ་ཚོགས་དང་གཡོན་ཐོད་ཁྲག་འཛིན་པ། དེའི་ཕྱི་རོལ་དུ་མ་མོ་བདུན་ལ་སོགས་པ། མ་མོ། མཁའ་འགྲོ་ཤ་ཟ་གྲངས་མེད་པ་དང་བཅས་པའོ། །ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རང་གི་སྙིང་ག་ནས་འོད་ཟེར་འཕྲོས། དུར་ཁྲོད་ཆེན་པོ་ཨུ་ཙ་ལ། བསིལ་བ་ཚལ། རི་རབ་ཀྱི་ཁོང་སེང༌། དཔལ་རྡོ་རྗེ་གདན་ལ་སོགས་པ་ནས། མགོན་པོ་འཁོར་བཅས་བཛྲ་ས་མཱ་ཛཿ ཨོཾ་བཛྲ་མཧཱ་ཀཱཀ་ལ་ཏྲི་ཡཾ་ཛ་ཛཿ ཏྲཀ་རཀྴ་ས་མ་ཡ་མཎྜ་ལ་ཨ་ཀདྡྷྱ། ཨ་ཀདྡྷྱ། ཨ་བེ་ཤ་ཡ། ཨ་བེ་ཤ་ཡ། ཏིཥྛ་ཏིཥྛ། ཨ་ཝ་ལོ་ཀ་ཡ་ཧཱུཾ་ཧཱུཾ་ཧཱུཾ་ཛཿ ཞེས་སྤྱན་དྲངས། ཨརྒྷཾ་ནས། ཤཔྟའི་བར་གྱིས་མཆོད། འབྲུ་གསུམ་གྱིས་ནང་མཆོད་ཕུལ། ཧཱུཾ། སྡེ་བརྒྱད་དམག་དཔོན་དཔའ་བོ་ཆེན་པོ་ནི། །འཇིགས་རུང་གར་དགུའི་ཉམས་ལྡན་སྟོབས་པོ་ཆེ། །
གདུག་པའི་དགྲ་བགེགས་ཚར་གཅོད་སྤྲུལ་པ་འགྱེད། ལྕམ་དྲལ་བྲན་གཡོག་འཁོར་དང་བཅས་ལ་བསྟོད། །ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཨོཾ་བཛྲ་མཧཱ་ཀཱ་ལ་ཏིཥྛ་བཛྲ། ཞེས་བཞུགས་སུ་གསོལ། ཡི་དམ་གྱི་སྔགས་ལན་བདུན་ཙམ་དྲག་ཏུ་བཟླས་ནས། ཨོཾ་བཛྲ་མཧཱ་ཀཱ་ལ་ས་པ་རི་ཝཱ་ར་ས་མ་ཡ་སྟྭཾ། རྡོ་རྗེ་རྩེ་ལྔ་པས་དབུ་བརྒྱན་པར་བསམ། སྔར་སྨན་དང་རཀྟ་བཤམས་ཤིང་བྱིན་གྱིས་བརླབས་ན། སྐབས་འདིར་འབུལ་ཞིང༌། བསྡུས་པའི་སྐབས་སུ་མ་བྱས་ཀྱང་ཆོག་གོ །འོན་ཀྱང་གཏོར་མ་ནང་མཆོད་དང༌། རཀྟས་བྲན་ལ་འབུལ་བ་ཙམ་ནི་བྱ་དགོས་ཏེ། ཨ་མྲྀ་ཏས་བསངས། སྭ་བྷཱ་ཝས་སྦྱངས། ཡཾ་ལས་རླུང༌། རཾ་ལས་མེ། ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ། གཏོར་མ་ཤ་ལྔ་བདུད་རྩི་ལྔ་ལས་བྱུང་བའི་ཡེ་ཤེས་ཀྱི་བདུད་རྩིའི་རྒྱ་མཚོ་དང༌། དགྲ་བགེགས་བསྒྲལ་བ་ལས་བྱུང་བའི་ཤ་ཁྲག་དམར་གྱི་ཕུང་པོ་རི་རབ་ཙམ་དུ་གྱུར། ཨོཾ་ཨཱཿཧཱུཾ། ལན་བདུན་དང༌། ནམ་མཁའ་མཛོད་ཀྱི་སྔགས་རྒྱས་སྤེལ། ཨོཾ་ཤྲཱི་མཧཱ་ཀཱ་ལ་ཏྲི་ཡཾ་ཛ་ཛཿ དགྲ་བགེགས་མཱ་྄ར་ཡ་ཧཱུཾ་ཕཊ། ཏྲཀ་རཀྴ་ཧ་ལ་དགྲ་བོ་མཱ་ར་ཡ་ཛ་ཛཿ བཱ་ལིཾ་ཨི་དཾ་གྲྀཧྞ། ཁ་ཁ་ཁཱ་ཧི་ཁཱ་ཧི། བྷུཉྫ་ཧོ། རཀྟ་པི་པ་ཏོ་ས་མཱ་ཡ་སྭཱཧཱ། ཞེས་ལན་བདུན་གྱིས་བསྟབ། ཡེ་ཤེས་བདུད་རྩིའི་རྒྱ་མཚོ་འདི། །མཐུ་ཆེན་ནག་པོ་ཆེན་པོ་དང༌། དཔལ་ལྡན་འདོད་ཁམས་གཙོ་མོ་དང༌། །དུར་ཁྲོད་མ་མོའི་ཚོགས་རྣམས་དང༌། །ལས་བྱེད་མོན་པའི་ཚོགས་རྣམས་དང༌། །རྒྱལ་ཆེན་བཞི་སོགས་
འཁོར་བཅས་ལ། །དངོས་གྲུབ་རྣམ་གཉིས་ཐོབ་ཕྱིར་དང༌། །གདུག་པ་ཐམས་ཅད་བསྒྲལ་ཕྱིར་འབུལ། །ཐུགས་དམ་དབང་གིས་བཞེས་སུ་གསོལ། །ཨོཾ་ཤྲཱི་མཧཱ་ཀཱ་ལ་ཁ་རཾ་ཁ་ཧི། ཚོགས་ཀྱང་གཏོར་མ་བཞིན་དུ་བྱིན་གྱིས་བརླབས། ལྷ་ཆེན་ལེགས་ལྡན་ནག་པོ་ཆེན་པོ་འཁོར་བཅས་ལ། །དམར་གྱི་ཨརྒྷཾ་མེ་ཏོག་བཟང་པོ་བསུར་ཆེན་དྲི། །ཞག་ཆེན་མར་མེ་སྦྱར་བའི་དྲི་དང་ཞལ་ཟས་མཆོག །བརྗིད་པའི་སྒྲ་དང་སྙན་པའི་རྐང་གླིང་མཆོད་པ་དང༌། །དྲི་ཆེན་རཀྟ་སྙིང་ཀླད་དྲི་ཆུ་བྱང་ཆུབ་སེམས། །རྟ་ཤ་མི་ཤ་གླང་ཆེན་ཁྱི་དང་བ་ལང་ཤ །སྣ་ཚོགས་སྐམ་རློན་ཉ་ཤ་ཚིལ་དང་ལ་ཕུག་སོགས། །ནས་འབྲས་དགུན་འབྲུམ་ལས་བྱུང་ཆང་དང་ཁུར་བར་བཅས། །ཕྱི་ནང་གསང་བའི་རྟེན་དང་དམ་རྫས་མ་ལུས་འབུལ། །བཞེས་ཏེ་ཀུན་ཏུ་དགྱེས་མཛོད་ལས། །འཕྲུལ་གྱི་དངོས་གྲུབ་སྩལ་བ་དང༌། །སྡང་བའི་དགྲ་བགེགས་ཀུན་སྒྲོལ་ཞིང༌། །ཡིད་ལ་བསམ་པ་ཀུན་འགྲུབ་མཛོད། །ཕུད་གོང་གི་གཏོར་མའི་སྔགས་ཀྱིས་འབུལ་ལོ། །དེ་ནས་བཟླས་པའི་དམིགས་པ་གསལ་བཏབ་ལ། ཨོཾ་ཤྲཱི་མཧཱ་ཀཱ་ལ་རུ་པ་ཧཱུཾ་ཕཊ། སྐུའི་སྙིང་པོའོ། །ཨོཾ་མཧཱ་ཀཱ་ལ་རཀྵ་དུ་བེང་ཎི་ཛཿ གསུང་གི་སྙིང་པོའོ། །ཨོཾ་བཛྲ་མཧཱ་ཀཱ་ལ་ཏྲི་ཡཾ་ཛ་ཛཿ དགྲ་བོ་མཱ་ར་ཡ་ཧཱུཾ་ཕཊ། ཐུགས་ཀྱི་སྙིང་པོ་སྟེ་བཟླས་པའི་གཙོ་བོ་འདི་ལ་བྱེད།
ཏྲཀ་རཀྴ་ཧ་ལ་དགྲ་བོ་མཱ་ར་ཡ་ཛ་ཛཿ ལྷ་མོའི་སྙིང་པོ་སྟེ། མགོན་པོའི་བརྒྱ་བརྒྱ་ལ་བཅུ་བཅུ་གདགས་སོ། །དུན་རུ་ཏྲ་རུ་ཐུཾ་བྷ་ཏི་ཛཿ ཤུ་ལ་ར་ཙ་ཏྲི་ཤཾ་ཛཿ བཛྲ་ཏྲི་ནི་གྱིང་ས་དུ་ཁ་ཐུཾ་ཏྲི་ས་མཱ་ཡ་ཛ་ཛཿ མོན་པ་གསུམ་གྱི་སྔགས་སོ། །དགྲ་བོ་མཱ་ར་ཡ་ཧཱུཾ་ཕཊ། དགྲ་བོ་མཱ་ར་ཡ་ནན། མཱ་ར་ཡ་སོད། མོན་པ་གསུམ་གྱི་བསད་སྔགས་སོ། །ནག་པོ་དགྲ་བོའི་ཤ་རུས་སྙིང་འདི་ཐོན་ཐོན། བདུད་པོ་དགྲ་བོའི་སྲོག་རྩ་ཆོད་ཆོད། ནག་པོ་དགྲ་བོའི་སྲོག་རྩ་ལ་ཛ་ཛཿ ནག་པོ་དགྲ་བོའི་བླ་རྩ་ལ་ཛ་ཛཿ ནག་པོ་དགྲ་བོའི་སྙིང་རྩ་ལ་ཛ་ཛཿ ནག་པོ་དགྲ་བོའི་ཀླད་པའི་རྩ་ལ་ཛ་ཛ། ནག་པོ་དགྲ་བོའི་སྙིང་རྒྱུས་དབུགས་ཀྱི་རྩ་ལ་ཛ་ཛ། ནག་པོ་དགྲ་བོའི་རྩ་རྒྱུས་སྲོག་ལ་ཛ་ཛཿ མོན་པ་བདུན་གྱི་དྲག་སྔགས་སོ། །ཙ་ཏི་སྟ་ཙཀྲ་ནི་ཧཱུཾ། མ་མ་ཏི་བ་བྷྱ྄ོཿཙཀྲ་ནི་ཧཱུཾ། བཾ་ནི་ར་ཧཱུཾ་བྷྱོ་མ་མ་ཆོ། ལས་ལ་གྲ་ཧ་ལ་ཧ་ལ་ཧཱུཾ་ཕཊ། མ་མོའི་སྲོག་སྔགས་སོ། །བཟླས་པའི་འཇུག་ཏུའང་གཏོར་མ་གསོས་ལ་གོང་བཞིན་ཕུལ་ནས། ཚོགས་གཞུང་དང༌། བསྐང་བ་དང༌། བཤགས་པ་སོགས་སྤྲོ་ན་སྐབས་འདིར་བྱ། བསྡུ་ན། ཨརྒྷཾ་ནས། ཤཔྟའི་བར་གྱིས་མཆོད། བདེ་ཆེན་འདུ་བྲལ་མེད་པའི་དཀྱིལ་འཁོར་ནས། །ཡང་དག་རྔམ་པའི་སྐུ་གཅིག་བྱུང་བ་ནི། །མཐིང་ནག་མེ་དཔུང་འཇིགས་བྱེད་འབར་བའི་སྐུ། །ལེགས་ལྡན་དཔའ་བོ་ཆེ་བཙན་དྲག་ཤུལ་ཅན། །ས་གསུམ་དབང་བསྒྱུར་ནག་
པོ་ཆེ་ལ་བསྟོད། །བསྟན་དགྲ་འཇོམས་མཛད་ཁྱོད་ལ་ཕྱག་འཚལ་ལོ། ཁྲག་མཚོར་རྒྱུག་ཅིང་ཁམས་གསུམ་སྐད་ཅིག་ཉུལ། །མ་གཅིག་རེ་མ་ཏཱི་ལ་གུས་པས་འདུད། །ལེགས་ལྡན་ནག་པོའི་སྐུ་གསུང་ཐུགས་ལས་སྤྲུལ། །དགྲ་བགེགས་སྒྲོལ་མཛད་དྲེགས་པ་བདུད་དུ་བསྟན། །འཕྲིན་ལས་ཕོ་ཉ་དུར་ཁྲོད་མ་མོ་བདུན། །ཡེ་ཤེས་དབྱིངས་ཀྱིས་སྤྲུལ་པའི་འཁོར་ལ་བསྟོད། །རྣལ་འཕྲུལ་ཕོ་ཉ་མ་ངེས་སྣ་ཚོགས་པ། །མཆེ་བ་ཅན་དང་བྱ་གཅན་གདུག་པའི་ཚོགས། །སྡེ་བརྒྱད་འཁོར་དང་བཅས་ལ་བསྟོད་པ་འབུལ། །བདག་ཅག་རེ་སྨོན་དུས་འདིར་འགྲུབ་པར་མཛོད། །ཐུན་གཏོར་ཡོད་ན་སྐབས་འདིར་འབུལ་ཞིང༌། ལྷའི་དེད་དཔོན་ཚོགས་ཀྱི་བདག །དཔལ་ལྡན་མཧཱ་ཀཱ་ལ་ནི། །ལྷ་མོ་གཉན་དང་གཉིས་སུ་མེད། །འཁོར་དང་བཅས་ཏེ་གཤེགས་སུ་གསོལ། །འདིར་གཤེགས་རྒྱན་གྱི་གཏོར་མ་འདི་གཞེས་ཤིག །ཅེས་སོགས་སྤྱི་དང་མཐུན་པར་བཏབ། ཡིག་བརྒྱ། བཟོད་གསོལ། གཤེགས་གསོལ། དམ་ཚིག་པ་བསྡུ་བ། སྨོན་ལམ་བཀྲ་ཤིས་སྤྱི་དང་མཐུན་ནོ། །འདིའི་རྗེས་གནང་བྱེད་པ་འདོད་ན། གྲུ་གསུམ་མཐིང་ནག་གི་དཀྱིལ་འཁོར་ལ་གཏོར་མ་འགོད། མཐའ་མཆོད་གཏོར་གྱིས་བསྐོར། བེང༌། ལྕགས་པར། ཕུར་བུ་རྣམས་ཀྱང་ཚོགས་པར་བྱས། གོང་དུ་བཤད་པ་ལྟར་གཏོར་མ་འདོད་དོན་གསོལ་བཏབ་ཡན་ཆད་རྫོགས་པར་བྱས་ལ།
བར་འདིར་རྗེས་གནང་བྱ་སྟེ། མཎྜལ་ཕུལ་ནས་གསོལ་བ་བཏབ་པ་ནི། རྗེ་བཙུན་རྡོ་རྗེ་འཛིན་པའི་གཙོ། །བདག་གི་ལུས་ངག་ཡིད་གསུམ་གྱི། །དྲི་མ་མཐའ་དག་སྦྱང་བའི་ཕྱིར། །དབང་བསྐུར་བྱིན་རླབས་སྩལ་དུ་གསོལ། །ཞེས་ལན་གསུམ་མོ། །གུར་ནས་འབྱུང་བའི་རྒྱུན་བཤགས་དང༌། རིགས་ལྔའི་སྡོམ་བཟུང་བྱ། གཏོར་མ་མགོན་པོ་འཁོར་བཅས་སུ་བསྐྱེད་ལ་ཡེ་ཤེས་པ་སྤྱན་དྲངས། གཏོར་དབང་སྤྱི་དང་མཐུན་པར་བྱ་སྟེ། སྐུའི་དབང་བསྐུར་རོ། །སློབ་མ་མགོན་པོར་བསྐྱེད་པ་ལ་འཕྲེང་བ་གཏད་དེ། བཟླས་ལུང་སྤྱི་དང་མཐུན་པར་སྦྱིན་ཏེ། གསུང་གི་དབང་བསྐུར་རོ། །བེང་གཏད་དེ། སངས་རྒྱས་ཀུན་གྱི་ཐུགས་ཀྱི་རྟེན། །གང་ཞིག་འཕྱར་བ་ཙམ་གྱིས་ནི། །དགྲ་བགེགས་རྡུལ་དུ་རློག་བྱེད་པ། །དེ་རིང་ཁྱོད་ལ་སྦྱིན་པར་བྱ། །ཨོཾ་མཧཱ་ཀཱ་ལ་རཀྴ་དུ་བེང་ཨཱཿཧཱུཾ། ཨ་བྷི་ཥིཉྩ་མཾ། ཐུགས་ཀྱི་དབང་བསྐྲུར་རོ། །ལྕགས་པར་གཏད་ལ། སངས་རྒྱས་ཀུན་གྱི་དངོས་གྲུབ་རྟེན། །གང་ཞིག་དྲན་པ་ཙམ་གྱིས་ནི། །ནག་པོ་དགྱེས་ཤིང་ངོམ་པར་བྱེད། །དེ་རིང་ཁྱོད་ལ་སྦྱིན་པར་བྱ། །ཨོཾ་མཧཱ་ཀཱ་ལ་ཙིཏྟ་པྲི་ཏི་ཨཱཿཧཱུཾ། ཨ་བྷི་ཥིཉྩ་མཾ། ཡོན་ཏན་གྱི་དབང་བསྐུར་རོ། །ཕུར་བུ་གཏད་ལ། སངས་རྒྱས་ཀུན་གྱི་འཕྲིན་ལས་རྟེན། །གང་ཞིག་སྒྲིལ་བ་ཙམ་གྱིས་ནི། །གདུལ་དཀའ་མ་ལུས་འཇིགས་པར་བྱེད། །དེ་རིང་ཁྱོད་ལ་སྦྱིན་པར་བྱ། །ཨོཾ་མཧཱ་ཀཱ་ལ་དགྲ་བོའི་སྙིང་ལ་ཀཱི་ལ་ཡ་ཧཱུཾ་ཕཊ། ཨ་བྷི་ཥིཉྩ་མཾ།
འཕྲིན་ལས་ཀྱི་དབང་བསྐུར་རོ། །རྗེས་ཁས་བླངས་མཎྜལ་ཡོན་འབུལ་བ་རྣམས་སྤྱི་དང་འདྲ་ཞིང༌། སྤྱི་བསྟབ་མན་ཆད་རྗེས་ཆོག་གོང་བཞིན་བྱའོ། །ཀུན༵་ནས་དྲག་ཤུལ་རབ་ཆེ་བ། །སྣུབས་ཀྱིས་དག༵འ་བར་རབ་བསྔགས་པའི། །བསྟན་སྲུང་ཆོས་སྐོར་མཐའ་ཡས་ཀྱང༌། །ཉེར་མཁོ་སྙིང༵་པོ༵་ཙམ་ཞིག་བྲིས། །མགོན་པོ་སྟག་ཞོན་དུ་གྲགས་པའི་སྒྲུབ་ཐབས་ཀྱི་ལེ་ཚན་ནོ།། །།མངྒ་ལཾ། །
བསྟན་སྲུང་ལེགས་ལྡན་ནག་པོ་ཡི་སྒྲུབ་ཐབས།
ཨོཾ་སྭཱ་སྟི། རྒྱལ་བ་ཀུན་ལ་ཕྱག་འཚལ་ནས། །བསྟན་སྲུང་ལེགས་ལྡན་ནག་པོ་ཡི། །སྒྲུབ་ཐབས་ཅུང་ཟད་བཤད་བྱ་སྟེ། །བགེགས་དང་བར་ཆད་ཞི་བར་མཛོད། །ཡི་དམ་གྱི་བདག་བསྐྱེད་སྔོན་དུ་འགྲོ་བས་ཆོས་འབྱུང་མཐིང་ནག་ཕྱི་རོལ་དུ་ཟླུམ་སྐོར་ཐོད་རྭ་མེ་རི་དང་བཅས་པ་ཞིག་བྲི། མཐའ་མཆོད་གཏོར་གྱིས་ཚང་བར་བསྐོར། ཡི་དམ་མཁའ་འགྲོའི་བདག་བསྐྱེད་སྔོན་དུ་འགྲོ་བས། མཆོད་པ་མགོན་པོ་སྤྱི་དང་མཐུན་པའམ། ཡི་དམ་ལྟར་བྱིན་གྱིས་བརླབས། མདུན་བསྐྱེད་བསངས་སྦྱངས། སྟོང་པའི་ངང་ལས་བསྲུང་བའི་འཁོར་ལོ་ཡངས་ཤིང་རྒྱ་ཆེ་བའི་ནང་དུ། དུར་ཁྲོད་ཆེན་པོ་འཇིགས་སུ་རུང་བས་བསྐོར་བའི་གཞལ་ཡས་ཁང་ནང་ཐོད་མཁར་འབར་བ། དེའི་དབུས་སུ་པད་ཉི་དང་དགྲ་བགེགས་ཀྱི་བམ་ཆེན་བསྣོལ་བའི་སྟེང་དུ་ཀྵ་ཡིག་འོད་ཀྱི་འཕྲོ་འདུ་ལས། ལེགས་ལྡན་ནག་པོ་སྲེད་མེད་ཀྱི་བུ་སྐུ་མདོག་མཐིང་ནག་ཞལ་གཅིག་ཕྱག་གཉིས་གཡས་ཙནྡན་གྱི་བེང་ཆེན་ནོར་བུས་སྤྲས་པ་འཛིན་པ། བེང་སྟོད་ནས་མེ་འབར་ཞིང་བེང་སྨད་ནས་ཆུ་འབྲུབ་པ། བེང་གི་
ནང་ནས་ལྷ་དང་ལྷ་མ་ཡིན་གྱི་དམག་ཚོགས་འགྱེད་པ། གཡོན་པས་ལྕགས་ཀྱི་པར་བུ་ནད་སྣ་ཚོགས་ཀྱིས་གང་བ་དཀུ་ལ་བརྟེན་པའི་ཚུལ་གྱིས་འཛིན་པ། ཟ་འོག་གི་བེར་ཆེན་སྐུ་ལ་གསོལ་ཞིང༌། གསེར་གྱི་སྐ་བོ་ཆེ་བཅིངས་པ། ཞབས་ལ་སག་ཏིའི་ལྷམ་གསོལ་བ། མི་མགོ་སྐམ་པོ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ་ཅན། སྦྲུལ་གྱིས་བརྒྱན་པ། དམར་ལ་ཟླུམ་པའི་སྤྱན་གསུམ་དགྲ་བགེགས་ལ་སྡང་མིག་ཏུ་གཟིགས་པ། མཆེ་བ་གཙིགས་ཤིང་ལྗགས་འགྲིལ་བ། སྨ་ར་སྨིན་མ་དབུ་སྐྲ་ཁམ་ནག་གྱེན་དུ་བརྫེས་པ། ཞབས་གཡས་བསྐུམ་གཡོན་བརྐྱང་བའི་སྟབས་ཀྱིས་མེ་དཔུང་འབར་བའི་དབུས་ན་བཞུགས་པའོ། །གཡོན་དུ་བྷྱོཿལས་དཔལ་ལྡན་ལྷ་མོ་རེ་མ་ཏཱི་སྐུ་མདོག་སྨུག་ནག་ཁྲམ་ཤིང་དང༌། ནད་རྐྱལ་འཛིན་པ་དྲཻའུ་རྟ་རྐང་གསུམ་ལ་ཆིབས་པ། མཐའ་སྐོར་དུ། ནག་པོ་སྟོང་ལྷ་མ་སྲིན་སྡེ་བརྒྱད། མ་མོ་ཆེན་མོ་བདུན་འཁོར་དང་བཅས་པས་ཡོངས་སུ་བསྐོར་བའོ། །ཡེ་ཤེས་པ་སྤྱན་འདྲེན་ནམ། མཆོད་བསྟོད་གྱི་མཐར་ཐུག་པའི་བར་འདི་ཉིད་ཀྱི་མཆོད་ཆོག་སྣ་ཚོགས་ནས་འབྱུང་བ་བཞིན་ཅི་རིགས་བྱ་བ་ཡིན་མོད་ཀྱི། དོན་གྱི་གཙོ་བོ་ལ་ཁྱད་པར་མེད་ཅིང༌། ཆོ་གའི་ངོ་བོ་ཐམས་ཅད་གཅིག་པ་ཡིན་པས། མགོན་པོ་སྟག་ཞོན་གྱི་སྐབས་སུ་བཤད་པ་ལྟར། འདོན་པ་སྤོས་པ་ཁོ་ནས་ཆོག་པ་ཡིན་ནོ། །སྙིང་པོ་ནི།
ཨོཾ་མཧཱ་ཀཱ་ལ་རཀྵ་དུ་བེང་ཎི་ཛཿ ཞེས་པའོ། །ལས་སྔགས་ནི། ཨོཾ་བཛྲ་ཡཀྵ་དེ་བ་མཧཱ་ཀཱ་ལ་ཁ་ཀྲོ་དྷ་ཧཱུཾ། ས་མ་ཡ་ཛ་ཛཿ ཐུན་ཀ་ལ་རཀྵ། ཎི་ཛ་རྦད། ཅེས་པ་སྟེ་ཅི་ནུས་སུ་བཟླའོ། །གཏོར་མའི་ཆོ་ག་ཡང་སྟག་ཞོན་གྱི་དེ་ཉིད་འདོན་པ་སྤོས་པས་ཆོགབསྟོད་པ་རྒྱས་པ་ཤིན་ཏུ་མང་ན་ཡང༌། མདོར་བསྡུ་ན། ཧཱུཾ། བདེ་ཆེན་འདུ་འབྲལ་མེད་པའི་ཀློང་དཀྱིལ་ནས། །ཡང་དག་ཡེ་ཤེས་སྐུ་གཅིག་བྱུང་བ་ནི། །མགོན་པོ་བེང་མ་གསང་བའི་སྐུར་བསྟན་པ། །མི་འགྱུར་ཁྲོ་བོ་ཁྱོད་ལ་ཕྱག་འཚལ་བསྟོད། །ལྷ་མོ་གཤིན་རྗེའི་ལྕམ་གཅིག་བདུད་ཀྱི་ཡུམ། །ལྷ་སྲིན་སྡེ་བརྒྱད་གནོད་སྦྱིན་མ་མོ་དང༌། །དེད་དཔོན་ནག་པོ་སྟོང་གི་ཚོགས་བཅས་ལ། །གུས་པའི་ཡིད་ཀྱིས་ཕྱག་འཚལ་བསྟོད་པར་བགྱི། །ཞེས་པའོ། །རྗེས་གནང་གི་ཆོ་ག་ཡང་སྟག་ཞོན་གྱི་སྐབས་ཉིད་འདོན་པ་སྤོ་བ་ཡིན་ནོ། །ཀུན༵་ནས་གནོད་སྦྱིན་མགོན་པོ་ཞེས། །བྱང་ཕྱོགས་བསྟན་སྲུང་དག༵འ་བར་བསྔགས། །ལས་ཚོགས་རྒྱ་མཚོ་སྒྲུབ་འདོད་པས། །འཇུག་སྒོའི་སྙིང༵་པོ༵་འདི་བཞེས་ཤིག །དཔལ་མགོན་པོ་བེང་བཀའ་མའི་སྒྲུབ་ཐབས་ཀྱི་ལེ་ཚན་ནོ།། །།
མགོན་པོ་བེང་སྣུབས་ལུགས་སུ་གྲགས་པ་གཏེར་མའི་སྒྲུབ་ཐབས།
ཨོཾ་སྭཱ་སྟི། དུས་གསུམ་རྒྱལ་བའི་བཀའ་སྡོད་ནི། །ལེགས་ལྡན་ནག་པོ་མཐུ་རྩལ་ཅན། །དེ་ལ་བསྟོད་དེ་ཕྱག་འཚལ་ནས། །སྒྲུབ་ཐབས་ཁྱད་པར་མདོ་ཙམ་བཤད། །མགོན་པོ་བེང་མ་གཏེར་མར་གྲགས་པར་སྒྲུབ་པར་འདོད་ན། སྒྲུབ་ཐབས་ཀྱི་སྤྱི་རྣམས་སྟག་ཞོན་
དང༌། བེང་བཀའ་མ་དང་འདྲ་བ་ལས། རང་གི་མདུན་དུ་ཉི་ཟླ་བམ་ཆེན་བརྩེགས་པའི་གནས་ལ། རང་གི་སྙིང་ག་ནས་ཀྵ་ཡིག་སྤྲོས། ཀྵ་ལས་གྲི་གུག་ཀྵས་མཚན་པ་ལས་མགོན་པོ་བསྐྱེད་དེ། མཧཱ་ཀཱ་ལ་ཧཱུཾ་ཞེས་བརྗོད་པས། མགོན་པོའི་ཕྱག་གཡས་པ་ཙནྡན་གྱི་བེང་ཆེན་དང༌། གཡོན་པ་ན་སྲིན་མོའི་རྐང་གི་མདུང་རིང་བསྣམས་པ། གཞན་སྤྱི་དང་འདྲ་བ་ལས་འཁོར་མ་མོ་བདུན་གྱིས་བསྐོར་བའོ། །སྤྱན་འདྲེན་གྱི་སྐབས་ཛཿཧཱུཾ་བཾ་ཧོཿ ཨེ་ཧྱེ་ཧི་མཧཱ་ཀཱ་ལ་བི་རུ་ཎི་ཛ་ཛ་ཧཱུཾ། ཞེས་པ་བེང་གི་ཕྱག་རྒྱ་བསྟན་ཞིང་ལན་མང་དུ་བརྗོད། སྔགས་ནི་མཧཱ་ཀཱ་ལ་གུ་ན་ཧྲི་ད་ཧཱུཾ་ཛཿ ཞེས་པ་དང༌། ཨོཾ་མཧཱ་ཀཱ་ལ་ཎི་ཐུམ་ལཾ་ཐུམ་རིལ་རྦད། པུ་ཎི་ར་ཛཿ དགྲ་བོའི་སྙིང་ལ་ཛཿ ཏྲཀ་རཀྴ་ཐུཾ་རིལ་རྦད། དགྲ་བོའི་སྙིང་ཁ་རག་ཛཿ ཞེས་པ་སྟེ། བོད་རྦད་གཉིས་སོ། །ཡང་འདི་ལ་འཁོར་གཡས་སུ་ཡུམ་དམར་མོ་གྲི་ཐོད་འཛིན་པ། གཡོན་དུ་རེ་མ་ཏཱི་སྤྱི་དང་མཐུན་པ། མདུན་དུ་ལས་མཁན་རལ་གྲི་དང་ཐོད་ཁྲག་འཛིན་པ་བསྐྱེད། ཨོཾ་དེ་བ་ཨ་སུ་ར་བྲི་ཐི་ཛ་གྷུ་ནི་ཧེཉྫ་ཧོ། བྷ་ཧུ་ར་ཏ་ཙ་ཧིནྡ། ཀུརྦྷི་ཛི་ཛྷ་ཧཱུཾ། ཏྲཀ་རཀྵ་ས་མ་ཡ། དཾ་དཾ་ཛ་ཛ་ཧཱུཾ་ཧཱུཾ། ཞེས་བཟླ་བའི་ལུགས་ཀྱང་ཡོད། ལྷག་མ་རྗེས་གནང་གི་བྱ་བ་ཡན་ཆད་ཐམས་ཅད་སྟག་ཞོན་གྱི་སྐབས་དང་འདྲའོ། །སྣུབས་ཆེན་ལེགས་པའི་བློ་གྲོ་ཀྱིས། །གཏེར་ནས་ཕྱུང་ཞིང་ཀུན༵་དུ་གྲགས། །རབ་དག༵འི་སྒྲུབ་སྐོར་ཆ་ཚང་ལས། ཁྱད་པར་སྙིང༵་པོ༵་ཙམ་ཞིག་བཀོད། །མགོན་པོ་བེང་སྣུབས་ལུགས་སུ་གྲགས་པ་གཏེར་མའི་སྒྲུབ་ཐབས་ཀྱི་ལེ་ཚན་ནོ།། །།མངྒ་ལཾ། །
ལེགས་ལྡན་མཆེད་གསུམ་སྒྲུབ་ཐབས་བསྡུས་པ།
ཨོཾ་སྭཱ་སྟི། སངས་རྒྱས་ཀུན་དང་བདེ་གཤེགས་ཀྱི། །གཙུག་ཏོར་ལས་བྱུང་རིགས་སྔགས་རྒྱལ། །དེ་ལ་བཏུད་ནས་ལེགས་ལྡན་ཆེ། །མཆེད་གསུམ་སྒྲུབ་ཐབས་བསྡུས་པ་བཤད། །མདུན་དུ་མཎྜལ་ནག་པོ་གྲུ་གསུམ་ཚོམ་བུ་ཅན། དེའི་མདུན་དུ་གཏོར་མ་གསུམ་བསྒྲིགས། མཐའ་མཆོད་གཏོར་གྱིས་བསྐོར་བ་བཤམ། བདག་བསྐྱེད་སྔོན་དུ་འགྲོ་བས་མདུན་བསྐྱེད་བསངས་སྦྱངས། སྟོང་པའི་ངང་ལས་པད་ཉི་དང་དགྲ་བགེགས་བསྣོལ་བའི་གདན་གསུམ་ལ། ཧཱུཾ་གསུམ་ལས་ལེགས་ལྡན་ནག་པོ་མཆེད་གསུམ་སྐུ་མདོག་མཐིང་ནག་ཙནྡན་གྱི་བེང་ཆེན་འཛིན་པ། དར་ནག་གི་འཇོལ་བེར་དང༌། གསེར་གྱི་སྐ་པོ་ཆེ་བཅིངས་པ། ཞབས་ལ་སག་ཏིའི་ལྷམ་ཡུ་རིང་གསོལ་ཞིང༌། མི་མགོ་དང་སྦྲུལ་གྱིས་བརྒྱན་པ། དྲག་ལ་རྔམ་པ། དུར་ཁྲོད་ཀྱི་དབུས་ན་མེ་དཔུང་འབར་བའི་ཀློང་ན་བཞུགས་པའོ། །གནས་གསུམ་བྱིན་གྱིས་བརླབས། ཡེ་ཤེས་པ་སྤྱན་དྲངས། དབང་བསྐུར་ཁྲོ་བོའི་རྡོ་རྗེས་རྒྱས་བཏབ། ཨརྒྷཾ་སོགས་ཀྱིས་མཆོད། འཇིག་རྟེན་གསུམ་ལ་དབང་བསྒྱུར་ཅིང༌། །དྲེགས་པ་གསུམ་གྱི་ལྷ་དང་བདུད། །འདུལ་ཕྱིར་ལེགས་ལྡན་ནག་པོ་ཆེ། །མཆེད་གསུམ་སྐུ་ལ་ཕྱག་འཚལ་ལོ། །ཨོཾ་མཧཱ་ཀཱ་ལ་ཤ་རི་བྷྱོཿ ཨོཾ་མཧཱ་ཀཱ་ལ་དུ་ཏྲི་བྷྱོཿ ཨོཾ་མཧཱ་ཀཱ་ལ་དུ་ཏྲི་བྷྱོཿ ཞེས་
བཟླས་པ་བྱ། གཏོར་མ་སྤྱི་དང་མཐུན་པར་བྱིན་གྱིས་བརླབས་ཏེ། སྔགས་གསུམ་གྱི་མཐར་ཨ་ཀཱ་རོ་བཏགས་པ་ལན་གསུམ་གྱིས་ཕུལ། ཕྲིན་བཅོལ་རྒྱས་པའམ། བསྡུ་ན། ལེགས་ལྡན་མཆེད་གསུམ་འཁོར་བཅས་ཀྱིས། །སངས་རྒྱས་བསྟན་པ་བསྲུང་བ་དང༌། །འགལ་རྐྱེན་ཐམས་ཅད་ཞི་བ་དང༌། །བཅོལ་བའི་ཕྲིན་ལས་སྒྲུབ་པར་མཛོད། །དེ་ནས་རྗེས་གནང་ནི། སློབ་མས་རྡོ་རྗེ་འཛིན་པ་སོགས་ཀྱིས་གསོལ་བ་བཏབ། ཡེ་ཤེས་འབེབས་པའི་ཚུལ་དུ་ལྷ་སྐུ་བསྟིམ། ཧཱུཾ་ཧཱུཾ་ཤྲཱི་མཧཱ་ཀ་ལ་ཡ་ཨ་བེ་ཤ་ཡ་ཛ་ཛཿ ས་མཱ་ཡ་ཏིཥྛ་བཛྲ་ཧཱུཾ། ཞེས་བརྗོད་ཅིང་རོལ་མོ་དྲག་ཏུ་བྱ། དེའི་རྐྱེན་གྱིས་སློབ་མ་ལེགས་ལྡན་མཆེད་གསུམ་དུ་སྐད་ཅིག་གིས་བསྐྱེད། སྐུ་སྤྱི་བོར་བཞག་ལ། སངས་རྒྱས་ཀུན་གྱིས་སྐུ་ཡི་རྟགས། །གང་ཞིག་བསྒོམས་པ་ཙམ་གྱིས་ནི། །དངོས་གྲུབ་མྱུར་དུ་ཐོབ་འགྱུར་བ། །དེ་རིང་ཁྱོད་ལ་སྦྱིན་པར་བྱ། །ཨོཾ་ཤྲཱི་མཧཱ་ཀཱ་ལ་ཀཱ་ཡ་ཨ་བྷི་ཥིཉྩ་ཧཱུཾ། བེང་གཏད་ལ། འདོན་པ་སྤོས་ཏེ། གསུང་གི་རྟགས། བཟླས་པ་ཙམ་གྱིས་ནི། ཝཱཀ་ཨ་བྷི་ཥིཉྩ༴ ཕུར་པ་གཏད་དེ། ཐུགས་ཀྱི༴ བཟུང་བ་ཙམ་གྱིས། ཙིཏྟ་ཨ་བྷི། ཐོད་པ་ཁྲག་གང་གཏད་དེ། ཡོན་ཏན། བཅངས་པ་ཙམ་གྱིས། གུ་ཎ་ཨ་བྷི། གཏོར་མ་དགྲ་བགེགས་ཀྱི་དོན་སྙིང་བདུད་རྩིའི་རང་བཞིན་དུ་བྱིན་གྱིས་བརླབས་པ་ལག་ཏུ་གཏད་དེ། ཧཱུཾ། འདི་ནི་དཔལ་ཆེན་ཧེ་རུ་ཀས། །བདུད་ཆེན་བསྒྲལ་བའི་སྙིང་ཡིན་ཏེ། །བུ་ཁྱོད་ཀྱིས་ནི་འདི་ལ་
