སྒྲུབ་ཐབས་རིན་ཆེན་འབྱུང་གནས་ལས་མགོན་པོ་ལྕམ་དྲལ་དང་རིགས་མཐུན་གྱི་སྒྲུབ་ཐབས་བཤད་པའི་སྐབས་ཏེ་ཉེར་གསུམ་པ།
གཤིན་རྗེ་མཐིང་གའི་སྒྲུབ་ཐབས།
ཨོཾ་སྭཱ་སྟི། རྡོ་རྗེ་སློབ་དཔོན་དཀྱིལ་འཁོར་གཙོ། །འཇམ་དཔལ་ཁྲོས་པ་གཤིན་རྗེ་གཤེད། །དེ་ལ་གུས་པས་བཏུད་བྱས་ནས། །གཤིན་རྗེའི་རྒྱལ་པོའི་སྒྲུབ་ཐབས་བཤད། །གཏོར་མ་ཤ་ཁྲག་གིས་བརྒྱན་པ་དང༌། ཉ་ཤའི་སྤོས་སོགས་དམ་རྫས་ཚང་བར་བྱས་ཏེ། འཇམ་དཔལ་ཁྲོས་པའི་བདག་བསྐྱེད་སྔོན་དུ་འགྲོ་བས། མཆོད་གཏོར་ཡི་དམ་ལྟར་བྱིན་གྱིས་བརླབས་ལ། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་རཀྟའི་རྒྱ་མཚོའི་དབུས་སུ་ཐོད་མཁར་འབར་བའི་གཞལ་ཡས་ཁང་ཀེང་རུས་ཀྱིས་ཐོག་ཕུབ་པ། དེའི་དབུས་སུ་མེ་རླུང་འཚུབ་མའི་ནང་ན་པད་ཉི་ལ་གནས་པའི་མ་ཧེ་ནག་པོ་དྲེགས་ཤིང་ཁྲོས་པ་དགྲ་བགེགས་ཀྱི་བཾ་ཆེན་བརྫིས་པའི་སྟེང་དུ། ཡ་ལས་དབྱུག་པ་ཡས་མཚན་པ་ཡོངས་སུ་གྱུར་པ་ལས། གཤིན་རྗེ་ཆོས་ཀྱི་རྒྱལ་པོ་སྐུ་མདོག་མཐིང་ནག་ཞལ་གཅིག་ཕྱག་གཉིས་མ་ཧེའི་གདོང་པ་ཅན། ཕྱག་གཡས་རྡོ་རྗེས་མཚན་པའི་ཐོད་དབྱུག་ནག་པོ་འཕྱར་ཞིང༌།
གཡོན་ཞགས་པ་ནག་པོ་དང་བཅས་པའི་སྡིགས་མཛུབ་མཛད་པ། སྐྲ་ཁམ་པ་གྱེན་དུ་བརྫེས་ཤིང༌། མཆེ་བ་གཙིགས་པ། གཅེར་བུ་ལིང་ག་གྱེན་དུ་བསྒྲེང་བ། རབ་ཏུ་འཇིགས་པའི་ཉམས་ཅན་རྒྱན་སྤངས་པ། ཞབས་གཡས་བསྐུམ་གཡོན་བརྐྱང་གི་སྟབས་ཀྱིས་མེ་རླུང་འཚུབ་མའི་ཀློང་ན་མ་ཧེའི་གདན་ལ་བཞུགས་པའོ། །གཡོན་དུ་ཙཾ་ལས་ཡུམ་ཙ་མུཎྜི་ནག་མོ་སྐྲ་དམར་སེར་སིལ་བུར་གྲོལ་ཞིང་ནུ་མ་འཕྱང་བ། བ་ལང་གི་པགས་པ་དང༌། གོས་ནག་གྱོན་ཞིང༌། ཏྲི་ཤུ་ལ་དང༌། ཐོད་པ་ཐོགས་པ་ཆེར་ཁྲོས་པའོ། །མཐའ་སྐོར་དུ་ཡ་བ་ཏི་བེ་ཅོན་འཛིན་པ། ཕྱ་སངས་འཁོར་ལོ་འཛིན་པ། དམིགས་པ་གསལ་ཞིང་འཛིན་པ། རལ་པ་ཚར་དགུ་མདུང་ཐུང་འཛིན་པ། གཤིན་རྗེའི་ཕོ་ཉ་ལྕགས་ཀྱུ་འཛིན་པ། དུས་ཀྱི་ཞགས་པ་བདུད་ཞགས་འཛིན་པ། ཡ་མ་དཎྜི་བེ་ཅོན་འཛིན་པ། ཡ་མ་དཾ་ཥྟི་མཆེ་བ་འབར་བ་འཛིན་པ། དུས་མཚན་མོ་དང༌། གསོད་པ་མོ་དང༌། ནག་མོ་དང༌། ནམ་གྲུ་ཤ་ཀ་ལཱི་ལ་སོགས་པ་གཤིན་རྗེ་དང༌། མ་མོའི་ཚོགས་ཐམས་ཅད་ཀྱིས་ཡོངས་སུ་བསྐོར་བར་གྱུར། རང་གི་སྙིང་ག་ནས་འོད་ཟེར་འཕྲོས་པས། ལྷོ་ཕྱོགས་རིམ་པ་བདུན་གྱི་ས་འོག་གཤིན་རྗེའི་གྲོང་ཁྱེར་སྒོ་མེད་ལྕགས་ཀྱི་མུན་ཁང་བཅུ་དྲུག་ནས། གཤིན་རྗེ་ཆོས་ཀྱི་རྒྱལ་པོ་འཁོར་དང་བཅས་པ་
བཛྲ་ས་མཱ་ཛཿ རུས་སྦལ་གྱི་འདུག་སྟངས་བཅས་ལ། རྡོ་རྗེ་བསྡམས་པ་ལས་སྲིན་ལག་བརྐྱང་བའི་གཤིན་རྗེའི་དམ་རྒྱ་གཡབ་ཅིང༌། ཧཱུཾ། འདི་ནས་ལྷོ་ཡི་ཕྱོགས་རོལ་ན། །དཔག་ཚད་བརྒྱད་ཁྲིའི་ཕ་རོལ་ན། །རིམ་པ་བདུན་གྱི་ས་འོག་ན། །ཐོད་པ་ལྕགས་ཀྱི་གྲོང་ཁྱེར་ན། །ཡི་དྭགས་ཀུན་གྱི་སྡེ་དཔོན་པ། །མ་མོ་ཀུན་གྱི་ཚོགས་རྗེའོ། །གསོན་གཤིན་ཀུན་གྱི་ཟམ་ཁ་བ། །གསོན་པོ་བཀོས་ལ་འདེབས་པ་པོ། །ཤི་བ་ཀུན་གྱི་གཤིན་བུ་རྗེ། །དགེ་བ་ཅན་གྱི་བཏངས་འཛིན་པ། །སྡིག་པ་ཅན་གྱི་ཆད་པ་མཁན། །ལྷ་དང་བཅས་པའི་འཇིག་རྟེན་ན། །ལེགས་ཉེས་ཆོས་བཞིན་སྤྱོད་པ་པོ། །ཆོས་རྒྱལ་གཤིན་རྗེ་ཞེས་བྱ་བ། །འཁོར་བཅས་གནས་འདིར་གཤེགས་སུ་གསོལ། །ཧྲཱིཿཥྟིཿའི་མཐར། ཡ་མ་རཱ་ཛ་ས་པ་རི་ཝཱ་ར་ཨཱ་ཀརྵ་ཡ་ཛཿ ཞེས་སྤྱན་དྲངས། གོང་གི་དམ་རྒྱ་དེ་ཉིད་དམ། རྡོ་རྗེ་ཁུ་ཚུར་གྱི་གུང་མོ་བརྐྱང་བ་དབྱུག་པའི་ཕྱག་རྒྱ་འཕྱར་བས་ཀྱང་རུང་སྟེ། ཧྲཱིཿཥྟིཿའི་མཐར་ཡ་མ་རཱ་ཛ་ས་པ་རི་ཝཱ་ར་ས་མ་ཡ་སྟྭཾ། ཞེས་དམ་ལ་བཞགཨརྒྷཾ་ནས་ཤཔྟའི་བར་གྱིས་མཆོད་པ་བསྡུས་པ་ཞིག་འབུལ། གཤིན་རྗེའི་རྒྱལ་པོ་འཁོར་དང་བཅས། །དམ་ཚིག་དབང་གིས་འདིར་བརྟན་བཞུགས། །མཆོད་པ་ཚུལ་བཞིན་བཞེས་ནས་ཀྱང༌། །ལས་གྲུབ་བར་དུ་བཞུགས་སུ་གསོལ། །ཨོཾ་ཡ་མ་རཱ་ཛ་ས་མ་ཡ་པདྨ་ཀ་མ་ལ་ཡེ་སྟྭཾ། ཛཿཧཱུཾ་བཾ་ཧོཿ གཉིས་སུ་མེད་པར་བསྟིམ།
ལག་པ་གཡས་བེ་ཅོན་གྱི་ཕྱག་རྒྱ་བཅས། གཡོན་པས་སོ་སོའི་ཕྱག་རྒྱ་བཅའ་བའམ། གཏོར་སྣོད་དམ་བཟེད་ཞལ་དུ་མཆོད་པ་བསྟབས་ལ། ཧྲཱིཿཥྟིཿའི་མཐར་ཡ་མ་རཱ་ཛ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་ཧཱུཾ། དེ་བཞིན་དུ། པཱདྱཾ། བཛྲ་པུཥྤེ་པཱུ་ཛ་ས་མ་ཡེ་ཧཱུཾ། དེ་ནས་ནཻ་ཝི་དྱའི་བར་རིགས་འགྲེ། རོལ་མོའི་སྒྲ་བསྒྲགས་ཤིང༌། ཨོཾ་བཛྲ་ཤཔྟ་ཨཱཿཧཱུཾ། ཞེས་བརྗོད། བཅོམ་ལྡན་ཆོས་རྗེ་འཇམ་དབྱངས་སྤྱན་སྔ་རུ། །བདུད་འདུལ་བསྟན་པ་བསྲུང་བར་ཞལ་བཞེས་པ། །ལས་ཀྱི་གཤིན་རྗེ་མ་མོ་མཁའ་འགྲོ་དང༌། །འབྱུང་པོ་རོ་ལངས་ཅི་བགྱི་བཀའ་ཉན་སོགས། །ཕྱི་ནང་གསང་བའི་དམ་ཅན་མ་ལུས་ལ། །བདག་གི་རེ་བའི་སེམས་ཀྱིས་འདུད་ཅིང་མཆིས། །ཞེས་བསྟོད། བཟླས་པའི་དམིགས་པ་གསལ་བཏབ་ལ། ཨོཾ་ཀ་ལ་རཱུ་པ་ཧཱུཾ་ཕཊ། ཤིན་ཏུ་ཉེ་སྙིང༌། ཨོཾ་ཀ་ལ་རཱུ་པ་ཡ་མ་རཱ་ཛ་ཡ་ཧཱུཾ་ཕཊ། ཉེ་སྙིང་དང༌། ཨོཾ་ཀ་ལ་རཱུ་པ་བྷི་མ་ཡཀྵ་ཧཱུཾ་མཧཱ་རོ་ཥ་ཎ་ར་སིདྡྷི་ཡེ་ཡ་མ་རཱ་ཛ་ཡ་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་པའི་སྙིང་པོ་རྣམས་ཅི་འགྲུབ་ཏུ་བཟླས། ཨོཾ་ཧྲཱིཿཙ་མུཎྜི་ཧཱུཾ་ཕཊ། ཅེས་ཡུམ་གྱི་སྔགས་ཀྱང་བཟླ། མཐར་ཨོཾ་ཀ་ལ་རཱུ་པ་སརྦ་བིགྷྣཱན་ཤ་ཏྲུ་ན་མཱ་ར་ཡ་ཨི་དཾ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི་སྭཱཧཱ། ཞེས་ལན་བདུན་གྱིས་གཏོར་མ་ཕུལ། ཨོཾ་བཛྲ་ཨརྒྷཾ་སྭཱཧཱ་ནས། ཤཔྟ་ཨཱཿཧཱུཾ་གི་བར་གྱིས་མཆོད། འཆི་བདག་དམ་ཅན་གཤིན་རྗེ་ནི། །འཇམ་པའི་དབྱངས་ཀྱི་ཕྱག་བརྙན་ཏེ། །མ་གཤིན་འབྱུང་པོའི་ཚོགས་བཅས་ལ། །མཆོད་ཅིང་
