སྒྲུབ་ཐབས་རིན་ཆེན་འབྱུང་གནས་ལས། དཔལ་ལྷ་མོའི་སྒྲུབ་ཐབས་བཤད་པའི་སྐབས་ཏེ་ཉེར་གཉིས་པ།
དཔལ་ལྡན་ལྷ་མོ་དུད་གསོལ་མའི་སྒྲུབ་ཐབས།
ཨོཾ་སྭཱ་སྟི། ཡུམ་གྱུར་རྡོ་རྗེ་མཁའ་འགྲོ་མ། །མ་མོ་གཙོ་མོའི་ཚུལ་བཟུང་ནས། །རྡོ་རྗེ་འཛིན་པའི་བསྟན་པ་སྐྱོང༌། །དེ་ལ་བཏུད་ནས་སྒྲུབ་ཐབས་བཤད། །དཔལ་ལྡན་དུད་གསོལ་མར་གྲགས་པ་འདོད་ཁམས་དབང་ཕྱུག་མའི་སྒྲུབ་ཐབས་བཤད་པར་བྱའོ། །དེ་ལ་སྟེགས་བུ་གྲུ་བཞི་ལ་འབྲུབ་ཁུང་གྲུ་
གསུམ། དེའི་དབུས་ཀྱི་ཐོད་པའི་ཟླུམ་སྐོར་ནང་ཟུར་གསུམ་དུ་རྡོ་རྗེ་ཕྱེད་པ་གསུམ་གྱིས་མཚན་པ། དབུས་སུ་ནས་ནག་གི་ཚོམ་བུ་བཀོད། མདུན་དུ་མཉྫི་ལ། ར་ནག་དང་བྱ་ནག་གི་ཤ་གཙོ་བོར་གྱུར་པའི་ཤ་ཁྲག་སྣ་ཚོགས་པས་སྦགས་པའི་གཏོར་མ་ཆེ་བ་ཞིག་བཤམ། མཆོད་པ་སྣ་ཚོགས་པས་མཐའ་བསྐོར། བདག་བསྐྱེད་བརྒྱུད་པ་འདི་ཉིད་དང་མཚུངས་པའི་དགེས་རྡོར་མ་ཡ་གདན་བཞི་ལ་སོགས་པའམ། ཁྲོ་བོ་གང་ཡང་རུང་བའི་མངོན་རྟོགས་སྔོན་དུ་འགྲོ་བས་མཆོད་པ་བྱིན་གྱིས་བརླབས། མདུན་དུ་སྐད་ཅིག་གིས་ལྷ་མོ་དུད་གསོལ་མ་བཞུགས་པའི་སྙིང་གར། ཨོཾ་དཀར་པོ་ལ་གནས་པའི་ར་ཡིག་དམར་པོ། ར་ལས་མེ་འོད་འཕྲོ་བ། སྐུ་ལུས་སྐད་ཅིག་གིས་བསྲེག །ཨོཾ་དེའི་སྟེང་དུ་བཾ་ཡོངས་སུ་གྱུར་པ་ལས་བུམ་པ་དཀར་པོ་བདུད་རྩིས་གང་བ། དེ་ལས་བདུད་རྩི་ལུད་དེ། ཨོཾ་བཀྲུས་པས་འོད་ཟེར་དཀར་པོ་རབ་ཏུ་འབར་བར་གྱུར། ཨོཾ་ཨཾ་མཧཱ་ཀ་ལི། དི་ཝཱི་ཀ་ར་ལི། བི་ཀྲནྟ་ཙཎྜ་རུ་པི་ཎི་ཧཱུཾ་ཕཊ། དེ་ཉིད་སྐད་ཅིག་གིས་དཔལ་ལྡན་ལྷ་མོའི་སྐུར་གྱུར་པ་ནི། སྐུ་མདོག་ནག་མོ། ཀེང་རུས་ལྟར་སྐེམ་པའི་ལུས་ཅན། ཞལ་གཅིག་ཕྱག་བཞི་ཞབས་གཉིས་པ། གཡས་ཀྱི་དང་པོ་ན་རལ་གྲི། གཉིས་པ་ན་པཉྫ་དམར་ཆེན་གྱིས་བསྐྱིལ་བ། གཡོན་གྱི་དང་པོ་ན་ཤཀྟི། གཉིས་པ་ཏྲི་ཤུ་ལ་དར་དཔྱངས་ཅན་འཛིན་པ། མི་རོ་རེངས་པ་ཁར་བཅུག་
ནས་མཆེ་བ་གཙིགས་པ། སྤྱན་གསུམ་དམར་བ། དབུ་སྐྲ་རལ་པ་དམར་སེར་གྱེན་བརྫེས་ལན་བུ་གཡོན་དུ་འཁྱིལ་བ། སྦྲུལ་དང་ཐོད་འཕྲེང་གིས་བརྒྱན་པ། སྙན་གཡས་ན་དྲིལ་བུའི་མགུལ་རྒྱན་ཅན་གྱི་སྦྲུལ་དང༌། གཡོན་ན་སེང་གེས་བརྒྱན་པ། མེ་ཏོག་དང་དར་ནག་གི་ཅོད་པན་ཅན། ལྷ་མ་ཡིན་གྱི་མགོ་བོའི་དོ་ཤལ་བྱས་པ། གླང་པོ་ཆེའི་ཀོ་བས་སྟོད་གཡོགས་ཤིང༌། བ་གླང་གི་པགས་པ་རེ་ལྡེ་སེར་པོའི་ཤམ་བུ་ཅན་གྱིས་སྨད་དཀྲིས་པ་ལ། ཀླུའི་རྒྱལ་པོ་བཤིགས་པས་སྐེ་རགས་བྱས་པ། ལྕགས་སྒྲོག་གིས་བརྒྱན་པའི་ཞབས་གཉིས་བོང་བུ་གྭ་པའི་སྟེང་ན་བཙན་བསྐྱིལ་གྱིས་བཞུགས་པ། དུར་ཁྲོད་ཀྱི་དབུས་ན་སྒྲ་དྲག་པོ་སྒྲོག་ཅིང༌། མ་མོ་མཁའ་འགྲོ་ཤ་ཟ་འབུམ་སྡེས་བསྐོར་བ། དེའི་ཐུགས་ཀར་ཐུགས་ཀྱི་ཡེ་ཤེས་མར་མེ་ལྟར་འབར་བ་སྒོ་ངའི་དབྱིབས་ཅན་སོར་བཞི་པ། དེའི་དབུས་སུ་ཧཱུཾ། མཐའ་སྐོར་དུ་ཨོཾ་ཧཱུཾ་ཤྲཱི་ཡ། དེ་ཝཱི་ཀ་ལི་མཧཱ་ཀ་ལི་ཧཱུཾ་བྷྱོཿ ཞེས་པས་བསྐོར་བར་གྱུར། ཐུགས་ཀའི་ཧཱུཾ་ལས་ཧཱུཾ་གཅིག་ཆད་དེ་བྷ་གར་ཐིམ། བཛྲ་ལཱ་སྱ་རཱ་ག་ཡ་མི། རང་གི་སྙིང་ག་ནས་འོད་ཟེར་འཕྲོས་པས། རང་བཞིན་གྱིས་གྲུབ་པའི་ལྷ་མོ་དཔལ་ནག་མོ་འབུམ་སྡེ་དང་བཅས་པ་ཨོཾ་བཛྲ་ས་མཱ་ཛཿ ཞེས་སྤྱན་དྲངས། ཨོཾ་ཤྲཱི་ཡ་དེ་ཝཱི་ཀ་ལི་ཀ་ལི་
མཧཱ་ཀ་ལི་ཧཱུཾ་བྷྱོཿ དྲྀ་ཤྱ་ཛཿཧཱུཾ་བཾ་ཧོཿ ས་མ་ཡ་སྟྭཾ། ས་མ་ཧོ། ཞེས་པས་གཉིས་སུ་མེད་པར་ཐིམ། འཁོར་ནག་མོ་འབུམ་སྡེ་ཐམས་ཅད་ཀྱང་གཅེར་བུ་རལ་པ་ཅན། གཡས་མི་སྙིང་དང༌། གཡོན་བནྡྷ་སྐྲ་ཅན་ཐོགས་པའོ། །ཐམས་ཅད་ཀྱི་ཐུགས་ཀར་ཡང་བྷྱོཿཡིག་གིས་མཚན་པ། དུད་པའི་གསོལ་བ་མ་ཁྱོད་ཀྱི་སྐུ་མྱུར་དུ་སྟོན་ཅིགསྐུ་མི་སྟོན་ན་ཡང་ཡིད་ལ་གང་འདོད་པ་དེ་གྲུབ་པར་གྱིས་ཤིགནང་མཆོད་གཏོར་ལ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ཨོཾ་ཧ་ན་ཧ་ན་བཛྲ་ས་མ་ཡ་མ་ཏི་ཀྲ་མ་ནཾ་ཧཱུཾ་ཕཊ། ཅེས་དམ་ལ་བཞགཨོཾ་ཧཱུཾ་ཤྲི་ཡ་སོགས་སྙིང་པོའི་མཐར། བཛྲ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ་ཕཊ། དེ་བཞིན་དུ། དྷུ་པེ། གནྡྷེ། ནཻ་ཝེ་ཏེ། ཨཱ་ལོ་ཀེ། ཞེས་སྦྱར། གཏོར་མའི་ནང་དུ་ཧ་སེར་པོ་ཧོ་དཀར་པོ་ཧྲཱིཿསྔོན་པོ་དེ་རྣམས་ཀྱི་འོད་ཀྱིས་ཁ་དོག་དྲི་རོ་ངན་པ་བཅོམ་སྟེ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཧ་ཧོ་ཧྲིཿསྭཱཧཱ། ལན་གསུམ་བརྗོད། ཨོཾ་ཧཱུཾ་སོགས་ཀྱིས་མཐར། ཨོཾ་མཧཱ་མཾ་ས་ཁཱ་ཧི། མཧཱ་གོ་རོ་ཙ་ན་ཁཱ་ཧི། མཧཱ་བ་སུ་ཏ་ཁཱ་ཧི། ཨི་དཾ་བཱ་ལིཾ་གྲྀཧྞ་གྲྀཧྞ་པཱ་ཡ་ཧཱུཾ་ཕཊ་སྭཱཧཱ། ཞེས་ལན་བདུན་གྱིས་ཕུལ་བས་འཁོར་དང་བཅས་པས་
གསོལ་བར་བསམ། བར་འདིར་བསྟོད་པ་ཏིལ་མར་མེ་དང༌། གཞན་ཡང་བསྟོད་པའི་བྱེ་བྲག་ཅི་ཤེས་ཀྱིས་བསྟོད་པ་ཡིན་ལ། བསྡུ་ན། དཔལ་ལྡན་ལྷ་མོ་མི་ཕམ་སྲིད་གསུམ་བདག །རང་དོན་སྒྲུབ་ཕྱིར་རྣམ་ཐར་ལ་གཞོལ་ཡང༌། །སྙིང་རྗེའི་དབང་གིས་རྗེས་ལ་ཐོབ་པ་ཡི། །ཤེས་རབ་སྣ་ཚོགས་དག་གིས་འགྲོ་དོན་མཛད། །ལྷོ་ཕྱོགས་གཤིན་རྗེའི་ཕོ་བྲང་རྟག་ཏུ་གནས། ཁམས་གསུམ་སྐད་ཅིག་ཙམ་གྱིས་སྐོར་བར་བྱེད། །གཞན་ལ་དབང་བསྒྱུར་འདོད་ཁམས་ཡ་མཐར་ཕྱིན། །དབང་ཕྱུག་ཆེན་པོའི་སྐུ་ལ་དགྱེས་འཁྲིལ་མ། །ལྷ་དབང་བརྒྱ་བྱིན་ལྷ་མིན་དབང་པོ་དང༌། །ཚངས་པའི་རྒྱལ་པོ་ས་འོག་དབང་པོ་དང༌། །རྒྱལ་ཆེན་བཞི་ལ་སོགས་པས་ཕྱག་བྱས་མ། །བདུད་དང་གཤིན་རྗེའི་རྒྱལ་པོ་འདར་ཞིང་འདུད། །མཚན་མོ་ནག་མོ་ཤིན་དུ་གཏུམ་པའི་གཟུགས། །མ་མོ་སྲིན་མོའི་ཚོགས་རྣམས་འདར་ཞིང་དངངས ། །ཕྱོགས་བཅུའི་དུག་བསྡུས་ཉི་མ་ཚིམས་པར་མཛད། །ནད་རྣམས་སློང་བྱེད་ནད་བདག་དམ་ལ་འདུ། །བདུད་རྩིའི་བདུད་བསྡུས་ཟླ་བར་ཐིམ་མཛད་མ། །ནད་ཡམས་གཅོད་མཛད་སྨན་མོ་དམ་ལ་འདུ། །གང་ཞིག་ཁྱོད་ལ་དད་ན་མ་བས་བྱམས། །ལྷ་མོ་ཁྱོད་ལ་བདག་གིས་རྟག་ཏུ་བསྟོད། །རཀྟ་དང་ཆང་གཏོར་མ་ལ་གཏོར་ཞིང༌། ཨོཾ་རོ་རུ་རོ་རུ་བི་ཏིཥྛ། བ་ཏོ་སི། ཀ་མ་ལ་རཀྵ་སི་ཧཱུཾ་བྷྱོཿ དགྲ་