ལོང༌། །བསྟན་པའི་དགྲ་བགེགས་མྱུར་དུ་སྒྲོལ། །ཀརྨ་ཨ་བྷི་ཥིཉྩ། གཏོར་མའི་བཀའ་བསྒོ་སྤྱི་དང་འདྲ། རྗེས་ཀྱི་བྱ་བ་ཡང་སྤྱི་དང་མཚུངས་སོ། །ཕྱིར་བཟློག་ཆེན་མོའི་གཟུངས་སྔགས་ལས། །བཤད་པར་ཀུན༵་དུ་གྲགས་པ་ཡི། །མིང་པོ་གསུམ་གྱི་སྒྲུབ་ཐབས་ནི། །མདོར་བསྡུས་རབ་དག༵འི་སྙིང༵་པོ༵་ལགས། མགོན་པོ་ལེགས་ལྡན་མཆེད་གསུམ་གྱི་སྒྲུབ་ཐབས་ཀྱི་ལེ་ཚན་ནོ།། །།མངྒ་ལཾ། །
མགོན་པོ་ཨཾ་གྷོ་རིའི་སྒྲུབ་ཐབས།
ཨོཾ་སྭཱ་སྟི། ཧེ་རུ་ཀ་ལ་བཏུད་བྱས་ནས། །དེའི་བཀའ་གཉན་དྲག་གཏུམ་མཆོག །ལེགས་ལྡན་མགོན་ལ་བཏུད་བྱས་ནས། །སྒྲུབ་ཐབས་ངོ་མཚར་ཅུང་ཟད་བྲི། །མཆོད་གཏོར་བཤམས་ལ། ཡི་དམ་གྱི་བདག་བསྐྱེད་སྔོན་དུ་འགྲོ་བས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་རང་གི་མདུན་དུ་བསྲུང་བའི་འཁོར་ལོ་དུར་ཁྲོད་དང་བཅས་པ། ནང་གྲུ་གསུམ་མཐིང་ནག་པདྨ་འདབ་བརྒྱད་དང་བཅས་པ། ཉི་མའི་དཀྱིལ་འཁོར། རུ་ཏྲ་ནག་པོ་གན་རྐྱལ་དུ་བསྒྱེལ་བའི་གདན་དང་བཅས་པ། དེའི་སྟེང་དུ་ཧཱུཾ་ལས་བེང་ཆེན་ཧཱུཾ་གིས་མཚན་པ་ལས་འོད་འཕྲོས་འདུས་ཡོངས་སུ་གྱུར་པ་ལས། དཔལ་ཡེ་ཤེས་ཀྱི་མགོན་པོ་ཨཾ་གྷོ་ར་སྐུ་མདོག་མཐིང་ནག་ཞལ་གཅིག་ཕྱག་གཉིས་པ། གཡས་ཙནྡན་གྱི་བེང་ཆེན་དང༌། གཡོན་ཐོད་ཁྲག་དཀུ་ལ་བརྟེན་པ། སྤྱན་གསུམ་མཆེ་གཙིགས་སྨ་ར་སྨིན་མ་རལ་པ་ཁམ་ནག་གྱེན་དུ་བརྫཻས་པ། ཁྲག་དང་རྒྱུ་མ་ཞལ་དུ་
གསོལ་ཞིང༌། དར་ནག་གི་འཇོལ་བེར་བསྣམས་ཤིང༌། གསེར་གྱི་སྐེ་རགས་བཅིངས་པ། སྦྲུལ་དང་རིན་པོ་ཆེའི་རྒྱན་ཅན། ཐོད་སྐམ་གྱི་དབུ་རྒྱན། བདུད་རིགས་ཀྱི་མགོ་བོའི་དོ་ཤལ་བྱས་པ། ཞབས་ལ་ཟངས་ཀྱི་ལྷམ་བུ་གསོལ་བ། མེ་དཔུང་འབར་བའི་དབུས་ན་བཞུགས་པའོ། །དེའི་ཐུགས་ཀ་ནས་ཧཱུཾ་དང་བྷྱོཿསྤྲོས་པ་ལས། གཡས་སུ་ཧཱུཾ་ལས་ལེགས་ལྡན་ནག་པོ། གཡས་ཙནྡན་བེང་ཆེན་འཕྱར་ཞིང༌། གཡོན་ཐོད་ཁྲག་གཙོ་བོ་ལ་སྟོབ་པ། གཙོ་བོ་དང་ཆ་ལུགས་མཚུངས་ཤིང༌། མི་རོའི་སྟེང་ན་འགྱིང་བའོ། །གཡོན་དུ་བྷྱོཿལས། དཔལ་ལྡན་ལྷ་མོ་སྐུ་མདོག་སྔོ་ནག་བོང་བུ་གྭ་དམར་ལ་ཞོན་པ། གཡས་རལ་གྲི་འཕྱར་ཞིང༌། གཡོན་ཐོད་ཁྲག་ཐུགས་ཀར་འཛིན་པ། རྒྱན་དང་རྣམ་ཆ་རེ་མ་ཏཱི་སྤྱི་དང་འདྲ་བར་བསྐྱེད། དེའི་ཕྱི་རིམ་ལ། གཡས་སུ་མཁའ་འགྲོ་སྡེ་ལྔ། གཡོན་དུ་རྒྱལ་པོ་ཆེན་པོ་བཞི། ཤར་དུ་དྲང་སྲོང་ཀུན་དུ་རིག །རྒྱབ་ཏུ་གནོད་སྦྱིན་ནོར་བུ་བཟང་པོ། དེ་དག་གི་ཕྱི་རོལ་དུ། ཤར་དུ་སྲིན་པོ་སྟོང༌། ཤར་ལྷོར་མ་མོ་སྟོང༌། ལྷོ་རུ་གཟའ་བདུད་སྟོང༌། ལྷོ་ནུབ་ཏུ་བཙན་དམར་སྟོང༌། ནུབ་ཏུ་གྱིང་ཕོ་སྟོང༌། ནུབ་བྱང་དུ་སྨུ་བདུད་སྟོང༌། བྱང་དུ་བདུད་མོ་སྟོང༌། བྱང་ཤར་དུ་གཤིན་རྗེ་སྟོང༌། དེ་དག་གི་ཕྱི་རོལ་དུ་སྡེ་
བརྒྱད་ཀྱི་ཚོགས་ཀྱིས་བསྐོར་བར་གྱུར། རང་གི་སྙིང་ག་ནས་འོད་ཟེར་འཕྲོས། དུར་ཁྲོད་རོལ་པའི་གནས་ནས། མགོན་པོ་འཁོར་བཅས་བཛྲ་ས་མཱ་ཛཿ ཧཱུཾ། དད་པ་དང་ནི་དམ་ཚིག་གིས། །ཚུར་གཤེགས་དཔལ་ལྡན་མགོན་པོའི་ཚོགས། །འཁོར་དང་བཅས་པ་འདིར་བཞུགས་ཤིག །འབར་བའི་སྐུ་སྟོན་མཆོད་པ་བཞེས། །ཨོཾ་ཨཾ་གྷོ་ར་མཧཱ་ཀཱ་ལ་ཛཿཧཱུཾ་བཾ་ཧོཿ ས་མ་ཡ་ཏིཥྛ་ལྷན། ཨརྒྷཾ་ནས་ཤཔྟའི་བར་གྱིས་མཆོད། ཧཱུཾ། ལྷ་མིན་གདུག་པའི་དམག་ཚོགས་གཡུལ་བཟློག་ཅིང༌། །སྟོབས་ལྡན་ལྷ་དམག་དཀར་པོ་འབུམ་དང་བཅས། །བགེགས་འདུལ་དཔལ་ལྡན་མགོན་པོ་འཁོས་བཅས་ལ། །དད་པའི་སེམས་ཀྱིས་བསྟོད་ཅིང་ཕྱག་འཚལ་ལོ། །ཨོཾ་ཨཾ་གྷོ་ར་མཧཱ་ཀཱ་ལ་ཡ་ཏི་སུ་ཛ་ཧོ་པྲ་ཏིཥ་ཧོ། ཞེས་ཕྱག་འཚལ་ལོ། །མཧཱ་པཉྩ་ཨ་མྲྀ་ཏ་ཨོཾ་ཨཱཿཧཱུཾ། ཞེས་ནང་མཆོད་ཕུལ། ཨོཾ་ཨཾ་གྷོ་ར་མཧཱ་ཀ་ལ་དུ་རི་སྭཱཧཱ་ཧཱུཾ་ཧཱུཾ། གཙོ་བོའི་སྔགས་སོ། །ཨོཾ་མཧཱ་ཀཱ་ལ་རཀྵ་ཧཱུཾ་ཧཱུཾ་ཕཊ་ཕཊ། ལས་མགོན་གྱིའོ། །མ་མ་རུ་རུ་ཙེ་རཀྨོ་ཙ་ལེ་བྷྱོཿཧཱུཾ་ཕཊ། ལྷ་མོའི་འོ། །གཏོར་མ་སྤྱི་དང་མཐུན་པར་བྱིན་གྱིས་བརླབས། སྙིང་པོའི་མཐར་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། བཏགས་པ་ལན་གསུམ་དང༌། སྤྱི་མཐུན་དུ་ཤཱ་ས་ན་དང༌། ཨ་ཀཱ་རོས་གཏོར་མ་ཕུལ། དམ་རྫས་རྒྱན་གྱི་གཏོར་མ་འདི་བཞེས་ལ། །
བདག་ལ་སྡང་བའི་དགྲ་བགེགས་མ་ལུས་པ། །མ་རུངས་ཚོགས་རྣམས་མྱུར་དུ་རླག་པར་མཛོད། །སངས་རྒྱས་བསྟན་པ་བསྲུང་བའི་དུས་ལ་བབ། །ཞེས་འཕྲིན་ལས་གཞོལ། རྗེས་ཀྱི་བྱ་བ་ནི་སྤྱི་དང་འདྲ་ལ། རྗེས་གནང་བྱེད་པར་འདོད་པས། ཆོས་འབྱུང་གི་སྟེང་དུ་དཔལ་གཏོར་བཞགདེ་ལ་གྲི་སྙིང་དང༌། ཙ་ཀ་ལི་དང༌། དར་ནག་གི་འཕན་དང༌། སྟག་རས་སོགས་འཛུགས་པར་བཤད་ཀྱང༌། ཙ་ཀ་ལི་དང་འཕན་ཙམ་གདགས། འཕྲིན་ལས་བཅོལ་བ་ཡན་ཆད་གོང་བཞིན་བྱས་ལ། སློབ་མས་མཎྜལ་ཕུལ། སྐྱབས་འགྲོ་སེམས་བསྐྱེད་བྱ། གུར་ནས་འབྱུང་བའི་རྒྱུན་བཤགས་དང༌། རིགས་ལྔའི་སྡོམ་བཟུང་བྱེད། བགེགས་གཏོར་བཏང་སྟེ། སུམ་བྷ་ནིས་བགེགས་བསྐྲད། མདུན་བསྐྱེད་གསལ་བཏབ། ཡེ་ཤེས་པ་སྤྱན་འདྲེན་བྱ། གཏོར་མ་སྤྱི་བོར་བཞག་ལ། གཏོར་སྣོད་རྣམ་དག་ཆོས་ཀྱི་དབྱིངས། །གཏོར་མ་ཡེ་ཤེས་བདུད་རྩི་ལྔ། །སྐལ་ལྡན་ཁྱོད་ལ་དབང་བསྐུར་བས། །བུམ་པའི་དབང་མཆོག་ཐོབ་པར་ཤོག །སྙིང་པོའི་མཐར་བཱ་ལིཾ་ཏ་ཨ་བྷྀ་ཥིཉྩ་ཧཱུཾ། གཏོར་མའི་ལྷ་སློབ་མའི་ཚངས་བུག་ནས་ཐིམ་པས་སློབ་མ་མགོན་པོའི་སྐུར་གྱུར། ཐོད་པ་བདུད་རྩིའི་གང་བ་མགྲིན་པར་གཏད་དེ། བནྡྷ་བསམ་འཕེལ་ཡིད་བཞིན་ནོར་བུའི་སྣོད། །རང་བྱུང་བདེ་སྐྱེད་དམ་རྫས་བདུད་རྩི་ཡིས། །སྐལ་ལྡན་རིགས་ཀྱི་བུ་ལ་དབང་བསྐུར་བས། །གསང་བའི་དབང་མཆོག་དམ་པ་ཐོབ་པར་ཤོག །
སྙིང་པོའི་མཐར་ཨ་མྲྀ་ཏ་ཨ་བྷི་ཥིཉྩ་ཧཱུཾ། ནང་མཆོད་ནས་ཀྱང་སྦྱིན། གཏོར་མ་ནས་དུམ་ཅིག་བཅད་དེ་སློབ་མ་ཟར་བཅུག་ལ། བཱ་ལིཾ་ཏ་ནི་མགོན་པོ་སྟེ། །བཟའ་དང་རོལ་པ་གཉིས་མེད་པས། །སྐལ་ལྡན་སྐྱེས་བུ་ཁྱོད་ལ་སྦྱིན། །གསུམ་པ་དབང་མཆོག་ཐོབ་པར་ཤོག །སྙིང་པོའི་མཐར་ཀཱ་ཡ་ཝཱཀ་ཙིཏྟ་ཨ་བྷི་ཥིཉྩ་ཧཱུཾ། ཐོད་འཕྲེང་ལག་ཏུ་གཏད་དེ། བླ་མེད་རིན་ཆེན་ཐོད་སྐམ་འཕྲེང༌། །མ་ཡེངས་རྒྱུན་དུ་བཟུང་བའི་རྟགས། །སྐལ་ལྡན་སྐྱེས་བུ་ཁྱོད་ལ་སྦྱིན། །བཞི་པའི་དབང་མཆོག་ཐོབ་པར་ཤོག །ཅེས་བརྗོད་ལ་བཟླས་ལུང་སྤྱི་དང་མཐུན་པར་སྦྱིན། ལྷག་མ་རྗེས་ཀྱི་བྱ་བ་སྤྱི་དང་འདྲའོ། །ཀུན༵་ནས་དམ་པ་སངས་རྒྱས་ཀྱི། །བཀའ་སྲུང་རབ་ཏུ་དག༵འ་བར་གྲགས། །འཁོར་བཅས་སྒྲུབ་ཐབས་རྗེས་གནང་གི །སྙིང༵་པོ༵་ཙམ་ཞིག་བྲིས་པ་ཡིན། །མགོན་པོ་ཨཾ་གྷོ་རིའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ལེགས་ལྡན་ཇོ་བོ་ལུགས་ཀྱི་སྒྲུབ་ཐབས།
ཨོཾ་སྭཱ་སྟཱི། སངས་རྒྱས་རྣམས་དང་བླ་མ་དང༌། །མར་མེ་མཛད་དཔལ་ལ་བཏུད་ནས། །ལེགས་ལྡན་ནག་པོ་སྒྲུབ་པའི་ཐབས། །དྲི་བྲལ་མདོར་བསྡུས་བཤད་པར་བྱ། །མདུན་དུ་བྲིས་སྐུ་དང༌། མཆོད་གཏོར་རྒྱ་ཆེར་བཤམ། ཕྱག་རྡོར་གྱི་བདག་བསྐྱེད་སྔོན་དུ་འགྲོ་བས། སྟོང་པའི་ངང་ལས། རང་གི་མདུན་དུ་གྲུ་གསུམ་མཐིང་ནག་འབར་བའི་གཞལ་ཡས་ཁང་ཕྱི་རོལ་དུར་ཁྲོད་ཆེན་པོས་བསྐོར་བའི་དབུས་སུ། པད་ཉི་བམ་རོ་བསྣོལ་བའི་གདན་ལ་ཧཱུཾ་ལས་ལེགས་ལྡན་
ནག་པོ་སྐུ་མདོག་སྨུག་ནག་ཕྱག་གཡས་ན་བེང་དང༌། གཡོན་ན་མདུང་འཛིན་པ། དར་གྱི་འཇོལ་བེར་དང་གསེར་གྱི་སྐེ་རགས་ཅན། ཞབས་ལ་སག་ཏིའི་ལྷམ་ཡུ་རིང་གསོལ་བ། ཞབས་གཡོན་བརྐྱང་གི་སྟབས་ཀྱིས་བཞུགས་ཤིང༌། མི་མགོའི་དོ་ཤལ་ཅན། མེ་དཔུང་འབར་བའི་དབུས་ན་བཞུགས་པའོ། །ཡང་ན་གཅེར་བུ་གཤིན་རྗེ་ཆས་སུ་བཞུགས་པའོ། །ཡང་ན་གཅེར་བུ་གཤིན་རྗེའི་ཆས་སུ་བཞུགས་པར་བསྒོམ་ཀྱང་རུང༌། མཆེད་གསུམ་བྱེད་ན་གཡས་སུ་བེང་མ་དང༌། གཡོན་དུ་གྲི་གུག་མ་བསྒོམ་པར་བྱའོ། །གསུམ་སྦྲག་ཏུ་ཐུགས་ཀར་བེང་མ་དང༌། དེའི་ཐུགས་ཀར་ཡང་གྲི་གུག་མ་སྒོམ་མོ། །གང་ལྟར་ཡང༌། རྒྱབ་ཏུ་གསང་བའི་མཁའ་འགྲོ་མ་དམར་མོ་གྲི་ཐོད་འཛིན་པ་དང༌། མདུན་དུ་དཔལ་ལྷ་མོ་རེ་མ་ཏཱིའམ། བདེ་བསྐྱེད་མཁའ་འགྲོ་སྐུ་མདོག་སྨུག་མོ་ཕྱག་གཡས་ན་གདུག་པའི་གཟའ་སྟག་གི་མགོའི་རྣམ་པ་ཅན། གཡོན་པས་ཤོ་རྡེའུ་དཀར་ནག་དང་བཅས་པ་འཛིན་པའོ། །གནས་གསུམ་བྱིན་རླབས། ཡེ་ཤེས་སྤྱན་འདྲེན། དབང་བསྐུར་རྒྱས་བཏབ་རྣམས་སྤྱི་དང་མཐུན་པ་ལས། མི་བསྐྱོད་པས་དབུ་བརྒྱན་ཞེས་བརྗོད། ལྷ་མིན་དམག་ཚོགས་གཡུལ་བཟློག་ཅིང༌། །ལྷ་དམག་དཀར་པོའི་དབུགས་འབྱིན་པ། །ལེགས་ལྡན་ནག་པོ་འཁོར་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །དེ་ནས་བཟླས་པའི་དམིགས་པ་གསལ་བཏབ་ལ། ཨོཾ་ཏྲི་མཧཱ་ཀཱ་ལ་ག་
ཎ་གུ་ཏི་སྭཱཧཱ། ན་མཿཏྲི་མཧཱ་ཀཱ་ལ་གྒ་ནི་ཤ་ཡ་ན་མོ་ཡོ་གི་ནཱི་ནཱཾ། ཏདྱ་ཐཱ། ཨོཾ་ཧི་ལི་ཧི་ལི། ཀེ་ཏི་ཀེ་ཏི་ནི། ཙེ་ཏི་ནི་ཙེ་ཏི་ནི་སྭཱཧཱ། ཞེས་མགོན་པོ་རྣམས་ཀྱི་སྤྱི་སྔགས་དང༌། བདེ་བསྐྱེད་མ་ལ། ཨོཾ་ཧྲིཿསེ་ལི་ཀི པྲད་ཛ་ལ། ཨ་མོ་གྷ་ཧྲཱིཿཧ་ཧཱུཾ་ཕཊ། ཅེས་བཟླའོ། །གཏོར་མ་བྱིན་རླབས་གྲི་གུག་མ་དང་འདྲ། སྔགས་ཀྱི་མཐར་ཨ་ཀཱ་རོ་བཏགས་པ་ལན་གསུམ་གྱིས་མཆོད་བསྟོད་འདོད་དོན་གསོལ་བཏབ་བྱ། འདིའི་རྗེས་གནང་གི སྔོན་འགྲོ་རྣམས་ལྷོ་ནུབ་མགོན་པོའི་སྐབས་སུ་འཆད་པ་དང༌། འདྲ་ཞིང༌། སློབ་མ་མགོན་པོར་བསྐྱེད་མི་དགོས། གཏོར་མ་ལྷར་བསྐྱེད་ཅིང༌། ཡེ་ཤེས་པ་སྤྱན་འདྲེན་པ་སྐུ་དང༌། གཏོར་དབང་ཐུགས་དང༌། སྔགས་ཀྱི་བཟླས་ལུང་གསུང་གི་རྗེས་གནང་རྣམས་སྦྱིན་ནོ། །རྙིང་མ་ཀུན༵་གྱི་ལེགས་ལྡན་དང༌། །མ་འདྲེས་ཇོ་བོའི་ལུགས་དག༵འ་བ། །འདི་ལ་སྙིང༵་ནས་ཡིད་ཆེས་པས། །མདོ་ཙམ་གསལ་པོ༵ར་བཀོད་པ་ཡིན། །རྩིས་མགོན་ལྷ་ཆེན་དཔལ་འབར་རམ། ལེགས་ལྡན་ཇོ་བོ་ལུགས་ཀྱི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ནག་པོ་ཆེན་པོ་གྲི་གུག་དཔའ་གཅིག་གི་སྒྲུབ་ཐབས།
ཨོཾ་སྭཱ་སྟི། ནག་པོ་ཆེན་པོ་སྒྲུབ་པའི་ཐབས། །ཉུང་གསལ་བྱིན་རླབས་བཀའ་བབས་དང༌། །ཨ་ཏི་ཤ་ཡི་མན་ངག་ནི། །བཅོས་སླད་བྲལ་བ་འདི་ལྟར་ལགས། །སྐྱབས་འགྲོ་སེམས་བསྐྱེད་སྔོན་དུ་བཏང་སྟེ། སྟོང་པ་ལ་ཅུང་ཟད་མཉམ་པར་བཞགཨོཾ་སྭ་བྷཱ་ཝ་སོགས་བརྗོད། པདྨ་དང་ཉི་མའི་སྟེང་དུ། མི་རོ་བཀན་པའི་གདན་ལ། རང་སྐད་ཅིག་གིས་དཔལ་ལྡན་མཧཱ་
ཀཱ་ལ་སྐུ་མདོག་དུས་མཐའི་སྤྲིན་དང་མཚུངས་པ། ཞལ་གཅིག་ཕྱག་གཉིས་པ། གཡས་གྲི་གུག་འཕྱར་ཞིང༌། གཡོན་ཐོད་པ་ཁྲག་གང་ཐུགས་ཀར་འཛིན་པ། སྤྱན་གསུམ། མཆེ་བ་གཙིགས་ཤིང༌། ལྗགས་བསྐྱོད་པ། སྨ་ར་དང་སྨིན་མ་དམར་སེར་གྱེན་དུ་བརྫེས་པ། སྦོམ་ཐུང་ཡན་ལག་ཧྲགས་ཤིང༌། གསུས་ཁྱིམ་ཆེ་བ། སྟག་ལྤགས་ཀྱི་ཤམ་ཐབས་ཅན། མི་མགོ་སྐམ་པོ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ་བྱས་པ། ཞབས་གཡས་བསྐུམ་གཡོན་བརྐྱང་བའི་སྟབས་ཀྱིས། མེ་ཚན་དྲག་པོ་འབར་བའི་ཀློང་ན་བཞུགས་པའོ། །ཐུགས་ཀར་རཾ་ལས་ཉི་མའི་སྟེང་དུ། ཧཱུཾ་མཐིང་ནགདེ་ལས་འོད་ཟེར་འཕྲོས། ཤར་ཕྱོགས་ནས་རྒྱལ་བ་མི་བསྐྱོད་པ་བཛྲ་ས་མཱ་ཛཿ རང་གི་སྤྱི་བོར་རིགས་བདག་གི་ཚུལ་དུ་བཞུགས་པར་གྱུར། ཡང་ཧཱུཾ་ལས་འོད་ཟེར་སྨུག་ནག་ཤིན་ཏུ་ཚ་བ་འཕྲོས། ཕྱོགས་བཅུའི་སེམས་ཅན་གདུག་པ་ཅན་ཐམས་ཅད་ཀྱི་ལུས་རྣམས་གདུངས་ཤིང༌། སེམས་ངན་པ་ཐམས་ཅད་བསྲེགས་པར་གྱུར། ཧཱུཾ་གི་མཐར་སྔགས་ཀྱིས་བསྐོར་བ་བསྒོམས་ལ། ཨོཾ་མཧཱ་ཀཱ་ལ་ཧ་ན་ཧ་ན་བཛྲེ་ཎ་ཧཱུཾ་ཕཊ། ཅེས་ཅི་ནུས་སུ་བཟླས་པའི་མཐར། དཔལ་མགོན་པོས་བདག་གི་དགྲ་ལྷ་དང་སྲུང་མ་ཆེན་པོ་མཛོད་ལ། སྤྱི་དང་ཁྱད་པར་གྱི་བསྟན་པ་སྐྱོང་བ་དང༌།
བདག་དང་སེམས་ཅན་རྣམས་ལ་གནོད་བྱེད་ཐམས་ཅད་འདུལ་ཞིང༌། འཕྲིན་ལས་རྣམ་པ་བཞི་འགྲུབ་པ་དང༌། བར་ཆད་བསྲུང་ཞིང༌། ཡིད་ལ་བསམ་པའི་དོན་ཐམས་ཅད་འགྲུབ་པར་མཛད་དུ་གསོལ། དཔལ་མགོན་པོ་ཁྱོད་ཀྱི་གོ་འཕང་ཐོབ་པར་མཛད་དུ་གསོལ། ཞེས་བདག་བསྐྱེད་ཀྱི་ལྷ་ལ་གསོལ་བ་དྲག་ཏུ་བཏབ་ཅིང༌། མ་འབྱོར་བ་དང་སོགས་ཀྱིས་བཟོད་པར་གསོལ། དགེ་བ་བསྔོ་བའོ། །བཟའ་བཏུང་ནམ་བྱེད་པའི་ཕུད་ནས་མི་ཆུང་ཙམ་བཅད་ལ། ཨོཾ་ཨཱཿཧཱུཾ་ལན་གསུམ་གྱིས་བདུད་རྩིར་བྱིན་གྱིས་བརླབས། ཨོཾ་མཧཱ་ཀཱ་ལ་བཛྲ་ས་མཱ་ཛཿ ཞེས་སྤྱན་དྲངས། སྙིང་པོའི་མཐར་ཨི་དཾ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། བཏགས་པ་ལན་གསུམ་གྱིས་འབུལ། ཨོཾ་མུཿ ཞེས་གཤེགས་སུ་གསོལ། ཁྱད་པར་མཆོད་པ་ནི། དུས་བཟང་ཐམས་ཅད་དང༌། ཁྱད་པར་ཉེར་དགུའི་མཚན་མོ། མདུན་དུ་མཎྜལ་ནག་པོ་གྲུ་གསུམ་ཞིག་བྱས་ལ། ཁྲག་དང་ཆང་གིས་བྱུགས། ཚོམ་བུ་ནག་པོ་ཞིག་བཀོད། དེའི་མདུན་དུ། བཤོས་བུའི་གཏོར་མ་ལག་ལེན་ལྟར་གསུམ་བཤམ། མཆོད་པ་སྣ་ལྔ་གཅིག་དང༌། མཆོད་ཡོན། མེ་ཏོག་ནག་པོའི་ཕུང་པོ། སྤོས་སྦྱོར་རམ། གུ་གུལ། དཔལ་འབར་གསུམ་རྣམས་བཤམ། བདག་བསྐྱེད་ཡི་དམ་མམ། གོང་དུ་བསྟན་པའི་མགོན་པོ་ཉིད་སྔོན་དུ་འགྲོ་བས། མཆོད་རྫས་རྣམས་སྤྱི་དང་མཐུན་པར་བྱིན་གྱིས་བརླབས། གཏོར་མ་ཨ་མྲྀ་ཏས་བསངས། སྭ་བྷཱ་ཝས་སྦྱངས། ཨོཾ་སྟོང་པར་གྱུར། ཨཱཿཐོད་པའི་སྣོད་ཡངས་ཤིང་རྒྱ་ཆེ་བ། ཧཱུཾ་ཤ་ལྔ་
བདུད་རྩི་ལྔས་གང་བ། ཧོཿཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་ཧོཿ ལན་གསུམ་བརྗོད། རང་གི་སྙིང་ག་ནས་འོད་ཟེར་འཕྲོས། དུར་ཁྲོད་ཆེན་པོའི་གནས་བརྒྱད་ནས། མགོན་པོ་ནག་པོ་འཁོར་དང་བཅས་པ་བཛྲ་ས་མཱ་ཛཿ མཎྜལ་གྱི་ཚོམ་བུའི་སྟེང་དུ་འཁོད་པ་ནི། དཔལ་ལྡན་མཧཱ་ཀཱ་ལ་ནས། ཧཱུཾ་མཐིང་ནག་གོ །མཆོད་ཡོན་ནས། ཤཔྟའི་བར་གྱིས་མཆོད། སྲིན་གསུགས་མའི་ཤོ་ལོ་ཀ་དང་པོས་བསྟོད། མདུན་བསྐྱེད་ཀྱི་ཐུགས་ཀའི་ཧཱུཾ་ལ་དམིགས་ནས། བཟླས་པ་ཅུང་ཟད་བྱས། གཏོར་མ་དང་པོ་གསོལ་བར་དམིགས་ལ། ནམ་མཁའ་མཛོད་ཀྱི་སྔགས་རྒྱས་རྒྱ་ཆེར་སྤེལ། སྙིང་པོའི་མཐར་ཨི་དཾ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་བདུན་གྱིས་བསྟབ། བདག་བསྐྱེད་ཀྱི་སྐབས་བཞིན་གསོལ་བ་དྲག་ཏུ་བཏབ། གཏོར་མ་གཉིས་པའང་སྔར་དང་འདྲ་བ་ལས། སྙིང་པོའི་མཐར། ཨ་ཀཱ་རོ་བཏགས་པས་འབུལ། འདི་ལ་འདོད་དོན་མི་ཞུ། གསུམ་པ་ཡང་ནམ་མཁའ་མཛོད་ཀྱི་སྔགས་རྒྱ་སྔོན་དུ་འགྲོ་བས། ཨོཾ་མཧཱ་ཀཱ་ལ་ཧཱུཾ་ཕཊ། ས་པ་རི་ཝཱ་རེ་བྷྱཿ ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ། ཨོཾ་སཾ་བྷ་ར་སཾ་བྷ་ར་ཧཱུཾ། ཞེས་ལན་ཉི་ཤུ་རྩ་གཅིག་ཙམ་གྱིས་འཁོར་དང་བཅས་པ་རྣམས་ལ་འབུལ་ལོ། །སྤོས་སྦྱོར་བསྲེག་ཅིང༌། མེ་ཏོག་རེ་རེ་ནས་གཏོར་མ་ལ་འབུལ་བ་དང༌། སྙིང་པོ་ཁོ་ན་བཟླས་པར་བྱའོ། །བསྟོད་པ་སྲིན་གཟུགས་མ་ཡོངས་རྫོགས་ཀྱི་མཐར། འདས་དང་མ་བྱོན་ད་ལྟར་གྱི། །བསྟན་པ་བསྲུང་བར་ཞལ་བཞེས་པ། །ནག་པོ་ཁྱོད་ནི་ཡིན་པ་སྟེ། །གདུག་པ་ཚར་གཅོད་
འཇིགས་པའི་གཟུགས། །དབུ་སྐྲ་ཁམ་ནག་གྱེན་བརྫེས་པས། །སྟེང་གི་ལྷ་ཚོགས་འཇིགས་པར་བྱེད། །སྤྱན་བགྲད་ལྗགས་འགྲིལ་མཆེ་གཙིགས་ནས། །བར་གྱི་ལྷ་ཚོགས་བསྲེག་པར་མཛད། །གཡས་ན་གྲི་གུག་བསྣམས་པ་ནི། །དགྲ་བགེགས་འདུལ་ཞིང་བདུད་མགོ་གཅོད། །གཡོན་ན་ཐོད་པ་བསྣམས་པ་ནི། །གནོད་སེམས་ཅན་གྱི་སྙིང་ཁྲག་གསོལ། ཁྲོས་པས་ཞབས་གཉིས་བརྡབས་པ་ཡིས། །མ་རུངས་རྣམས་ཀྱི་ལུས་ལ་ཉེད། །ནག་པོ་ཆེ་ལ་ཕྱག་འཚལ་འདུད། །གང་ལ་བྱ་བ་རྡུལ་དུ་རློགཅེས་སོགས་འཕྲིན་བཅོལ་ཅི་ཤེས་བྱ། དཔལ་འབར་གསུམ་ཡང་སྦར་ཏེ། ཨོཾ་མཧཱ་པྲ་དཱི་པེ་ཧཱུཾ། ཞེས་ལན་གསུམ་བརྗོད་ཅིང༌། གཏོར་མ་རྣམས་ལ་རེ་རེ་བཙུགས། བཟོད་གསོལ་གྱི་མཐར། གཏོར་མ་ཁང་སྟེང་ངམ་དུར་ཁྲོད་དུ་བསྐྱལ། ཨོཾ་མུཿ ཞེས་ཚོམ་བུ་བསྡུའོ། །ཚུལ་འདིས་སྔགས་འབུམ་ཕྲག་གཅིག་གིས་བསྙེན་པ་འགྲུབ་པར་བཤད། འབུམ་ཕྲག་བཅུ་གསུམ་གྱིས་སྟེང་གདོན་གྱིས་ཟིན་པའང་ཐར་བར་ཐེ་ཚོམ་མེད་ཅེས་གསུང༌། འབུམ་ཕྲག་སུམ་ཅུ་རྩ་གཉིས་ཀྱིས་ནི། ཤིན་དུ་སྐལ་བ་དམན་ཡང་ལས་ཐམས་ཅད་འགྲུབ་ཅེས་བཤད་ལ། འོན་ཀྱང་ད་ལྟར་འབུམ་ཕྲག་བཅོ་བརྒྱད་བསྙེན་ཚད་དུ་མཛད་ཅིང༌། དེ་ནས་སྒྲུབ་པ་ལ་འཇུག་པར་འདོད་ན། བྲིས་སྐུ་མདུན་དུ་བཀྲམ་ལ། མཎྜལ་མ་གཏོགས་གོང་གི་མཆོད་ཆོག་དང་འདྲ་བར་བྱ་བ་ལས། ཁྱད་པར་ནི་མདུན་བསྐྱེད་ཀྱི་བཟླས་པ་ཁོ་ན་གཙོ་བོར་བྱེད་ཅིང༌། སྔར་གྱི་མཎྜལ་གྱི་ཚབ་བྲིས་
སྐུ་ལ་བྱེད་པ་དང༌། སྔགས་འཕྲེང་ཞལ་ནས་ཞལ་ལྟེ་བ་ནས་ལྟེ་བར་འཁོར་བའི་དམིགས་པ་བྱེད། གཏོར་མ་གསུམ་པོ་སྒྲུབ་པ་མ་ཐོན་པར་ཕྱིར་མི་གཏོང་ཞིང༌། ཐུན་རེ་རེ་བཞིན་འབྱོར་པ་ཆེ་ན་གསར་པ་རེ་བཤམས་ལ། མིན་ན་ཁ་གསོ། ཐུན་མཚམས་སུ་གཤེགས་གསོལ་མི་བྱེད་པར་བྲིས་སྐུ་ལ་བརྟན་བཞུགས་བྱ། ཐུན་ཐམས་ཅད་དམ་སྲོད་ཐུན་ལ་ཐུན་གཏོར་རེ་ངེས་པར་གཏོང༌། ཚུལ་དེས་འབུམ་ཕྲག་བཅོ་བརྒྱད་བཟླས་ན། སྒྲུབ་པའི་གྲངས་ཚད་ཐོན་པར་བྱེད་དོ། །ཚུབ་མ་ཤུགས་དྲག་ཁང་ཐོག་འཚེག །གླུ་ལེན་བྱ་རོག་ཨ་ཙ་ར། །དར་ནག་ཐོགས་ཏེ་འོ་དོད་འབོད། །ཕྱིའི་རྟགས་སུ་ཤེས་པར་བྱ། །སློབ་དཔོན་འོངས་ནས་གཏམ་སྨྲ་དང༌། །ཆོས་འཆད་ལུང་སྟོན་གདུགས་འབུལ་དང༌། །བནྡྷ་སྟོན་པ་ནང་གི་རྟགས། །མགོན་པོའི་སྐུ་སྟོན་གྲི་གུག་དང༌། །མཁའ་འགྲོ་ཚོགས་དང་ཅ་ཅོ་འདོན། །དངོས་གྲུབ་སྟེར་བར་རྨི་བ་དང༌། །སྟག་དང་སེང་གེ་འཕྱོང་བ་དང༌། །ཤེལ་གྱི་མཆོད་རྟེན་བསྐོར་བ་དང༌། །གཏོར་ཆེན་ཁྱེར་འཕྲད་འགྲུབ་པའི་རྟགས། །མཚོན་ཆའི་ཆར་དང་ཨ་ཙ་ར། །འཁྲུགས་རྒོལ་དུ་བ་བཟློག་རྟགས་སོ། །ཞེས་གསུང་བ་ལྟར་རོ། །སྙིང་པོ་ལ་བཛྲེ་ཎ་བདག་ལ་སྲུངས་ཤིག་སྲུངས་ཤིག་ཧཱུཾ་ཕཊ་སྭཱ་ཧཱ། ཞེས་འཁོར་ལོ་འཁོར་བའི་ཚུལ་གྱིས་དམིགས་པ་གསལ་བཏབ་སྟེ་བཟླས་ན། ནད་གདོན་ཐམས་ཅད་ཐོན་ཅིང༌། བསྲུང་བ་དང༌། བྱིན་རླབས་ཀྱི་མཆོག་གོ །ཡང་གདོན་འདུལ་ན། བཛྲེ་ཎ་བདག་གམ་ཆེ་གེ་མོ་ལ་གནོད་པར་བྱེད་པའི་རྒྱལ་འགོང་མཱ་ར་ཡ་ཛ་ཛ་ཧཱུཾ་ཕཊ། ཞེས་བཟླ། རྒྱལ་འགོང་ཞེས་པར་གང་དགོས་སྤེལ། ཡང་བཛྲེ་ཎ་བ་སུ་པུཥྟིཾ་ཀུ་རུ་སྭཱཧཱ། བདག་གི་འབྱོར་བ་