བསྟོད་དེ་ཕྱག་ཀྱང་འཚལ། །འཁོར་བཅས་བདག་ལ་དགོངས་སུ་གསོལ། །བདག་ནི་རྣལ་འབྱོར་སྒྲུབ་པ་པོ། །འཇམ་དཔལ་གཞོན་ནུའི་ཐུགས་ཀྱི་སྲས། །གཤིན་རྗེ་གཤེད་ཀྱི་རྣལ་འབྱོར་པ། །རྫོགས་པའི་བྱང་ཆུབ་སྒྲུབ་པའི་ཕྱིར། །བསམ་པ་བྱང་ཆུབ་སེམས་ཀྱིས་བརླན། །རྒྱུད་ནི་ཡེ་ཤེས་རྡོ་རྗེ་འཆང༌། །གཟི་བྱིན་སྐུ་གསུང་ཐུགས་ཀྱིས་བསྐྱེད། །དོན་ནི་འགྲོ་བ་ཡོངས་ཀྱི་དོན། །ལས་ནི་སངས་རྒྱས་ཀུན་གྱི་ལས། །བཀའ་ནི་དཀོན་མཆོག་གསུམ་གྱི་བཀའ། །རྒྱལ་པོ་འཁོར་དང་བཅས་པ་རྣམས། །མཆོད་སྦྱིན་གཏོར་མ་འདི་བཞེས་ལ། །ནས། ཡིད་ལ་འདོད་པ་ཀུན་འགྲུབ་ཤོག།གི་བར་བརྗོད། དྲག་པོའི་ལས་ཀྱི་དོན་ཡིན་ན། འཆི་བདག་ནག་པོ་ལྷོ་ཕྱོགས་ཀྱི། །སོགས་ཀྱིས་འཕྲིན་ལས་བཅོལ། གང་ལྟར་ཡང་གཏོར་མ་ལྷོ་ཕྱོགས་སུ་གཏོང༌། ཡིག་བརྒྱ། བཟོད་གསོལ། གཤེགས་གསོལ། བདག་བསྲུང༌། བཀྲ་ཤིས་རྣམས་བྱའོ། །ལས་གཤིན་མ་ཧེའི་གདོང་དང༌། ལིངྒ་གྱེན་བསྒྲེང་དུ་བྱེད་པ་ནི། འཇིགས་བྱེད་ཁོ་ན་དང་སྦྲེལ་བའི་དབང་དུ་བྱས་པ་རྭ་བའི་མན་ངག་ཁྱད་པར་ཅན་ཡིན་ལ། གཞན་དུ་ཁྲོ་ཞལ་དུ་ཡང་བྱ་ཞིང༌། མི་མགོའི་ཕྲེང་བ་ཙམ་གྱི་རྒྱན་དང༌། རུས་འཕྲེང་ཙམ་དང༌། དུར་ཁྲོད་ཀྱི་ཆས་རྫོགས་པ་སོགས་ཅི་རིགས་སུ་འབྱུང་བ་རྣམས་ནི་འདམ་ཀ་དང༌། ལས་སོ་སོའི་གནས་སྐབས་ཡིན་པས། དེ་དང་དེའི་མན་ངག་ཤེས་པར་བྱའོ། །བཅུ་གསུམ་མར་བྱེད་ན། དྲག་པོའི་
གཞལ་ཡས་ཁང་གྲུ་བཞི་སྒོ་བཞིའི་དབུས་སུ་འཁོར་ལོ་སྔོན་པོ་རྩིབས་བཞི་པ། ལྟེ་བ་ལ་གཙོ་བོ་ཡབ་ཡུམ། རྩིབས་བཞི་ལ་ཡ་ལས་གཤེད་པོ་བཞི་ནག་པོ། སྒོ་བཞིར་གཤིན་རྗེ་ཕོ་ཉ་སོགས་གྱིང་ཆེན་བཞི་དཀར་པོ། གྲྭ་བཞིར་ཀ་ལ་ར་ཏྲི་ལ་སོགས་པ་མ་མོ་བཞི་དམར་མོ། ཕྱག་མཚན་དང༌། བཞོན་པ་བསྐུལ་ཞིང་བསྐྱོད། ཉང་སྟོད་ཨཱརྱའི་ལུགས་ཀྱི་བཅུ་གསུམ་མ་ལ་ནི། ཡ་ཝ་ཏི་སོགས། ཆུ་སྲིན། སེང་གེ འབྲུག་དང༌། བྱ་ཁྱུང་རྣམས་ལ་ཆིབས་པ། གྱིང་ཆེན་བཞི་སྟག་གཟིག་དོམ་རྣམས་ལ་ཆིབས་པར་བྱས་ཡོད། ལྷོ་ཕྱོགས་ཀྱི་ལས་གཤིན་ལ། ཤར་དུ་ཡ་བ་ཏི། ལྷོར་ཆོས་ཀྱི་རྒྱལ་པོ་ཞེས་སོགས་གཤིན་རྗེ་ཕོ་བརྒྱད་མོ་བརྒྱད་ཀྱིས་བསྐོར་བར་བྱེད་པ་ནི། མི་ལེགས་ཏེ། ཕོ་བརྒྱད་ཀྱི་ནང་ཚན་ཆོས་ཀྱི་རྒྱལ་པོ་ཉིད་གཙོ་བོ་ཡིན་པའི་ཕྱིར་རོ། །འདིའི་རྗེས་གནང་ནི། གཙོ་རྐྱང་ལ་སྐུ་གསུང་ཐུགས་ཀྱི་རྗེས་གནང་གཏོར་དབང་དང་བཅས་པ་དཀྱུས་མ་རེ་མཛད་པའི་ལུགས་ཀྱང་ཡོད་ཅིང༌། འཁོར་བཅས་ཀྱི་དབང་དུ་བྱས་ནས། མཎྜལ་གྲུ་གསུམ་མཐིང་ནག་ཚོམ་བུ་ནག་པོ་ཅན་གྱི་སྟེང་དུ། རྟེན་གཏོར་སྙིང་གཟུགས་མའམ་གྲུ་གསུམ་བཀོད། མཐའ་མཆོད་གཏོར་གྱིས་བསྐོར། གཏོར་མ་གཉིས་ཀར་ལ་བ་དན་ནག་པོ་བཙུགས། སྔོན་འགྲོ་གཏོར་མ་བཏང༌། བདག་བསྐྱེད་ནས་མདུན་བསྐྱེད་ཀྱི་འདོད་དོན་གསོལ་བཏབ་ཀྱི་བར་གོང་བཞིན་བྱས་ལ། སློབ་མས་མཎྜལ་ཕུལ། ཀུན་མཁྱེན་ཡེ་ཤེས་ཕུང་པོ་ཅན། །སོགས་ཀྱིས་གསོལ་བ་བཏབ། གུར་ནས་འབྱུང་བའི་རྒྱུན་བཤགས་དང༌། རིགས་ལྔའི་སྡོམ་བཟུང་བྱ། སློབ་མ་གཤིན་རྗེ་གཤེད་དུ་བསྐྱེད། མདུན་གྱི་གཏོར་མ་ཆོས་རྒྱལ་འཁོར་
བཅས་སུ་བསྐྱེད་ཅིང༌། རོལ་མོའི་སྒྲ་དང་བཅས་སྤྱན་དྲངས། དམ་བཞག་མཆོད་བསྟོད་དགུག་གཞུག་རྣམས་བྱ། སློབ་མའི་སྙིང་གར་པད་ཉི་ལ་ཡ་དང་ཧཱུཾ་བརྩེགས་པའམ། སྙིང་གར་ཉི་མ་ལ་ཧཱུཾ་ཡིག་འབར་བ། ལྟེ་འོག་ཏུ་ཉི་མ་ལ་ཡ་ཡིག་གསལ་བཏབ་ཀྱང་རུང་སྟེ། སློབ་དཔོན་གཤིན་རྗེ་གཤེད་ཀྱི་སྐུར་གསལ་བའི་ཐུགས་ཀའི་འོད་ཀྱིས་མདུན་བསྐྱེད་ཀྱི་ཐུགས་རྒྱུད་བསྐུལ། ཆོས་ཀྱི་རྒྱལ་པོའི་སྐུ་གཉིས་པ་ཞིག་ཆད་དེ། སྙིང་གའམ་ལྟེ་བའི་ཡ་ལ་ཐིམ་པར་བསམས་ལ། སྐུ་འདྲ་ཙ་ཀ་ལི་གཏད་དེ། གཏི་མུག་ཁྲོས་པ་ཡ་མ་རཱ་ཛ་ནི། །གཏི་མུག་ཅན་གྱི་རྒྱུད་ལ་ཁྱབ་པར་འཇུག།སེམས་ཅན་གཏི་མུག་ཡོངས་སུ་སྦྱོང་བའི་ཕྱིར། །མེ་ལོང་ཡེ་ཤེས་དམ་ཚིག་ཁྱོད་ལ་སྦྱིན། །ཧྲཱིཿཥྟིཿའི་མཐར་ཀ་ལ་རཱུ་པ་ཡ་མ་རཱ་ཛ་ཀཱ་ཡ་ཨ་བྷི་ཥིཉྩ་ཨོཾ། སྐུའི་རྗེས་གནང་ངོ༌། །དེ་ཉིད་དང་འདྲ་བ་ལས་སྔགས་འཕྲེང་བྱུང་སྟེ། ལྟེ་བའི་ཡ་ལ་ཐིམ། སྔགས་བྱང་ལག་ཏུ་གཏད། གོང་གི་ཚིགས་བཅད་ལ་གཏི་མུག་ཅེས་པའི་གནས་སུ་འདོད་ཆགས་ཞེས་པ་དང༌། མེ་ལོང་ཡེ་ཤེས་ཀྱི་གནས་སུ་སོར་རྟོག་ཡེ་ཤེས་དང༌། ཀཱ་ཡའི་གནས་སུ་ཝཱཀ་ཞེས་པ་བཅུག་སྟེ། གསུང་གི་རྗེས་གནང་ངོ༌། །དེ་བཞིན་དུ་ཕྱག་མཚན་བསྟིམ་པའི་དམིགས་པ་དང༌། དབྱུག་ཞགས་ལག་ཏུ་གཏད་དེ། ཞེ་སྡང་དང༌། ཆོས་དབྱིངས། ཙིཏྟ་ཞེས་འདོན་པ་སྤོས་ཏེ་ཐུགས་ཀྱི་རྗེས་གནང་ངོ༌། །དེ་བཞིན་དུ་འོད་ཟེར་སྣ་ལྔ་བསྟིམ་ཞིང༌། ཆོས་ཀྱི་རྒྱལ་པོའི་རྟོག་པའི་དཔེ་ལག་ཏུ་གཏད་དེ། ང་རྒྱལ།
མཉམ་ཉིད། གུ་ཎ། ཞེས་འདོན་པ་སྤོས། ཡོན་ཏན་གྱི་རྗེས་གནང་ངོ༌། །ལྟེ་བའི་ཡ་ཡིག་གི་འོད་ཀྱིས་འཕྲིན་ལས་རྣམ་པ་བཞི་སྒྲུབ་པར་བསམས་ལ། བཤན་པ་ཕོ་མོའི་འཁོར་ལོ་ལག་ཏུ་གཏད། ཕྲག་དོགབྱ་གྲུབ། ཀརྨ། ཞེས་འདོན་པ་སྤོས་ཏེ། འཕྲིན་ལས་ཀྱི་རྗེས་གནང་ངོ༌། །དེ་ནས་གཏོར་མ་ལག་ཏུ་གཏད་དེ་བཀའ་བསྒོ་དྲག་ཏུ་བྱ། སློབ་མ་དེ་བསྙེན་པ་བྱེད་པ་ཡིན་ན་བཟླས་ལུང་ཡང་སྤྱི་དང་མཐུན་པར་སྦྱིན་ནོ། །སློབ་མའི་རྗེས་ཀྱི་བྱ་བ་དང༌། མདུན་བསྐྱེད་ཀྱི་རྗེས་ཆོག་ནི་སྤྱིས་རིགས་འགྲེའོ། །འཇམ་པའི་དབྱངས་ཀྱི་བཀའ་གཉན་མཆོགདྲེགས་པ་ཀུན༵་གྱི་མཐར་ཐུག་པའི། །སྒྲུབ་ཐབས་རབ་དག༵འ་འདི་སྤེལ་བས། །སྙིང༵་པོ༵འི་བསྟན་པ་རྒྱས་པར་ཤོག།ཆོས་རྒྱལ་ལས་ཀྱི་གཤིན་རྗེ་མཐིང་གའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ལས་གཤིན་མ་རུ་རྩེ་བཞི་སྐོར་དུ་གྲགས་པའི་སྒྲུབ་ཐབས།
ཨོཾ་སྭཱ་སྟི། གཤིན་རྗེ་འཇོམས་པ་ལ་བཏུད་ནས། །གཤིན་རྗེའི་རྒྱལ་པོའི་སྒྲུབ་ཐབས་ནི། ཁྱད་པར་རྣམ་དབྱེ་མདོར་བསྡུས་ཙམ། །བརྗོད་འགྱུར་འདི་ལ་མཉན་པར་གྱིས། །ལས་ཀྱི་གཤིན་རྗེ་མཐིང་གའི་སྒྲུབ་ཐབས་ཤེས་པས་འདི་ལ་འཇུག་པར་བྱ་སྟེ། རང་གི་མདུན་དུ་མེ་རླུང་གི་རང་བཞིན་དམར་ནག་འབར་བའི་དཀྱིལ་འཁོར་དབུས། སྐད་ཅིག་གིས་ལས་ཀྱི་གཤིན་རྗེ་དམར་པོ་རབ་ཏུ་འཇིགས་པ། གཡས་རལ་གྲི་མེ་འབར་བ་འཕྱར་བ། གཡོན་རླུང་གི་འཁོར་ལོ་འབར་བ་སྐོར་བ། ཁ་གདངས་ཤིང་ལྗགས་འགྲིལ་བ། དམར་ལ་ཟླུམ་པའི་སྤྱན་གསུམ་པ། སྨ་ར་ཨག་ཚོམ་ཁམ་སེར་གྱེན་དུ་གཡེངས་པ། ཞིང་པགས་ཀྱི་སྟོད་གཡོགས་ཅན། མ་ཧེའི་