བགེགས་མ་ར་ཡ་ཧཱུཾ་ཕཊ། ཅེས་བརྗོད། སྔགས་དེ་ཉིད་དམ། ཨོཾ་ཧཱུཾ་ཤྲི་སོགས་གང་འགྲུབ་བཟླ། མཆེ་བའི་ཕྱག་རྒྱ་ཁའི་གྲྭར་བཅས་ལ། ཨོཾ་བྷྱཿབརྟ་ལི་བརྟ་ལི་ཚེ། ཁ་ཕྲུས་བཏབ་ལ། ཧཱུཾ། དུར་ཁྲོད་བདག་མོ་དངོས་གྲུབ་ཞལ། །གཏུམ་མོ་བརྩིགས་བྱེད་ཡི་དྭགས་ཁ། །དམ་ཚིག་སྲུང་མ་ཁྲག་དགའ་མོ། །ཀ་ལིའི་སྒྲ་སྒྲོགས་སྦྱོར་ཟིན་མ། །དུར་ཁྲོད་རོ་ཡི་ཚལ་དབུས་སུ། །ཚོགས་དང་ཕོ་ཉར་བཅས་པ་རུ། །གཙིགས་བྱེད་ལྷ་མོ་དུད་གསོལ་མ། །གསོལ་ཞིག་བཞེས་ཤིག་དམ་ཚིག་ལྷ། །གནས་ནས་གནས་སུ་མཛད་དུ་གསོལ། །བདག་གི་སེམས་ལ་ཅི་འདོད་པ། །དེ་ནི་ཁྱོད་ཀྱིས་གྲུབ་པར་གྱིས། །བདག་གིས་ལས་ནི་ཅི་བྱེད་ཀྱང༌། །དེ་ལ་ཀུན་གྱི་གྲོགས་གྱིས་ཤིག །གྲྀཧྞ་གྲྀཧྞ་སརྦ་དུཥྟཾ་བྷཀྵ་བྷཀྵ། ཕྲེཾ་ཕྲུཾ་ཕྲིཾ་ཕྲོཾ་ཕཊ་སྭཱཧཱ། ཞེས་བརྗོད་ལ་སེ་གོལ་གདབ། འཕྲིན་ལས་བཅོལ། འདོད་དོན་གསོལ་བཏབ་གང་འོས་བྱ། དེ་ལྟར་བགྱིའོ། །ཞེས་ཞལ་གྱིས་བཞེས་པར་བསམ། གཏོར་མ་གཙང་སར་བཏང༌། དགེ་བ་བསྔོ། འདིའི་རྗེས་གནང་བྱ་བར་འདོད་ན། མཎྜལ་གྲུ་གསུམ་གྱི་སྟེང་དུ། རྟེན་གཏོར་བཅས་ལ། མཐའ་མཆོད་གཏོར་གྱིས་བསྐོར། བདག་བསྐྱེད་མདུན་བསྐྱེད་གོང་དུ་བཤད་པ་ལྟར་བྱས་ལ། སློབ་མ་རྣམས་ཀྱིས། དཔལ་ལྡན་མགོན་པོ་བརྩེ་བ་ཅན། །ཡེ་ཤེས་ལྷ་མོ་འཁོར་བཅས་ཀྱི། །སྐུ་གསུང་ཐུགས་
དང་འཕྲིན་ལས་ཀྱི། །རྗེས་སུ་གནང་བ་སྩལ་དུ་གསོལ། །ཞེས་ལན་གསུམ་གསོལ་བ་བཏབ། གུར་ནས་འབྱུང་བའི་རྒྱུན་བཤགས་སམ་ཡན་ལག་ལྔ་པ་བྱ། གཏོར་མ་ལྷ་མོར་བསྐྱེད། མདུན་བསྐྱེད་དང་སངས་རྒྱས་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀ་ནས་འོད་ཟེར་སྤྱན་དྲངས་ཏེ་བསྟིམ་པས། སྡིག་སྒྲིབ་སྦྱངས། ཡང་ལྷ་མོའི་སྐུ་དཔག་ཏུ་མེད་པ་སྤྱན་དྲངས་ཏེ། རོལ་མོའི་སྒྲ་བྱ། སྤོས་བདུགསྙིང་པོའི་མཐར། ཨ་བེ་ཤཱ་ཡ། ཨ་བེ་ཤཱ་ཡ། ར་ར། ར་ར། ཙཱ་ལ་ཡ། ཙཱ་ལ་ཡ། ཧཱུཾ་ཨ་ཧ་ཛྷོཿ ཞེས་ལན་བརྒྱ་རྩ་བརྒྱད་བརྗོད། སློབ་མ་ལྷ་མོའི་སྐུར་བསྒོམ་དུ་གཞུགདཔྲལ་བར་དྲི་བཟང་གིས་ཐིག་ལེ་བྱས་ལ། སྙིང་པོའི་མཐར། ཨོཾ་ཀཱ་ཡ་བཛྲ་ཨ་བྷི་ཥིཉྩ་མཾ། ཏིཥྛ་བཛྲ་ཧཱུཾ། ཞེས་བརྗོད་དེ་བརྟན་པར་བྱ། སྐུའི་རྗེས་གནང་ངོ༌། །བཟླས་ལུང་སྤྱི་དང་མཐུན་པར་སྦྱིན་ལ། མགྲིན་པར་ཐིག་ལེ་བྱས་ལ། ཝཱཀ་བཛྲ་ཞེས་བརྗོད། གསུང་གི་རྗེས་གནང་ངོ༌། །ཕྱག་མཚན་སྙིང་གར་བསྟིམ་སྟེ། རོལ་མོའི་སྒྲ་བྱ། སྙིང་གར་ཐིག་ལེ་བྱས་ལ། ཙིཏྟ་བཛྲ་སོགས། ཐུགས་ཀྱི་རྗེས་གནང་ངོ༌། ཧཱུཾ་ལས་བྱུང་བའི་རལ་གྲི་ལ་སོགས་པའི་ཕྱག་མཚན་རབ་ཏུ་འབར་བར་གྱུར། སངས་རྒྱས་རྣམས་ཀྱི་ཐུགས་ཀ་ནས། ཡེ་ཤེས་པ་ཕྱག་མཚན་གྱི་རྣམ་པར་སྤྱན་དྲངས་ཏེ་བསྟིམ། རལ་གྲི་སློབ་མའི་ལག་ཏུ་གཏད་ལ། དེང་ནས་བྱང་ཆུབ་སྙིང་པོའི་བར། །གདུག་པ་ཅན་ཀུན་ཚར་གཅོད་དང༌། །སངས་
རྒྱས་བསྟན་པ་རྒྱས་པ་ཡི། །འཕྲིན་ལས་རབ་འབྱམས་སྤྱོད་པར་གྱིས། །ཨོཾ་བཛྲ་ཁངྒ་ཨ་བྷི་ཥིཉྩ་ཧཱུཾ། ཐོད་པ་གཏད་ལ། གདུག་པ་ཅན་ཀུན་ཚར་གཅོད་དང༌། ཞེས་པའི་ཚབ་ཏུ། སྐལ་ལྡན་རྗེས་སུ་འཛིན་པ་དང༌། །ཞེས་པ་དང༌། ཁངྒའི་ཚབ་ཏུ། བཛྲ་ཀ་པཱ་ལ་ཞེས་འདོན་པ་སྤོ། ཤཀྟི་གཏད་ལ། ནད་དང་བར་ཆད་ཞི་བ་དང༌། །བཛྲ་ཤཀྟི། རྩེ་གསུམ་གཏད་ལ། འགྲོ་བ་དབང་དུ་སྡུད་པ་དང༌། །བཛྲ་ཏྲི་ཤུ་ལ། ཞེས་འདོན་པ་སྤོ། ལྟེ་བར་ཐིག་ལེ་བྱས་ལ། ཀརྨ་བཛྲ་སོགས། སློབ་མའི་སྙིང་གར་ཡི་དམ། དེའི་ཐུགས་ཀར་བྷྱོཿཡིག་གི་སྟེང་དུ་ཧཱུཾ་གི་མཐའ་སྐོར་དུ། ཡི་དམ་གྱིས་བསྐོར་བ། སྔགས་ཀྱི་འོད་ཟེར་གྱི་དྲ་བ་དམ་པོས་བྷྱོཿཡིག་བཅིངས་པར་བསམ། དེ་ནས་གཏོར་མའི་བཀའ་བསྒོ་སྤྱི་དང་འདྲ་བ་ལས། མཐར་གཏོར་མ་ལ། ནང་མཆོད་རྡོ་རྗེའི་རྩེ་མོས་གཏོར་ལ། འདི་ནི་ཁྱོད་ཀྱི་དམྱལ་བའི་ནས། ཀྲ་མ་ཧཱུཾ། ལྷ་མོ་དམ་ལ་གནས་པར་བསམ། གཏོར་མ་དང་ནང་མཆོད་ནས་ཅུང་ཟད་གཅིག་སློབ་མ་ལ་སྦྱིན་ལ། ཨོཾ་རོ་རུ་རོ་རུ་སོགས་བརྗོད་དེ། དམ་ཚིག་བསྲེ་བའོ། །མཆོད་གཏོར་ལ་བརྩོན་པ་སོགས་དམ་ཚིག་ལ་གནས་པར་གདམས། སློབ་མ་དང༌། དཀྱིལ་འཁོར་གྱི་རྗེས་ཆོག་པ་རྣམས་སྤྱི་དང་འདྲའོ། །མ་མོ་ཀུན༵་གྱི་གཙོར་གྱུར་པ། །དག༵འ་ཆེན་ལྷན་ཅིག་སྐྱེས་པའི་དངོས། །བསྟན་སྲུང་བརྒྱ་དང་རྩ་བརྒྱད་ཀྱིས། །སྙིང༵་པོ༵་ཡིན་ཞེས་མར་པས་མངགས། །དཔལ་ལྡན་ལྷ་མོ་དུད་གསོལ་མའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
དཔལ་ལྡན་དམག་ཟོར་རྒྱལ་མོའི་སྒྲུབ་ཐབས།
ཨོཾ་སྭཱ་སྟི། དཔལ་ལྡན་གཤིན་རྗེ་གཤེད་པོ་ལ། །བཏུད་ནས་བཀའ་གཉན་བསྲུང་བའི་མཆོག །དམག་ཟོར་རྒྱལ་མོའི་སྒྲུབ་ཐབས་ནི། །མདོ་ཙམ་ཤིན་ཏུ་གསལ་པོར་བྲི། །སྨན་རཀ་གཏོར་གསུམ། གཡབ་དར། ཐོད་རྔ། ཚིལ་ཆེན། གུ་གུལ་རང་བྱུང༌། ཅོང་ཞི་བསྲེས་པའི་སྤོས་རྣམས་འཛོམས་པར་བྱ། གཏོར་མ་ཡི་དམ་གང་བྱེད་ལྟར་བྱིན་གྱིས་བརླབས། བསྡུ་ན་བསངས་སྦྱངས། འབྲུ་གསུམ་གྱིས་ཀྱང་ཆོགབྷྱོཿ བདུན་མ་ལན་གསུམ་བརྗོད། སྭ་བྷཱ་ཝས་སྦྱངས། སྟོང་པའི་ངང་ལས་ཡཾ་ལས་རླུང་འཚུབ་མའི་གུར་སྔོན་དང༌། རཾ་ལས་མེ་རླུང་འཚུབ་མའི་དབུས་སུ་པཾ་ལས་ཁྲག་ཞག་འཁྲུགས་པའི་རྒྱ་མཚོ། བྷྲུཾ་ལས་བསེ་མཁར་སྨུག་པོ་མཚན་ཉིད་ཐམས་ཅད་ཡོངས་སུ་རྫོགས་པ། ཕྱི་རོལ་དུར་ཁྲོད་ཆེན་པོའི་བསྐོར་བའི་དབུས་སུ། ཀྵ་ཡིག་ནག་པོ་ལས། དཔལ་ལྡན་དམག་ཟོར་རྒྱལ་མོ་དྲེའུ་རྟ་ལ་ཆིབས་པ། སྐུ་མདོག་སྔོ་ནག་ཞལ་གཅིག་ཕྱག་གཉིས་པ། ཕྱག་གཡས་པ་རྡོ་རྗེས་མཚན་པའི་ཙནྡན་གྱི་བེང་ཆེན་འཕྱར་སྟབས་སུ་འཛིན་པ། གཡོན་ན་ལ་ཐོད་ཐུན་ཁྲག་གིས་གང་བ་ཐུགས་ཀར་བསྣམས་པ། དར་ནག་གི་ལྷབ་ལྷུབ་དང༌། ཞིང་ཆེན་གྱི་གཡང་གཞི་དང༌། རེ་ལྡེའི་ཤམ་བུ་ཅན། ཐོད་སྐམ་གྱི་དབུ་རྒྱན། ཐོད་རློན་གྱི་དོ་ཤལ། སྦྲུལ་གྱི་སྐེ་རགས། ཐལ་