པུཥྟིཾ་ཀུ་རུ་སྭཱཧཱ། ཞེས་པས་ལོངས་སྤྱོད་ལྷག་པར་འཕེལ་བར་འགྱུར་ལ། ཨཱ་ཡུ་པུཥྟིཾ་ཚེ་པུཥྟིཾ་ཞེས་འདོན་པ་སྤོས་ན། ཚེ་སྒྲུབ་ཀྱི་མཆོག་ཡིན་ལ། བསྲུང་བ་དང་འདྲེ་འདུལ་གཙོ་བོར་ཕྱི་དྲོ་བཟླ་ཞིང༌། ལོངས་སྤྱོད་དང་ཚེ་སྤེལ་བ་གཙོ་བོར་སྔ་དྲོ་བཟླའོ། །སྒྲུབ་པ་དང་ལས་སྦྱོར་གྱི་ཚེ། བཟློག་པའི་རྟགས་བྱུང་ན། ཨོཾ་མཧཱ་ཀཱ་ལ་བཱ་ལིཾ་ཧཱུཾ་ཧཱུཾ་རིལ་རྦད། པུ་ནི་ཛ་མཧཱ་ཀཱ་ལ་ཏྲཀྴད་སིདྡྷི་མ་མ་དུ་ཏི་ཛཿ གླིང་བྱིན་ཚལ། སྙིང་ནས་ཛཿ དགྲ་བོ་མཱ་ར་ཡ་ཛ་ཛཿ ཞེས་བརྒྱ་རྩ་ཙམ་བཟླས་པས་སེལ་བར་འགྱུར་རོ། །དྲག་པོའི་ལས་སྦྱོར་ནི། སྒྲུབ་པའི་དུས་ཀྱི་ཆོ་ག་ལ་འདོན་པ་སྤོས་ནས། གཏོར་མ་དང་སྦྱིན་བསྲེག་ལ་བརྟེན་པའི་དགྲ་བསད་ཞིག་ཡོད་དེ། འདིར་མ་བྲིས་སོ། །དེའི་ཚེ་དྲག་ཏུ་བསྐུལ་བའི་ཚིག་ནི། གང་ཞིག་དཀོན་མཆོག་གསུམ་གནོད་དང༌། །བསྟན་པ་ལ་གནོད་མཚམས་མེད་བྱེད། །བདག་ལ་སྡང་བའི་དགྲ་བོ་འདི། །ཕྱི་དུས་འགྱང་བར་མ་འཇོག་པར། །བདག་གིས་བསྒོ་བ་ཀུན་ཁུག་ལ། །ལིང་ག་འདི་ལ་མྱུར་དུ་ཁུག །འདིའི་ཤ་ཟོ་ཁྲག་ལ་རོལ། །རུས་པ་ཀླད་པ་ནང་ཁྲོལ་དྲོངས། །རིགས་རྒྱུད་རྩད་ནས་ཆོད་ལ་ཤོག །མཛའ་བ་ཀུན་དང་ཁྲོལ་ལ་ཤོག །ཡང་ན་འདིའི་ཕྱིར་འབྲངས་ནས། །ཏིལ་འབྲུ་ཙམ་དུ་མཛད་དུ་གསོལ། །ཞེས་བརྗོད་པ་སྟེ། འདི་ཇོ་བོའི་གསུང་ཡིན་ནོ། །ཞེས་སངས་རྒྱས་སྒོམ་པ་གསུང་ངོ༌། །བཟླས་ལུང་བྱ་བའི་ཚུལ་ནི།
སློབ་དཔོན་གྱི་བྱ་བ་ཉེར་དགུ་མཆོད་པ་བཞིན་ལས། བཟླས་པའི་མཚམས་སུ་ལུང་སྦྱིན་ཏེ། སློབ་མས་མཎྜལ་ཕུལ། ཡན་ལག་བདུན་པ་བཟང་སྤྱོད་བཞིན་བྱ། སྐྱབས་འགྲོ་སེམས་བསྐྱེད་རྒྱས་པ་འགྲུབ་ན་རབ། མ་འགྲུབ་ན་སངས་རྒྱས་ཆོས་དང་མ་ཙམ་ཞིག་བྱ། མངོན་རྟོགས་ཕོགསྔགས་བཟླས་ལུང་དུ་སྦྱིན་པ་ཙམ་གྱིས་དོན་གྲུབ་པ་ཡིན་ནོ། །དེ་ནས་སློབ་དཔོན་གྱིས་ཆོ་གའི་ལྷག་མ་རྣམས་བྱ། སྒྲུབ་ཐབས་འདི་ལྷད་མེད་ཤིན་དུ་ཡིད་ཆེས་དང་ལྡན་པ། གྲགས་ཆུང་བ་ཞིག་སྣང་བས་འབྲོམ་སྟོན་པ་ཡབ་སྲས་ཀྱི་ཡིག་ཆུང་གཉིས་དང༌། སངས་རྒྱས་སྒོམ་པའི་གསལ་བྱེད་ཡིག་ཆུང་ལ་བརྟེན་ནས། བསྙེན་པ་དང་སྒྲུབ་པའི་ཚུལ་གསལ་བར་བཀོད་པ་ཡིན་ནོ། །ལས་སྦྱོར་ནི་དེ་དག་ཏུ་ཤེས་པར་བྱའོ། །ནག་པོ་ཆེན་པོའི་སྒྲུབ་པ་ནི། །ཀུན༵་དག༵འི་ཉམས་ལེན་སྙིང༵་པོ༵་འདི། །དེང་དུས་གཞན་ལ་མ་གྲགས་ཀྱང༌། །བདག་གི་བསོད་ནམས་དཔལ་ལས་རྙེད། །གྲི་གུག་དཔའ་གཅིག་གི་སྒྲུབ་ཐབས་བཟླས་ལུང་ལ་བརྟེན་པར་གྲགས་པའི་མན་ངག་བསྟན་པའི་ལེ་ཚན་ནོ།། །།དར་རྒྱས་འཕེལ། །
ཇོ་བོ་རྗེའི་ཐུན་མོང་བ་མ་ཡིན་པའི་ཆོས་སྐྱོང་མགོན་པོ་གྲི་གུག་དམར་པོའི་སྒྲུབ་ཐབས།
ཨོཾ་སྭཱ་སྟི། དཔའ་བོ་གང་ཞིག་དྲན་ཙམ་གྱིས། །ཕུན་ཚོགས་དངོས་གྲུབ་ཉེར་སྩོལ་ཞིང༌། །མི་མཐུན་ཕྱོགས་ཀུན་ཞི་མཛད་པའི། །ནག་པོ་ཆེ་ལ་ཕྱག་འཚལ་འདུད། །འདིར་ལྷོ་ནུབ་མགོན་པོ་ཞལ་དམར་ཞེས་བྱ་བ་སྒྲུབ་པ་ལ། བྲིས་སྐུའི་མདུན་དུ་མཆོད་གཏོར་རྒྱ་ཆེར་བཤམ། ཕྱག་ན་རྡོ་རྗེའམ་མི་གཡོ་བའི་བདག་བསྐྱེད་སྔོན་དུ་འགྲོ་བས། མཆོད་པ་བྱིན་རླབས་སྤྱི་དང་མཐུན་པར་བྱ། གཏོར་མ་ཨ་མྲྀ་ཏས་བསངས། ལག་པ་གཡོན་པ་བསྟན་ལ། ཨོཾ་སྟོང་པར་གྱུར།
གཡས་པ་བསྟན་ཏེ། ཨཱཿཐོད་པའི་སྣོད་ཡངས་ཤིང་རྒྱ་ཆེར་གྱུར། གཉིས་ཀ་བསྟན་ཏེ། ཧཱུཾ་ཤ་ལྔ་བདུད་རྩི་ལྔས་གང་བར་གྱུར། བྱ་ཁྱུང་གི་ཕྱག་རྒྱ་བསྟན་ཏེ། ཧོཿཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ། ལན་གསུམ་བརྗོད། རང་གི་མདུན་དུ་འཇིགས་རུང་དུར་ཁྲོད་ཆེན་པོའི་དབུས་སུ། ཁྲག་ཞག་རྦ་ཀློང་འཁྲུགས་པའི་རྒྱ་མཚོ་ན། བྷྲཱུཾ་ལས་རྡོ་རྗེའི་བྲག་རི་དམར་ནག་བདུད་བརྩེགས་ཀྱི་སྟེང༌། ཎི་ལས་མི་རོའི་གདན་སྟེང་དུ། ཀྵ་ལས་གྲི་གུག་ཀྵས་མཚན་པ་ལས་འོད་འཕྲོས། གདུག་པ་ཅན་ཐམས་ཅད་ཚར་བཅད། ཚུར་འདུས་ཡོངས་སུ་གྱུར་པ་ལས་མཧཱ་ཀཱ་ལ་སྐུ་མདོག་དམར་ནག་ཞལ་རས་ཀྱི་དཀྱིལ་འཁོར་ལྷག་པར་དམར་བ། ཞལ་གཅིག་ཕྱག་གཉིས་གཡས་གྲི་གུག་མེ་འབར་བ་འཕྱར་བས་གཤིན་རྗེ་བྲན་དུ་འཁོལ་བ། གཡོན་ཀླད་ཁྲག་དང་གློ་སྙིང་གིས་གང་བའི་ཐོད་པ་འཛིན་པས་སྒྲུབ་པོ་ལ་དངོས་གྲུབ་སྩོལ་བ། ཞགས་པ་ནག་པོས་དགྲ་བགེགས་ཀྱི་སྐེ་ནས་བཅིངས་ཤིང་ཞགས་པའི་སྣེ་མོ་ཕྱག་གཡོན་གྱི་མཐེབ་སྲིན་ལ་དཀྲིས་པ། ཞལ་གྱི་གྲྭ་ནས་ཁྲག་འཛག་པ། སྤྱན་གསུམ་དང་ལྡན་ཞིང་གད་རྒྱངས་དྲག་པོ་སྒྲོག་པ། མཆེ་བ་གཙིགས་ཤིང་ལྗགས་བསྐྱོད་པ་སྐན་སྒྲ་དྲག་པོ་སྒྲོགས་པས་ས་གཡོ་བར་བྱེད་པ། །
སྨ་ར་སྨིན་མ་དབུ་སྐྲ་དམར་སེར་གྱེན་དུ་བརྫེས་པ། སྦྲུལ་ནག་དང་དར་ནག་གི་ཐོད་བཅིངས་ཤིང༌། ཉི་ཟླས་དབུ་བརྒྱན་པ། སྦོམ་ཐུང་ཡན་ལག་ཧྲགས་ཤིང་གསུས་ཁྱིམ་ཆེ་བ། སྟག་ལྤགས་ཀྱི་ཤམ་ཐབས་ཅན། ཐོད་སྐམ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ་བྱས་པ། ཞབས་གཡས་བསྐུམ་གཡོན་བརྐྱང་བས་མེ་ཚན་དྲག་པོ་འབར་བའི་ཀློང་ན་བཞེངས་པ། དེའི་གཡས་སུ་གནོད་སྦྱིན་ཤན་པ་རའི་གདོང་ཅན་སྨུག་ནག་གཡས་གྲི་གུག་འཕྱར་ཞིང༌། གཡོན་དམ་ཉམས་ཀྱི་སྲོག་རྩ་ཞལ་དུ་གསོལ་བ། གཡོན་དུ་མ་ར་སྙིང་ཟ་མ་དམར་མོ་དུག་གི་གྲི་ཁྱེ་དང༌། དགྲ་བགེགས་ཀྱི་གློ་སྙིང་འཛིན་པ། རྒྱབ་ཏུ་གཟའ་བདུད་དམར་ནག་སྲིན་པོའི་ཆ་ལུགས་ཅན། མགོ་ལུས་མིག་གིས་གང་བ། མདའ་གཞུ་འགེངས་པ། མདུན་དུ་གསང་བའི་མཁའ་འགྲོ་མ་དམར་ནག་གྲི་གུག་དང་ཐོད་ཁྲག་འཛིན་པ། སྤྱན་གསུམ་དང་ལྡན་ཞིང་སྐྲ་གྲོལ་བ། མགོ་འཕྲེང་དང་རུས་པས་བརྒྱན་ཞིང་མི་ལྤགས་དང་སྟག་ལྤགས་གསོལ་བ། དེ་དག་ལ་སོགས་པ་མཁའ་འགྲོ་ཉི་ཤུ་རྩ་གཅིག་དང༌། སྲིད་པ་ཕོ་རྒྱུད་མོ་རྒྱུད་ལྷ་སྲིན་སྡེ་བརྒྱད་ཀྱི་ཚོགས་ཀྱིས་བསྐོར་བར་གྱུར། དེ་ཐམས་ཅད་ཀྱི་དཔྲལ་པར་ཨོཾ། མགྲིན་པར་ཨཱཿ ཐུགས་ཀར་ཧཱུཾ།
རང་གི་སྙིང་ག་ནས་འོད་ཟེར་འཕྲོས། ལྷོ་ནུབ་དུར་ཁྲོད་མུན་པའི་ཚལ་ནས་མགོན་པོ་འཁོར་དང་བཅས་པ་བཛྲ་ས་མཱ་ཛཿ ཧཱུཾ་དད་པ་དང་ནི་དམ་ཚིག་གིས། །ཚུར་གཤེགས་མཧཱ་ཀཱ་ལ་གཤེགས། །འཇིགས་བྱེད་བསྟན་སྲུང་ཡོངས་ཀྱི་གཙོ། །ཟག་མེད་དབྱིངས་ནས་གཤེགས་སུ་གསོལ། །ལྷོ་ནུབ་མཚམས་ཀྱི་གནས་མཆོག་ནས། །མི་བསྲུན་ཞིང་སྐྱོང་འཁོར་དང་བཅས། །རྣལ་འབྱོར་བསྟན་པ་བསྲུང་བའི་ཕྱིར། །སྒྲུབ་པའི་གནས་འདིར་སྤྱན་འདྲེན་གཤེགས། །ཨོཾ་མཧཱ་ཀཱ་ལ་ཧཱུཾ་ཕཊ། མཧཱ་ཀཱ་ལ་ས་པ་རི་ཝཱ་ར། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། པདྨ་ཀ་མ་ལ་ཡེ་སྟྭཾ། ཨོཾ་མཧཱ་ཀཱ་ལ་ཡ་གྲྀཧྞེ་དཾ་ཨརྒྷཾ་སྭཱཧཱ། ནས་ཤཔྟའི་བར་གྱིས་མཆོད། རྡོ་རྗེའི་ཐལ་མོའམ། རལ་གྲི་ཐོད་པའི་ཕྱག་རྒྱ་སྤྱི་བོར་བཞག་པར་མོས་ལ། ཨོཾ་ཤྲཱི་མཧཱ་ལ་ཀཱ་ལ་ས་མ་ཡ་མ་ཏི་ཀྲ་མ་ཐ་ས་མ་ཡ་རཀྵནྟུ། ཞེས་དམ་ལ་བཞག་ཅིང༌། ཡིད་ལ་ཇི་ལྟར་འདོད་པའི་བཀའ་བསྒོ་བྱ། གཏོར་མ་གསོལ་བར་བསམས་ལ། ཨོཾ་མཧཱ་ཀཱ་ལ་ས་པ་རི་ཝཱ་ར། ཨ་མྲྀ་ཏ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་བདུན་གྱིས་མགོན་པོ་དང༌། མཧཱ་ཡཀྵ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། མཧཱ་རཀྨོ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་གྱིས་གནོད་སྦྱིན་ཕོ་མོའི་འཁོར་བཅས་ལ་ཕུལ། གོང་བཞིན་མཆོད། ཨོཾ་མཧཱ་ཀཱ་ལ་ཧཱུཾ་ཕཊ། ཨོཾ་ཨཱཿ
ཧཱུཾ་གིས་ནང་མཆོད་ཕུལ། བསྟོད་པ་བསྡུས་པ་ནི། ཧཱུཾ། ཆོས་ཀྱི་དབྱིངས་ལས་སྣ་ཚོགས་སྤྲུལ་པའི་སྐུ། །གྲག་སྟོང་ང་རོས་བདུད་དཔུང་འཇོམས་པའི་གསུང༌། །རྟོག་མེད་ངང་ནས་སྒྲུབ་མཆོག་སྐྱོང་བའི་ཐུགས། །བསྟན་བསྲུང་ཆེན་པོ་ཁྱོད་ལ་བདག་བསྟོད་དོ། །ཞེས་བསྟོད། ཐུགས་ཀར་སྔགས་འཕྲེང་གསལ་བཏབ་ལ། ཨོཾ་མཧཱ་ཀཱ་ལ་ཧ་ན་ཧ་ན་བཛྲེ་ཎ་སྭཱཧཱ། ཞེས་ཅི་འགྲུབ་བཟླ། ཐུན་གྱི་མཐར་གོང་བཞིན་མཆོད་བསྟོད་བསྡུས་པའམ། ཕྱི་མཆོད་ནང་མཆོད་སྔར་བཞིན་ཕུལ་ལ། འདི་སྐད་ཅེས། ཧཱུཾ། ནག་པོ་ཆེན་པོ་འཁོར་བཅས་ལ། །བདག་གིས་མཆོད་པ་འབུལ་བ་ནི། །དགྲ་བགེགས་མ་ལུས་བསྒྲལ་བ་ཡི། །དམར་ཆེན་ཁྲག་གིས་ཨརྒྷཾ་དང༌། །དབང་པོ་ལྔ་ཡི་མེ་ཏོག་དང༌། །རུས་པ་རྐང་ཀླད་བསྲེས་པའི་སྤོས། །ཞུན་ཆེན་གསལ་བའི་སྒྲོན་མེ་དང༌། །རྡོ་རྗེ་རང་བྱུང་དྲི་ཆབ་དང༌། །ཤ་ཆེན་སྣ་ལྔའི་ཞལ་ཟས་དང༌། །རྐང་གླིང་ཐོད་རྔ་སྙན་པའི་སྒྲ། །དངོས་འབྱོར་ཡིད་སྤྲུལ་མཁའ་བཀང་ནས། །མགོན་པོ་འཁོར་དང་བཅས་ལ་འབུལ། །གཞན་ཡང་མཆོད་པ་འབུལ་བ་ནི། །འབྲུ་བཅུད་སྟོང་སྦྱར་ཛ་གད་དང༌། །རྩ་བརྒྱད་སྟོང་སྦྱར་བདུད་རྩི་སྨན། །དགྲ་བགེགས་རྣམ་གཉིས་བསྒྲལ་བ་ཡི། །དོན་སྙིང་ཤ་རུས་གཏོར་ཆེན་བཤམ། །དེ་བཞིན་
ཚེ་འཛིན་ཁྲག་གི་རྒྱུན། །བནྡྷ་ལྕང་ལོ་ཁྲག་གིས་བཀང༌། །བླ་ན་མེད་པའི་མཆོད་པ་འདི། །མགོན་པོ་འཁོར་དང་བཅས་ལ་འབུལ། མཐུན་པའི་རྫེས་སུ་བཞེས་པར་མཛོད། །དེ་ལས་གཞན་ཡང་མཆོད་པའི་ཚོགས། །ཞིང་ཆེན་བླ་བྲེ་འཕན་གདུགས་དང༌། །རྒྱུ་རློན་ལྡ་ལྡི་སྙིང་འཕྲེང་དཔྱངས། །ཀེང་རུས་སྣ་ཚོགས་རི་ལྟར་སྤུངས། །ཤ་ཁྲག་དྲི་བསུར་རྒྱུན་མི་འཆད། །སྣ་ཚོགས་རྒྱན་ཀྱི་མཆོད་པ་འདི། །མགོན་པོ་འཁོར་དང་བཅས་ལ་འབུལ། །དམ་ཚིག་དབང་གིས་བཞེས་ནས་ཀྱང༌། །ཞི་རྒྱས་དབང་དང་མངོན་སྤྱོད་ཀྱི། །བཅོལ་པའི་འཕྲིན་ལས་གྲུབ་པར་མཛོད། །དེ་ནས་བསྟོད་པ་ནི། ཧཱུཾ། ཕྱོགས་ཕྱོགས་བགྱི་བ་ཕག་གི་ན། །ལྷོ་ནུབ་སྲིན་པོའི་འཇིག་རྟེན་དུ། །མུན་པའི་ལྕགས་མཁར་དགུ་རིམ་ན། །མ་འདས་འཇིག་རྟེན་བཀའ་སྡོད་གཙོ། །ནག་པོ་མི་བསྲུན་འཇིགས་བྱེད་ཆེ། །གྲི་གུག་འབར་བས་ཉམས་པ་ཡི། །ཚེ་སྲོག་རྩད་བཅད་ཁྲག་གི་རྒྱུན། །ཐོད་པར་བླུག་ཅིང་ཞལ་དུ་གསོལ། །འཁོར་ནི་མི་བསྲུན་གདུག་པ་ཆེ། །ནག་པོས་དུས་འདའ་འདུལ་བྱེད་པ། །ལྷ་སྲིན་མ་མོ་མཐུ་བོ་ཆེ། །སྙིང་རྗེ་མེད་པར་གསོད་བྱེད་པའི། །འཇིག་རྟེན་མ་འདས་དམ་བཅས་ཀུན། །སྣ་ཚོགས་གཏོར་མ་འདི་བཞེས་ལ། ཁྲོ་གཏུམ་བཀའ་ལས་
མ་འདའ་བར། །སྣ་ཚོགས་ལས་འདི་ཐོགས་མེད་ཀྱིས། །ཧཱུཾ། རྡོ་རྗེ་གདན་མཆོད་དམ་པ་ནས། །གནོད་སྦྱིན་འཁྲུགས་པའི་གནས་མཆོག་ནས། །གནོད་སྦྱིན་ཤན་པ་མཐུ་བོ་ཆེ། །སྐུ་མདོག་དམར་ནག་འཇིགས་པའི་གཟུགས། །ཕྱག་ན་གནམ་ལྕགས་གྲི་གུག་བསྣམས། དམ་ཉམས་དགྲ་བོའི་ཚེ་སྲོག་གཅོད། །དམ་རྫས་གཏོར་མ་འདི་བཞེས་ལ། །བཅོལ་བའི་འཕྲིན་ལས་གྲུབ་པར་མཛོད། བྷྱོཿ གནོད་སྦྱིན་ཐུགས་ཀྱི་དགྱེས་བདེ་མོ། །མ་ར་སྙིང་ཟ་མཐུ་མོ་ཆེ། །སྐུ་མདོག་དམར་ནག་འཇིགས་པའི་གཟུགས། །ཕྱག་ན་དུག་གི་གྲི་ཁྱེ་འཛིན། །བསྟན་པ་བཤིག་པའི་ཚེ་སྲོག་གཅོད། །ཤ་དང་ཁྲག་ལ་ཟས་བྱེད་མ། །དམ་ཟས་གཏོར་མ་འདི་བཞེས་ལ། །བཅོལ་བའི་འཕྲིན་ལས་གྲུབ་པར་མཛོད། །དཔལ་ལྡན་མགོན་པོ་འཁོར་བཅས་རྣམས། །ཕྱི་ནང་གསང་བའི་མཆོད་སྤྲིན་དང༌། །ཏིང་འཛིན་སྔགས་རྒྱས་བྱིན་རླབས་པའི། །མཆོད་སྦྱིན་གཏོར་མ་འདི་བཞེས་ལ། །སངས་རྒྱས་བསྟན་པ་རྒྱས་པ་དང༌། །དཀོན་མཆོག་དབུ་འཕང་ཆེར་མཐོ་ཞིང༌། །བསྟན་འཛིན་སྐུ་ཚེ་ལེགས་བརྟན་ནས། །རྣམ་དཀར་འཕྲིན་ལས་རྒྱས་པར་མཛོད། ཁྱད་པར་བདག་ཅག་འཁོར་བཅས་ཀྱི། །ནད་གདོན་དགྲ་བགེགས་ཞི་བ་དང༌། །ཚེ་དང་བསོད་ནམས་རབ་རྒྱས་ནས། །ཐོས་
བསམ་སྒྲུབ་པ་འཕེལ་བར་མཛོད། །རྗེས་ཡིག་བརྒྱ། བཟོད་གསོལ། གཏོར་མགྲོན་གཤེགས་སུ་གསོལ་བ། སྨོན་ལམ་བཀྲ་ཤིས་རྣམས་སྤྱི་དང་འདྲའོ། །འདིའི་རྗེས་གནང་བྱ་བར་འདོད་པས། མཎྜལ་ཚོམ་བུ་ལྔ་དང་བཅས་པ། རྒྱབ་ཏུ་མཉྫིའི་སྟེང་དུ་གཏོར་མ་ནོར་གཟུགས་མ་ཁ་ཟས་བཟང་དགུས་བརྒྱན་པ། མཎྜལ་གྱི་གཡས་སུ་སྐུ་རྟེན། གཡོན་དུ་ཐོད་པ་དམ་རྫས་དང་བཅས་པ། མདུན་དུ་གྲི་གུག་རྣམས་བཀོད་ལ། དེ་དག་གི་མདུན་དུ་མཆོད་པ་བསྒྲིགས་ཤིང༌། དེའི་མདུན་དུ་གཏོར་མ་བཤམས་ལ། བདག་བསྐྱེད་ནས་བརྩམས་ཏེ་མདུན་བསྐྱེད་བཟླས་པའི་བར་གོང་དུ་བཤད་པ་བཞིན་བྱ། རྗེས་གནང་གི་རིམ་པ་རྣམས་བདག་འཇུག་གི་ཚུལ་དུ་དམིགས་པས་ལེན། སློབ་མ་རྣམས་གྲལ་ལ་འཁོད། ཆོས་བཤད། ཕྱག་དང་མཎྜལ་སྔོན་དུ་འགྲོ་བས། སློབ་དཔོན་དགོངས་སུ་གསོལ། བདག་ལ་ནག་པོ་ཆེན་པོའི་སྐུ་གསུང་ཐུགས་ཀྱི་རྗེས་སུ་གནང་བ་མ་ལུས་པ་སྩལ་དུ་གསོལ། ཞེས་ལན་གསུམ་གསོལ་བ་འདེབས་སུ་གཞུགསངས་རྒྱས་ཆོས་དང་མ་སོགས་ལན་གསུམ་གྱིས་སེམས་བསྐྱེད། གུར་ནས་འབྱུང་བའི་རྒྱུན་བཤགས་ཀྱིས་སྡོམ་པ་བཟུང༌། སློབ་དཔོན་བདག་བསྐྱེད་ཀྱི་ཡི་དམ་དུ་སྒོམ་ཚུལ་འབོགས་ཤིང༌། མདུན་དུ་འཇིགས་རུང་ནས། བདུན་བརྩེགས་ཀྱི་སྟེང་གི་རོའི་གདན་ལ། མཧཱ་ཀ་ལ་སྐུ་མདོག་དམར་ནག་ནས། ཚོགས་ཀྱིས་བསྐོར་བར་གྱུར། ཞེས་པའི་བར་གོང་བཞིན་མདུན་བསྐྱེད་གསལ་འདེབས་སུ་གཞུག སློབ་དཔོན་ལ་མོས་གུས་དུང་
བྱས་པས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་མགོན་པོའི་ཐུགས་ཀར་ཕོག་པས། ཐུགས་བརྒྱུད་བསྐུལ། མགོན་པོའི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས། སངས་རྒྱས་བྱང་སེམས་ཐམས་ཅད་ཀྱི་ཐུགས་ཀ་ནས། ནག་པོ་ཆེན་པོའི་སྐུ་ཆེ་བ་རི་རབ་ཙམ། ཆུང་བ་རྡུལ་ཕྲན་ཙམ་དཔག་ཏུ་མེད་པ་སྤྱན་དྲངས་ལུས་ལ་ཐིམ་པར་མོས་ཤིགཞེས་བརྗོད་ལ། དེ་ནས་རོལ་མོའི་སྒྲ་བྱ། མཎྜལ་གྱི་གཡས་ཀྱི་སྐུ་རྟེན་སྤྱི་བོར་བཞག་ལ། མི་འབྲལ་སྐུ་ཡིས་བྱིན་རླབས་པས། །བསྟན་དང་འཁོར་བཞི་སྐྱོང་བ་དང༌། །གདུགས་པ་ཅན་རྣམས་ཚར་གཅོད་ཕྱིར། །ནག་པོ་ཆེན་པོའི་སྐུ་འདི་བཟུང༌། །ཨོཾ་མཧཱ་ཀཱ་ལ་ཡ། ཀཱ་ཡ་ས་མ་ཡ་དྷཱ་ར་ཧཱུཾ། ཞེས་བརྗོད་སྐུའི་རྗེས་གནང་ངོ༌། །ཡང་སློབ་དཔོན་ལ་མོས་གུས་དུང་བྱས་པས། སློབ་དཔོན་གྱི་ཐུགས་ཀའི་འོད་ཟེར་གྱིས། མདུན་བསྐྱེད་ཀྱི་ཐུགས་ཀ་ནས་སྔགས་ཀྱི་འཕྲེང་བའི་ཚོགས་དང༌། སངས་རྒྱས་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀ་ནས་དབྱངས་དང་གསལ་བྱེད་ཀྱི་ཡི་གེ་དཔག་ཏུ་མེད་པ་སྤྱན་དྲངས། ཁྱེད་རང་རྣམས་ཀྱི་མགྲིན་པར་ཐིམ། ཞེས་བརྗོད་མགོན་པོའི་སྔགས་བྱང་དང༌། ཐོད་པ་ལག་པ་གཡོན་དུ་གཏད། མི་འབྲལ་གསུང་གིས་བྱིན་རླབས་པས། །སྣ་ཚོགས་འཕྲིན་ལས་སྒྲུབ་པ་དང༌། །ནག་པོ་ཆེན་པོ་མཉེས་བྱེད་པ། །
གསུང་གི་རིག་སྔགས་བཟུང་བར་བྱ། །ཨོཾ་མཧཱ་ཀཱ་ལ་ཡ། ཝཱཀ་ས་མ་ཡ་དྷཱ་ར་ཧཱུཾ། དེ་ནས་བཟླས་ལུང་སྤྱི་དང་མཐུན་པར་བྱ་སྟེ། གསུང་གི་རྗེས་གནང་ངོ༌། །སློབ་དཔོན་ལ་མོས་གུས་དུང་བྱས་པས། སློབ་དཔོན་གྱི་ཐུགས་ཀའི་འོད་ཟེར་གྱིས། མདུན་བསྐྱེད་མགོན་པོ་དང་སངས་རྒྱས་བྱང་ཆུབ་སེམས་དཔའ་རྣམས་ཀྱི་ཐུགས་ཀ་ནས་གྲི་གུག་ཐོད་པ་ལ་སོགས་པ་ཕྱག་མཚན་གྱི་ཚོགས་དཔག་ཏུ་མེད་པ་སྤྱན་དྲངས་འཕྲིན་ལས་རྣམ་བཞིས་སེམས་ཅན་གྱི་དོན་བྱས། སྙིང་གར་ཐིམ་ཞེས་བརྗོད་ལ་རོལ་མོ་བྱ། གྲི་གུག་ལག་པ་གཡས་སུ་གཏད་དེ། མི་འབྲལ་ཐུགས་ཀྱིས་བྱིན་རླབས་པས། །སློབ་དཔོན་རྒྱལ་བའི་བཀའ་བཞིན་དུ། །བརྩེ་ལྡན་དྲག་པོའི་འཕྲིན་ལས་ཀྱིས། །མ་རུང་སེམས་ཅན་བསྒྲལ་བར་བྱ། །ཨོཾ་མ་ཧཱ་ཀ་ལ་ཡ། ཙིཏྟ་ས་མ་ཡ་དྷཱ་ར་ཧཱུཾ། ཞེས་བརྗོད་དེ། ཐུགས་ཀྱི་རྗེས་གནང་ངོ༌། །དེ་ནས་གཏོར་མ་སྤྱི་བོར་བཞག་ལ། རྡོ་རྗེ་འཆང་དང་ཕྱག་ན་རྡོ་རྗེ་དང༌། །ཀླུ་སྒྲུབ་སྙིང་པོ་ནཱ་ག་བོ་དྷི་དང༌། །ཛྙཱ་ན་བོ་དྷི་བིཪྱ་བོ་དྷི་དང༌། །རཱ་ཧུ་ལ་དཔལ་མར་མེ་མཛད་དཔལ་ཞབས། །རྒྱལ་བའི་འབྱུང་གནས་དང་ནི་རིན་ཆེན་གསལ། གྲུ་གུ་ཁ་ཆེ་ལྷ་ཡི་དབང་ཕྱུག་དང༌། །ཞང་སྟོན་རྡོར་འབར་བློ་གྲོས་རྒྱལ་མཚན་དང༌། །ཤེས་རབ་རིན་ཆེན་ཤེས་རབ་རྡོ་རྗེ་དང༌། །དཀོན་རྒྱལ་དཀོན་དར་བསམ་འགྲུབ་
རྒྱལ་མཚན་དང༌། །བརྩོན་འགྲུས་རྡོ་རྗེ་ནམ་མཁའ་བསམ་འགྲུབ་དང༌། །ལྷ་དབང་ངག་དབང་ཀུན་དགའ་བཀྲ་ཤིས་སོགས། །རྩ་བ་བརྒྱུད་པའི་བླ་མ་ཐམས་ཅད་ཀྱིས། །བཀའ་དང་དམ་ལས་མ་འདའ་བར། །དམ་ཚིག་སྲུངས་ལ་བསྟན་པ་སྐྱོངས། །དཀོན་མཆོག་དབུ་འཕང་བསྟོད། ཁྱད་པར་དུ་ཡང་སློབ་མ་འདི་ཞེས་བྱ་བའི་ལུས་དང་གྲིབ་མ་བཞིན་དུ་འགྲོགས་ཏེ། ལུས་ངག་ཡིད་གསུམ་བསྲུང་བ་དང༌། བསྐྱབ་པ་དང༌། སྦ་བར་མཛད་དུ་གསོལ། ཞེས་སོགས་བཀའ་བསྒོ་རྒྱས་བསྡུས་སྤྱི་དང་མཐུན་པར་བྱ། གཏོར་མའི་མཐེབ་ཀྱུ་ནས་རྡོ་རྗེའི་རྩེ་མོས་ཅུང་ཟད་བླངས་ཀ་པཱ་ལའི་བདུད་རྩི་དང་སྦྲགས་ཏེ། སློབ་མ་ལ་ཅུང་ཟད་སྦྱིན། གཏོར་མ་ལའང་བདུད་རྩི་ཅུང་ཟད་བྲན་ཏེ། ནག་པོ་ཆེན་པོ་ཁྱོད་ཀྱིས། སློབ་མ་འདིའི་ཆོས་སྐྱོང་གྱིས་ལ་བྱིན་པའི་ཟས་ཟོ། བཅོལ་བའི་ལས་ཀྱིས་ཞེས་བརྗོད། དེ་ནས་མཎྜལ་འབུལ་བ་སོགས་རྗེས་ཀྱི་བྱ་བ་རྣམས་སྤྱི་དང་མཐུན་ཞིང༌། མཆོད་པ་ཁ་གསོས་བྱིན་གྱིས་བརླབས། ཕྱི་མཆོད་འབུལ་བ་ནས་བཀྲ་ཤིས་ཀྱི་བར་རྗེས་ཀྱི་བྱ་བ་རྣམས་གོང་བཞིན་ནོ། །པཎ་ཆེན་ཀུན༵་ལས་དག༵འ་བའི་ཕུལ། །མར་མེ་མཛད་ཀྱི་བཀའ་སྲུང་མཆོག །མིའུ་ཐུང་གསོད་བྱེད་སྒྲུབ་ཐབས་ཀྱི། །སྙིང༵་པོ༵་ཡི་གེར་འཁོད་འདིའོ། །ཇོ་བོ་རྗེའི་ཐུན་མོང་བ་མ་ཡིན་པའི་ཆོས་སྐྱོང་མགོན་པོ་གྲི་གུག་དམར་པོའི་སྒྲུབ་ཐབས་བཤད་པའི་ལེ་ཚན་ནོ།། །།མངྒ་ལཾ། །
མགོན་པོ་བཞི་སྦྲག་གི་སྒྲུབ་པའི་ཐབས།