གདན་ལ་གཡོན་བརྐྱང་གིས་བཞུགས་པ། གཡོན་དུ་ཡུམ་ཨེ་ཀ་ཛ་ཊི་སྐུ་མདོག་ནག་མོ་རལ་པ་མུན་ལྟར་གཏིབས་པ། ལྕགས་ཀྱུ་དང༌། ཐོད་ཁྲག་འཛིན་པ། མི་ལྤགས་གྱོན་ཞིང་རྒྱུ་མས་ཐོད་བྱས་པ། ཡབ་ཡུམ་གཉིས་ལ་འཁོར་གཤིན་རྗེ་དང་བདུད་མོ་འབུམ་འབུམ་གྱིས་བསྐོར་བའོ། །དེའི་ཐུགས་ཀ་ནས་ཛ་བཞི་སྤྲོས་པ་ལས་ཤར་དུ་སྲིན་པོ་མ་རུ་རྩེ། ལྷོ་རུ་གཤིན་རྗེ་མ་རུ་རྩེ། ནུབ་ཏུ་བདུད་པོ་མ་རུ་རྩེ། བྱང་དུ་གནོད་སྦྱིན་མ་རུ་རྩེ་རྣམས་དམར་པོ་སྤུ་གྲི་དང༌། ཞགས་པ་འཛིན་པ། བསེ་བྱའི་སྟེང་ན་བཞུགས་པའོ། །སྤྱན་འདྲེན་གྱི་ཚིགས་བཅད་ཀྱི་རྗེས་ལ། སྙིང་པོ་མཐར་ཨཱ་གཙྪ། ཨཱ་གཙྪ། ས་མ་ཡ་ཏིཥྛནྟུ་ཞེས་བརྗོད། བཟླས་པའི་སྔགས་ནི། ཨོཾ་ཡ་མ་རཱ་ཛ་ཨེ་ཀ་ཛ་ཊི་ཡ་ཧོ་ཕཊ། མ་ཧོ་ཕཊ། ཤུ་ཧོ་ཕཊ། མ་རུ་རྩེ་ཕཊ། ཌཾ་ཌཾ་ཕཊ། ཉི་ཕཊ། ཧཱུཾ་ཧཱུཾ་ཕཊ། ཅེས་པའོ། །གཏོར་སྔགས་སྙིང་པོའི་མཐར་ཨི་དཾ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི་བཏགས་པས་འབུལ། བསྟོད་པ་ནི། ཁྲག་མཚོ་ཆེན་པོའི་ཀློང་དཀྱིལ་ནས། །བསྐལ་པ་མེ་ལྟར་འབར་བའི་དབུས། །གཤིན་རྗེའི་དབང་པོ་མ་རུ་རྩེ། །གཤིན་རྗེ་འབུམ་དང་བཅས་ལ་བསྟོད། །རླུང་ནག་འཚུབ་མའི་དཀྱིལ་འཁོར་ན། །ཨེ་ཀ་ཛ་ཊི་མ་མོ་འབུམ། །ལས་བྱེད་བཞི་དང་འཁོར་གཡོག་ནི། །གྲངས་ལས་འདས་པ་རྣམས་ལ་བསྟོད། །ཅེས་པ་རྣམས་འདོན་པ་སྤོས་ལ། ལྷག་མ་
མཐིང་གའི་སྐབས་བཞིན་གཞུང་བསྲང་ངོ༌། །རྗེས་གནང་ལ། རྡོ་རྗེ་འཛིན་པ་སོགས་ཀྱིས་གསོལ་བ་འདེབས། སྐུའི་རྗེས་གནང་ནག་པོ་དང་འདྲ། གསུང་བཟླས་ལུང༌། ཐུགས་གཏོར་དབང་རྣམས་སོ། །ཆོས་སྐོར་ཀུན༵་ལས་ཆེས་དཀོན་པ། །རྭ་ལུགས་གཤིན་རྗེ་དམར་པོ་ཡི། །ཡིག་སྣ་མདོར་བསྡུས་ཡིད་དག༵འི་གནས། །འདི་ཡང་སྙིང༵་པོ༵ར་དགོས་པས་བྲིས། །ལས་གཤིན་མ་རུ་རྩེ་བཞི་སྐོར་དུ་གྲགས་པའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ལས་གཤིན་དམར་མོ་ཁྲག་མདོག་ཏུ་གྲགས་པའི་སྒྲུབ་ཐབས།
ཨོཾ་སྭཱ་སྟི། འཇམ་དཔལ་ཡ་མནྟ་ཀ་ལ། །བཏུད་ནས་ལས་ཀྱི་གཤིན་རྗེ་ནི། །སྲིན་པོ་དམར་ནག་ཁྲོས་ཚུལ་གྱི། །སྒྲུབ་ཐབས་ཅུང་ཟད་བརྗོད་པར་བྱ། །འདིར་ཆོ་གའི་སྤྱི་རྣམས་ལས་གཤིན་རྗེ་མཐིང་ག་ཁོ་ན་བཞིན་སྦྱར་ལ་ཁྱད་པར་ནི། རང་གི་ཐུགས་ཀ་ནས་ཡ་ཡིག་མདུན་དུ་སྤྲོས་པ་ལས་ལས་ཀྱི་གཤིན་རྗེ་དམར་ནག་ཆེར་ཁྲོས་ཤིང་འཁྲུགས་པ། ལག་གཡས་རྡོ་རྗེ་རྩེ་ལྔ་དང་མི་སྙིང་འཕྱར་བ། གཡོན་ཞགས་པ་དང་བཅས་པའི་སྡིགས་མཛུབ་མཛད་པ། སྟག་ལྤགས་ཀྱི་ཤམ་ཐབས་ཅན། གཡོན་བརྐྱང་བའི་བཞུགས་པའོ། །དེའི་གཡོན་དུ་མ་སྤྲོས་པ་ལས། དུས་མཚན་མ་དམར་ནག་རལ་གྲི་དང་ཐོད་ཁྲག་འཛིན་པ། ཏྲེའུ་ལ་ཆིབས་པ། སྤྲིན་དང་གློག་དམར་གྱི་སྟེང་ན་བཞུགས་པའོ། །སྤྱན་འདྲེན་གྱི་ཚེ། འདི་ཉིད་ཀྱི་སྒྲུབ་ཡིག་ནས་བརྗོད་པའི་ཚིགས་བཅད་རྣམས་བརྗོད་ཀྱང་རུང་ལ། མཐར་སྙིང་པོའི་སྔགས་དྲག་ཏུ་བརྗོད། བཟླས་པའི་སྐབས། དཔའ་བོ་ཆེན་པོ་བདག་ཅི་བགྱི། །ཞེས་བཀའ་ནོས་པར་བསམས་ལ། ཏྲཀ་རཀྴ་ཡ།
སྙིང་ཁ་ལ་ཏྲཀ །རཀྴ་ཡ། བཛྲ་དུན་ཏི་བཾ། བཛྲ་དུན་ཏི་རྦད། ཛཿཛཿ ཞེས་བཟླ། གཏོར་སྔགས་ནི། སྙིང་པོའི་མཐར། ཐུན་ཨ་ཛ་ཛཿགོ་ཤ། ཨོཾ་རུ་ལུ་རུ་ལུ་བྷྱོ་བྷྱོ་ཧཱུཾ་ཛ་ཛཿ བཱ་ལིཾ་གྲྀཧྞ་ཁ་ཁ་ཁཱ་ཧི་ཁཱ་ཧི། ཞེས་པའོ། །སྒོས་ཀྱི་བསྟོད་པ་བསྡུས་པ་ནི། ཧཱུཾ། ཤར་ཕྱོགས་དཀར་པོ་དུང་གི་གཞལ་ཡས་ནས། ཁྲག་མདོག་དམར་པོ་བསེའི་ལན་ཕྲན་ཅན། །ཤིན་ཏུ་མི་བཟད་གཏུམ་པོ་ཆེན་པོའི་སྐུ། །ལྕམ་དྲལ་འཁོར་དང་བཅས་ལ་བདག་བསྟོད་དོ། །རྒྱས་པར་ནི་སྒྲུབ་ཡིག་ཏུ་བལྟའོ། །རྗེས་གནང་ནི་འདི་དང་མ་རུ་རྩེ་བཞི་སྐོར་གཉིས་ཀ་ལ། ཆོས་འབྱུང་གྲུ་གསུམ་དམར་པོ་ལ་གཏོར་མ་ཟུར་དགུ་པ་འགོད་པར་མཐུན། རྗེས་གནང་དངོས་ཀྱང་འདྲ་བ་ལ། འདི་ལ་གསོལ་བཏབ་ནི། རྡོ་རྗེ་སློབ་དཔོན་དགོངས་སུ་གསོལ། །སངས་རྒྱས་བསྟན་པ་བསྲུང་བའི་ཕྱིར། །མགོན་པོ་ཆེན་པོ་ལྕམ་དྲལ་གྱི། །རྗེས་སུ་གནང་བ་སྩལ་དུ་གསོལ། །ཞེས་པ་ལན་གསུམ་མཛད་དོ། །དགྲ་བགེགས་ཀུན༵་ལ་དྲག་ཤུལ་གྱི། །ལས་རྣམས་སྒྲུབ་ལ་ཆེས་དག༵འ་བ། །གང་དེའི་སྒྲུབ་ཡིག་རྣམས་ལས་ནི། །སྙིང༵་པོ༵་ཁོལ་བྱུང་ཙམ་ཞིག་བྲིས། །ལས་གཤིན་དམར་མོ་ཁྲག་མདོག་ཏུ་གྲགས་པའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
དཔའ་བོ་དུར་ཁྲོད་བདག་པོ་ལྕམ་དྲལ་གྱི་སྒྲུབ་ཐབས།
ཨོཾ་སྭཱ་སྟི། དཔལ་ལྡན་ཧེ་རུ་ཀར་བཏུད་ནས། །དུར་ཁྲོད་བདག་པོའི་སྒྲུབ་ཐབས་ནི། །གཏོར་ཆོག་རྗེས་གནང་དང་འབྲེལ་བ། །མདོ་ཙམ་བདག་གིས་བཤད་པར་བྱ། །མཆོད་གཏོར་བཤམས་ལ། བདེ་
མཆོག་གམ་རྡོ་རྗེ་རྣལ་འབྱོར་མའི་བདག་བསྐྱེད་སྔོན་དུ་འགྲོ་བས། མཆོད་པ་དང་གཏོར་མ་ཡི་དམ་གྱི་ཆོ་ག་ལྟར་བྱིན་གྱིས་བརླབས། དེ་ནས་རང་གི་མདུན་གྱི་ནམ་མཁར་ཧཱུཾ་ཡིག་ལས་ཨེ་ཆད་པ་ལས་ཡཾ་གྱི་རླུང་གི་དཀྱིལ་འཁོར། རཾ་ལས་རཀྟའི་རྒྱ་མཚོ། སུཾ་ལས་ཞིང་ཆེན་གྱི་གཡང་གཞི། ཀེཾ་ལས་ཀེང་རུས་ཀྱི་རི་རབ། རཾ་ལས་ཉི་མའི་དཀྱིལ་འཁོར། སུཾ་ལས་ཐོད་མཁར་གྱི་གཞལ་ཡས་ཁང༌། དེའི་ནང་དུ་པཾ་ལས་པདྨ་མཎྜ་ལ་ཧཱུཾ་གིས་པདྨའི་གདན། མ་སུརྱ་མཎྜ་ལ་ཧཱུཾ་གིས་ཉི་མའི་གདན། ཨ་ཙཎྜ་མཎྜ་ལ་ཧཱུཾ་གིས་ཟླ་བའི་གདན་ཏེ། གདན་གཉིས་སུ་གྱུར། གདན་གཉིས་ཀྱི་སྟེང་དུ་ས་བོན་ཧཱུཾ་དང་ཨཾ་ལས་དུང་དང་མགྲོན་བུ་ཧཱུཾ་དང་ཨཾ་གིས་མཚན་པ་ལས། དཔའ་བོ་དུར་ཁྲོད་བདག་པོ་ཡབ་ཡུམ་སྐུ་མདོག་དཀར་ལ་འོད་ཟེར་འཕྲོ་བ། ཀེང་རུས་ཤིན་དུ་འཇིགས་པའི་གཟུགས་ཅན། ཞལ་གཅིག་ཕྱག་གཉིས་སྤྱན་གསུམ་བགྲད་པ། ལྗགས་འགྲིལ་བ། མཆེ་བ་གཙིགས་པ། ཕྱག་གཡས་ཐོད་སྐམ་གྱི་དབྱུག་པ་ནམ་མཁའ་ལ་འཕྱར་ཞིང༌། གཡོན་པ་ཐོད་པ་ཁྲག་གིས་གང་བ་ཐུགས་ཀར་བཟུང་ནས་ཞལ་དུ་གསོལ་བ། ཞབས་གཡོན་བརྐྱང་གི་བརླ་ལ་གཡས་བསྐུམ་པའི་སོར་མོ་རྣམས་བསྟད་པའི་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པ། དར་སྣ་ཚོགས་ཀྱི་ཤམ་ཐབས་ཅན། རིན་པོ་ཆེའི་དབུ་