ཆེན་གྱི་ཚོམ་བུ་སོགས་དུར་ཁྲོད་ཀྱི་ཆས་རྫོགས་པ། སྤྱན་གསུམ་མཆེ་གཙིགས་དབུ་སྐྲ་གྱེན་དུ་བརྫཻས་པ། ཁྲམ་ཤིང་སྐེད་ལ་གཟེར་ཞིང༌། སྒའི་སྔ་ཤ་ལ་ནད་རྐྱལ་དང་ཤོ་རྡེའུ་བཅས་པ། ཕྱི་ཤ་ལ་མཚོན་གྱི་གྲུ་གུ་དང་བྱང་དམར་ཁྲས་པོ་ཅན། དུས་བཞིའི་རྒྱལ་མོས་དབུ་ལ་བརྒྱན་པ། དབུའི་སྟེང་དུ་རྨ་བྱའི་གདུགས་དང་བཅས་པ། བདུད་ཕྲུག་དཔག་ཏུ་མེད་པས་བསྐོར་བ། བྱ་ནག་ཁྱི་ནག་ལུག་ནག་རྗེས་སུ་འབྲང་བ། དེའི་མིག་ཏུ་ཀྵིཾ། རྣ་བར་ཛྲིཾ། སྣ་ལ་ཁཾ། ལྕེ་ལ་གཾ དཔྲལ་བར་སྐཾ། ལྟེ་བར་སཾ། ཐུགས་ཀར་ཧཱུཾ། མགྲིན་པར་ཨཱཿ སྤྱི་བོར་ཨོཾ། ཨོཾ་སརྦ་ཏ་ཐཱ་ག་ཏ་ཙིཏྟ་ཝཱཀ་ཀཱ་ཡ་བཛྲ་སྭ་བྷཱ་ཝ་ཨཏྨ་ཀོ྅ཧཾ། རང་དང་མདུན་བསྐྱེད་གཉིས་ཀའི་ཐུགས་ཀ་ནས་འོད་ཟེར་འཕྲོས། བྱང་ཤར་མུ་ལེ་སྡིངས་ནས། ལྷ་མོ་འཁོར་དང་བཅས་པ་བཛྲ་ས་མཱ་ཛཿ བྷྱོཿ རླུང་ནག་འཚུབ་མའི་དཀྱིལ་འཁོར་ནས། །འདོད་ཆགས་ཁྲག་གི་རྒྱ་མཚོ་ནས། །ཞེ་སྡང་མེ་དཔུང་གཞལ་ཡས་ནས། །དཔལ་ལྡན་ལྷ་མོ་གཤེགས་སུ་གསོལ། །འཕྲིན་ལས་ཀུན་གྱི་བདག་མོ་སྟེ། །དཔལ་ལྡན་དམག་ཟོར་རེ་མ་ཏཱི། །ནག་མོ་འབུམ་སྡེའི་འཁོར་དང་བཅས། །འགྲོ་བ་འདུལ་ཕྱིར་གཤེགས་སུ་གསོལ། །ཨེ་ཨ་རལླི་ཧྲིཾ་ཧྲིཾ་ཛཿ བྷྱོཿ ནག་མོ་གདུག་ཅན་དྲེགས་
པ་ཅན། །ཀུན་དུ་ཁྱབ་པའི་གཟུགས་སྟོན་མ། །ནག་མོ་གཙོ་མོ་དྲེའུ་རྟ་ཆིབས། །འདིར་བྱོན་དྲེའུ་རྟའི་གདན་ལ་བཞུགས། །ཛཿཧཱུཾ་བཾ་ཧོཿ ས་མ་ཡ་སྟྭཾ། ཏིཥྛ་དྲྀ་ཤྱ་ཧོ། ཞེས་དམ་ཡེ་བསྲེ། བྷྱོཿ ཟ་བྱེད་ནག་མོ་མཆེ་བ་ཅན། །རྒོད་བྱེད་ཧ་ཧ་ནག་མོ་ཁྱོད། །གསོད་ལ་དགའ་བར་བྱེད་པ་མོ། །བདག་གི་བརྡའི་ཕྱག་འབུལ་ལོ། །ཨ་ཏི་པུ་ཧོ། པྲ་ཏི་ཛ་ཧོ། སྙིང་གའི་ཧཱུཾ་གི་འོད་ཀྱིས་དབང་ལྷ་སྤྱན་དྲངས། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ། ཞེས་གསོལ་བ་བཏབ། ཨོཾ་བཛྲ་ཨ་བྷི་ཥིཉྩ་ཧཱུཾ། ཞེས་དབང་བསྐུར། དབང་རྟགས་གཤིན་རྗེ་གཤེད་ཀྱིས་དབུ་བརྒྱན། སྨན་གྱིས་མཆོད་པ་ནི། ཕྲ་མོ་སྦོམ་པོ་ལས་བྱུང་བ། །བདུད་རྩིས་བྲན་པའི་ཛ་གད་འདི། །དམག་ཟོར་ནག་མོ་ལ་འབུལ་གྱིས། །བསྟན་པ་བསྲུང་ཕྱིར་བཞེས་སུ་གསོལ། །མཧཱ་པཉྩ་ཨ་མྲྀ་ཏ་ཁ་ཁ་ཁཱ་ཧི་ཁཱ་ཧི། རཀྟ་སྦྲེང་ཞིང༌། ཆུ་དང་མ་འདྲེས་དྭངས་མའི་ཁྲག །དྭངས་མ་ཡི་ནི་ཁྲག་ཆེན་པོ། །དམག་ཟོར་ནག་མོ་སོགས་གོང་བཞིན། མཧཱ་རཀྟ་ཁ་ཁ་ཁཱ་ཧི་ཁཱ་ཧི། རང་གཤིན་རྗེ་གཤེད་དང་ལྷ་མོ་ཡབ་ཡུམ་སྙོམས་པར་ཞུགས་པའི་སྦྱོར་མཚམས་ནས། ཐིག་ལེ་དཀར་དམར་བླངས་ནས། བདག་མདུན་གྱི་ལྗགས་ལ་བཞགས་པར་མོས་ལ་བདུད་རྩི་མྱངས་ཤིང་གཏོར། དམ་ཚིག་བསྲེ་བའོ། །གཏོར་མ་འབུལ་
བ་ནི། ཤ་ཁྲག་བདུད་རྩི་ལྔ་དང་སྦྱར། །འབྲུ་ལྔ་སྦྱར་བའི་གཏོར་མ་འདི། །དམར་ཟོར་སོགས་གོང་བཞིན། བྷྱོཿབདུན་མ་ལ། མཧཱ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། བཏགས་པ་ལན་བདུན། ཡང་རཀྟ་སྦྲེང་ལ། ཤ་ཆེན་ཚོགས་ནི་རི་ལྟར་སྤུངས། །རཀྟའི་ཚོགས་ནི་མཚོ་ལྟར་འཁྱིལ། །དམ་རྫས་བདུད་རྩི་འདི་བཞེས་ལ། །དམ་ཚིག་ཉམས་པའི་དགྲ་བགེགས་དང༌། །གནོད་བྱེད་འབྱུང་པོའི་ཚོགས་རྣམས་ཆོམས། །བདུད་ཀྱི་དམག་ཚོགས་དགྲ་ལ་དྲོངས། །དམག་དཔོན་རྒྱལ་མོ་དམག་སྣ་དྲོངས། །དམག་དཔུང་བསྐྱེད་ལ་རུ་མཚོན་ཕྱོར། །སརྦ་བིགྷྣཱན་ཤ་ཏྲུཾ་མ་ར་ཡ། ཨི་དཾ་བཱ་ལིཾ་ཁ་ཁ་ཁཱ་ཧི་ཁཱ་ཧི། སྒྲུབ་པའི་སྐབས་ཡིན་ན་བར་འདིར་བཤགས་པ་བྱ། དེ་ནས་བཟླས་པའི་དམིགས་པ་གསལ་བཏབ་ལ། བྷྱོ་རཀ་མོ་བྷྱོཿ རཀ་མོ་བྷྱོ་བྷྱོཿ རཀ་མོ་ཐུན་བྷྱོཿ ཁ་ལ་རཀ་ཆེན་མོ། རཀ་མོ་ཨ་བྱ་ཏ་བྱ་ཐུན་བྷྱོཿ རུ་ལུ་རུ་ལུ་ཧཱུཾ་བྷྱོཿཧཱུཾ། ཞེས་ཅི་འགྲུབ་ཏུ་བཟླ། མཐར་ཨརྒྷཾ་ནས་ཤཔྟའི་བར་གྱིས་མཆོད། དེ་ནས་བསྟོད་པ་ནི། བྷྱོཿ དཔལ་ལྡན་གཟུགས་མ་འདོད་ཁམས་གཙོ་མོ་ཁྱོད། །དྲེའུ་རྟ་ཞོན་ནས་དཔག་ཚད་ལྔ་བརྒྱར་རྒྱུག །བེ་ཅོན་ཐོད་པ་དམ་པ་རང་རྟགས་འཛིན། །རེ་ལྡེས་སྟོད་གཡོགས་སྦྲུལ་གྱི་ཤམ་བུ་ཅན། །ལྟེ་བར་ཉི་ཤར་གཙུག་ན་ཟླ་རྒྱས་མ། ཁྲག་ནད་བདག་
མོ་དབྱིངས་ཕྱུག་དཔལ་འབར་མ། །ལྷ་མོ་རེ་མ་ཏཱི་ལ་བསྟོད་པར་བགྱི། །རྣལ་འབྱོར་བཅོལ་བའི་འཕྲིན་ལས་འགྲུབ་པར་མཛོད། །འདོད་དོན་གསོལ་བཏབ་ནི། བདག་ཅག་དུས་འདིར་ཚེ་རིང་ཞིང༌། །བུ་དང་ཚ་བོ་རྒྱས་པ་དང༌། །འཁོར་དང་ལོངས་སྤྱོད་འཕེལ་བར་མཛོད། །ལོག་པར་ལྟ་བའི་དགྲ་དང་བགེགས། །བདུད་དང་བར་ཆད་རྣམས་མང་པོ། །ཐམས་ཅད་གཏན་ནས་བརླག་པར་མཛོད། །སངས་རྒྱས་བསྟན་པ་བསྲུང་བ་དང༌། །ཆོས་འཁོར་གཉན་པོ་ད་སྐྱོངས་ཤིག །ཅེས་བརྗོད། ཡིག་བརྒྱ། བཟོད་གསོལ། གཤེགས་གསོལ། སྨོན་ལམ་བཀྲ་ཤིས་སོགས་སྤྱི་དང་འདྲའོ། །འདིའི་རྗེས་གནང་བྱེད་པར་འདོད་པས། མཎྜལ་ཟླུམ་སྐོར་དམར་པོ་མེ་རི་དང་བཅས་པ་ལ། ཆོས་འབྱུང་ནག་པོ་ཚོམ་བུ་དང་བཅས་པ་ཞིག་བྱ། དེར་མཉྫིའི་ཁར་ཐོད་པའི་ནང་དུ་གཏོར་མ་ཤ་ཆེན་དང་གྲི་ཁྲག་གིས་བརྒྱན་པ་ལ། མདའ་དར་ནག་པོ་དང༌། ཙ་ཀ་ལི་བཙུགས། སྨན་རག་ཕུད་གསུམ་དང༌། མཆོད་པས་བསྐོར། གཤིན་རྗེ་གཤེད་ཀྱི་བདག་བསྐྱེད་གོང་དུ་བཤད་པའི་བཟླས་པ་ཡན་ཆད་སོང་མཚམས། བཤགས་པ་དང་ཚོགས་འཁོར་བྱ། དེ་ནས་སློབ་མས་མཎྜལ་ཕུལ། གང་གི་དྲིན་གྱི་སོགས་དང༌། གཙོ་བོ་ལྷ་མོར་བཅས་པ་ཡི། །སྐུ་གསུང་ཐུགས་ལ་སྐྱབས་སུ་མཆི། །དཔལ་ལྡན་ལྷ་མོའི་རྗེས་གནང་གི །དངོས་གྲུབ་དམ་པ་སྩལ་དུ་གསོལ། །ཞེས་གསོལ་བ་བཏབ། གུར་ནས་འབྱུང་བའི་རྒྱུན་བཤགས་བྱ། ཙནྡན་གྱི་བེ་ཅོན་ཡོན་དུ་ཕུལ་ཏེ།