ཨོཾ་སྭཱ་སྟི། མཐའ་དག་རྒྱལ་བའི་ཐུགས་ཀྱི་དངོས། །ཐུགས་ཀྱི་མགོན་པོར་སྐུ་སྤྲུལ་པ། །ནག་ཕྱོགས་མཐའ་དག་ཕམ་མཛད་པའི། །བསྟན་སྲུང་མཆོག་དེས་དགེ་བར་མཛོད། །ནག་པོ་ཆེན་པོ་གྲི་གུག་མ་སྒྲུབ་པར་འདོད་པས། མཆོད་གཏོར་བཤམ། ཡི་དམ་གྱི་བདག་བསྐྱེད་སྔོན་དུ་སོང་ནས་མཆོད་པ་བྱིན་རླབས་སྤྱི་དང་མཐུན། གཏོར་མ་ཨ་མྲྀ་ཏས་བསངས། ཨོཾ་སྟོང་པར་གྱུར། ཨཱཿཐོད་པའི་སྣོད་ཡངས་ཤིང་རྒྱ་ཆེ་བར། ཧཱུཾ་ཤ་ལྔ་བདུད་རྩི་ལྔས་གང་བར་གྱུར། ཧོཿཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ། ལན་གསུམ་བརྗོད། རང་གི་མདུན་དུ་འཇིགས་རུང་དུར་ཁྲོད་ཆེན་པོའི་དབུས་སུ། པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཎི་ལས་དགྲ་བགེགས་བསྒྲལ་བའི་བམ་ཆེན་བརྩེགས་པའི་གདན་ལ་ཧཱུཾ་ལས་གྲི་གུག་ཧཱུཾ་གིས་མཚན་པ་ཡོངས་སུ་གྱུར་པ་ལས། མཧཱ་ཀཱ་ལ་སྐུ་མདོག་དུས་མཐའི་སྤྲིན་དང་མཚུངས་པ། ཞལ་གཅིག་ཕྱག་གཉིས་གཡས་གྲི་གུག་འཕྱར་ཞིང༌། གཡོན་ཐོད་པ་སྙིང་བཅས་ཐུགས་ཀར་འཛིན་པ། ཞལ་གྱི་གྲྭ་ནས་ཁྲག་འཛག་པ། སྤྱན་གསུམ། མཆེ་བ་གཙིགས་ཤིང་ལྗགས་བསྐྱོད་པ། སྨ་ར། སྨིན་མ་དབུ་སྐྲ་དམར་སེར་གྱེན་དུ་བརྫེས་པ། སྦོམ་ཐུང་ཡན་ལག་ཧྲགས་ཤིང་གསུས་ཁྱིམ་ཆེ་བ། སྟག་ལྤགས་ཀྱི་ཤམ་ཐབས་ཅན། ཐོད་སྐམ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ་བྱས་པ། ཞབས་གཡས་
བསྐུམ་གཡོན་བརྐྱང་བས་པད་ཉི་མི་རོའི་གདན་ལ། མེ་ཚན་དྲག་པོ་འབར་བའི་ཀློང་ན་བཞེངས་པའོ། །ཡང་ན་སྟག་ལྤགས་ཀྱི་ཤམ་ཐབས་མི་མཛད་པར་དར་ནག་གི་འཇོལ་བེར་གསེར་གྱི་སྐེ་རགས་ཅན་དང༌། ཞབས་ལས་སག་ཏིའི་ལྷམ་ཡུ་རིང་གསོལ་བར་བྱས་ཀྱང་རུང༌། གཙོ་བོའི་གཡོན་དུ་རླུང་གི་དཀྱིལ་འཁོར་ལ། བྷྱོཿལས་འདོད་པ་ཁམས་ཀྱི་དབང་ཕྱུག་མ་སྔོན་མོ་རལ་གྲི་དང་ཐོད་ཁྲག་འཛིན་པ། སྲིན་པོའི་བོང་བུ་གྭ་དམར་གྱི་སྟེང་ན་བཙན་དཀྱིལ་གྱིས་བཞུགས་པ། རཀྟའི་རྒྱ་མཚོར་རྒྱུག་པའོ། །གཙོ་བོའི་མདུན་གྱི་འོག་ཕྱོགས་སུ། པད་ཉི་དང་བཾ་ཆེན་བསྣོལ་བའི་གདན་ལ་ཕཊ་ལས་ལས་ཀྱི་མགོན་པོ་སྐུ་མདོག་སྨུག་ནག་ཞལ་གཅིག་ཕྱག་གཉིས་སྤྱན་གསུམ་པ། གཡས་ཙནྡན་གྱི་བེང་ཆེན་དང༌། གཡོན་ལྕགས་པར་བདུད་རྩིས་གང་བ་འཛིན་པ། བེང་སྟོད་ནས་མེ་འབར་ཞིང༌། བེང་སྨད་ནས་ཆུ་འཁྲུག་པ། བེང་གི་ནང་ནས་ལྷ་དང་ལྷ་མ་ཡིན་གྱི་དམག་ཚོགས་འགྱེད་པ། དར་ནག་གི་འཇོལ་བེར་གསེར་གྱི་སྐེ་རགས་ཅན་གསོལ་ཞིང༌། གཡོན་བརྐྱང་བའི་སྟབས་ཀྱིས་བཞུགས་པའོ། །དེའི་གཡོན་དུ་མཾ་ལས་མ་གཅིག་ཨེ་ཀ་ཛ་ཊི་སྐུ་མདོག་སྨུག་ནག་རལ་གྲི་སྡིག་པའི་ཡུ་བ་ཅན་དང་ཐོད་ཁྲག་འཛིན་པ། དྲེའུ་རྟ་རྐང་གསུམ་ལ་ཆིབས་པ། ཕྱི་རོལ་ཏུ་ཕྱོགས་སྐྱོང་ཞིང་སྐྱོང་སྡེ་བརྒྱད་འབྱུང་པོའི་
ཚོགས་ཀྱིས་བསྐོར་བའོ། །དེ་ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རང་གི་སྙིང་ག་ནས་འོད་ཟེར་འཕྲོས། དུར་ཁྲོད་ཆེན་པོ་བརྒྱད་དང༌། རང་བཞིན་གྱི་གནས་ནས། མགོན་པོ་ལྕམ་དྲལ་འཁོར་དང་བཅས་པ་བཛྲ་ས་མཱ་ཛཿ ཧཱུཾ། དད་པ་དང་ནི་དམ་ཚིག་གིས། །ཚུར་གཤེགས་མཧཱ་ཀཱ་ལ་གཤེགས། །འཇིགས་བྱེད་བསྟན་སྲུང་ཡོངས་ཀྱི་གཙོ། །ཟག་མེད་དབྱིངས་ནས་གཤེགས་སུ་གསོལ། ཨོཾ་མཧཱ་ཀཱ་ལ་ཧཱུཾ་ཕཊ། ཨོཾ་མཧཱ་ཀཱ་ལ་ས་པ་ཏི་ཝཱ་ར་ཛཿཧཱུཾ་བཾ་ཧོཿ གཉིས་སུ་མེད་པར་བསྟིམ། པདྨ་ཀ་མ་ལ་ཡེ་སྟྭཾ། ཨོཾ་མཧཱ་ཀཱ་ལ་ཡ་གྲྀཧྞེ་དཾ། ཨརྒྷཾ་སྭཱཧཱ། ནས་ཤཔྟའི་བར་གྱིས་མཆོད། རྡོ་རྗེ་རྩེ་ལྔ་པའི་ཕྱག་རྒྱ་བསྟན་ལ། ཨོཾ་ཤྲཱི་མཧཱ་ཀཱ་ལ་ས་མ་ཡ། སྨ་ར། ས་མ་ཡ་མ་ཏི་ཀྲ་མ་ཐ། ས་མ་ཡ་རཀྵནྟུ་ཞེས་དམ་ལ་བཞགཨོཾ་མཧཱ་ཀཱ་ལ་ས་པ་རི་ཝཱ་ར་ཨ་མྲྀ་ཏ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། བདུན་གྱིས་ཡེ་ཤེས་མགོན་པོ་དང༌། འཁོར་རྣམས་ལ་སོ་སོའི་སྙིང་པོའི་མཐར། བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། བཏགས་པ་དང༌། ཤཱ་ས་ནས་ཀྱང་འབུལ། སྤྱི་ཁྱབ་ཏུ། ཨ་ཀཱ་རོ་ལན་གསུམ་གྱིས་བསྟབ། འབྲུ་གསུམ་གྱིས་ནང་མཆོད་འབུལ། བསྟོད་པ་བསྡུས་པ་ནི། ཧཱུཾ། མ་ལུས་འཇོམས་མཛད་དགྲ་བགེགས་ཐལ་བར་རློག །མཐར་བྱེད་
གཞོན་ནུ་འཇིགས་པའི་གད་རྒྱངས་ཅན། །མཉམ་ཉིད་ཐུགས་མངའ་གཏུམ་ཆེན་མེ་ལྟར་འབར། །བདེ་གཤེགས་བཀའ་ཡི་སྲུང་མ་ཁྱོད་ལ་བསྟོད། །ཅེས་པའོ། །ཐུགས་ཀར་སྔགས་འཕྲེང་གསལ་བཏབ་ལ། ཨོཾ་མཧཱ་ཀཱ་ལ་ཧ་ན་ཧ་ན་བཛྲེ་ཎ་ཧཱུཾ་ཕཊ། ཅེས་པ་ནི་སྙིང་པོའོ། །ཨོཾ་མཧཱ་ཀཱ་ལ་གུ་ཎ་ཧྲཱིཿད་ཧཱུཾ་ཧཱུཾ་ཕཊ། ཅེས་པ་ནི་ལས་ཀྱི་སྔགས་སོ། །ཨོཾ་ཤྲཱི་དེ་ཝཱི་ཧཱུཾ་ཕཊ། འདོད་ཁམས་མའི་མཚན་སྔགས་སོ། །ཨོཾ་མཧཱ་ཀཱ་ལ་རཀྵ་དུ་བེང་ཎི་ཛ་ཛཿ ལས་མགོན་གྱི་སྔགས་སོ། །ཨོཾ་རོ་རུ་རོ་རུ་ཙ་པ་ལ་ཨ་ཤུག་མེ་མ་ཧཱུཾ་མ་བྷྱོཿཛ་ཛཿ ཨེ་ཀ་ཛ་ཊིའི་སྔགས་སོ། །སླར་ཡང་ཕྱི་མཆོད་ནང་མཆོད་འབུལ། ཧཱུཾ། ནག་པོ་ཆེན་པོ་ཞེས་པ་ནས། གྲུབ་པར་མཛོད་ཀྱི་བར་མཆོད་འཕྲེང་ནི་མགོན་པོ་ལྷོ་ནུབ་པ་དང་འདྲའོ། །བསྟོད་པ་ནི། སྲིན་གཟུགས་མ་བྱ་ཞིང༌། ཇོ་བོས་མཛད་པར་གྲགས་པའི་བསྟོད་པ་ཆེ་ཆུང་རྣམས་ཀྱང་ཤེས་ན་འདོན། གང་གི་སྐུ་གསུང་ཐུགས་ཀྱི་མཐུས། །འདོད་པའི་ཁམས་ཀུན་ཟིལ་མནན་ནས། །འདོད་པའི་ཁམས་ལ་དབང་བསྒྱུར་མ། །འདོད་ཁམས་དབང་ཕྱུག་མ་ལ་འདུད། །དྲག་པོ་མི་སྡུག་གཏུམ་པའི་སྐུ། །ལྷ་ཡི་དམག་དཔོན་ཆེན་པོ་སྟེ། །ལྷ་མིན་གཡུལ་དུ་ཕམ་མཛད་པའི། །རྡོ་རྗེ་བདེ་ཁྱོད་ཕྱག་འཚལ་བསྟོད། །དགའ་ཚལ་མཛེས་པའི་ལྷ་མོ་ནི། །གདུག་པ་འདུལ་ཕྱིར་སྲིན་པོའི་སྐུ། །དགྲ་བགེགས་ཤ་དང་ཁྲག་ལ་རྔམ། །རྫོང་མོ་ཁྱོད་ལ་བསྟོད་པ་འབུལ། །དཔལ་ལྡན་མགོན་པོ་འཁོར་བཅས་རྣམས་སོགས་འཕྲིན་ལས་
བཅོལ་བ་ཡང་ལྷོ་ནུབ་པ་དང་འདྲའོ། །རྗེས་ཡིག་བརྒྱ། བཟོད་གསོལ། གཏོར་མགྲོན་གཤེགས་སུ་གསོལ་བ། བརྟན་བཞུགས། སྨོན་ལམ། བཀྲ་ཤིས་རྣམས་ཀྱང་སྤྱི་དང་འདྲའོ། །འདིའི་རྗེས་གནང་གི་རིམ་པ་ནི་ལྷོ་ནུབ་པའི་རྗེས་གནང་གི་ཆོ་ག་ལ་འདོན་པ་སྤོས་པ་ཉིད་ཀྱིས་འགྲུབ་བོ། །ཇོ་བོའི་བཀའ་གདམས་འཛིན་པ་ནི། །ཀུན༵་གྱིས་དག༵འ་བར་བསྔགས་པའི་ཕུལ། །ཆོས་སྐྱོང་བཞི་སྦྲག་ཅེས་གྲགས་པའི། །ཆོ་གའི་སྙིང༵་པོ༵་མདོ་ཙམ་ཡིན། །མགོན་པོ་བཞི་སྦྲག་གི་སྒྲུབ་པའི་ཐབས་ཀྱི་ལེ་ཚན་ནོ།། །།མངྒ་ལཾ། །
ཁ་ཆེ་པཎ་ཆེན་ནས་བརྒྱུད་པ་གྲི་གུག་མའི་སྒྲུབ་ཐབས།
ཨོཾ་སྭཱ་སྟི། དཔལ་ལྡན་རྡོ་རྗེ་འཆང་བ་ཉིད། །དྲག་གཏུམ་མི་ཟད་ཕོ་ཉའི་སྐུར། །སྟོན་འཛིན་ནག་པོ་ཆེན་པོ་ལ། །བཏུད་ནས་སྒྲུབ་ཐབས་བཤད་པར་བྱ། །བྲིས་སྐུ་ལ་སོགས་པའི་དྲུང་དུ་མཆོད་གཏོར་བཤམ། ཡེ་ཤེས་ཁྲོ་བོ་གང་ཡང་རུང་བའི་བདག་བསྐྱེད་སྔོན་དུ་འགྲོ་བས། མཆོད་པ་རྣམས་སྤྱི་དང་མཐུན་པར་བྱིན་གྱིས་བརླབས། ཐོད་པའི་སྣོད་དུ་ཧཱུཾ་ལས་བྱུང་བའི་གཏོར་མ་བདུད་རྩིའི་རྒྱ་མཚོ་ཆེན་པོ་དང༌། མཾ་ལས་བྱུང་བའི་མྱོས་བྱེད་དང༌། རཾ་ལས་བྱུང་བའི་རཀྟ་ཤ་ཁྲག་གི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ། ལན་མང་དུ་བརྗོད། སྟོང་པའི་ངང་ལས་མདུན་དུ་སྐད་ཅིག་གིས་ནག་པོ་ཆེན་པོ་དུས་ཀྱི་མུན་པ་ལྟ་བུ་ཞལ་གཅིག་ཕྱག་གཉིས་གཡས་གྲི་གུག་འཕྱར་བ། གཡོན་ཐོད་ཁྲག་ཐུགས་ཀར་འཛིན་པ། གཡོན་བརྐྱང་གི་སྟབས་ཀྱི་མི་རོའི་གདན་ལ་གནས་པ། སྟག་ལྤགས་
དང་སྦྲུལ་གྱིས་བརྒྱན་པ། ཐོད་སྐམ་གྱི་དབུ་རྒྱན་དང༌། ཐོད་རློན་གྱི་དོ་ཤལ་ཅན། སྤྱན་གསུམ་སྨ་ར་སྨིན་མ་དབུ་སྐྲ་སེར་པོ་གྱེན་དུ་བརྫེས་པ། མིའུ་ཐུང་གི་རྣམ་པ་ཆེས་གཏུམ་པ། མི་བསྐྱོད་པའི་དབུ་རྒྱན་ཅན། མེ་འོད་དྲག་ཏུ་འཕྲོ་བའོ། །དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རང་གི་སྙིང་ག་ནས་འོད་ཟེར་འཕྲོས། ནག་པོ་ཆེན་པོ་འཁོར་བཅས་སྤྱན་དྲངས། སྙིང་པོའི་མཐར། མཧཱ་ཀཱ་ལ་ཨཱ་གཙྪ་ཨཱ་གཙྪ་ཞེས་བརྗོད། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཨརྒྷཾ་ནས་ཤཔྟའི་བར་གྱིས་མཆོད། ཨོཾ་མཧཱ་ཀ་ལ་ཧ་ན་ཧ་ན་བཛྲེ་ཎ་སྭཱཧཱ། སྙིང་པོ་འབུམ་ཕྲག་བཞི་བཟླས་པའི་མཐར། ཨོཾ་ཨ་སི་མུ་ས་ལ། ཏྲི་ཤུ་ལ། ཨེ་ཧྱེ་ཧི། མཧཱ་ཀཱ་ལ། སརྦ་ཤ་ཏྲུན་ནིརྒྷ་ཏ་ཡ། ཛཱ་ར་ཎ། གྲྀཧྞ་པཱ་ཡ། གྲྀཧྣ་པཱ་ཡ་ཧཱུཾ་ཕཊ། ཁྲི་ཕྲག་གཅིག་བཟའ་བ་སྤངས་ནས་བཟླའོ། དེ་ལྟར་ལན་གསུམ་གྱི་མཐར་སྙིང་པོ་ཉིས་འབུམ་བཟླས་པ་བསྙེན་པ་གྲུབ་པའོ། །ཐུན་འཇོག་ཁར། ཨོཾ་མཧཱ་ཀཱ་ལ་ཧ་ན་ཧ་ན། རཀྵ་རཀྵ་བཱ་ལིཾ་གྲྀཧྞ་ཀ་ར་ཡཾ་ཀུ་རུ་ཛ་ཛཿ ཞེས་ལན་གསུམ་གྱིས་གཏོར་མ་ཕུལ། སྙིང་པོ་ལན་གསུམ་གསུམ་གྱིས་རཀྟ་དང་ཆང་བསྒྲེངས། སྤོས་སྦྱོར་བསྲེགས། ཅང་ཏེའུ་བརྡུངས་ཤིང་སྲིན་གཟུགས་མ་འདོན་ནོ། །རྟེན་ཡོད་ན་བརྟན་བཞུགས་བྱ། མེད་ན་མུཿཞེས་གཤེགས་སུ་གསོལ། འདིའི་རྗེས་གནང་ནི། རྡུལ་ཚོན་
གྱི་མཎྜལ་ནག་པོ་གྲུ་གསུམ་ལ་ཚོམ་བུ་ནག་པོ་བཀོད། ཛཾ་བུ་ཊི་ཀ་དང་ཤ་དང་སྲན་ཆན་བཏབ་པའི་གཏོར་མ་དང༌། མྱོས་བྱེད་རཀྟའི་མཆོད་པ་རྣམས་བཤམས། བསྟོད་པའི་བར་གོང་བཞིན་ཉམས་སུ་བླངས། རྗེས་གནང་གི་ངོ་བོ་ནི། པཎ་ཆེན་ཤཱཀྱ་ཤྲཱི་ནས་བརྒྱུད་པའི་རྗེས་གནང་གཞན་དང་འདྲའོ། །གསོལ་བཏབ་སྐྱབས་འགྲོ་སེམས་བསྐྱེད། སྐུ་བསྐྱེད་བསྟིམ། གསུམ་བཟླས་ལུང༌། ཐུགས་ཕྱག་མཚན་བསྟིམ་པ་རྣམས་ཡིན་ལ། ཕྱིས་ཀྱི་ལག་ལེན་ལ་གཏོར་དབང་བྱེད་པའང་འདུག་པས། དེ་ལྟ་ན་མཎྜལ་གྱི་སྟེང་དུ་མཉྫི་ལ་གཏོར་མའང་བཤམ་མོ། །ཆོས་སྐྱོང་ཀུན༵་གྱི་སྒྲུབ་ཐབས་ནི། །རྙིང་མའི་ལུགས་དང་འདྲེས་པ་མང༌། །འཕགས་ཡུལ་མཁས་པའི་གསུང་དྲི་མེད། །མཆོག་ཏུ་དག༵འ་བའི་སྙིང༵་པོ༵་འདིའོ། ཁ་ཆེ་པཎ་ཆེན་ནས་བརྒྱུད་པ་གྲི་གུག་མའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
དཔལ་མགོན་པོ་ཟངས་གྲི་ཅན་ལྷ་བཅུ་བདུན་མའི་སྒྲུབ་ཐབས།
ཨོཾ་སྭཱ་སྟི། ཧེ་རུ་ཀ་དཔལ་ལས་སྤྲུལ་པ། །ལེགས་ལྡན་ཆེན་པོ་ལ་བཏུད་ནས། །གཤིན་རྗེའི་ལུགས་ལྟར་སྒྲུབ་པ་ཡི། །སྒྲུབ་ཐབས་རྗེས་གནང་བཅས་པ་བཤད། །དམིགས་རྟེན་གྱི་མདུན་དུ་མཆོད་གཏོར་བཤམ། དམིགས་རྟེན་མེད་ན་མདུན་གྱི་ནམ་མཁར་བསྒོམས་ཀྱང་རུང༌། བདག་བསྐྱེད་ཧེ་རུ་ཀ་ལ་སོགས་པ་གང་རུང་སྔོན་དུ་འགྲོ་བས། མཆོད་པ་བྱིན་རླབས་མགོན་པོ་སྤྱི་དང་འདྲ་བར་བྱ། མདུན་བསྐྱེད་བསངས་སྦྱངས། སྟོང་པའི་ངང་ལས་ཁཾ་ལས་རྡོ་རྗེའི་བྲག་རི་ཆེན་པོའི་སྟེང་དུ། ཧཱུཾ་དང་གྲི་གུག་ལས་བསྲུང་བའི་འཁོར་ལོའི་ནང་དུ་དུར་ཁྲོད་ཆེན་པོས་བསྐོར་བའི་དབུས་སུ། བྷྲུཾ་ལས་གཞལ་ཡས་
ཁང་ཐོད་མཁར་གྲུ་གསུམ་པ། རྐང་གི་ཀ་བ། རྒྱུ་མའི་དྲ་ཕྱེད། ཀེང་རུས་ཀྱི་ཐོག་ཕུབས་སོགས་འཇིགས་པའི་རྒྱན་གྱིས་བརྒྱན་པ། སྒོ་གཅིག་མདུན་གྱི་ལོགས་སུ་གཏད་པ། དབུས་སུ་མུ་ཁྱུད་གྲི་གུག་གི་འཕྲེང་བས་བསྐོར་བའི་ནང་གནམ་ལྕགས་ཀྱི་འཁོར་ལོ། ལྟེ་བར་ཆོས་འབྱུང་གྲུ་གསུམ་མཐིང་ནག་དང་བཅས་པ། དབུས་སུ་པད་ཉིད་ལ་དགྲ་བགེགས་ཀྱི་གཟུགས་བརྙན་བསྣོལ་བ། རྩིབས་རྣམས་ལ་པད་ཉི་རོ་གདན་དང་བཅས་པ་བཅུ་དྲུགརང་གི་སྙིང་གའི་ཧཱུཾ་གི་འོད་ཟེར་གྱིས། དགྲ་བགེགས་ཀྱི་རྣམ་ཤེས་ཎི་ལྗང་ཁུ་དང་ཏྲི་སེར་པོ་རྣམ་པར་བཀུག་སྟེ་བསྟིམ། དབུས་ཀྱི་གདན་གྱི་སྟེང་དུ་ཧཱུཾ་ལས་གྲི་གུག་ཧཱུཾ་གིས་མཚན་པ་ལས་འོད་འཕྲོས། དགྲ་བགེགས་གདུག་པ་ཅན་ཐམས་ཅད་ཚར་བཅད། ཚུར་འདུས་ཡོངས་སུ་གྱུར་པ་ལས། དཔལ་ལེགས་ལྡན་ནག་པོ་ཆེན་པོ་རྡོ་རྗེ་སྲིན་པོའི་གཟུགས་ཅན། སྐུ་མདོག་བུང་བ་ལྟར་གནག་པ། ཐུང་ཞིང་སྦོམ་ལ་ཉི་མ་སྟོང་གི་གཟི་བརྗིད་ཅན། ཞལ་གཅིག་ཕྱག་གཉིས་སྤྱན་གསུམ་པ། མཆེ་བ་གཙིགས་ཤིང་ལྗགས་འགྲིལ་བ། ཞལ་གྱི་གྲྭ་ནས་ཁྲག་འཛག་པ། དབུ་སྐྲ་སྨ་ར་སྨིན་མ་ཁམ་ནག་གྱེན་དུ་འགྲེང་བ། ཕྱག་གཡས་གྲི་གུག་འབར་བ་འཕྱར་སྟབས་དང༌། གཡོན་གདུག་པ་
ཅན་གྱི་ཁྲག་གི་གང་བའི་ཐོད་པ་ཐུགས་ཀར་འཛིན་པ། སྟག་ལྤགས་ཀྱི་ཤམ་ཐབས་ཅན། ཐོད་སྐམ་གྱི་དབུ་རྒྱན་དང༌། ཐོད་རློན་གྱི་དོ་ཤལ་ཅན། སྦྲུལ་གདུག་པས་སྐུ་ལ་བརྒྱན་པ། གཏུམ་ཞིང་འཁྲུགས་པས་རང་གི་ཡན་ལག་གི་ཤ་ཡང་གཅོད་པ་ཙམ་དུ་ཁྲོས་པ། གཡོན་བརྐྱང་གི་སྟབས་ཀྱི་འགྱིང་ཞིང་བརྗོད་པས་དགྲ་བགེགས་རྣམས་བརྫིས་པ། བསྐལ་པའི་མེ་ལྟ་བུའི་དབུས་ན་བཞུགས་པའོ། །འཁོར་ལོའི་རྩིབས་བརྒྱད་ལ་ཡ་བརྒྱད་དང་མ་བརྒྱད་ལས་གྲི་གུག་བཅུ་དྲུག་ཡོངས་སུ་གྱུར་པ་ལས། གཤིན་རྗེ་བརྒྱད་དང༌། མ་མོ་བརྒྱད་དུ་གྱུར་པ་ནི། ཤར་དུ་ཡ་བ་ཏི་དང་ཕོ་ཉ་མོ། ལྷོར་ཆོས་ཀྱི་རྒྱལ་པོ་དང་མཆེ་བ་མོ། ནུབ་ཏུ་ཏེལ་བ་དང་བེ་ཅོན་ནག་མོ། བྱང་དུ་ཨ་ཝ་གླང་མགོ་དང་དུས་མཚན་མ། བྱང་ཤར་དུ་རལ་པ་ཚར་དགུ་དང་ལྕགས་ཀྱུ་མ། ནུབ་བྱང་དུ་རྨིགས་པ་དང་ཞག་པ་མོ། ལྷོ་ནུབ་ཏུ་ཕྱ་སངས་དང་ལྕགས་སྒྲོག་མ། ཤར་ལྷོར་མིག་དམར་དང་འབེབས་པ་མོ། དེ་ལྟར་གཤིན་རྗེ་བརྒྱད་ནི་མདོག་སྔོ་སྐྱ་སྐྲ་གྱེན་དུ་བརྫེས་པ། མ་མོ་བརྒྱད་ནི་མདོག་ནག་མོ། སྐྲ་དང་ནུ་མ་འཕྱང་བ། ཐམས་ཅད་ཀྱང་གཅེར་བུ་གྲི་གུག་དང་ཐོད་པ་འཛིན་པ། རྒྱན་སྤངས་པ། གཡོན་བརྐྱང་
གི་སྟབས་ཀྱིས་གནས་པ། བཀའ་ནོད་པའི་ཚུལ་ཅན་ནོ། །རང་གི་སྙིང་ག་ནས་འོད་ཟེར་འཕྲོས། མགོན་པོ་ཡེ་ཤེས་སེམས་དཔའ་བཛྲ་ས་མཱ་ཛཿ ཧཱུཾ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་ནག་པོ་ཆེ། །རྡོ་རྗེ་འཆང་གི་སྤྱན་སྔ་རུ། །ཇི་ལྟར་ཁས་བླངས་དམ་བཅས་ལྟར། །བྱིན་གྱིས་བརླབས་པའི་གནས་འདི་རུ། །དྲག་པོའི་ལས་ལ་སྤྱན་འདྲེན་གཤེགས། །ཨོཾ་མཧཱ་ཀ་ལ་ཛྙཱ་ན་ཛཿཧཱུཾ་བཾ་ཧོཿ གནས་གསུམ་བྱིན་གྱིས་བརླབས། མགོན་པོའི་སྤྱི་བོར་མི་བསྐྱོད་པས་རྒྱས་བཏབ་པར་གྱུར། བཛྲ་ཨཱ་ས་ན་ཏིཥྛནྟུ་ཞེས་གདན་ཕུལ། ཨོཾ་མཧཱ་ས་མ་ཡ་ཧ་ན་ཧ་ན་ཧཱུཾ་ཕཊ། ཅེས་དམ་རྒྱ་བསྟན་ལ་དམ་ཚིག་དྲན་ཏུ་གཞུགརྡོ་རྗེའི་རྩེ་མོའི་ནང་མཆོད་གཏོར་ཞིང༌། མགོན་པོ་དང་རང་གི་ལྕེ་ཐོག་ཏུ་མྱངས་པར་བསམས་ལ། འདི་ནི་ཁྱོད་ཀྱི་དམྱལ་བའི་ཆུ། །ཞེས་པ་ནས། ཋ་ཋ་ཋ་ཨོཾ་ཨཱཿཧཱུཾ། ཞེས་མནའ་ཆུ་འཐུང་ཁྱོད་བདག་དམ་ཚིག་བསྲེས་པ་ཡི། །དབང་དུ་གྱུར་པ་ཁྲག་འཐུང་མགོན། །བདག་ཀྱང་དམ་ལ་མི་འདའ་བར། །རྟག་ཏུ་ནག་པོ་ཁྱོད་མཆོད་ཀྱི། ཁྱོད་ཀྱང་དམ་ལས་མི་འདའ་བར། །བདག་གིས་བཅོལ་བའི་ལས་ཀུན་གྱིས། །གལ་ཏེ་དམ་ལས་འདའ་གྱུར་ན། ཁྱོད་ཀྱི་སྙིང་ཁྲག་ང་ལ་ཡོད། །ཞེས་དམ་ཚིག་ཁས་བླངས། བསྙེན་པ་སྔོན་དུ་སོང་ན།
སྐབས་འདིར་དབང་དུ་བསྡུ་བའི་དམིགས་པ་བྱེད། མ་ཡིན་ན་མི་དགོས། གཏོར་མ་ཡི་དམ་གྱི་མངོན་རྟོགས་ལྟར་བྱིན་གྱིས་བརླབས། མཐར། ཨོཾ་མཧཱ་ཀཱ་ལ་ཛྙཱ་ན་ཨ་མྲྀ་ཏ་ཨོཾ་ཨཱཿཧཱུཾ། ཞེས་ལན་གསུམ་གྱིས་བྱིན་གྱིས་བརླབས། ཨོཾ་ཤྲཱི་མཧཱ་ཀཱ་ལ་རཱུ་པ་ས་པ་རི་ཝཱ་རེ་བྷྱཿ ཨི་དཾ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། སརྦ་དུཥྟཾ་ནཾ་མ་ར་མ་ར། གྲྀཧྞ་གྲྀཧྞ་བནྡྷ་བནྡྷ་ཧ་ན་ཧ་ན་ད་ཧ་ད་ཧ་པ་ཙ་པ་ཙ་དི་ན་མེ་ཀེ་ན་ཧཱུཾ་ཧཱུཾ་ཕཊ། ཅེས་ལན་བདུན་ལ་སོགས་པས་ཕུལ། དེ་ནས་བླ་མ་དང་ཡི་དམ་གྱི་བཀའི་དམ་བསྒྲགས་ཏེ་འཕྲིན་ལས་བཅོལ། གོང་བཞིན་མནའ་ཆུ་བླུད་ལ། ལག་ཏུ་རྡོ་རྗེ་གཏད་པར་མོས་ཏེ། རྡོ་རྗེ་འདི་ནི་རྡོ་རྗེ་ཆེ། །སངས་རྒྱས་ཀུན་གྱིས་བྱིན་གྱིས་བརླབས། །དམ་ཚིག་འདི་ལས་འདས་གྱུར་ན། །ནག་པོ་ཁྱོད་ནི་ཉམས་པར་གྱུར། །ཨོཾ་བཛྲ་མཧཱ་ས་མ་ཡ་ཧ་ན་ཧ་ན་ཧཱུཾ་ཕཊ་དང༌། སྲོག་སྙིང་བརྗོད་དེ། བྲོ་དམ་པོ་དགག་གོ །ཨརྒྷཾ་ནས་ཤཔྟའི་བར་གྱིས་མཆོད། འབྲུ་གསུམ་གྱིས་ནང་མཆོད་ཕུལ་ལ། ཧཱུཾ། རྣམ་དག་དབྱིངས་ལས་མི་གཡོས་ཀྱང༌། །ཐུགས་རྗེས་ཁྲོས་པའི་སྐུར་སྟོན་ཞིང༌། །བདུད་དཔུང་འཇོམས་པའི་ལས་མཛད་པ། །ལེགས་ལྡན་མགོན་ལ་ཕྱག་འཚལ་བསྟོད། །བསྐལ་པའི་མེ་ལྟར་འབར་བ་ཡི། །དུར་ཁྲོད་ཆེན་པོའི་ཀློང་དཀྱིལ་ནས། །མི་མཐུན་ཕྱོགས་སུ་གྱུར་པ་ཀུན། །སྒྲོལ་མཛད་མགོན་ལ་ཕྱག་འཚལ་བསྟོད། །
དུས་གསུམ་སངས་རྒྱས་ཐམས་ཅད་ཀྱི། །བསྟན་པ་ཕྱོགས་བཅུར་སྐྱོང་མཛད་ཅིང༌། །གནོད་བྱེད་ཐམས་ཅད་ཕམ་མཛད་པ། །མཐུ་ཆེན་མགོན་ལ་ཕྱག་འཚལ་བསྟོད། །ཞེས་དང༌། སྲིན་གཟུགས་མས་བསྟོད། གཞན་ཡང་བསྟོད་པའི་རིགས་མང་དུ་ཡོད་པ་རྣམས་ཤེས་ན་བྱ། ལྷ་མོ་བསྐྱེད་ཡོད་ན། རྒྱ་མཚོའི་ཀློང་ན་སོགས་ཀྱིས་བསྟོད་པའི་སྲོལ་ཡོད་ཀྱང་འདི་ཉིད་ཀྱི་རང་ལུགས་ལ་མི་དགོས་པར་མངོན། ལེགས་ལྡན་ནག་པོ་ཆེན་པོ་ནི། །མི་བསྲུན་འཁོར་གྱི་དཀྱིལ་འཁོར་ན། །ལས་མཛད་གཤིན་རྗེ་མ་མོ་ནི། །མ་རུངས་སྤྲུལ་པའི་ཕོ་ཉ་སྟེ། ཁམས་གསུམ་སྲོག་ལ་དབང་བྱེད་ཅིང༌། །སྐྱེ་འགྲོའི་དབུགས་ལ་རྔམ་པ་པོ། ཁྲག་འཐུང་ལས་ཀྱི་སྲིན་པོ་དང༌། །སྲིན་མོའི་ཚོགས་ལ་བདག་བསྟོད་དོ། །ཞེས་འཁོར་ལ་བསྟོད། ཁྱོད་ཀྱིས་ཐུབ་པའི་བསྟན་པ་སྲུངས། །རྣལ་འབྱོར་པ་ཡི་བར་ཆད་བཟློག །ཆོས་དང་དཔལ་འབྱོར་རྒྱས་པར་མཛོད། །ལུས་དང་གྲིབ་མ་བཞིན་དུ་འགྲོགས། །འདས་དང་མ་བྱོན་ད་ལྟར་གྱི་སོགས་ཀྱི་འཕྲིན་ལས་བཅོལ། ཐུན་གཏོར་འབུལ་བར་སྤྲོ་ན་སྐབས་འདིར་གཏོང༌། བཟླས་པ་ནི་སྐབས་འདིའམ་གཏོར་མ་འབུལ་བའི་སྔོན་གང་དུ་བྱས་ཀྱང་འདྲ་སྟེ། རྩ་སྔགས་ནི། ན་མོ་རཏྣ་ཏྲ་ཡཱ་ཡ། ཏདྱ་ཐཱ། ཨོཾ་ཤྲཱི་སོགས་ཤཱ་ས་ན་རྩ་སྔགས་དང༌། ཨོཾ་མཧཱ་ཀཱ་ལ་རུ་པ་རུ་ཏྲ་ས་མ་ཡ་ཧཱུཾ་ཧཱུཾ་ཕཊ་ཕཊ། སྙིང་པོའོ། །ཨོཾ་མཧཱ་ཀཱ་ལ་ཧཱུཾ་ཕཊ།