རྒྱན་དང༌། སྙན་ཆས་བརྒྱན་པ། ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་ཡབ་ཡུམ་འཁོར་འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་དཔག་ཏུ་མེད་པས་བསྐོར་བ་གཉིས་སུ་གྱུར། དེ་གཉིས་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས་པས། ནུབ་ཕྱོགས་ཨུ་རྒྱན་མཁའ་འགྲོའི་ཕོ་བྲང་ནས། དཔའ་བོ་དུར་ཁྲོད་བདག་པོ་ཡབ་ཡུམ་གཉིས་ལ་འཁོར་འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་དཔག་ཏུ་མེད་པས་བསྐོར་བ། ཨོཾ་བཛྲ་ས་མཱ་ཛཿ ཧཱུཾ། དཔལ་ལྡན་མཐུ་སྟོབས་དབང་ཕྱུག་ཆེ། །འཕྲིན་ལས་རྣམ་བཞིའི་དོན་མཛད་པ། །དད་དང་དམ་ཚིག་ཆེན་པོ་ཡི། །གནས་འདི་ཉིད་དུ་གཤེགས་སུ་གསོལ། །ཤྲི་སྨ་ཤ་ན་ཨ་དྷི་པ་ཏ་ཡེ། ཨེ་ཧྱེ་ཧི་པདྨ་ཀ་མ་ལ་ཡེ་སྟྭཾ། ཤྲི་སྨ་ཤ་ན་ཨ་དྷི་པ་ཏི་མཧཱ་པི་ཤཱ་ཙི་ཨརྒྷཾ་ནས་ཤཔྟ་ཨཱཿཧཱུཾ། ཨོཾ་གྲྀ་རཱ་ཛ་གྲྀ་རཱ་ཛ་ཀུ་མ་ཀུ་མ་ཁུཾ་ཐིས་སྭཱཧཱ། དཔའ་བོ་དུར་ཁྲོད་བདག་པོ་ལྕམ་དྲལ་གྱི་ཞིལ་དུ་མཆོད་པར་འབུལ་ལོ། །ཨོཾ་ཨཱཿཧཱུཾ། རྒྱལ་བའི་ཐུགས་ཀྱི་འཕྲིན་ལས་ཀུན། །མ་ལུས་གདུག་པ་འདུལ་བའི་ཕྱིར། །འཇིགས་པའི་སྐུར་སྟོན་འདོད་དོན་སྟེར། །དུར་ཁྲོད་གནས་ཀྱི་བདག་པོར་བསྟོད། །དཔལ་འཁོར་ལོ་སྡོམ་པའི་ལྷ་ཚོགས་ཀྱིས་དབང་
བསྐུར། སྐུ་གང་དྲི་མ་དག ཆུའི་ལྷག་མ་ཡར་ལུད་པ་ལས། འཁོར་ལོ་བདེ་མཆོག་ལྷན་ཅིག་སྐྱེས་པ་རེ་རེས་དབུ་བརྒྱན། ཨོཾ་བཛྲ་ས་མ་ཡ་སྟྭཾ། ས་མ་ཡ་ཧོ། དཔའ་བོ་དུར་ཁྲོད་བདག་པོ་ལྕམ་དྲལ་བྲན་གཡོག་བཀའ་སྡོད་དང་བཅས་པ་རྣམས་ཀྱིས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ། དཔལ་འཁོར་ལོ་སྡོམ་པའི་ལྷ་ཚོགས་རྣམས་དང༌། དཔལ་ལྡན་བླ་མ་དམ་པ་རྣམས་ཀྱི་བཀའ་དང་དམ་ལས་མ་འདའ་བར་རྣལ་འབྱོར་པ་བདག་ཅག་འཁོར་དང་བཅས་པ་ལ་གནོད་ཅིང་འཚེ་བའི་དགྲ་དང་ཆོམ་རྐུན་ཐམས་ཅད་ཚར་གཅོད་པའི་འཕྲིན་ལས་མཛད་དུ་གསོལ། ཨོཾ་གྲཱྀ་རཱ་ཛ་གྲཱྀ་རཱ་ཛ། ཀུ་མ་ཀུ་མ་ཁུཾ་ཐིས་སྭཱཧཱ། ཤྲི་སྨ་ཤ་ན་ཨ་དྷི་པ་ཏི་མཧཱ་པི་ཤཱ་ཙི་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་ཕུལ། ཤྲི་སྨ་ཤ་ན་ཨ་དྷི་པ་ཏི་མཧཱ་པི་ཤཱ་ཙི་ཨརྒྷཾ་སོགས་ཀྱིས་མཆོད། ཨོཾ་གྲཱྀ་རཱ་ཛ་གྲཱྀ་རཱ་ཛ། ཀུ་མ་ཀུ་མ་ཁུཾ་ཐིས་སྭཱཧཱ། དཔའ་བོ་དུར་ཁྲོད་བདག་པོ་ལྕམ་དྲལ་གྱི་ཞལ་དུ་མཆོད་པར་འབུལ་ལོ། །ཨོཾ་ཨཱཿཧཱུཾ། ཧཱུཾ། རྒྱལ་བའི་ཐུགས་ཀྱི་འཕྲིན་ལས་ཀུན། །མ་ལུས་གདུག་པ་འདུལ་བའི་ཕྱིར། །འཇིགས་པའི་སྐུར་སྟོན་འདོད་དོན་སྟེར། །དུར་ཁྲོད་གནས་ཀྱི་བདག་པོར་བསྟོད། །རྣམ་དཀར་ཀེང་རུས་དག་པའི་གཟུགས། །འཕྲིན་ལས་རྣམ་བཞི་ཐོགས་མེད་པ། །གང་ལ་ཅི་འདོད་དངོས་གྲུབ་ཀུན། །ཉེ་བར་
སྩོལ་མཛད་ཁྱོད་ལ་བསྟོད། །ཡང་དག་ལམ་ལ་ཉེར་གནས་ཀྱང༌། །ལུས་ཅན་བདེ་ལ་འགོད་མཛད་པའི། །སྲིད་པའི་འཆིང་བ་ཀུན་ལས་སྐྱོབས། །ཕན་བདེ་ཀུན་སྩོལ་ཁྱོད་ལ་བསྟོད། །གང་གིས་ཁྱོད་བསྒྲུབས་ཁྱོད་མཆོད་ན། །དམ་རྫས་ཇི་བཞིན་ཉེར་དགོངས་ནས། །ཇི་ལྟར་གསོལ་བ་བཏབ་པ་བཞིན། །བདག་ལ་དངོས་གྲུབ་མ་ལུས་སྩོལ། །མཆོད་སྦྱིན་གཏོར་མ་རྒྱ་མཚོ་དང༌། །དངོས་གྲུབ་ཀུན་འབྱུང་དམ་རྫས་ཀྱིས། །དཔལ་ལྡན་བསྟན་སྲུང་འཁོར་བཅས་རྣམས། །འཕྲིན་ལས་གང་བཅོལ་སྒྲུབ་པར་མཛོད། །རྗེས་ཡིག་བརྒྱ། བཟོད་གསོལ། གཤེགས་བསྡུ། བདག་བསྲུང༌། སྨོན་ལམ་བཀྲ་ཤིས་རྣམས་སྤྱི་དང་འདྲའོ། །འདིའི་རྗེས་གནང་བྱེད་པར་འདོད་པས། གཏོར་མ་སྟོད་ཟུར་གསུམ། སྨད་ཟླུམ་པོ་མཐེབ་ཀྱུས་བསྐོར་བ་མར་ལ་སོགས་པའི་རྒྱན་ཀྱིས་བརྒྱན་པ། དར་དཀར་པོའི་ཅོད་པན་དང༌། ཡབ་ཡུམ་གྱི་ཙ་ཀ་ལི་གཟུགས། ཆུ་གཉིས་སྔོན་དུ་འགྲོ་བའི་ཉེར་སྤྱོད་ལྔ་བཤམ། རང་གི་མདུན་དུ་ནང་མཆོད་རྡོར་དྲིལ་བཞགཡི་དམ་གྱི་བདག་བསྐྱེད་སྔོན་དུ་འགྲོ་བས། མཆོད་གཏོར་བྱིན་གྱིས་བརླབས་ལ། གཏོར་ཆོག་ནས་འབྱུང་བ་ལྟར་དཔལ་དུར་ཁྲོད་ཀྱི་བདག་པོ་ཡབ་ཡུམ་གྱི་གཏོར་མ་ཕུལ། བཟླས་པ་ཅུང་ཟད་བྱས། མཎྜལ་ཕུལ་ཏེ། དཀོན་མཆོག་གསུམ་དང་དབྱེར་མེད་ཅིང༌། །ཡི་དམ་ལྷའི་ངོ་བོ་ཉིད། །བླ་མ་དམ་པའི་ཐུགས་རྗེ་ཡིས། །བྱིན་གྱིས་བརླབས་པ་སྩལ་དུ་གསོལ། །ཞེས་ལན་གསུམ་གྱིས་གསོལ་བ་
བཏབ། དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་གུར་ནས་འབྱུང་བའི་རྒྱུན་བཤགས་ལན་གསུམ་བྱེད་དུ་བཅུགདེ་ནས་རྗེས་གནང་གི་གཞི་བཀོད་པའི་དོན་དུ། སློབ་མ་རྣམས་གཏོར་ཆོག་ནས་འབྱུང་བ་ལྟར་གྱི་ཆོས་སྐྱོང་ཡབ་ཡུམ་དུ་བསྐྱེད་དོ། །དངོས་གཞི་ལ། སྐུའི་རྗེས་གནང་ནི། སློབ་དཔོན་འཁོར་ལོ་བདེ་མཆོག་ཡབ་ཡུམ་དུ་གསལ་བའི་ཐུགས་ཀ་ནས་འོད་ཟེར་འཕྲོས། ཨུ་རྒྱན་མཁའ་འགྲོའི་ཕོ་བྲང་དང༌། རང་བཞིན་གྱི་གནས་ནས་ཆོས་སྐྱོང་ཡབ་ཡུམ་བསམ་གྱིས་མི་ཁྱབ་པ་བཀུགསློབ་དཔོན་གྱི་ཞལ་དུ་ཞུགས། རྗེས་ཆགས་ཀྱི་མེས་འོད་དུ་བཞུ་ནས། ཡུམ་གྱི་མཁར་ཆོས་སྐྱོང་ཡབ་ཡུམ་དཔག་ཏུ་མེད་པའི་སྐུར་གྱུར་ནས། ཁྱེད་རང་གི་ལུས་ལ་ཐིམ་པར་མོས་པ་མཛོད་བྱས་ལ་གུ་གུལ་གྱིས་བདུགདྲིལ་བུ་སིལ། ཡབ་ཡུམ་གྱི་སྔགས་ཀྱི་རྗེས་སུ། པྲ་བེ་ཤ་ཡ་ཧཱུཾ། ཨ་བེ་ཤ་ཡ་ཧཱུཾ་ཕཊ། ཅེས་པ་མང་དུ་བཟླས། སྐུའི་རྗེས་གནང་ངོ༌། །གསུང་ལ་ཡང༌། སློབ་དཔོན་གྱི་ཐུགས་ཀ་ནས་འོད་ཟེར་འཕྲོ་བ་ནས། ཡུམ་གྱི་མཁར་བབས་པའི་བར་འདྲ་ལ། དེ་ནས་ཡི་གེ་ཨཱ་ལི་ཀཱ་ལི་དང༌། ཡབ་ཡུམ་གྱི་སྔགས་སུ་གྱུར་པ་ཁྱེད་རང་རྣམས་ཀྱི་མགྲིན་པར་ཐིམ་པར་མོས། སྔར་ལྟར་སྔགས་དང་དྲིལ་བུ་སིལ། ཡབ་ཡུམ་གྱི་སྔགས་ལན་གསུམ་རྗེས་ཟློས་བྱེད་དུ་བཅུག།བཅོམ་ལྡན་བདག་ལ་སོགས་ཀྱང་བྱེད་དུ་བཅུགསློབ་དཔོན་གྱིས་ཀྱང༌། བཅོམ་ལྡན་འདི་ལ་སོགས་བྱ། ཐུགས་ལ་ཡང་ཡུམ་གྱི་