སངས་རྒྱས་བསྟན་པ་བསྲུང་བ་དང༌། །སེམས་ཅན་ཀུན་ལ་ཕན་སླད་དུ། །མཐུ་དང་དངོས་གྲུབ་འབྱུང་བའི་རྒྱུ། །དམ་ཚིག་ཅན་དེ་བདག་ལ་སྩོལ། །ལན་གསུམ། སློབ་མ་གཤིན་རྗེ་གཤེད་ལ་ལྷ་མོས་འཁྱུད་པའི་སྐུར་སྒོམ་དུ་བཅུགསངས་རྒྱས་བྱང་སེམས་ཡི་དམ་དཔག་ཏུ་མེད་པ་བསྟིམ་སྟེ། ཧྲཱིཿཥྟཱིཿའི་མཐར་ལྷ་མོའི་དྲག་སྔགས་མང་དུ་བཟླ་ཞིང༌། སྤོས་དང་རོལ་མོས་བྱིན་དབབ། ལག་ཏུ་བེ་ཅོན་དང་ཐོད་པ་གཏད། མགོ་བོར་གཏོར་མ་བཞག་ལ། མ་མོ་མཁའ་འགྲོ་དམ་ཚིག་ཅན། །མ་བས་བྱམས་ཤིང་སྲིང་པས་བརྩེ། །གྲོགས་པས་དུངས་ཤིང་བྲན་པས་ཉན། །བཀའ་སྡོད་སྲུང་མའི་དབང་ཐོབ་ཤོག །ཧྲཱིཿཥྟཱིཿདང་བྷྱོཿབདུན་གྱི་མཐར། མ་མ་ཏྲཀ་རཀྵ་སི་ས་མ་ཡ། ཞེས་བརྗོད། ཕུན་གསུམ་ཚོགས་པ་སོགས་བཀྲ་ཤིས་བརྗོད་པས། ལུས་དང་གྲིབ་མ་བཞིན་དུ་འགྲོགས་པ་ཡིན། གཏོར་མ་མགྲིན་པར་བཞག་ལ། དམ་རྫས་གཏོར་མའི་དབང་བསྐུར་བས། །ངག་གི་འཕྲིན་ལས་ལྷུན་གྲུབ་ནས། །དམ་ཅན་འདུ་ཞིང་འཁོལ་བ་དང༌། །དགྲ་བགེགས་སྒྲོལ་བའི་དབང་ཐོབ་ཤོག །ཐོད་པ་ནས་བདུད་རྩི་བླུད། སྔགས་ཀྱི་མཐར། ཨ་བྷི་ཥིཉྩ་ཧཱུཾ། དེ་ཡིས་ཉེ་བར་བསྟན་པར་སོགས་བརྗོད། བླ་མ་དང་མདུན་བསྐྱེད་ཀྱི་ཞལ་ནས་སྔགས་འཕྲེང་དངུལ་ཆུའི་རྒྱུན་ལྟར་བྱུང༌། ཁར་ཞུགས། མགྲིན་པར་ཐིམ།
བཟླས་ལུང་བྱ། གཏོར་མ་སྙིང་གར་གཏད། ངག་གི་ཞེས་པར། ཐུགས་ཀྱི་ཞེས་འདོན་པ་བསྒྱུར། བདུད་རྩི་སྙིང་གའི་ས་བོན་ལ་ཐིམ། ཤེལ་ལྟར་དྭངས་པའི་འོད་ཀྱི་སྣང་པས་ཁེངས་པར་བསམ། སྔགས་ཀྱི་མཐར། བོ་དྷི་ཙིཏྟ་མཧཱ་སུ་ཁ་ཛྙཱ་ན་དྷ་ཏུ་ཧཱུཾ། དགེ་འདུན་དམ་པ་སོགས། དེ་ནས་གཏོར་མ་ལག་ཏུ་གཏད་ནས། བཀའ་སྡོད་ཀྱི་ཚུལ་གྱིས་བཀའ་བསྒོ་བྱ། སངས་རྒྱས་བསྟན་པ་ཡུན་དུ་གནས་བྱའི་ཕྱིར། །སྔོན་ཚེ་ཇི་ལྟར་ཁས་བླངས་དམ་བཅའ་བཞིན། །ཞི་དང་རྒྱས་དང་དབང་དང་མངོན་སྤྱོད་ཀྱི། །འཕྲིན་ལས་རྣམ་བཞི་ལྷུན་གྱིས་གྲུབ་པར་ཤོག །སྔགས་ལ། མ་མ་སཏྟ་ཀ་སརྦ་ཀརྨ་སིདྡྷི་ཀུ་རུ་ཧཱུཾ། ཉིན་མོ་བདེ་ལེགས་སོགས་བྱ། རྗེས་ཀྱི་བྱ་བ་སྤྱི་དང་མཐུན། འདོད་དོན་གསོལ་བཏབ་མན་ཆད་ཀྱང་འདིར་བྱའོ། །རྗེས་གནང་འདིའི་ལུགས་བཀའ་གཉན་པས། ཐུན་མོང་དུ་བྱེད་དགོས་ན། སྐུ་གསུང་ཐུགས་གཏོར་དབང་དང་བཅས་པ་སྤྱི་འགྲོའི་བྱེད་ཅིང༌། ཡང་ལག་ལེན་མཛེས་ཁྲིགས་ལ་དགའ་བའི་མིག་ངོར་མདུན་བསྐྱེད་ཀྱི་ལྷ་སྤྱན་དྲངས་ནས་སྤྱན་འདྲེན་གྱི་ཚིགས་བཅད། བཞུགས་གསོལ། བརྡའ་ཕྱགསྨན་རག་འབུལ་བ་སོགས་གོང་བཞིན་བྱེད་པ་དང༌། སྐུའི་རྗེས་གནང་གི་མཐར། ཆུ་དབང་བསྐུར་བ་སོགས་ཀྱི་ལག་ལེན་ཡང་སྣང་ངོ༌། །ཐུན་མོང་གི་སློབ་མ་ལ། ཐུན་མོང་གི་རྗེས་གནང་དང༌། ཐུན་མོང་མ་ཡིན་པ་ལ་ཡང་དེ་བཞིན་ཏེ། དེ་ལས་བཟློག་ན་ཚེ་ཐུང་བ་དང༌། ནད་མང་བ་དང༌། འཁོར་དང༌། ལོངས་སྤྱོད་རྣམས་ལ་གོད་ཁ་ཡོང་བའི་ཉེས་དམིགས་ཡོད་པས་
གོང་དུ་བཤད་པ་དེ་ལ་བཀའ་དོག་པར་བྱའོ། །ཤེས་རབ་གསང་བའི་སློབ་མ་ནི། ཀུན༵་གྱིས་མིང་ཡང་མ་ཤེས་པ། །བསྟན་བསྲུང་སྒྲུབ་ཐབས་དག༵འ་བའི་ཕུལ། །རྒྱ་མཚོ་ལྟ་བུའི་སྙིང༵་པོ༵་ལགས། །དཔལ་ལྡན་དམག་ཟོར་རྒྱལ་མོའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ལྷ་མོ་སྲོག་སྒྲུབ་ལྕགས་ཕུར་མར་གྲགས་པ་རང་བྱུང་རྒྱ་མཚོའི་སྒྲུབ་ཐབས།
ཨོཾ་སྭཱ་སྟི། ཡུམ་གཅིག་ཤེས་རབ་ཕ་རོལ་ཕྱིན། །སྲིན་མོ་ཆེན་མོའི་ཚུལ་བཟུང་ནས། །གདུག་པ་འདུལ་མཛད་རེ་མ་ཏཱི། །དེ་ལ་བཏུད་ནས་སྒྲུབ་ཐབས་བཤད། །རྡོ་རྗེ་རིགས་ཀྱི་ཁྲོ་བོ་ཆེན་པོའི་བསྙེན་པ་རྫོགས་པ་ཞིག་གིས་འདི་སྒྲུབ་སྟེ། ལྷ་མོའི་སྒྲུབ་ཐབས་ཀྱི་སྤྱིའི་གོ་བ་ཆགས་པ་ཞིག་གིས། མདུན་བསྐྱེད་ཁོ་ནའམ། བདག་མདུན་གཉིས་ཀར་རུང་བར་བཤད་མོད། གཙོ་བོར་སྔ་མ་ལྟར་བྱ་བ་ཡིན་པས། བྲིས་སྐུ་མཆོད་གཏོར་སོགས་ཚོགས་པར་བྱས་ལ། ཡི་དམ་གྱི་བདག་བསྐྱེད་སོང་ནས། འདི་སྐད་ཅེས། རང་གི་མདུན་དུ་འོད་ཀྱི་གུར་ཁང་སྔོན་པོ་རྒྱ་ཁྱོན་མཐའ་ཡས་པའི་ནང་དུ། མེ་རླུང་འཚུབ་མ་འཁྱིལ་བའི་དབུས། རཀྟའི་རྒྱ་མཚོའི་ནང་དུ་ཕྱི་གནམ་ལྕགས་འབར་བའི་གཞལ་ཡས་ཁང་གྲུ་བཞི་ནང་དུ་ཐོད་མཁར་གྲུ་གསུམ། རྨངས་རྡོ་རྗེ་ཕ་ལམ་ལས་གྲུབ་པ། དེའི་དབུས་སུ་རང་གི་སྙིང་ག་ནས་སྤྲོས་པའི་ཏི་ཡིག་ཡོངས་སུ་གྱུར་པ་ལས། ལྕགས་ཀྱི་དྲེའུ་རྟ་རྐང་གསུམ་རྫུ་འཕྲུལ་རླུང་གི་གཤོག་པ་ཅན། དེའི་སྒ་གོང་དུ་པདྨ་སྔོན་པོ་དང་ཉི་མ་ལ། རང་གི་ཐུགས་ཀ་ནས་སྤྲོས་པའི་མ་ཡིག་སྔོ་སྐྱ་ལས་བྱུང་བའི་རྩེ་གསུམ་མས་
མཚན་པའི་འོད་ཀྱི་འཕྲོ་འདུ་ལས་ལྷ་མོར་གྱུར། ཨོཾ་ནག་མོ་ཏིང་ལཾ་མ་མ། དུན་ཏིཾ་མ་བྷྱོཿ དཔལ་ལྡན་གཉན་གྱི་རེ་མ་ཏཱི་སྐུ་མདོག་ནག་མོ་དར་ནག་གི་གོ་ཟུ་འཇའ་ཚོན་རིས་ཅན། སྦྲུལ་ནག་གི་སྒྲོག་ཟུང་ཅན་གསོལ་བ། ཕྱག་བཞི་གཡས་ཀྱི་དང་པོ་འཕྲུལ་གྱི་མེ་ལོང༌། གཉིས་པ་ན་སྦྲུལ་ཞགས། གཡོན་དང་པོས་རྩེ་གསུམ། གཉིས་པས་ལྕགས་ཀྱི་ཕུར་བུ་སྒྲིལ་བ། དཔལ་ལྷ་མོ་རེ་མ་ཏཱིའི་རྒྱན་དང་ཆ་ལུགས་ཡོངས་སུ་རྫོགས་པ། ཡེ་ཤེས་ཀྱི་མ་མོ། ལས་ཀྱི་མ་མོ། འཇིག་རྟེན་གྱི་མ་མོ། ལྷ་མོ། ཀླུ་མོ། གནོད་སྦྱིན། དྲི་ཟ། གྲུལ་བུམ། སྲིན་མོའི་ཚོགས་བསམ་གྱིས་མི་ཁྱབ་པས་བསྐོར་བ། ཐུགས་ཀར་པད་ཟླ་ལ་མ་ཡིག་ཏིང་ངེ་འཛིན་སེམས་དཔའ་འོ། །དེ་ལས་འོད་འཕྲོས། ཡེ་ཤེས་སེམས་དཔའ་བཛྲ་ས་མཱ་ཛཿ དཔལ་ལྡན་གཉན་གྱི་རེ་མ་ཏཱི། ཁྱོད་ཀྱི་སྤྱི་བོའི་གཙུག་རུམ་ནས། །ཟླ་བ་ཉི་མའི་འོད་ཟེར་འཕྲོ། །ནག་མོ་མི་བཟད་ཆོ་འཕྲུལ་ཅན། །དུས་ལ་བབ་ཀྱི་ད་ཚུར་བྱོན། །ཨེ་ཧྱེ་ཧི་ཛ་ཨེ་ཨརལླི་ཧོ། ཞེས་པ་ཚར་གཅིག་དང༌། མ་མོ་ནག་མོ་ཏིཾ་ལ། མ་མོ་ནག་མོ་དུན་ཏིཾ་བྷྱོཿ ཛཿཧཱུཾ་བཾ་ཧོཿ ནག་མོ་དུན་བྷྱོཿ ཞེས་བརྒྱ་རྩ་བཟླས་ཤིང་སྤྱན་དྲངས། ཐོར་རུས་དམར་པོ་གཏམས་པའི་དཀྱིལ་འཁོར་ནས། །ལྷ་སྲིན་དགུ་བརྒྱ་བསྣོལ་བའི་བག་རྩེ་ལ། །རྡོ་རྗེ་རལ་