ཡང་སྙིང་ངོ༌། །ཨོཾ་མཧཱ་ཀཱ་ལ་ཏྲཀྴད་རྦད། སྲོག་སྙིང་ངོ༌། །དེ་ལ་ཡ་མ་རཱ་ཛ་བཏགས་པ་ནི་ལས་སྔགས་སོ། །འདིའི་རྗེས་གནང་བྱེད་པར་འདོད་ན། སྒོམ་དོན་དང་མཐུན་པའི་དཀྱིལ་ཐང་བཀྲམ། དེའི་དབུས་མཉྫི་ལ་གཏོར་མ་བཀོད། ཤ་ཁྲག་གིས་བརྒྱན་པའི་མཆོད་གཏོར་དང་ནང་མཆོད་སོགས་བཤམ། སྔོན་འགྲོ་གཏོར་མ་བཏང༌། གནས་ཡོ་བྱིན་རླབས་བྱ། བདག་མདུན་གཏོར་ཆོག་དང་བཅས་པ་གོང་བཞིན་བྱས་ལ་སློབ་མས་མཎྜལ་ཕུལ། རྡོ་རྗེ་འཛིན་པ་སོགས་ཀྱིས་གསོལ་བ་བཏབ། གུར་ནས་འབྱུང་བའི་རྒྱུན་བཤགས་དང༌། རིགས་ལྔའི་སྡོམ་བཟུང་བྱ། མདུན་བསྐྱེད་ཀྱི་དཀྱིལ་འཁོར་བླ་མའི་ངོ་བོར་གསལ་བཏབ། སློབ་མ་ཉིད་མགོན་པོ་གཙོ་རྐྱང་དུ་བསྐྱེད་ནས། ཡེ་ཤེས་པ་སྤྱན་འདྲེན་ནས་རྒྱས་བཏབ་ཀྱི་བར་བྱ་སྟེ། སྐུའི་རྗེས་གནང་ངོ༌། །བཟླས་ལུང་སྦྱིན་ཏེ་གསུང་གི་རྗེས་གནང་ངོ༌། །སེམས་སྤྲོས་བྲལ་དུ་ངོ་སྤྲད་དེ། ཐུགས་ཀྱི་རྗེས་གནང་ངོ༌། །དམ་རྫས་ཀ་པཱ་ལ་སྤྱི་བོར་བཞག་ལ། དམ་རྫས་རབ་ཏུ་འབར་བ་འདིས། །དེ་རིང་ཁྱོད་ལ་དབང་བསྐུར་ཏེ། །མཁའ་འགྲོ་གནོད་སྦྱིན་དམ་ཅན་གྱི། །འཕྲོ་འདུ་ཡོན་ཏན་དབང་ཐོབ་ཤོག །ཨོཾ་བཛྲ་མཧཱ་ཀཱ་ལ་གུ་ཎ་ཧྲི་ད་ཧཱུཾ། ཡོན་ཏན་གྱི་རྗེས་གནང་ངོ༌། །ཧཱུཾ་ལས་བྱུང་བའི་གྲི་གུག་ལག་པ་གཡས་དང༌། ཨ་ལས་བྱུང་བའི་ཐོད་པ་ལག་པ་གཡོན་དུ་གཏད་ལ། སངས་རྒྱས་ཀུན་གྱི་འཕྲིན་ལས་དབང༌། །ཟངས་གྲི་འབར་བས་དགྲ་སྲོག་གཅོད། །དབང་སྡུད་ཐོད་པའི་རང་རྟགས་ཅན། །འཕྲིན་ལས་རྣམ་
བཞི་ཐོབ་པར་ཤོག །ལས་སྔགས་བརྗོད་དེ་འཕྲིན་ལས་ཀྱི་དབང་ངོ༌། །དེ་ནས་གཏོར་མའི་བཀའ་བསྒོ་སྤྱི་དང་མཐུན་པར་བྱས་ཏེ། དེའི་མཐར་དམ་ཚིག་དྲན་པ་མནའ་ཆུ། དམ་ཚིག་ཁས་ལེན་བྲོ་དགག་པ་དང་བཅས་པ་སློབ་དཔོན་གཉིས་ཀས་བྱ། རྗེས་ཀྱི་བྱ་བ་ཐམས་ཅད་སྤྱི་དང་མཐུན་ནོ། །རྗེས་ཆོག་གི་སྐབས་གཏོར་མ་ཆེན་པོའི་ལྷ་ནམ་མཁར་སྤར་ལ། གཏོར་མ་དེ་ཉིད་བྱིན་གྱིས་བརླབས་ཏེ་འབུལ་བའི་ལག་ལེན་ཡང་མཛད། འདི་ལ་རྒྱས་པར་དབང་བསྐུར་བའི་ལུགས་དང༌། བསྡུ་ན་ལུང་ཙམ་གྱིས་ཆོག་པའི་སྐབས་ཀྱང་འདུག་ལ། ལག་ལེན་འབྲིང་པོའི་ལུགས་སུ་རྗེས་གནང་བྱེད་པ་ལྟར་འདིར་བཀོད་པ་ཡིན་ཏེ། རྣལ་འབྱོར་བླ་མེད་ཀྱི་དཀྱིལ་འཁོད་དུ་དབང་བསྐུར་བ་མ་ཐོབ་པ་ལ་འདིའི་དབང་བཞིས་ཀྱང་སྨིན་བྱེད་དུ་འགྱུར་བ་དཀའ་ལ། དེ་ཐོབ་པས་ལས་ཚོགས་མཐའ་དག་སྒྲུབ་པ་ལ། ལུང་མནོས་པས་ཀྱང་རུང་བ་ཙམ་ཡིན་མོད་ཀྱི། བྱིན་རླབས་ཀྱི་སྒོ་རྗེས་གནང་ཉིད་མཆོག་ཡིན་ལ། འཕྲིན་ལས་ཀྱི་ལྷ་འདི་འདྲ་བའི་རིགས་ལ། དབང་ཆེན་མོས་ཀྱང་རྗེས་གནང་ལས་ལྷག་པའི་བྱིན་རླབས་ཀྱི་སྒོ་ཡོད་པ་དཀའ་བའི་ཕྱིར། དབང་མཆོག་གི་རྒྱ་གཞུང་དུ་གྲགས་པ་ལྟར། དབང་དེ་དག་ཐོབ་ནའང་ལེགས་པ་ཡིན་མོད་ཀྱི། མིན་ནའང་རྗེས་གནང་ཐོབ་ན་དེ་ཉིད་ཀྱིས་ཆོག་ཤེས་པར་བྱའོ། །འདི་ནི་དུར་ཁྲོད་ནག་པོའི་རྒྱུད་ལས་འབྱུང་ལ། དེ་ལ་ཇོ་བོ་རྗེ། ནག་པོ་རོ་འཛིན། ཨ་ཙ་ར་དམར་པོ། ལོ་ཆེན་རིན་བཟང༌། གྱི་ལྗང་དབུ་དཀར་བ། གྲུ་གུ་སྟོན་པ་ནས་བརྒྱུད་པ་སྟེ། བརྒྱུད་པའི་ལུགས་སྲོལ་དྲུག་ཡོད་པར་གྲགས་ནའང༌། དོན་གྱི་ངོ་བོ་ལ་ཁྱད་པར་ཆེར་མེད། འདི་ནི་གྱི་ལྗང་ལུགས་གཙོ་ཆེ་བའི་དབང་དུ་བྱས་སོ། །གྱི་ལྗང་ལོཙྪས་ཕྱོགས་ཀུན༵་དུ། །
འཕྲིན་ལས་དག༵འ་བར་སྒྲུབས་ཞེས་བསྒྲགས། །ཇོ་བོའི་མན་ངག་ཀྱང་ལྡན་པའི། །ལག་ལེན་སྙིང༵་པོ༵་མདོ་ཙམ་ཡིན། །དཔལ་མགོན་པོ་ཟངས་གྲི་ཅན་ལྷ་བཅུ་བདུན་མའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
མགོན་པོ་གྲི་གུག་ལྷ་དགུའི་སྒྲུབ་ཐབས།
ཨོཾ་སྭཱ་སྟི། ཧེ་རུ་ཀ་ལ་གུས་བཏུད་ནས། །མགོན་པོ་གྲི་གུག་ཅན་སྒྲུབ་ཐབས། །ཛྙཱ་ནའི་བཞེད་གཞུང་འཕགས་ཡུལ་ལས། །བྱུང་བའི་ཡིད་ཆེས་ལྡན་པ་འབྲི། །ཆོས་འབྱུང་གྲུ་གསུམ་ནག་པོ་མཉྫིའི་སྟེང་དུ་གཏོར་མ་དང་བཅས་པ་བཤམ། མཐའ་མཆོད་གཏོར་དང་ཕྱག་མཚན་གྱིས་བསྐོར། ཡི་དམ་གྱི་བདག་བསྐྱེད་སྔོན་དུ་འགྲོ་བས། མདུན་བསྐྱེད་བསངས་སྦྱངས། བཛྲ་ར་བ་ལི་ཕཊ། རྡོ་རྗེའི་བྲག་རི་དང༌། ཀེང་རུས་ཀྱི་སྟེང་དུ། དུར་ཁྲོད་དང་བཅས་པའི་གཞལ་ཡས་ཁང་འཇིགས་སུ་རུང་བ། དབུས་སུ་པད་ཉིད་ལ་རང་གི་སྙིང་ག་ནས་སྤྲོས་པའི་ཧཱུཾ་ལས་གྲི་གུག་ཧཱུཾ་གིས་མཚན་པ་ཡོངས་སུ་གྱུར་པ་ལས། བཞི་སྦྲག་གི་སྐབས་བཞིན་གཙོ་རྐྱང་བསྐྱེད། ཁྱད་པར་མི་ལྤགས་ཀྱི་སྟོད་གཡོགས་ཅན་ནོ། །རང་གི་སྙིང་ག་ནས་འོད་ཟེར་འཕྲོས། ཡེ་ཤེས་སེམས་དཔའ་འཁོར་བཅས་བཛྲ་ས་མཱ་ཛཿ ཨེ་ཧྱེ་ཧི་མཧཱ་ཀཱ་ལ་ཀཱ་རུ་ཎི་ཀ་ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། གཙོ་བོའི་བྱང་ཤར་དུ། ལྷ་མོ་ནག་མོ་རྩེ་གསུམ་དང་ཐོད་ཁྲག་འཛིན་པ། མདུན་དུ་གསང་བའི་ལས་མགོན་དམར་ནག་གྲི་ཐོད་ཅན། ཛམྦུ་
ཀའི་ཞལ་དང་ལྡན་པའོ། །གཡས་སུ་གཤིན་རྗེ་ལྗང་ནག་རལ་གྲི་དང་ཐོད་ཁྲག་བསྣམས་པ། གཡོན་དུ་ལས་མགོན་བདུད་བྱ་རོག་གདོང་ཅན་ཐོད་འཛིན་པ། ཕྱི་རོལ་ཀྱི་ཤར་དུ་མཧཱ་ཀ་ལི་ནག་མོ་རལ་གྲི་དང་ཐོད་ཁྲག་འཛིན་པ་དྲེའུ་ལ་ཆིབས་པ། ལྷོར་བི་ཀ་ར་ལི་ནག་མོ་གྲི་གུག་དང་ཐོད་ཁྲག་འཛིན་པ་བྱ་རོག་ལ་ཆིབས་པ། ནུབ་ཏུ་པུ་ཀ་ར་ལི་ནག་མོ་རྡོ་རྗེ་དང་ཕུར་བུ་འཛིན་པ་རོ་ལངས་ལ་ཞོན་པ། བྱང་དུ་ཀངྒ་ལི་ནག་མོ་ཏྲི་ཤུ་ལ་དང་ཐོད་ཁྲག་འཛིན་པ་རོའི་གདན་ཅན། ཐམས་ཅད་ཀྱང་དྲག་པོའི་ཆ་ལུགས་ཡོངས་སུ་རྫོགས་པའོ། །ཨརྒྷཾ་སོགས་ཀྱི་ཕྱི་དང༌། འབྲུ་གསུམ་གྱིས་ནང་མཆོད་ཕུལ། བསྟོད་པ་ཤོ་ལོ་ཀ་གཅིག་གིས་བསྟོད། རྡོ་རྗེ་རྩེ་ལྔ་པའི་ཕྱག་རྒྱ་བསྟན་ལ། ནག་པོ་ཆེན་པོ་འཁོར་བཅས་ཀྱིས། དཔལ་ཧེ་རུ་ཀའི་བཀའ་ལས་མ་འདའ་བར། བདག་གི་བསམ་པའི་དོན་ཐམས་ཅད་སྒྲུབས་ཤིགདམ་ཚིག་ལས་འདས་ན། ཁྱོད་ཉིད་འཇིག་པར་གྱུར་ཏ་རེ། ནང་མཆོད་གཏོར་ཞིང༌། འཐུངས་ཤིག་འཐུངས་ཤིག་རྡོ་རྗེའི་ཆུ། །རྡོ་རྗེའི་ཆུ་འདི་འཐུངས་ནས་ནི། །དམ་ཚིག་བསྲུངས་ན་དངོས་གྲུབ་འཐོབ། །དམ་ལས་འདས་ན་བརླག་པར་འགྱུར། །ཨོཾ་སརྦ་ཨུ་ད་ཀ་ཋ། དམ་ཚིག་གི་རྡོ་རྗེ་གཏད་པར་བསམ་ལ། ཟུང་ཤིག་ཟུང་ཤིག་རྡོ་རྗེ་ཆེ། ཁྱོད་ཀྱིས་རྟག་ཏུ་འདི་ཟུང་ཤིག །གལ་ཏེ་བསྒོ་བ་མ་ཉན་ན། །ནག་མོ་ཁྱོད་ནི་
ཉམས་པར་འགྱུར། །གནས་གསུམ་བྱིན་རླབས་དང༌། དབང་བསྐུར་རྒྱས་གདབ་སྤྱི་དང་འདྲ་བ་ལས། ཧེ་རུ་ཀས་དབུ་བརྒྱན་ཞེས་བརྗོད། དངོས་བཤམས་ཀྱི་མཆོད་པ་རྣམས་བླ་མེད་སྤྱི་དང་མཐུན་པར་བྱིན་གྱིས་བརླབས། མོན་སྲན་རྡེའུ་ཛཾ་བུ་ཊི། །མེ་ཏོག་བདུག་སྤོས་ཤ་ལྔ་དང༌། །བདུད་རྩི་ལྔ་སྦྱར་གཏོར་མ་འདིས། །དཔལ་ལྡན་ནག་པོ་འཁོར་བཅས་མཆོད། །ཨོཾ་མཧཱ་ཀཱ་ལ་སརྦ་པཉྩ་ཨ་མྲྀ་ཏ་ཨརྒྷཾ་པྲ་ཏཱིཙྪ་ཨི་དཾ་བ་ལིཾ་ཏ་ཁཱ་ཧི་ཁཱ་ཧི། འབྲུ་གསུམ་གྱིས་ནང་མཆོད་ཕུལ། བསྟོད་པ་སྲིན་གཟུགས་མ་བྱ། བཟླས་པའི་དམིགས་པ་གསལ་བཏབ་ལ། ཨོཾ་བཛྲ་མཧཱ་ཀཱ་ལ་ཡ་ཧཱུཾ་ཕཊ་སྭཱཧཱ། ཞེས་སྙིང་པོ་དང༌། ཤཱ་ས་ན་ཏེ་རྩ་སྔགས་དང༌། ཨོཾ་དེ་ཝ་ཧ་ན་ཧ་ན་བནྡྷ་བནྡྷ་ཀྵིཾ་ཀྵིཾ་ཧཱུཾ་ཕཊ། ཨོཾ་བི་ཤ་ཙཱི་མཧཱ་ཀཱ་ལ་ཧཱུཾ་ཕཊ། ཨོཾ་ཡ་མ་མཧཱ་ཀཱ་ལ་ཧཱུཾ་ཕཊ། ཨོཾ་མཧཱ་ཀཱ་ལ་ཁ་ཏ་མུ་ཁ་ཧཱུཾ་ཕཊ། ཨོཾ་མཧཱ་ཀ་ལི་ཧཱུཾ་ཧཱུཾ་ཧཱུཾ་ཕཊ་ཕཊ་སྭཱཧཱ། ཨོཾ་བི་ཀ་ར་ལི་ཧཱུཾ་ཧཱུཾ་ཕཊ་ཕཊ་སྭཱཧཱ། ཨོཾ་སུ་ཀ་ར་ལི་ཧཱུཾ་ཧཱུཾ་ཕཊ་ཕཊ་སྭཱཧཱ། ཨོཾ་ཀངྐ་ལི་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་པ་རྣམས་འཁོར་གྱི་སྔགས་སོ། །གཏོར་མ་ཤ་ལྔ་བདུད་རྩི་ལྔ་དང་འབྲེལ་བའི་བྱིན་རླབས་སྤྱི་དང་མཐུན་པར་བྱ། སོ་སོའི་སྙིང་པོའི་མཐར་ཨི་དཾ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི་སྭཱཧཱ། ཞེས་བཏགས་པ་ལན་གསུམ་གྱིས་ཕུལ། ཐུན་མོང་དུ་ཤཱ་ས་ནས་བསྟབས། མཆོད་བསྟོད་འདོད་དོན་གསོལ་བ་བཏབ་པ་རྣམས་སྤྱིས་རིགས་འགྲེ། སློབ་མ་རྣམས་ཁྲུས་བྱ། བགེགས་གཏོར་བཏང༌།
མཎྜལ་ཕུལ། རྒྱུན་བཤགས་ཡན་ལག་ལྔ་པ་བྱ། སློབ་དཔོན་དགོངས་སུ་གསོལ། བདག་རྡོ་རྗེ་འཛིན་པ་འདི་ཞེས་བགྱི་བ་ལ་དཔལ་རྡོ་རྗེ་ནག་པོ་ཆེན་པོའི་སྐུ་གསུང་ཐུགས་ཡོན་ཏན་འཕྲིན་ལས་ཀྱི་རྗེས་སུ་གནང་བ་སྩལ་དུ་གསོལ། ཞེས་ལན་གསུམ་གསོལ་བ་བཏབ། གཏོར་མ་མགོན་པོ་འཁོར་བཅས་སུ་བསྐྱེད། སློབ་མའི་མགོ་ཐོག་གི་ནམ་མཁར་བཟུང༌། འཁོར་བཅས་ཀྱིས་གར་མཛད་པས་བགེགས་བསྐྲད་པར་བསམ། མགོན་པོའི་དཔྲལ་མགྲིན་སྙིང་ག་ལྟེ་བ་གསང་བ་རྣམས་ནས། འོད་ཟེར་དཀར་དམར་མཐིང་སེར་ལྗང་ཁུ་རྣམས་སྤྲོས་ཏེ། སློབ་མའི་གནས་ལྔ་ཐིམ་པས། སྐུ་གསུང་ཐུགས་ཡོན་ཏན་འཕྲིན་ལས་ཀྱི་བྱིན་གྱིས་བརླབས་པར་མོས། དེ་ནས་བཀའ་བསྒོ་དྲག་ཏུ་བྱ། མགོན་པོ་འཁོར་བཅས་ཡེ་ཤེས་ཀྱི་བདུད་རྩིར་ཞུ། སློབ་མའི་སྤྱི་བོ་ནས་ཞུགས། སྨིན་མཚམས་ཡན་ཆད་གང༌།ཁྲི་ཁྲགབུམ་དབང་ཐོབ་པར་མོས། དེ་བཞིན་དུ་མགྲིན་པ། སྙིང་གལྟེ་བ། གསང་བ་རྣམས་གང་བས་དབང་བཞི་ཐོབ་པར་མོས། སློབ་མ་དང་མདུན་བསྐྱེད་ཀྱི་རྗེས་ཀྱི་བྱ་བ་ནི། མགོན་པོ་གཞན་གྱིས་རིགས་འགྲེའོ། །འདིའི་སྲོལ་འཛིན་རྣམས། རྡོ་རྗེ་གུར་གྱི་རྒྱུད་མགོན་ཡིན་པར་བཞེད་ཅིང༌། དེ་ལྟར་འདྲ་བར་ཡང་མངོན་ནོ། །སྒྲུབ་ཡིག་ཀུན༵་དུ་རྒྱས་པ་ལ། །དག༵འ་བས་ཡིག་རྙིང་ནང་དུ་ལྟོས། །རྗེས་གནང་ཙམ་དང་ཉེར་འབྲེལ་བའི། །སྒྲུབ་ཐབས་སྙིང༵་པོ༵་འདི་ཡིས་ཆོག །མགོན་པོ་གྲི་གུག་ལྷ་དགུའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
བེར་ནག་ཟངས་གྲི་ཅན་གྱི་སྒྲུབ་ཐབས།
ཨོཾ་སྭཱ་སྟི། བླ་མ་ཡི་དམ་མགོན་པོ་ལ། །བཏུད་ནས་གུར་གྱི་མགོན་པོ་དང༌། །དབྱེར་མེད་མཆོག་གི་ལས་མཁན་ནི། །ཟངས་གྲི་ཅན་གྱི་སྒྲུབ་ཐབས་བཤད། །ཡི་དམ་གྱི་བདག་བསྐྱེད་སྔོན་དུ་འགྲོ་བས། མཎྜལ་གྲུ་གསུམ་མཐིང་ནག་འབར་བ་ཚོམ་བུ་ནག་པོ་དང་བཅས་པ། དེའི་དབུས་སུ་བདུད་བཤོས་ཟུར་གསུམ་བཀོད། མཐའ་མཆོད་གཏོར་གྱིས་བསྐོར། གཏོར་མ་ཡི་དམ་གྱི་མངོན་རྟོགས་ལྟར་བྱིན་གྱིས་བརླབས། བསངས་སྦྱངས། སྟོང་པའི་ངང་ལས་རང་གི་མདུན་དུ་དུར་ཁྲོད་ཆེན་པོའི་དབུས་སུ། རྡོ་རྗེའི་བྲག་རི་དམར་ནག་གི་སྟེང་དུ། དྲག་པོ་འབར་བའི་གཞལ་མེད་ཁང་འཇིགས་སུ་རུང་བའི་རྒྱན་ཐམས་ཅད་ཀྱིས་བརྒྱན་པའི་དབུས་སུ། ཧཱུཾ་ལས་ཟངས་གྲི་ཧཱུཾ་གིས་མཚན་པ་ཡོངས་སུ་གྱུར་པ་ལས། ལས་ཀྱི་མགོན་པོ་ཟངས་གྲི་ཅན་མཐིང་ནག་ཕྱག་གཡས་གྲི་གུག་འཕྱར་ཞིང༌། གཡོན་ཐོད་པ་སྙིང་ཁྲག་གིས་གང་བ་འཛིན་པ། སྦོམ་ཐུང་གཟི་བརྗིད་ཆེ་བ་སྲིན་པོའི་ཆ་ལུགས་ཅན། ཞབས་ལ་སག་ཏིའི་ལྷམ་ཡུ་རིང་གསོལ་ཞིང༌། གཡས་བསྐུམ་གཡོན་བརྐྱང་གི་སྟབས་ཀྱིས་བཞུགས་ཤིང༌། དགྲ་བགེགས་ཀྱི་བཾ་ཆེན་མནན་པ། ཤ་འགག་དཀར་པོ་དང་ལྗང་ཁུ་བརྩེགས་ཤིང༌། དར་ནག་གི་འཇོལ་བེར་དགུ་བརྩེགས་
བསྣབས་པ། སྦྲུལ་དང་མི་མགོས་བརྒྱན་ཞིང༌། མེ་དཔུང་འབར་བའི་དབུས་ན་བཞུགས་པའོ། །དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རང་གི་སྙིང་ག་ནས་འོད་ཟེར་འཕྲོས། ཡེ་ཤེས་པ་བཛྲ་ས་མཱ་ཛཿ རྡོ་རྗེ་འཆང་གི་སྤྱན་སྔ་རུ། །ཇི་ལྟར་ཁས་བླངས་དམ་བཅས་བཞིན། །བྱིན་གྱིས་བརླབས་པའི་གནས་འདི་རུ། །དྲག་པོའི་ལས་ལ་སྤྱན་འདྲེན་གཤེགས། །མཧཱ་ཀཱ་ལ་རཱུ་པ་ས་མཱ་ཡ་ཛཿ ཛཿཧཱུཾ་བཾ་ཧོཿ ས་མ་ཡ་ཧོ། ས་མ་ཡ་སྟྭཾ་གྱིས་དམ་ལ་བཞགའདི་ནི་ཁྱོད་ཀྱི་དམྱལ་བའི་ཆུ་སོགས་ཀྱིས་མནའ་ཆུ་བླུད། མཆོད་བསྟོད་བྱས་ཏེ་བཟླས་པའི་དམིགས་པ་གསལ་བཏབ་ལ། ཨོཾ་མཧཱ་ཀ་ལ་ཀ་ལ་རཱུ་པ་ས་མ་ཡ་ཧཱུཾ་ཧཱུཾ་ཕཊ་ཕཊ། ཅེས་དྲག་ཏུ་བཟླས། མཐར་ཨོཾ་མཧཱ་ཀ་ལ་རུ་ཏྲ། ན་མཿསརྦ་ཏ་ཐཱ་ག་བྷྱོ་སོགས་ལན་བདུན་གྱིས་ཕུལ། ཨརྒྷཾ་ནས་ཤཔྟའི་བར་གྱིས་མཆོད། འབྲུ་གསུམ་གྱིས་ནང་མཆོད་ཕུལ། ལས་ཀྱི་མགོན་པོ་མཧཱ་ཀཱ་ལ་ནི། །སངས་རྒྱས་སྟོང་གི་བསྟན་པ་སྲུང་བ་པོ། །བླ་མ་དམ་པའི་སྐུ་དགྲ་འདུལ་བ་པོ། །དུས་ཀྱི་གཟུགས་ཅན་ཁྱོད་ལ་ཕྱག་འཚལ་ལོ། །ཞེས་བསྟོད། མཆོད་སྦྱིན་གཏོར་མ་འདི་སོགས་ཀྱིས་གསོལ་བ་བཏབ། ཡིག་བརྒྱ། བཟོད་གསོལ། གཤེགས་གསོལ་སོགས་སྤྱི་དང་འདྲའོ། །རྗེས་གནང་གི་སྔོན་འགྲོའི་བྱ་བ་དང༌། སྐུའི་རྗེས་གནང་ཡན་ཆད་གུར་མགོན་ལྕམ་དྲལ་གྱི་རྗེས་གནང་ཉིད་འདོན་པ་སྤོས་པས་རུང་ཞིང༌།
གསུང་གི་རྗེས་གནང་བཟླས་ལུང་དཀྱུས་མ་དང༌། ཐུགས་ཀྱི་རྗེས་གནང་ཕྱག་མཚན་གྲི་ཐོད་ལག་ཏུ་གཏད། སངས་རྒྱས་ཀུན་གྱི་ཐུགས་ཀྱི་རྟེན། །ཐབས་དང་ཤེས་རབ་འབྲེལ་བར་བཟུང༌། །དངོས་གྲུབ་ཚོགས་ལ་རོལ་པ་དང༌། །གདུག་པའི་དགྲ་བགེགས་ཚར་ཆོད་ཅིག །སྙིང་པོ་བཟླས་ལ་བྱིན། དེ་ནས་གཏོར་མའི་བཀའ་བསྒོ་བྱ། རྗེས་སྤྱི་དང་འདྲ། བསྙེན་སྒྲུབ་ལས་ཚོགས་ནི་ཡིག་རྙིང་དུ་ཤེས་པར་བྱའོ། །ས་སྐྱའི་ལུགས་ལ་རྣམས་ཀུན༵་དུ། །ལས་མཁས་ཡིན་ཞེས་དག༵འ་བར་བསྔགས། །འོན་ཀྱང་གུར་མགོན་ཉིད་དུ་ངེས། །སྒྲུབ་ཐབས་སྙིང༵་པོ༵་མདོ་ཙམ་མོ། །བེར་ནག་ཟངས་གྲི་ཅན་གྱི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
གཅེར་བུ་ཟངས་གྲི་ཅན་གྱི་སྒྲུབ་ཐབས།
ཨོཾ་སྭཱ་སྟི། དཔལ་ཆེན་རྡོ་རྗེ་ཁྲོ་བོ་དང༌། །མི་བཟད་མགོན་པོ་ནག་པོ་ཡི། །ལྷ་ཚོགས་ལ་ཡང་གུས་བཏུད་ནས། །སྒྲུབ་ཐབས་མདོར་བསྡུས་བྲི་བར་བྱ། །མདུན་དུ་མཎྜལ་གྲུ་གསུམ་ཚོམ་བུ་ཅན། གཏོར་མ་དམར་ནག་མཐའ་མཆོད་གཏོར་གྱི་བསྐོར་བ་དང་བཅས་པ་བཤམ། ཡི་དམ་གྱི་བདག་བསྐྱེད་སྔོན་དུ་འགྲོ་བས། མཆོད་པ་དང༌། གཏོར་མ་བྱིན་རླབས། ཀྱཻ་རྡོར་རམ་ཡི་དམ་གང་བྱེད་བཞིན་བྱ། མདུན་བསྐྱེད་བསངས་སྦྱངས། སྟོང་པའི་ངང་ལས་དུར་ཁྲོད་ཆེན་པོའི་ས་གཞིར། ཉི་མ་དང་རོ་གདན་ལ། སཾ་ལས་སེང་གེ་དཀར་པོ་རབ་ཏུ་ཁྲོས་ཤིང་ཉམས་རྩལ་དང་ལྡན་པ། དེའི་སྟེང་དུ་ཧཱུཾ་ལས་གྲི་གུག་ཧཱུཾ་གིས་མཚན་པ་ཡོངས་སུ་གྱུར་པ་ལས། ལས་མགོན་གཅེར་བུ་ཟངས་གྲི་
ཅན། སྐུ་མདོག་ནག་ལ་ཅུང་ཟད་དམར་བའི་མདངས་ཅན། ཞལ་གཅིག་ཕྱག་གཉིས་གཡས་གྲི་གུག་ནམ་མཁའ་ལ་འཕྱར་བ། གཡོན་ཐོད་ཁྲག་བརླའི་སྟེང་ངོས་སུ་འཛིན་པ། མིག་གཡས་པ་ཉི་མ། གཡོན་ཟླ་བ། དབུས་མ་ནས་མེ་འཕྲོ་བ། སྟག་ལྤགས་ཀྱི་ཤམ་ཐབས་དང༌། མི་ལྤགས་ཀྱི་སྟོད་གཡོགས་གསོལ་བ། མགོ་འཕྲེང་དང་སྦྲུལ་གྱིས་བརྒྱན་པ་གཡས་བསྐུམ་གཡོན་བརྐྱང་བའི་སྟབས་ཀྱིས་མེ་དཔུང་འབར་བའི་དབུས་ན་ཤ་ཟ་གནོད་སྦྱིན་མ་མོ་མཁའ་འགྲོའི་ཚོགས་ཀྱིས་བསྐོར་བའོ། །དཔྲལ་བར་ཨོཾ། ཞེས་པ་ནས། མནའ་ཆུ་བླུད་ཅིང༌། མཆོད་བསྟོད་ཀྱི་བར་བེར་ནག་ཟངས་གྲི་ཅན་དང་འདྲ། བཟླས་པའི་དམིགས་པ་གསལ་བཏབ་ལ། ཨོཾ་མཧཱ་ཀཱ་ལ་རཱུ་པ་ཤ་ཧཱུཾ་ཕཊ། ཅེས་པ་སྙིང་པོ་དང༌། ཨོཾ་མཧཱ་ཀཱ་ལ་རཱུ་པ་ཡ། རུ་མ་ཀཱ་རི། ཙཎྜ་ཀཱ་རི། སྭ་མ་རེ། ཤ་ས་པ་ཡེ་ནི། པྲི་ཏ་མུ་ཀི ཀཽ་ར་ཀཽ་ར། ཧ་ན་ཧ་ན། བྷ་ག་བྷ་གབྷ་ག་ཏ་ཡ། ཧཱུཾ་ཧཱུཾ་ཕཊ་ཕཊ། ཅེས་དྲག་ཏུ་བཟླའོ། །མཐར་གཏོར་མ་འབུལ་བ་ནི། ཨོཾ་མཧཱ་ཀཱ་ལ་ཡ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི་སྭཱཧཱ། ཨ་མུ་ཀཾ་མཱ་ར་ཡ་ཕཊ། ཅེས་ལན་བདུན་གྱིས་ཕུལ། ཨརྒྷཾ་སོགས་དང༌། འབྲུ་གསུམ་གྱིས་ནང་མཆོད། ཧཱུཾ། དུས་གསུམ་དགྲ་བགེགས་ཚར་གཅོད་པ། །ལས་རྣམས་ཀུན་བྱེད་དྲག་ཤུལ་ཆེ། །རབ་ཏུ་རྔམ་པའི་ཞལ་དང་
ལྡན། །གཅེར་བུ་གྲི་ཐོད་འཛིན་ལ་བསྟོད། །ཤ་ཟ་ཁྲག་ལ་རྔམ་པ་པོ། །དྲག་པོ་དུར་ཁྲོད་འབྱུང་པོས་བསྐོར། །དཔའ་བོས་མྱུར་དུ་ཉམས་པ་སྒྲོལ། །གནོད་སྦྱིན་ཀླུ་བདག་ཁྱོད་ལ་བསྟོད། །མཆོད་སྦྱིན་གཏོར་མ་འདི་བཞེས་ལ་ནས། རྗེས་བསྡུ་བཀྲ་ཤིས་ཀྱི་བར་སྤྱི་དང་འདྲ། རྗེས་གནང་སྔོན་འགྲོ་གུར་དང་འདྲ་ཞིང༌། སྐུའི་རྗེས་གནང་འདོན་པ་སྤོས་པ་རྗེས་གནང་གི་གཞི་འགོད་པར་མཛད། སྙིང་པོའི་མཐར། ཀཱ་ཡ་སིདྡྷི་ཨོཾ། ཝཱཀ་སིདྡྷི་ཨ༔ ཙིཏྟ་སིདྡྷི་ཧཱུཾ། ཞེས་པ་རྣམས་སོ་སོར་བཏགས་ལ་བཟླ་བཞིན་དུ། སློབ་མའི་གནས་གསུམ་སོ་སོར་གཏོར་མ་གཏུགས་པས། གཏོར་མ་མགོན་པོར་གསལ་བའི་སྐུ་ལས་མགོན་པོ་དཔག་ཏུ་མེད་པ་བྱུང་ནས། སློབ་མའི་གནས་གསུམ་དུ་ཐིམ་པར་བསམ་པ་ནི་སྐུ་གསུང་ཐུགས་ཀྱི་རྗེས་གནང་ངོ༌། །སྔགས་ཀྱི་བཟླས་ལུང་སྤྱི་མཐུན་ཞིག་སྦྱིན་ཏེ། ཡོན་ཏན་གྱི་རྗེས་གནང་ངོ༌། །གཏོར་དབང་སྤྱི་དང་མཐུན་པར་བསྐུར། འཕྲིན་ལས་ཀྱི་རྗེས་གནང་ངོ༌། །ཀུན༵་དུ་གྲི་གུག་མར་གྲགས་པ། །དེ་ཉིས་ལས་མཁན་མགོན་པོའི་ཚུལ། །སྒྲུབ་ཐབས་ཟབ་ཅིང་དཀོན་པ་འདི། །དག༵འ་བས་སྙིང༵་པོ༵ར་གྲིལ་བ་ཡིན། །གཅེར་བུ་ཟངས་གྲི་ཅན་གྱི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ཚོགས་བདག་ཆེན་པོའི་སྒྲུབ་ཐབས།
ཨོཾ་སྭཱ་སྟི། ཡོན་ཏན་མགོན་པོ་ངོ་མཚར་ཅན། །ཚོགས་བདག་ཆེན་པོར་མཚན་གསོལ་བ། །ལྗང་ནག་ཁྲོས་རྒྱུད་ལས་བྱུང་ཞིང༌། །ཇོ་བོའི་ཞལ་གཟིགས་
ཡིན་པར་གྲགས། །འདི་ལ་འཕྲིན་ལས་ཀྱི་གཞུང་རྒྱས་པ་ནི། མགོན་པོ་ཏྲཀྴད་གཉོས་ལུགས་དང་འདྲ་བར་སྣང་བས། དེའི་ཚུལ་རྣམས་སྔོན་དུ་ཤེས་པར་བྱས་ལ། མདུན་དུ་རྟེན་དགྲམ། མཆོད་གཏོར་བཤམ། བདག་བསྐྱེད་སྔོན་དུ་འགྲོ་བས་མཆོད་གཏོར་བྱིན་གྱིས་བརླབས། མདུན་བསྐྱེད་བསངས་སྦྱངས། སྟོང་པའི་ངང་ལས་ཧཱུཾ་ལས་བསྲུང་འཁོར་གྱི་ནང་དུ་ཨེ་ཨགྣེ་མཎྜ་ལ་ཧཱུཾ། ཆོས་འབྱུང་མཐིང་ནག་མེ་འབར་བ། ཡཾ་ཀརྨ་རཀྵ་ཧཱུཾ། རཾ་བཛྲ་ཛྭ་ལ་རཾ། རྡོ་རྗེའི་ས་གཞི་དང༌། མེའི་ཁོར་ཡུག་གོ །བྷྲཱུཾ་བི་ཤྭ་བི་ཤུདྡྷེ་བནྡྷ་ཛྙཱ་ན་ཙཀྲ་ཨེ་བྷྲཱུཾ། གཞལ་ཡས་ཁང་དུ་གྱུར། དབུས་སུ་འཁོར་ལོ་རྩིབས་བཞི་པ་ལྟེ་བར་སིངྒ་ཛཾ་པ་ལ་བི་མ་ལ་སིདྡྷི་ཧཱུཾ། སེང་གེའི་གདན། རཏྣ་ར་ཏི་ཏྲཾ། རིན་པོ་ཆེའི་གདན། པཾ་པདྨ་མཎྜ་ལ་ཧཱུཾ། ཨ་ཙནྡྲ་མཎྜ་ལ་ཧཱུཾ། མ་སུཪྱ་མཎྜ་ལ་ཧཱུཾ། པདྨ་ཉི་ཟླ་བརྩེགས་པའི་གདན་དུ་གྱུར། དྷ་ར་ཧྲིཿ ཞེས་བརྗོད་པས་བཾ་ཆེན་བསྣོལ་བའི་གདན། དེའི་སྟེང་དུ་ཡི་གེ་ཐཾ་ཡིག་ལྗང་ནག་ལས་འོད་འཕྲོས། འོག་མིན་རྣམ་པར་སྣང་མཛད་ཀྱི་ཐུགས་ཀ་ནས་དངོས་གྲུབ་བསྡུས། སཾ་ཧ་ར་ཎ་ཧཱུཾ། ཐཾ་ཡིག་ལ་ཐིམ། དེ་ལས་དཔལ་ཡེ་ཤེས་ཀྱི་མགོན་པོ་སྐུ་མདོག་སྨུག་ནག་མི་ཟད་པའི་མཆེ་བ་རྣོན་པོ་ཟངས་ཡག་དུ་གཙིགས་པ། སྤྱན་སྡང་མིག་ཏུ་གཟིགས་པས་གནག་པའི་དགྲ་བོ་ཞེ་ལ་མནན་པ། ཕྱག་གཡས་ཀྱི་དང་པོས་རལ་གྲི། གཉིས་