མཁར་བབས་པའི་བར་འདྲ་ལ། དེ་ནས་ཕྱག་མཚན་གྲི་གུག་དང༌། རྡོ་རྗེ་དང༌། དབྱུག་ཐོ་དང༌། དགྲ་སྟ་ལ་སོགས་པ་དཔག་ཏུ་མེད་པར་གྱུར་ནས། ཁྱེད་རང་རྣམས་ཀྱི་ཐུགས་ཀར་ཐིམ་པར་མོས་པ་མཛོད་བྱས་ལ། ཏིཥྛ་བཛྲ་ཧཱུཾ་ཨཱཿཏིཥྛ་བཛྲ་ཞེས་བརྗོད། གཏོར་མ་མགོ་ཐོག་ཏུ་བཞག་ལ། རོལ་མོ་དང་བཅས། བླ་མ་བརྒྱུད་པའི་མཚན་སྨོས་ནས། དཔལ་ལྡན་བླ་མ་དམ་པ་རྣམས་དང༌། དཔལ་འཁོར་ལོ་བདེ་མཆོག་གི་ལྷ་ཚོགས་ཀྱི་བཀའ་དང་དམ་ལས་མ་འདའ་བར། དཔལ་དུར་ཁྲོད་བདག་པོ་ཡབ་ཡུམ་འཁོར་དང་བཅས་པས་སློབ་མ་འདི་དག་ལ་འགོ་བར་མཛད་དུ་གསོལ། སངས་རྒྱས་མ་ཐོབ་བར་དུ། ཞི་དང་རྒྱས་དང་དབང་གི་ལས། །བསད་བསྐྲད་དབྱེ་རྨོངས་རེངས་པ་སོགས། །ཇི་ལྟར་བསྒོ་བའི་ལས་སྒྲུབ་ཅིང༌། །སངས་རྒྱས་དམ་ཚིག་རྗེས་དྲན་མཛོད། །ཅེས་བཀའ་བསྒོ། འཕྲིན་ལས་ཐམས་ཅད་སྒྲུབ་པར་བསམ། དེ་ནས་གཙོ་བོས་ཇི་ལྟར་སོགས་གསུམ་གྱི་རྗེས་ལ་མཎྜལ་ཕུལ། དེང་ནས་བརྩམས་ཏེ་སོགས་བརྗོད་ལ། སློབ་མ་རྣམས་དང༌། སློབ་དཔོན་གྱིས་ནོངས་པ་བཟོད་པར་གསོལ། གཏོར་མགྲོན་གཤེགས་གསོལ་བྱ། བསྔོ་བ་སྨོན་ལམ་བཀྲ་ཤིས་ཀྱིས་རྒྱས་གདབ་བོ། །ཀུན༵་ནས་གྲགས་ཆེ་ས་སྐྱ་བའི། །མགོན་དཀར་ཞེས་གྲགས་དག༵འ་བར་བསྔགས། །གང་དེའི་མན་ངག་དང་འབྲེལ་བའི། །རྗེས་གནང་སྙིང༵་པོ༵་ཐོ་ཡིག་གོ །དཔའ་བོ་དུར་ཁྲོད་བདག་པོ་ལྕམ་དྲལ་གྱི་སྒྲུབ་ཐབས་ཀྱི་ལེ་ཚན་ནོ།། །།
པུ་ཏྲ་ལྕམ་དྲལ་གྱི་སྒྲུབ་ཐབས།
ཨོཾ་སྭཱ་སྟི། ཧེ་རུ་ཀ་དཔལ་ནག་པོ་ཆེའི། །དཀྱིལ་འཁོར་ལྷ་ཚོགས་ཀུན་བཏུད་ནས། །གུར་གྱི་མགོན་པོའི་ལས་བྱེད་ནི། །མཆོག་ཏུ་གྲགས་པའི་སྒྲུབ་ཐབས་བཤད། །རང་གི་མདུན་དུ་ཡི་དམ་དང༌། ཆོས་སྐྱོང་ཆེན་པོའི་གཏོར་མ་སྟེགས་བུ་མཐོ་བར་བཤམ། རྟག་གཏོར་ཟུར་བརྒྱད་པ། འབུལ་གཏོར་མཆོད་པ་དང་བཅས་པ་དེའི་མདུན་སྟེགས་བུ་དམའ་བ་ཞིག་ལ་བཤམ། སྔོན་འགྲོ་གཏོར་མ་བཏང༌། མཆོད་པ་བྱིན་རླབས་བྱ། ཡི་དམ་གྱི་བདག་བསྐྱེད་དང༌། གཏོར་བསྔོ་སྔོན་དུ་སོང་མཚམས། དཔལ་གུར་གྱི་མགོན་པོ་ལྕམ་དྲལ་གྱི་གཏོར་བསྔོ་དང་བཟླས་པ་ཅུང་ཟད་བྱ། དེ་མཚམས་མགོན་པོའི་ཐུགས་ཀ་ནས་ཡ་དང༌། ལྷ་མོའི་ཐུགས་ཀ་ནས་མཾ་མདུན་དུ་སྤྲོས་པ་ལས། ཡ་ལས་ནག་པོ་གནོད་སྦྱིན་གཡས་གྲི་གུག་འཕྱར་ཞིང༌། གཡོན་སྦར་བ་གདེངས་པའི་ལག་མཐིལ་ནས་ཉི་མ་འཆར་བ། མི་ལྤགས་ཀྱི་གཡང་གཞི་གྱོན་ཞིང་གསེར་གྱི་རྣ་ཆ་ཅན། དེའི་གཡོན་དུ་མཾ་ལས་ནག་མོ་གནོད་སྦྱིན་གཡས་གསེར་གྱི་སྤུ་གྲི་དང༌། གཡོན་སྦར་བ་གདེངས་པའི་ལག་མཐིལ་ནས་ཟླ་བ་འཆར་བ། དར་ནག་གི་ན་བཟའ་དང༌། བྱི་རུའི་ལན་ཚར་ཅན། དེ་གཉིས་ཀྱི་ཐུགས་ཀ་ནས་ཡབ་ལས་ཏྲི་གཉིས་དང༌། ཡུམ་ལས་བྷྱོཿགཅིག་སྤྲོས་པ་ལས། པུ་ཏྲ་མིང་སྲིང་གསུམ་དུ་གྱུར་ཏེ། དེ་དག་གི་མདུན་དུ་འཁོད་པ་ནི། ཏྲི་ལས་པུ་ཏྲ་ནག་པོ་ཞལ་གཅིག་ཕྱག་གཉིས་པ། གཡས་ཤང་ལང་གི་གྲི་རིང་འཕྱར་ཞིང༌། གཡོན་ཐོད་
པ་ཀླད་ཁྲག་དྲོན་མོས་གང་བ་འཛིན་ཞིང་ཞལ་དུ་གསོལ་བ། མོན་ཀྲིའི་ག་ཞ་དང༌། དར་ནག་གི་ན་བཟའ་ཅན། ཏྲི་ལས་བྷ་ཏྲ་ནག་པོ་དར་གྱི་ག་ཞ་དང༌། སྟག་སློག་གྱོན་པ། གཡས་དམ་ཤིང་དང༌། གཡོན་མི་སྙིང་འཛིན་ཞིང་གསོལ་བ། བྷྱོཿལས་སྲིང་མོ་རལ་གཅིག་མ། གཡས་གསེར་གྱི་སྤུ་གྲི་དང༌། གཡོན་རྒྱུ་མ་འཛིན་ཞིང༌། མིག་ནས་ཁྲག་འཛག་པ། ཁ་ནས་མེ་འབར་བ། ལྔ་ཆར་ཡང་སྐུ་མདོག་མཐིང་ནགམོན་བུ་ཕོ་མོའི་ཆ་ལུགས་ཅན། མི་མགོའི་རྒྱན་དང་ལྡན་པ། རབ་ཏུ་ཁྲོས་ལ་རྔམ་ཞིང་འཁྲུགས་པས། གདུག་པ་ཅན་ཐམས་ཅད་ཚར་གཅོད་པའི་ཚུལ་དུ་བཞུགས་པ། མེ་རླུང་འཚུབ་མའི་དབུས་ན་འགྱིང་བའོ། །དེའི་མཐའ་སྐོར་དུ། གཡས་ཀྱི་རུ་འདྲེན་པའི་སྐྱེས་པ་སྟག་ཆས་བརྒྱན་པ་བརྒྱ། གཡོན་གྱི་རུ་འདྲེན་པ་དགེ་སློང་གི་གཟུགས་ཅན་བརྒྱ། སླད་ཀྱི་རྗེས་སུ་འབྲང་བ་བནྡྷེ་ནག་པོ་ཕུར་ཐོགས་བརྒྱ། བདུན་གྱི་བཤུལ་བྱང་འདྲེན་པ་བུད་མེད་ནག་མོ་བརྒྱ། གཞན་ཡང་དམ་ཉམས་ཀྱི་རྗེས་གཅོད་པའི་བྱ་ནག་ཁྱི་ནག་ཅེ་སྤྱང་ལ་སོགས་པ་ཕོ་ཉ་བསམ་གྱིས་མི་ཁྱབ་པས་བསྐོར་བར་གྱུར། རང་གི་སྙིང་ག་ནས་འོད་ཟེར་འཕྲོས། རྒྱ་གར་རྡོ་རྗེ་གདན་གྱི་སྤོ་དང༌། བླ་མ་གོང་མའི་གདན་ས་ཁྱད་པར་ཅན་རྣམས་ནས། ལས་མགོན་པུ་ཏྲ་འཁོར་དང་བཅས་པ་
བཛྲ་ས་མཱ་ཛཿ ལས་མགོན་སྐུ་གཤེགས་གདན་ལ་བཞུགས་སོགས་དང༌། ཕོ་མོའི་བོད་སྔགས་གཉིས་ཀྱི་མཐར། ཨོཾ་བཛྲ་ས་མཱ་ཛཿ ཨེ་ཧྱེ་ཧི། ཨརྒྷཾ་ལ་སོགས་པས་མཆོད། ཡང་བོད་སྔགས་གཉིས་ཀྱི་མཐར་ས་མ་ཡ་སོགས་བཏགས་ལ་དམ་ཚིག་གི་ཕྱག་རྒྱ་བསྟན་ལ་དམ་བཞག་འཕྲིན་བཅོལ་བྱེད་ཚུལ་ལྕམ་དྲལ་གྱི་སྐབས་དང་འདྲ། དེ་ནས་རྦོད་རྦད་བསད་གསུམ་ཆར་རམ། བོད་སྔགས་གཉིས་ཅི་རིགས་པར་བཟླ། སྔགས་ཀྱི་མཐར་ཨ་ཀཱ་རོ་བཏགས་པ་ལན་བདུན་གྱིས་གཏོར་མ་ཕུལ། ཨརྒྷཾ་ནས་ཤཔྟའི་བར་གྱིས་མཆོད། སྔགས་ཀྱི་མཐར་འབྲུ་གསུམ་བཏགས་པས་ནང་མཆོད་དང༌། གནོད་སྦྱིན་ཡབ་ཡུམ་འཇིགས་པའི་གཟུགས། །རྔམ་ཞིང་འཁྲུགས་པའི་ཆ་ལུགས་ཀྱིས། །བདུད་དང་དགྲ་བགེགས་འཇོམས་མཛད་པའི། །བསྟན་སྲུང་ཡབ་ཡུམ་ཆེ་ལ་བསྟོད། །མོན་བུ་པུ་ཏྲ་ནག་པོ་བསྐྱོད། །མོན་ཀྲིའི་ག་ཞ་སྐུ་ལ་གསོལ། །ཤེར་ཤིང་སེག་ཤིང་ཕྱག་ན་བསྣམས། །པུ་ཏྲ་ནག་པོ་ཁྱོད་ལ་བསྟོད། །མོན་བུ་བྷ་ཏྲ་སྟག་སློག་བཀྲ། །དར་གྱི་ག་ཞ་སྐུ་ལ་གསོལ། །ཕྱག་ན་དམ་ཤིང་རྣོན་པོ་བསྣམས། །མོན་བུ་བྷ་ཏྲ་ཁྱོད་ལ་བསྟོད། །མོན་མོ་གསེར་གྱི་སྦུ་གྲི་མ། །ནག་མོ་ཆེན་མོ་ཁ་འབར་མ། །ཕྱག་ན་གསེར་གྱི་སྤུ་གྲི་བསྣམས། །ནག་མོ་ཁྱོད་ལ་བདག་བསྟོད་དོ། །བུད་མེད་ནག་མོ་ཆེན་མོ་བརྒྱ། །གཤེགས་ཀྱི་དེ་ནི་བཤུལ་ཡང་འདྲེན། །གཡས་ཀྱི་ཕྱོགས་ནས་རུ་འདྲེན་པ། །སྐྱེས་པ་སྟག་ཆས་བརྒྱན་པ་བརྒྱ། །གཡོན་གྱི་ཕྱོགས་ནས་རུ་འདྲེན་པ། །དགེ་སློང་ཉན་ཐོས་དགྲ་བཅོམ་བརྒྱ། །སླད་ཀྱི་རྗེས་འབྲང་འཇིགས་རུང་བ། །བནྡྷེ་