གཅིག་སྲིད་པ་ཀུན་གྱི་ཡུམ། །བརྗིད་ཅིང་འགྱིང་བའི་ཚུལ་གྱིས་བཞུགས་སུ་གསོལ། །ཏྲཀ་རཀྵ་མ་ཧེ་གུ་ལ་པདྨ་ཡ། ཏིཥྛ་ལྷན། ཙནྡྲ་སུརྻ་ཏི་ར་མཾ་ཧཱུཾ། བསྐལ་པ་མང་པོར་རང་རྒྱུད་ཆེར་སྦྱངས་པས། །སྙིང་རྗེའི་སྟོབས་ཀྱིས་ཕན་པའི་གཟུགས་སྟོན་པ། །བདེ་གཤེགས་རྒྱལ་བའི་བསྟན་པ་བསྲུང་བ་དང༌། །གདུག་པ་འདུལ་མཛད་ཁྱོད་ལ་ཕྱག་འཚལ་ལོ། །མཆོད་པ་ནི། ཆོས་སྐྱོང་སྤྱི་དང་མཐུན་པར་བྱིན་གྱིས་བརླབས་ནས། རཀྨོ་དུན་ཏིང་མ་མ་ཡ་ཧ་ཧི། ནག་མོ་དུན་ཏིང་མ་མ་ཡ་ཧ་ཧི། ཞེས་པ་རེ་རེའི་མགོར་སྦྱར་ནས། ཨརྒྷཾ་ནས་ཤཔྟའི་བར་གྱིས་མཆོད། བདག་གི་དམ་ཚིག་འགལ་བ་ཅི་བགྱིས་པ། །འཐོལ་ལོ་བཤགས་སོ་ཡེ་ཤེས་ལྷ་མོའི་ཚོགས། །བཤགས་སོ་བཤགས་སོ་འཇིག་རྟེན་མ་མོ་རྣམས། །ཐུགས་རྗེ་ཆེན་པོས་ཚངས་པར་མཛད་དུ་གསོལ། །དེ་ནས་སྤྲོ་ན། མ་མོའི་མཆོད་འཕྲེང༌། སྨན་རཀ་འབུལ་བ་སོགས་རྒྱས་བསྡུས་གང་འོས་རེ་བྱ་ཞིང༌། ཤིན་ཏུ་བསྡུ་ན། མི་དབང་འབྲས་བུ་སྨིན་པ་སྐམ། །ཚལ་གྱི་ཤིང་ཐོག་སྐམ་པོ་དང༌། །ཤིང་ལོ་རླུང་ཁྱེར་སར་མ་ལྷུང༌། །འཆི་ཁའི་ཚལ་ཐིག་གྲི་སྙིང་དང༌། །ནལ་བུའི་ཤ་ཁྲག་རྒྱལ་མཚན་དང༌། །བྱ་ལུག་སྨུག་ནག་ལ་སོགས་པ། །དམ་རྫས་ཐམས་ཅད་བུ་ལ་ཡོད། ཁྱོད་ཀྱི་ཐུགས་དམ་བསྐང་བར་བགྱི། །སྨན་སྣ་བདུད་རྩིའི་རྒྱ་མཚོར་འཁྱིལ། །
རཀྟའི་ཆུ་ཀླུང་འབུམ་ཕྲག་འབབ། །གཏོར་མའི་ཚོགས་ནི་རི་ལྟར་བརྩིགས། །ཨ་ལ་ལ་ཏེ་བཞེས་སུ་གསོལ། མཧཱ་པཉྩ་ཨ་མྲྀ་ཏ་ཁཱ་ཧི། མཧཱ་རཀྟ་ཁཱ་ཧི། བཟླས་པའི་དམིགས་པ་གསལ་བཏབ་ལ། ཨོཾ་ཏྲཀ་རཀྵ་མ་མ་མཧཱ་དུན་བྷྱོཿ མཧཱ་ཡཀྵ། མཧཱ་ཏིཀ་སྣ་ནག་མོ་དུན་ཏིང་ཐུན་བྷྱོཿ ཞེས་ཅི་འགྲུབ་བཟླ། གཏོར་མ་བླ་མེད་སྤྱིའི་གཏོར་ཆོག་བསྡུས་པ་ལྟར་བྱིན་གྱིས་བརླབས་ལ། སྙིང་པོའི་མཐར། མ་མོ་ནག་མོ་བེ་ཏ་ལི་ཀུ་ལུ་ཀུ་ལུ། ཧ་ཧ་མཧཱ་མཾ་ས་ལ་ཁ་རཾ་ཁཱ་ཧི། མཧཱ་རཀྟ་ལ་ཁ་རཾ་ཁཱ་ཧི། མཧཱ་ཙིཏྟ་ལ་ཁ༴ མཧཱ་ཀོ་རོ་ཙ་ན་ལ༴ མཧཱ་པཉྩ་ཨ་མྲྀ་ཏ་ལ༴ ཞེས་བདུན་གྱིས་ཕུལ། ཨརྒྷཾ་ལ་སོགས་པས་མཆོད། བྷྱོཿ དཔལ་ལྡན་ལྷ་མོ་ཆེན་མོ་ནི། །སྲིན་པོའི་ཆུང་མ་རལ་པ་ཅན། །སྐྱེ་གནས་རྣམ་བཞི་སྒྲོལ་བ་མོ། །ནག་མོ་འབུམ་གྱི་དབུས་ན་བཞུགས། །དབང་ཕྱུག་ཀུན་གྱི་གཙོ་མོ་སྟེ། ཁྲོ་མོ་ཀུན་གྱི་སྤྲུལ་པ་ཡིན། །སངས་རྒྱས་ཀུན་དང་སྦྱོར་བའི་ཡུམ། །སྲིད་གསུམ་ཟ་བར་བྱེད་ལ་འདུད། ཁྱོད་ཀྱི་ཐུགས་ཀྱི་དཀྱིལ་འཁོར་ནས། །འདོད་ཁམས་མ་མོ་སྟོང་སྟོང་འགྱེད། ཁྱོད་ཀྱི་གསང་བ་བྷ་ག་ནས། །ལས་ཀྱི་མ་མོ་སྟོང་སྟོང་འགྱེད། ཁྱོད་ཀྱི་གཡས་གཡོན་ཞབས་དག་ནས། །ཕོ་ཉ་སྟོང་ཕྲག་དྲུག་ཅུ་འགྱེད། །བདུད་དང་ལྷ་འདྲེ་ངན་སེམས་ཅན། །དགྲ་བོ་མ་ལུས་འདུལ་བར་མཛོད། །
རྟགས་དང་མཚན་མ་མྱུར་དུ་སྟོན། །གང་ལ་བྱ་བ་ནོར་ར་རེ། །མ་མོ་མཁའ་འགྲོ་འཁོར་བཅས་རྣམས། །སྒྲུབ་པོ་བདག་ལ་དངོས་གྲུབ་སྩོལ། །མ་མ་སྙིང་ཁྲག་ཚལ་པ་དུན་དུན་མ་བྷྱོཿ ཞེས་གཏོར་མ་གཙང་སར་བཏང་ངོ༌། །འདིའི་རྗེས་གནང་གི་བྱ་བ་ནི། དམག་ཟོར་རྒྱལ་མོའི་རྗེས་གནང་ཉིད་འདོན་པ་སྤོས་པས་རུང་ཞིང༌། བེ་ཅོན་ཐོད་ཁྲག་ལག་ཏུ་གཏོད་པའི་ཚབ་ཏུ། ཕྱག་མཚན་བཞི་ཆར་གཏོད་དགོས་སོ། །རང་བྱུང་རྒྱལ་མོའི་སྒྲུབ་ཐབས་ལྟར་ན། ཕྱག་གཡས་གཡོན་གྱི་ཕྱག་མཚན་གོ་བཟློག་པའི་ཁྱད་པར་ཁོ་ན་ཡིན་ནོ། །མ་མོ་ཀུན༵་ལས་ཆེས་དག༵འ་བའི། །སྲོག་སྒྲུབ་སྙིང༵་གི་ཐིག་ལེ་ལས། །བརྒྱུད་པ་བཟང་པོ༵འི་མན་ངག་བཞིན། །ཉུང་ངུར་བསྡུས་པ་ངོ་མཚར་ཆེ། །ལྷ་མོ་སྲོག་སྒྲུབ་ལྕགས་ཕུར་མར་གྲགས་པ་རང་བྱུང་རྒྱ་མཚོའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ལྷ་མོ་དུང་སྐྱོང་བའི་སྒྲུབ་ཐབས།
ཨོཾ་སྭཱ་སྟི། རྫོང་གི་ལྷ་མོར་མཚན་གསོལ་བའི། །ཀུན་གྱི་སྤྲུལ་གཞི་ཡིན་པར་གྲགས། །དཔལ་གྱི་མ་མོ་དུང་སྐྱོང་མའི། །སྒྲུབ་ཐབས་ཅུང་ཟད་ཙམ་ཞིག་བྲི། །ལྷོ་མོ་སྲོག་སྒྲུབ་ཉིད་ལ་འདོན་པ་སྤོས་པས་འགྲུབ་སྟེ། རང་གི་མདུན་དུ་འོད་ཀྱི་གུར་ཁང་ཞེས་པ་ནས། ཏི་ཡིག་ཡོངས་སུ་གྱུར་པ་ལས། དྲེའུ་སེར་སྐྱ་རྫུ་འཕྲུལ་རླུང་གི་གཤོག་པ་ཅན། དེའི་སྟེང་དུ་ཡི་གེ་མ་དཀར་པོ་ཡོངས་སུ་གྱུར་པ་ལས། དཔལ་ལྷ་མོ་དུང་སྐྱོང་མ་སྐུ་མདོག་དཀར་མོ། ཞི་ཁྲོའི་རྣམ་པ་ཅན་ཕྱག་གཡས་ཤེལ་གྱི་རལ་གྲི་མེ་འབར་བ་ནམ་མཁའ་ལ་འཕྱར་བ། གཡོན་
པས་གཏེར་གྱི་ནེའུ་ལེ་འཛིན་པས་སྒྲུབ་པ་པོ་ལ་དངོས་གྲུབ་ཀྱི་ཆར་འབེབས་པ། དབུ་སྐྲ་ནག་པོ་ཅུང་ཟད་བཅིངས་ཤིང་གྲོལ་བ། དར་དཀར་གྱི་གོ་ཟུ་འཇའ་ཚོན་རིས་ཅན་སྐུ་ལ་གསོལ་བ། དཔལ་ལྷ་མོ་རེ་མ་ཏཱི་རྒྱན་དང་ཆ་ལུགས་ཡོངས་སུ་རྫོགས་པ། ཞེས་པ་ནས། བཛྲ་ས་མཱ་ཛཿ བྱང་ཤར་མཚམས་ཀྱི་དུང་སྐྱོང་མ། ཁྱོད་ཀྱི་སྤྱི་བོའི་གཙུག་རུམ་ཞེས་པ་ནས། བཟླས་པའི་བར་སྲོག་སྒྲུབ་ཀྱི་སྐབས་དང་འདྲ་བ་ལས། ནག་མོ་མི་བཟད་ཆོ་འཕྲུལ་ཅན། །ཞེས་པར། ཞི་བའི་ལྷ་མོ་ཆོ་འཕྲུལ་ཅན། །ཞེས་འདོན་པ་སྤོ། བཟླས་པའི་སྔགས་ནི། བྷྱོཿཛཿཨོཾ་ཙ་པ་ལ་ཨ་ཤུག་མེ་བྷྱོཿ ཨོཾ་རོ་རུ་རོ་རུ་ཙ་པ་ལ་ཨ་ཤུག་མ་བྷྱོཿ ཛཿཛཿ ཞེས་བཟླའོ། །ཡང་འཁོར་དང་བཅས་པ་བསྐྱེད་པར་འདོད་ན། གཡོག་མོ་ཆུ་སྲིན་གདོང་ཅན་དམར་མོ་སྨད་ཕུར་བུའི་དབྱིབས་ཅན་གྱིས་དྲེའུའི་སྣ་ཁྲིད་པ། བྲམ་ཟེ་མཆོག་སྲེད་སྔོ་སྐྱས་ལོགས་ནས་ཤིས་པ་བརྗོད་པ། སེང་གེ་གདོང་ཅན་ནག་མོ་རྩེ་གསུམ་དང་གཏོར་མ་འཛིན་པ། ཕྱི་ནས་འབྲང་མ་ཞེས་བརྗོད། ཡང་དྲག་མོ་ལ་མོས་ན། སྐུ་མདོག་ནག་མོ་དབུ་སྐྲ་ཁམ་པ་དར་ནག་གི་གོས་ཅན་དུ་བསྒྱུར་རོ། །དེ་ནས་གཏོར་སྔགས་ནི། མ་མོ་ནག་མོ་བེ་ཏ་ལི་ཞེས་པ། ཨོཾ་ཤྲཱི་དེ་ཝཱི་ཞེས་འདོན་པ་སྤོ། བསྟོད་པའི་སྐབས། དཔལ་གྱི་ལྷ་མོ་ཆེན་མོ་ནི། །ཀླུ་རྒྱལ་ཀུན་གྱིས་ཞབས་ལ་བཏུད། །གྱིང་ཆེན་ཐམས་ཅད་བྲན་དུ་འཁོལ། །ཀླུ་བྲན་གྲངས་མེད་མང་པོར་བཅས། །