པས་རྩེ་གསུམ་མདུང་དར་ལེབ་རྒན་ཅན། གཡོན་གྱི་དང་པོས་ཁྱུ་མཆོག་གི་རྒྱལ་མཚན་འཕྱར་བ། འོག་མས་བདུད་ཞགས་འཛིན་པ། ཐོད་སྐམ་གྱི་དབུ་རྒྱན་དང༌། ཐོད་རློན་གྱི་དོ་ཤལ་ཅན། རིན་པོ་ཆེ་དང༌། སྦྲུལ་གྱིས་བརྒྱན་པ། ཉི་ཟླས་ཐོད་བྱས་པ། གླང་པོ་ཆེའི་ཀོ་རློན་གྱི་སྟོད་གཡོགས་དང༌། སྟག་ལྤགས་ཀྱི་ཤམ་ཐབས་ཅན། རོལ་པའི་སྟབས་ཀྱིས་བཞུགས་པའོ། །ཕྱོགས་བཞིའི་རྩིབས་ལ་མ་ཡིག་བཞི་ལས། མདུན་དུ་ཡུམ་བེ་ཏ་ལི་ལྗང་ཁུ་རལ་པ་གྲོལ་བ། གཡས་རྒྱུ་མ་གསོལ་ཞིང༌། གཡོན་ཐོད་ཁྲག་འཛིན་པ། ཞབས་བསྣོལ་བའི་སྟབས་ཅན། གཡས་སུ་ཕོ་ཉ་མོ་དཀར་མོ་སྐྲ་ཁམ་ནག་ཅན། ཕུར་པ་དང༌། ཞགས་པ་དམར་པོ་འཛིན་པ། རྒྱབ་ཏུ་བཀའ་སྡོད་མ་ལྗང་སྔོན་མི་ལྤགས་གྱོན་ཞིང༌། ཙནྡན་གྱི་དབྱུག་ཐོ་བསྣམས་པ། དེ་གཉིས་པུས་གཙུགས་སམ་བརྐྱང་བསྐུམ་གྱིས་བཞུགས་པ། གཡོན་དུ་མངག་གཞུག་མ་དམར་མོ་གངྐའི་མགོ་བོ་ཅན། ཞིང་དབྱུག་དང༌། ཞིང་ཆེན་ཚལ་པ་བསྣམས་པ། མཉམ་པའི་སྟབས་ཀྱིས་བཞུགས་པའོ། །ཕྱི་རོལ་དུ་བྷྱོཿབདུན་ལས། ཚངས་མ་དབང་མོ་གཞོན་ནུ་མ། །ལྷ་ཆེན་མ་དང་རྟོག་འདོད་མ། །རྒན་བྱེད་མ་དང་སྣ་ཆེན་མ། །མ་བདུན་སྲིན་མོའི་གཟུགས་ཅན་ནོ། །སྐུ་མདོག་དམར་
ནག་རྩེ་གསུམ་དང༌། བནྡྷ་ཁྲག་གིས་གང་བ་བསྣམས་པ། སྒོ་བཞིར། ཤེལ་གསེར་ཟངས་གཡུའི་མིག་ཅན་མ་མོ་བཞི་རྡོ་རྗེ་དང༌། ཞགས་པ་བསྣམས་པའོ། །སྤྱན་འདྲེན་གྱི་ཚེ། ཨེ་ཧྱེ་ཧི་ཤྲཱི་མཧཱ་ཀཱ་ལ་ག་ཎ་པ་ཏི་མཧཱ་ཀཱ་རུ་ཎི་ཀ་དྲྀ་ཤྱ་ཧོ་ས་མ་ཡ་སྟྭཾ། ཧཱུཾ་ཧཱུཾ་ཛ་ཛཿ ཞེས་དང༌། བསྟོད་པ་བསྡུས་པ་ནི། ལྷ་དམར་དཀར་པོའི་དབུགས་འབྱིན་སོགས་ཀྱིས་ཆོགཨོཾ་ཤྲཱི་མཧཱ་ཀ་ལ་ག་ཎ་པ་ཏི་སྭཱཧཱ། ན་མཿཤྲཱི་མཧཱ་ཀཱ་ལ་ག་ཎེ་ཤ་ཡ། ན་མོ་ཡོ་གི་ནཾ། ཏདྱ་ཐཱ། ཨོཾ་ཧི་ལི་ཧི་ལི། ཀི་ཏེ་ཀི་ཏེ། ཙིཏྟེ་ཙིཏྟེ་སྭཱཧཱ། ཞེས་པ་ནག་པོ་ཆེན་པོའི་གཟུངས་ཀྱིས་ཀྱང་བསྟོད། གཙུག་ལག་ཁང་དང་དཀྱིལ་འཁོར་གནས་འདི་རུ་སོགས་ཀྱིས་བཞུགས་གསོལ་བྱ། ཨརྒྷཾ་ནས། ཤཔྟའི་བར་གྱིས་མཆོད། བཅོམ་ལྡན་རྡོ་རྗེ་མ་གོང་འོག་གཉིས་ཀྱིས་མཆོད་པ་བསྔོས་ཤིང་འབུལ། སྨན་དང་རཀྟ་ཡང་སྤྲོ་ན་གཞུང་བཞིན་ཕུལ། འོད་ཕུང་བསྐལ་པའི་མེ་ལྟར་འབར་བའི་འོད་སོགས་ཀྱིས་སྤྲོ་ན་བསྟོད། དེ་ཡང༌། ཉོན་མོངས་གཡུལ་ལས་ལྷ་ཆེན་རྒྱལ་བའི་རྟགས། ཁྱུ་མཆོག་དམར་མོའི་རྒྱལ་མཚན་ཕྱག་ན་བསྣམས། །རལ་གྲི་རྩེ་གསུམ་ཡིད་བཞིན་ཞགས་པ་འཛིན། །ཐོད་པའི་མཁར་འཇོམས་སྤྱན་ལྔ་བརྩོན་པ་ཡི། །མཆོད་ཅིང་བཤིག་སྟེ་རྣམ་པར་འཕྲོག་མཛད་པ། །ཞེ་སྡང་རོ་ལངས་རྣམ་པར་འཇོམས་མཛད་པ། །ཞེས་སོགས་སྦྲེལ། བཟླས་པ་ནི། ནག་པོ་ཆེན་པོའི་གཟུངས་གོང་དུ་བཤད་
པ་ཉིད་ཅི་འགྲུབ་ཏུ་བཟླ་ཞིང༌། ཨོཾ་བཛྲ་ཡཀྵ་ཤྲཱི་མཧཱ་ཀཱ་ལ་ཧཱུཾ་ཛཿ གཙོ་བོའི་སྙིང་པོའོ། །ཨོཾ་བཛྲ་ཡཀྵ་བེ་ཏཱ་ལཱི་ཧཱུཾ་ཛཿ ཨོཾ་བཛྲ་ཛྭ་ལ་ཀུ་ལི་ཧཱུཾ་ཛཿ ཨོཾ་བཛྲ་ཨེ་ཀ་ཙ་ཏི་ཧཱུཾ་ཛཿ ཨོཾ་བཛྲ་ཤྲཱི་ཀཾ་ཀ་རི་ཧཱུཾ་ཛཿ ཡུམ་བཞིའོ། །ཨོཾ་བཛྲ་ཀྲོ་དྷ་བྷྱོཿ ཨོཾ་བཛྲ་གནྡྷཾ་བྷྱོཿ ཨོཾ་བཛྲ་མུ་བྷྱོཿ ཨོཾ་བཛྲ་ངང་ཏཾ་བྷྱོཿ ཨོཾ་བཛྲ་རུ་ཏི་རེ་མ་ཏཱི་བྷྱོཿ ཨོཾ་བཛྲ་མ་ནུ་ཧ་རཾ་བྷྱོཿ ཨོཾ་བཛྲ་ཨ་ཀར་པུཥྤ་ནི་བྷྱོཿཛཿ བྷྱོཿཧཱུཾ་ཛཿ མ་མོ་བདུན་གྱིའོ། །ཨོཾ་མཧཱ་ཀཱ་ལ་རཀྵ་མཧཱ་ཀཱ་ལ། པེ་ཏ་ལི། ཡ་ཐུ་ནི་ཛ་ཛཿ ཨོཾ་བཛྲ་ཡཀྵ་དེ་བ་ཤྲཱི་མཧཱ་ཀ་ལ་ཀྲོ་དྷ་པེ་ཏ་ལི་ཧཱུཾ་ཕཊ། ཛྲ་ཛྲ་ཛྲ། རྦད་པའོ། །མཧཱ་ཀཱ་ལ་ཎི་ཐུཾ་ལཾ། ཐུཾ་རིལ་རྦད་སུ་ཎི་ཛཿ དགྲ་བོའི་སྙིང་ལ་ཡ། ཏྲག་རཀྴ་ཐུཾ་རིལ་རྦད། དགྲ་བོའི་སྙིང་ལ་ཁ་རཀ་ཛཿ ཎི་ཛ་དགྲ་བོའི་སྙིང་ལ་ཐུཾ་རིལ། ལུས་ལ་ཡ་རྦད། པུ་ཎི་ཤིགདགྲ་བོའི་སྙིང་ལ་ཡ། བསད་པའོ། །ན་ག་བི་ད་ན་ག་རཱ་ཛ་ཧ་ཧ། རཀྵ་རཀྵ་མཉྩི། སྙིང་ལ་རཀྨོ་ཐུན་བྷྱོཿབྷྱོཿ རཀྨོ་ཁ་རག་ཙིཏྟ་ལ་རཀྨོ་བྷྱོཿ སྒོ་མ་བཞིའི་སྔགས་ཏེ་ཐུན་བརྡེག་པ་ལ་སོགས་པའོ། །མཐར་མཆོད་བསྟོད་བྱས་ཏེ། དམ་ལ་འབོད་ཀྱི་དམ་ཚིག་གཤེགས་སོགས་ཀྱིས་གཤེགས་པའོ། །ལྷག་མ་གཏོར་འབུལ་དང༌། རྗེས་གནང་གི་ཆོ་ག་ནི། མགོན་པོ་གཉོས་ལུགས་ཀྱི་སྐབས་སུ་འཆད་པར་འགྱུར་བ་ཁོ་ནའོ། བཀའ་གདམས་པ་དང་རྙིང་མ་བ། །ཀུན༵་ལ་སྔོན་དུས་རབ་
གྲགས་ཀྱང༌། །དེང་སང་ཆེས་དཀོན་རྙེད་པར་དག༵འ། །དེ་ཕྱིར་སྙིང༵་པོ༵་ཙམ་ཞིག་བསྡུས། མགོན་པོ་སེང་ཞོན་ཞེས་བྱ་བ། ཚོགས་བདག་མགོན་པོའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ལྷ་ཆེན་ལྕམ་དྲལ་གྱི་སྒྲུབ་ཐབས་དགྲ་བགེགས་ཀུན་འཇོམས།
ན་མོ་གུ་རུ་མཧཱ་ཀ་ལཱ་ཡ། རབ་འཇིགས་དྲེགས་པ་འདུལ་མཛད་དཔའ་བོ་ཆེ། །སྒྲུབ་ལ་བུ་གཅིག་ལྟར་བརྩེ་དངོས་གྲུབ་སྩོལ། །བླ་མ་དང་ནི་ནག་པོ་ཆེན་པོ་ལ། །གུས་པས་བཏུད་ནས་གཏོར་མའི་ཆོ་ག་བཤད། །འདིར་བྲིས་སྐུ་དང་མཆོད་གཏོར་བཤམ། བདག་བསྐྱེད་དང་ཡི་དམ་གྱི་མཆོད་གཏོར་སྔོན་དུ་འགྲོ་བས། འདི་སྐད་ཅེས་བྱའོ། །ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨཱཿསྭཱ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས། རང་གི་མདུན་དུ་འབྱུང་བཞི་རི་རབ་དང་བཅས་པའི་རྩེ་མོར། དུར་ཁྲོད་ཆེན་པོའི་གནས། ཤིན་དུ་གཏུམ་པའི་ལྗོངས། དྲེགས་པ་བདུད་ཀྱི་ཡུལ། དུག་གི་ན་བུན་འཐུལ་བ། དྲག་པོའི་ཀློག་འཁྱུག་ཅིང༌། རྒྱོབ་སོད་ཀྱི་འབྲུག་སྒྲ་སྒྲོག་པ། གནམ་ལྕགས་ཀྱི་ཐོག་དང་མཚོན་ཆ་སྣ་ཚོགས་ཀྱི་སེར་བ་འབབ་ཅིང༌། མ་མོ་འདུ་བའི་གནས། མཚན་མོ་མེ་འབར་བ། ཉིན་མོ་རླུང་ནག་འཚུབ་ཅིང༌། ན་བུན་རྣག་ཁྲག་དང་ཞག་ཏུ་འབབ་པ། མི་རོ་སྐམ་རློན་རིད་གསུམ་སྣ་ཚོགས་གཅལ་དུ་བཀྲམ་ཞིང༌། ཁྲག་ཞག་གི་རྦ་ཀློང་འཁྲུག་པ། གཅན་གཟན་གཏུམ་པོ་རྣམས་ངར་སྐད་འབོད་པའི་དབུས་ན། རྨངས་གཞི་ལྕགས་ལས་གྲུབ་པའི་
སྟེང་དུ། ཤར་མིའི་ཐོད་པས་བརྩིགས་པ། ལྷོ་རྟའི་ཐོད་པས་བརྩིགས་པ། ནུབ་སྤྲེའུའི་ཐོད་པས་བརྩིགས་པ། བྱང་ལུག་གི་ཐོད་པས་བརྩིགས་པའི་ཕོ་བྲང་ཆེན་པོ། ཕྱི་རིན་པོ་ཆེའི་གཞལ་ཡས་ཁང་ལ། ནང་ཐོད་པའི་མཁར་དུ་ཡོད་པ་གྲུ་བཞི་སྒོ་བཞི་པ་ཤིན་དུ་འཇིགས་ཤིང་རབ་ཏུ་འབར་བ། ཟུར་བཞི་ཟངས་ལས་བྱས་པ། སྒོ་བཞི་བསེ་ལས་བྱས་པ། གསེར་གྱི་རེ་ཆ་གསོལ་བ། མུ་མེན་འཕྲུལ་གྱི་གཡག་ཤིང་ཅན། རྟ་བབས་དུང་ལས་གྲུབ་པ། ཟངས་ལྕགས་ཁྲག་གི་བད་ཡོད་པ། ནང་ཀེང་རུས་ཀྱི་ཀ་གདུང་རྣམས་ཀྱིས་ཕུབ་པ། རུས་པའི་དྲ་བ་དྲ་ཕྱེད་དང༌། མི་མགོ་བརྩིགས་པའི་ཏོག་གིས་མཚན་པ། ངོས་རྣམས་ལ་ཁྲག་གི་ཟར་ཆུ་འབབ་པ། དེའི་ནང་མི་རོ་རྟ་རོ་གཅལ་དུ་བཀྲམ་པ། མི་ཁྲག་རྟ་ཁྲག་མཚོ་རུ་བསྐྱིལ་པ། མི་ལྤགས་རྟ་ལྤགས་ཡོལ་བར་བྲེས་པ། གསུར་ཆེན་དུད་པ་ཕྱོགས་བཅུར་འཐུལ་བ། ཕྱི་རོལ་རྨངས་གཞིའི་སྟེགས་བུ་ལ་རོ་ལངས་ཀྱི་ཤོན་བྱེད་པ། ཀེང་རུས་ཀྱི་གར་མཁན་འཁྲབ་པ། ཕྱོགས་ཐམས་ཅད་དུ་ཞིང་ཆེན་གྱི་བླ་རེ། མེ་རོའི་རྒྱལ་མཚན་དང་བ་དན། རྒྱུ་རློན་གྱི་ལྡ་ལྡི། མགོ་བོ་སྣ་ཚོགས་ཀྱི་དོ་ཤལ་དང༌། སྐྲའི་རྔ་ཡབ་ལ་སོགས་པ་ཉམ་ང་བག་ཚ་བའི་རྒྱན་དང༌།
ལྡན་པའི་ཕོ་བྲང་གི་ལྟེ་བར་ནག་པོ་བདུན་བརྩེགས་ལྕགས་མཁར་ཟུར་དྲུག་པ་ལ་མཐིང་ཟངས་གཡུའི་སྐས་བཙུགས་པའོ། །དེའི་དབུས་སུ་མཐིང་ནག་གྲུ་གསུམ་འབར་བའི་དཀྱིལ་འཁོར་ལ་རིན་པོ་ཆེའི་ཁྲི་པདྨ་དང་ཉི་མའི་སྟེང་དུ་མི་རོ་རྟ་རོ་ལ་གནས་པའི་རཾ་ལས་དུག་སྡོང་རཾ་གྱིས་མཚན་པ་ལས་འོད་འཕྲོས། དགྲ་བགེགས་ཐམས་ཅད་ཚར་བཅད། ཚུར་འདུས་ཡོངས་སུ་གྱུར་པ་ལས། ལྷ་ཆེན་དཔལ་འབར་མཧཱ་ཀཱ་ལ་སྲོག་བདུད་ནག་པོ་ཐོད་པའི་འཕྲེང་བ་ཅན་སྐུ་མདོག་སྨུག་ནགབདུད་རྟ་ནག་པོ་རྟིང་དཀར་ལ་ཆིབས་པ། ཞལ་གཉིས་ཕྱག་བཞི་པ། གཡས་ཤྭ་ན་མུ་ཁའི་གདོང་ཤེལ་མིག་གྱེན་དུ་ཕྱོགས་པས་དགྲ་བགེགས་ལ་ཟུག་ཅིང་བླ་འགུགས་པ། ཞལ་གཉིས་ཀའང་མཆེ་བ་གཙིགས་པ། ལྗགས་འགྲིལ་ཞིང་སྐན་སྒྲ་སྡེབ་པ། ཧཱུཾ་ཕཊ་ཀྱི་གད་མོ་དང་ང་རོ་དྲག་པོ་སྒྲོག་པ། ཕྱག་གཡས་གཉིས་ཀྱིས་དུག་གི་སྡོང་པོ་མེ་འབར་བ་དང་བདུད་ཞགས། གཡོན་གཉིས་ཀྱིས་ཁྲམ་ཤིང་དང་ཐོད་པ་སྙིང་བཅས་ཁྲག་གིས་གང་བ་འཛིན་པ། དམར་ལ་ཟླུམ་པའི་སྤྱན་གསུམ་སྡང་མིག་ཏུ་བགྲད་པ། སྨ་ར་དང་སྨིན་མ་དང་སྐྲ་ཁམ་ནག་གྱེན་དུ་བརྫེས་པ་ལ། སྦྲུལ་ནག་དང་དར་ནག་གི་ཅོད་པན་ཅན། མི་མགོ་སྐམ་པོ་ལྔས་དབུ་ལ་བརྒྱན་ཞིང༌། རློན་པ་ཁྲག་འཛག་པ་ལྔ་བཅུའི་དོ་ཤལ་
འཆང་བ། དུག་སྦྲུལ་སྟོང་གི་ཆུན་པོས་བརྒྱན་པ། སྐུ་ལ་དར་ནག་གི་འཇོལ་བེར་གསུམ་བརྩེགས་མུན་པའི་གཡུང་དྲུང་རིས་དང་གསེར་གྱི་སྐེ་རགས་ཅན། དེའི་སྟེང་ན་དྲེད་མོའི་བཅང་སླག་སེང་གེ་སྔོན་པོའི་གོང་ལག་ཅན་གསོལ་བ། ཞབས་ལ་སག་ཏིའི་ལྷམ་གྱོན་པ། སྙན་ནས་འབྲུག་སྟོང་ལྡིར་ཞིང༌། དྲི་འཛིན་ནས་ནག་པོ་བརྩེགས་པའི་རླུང་དམར་ལྡང་བ། སྡང་མིག་ལས་མེ་འོད་འཕྲོ་ཞིང༌། ཞལ་དུ་ཤ་ཁྲག་གིས་རྒྱ་མཚོ་འཁྱིལ་བ། སྒོ་དགུ་ནས་ཉམས་པ་ལ་དྲུག་གི་ཆར་སྤྲིན་འབེབས་པ། སྤྱི་བོ་ལ་ཉི་ཟླས་བརྒྱན་པ། སྐུ་ཆེ་ལ་ཡན་ལག་རགས་པ། ཁམས་གསུམ་འདར་ཞིང་སྐྲག་པར་བྱེད་པ། དགྲ་བགེགས་དང་ལོག་པར་ལྟ་བ་ཐམས་ཅད་སྐད་ཅིག་གི་རྡུལ་དུ་རློག་པའོ། །དེའི་གཡོན་དུ་བྷྱོཿདང་རལ་གྲི་ཞུ་བ་ལས་དཔལ་ལྡན་ལྷ་མོ་གཉན་གྱི་རེ་མ་ཏཱི་སྐུ་མདོག་ནག་མོ་ཞལ་གཅིག་ཕྱག་བཞི་མ། ཞལ་རས་ཕྱི་རྒྱབ་ཏུ་ཕྱོགས་པས་གཟིགས་པ། མི་རོ་ཞལ་དུ་གསོལ་བཞིན་པས། མཆེ་བ་གཙིགས་ཤིང་སྤྱན་གསུམ་དང་ལྡན་པ། དབུ་སྐྲ་རལ་པ་དམར་སེར་གཡོན་ངོས་སུ་འཁྱིལ་བ། ཕྱག་གཡས་གཉིས་ཀྱིས་ཞིང་ཆེན་དང་རལ་གྲི་སྡིག་པའི་ཡུ་བ་ཅན་མེ་འབར་བ། གཡོན་གཉིས་ན་ནེའུ་ལེའི་རྐྱལ་པ་ནོར་བུའི་ཆར་འབེབས་པ་དང༌། ཐོད་པ་ཁྲག་
གིས་གང་བ་འཛིན་པ། ཐོད་སྐམ་གྱི་དབུ་རྒྱན་དང༌། རློན་པའི་དོ་ཤལ་ཅན། སྙན་གཡས་གཡོན་ལ་དུག་སྦྲུལ་དང་སེང་གེས་བརྒྱན་པ། ཞལ་ནས་དྲག་སྔགས་ཀྱི་འོ་དོད་འབོད་ཅིང༌། མིག་ནས་ཁྲག་གི་ཆར་བ་འབབ་པ། ཤངས་ནས་ནད་ཀྱི་ན་བུན་འཐུལ་བ། ལྟེ་བའི་ཐད་ཀ་ནས་ཉི་མ་འཆར་ཞིང༌། སྤྱི་བོའི་གཙུག་ཏུ་ཟླ་བ་རྒྱས་པ། མི་ལྤགས་ཀྱིས་སྟོད་གཡོགས་ཤིང༌། རེ་སྡེས་སྨད་དཀྲིས་པ། སྦྲུལ་རིགས་བཞིའི་སྐེ་རགས་བཅིངས་པ། ཞབས་ལ་དབང་གི་ལྕགས་སྒྲོག་འཁྲོལ་བ། སྲིན་པོའི་བོང་བུ་གྭ་དམར་ལ་ཆིབས་པ། ནད་ཀྱི་རྐྱལ་བ། མཚོན་གྱི་གྲུ་གུ བྱང་དམར་གྱི་ཁྲེས་པོ། ཤོ་རྡེའུ་དཀར་ནགབདུད་ཀྱི་ཁྲམ་བམ་སྟེ་སྤྲུལ་པའི་མཚོན་ཆ་ལྔ་དང་བཅས་པ་སྲིན་པོའི་ཡ་འཁལ་ལ་སྔ་རུ་དང༌། མ་འཁལ་ལ་ཕྱི་རུ་བྱས་པ། གོང་རྨེད་སྦྲུལ་ལ་བགྱིས་ཤིང་རཀྟའི་རྒྱ་མཚོར་རྒྱུ་བ་ཡབ་ཡུམ་གཉིས་ཀའང་མེ་དཔུང་རབ་ཏུ་འབར་བའི་དབུས་ན་བཞུགས་པའོ། །ཟུར་དྲུག་ཏུ་བྷྱོཿདྲུག་ལས་སྤྲུལ་པའི་ཕོ་ཉ་མོན་མོ་ཤྭ་ན་ནག་མོ་དྲུག་སྐད་ཅིག་གིས་གྲུབ་པ་ནི། གསེར་མིག་མ། དངུལ་མིག་མ། ཟངས་མིག་མ། མཁར་མིག་མ། གཡུ་མིག་མ། མཆོང་མིག་མ་རྣམས་ཁྱིའི་གདོང་ཅན་ཞལ་གཅིག་ཕྱག་གཉིས་མ་སྐུ་མདོག་ནག་མོ་
གཡས་རྡོ་རྗེ་ནམ་མཁའ་ལ་གསོར་ཞིང༌། གཡོན་ཞགས་པ་ནག་པོ་འཕེན་པ། གཅེར་བུ་རུས་པའི་རྒྱན་ཅན། རལ་པ་རྟིང་པར་སླེབས་པ། ཕྱག་རྒྱ་བསྒྱུར་ཞིང་གར་བྱེད་པ། ཁྱི་སྐད་འདོན་ཞིང་རི་རབ་བསྐོར་བ། ལྷང་ལྷང་ངུ་ཞིང་དུར་ཁྲོད་ཉུལ་བ། བྱང་ཕྱོགས་ཀྱི་གནོད་སྦྱིན་ཆེན་པོ་བརྒྱད་ནི་ལྕགས་ཀྱི་བྱ་ཁྲ་བརྒྱད་དུ་སྤྲུལ་ནས་སྔོན་ལ་ལྡིང་པས། སྔ་དགྲ་ངར་བ་རྡུལ་དུ་རློག་པ། ལྷོ་ཕྱོགས་ཀྱི་གཤིན་རྗེ་ཆེན་པོ་བརྒྱད་ནི། སྟགགཟིགདོམ། དྲེད། འཕར་བ། སེང་གེ ཅེ་སྤྱང༌། ཁྱི་རྣམས་སུ་སྤྲུལ་ནས་ཕྱི་བཞིན་དུ་འབྲང་བས། ཕྱི་དགྲ་སེམས་པ་རྡུལ་དུ་རློག་པ། ཕྱི་སྐོར་དུ་སྐུ་གསུང་ཐུགས་ཀྱི་སྤྲུལ་པ་བདུད་པོ་སེང་གེའི་གདོང་ཅན་གསུམ་དང་རཾ་བདུན་དང་མ་བདུན་ལས་བྱུང་བའི་སྤྲུལ་བའི་མོན་པ་ཕོ་བདུན་མོ་བདུན་རྣམས་དང༌། གཞན་ཡང་སྤྲུལ་པ་དང་ཡང་སྤྲུལ་ཀྱི་ཚོགས་རྣམས་དང༌། བདུད་ཀྱི་དམག་ཉི་ཁྲི་ཆིག་སྟོང༌། ལྷ་དམག་འབུམ་སྡེ་དང་བཅས་ཤིང༌། ལྷ་མ་སྲིན་སྡེ་བརྒྱད་དང་བཅས་པ་ཐམས་ཅད་ཀྱང་གཅེར་བུ་འདབ་ཆགས་ཐང་ལ་བོར་བ་ལྟར་འདར་ཡེད་ཡེད་འདུག་པ་ཐམས་ཅད་ཀྱང་སྒྲུབ་པ་པོའི་བཀའ་སྡོད་པར་གྱུར། རང་གི་ཐུགས་ཀའི་ཧཱུཾ་ལས་འཕྲོས་པའི་འོད་ཀྱིས། རང་བཞིན་གྱི་གནས་ནས་མགོན་པོ་འཁོར་དང་བཅས་པ་
བཛྲ་ས་མཱ་ཛཿ སྤྱན་རས་གཟིགས་མགོན་ཐུགས་ཀྱི་འཕྲིན་ལས་ལས། །རྣམ་འཕྲུལ་ཞི་བས་འདུལ་བར་མི་སྤྱོད་ཅིང༌། །དྲག་པོའི་སྟོབས་ཀྱིས་གདུག་པ་ཚར་གཅོད་པ། །འཇིགས་པའི་གཟུགས་ཅན་ཁྱོད་ནི་འདིར་བྱོན་ཅིག །ལྷ་ཆེན་ཐུགས་ཀྱི་ཕོ་ཉ་མཐུ་བོ་ཆེ། ཁྱོད་ཀྱི་རྣམ་འཕྲུལ་ཕྱོགས་བཅུ་མ་ལུས་ཁྱབ། །ཡབ་ཅིག་རྟག་ཏུ་འདོད་རྒྱལ་ཁང་བཟང་ན། །ཕལ་ཆེར་ཨུ་ཙ་ལ་ཡི་དུར་ཁྲོད་ན། །རེས་འགའ་བསིལ་བའི་ཚལ་ན་སྲིན་པོའི་གཟུགས། །ད་ལྟ་ཙ་རི་རོང་གི་ཕོ་བྲང་ན། ཁྱོད་ཀྱིས་བརྟེན་ས་རྩུབ་མོའི་བྲག་ཕུག་ན། །རྣལ་འབྱོར་དམ་ཚིག་ལྡན་པའི་རྗེས་འབྲང་ཞིང༌། །གང་གིས་བཅོལ་བའི་ལས་རྣམས་གྲུབ་མཛད་པ། །དྲག་པོ་དབང་ཕྱུག་གཟི་ལྡན་འདིར་བྱོན་ཅིག །སྔོན་ཚེ་ཕྱག་ན་རྡོ་རྗེའི་སྤྱན་སྔ་རུ། །ཏྲཀྴད་ཁྱོད་ཀྱི་ཇི་ལྟར་ཁས་བླངས་བཞིན། །དྲག་པོའི་ལས་ལ་གནས་འདིར་སྤྱན་འདྲེན་གྱྀ། །སངས་རྒྱས་བསྟན་པ་བསྲུང་ཕྱིར་གཤེགས་སུ་གསོལ། །ཨེ་ཧྱེ་ཧི་མཧཱ་ཀཱ་ལ་ཏྲཀྴད་ས་པ་རི་ཝཱ་ར་བཛྲ་ས་མཱ་ཛཿ ཨརྒྷཾ་ནས། ཤཔྟའི་བར་གྱིས་མཆོད། འབྲུ་གསུམ་གྱིས་ནང་མཆོད་ཕུལ། ཧཱུཾ། ལྷ་མིན་དམག་ཚོགས་གཡུལ་བཟློག་ཅིང༌། །ལྷ་དམག་དཀར་པོའི་དབུགས་འབྱིན་པ། །ལྷ་ཆེན་དཔལ་འབར་འཁོར་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །ཞེས་བསྟོད་པ། ཛཿཧཱུཾ་བཾ་ཧོཿགཉིས་སུ་མེད་པར་
བསྟིམ། སླར་ཡང་འོད་འཕྲོས། རིགས་ལྔ་འཁོར་བཅས་བཛྲ་ས་མཱ་ཛཿ ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུཾ་ཞེས་དབང་བསྐུར། སྐུ་གང༌། དྲི་མ་དགཆུ་ལྷག་མ་ཡར་ལུད་པ་ལས། གཙོ་འཁོར་ཐམས་ཅད་ལ་མི་བསྐྱོད་བས་དབུ་བརྒྱན། བཟླས་པའི་དམིགས་པ་གསལ་བཏབ་ལ། ཨོཾ་ཤྲཱི་མཧཱ་ཀཱ་ལ་ཏྲཀྴད་མཧཱ་ཀཱ་ལ་སིདྡྷི་ཏྲི་ཡཾ་དུན་ཛ་ཛཿ ཞེས་དཔལ་མགོན་པོ་དང༌། ཨོཾ་རོ་རུ་རོ་རུ་ཙ་པ་ལ་ཨ་ཤུ་མེ་མ་ཧཱུཾ་མ་བྷྱོཿཛཿཛཿ མ་བོད། མ་བོད། མ་ཤོད། མ་ཤོད། གིངྒ་ར་གིངྒ་ར། མ་ལས་ཐམས་ཅད་གྲུབ་པར་མཛོད་ཅིགཅེས་དཔལ་ལྷ་མོའི་སྔགས་སོ། །དེ་ནས་གཏོར་མ་བསངས་སྦྱངས། སྟོང་པ་ཉིད་དུ་གྱུར། སྟོང་པའི་ངང་ལས་ཡཾ་ལས་རླུང༌། རཾ་ལས་མེའི་སྟེང་དུ་ཀཾ་ལས་མི་མགོའི་སྒྱེད་བུ་གསུམ། དེའི་སྟེང་དུ་ཨ་ལས་ཐོད་པ་ཕྱི་དཀར་ལ་ནང་དམར་བའི་ནང་དུ། བི་མུ་ཤུ་མ་ར་ལས་བདུད་རྩི་ལྔ། གོ་ཀུ་ད་ཧ་ན་ལས་ཤ་ལྔ་བསྐྱེད། སྙིང་གའི་ས་བོན་གྱི་འོད་ཀྱིས་མདུན་གྱི་ནམ་མཁའ་ལ་རྡོ་རྗེ་ཧཱུཾ་དང་བཅས་པར་གྱུར། དེ་ལས་འོད་ཟེར་འོག་ཏུ་འཕྲོས་པས་རླུང་གཡོས། རླུང་གིས་མེ་སྦར་ཤ་ལྔ་བདུད་རྩི་ལྔ་ཡི་གེ་དང་བཅས་པ་ཞུ་ཞིང་ཁོལ་བས་ལྦུ་བ་དུ་ཨོཾ་གྱུར། དེ་ལས་འོད་ཟེར་ཁ་དོག་ལྔ་འཕྲོས་པ། ཡེ་ཤེས་ཀྱི་བདུད་རྩི་བཀུག་ནས། དེ་ལ་ཐིམ་པས་ཡེ་ཤེས་ཀྱི་བདུད་རྩིའི་རྒྱ་མཚོར་གྱུར། ཨོཾ་
ཨཱཿཧཱུཾ་ལན་གསུམ། རྡོ་རྗེ་ཐལ་མོ་ཁ་གྱེན་དུ་ཕྱེ་ལ། མགོན་པོ་ཡབ་ཡུམ་འཁོར་བཅས་ཀྱི་སྔགས་གཏོར་མ་བདུད་རྩིའི་རང་བཞིན་ཅན་ལ་རེག་ཅིང་གསོལ་བས་ཚིམ་ཞིང་མཉེས་པར་གྱུར། ཨོཾ་མཧཱ་ཀཱ་ལ་ཏྲི་ཡཾ་ཛཿ ས་མ་ཡ་ས་མ་ལོ་ཀི་ནི་མུན་བྷྱོཿཧཱུཾ་ཕཊ་བཱ་ལིཾ་ཨི་དཾ་གྲྀཧྞ་ཁ་ཁ་ཁཱ་ཧི་ཁཱ་ཧི་བྷུཉྫ་ཧོ། རཀྟ་པི་པ་ཏོ་ས་མ་ཡ་སྭཱཧཱ། ཨོཾ་དེ་ཝི་མཧཱ་ཀ་ལི་རེ་མ་ཏཱི་མཧཱ་བཱ་ལིཾ་ཏ་ཁཱ་ཧི། མཧཱ་མཾ་ས་ཁཱ་ཧཱི་ཙིཏྟ་ཁཱ་ཧི། མཧཱ་གོ་རོ་ཙ་ན་ལ་ཁཱ་ཧི། མཧཱ་པཉྩ་ཨ་མྲྀ་ཏ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་བདུན་གྱིས་ཕུལ་ལ། དཔལ་ཡེ་ཤེས་ཀྱི་མགོན་པོ་མཧཱ་ཀཱ་ལ། རྣལ་འབྱོར་གྱི་དགྲ་ལྷ་བདུད་འདུལ་གྱི་དབང་ཕྱུགདུག་གསུམ་གྱི་སྨན་པ། རིག་འཛིན་གྱི་སྲོག་ཤིང༌། གཙུག་ལག་ཁང་དང་དཀྱིལ་འཁོར་གྱི་སྲུང་མ། ལྷའི་དེད་དཔོན་ཆེན་པོ། སྲོག་བདུད་ནག་པོ་ཐོད་པའི་ཕྲེང་བ་ཅན། བཱ་ལིཾ་རྒྱན་གྱི་གཏོར་མ་འདི་བཞེས་ཞིག་ཁ་རཾ་ཁཱ་ཧི། དཔལ་ལྡན་གཉན་གྱི་རེ་མ་ཏཱི། བདུད་ཀྱི་ཡུམ་ལ་གཤིན་རྗེའི་ལྕམ། ནག་མོ་དྲེའུ་ལ་ཞོན་པ། གཅེར་མོ་བོང་བུ་ལ་ཞོན་པ། མགྱོགས་མ་རླུང་ལ་ཞོན་པ། བཱ་ལིཾ་རྒྱན་གྱི་གཏོར་མ་འདི་བཞེས་ཤིག་ཁ་རཾ་ཁཱ་ཧི། གཞན་ཡང་འཁོར་གྱི་མ་མོ་དྲུགབྱང་ཕྱོགས་ཀྱི་གནོད་སྦྱིན་ཆེན་པོ་བརྒྱད། ལྷོ་ཕྱོགས་ཀྱི་གཤིན་རྗེ་ཆེན་པོ་བརྒྱད། སྤྲུལ་པ་ཡང་སྤྲུལ་ཕོ་ཉ།