ནག་པོ་ཕུར་ཐོགས་བརྒྱ། །འཁོར་བཅས་རྣམས་ལ་བསྟོད་པ་འབུལ། །སྐབས་གསུམ་བདག་ཀྱང་བསྟོད་པ་འབུལ། །ཞེས་པའམ། སྤྲོ་ན་བསྟོད་པ་རྒྱས་པ་བྱ་ཞིང༌། ཤིན་ཏུ་བསྡུ་ན། དཔལ་ལྡན་འཕྲིན་ལས་ཀུན་རྫོགས་པུ་ཏྲ་ཁྱོད། །སྐུ་མདོག་མཐིང་ནག་མེ་ཡི་འཕྲོ་འདུ་ཅན། །རྔམ་པའི་སྟོབས་ཀྱིས་འགྱིང་ཞིང་ཤང་ལང་བསྣམས། །གྱིང་ཆེན་གདུག་པ་འདུལ་མཛད་ཁྱོད་ལ་བསྟོད། །ཅེས་པ་གཅིག་པུས་ཀྱང་ཆོག་གོ །མཆོད་སྦྱིན་གཏོར་མ་འདི་བཞེས་ལ་སོགས་འཕྲིན་ལས་བཅོལ། འདིར་རྗེས་གནང་ནི། པུ་ཏྲ་མིང་སྲིང་གསུམ་གྱི་རྗེས་གནང་བྱས་པས། གནོད་སྦྱིན་ཡབ་ཡུམ་གྱི་རྗེས་གནང་ཡང་ཞར་ལ་ཐོབ་པར་འགྱུར་བའི་ཕྱིར། རྗེས་གནང་སྐབས་མིང་སྲིང་གསུམ་པོ་ཁོ་ནའི་ལུགས་སུ་མཛད། མཎྜལ་གསོལ་བཏབ། རྒྱུན་བཤགས་སྡོམ་བཟུང་རྣམས་གུར་ལྕམ་དྲལ་གྱི་སྐབས་དང་འདྲ། ཐུན་མོང་མ་ཡིན་པའི་གསོལ་བཏབ་ནི། སངས་རྒྱས་ཐམས་ཅད་ཀྱི་ངོ་བོར་གྱུར་པ་བླ་མ་དམ་པས་བདག་ལ། ལས་ཀྱི་མགོན་པོ་པུ་ཏྲ་མིང་སྲིང་གསུམ་གྱི་བྱིན་རླབས་དང་རྗེས་སུ་གནང་བ་སྩལ་དུ་གསོལ། ཞེས་ལན་གསུམ། དེ་ནས་སློབ་དཔོན་ཡི་དམ། མདུན་བསྐྱེད་སྟེང་གི་ནམ་མཁའ་ལ་ཡང་ཡི་དམ། དེའི་འོག་ཏུ་གུར་གྱི་མགོན་པོ་ལྕམ་དྲལ། དེའི་བཀའ་སྡོད་ཀྱི་ཚུལ་དུ་མིང་སྲིང་གསུམ་གསལ་བཏབ། སློབ་མ་གུར་མགོན་ཉིད་དུ་སྐད་ཅིག་གིས་བསྐྱེད། ཐུགས་ཀར་ཧཱུཾ་ཡིག་མཐིང་ནག་མེ་འབར་བ་ཆེན་པོ་ཞིག་
བསྒོམ། སློབ་དཔོན་གྱི་ཐུགས་ཀའི་ཧཱུཾ་ལས་འོད་ཟེར་འཕྲོས། མདུན་བསྐྱེད་གཙོ་འཁོར་རྣམས་ཀྱི་ཐུགས་ཀར་ཕོག་པས། དེ་ཐམས་ཅད་ཀྱི་སྐུའི་ཆ་ཐམས་ཅད་ནས་པུ་ཏྲ་མིང་སྲིང་གསུམ་གྱི་སྐུ་དཔག་ཏུ་མེད་པར་བྱུང༌། འཇིག་རྟེན་གྱི་ཁམས་ཐམས་ཅད་ཁྱབ། དགྲ་བགེགས་ཚར་གཅོད་པ་ལ་སོགས་པའི་འཕྲིན་ལས་མཛད། མདུན་བསྐྱེད་མིང་སྲིང་གསུམ་ཉིད་ཀྱི་ཐུགས་ཀར་ཐིམ། ཡང་དེའི་ཐུགས་ཀ་ནས་བྱུང༌། སློབ་མའི་སྙིང་གའི་ཧཱུཾ་གི་ཞབས་ཀྱུ་ལ་ཐིམ་པར་བསྒོམས་ལ། ཤཱ་ས་ན་དང་བོད་སྔགས་བརྗོད། གུ་གུལ་བདུག་ཅིང་རོལ་མོ་བྱ། གསུང་གི་རྗེས་གནང་ནི། སློབ་མའི་སྙིང་གའི་ཧཱུཾ་གི་མཐའ་མར་ཤཱ་ས་ན། དེའི་མཐའ་མར་བོད་རྦད་བསད་གསུམ་གྱི་སྔགས་ཀྱིས་བསྐོར་བར་དམིགས་ལ། འོད་ཟེར་དང་སྔགས་འབྲུ་གོང་བཞིན་སྤྲོ་བསྡུ་བྱས་ལ། སྙིང་གའི་བོད་རྦད་བསད་གསུམ་གྱི་སྔགས་ལ་ཐིམ་པར་མོས་ལ་རྗེས་ཟློས་བྱའོ། །ཨ་ལི་ཨ་ལི་མ་ཛཿ ཤཾ་ཤཾ་ལི་ཤི་དེད་ཨ་ཤྭ་དེ། མུ་སྨུགས་པུ་ཏྲ་ཨ་ལི་མ་ཛ་ཛཿ ནག་མོ་ཤ་ལ་རུབ་ཛ་ཛཿ ཕོའི་བོད་པའོ། །དྷྲིག་དྷྲིགཡ་དུ་པ་ཤ་ནི་སོད། དུམ་ཤིག་ཨཱ་གཙྪ། མོན་བུ་ཨཱ་གཙྪ། ཡ་ཎིར་ཡ་ཎིར་མོན་བུ་ཛཿ མོན་བུ་ཁྲག་འཇིབས། ཛ་རྦད་པའོ། །ཎིར་ན་རྦད། དུ་ན་རྦད། ཤི་ན་རྦད། ཤག་ཤིག་རྦད། ཏྲི་ཏ་རྦད།
ཏྲི་ན་རྦད། མོན་བུ་པུ་ཏྲ་ཤཾ་རྦད། ཡཾ་རྨུགས་ལིཾ་འདུས། ཁཾ་ཤོད་པ་ཡ་མོ་ཛཿ ཨ་མུ་ཀའི་རུས་པ་ལ་ཁྲོལ་ཁྲོལ་རྦད། གསེར་གྱི་སྤུ་གྲི་ཡཾ་རྦད། བསད་པའོ། །ཨོཾ་རོ་རུ་རོ་རུ་ཏྲི་ཙ་པ་ལ། ཨ་ཤུགྨེ་མ་ཧཱུཾ་མ་བྷྱོཿཛ་ཛཿ མོའི་བོད་པའོ། །ཏྲཀ་རཀྴ་ཁ་མུན་ཏྲ་རུ་ལུ་རུ་ལུ། རཀྴ་སྙིང་ཁྲག་སྙིང་བྷྱོཿ སྤུ་ཏ་སྦུ་ཏ་བྷྱོཿ ཤ་ཤ་ཏྲཀ ཏྲཀྨོ་ཏྲ་པ་སྙིང་ཁྲགཏྲཀྨུ་ཏྲ་ཆེ་གེ་མོ་མ་ར་ཡ། རྦད་པའོ། །ཨོཾ་མཧཱ་རཀྴ་ཙིཏྟ། སྲོག་ཏུཾ་ཏུཾ། ཀ་མ་ལ་རཀྴ་ཙིཏྟ་སྲོག་ཏུཾ་ཏུཾ། གུ་ཧྱེ་རཀྴ་ཙིཏྟ་སྲོག་ཏུཾ་ཏུཾ། ཧྲི་བཾ་རཀྴ་ཙིཏྟ་སྲོག་ཏུཾ་ཏུཾ། མ་མ་ཙ་བུར་ཙིཏྟ་སྲོག་ཏུཾ་ཏུཾ། པུ་རུ་ཙ་ལྷུཾ་ཙིཏྟ་སྲོག་ཏུཾ་ཏུཾ། བསད་པའོ། །སུཾ་ཏྲིག་རཀྴ་བྷྱོཿ ཐིབས་ཐིབས་ཙཀྲ་བྷྱོཿ རྦད་རྦད་ཏྲིན་ཤིག་ཤིགསེ་ན་ཏུབས། ཁ་རཀ་རྦད། དུཾ་བོ་བྷྱོཿ བཛྲ་ཙི་ཏྲི་རཀྴ། ཙ་ཏི་མཾ་ར་ཡ། ཐུན་མོང་གིས་བསད་པའོ། །ཐུགས་ཀྱི་རྗེས་གནང་ནི། འོད་ཟེར་ཕྱག་མཚན་སྤྲོ་བསྡུ་གོང་བཞིན་བྱས་ལ། སློབ་མའི་སྙིང་གའི་ཧཱུཾ་གི་ཞབས་ཀྱུ་ལ་བསྟིམ། གཏོར་མ་ལག་ཏུ་གཏད་ལ། བཀའ་ཉན་དུ་བཀའ་བསྒོ་དྲག་ཏུ་བྱ་ཚུལ་སྤྱི་དང་འདྲ་བ་ལས། མཐར་གཏོར་མ་ནམ་མཁར་བཏེག་ནས་བརྒྱུད་པའི་བླ་མའི་མཚན་བགྲངས་ཤིང༌། བཀའ་བསྒོ་བསྡུས་པ་ཞིག་བྱས་ལ། བོད་རྦད་བསད་གསུམ་དྲག་ཏུ་བཟླས་པས། བླ་མ་ཡི་དམ་འཁོར་བཅས་འོད་དུ་ཞུ་ནས། སྤྱི་གཙུག་ནས་ཞུགས།
སྙིང་གའི་ཧཱུཾ་ལ་ཐིམ། དེའི་ངང་དེར་སྤྲོས་བྲལ་ལ་མཉམ་པར་འཇོག་ཏུ་བཅུགརྗེས་ལྕམ་དྲལ་གྱི་སྐབས་དང་འདྲའོ། །པུ་ཏྲ་སྐུ་མདོག་སྔོ་སྐྱ་བྱེད་པའི་ལུགས་ཡོད་པའང་ཤིན་དུ་ལེགས་ཤིང༌། ཕྱག་ནའང་ཤེར་ཤིང་གི་འཁར་བསིལ་བསྣམས་པ་ཡོད་དོ། །བྷ་ཏྲའི་དམ་ཤིང་ཕུར་པ་ཡིན་པར་འདོད་ཅིང༌། ལས་ཚོགས་ཀྱི་ཡི་གེ་རྙིང་པ་འགའ་ནའང་དེ་བཞིན་སྣང་མོད། ཕུར་པ་དམ་ཤིང་དུ་བྱིན་བརླབས་ཞེས་འབྱུང་བས། དམ་ཤིང་དུ་མོས་དགོས་པའི་དོན་ཡིན། དངོས་ནི་འབའ་ཁྲམ་ལྟ་བུ་ལ་རྩ་རྩེ་རྣོན་པོར་ཡོད་པའོ་ཞེས་བླ་མ་གསུང་ངོ༌། །ལྷ་ཁང་ཀུན༵་གྱི་སྲུང་མ་ཞེས། །དྲག་ཤུལ་ཆེ་ཞིང་དག༵འ་བར་བསྔགས། །ཟུར་བཀའི་རྗེས་གནང་བྱེད་ཚུལ་གྱི། །སྙིང༵་པོ༵་མདོ་ཙམ་བཀོད་པ་ལགས། །པུ་ཏྲ་ལྕམ་དྲལ་གྱི་སྒྲུབ་ཐབས་ཀྱི་ལེ་ཚན་ནོ།། །།
བྲན་བདུད་གཤིན་རྗེ་ནག་པོའི་སྒྲུབ་ཐབས།