དབང་ཕྱུག་ཀུན་གྱི་གཙོ་མོ་སྟེ། །མ་བྷྱོཿའི་བར་གོང་བཞིན་གཏོར་མ་བཏང༌། འདི་ལ་རྗེས་གནང་ནི། མཎྜལ་པདྨ་འདབ་བརྒྱད་དཀར་པོ་ལ། ཟླུམ་སྐོར་དཀར་པོ་ཤ་ཆང་དཀར་གསུམ་མངར་གསུམ་སོགས་ཟས་བཟང་རྒུས་སྦགས་པ་ལ་ཙ་ཀ་ལི་ཞིག་བཙུགས། མཆོད་གཏོར་བཟང་དུ་བཤམ། བདག་བསྐྱེད་སྔོན་དུ་འགྲོ་བས་གོང་བཞིན་གཏོར་ཆོག་རྒྱས་པར་བཏང༌། སློབ་མས་མཎྜལ་ཕུལ། རྡོ་རྗེ་འཛིན་པ་དགོངས་སུ་གསོལ། སོགས་ཀྱིས་གསོལ་བ་གདབ། རྒྱུན་བཤགས་སྤྱི་དང་མཐུན་པར་བྱ། གཏོར་མ་ལྷ་མོར་བསྐྱེད་ཅིང་སྤྱན་འདྲེན་ཡན་ཆད་སྔོན་འགྲོ་དང་འདྲ། དེ་ནས་གཏོར་དབང་སྤྱི་དང་མཐུན་པར་བསྐུར། སྔགས་ཀྱི་བཟླས་ལུང་སྦྱིན་པ་ཙམ་བྱའོ། །རྗེས་ཀྱི་བྱ་བ་ནི་སྤྱི་དང་མཐུན་ནོ། །འདི་རྐང་ཐང་དུ་བྱེད་པའི་ལུགས་ཀྱང་ཡོད་མོད། རྗེས་གནང་ཐད་དུ་མི་དགོས་སོ། །མ་མོ་ཀུན༵་གྱི་བསྐྱེད་བྱེད་ཡུམ། །ཆོས་འཁོར་མཐའ་དག་དག༵འ་བས་སྦྱོངས། །སྙིང༵་ནས་ལྷ་མོ་ཁྱོད་བསྒྲུབས་ན། །བཀྲ་ཤིས་འབྱོར་པ་བཟང་པོ༵ར་གྱུར། །ལྷ་མོ་དུང་སྐྱོང་བའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
བདུད་མོ་རེ་མ་ཏཱིའི་སྒྲུབ་ཐབས།
ཨོཾ་སྭཱ་སྟི། འཇིག་རྟེན་འདས་ཀྱང་འཇིག་རྟེན་ཚུལ། །བདག་གི་མཚུན་གྱི་ལྷ་མོ་ནི། །ནག་མོ་རེ་མ་ཏཱིར་བཏུད་ནས། །སྒྲུབ་ཐབས་ཤིན་ཏུ་མདོར་བསྡུས་བྲི། །མདུན་དུ་ཁྲག་གི་མཎྜལ་མཆོད་གཏོར་སྨན་རག་དང་བཅས་བཤམས་ལ། བདག་བསྐྱེད་ཁྲོ་བོའི་མངོན་རྟོགས་དང་བཅས་པ་སྔོན་དུ་བཏང་ནས། མདུན་བསྐྱེད་སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་བྷྲཱུཾ་ལས་བསེ་མཁར་གྲུ་གསུམ་གྱི་ནང་དུ་ཐོད་མཁར་གྲུ་བཞི། ཞིང་ཆེན་གྱི་འཕན་གདུགས་རྒྱལ་མཚན་ལ་སོགས་
པ་འཇིགས་པའི་རྒྱན་གྱིས་བརྒྱན་པ། རྒྱ་དཔངས་ཚད་མེད་པའི་དབུས་སུ། གཏད་པ་ཧཱུཾ་ལས་སྲིན་པོའི་བོང་བུ་གཱ་དམར་རླུང་གི་ཤུགས་ཅན། ཞིང་གི་སྒ་དང་སྒ་གཡོགས་ཅན། དེའི་སྟེང་དུ། བྷྱོཿལས་དཔལ་ལྷ་མོ་ནག་མོ་རལ་གྲི་དང་ཐོད་ཁྲག་འཛིན་པ། རྒྱན་དང་ཆ་ལུགས་སྤྱི་དང་མཐུན་པའི་ཐུགས་ཀར་བྷྱོཿ བྷྱོཿལས་བྷྱོཿདཔག་ཏུ་མེད་པ་སྤྲོས། བདུད་མོ་རལ་གྲི་ཐོད་ཁྲག་ཐོགས་པ་འབུམ་གྱིས་བསྐོར་བར་གྱུར། འདོད་ཆགས་ཁྲག་མཚོ་ཞེ་སྡང་མེ་དཔུང༌། གཏི་མུག་རླུང་ནག་འཚུབ་མའི་དབུས་སུ་དགྱེས་པར་རོལ་པར་བསམས་ལ། རང་གི་སྙིང་ག་ནས་འོད་ཟེར་འཕྲོས། རྒྱ་མཚོ་ཆེན་པོའི་ཀློང་དང༌། དུར་ཁྲོད་ཆེན་པོའི་གནས་བརྒྱད་ནས་རེ་མ་ཏཱི་འཁོར་དང་བཅས་པ་ཨཱ་ཀརྵ་ཡ་ཛ་ཛཿ ཛཿཧཱུཾ་བཾ་ཧོཿ སྙིང་པོའི་མཐར། བཛྲ་ས་མ་ཡ་ཧ་ན་ཧ་ན་ཧཱུཾ་ཕཊ། ཅེས་དམ་རྒྱ་བསྟན་ལ་དམ་ལ་བཞགཨོཾ་མཧཱ་ཀ་ལི་རེ་མ་ཏཱི་མ་མ་རུ་ལུ་རཀྴ་རེ་མ་ཏཱི་རུ་ལུ་རུ་ལུ་བྷྱོཿཛཿཛཿ ཞེས་སྙིང་པོ་ལན་བདུན་གྱིས་བྱིན་གྱིས་བརླབས་ནས། གཏོར་མ་བླ་མེད་སྤྱི་དང་མཐུན་པར་བྱིན་གྱིས་བརླབས། ཐོད་རློན་གྱི་ཕྱག་རྒྱ་བཅས་ཏེ་སྙིང་པོའི་མཐར། ཨི་དཾ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། བཏགས་པས་འབུལ། སྨན་དང་རཀྟ་བྱིན་གྱིས་བརླབས་ནས་འབུལ་ཚུལ་ཡང་སྤྱི་དང་མཐུན། དེ་ནས་བཟླས་པ་གང་འགྲུབ་བྱེད་ཅིང༌། མཐར་ཨརྒྷཾ་ནས་ཤཔྟའི་བར་གྱིས་མཆོད། ལྷ་ལ་དབང་བསྐུར་སོགས་ཀྱིས་བསྟོད། འདོད་དོན་གསོལ་བ་དྲག་ཏུ་བཏབ།
ཡིག་བརྒྱ་བཟོད་གསོལ། གཤེགས་གསོལ། སྨོན་ལམ་བཀྲ་ཤིས་རྣམས་བྱའོ། །འདིའི་བཀའ་གཏད་ནི། མཎྜལ་གྱི་སྟེང་དུ་གཏོར་མ་སྤུངས་གཏོར་ལ་ཙ་ཀ་ལི་བཙུགས་པའམ། མེད་ན་སྔགས་བྱང་འཛུགས། གཏོར་མ་དམ་རྫས་སུ་བྱིན་གྱིས་བརླབས། ཙ་ཀ་ལིའམ་སྔགས་བྱང་ལྷར་བསྐྱེད་པ་ཡིན། གོང་བཞིན་ལས་བཟླས་པ་ཡན་ཆད་བྱས་ལ། སློབ་མས་མཎྜལ་ཕུལ། གསོལ་བཏབ་རྒྱུན་བཤགས་སྤྱི་དང་མཐུན་པར་བྱ། མདུན་བསྐྱེད་ལྷ་མོ་གསལ་བཏབ་ལ། ཡེ་ཤེས་པ་སྤྱན་འདྲེན། དེ་ནས་གཏོར་དབང་བཀའ་བསྒོ་དང་བཅས་པ་བྱས་ལ། དེའི་གནས་གསུམ་ནས། ལྷ་མོ་དཀར་དམར་མཐིང་གསུམ་སློབ་མའི་གནས་གསུམ་དུ་ཐིམ་པར་བསམ། ཙ་ཀ་ལི་རེག་ཅིང༌། ཨོཾ་ཨཱཿཧཱུཾ། ཞེས་བརྗོད། དེ་ནས་སྔགས་ཀྱི་བཟླས་ལུང་ཙམ་བྱིན་པས་སློབ་མའི་བྱ་བ་འགྲུབ་པ་ཡིན་ནོ། །སྐབས་འདིར་སྤུངས་གཏོར་ཕུལ་ལ་མཆོད་བསྟོད་མན་ཆད་རྗེས་ཆོག་གི་ཚུལ་དུ་བྱའོ། །ཀུན་ཏུ་ཟབ་པའི་སྒྲུབ་ཐབས་ནི། །རབ་ཏུ་དག༵འ་ཡང་ཤིན་ཏུ་དཀོན། །སྙིང༵་ནས་བཤེས་གཉེན་གཤེད་སྒྲུབ་ན། །ཏེ་པོ༵ར་ལྷ་འདིས་བསྲུང་སྐྱོབས་མཛད། །བདུད་མོ་རེ་མ་ཏཱིའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ཀླུ་མོ་རེ་མ་ཏཱིའི་སྒྲུབ་ཐབས།
ཨོཾ་སྭཱ་སྟི། གང་གི་ཞབས་པད་ཀླུ་རྣམས་ཀྱིས། །གུས་པས་བསྟེན་པའི་ལྷ་མོ་ལ། །བཏུད་ནས་དེ་ཡི་སྒྲུབ་ཐབས་ཀྱི། ཁྱད་པར་ཅུང་ཟད་བྲི་བར་བྱ། །ཀླུ་མོ་རེ་མ་ཏཱི་ཕྱག་བཞི་མའི་སྒྲུབ་ཐབས་ནི། བདུད་མོ་རེ་མ་ཏཱི་དང་འདྲ་བ་ལས། ས་བོན་མ་ལས་བསྐྱེད་ཅིང༌། ཕྱག་བཞིའི་གཡས་ཀྱི་དང་པོ་ན་རལ་གྲི། གཉིས་པས་ཐོད་སྐམ་གྱི་འཕྲེང་བ། གཡོན་