འཁོར་གྱི་དམག་ཉི་ཁྲི་ཆིག་སྟོང་སྡེ་བརྒྱད་དང་བཅས་པ་ཐམས་ཅད་བཱ་ལིཾ་རྒྱན་གྱི་གཏོར་མ་འདི་བཞེས་ཤིག་ཁ་རཾ་ཁཱ་ཧི། ཨོཾ་ཤྲཱི་མཧཱ་ཀཱ་ལ་ག་ན་པ་ཏི་ཡཀྵ་བཻ་ཏ་ལི་ས་པ་རི་ཝཱ་ར་ཨརྒྷཾ་ནས། ཤཔྟའི་བར་གྱིས་མཆོད། ཡབ་ཡུམ་གྱི་སྙིང་པོའི་མཐར་འབྲུ་གསུམ་སྦྱར་ནས་ནང་མཆོད་འབུལ། ཧཱུཾ། དད་པ་དང་ནི་དམ་ཚིག་གིས། །ཚུར་བྱོན་སྲོག་བདུད་མ་རུངས་པ། །མངོན་ཤེས་རྫུ་འཕྲུལ་ཐབས་ཀྱི་གཙོ། །དྲག་པོའི་ཞལ་ལ་གཏུམ་པོའི་སྐུ། །རྡོ་རྗེ་མཧཱ་ཀཱ་ལ་སྟེ། །ལྷ་ཆེན་ལྕམ་དྲལ་སྤྱན་འདྲེན་གྱི། །གནས་འདིར་མཆོད་ཕྱིར་གཤེགས་སུ་གསོལ། །སྲོག་གི་བཀའ་སྡོད་མགོན་པོའི་སྐུ། །སྲིན་པོའི་གཟུགས་ཀྱིས་གདུག་པ་ཅན། །ཚར་གཅོད་བྱང་ཆུབ་སེམས་དཔའ་སྟེ། །གྲོང་ཁྱེར་གསུམ་བརྩེགས་འཇིག་བྱེད་པས། གཏུམ་པོ་ཁྱོད་ལ་བདག་བསྟོད་དོ། །མདོག་ནག་གཟུགས་ཅན་བརྗིད་པ་ལ། །རལ་པ་ཁམ་ནག་གྱེན་དུ་འཁྱིལ། །སྟེང་གི་ལྷ་ཚོགས་དབང་དུ་སྡུད། ཁྲོས་པས་ཞབས་བརྡབས་ས་གཞི་གཡོ། །འཇིགས་པའི་གད་མོས་རི་རབ་བསྒྱེལ། །དབང་ཕྱུག་ཆེ་ལ་བདག་བསྟོད་དོ། །གཡས་པ་དུག་སྡོང་བདུད་ཞགས་བསྣམས། །གཡོན་པ་ཐོད་པ་སྙིང་བཅས་གསོལ། །དམ་ཚིག་ཉམས་པའི་སྙིང་འབྱིན་པའི། །དམ་ཚིག་ཅན་ལ་བདག་བསྟོད་དོ། །ལས་ཀྱི་སྲོག་བདུད་ཆེན་པོ་ནི། །བདུད་
རྟ་ནག་པོ་རྟིང་དཀར་ཆིབས། །སྐུ་ཆེ་ཡན་ལག་རགས་ཤིང་བརྗིད། །སྤྱན་དམར་ཞལ་གདངས་ལྗགས་འགྲིལ་ཞིང༌། །སྐུ་ལ་བེར་ནག་སྨུག་པོ་གསོལ། །སག་ཏིའི་ལྷམ་ལ་པད་ཉིའི་གདན། །བསྐལ་པའི་མེ་དཔུང་ནང་ན་འགྱིང༌། །མཐུ་སྟོབས་ཅན་ལ་བདག་བསྟོད། །འདས་དང་མ་བྱོན་ད་ལྟར་གྱི། །དུས་གསུམ་སངས་རྒྱས་ཐམས་ཅད་ཀྱི། །བསྟན་པ་བསྲུང་བར་ཐུགས་བསྐྱེད་པ། །ནག་པོ་ཁྱོད་ནི་ཡིན་པ་སྟེ། །གང་ཞིག་དཀོན་མཆོག་གསུམ་པོ་དང༌། །བླ་མ་བརྙས་བྱེད་སེམས་ཅན་འཚེ། །བདག་ལ་གནོད་བྱེད་དགྲ་དང་བགེགས། །ཐམས་ཅད་ཁྱེད་ཀྱིས་གཞོམ་པ་དང༌། །བསྟན་པ་བསྲུང་བར་མཛད་དུ་གསོལ། །ནད་དང་གནོད་པ་ཞི་བ་དང༌། །ཚེ་དང་བསོད་ནམས་འཕེལ་བ་དང༌། ཐམས་ཅད་དབང་དུ་སྡུད་པ་དང༌། །མི་མཐུན་ཕྱོགས་རྣམས་གཞོམ་པ་ཡི། །འཕྲིན་ལས་རྣམ་བཞི་ཁྱོད་ཀྱིས་ཀྱིས། །རྒྱན་གྱི་གཏོར་མ་འདི་ལོང་ལ། །བཅོལ་བའི་ལས་རྣམས་གྲུབ་པར་མཛོད། བྷྱོཿ མའི་ནང་ནས་མ་གཅིག་མ། །སྲིང་གི་ནང་ནས་སྲིང་གཅིག་མ། །དཔལ་ལྡན་གཉན་གྱི་རེ་མ་ཏི། །བདུད་ཀྱི་ཡུམ་ལ་གཤིན་རྗེའི་ལྕམ། །ལྷའི་གནས་ན་ལྷ་མོ་ནམ་གྲུ་མ། །ཀླུའི་གནས་ན་ཀླུ་མོ་གློག་འགྱུ་མ། །སྲིན་པོའི་གནས་ན་སྲིན་མོ་ཤཾ་ཤཾ་མོ། །མེའི་གནས་ན་བདུད་མོ་རེ་མ་ཏཱི། །མི་ལ་བདུད་དུ་
ཁྱོད་ལས་ཆེ་བ་མེད། །གནས་ནི་བྱང་ཤར་མཚམས་ན་གནས། །རྒྱུ་ནི་བར་སྣང་ཁམས་ལ་རྒྱུ། །སྐྱེ་འགྲོ་ཡོངས་ཀྱི་དབུགས་འཆའ་མ། རྐང་ལ་ལྕགས་ཀྱི་ལྷམ་གྱོན་མ། །སྐུ་ལ་མཛེས་པའི་རེ་ལྡེ་གསོལ། །མི་མགོ་རྟ་མགོ་མཁར་དུ་བརྩིགས། །ཐོད་པ་དགུ་བརྩེགས་གཞལ་ཡས་འདིར། །མ་གཅིག་ལྷ་མོ་སྤྱན་འདྲེན་ན། །དོ་ནུབ་ནམ་གྱི་གུང་སྟོད་ལ། །མིང་པོ་རྡོ་རྗེས་ལས་འཆོལ་གྱི། །སྲིང་མོ་དམ་ཅན་ལས་མཛོད་ལ། །བརྣག་པའི་ལས་རྣམས་གྲུབ་པར་མཛོད། །བོས་པའི་ཚེ་ན་སྙན་མ་སྲ། །བསྒྲུབས་པའི་ཚེ་ན་ཟོར་མ་ལྕི། །རྦད་པའི་ཚེ་ན་མཐུ་མ་ཆུང༌། །རྒྱན་གྱི་གཏོར་མ་འདི་ལོང་ལ། །བཅོལ་བའི་ལས་རྣམས་གྲུབ་པར་མཛོད། །ཧཱུཾ། སྲོག་བདུད་ནག་པོ་ཆེན་པོ་ཡི། །བཀའ་ཉན་སྒྲོལ་བྱེད་མ་མོ་དྲུགཁྱི་མོ་ནག་མོ་ཤེས་རབ་གསལ། ཁྲོ་ཆའི་ཞལ་ལ་རྡོ་རྗེའི་སྐུ། །རི་རབ་བསྐོར་ཞིང་རྫུ་འཕྲུལ་འགྱེད། །ལྷང་ལྷང་ངུ་ཞིང་དུར་ཁྲོད་ཉུལ། །སྡིག་ཅན་སྒྲོལ་བའི་མཐུ་མོ་ཆེ། །བདུད་གྱི་བུ་མོ་ལས་ལ་ཡ། ཁྱི་མོ་ནག་མོ་གསེར་མིག་མ། ཁྱི་མོ་ནག་མོ་དངུལ་མིག་མ། ཁྱི་མོ་ནག་མོ་ཟངས་མིག་མ། ཁྱི་མོ་ནག་མོ་མཁར་མིག་མ། ཁྱི་མོ་ནག་མོ་གཡུ་མིག་མ། ཁྱི་མོ་ནག་མོ་མཆོང་མིག་མ། །བདུད་ཀྱི་བུ་མོ་
ཁྱེད་དྲུག་ཀྱང༌། །ཤ་ཁྲག་གཏོར་མ་འདི་བཞེས་ལ། །ཉམས་པའི་དགྲ་བགེགས་སྒྲོལ་ལ་ཤོག །བསད་རྟགས་དོན་སྙིང་ཁྱེར་ལ་ཤོག །བར་ཆད་སོལ་ལ་མཐུན་རྐྱེན་སྒྲུབས། །བཅོལ་བའི་ལས་རྣམས་གྲུབ་པར་མཛོད། །མོན་མོ་ནག་མོ་ཤེལ་མིག་མ། །མོན་མོ་ནག་མོ་གསེར་མིག་མ། །མོན་མོ་ནག་མོ་ཟངས་མིག་མ། །མོན་མོ་ནག་མོ་གཡུ་མིག་མ། །མོན་མོ་ནག་མོ་དངུལ་མིག་མ། །མོན་མོ་ནག་མོ་ལྕགས་མིག་མ། །མོན་མོ་ནག་མོ་བསེ་མིག་མ། །མོན་མོ་ཆེན་མོ་ཁྱེད་བདུན་ཡང༌། །ཤ་ཁྲག་སོགས་གོང་བཞིན། ཧཱུཾ། མོན་པ་ནག་པོ་བྱི་ལ་ཞོན། །མོན་པ་ནག་པོ་འབྲུག་ལ་ཞོན། །མོན་པ་ནག་པོ་སྦྲུལ་ལ་ཞོན། །མོན་པ་ནག་པོ་གློག་ལ་ཞོན། །མོན་པ་ནག་པོ་སྟག་ལ་ཞོན། །མོན་པ་ནག་པོ་ཁྱུང་ལ་ཞོན། །མོན་པ་ནག་པོ་རླུང་ལ་ཞོན། །བདུད་ཀྱི་བཤན་པ་ཁྱེད་བདུན་ཡང༌། །ཤ་ཁྲག་སོགས་གོང་བཞིན། གཞན་ཡང་སྤྲུལ་པ་ཡང་སྤྲུལ་དང༌། །ཕྱོགས་བཞིའི་རུ་འདྲེན་དམག་གི་ཚོགས། །བདུད་པོ་ཉི་ཁྲི་ཆིག་སྟོང་དང༌། །ལྷ་དམག་དཀར་པོ་འབུམ་སྡེའི་ཚོགས། །གཞན་ཡང་ལྷ་སྲིན་སྡེ་བརྒྱད་རྣམས། །ཤ་ཁྲག་སོགས་ཀྱིས་བསྐུལ་ཞིང་འཕྲིན་ལས་བཅོལ། ཐུན་གྱི་གཏོར་མ་མེད་ན་འཇུག་གི་ཆོ་ག་བྱའོ། །གལ་ཏེ་ཐུན་གཏོར་ཡོད་ན་སྐབས་འདི་ཉིད་དུ་གཏོང་སྟེ། ཧཱུཾ། སྲིད་
གསུམ་དབང་སྡུད་མགོན་པོ་ཡབ་ཡུམ་དང༌། །སྟོབས་ལྡན་ཕོ་ཉ་མངག་གཞུག་འཁོར་དང་བཅས། །ཤིན་དུ་འཇིགས་ཁྲོས་དྲག་ལ་རྔམ་པའི་གཟུགས། །རྣོ་བའི་མཚོན་འཛིན་མགྱོགས་པའི་ཤུགས་ཅན་རྣམས། །ཟག་མེད་བདུད་རྩིའི་གཏོར་མ་འདི་བཞེས་ཤིག །སྨན་རཀ་ཕུད་ཀྱི་མཆོད་པ་འདི་བཞེས་ཤིག །ཛ་གང་དཔའ་བོའི་སྨན་ཕུད་འདི་བཞེས་ཤིག །ཛཾ་བུ་ཏི་བའི་མཆོད་པ་འདི་བཞེས་ཤིག །དམ་ཉམས་དགྲ་བོའི་ཤ་ཁྲག་འདི་བཞེས་ཤིག །སྔར་བཅོལ་ལས་ཀྱི་གཏང་རག་གཉན་པོར་འབུལ། །ད་བཅོལ་ལས་ཀྱི་གསོལ་འདེབས་ཆེན་པོར་བཞེས། །བདག་ཅག་དཔོན་སློབ་ཡོན་མཆོད་འཁོར་བཅས་ཀྱི། །ནད་དང་གནོད་པའི་རྐྱེན་རྣམས་ཞི་བ་དང༌། །ཚེ་དང་བསོད་ནམས་དཔལ་འབྱོར་འཕེལ་བ་དང༌། ཁྱད་པར་སངས་རྒྱས་བསྟན་པ་སྐྱོང་བ་དང༌། །བླ་མས་བཅོལ་བའི་འཕྲིན་ལས་གྲུབ་པར་མཛོད། །རྒྱལ་བའི་བཀའ་དང་དམ་ཚིག་བདེན་པ་བཞིན། །བྱང་ཆུབ་སྒྲུབ་པའི་བར་ཆད་བྱེད་པ་ཡི། །སྡང་བའི་དགྲ་དང་གནོད་པའི་བགེགས་ལ་སོགས། །ཐམས་ཅད་རྡུལ་ཕྲན་བཞིན་དུ་རླག་པར་མཛོད། །རྣལ་འབྱོར་བཅོལ་བའི་འཕྲིན་ལས་སྒྲུབ་པར་མཛོད། །བསྟན་པ་རྒྱས་པའི་ལས་འདི་མྱུར་དུ་སྒྲུབས། ཕུན་སུམ་ཚོགས་པ་མངའ་བ་སོགས་བཀྲ་ཤིས་ཀྱི་
ཚིགས་བཅད་བརྗོད། སླར་ཡང༌། ཨརྒྷཾ་ནས་ཤཔྟའི་བར་གྱིས་མཆོད། གོང་གི་བསྟོད་ཐུང་གིས་བསྟོད། བདག་ཅག་འཁོར་དང་བཅས་པ་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྒྲུབ་པའི་གདོང་གྲོགས་དང༌། ཕྱི་ནང་གསང་བ་གསུམ་གྱི་བར་ཆད་མི་མཐུན་པའི་ཕྱོགས་ཐམས་ཅད་བསྲུང་ཞིང་བཟློག་པ་དང༌། དགྲ་བགེགས་ལོག་འདྲེན་ཐམས་ཅད་ཐལ་བ་རྡུལ་དུ་རློག་པ་དང༌། མི་འགྱུར་བའི་ཚེ། མི་ཟད་པའི་ལོངས་སྤྱོད། རབ་ཏུ་རྒྱས་པའི་དབང་ཐང༌། ཐུབ་པར་དཀའ་བའི་མཐུ་སྟོབས་རྣམས་སྩལ་བ་དང༌། མདོར་ན་བསམ་པའི་དོན་ཐམས་ཅད་ཡིད་བཞིན་དུ་འགྲུབ་པར་མཛད་དུ་གསོལ། ཡི་གེ་བརྒྱ་པ་ཅི་འགྲུབ་ཏུ་བཟླ་ཞིང༌། མ་འབྱོར་པ་སོགས་ཀྱིས་བཟོད་པར་གསོལ། རྟེན་ཡོད་ན་བརྟན་བཞུགས་དང༌། མེད་ན་བཛྲ་མུཿ ཡེ་ཤེས་པ་གཤེགས། དམ་ཚིག་པ་རང་ཉིད་ལ་བསྟིམ། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ་གིས་བདག་བསྲུང༌། སླར་ཡང་སྨོན་ལམ་དང་བཀྲ་ཤིས་ཅི་རིགས་པར་བྱས་ལ་ཐུན་མཚམས་ལ་འཇུག་གོ །འདིར་མོན་པ་ཕོ་བདུད་མོ་བདུན་སོགས་ཀྱིས་ཞལ་ཕྱག་བཞོན་པ་བསྐྱེད་པར་འདོད་ན། བསྐུལ་བ་རྒྱས་པ་སོ་སོ་དག་ནས་འབྱུང་བ་ལྟར་བསྐྱེད་ཀྱང་རུང་ལ། མན་ངག་ལྟར་ན། མོན་པ་བྱི་ལ་ལ་ཞོན་པ། བདུད་ཞགས་དང་ནད་རྐྱལ། འབྲུག་ལ་ཞོན་པ་རལ་གྲི་དང་ཐོད་ཁྲག སྦྲུལ་ལ་ཞོན་པ་དུག་སྡོང་དང་བེ་ཅོན། གློག་ལ་ཞོན་པ་ཕྱག་
གཉིས་ཀྱི་བེ་ཅོན་ནག་པོ། སྟག་ལ་ཞོན་པ་སྤུ་གྲི་དང་སྙིང་ཞགས་འཛིན་པ། ཁྱུང་ལ་ཞོན་པ་སྟ་རེ་དང་སྦྲུལ་ཞགས། རླུང་ལ་ཞོན་པ་རལ་གྲི་དང་ཞགས་པ་ནག་པོའོ། །ཧཱུཾ་གསུམ་ལས་སྐུ་གསུང་ཐུགས་ཀྱི་སྤྲུལ་པ་འཇིགས་བྱེད་བདུད་ཕོ་གསུམ་ཁྲམ་ཤིང་དང་ནད་རྐྱལ། སེང་གེའི་མགོ་ཅན་སེང་གེ་ལ་ཞོན་པའོ། །མོན་མོ་ཤེལ་མིག་མ་ཤེལ་གྱི་རལ་པ་ཅན་ནས། བསེ་མིག་མ་བསེའི་རལ་པ་ཅན་གྱི་བར། རྡོ་རྗེ་དང་ནད་རྐྱལ་འཛིན་པ། ཐམས་ཅད་ཀྱང་སྐུ་མདོག་ནག་མོའོ། །གཞན་ཡང་དཔལ་མགོན་པོ་སྐུ་མདོག་ནག་པོ། ཡང་རུང་ཞིང༌། ལྷ་མོ་ཕྱག་དང་པོ་གཉིས་ཀྱིས་རྩེ་གསུམ་དང་མི་རོའི་རྒྱལ་མཚན་འཛིན་པ་དང༌། ནེའུ་ལེ་ནད་རྐྱལ་དུ་བསྒྱུར་ཞིང་དྲེའུ་རྟ་སྐང་གསུམ་ལ་ཆིབས་པ་དང་ཕྱག་གཉིས་མ་སོགས་སྣ་ཚོགས་ཡོད་ཅིང༌། ཤྭ་ན་མོ་རྣམས་ཀྱང༌། གསེར། གཡུ། མཆོང༌། ཟངས། དུང༌། འཁར་བ། ལྕགས་རྣམས་ཀྱི་མིག་ཅན་དང༌། མིག་དང་མཐུན་པའི་རལ་པ་བྱེད་པ་སོགས་ཡོད་པ་འགའ་ཞིག་འདམ་ཀ་དང༌། འགའ་ཞིག་བསྙེན་བསྒྲུབ་དང་ལས་ཚོགས་སོ་སོའི་ཡིན་ནོ། །ཤེལ་མིག་མའམ། དུང་མིག་མའམ། ཁྱི་མོ་ཤེས་རབ་གསལ་ཕྱག་བཞི་མར་བསྐྱེད་པར་ཡོད་དོ། །མན་ངག་ནི་ལོགས་སུ་བསྟན་པར་བྱའོ། །བསྙེན་པ་ཙམ་དང་ཉེར་འབྲེལ་བར། །སྒྲུབ་ཐབས་མཆོད་ཚོགས་འདི་བྱས་པས། །བསྟན་དགྲ་བདུད་སྡེར་བཅས་བཅོམ་ནས། །འཕྲིན་ལས་རྣམ་བཞི་འགྲུབ་པར་ཤོག །ལྷ་ཆེན་
ལྕམ་དྲལ་གྱི་སྒྲུབ་ཐབས་དགྲ་བགེགས་ཀུན་འཇོམས་ཞེས་བྱ་བ་འདི་ནི།། །།འཇམ་དབྱངས་རྡོ་རྗེ་བླ་མའི་གཏོར་ཆོག་ལ་གཞི་བྱས། ཡིག་རྙིང་ནས་ཁ་བཀང་སྟེ་ལྷག་ཆད་ནོར་བའི་དྲི་མ་སྤངས་ཤིང༌། རྒྱས་བསྡུས་མཚམས་ལ་བཀླགས་ཆོག་ཏུ་བྱས་པ་སྟེ། རྒྱལ་ཁམས་པ་ཏཱ་ར་ནཱ་ཐས་རང་ལོ་ཉེར་དགུ་པ་ལ་སྨྲས་པའོ། །འདིས་ཀྱང་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །དར་རྒྱས་འཕེལ། །
དཔལ་མགོན་པོ་ཏྲཀྴད་གཉོས་ལུགས་ཀྱི་རྗེས་གནང་།
ཨོཾ་སྭཱ་སྟི། སེངྒའི་གླིང་ན་རབ་གནས་ཤིང༌། །རྡོ་རྗེ་གདན་གྱི་ཆུ་ལོན་དུ། །ཀླུ་སྒྲུབ་ཀྱིས་ཀྱང་མངའ་གསོལ་བ། །ལྷ་ཆེན་དཔལ་འབར་ལ་འདུད་དོ། །འདིར་ལེགས་ལྡན་ནག་པོ་ཆེན་པོ་ཏྲཀྴད་ལ་སྒྲུབ་ཐབས་ལུགས་ཤིན་ཏུ་མང་བ་ལས། འདིར་གཉོས་ལུགས་ཡིན། དེ་ལ་སློབ་མ་རྗེས་བཟུང་གི་བྱ་བ་ནི་རྣམ་པ་བཞི་སྟེ། ཤིན་ཏུ་བསྡུས་པ་གཏོར་དབང༌། བསྡུས་པ་སྐུ་གསུང་ཐུགས་ཀྱི་རྗེས་གནང༌། རྒྱས་པ་བྱིན་རླབས་དབང་ལྔ། ཤིན་ཏུ་རྒྱས་པ་དབང་བཞི་རྣམས་ཡོད་པ་ལས། དང་པོ་གཉིས་ཀྱི་དབང་དུ་བྱས་ན། མདུན་དུ་མཎྜལ་གྲུ་གསུམ་མཐིང་ནག་གཏོར་མ་དང་བཅས་པ་བཀོད། མཐའ་མཆོད་གཏོར་གྱིས་བསྐོར། སྔོན་འགྲོ་གཏོར་མ་དང༌། མཆོད་པ་བྱིན་རླབས་སྔོན་དུ་འགྲོ་བས་ཡི་དམ་གྱི་བདག་བསྐྱེད་བཟླས་པ་དང་བཅས་པ་བྱ། མདུན་བསྐྱེད་ཀྱི་བྱ་བ་ནི། སྒྲུབ་ཐབས་དགྲ་བགེགས་ཀུན་འཇོམས་སུ་བཤད་ཟིན་པ་ཉིད་ཡིན་ཏེ། བསྟོད་པ་འཕྲིན་བཅོལ་ཡན་ཆད་གྲུབ་པའི་མཚམས་སུ། སློབ་མ་རྗེས་འཛིན་ཏེ། མཎྜལ་ཡན་ཆད་སྤྱི་དང་འདྲ། གསོལ་འདེབས་ནི། རྗེ་བཙུན་རྡོ་རྗེ་འཛིན་པའི་གཙོ། །བདག་གི་ལུས་ངག་ཡིད་གསུམ་གྱི། །དྲི་མ་མཐའ་དག་སྦྱང་བའི་ཕྱིར། །མ་སྨིན་
སྨིན་བྱེད་དབང་བསྐུར་སྩོལ། །ཞེས་ལན་གསུམ། གུར་ནས་འབྱུང་བའི་རྒྱུན་བཤགས་ལན་གསུམ། སློབ་དཔོན་ཡི་དམ་དང༌། གཏོར་མ་མགོན་པོར་བསྐྱེད་ལ། སྤྱན་འདྲེན་པ་ཡན་ཆད་བྱ། སློབ་མས་མོས་གུས་བྱས་པས། གཏོར་མ་མགོན་པོར་གསལ་བ་སློབ་མའི་སྤྱི་བོར་བྱོན། དེའི་དབུ་གཙུག་ཏུ་བླ་མ་ཡི་དམ་དུ་གསལ་བ་ལ་སངས་རྒྱས་བྱང་སེམས་ཐམས་ཅད་ཀྱིས་བསྐོར་བར་མོས། སློབ་དཔོན་གྱིས་བཀའ་བསྒོས་པའི་ཚེ། མགོན་པའི་གནས་གསུམ་ནས། འོད་ཟེར་དཀར་དམར་མཐིང་གསུམ་བྱུང་ནས། སློབ་མའི་ལུས་གང་བས། ལུས་ངག་ཡིད་གསུམ་གྱི་སྡིག་སྒྲིབ་བསྲེགས། སྐུ་གསུང་ཐུགས་ཀྱི་བྱིན་རླབས་ཞུགས་པར་རིམ་པར་སྒོམ་དུ་བཅུག་ལ། རོལ་མོ་དང་བཅས་པས་བཀའ་བསྒོ་བྱའོ། །རྗེས་ཀྱི་བྱ་བ་སྤྱི་དང་འདྲ། དེ་ཙམ་ནི་གཏོར་དབང་ངོ༌། །སྐུ་གསུང་ཐུགས་ཀྱི་རྗེས་གནང་བྱེད་ན། ཐོག་མར་གཏོར་དབང་དེ་ཉིད་རྫོགས་པར་བསྐུར་ཏེ། དེ་ལྟར་ན་ཁྱེད་རང་གི་ལུས་ངག་ཡིད་གསུམ་གྱི་དྲི་མ་མཐའ་དག་བྱང་སྟེ། ཡེ་ཤེས་ཀྱི་སྐུར་གྱུར་པ་ནི་ཞེས་མཚམས་སྦྱར་ནས། ཡི་དམ་ཁྲོ་བོ་གང་རུང་ཞིག་གི་མངོན་རྟོགས་ཕོགཡེ་ཤེས་པ་བསྟིམ་པ་ཡན་ཆད་སྐུའི་རྗེས་གནང་སྤྱི་དང་འདྲ་བར་བྱས་ནས། བླ་མའི་ཐུགས་ཀ་ནས་འོད་ཟེར་འཕྲོས། མགོན་པོའི་ཐུགས་བརྒྱུད་བསྐུལ་བ་རེ་རེ་བཞིན་ལ་སྔོན་དུ་འགྲོ་བར་སྦྱར་ནས། མདུན་བསྐྱེད་ལས་མགོན་པོའི་སྐུ་མང་
པོ་བྱུང༌། སློབ་མའི་སྤྱི་བོར་ཐིམ། མགོན་པོའི་སྐུ་སྤྱི་བོར་གཏུགས་ཏེ། མི་འབྲལ་སྐུ་ཡིས་བྱིན་རླབས་པས། །སངས་རྒྱས་རྣམས་ནི་ཐམས་ཅད་ཀྱི། །རྡོ་རྗེ་གསང་བ་གསུམ་ལས་བྱུང༌། །སྐུ་ཡི་དངོས་གྲུབ་ཐོབ་པར་ཤོག །ཨོཾ་མཧཱ་ཀཱ་ལ་རཱུ་པ་ཨ་བྷི་ཥིཉྩ་ཧཱུཾ། དེ་བཞིན་དུ། མགྲིན་པ་ནས་ཡིག་འབྲུ་བྱུང་སྟེ། མགྲིན་པར་ཐིམ། འཕྲེང་བ་མགྲིན་པར་གཏད་དེ། གོང་གི་ཚིགས་བཅད་ལ། མི་འབྲལ་གསུང་གི་དང༌། གསུང་གི་དངོས་གྲུབ་བཅས་འདོན་པ་བསྒྱུར། ཨོཾ་མཧཱ་ཀཱ་ལ་ཏྲི་ཡཾ་ཛ་ཝཱཀ་ཨ་བྷི་ཥིཉྩ་ཧཱུཾ། ཐུགས་ཀ་ནས་ཕྱག་མཚན་བྱུང་སྙིང་གར་ཐིམ། བེང་སྙིང་གར་གཏད་དེ། མི་འབྲལ་ཐུགས་ཀྱི༴ ཐུགས་ཀྱི་དངོས་གྲུབ༴ ཨོཾ་མཧཱ་ཀཱ་ལ་རཀྵ་དུ་ཙིཏྟ་ཨ་བྷི་ཥིཉྩ་ཧཱུཾ། དམ་ཚིག་དང་ལྡན་ཞིང་ཆོས་སྐྱོང་འདི་སྒྲུབ་པ་ལ་སྤྲོ་བ་ཡིན་ལ། གོང་དུ་ཡི་དམ་གྱི་ཐུགས་ཀར་མགོན་པོ་ཉིད་བསྐྱེད་པ་དང༌། སྐབས་འདིར་སྔགས་ཀྱི་བཟླས་ལུང་སྦྱིན་ནས་སློབ་མ་ལ་མཆོད་བསྟོད། བརྟན་བཞུགས། མགོན་པོ་དམ་ལ་བཞག་ཅིང་དམ་ཚིག་བསྲེ་བ་རྣམས་བྱེད། སློབ་མ་དམ་ཚིག་ལ་ཐེ་ཚོམ་ཟ་བ་དང༌། འདིའི་སྒྲུབ་པ་མི་བྱེད་པ་ལ། དེ་རྣམས་མི་བྱ་སྟེ། བྱས་ན་དཔོན་སློབ་གཉིས་ཆར་ལ་མི་ཤིས་སོ། །རྗེས་ཀྱི་བྱ་བ་རྣམས་སྤྱི་དང་འདྲ། གལ་ཏེ་གཏོར་དབང་ལ་སོགས་པ་འདི་དག་སྒྲུབ་པའི་འོས་མ་ཡིན་པར་གནས་མིན་དུ་མི་བྱ་བའི་མཐུ་མེད་ན། དམིགས་པ་དང༌། ལག་ལེན་འདི་བསྒྱུར་ཏེ། རང་ལ་ཉེས་པ་མི་འབྱུང་
ཞིང༌། དེ་ཉིད་མནའ་ལ་བཀར་བར་འགྱུར་བའི་ཐབས་ཡོད་པ་ནི་མན་ངག་ལས་ཤེས་པར་བྱའོ། །ཀུན༵་དུ་འཕྲིན་ལས་མགོན་པོ་ཞེས། །སློབ་དཔོན་རྣམས་ཀྱིས་དག༵འ་བར་བསྔགས། །སྙིང༵་ནས་བསྟན་པ་བསྲུང་འདོད་ན། །དྲག་པོ༵འི་མཐར་ཐུག་འདི་སྒྲུབས་ཤིག །དཔལ་མགོན་པོ་ཏྲཀྴད་གཉོས་ལུགས་ཀྱི་རྗེས་གནང་གི་བྱ་བ་བསྟན་པའི་ལེ་ཚན་ནོ།། །།དར་རྒྱས་འཕེལ། །
ཏྲཀྴད་དྭགས་པོ་ལུགས་ཀྱི་སྒྲུབ་ཐབས།
ཨོཾ་སཱ་སྟི། སངས་རྒྱས་ཀུན་ལ་ཕྱག་འཚལ་ནས། །བསྟན་སྲུང་མཆོག་ཞིག་སྒྲུབ་པའི་ཕྱིར། །སྒྲུབ་ཐབས་མདོར་བསྡུས་ཙམ་འབྲི་ན། །ནག་པོ་ཉིད་ཀྱིས་དགེ་ལེགས་སྩོལ། །མཎྜལ་གཏོར་མ་གྲུ་གསུམ་དང་བཅས་པ། མདུན་དུ་མཆོད་གཏོར་བཤམ། བདག་བསྐྱེད་སྔོན་དུ་འགྲོ་བའི་སྒོ་ནས། མཆོད་པ་བྱིན་རླབས་དང༌། སྨན་རག་གཏོར་གསུམ་བྱིན་གྱིས་བརླབས། མདུན་བསྐྱེད་སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་ཐོད་མཁར་འབར་བའི་ནང་དུ་ནག་པོ་གྲུ་གསུམ་གྱི་གཞལ་ཡས་ཁང་དེའི་ནང་དུ། མི་རོ་རྟ་རོ་བརྩེགས་པའི་གདན་ལ་པད་ཉིའི་སྟེང་དུ། རཾ་ལས་དཔལ་མགོན་པོ་སྐུ་མདོག་དུས་མཐའི་སྤྲིན་ལྟར་ནག་པ། ཞལ་གཅིག་ཕྱག་གཉིས་གཡས་རྩེ་གསུམ་གྱི་མགུལ་དུ་མི་མགོ་དཔྱངས་པ་རྒྱུ་དར་ནག་པོ་དང་བཅས་པ་འཕྱར་ཞིང༌། གཡོན་དགྲ་བགེགས་ཀྱི་གློ་སྙིང་བླངས་པ་བུན་ནེ་བ་ཞལ་དུ་གསོལ་ཞིང་བདུད་ཞགས་ནག་པོ་འཛིན་པ། སྐུ་ལ་དར་ནག་གི་འཇོལ་བེར་གསུམ་བརྩེགས་སུ་གསོལ་ཞིང༌། རིན་པོ་ཆེ་གསེར་གྱི་སྐེ་
རགས་བཅིངས་པ། ཞབས་ལ་ལྷམ་ཡུ་རིང་གསོལ་ཞིང༌། ལྕགས་ཀྱི་རལ་པ་མུན་ལྟར་གཏིབས་པ། མཆེ་གཙིགས་སྤྱན་གསུམ་སྨ་ར་འབར་ཞིང༌། ཐོད་སྐམ་གྱི་དབུ་རྒྱན་དང༌། ཐོད་རློན་གྱི་དོ་ཤལ་ཅན། རྟ་ནག་ཆིབས་ཤིང་རྫུ་འཕྲུལ་དང་དྲག་ཤུལ་ཆེ་བ། མེ་དཔུང་འབར་བའི་དབུས་ན་བཞུགས་ཤིང་བཀའ་ཉན་ལས་བྱེད་སྤྲུལ་པ་ཡང་སྤྲུལ་གྱི་འཁོར་དང་བཅས་པའོ། །རང་གི་སྙིང་ག་ནས་འོད་ཟེར་འཕྲོས། དུར་ཁྲོད་ཆེན་པོ་ཨུ་ཙ་ལ་ནས། ནག་པོ་ཆེན་པོ་འཁོར་བཅས་སྤྱན་དྲངས་པར་བསམ། ཨུ་ཙ་ལའི་དུར་ཁྲོད་ནས་སོགས་སམ། བསྡུ་ན། དད་པ་དང་ནི་དམ་ཚིག་གིས། །དཔལ་ལྡན་མགོན་པོ་སྤྱན་འདྲེན་ན། །སངས་རྒྱས་བསྟན་པ་བསྲུང་བའི་ཕྱིར། །མཆོད་པའི་གནས་འདིར་གཤེགས་སུ་གསོལ། །ཨོཾ་མཧཱ་ཀཱ་ལ་ཏྲཀྴད་ས་པ་རི་ཝཱ་ར་བཛྲ་ས་མཱ་ཛཿ ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཨོཾ་བཛྲ་མཧཱ་ཀ་ལ་ཏྲཀྴད་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། སོགས་ཀྱིས་མཆོད། སྙིང་པོའི་མཐར། ཨོཾ་མཧཱ་བཱ་ལིཾ་ཏ་ཁཱ་ཧི། མཧཱ་རཀྟ་ཁཱ་ཧི། མཧཱ་ཙིཏྟ་ཁཱ་ཧི། མཧཱ་གོ་རོ་ཙ་ན་ཁཱ་ཧི། ཞེས་ལན་གསུམ་གྱིས་ཕུལ། བསྟོད་པ་རྒྱས་པའམ། བསྡུ་ན། རཾ་ལས་བྱུང་བའི་སྟོབས་པོ་ཆེ། །བདུད་ཀྱི་རྒྱལ་པོ་ཁྲོ་གཏུམ་ཅན། །རྟ་ནག་ཞོན་པ་རྫུ་འཕྲུལ་ཆེ། །སྡིག་ཆེན་སྒྲོལ་མཛད་ཁྱོད་ལ་བསྟོད། །
མཆོད་སྦྱིན་གཏོར་མ་འདི་བཞེས་ལ་སོགས་འཕྲིན་ལས་ཞུ། གཏོར་ཆོག་ཙམ་ཡིན་ན་རྗེས་ཆོག་བྱ། སློབ་མ་རྗེས་སུ་འཛིན་ན། ཨོཾ་མཧཱ་ཀཱ་ལ་ཏྲཀྴད་མཧཱ་ཀ་ལ་སིདྡྷི་ཏྲི་ཡཾ་དུ་ཛཿཛཿ ཞེས་སྙིང་པོ་ཅུང་ཟད་བཟླས་ལ། སློབ་མའི་དོན་དུ་བགེགས་གཏོར་བཏང༌། སློབ་མས་མཎྜལ་ཕུལ། རྡོ་རྗེ་འཛིན་པ་དགོངས་སུ་གསོལ། །སོགས་ཀྱིས་གསོལ་བ་བཏབ། སློབ་དཔོན་ཕྱག་ན་རྡོ་རྗེ་དང༌། མདུན་བསྐྱེད་མགོན་པོར་གསལ་འདེབས་སུ་བཅུག་ལ། བླ་མ་རྡོ་རྗེ་འཛིན་པ་དང༌། །དཔལ་ལྡན་མགོན་པོ་འཁོར་བཅས་རྣམས། །མ་རུངས་པ་རྣམས་བསྒྲལ་སླད་དུ། །བདག་ལ་བྱིན་གྱི་བརླབ་ཏུ་གསོལ། །ཞེས་ལན་གསུམ་གསོལ་བ་བཏབ། མགོན་པོའི་གནས་གསུམ་ནས་འོད་ཟེར་དཀར་དམར་མཐིང་གསུམ་རིམ་པས་བྱུང་བ། སློབ་མའི་གནས་གསུམ་དུ་རིམ་པས་ཐིམ་པས་སྐུ་གསུང་ཐུགས་ཀྱི་རྗེས་གནང་ཐོབ་པར་མོས། གཏོར་མའི་བཀའ་བསྒོ་སྤྱི་དང་མཐུན་པར་བྱ། མགོན་པོའི་སྐུ་གཉིས་པ་ཞིག་ཆད་དེ། སྤྱི་བོ་ནས་བསྟིམ་པས། མགོན་པོའི་སྐུ་གསུང་ཐུགས་ཀྱི་ངོ་བོར་གྱུར་པར་བསམས་ལ། བཟླས་ལུང་སྤྱི་དང་མཐུན་པར་སྦྱིན། དེས་འདིའི་ཆོས་སྐོར་རྣམས་ཉམས་སུ་ལེན་པ་ལ་དབང་བ་ཡིན་པས་དམ་ཚིག་ལ་གནས་པར་གྱིས་ཤིག་ཅེས་གདམས། རྗེས་ཀྱི་བྱ་བ་སྤྱི་དང་འདྲ། བསྟན་བསྲུང་ཀུན༵་ལས་ཆེས་ཟབ་ཅེས། །རྒྱ་སྟོན་ལྕགས་རིས་དག༵འ་བར་བསྔགས། །སྤུ་གྲི་ཆིག་ཞུར་