ཨོཾ་སྭཱ་སྟི། བླ་མ་ཡི་དམ་མཁའ་འགྲོ་དང༌། ཁྱད་པར་ནག་པོ་ཆེར་བཏུད་ནས། །བྲན་བདུད་གཤིན་རྗེ་ནག་པོ་ཡི། །རྗེས་གནང་བྱེད་ཚུལ་མདོ་ཙམ་བཤད། །མཆོད་གཏོར་ཚང་བར་བཤམས་ནས། ཁྲོ་བོའི་བདག་བསྐྱེད་སྔོན་དུ་འགྲོ་བས་སྤྱི་དང་མཐུན་པར་བྱིན་གྱིས་བརླབས། རྟེན་རྣམས་བསངས་སྦྱངས། སྟོང་པའི་ངང་ལས། མེ་རླུང་འཁྲུགས་པའི་དབུས་སུ། བདུད་རྟ་བྲ་ནག་རུས་པའི་རྒྱན་ཅན། གོང་རྨེད་དུག་སྦྲུལ་གྱིས་བྱས་པ། སྒ་ལ་མི་ལྤགས་ཀྱི་གཡང་གཞི་གཡོགས་པའི་སྟེང་དུ། ཡ་ཡིག་ནག་པོའི་འཕྲོ་འདུ་ལས་བྲན་བདུད་གཤིན་རྗེ་ནག་པོ་ཞལ་གཅིག་ཕྱག་གཉིས། །མེ་སྟག་འཁྲུགས་པའི་སྤྱན་གསུམ་པ། དར་ནག་གསེར་
རིས་ཅན་གྱི་འཇོལ་བེར་གསོལ་ཞིང༌། སྦྲུལ་གྱི་སྐེ་རགས་དང༌། སག་ཏིའི་ལྷམ་གསོལ་བ། ཁྲམ་ཤིང་སྐེད་ལ་གཟེར་བ། གཡས་རུ་མཚོན་རྩེ་གསུམ་ནག་པོ་མགོ་རློན་བཞི་འཕྱང་བ་འཛིན་ཞིང༌། གཡོན་དགྲ་སྙིང་ཁྲག་འཛག་པ་ལ་དུག་སྦྲུལ་ནག་པོ་གཉིས་ཀྱིས་འཇིབ་པ་དང་བཅས་པ་འཛིན་པ། རོལ་པའི་སྟབས་ཀྱིས་བཞུགས་པའི་མདུན་དུ། ལྷ་མོ་སྤུ་གྲི་མ་ཐལ་སྐྱ་ཁ་ནས་མེ་འབར་བ་ལག་གཉིས་གྱེན་དུ་གདེངས་པ་མེ་དཔུང་རེ་ཐོགས་པ། གཅེར་མོ་རྒྱན་མེད་སྐྲ་གྲོལ་བ། ཙོག་པུའི་སྟབས་ཀྱིས་བཞུགས་ཤིང་གཙོ་བོ་ལ་བལྟ་བའོ། །གནས་གསུམ་བྱིན་གྱིས་བརླབས། ལྷོ་ཕྱོགས་རྒྱ་མཚོའི་འགྲམ་ནས། ལྕམ་དྲལ་ལ་སྡེ་བརྒྱད་ཀྱིས་བསྐོར་བ་སྤྱན་དྲངས་ཏེ་བསྟིམ། དབང་བསྐུར་ཏེ། རྡོ་རྗེ་ཕྱེད་པ་རེས་དབུ་བརྒྱན། ཨི་དཾ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི་སརྦ་ཤ་ཏྲུན། བིགྷྣཱན་མཱ་ར་ཡ་ཧཱུཾ་ཕཊ། ལན་གསུམ་གྱིས་གཏོར་མ་ཕུལ། ཨརྒྷཾ་སོགས་ཀྱིས་ཕྱི་མཆོད་དང་ས། འབྲུ་གསུམ་གྱིས་ནང་མཆོད་ཕུལ། ཧཱུཾ། ལྷོ་ཕྱོགས་རྒྱ་མཚོའི་ཕ་རོལ་ན། །དུར་ཁྲོད་འབར་བའི་ཀློང་དཀྱིལ་ན། །གཤིན་རྗེ་ནག་པོ་ཕྱག་གཉིས་པ། །མཚོན་ཆས་དགྲ་བགེགས་སྒྲོལ་ལ་བསྟོད། །མཆོད་སྦྱིན་གཏོར་མ་འདི་བཞེས་སོགས། །འདོད་དོན་གསོལ་བ་བཏབ། ཨོཾ་མཧཱ་ཀ་ལ་ཡཀྵ་མུཉྩ་ཀྲོ་དྷ། ཡ་མ་རཱ་ཛ། མ་རི་ཤམ།
མུཙྪ་ཡ་བྷྱོ། ཞེས་ཅི་ནུས་སུ་བཟླའོ། །རྗེས་ཀྱི་བྱ་བ་སྤྱི་དང་འདྲ། རྗེས་གནང་བྱེད་ན། ལག་ལེན་ལ་གུར་མགོན་གྱི་གཏོར་ཆོག་གི་རྗེས་སུ་མཛད་ནའང་གཅིག་ཏུ་ངེས་པ་མི་དགོས་ཤིང༌། དེ་ལྟར་བྱེད་ན་གུར་མགོན་གྱི་གཏོར་མའི་མདུན་དམའ་བའི་ཕྱོགས་སུ་འདིའི་བཤོམས་རྣམས་བྱེད་དོ། །གང་ལྟར་ཡང༌། ཆོས་འབྱུང་ནག་པོ་གྲུ་གསུམ་གྱི་དབུས་སུ། ཏིལ་ནག་ཁྲག་གིས་སྦགས་པའི་ཚོམ་བུ་ཟུར་གསུམ་ཆེ་ཆུང་གཉིས་བཀོད། དེའི་སྟེང་དུ་མཉྫི་ལ་གཏོར་མ་སྙིང་གཟུགས་མ་དང༌། བཤོས་བུ་ཟུར་གསུམ་གཉིས་སྣོད་གཅིག་ཏུ་བཀོད། གཏོར་མའི་གཡས་སུ་རུ་མཚོན་དང༌། ཁྲམ་ཤིང་དངོས་སུ་ཡོད་ན་འགོད་ཅིང༌། མེད་ན་ཙ་ཀ་ལི་ཚུན་ཆད་ཀྱང་བཤམ། མཐའ་མཆོད་གཏོར་གྱིས་བསྐོར། སྔོན་འགྲོ་གཏོར་མ་དང༌། མཆོད་པ་བྱིན་རླབས་བྱ། བདག་མདུན་གོང་དུ་བཤད་པ་བཞིན་བསྒྲུབས་པའི་རྗེས་སུ། སློབ་མས་མཎྜལ་ཕུལ་ནས། བླ་མ་དཔལ་ལྡན་ནག་པོ་ཆེ། །དེ་རིང་བདག་ལ་དགོངས་སུ་གསོལ། །མངོན་སྤྱོད་འཕྲིན་ལས་སྒྲུབ་པའི་ཕྱིར། །བྲན་བདུད་ནག་པོའི་བཀའ་གཏད་སྩོལ། །ཞེས་ལན་གསུམ་གསོལ་བ་བཏབ། རྒྱུན་བཤགས་བྱ། བླ་མ་རིན་པོ་ཆེས་བདག་ལ་སངས་རྒྱས་ཀྱི་བསྟན་པ་བསྲུང་བའི་ཆེད་དུ། ནག་པོ་ཆེན་པོ་བྲན་བདུད་ཡབ་ཡུམ་གྱི་རྗེས་སུ་གནང་བ་མ་ལུས་པ་སྩལ་དུ་གསོལ། ཞེས་ཁྱད་པར་གྱི་གསོལ་བཏབ་ལན་གསུམ་བྱ། དེ་ནས་གུར་མགོན་ལྕམ་དྲལ་གྱི་སྐབས་སུ་བཤད་པ་ལྟར་གྱི་སློབ་མ་གུར་གྱི་མགོན་པོར་བསྐྱེད། མདུན་དུ་སྔར་བཤད་པ་ལྟར་བྲན་བདུད་ཡབ་ཡུམ་བསྐྱེད། སློབ་དཔོན་གྱི་
ཐུགས་ཀ་ནས་འོད་འཕྲོས། མདུན་བསྐྱེད་གུར་མགོན་གྱི་ཐུགས་རྒྱུད་བསྐུལ། ཐུགས་ཀ་ནས་བྲན་བདུད་དཔག་ཏུ་མེད་པ་སྤྲུལ། མདུན་གྱི་བྲན་བདུད་ཀྱི་ཐུགས་ཀར་ཐིམ། དེའི་ཐུགས་ཀ་ནས་ཀྱང་སྐུ་དཔག་ཏུ་མེད་པར་བྱུང་ནས་སློབ་མའི་སྙིང་གའི་ཧཱུཾ་གི་ཞབས་ཀྱུ་ལ་ཐིམ། སྤོས་རོལ་དང་བཅས། སྙིང་པོའི་མཐར། ཨ་བེ་ཤ་ཡ་ཨ་བེ་ཤ་ཡ། ཛཿཧཱུཾ་བཾ་ཧོཿ ཞེས་ཡང་ཡང་བརྗོད། སྐུའི་རྗེས་གནང་ངོ༌། །ཡང་སློབ་དཔོན་གྱི་ཐུགས་ཀ་ནས་འོད་འཕྲོས། སྔ་མ་དང་འདྲ་བ་ལས། མདུན་གྱི་བྲན་བདུད་ཀྱི་ཞལ་ནས་སྔགས་ཕྲེང་བསམ་གྱིས་མི་ཁྱབ་པ་བྱུང༌། ཧཱུཾ་གི་ཞབས་ཀྱུ་ལ་ཐིམ་པ་སོགས་སྔ་མ་བཞིན་གསུང་གི་རྗེས་གནང་ངོ༌། །ཡང་འོད་འཕྲོས་སོགས་སྔར་དང་འདྲ་བ་ལས། བྲན་བདུད་ཡབ་ཡུམ་གཉིས་སློབ་མའི་པང་དུ་བྱོན། སློབ་དཔོན་གྱི་ཐུགས་ཀ་ནས་གུར་གྱི་མགོན་པོ་སྐུ་ཆེ་བ་གཟི་བརྗིད་ལྡན་པ་བྱོན། སློབ་མ་དང་བྲན་བདུད་ཀྱི་སྤྱི་བོར་ཞབས་བཞག་སྟེ་བཞུགས་པ་ལ། མོས་གུས་དུང་བྱས་པས་སྐུ་ལས་འོད་ཟེར་དཔག་ཏུ་མེད་པ་བྱུང༌། ལུས་ཐམས་ཅད་ཁྱབ་པས་བར་ཆད་ཞི་ཞིང༌། ནུས་མཐུ་མ་ལུས་པ་ཐོབ། མཐར་དེ་ཉིད་འོད་དུ་ཞུ་ནས། རང་ལ་ཐིམ། སྤོས་རོལ་སོགས་གོང་བཞིན། ཐུགས་ཀྱི་རྗེས་གནང་ངོ༌། །རུ་མཚོན་དང༌། ཁྲམ་ཤིང་བྲན་བདུད་བསྐྱེད། ཞུ་བ་ལས་ཕྱག་
མཚན་དུ་གྱུར། སྙིང་པོ་འདོན་ཞིང་ལག་ཏུ་གཏད། རུ་མཚོན་གཡུལ་ལས་རྣམ་པར་རྒྱལ་བ་དང༌། མི་མགོ་བཞི་བདུད་བཞི་བཅོམ་པ་དང༌། ཁྲམ་ཤིང་དགྲ་བགེགས་ཚར་གཅོད་པའི་བརྡའ་ཡིན་ནོ། །ཞེས་བཤད། ཡོན་ཏན་གྱི་རྫས་གནང་ངོ༌། །དེ་ནས་སྔར་གུར་མགོན་གྱི་གཏོར་མ་བཤམས་ཡོད་ན། དེའི་མཐེབ་ཀྱུ་གཅིག་བྲན་བདུད་ཀྱི་གཏོར་མ་ལ་གསོས་ནས། ནང་མཆོད་བྲན། འབྲུ་གསུམ་གྱིས་བྱིན་གྱིས་བརླབས་ལ་གོང་བཞིན་ཕུལ། ཕྱི་ནང་གི་མཆོད་དེ། སློབ་མའི་དོན་དུ་གསོལ་བ་འདེབས་པའི་ལག་ལེན་ཡང་གདའ། གང་ལྟར་གཏོར་མ་ལག་ཏུ་གཏད། དེ་དང༌། རང་གི་སྤྱི་བོར་གུར་མགོན་དང༌། དེའི་སྟེང་དུ་བླ་མ་ཡི་དམ་དུ་གསལ་བ་སོགས་བཞུགས་པར་བསམས་ནས། དམ་བཞག་སྔོན་དུ་འགྲོ་བའི་བཀའ་བསྒོ་སྤྱི་དང་མཐུན་པར་བྱེད་དེ། འཕྲིན་ལས་ཀྱི་རྗེས་གནང་ངོ༌། །སློབ་མ་དང༌། མདུན་བསྐྱེད་ཀྱི་རྗཻས་ཀྱི་བྱ་བ་རྣམས་ནི་སྤྱི་དང་འདྲའོ། །དྲག་པོའི་ལས་ལ་མོས་པའི་མི། །ཀུན༵་གྱིས་དག༵འ་ཞིང་བསྒྲགས་པའི་ཆོས། །སྙིང༵་ནས་འགྲུབ་པར་འདོད་ན་ནི། །གསང་སྟེ་བསྒྲུབས་ན་ཟབ་པོ༵ར་འགྱུར། །བྲན་བདུད་གཤིན་རྗེ་ནག་པོའི་སྒྲུབ་ཐབས་ཀྱི་ལེ་ཚན་ནོ།། །།མངྒ་ལཾ། །