གྱི་དང་པོས་ཐོད་ཁྲག །གཉིས་པ་ན་རྩེ་གསུམ་འཛིན་པ། སྲིན་མོ་ན་ལ་རྩེ། དམར་མོ་ཆུ་སྲིན་གྱི་མགོ་ཅན་ལྟེ་བ་མན་ཆད་ཕུར་བུའི་དབྱིབས་ཅན་གྱིས་ཆིབས་ཀྱི་སྔ་ནས་འཁྲིད་པ། འཁོར་ཀླུ་ཆེན་བརྒྱད་བུང་བ་ལྟར་གནག་པ་སྤུ་གྲི་དང་སྦྲུལ་ཞགས་འཛིན་པ། ཀླུ་བྲན་བྱེ་བ་འབུམ་གྱི་ཚོགས་ཀྱིས་བསྐོར་བ། ཞེས་དང༌། སྙིང་པོ་ནི། མ་མ་ཏྲཀ་རཀྴ སྙིང་ཁ་རཀ་ཙིཏྟ་སྲོག་དུང་དུང༌། ཛཿཛཿ ནཱ་ག་དུནྟི་བྷྱོཿབྷྱོཿ ཞེས་བཟླ། གཏོར་ཆོག་གི་གཞུག་ཏུ་ཀླུ་གཏོར་རེ་གཏོང་བ་ལག་ལེན་ཡིན། གཞན་ཐམས་ཅད་འདྲའོ། །ཆུ་སྲིན་བྱ་གདོང་ཅན་གྱི་སྔགས་བྱེ་བྲག་ཏུ་བཟླ་བའང་ཡོད་མོད་ཀྱི་མན་ངག་ཡིན་པའི་ཕྱིར་དཀྱུས་སུ་མ་བཀོད་དོ། །ཀུན༵་ཏུ་གྲགས་པ་མིན་ན་ཡང༌། །སྔགས་མཁན་མང་པོས་དག༵འ་བར་བསྒྲུབས། །རྒྱུད་དང་ལས་ཚོགས་ཆེས་མང་བའི། །རྩ་བའི་སྒྲུབ་ཐབས་སྙིང༵་པོ༵ར་གྲིལ། །ཀླུ་མོ་རེ་མ་ཏཱིའི་སྒྲུབ་ཐབས་ཀྱི་ལེ་ཚན་ནོ།། །།མངྒ་ལཾ། །
གནོད་སྦྱིན་རེ་མ་ཏཱིའི་སྒྲུབ་ཐབས།
ཨོཾ་སྭཱ་སྟི། བྱ་དཀར་ཅན་གྱི་གནས་མཆོག་ནི། །རོལ་ཞིང་དགྱེས་པའི་ལྷ་མོ་ནི། །གནོད་སྦྱིན་རྒྱལ་མོ་ལ་བཏུད་ནས། །དེ་ཡི་སྒྲུབ་ཐབས་ཁྱད་པར་བརྗོད། །མཎྜལ་གྲུ་བཞིའི་དབུས་སུ། ཁྲག་གི་མཎྜལ་གྲུ་གསུམ། དབུས་སུ་དྲི་བཟང་གི་ཐིག་ལེ་ཟླུམ་པོ་རྣམས་བཀོད། ས་བོན་ཀྵ་ལས་བསྐྱེད། ཕྱག་གཡས་རལ་གྲི། གཡོན་པས་གཏེར་གྱི་ནེའུ་ལེ་ནོར་བུའི་ཆར་འབེབས་པ་འཛིན་པ་དང༌། འཁོར་གནོད་སྦྱྀན་བརྒྱད་ནག་པོ་བེ་ཅོན་དང་ཐོད་ཁྲག་འཛིན་པ། གནོད་སྦྱིན་མོ་བརྒྱད་ནག་མོ་རལ་གྲི་
དང་ནེའུ་ལེ་འཛིན་པ། གནོད་སྦྱིན་མོ་འབུམ་སྡེ་ལྷ་སྲིན་སྡེ་བརྒྱད་ཀྱི་ཚོགས་དང་བཅས་པས་བསྐོར་བ། ཞེས་པ་དང༌། སྙིང་པོ་ནི། བྷྱོཿཛཿ ཨོཾ་ཙ་པ་ལ་ཨ་ཤུག་མེ་བྷྱོཿ ཨོཾ་རོ་རུ་རོ་རུ་ཙ་པ་ལ་ཨ་ཤུག་མ་བྷྱོཿཛཿཛཿ ཞེས་དང༌། གཏོར་མ་འབུལ་བའི་ཚེ་རིན་པོ་ཆེའི་ཕྱག་རྒྱ་བཅས་ནས་འབུལ་བ་རྣམས་ཁྱད་པར་རོ། །ལྷག་མ་རྗེས་གནང་སོགས་ཐམས་ཅད་བདུད་མོ་རེ་མ་ཏཱིའི་སྐབས་དང་འདྲའོ། །ཀུན༵་ཁྱབ་སྒྲུབ་ཐབས་ཡིན་ནའང༌། །ད་ལྟ་དཀོན་ཕྱིར་ཐོབ་ན་དག༵འ། །ནོར་སྒྲུབ་སྙིང༵་པོ༵ར་བྱེད་རྣམས་ཀྱང༌། །འདི་སྒྲུབ་ཐོགས་མེད་མཐུ་ལྡན་འགྱུར། །ཧཱུཾ། གནོད་སྦྱིན་རེ་མ་ཏཱིའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
རེ་མ་ཏཱི་རྡོ་རྗེ་གཤོག་རྒོད་མར་གྲགས་པའི་སྒྲུབ་ཐབས
ཨོཾ་སྭཱ་སྟི། སངས་རྒྱས་སྟོང་གི་འཕྲིན་ལས་མ། །སྨུག་ནག་ཆེན་མོ་དཔལ་ལྡན་མ། །དེ་ཡི་སྒྲུབ་ཐབས་མདོ་ཙམ་ཞིག །བརྗོད་ཀྱི་འདི་ལ་སྒྲུབ་པ་བྱ། །རང་ཡི་དམ་དུ་གསལ་བའི་གཏོར་མ་སྤྱི་དང་མཐུན་པར་བྱིན་གྱིས་བརླབས། ཆོ་གའི་གཞི་ཡང་ལྷ་མོའི་སྤྱི་དང་འདྲ་བ་ལས། རང་གི་མདུན་དུ་རཀྟའི་རྒྱ་མཚོ། ནང་མེ་རླུང་འཚུབ་མའི་དབུས་སུ་ཀཾ་ལས་ལྷ་མོ་རྡོ་རྗེ་གཤོག་རྒོད་རྩལ། སྨུག་ནག་ཞལ་གཅིག་ཕྱག་གཉིས་རལ་གྲི་དང་ཐོད་པ་འཛིན་པ་མཆན་ཁུང་དུ་ནེའུ་ལེ་བསྣམས་པ་མི་ལྤགས་ཀྱི་སྟོད་གཡོགས་ཅན། སྐུ་སྟོད་མཚོན་ཆ་འབར་བའི་གཤོག་པ་ཅན། གཞན་ལྷ་མོ་དྲེའུ་ཞོན་སྤྱི་དང་འདྲ། སྤྱན་འདྲེན་གྱི་སྐབས། རག་མོ་དུ་ར་དུནྟིང་བྷྱོཿ ཁ་ཁ་དུ་ར་དུནྟིང་བྷྱོཿ ཧེ་ར་དུ་ར་དུནྟིང་བྷྱོཿ ཞེས་སྤྱན་འདྲེན་གཏོར་
སྔགས་ནི། ཨོཾ་བཱ་ལིཾ་ཏ་ཁ་རཾ་ཁཱ་ཧི། ཡོ་ཀི་ནཱི་ཁ་རཾ་ཁཱ་ཧི། ཌཱ་གི་ནཱི་ཁ་རཾ་ཁཱ་ཧི། སྟཾ་པ་བྷ་ག་ཏ་ཨ་ཀ་ས་ལ་ཧོ། ཞེས་ལན་བདུན་གྱིས་ཕུལ། སྙིང་པོ་ནི། ཏདྱ་ཐཱ། རུ་རུ་བི་ཏིཥྛ་བད་དྷོ་མ་མོ་རག་མོ་ཙིཏྟ་ཁ་རག་མ་བྷྱོཿབྷྱོཿསྭཱ་ཧཱ། ཞེས་པའོ། །འདོད་གསོལ་གྱི་སྐབས། ལྷ་མོ་རྡོ་རྗེ་དབང་སྒྲུབ་མ། །འཕྲིན་ལས་བཅོལ་བའི་དུས་ཀྱི་ཚེ། །ཉིན་གསུམ་ཁྲ་ལྟར་འཁྱུག་ཅིང་བྱོན། །མཚན་གསུམ་གློག་ལྟར་འཁྱུག་ཅིང་བྱོན། །བསྟན་པ་བསྲུང་བའི་དུས་ལ་བབ། །མ་གཅིག་རྡོ་རྗེ་གཤོག་རྒོད་རྩལ། །དགྲ་བོ་འཇོམས་པའི་དུས་ལ་བབ། །དཔལ་ལྡན་རྡོ་རྗེ་རབ་བརྟན་མ། །རཀྟའི་མཆོད་པ་འདི་བཞེས་ཤིག །ཤ་ཁྲག་གཏོར་མ་འདི་བཞེས་ཤིགཁྱོད་ཀྱི་ཐུགས་དམ་དུས་ལ་བབ། །བཅོལ་བའི་ཕྲིན་ལས་གྲུབ་པར་མཛོད། །བདག་གི་བསམ་པ་ཐམས་ཅད་སྒྲུབས། །འདི་ཡི་རྗེས་གནང་ནི་སྐུ་གསུང་ཐུགས་ཀྱི་རྗེས་གནང་དཀྱུས་མ་བྱེད་པའི་སྲོལ་ཡོད་ནའང༌། བདུད་མོ་རེ་མ་ཏཱིའི་སྐབས་སུ་བཤད་པ་ལྟར་བྱའོ། །ཀུན༵་ནས་མཚན་མང་ལྡན་ན་ཡང༌། ཁོལ་མོ་རེ་མ་ཏཱི་རུ་གྲགས། །རབ་དག༵འ་སྒྲུབ་ཐབས་ཉེར་མཁོ་ཡི། །སྙིང༵་པོ༵་ཁོལ་ཕྱུང་ཡི་གེའོ། །རེ་མ་ཏཱི་རྡོ་རྗེ་གཤོག་རྒོད་མར་གྲགས་པའི་སྒྲུབ་ཐབས་ཀྱི་ལེ་ཚན་ནོ།། །།མངྒ་ལཾ། །
ལྷ་མོ་ཨེ་ཀ་ཛ་ཊིའི་སྒྲུབ་ཐབས།
ཨོཾ་སྭ་སྟི། དེ་བཞིན་གཤེགས་ལ་རྟག་གུས་པ། །སྲིན་པོ་འབུམ་ཕྲག་བདུན་འཁོར་བཅས། །སངས་རྒྱས་བསྟན་པ་སྐྱོང་མཛད་པའི། །མ་མོ་ཆེ་ལ་གུས་པས་འདུད། །འདིར་སྲིན་མོ་ཆེན་མོ་ཨེ་ཀ་ཛ་ཊིའི་སྒྲུབ་ཐབས་ནི། རེ་མ་ཏཱིའི་སྒྲུབ་ཐབས་གང་ཡང་རུང་བ་ཞིག་དང་མཐུན་པར་གཞུང་བསྲང༌། ཁྱད་པར་རྣམས་བཤད་པར་བྱ་སྟེ། དེ་ལ་བཞོན་པ་ཅན་དུ་བྱེད་ན་སྲིན་པོའི་བོང་བུ་གཱ་དམར་རམ། དྲེའུ་ནག་པོའམ། དྲེའུ་མོ་རྐང་གསུམ་མ་གང་རུང་ལ། དེའི་རྒྱབ་ཏུ་པདྨ་དང་ཉི་མའི་གདན། ཞེས་དང༌། རྐང་ཐང་དུ་བྱེད་ན། པད་ཉིའི་གདན་ཁོ་ན་ལ་བསྐྱེད་པ་ཡིན་ཏེ། གང་ལྟར་ཡང་བྲག་རི་དམག་ནག་གིས་བསྐོར་བའི་ནང་རཀྟའི་རྒྱ་མཚོའི་དབུས་སུ་བསྐྱེད། དེ་ཡང་ཏྲཀ་ལས་ལྷ་མོ་ཨེ་ཀ་ཛ་ཊི་སྐུ་མདོག་སྨུག་ནག་རལ་པ་ལན་བུ་གཅིག་ཏུ་གྱུར་པ། གཡོན་ངོས་སུ་འཕྱང་བ། ཞལ་གཅིག་ཕྱག་གཉིས་གཡས་མདུང་རྩེ་གསུམ་དང༌། གཡོན་མི་སྙིང་ཞགས་པ་དང་བཅས་པ་འཛིན་པ། སྟག་ཤམ་དང༌། མི་ལྤགས་ཀྱི་གཡང་གཞིའི་སྟོད་གཡོགས་ཅན། སྦྲུལ་དང་མི་མགོས་བརྒྱན་པ། མེ་དཔུང་འབར་བའི་དབུས་ན་བཞུགས་ཤིང༌། གཡུའི་སྤྱང་མོ་མང་པོ་ཕོ་ཉར་འགྱེད་པ། འཁོར་ལས་ཀྱི་ཕོ་ཉ་དང་སྲིན་པོའི་ཚོགས་ཀྱིས་བསྐོར་བའོ། །སྤྱན་འདྲེན་གྱི་སྐབས། ཛཿཧཱུཾ་བཾ་ཧོཿ མཧཱ་ཁྭ་དག་ཁྭ་དག་ཧཱུཾ་ཧཱུཾ་རྡིང་རྡིང༌། ཞེས་སྔགས་ཀྱིས་སྤྱན་འདྲེན། རོ་རུ་རོ་རུ་ཙ་པ་ལ་ན་མོ་ཞེས་ཕྱག་འཚལ། ཏྲཀ་རཀྴ་མ་མ་ས་མ་ཡ་ཏིཥྛ་ལྷན། ཞེས་གདན་འབུལ། ཏྲཀ་རཀྴ་ཀུར་ལན་སེར་སེར་དུག་དུག །ཅེས་དམ་ལ་བཞག་ཅིང་དབང་བསྐུར་རོ། །ཨེ་ཀ་ཙ་ཏི་ཏི་ལི་ཏི་ལི་རཾ་བ་