རྒྱ་མཚོ་ལས། །གཏོར་ཆོག་རྗེས་གནང་སྙིང༵་པོ༵ར་གྲིལ། །འདིའི་ལུགས་ཀྱི་ལྕམ་དྲལ་དང༌། ལྷ་གསུམ་མ་དང༌། འཁོར་མང་སོགས་བྱེད་ཀྱང་འདི་ཉིད་འདོན་པ་སྤོས་པས་ཆོག་གོ །ཤིན་ཏུ་ཟབ་པ་ཏྲཀྴད་དྭགས་པོ་ལུགས་ཀྱི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ཏྲཀྴད་ཇོ་བོ་ལུགས་སེང་ཞོན་གྱི་སྒྲུབ་ཐབས།
ཨོཾ་སྭཱ་སྟི། རྫོགས་སངས་རྒྱས་ལ་གུས་བཏུད་ནས། །ཕྱག་ན་རྡོ་རྗེའི་ཕོ་ཉ་མཆོག །སྟོབས་པོ་ཆེ་ལས་སྐུ་སྤྲུལ་པའི། །མགོན་པོའི་སྒྲུབ་ཐབས་བཤད་པར་བྱ། ཁྲོ་བོའི་བདག་བསྐྱེད་སྔོན་དུ་འགྲོ་བས། དཔལ་བཤོས་བཤོས་ཕྲན་གསུམ་གྱིས་བསྐོར་བ་བྲིས་སྐུའི་མདུན་དུ་བཤམ། གཏོར་མ་བྱིན་རླབས་སྤྱི་དང་མཐུན། མགོན་པོ་ཏྲཀྴད་ཀྱི་སྒྲུབ་ཐབས་རྒྱས་པ་གང་ཡང་རུང་བ་ཤེས་པ་ཞིག་གིས་འདི་ལ་འཇུག་པའི་དབང་དུ་བྱས་ནས། མི་འདྲ་བའི་ཁྱད་པར་བཤད་ན། རང་གི་སྙིང་གའི་ཧཱུཾ་ལས་རཾ་དམར་ནག་གཉིས་འཕྲོས། རཾ་ལས་བེང་དབྱུག་དམར་པོ་རཾ་གྱིས་མཚན་པའི་འཕྲོ་འདུ་ལས། ཡེ་ཤེས་ཀྱི་མགོན་པོ་སྐུ་མདོག་དམར་ནག་སྐུའི་རྣམ་པ་ཏྲཀྴད་སྤྱི་དང་འདྲ་བ་ལས། ཕྱག་གཡས་ཙནྡན་དམར་པོའི་བེང་ཆེན་ཏྲི་ཤུ་ལས་མཚན་པའི་མགུལ་དུ་མི་མགོ་འཕྱང་པ། གཡོན་གདུག་པའི་གློ་སྙིང་སྲོག་རྩ་དང་བཅས་པ་ཞལ་དུ་གསོལ་བ། ཞབས་གཡས་བསྐུམ་གཡོན་བརྐྱང་བས། སེང་གེ་དཀར་པོ་དྲེགས་པའི་སྟེང་ན་བཞུགས་པ། དེའི་གཡས་སུ་ཧཱུཾ་ལས་ལས་མགོན་སྤུ་གྲི་ཆིག་ཞུར་གྱི་སྐབས་དང་འདྲ་བ་གཅིག་གསལ་བཏབ། གཡོན་དུ་རུ་ལས་ཡུམ་བེ་ཏ་ལི་སྔོན་མོ། ཁྲོ་འཛུམ་རིན་པོ་ཆེ་དང་མགོ་
ཕྲེང་གིས་བརྒྱན་པ། མི་ལྤགས་སྟག་ལྤགས་གསོལ་བ་གྲི་ཐོད་འཛིན་ཞིང་བཞེངས་པའོ། །ཧཱུཾ་བདུན་ལས་དྲེགས་པ་ཕོ་བདུན་མཚོན་ཆ་སྣ་ཚོགས་འཛིན་པ། ཁྱུང༌། བྱི་ལ། སྟགའབྲུགརླུང་ནགདུག་སྦྲུལ། ཆུ་བོ་རྣམས་ལ་ཞོན་པ། བྷྱོཿབདུན་ལས་དྲེགས་པ་མོ་བདུན་སྐྲ་འཕྱང་བ། རྡོ་རྗེ་དང་ཞགས་པ་འཛིན་པ། མོན་པ་ཕོ་མོ་དེ་ཐམས་ཅད་མུན་ལྟར་གཏིབ་པའི་མདོག་ཅན་ནོ། །གནས་གསུམ་བྱིན་རླབས། ཡེ་ཤེས་སྤྱན་འདྲེན། དབང་བསྐུར་རྒྱས་བཏབ། གདན་འབུལ་བ་རྣམས་བྱས་ལ། སྔགས་བཟླ་སྟེ། སྤུ་གྲྀ་ཆིག་ཞུར་དང་འདྲའོ། །གཏོར་མ་འབུལ་བའི་སྔགས་ཀྱང་སྤྱི་དང་འདྲ་བའམ། གུང་གཏོར་འབུལ་བའི་སྔགས་དེས་བྱེད། བསྟོད་པ་ཡང་ཅུང་ཟད་འདོན་པ་སྤོ་དགོས་རྣམས་སྤོས་ནས། དད་པ་དམ་ཚིག་ལ་སོགས་ཀྱིས་བསྟོད། དྲེགས་པ་ཕོ་མོའི་བསྟོད་པ་རྣམས། འདི་རང་གི་ལུགས་ལ་མང་དུ་ཡོད་པ་རྣམས་ཤེས་བྱ། འདིའི་རྗེས་གནང་ཡང་སྤུ་གྲི་ཆིག་ཞུར་དང་འདྲ་བ་ལས། སྐུ་གསུང་ཐུགས་ཀྱི་རྗེས་གནང་གི་སྔོན་དུ་གཏོར་དབང་བྱེད་པ་ནི་ཁྱད་པར་རོ། །སེང་ཞོན་འདི་ལ་སྐུ་མདོག་མཐིང་ཀ་ཞིག་ཀྱང་ཡོད་པ་འདི་དང་གཉིས་ཀ །དཔལ་ལྡན་ཨ་ཏི་ཤའི་མན་ངག་སྟེ། གྲི་གུག་མ་དམར་ནག་གཉིས་དང་འབྲེལ་བར་འཕྲིན་ལས་མགོན་པོ་ཡང་དམར་ནག་གཉིས་འབྱུང་བ་ཡིན་པས་གྲགས་སོ། །སྲུང་མ་ཀུན༵་གྱིས་ནང་ནས་ཀྱང༌། །ཤིན་དུ་དག༵འ་བར་ཇོ་བོས་བསྒྲགས། །སྔ་ཕྱིའི་ཡི་གེ་མང་ཡོད་ཀྱང༌། །སྙིང༵་པོ༵་ཁྱད་པར་དེ་ཙམ་ལགས། །ཏྲཀྴད་ཇོ་བོ་ལུགས་སེང་ཞོན་གྱི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
དཔལ་མགོན་པོ་ཏྲཀྴད་གྲི་གུག་སྔགས་སྒྲུབ་མར་གྲགས་པའི་སྒྲུབ་ཐབ།
ཨོཾ་སྭཱ་སྟི། རྣམ་དག་ཡེ་ཤེས་གཅིག་ལ་ཡང༌། །སྣ་ཚོགས་དུ་མའི་སྣང་བརྙན་ཅན། །ནག་པོ་ཆེན་པོའི་སྒྲུབ་ཐབས་འདིར། །ཡ་མཚན་སྐྱེས་ནས་བདག་གིས་བརྗོད། །བདག་བསྐྱེད་གང་ཡང་རུང་བ་སྔོན་དུ་འགྲོ་བས། མཎྜལ་གྲུ་གསུམ་དབུས་སུ་ཉི་གདན་གསུམ་ལ་ཧཱུཾ་གསུམ་བཀོད། མཐའ་མཆོད་གཏོར་གྱིས་བསྐོར། མཆོད་གཏོར་རྣམས་བྱིན་གྱིས་བརླབས་ནས། མདུན་བསྐྱེད་བསངས་སྦྱངས། གཞལ་ཡས་ཁང་གི་དབུས་སུ་ཆོས་འབྱུང་གདན་དང་བཅས་པ་བསྐྱེད། རང་གི་སྙིང་ག་ནས་ཧཱུཾ་མཐིང་ནག་སྤྲོས་ཏེ། དབུས་ཀྱི་གདན་ལ་འཁོད་པ་ནི། དཔལ་མགོན་པོ་ནག་པོ་གྲི་ཐོད་ཅན་གཅེར་བུའམ། བེར་ནག་པོ་གསོལ་བ་འདམ་ཀ་ཡིན་པས་གང་བསྐྱེད་ཀྱང་ཆོགདེའི་ཐུགས་ཀ་ནས་རཾ་དང་བྷྱོཿསྤྲོས་ཏེ་གཡས་གཡོན་དུ་འཁོད་པ་ལས། གཡས་སུ་ལས་ཀྱི་མགོན་པོ་སྤུ་གྲི་ཆིག་ཞུར་གྱི་སྐབས་བཞིན་བསྐྱེད། གཡོན་དུ་ལྷ་མོ་ནག་མོ་རལ་གྲི་དང་ཐོད་ཁྲག་ཐོགས་པ་བསྐྱེད། གནས་གསུམ་བྱིན་རླབས། ཡེ་ཤེས་པ་སྤྱན་འདྲེན། དབང་བསྐུར་རྒྱས་བཏབ། དམ་བཞག་རྣམས་བྱས་ལ། བཟླས་པའི་ཚེ། ཨོཾ་བཛྲ་མཧཱ་ཀཱ་ལ་གུ་ཎ་ཧྲི་ད་ཧཱུཾ་ཕཊ། ཨོཾ་མཧཱ་ཀཱ་ལ་ཏྲཀྴད་མཧཱ་ཀ་ལ་སིདྡྷི་ཏྲི་ཡཾ་དུ་ཛཿཛཿ ཞེས་ཡེ་ཤེས་མགོན་པོ་དང་ལས་མགོན་གྱི་སྔགས་སྦྲེལ་ནས་བཟླ། ཨོཾ་རོ་རུ་རོ་རུ་ཙ་པ་ལ་མ་ཧཱུཾ་མ་བྷྱོཿཛཿཛཿ ཞེས་ལྷ་མོའི་སྔགས་ཀྱང་བཟླས་ལ། མཆོད་གཏོར་འབུལ་བ་དང༌། རྗེས་གནང་གི་བྱ་བ་ནི། སྤུ་གྲི་
ཆིག་ཞུར་གྱི་སྐབས་དང་འདྲ་ཞིང༌། བསྟོད་པ་ཡེ་ཤེས་མགོན་པོ་ལ། སྲིན་གཟུགས་མ་བྱེད། བཟླས་ལུང་གི་སྐབས་སྔགས་གསུམ་ཆར་སྦྲེལ་ནས་ལུང་སྟེར་རོ། །སངས་རྒྱས་ཀུན་གྱི་འཕྲིན་ལས་པར། །རྒྱུད་སྡེ་ཀུན༵་དུ་དག༵འ་བར་བསྔགས། །སྒྲུབ་ཐབས་ཤིན་ཏུ་རྨད་བྱུང་བའི། །སྙིང༵་པོ༵་ལ་ནི་ཉེ་བར་མཁོ། །དཔལ་མགོན་པོ་ཏྲཀྴད་གྲི་གུག་སྔགས་སྒྲུབ་མར་གྲགས་པའི་སྒྲུབ་ཐབས་ཀྱི་ལེ་ཚན་ནོ།། །།མངྒ་ལཾ། །
མགོན་པོ་ཏྲཀྴད་རྐང་ཐང་མར་གྲགས་པའི་སྒྲུབ་ཐབས།
ཨོཾསྭཱ་སྟི། ཤཱཀྱའི་ཏོག་ལ་གུས་བཏུད་ནས། །གང་དེའི་བཀའ་ཡི་འཕྲིན་ལས་པ། །རྨད་བྱུང་ནག་པོ་ལ་བཏུད་ནས། །གང་དེའི་སྒྲུབ་ཐབས་བཤད་པར་བྱ། །མཆོད་གཏོར་སོགས་སྤྱི་དང་མཐུན་པར་བཤམས། གསང་བདག་གམ་དཔལ་མགོན་པོ་གྲི་གུག་གི་བདག་བསྐྱེད་སྔོན་དུ་འགྲོ་བས། མདུན་བསྐྱེད་གཞལ་ཡས་ཁང་བསྐྱེད་པ་སྤུ་གྲི་ཆིག་ཞུར་དང་འདྲ་བ་ལས། ཡཾ་རཾ་ཀེཾ་རཾ་བྷྲཱུཾ་ལས་རླུང༌། ཁྲག་མཚོ། ཀེང་རུང་ཀྱི་རི་རབ། མེའི་དཀྱིལ་འཁོར་གྱི་སྟེང་ཐོད་མཁར་རོ། །ས་བོན་རཾ་དམར་ནག་ལས་གཙོ་བོར་བསྐྱེད་པ། སེང་ཞོན་གྱི་སྐབས་དང་འདྲ་བ་ལས། བམ་ཆེན་བསྣོལ་བའི་གདན་ལ་བཞུགས་པའོ། །ཞེས་བརྗོད། འཁོར་བསྐྱེད་པ་ནི། རཾ་བདུན་ལས་མོན་མོ་བདུན། སྐུ་མདོག་ནག་མོ་དུར་ཁྲོད་ཀྱི་ཆས་བརྒྱད་ཀྱིས་བརྒྱན་པ། གྲི་གུག་དང་ཐོད་པ་འཛིན་པ། སྤྲུལ་པ་ཁྱི་མོ་བདུན་ལས་ཤེས་རབ་གསལ་ཁྱི་གདོང་རྡོ་རྗེ་དང་ཞགས་པ་འཛིན་པ། གཞན་རྣམས་ཁྱི་ནག་གི་གཟུགས་
ཅན ཤེལ་གསེར་ཟངས་གཡུ་དུང་བསེ་རྣམས་ཀྱི་མིག་ཅན་ནོ། །ཨོཾ་ཨེ་ཧྱེ་ཧི་མཧཱ་ཀཱ་ལ་ཀ་རུ་ཎི་ཛ་ཛ་ཧཱུཾ་གིས་ཡེ་ཤེས་པ་སྤྱན་འདྲེན་དབང་བསྐུར་སོགས་ཀྱང་འདྲ་བ་ལས། མཆོད་པ་འབུལ་བའི་ཚེ། བཅོམ་ལྡན་རྡོ་རྗེ་མ་ཕྱི་མས་བྱེད། སྔགས་ཀྱི་ཤམ་བུ་འདེགས་ཚུལ་མི་འདྲ་ཡང་སྙིང་པོ་སྤུ་གྲི་ཆིག་ཞུར་གྱི་སྐབས་དང་འདྲ། རྗེས་གནང་གི་རིམ་པ་ཡང་དེ་ཁོ་ན་བཞིན་ནོ། །བདུད་དང་མུ་སྟེགས་དགྲ་བགེགས་ཀུན༵། །འཇོམས་ལ་མཆོག་ཏུ་དག༵འ་བའི་ཕུལ། །རབ་ཟབ་སྒྲུབ་པའི་ཐབས་རྒྱས་པ། །དེ་ལ་ཉེར་མཁོའི་སྙིང༵་པོ༵་ཡིན། །མགོན་པོ་ཏྲཀྴད་རྐང་ཐང་མར་གྲགས་པའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
དཔལ་མགོན་པོ་ཏྲཀྴད་མ་ནིང་མར་གྲགས་པའི་སྒྲུབ་ཐབས།
ཨོཾ་སྭཱ་སྟི། མཆོག་གྱུར་རྒྱལ་བའི་འཕྲིན་ལས་པ། །འཕྲིན་ལས་མགོན་པོ་ལ་བཏུད་ནས། །གང་དེའི་སྒྲུབ་ཐབས་རྨད་བྱུང་བ། །ལྕགས་ཁབ་ཅན་དུ་གྲགས་པ་བྲི། །འདི་ལ་གཞལ་ཡས་ཁང་དང༌། གཙོ་བོ་བསྐྱེད་པ་ཡན་སྤུ་གྲི་ཆིག་ཞུར་གྱི་སྐབས་དང་འདྲ་བ་ལས། སྟག་རལ་གཡས་སུ་བཀྲ་བ། གཟིག་ཤུགས་གཡོན་དུ་འཁྱུག་པ། ལྕགས་གཞུ་ནག་པོ་གྲུ་མོ་ལ་གྱོན་པ། ཙནྡན་བེང་ཆེན་སྐེད་ལ་གཟེར་བ་ཞེས་དང༌། གཡོན་དུ་བྷྱོཿལས་ཡུམ་རྡོ་རྗེ་རེ་མ་ཏཱི་དྲེའུ་ནག་པོ་རྐང་གསུམ་ལ་ཆིབས་པ། དྲ་བ་མིག་དགུ་རྒྱབ་ཏུ་ཁུར་བ། ཕྱག་གཡས་བདུད་ཀྱི་ཁྲམ་བཾ་དང༌། གཡོན་ནད་ཀྱི་རྐྱལ་བ་འཛིན་པ། ཆ་ལུགས་གཞན་ལྷ་མོ་སྤྱི་དང་འདྲ། མཐའ་སྐོར་དུ་ལུས་དང་གྲིབ་མའི་ཚུལ་གྱི་སྤྲུལ་པའི་ལས་མཁན་མོན་པ་ཕོ་དྲུག་མོ་དྲུག་བདུད་དམག་བྱེ་བ་དུང་ཕྱུར་
གྱི་ཚོགས་དང་བཅས་པ། སྟེང་དུ་བྱ་ནག་ལྡིང་བ། འོག་ཏུ་ཁྱི་ནག་རྔམ་པ། ཅེ་སྤྱང་དོམ་དྲེད་རོལ་དུ་འཁྲིད་པ་ཞེས་བརྗོད་པ་ནི་ཁྱད་པར་རོ། །སྔགས་ནི། ཨོཾ་ཤྲཱི་མཧཱ་ཀཱ་ལ་ཏྲཀྴད་ག་ན་གུ་ཡ་རཾ་སིདྡྷི་ཧཱུཾ་ཕཊ། ཅེས་པ་སྙིང་པོའོ། །དྲག་སྔགས་ནི། ཏྲི་ཡཾ་རུ་ཊ་ལ་སོགས་པའོ། །གཏོར་སྔགས་ཀྱི་སྐབས། སྙིང་པོའི་མཐར་ཨི་དཾ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། མཾ་ས་ལ་ཁཱ་ཧི། རཀྟ་ལ་ཁཱ་ཧི། ཙིཏྟ་ལ་ཁཱ་ཧི། ཀོ་རོ་ཙ་ན་ལ་ཁཱ་ཧི། པཉྩ་ཨ་མྲྀ་ཏ་ཁཱ་ཧི། ཞེས་འབུལ། དེ་ནས་བསྟོད་པའི་སྐབས། སྲོག་བདུད་མཧཱ་ཀཱ་ལ་ནི། །རྔམ་པའི་ཞལ་ལ་གཏུམ་པའི་སྐུ། །གསོད་དང་གཅོད་པའི་ལས་ལ་དགྱེས། ཁྱོད་ལ་འདུད་དོ་བསམ་པ་སྒྲུབས། །མིང་པོ་རྡོ་རྗེའི་ལས་བྱེད་མ། །དམ་ལ་གནས་ཤིང་བསྟན་པ་སྲུངས། ཁམས་གསུམ་ཁྲག་འཐུང་རེ་མ་ཏཱི། ཁྱོད་ལ་གུས་པས་ཕྱག་འཚལ་འདུད། །ཤེལ་གཡུ་དངུལ་དང་དུང་གི་མིག །མཆོང་དང་ཟངས་ཀྱི་མིག་ཅན་མ། །སྔགས་ཀྱི་རང་སྒྲ་དིར་རི་རི། །བཅོལ་བའི་ལས་རྣམས་རྟགས་བྱུང་ཞིག །སྲོག་བདུད་ནག་པོའི་དུས་ལ་བབས། །ལེགས་ལྡན་ནག་པོའི་དུས་ལ་བབ། །མ་ནིང་ནག་པོའི༴ ལྷ་ཆེན་དཔལ་འབར༴ ཅེས་བརྗོད། སློབ་མ་རྗེས་སུ་འཛིན་པའི་ཚུལ་ཡང་སྦུ་གྲི་ཆིག་ཞུར་གྱི་སྐབས་དང་འདྲ་བ་ལས་དཀར་ཕྱོགས་སྐྱོང་བ་ཐམས་ཅད་ལ་དཀར་གཏོར་ཞིག་ངེས་པར་འབུལ། ཆོ་ག་གང་གི་ལུགས་དང་བསྟུན་ཀྱང་འདྲ།
སློབ་མའི་བྱ་བའི་སྐབས། མགོན་པོའི་གནས་གསུམ་ནས་འོད་ཟེར་སྤྲོ་བའི་དོད་སྐུ་གཟུགས་དཀར་དམར་མཐིང་གསུམ་བསྟིམ་པ་ཡིན། འདི་ལ་སློབ་དཔོན་པདྨ་ནས་བརྒྱུད་པའི་རྙིང་མ་དང༌། རྒྱ་གར་ནག་ཆེན་ནས་བརྒྱུད་པའི་ལུགས་གཉིས་ཀྱི་མན་ངག་གུང་བསྒྲིགས་པ་ཡིན་པར་གྲགས་ལ། དྲགས་སྔགས་ཀྱི་ངོ་བོ་ཤིན་ཏུ་རྣོ་ཞིང་སྟོབས་ཆེན་ཡིན་ནོ། །ཀུན༵་དུ་ཟབ་པར་རབ་གྲགས་པ། །མངོན་སྤྱོད་འདོད་རྣམས་དག༵འ་བའི་གནས། །མགུལ་ཁུག་ལྕགས་ཀྱི་རྒྱ་ཅན་གྱི། འཇུག་སྒོའི་ཐབས་ཀྱི་སྙིང༵་པོ༵་ཡིན། །དཔལ་མགོན་པོ་ཏྲཀྴད་མ་ནིང་མར་གྲགས་པའི་སྒྲུབ་ཐབས་ཀྱི་ལེ་ཚན་ནོ།། །།མངྒ་ལཾ། །
ཏྲཀྴད་འབྲོང་ཞལ་ཅན་གྱི་སྒྲུབ་ཐབས།
ཨོཾ་སྭཱ་སྟི། ནག་པོ་ཆེན་པོའི་སྐུ་ཉིད་ལ། །བདུད་འདུལ་དྲེགས་པའི་ལྷ་སྤྲུལ་པ། །མ་རུངས་ཀུན་འཇོམས་ལ་བཏུད་ནས། །གང་དེའི་སྒྲུབ་ཐབས་བྲི་བར་བྱ། །བདག་བསྐྱེད་ཡི་དམ་དང་མདུན་བསྐྱེད་གཉའ་གནོན་དུ་དཔལ་མགོན་པོ་བསྐྱེད་ནས། དེའི་མདུན་དུ་ཆོས་འབྱུང་གསུམ་མི་རོ་ཅན་གསུམ་བརྩེགས་ཟུར་དགུ་པའི་དབུས་སུ། སྐད་ཅིག་གིས་ལས་མཁན་འབྲོང་ཞལ་ནག་པོ་ཞལ་གཅིག་ཕྱག་གཉིས་གཡས་བེ་ཅོན་འབར་བ་དང༌། གཡོན་གྲི་གུག་ཁྲག་འཛག་པ་འཛིན་པ། སྟག་རལ་དང་གཟིག་ཤུབས་ཅན་ཆ་ལུགས་མགོན་པོ་ཉིད་དང་འདྲ་བ་ལས། དྲེའུ་ནག་པོ་རྟིང་དཀར་ལ་ཞོན་པ། སྐད་ཅིག་གིས་བསྐྱེད་ནས། ཡེ་ཤེས་པ་སྤྱན་དྲངས་ཏེ་བསྟིམ། དམ་ལ་བཞག་ནས། ཨོཾ་བཛྲ་མཧཱ་ཀཱ་ལ་ཏྲཀྴད་ཏྲི་ཡཾ་བྷྱོཿཎི་ཚལ་པ་ཏྲི་ཡཾ་ཛ་ཛཿ རུ་རུ་རུ་རུ་ཙ་པ་ལ་ཨ་ཤུག་མེ་བྷྱོཿ ཞེས་བཟླས་མཆོད་གཏོར་སོགས་
གཞན་དང་འདྲ་ཞིང༌། སློབ་མ་རྗེས་འཛིན་ནི། སྤུ་གྲི་ཆིག་ཞུར་སྐབས་སུ་བཤད་པའི་གསོལ་གདབ་སྔོན་དུ་སོང་ནས། གཏོར་དབང་ཙམ་གྱིས་ཆོག་པ་ཡིན་ནོ། །དྲག་ལས་ཀུན༵་ལ་ཆེས་བསྔགས་པ། །ཐལ་མོ་བརྡབས་ཆོག་རབ་དག༵འ་བའི། །སྒྲུབ་ཐབས་རྗེས་གནང་བཅས་པ་ལ། །ཡི་གེ་སྙིང༵་པོ༵་ཙམ་གྱིས་ཆོག །ཏྲཀྴད་འབྲོང་ཞལ་ཅན་གྱི་སྒྲུབ་ཐབས་གྱི་ལེ་ཚན་ནོ།། །།དར་རྒྱས་འཕེལ། །
ལེགས་ལྡན་མཧཱ་ཀཱ་ལའི་སྒྲུབ་ཐབས།
ཨོཾ་སྭཱ་སྟི། དུས་གསུམ་གཤེགས་པའི་སངས་རྒྱས་རྣམས། །ཀུན་གྱི་ཐུགས་ལས་སྤྲུལ་པ་ཡི། །ལྷ་ཆེན་དཔལ་འབར་ལ་བཏུད་ནས། །གསང་བའི་སྒྲུབ་ཐབས་བྲི་བར་བྱ། །འདིའི་བསྙེན་པ་ནི། ལས་སྦྱོར་དང་སྦྲགས་མ་ཡིན་པའི་ཕྱིར་འདིར་མི་འབྲི་ལ། གཏོར་ཆོག་དང་རྗེས་སུ་འབྲེལ་བ་ཙམ་བཤད་ན། མཎྜལ་གྲུ་གསུམ་ནག་པོ་ཚོམ་བུ་ཅན་གྱི་མཐའ་མཆོད་གཏོར་གྱིས་བསྐོར་བ། བདག་བསྐྱེད་སྔོན་དུ་འགྲོ་བའི་སྒོ་ནས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་བྷྲུཾ་ལས་གནམ་ལྕགས་ཀྱི་ཐོད་མཁར་གྲུ་གསུམ་བསྣོལ་བ། སྒོ་མེད་ཡངས་ཤིང་རྒྱ་ཆེ་བ། མེ་འབར་ཞིང་ནད་དང་དུག་གི་ན་བུན་འཐུལ་བ། མཚོན་ཆའི་ཆར་འབེབས་པ། དེའི་ནང་དུ་ཨེ་ལས་གྲུ་གསུམ་མཐིང་ནག་འབར་བའི་སྟེང་དུ། པཾ་ལས་པདྨ། རཾ་ལས་ཉི་མར་ཎི་ལས་དགྲ་བགེགས་ཀྱི་ཞིང་ཆེན་བསྣོལ་བ། རང་གི་སྙིང་ག་ནས་རཾ་དམར་ནག་འཕྲོས་ཏེ། གདན་དེའི་སྟེང་དུ་འཁོད། རཾ་ལས་མེ་དཔུང་དམར་ནག་རཾ་གྱིས་མཚན་པ་ལས་འབར་བའི་མེ་དཔུང་གིས་འཇིག་རྟེན་གྱི་ཁམས་ཐམས་
ཅད་གང༌། དགྲ་བགེས་ཐམས་ཅད་བསྲེགས། སླར་ཡང་རཾ་ལས་རྩེ་གསུམ་རཾ་གྱིས་མཚན་པ་ལས་འོད་འཕྲོས། སེམས་ཅན་ཐམས་ཅད་བདེ་བ་ལ་བཀོད། གནོད་བྱེད་རྣམས་ཚར་བཅད་ཚུར་འདུས་ཡོངས་སུ་གྱུར་པ་ལས། རྡོ་རྗེ་མཧཱ་ཀཱ་ལ་སྲིན་པོའི་གཟུགས་ཅན་སྐུ་དམར་ནག་ཞལ་གཅིག་ཕྱག་གཉིས་ཤྭ་ནའི་ཞལ་རྔམ་ཞིང་གཙིགས་ལ། སྤྱན་གསུམ་བགྲད་པ། གཡས་ཁ་ཊྭཱཾ་ག་རྩེ་གསུམ་མི་མགོས་མཚན་པ་འཕྱར་བ། གཡོན་དགྲ་བོའི་གློ་སྙིང་བཟུང་ནས་ཞལ་དུ་གསོལ་བ། དབུ་སྐྲ་དམར་སེར་གྱེན་དུ་བརྫེས་པ་ལ་སྦྲུལ་དཀར་ཁྲས་ཐོད་བཅིངས་ཤིང༌། ཉི་ཟླའི་སྤྱི་གཙུག་བརྒྱན་པ། སྟག་ལྤགས་ཀྱི་ཤམ་ཐབས་དང༌། མི་ལྤགས་ཀྱི་སྟོད་གཡོགས་ཅན། སྦྲུལ་ནག་པོས་བརྒྱན་པ། ཞབས་གཡས་བསྐུམ་གཡོན་བརྐྱང་གི་སྟབས་ཀྱི་བཞུགས་པ། ཡང་ན་དར་ནག་གི་འཇོལ་བེར་གསུམ་བརྩེགས་གསོལ་བར་བྱས་ཀྱང་རུང་སྟེ་ཆ་ལུགས་ལྷག་མ་ཏྲཀྴད་སྤྱི་དང་འདྲའོ། །དེའི་མདུན་དུ་ཡུམ་ཁྱི་མོ་གསེར་མིག་མ། ཟུར་དྲུག་ལ་གཡས་སྐོར་གྱིས། གཡུ། མཆོང༌། ཟངས། དུང༌། འཁར། ལྕགས་མིག་མ་སྟེ། བདུན་ཀར་ཡང་རྡོ་རྗེ་དང་ཞགས་པ་བསྣམས་པ། ཁྱི་གདོང་ཅན། གཡང་གཞི་སྟག་ལྤགས་རུས་རྒྱན་སོགས་ཀྱིས་བརྒྱན་པ། སྲིན་མོའི་ཆ་ལུགས་ཅན་ནོ། །དུར་ཁྲོད་བརྒྱད་ནས། ཡེ་
ཤེས་པ་སྤྲིན་གཏིབས་པ་བཞིན་དུ་སྤྱན་དྲངས་པར་བསམས་ལ་མཧཱ་ཀཱ་ལ་ས་མ་ཡ་མཎྜལ་མ་ཡེ། ཨཱ་གཙྪ་ཨཱ་གཙྪ། ཨ་བེ་ཤ་ཡ་ཨ་བེ་ཤ་ཡ། ཏིཥྛ་ཡ། ཏིཥྛ་ཡ། ཨ་ཝ་ལོ་ཀ་ཡ་ཧཱུཾ་ཧཱུཾ་ཛཿཧཱུཾ་བཾ་ཧོཿ གཏོར་མ་བྱིན་གྱིས་བརླབས་ལ། ཨོཾ་མཧཱ་ཀཱ་ལ་ཏྲཀྴད་མཧཱ་ཀཱ་ལ་ཨི་དཾ་བཱ་ལིཾ་གྲྀཧྞ་གྲྀཧྞ་ཁ་ཁ་ཁཱ་ཧི་ཁཱ་ཧི། བྷུཉྫ་ཧོ་རཀྟ་པི་པ་ཏོ། ས་མ་ཡེ་ཧཱུཾ་ཁ་རཾ་ཁཱ་ཧི། ཞེས་ལན་གསུམ་གྱིས་གཏོར་མ་འབུལ། བཟླས་པའི་དམིགས་པ་གསལ་བཏབ་ལ། ཨོཾ་མཧཱ་ཀཱ་ལ་ཏྲཀྴད་མཧཱ་ཀཱ་ལ་དྲག་པོ་སིདྡྷི་ཏྲི་ཡཾ་དུ་ཛ་ཛཿ བོད་པའོ། །ནག་པོ་ཧེ་ཧེ་ཛ་ཛ་ཕཊ། རྦད་པའོ། །སྙིང་ཁ་རགཙིཏྟ་རྦད་བྷྱོཿཧཱུཾ་ཧཱུཾ་ཕཊ་དྷ་ཕཊ། བསད་པ་སྟེ་གསུམ་ཆར་གཅིག་ཏུ་གྲིལ་ནས་བཟློག །རྗེས་སྤྱི་དང་འདྲ་ལ། སློབ་མའི་བྱ་བ་ནི། གསོལ་བཏབ་དང༌། ཡན་ལག་བདུན་པ་ཏྲཀྴད་གཉོས་ལུགས་ཀྱི་སྐབས་བཞིན་ནས་སྐུའི་རྗེས་གནང་ནི། བླ་མ་མགོན་པོར་བསྐྱེད་ནས། ཡེ་ཤེས་པ་སྤྱན་དྲངས་གཏོར་མ་མགོ་ཐོག་ཏུ་བཞག་ནས་གཏོར་དབང་བསྐུར་ཏེ། གཏོར་མའི་མགོན་པོ་འོད་དུ་ཞུ་སྟེ་ཐིམ་པས། སྐུའི་སྤྲུལ་པ་དཔག་ཏུ་མེད་པ་སྤྲུལ། དགྲ་བགེགས་རྣམས་ཚར་བཅད་པར་བསམ་སྟེ་བུམ་དབང༌། གསུང་གི་རྗེས་གནང་ནི། ཀ་པཱ་ལའི་བདུད་རྩི་སློབ་མ་ལ་བྱིན། འཇིག་རྟེན་ཁམས་ཀྱི་དུག་རྣམས་བསྡུས་ཏེ། ཞལ་གྱི་སྒོ་ནས་ཞུགས། སྙིང་གའི་སྔགས་འཕྲཻང་གི་མེ་འོད་དང་འདྲེས་པ། བུ་ག་དགུ་
ནས་སྤྲོས་དགྲ་བགེགས་རྣམས་ལ་ཆར་བཞིན་བབས་པར་བསམས་པ་ནི། གསང་དབང༌། ཐུགས་ཀྱི་རྗེས་གནང་ནི། སློབ་མ་མགོན་པོ་ལ་ཡུམ་གསེར་མིག་མས་འཁྱུད་པ། སློབ་དཔོན་གྱི་ཐུགས་ཀ་ནས། ཕོ་ཉ་དང་འོད་ཟེར་གྱི་ཚོགས་དཔག་ཏུ་མེད་པ་སྤྲོས། དགྲ་བགེགས་རྣམས་བཀུག་སྟེ། ཤེས་རབ་ཀྱི་མཁའ་ནང་དུ་ཆོས་འབྱུང་མཐིང་ནག་གྲུ་གསུམ་གྱི་ནང་དུ་བཞགམཚོན་ཆའི་ཆར་ཕབ་སྟེ། ལུས་སེམས་རྡུལ་དུ་བརླག་པར་བསམ། ཤེས་རབ་ཡེ་ཤེས་ཀྱི་དབང༌། དབང་བཞི་པ་ནི་དེ་ལྟར་དགྲ་བགེགས་སྒྲོལ་བྱེད། སྒྲོལ་བྱ། སྒྲོལ་ཚུལ་གང་ཡང་མ་དམིགས་པ་ལ་མཉམ་པར་འཇོག་པའོ། །དེ་ནི་ཡོན་ཏན་གྱི་རྗེས་གནང་དུ་དོན་གྱི་ཡོང་ཞིང༌། གོང་མ་གསུམ་པོ་ཉིད་དྲག་པོའི་ལས་ཀྱི་བཀའ་གཏད་ཡིན་པས། འཕྲིན་ལས་ཀྱི་རྗེས་གནང་ལོགས་པ་མི་དགོས་གསུང་ངོ༌། །དྷ་ན་སིངྐྲའི་སྒྲུབ་ཐབས་བཞིན། །གསལ་བྱེད་ཀུན༵་དུ་དག༵འ་བ་འདི། །ཡིག་སྣའི་དོན་བཞིན་སྒྲུབ་པ་ལ། །ཉེར་མཁོའི་ལག་ལེན་སྙིང༵་པོ༵་ཡིན། །ཏྲཀྴད་གསང་སྒྲུབ་ཤྭ་ནའི་ཞལ་ཅན་གྱི་སྒྲུབ་ཐབས་ཀྱི་ལེ་ཚན་ནོ།། །།སྒྲུབ་ཐབས་རིན་ཆེན་འབྱུང་གནས་ལས། ལེགས་ལྡན་མཧཱ་ཀཱ་ལའི་སྒྲུབ་ཐབས་བཤད་པའི་སྐབས་ཏེ་ཉི་ཤུ་པའོ།། །།དར་རྒྱས་འཕེལ། །