མགོན་པོ་ལྕམ་དྲལ་དང་རིགས་མཐུན་གྱི་སྒྲུབ་ཐབས
ཨོཾ་སྭཱ་སྟི། བླ་མ་དང་ནི་ཆེ་བའི་ལྷ། །དཔལ་ཆེན་ཧེ་རུ་ཀ་ལའང་འདུད། །ཕུར་བུའི་སྲུང་མ་ཡིན་པར་གྲགས། །འཁོན་རབ་སྲུང་མའི་སྒྲུབ་ཐབས་བཤད། །ཤ་ཁྲག་གཙང་མ་དང་དཀར་གསུམ་སོགས་ཀྱི་བརྒྱན་པའི་གཏོར་མ་འབྲང་རྒྱས་དཀར་པོ་གཅིག་དང༌། བཤོས་བུ་ནག་པོ་ཞིག་བཤམས། སྤང་སྤོས་དང༌། སྤོས་དཀར་གྱིས་
བདུག་པ་སོགས་མཆོད་པའི་ཡོ་བྱད་གཞན་ཐམས་ཅད་ཀྱང་འཛོམ་པར་བྱས། རང་ཉིད་དཔལ་ཆེན་པོའམ། ཡེ་ཤེས་ཁྲོ་བོ་གང་ཡང་རུང་བའི་བདག་བསྐྱེད་སྔོན་དུ་འགྲོ་བས་མཆོད་གཏོར་རྣམས་སྤྱི་དང་མཐུན་པར་བྱིན་གྱིས་བརླབས། རང་གི་མདུན་དུ་པདྨ་ཉི་ཟླའི་གདན་ལ་བྷྱོཿདཀར་པོའི་འོད་ཀྱི་འཕྲོ་འདུ་ལས་དཀར་མོ་ཉི་ཟླ་སྟོང་གི་འཕྲེང་བ་ཅན་ཞལ་གཅིག་ཕྱག་གཉིས་མ། གཡས་རི་རབ་སྒོང་དུ་རྩེ་བ། གཡོན་གླིང་བཞི་བྱོ་ཡོལ་མཛད་ཅིང་ཐུགས་ཀར་འཛིན་པ། ཉི་ཟླ་སྤེལ་བ་དགུ་བརྒྱ་དགུ་བཅུ་རྩ་དགུའི་དོ་ཤལ་བྱས་པ། ཉི་ཟླ་གཅིག་དང་ཐོད་པའི་འཕྲེང་བ་ཐོད་དུ་བཅིངས་པ། སྦྲུལ་དང་རིན་པོ་ཆེས་བརྒྱན་ཞིང༌། སྟག་ལྤགས་ཀྱི་ཤམ་ཐབས་དང༌། དར་དཀར་གྱི་སྟོད་གཡོགས་ཅན། མཁའ་འགྲོ་མ་བྱེ་བས་བསྐོར་བའོ། །དེའི་གཡས་སུ་ཧཱུཾ་ཡིག་འོད་ཀྱི་འཕྲོ་འདུ་ལས། བདུད་རྒྱལ་དཔའ་བོ་ཐོད་འཕྲེང་ཅན། སྐུ་མདོག་ནག་པོ་ཞལ་གཅིག་ཕྱག་གཉིས་གཡས་མདུང་རིང་བ་དན་དང་བཅས་པ་འཕྱར་བ། གཡོན་མི་མགོའི་འཕྲེང་བ་འཛིན་པ། གོས་རྒྱན་ནག་པོ་ཅན། བདུད་རྟ་ནག་པོ་རྟིང་དཀར་ལ་ཆིབས་པ། བདུད་བྱེ་བའི་ཚོགས་ཀྱིས་བསྐོར་བའོ། །རང་བཞིན་གྱི་གནས་ནས་ཡེ་ཤེས་པ་སྤྱན་དྲངས། དབང་བསྐུར་ཏེ། ཧེ་རུ་ཀས་དབུ་བརྒྱན། མཆོད་བསྟོད་བསྡུས་པ་ཞིག་བྱས་ལ། སྙིང་པོའི་སྔགས་ཀྱི་མཐར། ཨི་དཾ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི་སརྦ་བིགྷྣཱན་ཤ་ཏྲུཾ་མཱ་ར་
ཡ་ཧཱུཾ་ཕཊ། ཅེས་ལན་བདུན་གྱིས་གཏོར་མ་ཕུལ་ལ། ཨོཾ་བཛྲ་ཤིནྟཾ་པདྨ་ཀུ་རུ་ཏིཾ་བྷྱོཿ ཞེས་གཙོ་མོ་དང༌། ཨོཾ་སརྦ་མ་ར་ཀྲིཥྞ་ཀཱ་པ་ལ་མཱ་ལ་དྷ་ར་ཧཱུཾ་ཕཊ། ཅེས་བདུད་རྒྱལ་གྱི་སྙིང་པོའོ། །མཱ་ར་ཡ་ཐུམ་ཤིགམཱ་ར་ཡ་ཨ་མོ་བཾ། མཱ་ར་ཡ་སྙིང་ཧྲུལ། སྟཾ་བྷ་ཡ་སོད་སོད། ཅེས་བདུད་རྒྱལ་གྱི་སྲོག་སྔགས་རྣམས་ཀྱང་དྲག་ཏུ་བཟླ། མཐར་ཨརྒྷཾ་ལ་སོགས་པས་མཆོད། ཧཱུཾ་མ་བྷྱོཿ དཔལ་ལྡན་དཀར་མོ་ཆེན་མོ་ནི། །ཉི་ཟླ་སྟོང་གི་འཕྲེང་བ་ཅན། །ཡེ་ཤེས་དབྱིངས་ཀྱི་རྗེ་མོ་སྟེ། །གཞན་དོན་འཇིག་རྟེན་པ་རུ་སྤྲུལ། །འཇིག་རྟེན་གནས་ཀྱང་མྱ་ངན་འདས། །འདས་དང་མ་འདས་མཚམས་ན་བཞུགས། ཁྱོད་ལ་བསྟོད་དེ་ཕྱག་ཀྱང་འཚལ། །བདུད་རྒྱལ་ཐོད་པའི་ཕྲེང་བ་ཅན། །དགྲ་བོའི་སྲོག་ལ་མངའ་མཛད་པ། ཁྱོད་ནི་སྲོག་བདག་ཆེན་པོ་སྟེ། ཁྱོད་ལ་བསྟོད་དེ་ཕྱག་ཀྱང་འཚལ། །མཆོད་སྦྱིན་གཏོར་མ་འདི་བཞེས་ལ། །བཅོལ་བའི་འཕྲིན་ལས་གྲུབ་པར་མཛོད། །ཅེས་བརྗོད་ལ་མཐར་རྗེས་བསྡུ་བ་ནི་སྤྱི་དང་འདྲ། འདིའི་རྗེས་གནང་གི་ཆོ་ག་ནི། མཎྜལ་ཆོས་འབྱུང་གྲུ་གསུམ་དཀར་པོའི་དབུས་སུ་འབྲུ་དཀར་པོའི་ཚོམ་བུ་བཀོད། སྟེང་དུ་འབྲང་རྒྱས་དཀར་པོ་ཕུག་རོན་གྱི་གཟུགས་དང་བཅས་པ་བཤམ། དེའི་གཡས་སུ་ཆོས་འབྱུང་གྲུ་གསུམ་ནག་པོ་ལ་འབྲུ་ནག་གི་ཚོམ་བུ་དང༌། སྟེང་དུ་དམར་གཏོར་བཀོད། མཐའ་ལ་མཆོད་པ་ཅི་བདེར་བསྒྲིགས། དེ་ནས་གོང་དུ་བཤད་པ་ལྟར་ཉམས་སུ་བླངས་རྗེས། སློབ་མ་རྣམས་ཀྱིས་མཎྜལ་ཕུལ། གང་གི་དྲིན་གྱིས་ནས། དཀྱིལ་འཁོར་ལྷ་
ཚོགས་རྣམས་ལ་འདུད། །དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེ། བདག་ལ་དཀར་མོ་ཉི་ཟླ་སྟོང་གི་འཕྲེང་བ་ཅན་དང༌། བདུད་རྒྱལ་ནག་པོ་ཐོད་པའི་འཕྲེང་བ་ཅན་གྱི་རྗེས་སུ་གནང་བ་སྩལ་དུ་གསོལ། ཞེས་ལན་གསུམ་གསོལ་བ་བཏབ། དངོས་གཞི་ལ། ལྕམ་དྲལ་གྱི་རྗེས་གནང་ལྷན་ཅིག་ཏུ་མཛད་པའི་ལུགས་ལ་ཡི་གེ་སྔ་ཕྱི་མང་དུ་སྣང་བ་རྣམས་ནི། སློབ་མ་ཡི་དམ་དུ་བསྐྱེད་པ་ལ་བཀའ་སྡོད་ཀྱི་ཚུལ་དུ་སྐུ་དང༌། གསུང་གི་རྗེས་གནང་དང༌། གཏོར་མའི་བཀའ་བསྒོ་ཙམ་ལ་ཐུགས་ཀྱི་རྗེས་གནང་དུ་མཛད་དོ། །འོན་ཀྱང་བླ་མའི་ཕྱག་ལེན་འདི་ལྟར་མཛད་པ་མཐོང་སྟེ། དཀར་མོ་ཉི་ཟླ་ལ་སྐུ་བསྐྱེད་བསྟིམ། གསུང་བཟླས་ལུང་སྤྱི་དང་མཐུན་པར་མཛད་ནས་ཐུགས་གཏོར་དབང་གི་ཚེ། གཏོར་མ་ལྷ་མོར་གསལ་བ་སྤྱི་བོར་བཞག་པ་ལ། མོས་གུས་དུང་བ་བྱས་པས། ལྷ་མོའི་སྤྲུལ་པ་ཕུག་རོན་དེས་རང་གི་ནད་གདོན་ཆགས་ཆེ་ཉམས་ང་ཐམས་ཅད་སྐད་ཅིག་ལ་ཁྱེར་ཏེ་རྒྱ་མཚོའི་མཐར་སོང་བར་བསམས་ལ། ཕུག་རོན་གྱི་གཟུགས་དེ་སློབ་མ་ལ་གཡས་སྐོར་དུ་ལན་གསུམ་བསྐོར་ནས་ཕྱིར་གཏོང༌། དེ་རྗེས་བཀའ་བསྒོ་སྤྱི་དང་མཐུན་པར་མཛད། དེའི་རྗེས་ཐོགས་ཉིད་ལ། བདུད་རྒྱལ་ལ་བཀའ་སྡོད་ཀྱི་ཚུལ་དུ་སྐུ་དང་གསུང་གི་རྗེས་གནང་དང༌། གཏོར་མ་ལག་ཏུ་གཏད་ལ་བཀའ་བསྒོ་བ་ཐུགས་ཀྱི་རྗེས་གནང་དུ་མཛད་དེ། རྗེས་ཀྱི་བྱ་བ་སྤྱི་དང་མཐུན་ནོ། །ས་སྐྱའི་རིང་ལུགས་འཛིན་པ་ཀུན༵། །མོས་ཞེན་དབང་གིས་དག༵འ་བར་སྒྲོག །སྙི༵ང་ནས་མོས་པ་ཐོབ་དཀོན་ནའང༌། །དེང་འདིར་ཡིད་ཆེས་བརྟན་པོ༵ས་སྦྱར། །དཀར་མོ་ཉི་ཟླ་ལྕམ་དྲལ་གྱི་སྒྲུབ་
ཐབས་ཀྱི་ལེན་ཚན་ནོ།། །།སྒྲུབ་ཐབས་རིན་ཆེན་འབྱུང་གནས་ལས། མགོན་པོ་ལྕམ་དྲལ་དང་རིགས་མཐུན་གྱི་སྒྲུབ་ཐབས་བཤད་པའི་སྐབས་ཏེ་ཉེར་གསུམ་པའོ།། །།