རཾ་བ་ཁཱ་ཧི། ཞེས་པའི་སྔགས་འདི་མཆོད་པའི་སྔགས་རེ་རེའི་འགོར་བཏགས་ཏེ་མཆོད་པ་འབུལ། གཏོར་སྔགས་ཀྱང་དེ་ཉིད་ཀྱི་མཐར་ཨི་དཾ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། མཧཱ་པཉྩ་ཨ་མྲྀ་ཏ་ལ་ཁཱ་ཧི། མཧཱ་རཀྟ་ལ་ཁཱ་ཧི། ཞེས་པའོ། །རང་གི་སྙིང་གའི་ཡེ་ཤེས་སེམས་དཔའི་འོག་ཏུ་ཡང་ལྷ་མོ་གཅིག་བསྒོམ་ལ་མདུན་བསྐྱེད་དང་སྤྲོ་བསྡུའི་དམིགས་པ་བྱེད་ཅིང༌། ཏྲཀ་རཀྴ་ཁ་མུ་ཏྲ་མུ་རུ་ལུ་རུ་ལུ་ཧཱུཾ་བྷྱོཿ ཞེས་དང༌། རཀྨོ་ཏེ་ཀེཾ་ཛ་ཛ་ཁ་ལ་བྷྱོཿ ཞེས་དང༌། རུ་ལུ་རུ་ལུ་མ་ཧི་མ་བྷྱོཿ ཞེས་པ་རྣམས་སྦྲེལ་ནས་བཟླ། བཟླས་པའི་མཐར། ཀཱ་ཡ་སིདྡྷི་ཨོཾ། ཝཱཀ་སིདྡྷི་ཨཱཿ ཙིཏྟ་སིདྡྷི་ཧཱུཾ། ཞེས་པ་གསུམ་པོ་སྤེལ་ཏེ་དངོས་གྲུབ་ལེན། བསྙེན་སྒྲུབ་ལས་གསུམ་དང་འབྲེལ་བའི་སྐབས་ཡིན་ན། ཐོད་རློན་གྱི་ནང་དུ་གཏོར་མ་ཁྲག་དང༌། དུག་དང༌། ཆང་གིས་སྦགས་པ་བཤམས་ལ། བྱིན་བརླབས་དཀྱུས་མ་སོང་བའི་གཞུག་ཏུ། ཨོཾ་ཨཱ་ཝེ་ཤ་ཡ། ཁ་བེ་ཤ་ཡ། པྲ་བེ་ཤ་ཡ། བྷེ་ཤ་རཱུ་པེ། ཤ་ཁ་ཐུན་བྷྱོཿ ཞེས་ལན་བདུན་བཟླས་ནས། ཁམས་གསུམ་གྱི་དུག་ཐམས་ཅད་འབེབས་པའི་མོས་པ་བྱའོ། །འདིའི་རྗེས་གནང་གི་བྱ་བ་ནི། བདུད་མོ་རེ་མ་ཏཱིའི་སྐབས་སུ་བཤད་པ་དང་འདྲ་བ་ལས། སློབ་མ་ཡི་དམ་གྱི་ང་རྒྱལ་དུ་གནས་པ་ལ། གཏོར་མ་ལག་ཏུ་གཏད་ལ་བཀའ་བསྒོ་བྱེད། གཞན་ཐམས་ཅད་འདྲའོ། །དྲགས་སྔགས་ཀུན་ལས་རྣོ་བའི་མཆོག །རལ་གཅིག་སྒྲུབ་ཐབས་དག༵འ་བའི་ཕུལ། །མ་མོ་སྙིང༵་ཐིག་ལས་བྱུང་བཞིན། །ལག་ལེན་བདེ་ཞིང་གསལ་པོ༵ར་བཀོད། །ལྷ་མོ་ཨེ་ཀ་ཛ་ཊིའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
དཔལ་ལྷ་མོའི་སྒྲུབ་ཐབས།
ཨོཾ་སྭཱ་སྟི། འདོད་ཁམས་དབང་ཕྱུག་ངོ་བོ་ཉིད། །ནམ་མཁའི་གོས་ཅན་ཞེས་གྲགས་པ། །ཤ་ཟ་ཆེན་མོ་ལ་བཏུད་ནས། །གཏོར་ཆོག་རྗེས་གནང་བྱེད་ཚུལ་བཤད། །མདུན་དུ་མཆོད་གཏོར་བཤམ། ཡི་དམ་གྱི་བདག་བསྐྱེད་སྔོན་དུ་འགྲོ་བས་གཏོར་མ་སྤྱི་དང་མཐུན་པར་བྱིན་གྱིས་བརླབས། རང་གི་སྙིང་ག་ནས་འོད་ཟེར་འཕྲོས། དུར་ཁྲོད་ཆེན་པོ་བསིལ་བའི་ཚལ་ནས། ལྷ་མོ་ནམ་མཁའི་གོས་ཅན་མ་འཁོར་དང་བཅས་པ་བཛྲ་ས་མཱ་ཛཿ སྙིང་པོ་ལན་གསུམ་གྱི་མཐར་ས་མ་ཡ་སྟྭཾ་གྱིས་དམ་ལ་བཞགསྐུ་མདོག་མཐིང་ནག་གམ་སྔོ་སྐྱ་ཞལ་གཅིག་ཕྱག་གཉིས་སྤྱན་གསུམ་མ། གཏུམ་མོ་སྐྲ་གྲོལ་བ། ཞིང་ལྤགས་དང༌། རིན་པོ་ཆེ་དང༌། མི་མགོའི་དོ་ཤལ་གྱིས་བརྒྱན་པ། སྐུ་ལ་ཏིལ་དམར་གྱིས་བྱུགས་པ། མཆེ་བ་ཟངས་ཡག་ཏུ་གཙིགས་ཤིང་ལྕེ་གློག་ལྟར་འཁྱུག་པ། ཁྲག་ལྟར་དམར་བའི་སྤྱན་དགྲ་ལ་ཕུར་ཚུགས་སུ་གཟིགས་པ། ཕྱག་གཡས་གྲི་གུག་དང༌། གཡོན་ཐོད་ཁྲག་འཛིན་པ། གཡོན་བརྐྱང་གི་སྟབས་ཀྱིས་བཾ་ཆེན་གྱི་གདན་ལ་བཞུགས་པ། འཁོར་ལས་ཀྱི་མ་མོ་དཔག་ཏུ་མེད་པས་བསྐོར་བའོ། །ཨརྒྷཾ་ནས་ཤཔྟའི་བར་གྱིས་མཆོད། ཨོཾ་བཛྲ། ཡཀྨོ་མཧཱ་ཀཱ་ལི་ཏྲཀ་རཀྴ་ར་ར་རོ་རུ་རོ་རུ་ཨརྒྷཾ་པྲ་ཏཱིཙྪ། བཱ་ལིཾ་ཁ་ཁ་ཁཱ་ཧི་ཁཱ་ཧི་པྲ་ཏཱིཙྪ་ཧཾ། ཞེས་ལན་གསུམ་གྱིས་གཏོར་མ་ཕུལ། དམ་བསྒྲགས་ལ་འདོད་དོན་གསོལ་བ་བཏབ། བྷྱོཿ སྨོན་ལམ་དབང་གི་ལྷ་མོའི་ཚུལ་
འཛིན་ཞིང༌། །ཡེ་ཤེས་ཞི་བའི་ངང་ལས་མ་གཡོས་ཀྱང༌། །རྣམ་འཕྲུལ་དུ་མས་འགྲོ་དོན་དཔག་མེད་མཛད། །གཅེར་བུ་ཡིད་འཕྲོག་མ་ལ་བདག་བསྟོད་དོ། །ཤ་ཟ་ཆེན་མོ་རྡོ་རྗེ་དམ་ཅན་མ། །རྒྱོབ་ཅིག་རྒྱོབ་ཅིག་དགྲ་བགེགས་སྲོག་རྩ་ཆོད། །སོད་ཅིག་སོད་ཅིག་དམ་ཉམས་ཁྲག་ལ་གསོལ། ཁ་རཾ་ཁཱ་ཧི་ལས་ལ་མཐུ་མ་ཆུང༌། །ཞེས་སོགས་དྲག་ཏུ་བསྐུལ། ཐུགས་ཀར་ཉི་མ་ཀྵ་ཡིག་གི་མཐར་སྔགས་ཀྱིས་བསྐོར་བར་བསམས་ལ། ཨོཾ་མཧཱ་ཀ་ལི་ཏྲཀ་རཀྴ་ར་ར་རོ་རུ་རོ་རུ་ཙ་པ་ལི་མཧཱ་ཀ་རུ་ཎི་ཀ་སྭཱཧཱ། ཞེས་བཟླས། འཇུག་ཏུ་ཟན་རིལ་ཉི་ཤུ་རྩ་གཅིག་གཏོར་མ་ལ་བཏབ་སྟེ། ཨོཾ་ཨཱཿཧཱུཾ། ཡཀྨོ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ཉེར་གཅིག་བརྗོད། ཡིག་བརྒྱ། བཟོད་གསོལ། གཤེགས་གསོལ་རྣམས་བྱའོ། །འདི་ཡི་རྗེས་གནང་ནི། གཏོར་མ་ཙ་ཀ་ལི་སྒྲོན་མའི་མཐའ་མཆོད་གཏོར་གྱིས་བསྐོར། གཏོར་མ་གཉིས་ཀ་བྱིན་རླབས་མཉམ་དུ་བྱ། ཙ་ཀ་ལི་སྐད་ཅིག་གིས་ལྷར་བསྐྱེད། གཞན་གཏོར་ཆོག་བཞིན་ལས། བསྟབ་གཏོར་སོང་མཚམས་སུ། སློབ་མས་མཎྜལ་ཕུལ། དུས་གསུམ་སངས་རྒྱས་ཐམས་ཅད་ཀྱི། །འཕྲིན་ལས་སྒྲུབ་མཛད་སློབ་དཔོན་མཆོག །བདག་ལ་ནམ་མཁའི་གོས་ཅན་གྱིས། །བྱིན་གྱིས་བརླབས་པ་སྩལ་དུ་གསོལ། །ཞེས་གསོལ་བ་བཏབ། སྐྱབས་སེམས་དང་རྒྱུན་བཤགས་བྱ། མདུན་བསྐྱེད་ལ་ཡེ་ཤེས་པ་སྤྱན་དྲངས་ནས་གསལ་འདེབས་སུ་བཅུག །སློབ་མ་ཡི་དམ་དུ་གསལ་བཏབ་ནས་བཟླས་ལུང་སྦྱིན། གཏོར་མ་ལག་ཏུ་གཏད་ལ་བཀའ་ཉན་དུ་
བཀའ་བསྒོ་དྲག་ཏུ་བྱའོ། །རྗེས་སྤྱི་དང་འདྲ། རྗེས་ཆོག་གི་ཐོག་མར་ཙ་ཀ་ལི་བཙུགས་པའི་གཏོར་མ་དེ་ཡང་འབུལ་ལོ། །ཇོ་བོའི་སློབ་མ་ཀུན༵་གྱི་ཕུལ། གསང་ཕུ་བ་ལ་གནང་བས་དག༵འ། །བསྟན་སྲུང་ཀུན་གྱི་སྙིང༵་པོ༵ར་མཛད། །འདི་འདྲ་རྙེད་པ་ངོ་མཚར་ཆེ། །ལྷ་མོ་ནམ་མཁའི་གོས་ཅན་གྱི་སྒྲུབ་ཐབས་ཀྱི་ལེ་ཚན་ནོ།། །།སྒྲུབ་ཐབས་རིན་ཆེན་འབྱུང་གནས་ལས། དཔལ་ལྷ་མོའི་སྒྲུབ་ཐབས་བཤད་པའི་སྐབས་ཏེ་ཉེར་གཉིས་པའོ།། །།མངྒ་ལཾ།